SHAKAWN KUNGDAWN

SHAKAWN KUNGDAWN

¹ Tara n lang ai ni a bawng ai hku hta n hkawm, Yubak kap ai ni a lam e n tsap, Jahpoi ai ni a hpawng hta n dung lawm ai sha, ² Yehowa a tara hta awng nga nna, Shi a tara hpe shani shana myit mang ai wa gaw, a nga ai. ³ Dai wa gaw hka kau e hkai ai, Shi a aten hta asi si nna, Alap mung n nyip ai hpun hte bung nga ai: Shi galaw ai yawng mayawng mung tai na ra ai. ⁴ Tara n lang ai ni chyawm gaw, dai zawn n rai; Nbung e shapoi ai mahkaw hte bung ma ai. ⁵ Dai majaw tara n lang ai ni, tara dara ai hta, Yubak kap ai ni, dinghpring ai ni a hpung hta, n rawt tsap lu na ma ai. ⁶ Kaning rai nme law, dinghpring ai ni a lam hpe Yehowa chye nga ai; Tara n lang ai ni a lam chyawm gaw, hten mat na ra ai.

¹ Masha amyu ni hpa majaw n-yun bu nga nna, Amyu baw ni, hpa majaw lila maw nga ma hka? ² Yehowa hte shi a Namman chya ai wa hpe, Ga ntsa hkawhkam ni rau hpawng nga nna, Du salang ni jawm bawng nga ma ai gaw: ³ “Shan a hkang hkyihkyang anhte gang dut gaw, shan a sumri anhte kabai kau gaw,” nga ma ai. ⁴ Lamu hta dung nga ai wa gaw mani nga ai, Dai Madu shanhte hpe asawng kau mu ai: ⁵ Dai shaloi, shi a masin pawt ai hte shi shanhte hpe ga tsun dan nna, Nachying myit kahtet ai hte shanhte hpe daru na mu ai gaw: ⁶ “Ngai gaw, nye a chyoi pra ai Ziun bum hta e Nye a hkawhkam wa hpe tawn da ni ai,” ngu na mu ai. ⁷ Ga madat ngai shana ya na nngai: “Ngai sha nang rai nga ndai, Dai ni ngai nang hpe shaprat sade ai. ⁸ Ngai e hpyi nna, masha amyu myu na a sali wunli matu, Nang madu na arung arai, lamu ga htum hkra, ngai nang hpe jaw na de ai. ⁹ Nang shanhte hpe hpri sumdoi hte shabya kau nna, Wan galaw ai wa a wan zawn, ga kau na maru ai,” nga nna Yehowa ngai hpe tsun ni ai. ¹⁰ Dai majaw hkawhkam ni e, hpaji daw mu, Ga ntsa tara agyi ni e, sharin achyin la mu. ¹¹ Yehowa hpe hkungga lara ai hte daw mu, Hkrit gari ai hte kabu gara nga mu. ¹² Dai kasha hpe pup mu: shing n rai yang, shi masin pawt nna nanhte lam e hten bya ai hkrum na myit dai: Kaning rai nme law, shi masin alawan pawt bu na ra ai: Shi hta shingbyi ai ni nlang hte gaw, a lu ma ai.

¹ Yehowa e, nye a gumlau ni gade law wa nga ma hka! Masha law law wa nye a gumlau maga e rawt masai. ² “Karai Kasang hta shi a matu hkye la shara n nga ai, Nga nna, nye myit masin a lam, law law wa tsun ma ai. [Selah.] ³ Yehowa e, nang chyawm gaw, nye a n-gang, Nye a arawng sadang hte nye baw sharawt ya ai wa, rai nga ndai. ⁴ Nye a nsen hte ngai Yehowa hpe shaga nga nna, Shi gaw shi a chyoi pra ai bum hta nna ngai hpe htan ya ni ai. [Selah.] ⁵ Yehowa ngai hpe shadaw ya ni ai majaw, Ngai kaleng taw nna, yup nhtawm, bai hprang lu nngai. ⁶ Ngai hpe grup grup kawan nga ma ai, Masha mun sen hpe ngai n hkrit nga nngai. ⁷ Yehowa e, rawt u; nye a Karai Kasang e, ngai hpe hkye la e: Ngai hpe gumlau ai nlang hte a shabyi nang kahpret nna, Tara n lang ai ni a kawng hpe nang daw kau ya ndai. ⁸ Yehowa gaw hkyehkrang la ai lam rai nga ai; Na amyu a ntsa e, na a shaman ai gaw, anga nga u ga law. [Selah.]

¹ Ngai hpe dinghpring shangun ai Karai Kasang e, ngai shaga yang htan ya e. Gyip ai shara e, nye a matu dam lada nang di ya ndai. Ngai hpe matsan dum nna, ngai hpyi ai ga madat ya e law. ² Kaman lila tsaw nna, masu ai lam tam nga ai masha kasha ni e, Gaten du hkra nye a arawng sadang hpe shanut nga na myit dai kun? [Selah.] ³ Yehowa gaw myit ding ai masha hpe shi a matu san da nu ai, chye mu. Yehowa hpe shaga yang, shi ngai hpe madat ya na nngai. ⁴ Myit kahtet nga timung, yubak hkum galaw myit, Yupku hta tinang dai dai myitsumru yu nna atsin sha nga mu. [Selah.] ⁵ Dinghpring ai hkungga nawng jau nna, Yehowa hpe shamyet shanat nga mu. ⁶ “Kaja ai gaw anhte hpe kadai madun lu na a kun?” nga nna law law wa tsun ma ai. Yehowa e, na a myiman a nhtoi, anhte a ntsa e jahtoi ya mi. ⁷ Shanhte a mam hte tsabyi ngai ai aten e kabu gara ai hta, Nang nye a myit hpe grau nna kabu shangun ya ndai. ⁸ Ngwi pyaw ai hte ngai kaleng taw nna yup nga nngai: Kaning rai nme law, a katsi n nga ai shara e nga timung, Yehowa e, nang hkrai ngai hpe a sumnung sha nga nga shangun nngai.

¹ Yehowa e, nye a ga madat mara ya e, Nye a myit aru yu nga ai hpe, dum nga u. ² Nye a Hkawhkam hte Karai Kasang e, ngai jahtau ai nsen matsing da u; Kaning rai nme law, nang kaw ngai akyu hpyi nga nngai. ³ Yehowa e, nang jau jau e nye a nsen na lu na ndai. Jahpawt manap e ngai na a matu hkungga lajang da nna, a mada nga nngai. ⁴ N tara ai hta awng nga ai Karai Wa, nang rai nga ndai n rai, N hkru ai amu nang hte rau nga lu na, n rai. ⁵ Gumrawng ai ni, na a man e grin nga lu na ma ai n rai, Yubak galaw ai ni nlang hte hpe nang ndawng nga ndai. ⁶ Masu ga tsun ai ni hpe nang jahten kau nga ndai, Sai kap ai hte hkalem sha ai wa hpe, Yehowa matsat nga ai. ⁷ Ngai chyawm gaw, na a kaba ai chyeju majaw, na a nta hta shang lu nngai. Nang hpe hkrit hkungga ai hte, na a Htingnu de yawng let, nawku lu nngai. ⁸ Yehowa e, ngai e gyam yu ai ni a majaw, Na a dinghpring ai lam de ngai hpe woi la e. Nye a man e na a lam shading ya e. ⁹ Shi a n-gup hta kamsham shara n rawng ai; Shanhte a kraw lawang n se nga malu ai; Shanhte a mayu hpaw nga ai lup rai nga malu ai, Shanhte a shinglet, bawk chye nga malu ai. ¹⁰ Karai Kasang e, shanhte hpe ra baw shagun mu, Shanhte bawng ai hta shanhte hkrat mu ga. Shanhte a n hkru ai lam kaba hta shanhte hpe shaden kau mu; Kaning rai nme law, shanhte nang hpe gumlau nga ma ai. ¹¹ Nang hpe shamyet shanat ai ni nlang kabu gara nga mu ga, Nang shanhte hpe maga da mu ai majaw, tutnawng e kabu jahtau nga mu ga: Na amying hpe tsawra ai ni mung, nang hta sharawng awng nga mu ga. ¹² Kaning rai nme law, nang gaw dinghpring ai wa hpe shaman ya nga ndai; Yehowa e, nang shi hpe chyeju hte n-gang zawn, kawan da nga ndai.

¹ Yehowa e, na a masin pawt ai hte ngai hpe ari hkum jaw e, Na a myit kahtet ai hte ngai hpe hkum sharin ya et. ² Yehowa e, ngai htum wa ni ai majaw, matsan dum la e, Yehowa e, nye a nra hkrit gari nga li ai majaw, shamai ya e. ³ Nye a myit masin nachying hkrit gari nga ai, Nang chyawm gaw, Yehowa e, gaten du hkra,__? ⁴ Bai wa rit, Yehowa e, nye myit masin mawai la ya e. Na a chyeju majaw ngai hpe hkye la ya e. ⁵ Si ai hta kadai mung nang hpe dum nga ai n rai. Katsan ga hta nang hpe kadai chyeju jaw na ma ta? ⁶ Ngai madai nna hki ba la nga nngai; Shana shagu hkrap ai hte nye yupku madi nga ai, Nye myi prwi hta nye a yupra hpe ngai shayawng dat nngai. ⁷ Nye a myi yawnhkyen ai hte a mam nga ai; Nye a gumlau ni a majaw, myi mak mat sai. ⁸ Nye a hkrapngu hkrapngoi ai hpe Yehowa na wu ai majaw, N shawp n kap galaw ai ni nlang, ngai kaw na hka mat wa manu. ⁹ Ngai shaga ai gaw, Yehowa madat mara ya sai; Ngai akyu hpyi ai gaw, Yehowa hta la ya na ra ai. ¹⁰ Nye a gumlau ni nlang kaya nna nachying hkrit gari ai hkrum na mara ai; Kaya kahpa hkrum let, shanhte akajawng sha kanut mat wa na ma ai.

¹ Nye a Karai Wa Yehowa e, nang hta ngai shingbyi nga nngai: Shi gaw hkanghkyi zawn nye a asak hpe n amya kau ai sha, ² Hkrang la ai wa n nga yang, dai hpe n ashin kau u ga, Hkan shachyut ai ni yawng kaw na ngai hpe hkye la nna shaw la e law. ³ Nye a Karai Wa Yehowa e, ndai ngai galaw taw gaw, Nye a lata hta yubak kap nga taw gaw, ⁴ Ngai hte hku ai wa hpe n kaja ai lam bai tai nna, Ngai hpe gumlau ai wa hpe pyi, pagawn di taw gaw: ⁵ Gumlau wa gaw nye a myit masin hpe hkan lep nna, Ga hta nye a asak kabye kau ya n ga, Nye a arawng ga nhpu hta a taw nga u ga. [Selah.] ⁶ Yehowa e, masin pawt let rawt u; Nye a gumlau ni n-yun bu ma ai hpe, shabai ya mu. Nye a lam dum u; dawdan ai hku nang hkangda ngut sai. ⁷ Masha hpawng amyu myu na a grupyin e jahpawng nhtawm, Dai ni a ntsa nna, tsaw ai shara de bai lung mat u. ⁸ Yehowa gaw masha amyu ni hpe jeyang nga ai. Yehowa e, ngai hta rawng ai dinghpring ai hte myit tsup ai hpe tau yu nna, ngai hpe tara dara ya e. ⁹ Tara n lang ai ni a n hkru ai lam sim mat malu ga; Dinghpring ai ni hpe mahtang shagrin mu. Dinghpring ai Karai Kasang gaw, Masin hte nhkyun ni hpe chyam yu ai wa rai nga ai. ¹⁰ Karai Kasang nye a n-gang lang ya nga ai; Myit malang ai ni a hkye la ai wa shi rai nga ai. ¹¹ Karai Kasang gaw dingman ai tara agyi wa rai nga ai, Lani hte lani myit kahtet ai Karai Wa mung, rai nga ai. ¹² Masha myit n kayin yang shi nhtu garang nna, Shi a ndan dawn nna, jin jin rai nga ai. ¹³ Dai wa hpe shi a jasi ai arai ni shi shading nna, Shi a pala ni hpe ju jahkyeng da nu ai. ¹⁴ Yu mu, n hkru ai hpe shangai na, shi machyi nga ai; Gumlau gumle hte na-um nasin rai nga nna, Masu ai gaw shangai dat wu ai. ¹⁵ Shi nhkun chye htu da nna, Shi htu ai hku hta hkrat nga ai. ¹⁶ Shi n hkru ai amu shi a baw hta bai wa lu ai. Shi a baw pungding hta shi a kashun kashe bai hkrat sa lu ai. ¹⁷ Ngai gaw Yehowa a dinghpring ai hte maren chyeju dum na nngai; Tsaw Htum ai Yehowa a amying hpe, ngai mahkawn mangoi na nngai.

¹ Anhte a Madu Yehowa e, Lamu hta, na a hpung shingkang shapraw ai wa gaw, Aga ting hta, na a mying nsang gaw, gade wa danhkung nga a hka! ² Nang hpe je hpre ai ni a majaw, Gumlau ni hte manawn ai ni hpe jasim kau mu ga, Ma chyangai hte chyu chyu ai ni a n-gup hta, nang hpung dagu tawn da ndai. ³ Na a sumsing lamu gaw, na a layung a amu, Nang tawn da ai shata hte shagan ni hpe ngai mada yu yang: ⁴ Nang adum nga ai shinggyim masha hte, Nang kawan yu nga ai masha kasha gaw, hpa wa mi rai nga a hka? ⁵ Nang shi hpe Karai Kasang hte loi mi sha shagrit da nna, Arawng sadang hte hpung shingkang shi hpe ka-up ya nu ai. ⁶ Na a lata amu ntsa e, nang shi hpe up shangun wu ai; Sagu bainam hte yamnga nlang hte hpe, ⁷ Nam e nga ai ashu ashan hpe mung, Ntsa malen na u ni, hka hta rawng ai nga ni, ⁸ Nammukdara a lam e pyau hkawm ai yawng hte hpe mung, Shi a lagaw npu e nang tawn da nu ai. ⁹ Anhte a Madu Yehowa e, Aga ting hta, na a mying nsang gaw, gade wa danhkung nga a hka!

¹ Nye a myit mahkra hte, ngai Yehowa hpe shakawn na nngai, Na a mauhpa magam nlang hte hpe, ngai gawn dan na nngai. ² Na a majaw ngai kabu nna, myit pyaw nga na nngai, Tsaw htum ai Wa e, na a amying hpe ngai mahkawn mangoi na nngai. ³ Nye a gumlau ni kanut mat wa yang, Shanhte na a man e kataw nna hten mat wa ma ai. ⁴ Ngai hpang maga de nang tara dara nna dawdan ya nit dai; Dingman ai tara agyi nang rai nga ndai rai nna, dai tingnyang hta dung nga ndai. ⁵ Nang gaw masha amyu ni hpe daru kau nna, Tara n lang ai ni hpe jahten kau mu ai: Shanhte a amying hpe prat dingnawng, shaprai kau ya manu ai. ⁶ Gumlau ni mat mat wa nna, prat tup htinggaw htum mat masai. Mare ni hpe mung nang run kau nna, De a masat dingsat pyi hten mat sai. ⁷ Yehowa chyawm gaw, htani htana adung nga nna, Tara dara na matu shi a tingnyang hpe lajang da nu ai. ⁸ Shi gaw mungkan ga hpe dingman ai hte tara dara nna, Malang ai hku hkan let amyu baw ni hpe jeyang na mu ai. ⁹ Yehowa gaw zingri zingrat hkrum ai ni a langchyi, ru tsang hkrum ai aten e, tsaw ai langchyi, rai na ra ai. ¹⁰ Dai majaw, na a amying chye ai ni nang hta hpa nga nna, Yehowa e, nang hpe tam ai ni hpe nang kau da ndai n rai. ¹¹ Ziun hta nga nga ai Yehowa hpe mahkawn mangoi mu; Amyu baw ni hpe shi a magam bungli shana ya mu. ¹² Sai matai dawp ai wa gaw shanhte hpe dum nga nna, Myit gyip ai ni a hpyi jahtau ai hpe malap kau ya mu ai n rai. ¹³ Yehowa e, ngai hpe matsan dum ya e: Si ai chyinghka na ngai hpe sharawt la ai wa e, Ngai hpe ndawng ai ni a zingri ai hpe, yu u. ¹⁴ shaloi na a akyu nlang hte gaw ngai gawn dan nna, Ziun shayi sha a chyinghka lam e, na a hkye la ai lam majaw, kabu gumlawt na nngai. ¹⁵ Masha amyu ni, tinang htu ai nhkun hta di hkrat bang nna, Shanhte makoi da ai mahkam hta tinang a lagaw ahkang nga malu ai. ¹⁶ Yehowa shi hkum dan nga ai: tara dara ai amu galaw nu ai; Tara n lang ai ni gaw, tinang a lata a amu hta hkam nga ma ai. [Higayun, Selah.] ¹⁷ Tara n lang ai ni hte, Karai Kasang hpe malap mali kau ai amyu yawng mayawng hte gaw, Le katsan ga de di hkrat na mara ai. ¹⁸ Matsan mayan ni hpe tut tut malap kau na mu ai n rai, ru tsang hkrum ai ni a myit mada ai lam, Tutnawng hten mat nga na n rai. ¹⁹ Rawt u, Yehowa e, si ging ai wa hpe n dang shangun u ga, Masha amyu ni na a man e dawdan ai hkrum mu ga. ²⁰ O, Yehowa e, shanhte hpe jahkrit mu; Masha amyu ni, si ging ai masha hkrai rai nga ma ai gaw, shanhte hpe shadum mu. [Selah.]

¹ Yehowa e, hpa rai nme, nang tsan tsan e tsap nga n ta? Ru tsang hkrum ai aten hta e, hpa rai nme makoi nga n ta? ² Tara n lang ai ni a gumrawng ai myit majaw, matsan mayan ni hkru mat masai, Dai ni maw ai hku hta shanhte ahkang mat masai. ³ Tara n lang ai wa, shi myit masin ra ai hku shakawn nga ai, Lawhpa ai wa gaw Yehowa hpe kau da nna, asawng nga ai. ⁴ Tara n lang ai wa myit kaba nna, “Shi ari jaw na n rai,” nga ai. Karai Kasang n nga ai, nga nna, myit mang nga ai. ⁵ Shi hkan ai hku, tutnawng e agrin nga lu ai; Na a tara dara ai lam ni, tsaw htum ai shara zawn, shi hte tsan gang nga ai: Shi a gumlau ni yawng hpe shi kawut kau mu ai. ⁶ “Ngai galoi mung htawt mat ai hkrum na nngai n rai, Prat dingsa e yubak n hkrum ai wa, ngai rai nga nngai,” Nga nna shi a kraw e a tsun nga ai. ⁷ Shi n-gup, matsa mawa, hkalem sha ai, kashun kashe ai hte hpring nga lu ai. Shi a shinglet npu e n shawp ai hte shut hpyit ai rawng nga lu ai. ⁸ Kahtawng ni a gyam yu ai shara hta e shi dung nga ai, Makoi ai shara hta mara n kap ai ni hpe sat kau mu ai. Shi a myi nji nmu nga ai ni hpe azi yu nga mu ai. ⁹ Hkanghkyi gaw shi a lungpu hta zawn, makoi ai shara hta e shi gyem nga ai: Matsan mayan ni hpe kamu la na shi gyem nga ai; Shi a sumgawn gang karawt yang, matsan mayan wa mung lawm nga ai. ¹⁰ shi lanyan nna gum nga ai rai nna, Nji nmu nga ai ni shi a lamyin hta hkrat ma ai. ¹¹ “Karai Wa malap mali kau nga ai; Shi myiman makoi da nga wu ai, Galoi mung mu mada nga na n rai,” Nga nna shi a kraw e a tsun nga ai. ¹² Rawt u, Yehowa e; Karai Wa e, na a lata sharawt u, Matsan mayan ni hpe hkum malap kau et. ¹³ Tara n lang ai wa gaw, hpa majaw Karai Kasang hpe asawng nna, “Shi ari jaw na n rai,” nga nna, shi a kraw e, a tsun nga lu ta? ¹⁴ Gaja wa nang mu mada nga ndai: na a lata hta matsing da na, N shawp ai hte shatsang ai hpe, nang a yu nga ndai; Nji nmu ai wa nang hta shamyet shanat nga ai; Jahkrai nmai ni a karum ai wa, nang tai nit dai. ¹⁵ Tara n lang ai wa a lahpum hpe daw kau u; N hkru ai wa a amu, n nga ai du hkra, ari hkan jaw u. ¹⁶ Yehowa gaw htani htana hkawhkam rai nga ai; Maigan amyu ni shi a mung hta na hkoi mat wa masai. ¹⁷ Yehowa e, myit gyip ai ni a ra ai lam, nang na yu nga ndai; Jahkrai nmai ni hte zingri zingrat hkrum ai ni hpe dawdan ya nna, ¹⁸ Ga ntsa masha htawmhpang e n jahkrit lu mu ga, Shanhte a myit hpe nang shadaw ya nna, Na a na hte madat mara la ya nga ndai law.

¹ Yehowa hta ngai shingbyi nga nngai: “U zawn na a bum hta pyen htawt u; ² Yu u, tara n lang ai ni ndan shachyen nna, Myit malang ai ni hpe nsin e gap na nga, Pala hpe ndan sumri hta bang da mu ai. ³ Npawt shadaw ni daw mat nga ma yang, Dinghpring ai wa hpa galaw lu a ta?” nga nna, Nye a myit masin hpe nanhte hpa majaw tsun nga myit ta? ⁴ Yehowa gaw shi a chyoi pra ai Htingnu hta nga nga ai: Sumsing lamu hta e shi a tingnyang rai nga ai. Shi a myi a mada nga nna, Shi a myi hpyi shinggyim masha ni hpe azi yu nga mu ai. ⁵ Yehowa dinghpring ai ni hpe dinglik yu nna, Tara n lang ai wa hte kashun kashe tsaw ai wa hpe, Shi a myit masin ndawng nga mu ai. ⁶ Tara n lang ai ni a ntsa e wan n-ga htu u ga, Shanhte a hkambum kan hte kahtet ai nbung, rai nga malu ga. ⁷ Kaning rai nme law, Yehowa dinghpring nga ai. Shi gaw dinghpring ai amu tsaw nga ai; Myit malang ai ni shi a myiman mu lu na mara ai.

¹ Karum rit, Yehowa e; myit pra ai wa mat wa nna, Kangka re ai ni, masha kasha ni hta na, htum mat wa ma ai. ² Langai hte langai tinang a htingbu wa hte masu ga tsun ma ai; Bawk ai nten hte, myit lahkawng hte shanhte tsun ma ai. ³ Yehowa e, “Anhte a shinglet n-gun sharawng ya mi ai. Anhte a nten anhte hte rau rai nga ai: Anhte a ntsa na Madu kadai wa rai nga a ta?” ⁴ Nga nna, bawk ai nten nlang hte hte, Ga kaba tsun ai shinglet hpe, gadoi kau u. ⁵ “Ru tsang hkrum ai ni a ru tsang ai hte, Matsan mayan ni a sharung shayawt ai a majaw, Ya ngai rawt wa na nngai rai nna, Ba galawp ai wa hpe shingbyi shara hta tawn da na nngai,” nga nna Yehowa tsun ai. ⁶ Yehowa a ga chyoi pra ai ga rai nga ai; Bunghkrawng kaw nna, ga de byawng hkrat ai, Sanit lang shabyawng ai gumhpraw hte bung nga ai. ⁷ Yehowa e, nang shanhte hpe makawp maga nga na ndai. Ndai amyu hta na, nang shanhte hpe galoi mung jahka nga na ndai. ⁸ Shinggyim masha ni hta n seng ai amu kaba wa ai shaloi, Tara n lang ai ni shara shagu hkan e tam hkawm nga ma ai.

¹ Yehowa e, gaten du hkra nang ngai hpe a malap kau nga na n ta? Gaten du hkra na a myiman, ngai kaw na makoi kau nga na wu ta? ² Gade na hkra nye a myit masin hta ngai sumru yu nga nna, Lani hte lani nye a myit hta yawnhkyen nga na rai ta? Gade na hkra gumlau ni ngai hta grau nga na ma ta? ³ Nye a Karai Kasang Yehowa e, mada yu nna htan ya e: Si ai hta ngai n yup nga n ga, ⁴ Dai gumlau wa, “Ngai shi hpe dang kau nngai,” n nga lu u ga, Ngai kataw yang ngai hpe zingri ai wa n kabu nga lu u ga, Nye a myi jahtoi ya e. ⁵ Ngai chyawm gaw, na a chyeju hta shamyet nga nngai, Na a hkye la ai lam hta nye a myit kabu nga ai; ⁶ Yehowa ngai hpe chyeju kaba jaw nngai majaw, Ngai shi hpe mahkawn mangoi na nngai.

¹ Mana ai wa gaw, “Karai Kasang n nga ai,” Nga nna shi a kraw e a tsun nga ai. Shanhte tsam mat nga ma ai rai nna, Matsat shabat lailen hkan nang ma ai: Kadai mung kaja ai amu n galaw ma ai. ² Zai byeng-ya rawng ai wa nga ai, n nga ai, Karai Kasang hpe tam ai wa nga ai kun? Mada yu na nga, Yehowa lamu de nna, masha kasha ni hpe gum yu nga ai. ³ Yawng dam mat wa masai; Shanhte rau brun mat wa masai. Kadai mung kaja ai amu n galaw ma ai: Gaja wa, langai mi muk n nga ai. ⁴ N hkru ai amu galaw ai hte, Nye a amyu masha ni hpe muk hpe zawn sha kau nna, Yehowa hpe n hpyi jahtau ai ni mahkra gaw Hpa mung n chye nga ma hka! ⁵ Karai Kasang gaw dai dingman ai amyu hte nga nga ai majaw, Shanhte dai yang e hkrit kaba hte hkrit gari wa masai. ⁶ Zingri hkrum ai wa a bawng ai hku hpe, Nanhte kaya hpya mayu mu timung, Yehowa shi a shingbyi shara rai nga ai. ⁷ Israela a matu Ziun kaw nna hkyehkrang la ai lam, kadai jaw na rai nga a ta? Yehowa shi a bawngdung ai amyu hpe hkrang la ai shaloi jang, Yaku awng wa nna, Israela kabu gara nga na ra ai.

¹ Yehowa e, na a Sum hta kadai shanu lu na rai nga a ta? Na a chyoi pra ai bum hta kadai nga lu na rai nga a ta? ² Tara hkan ai myit hte hkawm nna, dinghpring ai amu galaw let, Shi a myit hta dingman ai ga tsun ai wa; ³ Shi a shinglet hte bawlaw ai ga n tsun ai: Shi a jinghku wa hpe n shawp ai hku n galaw ai, Shi a htingbu wa hpe kaya kahpa n jahkrum ai wa; ⁴ Shi a myit hta shagrit ai hte kaya ging dum nga nna, Yehowa hpe hkrit kamyin ai ni hpe hkungga ai hte, Tinang a akyu hten timung, shi a dagam ai ga n lai ai wa; ⁵ Tinang a gumhpraw hpe ladu lai ai amyat hte n hkoi, Mara n kap ai wa a jaw e sake manawn n la ai wa gaw, Ndai galaw let, galoi mung shamu shamawt hkrum na n rai.

¹ Karai Wa e, ngai hpe bau sin ya e; nang hta ngai shingbyi nga nngai. ² “Nang nye a Madu rai nga ndai,” ngai Yehowa hpe tsun ni ai. Nang hta kaga nye a madu nga mai na lam n nga ai. ³ Ga ntsa e nga ai chyoi pra ai ni hte, Hpung lu ai ni hpe hkrai, ngai ra nga nngai; ⁴ Lam kaga hkan ai ni a tsin-yam law wa na ra ai. Shanhte a sai kumhpa hta, ngai ru jaw lawm na nngai n rai. Shanhte a amying nye a n-gup hte shamying na nngai, n rai. ⁵ Yehowa gaw nye a sali wunli hte, lusha gawm na hkambum rai nga ai: Nang gaw nye a sali kumhtaw hpe sin nga ndai. ⁶ Nye a lamu ga jarit pyaw ai shara hta ang nga ai, Gaja wa, nye a sali wunli hkik hkik rai nga ai. ⁷ Ngai hpe hpaji daw ya ai Yehowa hpe ngai sha-a na nngai, Shana e pyi nye a myit masin ngai hpe sharin ya nga ai. ⁸ Nye a man e ngai Yehowa hpe tut tut tawn da na nngai, Nye a hkra maga e shi anga nga ai majaw, ngai n shamu na nngai. ⁹ Dai majaw nye a myit masin kabu nga ai hte nye a arawng awng nga li ai; Nye a hkumshan mung asan apra sha nga lu li ai. ¹⁰ Kaning rai nme law, nang nye a myit masin hpe katsan ga de kau da ya na ndai n rai. Na a chyoi pra ai wa hten byak hkrum na, nang hkraw nga ndai n rai. ¹¹ Nang ngai hpe asak hkrung ai lam madun ya na ndai; Na a man e kabu gara htum nga ai: Na a hkra lata hta pyaw ai lam tut tut anga nga ai law.

¹ Yehowa e dinghpring ai ga madat u, Ngai jahtau ai ga hpe matsing ya e: Bawk ai n-gup hte n hpyi ai ga hpe, na la ya e. ² Ngai hpe dawdan ai ga, nang kaw na pru u ga, Na a myi, malang ai lam hpe a mu nga lit dai. ³ Nang nye a myit hpe dinglik ya yu nit dai; Shana e nang ngai hpe kawan yu nna, Ngai hpe chyam yu yang, hpa mung n mu ndai: Ngai myit ai lam nye a n-gup hte n shai li ai. ⁴ Masha a amu, na a n-gup ga hte nhtan shai nga ai, Ngai chyawm gaw, n hkru ai ni a lam hpe koi nga nngai. ⁵ Nye a lagaw na a lam hta a hkan nga li ai, Nye a lagaw lahpan kashawt nga li ai n rai. ⁶ Karai Wa e, nang ngai hpe htan ya ndai majaw, Ngai nang hpe a shaga nga nngai: Ngai hpang de na kayin nna, nye a ga madat ya e. ⁷ Na a hkra lata hte gumlau rawt ai ni kaw na Kamsham ai ni hpe hkyehkrang la ai wa e, Na a mauhpa chyeju madun dan mu. ⁸ Ngai hpe zingri nga ai tara n lang ai ni hte, Nye a asak hpe grup grup kawan nga ai gumlau ni kaw na, ⁹ Myi sha hpe yu ai zawn ngai hpe yu yu nna, Na a singkaw a shingnip npu e ka-up da ya e. ¹⁰ Shanhte matsan dum ai lam pat kau nna, Gumrawng gumtawng ga a tsun nga ma ai. ¹¹ Anhte hkawm ai lam hpe shanhte ya kawan da nna, Anhte hpe ga de jahkrat kau na a maw nga ma ai. ¹² Shi gaw, shan hpe sha mayu ai hkanghkyi hte, Makoi ai shara e gyem nga ai hkanghkyi hkalung hte, bung nga ai. ¹³ Rawt u, Yehowa e, shi man e tsap u, shi hpe jahkrat kau u, N hkru ai ni kaw na, na a nhtu hte, nye a asak hpe shalawt ya e. ¹⁴ Yehowa e, mungkan ga masha ni hte Ndai aprat hta sha matu mara lu ai ni kaw na, na a lata hte ngai hpe shalawt la e. Shanhte a kan hpe nang sutgan hte jahpring ya mu ai: Shanhte kashu kasha law law mayat maya nga ma ai rai nna, Shadang sha ni kaw sutgan htawng da lu ma ai. ¹⁵ Ngai chyawm gaw, dinghpring ai hte, na a myiman hpe mu lu na ring ngai; Yup hprang wa ai shaloi, na a hkumhkrang hpe mu yang, ngai myit dik na ring ngai.

¹ Nye a n-gun Yehowa e, ngai nang hpe tsawra nga nngai. ² Yehowa gaw nye a lunghkrung, nye a hpyendap, nye ahkye hkrang la ai Wa, Nye a Karai Wa, ngai shingbyi nga ai nye a lungpu, Nye a n-gang, nye a hkye la ai nrung, nye a langchyi, rai nga li ai. ³ Mai shakawn ai Yehowa hpe ngai shaga nna, gumlau ni kaw na ngai hkye la ai hkrum ni ai. ⁴ Si ai sumri ni ngai hpe kawan nga nna, N hkru ai hka hpunla ni ngai hpe jahkrit mi ai. ⁵ Katsan ga a sumri ni ngai hpe kum da nna, Nye a man e si hkrung si htan mahkam nga nga ai. ⁶ Ngai ru tsang ai hta ngai Yehowa hpe shaga nna, Nye a Karai Kasang hpe hpyi jahtau we ai. Shi a Htingnu hta nna shi nye a nsen madat nna, Ngai hpyi jahtau ai ga, shi a na hta shang lu ai. ⁷ Shaloi lamu ga shamu nna a wam nga ai, Bum ni a npawt nhpang ni gari nga ai: Shi myit kahtet ai majaw, dai hte kangi kanga rai ma ai. ⁸ Shi a ladi hta wan nhkut pru nna, Shi a n-gup na, wan hkru nga ai: Grung ai wan n-ga dai hta grung nga ai. ⁹ Shaloi shi gaw sumsing lamu hpe shanem nna yu wa ai, Shi a lagaw npu e, htat ai nsin sin nga ai. ¹⁰ Hkerub hta shi jawn nna pyen nga ai. Nbung a singkaw ntsa e pyen nang nga ai. ¹¹ Shi gaw nsin hpe shi a makoi magap shara shatai nna, Hka kaba a nsin hte, htat ai sumwi ni, Shi a grup grup na sum tai nga ma ai. ¹² Shi a shawng na htoi kabrim ai hte, Shi a htat ai sumwi hta na, sin hte wan n-ga poi nga ma ai. ¹³ Shaloi Yehowa gaw lamu de na mu shangoi nna, Tsaw Htum ai wa gaw, shi a nsen shapraw dat wu ai. Sin hte wan n-ga mung poi nga ma ai. ¹⁴ Shi a pala ni shi gap dat nna, shanhte hpe shabra dat mu ai. Myihprap law law hte shanhte hpe shamak kau mu ai. ¹⁵ Yehowa e, nang makan ai ga hte, Na a ladi na sa dat ai nsa majaw, Hka kaba ni a lam sumhkan wa nna, Ga npawt ni dawng pru wa ma ai. ¹⁶ Matsaw, ntsa de nna shi ladawn dat nhtawm, ngai hpe sai la ni ai. Hka kaba hta na ngai hpe shaw la ni ai. ¹⁷ Nden ja ai gumle gumlau wa hte, Ngai hpe ndawng ai ni kaw na, shi ngai hpe mawai la ni ai: Kaning rai nme law, shanhte ngai hta n-gun grau ja ma ai. ¹⁸ Tsin-yam hkrum ai nhtoi hta shanhte ngai hpe dim da timung, Yehowa nye a shadaw shara rai nga ai. ¹⁹ Shi ngai hpe dam lada ai shara de shapraw la nna, Ngai hta awng nga ai majaw, ngai hpe mawai la ni ai. ²⁰ Ngai dinghpring ai made Yehowa ngai hpe akyu jaw nna, Nye a lata sanseng ai hpe bai htang ya ni ai. ²¹ Kaning rai nme law, Yehowa a lam ngai hkan nang nna, Nye a Karai Kasang hpe shut kau nngai n rai. ²² Shi dawdan ai lam nlang hte nye a man e nga nga nna, Shi htet da ai ga hpe ngai gangkau nga nngai n rai. ²³ Shi a man e ngai yubak n kap nna, N hkru ai lam hpe koi kau nga nngai. ²⁴ Dai majaw Yehowa nye dinghpring ai hte, Shi myi hte mu lu ai nye a lata sanseng ai hte maren, ngai hpe bai htang ni ai. ²⁵ Matsan dum chye ai wa hpe nang matsan dum ai madun dan ndai; Myit dik ai wa hpe, myit dik ai myit madun dan ndai: ²⁶ Chyoi pra ai wa hpe, chyoi pra ai myit madun dan ndai, Myit magaw ai wa hpe, nhtan shai ai myit madun dan ndai. ²⁷ Ru tsang hkrum ai amyu hpe nang hkye la nna, Gumrawng ai myiman hpe shagrit kau ndai. ²⁸ Gaja wa, nang nye a pyengdin shatu ya ndai: Nye a Karai Kasang Yehowa, nye a nsin hpe jahtoi ya ai. ²⁹ Nang hte luksuk ni hpe ngai dang kau nna, Nye a Karai Kasang hte bunghku hpe shingtawt lu nngai. ³⁰ Karai Wa a lam ni chyip chyip rai nga ai; Yehowa a ga chyam yu yang teng nga lu ai; Shi hta shingbyi ai nlang hte a n-gang shi rai nga ai. ³¹ Yehowa hta shaje kadai wa Karai Kasang rai nga a ta? Anhte a Karai Kasang hta kaga, kadai wa lunghkrung rai nga a ta? ³² Dai Karai Wa, ngai hpe n-gun hte shingkyit kyit ya nna, Nye a lam hpe shadik ya ai. ³³ Shi gaw nye a lagaw hpe shan lagaw zawn shatai nna, Nye a tsaw ai shara de ngai hpe mara da ni ai. ³⁴ Shi nye lata hpe hpyen amu sharin ya nna, Nye a lahpum magri ndan shachyen lu li ai. ³⁵ Na a hkye la ai n-gang nang ngai hpe jaw nit dai; Na a hkra lata ngai hpe shadaw ya nna, Na a myit nem ai hku hta, ngai kaba wa nngai. ³⁶ Ngai tsap shara nang nye a npu e dam lada di ya nna, Nye a hkarutum n kayaw nga li ai. ³⁷ Ngai gumlau ni hpe hkan shachyut nna, dep na mawe ai; Shanhte garai n hten mat mat, ngai bai nhtang wa na nngai n rai. ³⁸ Shanhte n rawt lu hkra ngai shanhte hpe adup kau nna, Nye a lagaw npu e shanhte kataw nga ma ai. ³⁹ Nang ngai hpe majan gun na n-gun hte shingkyit kyit ya nna, Ngai hte nhtan shai ai ni, nye a npu e kadawng taw nga ma ai. ⁴⁰ Ngai hpe gumlau ai ni a shingdu de nang ngai hpe madun ya nna, Ngai e ndawng ai ni hpe ngai tsai tsai jahten kau mawe ai. ⁴¹ Shanhte hpyi jahtau ai mung, hkye la ai wa n nga ai, Yehowa hpe shaga timung, shi shanhte hpe n htan ya mu ai. ⁴² Shaloi nbung e kamawng ai nhpu hpe zawn, ngai shanhte hpe a mani n’di kau nna, Lam na hkumpup hpe zawn shanhte hpe ru kau mawe ai. ⁴³ Dai amyu a ru hka hta na, nang ngai hpe shalawt la nna, Masha amyu ni a bawmung tai u ga, nang ngai hpe tawn da ni ai. Ngai n chye ai amyu gaw, nye a amu galaw nga ai. ⁴⁴ Nye a lam na yang, shanhte madat nga nna, Tsasam ni a kasha ni nye a man e nem na ma ai. ⁴⁵ Tsasam ni a kasha ni nyip mat ma ai rai nna, Shanhte a hpyendap na gari let pru wa ma ai. ⁴⁶ Yehowa ahkrung nga ai; nye a lunghkrung, a nga u ga law. Nye a hkyehkrang la ai Madu Karai Kasang, galu kaba nga u ga law. ⁴⁷ Ngai hpang maga e bai tai lu ai lam waw ya nna, Nye a npu e masha amyu ni hpe tawn da ai Karai Wa gaw, a nga u ga law. ⁴⁸ Ngai hpe gumlau ai ni hta na, shi ngai hpe hkye la nngai; Gaja wa, je hpre ai ni a ntsa e nang ngai hpe sharawt nngai: N shawp ai ni hta na mung, nang ngai hpe mawai la ni ai. ⁴⁹ Dai majaw Yehohwa e, masha amyu ni hta ngai nang hpe shakawn na nngai. Na a amying nsang hpe mahkawn mangoi na nngai. ⁵⁰ Shi gaw shi a hkawhkam wa hpe hkyehkrang la ai lam kabu shangun nna, Shi Namman chya ai Wa, ngu ai, Dawi hte shi a aru arat hpe, Htani htana chyeju a madun dan nga mu ai law.

¹ Sumsing lamu gaw Karai Wa a hpung shingkang gawn dan nna, Lamu madin gaw, shi a lata amu madun ya nga ai. ² Lani hte lani aga sumtu a ngoi pra nga nna, Lana hte lana chye chyang ai hku pya dan nga ai. ³ Hpa tsun ai lam hta mung, hpa ga ga ai hta mung, Dai hte a nsen n na yu ai, n nga ga ai. ⁴ Mung shagu hta dai hte a ngoi ai gaw, Mungkan ting hta dai hte a mungga, pri rai sai: Shi gaw dai hte hta jan a matu sum lajang da nu ai. ⁵ Ajan gaw hkungran ai gawk na pru ai la nnan hte, Gat shingjawng na wa-ngan zawn gumlawt pru wa ai. ⁶ Lamu maga mi de nna shi pru wa nhtawm, Bai maga mi de htum hkra kayin hkawm dep wu ai: Hpa mung shi a kang kahtet ai hta na lawt lu ai n rai. ⁷ Yehowa a tara ra n rawng ai rai nna, myit masin hpe shalan shabran ya ai. Yehowa a sakse tengman nga ai rai nna, myit n su ai ni hpe hpaji jaw mu ai. ⁸ Yehowa a jep ai tara dingman nga ai rai nna, myit masin hpe kabu shangun ya nga ai. Yehowa htet da ai ga asan apra rai nga nna, shinggan myi sha hpe jahtoi ya nga ai. ⁹ Yehowa hpe hkrit hkungga ai lam chyoi pra nga ai rai nna, htani htana anga nga ai. Yehowa a tara dara ai ga teng nga ai rai nna, ahkum ara dinghpring nga lu ai. ¹⁰ Dai hte gaw aja hte jet htum ai aja hta grau mai ra nna, Lagat jahku hte gitbaw hta n-ga, grau dwi nga ma ai. ¹¹ Na a mayam wa mung, de a majaw myit dum myit hprang nga nna, Dai hte hpe hkan nang ai majaw, akyu kaba lu la nga ai. ¹² N chye nna shut ai lam hpe kadai dum lu a ta? N dan ai yubak hta na mung, ngai hpe jasan la e. ¹³ Dingsa galaw ai yubak mung ngai hpe n up u ga, Dai hta na, na a mayam wa hpe shabai la u: Shaloi ngai myit tsup nga nna, mara kaba hte mung lawt na ring ngai. ¹⁴ Nye a lunghkrung hte ngai hpe hkyehkrang la ai wa, Yehowa e, Nye a n-gup ga hte, nye a myit hta sumru yu ai lam gaw, Na a man e sharawng awng nga u ga law.

¹ Yehowa gaw ru tsang hkrum ai nhtoi hta nang hpe htan ya u ga, Yaku a Karai Kasang a mying gaw, nang hpe shatsaw ya u ga. ² Shi gaw chyoi pra Nta hta na nang hpe karum na shangun dat nna, Ziun bum nna nang hpe shadaw ya u ga. ³ Na a lusha hkungga nlang hte hpe dum ya nga nna, Na a wan nat ai hkungga hpe hkap la u ga. [Selah.] ⁴ Na a myit hta rawng ai hte maren shi jaw nna, Nang hpaji daw ai lam nlang hte hpe shabyin ya u ga. ⁵ Na a hkye la ai lam hta anhte awlaw nga na rai nna, Anhte Karai Kasang a mying nsang hte, Dawnghkawn hpe sharawt na ra ga ai: Nang hpyi ai hku nlang hte hpe shi shadik ya u ga. ⁶ Yehohwa shi a namman chya ya ai wa hpe hkye la nga ai gaw, ya ngai chye nngai. Shi a hkra lata hte galaw ai nsam amu hte, Chyoi pra ai lamu de na shi hpe htan ya wu ai. ⁷ Nkau mi gaw leng hta, nkau mi gaw gumra hta gumrawng nga ma ai; Anhte chyawm gaw, anhte a Karai Kasang a amying nsang hpe dum nga ga ai. ⁸ Shanhte kataw nna kadawng mat masai, Anhte chyawm gaw rawt nna ngang ngang tsap nga ga ai. ⁹ Yehowa e, hkawhkam wa hpe hkye la u: Anhte shaga ai nhtoi hta e, shi anhte hpe htan ya u ga law.

¹ Yehowa e, hkawhkam wa gaw na a n-gun hte kabu nga nna, Na a hkyehkrang la ai lam hta gade wa kabu gara nga a hka! ² Shi myit ra ai hku nang shi hpe jaw nit dai rai nna, Shi a n-gup hte hpyi ai lam ndang kau ndai n rai. [Selah.] ³ Nang shi hpe kaja ai wunli hte tau la nna, Shi a baw hta jet ai ja jaumau gup ya nu ai. ⁴ Shi nang kaw na asak galu hpyi nna, Nang shi hpe htani htana nhtoi jaw da nu ai. ⁵ Na a hkye la ai lam majaw, shi hpung kaba rawng nga nna, Hpung shingkang hte arawng sadang nang shi hpe jaw da nu ai. ⁶ Tut tut na akyu lu la hkra nang shi hpe san da nna, Na a myiman a kabu gara ai hta shi hpe sha-awng nu ai. ⁷ Hkawhkam wa gaw Yehowa hta maju jung nga nna, Tsaw htum ai Wa a chyeju hte shamu shamawt lu na n rai. ⁸ Na a lata gaw, nang hpe gumlau ai ni nlang hte hpe dep lu nna, Nang hpe ndawng ai ni hpe na a hkra lata dep na mu ai. ⁹ Na a myiman madun dan ai ahkying hta e, Nang shanhte hpe wanhtung zawn shatai na maru ai; Yehowa gaw shi a masin pawt ai hte shanhte hpe mayu kau nna, Wan mung shanhte hpe hkru kau na maru ai. ¹⁰ Dinghta ga na, shanhte a arung arai, Shinggyim masha ni hta na, shanhte a aru arat hpe, nang shamyit kau na maru ai. ¹¹ Kaning rai nme law, shanhte gaw na a lam n hkru ai hku maw nna, N shawp ai hku hapji daw timung, hpa mung n tai malu ai. ¹² Nang gaw na a ndan pala hte shanhte a myiman hpe shading ya nna, Shanhte a shingma hpe kayin ya na maru ai. ¹³ Yehowa e, na a atsam hte rawt u; Shaloi anhte gaw mahkawn mangoi let Na a daru magam hpe, shakawn kungdawn na ga ai.

¹ Nye a Karai Wa e, nye a Karai Wa e, nang hpa rai ngai hpe kau da nga n ta? Ngai hpyi jahtau ai ga gaw, ngai hpe karum na wa hte tsan nga ai. ² Nye a Karai Kasang e, shani e ngai jahtau nga timung, nang n htan ya ndai. Shana e jahtau nga timung, ban sa ai n hkrum nngai. ³ Nang chyawm gaw chyoi pra nga ndai rai nna, Israela a shakawn ai ga hta adung nga ndai. ⁴ Anhte a ji woi ni nang hpe kamsham nga ma ai; Shanhte kamsham nna, nang shanhte hpe mawai la mu ai. ⁵ Shanhte nang hpe shaga nna, lawt wa lu ma ai. Nang hpe kamsham nna, kaya kahpa n hkrum ma ai. ⁶ Ngai chyawm gaw, masha n rai, shingtai rai nga nngai: Masha shatan shara, amyu masha ni a matsat shabat ngai rai nga nngai. ⁷ Ngai hpe mu ai ni nlang ngai hpe asawng kau nna, N-gup nhkyeng let baw kanga nga ma ai. ⁸ Shanhte gaw “Yehowa hpe hpa u, shi gaw shi hpe hkye la u ga, Shi hta awng nga ai majaw, shi hpe mawai la u ga” nga ma ai. ⁹ Raitimung, ngai hpe hkritung nna shaw la ai wa, nang rai nga ndai, Nye nu a chyu hta nang ngai hpe kamsham shangun nga ndai. ¹⁰ Hkritung nna nang hta ngai mashum nga nngai, Nu a kan nna, nye a Karai Wa nang rai nga ndai. ¹¹ Ru tsang ai gaw ni wa magang ra ai rai nna, Karum ai wa n nga ai majaw, Ngai hte tsan tsan hkum nga et. ¹² Usu law law ngai hpe jawm da mi ai, Bashan a gwila ni ngai hpe kawan da mi ai. ¹³ Amya maw nna shabam ai hkanghkyi zawn, Shanhte ngai hpe n-gup mahka nga ma ai. ¹⁴ Ntsin zawn ru kau ai ngai hkrum nga nngai. Nye a nra hkrihkraw mahkra kashai mat sai: Nye a myit gitbaw zawn rai nga ai rai nna, Dai gaw nye a kraw e byaw mat nga ai. ¹⁵ Nye a n-gun di chyen zawn hkraw mat nga ai, Nye a shinglet nye a gumra hta kap mat sai: Si ai nhpu hta nang ngai hpe tawn da nit dai. ¹⁶ Kaning rai nme law, gwi ni ngai hpe jawm nna, N hkru ai shawa hpung ngai hpe grup ma ni ai: Nye a lagaw lata hpe mung jahpye ya ma ni ai. ¹⁷ Nye a nra yawng ngai hti lu nngai; Shanhte ngai hpe mada nna azi yu nga ma ai. ¹⁸ Nye a nba shanhte karan la mu ai rai nna, Nye a kata palawng hpe hpaida da ma ai. ¹⁹ Nang mahtang Yehowa e, hkum tsan nga et, nye a N-gun e, ngai hpe karum na lawan rit. ²⁰ Nye a myit masin hpe, nhtu kaw na, Nye a asak shingtai hpe, gwi a lata na hkrang la u. ²¹ Hkanghkyi a n-gup na ngai hpe hkye la ya e, Rai sa, hpawlam a nrung kaw nna pyi, nang ngai hpe htan ya nit dai, ²² Na a amying hpunau ni hpe ngai shana ya na nngai. Hpawng shingra ka-ang e, nang hpe shakawn na nngai. ²³ Yehohwa hpe hkrit hkungga ai ni e, shi hpe shakawn kungdawn mu, Yaku a aru arat nlang hte e, shi hpe shagrau sha-a mu: Israela kashu kasha nlang hte e, shi a man e agam nga mu. ²⁴ Kaning rai nme law, ru tsang ai wa a ru tsang ai hpe, Shi n gawn n sawn di nna matsat kau ya wu ai, n rai: Shi kaw na shi a myiman hpe makoi kau wu ai, n rai. Shi hpe hpyi jahtau yang, shi madat mara ya wu ai. ²⁵ Shawa hpawng kaba e, ngai shakawn ai ga gaw, nang kaw na pru nga ai. Nang hpe hkrit hkungga ai ni a man e, ngai dagam ai ga ngai shadik na nngai. ²⁶ Matsan mayan ni hkru kat hkra lusha lu na mara ai, Yehowa hpe hkan tam ai ni, shi hpe shakawn na mara ai; Nanhte a myit masin tutnawng e ahkrung nga malit ga. ²⁷ Ga ting na yawng mayawng hte gaw Yehowa hpe dum nna, shi hpang de kayin na mara ai. Masha amyu baw nlang hte gaw, na a man e nawku na mara ai. ²⁸ Dai mungdan gaw Yehowa a mungdan rai nga ai; Masha amyu baw shagu ni hpe shi Madu nga mu ai. ²⁹ Ga ntsa na lu su ai ni nlang hte gaw, lusha nna nawku na mara ai; Nhpu hta shang nna tinang a asak hpe n bau lu ai ni nlang hte mung, shi a man e, dingnyawm na mara ai. ³⁰ Shanhte a kashu kasha ni shi hpe dawjau na mara ai: Htawm prat du hkra, dai Madu a lam shanhte shana ya na maru ai. ³¹ Shanhte pru nna garai n shangai ai amyu hpe shi a dinghpring ai lam hte, “Dai shi galaw nu ai,” nga nna hkai dan na maru ai.

