NEHEMIA

NEHEMIA

¹ Hakalia kasha Nehemia a mungga gaw: Ngai gaw hkun ning ngu na, Hkesle shata hta e, Shushan mare na htingnu hta e nga nga yang, ² nye a kanau Hanan hte Yuda masha nkau mi sa du nna, ngai gaw bawngdung kaw na lawt lu ai, Yuda masha ni hte Yerusalem mare a lam shanhte hpe san yu nme ai. ³ Shaloi shanhte gaw, bawngdung kaw na lawt nna, mungdaw ni hta ngam nga ai ni gaw, tsin-yam tsindam, shoihpa shoirang law law wa hkrum ma ai: Yerusalem a bunghku ni gaw run agrawp mat nna, mare chyinghka ni mung, hkru mat ma masai, nga nna ngai hpe tsun ma ai. ⁴ Ngai chyawm gaw dai ga na jang, dung nga nna, nhtoi tsawmra wa mi hkrapngu hkrapngoi, sharung shayawt ai hte, lusha gam let, sumsing lamu na Karai Kasang hpe akyu hpyi nga nngai; ⁵ Shingrai ngai gaw, sumsing lamu na Karai Kasang Yehowa e; nang hpe tsawra nna, na a hkangda ai ga hkan nang ai ni hpe, ga shaka tawn da ai hte n-gaw nwai ai myit madun ai, galu kaba ai hte hkrit mai ai Karai Kasang e: ⁶ na a mayam wa, Israela kashu kasha ni a matu, na a man e shani shana akyu hpyi nga nna, Israela kashu kasha ni rai nga ai anhte gaw nang hpe shut kau ai yubak mara madun tawngban nga yang, na a mayam wa a ga hpe madat mara na matu, ya na a na hpe hpaw nna, na a myi azi yu mi. Rai sa, ngai mung nye wa nta dap ni mung, yubak galaw saga ai. ⁷ Anhte nang hpe grai shut kau nna, na a shangun ma Mawshe hpe, nang htet da ai hkangda ai ga, matsun maroi ga hte tara dara ai ga ni hpe n hkan galaw ga ai. ⁸ Nang mahtang, nanhte shut hpyit nga myit yang gaw, ngai nanhte hpe maigan amyu ni hta shabra kau na raitimung, ⁹ nanhte myit kayin nna, nye a hkangda ai ga hkan galaw myit yang gaw, nanhte a shabra kau hkrum ai ni gaw, lamu ga htum hkra bra nga timung, ngai shanhte hpe shinggyin la nhtawm, nye mying nsang tawn da na matu, ngai lata la ai shara de bai woi wa na nme ai, nga nna na a shangun ma Mawshe hte tawn da ai ga shaka hpe dum mu. ¹⁰ Ya, da ndai ni gaw, na a galu kaba ai atsam, na a n-gun ja ai lata hte nang hkye mawai la ai, na a mayam ni hte na a amyu masha ni rai nga ma ai. ¹¹ Madu e, na a mying nsang hpe hkrit hkungga ai, na a mayam wa hte, na a mayam kaga ni a akyu hpyi ai ga hpe madat mara nga u law; na a mayam wa hpe dai ni shaman ya nna, ndai hkawhkam wa a man e, myiman pa shangun e law, ngu nna hpyi wu ai. Ngai chyawm gaw hkawhkam wa a tsabyi jau ai wa rai nga nngai.

¹ Ya hkawhkam Artahkere a hkaw dung ai hkun ning na, Nisan shata hta, tsabyi jahku hpe shi man e tawn da jang, dai tsabyi jahku hpe ngai la nna, hkawhkam wa hpe jau we ai. Ngai shawng de shi a man e myiman sum ai n madun yu nna, ² hkawhkam wa gaw, nang hkam kaja nga ninglen, na a myiman hpa majaw sum nga lit ta? dai gaw myit yawn ai kumla rai nga ai, nga nna ngai hpe tsun ai majaw, ngai ja ja hkrit nga nngai. ³ Shaloi ngai gaw hkawhkam wa hpe, hkawhkam wa gaw, tutnawng asak hkrung nga u ga; nye ji wa ni a lup rawng ai mare gaw, katsi katsang rai nga nna, bunghku chyinghka ni hkru mat sai majaw, ngai myiman n sum ai, kaning rai nga lu na rai ta? ngu we ai. ⁴ Shaloi hkawhkam wa gaw, nang hpa tam nga n ta? ngu wu yang, ngai gaw, sumsing lamu na Karai Kasang hpe hpyi nngai. ⁵ Shingrai ngai gaw hkawhkam wa hpe, hkawhkam wa myit hkrum ai hte, na a mayam wa na a man e myiman pa a yang gaw, nye ji wa ni a lup hpe lajang de da na matu, de a mare, Yuda mung de, ngai hpe bai shabawn dat e law, ngu we ai. ⁶ Shaloi hkawhkam wa gaw, Nang gade na hkra wa nna, galoi bai sa lu na n ta? nga nna bai san ai. Hkawhkam jan mung shi hte rau dung nga ai. Shingrai ngai hpe shabawn dat na, hkawhkam wa myit hkraw ai hte, ngai shi hpe ahkying aten daw da nngai. ⁷ Bai ngai gaw, hkawhkam wa myit hkraw n yang gaw, hka sinna hkran up ai munggyi ni, Yuda mung du hkra ngai hpe shalai dat lu na ahkang laika hte, ⁸ hkawhkam a maling up ai Asap gaw, Karai Kasang a nta hte seng ai hpyendap na chyinghka ni a matu mung, mare bunghku a matu mung, nye nta a matu mung, angau hpunpyen jaw lu na ahkang laika jaw dat e, ngu nna hkawhkam wa hpe hpyi we ai. Hkawhkam wa mung, nye ntsa e nga ai, nye a Karai Kasang a chyeju majaw, ahkang laika jaw dat ai. ⁹ Dai rai nna, hka sinna hkran up ai munggyi ni kaw ngai shang nhtawm, hkawhkam a ahkang laika ni shanhte hpe madun dan nme ai. Hkawhkam wa mung ngai hte rau hpyenbu ni hte gumra jawn ai hpyen masha ni hpe shangun dat mu ai. ¹⁰ Shingrai, Israela kashu kasha ni hpe lanu lahku ya na nga, masha langai mi sa wa ai lam, Horoni masha Sanbalat hte, mayam rai nga ai Ammon masha Tobia na mu yang, shan gaw nachying myit n pyaw nga ma ai. ¹¹ Ya ngai gaw Yerusalem mare de du nna, masum ya nga nhtawm, ¹² ngai kaw hkan nang ai masha nkau mi hte rau shana e rawt ga ai: raitimung, Yerusalem mare a matu galaw na nga, nye a Karai Kasang gaw, ngai hpe kaning rai hpaji daw ya ai lam, ngai kadai hpe mung n tsun dan nngai: ngai jawn ai gumra hta kaga, rai htaw ai yamnga n lawm nga ai. ¹³ Shaloi ngai gaw shana aten e kadit chyinghka lam hku pru nna, baren hka htung hte maza htawm kau ai chyinghka lam du hkra, run agrawp kau ai Yerusalem mare bunghku ni hte, de a hkru mat ai chyinghka ni hpe mada yu nngai. ¹⁴ Dai hpang, hka hpawk chyinghka hte hkawhkam hka lawng lai hkra, ngai hkawm yu yang, ngai jawn ai gumra matu lai na lam n nga ai. ¹⁵ Bai dai shana e bunghku ni hpe yu let, dai hkaraw lam ngai hkan nna, bai nhtang wa nhtawm kadit chyinghka lam hku kayin shang wa nngai. ¹⁶ Mung du ni chyawm gaw, ngai gade hkawm ai hte, ngai hpa galaw maw ai lam n chye ma ai. Yuda masha ni, hkinjawng ni, arawng lu ai ni hte mung du ni hpe hpa mung garai n tsun shapraw nngai. ¹⁷ Dai hpang ngai shanhte hpe, Anhte hkrum ai tsin-yam tsindam, Yerusalem mare katsi katsang rai nga ai hte, de a chyinghka ni hkru mat nga ai hpe nanhte mu manit dai: sa marit, htawmhpang e anhte aroi arip n hkrum u ga, Yerusalem bunghku ni hpe anhte sharawt ga, ngu nna shanhte hpe tsun dan let, ¹⁸ ngai hpe chyeju madun ai nye a Karai Kasang a lata a lam mung, hkawhkam wa ngai hpe tsun dan ai mungga hpe mung, ngai shanhte hpe shana ya nme ai. Shaloi shanhte gaw, rawt ga, mare hpe bai de da gaw, nga nna tsun shajang ma ai. Shingrai dai amu kaja hpe galaw na matu shanhte dating nga ma ai. ¹⁹ Ya, Horoni masha Sanbalat, mayam rai nga ai Ammon masha Tobia hte Arabi masha Geshem hte gaw dai lam na jang, shanhte asawng asang mani let anhte hpe roi nna, nanhte galaw ai lam hpa rai ta? Hkawhkam wa hpe gumlau na myit ni? ngu nna tsun mi ai. ²⁰ Ngai mahtang, sumsing lamu na Karai Kasang, anhte hpe lanu lahku ya na mi ai; dai re ai majaw, anhte, shi a mayam ni, rawt nna galaw na ga ai: nanhte chyawm gaw Yerusalem mare hta sali wunli, arung arai, masat dingsat n lu myit dai, ngu nna shanhte hpe htan mu ai.

