2 TESALONIKENGOLU

¹ Nte Poli nin Silifen anin Timote le be ɲin safe in kila n Fa Ala nin Marigi Isa Kirisita la jama ma Tesalonike. ² N Fa Ala nin Marigi Isa Kirisita xa neemo nin heero di alu ma. ³ N badinŋolu, n xa xan xa barako la Ala ɲen tuma bee, alu la kuwo la. A be bennin bete n xa wo ke, bawo alu be taxala ɲa lannaya to, anin du do be kafula alu la ɲoxoxano ma xa taxa a fe. ⁴ Wo keta ntelu kunxotota kunŋo ti Ala la jama ɲala dula tolu, bawo haali x’a tu moxolu be alu toorola, x’alu ɲaani, alu muɲata xa lannaya ke. ⁵ Wo b’a yitala xo Ala si kiiti tilinninŋo tege moxolu xan. Alu be toorola wo ɲa ma, walasa alu xa xan Ala la Mansaya soto ti. ⁶ Tonɲa, Ala bulu, a be tilinnin x’alu toorobaxolu sara tooro la. ⁷ Anin du, atelu mennu be tooronin, a si daho di atelu nin ntelu ma, nin Marigi Isa nin a la meleke barakemalu nata lunŋo men xa bo sanŋo to. ⁸ N Marigi Isa s’i yita tamano to, walasa xa Alalonbalolu ɲangi anin mennu man son a la xibaru Dimanŋo ma. ⁹ Wolu la ɲangilo si ke halagili banbalo ti. I nin Marigi te si janɲa; i ɲa me la a la sintigiya nooroma xan. ¹⁰ Wo si ke Marigi nalunŋo. Marigi si na wo lunba, walasa a la moxo senumanŋolu mennu be lanin a la, wolu x’a tantu x’a jagi. Atelu kennu mu wolu do lelu ti, bawo alu lata n na seedeyalo la Isa la kuwo to. ¹¹ Wo le x’a tu, n be Ala matarala alu ɲen tuma bee. N b’a ŋininna n na Ala la, a x’alu deema, walasa a x’alu kili nilamaya men xanma, alu xa xan wo ti. N b’a tarala du a xa barako di alu ma, walasa ku beto mennu xa di alu ɲen x’e ke, anin alu b’a fe xa baaro men ke lannaya la, alu xa sin xa wolu dafa. ¹² Wo ɲa ma, n Marigi Isa toxo si bunɲa alu la kuwo xanma, anin alu dulu si bunɲa ate la kuwo xanma, n na Ala anin Marigi Isa Kirisita la neemo barako to.

¹ N badinŋolu, fenŋo men mu n Marigi Isa Kirisita la nalikuwo ti, anin n na ɲoxotaro a bata, n be alu tarala xo ² alu hakilo xana ɲaxami tariya xa sila, nin dolu b’a fola xo Marigi la lunŋo sita xa ban. Haali nin do x’a fo xo Ala xo ten, walla waajulilalu x’a fo, walla do x’a safe ntelu toxo la, alu xana la a la. ³ Moxo xana alu lafili ɲa si ma, bawo wo lunŋo me na fo moxo kiika xa muruti Ala ma folo, anin fo Sentanemoxo x’é yita folo, nin wo mu halagibaxato ti. ⁴ Alaya be fola fenŋo mennu ma wo, fen fen be batula wo, a si wo bee kele, x’a fan bunɲa xa tanbi wolu bee xan. A si taxa sigi fo Alabatusuba xono, x’a fan yita x’a fo xo ate le mu Ala ti. ⁵ Xa n tu i ɲoxo xan, ń xa wo fo alu ɲen. Alu hakilo nte a la ba? ⁶ Fenŋo men b’a balinin saasa x’é yita jannin a la waxato xa si, alu xa wo lon. ⁷ Bawo Sentanemoxo be baaro la dibo to xa ban, bari men b’a tomutanin saasa, nin wo man taxa xa bo je, wo kuwolu me ke. ⁸ Bari nin wo taxata, Sentanemoxo s’í yita; bari Marigi Isa si wo jani a dafoɲo la, x’a halagi a la na nooro fe. ⁹ Sentanemoxo nin Sentane barako le be nala. A si kawakuwo nin taagumanseedo nin kuba sifa bee ke, xa moxolu lafili. ¹⁰ A si ku jaxo sifa bee do ke, walasa xa halagibaxatolu lafili. Wolu si halagi, bawo i man son xa tonɲa muta x’a xanu, wo men tun s’i kisi. ¹¹ Wo xanma, Ala be barako lajigila i xan, men s’i lafili x’e bula lala faniya la, ¹² walasa moxo wo moxo man la tonɲa la, fo xa tilinbaliya le xanu, kiito xa tege wolu xan. ¹³ N badinŋolu anin Marigi la xanuninŋolu, ntelu kennu xa xan xa barako la Ala ɲen tuma bee alu la kuwo xanma, bawo kabirin duniya man da nin Ala x’alu sugandi. A x’alu kisi Ni Senunŋo barako la anin lannaya xanma tonɲa la. Wo Ni Senunŋo x’alu ke a ta ti. ¹⁴ Ala x’alu kili wo kisilo xanma n na xibaru Dimanŋo la, nin alu si Marigi Isa Kirisita nooro soto. ¹⁵ N badinŋolu, wo xanma, alu i balan. Alu xa tonbenno mennu soto n na xumolu walla n na safe xono, alu wolu muta bete. ¹⁶ N Marigi Isa Kirisita fan, anin N Fa Ala men xa n xanu, xa hakililasigi banbalo nin gigi beto di n ma a la neemo barako to, ¹⁷ wo x’alu jusudun, xa barako di alu ma xa ku beto bee ke, kewalolu nin xumolu la.

