YAWSHU

YAWSHU

¹ Yehowa a shangun kasa Mawshe si mat ai hpang e, Yehowa gaw Mawshe a hkringmang Nun a kasha Yawshu hpe, ² Nye a shangun kasa Mawshe si mat sai; dai rai nna rawt u, nang hte nang kaw na nadai masha nalang hte hte, dai Yawdan hka rap mu; Israela kashu kasha ni hpe ngai jaw ai mungdan de shang wa mu. ³ Mawshe hpe ngai ndat da ai hte maren, nang hte kabye du madu, ngai nanhte hpe jaw made ga. ⁴ Nam mali hte wora Lebanon bum garet nna, hka nu kaba ngu ai Uhprat hka htep, Hiti mung ting hte Jan shang maga Nammukdara kaba du hkra nanhte a lamu ga jarit rai na ra ai. ⁵ Nang naw hkrung nga dingsa nang hpe kadai daw lu na n rai: Mawshe hte rau ngai nga nga ai zawn, nang hte rau ngai nga nga na ring ngai; ngai nang hpe kau da na n rai, nang hpe kau rap rai na n rai. ⁶ N-gun dating u, myit nden shaja u kaji kawa ni e jaw na ngu nna shanhte hpe dagam da ai mungdan, ndai masha ni hpe madu sha shangun na rai ndai. ⁷ Dai rai nna, nye a shangun kasa Mawshe nang hpe tara hkangda ai hte maren hkan nang lu hkra, n-gun dating nna, myit nden ja ja shaja u; nang galaw ai lam magup hta myit ai kaw du hkra, dai tara lam hta hkan nang nga u; hkra de pai de hkum yit et. ⁸ Ndai tara laika hpe na nten hta na dawm mai na n rai; dai hta ka da mada mahkra nang hkan nang lu n ga, dai hpe shani shana hti aru yu nga u; dai rai jang, nang maw ai lam byin lu nna, nang myit ai kaw du na ra ai. ⁹ Nang hpe ngai hkang sade ai, n rai ni? n-gun dating nna myit nden shaja u; hkum hkrit et, myit hkum hten et: kaning rai nme law, nang sa wa ai lam magup hta na a Karai Kasang Yehowa rau rai nga ai, ngu nna tsun wu ai. ¹⁰ Shaoi Yawshu shawa masha ni a du ni hpe shaga la nna ning ngu hkang dat mu ai: ¹¹ Dai dap ting de ga sa wa nna, nanhte a Karai Kasang Yehowa nanhte hpe madu sha shangun ai mungdan de shang wa na matu, ya masum ya e ndai Yawdan hka rap na re ai majaw sha jarit jahting magang na lam amyu masha ni hpe tsun masu, ngu mu ai. ¹² Bai Yawshu gaw, Rubin amyu, Gad amyu hte Manasha amyu chyen mi hpe shaga la nna, ¹³ Yehowa a shangun kasa Mawshe ning nga nanhte hpe hkangda sai: Nanhte a Karai Kasang Yehowa nanhte hpe ban sa shagun nna ndai mungdan madun manit dai: ¹⁴ nanhte a mdau jan kasha ni hpe yamnga ni hpe, Yawdan hka sinpraw hkran, Mawshe nanhte hpe jaw da ai mungdan hta tawn da na rai myit dai: ¹⁵ Yehowa nanhte hpe ban sa shangun ai zawn, nanhte a hpunau ni hpe ban sa shangun nna, shanhte mung, nanhte a Karai Kasang Yehowa jaw ai mungdan madu la lu ai du hkra nanhte hta na nden ja ai share ni yawng, ri nhtu lang let, nanhte a hpunau ni hte rua rap sa nna karum la lu na rai myit dai, nga da ai ga hpe dum u: dai ngut jang she, Yehowa a shangun kasa Mawshe jaw da ai Yawdan hka sinpraw hkran, nanhte madu lu ai mungdan de bai wa shang sha lu na rai myit dai, ngu nna tsun mu ai. ¹⁶ Shanhte mung, Nang madu tsun matsun anhte galaw na ga ai; shangun dat ai shara magup de anhte sa na ga ai: ¹⁷ Lam shagu hta Mawshe a ga madat ai zawn, na a ga mung madat na ra ai: na a Karai Kasang Yehowa Mawshe hte rau nga ai zawn, nang hte rau nga nga u ga. ¹⁸ Na a mungga hpe tawt nna hkangda mada hpe n madat ai wa kadai raitimung sat kau ai hkrum lu na rai nga ai: dai rai nna n-gun dating u, myit nden shaja u, ngu nna Yawshu hpe htan mu ai.

¹ Shaloi Nun a kasha Yawshu gaw Shitim shara kaw na kin-yu lahkawng hpe, Ndai mung hte Yerihko mare hpe sa yu yu ma su, ngu nna lagyim shangun dat wu ai. Shan gaw sa wa nna, Rahab ngu ai Shawa num a nta de shang nga nga ai. ² Shaloi Yerihko hkawhkam wa hpe, Ndai mung hpe kin-yu yu na nga, Israela masha dai na ndai mare de shang wa sai, ngu nna sa shana ya mu ai. ³ Dai rai nna, Yerihko hkawhkam gaw Rahab hpang de shangun nna, Nang kaw sa nna, na nta de shang wa ai masha hpe shapraw ya mi: mungdan ting hpe kin-yu yu na nga, shan gaw sa ai rai ma ai, ngu nna hkang dat wu ai. ⁴ Dai numsha chyawm gaw, dai yan hpe woi makoi da nna, Ngai kaw du gaw du ma ai, raitimung kanang na sa ma ai gaw ngai n chye nngai; ⁵ jan du wa nna chyinghka la na aten rai jang, shan pru mat wa masai; gade rai wa ma ai mung, n chye dat nngai; alawan shachyut ma su, dep lu na re ai, ngu nna tsun wu ai. ⁶ Shing nga timung, dai yan hpe chyawm gaw shi a nta magaw ntsa de lung shangun nna, magaw ntsa e lam tawn ai lachyit hpun sumpum kata e makoi da nu ai. ⁷ Shangun ma ni gaw, Yawdan hka uhkan lam de shan hpe hkan shachyut sa ma ai: shan hpe hkan shachyut ai ni shinggan gale jang mare chyinghka la kau mu ai. ⁸ Shingrai dai numsha gaw, kin-yu yan garai n yup yang, nta magaw de shan kaw lung chyai nna, ⁹ Yehowa ndai mungdan nanhte hpe jaw kau sai mung, nanhte hpe anhte hkrit mak mat nna, nanhte a majaw mung masha ni nlang minla byaw mat masai mung, ngai chye ni ai. ¹⁰ Kaning rai nme law, Egutu mung na nanhte pru wa ai shaloi, Nawng Hkyeng hka hpe Yehowa shahkyet kau ai hte, Yawdan hka wora hkran e nanhte atsai awai hpya kau ai Amori hkawhkam Sihon yan Oga hpe nanhte di ai amu lam ni anhte na saga ai. ¹¹ Shi ga dai na jang, anhte mung minla byaw mat ma nna, nanhte a majaw kadai wa hta mung nden ja ai myit n-gun kachyi mi muk n ngam chyawn saga ai: nanhte a Karai Kasang Yehowa chyawm gaw, lahta tang na sumsing lamu hta mung, lawu tsang na ginding aga hta mung, Karai Kasang rai nga ai. ¹² Dai rai nna, nan hpe ngai shalawt ai chyeju a matu, nanhte mung nye a hpunau ni hta chyeju htang nna, ¹³ ngia nu ngai wa, ngai nau ngai na, ngai yung ngai ja ni hte shanhte hte seng maseng ni hpe n sat kau ya ai shaprawn da na lam, Yehowa hta dagam da mi; tengman ai sakse kaumla mung jaw da mi, ngu nna tsun wu ai. ¹⁴ Dai yan mung, Nang an a lam n shabrawng ya n yang gaw, na a asak matu an a asak gaw pahkam tai nga u ga: ndai mungdan Yehowa anhte hpe jaw ai nhtoi e na a lam hpe kangka hkra hkan nna chyeju htang na ra ga ai, ngu nna yin la mu ai. ¹⁵ Num de a nta gaw mare bunghku hte yep rai nga ai rai nna, dai bunghku ntsa e shi nga nga ai mjaw, dai yan hpe hkuwawt hku sumri hte shayu dat n-htawm. ¹⁶ Hkan tam ai ni hte n hkrum myit ga, bum de sa wa nna, masum ya tup makoi nga mu; hkan tam ai ni bai wa jang she bai wa mu, ngu nna tsun dat wu ai. ¹⁷ Shan mung, Nang an hpe dagam shangun ai lam hta an a ntsa e mara n rawng u ga: ¹⁸ yu u, ndai mung de anhte du jang, ya an hpe shayu dat ai hkuwawt hku hta ndai sumri hkyeng noi tawn nna, na nnu nwa, nhpu nnau ni hte nta masha ni yawng hpe shaga jahpawng tawn na rai ndai. ¹⁹ Shaloi na nta nhku nna shinggan pru ai wa kadai mung si ai hkrum yang, shi dai tam si ai rai u ga; anhte chyawm gaw mara lawt u ga: na nta nhku na hpe nan anhte sat ga yang gaw, dai wa a bunglat anhte hta mara u ga. ²⁰ - ²¹ Nang mung an a amu lam shabrawng ya n yang gaw, an hpe nang dagam shangun ai lam hta anhte mara lawt u ga, ngu nna shi hpe tsun da mu ai. Dai numsha mung, Nan a ga hte maren rai u ga; nga nna yin la let, shan hpe dat dat mu ai rai nna, shan mung wa mat ma ai: dai sumri hkyeng mung dai hkuwawt hku hta shi noi da wu ai. ²² Shaloi shan gaw bum de lung mat wa nna, hkan tam ai ni bai wa ai du hkra, masum ya nga nga ma ai: hkan tam ai ni gaw lam htum hkra tam timung, n mu mu ai. ²³ Dai masha yan chyawm gaw bum de na bai nhtang yu wa nhtawm, hka rap nna, Nun a kasha Yawshu kaw pru wa ma ai: shingrai, shan hkrum ai amu lam yawng mayawng tsun dan let, ²⁴ Gaja wa teng teng, Yehowa gaw wora mung ting anhte hpe ap ya ma ni ai: anhte a man e mung, mung masha ni nlang yaw mat masai, ngu nna Yawshu hpe wa tsun dan mu ai.

¹ Yawshu chyawm gaw jahpawt jau jau e rawt nna, Israela kashu kasha ni nlang hte rau Shitim shara na htawt n-htawm Yawdan hka du ma ai; garai n rap yang dai yang e shanhte but nga ma ai. ² Ya masum ya du ai shani e du gyi ni gaw dap ting de ga sa wa nna, ³ Nanhte a Karai Kasang Yehowa a ga shaka sumpu hte sumpu hpai ai hkinjawng Lewi masha ni hpe mu jang, nanhte mung hkan rawt nang na rai myit dai: ⁴ raitimung sumpu hte nanhte a lapran e dawng hkying lahkawng daram shagang na rai myit dai: hkan nang na lam chye lu hkra sumpu de nau wa n shani ai sha hkan na rai myit dai: kaning rai nme law, ndai lam kalang mi muk nanhte n lai yu myit dai, ngu nna masha ni hpe hkangda mu ai. ⁵ Bai Yawshu gaw amyu masha ni hpe, Yehowa hpawt ni e nanhte hta mauhpa amu madun na ra ai majaw, nanhte a hkum dai shachyoi shapra da mu, ngu wu ai. ⁶ Hkinjawng ni hpe mung, Ga shaka sumpu hpai nna masha ni a shawng e rap sa wa mu, ngu nna Yawshu tsun da ai hte maren shanhte mung ga shaka sumpu hpai nna amyu masha ni a shawng e sa wa ma ai. ⁷ Bai Yehowa Yawshu hpe, Mawshe hte rau ngai nga nga ai zawn, nang hte rau ngai nga nga nngai gaw, Israela amyu ting chye lu hkra, dai ni ngai nang hpe shanhte a man e shagrau hpang de ga. ⁸ Ga shaka sumpu hpai ai hkinjawng ni hpe, Yawdan hka hkin-gau du jang, Yawdan hka hta nanhte tsap nga lu na re ai. Ngu nna tsun mu, ngu wu ai. ⁹ Bai Yawshu gaw Israela kashu kasha ni hpe, Wa marit, nanhte a Karai Kasang Yehowa a ga madat la maru. ¹⁰ A hkrung nga ai Karai Wa nanhte hta nga nga nna, nanhte a man na, Hkanani, Hiti, Hiwi, Perizi, Girgashi, Amori hte Yebusi masha ni hpe, shi gaja wa teng teng jahtaw kau na gaw, ndai lam hta nanhte chye lu na marin dai: ¹¹ Yu mu, Lamu ga Madu a ga shaka sumpu gaw nanhte a man e Yawdan hka lai dut na ra ai. ¹² Dai rai nna, Israela amyu ni hta na, amyu mi a marai langai langai di nna, marai shi lahkawng san da mu. ¹³ Kaning rai nme law, lamu ga Madu Yehowa a sumpu hpai ai hkinjawng ni a lagaw lahpan ni Yawdan hka kabye hkra ai hte shaloi jang, Yawdan hka gaw dai kaw hprut rai di mat nna, hka hku de na hka gaw sumpum tsaw mat wa na ra ai, ngu nna tsun mu ai. ¹⁴ Shaloi, amyu masha ni Yawdan hka rap na nga, tinang sum shara na htawt ma yang, ga shaka sumpu hpai ai hkinjawng ni gaw masha ni a shawng e sa wa nna, ¹⁵ sumpu hpai ai ni Yawdan hka du ai hte, dai sumpu hpai ai hkinjawng ni a lagaw lahpan ni le nga ai hka hpe kabye dat yang, nmut ta rai nna hka dingdung hkingau lim hkra tung nga ai raitimung, ¹⁶ hka hku de na lwi hkrat wa ai hka gaw dai yang hkring mat nna, grai tsan ai Zarehtan makau na Adam mare du hkra rawt tsaw mat wa ai; pa nawng ngu ai Jum Nawng de lwi wa ai hka mung atsai awai hkyet mat nna, amyu masha ni gaw, Yerihko ang hku rap wa ma ai. ¹⁷ Shingrai Yehowa a ga shaka sumpu hpai ai hkinjawng ni gaw Yawdan hka ka-ang e ga hta tsap lu ma ai; amyu masha ni yawng rap kawt ma ai du hkra, Israela amyu ting ga hku hkawm wa lu ma ai.

¹ Ya amyu masha ni nlang rap kawt ma jang, Yehowa Yawshu hpe, ² Amyu masha ni hta na, amyu mi na marai langai langai di nna, marai shi lahkawng san la nhtawm, ³ shanhte hpe, Yawdan hka ka-ang hkinjawng ni tsap ai shara na, lung bawng shi lahkawng hta hpai wa nna, dai na nanhte but ai shara e tawn da mu, ngu nna hkang dat u, ngu wu ai. ⁴ Yawshu mung, amyu mi hta na langai ngai di nna Israela kashu kasha ni hta na san da ngaut sai marai shi lahkawng hpe shaga la n htawm, Nanhte a Karai Kasang Yehowa a sumpu man Yawdan hka ka-ang de sa nhtawm, Israela amyu nambat hte maren langai mi e lung bawng langai ngai sa hpai la ma su: ⁵ dai gaw nanhte hta sakse tai nga na rai nga ai; htawmhpang prat e nanhhte a kashu kasha ni, Nlung ndai gaw hpa re ai rai ta? nga nna san ma yang, ⁶ Yehwoa a ga shaga zumpu a man e Yawdan hka hkyet dut ai majaw da ai rai nga ai; dai gaw, Yawdan hka hta rap wa yang, hka hkyet dut mat ai rai nga ai, ngu nna nanhte tsun dan na rai myit dai: ⁷ dai rai nna, nlung dai ni gaw, Israela kashu kasha ni matu prat dingsa dum nga na masat dingssat tai na ra ai, ngu mu ai. ⁸ Shaloi Israela kashu kasha ni gaw Yawshu hkangda ai hte maren galaw ma ai; Yehowa Yawshu hpe tsun da ai hte maren, Israela kashu kasha ni a amyu nambat hkan nna, Yawdan hka na lung bawng shi lahkawng hta la nhtawm shanhte but ai shara de hpai wa nna tawn da ma ai. ⁹ Bai Yawshu gaw, ga shaka sumpu hpai ai hkinjawng ni tsap ai shara, dai Yawdan hka ka-ang e mung nlung shi lahkawng jung da wu ai rai nna, dai ni du hkra nga nga ai. ¹⁰ Kaning rai nme law, Mawshe Yawshu hpe hkangda sai hte maren, shawa masha ni hpe htawn tsun na lam, Yehowa Yawshu hpe tsun matsun shatup ngut ai du hkra, sumpu hpai ai hkinjawng ni gaw, Yawdan hka ka-ang e atsap nga ma ai: amyu masha ni chyawm gaw tin tin rap wa ma ai. ¹¹ Shingrai amyu masha ni mahkra rap kawt ma jang, she, Yehowa a sumpu hte hkinjawng ni gaw amyu masha ni a man e rap wa ma ai. ¹² Rubin amyu, Gad amyu, Manashe amyu chyen mi mung, Mawshe shanhte hpe hkangda sai hte maren, ri nhtu lang nna Isrela kashu kasha ni a man e rap wa ma ai: ¹³ shanhte gaw mun mali dang du ma ai rai nna hpyen gasat na matu hkyen lang let Yehowa a man e Yerihko pa de rap wa ma ai. ¹⁴ Dai shani e Yehowa gaw Yawshu hpe Israela amyu ting a man e shagrau wu ai rai nna, shanhte gaw Mawshe hpe hkrit hkungga ai zawn, Yawshu hpe mung shi a prat tup hkrit hkungga mu ai. ¹⁵ Shaloi Yehowa gaw Yawshu hpe, ¹⁶ Sakse sumpu hpai ai hkinjawng ni hpe, Yawdan hka na pru wa marit, ngu nna tsun u, ngu wu ai. ¹⁷ Yawshu mung, hkinjawng ni hpe, Yawdan hka na pru wa marit, ngu nna tsun dat wu ai. ¹⁸ Shaloi Yehowa a ga shaka sumpu hpai ai hkinjawng ni Yawdan hka ka-ang na pru lung wa ai rai nna, shanhte a lagaw lahpan hkarang kabye dep ai hte rau, Yawdan hka gaw shi a shara de bai lwi wa nna, myi na ta hka dingdung na hkin-gau lim hkra bai rai mat ai. ¹⁹ Shata langai ngu na nhtoi shi ya hta, amyu masha ni gaw Yawdan hka na pru lung wa nna, Yerihko mare a sinpraw maga Gilgala ngu ai shara e dap jung ma ai. ²⁰ Yawdan hka na shaw la ai ndai nlung shi lahkawng hpe mung, Yawshu gaw dai Gilgala shara e jung da wu ai. ²¹ Bai Yawshu gaw Israela kashu kasha ni hpe, Htawmhpang prat e, nanhte a kashu kasha ni gaw, Nlung ndai ni gaw hpa re ai i? Nga nna kanu kawa hpe san yang, ²² nanhte gaw, Israela masha ni Yawdan hka hpe hkarang majing na zawn rap wa ai rai ma ai, ngu nna shanhte hpe hkai dan na rai myit dai. ²³ Kaning rai nme law, Yehowa a lata hpung dagu rawng nga ai gaw, ga ntsa amyu baw mahkra chye lu na hte, nanhte prat dingsa nanhte a Karai Kasang Yehowa hpe hkrit hkungga nga myit ga nga, ²⁴ Nawng Hkyeng hpe anhte rap wa yang, dai hpe rap tawng ai du hkra, anhte a Karai Kasang Yehowa gaw, nanhte a man na dai hka hpungnung hpe shahkyet kau ai zawn, nanhte hta mung, Yawdan hka rap tawng lu hkra, nanhte a Karai Kasang Yehowa gaw nanhte a man na hka hpungtun hpe shahkyet kau ya ai rai nga ai, ngu nna tsun wu ai.