¹ Dai hpang hkinjawng agyi Eliashib hte shi a kahpu kanau hkinjawng ni gaw rawt nna, sagu chyinghka lam hpe galaw da ma ai; shanhte dai hpe shachyoi shapra nna, chyinghka ni noi da mu ai; Hamea langchyi du hkra, rai sa, Hananela langchyi du hkra, shanhte shangut nna shachyoi shapra da mu ai. ² Shanhte hte yep Imri a kasha Zahkura galaw ma ai. ³ Hasena kashu kasha ni gaw, nga chyinghka hpe galaw ma ai; shanhte gaw de a dingbat ni mara da nna, chyinghka ni hpe noi da ai hte, chyinghka shingla ni hte htinggrang ni hpe shakap da mu ai. ⁴ Shanhte hte yep Hakoza kashu, Uria kasha Meremot lajang da wu ai. Shi hte yep, Meshabela kashu, Berehkia kaha Meshulam lajang wu ai. Shi hte yep Bana kasha Zadok lajang wu ai. ⁵ Shanhte hte yep Teko masha ni lajang ma ai: raitimung, shanhte a arawng lu ai ni gaw, tinang madu a amu hpe galaw karum ma ai, n rai. ⁶ Pasea kasha Yoiada yan Besodia kasha Meshulam gaw, chyinghka dingsa hpe lajang da mu ai: shanhte gaw de a dingbat ni mara da nna, chyinghka ni hpe noi da ai hte, chyinghka shingla ni hte htinggrang ni hpe shakap da mu ai. ⁷ Shanhte hte yep Gibeon masha Melatia, Meron masha Yadon, Gebin hte Mizpa masha ni gaw, lajang da mu ai: dai ni gaw hka sinna hkran up ai munggyi a tingnyang hte seng ma ai. ⁸ Shi hte yep janghkam wa, Haraia kasha Uziela lajang nga ai. Shi hte yep, manam pyaw ai baw hpaw chye ai Hanania lajang nga ai: shanhte gaw dam lada bunghku du hkra, Yerusalem mare hpe shanang da mu ai. ⁹ Shanhte hte yep, Yerusalem ginwang chyen mi up ai, Hura kasha Rehpaia lajang nga ai. ¹⁰ Shanhte hte yep, Haruma kasha Yedaia gaw, Karai Kasang a nta tawtap e lajang nga ai. Shi hte yep, Hashaba kasha Hatusha lajang nga ai. ¹¹ Daw kaga langai mi mung, langchyi ni hte wanhtung ni hpe mung, Harim a kasha Malhkia hte Pahatmoba kasha Hashub lajang nga ma ai. ¹² Shan hte yep, Yerusalem ginwang chyen mi up ai, Halo a kasha Shalum hte shi a shayi sha ni lajang nga ma ai. ¹³ Hanun hte Zanoa masha ni gaw kadit chyinghka hpe lajang nga ma ai: shanhte galaw da nna, chyinghka ni hpe noi da ai hte, de a shingla ni htinggrang ni hpe shakap da nhtawm, maza htawm kau ai chyinghka du hkra, dawng hkying mi tup mare bunghku hpe gaw da mu ai. ¹⁴ Bet-hahkerim ginwang up ai du, Rehkab a kasha Malhkia gaw maza htawm kau ai chyinghka hpe galaw lajang nna, de a chyinghka ni hpe noi da ai hte, de a shingla ni hte htinggrang ni hpe shakap da wu ai. ¹⁵ Mizpa ginwang chyen mi up ai du, Hkola-hoze kasha Shalum gaw, hkahpawk chyinghka hpe lajang da wu ai: shi dai hpe galaw nna, galup da ai hte, de a chyinghka ni noi da nna, de a shingla ni hte htinggrang ni shakap da nhtawm, hkawhkam sun makau na Shela hka lawng bunghku hpe, Dawi mare na yu wa ai lakang du hkra gaw da wu ai. ¹⁶ Shi a hpang e Bet-zura ginwang up ai du, Azbuk a kasha Nehenua gaw, Dawi a lup tawtap kaw nna, galaw ngut sai hka lawng hte, hpyen share ni a nta du hkra, lajang wu ai. ¹⁷ Shi a hpang e, Lewi masha, Bani a kasha Rehum lajang nga ai. Shi a hpang e Keila ginwang chyen mi up ai du, Hashabia gaw, shi a ginwang matu lajang nga ai. ¹⁸ Shi a hpang e, Keila ginwang chyen mi up ai du, shanhte a kanau Hanada a kasha Bawai lajang nga ai. ¹⁹ Shi hte yep, Mizpa mare up ai, Yeshua kasha Ezera gaw hpyen rai tawn da ai nta tawtap, mare bunghku jut du hkra, daw mi lajang wu ai. ²⁰ Shi a hpang e Zabai a kasha Baruk gaw, mare bunghku jut kaw nna, hkinjawng agyi Eliashib a nta a chyinghka lam du hkra, atsawm sha lajang wu ai. ²¹ Shi a hpang e Hakoza kashu, Uri a kasha Meremot gaw Eliashib a nta chyinghka kaw nna, nta jut du hkra daw mi lajang wu ai. ²² Shi a hpang e layang ga na hkinjawng ni lajang nga ma ai. ²³ Shanhte a hpang e Ben-yamin yan Hashub gaw tinang a nta tawtap e lajang nga ma ai. Shan a hpang e Anania kashu, Maseia kasha Azaria gaw shi a nta makau e lajang nga ai. ²⁴ Shi a hpang e, Henada a kasha Binui gaw, Azaria nta kaw nna bunghku magaw ai mare jut du hkra, daw mi lajang wu ai. ²⁵ Uzai a kasha Pala gaw, bunghku magaw ai tawtap e mung, htawng wing makau, hkawhkam a lahta nta ndaw e nga ai langchyi hpe mung lajang wu ai. Shi a hpang e Parosha kasha Pedaia lajang wu ai. ²⁶ Nehtinim masha ni chyawm gaw, sinpraw maga na hka chyinghka tawtap e shinggan de kra ai langchyi du hkra, Ohpela shara e nga nga ma ai. ²⁷ Teko masha ni mahtang, kra nga ai langchyi kaba kaw nna, Ohpela bunghku du hkra, daw mi lajang da mu ai. ²⁸ Ya, gumra chyinghka lahta e hkinjawng ni langai hte langai, tinang a nta tawtap e lajang nga ma ai. ²⁹ Shanhte a hpang e Imera a kasha Zadok gaw shi nta tawtap e lajang nga ai. Shi a hpang e, sinpraw chyinghka sin ai wa, Shehkania kasha, Shemaia lajang nga ai. ³⁰ Shi a hpang e Shelemia kasha Hanan hte, Zalap a kru ngu na kasha Hanun gaw, daw mi lajang nga ma ai. Shi a hpang e Berehkia kasha Meshulam gaw shi a yup gawk tawtap e lajang nga ai. ³¹ Shi a hpang e janghkam wa Malhkia gaw, Nehtinim masha ni hte, hpaga ga ai ni a nta du hkra mung, Hamiphka chyinghka tawtap e mare jut du hkra mung, lajang nga ai. ³² Janghkam ni hte hpaga ga ai ni gaw, mare jut e lung ai lam kaw nna, sagu chyinghka lapran e, lajang nga ma ai.

¹ Shingrai anhte gaw, mare bunghku gaw da ai lam, Sanbalat na wu yang, shi pawt bu nna, ja ja myit kahtet let Yuda masha ni hpe roi nga ai. ² Shi a kahpu kanau ni hte Samari hpyen masha ni a man e, shi gaw, ndai n-gun kya ai Yuda masha ni hpa galaw nga ma ta? tinang shara hpe shangang da na rai kun? hkungga nawng ya na rai kun? lani jan hta sha shangut na rai kun? hkru hkat mat ai nlung ni hpe shanut shanaw sumpum na jahkrung shapraw lu na rai kun? nga nna tsun ai. ³ Ya Ammon masha Tobia mung shi makau e nga nga nna, shanhte nan gaw da ai nlung bunghku hpe, chyahkyawn langai mi lung wa yang, daw ru mat na ra ai, nga nna tsun nga ai. ⁴ Anhte a Karai Kasang e, madat mara u; anhte aroi arip hkrum nga ga ai; shanhte a shatan nhkan ga shanhte a ntsa e nhtang dat u ga; bawngdung ai mung hta shanhte kashun kashe hkrum mu ga; ⁵ Mare bunghku kum ai ni a man e shanhte nang hpe pawt bu shangun ai majaw, shanhte a mara hpe hkum magap kau u ga; shanhte a yubak hpe na a man e arut kau ai n hkrum u ga law. ⁶ Raitimung anhte gaw mare bunghku hpe gaw da ga ai; mung masha ni shakut sharang nga ai majaw, mare grupyin bunghku matut nna, tsaw de ka-ang hkrawng du hkra sha ngut wa sai. ⁷ Dai hpang, Yerusalem a bunghku kum ai byin wa ai hte, de a waw malawng mat ai hpe pat shachyip kau ai lam, Sanbalat, Tobia, Arabi masha ni, Ammon masha ni hte Ashdod masha ni na ma yang, shanhte ja ja pawt bu nga ma ai rai nna, Yerusalem mare de sa gasat na hte, kashuk kashak shabyin na nga, nlang hte gaw bawng hkrum masai. ⁹ Raitimung anhte gaw, anhte a Karai Kasang hpe akyu hpyi let, shanhte a majaw, shani shana sin langa tawn da ga ai. ¹⁰ Yuda masha ni mung, lit gunhpai ai ni n-gun yawm wa ai hte shanut shanaw grai law nga ai majaw, mare bunghku hpe n kum lu saga ai, nga ma ai. ¹¹ Anhte hpe hpyen ai ni mung, shanhte n dum shamyi nga nga yang, shanhte a ka-ang de anhte shang nna, shanhte hpe sat kau ai hte dai amu hpe nhtut kau shangun na re ai, nga ma ai. ¹² Shanhte a makau e de nga ai Yuda masha ni mung, shara shagu hkan sa nna, Nanhte gaw anhte hpang de nhtang wa marit, nga nna shi lang lai hkra anhte hpe tsun mi ai. ¹³ Shing nga ma ai majaw, mare bunghku a shinggan na, nem htum ai dam lada ai shara e ri, nhtu, ndan lang ai mung masha ni hpe, tinang dap lakung hkan nna, ngai san da nngai. ¹⁴ Bai, amu ni hpe yu hpajang ngut nhtawm, ngai rawt nna, agyi salang ni, du ni hte naw ngam nga ai mung masha ni hpe shaga la nna, hpyen ni hpe hkum hkrit myit, galu kaba ai hte hkrit mai ai Madu hpe dum mu; nanhte a nhpu nnau ni, shayi shadang sha ni, kasha kanu ni hte tinang nta ni a matu gasat mu, nga nna tsun nngai. ¹⁵ Shingrai, anhte dai lam dum chye nna, Karai Kasang gaw shanhte a hpaji daw ai lam shanut kau ya ai hpe, hpyen ni na ma ai, shaloi jang, anhte langai hte langai bunghku kum na matu, tinang a amu de bai wa ga ai. ¹⁶ Dai aten kaw nna, nye a mayam ni ka-ang hkup amu galaw nga ma ai; ka-ang hkup mahtang, ri, n-gang, ndan ni hte hpri hpyen palawng ni hpe lang nga ma ai: du ni mung, Yuda masha nlang hte a hpang maga lawm nga ma ai. ¹⁷ Bunghku kum ai ni hte lit gunhpai ai ni gaw, amu hta shaja ma ai; langai hte langai lata maga hkawn mi de amu galaw, bai maga hkawn mi de gaw, ri nhtu lang nga ma ai: ¹⁸ Bunghku kum ai ni langai hte langai, tinang a nhtu hpye let kum nga ma ai. Pahtau dum ai wa mung nye a makau e tsap nga ai. ¹⁹ Bai ngai gaw agyi salang ni, du ni hte naw ngam nga ai mung masha ni hpe, Amu gaw kaba ai hte law nga ai; anhte langai hte langai bunghku ntsa e shada tsan tsan rai nga ga ai; ²⁰ Dai rai nna, gara shara na rai tim pahtau dum ai nsen na yang, anhte hpang de wa hpawng marit: anhte a Karai Kasang gaw anhte a matu gasat na ra ai, ngu nna tsun nngai. ²¹ Shingrai anhte gaw ndai amu shachyen nga nna, masha ka-ang hkup gaw, nhtoi htoi ai kaw nna, shagan pru ai aten du hkra, ri nhtu ni lang nga ma ai. ²² Dai hta kaga ngai gaw, Masha ni gaw shana aten e anhte a matu sin langa tai na hte, shani e amu galaw lu hkra, langai hte langai tinang a mayam ni hte Yerusalem mare kata e shanu nga mu ga, ngu nna mung masha ni hpe ngai tsun nngai. ²³ Shingrai, ngai mung, nye a kahpu kanau ni, nye a mayam ni, ngai hpe hkan nang ai sin langa ni langai mi mung, tinang a hpun palawng n raw kau ai nga nga ga ai; langai hte langai hka shin yang pyi ri nhtu n tat ma ai.

