YONA

YONA

¹ Ya Amihtai a kasha Yona kaw, Yehowa a mungga du nna, ² Rawt u, kaba la ai Ninewe mare de sa nna, shama ai ga hte jahtau tsun u: kaning rai nme law, shanhte a n hkru ai amu, nye a man de hkrang lung wa ra ai, ngu wu ai. ³ Yona chyawm gaw, Yehowa a man na, Tarshi mare de hprawng mat na, rawt ai; dai rai nna shi gaw Yopa mare de yu wa nna, Tarshi de sa wa ai shanghpaw li mu wu ai: shaloi dai li jahpu shi ya nna, Yehowa a man na hprawng na matu, shanhte hte rau Tarshi de sa wa na, dai li kata de shang bang wa ai. ⁴ Yehowa chyawm gaw, dai nammukdara hta nbung kaba shangun dat wu ai: dai shanghpaw li ganoi noi agrawp mat hkra, nammukdara hta laru kaba ru wa ai. Shingrai li ma ni gaw, hkrit nga ma ai rai nna, langai hte langai tinang a hpara hpe hpyi jahtau nga ma ai: ⁵ shang hpaw li tsang u ga, dai hta rawng ai rai ni hpe mung, nammukdara hta jahkrat bang kau mu ai: Yona chyawm gaw shanghpaw li a gawk kata de, shang rawng nga nna, kaleng taw let yup a nga ai. ⁶ Dai re ai majaw li agyi wa shi kaw sa nna, Yup taw nga ai wa e, nang hpa maw n ta? Rawt u, na a Karai Kasang hpe hpyi jahtau u: anhte n hten u ga, dai Karai Kasang anhte hpe myit dum dam nhten, ngu wu ai. ⁷ Bai shanhte gaw, Sa marit, ndai tsin-yam tsindam, gade a yubak majaw, anhte hkrum ai chye lu hkra, hpaida da yu ga, nga nna langai hte langai tinang a manang wa hpe tsun ma ai. Shingrai shanhte hpaida da nna, dai gaw Yona hta jaw nga ai. ⁸ Dai rai nna shanhte gaw, Gade a majaw ndai tsin-yam tsindam anhte hkrum nga ai hpe, ya tsun dan mi: nang hpa amu gun n ta? nang gade na rai wa n ta? nang gara mung na rai n ta? nang hpa baw amyu rai nga n ta? ngu nna shi hpe san mu ai. ⁹ Shi gaw, Ngai Hebre masha rai nga nngai; nammukdara hte hkarang hpe hpan tawn da ai, sumsing lamu na Karai Kasang Yehowa hpe hkrit hkungga ai wa rai nga nngai, ngu nna shanhte hpe htan mu ai. ¹⁰ Shingrai dai masha ni gaw nachying hkrit nga ma ai rai nna, Ndai nang galaw ai gaw, hpa rai nga a ta? ngu nna shi hpe tsun mu ai: kaning rai nme law, shi shanhte hpe tsun dan ai majaw, Yehowa man na shi hprawng mat ai, ndai masha ni chye nga ma ai. ¹¹ Bai shanhte gaw, Dai nammukdara anhte a matu sim mat u ga, nang hpe kaning di na rai ta? ngu nna shi hpe san mu ai: kaning rai nme law, nammukdara gaw, grau grau rawt kabrawng wa nga ai. ¹² Shi gaw, Ngai hpe hpai la nna, nammukdara hta jahkrat bang kau mi; shaloi dai nammukdara nanhte a matu sim mat na ra ai: ndai laru kaba, nye a majaw nanhte a ntsa e ru nga ai gaw, ngai chye nngai, ngu nna shanhte hpe htan mu ai. ¹³ Li ma ni chyawm gaw, hkarang de dep hkra, ja ja shap shaja ma timung, nammukdara gaw grau grau rawt kabrawng wa nga ai majaw, shanhte n dang lu mu ai. ¹⁴ Dai re ai majaw shanhte gaw, Yehowa hpe, Yehowa e, ndai wa a asak majaw, anhte n sum u ga; mara n rawng ai asai anhte hta hkum shakap mi law: nang chyawm gaw Yehowa e, galaw mayu ai hte maren, nang galaw nitdai, ngu nna hpyi jahtau mu ai. ¹⁵ Shaloi shanhte Yona hpe hpai la nna, nammukdara hta jahkrat bang kau mu ai: nammukdara a kabrawng bu ai mung, sim mat ai. ¹⁶ Dai re ai majaw dai masha ni gaw Yehowa hpe nachying hkrit hkungga nna, Yehowa hpe hkungga nawng ya let, ga sadi tawn da ma ai.