¹ Ya Israela kashu kasha ni Yawdan hka hpe rap lu na matu, Yehowa hka shahkyet kau ai lam hpe, Yawdan hka sinna hkran de nga ai Amori hkawhkam ni n-lang hte, nammukdara makau e nga ai Hkanani hkawhkam ni nlang, na ma yang, shanhte minla byaw mat shajang nna Israela kashu kasha ni a majaw myit htum mat ma ai. ² Dai shaloi e Yehowa gaw Yashu hpe, Nhpai lung nhkyi galaw la nna Israela kashu kasha ni hpe matu gadoi lam naw jaw u, ngu nna tsun wu ai. ³ Yawshu mung nlung nhkyi galaw la nna Giba-aralut shara e, Israela kashu kasha ni hpe matu gadoi ai lam jaw mu ai. ⁴ Ya Yawshu shanhte hpe matu gadoi jaw ai lam gaw ndai rai nga ai: Egutu mung na pru wa ai, ri nhtu chye lang ai lasha wa-ngan ni nlang hte gaw, Egutu mung na pru ai hpang nam mali lam e si mat masai. ⁵ Dai kaw na pru wa ai ni yawng gaw matu gadoi hkam masai; raitimung Egutu mung na pru nna nam e hkawm wa let, dai daw ai ni nlang hte chyawm gaw matu gadoi garai n hkam ma ai. ⁶ Kaning rai nme law, Egutu mung na pru wa ai Israela kashu kasha ni Yehowa a ga n madat ma ai rai nna, Yehowa anhte hpe jaw na nga nna kaji kawa ni hpe dagam da ai mungdan, nga chyu hte lagat jahku lwi ai ga hpe shanhte mu lu na n rai, nga nna Yehowa dagam kau ai majaw, shanhte hta na ri nhtu chye lang ai lasha wa-ngan nlang si htum ai du hkra, dai nam mali hkan e mali shi ning tup kayin hkawm wa ma ai. ⁷ Shanhte a mali ngu na shanhte a kashu kasha ni gaw, hkrun lam e rai nna matu gadoi garai n hkam ma ai majaw, Yawshu gaw shanhte hpe matu gadoi ai lam jaw wu ai. ⁸ Shingrai amyu masha ni nlang matu gadoi hkam ngut nna, machyi mai ai du hkra, dai dap e shanhte anga nga ma ai. ⁹ Dai rai nna Yehowa Yawshu hpe tsun wu ai gaw, Dai ni, Egutu mung na kaya kahpa lam hpe nanhte kaw na ngai galau kau ya masade ai, nga ai. Dai hkan nna shara dai hpe dai ni du hkra Gilgala ngu nna shamying wu ai. ¹⁰ Shaloi Israela kashu kasha ni Gilgala shara e dap jung nga nna, dai shata shi mali ya shana de Yerihko pa e dai shalai dat ai poi sha ma ai. ¹¹ Shalai dat ai poi sha ai hpang shani jang, dai mung na mam hte galaw ai matsi n rawng ai muk hte mam nmyi shanhte sha lu ma ai. ¹² Dai mung na mam sha lu ai hpang shani nna gaw dai manna dawm mat sai: htawmhpang e Israela kashu kasha ni manna n lusha masai: dai shaning shanhte gaw Hkanan mung na nsi naisi sha ma ai. ¹³ Ya Yawshu gaw Yerihko makau e nga nga ai shaloi sharawt mada yu yang, yu u, nhtu shaw shada lang nna shi hte man ap rai tsap nga ai wa langai mi nga nga ai: Yawshu gaw shi hpang de sa wa nna, Nang gaw anhte hpang maga na rai n ni? gumlau hpyen hpang maga na rai n ni? ngu nna san yu wu ai. ¹⁴ Dai wa chyawm gaw, N rai, Yehowa a hpyen laba up ai bu rai nna ya sa wa ring ngai, ngu wu ai. Shaloi Yawshu gaw ga e dingnyawm nawku let, nye a Madu e, na a mayam wa hpe hpa tsun mayu n ta? ngu wu ai. ¹⁵ Yehowa a hpyen laba up ai bu wa gaw, Yawshu hpe, Na a kyepdin raw u: nang kabye ai ga gaw chyoi pra ai ga rai nga ai, nga ai. Yawshu mung shingrai galaw wu ai.

¹ Ya Yerihko mare gaw Israela kashu kasha ni a majaw chyip chyip la da nga ai rai nna, pru pru shang shang kadai n nga masai. ² Shaloi Yehowa gaw Yawshu hpe, Yu u, Yerihko mare hpe mung, de a hkawhkam hte n-gun ja ai share ni hpe mung, na a lata de ngai ap ya sade ai. ³ Dai rai nna hpyen masha ni mahkra dai mare hpe lang mi hkawm shinggrup na rai myit dai: shing di kru ya du hkra nang di na rai ndai. ⁴ Hkinjawng masha marai sanit hte gaw dai sumpu a shawng e garu pahtau sanit lang nna sa wa na rai ma ai: sanit ya du ai shani hta dai mare hpe sanit lang hkawm shinggrup let hkinjawng ni pahtau dum na rai ma ai. ⁵ Shingrai shanhte gaw garu pahtau hte mahku galu wa dum dat nna, dai pahtau mahku nanhte na jang, masha nlang nsen shaja nna jahtau garu dat na rai myit dai: shaloi mare bunghku yan ting gaw daw ru mat wa na ra ai rai nna, kadai mung tinang man ang ai kaw nna shang wa na rai myit dai, ngu wu ai. ⁶ Shaloi Nun a kasha Yawshu gaw hkinjawng ni hpe shaga nna, Dai ga shaka sumpu hpai nna, Yehowa a sumpu shawng e hkinjawng marai sanit hte garu pahtau snait lang let sa wa mu, ngu mu ai. ⁷ Shanhte mung amyu masha ni hpe, Rawt mu, mare hpe shinggrup masit; Yehowa a sumpu shawng e ri nhtu lang ai ni sa wa ga, ngu mu ai. ⁸ Shingrai Yawshu gaw amyu masha ni hpe tsun ngut yang Yehowa a man e garu pahtau sanit lang ai hkinjawng marai sanit hte gaw sa wa let pahtau dum ma ai: Yehowa a ga shaka sumpu mung shanhte kaw hkan nang nga ai. ⁹ Ri nhtu lang ai ni, pahtau dum ai hkinjawng ni a shawng e sa wa nna, hpang na dap ni gaw dai sumpu hpang e hkan nang sa wa ma ai: hkinjawng ni pahtau dum let sa wa ra ai. ¹⁰ Bai Yawshu shawa masha ni hpe, Ngai tsun ai nhtoi garai n du yang, hkum garu myit, nsen hkum shapraw myit, ga htahkun mi muk hkum shaga myit; ngai tsun jang she garu na rai myit dai, ngu nna hkangda wu ai. ¹¹ Shingrai Yehowa a sumpu gaw dai mare hpe kalang bat wang kawai shinggrup kau da nna, dap de bai wa nhtawm, dap e shana shalai mu ai. ¹² Bai Yawshu gaw jahpawt jau jau e rawt nna, hkinjawng ni mung Yehowa a sumpu la hpai ma ai. ¹³ Garu pahtau sanit lang ai hkinjawng marai sanit mung, Yehowa a sumpu man e pahtau dum let sa wa ma ai; ri nhtu lang ai ni mung, shanhte a shawng e sa wa ma ai; hpang na dap ni mung Yehowa a sumpu hpang e hkan nang ma ai rai nna, pahtau dum let sa wa ma ai. ¹⁴ Shingrai ni ni shani mung mare hpe kalang grup wang kawai kau da nna dap de bai wa ma ai: dai zawn kru ya du hkra galaw ma ai. ¹⁵ Sanit ya ngu ai shani e chyawm gaw jahpawt jau jau, nhtoi nnan htoi wa yang, shanhte rawt nna, shawng na zawn dai mare hpe wang kawai nna sanit lang bat mu ai: dai shani e chyu sha sanit lang bat kawai ma ai. ¹⁶ Shingrai bat sanit grup ai lam hta hkinjawng ni pahtau dum dat yang, Yawshu gaw shawa masha ni hpe, Ya garu dat manu; Yehowa nanhte hpe ndai mare ap ya na rai sai. ¹⁷ Mare hte dai hta rawng marawng Yehowa hpe ap kau na matu machyai kau sai; dai shawa num Rahab hpe chyu sha, shi hte shi a nta e nga manga, jahkrung da na rai myit dai; shi gaw anhte shangun dat ai kasa yan hpe makoi ya ma ni ai. ¹⁸ Nanhte chyawm gaw dai machyai kau sai rai ni hpe koi gam mu; Isrela dap hpe nanhte dagam dala jahkrum nna sharu shatang ai lam n pru u ga, dai machyai kau sai arai ni hpe hkum la lang myit. ¹⁹ Aja, gumhpraw yawng hte magri rai ahpri rai, Yehowa a matu chyoi pra nga ai: dai hte gaw Yehowa a sutdek hta bang da na rai nga ai, ngu nna tsun mu ai. ²⁰ Shingrai shawa masha ni jahtau nna, hkinjawng ni pahtau dum ma ai: shawa masha ni pahtau mahku na jang, shanhte nsen kaba hte garu dat ma ai rai nna, dai bunghku gaw yan ting daw ru mat wa ai; shaloi masha nlang tinang man ang ai kaw nna mare de shang wa nna, dai mare hpe madu la lu ma ai. ²¹ Dai mare kata na numsha lasha, kaji kaba, sagu bainam, wutang gumra nga manga hte hpe, shanhte nhtu hte atsai awai sat kau mu ai. ²² Shaloi Yawshu gaw dai mung de kin-yu sa yu ai yan hpe, Nan dagam da ai hte maren, dai shawa num a nta de sa nna, shi hte shi a nta e nga manga woi wa marit, ngu dat mu ai. ²³ Kin-yu tai ai shabrang yan mung shang sa nna, Rahab hte shi a kanu kawa, kahpu kanau ni hte shi kaw nga manga hpe mung, shi a makyin jinghku yawng hpe mung woi wa nna, Israela a dap shinggan e tawn da mu ai. ²⁴ Mare hte dai hta rawng marawng hpe chyawm gaw nat kau mu ai: aja gumhpraw hte, ahpri magri rai ni hpe chyu sha, Yehowa a sutdek hta shanhte bang da ma ai. ²⁵ Yerihko hpe kin-yu yu yu na Yawshu shangun dat ai kasa yan hpe, shawa num Rahab makoi ya sai majaw, Yawshu gaw shi hte shi a nta masha ni hpe mung, shi lu malu hpe mung, jahkrung da ya ai rai nna, dai ni du hkra, Israela kashu kasha ni hta shi nga nga ai. ²⁶ Dai shaloi Yawshu gaw, Kadai wa rawt nna, Yerihko mare ndai bai de yang, Yehowa a man e dagam dala hkrum ai wa tai u ga; dai wa gaw, Kasha alat a baw hte npawt nhpang gaw nna, Kasha hpungdim hte mare chyinghka sharawt na wu ai, nga nna, dagam kau wu ai. ²⁷ Shingrai Yehowa Yawshu hte rau nga nga ai rai nna, shi a lam mung ting kajai gumhkawng wa ai.

¹ Raitimung, Israela kashu kasha ni gaw, dai machyai kau sai arai ni a majaw shut hpyit mara rawng nga ai: kaning rai nme law, Yuda amyu na Zera lakung, Zabdi dap Hkarmi a kasha Ahkan gaw, dai machyai kau sai arai la wu ai rai nna, Yehowa a pawt bu ai gaw Israela kashu kasha ni a ntsa e nga nga sai. ² Yawshu chyawm gaw Yerihko mare kaw nna, Behtela sinpraw maga, Bet-awen makau na Ai ngu ai mare de, masha shangun nna, Dai mungdan hpe kin-yu sa yu ma sa, ngu nna dat dat wu ai: shaloi dai ni gaw lung sa wa nna Ai mare hpe sa yu mu ai. ³ Dai ni gaw Yawshu hpe bai wa nna, Masha nlang wa n sa mu ga; hkying lahkawng hkying masum daram sa nna Ai mare hpe gasat mu ga: mare masha ni n law ma ai majaw, masha nlang hpe shaba kau shara n nga ai, ngu nna tsun mu ai. ⁴ Shingrai marai hkying masum daram lung wa ma ai rai nna, Ai masha ni a man na hprawng wa ma ai. ⁵ Ai masha ni chyawm gaw shanhte hta na marai sum shi kru hpe sat kau lu ma ai hte, mare chyinghka kaw nna Shebarim du hkra yu wa ai kadawng e shanhte hkan sat mu ai rai nna, amyu masha ni a myit minla byaw mat nna, ntsin zawn tai mat malu ai. ⁶ Shaloi Yawshu gaw shi a palawng gang je kau nna, shi hte Israela agyi salang ni gaw tinang a baw hta ga nhpu hte bun let, Yehowa a sumpu man e shana de du hkra dingnyawm dagup nga ma ai. ⁷ Yawshu gaw, Ala, Yehowa Madu e, ndai amyu masha ni hpe Amori masha ni a lata de ap nna jahten kau na matu, woi rap wa n ta? anhte Yawdan hka wora hkran e myit shatawng nna nga nga sa na e le! ⁸ Madu e, Israela masha ni masha hpyen ni a man e nga mat wa ai gaw ngai kaning ngu na rai ta? ⁹ Hkanani masha ni hte ndai mung na masha ni nlang ndai na na mara ai rai nna, anhte hpe sa wang nhtawm, anhte a mying hpe ga ntsa na shamyit kau ya na mara ai; dai rai nna na a galu kaba ai mying ningsang matu, kaning di na wu ta? nga nna sa lajin wu ai. ¹⁰ Yehowa chyawm gaw Yawshu hpe, Rawt u, hpa rai dagup nga n ta? ¹¹ Israela amyu shut hpyit masai; ngai tawn da ai ga shaka pyi shanhte run kau ma mu ai; shanhte machyai da sai arai la nna, lagu mung lagu, masu mung masu; tinang a arai hta nan bang da nu ai. ¹² Dai re ai majaw Israela kashu kasha ni gaw dagam dala hkrum ma ai rai nna, masha hpyen ni a man e n hkam lu ai hte nga mat wa ma ai: dagam dala hkrum ging ai wa hpe n seng kau myit yang gaw, ngai nanhte hte rau naw nga lu na n rai. ¹³ Rawt u, amyu masha ni hpe shachyoi shapra u; hpawt ni nhtoi a matu tinang hkum hpe shachyoi shapra mu, ngu nna tsun u: kaning rai nme law, Israela Karai Kasang Yehowa tsun ai gaw, Israela amyu e, machyai kau sai rai nanhte hta rawng nga ai; dai hpe nanhte a kata na n seng kau dingsa masha hpyen ni a man e nanhte tsap lu na myit dai n rai. ¹⁴ Hpawt de manap e amyu baw sang hkan nna sit sa lu na rai myit dai; Yehowa lata la ai amyu gaw lakung lama hkan nna sit sa lu n rai myit dai; Yehowa lata la ai lakung gaw nta dap hkan nna sit sa lu na rai myit dai; Yehowa lata la ai dap gaw masha langai hte langai sit sa lu na rai myit dai. ¹⁵ Shingrai, machyai kau ai rai rem ai lata la hkrum ai wa gaw, Yehowa a ga shaka tawt lai kau nna, Israela amyu hta angawk angak re ai amu galaw wu ai majaw, shi hpe, shi lu malu hte hpawn nat kau na rai myit dai, ngu wu ai. ¹⁶ Yawshu mung jahpawt jau jau rawt nna, Israela masha ni hpe amyu baw langai hte langai woi sit wu yang, Yuda amyu hpe lata la wu ai: ¹⁷ bai, Yuda amyu hpe woi sit wu yang, Zera lakung hpe lata la wu ai; bai Zera lakung dap htinggaw langai hte langai woi sit wu yang, Zabdi htinggaw hpe lata la wu ai: ¹⁸ dai htinggaw na lasha langai hte langai hpe woi sit wu yang, Yuda amyu na Zera lakung Zabdi dap Hkarmi a kasha Ahkan hpe lata la wu ai. ¹⁹ Shaloi Yawshu gaw Ahkan hpe, Ngai sha e, Israela Karai Kasang Yehowa hpe shagrau nna shi a man e tawngban u: nang galaw kau ai amu ngai e tsun dan e; hkum ip tawn da et, ngu wu ai. ²⁰ Ahkan gaw Yawshu hpe htan nna, Gaja wa teng teng, Israela Karai Kasang hpe ngai shut ni ai; ²¹ ngai shut kau ai lam gaw, dai lanep rai hta na reng ai Shina hpajawng langai mi, gumhparaw shekela ni tsa hte shekela manga shi rawng ai ja hkaw langai mi ngai mu nna, dai hpe ra ai majaw la kau se ai: yu u, dai gaw nye a sum kata e ga hta lup da we ai, gumhpraw gaw ga de jahtum nga ai, ngu nna tsun dan wu ai. ²² Shaloi Yawshu shagnun ma dat dat nna, shanhte dai sum de gat sa yu ma yang, yu u, dai arai gaw shi a sum e makoi da wu ai rai nna, gumhpraw gaw ga de jahtum nga ai. ²³ Dai arai hpe shanhte sum na la shapraw nhtawm, Yawshu hte Israela kashu kasha ni yawng a man de la wa nna, Yehowa a man e tawn da ma ai. ²⁴ Shaloi Yawshu hte Israela amyu ting, Zera a kasha Ahkan hpe, dai gumhpraw, hpajawng, aja hkaw rai ni hte, shi a shayi shadang sha ni, shi a wutang, gumra, sagu bainam, shi a sum, shi lu malu mahkra hte hpawn la nna Ahkora kadit e woi sa mu ai. ²⁵ Dai yang, Yawshu gaw, Nang anhte hpe hpa rai sharu n ta? Dai ni Yehowa nang hpe sharu na ndai, nga nna tsun ai lata, Israela kashu kasha ni nlang shi hpe nlung hte jawm kabai sat mu ai; shanhte hpe mung, wan hte nat nna, nlung hte kabai sat mu ai. ²⁶ Shingrai shanhte shi a ntsa e nlung sumpum kaba lung kawng da wu ai rai nna, dai ni du hkra nga nga ai. Yehowa a pawt bu ai masin mung kawp mat lu ai. Dai hkan nna dai shara hpe, dai ni du hkra, Ahkora kadit ngu nna shamying da mu ai.

