2 TIMOTE
11 Nte Poli le xa ɲin safe in ke. Ń keta Isa Kirisita la kiladinŋo ti, x’a la Ala sago xan. Ala xa ń bula xumala nilamaya xan, nilamaya men be sotola Isa Kirisita la kafuɲoxoya xono. A tun xa wo lahido ta n ɲen. 2 Timote, ń dinxe xanuninŋo, nte le be ɲin safe in kila í ma. Fa Ala anin n Marigi Isa Kirisita xa neemo nin hinno nin heero di í ma. 3 Ń be barako bulala Ala ɲen, ń jusukunŋo senuyaninŋo be baaro la men ɲen, í xo n mamaxelu x’a ke ɲa men. Su nin tili, ń nte ŋinala í kun ń na Alamataralu to. 4 Ń hakilo be í la ɲajiyolu kun. A xa di ń ɲen bete x’é je tugun, walasa ń xa ɲaɲa bete. 5 Nte hakilo be í la lannaya soobe la. Wo lannaya ɲoxon tun b’é mamamuso Loyise anin í na Unise la, jannin ite xa lannaya ke. Ń be lanin a la xo wolu la lannaya ɲoxon be í du la. 6 Wo xanma, ń be í hakilo lajigila a la xo Ala x’a la solifenŋo men di í ma, ń xa ń bulolu la í xan tumo men, xa Ala matara í ɲen, xana a tu wo xa sa. 7 Bawo Ala xa Niyo men di n ma, wo nte silanɲa bulala n xono, bari a be barako nin xanuya nin fanmuto le dila n ma. 8 Í xana maluya xa n Marigi la kuwo fo moxolu ɲen. Í xana maluya du xo nte be kaso la a la kuwo to. Bari son í nin nte xa tooro xibaru Dimanŋo nofe, Ala barako la. 9 Ate Ala fan ne xa n kisi, xa n kili xa n ke a ta ti. Wo man ke n na kewalolu xanma; a keta a fan na ku lategeninŋo nin a la neemo le xanma. Wo neemo dita n ma Isa Kirisita barako to, jannin duniya xa da. 10 N Kisibaxa Isa Kirisita la na xa wo yita saasa. Isa Kirisita xa saya barako ban, xa nilamaya nin sabaliya yita Xibaru Dimanŋo la. 11 Wo Xibaru Dimanŋo le xanma, nin nte keta waajulikela nin kiladinŋo nin karanmoxoba ti. 12 Wo le x’a tu, nte be ɲin tooro innu muɲala. Nte nte maluyala; bawo nte be lanin men na, nte xa wo tigo lon. Nte be lanin a la, xo a xa men xarifa nte ma, a sinŋo b’a ɲen xa wo mara fo labanŋo lunŋo. 13 Nte x’é laxaran xuma senumanŋo mennu la, wolu mara í xono, lannaya nin xanuya to, mennu be sotola Isa Kirisita la kafuɲoxoya to, x’é taxamasinŋo ben wolu ma. 14 Xaran ɲuma men xarifata í ma, wo mara Ni Senunŋo barako to, Ni Senunŋo men be siginin n to. 15 Í fan x’a lon xo Asi maro lannayabaxolu bee xa nte bula. Fijeli nin Heremojene be wolu xono. 16 Ala mu a la hinno kela Onesifore la dinbaya ɲen, bawo a xa ń hakilo lasigi kiika ti. Nte la kasolabulo man a maluya, 17 bari kabirin a sita Rome, nin a x’é jija xa ń ŋinin, fo a xa ń je. 18 Marigi mu a kela a xa Ala la ɲumaya soto kiito lunŋo. A xa nte maaku kiika men ɲan xa ń tu Efesi, ite fan xa wolu bee lon.
