1 YAYA

¹ Men tun be je kabirin folofolo, n xa men me, n xa men je n ɲalu la, n xa men mafele nin n bulolu maxata a la, nin wo mu nilamaya banbalo Xumo ti, ń be ɲin safe in kila alu ma wo la kuwo xan. ² Nilamaya x’é yita, n x’a je, n b’a seedeya bola. N be nilamaya banbalo fola alu ɲen, men tun be Fa Ala bata n’a yitata n na. ³ N xa men je anin n xa men me, n be wo fola alu dulu ɲen, walasa alu dulu xa dun n na kafuɲoxoya xono. Ntelu be kafuɲoxoya men xono, wo mu Fa Ala anin a Dinxe Isa Kirisita la kafuɲoxoya le ti. ⁴ N be ɲin ku innu safela x’e ki alu ma, walasa n na ɲaɲo xa dafa. ⁵ N xa xumo men me Isa Kirisita la, nin n b’a fola alu ɲen, wo mu le xo: Ala mu keneya le ti, dibi si nte a la. ⁶ Nin n xo, xo n be a la kafuɲoxoya xono, x’a tara n be n na kuwolu kela dibo to, wo to, n xa fani n na xumolu anin n na kebaarolu xono. ⁷ Bari nin n be i taxamala keneya la í xo Ala fan be keneya la ɲa men, wo to, kafuɲoxoya be n nin i ɲoxo te anin a Dinxe Isa jelo be n senuyala xa junubo bee bo n na. ⁸ Nin n xo xo junube nte n na, n be n fan nelu lafilila, n nte tonɲa silo xan. ⁹ Bari nin n be n lola n na junubolu la Ala ɲen, ate mu xantigo nin tilinninŋo le ti, a si n na junubolu yaafa n ma, xa n senuya n na tilinbaliyakuwolu bee to. ¹⁰ Nin n xo xo n man junube ke, n be Ala kela fano le ti, a la xumo nte n xono.

¹ Ń na dindinŋolu, ń be ɲin safe in kila alu ma walasa alu xana junube ke. Bari nin do xa junubo ke, deemabaxo do be n kun Fa Ala bata: Wo mu Isa Kirisita le ti, ate men be tilinnin. ² Bawo ate fan keta n na junubeyaafo sadaxo ti. Ntelu talu kilinnu nte, bari a keta a ti duniya bee ɲen. ³ Nin n be Ala la sariyalu labatula, n b’a lonna wo le to xo n xa Ala lon. ⁴ Nin do xo: «Ń x’a lon» x’a tara a nte a la sariyalu labatula, wo mu fano le ti, a nte tonɲa silo xan. ⁵ Bari moxo men be a la xumaxanŋo labatula, Ala la xanuya dafaninŋo be wo tigo jusukunŋo la soobeya la. Wo le to, n b’a lonna xo n nin Ala be kafunin. ⁶ Moxo men je a fo xo ate nin a be kafunin, wo tigo xa xan xa í taxama í xo Isa xa í taxama ɲa men. ⁷ Ń xanuntelu, nte be safe men kila alu ma, wo nte sariya kuta ti, bari sariya xoto le mu, alu xa men soto kabirin folofolo. Alu xa xumo men me, wo le mu wo sariya xoto ti. ⁸ Wo bee nin a ta, ń be sariya kuto le kila alu ma. Wo mu tonɲa le ti, Kirisita nin atelu dulu bulu; bawo dibo be tanbila le, keneya soobe be manala xa ban. ⁹ Moxo men je a fo xo ate be í taxamala keneya la, x’a tara a be a badinŋo jaxuyala, wo be dibo to haalibi. ¹⁰ Moxo men be a badinŋo xanula, wo tigo be tunin keneya la. Fusi nte wo tigo la men si ke sabaabu ti xa moxo xote bula filo xono. ¹¹ Bari moxo men be a badinŋo jaxuyala, wo tigo be dibo to, a be í taxamala dibo to, a man a lon a be taxala dula men, bawo dibo x’a fiyonɲa. ¹² Ń na