¹ Shaloi Yehowa gaw Yawshu hpe, Hkum hkrit et, myit hkum kaji et: hpyen ma ni nlang hte hpe woi nna, rawt mu; Ai mare de lung wa mu: yu u, Ai mare a hkawhkam hte shi a masha ni, shi a mare hte shi a mungdan hpe na a lata de ngai ap ya de ai: ² Yerihko mare hte de a hkawhkam hpe di ai zawn, Ai mare hte de a hkawhkam hpe nang di na rai ndai: raitimung, arung arai, yamnga lanep mahkra gaw nanhte a matu magawn la na rai myit dai: dai mare a wora maga de hpyen masha mayun up tawn da u, ngu nna tsun wu ai. ³ Shaloi Yawshu hte hpyen masha mahkra gaw, Ai mare de lung wa na rawt ma ai: Yawshu mung n-gun ja ai share mun masum lata la nna, shana e shangun dat wu ai. ⁴ Shanhte hpe mung, Nanhte gaw dai mare wora maga e gawp nga na rai myit dai; mare hte nau wa hkum tsan sa wa myit, nanhte yawng jin jin hkyen nga mu: ⁵ ngai hte ngai kaw na masha nlang hte gaw mare de shanang sa na ga ai. Shanhte shawng na zawn gasat na nga pru wa jang, anhte hprawng ya na ga ai: ⁶ shanhte mung, hkan shachyut na nga pru yang, ndum shami mare hte tsan wa hkra hprawg shalen na ga ai: kaning rai nme law, Shawng na hte maren anhte a man na shanhte hprawng masai, nga nna shanhte tsun na mara ai: anhte mung gaja wa hprawng ya na ga ai. ⁷ shaloi nanhte gaw up nga ai kaw na pru nna, dai mare hpe gasat dip la na rai myit dai; nanhte a Karai Kasang Yehowa gaw nanhte a lata hta dai mare ap ya na ra ai. ⁸ Shingrai dai mare hpe dang la lu jang, nat kau na rai myit dai; Yehowa tsun ai ga hte maren nanhte galaw na rai myit dai: yu u, ngai nanhte hpe hkang dat masade ai, ngu nna hkang dat mu ai. ⁹ Shingrai Yawshu shanhte hpe shangun dat mu ai; shanhte mung, sa up nga na matu sa wa nna, Ai mare a sinna maga, Behtela hte Ai lapran e sa up ma ai: Yawshu chyawm gaw, amyu masha ni kaw, dai shana naw shalai wu ai. ¹⁰ Shaloi Yawshu gaw jahpawt jau jau e rawt nna, masha ni hpe shinggyin la nhtawm, Israela du agyi ni hte rau, masha ni a shawng e sa wa let, Ai mare de lung wa ai. ¹¹ Shi kaw nang ai hpyen masha ni nlang hte mung lung wa nna, mare de shanang sa nhtawm, Ai mare a dingdung man de dap jung nga ma ai: ya, Ai mare hte shi a lapran e hkaraw din nga ai. ¹² Shi gaw marai hkying manga daram san la nna Ai mare a sinna maga Behtela hte lapran e up da wu ai. ¹³ Shingrai shanhte dai mare a dingdung man de na hpyen daw wa nlang hte hte, mare a sinna maga e up nga ai ni hpe hkyen tawn ma ai: Yawshu gaw dai shana e hkaraw ka-ang de sa wa wu ai. ¹⁴ Ya, Ai mare a hkawhkam gaw dai hpe mu jang, shanhte jau jau e gan rawt nna, shi hte shi a mare na lasha ni nlang hte rau, madat da ai ahkying hta dai pa ang ang maga de Israela masha ni hpe gasat na nga htim ma ai: mare a htawm de masha up nga ai chyawm gaw shi n chye wu ai. ¹⁵ Shaloi Yawshu hte Israela kashu kasha ni yawng gaw sum wa masu let nam lam hku hprawng wa ma ai. ¹⁶ Shanhte hpe hkan shachyut na nga. Mare na masha nga manga hpe ginrawn la nna, shanhte Yawshu hpe hkan shachyut let mare hte n dum shami tsan mat wa ma ai. ¹⁷ Shingrai Ai mare hte Behtela mare yan hta Israela masha ni hpe n hkan shachyut ai lasha langai mi muk n ngam hkra, mare hpe jahkam kau da nna Israela masha ni hpe shachyut sa mat ma ai. ¹⁸ Shaloi Yehowa Yawshu hpe, Nang lang ai ri tu Ai mare de dawn dat u; dai mare na a lata de ngai ap ya de ga, ngu wu ai; Yawshu mung shi lang ai ri tu hpe. Ai mare de dawn dat wu ai. ¹⁹ Shi a lata ladawn dat yang, up nga ai hpyen ni rawt nna mare de alawan wan gat shang nhtawm gasat dip la nna tin tin nat kau dat mu ai. ²⁰ Dai rai nna, Ai mare masha ni gaw kayin yu mu yang, yu mu, shanhte a mare hkru ai wanhkut lamu de dingdung rai nga ai; dai rai nna gara de mung, shanhte n chye hprawng mat ma ai: nam de hprawng masu ai ni mung shachyut nang ai ni hpe mahtang kayin gasat ma ai. ²¹ Ya, up da ai hpyen ni dai mare lu la nna, mare na wanhkut dingdung rai nga ai hpe Yawshu hte Israela kashu kasha ni nlang mu ma yang, shanhte bai nhtang nna Ai masha ni hpe sat ma ai. ²² Mare kata na ni mung pru gasat ma ai hte, Israela masha ni gaw Ai masha ni hpe matep gasat nna, langai mi muk n lawt na hku jawm azat ma ai. ²³ Ai hkawhkam hpe chyawm gaw shanhte chyahkrung rim la nna Yawshu hpang de woi wa mu ai. ²⁴ Shingrai, Israela masha ni gaw, pa e mung, shanhte hpe hkan shachyut nang ai nam hkan e mung, Ai masha nlang hte hpe nhtang gasat nna, mahkara hpe nhtu hte atsai awai azat shamyit kau mu ai. ²⁵ Dai shani e Ai mare na numsha lasha mahkra mun me hkying lahkawng dang si mat ma ai. ²⁶ Kaning rai nme law, Yawshu gaw Ai masha nlang hpe atsai awai sat kau ma ai du hkra shi a lata e lang ai ari hpe n dawm wu ai. ²⁷ Raitimung, Yehowa Yawshu hpe, hkangda sai hte maren, dai mare na yamnga hte lanep rai mahkra gaw Israela masha ni tinang a matu magaawn la ma ai. ²⁸ Shingrai Yawshu gaw Ai mare hpe nat kau wu ai rai nna, dai ni du hkra, htani htana na matu a katsi katsang nga ai shanut sumpum shatai wu ai. ²⁹ Ai mare a hkawhkam hpe shana de du hkra hpun hta noi da nna, jan du jang Yawshu hkangda ai hte maren, si mang hpe hpun hta na jahkrat nhtawm, mare chyinghka lam e kabai tawn nna de a ntsa e, dai ni du hkra nga ai, nlung sumpum kaba sumpum da mu ai. ³⁰ Hpri arai hte n tawk shapri ai lung bawng hte tawn hkungri galaw na rai ndai, nga nna Mawshe a tara laika hta ka da ai hte. ³¹ Yehowa a shangun kasa Mawshe Israela kashu kasha ni hpe hkangda ai hku hkan nna, Yawshu gaw Ebala bum e, Israela Karai Kasang Yehowa a matu tawn hkungri gaw nhtawm, dai hta Yehowa a matu wan nat hkungga hte mahku hkungga nawng ma ai. ³² Dai hta kaga shi gaw Israela kashu kasha ni a man e nlung hta Mawshe a tara ga ka tawn da wu ai. ³³ Israela masha ni hpe shaman ya na lam, Yehowa a shangun kasa Mawshe shawng e hkangda sai hte maren, Israela amyu masha ni yawng hte shanhte a du salang ni tara agyi ni, shingbyi manam ni ngu ai, amyu jet hte n jet yawng mayawng hte gaw Yehowa a ga shaka sumpu hpai ai hkinjawng Lewi masha ni hte dai sumpu a man e lahkawng maga hpra ang ang rai nna ka-ang hkup gaw Gerizim bum maga de, ka-ang hkup gaw Ebala bum maga de tsap nga ma ai. ³⁴ Shaloi tara laika hta ka da mada shaman chyeju hte dagam dala dingnye ngu ai tara ga yawng mayawng hpe shi hti wu ai. ³⁵ Yawshu mung, Mawshe hkangda mada hte maren, Israela shawa hpung ting hte shanhte hta na numsha hte ma kaji, shingbyi manam yawng a man e, ga dahkun mi muk n shayet ai sha, hti dan wu ai.

¹ Ya Yawdan hka sinna hkran, bum ga hte pa hkan, Lebanon bum wora maga Nammukdara kaba hka kau dingdung hkan na, Hiti, Amori, Hkanani, Perizi, Hiwi hte Yebusi amyu ni a hkawhkam ni nlang hte gaw ashi dai na jang, ² Yawshu hte Israela masha ni hpe jawm gasat na nga, myit langai sha hte rau hpawng nga ma ai. ³ Ya Gibeon masha ni gaw, Yerihko hte Ai mare hta Yawshu galaw ai lam na ma jang, shanhte maw hkalem ai hku galaw nna, shanhgun kasa tai masu let, ⁴ shanhte a lawze daw ni hta lachyit tingsan dingsa hte htaw nna, aje amya kapa gala re ai shanhpyi tsabyi ndum dingsa ni gun; ⁵ kap gala re ai kyepdin dingsa ni din, labu palawng dingsa bu hpun sa nna, shanhte a sha jarit gaw nshu lamu mut mat sai lusha chyatsu rai malu ai. ⁶ shanhte gaw Gilgala dap e nga ai Yawshu shpang de sa nna, shi hte Israela masha ni hpe, Anhte gaw sumtsan mung na du sa ra ga ai; dai re ai majaw anhte hte ga shaka tawn da ga, ngu mu ai. ⁷ Israela masha ni chyawm gaw, Nanhte anhte kaw rai nga myit dai nhten; dai rai yang, nanhte hte ga shaka kaning rai da lu na rai ta? ngu nna Hiwi masha ni hpe hkap htan mu ai. ⁸ Shanhte mung, Anhte na a mayam ni rai nga ga ai, ngu nna Yawshu hpe bai tsun mu ai. Shaloi Yawshu gaw, Nanhte kadai ni rai myit ta? kananng na du sa myit ta? ngu nna shanhte hpe san wu ai. ⁹ Shaloi shanhte gaw, Na a Karai Kasang Yehowa a amying ningsang majaw, na a mayam ni nachying tsan ai mung kaw nna du ra ga ai: shi a gumhkawng ai shiga hpe mung, Egutu mung e galaw ai lam yawng mayawng hpe mung, ¹⁰ Yawdan hka sinpraw hkran, Hesbon e dung ai hkawhkam Sihon hte, Ashtarot e dung ai Bashan hkawhkam Oga ngu ai Amori hkawhkam yan hta galaw ai lam yawng mayawng hpe mung anhte na ma saga ai. ¹¹ Dai rai nna anhte a du salang ni hte anhte a mung masha ni nlang hte gaw, Lam na sha jarit la gun nna shanhte hpe sa bawp la ma su: shanhte hpe, Anhte nanhte a mayam ni rai saga ai; anhte hte ya ga shaka tawn ga, ngu mu, nga nna shangun dat mi ai. ¹² Nanhte hpe bawp la na pru sa ai shani e lam jarit ngu nna tinang nta na gun ai muk ndai ni a kahtet sha rai mali ai: ya yu mu, tsu mat nna nshu lamu mut mat hkra rai sai: ¹³ tsabyi jahku hte hpring tup re ai shanhpyi ndum ndai ni nnan rai mali ai; yu mu, ya je waw mat sai; hpun palawng ndai ni, kyepdin ndai ni lam nau tsan ai majaw dingsa mat masai, ngu nna bai tsun mu ai. ¹⁴ Israela masha ni mung, Yehowa kaw n san ai, dai ni a lusha hkap la sha ma ai. ¹⁵ Yawshu mung shanhte hpe jahkrung da na lam ga shaka da nna htinglu kau wu ai: shawa hpung a du ni mung dai hku dagam da ma ai. ¹⁶ Ya shanhte hte ga shaka tawn da ai hpang masum ya rai yang, dai masha ni shanhte kaw na rai nna, htingbu sha rai nga ma ai gaw, Israela masha ni chye ma ai. ¹⁷ Dai majaw Israela kashu kasha ni sa wa nna, masum ya sat yang shanhte a mare ni de du ma ai: shanhte a mare ni gaw Gibeon, Hkehpira, Berot hte Kiryat-yarim rai malu ai. ¹⁸ Israela kashu kasha ni chyawm gaw, shawa hpung a du ni, Israela Karai Kasang a amying hte dagam kau sai majaw, shanhte hpe nsat kau ma ai: raitimung, shawa hpung ting gaw dai du agyi ni hpe mara shagun mu ai. ¹⁹ Du agyi ni chyawm gaw, Anhte Israela Karai Kasang Yehowa a amying hte dagam kau sagaw ai majaw, shanhte hpe mai shut na n rai. ²⁰ Shanhte hpe dagam ya shut ai majaw, anhte hta mara rawng na tsang ra sai rai nna, shanhte hpe jahkrung da na lam, ning di nna tawn da ga, ngu nna shawa hpung masha ni mahkra hpe tsun dan mu ai. ²¹ Bai, du agyi ni gaw shanhte hpe, Jahkrung da saga, ngu nna tsun da mu ai: shingrai du agyi ni shanhte hpe tsun da mu ai hte maren, dai masha ni gaw shawa hpung ting a matu hpun hta ai hte hka ja ai masha tai ma ai. ²² Shaloi Yawshu shanhte hpe shaga la nna, Nanhte gaw anhte kaw sha nga da myit htawm Nanhte hte grai tsan ga ai, nga nna anhte hpe hpa rai maw hkalem myit ta? ²³ Ya chyawm gaw nanhte dagam hkrum ai ni tai manit dai rai nna, mayam tai nna nye a Karai Kasang a nta matu hpun hta hka ja amu hte langai mi muk lawt na myit dai n rai, ngu wu ai. ²⁴ Shanhte gaw Yawshu hpe, Ndai mung ting nanhte hpe jaw kau nna, mung masha mahkra hpe nanhte a man na shamyit kau na nga, na a Karai Kasang Yehowa shi a shangun kasa Mawshe hta hkangda sai lam hpe na a mayam ni teng teng na lu saga ai rai nna, nanhte a lata hte si sum na hpe hkrit la ga ai majaw galaw kau sagaw ai. ²⁵ Ya rai tim, yu u, anhte ni na a lata e rai nga ga ai: kaja ai hte tengman ai hku, nang myit lu ai hte maren anhte hpe di mi, ngu nna tsun mu ai. ²⁶ Shingrai Yawshu dai hku galaw nna shanhte hpe n sat kau ai sha Israela kashu kasha ni a lata na shaw la wu ai. ²⁷ Dai shani e Yawshu gaw, shanhte hpe, Yehowa san da ai shara na tawn hkungri a matu hte shawa hpung a matu, hpun hta ai hte hka ja ai masha shatai na hpajang da wu ai rai nna, dai ni du hkra nga nga ma ai.