¹ Dai shaloi e, mung na lasha numsha ni gaw, tinang a kahpu kanau Yuda masha ni hpe, grai wa mara shagun da mu ai. ² Nkau mi gaw, anhte hte anhte a shayi shadang sha ni law la nga ga ai: anhte lusha lu nna asak hkrung nga lu hkra, nai mam jaw mi law, nga ma ai. ³ Nkau mi mung, anhte gaw anhte a yi hkauna ni, tsabyi sun ni hte dum nta ni hpe tang kau sagaw ai: jan gri nga ai majaw, nai mam jaw mi law, nga ma ai. ⁴ Bai nkau mi gaw, hkawhkam wa hpe hkanse jaw na matu, anhte gaw, yi hkauna ni hte tsabyi sun ni a malai, gumhpraw hkoi la saga ai. ⁵ Ya raitimung anhte a hkumshan, hpunau ni a hkumshan zawn rai nga ai; anhte a kashu kasha ni shanhte a kashu kasha ni zawn rai nga ninglen, anhte gaw, anhte a shayi shadang sha ni hpe dut nna mayam shatai nga ga ai; gaja wa, ya e pyi, anhte a shayi sha nkau mi mayam tai nga ma ai: masha kaga ni anhte a yi hkauna ni hte tsabyi sun ni hpe madu nga ai majaw, anhte hpa mung n galaw lu ga ai, nga ma ai. ⁶ Shingrai, shanhte a lajin ai ga ngai na yang, ngai grai myit kahtet nga ai rai nna, ⁷ ngai hkrai myitsumru yu nhtawm, agyi salang ni hte du ni hpe shaga nna, Nanhte gaw hpunau shada amyat sha nga myit hka, ngu nna shanhte hpe daru mu ai, Bai, shanhte hpang maga shawa hpawng kaba ngai shaga la nna, ⁸ Maigan masha ni a lata hta yamnga ai, anhte a hpunau Yuda masha ni hpe, anhte dang lu ai hte maren shaw la nhtawm, ya, nanhte gaw, hpunau ni hpe bai dut kau nga myit ni? shanhte gaw hpunau ni kaw yamnga lu na rai ma ni? ngu nna tsun mu yang, shanhte hpa mung n htan ai, atsin sha nga nga ma ai. ⁹ Bai ngai gaw, Nanhte galaw ai lam n mai nga ai: anhte hpe hpyen ai maigan masha ni a man e, anhte a Karai Kasang hpe hkrit hkungga ai myit hte, mai hkawm nga ai, n rai ni? ¹⁰ Ngai mung ngai hpu ngai nau ni mung, nye a mayam ni mung, shanhte hpe gumhpraw hte nai mam hkoi ya nga ai. Ning rai amyat sha ai lam kau da ga. ¹¹ Shanhte a yi hkauna ni, tsabyi sun ni, tsanlun sun ni hte dum nta ni hpe mung, shanhte kaw na lahkawn la ai gumhpraw, nai mam, tsabyi jahku, asau ni hpe mung, dai ni jang htam latsa hta htammi nhtang ya mu, ngu mu ai. ¹² Dai rai nna shanhte gaw, Nang tsun ai hte maren, anhte hpa mung n hpyi n la ai, nhtang ya na ga ai, nga ma ai. Ndai ga shaka hte maren, shanhte galaw na lam, hkinjawng ni hpe dagam shangun mu ai. ¹³ Dai hta kaga ngai gaw, nye a palawng galu ahpu let, ndai ga shaka n hkan ai wa kadai hpe mung, shi a nta hte shi a amu bungli hta na, Karai Kasang ahpu kau u ga: dai zawn ahpu kau ai hte man mat ai hkrum mu ga, nga nna tsun jang, shawa hpawng ting, Amen, nga nna Yehowa hpe shakawn kungdawn ma ai. Mung masha ni gaw ndai ga shaka tawn da ai hte maren hkan galaw ma ai. ¹⁴ Dai hta n-ga, hkawhkam Artahkere hkaw dung ai hkun ning nna sumshi lahkawng ning du hkra, shi lahkawng ning tup, ngai Yuda mung hta shanhte a munggyi rai nga timung, ngai hte nye a hpunau ni gaw munggyi a jarit sha ai n rai. ¹⁵ Shawng de na munggyi ni chyawm gaw, mung masha ni a hkaulaw sha ma ai rai nna, muk hte tsabyi jahku mung, gumhpraw shekela mali shi mung, sha ma ai: shanhte a mayam ni pyi mung masha ni a ntsa e up nga ma ai. Ngai chyawm gaw Karai Kasang hpe hkrit kamyin ai majaw, dai zawn n galaw nngai. ¹⁶ Gaja wa bunghku kum na amu hta ngai dinggrin nga nna, lamu ga n mari nngai. Nye a mayam ni mahkra mung dai amu hta jawm galaw ma ai. ¹⁷ Grupyin e nga ai, maigan amyu ni hta na anhte kaw sa manam ai ni hta kaga, Yuda masha ni hte arawng lu ai ni latsa e manga shi, nye sha ku hta lusha nga ma ai. ¹⁸ Shani shagu hkyen tawn ai gaw, usu langai mi, san da ai sagu kru hte a-u ni rai nga ai: shi ya lang mi tsabyi jahku amyu myu jaw mu ai: dai daram ma wa timung, mung masha ni gaw lit li nga ma ai majaw munggyi jarit ngai n hpyi nngai. ¹⁹ Nye a Karai Kasang e, ndai mung masha ni hpe ngai galaw ai amu mahkra majaw, ngai hpe chyeju madun na dum e law.

¹ Ya, dai aten e pyi, ngai gaw mare chyinghka ni hpe garai n noi da timung, mare bunghku ni ngut wa ai hte, waw malawng ai shara ni chyip wa ai lam, Sanbalat, Tobia, Arabi masha Geshem hte anhte hpe hpyen ai kaga ni na ma yang, ² Sanbalat yan Geshem gaw ngai hpang de kasa shangun dat nna, Yu wa rit, Ono kadit na mare langai mi hta hkrum ga, nga nna ngai hpe n hkru ai hku maw ma ai. ³ Ngai mahtang, ngai gaw amu kaba galaw nga ai majaw, n yu wa lu nngai; nan hpang de yu wa nna, dai amu hpe hpa majaw jahkam da na rai ta? ngu nna shan hpang de kasa nhtang shangun dat we ai. ⁴ Shingrai mali lang du hkra ngai hpang de shangun dat nna, ngai gaw shawng na hte maren htan nme ai. ⁵ Manga lang ngu na hta, Sanbalat gaw shi a mayam wa ngai hpang de shangun dat nna, shi gaw dazik n kap ai laika gun nga ai: ⁶ Dai laika hta rawng ai ga gaw, nang hte Yuda masha ni gaw gumlau na maw myit dai da, grupyin na amyu ni hta kajai nga ma ai; Gashem mung dai lam tsun nga ai: dai lam majaw nang bunghku kum nna, kajai nga ai hte maren, nang shanhte a hkawhkam tai na maw ndai. ⁷ Dai rai nna, Yuda mung hta hkawhkam rai nga ai, nga nna na a lam Yerusalem mare hta hkaw dan na matu, nang myihtoi san da ndai: ya dai lam hte maren hkawhkam wa hpe shana ya na majaw, yu wa rit, anhte rau bawng yu ga, nga nna ka da nga ai. ⁸ Ngai mahtang, nang tsun ai ga hkaw mi pyi n teng lit dai; na a myit hta majoi myit kau nu ai le, ngu nna htang dat we ai. ⁹ Kaning rai nme law, shanhte n-gun yawm nna, dai amu hpe n shangut lu mu ga, nga nna, shanhte nlang anhte hpe jahkrit na maw ma ai. Raitimung, nye a lata hpe n-gun shaja ya e law. ¹⁰ Dai hpang ngai gaw, Mehetabela kashu, Delaia kasha Shemaia nta hta shang nngai: shi gaw nta hta up rawng nga ai; shaloi shi gaw, Karai Kasang a nta, nawku Htingnu kata de, an hkrum ga, nawku Htingnu chyinghka ni hpe la da ga: shanhte nang hpe sa sat na ma ai; gaja wa dai na e pyi sa sat na mara ai, nga nna ngai hpe tsun ai. ¹¹ Ngai mahtang, ngai zawn re ai wa hprawng na rai kun? Ngai hte bung ai wa, asak lawt na matu, nawku Htingnu de shang na, kadai wa rai ta? Ngai n shang na nngai, ngu nna htan wu ai. ¹² Karai Kasang shi hpe shangun dat ai n rai, Tobia yan Sanbalat shi hpe grau ai majaw, shi ngai hpe ning nga htoi ya ai lam, ngai dum chye we ai. ¹³ Ngai hkrit wa nna, shan tsun ai hte maren galaw nna, ngai hta yubak kap wa ai majaw, masha ni ngai hpe mara shagun let, asawng asang ai lu hkra, shan gaw dai myihtoi wa hpe grau mu ai. ¹⁴ Nye a Karai Kasang, dai zawn maw ai Tobia yan Sanbalat hpe mung, Nodia mying ai num myihtoi hte ngai hpe jahkrit mayu ai myihtoi kaga ni hpe mung, dum mu law. ¹⁵ Shingrai nhtoi manga shi lahkawng ya na yang, bunghku gaw Elula shata hkun manga ya e ngut wa sai. ¹⁶ Anhte hpe hpyen ai ni dai lam na ma yang, grupyin na amyu masha ni yawng hkrit kaya ai hte, ndai amu gaw anhte a Karai Kasang kaw na rai nga ai hpe, chye mu ai majaw, myiman grai sum ma ai. ¹⁷ Dai aten hta e Yuda du ni gaw Tobia hpang de laika law law shagun dat mu ai; Tobia kaw na laika ni mung, shanhte lu la ma ai. ¹⁸ Kaning rai nme law, shi gaw Ara kasha Shehkania kahkri rai nga ai hte, shi a kasha Yohanan gaw Berehkia kasha Meshulam a shayi sha hpe hkungran la ai majaw, Yuda mung masha law law wa shi hte matut nga ma ai. ¹⁹ Dai hta kaga shanhte gaw shi amu kaja ai lam nye a man e tsun dan nna, ngai tsun ai ga mung shi hpe shana ya mu ai. Tobia gaw ngai hpe jahkrit na nga ngai hpang de laika shagun dat ai.

