YOBA

YOBA

¹ Uza mung hta e, Yoba mying ai wa langai mi nga ai; dai wa gaw dinghpring ai hte kangka ai wa rai nga nna, Karai Kasang hpe hkrit kamyin let, yubak mara hpe koi kau wu ai. ² Shi gaw shadang sha sanit hte shayi sha masum shaprat wu ai. ³ Shi lu ai sutgan gaw, sagu bainam hkying sanit, gawla-uk hkying masum, dumsu gap manga tsa, lawze kanu manga tsa hte, ali ama grai law nga ai, rai nna, dai wa gaw sinpraw masha ni mahkra hta grau kaba ai wa rai nga ai. ⁴ Ya shi a shadang sha ni gaw, langai hte langai, san da ai nhtoi hta, tinang a nta e poi galaw law rai nna, shanhte hte rau poi sha na matu, shanhte a kajan masum hpe mung shaga ga di mu ai. ⁵ Poi sha ngut ai nhtoi ni lai jang, Yoba gaw shaga la nna, shanhte hpe shachyoi shapra nhtawm, jahpawt jau jau e rawt nna, shanhte a nambat gu hkra, wan nat hkungga nawng ya ya re ai: kaning rai nme law, ngai sha ni gaw shut hpyit nna, tinang a myit hta Karai Kasang hpe kau da masai nhten, nga nna Yoba myit la nga ai. Yoba gaw dai lam tutnawng a galaw nga ai. ⁶ Ya Karai Kasang a kasha ni gaw, tinang hkum hpe Yehowa man e sa shadan dan ai nhtoi du yang, Satan mung shanhte hte rau ginrun sa wa ai. ⁷ Shaloi Yehowa gaw Santan hpe, nang gade nna du pru n ta? Ngu nna san wu ai. Satan gaw, ga ntsa e htinglet hkawm nna, le nang wo nang jawt du ai kaw na pru nngai, ngu nna Yehowa hpe htan wu ai. ⁸ Bai Yehowa gaw, Nye a shangun ma Yoba hpe nang matsing da nu ni? Ga ntsa e shi hte bung ai wa n nga ai; shi gaw dinghpring ai hte kangka ai wa rai nga nna, Karai Kasang hpe hkrit kamyin let, yubak mara hpe koi kau ai wa rai nga ai, ngu nna Satan hpe tsun wu ai. ⁹ Satan mahtang, Yoba gaw Karai Kasang hpe kaman sha hkrit kamyin nga a ni? ¹⁰ Nang gaw shi hpe mung, shi a nta hte shi lu malu mahkra hpe mung, grup hkra nhpan kum da ndai, n rai ni? Shi a lata amu hpe nang shaman ya nna, shi a sutgan gaw dai mungdan hta law htam wa sai. ¹¹ Ya chyawm gaw, na a lata ladawn nna, shi lu malu hpe hkra kau ya u; shaloi jang shi nang hpe na a myiman chyaw e, nyet kau da na ra ai, ngu nna Yehowa hpe htan wu ai. ¹² Shingrai Yehowa gaw, shi lu malu na a lata e rai nga ai; shi hkum hpe sha hkum hkra et, ngu nna Satan hpe tsun wu ai. Dai rai nna Satan gaw Yehowa kaw na pru mat wa ai. ¹³ - ¹⁴ Ya Yoba a shayi shadang sha ni gaw, shanhte a kahpu kaba a nta e, tsabyi poi lusha nga ma ai shani e, kasa langai mi Yoba hpang de sa du nna, utang ni gaw hkauna shawt nga nna, lawze yi ni gaw dai makau hkan e makrut sha nga ma ai; ¹⁵ Sheba masha ni mahtang sa htim nna, yamnga ni hpe gawt mat wa manu ai; nchyang ni hpe mung ri nhtu hte sat kau manu ai; nang hpe wa tsun dan na matu, ngai chyu sha lawt ni ai, ngu wu ai. ¹⁶ Dai wa gaw ga naw tsun nga yang, kasa kaga langai mi du kahtap nna, Karai Kasang a wan gaw sumsing lamu de na di hkrat wa nna, sagu bainam ni hte nchyang ni hpe hkru kau ai hte shamyit kau manu ai; nang hpe wa tsun dan na matu, ngai chyu sha lawt ni ai, ngu wu ai. ¹⁷ Dai wa gaw ga naw tsun nga yang, kasa kaga langai mi bai du kahtap nna, Hkalde masha ni dap masum htim lung wa nna, gawla-uk ni hpe gawt mat wa manu ai; nchyang ni hpe mung ri nhtu hte sat kau manu ai: nang hpe wa tsun dan na matu, ngai chyu sha lawt ni ai, ngu wu ai. ¹⁸ - ¹⁹ Dai wa gaw ga naw tsun nga yang, kasa kaga langai mi bai du kahtap nna, na a shayi shadang sha ni gaw, shanhte a kahpu kanau a nta e tsabyi poi lusha nga yang, nam mali de na n-bung kaba bung wa nna, dai nta jut mali hpe wa ahpawt jang, dai nta gaw shabrang ni a ntsa e daw kamyet nna, shanhte si mat masai; nang hpe sa tsun dan na matu, ngai chyu sha lawt ni ai, ngu wu ai. ²⁰ Shaloi Yoba gaw rawt nna, shi a hpun nba gang je kau ai hte, shi a kara shangun kau nhtawm, ga de gum dagup let nawku nna, ²¹ ngai gaw nu a hkritung nna singgu krin shangai sa nngai, Dai de singgu krin bai wa na ni ai; Yehowa jaw ya nna, Yehowa bai dawm la nga ai, Yehowa mying nsang gaw a nga u ga law, nga ai. ²² Yoba gaw dai lam yawng hkrum timung, shut mung n shut, Karai Kasang hpe mara mung n shagun ai, nga nga ai.

¹ Ya Karai Kasang a kasha ni gaw, tinang hkum hpe Yehowa man e sa shadan dan ai nhtoi du yang, Satan mung Yehowa man e shi hkum hpe shadan dan na nga, shanhte hte rau ginrun sa wa ai. ² Shaloi Yehowa gaw Satan hpe, nang galaw ga de na du pru n ta? Ngu nna san wu ai. Satan gaw, ga ntsa e htinglet hkawm nna, le nang wo nang jawt du ai kaw na pru nngai, ngu nna Yehowa hpe htan wu ai. ³ Bai Yehowa gaw, nye a shangun ma Yoba hpe nang matsing da nu ni? Ga ntsa e shi hte bung ai wa n nga ai; shi gaw dinghpring ai hte kangka ai wa rai nga nna, Karai Kasang hpe hkrit kamyin let, yubak mara hpe koi kau ai wa rai nga ai: mara n nga ai, shi hpe jahten na nga, nang ngai hpe shadut timung, shi gaw shi a dinghpring ai myit hta naw agrin nga ai, ngu nna Satan hpe tsun wu ai. ⁴ Satan mahtang, hpyi a matu hpyi, nga ai hte maren, masha gaw shi a asak a matu tinang lu malu jaw kau na ra ai. ⁵ Ya chyawm gaw, na a lata ladawn nna, shi a nrut nra hte ashan hpe hkra kau ya u; shaloi jang, shi nang hpe, na a myiman chyaw e, nyet kau da na ra ai, ngu nna Yehowa hpe htan wu ai. ⁶ Shingrai Yehowa gaw, yu u, shi na a lata e rai nga ai; shi a asak hpe sha shalawt da u, ngu nna Satan hpe tsun wu ai. ⁷ Dai rai nna Satan gaw Yehowa kaw na pru mat wa nna, Yoba hpe lagaw lahpan kaw nna baw pungding du hkra krawi jap tu ahpra shangun wu ai. ⁸ Shi hkum hpe ahkut kau na matu, di chyen shi la nna, wan dap hta dung nga ai. ⁹ Shaloi madu jan gaw, nang gaw na a dinghpring ai myit hta naw agrin nga n ni? Karai Kasang hpe nyet kau da nna, si mat wa u, ngu nna shi hpe tsun wu ai. ¹⁰ Shi chyawm gaw, myit n gring ai num ni tsun ai zawn, nang tsun nga ndai; ataw, Karai Kasang a lata na kaja ai hpe hkam la nhtawm, n kaja ai hpe mung hkam la na, n mai nga a ni? Ngu wu ai. Yoba gaw dai lam yawng hkrum timung, n-gup hte pyi n shut nga ai. ¹¹ Ya Yoba a jinghku jing-yu ni ngu ai, Teman masha Elihpa, Shuhi masha Bilda, Nama masha Zohpa, marai masum hte gaw, Yoba hta byin ai tsin-yam tsindam mahkra a lam na ma yang, shi hte rau yawnhkyen nna, shi hpe shangwi shapyaw na matu, sa zuphpawng na aten madat da ai majaw, langai hte langai tinang a shara na sa wa ma ai. ¹² Shanhte gaw tsan tsan kaw nna shi hpe mu mada timung, shi hpe n chye mu ai majaw, shanhte nsen sharawt nna, hkrapngu hkrapngoi let, tinang hpun nba gang je kau ai hte, tinang a baw hta hkrat bun hkra, ga nhpu lamu de agat shalun ma ai. ¹³ Shingrai shanhte gaw sanit ya sanit na tup shi hte rau ga hta dung nga nna, shi hkrum ai tsin-yam tsindam gaw, grai yak la nga ai hpe, shanhte mu ma ai majaw, kadai mung shi hte ga hkaw mi pyi n tsun ma ai.

¹ Dai hpang Yoba gaw n-gup hpaw nna, shi a shangai nhtoi hpe dagam kau wu ai. ² - ³ Yoba gaw, ngai shangai wa ai nhtoi hte, “Lasha shaprat sai,” nga nna shi wawn tsun ai shana gaw, hten byak mat u ga. ⁴ Dai shani gaw, nsin chyip rai mat u ga; Karai Wa ntsa de nna, dai nhtoi hpe n mada yu u ga, dai shani a ntsa e, nhtoi nhtoi mat u ga. ⁵ Nsin hte si ai shingnip, dai shani hpe ka-up nga u ga, de a ntsa e sumwi htat nga u ga; dai shani, n hpru n mai ai shani tai mat u ga. ⁶ Dai shana gaw htat ai nsin hta lup mat u ga; shaning na nhtoi ni hta n lawm u ga, shata hti ai hta mung n lawm nga u ga. ⁷ Gja wa, dai shana gaw, katsi katsang rai nga u ga; kabu gara ai nsen dai hta n lawm nga u ga. ⁸ Shani hpe matsa dagam chye ai ni hte, Baren hpe jasu chye ai ni gaw, dai shana hpe dagam kau mu ga. ⁹ De a nrim gintawng ni gaw nip mat mu ga: nhtoi hpe marit timung, n mu lu u ga; jahpawt na sawmrawm nhtoi hpe n mu lu u ga. ¹⁰ Kaning rai nme law, dai shana gaw, nu a hkritung n pat kau ai hte, nye myi hta na tsin-yam tsindam makoi kau ya ai, n rai. ¹¹ Ngai gaw, dai daw shara e hpa majaw n si a ta? Shangai ningtawn e, hpa majaw nsa n hti mat a ta? ¹² Hpa majaw ngai hpe lahpyen e pawn mi ta? Hpa majaw madoi chyuhpang, jaw mi ta? ¹³ Shing n rai yang, ngai kaleng taw nna, asim sha nga na nngai; ngai yup pyaw let, asan apan nga na nngai: ¹⁴ - ¹⁶ Tinang matu hten run chye ai masat dingsat dè da ai, ga ntsa hkawhkam ni, du bawmung ni hte rau mung; Aja sut mahkawng da nna, tinang a nta ni hta, gumhpraw hte jahpring ai agyi salang ni hte rau mung; shata n gu ai makoi kau ai nbya hte, nhtoi galoi n mu lu ai ma chyangai zawn, ngai n nga mat na ni ai. ¹⁷ Dai shara e n hkru ai ni, sharu shatsang lu na, n rai; dai yang e hki ba ai ni ban sa nga ma ai. ¹⁸ Bawngdung ai ni rau sim sa nga ma ai rai nna, hpareng wa a nsen hpe na lu ma ai, n rai. ¹⁹ Dai yang e kaji kaba yawng dè nga ma ai, rai nna, mayam wa gaw madu a lata na lawt lu nga ai. ²⁰ Tsin-yam tsindam hkrum ai wa hpe, hpa majaw nhtoi jahtoi ya n ta? Myit masin hka ai wa hpe hpa majaw asak jaw n ta? ²¹ Shanhte gaw si ai hpe marit timung, n hkrum ma ai. Makoi da ai sutgan htu tam ai hta, si lam hpe grau nna tam ma ai. ²² Shanhte nsung hku hpe mu jang, kabu nna, nachying sharawng awng nga ma ai. ²³ Tinang wa na lam n mu ai wa hte, Karai Wa grupyin kum da ai wa hpe, nhtoi hte asak hpa majaw jaw n ta? ²⁴ Ngai shat garai n sha yang, yawn madai nga nngai; ngai hkrap shabam ai gaw hka hpungtun zawn wu nga ai. ²⁵ Kaning rai nme law, ngai hkrit gari ai lam, nye a ntsa e du sai; ngai hkrit ai tsin-yam ngai kaw du ra ai. ²⁶ Ngai amu sha nga ai mung, n rai; sim sa nga ai mung, n rai; gan ga lu ai mung, n rai: raitimung, ru tsang ai hkrai hkrum ai law, nga ai.

¹ Shaloi Teman masha Elihpa htan nna tsun ai gaw, ² nang hte ga tsun yang, nang myit machyi na n ni? Raitimung, ga n tsun ai, kadai wa nga lu na rai ta? ³ Nang gaw masha law law hpe sharin ya nit dai, n-gun n rawng ai lata ni hpe nang n-gun shaja ya ndai. ⁴ Na a ga gaw kataw ai wa hpe shadaw ya nga ai, kya noi mat ai lahput ni hpe, nang shaja ya ndai. ⁵ Ya chyawm gaw, nang nan hkrum nna, myit hten nit dai; nang hpe hkra ai majaw, myit law nga ndai. ⁶ Nang tara hkungga ai gaw, na a myit machyu shara, na dinghpring ai lam gaw, na a myit mada shara rai nga ai, n rai ni? ⁷ Ya dum u, mara kata ai wa, kadai hten byak hkrum nga a ta? Dinghpring ai wa gaw, kanang e htum wa sata? ⁸ Ngai mu ai hte maren, Yubak hpe shawt hkai ai wa hte, n hkru ai lam gat yai ai ni gaw, dai hpe dan la ga ma ai. ⁹ Karai Wa kawut ai majaw, shanhte hten byak hkrum nna, shi pawt kahtet ai nsa hte myit mat masai. ¹⁰ Hkanghkyi shabam ai, hkanghkyi matse a nsen hte, hkanghkyi hkalung ni a kawng, daw mat masai. ¹¹ Shahpa n nga ai majaw, hkanghkyi dingla si mat nna, hkanghkyi kanu a kasha ni bra mat masai. ¹² Ga langai mi, ngai hpe lagyim tsun nna, nye a na gaw, de a kahte ai nsen na lu li ai. ¹³ Masha ni yup a ai aten hta e, shana na shingran majaw, myit aru nga yang, ¹⁴ nye a nrut nra ni yawng gari kawa rai hkra, nye a ntsa e hkrit kajawng ai gaw du ra ai. ¹⁵ Shaloi minla langai mi nye a man e lai hkawm nna, nye a kara lachyi rawng nga ai. ¹⁶ Dai gaw tsap nga timung, de a hkumhkrang pra ngai n mu nngai; shingna sha ngai mada mu nngai: atsin sha nga ai hpang, ngai na ai nsen gaw, ¹⁷ si chye ai wa gaw, Karai Wa hta grau dinghpring nga a ni? Shinggyim masha gaw, Hpan Madu hta grau san pra nga a ni? ¹⁸ Yu u, shi a ali ama ni hpe shi n kam nga ai; lamu kasa ni hta pyi, mara shagun shara rawng nga ai: ¹⁹ Dai rai yang, ga kagam nta hta dè rawng nna, ga nhpu hta nhpang gaw da ai ni hte, shingtai zawn agrawp kau hkrum ai ni hta, grau nna mara shagun shara nga ai, n rai ni? ²⁰ Jahpawt kaw nna shana du hkra, shanhte adup kau ai hkrum nna, kadai mung, hpa n nawn ai sha, shanhte hten mat ma ai. ²¹ Shanhte a arawng gaw dawm kau hkrum ai, n rai ni? Hpaji n chye ai shanhte si mat wa masai.

¹ Ya shaga u; kadai wa nang hpe htan na rai ta? Chyoi pra ai ni hta, kadai wa hpe mada yu na n ta? ² Sindawng kahtet ai gaw, masha angawk hpe sat kau nga ai; manawn masham ai gaw, hpaji kata ai wa hpe, si shangun nga ai. ³ Angawk ai wa ru jung nga ai hpe, ngai mu timung, Shi dè nga ai shara hpe ngai alawan dagam kau nngai. ⁴ Shi a kasha ni gaw, sim sa ai shara hte tsan nga ma ai; mare chyinghka hta, shanhte ahtu adep hkrum timung, mawai la ai wa n nga ai. ⁵ Kawsi ai ni gaw, shi dan ai mam hpe lagu sha nna, ju nhpan kata na pyi kashun la mu ai; hpang kara ai ni gaw, shanhte a arung arai hpe, maut kau ya mu ai. ⁶ Nni nkri gaw ga nhpu hta na pru ai, n rai; tsin-yam tsindam gaw lamu ga hta na tu pru ai n rai. ⁷ Wan numya ni ntsa de poi lung wa ai zawn, shinggyim masha gaw, tsin-yam hkrum na matu, shangai wa sai. ⁸ Ngai chyawm gaw, Karai Wa hpe tam na nngai; nye a amu, Karai Kasang kaw, ap ya na nngai. ⁹ Shi gaw galu kaba ai hte n dang chye ai amu galaw nga ai; n dang hti ai mauhpa bungli shachyen nga ai: ¹⁰ Ga ntsa e shi marang jahtu ya nna, yi hkauna ni hpe madit ya mu ai: ¹¹ Shingrai, shi gaw, matsan mayan ni hpe shagrau shatsaw nna, yawnhkyen hkrum ai ni hpe, bran nga ai de, shalun mu ai. ¹² Hkalem hkalau ai ni a lata, tinang amu hpe n shabyin lu u ga, shi gaw, shanhte a hpaji daw ai lam shanut kau ya mu ai. ¹³ Shi gaw, hpaji rawng ai ni hpe, tinang a hpaji hte shakrip mu ai; hkalem sha ai ni a bawng ai hku hpe gale kau ya mu ai. ¹⁴ Shanhte gaw, shani e nsin hkrum nna, jan pungding aten a, shana e zawn, lamawm hkawm nga ma ai. ¹⁵ Shi gaw, shanhte a n-gup nna pru ai nhtu hta na mung, n-gun ja ai ni a lata na mung, matsan mayan ni hpe mawai la mu ai. ¹⁶ Shingrai, gawng run ni a matu myit mada shara nga ai; n hkru ai gaw tinang a n-gup hpe pat kau nga ai. ¹⁷ Karai wa e mara madun ya hkrum ai wa gaw a nga ai; dai rai nna, n-gun chyalai rawng ai Madu sharin ai ga hpe, n gawn n sawn hkum rai et. ¹⁸ Shi gaw jahpye ya nna, ahkyen kayawp ya nga ai, shi hkala kau nna, shi a lata hte shamai ya nga ai. ¹⁹ Shi nang hpe ru tsang amu kru hta na mawai la ai hta n-ga, sanit lang hkrum timung, nni nkri nang hpe hkra na, n rai. ²⁰ Hku hku hkrum yang, si hkrung si htan hta na mung, hpyen gasat hkrum yang, nhtu hta na mung, nang hpe mawai la na ra ai. ²¹ Shatan nhkan kaw na nang lawt lu nna, hten byak ai du timung, nang hkrit shara n nga ai. ²² Hten byak ai hte hku hku ai hpe nang mani kau nna, lamu ga na matse labye ni hpe, hkrit shara n nga ai. ²³ Pa ga na nlung ni gaw, nang hte ga shaka tawn da nna, prang ga na matse labye ni mung, nang hte jinghku hku na mara ai. ²⁴ Na a sum ngwi pyaw nga ai hpe nang mu nna, na a buga de sa kawan yang, myit hten shara n nga ai. ²⁵ Na a matu mara ni law htam wa ai hte, na a aru arat ni gaw, ga ntsa na tsingdu zawn rai nga ai hpe, nang mu lu na ndai. ²⁶ Aten ladaw du yang, shu la ai hkauling zawn, nang gaw aprat nga nna, nsung hku de shang wa na rin dai. ²⁷ Yu u, ndai lam anhte sagawn yu nna, ning rai nga ai; na la u, nang nan dai hpe chye na u, nga ai.