¹ Yawshu gaw Yerihko hte de a hkawhkam hpe di ai zawn, Ai mare hte de a hkawhkam hpe di wu ai rai nna, Ai mare hpe gasat dip la nhtawm atsai awai shamyit kau wu ai lam hpe mung, Gibeon masha ni Israela amyu hte ga shaka da nna rau nga nga ai lam hpe mung, Yerusalem hkawhkam Adoni-zedek na wu yang, ² shanhte ja ja hkrit nga ma ai; kaning rai nme law Gibeon gaw hkawhkam dung ai mare zawn mare kaba rai nga ai hte, Ai mare hta grau kaba nna, dai yang na lasha ni yawng wa-ngan hkrai rai nga ma ai. ³ Dai re ai majaw, Yerusalem hkawhkam Adoni-zedek, Hebron hkawhkam Hoham, Yamut hkawhkam Piram, Lahkisha hkawhkam Yahpia, Eglon hkawhkam Debira hte hpang de kasa shangun dat nna. ⁴ Gibeon mare gaw Yawshu hte Israela amyu ni kaw ga shaka jinghku hku masai majaw, wora mare hpe gasat la lu hkra ngai kaw lung marit, ngai hte jawm gasat ga, ngu dat wu ai. ⁵ Dai ga hkan nna, Yerusalem hkawhkam, Hebron hkawhkam, Yamut hkawhkam, Lahkisha hkawhkam, Eglon hkawhkam ngu ai Amori hkawhkam manga hte gaw jawm hpawng nna, shanhte a hpyen laba nlang hte rau lung wa nhtawm, Gibeon mare a man e dap jung ma ai rai nna wang gasat nga ma ai. ⁶ Shaloi Gibeon masah ni gaw, Gilgala dap de Yawshu kaw masha shangun nna, Na a mayam ni hpe lup mu hkum yu nga et; anhte hpe hkye la na alawan lung wa rit; bum ga na Amori hkawhkam ni nlang anhte hpe gasat na nga hpawng nga masai, ngu nna sa tsun mu ai. ⁷ Dai re ai majaw Yawshu gaw, hpyen masha ni nlang hte hte wa-ngan share nlang hte rau Gilgala dap na lung wa ma ai. ⁸ Yehowa mung, Shanhte hpe hkum hkrit et; na a lata de ngai shanhte hpe ap ya sade ai; nang hpe kadai mung hkap daw lu na n rai, ngu nna Yawshu hpe shalan wu ai. ⁹ Dai rai nna Yawshu gaw Gilgala dap nna shana tup lung wa nhtawm, dai hpyen ni hpe ndum shami gasat kajawng dat ai hte, ¹⁰ Yehowa mung shanhte hpe Israela amyu a man e jasum kau wu ai rai nna, Gibeon makau e gasat kaba hte sat kau nhtawm, Bet-horon de lung wa ai kadawng lam hkan nna Azeka hte Makeda du hkra shachyut gasat mu ai. ¹¹ Shingrai Israela man na shanhte hprawng wa ma yang, Bet-horon kaw na yu wa ai lam e, Yehowa gaw lamu de na lungdin kaba jahkrat bun wu ai rai nna, Azeka mare du hkra adup ai hte si shajang ma ai: Israela kashu kasha ni a nhtu hte si ai hta, sin marang e si ai mahtang grau law ma ai. ¹² Yehowa, Amori masha ni hpe Israela kashu kasha ni a man e ap kau ai shani hta, Yawshu gaw Yehowa kaw tsun nna, jan e, Gibeon ntsa e naw la u, Shata e, Aiyalon kadit e naw hkring u, nga nna Israela masha ni a man e tsun wu ai. ¹³ Dai hte maren, Dai amyu gaw masha hpyen ni hpe ari jaw lu ai du hkra, Jan gaw ala nga nna, shata gaw hkring nga mat ai. Dai lam hpe shing nga Yashara laika hta ka da nga ai n rai ni? Shingrai ajan gaw lamu ka-ang e hkring nan nga nna, lani jan mi daram na hkra lau n shang mat ai. ¹⁴ Yehowa masha a ga madat ya nna, dai zawn re ai nhtoi lani mi muk shawng de hpang de n byin yu ai: kaning rai nme law, Yehowa gaw Israela hpang maga gasat nga ai. ¹⁵ Shaloi Yawshu gaw Israela masha ni mahkra hte rau Gilgala dap de bai wa ma ai. ¹⁶ Ya dai hkawhkam manga hte gaw hprawng wa nna, Makeda ginlawng hku e makoi rawng nga ma ai. ¹⁷ Shaloi Yawshu hpe, Dai hkawhkam manga Makeda ginlawng hku hta rawng nga ai, mu da sagaw ai, ngu nna wa shana mu ai. ¹⁸ Shaloi Yawshu gaw, Ginlawng hku mahka e nlung kaba galau pat nna sin masha tawn da mu: ¹⁹ nanhte chyawm gaw hkum hkring myit; dai hpyen ni hpe shachyut nna dep madep hpe sat kau mu; mare de hkum shang shangun myit; nanhte a Karai Kasang Yehowa gaw shanhte hpe nanhte a lata hta ap ya sai, ngu nna hkang dat wu ai. ²⁰ Ya Yawshu hte Israela kashu kasha ni gaw masha hpyen ni hpe htum mat ma ai du hkra gasat kaba hte sat kau nna, naw ngam ai ni bunghku kum ai mare de hprawng shang mat ma jang, ²¹ amyu masha ni mahkra gaw, Makeda dap de Yawshu kaw apyaw sha bai wa ma ai: Israela kashu kasha ni a man e grang dakat lu ai wa langai mi muk n nga ma ai. ²² Shaloi Yawshu gaw, Dai ginlawng hku hpaw nna, dai hkawhkam manga hpe shapraw nhtawm ngai hpang de woi wa marit, ngu nna hkang dat wu ai. ²³ Shanhte mung hpaw nna, Yerusalem hkawhkam, Hebron hkawhkam, Yarmut hkawhkam, Lahkisha hkawhkam, Eglon hkawhkam ngu ai, dai hkawhkam manga hpe ginlawng hku na shi hpang de shaw wa wu ai. ²⁴ Ya shanhte gaw dai hkawhkam ni hpe Yawshu hpang de woi wa ma ai rai nna, Yawshu gaw Israela masha ni mahkra hpe shaga la nna, shi hte rau gasat sa ai hpyenbu ni hpe, Sit wa marit, ndai hkawhkam ni a du kabye ya maru, ngu wu ai: shanhte mung sit sa nna, dai hkawhkam ni a du kabye ya mu ai. ²⁵ Shingrai Yawshu gaw, Nanhte gasat ai hpyen ni nlang hpe Yehowa ning di na wu ai rai nna, hkum hkrit myit, myit hkum kaji myit; n-gun dating nna n-gun shaja mu, ngu nna shanhte hpe shalan wu ai. ²⁶ Shing nga tsun ngut jang, Yawshu gaw dai hkawhkam ni hpe htau kau nna, hpun manga hta noi da mu ai: shanhte hpe shana de du hkra noi da mu ai. ²⁷ Jan du jang she, Yawshu hkang dat nna, shanhte hpe hpun na jahkrat n-htawm, shanhte makoi nga ai ginlawng hku hta kabai bang kau nna, ginlawng hku mahka e nlung kaba hte pat da mu ai: shingrai dai ni du hkra rai nga ai. ²⁸ Dai shani e Yawshu gaw Makeda mare hpe gasat la wu ai rai nna, mare hte de a hkawhkam hpe nhtu hte hpya sat kau wu ai: mare hta rawng ai masha nlang hte hpe, langai mi muk n ngam hkra, shi atsai awai shamyit kau wu ai; Yerihko hkawhkam hpe di ai hte maren, Makeda hkawhkam hpe mung di wu ai. ²⁹ Bai Yawshu gaw Israela masha mahkra hte rau Makeda dap nna Libna mare de htawt nhtawm, Libna hpe gasat wu ai: ³⁰ Yehowa gaw dai mare hte hkawhkam hpe Israela masha ni a lata de ap kau wu ai rai nna, mare hte dai hta rawng ai masha nlang hpe, langai mi muk n ngam hkra nhtu hte hpya sat kau mu ai: Yerihko hkawhkam hpe di ai hte maren, de a hkawhkam hpe mung di wu ai. ³¹ Bai Yawshu gaw Israela masha ni mahkra hte rau Libna mare nna Lahkisha mare de htawt nhtawm, Lahkisha de dap jung nna gasat ma ai: ³² Yehowa gaw Lahkisha mare hpe mung, Israela masha ni a lata hta ap ya wu ai rai nna hpang shani e dang la kau mu ai: Libna hpe di ai hte maren, dai mare hte dai hta rawng ai masha nlang hte hpe nhtu hte hpya sat kau mu ai. ³³ Dai shaloi e Gezera hkawhkam Horam gaw Lahkisha mare hpe karum na nga lung wa ai hpe, Yawshu gaw dai hkawhkam hte shi a masha ni nlang hpe mung, langai mi muk n ngam hkra, hkap sat kau wu ai. ³⁴ Bai Yawshu gaw Israela masha ni mahkra hte rau Lahkisha mare nna Eglon de htawt nhtawm, dai de dap jung nna gasat ma ai: ³⁵ dai shani jang dai mare hpe shanhte dang la lu ma ai rai nna, nhtu hte hpya sat kau mu ai; Lahkisha mare hpe di ai hte maren, dai mare hta rawng ai ni nlang hte hpe lani jan sha hta atsai awai shamyit kau mu ai. ³⁶ Bai Yawshu gaw Israela masha ni mahkra hte rau Eglon mare nna Hebron de htawt nhtawm dai de gasat ma ai: ³⁷ dai mare hpe shi dang la nna, dai mare hte, de a hkawhkam hpe mung, dai hte seng ai mare ginwang ni hpe mung, dai hta rawng ai masha nlang hte hpe mung nhtu hte hpya sat kau mu ai: Eglon hpe di ai hte maren, dai mare hte dai hta rawng ai ni nlang hte hpe, langai mi muk n ngam hkra atsai awai shamyit kau mu ai. ³⁸ Bai Yawshu gaw Israela masha ni mahkra hte rau, Debira mare de nhtang wa nna gasat ma ai: ³⁹ dai mare hte, de a hkawhkam hpe mung, dai hte seng ai mare ginwang ni hpe mung dang la lu nna, nhtu hte shanhte hpe hpya sat ai hte mare ni hta rawng ai masha nlang hte hpe langai mi muk n ngam hkra atsai awai shamyit kau mu ai: Hebron yan Libna mare hte de a hkawhkam hpe di ai hte maren, Debira mare hte de a hkawhkam hpe di nu ai. ⁴⁰ Shingrai Yawshu gaw dai bum ga hte Dingda ga, pa ga hte kadit ga mahkra hte de a hkawhkam ni hpe hpya sat kau mu ai: langi mi hpe mung jahkrung da wu ai n rai; Israela Karai Kasang Yehowa hkangda ai hte maren, hkrung mahkrung hpe atsai awai shamyit kau wu ai. ⁴¹ Kadesha-barnea kaw nna Gaza du hkra, Goshen ga ting Gibeon du hkra, Yawshu gasat la wu ai. ⁴² Israela Karai Kasang Yehowa gaw, Israela masha ni hpang maga gasat ya nga ai majaw, dai mung mahkra hte de a hkawhkam ni nlang hpe, Yawshu gaw lang lata sha dang kau wu ai. ⁴³ Shingrai Israela masha ni mahkra gaw Yawshu hte rau Gilgala dap de bai wa ma ai.

¹ Ya, Hazora hkawhkam Yabin gaw dai na jang, Madon hkawhkam Yobab hte, Shimron hkawhkam, Ahkashap hkawhkam ni hpe mung, ² dingdung bum ga na hkawhkam ni hpe mung, Genesaret nawng a dingda maga na pa ga hte kadit ga, sinna maga na Dora kawng na hkawhkam ni ngu ai. ³ sinpraw sinna de na Hkanani masha ni hte, bum ga e nga ai Amori, Hiti, Perizi, Yebusi masha, Mizpa mung na Hermon bum makau e nga ai Hiwi masha ni hpe mung, shaga wu ai rai nna, ⁴ dai hkawhkam ni gaw, nammukdara hkingau na zaibru zawn law la ai luksuk laba ni hte, gumra hte hpyen leng law law hte pru sa ma ai. ⁵ Dai hkawhkam ni mahkra rau hpawng nna, Israela masha ni hpe gasat na matu Meron hka nawng makau e shara hta sha dap jung nga ma ai. ⁶ Shaloi Yehowa gaw Yawshu hpe, Shanhte hpe hkum hkrit et; shanhte mahkra hpe hpawt ni ndai hkying hta Israela masha ni a man e chyasi ngai ap na we ai; gumra ni a lahkap nang dan kau nna leng ni hpe nat kau na rai ndai, ngu wu ai. ⁷ Shingrai Yawshu hte shi kaw na hpyen masha ni nlang, Merom hka nawng makau de lung wa nna, shanhte hpe akajawng sha htim gasat dat mu ai. ⁸ Yehowa mung shanhte hpe Israela masha ni a lata de ap wu ai rai nna, shanhte hpe gasat jahtaw dat ai hte Sidon kaba hta Misrehpot ma-im du hkra mung, sinpraw maga Mizpa kadit du hkra mung hkan shachyut nna, langai mi muk n lawt hkra sat kau mu ai. ⁹ Yehowa Yawshu hpe tsun da sai hte maren, shi shanhte hpe di mu ai: gumra ni a lahkap shi dan kau nna, leng ni hpe nat kau wu ai. ¹⁰ Shaloi Yawshu gaw, dai aten e bai wa nna, Hazora mare hpe gasat la n-htawm, de a hkawhkam hpe htau kau wu ai: moi shawng nna Hazora mare dai gaw dai mungdan mahkra ni a daju rai nga ai. ¹¹ Dai hta rawng ai masha mahkra hpe shanhte nhtu hte sat kau nna, langai mi hpe muk n jahkrung da ai sha atsai awai shamyit kau mu ai; Hazora mare hpe mung nat kau wu ai. ¹² Dai hkrawhkam mare ni mahkra hte de a hkawhkam ni hpe Yawshu gasat la nna, Yehowa a shangun kasa Mawshe hkangda ai hte maren, nhtu hte atsai awai sat shamyit kau wu ai. ¹³ Raitimung, kawng ntsa e de ai mare ni hta, Hazora mare hta kaga, gale ni hpe chyawm gaw Israela masha ni n nat kau ma ai: Hazora hpe chyu sha Yawshu nat kau wu ai. ¹⁴ Dai mare hkan na lanep rai ni hte yamnga yawng mayawng hpe chyawm gaw Israela masha ni tinang a matu magawn la ma ai; masha hkrung mahkrung hpe sat kau lu ai du hkra shanhte nhtu hte shamyit kau mu ai; langai mi hpe mung jahkrung tawn mu ai. n rai. ¹⁵ Yehowa shi a shangun kasa Mawshe hpe hkangda wu ai hte maren, Mawshe gaw Yawshu hpe hti da wu ai: Yawshu mung shing di galaw wu ai; Yehowa Mawshe hpe hkangda ai lam yawng mayawng, langai mi muk n yawm hkra shatup wu ai. ¹⁶ Shingrai Yawshu gaw, Seira bum de lung wa ai lam na Halak bum kaw nna, Hermon bum makau Lebanon kadit na Bala-Gad du hkra, ¹⁷ bum ga nlang hte Dingda ga ting, Goshen mung ting, layang ga hte pa ga, Israela bum ga hte dai hte seng ai layang ga mahkra hpe, kabye la lu wu ai rai nna, de a hkawhkam ni nlang hte hpe rim la nhtawm sat kau mu ai. ¹⁸ Yawshu mung, ndai hkawhkam ni mahkra hpe tsawmra wa na hkra hpyen gasat nga ai. ¹⁹ Gibeon mare na Hiwi masha ni hta kaga, Israela masha ni hte jinghku hku ai mare langai mi muk n nga ai: yawng mayawng hpe adip gasat la wu ai. ²⁰ Kaning rai nme law, Yehowa Mawshe hpe hkangda ai hte maren, dai masha amyu ni hpe kachyi mi muk matsan n dum ai sha, atsai awai sat nna shamyit kau lu na matu, Israela masha ni hpe hkap daw gasat gwi hkra, Yehowa gaw shanhte a myit hpe shaja ya da mu ai. ²¹ Dai hte yang Yawshu sa nna, Anak masha ni hpe bum ga hkan na mung, Hebron, Debira hte Anab mare na mung, Yuda bum ga hkan na mung, Israela bum ga hkan na mung, jahtum kau wu ai: Yawshu gaw shanhte hte shanhte a mare ni hpe atsai awai shamyit kau mu ai. ²² Israela kashu kasha ni a mungdan hta naw ngam ai Anak masha ngu na langai mi muk n nga sai: Gaza, Gahta, Ashdod mare ni hta sha nga sai. ²³ Yehowa Mawshe hpe tsun da ai hte maren Yawshu gaw dai mung ting kabye la nna, Israela masha ni a amyu lakung langai hte langai hpe Sali ga karan ya wu ai. Dai mungdan mung majan sim mat ai.

¹ Ya, Israela kashu kasha ni, gasat nna kabye la lu ai Arnon hka kaw nna Hermon bum du hkra hte na pa ga yawng lawm ai Yawdan hka, Jan pru maga na hkawhkam ni gaw ndai yan rai ma ai. ² Hesbon e dung ai Amori hkawhkam Sihon; dai wa a mungdan gaw, Arnon hkaraw ka-ang ngu na hkin-gau e de ai Aroera mare kaw nna, Gilead mung chyen, Amon kashu kasha ni a lamu ga jarit Yabok hka du hkra; ³ bai, sinpraw hkran Genesaret nawng kaw nna, Bet-yeshi-mot hprang ai lam pa ga na Jum Nawng du hkra pa ga nlang hte hte, Pisga bum lagaw garet ai dingda lamu ga jarit du hkra, rai nga ai: ⁴ bai, Rehpim amyu hta na hkrat ai, Ashtarot hte Edri e dung ai Bashan hkawhkam Oga: ⁵ dai wa a mungdan gaw, Hermon bum hte Saleka kaw nna, Bashan mung ting, Geshuri hte Mahkahti masha ni a lamu ga jarit du ai, Heshbon hkawhkam Sihon a lamu ga jarit tai ai Gilead mung chyen mi lawm hkra rai nga lu ai. ⁶ Dai yan hpe Yehowa a shangun kasa Mawshe hte Israela kashu kasha ni sat kau nna, Yehowa a shangun kasa Mawshe gaw shan a mung hpe, Rubin amyu, Gad amyu hte Manashe amyu chyen ni e, Sali ga matu jaw kau wu ai. ⁷ Bai, Yawdan hka sinna hkran rai yang, Lebanon kadit na Bala-Gad mare kaw nna, Seira bum de lung wa ai lam e nga ai Halak bum du hkra; bum ga ting hte layang ga, pa ga hte kadit ga, nam mali hte dingda ga hkan e nga ai, ⁸ Hiti, Amori, Hkanani, Perizi, Hiwi hte Yebusi masha ni a lamu ga ngu ai, Yawshu hte Israela kashu kasha ni kabye la nna, Israela amyu langai hte langai hpe Sali ga matu Yawshu karan jaw kau ai mungdan ni hta na, Yawshu hte Israela kashu kasha ni sat kau lu ai hkawhkam ni gaw: ⁹ Yerihko hkawhkam; Behtela makau na Ai hkawhkam: ¹⁰ Yerusalem hkawhkam; Hebron hkawhkam; ¹¹ Yarmut hkawhkam; Lahkisha hkawhkam; ¹² Eglon hkawhkam; Gezera hkawhkam; ¹³ Debira hkawhkam; Gedera hkawhkam; ¹⁴ Horma hkawhkam; Arad hkawhkam; ¹⁵ Libna hkawhkam; Adulam hkawhkam; ¹⁶ Makeda hkawhkam; Bet-Ela hkawhkam; ¹⁷ Tapura hkawhkam; Hehpera hkawhkam; ¹⁸ Ahpek hkawhkam; Lasharon hkawhkam; ¹⁹ Madon hkawhkam; Hazora hkawhkam; ²⁰ Shimronmeron hkawhkam; Akshahpa hkawhkam; ²¹ Tanak hkawhkam; Megido hkawhkam; ²² Kedesha hkawhkam; Hkarmela bum na Yokneam hkawhkam; ²³ Dora kawng ga e nga ai Dora hkawhkam; Gilgala e nga ai Go-im hkawhkam; ²⁴ Tirza hkawhkam rai nga ma ai: nlang hte gaw hkawhkam sumshi langai rai nga ma ai.

