GA SHAGAWP

GA SHAGAWP

¹ Hpaji byeng-ya hte obedi lam chye na lu nna, myitsu ai ga sumtu hpe chye gawn lu na matu mung; ² dinghpring ai lam tara dara ai lam, tengman ai lam hte seng ai, htaphtuk ai sharin achyin ai ga lu la na matu mung; ³ myit n su ai ni let wa nna, shabrang wa hpe chye chyang ai hte sadi sahka re ai nyan jaw na matu mung, Israela hkawhkam, Dawi a kasha Shawlumon hpajang da ai ga shagawp rai nga ai. ⁴ Hpaji byeng-ya rawng ai wa gaw madat mara nga nna, zai byeng-ya naw jat la lu na hte, ⁵ myitsu ai wa gaw hkum tsup re ai htunghking hkan nang lu hkra, ⁶ ga shagawp hte ga shadawn hpe mung, hpaji rawng ai ga ginsat hte gumwai ga hpe mung, chye na la u ga law. ⁷ Yehowa hpe hkrit hkungga ai myit gaw chye chyang ai a npawt rai nga ai; myit n gring ai ni chyawm gaw hpaji byeng-ya hte sharin achyin ai ga hpe gangkau ma ai. ⁸ Ngai sha e, wa a sharin achyin ai ga madat mara u; Nnu a tara hpa mung, hkum gangkau et. ⁹ Dai lam hte gaw na a baw hta tsawm htap ai shanghkawng, Na a du hta gali ai hkachyi tai na ra ai. ¹⁰ Ngai sha e, yubak kap ai ni nang hpe lau yang, hkum hkan et. ¹¹ Shanhte gaw, anhte hte rau hkan rit, Masha asak sat na anhte gyam yu ga; Mara n kap ai ni hpe majoi mayun yu ga: ¹² Katsan ga zawn anhte shanhte hpe chyahkrung mayu kau nna, Nsung hku hta shang ai ni hpe zawn atsai awai di kau gaw. ¹³ Hpu la ai arung arai amyu myu anhte mu la nna, Anhte a nta ni hpe lanep hte jahpring na ga ai. ¹⁴ Nang anhte a kanawn manang tai u, Gumhpraw jan langai sha anhte jawm madu ga, nga nna tsun timung, ¹⁵ Ngai sha e, shanhte hte rau hkum hkan et, Na a lagaw shanhte a lam hta na loi kau u ga. ¹⁶ Kaning rai nme law, shanhte a lagaw n hkru ai galaw na gat nna, Masha asai jahkaw kau na lawan nga malu ai. ¹⁷ Gaja wa, singkaw tu ai ni a man e sumgawn kahpyen yang, kaman rai nga ai: ¹⁸ Shanhte chyawm gaw tinang a asai jahkaw kau na gyam nga nna, Tinang a asak jasum kau na, mayun nga ma ai. ¹⁹ N tara ai sutgan marin ai ni a lam yawng hte gaw dai zawn rai nga nna, Dai gaw tinang a madu ni a asak hpe dawm kau ya nga ai. ²⁰ Hpaji byeng-ya gaw, mare lam hta e garu nga nna, Dam lada ai shara hkan e tinang a nsen shabra dat nga ai; ²¹ Masha hpawng dè nga ai shara e shi jahtau nna, Mare chyinghka hte mare kata e ga a tsun nga let, ²² Myit n su ai ni e, nanhte gaw myit n su ai amu hta sharawng nga nna, Jahpoi asawng ai ni gaw jahpoi asawng ai lam hta pyaw nga na hte, Angawk angak re ai ni chye chyang ai lam hpe ndawng nga na gaw, gaten du hkra rai ta? ²³ Ngai shadum shahprang ai ga hpe, madat mara nna kayin wa marit; Ngai nanhte a ntsa e nye a wenyi ru bun ai hte, Nye a ga sumtu hpe chye shangun na made ai. ²⁴ Ngai shaga yang, nanhte n dang kau ai hte, Ngai lata ladawn yang kadai mung n matsing nga ai sha, ²⁵ Ngai hpaji daw ai lam nlang nanhte gangkau nna, Ngai shadum shahprang ai ga n madat myit dai majaw, ²⁶ Nanhte ru tsang hkrum ai shani e ngai mani nga nna, Hkrit kajawng hkrum yang asawng kau na nngai. ²⁷ Nanhte hkrit kajawng ai gaw, nbung laru zawn, Nanhte hkrum na ru tsang ai gaw, bungsha zawn du nna, Ru tsang ai hte kyindut ai nanhte hkrum wa yang, ²⁸ Nanhte ngai hpe shaga timung, ngai n htan na nngai, Ngai hpe tam shakut myit timung, n mu lu na mi ai. ²⁹ Kaning rai nme law, shanhte gaw hpaji byeng-ya hpe ndawng ma ai, Yehowa hpe hkrit hkungga ai myit n lata la ma ai. ³⁰ Ngai hpaji daw ai lam langai muk n hkan hkraw ai hte, Ngai shadum shahprang ai ga yawng matsat kau ma ai. ³¹ Dai rai nna shanhte gaw tinang galaw ai hte maren hkrum sha nna, Tinang maw ai lam hte hkru kat wa na mara ai. ³² Myit n su ai ni, tinang htak wa ai lam hte sat kau ai hkrum ma ai; Angawk ai ni gaw n dum n myi hte hten byak hkrum ma ai. ³³ Ngai hpe madat mara ai ni chyawm gaw asim sha nga lu nna, Tsin-yam tsindam n hkrit ai, ngwi pyaw nga na mara ai.

¹ Ngai sha e, nang hpaji byeng-ya ga hpe madat nga nna, Na a myit masin chye chyang ai lam tam lu hkra, ² Nye a ga hpe nang madat mara nga ai hte, Ngai htet da ai ga hpe na myit kata e bang da yang: ³ Rai sa, chye ginhka ai myit lu la hkra nang hpyi jahtau nna, Chye na lu ai myit rawng hkra nsen sharawt ai hte, ⁴ Dai hpe gumhpraw zawn tam nga nna, Makoi da ai sut rai hpe zawn, sawk yu yang, ⁵ Yehowa hpe hkrit hkungga ai myit nang chye na lu nna, Karai Kasang hpe chye chyang ai nyan mu lu na rin dai. ⁶ Kaning rai nme law, Yehowa gaw hpaji byeng-ya jaw nga ai: Shi a n-gup na, chye chyang ai hte zai byeng-ya pru nga ai. ⁷ Tara dara ai lam hpe makawp maga na hte, shi a chyoi pra ai ni a lam hpe bau sin nga lu hkra, ⁸ Shi gaw tengman ai ni a matu hpaji madung mahkawng da nga ai: Myit tsup ai ni a n-gang shi rai nga ai. ⁹ Shaloi nang gaw, dinghpring ai lam, tara dara ai lam, Tengman ai lam hte mai kaja ai lam shagu hpe chye na lu na rin dai. ¹⁰ Shingrai hpaji byeng-ya gaw na a kraw lawang hta shang nga nna, Na a myit masin gaw chye chyang ai lam hta sharawng awng na ra ai. ¹¹ Sadi sahka gaw nang hpe bau sin ai hte, Zai byeng-ya gaw nang hpe makawp maga na ra ai. ¹² Dai gaw, n hkru ai lam hta na nang hpe mawai la na ra ai: Masu magaw ga tsun ai wa, a lam hkan nang nga ai hte; ¹³ Tengman ai lam kau da nna, nsin sin ¹⁴ Yubak galaw na sharawng awng ai hte, myit magaw ai amu hta kabu gara nga nna, ¹⁵ Masu magaw lam hkan nna, tengman ai lam yit kau ai ni a lata na mung, nang hpe mawai la na ra ai. ¹⁶ Bai dai gaw, ram prat na tinang a hkungran manang kau da nna, Tinang a Karai Kasang Wa hte tawn da ai ga shaka hpe malap kau ai. ¹⁷ Tinang a amyu hte daw hka wa ai shawa num hte, Hkalem ai ga chye tsun ai liknga num a lata na mung, nang hpe mawai la na ra ai. ¹⁸ Dai num a nta gaw, si ai hte mung, shi a lam ni gaw Katsan ga de shang ai ni hte mung, seng nga ai. ¹⁹ Shi hpang de shang ai wa kadai mung, nhtang wa lu ai n rai; Asak lam hpe mung dep ma ai n rai. ²⁰ Nang gaw, mai kaja ai masha ni a lam hta hkan hkawm u; Dinghpring ai ni a lam dingyang hkan nga u. ²¹ Tengman ai ni gaw mungdan hta shanu nga nna, Hkup tsup ai ni gaw, dai hta grin nga na mara ai. ²² Tara n lang ai ni chyawm gaw, dai mungdan na shamyit kau ai hkrum nna, Hkalem sha ai ni gaw baw kau ai hkrum na mara ai.

¹ Ngai sha e, nye tara hpe hkum malap kau et; Na a myit masin gaw, ngai htet da ai ga hpe matsing u ga. ² Kaning rai nme law, dai gaw asak galu ai shaning shata hte, Ngwi pyaw ai lam, nang hpe shalaw jahtam ya na ra ai. ³ Chyeju myit hte kangka re ai myit hkum kau da et; Dai hpe na a du hta gali nga u, Na a kraw lawang lungpa hta tawk ka da u. ⁴ Shingrai yang, Karai Kasang a man e mung, masha a man e mung, Nang myiman pa nna, kajai gumhkawng ai hkrum na ndai. ⁵ Na a myit masin mahkra hte Yehowa hpe kamhpa nga u; Na a chye chyang ai nyan hta hkum shamyet shanat nga u. ⁶ Lam shagu hta shi hpe adum nga u, Shingrai yang, shi na a lam shading na ra ai. ⁷ Ngai hpaji rawng nngai, hkum myit et; Yehowa hpe hkrit hkungga nna, yubak hpe koi kau u. ⁸ Shingrai yang, na a hkum hkam kaja nga nna, Na a nrut nra ni hta lasawi hpring na ra ai. ⁹ Na a sutgan hte shawng ngai ai nsi naisi yawng hta na, Yehowa hpe hkungga let nawng ya u: ¹⁰ Dai rai yang, na a mam dum ni hpring chyat wa nna, Na a tsabyi htumrin ni tsabyi jahku nnan hte kabrat na ra ai. ¹¹ Ngai sha e, Yehowa a sharin ai hpe n gawn n sawn hkum rai et; Shi nang hpe daru yang, gawng hkum run et: ¹² Kawa gaw sharawng awng ai kasha hpe sharin ya ai zawn, Yehowa gaw tsawra ai wa hpe sharin ga ai. ¹³ Hpaji byeng-ya mu hkrup ai hte, Chye chyang ai myit lu la ai wa gaw, a nga ai. ¹⁴ Kaning rai nme law, hpaji hpaga ga ai gaw gumhpraw hpaga hte, De a amyat gaw ja jet hte, grau akyu nga ai. ¹⁵ Dai gaw patamya lungseng hte grau hpu nga ai rai nna, Nang ra ai hpa raitimung, dai hte shadawn lu ai n rai. ¹⁶ Shi a hkra lata hta asak galu ai, rai nga nna, Pai lata hta sutgan hte arawng sadang rawng nga lu ai. ¹⁷ Shi a lam ni gaw, sharawng awng ai lam ni rai nga nna, Shi hkan ai hku yawng, ngwi pyaw nga ai. ¹⁸ Shi gaw, shi hta manoi manat ai ni a matu asak hpun rai nga ai: Dai hpe n tat kau ai wa gaw a nga ai. ¹⁹ Yehowa gaw hpaji byeng-ya hte ginding aga hpe gaw da nna, Chye chyang ai hte, sumsing lamu hpe hpajang da nu ai. ²⁰ Shi chye chyang ai nyan hte sung ai shara ni ga mahka wa nna, Sumwi kaw na mari hkrat nga ai. ²¹ Ngai sha e, dai lam ni hpe na a man na n gangkau ai sha, Hpaji madung hte chye ginghka ai myit rawng nga u: ²² Shingrai yang, dai gaw na a wenyi hpe jahkrung ya ai asak, Na a du hta arawng sadang, tai na ra ai. ²³ Na a lam hta hkrithpa n hkrum ai hte, Na a lagaw n ahtu ai sha, nang sa wa na ndai. ²⁴ Nang yup kaleng wa yang, hpa hkrit ra ai n rai; Rai sa, nang pyaw pyaw yup kaleng nga lu na ndai. ²⁵ A kajawng sha du ai hkrithpa hte, Tara n lang ai ni hkrum ai tsin-yam hpe hkum hkrit et: ²⁶ Kaning rai nme law, Yehowa gaw na a kamhpa shara rai nga nna, Na a lagaw hpe sharen da ai n hkrum hkra, bau sin nga ai. ²⁷ Chyeju hkam la ging ai ni hpe, chyeju galaw lu yang, N galaw ai hkum nga et. ²⁸ Na a htingbu wa hpe, jaw hpa lu nga ninglen, Naw wa su, bai sa rit, hpawt de she ngai jaw na de ai, nga nna hkum tsun et. ²⁹ Makran shara n nga ai, na a htingbu wa hpe N kaja ai hku hkum maw et. ³⁰ Nang hpe n shut ai wa hpe, Mara kata e ga law hkum saw et. ³¹ Kashun kashe sha lu ai wa hpe hkum manawn et, Shi a lam langai mi muk hkum hkan et. ³² Kaning rai nme law, Yehowa gaw myit magaw ai ni hpe matsat nga ai. Tengman ai ni chyawm gaw shi hte jinghku hku lu na mara ai. ³³ Tara n lang ai ni a nta hpe, Yehowa dagam kau nga ai. Dinghpring ai ni a nga shara hpe shi shaman ya wu ai. ³⁴ Gaja wa jahpoi asawng ai ni hpe shi jahpoi asawng kau nga ai; Myit gyip ai ni hpe chyeju myit madun nga ai. ³⁵ Hpaji rawng ai ni gaw, arawng sadang sali wunli hkam la na ma ai; Angawk ai ni chyawm gaw kaya kahpa hkrum sha na mara ai.

¹ Ngai sha ni e, nwa a sharin shaga ai ga hpe na la mu; Zai byeng-ya hpe chye na lu hkra, madat mara nga mu. ² Ngai gaw nanhte hpe mai kaja ai ga ginsat jaw ni ai; Nye a tara hpe hkum gangkau myit. ³ Ngai chyawm gaw, wa a sinda shan, Nu a man e, tsawra ai, ngai hkyeng hkalung rai nga nngai. ⁴ Nye wa ngai hpe sharin achyin let tsun ai gaw: Nye ga hpe na kraw lawang e matsing da u; Hkrung nga lu hkra, ngai htet da ai ga hpe hkan shatup nga u. ⁵ Hpaji byeng-ya hpe tam la u, zai byeng-ya hpe tam la u; Nye n-gup ga hpe hkum malap, hkum gangkau et. ⁶ Hpaji byeng-ya hpe hkum kau da et, shi nang hpe bau sin na ra ai; Shi hpe tsawra u, nang hpe makawp maga na ra ai. ⁷ Hpaji byeng-ya madung rai nga ai; dai rai nna hpaji byeng-ya tam la u; Nang lu malu mahkra hta zai byeng-ya hpe grau tam la u. ⁸ Shi hpe shagrau u, shi nang hpe shagrau shatsaw na ra ai; Shi hpe manoi manat yang, nang hpe arawng sadang jaw na ra ai. ⁹ Shi gaw na a baw hta tsawm htap ai shanghkawng, shagup ya nna, Daru magam re ai janmau nang hpe ap ya na ra ai. ¹⁰ Ngai sha e, nye ga na la nna madat mara u; Shingrai yang, na asak galu na ra ai. ¹¹ Hpaji byeng-ya lam, ngai nang hpe sharin ya nna, Tengman ai lam de nang hpe woi wa de ai. ¹² Nang hkawm wa yang, asan apan hkawm lu na ndai; Gat wa jang, ahtu kataw ai n hkrum na rin dai. ¹³ Sharin achyin ai lam hpe manat nga u; dai hpe hkum dat dat u; Dai gaw na a asak rai nga ai majaw, sin da u. ¹⁴ Tara n lang ai ni a lam hta hkum shang et; Yubak kap ai ni a lam hku hta hkum hkawm et. ¹⁵ Shanhte a lam koi kau u, hkum garet hkawm et; Yen kau da nna lai wa su. ¹⁶ Shanhte gaw n hkru ai amu n lu galaw yang, n yup lu ma ai; Masha hpe n kataw shangun yang, yup n pyaw lu ma ai. ¹⁷ Mara kap ai muk shanhte sha nga nna, Kashun kashe re ai tsabyi lu nga ma ai. ¹⁸ Dinghpring ai ni a lam chyawm gaw, jahpawt nhtoi hte bung nga ai; Dai gaw nhtoi leng hkra ahtoi ahkung wa nga ai. ¹⁹ Tara n lang ai ni a lam gaw, nsin zawn rai nga ai; Hpa ahtu kataw shara hkrum na shanhte n chye ma ai. ²⁰ Ngai sha e, nye a ga hpe madat mara u; Nye matsun maroi ga hpe na la u. ²¹ Dai gaw na a man na hkum jahka et; Na a kraw lawang kata e kyem tawn da u. ²² Dai gaw, mu tam ai ni a matu asak hkrung ai lam, Hkumshan ting a matu hkam kaja ai lam rai nga ai. ²³ Myit masin gaw asak a npawt nhpang rai nga ai majaw, Dai hpe tsam mari bau sin nga u. ²⁴ Lale chye ai n-gup hte kajam galam chye ai aten hpe, Nang kaw na tsan tsan gangkau u. ²⁵ Na a myi ang ang mada yu u; Myi hpyu hkum rai et. ²⁶ Nang sa wa ai lam hpe numda daw nna, Nang hkan nang ai lam shagu hpe, shagrin da u. ²⁷ Hkra de pai de hkum yit et; Na a lagaw yubak lam hpe koi kau u.

