MIHKA

MIHKA

¹ Yuda hkawhkam ni Yohtam, Ahaza, Hezekia lakhtak e, Morasha masha Mihka gaw, Samari hte Yerusalem a lam lakap nna mu ai Yehowa a mungga, da ndai rai nga ai. ² Amyu baw ni yawng hte e, madat mara mu; dinghta ga hte, dai hta rawng marawng ni e, na la mu: Madu Yehowa ngu ai Madu gaw, shi a chyoi pra ai nawku Htingnu hta na, nanhte a lam sakse hkam ya u ga. ³ Kaning rai nme law, yu u, Yehowa gaw shi a shara na pru wa nna, yu wa yang, ga ntsa na tsaw ai kawng ni a ntsa e kabye hkawm na ra ai. ⁴ Bum ni gaw shi a npu e byawng mat nna, kadit ni gaw; wan makau na gitbaw hte, nhkap na lwi hkrat wa ai hka zawn, ga mahka wa na mara ai. ⁵ Ndai yawng hte gaw, Yaku tara tawt lai nna, Israela dap a yubak majaw, rai nga ai. Yaku a tara tawt lai ai lam, hpa rai ta? Samari mare, n rai ni? Yuda a tsaw ai kawng ni, kanang rai nga a ta? Yerusalem mare hta rai nga ai, n rai ni? ⁶ Dai re ai majaw, ngai gaw, Samari mare hpe pa ga na nlung sumpum hte, tsabyi sun galaw ai shara zawn shatai nna, de a nlung ni hpe kadit e sharu kau nhtawm, bunghku npawt ni hpe shadawng dan nngai. ⁷ Shi a tawk la ai sumla ni yawng agrawp kau ai hkrum nna, shawa num jahpu hte lu la ai arai ni, hkru mat na ra ai; shi a hpara sumla ni yawng hpe, ngai shaza kau na nngai: kaning rai nme law, dai ni hpe shawa num jahpu hte mahkawng da ai rai nna, shawa num jahpu bai tai na ra ai. ⁸ Ndai lam majaw, ngai sharung shayawt nna, hkrap shabam na nngai; hpun palawng raw kau nna, singgu krin hkawm na nngai; nam gwi zawn ngai gaw du nna, u gawla-uk zawn ngoi shaga na nngai. ⁹ Kaning rai nme law, shi hkrum ai hkala nba mai wa lu na, n rai; dai gaw, Yuda mung de pyi du rap nna, nye a amyu masha ni a chyinghka ngu ai, Yerusalem mare de, dep ra ai. ¹⁰ Ashi dai hpe Gat mare hta e hkum tsun myit; Ahku mare hta e, hkum hkrap myit; Bet-le-ahpra mare hta e, ga nhpu hta galu nga u; ¹¹ Shahpira mare hta shanu nga ai num e, singgu krin hte kaya kahpa hkrum let, rap sa wa u; Zanan mare hta shanu nga ai ni gaw, n pru gwi ma ai; Betezela hkrap shabam ai a majaw, nanhte a matu shingbyi shara n nga ai. ¹² Kaning rai nme law, Yehowa kaw na ari ahpri, Yerusalem mare chyinghka du hkra dep nga ai majaw, Marot kahtawng e shanu nga ai num gaw, shi kaning rai na lam, myit ung ang nga ai. ¹³ Lahkisha mare e shanu nga ai num e, laring gumra hte hpyen leng byau u: nang gaw Ziun shayi sha a yubak n-pawt rai nga ndai; Israela a tara tawt lai ai lam; nang kaw na pru nga ai. ¹⁴ Dai re ai majaw nang gaw, Gat mung na Moreshe mare de shabawn ai kumhpa jaw dat na ndai: Akziba mare nta ni gaw, Israela hkawhkam ni a hkalem hkalau ai lam rai na ra ai. ¹⁵ Maresha hta shanu nga ai num e, na ntsa e up na wa hpe, ngai naw shaga na nngai: Israela amyu hta hpung shingkang rawng ai ni gaw, Adulam ginlawng hku de du na mara ai. ¹⁶ Na a tsawra ai kashu kasha ni gaw, bawngdung hkrum ai majaw, na a kara hpe doi shakrin kau u: langda baw zawn, na a baw hpe shakrin kau u.