¹ Yehowa ngai sagu hpe rem ai wa rai nga ai; Ngai hpa mung n ra nngai. ² Tsit lali ai udat shara e shi ngai hpe hpum shangun nna, Ngwi ai hka kau de woi sa wa nngai. ³ Nye a myit masin hpe shi shalan shabran ya nna, Shi amying nsang a matu mara, Dingman ai lam hta ngai hpe lakawn wa nngai. ⁴ Si ai hkaraw a shingnip hta e ngai hkawm sa wa timung, Nang ngai hte rau nga nga ai majaw, Ngai aru ara hpe n hkrit nngai: Na a sumdoi hte na a dawhkrawng gaw, ngai hpe shapyaw ya nga ai. ⁵ Nye gumlau ni a man e, nye a matu sha ku nang lajang da ya nga ndai; Nye a baw hpe namman hte nang chya ya ndai, Nye a gawm a kabrat nga li ai. ⁶ Gaja wa, ngai ahkrung nga ai nhtoi nlang hte hta, Kaja ai hte chyeju ngai kaw hkan nang nna, Yehowa a nta hta ngai prat dingnawng, anga nga lu na ring ngai law.

¹ Lamu ga hte de a yawng mayawng hta, Mungkan ga hte dai hta shanu nga ai ni nlang hte hpe, Yehowa madu nga ai. ² Shi dai hpe nammukdara ntsa e gaw da nna, Hka lam ni a ntsa e tawn da wu ai. ³ Yehowa a bum de kadai lung lu na rai nga a ta? Shi a chyoi pra ai shara e kadai tsap nga lu na rai nga a ta? ⁴ Sanseng ai lata hte chyoi pra ai myit rawng nna, Tinang myit masin kaman lila hpe n nawn n sawn ai hte Hkalem ai hku n dagam ai wa, rai lu ai. ⁵ Dai wa gaw Yehowa kaw na shaman ai hte, Shi hpe hkyehkrang la ai Karai Kasang kaw na dinghpring ai, lu la na ru ai. ⁶ Ndai amyu shi hpe tam ai amyu rai nga ai: Na a myiman hpe hkan tam ai ni Yaku rai nga ai. [Selah.] ⁷ Hpung shingkang rawng ai Hkawhkam wa shang lu u ga, Mare chyinghka ni e, tinang a baw hpe sharawt mu; Prat dingsa na chyinghka ni e, tinang a hkum sharawt mu. ⁸ Hpung shingkang rawng ai, ndai Hkawhkam wa gaw, kadai wa rai nga a ta? N-gun chyalai rawng ai, share kaba ngu ai Yehowa, Majan hta share kaba tai ai Yehowa rai nga ai. ⁹ Hpung shingkang rawng ai Hkawhkam wa shang lu u ga, Mare chyinghka ni e, tinang a baw hpe sharawt mu; Prat dingsa na chyinghka ni e, tinang a hkum sharawt mu. ¹⁰ Hpung shingkang rawng ai, ndai Hkawhkam wa chyawm gaw, kadai wa rai nga a ta? Zaw nawng zaw wa up ai Yehowa Shi gaw hpung shingkang rawng ai Hkawhkam wa rai nga ai law.

¹ Yehowa e, nye a myit masin hpe ngai nang kaw sharawt nga nngai. ² Nye a Karai Kasang e, nang hta ngai shingbyi nga nngai; Ngai kaya kahpa hkrum na nngai n rai: Nye a gumlau ni ngai hpe dang lu na mi ai, n rai. ³ Rai sa, nang hpe myit mada ai ni nlang, kaya kahpa n hkrum lu ma ai. Myit magaw ai ni mahtang, kaya kahpa hkrum na mara ai. ⁴ Yehowa e, na a lam ngai hpe madun ya e, Na a lai ngai hpe sharin ya e. ⁵ Ngai hpe hkyehkrang la ai Karai Kasang nang rai nga ndai majaw, Na a sadi sahka ai hta ngai hpe woi wa nna sharin ya e; Shani tup ngai nang hpe myit a mada nga nngai. ⁶ Yehowa e, na a n-gaw nwai ai hte na a chyeju hpe dum u. Dai hte gaw moi chyaloi nhkoi kaw nna rai nga ai. ⁷ Prat ram nga yang galaw ai yubak hte, Nye a shut hpyit ai hpe hkum matsing da ya et. Yehowa e, na a kaja htum ai myit majaw, Na a chyeju hte maren ngai hpe dum e. ⁸ Yehowa gaw mai kaja ai hte dingman ai wa rai nga ai: Dai majaw, shi gaw dai lam hta, yubak kap ai ni hpe sharin ya mu ai. ⁹ Myit gyip ai ni hpe tara lam de shi lau la nna, Myit gyip ai ni hpe shi a lam sharin ya mu ai. ¹⁰ Yehowa a ga shaka hte sakse ga hkam ai ni a matu, Shi a lam nlang hte gaw chyeju hte sadi sahka rai nga ai. ¹¹ Yehowa e, na amying majaw, nye a yubak hpe dat kau ya e: Kaning rai nme law, dai gaw kaba nga li ai. ¹² Yehowa hpe hkrit hkungga ai wa kadai rai nga a ta? Dai wa gaw gara hku mai hkan na, shi hpe madun ya na ru ai. ¹³ Shi a myit masin ngamu ngamai ai hta nga lu nna, shi a kashu kasha ni mung, dai mungdan hpe madu lu na maru ai. ¹⁴ Yehowa hpe hkrit kamyin ai ni, shi a sung ai lam chye nga nna, shi shanhte hpe shi a ga shaka chye lu shangun mu ai. ¹⁵ Nye a myi Yehowa hpe tut tut a yu nga ai rai nna, Shi nye a lagaw hpe sumgawn hta na shaw la ya nngai. ¹⁶ Ngai myit karen nna, nni nkri hkrum nga nngai majaw, Ngai hpang de kayin nna, matsan dum la e. ¹⁷ Nye a myit ru tsang ai gaw, kaba wa nga ai, Nye a tsin-yam tsindam hta na ngai hpe shaw la e. ¹⁸ Nye a nni nkri hte ruyak ai hpe yu u: Nye a yubak nlang hte hpe dat kau ya e. ¹⁹ Nye a gumlau ni hpe yu u; shanhte law nga ma ai: N-yun bu let shanhte ngai hpe ndawng n yawt nga ma ai. ²⁰ Nye a myit masin hpe bau sin ya nna, Ngai hpe hkyehkrang la e; Nang hta ngai shingbyi nga nngai majaw, Ngai kaya kahpa n hkrum n ga. ²¹ Nang hpe ngai myit mada nga nngai majaw, Myit san ai hte dingman ai gaw, ngai hpe sin nga mi ga. ²² Karai Kasang e, Israela hpe tinang a ru tsang ai mahkra nta na, hkyehkrang la u law.

¹ Yehowa e, nye a myit san pra ai hte ngai hkawm nga nna, Myit n kashai let, Yehowa hpe shamyet shanat nga nngai majaw, Ngai hpe tara dara ya e. ² Yehowa e, ngai hpe dinglik yu nna chyam yu e, Nye a nhkyun ni hte masin salum hpe manaw yu u. ³ Na a chyeju nye a myiman e anga nga nna, Na a sadi sahka hta ngai a hkawm nga nngai. ⁴ Matu nhpang n hten ai ni hte rau ngai n dung nngai, Hpyi hpun ai ni kaw, ngai n shang nngai. ⁵ N hkru ai ni a hpawng hpe ngai ndawng nngai, Tara n lang ai ni hte rau, ngai n dung nga nngai. ⁶ Ngai nye a lata hpe dingman ai hte shin nga nngai: Yehowa e, shakawn ai nsen hte lawm lu nna, ⁷ Na a mauhpa amu nlang hte hpe gawn dan lu hkra, Na a hkungri grupyin e, ngai nga mayu nga nngai. ⁸ Yehowa e, na a nta a htingra hte, Na a hpung shingkang danhkung ai shara hpe, ngai tsawra nngai. ⁹ Yubak kap ai ni hte rau, nye a myit masin hpe, Asai kap ai ni hte rau, nye a asak hpe, hkum rawng da ya e. ¹⁰ Shanhte a lata hta n hkru n hkra ai rawng nga nna, Hkra lata gaw sake manawn hte hpring nga malu ai. ¹¹ Ngai chyawm gaw, nye a myit san myit pra ai hte hkawm nga nngai: Ngai hpe hkyehkrang la e, ngai hpe matsan dum la e law. ¹² Nye a lagaw dam lada ai shara hta e tsap nga ai: Shawa hpawng ni hta e, ngai Yehowa hpe shagrau sha-a na nngai.

¹ Yehowa gaw nye a nhtoi hte hkyehkrang la ai lam rai nga ai, Kadai wa hpe ngai hkrit nga n ta? Yehowa gaw nye a asak shingbyi shara rai nga ai, Ngai kadai wa hpe hkrit kajawng na rai nga a ta? ² Nye a hkumshan sha na, n hkru ai ni sa wa nna, Ngai hpe zingri ai ni hte gumlau ni, ni wa ma jang, Shanhte ahtu kataw nna hkrat mat ma ai. ³ Luksuk ni nye a man e dap jung nga ma timung, Nye a myit hpa n hkrit li ai; Majan pru wa nga timung, Dai hta she nye a myit grin nga na ra ai. ⁴ Lam langai mi ngai Yehowa hpe hpyi se ai: Ngai ahkrung nga ai nhtoi hte ting, Yehowa a nta hta nga nga lu nna, Yehowa a tsawm pra ai mu lu na hte, Shi a Htingnu e myit htang nga na, ngai ra nga nngai. ⁵ Shi gaw ruyak ai nhtoi hta shi a npan e ngai hpe makoi da ni ai; Shi sum a shingbyi shara hta ngai hpe magap da nngai: Lunghkrung ntsa e, shi ngai hpe shadun da ni ai. ⁶ Ya shi gaw, grupyin e nga ai, ngai hpe gumlau ai ni a ntsa e, Nye a baw hpe, sharawt ya ni ai. Shi a sum hta pahtau dum let ngai hkungga jaw na nngai. Ngai Yehowa hpe mahkawn mangoi nna, tingse dum na nngai. ⁷ Yehowa e, ngai jahtau yang, madat mara ya e, Ngai hpe matsan dum nna htan ya e. ⁸ “Nye a myiman hpe tam mu,” nga nna, nye a myit masin hpe tsun ndai majaw, Yehowa e, na a myiman hpe ngai tam nga nngai. ⁹ Na a myiman ngai kaw na hkum makoi kau u; Masin pawt ai hte na a mayam wa hpe hkum kau da et: Ngai hpe karum ai wa nang rai nga nit dai; Ngai hpe hkyehkrang la ai Karai Kasang e, Ngai hpe hkum gangkau et, ngai hpe hkum jahti da et. ¹⁰ Nye nu wa ni ngai hpe jahka kau raitimung, Yehowa ngai hpe pawn la na nngai. ¹¹ Yehowa e, na a lam ngai hpe madun ya e, Ngai hpe gyam yu ai ni a majaw, malang ai hku hta ngai hpe woi wa e. ¹² Kashun kashe maw ai ni hte, N teng n man ai sakse ni nye a man e rawt nga ma ai majaw, Gumlau ni ra ai lam hta ngai hpe hkum ap kau da et. ¹³ Hkrung nga ai ni a shara hta e, Yehowa a kaja htum ai hpe ngai naw mu lu na nngai, ngai n kam taw gaw, myit htum ni ai. ¹⁴ Yehowa hpe myit mada nga u; Dakan nga nna, na a myit dakring nga u: Rai sa, Yehowa hpe myit mada nga u ga law.

¹ Yehowa e, nang hpe ngai jahtau nga nngai; Nye a lunghkrung e, na lahpang ai wa zawn hkum tai et: Nang atsin sha nga n yang gaw, nsung hku hta shang ai ni zawn, Ngai mung rai na rai nga nngai. ² Na a chyoi pra ai gawk de nye a lata ladawn let, Nang hpe hpyi jahtau ai shaloi jang, Nye a akyu hpyi ai nsen madat mara ya e. ³ Tinang a htingbu wa hte, mung pyaw ga jahta nna, Tinang a myit hta n hkru ai lam maw ai, N shawp ai amu galaw ai ni hte, tara n lang ai ni hte rau, Ngai hpe hkum dun gangkau et. ⁴ Shanhte a amu hte n hkru ai lam hte maren shanhte hpe bai tai u; Shanhte a lata galaw ai hte maren, shanhte hpe bai jaw u; Shanhte a amu shanhte hpang de nhtang dat u. ⁵ Kaning rai nme law, shanhte gaw Yehowa a bungli hte, Shi a lata galaw ai amu hpe, hpa n nawn nga ma ai. Shi shanhte hpe run kau na mu ai, shagrin da na mu ai, n rai. ⁶ Yehowa gaw ngai akyu hpyi ai nsen madat mara ya ai majaw, a nga u ga law. ⁷ Yehowa gaw nye a n-gun hte n-gang rai nga ai, Shi hta nye a myit shingbyi nga nna ngai karum ai hkrum ni ai. Dai majaw nye a myit awng nga nna, Mahkawn mangoi let ngai shi hpe chyeju jaw na nngai. ⁸ Yehowa gaw shanhte a matu n-gun rai nga ai, Shi a Namman chya ai wa a matu, makawp maga ai bunghku, shi rai nga ai. ⁹ Na a amyu hpe hkyehkrang lu u, Na a sali wunli hpe shaman ya e; Tutnawng e shanhte hpe woi rem nna pawn la mu law.

¹ Karai Wa a kasha ni e, Yehowa hpe daw mu, Hpung shingkang hte daru magam, Yehowa hpe jaw mu. ² Yehowa a mying nsang hpe hpung shingkang jaw mu, Chyoi pra ai hte mawn sumli nna Yehowa hpe naw mu. ³ Yehowa a nsen nammukdara ntsa e nga nga nga ai, Hpung shingkang danhkung ai Karai Wa gaw ngoi wu nga ai: Yehowa gaw hka kaba ni a ntsa e anga nga ai. ⁴ Yehowa a nsen, nsen kaba rai lu ai, Yehowa a nsen, hpung kaba rawng nga ai. ⁵ Yehowa a nsen arit hpun ni hpe daw kau lu ai, Rai sa, Yehowa gaw Lebanon arit maling hpe agrawp kau wu ai. ⁶ shi dai ni hpe dumsu kasha zawn gumtawng shangun mu ai; Lebanon hte Sirion yan hpawlam kasha zawn di mu ai. ⁷ Yehowa a nsen wan nli shabra dat mu ai. ⁸ Yehowa a nsen dai nam mali hpe ashun wu ai; Yehowa Kadesha nam mali hpe awam wu ai. ⁹ Yehowa a nsen tsu yi ni hpe kasha jahkai mu ai rai nna, Maling ni hpe ashin ashan di kau mu ai. Shi a Htingnu na arai yawng, “Hpung shingkang nga ai,” nga nna garu ma ai. ¹⁰ Yehowa gaw Sha-u sha-ing ai ntsa e, dung nga sai; Yehowa gaw htani htana Hkawhkam adung nga ai. ¹¹ Yehowa shi a amyu hpe n-gun shaja na ru ai; Yehowa shi a amyu hpe ngwi pyaw ai hte shaman ya na ru ai law.

¹ Yehowa e, ngai nang hpe shagrau na nngai: Nang ngai hpe shaw la nit dai rai nna, gumlau ni awng wa na ahkang n jaw ndai. ² Nye a Karai Wa Yehowa e, ngai nang hpe jahtau nna, Nang ngai hpe shamai ya nit dai. ³ Yehowa e, Katsan ga na nye a myit masin hpe nang shaw la nna, Nsung hku de n shang u ga, ngai hpe shabran nit dai. ⁴ Yehowa a chyoi pra ai ni e, shi hpe shakawn mu, Shi a chyoi pra ai masat dingsat hpe mahkawn mangoi mu. ⁵ Kaning rai nme law, shi hkring mi sha masin pawt nga ai, Shi a n-gaw nnyeng chyawm gaw, prat tup agrin nga ai; Shana e hkrapngu hkrapngoi gaw shang nga timung, Jahpawt e mahkawn mangoi shara rai nga ai. ⁶ “Ngai galoi mung shamu shamawt hkrum na nngai n rai,” Nga nna, ngamai ai shaloi e ngai tsun nga nngai. ⁷ Yehowa e, nang gaw na a n-gaw nnyeng hte nye a bum hpe shangang da nu ai; Na a myiman hpe makoi kau yang, ngai mak mak rai nga nngai. ⁸ Ngai gaw: “Dai nsung hku de ngai shang yang, Nye a asai hpa akyu nga lu na a ta? Ga nhpu nang hpe shakawn lu na a kun? Na a sadi sahka hpe shana ya lu na a kun?” ⁹ Ngu nna Yehowa hpe ngai shaga nna, Nye a Madu hpe akyu hpyi nga nngai. ¹⁰ Yehowa e, madat mara ya nna, ngai hpe matsan dum la e, Yehowa e, ngai hpe karum ai wa tai nga u. ¹¹ Nye a yawnhkyen ai hpe ka gumlawt ai hte nang galai ya ndai; Nye a lachyit nba hpe nang raw kau ya nna, Kabu gara ai hte ngai hpe shingkyit kyit ya ndai. ¹² Dai majaw galoi mung n sim n sa hkra, Nye a arawng nang hpe mahkawn mangoi na ra ai; Nye a Karai Kasang Yehowa e, Ngai nang hpe htani htana e shakawn kungdawn na nngai.

¹ Yehowa e, nang hta ngai shingbyi nga nngai; Ngai galoi mung kaya kahpa n hkrum n ga: Na a dinghpring ai hte ngai hpe mawai la e. ² Na a na ngai hpang de kayin dat u. Alawan ngai hpe hkyehkrang la e: Nye a matu grin ai lunghkrung tai nga u, Ngai hpe makawp maga na wahpang nta tai nga u. ³ Nye a lungpu hte wahpang nang rai nga ndai rai nna, Na a amying majaw ngai hpe woi wa nna, lakawn la e. ⁴ Nye a makam masham nang rai nga ndai majaw, Shanhte nye a matu hkam ai mahkam na, Ngai hpe gare shaw la e. ⁵ Na a lata hta nye a wenyi hpe ngai ap ya de ai; Tengman ai Karai Wa Yehowa e, Nang ngai hpe hkrang la nit dai. ⁶ Kaman lila hkan nang ai ni hpe ngai ndawng nngai: Ngai Yehowa hpe shamyet shanat nga nngai. ⁷ Nye a nni nkri hpe nang mu nga nna, Nye myit masin a ru tsang ai hpe chye nga ndai; majaw, Na a chyeju hta ngai kabu nna shakawn nga na nngai. ⁸ Gumlau ni a lata hta nang ngai hpe ap kau ndai n rai, Dam lada ai shara e, nang nye a lagaw hpe shatsap ya ndai. ⁹ Yehowa e, nye a matu ru tsang nga ai majaw, Ngai hpe matsan dum la e; Nye a myi, nye a myit masin hte hkum hkrang gaw, Sharung shayawt ai hte gyip mat masai. ¹⁰ Nye a asak ruyak ai hte htum mat sai, Shaning shanang madai ai hte lai mat wa nngai: Nye a mara majaw nye a n-gun yawm mat nna, Nye hkum a nrut nra ni tsam mat masai. ¹¹ Gumlau ni law ma ai majaw, ngai shatan shara tai nga nna, Htingbu ni a matu myit ba shara rai nga nngai; Ngai hpe chye chyap ai ni a hkrit shara ngai tai nga nna, Shinggan e ngai hpe mu ai ni koi hprawng ma ai. ¹² Si mat ai masha hpe zawn ngai malap kau ai hkrum nngai, dibu chyaga zawn ngai tai nga nngai. ¹³ Masha ni tsun shatan ai ga ngai na lu nna, Grupyin e hkrit shara hkrai rai nga ai: Shanhte nye a lam jawm bawng ma yang, Nye a asak la kau na hpaji daw ma ai. ¹⁴ Ngai chyawm gaw, nang hta shamyet nga nngai, Yehowa e; “Nang gaw nye a Karai Kasang rai nga ndai,” ngai nga nga nngai. ¹⁵ Nye a aten aprat na a lata hta rai nga li ai: Gumlau ni hte hkan shachyut ai ni a lata na ngai hpe mawai la e. ¹⁶ Na a myiman gaw, na mayam a ntsa e, htoi nga u ga: Na a chyeju hte ngai hpe hkyehkrang la e. ¹⁷ Yehowa e, ngai nang hpe shaga nga nngai majaw, Kaya kahpa ngai n hkrum na nngai. Tara n lang ai ni chyawm gaw, kaya kahpa hkrum nna, Katsan ga e atsin sha nga na mara ai. ¹⁸ gumrawng nna shatan nhkan ai ga hte Dinghpring ai ni hpe, n gawn n sawn hku masu ai nten gaw, ma-a mat malu ga. ¹⁹ Masha kasha ni a man e, nang hta shingbyi ai ni a matu nang galaw dan nna, Nang hpe hkrit kamyin ai ni a matu nang kyem da ai chyeju gaw, gade wa kaba nga a hka! ²⁰ Nang shanhte hpe masha a gasat gala kaw nna, na a myiman a makoi shara hta e, makoi da nna, Masha a ru hka na, na a sum hta e, ka-up da na mu ai. ²¹ Yehowa gaw, a nga u ga law! ngang ai mare hta, Mauhpa sumnung ai myit, shi ngai hpe madun dan ni ai. ²² Ngai chyawm gaw, “Na a man e ngai n shang lu nngai,” Nga nna, myit kaji let tsun nga nngai; Raitimung, nang hpe hpyi jahtau yang, Ngai akyu hpyi ai nsen nang madat ya ndai. ²³ Yehowa a chyoi pra ai ni e, shi hpe tsawra mu: Yehowa gaw sadi sahka re ai ni hpe lanu lahku nga ai: Gumrawng ai amu galaw ai wa hpe chyawm gaw, shi gaja wa ari jaw wu ai. ²⁴ Yehowa hpe ala nga ai ni nlang hte e, Dakan nga nna, nanhte a myit dakring rai nga mu law.

¹ Shut hpyit ai hta na raw dat kau ya ai hte, Yubak hpe makoi kau ya ai hkrum ai wa gaw, a nga ai. ² Yehowa e mara n shagun nna, shi a wenyi hta ra n rawng ai wa gaw, a nga ai. ³ Ngai atsin sha nga nga yang, Tut tut sharung shayawt nga nngai majaw, Nye a nrut nra ni tsam mat ma ai. ⁴ Na a lata gaw shani shana nye a ntsa e a li nga nna, Nye a salat, nlum ta hta na hkraw hkun ai hte galai mat sai. [Selah.] ⁵ Shaloi ngai gaw nye a yubak nang hpe madun dan nna, Nye a mara hpe makoi da nngai n rai: “Ngai shut hpyit ai lam Yehowa hpe ngai nem kau na,” ngai a tsun nga nna, Nang gaw nye a yubak mara hpe raw kau ya nit dai. [Selah.] ⁶ Dai re ai majaw nang hpe hkrum lu ai aten hta e, Chyoi pra ai ni nlang nang kaw hpyi mu ga; Gaja wa, hka kaba tung wa timung, Shanhte kaw du lu na n rai. ⁷ Nang gaw nye a makoi magap shara rai nga ndai, Ru tsang ai lawt u ga, nang ngai hpe sin nga ndai: Padang nlaw mahkawn ga hte nang ngai hpe kawan da ni ai. [Selah.] ⁸ Ngai nang hpe sharin ya nna, nang sa wa na lam madun ya na nngai, Nang hpe mada let hpaji daw ya na nngai. ⁹ Myit n rawng ai gumra hte lawze zawn hkum rai myit: Nang kaw ani sha n du hkraw ai majaw, Hpri makrang hte gumhtung sumri hte dai ni hpe dun la lu na rai nga ai. ¹⁰ Tara n lang ai ni a matu atsu atsam law law nga timung, Yehowa hta shamyet shanat nga ai ni hpe, chyeju hte kawan da nga mu ai. ¹¹ Dinghpring ai ni e, Yehowa hta kabu gara let shakawn mu; Myit dinghpring ai ni nlang hte e, kabu gara let kungdawn mu law.

¹ Dinghpring ai ni e, Yehowa hpe shakawn mu; Myit dinghpring ai ni a kungdawn ga sut nga ai. ² Tingse dum let Yehowa a chyeju shakawn mu, Sumri shi rawng ai duria hte shi a matu dum mu. ³ Shi a matu mahkawn ga nnan mahkawn mu, Kabu gara jahtau let pyaw pyaw dum mu. ⁴ Kaning rai nme law, Yehowa a ga dingman nga ai, Shi a amu nlang hte gaw kangka rai nga lu ai. ⁵ Dinghpring ai hte tara ding ai lam shi tsawra ai, Lamu ga ting Yehowa a chyeju hte hpring nga ai. ⁶ Yehowa a mungga hte sumsing lamu tai nga nna, Shi a n-gup na nsoi nsa hte, de a zaw nawng zaw wa byin nga ai. ⁷ Shi gaw nammukdara a hka hpe sumpum gumdin da nna, Sung htum ai shara hpe dum hta mahkawng da nu ai. ⁸ Yehowa man e, aga ting hkrit kamyin nga u ga, Mungkan e nga ai ni nlang hte gaw agam nga mu ga. ⁹ Kaning rai nme law, shiga tsun nna byin nga ai, Shi htet da nna shi a ga grin nga ai. ¹⁰ Masha amyu ni a hpaji daw ai hpe, Yehowa shanut kau ya mu ai: Amyu baw ni a myit ai hku hpe, shi hkum da mu ai. ¹¹ Yehowa hpaji daw ai lam htani htana anga nga ai. Shi myit ai hku prat mi hte prat mi agrin nga lu ai. ¹² Karai Kasang ngu ai, Yehowa hpe nawku ai amyu hte, Sali wunli matu shi lata la ai abaw gaw, a nga ai. ¹³ Yehowa gaw lamu de nna mada yu nga ai, Shinggyim masha ni nlang hte hpe a mu nga ai. ¹⁴ Shi dung nga ai shara kaw nna, Ga ntsa masha nlang hte hpe a matsing nga ai. ¹⁵ Shi gaw shanhte a myit nga manga hte hpe hpan ya nna, Shanhte a amu nlang hte hpe, aru nga ya mu ai. ¹⁶ Kadai hkawhkam mung, luksuk kaba hte lawt lu ai n rai, Gara share mung, tinang a n-gun kaba hte lawt lu ai n rai. ¹⁷ Nlaw na matu gumra lali rai nga ai. Kadai hpe mung de a n-gun kaba hte, shalawt lu na n rai. ¹⁸ Yu mu, Yehowa hpe hkrit kamyin ai ni hte, Shi a chyeju ala nga ai ni a ntsa e, ¹⁹ Shanhte a myit masin hpe si ai kaw na mawai la ya na hte, Hku hku ai nhtoi hta shanhte shabran la na nga, Shi a myi a yu nga ai. ²⁰ Anhte a myit masin Yehowa hpe a la nga ai; Shi gaw anhte hpe karum ai wa hte anhte a n-gang rai nga ai. ²¹ Shi a chyoi pra ai amying hta anhte shemyet shanat nga ga ai majaw, Anhte myit masin shi hta kabu nga ga ai. ²² Yehowa e, nang hpe a la nga ga ai hte maren, Na a chyeju anhte a ntsa e jahkrat ya mi law.

¹ Ngai Yehowa hpe prat tup sha-a nga na nngai, Shi a shakawn ga nye a n-gup hta tut e rawng nga u ga. ² Nye a myit masin Yehowa hta gumrawng na ra ai; Myit gyip ai ni, na lu nna kabu na mara ai. ³ Ngai hte rau Yehowa hpe shagrau ga; Shi a amying hpe anhte jawm sharawt gaw. ⁴ Ngai Yehowa hpe tam nna, shi ngai hpe htan ya ni ai; Hkrit gari ai nlang hte hta na, shi ngai hpe mawai la nngai. ⁵ Shanhte gaw shi hpe mada yu nna, nhtoi mu lu ma ai, Shanhte a myiman kaya kahpa n hkrum na malu ai. ⁶ Ndai matsan mayan wa shaga nga yang, Yehowa madat mara nga nna, ru tsang ai nlang hta na shi hpe hkye la wu ai. ⁷ Yehowa hpe hkrit kamyin ai ni a grupyin e, Shi a Lamu kasa dap jung nga nna, shanhte hpe mawai la mu ai. ⁸ Yehowa mai kaja nga ai gaw, chyim yu nna chye mu; Shi hta shingbyi ai wa gaw, a nga ai. ⁹ Yehowa a chyoi pra ai ni e, shi hpe hkrit hkungga mu: Shi hpe hkrit hkungga ai ni, hpa mung n ra ma ai. ¹⁰ Hkanghkyi hkalung ni lusha kadawn nna, kawsi hkrum ma timung, Yehowa hpe tam ai ni kaja ai hpa mung n ra ma ai. ¹¹ Wa marit, ma ni e, nye a ga madat mu: Yehowa hpe hkrit hkungga na lam, ngai nanhte hpe sharin ya made ga. ¹² Aprat galu na ra nga nna, kaja ai hkrum u ga. Nhtoi law law tsaw ai wa kadai mung, ¹³ Na a shinglet hpe n hkru ai kaw na jahka la u, Na a n-gup hte hkalem ai ga, hkum tsun et: ¹⁴ N hkru ai hpe koi kau nna, kaja ai galaw u, Ngwi pyaw ai hpe tam nna, hkan sa nga u. ¹⁵ Yehowa a myi gaw dinghpring ai ni hpe yu nga nna, Shanhte a jahtau ai ga hpe shi a na madat nga ai. ¹⁶ N hkru ai amu galaw ai ni a matsing shara, Ga ntsa na shaprai kau na, Yehowa a myiman da nga ai. ¹⁷ Dinghpring ai ni jahtau yang Yehowa madat nga nna, Ru tsang ai nlang hta na, shanhte hpe mawai la mu ai. ¹⁸ Yehowa gaw myit maku daw ai ni hte ani sha rai nga ai rai nna, Wenyi htum ai ni hpe hkye la mu ai. ¹⁹ Dingman ai wa gaw ru tsang law law hkrum nga timung, Yehowa shi hpe nlang hta na mawai la nu ai. ²⁰ Shi a nrut nra yawng hte hpe shi yu ya nga nna, Langai mi muk daw mat lu ai n rai. ²¹ Yubak gaw n hkru ai ni hpe sat kau na mu ai; Dingman ai wa hpe ndawng ai ni, mara kap na mara ai. ²² Yehowa gaw shi a ali ama ni a myit masin hpe hkrang la ya mu ai. Shi hta shingbyi ai ni nlang hte gaw mara n kap na mara ai.

¹ Yehowa e, ngai hpe ndang kalang hkat ai ni hte, nang ndang kalang hkat u, Ngai hpe hpyen gasat ai ni hte, hpyen gasat u. ² N-gang kaling hte n-gang galu la nna, Ngai hpe karum na, rawt u. ³ Ri mung dawn nna, Ngai hpe hkan shachyut ai ni a lam pat kau u. “Na a hkyehkrang la ai lam ngai rai nga nngai,” nga nna nye a myit masin hpe tsun u. ⁴ Nye a asak hpe tam ai ni, kaya kahpa hkrum nna myiman sum mu ga, Ngai hpe hkala kau na maw ai ni, kanut wa nna mak mat ai hkrum mu ga. ⁵ Nbung e poi mat ai mahkaw zawn, shanhte rai mu ga, Yehowa a lamu kasa mung shanhte hpe ye kau mu ga. ⁶ Shanhte a lam nsin sin nna manen nga u ga, Yehowa a Lamu kasa mung shanhte hpe hkan shachyut mu ga. ⁷ Mara n nga ai mi, shanhte nye a matu mahkam up da nna, Mara n nga ai mi, nye a asak a matu nhkun htu ma ai. ⁸ N dum shami e shi hten mat u ga; Shi up da ai mahkam hta shi dai lu u ga, Dai hta e rung rai u ga. ⁹ Shingrai nye a myit masin Yehowa hta kabu nga nna, Shi a hkyehkrang la ai lam hta sharawng awng nga na li ai. ¹⁰ Yehowa e, nang zawn kadai rai nga a hka? Nni nkri hkrum ai wa hpe, shi hta n-gun grau ja ai wa kaw na, Nni nkri hkrum ai wa hte matsan mayan wa hpe, Zingri zingrat ai wa kaw na, nang mawai la nga ndai, Nga nna nye a nrut nra nlang hte gaw tsun na mara ai. ¹¹ N hkru ai sakse ni rawt ma ai: Ngai n chye ai lam shanhte ngai hpe san ma ai. ¹² Shanhte kaja ai hpe n kaja ai hte htang ma ai. Nye a myit masin karut nga li ai. ¹³ Ngai chyawm gaw, shanhte machyi nga ma yang, lachyit nba bu hpun nna, Lusha gam ai hte myit gawng run nga nngai. Ngai akyu hpyi ai ga nye a sinda e a htu nga li ai. ¹⁴ Jinghku hte hpunau a matu zawn, ngai yawn hkawm nga nna, Kanu a majaw sharung shayawt ai wa zawn, Yawn palawng hte ngai karen hkawm nga nngai. ¹⁵ Raitimung, ngai kataw yang, shanhte kabu nna hpawng ma ai: N hkaw ai ni hte ngai n chye ai ni, nye a man e hpawng nga ma ai. Shanhte asawng asang re ai n sim ma ai. ¹⁶ Shat hpraw madoi ai ni hte rau, shanhte ngai hpe wa utik mi ai. ¹⁷ Madu e, gaten du hkra nang a yu nga na n ta? Shanhte a jahten ai hta na nye a myit masin hpe, hkanghkyi ni kaw na nye a asak shingtai hpe, shaw la ya e. ¹⁸ Shaloi shawa hpawng kaba e ngai nang hpe shakawn na nngai, Masha law law a ka-ang e nang hpe kungdawn na nngai. ¹⁹ Masu ai lam hkan nna ngai hpe gumlau ai ni, n kabu lu mu ga, Mara n nga ai mi, ngai hpe ndawng ai ni, myi kunglau n rai lu mu ga. ²⁰ Kaning rai nme law, shanhte ngwi pyaw ai ga n tsun nna, Dai mung e anu sha nga nga ai ni hpe, hkalem ai hku maw ma ai. ²¹ Shanhte ngai hpe n-gup mahka nga nna: “Da, da, anhte a myi hte mu lu sagaw ai,” nga ma ai. ²² Yehowa e, nang mu nga ndai; atdin sha hkum nga et: Madu e, ngai hte tsan tsan hkum nga et. ²³ Nye a Karai Kasang hte Madu e, ngai hpe tara dara na hte ngai hpe jeyang ya na nga, na hkum hpe jasu nna rawt u. ²⁴ Nye a Karai Wa Yehowa e, na a dinghpring ai hte ngai hpe tara dara ya e. Shanhte mung nye a lam n kabu lu mu ga. ²⁵ “Ara, anhte ra ai hku rai sai,” nga nna shanhte a kraw e n tsun lu mu ga, “Anhte shi hpe mayu kau sagaw ai, n nga lu mu ga. ²⁶ Ngai ru tsang hkrum ai majaw kabu ai ni, kaya kahpa hkrum nna mak mat mu ga; Nye a jaw e tinang hkum hpe shagrau ai ni, kaya kahpa hte myiman sum ai, dagrup nga mu ga. ²⁷ Nye a dingman ai lam tsawra ai ni chyawm gaw, Kabu jahtau nna sharawng awng nga mu ga: “Shi ali ama a ngwi pyaw na lam yaw ya ai Yehowa gaw, galu kaba nga u ga,” nga nna shanhte tut tut a tsun nga mu ga. ²⁸ Nye a shinglet, na a dinghpring ai lam hte, Nang hpe shakawn kungdawn ai lam, shani tup a tsun nga na li ai.

¹ Yubak gaw tara n lang ai wa hpe, “Nye a kraw lawang hta, Yehowa a man e, Hpa hkrit hkungga shara n nga ai,” ngu wu ai. ² Kaning rai nme law, shi shut hpyit ai gaw, masha ni n mu hkrup nna, N dawng nga ai du hkra, shi hkum hpe maw kau wu ai. ³ Shi a n-gup ga n hkru ai hte hkalem ai ga rai nga lu ai; Shi gaw hpaji byeng-ya hte kaja ai lailen kau da nu ai. ⁴ shi a yupku hta n hkru ai hku daw nga ai, N kaja ai lam hta shi a tsap nga ai: N shawp ai hpe shi matsat kau wu ai n rai. ⁵ Yehowa e, na a chyeju sumsing lamu du hkra, na a sadi sahka sumwi du hkra, dep nga ai. ⁶ Na a dinghpring ai gaw Karai Wa a bum ni zawn rai nga ai, Nang dawdan ai hku nachying sung nga lit dai; Yehowa e, masha hte yamnga hpe, nang lanu lahku nga ndai. ⁷ Karai Kasang e, na a chyeju gade wa hpu nga lit hka! Masha kasha ni, na singkaw a shingnip hta shingbyi nga ma ai. ⁸ Na a nta na sau hpum ai hte shanhte hkru kat nga ma ai, na a ngwi pyaw ai hka hta na, nang shanhte hpe shalu mu ai. ⁹ Nang hte rau asak hka hpawk rai nga ai; Na a nhtoi majaw anhte nhtoi mu lu na ga ai. ¹⁰ Nang hpe chye chyap ai ni a matu na a chyeju, Myit malang ai ni a matu na a dingman ai hpe, a madun nga u. ¹¹ Gumrawng ai lagaw ngai hpe n dep u ga, Tara n lang ai ni a lata, ngai hpe n shamawt mu ga. ¹² Shut ai hku galaw ai ni dai yang e kataw nga ma ai; shanhte kanawng kau ai hkrum nna, n rawt lu ma ai.

¹ N shawp ai ni a lam myit hkum kahtet et, n hkru ai amu galaw ai ni hpe, hkum manawn et. ² Tsingdu zawn shanhte alawan dan kau ai hkrum nna, tsit lali ai maku zawn nyip mat na mara ai. ³ Yehowa hpe shamyet shanat nga nna kaja ai amu galaw u: Dai mung hta shanu nga nna, sadi sahka hpe tam u. ⁴ Yehowa hta sharawng awng nga nna, na a myit hpyi ai hku shi nang hpe jaw na ndai. ⁵ Na a lam Yehowa hpe ap yu u: shi hpe kamsham nga u, shi shabyin ya na rin dai. ⁶ Shi gaw na a dinghpring ai hpe sawmrawm nhtoi zawn, na a dawdan ai hpe, jan pungding shingkang zawn, shapraw dan na ra ai. ⁷ Yehowa a man e amu sha nga nna shi hpe ala nga u: myit magaw ai hku maw nna, shabyin lu ai hte, n hkru ai lam hta awng nga ai wa a jaw e, myit hkum kahtet et. ⁸ Masin pawt ai kau u, n-yun hkum bu et. Myit hkum kahtet et, yubak sha pru na ra ai. ⁹ N shawp ai ni kran kau ai hkrum na mara ai; Yehowa hpe myit mada ai ni, lamu ga hpe madu lu na mara ai. ¹⁰ Gade n na yang, tara n lang ai wa nga nga lu na n rai, Shi shanu ai shara e tam yu yang, shi n nga ai. ¹¹ Myit gyip ai ni mahtang lamu ga hpe madu lu nna, Angwi apyaw hta sharawng awng na mara ai. ¹² Tara n lang ai wa, dingman ai wa hpe n kaja ai hku maw nna, shi a wa utik da nga wu ai. ¹³ Shi a nhtoi du na ra ai, dai Madu chye nga nna, shi hpe mani kau da wu ai. ¹⁴ Nni nkri hkrum ai ni hte matsan mayan ni hpe kataw mu ga, lam ding ding hkan ai ni hpe sat kau na nga, tara n lang ai ni nhtu shaw nna, ndan shachyen nga ma ai. ¹⁵ Shanhte a nhtu tinang a salum hta htinggrang wa nna, shanhte a ndan ni mung agrawp mat na malu ai. ¹⁶ Tara n lang ai ni a n taw n tsang lu ai hta, Dingman ai wa a kaji sha gaw, grau mai nga ai: ¹⁷ Tara n lang ai ni a lata hpe agrawp kau ai hkrum na ra ai, Dingman ai ni hpe chyawm gaw, Yehowa shadaw da nga mu ai. ¹⁸ Mara n rawng ai ni a nhtoi hpe Yehowa chye nga ai; shanhte a sali wunli mung htani htana anga nga ai: ¹⁹ Ruyak ai aten e shanhte kaya kahpa n hkrum nna, Hku hku ai nhtoi hta e hkru kat lu na ma ai. ²⁰ Tara n lang ai ni hten byak mat ai hkrum na mara ai; Yehowa hpe gumlau ai ni, prang na nampan zawn rai nga ma ai: Wan nhkut zawn shanhte hkoi mat na ma ai. ²¹ Tara n lang ai wa, hkoi la nna bai n wa lu ai; Dingman ai wa chyawm gaw matsan dum chye nna, jaw lu ai. ²² Shi a shaman ai lu la ai ni gaw lamu ga hpe madu lu na mara ai; Shi e dagam kau ai ni gaw, kran kau ai hkrum na mara ai. ²³ Yehowa gaw masha sa wa na hku san da nga ai rai nna, Shi a lam hta sharawng awng nga ai. ²⁴ Yehowa shi a lata hpe shadaw ya wu ai majaw, shi kataw yang, taw nan nga na n rai. ²⁵ Ngai shabrang brang nna ya dingla ni ai: Raitimung, dingman ai wa kau tawn da ai hkrum nna, Shi a kashu kasha ni muk sa hpyi ai gaw, ngai n mu yu nngai. ²⁶ Shi tut tut matsan dum chye nna hkoi ya nga ai; shi a kashu kasha ni shaman ya ai hkrum nga ma ai. ²⁷ N shawp ai hpe koi kau u, kaja ai amu galaw nna, Prat dingsa e anga nga u. ²⁸ Yehowa gaw tara ding ai hku tsawra nga nna, Shi a chyoi pra ai ni hpe kau da mu ai n rai: Shanhte prat dingsa e anga nga na ma ai. Tara n lang ai ni a aru arat chyawm gaw, kran kau ai hkrum na mara ai. ²⁹ Dinghpring ai ni gaw dai mungdan hpe madu lu nna, Dai hta e nan nawng e nga nga lu na mara ai. ³⁰ Dinghpring ai wa a n-gup gaw hpaji ga hkai dan nga nna, Shi a shinglet tara ding ai hku a tsun nga ai. ³¹ Shi a Karai Wa a tara gaw shi a kraw lawang hta e rawng nga ai; Shi a lagaw lahpan kashawt lu na n rai. ³² Tara n lang ai wa gaw dinghpring ai wa hpe gyam yu nna, Shi hpe sat kau na tam nga ai. ³³ Yehowa gaw shi a lata hta shi hpe ap kau na wu ai n rai, Tara dara ai hkrum yang, shi yubak hkrum na n rai. ³⁴ Yehowa hpe myit mada nga nna, shi a lam hpe dum u, Shaloi, dai mungdan hpe madu na, shi nang hpe shagrau na rin dai: Tara n lang ai ni hpe kran kau ai gaw, nang mu mada lu na rin dai. ³⁵ Tara n lang ai wa gaw daru magam rai lu nna, Shi a shara e tu ai hpun zawn kaba wa ai gaw, Ngai mu lu nngai raitimung: ³⁶ Marai mi lai wa yang, yu u, shi n nga ai, Ngai shi hpe tam we timung, n mu we ai. ³⁷ Mara n rawng ai wa hpe matsing u, Myit malang ai wa hpe mada yu u: Ngwi ai lam hkan ai wa a aru arat pra nga ai. ³⁸ Shut hpyit ai ni chyawm gaw, lang lata sha hten wa na mara ai; Tara n lang ai ni a aru arat, kran kau ai hkrum na mara ai. ³⁹ Dinghpring ai ni a hkyehkrang la ai lam gaw Yehowa kaw na rai nga ai, Ru tsang ai aten hta e shi shanhte a makawp maga rai nga ai. ⁴⁰ Yehowa gaw shanhte hpe karum nga nna mawai la mu ai: shi hta shingbyi nga ma ai majaw, shi shanhte hpe tara n lang ai ni kaw na, mawai la nna, hkyehkrang la mu ai.

¹ Yehowa e, na a masin pawt ai hte ngai hpe hkum daru et; na a myit kahtet ai hte, ngai hpe hkum sharin ya et. ² Na a pala ni nye a hkum hta jung nga nna, Na a lata gaw nye a ntsa e a dip nga ai. ³ Na a sindawng kahtet ai majaw, nye a hkumshan hkam kaja nga ai n rai, Nye a yubak majaw, nye a nrut nra ni masa nga ma ai n rai. ⁴ Ngai shut hpyit ai gaw nye a baw lim nga nna, li ai lit zawn nye a matu nau wa li la nga ai. ⁵ Ngai angawk angak ai amu majaw, Nye a nma ni manam nga nna a bya nga ma ai. ⁶ Du krung ai hte ja ja htingkung nna, ngai nga nga nngai; Shani tup yawn palawng hte ngai karen hkawm nga nngai. ⁷ Nye a mashi ting kahtet machyi nga nna, nye a ashan hkam kaja nga ai n rai. ⁸ Hpam mat ma nna, agrawp agrap ngai rai nga nngai; Nye a kraw lawang na madai ai majaw shabam nga nngai. ⁹ Madu e, ngai ra ai nlang na a man e nga nga ai; Ngai madai ai mung, nang n chye ya nga ndai n rai. ¹⁰ Nye a salum a duk nga ai, nye a n-gun yawm mat sali ai; Nye a myi a nhtoi pyi mat mat sai. ¹¹ Nye a ana majaw, tsawra ai ni hte jinghku ni ngai hte daw hka wa nna, nye a htingbu ni tsan tsan e tsap nga ma ai. ¹² Nye a myit masin hpe tam ai ni, mahkam hkam nna, Ngai hpe n kaja ai maw ai ni, hkalem ai ga tsun nga ma ai: Shani tup myit magaw ai lam a daw nga ma ai. ¹³ Ngai chyawm gaw, na lahpang ai wa zawn, hpa mung n na nngai; N-gup n hpaw chye ai ma-a ai wa zawn, ngai rai nga nngai. ¹⁴ Gaja wa, na n na ai wa hte, Ndang kalang ga n chye tsun ai wa zawn, ngai rai nga nngai. ¹⁵ Raitimung, Yehowa e, ngai nang hpe ala nga nngai, Nye a Madu Karai Kasang e, nang htan ya na ndai. ¹⁶ Kaning rai nme law, “Nye a lagaw kashawt yang, Ngai hta grau mayu ai ni, nye a lam n kabu lu mu ga,” ngai tsun nga nngai. ¹⁷ Ngai kataw magang wa nga nngai, Ngai yawnhkyen ai nye a man e tut tut anga nga ai. ¹⁸ Ngai shut hpyit ai gaw, ngai nem lu na rai nga nngai; Nye a yubak majaw, myit yawn nga na nngai. ¹⁹ Nye a hpyen ni chyawm gaw, sek sek rai nna, n-gun rawng nga ma ai; Mara n nga timung, ngai hpe ndawng ai ni law wa ma ai. ²⁰ Shanhte kaja ai hpe n kaja ai hte htang ma ai; Ngai kaja ai lam hkan nga nngai majaw, Shanhte ngai hte nhtan shai nga ma ai. ²¹ Yehowa e, ngai hpe hkum kau da et. Nye a Karai Kasang e, ngai hte hkum tsan nga et. ²² Ngai hpe hkyehkrang la ai Madu e, Ngai hpe karum na lawan rit law.

¹ “Nye a shinglet hte ngai n shut nga n ga, Nye a lam ngai sadi nga na nngai; Tara n lang ai wa nye a man e naw nga nga yang, Nye a n-gup ngai hkangda na we ai, Nga nna ngai tsun nga nngai. ² Saloi ngai atsin sha rai nga nna ma-a nga nngai; Mai kaja na hpe pyi ngai hpa mung n tsun nngai: Raitimung, nye a yawnhkyen ai kaba wa li ai. ³ Nye a kraw kata na myit kahtet nga li ai, Myit yu nga yang wan grung nga ai. Shaloi nye a shinglet hte ngai ga tsun nga nngai. ⁴ Yehowa e, nye a lam jahtum na hte, Nye a lagaw langa gade gadun nga ai gaw madun ya e: Ngai gade hten loi nga nngai gaw ngai hpe chye shangun ya e. ⁵ Nye a nhtoi lahpa mi daram nang tawn da ya nit dai; Nye a aprat na a man e hpa mung n rai nga ai: Gaja wa, masha gade reng nga raitimung, Shi kaman lila sha naw rai nga ai. [Selah.] ⁶ Gaja wa, masha wa gaw shingnip zawn hkawm nga ai, Nbung a matu sha, shanhte tsang nga ma ai: Shi mahkawng da nga timung, Kadai lu la na ru ai gaw n chye wu ai. ⁷ Ya chyawm gaw, Madu e, Hpa jaw ai me ngai la nga na rai nga a ta? Nye a myit mada shara nang hta rai nga ai. ⁸ Nye a mara nlang hta na ngai hpe mawai la e: Angawk ai ni a shatan shara ngai hpe hkum shatai et. ⁹ Nang gaw ndai lam shabyin ndai majaw, Ngai n shaga, nye a n-gup n hpaw we ai. ¹⁰ Nang ngai hpe shakap ai ana ngai kaw na shapraw kau ya e; Na a lata anu ai majaw, ngai tsam mat ni ai. ¹¹ Yubak majaw nang daru nna, masha hpe ari jaw yang, nang shi a hpung hpe manut sha ai nba zawn, di kau ya wu ai: Masha mahkra gaw kaman lila sha rai nga ma ai. [Selah.] ¹² Yehowa e, ngai akyu hpyi ai ga madat mara ya e, Ngai hpyi jahtau ai ga na la ya e; Nang kaw ngai manam rai nga nngai hte, Ngai ji wa ni zawn kaga buga masha rai nga nngai majaw, Nye a myi prwi hpe atsin sha hkum yu nga et. ¹³ Ngai garai n pru nna, n mat mat ai hte yang, Gan ga lu n ga, ngai hpe matsan naw dum la e law.

