2 KORENTENGOLU

¹ Nte Poli, men mu Isa Kirisita la kiladinŋo ti x’a la Ala sago xan, anin n badinxe Timote le be ɲin safe in kela, x’a ki Ala la jama ma Korente anin senumanŋolu bee ma, mennu be Akayi jamano bee xono. ² N Fa Ala anin n Marigi Isa Kirisita xa neemo nin heero di alu ma. ³ Tanto be n Marigi Isa Kirisita Fa Ala ɲen, Fa hinnatigo anin hakililasigo bee tigi Ala. ⁴ A be n hakilo lasigila n na toorokuwolu bee to, walasa mennu be tooroku sifa bee jela, n xa sin xa wolu hakilo lasigi, n fannu la hakililasigi sotoninŋo fe, ate Ala xa men di n ma. ⁵ N be Kirisita la tooro ɲoxon kiika sotola ɲa men, wo ɲa kilinŋo ma, n be hakililasigiba du sotola Kirisita la. ⁶ Nin n be tooro xono, a kunŋo mu le walasa alu xa hakililasigo nin kisilo soto. Nin n be hakililasigo xono, a kunŋo mu le walasa alu xa hakililasigo soto, men si a tu alu si sin no xa ntelu la tooro sotoninŋolu ɲoxonnu muɲa. ⁷ Gigi xoyo le be n na alu la kuwo to, bawo n x’a lon xo n nin alu be xaaɲannin n na toorokuwolu to ɲa men, wo ɲa ma, n nin alu si xaaɲan n na hakililasigo du to ten. ⁸ Ń badinŋolu, n xa tooro mennu soto xa n tu Asi maro xono, n nte a fe alu xa tu wolu lonbaliya to: Wo toorolu dono xuliyata n ma bete fo xa tanbi n barako danŋo xan. N fan tunnu yili nte a ma tugun xo n si tu balunin. ⁹ A keta n fannu ɲen xo ń na saya lategeta. Wo ɲa ma, n gigo me la no n fannu xan, fo Ala doron xan, ate men be furelu lakunila. ¹⁰ Ate le xa n bo wo ɲoxon saya bulu. Ate le du be n bola a bulu tugun. N xa n gigo ke ate le ti, a si n bo wo ɲoxon bulu tugun. ¹¹ Alu dulu si n deema alu la Alamataralu la ntelu ɲen, walasa Ala xa neemo men di n ma moxo kiika la Alamatara koso, wo x’a tu moxo kiika xa barako la Ala ɲen ntelu koso. ¹² N si sin xa n fannu bunɲa kuwo men to, wo mu ɲin ne ti xo: N jusukunŋo mu n seedo ti xo n bosilo keta ɲa men duniya to, sakuta a keta ɲa men atelu ma, wo keta majigo nin xoyiya to, mennu bota Ala la. N man wo ke hadamadinŋo la hakilitigiya barako la, bari Ala la neemo barako la. ¹³ Alu be men xaranna x’a faamu, n nte fusi xote safela nin wo nte. Nte yilo b’a ma du xo alu si wo faamu bete, ¹⁴ í xo alu b’a faamula dondin saasa, xo Marigi Isa nalunŋo, ntelu si ke alu fanbunɲa kunŋo ti, í xo alu si ke ntelu ta ti ɲa men. ¹⁵ Wo gigo xono, nte tun b’a fe xa na alu bata folo, walasa alu xa neemo soto í xo sinɲa fula. ¹⁶ Nte tun b’a fe xa bo alu bata la, wo xo xa tanbi xa taxa Maseduwane, anin x’alu je ń koppato. Wo to, alu tunnu si ń deema xa taxa Yude. ¹⁷ Nte xa ɲin ku in natege tumo men, nte tun nte ń soobe la ba? Walla nte la ku bululaninŋolu mu hadamadinŋo fan na ku bululaninŋo lelu ti ba, fo «iyo» nin «ayi» si ke nte xono i ɲoxo la? ¹⁸ Ala mu xantigo le ti, n xa xumo men fo alu ɲen, wo tun nte «iyo» anin «ayi» ti i ɲoxo la. ¹⁹ Bawo Ala Dinxe Isa Kirisita, nte nin Silifen anin Timote xa men na kuwo waajulo ke alu bata, wo man ke «iyo» nin «ayi» ti, bari a keta «iyo» le ti. ²⁰ Bawo Ala la lahidolu bee keta «iyo» ti ate le fe. Ate Isa Kirisita le du barako to, nin n be «amiini» fola xa Ala tantu. ²¹ Men be ntelu nin atelu barako bunɲala Isa Kirisita la kafuɲoxoya to, xa n bula í dan na a fan ɲen, wo mu Ala le ti. ²² A x’a la taagumanseedo ke n na, xa Ni Senunŋo lasigi n jusukunŋo la folo, men b’a yitala n na xo n si Ala la fen ɲuma to dulu soto. ²³ Ala mu nte seedo ti, a xa ń faxa nin ń be faniya le fola: Alu la hinno le x’a tu nte man ń koppa Korente ma tugun. ²⁴ Wo xoto nte xo n mu alu kuntigolu ti lannaya kuwo to, bawo alu la lannaya sinsinninŋo le mu, bari n nin alu be baaro kela i ɲoxo fe, walasa alu xa ɲaxali.