dindinŋolu, nte be ɲin safe in kila alu ma, bawo alu la junubolu yaafata Isa le toxo barako to. ¹³ Ń falu, nte be ɲin safe in kila alu ma, bawo men be je kabirin folofolo, alu xa wo lon. Xamarindinŋolu, nte be ɲin safe in kila alu ma, bawo alu xa sinŋo soto Sentane xan. ¹⁴ Ń na dindinŋolu, nte be ɲin safe in kila alu ma, bawo alu xa n Fa Ala lon. Ń falu, nte be ɲin safe in kila alu ma, bawo men be je kabirin folofolo, alu xa wo lon. Xamarindinŋolu, nte be ɲin safe in kila alu ma, bawo barako be alu la, Ala la xumo be tunin alu xono, anin alu xa sinŋo soto Sentane xan. ¹⁵ Alu xana duniya xanu, alu xana duniya xono fenŋolu xanu. Nin moxo men be duniya xanula, wo tigo nte n Fa Ala xanula. ¹⁶ Fenŋo mennu bee be duniya xono: Hadamadinŋo nidiyanɲefenŋolu, ɲabonfekuwolu anin duniya fanbunɲa kuwolu, wolu nte bola Fa Ala to, bari i be bola duniya le to. ¹⁷ Duniya be tanbila le, moxolu ɲa be bola fen wo fen fe, wo du bee be tanbila le, bari moxo wo moxo be Ala sago kela, wo tigo si nilamaya fo abada. ¹⁸ Ń na dindinŋolu, duniya bantumo sita. A fota alu ɲen xo Kirisita Jaxo be nala, bari Kirisita jaxolu kiika nata xa ban. Wo le to, n b’a lonna xo duniya bantumo sita. ¹⁹ Wo moxolu tunnu nte n do ti, wo le x’a tu i x’e fata n ma, bawo nin i tunnu mu n do ti, i tunnu si tu n to. Bari i x’e fata n ma walasa a xa xoyiya xo i si nte n do ti. ²⁰ Atelu kennu xa Ni Senunŋo soto, Ala senumanŋo xa men di alu ma. Alu bee xa lonŋo du soto. ²¹ Nin nte xa ɲin safe in ki alu ma, a nte xo alu man tonɲa lon de! Alu xa tonɲa lon, wo le x’a tu, nte b’a kila alu ma, alu x’a lon du xo faniya si me bo no tonɲa to. ²² Awa, jon mu fano ti? Men xo xo Isa nte Kirisita ti, wo le nte ba? Men x’é ban Fa Ala nin a Dinxe to, wo le mu Kirisita Jaxo ti. ²³ Moxo men x’é ban Ala Dinxe to, wo tigi man n Fa Ala soto. Bari moxo men je son a Dinxe to, wo xa n Fa Ala du soto. ²⁴ Atelu kennu xa xumo men me kabirin folofolo, wo xa tu alu jusukunŋo la. Alu xa xumo men me kabirin folofolo nin wo tuta alu jusukunŋo la, alu dulu si tu Ala Dinxe nin n Fa Ala la kafuɲoxoya xono. ²⁵ Kirisita xa men lahido ta xo a b’a dila n ma, wo fele: Nilamaya banbalo. ²⁶ Moxo mennu be a ŋininna x’alu lafili, nte xa ɲin safe, x’a ki alu ma wo lelu la kuwo la. ²⁷ Atelu kennu, Kirisita x’a Ni Senunŋo di alu ma. Alu maaku nte a la, moxo x’alu laxaran, bawo Ni Senunŋo fan be alu laxaranna fenŋo bee la xa ban. Ate la xaranŋo mu tonɲa le ti, faniya nte. Wo le x’a tu, alu Ni Senunŋo la xaranŋo labatu, xa tu Kirisita la kafuɲoxoya xono. ²⁸ Ń na dindinŋolu, alu tu Kirisita la kafuɲoxoya xono, walasa nin a nata lun men, a xa lannaya xoyo tara n na, n xana malu wo lunŋo. ²⁹ Alu x’a lon xo Kirisita be tilinnin. Wo xanma, alu xanta x’a lon du xo moxo wo moxo be tilinninɲa silo taxamala, wo tigo mu Ala dinŋo le ti.