¹ Yehowa hpe maja let ngai a la nga nngai; Ngai hpang de shi na kayin nna, Ngai hpyi jahtau ai ga madat ya ni ai. ² N seng ai nhkun hte kagam hkumpup hta na, Shi ngai hpe shaw la nhtawm, Nye a lagaw hpe lunghkrung ntsa e mara da nna, Nye a lahkam hpe shagrin da nu ai. ³ Anhte a Karai Kasang hpe shakawn na nga, Shi nye a n-gup hta mahkawn ga nnan jaw da ni ai; Masha law law wa dai mu nna, hkrit hkungga ai hte, Yehowa hpe shamyet shanat na mara ai. ⁴ Yehowa hpe shingbyi shara shatai nna, Gumrawng ai ni hte masu ai lam hkan nang ai ni hpe, n yu ai wa gaw, a nga ai. ⁵ Nye a Karai Kasang Yehowa e, Anhte a matu nang galaw da ai mauhpa hte hpaji daw ai amu, law la lit dai; Nang hte shadawn yu na gaw n nga ai: Dai ni a lam ngai tsun shana ya mayu yang, Dai ni gaw n dang hti hkra law la nga ai. ⁶ Hkungga hte lusha kumhpa nang n ra nit dai; Nye a na lashing nang hpaw ya nit dai: Wan nat hkungga hte htingrai hkungga nang n hpyi ndai. ⁷ Shaloi ngai gaw, “Yu u, ngai sa du ring ngai, Laika katsu hta nye a lam ka da nga ai. ⁸ Nye a Karai Kasang e, na a myit hkan nang na ngai ra nga nngai; Nye a kraw lawang hta na a tara rawng nga ai,” nga nna ngai tsun ni ai. ⁹ Ngai gaw dai shawa hpawng kaba a ka-ang e, Dinghpring ai lam a kabu gara shiga hkaw dan ni ai; Yu u, nye a n-gup hpe ngai pat da we ai n rai, Yehowa e, nang nan chye nga ndai. ¹⁰ Na a dinghpring ai hpe nye a kraw e ngai ip da we ai n rai: Na a sadi sahka hte hkye la ai lam ngai hkai dan ni ai. Dai shawa hpawng kaba hta, Na a chyeju hte sadi sahka hpe ngai n makoi da nga nngai. ¹¹ Nang mung, Yehowa e, na a n-gaw nwai myit hpe ngai hta na hkum shadang da et. Na a chyeju hte sadi sahka ngai hpe tut tut shadaw nga u ga. ¹² N dang hti ai ru tsang ai ngai hpe kawan da ni ai, Ngai n mada yu lu hkra, nye a yubak ngai hpe lep ni ai: Dai ni gaw nye baw kara hta grau law nga ai rai nna, Nye a minla byaw mat sali ai. ¹³ Yehowa e, ngai hpe mawai la na, myit dum nga u, Yehowa e, ngai hpe karum na, lawan rit. ¹⁴ Nye a sumri sumdam hpe dan na tam ai ni, Kaya kahpa jawm hkrum nna, myiman sum mu ga: Ngai hpe tsin-yam tsindam jahkrum mayu ai ni, kanut mat wa nna, arawng sum mat mu ga. ¹⁵ Ngai hpe, “Da, da,” nga ai ni, Shanhte galaw ai kaya kahpa amu a majaw, hten byak hkrum mu ga. ¹⁶ Nang hpe tam ai ni nlang hte gaw, Nang hta awng nna, kabu gara nga mu ga: Na a hkyehkrang la ai lam tsawra ai ni gaw, “Yehowa galu kaba nga u ga,” nga nna tut tut a tsun nga mu ga. ¹⁷ Ngai nni nkri hte matsan mayan hkrum nga nngai, Raitimung, dai Madu gaw ngai hpe myit dum nga ai; Ngai hpe karum ai wa hte, mawai la ai wa nang rai nga ndai: Nye a Karai Wa e, hkum ganung nga et law.

¹ Matsan mayan ni hpe dum ai wa gaw, a nga ai; Yehowa gaw dai wa hpe kyindut ai nhtoi e shalawt dat na wu ai. ² Yehowa shi hpe bau sin shabran la na wu ai, Dai mungdan hta shi apyaw sha nga lu na ra ai: Gumlau ni ra ai hku shi hpe ap kau na wu ai n rai. ³ Ali ahti hkrum yang, Yehowa shi hpe shadaw ya na wu ai; Machyi makaw hkrum yang, nang shi a yupku galai ya na ndai. ⁴ Ngai gaw, “Yehowa e, ngai hpe matsan dum la e, Nye a myit masin hpe shamai shatsai ya e: Kaning rai nme law, nang hpe ngai shut ni ai,” nga nna hpyi nga nngai. ⁵ Gumlau ni nye a lam n hkru ai hku tsun nna, “Shi a amying mat mat lu ga, shi galoi si na ra ai kun?” nga ma ai. ⁶ Shi ngai hpe sa hpu yu yang, kaman ga shi tsun nga ai; Shi a myit shut ai lam matsing da nna, Shinggan de pru jang, dai hpe shabrawng dat wu ai. ⁷ Ngai hpe ndawng ai ni nlang hte gaw nye a lam kahte nga ma ai; Ngai hpe n hkru n hkra ai hku a maw nga ma ai. ⁸ “N hkru ai ana shi hta kap nga ai rai nna, Lang mi kataw yang, shi bai rawt lu na n rai,” nga nna tsun ma ai. ⁹ Ngai manoi nga ai nye a muk sha ai jinghku wa nan, Shi a lahtin hte ngai hpe shingdit nngai. ¹⁰ Yehowa e, ngai shanhte hpe tai lu mawe ga, Ngai hpe matsan dum nna, sharawt la e. ¹¹ Nye hpyen ni ngai hpe n dang lu mi ai majaw, Nang ngai hpe tsaw nga ndai gaw, ngai chye nga nngai. ¹² Nye a myit malang ai hta nang ngai hpe shadaw ya nna, na a man e ngai hpe tut tut tawn da nga ndai. ¹³ Israela a Karai Kasang Yehowa gaw, Htani htana prat dingsa e, a nga u ga law. Amen, rai sa, Amen.

¹ Karai Kasang e, shan nga gaw hka shi hka wam machyu ai zawn, Nye a myit masin nang hta machyu nga ai. ² Nye a myit masin Karai Kasang hpe, Hkrung nga ai Karai Wa hpe, shagroi gara nga ai: Ngai Karai Kasang kaw, galoi wa me dawng pru lu na rai nga ai kun? ³ “Na a Karai Kasang gaw kanang nga lit ta?” Nga nna tut tut a tsun nga ma ai majaw, Nye a myi pruwi nye a shat shani shana tai nga li ai. ⁴ Kaning rai nme law, shawa masha ni hte ngai lung wa nna, Poi galaw ai hpawng hpe kabu ai nsen hte mahkawn mangoi let, Karai Kasang a nta de woi sa sa di de ai gaw, Ngai dum nga nna, nye a myit masin ngai hta kabrawng nga ai. ⁵ Nye a myit masin e, nang hpa majaw kanyung nga n ta? Hpa majaw ngai hta e kadau nga n ta? Karai Kasang hpe a la nga u; shi karum nga ai majaw, Ngai shi a chyeju naw shakawn na we ai. ⁶ Nye a Karai Wa e, nye a myit gawng run nga li ai: Dai majaw Yawdan ginwang, Hermon bum hte, Dai bum kaji hkan nna ngai nang hpe dum nga nngai. ⁷ Na a hka rum kadu yang, hkringbu langai hte langai wu nga ai: Na a hka leng kaba nlang hte hte, De a gumdin gumhkaw ni gaw, Nye a ntsa e hprawi rai nga ma ai. ⁸ Yehowa gaw shi a chyeju shani e jaw nga nna, shana e mung shi hpe mahkawn ai ga hte, Nye a asak daju Karai Wa hpe hpyi let, ngai nga nga na nngai. ⁹ Dai majaw Karai Wa hpe, Nye a lunghkrung e, Nang hpa rai ngai hpe malap kau nga n ta? Gumlau ni sharu shatsang ai majaw, Yawn hkrum ai wa zawn ngai hpa rai hkawm nga n hka? ngu na we ai. ¹⁰ “Na a Karai Kasang gaw kanang nga lit ta?” Nga nna tut tut a tsun nga ma ai majaw, Nye a nrut nra hpe a dup kau ai zawn, Gumlau ni ngai hpe shatan nga ma ai. ¹¹ Nye a myit masin e, nang hpa majaw kanyung nga n ta? Hpa majaw ngai hta e kadau nga n ta? Karai Kasang hpe a la nga u, Ngai shi a chyeju naw shakawn na we ai: Ngai hpe karum ai wa hte, nye a Karai Wa shi rai nga ai.

¹ Karai Kasang e, n hkru ai amu a majaw, Ngai hpe dawdan nna jeyang ya e; Hkalem sha ai ni hte n shawp ai ni kaw na, ngai hpe mawai la e. ² Ngai hpe n-gun jaw ai Karai Kasang nang rai nga ndai: Nang hpa rai ngai hpe kau da nga n ta? Gumlau ni sharu shatsang ai majaw, Yawn hkrum ai wa zawn ngai hpa rai hkawm nga n hka? ³ Na a nhtoi hte sadi sahka hpe shangun dat mu; Dai yan ngai hpe lakawn la mi ga: Na a chyoi pra ai bum de mung, Na a sumpan nta de mung, ngai hpe woi shang mi ga. ⁴ Shaloi Karai Kasang a tawn hkungri hte, Ngai nachying sharawng awng ai Karai Wa kaw, ngai shang wa nna, Karai Kasang e, nye a Karai Kasang e, Tingse hte nang hpe mahkawn mangoi na nngai. ⁵ Nye a myit masin e, nang hpa majaw kanyung nga n ta? Hpa majaw ngai hta e kadau nga n ta? Karai Kasang hpe a la nga u, ngai shi a chyeju naw shakawn na we ai: Ngai hpe karum ai wa hte, nye a Karai Wa shi rai nga ai.

¹ Karai Kasang e, anhte na hte anhte na yu saga ai, anhte a ji woi ni anhte hpe hkai dan ma ni ai: Moi ji woi ni a lakhtak e, amu langai mi nang galaw nit dai. ² Na a lata masha amyu ni hpe shaden kau nna, Ji woi ni hpe hkai da mu ai: Amyu baw ni hpe nang zingri kau nna, Ji wa ni hpe shabran dat mu ai. ³ Shanhte a nhtu hte dai mungdan hpe shanhte madu lu mu ai n rai, Shanhte a lata gaw shanhte hpe hkye la mu ai n rai: Na a hkra lata, na a lahpum, na a myiman a nhtoi hte, shanhte hkyehkrang la ai hkrum mu ai; Kaning rai nme law, nang shanhte hpe tsawra mu ai. ⁴ Karai Kasang e, nang nye a Hkawhkam rai nga ndai, Yaku amyu a matu hkyehkrang la ai lam hpaw da u. ⁵ Na a marang e anhte gumlau ni hpe kanawng kau lu ga ai, Na a amying majaw hpyen ni hpe kabye kau lu ga ai. ⁶ Nye a ndan hpe ngai n kam nngai, Nye a nhtu mung ngai hpe hkye la lu ai n rai. ⁷ Nang chyu sha gumlau ni kaw na anhte hpe hkye la nna, Anhte hpe ndawng ai ni hpe kaya jahkrum mu ai. ⁸ Karai Kasang hta anhte shani tup gumrawng nga nna, na a amying hpe prat tup shakawn na ga ai. [Selah.] ⁹ Raitimung nang anhte hpe kau da nna, anhte a arawng jahpoi kau ya ndai: Anhte a luksuk ni hte rau nang n pru sa ndai. ¹⁰ Anhte a hpyen ni a man e, nang anhte hpe shabai dat nna, N dawng n yawt ai ni, anhte hpe hpya la mi ai. ¹¹ Sat na maw ai sagu hpe zawn nang anhte hpe ap kau nna, Amyu baw ni hta anhte hpe shabra kau mi ai. ¹² Na a amyu hpe jahpu n hpyi ai sha nang dut kau nna, De a manu hte na a sutgan jat lit dai n rai. ¹³ Anhte a htingbu ni a man e shatan nhkan shara hte, Grupyin e nga ai ni a man e, roi nna asawng asang shara, nang anhte hpe shatai mi ai. ¹⁴ Amyu ni a man e ga shadawn shara hte, Amyu baw ni a baw kanga shara, nang anhte hpe shatai mi ai. ¹⁵ Roi rip ai wa hte arawng jahpoi ai wa a ga majaw, Gumlau ai wa hte matai tai ai wa a man e, ¹⁶ Ngai hkrum ai shatan nhkan shani shagu ngai hte nga nga nna, Nye myiman a kaya kahpa ngai hpe htinggrum da nga nngai. ¹⁷ Dai hte wa anhte hkrum ga timung, Anhte nang hpe malap kau ga ai n rai: Na a ga shaka hpe mung n tawt n lai ga ai. ¹⁸ Anhte a myit bai n htak mali ai rai nna, Na a lam kaw na anhte n yit mat wa ga ai. ¹⁹ Nang chyawm gaw chyahkyawn ni a shara e anhte hpe adup kau nna, Si ai shingnip hte anhte hpe ka-up da nit dai. ²⁰ Karai Kasang a amying hpe anhte malap kau nna, Hpara tsasam kaw lata ladawn ga yang gaw, ²¹ Kraw e makoi da ai hpe chye ai Karai Kasang, Dai hpe sawk yu na, n rai ni? ²² Gaja wa na a jaw e anhte shani shagu sat kau ai hkrum ga ai; Sat na san da ai sagu hpe zawn, anhte hpe nawn da mi ai. ²³ Madu e, rawt u, nang hpa rai yup mu nga n ta? Rawt u, anhte hpe tut tut hkum kau da et. ²⁴ Nang hpa rai na a myiman hpe up da nga nna, Anhte a ru tsang ai hte tsin-yam tsindam hpe malap kau ya nga n ta? ²⁵ Anhte a myit masin, ga nhpu e dagup nga nna, Anhte a sinda, ga hta kap nga ai. ²⁶ Anhte hpe karum na rawt u, Na a chyeju hte anhte hpe hkrang la mi law.

¹ Nye a myit masin kaja ai ga katu nga ai; Hkawhkam wa a gawp e ngai galaw ai amu hpe ngai tsun nga nngai: Nye a shinglet atsawm sha chye ka ai wa a kanyit rai nga ai. ² Masha kasha ni hta nang ahpraw grau tsawm nga ndai. Na a n-gup hta chyeju ru bang ya nga ai. Dai majaw Karai Kasang gaw nang hpe tut tut shaman ya ndai. ³ Share wa e, na a nhtu, na a arawng sadang, na a hpung shingkang hte hpe, hpye u. ⁴ Sadi sahka, myit nem ai, dinghpring ai a majaw, na a hpung shingkang danhkung let jawn sa wa su. Na a hkra lata hkrithpa amu nang hpe sharin ya u ga. ⁵ Na a pala ni masen nga ma ai rai nna, Hkawhkam a gumlau ni a salum hta jung nga ai: Masha amyu ni, na a lagaw nhpang e kataw nga ma ai. ⁶ Karai Kasang e, na a tingnyang htani htana anga nga ai, Na a mungdan a sumdoi dingman ai sumdoi rai nga ai. ⁷ Nang gaw dinghpring ai tsaw nna yubak hpe ndawng ndai: Dai majaw Karai Kasang gaw, na a Karai Kasang, Na a manang ni hta, kabu gara ai nammam hte nang hpe grau chya ya nit dai. ⁸ Na a hpun palawng gaw mura, achyaw, hpun maza mawng nga ai, Magwi kawng htingnu hta na tingse dum ai gaw, nang hpe shapyaw nga ai. ⁹ Hkawhkam ni a shayi sha ni, na a nja jan ni rai nga ma ai; Uhpira ja hte mawn nga ai hkawhkam jan gaw, Na a hkra maga de tsap nga ai. ¹⁰ Shayi sha e, madat u, mada yu nna na la u, Na a amyu hte nwa a nta hpe, malap kau u. ¹¹ Hkawhkam wa gaw na a ahpraw tsawm ai ra a yang gaw, Na a madu wa shi rai nga ai majaw, shi hpe hkungga lara u. ¹² Turu shayi sha e, mung masha ni hta grau sut lu ai ni, Kumhpa hte na a myiman tam na mara ai. ¹³ Hkawhkam wa a shayi sha gaw dinghku kata e arawng htak rai nga ai. Shi a hpun palawng ja hte kaboi ai rai nga ai. ¹⁴ Za hte ka ai hpun nba hte hkawhkam wa kaw sa sa nna, Shi a hpang hkan ai shingnan hkawnsek ni hpe mung, Nang kaw woi shashawn na maru ai. ¹⁵ Kabu gara re ai hte shanhte woi sa mu ai, Hkawhkam a Hkaw de shanhte shang lu ma ai. ¹⁶ Na a nji ni a malai na nsha ni shang na mara ai, Mung shagu hta nang shanhte hpe du shatai na maru ai. ¹⁷ Prat mi hte prat mi na a amying nsang hpe ngai dum shangun na mawe ai: Dai rai nna, htani htana prat dingsa, masha amyu ni gaw nang hpe a shakawn nga na mara ai law.

¹ Karai Kasang gaw anhte a shingbyi shara hte n-gun rai nga ai, Ru tsang ai aten e karum na jin nga chalu rai nga ai. ² Dai majaw ginding aga galai mat wa nna, Nammukdara ka-ang na bum ni a wam nga timung; ³ Hka leng ni wung nga nna kanawng nga ai hte, Dai ni rawt hta ai a majaw, bum ni ashun nga ma timung, anhte n hkrit ra ga ai. [Selah.] ⁴ Hka nu hte de a hka gai ni Karai Kasang a mare hte, Tsaw htum ai Wa a chyoi pra ai htingnu ni hpe, shapyaw nga ma ai. ⁵ Karai Kasang gaw de a ka-ang e shanu nga ai: Dai mare gaw shamu shamawt nga ai n rai; Karai Kasang gaw shi hpe jau jau e karum na wu ai. ⁶ Masha amyu ni kabrawng nga masai, mungdan ni shamu shamawt mat masai: Shi gaw shi a nsen dat dat nna, ginding aga byawng mat sai. ⁷ Zaw nawng zaw wa up ai Yehowa, anhte hte rau nga nga ai, Yaku a Karai Kasang gaw anhte a langchyi rai nga ai. [Selah.] ⁸ Sa marit, Yehowa a amu hpe mada yu mu; Ga ntsa e shi akrin atsai di kau nu ai. ⁹ Ga ting hta na hpyen majan shi jasim kau wu ai; Ndan pala hpe shi daw kau nna, Ri hpe kahtum kadaw di kau wu ai: Hpyen leng ni hpe wan hte nat kau mu ai. ¹⁰ Amu sha nga mu, ngai Karai Kasang rai nga nngai, chye mu. Amyu baw ni hta ngai galu kaba wa nna, Ga ntsa e danhkung nga na nngai. ¹¹ Zaw nawng zaw wa up ai Yehowa anhte hte rau nga nga ai. Yaku a Karai Kasang gaw anhte a langchyi rai nga ai. [Selah.]

¹ Masha amyu shagu ta lahpawk dum nga mu, Karai Kasang hpe awng ai nsen hte garu mu. ² Kaning rai nme law, Yehowa gaw, Tsaw htum ai hte hkrithpa wa rai nga ai: Mungkan ting a hkawhkam kaba mung, shi rai nga ai. ³ Shi gaw anhte a npu e masha amyu ni hpe, Anhte a lagaw kata e amyu baw ni hpe, dip da mu ai. ⁴ Shi tsawra ai Yaku a gumrawng shara, Anhte a sali wunli tai na, shi san da nu ai. [Selah.] ⁵ Karai Kasang gaw garu ai nsen hte, Yehowa gaw pahtau dum wu ai hte, lung wa sai. ⁶ Mahkawn mangoi mu, Karai Kasang hpe mahkawn mu, Mahkawn mangoi mu, anhte a hkawhkam wa hpe mangoi mu. ⁷ Karai Kasang gaw ga ting a hkawhkam rai nga ai, Hpaji ga hte mahkawn mangoi mu. ⁸ Karai Kasang gaw masha amyu ni hpe up nga ai, Karai Kasang gaw shi a chyoi pra ai tingnyang hta dung nga ai. ⁹ Abraham a Karai Kasang a amyu hte rau, Amyu ni a du salang ni zuphpawng nga ma ai. Kaning rai nme law, mungkan a n-gang ni hpe, Karai Kasang up nga ai. Shi gaw nachying grau ai wa rai nga ai law.

¹ Anhte a Karai Kasang a mare hte, Shi a chyoi pra ai bum hta e, Yehowa gaw galu kaba nga ai rai nna, Shakawn ging ai wa rai nga ai. ² Ngoi rai nna tsaw lung wa ai, Dingdung maga e nga ai Ziun bum gaw, Mungkan ting na ngwi pyaw shara rai nga ai: Hkawhkam kaba a mare mung, dai rai nga ai. ³ Karai Kasang shawung shara rai nga ai gaw, De a htingnu ni hta e, shi madun dan ya mu ai. ⁴ Yu mu, hkawhkam ni hpawng nga ma ai, Shanhte rau lai sa wa ma ai. ⁵ Shanhte mada yu nna a mau nga ma ai, Shanhte kajawng nna hprawng mat ma ai. ⁶ Dai yang e shanhte hkrit gari ai hte, Shinggyim machyi ai num zawn, kawa machyi hkrum nga ma ai. ⁷ Nang gaw sinpraw de na nbung laru hte, Tarshi a hpaga li ni hpe agrawp kau mu ai. ⁸ Zaw nawng zaw wa up ai Yehowa a mare, Anhte a Karai Kasang a mare hta e, Na yu ga ai hte maren, anhte mu yu sagaw ai: Karai Kasang gaw dai hpe tutnawng e shagrin da na wu ai. [Selah.] ⁹ Karai Kasang e, na a Htingnu kata e, Na a chyeju hpe anhte dum nga saga ai. ¹⁰ Karai Kasang e, na a amying nsang grau nga ai hte maren, Nang hpe shakawn ai gaw ga ting e chyam nga ai: Na a hkra lata dingman ai hte hpring nga ai. ¹¹ Nang tara dara ai lam a majaw, Ziun bum kabu gara nga nna, Yuda a shayi sha ni sharawng awng nga mu ga. ¹² Ziun hpe grup kayin nna kawan hkawm yu mu, De a langchyi ni hpe hti yu mu: ¹³ Hpang prat na ni hpe hkai dan lu myit ga, De a bunghku ni hpe matsing da nna, De a htingnu ni hpe sawn yu mu. ¹⁴ Kaning rai nme law, dai Karai Kasang gaw, Htani htana e anhte a Karai Kasang rai nga ai: Si hkra shi anhte hpe woi wa na mi ai law.

¹ Masha amyu shagu ndai madat mu; Dinghta ga e nga ai ni nlang hte e, na la mu. ² Du magam ni darat daroi ni Sut su ai hte matsan mayan ni yawng, na la mu. ³ Nye a n-gup hpaji hparat shapraw dan nna, Nye a myit zai byeng-ya aru yu na ra ai. ⁴ Nye a na, ga shadawn na la na rai nna, Tingse dum let gumwai ga htai dan na nngai. ⁵ Kyindut ai nhtoi hta e, yubak ngai hpe kawan nga yang, Hpa majaw ngai hkrit na rai nga n ta? ⁶ Masha wa gaw tut tut ahkrung nga nna, Hten mat ai galoi mung n hkrum lu hkra, ⁷ Tinang a sutgan hpe kamsham nna, Tinang n taw n tsang lu su ai hpe shakawn nga ai ni; ⁸ Kadai mung tinang a kanau wa hpe hkrang la lu na n rai, Shi a matu htingrai ai ja Karai Kasang hpe jaw lu na n rai. ⁹ Shanhte a gawng malai jahpu kaba nga nna, Prat dingsa e n law hkraw nga malu ai. ¹⁰ Gaja wa, hpaji hparat rawng ai wa si mat ai hte, Mana ai wa hte angawk ai wa rau hten mat nna, Tinang a sutgan hpang na ni hpe htawng da ya ma ai gaw, shi a mu lu nga ai. ¹¹ Shanhte a nta ni prat tup agrin nga nna, Tinang a htingra ni prat dingnawng anga nga na re ai; nga nna, Shanhte gaw tinang a kraw e a myit nga ma ai rai nna, Mungdaw ni hpe tinang a amying shakap da mu ai. ¹² Raitimung, hpung rawng ai wa gaw agrin nga ai n rai: Shi gaw hten mat ai ashu ashan hte bung nga ai. ¹³ Dai lam gaw shanhte ngawk ai lam rai nga timung, Hpang de na ni shanhte a ga hpe ra ma ai. [Selah.] ¹⁴ Shanhte hpe katsan ga a matu sagu zawn jahpawng da nna, Si du gaw shanhte hpe rem nga mu ai: Dai jahpawt e myit ding ai ni gaw shanhte hpe dang kau nna, Shanhte a hkum tsawp ni katsan ga hta e tsam mat malu ai: Nga shara kaga shanhte n lu ma ai: ¹⁵ Karai Kasang chyawm gaw katsan ga de na, Nye a myit masin hpe hkrang la na ru ai. Kaning rai nme law, shi ngai hpe gare la na nngai. [Selah.] ¹⁶ Masha wa gaw sutgan lu nna, Shi nta a arawng jat wa yang, nang hkum hkrit et. ¹⁷ Shi si wa yang hpa mung la wa lu na n rai, Shi a arawng sadang shi kaw hkan yu nang lu na n rai. ¹⁸ Naw hkrung nga yang shi hpe shaman ya nna, Ngamai ai majaw shi hpe shakawn ya mu timung, ¹⁹ Kaji kawoi ni kaw shi shang na ra ai: Shanhte galoi mung nhtoi n mu lu na ma ai. ²⁰ Hpung rawng timung, myit n gu ai wa gaw, Hten mat ai ashu ashan hte bung nga ai.

¹ N-gawn tawa Karai Kasang Yehowa gaw, Mungga jaw dat wu ai rai nna, Jan pru ai maga kaw nna, shang ai maga du hkra lamu ga hpe shaga wu ai. ² Tsawm htum ai Ziun bum kaw nna, Karai Kasang gaw htoi tu nga ai. ³ Anhte a Karai Kasang du ra ai rai nna, Shi atsin sha nga nga lu ai n rai; Shi a man e wan a hkru nga nna, Shi a grupyin e laru kaba ru nga ai. ⁴ Shi gaw shi a amyu hpe jeyang na, aga hpe mung, Sumsing lamu hpe mung, shaga mu ai. ⁵ “Hkungga nawng let ngai hte ga shaka tawn da ai, Nye a dingman ai ni e, ngai kaw hpawng marit,” nga ai. ⁶ Karai Kasang nan tara dara nga ai majaw, Sumsing lamu gaw shi a dinghpring ai hpe shana ya nga ai. [Selah.] ⁷ “Nye a amyu e, madat u, ngai ga tsun na nngai, Israela e, ngai nang hpe sakse jaw de ga: Ngai gaw Karai Kasang, na a Karai Kasang rai nga nngai. ⁸ Hkungga jaw ai lam a majaw ngai nang hpe n dara na nngai; Na a wan nat ai hkungga ni nye a man e tut tut nga nga ai. ⁹ Raitimung, na a nta na usu langai mi, Na a ulawng na bainam la langai mi, ngai n la na nngai. ¹⁰ Nam maling hkan e nga ai ashu ashan nlang hte hte, Kawng hkying mi hta pra nga ai yamnga ni, nye a rai nga ai. ¹¹ Bum na u nlang hte hpe ngai chye nga nngai. Udat hkan e hkawm mahkawm ngai hte rau rai nga ai. ¹² Ngai kawsi hkrum yang, nang hpe shana na de ai n rai; Aga ting hte de a yawng mayawng nye a rai nga ai. ¹³ Ngai gaw usu shan sha na kun? Bainam la a asai lu na kun? ¹⁴ Karai Kasang hpe shakawn kungdawn hkungga jaw u, Tsaw htum ai Wa hpe na a ga ndat rap raw u. ¹⁵ Ru tsang ai nhtoi hta e ngai hpe shaga e; Ngai nang hpe hkyehkrang la nna, Nang ngai hpe shagrau sha-a na rin dai,” nga ai. ¹⁶ Bai, tara n lang ai wa hpe Karai Kasang gaw, “Nye a arawn alai nang hpa rai hkai dan nga nna, Na a n-gup hte nye a ga shaka hpe hpa rai tsun nga n ta? ¹⁷ Sharin ai ga hpe nang ndawng nga nna, Nye a mungga hpe na a shingdu de kabai kau ndai. ¹⁸ Lagu lagut mu yang, nang shi hpe ra nga nna, Num shaw ai ni hte rau mazum nga ndai. ¹⁹ Na a n-gup n hkru ai hpe nang ap ya nna, Na a shinglet hkalem ai lam mazing nga ai. ²⁰ Na nhpu nnau a lam n sun ai hku nang tsun nga nna, Na nnu a kasha hpe shara nga ndai. ²¹ Dai nang galaw ai hpe ngai atsin sha nga nga ai majaw, Nang zawn ngai rai nga nngai, nang myit nga ndai: Raitimung, ngai nang hpe sharin ya nna, Na mara na a man e, hpyan dan na de ai,” ngu wu ai. ²² Karai Kasang hpe malap mali kau ai ni e, ndai lam myit yu mu: Shing n rai yang, mawai la ai wa n nga nna, Ngai nanhte hpe amya je kau na made ai. ²³ Shakawn kungdawn hkungga jaw ai wa gaw, Nye a arawng shapraw ai wa rai nga ai: Shi hkan sa ai lam yaw yu ai wa hpe, Karai Kasang a hkyehkrang la ai lam ngai madun na we ai.

¹ Karai Kasang e, na a chyeju hte maren, ngai hpe matsan dum la e, Na a n-gaw nnyeng myit kaba nga ai hte maren, nye a mara arut kau ya e. ² Nye a shut hpyit ai hpe atsai awai kashin kau ya e, Nye a yubak kaw na ngai hpe jaseng la e. ³ Nye a mara ngai chye nga nna, Nye a yubak nye a man e tut tut rai nga ai. ⁴ Nang tsun nga ai ga dinghpring nga u ga, Na a tara dara ai lam hta mara n kap u ga, Nang hpe chyu sha ngai yubak galaw nna, Na a man e n hkru ai amu galaw ni ai. ⁵ Yu mu, shut hpyit ai hta ngai shangai wa nna, Nu a hkritung e pyi yubak kap nga nngai. ⁶ Myit kata na sadi sahka hpe nang tsaw nga nna, Kraw lawang e ngai hpe hpaji sharin ya ndai. ⁷ Husup hte ngai hpe jaseng ya nna, ngai san wa na nngai. Ngai hpe kashin ya nna, hkyen hta grau ngai hpraw wa na nngai. ⁸ Nang daw kau ai nrut nra ni bai kabu lu mu ga, Ga ngwi ga pyaw ngai hpe shana ya e. ⁹ Nye a yubak kaw na, na a myiman kayin kau nna, Nye a shut hpyit ai nlang hte hpe arut kau ya e. ¹⁰ Karai Kasang e, ngai hta sanseng ai myit hpan tawn da nna, Agrin nga na Wenyi, nye a kata e shabai bang ya e. ¹¹ Na a myiman na ngai hpe hkum shaden kau e, Na a chyoi pra ai Wenyi ngai hta na hkum dawm la ya e. ¹² Na a hkyehkrang la ai lam a kabu gara ai gaw, ngai hpe bai jaw nna, N wai ai Wenyi hte ngai hpe shadaw da e. ¹³ Shaloi, tara tawt lai ai ni hpe na a lam ngai sharin ya nna, Yubak kap ai ni nang kaw bai kayin wa na mara ai. ¹⁴ Karai Kasang e, ngai hpe hkyehkrang la ai Karai Kasang e, Bunglat hka hta na ngai hpe shalawt dat e: Shaloi nye a shinglet, na a dinghpring ai lam hpe marawn shakawn na ra ai. ¹⁵ Madu e, nye a nten hpaw ya e. Shaloi nye a n-gup nang hpe shakawn na lam hkai dan na ra ai. ¹⁶ Shagu hkungga nang tsaw nga ndai n rai; Dai n rai taw, ngai jaw na de ai: Wan nat ai hkungga hpe mung nang n ra ndai. ¹⁷ Karai Kasang tsaw nga ai shagu hkungga gaw, Gawng run mat ai wenyi hpe rai nga ai. Karai Kasang e, gawng run nna htum mat ai myit hpe, Nang gangkau nga na ndai n rai. ¹⁸ Na a n-gaw nwai myit hte Ziun hpe mai kaja ai galaw u, Yerusalem mare na bunghku hpe gaw da ya u. ¹⁹ Shingrai nang gaw, dingman ai hkungga, Wan nat ai hte hkum dingyawng hkungga hta awng nga na rin dai: Na a hkungri ntsa e mung, shanhte usu nawng ya na mara ai.

¹ Share wa e, nang hpa rai n hkru ai hta gumrawng nga n ta? Karai Wa a chyeju tut tut anga nga ai. ² Lau sha ai wa e, na a shinglet, Dai ai kara nhkyi zawn hten byak ai maw nga ai. ³ Kaja ai hta n hkru ai hpe, Dingman ai hta masu ai ga hpe, Nang grau tsaw nga ndai. [Selah.] ⁴ Hkalem sha chye ai shinglet e, Shabyak na ga nlang hte hpe nang tsaw nga ndai. ⁵ Karai Wa nang hpe tut tut agrawp kau na ndai: Na a sum hta na shi nang hpe gare kau dat nna, Dinghta ga de na, na a aru hpe baw kau ya na rin dai. ⁶ Dingman ai ni dai lam mu nna hkrit nga na mara ai; Shanhte gaw shi hpe mani kau nna, ⁷ “Yu mu, Karai Kasang hta n shingbyi nga ai, Shi a sutgan hpe shamyet nna, Shi a n hkru ai hta ngang nga ai share wa gaw, ndai wa rai nga ai,” nga na mara ai. ⁸ Ngai chyawm gaw, Karai Kasang a nta na, Tsit lali ai tsanlun hpun zawn rai nga nngai: Karai Kasang a chyeju hpe ngai tutnawng a hpa nga nngai. ⁹ Dai nang galaw ndai majaw, Ngai nang hpe tut tut shakawn nga na nngai: Na a amying gaw chyoi pra ai ni a man e mai kaja nga ai majaw, Dai hpe ngai ala nga na nngai law.

¹ Mana ai wa gaw, “Karai Kasang n nga ai,” Nga nna shi a kraw e a tsun nga ai. Shanhte tsam mat nga ma ai rai nna, Matsat shabat lailen hkan nang ma ai: Kadai mung kaja ai amu n galaw ma ai. ² Zai byeng-ya rawng ai wa nga ai, n nga ai, Karai Kasang hpe tam ai wa nga ai kun? mada yu na nga, Karai Kasang lamu de nna, masha kasha ni hpe gum yu nga ai. ³ Yawng htak mat wa masai, Shanhte rau bran mat wa masai. Kadai mung kaja ai amu n galaw ma ai: Gaja wa, langai mi muk n nga ai. ⁴ N hkru ai amu galaw ai hte, nye a amyu masha ni hpe muk hpe zawn sha kau nna, Karai Kasang hpe n hpyi jahtau ai ni gaw, Hpa mung n chye ma hka? ⁵ Hkrit shara n nga timung, Shanhte hkrit kaba hte hkrit nga ma ai: kaning rai nme law, na a grupyin e dap jung ai ni a nrut nra hpe, Karai Kasang dumbru dumbra di kau ya mu ai. Karai Kasang shanhte hpe gangkau mu ai majaw! Nang shanhte hpe kaya kahpa jahkrum mu ai. ⁶ Israela a matu Ziun kaw na hkyehkrang la ai lam kadai jaw na rai nga a ta? Karai Kasang shi a bawngdung ai amyu hpe hkrang la ai shaloi jang, Yaku awng wa nna, Israela kabu gara nga na ra ai.

¹ Karai Kasang e, na a amying hte ngai hpe hkye la e, Na a atsam hte ngai hpe jeyang ya e. ² Karai Kasang e, ngai akyu hpyi ai ga madat ya e, Nye a n-gup ga na la ya e. ³ Masha tsasam ni nye a gumlau maga e rawt nna, Mazut bu ai ni nye a asak hpe tam ma ai: Shanhte Karai Kasang hpe hpa n nawn ma ai. [Selah.] ⁴ Yu mu, Karai Kasang ngai hpe karum ai wa rai nga ai, Dai Madu, nye a asak shadaw ai ni hte lawm nga ai. ⁵ Ngai hpe gyam yu ai ni hpe shi bai tai na mu ai; Na a sadi sahka hte shanhte hpe jahkoi kau mu. ⁶ Mayu hkungga ngai nang hpe jaw na nngai: Yehowa e, na a amying mai kaja nga ai majaw, Ngai dai hpe shakawn kungdawn na nngai. ⁷ Kaning rai nme law, ru tsang ai nlang hta na, Nang ngai hpe mawai la nna, Nye a myi gumlau ni a lam yu ra nga li ai.

¹ Karai Kasang e, ngai hpyi ai ga na la ya e, Ngai akyu hpyi yang hkum makoi nga et. ² Ngai hpe matsing da nna htan ya e: Gumlau wa a nsen hte, N hkru ai ni a kashun kashe a majaw, Ngai myit aru let kadau hkawm nna, a madai nga nngai. ³ Shanhte ngai hpe mara sharawng la nna, Masin pawt ai hte ngai hpe zingri kau mi ai. ⁴ Nye a myit nye a kraw e machyi nga nna, Si na hpe hkrit gari ai gaw, ngai kaw pru nga ai. ⁵ Hkrit ai hte gari kawa ai gaw ngai kaw na pru nna, Kajawng kaja ngai hpe htinggrum da nngai. ⁶ Dai rai nna ngai gaw, “Hkrudu zawn singkaw lu n ga lè! Ngai hpyen mat wa nna ban sa nga na nngai. ⁷ Tsan tsan de ngai rai mat wa nna, Nam mali hkan e shanu nga na nngai. [Selah.] ⁸ Nbung bung ai hte laru kaba kaw na, Shingbyi ai shara de ngai alawan hprawng mat wa na nngai” nga nna tsun nga nngai. ⁹ Madu e, dai mare hta e ahkrim sha ai hte, Ga law ga la ngai mu se ai majaw, Shanhte a ga shanut ya nna shabra kau mu. ¹⁰ Shani shana de a bunghku ntsa e shanhte kawan hkawm nna, De a ka-ang e, ahkrip ahkrap kashun kashe rai nga ma ai. ¹¹ De a ka-ang e hpya sha ai hkrai hkrai rai nga nna, De a htingwang ni hta ahtu adep, hkalem sha ai n sim nga ai. ¹² Gumlau ga ai wa ngai hpe shatan taw gaw, ngai hkam lu na nngai; Ngai hpe ndawng ga ai wa gumrawng nga taw gaw, ngai koi lu na nngai: ¹³ Nang chyawm gaw ngai zawn rai nga nna, Nye a manang hte nye a jinghku wa rai nga ndai. ¹⁴ An angwi apyaw rau bawng saga ai. Masha wunawng wuwa ni hte rai, an mung, Karai Kasang a nta de sa saga ai. ¹⁵ Shanhte hten byak mat ai hkrum mu ga; Shanhte a shara e mung, kraw kata e mung, N hkru ai hkrai rai nga malu ai majaw, Katsan ga de jahkrung yu hkrat wa mu ga. ¹⁶ Ngai chyawm gaw, Karai Kasang hpe shaga nga nna, Yehowa ngai hpe hkyehkrang la na nngai. ¹⁷ Shana e, jahpawt e, jan pungding ga ai aten e, Ngai myit aru yu let madai nga nna, Shi nye a nsen hpe madat ya na ra ai. ¹⁸ Ngai kaw ani sha du ai hpyen gasat hta na, Shi nye a asak hpe angwi sha hkrang la ya nngai: Ngai hpe hkap daw ai ni law nga ma ai. ¹⁹ Shanhte myit n galai ma ai hte, Karai Kasang hpe n hkrit ma ai majaw, Moi chyaloi nhkoi nna nga ai Karai Wa gaw, Shanhte hpe madat nga nna shagrit kau na mu ai. [Selah.] ²⁰ Shi hte hku ai wa hpe shi hkap gasat nga nna, Shi a ga shaka hpe wu kau wu ai. ²¹ Shi a n-gup ga sau zawn manen lu timung, Shi a myit hta majan lawn nga ai; Shi tsun ai ga, nammam hta grau kya nga timung, Dai gaw shaw ai nhtu rai nga ai. ²² Na a lit Yehowa hta mara da u. Shi nang hpe shadaw na re ai: Tutnawng e dinghpring ai ni hpe, Kataw shangun nga na n rai. ²³ Nang chyawm gaw Karai Kasang e, Hten byak hkrum na nhkun de shanhte hpe jahkrat kau na mu ai. Sai kap ai ni hte hkalem sha ai ni, Prat hpungngang ga na ma ai, n rai. Ngai chyawm gaw nang hta machyu nga na nngai.

¹ Karai Kasang e, ngai hpe matsan dum la e, Masha ni ngai hpe mayu kau na ra nga ma ai: Shani tup gasat mi ai majaw, ngai myit ru nga nngai. ² Shani tup a gyam yu nga ma ai ni, Ngai hpe mayu kau na ra nga ma ai: Myit kaba ai hte ngai hpe hpyen gasat ai ni, Law law wa rai nga ma ai. ³ Hkrit ang ai nhtoi hta e chyawm gaw, Ngai nang hta hpa nga na nngai. ⁴ Karai Kasang hta shi a ga hpe ngai shakawn nga nngai, Karai Kasang hta ngai machyu nga nna, hpa mung n hkrit nga nngai: Masha ashan ngai hpe hpa di lu na rai nga a ta? ⁵ Shani tup shanhte nye a ga shanut kau nna, N hkru ai hku hkrai hkrai ngai hpe maw ma ai. ⁶ Nye a asak hpe tam ma ai majaw, Shanhte zuphpawng nna gyam yu let, Nye a lagaw hkang hpe matsing nga ma ai. ⁷ N hkru nga ma ai majaw shanhte lawt lu na kun? Karai Kasang e, masin pawt ai hte dai amyu ni hpe jahkrat kau mu. ⁸ Ngai kahkrang hkawm ai hpe, nang matsing da nna, Nye a myi prwi na a ndum hta mahkawng da u: Dai hte na a laika hta rawng nga ai, n rai ni? ⁹ Dai majaw ngai jahtau ai nhtoi hta e, Nye a hpyen ni kanut mat wa na ma ai: Karai Kasang ngai hte rau rai nga ai, dai ngai chye nga nngai. ¹⁰ Karai Kasang hta dai mungga hpe ngai shakawn na nngai. Yehowa hta dai mungga hpe ngai kungdawn na nngai. ¹¹ Karai Kasang hta ngai machyu nga nna, hpa mung n hkrit nngai: Masha wa gaw ngai hpe hpa di lu na rai nga a ta? ¹² Karai Kasang e, nang hpe ndat ai ga, nye a ntsa e naw rai nga ai: Shakawn hkungga ngai nang hpe nawng ya na nngai. ¹³ Nang gaw si hkrung si htan kaw na, Nye a asak hpe mawai la ya nit dai: Hkrung nga ai ni a nhtoi hta e, Karai Kasang a man e hkawm lu n ga, Nye a lagaw kataw ai kaw na nang mawai la ya nit dai, n rai ni?

¹ Karai Kasang e, ngai hpe matsan dum la e. Nye a myit masin nang hta shingbyi nga ai majaw, ngai hpe matsan dum la e. Dai jahten shabyak ai amu lai mat wa hkra, Na a singkaw a shingnip hta ngai shawung nga na nngai. ² Tsaw htum ai Karai Kasang ngu ai, Nye a amu shangut ya ai Karai Wa hpe, ngai shaga nga nngai. ³ Ngai hpe mayu kau maw ai wa a shatan nhkan hta na, Lamu de na shi ladawn nna, ngai hpe hkye la nngai; [Selah.] Karai Kasang gaw shi a chyeju hte sadi sahka hpe shangun dat na ra ai. ⁴ Nye a myit masin hkanghkyi ka-ang e rai nga ai, Wan hkru ai ka-ang e ngai kaleng nga nngai: Shinggyim masha ni a wa, ri pala hte, Shanhte a shinglet, dai ai nhtu rai nga malu ai. ⁵ Karai Kasang e, sumsing lamu hta nang grau tsaw nga u ga; Aga ting hta e na a hpung shingkang danhkung nga u ga. ⁶ Shanhte gaw nye a lam hta mahkam hkam nna, Nye a myit masin du krung nga li ai: Shanhte nye a man e nhkun htu ma timung, Tinang dai, dai hta hkrat ma ai. [Selah.] ⁷ Karai Kasang e, nye a myit ngang kang nga ai. Rai sa, nye a myit ngang kang rai nga ai: Ngai mahkawn mangoi nna tingse dum na nngai. ⁸ Nye a arawng sadang e, dumhprang u, Tingse hte sumpyi ni e, dumhprang mu: Jahpawt manap hpe mung ngai jasu na we ai. ⁹ Madu e, masha amyu ni hta, ngai nang hpe shakawn na nngai, Amyu baw ni hta ngai nang hpe tingse dum na nngai. ¹⁰ Karai rai nme law, na a chyeju lamu du hkra, Na a sadi sahka sumwi kaw du hkra, lep nga ai. ¹¹ Karai Kasang e, sumsing lamu hta nang grau tsaw nga u ga; Aga ting hta e, na a hpung shingkang danhkung nga u ga.

¹ Du ni e, nanhte gaja wa dinghpring ai ga tsun nga myit ni? Masha kasha ni hpe dingman ai hku dawdan ya nga myit ni? ² Gaja wa, nanhte a kraw e, nanhte n shawp ai hku maw nna, Ga ntsa e, nanhte a lata na kashun kashe hpe shen karan nga myit dai. ³ Tara n lang ai ni hkritung nna hpre nga ma ai, Masu ga tsun ai ni shangai kaw nna lam dam mat wa ma ai. ⁴ Shanhte a tuk lapu a tuk hte bung nna, Tinang a na hpe pat kau nna, na n na ai pu htum zawn rai nga ma ai. ⁵ Shi gaw lakle sara a nsen n na lu ai, Hpaji chye ai wa a Mandan ga pyi n na nga ai. ⁶ Karai Kasang e, shanhte a n-gup hta na wa baw kau ya mu; Yehowa e, hkanghkyi ni a kawng, daw kau ya mu. ⁷ Lwi ai hka zawn shanhte hkyet mat nna, Ndan shading yang, pala jadaw zawn rai mat mu ga. ⁸ Shanhte gaw, hkawm let mat mat ai lapawp hte, Jan galoi n mu ai nbya zawn, rai nga mu ga. ⁹ Nanhte a di ni ju hpun hte garai n kahtet yang, Katsing timung, hkut sai raitimung, Nbung laru e ahpawt kau na ru ai. ¹⁰ Dinghpring ai wa gaw matai dawp ai mu lu yang, kabu na ra ai; Tara n lang ai ni a asai hta shi a lagaw hpe kashin na ru ai. ¹¹ Shingrai masha ni gaw, “Gaja wa, dinghpring ai ni a matu, sali wunli nga nga nna, Karai Kasang nan ga ting hta e, gaja wa tara dara nga ai,” nga nna tsun na mara ai.

¹ Nye a Karai Kasang e, gumlau ni kaw na ngai hpe mawai la e, Nye a hpyen ni hta na ngai hpe makawp maga da e. ² N hkru ai amu galaw ai ni kaw na ngai hpe mawai la e, Sai kap ai masha ni hta na ngai hpe hkye la e. ³ Yu mu, nye a asak la na shanhte gyam nga ma ai, Ngai hpe jahten na, n-gun ja ai ni zuphpawng nga ma ai: Raitimung, Yehowa e, ngai mara n kap nngai, Ngai yubak mung n galaw nngai. ⁴ Mara n nga timung htim sa wa na, shanhte gat nga ma ai; Ngai hpe karum na rawt nna yu nga e. ⁵ Gaja wa, Israela Karai Kasang, Zaw nawng zaw wa up ai Karai Kasang Yehowa e, Amyu baw nlang hte hpe kawan yu na, rawt u: N shawp ai hku hkan ai ni hpe matsan hkum dum nga et. [Selah.] ⁶ Shanhte shana e bai wa nna, Gwi zawn nying let, Mare grupyin e kayin hkawm nga ma ai. ⁷ N-gup hte grang ai ga shanhte tsun ma ai; Shanhte a nten hta nhtu lawm nga malu ai: Shanhte gaw, “Kadai wa chye lu na kun?” nga nna tsun ma ai. ⁸ Nang chyawm gaw, Yehowa e, shanhte hpe mani kau nna, Amyu baw nlang hte hpe shatan nga mu ai. ⁹ N-gun rawng nga ndai majaw nang hta ngai shamyet nga nngai: Karai Kasang gaw nye a langchyi rai nga ai. ¹⁰ Karai Kasang a chyeju ngai hpe tau la nngai, Ngai hpe gyam ai ni hpe Karai Kasang bai tai lu shangun nngai. ¹¹ Anhte a n-gang, Madu e, Nye a amyu n malap kau u ga, shanhte hpe hkum sat kau mu: Na a n-gun hte shanhte hpe shabra nna jahkrat kau mu. ¹² Shanhte a n-gup na yubak hte nten e shut ai ga, Shanhte a matsa mawa hte masu ai ga majaw, Tinang a gumrawng ai hta ahkang nga mu ga. ¹³ N-yun bu ai hte shanhte hpe jahtum kau mu, Shanhte n nga lu mu ga, jahtum kau mu. Yaku hta mung, lamu ga htum hkra mung, Karai Kasang up nga ai, shanhte hpe shachye mu. [Selah.] ¹⁴ Shanhte shana e bai wa nna, Gwi zawn nying let, Mare grupyin e kayin hkawm nga mu ga. ¹⁵ Lusha na matu shanhte kahkrang, hkawm nna, N hkru kat lu ai, shana tup nga nga ma ai. ¹⁶ Ngai chyawm gaw, na a n-gun hpe mahkawn mangoi na nngai; Nye a langchyi hte ngai ru tsang ai nhtoi e, Nye a shingbyi shara nang rai nga ndai majaw, Na a chyeju hpe, ngai jahpawt e kungdawn nga na nngai. ¹⁷ Nye a n-gun e, ngai nang hpe mahkawn mangoi na nngai: Karai Kasang gaw nye a langchyi hte Ngai hpe chyeju jaw ai Karai Kasang, rai nga ai.

