NAHUM

NAHUM

¹ Ninewe mare hpe lakap nna tsun ai myihtoi ga: Elkosha masha Nahum a shingran laika da ndai rai nga ai. ² Yehowa gaw nsu nnawn myit rawng nna, matai htang ai Karai Kasang rai nga ai; Yehowa gaw n-yun bu let matai htang nga ai: Yehowa gaw, hkap daw ai ni hpe matai htang nga nna, hpyen ni a matu ari ahpri kyem da nga ai. ³ Yehowa gaw myit galu kaba nna, n-gun atsam ja nga ai: shi gaw mara kap ai wa hpe shalawt dat na n rai: Yehowa gaw bungsha hte laru marang hta yu wa nna, sumwi ni gaw shi a lagaw npu na ga nhpu rai nga ai. ⁴ Shi gaw nammukdara hpe daru nna, shahkyet kau wu ai; hka nu ni yawng hpe, hkyet kan mat shangun wu ai: Bashan hte Hkarmela bum gaw nyip nyui mat ma ai; Lebanon apu mung, hkraw mat nga ai. ⁵ Shi a majaw bum ni ashun awam nna, kawng ni byawng mat nga ai; lamu ga gaw, gaja wa, mungkan ga hte dai hta nga manga yawng, shi a man e shamu nga ma ai. ⁶ Shi sindawng kahtet yang, kadai tsap nga lu na rai ta? shi masin pawt bu yang, kadai hkap ban lu na rai ta? shi a pawt bu kahtet ai gaw, wan zawn ru bun nga nna, shi a lata hte lunghkrung ni, agrawp mat ai hkrum nga ai. ⁷ Yehowa gaw mai kaja nga ai; ru tsang ai aten hta e makawp maga shara, shi rai nga ai: shi hta shingbyi ai ni hpe shi matsing nga ai. ⁸ Shi gaw Ninewe mare hpe mawru ru ai hte, shamyit kau nna, hpyen ni hpe nsin sin ai shara de shachyut kau na ra ai. ⁹ Nanhte gaw Yehowa hpe hpa lam hpaji daw myit ta? shi gaw htum hkra shamyit kau na myit dai: sharu shatsang ai lam bai pru lu na n rai. ¹⁰ Kaning rai nme law, shanhte gaw ju hpun zawn shada gindun nga nna, tinang a lauhki hte nang nga ai majaw, yi hku chyahkraw zawn, shanhte htum hkra hkru mat na mara ai. ¹¹ Yehowa hpe n shawp ai hku maw ai hte, be lagya hpaji daw ai wa langai mi, nang kaw na paw pru wa sai. ¹² Yehowa ning nga ai: Shanhte gaw n-gun an nga nna, law nga timung, shanhte jahtum kau ai hkrum nna, shi gaw hkoi mat na ra ai. Ngai nang hpe zingri zingrat yu timung, htawmhpang de zingri zingrat sa na n rai. ¹³ Shi a kandang na a du hta na, ya ngai agrawp kau nna, nang hpe hkang ai sumri, dut kau na nngai. ¹⁴ Na a matu mara htawmhpang de matut lu na n rai, nga nna Yehowa na a lam hkangda sai: tawk ai sumla hte jaw ai sumla hpe, na a hpara ni a nta na, ngai jahtum kau na nngai: nang n hpru n mai rai nga ndai majaw, na a lup ngai galaw na nngai. ¹⁵ Mai kaja ai shiga hte, ngwi pyaw lam tsun shana ya ai wa a lagaw hpe, bum lang ntsa e mada yu mu! Yuda e, na a poi ni hpe galaw u; na ndat ga rap raw u: n hkru ai wa gaw htawmhpang e nang kaw ga sa wa lu na n rai: shi gaw nhtum nni shamyit kau ai hkrum wa sai.