¹ Wo le x’a tu, nte x’a latege xo ń nte ń koppala alu bata, walasa ń xana taxa alu nitokuwa tugun. ² Bawo nin nte x’alu nitokuwa, jon si nte nitodiya tugun? Atelu nte ba, ń xa atelu mennu nitokuwa? ³ Nte la safe kekunŋo tun mu le, walasa nin ń sita alu bata, nte xana nitokuwa soto moxolu koso, men tunnu xa xan xa nte nitodiya. Men mu alu la kuwo ti, a be xoyiyanin nte ma xo nte la nitodiya mu alu bee du ta le ti. ⁴ Nte juso ɲaxamininba nin nte nitokuwaninŋo nin nte ɲaji kiika boto le xa wo safe ke x’a ki alu ma. Nte man wo ke x’alu nitokuwa, bari nte xa wo ke le, walasa nte be alu xanunin bete ɲa men, alu xa wo lon. ⁵ Nin moxo do xa nitokuwa kuwo ke, wo tigi man nte nitokuwa, bari ɲa do ma, x’a tara n man danmatanbi, a x’alu bee le nitokuwa. ⁶ Alu kiika xa jalago men naboyi wo xe xan, wo waseta. ⁷ Wo le x’a tu, saasa alu xanta le xa yaafa a ma, x’a hakilo lasigi, walasa a xana nitokuwa jaxu, fo x’a gigo xati. ⁸ Anin, ń b’a ŋininna alu fe, xo alu xa xanuya yita a la. ⁹ Nte la safe kikunŋo du tun mu le x’alu xotobo, walasa x’a lon nin alu be tobennin xa xulu kuwo bee to. ¹⁰ Alu je yaafa moxo men ma, nte si yaafa wo ma. Nin nte yaafata kuwo do to, men xa nte yaafakun bo, nte yaafata alelu koso, Kirisita ɲa xoto; ¹¹ walasa Sentane xana sinŋo soto n xan. Bawo n x’a ŋanneyalu lon. ¹² Awa, nte sita Torowasi gallo xono tumo men, xa Kirisita la xibaru Dimanŋo waajulo ke, nte x’a je xo Marigi tun xa daba yele nte ɲen wo xanma. ¹³ Bari nte hakilo tun nte siginin, bawo ń man ń badinxe Tite je. Wo le x’a tu, nte xa ń sara i la xa bo je, xa taxa Maseduwane jamano xan. ¹⁴ Tanto be Ala ɲen, ate men be n nin a la sinsoto jama lataxala i ɲoxo fe tuma bee, Kirisita barako to. A b’a kela ntelu fe Kirisita xa lon dula bee, í xo latikolonŋo men xaso be jenjenna a bee to. ¹⁵ Ń mu Kirisita sumadimanŋo le ti Ala bulu, moxo kisininŋolu to, anin halagibaxatolu to. ¹⁶ Dolu bulu, wo mu saya sumo le ti, men be saya lasila i ma. Do xotelu bulu, wo mu nilamaya sumo le ti, men be nilamaya lasila i ma. Jon be je nin a nin wo ɲoxon baaro xa xan? ¹⁷ Ntelu nte í xo moxo kiika xotelu, mennu be Ala la xumo kela jaagukunŋo ti. Bari x’a la a xan xo Ala le xa n ki, n be xumala tonɲa la a ɲa xoto, xa n tu Kirisita la kafuɲoxoya xono.

¹ N s’a damuta tugun ba xa n fannu toxoɲuma fo? Walla n maakuwo b’a la ba, í xo dolu b’a kela ɲa men xa safelu ki alu ma xa n fannu toxoɲuma fo, walla xa wo ɲoxon safelu soto xa bo alu la? ² Atelu fan nelu mu n na safe ti, men safeninŋo be n jusukunŋolu la, moxo bee xa men lon x’a xaran. ³ Sikka nt’a to, alu mu Kirisita la safe le ti, men baaro xarifata ntelu ma. A safeninŋo nte lankaro la, bari Ala nilama Niyo la. A safeninŋo nte kuru walahalu xan, bari walaha subumalu xan, alu jusukunŋolu xan. ⁴ N xa wo lannaya le soto Kirisita barako to, Ala ɲa xoto. ⁵ N me a fo no xo n si wo ɲoxon baara ke n fannu barako la, n na sinŋo be bola Ala le to. ⁶ Ate le xa sinŋo di n ma xa ke Kafuxan Kuto baarakelalu ti, men nte sariya safe ta ti, bari Ni Senunŋo ta. Bawo sariya safe be nala saya le tila, bari Ni Senunŋo be nilamaya le dila. ⁷ Awa, sariya men mu saya sabaabo ti, fo a xumolu safeta kuru walaholu xan, wo xa nooro soto fo Banisirayila dinŋolu tunnu me kila Musa ɲada mafele no wo nooro koso. Haali wo, wo nooro tun nte tuxan wo ɲada to. ⁸ Ni Senunŋo la baaro be nooro men sabaabula, wo me bunɲabete ba xa tanbi wo xan? ⁹ Fenŋo men si halagilo sabaabu, nooro keta wo la baaro la; fenŋo men be tilinninɲa dila, nooro me ke wo la baaro la bete ba xa tanbi wo fen folo ta xan? ¹⁰ Nooro tun be men xan, nooro nte wo xan tugun, ɲin nooro maɲoxonjebali kuta in ɲa xoto. ¹¹ Nin nooro keta fen tanbita la, fenŋo men be tula, wo nooro si bunɲa bete xa tanbi wo folo ta xan. ¹² Xa wo ɲoxon gigi tu n na, yilanyilan si nte n na. ¹³ N nte a kela í xo Musa, wo men tun be faano buurila a ɲada la, walasa Banisirayila dinŋolu xana a la nooro banta labanto je. ¹⁴ Bari i hakilibunda taxunta. Haalibi, nin i be Kafuxan Xoto kitaabolu xaranna, wo faanu kilinŋo be buurinin i hakilo ma. A man bo je bawo a be bola je Kirisita kafuɲoxoya le fe. ¹⁵ Haalibi, nin i be Musa la kitaabolu xaranna tuma wo tuma, faano do be buurinin i hakilo ma. ¹⁶ Bari xa tuubi Marigi ɲen, wo doron ne si faanu in bo je. ¹⁷ Bawo Marigi mu Niyo le ti. Marigi Niyo be dula men, hooroya be non. ¹⁸ Ntelu mennu bee ɲada laxulunŋo mu, Marigi nooro be í yitala n xan, a b’é xo í xa fenŋo do mafele duŋare to. Wo ɲa ma, n be yelemala xa ke í xo Marigi. N be bola nooro do to, xa dun do xote to, men xa bun, Marigi men mu Niyo ti barako to.