¹ Karai Kasang e, nang anhte hpe kau da nit dai. Nang anhte hpe shabra kau nit dai’ Nang masin pawt nga ndai; Anhte hpe bai shalan shabran la mi. ² Nang gaw dai mungdan hpe anawn dat nna, ga kau nu ai; Dai gaw gari awam nga ai majaw, De a kaprang ga ai hpe shapri ya u. ³ Na a amyu hpe ru tsang nang jahkrum nna, Nang ai tsabyi anhte hpe jaw shalu mi ai. ⁴ Tengman ai lam majaw sharawt na dawnghkawn gaw, Nang hpe hkrit kamyin ai ni hpe, nang jaw nit dai. [Selah.] ⁵ Na a tsawra ai ni gaw lawt lu mu ga, Na a hkra lata hte hkye la nna, anhte hpe htan ya mi. ⁶ Karai Kasang shi a chyoi pra ai hte tsun dan ai gaw, “Ngai kabu na nngai; Shehkem hpe ngai karan na we ai. Suhkot kadit hpe ngai shadawn na we ai. ⁷ Geliad hte Manashe nye a rai nga ma ai; Ehprim gaw nye a baw a magap, Yuda, nye a hkawhkam sumdoi rai nga ma ai. ⁸ Moba nye a lagaw kashin ai di rai nga ai, Edom hta nye a kyepdin ngai kabai tawn na we ai: Hpilisti mung e, nye a matu garu mu: ⁹ Dai ngang ai mare hta e, Ngai hpe kadai shashawn na rai nga a ta? Edom de ngai hpe kadai woi shang na rai nga a ta?” nga ai. ¹⁰ Karai Kasang e, nang anhte hpe kau da nit dai, n rai ni? Karai Kasang e, anhte a luksuk ni hte rau nang n pru sa ndai. ¹¹ Ru tsang ai hta na anhte hpe karum la mi, masha karum ai lam kaman sha rai nga ai. ¹² Karai Kasang hte anhte nlaw lu na ga ai, Shi anhte a hpyen ni hpe, kabye kau na mu ai.

¹ Karai Kasang e, ngai jahtau ai ga madat ya e, Ngai akyu hpyi ai ga matsing ya e. ² Ngai myit kaji nga yang, ga htum ai kaw nna, Ngai nang hpe shaga na nngai: Nye a matu naw tsaw la ai lunghkrung ntsa e, ngai hpe shalun da e. ³ Kaning rai nme law, nye a shingbyi shara hte, Gumlau ni a man e ngang ai langchyi, nang tai nga ndai. ⁴ Na a Sum hta ngai tutnawng e anga nga na nngai, Na a singkaw pawt ai kaw e ngai makoi na nngai. [Selah.] ⁵ Karai Kasang e, nye a ga shaka nang na ndai, Nang hpe hkrit kamyin ai ni hpe nang sali wunli jaw ndai. ⁶ Hkawhkam wa a nhtoi hpe naw jat ya u ga, Shi a shaning prat mi hte prat mi grin nga lu ga. ⁷ Shi gaw Karai Kasang a man e tutnawng e anga nga u ga; Shi hpe bau sin na chyeju hte sadi sahka hpe san da u. ⁸ Shingrai jang, na a amying hpe ngai prat tup mahkawn mangoi na nngai, Shani shagu nye a ga shaka hpe raw na nngai.

¹ Nye a myit masin Karai Kasang a man e amu sha rai nga ai; Shi kaw nna ngai hpe hkyehkrang la ai lam pru nga ai. ² Shi chyu sha nye a lunghkrung, nye a hkyehkrang la ai lam, Nye a langchyi rai nga ai; ngai shamu shamawt ai law law n hkrum na nngai. ³ Kayawt ai shakum hte, nga ai bunghku hpe zawn, Nanhte nlang hte gaw masha hpe sharun na, Gaten du hkra shi hpe htim nga na myit ta? ⁴ Gaja wa, shi a arawng hpe jahten na shanhte bawng nga ma ai; Shanhte masu matsa ai ga hpe sharawng nga ma ai; Tinang a n-gup hte shaman ya timung, Kraw lawang e, dagam dala ga tsun nga ma ai. [Selah.] ⁵ Nye a myit masin e, Karai Kasang kaw asim sha nga u, Shi kaw nna nye a myit mada shara pru nga ai. ⁶ Shi chyu sha nye a lunghkrung, nye a hkyehkrang la ai lam, Nye a langchyi rai nga ai: ngai shamu shamawt ai n hkrum na nngai. ⁷ Nye a hkyehkrang la ai lam hte, nye a arawng sadang Karai Kasang hta rai nga ai. Ngai hpe n-gun jaw ai lunghkrung hte nye a shingwung shara Karai Kasang rai nga ai. ⁸ Amyu masha ni e, Karai Kasang hpe tut tut hpa nga mu; Nanhte a myit shi a man e hpaw dan mu: Karai Kasang gaw anhte a shingbyi shara rai nga ai. [Selah.] ⁹ Gaja wa, darat daroi masha ni nbung hkrai rai nga ma ai; Daru magam masha ni masu ai hkrai rai nga ma ai: Shanhte hpe joi hta shen yu yang, yawng hte wa nbung hta grau tsang ma ai. ¹⁰ Kashun kashe ai hpe hkum machyu myit, Shanyen la lu ai majaw myit hkum gumrawng myit. Sut su yang dai hta myit hkum noi myit. ¹¹ Karai Kasang lang mi ga jaw ni ai: Karai Kasang n-gun a npawt rai nga ai gaw, Lahkawng lang ngai na yu se ai. ¹² Madu e nang kaw nna chyeju pru nga ai: Kaning rai nme law, tinang galaw ai hte maren, Nang langai hte langai hpe bai htang na ndai.

¹ Karai Kasang e, nye a Karai Wa nang rai nga ndai, Jahpawt jau jau e, ngai nang hpe tam na nngai. Hka n rawng ai hkraw ai hte krin ai prang hta e, Nye a myit masin nang hpe shagroi gara nga nna, Nye a hkumshan nang hpe marit nga ai. ² Na a atsam hte hpung shingkang mu lu n ga, Dai chyoi pra ai Nta hta e ngai nang hpe mada nga nngai. ³ Na a chyeju gaw asak hta grau hpu nga ai, Nye a n-gup nang hpe shakawn na ra ai. ⁴ Naw hkrung nga yang, ngai nang hpe sha-a na nngai, Na a amying hte nye a lata hpe ngai sharawt na nngai. ⁵ Nye a yupku hta e nang hpe dum nna, Shana na ladaw hta e nang hpe myit nga yang, ⁶ Nye a myit masin sau ai hpum ai hte zawn hkru kat wa nna, Kabu gara ai aten hte nye a n-gup nang hpe shakawn nga ai. ⁷ Ngai hpe karum ai wa nang rai nga ndai: Na a singkaw a shingnip hta e ngai awng nga nngai. ⁸ Nye a myit masin nang hpe hkan kanan nga nna, Na a hkra lata ngai hpe shadaw ya nga ai. ⁹ Nye a asak hpe jahten na tam ai ni chyawm gaw, Ga sung htum ai shara de shang na ma ai. ¹⁰ Nhtu hte si ai shanhte hkrum na mara ai, Chyahkyawn ni a matu shanhte tai na mara ai. ¹¹ Hkawhkam wa chyawm gaw Karai Kasang hta kabu na ra ai; Shi hta manoi ai ni yawng gumrawng na ma ai: Kaning rai nme law, masu ga tsun ai ni a n-gup pat kau ai hkrum na ra ai.

¹ Karai Kasang e, ngai lajin ai nsen madat ya e; Hpyen ni hpe hkrit ai kaw na, nye a asak bau sin ya e. ² N kaja ai ni a bawng ai hku hte, Shut hpyit ai amu galaw ai shawa hpawng na, ngai hpe makoi magap la e. ³ Shanhte gaw tinang a shinglet hpe nhtu zawn karang nga ma ai: Myit malang ai wa hpe mayun de nna gap na, ⁴ Hka ai ga ngu ai tinang a pala hpe dawn nga ma ai; Hpa mung n hkrit n kang ai, akajawng sha shi hpe gap mu ai. ⁵ Tinang a n kaja ai amu hpe shanhte shangang da nna, Mayun e mahkam hkam na bawng ma ai: “Anhte hpe kadai wa mi mu lu na rai hka?” nga nna tsun ma ai. ⁶ Shanhte gaw n shawp ai lam daw ma ai: Anhte jin saga ai, amu chyip chyip rai nga ai rai nna, Masha a kraw mung, shi a myit mung sung nga ai, nga ma ai. ⁷ Karai Kasang chyawm gaw shanhte hpe gap mu ai; Ndum shami e pala gaw shanhte hpe hkra nna hkala ma ai. ⁸ Tinang a shinglet shanhte hpe kataw shangun mu ai, Shanhte hpe mu ai ni nlang hte baw kanga na mara ai. ⁹ Shaloi masha mahkra hkrit hkungga let, Karai Kasang a amu hpe shana ya nna, Shi galaw ai hku myit yu na mara ai. ¹⁰ Dingman ai ni Yehowa hta kabu gara nga nna, shi hta shingbyi nga na mara ai. Myit malang ai ni nlang hte gaw gumrawng na mara ai.

¹ Karai Kasang e, Ziun hta e, nang hpe angwi apyaw shakawn nna, Nang hpe ga shaka raw lu na, rai nga ai. ² Akyu hpyi ai ga madat mara ai wa e, Masha nlang nang kaw du na mara ai. ³ N hkru ai amu ngai hpe dang wa raitimung, Nang gaw anhte a mara hpe magap da na ndai. ⁴ Na a wing hta e, nang hte ani sha nga lu hkra, Nang san da ai wa gaw, a nga ai; Na a chyoi pra ai htingnu hte na a nta na kaja ai hte, Anhte hkru kat lu na ga ai. ⁵ Anhte hpe hkyehkrang la ai Karai Kasang e, Dingman ai hku hkan nna hkrithpa amu hte, Nang anhte hpe htan ya nga ndai; Aga ting hte tsan tsan e nga ai nammukdara a hpa shara nang rai nga ndai. ⁶ N-gun hpe shi kyit nga nna, Shi a atsam hte bum ni hpe shagrin da wu ai. ⁷ Namukdara a wu ngoi ai hpe mung, De a hka leng ni a kashaw ai hte, Amyu baw ni a kabring kabrawng ai hpe, Shi jasim kau mu ai. ⁸ Dai majaw lamu ga htum hkra nga ai ni gaw, Na a kumla ni hpe hkrit nga ma ai. Jahpawt pru, shana shang ai shara kabu gara nga ma ai. ⁹ Aga hpe nang kawan yu nna, madit ya nga ndai; Nang dai hpe law law jasau wu ai; Karai Kasang a hka nu ntsin hte hpring nga ai; Shanhte a nai mam hpe nang shatut ya mu ai; Rai sa, nang shingrai lajang nga ndai. ¹⁰ De a htai hkang ni hpe nang madit ya nna, De a hkinbawng ni hpe ara sha di shangun wu ai: Marang shaya ai hte nang dai hpe shanyap wu ai, De a tu matu hpe nang shaman ya nga ndai. ¹¹ Nang gaw shaning shanang hpe na a ngamai ai hte jahpring nna, Na a lagaw hkang ni sau lwi nga ma ai. ¹² Nam na udat ni hta mung lwi nga nna, Kawng ni kabu gara ai a kyit nga ma ai. ¹³ Prang ni hta sagu bainam chyam nga nna, Kadit ni hta nai mam ut rai nga ai: Dai hte gaw garu jahtau nga ma ai. Rai sa, mahkawn mangoi let nga ma ai.

¹ Mung shagu Karai Kasang hpe garu mu. ² Shi mying a hpung shingkang hpe mahkawn mu, Shi hpe shakawn yang, arawng sadang jaw mu: ³ “Karai Kasang e, na a amu gade wa hkrithpa rai nga a hka; Na a chyalai n-gun majaw, Na a man e gumlau ni hkayawm na mara ai. ⁴ Mung shagu nang hpe nawku nna mahkawn mangoi na mara ai, na a amying nsang hpe mahkawn mangoi na mara ai,” nga nna tsun mu. [Selah.] ⁵ Wa marit, Karai Kasang a magam amu hpe yu mu; Shinggyim masha ni hpe dan ai amu gaw, hkrithpa amu rai nga ai. ⁶ Shi gaw nammukdara hpe hkarang hte galai wu ai; Shanhte dai hka hpe lagaw hte rap manu ai: Dai shaloi anhte shi hta kabu nga saga ai. ⁷ Shi gaw shi a n-gun hte prat tup up nga ai, Shi a myi, masha amyu ni hpe azi yu nga ai: Je hpre ai ni tinang hkum hpe shagrau lu na ma ai n rai. [Selah.] ⁸ Masha amyu ni e, anhte a Karai Kasang hpe shagrau mu, Shi hpe shakawn ai nsen hte jahtau mu. ⁹ Anhte a myit masin hpe shi jahkrung ya nna, Anhte a lagaw hpe kashawt shangun mi ai n rai. ¹⁰ Rai tim Karai Kasang e, nang anhte hpe chyam yu nit dai, Gumhpraw hpe zawn, anhte hpe shabyawng yu nit dai. ¹¹ Dai htawng kata de nang anhte hpe jahkrat nna, Anhte a shingma hta li ai lit shagun nit dai. ¹² Anhte a baw ntsa e, masha hpe jawn shangun nna, Wan hta, hka hta, anhte shang ga timung, Nang anhte hpe apra asan sha lai kawt shangun mi ai. ¹³ Wan nat hkungga hte na a nta hta ngai shang na nngai: ru tsang hkrum ai shani e, nye a nten hpaw mahka nna, ¹⁴ Nye a n-gup ga shaka tawn da ai hte maren, Dai ga shaka hpe ngai raw na nngai. ¹⁵ Hpum ai wan nat hkungga hte, sagu la hte rau manam pyaw ai baw, Ngai nang hpe nawng ya na nngai, Dumsu hte bainam la hpe mung ngai lang ya na nngai. [Selah.] ¹⁶ Karai Kasang hpe hkrit kamyin ai ni nlang hte e, Wa marit, madat mara nga mu; Nye a myit masin hpe shi hpa galaw ai gaw, Ngai gawn dan na nngai. ¹⁷ Nye a n-gup hte ngai shi hpe shaga nga nna, Nye a shinglet shi hpe shagrau ai ga chye tsun nga ai. ¹⁸ Nye a myit hta shut hpyit ai kap yang gaw, Dai Madu madat ya na n rai. ¹⁹ Ya chyawm gaw Karai Kasang madat ya ni ai. Ngai akyu hpyi ai nsen shi matsing da nga wu ai. ²⁰ Nye a akyu hpyi ai ga n gangkau ai hte, Shi a chyeju hpe n dawm la wu ai majaw, Karai Kasang gaw, a nga ai law.

¹ Karai Kasang e, anhte hpe matsan dum nna shaman ya mi: dinghta ga hta e na a lam, ² Amyu shagu na a hkyehkrang la ai lam, chye na lu mu ga, na a myiman a nhtoi anhte hpe jahtoi ya mi. [Selah.] ³ Karai Kasang e, masha amyu ni nang hpe shakawn mu ga, Rai sa, amyu shagu nang hpe kungdawn mu ga. ⁴ Nang gaw masha amyu ni hpe dingman ai hku tara dara nna, Ga ntsa amyu baw ni hpe lakawn la mu ai majaw, Shanhte awng wa nna, kabu gara let jahtau nga mu ga. [Selah.] ⁵ Karai Kasang e, masha amyu ni nang hpe shakawn mu ga, Rai sa, amyu shagu nang hpe kungdawn mu ga. ⁶ Aga gaw shi a nsi naisi dik hkra shapraw ya sai, Karai Kasang, anhte a Karai Kasang, anhte hpe shaman ya mi ai. ⁷ Karai Kasang anhte hpe shaman ya nna, Aga ting htum hkra shi hpe hkrit hkungga na mu ai.

¹ Karai Kasang rawt nna, shi hpe gumlau ai ni bra mat mu ga, Shi hpe ndawng ai ni shi a man na hprawng mu ga. ² Wan nhkut mawng mat wa ai zawn, Shanhte hpe kamawng kau mu; Wan hta gitbaw byawng mat ai hte maren, Karai Kasang a man e, tara n lang ai ni hten byak mat mu ga. ³ Dinghpring ai ni chyawm gaw kabu gara nga nna, Karai Kasang a man e, sharawng awng nga mu ga: Kabu gara ai hte ja ja pra pra rai nga mu ga. ⁴ Karai Kasang hpe mahkawn mu, Shi a amying nsang hpe mangoi mu; Nam prang e jawn ai wa a matu lam waw mu, Shi a amying Yehowa rai nga ai; Shi a man e sharawng awng nga mu. ⁵ Karai Kasang gaw shi a chyoi pra ai shara hta e, Jahkrai ma ni a kawa, gaida jan ni a jeyang ai wa, rai nga ai. ⁶ Karai Kasang gaw gram nga ai ni hpe htinggaw sharawn nna, Bawngdung ai ni hpe ngamai ai de shashawn mu ai: Je hpre ai ni chyawm gaw zaibru jang hta nga nga ma ai. ⁷ Karai Kasang e, na a amyu a man e nang pru sa nna, Nam mali hta e hkawm langang ai shaloi e, [Selah.] ⁸ Ginding aga gari kawa rai nga nna, Sumsing lamu Karai Kasang a man e yun nga ai: Karai Kasang, Israela a Karai Kasang a man e, Wora Sina bum mung, gari kawa rai nga ai. ⁹ Karai Kasang e, marang mana maga nang jahtu dat nna, Na a nyip mat ai sali wunli hpe shabran wu ai. ¹⁰ Karai Kasang e, na a hpung dai hta e zim nga nna, Nang gaw matsan mayan ni a matu ngamai ngamu lajang da nu ai. ¹¹ Dai Madu gaw mungga jaw dat mi ai; Shi ga htawn tsun ai num ni, hpung kaba rai nga ma ai. ¹² Luksuk ni a hkawhkam ni hprawng mat wa ma ai, Rai sa, shanhte hprawng mat wa ma ai rai nna, Nta e hti nga ai num gaw, dai lanep karan na ra ai. ¹³ Ulawng ni a lapran e, nanhte taw nga myit yang gaw, Hkrudu a singkaw hpe gumhpraw hte kayawp nga nna, Shi a singkaw mun, tsit kabrim ai ja hte ala nga ai. ¹⁴ Chyahtum chyalai n-gun rawng ai Karai Kasang gaw, dai mung hta e hkawhkam ni hpe shabra kau mu ai shaloi, Zalmon hta e hkyen hkrat ai zawn, rai nga ai. ¹⁵ Bashan bum gaw, Karai Kasang a bum rai nga ai, Bashan bum, pungding marawng ai bum rai nga ai. ¹⁶ Pungding law law marawng ai bum ni e, Karai Kasang anga nga na matu shi lata la ai bum hpe, nanhte hpa rai lagyim yu nga myit ta? Yehowa gaw dai de prat dingsa e anga nga na ra ai. ¹⁷ Karai Kasang a hpyen leng ni mun lahkawng hte, hkying mi hte hkying mi rai nga lu ai; Dai Madu gaw dai ni hte rau rai nga ai: Chyoi pra ai Sina bum e zawn, bai rai nga ai. ¹⁸ Karai Kasang Yehowa gaw dai yang e nga lu n ga, Tsaw ai shara de nang lung wa nna, Bawngdung na ni hpe rim la wa mu ai; Masha ni hta na kumhpa lu la nga ndai, Rai sa, je hpre ai ni hta na pyi, nang lu la nga ndai. ¹⁹ Dai Madu gaw lani hte lani a nga u ga; Anhte a lit hpe shi gunhpai nga ai, Dai Karai Wa gaw anhte a hkyehkrang la ai lam rai nga ai. [Selah.] ²⁰ Karai Wa gaw anhte hpe hkyehkrang la ai Karai Wa, rai nga ai, Madu Yehowa mung, si ai kaw na pru wa lu ai lam, hpaw ya nga ai. ²¹ Gaja wa, Karai Kasang shi a hpyen ni a baw, Tinang a mara hte hkawm ai, njaw kaba tu ai pungding hpe a byen ga na wu ai. ²² Dai Madu gaw, “na a lagaw asai hta nang gumchya lu nna, Na a gwi ni a shinglet gumlau ni hpe mata lu mu ga; ²³ Ngai shanhte hpe Bashan de na shabai la nna, Nammukdara na hpung wai hta na nhtang dat na mawe ai,” nga ai. ²⁴ Karai Kasang e, nang nawt sa wa ai hpe, nye a Karai Wa hte Hkawhkam chyoi pra ai lam hkan nna, Nawt sa wa ai hpe, shanhte mu ma ai. ²⁵ Mahkawn mangoi ai ni shawng sa wa nna, Tingse dum ai ni hpang hkan ma ai: Shupsheng dum let mahkawn ni ka-ang e sa ma ai. ²⁶ Israela a npawt manat ai ni e, shawa hpawng e Karai Kasang hpe sha-a mu; rai sa, dai Madu hpe sha-a mu. ²⁷ Dai yang e, kaji timung, shanhte hpe up ai Ben-yamin hte, Yuda agyi salang ni, mung damak rai nga ma ai: Zebulun a du salang ni hte, Naphtali a du salang ni mung, lawm nga ma ai. ²⁸ Na a Karai Kasang, na a n-gun atsam hpan ya sai; Karai Kasang e, anhte a matu nang galaw ai hpe shagrin da ya mi. ²⁹ Yerusalem mare e nga ai, na a Htingnu majaw, Hkawhkam ni nang hpe kumhpa sak na ma ai. ³⁰ Maiaw pa na matse labye, usu hpung ni hte Amyu ni a dumsu kasha ni, gumhpraw tawng lang let, Sa dingnyawm mu ga, shanhte hpe daru kau mu: Majan tsaw ai amyu ni hpe shabra kau mu. ³¹ Egutu mung na arawng lu ai ni, du na mara ai; Hkusha gaw Karai Kasang hpang de shi a lata ladawn na wu ai. ³² Dinghta ga na mungdan ni e, Karai Kasang hpe mahkawn mu, dai Madu hpe mahkawn mangoi mu. [Selah.] ³³ Chyi nma kaw nna sumsing lamu hta jawn ai wa hpe mahkawn mu; Yu mu, shi gaw nsen kaba hte jahtau dat wu ai. ³⁴ Karai Kasang hpe hkang na ahkang jaw mu: Shi a hpung shingkang Israela ntsa e, Shi a hpung dagu sumw i hta, danhkung nga ai. ³⁵ Karai Kasang e, na a htingnu ni hta, Hkrithpa wa nang rai nga ndai; Israela Karai Wa gaw shi a amyu hpe, N-gun lagaw hte atsam kaba jaw wu ai: Karai Kasang gaw, a nga u ga law.

¹ Karai Kasang e, ngai hpe hkyehkrang la e; nye a asak du hkra hka lim nga ai. ² Sung ai hkumpup hta ngai chyat nga nna, kabye shara n hkap nga ai. Sung ai hka lam de ngai rai wa nna, hka hpuntun ni ngai hpe dip ni ai. ³ Shaga ai hte ngai hki ba nga nngai, nye a mayu kasa mat sai; nye a Karai Kasang hpe ala nga let, nye a myi a mam mat sai. ⁴ Mara n nga timung, ngai hpe ndawng ai ni, Nye baw a kara hta grau law nga ma ai: Ngai hpe jahten mayu ai, masu ai gumlau ni, n-gun ja nga ma ai. Ngai n kashun la ai arai hpe pyi, Ngai bai ya lu nga nngai. ⁵ Karai Kasang e, ngai angawk ai amu nang chye nga ndai, nye a mara mung, na a man e up da lu ai n rai. ⁶ Zaw nawng zaw wa up ai Madu, Yehowa e, Nang hpe myit mada nga ai ni, Nye a majaw kaya kahpa n hkrum mu ga; Israela a Karai Kasang e, Nang hpe tam nga ai ni, Nye a majaw arawng n hpoi mu ga. ⁷ Kaning rai nme law, na a majaw, Ngai shatan nhkan ai hkrum nga nna, ngai myiman sum nga nngai. ⁸ Nye hpunau ni hta tsasam wa zawn ngai rai nga nna, Nu a kasha ni hta sumtsan masha ngai rai mat ni ai. ⁹ Na nta hta manoi ai nja nhpra myit ngai hpe sha kau nna, Nang hpe shatan ai ni a ga, nye a ntsa e mara nga ai. ¹⁰ Nye a myit masin hkrap let lusha gam nga yang, Shatan nhkan hkrai hkrai hkrum sha nga nngai. ¹¹ Nye a hpun palawng lachyit nba hpun we yang, Shanhte a jaw shara ngai tai nga nngai. ¹² Mare chyinghka e dung ai ni, nye a lam kajai nna, Chyaru nang ai ni, laka ga hte ngai hpe asawng ma ai. ¹³ Ngai chyawm gaw, Yehowa e, Kaja ai ladaw e, nang hpe akyu hpyi nga nngai; Karai Kasang e, na a chyeju kaba nga ai majaw, Hkyehkrang la lu ai sadi sahka ga hte, ngai hpe htan ya e. ¹⁴ Dai hkumpup hta ngai n chyat n ga, Ngai hpe mawoi la e; Ngai hpe ndawng n yawt ai ni kaw na mung, sung la ai hka lam kaw na mung, ngai hpe mawai la e. ¹⁵ Hka hpungtun ni ngai hpe n dip n ga, hka hpungwai ni ngai hpe n mayu kau nna, Dai hka htung mahka nye a ntsa e n pat u ga. ¹⁶ Yehowa e, ngai hpe htan ya e; Kaning rai nme law, na a chyeju kaja nga ai; Na n-gaw nwai ai myit kaba nga ai hte maren, ngai hpang de kayin wa rit. ¹⁷ Ru tsang ai ngai hkrum nga nngai majaw, Na a mayam kaw na, na a myiman hkum kayin la et; alawan ngai hpe htan ya e. ¹⁸ Nye myit masin hpe hkye la na, sit wa rit; Nye a gumlau ni a majaw, ngai hpe hkrang la e. ¹⁹ Nang chyawm gaw, ngai hkrum ai shatan nhkan, Kaya kahpa, aroi arip hpe, chye ya nga ndai: Ngai hpe hpyen ai ni nlang hte gaw, na a man e rai nga ma ai. ²⁰ Shatan nhkan ai hte ngai myit htum nngai, Si hkra ngai machyi nga nngai; Myit yu machyi ai masha, ngai tam timung, n nga ai, Shangwi shapyaw ai wa mung, ngai n mu nngai. ²¹ Nye a lusha hta shanhte shagri bang jaw nna, Hpang gara jang, ngai hpe ntsin hkri shalu mi ai. ²² Shanhte a sha ku tinang a matu sumgawn zawn, Hkrit na n dum ai shaloi, mahkam zawn, tai malu ga. ²³ Shanhte a myi n mu lu hkra, shinggang malu ga; Shanhte a nshang tut tut gari nga malu ga. ²⁴ Na a n-yun bu ai shanhte a ntsa e ru bun nna, Na a sindawng kahtet ai shanhte hpe lep mu ga. ²⁵ Shanhte a htingra a katsi katsang rai mat nna, Tinang a sum ni hta kadai mung n nga malu ga. ²⁶ Kaning rai nme law, nang anu ai wa hpe, Shanhte htan shachyut ma ai rai nna, Nang galun nna nma shakap ai wa hpe, Shanhte bai shanan ma ai. ²⁷ Shanhte a mara ntsa e, mara kahtap ya nna, Na a dingman ai shara hta e, Shanhte hpe hkum shashawn la mu. ²⁸ Asak laika hta na shanhte hpe arut kau nna, Dingman ai ni a mying ka da yang, shanhte n lawm mu ga. ²⁹ Ngai chyawm gaw matsan mayan hte, nni nkri hkrum nga nngai. Karai Kasang e, na a hkyehkrang la ai chyeju ngai hpe shagrau n ga. ³⁰ Karai Kasang a amying nsang hpe, mahkawn mangoi ga hte ngai shakawn na we ai: Chyeju dum let ngai shi hpe shagrau na we ai. ³¹ Yehowa dai lam hpe, utang hte nrung tu nna, Lahkru ga ai usu hta, grau tsaw nga ai. ³² Myit nem ai ni dai lam hpe mu nna, kabu gara na mara ai. Karai Kasang hpe tam ai ni e, myit masin bran nga malit ga. ³³ Yehowa gaw matsan mayan ni hpe madat ya nga nna, Shi bawngdung ai ni hpe, n gawn n sawn di mu ai n rai. ³⁴ Sumsing lamu hte ginding aga, nammukdara hte De a hkrung mahkrung hte gaw, shi hpe shakawn kungdawn nga mu ga. ³⁵ Karai Kasang gaw Ziun hpe hkyehkrang la nna, Yuda a mare ni hpe de ya nga mu ai. Dai ni hta e shanhte nga nga nna, madu lu na mara ai. ³⁶ Shi a ali ama ni a matu mara mung, dai hte hpe lu la nna, Shi a mying nsang tsawra ai ni dai hta e, anga nga na mara ai.

¹ Karai Kasang e, ngai hpe mawai la na, Yehowa e, ngai hpe karum na, lawan rit. ² Nye a sumri sumdam hpe dan na tam ai ni, Kaya kahpa hte myiman sum ai hkrum mu ga; Ngai hpe tsin-yam tsindam jahkrum mayu ai ni, Kanut mat wa nna arawng sum mat mu ga. ³ “Da, da,” nga nna tsun ai ni, Shanhte galaw ai kaya kahpa amu a majaw, kanut mat wa mu ga. ⁴ Nang hpe tam ai ni nlang hte gaw, Nang hta awng nna, kabu gara nga mu ga; Na a hkyehkrang la ai lam tsawra ai ni gaw, “Karai Kasang galu kaba nga u ga,” nga nna tut tut a tsun nga mu ga. ⁵ Ngai nni nkri hte matsan mayan hkrum nga nngai; Karai Kasang e, ngai kaw lawan rit, Ngai hpe karum ai wa hte, mawai la ai wa nang rai nga ndai: Yehowa e, hkum ganung nga et law.

¹ Yehowa e, nang hta ngai shingbyi nga nngai: Kaya kahpa galoi mung, n hkrum na nngai. ² Na a dinghpring ai hte ngai hpe mawai la nna raw dat e, Na a na ngai hpang de kayin nna ngai hpe hkyehkrang la e. ³ Nye a matu, ngai galoi mung shang lu na, grin ai lungpu tai u; Nye a lunghkrung hte ngang ai wahpang nang rai nga ndai majaw, Ngai hpe hkyehkrang la na ga nang hkangda nit dai. ⁴ Nye a Karai Kasang e, tara n lang ai ni a lata hte, N shawp ai hte aja awa re ai ni a lata na, ngai hpe mawai la e. ⁵ Kaning rai nme law, Madu, Yehowa e, Brang ram prat kaw nna nye a myit mada shara hte, Nye a makam masham nang rai nga ndai. ⁶ Chyangai kaw nna nang hta ngai shamyet ni ai; Nu a hkritung na nang ngai hpe shapraw la nit dai: Ngai nang hpe tut tut shakawn nga na nngai. ⁷ Law law ni a man e, mauhpa zawn ngai rai nga nngai; Raitimung, nang gaw nye a ngang ai shingbyi shara rai nga ndai. ⁸ Nye a n-gup nang hpe shakawn ai ga hte, Shani tup na a arawng sadang hte, hpring nga ai. ⁹ Ngai dingla jang ngai hpe hkam kabai kau et, Nye a n-gun yawm mat yang, ngai hpe hkum jahti da et. ¹⁰ Kaning rai nme law, gumlau ni nye a lam tsun nga ma ai; Nye a asak hpe gyam yu ai ni rau bawng nna, ¹¹ “Karai Kasang shi hpe jahti da nu ai, Hkan rim la gaw, shi hpe hkrang la na wa n nga ai,” nga nna tsun ma ai. ¹² Karai Kasang e, ngai hte tsan tsan hkum nga et; Nye a Karai Wa e, ngai hpe karum na lawan rit. ¹³ Nye a asak hpe gumlau na maw ai ni, Kaya hkrum nna htum mat wa mu ga; Ngai hpe n hkru ai hku galaw na tam ai ni, Shatan nhkan hte arawng hpoi ai ka-up nga mu ga. ¹⁴ Ngai chyawm gaw tut tut myit mada nga nna, Nang hpe shakawn ai ga, a jat nga na nngai. ¹⁵ Nye a n-gup shani tup na a dinghpring ai lam hte, Na a hkyehkrang la ai lam hpe, gawn nga na we ai: Dai gade law nga ai gaw, ngai n dang sawn nngai. ¹⁶ Madu Yehowa a n-gun chyalai hte ngai sa du nna, Na a dinghpring ai hpe chyu sha, madun dan na nngai. ¹⁷ Karai Kasang e, brang ram prat kaw nna, Nang ngai hpe sharin achyin ya nit dai; Ya du hkra na a lamik kumla hpe ngai madun dan nga nngai. ¹⁸ Dai majaw Karai Kasang e, prat mi hte prat mi na a lata, Hpang na ni hpe na a atsam ngai madun dan ya ai du hkra, Dingla nna baw hpraw timung, ngai hpe hkum jahti da et. ¹⁹ Karai Kasang e, na a dinghpring ai gaw grai tsaw nga ai: Magam amu shachyen ai Karai Kasang e, Nang hte kadai wa bung lu na rai nga a ta? ²⁰ Tsin-yam tsindam kaba law law anhte hpe madun ai wa e, Nang anhte hpe bai shalan shabran la nna, Ga a sung htum ai kaw na bai sharawt la na ndai. ²¹ Ngai hpe arawng sadang shajat ya nna, Ngai hpe bai shangwi shapyaw la e. ²² Shaloi, Karai Kasang e, nang hte na a sadi sahka hpe, Tingse hte ngai shakawn kungdawn na nngai: Israela a chyoi pra ai Wa e, Tingse hte ngai nang hpe mahkawn mangoi na nngai. ²³ Nang hpe mahkawn mangoi nga yang, Nye a n-gup hte, nang hkyehkrang la ai nye a amyit masin gaw, Ja ja kabu nna jahtau na ra ai. ²⁴ Nye a shinglet mung, na a dinghpring ai lam hpe, Shani tup shana ya na ra ai; Kaning rai nme law, ngai hpe n hkru ai hku maw ai ni, Kaya kahpa hte myiman sum ai hkrum nga ma ai.

¹ Karai Kasang e, hkawhkam wa hpe na a tara dara ai lam, Hkawhkam a kasha hpe, na a dinghpring ai myit, jaw ya u. ² Shi gaw na a amyu hpe dinghpring ai hku, Na a nni nkri hkrum ai ni hpe tara malang ai hku, jeyang nga u ga. ³ Dingman ai hku majaw, bum ni hte kawng ni gaw, Amyu masha ni hpe ngwi pyaw lam tawn da na mu ai. ⁴ Nni nkri hkrum ai amyu masha ni hpe shi tara dara ya u ga; Matsan mayan ni a kashu kasha ni hpe shi hkye la nna, Zingri zingrat ai wa hpe a dup kau mu ga. ⁵ Shu mashi shu masha, jan shata anga nga ai prat dingsa, Shanhte nang hpe hkrit hkungga mu ga. ⁶ Udat shara e, marang htu ai zawn, Aga hta marang n yit yang na zawn, shi yu wa ruga. ⁷ Shi a aprat e dingman ai ni awng wa mu ga, Shata mat mat ai du hkra ngwi kaba rai nga lu u ga. ⁸ Nammukdara kaw nna nammukdara du hkra, Uhprat hka nu kaw nna lamu ga htum hkra, shi up nga u ga. ⁹ Nam mali e nga ai ni shi a man e dingnyawm nna, Shi hpe gumlau ai ni, ga nhpu mata mu ga. ¹⁰ Tarshi hte zunlawng ni a hkawhkam ni kumhpa sak nna, Sheba hte Seba hkawhkam ni kang bang nga mu ga. ¹¹ Hkawhkam yawng hte gaw shi hpe nawku nna, Masha amyu shagu shi hpe daw nga mu ga. ¹² Kaning rai nme law, shaga nga ai matsan ai wa hte, Nrum ntau n lu ai nni nkri hkrum ai wa hpe, shi mawai la na ra ai. ¹³ Hti n mai ni hte, matsan mayan ni hpe shi matsan dum nna, Matsan mayan ni a myit masin hpe hkyehkrang la na nu ai. ¹⁴ Zingri zingrat hte dip sha ai kaw na, shi shanhte a asak hpe shaw la nna, Shanhte a asai gaw shi a myi hta hpu la nga na malu ai. ¹⁵ Shaloi shi hkrung nga nna, shi hpe Sheba a aja jaw mu ai rai nna, Shi a matu mara tut tut akyu hpyi ya na mara ai: Shani shanang shi hpe shaman ya na mu ai. ¹⁶ Mungdan na bum ni a pungding du hkra, nai mam paw wa nna, Lebanon zawn, de a nsi naisi a hkung nga lu ga: mare masha ni mung, lamu ga na nam lap zawn prut wa mu ga. ¹⁷ Shi a mying nsang gaw tutnawng e anga nga lu ga; Jan grin nga ai zawn shi a amying pu nga lu ga: Shi a majaw masha ni a lu nga mu ga; Nlang hte gaw shi hta sharawng awng nga mu ga. ¹⁸ Israela a Karai Kasang, Yehowa Karai Kasang gaw, a nga u ga; Shi chyu sha mauhpa amu galaw nga ai. ¹⁹ Shi a danhkung nga ai amying nsang prat dingsa e, a nga u ga; Mungdan ting gaw shi a hpung shingkang pri rai nga u ga law. Amen, rai sa, Amen. ²⁰ Yese a kasha Dawi a akyu hpyi ai ga ngut sai.

¹ Gaja wa, Karai Kasang gaw Israela hta na Myit sanseng ai ni hpe n-gaw nnyeng rai nga ai. ² Ngai chyawm gaw, lagaw ganoi noi kaprau nna, Kabye kashawt magang wa nga nngai. ³ Tara n lang ai ni a ngamai ai lam mu mada yang, Grang ai ga tsun ai ni hpe, ngai manawn nga nngai. ⁴ Shanhte tsin-yam tsindam, galoi n hkrum ma ai, Shanhte a kan ahpum asau rai nga malu ai. ⁵ Masha gale zawn shanhte ru tsang ai n hkrum ma ai, Masha kaga zawn machyi makaw n hkrum ma ai. ⁶ Dai majaw gumrawng ai gaw shanhte a du hta gali da nna, Shanhte bu hpun ai nba, kashun kashe re ai, rai nga ai. ⁷ Shanhte a myi hpum nna myi myi rai malu ai. Shanhte myit ai hku ladu lai nga malu ai. ⁸ Shanhte roi nna kashun kashe na lam tsun ma ai. Gumrawng gumtawng ga a tsun nga ma ai. ⁹ Shanhte a n-gup lamu hte nhtan shai nna, Shanhte a shinglet aga hta len hkawm nga malu ai. ¹⁰ Dai majaw, Karai Wa masha ni pyi shanang sa nna, Ntsin hpe chyup ai zawn, n hkru ai hpe law law chyup nga nna, ¹¹ “Karai Wa kaning rai chye lu na kun? Tsaw htum ai wa gaw chye chyang lu na a hka?” nga ma ai. ¹² Yu mu, tara n lang ai ni gaw shingrai nga ma ai; Galoi mung ngamai wa nna, shanhte a hpung kaba wa malu ai. ¹³ Gaja wa, ngai gaw nye a myit kaman sha shapra nga nna, Nye a lata hpe, mara n kap hkra, kashin kau we ai. ¹⁴ Ngai gaw shani tup nni nkri hkrum nga nna, Jahpawt shagu sharin achyin ai hkrum nga nngai. ¹⁵ Raitimung, “Kaman sha rai nga ai,” ngu nna ngai tsun taw gaw, Ndai prat na, na a kashu kasha ni hpe, Ngai shut kau ai wa rai na nngai. ¹⁶ Ndai amu hpe chye lu hkra myit aru yu yang, Dai gaw nye a matu nau yak la nga ai. ¹⁷ Dai hpang e, Karai Wa a nta hta ngai shang nna, Shanhte a htum mat na hpe myit dum lu nngai. ¹⁸ Gaja wa, nang shanhte hpe manen ai shara hta tawn da nna, Le, hten mat na shara de jahkrat kau mu ai. ¹⁹ Ahkring sha shanhte hten mat wa ma hka! Tsin-yam kaba hte shanhte atsai awai hten mat masai. ²⁰ Yup rawt yang, yupmang hpe hpa n nawn ai zawn, Madu e, nang hprang yang, shanhte a shingna hpe pyi matsat na ndai. ²¹ Nye a myit masin kahtet nga nna, Nye a nhkyun ni hpam nga li yang, ²² Hpa mung n chye ai angawk ai wa hte, Na man e yamnga zawn, ngai rai nga nngai. ²³ Raitimung, ngai gaw tut tut nang hte rau nga nga nna, Nye a hkra lata hpe nang jum ya nga ndai. ²⁴ Na hpaji daw ai hte nang ngai hpe woi la nna, Hpang jahtum e, hpung shingkang hte ngai hpe hkap la na rai nga ndai. ²⁵ Sumsing lamu hta e, ngai kadai hpe lu nga n ta? Nang hpe lu yang ngai mungkan ga hpe hpa n ra nngai. ²⁶ Nye a hkumshan hte myit masin mat wa timung, Karai Kasang gaw nye a myit lunghkrung hte, prat dingsa na sali wunli rai nga ai. ²⁷ Yu mu, nang hte tsan gang ai ni hten mat masai, Nang hte dingsa sahka wa ai ni hpe, nang shaprai kau nga ndai. ²⁸ Karai Kasang kaw sit wa na, nye a ngamai shara rai nga ai: Na a magam amu nlang ngai gawn dan nga lu hkra, Yehowa hta nye a kamsham shara ngai tawn da se ai.

¹ Karai Kasang e, nang anhte hpe hpa rai tutnawng e, kau da nga n ta? Na a ndat na sagu hpung hpe, nang hpa rai myit kahtet nga n ta? ² Moi moi e nang mari da ai na a hpung hpe, Nang dung nga yu ai Ziun bum hte, Nang hkrang shaw la ai sali wunli amyu hpe, dum nga u. ³ Tut tut marawng marang rai nga ai de sa yu u, Gumlau ni a chyoi pra ai shara hpe hpya kau manu ai. ⁴ Na a tara jarawp kata e, hpyen ni shabam nga nna, shanhte a kumla ni dai yang e, tawn da nga ma ai. ⁵ Laja ai shalawng hpe nwa hte masha hkyen kau ai zawn, dai yang e rai mat sai. ⁶ Ya, shanhte gaw de a hpunpyen maka yawng hte hpe Sumdu, nwa hte abyen grawp kau manu ai. ⁷ Na a chyoi pra ai shara hpe shanhte nat kau mu ai; Na a mying nsang nga ai shara hpe, Shanhte ga du hkra awu asin di kau mu ai. ⁸ Shanhte gaw, “Yawng hte hpe jahten kau gaw,” nga nna kraw lawang e, tsun ma ai. Mung ting na Karai Wa a tara jarawp nlang hte hpe, shanhte nat kau mu ai. ⁹ Anhte a kumla ni hpe anhte n mu lu gaw ai: Ya aten e myihtoi n pru n nga ai; Anhte hta ladaw langa chye ai masha n nga ai. ¹⁰ Karai Kasang e, gaten du hkra, hpyen ni shatan lu na rai nga ma ta? Gumlau ni gaw na a amying nsang hpe, tut tut asawng nga lu na rai ma ni? ¹¹ Na a hkra lata hpe nang hpa majaw dawm la wu ta? Dai gaw sinda na shaw nna, shanhte hpe jahten kau mu. ¹² Raitimung Karai Kasang gaw moi nna nye a hkawhkam rai nga ai. Shi gaw dinghta ga hta e hkyehkrang la ai lam, hpaw nu ai. ¹³ Nang gaw na a n-gun hte nammukdara hpe jahka nu ai; Hka kata na nga matse ni a baw, nang baw kau nu ai. ¹⁴ Baren ni abaw hpe nang agrawp kau nna, Nam mali na amyu ni a shahpa shatai nu ai. ¹⁵ Hka deng hte hka shi hpe nang shalawi nit dai; Tut tut a lwi nga ai hka nu ni hpe, nang shahkyet kau manu ai. ¹⁶ Shani hpe mung, shana hpe mung nang madu nga ndai, Shata hkum hte ajan hpe mung, nang hpan da nit dai. ¹⁷ Mung shagu a lamu ga jarit nang shadawn ya nna, Nlum ta hte ginhtawng ta tawn da ndai. ¹⁸ Yehowa e, da ndai dum u: gumlau ni shatan nna, mana ai amyu gaw na a amying nsang hpe roi ma ai. ¹⁹ Na a hkrudu a asak hpe matse labye ni hpe hkum ap ya mu; Na a nni nkri hkrum ai ni hpe tutnawng e hkum malap kau et. ²⁰ Tawn da sai ga shaka hpe myit dum u: Dai mung na njut nnaw shagu hkan e, kashun kashe re ai shara hkrai rai nga ai. ²¹ Zingri hkrum ai ni kaya kahpa hte n wa mu ga: nni nkri hte matsan mayan hkrum ai ni, Na a amying nsang hpe shakawn nga mu ga. ²² Karai Kasang e, rawt u, na amu hpe yu maga u: Mana ai wa gaw tut e nang hpe a shatan nga ai, dum u. ²³ Nang hpe hpyen ai ni a nsen hkum malap kau et, Nang hte nhtan shai ai ni a ngoi wu ai nsen gaw, tutnawng e a jat wa nga ai law.

¹ Karai Kasang e, anhte nang hpe shakawn ga ai, anhte chyeju dum nna, na a amying ni nga ai: Na a mauhpa amu shanhte gawn dan ma ai. ² “Rai sa, ahkying ladaw ngai tawn da nna, Malang ai hku dawdan na nngai. ³ Aga hte dai hta nga ai ni nlang run wa yang, De a shadaw ni hpe, ngai madi nga nngai. [Selah.] ⁴ Grang ai ni hpe, grang ai ga hkum tsun myit, Tara n lang ai ni hpe, Nung hkum sharawt myit, ⁵ Tsaw ai de nrung hkum sharawt da myit, Du ja ai hte ga hkum tsun nga myit,” Nga nna ngai shanhte hpe tsun da ni ai. ⁶ Gaja wa, sinpraw sinna de na mung, Nam mali hkan na bum ni hta nna mung, Dawdan shara n du lu ai. ⁷ Karai Kasang chyu sha tara agyi rai nga ai: Langai mi hpe shi shagrit kau nna, Langai mi hpe shagrau wu ai. ⁸ Yehowa a lata hta gawm langai mi nga nna, Nsa ja ai tsabyi hte kayau ai tsi hte hpring nga ai: Dai hta na shi ru dat wu ai rai nna, Ga ntsa na tara n lang ai ni nlang hte gaw De a chyabu du hkra shup nna, lu lu na rai ma ai. ⁹ Ngai chyawm gaw, tutnawng e hkai dan nna, Yaku a Karai Kasang hpe mahkawn mangoi na nngai. ¹⁰ Yubak kap ai ni a nrung nlang hte hpe, ngai daw kau na nngai; Dingman ai ni a nrung chyawm gaw, sharawt da ai hkrum na ra ai.

¹ Yuda mung hta e, Karai Kasang hpe chye ma ai: Israela hta e, shi a amying galu kaba nga ai. ² Shalem hta e, shi a sum nga nga nna, Ziun bum hta e, shi a shanu shara rai nga ai. ³ Dai yang e, ndan myihprap ni hte, N-gang, nhtu hte hpyen rai ni hpe, Shi agrawp kau nu ai. [Selah.] ⁴ Nang gaw lanep lu la ai bum ni a ntsa e, Shingkang hte arawng kaba lu nga ndai. ⁵ Nden ja ai ni hten byak re ai hkrum sha nna, Ndum shami yup taw nga ma ai; N-gun ja ai ni tinang a lata hpe pyi, n dum ma ai. ⁶ Yaku a Karai Kasang e, nang daru nga ndai majaw, Gumra hte hpyen leng, yup kaba hta yup ma ai. ⁷ Nang gaw hkrithpa Wa rai nga ndai: Nang masin pawt bu nga yang, Na a man e kadai tsap lu na rai nga a ta? ⁸ Nang gaw sumsing lamu de nna jeyang ai lam shana ya ndai; Karai Kasang gaw tara dara na hte, ⁹ Mungkan ting na myit gyip ai ni hpe hkyehkrang la na rawt wa ai shaloi e, Lamu ga hkrit nga nna atsin sha nga nga ai. [Selah.] ¹⁰ Gaja wa, na a masin pawt ai daw mi sha, Nang shingkyit zawn kyit nga yang, Masha wa a masin pawt ai gaw, Nang hpe shakawn kungdawn na ra ai. ¹¹ Nanhte a Karai Kasang Yehowa hpe, Ga shaka tawn da nna raw dat mu: Grupyin e nga ai ni nlang hte gaw, Hkrit mai ai wa hpe kumhpa sa sak mu. ¹² Wa zep ai du ni a nsa hpe, shi jahtum kau ya mu ai. Ga ntsa hkawhkam ni a matu shi hkrithpa rai nga ai.

¹ Nye a nsen hte ngai Karai Kasang hpe jahtau nga nngai; Karai Kasang kaw nye a nsen shapraw yang, shi ngai hpe madat ya na re ai. ² Ngai ru tsang ai nhtoi hta e, dai Madu hpe ngai tam nga nngai. Shana e pyi nye a lata hpe ngai a ladawn da nga nngai; Nye a myit masin ngwi pyaw ai hpe kau da nu ai. ³ Karai Kasang hpe dum yang, ngai madai nga nngai; Myit sumru nga yang, nye a wenyi htan wa li ai. [Selah.] ⁴ Nye a myi hpyi ni hpe nang jum shadang nga ndai, N di n da ngai rai nga nna, ga n chye tsun nngai. ⁵ Moi na lai mat wa ai nhtoi ni hte, chyaloi nhkoi na prat ni hpe, ngai myit yu nga nngai. ⁶ Nye a shana na mahkawn mangoi ga hpe ngai dum nga nna, Nye a kraw hta e myitsumru nga nngai Nye a wenyi mung Madu a lam a gawn yu nga ai. ⁷ Madu gaw tutnawng e kau da nga na kun? Shi a myiman bai n madun na sahka? ⁸ Shi a chyeju tutnawng e htum mat sahka? Shi a ga ndat prat mi hte prat mi hten mat lu na kun? ⁹ Karai Wa gaw matsan dum na malap kau a ni? Masin pawt let shi a sumnung ai myit hpe, Dawm la kau na nu ni? [Selah.] ¹⁰ Shaloi ngai gaw, “Dai lam ngai nan chyum sha ai hte, Tsaw htum ai Wa a hkra lata galai ai majaw rai nga ai,” nga nna ngai tsun nga nngai. ¹¹ Yehowa a amu bungli ngai shana ya nna, Chyaloi nhkoi na mauhpa bungli hpe, adum nga na nngai. ¹² Nang galaw ai lam nlang hte hpe ngai myit nga nna, Na a magam amu hpe myit aru yu na nngai. ¹³ Karai Kasang e, na a lam chyoi pra ai lam rai nga ai; Karai Kasang zawn kaba ai hpara gaw, kadai rai nga a ta? ¹⁴ Nang gaw mauhpa amu galaw ai Karai Wa rai nga ndai, Masha amyu ni hta, na a atsam danhkung nga ai. ¹⁵ Na a amyu, Yaku hte Yosep a kashu kasha ni hpe, Na a hkra lata hte nang shaw hkrang la mu ai. [Selah.] ¹⁶ Karai Kasang e, hka hpung ni nang hpe mu ma ai. Hka hpung ni nang hpe mu nna, hkrit kawam nga ma ai: Sung htum ai shara ni mung, kanawng nga ma ai. ¹⁷ Sumwi ni ntsin jahtu nna, lamu gaw mu ngoi nga ai; Na a pala ni mung, bra hkawm nga ma ai. ¹⁸ Nbung laru hta e, na a mu ngoi ai ngoi nga nna, Myihprap ni mungkan ga hpe jahtoi ya nga ai: Lamu ga mung gari nna awam nga ai. ¹⁹ Na a lam nammukdara hta e rai nga nna, Nang sa ai hku, hka kaba ni hta e rai nga ai: Na a lagaw hkang hpe kadai n chye lu ai. ²⁰ Nang gaw Mawshe yan Arun a lata hte, Na a amyu hpe sagu hpung hpe zawn, woi wa nu ai.

