ZEHPANI

ZEHPANI

¹ Yuda hkawhkam, Amon a kasha, Yoshia lakhtak e, Hezekia, Amaria, Gedalia hta na hkrat ai, Hkushi a kasha Zehpani a kaw du ai Yehowa a mungga, da ndai rai nga ai. ² Lamu ga ting hta na nga manga hpe, ngai atsai awai shamyit kau na nngai, nga nna Yehowa tsun ai. ³ Shinggyim masha hte yamnga hpe ngai shamyit kau na n ngai; ntsa malen u ni, nammukdara nga ni hte, tara n lang ai ni hpawn, ahtu kataw shara ni hpe, shamyit kau na nngai; ga ntsa de na, shinggyim masha hpe, ngai jahtum kau na nngai, nga nna Yehowa tsun ai. ⁴ Ngai gaw, Yuda mung hte Yerusalem mare na ni mahkra a ntsa e nye a lata ladawn nna, ndai shara hta na, naw ngam nga ai Bala sape ni hte hkinjawng ni hte hpawn, sumla hkinjawng ni a amying hpe mung; ⁵ sumsing lamu na zaw nawng zaw wa ni hpe, tinang a nta ntsa e nawku ai ni hpe mung, Yehowa hte Malhkam hpara hpe, rau nawku nna, dagam nga ai ni hpe mung; ⁶ Yehowa kaw na htak mat wa ai ni hte, Yehowa hpe galoi n hkan tam ai ni hpe mung, jahtum kau na nngai. ⁷ Madu Yehowa man e a sim sha nga u; Yehowa a nhtoi du magang ra ai: Yehowa gaw shagu hkungga nawng na poi shachyip da nna, lawm ai ni hpe san da nu ai. ⁸ Ya, Yehowa a hkungga nawng ya ai shani e, ngai gaw, du ni, hkawhkam kasha ni hte, tsasam hpun palawng bu hpun ai ni nlang hte hpe, ari jaw na nngai. ⁹ Dai shani e, masha wa a chyinghka hkinbawng shingkawt nna, tinang a madu a nta hpe, kashun kashe, hkalem hkalau la ai arai ni hte, jahpring ai ni mahkra hpe mung, ngai ari jaw na nngai. ¹⁰ Dai shani hta e, nga chyinghka lam hku e hkrap shabam ai nsen, mare wing lahkawng ngu na daw hta na, marawn jahtau ai hte, kawng ni kaw na sharut gyi ai nsen, pru na ra ai, nga nna Yehowa tsun ai. ¹¹ Hpaga hkyet e shanu nga ai ni e, hkrap shabam nga mu: kaning rai nme law, hpaga ga ai amyu masha ni yawng, n-yawm mat masai; gumhpraw gun sa ai ni yawng, htum mat masai. ¹² Dai aten e ngai gaw pyengdin lang let, Yerusalem mare hpe sawk yu nna, Yehowa gaw kaja ai mung, n kaja ai mung, galaw na n rai, nga nna hpa n nawn let, gumlu gumlan rai nga ai ni hpe, ari jaw na nngai. ¹³ Shanhte a arung arai lanep tai nna, shanhte a nta ni gaw, shingran katsi ai shara tai mat na ra ai: gaja wa shanhte gaw, nta galaw timung, dai hta rawng lu na n rai; tsabyi sun hkai sharing da timung, tsabyi jahku lu lu na n rai. ¹⁴ Yehowa a galu kaba ai nhtoi ni nga ai; dai gaw ni wa nna, grai lawan nga ai: Yehowa a nhtoi a nsen wu ngoi nga ai: dai nhtoi hta e, share wa pyi, grai gahtau na ra ai. ¹⁵ Dai nhtoi gaw, sindawng kahtet ai nhtoi, ru tsang ai hte kyindut hkrum ai nhtoi, shingran katsi ai hte marawng marang shabyin ai nhtoi, nsin sin ai hte sin mak ai nhtoi, sumwi mung ai hte nsin htat ai nhtoi, ¹⁶ bunghku kum ai mare ni hte, tsaw ai hpyendap ni hpe htim let, pahtau dum nna, garu jahtau ai nhtoi, rai na ra ai. ¹⁷ Mung masha ni gaw Yehowa hpe shut kau ai majaw, ngai shanhte a ntsa e ru tsang shangun nna, shanhte gaw myi hten ai ni zawn lamawm hkawm na mara ai: shanhte a asai gaw, ga nhpu zawn, shanhte a hkumshan gaw, hkyi zawn, kabai kau ai hkrum na mara ai. ¹⁸ Yehowa a sindawng kahtet ai nhtoi hta, shanhte a ja gum hpraw gaw, shanhte hpe mawai la lu na n rai; shi n-yun bu ai wan gaw, mung ting hpe hkru kau na ra ai: kaning rai nme law, shi gaw mung masha ni mahkra hpe alawan shamyit kau na ra ai.