¹ Ya Yawshu gaw aprat kaba nna dingla wa sai: dai rai nna Yehowa gaw shi hpe, Ya, nang aprat kaba ai hte dingla nit dai: kabye la na lamu ga mung naw law nga ai. ² Naw nga ai mung hte gaw: Hpilisti hte Geshuri ginwang ting ngu ai, ³ Egutu maga na Shihora hka kaw nna, Hkanani mung hta lawm ai dingdung man de na Ekron mare du hkra nga ai, Gaza, Ashdod, Ashkelon, Giti, Ekron masha ni a hkawhkam manga ngu na Hpilisti ga hte Awim mung ting; ⁴ dingda man kaw nna Amori mung a lamu ga jarit Ahpek shara du ai; Hkanani masha ni a mung ting hte Sidon hta lawm ai Meara du hkra; ⁵ Jan praw maga Hermon bum lagaw na Bala-Gad kaw nna, Hamot mare du ai Gebali masha ni a mung hte, Lebanon mung ting rai nga ai: ⁶ Lebanon bum kaw nna, Misrehpot-ma-im du hkra nga ai, bum ga na masha ni nlang ngu ai Sidon masha mahkra hpe Israela masha ni a man na ngai shachyut kau na we ai: dai re ai majaw, ngai nang hpe hkangda ai hte maren, Israela masha ni hpe dai lamu ga Sali karan ya nu. ⁷ Dai lamu ga hpe, dai amyu jahku hte Mawshe amyu chyen mi hpe ya karan ya u. ⁸ Dai Manashe chyen mi hte Rubin amyu Gad amyu ni gaw Yawdan hka sinpraw hkran de Mawshe jaw da sai rai nna, tinang a lamu ga Sali lu chyalu rai masai, ngu wu ai. Yehowa a shangun kasa Mawshe shanhte hpe jaw da ai lamu ga gaw: ⁹ Arnon hkaraw hkin-gau e de ai Aroera mare hte hkaraw ka-ang e nga ai mare kaw nna, Madeba hte Dibon layang ga ting; ¹⁰ Amon kashu kasha ni a lamu ga jarit du hkra, up ai, Heshbon e dung ai Amori hkawhkam Sihon a mare ni nlang; ¹¹ Gilead mung, Geshuri hte Mahkahti masha ni a mung, Hermon bum ting hte Saleka du hkra Bashan mung ting; ¹² Rehpim amyu hta na hkrat ai Ashtarot hte Edri e dung ai Bashan hkawhkam Oga mungdan ting rai nga ai: shanhte hpe Mawshe gasat nna shachyut kau mu ai. ¹³ Raitimung, Israela kashu kasha ni gaw, Geshuri hte mahkahti masha ni hpe shachyut kau mu ai n rai: Geshuri hte Mahkahti masha ni, dai ni du hkra Israela masha ni hta nga nga ma ai. ¹⁴ Lewi amyu hpe chyawm gaw lamu ga Sali n jaw wu ai: Yehowa shanhte hpe tsun da ai hte maren, Israela Karai Kasang Yehowa hpe wan hte nawng jau ai hkungga gaw, shanhte a sali rai malu ai. ¹⁵ Mawshe gaw Rubin amyu lakung langai hte langai hpe lamu ga sali karan jaw da mu ai. ¹⁶ Shanhte a lamu ga gaw: Amon hkaraw hkin-gau e de ai Aroera mare hte hkaraw ka-ang e nga ai mare kaw nna Medeba layang ga ting; ¹⁷ Heshbon hte dai pa na mare yawng; Nibon, Bomat-Bala, Bet-meon; ¹⁸ Yahat, Kedemot hte Mepat; ¹⁹ Kir-yatim, Sebma hte hkaraw na kawng e de ai Zeret-Shahara; ²⁰ Bet-peora, Pisga manep, Bet-yaeshimot hte ²¹ pa na mare ni yawng hte hpawn, Heshbon e dung ai, Sihon hkawhkam a mungdan ting rai nga ai; dai Sihon hkawhkam hpe shi a npu na, Ewi, Rekem, Zura, Hura, Reba ngu ai Midian du ni hte hpawn Mawshe sat kau wu ai. ²² Beora a kasha lakle sara Balam hpe mung, Israela kashu kasha ni gaw, dai ni hte rau, nhtu hte sat shalawm kau mu ai, ²³ Dai rai nna Rubin kashu kasha ni a lamu ga jarit gaw Yawdan hka hte de a hka kau ga rai nga ai. Dai gaw Rubin a kashu kasha ni a lakung lama hkan nna lu la ai sali wunli kahtawng mare ni rai nga malu ai. ²⁴ Bai Mawshe gaw, Gad amyu hpe, amyu lakung langai hte langai lamu ga sali karan jaw da mu ai. ²⁵ Shanhte a lamu ga gaw, Yezera kaw nna Gilead mare ni nlang hte Raba ang na Aroera du hkra Amon a kashu kasha ni a lamu ga chyen mi; ²⁶ Heshbon kaw nna Ramatmizpa hte Betonim du hkra; Mahanim kaw nna Debira du hkra; ²⁷ kadit ga e rai yang, Bet-haram, Bet-nimra, Suhkot, Zahpon mare ni ngu ai. Yawdan hka sinpraw hkran, dai hka kau dingdung Geneseret nawng htum hkra, Heshbon hkawhkam Sihon a lamu ga ngam ai hte nlang rai malu ai. ²⁸ Dai gaw Gad a kashu kasha ni a lakung lama hkan nna, lu la ai sali wunli kahtawng mare ni rai nga malu ai. ²⁹ Bai, Mawshe gaw Manashe amyu chyen mi hpe sali karan jaw da wu ai: dai gaw Manashe amyu chyen mi a kashu kasha lakung lama ni a matu rai nga ai. ³⁰ Shanhte a lamu ga gaw, Mahanim kaw nna Bashan ngu ai, Bashan hkawhkam Oga a mungdan ting; Bashan mung hta lam ai Yaira mare kru shi yawng; ³¹ Gilead mung chyen mi hte, Bashan mung hta Oga up lawm ai Ashtarot hte Edri mare ni gaw Manashe a kasha Mahkira kashu kasha chyen mi a lakung lama ni a matu rai nga malu ai. ³² Dai hte gaw Mawshe Yawdan hka sinpraw hkran Yerihko hte tawtap na Moba pa e karan ya ai sali ga rai malu ai. ³³ Lewi amyu hpe chyawm gaw Mawshe sali n jaw wu ai; Yehowa shanhte hpe tsun dan mu ai hte maren, Israela Karai Kasang Yehowa gaw shanhte a sali wunli rai nga ai.

¹ Ndai gaw Israela kashu kasha ni Hkanan mung e lu la ai sali ga ni rai nga ai; hkinjawng Eleaza, Nun a kasha Yawshu hte Israela kashu kasha amyu du agyi ni gaw, ² Yehowa Mawshe hpe hkangda wu ai hte maren, hpaida hte dai amyu jahku hte chyen mi hpe karan ya mu ai. ³ Amyu lahkawng hte chyen mi hpe gaw, Yawdan hka wora hkran de Mawshe jaw da nu ai: Lewi amyu hpe gaw sali ga karan ai hta n shalawm mu ai. ⁴ Yosep a kashu kasha ni mahtang Manashe hte Ehprim amyu lahkawng rai ma ai majaw; Lewi masha ni a matu nga nga na mare hte, shanhte a yamnga hte arai tawn da na mare ginwang hta kaga, sali shaje n jaw mu ai. ⁵ Shingrai Israela kashu kasha ni gaw, Yehowa Mawshe hpe hkangda ai hku hkan nna, lamu ga sali karan la ma ai. ⁶ Shaloi Yuda a kashu kasha ni gaw Gilgala dap e Yawshu kaw sa nna, Kenizi lakung Yehpun a kasha Hkaleb gaw, Yehowa, Kadesha-barnea e nang hte an a lam Karai Kasang a shangun kasa Mawshe hpe tsun wu ai ga hpe nang chye nga ndai. ⁷ Ndai mung hpe kin-yu sa yu na Kadesha-barnea kaw nna Karai Kasang a shangun kasa Mawshe ngai hpe shangun dat ai shaloi, nye a asak mali shi ning rai li ai; ngai mung, ngai myit lu ai hte maren wa tsun dan nngai. ⁸ Ngai hte rau lung wa ai hpunau manang ni amyu masha ni a myit hten na lam tsun ma timung, ngai chyawm gaw nye a Karai Kasang Yehowa ahkang htep lahti hkan ni ai. ⁹ Dai shani e Mawshe gaw, Nang nye a Karai Kasang Yehowa ahkang htep lahti hkan nit dai majaw, gaja wa teng teng, nang kabye du sai ga gaw nang hte na a kashu kasha ni a matu prat dingsa na sali wunli tai nga na salit dai, nga nna shaka da ni ai. ¹⁰ Ya, yu u, Israela masha ni nam mali hkan e kayin hkawm nga ai nhtoi hte ting hta, Yehowa Mawshe hpe shing nga tsun ai shani kaw nna ya du hkra, Yehowa a ga hte maren, mali shi manga ning tup nye a asak hpe jahkrung da ya ni ai rai nna, dai ni nye a asak matsat shi manga ning du sali ai. ¹¹ Raitimung Mawshe ngai e shangun ai shani e n-gun lagaw ja nngai zawn, dai ni mung naw ja nga nngai: dai shaloi e hkawm sa hkawm wa lu ai hte majan gun dang lu ai zawn, ya mung n-gun ja nga nngai. ¹² Dai rai nna, dai shani e Yehowa tsun ai bum ndai ngai hpe jaw e; dai bum hta Anak masha ni nga ai mung, mare bunghku ngang ai mare kaba ni nga ai mung, dai shani nang na nit dai: Yehowa ngai hte rau nga nga yang gaw, Yehowa a ga hte maren ngai shanhte hpe shachyut kau lu na a dawng, ngu nna Yawshu hpe hpyi wu ai. ¹³ Yawshu mung shi hpe shaman ya ai hte, Hebron ga hpe Yehpun a kasha Hkaleb a sali wunli matu jaw kau wu ai. ¹⁴ Dai rai nna, Kenizi lakung Yehpun a kasha Hkaleb gaw, Israela Karai Kasang Yehowa a hpang htep lahti hkan nang ai majaw, Hebron ga gaw dai ni du hkra shi a sali wunli ga tai wa ai. ¹⁵ Hebron mare a shawng na amying gaw, Kiriat-arba rai nga ai: Arba ngu ai gaw Anak kashu kasha ni hta na grau kaba ai wa rai nga ai. Dai mungdan mung majan sim mat ai.

¹ Yuda amyu a kashu kasha ni, tinang a lakung lama hkan nna, hpaida hta jaw ai sali ga gaw, dingda maga rai yang, Edum ga hte yep, Zin nam mali du hkra rai nga ai. ² Dingda maga na shanhte a lamu ga jarit gaw, Jum Nawng htum ai shingjut kaw nna, ³ dingda de dun hkrat wa ai Akrabim bum hkan nna, Zin mali e byawn; bai, Kadesha-barnea dingda maga kaw nna Hezron hprang, Adara e byawn, Karka e hkrawn, kayin wa nna, ⁴ Azmon hku garet nhtawm, Egutu hka e hkrawn, Nammukdara e htuk rai nga ai: dai gaw shanhte a lamu ga dingda jarit rai na, rai nga ai. ⁵ Sinpraw de rai yang, dai Jum Nawng gaw, Yawdan hka htumpa du hkra, lamu ga jarit rai nga ai. Dingdung man de na jarit gaw, Yawdan hka htumpa, Nawng shingjut kaw nna, ⁶ Bet-hogla hku lung wa nhtawm, Bet-Araba lahta hku hprang, Rubin a kasha Bohan a nlung mahtan du hkra rai nga ai; ⁷ bai, Ahkora kadit lahta hku kaw nna, Debira e hprang, hka dingda na Adumim kadawng lam tawtap na Gilgala e hkrawn; Enshemesha hka hpawk hprang, ⁸ Enregola shara e byawn; bai, Yebusi masha ni nga ai Yerusalem mare a lawu maga na, Hinom a kasha hkaraw hku hkrawn, Hinom hkaraw a sinna maga, Rehpim hkaraw ntsa na bum pungding e hkroi; ⁹ dai bum na bai yu nhtawm, Nepto hka hpawk hku hkrawn, Ehpron bum na mare ni de hprang, Kiriatyarim ngu ai Bala de byawn; ¹⁰ bai Bala sinna ang hku, Yearim ngu ai Hkesalon bum lahta hku hprang Seira bum garet nna, Bet-shemesha e hkrawn, Timma e hprang, ¹¹ Ekron lahta e byawn; bai dai kaw nna, Shikeron hku hprang, Bala bum hkrawn, Yabnela e byawn rai nna Nammukdara e htuk rai nga ai. ¹² Sinna maga na jarit gaw, Nammukdara kaba hte de a hkin-gau rai nga ai. Dai hte gaw, Yuda amyu lakung ni a lamu ga jarit grupyin rai nga ai. ¹³ Yehowa, Yawshu hpe hkangda ai hte maren, shi gaw Yuda kashu kasha ni hta, Yehpun a kasha Hkaleb a matu Hebron ngu ai Anak a kawa Arba a mare jaw kau wu ai. ¹⁴ Hkaleb gaw dai mare na Anak a kasha masum, Sheshai, Ahiman, Talamai hte hpe shachyut kau nhtawm, ¹⁵ dai kaw nna Debira masha ni hpe lung gasat mu ai: dai Debira gaw shawng e Kiriat-sehpera mying ai rai nga ai. ¹⁶ Shaloi Hkaleb gaw, Kiriat-sehpera gasat la lu ai wa hpe, ngai shayi sha Aksa ya sha na, ngu wu ai. ¹⁷ Dai rai nna, Hkaleb a kanau Kenaza a kasha Otniela gaw dai mare gasat la wu ai rai nna, Hkaleb gaw dai wa hpe shi a shayi Aksa ya sha wu ai. ¹⁸ Dai numsha gaw rawt wa ai shaloi e, kawa kaw yi hpyi na lam madu wa hte bawng nna, lawze dinghkung na yu hkrat wu ai: shaloi Hkaleb gaw, Nang hpe ra n ta? ngu wu yang, ¹⁹ Shi gaw, Chyeju shaman ya e; nang ngai e Dingda ga e tawn da nit dai majaw, hka hpawk mung, naw jaw e law, ngu nna hpyi wu ai. Kawa mung lahta hka hpawk hte lawu hka hpawk shi e jaw wu ai. ²⁰ Da ndai gaw, Yuda kashu kasha lakung lama ni a sali ga rai nga ai. ²¹ Edom mung hte tut, Dingda jahtum na Yuda amyu kashu kasha ni madu la lu ai mare ni gaw, Kabzela, Edera, Yagura, ²² Kina, Dimona, Adada, ²³ Kedesha, Hazora, Itnan; ²⁴ Zihpa, Telem, Bealot; ²⁵ Hazora-hadata, Hazora ngu ai Keriat-hezron; ²⁶ Amam, Shema, Molada; ²⁷ Hazara-gada, Heshmon, Bet-palet; ²⁸ Hazara-shuala, Ber-sheba, Biziotia; ²⁹ Bala, I-im, Ezem; ³⁰ Elatola, Hkesila, Horma; ³¹ Ziklag, Madmana, Sansana; ³² Lebaot, Shilahim, Ain hte Rimon rai nga ai: dai mare ni mahkra gaw, tinnang a kahtawng ni hte hpawn hkun jahku rai nga ma ai. ³³ Layang ga na mare ni gaw, Eshtaola, Zora, Ashna; ³⁴ Zanoa; En-ga nim, Taupa, Enam; ³⁵ Yarmut, Adulam, Sahko, Azeka; ³⁶ Sharim, Adihtim, Gedera, Gederohtim, rai nga ai: kahtawng hte hpawn mare nlang shi mali rai nga ma ai. ³⁷ Bai, zenan, Hadasha, Migdala-gad; ³⁸ Dilean, Mizpe, Yokhtela; ³⁹ Lahkisha, Bodkat, Eglon; ⁴⁰ Hkabon, Lamam, Hkitlisha; ⁴¹ Gederot, Bet-dagon, Nama Makeda rai nga ai: kahkawng hte hpawn mare nlang shi kru rai nga ma ai. ⁴² Bai, Libna, Ehtera, Ashan; ⁴³ Iphta, Ashna, Nezeb; ⁴⁴ Kila, Akzib, Maresha rai nga ai: kahtawng hte hpawn mare jahku rai nga ma ai. ⁴⁵ Ekron hte dai hte seng ai kahtawng mare ni: ⁴⁶ Ekron kaw nna Nammukdara du hkra, Ashdod hte htep na kahtawng mare ni: ⁴⁷ Ashdod hte de a kahtawng mare ni: Egutu hka hte Nammukdara kaba hkin-gau du hkra Gaza hte de a kahtawng mare ni mung lawm ma ai. ⁴⁸ Bai, bum ga de nga ai mare ni gaw, Shamira, Yatira, Sohka; ⁴⁹ Dana, Debira ngu ai Kiriat-sana; ⁵⁰ Anab, Eshtemo, Anim; ⁵¹ Goshen, Holon, Gilo rai nga ai: kahtawng ni hte hpawn, mare shi langai rai nga ma ai. ⁵² Bai, Araba, Duma, Eshan; ⁵³ Yanim, Bet-tapua, Ahpe ka; ⁵⁴ Humta, Hebron ngu ai, Kiriat-arba, Ziora rai nga ai; kahtawng ni hte hpawn mare jahku rai nga ma ai. ⁵⁵ Bai, Maon, Hkarmela, Zihpa, Yuta; ⁵⁶ Yezrela, Yokdam, Zanoa; ⁵⁷ Ka-in, Gibea, Timna, rai nga ai: kahtawng ni hte hpawn mare shi rai nga ma ai. ⁵⁸ Bai, Hahula, Bet-zura, Gedora; ⁵⁹ Marat, Bet-anat, Elatekon, rai nga ai: kahtawng ni hte hpawn, mare kru rai nga ai. ⁶⁰ Bai Kiriat-yarim ngu ai Kiriat-bala hte Raba rai nga ai; kahtawng ni hte hpawn mare lahkawng rai nga ma ai. ⁶¹ Bai, nam mali hkan e nga ai mare ni gaw, Bet-araba, Midin, Sehkahka; ⁶² Nebshan, dai Jum mare hte Engedi rai nga ai: kahtawng ni hte hpawn, mare kru rai nga ma ai. ⁶³ Yerusalem mare e nga ai Yebusi masha ni chyawm gaw Yuda kashu kasha ni shachyut kau lu ai n rai; dai rai nna Yebusi masha ni gaw Yerusalem mare hta, Yuda kashu kasha ni hte rau, dai ni du hkra nga nga ma ai.

