KOLOSENGOLU

KOLOSENGOLU

¹ Nte Poli, nte men mu Isa Kirisita la kiladinŋo ti, x’a la Ala sago xan, anin n badinxe Timote, ² nte lelu be ɲin safe in kila n badinŋolu ma, senuman xantigolu Kirisita la kafuɲoxoya xono, mennu be Kolose gallo to. N Fa Ala xa neemo nin heero ke alu ɲen. ³ N be barako bulala n Marigi Isa Kirisita Fa Ala ɲen tuma bee, nin n be Ala matarala alu ɲen. ⁴ Lannaya men be alu la Isa Kirisita la, n xa wo xibaro me anin xanuya men be alu la, moxo senumanŋolu bee ɲen. ⁵ Alu be wo kela gigo xono, men be maranin alu ɲa sanŋo to. Wo gigo kufota alu ɲen tonɲa xumo fe, nin wo mu xibaru Dimanŋo ti. ⁶ Xibaru Dimanŋo be jenjenxan xa nafa ke duniya bee xono, í xo a x’a ke alu tema ɲa men, kabirin lun folo men, nin alu xa Ala la neemo kume anin x’a lon a mu men ti tonɲa la. ⁷ N baarakeɲoxo xanuninŋo Epafarasi le xa xaranŋo di alu ma wo kuwo la. A be baaro kela alu ɲen í xo Kirisita la baarakedin xantigo. ⁸ Ni Senunŋo xa xanuya men di alu ma, a xa wo fo n ɲen. ⁹ Wo le x’a tu, kabirin n x’alu la xibaruya me, n nte Alamatara dabulala alu ɲen. N b’a ŋininna Ala fe alu x’a sago lon bete, anin alu xa hakilitigiya nin faamuyalo soto Ni Senunŋo fe. ¹⁰ Wo ɲa ma, alu si sin no x’e taxama x’a ben Marigi sago ma, x’a diyanɲekuwo ke tuma bee. Alu si ku beto sifa bee ke, anin xa taxa ɲa Ala lonŋo to. ¹¹ N be a ŋininna a fe, xo a xa barako di alu ma kuwo bee to, a la sintigiya nooroma la, walasa alu xa sin xa kuwo bee kun muɲo to. ¹² Alu ɲaɲaninŋo xa barako la n Fa Ala ɲen, ate men xa sinŋo di alu ma xa nidula soto senumanŋolu la ke to, men be keneya xono. ¹³ A xa n bo dibo fango bulu, xa taxa n ti a Dinxe xanuninŋo la mansaya xono. ¹⁴ Ate le barako to n kunbota, n na junubolu yaafata. ¹⁵ Kirisita mu Alajebalo mununŋo le ti. A xa dafenŋolu bee saawa. ¹⁶ Bawo fenŋo bee data ate le fe, sanŋo to anin duguxulo xan, fen jetalu nin fen jebalolu, mansayalu, marigiyalu, kuntigiyalu, fangolu. Fenŋo bee data ate le fe anin ate le ɲen. ¹⁷ A tun be je kabirin dafen si man da, ate le du barako to, nin fenŋo bee b’a no to. ¹⁸ Ate le mu balo kunŋo ti, nin wo mu Ala la jama ti. Ate le mu damuto ti. Ate le mu folo ti xa bo furelu to, walasa a xa foloya soto kuwo bee to. ¹⁹ Bawo a diyata Ala ɲen x’a la dafaninɲa bee lasigi a Dinxe to. ²⁰ Ate le fe, nin a xa benŋo ke a nin fen bee te: Mennu be duguxulo xan, anin mennu be sanŋo to. A xa benŋo ke i te a jelu bonninŋo fe, gengenyiro xan. ²¹ Ate mennu nin Ala te tun xa jan folo, alu tunnu mu a jaxo lelu ti jaxumanŋo miiriya nin a ko koso. ²² Bari saasa, Ala xa benŋo ke alu nin a te, a Dinxe la saya fe, x’a moxoma balo tu a ma. A xa wo ke walasa alu senumanŋo nin alu fentanŋo nin alu jalagibalo xa lo a ɲa xoto. ²³ Bari alu xa xan xa tu lannaya xono, xa tu siginin bete jusigilan xolenŋolu xan. Alu xa gigo men soto xibaru Dimanŋo lamelo fe, fusi xana wo lasoto alu la. Wo Xibaru Dimanŋo waajulo keta hadamadinŋolu bee ɲen duniya xono. Nte Poli keta baaradinŋo ti wo Xibaru Dimanŋo fo le xanma. ²⁴ Saasa, nte be ɲaxalila toorolu la, ń be mennu xono alu koso. Tooro mennu tuta Kirisita ɲen xo, nte be wolu dafala ń balasubo to ate balo ɲen, nin wo mu Ala la jama ti. ²⁵ Ń keta Ala la jama la baarakedinŋo ti, x’a la baaro xan, Ala xa men xarifa nte ma xo ń x’a ke alu ɲen: A xa nte bula Ala la xumo fola x’a dafa, ²⁶ nin wo mu a la gullo ti, a tun xa men tu dugunin hadamadinŋolu bee ma kabirin waxati jan. Bari saasa, Ala x’a yita a la moxo senumanŋolu la. ²⁷ Bawo a diyata Ala ɲen xa wo gullo yita i la, dan nte men nafa ma, anin dan nte men nooro ma, a xa men toben siyalu bee ɲen. Wo gullo fele: Kirisita be alu xono, nin wo mu alu la nooro sotota gigo ti. ²⁸ N be Kirisita la kuwo waajulo le kela hadamadinŋolu bee ɲen. N be bee lasobila anin xa bee xaran hakilitigiya dafaninŋo to, walasa moxo bee xa dafa Kirisita la kafuɲoxoya xono. ²⁹ Wo le x’a tu, nte be baaro kela anin xa kelo ke Kirisita barako la, men be baaro la nte to, sintigiya to.