¹ Ala x’é tu a la ɲumaya xono xa wo baaro xarifa n ma, wo le x’a tu, n nte segela. ² N x’e ban dibilakuwolu nin maluyakuwolu to, n nte i taxamala kewuya la. N nte Ala la xumo mayelemala, bari n be tonɲa le yitala nin moxolu bee si la n na, Ala ɲa xoto. ³ Wo bee nin a ta, nin n na xibaru Dimanŋo be dibinin, a be dibinin halagibaxato lelu ɲen. ⁴ A be dibinin lannayabalo lelu ɲen, bawo ɲin duniya in ala xa wolu hakilo fiyonɲa, walasa Xibaru Dimanŋo men be Kirisita la nooro yitala, i xana wo keneya je, ate Kirisita men mu Ala mununŋo ti. ⁵ N na waajulo nte n fannu xan, bari a be Isa Kirisita, n Marigi le xan. Men mu ntelu la kuwo ti, n b’a fola xo n mu alu la jonŋo lelu ti Isa koso. ⁶ Bawo Ala men x’a fo xo: “Keneya xa mana dibo to,” ate fan ne xa keneya lamana n jusukunŋolu la, walasa n x’a la nooro keneya lon, wo men be ŋelenxula Kirisita ɲada to. ⁷ Bari wo naafulo be n kun banxudaxolu xono, walasa a xa xoyiya xo ɲin sintigiya maɲoxonjebali in be bola Ala le la, a nte bola ntelu la. ⁸ N xa tooro sifa bee je, bari n man xonotofili. N hanmeta, bari n gigo man xati. ⁹ A lota n nofe xa n tooro, bari Ala man n kilinnu bula. N buwota xa n naboyi dugo ma, bari n man halagi. ¹⁰ N be Isa la saya yitala n balo to tuma bee, walasa Isa la nilamaya du xa yita n balo to. ¹¹ N na nilamaya xono, saya be n nofe tuma bee Isa koso, walasa Isa la nilamaya du x’é yita n bala satalu to. ¹² Wo ɲa ma, saya be baaro la ntelu to, bari nilamaya be baaro la atelu to. ¹³ Kitaabo b’a fola xo: «Nte xa lannaya ke, wo le x’a tu, nte xumata.» N dulu xa lannaya ke, wo le x’a tu, n be xumala. ¹⁴ N x’a lon xo men xa Marigi Isa lakuni xa bo furelu to, wo si ntelu dulu nin Isa lakuni i ɲoxo fe, anin xa ntelu nin atelu bula a senbo to. ¹⁵ N be kuwo fen wo fen jela, alelu ɲen mu, walasa Ala la neemo xa si moxo kiika ma xa taxa a fe, men si ke sabaabu ti tantuli kiika xa ke, xa nooro la Ala xan. ¹⁶ Wo le x’a tu, n nte segela. Haali nin n balo be tiɲala dondin dondin, n niyo be tokutayaxan ne lun wo lun. ¹⁷ Bawo n be tooro mennu sotola ɲin waxati in, wolu be nooro maɲoxonjebalo nin nooro banbalo men tobenna ntelu ɲen, wo toorolu xa fe wo nooro sinna. ¹⁸ N ɲa nte fen jetalu to, n ɲa be fen jebalo lelu to. Fen jetalu tanbito le mu, bari fen jebalolu be tula fo abada.

¹ N x’a lon xo balo men be n ma ɲin duguxulu in xan, wo be le í xo ɲafa. Nin wo tiɲata, bunŋo do be n kun, men mu Ala buluno ti. Wo mu sigidula tiɲabalo le ti, sanŋo to, moxo bulu man men lo. ² Saasa, n be ŋuntanna, bawo bunŋo men be n kun sanŋo to, a loxoba be n na xa wo dun í xo faano, ³ walasa fen xa tara n ma, n balamaxulunŋo xana tara. ⁴ Bawo ntelu mennu be wo ɲafa xono, n be ŋuntanna, í xo nin dono be n kun. A nte xo n b’a fe x’e mawura, bari n b’a fe xa faano do le dun do in xan, walasa men mu sata ti, wo xa laxunu nilamaya fe. ⁵ Ala fan ne xa n toben wo kuwolu xanma. A xa Ni Senunŋo di n ma folo, men b’a yitala n na xo n si a la fen ɲuma to dulu soto. ⁶ Wo le x’a tu, n be jijanin bete tuma bee. N x’a lon xo xa ɲin bala in tu n ma, n nin Marigi dula xa jan. ⁷ Bawo n be i taxamala lannaya le la, ɲajo la nte. ⁸ N be jijanin bete, a xa fisa n ɲen xa bo ɲin bala in xono, xa taxa sigi Marigi bata. ⁹ Wo le x’a tu, n tuta ɲin bala in xono wo, n bota a xono wo, n be men ŋininna, wo mu le n na kuwo xa diya a ɲen. ¹⁰ Bawo waajibo le mu n bee xa lo Kirisita ɲa xoto a xa kiito tege n xan. Wo to, bee kilin wo kilin nin men xa xan, bee si wo soto, x’a la í la ɲuma walla í la jaxuman keninŋo xan, í la nilamaya xono duguxulo xan. ¹¹ Marigi ɲasilanɲa mu men ti, n xa wo lon, wo xanma, n b’a ŋininna xa moxolu lafaamu. Ala xa n lon bete, anin ń hakilo la xo alu dulu xa nte lon alu jusukunŋolu la. ¹² N nte n fannu toxoɲuma fola alu ɲen tugun, bari n b’a fe le alu xa kunnawuli ntelu koso. Wo to, alu si ɲa soto xa jaabilo di moxolu ma, mennu be i fannu bunɲala kenema kuwolu xanma x’a tara i jusukunŋo la nte. ¹³ Nin n keta hakilintanŋo ti, wo keta Ala le ɲen; bari nin n keta hakilima ti, alelu ɲen mu. ¹⁴ Kirisita la xanuya be n juso lafanin nin n be i miirila ɲin ma xo: Kilin sata bee ɲen, wo to xo bee sata. ¹⁵ A sata bee ɲen, walasa nilamalu xana nilamaya ke i fannu ɲen tugun, bari men sata xa kuni i ɲen, i xa nilamaya ke wo ɲen. ¹⁶ Wo le x’a tu, n man moxo si lon tugun x’a la hadamadinɲa keɲa xan. Haali nin n tunnu xa Kirisita lon x’a la hadamadinɲa keɲa xan, saasa n man a lon ten bitugun. ¹⁷ Wo to, nin moxo do be Kirisita la kafuɲoxoya xono, a mu dafen kuto le ti. Ku xotolu tanbita, a fele, kuwo bee keta kuto ti. ¹⁸ Wo bee be bola Ala le la, ate men xa n nin a fan naben Kirisita barako to. A xa a nin duniya te labenŋo baaro xarifa ntelu ma. ¹⁹ Bawo Kirisita fe, Ala tun be baaro la, walasa x’a fan nin hadamadinŋolu laben, x’a tara a man i la junubolu jaate. A xa ntelu bula wo telabenno xumo fola. ²⁰ Kirisita le toxo la, nin n be lasigidinɲa la, anin ntelu fe, Ala fan ne be alu kilixan. Kirisita toxo la, n be alu matarala xo alu xa son alu nin Ala te xa ben. ²¹ Kirisita tun mu junubentanŋo le ti, bari Ala x’a ke junubo ti ntelu ɲen, walasa ate kafuɲoxoya fe, n xa Ala la tilinninɲa soto.