¹ Ya Yosep a kashu kasha ni a matu hpai da hta jaw ai sali ga gaw, Yawdan hka kau Yerihko mare a sinpraw maga na, Yerihko hka kaw nna, nam mali bum lam hkan nhtawm Betela mare e byawn; ² bai Behtela kaw nna Luza hku hprang Arhki masha ni a lamu ga jarit hku ret, Atarat e byawn; ³ bai, dai kaw nna sinna de rai wa yang, Yahpleti masha ni a lamu ga jarit hku ret, lawu Bet-horon hprang, Gezera e byawn rai nna, Nammukdara e htuk rai nga ai. ⁴ Shingrai Yosep a kasha Manashe yan Ehprim gaw tinang a sali ga lu la ma ai. ⁵ Ehprim kashu kasha ni tinang lakung lama hkan nna lu la ai lamu ga gaw: sinpraw maga rai yang, Atarot-ada kaw nna lahta Bet-horon du hkra; ⁶ bai, dingdung maga na Mikmehta kaw nna, lamu ga jarit gaw sinna de rai wa ai; bai, lamu ga jarit gaw sinpraw de yawng nna, Tanat-shilo hku hprang, Yanoa sinpraw maga de hkrawn, ⁷ Yanon kaw nna Atarat hte Nara hprang, Yerihko e byawn rai nna Yawdan hka e htuk rai nga ai. ⁸ Bai, Tapua kaw nna dai lamu ga jarit gaw, sinna de rai wa nna Kana hka shi du nhtawm Nammukdara e htuk rai nga ai. ⁹ Dai gaw Manashe a kashu kasha ni lu la ai sali ga hta, Ehprim kashu kasha ni a matu karan tawn ai kahtawng mare ni hte hpawn, Ehprim amyu kashu kasha ni tinang lakung lama hkan nna lu la ai sali ga rai nga ai. ¹⁰ Gezera e nga ai Hkanani masha ni hpe shanhte n shachyut kau mu ai majaw, Hkanani masha ni Ehprim a lamu ga hta dai ni du hkra nga nga nna shabrai sha ai nchyang tai ma ai.

¹ Ndai gaw Manashe amyu a matu hpaida hta jaw ai sali ga rai malu ai; shi gaw Yosep a kasha alat rai nga ai. Manashe a kasha alat Gilead kawa Mahkira chyawm gaw hpyen masha rai nga ai rai nna, Gilead hte Bashan mung lu la lu ai. ² Manashe a kashu kasha kaga ni ngu na, Abieza lakung, Helek lakung, Asreela lakung, Shehkem lakung, Hehpera lakung hte Shemida lakung ni mung, tinang lakung lama hkan nna hpaida hta jaw ai lamu ga naw lu la ma ai: dai ni gaw Yawsep a kasha Manashe lakung a kashu kasha ni rai ma ai. ³ Raitimung, Manashe, Mahkira, Gilead, hte Hehpera hta na hkrat ai Zelohpa gaw, shadang sha n lu ai, shayi sha hkrai rai lu ai: shi a shayi sha ni a amying gaw Mala, Noa, Hogla, Milhka, Tirza hte rai ma ai. ⁴ Shanhte gaw hkingjawng Eleaza, Nun a kasha Yawshu hte du gyi ni a man de sit sa nna, An nau ni hpe hpunau ni hte rau sali ga jaw na lam, Yehowa, Mawshe hpe hkangda nu ai, ngu nna tsun mu ai: dai re ai majaw Yehowa hkangda ai hte maren, shi shanhte hpe kawa a kahpu kanau ni hte rau sali ga jaw mu ai. ⁵ Shingrai Manashe a shayi sha ni shadang sha ni hte rau sali ga lu la ai majaw, ⁶ Yawdan hka wora hkran na, Gilead hte Bashan mung hta kaga, Manashe a matu ni gaw hkambum shi tai ma ai. Gilead mung chyawm gaw, Manashe a kasha kaga ni a lamu ga rai nga ai. ⁷ Manashe a lamu ga jarit gaw, Ashera mare kaw nna Shehkem tawtap na Mikmehta hku hprang; hkra maga hku hkan nna En-tapua masha ni nga ai shara e byawn rai nga ai. ⁸ Tapua ginwang gaw Manashe hte seng na ai: raitimung, Manashe mung jarit na Tapua mare gaw Ehprim masha ni a rai nga ai. ⁹ Bai, dai lamu ga jarit gaw Kana hka shi dingda daw hkan nna, Manashe ga hte Ehprim mare kau mi lawm timung, hka dingdung maga gaw Manashe ga rai wa nna Nammukdara e htuk rai nga ai. ¹⁰ Dingda de Ehprim ga, dingdung de Manashe ga rai nna, Nammukdara sinna jarit rai nga ai; dingdung man de Ashera ga, sinpraw man de Isahka ga rai nga ai. ¹¹ Bai Manashe gaw Isahka hte Ashera mung hta, Bet-shean hte de a mare ni, Iblam hte de a mare ni; Dora masha ni hte de a mare ni, En-dora masha ni hte de a mare ni, Tanak masha ni hte de a mare ni, Megido masha ni hte de a mare ni madu nga lu ma ai; shingrai kawng masum ngu ai mung mi shanhte lu la ma ai. ¹² Raitimung Manashe kashu kasha ni gaw, dai mare ni hpe n dip la lu ma ai rai nna, Hkanani masha ni dai yang nga nga ma ai. ¹³ Shingrai, Israela kashu kasha ni gaw n-gun ja nga timung, Hkanani masha ni hpe atsai awai n shachyut kau ai sha, shanhte hpe amu bungli gunhpai shangun ma ai. ¹⁴ Shaloi Yosep a kashu kasha ni Yawshu hpe, Yehowa ngai hpe shaman ya ai hte, amyu kaba rai nga nngai she rai yang me, hkambum ga langai sha ngai e a jaw ai gaw, hpa majaw rai ta? ngu nna tsun mu ai. ¹⁵ Yawshu shanhte hpe, Nang amyu kaba rai nga nna, Ehprim bum ga nau gyip lit yang gaw, maling ga de lung nna, Perizi hte Rehpim masha ni a mung e wa hkyen la mu law, ngu nna htan wu ai. ¹⁶ Bai Yosep a kashu kasha ni gaw, Dai bum ga gaw anhte matu n law mali ai: dai pa ga na Bet-shean hte de a mare ni hte, Yezrela pa hkan e nga ai Hkanani masha ni nlang hte gaw hpri leng lu ai hkrai rai ma ai, ngu nna bai tsun mu ai. ¹⁷ Shaloi Yawshu gaw, Ehprim hte Manashe amyu ngu ai Yosep a kashu kasha ni hpe, Nang amyu kaba rai nna, n-gun ja ndai majaw, hkambum langai sha madu lu na n rai: ¹⁸ bum mi naw madu lu na ndai; dai hta maling htat timung, nang hkyen kau nna dai gaw htum hkra na a rai na rai nga ai; Hkanani masha ni n-gun ja ai hte hpri leng lu ma timung, nang shanhte hpe shachyut kau lu na rai nga ai, ngu nna tsun wu ai.

¹ Ya Israela kashu kasha shawa hpung ting gaw, Shilo mare e zuphpawng nna, dai yang e dai shawa sum sharawt mu ai: mung ting gaw shanhte a man e grit mat ma ai. ² Dai shaloi e Israela kashu kasha ni hta sali ga garai n madu ai amyu sanit naw nga ma ai. ³ Dai rai nna Yawshu Israela kashu kasha ni hpe Nanhte a nji nwa ni a Karai Kasang Yehowa jaw ai mungdan hpe n madu la ai, gaten du hkra ganung nga na myit ta? ⁴ Nanhte hta amyu mi na marai masum sum san tawn ya mi; shanhte hpe ngai shangun dat nna, dai mung ting de shanhte jawt hkawm nhtawm, lu la ang ai sali ga hpe ka matsing la nna ngai hpang de wa maru ga. ⁵ Dai mungdan hpe hkambum sanit di karan na rai mu ai: Yuda gaw dingda maga shi a shara e nga nga na rai wu ai; Yosep amyu masha ni gaw dingda maga shi a shara e nga nga na rai wu ai. ⁶ Nanhte gaw dai mungdan hpe hkambum sanit di ka karan nna, dai ka da ai laika ngai hpang de la wa na rai myit dai: shaloi ngai gaw anhte a Karai Kasang Yehowa a man e nanhte a matu hpaida da na nngai. ⁷ Lewi masha ni chyawm gaw nanhte zawn hkambum lu la na n rai; Yehowa a hkinjawng aya gaw shanhte a sali rai nga ai: Gad amyu, Rubin amyu hte Manashe amyu chyen mi gaw Yawdan hka sinpraw hkran de, Yehowa a shangun kasa Mawshe jaw da ai hte maren sali ga lu la masai, ngu nna tsun mu ai. ⁸ Ya dai masha ni rawt nna sa wa ma ai: Yawshu gaw dai mung ka matsing sa ai ni hpe, Mung ting jawt hkawm wa nna, dai hpe ka matsing la nhtawm ngi hpang de wa marit: shaloi ngai nang Shilo e Yehowa a man e nanhte a matu hpaida da ya na nngai, ngu nna hkang dat wu ai. ⁹ Dai ni mung pru nna, mung ting hpe jawt hkawm let, mare kahtawng lam hkan nna, hkambum sanit, di karan nhtawm, laika hta ka la nna, Shilo a dap de Yawshu kaw bai du wa ma ai. ¹⁰ Shaloi Yawshu gaw Shilo e Yehowa a man e shanhte a matu hpaida da nna, Israela masha ni hpe, amyu langai hte langai a matu lamu ga karan ya wu ai. ¹¹ Shingrai Ben-yamin a kashu kasha ni tinang a lakung lam hkan nna hpaida hta jaw ai ga gaw, Yuda kashu kasha ni hte Yosep a kashu kasha ni a lapran e ang nga lu ai. ¹² Dingdung maga nna jarit gaw, Yawdan hka kaw nna, Yerihko lahta hku hprang, sinna maga na bum hta hkrawn, Bet-aven mali e byawn rai wa ai. ¹³ Dai kaw nna dai jarit gaw dingda de rai wa nna, Bet-ela ngu ai Luza mare makau hprang, lawu Bet-horon dingda maga na bum lagaw ret Atarot-ada e byawn rai nga ai. ¹⁴ Dai kaw nna, lamu ga jarit gaw sinna maga na kayin nna, Bet-horon tawtap e nga ai bum hkan let, dingda de shang wa ai rai nna, Yuda kashu kasha ni a mare Kiriat-Yarim ngu ai Kiriot-Bala e byawn rai nga ai: dai gaw sinna jarit rai nga ai. ¹⁵ Dingda maga na jarit gaw, Kiriat-Yarim kaw nna, sinna de shang nhtawm, Nephto hka hpawk e byawn; ¹⁶ bai, Rehpim kadit dingdung de nga ai Hinom a kasha a kadit tawtap na bum lagaw hkan nhtawm, Yebusi masha ni a mare dingda na Hinom kadit hku hkrawn, En-rogela e byawn; ¹⁷ dai kaw nna, dingdung de lung wa nhtawm, En-sheme de hprang, Adumim kadawng tawtap na Gelilot e byawn; bai Rubin a kasha Bohan a nlung mahtan hku hprang, ¹⁸ Araba dingdung maga na pa hku hkrawn, Araba de lup rai nga ai; ¹⁹ bai, Bet-hogla lahta hku ret, Jum Nawng dingdung shingjut na Yawdan hka htumpa e htuk rai nga ai: dai gaw dingda jarit rai nga ai. ²⁰ Yawdan hka gaw sinpraw maga na jarit rai nga ai. Dai gaw, Ben-yamin kashu kasha ni tinang lakung lama hkan nna lu la ai sali ga a grupyin lamu ga jarit rai nga ai. ²¹ Ya, Ben-yamin amyu kashu kasha ni tinang a lakung lama hkan nna lu la ai mare ni gaw, Yerihko, Bet-hogla, Emek-kezi; ²² Bet-araba, Zemarim, Bet-ela; ²³ Awim, Para, Ohpra; ²⁴ Hkehpa-amoni, Ohpni, hte Geba rai nga ai: kahtawng hte hpawn mare shi lahkawng rai nga ai. ²⁵ Bai, Gibeon, Rama, Rerot; ²⁶ Mizpe, Hkehpira, Moza; ²⁷ Rekem, lrapela, Tarala; ²⁸ Zela, Elep, Yerusalem ngu ai Yebusi mare, Gibat, hte Kiriat rai nga ai: kahtawng hte hpawn mare shi mali rai nga ma ai. Dai gaw Ben-yamin amyu kashu kasha ni tinang a lakung lama hkan nna lu la ai sali ga rai nga ai.

¹ Lahkawng lang na hpaida hta jaw ai gaw, Simun kashu kasha lakung lama ni a matu rai nga ai: shanhte a lamu ga gaw Yuda kashu kasha ni a sali ga hta lawm nga ai. ² Shanhte a sali ga hta lawm ai mare ni gaw, Ber-sheba, ngu ai Sheba, Molada; ³ Haza-shuala, Bala, Ezem; ⁴ Elatola, Behtula, Horma; ⁵ Zilkla, Bet-marahkabot, Haza-susa; ⁶ Bet-lebaot hte Sharuhen rai nga ai: kahtawng ni hte hpawn, mare shi masum rai nga ma ai. ⁷ Bai, Ain, Rimon, Ehtera, hte Ashan rai nga ai: kahtawng ni hte hpawn mare mali rai nga ma ai. ⁸ Dingda maga Rama ngu ai Balat-bera du hkra, ndai mare ni a grupyin kahtawng ni mung lawm nga ai. Dai gaw Simun a kashu kasha ni, tinang a lakung lama hkan nna lu la ai sali ga rai nga ai. ⁹ Simun a kashu kasha ni a sali ga gaw, Yuda kashu kasha ni a hkambum hta na shaw la ai rai nga ai: kaning rai nme law, Yuda a kashu kasha ni a hkambum gaw nau kaba malu ai majaw, shanhte a kata e Simun a kashu kasha ni sali ga madu la ma ai. ¹⁰ Bai, masum lang na hpaida hta jaw ai gaw Zebulun kashu kasha lakung lama ni a matu rai nga ai: shanhte a lamu ga jarit gaw Sarid du hkra rai nga ai; ¹¹ dai kaw nna sinna de rai wa nhtawm, shanhte a lamu ga jarit gaw Marala e hprang, Dabeshet e byawn, Yokanam mare makau na hka e htuk rai nga ai; ¹² bai Sarid kaw nna sinpraw de rai wa nhtawm, Hkislot-tabora e hkrawn, Daberat hku hprang, Yahpia e byawn rai nga ai: ¹³ dai kaw nna sin praw de rai wa nhtawm, Gat-hehpera hte Et-kazin hku hprang, Nea hte htep na Rimon e byawn rai nga ai; ¹⁴ bai dingdung maga garet nna Hanahton hku hprang, Iphtela kadit e dak rai nga ai, ¹⁵ Kata, Nahala, Shimron, Idala, hte Betlehem mare ni lawm nga ai: de a kahtawng ni hte hpawn mare shi lahkawng rai nga ai: ¹⁶ Dai gaw Zebulun a kashu kasha ni, tinang a lakung lama hkan nna lu la ai sali ga kahtawng mare ni rai nga ai. ¹⁷ Bai, mali lang na hpaida hta jaw ai gaw, Yeshahka kashu kasha lakung ni a matu rai nga ai: ¹⁸ shanhte a lamu ga jarit gaw, Yesrela, Hkesulot, Shunem; ¹⁹ Hahparim, Shion, Anaharat; ²⁰ Rabit, Kishon, Ebe; ²¹ Remet, Enganim, En-hada, Bet-paze mare ni hte hpawn, ²² Tabora, Shahazuma, hte Bet-sheme e byawn rai nna Yawdan hka e htuk rai nga ai: de a kahtawng ni hte hpawn mare shi kru rai nga ai. ²³ Dai gaw Yeshahka a kashu kasha lakung lama hkan nna, lu la ai sali ga kahtawng mare ni rai nga ma ai. ²⁴ Bai, manga lang na hpaida hta jaw ai gaw, Ashe a kashu kasha lakung lama ni a matu rai nga ai. ²⁵ Shanhte a lamu ga jarit gaw, Helkat, Hali, Beten, Akshap; ²⁶ Alamelek, Amad hte Mishala mare ni hte hpawn, sinna maga de Hkarmela hte Shihora libnat du hkra rai nga ai; ²⁷ bai Jan praw maga kayin nna, Bet-dagon hku hprang, Zebulun ga jarit ret, Iptaela kadit hku hkrawn rai nna, dingdung de rai wa nhtawm, Bet-emek hte Niela hku hprang, pai maga de rai yang, Hkabula; ²⁸ Ebron, Rehoba, Hamon, Kana hku hkan nna Sidon kaba e byawn; ²⁹ bai dai jarit gaw, Rama hku kayin nna, bunghku kum ai Turu mare hku hprang, Hosa e byawn Akziba ginwang hkan e Nammukdara e htuk rai nga ai: ³⁰ Uma, Ahpek hte Rehoba mare ni mung lawm ma ai: de a kahtawng ni hte hpawn mare hkun lahkawng rai nga ma ai. ³¹ Dai gaw Ashe kashu kasha lakung lama hkan nna, lu la ai sali ga kahtawng mare ni rai nga ma ai. ³² Bai, kru lang na hpaida hta jaw ai gaw, Naphtali a kashu kasha lakung lama ni a matu rai nga ai. ³³ Shanhte a lamu ga jarit gaw, Helep hte Zananim shara na wa myi hpun kaw nna, Adamikab, Yebnela hte Lakum hku hprang, Yawdan hka e htuk rai nga ai; ³⁴ bai sinna de kayin nna Azanot-tabora hku hprang, Hukok e byawn; dingda maga gaw Zebulun hte tut, sinna maga gaw Ashe hte tut, Janpraw maga gaw Yuda mare du hkra Yawdan hka jarit rai nga ai. ³⁵ De a bunghku kum ai mare ni gaw, Zidim, Zera, Rakat, Hkineret; ³⁶ Adama, Rama, Hasora; ³⁷ Kedesha, Edrai, En-hazora; ³⁸ Iron, Migdalela, Horem, Bet-anat hte Betsheme rai nga ma ai: de a mare ni hte hpawn, mare shi jahku rai nga ma ai. ³⁹ Dai gaw Naphtali a kashu kasha lakung lama hkan nna lu la ai sali ga a kahtawng mare ni rai nga ma ai. ⁴⁰ Bai, sanit lang na, hpaida hta jaw ai gaw, Dan a kashu kasha lakung lama ni a matu rai nga ai. ⁴¹ Shanhte a sali ga mare ni gaw, Zora, Eshtaola, Irasheme; ⁴² Shalabin, Aiyalon; Itla; ⁴³ Elon, Timna, Ekron; ⁴⁴ Elateka, Gibehton, Balat; ⁴⁵ Yehuda, Bene-berak, Gat-rimon; ⁴⁶ Me-jakon, Rakon hte Yopa tawtap na ga du hkra lawm nga ai. ⁴⁷ Dan a kashu kasha ni a lamu ga gaw nau gyip malu ai majaw, shanhte gaw Leshem mare de sa gasat nna madu la nhtawm, dai de sa nga nga ai; shanhte amyu a kawa daju Dan amying hkan nna, dai Leshem mare hpe Dan mare ngu nna lai shamying mu ai. ⁴⁸ Dai gaw Dan a kashu kasha lakung lama hkan nna lu la ai sali ga a kahtawng mare ni rai nga ma ai. ⁴⁹ Shingrai shanhte gaw dai mungdan hpe ga jarit tawn nna, sali ga karan na shangut ma ai: Israela kashu kasha ni mung, Nun a kasha Yawshu hpe shanhte a lamu ga hta na sali ga jaw mu ai: ⁵⁰ Ehprim bum ga na, shi hpyi ai Timnatsera mare, Yehowa hkangda ai hte maren shi hpe jaw mu ai; dai mare shi de nna nga nga ai. ⁵¹ Dai hte gaw hkinjawng Eleaza, Nun a kasha Yawshu hte Israela kashu kasha ni hta na lakung lama ni a du gyi ni, Shilo mare hta, Yehowa a man e, shawa sum chyinghka lam e, hpaida hte karan ya ai lamu ga sali ni ra nga ai. Shingrai shanhte gaw dai mungdan hpe karan ai amu shangut ma ai.