¹ Sumdu ngu ai wa gaw, nang hpang de du ra ai; hpyendap hpe shangang u: nmaw lam hpe sin u, nshang shingkyit kyit u; n-gun dating da kan nga u. ² (Kaning rai nme law, Yehowa gaw Israela arawng sadang zawn, Yaku a arawng sadang hpe nhtang wa shangun nu ai: hpya lu hpya sha ai ni gaw, shi hpe kaman shadawng kau nna, shi a tsabyi ru a lakung lakying ni hpe, krum kau mu ai.) ³ Shi a share ninghkrin ni a n gang ni hkyeng nga nna, wa-ngan ni a hpun palawng hkyeng mang rai nga ai: hpyen hkyen ai shani e, hpyen leng ni gaw, gang hte htoi kabrim nna, marau hpun ri tu ni gaw, tu ala nga ai. ⁴ Hpyen leng ni gaw mare lam ni hta wu kadu nga nna, nmaw lam ni hta gat kahkrang nga ma ai; dai ni gaw wan shanan nsan ai rai nna, myihprap zawn gat gala nga ma ai. ⁵ Hkawhkam wa gaw shi a nden ja ai ni hpe dum nga timung, shanhte gaw gasat sa wa nga yang, ahtu kataw wa ma ai; mare bunghku de shanhte alawan gat sa timung, hpyen ni a langchyi sharawt nga la ai. ⁶ Hka lam chyinghka ni hpaw malang nga nna, hkawhkam htingnu gaw mat mat nga ai. ⁷ Hkang tawn da ai ga hte maren, Ninewe shayi sha gaw, singgu krin woi wa ai hkrum nna, shi a shingnan num ni, hkrudu zawn ngoi let, sinda adup ma ai. ⁸ Ninewe gaw moi kaw nna hka lawng zawn rai nga ai: ya chyawm gaw shanhte hprawng wa ma ai. Hkring mu, hkring mu, ngu nna jahtau timung, kadai n kayin yu ma ai. ⁹ Aja hpe kashun la mu. Gumhpraw hpe kashun la mu: mahkawng da ai sutgan hte, reng htum ai arung arai n ma hkraw nga ai. ¹⁰ Mare daju gaw hpa n rawng ai, akrin akraw, asan awan rai nga ai: shi a minla byaw mat nna, lahput gari ahkawk ai hte, nshang yawng gawngkya nna, myiman nlang hkrit ai hte chyang mat ma ai. ¹¹ Hkanghkyi nhkun hkanghkyi uram ni tam sha ai shara, hkanghkyi la hkanghkyi yi hkalung ni hte rau hkawm nga nna, dai ni hpe n jahkrat lu ai shara gaw, ya kanang rai nga a ta? ¹² Hkanghkyi la gaw, hkalung ni a matu amya sat kau nna hkanghkyi yi a matu magra sat let, shi a lungpu ni hpe shan hte, shi a nhkun ni hpe si mang ni hte, jahpring da wu ai. ¹³ Yu u, ngai nang hpe hkap daw nna, na a hpyen leng ni hpe wanhkut shatai na hte, nhtu gaw hkanghkyi uram ni hpe, shamyit kau na ra ai; nang amya sha lu na shan hpe, ga ntsa na ngai jahtum kau nna, na a kasa ni a nsen hpe htawmhpang de kadai na lu na n rai, nga nna Zaw nawng zaw wa up ai Yehowa tsun ai.