¹ X’a la n nin Ala la baarakeɲoxoya xan, n be alu matarala xo: Alu xa Ala la neemo men soto, alu xana a tu wo xa ke fuwo ti. ² Bawo Ala xo: «Nte x’é lame waxati ɲuma, Ń x’é deema kisilo lunŋo.» A fele, saasa le mu waxati ɲuma ti. A fele, saasa le mu kisilo lunŋo ti. ³ N nte a fe ɲa si ma xa ke takkinnafen ti moxo do ɲen, walasa fe si xana je n na baaro la. ⁴ Bari n be kuwo bee kela le x’a yita xo n mu Ala la baaradinŋolu ti. N be muɲaba yitala toorokuwolu to, bonekuwolu to, anin xonotofilikuwolu to. ⁵ N buwota xa bula kaso la, jama lamurutita n xanma. N bulata baara xolenŋolu la, xa tooro sinnoxobaliya nin xonxo bulu. ⁶ N b’a yitala du xo n mu Ala la baarakedinŋolu ti n na senuya fe, n na lonŋo fe, n na muɲo nin n na ɲumaya fe, Ni Senunŋo la baaro fe, n na xanuya soobe fe, ⁷ n na tonɲa waajulo fe anin Ala la sintigiya fe, tilinninɲa kelekemiranŋolu fe, n be kelo kela anin n be n fannu lakantala mennu la. ⁸ N si bunɲa, n si doxoya du. N toxojaxo si fo, n toxoɲuma du si fo. N be jaatenin faniyantelu ti, x’a tara n mu tonɲatigo lelu ti. ⁹ N be mafelenin í xo moxo mennu nte lonnin, x’a tara n be lonnin bete. N be mafelenin í xo moxo satolu, x’a tara n be i nila. N be ɲangila, bari n nte faxala. ¹⁰ N juso be xasila, bari wo bee nin a ta, n be ɲaxalinin tuma bee. N mu fangantanŋolu ti, bari n be moxo kiika kela fentigolu ti. N be í xo bulutoxulunŋolu, x’a tara tonɲa la, fenŋo bee be n bulu. ¹¹ N badin Korentengolu, n xa tonɲa le fo alu ɲen. N xa n jusukunŋo bee le dayele alu ɲen. ¹² Alu la kuwo man doxo ntelu ma n jusukunŋo la. Alu fan nelu x’alu jusukunŋolu dataxun ntelu ɲen. ¹³ Saasa, nte be xumala alu ɲen í xo ń dinŋolu: Ntelu xa men ke alu ɲen, alu dulu xa wo ɲoxon ke n ɲen. Alu i jusukunŋo muume dayele n ɲen! ¹⁴ Alu nin lannayabalolu xana su kilin la i xanna. Tilinninɲa nin tilinbaliya si kafu no ɲa di? Keneya nin dibo si kafu no ɲa di? ¹⁵ Kirisita nin Sentane si ben no ɲa di? Walla sila joman be lannayabaxo nin lannayabalo te? ¹⁶ Ben joman ne si sin no xa ke Alabatusuba nin bololu te? Bawo nte lelu mu Ala nilama la batusuba ti, í xo Ala fan x’a fo ɲa men xo: «Nte si sigi i bata, ń nin i si i taxama i ɲoxo fe, nte si ke i la Ala ti, i si ke nte la siya ti.» ¹⁷ Wo le x’a tu, Marigi Ala xo: «Alu bo ɲin moxo innu to, x’e tala i ma, alu xana maxa fen noxonin si la. Nte si alu lamuta. ¹⁸ Nte si ke alu ɲen fa ti, alu si ke nte ɲen dinxelu nin dinmusolu ti, Sinŋobeetigi Marigi xo ten.»

¹ Ń badin xanuninŋolu, x’a la a xan ɲin ɲoxon lahidulu be n bulu, alan xa n fannu senuya balo nin niyo la noxokuwolu bee ma. Alan xa n na senuya dafa Alaɲasilanɲa xono. ² Alu i jusukunŋo dayele n ɲen. N man moxo si tooɲo. N man moxo si tiɲa. N man moxo si domo. ³ Nte nte wo fola xo ń be alu jalagila. Bawo ń x’a fo xa ban xo, alu xanuya be n na, nilamaya nin saya bee xono. ⁴ Nte be lanin alu la bete! Nte be sewonin bete alu la. Nte xa hakililasigiba soto, ń be ɲaɲanin bete n na toorokuwolu bee xono. ⁵ Tonɲa la, kabirin n sita Maseduwane jamano xan, n man lafiya si soto. N xa tooro sifa bee je. Kelo be n namininŋo to, silanɲa be n xono. ⁶ Bari Ala men be hakililasigo dila jusuxasininŋolu ma, wo xa n hakilo lasigi Tite la na fe. ⁷ A la na doron man wo ke, bari a xa hakililasigo men du soto alu la. A x’a fo n ɲen xo alu b’a fe xa nte je tugun. Jusuxaso men be alu la, anin alu be jijanin nte ɲen ɲa men, a xa wo dulu fo n ɲen. Wo le xa do kafu nte la ɲaɲo ma tugun. ⁸ Awa, haali nin nte xa safe men ki alu ma, wo x’alu nitokuwa, nte nte nimisinin wo la saasa. Nte tun nimisita wo la, ń x’a je tumo men xo wo safe tun x’alu nitokuwa waxati la. ⁹ Bari saasa, nte be ɲaɲanin. Nte nte ɲaɲanin xo ń x’alu nitokuwa de, bari nte be ɲaɲanin bawo alu la nitokuwa x’a tu alu nimisita. Alu la nitokuwa keta Ala sago ti, wo to, ntelu man leebu si lasi alu ma. ¹⁰ Bawo nitokuwa men be bennin Ala sago ma, wo be nala nimiso le tila, men xo mu kisilo ti. Nimisi nte wo to. Bari duniya la nitokuwa be nala saya le tila. ¹¹ Saasa, alu a mafele alu la nitokuwa men keta Ala sago ma, wo falinta men na: A x’alu jusudun. Alu x’alu fannu lafaasa bete. Alu diminbeteta, alu silabeteta, a diyata alu ɲen bete xa nte je. Alu juso bee tun be wo kuwo to. Alu xa jalagilo ke wo kuwo to bete. Alu x’a yita ɲa bee ma xo alu xa xoyi wo kuwo to. ¹² Nin í x’a je nte xa safe ki alu ma, men xa ku jaxo ke, wo koso nte, men du xa wo ku jaxo soto, wo koso nte. Bari a keta walasa x’a yita alu la Ala ɲa xoto, alu be balannin ntelu ɲen ɲa men. ¹³ Wo le xa n hakilo lasigi. N man hakililasigo doron soto, do kafuta n na ɲaɲo ma, n x’a je tumo men xo Tite tun be ɲaɲanin alu bee la hakililasigo la. ¹⁴ Awa, nin nte xa ń wasu dondin a ɲen alu la kuwo la, alu man nte kunŋo lajimi. Bari n xa tonɲa fo alu ɲen ɲa men tuma bee, wo ɲa ma, n xa tantulo men la alu xan Tite ɲen, wo du keta tonɲa ti. ¹⁵ Do le kafuta a la xanuya ma alu ɲen, tuma wo tuma nin a hakilo jigita alu bee la xuluwo la, anin alu la kunbenniɲa la, silanɲa nin jarajaro to. ¹⁶ Nte be ɲaɲala bawo ń si sin no xa ń na lannaya la alu xan kuwo bee to.