¹ Ń badinŋolu, alu a mafele, Fa Ala xa n xanu ɲa men. A la xanuya koso, n be kilila xo Ala dinŋolu. Tonɲa la, n mu wo lelu ti. Wo le x’a tu, duniya moxolu man n lon, bawo wolu man Ala lon. ² Xanuninŋolu, kabirin saasa, n mu Ala dinŋolu ti. Bari n be kela men ti, wo man yita folo. N x’a lon xo nin a nata, n si ke í xo a fan be ɲa men, bawo a be ɲa men, n be a jela wo ɲa in ne. ³ Wo gigo be moxo wo moxo la, wo tigo si í senuya í xo Isa Kirisita xa senu ɲa men. ⁴ Moxo wo moxo be junubo kela, wo tigo be Ala la sariya tiɲala, bawo junubo mu sariya tiɲalo le ti. ⁵ Alu x’a lon xo Isa Kirisita nata xa moxolu la junubolu bo je. Alu x’a lon xo junube nte ate la. ⁶ Wo to, moxo wo moxo be tunin ate la kafuɲoxoya xono, wo si junubeko dabula. Moxo wo moxo be tula xa junubo ke taxanin, wo tigo man a je, wo tigo man a lon. ⁷ Ń na dindinŋolu, alu xana a tu moxo si x’alu lafili! Moxo wo moxo be tilinninɲa silo taxamala, wo tigo be tilinnin í xo Isa Kirisita be tilinnin ɲa men. ⁸ Moxo wo moxo be tula xa junubo ke taxanin, wo tigo mu Sentane la moxo le ti. Sentane xa junubo ke kabirin folofolo. Ala Dinxe nakunŋo mu le xa Sentane la kebaarolu tiɲa. ⁹ Moxo wo moxo keta Ala dinŋo ti, wo tigo si junubeko dabula, bawo Ala la siyo be a to, a me tu no junubo kela, bawo Ala x’a bange. ¹⁰ Ala dinŋolu anin Sentane dinŋolu be bola i ɲoxo to ten ne: Moxo wo moxo nte tilinninɲa silo taxamala, walla moxo wo moxo nte a badinŋo xanula, wo tigo nte Ala din ti. ¹¹ Alu xa xumo men me kabirin folofolo, wo le fele xo: Alan x’e ɲoxo xanu. ¹² N xana ke í xo Kabila. Ate tun mu Sentane la moxo le ti. A x’a doxoxe faxa. Mun na a x’a faxa? Bawo ate Kabila fan na kebaarolu tunnu xa jaxu, x’a tara a doxoxe la kebaarolu tunnu be tilinnin. ¹³ Ń badinŋolu, nin duniya moxolu be alu jaxuyala, wo xana alu dabaro ban. ¹⁴ Nin n be n badinŋolu xanula, wo le b’a yitala xo n bota saya to xa dun nilamaya banbalo to. Moxo men nte a badinŋo xanula, wo tigo be tunin saya to. ¹⁵ Moxo wo moxo be a badinŋo jaxuyala, wo mu moxofaxala le ti. Alu x’a lon xo nilamaya banbalo nte moxofaxala si ɲen. ¹⁶ N xa xanuya lon men ma, wo fele: Isa x’a niyo di ntelu xanma, ntelu dulu xa xan xa n niyo di n badinŋolu xanma. ¹⁷ Nin ɲin duniya in naafulo be do kun, a x’a badinŋo do je a maakuwo be fen do la, nin a man son xa hinna a la, Ala la xanuya be wo tigo la ɲa di? ¹⁸ Ń na dindinŋolu, n na xanuya man xan xa ke da nin nenkunŋo la ti. Bari a xa xan xa ke xanuya soobe le ti, men si lon n na kewalolu fe. ¹⁹ Wo ɲa in ne ma, n b’a lonna xo n be i taxamala silo men xan, xo wo mu tonɲa silo le ti. N hakilo sigininŋo si tu Ala ɲa xoto wo ɲa in ne ma. ²⁰ Nin n jusukunŋo be n jalagila, Ala xa bun n jusukunŋo ti; ate xa fen bee lon. ²¹ Xanuninŋolu, nin alan jusukunŋo nte n jalagila, n hakilo si sigi Ala ɲa xoto. ²² N je fen wo fen ŋinin a la, a si wo di n ma, bawo n b’a la sariyalu labatula, x’a sago ke. ²³ A la sariya fele: Xo n xa la a Dinxe Isa Kirisita toxo la, anin xo n x’e ɲoxo xanu í xo Kirisita x’a fo n ɲen ɲa men. ²⁴ Moxo men be Ala la sariyalu labatula, wo tigo be Ala to, Ala du be wo tigo to. N b’a lonna ɲa men xo Ala be n to, wo fele: A xa Ni Senunŋo di n ma.