¹ Shaloi Yoba htan nna, ² ngai hkrum ai tsin-yam tsindam hpe shen yu ga lè; ngai hkrum sha ai shoihpa shoirang, joi hta mahkawng da u ga. ³ Ya dai gaw nammukdara zaibru hta grau li na ra ai; dai re ai majaw, ngai ga tsun lai nngai. ⁴ N-gun chyalai rawng ai wa a pala ni ngai hta jung nna, nye a wenyi gaw de a gung hpe chyup la nga ai: Karai Wa a hkrithpa ni, ngai hpe htim na, hkyen ma ai. ⁵ Nam lawze gaw, tsingdu sawng yang, shbam ga a ni? Dumsu gaw, ushat nga yang, nbaw ga a ni? ⁶ Nsam n nga ai rai hpe, jum n bang ai, sha lu a ni? Udi hpyi gaw sau ai nsam rawng a ni? ⁷ Dai hpe ahtawk na pyi, nye a myit n hkraw, dai gaw nye a matu akren ai shahpa rai law. ⁸ Ngai hpyi ndawt ai lam lu la u ga, ngai myit mada ai lam Karai Kasang jaw ya n ga. ⁹ Karai Wa gaw ngai hpe shaza kau u ga; shi a lata ladawn nna, ngai hpe jahtum kau u ga. ¹⁰ Shingrai, n htum n ni nni nkri ngai hkam sharang timung, chyoi pra ai Wa a ga hpe ngai n shim da ai gaw, nye a myit pyaw shara naw rai nga u ga. ¹¹ Ngai naw ala nga na, nye a n-gun kanang rai nga a ta? Ngai naw shakut sharang nga yang, hpa akyu hkam la na rai ta? ¹² Nye a n-gun nlung a n-gun rai ni? Nye a hkumshan magri rai ni? ¹³ Ngai gaw nye hkum hpe hpa n di lu nngai, nye a nyan hpaji mung htum sai, n rai ni? ¹⁴ Jinghku ni gaw gawng run hkrum ai wa hpe matsan dum mai nga ai; shing n rai yang, shi gaw n-gun chyalai rawng ai Wa hpe hkrit hkungga na myit kau da na ra ai. ¹⁵ Ngai hpu ngai nau ni chyawm gaw, hka shi zawn hkalem nna, hkaraw e lwi ai hka zawn mat mat ma ai. ¹⁶ Dai ni gaw ntsin ke ai hte chyang mat wa nna, hkyen gumdin ni dai hta lup mat wa ma ai. ¹⁷ Nlum ta du jang, dai ni byawng mat wa nna, kahtet ai majaw, hkyet kan mat wa ma ai. ¹⁸ Dai lam lai ai hpaga ni, hka tam na, shayan shang timung, ahkun ahkraw hkrai mu nna, hten mat hkrum ma ai. ¹⁹ Tema mung na hpaga ni hka tam nna, Sheba hpung ni ntsin lu na myit mada let sa du ma ai. ²⁰ Ya nanhte dai hte maren, kaman rai nga myit dai; nanhte hkrithpa mu nna hkrit gari nga myit dai. ²² Ngai gaw, ngai hpe kumhpa jaw mi; shing n rai, nanhte a arung arai hta na nye a matu shapraw jaw mi; ²³ Hpyen ni a lata na ngai hpe mawai la mi; shing n rai, ngai hpe sharu shatsang ai ni a lata na, ngai hpe hkrang la mi, nga nna ngai tsun yu n ni? ²⁴ Ngai hpe sharin ya mi, ngai atsin sha nga na nngai; ngai shut ai lam, ngai hpe madun ya mi. ²⁵ Tengman ai ga gaw, atsam gade rawng nga a hka! Nanhte a shadum ai lam chyawm gaw, hpa rai nga a ta? ²⁶ Myit htum ai wa tsun ai ga gaw, nbung sha rai nga, timung, ga dai hpe hkan nna mara shagun mayu myit ni? ²⁷ Gaja wa, nanhte gaw, jahkrai ma hpe hpaida da nna, jinghku ni hpe hpaga rai zawn nawn myit dai. ²⁸ Ya, nye a hkum hpe mada yu mu; nanhte a man e masu ai ga ngai n tsun na nngai. ²⁹ Bai wa manu, yubak n pru u ga; rai sa, bai wa manu, nye a lam dingman ai lam rai nga ai. ³⁰ Nye a shinglet hta, yubak kap nga ai kun? shawp ai n shawp ai, ngai n chyim ginhka lu na kun?

¹ Shinggyim masha gaw, ga ntsa ehpyen gasat hkrai hkrum nga ai, n rai ni? Shi a nhtoi ni gaw nchyang wa a nhtoi zawn rai nga ai, n rai ni? ² Nchyang wa gaw shana aten hpe ndawt la ai hte, shabrai sha ai wa gaw shabrai la na aten hpe myit mada nga ai zawn, ³ ngai gaw shata law law wa ruyak hkrum sha nngai; nji nmu hpring ai shana gaw, nye a matu san da nga ai. ⁴ Galoi wa me shana lai nna, ngai yup rawt lu na i? nga nna yup kaleng let ngai tsun nga nngai: nhtoi htoi hkra ngai gale galau hkrai rai nga nngai. ⁵ Byet hte hkagrawi gaw, nye a hkumshan hpe ka-up nga ai; nye a hkum hpyi ga kaprang wa nna, matsawi abyi nga ai. ⁶ Nye a nhtoi ni gaw, da danghkyem hta, grau lawan nna, myit mada shara n nga ai, lai mat wa sai. ⁷ Nye a asak gaw nbung rai nga ai hpe, dum nga u. Nye a myi gaw mai kaja ai hpe bai mu sa na, n rai. ⁸ Ngai hpe sa hpu ai wa gaw, ngai hpe bai mu sa na, n rai, nang ngai hpe mada yu yang, ngai n nga mat ni ai. ⁹ Sumwi hkoi mat nna, mat mat ai zawn, katsan ga de yu wa ai ni, bai lung wa lu na, n rai. ¹⁰ Shi gaw, tinang nta de bai nhtang wa lu na, n rai, shi a shara gaw shi hpe bai chye lu na, n rai. ¹¹ Dai rai nna, ngai gaw nye a n-gup hpe ip da na, n rai: nye a wenyi hki ba ai hte ga tsun na nngai, nye a myit karen ai majaw, lajin ga tsun na nngai. ¹² Nang ngai hpe grupyin wang da ai gaw, ngai gaw nammukdara, shing n rai, baren rai nga a ni? ¹³ Nye a yupku ngai hpe shangwi shapyaw na hte, nye yupra ngai lajin ai ga jasim u ga, nga nna tsun yang, ¹⁴ nang gaw yupmang hte ngai hpe jahkrit shama nna, shingran hte hkrit kajawng shangun ndai. ¹⁵ Shingrai, ngai myit masin shadau si ai lata la nna, nye a lasi lamun re ai nrut nra ni hta, si hkrung si htan grau mai nga ai. ¹⁶ Ngai n-gun yawm wa nngai; tutnawng hkrung nga na, n rai; ngai hkrai nga nga n ga; nye nhtoi ni nbung hkrai rai nga ai. ¹⁷ Nang gaw shinggyim masha hpe shagrau shaa nna, shi a lam myitsumru yu na hte, ¹⁸ jahpawt shagu shi hpe kawan katsan nna, ahkying shagu shi hpe dinglik yu na gaw, shi hpa wa mi rai nga a hka? ¹⁹ Na a myiman ngai kaw na, galoi kayin mat wa nna, ngai mayen mayu ai du hkra, ngai hpe hkrai, galoi tawn da na rai ta? ²⁰ Masha wa hpe azi yu ai wa e, ngai shut hpyit yang, nang hta hpa hkra a ta? Ngai nan nye hkum hpe matsat ai du hkra, hpa majaw nang ngai hpe mahta shara shatai n ta? ²¹ Nang hpa majaw nye yubak hpe n raw, nye mara hpe n dat rai ta? Gade n na yang ga nhpu hta ngai kaleng taw nna, nang ngai hpe tam gawn yu timung, ngai n nga na nngai, nga ai.

¹ Shaloi Shuhi meaha Bildad htan nna, ² nang gaw gaten du hkra, dai lam tsun nga nna, na a n-gup ga, nbung laru zawn, wu nga na rai ta? ³ Karai Wa gaw, n tara ai hku tara dara na a kun? n-gun chyalai rawng ai Wa gaw, dingman ai lam, shabyak kau na rai ni? ⁴ Na nshu nsha ni shi hpe shut hpyit kau nna, shi shanhte hpe tinang a yubak hta ap kau timung, ⁵ nang gaw Karai Wa hpe akroi anoi hkan tam nna, n-gun chyalai rawng ai Wa hpe tawngban nga let, ⁶ sanseng ai hte kangka ai myit rawng ai rai yang, gaja wa, na a matu shi rawt nna, na a dingman ai shara hpe ngamu ngamai shangun na ra ai. ⁷ Nang gaw npawt e kaji nga timung, hpang jahtum e galu kaba na rin dai. ⁸ Moi chyaloi na aprat hpe san yu nna, de a kaji kawa ni sagawn yu ai lam, sawn yu u. ⁹ Ga ntsa e anhte a nhtoi ni shingnip sha rai nga ai majaw, anhte gaw mani na masha naw rai nga nna, hpa n chye ga ai. ¹⁰ Moi na ni she nang hpe sharin shaga nga nna, tinang a kraw lawang na ga shapraw dan na mara ai, n rai ni? ¹¹ Hkumpup n nga yang, maiaw tu lu na a ni? Hka n nga yang, kungji tu lu na a ni? ¹² Dai gaw naw tsit lali nga ai hpe, n dan timung, tsingdu kaga mahkra hta shawng nyip mat na ra ai. ¹³ Karai Wa hpe malap kau ai ni nlang, dai hku hkan nang nna, n shawp ai wa a myit mada ai lam, hten mat na ra ai. ¹⁴ Shi myit machyu shara agrawp mat nna, shi a shamyet shara, gindigram tsip rai mat na ra ai. ¹⁵ Shi gaw shi a nta hpe shamyet timung, ngang nga na, n rai; dai hpe shangang timung, grin nga na n rai. ¹⁶ Shi gaw jan nprang e tsit lali nga ai hte, shi a maku ni shi a sun hta prut nga ai. ¹⁷ Shi a ru ni lung rawk ntsa e hkram nga nna, nlung nta hpe shi mada yu nga ai. ¹⁸ Raitimung, shi hpe shamyit kau yang, shi a shara gaw, “ngai nang hpe n mu yu nngai,” nga nna shi hpe nyet kau na ra ai. ¹⁹ Yu u, shi kabu gara ai lam gaw, shingrai nga ai; ga nhpu hta na kaga ni naw prut na mara ai. ²⁰ Yu u, Karai Wa gaw myit tsup ai wa hpe kau da na, n rai; tara n lang ni hpe gaw shadaw ya na, n rai. ²¹ Shi gaw na a n-gup hpe mani ai hte, na nten kabu gara jahtau ai hte, jahpring na ra ai. ²² Nang hpe ndawng n yawt ai ni kaya kahpa htinggrum na mara ai; tara n lang ai ni a shara gaw, htum mat na ra ai, nga ai.

¹ Shaloi Yoba htan nna, ² dai lam teng nga ai, ngai gaja wa chye, timung, shinggyim maha gaw Karai Wa man e, kaning rai dinghpring lu a ta? ³ Marai langai ngai shi hte dangrang hkat mayu yang, lam hkying mi hta, lang mi pyi, shi hpe htan lu na, n rai. ⁴ Hpaji hkum ai hte n-gun lagaw rawng htum ai wa hpe kadai wa daw hkat nna, dang kau lu na rai ta? ⁵ Shi gaw bum ni hpe n dum shami sit kau nna, shi a pawt bu ai hte yang, galau ka-up kau mu ai; ⁶ Shi gaw lamu ga hpe de a shara na kanawng sit kau nna, de a shadaw ni gari awam nga ma ai. ⁷ Jan hpe shi htet da nna, shi n pru lu nga ai, shagan ni hpe mung magap makoi da wu ai. ⁸ Sumsing lamu hpe shi nan kahpyen da nna, nammukdara hka leng ni hta, kabye hkawm nga ai. ⁹ Shi gaw wala shingtau, nhtoi gintawng, kru majan hte dingda maga na shagan gawk ni hpe hpan da nu ai. ¹⁰ Shi gaw galu kaba ai hte n dang chye ai amu galaw nga ai; n dang hti ai amu bungli shachyen nga ai. ¹¹ Shi nye a man e yu sa wa nna, ngai shi hpe n mu nngai; shi lai sa wa nna, ngai shi hpe n dum nngai. ¹² Shi htim kashun la mayu yang, kadai hkum da lu na rai ta? Nang hpa galaw n ta? Ngu nna kadai wa shi hpe tsun wamm na rai ta? ¹³ Karai Wa gaw myit kawp wa na, n rai; Rahab a shingtau ni pyi shi a npu e dagum nga ma ai. ¹⁴ Dai rai yang, ngai shi hpe kaning ngu htan lu nna, shi a man e hpa baw ga lata tsun lu na rai ta? ¹⁵ Ngai dinghpring timung, hpa n htan wam nngai; nye tara agyi wa hpe, tawngban ai ga sha, tsun lu nngai. ¹⁶ Ngai shaga ai, shi htan ya timung, shi nye a nsen hpe madat na, ngai n kam lu nngai. ¹⁷ Shi gaw nbung laru hte ngai hpe ka-up da nna, mara kata e, ngai hpe hkye ahpra shangun nngai. ¹⁸ Ngai nsa awai na, shi n hkraw nga ai; aju machyi ai hte ngai hpe jahpring ya nngai. ¹⁹ N-gun lagaw hta shamyet, ngu yang, yu u, shi atsam grau rawng nga ai; tara dara hkat, ngu yang, ngai hpang maga kadai sakse hkam na rai ta? ²⁰ Ngai dinghpring, timung, nye a n-gup ngai hpe mara shagun na ra ai; ngai myit tsup, timung, ngai hpe gumlau shadu na ra ai. ²¹ Ngai myit tsup, timung, ngai myit masin hpe pyi n nawn nngai; asak naw hkrung nga na, ngai matsat ni ai. ²² Yawng lam sha rai nga ai; dai rai nna, “Shi gaw myit tsup ai wa hpe mung, tara n lang ai wa hpe mung, maren shamyit kau mu ai,” nga nna ngai tsun nngai. ²³ Ari ahpri e akajawng sha shaza kau yang, shi gaw, mara n kap ai ni tsin-yam hkrum ai hpe asawng kau nga ai. ²⁴ Lamu ga gaw tara n lang ai ni a lata e rawng nga ai; shi gaw de a tara agyi ni a myiman hpe tau ya mu ai: ataw, shi n rai yang, kadai wa rai ta? ²⁵ Nye a nhtoi ni gaw, gat chyang ai wa hta, grau lawan nga ai; dai ni gat lai wa nna, mai kaja ai hpe, n mu ma ai. ²⁶ Dai ni gaw lawan nga ai shanghpaw li ni hte, shahpa htim magra ai langda zawn, lai mat wa ma ai. ²⁷ Ngai gaw, “ngai madai ai hpe ngai malap kau na nngai; ngai myiman sum ai kau da nna kabu gara ai dagraw na nngai,” nga nna ngai tsun yang, ²⁸ ngai yawnhkyen hkrum ai majaw, hkrit gari nga nngai; nang ngai hpe mara n shagun na n rai, ngai chye nga nngai. ²⁹ Kaning raitimung, ngai hpe mara shagun na nngai; dai rai yang, hpa majaw kaman sha shakut sharang nga na rai ta? ³⁰ Nye hkum hpe hkyen ntsin hte ngai kashin nna, nye lata hpe tsai tsai shin timung, ³¹ nang ngai hpe hka hkawng hta gumpye bang nna, nye hpun palawng pyi ngai hpe matsat kau na ra ai. ³² Ngai shi hte htai lai hkat nna, tara tingnyang de rau shang wa lu na gaw, shi ngai zawn shinggyim masha n rai. ³³ An a ntsa e lata mara nna, hkum da lu hkra, an a lapran e htinglu ya ai wa n nga ai. ³⁴ Shi a shingna ngai kaw na shi dawm la nna, shi a hkrithpa ngai hpe n jahkrit u ga: ³⁵ Shaloi ngai shi hpe n hkrit ai hte ga tsun na nngai; ya chyawm gaw ngai tsun na ginwan n hku nga ai.

¹ Nye a wenyi asak hpe shayawt nga ai; lajin laroi ga ngai n sim n sa tsun na nngai; nye a myit masin karen ai hte ga tsun na nngai. ² Karai Wa hpe ngai tsun ai gaw, ngai hpe mara hkum shagun et; ngai hte hpa majaw htai lai hkat ai lam madun e, ³ nang ngai hpe zingri ai gaw, na matu htuk nga a ni? Nang nan hpan da ai rai hpe, nang matsat kau nna, tara n lang ai ni a bawng ai lam hta awlaw na, htuk nga a ni? ⁴ Nang gaw dinghta myi tu n ni? Shinggyim masha mu de nna mu n ni? ⁵ Na a nhtoi ni gaw masha nhtoi zawn rai nga a ni? Na a shaning ni gaw shinggyim lasha nhtoi ni zawn rai nga a ni? ⁶ Kaning rai nme law, nye a mara hpe nang hkan tam nna, nye a yubak hpe manaw sawk yu ndai. ⁷ Raitimung, ngai n hkru ai wa, n re ai hte, na a lata na mawai la ai wa n nga ai hpe, nang chye nga ndai. ⁸ Na lata ngai hpe hpan hpajang da nna galaw timung, nang ngai hpe htum hkra shamyit kau ndai. ⁹ Ga kagam zawn nang ngai hpe shachyaw ai lam, dum u; ga nhpu hta ngai hpe nhtang shangun na a hka. ¹⁰ Nga chyu zawn nang ngai hpe ru kau nna, nga chyu ge zawn, ngai hpe jage kau ni ai, n rai ni? ¹¹ Hpyi hte shan nang ngai hpe bu hpun shangun nna, nrut nra hte lasa e ngai hpe makyit shachyaw nu ai. ¹² Asak hte chyeju hpe nang ngai hpe ap ya nna, nang lanu lahku ya ai majaw, nye a wenyi agrin nga ai. ¹³ Raitimung, na a myit hta ndai lam nang ip da nna, nang maw ai hku, ndai rai nga ai gaw, ngai chye ni ai. ¹⁴ Ngai yubak galaw yang, nang hkan matsing nna, nye shut hpyit ai hpe raw dat na, nang n hkraw ndai. ¹⁵ Ngai tara n lang yang, dingnye ngai hkrum n ga; ngai dinghpring nga timung, kaya kahpa hte hpring nna, nni nkri hkrum nngai majaw, nye a baw hpe ngai sharawt lu na, n rai. ¹⁶ Ngai baw sharawt yang, hkanghkyi zawn nang ngai hpe hkan shachyut nna, na a mauhpa lam nye a man e bai madun dan ndai. ¹⁷ Ngai hpe mara shagun ai sakse nang naw shaga nna, na pawt sindawng ai gaw nye a ntsa e shalaw dat ndai: hpyen majan lang mi hte lang mi ngai hkrum nnai. ¹⁸ Hpa majaw nu a kan hta na ngai hpe shapraw n ta? Shing n rai yang, ngai nsa n rawng nna, ngai hpe kadai n mu lu na re ai. ¹⁹ N nga ai wa zawn ngai rai nga nna, nu a kan hta na nsung hku de hpai kau ai hkrum nngai. ²⁰ Nye a nhtoi ni gadun nga ai, n rai ni? Nsin hte si ai shingnip ka-up nga ai mung, yuptung hta e zawn nsin htat ai ga de; si ai shingnip hte kashuk kashak hkrai rai nga nna, ²² nhtoi pyi nsin chyip rai nga ai ga de, ngai wa nna, bai n htang lu ai mung de garai n shang yang, ngai nsa awai la lu n ga, ngai hpe hkrai tawn da mi law, nga ai.