¹ Sai jahkaw ai mare gaw, dingnye lu u ga! masu magaw hte adip arip dai hta hpring chyat nga ai: shi tutnawng shan amya sha nga ai. ² Lasik hte kayat ai nsen, leng ni chyai ai nsen, gat chyang ai gumra, tanglawt ai hpyen leng ni a nsen law! ³ gumra jawn ai ni htim nna, tu gala ai nhtu hte, kabrim ala ai ri tu majaw sat kau hkrum ai ni law nga nna, si mang ni sumpum nga ma ai: si mang ni mana maga law nga ai majaw, lai wa ai ni dai hta ahtu kataw nga ma ai: ⁴ dai gaw, ahpraw tsawm nna, shaba wawt ai ni a madu jan ngu ai, shawa num a law la ai hpye ai amu majaw, rai nga ai; shi gaw shi a shawa num a amu hte maigan amyu ni hpe, de a shaba wawt ai amu hte baw sang ni hpe, dut kau nga ai. ⁵ Yu u, ngai nang hpe hkap daw nna, na a labu hpe, na myiman ntsa e malu kau nna, maigan amyu ni hpe, na a singgu krin, hkawhkam mungdan ni hpe, na a kaya kahpa, madun dan na nngai. ⁶ Nang hpe matsat shabat kabai bun nna, awu asin di kau nhtawm, masha ni a man e kumla shatai na nngai. ⁷ Shingrai nang hpe mu ai ni yawng, Ninewe mare marawng marang tai wa sahka; shi a matu kadai hkrap shabam na rai ta? shi a matu shalan shabran ai wa, ngai kanang tam na rai ta? nga nna tsun let nang kaw na hprawng na mara ai, nga nna Zaw nawng zaw wa up ai Yehowa tsun ai. ⁸ Nang gaw No-amon mare hta, grau kaja nga n ni? Dai mare gaw hka hkawng ni a lapran e de nga nna, hka nu ni, dai hpe shinggrup nga ai: de a kaduk, hka kaba ni rai nga nna, nammukdara gaw de a bunghku rai nga ai. ⁹ Hkusha hte Egutu mung gaw, galoi n htum ai, shi a atsam rai nga nna, Put hte Lubim, na a nrum ntau yan rai nga ma ai. ¹⁰ Raitimung, shi gaw rim la ai hkrum nna, bawngdung ai de sa wa ai: mare lam ni a mashe shagu hta, shi a ma kaji ni adit sat kau ai hkrum nna, arawng sadang lu ai ni a lam, shanhte hpaida da ai hte, daru magam rawng ai ni hpe, hpri sumri hte gyit ma ai. ¹¹ Nang mung mak mat nna, hprawng makoi na ndai: hpyen wa a lata na lawt lu hkra, hpyendap hpe tam na ndai. ¹² Na a hpyendap ni yawng, shawng myin ai asi si ai lakum hpun hte bung nga ai: dai hpe ashun yang, sha mayu ai wa a n-gup hta, asi hkrat bang na ra ai. ¹³ Yu u, na a ka-ang e nga ai masha ni gaw, num zawn rai mat masai; nang hpe hpyen ai ni shang lu na matu, na a mung chyinghka ni hpaw malang nga ai; na a htinggrang ni yawng hkru mat masai. ¹⁴ Hpyen wang tawn ai shani na matu hka ja tawn u; hpyendap ni hpe shangang u; ga kagam hta shang nna wut kabye u; wut kabaw ai nhkun hpe shangang u. ¹⁵ Dai shara hta nan, nang hkru kau ai hkrum na ndai; nhtu gaw nang hpe jahtum kau na ra ai; dai gaw hkakrit hkadawn zawn, nang hpe sha kau na ra ai; hkakrit hkadawn zawn, nang law wa u ga, dinggam-yaw zawn, nang htam wa u ga. ¹⁶ Na a hpaga ga ai ni hpe, sumsing lamu shagan ni zawn, nang shalaw timung, hkakrit hkadawn ni, dai hpe sha kau nna, pyen mat ma ai. ¹⁷ Na a du ni gaw dinggam-yaw zawn, na a hpyenbu ni gaw, dinggam-yaw wunawng zawn, rai nga ma ai: dai ni gaw kashung ai aten e nhpan hkan e kap nga timung, jan kahtet jang, pyen mat wa nna, kanang du ai hpe, kadai n chye nga ai. ¹⁸ Asuri hkawhkam wa e, na a sagu rem ni yup nga ma ai; na a nden ja ai ni gaw, ban sa nga ma ai: na a amyu masha ni gaw, bum lang hkan e bra nga nna, shanhte hpe shinggyin la ai wa n nga ai. ¹⁹ Nang hkrum ai hkala nba mai wa lu na, n rai: na a nma yak la nga ai; na a lam shiga na lu ai ni yawng, na a majaw lahpawk dum na mara ai: kaning rai nme law, nang tutnawng galaw ai n hkru ai amu hpe, n hkrum ai wa, kadai rai ta?