¹ Ngai sha e, nye hpaji byeng-ya hpe madat mara u; Nye a zai byeng-ya hpe na la u. ² Shingrai yang, nang sadi sahka rawng nna, Na a n-gup chye chyang ai hpe hkyem da na ra ai. ³ Kaning rai nme law, shawa num a nten gaw lagat jahku kapya nna, Shi a n-gup sau hta grau manen timung, Shi gaw hpang jahtum e lashi pila zawn hka nna, Ntawng nhtu zawn dai nga ai. ⁵ Shi a lagaw si hkrung si htan de yu wa nna, Shi hkawm ai lam gaw katsan ga de ang wa ai. ⁶ Shi gaw asak hkrung ai numda lam hpe n mu nga ai; Shi a lam ni ndi nda rai nga timung, shi dai n chye nga ai. ⁷ Dai rai nna, ngai sha ni e, nye a ga madat mara mu; Nye n-gup na pru ai ga hkum gangkau myit. ⁸ Shing re ai num hpe tsan tsan koi kau mu; Shi a nta chyinghka de pyi hkum ni et. ⁹ Shing n rai yang, nang gaw, na a arawng sadang masha wa hpe, Na a asak gumshem ai ni hpe ap ya na wu ai. ¹⁰ Tsasam masha ni gaw na a ngamu ngamai ai hte hkru kat nna, Na a sutgan gaw sumtsan mung na ni a nta hta shang na ra ai. ¹¹ Shaloi nang gaw, aprat htum magang wa ai hte, Na a hkum hkrang hte hkumshan tsam mat wa yang, ¹² Ngai gaw sharin achyin ai ga hpe ndawng kau se hka; Nye a myit, shadum shahprang ai ga hpe lale kau nu hka; ¹³ Nye sara ni a nsen ngai n madat nna, Ngai hpe sharin achyin ai ni a ga hpe n hta la nngai: ¹⁴ Ngai gaw shawa hpawng ka-ang e ganoi noi, Nhkru ai lam shagu hta woi awn kau se hka, nga nna sharung shayawt na rin dai. ¹⁵ Na a hka htung na ntsin hpe, Na a hka hpawk na lwi ai ntsin hpe, a lu nga u. ¹⁶ Na a hka deng ni shinggan de bra wa nna, Mare lam ni hta hka shi ni lwi nga mu ga. ¹⁷ Dai hta tsasam masha ni n lawm ai sha, Dai gaw na a matu hkrai rai nga u ga. ¹⁸ Na a hka hpawk shaman ai hkrum nna, Na a ram prat na madu jan hte rau pyaw nga u: ¹⁹ Shi gaw tsawra ai ding kanu hte tsawm htap ai shan nga yi zawn rai nga nna, Shi a madoi chyuhpang nang hpe tut tut shapyaw nga u ga: Shi hte tsawra hkat ai hta, tutnawng myit dik nga u. ²⁰ Ngai sha e, nang hpa majaw masha num htalen nga nna, Tsasam num hte kasawt nga n ta? ²¹ Masha sa wa ai lam Yehowa man e rai nga nna, Shi hkan ai hku yawng mayawng hpe, shi dinglik yu nga ai. ²² Tara n lang ai wa gaw, shi galaw ai yubak hta rim la ai hkrum nna, Shi a mara sumri hte hkangda ai hkrum na ra ai. ²³ Shi gaw sharin achyin ai n hkam la ai hte si mat na ra ai; Shi angawk angak an ai aten e lam dam mat na ra ai.

¹ Ngai sha e, nang gaw htingbu wa a matu pahkam tai ai hte, Tsasam wa a matu ga sadi tawn da ai rai yang, ² Nang gaw na a n-gup ga a mahkam hte hkrup nna, Nang tawn da ai ga gaw, na a matu masawn tai wa sai. ³ Ya chyawm gaw, ngai sha e, ning rai galaw u: Nang htingbu wa lata hta shang mat ai majaw, Shi hang de sa u, myit nem let shi hpe shalen nna, lawt wa u; ⁴ Garai n lawt yang, hkum yup pyaw nga et, Myi grip mi pyi, hkum yup nga et. ⁵ Jaugawng wa a lata na ding kanu zawn, U hkam wa a lata na u zawn, lawt pru wa u. ⁶ Lagawn ai wa e, kakyin hpang de sa su; Shi a arawn alai hpe sumru yu nna, hpaji rawng u. ⁷ Shi gaw hpaawn wa, agyi wa, up ai wa n lu timung, ⁸ Nlum ta hta shi a shahpa, Nmut ta e shi a jarit hpe mahkawng da nga ai. ⁹ Lagawn ai wa e, nang gaw gaten du hkra yup nga na n ta? Yup ai kaw na galoi hprang na n ta? ¹⁰ Hkring mi yup, hkring mi sha naw yup pyaw nna, Lata hkintum let, naw kaleng taw nga yang, ¹¹ Matsan mayan ai gaw damya wa zawn, Sutgan ginlut kau ai gaw, hpyen wa zawn, du na ra ai. ¹² Masu magaw ai n-gup hte ga a tsun nga ai wa, Shi myi grip let kumla madun nna, ¹³ Lagaw hte mung kumla madun ai hte Layung ni hte dingsi ai wa, ¹⁴ Myit magaw rawng nna, N kaja ai hpaji tutnawng daw ya ai hte Manang shada dumbru dumbra shangun ai wa, Lam n la ai hte mara kap ai wa rai nga ai. ¹⁵ Dai re ai majaw, shi akajawng sha tsin-yam tsindam hkrum nna, Bai n mai lu hkra, alawan agrawp kau ai hkrum na ra ai. ¹⁶ Yehowa ndawng nga ai lam kru rai nga ai. Rai sa, shi matsat kau ai lam sanit gaw, ¹⁷ Gumrawng gumtawng re ai myiman, masu ga tsun ai shinglet, Mara n kap ai wa a sai hpe jahkaw kau ai lata; ¹⁸ N kaja ai hpaji daw ai myit masin, Kajam galam galaw na lawan ai lagaw, ¹⁹ Masu ga tsun ai sakes wa, Kahpu kanau shada dumbru dumbra shangun ai wa rai nga ai. ²⁰ Ngai sha e, na nwa a htet da ai ga hpe hkan nang u; Nnu a tara hpe mung hkum gangkau et. ²¹ Dai hpe na a myit masin hta tutnawng gyit da nna, Na a du hta gali da u. ²² Dai gaw, nang hkawm sa wa yang, nang hpe lam madun na ra ai; Yup nga yang, nang hpe bau sin na ra ai: Yup hprang wa yang, nang hte tsun chyai na ra ai. ²³ Kaning rai nme law, htet da ai ga gaw pyengdin rai nga ai; Tara gaw nhtoi rai nga ai; Mara madun ai shadum shahprang ga gaw asak lam rai nga ai. ²⁴ Dai gaw, n shawp ai num hte, hkalem hkalau chye ai Tsasam num a shinglet hta na, nang hpe makawp maga na ra ai. ²⁵ Shing re ai num tsawm htap timung, ra gasit ai myit hkum rawng et. Shi a myi kaw hte nang hpe n lau la u ga. ²⁶ shawa num a majaw, la wa gaw, muk tawng mi sha lu nga ai; La shaw ai num gaw hpu la ai asak hpe gyam nga ai. ²⁷ Masha gaw hpun palawng n hkru hkra, Wan hpe majaw hpai lu a ni? ²⁸ Lagaw n hkaw hkra, wan n-ga ntsa e kabye lu a ni? ²⁹ Masha jan shaw ai wa dai hte maren rai nga ai. Shi hte kanawn ai wa kadai mung, mara lawt lu na n rai. ³⁰ Marai langai ngai kawsi hkrum ai majaw lagu yang pyi, Mara lawt lu na, n rai. ³¹ Shi hpe mu hkrup yang, htam sanit nhtang ya na ra ai, Shi nta e nga ai sutgan yawng, wa kau na ra ai. ³² Masha jan shaw ai wa chyam gaw nyan n rawng nga ai; Shi a asak jasum kau mayu ai majaw, dai lam galaw nga ai. ³³ Anu kayat ai hte arawng hpoi ai, shi hkrum na ra ai; Shi hkrum ai kaya kahpa prai mat lu na n rai. ³⁴ Kaning rai nme law, la wa gaw n ju ndawng ai myit rawng nna, Ari jaw ai shani e matsan dum nga na n rai. ³⁵ Htingrai htingrat ja hpe shi hpa n nawn nga ai. Kumhpa law law jaw timung, masin n si nga ai.

¹ Ngai sha e, ngai tsun ai ga hkan nang nga u; Ngai htet da ai ga, nang hta mahkawng da u. ² Ngai htet da ai ga hkan nang nna ahkrung nga u, Nye tara hpe na myi tum zawn makawp maga u. ³ Na a layung ni hta dai hpe gyit da nna, Na a kraw lawang lungpa hta tawk ka da u. ⁴ Hpaji byeng-ya hpe, Nang gaw nye a kajan, Zai byeng-ya hpe, Nye nau na, ngu nna hkau chyap nga u. ⁵ Shingrai yang shan gaw shawa num hte, Hkalem hkalau chye ai tsasam num a lata na nang hpe mawai la na mara ai. ⁶ Kaning rai nme law, nye nta na hkuwawt hku, Hkinji lapran hku ngai asoi yu nga yang, ⁷ Nyan tang ai ni hta marai langai mi hpe ngai mu nna, prat ram ni hta nyan n rawng ai shabrang langai mi hpe matsing da nngai. ⁸ Dai wa gaw, dai num a nta lam jut makau de lai hkawm nna, Nrim rim, pran tawm mahka, ⁹ Yuptung hpawa nsin htat ai aten e Shi a nta lam de hkan shang wa ai. ¹⁰ Shaloi shawa num hpun palawng bu hpun nna, Lak lai ai num gaw, shi hpe hkap tau la wu ai. ¹¹ Dai num gaw seng breng ai hte myit ja ai num rai nga ai: Shi nta e n nga ai sha, le hkawm nga ai. ¹² Ya sha mare lam e, ya sha mare htingwan hkan e nwan hkawm let, Njut nnaw hkan e mayun joi yu nga ai. ¹³ Shi gaw dai shabrang wa hpe hkap pup nna, Kaya n chye ai myiman hte, ¹⁴ Nye nta e shagu hkungga hte mahku hkungga shan rawng nga ai. Dai ni nye ga shaka hpe ngai raw kau se ai. ¹⁵ Dai majaw nang hpe sa tau na ngai pru nngai; Na a myiman hpe tam shakut nna mu se ai. ¹⁶ Nye yupku hpe maka ka ai panep hte mung, Egutu ri sumpan hte mung ngai nep nna mawn tawn se ai. ¹⁷ Nye yupra hpe mura, achyaw, maza hpun hte, ngai pup shamawng se ai. ¹⁸ Ya sa rit, nhtoi htoi hkra pyaw daw kadaw ga; Sumtsaw sumra hte pyaw nga ga. ¹⁹ Nye a madu gaw nta e n nga ai; Gumhpraw jan gun nna, sumtsan mung de sa wa sai; ²⁰ Shata hpung ang e she bai wa na ra ai, nga ai. ²¹ Shingrai, si mani ga hte shi hpe lau la nna, Hkyaw ai ga hte hkan nang shangun wu ai. ²² Shi gaw, tinang a masin hta pala htinggrang ai du hkra, Sat na shara de hkan nang ai usu hte ²³ Sharen da hkrum na angawk ai wa zawn, Shaloi jang, dai num a hpang e hkan nang nga ai. Tinang asak sum na, mahkam hpe n chye ai, gat shang ai u zawn shi rai nga ai. ²⁴ Dai rai nna, ngai sha ni e, nye a ga madat mu; Nye a n-gup ga hpe matsing da mu. ²⁵ Dai num a lam hpe myit hkum marin et; Shi hkawm ai hku hta hkum yit shang et. ²⁶ Kaning rai nme law, shi gaw law law hpe hkala nba di kadawng kau mu ai; Shi sat kau ai ni gaw wunawng kaba rai nga ma ai. ²⁷ Shi nta na lam gaw, katsan ga de ang wa nna, Si du a gawk ni de, yu wa nga ai.

¹ Hpaji hparat shaga nga ai, Zai byeng-ya gaw, shi a nsen shabra nga ai, n rai ni? ² Nmaw lam makau jinghkang e mung, Lam mashe makau hkan e mung shi tsap nga ai. ³ Mare shang na chyinghka makau e mung, Chyinghka lam e shang wa yang, shi jahtau nna, ⁴ Shinggyim masha ni e, ngai nanhte hpe shaga nga nngai; Nye a nsen gaw, masha kasha ni hta ang nga ai. ⁵ Hpaji tang ai ni e, htauli htaula rai nga mu: Angawk ai ni e, myit let nga mu. ⁶ Madat mara nga mu; kaja htum ai ga ngai tsun na nngai; Ngai n-gup hpaw yang, tengman ai ga pru na ra ai. ⁷ Nye n-gup gaw tengman ai ga shapraw na ra ai; Nye a nten gaw yubak hpe matsat kau nga ai. ⁸ Nye n-gup ga mahkra gaw, dinghpring ai ga rai nga ai; Magaw ai hte gale galau ai n lawm nga ai. ⁹ Dai ga mahkra gaw chye na ai wa a matu dan leng nga ai; Chye chyang ai myit mu tam ai wa gaw, dai hpe awlaw nga ai. ¹⁰ Ngai sharin ai lam, gumhpraw a shawng e, hkap la u. ¹¹ Hpaji byeng-ya gaw lungseng hta grau hpu nga ai, Ra mara hpa raitimung, dai hte shadawn lu ai, n rai. ¹² Ngai hpaji byeng-ya gaw, htauli htaula hta shanu nga nna, Chye chyang ai hte chye ginhka ai myit mu hkrup nngai. ¹³ Yehowa hpe hkrit kamyin ai myit gaw, yubak hpe ndawng nga ai; Gumrawng gumtawng ai, myit kaba ai, n hkru ai lam hte, Masu magaw chye ai n-gup hpe ngai ndawng nngai. ¹⁴ Hpaji daw lu ai hte lam madung ngai rai nga nngai; Chye chyang ai npawt ngai rai nga nngai; Ngai gaw n-gun atsam hte hpring nga nngai. ¹⁵ Nye a majaw hkawhkam ni up nga lu nna, Du agyi ni, dinghpring ai tara tawn da nga ma ai. ¹⁶ Nye a majaw agyi salang ni, hkringjung hkringmang ni hte Ga ntsa tara agyi ni mahkra up nga lu ma ai. ¹⁷ Ngai e tsawra ai ni hpe, ngai tsawra nga nngai; Ngai hpe tam shakut ai ni gaw mu ma ai. ¹⁸ Sut su ai hte arawng sadang, grin nga ai sutgan hte Dinghpring ai lam, ngai hta rai nga ai. ¹⁹ Ngai si ai asi gaw, aja hte jet htum ai aja hta, Ngai shapraw ai amyat gaw gumhpraw hta, grau kaja nga ai. ²⁰ Ngai hpe tsawra ai ni sali wunli lu la nna, Shanhte a sut gek ni hpe sutgan hte jahpring ya lu hkra, ²¹ Ngai gaw dinghpring ai hku hkan nna, Tengman ai tara dara ai lam ka-ang e, hkawm nga nngai. ²² Yehowa gaw, moi chyaloi nhkoi na amu garai n galaw nga yang, Shi ngai hpe npawt madung shatai nga ai. ²³ Lamu ga garai n nga, chyi nma hpri nhpra kaw nna, Shi ngai hpe shalat tawn da ni ai. ²⁴ Sung htum ai shara garai n nga, lwi nga ai hka hpawk ni garai n pra yang, shi ngai hpe shaprat ni ai. ²⁵ Bum ni hpe garai n gaw da ai hte, Kawng ni garai n nga, ²⁶ Lamu ga hte de a dam lada ai shara ni hpe mung, Dinghta ga na ga nhpu langai mi hpe mung, garai n hpan da yang, shi ngai hpe shaprat ni ai. ²⁷ Shi gaw sumsing lamu hpe hpajang da yang, ngai lawm nngai: Sung htum ai shara hpe jarit kawan da ai hte, ²⁸ Sumsing lamu a madin shagrin da yang, Sung htum ai shara a hka hpawk ni hpe shangang da ai hte, ²⁹ Nammukdara jarit hpe n lai lu na lam, Hka leng ni hpe hkangda nna, Lamu ga a npawt nhpang ni gaw da shangut jang, ³⁰ Ngai gaw hpaawn wa zawn shi hte rau nga nga nna, Shi gaw nye a majaw shani shagu kabu gara nga ai; Ngai mung shi a man e tutnawng awng sharawng nga nngai; ³¹ Shi hpan da ai ginding aga hta, ngai kabu gara nga nna, Shinggyim masha ni hte rau awng sharawng nga nngai. ³² Dai rai nna, ngai sha ni e, nye a ga madat mu. Nye a lam hkan ai ni gaw, a lu ma ai. ³³ Sharin achyin ai ga na la mu; hpaji byeng-ya rawng nga mu: Dai hpe hkum gangkau myit. ³⁴ Nye a ga madat let, nye a chyinghka makau e, Shani shagu doi yu nga nna, nye chyinghka shadaw makau e ala nga ai wa gaw, a lu ai. ³⁵ Ngai hpe mu tam ai wa gaw, asak hpe mu la nna, Yehowa a chyeju mung hkam la lu nu ai. ³⁶ Ngai hpe shut hpyit ai wa chyawm gaw, tinang a asak wenyi hpe shut kau nu ai; Ngai hpe ndawng ai ni yawng, si ai hpe tsawra nga ma ai.

¹ Hpaji byeng-ya gaw shadaw sanit kran nna, Tinang a nta hpe gap da nu ai. ² Shi gaw shi a yamnga ni hpe sat nna, Shi a tsabyi jahku hpe kayau nhtawm, sha ku hpe mung hkyen lajang tawn nu ai. ³ Shi a mayam num ni hpe shi shangun dat nna, Mare na tsaw htum ai shara ni hte e, ⁴ Hpaji tang ai wa kadai mung, shang rit, Byeng-ya n rawng ai wa e, sa rit: ⁵ Nye a muk hpe sha mu, Ngai kayau ai tsabyi jahku hpe lu mu. ⁶ Myit n su ai lam kau da nna, hkrung nga mu, Zai byeng-ya lam hta hkan hkawm nga mu, nga nna jahtau tsun mu ai. ⁷ N kaw n law re ai wa hpe shadum shahprang ai wa, aroi arip hkrum sha nga ai; N hkru ai wa hpe mara madun ai wa, agang chyalang hkrum na ra ai. ⁸ N kaw n law re ai wa hpe hkum shadum et, shi nang hpe ndawng na ra ai: Hpaji rawng ai wa hpe shadum u, shi nang hpe tsawra na ra ai. ⁹ Hpaji rawng ai wa hpe shadum yang shi grau nna hpaji rawng na ra ai; Dinghpring ai wa hpe sharin yang, shi grau nna chye chyang wa na ra ai. ¹⁰ Yehowa hpe hkrit hkungga ai myit gaw, hpaji byeng-ya a npawt rai nga ai; Chyoi pra ai wa hpe chye chyap ai myit gaw, zai byeng-ya rai nga ai. ¹¹ Kaning rai nme law, nye a majaw na a nhtoi ni galu wa nna, Nang hkrung nga ai shaning ni law htam wa ra ai. ¹² Nang hpaji rawng yang, nang nan akyu hkam la na ndai; N kaw n law rai yang, nang nana ri hkrum na ndai. ¹³ Myit n su ai num gaw seng breng nna, Nyan tang ai hte, hpa mung n chye nga ai. ¹⁴ Shi a nta chyinghka makau na, Mare a tsaw htum ai shara ntsa e dung nga let, ¹⁵ Tinang lam ang ang lai sa wa ai ni hpe, Shi shaga nga ai rai nna, ¹⁶ Nyan tang ai wa kadai mung nang de shang rit, nga ai. Bai, shi gaw, hpaji kata ai wa hpe ¹⁷ Lagu ai ntsin dawi nga ai, Mayun sha ai muk mu nga ai, nga nna tsun ai. ¹⁸ Shang ai wa mahtang, dai shara gaw tsu ni hpawng nga ai shara, Dai num a manam ni gaw, katsan ga a hkaraw e dè nga ai lam hpe, n chye nga ai.