¹ Ya Yehowa gaw, Yona hpe hkap mayu kau na matu, nga kaba san tawn da nna, Yona gaw dai nga a kan kata e, masum ya masum na tup rawng nga ai. ² Shaloi Yona gaw dai nga a kan kata nna, shi a Karai Kasang Yehowa hpe hpyi wu ai. ³ Da ndai shi hpyi ai ga rai nga ai: Ngai rutsang hkrum ai majaw, Yehowa hpe ngai jahtau nna, Shi ngai hpe htan ya nngai. Katsan ga kata na, ngai shabam nga nna, Nang nye a nsen madat nga ndai. ⁴ Le asin amun sung ai shara kata, nammukdara a hpungtang de, Nang ngai hpe gumpye bang kau ni ai; Hka hpungla ni ngai hpe kawan mi ai, Na a hkaleng kaba nlang hte hte, na a gumdin gumhkaw ni, Nye a ntsa e lwi nga ma ai. ⁵ Ngai chyawm gaw, Na a myiman kaw na shaden kau ai, ngai hkrum timung, Na a chyoi pra ai nawku Htingnu de, myiman bai yawng na nngai, ngu nna tsun nngai. ⁶ Myit masin du hkra, hka hpungla ni ngai hpe kawan da mi ai; Le sung ai gaw, ngai hpe shinggrup nga ai: Nye a baw nawng ru ahkyen nga li ai. ⁷ Bum ni a npawt du hkra, ngai yu hkrat wa nngai: Dinghta ga a htinggrang ni, ngai hpe prat tup pat da timung, Nye a Karai Kasang Yehowa e, nang gaw nye a asak hpe, kasang ga hta na shaw la ya nitdai. ⁸ Nye a kraw kata e minla byaw mat yang, Yehowa hpe ngai dum nga nngai; Nye a akyu hpyi ai ga, na a chyoi pra ai nawku Htingnu de, nang kaw hkrang sali ai. ⁹ Be be lila masu ai lam hpe awlaw ai ni gaw, Tinang nang a chyeju lam, kau da shajang ma ai. ¹⁰ Ngai chyawm gaw chyeju dum ai nsen hte, nang hpe hkungga jaw na nngai: Ngai ndat da ai ga sadi ngai shanga na nngai; Hkyehkrang la ai lam Yehowa kaw na rai nga ai, nga ai. ¹¹ Shaloi Yehowa gaw, dai nga hpe tsun wu ai rai nna, shi gaw Yona hpe dai hkarang ntsa de, nhpat shapraw kau dat wu ai.