¹ Tinang a yupku ntsa e n kaja ai hku maw nna, n hkru ai lam galaw ai ni gaw, dingnye lu ma ai: shanhte gaw tinang a lata hta ahkang aya lu ai majaw, jahpawt nhtoi htoi jang, dai lam shabyin ma ai. ² Dai ni gaw, yi hkauna marit nna kashun la ma ai; nta hpe ra nna, gare la ma ai; kaja ai wa hte shi a dap hpe, madu hte shi a sali wunli hpe, adip arip di kau mu ai. ³ Dai rai nna, Yehowa ning nga ai: Yu u, ndai aten n hkru ai aten rai nga ai majaw, nanhte a du n lawt lu nna, gumrawng gumtawng let n hkawm lu hkra, ndai htinggaw a lam, n hkru ai hku ngai maw nga nngai. ⁴ Ndai aten e shanhte gaw, nanhte a lam ga shadawn hku tsun nna, Anhte htum mat saga ai; nye a amyu masha ni a sali wunli, shi galai kau nna, nye a lata na dawm la nu hka! Shi gaw htak mat ai ni hpe, anhte a yi hkauna ni karan jaw kau mu ai, nga nna yawn madai let shabam na mara ai. ⁵ Dai re ai majaw, Yehowa shawa hpawng hta, na a matu shadawn sumri hte ga dachyawk karan ai wa, n nga na sai. ⁶ Shanhte gaw, Myihtoi hkum htoi myit; ndai lam htoi mai na, n rai: shatan nhkan ga galoi n htum hkraw ai, nga nna jet ma ai. ⁷ Ataw, Yaku a dap e, Yehowa a Wenyi ban shadang kau ai hkrum a ni? ndai amu gaw shi a amu rai nga a ni? Nye a mungga gaw, malang ai lam hkan ai wa a matu, mai kaja nga ai, n rai ni? ⁸ Nye a amyu masha ni chyawm gaw, mani ma ni kaw nna, hpyen wa zawn rawt ma ai; nanhte gaw, hpyen n re ai, angwi apyaw lai hkawm ai ni a hpajawng hte kata palawng hpe, kashun la ya myit dai. ⁹ Nye amyu masha ni a gaida gaina ni hpe, tinang a ngwi pyaw ai nta ni hta nanhte shaden kau nna, shanhte a ma kaji ni kaw na nye a arawng sadang hpe tutnawng shaw la manu ai. ¹⁰ Rawt mu, sa wa manu: hten byak kaba hte jahten shabyak chye ai awu asin re ai amu majaw, ndai shara gaw, nanhte a ban sa shara, n rai. ¹¹ Tinang myit hkan nna, masu ga tsun ai wa gaw, Ngai nan tsabyi jahku hte chyaru lam, nang hpe myihtoi htoi na nngai, nga nna tsun yang, dai wa gaw, ndai amyu masha ni a myihtoi rai na ra ai. ¹² Yaku e, na amyu ting hpe, ngai teng teng shinggyin la na nngai; gaja wa, Israela hta naw ngam nga ai ni hpe, ngai jahpawng da na nngai: Bozra mung na sagu ni hte, tinang a udat shara na sagu hpung hpe zawn, ngai shanhte hpe hpawng nga shangun na nngai; masha law ai majaw wu kadu nga ai. ¹³ Lam hpaw ai wa gaw, shanhte a shawng e lung wa sai; shanhte ru kabang wa ai hte, chyinghka de du nna, dai hku pru wa masai: shanhte a hkawhkam wa gaw, shanhte a shawng e sa wa nna, Yehowa gaw shanhte a baw rai nga ai.