¹ Ń b’a fe alu xa nte la kelo xoleya lon, ń be men na alu ɲen, Lawodisengolu ɲen, anin kiika xotelu ɲen, mennu man nte je abada. ² Nte b’a fe wo ɲa ma x’e jusudun, anin i xa xanben xanuya to, i xa faamuyali dafaninŋo soto, xa Ala la gullo lon. Wo gullo mu Kirisita le ti. ³ Hakilitigiya nin lonŋo bee juwo duguninŋo be ate le to. ⁴ Nte be wo fola walasa moxo si xana alu lafili xumaxan dimanŋolu la. ⁵ Haali nin nte xunturo nte alu bata, ń be alu bata ń hakilo la. Nte be ɲaɲanin bawo ń x’a je xo alu be alu lono to, anin xo alu sinsinninŋo be alu la lannaya to, Kirisita la. ⁶ Awa, x’a la a xan alu sonta Isa Kirisita ma, xo a le mu Marigi ti, alu i taxama a la kafuɲoxoya xono. ⁷ Alu i lillidun anin xa jusigi ate kafuɲoxoya to, xa sinsin lannaya to, í xo alu laxaranta a ma ɲa men. Waleɲumalonŋo kiika xa bo alu la. ⁸ Alu i korosi moxo si xana alu neene lafililixumolu nin xuma toxulunŋolu la, mennu be bola hadamadinŋolu la hakilitigiya xono: Wolu be tanin hadamadinŋolu la laadolu ma, anin fangolu mennu be ɲin duniya in kunna, i nte tanin Kirisita ma. ⁹ Bawo Ala la dafaninɲa balama bee be siginin ate to. ¹⁰ Alu xa fenŋo bee soto x’alu wasa ate le barako to, ate men be kuntigiyalu nin fangolu bee kunna. ¹¹ Alu nin ate la kafuɲoxoya xono, alu ɲaxata ɲaxalo men nte hadamadinŋolu ta ti, bari ɲaxalo men keta Kirisita fe, men x’alu bala junubema bo alu la. ¹² Awa, alu batiseta tumo men, alu nin Kirisita lasita i ɲoxo fe, alu nin a kunita du i ɲoxo fe, bawo alu lata Ala la sintigiya la, men x’a lakuni xa bo furelu to. ¹³ Folofolo, alu tunnu saninŋo le mu alu la junubolu nin alu la ɲaxabaliya koso. Bari saasa, Ala x’alu nin Kirisita nilamaya i ɲoxo fe. A xa n na junubolu bee yaafa. ¹⁴ Jalagisafe men tun be n xanma n na sariya tiɲalo koso, a xa wo lasanko. A x’a gengen yiro ma. ¹⁵ A xa kuntigolu nin fangatigolu la sinŋo bo i bulu, x’e ke jelefenŋo ti. A xa sinŋo soto i xan Kirisita gengenyiro le barako to. ¹⁶ Wo le x’a tu, alu xana son moxo si x’alu jalagi domolifen ku walla minfen ku to, anin salli ku walla xaru kuta ku, walla tofoɲolun ku to. ¹⁷ Wo kuwolu bee mu fen natalu niiniyo lelu ti, bari tonɲa fan, wo mu Kirisita le ti. ¹⁸ Alu xana a tu moxo si x’alu bali x’alu la kunnawulijala soto a la fu fanmajigo, walla a la melekebato la. Wo moxo sifalu be i la jelifenŋolu jaatebetela. I be bunɲaba fuwo dila i fannu ma i la hadamadin miiriya gansanŋolu fe. ¹⁹ I nte tula sitinin Kirisita la, wo men mu kunŋo ti. Ate le ken barako to, nin balo muume be balunin x’e ɲoxo muta bete, xa tu kilin ti, xulutugudalu nin xulukunnafasolu fe, anin a be bunɲala í xo a xa di Ala ɲen ɲa men. ²⁰ Alu nin Kirisita sata i ɲoxo fe, fango mennu be ɲin duniya in kunna, alu bota wolu bulu. Wo to, mun na alu be i taxamala a be í xo nin alu be dennin ɲin duniya in ne la, xa son ɲin sariya sifa innu xa la alu xan: ²¹ «Í xana ɲin ta», «í xana ɲin nene», «í xana maxa ɲin na»? ²² Wo fenŋolu bee be banna le, nin i x’e maakuwo ɲan i la. Wolu mu hadamadinŋolu la ku lategeninŋolu anin i la xaranŋo lelu ti. ²³ Wolu be bonin hakilitigiya fe moxolu ɲala, x’a la i la batuliɲa xan, men be bola moxo la, anin i la fu fanmajigo nin i fannu balasubo toorolo. Bari nafa nte wolu si la. Hadamadinŋo nidiyanɲekuwo doron nelu mu.