¹ Ń badinŋolu, Ala la neemo men dita Ala la jamalu ma Maseduwane jamano xan, n b’a fe alu xa wo lon. ² Je lannayabaxolu xotobota tooroku kiika fe; bari i la ɲaɲo tun xa bun ɲa men, fo i xa i bulolu labula bete, haali x’a tara i tunnu la fangantanɲa xa bun. ³ Nte mu wo seedo ti xo i xa nilo ke i sinkuwo la. I fannu tanbita i sinkuwo la, i xa wo ke i fannu ma. ⁴ I x’e balan n ma xo n xa son i dulu xa sindun wo deema bolo to, men tun xa xan xa ki Yude senumanŋolu ma. ⁵ I xa men ke, wo tanbita ntelu yilibenmata xan. I xa i fannu di Marigi ma folo, wo xo, ntelu ma, x’a la Ala sago xan. ⁶ Wo le x’a tu, n xa Tite matara xo a xa wo xanuya baaro men damuta alu bata, a xa wo dafa. ⁷ Awa, x’a la a xan fenŋo bee be alu kun xa fuuma: Lannaya, xuma ɲalonŋo, lonŋo, jijaliɲa bee, anin alu xa xanuya men soto ntelu la. Wo xanma, n b’a fe alu xa wo xanuya baaro du ke xa fuuma. ⁸ Ń nte ɲin fola alu ɲen í xo waajibi, bari nin ń xa tolu la jijalo fo alu ɲen, ń be ɲa le dila alu ma alu si a yita ɲa men xo alu la xanuya mu tonɲa le ti. ⁹ Bawo alu xa n Marigi Isa Kirisita la neemo lon: Ate men tun mu fentigo ti, a x’a fan ke fangantanŋo ti atelu ɲen, walasa alu xa fentigiya a la fangantanɲa fe. ¹⁰ Nte be ń hakililata dila alu ma ɲin ku in to: A xa ɲin alu xa taxa ɲa wo la, serun ate mennu fololu xa ku ke anin wo doron nte, alelu dulu x’a latege xa ku ke. ¹¹ Wo to saasa, alu wo baaro dafa. Alu x’a latege ɲaɲo to xa wo baaro ke, wo ɲa ma, alu a ke ɲaɲo to, x’a la alu sinkuwo xan. ¹² Nin ŋanneya xa ɲin soobeya la, men be n bulu, wo si muta. Men nte bulu, wo nte jaatela. ¹³ Wo xoto nte xo moxo tolu deemalo x’alu fannu maakuwo sa, bari bee la xaaɲanŋo le be nofe. ¹⁴ Bi, alu be fuumanin men na, wo si ke xa itelu be dasanin men na dafa, walasa lun do, i je fuuma men na, wo xa ke xa atelu je dasa men na dafa. Wo si na xaaɲanŋo ti, ¹⁵ í xo a be safenin Kitaabo to ɲa men xo: «Men xa kiika ko, wo ta man fuuma, men xa dondin ko, wo ta man dasa.» ¹⁶ Barako xa bula Ala ɲen, wo men xa jijalo di Tite ma alu la kuwo to, í xo men ɲoxon be ntelu la. ¹⁷ N xa men ŋinin a fe, a sonta wo ma. A taxata ɲa jijalo to, fo a fan x’a latege xa taxa alu bata. ¹⁸ N be a nin n badinxe kila, Ala la jamalu bee be men jagila a la baaro koso, xibaru Dimanŋo kuwo to. ¹⁹ X’a kafu wo ma, Ala la jama lelu x’a sugandi x’a xa ke n dandanbaxo ti n na taxamo to, wo xanuya baaro la. N be wo baaro kela Marigi fan na bunɲa xanma, anin n na ŋanneya beto yito xanma. ²⁰ N be i korosila walasa maxumalidula si xana soto n ma ɲin xaalisiba in nabaaraɲa to. ²¹ N b’a ŋininna xa ɲuma ke Ala ɲa xoto, wo doron nte, bari moxo dulu ɲa xoto. ²² N janxa i nin n badinxe do ki, n x’ate men na jijalo xotobo tuma kiika anin ku kiika to. A be jijalo yitanin saasa xa tanbi folo xan, bawo a be lanin alu la bete. ²³ Tite mu ń taxamaɲoxo nin ń baarakeɲoxo le ti alu bata. N badinŋolu mu Ala la jamalu la kiladinŋo lelu ti, mennu be baaro kela Kirisita bunɲa xanma. ²⁴ Wo to, alu a yita i la xo alu b’e xanunin bete, walasa a xa henne Ala la jamalu ma, anin i x’a lon xo n boloxo le mu xa sewo alu la kuwo la.

¹ Men mu senumanŋolu deema kuwo ti, kun nte a la nte xa safe ki alu ma wo la. ² Nte xa alu ŋanneya ɲuma lon. Nte xa ń na sewo yita alu la kuwo la Maseduwanengolu ɲen, x’a fo xo: «Akayi jamano badinŋolu be tobennin xa deemalo ke kabirin serun.» Alu la jijalo xa i tala bee jusudun. ³ Wo bee nin a ta, nte be n badinŋolu kila alu ma, walasa sewo men be nte la alu la kuwo to, wo kuwo xan, wo xana ke fuwo ti. Nte b’a fe alu xa tara tobennin í xo nte tun x’a fo ɲa men. ⁴ Nin wo nte, nin nte nin Maseduwanengo dolu nata, x’a tara alu nte tobennin, n si malu, walla atelu si malu, bawo n lata alu la ten. ⁵ Wo to, nte x’a mafele xo a xa xan nte xa ɲin badin innu matara i xa taxa ń ɲa alu bata, walasa alu fannu xa nilifenŋo men lahido ta xa ban, i xa wo ɲabo. Wo to, nte si a tara a tobenta, anin wo si a yita xo alu be nilo kela ŋanneya ɲuma la, alu nte a kela ŋanneya jaxu la. ⁶ Alu a lon xo: Men be dondin lanna, wo si dondin tege. Men be kiika lanna, wo si kiika tege. ⁷ Bee kilin kilin xa nilo ke í xo a x’a latege a jusukunŋo la ɲa men. A xana ke nitokuwa nin diyakuwa la, bawo men be nilo kela ɲaɲo to, wo le la kuwo xa di Ala ɲen. ⁸ A sinŋo be Ala ɲen xa neemo sifa kiika bee do ke alu ɲen, walasa alu maakuɲanfenŋolu xa tara alu bulu tuma bee, anin kiika xa tu alu bulu kuɲumako bee xanma. ⁹ Í xo a be safenin Kitaabo to ɲa men xo: «A x’a bulo labula, a xa fangantanŋolu so, a la tilinninɲa be tula fo abada.» ¹⁰ Ala men be lannifenŋo dila senekela ma, xa domolifenŋo di baluwo ti, wo si lannifenŋo di alu dulu ma, x’a labugi, walasa alu la ɲumaya xa nafa kiika ke. ¹¹ Alu si fentigiya ɲa bee ma, walasa alu xa sin tuma bee xa ɲumaya yita. Wo ɲa ma, moxo kiika si Ala tantu nilifenŋolu koso, n be mennu lasila i ma alu toxo la. ¹² Bawo alu be baaro men kela wo nilifenŋolu ti, wo nte danna Ala la moxo senumanŋolu maakuwo ɲiɲalo doron ma, bari wo s’a tu barakelalo kiika xa ke Ala ɲen. ¹³ Wo baaro nafa s’a tu kiika xa Ala tantu alu la xululo xanma. Anin, a si alu la xantigiya yita Kirisita la xibaru Dimanŋo ɲen. I s’a tantu du alu la ɲumaya koso, bawo alu nin itelu nin tolu bee kafuta alu bulufenŋolu to. ¹⁴ Ala xa neema maɲoxonjebalo men ke alu ɲen, wo s’a tu, i xa Ala matara alu ɲen, xa i la xanuya yita alu la. ¹⁵ Barako xa bula Ala ɲen a la nilifen maɲoxonjebalo xanma.