¹ Xanuninŋolu, mennu bee b’a fola xo Ala Niyo be i fe, alu xana la wolu bee la. Alu wolu segesege folo, x’e mafele nin a x’a tara i niyo bota Ala le to. Awa, kila fano kiika nata duniya to. ² Alu si Ala Niyo lon ɲa men, wo fele: Ni wo ni b’a fola xo Isa Kirisita xa balasubo ta xa na, wo niyo bota Ala le to. ³ Bari ni wo ni man a fo xo Isa Kirisita xa balasubo ta xa na, wo niyo nte bola Ala to. Wo niyo mu Kirisita Jaxo niyo le ti. Alu x’a me xo wo be nala, a be duniya to saasa xa ban. ⁴ Ń na dindinŋolu, atelu kennu mu Ala ta lelu ti. Alu xa sinŋo soto kila fanolu xan, bawo niyo men be alu to, wo barako xa bun xa tanbi duniya moxolu ta xan. ⁵ Wolu mu duniya ta lelu ti, wo le x’a tu, i be xumala x’a ben duniya keɲa ma, duniya be i lamela. ⁶ Bari ntelu mu Ala ta lelu ti. Moxo wo moxo xa Ala lon, wo si n name, bari moxo wo moxo nte Ala ta ti, wo me n name. N si tonɲa Niyo nin faniya niyo bo i ɲoxo to ten ne. ⁷ Xanuninŋolu, alan x’e ɲoxo xanu, bawo xanuya be bola Ala le to. Xanuya be moxo wo moxo la, wo tigo mu Ala dinŋo ti, a xa Ala lon. ⁸ Xanuya nte moxo men na, wo tigo man Ala lon, bawo Ala mu xanuya le ti. ⁹ Ala x’a la xanuya yita n na ɲa men, wo fele: A x’a Dinxe kilinpe ki xa na duniya to, walasa n xa nilamaya soto ate barako to. ¹⁰ Xanuya mu ɲin ne ti: A nte don ti xo ntelu xa Ala xanu, bari Ala le xa ntelu xanu, a x’a Dinxe ki x’a ke n na junubeyaafo sadaxo ti. ¹¹ Xanuninŋolu, nin Ala xa n xanu ten, n dulu xa xan x’e ɲoxo xanu. ¹² Moxo si bada man Ala je, bari nin n be i ɲoxo xanula, Ala be n to. A la xanuya dafaninŋo si je n na. ¹³ N s’a lon ɲa men xo n be tunin Ala to anin x’a be tunin n to, wo fele: A x’a Niyo di n ma. ¹⁴ N x’a je anin n b’a seedeyala xo n Fa Ala x’a Dinxe le ki xa na ke duniya Kisibaxo ti. ¹⁵ Nin men xo, xo Isa mu Ala Dinxe ti, Ala be wo tigo to, wo tigo du be Ala to. ¹⁶ Ala be ntelu xanula ɲa men, ntelu xa wo lon, anin n lata a la. Ala mu xanuya le ti. Moxo men be tunin xanuya to, wo tigo be Ala to, Ala be wo tigo to. ¹⁷ Nin xanuya dafaninŋo be n na, wo to, kiito tegelunŋo n hakilo si sigi, bawo n na nilamaya ɲin duniya in xono, wo keta í xo Isa ta. ¹⁸ Silanɲa nte xanuya xono. Xanuya dafaninŋo be silanɲa kabala le. Wo ɲa ma, moxo men be silala, wo la xanuya man dafa, bawo silanɲa be a yitala xo ɲangilo be je. ¹⁹ Ntelu kennu be Ala xanula, bawo a folo xa ntelu xanu. ²⁰ Nin moxo men xo xo ate be Ala xanula, x’a tara a be a badinŋo jaxuyala, wo tigo mu fano le ti. A ɲa be a badinŋo men na, nin a nte wo xanula, a ɲa nte Ala men na, a si wo xanu ɲa di? ²¹ Isa Kirisita xa sariya men di n ma, wo fele: Moxo men be Ala xanula, wo xa xan x’a badinŋo du xanu.