¹ Shawlumon a ga shagawp da ndai rai nga ai: Hpaji rawng ai kasha gaw, kawa hpe kabu shangun nga ai; Angawk ai kasha chyawm gaw, kanu hpe yawn shangun nga ai. ² N tara ai sutgan gaw, hpa akyu n nga ai; Dinghpring ai lam chyawm gaw, si ai kaw na mawai la nga ai. ³ Yehowa gaw dinghpring ai wa a myit masin hpe kawsi jahkrum ai n rai; Tara n lang ai ni a myit ra ai lam hpe chyawm gaw, shi gangkau nga ai. ⁴ Lagawn ai lata gaw matsan mayan hkrum nga ai; Shakut sharang ai lata chyawm gaw, sut su nga ai. ⁵ Nmut ta e shu la ai wa gaw, hpaji rawng ai kasha rai nga ai; Mam dan ten e yup ai wa chyawm gaw, kaya hkrum ai kasha rai nga ai. ⁶ Dinghpring ai wa a baw ntsa e chyeju anga nga ai; Tara n lang ai ni a n-gup chyawm gaw, kashun kashe a up nga ai. ⁷ Dinghpring ai wa a masat dingsat gaw, a nga ai; Tara n lang ai wa a amying chyawm gaw, tsam mat na ra ai. ⁸ Hpaji rawng ai wa gaw, hkangda ai ga hkam la nga ai; Baw law ai angawk wa chyawm gaw, kadawng mat na ra ai. ⁹ Tengman ai lam hta hkan hkawm ai wa gaw, ding ding hkawm nga ai. Magaw ai lam hkan ai wa chyawm gaw, dan leng wa na ra ai. ¹⁰ Myi grip let kumla madun ai wa gaw, ruyak jahkrum nga ai; Baw law ai angawk wa chyawm gaw, kadawng mat na ra ai. ¹¹ Dinghpring ai wa a n-gup gaw, asak hka htung rai nga ai; Tara n lang ai ni a n-gup chyawm gaw, kashun kashe a up nga ai. ¹² Ndawng n yawt ai myit gaw, ga law ga la shapraw nga ai; Tsawra ai myit chyawm gaw, yubak yawng hpe magap kau nga ai. ¹³ Nyan rawng ai wa a n-gup gaw, hpaji ga tsun nga ai; Nyan kata ai wa a shingma chyawm gaw, shingna hkrum na ra ai. ¹⁴ Hpaji rawng ai wa gaw, chye machye hpe mahkawng da nga ai; Myit n su ai wa a n-gup chyawm gaw, hten byak ai hte ni nga ai. ¹⁵ Sahti wa a sutgan gaw, shi a ngang ai mare rai nga ai; Sut kata ai chyawm gaw, matsan mayan ni a hten wa na lam rai nga ai. ¹⁶ Dinghpring ai ni a amu gaw, asak lam rai nga ai; Tara n lang ai ni a amyat gaw, yubak rai nga ai. ¹⁷ Sharin achyin hkam ai wa gaw, asak lam hta hkawm nga ai; Shadum shahprang ai ga gangkau ai wa chyawm gaw, lam dam nga ai. ¹⁸ N dawng ai myit up da ai wa gaw masu chye ai n-gup tu nga ai; Masu ai shi tsun shabra ai wa gaw, angawk ai wa rai nga ai. ¹⁹ Ga law law tsun ai hta, yubak n lawm ai, n nga lu ai; Tinang a n-gup shim da ai wa chyawm gaw, myitsu ai wa rai nga ai. ²⁰ Dinghpring ai wa a shinglet gaw, gumhpraw jet hte bung nga ai; Tara n lang ai ni a myit masin gaw, hpa n hkaw nga ai. ²¹ Dinghpring ai ni a n-gup gaw, masha law law hpe bau nga ai: Myit n su ai ni chyawm gaw, nyan kata ai majaw si ma ai. ²² Yehowa a shaman ai gaw ngamu ngamai shangun nga ai; Dai hta e yawnhkyen hpa mung n lawm nga ai. ²³ Angawk ai wa gaw, yubak galaw na, pyaw lam nawn nga ai; Nyan rawng ai wa mahtang, hpaji hpe dai zawn nawn nga ai. ²⁴ Tara n lang ai wa hkrit ai lam, shi a ntsa e du na ra ai; Dinghpring ai ni a marit ai lam dik wa na ra ai. ²⁵ Tara n lang ai wa gaw, bung sha zawn hkoi mat na ra ai; Dinghpring ai wa chyawm gaw htani htana agrin nga na ra ai. ²⁶ Ntsin hkri gaw wa a matu, wanhkut gaw myi a matu, n htuk nga ai hte maren, Lagawn ai wa mung, shi hpe shangun dat ai ni a matu, rai nga ai. ²⁷ Yehowa hpe hkrit hkungga ai myit gaw asak galu shangun nga ai; Tara n lang ai ni a shaning chyawm gaw gadun nga ai. ²⁸ Dinghpring ai ni a myit mada ai lam gaw, kabu gara lam rai nga ai; Tara n lang ai ni a myit mada ai lam chyawm gaw hten mat na ra ai. ²⁹ Yehowa a lam gaw tengman ai ni a n-gun atsam rai nga ai; N hkru ai amu galaw ai ni a matu chyawm gaw, hten byak ai lam rai nga ai. ³⁰ Dinghpring ai ni gaw htani htana e shamu shamawt lu na n rai; Tara n lang ai ni chyawm gaw, Mungdan hta e shanu nga lu na n rai. ³¹ Dinghpring ai wa a n-gup gaw, hpaji byeng-ya shapraw wu ai; Masu magaw chye ai shinglet chyawm gaw, atawk kau ai hkrum na ra ai. ³² Dinghpring ai wa a n-gup gaw, tsawra mai ai lam chye nga ai; Tara n lang ai ni a n-gup chyawm gaw, manai ai ga hkrai tsun nga ai.

¹ Yehowa gaw n man ai joi jang hpe matsat nna, Tengman ai joi si hpe, ra sharawng nga ai. ² Gumrawng gumtawng yang, kaya kahpa pru; Myit shagrit ai ni, hpaji byeng-ya lu. ³ Tengman ai ni a malang ai myit, shanhte hpe awn wa nga ai; Myit magaw ai ni a hkalem ai myit chyawm gaw, shanhte hpe shaza kau nga ai. ⁴ Sindawng kahtet ai shani e sutgan gaw hpa akyu n nga ai; Dinghpring ai lam chyawm gaw, si ai kaw na mawai la nga ai. ⁵ Hkum tsup ai wa a dinghpring ai myit shi hpe woi awn na ra ai; Tara n lang ai wa chyawm gaw tinang n hkru ai hta kadawng mat na ra ai. ⁶ Myit malang ai ni a dinghpring ai gaw, shanhte hpe mawai la na ra ai; Hkalem hkalau ai ni chyawm gaw tinang maw sha ai hta hkang mat na mara ai. ⁷ Tara n lang ai wa si yang, shi myit mada ai lam htum mat nna, N hkru ai ni a marit ai lam hten mat na ra ai. ⁸ Dinghpring ai wa gaw, nni nkri kaw na lawt wa nna, Tara n lang ai wa, shi a malai hkrum sha na ra ai. ⁹ N shawp ai wa a n-gup gaw, htingbu wa hpe shayuk kau nga ai; Dinghpring ai wa chyawm gaw, chye chyang ai hte lawt lu na ra ai. ¹⁰ Dinghpring ai ni ngamu ngamai yang, mare ting kabu nga ai; Tara n lang ai wa, hten byak hkrum yang chyawm gaw, garu jahtau nga ma ai. ¹¹ Myit malang ai ni a shaman ai hte mare gaw galu kaba nga ai; Tara n lang ai ni a n-gup hte dai hpe jahten kau nga ai. ¹² Myit n su ai wa gaw, htingbu wa hpe n kaw n law rai nga ai; Nyan rawng ai wa chyawm gaw, atsin sha rai nga ai. ¹³ Nwan hkawm nna shi htawn ai wa, ip da mai ai lam sha brawng dat ai; Kangka myit rawng ai wa chyawm gaw, makoi magap da nga ai. ¹⁴ Hpaji daw chye ai nyan n rawng yang, mung masha ni sum wa ma ai; Hpaji daw chye ai ni law nga yang, lawt pru shara nga ai. ¹⁵ Tsasam wa matu pahkam hkam ai wa gaw, yawn hpa hkrum na ra ai; Pahkam n hkam hkraw ai wa chyawm gaw, myit tsang shara n nga ai. ¹⁶ Ra sharawng mai ai num gaw, arawng sadang lu, Daru magam rawng ai wa gaw sut su nga ai. ¹⁷ Matsan dum chye ai wa gaw, shi hkum hpe lanu lahku nga ai; Sheng mareng re ai wa chyawm gaw, shi hkumshan hpe pyi sharu nga ai. ¹⁸ Tara n lang ai wa gaw, maw sha map sha ai shabrai lu la nga ai; Dinghpring ai nli gat ai wa chyawm gaw, grin nga ai shabrai lu la na ra ai. ¹⁹ Shingrai dinghpring ai gaw asak lam rai nga ai; yubak hpe hkan tam ai wa gaw, shi si na hpe hkan tam nga ai. ²⁰ Yehowa gaw myit magaw ai ni hpe matsat nga ai; Hkum tsup ai lam hkan ai ni hta shi awng sharawng nga ai. ²¹ N hkru ai ni shada matut timung, mara lawt lu na, n rai; Dinghpring ai ni a aru arat chyawm gaw lawt lu na mara ai. ²² Tsawm htap timung, sari n rawng ai num gaw, Wa kanu a nnaw hta noi ai ja shanghkawng hte bung nga ai. ²³ Dinghpring ai ni a marit ai hku, mai kaja ai hkrai rai nga ai; Tara n lang ai ni a myit mada ai lam chyawm gaw, pawt sindawng ai hkrai rai nga ai. ²⁴ Jaw kau timung, sut su wa ai wa mung, nga ai; N taw n tsang mahkawng da timung, matsan hkrum ai wa mung nga ai. ²⁵ N daw n hta jaw ai wa gaw, hpum wa na ra ai; Ntsin jaw bun ai wa gaw, jaw bun ai bai hkrum na ra ai. ²⁶ Mam n dut hkraw ai wa gaw, dagam dala hkrum na ra ai; Dut ya ai wa chyawm gaw, shaman ai lu la na ra ai. ²⁷ Mai kaja ai hpe tam shakut ai wa gaw, akyu hkam la na ra ai; N hkru ai hpe hkan shachyut ai wa gaw, dai hpe hkrum na ra ai. ²⁸ Tinang sutgan hta hpa ai wa gaw, kadawng mat na ra ai; Dinghpring ai wa chyawm gaw, tsit lali ai hpun lap zawn prut wa na mara ai. ²⁹ Tinang a dinghku hpe sharu shatsang ai wa gaw, nbung sali hkam la na ra ai; Nyan tang ai wa gaw, hpaji rawng ai wa kaw yam na ra ai. ³⁰ Dinghpring ai wa a asi gaw, asak hpun a asi rai nga ai; Masha myit masin hpe woi awn lu ai wa gaw, hpaji lu ai wa rai nga ai. ³¹ Yu u, dinghpring ai wa pyi, ga ntsa e ari hkrum nga ai rai yang, Tara n lang ai wa hte yubak kap ai wa grau nna hkrum na, n rai ni?

¹ Sharin achyin ai tsawra ai wa gaw, chye chyang ai hpe tsawra nga ai; Shadum shahprang ai hpe ndawng ai wa chyawm gaw, dusat myit rawng nga ai. ² Mai kaja ai wa gaw, Yehowa kaw na chyeju hkan la na ra ai; N hkru ai hpaji daw ai wa chyawm gaw, dawdan ai hkrum na ra ai. ³ Masha wa gaw n hkru ai hte grin nga lu na, n rai; Dinghpring ai ni a aru chyawm gaw shamu shamawt lu na, n rai. ⁴ Sari rawng ai num gaw madu wa a janmau rai nga ai; Kaya jahkrum ai num chyawm gaw, madu wa a nrut nra ni shatsam kau ai mawng zawn rai nga ai. ⁵ Dinghpring ai ni a myit mang ai hku, ding nga ai; Tara n lang ai ni a maw ai hku chyawm gaw, gale galau rai nga ai. ⁶ Tara n lang ai ni a ga gaw masha sai jahkaw na gyam nga ai; Dinghpring ai ni a n-gup chyawm gaw shanhte hpe hkrang la nga ai. ⁷ Tara n lang ai ni kadawng mat nna, n nga mat ma ai; Dinghpring ai ni a nta chyawm gaw agrin nga na ra ai. ⁸ Masha wa tinang a hpaji hte maren shagrau ai hkrum na ra ai; Myit magaw ai wa chyawm gaw, n kaw n law di kau ai hkrum na ra ai. ⁹ Tinang hkum dai shagrau timung, shahpa n lu ai wa hta, Arawng n lu timung, shangun malu ai wa gaw, grau akyu nga ai. ¹⁰ Dinghpring ai wa gaw tinang a yamnga hpe lahpawt chye nga ai; Tara n lang ai ni chyawm gaw n-gaw nwai ai hta pyi, sheng mareng rai nga ma ai. ¹¹ Tinang a yi hkauna galaw ai wa gaw, hkru hkru kat kat sha lu ai; Kaman re ai ni hpe hkan nang ai wa chyawm gaw, myit n su nga ai. ¹² Tara n lang ai wa gaw, n hkru ai ni a mahkam hpe ra nga ai; Dinghpring ai ni a aru chyawm gaw asi si nga ai. ¹³ Ga lai ai gaw, n hkru ai wa a matu, mahkam rai nga ai; Dinghpring ai wa chyawm gaw lawt wa na ra ai. ¹⁴ Masha gaw tinang a n-gup asi kaja hte hkru kat na ra ai; Tinang lata galaw ai hte hkam la na ra ai. ¹⁵ Myit n su ai wa, tinang lam malang ai nawn nga ai; Hpaji daw ai ga madat ai wa chyawm gaw, hpaji rawng nga ai. ¹⁶ Myit n su ai wa pawt kahtet yang, alawan dan nga ai; Hpaji rawng ai wa chyawm gaw, kaya kahpa ip da nga ai. ¹⁷ Tengman ai ga tsun ai wa gaw, dinghpring ai lam, Masu ai sakes wa gaw hkalem ai lam, shapraw nga ai. ¹⁸ Nhtu hte galun ai zawn, laji magra nna tsun ai wa mung nga ai; Hpaji rawng ai wa a shinglet chyawm gaw, ana pyi shamai ya lu ai. ¹⁹ Tengman ai n-gup gaw, dinggrin anga nga ai; Masu ai shinglet chyawm gaw chyahkring sha nga ai. ²⁰ N hkru ai lam maw ai ni a myit hta hkalem hkalau rawng nga ai; Ngwi pyaw ai lam maw ai ni chyawm gaw, kabu gara hkrum ma ai. ²¹ Dinghpring ai wa gaw shoihpa shoirang n hkrum nga ai; Tara n lang ai ni chyawm gaw n hkru ai hte hpring na mara ai. ²² Yehowa gaw masu ai n-gup hpe matsat nga ai; Tengman ai lam hkan ai ni hta chyawm gaw, shi sharawng awng nga ai. ²³ Hpaji rawng ai wa gaw, tinang chye ai hpe pyi ip da nga ai; Angawk ai ni chyawm gaw, tinang myit n su ai shabrawng dat ma ai. ²⁴ N-gun marai rawng ai wa gaw, up nga na ra ai; Lagawn ai wa chyawm gaw nchyang tai na ra ai. ²⁵ Myit ru ai lam gaw, gum dagup shangun nga ai; Ngwi pyaw ai ga chyawm gaw, kabu gara shangun nga ai. ²⁶ Dinghpring ai wa gaw, htingbu wa hpe lam madun nga ai; Tara n lang ai ni a lam chyawm gaw, shanhte hpe shayit kau ai lam rai nga ai. ²⁷ Lagawn ai wa jaugawng gawng timung, shi lu ai shan pyi, n kam kakang ai. Shakut sharang ai wa chyawm gaw, manu ging ai sutgan lu la na ra ai. ²⁸ Dinghpring ai lam gaw, asak hkrung ai lam rai nga ai; Dai lam hku hta si hkrung si htan n nga ai.