¹ Myiman htat ai amyu e, nanhte dawdan ai garai n hkrum, dai nhtoi gaw mahkaw zawn garai n poi mat ai hte, Yehowa a sindawng kahtet ai, nanhte a ntsa e garai n du nna, ² Yehowa a masin pawt ai nhtoi nanhte hpe garai n dep yang, tinang dai zuphpawng nna, tinang myit nem mu. ³ Ga ntsa hta myitsumnung nga nna, Yehowa a tara hkan nang ai ni yawng hte e, Yehowa hpe hkan tam mu; dinghpring ai lam hte sumnung ai lam hpe tam manu:Yehowa a masin pawt ai nhtoi hta, nanhte hprawng makoi shara mu dam nhten. ⁴ Kaning rai nme law, Gaza mare gaw kau da ai hkrum nna, Ashkelon mare gaw katsi katsang shara tai na ra ai: Ashdod mare masha ni hpe, shani chyingtung e shapraw kau nna, Ekron mare gaw, baw kau ai hkrum na ra ai. ⁵ Nammukdara hkin-gau e shanu nga ai, Hkerehti amyu na ni e, nanhte ding-nye lu myit dai: Hpilisti masha ni a lamu ga Hkanan e, Nang hta kadai mung n shanu nga lu hkra, ngai nang hpe hkap daw na nngai, nga nna Yehowa mungga tawn da nu ai. ⁶ Nammukdara hkin gau gaw udat shara, sagu rem ai ni a sum gap shara hte, sagu hpung ni a matu ulawng, tai mat na ra ai. ⁷ Dai hkingau gaw, naw ngam nga ai Yuda nta masha ni a matu tai na ra ai: shanhte gaw dai yang e tinang a sagu hpung ni hpe shayaw nna, shana du jang dai ni gaw, Ashkelon mare na nta ni hta hpum nga na mara ai: kaning rai nme law shanhte a Karai Kasang Yehowa gaw, shanhte hpe kawan katsan yu nna, bawngdung ai ni hpe woi nhtang wa na ra ai. ⁸ Moba masha ni gaw, nye a amyu masha ni hpe shatan nhkan nna, Ammon a kashu kasha ni gaw, shanhte hpe shatan let, asawng asang di kau ai lam, ngai na ni ai; shanhte gaw nye a amyu masha ni a lamu ga jarit makau e tinang hkum hpe shagrau shatsaw nga ma ai. ⁹ Dai rai nna, Israela Karai Kasang, Zaw nawng zaw wa up ai Yehowa ning nga ai: Gaja wa, ngai hkrung nga ai hte maren, Moba gaw Sodom zawn, Ammon a kashu kasha ni gaw, Gomora zawn, tsamat tu ai shara, jum nhkun hte htani htana shingran katsi ai shara tai na ra ai: nye a amyu masha ni hta naw ngam nga ai ni gaw, shanhte hpe hpya lu hpya sha nna, nye a amyu hta hti nga ai ni gaw, shanhte hpe madu na mara ai. ¹⁰ Shanhte gaw gumrawng gumtawng ai myit madun nna, Zaw nawng zaw wa up ai Yehowa a amyu masha ni hpe shatan nhkan let, tinang hkum hpe shagrau shatsaw ai majaw, ndai lam hkrum sha ma ai. ¹¹ Yehowa shanhte hpe nhtum nni di na ra ai; kaning rai nme law, shi gaw ga ntsa hpara ni mahkra hpe kawsi shakyet nna, maigan amyu ni a zunlawng masha ni yawng, langai hte langai tinang a shara kaw nna shi hpe nawku na mara ai. ¹² Hkusha masha ni e, nanhte