¹ Shaloi Nama masha Zohpa htan nna, ² ga law law pru ai majaw, n htan yang, mai a ni? N-gup ga sha chye shapraw ai wa gaw, mara lawt na rai ni? ³ Nang bawlaw ai ga majaw, masha ni atsin sha mai nga na rai ni? Nang asawng yang, nang hpe kaya jahkrum ai wa, n nga na rai ni? ⁴ Nang mahtang, “nye a ga teng li ai; na a man e ngai sanseng nngai,” nga nna tsun ndai. ⁵ Karai Wa gaw ga tsun u ga le; nang hpe shaang nna shi n-gup hpaw u ga lè. ⁶ Anhte chye lu ai hta n-ga, shi htam law law wa chye chyalu rai nga ai majaw, makoi da ai hpaji shi nang hpe madun dan u ga: nang hkam ging ai yubak hta na, Karai Wa shayawm kau nga ai, chye u. ⁷ Nang gaw sawk yu ai hte, Karai Wa hpe chye lu n ni? n-gun chyalai rawng ai Wa hpe npawt ndung hkren chye lu n ni? ⁸ Sumsing lamu hta grau tsaw nga ai hpe, kaning di lu n ta? katsan ga hta grau sung nga ai hpe, nang hpa chya lu n ta? ⁹ De a shadawn ai gaw, lamu ga hta grau galu nga nna, nammukdara hta grau nna dam lada nga ai. ¹⁰ Shi lai wa let, nang hpe sharen da nna, salang bawng shaga yang, shi hpe kadai hkum da lu na rai ta? ¹¹ Shi gaw shakawng ndawng re ai ni hpe chye nga nna, shanhte n dum shami galaw ai yubak hpe mu nga ai. ¹² Raitimung, lawze nhprang gaw masha tai lu yang she, kaman lila wa gaw hpaji myit lu na re ai. ¹³ Nang gaw na a myit masin hpe jahkut nna, Karai Wa hpang de na a lata ladawn yang, ¹⁴ na a lata na n hkru ai amu hpe nang kaw na tsan kau nna, n shawp ai gaw na a sum hta n nga yang, ¹⁵ agang chyalang n kap ai myiman hte nang mada yu lu nna, hkrit myit n rawng ai, grin nga lu na ndai. ¹⁶ Nang hkrum ai tsin-yam tsindam hpe nang malap kau nna, lwi mat ai hka zawn nawn na rin dai. ¹⁷ Na a asak gaw jan pungding hta grau htoi na ra ai; nsin sin timung, jahpawt manap zawn leng na ra ai. ¹⁸ Myit mada lam nga ai majaw, nang dakan nga nna, lu malu hpe sawn yu nhtawm, asim sha yup wa ndai. ¹⁹ Nang yup taw nga yang, kadai mung nang hpe jahkrit lu na, n rai; masha law law wa na a myiman hpe tam na mara ai. ²⁰ Tara n lang ai ni a myi gaw n-gun yawm na ra ai; shanhte a shingbyi shara hten mat nna, shanhte myit mada ai lam, nsa hti na lam rai nga ai, nga ai.

¹ Shaloi Yoba htan nna, ² gaja wa, nanhte gaw masha nan rai nga nna, nanhte hte rau hpaji byeng-ya si na ra ai. ³ Ngai mung, nanhte zawn myit hpaji lu nna, nanhte a lawu e grit nga nngai, n rai: ndai lam ni n chye ai gaw, kadai wa rai ta? ⁴ Ngai gaw Karai Wa hpe shaga nna, shi ngai hpe htan ya timung nye htingbu ni a man e, asawng shara ngai tai nngai: dinghpring ai hte tengman ai wa gaw, asawng shara tai nga a hka. ⁵ Ngamu ngamai re ai wa gaw, n ji n mu hkrum ai wa hpe n kaw n law di kau nga ai; lagaw kashawt ai wa a matu, dai lam hkyen tawn chyalu rai nga ai. ⁶ Damya ni a sum ni, a ngwi a pyaw rai nga ai; Karai Wa hpe lale ai ni gaw, a shim sha nga lu nna, shanhte a lata hta Karai Wa gaw ngamu ngamai ai jaw mu ai. ⁷ Raitimung ashu ashan ni hpe san yu u, dai ni nang hpe sharin na mara ai; ntsa malen u ni hpe san yu u, dai ni nang hpe tsun dan na mara ai: ⁸ Shing n rai, lamu ga hpe aru yu u, shi nang hpe sharin na ra ai, nammukdara nga ni nang hpe hkai dan na mara ai. ⁹ Yehowa ndai lam yawng hte hpe shabyin ai gaw, n chye ai, kadai wa rai nga a ta? ¹⁰ Shi a lata hta hkrung mahkrung rawng nga nna, nsoi nsa rawng ai shinggyim masha hpe shi jahkrung da nga ai. ¹¹ N-gup gaw ashat hpe chyim yu ai zawn, na gaw aga hpe tsan nga ai, n rai ni? ¹² Aprat kaba ai ni gaw, hpaji byeng-ya rawng ma ai; asak galu ai ni gaw, myitsu nga ma ai. ¹³ Karai Kasang chyawm gaw, hpaji byeng-ya hte daru magam rawng nga ai; shi hta hpaji daw ai hte, myit tsup ai nyan, hpring nga ai. ¹⁴ Yu u, shi run kau yang, kadai dè da lu ai, n rai; shi masha hpe sharen da yang, kadai malaw lu na, n rai. ¹⁵ Shi hka nu ni hpe dim kau yang, dai ni hkyet mat nga ai; bai hpaw dat yang, lamu ga hpe lim kau nga ai. ¹⁶ Shi gaw n-gun lagaw hte chye chyalu nyan hpring nga ai; hkalem hkrum ai wa hte hkalem shangun ai wa gaw, shi a lata hta rai nga ai. ¹⁷ Bawmung ni hpe singgu krin bawng rim wa nna, tara agyi ni hpe mana shangun mu ai. ¹⁸ Hkawhkam ni gyit da ai sumri hpe shi raw kau nna, shanhte a nshang hpe shingkyit hte kyit da mu ai. ¹⁹ Hkinjawng ni hpe singgu krin bawng rim wa nna, nden ja ai ni hpe, gale galau kau mu ai. ²⁰ N-gup ningtam rawng ai ni hpe maa shangun nna, salang ni a hpaji dawm kau ya mu ai. ²¹ Du ni hpe kaya kahpa jahkrum nna, n-gun ja ai ni hpe shanut kau mu ai. ²² Asin amang hta na, sung htum ai arai shi shadan dan nna, si ai shingnip hpe nhtoi hta shapraw dan wu ai. ²³ Masha amyu ni hpe shi shagrau nhtawm, shanhte hpe shmayit kau mu ai; mungdan ni hpe dam lada shangun nna, bai shagying kau mu ai. ²⁴ Mung masha agyi ni a hpaji shi dawm la nna, lam n hku ai katsi katsang re ai shara e, brak hkawm shangun mu ai. ²⁵ Shanhte gaw nhtoi n mu ai, nsin hta lamawm hkawm nga ma ai; chyaru nang ai wa zawn, ndi nda hkawm shangun mu ai.

¹ Yu mu, dai lam mahkra nye myi hte mu se ai; nye a na dai lam na la nna ngai chye na se ai. ² Nanhte chye ai lam ngai mung chye nngai; ngai nanhte a lawu e grit nga nngai, n rai. ³ Gaja wa, n-gun chyalai rawng ai wa hpe ngai ga tsun nna, Karai Kasang hte dangrang hkat mayu nngai. ⁴ Nanhte chyawm gaw, masu ga chye jahta ai ni, akyu n rawng ai tsi sara ni hkrai, rai nga myit dai. ⁵ Nanhte atsin sha nga myit taw gaw, gaja wa, hpaji rawng ai zawn, nawn na myit dai. ⁶ Ngai dangrang hkat ai lam na la mu; ngai mara raw ai ga, madat mara la mu. ⁷ Nanhte gaw Karai Wa hpe maga gum ai hte tsun myit ni? Shi myiman tau yu let, n teng ai ga tsun nga myit ni? ⁸ Nanhte gaw shi myiman hpe shapa mayu myit ni? Karai Wa a hpang maga, dangrang hkat nga myit ni? ⁹ Shi nanhte hpe sawk yu na, gwi nga myit ni? masha hpe hkalem ai zawn, shi hpe hkalem lu na rai ni? ¹⁰ Nanhte mayun de nna myiman tau yang, shi nanhte hpe gaja wa daru na myit dai. ¹¹ Shi a daru magam hpe nanhte hkrit mai ai, n rai ni? Shi a hkrithpa nanhte a ntsa e du na ra ai, n rai ni? ¹² Nanhte a matsun maroi ga, wan dap hkrai rai nga ai: nanhte a n-gang, ga kagam n-gang hkrai rai nga ai. ¹³ Atsin sha nga mu; ngai hkrai tsun n ga; ngai hta hpa byin yang, byin u ga: ¹⁴ Ngai hpa majaw nye ashan hpe lahpawt nna gare makrang let, nye a asak hpe, nye a lata hta latup nga na rai ta? ¹⁵ Yu u, shi ngai hpe sat kau nna, ngai myit mada shara n nga nngai; raitimung, ngai shi a man e mara raw ai ga tsun shanang nga na nngai. ¹⁶ N shawp ai wa shi a man e n shang lu u ga, nga ai gaw, nye a hkyehkrang la ai lam rai nga ai. ¹⁷ Nye a mungga hpe atsawm sha na la mu; ngai tsun shapraw ai lam matsing la mu. ¹⁸ Ngai nye a amu hpe ya lajang da se ai, ngai dinghpring nga ai gaw, ngai chye nngai. ¹⁹ Ngai hpe mara madun ai wa, kadai rai ta? madun lu yang, ngai atsin sha nga nna, si hkam na nngai. ²⁰ Lam lahkawng sha ngai hta na shayawm kau u; shaloi ngai nang kaw na nye myiman makoi da na n rai. ²¹ Na a lata ngai kaw na tsan tsan dawm la u; na hkrithpa hte ngai hpe hkum jahkrit shama et. ²² Shaloi nang shaga ai, ngai htan na nngai; shing n rai, ngai shaga yang, nang htan ya e. ²³ Ngai n hkru ai hte yubak gaw, gade law nga a hka? Ngai tawt lai ai hte shut hpyit ai, ngai hpe madun e. ²⁴ Na a myiman nang makoi kau nna, ngai hpe hpyen wa zawn nawn ai gaw, hpa majaw rai ta? ²⁵ Lahpraw lahpra hpe, sharu shatsang na rai ni? Hkraw mat ai yi hku hpe, hkan shachyut na rai ni? ²⁶ Nye a lam yak la ai hku nang ka da nna, brang ram prat na yubak hpe, nye a sali wunli shatai wu ai. ²⁷ Ngai wa tsam mat ai arai hte gadaw nna, manut e sha ai hpun nba hte bung timung, ²⁸ nang gaw, nye a lagaw hpe sharen da nna, ngai sa wa ai lam shagu hpe matsing da ndai: ngai tsap nga ai grupyin e pyi, nhpan kum da ndai.

¹ Numsha hta shangai ai shinggyim masha gaw, aprat gadun nna, ruyak ai hte hpring nga ai. ² Nampan zawn shi pu wa nna, dan kau ai hkrum nga ai; shingna zawn shi lai wa nna, grin nga lu ai, n rai. ³ Dai zawn re ai wa hpe azi yu nna, nang hte tara hkat na, ngai hpe shashawn nga n hka? ⁴ Awu asin re ai kaw na sanseng ai hpe shapraw dan lu na, kadai wa rai ta? kadai mung n nga ai. ⁵ Masha a nhtoi ni ladaw da ya nna, shi nga lu ai shata ni hpe nang hti matsing da ai hte, shi n lai lu ai aten nang san da ndai majaw, ⁶ nchyang wa zawn, shi a nhtoi shalai dat nna, shi ban sa lu hkra, na a myiman shi kaw na kayin la u law. ⁷ Hpun a matu myit mada shara naw nga ai: kran kau hkrum timung, nnaw bai rawt wa nna, de a tsit lali ai maku ni prut n htum na ra ai. ⁸ De a aru ni ga hta dingsa mat nna, hpun shan gaw ga nhpu hta nyawp mat timung, ⁹ hka salu a majaw maku bai prut nna, abawng zawn makrung krung na ra ai. ¹⁰ Masha wa chyawm gaw si nna, nyawp mat wa ai; shinggyim masha nsa hti sayang, shi kanang nga ai kun? ¹¹ Nawng hka lwi yawm mat wa nna, hka nu ni hkyet kan mat ai zawn; ¹² masha gaw yup wa nna bai n rawt lu ai, sumsing lamu htum ai du hkra, shi n hprang nga ai: shi a yup ai hta na jasu kau hkrum ai, n rai. ¹³ Nang ngai hpe katsan ga e makoi da e, na pawt sindawng ai lai hkra, ngai hpe magap da e: ngai hpe dum na matu, aten ladaw tawn da u law. ¹⁴ Masha gaw si wa sayang, bai hkrung rawt lu na kun? dai rai yang, ngai galai mat ai aten du hkra, ngai hpyen gasat ang ai nhtoi tup, ala nga na nngai. ¹⁵ Shingrai nang shaga nna, ngai nang hpe htan na nngai; na lata e galaw ai wa hpe, nang nja nhpra nga ndai. ¹⁶ Ya chyawm gaw nye lagaw hkang hpe nang hti yu nna, nye a yubak hpe matsing da ndai, n rai ni? ¹⁷ Ngai tawt lai ai lam nang tingsan hta dazik shakap nna, ngai shut hpyit ai hpe hyem da ndai. ¹⁸ Raitimung, gyi mat ai bum gaw mat mat nna, lunghkrung ni mung, tinang a shara na sit mat ma ai. ¹⁹ Hka gaw nlung ni hpe agre hkalawk kau mu ai; hka lim ai hte ga nhpu ni yawng mat wa ma ai: dai zawn nang gaw masha a myit mada lam hpe shaprai kau ya ndai. ²⁰ Nang shi hpe tut tut dip da nna, shi lai mat wa sai; shi a myiman hpe nang galai nna, shi hpe shapraw kau wu ai. ²¹ Shi a kasha ni arawng sadang hkrum timung, shi n chye wu ai; shagart kau hkrum timung, shi shanhte hpe n dum wu ai. ²² Shi a hkumshan kawa machyi hkrai hkrum nna, shi a myit masin kraw e yawn madai nga ai, nga ai.

¹ Shaloi Teman masha Elihpa htan nna, ² hpaji rawng ai wa gaw, nbung hpaji hte htan mai a ni? Tinang kan hpe sinpraw nbung hte jahpring mai a ni? ³ Kaman lila ga hte dangrang hkat mai a ni? Akyu n rawng ai mung sumtu hte sharin mai a ni? ⁴ Gaja wa, nang gaw hkrit hkungga ai lam hpe jahten kau nna, Karai Wa hpe myitsumru yu ai lam, pat da ndai. ⁵ Na tawt lai ai myit na n-gup hpe tsun sharin ya nga ai; hkalem ai wa a shinglet, nang lata la ndai. ⁶ Ngai nang hpe dawdan ai n rai, na n-gup she rai nga ai; na nten nan, nang hpe mara shagun nga ai. ⁷ Shawng shangai ai wa, nang rai n ni? bum ni garai n nga yang, nang nga nit ni? ⁸ Karai Wa a salang bawng hta, nang lawm sa ni? hpaji hkum sumhpa hpe, nang kashun la nu ni? ⁹ Anhte n chye ai, nang hpa chye n ta? Anhte n gawn lu ai, nang hpa gawn yu n ta? ¹⁰ Dingla u-gut gu nna, ning wa aprat grau kaba ai ni, anhte a hpang maga e lawm nga ma ai. ¹¹ Karai Wa matsan dum ai hte, nang hpe tsun ai ga ngwi, na a man e kaji nga a ni? ¹² Na a wenyi Karai Wa hte nhtan shai nga nna, na a n-gup ga a jawp nga ai du hkra, ¹³ na a myit hkan let yit mat wa ai hte, na a myi htan kashoi nga ai gaw, hpa majaw rai ta? ¹⁴ Shinggyim masha gaw hpa wa rai nga nna, chyoi pra lu a ni? numsha hta shangai ai wa, kaning rai dinghpring lu a ta? ¹⁵ Shi gaw shi a chyoi pra ai ni hpe pyi n kam nna, sumsing lamu mung, shi a man e sanseng nga ai, n rai: ¹⁶ Dai rai yang, matsat shabat hta galu nga nna, yubak hpe ntsin zawn lu ai wa hpe, grau nna n kam ai. ¹⁷ Ngai nan gawn dan de ga, nye ga madat u; ngai mada mu ai lam, nang hpe hkai dan de ga: ¹⁸ Dai lam gaw, ji wa prat kaw nna n makoi da ai, hpaji rawng ai ni hkai dan ai lam, rai nga ai. ¹⁹ Shanhte hkrai dai mungdan hpe up lu nna, tsasam wa kadai mung, n hkran nga ai. ²⁰ Tara n lang ai wa gaw, prat tup nni nkri hkrum nga ai: kum shem ai wa a matu, ladaw da ai shaning rai nga ai. ²¹ Shi a na hta hkrithpa nsen kadu nga ai; ngamu ngamai nga yang, hpya sha ai wa gaw, shi kaw du nga ai. ²² Nsin chyip hta na lawt na, myit mada shara n nga ai; nhtu gaw shi hpe hkap nga ai. ²³ Shi shahpa tam kahkang hkawm nna, kanang mu na i? nga ai; Shi a matu hkyen da ai nsin chyip re ai nhtoi ni nga ai, shi chye nga ai. ²⁴ Ru tsang ai hte yawnhkyen ai gaw, shi hpe jahkrit shama nna, hpyen htim na matu jin jin rai nga ai hkawhkam zawn, shi hpe dang kau nga ai. ²⁵ Hpa majaw nga yang, Karai Wa hpe shi lale nna, n-gun chyalai rawng ai wa a man e myit kaba nga ai. ²⁶ Du ja ai hte, sumla tawk ka ai n-gang htat lang let, shi hpe gasat na matu, gat htim nga ai. ²⁷ Shi a myiman hpe hpum sau ai hte htinggrum nna, shi a nshang mung hpum sau nna, kapum nga ai. ²⁸ Katsi katsang re ai mare hta shi nga nga nna, masha n mai rawng ai, daw hten magang wa ai, nta htingkraw ni hta, shi rawng nga ai. ²⁹ Shi sut su na, n rai; shi a sutgan grin nga lu na, n rai; shi a arung arai, ga ntsa e chyam wa na, n rai. ³⁰ Shi gaw nsin kata na pru lu na, n rai; wan shinglet gaw shi a makrung ni hpe galip kau na ra ai: Karai Wa nsa kawut ai hte mat mat na ra ai. ³¹ Shi gaw, shi hkum hpe hkalem kau let, kaman lila hpe n kam u ga; kaman lila gaw, shi a shabrai tai na ra ai. ³² Shi aprat garai n htum yang, dai lam dik na ra ai; shi a lap gaw tsit lali nga na, n rai. ³³ Shi gaw, tsabyi ru zawn, n myin ai tsabyi si ni hpe sharun nna, tsanlun hpun zawn, shi a pu ni hpe sharun kau na ra ai. ³⁴ N shawp ai ni a hpung gaw maudung dung nna, sake manawn sha ai ni a sum, wan hkru na ra ai. ³⁵ Shanhte gaw gumlau ai hte hkum li wa nna, yubak hpe shangai ma ai; shanhte a kraw lawang hta hkalem hkalau ai maw nga ai, nga ai.

¹ Shaloi Yoba gaw htan nna, ² ngai gaw dai lam law law lang na yu ni ai; nanhte nlang akyu n rawng ai shalan shabran ai ni rai nga myit dai. ³ Kaman lila ga ya ngut mat sa ni? nang hpa majaw ga htan shara nga a ta? ⁴ Ngai mung nanhte zawn tsun lu nngai; ngai hkrum ai zawn nanhte hkrum yang, ngai nanhte a lam ga sumtu tsun hkai lu nna, nye a baw nanhte a man e kanga lu na nngai. ⁵ Nye a n-gup nanhte hpe shadaw shangang lu nna, nye a ga ngwi nanhte hpe shapyaw lu na ra ai. ⁶ Ngai ga tsun timung gan ga lu ai, n rai; n tsun ai nga yang, lak lai nga na kun? ⁷ Karai Wa chyawm gaw, ngai hpe hki ba shangun nna, nye a kanawn manang ni hpe shaza kau mu ai. ⁸ Nang ngai hpe kamu la ai gaw, ngai hpe mara shagun ai sakse tai wa sai; ngai lasi lamun ai gaw nye a man e rawt nna, ngai hpe myiman chyaw mara shagun nga ai. ⁹ N-yun bu let shi ngai hpe amya nna, ashep kau nga ai; shi nye a ntsa e wa utik nga ai: ngai hpe hpyen ai wa gaw, ngai hpe myi yu kabrim nga ai. ¹⁰ Masha ni gaw ngai hpe n-gup mahka nga ma ai: kaya kahpa jahkrum let nye shabyi kahpret ya mi ai; ngai hpe htim na rau zuphpawng nga ma ai. ¹¹ Karai Wa gaw n hkru ai ni a hpawng hta ngai hpe sharen da nna, tara n lang ai ni a lata de, ngai hpe gumpye kau ni ai. ¹² Ngai ngwi pyaw nga yang, shi ngai hpe agrawp kau nna, nye du magra jum let, ngai hpe ari gumpye kau nngai: shi gap na mahta shara ngai hpe shatai nngai. ¹³ Shi a pala gap ai ni, ngai hpe shinggrup nna, matsan pyi n dum ai, nye nhkyun ga kau ai hte, nye a shagri hpe, ga hta ru kau mu ai. ¹⁴ Shi ngai hpe lang mi hte lang mi nma jahpye nna, share wa zawn ngai hpe gat htim nga ai. ¹⁵ Ngai gaw nye hkum hpyi ntsa e lachyit nba chywi shakap nna, nye a nrung hpe ga nhpu hta galu kau se ai. ¹⁶ Nye a lata hta kashun kashe n nga ai hte, ngai akyu hpyi ai ga sanseng nga timung, ¹⁷ nye a myiman gaw hkrapngu hkrapngoi ai hte hkyeng nga nna, nye a myi hpyi ntsa e si ai shingnip ka-up nga ai. ¹⁸ Ginding aga e, nye a asai hpe hkum ka-up da et; ngai shabam ai nsen nang kaw hkum jahkring da ya et. ¹⁹ Ya pyi, yu u, nye a sakse gaw sumsing lamu e rai nga ai; nye a pahkam wa gaw, matsaw lahta tang e dung nga ai. ²⁰ Nye a jinghku jing-yu ni ngai hpe asawng ma ai; ngai chyawm gaw, Karai Wa man e myi prwi pru nga nngai. ²¹ Shinggyim wa gaw htingbu wa hte dangrang hkat lu ai zawn, Karai wa a man e mung mara raw ai ga tsun lu u ga. ²² Kaning rai nme law, shaning gade n na yang, bai n wa lu ai lam de, ngai hkan wa na nngai.