¹ Alu nin Kirisita kunita i ɲoxo fe xa bo furelu to. Wo to, fenŋo mennu be sanŋo to, alu wolu ŋinin, Kirisita be siginin jan men, Ala kininŋo xoto. ² Alu i miiro lataxa sanŋo to fenŋolu ma, alu xana i miiro lataxa duguxulo xan fenŋolu ma. ³ Bawo alu sata le; anin, alu la nilamaya nin Kirisita be dugunin Ala to. ⁴ Alu la nilamaya, nin wo mu Kirisita ti, wo je í yita lun men, wo lunŋo, alu dulu nin a si yita nooro dafaninŋo to. ⁵ Fen wo fen mu duguxulo xan jigo ti, alu wo bee faxa: Jadoya nin kunoxoninko nin jaxumanŋo nego nin nege jaxo sifa bee, anin wasabaliya, bawo wasabaliya mu bolibato do le ti. ⁶ Wo kuwo lelu b’a tula Ala la diminŋo be boyila a soosobaxolu to. ⁷ Alu jigo le tun fele xotonin, tumo men, alu tunnu be ɲin junube innu xono. ⁸ Bari saasa, alu wo bee dabula: Diminŋo, jusubo, anin jaxuya. Nanili walla xuma jaxu si xana bo alu da. ⁹ Alu xana faniya fo i ɲoxo ɲen, bawo alu x’alu jigo xoto nin a la kewalolu bo alu la, ¹⁰ xa jigo kuto dun alu to. Alu mu moxo kuto lelu ti, n Dabaxa Ala be tula xa mennu tokutaya x’a ben a fan mununŋo ma, walasa alu xa lon dafaninŋo soto a la kuwo to. ¹¹ Awa, í keta Gereki ti wo, walla Yahudiya, í ɲaxata wo, walla í man ɲaxa, í keta luntan ti wo, walla wulaxono moxo, í keta jon ti wo, walla hooro, wo si nte jaatela. Men be jaatela, wo mu Kirisita le ti, wo men mu fenŋo bee ti, anin a be bee xono. ¹² X’a la a xan Ala x’alu sugandi, x’alu senuya, x’alu xanu, wo xanma alu hinna i ɲoxo la, xa ɲuma ke i ɲoxo ɲen, x’e majigi i ɲoxo ɲen, xa sabari anin xa muɲa. ¹³ Alu muɲa i ɲoxo ɲen. Nin do dunta do gaso to, alu xa yaafa i ɲoxo ma. Marigi yaafata alu ma ɲa men, alu dulu xa yaafa i ɲoxo ma ten. ¹⁴ X’a kafu wo bee ma, alu i ɲoxo xanu, bawo xanuya le mu kilinɲa dafalanŋo ti. ¹⁵ Kirisita la heero xa sigi alu jusukunŋolu la. Ala x’alu kili wo heero le xanma, x’alu bee ke bala kilin ti. Alu ke waleɲuma lonbaxolu ti. ¹⁶ Kirisita la xumo nin a nafa bee xa sigi alu to. Alu i ɲoxo laxaran, x’e ɲoxo lasobi hakilitigiya dafaninŋo to, Jaburu donkilolu la, tantuli donkilolu la, anin Ni Senunŋo la donkili dinmaninŋolu la. Alu donkilo la Ala ɲen alu jusukunŋo bee la, xa barako bula a ɲen. ¹⁷ Alu be ku wo ku kela, xuma wo, walla kewale, alu wo ke Marigi Isa toxo la, xa barako la n Fa Ala ɲen ate barako to. ¹⁸ Musolu, alu xulu alu xelu ɲen í xo a xa xan ɲa men Marigi ɲa xoto. ¹⁹ Xelu, al’alu musulu xanu, alu xana xutu mara í xono i ma. ²⁰ Dinŋolu, al’alu wulubaxolu lame kuwo bee to, bawo wo le xa di Marigi ɲen. ²¹ Falu, alu xana alu dinŋolu ladimin, nin wo nte, i si timinakuwa. ²² Jonŋolu, marigo mennu be alu ma ɲin duniya in to, alu wolu lame