¹ Ya, bunghku kum ngut ai hte, chyinghka ni noi da nna, chyinghka sin ai ni, mahkawn mangoi chye ai ni hte Lewi masha ni hpe san da ngut jang, ² Yerusalem mare hpe up na matu, ngai nau Hanan hte hpyendap up ai bu Hanania hpe san da mu ai: kaning rai nme law, shi gaw kangka ai hte, masha law law hta Karai Kasang hpe grau nna hkrit hkungga nga ai. ³ Bai ngai shanhte hpe, jan garai n lum yang, Yerusalem mare chyinghka ni hpe hkum hpaw da myit; chyinghka sin ai ni naw nga yang, chyingjhka ni la da nna, htinggrang da mu: mare masha ni hta na sin langa tawn da nna, langai hte langai tinang sin ang ai shara hte tinang a nta tawtap a sin nga mu, ngu nna hkangda mu ai. ⁴ Dai mare chyawm gaw kaba ai hte dam lada nga timung, mare masha ni n law nna, nta ni hpe garai n galaw da lu ai. ⁵ Bai, ahtik labau gawn na matu, agyi salang ni, du ni hte mung masha ni hpe hpawng shangun na lam, nye a Karai Kasang gaw nye a myit hpe shadut ya nga ai. Shawng lung wa ai ni a ahtik labau laika ngai mu nna, dai hta ning nga ka da nga ai: ⁶ Da ndai gaw Babelon hkawhkam Nebuhkadneza, Babelon mare de rim wa ai bawngdung ai ni hta na pru wa nna, ⁷ Zerubabela, Yeshua, Nehemia, Azaria, Ramia, Nahamani, Mordehkai, Bilshan, Misperet, Bigwai, Nehum, Bana hte rau, Yerusalem mare kaw nna Yuda mung hta langai hte langai seng ai mare de du wa ai mung masha ni a jahpan rai nga ai. Israela kashu kasha ni a jahpan nambat gaw ndai rai nga ai: ⁸ Parosha kashu kasha ni gaw, hkying lahkawng latsa e sanit shi lahkawng rai ma ai. ⁹ Shehpatia kashu kasha ni gaw, masum tsa e sanit shi lahkawng rai ma ai. ¹⁰ Ara kashu kasha ni gaw, kru tsa e manga shi lahkawng rai ma ai. ¹¹ Yeshua yan Yoab a dap lakung na Pahat-moba kashu kasha ni gaw hkying lahkawng matsat tsa e shi matsat rai ma ai. ¹² Elam a kashu kasha ni gaw, hkying mi ni tsa e manga shi mali; ¹³ Zatu a kashu kasha ni gaw, matsat tsa e mali shi manga; ¹⁴ Zahkai a kashu kasha ni gaw, sanit tsa e kru shi; ¹⁵ Binui a kashu kasha ni gaw, kru tsa e mali shi matsat, ¹⁶ Bebai a kashu kasha ni gaw, kru tsa e hkun matsat; ¹⁷ Azgad a kashu kasha ni gaw, hkying lahkawng masum tsa e hkun lahkawng; ¹⁸ Adonikam a kashu kasha ni gaw, kru tsa e kru shi sanit; ¹⁹ Bigwai a kashu kasha ni gaw, hkying lahkawng e kru shi sanit; ²⁰ Adin a kashu kasha ni gaw, kru tsa e manga shi manga; ²¹ Hezekia dap lakung na Atera kashu kasha ni gaw, jahku shi matsat; ²² Hashum a kashu kasha ni gaw, masum tsa e hkun matsat; ²³ Bezai a kashu kasha ni gaw, masum tsa e hkun mali; ²⁴ Harip a kashu kasha ni gaw, latsa e shi lahkawng; ²⁵ Gibeon a kashu kasha ni gaw, jahku shi manga; ²⁶ Betlehem hte Netohpa kashu kasha ni gaw, latsa e matsat shi matsat; ²⁷ Anahtot masha ni gaw, latsa e hkun matsat; ²⁸ Bet-azmawet kashu kasha ni gaw, mali shi lahkawng; ²⁹ Kireat-yerim, Hkehpira hte Berot masha ni gaw, sanit tsa e mali shi masum; ³⁰ Rama hte Geba masha ni gaw, kru tsa e hkun langai; ³¹ Mikma masha ni gaw, latsa e hkun lahkawng; ³² Behtela hte Ai masha ni gaw, latsa e hkun masum; ³³ Kaga Nebo masha ni gaw, manga shi lahkawng; ³⁴ kaga Elam kashu kasha ni gaw, hkying mi ni tsa e manga shi mali; ³⁵ Harim a kashu kasha ni gaw, masum tsa e hkun; ³⁶ Yerihko a kashu kasha ni gaw, masum tsa e mali shi manga; ³⁷ Loda, Hadid hte Ono a kashu kasha ni gaw, sanit tsa e hkun langai; ³⁸ Sena kashu kasha ni gaw, hkying masum jahku tsa e sum shi rai ma ai. ³⁹ Bai, hkinjawng ni hta, Yeshua dap lakung na Yedaia kashu kasha ni gaw, jahku tsa e sanit shi masum; ⁴⁰ Imera kashu kasha ni gaw, hkying mi manga shi lahkawng; ⁴¹ Pashura kashu kasha ni gaw, hkying mi ni tsa e mali shi sanit; ⁴² Harim a kashu kasha ni gaw, hkying me shi sanit rai ma ai. ⁴³ Bai, Lewi masha ni hta, Hodewa dap lakung na Yeshua yan Kadmiela kashu kasha ni gaw, sanit shi mali; ⁴⁴ mahkawn mangoi chye ai Asap a kashu kasha ni gaw, latsa e mali shi matsat; ⁴⁵ chyinghka ni sin nga ai, Shalum, Atera, Talmon, Akuba, Hatita hte Shobai a kashu kasha ni gaw, latsa e sumshi matsat rai ma ai. ⁴⁶ Bai, Nehtinim masha ni hta na, Ziha kashu kasha ni; Hasuhpa kashu kasha ni; Tobaot kashu kasha ni; ⁴⁷ Kero a kashu kasha ni; Sia kashu kasha ni; Padon a kashu kasha ni; ⁴⁸ Lebana kashu kasha ni; Hagaba kashu kasha ni; Salmai a kashu kasha ni; ⁴⁹ Hanan a kashu kasha ni; Gidela kashu kasha ni; Gahara kashu kasha ni; ⁵⁰ Reaia kashu kasha ni; Rezin a kashu kasha ni; Nekoda kashu kasha ni; ⁵¹ Gazam a kashu kasha ni; Uza a kashu kasha ni; Pasea kashu kasha ni; ⁵² Besai a kashu kasha ni; Meunim a kashu kasha ni; Nehpushem a kashu kasha ni; ⁵³ Bakbuk a kashu kasha ni; Hakuhpa kashu kasha ni; Harahura kashu kasha ni; ⁵⁴ Bazalit a kashu kasha ni; Mehida kashu kasha ni; Harsha kashu kasha ni; ⁵⁵ Barko a kashu kasha ni; Sisera kashu kasha ni; Tema kashu kasha ni; ⁵⁶ Nezia kashu kasha ni hte Hatihpa kashu kasha ni rai nga ma ai. ⁵⁷ Bai, Shawlumon a ali ama ni hta na, Sotai a kashu kasha ni; Sohperet a kashu kasha ni; Perida kashu kasha ni; ⁵⁸ Yala kashu kasha ni; Darkon a kashu kasha ni; Gidela kashu kasha ni; ⁵⁹ Shehpatia kashu kasha ni; Hatila kashu kasha ni, Pohkeret-hazebim kashu kasha ni hte Amon a kashu kasha ni rai nga ma ai. ⁶⁰ Nehtinim masha ni hte Shawlumon a ali ama ni a kashu kasha ni yawng hte gaw, masum tsa e jahku shi lahkawng rai nga ma ai. ⁶¹ Da ndai hte gaw, Tela-mela, Tela-harsha, Hkeruba, Adon hte Imera shara ni kaw na pru timung, tinang kawa ni a dap lakung ni hte Israela amyu ni hta na ahtik labau n chye gawn ai, ⁶² Delaia kashu kasha ni; Tobia kashu kasha ni; Nekoda kashu kasha ni; rai ma ai: yawng hte gaw marai kru tsa mali shi lahkawng rai ma ai. ⁶³ Hkinjawng ni hta na, Hoboia kashu kasha ni, Hakoza kashu kasha ni, Barazilai kashu kasha ni rai nga ma ai: dai Barazilai gaw, Giliad masha Barazilai a shayi ni hta num la nna, shanhte a amying hpe hkan mying wu ai. ⁶⁴ Shanhte gaw tinang a ahtik labau jahpan laika tam timung n mu ma ai: dai re ai majaw shanhte hpe n san n seng ngu mu ai rai nna, hkinjawng amu n galaw lu ma ai. ⁶⁵ Urim hte Htumim chye lang ai hkinjawng garai n pru yang, shanhte gaw chyoi pra htum ai lusha hpe n lu n sha na nga, nga nna munggyi wa gaw, shanhte hpe hkangda mu ai. ⁶⁶ Dai shawa hpawng ting hta, marai mun mali, hkying lahkawng, masum tsa e kru shi lawm ma ai: ⁶⁷ dai hta kaga num mayam ni hte la mayam ni hkying sanit, masum tsa e sumshi sanit rai nga ma ai: mahkawn mangoi chye ai numsha lasha, ni tsa e mali shi manga mung lawm ma ai. ⁶⁸ Shanhte a gumra ni sanit tsa e sumshi kru; lawze ni ni tsa e mali shi manga; ⁶⁹ gawla-uk ni mali tsa e sumshi manga; law gung ni, hkying kru sanit tsa e hkun rai nga ma ai. ⁷⁰ Ya, kaji kawa ni a dap lakung ni a agyi ni nkau mi gaw, dai amu bungli a matu alu jaw ma ai. Munggyi wa gaw, ja den-ga hkying mi, angdung manga shi, hkinjawng labu palawng manga tsa sumshi hpe, sutdek hta bang da wu ai. ⁷¹ Bai, dap lakung agyi ni nkau mi gaw, dai amu bungli matu, sutdek hta bang da ai aja gumhpraw gaw, ja den-ga mun lahkawng, gumhpraw joi hkying lahkawng e ni tsa rai nga ai. ⁷² Naw ngam nga ai masha ni mung, ja den-ga mun lahkawng, gumhpraw joi hkying lahkawng, hkinjawng hpun palawng kru shi sanit bang da ma ai. ⁷³ Shingrai, hkinjawng ni, Lewi masha ni, chyinghka sin ai ni, mahkawn mangoi chye ai ni, mung masha nkau mi, Nehtinim masha ni hte Israela amyu ting, tinang a mare ni hta nga nga ma ai. Ya shata sanit du ma yang, Israela kashu kasha ni gaw, tinang a mare ni hta de nga ma ai.