¹ Bai ngai gaw, Yaku a du ni hte, Israela dap na agyi salang ni e, madat mara mu: nanhte gaw tara malang ai hku chye mai ai, n rai myit ni? ² nanhte gaw kaja ai hpe ndawng nna, n kaja ai hpe ra myit dai: mung masha ni a hpyi hpe nanhte gaw kau nna, nrut nra ni hta kap ai shan hpe machyin kau myit dai; ³ nye amyu masha ni a hkumshan hpe pyi nanhte sha nna, shanhte a hpyi gaw kau ai hte, nrut nra ni hpe agrawp kau nhtawm dibu hta shadu na matu azat nna, sau di hta rawng ai shan zawn, shatai mu ai. ⁴ Dai shaloi e shanhte gaw Yehowa hpe hpyi jahtau timung, shi shanhte hpe n htan na ra ai: gaja wa, n hkru n hkra ai arawn alai hkan galaw ai hte maren, shi gaw dai aten e, shi a myiman, shanhte kaw na kayin makoi mat na ra ai. ⁵ Nye a amyu masha ni hpe lam shadam let, hkru hkru sha lu jang, Nang ngwi pyaw nga ndai, nga nna mung, n galaw daw ai wa hpe, Nang hpyen hkrum na ndai, nga nna tsun jahtau ai myihtoi ni a lam, Yehowa ning nga ai: ⁶ Nanhte shingran n mu lu ai shana du na ra ai; shaba n wawt lu hkra, nsin sin na ra ai; myihtoi ni a ntsa e jan shang nna, shani chyingtung e pyi, htat ai nsin shanhte hpe ka-up na ra ai. ⁷ Shingrai myihtoi ni kaya kahpa hkrum nna, nwawt ni mak mat na mara ai: gaja wa, Karai Kasang n htan ai majaw, shanhte nlang hte gaw, tinang a n-gup pat kau na mara ai. ⁸ Ngai chyawm gaw, Yaku hpe tinang a tara tawt lai ai lam, Israela hpe tinang a yubak lam, madun dan na matu, Yehowa a Wenyi jaw e, n-gun atsam, tara dara ai nyan hte hpung dagu hpring nga nngai. ⁹ Tara ding ai lam matsat kau nna, tengman ai lam yawng hpe shanut kau ai, Yaku a dap na du ai hte, Israela dap na agyi salang ni e, ndai lam madat mara mu. ¹⁰ Nanhte gaw Ziun hpe asai hte, Yerusalem mare hpe, n hkru n hkra ai hte de da myit dai. ¹¹ Du ni gaw mayun kumhpa matu tara dara ma ai; de a hkinjawng ni gaw shabrai lu hkra sha sharin ya ma ai; de a myihtoi ni gaw ma-un lu hkra sha, htoi ma ai: raitimung, shanhte gaw, Yehowa hpe shamyet shanat let, Yehowa gaw anhte a ka-ang e rai nga ai, n rai ni? anhte ari ahpri hpa hkrum na n rai, nga nna tsun ma ai. ¹² Dai re ai majaw, nanhte a jaw e, Ziun gaw yi hkauna zawn shawt kau ai hkrum nna, Yerusalem mare gaw marawng marang sumpum tai mat na hte, nawku Htingnu bum mung, nam mali na tsaw ai kawng ni zawn, tai mat na ra ai.