¹ Nye a wenyi nji nmu rai nga ai; nye a aprat htum mat wa sai, nye a matu nsung hku hpaw nga ai. ² Gaja wa, jahpoi asawng ai ni nye a man e rai nga nna, shanhte a ga law ai lam hta, nye myi azi nga ai. ³ Tang da u; nang nan nye pahkam tai u; kadai wa ngai hte ga sadi tawn da na rai ta? ⁴ Nang shanhte a myit nyan dawm la ndai majaw, nang shanhte hpe shagrau shatsaw na, n rai. ⁵ Sutgan kashun la na nga, jinghku ni hpe ap kau ai wa,__ shi a kasha ni gaw, myi hten na mara ai. ⁶ Shi ngai hpe, amyu baw ni hta, kajai shara shatai nna, nye a myiman mayen mahtaw bun hkrum nga ai. ⁷ Yawn hkrap ai majaw, nye a myi a mam nga nna, nye a daw shan ni yawng, shingna zawn rai nga ma ai. ⁸ Dai lam majaw tengman ai ni mau mat nna, mara n kap ai ni n shawp ai ni a lam myit kahtet nga ma ni. ⁹ Raitimung, dinghpring ai wa gaw shi a lam hkan nang nga nna, sanseng ai wa a lata gaw, grau nna n-gun ja na ra ai. ¹⁰ Nanhte chyawm gaw, naw bai wa marit; nanhte hta hpaji rawng ai wa langai mi, n mu na nngai. ¹¹ Nye nhtoi ni lai mat wa sai; ngai maw ai hku byak mat sai; rai sa, nye a myit maku daw mat sai. ¹² Shana gaw nye a matu shani tai wa sai; nhtoi gaw nsin hte ni nga ai. ¹³ Katsan ga gaw nye a myit mada nta rai nga ai hte, nsin kata nye a yupra nep nga nna, ¹⁴ hten byak ai hpe, nang gaw nye a wa, byet hpe, ngai nu, ngai jan e, nga nna ngai tsun ai rai yang, ¹⁵ nye a myit mada shara hpa rai nga a ta? gaja wa, nye myit mada shara hpe kadai mu lu na rai ta? ¹⁶ Ga nhpu hta ngai ban sa ai hkrum yang, dai gaw katsan ga chyinghka htinggrang de yu wa na ra ai, nga ai.

¹ Shaloi Shuhi masha Bildad htan nna, ² gaten du hkra ga sumtu hkan tam na rai myit ni? Sawn yu mu, dai hpang anhte tsun na ga ai. ³ Hpa majaw anhte hpe dusat zawn nawn nna, na a man e n san n seng ai rai nga ga ta? ⁴ N-yun bu nna, tinang hkum hpe amya kau ai wa e; na a jaw e lamu ga hpe kau da na rai ni? Lunghkrung gaw shi a shara na sit mat lu na rai ni? ⁵ Gaja wa, tara n lang ai wa a nhtoi nip mat na ra ai; shi a wan n tu lu nga ai. ⁶ Shi sum a nhtoi nip mat na ra ai; shi ntsa na pyengdin wan si mat na ra ai. ⁷ Shi gumrawng hkawm ai lam gying mat wa nna, shi maw ai hku, shi hpe kadawng kau na ru ai. ⁸ Shi a lagaw sumgawn hta ahkang mat nna, nbyeng ntsa e shi hkawm mat nga ai. ⁹ Mahkam gaw shi a lagaw hpe hkam nga ai; dinghkrai htim nna shi hpe lu na ra ai. ¹⁰ Ga hta e shi a matu hkang sumri up da nna, shi lai wa ai lam hta ndaw hkam da mu ai. ¹¹ Hkrithpa gaw lam shagu hta shi hpe shinggrup nna, lahtin hprut hprut hkan shachyut na ra ai. ¹² Kawsi hpang kara hte shi n-gun yawm nna, hten byak hkrum magang nga ai. ¹³ Shi hkum a daw shan ni sha kau ai hkrum nna, si du wa kasha alat gaw, shi a n-gun atsam hpe mayu kau na ra ai. ¹⁴ Shi shanu nga ai sum na shaden kau ai, shi hkrum nna, si hkrung si htan hkawhkam hpang de woi wa hkrum na ra ai. ¹⁵ Shi hte n bung ai gaw, shi a sum hta rawng nga nna, shi a htingra ntsa e kan ayai tawn na ra ai. ¹⁶ Kata de na shi a ru ni hkraw mat nna, ntsa de na lakung lakying ni, krum kau hkrum na ra ai. ¹⁷ Ga ntsa e shi hpe dum na masat dingsat mat mat nna, mare lam ni hta shi a amying hpe kadai n dum nga ai. ¹⁸ Shi hpe nhtoi kaw nna nsin de shachyut kau nna, dinghta ga na shapraw kau ai hkrum na ra ai. ¹⁹ Shi a amyu hta nnaw n rawt ai hte, shi shanu ai shara hta langai mi mung n ngam nga ai. ²⁰ Shi prat e nga ai ni, hkrit kajawng nga ai hte maren, hpang e pra ai ni, shi a lam amau nga na mara ai. ²¹ Gaja wa, tara n lang ai ni a nga shara dai zawn rai nga ai; Karai Kasang hpe n chye ai wa, dai shara hta nga nga na ra ai, nga ai.

¹ Shaloi Yoba htan nna, ² gaten du hkra nye a myit masin hpe sharu nna, ga sumtu hte ngai hpe agrawp kau na myit ta? ³ Shi lang du hkra nanhte ngai hpe aroi myit dai; ngai hpe nhtum nni di na, nanhte n kaya myit dai. ⁴ Ngai gaja wa shut ni ai rai yang gaw, nye a mara ngai hta sha kap nga ai. ⁵ Nanhte gaja wa nye a ntsa e grau mayu nna, ngai hkrum ai kaya kahpa majaw, ngai hpe mara shagun mayu timung, ⁶ Karai Wa gaw nye a lam shabyak kau ai rai nna, shi a sumgawn ngai hpe ka-up da ni ai, dum nga mu. ⁷ Ngai gaw, karum rit law, nga nna jahtau timung, htan ai ga n na nngai; ngai marawn timung, tara agyi kanang n nga ai. ⁸ Ngai n lai lu hkra, shi nye a lam udang pat da nna, ngai sa wa ai hku hpe nsin jasin wu ai. ⁹ Nye a arawng sadang hpe shi hpyu la nna, nye a baw na janmau malaw la nu ai. ¹⁰ Grup hkra shi ngai hpe shaza kau nna, ngai htum mat ni ai; nye myit mada ai lam hpe hpun zawn baw kau nu ai. ¹¹ Shi ngai hpe sindawng kahtet nna, hpyen wa langai mi zawn, ngai hpe nawn nngai. ¹² Shi a luksuk ni rau da du nna, nye a man e kaduk htu ai hte, nye a sum grupyin e dap jung nga ma ai. ¹³ Ngai hpu ngai nau ni hpe, shi ngai kaw na shatsan kau manu ai; nye a kanawn manang ni, tsasam tai mat masai. ¹⁴ Nye a amyu baw ni ngai hpe kau da nna, nye a makyin jinghku ni, ngai hpe malap kau ma ni ai. ¹⁵ Nye a nta masha ni hte shingnan num ni gaw, ngai hpe tsasam manam zawn nawn nna, ngai shanhte a man e maigan wa tai nga nngai. ¹⁶ Nye a mayam wa hpe shaga yang, shi n htan hkraw ai; ngai shi hpe hpyi nem tawngban ra ai. ¹⁷ Nye madu jan gaw nye a nsoi nsa hpe, ngai sha ni gaw, nye a madai ai nsen hpe, matsat nga ma ai. ¹⁸ Ma kaji ni pyi ngai hpe n kaw n law di nna, ngai rawt wa yang, nye a ga n hkap ma ai. ¹⁹ Nye a mung bawng manang ni, ngai hpe matsat nna, ngai tsawra ai ni gaw, ngai hpe hpyen ma ai. ²⁰ Nye a hpyi shan nye a nrut nra ni hta kap mat nna, wa uji hte sha ngai lawt lu nngai. ²¹ Nye a jinghku ni e, Karai Wa a lata ngai hpe hkra ai majaw, ngai hpe matsan dum e, matsan dum e law. ²² Nanhte hpa majaw Karai Wa zawn ngai hpe hkan shachyut nna, nye a hkumshan hte n hkru hkraw myit ni? ²³ Ya ngai tsun ai ga ka da mu ga law; laika shabawn hta dem bang da mu ga law. ²⁴ Prat dingsa na masat dingsat matu, lunghkrung hta, hpri kanyit hte tawk ka nhtawm, achyu sup da u ga law. ²⁵ Ngai hpe hkyehkrang la ai wa hkrung nga ai gaw, ngai nan chye nngai Shi gaw hpang jahtum e ga nhpu ntsa e dawng pru na ra ai. ²⁶ Shingrai, nye ahpyi ashep ashin hkrum mat timung, nye a hkumshan hte nan, Karai Wa hpe mu lu na nngai. ²⁷ Ngai hkum nan shi hpe mada yu nna, tsasam wa zawn n rai; nye myi hte chyaw azi yu nga na nngai: dai lam majaw nye kraw lawang na myit ndawt si nga ai. ²⁸ Ya nanhte mahtang, anhte shi hpe kaning di zingri na rai ta? Shi a ra baw kaning rai mu na rai ta? nga nna tsun myit yang, ²⁹ nanhte nan nhtu hkrum na makran nga mu: dawdan nhtoi du na ra ai, nanhte nan chye lu hkra, pawt bu ai gaw nhtu hkrum ging ai yubak rai nga ai, nga ai.

¹ Shaloi Nama masha Zohpa htan nna, ² dai lam majaw nye myit htan na shadut nna, de a jaw e nye kraw lawang katu nga ai. ³ Ngai kaya hkrum hkra, mara shagun ai ga ngai na timung, nye chye chyang ai nyan hte ngai htan lu nngai. ⁴ Ga ntsa e Adam hpe tawn da ai aten kaw nna, tara n lang ai wa gaw na na wa n dang lu ai hte ⁵ n shawp ai wa a kabu gara ai lam, hkring sha rai nga ai gaw, moi chyaloi nna chye chyalu rai nga ai hpe, nang n chye n ni? ⁶ Shi a hpung shingkang lamu de du nna, shi a baw sumwi du hkra dep timung, ⁷ shi hkyi hte maren, tut shi hten mat nna, shi hpe mu yu ai ni, “Shi kanang rai wa sata?” nga nna san shajang na mara ai. ⁸ Yup mang zawn shi wai mat nna, shi hpe n mu na ra ai; shana na shingran zawn, mat mat na ra ai. ⁹ Shi hpe mu ga ai myi gaw, shi hpe bai n mu na ra ai; shi a shara gaw shi hpe bai n mada yu na ra ai. ¹⁰ Shi a kasha ni gaw matsan mayan ni hpe tawngban nna, mahkawng da ai sutgan hpe shi a lata hte nhtang jaw na ra ai. ¹¹ Shi a nrut nra ni, an ai n-gun hte hpring nga timung, shi hte rau ga nhpu hta kaleng taw na ra ai. ¹² Yubak gaw shi a n-gup hta dawi sau nna, shi a shinglet npu e dai hpe makoi da let, ¹³ prat kau na lahpawt ai hte, shi a n-gup kata e maum da timung, shi sha ai shat shi a kan hta galai mat nna, shi a kraw kata e pu htum a tuk tai mat na ra ai. ¹⁵ Shi sutgan mayu kau timung, bai nhpat kau na ra ai; Karai Wa shi a kan hta na dai hpe shapraw kau na ra ai. ¹⁶ Pu htum a tuk shi chyu nna, pu hkram kawa ai hte si na ra ai. ¹⁷ Hka shi hka wam ngu ai, nga chyu hte lagat jahku lwi ai hka nu ni hpe, shi mu mada lu ai n rai. ¹⁸ Shi n-gun dat nna lu ai sutgan hpe, shi n sha lu ai, bai nhtang ya nga ai; arung arai law lu ai made, kabu gara nga lu ai, n rai. ¹⁹ Shi gaw matsan mayan ni hpe adip arip kau da nna, shi n galaw ai nta hpe shi kashun la ai hte, ²⁰ shi a kraw lawang e ngwi pyaw ai lam n chye ai majaw, shi ra mara hta na hpa mung shangam da lu ai, n rai. ²¹ Shi a lawhpa ai n-gup hta hpa mung ngam nga ai, n rai; dai re ai majaw shi a sutgan grin nga ai, n rai. ²² Lu su nga yang pyi shi kyindut hkrum nna, matsan mayan ni yawng layung madi na mara ai. ²³ Shi gaw, shi a kan hpring wa magang yang, Karai Wa a pawt bu kahtet ai gaw shi a ntsa e du nna, shi sha ai shat ntsa e mung, marang zawn htu na ra ai. ²⁴ hpri ri hpe hprawng yen lu timung, magri ndan ze rai na ra ai. ²⁵ Pala hpe baw yang, shi a hkum hta htinggrang nga ai; kabrim ai nhtu shi a shagri na pru na ra ai: hkrit kajawng ai gaw, shi a ntsa e ka-up nga ai. ²⁶ Shi mahkawng da ai sutgan, nsin hkrai rai nga ai; masha n wut ai wan shi hpe hkru na ra ai: shi a sun hta ngam mangam hkru mat na ra ai. ²⁷ Sumsing lamu gaw shi tawt lai ai madun dan nna, ginding aga gaw, shi hpe mara shagun na ra ai. ²⁸ Shi nta na ngamu ngamai hkoi mat nna, pawt sindawng ai nhtoi hta, lwi mat wa na ra ai. ²⁹ Dai gaw Karai Kasang tara n lang ai wa hpe jaw da ai kumhpa, shi a matu Karai Wa san da ai sali wunli rai nga ai.

¹ Shaloi Yoba htan nna, ² nye a ga atsawm sha madat mara mu; dai gaw nanhte a shangwi shapyaw ai lam tai u ga. ³ Ngai ga tsun na ahkang naw jaw mi; ngai tsun ngut jang she, mani asawng u. ⁴ Ngai put angun ai gaw masha majaw rai ni? ngai hpe majaw myit n kahtet na rai ta? ⁵ Ngai hpe mada yu let mau mat nna, nanhte a n-gup hpe lata hte pat kau mu. ⁶ Gaja wa, dai lam ngai dum yang, ngai mak mat nna, nye a hkumshan hkrit gari mat nga ai. ⁷ Tara n lang ai ni hkrung nga ai hta n-ga, asak kaba ai hte sahti gunmi hpung rawng ai gaw, hpa majaw rai ta? ⁸ Shanhte a kashu kasha ni, shanhte a grupyin e rai nga nna, shanhte a aru arat ni, shanhte a man e grin nga ma ai. ⁹ Shanhte a nta ni hkrithpa lawt nna, ngwi pyaw nga ai; Karai Wa a shingna gaw shanhte hpe n hkra nga ai. ¹⁰ Shi a usu uli lung yang, galoi mung ulung hkrat nga ai; shi a dumsu kanu galoi mung ubya bya ai, n rai. ¹¹ Shanhte a kasha ni gaw sagu hpuhng zawn law wa nna, shanhte a ma kaji ni ka gumlawt nga ma ai. ¹² Shanhte gaw shupsheng hte tingse dum let mahkawn mangoi nna, sumpyi dum ai nsen hte kabu gara nga ma ai. ¹³ Tinang a aprat hpe, ngwi pyaw ai hte, shanhte shalai dat nna, akajawng sha katsan ga de yu wa ma ai. ¹⁴ Shanhte gaw Karai Wa hpe, anhte kaw na pru wa u; na a lam hpe anhte n chye mayu ga ai: ¹⁵ N-gun chyalai rawng ai wa kaw yam na, shi kadai wa rai ta? Shi hpe akyu hpyi yang, hpa akyu pru na rai ta? nga ma ai. ¹⁶ Raitimung, shanhte mai kaja ai lam shanhte up nga ai, n rai; tara n lang ai ni a bawng ai hku ngai hte tsan nga ai. ¹⁷ Tara n lang ai wa a pyengdin si mat nna, shanhte a ntsa e tsin-yam tsindam du ai hte; Karai Wa pawt bu let, shanhte hpe shayawn nna, ¹⁸ nbung a man e yi hku zawn shanhte tai mat ai hte, nbung laru e shapoi ai mahkaw zawn tai ai gaw, gade lang rai ta? ¹⁹ Karai Wa gaw shanhte a kasha ni a matu ari mahkawng da a hka! Shi hpe matai htang ai hte shadum nga u ga; ²⁰ Shi hten byak hkrum ai hpe shi myi nan mu lu nna, n-gun chyalai rawng ai wa a pawt bu ai hpe shi lu nga u ga. ²¹ Shi nga lu ai shaning shata ni gu lu yang, shi a nta na ni hpe pyi, shi hpa nawn a ta? ²² Matsaw ntsang na ni hpe dawdan ya ai Karai Wa hpe chye chyang ai lam, kadai wa sharin lu na rai ta? ²³ Marai langai mi gaw n-gun lagaw an nna, ngwi pyaw ai hte asan aban si wa ai. ²⁴ Shi nhtung ni nga chyu hte hpring nga nna, shi a nrut nra ni lasawi hte hpring kabrat nga ai. ²⁵ Bai langai mi gaw, mai kaja ai hpe galoi n hkrum yu ai, myit ru myit tsang ai hte si wa ai. ²⁶ Shan lahkawng gaw ga nhpu hta rau kaleng taw nga nna, byet ni shan hpe ka-up nga ma ai. ²⁷ Nanhte ngai hpe myit maw ai hte, ngai hpe sharu shatsang na, nye a lam hpaji daw ai hku, ngai chye nngai. ²⁸ Nanhte gaw, du htingnu, kanang rai nga a ta? tara n lang ai wa a sum, kanang rai nga a ta? nga nna tsun myit dai. ²⁹ Lam hkawm ai ni hpe n san yu myit ni? shanhte a sakse kumla n sawn yu myit ni? ³⁰ N hkru ai wa gaw tsin-yam hkrum ai nhtoi a matu san da nga ai; sindawng kahtet ai nhtoi a matu, woi wa hkrum nga ai. ³¹ Shi galaw ai lam shi a man e kadai madun dan na rai ta? Shi galaw ai hte maren, kadai tai lu na rai ta? ³² Raitimung, shi makoi mayang bru ai hkrum nna, shi a lup masat dingsat hpe n sin nga ai. ³³ Hkaraw a shingbut shi a ntsa e pyaw nga ai: shi a shawng e n dang hti ai ni galaw ai hte maren, masha yawng shi a ninli hkan nang na mara ai. ³⁴ Dai rai yang, nanhte htan ai ga akyu n rawng ai majaw, ga kaman hte ngai hpe kaning rai shapyaw lu na rai ta? nga ai.

