MALAHKI

MALAHKI

¹ Malahki a n-gup hte, Israela matu jaw dat ai, Yehowa a shingran mungga, da ndai rai nga ai: ² Ngai nanhte hpe tsawra ni ai, nga nna Yehowa tsun ai. Nanhte mahtang, Nang anhte hpe kaning rai tsawra n ta? nga nna san myit dai. Ataw, Esaw gaw Yaku a kahpu, n rai ni? raitimung ngai Yaku hpe tsawra nngai: ³ Esaw hpe ngai ndawng nna, shi nga ai bum ni hpe katsi katsang shara shatai ai hte, shi a sali wunli hpe, zaibru jang na nam gwi ni hpe, ap kau ya ni ai, nga nna Yehowa tsun ai. ⁴ Edom masha ni gaw, Anhte hten byak hkrum timung, anhte bai wa nna, akrin akraw re ai shara ni hpe bai dè da na ga ai, nga nna tsun ma timung, Zaw nawng zaw wa up ai Yehowa ning nga ai, Shanhta dè da timung, ngai run kau na nngai: masha ni gaw shanhte hpe, Tara n lang ai mungdan, Yehowa tutnawng pawt nga ai amyu, ngu nna shamying na maru ai. ⁵ Dai amu hpe nanhte mu mada nna, Yehowa gaw Israela a lamu ga jarit lai hkra, galu kaba nga u ga, nga nna tsun na myit dai. ⁶ Kasha gaw kawa hpe, mayam gaw madu hpe, hkungga ga ai: ngai kawa rai yang, ngai hpe hkungga ai, kanang? Ngai madu rai yang, ngai hpe hkrit ai, kanang? Nga nna Zaw nawng zaw wa up ai Yehowa gaw, nye a amying hpe nhpu nru di ai hkinjawng ni hpe, san nga ai. Nanhte mahtang, Na a amying hpe anhte kaning rai nhpu nru di ga ta? nga nna bai htan myit dai. ⁷ Nanhte gaw, n san n seng ai muk, nye a tawn hkungri ntsa e nawng ya myit hka; raitimung nanhte gaw, Anhte nang hpe kaning rai awu asin di ga ta? nga nna san myit dai. Yehowa a sha ku gaw hpa lam n la ai, nga nna mung; ⁸ myi hten ai shagu hkungga hpe nawng ya yang, dai gaw yubak n rai, nga nna mung; lagaw hten ai hte machyi ai shagu hkungga hpe nawng ya yang, dai mung yubak n rai, nga nna tsun ai majaw, Yehowa hpe awu asin di ai, rai nga ai. Ning re ai kumhpa na a munggyi wa hpe sak ya u; shi nang hpe yu ra na, rai ni? na a myiman tau na, rai ni? nga nna Zaw nawng zaw wa up ai Yehowa tsun ai. ⁹ Ya chyawm gaw, Karai Kasang anhte hpe chyeju madun u ga, shi a man e akyu hpyi mu: ndai amu gaw, nanhte a lata na amu rai nga ai: shi nanhte a myiman tau lu na rai ni? nga nna Zaw nawng zaw wa up ai Yehowa tsun ai. ¹⁰ Nye a tawn hkungri ntsa e, awan kaman sha n shachyi kau myit ga, nye a nta na chyinghka ni hpe la da mayu ai wa, kadai? Nanhte hpe ngai n ra nngai; nanhte a lata na shagu hkungga hpe ngai n hkap la na nngai, nga nna Zaw nawng zaw wa up ai Yehowa tsun ai. ¹¹ Kaning rai nme law, nye a amying ningsang gaw, jan pru maga kaw nna jan shang maga du hkra, maigan amyu ni hta galu kaba nga na ra ai: nye a amying ningsang, maigan amyu ni hta galu kaba nga ai majaw, nye a amying matu, shara shagu hta, manam pyaw ai baw hte sanseng ai shagu hkungga hpe, nat nawng ya na mara ai, nga nna Zaw nawng zaw wa up ai Yehowa tsun ai. ¹² Nanhte mahtang, Yehowa a sha ku awu asin rai nga nna, mara da ai lusha kumhpa gaw, hpa lam n la ai, nga nna tsun myit dai majaw, dai amying hpe awu asin di kau manu ai. ¹³ Bai nanhte gaw, Ataw, dai gaw gawng shate ai hkrai rai nga ai, nga nna tsun let jahpoi myit dai, nga nna Zaw nawng zaw wa up ai Yehowa tsun ai: kashun kashe la ai hkungga, lagaw hten ai hte myi hten ai hkungga, nanhte dun sa nna, dai zawn re ai baw nanhte nawng ya myit hka: dai hpe nanhte a lata na ngai hkap la na, rai ni? nga nna Yehowa tsun ai. ¹⁴ Ga ndat tawn da nhtawm, tinang a sagu hpung hta sagu la rawng ninglen, hkalem nna, dai Madu hpe ra rawng ai hkungga nawng ya ai wa gaw, dingnye lu u ga: kaning rai nme law, ngai gaw galu kaba ai Hkawhkam rai nga nna, nye a amying ningsang gaw, maigan amyu ni hta hkrithpa amying rai nga ai, nga nna Zaw nawng zaw wa up ai Yehowa tsun ai.