mung nye a nhtu hte si na marin dai. ¹³ Shi gaw shi a lata hpe dingdung maga de ladawn nna, Asuri mung hpe shaza kau na hte, Ninewe mare hpe shingran katsi ai shara, hkunhkraw ai zaibru jang zawn, di kau na ra ai. ¹⁴ Yamnga hpung ni hte, matse labye amyu myu ni, de a ka-ang e hpum na mara ai: wunpu u hte dumsi ni, de a shadaw ni a lapran e shanu nga nna, hkuwawt hku e de a nsen ngoi na ra ai: chyinghka hkinbawng ni shingran katsi mat nna, shi gaw arit hpunpyen maka ni hpe shadawng kau nu ai. ¹⁵ Dai mare nan, Ngai gaw nga nga nna, ngai hta shaje kadai n nga ai, nga nna kabu sha rawng ai myit hte sawse lawklek nga let, tinang a kraw lawang e tsun ai mare rai nga ai: ya, shi gaw, katsi katsang hte matse labye ni hpum nga ai shara tai wa sahka! dai hku lai wa ai ni yawng, de a lam, Yi lo, nga nna, tinang a lata ari na mara ai.

¹ Gumle gumlau myit rawng nna, awu asin re ai hte, adip arip hkan galaw ai mare gaw, dingnye lu u ga. ² Shi gaw Yehowa nsen hpe, n madat nga ai; sharin achyin ai, n hkam la nga ai; Yehowa hpe shamyet shanat nga ai, n rai; shi a Karai kasang hpang de sit wa ai, n rai. ³ Shi a du ni gaw, dai mare ka-ang e shabam ai hkanghkyi rai nga ma ai; tara agyi ni gaw, hpang jahpawt du hkra hpa n ngam da ai, shana kawan hkawm ai chyahkyawn, rai nga ma ai. ⁴ Myihtoi ni gaw ga kaman tsun nna, hkalem hkalau ai ni, rai nga ma ai: hkinjawng ni gaw, dai chyoi pra ai shata hpe, awu asin di kau nna, jep ai tara hpe shanut kau ma ai. ⁵ De a ka-ang e nga ai Yehowa gaw dinghpring nga ai; shi gaw n shawp n kap ai amu galaw na n rai; jahpawt shagu tara malang ai hku, shi shapraw nna, dai gaw htum mat lu ai n rai; tara manai ai ni chyawm gaw kaya n chye ma ai. ⁶ Ngai gaw maigan amyu ni hpe jahtum kau nngai; bunghku jut langchyi ni gaw, run mat wa sai; shanhte a mare lam ni hta, kadai n lai hkra, ngai shaza kau nngai: shanhte a mare ni hta, shanu nga ai wa langai mi n ngam nga lu hkra, marawng marang hkrai nga ai. ⁷ Ngai mahtang, Ngai shi a lam myit shatawng da ai yawng hte maren, shi a nta jahtum kau ai n hkrum hkra, ngai hpe hkrai hkrit hkungga nna, sharin achyin ai ga hkam la u, ngu nna tsun timung, shanhte jau jau rawt nna, tinang a shut hpyit ai lam shanang galaw ma ai. ⁸ Dai re ai majaw, ngai hpyen gasat rawt ai shani du hkra, ngai hpe ala nga mi; kaning rai nme law, maigan amyu ni hte hkawhkam mungdan ni a ntsa e, nye a kahtet sindawng ai myit mahkra hpe ru bun na matu, shanhte hpe zuphpawng shangun na nga, ngai myit shatawng da nngai: nye a n-yun bu ai wan hte lamu ga ting hkru