21 Ń din, neemo men be n ɲen Isa Kirisita kafuɲoxoya to, í barako ŋinin wo neemo to. 2 Í xa men me nte la seede kiika ɲala, wo xarifa lannayamoxo dolu ma, mennu fannu si sin no xa moxo xotelu laxaran wolu ma. 3 Í nidula tooro ta, í xo Isa Kirisita la sorodasi ɲuma. 4 Sorodasi nte hanmela duniya kuwolu la, nin a b’a fe a la kuwo xa diya a kuntigo ɲen. 5 Moxo mennu be ɲoxodanboro kela, wolu xa xan xa i bori boro sariya la, nin wo nte, i me kunnawulijala soto. 6 Senekela men be segela, wo folo le xa xan x’a niyo soto senefenŋo to. 7 Nte be men fola í ɲen, í miiri bete wo ma. Ń x’a lon xo Marigi fan si hakilo di í ma xa wo bee faamu. 8 Í hakilo xa tu Isa Kirisita kun, mansaxe Dawuda mamarinŋo. A kunita xa bo furelu to, í xo xibaru Dimanŋo x’a fo ɲa men. Nte be wo Xibaru Dimanŋo le foxan. 9 Wo Xibaru Dimanŋo nofe, nte be tooronin, xa ń siti joloxo la, í xo nin ń mu kujaxukela le ti. Bari Ala la xumo nte sitinin de! 10 Wo le x’a tu, nte be kuwo bee muɲala Ala la moxo sugandininŋolu koso, walasa i dulu xa kisi Isa Kirisita kafuɲoxoya xanma, xa nooro banbalo soto. 11 Ɲin xuma in mu tonɲa le ti xo: «Nin n nin Kirisita sata i ɲoxo fe, n nin a si nilamaya i ɲoxo fe du. 12 Nin n x’e timinadiya xa tu lannaya la fo a labanŋo, n nin a si sigi mansaya la i ɲoxo fe. Nin n x’e bo a la, a du si í bo n na. 13 Nin ntelu man ke xantigi ti, ate si tu xantigo ti, bawo a me a fan sooso no.» 14 Í xa moxolu hakilo lajigi wo kuwolu la, x’a fo x’a xoleya i ma Ala ɲala xo i xana soosoli ke xuma to. Wo nte fen ɲanna, fo x’e mebaxolu lafili doron. 15 Í jija baaro la, fo í xa Ala la toxo dimanŋo soto. Í la baaro ke x’a ben; fe xana je a la, men si a tu í xa malu. Ala la tonɲa waajulo ke tilinninɲa to. 16 Í fan tanga xumakuntanfo ma, mennu nin Alasilo me ben, bawo i fobaxolu b’e soobola le Ala la xa taxa a fe. 17 I la xaranŋo be le í xo telo men be moxo subo ɲimila. Himene nin Filete mu wo moxo dolu ti. 18 Wolu x’e jenge, x’e soobo tonɲa la. I xo, xo furekuniyo keta xa ban. I xa moxo dolu la lannaya tiɲa. 19 Wo bee nin a ta, Ala fan xa jusigilanŋo mennu sigi, wolu si tu je. Ɲin xuma innu safeta wo kuwo to xo: «Marigi fan x’a talu lon», anin xo: «Moxo wo moxo be Marigi toxo kilila, wo x’é soobo tilinbaliyakuwolu la.» 20 Bunba xono miranŋolu nte sano nin xaalisixoyo doron ti, dolu si tara je mennu be daranin yiro nin banxo du la. Miranŋo mennu da xa xole, wolu be je lunbalu xanma, tolu be je lun gansanŋolu xanma. 21 Nin moxo do x’é senuya wo ku jaxolu bee ma, wo tigo si ke baara ɲumakemiranŋo ti; a keta Ala ta ti, xa senuya. A si ke maakuɲanmiranŋo ti a Marigi ɲen. A be tobennin baara ɲuma bee xanma. 22 Í bori xamarindinɲa nege jaxolu ma. Mennu be Marigi tarala xa i jusukunŋo senumanŋo tu, í nin wolu xa tilinninɲa nin lannaya nin xanuya nin heero ŋinin i ɲoxo fe. 23 Í ban hakilintanŋolu la soosoli fuwolu ma. Í x’a lon xo wolu be nala kelo le tila. 24 Marigi la jonŋo dun man xan xa kele ke. A xa xan xa ke moxo ɲuma ti bee ma, a xa sin moxolaxaranŋo la, xa muɲa. 25 Mennu b’a la xumo soosola, a xa xan xa wolu xaran sabaro to. Jon x’a lon fo Ala si tuubijuso dun wolu xono, walasa i xa tonɲa lon, 26 xa hakili soto, xa bo Sentane la kalanŋo da, wo men tun xa i muta xa i bula a sago kela?
31 Í hakilo xa tu a la xo duniya laban tumo, waxati xolenŋolu si ke. 2 Moxolu s’i fannu kilin na nafa ŋinin, xa ke xaalisi kunte nin wasubaxantelu nin fanbunɲalalu ti. I si Ala toxo tiɲa, xa muruti i wulubaxolu ma. I si ke fisiriwalo ti, xa Alakuwo bee toxosi. 