2 PIYERE
11 Nte Simon Piyere le xa ɲin safe in ke, nte men mu Isa Kirisita la jonŋo nin a la kiladinŋo ti. Ń b’a kila moxolu ma, mennu xa n na lannaya nafamaba ɲoxon soto, n na Ala nin n Kisibaxa Isa Kirisita la tilinninɲa barako to. 2 Neemo nin heero xa ke alu ɲen fo xa fuuma, Ala anin n Marigi Isa lonniya soobe fe. 3 N maakuwo be fen wo fen na nilamaya nin Alaɲasilanɲa xanma, Marigi xa wo bee di n ma a la sintigiya la, men bota Ala la. Men xa n kili xo n xa dun a fan na nooro nin a la ɲumaya xono, a xa wo lonŋo di n ma. 4 Wo ɲa le ma, nin a xa fen nafamabalu nin ɲalamalu di n ma, a tun xa mennu lahido ta, walasa wolu soto fe, alu xa sin xa kisi duniya negolu ma, mennu be moxo halagila, anin alu xa sin xa Ala keɲa ta. 5 Wo le x’a tu, alu i balan bete xa ɲumaya kafu alu la lannaya ma, xa lonŋo kafu ɲumaya ma, 6 xa fanmuto kafu lonŋo ma, xa muɲo kafu fanmuto ma, xa Alaɲasilanɲa kafu muɲo ma, 7 xa badinxano kafu Alaɲasilanɲa ma, xa xanuya kafu badinxano ma. 8 Bawo nin wo jigo betolu be alu la, anin nin i keta alu la xa fuuma, i me alu tu baarabalo nin nafakebalo ti n Marigi Isa Kirisita lonŋo to. 9 Bari wolu nte moxo men na, wo mu fiyonto le ti, a la jeta xa sutu. A be ŋinanin xo a xa junubo mennu ke xotonin, a senuyata xa bo wolu xono. 10 Wo le x’a tu, ń badinŋolu, alu kiika kafu alu la jijalo ma walasa x’alu la kililo nin alu la sugandilo sinsin. Nin alu be wo kela, alu me boyi abada. 11 Wo ɲa le ma, nin n Marigi anin n Kisibaxa Isa Kirisita la Mansaya banbalo si dayele alu ɲen a ɲa ma. 12 Wo le x’a tu, nte si tu x’alu hakilo lajigi wo kuwolu la tuma bee, haali x’a tara alu x’e lon xa ban, anin alu xa tonɲa men soto, alu be sinsinnin wo xan. 13 Bari nte b’a miirila xo xa nte tu ɲin bala sata in to, a xa ɲin nte x’alu tu i ɲala ń na hakililajigi xumolu fe. 14 Bawo nte x’a lon xo dondin, nte si bo ɲin bala sata in to, í xo n Marigi Isa Kirisita x’a yita ń na ɲa men. 15 Wo to, nte si ń jija bete walasa haali nte sa xo, alu xa sin x’alu hakilo lajigi ɲin ku innu la tuma bee. 16 Awa, n Marigi Isa Kirisita be nala sintigiya men to, n man wo fo alu ɲen xa n gigo tu lanin hadamadinŋolu la taali daraninŋolu xan. Bari n fan nelu ɲa x’a je a la nooroba xono. 17 Bawo a xa bunɲa nin nooro soto n Fa Ala la tumo men, ɲin xumaxan in bota Ala nooro maɲoxonjebalo la x’a fo a ɲen xo: «Ɲin mu ń Dinxe baato le ti, men na kuwo xa di bete nte ɲen.» 18 Ntelu fannu xa wo xumaxanŋo me xa bo sanŋo to, xa n nin a tu kuru senumanŋo xan. 19 Wo ɲa ma, n be tolala bete kilalu la xumo la. Nin alu xa i hakilo tu wo la, wo xa ɲin: Wo xumo be le í xo lanpo men be manala dibo to, jannin saxo xa yele, anin jannin saxuyelenda la loolo xa keneya bo alu jusukunŋolu la. 20 Alu a lon folo xo moxo si me Kitaabo kilayaxumo do xoto lon no a fan ɲen. 21 Bawo hadamadinŋo sago bada man kilayaxuma sabaabu, bari Ni Senunŋo le xa moxolu bula xumala Ala la xan to.