¹ Shaloi Teman masha Elihpa htan nna, ² hpaji rawng ai wa gaw, tinang a akyu shabyin lu ai hte maren, n-gun ja ai wa gaw, Karai Wa a matu akyu shabyin lu a ni? ³ Nang dinghpring ai majaw, n-gun chyalai rawng ai wa kabu nga a ni? Na a lam hta mara n kap yang, dai gaw shi a matu amyat rai nga a ni? ⁴ Hkrit hkungga ai myit rawng ai majaw, nang hpe daru ai rai ni? Tara dara hkat na, nang hte shang na rai ni? ⁵ Nang galaw ai yubak kaba la nga ai, n rai ni? Nang tawt lai ai mara n htum hkraw nga a hka. ⁶ Nang gaw nhpu nnau a sut rai pagawn tang da shangun ndai; singgu krin re ai ni a hpun palawng nang hpyu la ndai. ⁷ Hki ba mat ai wa hpe lu na ntsin nang n jaw ndai; kawsi hkrum ai wa hpe shat n jaw hkraw ndai. ⁸ Lapyin ja ai wa mahtang lamu ga hpe up lu ai; shi a myiman pa ai ni dai yang e nga lu ma ai. ⁹ Gaida jan hpe nang kaman dat dat nna, jahkrai ma ni a lata daw mat ai hkrum ma ai. ¹⁰ Dai re ai majaw na a grupyin e mahkam up nga nna, akajawng sha hkrit kahpra ai hkrum hkrum rai ndai. ¹¹ Nsin sin mak nna, nang hpe lim kau na hka hpungtun ni hpe, nang n mu n ni? ¹² Karai Wa gaw sumsing lamu lahta tang e dung nga ai, n rai ni? Mada yu u, tsaw htum ai shagan ni gaw, gade tsaw nga ma hka! ¹³ Nang chyawm gaw, Karai Kasang hpa chye lu a ta? Htat ai nsin kata e chye ginhka lu a ni? ¹⁴ Sumwi ni shi hpe ka-up nna, shi n mu lu ai; lamu a lahta tsang e shi hkawm nga ai, nga nna tsun ndai. ¹⁵ Lam yit ai ni hkan hkawm ai lam dingsa hpe nang naw hkan nang na n ni? ¹⁶ Shanhte gaw aten garai n du yang nyawp mat nna, shanhte a npawt nhpang ni hka hpungtun e shayawng kau nga ai. ¹⁷ Dai ni gaw Karai Wa hpe, anhte kaw na pru wa u; n-gun chyalai rawng ai wa anhte hpe hpa di lu na rai kun? nga nna tsun ma ai. ¹⁸ Shi mahtang, shanhte a nta ni hpe mai kaja ai hte jahpring ya mu ai: raitimung, tara n lang ai ni a bawng ai hku ngai hte tsan nga ai. ¹⁹ Dinghpring ai ni dai lam mu nna, kabu nga ma ai. Mara n kap ai ni shanhte hpe mani asawng nga ma ai. ²⁰ Gaja wa anhte hpe hpyen ai ni htum mat masai, shanhte a ngam ai sutgan hkru mat sai, nga ma ai. ²¹ Shi hte hkau chyap nna, ngwi pyaw nga u; shingrai yang, ngamu ngamai hkrum na ndai. ²² Shi n-gup na sharin ai ga hkap la nna, shi tsun ai mungga matsing da u. ²³ N-gun chyalai rawng ai wa hpang de bai wa yang, grin nga na ndai; shut hpyit ai gaw na a sum hte tsan nga nna, ²⁴ na a sutgan, ga nhpu hta kayau kau ai hte, Ohpira ja hpe hkaraw na lung sha ni hta kabai bang kau yang, ²⁵ n-gun chyalai rawng ai wa na a sutgan tai nna, gumhpraw sumpum lu la na ndai. ²⁶ Shingrai nang gaw N-gun Chyalai rawng ai wa hta kabu nga lu nna, Karai Wa hpe mada yu lu na ndai. ²⁷ Nang shi hpe akyu hpyi yang, shi madat ya na ra ai; ga sadi tawn da ai hte maren, shadik ya na ndai. ²⁸ Nang myit shatawng ai hku byin wa nna, nang sa wa ai lam hta nhtoi htoi na ra ai. ²⁹ Kadawng yu wa timung, bai lung wa na nngai, nga nna tsun na ndai: Myit gyip ai wa hpe shi hkye la na ra ai. ³⁰ Mara kap ai wa hpe pyi shi hkrang la na ra ai: na a lata sanseng nga ai majaw, shi hkrang la ai hkrum na ra ai, nga ai.

¹ Shaloi Yoba htan nna, ² dai ni pyi ngai lajin ai ga kahtet nga ai; ngai hkrum ai tsin-yam, ngai madai ai hta grau li nga ai. ³ Shi nga ai shara ngai mu lu n ga le; shi tingnyang man de ngai shang lu n ga le. ⁴ Ngai gaw shi a man e nye a amu tsun dan nna, nye a n-gup hpe dangrang hkat na ga hte jahpring na nngai. ⁵ Shi ngai hpe htan ai ga ngai chye na lu nna, shi ngai hpe tsun ai gaw, ngai matsing lu na nngai. ⁶ Shi ngai hta n-gun grau ja ai majaw, ngai hpe adip na rai ni? n rai law, shi gaja wa nye a ga madat na ra ai. ⁷ Shaloi myit ding ai wa gaw shi hte tsun hkat lu nna, ngai gaw tara agyi kaw na tut tut lawt lu na nngai. ⁸ Ya chyawm gaw, ang ang sa wa yang, shi n nga ai; kanut wa yang, shi hpe n mu hkrup nngai. ⁹ Pai maga de bungli shachyen yang, shi hpe n mada mu nngai; hkra maga de makoi nga ai majaw, ngai n mu lu nngai. ¹⁰ Shi mahtang ngai htinglet hkawm ai lam chye nga ai; ngai hpe dinglik yu yang, ja jet zawn ngai pru na nngai. ¹¹ Nye a lagaw shi a lagaw hkang raw hkan hkawm nga ai; Shi tawn da ai lam ngai hkan nna, yit mat wa ai, n rai. ¹² Shi n-gup na htet da ai ga, ngai n lai kau nngai; ngai ra ai lam hta, shi tsun ai ga hpe ngai grau sharawng nngai; ¹³ Raitimung, shi myit langai sha rai nga ai; shi hpe kadai wa shabai lu na rai ta? shi myit ra ai hte maren galaw na ra ai. ¹⁴ Nye matu san da ai lam shi shabyin nna, shing re ai lam law law wa, shi hte rau rai nga ai. ¹⁵ Dai re ai majaw, ngai shi a man e mak mat nngai; ngai sumru yu yang, shi majaw hkrit gari nngai. ¹⁶ Karai Wa gaw nye myit shakya nna, n-gun chyalai rawng ai wa gaw, ngai hpe shamak kau nngai. ¹⁷ Nsin sin ai hte htat ai nsin nye myiman hpe ka-up yang, dai lam majaw ngai am mat ai, n rai.

¹ N-gun chyalai rawng ai wa gaw, hpa majaw aten ladaw n madat da a ta? Shi hpe chye chyang ai ni, hpa majaw shi a nhtoi ni hpe n chye ginhka ma ta? ² N kau mi gaw ban dung shadaw ni hpe sit kau ma ai; Yamnga hpung hpe kashun la nna rem nga ma ai. ³ Chyahkrai ma ni a lawze hpe gau mat wa nna, gaida jan a dumsu hpe tang la ya ma ai. ⁴ Matsan mayan ni hpe lam shayit kau ma ai; nni nkri hkrum ai mung masha ni, rau hprawng makoi nga ma ai. ⁵ Yu u, nam lawze zawn shanhte nam mali de sa wa ai hte, shahpa tam na matu jau jau e rawt pru nna, shanhte hte kashu kasha ni matu, prang ga e shahpa mu ma ai. ⁶ Tinang sha na matu hkaibang ga e ushat dan la nna, tara n lang ai wa a tsabyi sun hta nlim gut ma ai. ⁷ Hpun nba n lu ai majaw singgu krin shana shalai nna, kashung ta e hpun nba n lu ma ai. ⁸ Bum ga na marang hte shanhte nyaw mat nna, shingbyi shara n lu ai majaw, lungpu hkan machyu nga ma ai. ⁹ Bai nkau mi gaw, jahkrai ma hpe kanu a chyu hte jahka kau nna, matsan mayan ni a arung arai hpe tang da ma ai. ¹⁰ Shingrai shanhte gaw hpun palawng n nga, singgu krin hkawm ai hte, kawsi let masha wa a hkauling lahkawn nga ma ai. ¹¹ Hpang kara let, masha wa a nta e shanhte sau rin nna, tsabyi htumbyen kabye shup nga ma ai. ¹² Mare ni hta e si magang ai ni madai nga nna, hkala nba hkrum ai ni shabam nga ma ai: Karai Wa chyawm gaw shanhte a ga kaman n nawn ya ai. ¹³ Dai ni gaw nhtoi hpe gumlau ai ni hta lawm ma ai; shanhte gaw de a lam ni n chye ma ai rai nna, de a lam hku n hkan hkraw ma ai. ¹⁴ Masha sat ai wa gaw nhtoi htoi yang rawt nna, nni nkri hkrum ai ni hte matsan mayan ni hpe sat kau nga ai: shana e rai yang lagu lagut tai nga ai. ¹⁵ Num shaw ai wa gaw nsin hpe ala nga nna, shi a myiman magap kau let, “Kadai mung ngai hpe n mu ai,” nga ai. ¹⁶ Shing re ai ni gaw shana e rai yang, masha nta hpe tawk waw ma ai: shani e rai yang makoi up nga ma ai; shanhte nhtoi galoi n mu ma ai. ¹⁷ Shanhte gaw si du a shingnip hkrithpa hpe chye ma ai majaw, jahpawt manap gaw shanhte a man e si du shingnip zawn rai nga ai. ¹⁸ Shi gaw hka ntsa e alawan waw mat nna, shanhte a hkambum ga ntsa e dagam dala hkrum nga ai: shanhte a lam tsabyi sun nga ai de n hkrang nga ai. ¹⁹ Jan gri nna kahtet ai hte, gyawna hka hpe shahkyet kau ai zawn, katsan ga gaw yubak kap ai ni hpe shamyit kau na ra ai. ²⁰ Shi a kanu gaw shi hpe malap kau na ra ai; byet ni shi hpe mu mu sha kau na mara ai: htawmhpang de shi hpe kadai dum na, n rai; n shawp ai wa gaw hpun zawn daw kau ai hkrum na ra ai. ²¹ Dai wa gaw maudung num hpe maw sha nna, gaida jan hpe karum nga ai, n rai. ²² Raitimung, shi gaw n-gun ja ai ni hpe pyi shi n-gun hte naw shadaw ya ai; si magang wa ai ni hpe mung shaprawn dat nga ai. ²³ Shi shanhte hpe shingbyi shara jaw nna, shanhte dai hta shamyet nga ma ai; shi a myit shanhte hpe hkan yu nga ai. ²⁴ Shanhte shagrau shatsaw hkrum timung, hkring mi rai yang n nga mat ma ai; shanhte shagrit kau ai hkrum let, kaga yawng hte maren htum mat nna, mam shingkyang zawn dan kau ai hkrum ma ai. ²⁵ Dai lam n rai yang, ngai masu nga ai, kadai madun dan lu nna, nye ga lila rai nga ai, kadai tsun lu na rai ta? nga ai.

¹ Shaloi Shuhi masha Bildad htan nna, ² daru magam hte hkrithpa shi hta rawng nga ai; matsaw ntsang de shi hparan nga ai. ³ Shi a luksuk ni hpe dang hti lu a ni? Shi a nhtoi gaw, gede a ntsa e nhtoi a ni? ⁴ Dai rai nna shinggyim masha gaw, Karai Wa man e kaning rai dinghpring lu a ta? Numsha hta shangai ai wa gaw, kaning rai san pra lu a ta? ⁵ Yu u, shata pyi htoi nga ai n rai; Shi a man e shagan ni sanseng nga ai, n rai. ⁶ Dai hta n-ga, abyet rai nga ai shinggyim masha hte shingtai rai nga ai masha kasha gaw, grau nna n sanseng nga a hka! nga ai.

¹ Shaloi Yoba htan nna, ² n-gun n ja ai wa hpe nang kaning rai karum a hka! Kya noi ai lata hpe nang kaning rai shadaw a ta? ³ Hpaji n rawng ai wa hpe nang kaning rai hpaji daw nna, nyan byeng-ya amyu myu shi hpe madun dan n hka! ⁴ Ndai ga kadai hpe shaang tsun n ta? nang gade a wenyi hte hkaw tsun n ni? ⁵ Minla ni gaw, nammukdara npu e dai yang rawng nga ai ni hte rau, hkrit gari ma ai. ⁶ Katsan ga gaw shi a man e brang lang rai nga nna, sung htum ai shara hta magap n rawng nga ai. ⁷ Dingdung maga hpe asan awan hta shi hpyan da nna, ginding aga hpe hpat wat e, noi da wu ai. ⁸ Shi gaw shi a htat ai sumwi ni hta hka hpe majaw da nna, sumwi ni gaw je malawng mat ai, n rai. ⁹ Shi a sumwi hpe shi kahpyen nna, shi a tingnyang hpe ka-up da wu ai. ¹⁰ Nhtoi hte nsin hkrum jahtum ai shara du hkra, hka hpung ni a jarit shi tawn da wu ai. ¹¹ Sumsing lamu a shadaw ni gari awam nna, shi daru ai majaw, mak mat ma ai. ¹² Shi a n-gun atsam hte nammukdara hpe kabrawng shangun nna, shi a zai byeng-ya hte Rahab hpe shamyit kau wu ai. ¹³ Shi a wenyi hte sumsing lamu ni san wa nna, shi a lata gaw lawan ai lapu hpe galun baw kau wu ai: ¹⁴ Yu mu, dai gaw shi a lam masun sha, naw rai nga ai; Shi a lam kahte tsun ai sha naw, anhte na lu a hka! Shi daru magam atsam hpe kadai dang chye lu a ta? nga ai.

¹ Bai Yoba shi a ga shagawp sharawt nna, kahtap tsun ai gaw, ² nye amu hpe shabyak kau ya ai, hkrung nga ai Karai Wa hte, Nye a wenyi hpe sharu ai, n-gun chyalai rawng ai wa hpe, gang let, ³ ngai hta nsoi nsa naw rawng nga ninglen, Karai Wa ndaw nsa nye ladi hta naw rawng nga dingsa, ⁴ nye n-gup n teng n man ai ga ntsun ai hte, nye shinglet hkalem hkalau ai ga n shapraw nga ai. ⁵ Nanhte hpe awlaw ai ga ngai hte tsan u ga; ngai si ai du hkra nye myit tsup ai hpe ngai nyet kau na n rai. ⁶ Nye dinghpring ai hta ngai dakan nga nna, n yen nngai; ngai hkrung nga dingsa nye myit ngai hpe mara shagun lu ai, n rai. ⁷ Ngai hpe hpyen ai wa gaw, tara n lang ai wa zawn, ngai hte nhtan shai ai wa gaw, n ding n man ai wa zawn, rai u ga. ⁸ N shawp ai wa gaw amyat lusha timung, Karai Wa shi a wenyi dawm la yang, shi a myit mada shara hpa rai ta? ⁹ Shi ru tsang ai hkrum yang Karai Wa gaw, Shi jahtau shaga ai hpe madat na rai kun? ¹⁰ N-gun chyalai rawng ai wa hta shi pyaw nga nna, Karai Wa hpe tutnawng e hpyi manoi nga lu na n ni? ¹¹ Ngai nanhte hpe Karai Wa amu madun dan na nngai; n-gun chyalai rawng ai wa maw ai lam ngai makoi da na, n rai. ¹² Nanhte nan lala dai lam mu myit htawm, ya hpa majaw kaman lila sha tsun nga myit ta? ¹³ Da ndai gaw, tara n lang ai wa hpe Karai Wa karan jaw ai hkambum, adip arip re ai wa gaw n-gun chyalai rawng ai wa kaw na lu la ai sali wunli rai nga ai. ¹⁴ Shi kashu kasha law htam wa timung, shanhte nhtu a shat tai na ma ai; shi a aru arat ni gaw kawsi hpang kara hkrum na mara ai. ¹⁵ Shi kaw naw ngam nga ai ni hpe si du makoi na ra ai: shi a gaida ni hkrapngu hkrapngoi lu na, n rai. ¹⁶ Shi gaw gumhpraw hpe ga nhpu zawn mahkawng da nna, hpun palawng hpe ga kagam zawn mazing da timung, ¹⁷ shi mazing da ai hpun palawng dinghpring ai ni bu hpun nna, mara n kap ai ni shi a gumhpraw hpe karan la na mara ai. ¹⁸ Shi galaw ai nta gaw shingtai tsip hte, sun sin ai ni gap ai sum zawn, rai nga ai. ¹⁹ Sut su let shi si wa timung, jat na ga de sha lu ai, n rai; myi grip mi sha rai yang shi n nga sai. ²⁰ Hkrit kajawng ai gaw, hka hpungtun zawn, shi hpe hkan dep nna, shana e rai yang nbung laru shi hpe ahpawt kau nga ai. ²¹ Sinpraw nbung shi hpe shapoi kau nna, shi n nga ai; dai gaw shi a shara kaw na shi hpe yeng kau wu ai. ²² Karai Wa gaw matsan n dum ai hte shi hpe jinghkyen nga ai; shi a lata na shi hprawng gale mayu na ra ai. ²³ Masha ni shi a lam lahpawk dum nna, jahpoi asawng let shi hpe shachyut kau na mara ai.

¹ Gaja wa gumhpraw maw nhkun nga nga ai; jen la ai ja jet pru na shara mung, rai nga ai. ² Hpri hpe ga nhpu kaw na shaw la ai hte, nlung shabyawng yang, magri lu la nga ai. ³ Masha gaw nsin hpe hkang chye nna, lamu ga kata jahtum du hkra, htat ai nsin hte si ai shingnip hta rawng ai nlung ni hpe asawk yu nga ai. ⁴ Masha shanu ai shara kaw nna shi ginlawng hku htu tawk nhtawm, ntsa e hkawm ai ni, dai kata e rawng ai ni hpe, n dum ma ai: masha gaw npu e shanhte goi wat goi lang let nga nga ma ai. ⁵ Ginding aga gaw nsi naisi shatut nga ai; kata e chyawm gaw wan hte zawn gale galau ai hkrum nga ai. ⁶ De a nlung ni hta lungseng mung rawng nna, de a ga nhpu hta, aja lawm nga ai. ⁷ Dai lam gaw u matse n chye nna, lang da a myi pye n mu lu ai. ⁸ Nam na matse labye ni dai lam n kabye yu ai hte, hkanghkyi kanu ni dai hku n lai lu ma ai. ⁹ Masha gaw lung gring hpe pyi tawk ga nna, bum ni hpe bum lagaw du hkra galau kau mu ai. ¹⁰ Lung hkrung hta shi hka hkawng waw nna, hpu ai baw yawng mayawng mu mada nga ai. ¹¹ Abyi pru ai hka hpe shi shachyip kau nna, up makoi nga ai rai ni hpe shapraw la wu ai. ¹² Raitimung, hpaji byeng-ya hpe, kanang mu lu a ta? chye chyang ai a npawt, kanang rai nga a ta? ¹³ Shinggyim masha de a manu n chye nga ai, hkrung nga ai ni a shara hta n mu tam nga ai. ¹⁴ Sung htum ai shara gaw, “Ngai hta n rawng nga ai,” nammukdara gaw, “Ngai hta mung n rawng ai,” nga ai. ¹⁵ Dai hpe ja jet hte galai lu ai, n rai, de a manu hpe gumhpraw hte shen lu ai, n rai. ¹⁶ Uhpira ja jet, reng htum ai unuk lungseng hte mung, nila lungseng hte mung, dai hpe mari lu ai, n rai. ¹⁷ Aja hte pat dai hte n bung nna, ja jet hte galaw ai gali lakai dai hte galai lu ai, n rai. ¹⁸ Danda hte pale hpa tsun shara n nga ai; hpaji gaw lungseng hkyeng hte grau hpu nga ai. ¹⁹ Hkusha mung na utahpaya dai hpe n dep nga ai; ja jet hte mung n mari la lu ai. ²⁰ Dai rai yang, hpaji byeng-ya kanang nna pru ai rai ta? Chye chyang ai a npawt, kanang rai nga a ta? ²¹ Dai gaw hkrung mahkrung ni a myi hta na makoi nga nna, ntsa malen u ni pyi dai hpe mu hkrup lu ai, n rai. ²² Sung htum ai shara hte si hkrung si htan du gaw, “An dai kajai ai lam, na gaw na lu ga ai,” nga ma ai. ²³ Karai Kasang chyu sha de a lam matsing nga nna, shi gaw de a npawt nhpang chye nga ai. ²⁴ Shi gaw lamu ga htum hkra mada yu nna, sumsing lamu npu e nga manga hpe mu nga ai. ²⁵ Shi gaw nbung laru hpe shen yu nna, hka hpung ni hpe shadawn sharam yu nga ai. ²⁶ Shi gaw marang htu na lam hpajang da nna, mu ngoi ai hte myihprap kala ai lam tawn da yang, ²⁷ hpaji byeng-ya hpe shi mu nna madun dan nga ai; dai hpe shi gawn yu nna shagrin da wu ai. ²⁸ Shinggyim masha hpe chyawm gaw, yu u, Madu hpe hkrit hkungga na, hpaji byeng-ya rai nga ai; yubak mara koi kau na, chye chyang ai lam rai nga ai, ngu nna hkangda nu ai, nga ai.