3 I si ke moxo sondonme xolenŋolu nin hinnabalolu ti, anin moxo toxotiɲalalu nin fanmutabalolu nin masiibemoxolu. I nte ɲuma si fe. 4 I si ke janfantelu nin jusu tarinŋolu nin fankekutolu ti. I diyanɲekuwolu si diya i ɲen Ala ti. 5 I s’i fannu ke Alaɲasilanɲabaxolu ti moxolu ɲala, x’a tara i nte a ti i jusukunŋo la. Í soobo wo moxo sifalu la. 6 I dolu si dun luwolu xono, xa musu hakilidoxonŋo dolu bula i la jala xono, junubo kiika be mennu la, anin nege sifa bee be mennu la. 7 Wo musolu be lonŋo ŋininna tuma bee, bari i nte tonɲa jela. 8 Janesi nin Janbere xa kila Musa sooso ɲa men, ɲin moxo in dulu si tonɲa sooso ten. Moxo hakili tiɲaninŋo lelu mu. I la lannaya mu fuwo le ti. 9 Bari i me taxa dulajan, bawo moxo bee s’i la hakilintanɲa je, í xo Janesi nin Janbere. 10 Bari ite ken tuta ń xo, xa ń na xaranŋo muta, xa ń bosilo ta, x’a lo ń miiriyalu nofe, xa ń na lannaya ɲoxon ke, xa ń na sabaro nin ń na xanuya nin ń na timinadiya ɲoxon ke. 11 Í tuta ń nofe ń na toorolu nin ń na segelu dulu xono, fen fen xa ń soto Antiyosi nin Ikone nin Lisitere. Tooro joman be je nin a man la ń xan? Bari Marigi xa ń bo a bee xono. 12 Moxo wo moxo fan b’a fe xa í taxama Ala sago ma, Isa Kirisita kafuɲoxoya xono, wolu bee si tooro soto. 13 Bari moxo jaxolu nin nanbarantelu si taxa ɲa jaxuya to. I si moxo dolu lafili. I fannu be filo xono xa ban. 14 Ite ken xaranta kuwo mennu la, nin í x’e muta lannaya to, í jija wolu xana í soto í la. Mennu x’é laxaran wo kuwolu la, í fan xa wo tigolu lon. 15 Kabirin í dindinma, í xa Kitaabo xuma senumanŋolu lon, i si sin no xa hakilitigiya di í ma nin í si kisi, bawo í xa lannaya ke Isa Kirisita la. 16 Ala le xa Kitaabo xonoxumolu bee fo a safebaxolu ɲen. Nafa be wo xumolu la, xa moxolu laxaran, x’e lason, x’e latilin, x’e xulu tilinninɲa silo xan, 17 walasa Ala la moxo xa ke moxo dafaninŋo ti, xa toben kewale ɲuma bee ko xanma.
41 Nte b’a fola x’a xoleya í ma Ala nin Isa Kirisita ɲala, wo men be nilamalu nin furelu la kiito tegela, ń b’a ŋininna í fe Kirisita la nalo nin a la Mansaya xanma, 2 xo í x’é jija Ala la xumo waajulo la, tuma bete nin tuma jaxu. Moxolu la filo yita i la fo i xa yelema. Mennu nin jalagilo xa xan, wolu jalagi, x’e jusudun, x’e xaran muɲo to. 3 Waxato do si na, moxolu me son xaran soobe to tugun, bari x’a la i fannu negolu xan, i si karanmoxo kiika ŋinin i fannu ma, mennu s’i tulutodiya xumolu fo i ɲen. 4 I s’i tulo bo tonɲa la, x’a lo taliyolu nofe. 5 Ite ken xa ke moxo hakilima ti kuwo bee to, xa tooro muɲa, xa ke xibaru Dimanŋo waajubaxo ti, xa í la baaro bee ke x’a dafa. 6 Nte ken keta í xo sadaxo xa ban. Dondin, nte si duniya tu. 7 Nte xa kele beto ke. Nte xa ń soto ń na boro la. Ń tuta lannaya silo xan. 8 Saasa, ń be kunnawulijala laxononin. Wo mu tilinninɲa jala le ti. Marigi, men mu kiititegela tilinninŋo ti, ate le be nala wo jala dila nte ma duniya labanŋo lunŋo. A nte wo dila nte kilin ma; bari mennu x’a xanu x’a nalunŋo laxono, a b’a dila wolu bee le ma. 9 Í tariya í xa na ń bata jan. 10 Demasi bota ń na, bawo ɲin duniya in kuwolu diyata a ɲen. A taxata Tesalonike. Keresan taxata Galasi maro xan. Tite taxata Dalamanasi. 11 Luka kilinpe le be nte bata jan. Nin í be nala, í nin Maraka xa na, bawo a si nte deema no ń na baaro la. 12 Ń xa Tisike ki a xa taxa Efesi. 13 Ń xa dorokeba men tu Karapusi bulu Torowasi, í nin wo xa na, a nin kitaabolu, sakuta gulumalu. 14 Numuxe Alekisandere xa ku jaxu kiika ke ń na. Marigi si a sara a la kebaaro la. 15 Í du x’é korosi bete a ma, bawo a xa n na xumolu sooso bete. 16 Nte taxata kiititegedula xa ń ɲafo tumo men folofolo, moxo si man nte deema. I bee xa ń bula. Ala xana wo jaate i ɲen. 17 Bari Marigi xa nte deema, xa barakeba di ń ma, walasa ń xa waajulo ke a ɲa ma, anin, Alalonbalolu bee x’a lame. Nte bota waraba da xono. 18 Marigi si nte bo ku jaxo bee bulu, xa ń nakisi, xa ń nadun sanxulo Mansaya xono. Nooro xa la Fa Ala xan, birin abada, fo abada. Amiini. 19 Í xa Pirisiye nin Akilasi xonton, anin Onesifore la lumamoxolu. 20 Erasite tuta Korente. Ń xa Torofime tu Mile, bawo a tun man kende. 21 Í balan í xa na jannin neno xa si. Ubulusi b’é xontonna, anin Pudansi nin Linusi nin Kulodiya anin badin tolu bee. 22 Marigi xa tu í fe. Ala la neemo xa ke alu fe.