¹ N badinŋolu, jannin n xa xumo dafaxa, n b’a ŋininna alu fe, alu xa Ala matara n ɲen, walasa Marigi la xumo xa jenjen, anin xa bunɲa soto, í xo a xa bunɲa soto atelu bata ɲa men. ² Alu Ala matara n ɲen, walasa n xa kisi moxo jaxolu masiibo ma, bawo moxo bee nte sonna lannaya ma. ³ Marigi mu xantigo le ti. A si alu sinsin, x’alu kisi Sentane ma. ⁴ Marigi b’a la xoyiyanin n ma, xo n xa men xoleya alu ma, alu be wo kela, xo alu si taxa ɲa xa wo ke. ⁵ Marigi x’alu jusukunŋo tilin Ala ma, xo alu x’a xanu anin xa muɲa í xo Kirisita. ⁶ N badinŋolu, n b’a xoleyala alu ma, Marigi Isa Kirisita toxo la, xo alu x’e soobo n badin salabaxantunŋolu bee la, nin i nte sonna ntelu la folu ma. ⁷ Alu xa xan xa n nadigi ɲa men, alu fannu xa wo ɲa lon. N man ke salabaxantun ti xa n tu alu bata. ⁸ N man domolo ke moxo si bata fu; bari n xa baaro ke xa sege, suwo nin tilo, walasa n xana ke alu si ma doni ti. ⁹ Nin n xa wo ke, a xoto nte don ti xo n tunnu nin domoli man xan alu bata. N xa wo ke le, nin alu si ke n nadigibaxo ti. ¹⁰ N be alu bata tumo men, n tunnu xa ɲin yanmaru in di alu ma xo: Nin moxo men nte a fe xa baara ke, wo xana domoli du ke. ¹¹ N be wo fola alu ɲen, bawo n x’a me xo dolu be alu to mennu xa sala. I me son baara ma, fo x’e da dun ŋandi kuwolu to. ¹² N b’a fola wo tigolu ɲen, x’a xoleya i ma Marigi Isa Kirisita toxo la, xo i xa baaro ke a ɲa ma, xa balu i fannu la. ¹³ Bari atelu kennu n badinŋolu, alu xana sege kuɲumako la. ¹⁴ N xa men fo safe in xono, nin moxo men man son xa wo ke, alu hakilo xa tu wo tigo la. Alu a sin bo alu la kuwolu to, walasa a xa malu. ¹⁵ Bari alu xana a muta alu jaxu ti, bari alu s’a tonben; bawo alu badinŋo le mu. ¹⁶ Heeratigi Marigi fan xa heero di alu ma tuma bee, anin ɲa bee ma. Marigi xa ke alu bee fe. ¹⁷ Nte Poli fan bulo le xa ɲin xontonni in safe. Ń buluno le je ń na safelu bee to. ¹⁸ N Marigi Isa Kirisita la neemo xa ke alu bee fe.