¹ Bai lahkawng lang ngu na hta, Yehowa a mungga Yona kaw du nna, ² Rawt u, kaba la ai Ninewe mare de sa nna, ngai nang hpe tsun da ai hkaw dan ai ga hpe jahtau tsun u, ngu wu ai. ³ Shingrai Yona gaw, Yehowa a ga hte maren rawt nna, Ninewe de sa wa ai. Ya Ninewe mare gaw, nhtoi masum ya sat dam nna, Karai Kasang a man e mare kaba rai nga ai. ⁴ Shaloi Yona gaw dai mare kata de lani sat hkawm hpang nna, Nhtoi mali shi ya lai jang, Ninewe hten mat na ra ai, ngu nna jahtau tsun wu ai. ⁵ Ya Ninewe masha ni gaw, Karai Kasang hpe kamsham ma ai rai nna, lusha gam na ladaw tawn da ma ai hte, kaji ai ni kaw nna kaba ai ni du hkra, lachyit nba buhpun ma ai. ⁶ Dai ga gaw Ninewe hkawhkam kaw mung du nna, shi gaw shi a tingnyang hta na rawt nhtawm, hkawhkam yangwat raw kau wu ai hte, lachyit nba lawai let, wan dap hta dung nga ai. ⁷ Dai hta n-ga, hkawhkam wa hte shi a agyi salang ni gaw, Masha mung, yamnga mung, dumsu hpung mung, sagu bainam hpung mung, hpa muk n chyim yu mu ga; ushat hkum shayaw mu, ntsin mung hkum lu shangun mu; ⁸ masha hpe mung, yamnga hpe mung, lachyit nba jahpun nna, Karai Kasang hpe ja ja hpyi jahtau shangun mu: gaja wa langai hte langai, tinang nang a n hkru ai lam hte, tinang a lata a kashun kashe amu hpe, kau da shangun mu. ⁹ Karai Kasang gaw myit malai, myit nem na hte, anhte n hten u ga, shi a pawt bu ai myit n galai na, kadai chye lu a ta? nga nna ga shabra ma ai. ¹⁰ Ya shanhte gaw tinang a n hkru ai lam, koi kau ai amu hpe, Karai Kasang mu wu ai rai nna, shi shanhte hpe ari jaw na lam, Karai Kasang myit malai nna, hpa n di mu ai.

¹ Yona chawm gaw ja ja wa myit n pyaw nna, masin pawt bu nga ai. ² Dai rai nna shi gaw Yehowa hpe, Gaja wa Yehowa e, nye a mung e ngai naw rai nga yang, ndai ngai tsun ni ai ga, n rai ni? Nang gaw chyeju, matsan dum ai, myit galu kaba ai, n-gaw nwai myit hpring nna, n hkru ai hta na myit nem la ai Karai Kasang rai nga ndai hpe, ngai chye nngai majaw, ngai gaw Tarshi de tin tin hprawng mat wa nngai. ³ Ya chyawm gaw, Yehowa e, nye a asak dawm la kau ya e; hkrung nga na hte, si ai gaw, nye a matu grau kaja nga ai, ngu nna hpyi wu ai. ⁴ Shaloi Yehowa gaw, Nang masin pawt mai a ni? ngu wu ai. ⁵ Yona mahtang, dai mare na pru wa nna, de a sinpraw maga e dung nga ai; dai yang e shi gaw shi a matu sum gap nna, dai mare hta hpa byin wa na, mu lu hkra, de a shingnip kata e dung nga ai. ⁶ Shaloi Karai Kasang Yehowa gaw, Yona a baw shingnip ya u ga hte, shi a rutsang ai hta na, shi hpe shalan shabran ya u ga, shi a ntsa e taudwi ru tu shangun wu ai: Yona mung taudwi ru a majaw ja ja kabu nga ai. ⁷ Karai Kasang chyawm gaw, hpang jahpawt nhtoi htoi ai ahkying e, shingtai langai mi san da nna, dai gaw taudwi ru hpe, nyip nywi mat hkra, kawa wu ai. ⁸ Bai Karai Kasang gaw, jan pru jang, kahtet ai sinpraw nbung san da nna, ajan gaw Yona a baw hpe hkra ai majaw, shi ma mat ai: dai rai nna shi hkum si na, shi hpyi nga nna, Hkrung nga na hte, si ai gaw, nye a matu grau kaja nga ai, nga ai. ⁹ Shaloi Karai Kasang gaw, Yona hpe, Taudwi ru a majaw, nang masin pawt mai a ni? ngu nna san wu yang, shi gaw, Si ai du hkra ngai masin pawt na, mai nga ai, ngu wu ai. ¹⁰ Shaloi Yehowa gaw, Galaw mung nang n galaw, tu mung nang n tu shangun ai; lana mi hta sha tu nna, lana mi hta sha wai mat ai taudwi ru hpe nang lahpawt nga ndai: ¹¹ dai re ai mi, tinang a hkra lata hte pai lata hpe pyi n chye ginhka ai, masha sen me mun lahkawng rawng ai, mare kaba Ninewe hpe, ngai lahpawt dum mai nga ai n rai ni? dai hta kaga yamnga law law mung rawng nga ai, ngu nna tsun wu ai.