¹ Bai, Yehowa Yawshu hpe tsun wu ai gaw, ² Israela kashu kasha ni hpe ning ngu tsun u: Ngai Mawshe hpe tsun da sai hte maren, masha wa hpe sat kau mayu ai myit n rawng ai sha, n dum shami hkala sat ai wa hprawng shingbyi lu na mare ni lata san da mu: ³ dai ni gaw matai htang ai wa a lata na lawt lu na matu hprawng shingbyi na mare tai na rai nga ai. ⁴ Dai wa gaw mare langai ngai de hprawng nna, mare chyinghka e tsap nhtawm, dai mare na salang ni hpe shi a lam tsun dan na rai wu ai: shaloi dai ni gaw shi hpe mare kata de shawn la nhtawm, shanhte kaw nga nga shangun na rai mu ai. ⁵ Matai htang ai wa hkan du timung, shi a lata de dai masha sat ai wa hpe ap ya lu na n rai: kaning rai nme law, dai wa gaw shi a manang wa hpe ndawng ai majaw n rai, ndum shami hkala kau ai she rai lu ai. ⁶ Dai wa gaw, shawa hpung a man e dawdan ai shani du hkra rai yang, rai, dai prat na hkinjawng agyi wa si ai du hkra rai yang, rai, dai mare hta anga nga lu na rai nga ai: dai hpang e she, shi bai wa nna, shawng na hprawng kau da ai mare, tinang a buga, ndum nta de, anga nga lu na rai nga ai, nga nna tsun wu ai. ⁷ Shingrai shanhte gaw, Galile mung, Naphtali bum ga na, Kedesha mare, Ehprim bum ga na Shehkem mare, Yuda bum ga na, Kiriat-arba ngu ai Hebron mare hte hpe san da mu ai. ⁸ Bai, Yawdan hka wora hkran, Yerihko tawtap Rubin ga hta, nam mali pa na Bezera mare, Gad ga hta Gilead mung na Ramat mare, Manashe ga hta, Bashan mung na Golan mare hte hpe san da mu ai. ⁹ Mare dai ni gaw, Israela kashu kasha ni mahkra hte shanhte kaw shingbyi nga ai tsasam manam a matu san da mu ai rai nna, n dum shami masha sat hkrup ai wa, shawa hpawng a man e garai n tsap yang, matai htang ai wa a lata na lawt hkra hprawng shingbyi na mare ni rai nga ai.

¹ Dai shaloi Lewi amyu lakung lama ni a du gyi ni gaw, Eleaza yan Nun a kasha Yawshu hte Israela kashu kasha lakung lama ni a du gyi ni hpang de sit sa nna, ² Anhte nga na matu mare mung, yamnga rem na ginwang ga mung anhte hpe jaw na lam, Yehowa Mawshe hpe hkangda nu ai, nga nna hkanan mung Shilo mare e sa tsun mu ai. ³ Dai rai nna Israela kashu kasha ni gaw, Yehowa hkangda sai hte maren tinang nang a sali ga hta na mare hte ginwang ga Lewi masha ni hpe, jaw mu ai. ⁴ Kohat lakung lama ni matu hpaida hta jaw nna, lu la ai sali ga hta Lewi masha hkinjawng Arun a kashu kasha ni hpaida hta jaw ai mare ni gaw, Yuda amyu, Simun amyu hte Ben-yamin amyu ni hta na, mare shi masum rai nga malu ai. ⁵ Naw nga ai Kohat kashu kasha ni gaw Ehprim amyu, Dan amyu hte Manashe amyu chyen mi hta na, hpaida jaw ai hte mare shi lu la ma ai. ⁶ Gershon kashu kasha ni mung hpaida hta jaw nna, Yishahka amyu, Ashe amyu, Naphtali amyu hta na hte Bashan mung e Manashe amyu chyen mi kaw na mare shi masum lu la ma ai. ⁷ Merari kashu kasha ni mung tinang lakung lama hkan nna, Rubin amyu, Gad amyu hte Zebulun amyu hta na mare shi lahkawng lu la ma ai. ⁸ Shingrai Israela kashu kasha ni gaw, Yehowa Mawshe hpe hkangda wu ai hte maren, ndai mare ni hte mare ginwang ni hpe, hpaida hte, Lewi masha ni hpe jaw mu ai. ⁹ Shanhte gaw, Yuda amyu kashu kasha ni hte Simun amyu kashu kasha ni hta na, ndai ngu shamying ai mare ni hpe jaw mu ai rai nna, ¹⁰ dai hte gaw Lewi amyu Kohat lakung na Arun a kashu kasha ni a matu rai nga ai: kaning rai nme law, shawng na hkambum gaw shnahte a rai nga ai. ¹¹ Dai ni gaw, Yuda bum ga na Kiriat-arba ngu ai Hebron mare hte dai hte seng ai ginwang ga shanhte hpe jaw mu ai: (dai Arba chyawm gaw Anak a kawa rai nga ai) ¹² Raitimung dai mare a yi hkauna ni hte de a kahtawng ni chyawm gaw, Yehpun a kasha Hkaleb hpe sali ga jaw da mu ai. ¹³ Shingrai hkinjawng Arun a kashu kasha ni hpe, masha hkala sat hkrup ai wa a shingbyi mare tai na matu Hebron hte de a ginwang ga, Libna hte de a ginwang ga; ¹⁴ Yatira hte de a ginwang ga, Eshtemoa hte de a ginwang ga; ¹⁵ Holon hte de a ginwang ga, Debira hte de a ginwang ga; ¹⁶ Ain hte de a ginwang ga, Yuta hte de a ginwang ga, Bet-sheme hte de a ginwang ga jaw mu ai: dai gaw dai amyu lahkawng hta na, mare jahku rai nga ma ai; ¹⁷ bai, Ben-yamin amyu hta na, Gibeon hte de a ginwang ga, Geba hte de a ginwang ga, ¹⁸ Anahtot hte de a ginwang ga, Alamon hte de a ginwang ga, ngu ai mare mali jaw mu ai. ¹⁹ Shingrai Arun a kashu kasha hkinjawng ni lu la ai mare yawng gaw, ginwang ga hte hpawn hpawn, mare shi masum rai nga ai. ²⁰ Naw ngam ai Kohat kashu kasha lakung lama Lewi masha ni a hkambum mare ni gaw Ehprim amyu hta lawm nga ai. ²¹ Shanhte hpe jaw ai mare dai ni gaw, masha hkala sat hkrup ai wa a shaingbyi mare na matu, Ehprim bum ga na Shehkem mare hte de a ginwang ga, Gezara mare hte de a ginwang ga; ²² Kibzim hte de a ginwang ga; Bet-horon hte de a ginwang ga ngu ai mare mali rai nga ai. ²³ Bai, Dan amyu hta na, Elateke hte de a ginwang ga, Gibehton hte de a ginwang ga; ²⁴ Aiyalon hte de a ginwang ga, Gat-rimon hte de a ginwang ga ngu ai mare mali rai nga ai. ²⁵ Bai, Manashe amyu chyen mi hta na, Tanak hte de a ginwang ga, Gat-rimon hte de a ginwang ga ngu ai mare lahkawng rai nga ai. ²⁶ Shingrai naw ngam ai Kohat kashu kasha lakung lama ni lu la ai mare hte ginwang ga gaw, mare shi rai nga ma ai. ²⁷ Bai, Gershon a kashu kasha lakung lama Lewi masha ni hpe jaw ai mare ni gaw, masha hkala sat hkrup ai wa a shingbyi mare tai na matu, Manashe amyu chyen mi hta na, Bashan mung e Golan hte de a ginwang ga, Be-eshtera hte de a ginwang ga ngu ai mare lahkawng rai nga ai. ²⁸ Yishahka amyu hta na Kishon hte de a ginwang ga, Daberat hte de a ginwang ga; ²⁹ Yarmut hte de a ginwang ga, En-ganim hte de a ginwang ga ngu ai mare mali rai nga ai. ³⁰ Bai, Ashe amyu hta na, Mishala hte de a ginwang ga, Abdon hte de a ginwang ga, ³¹ Helakat hte de a ginwang ga, Rehob hte de a ginwang ga ngu ai mare mali rai nga ai. ³² Bai, Naphtali amyu hta na, masha hkala sat hkrup ai wa a shingbyi mare tai na matu, Galile mung e Kedesha hte de a ginwang ga, Hammot-dora hte de a ginwang ga, Kartan hte de a ginwang ga ngu ai mare masum rai nga ai. ³³ Shingrai Gershon a kashu kasha ni tinang lakung lama hkan nna lu la ai mare hte ginwang ga gaw, mare shi masum rai nga ai. ³⁴ Bai, naw ngam ai Lewi masha, Merari kashu kasha lakung lama ni hpe jaw ai mare ni gaw, Zebulun amyu hta na, Yoknam hte de a ginwang ga, Karta hte de a ginwang ga; ³⁵ Dimna hte de a ginwang ga, Nahala hte de a ginwang ga ngu ai mare mali rai nga ai. ³⁶ Bai, Rubin amyu hta na, Bezera hte de a ginwang ga, Yahaza hte de a ginwang ga; ³⁷ - ³⁸ Kedemot hte de a ginwang ga, Mepat hte de a ginwang ga ngu ai mare mali rai nga ai. Bai, Gad amyu hta na, masha hkala sat hkrup ai wa a shingbyi mare tai na matu, Gilead mung Ramot hte de a ginwang ga, Mahanim hte de a ginwang ga; ³⁹ Heshbon hte de a ginwang ga, Yazera hte de a ginwang ga, ngu ai mare mali tup rai nga ai. ⁴⁰ Shingrai, naw ngam ai Lewi amyu, Merari kashu kasha ni, tinang lakung lama hkan nna lu la ai hkambum mare ni gaw, mare shi lahkawng rai nga ai. ⁴¹ Israela kashu kasha ni a kata e Lewi masha ni nga nga lu ai mare ni yawng gaw, ginwang ga ni hte hpawn hpawn, mare mali shi matsat rai nga ai. ⁴² Dai mare ni mahkra gaw, langai hte langai grupyin e ginwang ga lawm ai hkrai rai nga ma ai. ⁴³ Shingrai, Ngai jaw na, nga nna Yehowa shanhte a kaji kawa ni hpe shaka da ai mungdan yawng mayawng, Israela kashu kasha ni hpe jaw nu ai rai nna, shanhte madu la lu ai hte dai hta nga nga masai. ⁴⁴ Yehowa kaji kawa ni hpe ga shaka da ai hte maren, grupyin shara shagu hta ban sa shangun mu ai rai nna, shanhte a man e kadai masha hpyen wa mung n tsap lu ma ai; Yehowa shanhte hpe masha hpyen ni yawng a lata na shaw la mu ai. Yehowa Israela masha ni hpe tsun da ai chyeju lam langai mi muk yawm ai n rai: yawng mayawng byin tup wa sai.

¹ Shaloi Yawshu gaw, Rubin masha ni, Gad a masha ni hte Manashe chyen masha ni hpe shaga la nna, ² Yehowa a shangun kasa Mawshe nanhte hpe hkangda mada hte maren, nanhte hkan galaw nna, ngai nanhte hpe hkangda mada mung, nanhte madat manit dai: ³ dai ni du hkra, ndai hte na wa ai laman e, nhpu nnau ni hpe nanhte n kau da ai sha, nanhte a Karai Kasang Yehowa nanhte hpe hkangda ai lam nanhte hkan shatup manit dai. ⁴ Ya chyawm gaw, nanhte a Karai Kasang Yehowa ga ndat nga ai hte maren, nanhte a nhpu nnau ni hpe ban sa shangun mu ai: dai re ai majaw nanhte nhtang nna, Yawdan hka wora hkran e Yehowa a shangun kasa Mawshe nanhte hpe jaw da ai, nanhte a ndum nta, nanhte madu lu ai sali ga de, bai wa manu. ⁵ Raitimung, Yehowa a shangun kasa Mawshe hkangda ai ga hte jep ai tara hpe hkan shatup nna, nanhte a myit masin mahkra hte kraw lawang mahkra hte, nanhte a Karai Kasang Yehowa hpe tsawra nna, shi a lam shagu hkan nang let, shi hkangda ai ga madat, shi hta shamyet shanat nna, shi a magam gunhpai lu na, shaja nga mu, ngu nna tsun wu ai. ⁶ Shingrai Yawshu gaw shanhte hpe shaman ya nna dat dat wu ai: shanhte mung tinang ndum nta de bai wa ma ai. ⁷ Manashe amyu chyen mi a matu sali ga gaw Bashan mung hta Mawshe jaw da sai; bai chyen mi a matu gaw Yawdan hka sinna hkran de shanhte a hpunau ni hte rau Yawshu jaw nu ai. ⁸ Dai hta kaga Yawshu shanhte hpe ndum nta de dat dat yang, Ya, nanhte sutgan law law, yamnga law law, aja gumhpraw ahpri magri hte hpun palawng law law wa lu la manit dai rai nna nanhte a ndum nta de wa manit: masha hpyen ni kaw na kashun la lu ai lanep rai ni hpe nhpu nnau ni hte karan la mu, nga nna tsun let shanhte hpe shaman ya mu ai. ⁹ Shingrai Rubin kashu kasha ni, Gad a kashu kasha ni hte Manashe a n-gup hta hkangda ai hte maren, shanhte a madu lu ai ga, Gilead mung de nhtang wa na nga, Hkanan mung Shilo mare e, Israela kashu kasha ni kaw na pru wa ma ai. ¹⁰ Ya shanhte Hkanan mung na Yawdan hka ginwang du jang, Rubin kashu kasha ni, Gad kashu kasha ni hte Manashe amyu chyen ni gaw, Yawdan hka makau e danhkung ai tawn hkungri kaba gaw tawn ma ai. ¹¹ Shingrai, Yu, mu, Rubin a kashu kasha ni, Gad a kashu kasha ni hte Manashe amyu chyen ni gaw, Hkanan mung hte tawtap, Yawdan ginwang hta, Israela kashu kasha ni hte hkran hpra e, tawn hkungri gaw tawn masai, nga ai shi Israela kashu kasha ni na ma ai. ¹² Israela kashu kasha ni dai shi na jang, shanhte hpe sa gasat na nga, Israela kashu kasha ni a shawa hpung ting Shilo mare e zuphpawng nga ma ai. ¹³ Ya, Israela kashu kasha ni gaw, hkinjawng Eleaza a kasha Hpineha hte Israela amyu lakung shagu hta na du kaba ni ngu ai, Israela masha mun mun hkying hkying hta na du agyi marai shi hte hpe san la nna, ¹⁴ Rubin amyu, Gad amyu hte Manashe amyu chyen ni nga ai Gilead mung de shangun dat mu ai. ¹⁵ Shaloi shanhte gaw Rubin amyu, Gad amyu hte Manashe amyu chyen ni nga ai Gilead mung du nna, ¹⁶ Yehowa a shawa hpung ting ning nga ma ai, Nanhte dai ni Yehowa hpe gumlau na nga tawn hkungri gaw da nna, Yehowa a lam hpe dai ni kau da ai hte Israela Karai Kasang hpe tawt lai myit dai gaw, hpa lam rai nga malit ta? ¹⁷ Nanhte dai ni Yehowa a lam n hkan ai dam mat wa na gaw, Peora a majaw hkrum ai yubak, anhte a matu garai n ram a ni? Yehowa a shawa hpung hta ana zinli du ai pyi, dai hpe anhte dai ni du hkra garai n shasan lu ga ai: ¹⁸ nanhte dai ni Yehowa hpe gumlau ai majaw, hpawt ni Israela shawa hpung ting hta shi a pawt ai sindawng du na ra ai. ¹⁹ Nanhte madu ai lamu ga n san n seng malit yang, Yehowa madu nna Yehowa a shawa sum nga ai mung de rap nhtawm, anhte hte rau wa madu la maru:shing n raitimung, anhte a Karai Kasang Yehowa a tawn hkungri hta kaga, tinang a matu tawn hkungri shaje gaw da nna Yehowa hpe hkum gumlau myit, anhte hpe mung hkum gumlau myit, ²⁰ Zera kasha Ahkan mung machyai kau sai rai hta shut ai majaw, Israela shawa hpung ting a ntsa e pawt sindawng du ai n rai ni? Dai wa shut ai majaw shi hkrai si sum ai n rai, ngu nna tsun mu ai. ²¹ shaloi Rubin a kashu kasha ni, Gad a kashu kasha ni hte Manashe amyu chyen ni gaw Israela masha mun mun hkying hkying a du gyi ni hpe, ²² Hpung dagu rawng ai Karai Kasang Yehowa, Hpung dagu rawng ai Karai Kasang Yehowa shi nan chye nga ai: Israela masha ni mung chye lu na marin dai: Anhte gumlau mayu nna, Yehowa hpe tawt lai myit rawng nna, Yehowa a lam hta na dam mat wa na ngu nna tawn hkungri galaw ai she rai saga yang gaw, dai ni jang hkrum sha n ga: ²³ dai tawn hkungri hta wan nat hkungga, shadung kumhpa hte mahku hkungga nawng na myit ga ai rai yang gaw, Yehowa shi nan sawk yu mi ga: ²⁴ htawmhpang prat e nanhte a kashu kasha ni mahtang, Rubin kashu kasha ni hte Gad kashau kasha ni e, Israela Karai Kasang Yehowa hte nanhte hpa daw myit ta? ²⁵ Yehowa gaw nanhte hte anhte a lapran e Yawdan hka din da nu ai: Yehowa hte nanhte hpa n daw myit dai, nga nna anhte a kashu kasha ni hpe tsun na ra ai majaw, anhte a kashu kasha ni Yehowa hpe n hkrit n kang ai nga mat shangun na hpe anhte tsang ai majaw she ndai galaw ga ai n rai ni? ²⁶ Dai rai nna, Anhte tawn hkungri galaw saga, ngu nna bawng ga ai: wan nat hkungga nawng na ngu ai mung n rai; ²⁷ htawmhpang prat e nanhte a kashu kasha ni anhte a kashu kasha ni hpe, Nanhte gaw Yehowa hte hpa n daw myit dai, n nga lu mu ga ngu nna mung, anhte Yehowa man e wan nat hkungga hte mayu hkungga nawng jau let amu gunhpai lu n ga ngu nna mung, anhte hte nanhte a lapran e ndai tawn hkungri gaw anhte a hpang na shu mashi shu masha prat dingsa sakse tai nga u ga, ngu nna she gaw tawn ga ai. ²⁸ Shingrai, htawmhpang prat e shanhte gaw anhte hte anhte a kashu kasha ni hpe shing nga tsun jang, anhte mung, Anhte a ji wa ni gaw da ai Yehowa a tawn hkungri hkrang hpe yu yu mu; dai gaw wan nat hkungga nawng na matu n rai, mayu hkungga nawng na matu mung n rai; anhte hte nanhte a lapran e sakse tai na matu she gaw tawn ai re ai, nga nna tsun lu shara rawng nga u ga, ngu nna bawng ga ai. ²⁹ Anhte Yehowa hpe gumlau nna, shawa sum a man na anhte a Karai Kasang Yehowa a tawn hkungri hta kaga, tawn hkungri shaje galaw nna wan nat hkungga, shadung kumhpa hte mayu hkungga nawng jau ai hte Yehowa a lam hta na dai ni dam mat wa na gaw anhte hte tsan nga u ga law, ngu nna htan mu ai. ³⁰ Hkinjawng Hpineha hte shi hte rau nga ai shawa hpung a du gyi ni ngu ai Israela masha mun mun hkying hkying a du gyi ni gaw, Rubin kashu kasha, Gad kashu kasha ni hte Manashe kashu kasha ni a ga na jang, shanhte grai kabu nga ma ai. ³¹ Shaloi hkinjawng Eleaza a kasha Hpineha gaw, Nanhte Yehowa hpe n shut myit dai majaw, Yehowa anhte hta nga nga ai gaw dai ni anhte chye saga ai: nanhte Israela kashu kasha ni hpe Yehowa a lata na ya hkye la manit dai, ngu nna Rubin kashu kasha ni, Gad kashu kasha ni hte Manashe kashu kasha ni hpe tsun mu ai. ³² Shingrai hkinjawng Eleaza a kasha Hpineha hte du gyi ni gaw, Rubin kashu kasha ni hte Gad kashu kasha ni nga ai Gilead mung nna, Israela kashu kasha ni nga ai Hkanan mung de bai wa nna dai shiga wa tsun shana wu ai. ³³ Israela kashu kasha ni dai ga na jang kabu nga ma ai: Israela kashu kasha ni mung Karai Kasang hpe shakawn kungdawn nna, Rubin kashu kasha ni hte Gad a kashu kasha ni nga ai mung hpe hpya kau na matu, shanhte hpe hpyen rawt na lam, naw n tsun masai. ³⁴ Rubin kashu kasha ni hte Gad kashu kasha ni mung dai tawn hkungri hpe Eda, ngu shamying mu ai: kaning rai nme law, Yehowa, Karai Kasang rai nga ai gaw, ndai tawn hkungri anhte a lapran e sakse rai nga ai, nga ai rai malu ai.