¹ Shaloi jang, shawa hpawng ting hka chyinghka ndaw na dam lada ai shara hta myit langai sha hte sa hpawng nna, Yehowa gaw Israela hpe hkang tawn da ai Mawshe a tara laika hpe la sa rit, ngu nna chyare wa Ezra hpe hpyi mu ai. ² Dai rai nna hkinjawng Ezra gaw, shata sanit a shawng shani e, chye na lu ai shawa hpawng numsha lasha mahkra a man e, dai tara laika hpe la shapraw nhtawm, ³ Jahpawt jau jau e kaw nna, jan pungding du hkra, hka chyinghka ndaw na dam lada ai shara e tsap let, chye na lu ai numsha lasha ni a man e hti dan ai hte, mung masha ni yawng dai tara laika ga hpe madat mara nga ma ai. ⁴ Chyare wa Ezra gaw, shanhte shachyaw san da ai tara tingnyang ntsa e tsap nga nna, shi a hkra maga de, Mahtia, Shema, Anaia, Uria, Hilkia hte Masia; pai maga de, Pedaia, Mishaela, Malhkia, Hashum, Hashbadana, Zehkaria, Meshulam hte tsap nga ma ai. ⁵ Shingrai Ezra gaw mung masha ni mahkra hta grau tsaw ai shara e tsap let, mung masha mahkra ni a man e dai tara laika hpe hpaw da nna, dai laika hpe hpaw ai shaloi shanhte nlang hte gaw rawt tsap ma ai; ⁶ ya Ezra gaw galu kaba re ai Karai Kasang Yehowa hpe shakawn kungdawn wu ai. Mung masha ni nlang hte gaw, tinang a lata sharawt let, Amen, Amen, nga ma ai rai nna, ga du hkra gum dagup let, Yehowa hpe nawku nga ma ai. ⁷ Dai hta kaga, Yeshua, Bani, Sherebia, Yamin, Akub, Shabehtai, Hodia, Masia, Kalita, Azaria, Yozabad, Hanan, Pelaia hte hte Lewi masha ni gaw, dai tara laika a ga lachyum, mung masha ni hpe shapraw dan mu ai: mung masha ni gaw tinang a shara e nga nga ma ai. ⁸ Shingrai shanhte gaw Karai Kasang a tara laika hpe dan dan leng leng hti nna, ga lachyum shapraw dan ai majaw, mung masha ni chye na ma ai. ⁹ Mung masha ni gaw dai tara laika ga na jang, hkrapngu hkrapngoi nga ma ai rai nna, munggyi Nehemia, hkinjawng chyare wa Ezra hte, mung masha ni hpe sharin achyin nga ai Lewi masha ni gaw, Dai ni nan, nanhte a Karai Kasang Yehowa a matu chyoi pra ai shani rai nga ai: myit hkum yawn, hkrap mung hkum hkrap myit, ngu nna mung masha ni mahkra hpe tsun mu ai. ¹⁰ Bai shi gaw, Sa wa mu; sau ai hpe sha mu, dwi ai hpe lu mu; n lu ai ni hpe gam jaw mu: dai ni gaw Madu a chyoi pra ai shani rai nga ai; myit hkum kaji myit; Yehowa hta kabu gara nga ai gaw, nanhte a n-gun atsam rai nga ai. ¹¹ Shingrai Lewi masha ni mung, ndai shani gaw chyoi pra ai shani rai nga ai majaw, atsin sha nga mu; myit hkum kaji myit, ngu nna mung masha ni mahkra hpe jasim mu ai. ¹² Mung masha ni gaw, hkaw tsun dan ai ga hpe chye na mu ai majaw, lu na sha na matu mung, kaga ni hpe gam jaw na matu mung, grai ngwi pyaw nga na matu mung, sa wa ma ai. ¹³ Ni ni shani hta e, mung masha ni yawng hta na, dap lakung ni a agyi ni hte rau, hkinjawng ni hte Lewi masha ni gaw, tara hpe madat mara nga na matu, chyare wa Ezra hpang de sa zuphpawng nga ma ai. ¹⁴ Shingrai, shata sanit hta e, Israela kashu kasha ni gaw, sumpoi galaw na matu, tara laika hta ka da nga ai hte maren, Yerusalem mare hta e mung mare shagu hta e mung, ¹⁵ tsanlun hpun lakung lakying, nam na tsanlun hpun, murtu hpun hte namhtan hpun lakung, lahkawn la na nga, bum de lung wa ma su, nga nna Yehowa Mawshe hpe hkangda ai ga hpe shanhte mu hkrup mu ai. ¹⁶ Ya mung masha ni sa wa nna, lakung lakying ni la wa nhtawm, tinang nta ni a ntsa e mung, tinang a wing kata e mung, Karai Kasang nta a wing kata e mung, hka chyinghka hte Ehprim chyinghka ndaw na dam lada ai shara e mung, sum gap nga ma ai. ¹⁷ Dai rai nna, bawngdung kaw na lawt wa ai shawa hpawng nlang hte gaw, sum gap nna sum ni hta nga nga ma ai; Nun a kasha Yeshua aprat kaw nna ndai shani du hkra, Israela kashu kasha ni gaw dai zawn n galaw yu ma ai. Shingrai kabu gara shara kaba rai nga ai. ¹⁸ Dai hta kaga, shi gaw, shawng shani kaw nna, lani hte lani, poi wai ai shani du hkra, Karai Kasang a tara laika hpe hti nga ai; shanhte gaw dai poi hpe sanit ya tup galaw ma ai: matsat ya ngu na hta, tara hte maren, chyoi pra ai poi galaw ma ai.

¹ Ya, dai shata a hkun mali ya hta e Israela kashu kasha ni gaw lusha gam let, lachyit nba bu hpun ai hte ga nhpu hte bun nna zuphpawng nga ma ai. ² Israela aru arat ni gaw, tinang a yubak hte kaji kawa ni a shut hpyit ai lam tawngban let, maigan masha ni mahkra hta na tinang hkum hka wa ma ai. ³ Shanhte gaw tinang a shara e tsap nga nna, shani daw mali hta na daw mi, tinang Karai Kasang Yehowa a tara laika hpe hti ma ai, bai daw mi hta, yubak tawngban let, tinang a Karai Kasang Yehowa hpe nawku ma ai. ⁴ Shaloi Yeshua, Bani, Kadmiela, Shebania, Buni, Sherebia, Bani, Hkenan hte gaw, Lewi masha ni a lakang ntsa e tsap nga nna, shanhte a Karai Kasang Yehowa hpe nsen kaba hte jahtau mu ai. ⁵ Bai Lewi masha ngu ai, Yeshua, Kadmiela, Bani, Hashabni, Sherebia, Hodia, Shebania, Pehtahia hte gaw, Rawt mu, nanhte a Karai Kasang Yehowa hpe tutnawng prat dingsa e shagrau sha-a nga u ga law; shagrau sha-a ai hte shakawn kungdawn n ma ai, na a danhkung nga ai mying nsang gaw, a nga u ga law. ⁶ Nang nan Yehowa rai nga ndai; nang gaw sumsing lamu hte sumsing lamu ni a sumsing lamu hte de a zaw nawng zaw wa ni hpe mung, ginding aga hte dai hta nga manga hpe mung, nammukdara hte dai hta rawng marawng hpe mung, hpan tawn da nna, mahkra hpe bau sin nga ndai: sumsing lamu a zaw nawng zaw wa ni gaw nang hpe nawku nga ma ai. ⁷ Nang Karai Kasang Yehowa e, nang gaw Abram hpe lata la nna, Hkaldea mung Ura mare na woi shapraw nhtawm, shi a amying hpe Abraham ngu nna lai ya wu ai; ⁸ Shi gaw na a man e kangka nga ai hpe, nang mu nna, shi a aru arat ni hpe Hkanani, Hiti, Amori, Perizi, Yebusi hte Girgasi masha ni a mung ni hpe jaw na nga, nang shi hte ga shaka tawn da nna, nang dinghpring rai nga ai majaw, na a ndat ga hpe nang shadik ya nu ai. ⁹ Anhte a ji wa ni gaw, Egutu mung hta e hkrum ai tsin-yam tsindam hpe nang mu nna, Nawng Hkyeng makau e shanhte a nsen hpe madat mara nu ai: ¹⁰ Hpara-u mung, shi a ali ama ni hte mung masha ni gaw, anhte a ji wa ni hpe gumrawng gumtawng hku galaw nga ai hpe, nang chye nga ndai majaw, Egutu masha ni yawng a man e mauhpa amu hte lamik kumla, nang madun dan mu ai rai nna, na amying gaw dai ni du hkra danhkung nga ai. ¹¹ Anhte a ji wa ni gaw, nawng ka-ang hku hkarang hta rap wa lu mu ga, shanhte a man e nawng hpe nang jahka da nna, hkan shachyut ai ni hpe, nlung zawn, dai nawng kaba hta gumpye bang kau mu ai. ¹² Dai hta kaga, shani e sumwi shadaw hte mung, shana e shanhte sa wa na lam jahtoi ya na matu, wan shadaw hte mung, nang shanhte hpe woi wa mu ai. ¹³ Nang nan Sina bum ntsa de yu wa nna, sumsing lamu kaw nna shanhte hpe shaga let, tengman tara dara ai lam, kangka re ai tara, mai kaja ai matsun maroi ga hte htet da ai ga, nang shanhte hpe jaw da mu ai. ¹⁴ na a chyoi pra ai laban nhtoi hpe, nang shanhte hpe madun da nna, na a shangun ma Mawshe a lata hta hkangda ai ga, matsun maroi ga hte jep ai tara, jaw da ai hte, ¹⁵ shanhte kawsi yang, lamu ntsa na muk, hpang kara yang, lunghkrung na ntsin, nang shapraw jaw nna, shanhte hpe jaw na nga, nang dagam da ai mung hpe, shang madu lu na, nang shanhte hpe hkangda mu ai. ¹⁶ Raitimung, shanhte hte anhte a ji wa ni gaw, gumrawng nna du ja ai hte, hkangda ai ga ni hpe n madat mara nna, shanhte a ka-ang e nang madun dan ai mauhpa amu hpe n dum nga ai sha, shanhte du shaja ai hte, gumlau let, mayam tai nga ai mung de nhtang wa na nga, hpyenbu hpe san da ma ai. Nang chyawm gaw, yubak raw dat ai, matsan dum ai hte chyeju myit rawng ai, myit galu ai hte n-gaw nwai myit madun ai Karai Kasang rai nga nna, shanhte hpe kau da mu ai n rai. ¹⁸ Gaja wa, shanhte dumsu kasha sumla jaw nna, dai gaw Egutu mung na nang hpe shapraw la ai Karai Kasang rai nga ai, nga nna tsun ma ai majaw, nang hpe pawt bu shangun yang pyi, ¹⁹ na a galu kaba ai chyeju hte, dai nam mali hkan e shanhte hpe kabai kau da mu ai, n rai: shanhte hpe lam madun na matu, shani na sumwi shadaw hte, shana e shanhte hkawm sa wa yang, shanhte sa wa na lam jahtoi ya na matu, shana na nhtoi shadaw mung, hkoi mat ai n rai. ²⁰ Shanhte hpe sharin achyin ya na matu, na a mai kaja ai wenyi nang shanhte hpe jaw nna, shanhte n-gup na manna muk hpe dawm la wu ai, n rai; shanhte hpang kara nga yang, ntsin a jaw nga mu ai. ²¹ Rai sa, nang shanhte hpe nam mali hkan e, mali shi ning tup n taw n tsang bau sin mu ai rai nna, shanhte a hpun palawng dingsa wa ai, n rai; shanhte a lagaw mung n bum malu ai. ²² Dai hta kaga, hkawhkam mungdan ni hte maigan amyu ni hpe nang shanhte hpe jaw da nna, daw mi hte daw mi ang wa ai hte