¹ Bai Yoba shi a ga shagawp sharawt nna kahtap tsun ai gaw, ² moi lai wa ai shaning shata zawn, ngai naw nga lu n ga le; dai shaloi e Karai Wa gaw nye a nhtoi ni hpe bau sin nga a hka! ³ Shi a pyengdin nye a baw ntsa e htoi tu nga nna, Shi a nhtoi hta hpa let, nsin sin timung, hkawm lu nngai. ⁴ Ngai n-gun an nga nna, Karai Wa a mahku mara nye a sum ntsa e naw nga lu n ga le. ⁵ Chyahtum chyalai n-gun rawng ai wa ngai hte rau naw nga nna, nye a kasha ni ngai grupyin e naw nga nga ma ai. ⁶ Ngai hkawm wa ai lam hta nga chyu lwi nna, lunghkrung hta na nye a matu sau hka hpaw pru nga ai. ⁷ Mare chyinghka de ngai pru nna, mare htingwan e nye dung shara hkyen da yang, ⁸ shabrang ni ngai hpe mu nna makoi nga ma ai; dingla ni mung rawt nna tsap nga ma ai. ⁹ Agyi ni ga tsun n gwi ai hte, tinang a n-gup hpe lata hte pat kau nga ma ai. ¹⁰ Du salang ni atsin sha nga nna, shanhte a shinglet gumra hta kap nga malu ai. ¹¹ Masha ni nye a ga na yang, ngai hpe shaman ya ma ai; ngai hpe mu yang, ngai hpe shakawn nga ma ai. ¹² Ngai gaw hpyi jahtau ai matsan mayan hkrum ai wa hpe mung, karum ai wa n lu ai jahkrai ma hpe mung, mawai la nngai. ¹³ Hten byak magang hkrum ai wa gaw, ngai hpe shaman ya nna, gaida jan a myit masin hpe kabu shangun nga nngai. ¹⁴ Ngai gaw dinghpring ai hpe hpahpun shatai nna, dai gaw nye a hpun palawng rai nga ai. Ngai dawdan ai lam nye palawng galu hte janmau rai nga ai. ¹⁵ Ngai gaw myi hten ai ni a myi, lagaw hten ai ni a lagaw tai nngai. ¹⁶ Matsan mayan ni a kawa ngai rai nga nna, ngai hpe n chye ai wa a amu ngai sawk yu nngai. ¹⁷ N hkru ai wa a kawng hpe ngai daw kau nna, shi kashun amya sha ai rai hpe, n-gup na gare la we ai. ¹⁸ Dai shaloi ngai gaw, “nye tsip hta ngai nsa hti na nngai; nye nhtoi ni gaw zaibru hte maren law htam na ra ai: ¹⁹ Nye a aru gaw hka kau e hkram nga nna, mari gaw shana tup nye a lakung lakying ni hta hkrat nga ai. ²⁰ Nye a arawng gaw tutnawng pu majawm nga nna, nye a ndan mung nye a lata hta nnan rai nga ai,” nga nna tsun nngai. ²¹ Masha ni gaw nye a ga madat nna, ngai daw ya ai hpaji hpe atsin sha la nga ma ai. ²² Ngai tsun ai hpang shanhte bai ntsun ma ai; nye a ga shanhte a ntsa e ntsin zawn hkrat nga ai. ²³ Marang hpe la ai zawn shanhte ngai hpe la nna, marang shadoi hpe marit ai zawn, n-gup mahka nga ma ai. ²⁴ Shanhte myit hpa shara n nga yang, ngai shanhte hpe myit shapyaw nna, shanhte gaw nye a myiman jasum ya lu ai, n rai. ²⁵ Shanhte hkan sa na lam ngai madun ya nna, agyi wa zawn dung nga nngai; hpyen luksuk ni hte rau nga ai hkawhkam wa hte, yawng hkyen hkrum ai ni hpe shalan shabran ai wa zawn ngai rai nga nngai.

¹ Ya chyawm gaw ngai hte asak kaji ai ni ngai hpe jahpoi asawng ma ai; shanhte a kawa ni, nye sagu sin ai gwi ni hte kanawn na pyi, ngai n hkraw nngai. ² Raitimung, shanhte a n-gun atsam yaw mat sai majaw, shanhte a lata lapyin, nye a matu hpa akyu shapraw lu a ta? ³ Matsan chyaren ai hte kawsi hpang kara ai majaw, shanhte agyawm mat nna, moi kaw nna shingran katsi ai nam mali e makrut sha nga nga ma ai. ⁴ Shanhte gaw singwun lapran hkan e jum hka lap di la nna, marau ru gaw shanhte a shahpa rai nga ai. ⁵ Masha ni nga ai kaw na shanhte hpe shachyut kau nna, lagu lagut hpe zawn hkan marawn mu ai. ⁶ Shingrai, shanhte gaw krung sinwa hkaraw nhkap hkan e mung, ginlawng hku hte lungpu hkan e mung nga nga ma ai. ⁷ Singwum lapran hkan e shanhte shabam nna, tsamat hpun npu e de nga ma ai. ⁸ Arawng n lu ai angawk angak re ai ni a kasha ni shanhte rai nga nna, mungdan hta na jahtaw kau ai hkrum ma ai. ⁹ Ya chyawm gaw, ngai shanhte a laka shagawp ai hte, shanhte a mani asawng shara, tai ni ai. ¹⁰ Shanhte ngai hpe matsat nna, tsan tsan e tsap nga ma ai; nye myiman hpe mayan mahtaw bun ai pyi, n agam ma ai. ¹¹ Karai Wa shi a ndan sumri jahtum dat nna, ngai hpe zingri ni ai; shanhte nye a man e runghtung sumri dat dat ma ai. ¹² Pagawn para re ai ni, nye a hkra maga e rawt ma ai; shanhte nye a lagaw hpe kanawng nna, ngai hpe jahten na matu, lam gaw ma ai. ¹³ Ngai sa wa ai hku shanhte htu kaput kau ma ai; ngai hpe kataw shangun na shanhte shakut ma ai: shanhte hpe dang na karum ai wa n nga ai. ¹⁴ Dam ai bunghku hkuwawt hku hta zawn shanhte ru bang nna, yawng hpe shaza kau ai hte, ngai hpang de rau htim wa ma ai. ¹⁵ Hkrithpa ni nye a ntsa e du nna, nbung laru zawn, nye arawng hpe hkan shachyut ai hte, nye ngamu ngamai ai gaw, sumwi zawn poi mat sai. ¹⁶ Ya e mung nye a myit masin ngai hta byawng mat nna, zingri zingrat hkrum na shani ngai hpe dep ni ai. ¹⁷ Shana aten nye a nrut nra ni htinggrang machyi nna, kawa machyi ai majaw, yup n lusha nngai. ¹⁸ Karai Wa a atsam majaw nye hpun palawng kanyup mat nna, ana gaw palawng du hkawp zawn ngai hpe kyit nga ai. ¹⁹ Shi gaw hkumpup hta ngai hpe gumpye bang kau nna, ngai gaw ga nhpu hte wan dap zawn tai mat ni ai. ²⁰ Ngai nang hpe hpyi jahtau timung, nang n htan ndai; ngai la tsap nga yang, ngai hpe azi yu ndai. ²¹ Ngai hpe zingri na, nang gumshem ai wa tai ndai; na a lata a n-gun ngai hpe hkap gasat nga ai. ²² Nang ngai hpe nbung hta jawn shangun nna, shapoi kau ai hte, nbung laru hta ayun kamawng mat shangun ndai. ²³ Si mat ai hte hkrung mahkrung ni a matu san da ai shara de nang ngai hpe woi wa na gaw, ngai chye nngai. ²⁴ Raitimung, kataw ai wa gaw lata ladawn ga ai, n rai ni? Nni nkri hkrum yang, jahtau shaga nga ai, n rai ni? ²⁵ Ruyak hkrum ai wa a matu, ngai hkrap yu ni ai, n rai ni? Matsan mayan ni a matu, myit yu machyi yu ni ai, n rai ni? ²⁶ Raitimung, mai kaja ai hpe ngai mada nga yang, yubak sha du pru ai; nhtoi hpe marit nga yang htat ai nsin sin wa ai. ²⁷ Nye kraw lawang ndi nda rai nga nna, n sim hkraw ai; nni nkri hkrum ai shani, nye ntsa e du ra ai. ²⁸ Jan n hkra timung, chyang mat ai hte hkawm nngai; shawa hpawng hta ngai rawt tsap nna, hpyi jahtau nngai. ²⁹ Ngai gaw chyahkyawn ni a kahpu kanau, u gawla-uk ni a kanawn manang, tai ni ai. ³⁰ Nye hkum hpyi chyang mat ai hte hkai mat nna, nye nrut nra ni kahtet ai hte hkat krawp mat nga ai. ³¹ Dai rai nna, nye a tingse sharung shayawt ai nsen, nye a sumpyi hkrapngu hkrapngoi ai nsen sha shapraw nga ai.

¹ Ngai gaw nye myi hte ga shaka tawn da ni ai majaw, mahkawn hpe kaning rai yu masen na rai ta? ² Kaning rai nme law, matsaw ntsang na Karai Wa gaw hpa gam jaw na rai ta? Ntsa de na n-gun chyalai rawng ai wa gaw, hpa sali wunli karan na rai ta? ³ N hkru n hkra ai ni hpe, zingri zingrat jahkrum na hte, n shawp ai amu galaw ai ni hpe, ana zinli gam jaw na n rai ni? ⁴ Shi gaw, nye a lam chye nga ai, n rai ni? Nye a lagaw hkang yawng hti yu nga ai, n rai ni? ⁵ Ngai gaw myit magaw ai hte hkan hkawm nna, nye a lagaw hkalem hkalau ai de lawan nga yang,__ ⁶ Karai Wa nye myit tsup ai hpe chye lu hkra, man ai joi hta ngai hpe shen yu u ga. ⁷ Nye a lagaw lam yit nga nna, nye a myit masin nye a myit ra ai hku hkan nga yang, nye a lata hta kashun kashe lawm nga yang, ⁸ ngai gat hkai ai hpe, masha ni sha nna, nye a tu matu ru hte nawng baw kau mu ga. ⁹ Ngai gaw masha jan hpe hkan masem nna, htingbu wa chyinghka makau e gawp nga ai rai yang, ¹⁰ nye madu jan masha ni a htumrin rin nna, la kaga ni shi hpe aroi arip di mu ga. ¹¹ Kaning rai nme law, dai gaw matsat shabat lam rai nga nna, dawdan ging ai yubak rai nga ai. ¹² Dai gaw sung htum ai shara du hkra hkru kau ai wan rai nga nna, nye ngamu ngamai yawng, ru hte nawng, shamyit kau wu ai. ¹³ Nye mayam wa, nye mayam jan, ngai hte dangrang hkat yang, shan a amu hpe ngai n hta hkraw ai rai yang gaw, ¹⁴ Karai Wa a rawt wa yang, ngai kaning rai na rai ta? Ngai hpe sawk yu yang, kaning ngu htan na ma? ¹⁵ Ngai hpe hpan da ai wa, shi hpe mung hpan da ai, n rai ni? Madu langai sha an lahkawng hpe hkritung e shachyaw mi ai, n rai ni? ¹⁶ Ngai gaw matsan chyaren ai ni a marit ai hku hkum da nna, gaida jan a myiman jasum kau ya yu n ni? ¹⁷ Jahkrai ma hpe nye shahpa n-gup mi n karan jaw ai, ngai hkrai kamaw kau yu n ni? ¹⁸ Ataw, shi gaw kawa kaw nga ai zawn, ngai hte rau kaba wa nna, ngai shangai ai shani kaw nna, gaida jan hpe shadaw ni ai. ¹⁹ Hpun palawng n lu ai majaw si wa ai masha langai mi ngai hte, hpun panep n lu ai matsan mayan wa hpe ngai mu nna, ²⁰ shi a hkum hkrang ngai hpe n shaman ya ai hte, nye sagu mun shi hpe n shalum ai rai yang,__ ²¹ mare chyinghka e ngai hpe maga ai ni dung nga ai majaw, jahkrai ma ni hpe ngai mara shagun ai rai yang, ²² nye lahpa shingban gyi mat nna, nye a lahpum nra daw mat u ga. ²³ Kaning rai nme law, Karai Wa shoihpa shoirang hpe ngai hkrit nna, shi daru magam man e hpa mung n galaw lu nngai. ²⁴ Ngai gaw aja hpe hpa nna, ja jet hpe, “nang nye a kamhpa shara rai nga ndai,” nga nna tsun ai hte, ²⁵ ngai sut su nna, nye lata law law mahkawng da lu ai majaw, ngai kabu gara nga nna, ²⁶ htoi kabrim ai ajan hte htoi leng hkawm ai shata hpe, ngai mada yu let, ²⁷ nye myit makun nna nye a n-gup nye a lata hpe pup ai rai yang, ²⁸ ntsa de nga ai Karai Wa hpe nyet kau nngai majaw, dai lam mung dawdan ging ai yubak rai nga ai. ²⁹ Ngai hpe ndawng ai wa hten byak hkrum yang, ngai n kabu nna, tsin-yam tsindam shi hkrum sha yang, ngai n gumrawng nngai. ³⁰ Gaja wa, shi hpe dagam ai hte shi a asak dawm la na, nye a n-gup hte hpyi nna, shut nga ai, n rai. ³¹ “Nye madu a shan hkru hkru kat kat n sha lu ai,” nga nna, nye a sum hta kadai wa tsun lu na rai ta? ³² Malet nhprang hkawm ai wa gaw, mare lam hta shana n lai u ga, lam hkawm ai wa hpe, nye a chyinghka ngai hpaw da nngai. ³³ Ngai gaw Adam zawn nye mara hpe makoi da nna, nye kraw e, ngai tawt lai ai hpe magap da nngai, n rai. ³⁴ Shawa wunawng kaba hpe ngai tsang nna, mayu dama ni a aroi arip ai hpe hkrit nga ai majaw, shinggan de n pru ai atsin sha nga nga nngai, n rai. ³⁵ Marai langai ngai nye ga hpe madat u ga le! Yu u, nye masat ndap rai nga ai; chyahtum chyalai n-gun rawng ai wa ngai hpe htan u ga; ngai hpe mara shagun ai wa ka da ai laika ngai mu n ga. ³⁶ Gaja wa, dai hpe nye lahpa hta ngai hpai na nngai; janmau zawn dagraw gup na we ai. ³⁷ Nye a lam yawng, ngai shi hpe hkai dan nna, du zawn ngai shi a man de shang na nngai. ³⁸ Nye a lamu ga ngai hpe mara shagun ai hte, de a htai hkang ni rau hkrap shabam nga nna, jahpu n jaw ai, de a nsi naisi ngai sha let, de a madu ni hpe asak jasum kau ai rai yang, ⁴⁰ hkaulan mam a malai ju hpun, muk-yaw mam a malai manam tsing lu u ga law, nga ai. Yoba tsun ai ga htum sai.

¹ Shingrai Yoba gaw, shi nan dinghpring dum ai majaw, ndai marai masum shi hpe bai n htan ai sha, nga mat ma ai. ² Shaloi Rama amyu, Buzi lakung na, Barahkela a kasha Elihu gaw masin kahtet nga ai: Yoba gaw Karai Kasang hta shi nan grau dinghpring dum ai majaw, shi hpe masin kahtet nga ai. ³ Yoba a jinghku masum hte gaw, shi hta mara n mu tam timung, shi hpe dawdan ai majaw, shanhte hpe mung masin kahtet nga ai. ⁴ Elihu gaw shanhte hta asak grau kaji ai majaw, Yoba hte ga tsun na shi ala nga ai. ⁵ Ya shanhte masum hte gaw, Yoba hpe ga n chye htan ai lam Elihu mu jang, shi masin kahtet nga ai. ⁶ Shingrai Buzi lakung na Barahkela a kasha Elihu htan nna, ngai gaw asak kaji nngai; nanhte mahtang dingla ugut gu manit dai; dai re ai majaw ngai agam ai hte ngai chye ai hku nanhte a man e n shapraw wam nngai. ⁷ Ngai gaw, “Aten nhtoi na ai wa ga tsun mai ai, asak galu ai ni hpaji byeng-ya sharin ya mu ga,” nga nna tsun nngai. ⁸ Raitimung, shinggyim masha hta wenyi rawng nga nna, chyahtum chyalai n-gun rawng ai wa a nsoi nsa gaw, shanhte hpe shachye shachyang mu ai. ⁹ Aprat kaba ai ni tut hpaji rawng ai n rai, dingla ni hkrai dawdan ai lam chye lu ma ai, n rai. ¹⁰ Dai rai nna ngai gaw, “nye a ga madat mu, ngai chye ai hku ngai nan shapraw dan na nngai,” nga nna tsun ni ai. ¹¹ Yu mu, nanhte tsun ai ga ngai ala nga nngai; nanhte ga tsun na lam naw aru yu nga yang, nanhte dangrang hkat ai ga ngai na la ni ai. ¹² Rai sa, nanhte a ga htum hkra ngai matsing yang, yu mu, Yoba hpe kadai mung mara n madun lu ai hte, nanhte hta shi hpe htan lu ai wa n nga ai. ¹³ Nanhte gaw, “anhte nan hpaji byeng-ya mu saga ai,” nga nna tsun shara n nga ai; shinggyim masha n rai, Karai Wa nan Yoba hpe shamak kau lu ai. ¹⁴ Yoba gaw ngai hpe shaang nna ga tsun ai, n rai; nanhte htan ai hku ngai shi hpe htan na, n rai. ¹⁵ Shanhte mau mat nna, hpa mung n chye htan mat ma ai; shanhte gaw chye tsun ai ga hkaw mi muk n nga ai. ¹⁶ Shanhte atsin sha nga nna, hpa mung n chye htan ai; tsap nga ai majaw, ngai mung la nga mai na kun? ¹⁷ Shing n rai, ngai nan ngai tsun ai hku tsun na nngai; ngai mung ngai myit ai hku hkai dan na nngai. ¹⁸ Ngai gaw tsun na ga hte hpring nga nngai; ngai hta rawng ai wenyi ngai hpe shadut nga ai. ¹⁹ Yu mu, nye a kraw matsut da ai tsabyi jahku hte bung nga ai; kapaw ga magang wa ai shanhpyi ndum nnan zawn, rai nga ai. ²⁰ Ngai awai lu na matu ga tsun na nngai; ngai n-gup hpaw nna, htan na nngai. ²¹ gade a myiman mung ngai n tau u ga; kadai hpe mung a shapyaw ai ga hte hkalau na n rai. ²² Ngai chyawm gaw masha hpe a shapyaw ai ga hte n chye hkalau nngai; dai n rai yang, ngai hpe hpan da ai wa ngai hpe alawan dawm la na ra ai.

¹ Raitimung, Yoba e, nye ga madat u; ngai tsun ai ga mahkra na la u. ² Yu u, nye n-gup ngai hpaw nna, nye shinglet hte ga tsun na nngai. ³ Ngai myit malang ai hku ngai tsun dan na ra ai; nye a nten chye ai lam dan dan shapraw na ra ai. ⁴ Karai Wa a Wenyi gaw ngai hpe hpan da ni ai; n-gun chyalai rawng ai wa a nsoi nsa, ngai hpe jahkrung ni ai. ⁵ Nang rai lu yang, ngai hpe htan e; na a ga nye a man e shajin tawn u, rawt tsap u. ⁶ Yu u, Karai Wa man e nang hte maren ngai rai nga nngai: Shi ngai hpe mung, ga kagam hta na shachyaw ni ai. ⁷ Nye hkrithpa nang hpe shamak kau lu na, n rai; nye a lata na a ntsa e li nga ai, n rai. ⁸ Gaja wa nang gaw, “ngai sanseng ai hte yubak n ka nngai; ngai san pra ai hte ngai hta mara n rawng nga ai. ⁹ Yu u, Shi gaw ngai hpe jahte tam nna, ngai hpe hpyen wa zawn nawn nga ai: ¹⁰ Shi gaw nye a lagaw hpe sharen da nna, ngai sa wa ai lam shagu hpe matsing nga ai,” ¹¹ Nga nna, nye a man e nang tsun nit dai; nang tsun ai nsen ngai na ni ai. ¹² Yu u, Karai Wa gaw masha hta grau kaba nga ai majaw, nang tsun ai ga n htuk nga ai, ngai htan nngai law. ¹³ Nang shi hte hpa majaw nhtan shai nga n ta? Shi galaw ai lam ni gawn yu ra ai, n rai. ¹⁴ Karai Kasang lam langai mi hta tsun timung, masha n dum yang, lahkawng lang shagup tsun nga ai. ¹⁵ Masha ntsa e yup a ai yu hkrat wa nna, shi a yupku ntsa e yup pyaw nga yang, yupmang mu nna shana na shingran hte, ¹⁶ Karai wa gaw shi a na hpaw ya nna, shanhte hpe shadum ai lam shatup ya wu ai. ¹⁷ Shingrai, masha maw ai hku shi hkum kau ai hte, gumrawng gumtawng rawng ai myit, pat kau wu ai. ¹⁸ Shi a myit masin hpe nsung hku hta na, shi a asak hpe ri nhtu hta na, mawai la wu ai. ¹⁹ Bai, masha gaw shi a yup kau ntsa e machyi makaw hkrum nna, shi a nrut nra ni tut tut kawa machyi ai hte, sharin achyin hkrum nga ai. ²⁰ Shi gaw shat pyi n kam sha ai hte, shi a wenyi gaw mu ai shahpa hpe matsat nga ai. ²¹ Shi a hkumshan gaw n kap mat hkra lasi mat nna, ndawng yu ai nrut nra ni, ya dawng pru nga ai. ²² Rai sa, shi a wenyi gaw lup hte ni wa nna, shi a asak gaw, si du a ali ama ni hpang de du wa magang nga ai. ²³ Raitimung, masha wa hpe tengman ai lam madun dan na matu, lamu kasa hkying mun hta na htinglu htinglai ya ai wa langai mi, shi a makau e tsap nga ai, rai yang; ²⁴ Karai wa shi hpe matsan dum nga nna, “lup de shi n yu wa hkra, shi hpe hkyehkrang la u; ngai shi a lam gawng malai hkungga mu lu nngai,” nga ai. ²⁵ Shi a hkumshan gaw ma kaji a hkumshan zawn hkalung wa nna, shi gaw brang ram prat bai galai na ra ai. ²⁶ Karai Wa hpe shi akyu hpyi nna, chyeju hkan la let, kabu gara ai myit hte shi a myiman hpe mu lu na ra ai: masha hpe shi a dinghpring ai akyu, shi nhtang jaw na ra ai. ²⁷ Bai shi gaw, “ngai shut ni ai; tengman ai lam hpe hkalau kau nngai; raitimung, matai htang ai n hkrum ai sha, ²⁸ shi nye a myit masin hpe lup de na mawai la nhtawm, nye a asak gaw nhtoi mu lu na ra ai,” nga nna masha ni a man e mahkawn mangoi na ra ai. ²⁹ Yu u, masha wa a myit masin hpe nsung hku de na dawm la nna, ahkrung nga ai ni a nhtoi hte shi hpe jahtoi ya lu hkra, ³⁰ Karai Wa gaw ning re ai lam mahkra hpe tutnawng kahtap galaw nga ai. ³¹ Matsing u, Yoba e, nye a ga madat u; atsin sha nga u, ngai tsun na nngai. ³² Tsun shara nga yang, naw tsun u; nang mara lawt na, ngai ra nngai majaw, ga tsun u. ³³ Tsun shara n nga yang, nye a ga madat u; atsin sha nga u, ngai nang hpe hpaji byeng-ya sharin na de ai, nga ai.