¹ Moxo wo moxo lata a la xo Isa le mu Kirisita ti, wo tigo mu Ala dinŋo ti. Moxo wo moxo du be Ala xanula, wo tigo be a dinŋo dulu xanula. ² N si a lon ɲa men xo n be Ala dinŋolu xanula, wo fele: Nin n be Ala xanula anin x’a la sariyalu labatu. ³ Xa Ala xanu, wo mu ɲin ne ti, x’a la sariyalu labatu. A la sariyalu man xuli n ma. ⁴ Awa, Ala dinŋo bee si sinŋo soto no duniya xan. N be sinŋo sotola duniya xan ɲa men, wo fele: N na lannaya fe. ⁵ Jon si sinŋo soto duniya xan? Fo men kilin lata a la xo Isa le mu Ala Dinxe ti. ⁶ Isa Kirisita le nata, a nin jiyo nin jelo. A nin jiyo doron man na, bari a nin jiyo nin jelo nata. Ni Senunŋo b’a seedeyala xo wo mu tonɲa le ti, bawo Niyo mu tonɲa le ti. ⁷ Seede saba le be je. ⁸ Ni Senunŋo nin jiyo anin jelo, wo sabo bee be xanma. ⁹ N be sonna hadamadinŋolu la seedeyalo ma, Ala la seedeyalo le ɲoxon nte. Ala xa wo seedeyalo le ke a Dinxe la kuwo to. ¹⁰ Wo ɲa ma, moxo wo moxo lata Ala Dinxe la, wo tigo sonta wo seedeya ma; bari moxo men man la Ala la, wo xa Ala ke fano ti, bawo Ala xa seedeyalo men ke a Dinxe la kuwo to, a man la wo la. ¹¹ Wo seedeya fele: Ala xa nilamaya banbalo di n ma. N be wo nilamaya sotola a Dinxe to. ¹² Wo Dinxe be men bulu, wo xa nilamaya soto. Ala Dinxe nte men bulu, wo man nilamaya soto. ¹³ Ń be ɲin safela alu ɲen, walasa alu x’a lon xo alu xa nilamaya banbalo soto, atelu mennu lata Ala Dinxe toxo la. ¹⁴ Hakililasigo men be n na a bata, wo fele: Nin n xa fen do ŋinin a la men mu a sago ti, a si n name. ¹⁵ Nin n x’a lon xo a be n namenin, n x’a lon xo n je fen wo fen ŋinin a la, n xa wo soto. ¹⁶ Nin moxo do x’a badinŋo je junubo kela men nte saya lasila a ma, a xa Ala matara a ɲen, Ala si nilamaya di a ma, nin a la junubo nte saya lasila a ma ken. Junubo do be je men be saya lasila moxo ma. Ń man a fo xo alu xa taralo ke wo ɲoxon junube xanma. ¹⁷ Tilinbaliyakuwo bee mu junubo le ti. Bari junubo bee nte saya lasila moxo ma. ¹⁸ N x’a lon xo moxo wo moxo bangeta tugun xa ke Ala dinŋo ti, wo tigo me tu no junubeko la, bawo Ala Dinxe b’a lakantala, Sentane me fusi no a ma. ¹⁹ N x’a lon xo n mu Ala ta lelu ti, xo duniya bee be Sentane la fango le xono. ²⁰ Bari n x’a lon xo Ala Dinxe nata, xa hakilitigiya di n ma, walasa n xa Ala soobe lon. N be Ala soobe la kafuɲoxoya to a Dinxe Isa Kirisita le barako to. Ate le mu Ala soobe ti, anin nilamaya banbalo. ²¹ Ń na dindinŋolu, alu i korosi bolibatutalu ma.