maren, karan jaw mu ai. Shingrai shanhte gaw Heshbon hkawhkam Sihon a mungdan hte, Bashan hkawhkam Oga a mungdan hpe madu nga lu ma ai. ²³ Shanhte a kashu kasha ni hpe mung, lamu shagan ni zawn nang law htam wa shangun nna, shanhte a kaji kawa ni hpe ndat da ai mung de woi shashawn nhtawm, madu nga shangun mu ai. ²⁴ Shingrai kashu kasha ni gaw dai mungdan hpe sa shang madu nga lu nna, de a amyu ni hte shanhte a hkawhkam ni hpe, di mayu ai hte maren di mu ga, mung madu ni ngu ai Hkanan masha ni hpe shanhte a man e dip kau nna, shanhte a lata de ap kau mu ai. ²⁵ Dai rai nna shanhte gaw, bunghku kum ai mare ni, ga sau rawng ai lamu ga, sutgan amyu myu hte hpring ai nta ni, tawk da ai hka htung ni, tsabyi sun ni, tsanlun sun ni hte namsi hpun law law wa lu la ma ai rai nna, shanhte hkru hkru kat kat sha lu ai hte, hpum wa let, na a galu kaba ai chyeju hta sharawng awng nga ma ai. ²⁶ Raitimung, shanhte n madat nga ma ai hte, nang hpe gumlau let, na a tara hpe shingdu kayin kau ai hte, nang hpang de kayin wa na matu, na a lam sakse hkam ya ai, na a myihtoi ni hpe, sat kau nna, grai wa shut hpyit nga ma ai. ²⁷ Dai re ai majaw, shanhte hpe zingri zingrat ai hpyen ni a lata de, nang shanhte hpe ap kau mu ai: shanhte tsin-yam tsindam hkrum ai aten e, nang hpe jahtau shaga ma yang, nang gaw sumsing lamu de nna htan ya mu ai: na a galu kaba ai chyeju hte maren, hpyen ni a lata na shanhte hpe hkye mawai la na nga, hkye la madu ni shanhte hpang de shangun dat mu ai. ²⁸ Raitimung, shanhte gan ga lu ai hpang e, na a man e shut hpyi ai amu bai galaw ma ai; dai re ai majaw, hpyen ni gaw shanhte a ntsa e up nga na matu, nang shanhte hpe hpyen ni a lata de ap kau mu ai; shing di timung, shanhte myit kayin nna nang hpe jahtau shaga yang, nang gaw lamu de nna madat mara ya nna, na a chyeju hte maren law law lang shanhte hpe shaw hkrang la mu ai. ²⁹ Na a tara de shanhte kayin wa lu hkra, nang shanhte hpe shadum shahprang timung, shanhte gumrawng ai hku galaw nna, na a hkangda ai ga ni hpe n madat ma ai; asak jahkrung ya chye ai, na a matsun maroi ga ni hpe, shanhte tawt lai ai hte, myit magaw nna du ja nga let, hpa mung n madat ma ai. ³⁰ Shingrai, shaning law law wa nang shanhte a lam shakut sharang nna, na a Wenyi shadut ai a jaw e, na a myihtoi ni a n-gup hte shadum shahprang timung, shanhte n madat nga ma ai: dai re ai majaw, dai mung na maigan ni a lata hta, nang shanhte hpe ap kau mu ai. ³¹ Raitimung, nang gaw chyeju hte matsan dum myit rawng ai Karai Kasang rai nga ndai majaw, na a galu kaba ai chyeju hte maren, nang shanhte hpe atsai awai n shamyit kau ai hte, shanhte hpe kau da mu ai n rai. ³² Dai re ai majaw, anhte a Karai Kasang, ga shaka shatup nna n-gaw nwai myit rawng ai, galu kaba ai, daru magam madun ai hte hkrit mai nga ai, Karai Kasang e, Asuri hkawhkam ni a aprat kaw nna, dai ni du hkra, anhte a ntsa e mung, anhte a hkawhkam ni, ji wa ni hte amyu ting a ntsa e mung, du pru ai tsin-yam tsindam hte gaw, na a man e kaji nga ai zawn, n rai nga u ga. ³³ Nang chyawm gaw, anhte hkrum sha ai lam shagu hta, dinghpring nga ndai; nang gaw kangka re ai hku galaw nit dai; anhte mahtang tara tawt lai sagaw ai: ³⁴ Anhte a hkawhkam ni, du ni, hkinjawng ni, dap lakung ni a agyi ni gaw, na a tara hpe hkan nang ma ai mung n rai, nang shanhte hpe shadum shahprang let, shanhte hpe jaw da ai hkangda ai ga ni hte matsun maroi ga ni hpe mung, madat mara ma ai, n rai. ³⁵ Na a chyeju myit kaba a jaw e, nang shanhte hpe jaw da ai mungdan hte, ga sau rawng nna dam lada ai lamu ga hta nga lu timung, shanhte nang hpe n daw n jau ai hte, tinang a n hkru ai amu ni hpe koi kau da ma ai, n rai. ³⁶ Yu u, dai ni anhte mayam ni hkrai rai nga ga ai; madu sha lu na hte, mai kaja ai nsi naisi sha lu na matu, anhte a ji wa ni hpe nang jaw da ai mungdan hta, anhte mayam ni hkrai rai nga ga ai. ³⁷ Anhte yubak majaw, anhte a ntsa e up shangun ai hkawhkam ni mahtang, dai mungdan hta na lahkawn hkanse law law lu la ma ai: anhte a hkum hkrang ntsa e mung, anhte a yamnga ni a ntsa e mung, shanhte ahkang lu nna galaw mayu ai hte maren di ma ai rai nna, anhte gaw ruyak kaba sha nga ga ai. ³⁸ Shingrai hkrum sha timung, anhte tengman ai ga shaka tawn da nna, ka da ai; anhte a du ni, Lewi masha ni hte hkinjawng ni gaw, dai laika hpe dazik shakap ma ai, ngu nna tsun mu ai.

¹ Ya dazik shakap ai ni gaw, Hahkalia kasha munggyi Nehemia hte hkinjawng ni hta na, Zedekia, ² Seraia, Azaria, Yeremia, ³ Pashura, Amaria, Malhkiya, ⁴ Hatu, Shebania, Maluk, ⁵ Harim, Meremot, Obadia, ⁶ Daniela, Ginehton, Baruk, ⁷ Meshulam, Abiya, Miyamin, ⁸ Mazia, Bilgai, Shemaia hte rai ma ai. ⁹ Lewi masha ni hta na, Azani a kasha Yeshua, Henada a kasha Binui yan Kadmiela, ¹⁰ shanhte a kahpu kanau ni, Shebania, Hodia, Kelita, Pelaia, Hanan, ¹¹ Mihka, Rehob, Hashabia, ¹² Zahkura, Sherebia, Shebania, ¹³ Hodia, Bani, Beninu hte rai ma ai. ¹⁴ Mung masha ni a du salang ni gaw Parosha, Pahatmoba, Elam, Zatu, Bani, ¹⁵ Buni, Azgad, Bebai, ¹⁶ Adoniya, Bigwai, Adin, ¹⁷ Atera, Hezekia, Azura, ¹⁸ Hodia, Hashun, Bezai, ¹⁹ Harip, Anahtot, Nebai, ²⁰ Magpia, Meshulam, Hezira, ²¹ Meshezabela, Zadok, Yadua, ²² Pelatia, Hanan, Anaia, ²³ Hoshea, Hanania, Hashuba, ²⁴ Haloshe, Pilha, Shobek, ²⁵ Rehum, Hashabna, Masea, ²⁶ Ahia, Hanan, Anan, ²⁷ Maluk, Harim, Bana hte rai ma ai. ²⁸ Hpaji byeng-ya hte chye chyang ai myit rawng ai, naw ngam nga ai masha ni mahkra gaw, hkinjawng ni, Lewi masha ni, chyinghka sin ai ni, mahkawn mangoi chye ai ni, Nehtinim masha ni hte rau, Karai Kasang a tara hpe hkan nang na nga, kasha kanu ni, shayi shadang sha ni hte hpawn, dai mung na maigan amyu ni hta na tinang hkum hpe jahka kau ai ni nlang hte gaw, ²⁹ tinang a kahpu kanau ni hte agyi salang ni hta manoi nga ma ai rai nna, Karai Kasang gaw shi a shangun ma Mawshe a lata hta ap ya ai tara hpe hkan shatup na hte, anhte a Madu Yehowa hkangda ai ga, matsun maroi ga hte madat da ai ga yawng hkan nang na mung; ³⁰ anhte a shayi sha ni hpe, mung na maigan masha ni kaw n ya sha ai hte, shanhte a shayi sha ni hpe anhte shadang sha ni a matu n hpyi la na mung; ³¹ mung na maigan masha ni gaw laban nhtoi e arung arai nai mam sa dut yang, laban nhtoi hta, shing n rai, chyoi pra ai nhtoi hta, n mari la na mung; sanit ning du shagu amu jahkam da na hte, hpa hka mung n ji la na, nga nna shanhte gaw ga sadi tawn da let dagam ma ai. ³² Dai hta kaga anhte gaw, anhte a Karai Kasang a nta hta dawjau ai amu ngu ai, madun dan ai muk ni a matu mung, ³³ tutnawng na shadung hkungga ni, tutnawng na wan nat hkungga ni, laban nhtoi ni, shata praw shani ni, madat da ai poi ni, chyoi pra ai arai ni, Israela amyu matu htingrai htingrat ya na mara raw na hkungga ni hte, anhte a Karai Kasang a nta hte seng ai amu mahkra a matu mung, masha hkum shagu, shekela htam masum hta htammi, laning hte laning a jaw nga na, nga nna anhte ga ndat tawn da ga ai. ³⁴ Bai, jep ai tara hta ka da nga ai hte maren, anhte a Karai Kasang a tawn hkungri ntsa e ju na matu, shaning shagu madat da ai aten hta tinang a dap lakung hkan nna, anhte a Karai Kasang a nta kata de hpun kumhpa la sa na matu mung; ³⁵ shaning shagu na shawng ngai ai nsi naisi, namsi namsaw amyu myu Yehowa nta de la sa na matu mung; ³⁶ tara hta ka da nga ai hte maren, shawng shangai ai lasha alat hte, yamnga sagu dumsu ni hpe anhte a Karai Kasang a nta hta dawjau nga ai hkinjawng wa hpang de la sa na matu mung; ³⁷ shawng galaw ai muk katsing, nwat hkungga ni, namsi namsaw amyu myu, tsabyi jahku nnan hte sau ni hpe, anhte a Karai Kasang a nta gawk ni hta dawjau nga ai hkinjawng ni hpang de la sa na matu mung; Lewi masha ni gaw mare kahtawng ni a lamu ga hta na htamshi hta na htammi lusha nga ai majaw, dai htamshi hta na htammi, shanhte hpang de la sa na matu mung, nga nna anhte hkinjawng ni, Lewi masha ni hte amyu masha ni gaw hpaida da ai hte tawn da ga ai. ³⁸ Lewi masha ni gaw htamshi hta htammi lahkawn sha ma yang, Arun amyu hkinjawng ni gaw, Lewi masha ni hte lawm na mara ai. Bai, Lewi masha ni gaw tinang lahkawn la ai hta na, htamshi hta htammi shaw la nna, anhte a Karai Kasang a nta gawk sutdek hta bang da na ma ai. ³⁹ Kaning rai nme law, Israela kashu kasha ni hte Lewi masha ni gaw, nwat re ai nmyi hkungga ni hte, tsabyi nnan hte sau hkungga ni hpe, chyoi pra ai shara hte seng ai arung arai ni nga ai hta, dawjau nga ai hkinjawng ni, chyinghka sin ai ni hte mahkawn mangoi nga ai ni a gawk ni a kata e la sa na mara ai: anhte a Karai Kasang a nta hpe, anhte kau da ga ai n rai.