¹ Ya chyawm gaw, hkinjawng ni e, ndai hkangda ai ga gaw, nanhte a matu rai nga ai. ² Nye a amying hpe shagrau shatsaw na matu, nanhte n madat nna, n matsing hkraw myit yang gaw, ngai nanhte a ntsa de dagam dala tsin-yam dat dat nna, nanhte hpe shaman ai a malai dingnye shabyin na nngai: gaja wa, shanhte n matsing hkraw ai majaw, ya e pyi shabyin ni ai, nga nna Zaw nawng zaw wa up ai Yehowa tsun ai. ³ Yu u, nanhte a nli hpe ngai jahten na nngai; nanhte a poi hkungga ahkyi hpe nanhte a myiman ntsa e ngai gat bun nna, dai hkyi hte rau, nanhte hpe shapraw na mara ai. ⁴ Shingrai nye a ga shaka, Lewi amyu hta grin wa lu na matu, ndai hkangda ai ga ngai nanhte hpang de shangun dat nngai gaw, nanhte chye lu na marin dai, nga nna Zaw nawng zaw wa up ai Yehowa tsun ai. ⁵ Ngai shi hte tawn da ai ga shaka gaw, asak hte ngwi pyaw lam rai nga ai; ngai hpe hkrit hkungga na matu, ngai shi hpe dai mungga jaw nngai: shi gaw ngai hpe hkrit hkungga nna, nye a amying a man e agam nga ai. ⁶ Shi a shinglet tengman ai tara tsun nga nna, shi a n-gup hta hkalem hkalau ai ga n rawng nga ai: ngwi pyaw ai hte malang ai hku hkan let, shi ngai hte rau hkawm nga nna, masha law law hpe shut hpyit lam kaw na, kayin shangun mu ai. ⁷ Kaning rai nme law, hkinjawng wa gaw, Zaw nawng zaw wa up ai Yehowa a kasa rai nga ai majaw, shi a nten ni chye chyang ai lam kyem da nna, masha ni gaw shi a n-gup hta na tara tam lu na mara ai. ⁸ Nanhte chyawm gaw lam dam manit dai; nanhte gaw masha law law hpe, tara lam hta kataw shangun manu ai: Lewi amyu hte tawn da ai ga shaka hpe, nanhte run kau manu ai, nga nna Zaw nawng zaw wa up ai Yehowa tsun ai. ⁹ Dai rai nna, nanhte gaw nye a lam n hkan ai hte, tara dara yang, myiman tau ai majaw, amyu masha ni mahkra a man e, ngai nanhte hpe nhpu nru di nna, shayuk kau na nngai. ¹⁰ Anhte yawng kawa langai sha lu ga ai, n rai ni? anhte hpe hpan da ai Karai Kasang, langai sha rai nga ai, n rai ni? Dai rai yang, anhte hpunau shada da, hpa majaw hkalem hkalau di nna, ji wa ni hte tawn da ai ga shaka hpe run kau ga ta? ¹¹ Yuda amyu gaw hkalem hkalau lam hkan nna, Israela hte Yerusalem mare hta matsat shabat amu byin pru nga ai: kaning rai nme law, Yuda amyu gaw, Yehowa tsawra ai chyoi pra ai shara hpe, awu asin di kau nna, maigan hpara a shayi sha hpe hkungran la nu ai. ¹² Shingrai galaw ai wa, sara hte sape hpe raitimung, Zaw nawng zaw wa up ai Yehowa hpang de hkungga la sa ai wa hpe raitimung, Yehowa gaw Yaku a sum ni hta na jahtum kau na ra ai. ¹³ Bai nanhte galaw ai lam, ndai rai nga ai: nanhte gaw Yehowa a tawn hkungri hpe myi prwi, hkrapngu hkrapngoi nna, madai ai hte ka-up manu ai: dai majaw shi gaw dai kumhpa hpe n nawn nna, nanhte a lata na kabu gara ai myit hte, n hkap la wu ai. ¹⁴ Raitimung nanhte gaw, Hpa majaw rai ta? nga nna san myit dai. Yehowa gaw nang hte, na brang ram prat na madu jan a lapran e, sakse tai nga ai majaw, rai nga ai: shi gaw na a kanawn manang hte, nang ga sadi tawn da ai madu jan rai nga timung, nang shi hpe hkalem hkalau ai hku galaw nu ai. ¹⁵ Karai Wa gaw, Wenyi naw ngam nga timung, langai sha hpe hpan da wu ai, n rai ni? Hpa majaw langai