kuwo bee to. Alu xana baaro ke i ɲen xo bawo alu be lakorosinin, í xo nin alu b’a ŋininna le x’alu kudiya moxolu ɲen. Bari alu baaro ke i ɲen xono xoyiya to, í xo moxo mennu be silala Marigi ɲa. ²³ Alu be baara wo baara kela, alu a ke alu jusukunŋo bee la, í xo nin alu be a kela Marigi le fan ɲen. Alu xana a jaate moxolu ɲen ti. ²⁴ Alu a lon xo Marigi si ke di alu ma sara ti. Alu baaro ke Kirisita ɲen, wo men mu Marigi ti. ²⁵ Moxo wo moxo je tilinbaliya ke, wo tigo si a la tilinbaliya sara soto, bawo Ala nte moxo fisiyala moxo ti.

¹ Marigolu, al’alu la jonŋolu mutakubete tilinninɲa la, x’a lon xo Marigo be alu dulu ma sanŋo to. ² Alu i timinadiya Alamatara la. Alu tu i ɲala wo la, xa barako bula Ala ɲen. ³ Alu Ala matara ntelu dulu ɲen, walasa Ala xa da do yele n ɲen x’a la xumo fo, xa Kirisita la kuwo gullo fo. Nte be kaso la saasa wo le nofe. ⁴ Alu Ala matara ń ɲen walasa ń xa sin xa wo gullo fo a foɲa ma. ⁵ Mennu nte lannayabaxa ti, alu i taxama hakilitigiya la wolu mafan, xa waxato tomuta bete. ⁶ Horomo xa ke alu la xumolu to tuma bee, anin i xa ke xuma nafamalu ti. Alu moxo bee jaabiɲa ɲuma lon. ⁷ Tisike, men mu n badinxe xanuninŋo anin n baarakeɲoxo xantigo ti Marigi la baaro to, wo si nte xibaruyalu bee lasi alu ma. ⁸ Nte b’a kila alu ma ɲin ne xanma, walasa a xa ntelu xibaruya di alu ma, anin a x’alu hakilo lasigi. ⁹ N badinxe xantigo nin xanuninŋo, Onesime, men mu alu do ti, wo le b’a dandanna. Kuwo mennu be kexan jan, i si alu lalon wolu bee la. ¹⁰ Arisitarake, men nin nte be kaso la, wo be alu xontonna, anin Maraka, nin wo mu Baranabasi badinxe ti. Maraka la kuwo ɲafota alu ɲen xa ban: Nin a nata alu bata, alu a mutakubete. ¹¹ Isa men be kilila xo Yusitusi du be alu xontonna. Wolu doronnu Yahudiya lelu nin nte be baaro la Ala la Mansaya ɲen. I keta nte hakililasigo ti. ¹² Epafarasi men du mu alu do ti, wo be alu xontonna. Isa Kirisita la jonŋo le mu, men nte Alamatara kelo dabulala alu ɲen walasa alu xa tu sinsinnin, xa dafa anin xa son Ala sago bee ma. ¹³ Nte mu a seedo ti xo alu hanmo b’a la bete, atelu nin Lawodise lannayabaxolu anin Hiyerapolisi lannayabaxolu. ¹⁴ N xanunte dogotooro Luka nin Demasi be alu xontonna. ¹⁵ Alu Lawodise badinŋolu xonton, anin Ninfa nin Ala la jama men be kamarila a la luwo ma. ¹⁶ Nin alu xa ń na safe xaran, alu i balan Ala la jama men be Lawodise du x’a xaran. Men du je bo Lawodise, alu dulu xa wo xaran. ¹⁷ Alu a fo Arasipe ɲen xo: «Marigi xa baaro men xarifa í ma, í hakilo tu wo la, x’a ke x’a dafa.» ¹⁸ Nte Poli fan bulo le be ɲin xontonni xuma innu safela: Alu xana ŋina xo ń be kaso la. Ala la neemo xa ke alu fe.