¹ Raitimung, hpang jahtum na prat hta e, Yehowa a nta bum gaw, bum pungding ni a ntsa e de nga nna, kawng ni a ntsa e grau tsaw nga ai hte, masha amyu ni dai de htaw bang na mara ai. ² Maigan amyu law law wa, Sa marit, Yehowa a bum, Yaku a Karai Kasang a Nta de lung wa saga: shi gaw shi a lam anhte hpe sharin ya nna, anhte gaw shi a lam hku hkan sa na ra ga ai, nga nna hkawm let tsun shajang na mara ai. Kaning rai nme law, Ziun bum na jep ai tara, Yerusalem mare na Yehowa a mungga, pru na ra ai: ³ shi gaw masha amyu law law a lapran e tara dawdan nna, tsan tsan e nga ai atsam rawng ai maigan amyu ni hpe jeyang na ra ai: shanhte gaw tinang a nhtu ni hpe, na jawn, tinang a ri ni hpe, nhkyau, dup kau na mara ai; amyu mi gaw amyu mi hpe shada hpyen gasat na n rai; shanhte gaw htawmhpang e hpyen majan sharin sana n rai. ⁴ Langai hte langai tinang a tsabyi ru hte, tinang a lakum hpun nhpang hkan e dung nga nna, shanhte hpe jahkrit shama na wa, kadai n nga ai: kaning rai nme law, Zaw nawng zaw wa up ai Yehowa a n-gup dai lam tsun nga ai. ⁵ Amyu baw ni yawng tinang hte seng ai hpara ni a amying gang let hkan hkawm ma ai; anhte chyawm gaw anhte a Karai Kasang Yehowa a amying gang let, htani htana prat dingsa hkawm nga saga ai. ⁶ Yehowa ning nga ai: Ngai gaw, dai shani e, lagaw hten ai ni hpe shinggyin la nna, gawt kau hkrum ai ni hte, ngai zingri zingrat yu ai ni hpe, hpawng shangun na nngai: ⁷ lagaw hten ai wa hpe, naw ngam ai amyu chyen mi, tsan tsan de shaden kau hkrum ai ni hpe, n-gun ja ai amyu mi, ngai shatai nna, Yehowa gaw Ziun bum ntsa e, ya kaw nna prat dingsa du hkra, shanhte hpe up na ra ai. ⁸ Sagu hpung a langchyi ngu ai, Ziun shayi sha a Ohpela bum e, nang up lu na ndai; gaja wa, shawoi na ahkang aya ngu ai, Yerusalem shayi sha a mungdan gaw, na a lata hta bai du na ra ai. ⁹ Ya nang hpa majaw jahtau shabam nga n ta? Nang hta hkawhkam n nga a ni? hpaji daw ya ai wa n nga ai majaw, shinggyim machyi ai num zawn, nang kawa machyi hkrum n ni? ¹⁰ Rai sa, Ziun shayi sha e, shinggyim machyi ai num zawn, kawa machyi hkrum nna, kasha shangai na n-gun dat u; kaning rai nme law, ya pyi ndai mare na nang pru nna, pa ga hta hkring nga nhtawm, Babelon mare du hkra sa wa na rin dai: dai mare hta nang mawai la ai hkrum na ndai; ndai yang e Yehowa gaw hpyen ni a lata na, nang hpe hkyehkrang la na ra ai. ¹¹ Ya e pyi, Ziun mare awu asin hkrum u ga, shi hta anhte a myi dik u ga, nga nna tsun ai maigan amyu ni law law, na a lam zuphpawng nga ma ai. ¹² Raitimung shanhte gaw, Yehowa myit mang ai hku n chye, shi hpaji daw ai lam hpe, n chye na ma ai: kaning rai nme law, shi gaw shanhte hpe hkauling zawn chyarang hta sumpum tawn mu ai. ¹³ Ziun shayi sha e, rawt nna kabye u; na a nrung hpe, hpri, na lahkru hpe, magri, ngai shatai nna, nang gaw amyu baw law law hpe dup mani kau na mu ai: shanhte a sutgan hpe Yehowa a matu, shanhte a arung arai hpe, ginding aga ting a Madu ngu ai wa a matu, ngai majai kau na nngai.