sha hpan da a ta? nga yang, Karai Kasang hte ging dan ai amyu hpe tam nna, hpan da nu ai. Dai re ai majaw, nanhte gaw tinang a wenyi hpe sadi nna, brang ram prat na madu jan hpe hkalem hkalau ai hku, hkum di myit. ¹⁶ Num jahka kau ai lam hpe, ngai ndawng nngai, nga nna Israela Karai Kasang Yehowa tsun ai; kashun kashe amu hpe, tinang a hpun palawng hte ka-up ai wa hpe mung, ngai ndawng nngai, nga nna Zaw nawng zaw wa up ai Yehowa tsun ai: dai re ai majaw tinang a wenyi hpe sadi nga mu; hkalem hkalau ai amu hkum galaw myit. ¹⁷ Nanhte gaw Yehowa hpe na jin hkra, nanhte a ga hte shatsang myit dai. Raitimung nanhte gaw, Shi hpe kaning rai shatsang ga ta? nga nna san myit dai. Nanhte gaw, Yubak galaw ai ni yawng, Yehowa man e mai kaja nga ma ai; shi gaw shanhte hta sharawng awng nga ai: tara malang ai hku hkan ai Karai Kasang gaw, kanang nga a ta? nga nna tsun ai gaw, shi hpe shatsang ai, rai nga ai.

¹ Yu u, nye a Kasa hpe ngai shangun dat nngai; shi gaw nye a man e, lam lajang na ra ai: nanhte hkan tam ai Madu gaw, shi a nawku Htingnu de akajawng sha du na ra ai; nanhte marit nga ai ga shaka a Kasa gaw, yu u, shi du ra ai, nga nna Zaw nawng zaw wa up ai Yehowa tsun ai. ² Raitimung, shi du ai nhtoi hpe, kadai hkam sharang lu na rai ta? shi paw pru yang, kadai tsap nga lu na rai ta? kaning rai nme law, shi gaw janghkam wa a wan hte, rai hkrut ai wa a sabya zawn, rai nga ai: ³ shi gaw janghkam wa zawn dung let, gumhpraw hpe jasan jaseng nna, jen yu ai zawn, Lewi kashu kasha ni hpe jen yu nna, aja hte gumhpraw zawn, shanhte hpe jet shangun na ra ai: shingrai shanhte gaw dinghpring ai hku hkan nna, Yehowa hpe kumhpa nawng ya na mara ai. ⁴ Dai shaloi e, Yuda hte Yerusalem masha ni a kumhpa gaw, moi chyaloi nhkoi na aten e zawn, Yehowa a matu ra sharawng hpa tai na ra ai. ⁵ Nanhte hpe tara dara na matu, ngai ni wa nna, shaba wawt ai ni, numshaw lashaw ai ni, masu lam dagam ai ni, nchyang shabrai n jaw ai zingri ai ni, gaida gaina hte chyahkrai nmai ni hpe zingri ai ni, malet nhprang manam hpe maw sha map sha ai ni hte, ngai hpe n hkrit hkungga ai ni a man e, larau ladau re ai sakse ngai tai na nngai, nga nna Zaw nawng zaw wa up ai Yehowa tsun ai. ⁶ Kaning rai nme law, ngai Yehowa gaw galai mat lu ai, n rai: dai re ai majaw, Yaku a kashu kasha ni e, nanhte htum mat ai, n rai. ⁷ Nanhte gaw, nji nwa ni a prat kaw nna, nye a matsun maroi ga n hkan ai, kau da manu ai. Ngai hpang de nhtang wa marit, shaloi ngai nanhte hpang de nhtang wa na nngai, nga nna Zaw nawng zaw wa up ai Yehowa tsun ai. Nanhte mahtang, Anhte kaning rai nhtang wa na rai ta? nga nna tsun myit dai. ⁸ Shinggyim masha gaw, Karai Kasang hpe, hpya lu hpya sha mai a ni? nanhte mahtang ngai hpe hpya lu hpya sha ma ni ai. Raitimung nanhte gaw, Anhte nang hpe kaning rai hpya lu hpya sha ga ta? nga nna tsun myit dai. Htamshi hta htammi hte, nwat kumhpa n jaw ai majaw, ngai hpe hpya lu hpya sha ai, rai nga ai. ⁹ Ndai amyu ting, ningrai ngai hpe hpya lu hpya sha ai majaw, nanhte dagam dala hkrum myit dai. ¹⁰ Nye a nta hta lusha rawng nga na matu, htamshi hta htammi yawng, nye a sutdek hta bang da mu: shingrai ngai