¹ Hpaji rawng ai kasha gaw, kawa sharin shaga ai, madat nga ai; N kaw n law re ai wa chyawm gaw daru ai ga n madat nga ai. ² Masha gaw tinang n-gup a asi ngu ai mai kaja ai hpe sha lu ai; Hkalem sha ai wa chyawm gaw, kashun kashe hkrum sha na ra ai. ³ Tinang n-gup hpe shim da ai wa gaw, tinang asak hpe bau nga ai; Tinang n-gup hpaw mahka ai wa chyawm gaw, hten byak hkrum na ra ai. ⁴ Lagawn ai wa gaw myit marit timung, hpa n lu la nga ai; Shakut sharang ai wa chyawm gaw, myit awng na ra ai. ⁵ Dinghpring ai wa gaw, masu ai ga ndawng nga ai; Tara n lang ai wa chyawm gaw, matsat shabat rai nna kaya kahpa hkrum na ra ai. ⁶ Dinghpring ai tara gaw, tengman ai lam hkan ai ni hpe bau sin nga ai; N hkru ai amu chyawm gaw, yubak kap ai ni hpe kadawng kau nga ai. ⁷ Langai ngai gaw sut mahkawng timung, hpa n lu nga ai; Langai ngai gaw gam jaw kau timung, sut kaba lu nga ai. ⁸ Masha a sutgan gaw shi a gawng malai hkungga rai nga ai; Matsan ai wa chyawm gaw mara shagun ai ga n na nga ai. ⁹ Dinghpring ai ni a nhtoi gaw kabu gara nga ai; Tara n lang ai ni a pyengding chyawm gaw, si mat na ra ai. ¹⁰ Gumrawng ai majaw, ga law ga la hkrai byin nga ai; Hpaji daw ai ni a ga hkan ai wa, hpaji rawng nga ai. ¹¹ Sawse lawklek ai lam hte lu la ai sutgan gaw yawm mat na ra ai; Shakut sharang nna mahkawng da ai sutgan chyawm gaw, law htam wa na ra ai. ¹² Myit mada ala jin yang, myit daw wa na ra ai; Ra mara dik wa ai chyawm gaw, asak hpun rai nga ai. ¹³ Mung ga hpe n kaw n law di ai wa, tinang dai hten byak hkrum na ra ai; Hkangda ai ga hpe hkrit hkungga ai wa chyawm gaw, akyu lu la na ra ai. ¹⁴ Si hkrung si htan mahkam ni hpe lawt lu hkra, Hpaji rawng ai wa a tara gaw, asak hka hpawk rai nga ai. ¹⁵ Nyan kaja rawng ai wa gaw, myiman pa nga ai; Shut hpyit ai ni a lam chyawm gaw, yak htum ai lam rai nga ai. ¹⁶ Kangka re ai ni gaw chye chyang ai hte galaw ma ai; Angawk ai wa chyawm gaw, tinang angawk ai lam shabra nga ai. ¹⁷ Tara n lang ai shangun ma gaw, tinang amu hpe hprai kau nga ai; Kangka re ai kasa chyawm gaw hkam kaja ai lam rai nga ai. ¹⁸ Sharin achyin ai gangkau ai wa gaw, matsan mayan hte kaya kahpa hkrum na ra ai; Shadum shahprang ga madat ai wa chyawm gaw, arawng sadang lu la na ra ai. ¹⁹ Ra mara dik wa ai gaw, dwi sau ai lam rai nga ai; Angawk ai ni chyawm gaw yubak lam koi kau na matsat nga ma ai. ²⁰ Hpaji rawng ai ni hte kanawn ai wa hpaji rawng na ra ai; Angawk ai ni a manang ni chyawm gaw, hten byak hkrum na ra ai. ²¹ Yubak gaw mara kap ai ni hpe hkan shachyut nga ai; Dinghpring ai ni chyawm gaw, mai kaja ai akyu hkam la na mara ai. ²² Mai kaja ai wa gaw, kashu kasha ni matu sali wunli ngam da nga ai; yubak kap ai wa a sutgan chyawm gaw, dinghpring ai wa a matu mahkawng da nga ai. ²³ Matsan mayan ni gaw, hkam da ai hkauna galaw nna, shahpa grai lu ma ai. Raitimung tara ding ai hku n hkan yang, sum mat na ma ai. ²⁴ Shingna n lang ai wa gaw, kasha hpe ndawng nga ai; Kasha hpe tsawra ai wa chyawm gaw, kaji ai kaw nna sharin nga ai. ²⁵ Dinghpring ai wa gaw, hkru hkru sha lu nga ai; Tara n lang ai ni chyawm gaw, kan kyaw ai hkrum na mara ai.

¹ Hpaji rawng ai num gaw, tinang nta hpe gap da nga ai; Nyan tang ai num chyawm gaw, tinang lata hte hpya kau nga ai. ² Tengman ai lam hkan ai wa gaw, Yehowa hpe hkrit hkungga nga ai; Magaw ai lam hkan ai wa chyawm gaw, shi hpe n kaw n law di wu ai. ³ Nyan tang ai wa a n-gup hta gumrawng ai matu, shingna rawng nga ai; Hpaji rawng ai ni a n-gup chyawm gaw, shanhte hpe bau sin nga ai. ⁴ Usu n rawng yang, ulawng sanseng nga ai; Raitimung, usu n-gun marang e sut grai su nga ai. ⁵ Tengman ai sakse wa masu ga n tsun nga ai; Masu ai sakse wa chyawm gaw masu ga tsun nga ai. ⁶ N kaw n law re ai wa gaw hpaji tam timung, n mu nga ai; Myit gawp ai wa chyawm gaw, hpaji lu loi nga ai. ⁷ Angawk ai wa kaw na pru u, Nang shi a n-gup na, chye chyang ai lam mu lu na n rai. ⁸ Tinang sa wa ai lam chye lu ai gaw, myitsu ai wa a hpaji rai nga ai; Angawk ai ni maw ai lam chyawm gaw, hkalam ai hkrai rai nga ai. ⁹ Myit n su ai ni, yubak hpe hpa n nawn ma ai; Myit malang ai ni chyawm gaw, shada da hkau chyap ma ai. ¹⁰ Myit masin gaw, tinang ruyak ai hpe, dum nga ai; Tinang kabu gara ai hta, tsasam wa lawm lu ai n rai. ¹¹ Tara n lang ai ni a nta gaw, kadawng daw mat nga ai; Myit malang ai ni a sum chyawm gaw, awng wa nga ai. ¹² Masha myit ai hte maren, tinang lam malang nga timung, De a jahtum gaw, si ai kaw byawn rai nga ai. ¹³ Mani nga yang pyi, myit kaji nga ai; Pyaw hpa a jahtum e ruyak hkrai rai nga ai. ¹⁴ htak mat ai wa raitimung, kaja ai wa raitimung, Tinang a arawn alai hte hkru kat na mara ai. ¹⁵ Nyan tang ai wa gaw na mana kam nga ai; Myit su ai wa chyawm gaw tinang sa wa ai lam gawn yu nga ai. ¹⁶ Hpaji rawng ai wa gaw, yubak hpe hkrit ai hte koi kau nga ai; Angawk ai wa chyawm gaw, gumrawng nna share nga ai. ¹⁷ Myit kahtet ai wa gaw, n shawp ai amu shapraw nga ai; N kaja ai hpaji daw ai wa hpe masha ni ndawng na maru ai. ¹⁸ Nyan tang ai wa a sali wunli, angawk angak rai nga ai; Myit su ai ni chyawm gaw, chye chyang ai janmau gup ma ai. ¹⁹ N hkru ai ni gaw myit kaja ai ni a man e, Tara n lang ai ni gaw dinghpring ai ni a chyinghka lam e, gum dagup na mara ai. ²⁰ Matsan mayan wa hpe, tinang htingbu wa pyi, ndawng nga ai; Sut su ai wa chyawm gaw jinghku jing-yu law nga ai. ²¹ Tinang htingbu wa hpe n kaw n law di ai wa, mara nga ai; Matsan mayan ni hpe matsan dum ai wa chyawm gaw, a nga ai. ²² N kaja ai hku maw ai ni, lam dam na, n rai ni? Kaja ai hku maw ai ni chyawm gaw, chyeju hte kangka ai hkam la na mara ai. ²³ Galaw shakut ai lam shagu hta amyat rai nga ai; Baw law ai akyu chyawm gaw, matsan mayan hkrai rai nga ai. ²⁴ Hpaji rawng ai ni a sutgan gaw, shanhte a janmau rai nga ai; Angawk ai ni a angawk ai lam gaw angawk hkrai rai nga ai. ²⁵ Tengman ai sakes gaw, masha asak hpe shalawt dat ai; N teng ai sakes hta, masu magaw lawm nga ai. ²⁶ Yehowa hpe hkrit hkungga ai gaw, shamyet shanat shara kaba rai nga ai; Kasha ni mung shingbyi shingwung shara lu na mara ai. ²⁷ Yehowa hpe hkrit hkungga ai gaw, asak hka hpawk rai nga ai; De a majaw, si ai mahkam hta na, lawt lu na rai nga ai. ²⁸ Mung masha ni law wa yang, hkawhkam wa arawng agrin nga ai; Mung masha ni n law yang, du magam ni yu mat ma ai. ²⁹ Myit galu ai wa gaw, hpaji kaba rawng nga ai; Myit gadun ai wa chyawm gaw, grai angawk nga ai. ³⁰ Sumnung ai myit gaw, hkam kaja ai lam rai nga ai; Manawn masham myit chyawm gaw, nrut nra shatsam kau ai lam rai nga ai. ³¹ Matsan mayan wa hpe zingri zingrat ai wa gaw, hpan Madu hpe shatan nga ai; Hpan Madu hpe hkungga ai wa chyawm gaw, matsan mayan ni hpe matsan dum chye nga ai. ³² Tara n lang ai wa gaw tinang a n hkru ai hta kadawng mat nga ai; Dinghpring ai wa chyawm gaw, si wa yang, pyi, shingbyi shara mu nga ai. ³³ Nyan rawng ai wa a myit hta hpaji shanu nga ai; Angawk ai ni a kraw lawang chyawm gaw, dan nga ai. ³⁴ Dinghpring ai arawn alai gaw, mung masha ni hpe shagrau nga ai; Yubak mahtang, masha amyu ni a kaya kahpa lam rai nga ai. ³⁵ Hkawhkam wa gaw myit gawp ai ali ama ni hpe yu ra nga ai; Kaya jahkrum ai ni hpe chyawm gaw, pawt sindawng nga ai.

¹ Si mani hte htan ai ga gaw, myit kahtet ai hpe shakawp ya nga ai; Kajet kajau re ai ga chyawm gaw, pawt sindawng ai hpe sharawt ya nga ai. ² Hpaji rawng ai ni a shinglet gaw, chye chyang ai hpe sumli chye ai; Angawk ai wa a n-gup chyawm gaw, ngawk ai hkrai ru jaw nga ai. ³ Yehowa a myi gaw shara shagu hkan e mada nga nna, Kaja ai hte n kaja ai hpe ginhka yu nga ai. ⁴ Ngwi ai shinglet gaw asak hpun rai nga ai; Hkalau ai shinglet chyawm gaw, gawng run ai lam rai nga ai. ⁵ Myit n su ai wa gaw kawa a sharin achyin ai hpe n kaw n law di nga ai; Shadum shahprang ai madat ai wa chyawm gaw, nyan rawng nga ai. ⁶ Dinghpring ai wa a nta hta, arung arai law nga ai; Tara n lang ai wa a amyat chyawm gaw, yubak hkrai rai nga ai. ⁷ Hpaji rawng ai ni a n-gup gaw, chye chyang ai gat hkai nga ai; Angawk ai ni a myit chyawm gaw dai zawn n rai. ⁸ Tara n lang ai ni a shagu hkungga hpe, Yehowa matsat nga ai; Myit malang ai ni a akyu hpyi ai ga hta, shi awng sharawng nga ai. ⁹ Tara n lang ai wa a lm hpe, Yehowa matsat nga ai; Dinghpring ai lam shachyut ai wa hpe chyawm gaw, shi tsawra nga ai. ¹⁰ Lam yit ai wa gaw ari kaba hkrum na ra ai; shadum shahprang ai ndawng n yawt ai wa gaw, si na ra ai. ¹¹ Katsan ga hte Sung htum ai shara gaw, Yehowa man e dan leng nga ai; Dai hta grau nna shinggyim masha a myit shi a man e dan leng na ra ai. ¹² N kaw n law re ai wa mara madun ai lam n ra nga ai; Shi gaw hpaji rawng ai ni hte n kanawn hkraw nga ai. ¹³ Myit kabu yang, myiman htoi nga ai; Myit law nga yang, gawng run lawm nga ai. ¹⁴ Nyan rawng ai wa a myit gaw, chye chyang ai tam nga ai; Angawk ai ni a n-gup chyawm gaw, angawk ai hpe makrut sha nga ai. ¹⁵ Matsan chyaren ai ni a nhtoi yawng, ruyak ai hkrai rai nga ai; Myit pyaw ai wa chyawm gaw, tutnawng poi sha nga ai. ¹⁶ Yehowa hpe hkrit kamyin let, lu ai kaji sha gaw, Nji nmu hte lu ai sutgan law law hta, grau mai nga ai. ¹⁷ Kawn tawn ai usu hpe n ju n yawt let sha ai hta, Tsawra myit hte sha ai shatmai lap ma mi gaw, grau mai nga ai. ¹⁸ Pawt sindawng ai wa gaw, ga law ga la shapraw nga ai; Myit galu ai wa chyawm gaw mye kau nga ai. ¹⁹ Lagawn ai wa a lam, ju hpun nhpan hte bung nga ai; Myit malang ai ni a lam chyawm gaw, nmaw lam tai nga ai. ²⁰ Hpaji rawng ai kasha gaw, kawa hpe kabu shangun nga ai; Angawk ai wa chyawm gaw kanu hpe n kaw n law di wu ai. ²¹ Myit n su ai wa gaw, angawk ai hta pyaw nga ai; Myit gawp ai wa chyawm gaw, malang ai lam hkan nga ai. ²² N bawng yu yang, myit ai lam hten wa ai; Hpaji daw chye ai ni law nga yang, myit ai lam grin wa ai. ²³ Masha gaw tinang htan ai ga hta kabu nga lu ai; Ahkyak e tsun ai ga gaw, gade pyaw nga a hka! ²⁴ Le lawu katsan ga lam koi kau lu hkra, Hpaji rawng ai wa a asak lam gaw, matsaw ntsang de ang wa ai. ²⁵ Yehowa gaw gumrawng ai wa a nta hpe shaprai kau na ra ai; Gaida jan a lamu ga jarit hpe chyawm gaw, shagrin da na wu ai. ²⁶ Yehowa gaw mawp lu mawp sha ai lam hpe, matsat nga ai; Ngwi pyaw ai ga chyawm gaw, sanseng ai ga rai nga ai. ²⁷ gumhpraw maji ai wa gaw, tinang a nta hpe sharu shatsang nga ai; Sake manawn matsat ai wa chyawm gaw, asak hkrung na ra ai. ²⁸ Dinghpring ai wa a myit gaw, htan na lam sumru yu nga ai; Tara n lang ai ni a n-gup chyawm gaw, n hkru ai hkrai ru jaw nga ai. ²⁹ Yehowa gaw tara n lang ai ni hte tsan nga ai; Dinghpring ai ni a akyu hpyi ai ga chyawm gaw, shi madat nga ai. ³⁰ Myi a nhtoi gaw myit hpe shapayaw nga ai; Kaja ai shiga gaw, nrut nra ni hpe lasawi hte jahpring nga ai. ³¹ Asak hkrung ai lam hte seng ai shadum shahprang ga madat ai wa gaw, Hpaji byeng-ya rawng ai ni hte rau mazum nga na ra ai. ³² Sharin achyin ai ga shinggan kau ai wa gaw, tinang a asak hpe n kaw n law di kau wu ai; Madat mara ai wa chyawm gaw, nyan lu la nga ai. ³³ Yehowa hpe hkrit kamyin ai myit gaw, hpaji sharin ai lam rai nga ai; Arawng sadang a shawng e myit shagrit ai rai nga ai.

¹ Myit masin hpaji daw ai gaw, masha hte seng nga ai; Shinglet hte htan ai ga chyawm gaw, Yehowa kaw na rai nga ai. ² Masha a man e tinang lam yawng san pra nga ai; Yehowa chyawm gaw wenyi hpe shen yu nga ai. ³ Na a amu bungli Yehowa hpe ap da u; Shingrai yang, nang myit ai hku grin wa na ra ai. ⁴ Yehowa gaw yawng mayawng hpe shi a matu, Tara n lang ai ni hpe mung, tsin-yam tsindam hkrum na nhtoi a matu, hpan da nu ai. ⁵ Myit kaba ai ni yawng mayawng hpe, Yehowa matsat nga ai; Shanhte shada matut timung, mara lawt lu na, n rai. ⁶ Chyeju hte kangka ai gaw, yubak mara hpe htingrai lu nga ai; Yehowa hpe hkrit kamyin ai myit hte, yubak hpe koi kau lu nga ai. ⁷ Yehowa gaw masha wa a lam sharawng nga ai rai yang, Dai wa a hpyen wa hpe pyi, shi hte hkau chyap shangun wu ai. ⁸ Dinghpring ai hte loi mi sha lu ai gaw, N tara ai hte law law lu la ai hta, grau mai nga ai. ⁹ Masha gaw tinang sa wa ai lam myit yu timung, Yehowa gaw shi a lagaw hpe htawt shangun wu ai. ¹⁰ Hkawhkam wa n-gup hta shingran ga rawng nga ai; Shi tara dara yang, tsun shut lu ai n rai. ¹¹ Tengman ai jang hte joi Yehowa kaw na rai nga ai; Tingsan hta rawng ai joi si ni yawng, shi a amu rai nga ai. ¹² Hkawhkam tingnyang gaw, dinghpring ai hte sha grin ngalu ai majaw, Hkawhkam ni, tara n lang ai amu galaw yang, matsat shabat rai nga ai. ¹³ Hkawhkam ni gaw dinghpring ai n-gup hta sharawng nga nna, Tengman ai ga tsun ai wa hpe, tsawra ma ai. ¹⁴ Hkawhkam a pawt sindawng ai gaw, si du kasa rai nga ai; Hpaji rawng ai wa chyawm gaw, shakawp chye nga ai. ¹⁵ Hkawhkam a myiman htoi ai hta asak rawng nga ai; shi a chyeju gaw, marang shadoi sumwi hte bung nga ai. ¹⁶ Aja lu la ai hta, hpaji lu la ai gaw, gade grau a hka! Gumhpraw hta hpaji lata la ai gaw, grau mai nga ai. ¹⁷ Myit malang ai ni a nmaw lam gaw, yubak hpe koi kau ai lam rai nga ai; Tinang a lam hpe chye sin ai wa gaw, tinang myit masin hpe sin nga ai. ¹⁸ Gumrawng gumtawng ai gaw, hten byak ai a shawng e, Myit kaba ai gaw, kadawng mat ai a shawng e, rai nga ai. ¹⁹ Matsan mayan ni hte rau myit nem nga ai gaw, Gumrawng ai ni hte rau lanep karan la ai hta, grau mai nga ai. ²⁰ Mungga hpe hkan shatup ai wa gaw, awng wa na ra ai; Yehowa hta shamyet shanat ai wa gaw, a lu nga ai. ²¹ Nyan hpaji rawng ai wa hpe, sadi chye ai wa, ngu na ra ai; Ga ngwi chye tsun ai n-gup gaw, chye chyang ai lam shalaw dat nga ai. ²² Nyan hpaji lu ai wa gaw, asak hka hpawk lu nga ai; Myit n su ai ni a shadum shahprang ai chyawm gaw, angawk ai hkrai rai nga ai. ²³ Nyan rawng ai wa a myit gaw shi a n-gup hpe sharin nna, shi tsun ai ga hta, chye chyang ai lawm lu ai. ²⁴ Ngwi ai ga gaw, gat baw zawn rai nga nna, Myit matu dwi ai, hkum hkrang a matu hkam kaja ai lam rai nga ai. ²⁵ Masha myit ai hte maren, tinang lam malang nga timung, De a jahtum gaw, si ai kaw byawn rai nga ai. ²⁶ Amu galaw ai wa a n-gup, shi hpe shadut ai majaw, Shi a myit gaw, amu shaja ai hta, shi hpe shaawn nga ai. ²⁷ Lam n la ai wa gaw, n hkru ai hku maw nga ai; Shi a n-gup hta grung ai wan rai nga ai. ²⁸ Myit magaw ai wa gaw ga law ga la gat hkai nga ai; shi kahte tsun ai wa gaw, jinghku jing-yu ni hpe shabra kau nga ai. ²⁹ Gumshem ai wa gaw shi a htingbu wa hpe hkalem nna, N kaja ai lam de lau la mu ai. ³⁰ Myi di ai wa gaw kajam galam maw nga ai; N-gup shatup ai wa gaw, n shawp ai amu shabyin nga ai. ³¹ Baw hpraw ai gaw, dinghpring ai lam hta grin nga yang, Arawng sadang janmau rai nga ai. ³² Myit galu ai wa gaw n-gun ja ai wa hta, Tinang myit hkang chye ai wa gaw, mare hpe gasat la ai wa hta, grau kaja nga ai. ³³ Hpaida hpe lahpyen e ru dagup bang timung, Yehowa gaw de a lam mahkra hpe up nga ai.