¹ Ya chyawm gaw, luksuk laba ni a kanu e, na a luksuk laba ni hpe hkyen tawn u: hpyen wa gaw anhte hpe wang tawn sai; shanhte gaw, Israela tara agyi wa a shabyi hpe, ri tawng hte kayat na mara ai. ² Raitimung, nang Betlehem-Ehprat e, Yuda mare mun sen hta nang kaji nga timung, Israela amyu hpe up na madu gaw, nye a matu, nang kaw na pru na ra ai: dai wa gaw, moi chyaloi nhkoi kaw nna paw pru ai wa rai nga ai. ³ Dai rai nna shinggyim machyi ai num, kasha shangai ai aten du hkra, shi shanhte hpe ap kau na ra ai: dai shaloi e naw ngam nga ai shi a kahpu kanau ni gaw, Israela kashu kasha ni hte rau, nhtang wa na mara ai. ⁴ Dai wa gaw tsap nga nna, Yehowa a n-gun hte mung, shi a Karai Kasang Yehowa mying ningsang a daru magam hte mung, shi a sagu hpung hpe bau nga na ra ai: shanhte mung grin nga na mara ai: kaning rai nme law, shi gaw, lamu ga htum hkra ya galu kaba wa na ra ai. ⁵ Dai wa gaw anhte a ngwi pyaw madu tai na ra ai. Asuri wa gaw anhte a mung hta shang nna, anhte a htingnu ni hpe kabye yang, shi hpe hkap daw na matu, sagu rem sanit hte agyi matsat, anhte kaw na pru na ra ai. ⁶ Shanhte gaw Asuri mung hte, Nimrod mung hpe, de a mashang du hkra, nhtu hte shaza kau na mara ai: Asuri wa gaw anhte a mung hta shang nna, anhte a lamu ga jarit hpe kabye yang, dai wa gaw shi a lata na, anhte hpe mawai la na ra ai. ⁷ Naw ngam nga ai Yaku a masha ni gaw, masha amyu baw ni law law a ka-ang e, Yehowa kaw na hkrat ai mari hte, masha matu n hkring, shinggyim masha myit n hkan ai, tsingdu ntsa e htu ai marang zawn, tai na mara ai. ⁸ Naw ngam nga ai Yaku a masha ni gaw, masha amyu baw ni law law a ka-ang e, maigan masha ni a man e, maling na ashu ashan ni hta, hkanghkyi, sagu hpung hta hkanghkyi uram zawn, tai na mara ai: shi ga sa wa yang, kadai n mawai la lu hkra, shi kabye nna amya sha kau na ra ai. ⁹ Nang hpe hpyen ai ni a ntsa e, na a lata shada nna, nang hpe gasat ai ni yawng, htum mat mu ga. ¹⁰ Dai shani e, ngai gaw, na a gumra ni hpe, na a ka-ang e, jahtum kau nna, na a leng ni hpe agrawp kau na nngai; ¹¹ na a mung na mare ni hpe ngai run kau nna, na a hpyendap ni yawng hpe hpya kau na nngai; ¹² nang kaw na nat shung ai ni hpe ngai jahtum kau nna, gumhpan ni mung, htawmhpang e nga lu na n rai: ¹³ na a tawk ai sumla ni hte, na a shadaw ni hpe, na a ka-ang na ngai jahtum kau nna, nang gaw htawmhpang e, na a lata hte galaw ai arai ni hpe, nawku lu na n rai; ¹⁴ na a Asherim shadaw ni hpe, na a ka-ang na ngai baw kau nna, na a mare ni hpe shaza kau na nngai. ¹⁵ Nye a ga n madat ai maigan amyu ni hpe, pawt sindawng kahtet ai hte ngai dawdan na nngai, nga nna Yehowa tsun ai.

¹ Rawt u, bum ni a man e dangrang hkat nna, kawng ni hpe na a nsen na shangun u, nga nna Yehowa ngai hpe tsun ai ga, ya na la mu. ² Bum ni hte dinggrin anga nga ai, lamu ga npawt nhpang ni e, Yehowa a dangrang hkat ai amu na la mu; kaning rai nme law, Yehowa gaw shi a amyu hte dangrang hkat ai lam nga nna, shi gaw Israela amyu hte ndang kalang hkat na ra ai. ³ Nye a amyu e, ngai nang hpe hpa galaw yu n ta? nang hpe kaning di jahki shaba yu n ta? ngai hpe htan ya e. ⁴ Ngai gaw Egutu mung na nang hpe shapraw la