¹ Ya mung du ai gaw Yerusalem mare hta de ma ai; naw ngam nga ai masha ni gaw, marai shi hta na marai langai mi, chyoi pra ai Yerusalem mare hta nga nga nna, kaga jahku hte gaw mung mare ni hta de nga na lam, hpaida da ma ai. ² Yerusalem mare hta de nga na nga na nga, tinang nan yin la ai ni hpe, mung masha ni shaman ya mu ai. ³ Da ndai gaw, Yerusalem mare hta de nga ai mungdaw du ni rai nga ma ai: Yuda mare ni hta chyawm gaw, Israela masha ni, hkinjawng ni, Lewi masha ni, Nehtinim masha ni hte Shawlumon a mayam ni a kashu kasha ni gaw, langai hte langai tinang a lamu ga dachyawk hta de nga ma ai. ⁴ Ya, Yerusalem mare hta e Yuda kashu kasha ni nkau mi mung, Ben-yamin a kashu kasha ni nkau mi mung de nga ma ai: Yuda amyu, Paret dap na, Mahalela, Shehpati, Amaria, Zehkaria, Uzia hta na hkrat ai Ahtaia; ⁵ Shilo shara na Zehkaria, Yoiarib, Adaia, Hazaia, Hkulahoze, Baruk hta na hkrat ai Masea rai ma ai. ⁶ Yerusalem mare e de nga ai, nden ja myit rawng ai, Paret a kashu kasha ni gaw, mali tsa e kru shi matsat rai ma ai. ⁷ Ben-yamin a kashu kasha ni hta na, Yeshaia, Ihtiela, Masea, Kolaia, Pedaia, Yoeda, Meshulam hta na hkrat ai Salu rai nga ai. ⁸ Shi a hpang e gabai yan Salai masha ni gaw jahku tsa e hkun matsat rai ma ai. ⁹ Zihkri a kasha Yoela gaw, shanhte a ntsa e up nga ai; Hasenua kasha Yuda gaw, mare up ai wa a bawmung rai nga ai. ¹⁰ Bai, hkinjawng ni hta na, Yedaia kasha Yoiarib yan Yahkin; ¹¹ Karai Kasang a nta up ai Ahitub, Meraiot, Zadok, Meshulam, Hilkia hta na hkrat ai Seraia rai ma ai. ¹² nta hta amu galaw ai, shanhte a kahpu kanau ni gaw, matsat tsa e hkun lahkawng rai nga ma ai: bai, Malhkiya, Pashura, Zehkaria, Amzi, Pelalia, Yeroham hta na hkrat ai Adaia rai nga ai: ¹³ shi a kahpu kanau, dap lakung ni a agyi ni, ni tsa e mali shi lahkawng rai nga ma ai: bai, Imera, Meshilmot, Azai, Azarela hta na hkrat ai Amashai rai nga ai: ¹⁴ Shanhte a kahpu kanau, nden ja ai masha latsa e hkun matsat rai nga ma ai: Hagedolim a kasha Zabdiela gaw shanhte hpe up nga ai. ¹⁵ Bai, Lewi masha ni hta na, Buni, Hashabia, Azrikam, Hashub hta na hkrat ai Shemaia hte ¹⁶ Shabehtai yan Yozaba rai nga ma ai; shanhte gaw Karai Kasang nta a shinggan amu ni hpe up nga ai, Lewi masha ni a agyi ni, rai nga ma ai: ¹⁷ Bai, Asap, Zabdi, Mihka hta na hkrat ai Matania rai nga ai; shi gaw chyeju hpe shakawn ai hte akyu hpyi ai lam hta agyi rai nga ai: bai, shi a kahpu kanau ni hta lahkawng ngu na Bakbuki rai nga ai: bai, Yeduhtun, Gala, Shamua hta na hkrat ai Abda rai nga ai. ¹⁸ Chyoi pra ai mare hta de nga ai, Lewi masha yawng hte gaw, ni tsa e matsat shi mali rai nga ma ai. ¹⁹ Dai hta kaga chyinghka sin ai agyi Akub yan Talmon hte rau, chyinghka sin ai kahpu kanau ni yawng, latsa e sanit shi lahkawng rai nga ma ai. ²⁰ Naw ngam nga ai, Israela masha ni, hkinjawng ni, Lewi masha ni gaw, Yuda mare ni hta, tinang hte seng ai lamu ga sali wunli hta, de nga ma ai. ²¹ Nehtinim masha ni chyawm gaw Ohpela bum hta de nga nna, Ziha yan Gispa gaw shanhte a ntsa e up nga ma ai. ²² Yerusalem mare e de nga ai Lewi masha ni a ntsa e up ai wa, Mihka, Matania, Hashabia, Bani hta na hkrat ai, Uzia rai nga ai: shi gaw Karai Kasang a nta hte seng ai, mahkawn mangoi amu up ai, Asap a kashu kasha ni hta na rai nga ai. ²³ Kaning rai nme law, mahkawn mangoi ai ni, shani shagu ra ai hte maren, shanhte hpe karan jaw na lam, hkawhkam wa kaw na hkangda ai ga rai nga ai. ²⁴ Bai, Yuda amyu, Zera dap na, Meshebela kasha Pehtahia gaw, mung masha ni hte seng ai lam shagu hpe, hkawhkam wa ahkang hte shangut wu ai. ²⁵ Mare kahtawng ni hte lamu ga lam yu yang, Yuda kashu kasha ni nkau mi gaw, Kiriat-arba hte de a kahtawng ni hta, Dibon hte de a kahtawng ni hta, Yekbazela hte de a kahtawng ni hta; ²⁶ Yeshua, Molada, Bet-pelet, ²⁷ Hazarashula, Berasheba hte de a kahtawng ni hta; ²⁸ Ziklag, Mehkona hte de a kahtawng ni hta; ²⁹ En-rimon, Zora, Yarmut, ³⁰ Zano, Adulam hte de a kahtawng ni hta; Lahkisha hte de a lamu ga hta; Azeka hte de a kahtawng ni hta de nga ma ai. Shingrai shanhte gaw Berasheba kaw nna Hinom kadit du hkra de nga ma ai. ³¹ Ben-yamin a kashu kasha ni mung, Geba kaw nna, Mikmat, Aiya, Betela hte de a kahtawng ni hta; ³² Anahtot, Noba, Anania, ³³ Hazora, Rama, Gitim, ³⁴ Hadid, Zebuim, Nebalat, ³⁵ Loda hte hpaji chye galaw ai ni a One kadit hta de nga ma ai. ³⁶ Lewi masha hpung ni nkau mi gaw Yuda hte seng timung, Ben-yamin hte matut nga ai.

¹ Da ndai hte gaw, Yeshua kashu, Shelatila kasha Zerubabela hte rau lung wa ai hkinjawng ni hte Lewi masha ni rai nga ma ai: Seraia, Yeremia, Ezra, ² Amaria, Maluk, Hatusha, ³ Shehkania, Rehum, Meremot, ⁴ Ido, Genehtoi, Abiya, ⁵ Mijamin, Madia, Bilga, ⁶ Shemaia, Yeiarib, Yedaia, ⁷ Salu, Amok, Hilkia, Yedaia hte gaw, Yeshua aprat e tinang kahpu kanau hkinjawng ni hta, agyi ni rai nga ma ai. ⁸ Bai, Lewi masha ni gaw, Yeshua, Binui, Kadmiela, Sherebia, Yuda hte, kahpu kanau ni hte rau mahkawn mangoi amu gunhpai ai Matania rai nga ma ai. ⁹ Bai shanhte a kahpu kanau Bakbuk yan Uno gaw shanhte hte bung ai aya lu ma ai. ¹⁰ Yeshua gaw Yoiakim hpe shaprat wu ai; Yoiakim Eliashib hpe shaprat wu ai; Eliashib Yoiada hpe shaprat wu ai; ¹¹ Yoiada Yonahtan hpe shaprat wu ai; Yonahtan gaw Yadua hpe shaprat wu ai. ¹² Ya Yoiakim a aprat hta e, hkinjawng dap ni a agyi ni gaw, Seraia dap na Meraia; Yeremia dap na Hanania; ¹³ Ezra dap na Meshulam; Amaria dap na Yehohanan; ¹⁴ Maluhki dap na Yonahtan; Shebania dap na Yosep; ¹⁵ Harim dap na Adna; Meraiot dap na Helakai; ¹⁶ Ido dap na Zehkaria; Ginehton dap na Meshulam; ¹⁷ Abiya dap na Zihkri; Miniamin hte Moadia dap na Piltai; ¹⁸ Bilga dap na Shamua; Shemaia dap na Yehonahtan; ¹⁹ Yoiarib a dap na Matenai; Yedaia dap na Uzi; ²⁰ Salai dap na Kalai; Amok dap na Ebera ²¹ Hilkia dap na Hashabia; Yedaia dap na Nehtanela rai nga ma ai. ²² Dai hta kaga, Eliashib, Yoiada, Yohanan hte Yadua aprat e Lewi dap lakung ni a agyi ni hpe mung, hkinjawng dap agyi ni hpe mung, Persi hkawhkam Dari prat du hkra, ka matsing da ai jahpan rai nga ai. ²³ Eliashib a kasha Yohanan aprat du hkra, Lewi amyu dap agyi ni hpe, hkawhkam labau laika ni hta ka da nga ai. ²⁴ Karai Kasang a masha wa Dawi hkangda ai hte maren, chyeju dum let, shakawn kungdawn na matu, hpung mi hte hpung mi san tawn da ai kahpu kanau Lewi masha ni a agyi ni gaw, Hashabia, Sherebia, Kadmiela kasha Yeshua hte rai ma ai. ²⁵ Matania, Bakbuk, Obadia, Meshulam, Talmon, Akub hte gaw chyinghka sin ai ni rai nga nna, chyinghka lam makau na, rai tawn da ai nta ni hpe sin nga ma ai. ²⁶ Shanhte gaw Yozadak a kashu Yeshua kasha Yoiakim a aprat e mung, munggyi Nehemia aprat e mung, hkinjawng chyare wa Ezra aprat e mung, nga nga ma ai. ²⁷ Ya Yerusalem a mare bunghku hpe Karai Kasang hpe ap ya ai shaloi jang, ap ya ai poi hta, kabu gara ai hte chyeju dum let, mahkawn mangoi nna, shupsheng, doria, hte tingse dum na matu, shara shagu hkan nga ai Lewi masha ni hpe tam nna, Yerusalem de woi lung wa mu ai. ²⁸ Mahkawn mangoi chye ai ni gaw, Yerusalem grupyin e htawng nga ma ai majaw, mahkawn mangoi chye ai kashu kasha ni gaw, Yerusalem grupyin na ginwang hta na mung, Netohpa kahtawng ni hta na mung, ²⁹ Bet-gilgala shara ni hta na mung, Geba hte Azmawet pa ga hta na mung, sa hpawng ma ai. ³⁰ Hkinjawng ni hte Lewi masha ni gaw, tinang hkum hpe jasan jaseng kau nna, mung masha ni hpe mung, chyinghka ni hpe mung, bunghku ni hpe mung jasan jaseng kau ma ai. ³¹ Shaloi ngai gaw Yuda du salang ni hpe bunghku ntsa de shaga la nhtawm, mahkawn mangoi let nawt hkawm ai hpung kaba lahkawng, san da nngai; hpung mi gaw bunghku a hkra maga, maza htawm kau ai chyinghka de hkawm wa ma ai: ³² Shanhte a hpang e Hosaia hte Yuda agyi salang ni chyen mi; ³³ Azaria, Ezra, Meshulam, ³⁴ Yuda, Ben-yamin, Shemaia, Yeremia hte ³⁵ pahtau lang ai hkinjawng kasha ni nkau mi: Asap, Zahkura, Mihkaia, Matania, Shemaia, Yonahtan a kasha Zehkaria; ³⁶ shi a kanau ni, Shemaia, Azarela, Milalai, Gilalai, Ma-ai, Nehtanela, Yuda, Hanani hte gaw, Karai Kasang a masha wa Dawi a dum ai baw lang let hkan nang ma ai; chyare wa Ezra gaw shanhte a shawng e sa wa ai. ³⁷ Shanhte tawtap e nga ai, hka hpawk chyinghka de du yang, shanhte gaw Dawi a htingnu lahta na, Dawi mare de lung wa ai lakang hkan nna, bunghku lam hku, sinpraw maga, hka chyinghka du hkra, hkawm wa ma ai. ³⁸ Bai, shakawn kungdawn nga ai hpung mi gaw, shanhte hpe tau la na matu pru wa ma ai; ngai hte mung masha chyen mi gaw, shanhte a hpang e sa nna, dam lada ai bunghku du hkra, wanhtung langchyi lahta hku lai; ³⁹ bai, Ehprim chyinghka, Dingsa chyinghka, Anga chyinghka hte Hananela hte Hamea langchyi ni lai nna, Sagu chyinghka du nhtawm, sin langa ni a lam makau e tsap hkring nga ga ai. ⁴⁰ Karai Kasang a nta kata e shakawn kungdawn ai hpung lahkawng, shingrai tsap nga nna, ngai hte rau agyi salang ni chyen mi rai nga ma ai: ⁴¹ Bai pahtau lang ai hkinjawng ni gaw, Eliakim, Masea, Miniamin, Mihkaia, Elionai, Zehkaria, Hanani hte rau, ⁴² Masea, Shemaia, Eleaza, Uzi, Yehohanan, Malhkiya, Elam, Ezera hte rai ma ai. Mahkawn mangoi ai ni gaw, shanhte hpe up ai wa Yezrahia woi awn ai hte aja awa mahkawn mangoi nga ma ai. ⁴³ Dai shani jang shanhte gaw grai kaba ai shagu hkungga ni nawng ya nna, Karai Kasang shanhte hpe ja ja kabu shangun ai majaw, shanhte gaw kabu gara nga ma ai: kasha kanu ni hte kashu kasha ni mung kabu gara nga ma ai rai nna, Yerusalem a kabu gara ai gaw, tsan tsan kaw nna na lu ma ai. ⁴⁴ Shaloi hkinjawng ni hte Lewi masha ni gaw, dawjau ai amu hpe gunhpai nga ma ai majaw, Yuda masha ni kabu gara nga ma ai rai nna, hkinjawng ni hte Lewi masha ni mare ni kaw na hkam la ang ai, shawng ngai ai nsi naisi hte nwat hkungga ni hte htamshi hta htammi lahkawn la nna mahkawng da ai sutdek hpe up na matu, shanhte gaw dai ni jang up ai masha ni hpe san da mu ai. ⁴⁵ Shanhte hte rau, mahkawn mangoi chye ai ni hte, chyinghka sin ai ni gaw, Dawi hte shi a kasha Shawlumon hkangda ai hte maren, shanhte a Karai Kasang a amu hte jasan jaseng ai amu hpe, hkan galaw ma ai. ⁴⁶ Kaning rai nme law, moi Dawi hte Asap aprat hta, mahkawn mangoi ai ni hpe up ai wa hte, Karai Kasang hpe shakawn kungdawn na matu, mahkawn mangoi ga, rai nga ai. ⁴⁷ Bai, Zerubabela aprat hta e mung, Nehemia aprat hta e mung, Israela masha ni yawng, chyinghka sin ai ni hte mahkawn mangoi ai ni hpe, lani hte lani ang ai jarit jaw da mu ai: Lewi masha ni hte seng ai hpe shanhte san tawn da mu ai; Lewi masha ni mung, Arun a kashu kasha ni hte seng ai hpe, san tawn da mu ai.