¹ Ngwi pyaw ai hte muk jahkraw n-gup mi sha lu ai gaw, Nta ting hpring nga ai poi hkungga hpe gasat gala hte sha lu ai hta, grau kaja nga ai. ² Myit gawp ai mayam gaw, kaya hkrum ai kasha hpe up lu nna, Kahpu kanau ni hte rau sali wunli hkam la na ra ai. ³ Bunghkrawng gaw gumhpraw hpe, adi gaw aja hpe jen nga ai; Yehowa chyawm gaw, myit masin hpe dinglik yu nga ai. ⁴ N hkru ai wa gaw, n shawp ai n-gup hpe madat nga ai; Masu ai wa gaw, kajam galam re ai shinglet hpe kam nga ai. ⁵ Matsan mayan ni hpe asawng ai wa gaw, Hpan Madu hpe jahpoi nga ai; Masha wa ruyak hkrum yang, kabu ai wa gaw, ari lawt na n rai. ⁶ Kashu ni gaw, asak kaba ai ni a janmau rai nga ai; Kasha ni a arawng sadang gaw kanu kawa rai nga ai. ⁷ Tsawm htap ai ga gaw, angawk ai wa hte n htuk nga ai; Masu ai n-gup gaw, du ni hte grau nna n htuk nga ai. ⁸ Sake manawn sha ai wa gaw, dai hpe lungseng zawn nawn nga ai; Myiman yawng wa ai shagu hta, awng wa nga ai. ⁹ Masha wa mara hpe magap da ai wa gaw, tsawra galaw nu ai; Tsun shabrawng dat ai wa chyawm gaw, jinghku ni hpe shabra kau nu ai. ¹⁰ Angawk ai wa gaw shingna latsa hpe dum ai hta, Myit gawp ai wa gaw daru sharin ai ga hkaw mi hpe, grau dum nga ai. ¹¹ N hkru ai wa gaw, gumlau ai amu hkrai shabyin nga ai; Dai majaw gumshem ai kasa hpe shi hpang de shangun dat na ra ai. ¹² Angawk ai amu galaw let, angawk ai wa hte hkrum na hta, Kasha mat ai tsap kanu hte hkrum na, grau mai nga ai. ¹³ Kaja ai a malai, n kaja ai htang jaw ai wa gaw, N kaja ai gaw shi a nta hta na prai mat lu na, n rai. ¹⁴ Ga law ai npawt gaw, hka shalen dat ai hte bung ai majaw, Garai n ga law yang, htailai ai lam koi kau u. ¹⁵ Tara n lang ai wa hpe mara shalawt dat ai wa hte, Dinghpring ai wa hpe mara shagun ai yan hpe, Yehowa maren matsat nga ai. ¹⁶ Angawk ai wa gaw, hpaji n ra nga ai rai nna, Hpa majaw shi a lata hta hpaji jahpu ap ya na rai ta? ¹⁷ Jinghku wa gaw tutnawng tsawra nga nna, Ruyak hkrum ai nhtoi a matu, kahpu kanau tai nga ai. ¹⁸ Nyan kata ai wa gaw htingbu wa a man e, Lata matut nna, pahkam hkam nga ai. ¹⁹ Gasat gala hpe tsawra ai wa gaw, tawt lai ai hpe mung tsawra ai; Tinang chyinghka hpe shatsaw ai wa gaw, hten byak ai hpe hkan tam nga ai. ²⁰ Myit magaw ai wa gaw, mai kaja ai hpe n mu lu ai; Shinglet magaw ai wa gaw, ruyak hkrum na ra ai. ²¹ Angawk ai wa hpe shaprat ai wa gaw, tinang a yawn hpa tai nga ai; Myit n rawng ai wa a kawa gaw, kabu nga lu ai n rai. ²² Kabu gara ai myit hkam kaja ai tsi rai nga ai; Gawng run ai chyawm gaw, nrut n ra ni hpe jahkraw kau nga ai. ²³ Tara n lang ai wa gaw, tara lam hpe shanut kau na matu, Masha wa a sumbu na, sake manawn manaw la wu ai. ²⁴ Nyan rawng ai wa a man e hpaji byeng-ya rai nga ai; Angawk ai wa a myi chyawm gaw, lamu ga htum hkra mada yu nga ai. ²⁵ Angawk ai kasha gaw, kawa a yawnhkyen ai lam mung, Shangai kanu a ruyak ai lam mung, rai nga ai. ²⁶ Dinghpring ai wa hpe shawa mai ai, n rai; Myit malang ai du ni hpe zingri mai ai, n rai. ²⁷ Chye chyang ai myit rawng ai wa gaw, ga law law n tsun nga ai; Nyan rawng ai wa gaw myit shingdi nga ai. ²⁸ Myit n su ai wa pyi, atsin sha nga yang, hpaji rawng ai, Tinang n-gup n hpaw yang, nyan rawng ai, zawn nawn ma ai.

¹ Tinang hkrai lak nga ai wa gaw, tinang myit machyu nna, Zai byeng-ya lam shagu hte n hkrak nga ai. ² Angawk ai wa gaw, hpaji hta awng sharawng nga ai n rai; Shi a myit shapraw dan ai hta kaga, hpa mung n ra nga ai. ³ Tara n lang ai wa shang yang, n kaw n law re ai mung lawm nga ai; Kaya kahpa hte rau, myit yawn ai mung lawm nga ai. ⁴ Masha a n-gup ga gaw, sung ai hka hte bung nga ai; Hpaji hka hpawk gaw, lwi ai hka shi rai nga ai. ⁵ Tara dara ai hta dinghpring ai wa hpe sum shangun hkra, Tara n lang ai wa a myiman tau na, n mai nga ai. ⁶ Angawk ai wa a n-gup gaw ga law chye nga ai; Shi a n-gup gaw shingna hpyi nga ai. ⁷ Angawk ai wa a n-gup, shi a hten byak ai lam rai nga ai; Shi a nten ni gaw, shi a myit masin a mahkam rai nga ai. ⁸ Tsun kahte ai wa a ga gaw, dwi sau ai shahpa zawn rai nga nna, Kraw lawang kata de shang wa ai. ⁹ Tinang a amu makan hta lagawn ai wa gaw, Jahten shabyak ai wa hte, kahpu kanau daw nga ai. ¹⁰ Yehowa a amying ningsang gaw ngang ai langchyi rai nga ai; Dinghpring ai wa gaw, dai de hprawng shang nna, shim nga ai. ¹¹ Sahti wa a sutgan gaw, shi a ngang ai mare rai nga nna, Tsaw ai bunghku zawn nawn nga ai. ¹² Hten byak ai a shawng e myit tsaw myit dap ai, Arawng sadang a shawng e myit nem ai, rai nga ai. ¹³ Naw n sagawn yu ai, ga htan ai wa gaw, Angawk ai mara hte kaya kahpa hkrum na ra ai. ¹⁴ Masha myit gaw, tinang nji nmu hpe sharang lu nga ai; gawng run ai myit hpe chyawm gaw, kadai shalan lu na rai ta? ¹⁵ Myit gawp ai wa a myit gaw, chye chyang ai hpe mahkawng da nga ai; Hpaji rawng ai ni a ana gaw, chye chyang ai lam hkan madat nga ai. ¹⁶ Kumhpaw kumhpa gaw masha a matu lam hpaw nna, Daru magam ni a man e dung nga shangun lu ai. ¹⁷ Tinang amu shawng sa tsun ai wa gaw, tengman dam nhten; Raitimung, htingbu wa sa nna, shi hpe manaw yu nga ai. ¹⁸ Hpaida gaw htailai hkat ai hpe jasim chye nna, Wa-ngan ni a amu hpe mye lu nga ai. ¹⁹ Hpunau hpe myit machyi ai gaw, ngang ai mare hta grau yak nga ai; Hpunau shada jahte tam ai gaw, hpyendap chyinghka htinggrang zawn rai nga ai. ²⁰ Masha a kan gaw, tinang n-gup a asi hte hpring lu nga ai; Tinang nten a amyat hte hkru kat lu na ra ai. ²¹ Shinglet gaw si hkrung si htan hpe up nga ai; Shinglet hpe sharawng ai wa gaw, de a si sha lu na ra ai. ²² Madu jan lu ai wa gaw mai kaja ai hpe lu nu ai rai nna, Yehowa a chyeju hpe hkam la nu ai. ²³ Matsan mayan wa tawngban timung, Sut su wa chyawm gaw n gawn n sawn htan nga ai. ²⁴ Kanawn manang law ai wa, hten byak tam ai wa rai nga ai; Raitimung, hpunau wa manoi ai hta, grau manoi ai jinghku wa mung nga ai.

¹ Hkalem hkalau ga tsun ai masha angawk wa hta, Tengman ai lam hkan ai, matsan mayan wa gaw, grau mai nga ai. ² Myit masin gaw, chye chyang ai n rawng yang, n mai nga ai; Nau kaprap ai wa gaw shut na ra ai. ³ Masha gaw ngawk ai myit a majaw, tinang lam yit nna, Kraw e Yehowa hpe mara shagun nga ai. ⁴ Ngamu ngamai yang, jinghku jing-yu law nga ai; Matsan mayan wa chyawm gaw, jinghku jing-yu taw nga ai. ⁵ Masu ai sakse gaw, mara n kap na, n rai; Masu ga tsun ai wa gaw, ari lawt na, n rai. ⁶ Masha law law wa du ni a chyeju hpe tam nga ai; Kadai mung kumhpa jaw ai wa hte jinghku hku ma ai. ⁷ Matsan ai wa a hpunau ni yawng, shi hpe ndawng nga ma ai; shi a jinghku ni grau nna, shi hpe koi kau ma ai; Hkan shaga timung, makoi mat ma ai. ⁸ Hpaji lu ai wa gaw, tinang myit masin hpe tsawra nga ai; Nyan hpe manoi ai wa gaw, mai kaja ai hpe hkam la na ra ai. ⁹ Masu ai sakse gaw mara n kap na, n rai; Masu ga tsun ai wa gaw hten byak hkrum na ra ai. ¹⁰ Angawk ai wa gaw pyaw pyaw nga na, n htuk nga ai; Mayam wa gaw du ni a ntsa e up na, grau nna n htuk nga ai. ¹¹ Sadi sahka re ai wa gaw, myit galu kaba nga ai rai nna, Masha wa shut ai hpe, hkam mana ai gaw, shi a arawng rai nga ai. ¹² Hkawhkam a pawt sindawng ai gaw, hkanghkyi shabam ai zawn rai nga ai; Shi a chyeju chyawm gaw, tsingdu ntsa e hkrat ai mari zawn rai nga ai. ¹³ Kasha angawk gaw, kawa a shoihpa shoirang rai nga ai; Aput angun ai madu jan gaw, tutnawng kahte hkrat ai marang nsi hte bung nga ai. ¹⁴ Nta hte sutgan gaw, kanu kawa a sali wunli rai nga ai; Myit gawp ai madu jan chyawm gaw, Yehowa kaw na rai nga ai. ¹⁵ Lagawn ai myit gaw, yup pyaw shangun nna, Amu makan n tsang ai wa gaw, kawsi hpang gara hkrum na ra ai. ¹⁶ Hkangda ai ga hpe, hkan nang ai wa gaw, tinang myit masin bau sin nga ai; Tinang lam hpe n kaw n law re ai wa chyawm gaw, si mat na ra ai. ¹⁷ Matsan mayan wa hpe matsan dum ai wa gaw, Yehowa hpe hkoi ya ai rai nna, Shi galaw ai hte maren bai hkam la na ra ai. ¹⁸ Myit mada shara naw nga yang, tinang kasha hpe sharin u; Shi akyu hten hkra, matsan hkum dum et. ¹⁹ Myit grai kahtet ai wa gaw, ari hkrum na ra ai; Shi hpe lang mi mawai la yang, bai mawai la ra na ra ai. ²⁰ Nang gaw htawmhpang de hpaji rawng ai wa tai na matu, Hpaji daw ai ga madat la u, sharin shaga ai ga hta la u. ²¹ Masha a myit gaw, lam amyu myu maw timung, Yehowa a maw ai lam agrin nga na ra ai. ²² Masha gaw tinang galaw ai chyeju hta awng sharawng nga ai; Masu ga tsun ai wa hta matsan mayan wa gaw, grau mai nga ai. ²³ Yehowa hpe hkrit kamyin ai myit gaw, asak lam rai nga ai; Dai myit rawng ai wa gaw apyaw sha nga lu na ra ai; Shi gaw aru ara hkrum na ra ai, n rai. ²⁴ Lagawn ai wa gaw, tinang a lata di hta manaw bang da timung, N-gup de n kam hta bang nga ai. ²⁵ N kaw n law re ai wa hpe kayat yang, nyan tang ai wa dumhprang na ra ai; Myit gawp ai wa hpe shadum yang, shi gaw chye chyang ai lam chye na ra ai. ²⁶ Kawa a sutgan hpe ginlut kau nna, kanu hpe shaden kau ai kasha gaw, Kaya kahpa hte shatan nhkan hkrum ai kasha rai nga ai. ²⁷ Ngai sha e, shadum shahprang ai ga gangkau yang, Chye chyang ai lam yit kau ai hte maren rai nga ai. ²⁸ Hpa n hkaw ai sakes wa gaw, tara agyi wa hpe shatan nga ai; Tara n lang ai ni a n-gup gaw, yubak mara hpe mayu kau nga ai. ²⁹ Shatan nhkan re ai ni a matu, tara dawdan ai, angawk ai ni a shingma a matu, anu kayat ai, jin jin rai nga ai.

¹ Tsabyi jahku hkalem chye nga ai; chyaru gaw kabring kabrawng shabyin nga ai. Dai hte nang pa hkawm ai wa gaw, hpaji rawng nga ai, n rai. ² Hkawhkam wa jahkrit ai gaw, hkanghkyi shabam ai hte bung nga ai; Shi hpe shapawt ai wa gaw, tinang a asak hpe shut nga ai. ³ Gasat gala hpe jasim kau ai wa gaw arawng lu ai; Myit n su ai wa kadai mung, ga law ga la hta lawm nga ai. ⁴ Kashung ai majaw lagawn ai wa gaw, yi hkauna n kam galaw ai rai nna, Mam dan ai aten e hpyi sha timung, hpa n lu nga ai. ⁵ Masha a myit hta hpaji daw ai gaw, sung ai hka hte bung timung, Nyan rawng ai wa mahtang ja la lu na ra ai. ⁶ Masha law law wa tinang galaw ai chyeju hpe tsun shana ma timung, Kangka re ai wa hpe, kadai tam mu lu a ta? ⁷ Dinghpring ai wa gaw, tinang a tengman ai lam hta hkan hkawm ai majaw, Shi a kashu kasha ni a lu ma ai. ⁸ Tara tingnyang hta dung ai hkawhkam wa gaw, N kaja ai yawng mayawng hpe, shi a myi hte tsan kau nga ai. ⁹ “Ngai gaw nye a myit masin hpe jasan jaseng nngai, Ngai yubak n kap nngai,” nga nna kadai wa tsun lu a ta? ¹⁰ N bung ai joi, n gadaw ai dang hpe, Yehowa maren matsat nga ai. ¹¹ Ma pyi, tinang a amu seng ai n seng ai, teng ai n teng ai, Tinang a arawn alai hte madun nna, shapraw dan nga ai. ¹² Na lu ai na hpe mung, mu lu ai myi hpe mung, Yehowa hpan da nu ai. ¹³ Matsan mayan n hkrum hkra, hkum yup pyaw nga et; Hprang nga yang, hkru hkra sha lu na ndai. ¹⁴ Mari ai wa gaw, “N kaja ai, n kaja ai,” nga nna tsun timung, Pru wa nhtawm, grang dakat nga ai. ¹⁵ Aja hte lungseng hkyeng law law nga timung, Chye chyang ai nten gaw, hpu htum ai lungseng rai nga ai. ¹⁶ Tsasam wa a matu pahkam hkam ai wa a hpun palawng hpe la kau u; Maigan ni a matu pahkam hkam ai wa gaw, lamu ma tang da u ga. ¹⁷ Hkalau la ai shahpa gaw, masha matu dwi nga timung, Sha ai wa a n-gup hta lung sha hpring na ra ai. ¹⁸ Lam shagu gaw hpaji daw ai hte sha grin wa lu ai majaw, Atsawm sha bawng yu nna, hpyen majan baw u. ¹⁹ Nwan hkawm nna shi htawn ai wa, ip da mai ai lam shabrawng dat ai; Dai re ai majaw seng bring wa hte hkum kanawn et. ²⁰ Kanu kawa hpe dagam ai wa gaw, Shi a pyengdin, htat ai nsin hta si mat na lu ai. ²¹ Sali wunli hpe alawan hkam la lu timung, Jahtum e dingnye tai na ra ai. ²² “Ngai matai dawp na nngai,” nga nna hkum tsun et; Yehowa hpe ala nga u, shi nang hpe hkye la na ra ai. ²³ N bung ai joi hpe Yehowa matsat nga ai; N man ai jang mung, kaja ai n rai. ²⁴ Masha sa wa ai lam Yehowa hpajang da nga ai; Dai rai yang masha gaw tinang lam hpe kaning rai chye lu na rai ta? ²⁵ “Ndai gaw chyoi pra nga ai,” nga nna tsun shut ai mung, ga sadi tawn da nhtawm, nhtang san yu ai mung, masha a mahkam tai nga ai. ²⁶ Hpaji rawng ai hkawhkam gaw, n hkru ai ni hpe tsan kau nna, Shanhte a ntsa e hpwi rin shangun nga ai. ²⁷ Masha a myit masin gaw, kraw lawang e rawng marawng hpe sawk yu ai, Yehowa a pyengdin rai nga ai. ²⁸ Chyeju hte tengman ai gaw, hkawhkam wa hpe shagrin da nna, Shi a tingnyang gaw, chyeju hta gaw da nga ai. ²⁹ Shabrang ni a arawng sadang, n-gun atsam, Dingla ni a hpung shingkang baw hpraw ai, rai nga ai. ³⁰ N hkru ai hpe, anu kayat ai hte yeng seng kau lu ai; Kraw lawang gaw nma hpe dum nga ai.