kau na ra ai, nga nna Yehowa tsun ai. ⁹ Dai hpang e, amyu baw ni mahkra gaw, Yehowa amying hpe shaga nna, myit langai sha hte shi hpe dawjau lu hkra, ngai shanhte hpe sanseng ai n-gup jaw na nngai. ¹⁰ Hkusha mung na hka nu ni a wora hkran e, bra nga ai, nye a amyu shayi sha hta na, ngai npe tawngban ai ni gaw, nye a matu kumhpa sakjaw na mara ai. ¹¹ Shingrai, nang ngai hpe tawt lai ai amu majaw, dai shani hta e nang kaya kahpa hkrum na, n rai; kaning rai nme law, dai shaloi e gumrawng gumtawng grang ai ni hpe, na a ka-ang na ngai yeng kau nna, nye a chyoi pra ai bum hta e myit kaba ai masha, htawmhpang de nga lu na n rai. ¹² Nni nkri hkrum ai, matsan mayan amyu hpe, na a ka-ang e ngai jahti da nna, shanhte gaw Yehowa amying hta, shingbyi nga na mara ai. ¹³ Naw ngam nga ai Israela masha mi gaw, n hkru n hkra ai amu galaw na, n rai; masu ga mung tsun na, n rai; shanhte a n-gup hta hkalem hkalau ai shinglet tu lu na n rai: kaning rai nme law, shanhte hpe kadai n jahkrit ai, shanhte lusha nna, hpum nga na mara ai. ¹⁴ Ziun shayi sha e, mahkawn mangoi u; Israela e, kabu jahtau u: Yerusalem shayi sha e, na a myit masin mahkra hte kabu gara nga nna, sharawng awng nga u. ¹⁵ Yehowa gaw, nang hpe dawdan ai ga shabai kau nna, na a hpyen wa hpe manga kau nu ai: Israela hkawhkam ngu ai Yehowa gaw, na a ka-ang e rai nga ai; nang gaw tsin-yam tsindam hpe, htawmhpang e hkrit ra ai, n rai. ¹⁶ Dai shani e, Yerusalem hpe, Hkum hkrit et; Ziun e, na a lata hkum shakya et; nga nna tsun na ra ai. ¹⁷ Na a Karai Kasang Yehowa gaw, na a ka-ang e rai nga ai; shi gaw daru magam rawng nna, hkyehkrang la na ra ai: na a lam shi kabu gara nna, sharawng awng na ra ai; shi gaw tsawra nna, atsin sha rai nga ai: mahkawn mangoi let, shi nang hta myit kabu nga na ra ai. ¹⁸ Nang hte seng nna, ndat da ai poi a lam myit yawn ai ni hpe, ngai shinggyin la na nngai: shatan nhkan hkrum ai lit, shanhte a matu li la nga ai. ¹⁹ Yu u, nang hpe zingri zingrat ai ni nlang hte hpe, ndai aten e ngai dawdan na nngai: lagaw hten ai ni hpe ngai hkyehkrang la nna, shabra kau hkrum ai ni hpe jahpawng da na nngai: ga ntsa ting hta kaya hkrum ai ni hpe, shakawn kungdawn shara hte amying shingteng lu ai amyu, ngai shatai na nngai. ²⁰ Ndai aten e ngai nanhte hpe bai woi wa na nngai; ndai aten e ngai nanhte hpe bai jahpawng da na nngai: kaning rai nme law, bawngdung ai ni hpe, nanhte a man e nhtang wa shangun yang, ga ntsa amyu ni mahkra hta, ngai nanhte hpe amying shingteng jaw nna, shakawn kungdawn shara shatai na nngai, nga nna Yehowa tsun ai.