¹ Nte Poli fan be a ŋininna alu fe, Kirisita la sabaro nin a la ɲumaya fe, nte men be majiginin bete nin n be alu bata, ɲada nin ɲada; bari nin ń dula xa jan, ń xa fati alu ɲa, ² nte be alu matarala xo: Alu xana nte diyakuwa xa fatiya nin ń taxata alu bata. Bawo mennu b’a fola xo ntelu be kuwolu kela x’a ben hadamadinŋo le ma, nte b’a fe xa fatiya le yita wolu la. ³ Tonɲa le mu, n mu hadamadinŋo lelu ti, bari n nte kelo kela hadamadinŋo la ɲa ma. ⁴ N be kelo kela kelekemiranŋo mennu la, wolu man bo hadamadinŋo la, bari wolu barako be bola Ala le la, mennu si kelekunben bunŋolu tiɲa. N be miiriyafuwolu tiɲala. ⁵ Sintigiya fen wo fen b’a fan xototala, xa Ala lonniya kele, n be wolu bee tiɲala. N be miiriyalu bee mutala walasa i xa xulu Kirisita ɲen. ⁶ N be tobennin xa xanbulalo bee ɲangi, nin alu la xanmutalo dafata tumo men. ⁷ Alu fenŋolu jeɲa mafele. Nin moxo do be lanin a la xo a mu Kirisita ta ti, a tigo x’é miiri ɲin ma tugun xo: Ntelu dulu mu Kirisita talu ti í xo wo tigo. ⁸ Bawo Marigi xa sinŋo men di n ma, haali nin nte xa ń wasu wo xanma dondin, nte nte maluyala wo la. Wo sinŋo dikunŋo mu le x’alu la kafo lataxa ɲa, a man di a tiɲa xanma. ⁹ Nte nt’a fe x’a yita ń na safelu to xo nte be alu lasilala. ¹⁰ Bawo dolu be men fola, wo fele xo: «Poli la safelu xumolu xa xole anin i xa fati; bari nin a fan be n bata, barake nte a la, a xumaɲa nte fusi ti.» ¹¹ Moxo men be xumala ten, wo xa xan ɲin lon xo: N mu men ti dulajanŋo n na safelu la, nin n keta alu bata tumo men, n be kela wo le du ti n na kewalolu la. ¹² Bawo ntelu me fatiya x’e suman, walla x’e xaaɲan moxo dolu ma, mennu be i fannu toxoɲuma fola, x’e fannu ke sumannilan ti, anin xaaɲanma fen ti. Hakilintanŋo lelu mu. ¹³ Nte kennu nte nala i wasula xa danmatanbi. Ntelu si wo ke x’a ben Ala la baaro dandula ma n ɲen, men xa n nasi fo alu bata. ¹⁴ Ntelu nte tanbila n dandula xan, a tun si ke wo ti nin n tunnu man na alu bata. Bawo nte lelu fololu nata alu bata xa Kirisita xibaru Dimanŋo di alu ma. ¹⁵ Wo ɲa ma, n nte i wasula xa danmatanbi, xa moxo xotelu la baarakeninŋo ke n ta ti. Bari n yilo b’a ma xo do si kafu alu la lannaya ma, anin xo n si sin no xa baara ke alu bata, men nafa xa bun, bari x’a tara n man tanbi dula xan, dula men fota n ɲen. ¹⁶ N si sin no wo xo, xa Xibaru Dimanŋo lasi mara xotelu la, mennu be siginin atelu jefen, x’a tara n man i wasu moxo xotelu la baarakeninŋolu xanma i la dula. ¹⁷ Men b’a fan bunɲala, wo x’a fan bunɲa Marigi la kuwo xanma. ¹⁸ A nte xo moxo men be a fan toxoɲuma fola xo wo le mu toxoɲumatigo ti, bari Marigi be men toxoɲuma fola, wo le mu toxoɲumatigo ti.