¹ Nye a amyu e, nye a tara hpe na la mu, Nye a n-gup ga hpe madat mara la mu. ² Nye a n-gup, ga shagawp hte ngai hpaw nna, Chyaloi nhkoi na gumwai ga, htai dan na nngai. ³ Anhte na la nna chye ga ai hte maren, Ji woi ni anhte hpe hkai dan mi ai gaw, ⁴ Shanhte a kashu kasha ni a man e anhte makoi da na gaw ai n rai: Yehowa hpe mai shakawn ai lam hte, Shi a atsam, shi galaw sai mauhpa amu hpe, Anhte shu mashi shu masha du hkra gawn dan na ga ai. ⁵ Kaning rai nme law, shi gaw Yaku hta e sakse ga, Israela hta e jep ai tara tawn da nna; Shanhte a kaji kawoi ni zawn, gumlau ai hte mung n yu nna, ⁶ Tinang a myit masin hpe n shading nna, Karai Wa a man e tinang a wenyi sadi n dung ai amyu n tai mu ga she: ⁷ Karai Kasang hpe kamsham nga nna, Karai Wa a amu hpe n malap kau ai sha, Shi htet da mada hpe hkan mayu lu hkra, ⁸ Htawmhpang e du ai amyu ni a kashu kasha ni, Dai tara hpe chye na lu nna, Shanhte gaw tinang a kashu kasha ni hpe bai gawn dan nna, Dai lam ni kashu kasha ni hpe sharin ya mu ga, Shi anhte a ji woi ni hpe hkangda mu ai. ⁹ Ndan shachyen nna gap chye ai Ehprim a kashu kasha ni, Hpyen shani hta e, hpang de kayin mat wa ma ai. ¹⁰ Karai Kasang a ga shaka hpe shanhte n dum nna, Shi a tara hpe hkan nang na ndang nga ma ai. ¹¹ Shanhte gaw shi a magam amu hte, Shanhte hpe madun dan ai mauhpa bungli hpe, malap mali kau mu ai. ¹² Shi gaw shanhte a kaji kawoi ni a man e, Egutu mung na Zuan prang hta e, mauhpa amu galaw wu ai. ¹³ Dai nawng hpe shi jahka da nna, shanhte hpe shalai dat mu ai; Hka leng ni hpe sumpum zawn, tawn da wu ai. ¹⁴ Shi shanhte hpe shani e sumwi hte, Shana tup wan nhtoi hte, woi wa mu ai. ¹⁵ Nam na lunghkrung ni hpe shi jaga nna, Sung la ai hka hta na zawn, shanhte hpe shalu mu ai. ¹⁶ Dai nlung hta na hka shi shapraw dat nna, Hka nu zawn ntsin lwi shangun mu ai. ¹⁷ Raitimung, shanhte yubak naw galaw nna, Hkun hkraw ai shara e, Tsaw Htum ai Wa hpe gumlau mu ai. ¹⁸ Tinang a asak a matu shanhte lusha hpyi nna, Tinang a myit hta, Karai Wa hpe chyam yu ma ai. ¹⁹ Shanhte Karai Kasang hpe put nna tsun mu ai gaw: “Nam mali hkan e sha ku lajang da lu na a kun? ²⁰ Yu mu, dai lunghkrung hpe shi kayat wu yang, Hka kahpawk pru wa nna, hka shi ni lwi ma ai. Muk mung, shi jaw lu na a kun? Shi amyu a matu ashan san ya lu na a kun?” nga ma ai. ²¹ Shing nga ai ga Yehowa na wu ai majaw, Shi masin pawt bu nna, Yaku hta e wan chyi nga ai, Israela hpe mung masin pawt nga wu ai. ²² Karai Kasang hpe shanhte n kam nna, Shi a hkyehkrang la ai lam hta, n hpa ma ai. ²³ Raitimung, ntsa na sumwi hpe shi htet da nna, Sumsing lamu a chyinghka ni hpe hpaw dat wu ai. ²⁴ Sha na matu, shi shanhte a ntsa e manna jahtu ya nna, Lamu na n-gu shanhte hpe jaw mu ai. ²⁵ Du magam ni a shat masha ni sha nga nna, Lusha shahpa hkru kat hkra shi jaw da mu ai. ²⁶ Lamu na sinpraw nbung shi shapraw nna, Shi a n-gun hte dingda nbung woi wa wu ai. ²⁷ Ashan hpe mung, ga a nhpu daram, Pyen ai u hpe, nammukdara a zaibru daram, Shi shanhte a ntsa e jahtu ya mu ai. ²⁸ Shanhte a dap ka-ang e, Shanhte a nga ai shara grupyin e, Shi dai hte hpe jahkrat ya mu ai. ²⁹ Shaloi shanhte sha nna hkru kat nga ma ai, Shanhte ra ai hku dik wa malu ai. ³⁰ Shanhte ra ai shat garai n jin nna, Tinang a n-gup e shahpa naw rawng nga yang, ³¹ Karai Kasang shanhte hpe masin pawt nna, Shanhte hta na hkum bawng ai ni hpe sat kau nhtawm, Israela shabrang ni hpe katawng kau mu ai. ³² Raitimung, shanhte yubak naw galaw nna, Shi a mauhpa amu n kam n sham ma ai. ³³ Dai majaw shi gaw shanhte a nhtoi ni hpe nbung zawn, Shanhte a shaning ni hpe hkrithpa hte e, jahtum ya mu ai. ³⁴ Dai ni hpe sat kau mu yang, shanhte shi hpe dum nna, Karai Wa hpang de kayin wa let shi hpe tam ma ai. ³⁵ Karai Kasang gaw shanhte a lunghkrung, Tsaw Htum ai Karai Wa shanhte a shaw hkrang la ai madu rai nga ai, shanhte dum lu nga ma ai. ³⁶ Raitimung, tinang a n-gup hte shanhte shi hpe shapyaw nna, Tinang a shinglet hte shi hpe masu kau mu ai. ³⁷ Shanhte a myit shi a man e n sadi nga malu ai rai nna, Shi a ga shaka hpe shanhte n hkan ma ai. ³⁸ Shi chyawm gaw, matsan dum nga nna, N jahten kau ai sha, mara magap ya mu ai: Shi a masin pawt ai law law lang shakawp kau nna, Shi a myit kahtet ai nlang n sharawt wu ai. ³⁹ Shanhte gaw ashan hte, poi mat nna bai n wa lu ai bung shi hkrai rai nga ma ai gaw, shi adum nga ai. ⁴⁰ Nam mali hkan e shanhte gade lang gumlau nga nna, Hkraw krin ai shara e, shi hpe myit shayawn da mu hka! ⁴¹ Karai Wa hpe shanhte bai chyam yu yu di nna, Israela a Chyoi pra ai Wa hpe shapawt mu ai. ⁴² Shanhte gaw shi a lata hte, hpyen ni a lata na, Shanhte hpe shalawt la mu ai nhtoi hpe, Hpa mung n dum nga ma ai. ⁴³ Shi gaw, Egutu mung hta e shi a lamik, Zuan prang hta e shi a kumla, madun dan mu ai. ⁴⁴ Shanhte ntsin n lu lu hkra, hka nu ni hte Hka shi ni hpe, asai shatai wu ai. ⁴⁵ Shanhte hpe kawa na jinghkam hte, shanhte hpe jahten na shu hpe, shangun dat wu ai. ⁴⁶ Shanhte a nsi naisi hpe shingchyut e, Nai mam hpe dinggam-yaw ni e, jaw kau mu ai. ⁴⁷ Shanhte a tsabyi ru hpe sin hte, Lakum hpun ni hpe hkyen hte, jahten kau ya mu ai. ⁴⁸ Shanhte a yamnga ni hpe sin hte, Yamnga hpung ni hpe myihprap hte, sat kau ya mu ai. ⁴⁹ Shi gaw sindawng pawt kahtet ai hte, Tsin-yam tsindam, nji nmu, ru tsang ai hpe, n hkru ai kasa hpung zawn, shangun dat wu ai. ⁵⁰ Shi masin pawt ai pru na nga, shi lam lajang nna, Shanhte a asak hpe si ai de na n shabai ya mu ai: Ana ahkya hte shi shanhte hpe sat kau mu ai. ⁵¹ Egutu masha ni a kasha alat nlang hte hte, Ham a sum ni hta n-gun rawng ai ni hpe, shi sat kau mu ai. ⁵² Shi a amyu hpe chyawm gaw, sagu hpung zawn shi woi wa nna, Sagu hpung kaba hpe zawn, nam mali e, lakawn wa mu ai; ⁵³ Shi shanhte hpe angwi sha woi wa nna, shanhte n hkrit ma ai; Gumlau ni hpe chyawm gaw dai nawng hta e ka-up kau mu ai. ⁵⁴ Shanhte hpe, shi a chyoi pra ai ga jarit hte, Shi a hkra lata madu ai bum de, woi wa mu ai. ⁵⁵ Masha amyu ni hpe shi shanhte a man na shaden kau ya nna, Shanhte a sali wunli hpe karan ya mu ai: Shanhte a sum ni hta e, Israela amyu ni nga nga ma ai. ⁵⁶ Raitimung, shanhte gaw Tsaw Htum ai Karai Kasang hpe, Dinglik nna gumlau nga ma ai; Shi a sakse ga hpe mung n hkan ma ai. ⁵⁷ Kaji kawoi ni zawn shanhte kanut mat wa nna, htak mat ma ai; N ding ai ndan zawn, nhtang wa ma ai. ⁵⁸ Tsaw ai shara ni hte shi hpe shapawt nna, Summla ni hte shi a nsu nnawn myit shapraw ya mu ai. ⁵⁹ Karai Kasang dai lam na la nna, myit kahtet bu nga ai, Israela hpe nachying matsat kau wu ai. ⁶⁰ Dai rai nna, shi gaw Shilo a sumpan hta, Masha a ka-ang e gap ai sum hpe, kau da wu ai. ⁶¹ Bawngdung nga mu ga, shi a atsam hte, Gumlau ni a lata de shi a arawng hpe, ap ya mu ai. ⁶² Shi a amyu hpe nhtu hta shi ap da nna, Shi a sali wunli hpe masin pawt bu nga wu ai. ⁶³ Shanhte a shabrang ni wan hkru ai hkrum nna, Mahkawn ni gaw hkungran laka ga n na lu ma ai. ⁶⁴ Hkinjawng ni nhtu hte si ma timung, Gaida jan ni n hkrap lu ma ai. ⁶⁵ Shaloi dai Madu gaw, yup pyaw ai wa hte, Tsabyi majaw jahtau ai share zawn, hprang wa ai. ⁶⁶ Shi a gumlau ni hpe kanut wa shangun nna, Prat dingsa kaya kahpa jahkrum mu ai. ⁶⁷ Yosep a sum hpe shi gangkau nna, Ehprim a amyu hpe n san da wu ai. ⁶⁸ Yuda amyu hte, shi tsawra nga ai, Ziun bum hpe, shi san da wu ai. ⁶⁹ Matsaw matsang hte, htani htana dinggrin nga ai lamu ga hpe zawn, Shi a chyoi pra ai shara hpe shi dè da wu ai. ⁷⁰ Shi a mayam Dawi hpe mung shi san da nna, Sagu hpung ni hta na shi hpe lata la wu ai. ⁷¹ Shi a amyu Yaku hte, shi a sali wunli Israela hpe lanu lahku ya mu ga, kasha hkrat ai sagu yi ni kaw na, shi hpe shaw la wu ai. ⁷² Shi gaw shanhte hpe myit ding ai hte rem nga nna, Hpaji kung ai lata hte woi lakawn wa mu ai.

¹ Karai Kasang e, maigan amyu ni, Na a sali wunli hta shang nga nna, Na a chyoi pra ai htingnu hpe wu kau mu ai: Yerusalem mare hpe marawng marang di kau mu ai. ² Shanhte gaw na a ali ama ni a mang ni hpe, ntsa na u ni a shahpa shatai nna, Na a chyoi pra ai ni a hkumshan hpe, Nam na matse labye ni hpe, jaw kau mu ai. ³ Yerusalem grupyin e shanhte a asai hpe, hka zawn, ru kau nna, Makoi mayang rai na masha mi n nga ai. ⁴ Anhte a htingbu ni a man e shatan nhkan ai, Grupyin e nga ai ni a man e, roi nga ai hte Asawng asang re ai, anhte hkrum nga ga ai. ⁵ Yehowa e, nang gaten du hkra masin a pawt nga na n ta? Na a supbun bun ai myit, wan zawn a hkru nga na rai ta? ⁶ Nang hpe n chye ai maigan amyu ni hte, Na a amying hpe n shaga ai mungdan ni a ntsa e, Na a myit kahtet ai hpe ru bun dat u. ⁷ Shanhte gaw Yaku hpe makrut sha nna, Shi a nga shara hpe akrin atsai di kau mu ai. ⁸ Ji woi ni a mara anhte hta hkum shagun mi; Na a matsan dum ai myit hte, anhte hpe alawan tau la mi: Anhte matsan mayan rai la nga ga ai. ⁹ Anhte hpe hkyehkrang la ai Karai Kasang e, Na amying a arawng majaw, anhte hpe karum la mi; Na amying nsang a gawp e, Anhte hpe mawai la nna, yubak magap kau ya mi. ¹⁰ “Shanhte a Karai Kasang kanang nga a hka?” Nga nna maigan amyu ni hpa rai tsun lu na rai ma ta? Na a ali ama ni a ru kau ai asai majaw, matai dawp ai lam, masha amyu ni hte anhte a man e, pra rai nga u ga. ¹¹ Bawngdung ai ni a madai ai gaw nang kaw hkrang shang u ga: Na a galu kaba ai lahpum hte, si ang ai ma ni hpe bau sin u. ¹² Madu e, anhte a htingbu ni, Nang hpe shatan nhkan di ma ai hpe, Shanhte a sinda hta, htang sanit bai tai mu. ¹³ Anhte chyawm gaw, na a amyu hte Nang rem nga ai sagu ni, Nang hpe tutnawng e, chyeju dum na ga ai: Prat mi hte prat mi, na a shakawn ga, anhte gawn dan na ga ai.

¹ Sagu hpung hpe zawn, Yosep amyu hpe woi wa ai, Israela hpe rem ai wa e, madat u; Hkerubim ntsa e dung ai wa e, danpru rit. ² Ehprim, Ben-yamin hte Manashe a man e, Na a share n-gun shapraw nna, Anhte hpe karum na sa wa rit. ³ Karai Kasang e, anhte hpe shalan shabran la mi: Na a myiman a nhtoi jahtoi ya nna, Anhte hkyehkrang la ai hkrum na ga ai. ⁴ Zaw nawng zaw wa up ai Karai Kasang Yehowa e, Nang gaten du hkra na amyu a hpyi ai ga hpe pawt nga na n ta? ⁵ Nang shanhte hpe myi prwi shat jaw nna, Myi prwi law law wa lu shangun mu ai. ⁶ Nang anhte hpe htingbu ni hte ga lai shara shatai nna, Gumlau ni mung anhte hpe aroi arip rai ma ai. ⁷ Zaw nawng zaw wa up ai Karai Kasang e, Anhte hpe shalan shabran la mi: Na a myiman a nhtoi jahtoi ya nna, Anhte hkyehkrang la ai hkrum na ga ai. ⁸ Nang gaw Egutu mung na tsabyi ru langai mi la wa nna, Masha amyu ni hpe shaden kau nhtawm, dai hpe hkai da wu ai. ⁹ De a shara nang tsan kau wu ai rai nna, Shi a ru jung wa nna, mung ting e hkram nga ai. ¹⁰ Shi a shingnip bum ni hpe hkung nga nna, Shi a lakung ni Karai Wa a arit hpun ni hpe htawng nga ai. ¹¹ Shi a lakung ni hpe nammukdara du hkra, makrung ni hpe dai hka nu du hkra, shahkrawn dat wu ai. ¹² Dai yang hprang ai ni nlang de a asi hpe di kau lu mu ga, Nang hpa majaw de a bunghku ni hpe, run kau wu ta? ¹³ Maling na wa du dai hpe kanaw sha nna, Nam na ashu ashan ni dai hpe sha kau mu ai. ¹⁴ Zaw nawng zaw wa up ai Karai Kasang e, Bai wa rit; lamu de na mada yu nna, Ndai tsabyi ru hpe sa kawan katsan yu u. ¹⁵ Na a hkra lata hkai da nna, Na a matu nang lata la ai lakung hpe, lanu nga u. ¹⁶ Dai gaw wan hkru ai hte kran kau ai hkrum sai; Nang daru kau ai majaw, shanhte hten byak mat masai. ¹⁷ Na a hkra maga e dung nga ai wa hte, Na a matu nang lata la ai masha kasha a ntsa e, na a lata anga nga u ga. ¹⁸ Shaloi anhte nang kaw na n htak mat na ga ai: Anhte hpe jahkrung la mi, anhte na a amying nsang hpe shaga na ga ai. ¹⁹ Zaw nawng zaw wa up ai Karai Kasang Yehowa e, Anhte hpe shalan shabran la mi: Na a myiman a nhtoi jahtoi ya nna, Anhte hkyehkrang la ai hkrum na ga ai.

¹ Anhte a n-gun lagaw rai nga ai Karai Kasang hpe jahtau mu, Yaku a Karai Kasang hpe kabu gara jahtau mu. ² Mahkawn mangoi nna, shupsheng dum mu, Pyaw ai tingse hte doria hpe dum mu. ³ Shata praw shani e pahtau dum mu, Anhte a shata shagawng ai poi hta e dum mu. ⁴ Dai gaw Israela a matu ga madat hte, Yaku a Karai Kasang a tara rai nga ai. ⁵ N chye na lu ai ga ngai na yu se ai rai nna, Shi gaw Egutu mung ntsa e hkawm lai wa ai shaloi e, Yosep hta e, dai jep ai tara hpe shi tawn da wu ai. ⁶ Ngai gaw shi a lahpa dai lit hta na shaw la nna, Shi a lata ka ji hta na shalawt ya we ai. ⁷ Ru tsang hkrum yang nang shaga nna, ngai nang hpe mawai la de ai; Mu ngoi ai nsen hte ngai nang hpe htan ya de ai: Meriba hka makau e, ngai nang hpe chyam yu de ai. [Selah.] ⁸ Nye a amyu e, madat u, ngai matsun tsun da na nngai. Israela e, nang nye a ga hpe chye madat taw e! ⁹ Hpara tsasam, na a ka-ang e n nga lu na ra ai; Masha kaga a hpara, nang nawku lu na ndai n rai. ¹⁰ Egutu mung na nang hpe shapraw la ai, Na a Karai Kasang Yehowa ngai rai nga nngai: Na a n-gup mahka u, ngai jahpring ya na de ai. ¹¹ Nye a amyu chyawm gaw, nye a nsen n madat nna, Israela ngai hpe hpa mung n nawn nga ai. ¹² Dai majaw tinang myit ai hku shanhte hkan nang lu hkra, Tinang a myit ja ai hta ngai shanhte hpe dat dat mawe ai. ¹³ Nye a amyu nye a ga madat nna, Israela nye a lam hta hkawm a taw gaw: ¹⁴ Gade n na yang, ngai shanhte a gumlau ni hpe shagrit kau nna, Shanhte hpe shatsang ai ni a ntsa e, nye a lata mara na we ai. ¹⁵ Yehowa hpe ndawng ai ni, shi a man e dingnyawm nga mu ga; Nye amyu a aten, gamhpa dinggrin anga nga na malu ai. ¹⁶ Sau ai hkaulan mam hte ngai shanhte hpe bau nna, nlung hku na lagat jahku hte shanhte hpe jahkru na mawe ai.

¹ Karai Kasang gaw Karai Wa a hpung hta e tsap nga ai; Karai daw ni a ka-ang e, shi tara dara nga ai: ² “Tara n lang ai ni a myiman hpe tau yu nna, Gaten du hkra, n tara ai hku hkan na myit ta? ³ Matsan mayan ni, jahkrai nmai ni hpe karum mu, Myit gyip ai ni hte hku hku ai ni hpe awlaw mu. ⁴ Hpa n lu ai ni hte matsan mayan ni hpe shalawt dat mu; Tara n lang ai wa a lata na shanhte hpe shaw la mu. ⁵ Shanhte hpa mung n chye n chyang ma ai. Nsin e kahkrang hkawm nga ma ai: Lamu ga a npawt nhpang yawng shamu shamawt nga ai. ⁶ Ngai gaw, Karai daw ni hte, Tsaw Htum ai Wa a kasha ni, nanhte rai nga myit dai, nga nna tsun ni ai. ⁷ Raitimung, masha zawn nanhte si mat nna, Du langai mi zawn, kadawng mat na marin dai,” nga ai. ⁸ Karai Kasang e, dinghta ga hpe tara dara na rawt u; Amyu baw shagu na a sali wunli tai na mara ai law.

¹ Karai Kasang e, lukmu rai hkum nga et, Karai Wa e, atsin atsu hkum rai nga et. ² Yu u, nang hpe gumlau ai ni kabrawng nga nna, Nang hpe ndawng ai ni baw sharawt ma ai. ³ Na a amyu hpe shanhte hpaji daw nna, Nang makawp maga ai ni a lam bawng nga ma ai. ⁴ Shanhte gaw, “sa marit, amyu ni hta na, shanhte hpe tsan kau gaw; Israela amying hpe htawmhpang de kadai mung n dum mu ga,” nga nna tsun ma ai. ⁵ Shanhte myit langai sha hte bawng nna, nang hpe gumlau ai ni a maga e ga shaka tawn da mu ai. ⁶ Edom amyu hte Ishmaela amyu, Moba hte Hagara amyu a sum ni, ⁷ Gabala, Ammon, Amalek amyu ni, Hpilisti ni hte Turu mare na ni, lawm ma ai. ⁸ Asuri masha ni mung shanhte hte myit hkrum ma ai; Shanhte gaw lawt na masha ni hpe sa karum ma ai. [Selah.] ⁹ Midian hte, Kishon hka makau na, Sisera hte Yabin hpe di ai zawn, shanhte hpe di mu. ¹⁰ Endora makau e, shanhte sum mat wa nna, Aga a nam hpun zawn, rai mat ma ai. ¹¹ Shanhte a salang ni hpe Oreb yan Zeeb, Shanhte a du ni nlang Zeba yan Zalumuna hpe zawn, shatai u. ¹² Kaning rai nme law, shanhte gaw, “Karai Kasang a shanu shara hpe anhte madu la gaw,” nga ma ai. ¹³ Nye a Karai Wa e, bungsha e shapoi ai ga nhpu zawn, Nbung hta poi ai yi hku hpe zawn, shanhte hpe shatai mu. ¹⁴ Maling dinggram hpe hkru kau ai wan hte, Bum ni hpe jahkat kau ai sharaw zawn, ¹⁵ Na a bunghpoi e shanhte hpe hkan shachyut nna, na a laru hte shanhte hpe jahkrit kau mu. ¹⁶ Yehowa e, shanhte gaw na amying hpe tam mu ga, Shanhte a myiman kaya kahpa hte jahpring ya mu. ¹⁷ Yehowa e, nang hte na a amying chyu sha, Ga ting hta e Tsaw Htum nga ai, shanhte chye mu ga. ¹⁸ Prat dingsa shanhte kaya kahpa hte hkrit gari nna, Myiman sum ai hte hten byak ai hkrum mu ga law.

¹ Zaw nawng zaw wa up ai Yehowa e, Na a shanu shara ni gaw gade awng mai nga a hka! ² Nye a myit masin Yehowa a wing ni hpe marit nna ndawt nga ai; Nye a myit hte hkumshan gaw, ahkrung nga ai Karai Wa hpe kabu gara jahtau nga ai. ³ Nye a hkawhkam, nye a Karai Kasang, Zaw nawng zaw wa up ai Yehowa e, na a hkungri ni a makau e, u tsa gaw nta mu lu nna, Hkalung lung na matu, pilan gaw tsip tsip na shara mu nga ai. ⁴ Na a nta e nga ai ni gaw, a nga ma ai. Shanhte nang hpe shakawn kungdawn nga na ma ai. [Selah.] ⁵ Nang hta n-gun la ai wa gaw, a nga ai; Ziun a lam ni shi a myit hta hkrang nga ai; ⁶ Shanhte gaw hkrapngu hkrapngoi ngu ai kadit lai wa yang, Dai shara hpe hka deng shatai mu ai. Marang nnan mung dai hpe sha-a wu ai. ⁷ Shanhte n-gun bai jat la la rai nna, Ziun bum na Karai Kasang a man e du lu ma ai. ⁸ Zaw nawng zaw wa up ai Karai Kasang Yehowa e, Nye a akyu hpyi ai ga madat ya e: Yaku a Karai Kasang e, na la u. [Selah.] ⁹ Anhte a n-gang Karai Kasang e, mada yu u, Na a namman chya hkam ai wa hpe matsing da u. ¹⁰ Na a wing kata e lani mi sha nga lu ai gaw, nhtoi kaga hkying mi hta grau kaja nga ai. Tara n lang ai wa a sum hta nga lu ai hta, Karai Kasang a chyinghka hkinbawng sin na, ngai grau tsaw nga nngai. ¹¹ Yehowa Karai Sasang ajan hte n-gang rai nga ai, Yehowa gaw chyeju hte arawng sadang jaw lu ai; Dingman ai hku hkan ai ni hpe, shi kaja ai hpa mung ndang na n rai. ¹² Zaw nawng zaw wa up ai Yehowa e, nang hta shamyet shanat ai wa gaw, a nga ai law.

¹ Yehowa e, nang gaw na a mungdan hpe ra nit dai. Yaku a bawngdung ai ni hpe, nang shabai la nu ai. ² Na a amyu a mara hpe, nang raw kau ya nna, Shanhte a yubak nlang hte hpe magap da nu ai. [Selah.] ³ Na a masin pawt ai nlang nang dawm la kau nna, Na a myit kahtet ai hpe shayawm nu ai. ⁴ Anhte hpe hkyehkrang la ai Karai Kasang e, Anhte hpe bai wa shangun nna, Anhte hpe ndawng n yawt ai myit jasim kau u. ⁵ Nang anhte hpe tutnawng e a pawt nga na n ni? Prat mi hte prat mi masin a pawt nga na n ni? ⁶ Na a amyu nang hta bai kabu gara nga lu mu ga, Nang anhte hpe bai jahkrung ya na ndai, n rai ni? ⁷ Yehowa e, na a chyeju anhte hpe madun dan nna, Na a hkye la ai lam anhte hpe hpaw ya mi. ⁸ Yehowa Krai Wa tsun ai ga hpe ngai madat na nngai; Shi gaw shi a amyu hte chyoi pra ai ni hpe, ngwi pyaw ai ga a tsun nga ai: Shanhte gaw angawk ai lam hta bai n shang mu ga. ⁹ Gaja wa, anhte a mungdan hta e arawng nga lu u ga; Shi a hkyehkrang la ai lam, shi hpe hkrit kamyin ai ni kaw ani sha nga nga ai. ¹⁰ Chyeju hte sadi sahka gaw hkrum nga masai, Dinghpring ai hte ngwi pyaw ai gaw, shada da pup nga ma ai. ¹¹ Sadi sahka gaw lamu ga de na tu pru nna, Dinghpring ai gaw sumsing lamu de na mada yu na ra ai. ¹² Yehowa gaw mai kaja ai lam jaw ya nna, Anhte a lamu ga, de a nsi naisi jaw na mi ai. ¹³ Shi a man e dinghpring ai gaw hkawm nga nna, Shi a lagaw hkang, lam shatai na ra ai.

¹ Yehowa e, na a na kayin nna, ngai hpe htan ya e; Nni nkri hte matsan mayan, ngai hkrum nga nngai. ² Ngai hkrit hkungga ai myit rawng nga nngai majaw, Nye a myit masin hpe bau sin u: Nye a Karai Kasang wa, nang e, Nang hta shamyet nga ai, na a mayam wa hpe hkyehkrang la u. ³ Shani tup ngai nang hpe shaga nga nngai majaw, Madu e, ngai hpe matsan dum la e. ⁴ Madu e, nye a myit masin nang hpe marit nga li ai majaw, Na a mayam wa a myit masin hpe, shapyaw ya e. ⁵ Madu e, nang mai kaja nga nna, mara raw kau ya ndai; Nang hpe shaga ai ni nlang hte hpe, nang chyeju kaba madun nga ndai. ⁶ Yehowa e, ngai hpyi ai ga madat u, Ngai akyu hpyi ai nsen hpe mung, matsing da u. ⁷ Nang ngai hpe htan ya na ndai majaw, Ngai ru tsang ai nhtoi e, ngai nang hpe shaga na nngai. ⁸ Madu e, Hpara ni hta e nang hte bung ai mi, n nga ai, Na a amu zawn re ai mung n nga ai. ⁹ Madu e, nang hpan tawn da ai amyu nlang hte gaw, Na a man e shang nna nawku na mara ai: Na a amying hpe mung, shagrau na mara ai. ¹⁰ Nang galu kaba nga ndai rai nna, Mauhpa amu galaw nga ndai: Nang chyu sha Karai Kasang rai nga ndai. ¹¹ Yehowa e, na a lam ngai hpe sharin ya e, Na a tengman ai hta e, ngai hkawm mayu nga nngai. Na a amying hpe hkungga nga n ga, nye a myit shadut ya e. ¹² Nye a Madu Karai Kasang e, Ngai nang hpe myit yawng hte shakawn nga nna, Tutnawng e, na a amying hpe shagrau na nngai. ¹³ Kaning rai nme law, na a chyeju kaba nga nna, Nye a myit masin hpe, sung htum ai katsan ga na, nang mawai la ya nit dai. ¹⁴ Karai Kasang e, gumrawng ai ni nye a man e rawt wa nna, Damya hpung ni, nye a myit masin hpe tam nga ma ai: Shanhte nang hpe hpa n nawn nga ma ai. ¹⁵ Madu e, nang chyawm gaw, matsan dum chye ai, Sumnung re ai, myit galu ai, chyeju kaba hte, Sadi sahka rawng ai Karai Wa, rai nga ndai. ¹⁶ Ngai hpang de kayin nna, matsan dum la e; Na a n-gun lagaw, na a mayam wa hpe, Na a hkyehkrang la ai lam, na a nchyang jan a kasha hpe, jaw ya u. ¹⁷ Ngai hpe ndawng ai ni mu nna, kaya kahpa hkrum mu ga, Kaja ai kumla ngai hpe madun ya e: Kaning rai nme law, Yehowa e, nang ngai hpe, Karum nna shangwi shapyaw ya nit dai law.

¹ Shi a npawt nhpang gaw chyoi pra ai bum ni a ntsa e jung nga ai. ² Yehowa gaw Yaku a htingra ni nlang hte hta, Ziun bum na chyinghka ni hpe, grau tsawra wu ai. ³ Karai Kasang a mare, nang e, na a lam, Arawng rawng ai ga kaba pru nga ai. [Selah.] ⁴ Ngai hpe chye chyap ai ni hta na, Rahab yan Babelon rai nga ma ai, ngai ngu na mawe ai. Hpilisti, Turu, Hkusha hpe yu yu mu: Ndai ni wonang e shangai wa masai. ⁵ “Langai hte langai, Ziun mung hta shangai wa masai, Tsaw Htum ai Wa mung, dai hpe shadaw da wu ai,” Ngu nna Ziun a lam masha ni tsun na maru ai. ⁶ Amyu baw ni hpe jahpan la ai shaloi e, “Ndai amyu gaw nang e shangai wa sai,” Nga nna, Yehowa gawn yu na ra ai. [Selah.] ⁷ “Nye a hka htung ni nlang hte, nang hta nga nga ai,” Nga nna, mahkawn mangoi ai hte ka manawt ai ni nga na mara ai.

¹ Ngai hpe hkyehkrang la ai Karai Kasang Yehowa e, Shani shana ngai nang hpe shaga nga nngai. ² Ngai hpyi ai ga nang kaw hkrang u ga, Ngai jahtau ai ga, nang na la ya e. ³ Nye a myit masin ru tsang ai hte hpring nga nna, Nye a asak katsan ga de ni wa sai. ⁴ Nsung hku hta shang ai ni hte ngai bung nna, N-gun n rawng ai wa zawn, ngai tai ni ai. ⁵ Nang galoi mung bai n dum ai, lasa si nna, Lup hta taw nga ai mang ni hta, ngai lawm nga nngai: Na a lata hte shanhte dawdan ai hkrum masai. ⁶ Nang ngai hpe sung htum ai hku hte, Hka hpungla ni a nsin sin ai shara hta, kau da ni ai. ⁷ Na a myit kahtet ai nye a ntsa e dip nga nna, Na a hka leng ni yawng ngai hpe kamyet nga ma ai. [Selah.] ⁸ Nang nye a jinghku ni hpe ngai hte shatsan kau nna, Shanhte a matsat shabat shara, ngai hpe shatai ni ai; Ngai sharen da ai hkrum nna n pru lu nngai. ⁹ Ru tsang ai majaw, nye a myi a mam nga ai; Yehowa e, shani shagu ngai nang hpe shaga nga nngai; Nye a lata na a man e ngai ladawn nga nngai. ¹⁰ Si mat ai ni hpe, mauhpa amu madun lu na n ni? Tsu ni bai rawt nna, nang hpe shakawn na ma hka? [Selah.] ¹¹ Lup hta e, na a chyeju hte, ngarai mung e, Na a sadi sahka hpe, shanhte hkai na ma kun? ¹² Nsin sin ai shara e na a mauhpa amu hte, Hten bya ai mung e, na a dingman ai hpe, shanhte chye lu na ma ni? ¹³ Ngai chyawm gaw, Yehowa e, nang hpe shaga nga nngai; Jahpawt e, nye a akyu hpyi ai ga na a man e du nga ai. ¹⁴ Yehowa e, nang hpa rai nye a myit masin hpe kau da nga n ta? Na a myiman nang hpa rai kayin la kau n ta? ¹⁵ Brang ram kaw nna, nni nkri ngai hkrum nna, si na tik sha ra nngai. Na a hkrithpa hpe ngai gun nna myit htum nga nngai. ¹⁶ Na a myit kahtet ai nye a ntsa e du nna, Na a hkrit gari ai baw ngai hpe jahten mi ai. ¹⁷ Dai gaw shani tup hka zawn ngai hpe kawan da nna, ngai hpe grup hkra di mi ai. ¹⁸ Ngai hpe ra ai wa hte jinghku hpe, Ngai hte nang shatsan kau nna, Ngai hte hkau chyap ai ni, nsin zawn rai ma ai.

¹ Yehowa a chyeju hpe ngai galoi mung mahkawn mangoi nga na nngai. Nye a n-gup hte na a sadi sahka hpe Prat mi hte prat mi, shana ya na nngai. ² Kaning rai nme law, Chyeju gaw galoi mung agrin nga ai; Na a sadi sahka hpe sumsing lamu hta e nang tawn da nga ndai, nga nna ngai a tsun nga nngai. ³ Nang gaw, “Ngai san da ai wa hpe ga shaka ngai tawn da nna, Nye a mayam Dawi hpe ngai dagam da se ai: ⁴ Na a aru arat hpe tutnawng e, ngai shagrin da nga nna, Na a tingnyang hpe prat mi hte prat mi shadun da na we ai,” nga nit dai. [Selah.] ⁵ Yehowa e, sumsing lamu gaw na a mauhpa lam hpe, Chyoi pra ai ni a hpung gaw na a sadi sahka hpe, shakawn nga na ma ai. ⁶ Lamu sumwi hta e Yehowa hte kadai wa bung nga a ta? Hpara kasha ni hta Yehowa hte kadai wa pre nga a ta? ⁷ Shi gaw, chyoi pra ai ni a shawa hpawng hta e, Makrim hpa rai nga ai rai nna, Shi a grupyin e nga ai nlang hte hta, Hkrithpa Karai Wa rai nga ai. ⁸ Zaw nawng zaw wa up ai Karai Kasang Yehowa e, Nang zawn n-gun rawng ai gaw, kadai wa rai nga a ta? Na a sadi sahka nang hpe shinggrup nga ai. ⁹ Nammukdara gumrawng ai hpe nang up nga nna, De a hka leng ni kabrawng yang, jasim nga ndai. ¹⁰ Sat kau hkrum ai wa hpe zawn, nang Rahab hpe agrawp kau nna, na a n-gun rawng ai lahpum hte, gumlau ni hpe shabra kau mu ai. ¹¹ Sumsing lamu hte dinghta ga gaw, na a rai nga ai. Mungkan ga hte de a yawng mayawng hpe, nang gaw da nit dai. ¹² Dingdung, dingda nang hpan da nit dai, Tabura hte Hermun, na a amying hta kabu nga ma ai. ¹³ Na a lahpum wa-ngan lahpum rai nga lit dai; Na a lata n-gun ja nga ai, na a hkra lata sharawt nga ndai. ¹⁴ Dinghpring ai hte tara dara ai lam, na a tingnyang a npawt rai nga ai; Chyeju hte sadi sahka na a man e a la nga ai. ¹⁵ Pahtau dum ai nsen chye na ai amyu gaw, a lu nga ai; Yehowa e, na a myiman a nhtoi hta e, shanhte hkawm nga lu ma ai. ¹⁶ Na a amying hta e, shanhte shani tup kabu nga lu nna, Na a dingman ai hta shagrau ai hkrum nga ma ai. ¹⁷ Shanhte a n-gun lagaw a hpung nang rai nga nna, Na a n-gaw nnyeng hte anhte a nrung hpe sharawt nga ndai. ¹⁸ Anhte a n-gang Yehowa kaw na rai nga ai; Anhte a hkawhkam wa gaw, Israela a Chyoi pra ai wa kaw na rai nga ai. ¹⁹ Kalang mi hta shingran hte nang tsun nna, Kamsham ai ni hpe tsun ndai gaw: “Share wa langai mi hpe ngai shadaw se ai, Dai amyu hta na shabrang wa hpe shagrau da se ai: ²⁰ Nye a mayam Dawi hpe ngai mu da nna, Nye a chyoi pra ai namman hte shi hpe chya ya se ai. ²¹ Nye a lata shi hte rau nga nga nna, Nye a lahpum shi hpe shangang na we ai. ²² Gumlau wa gaw shi hpe n rim la lu nna, N hkru ai wa gaw shi hpe dip lu na wu ai, n rai. ²³ Shi hpe zingri ai ni hpe, ngai shi a man e nyap tawn nna, Shi hpe ndawng ai ni hpe, adup kau na mawe ai. ²⁴ Nye a chyeju hte sadi sahka shi hte rau anga nga nna, Nye a amying majaw shi a nrung rawt wa na lu ai. ²⁵ Ngai gaw shi a lata hpe nammukdara ntsa e, Shi a hkra lata dai hka nu ntsa e, mara da ya na we ai. ²⁶ Shi gaw, Nye a Wa, nye a Karai Wa, Ngai hpe hkye la ai lunghkrung, nang rai nga ndai, nga nna ngai hpe shaga na ra ai. ²⁷ Ngai mung kasha alat shara shi hpe jaw da nna, Mungdan hkawhkam ni hta grau kaba ai wa shatai na we ai. ²⁸ Nye a chyeju shi hte tutnawng e anga nga nna, Nye a ga shaka shi hte hka wa na n rai. ²⁹ Shi a aru arat tutnawng e anga nga na ra ai; Shi a tingnyang lamu a nhtoi zawn, agrin nga na lu ai. ³⁰ Shi a kashu kasha ni nye a tara hpe kau da nna, Nye a tara ai lam n hkan ma ai; ³¹ Nye a ga madat hpe awu asin di kau nna, Ngai htet da ai ga hpe n dum ma yang gaw, ³² Ngai shanhte a mara hpe shingna hte, Shanhte a shut hpyit ai hpe kayat ai hte, ari jaw na mawe ai. ³³ Raitimung, nye a chyeju nlang ngai n dawm la nna, Nye a sadi sahka lam hpe masu kau na we ai, n rai. ³⁴ Nye a ga shaka hpe ngai n wu kau nna, Nye a n-gup ga hpe shabai la na we ai n rai. ³⁵ Nye a chyoi pra ai hte ngai lang mi dagam se ai; Dawi hpe ngai hkalem kau na we ai n rai. ³⁶ Shi a aru arat tutnawng e anga nga nna, Shi a tingnyang dai ajan zawn, nye a man e anga nga ai. ³⁷ Dai gaw, shata zawn tutnawng e agrin nga nna, Sumwi ntsa e nga ai sakse mung, teng nga ai,” nang nga nit dai. [Selah.] ³⁸ Nang chyawm gaw kau da nna matsat kau nit dai. Na a namman chya hkam ai wa hpe, nang myit kahtet nga ndai. ³⁹ Na a mayam hte tawn da ai ga shaka hpe nang kau da nna, Shi a janmau hpe ga hta e galu kau ya nu ai. ⁴⁰ Shi a shakum nlang hte hpe nang run kau nna, Shi a bunghku ni hpe marawng marang di kau ya nu ai. ⁴¹ Lam e lai ai ni nlang hte shi hpe hpya la nna, Htingbu ni a matu kaya kahpa shara shi tai nga ai. ⁴² Shi hpe hpyen ai ni a hkra lata nang sharawt ya nna, Shi hpe gumlau ai ni nlang hte hpe kabu shangun mu ai. ⁴³ Gaja wa shi a nhtu nshan hpe nang galau kau ya nna, Hpyen majan hta e, shi hpe n shadaw wu ai. ⁴⁴ Shi a shingkang hpe nang la kau ya nna, Shi a tingnyang hpe ga de jahkrat kau ya mu ai. ⁴⁵ Shi a brang ram nhtoi hpe nang gadun ya nna, Kaya kahpa hte shi hpe htinggrum da nu ai. [Selah.] ⁴⁶ Yehowa e, gaten du hkra nang a makoi nga nna, Na a myit kahtet ai gaw wan zawn, a grung nga na lit ta? ⁴⁷ Nye a aprat gade gadun nga ai gaw, dum u: Shinggyim masha ni hpe hpa lila majaw nang hpan da nga n hka! ⁴⁸ Si htan n mu nna, katsan ga de na shi a myit masin hpe, Shalawt la lu ai wa gaw, kadai rai nga a ta? [Selah.] ⁴⁹ Madu e, moi moi e, na a sadi sahka hte Dawi hpe, Nang dagam ai chyeju gaw, kanang rai nga a ta? ⁵⁰ Yehowa e, na a ali ama ni hkrum ai shatan nhkan hpe dum u; Nye a sinda e, amyu law law ni a shatan ai ga hpe, ngai gun nga we ai. ⁵¹ Yehowa e, gumlau ni nang hpe shatan ma ai rai nna, Na a namman chya hkam ai wa a lagaw hkang hpe shatan nhkan di mu ai. ⁵² Yehowa gaw htani htana e, a nga u ga law. Amen, rai sa, Amen.

¹ Madu e, nang gaw ji woi ni a lakhtak kaw nna, Anhte anga nga shara rai nga ndai. ² Bum ni hpe garai n shangai nna, Mungkan ga hte dinghta aga hpe garai n shaprat yang, Nang gaw chyi nma hpri nhpra kaw nna, Karai Wa, rai nga ndai. ³ Nang gaw mungkan masha hpe ga nhpu de shabai dat nna, “Shinggyim masha ni e, wa ma su,” nga nna tsun nga ndai. ⁴ Rai sa, na a man e shaning hkying mi gaw, Mani lai wa sai nhtoi hte shana na ladaw zawn, rai nga ai. ⁵ Nang shanhte hpe shayawng dat mu ai; Shanhte gaw yup pyaw ai zawn, rai nga ma ai: Shanhte jahpawt e tsingdu zawn tu nga ma ai. ⁶ Dai gaw jahpawt e pu wa nna lagra nga ai, Shana e, dan kau hkrum nna nyip mat nga ai. ⁷ Gaja wa, na a masin pawt ai hte anhte tsam mat wa nna, Na a myit kahtet ai hte hkrit gari ai hkrum ga ai. ⁸ Nang gaw anhte a yubak hpe na a man e, tawn da ndai; Ndum shami re ai mara hpe pyi, na myiman a nhtoi hta shadan da nu ai. ⁹ Na a n-yun bu ai hte, anhte a nhtoi nlang mat ma ai: Anhte a shaning ni madai nga let shalai dat gaw ai. ¹⁰ Anhte a aprat a nhtoi ni sanit shi ning rai nga ai; Kalang lang, n-gun ja ai a majaw matsat shi ning du raitimung, De a gumrawng shara gaw, amu hte yawnhkyen ai hkrai rai nga ai: Dai gaw alawan lai wa nna, anhte pyen mat nga ga ai. ¹¹ Na a ja la ai pawt sindawng ai hte, hkrit mai ai n-yun bu ai hpe, Kadai wa chye ya lu na rai nga a ta? ¹² Anhte gaw myit hpaji lu la hkra, Anhte a nhtoi chye hti lu na, sharin ya mi. ¹³ Yehowa e, wa rit; gade na hkra? Na a ali ama ni hpe shangwi shapyaw ya mu. ¹⁴ Jahpawt e, na a chyeju hte anhte hpe jahkru ya mi; Shaloi anhte prat tup awng nga nna kabu nga na ga ai. ¹⁵ Nang anhte hpe nni nkri jahkrum ai nhtoi hte, Ru tsang ai shaning anhte hpe madun ai hte maren, anhte hpe kabu shangun ya mi. ¹⁶ Na a magam amu, na a ali ama ni hpe, Na a hpung shingkang, shanhte a kashu kasha ni hpe, madun ya mu. ¹⁷ Anhte a Madu Karai Kasang a shawang myit gaw, anhte a ntsa e anga nga u ga; Anhte a lata a amu bungli, anhte a matu shangang ya mi; Rai sa, anhte a lata a amu bungli shakang ya mi law.

¹ Tsaw Htum ai Wa a shim ai shara e dung nga ai wa gaw, Chyalai n-gun rawng ai Karai Wa a shingnip hta anga nga lu ai. ² Ngai gaw Yehowa hpe, “Nye a shingbyi shara hte wahpang, Ngai hpa nga ai Karai Kasang nang rai nga ndai,” nga nna tsun nga na nngai. ³ Kaning rai nme law, shi gaw u hkam ai wa a mahkam hte, Bya wa ai ana ahkya hta na, nang hpe mawai la na ndai. ⁴ Shi a singkaw mun hte shi nang hpe magap da nna, Shi a singkaw npu e, nang shim nga lu na ndai: Shi a sadi sahka gaw, n-gang hte hpyen palawng rai nga ai. ⁵ Shana na hkrithpa hte, Shani e gap dat ai pala hpe; ⁶ Nsin e kawan hkawm ai ana ahkya hte, Jan pungding e byin ai ali awaw hpe, nang n hkrit ra nga ndai. ⁷ Na a makau e masha hkying mi, Na a hkra maga e mun mi, kataw timung, Dai nang hpe hkra lu na n rai. ⁸ Gaja wa, na a myi hte nang mada yu nna, Tara n lang ai ni hta kap wa ai ari hpe mu lu na rin dai. ⁹ Yehowa e, nye a shingbyi shara nang rai nga ndai! Nang gaw Tsaw Htum ai Wa hpe na a nga shara shatai nu ai; ¹⁰ Aru ara nang hta byin lu na n rai, Machyi makaw na a sum hta, ni wa lu na n rai. ¹¹ Lam shagu hta e nang hpe bau sin na, Na a matu shi a lamu kasa ni hpe, shi hkangda mu ai. ¹² Nlung hta na a lagaw n ahtu u ga, Shanhte a lata hta nang hpe pawn la na mara ai. ¹³ Hkanghkyi hte pu htum a ntsa e nang hkawm lu nna, Hkanghkyi hkalung hte baren hpe kabye lu na rin dai. ¹⁴ Ngai hta shi kanan nang nga ai majaw, Ngai shi hpe mawai la na we ai; Nye a amying hpe chye nga ai majaw, Ngai shi hpe makawp maga na we ai. ¹⁵ Shi ngai hpe shaga yang, ngai htan na nngai, Ru tsang ai hta ngai shi hte rau nga na nngai; Ngai shi hpe sai la nna, shagrau na we ai. ¹⁶ Prat galu ai hte ngai shi hpe shakat ya nna, Nye a hkyehkrang la ai lam shi hpe madun dan na we ai.

¹ Yehowa hpe shakawn kungdawn nna, Tsaw Htum ai Wa a amying hpe mahkawn mangoi na; ² Sumri shi rawng ai dum ai baw hte tingse, Mahku pyaw ai tingse kaji hte, ³ Jahpawt manap e na a chyeju hpe, Shana ahkying e, na a sadi sahka hpe hkai dan na, mai kaja rai nga ai. ⁴ Kaning rai nme law, Yehowa e, Na a amu hta nang ngai hpe kabu shangun nna, Na lata a bungli majaw, ngai awng wa na nngai. ⁵ Yehowa e, na a amu gade kaba nga a hka! Nang myint ai hku nachying sung la nga ai. ⁶ Dai gaw karing karang masha n chye na lu ai, Angawk ai wa mung n myit hkawn lu ai. ⁷ Tara n lang ai ni tsingdu zawn tu wa nna, Shut hpyit ai hku galaw ai ni nlang pu wa ma yang, Dai gaw, shanhte a prat dingsa e hten mat hkrum na lam rai nga ai. ⁸ Yehowa e, nang chyawm gaw, Htani htana, a grau nga ai wa, rai nga ndai. ⁹ Kaning rai nme law, yu u, nang hpe gumlau ai ni, Yehowa e, Nang hpe gumlau ai ni, hten wa na mara ai: Shut hpyit ai hku galaw ai ni nlang brun mat wa na mara ai. ¹⁰ Nye a nrung hpe chyawm gaw, Hpawlam a nrung zawn, nang shatsaw da nna, Namman nnan hte ngai hpe chya ya ni ai. ¹¹ Ngai hpe gyam yu ai ni e, nye a myi lala mu lu nna, N hkru nna ngai hte nhtan shai ai ni a lam, Nye a na hte ngai na hkrup se ai. ¹² Dinghpring ai wa gaw umung hpun zawn tu lu nna, Lebanon a arit hpun zawn gung dam wa na ra ai. ¹³ Yehowa a nta e hkai tawn da ai ni, Anhte a Karai Kasang a wing e, kaba wa na mara ai. ¹⁴ Yehowa dingman nga ai gaw, shana ya lu na, Shanhte gaw prat nga ai shaloi e asi naw si nna, Sau rawng ai hte kat kat rai na mara ai. ¹⁵ Shi gaw, nye a lunghkrung rai nga ai. Shi hta e n ding ai, hpa mung n nga nga ai.