¹ Hkawhkam a myit masin gaw, hka shi hka gai zawn, Yehowa a lata hta rawng nga nna, Shi myit ra ai hte maren shalen dat wu ai. ² Masha a man e tinang lam yawng tengman nga ai; Yehowa chyawm gaw myit masin hpe shen yu nga ai. ³ Yehowa gaw, shagu hkungga nawng ya ai hta, Dinghpring ai hte tara hkan shatup na lam, grau ra nga ai. ⁴ Tsaw dap ai myiman, gumrawng ai myit masin, tara n lang ai ni a pyengdin pyi, yubak rai nga ai. ⁵ shakut sharang ai wa a myit mamyit gaw, law htam wa na lam rai nga ai; Law hpa ai wa chyawm gaw matsam mayan hkrum na ra ai. ⁶ Masu ai shinglet hte sutgan mahkawng da ai lam gaw, Salu hkan shachyut nna, si mat ai lam rai nga ai. ⁷ Tara n lang ai ni gaw, tara lam n hkan hkraw ai majaw, Tinang a n hkru ai myit, shanhte hpe yeng kau na mu ai. ⁸ Mara kap ai wa a lam gaw, magyi magaw rai nga ai; Sanseng ai wa a amu chyawm gaw, tengman nga ai. ⁹ Azep ai num hte rau, masha law ai nta e nga na hta, Nta jut hkan e nga na gaw, grau mai nga ai. ¹⁰ Tara n lang ai wa gaw n hkru ai hkrai tam nga ai; Htingbu wa gaw shi a man e myiman n pa lu ai. ¹¹ N kaw n law re ai wa ari hkrum yang, nyan tang ai wa gaw dumhprang nga ai. Hpaji rawng ai wa hpe sharin yang, shi chye chyang ai lam jat wa nga ai. ¹² Tara n lang ai ni a nta gaw, kaning rai hten mat wa ai hpe, Dinghpring ai wa gaw sumru yu nga ai. ¹³ Matsan mayan ni hpyi jahtau yang, na pat kau ai wa gaw, Tinang nan jahtau yang, kadai mung n madat nga ai. ¹⁴ Mayun e jaw ai kumhpa gaw, myit kahtet ai hpe Lahpyen e bang ya ai sake manawn gaw, pawt sindawng ai hpe, shakawp ya nga ai. ¹⁵ Dinghpring ai wa gaw, tara hpe hkan shatup na lam hta kabu nga ai; Dai lam gaw, n shawp ai ni hten byak wa na lam rai nga ai. ¹⁶ Chye chyang ai lam yit kau ai wa gaw, Katsan ga na tsu ni hte hpawng nga na ra ai. ¹⁷ Pyaw daw kadaw ai wa gaw, matsan mayan hkrum na ra ai; Tsabyi jahku hte asau tsaw ai wa gaw lu su na n rai. ¹⁸ Tara n lang ai wa gaw, dinghpring ai wa a matu, Myit magaw ai wa gaw, tengman ai ni a matu, gawng malai hkungga tai nga ai. ¹⁹ Aput angun nna azep ai num hte rrau nga na hta, Zaibru jang e nga na gaw, grau mai nga ai. ²⁰ Hpaji rawng ai wa a nta hta hpu la ai arung arai hte sau rawng nga ai; Angawk ai wa chyawm gaw, dai hpe ginlut shamat kau nga ai. ²¹ Dinghpring ai hte chyeju lam hkan tam ai wa gaw, Asak hkrung ai, dinghpring ai hte arawng sadang mu la na ra ai. ²² Hpaji rawng ai wa gaw, n-gun ja ai ni a mare de lung lu nna, De a ngang ai shamyet shanat shara hpe, shagrit kau wu ai. ²³ Tinang n-gup hte shinglet hpe hkang ai wa gaw, Tinang myit masin ru tsang n hkrum hkra, bau sin nga ai. ²⁴ Myit kaba ai hte gumrawng ai wa a amying gaw, Seng breng wa rai nga ai; Shi gaw tinang a sindawng kahtet ai hta amu shachyen nga ai. ²⁵ Lagawn ai wa gaw, amu n galaw mayu ai majaw, Tinang marit ai myit hte si wa nga ai. ²⁶ Langai ngai gaw, shani tup grai marit bu nga ai; Dinghpring ai wa chyawm gaw, n lahpawt ai sha, gam jaw nga ai. ²⁷ Tara n lang ai ni a shagu hkungga gaw, matsat shabat rai nga ai; Mara raw na matu nawng ya ai rai yang, grau nna rai nga ai. ²⁸ Masu ai sakes wa gaw, hten wa na ra ai; Tinang nan na ai wa chyawm gaw, tutnawng sakse hkam lu na ra ai. ²⁹ Tara n lang ai wa gaw, tinang myiman hpe jahtat nga ai; Myit malang ai wa gaw, tinang lam hpe shagrin da nga ai. ³⁰ Hpaji gade, chye chyang ai myit gade, hpaji daw ai lam gade raitimung, Yehowa hpe dang lu na lam n nga ai. ³¹ Hpyen gasat ai shani a matu, gumra hkyen tawn timung, Padang lam gaw Yehowa kaw na rai nga ai.

¹ Arawng lu ai amying hpe, sutgan hte grau nna lata mai nga ai; Masha wa tsawra ai gaw, aja gumhpraw hta grau kaja nga ai. ² Sut su ai wa hte matsan mayan ai wa, hkrum kadup ma ai; Yehowa gaw mahkra hpe hpan da nga ai. ³ Hpaji rawng ai wa gaw, n kaja ai hpe tau chye nna, koi kau nga ai; Nyan tang ai wa chyawm gaw, dingyang sa wa nna, yubak hkrum nga ai. ⁴ Myit nem ai hte Yehowa hpe hkrit hkungga ai a akyu gaw, Sutgan, arawng sadang hte asak rai nga ai. ⁵ Myit magaw ai wa a lam hta ju hpun hte mahkam rai nga ai; Tinang a myit masin bau sin ai wa chyawm gaw, dai hte tsan wa na ra ai. ⁶ Ma kaji hpe, shi hkan mai ai lam hta sharin u; Shingrai yang, dingla wa yang pyi, lam n yit na ra ai. ⁷ Sut su wa gaw, matsan mayan ni hpe up na ra ai; Hkoi la ai wa gaw, hkoi ya ai wa a mayam rai nga ai. ⁸ Yubak nli hpe gat hkai ai wa gaw, yubak dan la na ra ai; Shi maw ai pawt sindawng ai lam mat mat na ra ai. ⁹ N-gaw nwai ai myi tu ai wa gaw, matsan mayan ni hpe gam jaw ai majaw, shaman ai hkrum na ra ai. ¹⁰ N kaw n law re ai wa hpe shapraw kau u; dai rai yang, Ga law ga la ai, dangrang hkat ai hte kaya kahpa ai sim mat na ra ai. ¹¹ Sanseng ai myit masin tsawra ai wa gaw, Htaphtuk ai ga chye tsun nna, hkawhkam wa hte jinghku hku na ra ai. ¹² Yehowa a myi gaw, chye chyang ai wa hpe bau sin nga ai; Maw sha ai wa a ga hpe chyawm gaw, shi shanut kau nga ai. ¹³ Lagawn ai wa gaw, “Nta nhpung e hkanghkyi nga ai; Lam de pru yang, ngai si na nngai,” nga ai. ¹⁴ Nse ai num a n-gup gaw, sung la ai nhkun rai nga ai; Yehowa matsat kau hkrum ai wa gaw, dai hta di hkrat na ra ai. ¹⁵ Angawk ai myit gaw, ma kaji a myit hta manoi nga ai; Raitimung, sharin ai shingna gaw, dai hpe tsan tsan shapraw kau nga ai. ¹⁶ Tinang sutgan shalaw na matu, matsan mayan ni hpe zingri ai wa hte, Sut su ai ni hpe jaw ai wa gaw, matsan mayan hkrum na ra ai. ¹⁷ Hpaji byeng-ya rawng ai ni a ga hpe na ja nna madat la u; Nye a chye chyang ai lam hpe na a kraw lawang e matsing da u. ¹⁸ Kaning rai nme law, dai ga hpe na a kraw e matsing da nna, Na a n-gup hta bang da ai gaw, ngwi pyaw ai lam rai nga ai. ¹⁹ Nang gaw Yehowa hta shamyet shanat nga lu hkra, Dai ni, ndai lam ni, ngai nang hpe mung chye shangun de ai. ²⁰ Nang gaw tengman ai ga a lam atsawm sha chye na lu nna, Nang hpang de shangun dat ai ni hpe kangka hte tengman ai ga nhtang tsun lu hkra, ²¹ Hpaji daw ai hte chye chyang ai lam hte seng ai Kaja htum ai mungga hpe, ngai nang hpe ka dat ai, n rai ni? ²² Matsan mayan ai wa gaw, matsan nga ai hpe yu rip nna shi a arung arai hpe hkum kashun la et; Mare chyinghka e dung ai nni nkri hkrum ai wa hpe mung, hkum zingri et. ²³ Kaning rai nme law, amu sa tsun yang, Yehowa shanhte hpe maga nna, Shanhte hpe dip sha ai ni a asak hpe, dip jahtum na ra ai. ²⁴ Myit gadun ai wa hte jinghku hkum hku et; Sindawng katawt ai wa kaw hkum hkan et: ²⁵ Hkan yang, nang shi a lam sharin la nna, Dai gaw, na a myit masin a mahkam tai na ra ai. ²⁶ Nang gumhpraw n sum mayu yang gaw, Lata matut ai ni hte, masha a hka hkam ai ni kaw, ²⁷ Hkum lawm nga et: Hpa majaw na a yupra hpe, kashun la shangun mayu n ta? ²⁸ Moi, nji nwa ni jung da ai, Lamu ga jarit shadaw hpe, hkum sit kau et. ²⁹ Tinang a amu hta marai shapraw ai wa hpe, nang mu hkrup n ni? Dai wa gaw, yu maya ni a man e n rai, hkawhkam wa a man e she tsap nga na ra ai.

¹ Nang gaw du wa hte dung nna lusha nga yang, Na a man e kadai wa nga nga ai hpe myitsumru yu u: ² Nanglu sha lai ai wa rai nga yang, Na a du hta nhtu shada nga ai. ³ Shi a dwi sau ai shahpa hpe hkum sharawng et; Dai gaw hkalem ai shahpa rai nga ai. ⁴ Sutgan lu hkra tinang hkum hpe hkum jahki et; Na a nyan hta hkum hpa et. ⁵ Hpa n re ai hpe nang azi yu nga n ni? Sumsing lamu de pyen mat wa ai langda zawn, Gaja wa sutgan gaw singkaw tu nga ai. ⁶ N ju n yawt ai ni a shat hpe hkum sha et. Shi a dwi sau ai shahpa hpe hkum marit et. ⁷ Shi kraw e myit ai hte maren shi rai nga ai: Shi gaw, “Lu u, sha u,” nga ti mung, Shi a myit nang hte n hkau nga ai. ⁸ Nang sha ai shahpa n-gup mi hpe, bai nhpat kau na ru ai; Nang tsun ai ga ngwi mung kaman rai nga ai. ⁹ Angawk ai wa na hkra, ga hkum tsun et; Shi gaw, na a ga hta lawm ai hpaji hpe jahpoi na ra ai. ¹⁰ Moi na lamu ga jarit shadaw hpe, hkum sit kau et; Jahkrai ma ni a yi hkauna hpe hkum dawm la et: ¹¹ Kaning rai nme law, shanhte hpe Hkyehkrang la ai wa gaw, n-gun rawng nna, Amu tsun yang, shanhte hpe maga na ra ai. ¹² Shadum shahprang ai hta myit manoi nna, Chye chyang ai ga hpe madat mara la u. ¹³ Ma kaji hpe n sharin ai, hkum nga et; Ri tawng hte kayat timung, shi n si na re ai. ¹⁴ Ri tawng hte shi hpe kayat nna, Shi a wenyi hpe katsan ga de na mawai la lu nga ai. ¹⁵ Ngai sha e, na a myit masin hta hpaji rawng yang, Nye hkum hkrang hte myit masin kabu gara na ra ai; ¹⁶ Rai sa, na a n-gup tengman ai ga tsun nga yang, Nye a nhkyun ni sharawng awng na ra ai. ¹⁷ Yubak galaw ai ni hpe hkum manawn et; Yehowa hpe shani ting hkrit kamyin nga u: ¹⁸ Gaja wa, dawdan ai aten du na ra ai, Nang myit mada ai lam hten wa na, n rai. ¹⁹ Ngai sha e, nye ga madat nna, hpaji rawng u; Tara lam hta na a myit masin hpe shading u. ²⁰ Tsabyi jahku lu lai ai ni hte, shan sha marim ai ni hpe, hkum kanawn et. ²¹ Lu lai, sha lai ai wa gaw, matsan mayan hkrum na ra ai; Yup lai ai myit gaw, masha hkum hpe tsupni jahpun na ra ai. ²² Nang hpe shaprat ai, nwa ga hpe madat u; Asak kaba ai, nnu hpe, n sawn n sang hkum di et. ²³ Tengman ai hpe mari la u, hkum dut kau et; Hpaji byeng-ya, sharin achyin ai hte chye chyang ai hpe mung, mari la u. ²⁴ Dinghpring ai wa a kawa gaw, grai kabu gara na ra ai; Hpaji rawng ai kasha hpe shaprat ai wa gaw, shi hta sharawng awng na ra ai. ²⁵ Na nnu yan nwa gaw, sharawng awng nga nna, Nang hpe shangai ai kanu gaw, kabu gara nga u ga. ²⁶ Ngai sha e, na a myit masin, ngai hta manoi e; Ngai sa wa ai lam hpe, na a myi azi yu u ga. ²⁷ Shawa num gaw, sung la ai nhkun rai nga ai; Tsasam num gaw, gyip ai ginlawng hku rai nga ai. ²⁸ Shi gaw hpya sha na matu mayun hkawm nna, Myit magaw ai la ni hpe shalaw dat wu ai. ²⁹ Kadai wa yawnhkyen nga a ta? Kadai wa gawng run nga a ta? Kadai wa ga law nga a ta? Kadai wa sharung shayawt nga a ta? Kadai wa mara kata e hkala nba hkrum nga a ta? Kadai wa myi hkyng nga a ta? ³⁰ Tsabyi jahku hpe na na wa lu nna, Tsi hte kayau ai tsabyi jahku tam ai ni, rai ma ai. ³¹ Hkyeng hkyeng rai nna, gawm hta kabrim kabram rai nga ai, Lu pyaw na nsan ai tsabyi jahku hpe, hkum yu et: ³² Dai gaw hpang jahtum e lapu zawn kawa nna, Pu htum zawn achye na ra ai. ³³ Na a myi gaw tsasam num ni hpe mada yu nna, na a myit, magaw ai ga tsun na ra ai. ³⁴ Gaja wa, nang gaw, nammukdara ka-ang e kaleng taw nna, Shanghpaw li dawnghkawn shadaw matu e yup ai wa zawn, rai na ndai. ³⁵ Shante ngai hpe kayat timung, ngai n machyi nngai; Adup timung ngai hpa n dum nngai; Ngai gara aten e hprang na i? dai lam hpe ngai naw tam na nngai, nga nna nang tsun na rin dai.