¹ Nin alu tunnu si son xa nte la hakilintanɲa dondin muɲa! Iyo, alu muɲa ń xoto! ² Nte be kiiliyanin alu to, kiiliya men be bola Ala la. Ń x’alu mamuta xe kilin doron ne ɲen, nin wo mu Kirisita ti. Ń b’a fe x’alu lalo a ma í xo xarafa senumanŋo. ³ Bari, í xo sa xa Hawa lafili a la kewuya fe ɲa men, ń be silanin xo alu hakilo xana taxa yelema, x’alu la xantigiya soobe tiɲa Kirisita ɲen. ⁴ Bawo nte x’a je xo nin moxo do nata xa Isa xote la kuwo fo alu ɲen, men nin ntelu ta nte kilin ti, alu si son wo ma. Nin alu xa niyo do xote soto, men nin alu la sotoninŋo nte kilin ti, walla xa xibaru Diman xote soto alu tunnu man men soto, alu si muɲa bete wo xoto. ⁵ Ń hakilo la xo alu be wo mennu jaatenin kiladinbalu ti, wolu man fisa nte ti fusi to. ⁶ A si ke xo nte nte xumaɲalonnaba ti, bari lonŋo ken silo la, a nte ten. Ntelu xa wo silo yita alu la, x’a xoyiya kuwo bee to, anin ɲa bee ma. ⁷ Nte xa Ala la Xibaru Dimanŋo fo alu ɲen tumo men, nte xa wo ke fu. Nte xa ń fan majigi, walasa x’atelu xotota. Nte xa junube ke wo ti ba? ⁸ Nte sonta Ala la jama do xotelu xa nte sara, xa balu wolu la, walasa nte xa baaro ke atelu ɲen. ⁹ Xa nte tu alu bata, nte man den moxo si la, xa nte maakuwo tu fenŋo dolu la, bawo n badinŋo mennu nata xa bo Maseduwane, wolu xa nte maakuɲanfenŋolu bee sanba ń ma. Kuwo bee to, nte xa ń fan kisi xa ke alu ma doni ti. Nte si taxa ɲa xa ń fan kisi wo ma. ¹⁰ Kirisita la tonɲa men be nte to, wo xanma, nte b’a fola xo: Sewokuwo men be nte bata, moxo si me wo bo no nte la Akayi maro bee xono. ¹¹ Mun na? Xo nte nte alu xanula ba? Ala x’a lon xo nte be alu xanula! ¹² Nte be men kexan, nte si wo ke tugun, walasa mennu be sabaabu ŋininna x’e wasu xo i mu ntelu bonɲoxonkunŋolu ti, n x’e bali i xa wo soto. ¹³ Wo moxolu mu kiladin fano lelu ti, anin nanbarantelu mennu be i fannu kela Kirisita la kiladinŋolu ti. ¹⁴ Wo nte dabariban ku ti, bawo Sentane fan b’a fan kela keneya melekiyo ti. ¹⁵ Wo to, a nte ju ku ti nin a la baaradinŋo dulu x’e fannu ke tilinninɲa la baaradinŋolu ti. Bari i la ketalu nin labanɲa men xa xan, i si wo soto. ¹⁶ Nte be saagila a ma xo: Moxo si xana nte jaate xo ń mu hakilintanŋo ti! Walla nin nte be jaatela wo ti, alu son a ma xo nte mu hakilintanŋo ti, walasa nte du xa sin xa ń fan bunɲa dondin. ¹⁷ Nte be nala men fola, ń nte wo fola x’a ben Marigi sago ma, bari a be í xo moxo men mu hakilintanŋo ti muume, bawo ń be lanin a la xo fanbunɲakunŋo be nte bulu. ¹⁸ Bari x’a la a xan moxo kiika be i fannu bunɲala hadamadinɲa kuwolu xanma, nte du be nala ń fan bunɲala. ¹⁹ Ate mennu b’alu fannu jaatenin hakilitigolu ti, alu be sonna xa hakilintanŋolu la kuwolu muɲa. ²⁰ Alu be sonna xa don muɲa alu xa muta í xo jonŋolu, alu xa domo, alu xa bulutoxulunɲa, waso xa ke alu la, alu xa te alu ɲa xan. ²¹ Nte be men fola, nte be maluyala wo la xo: N xa barakentanɲa le yita! Moxolu si son xa men fo, ń be xumala í xo moxo hakilintanŋo, nte du si son xa wo fo. ²² I mu Heburo lelu ti ba? Nte du mu wo le ti. I mu Banisirayilango lelu ti ba? Nte du mu wo le ti. I mu Burehima bonsonŋo lelu ti ba? Nte du mu wo le ti. ²³ I mu Kirisita la baaradinŋo lelu ti ba? Nte be nala xumala a be í xo moxo men mu hakilintanŋo ti muume, nte mu wo ti xa tanbi wolu xan. Nte xa baaro ke xa tanbi wolu xan, nte bulata kaso la kiika ti xa tanbi wolu xan. Nte buwota bete xa tanbi wolu xan, xa sutiya saya la sinɲa kiika ti. ²⁴ Sinɲa luulu, Yahudiyalu xa busa daɲa tan saba nin xononto ta nte to. ²⁵ Romengolu xa nte buwo guma la í xo sinɲa saba. Sinɲa kilin, moxolu xa nte bun kurolu la x’e be ń faxala. Xulunŋo futita nte ti sinɲa saba xooxojiyo xan. Nte xa tili kilin nin su kilin ke xooxojiyo to. ²⁶ Nte la dugutotaxa kiika to, nte xa ba faninŋolu nin boyinxannilalu masiibo lon, xa ń badin Yahudiyalu anin siya tolu masiibo lon. Ń xa masiibo je gallubalu nin wulolu xono, xa masiibo je xooxojiyo xan, xa ke masiibo xono ń badin fanolu to. ²⁷ Nte xa baara xolenŋolu ke, xa sege muɲa. Ń sita ń ɲala sinɲa kiika ti. Ń xa xonxo nin mindoxo je. Ń xa diyakuwa sunŋo ke kiika ti. Ń toorota neno nin feeto bulu. ²⁸ Ń da nte sila a to ma, ń na lun wo lun dono be je, nin wo mu Ala la jamalu bee hanmo ti. ²⁹ Nin do barako xa doxo, nte du barako xa doxo wo fe; nin do x’é xodi lannaya la, wo si nte jani í xo ta. ³⁰ Nin nte xa xan xa ń fan bunɲa, ń si ń fan bunɲa ń na barakentanɲa le xanma. ³¹ Tanto be Marigi Isa Fa Ala men ɲen fo abada, wo x’a lon xo nte nte faniya fola. ³² Xa nte tu Damasi gallo xono, mansaxe Aretasi la goferenero xa garadolu bula xa gallo dundalu korosi, walasa xa nte muta. ³³ Bari dolu xa nte bula sinso xono xa ń nabo foloda fe, xa ń najigi gallo laminintato xofe. Nte xa ń fan soto a la wo ɲa in ne.