gaw, sumsing lamu hkuwawt hku hpaw nna, nanhte n dang hkap la lu hkra, nanhte a ntsa e shaman ai chyeju ru bun na, n ru bun na gaw, ya dai lam ngai hpe chyam yu mi, nga nna Zaw nawng zaw wa up ai Yehowa tsun ai. ¹¹ Ngai gaw kawa sha ai dinggam-yaw hpe, nanhte a matu daru kau nna, dai gaw nanhte a lamu ga na nsi naisi hpe, sha kau lu na, n rai; nanhte a tsabyi ru ni mung, aten garai n du yang, asi run mat na, n rai, nga nna Zaw nawng zaw wa up ai Yehowa tsun ai. ¹² Maigan amyu ni yawng, nanhte hpe shagrau sha-a na mara ai: kaning rai nme law, nanhte a mungdan, ra sharawng mai ai mungdan tai na ra ai, nga nna Zaw nawng zaw wa up ai Yehowa tsun ai. ¹³ Nanhte gaw ngai hpe sha-ang let, sheng mareng ga tsun myit dai. Raitimung nanhte gaw, Anhte nang hpe hpa tsun ga ta? nga nna san myit dai. ¹⁴ Nanhte gaw, Karai Kasang hpe dawjau na, be be kaman sha rai nga ai; shi a matsun maroi ga hkan nang nna, sharung shayawt hpun palawng bu hpun let, Zaw nawng zaw wa up ai Yehowa man e hkawm nga ai gaw, hpa akyu pru a ta? ¹⁵ Ya e pyi, gumrawng gumtawng ai ni hpe, anhte sha-a nga ga ai; gaja wa, tara n lang ai amu galaw ai ni, galu kaba wa ma ai; shanhte Karai Kasang hpe chyam yu timung, lawt lu ma ai, nga nna tsun manit dai. ¹⁶ Shaloi Yehowa hpe hkrit hkungga ai ni gaw, shada da tsun nga ma ai; Yehowa mung madat nna, na la nga ai: shingrai Yehowa hpe hkrit hkungga nna, shi a amying hpe dum ai ni matsing na matu, shi a man e jahpan laika ka da nga ai. ¹⁷ Dai hta n-ga, Dai amu hpe ngai shabyin ai shani hta, shanhte gaw nye a masha ni hte nye a sutgan tai na mara ai; kawa a amu gunhpai ai kasha hpe kawa lahpawt ai zawn, ngai shanhte hpe lahpawt na nngai. ¹⁸ Dai shaloi e nanhte gaw myit kayin nna, dinghpring ai wa hte, tara n lang ai wa hpe, Karai Kasang hpe dawjau ai wa hte n daw n jau ai wa hpe, chye ginhka lu na marin dai, nga nna Zaw nawng zaw wa up ai Yehowa tsun ai.

¹ Kaning rai nme law, dai nhtoi du ra ai; dai gaw wanhtung zawn grung kahtet nga ai: gumrawng gumtawng ai ni hte, tara n lang ai amu galaw ai ni yawng, yi hku ndu tai na mara ai: du ra ai nhtoi gaw, npawt ndung n ngam hkra, shanhte hpe hkru kau na ra ai, nga nna Zaw nawng zaw wa up ai Yehowa tsun ai. ² Nye a amying hpe hkrit hkungga ai ni a nta e chyawm gaw, dinghpring shangun ai ajan gaw, shamai shatsai ai singkaw hte, du pru na ra ai: nanhte mung pru wa nna, ulawng na dumsu kasha zawn, gumtawng na marin dai. ³ Tara n lang ai ni hpe mung, nanhte kabye dip kau na marin dai: kaning rai nme law, ngai shabyin ai nhtoi hta e, shanhte gaw, nanhte a lagaw lahpan npu e, wan dap zawn tai na mara ai, nga nna Zaw nawng zaw wa up ai Yehowa tsun ai. ⁴ Israela amyu ting a matu, Horeb bum e, nye a shangun ma Mawshe hpe, ngai hkangda ai jep ai tara, matsun maroi ga hte tara dara ai ga ni hpe, adum nga mu. ⁵ Yu mu, galu kaba ai hte, hkrithpa re ai, Yehowa a nhtoi garai n du yang, ngai nanhte hpang de myihtoi Elia hpe shangun dat na nngai. ⁶ Ngai sa nna, mungkan ga hpe dagam dala hte n shachyum hkra, shi gaw kawa ni a myit masin hpe kasha ni hpang de, kasha ni a myit masin hpe tinang a kaji kawa ni hpang de, kayin shangun na ra ai, nga ai.