2 YAYA

¹ Nte Moxoba le xa ɲin safe in ke x’a ki Ala la Musu sugandininŋo nin a dinŋolu ma, nte be mennu xanula tonɲa la. Nte kilin doron nte alu xanula, bari fen wo fen xa tonɲa lon, wolu dulu bee le be alu xanula. ² Tonɲa men be tunin n na, xa ke n fe fo abada, nte be alu xanula wo tonɲa koso. ³ N Fa Ala nin Isa Kirisita, nin wo mu n Fa Dinxe ti, wo xa neemo nin hinno nin heero di n ma, walasa n xa tu tonɲa nin xanuya silo xan. ⁴ Nte x’a tara í dinŋolu dolu be tonɲa silo taxamala í xo n Fa Ala la sariya x’a fo n ɲen ɲa men. Wo diyata nte ɲen kujaxu. ⁵ Awa saasa, Musu sugandininŋo, nte b’a ŋininna í fe xo: Alan x’e ɲoxo xanu. Nte be men safela x’a ki í ma, wo nte sariya kuta ti, n xa sariya men soto kabirin folofolo, wo le mu. ⁶ Xanuya mu men ti, wo fele: Xa Ala la sariyalu silo taxama. Alu xa wo sariya le me kabirin folofolo, walasa alu xa wo silo taxama. ⁷ Moxolafilila kiika jenjenta duniya xono, wo lelu nte sonna xa la a la xo Isa Kirisita keta moxo ti. Wo ɲoxon moxo le mu moxolafilila ti anin Kirisita Jaxo. ⁸ Wo to, al’alu fannu korosi, walasa n xa baaro men ke, alu xana bono wo to, bari alu xa baraaji dafaninŋo soto. ⁹ Moxo wo moxo be taxala ɲa xa tanbi Kirisita la xaranŋo xan, Ala nte wo tigo to. Moxo men be tula Kirisita la xaranŋo xan, n Fa Ala nin a Dinxe be wo tigo to. ¹⁰ Nin moxo wo moxo nin xaran xote nata alu bata, men nte Kirisita la xaranŋo ti, alu xana a jigiya alu bata, alu xana son xa haali a xonton. ¹¹ Bawo men je a xonton a bata, a be le í xo wo nin a be kafunin a la baara jaxolu la. ¹² Xuma kiika be ń ma x’a fo alu ɲen, bari ń nte a fe xa wolu bee safe. Bawo nte hakilo be a ma xa taxa alu bata, ń fan nin alu xa xuma da nin da, walasa n na ɲaɲo xa dafa. ¹³ Í Badinmusu sugandininŋo du dinŋolu be í xontonna.