¹ Yehowa gaw Hkawhkam rai nga ai; Hpung shingkang hpe shi bu hpun nga ai; Yehowa gaw n-gun hte mawn sumli nga ai, Dai hpe shingkyit zawn kyit da nu ai: Gaja wa, mungkan ga hpe shi tawn da nu ai: Dai gaw shamu shamawt nga ai n rai. ² Chyaloi nhkoi nna, na a tingnyang nga nga ai, Chyi nma hpri nhpra kaw nna, nang nga nga ndai. ³ Yehowa e, hka nu ni hte hka shi ni, Nsen shapraw nga ma ai: Hka nu ni kadu kashaw nga ma ai. ⁴ Hka sumhpa ni ngoi kaba ai hte, Nammukdara a n-gun ja ai hka leng ni hta, Tsaw ai shara de nga ai Yehowa gaw n-gun grau kaba nga ai. ⁵ Na a sakse ga nachying grin nga ai; Yehowa e, lamu ga aprat htum hkra, Na a nta gaw chyoi pra nga na, ging nga ai.

¹ Mara bai tai htang ya ai Karai Wa, Yehowa e, Bai tai htang ya ai Karai Wa e, htoi kabrim nga u. ² Lamu ga a tara agyi wa e, rawt pru u: Gumrawng ai ni hpe amu hte maren bai tai mu. ³ Yehowa e, tara n lang ai ni gaten du hkra__, Tara nlang ai ni gaten du hkra, ninglaw nga lu na rai ma hka? ⁴ Shanhte ga galu galang tsun nna, grang nga ma ai; Shut hpyit ai hku galaw ai ni nlang, lila ga tsun ma ai. ⁵ Yehowa e, shanhte gaw na a amyu hpe dip da nna, Na a sali wunli hpe zingri zingrat mu ai. ⁶ Gaida jan hte masha tsasam wa hpe shanhte sat kau nna, Jahkrai ma ni hpe htau kau mu ai. ⁷ Shanhte gaw, “Yehowa n mu mada na re ai, Yaku a Karai Kasang n dum nga ai,” nga ma ai. ⁸ Amyu masha ni hta myit n kung ai ni e, dum nga mu; Angawk ai ni e, galoi wa mi she hpaji chye na myit ta? ⁹ Na shatut ai wa gaw, n na lu na rai ni? Myi hpan da ai wa gaw, n mu lu na a hka kun? ¹⁰ Masha wa hpe chye chyang ai lam sharin ya nna, Amyu baw ni hpe ari jaw ai wa gaw, n daru lu na rai ni? ¹¹ Masha a myit mang ai lam nbung sha rai nga ai gaw, Yehowa chye ya nga ai. ¹² Yehowa e, nang shadum ya nna, Na a tara hpe sharin ya ai wa gaw, a nga ai. ¹³ Tara n lang ai ni a matu, nsung hku htu ngut hkra, Ru tsang ai nhtoi hta na shi lawt lu u ga, Nang shi hpe ban sa ai lam, madun ya nu ai. ¹⁴ Yehowa gaw shi a amyu hpe kau da na n rai, Shi a sali wunli hpe jahti da na n rai. ¹⁵ Dingman ai lam gaw naw awlaw nga na rai nna, Myit malang ai ni yawng dai hku hkan nang na mara ai. ¹⁶ N hkru ai ni hpe jet kau na, ngai hte rau kadai wa rawt na rai nga a ta? Shut hpyit ai ni hpe daru kau na, ngai hte rau kadai wa tsap na rai nga a ta? ¹⁷ Yehowa ngai hpe n karum taw gaw, nye a myit masin ya e pyi, A katsi katsang nga ai kaw, nga mat na sali ai. ¹⁸ Ngai gaw, “Nye a lagaw kashawt nga li ai,” nga ai shaloi, Yehowa e, na a chyeju ngai hpe shadaw ni ai. ¹⁹ Nye a kraw lawang na myit law ai shaloi e, Nang shakawp ya nna, nye a myit masin hpe kabu shangun ya nngai. ²⁰ Tara a malai, n hkru ai hku tawn da ai, kashun kashe re ai tingnyang gaw, Nang hte hku lu na rai ni? ²¹ Shanhte dingman ai wa a asak hpe rau htim nna, Mara n lu ai asai hpe, ga dan kau mu ai. ²² Raitimung, Yehowa gaw nye a wahpang rai nga ai, Nye a Karai Kasang, ngai shingbyi ai lunghkrung rai nga ai. ²³ Shi gaw shanhte a mara hpe, bai nhtang ya na mu ai, Yubak majaw shanhte hpe jahtum kau na mu ai: Anhte a Karai Kasang Yehowa, shanhte hpe jahtum kau na mu ai law.

¹ Wa marit, Yehowa hpe garu ga, Anhte hpe hkyehkrang la ai lunghkrung kaw, kabu gara jahtau ga! ² Chyeju dum let shi a man de anhte shang ga, Mahkawn mangoi ga hte shi hpe kabu gara jahtau ga. ³ Kaning rai nme law, Yehowa gaw Karai Wa kaba hte, Hpara ni mahkra a ntsa e, Hkawhkam kaba, rai nga ai. ⁴ Lamu ga sung ai shara ni, shi a lata hta rawng nga ai, Bum pungding ni mung shi a rai nga ai. ⁵ Nammukdara hpe shi galaw nna up nga ai, Shi a lata gaw hkarang hpe mung hpajang da nu ai. ⁶ Sa marit, anhte a Hpan Wa Ningsang Yehowa a man e, Anhte dingnyawm let nawku nna lahput hput di nga ga! ⁷ Shi gaw, anhte a Karai Kasang rai nga ai; Anhte mung shi a udat a amyu hte, Shi a lata na sagu hpung rai nga ga ai. Nanhte dai ni shi a nsen madat myit ga! ⁸ Meriba hte, nam e nga ai Masa a makau na zawn, Nanhte a myit masin hpe hkum shaja myit. ⁹ Nanhte a nji nwoi ni dai yang e, ngai hpe dinglik yu mi ai; Nye a amu hpe mu lu raitimung, ngai hpe chyam yu mi ai. ¹⁰ Ngai gaw mali shi ning tup ndai amyu hpe n yawt nga nna; “Shanhte gaw tinang a myit hte lam dam mat ai amyu hte, Nye a lam hpe mung n chye ai ni, rai nga ma ai,” nga nna ngai tsun nga nngai. ¹¹ Dai majaw, “Nye a ban sa ai hta shanhte n shang lu mu ga,” Nga nna masin pawt let, ngai dagam da nngai.

¹ Yehowa hpe mahkawn ga nnan hte mahkawn mu, Aga ting Yehowa hpe mahkawn mangoi mu. ² Yehowa hpe mahkawn mangoi mu, shi a amying hpe sha-a mu; Shi a hkyehkrang la ai lam hpe lani hte lani hkai dan mu. ³ Masha amyu ni hpe shi a hpung shingkang, Amyu baw shagu hpe shi a mauhpa amu, gawn dan mu. ⁴ Yehowa gaw galu kaba nga ai rai nna, Nachying shakawn ging ai wa, rai nga ai: Hpara mahkra ni hta shi hpe grau hkrit mai nga ai. ⁵ Amyu baw ni a hpara ni, sumla hkrai rai nga ma ai; Yehowa chyawm gaw, sumsing lamu hpe hpan da nu ai. ⁶ Ndaw nsa hte hpung shingkang shi a man e nga nga ai, Atsam hte reng htum ai, shi a Chyoi pra ai shara e, nga nga ai. ⁷ Masha amyu dap ni e, anhte a Yehowa hpe, Rai sa, Yehowa hpe hpung shingkang hte atsam yin la mu. ⁸ Yehowa a amying nsang hpe hpung shingkang yin la mu; Lusha hkungga lang nna, shi a wing hta shang mu. ⁹ Chyoi pra ai hpe mawn sumli nna, Yehowa hpe nawku mu; Mung shagu shi a man e hkrit gari nga mu ga. ¹⁰ “Yehowa gaw Hkawhkam rai nga ai,” Ngu nna masha amyu ni hpe tsun dan mu; Gaja wa, mungkan ga hpe shi tawn da nna, Dai gaw shamu shamawt nga ai n rai; Amyu baw ni hpe malang ai hku, shi dawdan na ra ai. ¹¹ Yehowa a man e, sumsing lamu kabu gara nga nna, ginding aga garu jahtau na ra ai: Nammukdara hte dai hta rawng marawng, nsen kaba hte kashaw nga mu ga. ¹² Pa hte dai yang na nga manga kabu awng nga mu ga; Shaloi maling na hpun yawng hte awng sharawng nga na mara ai. ¹³ Kaning rai nme law, lamu ga hpe tara dara na, shi du sa nna, Shi gaw mungkan ga hpe dingman ai hte, amyu baw ni hpe sadi sahka hte, tara dara na ra ai.

¹ Yehowa gaw Hkawhkam rai nga ai; Ginding aga kabu jahtau nga u ga; Zunlawng law law ni mung, kabu gara nga mu ga. ² Sumwi hte nsin shi a grupyin e nga nga ma ai; Dingman ai hte tara dara ai gaw, shi a tingnyang a npawt nhpang rai nga ai. ³ Shi a man e wan hkawm nga nna, Shi a grupyin hkan na hpyen ni hpe hkru kau mu ai. ⁴ Shi a myihprap mungkan ga hpe jahtoi ya nga ai; Aga gaw dai hpe mu nna hkrit gari nga ai. ⁵ Aga ting a Madu, Yehowa a man e, Bum ni gaw gitbaw zawn, byawng mat ma ai. ⁶ Sumsing lamu gaw shi a dinghpring ai hpe shana ya nna, Amyu shagu shi a hpung shingkang hpe mu lu ma ai. ⁷ Gawngngu hpuntawng dawjau ai ni nlang hte hte, Sumla hta gumrawng ai ni, kaya kahpa hkrum mu ga: Hpara yawng hte e, shi hpe nawku mu. ⁸ Yehowa e, na a tara ai lam majaw, Ziun na nna kabu nga ai; Yuda a shayi sha ni mung, kabu jahtau nga ma ai. ⁹ Kaning rai nme law, nang Yehowa e, Lamu ga ntsa e tsaw htum ai wa rai nga ndai; Hpara mahkra ni a ntsa e, nang nachying grau nga ndai. ¹⁰ Yehowa hpe tsawra ai ni e, n hkru ai hpe ndawng kau mu; Shi hpe kamsham ai ni a myit masin hpe shi sin nga ai: Tara n lang ai ni a lata na, shi shanhte hpe mawai la mu ai. ¹¹ Dingman ai ni a matu, nhtoi htoi nga ai, Myit malang ai ni a matu kabu shara rai nga ai. ¹² Dingman ai ni e, Yehowa hta kabu gara nga mu, Shi a chyoi pra ai shingteng amying hpe shakawn nga mu.

¹ Yehowa hpe mahkawn ga nnan hte mahkawn mu; Shi gaw, mauhpa amu galaw nu ai: Shi a hkra lata hte chyoi pra ai lahpum, shi a matu hkyehkrang la ai lam shapraw nu ai. ² Yehowa gaw shi a hkyehkrang la ai lam hpaw ya wu ai; Shi gaw shi a dinghpring ai lam, masha amyu ni a man e madun dan mu ai. ³ Shi a chyeju hte sadi sahka, Israela a nta a matu shi dum nu ai: Lamu ga makau shagu hkan e mung, Anhte a Karai Kasang a hkyehkrang la ai lam mu lu masai. ⁴ Mung shagu e, Yehowa hpe kabu jahtau mu, Nsen kaba hte garu nna mahkawn mangoi mu. ⁵ Tingse dum nna Yehowa hpe mahkawn mu, Tingse hte mahku ngwi ai nsen hte mangoi mu. ⁶ Pahke hte ngoi ai pahtau hte, Hkawhkam Yehowa a man e kabu jahtau mu. ⁷ Nammukdara hte dai hta na yawng mayawng, Mungkan ga hte de a nga manga ni, ngoi kashaw nga mu ga. ⁸ Yehowa a man e, hka nu ni lata lahpawk dum mu ga; Bum ni gaw jawm garu kabu nga mu ga. ⁹ Kaning rai nme law, lamu ga hpe tara dara na shi du sa nna, Mungkan ga hpe dingman ai hte, amyu baw ni hpe malang ai hku hte, tara dara na ra ai.

¹ Yehowa gaw Hkawhkam rai nga ai; Amyu baw ni hkrit gari nga mu ga: Hkerubim ntsa e shi adung nga ai, Ginding aga awam nga u ga. ² Yehowa gaw Ziun hta e kaba nga ai rai nna, Amyu baw shagu a ntsa e grau tsaw nga ai. ³ Na a kaba ai hte hkrit mai ai amying nsang hpe, Shanhte shakawn kungdawn nga mu ga: shi gaw chyoi pra nga ai. ⁴ Dingman ai tara tsawra ai hkawhkam a atsam hpe, Tara npawt hta nang tawn da nu ai; Nang gaw Yaku hta e tara dara ai hte dingman ai lam, shashawn nu ai. ⁵ Anhte a Karai Kasang Yehowa hpe shagrau mu, Shi lagaw mara ai lahkum makau e nawku mu: Shi gaw chyoi pra nga ai. ⁶ Shi a hkinjawng ni hta lawm ai Mawshe yan Arun, Shi a amying hpe shaga ai ni hta lawm ai Samuela gaw, Yehowa hpe shaga ma ai rai nna, shi shanhte hpe htan ya mu ai. ⁷ Shi shanhte hpe sumwi shadaw hta nna ga tsun mu ai: Shanhte mung shi a sakse ga hte, shanhte e jaw ai tara hpe hkan nang ma ai. ⁸ Anhte a Karai Kasang Yehowa e, Nang shanhte hpe htan ya mu ai. Shanhte a mara raw kau ya ai Karai Wa nang rai nga timung, Shanhte a bungli hte maren matai bai dawp mu ai. ⁹ Anhte a Karai Kasang Yehowa hpe shagrau mu, Shi a chyoi pra ai bum hta e nawku mu: Anhte a Karai Kasang Yehowa gaw chyoi pra nga ai law.

¹ Mung shagu Yehowa hpe kabu jahtau nga mu. ² Yehowa hpe kabu gara ai hte dawjau nga mu, Shi a man de mahkawn mangoi let shang mu. ³ Yehowa gaw Karai Kasang rai nga ai, chye mu: Shi anhte hpe hpan da mi ai rai nna, Anhte shi a masha ni rai nga ga ai; Shi a amyu hte shi a udat na sagu hpung, anhte rai nga ga ai. ⁴ Shi a chyinghka de chyeju dum let shang mu, Shi a wing hta e shakawn kungdawn let shang mu; Shi a chyeju dum nna shi a amying nsang hpe sha-a mu. ⁵ Kaning rai nme law, Yehowa gaw mai kaja nga ai; Shi a chyeju htani htana anga nga nna, Shi a sadi sahka prat mi hte prat mi agrin nga ai law.

¹ Chyeju hte tara dara ai lam ngai mahkawn mangoi na nngai: Yehowa e, ngai nang hpe shakawn na nngai. ² Myit malang ai lam ngai matsing yu na nngai; Nang ngai kaw galoi e du na rin ta? Nye a nta hta hkum tsup ai myit hte ngai hkang nga na nngai. ³ N hkru ai amu hpe ngai n yu na nngai, Shut hpyit ai ni a amu hpe ngai ndawng nga nngai: Dai gaw ngai hta kap lu na n rai. ⁴ Magaw ai myit ngai hte tsan nga u ga, N shawp ai hpe ngai n dum nga nngai. ⁵ Shi a htingbu wa hpe mayun de nna shi htawn ai wa hpe, ngai atsai awai di kau na we ai: Gumrawng nna myit kaba ai wa hpe, ngai n dang hkam nngai. ⁶ Dai mung na sadi sahka re ai ni, Ngai hte rau nga mu ga, ngai tam na nngai; Myit malang ai lam hta hkan ai wa gaw, Nye a amu gunhpai lu na ra ai. ⁷ Hkalen sha ai wa gaw, nye a nta hta rawng lu na n rai; Masu ai ga tsun ai wa gaw, nye a man e grin lu na n rai. ⁸ N hkru ai amu galaw ai ni nlang hte hpe, Yehowa a mare na jahkoi kau na, Dai mung na tara n lang ai ni yawng hte hpe, Ngai jahpawt shagu atsai awai di kau na mawe ai.

¹ Yehowa e, ngai akyu hpyi ai ga madat ya e, Ngai hpyi jahtau ai ga, nang kaw hkrang pru u ga. ² Ngai ru tsang hkrum ai nhtoi hta e, na a myiman ngai kaw na hkum makoi kau et; Na a na ngai hpang de kayin dat rit; Ngai shaga ai nhtoi e, alawan htan ya e. ³ Nye a nhtoi wan nhkut zawn hkoi mat sai, Nye a nrut nra ni wan nwu zawn hkru mat ma masai. ⁴ Nye a myit tsingdu zawn hkraw wa nna, nyip mat li ai, Lusha na pyi, ngai malap kau nga nngai. ⁵ Ngai madai sharung nga nngai majaw, Nye a nrut nra ni hpyi hta kap mat wa masai. ⁶ Zaibru jang e nga mat ai wunpu u hte, Prang ga e nga ai u hku zawn, ngai rai nga nngai. ⁷ Ngai yup n lusha nga nngai rai nna, Nta magaw e dung ai u shingtai zawn, rai nga nngai. ⁸ Ngai hpe gumlau ai ni shani tup ngai hpe shatan mi ai; Ngai hpe ndawng n yawt ai ni ngai hpe dagam kau mi ai. ⁹ Wan dap hpe shat zawn ngai sha nna, Nye a luhpa myi prwi hte kayau nga ai. ¹⁰ Dai gaw na a masin pawt ai hte, myit kahtet bu ai a majaw rai nga ai; Kaning rai nme law, nang ngai hpe shagrau nhtawm, bai shagrit kau ni ai. ¹¹ Nye a nhtoi ni mat wa ai shingnip zawn rai nga nna, Tsingdu zawn ngai nyip mat nga nngai. ¹² Nang chyawm gaw, Yehowa e, htani htana anga nga nna, Na a amying shingteng prat mi hte prat mi agrin nga ai. ¹³ Nang rawt wa nna Ziun hpe matsan dum na ndai: Rai sa, shi hpe yu lahku na aten du ra ai rai nna, Shi a ladaw langa da ai, ya e rai sai. ¹⁴ Na a mayam ni shi a nlung ni hpe sharawng nga nna, Shi a nhpu hpe pyi, ra la nga ma ai. ¹⁵ Shaloi masha amyu ni Yehowa a amying nsang hpe, Ga ntsa hkawhkam ni nlang na a arawng sadang hpe, hkrit hkungga na mara ai. ¹⁶ Kaning rai nme law, Yehowa gaw Ziun hpe de da nu ai; Shi a hpung shingkang danhkung nga ai. ¹⁷ Matsan mayan ni a akyu hpyi ai ga shi madat ya nna, Shanhte a akyu hpyi ai lam matsat kau ya mu ai n rai. ¹⁸ Dai gaw hpang na ni a matu ka da nga ai rai nna, Naw pru na ra ai amyu gaw, Yehowa hpe shakawn na mara ai. ¹⁹ Kaning rai nme law, shi gaw shi a chyoi pra ai, Tsaw Htum ai shara de nna, azi yu nga ai; Lamu de nna ga de, Yehowa a mada nga ai. ²⁰ Bawngdung ai ni a madai ai hpe shi madat nga ai, Si na wa a matu shi chyinghka hpaw ya nga ai. ²¹ Dai majaw amyu baw ni zuphpawng nga nna, Mungdan na ni Yehowa hpe dawjau nga ai shaloi e, ²² Yehowa a amying hpe, Ziun hta e, Yerusalem mare e shi hpe shakawn ai gaw, masha ni gawn dan na mara ai. ²³ Shi gaw nye a n-gun hpe, lam hkan e shayawm nna, Nye a nhtoi ni hpe shagying ya ni ai. ²⁴ Shaloi ngai tsun ai gaw, Nye a Karai Wa e, Nye a prat hpungngang e, ngai hpe hkum la kau et; Na a shaning ni prat mi hte prat mi rai nga ai. ²⁵ Nang gaw moi moi e, ginding aga hpe gaw da nna, Sumsing lamu, na a lata a amu rai nga ai. ²⁶ Dai ni hten wa ma timung, nang agrin nga ndai; Yawng gaw hpun nba zawn dingsa mat ma ai; Nang dai hte hpe nba zawn galai kau nna, Dai ni galai mat ma ai. ²⁷ Nang chyawm gaw dinggrin anga nga nna, Na a shaning ni htum ngu ai n nga ai. ²⁸ Na a ali ama ni a kashu kasha ni, anga nga na ma ai rai nna, Shanhte a matu mara ni, na a man e agrin nga na mara ai.

¹ Nye a myit masin e, Yehowa hpe sha-a nga u, Nye kraw lawang mahkra e, shi a chyoi pra ai amying nsang hpe sha-a nga mu. ² Nye a myit masin e, Yehowa hpe sha-a nga u, Shi a chyeju yawng hte hpe hkum malap kau et. ³ Na a yubak yawng mayawng, shi raw kau ya ai, Na a ana ahkya mahkra hpe shamai ya nga ai. ⁴ Na a asak hpe nsung hku hta na shi hkyehkrang la nna, Chyeju hte n-gaw nwai ai nang hpe shagup ya nga ai. ⁵ Nang gaw, kalang zawn, ram prat bai pra lu hkra, na a aprat hpe mai kaja ai hte shakat nu ai. ⁶ Yehowa gaw dingman ai bungli galaw nga ai rai nna, Zingri hkrum mahkrum ni hpe dawdan ya nga ai. ⁷ Shi gaw shi a lam Mawshe hpe, shi a lai len ni Israela kashu kasha ni hpe, madun dan ya manu ai. ⁸ Yehowa gaw matsan dum ai, sumnung ai, galu kaba nna, Nachying n-gaw nwai ai myit, rawng nga ai. ⁹ Shi tutnawng e a daru nga ai n rai, Shi prat dingsa e a pawt nga na n rai. ¹⁰ Anhte a yubak hte maren, shi bai tai mi ai n rai. Mara lu ai hte maren, anhte hpe ari jaw mi ai, n rai. ¹¹ Lamu gaw aga hta tsaw nga ai hte maren, Shi a n-gaw nwai myit, shi hpe hkrit kamying ai ni a ntsa e, a galu kaba nga lu ai. ¹² Sinpraw maga gaw, sinna maga hte tsan nga ai hte maren, Shi anhte a yubak hpe anhte hte shatsan kau ya mi ai. ¹³ Kawa gaw kasha ni hpe matsan dum lama ai zawn, Yehowa gaw shi hpe hkrit kamyin ai ni hpe matsan dum lama nga ai. ¹⁴ Anhte a hkum tsawp hpe shi chye ya nga ai, Anhte ga nhpu rai nga ga ai hpe, shi dum nga ai. ¹⁵ Masha a nhtoi gaw tsingdu zawn rai nga ai, Pa e tu ai nampan hte maren shi pu nga ai. ¹⁶ Shi a ntsa e nbung ahpawt jang, shi n nga ai, Shi a shara pyi, shi hpe bai n chye lu ai. ¹⁷ Yehowa hpe hkrit kamyin ai ni a ntsa e, Shi a chyeju gaw chyaloi nhkoi kaw nna prat dingsa du hkra, anga nga ai rai nna; ¹⁸ Shi a ga shaka hpe hkan nang ai ni hte, Shi a ga matsun ni hpe dum galaw ai ni a ntsa e, Shi a dinghpring ai gaw, shu mashi shu masha prat du hkra, anga nga na ra ai. ¹⁹ Yehowa gaw lamu ntsa e, shi a tingnyang shadun tawn nna, Shi a mungdan shara shagu hkan e chyam nga ai. ²⁰ N-gun ja nna, shi a mungga nsen madat let, Shi a mungga hpe shadik ya ai lamu kasa ni e, Yehowa hpe sha-a mu. ²¹ Shi ra ai hku hkan nang nna, shi a magam bungli gunhpai ai zaw nawng zaw wa yawng hte e, Yehowa hpe sha-a mu. ²² Shi a mungdan shara shagu hkan e, hpan hpajang da mada ni e, Yehowa hpe sha-a mu: Nye a myit masin e, Yehowa hpe sha-a nga u law.

¹ Nye a myit masin e, Yehowa hpe sha-a nga u; Nye a Karai Kasang Yehowa e, Nang nachying galu kaba rai nga ndai; Arawng hte hpung shingkang nang bu hpun nga ndai. ² Nhtoi hpe nba zawn nang hpun lawai nga ndai, Sumsing lamu hpe hpajawng zawn, nang kahpyen da nu ai. ³ Shi a gawk madung gaw hka hta shi tawn da nu ai; Sumwi hpe shi a leng ni shi shatai nu ai; Nbung a singkaw hta shi hkawm nga ai. ⁴ Nbung hpe shi a kasa shi shatai nna, Shi a ali ama ni grung ai wan shinglet rai nga ma ai. ⁵ Aga hpe de a npawt hta shi gaw da nu ai, Dai gaw htani htana e shamu shamawt rai na n rai. ⁶ Dai hpe nba hte zawn, hka hte nang magap da nna, Bum ni a ntsa e, hka lim nga ai. ⁷ Nang daru jang, dai ni hprawng mat ma ai, Na mu ngoi ai nsen majaw, dai ni lawan mat wa ma ai. ⁸ Bum ni tsaw wa ma ai, kadit ni nem wa ma ai. Nang tawn da ai shara hta, dai ni grin nga ma ai. ⁹ Dai ni nlai lu ai lamu ga jarit nang tawn da nna, Aga hpe magap na, dai ni nhtang wa lu ma ai n rai. ¹⁰ Shi gaw hkaraw ni hta, hka shi jahpaw dat nu ai: Bum ni a lapran e, dai ni lwi nga ma ai. ¹¹ Dai ni gaw pa na ashu ashan ni yawng hpe shalu mu ai. Nam na lawze ni hpang gara yang, hkru hkra lu lu ma ai. ¹² Ntsa malen na u ni dai ni a makau e shanu nga nna, Lakung lakying ni hta e, shaga kashai nga ma ai. ¹³ Shi a gawk ni hta nna, bum ni hpe shi ntsin jaw mu ai; Na a bungli a asi hta e lamu ga hkru kat nga ai. ¹⁴ Aga hta na lusha lu la mu ga, shi gaw, yamnga ni a matu tsingdu, Masha a matu nsi naisi, shatut ya mu ai. ¹⁵ Tsabyi jahku masha a myit hpe shapyaw ya nga ai, Shi a myiman namman hte htoi nga ai: Ashat mung masha a myit hpe shadaw ya nga ai. ¹⁶ Yehowa a hpun ni, rai sa, shi hkai da nga ai, Lebanon a arit hpun ni, hkru kat nga ma ai. ¹⁷ Dai hta e u ni tsip tsip nga ma ai; Ukawp ni marau hpun ntsa e shanu nga ma ai. ¹⁸ Tsaw ai bum ni ya ni a shanu shara, Lungpu ni du dumsi ni a makoi shara, rai nga ai. ¹⁹ Ladaw da nga na matu shata hpe tawn da wu ai. Jan mung, shi a shang na aten chye nga ai. ²⁰ Nsin hpe nang shasin nna shana tai nga ai, Dai shaloi maling na matse labye yawng, pru hkawm ma ai. ²¹ Hkanghkyi hkalung ni shan amya na shabam nna, Karai Wa kaw tinang a shahpa tam ma ai. ²² Jan bai pru jang, shanhte nhtang mat wa nna, Tinang a shanu ai shara hta, hpum nga ma ai. ²³ Shaloi masha wa gaw, amu galaw na pru sa nna, Shana de du hkra, bungli hta noi nga nga ai. ²⁴ Yehowa e, na a amu gade law la nga a hka! Nang mahkra hte hpe, hpaj hte galaw nu ai; Aga gaw, nang hpan da ai arai hte hpring nga ai. ²⁵ Wora kaba nna dam nga ai nawng hta e, Kadai n dang hti lu hkra kanawng hkawm ai baw, Nga amyu kaji kaba mung, nga nga ma ai. ²⁶ Dai hta e shanghpaw li ni hkawm nna, Nang hpan da ai baren mung pyau nga ai. ²⁷ Aten du jang, shanhte hpe shahpa jaw ruga, Nga nna, nlang hte gaw nang hpe mada nga ma ai. ²⁸ Nang jaw nna shanhte hkap la ma ai, Nang lata hpaw nna, shanhte mai kaja ai hte hkru kat lu ma ai. ²⁹ Nang myiman kayin mat nna, shanhte myit ru ma ai, Shanhte a nsoi nsa nang dawm la jang, shanhte si wa nna, Tinang a nhpu hta bai nhtang mat wa ma ai. ³⁰ Na a nsoi nsa shapraw dat ai hte nang shanhte hpe hpan da nna, Lamu ga hpe bai gram nu ai. ³¹ Yehowa a arawng sadang htani htana anga nga u ga, Yehowa, shi a amu bungli hta, kabu nga u ga. ³² Lamu ga hpe shi mada yu nna, dai gari nga ai, Bum ni hpe shi ahtawk nna, dai ni wan nhkut hku ma ai. ³³ Ngai hkrung nga ai hte yang, Yehowa hpe ngai mahkawn na nngai, Ngai naw nga yang, nye a Karai Wa hpe ngai mangoi na nngai. ³⁴ Nye a myit htang ai ga hta, shi awng nga u ga, Ngai mahtang Yehowa hta kabu na nngai. ³⁵ Yubak kap ai ni dinghta ga hta na htum mat nna, Tara n lang ai ni hpang de n pra lu mu ga! Nye a myit masin e, Yehowa hpe sha-a nga u. Halelu-Yah.

¹ Yehowa a chyeju hpe shakawn mu, Shi a amying nsang hpe shaga mu: Shi a amu bungli, amyu baw ni hpe tsun dan mu. ² Shi hpe mahkawn mu, shi hpe mangoi mu, shi a mauhpa amu nlang hte hkai dan mu. ³ Shi a chyoi pra ai amying hta kabu gumrawng nga mu: Yehowa hpe tam ai ni a myit masin kabu nga malu ga. ⁴ Yehowa hte shi a n-gun atsam hpe tam san mu; Shi a myiman hpe tutnawng e hkan tam mu. ⁵ Shi a mayam Abraham a aru arat hte e, Shi lata la ai Yaku a kashu kasha ni e, ⁶ Shi galaw dan sai lamik kumla bungli hte, shi a mauhpa magam, shi n-gup na pru ai tara hpe, adum nga mu. ⁷ Shi Yehowa gaw anhte a Karai Kasang rai nga ai: Ga ting hta e shi a tara dara ai ga, pru nga ai. ⁸ Abraham hte tawn da nga nna, Isak hpe dagam shagrin da ai ga shaka ngu ai, ⁹ Prat hkying mi a matu hkangda ai mungga hpe, Shi prat dingnawng e adum nga ai. ¹⁰ “Hkanan mung hpe na a sali wunli jarit matu, Ngai nang hpe jaw na nngai,” nga ai ga gaw, ¹¹ Yaku hte ga madat shi tawn da nna, Israela hta prat dingsa na ga shaka shatai nu ai. ¹² Shanhte hpe hti yu na mi garai n ra, Amyu kaji naw rai nga nna, dai mung e shingbyi nga ma yang, ¹³ Amyu mi hta na amyu mi de, Mung mi kaw nna mung mi de, htawt hkawm ma ai shaloi e, ¹⁴ Shanhte hpe zingri na shi n hkraw nga ai rai nna, shanhte a majaw hkawhkam hpe pyi ari jaw nu ai. ¹⁵ “Nye a namman chya hkam ai ni hpe hkum hkra myit, Nye a myi htoi ni hpe hkum shatsang myit,” nga nna shi tsun nga ai. ¹⁶ Shaloi dai mung hta e n-gawn hku wa shabyin dat nna, lusha a npawt yawng hpe jahten kau mu ai. ¹⁷ Shanhte a shawng e, marai langai mi hpe shi shangun dat wu ai; Mayam tai na, Yosep gaw dut kau ai hkrum nu ai. ¹⁸ Yehowa, shi hpe chyam yu ai ga hte, Shi htai dan ai ga dik wa ai aten du hkra, ¹⁹ Shanhte gaw shi a lagaw hpe hkang hkyihkyang hte, Shi a myit masin hpe hpri hte zingri zingrat mu ai. ²⁰ Shaloi hkawhkam wa gaw shi hpe raw kau nna, Amyu ni hpe up ai du, shi hpe dat dat wu ai. ²¹ Shi a hkringmang ni hpe gyit mayu yang gyit na, Shi a agyi salang ni hpe hpaji sharin ya na, ²² Shi a nta a madu shi hpe tawn da nna, Shi a sutgan yawng a ntsa e, du shatai nu ai. ²³ Shingrai Israela gaw Egutu mung de du nna, Yaku gaw Ham a mung hta e shingbyi nga ai. ²⁴ Shi a amyu hpe grai mayat maya wa shangun nna, shanhte a hpyen ni hta n-gun grau shaja mu ai. ²⁵ Bai shi shanhte hpe shi a ali ama ni hpe hkalem sha na, Shi a amyu hpe ndawng na, shadut mu ai. ²⁶ Shi a mayam Mawshe hte, Shi lata la ai Arun hpe, shi shangun dat mu ai. ²⁷ shanhte a man e shi a lamik kumla shan madun dan nna, Ham a mung hta e, mauhpa amu galaw ma ai. ²⁸ Nsin hpe shi dat nna shasin nu ai: shan gaw shi a ga hte shai lu ma ai n rai. ²⁹ Hka hpe asai shatai nna, dai hta na nga ni hpe jasi kau wu ai. ³⁰ Shanhte a mung de shu li shawa dat nna, Hkawhkam a gawk hta pyi shang ma ai. ³¹ Shi tsun da jang, jinghkam du nna, mung ting hta machyi ut rai nga ai. ³² Marang a malai sin jahkrat dat nna, Shanhte a mung hta e, wan rawt nga ai. ³³ Shanhte a tsabyi ru hte maihpang hpun ni hpe hkra nna, Mung ting na hpun shagu agrawp mat ma ai. ³⁴ Shi tsun jang, dinggam-yaw du nna, N dang hti lu ai nkangkawt chyat rai nga ai. ³⁵ Mung ting na shat maw shat mai lap hpe, sha kau nna, Pa na nsi naisi hpe mung sha kau mu ai. ³⁶ Dai hpang, shi gaw shanhte a shawng na n-gun, Mung na kasha alat yawng hte hpe, sat kau mu ai. ³⁷ Shi a masha ni hpe aja, gumhpraw hte shapraw woi wa nna, Shi a amyu hta kataw ai mi n nga ma ai. ³⁸ Shanhte pru wa yang, Egutu masha ni kabu nga ma ai: kaning rai nme law, shanhte dai ni hpe hkrit da mu ai. ³⁹ Shingnip tai na shi sumwi hpe hpyan ka-up nna, Shana e, wan jahtoi ya mu ai. ⁴⁰ Shanhte hpyi nna shi u preng dat dat ya mu ai, Lamu na shat hte shanhte hpe shakat ya mu ai. ⁴¹ Lunghkung hpe shi hpaw nna, ntsin pru nga ai; Hkraw ai shara e hka zawn, dai lwi nga ai. ⁴² Kaning rai nme law, shi tsun da ai chyoi pra ai ga hte, Shi a mayam Abraham hpe shi dum nga ai. ⁴³ Shi a amyu hpe kabu gara ai hte, shi lata la ai ni hpe, Garu jahtau ai hte, shi shapraw wa mu ai. ⁴⁴ Shi a ga madat matsing nga nna, Shi a jep ai tara hkan nang nga mu ga, ⁴⁵ Masha amyu ni a mungdan, shi shanhte hpe jaw da nna, Shanhte a sali wunli matu, amyu baw ni a bungli hta, shanhte shang lu ma ai. Halelu-Yah.

¹ Yehowa hpe shakawn kungdawng mu: Yehowa gaw mai kaja nga ai majaw, chyeju dum mu; Shi a chyeju htani htana e anga nga ai. ² Yehowa a n-gun amu hpe, kadai gawn dan lu a ta? Shi hpe shakawn ai ga yawng hte, kadai madun lu a ta? ³ Dingman ai tara dara ai lam hkan nang nna, Ding ai bungli tut tut a galaw nga ai ni gaw, a nga ma ai. ⁴ Nang lata la ai ni a ngamai ai lam ngai mu lu na hte, Na a amyu a kabu gara ai hta ngai mung kabu lu nna, Na a sali wunli hte shakawn kungdawn nga lu n ga, ⁵ Yehowa e, na a amyu hpe karum ai chyeju hte ngai hpe dum ya nna, Na a hkyehkrang la ai lam ngai hpe madun dan ya e. ⁶ Anhte gaw ji woi ni hte rau yubak galaw ga ai, Anhte shut hpyit nna, tara tawt lai saga ai. ⁷ Egutu mung na anhte a ji woi ni, Na a mauhpa bungli hpe, mung n yu nna, Na a kaba la ai chyeju hpe, n dum ma ai rai nna, Dai hkyeng ai Nawng makau e pyi gumlau nga ma ai. ⁸ Raitimung, shi a daru magam danhkung wa u ga, Shi mying nsang a matu, shi shanhte hpe hkyehkrang la mu ai. ⁹ Hkyeng ai Nawng hpe shi daru kau nna, dai gaw hkyet mat wa ai; Shi shanhte hpe hkarang e zawn, dai sung ai shara e, woi rap wa mu ai. ¹⁰ N dawng ai ni a lata na, shi shanhte hpe hkyehkrang la nna, Gumlau ni a lata na, shanhte hpe mawai la mu ai. ¹¹ Hka leng ni shanhte a hpyen ni hpe ka-up kau mu ai, Langai mi muk n ngam mat ma ai. ¹² Shaloi shanhte gaw shi a ga hpe kamsham nna, Shi a arawng hpe shakawn kungdawn ma ai. ¹³ Gade n na yang shanhte gaw shi a amu hpe malap kau ya mu ai, Shi hpaji daw ai lam hpe, n myit yu ma ai. ¹⁴ Nam mali hkan e, shanhte myit marin la nga nna, Shingran katsi ai shara e, Karai Wa hpe dinglik yu ma ai. ¹⁵ Shanhte hpyi ai lam, shi shadik ya mu timung, Shanhte hpe lasi lamun di shangun mu ai. ¹⁶ Dai dap hkan e nga ai shaloi, shanhte Mawshe hte, Yehowa a chyoi pra ai Arun hpe manawn mu ai. ¹⁷ Lamu ga mahka wa nna Dahtan hpe mayu kau wu ai; Abiram a hpung hpe makoi magap kau mu ai. ¹⁸ Shanhte a hpung hta e, wan nat mu ai rai nna, Wan nli gaw tara n lang ai ni hpe hkru kau mu ai. ¹⁹ Horeb makau e shanhte dumsu kasha hpe shachyaw nna, Jaw la ai sumla hpe nawku ma ai. ²⁰ Shingrai shanhte gaw tinang a arawng hpe, Tsingdu sha ai usu a sumla hte, galai kau mu ai. ²¹ Egutu mung hta e, amu kaba galaw ai, Ham a shara e, mauhpa bungli shapraw ai, ²² Hkyeng ai Nawng makau e, hkrithpa nsam shabyin ai, shanhte a hkyehkrang la ai Karai Wa hpe, shanhte malap mali kau mu ai: ²³ Shaloi shanhte hpe jahten na shi maw nga ai: Raitimung, shi lata la ai Mawshe gaw Shi a man e tsap nga nna, shanhte hpe n jahten mu ga, Shi a myit hpe shakawp ya wu ai. ²⁴ Dai pyaw ai mungdan hpe, shanhte matsat kau mu ai, Shi a ga hpe mung n kam n sham ma ai. ²⁵ Tinang a sum hta, shanhte wu wu di di rai nga nna, Yehowa a nsen hpe n madat mu ai. ²⁶ Shaloi dai nam hkan e, shanhte hpe jahkrat kau na, masha amyu ni hta, shanhte a kashu kasha ni hpe shabra kau nna, ²⁷ Mung shagu hta shanhte hpe shaden kau na, Nga nna shanhte hpe shi a lata sharawt da wu ai. ²⁸ Bala Peura hpe shanhte manoi nna, Si ai wa hpe nawng ai hkungga sha ma ai. ²⁹ Shanhte a amu majaw masin pawt pru nna, Shanhte hpe ana zinli e zingri mu ai. ³⁰ Dai shaloi Hpinaha rawt dawdan nna, Dai ana zinli hkoi mat wa ai. ³¹ Dai hpe tutnawng, prat mi hte prat mi, Shi hpe dinghpring ai zawn, nawn da mu ai. ³² Bai, Meriba makau e, shanhte gumlau nna, Shanhte a majaw Mawshe mung, ra rawng mat ai. ³³ Kaning rai nme law, shi a wenyi hpe shanhte shatsang ya nna, Shi gaw shi a n-gup hte ga shut kau wu ai. ³⁴ Shanhte gaw Yehowa htet da ai hte maren, Masha amyu ni hpe atsai awai n di kau mu ai. ³⁵ Masha amyu ni hte shanhte kayau kaya rai nga nna, Shanhte a htunghking hpe sharin la ma ai. ³⁶ Dai ni a sumla ni hpe mung shanhte nawku nna, Dai gaw shanhte a mahkam tai wa ma sa lu ai. ³⁷ Shanhte gaw tinang a shayi shadang sha ni hpe, Nat ni hpe nawng ya kau mu ai. ³⁸ Mara n rawng ai asai, shanhte ru kau mu ai: Hkanan a hpara sumla ni hpe ru jaw mu ai asai gaw, Tinang a shayi shadang sha ni a asai nan rai nga ai: Shing di nna mungdan hpe asai hte wu kau mu ai. ³⁹ Tinang a bungli majaw, shanhte n san n seng wa ma ai, Shanhte a arawn alai majaw tinang dai shut hpyit nga ma ai. ⁴⁰ Shaloi Yehowa shi a amyu hpe myit kahtet nga nna, Shi a sali wunli hpe matsat kau wu ai. ⁴¹ Masha amyu ni a lata hta, shi shanhte hpe ap ya nna, Shanhte hpe ndawng ai ni, shanhte a ntsa e up mu ai. ⁴² Shanhte hpe gumlau ai ni shanhte hpe zingri zingrat nna, Dai ni a lata npu e, shanhte gum nga ma ai. ⁴³ Shi law law lang shanhte hpe mawai la mu timung Shanhte daw lu ai hpaji, gumlau hku hkrai rai nga ai: Dai majaw tinang a mara hta shanhte grit mat wa ma ai. ⁴⁴ Raitimung, shanhte a jahtau ai ga na ya mu yang, Shi shanhte a ru tsang ai hpe mu ya mu ai. ⁴⁵ Shanhte hte tawn da ai ga shaka shi dum nna, Shi a chyeju kaba hte shanhte hpe, matsan bai dum mu ai. ⁴⁶ Shanhte hpe rim mat wa ai ni hpe mung, Matsan dum chye na lam, hpaw ya mu ai. ⁴⁷ Anhte a Karai Kasang Yehowa e, anhte hpe hkyehkrang la mi; Na a chyoi pra ai amying hpe shakawn kungdawn nna, Nang hpe shakawn ai hta nlaw nga lu hkra, Masha amyu ni hta na, anhte hpe shinggyin la mi law. ⁴⁸ Israela Karai Kasang Yehowa gaw, Htani htana prat dingsa e, a nga u ga law! Masha amyu shagu, Amen, nga mu ga. Halelu-Yah.

¹ Yehowa gaw mai kaja nga ai mAjaw, shi a chyeju dum mu; Shi a chyeju htani htana e anga nga ai. ² Yehowa a majaw mawai la ai hkrum ai ni, Gumlau ni a lata na mawai la ai hkrum nna, ³ Sinpraw sinna, dingdung dingda, Mung shagu hta na shinggyin la ai hkrum ai ni, Ning nga nna a tsun nga mu ga. ⁴ Shanhte gaw nam mali hkan na katsi katsang re ai lam hta e, brak hkawm nga ma ai rai nna, Shanu nga lu na mare n mu mu ai. ⁵ Kawsi hpang kara hkrum nna, Shanhte a myit masin htum mat ma ai. ⁶ Shaloi shanhte gaw tinang a ru tsang ai hta e, Yehowa hpe hpyi jahtau mu ai rai nna, Shi gaw nni nkri yawng hta na, shanhte hpe shaw dat mu ai. ⁷ Shanhte shanu nga lu na mare de, du lu mu ga, Malang ai hku e shanhte hpe woi wa mu ai. ⁸ Yehowa gaw shinggyim masha ni hpe galaw dan ai, mauhpa bungli hte, Shi a chyeju majaw, shi hpe shakawn kungdawn nga mu ga. ⁹ Kaning rai nme law, hpang kara hkrum ai myit masin hpe, shi jahkru ya nna, Kawsi hkrum ai myit masin hpe, kaja ai hte shakat ya mu ai. ¹⁰ Karai Wa a ga hte nhtan shai nna, Tsaw Htum ai Wa a ga madat hpe roi kau mu ai majaw, ¹¹ Nsin hte si ai shingnip hta dung nga nna, Nni nkri hte, hpri sumri e gyit da ai hkrum nga yang, ¹² Shanhte a myit masin hpe yak la ai amu hta, Shi naw shagrit ya mu ai rai nna, Shanhte kataw yang, karum ai wa n nga ai. ¹³ Shaloi shanhte gaw tinang a ru tsang ai hta e, Yehowa hpe hpyi jahtau mu ai rai nna, Shi gaw nni nkri yawng hta na, shanhte hpe shaw dat mu ai. ¹⁴ Nsin hte si ai shingnip hta na shi shanhte hpe shapraw dat nna, Shanhte hpe hkang ai sumri gang dut kau ya mu ai. ¹⁵ Yehowa gaw shinggyim masha ni hpe galaw dan ai mauhpa amu hte, Shi a chyeju majaw, shi hpe shakawn kungdawn nga mu ga. ¹⁶ Magri chyinghka ni hpe shi agrawp kau nna, hpri htinggrang ni hpe kahtum kadaw di kau nu ai. ¹⁷ Myit n su ai ni, tinang a shut hpyit ai hte, Yubak galaw nga ma ai majaw, nji nmu hkrum ma ai. ¹⁸ Shanhte hpa shahpa hpe mung matsat kau nna, Si hkrung si htan chyinghka de ni wa ma ai. ¹⁹ Shaloi shanhte gaw tinang a ru tsang ai hta e, Yehowa hpe hpyi jahtau mu ai rai nna, Shi gaw nni nkri yawng hta na, shanhte hpe shaw dat mu ai. ²⁰ Shi a mungga shi dat dat nna, shanhte hpe shamai mu ai, dai nhkun hta na shanhte hpe shalawt dat mu ai. ²¹ Yehowa gaw shinggyim masha ni hpe galaw dan ai mauhpa amu hte, Shi a chyeju majaw, shi hpe shakawn kungdawn nga mu ga. ²² Shanhte gaw shakawn hkungga nawng jaw nna, kabu gara ai nsen hte shi a bungli hpe hkai dan nga mu ga. ²³ Nammukdara hta shanghpaw li hte hkawm ai ni, Hka kaba ni a ntsa e, amu galaw ai ni, ²⁴ Yehowa a amu bungli hte, Sung ai shara na shi a mauhpa amu hpe, mu ma ai. ²⁵ Shi htet da ai majaw, nbung laru ru wa nna, Hka leng ni rawt hta ma ai. ²⁶ Shanhte gaw htaw lamu de lung wa nna, Le sung ai de bai yu wa ma ai: yak la ai majaw, shanhte a minla byaw mat malu ai. ²⁷ Chyaru nang ai wa zawn, shanhte ndi nda rai hkawm nna, shanhte a hpaji nlang mak mat malu ai. ²⁸ Shaloi shanhte gaw tinang a ru tsang ai hta e, Yehowa hpe hpyi jahtau mu ai rai nna, Shi gaw nni nkri yawng hta na, shanhte hpe shaw dat mu ai. ²⁹ Dai nbung laru hpe, bung li sha shatai dat nna, hka leng ni sim mat ma ai. ³⁰ Dai sim mat ai majaw, shanhte kabu nna, Tinang ra ai daru de, shi shanhte hpe woi wa mu ai. ³¹ Yehowa gaw shinggyim masha ni hpe galaw dan ai mauhpa amu hte, Shi a chyeju majaw, shi hpe shakawn kungdawn nga mu ga. ³² Shawa masha ni a ka-ang e shi hpe shagrau nna, Salang ni a hpawng hta, shi hpe shakawn nga mu ga. ³³ Mung masha ni a n hkru ai amu majaw, Shi gaw hka nu ni hpe zaibru jang, ³⁴ Hka hpaw ai shara hpe ga jahkraw, Sau rawng ai ga hpe krin ai shara, shatai nu ai. ³⁵ Bai shi gaw zaibru jang hpe hka hpung-ya, Hkraw ai shara hpe hka hpaw ai shara shatai nna, ³⁶ Kawsi ai ni hpe dai yang e nga shangun mu ai: Nga na mare mung shanhte de manu ai. ³⁷ Shanhte yi galaw nna tsabyi sun hkai da mu ai, Nsi naisi hpe mung, shu da mu ai. ³⁸ Shi shanhte hpe shaman ya nna, shanhte nachying mayat maya ma ai: shanhte a yamnga ni mung jat wa malu ai. ³⁹ Dai hpang zingri ai, ru tsang ai hte yawnhkyen hkrum ai majaw, shanhte yawm wa nna, grit mat wa ma ai. ⁴⁰ Du ni hpe kaya kahpa jahkrum nna, Lam n hku ai katsi katsang nga ai shara e, Shanhte hpe brak hkawm shangun ai wa gaw, ⁴¹ Matsan ai ni hpe ru tsang ai hta na shalawt dat nna, Shanhte a dap ni hpe, sagu hpung zawn shatai mu ai. ⁴² Myit malang ai ni dai hpe mu lu nna kabu nga ma ai. N hkru ai ni mung tinang a n-gup pat kau ma ai. ⁴³ Hpaji rawng ai wa kadai raitimung, ndai amu hpe myit yu nna, Yehowa a chyeju hpe dum nga mu ga law.

¹ Karai Kasang e, nye a myit ngang kang nga ai: ngai mahkawn mangoi nna, tingse dum na nngai; Rai sa, nye a arawng dai galaw na ra ai. ² Tingse hte sumpyi ni e, dumhprang mu, jahpawt manap hpe mung, ngai jasu na we ai. ³ Yehowa e, masha amyu ni hta, ngai nang hpe shakawn na nngai; Amyu baw ni hta, ngai nang hpe tingse dum na nngai. ⁴ Kaning rai nme law, na a chyeju lamu du hkra, Na a sadi sahka sumwi kaw du hkra, lep nga ai. ⁵ Karai Kasang e, sumsing lamu hta nang grau tsaw nga u ga; Aga ting hta e, na a hpung shingkang danhkung nga u ga; ⁶ Na a tsawra ai ni lawt lu mu ga, Na a hkra lata hte hkye la nna, anhte hpe htan ya mi. ⁷ Karai Kasang shi a chyoi pra ai hte tsun dan ai gaw, “Ngai kabu na nngai; Shehkem hpe ngai karan na we ai; Suhkot kadit hpe ngai shadawn na we ai. ⁸ Geliad hte Manashe nye a rai nga ma ai; Ehprim gaw nye a baw magap, Yuda, nye a hkawhkam sumdoi rai nga ma ai. ⁹ Moba nye a lagaw kashin ai di rai nga ai; Edom hta nye a kyepdin ngai kabai tawn na we ai: Hpilisti mung a matu, ngai garu nga nngai. ¹⁰ Dai ngang ai mare hta e, ngai hpe kadai shashawn na rai nga a ta? Edom de ngai hpe kadai woi shang na rai nga a ta? nga ai. ¹¹ Karai Kasang e, nang anhte hpe kau da nit dai, n rai ni? Karai Kasang e, anhte a luksuk ni hte rau, nang n pru sa ndai. ¹² Ru tsang ai hta na anhte hpe karum la mi, Masha karum ai lam kaman sha rai nga ai. ¹³ Karai Kasang hte anhte nlaw lu na ga ai; Shi anhte a hpyen ni hpe kabye kau na mu ai.