¹ Dai shani e shanhte gaw Mawshe a laika hpe, mung masha ni a man e hti dan mu ai: dai laika hta, Ammon hte Moba masha ni gaw, Karai Kasang a shawa hpawng hta tutnawng lawm na ahkang n nga ai lam, mu hkrup nga ai; ² Kaning rai nme law, shanhte gaw Israela masha ni hpe muk ntsin hte n hkap tau la ai sha, shanhte hpe dagam na matu, Balam hpe grau mu ai. Raitimung, anhte a Karai Kasang gaw, dagam dala ga hpe shaman ai ga shatai wu ai. ³ Dai tara hpe na jang, shanhte gaw kayau kaya nga ai amyu masha ni hpe, Israela amyu masha ni hta na jahka kau mu ai. ⁴ Dai lam galaw timung, anhte a Karai Kasang a nta gawk ni sin ai hkinjawng Eliaship gaw, Tobia hte kanawn manang daw ai majaw, shi a matu gawk kaba lajang da wu ai: ⁵ Dai shara hta e shawng e shadung kumhpa ni, manam pyaw ai baw, hka wan ni, lahkawn la ai nai mam a htamshi hta htammi tawn da nna tara hte maren Lewi masha ni, mahkawn mangoi ai ni hte chyinghka sin ai ni hpe karan jaw mu ai; hkinjawng ni hte seng ai nwat kumhpa ni mung dai de tawn da ma ai. ⁶ Ngai chyawm gaw, dai aten a Yerusalem e n nga nngai; Babelon hkawhkam Artahkere hkaw dung ai sumshi lahkawng ning hta e hkawhkam kaw ngai shang nhtawm, aten tsawmra na wa yang, ngai ahkang hpyi nna, ⁷ Yerusalem de bai wa nngai; dai shaloi Eliashib gaw Karai Kasang a nta wing kata e Tobia matu, n shawp ai amu ngu ai, gawk lajang da ai lam, ngai na chye nngai. ⁸ Dai majaw ngai grai myit yawn nna, Tobia hte seng ai arung arai mahkra hpe gawk hta na htawm shapraw kau nhtawm, ⁹ gawk ni hpe jasan jaseng na matu hkangda nngai; dai hpang Karai Kasang a nta hte seng ai arai ni mahkra hte hpawn, shadung kumhpa ni, manam pyaw ai baw hpe, ngai bai shashawn da nngai. ¹⁰ Lewi masha ni hte seng ai daw mi shanhte hpe n jaw mu ai majaw, dawjau nga ai Lewi masha ni hte mahkawn mangoi ai ni langai hte langai gaw tinang a yi hkauna galaw sha nga ma ai, ngu nna ngai dum nngai. ¹¹ Dai re ai majaw, Karai Kasang a nta hpe hpa majaw kau da myit ta? ngu nna du salang ni hte ndang kalang hkat nhtawm, Lewi masha ni hpe jahpawng la nna, tinang a shara hta bai san da mu ai. ¹² Shaloi Yuda masha ni yawng, nai mam, tsabyi jahku, sau, htamshi hta htammi, sutdek hta sa bang da ma ai. ¹³ Bai, hkinjawng Shelemia, chyare wa Zadok hte Lewi masha Pedaia hte hpe, sutdek ntsa e up ai agyi ni tai na, ngai san da nngai: shanhte a lawu e Matania kashu, Zahkura kasha Hanan rai nga ai; shanhte gaw kangka re ai masha ni rai nga nna, kahpu kanau ni hpe karan jaw ai amu gun nga ma ai. ¹⁴ Nye a Karai Kasang e, dai amu majaw ngai hpe dum e; nye a Karai Kasang a nta matu mung, dai hte seng ai dawjau ai amu matu mung, ngai galaw ai mai kaja ai amu hpe hkum shaprai kau ya e. ¹⁵ Dai aten e, Yuda mung hta nkau mi gaw, laban nhtoi e tsabyi htumbyen kabye ai hte, hkauling lahkawn nna lawze htaw nga ai mung, tsabyi jahku tsabyi si lakum si hte dut rai amyu myu htaw let, laban nhtoi hta Yerusalem e shashawn ai mung, ngai mu nngai: shanhte ning rai shahpa dut sha ai nhtoi hta ngai shanhte hpe shadum shahprang nngai. ¹⁶ Dai hta kaga, Turu masha mung nga nga nna, shanhte gaw laban nhtoi hta e anga hte arai amyu myu shashawn nna, Yuda hte Yerusalem masha ni hpe dut jaw mu ai. ¹⁷ Shaloi ngai gaw, Laban nhtoi hpe awu asin di kau ai gaw, kaning re ai n shawp ai amu rai ta? ¹⁸ Ji wa ni dai lam galaw ai majaw, Karai Kasang gaw anhte a ntsa e mung, ndai mare ntsa mung, ndai ari ahpri shapraw da ai, n rai nga a ni? Ya nanhte nan laban nhtoi hpe awu asin di kau ai hte, Israela ntsa e grau nna pawt sindawng ai, du shangun nga myit hka, ngu nna Yuda agyi salang ni hpe daru mu ai. ¹⁹ Ya laban nhtoi du magang nna nrim rim rai yang, Yerusalem mare chyinghka ni hpe la da na hte, laban nhtoi garai n lai yang, n hpaw na lam, ngai hkangda nngai: laban nhtoi hta e, hpa lit mung n shashawn lu hkra, chyinghka ni hpe sin nga na matu, nye a ali ama ni nkau mi hpe ngai tawn da nngai. ²⁰ Shingrai hpaga ga ai ni hte rai amyu myu dut ai ni gaw, Yerusalem mare shinggan e langai lahkawng lang but nga ma ai. ²¹ Dai rai nna ngai gaw, Nanhte hpa majaw bunghku shinggan e but nga myit ta? ning rai bai galaw yang, ngai nanhte hpe rim ari jaw na made ai, ngu nna shanhte hpe daru kau nme ai majaw, dai aten kaw nna laban nhtoi hta n sa mat ma ai. ²² Bai, Lewi masha ni gaw, laban nhtoi hpe shachyoi shapra na matu tinang hkum hpe shachyoi shapra nna, chyinghka ni hpe sin nga na lam, ngai shanhte hpe hkangda nngai. Nye a Karai Kasang e, dai lam majaw mung ngai hpe dum ya e; na n-gaw nwai ai myit galu kaba ai hte maren, ngai hpe matsan dum la e law. ²³ Dai aten e, Ashdod, Ammon, Moba amyu shayi sha ni hpe hkungran la ai Yuda masha nkau mi hpe ngai mu nngai. ²⁴ Shanhte a kashu kasha ni gaw, Yuda ga n chye shaga nna, Ashdod ga chyen mi, shing n rai, tinang hte matut ai amyu masha ni a ga hpe kayau kaya tsun ma ai. ²⁵ Dai rai nna, ngai shanhte hpe daru kau ai hte dagam dala kau nme ai; nkau mi hpe ngai anu kayat nna, shanhte a kara mun ni hpe baw kau ya let, Nanhte gaw, nanhte a shayi sha ni hpe shanhte a shadang sha ni hte n ya sha nna, shanhte a shayi sha ni hpe nanhte a shadang sha ni matu mung, nanhte hkum nan a matu mung, n hpyi la na lam, nga nna Karai Kasang a amying gang let, shanhte hpe dagam shangun nngai. ²⁶ Hpa majaw nga yang, Israela hkawhkam Shawlumon gaw, dai lam galaw nna, shut nga ai, n rai ni? mung mi hte mung mi shi hte bung ai hkawhkam n nga ai; shi a Karai Kasang mung shi hpe tsawra nna, Israela amyu ting a ntsa e hkawhkam shatai nu ai; raitimung, shi nan, maigan num ni a majaw shut hpyit nga a hka. ²⁷ Dai rai nna, anhte gaw nanhte a ga madat ai hte, maigan num hkungran la nna, anhte a Karai Kasang a man e dai zawn re shut hpyit kaba shapraw mai na rai ni? ngu nna tsun mu ai. ²⁸ Ya hkinjawng agyi Eliasheb a kasha Yoiada a shadang sha langai mi gaw, Horoni masha Sanbalat a kahkri rai nga ai majaw, ngai shi hpe shachyut kau nngai. ²⁹ Nye a Karai Kasang e, shanhte gaw, hkinjawng aya hpe mung, hkinjawng hte Lewi masha ni a ga shaka hpe mung, awu asin di kau ma ai majaw, shanhte hpe mada yu u law. ³⁰ Shingrai ngai gaw, shanhte hpe, maigan amyu masha ni mahkra hta na jahka kau nna, hkinjawng ni hte Lewi masha ni hpe langai hte langai tinang hte seng ai amu hta san da nngai; ³¹ Ndat da ai aten hta hpun kumhpa hte shawng ngai ai nsi naisi hpe nawng na matu hkangda nngai. Nye a Karai Kasang e, chyeju hku ngai hpe dum e law.