nna, mayam tai nga ai nta na hkrang la ni ai; Mawshe, Arun hte Miriam hpe, na a shawng e ngai shangun dat ni ai. ⁵ Nye a amyu e, Moba hkawhkam Balak hpaji daw ai hte, Beora kasha Balam shi hpe htan ai ga, dum u; Yehowa a dinghpring ai amu chye lu hkra, Shitim hte Gilgala lapran e byin ai lam hpe, dum u. ⁶ Ngai gaw Yehowa a man de, hpa kumhpa hte sit sa nna, tsaw htum ai Karai Kasang hpe nawku na rai ta? Wan nat hkungga hte, ladu hkrum ai dumsu kasha nawng ya let, shi a man de ngai du na rai i? ⁷ Yehowa gaw sagu la hkying mi hte, sau hka mun ni hpe, sharawng awng na rai kun? Ngai tawt lai ai amu matu, nye a kasha alat hpe, nye myit masin yubak a matu, nye nshang na hkrat ai ma hpe, gawng malai hkungga shatai na rai ni? ⁸ Masha wa e, mai kaja ai lam, shi nang hpe madun dan nit dai: dinghpring ai lam, tsawra matsan dum ai lam hte, na a Karai Kasang man e myit nem let hkan hkawm na lam hta kaga, Yehowa gaw nang hpe hpa hpyi a ta? ⁹ Yehowa a nsen gaw dai mare hpe shaga nna, zai byeng-ya rawng ai wa gaw, na a amying ningsang hpe hkrit hkungga nga ai: sharin ai shingna hpe mung, dai hpe hparan ai wa hpe mung, matsing mu. ¹⁰ Tara n lang ai wa a nta hta n tara ai sutgan hte, matsat shabat re ai dang bye kaji, naw nga a ni? ¹¹ N man ai joi hte, tingsan hta n teng ai joi si lang yang, ngai sanseng nga lu a ni? ¹² Kaning rai nme law, dai mare na sut su ai ni gaw kashun kashe majaw lu su ma ai; yu maya ni gaw masu ga tsun nna, shanhte a n-gup hta hkalem hkalau ai shinglet tu nga ai. ¹³ Dai re majaw ngai nang hpe hkala nba kaba hte jahpye nngai; na a yubak majaw, ngai nang hpe shingran katsi ai shara shatai nngai. ¹⁴ Nang shat sha timung, hkru kat lu na n rai; tut kaw si kyet na ndai: nang makoi da lu timung, lu su na n rai; nang la wa ai rai ni hpe, ngai lanep shatai na nngai. ¹⁵ Nang nli gat timung, mam dan lu na n rai; tsanlun si kabye timung, na hkum hpe sau chya lu na n rai; tsabyi si shup timung, tsabyi jahku lu lu na n rai. ¹⁶ Kaning rai nme law, Omri a matsun maroi ga hte, Ahab a nta na ni galaw ai amu mahkra hpe, nang hkan galaw nna, shanhte a hpaji daw ai lam hta, nanhte hkan nang nga myit dai; dai rai nna, ngai nang hpe shingran katsi ai shara shatai nna, mare masha ni gaw asawng asang shara tai na mara ai: nye amyu masha ni hkrum ai shatan nhkan, nanhte a ntsa e mara na ra ai.

¹ Ngai dingnye lu nngai; kaning rai nme law, myin ai namsi di la kau ai hte, tsabyi si nlim gut ai hpang hti nga ai wa zawn ngai rai nga nngai: sha na matu tsabyi si sumbaw langai mi n nga ai; shawng myin ai lakum si hpe ngai marit nga nngai. ² Dinghpring ai wa gaw, ga ntsa na htum mat sai; mung masha ni hta myit malang ai wa langai mi n nga sai; shanhte nlang asai jahkaw kau na gyam yu ma ai: langai hte langai tinang hpunau wa hpe, sumgawn hte hkan tam ma ai. ³ N hkru n hkra ai amu galaw na, shanhte a lata tsam mari shakut ma ai: du wa gaw kumhpa hpyi nga ai; tara agyi wa gaw, mayun kumhpa sha nga ai; aya kaba lu ai wa gaw, shi myit magaw ai lam shapraw dan nga ai: shingrai shanhte gaw myit langai sha hte galaw ma ai. ⁴ Shanhte hta grau kaja ai wa gaw ju hpun zawn rai nga ai; myit grau malang ai wa gaw ju