¹ N hkru ai masha ni hpe hkum manawn et; shanhte hte kanawn na, hkum ra et: ² Kaning rai nme law, shanhte a myit adip ahkrip maw nna, Shanhte a n-gup hkalem hkalau ai ga tsun nga ai. ³ Hpaji hparat hte nta hpe gap da lu nna, Zai byeng-ya hte shagrin da lu na ra ai: ⁴ Chye chyang ai hte de a gawk ni hpe, Hpu la nna tsawm htap ai sut rai hte jahpring da na ra ai. ⁵ Hpaji byeng-ya rawng ai wa gaw, n-gun ja nga ai; chye chyang ai myit rawng ai wa gaw, n-gun lagaw jat wa nga ai. ⁶ Atsawm sha bawng yu nna she, hpyen majan baw u; Hpaji daw chye ai ni law nga yang, lawt pru shara nga ai. ⁷ Hpaji byeng-ya gaw, myit n su ai wa a matu, nau tsaw nga ai; Shi gaw mare chyinghka lam e n-gup n hpaw wam nga ai. ⁸ N hkru ai hku hpaji daw ai wa hpe, Kajam galam wa, ngu na maru ai. ⁹ Myit n su ai wa a myit mang ai lam, yubak rai nga ai; Jahpoi ai wa gaw, masha a man e matsat shabat rai nga ai. ¹⁰ Nang ruyak hkrum ai shani e myit htum wa yang, N-gun ja ai wa ngu na, n rai. ¹¹ Sat kau hkrum magang wa nga ai ni hpe, mawai la u; Si hkam na matu hkrit gari hkawm ai ni hpe, hkrang shaw la na shakut u. ¹² “Anhte n chye ga ai,” nga timung Myit masin hpe shen yu ai wa gaw, n matsing na a ni? Na a wenyi hpe bau sin ai wa gaw, n chye na rai ni? Masha langai hte langai hpe, tinang amu hte maren, htang jaw na, n rai ni? ¹³ Ngai sha e, lagat jahku, mai kaja ai majaw, lu u; Dwi mu ai gitbaw hpe mung, chyup u: ¹⁴ Dai hte maren, na myit masin hte seng ai hpaji byeng-ya hpe chye ginhka u. Nang dai hpe mu tam taw, shabrai lu na ndai; Na a myit mada shara, htum na n rai. ¹⁵ Tara n lang ai wa e, dinghpring ai wa a nta hpe hkum mayun yu et; Shi shanu nga ai shara hpe, hkum shaprai kau ya et. ¹⁶ Kaning rai nme law, dinghpring ai wa gaw sanit lang kataw timung, bai rawt lu na ra ai; Tara n lang ai ni chyawm gaw, tsinyam tsindam hte htum mat na mara ai. ¹⁷ Nang hpe hpyen ai wa kataw yang, hkum kabu et; Shi ahtu kadawng yang, myit hkum sharawng et. ¹⁸ Nang kabu yang, Yehowa dai hpe mu nna, n yu ra ai hte, shi a ntsa na pawt sindawng ai hpe dawm kau na ra ai. ¹⁹ N shawp ai ni a lam myit hkum kahtet et. Tara n lang ai ni hpe hkum manawn et. ²⁰ Kaning rai nme law, n shawp ai wa gaw akyu lu la na n rai; Tara n lang ai ni a pyengdin si mat na ra ai. ²¹ Ngai sha e, Yehowa hte hkawhkam wa hpe, hkrit kamyin nga u; Myit gale galau re ai ni hte hkum kanawn et: ²² Shanhte hpe hkra na tsin-yam tsindam gaw, akajawng sha pru na ra ai: Shan lahkawng ari jaw na lam hpe kadai wa chye lu a ta? ²³ Da ndai gaw hpaji rawng ai ni tsun ai ga mung rai nga ai. Tara dara ai hta, masha a myiman tau mai ai, n rai. ²⁴ “Nang dinghpring ndai,” nga nna tara n lang ai wa e tsun ai wa hpe, Masha amyu ni dagam kau nna, amyu baw ni matsat kau na maru ai. ²⁵ Shi hpe daru kau ai ni chyawm gaw, ngwi pyaw nga nna, Shanhte a ntsa e shaman chyeju anga nga na ra ai. ²⁶ Tengman ai ga hte htan ai wa a n-gup hpe, Masha yawng pup na mara ai. ²⁷ Na a shinggan amu hkyen tawn nna, Na a yi hkauna tawm ngut jang she, Na a nta hpe galaw tawn u. ²⁸ Mara kata e na a htingbu wa hpe sakse hkum hkam et; Na a n-gup hte masha wa hpe hkum hkalem et. ²⁹ “Shi ngai hpe di ai hte maren, ngai shi hpe di na we ai; Shi galaw ai hte maren ngai tai na we ai,” nga nna hkum tsun e. ³⁰ Ngai gaw lagawn ai wa a yi hkauna hte, Nyan n rawng ai wa a tsabyi sun makau hku garet hkawm yu yang, ³¹ Yu u, ju hpun hkrai tu nna, Ga ting tsamat ka-up nga ai hte De a nlung bunghku run mat nga ai hpe, ngai mu nngai. ³² Shaloi ngai mada yu let sumru yu nna, sharin achyin ai lam hkam la nngai. ³³ Hkring mi yup, hkraing mi sha naw yup pyaw nna, Lata hkintum let, naw kaleng taw nga yang, ³⁴ Matsan mayan ai gaw damya wa zawn, Sutgan ginlut kau ai gaw, hpyen wa zawn, du na ra ai.

¹ Da ndai mung, Yuda hkawhkam Hezekia a masha ni ka hpajang da ai, Shawlumon a Ga shagawp rai nga ai. ² Lama ma hpe makoi da ai gaw, Karai Kasang a arawng rai nga ai: Lama ma hpe sawk yu na chyawm gaw, hkawhkam a arawng rai nga ai. ³ Sumsing lamu gaw tsaw nga nna, ginding aga sung nga ai hte maren, Hkawhkam wa a myit masin hpe, n sawk yu lu ai. ⁴ Gumhpraw hta na hkyi shapraw kau yang, Janghkam wa yu ra ai gawm, pru na ra ai: ⁵ Hkawhkam wa kaw na n hkru ai wa hpe shapraw kau yang, Shi a tingnyang htani htana agrin nga na ra ai. ⁶ Hkawhkam wa a man e, na hkum hpe, hkum shagrau et; Daru magam rawng ai ni a shara hta e, hkum tsap nga et; ⁷ Kaning rai nme law, nang mu mada lu ai du wa man e shagrit kau hkrum ai hta, “Nang de lung rit,” nga ai ga hpe grau na mai nga ai. ⁸ Alawan hkum ga law et; Htingbu wa nang hpe kaya jahkrum kau yang, nang kaning rai na n ta? ⁹ Na a htingbu wa hte amu a lam bawng yu u; Ip da mai ai lam hpe, masha wa e hkum shapraw dan et. ¹⁰ Shing n rai, shi gaw nang hpe kaya jahkrum nna, Na a arawng tutnawng sum mat na ra ai. ¹¹ Htaphtuk ai ga gaw, gumhpraw hta ka hkrep ai Aja makawk si hte bung nga ai. ¹² Madat mara mayu ai wa hpe, hpaji lam hte chye madun ai wa gaw, Ja lakan hte jet ai ja rai zawn rai nga ai. ¹³ Mam dan ai aten hta hkyen a majaw katsi ai zawn, Kangka re ai kasa gaw, shangun dat ai wa a matu rai nga ai: Shi gaw madu ni a myit hpe shakawp ya na ra ai. ¹⁴ “Jaw na,” grang dakat nhtawm, n jaw ai wa gaw, Marang n lawm ai sumwi hte nbung rai nga ai. ¹⁵ Myit galu ai hte du wa myit hpe pyi kayin shangun lu nna, Ngwi ai ga chye tsun ai shinglet gaw, nrut nra hpe agrawp kau lu ai. ¹⁶ Lagat jahku hpe mu n ni? Hkru ram sha lu u; Lu lai yang, nau hkru nna madawn na rin dai. ¹⁷ Na a htingbu wa nta e ya shang shang hkum rai et; Shing n rai, shi nang hpe mu jin nna ndawng na ra ai. ¹⁸ Htingbu wa hpe masu ai sakse hkam ai wa gaw, Hkawn, nhtu hte dai ai ri rai nga ai. ¹⁹ Tsin-yam hkrum ai shani e, myit magaw ai wa hta hpa ai gaw, Wa rum ai, shing n rai, lagaw kashai mat ai hte bung nga ai. ²⁰ Yawnhkyen hkrum ai ni hpe mahkawn mangoi ai wa gaw, Kashung ta e palawng raw ai hte, shau ntsa e ntsin hkri ru bun ai wa hte bung nga ai. ²¹ Nang hpe hpyen ai wa kawsi yang, shat jaw u, Hpang kara nga yang ntsin jaw lu u: ²² Shingrai yang, nang shi a baw ntsa e grung nga ai wan n-ga sumpum da nna, Yehowa nang hpe shabrai jaw na ra ai. ²³ Dingdung nbung hta marang lawm ai zawn, Shi htawn tsun ai shinglet hta, sindawng kahtet ai myiman lawm nga ai. ²⁴ Azep ai num hte rau, masha law ai nta e nga ai hta, Nta jut hkan e nga na gaw, grau mai nga ai. ²⁵ Sumtsan mung na du ai kabu gara shiga gaw, Hpang kara ai wa a matu, katsi ai ntsin zawn, rai nga ai. ²⁶ Dinghpring ai wa gaw, tara n lang ai wa a man e myit kataw yang, Hkanu ai hka hpawk, yat ai hka htung hte bung nga ai. ²⁷ Lagat jahku lu lai, n mai ai, Tinang arawng shapraw na, n tai ai. ²⁸ Tinang myit hpe n dip lu ai wa gaw, Bunghku run nna, asan brang lang re ai mare hte bung nga ai.

¹ Nlum ta e hkyen hkrat ai, nmut ta e marang htu ai, n htuk ai hte maren, Arawng sadang gaw, angawk ai wa a matu, n htuk nga ai. ² U tsa gaw pyau hkawm nna, pilan gaw pyen mat wa ai zawn, Kaman e dagam ai ga gaw, byin lu na n rai. ³ Gumra a matu lasik, lawze a matu runghtung, Angawk ai wa shingma matu shingna rai nga ai. ⁴ Nang gaw angawk ai wa hte n bung n ga, Shi a angawk ai ga hte maren, shi hpe hkum htan et. ⁵ Angawk ai wa gaw n gumrawng lu u ga, Shi a angawk ai ga hte maren shi hpe htan u. ⁶ Angawk ai wa hte shiga shagun dat ai wa gaw, Tinang lagaw hpe kahtam dut kau nna, gung lu ai wa rai nga ai. ⁷ Angawk ai wa gaw ga shagawp tsun yang, Lagaw hten ai wa hkawm ai hte maren rai nga ai. ⁸ Angawk ai wa hpe shagrau ai wa gaw, Nlung sumpum hta, lungseng majaw kabai bang ai wa zawn rai nga ai. ⁹ Angawk ai wa gaw ga shagawp tsun yang, Chyaru nang ai wa a lata hta ju ju ai hte maren rai nga ai. ¹⁰ Angawk ai wa hte, malet nhprang ni hpe nchyang saw ai wa gaw, Yawng hpe hkala kau ai ndan gap ai wa hte bung nga ai. ¹¹ Tinang a angawk ai amu bai nhtang galaw ai angawk wa gaw, Tinang a nhpat nhtang sha ai gwi zawn rai nga ai. ¹² Hpaji rawng dum ai wa nga yang, Shi hpe myit mada ai hta, angawk wa hpe myit mada ai hta, angawk wa hpe myit mada ai gaw, grau mai nga ai. ¹³ Lagawn ai wa gaw, “Nmaw lam hkan hkanghkyi nga ai, Mare lam hta hkanghkyi hkrum na nngai,” nga ai. ¹⁴ Chyinghka gaw hkinbawng hta, kayin wa ai hte maren, Lagawn ai wa gaw tinang a yupra hta kayin nga ai. ¹⁵ Lagawn ai wa gaw, tinang a lata di hta manaw bang da timung, N-gup de hta bang na pyi, n kam nga ai. ¹⁶ Lagawn ai wa gaw, npawt nhpang gawn dan lu ai marai sanit hta, Ngai hpaji grau rawng nngai, nga nna myit nga ai. ¹⁷ Lam e lai wa yang, tinang hte n seng ai amu hta sa jawp lawm ai wa gaw, Gwi ana gang ya ai wa hte bung nga ai. ¹⁸ “Ngai she shatu nngai,” nga nna, Tinang a htingbu wa hpe hkalem sha ai wa gaw, ¹⁹ Wan n-ga, pala hte si ai baw hpe, Kabai dat ai mana wa hte bung nga ai. ²⁰ Hpun n nga yang, wan si wa ai; Shi htawn ai wa n nga yang ga law ga la sim nga ai. ²¹ Wan nhtaw ntsa e wan n-ga, wan ntsa e hpun bang ai zawn, Ga law shapraw chye ai wa gaw, gasat gala shabyin nga ai. ²² Tsun kahte ai wa a ga gaw, dwi sau ai shahpa zawn rai nga nna, Kraw lawang kata de shang wa ai. ²³ N-gup pyaw nna myit magaw ai wa gaw, Gumhpraw hkyi sup ai ga dibu hte bung nga ai. ²⁴ Masin n si hkraw ai wa gaw, ga pyaw tsun timung, Shi a kraw kata e hkalem hkalau ai hkrai hpring nga lu ai. ²⁵ Shi gaw ga sau tsun timung, shi hpe hkum kam et; Shi a kraw e matsat shabat lam sanit rawng nga ai. ²⁶ Shi masin n si ai hpe, hkalem ai hte ka-up da timung, Shi n hkru ai myit gaw, shawa hpawng a man e dandawng na ra ai. ²⁷ Nhkun htu ai wa gaw, dai hta hkrat na ra ai; Nlung galau ai wa ntsa e, dai nlung bai kamyet na ra ai. ²⁸ Masu ai shinglet gaw, tinang shachyum ai ni hpe ndawng nga ai; Hkalem ai ga chye tsun ai n-gup gaw, jahten kau chye nga ai.

¹ Lani mi hta sha hpa byin na ra ai, n chye lu ai majaw, Hpawt ni hpe, hpa nna hkum gumrawng et. ² Tinang nan tinang hkum hpe n shakawn ai sha, kaga wa she shakawn u ga. Tinang n-gup hte n rai, tsasam wa she nang hpe shakawn u ga. ³ Nlung gaw hkak nna, Zaibru gaw li nga ai; Myit n su ai wa sindawng kahtet ai chyawm gaw, dai yan hta grau lu nga ai. ⁴ Myit kahtet ai gaw n hkru nga ai, pawt sindawng ai gaw, ladu lai chye nga ai; Nsu nnawn hpe chyawm gaw, kadai dang kau lu a ta? ⁵ Dan dan leng leng shadum shahprang ai gaw, Atsin sha tsawra ai hta, grau mai nga ai. ⁶ Jinghku wa gaw ari jaw jang, kangka ai hte jaw nga ai; Hpyen wa chyawm gaw pup timung hkalem nga ai. ⁷ Sha hkru ai wa gaw, gitbaw hpe pyi, gangkau na ra ai; Kawsi kyet ai wa chyawm gaw, hka ai hpe dwi ai zawn nawn nga ai. ⁸ Tinang shara hpe kau da nna, le hkawm ai wa gaw, Tinang tsip kau da ai u hte maren rai nga ai. ⁹ Sau hte manam pyaw ai baw, myit masin hpe shapyaw ai zawn, Sanseng ai myit hte hpaji law ya chye ai, jinghku wa a tsawra ai myit gaw, ngwi pyaw shangun nga ai. ¹⁰ Tinang a jinghku wa hte, nwa a jinghku wa hpe, hkum kau da et; Ruyak hkrum ai nhtoi hta e mung, nhpu nnau wa nta de hkum sa et; Ni nga ai htingbu wa gaw, tsan tsan e nga ai hpunau wa hta, grau mai nga ai. ¹¹ Ngai sha e, hpaji rawng u; ngai hpe shatan ai wa a ga, Ngai htan lu hkra, nye a myit shapyaw ya e. ¹² Myit su ai wa gaw, yubak lam hpe tau chye nna, koi kau nga ai; Nyan tang ai wa chyawm gaw, dingyang sa wa nna, ari hkrum nga ai. ¹³ Tsasam wa a matu pahkam hkam ai wa a hpun palawng hpe la kau u; Maigan num a matu pahkam hkam ai wa gaw, lama ma tang da u ga. ¹⁴ Jahpawt jau jau e rawt nna, tinang a jinghku wa hpe nsen kaba hte shakawn ai wa gaw, Dagam kau ai hku ang nga ai. ¹⁵ Ga law ga la tam ai num gaw, marang grai htu ai shani e Kahte hkrat ai marang nsi hte maren, rai nga ai. ¹⁶ Shi hpe jasim mayu ai wa gaw, nbung hpe jasim nga ai, Shi a hkra lata gaw namman hkrai jum hkrup nga ai. ¹⁷ Hpri hpe hpri hte shadai lu ai zawn, Masha shada kanawn ai hte myit let wa lu ai. ¹⁸ Lakum hpun sin ai wa gaw, lakum si sha lu na ra ai; Tinang madu hpe bau sin ai wa gaw, arawng sadang lu la na ra ai. ¹⁹ Hka hta e myiman shingna pra nga ai hte maren, Masha a myit masin manang wa a man e dan leng nga ai. ²⁰ Katsan ga hte sung htum ai shara gaw, n hkru kat lu ai zawn, Masha a myi mung galoi hkru kat lu na n rai. ²¹ Bunghkrawng gaw gumhpraw hpe, adi gaw aja hpe jen nga ai; Masha hpe shakawn ai gaw, shi hpe jen yu ai lam rai nga ai. ²² Myit n su ai wa hpe htum hta mam hte rau htu timung, Shi a angawk ai myit pru lu na n rai. ²³ Na a sagu hpung ni a lam, chye lu hkra shakut u; Yamnga hpung ni hpe atsawm sha yu yu u. ²⁴ Kaning rai nme law, sutgan gaw tutnawng nga nga lu ai, n rai; Janmau gaw shu mashi shu masha prat du hkra, grin nga lu a ni? ²⁵ Tsingdu dan mahkawng la nna, Maku bai rawt nga ai: Bum ga na namlaw namlap di la lu nga ai: ²⁶ Sagu kasha ni gaw na a matu hpun palawng, Bainam ni gaw lamu ga mari na matu rai nga ai. ²⁷ Nang mung, na nta masha ni mung, Na a mayam num ni mung, sha na matu bainam chyu law na ra ai.