¹ Bai Elihu kahtap tsun ai gaw, ² hpaji byeng-ya rawng ai ni e, nye a ga madat mu; chye chyang ai nyan rawng ai ni e, nye a ga na la mu. ³ N-gup gaw ashat hpe chyim yu ai zawn, na gaw aga hpe tsan kau nga ai. ⁴ Anhte gaw tinang a matu tengman ai lam lata ga; mai kaja ai lam tinang nan matsing ga. ⁵ Yoba mahtang, “ngai nan dinghpring nngai; Karai Wa gaw nye amu hpe sum shangun nga ai. ⁶ Nye akyu hten hkra, ngai masu mai a ni? Ngai n shut timung, n mai lu hkra hkala nba hkrum ni ai,” nga nna tsun ai. ⁷ Yoba zawn re ai wa kadai rai ta? Shi ntsin hpe lu ai zawn, jahpoi asawng ai hpe mayu kau nga ai. ⁸ N hkru n hkra ai ni hte shi kanawn nga nna, tara n lang ai ni hte rau a hkawm nga ai. ⁹ “Masha wa Karai Kasang hta sharawng awng lu na hpa akyu n nga ai,” nga nna shi tsun ai. ¹⁰ Dai re ai majaw, myitsu ai ni e, nye a ga madat mu: tara tawt lau ai gaw Karai Wa hte, shut hpyit ai gaw chyahtum chyalai n-gun rawng ai wa hte, tsan nga u ga. ¹¹ Masha galaw ai hte maren, shi matai htang na ra ai; tinang alm hte maren, hkrum sha shangun na ra ai. ¹² Gaja wa, Karai Wa gaw tara tawt lai nga ai, n rai, n-gun chyalai rawng ai wa gaw n tara ai hku dawdan na, n rai. ¹³ Shi hpe ginding aga kadai ap ya a ta? Nga yawng nga pra hpe kadai hpan da a ta? ¹⁴ Shi gaw shi hte seng ai hkrai myit dum nna, shi a wenyi hte shi a nsoi nsa dawm la kau ai rai yang, ¹⁵ hkrung mahkrung lang lata sha nsa hti mat nna, shinggyim masha gaw ga nhpu de nhtang mat wa na ra ai. ¹⁶ Nang chye na ai rai yang, ndai madat u, ngai tsun ai ga naw na la u. ¹⁷ Tara hpe ndawng ai wa up mai a ni? Dinghpring ai hte daru magam rawng ai wa hpe, mara shagun mai a ni? ¹⁸ Hkawhkam wa hpe, “Nang n shawp ndai,” Agyi salang ni hpe, “nanhte n hkru myit dai,” nga nna tsun mai a ni? ¹⁹ Shi gaw du ni a myiman n tau yu ai hte, matsan mayan ni hta sut su ai ni hpe, grau hkungga nga ai, n rai. Shi a lata shanhte nlang hte hpe hpan da mu ai. ²⁰ Hkring mi sha, yuptung e pyi shanhte si mat ma ai; masha amyu ni gari awam hkrum ai hte lai mat wa ma ai: daru magam rawng ai ni pyi, gade a lata n du ai, myit mat ai hkrum ma ai. ²¹ Karai Wa nan masha hkawm ai lam hpe hkan mada yu nna, shi a lagaw hkang mahkra hpe hkan mu nga ai. ²² N hkru n hkra re ai amu galaw ai ni makoi nga lu hkra, nsin hte si ai shingnip n nga ai. ²³ Masha gaw Karai Wa man e tara shang dara hkat na, shi gaw masha wa hpe sagawn yu ra ai, n rai. ²⁴ Hpa garai n gawn yu yang, shi gaw daru magam ni hpe agrawp kau nna, shanhte a malai kaga ni hpe tawn da mu ai. ²⁵ Dai rai nna shanhte a amu hpe shi mada yu ai hte, shana e rai yang, shanhte hpe gumpye adup kau mu ai. ²⁶ Shi gaw tara n lang ai ni hpe maga nga ai, n rai; shawa hpawng shingra e shanhte hpe kahpret mu ai. ²⁷ Shingrai timung, shanhte shi kaw na tsan mat wa nna, shi a lam langai mi muk n nawn ma ai. ²⁸ Dai re ai majaw matsan chyaren ai ni a jahtau shaga ai nsen shi kaw du nna, nni nkri hkrum ai ni a jahtau shaga ai nsen shi na wu ai. ²⁹ Shi ngwi pyaw shangun yang, kadai sharu lu na rai ta? Shi myiman makoi yang, amyu raitimung, marai langai sha mung, shi hpe kadai mu lu na rai ta? ³⁰ Shingrai, n shawp ai wa gaw, up nga lu na, n rai; amyu masha ni hpe mahkam hkam ai wa nga lu na, n rai. ³¹ Marai langai ngai, “ngai ari hkrum sha nngai. Htawmhpang de n kaja ai amu galaw na, n rai. ³² Ngai n myit hkawn lu ai lam ngai hpe sharin ya e; ngai yubak galaw ni ai rai yang, dai hta bai jat na n rai,” nga nna Karai Wa hpe hpyi nem nga yang, ³³ shi tawn da ai hku nang n hkan hkraw ndai majaw, nang ra ai hku shi hkan nna matai htang na rai ni? Shi n rai, nang dai lata la mai ai, rai ni? Dai rai nna nang chye na ai hku tsun u. ³⁴ Myit su ai ni ngai hpe ga tsun mi ga; zai byeng-ya rawng ai ni, nye ga madat mu ga. ³⁵ Yoba gaw n chye na ai hku tsun shut nu ai; shi a ga hpaji rawng ai ga, n rai. ³⁶ Yoba gaw tara n lang ai wa zawn n htan nga ai majaw, jahtum du hkra dinglik yu ai hkrum u ga law. ³⁷ Shi gaw yubak hta gumlau ai amu naw kahtap nga ai; anhte a ka-ang e shi lata lahpawk dum nna, Karai Wa hpe jahte tam ai ga shalaw nga ai, nga ai.

¹ Bai Elihu kahtap tsun ai gaw, ² “ngai gaw Karai Wa hta grau dinghpring nngai, nga nna mung, ngai gaw hpa akyu lu la na rai ta? ³ Ngai yubak galaw tim’ maren akyu lu la na, n rai ni?” nga nna nang tsun ai gaw, tara hku re ai, nawn da wu ni? ⁴ Nang hte na a kanawn manang ni a ga hpe ngai htan kau na nngai. ⁵ Sumsing lamu de mada yu nna, nang hta grau tsaw ai sumwi ni hpe azi yu u. ⁶ Nang yubak galaw timung, shi hpe kaning rai hkra lu a ta? Na gumlau ai amu law htam timung, shi hpe hpa di lu a ta? ⁷ Nang dinghpring timung, shi hpe hpa jaw lu n ta? Na a lata na hpa kumhpa hkam la na rai ta? ⁸ Nang galaw ai yubak nang zawn re ai wa hpe hkra nga ai; nang dinghpring ai rai yang, masha kasha akyu lu la na nhten. ⁹ Zingri zingrat law law hkrum ai majaw, shanhte jahtau nga ma ai; n-gun ja ai ni a adip arip di ai majaw, shanhte shabam nga ma ai. ¹⁰ Raitimung, shana aten e anhte hpe mahkawn mangoi shangun ai hte, ga ntsa ashu ashan ni hta anhte hpe grau chye shangun nna, ¹¹ ntsa malem u ni hta anhte hpe hpaji grau jaw ya ai wa, nye hpan Madu Karai Wa gaw kanang rai nga a ta? Nga nna n chye san ma ai. ¹² Dai majaw shanhte jahtau timung, gumrawng ai ni a majaw, shanhte hpe htan ai wa n nga ai. ¹³ Gaja wa, Karai Wa gaw kaman lila ga hpe n madat nga ai; chyahtum chyalai n-gun rawng ai wa mung, dai hpe n nawn nga ai. ¹⁴ Nang gaw, “ngai shi hpe n mu nngai,” nga nna tsun ndai majaw, grau nna n nawn nga ai n rai ni? Amu gaw shi kaw rai nga ai, shi a man e ala nga u. ¹⁵ Ya chyawm gaw, pawt sindawng ai hte shi ari n jaw nna, grang dakat ai ga ai n nawn nga ai majaw, ¹⁶ Yoba gaw kaman lila ga tsun let n-gup hpaw nna, lam n la ai ga shalaw jahtau wu ai, nga ai.

¹ Bai Elihu kahtap tsun ai gaw, ² naw hkring u, ngai hkai dan de ga: Karai Wa a lam ngai tsun shara naw nga ai. ³ Tsan tsan kaw na zai byeng-ya ngai shapraw nna, nye hpan Madu hpe ngai awlaw na nngai. ⁴ Gaja wa, nye a ga masu ai ga n rai, hkum tsup ai hpaji rawng ai wa nang kaw rai nga ai. ⁵ Yu u, Karai Wa daru magam rawng timung, kadai hpe gangkau ai n rai; shi gaw n-gun atsam hte chye chyang ai hta galu kaba rai nga ai. ⁶ Shi gaw tara n lang ai ni a asak hpe, bau nga ai n rai; nni nkri hkrum ai ni hpang maga e dawdan ya nga ai. ⁷ Shi gaw dinghpring ai ni hpe n yu nga ai, n rai: shanhte tutnawng shagrau ai hkrum lu hkra, Hkawhkam ni hte rau tingnyang hta dung shangun mu ai: ⁸ Bai, shanhte gaw hpri sumri hte gyit hkang hkrum nna, nni nkri re ai sumri hte gyit da ai hkrum yang, ⁹ shi gaw, shanhte hpe tinang galaw ai bungle hte, shanhte myit kaba ai mara, madun dan mu ai. ¹⁰ Sharin ai ga madat mayu hkra, shi shanhte a na hpaw ya nna, shanhte yubak kaw na kayin wa na lam, hkangda mu ai. ¹¹ Shanhte madat mara nna, shi hpe dawjau nga yang, shanhte gaw ngamu ngamai ai hte tinang a nhtoi ni, ngwi pyaw let tinang a shaning shata ni, shalai dat na mara ai. ¹² Madat mara ai myit n rawng yang, shanhte ri nhtu hte htum mat nna, chye chyang ai nyan n rawng ai, nsa hti mat na mara ai. ¹³ N shawp ai myit rawng ai ni gaw, pawt sindawng ai mahkawng da ma ai; gyit hkang ai hkrum timung, hpyi jahtau ma ai n rai. ¹⁴ Asak kaji nga yang pyi, shanhte si mat nna, n san n seng ai ni hte rau htum mat ma ai. ¹⁵ Shi gaw nni nkri hkrum ai ni hpe, tinang hkrum ai nni nkri hte mawai la nna, adip arip re ai hte shanhte a na hpe hpaw ya mu ai. ¹⁶ Rai sa, shi nang hpe mung, ru tsang ai hte gyip ai shara kaw nna, dam lada re ai de lau la mayu ai hte, na a sha ku ntsa e tawn da ai shahpa gaw, dwi sau ai hkrai rai na ra ai. ¹⁷ Nang chyawm gaw tara n lang ai ni a dawdan ai hku hpring nga nna, dawdan ai hte tara dara ai gaw nang hpe dep na ra ai. ¹⁸ Nang kahtet kamawt hkrum ai majaw, pawt ai myit n madun n ga, sadi u; nang jaw ai gawng malai hkungga kaba timung, myit hkum hten et. ¹⁹ Nang hpyi jahtau ai hte n-gun lagaw ting dat ai majaw, ru tsang ai lawt na rai ni? ²⁰ Shana hpe hkum marit et; dai aten e amyu baw ni tinang shara na shapoi kau hkrum na mara ai. ²¹ Sadi u, n hkru n hkra ai hpe hkum tam et; nang gaw matsan chyaren ai hta dai lam hpe grau sharawng nit hka! ²² Yu u, Karai Wa gaw shi a n-gun atsam hte tsaw htum ai amu galaw nga ai; shi zawn re ai sara kadai rai nga a ta? ²³ Shi sa wa ai lam, kadai san da lu a ta? “nang shut nit dai,” nga nna kadai tsun lu a ta? ²⁴ Shi a amu bungli hpe shagrau na, dum u; dai lam masha ni mahkawn mangoi yu masai. ²⁵ Masha ni yawng dai lam hpe azi yu masai; shinggyim masha ni tsan tsan kaw nna dai hpe mada yu ma ai. ²⁶ Yu u, Karai Wa gaw galu kaba nga ai rai nna, anhte shi hpe n chye ga ai; shi a asak shaning gade re ai kadai n dang gawn lu ai. ²⁷ Shi gaw hka nsi ni hpe shalun la nhtawm, dai ni gaw shi a salu hta na marang tai nna, ²⁸ sumwi ni gaw dai hpe n taw n tsang, masha ni a ntsa e jahtu dat mu ai. ²⁹ Gaja wa, sumwi ni nawng bra wa ai hte, shi sum a mu ngoi ai nsen, kadai chye lu a ta? ³⁰ Yu u, shi gaw shi a nhtoi hte shi hkum hpe shinggrup da nna, nammukdara a htumpa hpe magap da wu ai. ³¹ Dai lam hte masha amyu ni hpe shi dawdan nna, lusha shahpa n taw n tsang karan jaw mu ai. ³² Shi gaw shi a lata yan hta myihprap lang nna, hpyen ni hpe hkra na htet da wu ai. ³³ Shi a mu ngoi ai gaw shi a lam madun dan nga ai; yamnga ni pyi shi lung wa ai lam chye sawn ma ai.

¹ Dai lam majaw nye a myit masin gari nna, dai gaw nye a kraw lawang e kahpra nga ai. ² Shi ngoi ai nsen kaba hte, shi n-gup nna pru ai, wu kadu ai nsen hpe, madat mu law. ³ Shi dai hpe sumsing lamu npu ting shabra dat nna, lamu ga jarit htum hkra, shi a myi hprap gala nga ai. ⁴ De a hpang e nsen ngoi nga ai: shi gaw shi a hpung shingkang nsen hte shaga nga ai; shi nsen ngoi yang, myihprap ni hpe hkum da ai n rai. ⁵ Karai Wa gaw shi a nsen hte mauhpa rai hkra ngoi nga ai; anhte n dang chye ai galu kaba ai amu galaw nga ai. ⁶ Shi gaw, ga ntsa e hkrat nga u, nga nna ahkyen hpe mung, marang nhpawng hte, shi a atsam majaw, laru marang hpe mung, hkangda wu ai. ⁷ Shi hpan da ai shinggyim masha yawng chye na lu mu ga, shi dai hte masha mahkra a amu hpe jahkam da ya mu ai. ⁸ Dai shaloi e matse labye ni tinang a lungpu e shang nna, shanhte a shingbyi shara e gawp nga ma ai. ⁹ Dingda maga de nna nbung laru, dingdung maga de nna katsi ai nbung du pru nga ai. ¹⁰ Karai Wa kawut ai hte hka ge mat nna, dam lada ai hka man gying mat nga ai. ¹¹ Shi gaw htat ai sumwi ni hpe ntin hte jahpring nna, myihprap rawng ai sumwi ni hpe shabra kau wu ai. ¹² Dai ni gaw shi a jaw e kayin hkawm wa nna, shi hkangda mada hte maren, ¹³ ari jaw na matu raitimung, lamu ga a akyu hte, shing n rai, masha hpe chyeju madun na matu raitimung, ginding aga ting hta e amu shatup nga ai. ¹⁴ Yoba e, ndai ga madat u; asim sha nga nna, Karai Wa a mauhpa amu ni hpe sumru yu u. ¹⁵ Karai Wa gaw ndai amu ni hpe kaning rai hkangda nna, shi sumwi na myihprap gala ai lam, nang chye nga n ni? ¹⁶ Hpaji hkum tsup ai Karai Wa mauhpa amu ngu ai, sumwi ni gaw hpat wat e mawng nga ai lam, nang chye nga n ni? ¹⁷ Dingda nbung majaw lamu ga saup wa nna, na a hpun nba kaning rai lum wa ai hpe nang chye na n ni? ¹⁸ Jaw ai magri jamna zawn grin nga ai lamu madin hpe, nang shi hte rau din da n ni? ¹⁹ Anhte shi hpe kaning nga tsun na, sharin ya mi; nsin hta lup nga ai majaw, anhte hpa n chye myit ga ai. ²⁰ Ngai ga tsun mayu nngai, shi hpe shana ya na mai a ni? Gaja wa masha gaw, ngai si mayu nngai, nga nga a ni? ²¹ Ya chyawm gaw, masha ni lamu na tu kabrim ai nhtoi hpe n mu timung, nbung wa nna lamu hpe jasan kau mu ai. ²² Dingdung maga de na, aja zawn htoi kabrim ala nga ai; Karai Wa hta hkrithpa hpung shingkang danhkung nga ai. ²³ Chyahtum chyalai n-gun rawng ai wa hpe anhte n sawk yu lu ga ai; n-gun atsam hte shi danhkung nga ai; tara hku hkan ai hte dinghpring tsup nga ai majaw, shi kadai hpe mung n zingri nga ai law. ²⁴ Dai re ai majaw shinggyim masha ni shi hpe hkrit hkungga ma ai; tinang nan hpaji rawng dum ai wa hpe shi n yu ra nga ai law, nga ai.