21 Kila fanolu keta Banisirayila dinŋolu to xotonin, wo ɲa ma, karanmoxo fanolu si ke alu dulu to. I si xaransila fuwolu mundin nadun alu to. I si i bo Kuntigo la, wo men x’e kunbo, xa halagilo lasi i fannu ma tariya. 2 Moxo kiika si a lo i nofe x’e la ku noxoninŋolu ɲoxonnu ke. Xumajaxo si fo tonɲa silo ma. 3 Wo karanmoxo fanolu la natantunɲa xanma, i si alu domo nanbara xumolu la. Bari kabirin waxati jan nin wo moxolu la kiito lategeta xa ban, i la halagilo nte nala mela bitugun. 4 Bawo melekiyo mennu xa junubo ke, Ala man wolu tu je, bari a x’e fili jahanaba, xa joloxo ke i la x’e mara dibo to non, xa kiito lunŋo laxono. 5 A man duniya folo du tu je, bari a nata waameba ti wo Alaɲasilanɲabali duniya xan. A xa Nuhun ne kisi, wo men tun be waajulo kela tilinninɲa xan, anin moxo woorowula xotelu. 6 A xa Sodome nin Gomore gallolu jalagi x’e halagi ta fe, xa wo ke misaali ti x’a di Alaɲasilanɲabali natalu ma. 7 Bari a xa Lote kisi, wo men tun mu moxo tilinninŋo ti. Wo kujaxukela jadolu tunnu la nilamaya keɲa xa wo tooro bete. 8 Bawo wo moxo tilinninŋo men tun b’e to, wo ɲa nin a tulo tun be i la lun wo lunŋo ketalu la. I la nilamaya noxoninŋo tun be a jusukun tilinninŋo toorola. 9 Wo to, Marigi x’a ɲasilanɲabaxolu boɲa lon tooro xono, anin a xa kujaxukelalu lamaraɲa lon walasa x’e ɲangi kiito tegelunŋo. 10 Mennu be a lola i nidiyanɲeku noxoninŋolu nofe, xa Ala la Marigiya mafele fuwo ti, wo lelu la ɲangilo be jaxuyala. Wo karanmoxo fanolu be lanin i fannu la, i la xumolu xa jaxu, i nte silala xa Noorotigolu nani. 11 Haali x’a tara melekiyolu mennu fango nin i la sintigiya xa bun bete, wolu nte i jalagila x’e nani Marigi ɲa xoto. 12 Bari wo moxolu kennu be le í xo wulaxonosubu hakilintanŋolu, mennu be danin mutalo nin tolilo xanma. I man men lon, i be wo nanila. I si toli í xo subolu be tolila ɲa men. 13 I si sara i la kujaxu keninŋolu bee la. I be i diyanɲo sotola i nidiyanɲekuwolu kelo to, tiliya to. I mu noxo nin ɲagamo lelu ti, i be i diyanɲekuwolu kela alu lafililo ti, nin i nin alu be kafula xa domolibalu ke. 14 Jadoya be lanin i ɲakeso xan, i nte fala junubeko la. I be hakilidoxonŋolu neenela x’e lafili. Wasabaliya bandeero b’e bulu, moxo danganinŋo lelu mu. 15 I xa sila tilinninŋo bula. I filita x’a lo Bosore dinxe Balamu la silo nofe. Wo keta xaaliso fe, men dita a ma kujaxuko xanma. 16 Bari xumo keta a ɲen a la soosolo koso. Falimusu damuntunmafenŋo xumata a ɲen í xo hadamadinŋo, xa dansigi ke kila la hakilintanɲa la. 17 Wo moxolu be le í xo jiwoyo mennu jata, anin í xo xabolu, foɲoba be taxaxan mennu tila. Dibiba le be i laxononin. 18 I be xumabatoxulunŋo lelu fola. Mennu birin bola moxo filininŋolu bulu, i be wolu neenela nidiyanɲeku noxoninŋolu la. 19 I be hooroyalo lahido tanin wolu ɲen, x’a tara i fannu be tolininɲa la jonɲa xono, bawo fenŋo men be sinŋo sotonin í xan, í mu wo la jonŋo le ti. 20 Awa, mennu bota duniya ku noxoninŋolu xono, n Marigi anin n Kisibaxa Isa Kirisita lonŋo koso, nin wo kuwolu xa wolu muta tugun, xa sinŋo soto i xan, i keɲa labanŋo si jaxuya xa tanbi i folo keɲa xan. 21 Nin wo tunnu man tilinninɲa silo lon, wo le tun xa fisa i ma a lonŋo ti, wo xo xa saaginin i xodila sariya senunŋo la, men dita i ma. 22 Sando men be fola xo: «Wulo xa men foono, a x’é koppa wo ma,» anin xo: «Lemuso men birin í kula, wo taxata í birigintin booxo to tugun.» Wo keta tonɲa ti i la kuwo to.