¹ Ya, Yehowa gaw, grupyin na hpyen ni yawng hpe manga kau ai hte Israela kashu kasha ni hpe ban sa shangun a tsawmra na wa nna, Yawshu aprat kaba nna dingla wa sayang; ² Yawshu gaw Israela masha ni yawng hte shanhte a salang ni, du gyi ni, tara agyi ni hte bu ni hpe shaga la nna, Ngai gaw aprat kaba ai hte dingla ni ai: ³ nanhte a Karai Kasang Yehowa nanhte a matu ndai amyu masha ni yawng hte hta galaw ai lam magup hpe nanhte hkum nan chye myit dai: nanhte hpang maga majan gasat ya ai gaw, nanhte a Karai Kasang Yehowa rai nga ai. ⁴ Yu mu, Yawdan hka kaw nna, sinna maga Nammukdara kaba du hkra, ngai shamyit kau sai masha amyu nlang hte, ndai ngam nga ai amyu ni a mungdan hpe nanhte amyu ni a sali wunli tai na matu, ngai karan ya masade ai. ⁵ Nanhte a Karai Kasang Yehowa ga ndat nga ai hte maren, ndai amyu ni hpe nanhte a Karai Kasang Yehowa shachyut kau nna, nanhte a myiman na shaden kau na hte, shanhte a lamu ga nanhte madu la na marin dai. ⁶ Dai re ai majaw, nanhte myit nden shaja nna Mawshe a laika hta ka da mada hte maren, pai de hkra de n yit ai sha, hkan nang nga mu; ⁷ nanhte hta naw ngam nga ai ndai amyu ni hte n kanawn, shanhte a Hpara amying n gang, de a amying hte n dagam, shanhte hpe n jaw n jau, n naw n ku ai sha; ⁸ dai ni du hkra hkan nga manit dai zawn, nanhte a Karai Kasang Yehowa hta samyet shanat nga mu. ⁹ Kaning rai nme law, Yehowa nanhte a man na galu kaba ai hte n-gun ja ai amyu ni hpe shaden kau ya sai rai nna, dai ni du hkra nanhte a man e kadai n tsap lu masai. ¹⁰ Nanhte hpe tsun da sai hte maren, nanhte hpang maga gasat karum ai wa nanhte a Karai Kasang Yehowa rai nga ai majaw, nanhte hta na marai langai sha masha hkying mi hpe jahtaw kau lu na marin dai. ¹¹ Dai re ai majaw, nanhte a Karai Kasang Yehowa hpe tsawra nga na, grai sadi nga mu. ¹² Dai n rai, nanhte loi mi sha htak mat wa nna, ya nanhte hta naw ngam nga ai ndai amyu ni hte makyit mahkai let, num la num ya rai nna, shanhte hte kanawn mazum myit yang gaw, nanhte a Karai Kasang Yehowa htawmhpang de ndai amyu ni hpe nanhte a man na shaden kau ya sa na n rai; ¹³ nanhte a Karai Kasang Yehowa nanhte hpe jaw sai, ndai kaja ai mungdan hta na nanhte n htum mat dingsa, shanhte gaw nanhte a dawnggawng hte ndaw mahkam, nanhte a garep hta lasik, nanhte a myi hta aju tai na mara ai gaw, gaja wa teng teng chye da nga mu law. ¹⁴ Yu mu, ngai mi chyawm gaw, ga ntsa n-gawn shawa yawng wa ai lam de, dai ni wa ni ai: nanhte a Karai Kasang Yehowa nanhte a matu tsun da ai chyeju lam langai mi muk n yawm ai sha, nlang hte hpring tup wa sai gaw, nanhte nan tinang kraw, tinang myit hta chye nga myit dai. ¹⁵ Nanhte a Karai Kasang Yehowa, nanhte hpe tsun da sai chyeju lam shagu nanhte hta hpring tup wa sai zawn, nanhte a Karai Kasang Yehowa nanhte hpe jaw ai ndai mungdan kaja hta na nahte n htum mat dingsa, nanhte a ntsa e ari hkum sumhpa mung Yehowa dat dat na ra ai. ¹⁶ Nanhte a Karai Kasang Yehowa nanhte hpe hkangda ai ga shaka lam hta na nanhte tawt lai nna, Hpara shaje ni hpe sa jaw jau ai hte nawku nga myit yang gaw, Yehowa a pawt ai sindawng nanhte hta du nna, shi nanhte hpe jaw da ai ndai mungdan kaja hta na nanhte alawan htum mat wa na marin dai, ngu nna tsun mu ai.

¹ Ya, Yawshu gaw, Israela amyu yawng hte hpe Shehkem mare e jahpawng nna, Israela salang ni, du gyi ni, tara agyi ni hte bu ni hpe shaga la wu ai: shanhte gaw Karai Kasang a man de sa pru ma ai. ² Shaloi Yawshu Israela masha ni mahkra hpe, tsun wu ai gaw, Israela Karai Kasang Yehowa ning nga ai: Abraham hte Nahora a kawa Htera ngu ai nanhte nji nwa ni, moi prat e dai Hka nu wora hkran e nga nga ma ai rai nna, shanhte Hpara kaga nawku ma ai. ³ Shaloi nanhte a kawa Abraham hpe Hka wora hkran na ngai shaga nna, Hkanan mung ting shi e woi hkawm let shi a amyu matu shalaw jahtam ai hte Isak hpe jaw we ai. ⁴ Isak hpe mung Yaku hte Esaw ngai jaw nna, Esaw hpe Seira bum madun se ai: Yaku hte shi a kashu kasha ni chyawm gaw Egutu mung de yu wa ma ai. ⁵ Dai de Mawshe yan Arun hpe ngai shangun nna, Egutu masha ni hta galaw ai lam hte maren Egutu mung hpe sharim kau nna, dai hpang nanhte hpe shaw woi wa made ai. ⁶ Shingrai, nanhte a nji nwa ni hpe Egutu mung na ngai shaw woi wa nna, nanhte gaw dai nawng de du wa myit dai: Egutu masha ni mung, leng hte gumra jawn ai hpyen hte rai nna dai Hkyeng ai nawng du hkra nanhte a nji nwa ni hpe hkan shachyut ma ai. ⁷ Shanhte Yehowa hpe jahtau jang, nanhte hte Egutu masha ni a lapran e nsin madin shi din da nna, shanhte a ntsa e dai hka shalim dat ai hte shanhte hpe galup kau mu ai: shingrai, Egutu mung hta ngai galaw ai lam hpe nanhte myi chye mu yu manit dai: nam mali hkan e mung nhtoi tsawmra wa na hkra nanhte nga kau manit dai. ⁸ Dai hpang, Yawdan hka wora hkran e nga ai Amori masha ni a mung de ngai nanhte hpe woi shawn nna, shanhte nanhte hpe hkap gasat ma ai: shaloi shanhte hpe nanhte a lata de ngai ap kau ai rai nna, shanhte a lamu ga nanhte madu la lu myit dai; shanhte hpe mung nanhte a man na ngai shamyit kau mase ai. ⁹ Shaloi Moba hkawhkam, Zipora kasha Balak mung rawt nna, Israela hpe gasat wu ai: nanhte hpe matsa sat na matu mung, Beora kasha Balam hpe shaga wu ai; ¹⁰ ngai chyawm gaw Balam a ga n madat ya we ai; dai majaw shi nanhte hpe a shaman ya nga nna, shi a lata na ngai nanhte hpe hkye la masade ai. ¹¹ Bai, nanhte Yawdan hka rap nna Yerihko de du wa myit dai: Yerihko masha ni ngu ai, Amori, Perizi, Hkanani, Hiti, Girgashi, Hiwi hte Yebusi masha ni nanhte hpe hkap gasat ma timung, shanhte hpe nanhte a lata de ngai ap kau mawe ai. ¹² Shingrai, na a nhtu hte n rai, na a ndan hte n rai, nanhte a shawng e git shang ngai shangun dat nna, dai Amori hkawhkam lahkawng hpe shaden kau ya masade ai. ¹³ Nanhte n shaja da ai lamu ga, nanhte n de ai mare, ngai nanhte hpe jaw nna, dai hta nanhte nga nga lu myit dai; nanhte n hkai ai tsabyi sun hte tsanlun sun hta na nanhte sha lu myit dai, nga nna Yehowa tsun nga ai. ¹⁴ Dai re ai majaw, Yehowa hpe hkrit hkungga nna, sadi sahka re ai hte tengman ai hku shi hpe jaw jau nga mu: Hka wora hkran na hte Egutu mung e nanhte a nji nwa ni jaw jau ai Hpara ni hpe kau da nna, Yehowa hpe jaw jau nga mu. ¹⁵ Shing n rai, Yehowa hpe jaw jau na nanhte n ra myit yang gaw, Hka wora hkran na nanhte a nji nwa ni jaw jau ai Hpara ni hte ya nanhte nga ai mung na Amori masha ni a Hpara ni hta, gara hpe mahtang jaw jau na gaw, dai ni jang lata la mu: ngai hte nye a nta masha ni chyawm gaw Yehowa hpe jaw jau na ga ai law, ngu nna tsun wu ai. ¹⁶ Shaloi amyu masha ni gaw, Yehowa hpe kau da nna, Hpara shaje sa jaw jau na gaw anhte hte tsan nga u ga law; ¹⁷ Egutu mung a mayam nta na anhte hte anhte a ji wa ni hpe shaw woi wa nna, ndai lamik kumla kaba anhte a man e madun dan ai hte, anhte hkawm wa ai lam dingdung hkan e, anhte ga hkawm wa ai masha amyu ni hta anhte hpe bau sin ai gaw, anhte a Karai Kasang Yehowa sha rai nga ai: ¹⁸ ndai mungdan hta nga ai Amori amyu ni mahkra hpe anhte a man na shaden kau ya ai mung, Yehowa rai nga ai: dai re ai majaw, anhte mung Yehowa hpe jaw jau na ga ai; shi chyu sha anhte a Karai Kasang rai nga ai law, nga nna htan ma ai. ¹⁹ Bai, Yawshu gaw amyu masha ni hpe, Nnahte Yehowa hpe n jau lu na myit dai: shi gaw chyoi pra ai Karai Kasang rai nga ai; nau nnawn loi ai Karai Kasang mung rai nga ai: shi gaw nanhte a shut hpyit ai amu hte nanhte a yubak hpe raw dat kau lu na n rai. ²⁰ Nanhte Yehowa hpe kau da nna, Hpara tsasam ni hpe lama sa jau dam yang, nanhte hpe chyeju jaw da nhtawm, shi bai nhtang nna hpya shamyit kau na myit dai, ngu nna tsun mu ai. ²¹ Shaloi amyu masha ni gaw, N rai law, anhte Yehowa hpe jaw jau na ga ai, nga nna Yawshu hpe bai htan ma ai. ²² Bai Yawshu gaw amyu masha ni hpe, Yehowa hpe jaw jau na nga, nanhte shi e lata la manit dai gaw, nanhte hkum nan sakse rai nga myit dai, ngu nna tsun mu ai. Shanhte mung, Rai nga ga ai, nga ma ai. ²³ Yawshu mung, Dai rai yang gaw, nanhte jau tawn ai Hpara tsasam ni hpe tsan kau nna, nanhte a myit masin hpe Israela a Karai Kasang Yehowa hpang de kayin dat mu, ngu mu ai. ²⁴ Amyu masha ni mung, Anhte a Karai Kasang Yehowa hpe anhte jaw jau na ga ai; shi a ga anhte madat mara na ga ai, nga nna Yawshu a man e yin la ma ai. ²⁵ Shingrai Yawshu gaw dai shani e, amyu masha ni hte ga shaka da nna, Shehkem mare e matsun maroi hte ga madat tawn da wu ai. ²⁶ Yawshu gaw, ga dai ni hpe Karai Kasang a tara laika hta ka da wu ai; Yehowa a chyoi pra ai sum makau na wa myi hpun npu e nlung kaba sharawt jung tawn nhtawm, ²⁷ Yawshu gaw, Yu mu, ndai nlung mahtan gaw anhte a matu sakse tai nga na rai nga ai: Yehowa nanhte hpe tsun ai ga yawng mayawng dai hta na la sai; dai rai nna, nanhte a Karai Kasang hpe nanhte n ningdang kau myit ga, dai gaw nanhte hpang maga na sakse tai nga na ra ai, ngu nna amyu masha ni nlang hte hpe tsun dat wu ai. ²⁸ Dai ngut jang Yawshu gaw amyu masha ni langai hte langai hpe tinang a sali ga de wa shangun mu ai. ²⁹ Dai amu ni ngut ai hpang, Yehowa a shangun kasa, Nun a kasha Yawshu gaw, asak latsa e shi ning du nna, si mat sai. ³⁰ Shi hpe, Ehprim bum ga, Gasha kawng dingdung maga e nga ai, shi a lamu ga sali Timnat-sera mare ginwang na ga hta makoi mayang mu ai. ³¹ Yawshu a prat tup hta mung, Israela masha ni a matu Yehowa galaw ai lam magup hpe chye nna Yawshu a hpang e shi hpe mu dep ai salang ni a prat tup hta mung Israela masha ni Yehowa hpe jaw jau ma ai. ³² Israela kashu kasha ni gaw Egutu mung na la wa ai Yosep a nrut nra hpe, Shehkem a kawa Hamura kashu kasha ni kaw na, Yaku gaw gumhpraw lap latsa hte mari la ai, Shehkem mare a ginwang na ga dachyawk hta wa lup mu ai; dai gaw Yosep a kashu kasha ni a sali wunli rai nga ai. ³³ Arun a kasha Eleaza mung si mat sai; amyu masha ni shi a kasha Hpineha hpe jaw ai Ehprim bum ga na Hpineha kawng hta shi hpe makoi mayang ma ai.