¹ Awa, fo nte xa ń fan bunɲa le haali nin nafa nte wo la. Wo bee nin a ta, saasa nte be xumala jelifenŋolu nin yitalifenŋolu xan, Marigi xa mennu ke nte ɲen. ² Nte xa Kirisita la moxo do lon, a san tan nin naano le fele, a tata xa taxa a ti fo sanfata sabananŋo xan. A tun b’a moxo sawuro le to ba? Ń man wo lon. A tun nte a moxo sawuro to ba? Ń man wo lon, bari Ala x’a lon. ³ Nte xa don lon xo wo xe tata xa taxa a ti fo arajanna. A tun b’a moxo sawuro le to ba? A tun nte a moxo sawuro to ba? Ń man wo lon, bari Ala x’a lon. Wo xe xa xumolu me non, mennu me fo no anin a nte dagenin moxo xa saagi mennu ma. ⁵ Nte si ń fan bunɲa wo xe la kuwo la, bari men mu ń fan ken ti, ń si ń fan bunɲa ń na barakentanɲa le xanma. ⁶ Nin ń tun b’a fe xa ń fan bunɲa, ń me ke moxo hakilintan ti, bawo ń tun be nala tonɲa le fola. Bari nte si ń fan bunɲa tu je, walasa moxolu be nte jela men kela, anin i be men mexan ń na, i xana taxa nte jaate xa tanbi wo xan. ⁷ Wo bee nin a ta, walasa nte xana ń fan bunɲa wo yitalifen maɲoxonjebalolu koso, dimin ŋaninma do bulata nte balasubo to, wo keta Sentane la melekiyo do bulaninŋo ti nte la, xa ń tooro walasa nte xana ń fan bunɲa. ⁸ Nte xa Marigi matara wo kuwo la í xo sinɲa saba xo a xa wo bo nte la. ⁹ Bari a xa ń jaabi xo: «Ń na neemo waseta í ɲen; ń na sintigiya be í yitabetela barakentanɲa le to.» Wo le x’a tu, a xa di nte ɲen xa ń fan bunɲa ń na barakentanɲalu la, walasa Kirisita la sintigiya xa ke nte xan. ¹⁰ Wo le x’a tu, ń be ɲaɲala barakentanɲalu nin nanilolu nin xoleyalu nin toorokuwolu nin xonotofilikuwolu la, ń be mennu sotola Kirisita koso. Bawo nte barako xa doxo tumo men, ń barako xa bun wo tumo le. ¹¹ Nte be xumala í xo hakilintanŋo, bari alelu xa ń diyakuwa xa ń bula wo la. Ate le tunnu xa xan xa ń nafaasa. Bawo haali nin nte nte fusi ti, alu la wo kiladinbalu nte nte ɲa, ɲa si le ma. ¹² Taagumanseedo mennu be nte la kiladinɲa yitala, wolu keta alu bata muɲa dafaninŋo to: Taagumanseedolu nin kawakuwolu anin sintigiyakuwolu. ¹³ Awa, nte xa mun ke Ala la jama tolu ɲen nin nte man wo ke atelu ɲen? Fo ɲin ku kilin in de, xo nte man den alu la! Alu wo tilinbaliya yaafa nte ɲen. ¹⁴ A fele, nte be tobennin saasa xa ń na taxakun sabananŋo ke alu bata; nte nte nala denna alu la; bawo nte nte alu bulufenŋolu nofe, nte be alu fan nelu nofe. Dinŋolu man xan xa naafulo kamari i wulubaxolu ɲen, bari wulubaxo lelu xa xan xa naafulo kamari i dinŋolu ɲen. ¹⁵ A ken si diya nte ɲen xa ń bulufenŋolu bee di anin xa ń fan di alu koso. Nin nte be alu xanula xa taxa a fe, wo si do bo alu la xanuya la nte ɲen ba? ¹⁶ Alu si son a ma xo nte man den alu la. Bari a si fo xo nte mu kewo le ti, xo ń x’alu muta kewuya la. ¹⁷ Nte xa mennu ki xa taxa alu bata, nte x’alu domo wolu do la ba? ¹⁸ Nte xa Tite matara xo a xa taxa alu bata, ń x’a nin n badinxe bula. Tite x’alu domo le ba? Nte nin ate la miiriya bee man ke kilin ti ba? N bee man a lo sila kilin fe ba? ¹⁹ Kabirin tuma jan, alu b’a miirila ba xo n be xumala xa boloxo di n fannu ma alu ɲa xoto? Ayi de, bari n be xumala Ala le ɲa xoto, Kirisita la kafuɲoxoya to. N badin xanuninŋolu, wo bee kunŋo mu le nin alu si taxa ɲa lannaya to. ²⁰ Nte be silala xo nin nte sita alu bata, nte xana taxa alu tara ɲa ma, men nin nte diyanɲo nte kilin ti, anin alu xa nte tara ɲa ma, men nte alu diyanɲo ti. Nte be silala ń xana taxa a tara xo kelolu nin kiiliya be alu te, anin diminnalu nin fadinɲalu, nin nanilolu nin ɲoxomaxumolu nin fanbunɲa anin ku ɲaxamininŋolu. ²¹ Nte be silala xo nin nte taxata alu bata sinɲa xote, nte la Ala xana taxa nte majigi alu ɲa xoto, anin xo nte xana taxa xasi moxo kiika koso, mennu be taxala ɲa xa junubo ke, í xo i x’a ke xotonin ɲa men. I man son xa nimisi i la ku noxoninŋolu nin i la jadoyalu nin i la ku kabanin keninŋolu la.

¹ Ɲin be kela a sinɲa sabananŋo le ti nte xa taxa alu bata. «Kuwo bee xa xan xa ɲabo x’a la moxo fula walla saba la seedeya xan.» ² Ń be ɲin kankeri in lala, mennu xa junubo ke xa tanbi anin moxo tolu bee ɲen. Nte tun xa wo ke ń na nali fulananŋo sinfe alu bata, bari ń be saagila a ma saasa x’a tu nte nte je: Nin nte taxata tugun, ń me tanbi fusi la. ³ Alu be taagumanseedo ŋininna, men s’a yita xo Kirisita be xumala nte fe, alu si wo soto. Kirisita nte barakentan ti alu bata, bari a be a la sintigiya yitala alu to. ⁴ Tonɲa le mu, a gengenta yiro xan tumo men, a tun mu barakentanŋo ti. Bari saasa, a be í nila Ala la sintigiya fe. N dulu mu barakentanŋolu ti ate kafuɲoxoya xono. Bari n nin a si nilamaya i ɲoxo fe, Ala la sintigiya barako la alu ɲen. ⁵ Al’alu fannu segesege, x’a mafele nin alu be lannaya silo xan. Al’alu fannu xotobo. Alu man a lon ba xo Isa Kirisita be alu to? Fo nin xotobolo da man diya alu la de. ⁶ Ń yilo b’a ma xo alu si a lon xo xotobolo da man kuwa n na. ⁷ N be Ala matarala xo alu xana kujaxu si ke. N nte a fe x’a yita xo xotobolo da diyata n na, bari n b’a fe x’alu je ɲuma le kela, haali nin xotobolo keta í xo nin a da kuwata n na. ⁸ Bawo sin fusi nte n ɲen tonɲa xanma, sinŋo be n ɲen a ɲen ne. ⁹ Ntelu be ɲaɲala nin n barako xa doxo, x’a tara atelu barako xa bun. N be Ala matarala men na, wo mu le xo alu xa dafa. ¹⁰ Wo le x’a tu, xa nte nin alu te janɲaninŋo tu, ń be ɲinnu safela alu ɲen, walasa nin nte sita je tumo men, nte xana fatiya alu ma x’a la Marigi la sin dinmaninŋo xan nte ma. Wo sinŋo dita alu la ɲataxo le xanma, a man di alu tiɲa xanma. ¹¹ Awa saasa, ń badinŋolu, alu ɲaxali, alu a ŋinin alu xa dafa, alu i ɲoxo jusudun. Alu i ɲoxo faamu. Benŋo xa ke alu te. Nin wo keta, xanuya nin heero tigi Ala si tu alu fe. ¹² Alu i ɲoxo xonton baataya xontonni senumanŋo la. Senumanŋolu bee be alu xontonna. ¹³ Marigi Isa Kirisita la neemo, anin Ala la xanuya, nin Ni Senumanŋo la kafuɲoxoya xa ke alu bee fe.