31 Ń badin xanuninŋolu, ɲin mu ń na safe fulananŋo le ti xa ban, ń xa men ki alu ma. I do wo do to, ń keta a fe miiriya senunŋolu xa ke alu la, ń na hakililajigolu bee fe. 2 Nte b’a fe kila senumanŋolu xa xumo mennu fo xotonin, alu hakilo xa jigi wolu la, anin Marigi nin Kisibaxo la sariya la, alu la kiladinŋolu xa mennu lasi alu ma. 3 Alu a lon folo xo duniya labanŋo lunŋolu, moxo dolu si bo mennu be i taxamala i nidiyanɲolu la. I si alu ke jelefenŋo ti. 4 I s’a fo xo: «Xo di a man lahido ta le xo a be nala? Awa, a dun be min? Bawo kabirin mamolu sa tumo, kuwo bee b’a ɲa ma í xo duniya damuto.» 5 Wolu be i fannu laŋinala a kun xo kabirin waxati jan, Ala xa sanxulo nin duguxulo da a la xumo fe. Duguxulo talata xa bo jiyo ma, xa dara jiyo fe. 6 Wo ji kilinŋo le fe, nin wo mu waameba jiyo ti, nin duniya folo halagita. 7 Men mu ɲin sanxulu in nin ɲin duguxulu in ti, wo xuma kilinŋo le b’e lamaranin ta ɲa. A b’e lamaranin kiito anin Alaɲasilanɲabalolu halagi lunŋo ɲa. 8 Bari ń badin xanuninŋolu, fen do be je, alu man xan xa ŋina men kun: Marigi bulu, tili kilin be le í xo wulu san, anin wulu san be le í xo tili kilin. 9 Marigi xa lahido men ta, a nte mela x’a tara a man wo latimme, í xo dolu b’a miirila ɲa men. Bari a be muɲanin alu xoto le, bawo a nte a fe moxo si xa halagi; bari a b’a fe le bee xa tuubi. 10 Marigi la lunŋo be nala le í xo sunŋo. Wo lunŋo, sanxulo si sanko mankanba to. Sanxulo fenŋolu bee si jani ta fe, duguxulo nin a xan fenŋolu bee si ban. 11 Awa, nin wo fenŋolu bee be nala banna ten, wo tuma alu xanta xa men ke, alu wo lon. Alu taxamaɲa xa xan xa ke senuya to, anin alu xa xan xa do kafu alu la Alaɲasilanɲa ma. 12 Alu xa xan xa Ala la lunŋo laxono, x’alu sinkuwo bee ke walasa a xa na junna. Wo lunŋo le mu nin ta be sanxulo janila, anin sanxulo fenŋolu si xolen tafuntano bulu. 13 N be sanxulu kuto nin duguxulu kuto laxononin í xo Ala xa wo lahido ta ɲa men, tilinninɲa si sigi non. 14 Wo le x’a tu, ń badin xanuninŋolu, x’alu tu wo lunŋo laxononin, alu i jija, walasa alu senumanŋo jalagibalo xa tara a ɲa xoto, heero to. 15 Alu a jaate xo Marigi la muɲo kunŋo mu le walasa alu xa kisi, í xo n badinxe xanuninŋo Poli x’a fo alu ɲen, a la safe to ɲa men, x’a la Ala la hakilitigiya dininŋo ti a ma. 16 A be wo xumo le fola safelu bee to, a xumata ɲin ku in xan mennu to. Wo safelu dulalu dolu xa xole x’e faamu, fo moxo kulonbalolu nin basigibalolu b’e xotolu yelemala, í xo i be Kitaabo dula xote dulu kela ɲa men. Wo ɲa ma, i be halagilo lasila i fannu ma. 17 Atelu kennu, ń badin xanuninŋolu, alu lasobininŋo le mu. Wo to alu i korosi, alu xana Alaɲasilanɲabalolu ladigi, wo mennu be filixan, anin alu xana son alu xa labo alu lodula sinsinninŋo xan. 18 Bari alu taxa ɲa n Marigi anin n Kisibaxa Isa Kirisita la neemo nin a lonŋo to. Nooro xa la ate xan kabirin saasa fo abada. Amiini.