¹ Ngai shakawn kungdawn nga ai Karai Kasang e, atsin sha hkum nga nga et. ² Kaning rai nme law, tara n lang ai wa a n-gup hte, Hkalem sha ai wa a n-gup, hpaw nga malu ai; Masu ai shinglet ni nye a lam a tsun nga ma ai. ³ Shanhte gaw ndawng n yawt ai ga hte, ngai hpe kawan da mi ai rai nna, mara n nga timung, ngai hpe hpyen galaw ma ai. ⁴ Nye a tsawra ai malai, ngai hpe nhtan shai ai hku hkan galaw ma ai: Ngai chyawm gaw akyu hpyi nga nngai. ⁵ Shanhte gaw kaja ai malai n kaja ai, Tsawra ai a malai, ndawng n yawt ai, ngai hpe bai htang ma ai. ⁶ Shi a ntsa e, tara n lang ai wa hpe san da u ga; Shi a hkra maga e, mara shagun ai wa tsap nga u ga. ⁷ Shi hpe dawdan ai shaloi, shi ari hkrum u ga; Shi a akyu hpyi ai ga, yubak tai u ga. ⁸ Shi a nhtoi gadun lu ga, Shi a aya hpe masha kaga lu la u ga. ⁹ Shi a kashu kasha ni jahkrai nmai, Shi a madu jan mung, gaida gaina tai nga mu ga. ¹⁰ Shi a kashu kasha ni hpyi sha let brak hkawm mu ga. Shanhte a tsam mat ai nta hta nna, shahpa tam mu ga. ¹¹ Gumhpraw boi ai wa, shi a arai yawng kashun la nna, masha tsasam ni, shi galaw ai arai hpe shanyen la ya mu ga. ¹² Shi hpe chyeju madun ai wa n nga u ga: Shi a jahkrai nmai ni hpe matsan dum ai wa n nga u ga. ¹³ Shi a aru arat htum mat u ga, Hpang e pra wa ai ni hta, shanhte a amying mat mat malu ga. ¹⁴ Shi kaji ni a mara hpe Yehowa adum nga u ga; Shi kanu a yubak hpe n raw dat lu u ga. ¹⁵ Dai gaw, Yehowa a man e tut tut anga nga nna, ga hta na shanhte a masat dingsat shaprai kau u ga. ¹⁶ Shi hkum nan matsan dum na lam n chye nna, Nni nkri hkrum nna matsan mayan ni hte, Gawng run hkrum ai ni hpe si hkra, zingri zingrat manu ai. ¹⁷ Rai sa, shi gaw dagam na lam tsawra nna, dai gaw shi hpang de, bai nhtang nga ai; shaman ai lam n tsaw ai majaw, dai gaw shi hte tsan gang nga ai. ¹⁸ Shi gaw dagam ai hpe hpun palawng zawn, bu hpun nna, Dai gaw ntsin zawn shi a kraw lawang kata e, Namman zawn, shi a nrut nra du hkra, hkawn nga ai. ¹⁹ Shingrai, dai gaw, bu hpun ai hpun palawng hte, Tut tut kyit nga ai shingkyit zawn, rai nga u ga. ²⁰ Ngai hpe hpyen ai ni hte, nye a lam n hkru ai ga tsun ai ni, Yehowa kaw na, shing re ai shabrai lu la mu ga. ²¹ Nye a Madu Yehowa e, nang chyawm gaw, na a amying majaw, ngai hpe lanu lahku la e; Na a chyeju mai kaja nga ai majaw, ngai hpe mawai la e. ²² Kaning rai nme law, ngai nni nkri hkrum nna, matsan mayan rai nga nngai; Nye a kraw na myit achyaw machyi nga ai. ²³ Mat mat wa ai shingnip zawn ngai lai wa nna, Dinggam-yaw hpe zawn, gawn kau ai hkrum nga nngai. ²⁴ Lusha gam ai majaw, nye a lahput gari nga nna, Nye a hkumshan lasi lamun rai nga ai. ²⁵ Shanhte a matu shatan shara ngai rai nga nngai, Shanhte ngai hpe mu jang, baw kanga ma ai. ²⁶ Nye a Karai Kasang Yehowa e, ngai hpe karum la e, Na a chyeju hte maren, ngai hpe hkye la e. ²⁷ Yehowa e, dai gaw na a lata a bungli rai nga nna, dai nang galaw nit dai gaw, shanhte chye mu ga. ²⁸ Shanhte dagam ma timung, nang gaw shaman ya e; Shanhte rawt ma yang shanhte kaya kahpa hkrum ma ai; na a mayam wa chyawm gaw, kabu gara rai nga ai. ²⁹ Ngai hte nhtan shai ai ni, myiman sum ai bu hpun nna, Kaya kahpa nba zawn, shanhte hpe htinggrum mu ga. ³⁰ Nye a n-gup hte, Yehowa hpe ngai nachying shakawn nna, Masha hpawng hta e, shi hpe kungdawn na nngai. ³¹ Kaning rai nme law, shi gaw matsan ai wa a asak hpe, dawdan ai ni a lata na hkye la na, Shi a hkra maga e, a tsap nga na ra ai.

¹ Yehowa nye a madu hpe tsun wu ai gaw, “Na a gumlau ni hpe, na a lagaw kabye ai lahkum ngai shatai ai du hkra, Nye a hkra maga e naw adung nga u,” nga ai. ² Yehowa gaw na a uphkang na sumdoi, Ziun kaw nna jaw dat na ndai: Nang gaw, nang hpe gumlau ai ni a ka-ang e a up nga u. ³ Na a hpyen majan shani e, na a amyu masha ni gaw Chyoi pra ai hte mawn sumli let, hkan nang mayu nga ma ai; jahpawt manap jau jau na mari zawn, Na a brang ram ni nang kaw du na mara ai. ⁴ Yehowa dagam da ndai gaw: “Nang gaw Melhkizekek a hkringhtawng lam hte maren, Htani htana hkinjawng rai nga ndai,” Ngu ndai rai nna, myit bai kayin na n rai. ⁵ Na a hkra maga e nga ai Madu gaw, Shi a masin pawt ai nhtoi hta e, Hkawhkam ni hpe shanyawp kau na mu ai. ⁶ Shi gaw masha amyu ni hpe dawdan na mu ai; shanhte hta e moi mang hpring nga ai; Mung law law ni a baw hpe shi agrawp kau na wu ai. ⁷ Lam makau e lwi ai hka shi hta na shi lu na ra ai; Dai majaw shi gaw baw sharawt na ru ai.

¹ Myit malang ai ni a salang bawng hta e mung, Dai shawa hpawng hta e mung, nye a myit masin mahkra hte, Ngai Yehowa hpe shakawn kungdawn na nngai. ² Yehowa a amu bungli kaba la nga ai, dai amu hta awng nga ai ni nlang, dai lam hkan tam gawn nga ma ai. ³ Shi a bungli arawng sadang hte hpung shingkang rai nga ai; Shi a dinghpring ai gaw, prat dingsa e anga nga ai. ⁴ Shi a mauhpa amu hpe matsing lu na matu, Shi gaw masat dingsat tawn da nu ai; Yehowa gaw matsan dum ai hte chyeju jaw na myit rawng nga ai. ⁵ Shi gaw shi hpe hkrit kamyin ai ni hpe lusha jaw mu ai; Shi a ga shaka hpe shi galoi mung adum nga ai. ⁶ Masha amyu ni a sali wunli shi a amyu hpe jaw kau ai majaw, Shi gaw shi a amu a n-gun, shanhte hpe madun dan mu ai. ⁷ Shi a lata a amu sadi sahka hte tengman ai, rai nga ai; Shi a ga matsun ni nlang tengman nga ai. ⁸ Dai ni gaw htani htana agrin nga ai rai nna, Sadi sahka hte malang ai hku hkan nna a byin nga ai. ⁹ Shi gaw shi a amyu hta hkyehkrang la ai lam shangun dat wu ai; Shi a ga shaka htani htana e dinggrin rai nga ai; Shi a amying chyoi pra ai hte hkrithpa rai nga ai. ¹⁰ Yehowa hpe hkrit hkungga ai myit gaw, Hpaji byeng-ya a npawt rai nga ai; Dai hpe hkan nang ai ni nlang hte gaw, myitsu ai lam kaja chye lu ma ai: Shi hpe shakawn kungdawn ai lam, htani htana e agrin nga ai.

¹ Yehowa hpe hkrit hkungga nna, Shi htet da ai ga hta e, awng nga ai wa gaw, a nga ai. ² Shi a matu mara ni lamu ga hta e kaba wa na mara ai; Myit malang ai ni a aru arat, shaman ai lu la na maru ai. ³ Aja, sutgan shi a nta e anga nga ai rai nna, Shi a dinghpring ai gaw gamhpa agrin nga ai. ⁴ Matsan dum chye ai, n-gaw nwai ai hte dinghpring ai nhtoi, Myit malang ai ni a matu mara nsin hta e danpru na ra ai. ⁵ Alu jaw nna, hkoi ya ai wa gaw, mai kaja nga ai, Tara dara ai nhtoi hta e, shi a amu tai na ra ai. ⁶ Shi gaw prat dingsa e shamu shamawt hkrum na n rai; Dinghpring ai wa hpe galoi mung adum nga na maru ai. ⁷ N kaja ai shiga hpe shi n hkrit wu ai; Shi a myit Yehowa hta hpa nga nna, ngang nga ai. ⁸ Shi a myit ngang kang nga ai rai nna, Shi hpe gumlau ai ni yubak hkrum nga ai mu lu ai du hkra, shi n hkrit nga ai. ⁹ Shi gat hkai nna matsan mayan ni hpe gam jaw mu ai, Shi a dinghpring ai gaw htani htana anga nga ai; Shi a nrung arawng hte rawt nga lu ai. ¹⁰ Tara n lang ai wa gaw dai hpe mu nna manawn nga ai; Wa utik let shi nga nna, byawng mat wa na ra ai. Tara n lang ai ni a ra ai hku hten mat na ra ai.

¹ Yehowa a ali ama ni e, shakawn mu, Yehowa a amying nsang hpe kungdawn mu. ² Ya kaw nna htani htana du hkra, Yehowa a amying ningsang, a nga lu ga. ³ Jan pru kaw nna jan shang kaw du hkra, Yehowa a amying hpe shakawn shara rai nga ai. ⁴ Yehowa gaw masha amyu nlang a ntsa e, Shi a hpung shingkang lamu ntsa e, tsaw nga ai. ⁵ Htaw ntsa e shi a dung tingnyang rai nga timung, Lamu hte aga a arai guji guyang yu yu na, ⁶ Shi a hkum hpe shagrit shanem wu ai, Anhte a Karai Kasang Yehowa zawn, kadai wa rai nga a ta? ⁷ Shi gaw sut n lu ai ni hpe nhpu hta na sharawt la mu ai; Matsan mayan ni gaw du salang ni a makau e, ⁸ Rai sa, shi a amyu a du salang ni a makau e, Dung nga mu ga, wan dap hta na, shanhte hpe sharawt la mu ai. ⁹ Maudung num gaw dinghku jan tai wa nna, Kabu gara ai myit hte shadang sha shangai na kanu, shatai wu ai. Halelu-Yah.

¹ Israela masha ni Egutu mung hta na, Yaku a dap gaw gri magra ga ga ai amyu hta na, pru wa ma ai shaloi e; ² Yuda ginwang shi a chyoi pra ai shara, Israela mung shi a ninghtawn, tai ma ai. ³ Nammukdara gaw dai hpe mu nna hprawng wa ai. Yawdan hka mung, nhtang mat wa ai. ⁴ Bum ni gaw sagu la zawn, Kawng ni sagu kasha zawn, shingtawt ma ai. ⁵ Nammukdara e, nang hpa majaw hprawng wa n ta? Yawdan hka e, nang hpa majaw nhtang mat wa n ta? ⁶ Bum ni e, sagu la zawn, Kawng ni e, sagu kasha zawn, hpa rai shingtawt hkawm nga myit ta? ⁷ Ginding aga e, dai Madu a man e, Yaku a Karai Kasang a man e, gari ashun nga u. ⁸ Shi gaw lunghkrung hpe hka lawng, Nhpai lung hpe, hka hpaw shara shatai wu ai.

¹ Yehowa e, anhte hpe n rai, anhte hpe n rai: na a chyeju hte sadi sahka a majaw, Na a amying nsang hpe sha, arawng jaw u. ² “Shanhte a Karai Kasang ya kanang nga malu hka?” Nga nna, masha amyu ni, hpa rai tsun na ma ta? ³ Anhte a Karai Kasang gaw sumsing lamu e anga nga ai; Shi ra ai hku yawng mayawng shi galaw nga ai. ⁴ Shanhte a sumla ni, aja, gumhpraw, Masha a lata hte galaw ai arai, rai nga malu ai. ⁵ Shanhte n-gup tu, timung, n chye shaga ma ai, Myi tu, timung, n mu lu ma ai. ⁶ Na tu, timung, n na lu ma ai, Ladi tu, timung, n chye manam ma ai. ⁷ Shanhte gaw lata hte n chye jum ma ai, Lagaw hte n chye hkawm ma ai: Shanhte a mayu hte nsen n chye shapraw ma ai. ⁸ Dai ni tawk tawn ai ni hte, Shanhte hpe shamyet shanat ai ni yawng, Shanhte hte maren rai na mara ai. ⁹ Israela e, Yehowa hpe shamyet shanat nga u; Shi gaw, shanhte a karum ai wa hte n-gang rai nga ai. ¹⁰ Arun a dap e, Yehowa hpe shamyet shanat nga u: Shi gaw shanhte a karum ai wa hte n-gang rai nga ai. ¹¹ Yehowa hpe hkrit hkungga ai ni e, Yehowa hpe shamyet shanat nga mu; Shi gaw, shanhte a karum ai wa hte n-gang rai nga ai. ¹² Yehowa gaw anhte hpe adum nga ai; shi anhte hpe shaman ya mi ai: Shi gaw Israela dap hpe shaman ya nga ai; Arun a dap hpe mung shaman ya nga ai. ¹³ Shi gaw Yehowa hpe hkrit hkungga ai ni, Kaji kaba yawng hpe, shaman ya nga ai. ¹⁴ Yehowa gaw nanhte hte, nanhte a kashu kasha ni hpe, Law htam wa shangun malit ga. ¹⁵ Lamu hte aga hpe hpan da ai Yehowa gaw, Nanhte hpe shaman ya myit ga. ¹⁶ Sumsing lamu gaw, Yehowa a lamu rai nga ai, Ginding aga hpe chyawm gaw, shinggyim masha ni hpe ap ya sai. ¹⁷ Si mat ai ni hte, katsi katsang re ai shara de, yu hkrat wa ai ni, Yehowa hpe shakawn lu ma ai n rai. ¹⁸ Anhte chyawm gaw, ya kaw nna, htani htana du hkra, Yehowa hpe shakawn kungdawn nga na ga ai. Halelu-Yah.

¹ Yehowa gaw nye a akyu hpyi ai nsen, Madat ya nga ai majaw, ngai awng nga nngai. ² Shi gaw ngai hpang de shi a na kayin dat wu ai rai nna, Ngai hkrung nga ai prat hte hta e, ngai shi hpe shaga na nngai. ³ Si ai sumri ni ngai hpe kawan nga nna, Katsan ga na ru tsang ai ngai hpe lep ni ai: Ruyak ai hte nni nkri ngai hkrum nga nngai. ⁴ Dai shaloi ngai gaw, O, Yehowa e, Nye a myit masin hpe mawai la ya e, Ngu nna, Yehowa a amying hpe, shaga we ai. ⁵ Yehowa gaw n-gaw nwai hte dinghpring nga ai, Anhte a Karai Kasang, matsan dum ai wa rai nga ai. ⁶ Yehowa gaw myit n su ai ni hpe bau sin nga ai; Ngai nni nkri hkrum yang, shi ngai hpe hkye la nngai. ⁷ Nye a myit masin e, Yehowa nang hpe chyeju madun nit dai majaw, Nang ban lu ai shara de bai wa su. ⁸ Nang gaw nye a myit masin hpe si ai kaw na, Nye a myi hpe myi prwi kaw na, Nye a lagaw hpe kashawt ai kaw na, shalawt dat ya ni ai. ⁹ Naw ahkrung nga ai ni a mung hta e, Ngai Yehowa a man e a hkawm nga na nngai. ¹⁰ “Nni nkri ngai ja ja hkrum nga nngai,” Nga nna tsun ai shaloi e pyi, ngai kamsham nga nngai. ¹¹ Masha nlang masu ai ni rai nga ma ai, Nga nna, n dum shami ngai tsun hkrup nngai. ¹² Yehowa ngai hpe jaw ai chyeju nlang hte hpe, Ngai kaning di dang wa lu na rai nga a ta? ¹³ Hkyehkrang la ngu ai gawm hpe ngai magra jum nna, Yehowa a amying hpe shaga na nngai. ¹⁴ Nye a ga shaka, ngai Yehowa hpe raw na nngai, Shi a amyu masha ni a man e, ngai dai lam galaw na nngai. ¹⁵ Chyoi pra ai ni a si mat wa ai gaw, Yehowa a man e hpu la nga ai. ¹⁶ Yehowa e, na a shangun ma gaja wa ngai rai nga nngai: Na a nchyang jan a kasha ngu ai, Na a shangun ma ngai rai nga nngai: Ngai hpe gyit hkang ai sumri nang raw nu ai. ¹⁷ Shakawn kungdawn hkungga ngai nang hpe jaw nna, Yehowa a amying ningsang hpe shaga na nngai. ¹⁸ Nye a ga shaka, ngai Yehowa hpe raw na nngai: Shi a amyu masha ni a man e, Yehowa a nta a wing kata e, ¹⁹ Yerusalem e, na a ka-ang e, dai lam ngai galaw na nngai. Halelu-Yah.

¹ Masha amyu ni e, Yehowa hpe shakawn mu, Amyu baw nlang hte e, shi hpe kungdawn mu. ² Kaning rai nme law, shi a chyeju, Anhte a ntsa e kaba la nga ai rai nna, Yehowa a sadi sahka htani htana anga nga ai. Halelu-Yah.

¹ Yehowa gaw mai kaja nga ai majaw, shi hpe shakawn kungdawn mu: Shi a chyeju htani htana agrin nga ai. ² Shi a chyeju htani htana agrin nga ai, Nga nna Israela masha ni tsun nga mu ga. ³ Shi a chyeju htani htana agrin nga ai, Nga nna Arun a dap ni tsun nga mu ga. ⁴ Shi a chyeju htani htana agrin nga ai, Nga nna Yehowa hpe hkrit kamyin ai ni tsun nga mu ga. ⁵ Kyindut ai shara kaw nna, ngai Yehowa hpe shaga nna, Dam lada re ai shara hta e, Yehowa ngai hpe htan ya nngai. ⁶ Yehowa ngai hte rau rai nga ai: ngai hpa mung n hkrit nga nngai: Masha wa ngai hpe hpa di lu na a ta? ⁷ Yehowa ngai hpe karum ai wa rai nga ai. Ngai hpe ndawng ai ni hta, ngai myit shatup lu na mawe ai. ⁸ Yehowa hta shingbyi nga ai gaw, Masha wa hpe shamyet nga ai hta, grau kaja nga ai. ⁹ Yehowa hta shingbyi nga ai gaw, Du ni hpe shamyet nga ai hta grau kaja nga ai. ¹⁰ Masha amyu ni yawng ngai hpe kawan da mi ai, Yehowa a amying hte ngai shanhte hpe manga kau na mawe ai. ¹¹ Shara shagu hkan e, shanhte ngai hpe wang da nga ma timung, Yehowa a amying hte ngai shanhte hpe manga kau na me we ai. ¹² Lagat zawn shanhte ngai hpe jawm mi ai; Ju hpun hkru ai wan zawn shanhte krip mat ma ai: Yehowa a amying hte ngai shanhte hpe manga kau na mawe ai. ¹³ Ngai hpe jahkrat na, nang ngai hpe kanawng dat timung, Yehowa ngai hpe shadaw da nngai. ¹⁴ Yehowa gaw, nye a n-gun hte mahkawn mangoi lam rai nga ai, Ngai hpe hkyehkrang la ai wa mung, shi rai nga ai. ¹⁵ Dinghpring ai ni a sum ni hta e, Kabu gara ai hte hkyehkrang la ai nsen ngoi nga ai: Yehowa a hkra lata gaw nlaw nga ai. ¹⁶ Yehowa a hkra lata sharawt da nga ai, Yehowa a hkra lata gaw nlaw nga ai. ¹⁷ Ngai si wa na nngai n rai; Ngai naw ahkrung nga na rai nna, Yehowa a amu bungli hpe naw gawn dan na nngai. ¹⁸ Yehowa ngai hpe ari ahpri jaw timung, Si ai de ngai hpe ap kau ni ai, n rai. ¹⁹ Ngai shang lu nna, Yehowa a chyeju shakawn n ga, Nye a matu, dinghpring ai chying hka ni hpaw da mu. ²⁰ Ndai gaw, Yehowa a chyinghka rai nga ai: Dinghpring ai ni, shang lu na ma ai. ²¹ Nang ngai hpe htan ya nna, nye a hkyehkrang la ai lam, tai nga ndai majaw, Ngai nang hpe shakawn na nngai. ²² Wahpang gaw ai ni lata kau ai nlung gaw, Ningjut jahtum na nlung tai wa sai: ²³ Dai gaw Yehowa a majaw byin nga ai: Anhte a man e mung mauhpa amu rai nga ai. ²⁴ Dai ni gaw, Yehowa tawn da ai nhtoi rai nga ai. Dai hta e, anhte kabu nna awng nga ga. ²⁵ Yehowa e, ya hkyehkrang la mi law; Yehowa e, ya shaman ya mi law. ²⁶ Yehowa a amying hte du sa ai wa gaw, a nga u ga; Yehowa a nta hta e, anhte nang hpe, sha-a nga ga ai. ²⁷ Yehowa gaw Karai Wa rai nga ai rai nna, anhte hpe jahtoi ya nga ai. Hkungri a nrung hta e, poi hkungga hpe, sumri hte gyit da mu. ²⁸ Nang gaw nye a Karai Wa rai nga ndai, Ngai nang hpe shakawn kungdawn na nngai; Nye a Karai Kasang e, Ngai nang hpe shagrau sha-a na nngai. ²⁹ Yehowa mai kaja nga ai majaw, Shi hpe shakawn kungdawn mu: Shi a chyeju htani htana agrin nga ai law.

¹ Tinang a lam hta mara n rawng ai ni hte, Yehowa a tara hpe hkan nang ai ni, a lu ma ai. ² Shi a sakse ga hpe matsing nga nna, Myit yawng hte shi hpe hkan tam ai ni, a lu ma ai. ³ Shanhte gaw n hkru ai amu n galaw ma ai, Shi a lam hta e, hkawm nga ma ai. ⁴ Na a ga matsun hpe htep lahti hkan lu mu ga, Nang anhte hpe htet da nit dai. ⁵ Na a ga madat hpe hkan nang lu hkra, Nye a lam ding nga u ga! ⁶ Shaloi nang htet da mada hpe dum nga yang, Ngai kaya kahpa n hkrum na nngai. ⁷ Na a dinghpring ai tara dara ai lam hpe sharin yang, Myit malang ai hku hkan nna, ngai nang hpe shakawn na nngai. ⁸ Na a ga madat ngai hkan nang na nngai, Ngai hpe hkum kabai kau et. ⁹ Shabrang wa gaw, shi a lam pra nga u ga, kaning rai na rai ta? Na a mungga hte maren sadi nga yang, rai na ra ai. ¹⁰ Nye myit mahkra hte, ngai nang hpe tam ni ai; Nang htet da ai ga hpe ngai n lai n ga. ¹¹ Ngai nang hpe n shut n hpyit n ga, Na a ga hpe, nye a myit hta, ngai bang da se ai. ¹² Yehowa e, nang a lu ndai, Na a ga madat, ngai hpe sharin ya e. ¹³ Na n-gup na tara dara ai hku yawng hte hpe, Nye a nten hte, ngai hkai dan na nngai. ¹⁴ Sutgan lu la ai hta grau nna, Na a sakse ga hta, ngai kabu nga nngai. ¹⁵ Na a ga matsun hpe, ngai myit aru nga nna, Na a lam shagu hpe yu nga na nngai. ¹⁶ Na a ga madat hta e, ngai awng nga nna, Na a mungga hpe n malap kau na nngai. ¹⁷ Na a mayam wa hkrung nga u ga, shi hpe yu lahku u; Shaloi na a mungga hpe, ngai hkan nang na nngai. ¹⁸ Na a tara hta mauhpa lam mu lu n ga, Nye a myi hpe jahpaw ya e. ¹⁹ Ga ntsa e, manam sha ngai rai nga nngai, Na a htet da ai ga, nye a man e, hkum makoi da u. ²⁰ Nang tara dara ai lam hpe, myit marit nga nngai majaw, Nye a myit masin ahkying shagu ndawt nga ai. ²¹ Nang gaw gumrawng ai ni hpe, daru kau nit dai; Nang htet da ai ga hpe tawt lai ai ni, dagam kau ai hkrum ma ai. ²² Na a sakse ga hpe, ngai hkan nga nngai majaw, Shatan nhkan hte asawng asang re ai hta na, ngai hpe shalawt dat e. ²³ Du salang ni nye a lam bawng ma timung, Na a mayam wa na a ga madat hpe a myit yu nga ai. ²⁴ Na a sakse ga, ngai awng shara hte, Ngai hpe hpaji daw ya ai ga, rai nga ma ai. ²⁵ Nye a myit masin ga nhpu hta a jung nga ai: Na a ga hte maren ngai hpe jahkrung ya e. ²⁶ Nye a lam ngai hkai dan nngai rai nna, nang ngai hpe htan ya nit dai; Na a ga madat, ngai hpe sharin ya e. ²⁷ Na a ga matsun ngai hpe chye na shangun e, Shaloi, na a mauhpa amu hpe ngai myit yu nga na nngai. ²⁸ Yawn la nngai majaw, nye a myit masin hkrap nga ai; Na a ga hte maren, ngai hpe sharawt la e. ²⁹ Masu ai lam ngai hte shatsan kau ya nna, Matsan dum let, na a tara ngai hpe jaw e. ³⁰ Sadi sahka ai lam ngai lata la ni ai, Na a tara dara ai hku, ngai dum nga nngai. ³¹ Na a sakse ga hta ngai a noi nga nngai; Yehowa e, ngai hpe kaya kahpa hkum hkrum shangun et. ³² Nye a myit hpe nang hpaw ya ndai majaw, Nang htet da ai lam de, ngai gat nga nngai. ³³ Yehowa e, na a ga madat lam ngai hpe sharin ya e; Prat htum hkra, ngai dai hpe hkan nang na nngai. ³⁴ Chye chyang ai myit ngai hpe jaw rit law; Shaloi na a tara hpe myit ting hte hkan nang na nngai. ³⁵ Nang htet da ai lam hku e, ngai hpe woi wa e; Dai hta e ngai awng nga na nngai. ³⁶ Nye a myit lawhpa ai de n rai u ga, Na a sakse ga hpang de, dai hpe kayin ya e. ³⁷ Kaman lila hpe n mu n ga, nye a myi kayin la ya e: Na a lam hta ngai hpe jahkrung da e. ³⁸ Nang hpe hkrit hkungga na, nga ai ga sadi, Na a mayam a ntsa e, shadik ya e. ³⁹ Ngai hkrit nga we ai, shatan nhkan hpe la kau u; Na a tara dara ai lam mai kaja nga ai. ⁴⁰ Yu u, na a ga matsun ni hpe ngai marit nga nngai, Na a dingman ai hte ngai hpe jahkrung da e. ⁴¹ Yehowa e, na a chyeju hte hkyehkrang la ai lam, Na a ga hte maren, ngai kaw du u ga. ⁴² Shaloi, na a ga hta shamyet nga nngai majaw, Ngai e shatan ai wa hpe htan lu na we ai. ⁴³ Na a tara dara ai lam hpe, kam nga nga nngai majaw, Nye a n-gup hta na, sadi sahka ai ga hpe hkum dawm la u. ⁴⁴ Shaloi htani htana prat dingsa e n hprai hkra, Na a tara hpe ngai hkan nga na nngai. ⁴⁵ Na a ga madat hpe ngai tam nga nngai majaw, Numdaw numdan n hkrum ai, ngai hkawm sa lu nngai. ⁴⁶ Hkawhkam ni a man a na a sakse ga hpe, Ngai hkai dan nna, kaya kahpa n hkrum na nngai. ⁴⁷ Ngai tsawra ai, na a jep ai tara hta, Ngai ngwi pyaw nga na nngai. ⁴⁸ Ngai tsawra ai, na a jep ai tara hpe, Nye a lata ngai sharawt na we ai rai nna, Na a ga madat hpe a myit yu nga na nngai. ⁴⁹ Ngai hpe myit mada shangun ai majaw, Na a mayam wa hpe nang tsun ai ga, adum nga u. ⁵⁰ Na a ga hte ngai bran nga nngai, Dai gaw nye a nni nkri hta e, ngwi pyaw shara tai wa ai. ⁵¹ Gumrawng ai ni, ngai hpe ja ja jahpoi ma timung, Na a tara hpe ngai n lai nga nngai. ⁵² Yehowa e, chyaloi nhkoi na, na a dawdan ai hpe, Ngai dum nga nna, ngwi pyaw nga nngai. ⁵³ Na a tara hpe kau da nga ai n hkru ai ni a matu, Ngai myit ja ja kahtet nga nngai. ⁵⁴ Ngai manam rai nga ai nta hta e, Na a ga madat, nye a mahkawn ga tai nga ai. ⁵⁵ Yehowa e, shana aten e, na a amying hpe ngai dum nga nna, Na a tara hkan nga na nngai. ⁵⁶ Na a ga matsun hpe matsing nga nngai majaw, Dai hta ngai pyaw nga nngai. ⁵⁷ Yehowa e, nye a sali wunli nang rai nga ndai; Na a mungga hpe hkan nang na, ngai myit da ni ai. ⁵⁸ Nye a myit mahkra hte, ngai nang hpe hpyi nga nngai; Na a ga hte maren, ngai hpe matsan dum la e. ⁵⁹ Nye a lam hpe ngai myit yu nga nna, Na a sakse ga hpang de, kayin wa nngai. ⁶⁰ Na a sakse ga hpe hkan nang nga na, Ngai n ganung, alawan rai nga nngai. ⁶¹ Tara n lang ai ni a sumri ngai hpe kawan nga timung, Na a tara hpe ngai n malap kau nngai. ⁶² Na a dingman ai tara dara ai lam majaw, Nang hpe shakawn na, ngai yuptung e rawt na nngai. ⁶³ Nang hpe hkrit kamyin ai ni mahkra hte, Na a ga matsun hpe hkan ai ni a manang, ngai rai nga nngai. ⁶⁴ Yehowa e, ga ntsa e, na a chyeju hte hpring nga ai; Na a ga madat ngai hpe sharin ya e. ⁶⁵ Yehowa e, na a ga hte maren, Na a mayam wa hpe nang kaja ai lam galaw nit dai. ⁶⁶ Nang htet da ai ga ngai kam nga nngai majaw, Kaja ai hpaji hte chye chyang ai lam, ngai hpe sharin ya e. ⁶⁷ Nni nkri garai n hkrum yu yang, ngai lam dam ni ai; Ya chyawm gaw, na a ga hpe ngai hkan nga nngai. ⁶⁸ Nang kaja nga nna, kaja ai amu galaw nga ndai; Na a ga madat ngai hpe sharin ya e. ⁶⁹ Gumrawng ai ni ngai hpe masu ai ga shatu ma timung, Ngai gaw myit mahkra hte na a ga madat a hkan nga nngai. ⁷⁰ Sau zawn shanhte a myit ge mat malu ai; Ngai chyawm gaw na a tara hta e, awng nga nngai. ⁷¹ Na a ga madat ngai sharin la lu na, Nye a matu nni nkri hkrum na, mai nga ai. ⁷² Na n-gup hta na pru ai tara gaw, nye a matu Aja gumhpraw hkying mi hta grau kaja nga ai. ⁷³ Na a lata ngai hpe hpan da nna hkrang shabyin nu ai; Nang htet da ai ga hpe, ngai sharin la lu hkra, Ngai hpe chye chyang ai myit jaw ya e. ⁷⁴ Na a ga hpe ngai myit mada nga nngai majaw, Nang hpe hkrit kamyin ai ni, Ngai hpe mu yang, kabu lu na mara ai. ⁷⁵ Yehowa e, na a tara dara ai lam, dingman nga ai rai nna, Sadi sahka hte nang ngai hpe sharin ndai hpe, ngai chye nga nngai. ⁷⁶ Na a mayam wa hpe tsun da ai hte maren, Na a chyeju gaw, ngai hpe shapyaw ya u ga. ⁷⁷ Na a tara, ngai awng wa na lam rai nga ai majaw, Ngai hkrung nga lu hkra, na a chyeju ngai kaw du u ga. ⁷⁸ Gumrawng ai ni ngai hpe masu kau mi ai majaw, Shanhte kaya kahpa hkrum na mara ai; Ngai chyawm gaw na a ga matsun hpe myit yu nga nngai. ⁷⁹ Nang hpe hkrit kamyin ai ni hte, na a sakse ga hpe chye lu ai ni, Ngai hpang de kayin wa maru ga. ⁸⁰ Ngai kaya kahpa n hkrum n ga, Na a ga madat hta e nye a myit tsup nga li ga. ⁸¹ Nye a myit masin, na a hkyehkrang la ai lam hpe marit nga ai; na a mungga hpe ngai myit mada nga nngai. ⁸² “Nang ngai hpe galoi shapyaw na n kun? nga nna, Na a ga ndat mada lu hkra nye a myi tsu nga li ai. ⁸³ Wan nhkut hta garau ai shanhpyi htingpa zawn, ngai tai mat nngai raitimung, Na a ga madat hpe ngai n malap kau nngai. ⁸⁴ Na mayam wa a nhtoi ni, gade gadun nga a hka! Ngai hpe zingri ai ni e, Nang galoi me dawdan na mu ta? ⁸⁵ Gumrawng nna na a tara hpe n hkan nang ai ni, Nye a matu nhkun htu ma ai. ⁸⁶ Na a jep ai tara nlang, sadi sahka rai nga ai: Masu let shanhte ngai hpe hkan shachyut ma ai; ngai hpe karum la e. ⁸⁷ Shanhte gaw lamu ga hta e ngai hpe ganoi noi jahten ma timung, Na a ga matsun hpe ngai n kau da nngai. ⁸⁸ Na a chyeju hte maren, ngai hpe shabran ya e, Shaloi na a sakse ga hpe ngai hkan nga na nngai. ⁸⁹ Yehowa e, htani htana e na a mungga gaw, Sumsing lamu hta e agrin nga ai. ⁹⁰ Na a sadi sahka prat mi hte prat mi anga nga ai, Aga hpe nang gaw da nna, dai anga nga ai. ⁹¹ Dai ni jang, na a tara hte maren, dai arai ni anga nga ma ai, Arai yawng mayawng na a ali ama ni rai nga ma ai. ⁹² Na a tara nye a kabu gara ai lam n rai taw gaw, Nye a nni nkri hta e, ngai hten byak na ni ai. ⁹³ Na a ga matsun hte ngai shabran ai hkrum nngai majaw, Dai hte hpe ngai galoi mung n malap kau na nngai. ⁹⁴ Na a ga matsun hpe ngai tam nngai majaw, Na a ma ngai rai nga nngai: ngai hpe hkye la e. ⁹⁵ Tara n lang ai ni, ngai hpe jahten na hkap nga ma ai; Na a sakse ga hpe ngai myit yu nga nngai. ⁹⁶ Lam magup hta e, tsup lu na hku ngai mu se ai; Nang htet da ai ga dam lada wa rai nga ai. ⁹⁷ Na a tara hpe ngai gade wa tsaw nga n hka! Ngai shani tup dai hpe myit aru nga nngai. ⁹⁸ Nang htet da ai ga majaw, ngai gaw gumlau ni hta grau nna hpaji lu nga nngai; Kaning rai nme law, dai gaw prat dingsa e ngai hta a rawng nga ai. ⁹⁹ Na a sakse ga hpe ngai myit aru nga nngai majaw, Ngai sharin la ai sara ni yawng hta, ngai grau nna chye lu nngai. ¹⁰⁰ Na a ga matsun ga hpe ngai hkan nga nngai majaw, Salang ni hta grau nna ngai myitsu nga nngai. ¹⁰¹ Na a mungga hpe hkan nang lu na matu, Ngai n kaja ai lam yawng hpe koi kau nga nngai. ¹⁰² Nang ngai hpe sharin ya ndai majaw, Na a tara dara ai lam na ngai n lai nga nngai. ¹⁰³ Na a mungga gaw gade dwi nga a hka! Nye a n-gup hta lagat jahku hta grau dwi nga ai. ¹⁰⁴ Na a ga matsun hte ngai myitsu nga nngai; Dai majaw masu ai lam shagu ngai ndawng nga nngai. ¹⁰⁵ Na a mungga nye a lagaw a pyengdin hte, Nye a hkrun lam a nhtoi rai nga ai. ¹⁰⁶ Na a dingman ai tara dara ai lam hpe hkan nang na, Ngai dagam da nna galaw ngut se ai. ¹⁰⁷ Ngai nni nkri law law wa hkrum nga nngai, Yehowa e, na a ga hte maren ngai hpe shalan ya e. ¹⁰⁸ Yehowa e, nye a n-gup a dingsa hkungga hpe hkap la u, Na a tara dara ai lam ngai hpe sharin ya e. ¹⁰⁹ Nye a myit masin gaw nye a lata hta anga nga li timung, Na a tara hpe ngai malap mali kau na nngai n rai. ¹¹⁰ Tara n lang ai ni nye a matu mahkam hkam ma timung, Na a ga matsun hpe ngai n shut nga nngai. ¹¹¹ Na a sakse ga nye a myit hpe shapyaw ya ai majaw, Dai gaw prat dingsa nye a sali wunli rai nga ai. ¹¹² Na a ga madat htani htana a galaw nga na, Nye a myit masin hpe ngai saw da we ai. ¹¹³ Gale galau re ai ni hpe ngai ndawng nngai; Na a tara hpe chyawm gaw ngai tsawra nga nngai. ¹¹⁴ Nang gaw nye a makoi shara hte n-gang rai nga ndai; Na a mungga hpe ngai myit mada nga nngai. ¹¹⁵ N hkru ai ni e, ngai kaw na pru wa mu; Nye a Karai Kasang a htet da ai ga hpe ngai hkan nang na nngai. ¹¹⁶ Ngai hkrung nga lu nna, Nye a myit mada ai lam kaya kahpa n tai u ga, Na a ga hte maren ngai hpe shadaw ya e. ¹¹⁷ Ngai hpe shadaw yang, ngai mai wa na nngai; Shaloi na a ga madat hpe ngai tut tut a myit nga na nngai. ¹¹⁸ Na a ga madat hta na tawt lai ai ni hpe, nang n yawt nga ndai, Kaning rai nme law, shanhte a maw ai hku, masu ai hkrai rai nga ma ai. ¹¹⁹ Mung shagu na tara n lang ai ni hpe, Hkumpup hpe zawn, nang lai kau da mu ai: Dai majaw na a sakse ga hpe ngai tsawra nngai. ¹²⁰ Nang hpe hkrit hkungga ai hte nye a ashan nshung si bun nga ai; Na a tara dara ai hpe mung ngai hkrit kamyin nga nngai. ¹²¹ Tara ai hte dingman ai lam ngai galaw se ai; Zingri ai ni kaw, ngai hpe hkum ap kau u ga. ¹²² Na a mayam wa a ngamai lu na matu ama hkam u; Gumrawng ai ni ngai hpe n zingri lu mi ga. ¹²³ Na a hkye la ai lam hte dingman ai ga hpe, Nye a myi mada nna, atsu nga li ai. ¹²⁴ Na a chyeju hte maren, na a mayam wa hpe galaw nna, Na a ga madat ngai hpe sharin ya e. ¹²⁵ Ngai na a mayam wa rai nga nngai; Na a sakse ga hpe ngai chya lu n ga, Chye chyang ai myit ngai hpe jaw ya e. ¹²⁶ Yehowa a matu amu galaw ai aten rai nga ai: Na a tara hpe shanhte hpa n nawn nga ma ai. ¹²⁷ Dai majaw aja hte jet ai aja hta grau nna, Na a htet da ai ga hpe ngai tsaw nga nngai. ¹²⁸ Dai majaw na a ga matsun nlang teng nga ai, ngai nga nna, Masu ai lam shagu hpe ndawng kau nngai. ¹²⁹ Na a sakse ga mauhpa wa rai nga ai; Dai majaw nye a myit masin dai hta hkan nang nga ai. ¹³⁰ Na a mungga hpe hpaw dan yang, nhtoi htoi wa nna, Myit n su ai ni hpe, kunghpan wa shangun mu ai. ¹³¹ Na a htet da ai ga hpe ngai marit la nga nngai majaw, Ngai n-gup mahka nga nna, sa dawn dawn nga nngai. ¹³² Na a amying hpe tsawra ai ni hpe nang di ang ai hte maren, Ngai kaw kayin nna, ngai hpe matsan dum la e. ¹³³ Nye a lagaw hkang hpe na a ga hte shangang ya e; N shawp ai hpa mung, ngai hpe n up u ga. ¹³⁴ Masha a kashun kashe hta na, ngai hpe shalawt dat e; Shaloi na a ga matsun hpe ngai hkan na nngai. ¹³⁵ Na a mayam wa ntsa e, na a myiman jahtoi ya u ga; Na a ga madat hpe mung, ngai hpe sharin ya e. ¹³⁶ Shanhte na a tara hpe n hkan ma ai majaw, Nye a myi kaw na hka zawn lwi nga ai. ¹³⁷ Yehowa e, nang dinghpring nga ndai rai nna, Na a tara dara ai lam ni malang nga ai. ¹³⁸ Na a sakse ga hpe dingman nga ai hte, Nachying sadi sahka rai nga u ga, nang htet da nu ai. ¹³⁹ Ngai hpe hpyen ai ni na a mungga hpe malap kau ma ai majaw, Nye a nja nhpra ai myit ngai hpe shaza kau nngai. ¹⁴⁰ Na a ga nachying jet nga ai rai nna, Na a mayam wa dai hpe tsawra nga ai. ¹⁴¹ Ngai gaw kaji nga nna hpa n ging nngai raitimung, Na a ga matsun hpe ngai n malap nngai. ¹⁴² Na a dingman ai gaw, prat dingsa e dingman nga ai rai nna, Na a tara gaw sadi sahka rai nga ai. ¹⁴³ Ru tsang ai hte yawnhkyen ai ngai hkrum nngai raitimung, Na a htet da ai ga nye a kabu ga shara rai nga ai. ¹⁴⁴ Na a sakse ga prat dingsa a teng nga lit dai; Ngai hkrung lu n ga, ngai hpe chye chyang ai myit jaw ya e. ¹⁴⁵ Nye a myit mahkra hte ngai shaga nga nngai; Yehowa e, ngai hpe htan ya e; Na a ga madat hpe ngai hkan nang nga na nngai. ¹⁴⁶ Na a sakse ga hpe ngai madat lu n ga, Nang hpe shaga yang, ngai hpe hkyehkrang la e. ¹⁴⁷ Nhtoi garai n htoi yang, ngai jahtau nga nngai, Na a mungga hpe ngai myit mada nga nngai. ¹⁴⁸ Shana na ladaw garai n lai lu yang, Na a ga hpe myit htang yu na ngai hprang nga nngai. ¹⁴⁹ Na a chye hte maren, nye a nsen madat ya e; Yehowa e, na a tara dara ai hku hte maren, ngai hpe shalan shabran ya e. ¹⁵⁰ N hkru ai myit rawng ai ni, sit ni wa ma timung, Na a tara hte shanhte tsan nga ma ai. ¹⁵¹ Yehowa e, nang gaw ni nga ndai; Na a htet da ai ga nlang tengman nga ai. ¹⁵² Na a sakse ga htani htana agrin nga ai hpe, Moi kaw nna ngai chye nga nngai. ¹⁵³ Na a tara hpe ngai n malap kau nngai majaw, Nye a nni nkri yu nna, ngai hpe mawai la e. ¹⁵⁴ Nye a amu hpe jeyang nna ngai hpe hkyehkrang la e; Na a ga hte ngai hpe shalan shabran ya e. ¹⁵⁵ Tara n lang ai ni, na a ga madat hpe n tam ma ai majaw, Hkyehkrang la ai lam shanhte hte tsan nga ai. ¹⁵⁶ Yehowa e, na a chyeju law htam nga ai; Nang dawdan ai lam hte maren, ngai hpe shalan shabran ya e. ¹⁵⁷ Ngai hpe zingri ai ni hte hpyen ni law nga ma ai; Na a sakse ga hte ngai shai nga nngai n rai. ¹⁵⁸ Hkalem sha ai ni na a mungga hpe n hkan nang ai majaw, Ngai shanhte hpe mu mada nna, myit yu machyi nga nngai. ¹⁵⁹ Na a ga matsun hpe ngai tsaw nga nngai, dum nu; Yehowa e, na a chyeju hte maren ngai hpe shalan shabran ya e. ¹⁶⁰ Na a ga sumhpa, sadi sahka rai nga ai; Na a dingman ai tara dara ai lam, htani htana agrin nga ai. ¹⁶¹ Mara n nga timung, du ni ngai hpe hkan shachyut ma ai; Raitimung, nye a myit na a ga hpe hkungga nga ai. ¹⁶² Lanep law law lu ai wa zawn, Na a ga hta ngai kabu gara nga nngai. ¹⁶³ Masu ai ga hpe ngai ndang nna matsat nga nngai; Na a tara hpe ngai tsawra nga nngai. ¹⁶⁴ Na a dingman ai tara dara ai lam majaw, Lani mi hta e sanit lang, ngai nang hpe shakawn ga nngai. ¹⁶⁵ Na a tara hpe tsawra ai ni gaw ngwi pyaw kaba chye nga ma ai. Shanhte hta kadai mung myit kataw shara n nga ai. ¹⁶⁶ Yehowa e, na a hkyehkrang la ai lam hpe ngai myit mada nga nna, Na a htet da ai ga hpe hkan nang nga nngai. ¹⁶⁷ Nye a myit masin na a sakse ga hpe madat nga ai; Rai sa, dai hpe ngai ja ja tsawra nga nngai. ¹⁶⁸ Na a ga matsun hte sakse ga hpe ngai madat nga nngai; Nye a lam yawng hte gaw na a man e rai nga ai. ¹⁶⁹ Yehowa e, ngai jahtau ai ga, nang kaw du hkrang u ga; Na a ga hte maren ngai hpe shachye shachyang ya e. ¹⁷⁰ Ngai hpyi jahtau ai ga, na a man e hkrang pru ga; Na a ga hte maren ngai hpe mawai la e. ¹⁷¹ Nang gaw na a ga madat ngai hpe sharin nga yang, Nye a n-gup shakawn kungdawn ga shapraw na ra ai. ¹⁷² Nang htet da ai ga nlang, dingman nga ai majaw, Nye a shinglet na a ga hpe mahkawn mangoi na ra ai. ¹⁷³ Na a ga matsun hpe, ngai lata la nngai majaw, Na a lata ngai hpe karum nga n ga. ¹⁷⁴ Yehowa e, na a hkyehkrang la ai lam hpe ngai marit nga nna, Na a tara gaw ngai kabu shara rai nga ai. ¹⁷⁵ Nye a myit masin hkrung nga lu nna, nang hpe shakawn nga u ga, Nang tara dara ai lam ngai hpe karum nga n ga. ¹⁷⁶ Ngai lam dam mat wa yang, Mat ai sagu kasha hpe zawn, na a mayam wa hpe hkan tam u; Kaning rai nme law, nang htet da ai ga hpe ngai n malap kau nngai law.

¹ Ngai ru tsang ai hta e ngai Yehowa hpe shaga nga nna, shi ngai hpe htan ya ni ai. ² Yehowa e, nye a asak hpe, masu ai n-gup hte, Hkalem sha ai shinglet hta na, mawai la ya e. ³ Hkalem sha ai shinglet e, shi nang hpe hpa jaw na a ta? Shi nang hpe hpa naw bai htang na a ta? ⁴ Share wa a dai ai pala hte, Marau hpun na wan n-ga, nang hkrum na rin dai. ⁵ Meshek shara hta e ngai shingbyi nga nna, Kedera sum ni a makau e naw nga nngai majaw, ngai dingnye lu nga nngai. ⁶ Ngwi pyaw lam hpe ndawng ai ni hte rau, Nye a myit masin nau nan na hkra wa nga nga sai. ⁷ Ngai ngwi ai lam ra nga nngai raitimung, Ngai ga tsun jang e, shanhte majan baw na maw ma ai.

¹ Ngai gaw bum lang de mada yu na nngai; ngai hpe karum na gaw, kanang na pru na a ta? ² Lamu hte aga hpe hpan tawn da ai Yehowa kaw na, Ngai hpe karum ai lam pru wa ai. ³ Shi gaw na a lagaw hpe kashawt shangun na, n rai; Nang hpe bau sin ai wa gaw yup wa ai n rai. ⁴ Yu mu, Israela hpe bau sin ai wa gaw, Yup nga, yup pyaw wa nga ai, n rai. ⁵ Yehowa gaw nang hpe bau sin ai wa rai nga ai; Yehowa na a hkra lata a shingnip rai nga ai. ⁶ Shani na ajan, shana na shata, nang hpe hkra lu na ndai n rai. ⁷ Yehowa gaw ru tsang yawng hta na, nang hpe bau sin na ra ai; Na a myit masin hpe shi bau sin na ra ai. ⁸ Yehowa gaw ya kaw nna prat dingsa e, Na a pru wa ai hte shang wa ai lam bau sin ya na ra ai.

¹ Yehowa a nta de anhte lung wa saga, Nga nna ngai hpe tsun nga ma yang, ngai kabu nga nngai. ² Yerusalem e, na a chyinghka ni hta e, Anhte a lagaw tsap nga lu ga ai. ³ Yerusalem e, ngang ai mare zawn, Nang hpe de da nit dai. ⁴ Israela sakse tai lu na hte, Yehowa a amying hpe shakawn kungdawn na matu, Amyu baw ni, Yehowa a amyu baw ni, dai de lung wa na ma ai. ⁵ Kaning rai nme law, dai yang e tara tingnyang ni, Dawi a nta na tingnyang ni, shadun da mu ai. ⁶ Yerusalem a ngwi pyaw na lam matu hpyi nga mu: Nang hpe tsawra ai ni awng wa lu mu ga. ⁷ Na a bunghku kata e, ngwi pyaw ai, Na a htingnu ni a kata e, awng wa na lam, hku nga u ga. ⁸ Nye a hpunau ni hte jinghku ni a matu mara, Nang hta e ngwi pyaw nga lu u ga, ngai tsun na nngai. ⁹ Anhte a Karai Kasang Yehowa a nta a majaw, Na a mai kaja na lam ngai tam na nngai.