¹ Tara n lang ai wa gaw, shachyut ai wa n nga timung, hprawng nga ai; Dinghpring ai ni chyawm gaw, hkanghkyi zawn nden ja nga ai. ² Mung hten wa yang, du ni law ma ai; Myit gawp ai hte chye chyang ai wa a jaw e, mungdan grin nga lu ai. ³ Matsan mayan ni hpe zingri ai matsan mayan wa gaw, Lusha hpa mung n ngam hkra, agre kau ai marang hte bung nga ai. ⁴ Tara hpe kau da ai ni gaw, tara n lang ai ni hpe shakawn ma ai; Tara hpe hkan nang ai ni chyawm gaw, shanhte hte dangrang hkat ma ai. ⁵ N shawp ai ni gaw, tara malang ai hku n chye ma ai; Yehowa hpe hkan tam ai ni chyawm gaw, lam shagu chye ginhka ma ai. ⁶ Malang ai hku hkan nang ai, matsan mayan wa gaw, Magaw ai hku hkan nang ai sahti wa hta, grau mai nga ai. ⁷ Tara hkan nang ai wa gaw, myit gawp ai kasha rai nga ai; Sha lai ai ni hte kanawn ai wa chyawm gaw, kawa hpe kaya jahkrum chye ai. ⁸ Atu sha nna hkau boi hte tinang a sutgan shalaw ai wa gaw, Matsan mayan ni hpe matsan dum ai wa a matu, mahkawng da nga ai. ⁹ Tara n na lu hkra, na kayin kau ai wa gaw, Akyu hpyi timung, shi hpyi ai ga matsat shabat rai nga ai. ¹⁰ Myit malang ai wa hpe shayit nna, n kaja ai lam de lau la ai wa gaw, Tinang htu ai nhkun hta hkrat na ra ai: Myit tsup ai ni chyawm gaw, mai kaja ai sali hkam la na mara ai. ¹¹ Sut su ai wa gaw, “Ngai hpaji rawng nngai,” nga nna myit timung, Nyan rawng ai matsan mayan wa gaw, shi hpe sawk yu na ra ai. ¹² Dinghpring ai ni nlaw nga yang, arawng sadang kaba nga ai; Tara n lang ai ni rawt jang, masha ni makoi mat ma ai. ¹³ Tinang mara ip da ai wa gaw gan ga lu na, n rai; Mara tawngban nna koi kau ai wa chyawm gaw, n-gaw nwai ai hkam la na ra ai. ¹⁴ Tutnawng hkrit kamyin ai wa gaw, a nga ai; Tinang myit shaja da ai wa chyawm gaw, tsin-yim hkrum na ra ai. ¹⁵ Matsan mayan ni ntsa e up ai, tara n lang ai du wa gaw, Shabam ai hkanghkyi hte nwan hkawm ai tsap rai nga ai. ¹⁶ Nyan n rawng ai du gaw, gumshem du rai nga ai; Lawhpa myit n rawng ai du chyawm gaw, asak galu na ra ai. ¹⁷ Masha a sai kap ai wa gaw, nsung hku de hprawng na ra ai; Kadai mung shi hpe n hkum u ga. ¹⁸ Myit malang ai hku hkan ai wa gaw, tsin-yam lawt na ra ai; Magaw ai lam hkan ai wa chyawm gaw, akajawng sha kataw na ra ai. ¹⁹ Tinang a yi hkauna galaw ai wa gaw, hkru hkru kat kat sha lu ai; Kaman re ai ni hpe hkan nang ai wa chyawm gaw, matsan mayan law hkrum na ra ai. ²⁰ Kangka re ai wa gaw, shaman ai chyeju law lu la na ra ai; Alawan sut su mayu ai wa chyawm gaw, yubak lawt na, n rai. ²¹ Masha myiman hpe tau na mung, Muk hkyep mi a jaw e tara manai kau na mung, n mai nga ai. ²² Nju n yawt ai myi tu ai wa gaw, gumhpraw shachyut nga timung, Htawmhpang de matsan mayan hkrum na hpe, n mu lu ai. ²³ Masha hpe hkyaw ai ga chye tsun ai wa gaw akyu lu la ai hta, Shadum shahprang ai wa mahtang, grau nna hkam la na ra ai. ²⁴ “Mara n nga ai,” nga nna tinang a kanu kawa hpe hpya sha ai wa gaw, Hten byak ai wa a kanawn manang rai nga ai. ²⁵ Lawhpa myit rawng ai wa gaw, ga law ga la shabyin nga ai; Yehowa hpe machyu ai wa chyawm gaw, hpum sau na ra ai. ²⁶ Tinang myit hpe machyu ai wa gaw, angawk ai wa rai nga ai; Hapji lam hkan nang ai wa chyawm gaw, tsin-yam lawt na ra ai. ²⁷ Matsan mayan ni hpe gam jaw ai wa gaw, tinang nan kadawn na n rai; Koi kau ai wa chyawm gaw dagam dala law law hkrum na ra ai. ²⁸ Tara n lang ai ni rawt wa yang, masha ni makoi mat ma ai; Shanhte hten wa yang, dinghpring ai ni law htam wa ma ai.

¹ Law law lang shadum shahprang timung, tinang du shaja ai wa gaw, Bai n mai lu hkra, alawan agrawp kau ai hkrum na ra ai. ² Dinghpring ai ni up yang, mung masha ni kabu nga ma ai; Tara n lang ai wa ahkang aya lu yang, mung masha ni madai nga ma ai. ³ Hpaji byeng-ya tsawra ai wa gaw, kawa hpe kabu shangun nga ai; Shawa num ni hte mazup ai wa chyawm gaw, sutgan ginlut kau nga ai. ⁴ Tengman ai hku dawdan ai hkawhkam wa gaw, mungdan hpe shagrin nga ai. Sake manawn sha ai hkawhkam wa chyawm gaw, mungdan hpe galau ka-up nga ai. ⁵ Tinang a htingbu wa hpe hkyaw ai wa gaw, Shi sa wa ai lam hta sumgawn nep da nga ai. ⁶ N shawp ai wa a shut hpyit ai hta, mahkam up nga ai; Dinghpring ai wa chyawm gaw, kabu gara mahkawn mangoi nga ai. ⁷ Dinghpring ai wa gaw, matsan mayan ni a amu lam sumru yu nga ai; Tara n lang ai wa chyawm gaw, dai hpe hpa n nawn nga ai. ⁸ N kaw n law re ai ni gaw, mare hpe nat kau ma ai; Hpaji rawng ai ni chyawm gaw, myit kahtet ai hpe shabai kau ma ai. ⁹ Hpaji rawng ai wa gaw, angawk ai wa hte dangrang hkat yang, Myit kahtet timung, mani timung, kabu na lam n nga ai. ¹⁰ Masha sat mayu ai ni gaw, hkum tsup ai wa hpe ndawng ma ai; Myit malang ai ni chyawm gaw, shi a asak hpe bau sin ma ai. ¹¹ Angawk ai wa gaw, shi myit mamyit shapraw dan nga ai; Hpaji rawng ai wa gaw, aten n du dingsa ip da nga ai. ¹² Du wa gaw masu ai ga madat yang, Shi a ali ama ni yawng, n hkru na mara ai. ¹³ Matsan mayan wa hte zingri zingrat ai wa gaw hkrum masai; Yehowa gaw, shan a myi hpe jahtoi ya mu ai. ¹⁴ Kangka re ai hte matsan mayan ni hpe dawdan ai hkawhkam, Shi a tinagnyang prat dingsa agrin nga na ra ai. ¹⁵ Shingna hte shadum shahprang ai gaw, hpaji hpe shapraw nga ai; Tinang myit machyu ai ma chyawm gaw, kanu hpe kaya jahkrum nga ai. ¹⁶ Tara n lang ai ni law wa yang, shut hpyit ai lam law wa ai; Raitimung, dinghpring ai ni gaw, shanhte hten wa ai hpe mu lu ma ai. ¹⁷ Na nsha hpe sharin u; shingrai yang, shi nang hpe ban sa shangun nna, Na a myit masin hpe, kabu shangun na ra ai. ¹⁸ Shingran ga n nga yang, mung masha ni gumlu gumlang rai ma ai; Tara hkan shatup ai wa chyawm gaw, a nga ai. ¹⁹ Ga hte sha mayam wa hpe n sharin lu ai; Shi chye na timung, n madat na ra ai. ²⁰ Ga dumhpran ai wa nga yang, Shi hpe myit mada ai hte angawk ai wa hpe myit mada ai gaw, grau mai nga ai. ²¹ Tinang a mayam wa hpe kaji kaw nna shalan tawn yang, Shi gaw htawmhpang e kasha alat tai na ra ai. ²² Pawt sindawng ai wa gaw ga law ga la shabyin wu ai; Myit kahtet ai wa gaw, tara grai tawt lai nga ai. ²³ gumrawng ai wa gaw, shagrit kau ai hkrum na ra ai; Myit nem ai wa chyawm gaw, arawng sadang lu la na ra ai. ²⁴ Lagut hpe hkap la ai wa gaw, tinang asak hpe ndawng nga ai; Dagam ai ga na timung, hpa n shabrawng hkraw ai. ²⁵ Masha hpe hkrit ai myit gaw, mahkam rai nga ai; Yehowa hpe shamyet ai wa chyawm gaw, shagrau ai hkrum na ra ai; ²⁶ Masha law law wa, du ni a man e myiman tam nga ai; Raitimung, Yehowa hkrai, masha amu hpe dawdan nga ai. ²⁷ Dinghpring ai ni gaw n hkru ai wa hpe, Tara n lang ai ni gaw, malang ai hku hkan ai wa hpe, matsat nga ma ai.

¹ Da ndai gaw, Yake a kasha Agura shingran ga rai nga ai: dai wa gaw ning nga ai, Karai Wa a lam ngai myit ndawt ai hte, Gaja wa Karai Kasang a lam hpe ba hkra sumru yu nna hki mat nngai. ² Kaning rai nme law, ngai gaw masha mahkra hte grau zai nna, Masha daram nyan n rawng nngai. ³ Ngai gaw hpaji byeng-ya n sharin ai hte, Chyoi Pra ai Wa zawn, chye chyang ai myit n rawng nngai. ⁴ Lamu de lung wa nna, bai yu wa ai gaw, kadai? Tinang a lata hte nbung hpe latup da lu ai gaw, kadai? Tinang a palawng hte hka hpung ni hpe majaw da lu ai gaw, kadai? Lamu ga njut nnaw ni hpe tawn da ai gaw, kadai? Shi a amying hpa rai ta? Kasha a amying mung hpa rai ta? Nang chye n yang gaw tsun u. ⁵ Karai Wa a ga yawng mayawng sanseng nga ai: Shi gaw shi hta shingbyi ai ni a n-gang rai nga ai. ⁶ Shi nang hpe n daru lu hkra, nang masu ai wa n tai n ga, Shi a ga hta hkum kahtap et. ⁷ Nang kaw lam lahkawng ngai hpyi nngai; Ngai garai n si yang dai lam jaw e law: ⁸ Kaman lila hte masu magaw ai, ngai hte tsan nga u ga; Matsan mayan mung, sutgan mung, ngai hpe n jaw u ga: Ngai hkru kat nna, Yehowa kadai rai nga a ta? nga nna n tsun u ga mung, ⁹ Matsan mayan rai yang, ngai lagu nna, Nye a Karai Kasang a amying hpe awu asin n di kau u ga mung, Asak bau ram ai shat sha karan jaw e law. ¹⁰ Madu a man e mayam wa hpe hkum shatan et; Shingrai yang, shi nang hpe dagam nna, nang hta mara kap na ra ai. ¹¹ Tinang kawa hpe dagam kau nna, Kanu hpe mung, n shaman ya ai masha amyu; ¹² Tinang myit hta sanseng dum timung, Agang chyalang hta na garai n kashin kau ai masha amyu; ¹³ Grai wa gumrawng gumtawng nna, Myit tsaw myit dap ai hte grang nga ai masha amyu; ¹⁴ Matsan mayan ni hpe ga ntsa na mung, Kawsi hpang kara hkrum ai ni hpe shinggyim masha ni hta na mung, shatsai kau lu hkra, Ntawng nhtu hte bung ai kawng, Nhkyi hte bung ai wa tu ai masha amyu, rai nga a hka! ¹⁵ Wawtbying gaw, “Jaw rit, jaw rit,” nga ai shayi sha lahkawng lu ai; Myit n dik hkraw ai marai masum hta kaga, “Ram sai,” n chye nga ai amyu mali rai nga ai: ¹⁶ Katsan ga, maudung num a pujat, Ntsin n hkru hkraw ai lamu ga hte, Awan, “Ram sai,” n chye tsun nga ai. ¹⁷ Tinang a kawa hpe asawng nna, Kanu a ga n kaw madat ai wa a myi hpe, Hkaraw na u hka ni malawk kau ya nna, Langda hkalung ni sha kau na mara ai. ¹⁸ Nye a nyan n dep lu ai lam masum hta kaga, Ngai n dang chye ai lam mali rai nga ai; ¹⁹ Dai gaw, ntsa malen e pyen ai langda a lam, Lunghkrung ntsa e lapu hkawm wa ai lam, Nammukdara e shanghpaw li hkawm wa ai lam, La wa hte mahkawn mazum wa ai lam, rai nga ai. ²⁰ La shaw ai num a lam mung dai hte maren rai nga ai; Shi gaw sha ngut ai hpang, n-gup katsut kau nna, Ngai hpa lam mung n shut nngai, nga ai. ²¹ Lam masum a majaw lamu ga gari nga ai hta n-ga, Lam mali hpe n hkam sharang lu nga ai: ²² Dai gaw, du tai ai mayam, Hkru hkru sha lu ai angawk wa, ²³ N se n shawp ai dinghku num, Madu num a sali dagraw ai mayam num, rai nga ai. ²⁴ Ga ntsa e kaji timung, Hpaji grai rawng ai amyu mali rai nga ai: ²⁵ - ²⁸ Dai gaw, n-gun n ja ai amyu raitimung, Nlum ta e tinang a shahpa mahkawng da ai kagyin; (v 26) N-gun kya ai amyu raitimung, Lungpu hkan e tinang a nta galaw lu ai du; (v 27) Hkawhkam n nga timung, Mahkra rau pyen kanawng hkawm ai dinggam-yaw; (v 28) Tinang a lata hte mahkyit noi nna, Hkawhkam htingnu e shanu nga lu ai dingsing, rai nga ai. ²⁹ Hpung shingkang hte hkawm chye ai amyu masum hta n-ga, Hpung rawng ai hte hkawm ai amyu mali rai nga ai: ³⁰ Dai gaw, dusat yawng hta n-gun grau ja nna, Kadai hpe n yen ai, hkanghkyi; ³¹ Hpyen gumra hte bainam la; Kadai n gumlau lu ai hkawhkam wa, rai nga ai. ³² Na hkum hpe shagrau let, ngawk ai amu nang galaw nna, N kaja ai hpaji daw hkrup jang, Na n-gup hpe, na lata hte pat da u. ³³ Gaja wa, ngachyu hpe garu yang, tawbat pru ai; Ladi hpe manai yang sai pru ai: Dai hte maren, sindawng kahtet yang ga law ga la pru nga ai.

¹ Da ndai gaw, hkawhkam Lemuela a kanu, kasha hpe sharin ya ai shingran ga rai nga ai. ² Ataw, ngai sha e, ngai shaprat ai ma e, Nye a ga shaka hte seng ai sha e: ³ Na a n-gun marai numsha ni hpe hkum jaw kau et, Hkawhkam ni hpe jahten shabyak ai lam hkum hkan et. ⁴ Lemuela e, hkawhkam ni gaw tsabyi lu na hte, Du ni gaw, Chyaru kanang nga a ta? Nga nna tsun ai gaw n htuk nga ai. ⁵ Shanhte chyaru lu ai hte, tara hpe malap kau nna, Matsan mayan ni hpe, n tara ai hku jeyang na tsang ra ai. ⁶ Htum mat magang ai wa hpe, chyaru, Myit htum ai wa hpe, tsabyi, jaw lu u: ⁷ Shi lu nna, shi a matsan mayan lam malap kau ai hte, Shi hkrum ai nni nkri hpe, bai n dum u ga. ⁸ Kamhpa kata ai ni a amu hpe makawp maga let, Maa ai ni a matu, na a n-gup hpaw u: ⁹ Na a n-gup hpaw let, tengman ai hku tara dara u; Matsan mayan hte nni nkri hkrum ai ni hpe, tengman ai hku dawdan u. ¹⁰ Sari rawng ai num hpe kadai wa mu lu a ta? Shi gaw lungseng hta grau hpu nga ai. ¹¹ Shi a madu wa shi hta hpa nga nna, Shi gaw matsan mayan n hkrum na ra ai. ¹² Shi gaw, shi a prat dingsa madu wa a matu, N kaja ai n rai, kaja ai hku hkrai, tam nga ai. ¹³ Shi gaw sagu mun hte lachyit ri tam nna, Shi a lata hte ri da galaw nga ai. ¹⁴ Shi gaw hpaga shanghpaw li zawn, Tsan tsan kaw nna lusha la wa ai. ¹⁵ Nhtoi garai n htoi yang shi rawt nna, Nta masha ni hpe shahpa karan, Mayam num ni hpe amu bungli hparan ya nga ai. ¹⁶ Shi sumru yu nna hkauna mari nga ai; Shi nan galaw nna, lu ai gumhpraw hte, tsabyi sun hkai nga ai. ¹⁷ Shi a nshang hpe n-gun hte shi kyit nna, Shi a lahpum ni hpe lapyin sharawng nga ai. ¹⁸ Shi dut kun rai manu hkru lu ai rai nna, Shi a pyengdin shana tup, htoi tu nga lu ai. ¹⁹ Shi a lata yan gawng ri ri nna, Shi a layung ni kabang hpe shachyai nga ai. ²⁰ Shi gaw matsan mayan ni hpe, shi a lata ladawn nna, Kawsi hpang kara hkrum ai ni hpe, karum nga ai. ²¹ Shi a nta masha ni yawng hkyeng ai gadiba bu hpun lu ai majaw, Hkyen hkrat timung, shanhte hpe n tsang ra ai. ²³ Shi a madu wa gaw, mare chyinghka lam hta Mung du salang ni hte dung nna, danhkung nga ai. ²⁴ Shi gaw lachyit sumpan da nna dut nga ai; Hpaga ga ai ni kaw, shingkyit mung da dut nga ai. ²⁵ N-gun lagaw hte sari sadang, shi a hpun palawng rai nga ai; Du na ra ai aten hpe shi mani kau nga ai. ²⁶ Shi n-gup hpaw yang, hpaji ga pru nna, shi a shinglet n-gaw nwai ai tara tsun nga ai. ²⁷ Dinghku masha ni hpe shi atsawm sha yu yu nna, Lagawn ai shat n sha nga ai. ²⁸ shi a kashu kasha ni rawt nna, Nang a lu ndai, nga ma ai; shi a madu wa mung, ²⁹ amyu shayi sha law law wa, kaja ma ai, raitimung, Nang gaw shanhte yawng hta grau ndai, ngu nna shi hpe shakawn wu ai. ³⁰ Hkum shing-yan tsawm ai gaw hkalem ai rai nga ai; Hpraw tsawm ai gaw kaman lila rai nga ai. Yehowa hpe hkrit hkungga ai num chyawm gaw, shakawn ging ai num rai nga ai. ³¹ Shi lata a shabyin ai akyu shi hpe jaw u; Shi galaw ai amu, mare chyinghka hta, shi hpe shakawn u ga.