nhpan hta grau yak nga ai; na a sin langa ni mu ai nhtoi ngu ai, nang ari ahpri hkrum na nhtoi, ya du ra ai: ya shanhte gaw nhtum nni hkrum na mara ai. ⁵ Htingbu htingpyen ni hpe, hkum kam myit; makyin jinghku ni hpe hkum hpa myit; tsawra madu jan a man e pyi, na n gup pat kau u: ⁶ kaning rai nme law, kasha gaw kawa a arawng jahpoi nga ai; shayi sha gaw kanu hpe, kanam gaw shi a kamoi hpe hkap daw nga ai; tinang hpe hpyen ai ni gaw, tinang a nta na ni rai nga ma ai. ⁷ Ngai chyawm gaw, Yehowa hpe a mada nga na nngai; ngai e hkyehkrang la ai Karai Kasang hpe, ngai ala nga na nngai: nye a Karai Kasang gaw, ngai hpe madat na ra ai. ⁸ Hpyen wa e, nye a lam hkum yu kabu et; ngai kataw timung, bai rawt na nngai; ngai nsin kata e dung nga timung, Yehowa nye a nhtoi rai na ra ai. ⁹ Ngai gaw Yehowa hpe shut nngai majaw, shi nye a amu a lam tsun nna, ngai hpe dawdan ai shani du hkra, shi a pawt sindawng ai hpe, ngai hkam mana na nngai: shi ngai hpe nhtoi de bai shapraw nna, shi a dinghpring ai lam ngai mu mada na nngai. ¹⁰ Dai shaloi ngai hpe hpyen ai wa dai lam mu mada nna, Na a Karai Kasang Yehowa kanang nga a ta? nga nna ngai hpe tsun ai num gaw, kaya kahpa hkrum na ra ai: nye a myi shi hta dik na ra ai; shi gaw mare lam a hkumpup zawn, kabye kau ai hkrum na ra ai. ¹¹ Na a mare bunghku ni de da ai aten du na ra ai; dai aten e na a lamu ga jarit maden jat wa na ra ai. ¹² Dai shani e, Asuri mung hte Egutu mare ni hta na mung, Egutu mung hte Hka nu lapran hkan na mung, nammukdara kaw nna, nammukdara du hkra, bum mi kaw nna bum mi du hkra, bra nga ai ni gaw, nang hpang de du na mara ai. ¹³ Raitimung, dai garai n byin yang, dai mungdan gaw, mung masha ni hkan nang ai arawn alai majaw, shingran katsi ai shara tai na ra ai. ¹⁴ Hkarmela bum na maling dinggram e shi hkrai shanu nga ai, na a amyu ngu ai, sali wunli sagu hpung hpe, na a dawhkrawng hte rem u: Bashan hte Gilead mung na udat shara hta moi shawng e sha lu ai zawn, shanhte bai sha lu mu ga. ¹⁵ Egutu mung na pru wa ai shani e, nang mu ai hte maren, ngai shanhte hpe mauhpa amu bai madun na nngai. ¹⁶ Maigan amyu ni dai lam mu mada nna, tinang a daru magam hpa n re ai dum let, kaya mat na mara ai, shanhte gaw tinang a n-gup pat kau na mara ai; na mung lahpang mat na mara ai. ¹⁷ Shanhte gaw lapu zawn ga nhpu mata na mara ai: ga ntsa gumrawt hkawm ai baw zawn, tinang a nhkun de na hkrit gari let pru na mara ai: shanhte gaw anhte a Karai Kasang Yehowa hpang de hkrit gari let du nna, na a majaw hkrit kamyin nga na mara ai. ¹⁸ Nang hte bung ai Karai Kasang kadai rai nga a ta? shi gaw, naw ngam nga ai, shi a sali wunli masha ni a yubak hpe raw dat kau ya nna, shanhte a tara tawt lai ai hpe, shalai kau dat nga ai: shi gaw tsawra matsan dum ai lam hta sharawng awng nga ai majaw, tutnawng pawt nga ai n rai. ¹⁹ Shi anhte hpe matsan bai dum na ra ai; anhte a shut hpyit ai mara hpe, shi kabye lai kau nna, anhte a yubak mahkra hpe nammukdara a sung htum ai de, kabai kau na ra ai. ²⁰ Moi chyaloi nhkoi kaw nna, anhte a ji wa ni hpe dagam da ai hte maren, nang gaw, Yaku hta kangka re ai lam. Abraham hta tsawra matsan dum ai lam, naw shadik da na ndai.