¹ Shaloi Yehowa gaw bung sha kaw nna Yoba hpe htan let, ² hpaji daw ai lam hpe, myit n su ai ga hte shamak kau ai wa gaw, kadai rai ta? ³ Share wa zawn na nshang shingkyit kyit u; ngai san de ga, nang htan ya e. ⁴ Ginding aga npawt hpe ngai gaw da yang, nang kanang nga n ta? Nang chye na yang, ya madun u. ⁵ De a dingdung dingda kadai shadawn nga ai gaw, nang chye nga n ni? De a ntsa e shadawn sumri hpe, kadai gran a ta? ⁶ De a npawt nhpang ni hpa hta gaw da a ta? N-htoi gintawng ni rau mahkawn mangoi nga nna, ⁷ Karai Kasang a ali ama ni yawng kabu jahtau nga ma yang, de a njut nlung hpe kadai mara da a ta? ⁸ Nammukdara gaw ga de nna kapaw pru wa yang, Kadai wa chyinghka hte pat da lu a ta? ⁹ Da a hpun palawng gaw sumwi, de a sanen gaw htat ai nsin, ngai shatai nna, ¹⁰ de a matu lamu ga jarit tawn da nhtawm, chyinghka ni hte htinggrang ni tawn da yang, ¹¹ “nang du hkra nang sa lu nna n lai lu ndai, na a gumrawng ai hka leng ni nang e sim mat na ra ai,” nga nna tsun ai wa kadai wa rai ta? ¹² Nang gaw, na a prat tup jahpawt manap hpe hkangda nna, nhtoi gaw lamu ga htum hkra htoi nga na hte, ¹³ tara n lang ai ni hpe jahtaw kau lu hkra, jahpawt nhtoi hpe htoi leng shangun lu n ni? ¹⁴ De a majaw lamu ga gaw dazik tawk sai ga kagam hte bung nna arai yawng mayawng hpun palawng zawn dan leng wa ai. ¹⁵ Tara n lang ai ni a nhtoi hkoi mat wa nna, gumrawng gumtawng ai ni a lata agrawp kau ai hkrum nga ai. ¹⁶ Nang gaw nammukdara hka hpawk ni hta shang yu n ni? Sung htum ai htumpa e htinglet hkawm yu n ni? ¹⁷ Si hkrung si htan chyinghka ni nang hpe madun a ni? Si ai shingnip de hprang ai lam nang mu yu n ni? ¹⁸ Lamu ga dam lada ai hpe nang mada yu nit ni? Yawng mayawng hpe mu chye yang tsun u. ¹⁹ Nhtoi shanu nga ai shara de du ai lam gaw, kanang rai nga a ta? Nsin a shara mung kanang rai nga a ta? ²⁰ Nang gaw, de a ginwang jarit du hkra dai hpe woi la lu nna, de a nta de du ai lam ni nang chye lu n ni? ²¹ Gaja wa dai aten e nang mung shangai wa nna, na nhtoi ni galu nga ai majaw, nang chye na ndai. ²² Ahkyen rawng ai sutdek de nang shang yu n ni? Ru tsang hkrum ai aten hte, hpyen gasat nna, ²³ majan hkrum ai shani matu, ngai mahkawng da ai, sin a sutdek hpe nang mu yu n ni? ²⁴ Nhtoi gaw kanang na galai wa nna, sinpraw nbung gaw kanang nna lamu ga ntsa e bra nga a ta? ²⁵ Masha n nga ai ga hte, marai langai mi muk n shanu lu ai, ahkun ahkraw re ai ga ntsa e marang htu shangun ai hte, ²⁶ hpang kara ai zaibru jang hpe madit nna, tsit lali ai tsingdu prut shangun na matu, ²⁷ hka hpungla ni hkan lwi ai lam, mu ngoi ai hte myihprap gala ai lam hpe, kadai hpaw a ta? ²⁸ Marang gaw kawa lu ai rai ni? Mari nsi ni hpe kadai shaprat a ta? ²⁹ Ntsin shage gade a kan nna pru a ta? Sumsing lamu na ahkyen hpe, kadai shangai a ta? ³⁰ Ahka gaw nlung zawn gumdin mat nna makoi nga ai; sung ai hka hpung ni gaw ge mat ma ai. ³¹ Nang gaw kru majan hpe nhtan shabawn lu n ni? Wala shingtau a shingkyit hpe raw kau lu n ni? ³² Du hkra ladaw ni hpe nang shapraw lu n ni? Nhtoi gingawng hte de a kasha 32 hpe woi awn lu n ni? ³³ Sumsing lamu a htung tara nang chye n ni? Nang dai hpe ga ntsa de up shangun lu n ni? ³⁴ Marang nhpawng ni nang hpe ka-up nga na matu, nang gaw sumwi ni hpe hkangda lu n ni? ³⁵ Myihprap ni hpe nang kala dat shangun lu nna, dai ni gaw, anhte nga nga ga ai, nga nna tsun let sa wa na ma ni? ³⁶ Hpaji byeng-ya hte kraw lawang hta kadai bang ya a ta? Myit masin hpe chye chyang ai nyan kadai jaw a ta? ³⁷ Hpaji rawng nna sumwi ni hpe kadai hti lu a ta? Nhpu mawng gumdin nna, ³⁸ ga tawng ni ja ahkak mat yang, sumsing lamu a nhtung ni hpe kadai ru dat lu a ta? ³⁹ Nang gaw hkanghkyi kanu a matu shahpa tam lu n ni? Hkanghkyi hkalung ni tinang a makoi shara e gawp nga nna, ⁴⁰ singwun npu e gyem yu nga yang, shanhte hpe hkru hkra jaw lu n ni? ⁴¹ U hka hkalung ni shahpa n lu ai majaw, nwan hkawm nna Karai Wa hpe hpyi jahtau yang, u hka hpe shahpa jaw ai wa kadai rai ta?

¹ Ya ni gara aten e kasha hkrat ai, nang chye lu n ni? Shan nga ni hkalung woi ai aten, nang matsing lu n ni? ² Dai ni gaw nhtoi shata gade umat rai nga ai hpe, nang hti yu lu n ni? Dai ni kasha hkrat na aten nang dum n ni? ³ Shanhte gaw gum let kasha hkrat kau nna, tinang a shangai machyi sim mat malu ai. ⁴ Hkalung ni mung kung wa nna, prang ga e kaba wa ai hte, kaga de hkawm mat wa nhtawm, kanu hpang de bai n wa ma ai. ⁵ Nam lawze nhprang hpe, kadai dat dat a ta? Gat chyang ai laring gumra a sumri hpe, kadai raw lu a ta? ⁶ Layang prang ga hpe shi shanu nga ai nta ngai shatai nna, shi shingbyi nga ai shara gaw, jum shum ai ga rai nga ai. ⁷ Mare a wu kadu ai nsen hpe shi hpa n nawn nna, gawt shachyut ai wa a nsen hpe n chye matsing nga ai. ⁸ Bum ga gaw shi a udat ginwang rai nga nna, tsit lali ai lap amyu shagu hpe tam sha nga ai. ⁹ Hpawlam gaw na a amu galaw nna, na a waking makau e yup nga hkraw a ni? ¹⁰ Nang shi hpe sumri hte na htai hta gyit lu nna, na a hkaibang hpe shi masit hkraw na rai ni? ¹¹ Shi n-gun ja ai majaw nang shi hpe kam nna, na a amu shi hpe ap lu na n ni? ¹² Na a mam hpe chyarang hta shinggyin la nna, na a dum hta mahkawng da na nang shi hpe kam n ni? ¹³ U gawla-uk gaw singkaw kahprap nga ai: raitimung, matsan dum ai singkaw mun rai ni? ¹⁴ N rai law, shi gaw shi a di ni hpe ga hte di da nna, ga nhpu gaw dai ni hpe shalum nga ai. ¹⁵ Masha gaw, dai ni hpe kabye hkrup na hte, matse labye ni kabye ga kau na hpe shi n tsang nga ai. ¹⁶ Karai Wa gaw shi kaw na hpaji dawm la kau ai hte, chye chyang ai nyan shi hpe n karan ya ai majaw, ¹⁷ shi gaw shi a hkalung ni hpe, shi hte n seng ai zawn, aja awa di nna, be be kaman di di kau timung, shi hpa n nawn nga ai. ¹⁸ Raitimung, shi singkaw kahpyen nna rawt nga yang, gumra hte gumra jawn ai wa hpe shi asawng kau nga ai. ¹⁹ Nang gaw laring gumra hpe n-gun jaw sa ni? Shi a du hta singgung mun nang tu shangun n ni? ²⁰ N-gam yaw zawn nang shi hpe gumtawng shangun n ni? Shi a ladi sharat ai nsen gaw, hkrithpa rai nga ai. ²¹ Shi gaw kadit ga hpe lahkut nna, tinang a n-gun hta gumrawng let, hpyen luksuk ni hpe tau la na pru wa ai. ²² Hkrithpa hpe shi asawng nna, mak mat hkrum ai n rai; ri nhtu hpe mung shi n yen nga ai. ²³ Pala ndum hte, tu kabrim ai ri tu hte n-gang, shi ntsa e shara hkrawk hkrak nga ai. ²⁴ N-yun bu nna pawt kahtet ai hte aga hpe shi gamaw kau nna, pahtau dum ai nsen ngoi yang, shi asim sha nga lu ai n rai. ²⁵ Pahtau galoi dum yang, shi gaw, Aha! Nga nna, hpyen gasat gala ai hte hpyenbu ni a reng ai ga, luksuk ni a garu jahtau ai hpe, tsan tsan kaw nna chye lu nga ai. ²⁶ Langji gaw na a hpaji hte singkaw kahpyen nna, dingda maga de ang ang pyen chye a ni? ²⁷ Nang hkangda ai majaw langda gaw ntsa de pyen lung wa nna, tsaw ai shara e tsip tsip nga a ni? ²⁸ Shi gaw lunghkrung ntsa e nga nga nna, bum pungding lunghtawn ntsa e shanu nga ai. ²⁹ Dai kaw nna tinang a shahpa hpe shi mada nga nna, shi a myi tsan tsan kaw nna dai hpe mu lu nga ai. ³⁰ Shi a hkalung ni mung sai lu ma ai: mang taw ai shara e shi nga nga ai, nga ai.

¹ Bai Yehowa gaw Yoba hpe htan nna, ² bawlaw ai wa gaw chyahtum chyalai n-gun rawng ai wa hte dangrang hkat na mai a ni? Karai Wa hte ndang kalang hkat ai wa gaw htan yu u ga, nga ai. ³ Dai rai nna Yoba gaw Yehowa hpe htan nna, ⁴ yu u, ngai hpa n re ai wa, nang hpe hpa htan lu na rai ta? Nye a lata hte nye n-gup hpe pat da na nngai. ⁵ Lang mi ngai tsun timung bai n htan gwi ni ai; lahkawng lang tsun timung, bai n kahtap wam ni ai, nga ai. ⁶ Shaloi Yehowa gaw bung sha kaw nna Yoba hpe htan let, ⁷ share wa zawn na nshang shingkyit kyit u; ngai san de ga, nang htan ya e. ⁸ Nang gaja wa nye tara dara ai lam shabyak mayu n ni? Nang dinghpring lu hkra, ngai hpe mara shagun mayu n ni? ⁹ Na a lahpum Karai Wa a lahpum zawn rai nga a ni? Shi zawn mu ngoi ai nsen shapraw lu n ni? ¹⁰ Hpung dagu hte arawng sadang ya bu hpun u; daru magam hte hpung shingkang hpe mawn sumli u. ¹¹ Na a pawt sindawng ai myit ru dat nna, gumrawng ai ni hpe yu matsing nna shabyak kau mu. ¹² Gumrawng ai ni hpe yu matsing nna shagrit kau mu; tara n lang ai ni hpe tinang a shara hkan kabye dip kau mu. ¹³ Shanhte hpe ga nhpu hta rau makoi kau mu; shanhte a myiman hpe nsin hta e ka-up da mu: ¹⁴ Dai rai yang she, na a hkra lata nan nang hpe hkye la lu na ra ai, nga nna ngai mung na a lam awlaw na nngai. ¹⁵ Yu u, nang hte rau ngai hpan da ai magwi manang gaw dumsu zawn tsingdu tsingman sha nga ai. ¹⁶ Shi a n-gun chyawm gaw shi a nshang e nga nga nna, shi a atsam gaw kan a lasa ni hta rawng nga ai. ¹⁷ Shi a nmai gaw marau hpun zawn kanga nga nna, magyi lasa ni htap mi hte htap mi kapyawn nga lu ai. ¹⁸ Shi a nrut nra ni gaw, magri hkailawng rai nga nna, garep nra ni gaw hpri tawng hte bung nga ai. ¹⁹ Karai Wa a hpan da mada hta shi nhtung nhka rai nga ai; shi hpe hpan da ai wa chyu sha, shi hpe nhtu jaw lu ai. ²⁰ Gaja wa, nam na matse labye ni ginsup nga ai bum ga gaw, shi a matu lusha shahpa shapraw nga ai. ²¹ Shi gaw maiaw hte kungji tu ai hpungya hta dawngmu singwum npu e hpum nga ai. ²² Dai singwum ni gaw shi hpe shingnip ka-up nna, hka shi makau na mu mahka hpun ni shi hpe shinggrup nga ai. ²³ Yu mu, hka tung lim wa timung, shi n hkrit nga ai; Yawdan hka pyi shi a n-gup hpe ahtu timung a sim sha nga nga ai. ²⁴ Shi maja nga yang, shi hpe rim la lu na kun? shi a ladi hpe shoi ya lu na rai ni?

¹ Nang gaw baren hpe nga myit hte lamat la lu n ni? Shi a shinglet hpe sumri hte gyit shadau lu n ni? ² Shi a ladi hpe pali hte shoi lu n ni? Shi a nnaw hpe sumprup hte shoi dinghkren na rai ni? ³ Shi nang hpe akroi anoi tawngban na rai ni? Ga ngwi ga sau nang hpe tsun na a ni? ⁴ Shi prat dingsa e na a mayam tai lu hkra, shi nang hte ga shaka tawn da na rai ni? ⁵ U hte ginsup ai zawn, shi hte ginsup na rai ni? Shi hpe na num ma ni a manang shatai na rai ni? ⁶ Nga hkan ai ni gaw shi hpe hpya dut na ma ni? Hpaga ga ai ni gaw shi hpe shen karan na ma ni? ⁷ Shi a hpyi hpe ri chyinghkyi hte mung, shi a baw hpe nga galun ai ri hte mung, galun waw shajang lu n ni? ⁸ Shi hpe sha hkra yu u; shi hkap gasat na lam dum u; htawmhpang e shi hpe gasat mayu sa na n rai. ⁹ Shi hpe gasat ai wa gaw hpa myit mada shara n nga ai; shi hpe mu yang pyi, myit htum nga ai n rai ni? ¹⁰ Shi hpe jasu lu hkra, nden ja ai myit kadai n rawng ai: dai rai nna nye a man e kadai tsap lu na rai ta? ¹¹ Ngai chyeju nhtang dum hkra, ngai hpe chyeju galaw yu ai wa kadai rai ta? Sumsing lamu npu e nga manga nye a hkrai rai nga ai. ¹² Shi a daw shan ni a lam, shi danhkung ai atsam hte, shi hkum hkrang a htaphtuk ai lam hpe, ngai atsin sha nga na n rai. ¹³ Shi a ntsa palawng hpe kadai gaw kau lu na, rai ta? Shi a n-gup mahka hta, kadai wa shang lu na rai ta? ¹⁴ Shi a myiman chyinghka hpe kadai hpaw lu na rai ta? Shi a wa kawng grup grup hkrithpa rai nga ai. ¹⁵ Ngang ngang la da nna, dazik hte tawk da ai zawn, shi a hkum sep n-gang ni, shi a gumrawng shara rai nga ai. ¹⁶ Langai hte langai htep htep rai nga nna, nbung pyi de a lapran e shang lu ai n rai. ¹⁷ Pa mi hte pa mi matut manoi rai nga nna, n daw n hka lu hkra gindun nga ma ai. ¹⁸ Shi kahti yang, htoi kabrim ala nga nna, shi a myi gaw jahpawt manap na nhtoi hte bung nga ai. ¹⁹ Shi a n-gup hta na wan shanan grung pru nna, wan numya ni kamawng pru nga ma ai. ²⁰ Shi ladi sharat yang, prut kaprawk ai di hte wan wut ai maiaw hta na zawn, wanhkut mawng pru nga ai. ²¹ Shi a nsa sa ai gaw wan n-ga hpe shachyi lu nna, shi a n-gup hta na wan shinglet tu pru nga ai. ²² Shi a du krung e n-gun lapyin dung nga ai; shi shawng e hkrit kajawng ai gaw ka gumlawt nga ai. ²³ Shi a shan pawm ni matut kahtap nga nna, ngang hkang nga ai majaw, shamu shamawt nga lu ai n rai. ²⁴ Shi a myit masin gaw nlung hte maren ja nga ai; htumrin a kata nlung zawn ja nga lu ai. ²⁵ Shi dawng pru yang, nden ja ai ni pyi hkrit gari ma ai; mak mat hkrum ai majaw, mau am mat ma ai. ²⁶ Nhtu kahtam yang nhtu hkam na n rai; ri, pala, hpyen rai hte mung jung na n rai. ²⁷ Shi gaw hpri hpe yi hku zawn, magri hpe tsam mat ai hpun hpe zawn, nawn nga ai. ²⁸ Ndan pala hte shi hpe jahtaw lu na n rai. Lahpaw pala nlung hpe yi hku zawn shatai nga ai. ²⁹ Patbau hpe yi hku zawn shi nawn nna, ri tu hte dawn yang, shi mani kau ya nga ai. ³⁰ Shi a kan hpyi, dai ai di chyen hte bung nna, na hking hte zawn, hkumpup hpe masit ya wu ai. ³¹ Shi gaw sung ai shara hpe, di hte maren prut shangun nna, nawng ni hpe manam ai baw rawng ai ndum zawn, shatai wu ai. ³² Shi lai wa ai lam hkang gaw tu ala nga ai rai nna, sung ai shara gaw hpraw mat wa ai zawn rai nga ai. ³³ Lamu ga ntsa e shi hte shadawn lu ai wa n nga ai; hkrit kang ai myit n rawng hkra, shi hpe hpan da wu ai. ³⁴ Ntsa de na nga manga hte hpe shi mu yu nga ai; shi gaw matse labye ni yawng a ntsa e hkawhkam rai nga ai, nga ai.

¹ Shaloi Yoba gaw Yehowa hpe htan nna, ² nang gaw yawng mayawng hpe galaw lu nna, nang maw ai lam hkum da shara n nga ai hpe, ngai chye nngai. ³ “Hpaji daw ai lam hpe myit n su ai hte shabyak ai wa gaw, kadai rai ta?” Dai re ai majaw ngai n chye na ai lam, ngai n dang chye ai mauhpa amu a lam, ngai tsun hkrup se ai. ⁴ Madat mara u law, ngai ga tsun na nngai; ngai san de ga, ngai hpe sharin ya e. ⁵ Ngai gaw na a lam na hte na yu ni ai; ya chyawm gaw, nye myi hte nan nang hpe mu sade ai. ⁶ Dai re ai majaw, nye hkum dai hpe ngai matsat kau nna, ga nhpu hte wan dap hta myit nem nga nngai law, nga ai. ⁷ Ya Yehowa gaw ndai ga Yoba hpe tsun ngut jang, shi gaw Teman masha Elihpa hpe, nang hte na a manang lahkawng gaw nye shangun ma Yoba zawn nye a lam htaphtuk ai ga n tsun ai majaw, ngai nanhte hpe pawt bu nngai. ⁸ Dai rai nna, nanhte gaw usu sanit, sagu la sanit, lata la nhtawm, nye a shangun ma Yoba hpang de sa nna, nanhte a matu wan nat hkungga nawng ya mu; shingrai nye shangun ma Yoba gaw nanhte matu mara tawngban na ra ai; nanhte angawk ai myit hte maren ngai nanhte hpe ari n jaw n ga, shi a myiman hpe ngai tau ya na nngai; kaning rai nme law, nanhte gaw nye a shangun ma Yoba zawn, nye a lam htaphtuk ai ga n tsun myit dai, ngu nna tsun wu ai. ⁹ Shingrai, Teman masha Elihpa, Shuhi masha Bilda hte Nama masha Zohpa sa du nna, Yehowa shanhte hpe hkangda ai hte maren galaw mu ai: Yehowa mung, Yoba a myiman hpe tau ya wu ai. ¹⁰ Ya Yoba gaw shi a manang ni a matu tawngban nga yang, Yehowa gaw Yoba hpe shi a bawngdung ai kaw na shalawt dat wu ai hta n-ga, shi shawng e lu malu mahkra hta htam lahkawng shagup ya wu ai. ¹¹ Shaloi shi a kahpu kanau ni, shi a kajan ni hte shi a shawng na jinghku jing-yu ni yawng, shi hpe sa hpu yu nna, shi a nta nhku e shi hte rau shat sha ma ai: shanhte gaw shi a lam yu machyi nna, Yehowa shi hpe hkrum shangun ai tsin-yam tsindam mahkra a gawp e shi hpe shangwi shapyaw ya mu ai: langai hte langai ja denga langai ngai, ja shingwang langai ngai shi hpe sakjaw mu ai. ¹² Shingrai Yehowa gaw Yoba hpe hpang jahtum e, moi shawng na hta grau nna shaman ya wu ai; shi gaw sagu bainam mun mi hkying mali, gawla-uk hkying kru, utang gap hkying mi hte lawze yi hkying mi lu la wu ai. ¹³ Bai shi gaw shadang sha sanit hte shayi sha masum shaprat wu ai. ¹⁴ Shawng shangai ai shayi sha amying gaw Yemima, hpang na gaw Kesia, masum ngu na gaw Karen-hapuk mying lu ai. ¹⁵ Yoba a shayi sha ni zawn hpraw tsawm ai numsha, dai mung ting hta e n mu lu ai: kawa mung kahpu kanau ni hte rau shanhte hpe sali wunli karan jaw mu ai. ¹⁶ Ya dai amu byin ai hpang, Yoba gaw latsa e mali shi ning naw hkrung nga ai rai nna shi a aru arat ni, prat mali du hkra mu nga lu ai. ¹⁷ Dai hpang Yoba gaw dingla ugut gu nna, si wa sai.