¹ Sumsing lamu hta e dung nga ai wa e, Nye a myi nang hpe a mada yu nga ai. ² Yu mu, mayam ni a myi, madu a lata hpe, Shingnan num a myi, madu jan a lata hpe, mada nga ma ai hte maren, Anhte a Karai Kasang Yehowa gaw, Anhte hpe matsan dum nga ai du hkra, Anhte a myi shi hpe a mada nga mali ai. ³ Yehowa e, anhte hpe matsan dum mi, matsan dum mi law; Kaning rai nme law, anhte gaw kaya kahpa nau hkrum la nga ga ai. ⁴ Nhpaw n-ya re ai ni a aroi arip hte, Gumrawng ai ni a shatan nhkan hpe, Anhte a myit masin nau nan wa hkrum la sai.

¹ Yehowa anhte hte rau n nga taw gaw, ² Masha ni anhte hpe gasat na rawt ma yang, Yehowa anhte hte rau n nga taw gaw: ³ Shanhte gaw anhte hpe masin pawt nna, Naw hkrung nga yang pyi, mayu kau na mi ai. ⁴ Dai hka leng ni anhte hpe lim kau nna, Hka nu ni anhte a asak hpe kaput na mi ai; ⁵ Gaja wa anhte a asak ntsa e, Kabrawng la ai hka nu ni, kaput na mi ai, Nga nna Israela masha ni ya tsun nga mu. ⁶ Shanhte a wa anhte hpe sha na matu, N jaw kau ai Yehowa gaw, a nga u ga. ⁷ Mahkam hta na lawt lu ai u zawn, Anhte a myit masin lawt lu mali ai. Mahkam gaw dut mat nna, anhte lawt lu saga ai. ⁸ Lamu hte aga hpe hpan tawn da ai Yehowa a amying hta e, Anhte hpe karum ai lam anga nga ai.

¹ Yehowa hpe shamyet shanat ai ni, n shamu nga ai Ziun bum zawn rai nga ma ai; Dai gaw htani htana anga nga ai. ² Bum ni gaw Yerusalem hpe grup di da mu ai hte maren, Yehowa mung, ya kaw nna prat dingsa e, Shi a amyu hpe grup di da mu ai. ³ Dingman ai ni, n hkru ai amu hpe, tinang a lata hte n galaw lu mu ga, Tara n lang ai ni a up ai sumdoi, Dingman ai ni a sali wunli a ntsa e, mara lu na n rai. ⁴ Yehowa e, mai kaja ai ni hte, Myit malang ai ni hpe, mai kaja ai myit madun u. ⁵ Magaw ai lam de shang mat wa ai ni hpe chyawm gaw, Yehowa gaw yubak galaw ai ni hte rau, jahten kau mu ga: Israela ntsa e, ngwi pyaw ai gaw anga nga u ga law.

¹ Yehowa gaw Ziun a bawngdung ai ni hpe nhtang dat mu ai shaloi e, Anhte wa yupmang mu ai ni zawn, rai nga ga ai. ² Dai shaloi anhte a n-gup mani ai hte, Anhte a shinglet shakawn ai hte hpring nga ai: “Yehowa shanhte a matu bungli kaba galaw nu ai.” Nga nna amyu masha ni tsun nga ma ai. ³ Rai sa, Yehowa anhte a matu bungli kaba galaw nu ai; Dai rai nna anhte kabu gara nga ga ai. ⁴ Yehowa e, dingda maga na hka shi ni zawn, Anhte a bawngdung ai ni hpe, nhtang dat mi. ⁵ Myi prwi hte gat hkai ai ni, Kabu gara let bai shu lu na mu ai. ⁶ Nli noihpye hpye let hkrap nna pru wa ai wa gaw, Hkauling lahkawn hpai nna, kabu gara ai hte bai wa na ra ai law.

¹ Yehowa gaw dai nta hpe n gap da yang, Nta gap da ai ni kaman sha galaw kau na mu ai: Yehowa gaw dai mare hpe n sin yang, Bau sin ai ni kaman sha sin kau na mu ai. ² Jahpawt jau jau e rawt nna, Shana aten lai hkra, n sim n sa re ai hte, Hki ba let shat sha timung, kaman lila rai nga ai: Shi gaw dai lam shi a tsawra ai ni hpe naw yup nga ma yang, a jaw nga mu ai. ³ Yu mu, kashu kasha gaw Yehowa jaw ai sali wunli rai nga ai; Kan a nsi naisi shabrai zawn, rai nga ai. ⁴ Share wa a lata na pala zawn, Prat ram yang na shadang sha ni rai nga ma ai. ⁵ Shi a pala ndum, dai hta jahpring lu ai wa gaw, a nga ai: Mare chyinghka e gumlau ni hte ga tsun yang, Shanhte kaya kahpa hkrum na ma ai n rai.

¹ Yehowa hpe hkrit hkungga nna, shi a lam hta hkan nang ai ni yawng hte gaw, a nga ma ai. ² Na a lata a amu nang sha lu na ndai, nang a lu nna ngamai lu na ndai. ³ Na a nta kata e, na a madu jan gaw si si ai tsabyi ru zawn, rai nga ai; Na a nsha ni, hkai ai tsanlun hpun zawn, Na a sha ku grupyin e rai nga ma ai. ⁴ Yu mu, Yehowa hpe hkrit hkungga ai wa gaw, Teng teng ning rai hkrum lu na ra ai. ⁵ Yehowa gaw Ziun hta na, nang hpe shaman ya nna, Nang hkrung nga ai nhtoi tup, Yerusalem a ngamai ai hpe nang mu lu n ga; ⁶ Na a kashu kasha ni hpe mung, nang mu lu n ga: Israela ntsa e, ngwi pyaw ai gaw anga nga u ga law.

¹ Brang ram prat kaw nna shanhte ngai hpe ja ja shatsang mi ai, Rai sa, brang ram prat kaw nna ngai hpe ja ja shatsang mi ai. ² Raitimung, shanhte ngai hpe n dang ma ai, Nga nna Israela masha ni ya tsun nga mu. ³ Hkauna shawt ai ni nye a shingma hta shawt nna, Htai hkang galu jahkang ya mi ai. ⁴ Yehowa gaw dingman nga ai rai nna, tara n lang ai ni a sumri hpe shadut kau ya mu ai. ⁵ Ziun hpe ndawng n yawt ai ni nlang hte gaw, Kaya kahpa hkrum nna, kanut mat wa mu ga. ⁶ Garai n baw yang, hkraw mat ai hte, Dan ai masha mung latup mi muk n lu la nna, ⁷ Hkauling gyit ai wa n lahkawn la lu ai, Nta magaw na tsingdu zawn, shanhte rai nga mu ga. ⁸ “Yehowa a shaman ai gaw, nanhte a ntsa e nga nga u ga, Yehowa a amying hte anhte nanhte hpe shaman ya ga ai,” Nga nna lai hprang ai ni mung n tsun lu mu ga.

¹ Yehowa e, sung la ai shara de nna, Ngai nang hpe shaga nga nngai. ² Madu e, nye a nsen hpe madat mara ya e: Ngai akyu hpyi ai nsen hpe, Na a na hte na la nna matsing ya e. ³ Yehowa e, nang mara matsing nga yang gaw, Madu e, kadai tsap nga lu na rai ta? ⁴ Raitimung, nang hpe hkrit hkungga nga mu ga, Nang gaw mara hpe raw dat kau ya ndai. ⁵ Yehowa hpe ngai myit mada nga nngai. Rai sa, nye a myit masin myit mada nga ai; Shi a mungga hpe ngai ala nga nngai. ⁶ Jahpawt manap hpe ala nga ai ni hta grau, Rai sa, jahpawt manap hpe ala nga ai ni hta grau nna, Nye a myit masin gaw, dai Madu hpe ala nga ai. ⁷ Israela e, Yehowa hpe ala nga u; Yehowa gaw chyeju myit rawng nga ai rai nna, Hkyehkrang la ai lam kaba shi hte rau rai nga ai. ⁸ Shi gaw Israela hpe tinang a yubak nlang hta na hkyehkrang la na maru ai.

¹ Yehowa e, nye a myit kaba nga ai n rai, nye a myiman mung dap nga ai n rai. Ngai hte n ging ai amu hpe ngai n bawng nna, Ngai hta grau ai mauhpa bungli ngai n tam nngai. ² Gaja wa, chyu hka ai ma, kanu hte rau nga ai zawn, Nye a myit masin hpe, ngai jasim kau nna, atsin sha di da we ai: Nye a myit masin gaw chyu hka ai ma zawn, ngai hta rai nga ai. ³ Israela e, ya kaw nna prat dingsa e, Yehowa hpe ala nga u.

¹ Yehowa e, Dawi a jaw e shi a ruyak ai nlang hte hpe, adum nga u. ² Shi gaw, “Yehowa a matu nga ai htingra, Yaku a hpung dagu wa a matu nga ai nta, Ngai garai n mu lu lu gaw, ³ Nye a sum a nta hta e ngai n shang, Nye a yupku ntsa de ngai n lung, ⁴ Nye a myi yup n lusha nna, Nye a myi, myi di lu na li ai n rai,” ⁵ Nga nna Yehowa hpe shi dagam da nna, Yaku a hpung dagu wa hpe ndat ga, tawn da nu ai. ⁶ Dai gaw Ehpra hta e nga nga ai, anhte na ga timung, Yaara prang ga e, dai hpe mu lu sagaw ai. ⁷ Shi a sumpan nta de, anhte shang nna, Shi a lagaw a kabye lahkum e, anhte nawku saga. ⁸ Yehowa e, nang hte na a n-gun a Sumpu, Nang ban nga ai shara de, rawt sa wa u. ⁹ Na a hkinjawng ni dinghpring ai hpe bu hpun nna, Na a chyoi pra ai ni kabu gara let jahtau nga mu ga. ¹⁰ Na a mayam wa Dawi a myiman tau nna, Na a namman chya hkam ai wa a myiman hpe, hkum kayin kau ya u. ¹¹ Yehowa gaw Dawi hpe teng teng dagam da nna, Dai hta na nhtang wa na n rai: Na a aru arat hpe tingnyang hta e, ngai shadun na nngai: ¹² Na a nshu nsha ni nye a ga shaka hte, Shanhte hpe ngai sharin ya ai sakse ga hpe, hkan nang ma yang gaw, Shanhte a kashu kasha ni prat dingsa, Na a tingnyang ntsa e, dung nga lu na mara ai. ¹³ Kaning rai nme law, Yehowa gaw Ziun hpe lata la nna, Dai hta e dung nga na a ra nga ai. ¹⁴ Shi gaw, nang e prat tup nye a sa ban shara rai nga ai; Dai hpe ngai tsaw nga nngai majaw, nang e ngai adung nga na nngai; ¹⁵ Shi a lusha hpe ngai teng teng shaman ya nna, Shi a matsan mayan ni hpe shat hte jahkru na mawe ai. ¹⁶ Shi a hkinjawng ni hpe hkyehkrang la ai lam hte ngai jahpun na mawe ai: Shi a chyoi pra ai ni gaw kabu gara ai hte jahtau na ma ai. ¹⁷ Dai yang e Dawi a matu ngai nrung shatut nna, Nye a namman chya hkam ai wa a matu pyengdin shadun se ai. ¹⁸ Shi hpe gumlau ai ni ngai kaya kahpa hte htinggrum da na mawe ai; Shi a janmau chyawm gaw, shi a ntsa e arawng pu na ra ai, nga nna tsun ai.

¹ Yu mu, hpunau ni myit hkrum nga nna, Rau hpawng nga lu ai gaw, Gade ngwi pyaw nga a hka! ² Dai gaw, baw kaw nna, nhka mun du hkra, Rai sa, Arun a nhka mun hte, Shi a palawng a du hkawp du hkra, Byawng hkrat ai jet ai namman hte, ³ Hermun bum kaw nna Ziun bum hta, hkrat ai mari hte, bung nga ai; Kaning rai nme law, Yehowa gaw dai yang e, Htani htana asak a shaman ai gaw, a jaw nga mu ai.

¹ Yu mu, Yehowa a nta kata e, shana e dawjau nga ai, Yehowa a ali ama ni yawng hte e, Yehowa hpe sha-a mu. ² Dai chyoi pra ai nta du hkra lata ladawn nna, Yehowa hpe sha-a mu. ³ Lamu hte aga hpe hpan tawn da ai Yehowa gaw, Ziun kaw nna nang hpe shaman ya u ga.

¹ Yehowa a amying nsang hpe shakawn mu; Yehowa a nta e dawjau nga nna, ² Anhte a Karai Kasang a nta a wing e nga ai, Yehowa a ali ama ni e, kungdawn mu. ³ Yehowa hpe shakawn kungdawn mu; Kaning rai nme law, Yehowa gaw mai kaja nga ai. Shi a amying nsang hpe mahkawn mangoi mu; kaning rai nme law, dai gaw ngwi pyaw nga ai. ⁴ Yehowa gaw Yaku hpe lata la nna, Israela shi a sali wunli rai nga ai. ⁵ Kaning rai nme law, Yehowa gaw galu kaba nga nna, Anhte a Madu, Hpara ni mahkra hta grau nga ai, ngai chye lu se ai. ⁶ Sumsing lamu hte ginding aga hta e, Nammukdara hte sung la ai shara shagu e, Yehowa hpa mung galaw mayu ai hte maren, galaw nga ai. ⁷ Lamu ga ting na shi salu sharawt wu ai; Myihprap hpe marang a matu shatai wu ai, Shi a dum hta na, nbung hpe shapraw dat wu ai. ⁸ Shi gaw Egutu mung na kasha alat ni hpe, Masha kaw nna yamnga du hkra sat kau mu ai. ⁹ Egutu mung e, shi gaw na a ka-ang e, Hpara-u hte shi a ali ama ni a man e, Lamik kumla hte mauhpa amu shapraw dat wu ai. ¹⁰ Shi gaw amyu kaba law law hte, N-gun ja ai hkawhkam ni hpe sat kau mu ai. ¹¹ Amori masha ni a hkawhkam Sihon, Bashan hkawhkam Oga hte, Hkanan a hkawhkam ni mahkra hte hpe, shi sat kau mu ai. ¹² Shanhte a lamu ga hpe sali wunli tai u ga, Shi a amyu Israela hpe jaw da wu ai. ¹³ Yehowa e, na a amying htani htana anga nga ai; Yehowa e, prat mi hte prat mi, na a masat dingsat agrin nga ai. ¹⁴ Kaning rai nme law, Yehowa gaw shi a amyu hpe, dawdan na mu ai rai nna, Shi a ali ama ni a matu, myit galai na ra ai. ¹⁵ Masha amyu ni a sumla ni aja, gumhpraw, Masha lata hte galaw ai arai rai nga malu ai. ¹⁶ Shanhte n-gup tu, timung, n chye shaga ma ai; Myi tu, timung, n mu lu ma ai; ¹⁷ Na tu, timung, n na lu ma ai, Shanhte a n-gup hta nsoi nsa mi n rawng ma ai. ¹⁸ Dai ni hpe tawk ai ni hte, Shanhte hpe shamyet shanat ai ni yawng, Shanhte hte maren rai na mara ai. ¹⁹ Israela a nta ni e, Yehowa hpe shakawn mu, Arun a nta ni e, Yehowa hpe kungdawn mu. ²⁰ Lewi a nta ni e, Yehowa hpe shakawn mu; Yehowa hpe hkrit kamyin ai ni e, Yehowa hpe shakawn kungdawn mu, ²¹ Yerusalem mare hta e, dung nga ai Yehowa gaw, Ziun hta e, a nga u ga law! Halelu-Yah.

¹ Yehowa gaw mai kaja nga ai majaw, shi hpe shakawn kungdawn mu; Shi a chyeju htani htana agrin nga ai. ² Hpara ni a Karai Kasang hpe shakawn kungdawn mu, Shi a chyeju htani htana agrin nga ai. ³ Madu ni a Madu hpe shakawn kungdawn mu, Shi a chyeju htani htana agrin nga ai. ⁴ Shi chyu sha mauhpa kaba galaw ai wa hpe, shakawn mu, Shi a chyeju htani htana agrin nga ai. ⁵ Hpaji hte sumsing lamu hpe hpan tawn da ai wa hpe, kungdawn mu, Shi a chyeju htani htana agrin nga ai. ⁶ Hka a ntsa e, ginding aga hpe nep da ai wa hpe, shakawn mu, Shi a chyeju htani htana agrin nga ai. ⁷ Nhtoi hkum kaba ni shatai ai wa hpe kungdawn mu, Shi a chyeju htani htana agrin nga ai. ⁸ Shi gaw shani hpe up na matu ajan hpe shabyin nu ai, Shi a chyeju htani htana agrin nga ai. ⁹ Shana hpe up na matu, shata hte shagan ni shabyin nu ai: Shi a chyeju htani htana agrin nga ai. ¹⁰ Egutu mung na kasha alat ni sat kau ai wa hpe shakawn mu, shi a chyeju htani htana agrin nga ai. ¹¹ Shi gaw shanhte a ka-ang na Israela hpe woi wa mu ai, Shi a chyeju htani htana agrin nga ai. ¹² N gun ja ai lata, ladawn da ai lahpum hte shanhte hpe woi wa mu ai, Shi a chyeju htani htana agrin nga ai. ¹³ Dai Hkyeng ai Nawng hpe jahka kau ai wa hpe kungdawn mu, Shi a chyeju htani htana agrin nga ai. ¹⁴ Shi gaw de a ka-ang hku Israela hpe shalai dat mu ai, Shi a chyeju htani htana agrin nga ai. ¹⁵ Hpara-u hte shi a luksuk ni hpe, Dai Hkyeng ai Nawng hta e, gumpye bang kau mu ai, Shi a chyeju htani htana agrin nga ai. ¹⁶ Nam mali hku e shi a amyu hpe lakawn wa ai wa hpe, shakawn mu, Shi a chyeju htani htana agrin nga ai. ¹⁷ Hkawhkam kaba ni hpe sat kau ai wa hpe, kungdawn mu, Shi a chyeju htani htana agrin nga ai. ¹⁸ Hpung shingkang rawng ai hkawhkam ni hpe, sat kau mu ai wa hpe shakawn mu, Shi a chyeju htani htana agrin nga ai. ¹⁹ Shi gaw Amori hkawhkam Sihon hpe, sat kau nu ai, Shi a chyeju htani htana agrin nga ai. ²⁰ Bashan a hkawhkam Oga hpe, sat kau nu ai, Shi a chyeju htani htana agrin nga ai. ²¹ Shanhte a lamu ga hpe shi jaw kau ya mu ai, Shi a chyeju htani htana agrin nga ai. ²² Dai hpe shi a mayam wa Israela a sali wunli shatai wu ai, Shi a chyeju htani htana agrin nga ai. ²³ Anhte naw kaji nga yang, shi anhte hpe dum nga mi ai, Shi a chyeju htani htana agrin nga ai. ²⁴ Hpyen ni kaw na shi anhte hpe hkyehkrang la mi ai, Shi a chyeju htani htana agrin nga ai. ²⁵ Shi gaw hkrung mahkrung yawng hte hpe shat a jaw nga ai, Shi a chyeju htani htana agrin nga ai. ²⁶ Sumsing lamu na Karai Wa hpe shakawn kungdawn mu, Shi a chyeju htani htana agrin nga ai.

¹ Babelon hka nu hka shi ni a makau e, anhte dung nga nna, Ziun hpe myit dum yang, hkrap nga ga ga ai. ² Dai yang e tu ai, mu mahka hpun ni hta, Anhte a tingse ni anhte noi da ga ai. ³ Kaning rai nme law, dai yang e, Anhte hpe sharen da ai ni, mahkawn ga hpyi ma ai; Anhte hpe zingri ai ni, “Kabu nga nna, Ziun a mahkawn ga, anhte hpe mahkawn mangoi dan mi,” nga nna hpyi ma ai. ⁴ Masha tsasam a mung hta e, Yehowa a mahkawn mangoi ga hpe, Anhte kaning rai mahkawn mangoi lu na law e? ⁵ Yerusalem e, ngai nang hpe malap kau sayang gaw, Nye a hkra lata ngai hpe malap kau u ga. ⁶ Nang hpe ngai n dum nga nna, Yerusalem hpe nye a kabu htum ai shara, n shatai nga sayang gaw, Nye a shinglet nye a gumra hta kap mat u ga. ⁷ Yehowa e, Yerusalem a nhtoi hta e, “Run kau mu, npawt du hkra run kau mu,” Nga nna tsun ai Edom a kashu kasha ni hpe, dum nga u. ⁸ Run kau hkrum ai Babelon shayi sha e, Nang anhte hpe di mi ai hte maren, Nang hpe bai tai lu ai wa gaw, a nga ai. ⁹ Na a ma chyangai ni hpe la nna, Nlung hta adit ai wa gaw, a nga ai.

¹ Nye a myit masin mahkra hte, ngai nang hpe shakawn na nngai; Hpara ni a man e, Ngai nang hpe mahkawn mangoi na nngai. ² Na a chyoi pra ai Htingnu a man e, Ngai nawku na nngai rai nna, Na a chyeju hte sadi sahka a majaw, Na a amying hpe shakawn na nngai: Kaning rai nme law, nang gaw na a mungga hpe, Na a amying ntsa e shagrau da nu ai. ³ Ngai shaga nga ai nhtoi hta e, Nang ngai hpe htan ya nit dai; Nang ngai hpe sharawng awng shangun ni ai; Nye a myit masin n-gun rawng nga ai. ⁴ Yehowa e, mungkan ga a hkawhkam ni nlang, Nang hpe shakawn kungdawn na mara ai: Kaning rai nme law, shanhte gaw na a n-gup ga na yu masai. ⁵ Yehowa a lam hpe shanhte mahkawn mangoi na mara ai; Kaning rai nme law, Yehowa arawng sadang galu kaba nga ai. ⁶ Yehowa gaw tsaw htum nga timung, Myit gyip ai ni hpe mada yu nga ai; Gumrawng ai ni hpe chyawm gaw, shi tsan tsan kaw nna chye da mu ai. ⁷ Ru tsang ai hta e, ngai hkawm nga timung, Nang ngai hpe shalan shabran ya na ring ngai: Ngai hpe gumlau ai ni a masin pawt ai hpe, Na a lata hpe nang ladawn dat nna, Na a hkra lata ngai hpe hkyehkrang la na ring ngai. ⁸ Yehowa gaw nye a lam shaboi ya na ring ngai; Yehowa e, na a chyeju htani htana agrin nga ai: Na a lata a amu hpe, hkum kau da u law.

¹ Yehowa e, nang ngai hpe manaw yu nna chye nga ndai. ² Ngai dung nga ai hte rawt wa ai gaw nang chye nga ndai: Ngai myit mang ai hpe mung, Tsan tsan kaw nna pyi nang chye nga ndai. ³ Ngai hkawm wa ai hte taw nga ai hpe, Nang dinglik yu nga ndai rai nna, Nye a lam shagu hpe chye chyap nga ndai. ⁴ Yehowa e, nye a shinglet hte ngai tsun ai ga hkaw mi muk, Nang n chye nga ai gaw, n nga lu ai. ⁵ Nang gaw nye a shawng de, hpang de ngai hpe kawan da nna, Nye a ntsa e, na a lata hpe mara da nu ai. ⁶ Dai hte wa chye chyang ai lam, nye a matu mauhpa kaba rai nga ai; Dai gaw nau tsaw la nga ai rai nna, ngai n dang myit lu we ai. ⁷ Na a Wenyi hte ngai kanang e hka lu na n hka? Na a myiman kaw nna gade hprawng lu na ma? ⁸ Sumsing lamu de lung wa yang, dai yang e, nang nga nga ndai; Katsan ga e, ngai panep nep yang, dai hta e mung, nang nga nga ndai. ⁹ Jahpawt manap a singkaw hpe ngai la nna, Nammukdara a jahtum e dung nga yang, ¹⁰ Dai yang e mung, na a lata ngai hpe woi wa nna, Na a hkra lata ngai hpe a jum nga na ra ai. ¹¹ Gaja wa, nsin gaw ngai hpe ka-up da nna, Nhtoi gaw nye a grupyin e shana tai u ga, nga nna ngai tsun nga yang, ¹² Nsin mung na a man e nsin zawn n rai mat nna, Dai shana gaw shani zawn htoi mat ai: Nsin gaw nhtoi hte na a man e maren rai nga ai. ¹³ Kaning rai nme law, nye a nhkyun ni nang lajang da nna, Nye nu a kan hta e ngai hpe shachyaw ni ai. ¹⁴ Hkrithpa hte mauhpa lam hkan nna, Ngai hpe hpan da ni ai majaw, Ngai nang hpe shakawn kungdawn nga nngai; Na a bungli mauhpa bungli rai nga ai rai nna, Dai hpe nye a myit masin nachying chye nga ai. ¹⁵ Makoi magap shara e ngai hpe hpan da nna, Aga a sung ai shara e shachyaw nu ai shaloi e, Nye a nrut nra hpe nang n malap kau da ndai. ¹⁶ Nye a hkum hkrang garai n kumla yang, Na a myi ngai hpe mu nga ai rai nna, Nye a matu tawn da ai nhtoi ni hta, Langai mi muk ngai garai n mu yang, Na a laika hta nlang hte hpe ka da nu ai. ¹⁷ Karai Wa e, nye a lam nang myit mang ai hku, gade hpu nga a hka! Nlang hte gaw, gade law nga a hka! ¹⁸ Dai hte hpe hti yu yang, zaibru hta n-ga law nga ma ai: Ngai yup hprang wa yang, nang hte rau ngai naw nga na nngai. ¹⁹ Karai Wa e, tara n lang ai ni hpe nang sat kau n ga; Sai kap ai ni ngai hte tsan nga mu ga. ²⁰ Dai ni, hkalem sha let nang hpe gumlau nna, Mara n nga timung, nang hte nhtan shai ma ai. ²¹ Yehowa e, nang hpe ndawng n yawt ai ni hpe, Ngai mung ndawng na mawe ai, n rai ni? Nang hpe gumlau na maga e rawt ai ni hpe, Ngai matsat kau na mawe ai, n rai ni? ²² N dawng n yawt ai myit yawng hte, Ngai shanhte hpe ndawng n yawt da mawe ai; Ngai hpe gumlau ai ni zawn, ngai shanhte hpe nawn da mawe ai. ²³ Karai Wa e, ngai hpe manaw yu nna, Nye a myit mang ai lam hpe chye ya e; Ngai hpe dinglik yu nna, ngai myit ai hku hpe chye ya e. ²⁴ Yawn mai ai lam de, ngai hkan taw gaw, yu yu u; Htani htana grin nga ai lam de, ngai hpe woi wa e law.

¹ Yehowa e, tinang a myit hta n hkru ai hku daw nga nna, Shani shagu gumle gumlau sharawt nga ai. ² N hkru ai masha kaw na, ngai hpe mawai la e; Kashun kashe re ai wa kaw na, ngai hpe makawp maga la e. ³ Shanhte gaw lapu zawn tinang a shinglet hpe mayoi da nna, Pu htum a tuk shanhte a nten npu e rawng nga ai. [Selah.] ⁴ Yehowa e, nye a lagaw kashawt u ga, myit daw nga ai tara n lang ai wa a lata kaw na, ngai hpe bau sin ya e. Kashun kashe re ai wa kaw na ngai hpe makawp maga la e. ⁵ Gumrawng ai ni nye a matu mahkam hte sumri up da nna, Nye a lam e, sumgawn nep da mu ai: Nye a matu ndaw mung jun da mu ai. [Selah.] ⁶ Ngai gaw, Nye a Karai Wa nang rai nga ndai; Yehowa e, ngai akyu hpyi ai nsen madat ya e, nga nna, Yehowa hpe ngai tsun nga nngai. ⁷ Dai Madu Yehowa gaw, ngai hpe hkyehkrang la ai n-gun rai nga ai; Hpyen palawng bu hpun ai shani e, nang nye a baw hpe magap da ya ndai. ⁸ Yehowa e, tara n lang ai wa a ra ai hku hpe hkum shabyin ya u; Shi a myit mang ai lam hpe hkum shadik ya et. [Selah.] ⁹ Nye a grupyin e, tinang a baw hpe sharawt mu ai ni, Shanhte a n hkru ai n-gup ga, shanhte hpe htinggrum nga mu ga. ¹⁰ Shanhte a ntsa e, wan n-ga hkrat bun mu ga; Grung ai wan hta e, shanhte hpe jahkrat dat mu ga, Bai n pru lu ai sung la ai nhkun hta e, shanhte hpe jahkrat dat mu ga. ¹¹ Baw law ai masha gaw ga ntsa e n grin lu u ga; Kashun kashe sha ai wa hpe mung, N hkru ai gaw shi hpe hkan jahten na ra ai. ¹² Nni nkri hkrum ai ni a jeyang na lam hte, Matsan mayan ni a tara dara ai lam hpe, Yehowa tawn da nga ai gaw, ngai chye nga nngai. ¹³ Gaja wa, dinghpring ai ni, na a amying hpe, shakawn na mara ai; Myit malang ai ni, na a man e anga nga lu na mara ai law.

¹ Yehowa e, ngai nang hpe shaga nga nngai; Ngai kaw alawan wa rit; Nang hpe ngai shaga nga yang, nye a nsen madat mara ya e. ² Ngai akyu hpyi ai ga, na a man e, manam pyaw ai baw zawn, Ngai lata ladawn ai gaw, shana na hkungga zawn, rai nga u ga. ³ Yehowa e, nye a n-gup hpe sin ya e; Nye a nten chyinghka bau da ya e. ⁴ Nye a myit n shawp ai amu n maw u ga; Kaman lila galaw ai masha ni hte rau, Tara n hkan ai bungli ngai mung n galaw n ga; Shanhte a reng ai shat hpe, ngai n sha lawm n ga. ⁵ Dinghpring ai wa gaw ngai hpe kayat u ga; dai gaw chyeju rai nga ai; Ngai hpe sharin ya u ga; dai gaw baw chya ai namman zawn rai nga ai; Nye a baw dai namman hpe n hkum kau u ga: Ngai wa masha ni a n hkru ai malai, akyu naw hpyi nga nngai. ⁶ Shanhte a tara agyi ni pyi, nlung hta agrawp kau ai hkrum ma yang, “Katsan ga a mahka e anhte a nrut nra ni ayai nga timung, ⁷ Dai gaw, aga hpe htu nna, galau kau ai hte bung nga ai,” nga nna, ngai shapyaw ai ga hpe, shanhte na ma ai. ⁸ Kaning rai nme law, nye a Madu Yehowa e, Nye a myi nang hpe a mada nga li ai; Nang hpe ngai myit mada nga nngai, Nye a asak sumri hpe hkum dawm kau ya e. ⁹ Nye a matu hkam ai mahkam hte, N hkru ai bungli galaw ai ni a nbyeng hta na, ngai hpe shalawt dat e. ¹⁰ Ngai gaw apra asan sha lai wa lu nna, Tara n lang ai ni tinang a mahkam hta, rung rai mu ga.

¹ Nye a nsen hte ngai Yehowa hpe jahtau nga nngai: Nye a nsen hte ngai Yehowa hpe akyu hpyi nga nngai. ² Shi a man e nye a aru ara ngai ru kau na nngai, Shi a man e ngai ru tsang ai lam ngai tsun dan na nngai. ³ Nye a wenyi gawng run nga ai shaloi e, Nang nye a lam hpe chye nga ndai; Ngai sa wa ai hku hta e, shanhte mahkam up da mu ai. ⁴ Nye a hkra maga de mada yu u, Ngai hte hkau chyap ai wa n nga ai; Ngai shingbyi shara hten wa sai, Nye a myit masin hpe lahpawt ai wa n nga ai. ⁵ Yehowa e, ngai nang hpe jahtau nga nngai; Ngai shingbyi shawung shara hte, Hkrung nga ai ni a ga hta e nye a hkambum, Nang rai nga ndai, nga nna ngai tsun nga nngai. ⁶ Ngai matsan mayan nachying hkrum nngai majaw, Ngai hpyi jahtau ai hpe matsing la ya e; Hkan shachyut ai ni kaw na ngai hpe mawai la e; Shanhte gaw ngai hta n-gun grau ja ma ai. ⁷ Na a amying nsang hpe ngai shakawn nga lu n ga, Dai htawng hta na nye a myit masin hpe shapraw dat u; Shingrai nang ngai hpe chyeju galaw ai majaw, Dingman ai ni ngai hpe bawp nga lu na mara ai.

¹ Yehowa e, ngai akyu hpyi ai ga na la ya e; Ngai tawngban ai ga madat ya e; Na a sadi sahka hte dingman ai hte maren ngai hpe htan ya e. ² Na a man e hkrung mahkrung n ding n man rai nga ma ai majaw, Na a mayam wa hpe tara hkum dara et. ³ Dai gumlau wa gaw nye a myit masin hpe hkan shachyut nu ai: Nye a asak hpe ga du hkra kabye kau wu ai: Moi moi na si mat ai ni zawn, Nsin sin ai shara e, shi ngai hpe nga shangun ni ai. ⁴ Dai majaw nye a wenyi gawng run nga ai, Nye a myit kraw hta e, hten mat nga ai. ⁵ Shawoi na nhtoi ni ngai dum nga nngai; Na a bungli yawng hpe ngai myit yu nga nngai: Na a lata a magam hpe, ngai aru yu nga nngai. ⁶ Nye a lata hpe nang kaw ngai ladawn da we ai: Hkraw mat ai ga zawn nye a myit masin nang hpe marit nga nngai. [Selah.] ⁷ Yehowa e, ngai hpe alawan htan ya e, Nye wenyi htum mat sai; Nsung hku hta shang ai ni zawn, ngai n rai mat u ga, Na a myiman ngai kaw na hkum kayin la et. ⁸ Nang hpe ngai shamyet shanat nga nngai majaw, Jahpawt manap e, na a chyeju ngai hpe shana ya e. Nang kaw nye a myit masin hpe ngai sharawt nga nngai majaw, Ngai sa wa ai lam ngai hpe sharin ya e. ⁹ Yehowa e, nang hpang de ngai hprawng wa nngai rai nna, Gumlau ni kaw na ngai hpe mawai la e. ¹⁰ Nye a Karai Kasang nang rai nga ndai majaw, Na a myit hkan nang na, ngai hpe sharin ya e. Na a mai kaja ai Wenyi gaw, Ngwi pyaw ai mung de ngai hpe woi wa u ga. ¹¹ Yehowa e, na a amying nsang a matu mara ngai hpe shalan shabran ya e; Na a dinghpring ai majaw, ru tsang ai hta na, nye a myit masin hpe shaw la ya e. ¹² Na a chyeju hte, ngai hpe gumlau ai ni hpe atsai awai di mu: Na a mayam wa ngai rai nga nngai majaw, Nye a myit masin hpe zingri ya ai ni nlang hte hpe, jahten kau mu.

¹ Nye a lunghkrung rai nga ai Yehowa gaw, a nga u ga: Shi gaw nye a lata hpe hpyen amu, Nye a layung ni hpe majan amu, sharin ya mu ai. ² Shi gaw nye a chyeju, nye a wahpang nta, Nye a langchyi hte ngai hpe shalawt ai wa, Nye a n-gang hte ngai shingbyi nga ai wa, rai nga ai: Nye a amyu hpe shi nye a npu e tawn da manu ai. ³ Yehowa e, nang chye nga ai shinggyim masha hte, Nang ai mi nawn nga ai masha kasha gaw, hpa wa mi rai nga a hka? ⁴ Masha wa gaw nbung hte bung nga ai. Shi a nhtoi ni lai mat wa ai shingnip zawn rai nga lu ai. ⁵ Yehowa e, na a sumsing lamu hpe shanem nna, yu hkrat wa rit; Bum ni hpe ahtawk nna, dai ni wan nhkut shapraw mu ga. ⁶ Myihprap galam dat nna, shanhte hpe shabra mu; Na a pala ni hpe dat dat nna, shanhte hpe shamak kau mu. ⁷ Tsaw htum ai shara kaw nna na a lata ladawn dat u; Hka kaba hte masha tsasam ni a lata na, Ngai hpe shaw la nna, mawai la e. ⁸ Shanhte a n-gup kaman ga tsun nga nna, Shanhte a hkra lata hkalem sha ai lata rai nga ai. ⁹ Karai Kasang e, ningnan mahkawn ga, Ngai nang hpe mahkawn mangoi na nngai; Sumri shi rawng ai tingse hte e, Ngai nang hpe dum dan nna shakawn na nngai. ¹⁰ Shi gaw hkawhkam ni hpe nlaw shangun nu ai; Shi a mayam Dawi hpe n hkru ai nhtu hta na shalawt dat nu ai. ¹¹ Masha tsasam ni a lata hta na, ngai hpe shaw la nna mawai la e; Shanhte a n-gup kaman ga tsun nga nna, Shanhte a hkra lata hkalem sha ai lata rai nga ai. ¹² Anhte a shadang sha ni, brang ram ai aten e, nampan zawn kaba wa nna, Anhte a shayi sha ni, htingnu a kasi hkan nna, Tawk ka ai njut shadaw zawn, rai nga ma yang: ¹³ Anhte a mam dum ni hpring nga nna, Baw sumhpa hkum hkra rawng nga ai hte, Anhte a sagu bainam ni nachying mayat maya wa nna, Udat shara e kasha hkying mun mi hkrat wa nga yang: ¹⁴ Anhte a usu ni law law htaw lu na hte, Bunghku sharun shadaw lu ai, hpa mung n nga ai, Rim la nna pru wa ai mi, n nga ai, Anhte a mare lam ni hta sharung shayawt ai mi n nga nga yang, ¹⁵ Shingrai nga lu ai amyu gaw, a nga ai; Karai Kasang matu Yehowa lu ai amyu gaw, a nga ai.

¹ Nye a Karai Kasang hte Hkawhkam wa e, Ngai nang hpe shagrau na nngai; Na a amying nsang hpe, htani htana sha-a nga na nngai. ² Shani shagu ngai nang hpe a sha-a nga na de ai: Na a amying nsang hpe, htani htana Prat dingsa, ngai shakawn nga na nngai. ³ Yehowa gaw galu kaba nga ai rai nna, Nachying shakawn ging ai wa, rai nga ai; Shi a galu kaba ai magam hpe, kadai mung n dang sawk yu nga ai. ⁴ Shu mashi shu masha ni prat mi hte prat mi, Na a bungle hpe shagrau na mara ai; Na a daru magam hpe hkai dan nga na mara ai. ⁵ Na a hpung shingkang a danhkung ai arawng sadang hte, Na a mauhpa bungli hpe, ngai myit aru yu nga na nngai. ⁶ Na a hkrithpa nsam rawng ai magam hpe, shanhte tsun nga ma ai rai nna, Na a galu kaba ai lam hpe ngai gawn dan na mawe ai. ⁷ Na a mai kaja ai masat dingsat hpe, shanhte kajai gumhkawng na mara ai; Na a dinghpring ai hpe mung, shanhte jahtau garu na mara ai. ⁸ Yehowa gaw sumnung ai, matsan dum ai, galu kaba ai hte nachying n-gaw nwai ai hte hpring nga ai. ⁹ Yehowa gaw nlang hte hpe mai kaja ai myit madun nga ai rai nna, Shi a arai yawng a ntsa e, shi a sumnung ai myit anga nga lu ai. ¹⁰ Yehowa e, na a bungli nlang hte gaw, Nang hpe shakawn kungdawn nga ma ai; Na a chyoi pra ai ni mung, nang hpe sha-a let nga nga ma ai. ¹¹ Shinggyim masha ni hpe, shi a atsam bungli hte, Shi a mungdan danhkung ai arawng sadang hpe chye na lu mu ga. ¹² Na a mungdan a arawng sadang hpe, shanhte kajai gara nna, Na a atsam rawng ai bungli hpe tsun dan na mu ai. ¹³ Na a mungdan gaw htani htana agrin nga ai mungdan rai nga ai rai nna, Nang hkang ai ahkang gaw, prat mi hte prat mi dinggrin anga nga lu ai. ¹⁴ Yehowa gaw kataw ai ni mahkra hpe, sharawt ai rai nna, Shagrit kau hkrum ai ni yawng hpe shadaw nga ai. ¹⁵ Yawng mayawng a myi nang hpe a mada nga nna, Aten du jang, nang shanhte hpe shat jaw mu ai. ¹⁶ Na a lata hpe nang hpaw nga nna, Hkrung mahkrung ni hpe kaja ai hte shakat da mu ai. ¹⁷ Yehowa gaw lam shagu hta dinghpring nga ai rai nna, Shi a amu yawng hte hta chyeju madun nga ai. ¹⁸ Yehowa gaw shi hpe shaga ai ni nlang hte hte, Sadi sahka hte shi hpe shaga ai ni nlang hte hte, ni nga ai. ¹⁹ Shi hpe hkrit kamyin ai ni a ra ai hku shi shadik ya nna, Shanhte a jahtau ai hpe shi na la nna, shanhte hpe hkye la mu ai. ²⁰ Yehowa, shi hpe tsawra ai ni nlang hte hpe bau sin nga ai; Tara n lang ai ni nlang hte hpe jahten kau mu ai. ²¹ Nye a n-gup Yehowa hpe shakawn kungdawn na ra ai; Hkrung mahkrung ni shi a chyoi pra ai mying nsang hpe, htani htana e a sha-a nga mu ga law.

¹ Nye a myit masin e, Yehowa hpe shakawn kungdawn u. ² Ngai asak hkrung nga ai hte yang, Yehowa hpe ngai shakawn nga na nngai; Ngai naw agrin nga ai hte yang, Nye a Karai Kasang hpe ngai kungdawn nga na nngai. ³ Hpa hta mung n karum lu ai, du ni hte, Shinggyim masha hpe, hkum hpa nga myit. ⁴ Shi a nsoi nsa hkyet mat yang, shi ga de bai nhtang mat wa ai rai nna, Dai shani jang, shi maw ai hku yawng hten mat wa ai. ⁵ Yaku a Karai Wa, karum ai wa rai nna, Shi a Karai Kasang Yehowa hpe, myit mada nga ai wa gaw, a nga ai. ⁶ Shi gaw sumsing lamu hte ginding aga, Nammukdara hte dai hta rawng marawng a Hpan Wa Ningsang rai nga ai: Shi gaw htani htana sadi sahka adum nga ai. ⁷ Nni nkri hkrum ai ni hpe shi tara dara ya mu ai, Hku hku hkrum ai ni hpe lusha shahpa jaw mu ai. Yehowa gaw bawngdung ai ni hpe raw dat mu ai; ⁸ Yehowa gaw myi kyaw ai ni hpe shamu ya mu ai; Yehowa gaw kataw ai ni hpe sharawt ya mu ai; Yehowa gaw dingman ai ni hpe tsawra nga mu ai. ⁹ Yehowa gaw bu hkawm ai ni hpe bau sin ya mu ai, Jahkrai nmai ni hte gaida gaina ni hpe shadaw ya mu ai. Tara n lang ai ni a lam hpe, shi shanut kau ya mu ai. ¹⁰ Yehowa gaw htani htana Hkawhkam rai nga ai; Ziun e, na a Karai Kasang gaw prat mi hte prat mi a up nga ai. Halelu-Yah.

¹ Yehowa hpe shakawn kungdawn mu: kaning rai nme law, anhte a Karai Kasang hpe, Mahkawn mangoi na mai kaja nga ai: Dai gaw ngwi pyaw ai lam rai nga ai, Shakawn kungdawn ai lam sut nga ai. ² Yehowa gaw Yerusalem mare hpe bai de da ai wa rai nga ai; Bra mat ai Israela amyu masha ni hpe, bai shinggyin la mu ai. ³ Myit maku daw ai ni hpe shi shamai ya nna, Shanhte a nma hpe ahkang kayawp ya mu ai. ⁴ Shi gaw shagan ni hpe nambat jaw nu ai rai nna, Langai hte langai hpe amying shamying ya mu ai. ⁵ Anhte a Madu galu kaba nga ai rai nna, Shi a hpung dagu mung galu kaba nga ai; Shi myit ai lam kadai n dang gawn lu ai. ⁶ Yehowa gaw matsan mayan ni hpe sharawt dat nna, Tara n lang ai ni hpe ga de jahkrat kau mu ai. ⁷ Yehowa hpe, chyeju dum let mahkawn mu, Anhte a Karai Kasang hpe tingse hte mangoi mu. ⁸ Shi gaw lamu hpe sumwi hte magap da nna, Lamu ga a matu marang hpe san da nu ai: Bum ni hta tsingdu shatut da nu ai. ⁹ Yamnga ni hte, jawp nga ai u hka hkalung ni hpe, shahpa jaw mu ai. ¹⁰ Gumra a n-gun hpe shi n ra nga ai, Masha a laram ai hta shi n awng nga ai. ¹¹ Yehowa gaw shi hpe hkrit kamyin ai ni hte, Shi a chyeju hpe myit mada ai ni hta, awng nga ai. ¹² Yerusalem e, Yehowa hpe shakawn u, Ziun e, na a Karai Kasang hpe kungdawn u. ¹³ Na a mare chyinghka htinggrang ni hpe shi shangang da nna, Na a htingwang na nshu nsha ni hpe shaman ya nit dai. ¹⁴ Na a lamu ga jarit hpe shi shangwi ya nna, Sau ai mam hte nang hpe shakat nit dai. ¹⁵ Shi gaw ga de shi a ga matsun hpe dat dat nna, Shi a mungga alawan gat pru nga ai. ¹⁶ Sagu mun zawn, hkyen gumdin shi jahkrat dat nna, Htat ai hkyen hpe wan dap zawn gat dat wu ai. ¹⁷ Shi a sin hpe lungja zawn jahkrat dat nna, Shi a kashung ai hpe kadai sharang lu na rai nga a ta? ¹⁸ Bai shi a mungga hpe shi dat dat nna, dai ni hpe shabyawng dat nu ai; Shi a nbung hpe shabung dat nna, hka shi ni lwi wa ma ai. ¹⁹ Shi gaw Yaku hta shi a mungga hpe, Israela hta shi a ga matsun hte, tara dara ai lam hpe, madun dan mu ai. ²⁰ Shi gaw amyu kaga ni hpe, shing di galaw ya mu ai n rai: Shi a dara ai lam ni hpe, shanhte n chye na lu ma ai. Halelu-Yah.

¹ Sumsing lamu de na, Yehowa hpe shakawn mu, Tsaw Htum ai shara e, shi hpe kungdawn mu. ² Shi a lamu kasa yawng hte e, shi hpe shakawn mu, Zaw nawng zaw wa yawng hte e, shi hpe kungdawn mu. ³ Ajan hte shata, shi hpe shakawn mu, Nhtoi htoi ai shagan ni e, shi hpe kungdawn mu. ⁴ Lamu lahta tang na lamu hte, Lamu ntsa e nga ai hka hpung ni e, shi hpe shakawn kungdawn mu. ⁵ Yehowa htet da nu ai rai nna, dai ni hpe hpan da wu ai majaw, Shi a amying nsang hpe shakawn kungdawn mu. ⁶ Dai ni gaw htani htana prat dingsa agrin nga ma ai: Ga madat shi tawn da nu ai rai nna, hpa mung dai hpe n lai lu ma ai. ⁷ Baren ni hte, sung htum ai shara ni, Awan, asin, ahkyen hte salu, ⁸ Shi a mungga madat ai nbung laru, Bum ni hte kawng ni nlang hte hte, ⁹ Asi si ai hpun hte arit hpun ni, Matse labye hte yamnga nlang hte hte, ¹⁰ Gumrawt hkawm ai baw hte, pyen ai u ni; Ga ntsa hkawhkam ni hte amyu baw shagu, ¹¹ Du ni hte tara agyi ni nlang hte hte, Shabrang ni hte mahkawn ni mung, ¹² Dingla ni hte ma kaji ni e, Dinghta ga kaw nna Yehowa hpe shakawn mu. ¹³ Yehowa a amying hpe dai ni shakawn nga mu ga; Kaning rai nme law, shi a amying chyu sha grau nga ai. Shi a hpung shingkang mung, ginding aga hte, Sumsing lamu a ntsa e chyam nga ai. ¹⁴ Shi a amyu masha ni nlang a matu, shi dai nrung hpe sharawt da nu ai; dai gaw, shi hte ni nga ai amyu, Israela kashu kasha ni hte, Shi a chyoi pra ai ni yawng a matu mara, Shakawn kungdawn ai lam rai nga ai. Halelu-Yah.

¹ Yehowa hpe mahkawn ga nnan mahkawn mu; Chyoi pra ai ni a hpawng hta e, Shi hpe shakawn kungdawn ai ga, mahkawn mu. ² Israela gaw shi a Hpan Wa Ningsang hta kabu nga nna, Ziun a kashu kasha ni shanhte a Hkawhkam hta, sharawng awng nga mu ga. ³ Ka let shi a amying hpe shakawn mu: Shupsheng hte tingese dum let, shi hpe mahkawn mangoi nga mu ga. ⁴ Kaning rai nme law, Yehowa gaw shi a amyu hta, awng nga ai rai nna, Myit gyip nga ai ni hpe hkyehkrang la ai hte, mawn sumli mu ai. ⁵ Chyoi pra ai ni gaw hpung shingkang hta, sharawng awng nga mu ga; Shanhte a yupku ni hta mung, kabu gara let jahtau nga mu ga. ⁶ Masha amyu ni hpe bai tai nna, Amyu baw ni hpe ari jaw na hte, ⁷ Shanhte a hkawhkam ni hpe hkang hkyihkyang hte, Shanhte a arawng lu ai ni hpe hpri sumri hte gyit nna, ⁸ Ka da nga ai hte maren, Shanhte hpe tara dara mu ga, ⁹ Karai Wa a matu shanhte a n-gup hta, mahkawn ga kaba rawng nga nna, Shanhte a lata hta nshan lahkawng dai ai nhtu lang nga mu ga: Dai gaw chyoi pra ai ni mahkra a matu, Hpung shingkang rai nga malu ai law. Halelu-Yah.

¹ Karai Wa a chyoi pra ai shara kaw e, shi hpe shakawn kungdawn mu; Shi a atsam danhkung ai lamu madin a ntsa e, Shi hpe shakawn kungdawn mu. ² Shi a magam bungli majaw, Shi hpe shakawn kungdawn mu; Shi galu kaba nga ai hte maren, Shi hpe shakawn kungdawn mu. ³ Pahtau a ngoi ai mahku hte, Shi hpe shakawn kungdawn mu; Tingse hte madum pyiman hte, Shi hpe shakawn kungdawn mu. ⁴ Shupsheng dum ai hte ka let, Shi hpe shakawn kungdawn mu; Tingse sumri hte sumpyi hte, Shi hpe shakawn kungdawn mu. ⁵ Ngwi ai shupsheng kaba hte, Shi hpe shakawn kungdawn mu; Grai ngoi ai shupsheng kaba hte, Shi hpe shakawn kungdawn mu. ⁶ Nsoi nsa rawng ai yawng hte gaw, Yehowa hpe shakawn kungdawn nga mu ga law. Halelu-Yah.