YEREMIA

YEREMIA

¹ - ³ Yuda hkawhkam, Amon a kasha, Yoshia hkaw dung ai shi masum ning hta e mung; bai Yuda hkawhkam, Yoshia kasha, Yohoiakim a lakhtak e mung, Yuda hkawhkam Yoshia kasha Zedekia hkaw ding ai shi langai ning ladu hkrum ai, shata manga ngu na hta, Yerusalem masha ni hpe bawng rim mat wa ai du hkra, Yehowa a mungga hkapla ai, Benyamin mung na, Anahtot mare e nga ai hkinjawng ni hta na, Hilkia kasha Yeremia mungga gaw, da ndai rai nga ai. ⁴ - ⁵ Ya Yehowa a mungga ngai kaw du nna, Ngai nang hpe nnu a hkritung e garai n shachyaw yang pyi, ngai nang hpe chye nngai; nang garai n shangai yang pyi, ngai nang hpe shachyoi shapra nngai: masha amyu ni a myihtoi tai na, ngai nang hpe aya dang da ni ai, nga ai. ⁶ Dai rai nna ngai gaw, Aka, Madu Yehowa e, ngai ga n chye tsun nngai: ma naw rai nga nngai, ngu we ai. ⁷ Yehowa chyawm gaw, Ngai ma naw rai nga nngai, nga nna hkum tsun et; kadai hpang de mung ngai nang hpe shangun yang, nang sa na ndai; ngai nang hpe htet da mada nang tsun na ndai. ⁸ Shanhte hpe hkum hkrit et; nang hpe mawai la na matu, ngai nang hte rau rai nga nngai, nga ai. ⁹ Bai Yehowa gaw shi a lata ladawn nna, nye a n-gup hpe ahtawk let, Yu u, na a n-gup hta nye mungga hpe ngai bang da se ai: ¹⁰ matsing u, baw kau na hte run kau na matu mung, jahten shabyak na hte galau kau na matu mung, gaw da na hte gat hkai na matu mung, amyu baw ni hte hkawhkam mungdan ni a ntsa e, dai ni jang, ngai nang hpe san da ni ai, nga ai. ¹¹ Bai, Yehowa a mungga gaw ngai kaw du nna, Yeremia e, nang hpa mu n ta? nga nna san yang, ngai gaw, Jau jau pu ai hpun lakung hpe mu nngai, ngu we ai. ¹² Shaloi Yehowa gaw, Nang mu ai lam teng nga ai; kaning rai nme law, nye ga hpe shadik na matu, ngai mung jau jau e sin nga na nngai, nga ai. ¹³ - ¹⁴ Bai Yehowa a mungga gaw, lahkawng lang ngu na, ngai kaw du nna, Nang hpa mu n ta? nga nna san yang, ngai gaw, Dingdung maga de na pru ai prut kabrawng ai di bu hpe mu nngai, ngu we yang, Yehowa gaw, Dingdung maga de na ari ahpri, ndai mung masha ni mahkra ntsa de pru na ra ai. ¹⁵ Kaning rai nme law, Dingdung mungdan de na amyu baw ni mahkra hpe ngai shaga nna, shanhte sa du nhtawm, langai hte langai, Yerusalem mare chyinghka lam hkan e mung, bunghku grupyin hkan e mung, Yuda mare ni mahkra hta e mung, tinang a tingnyang ni hpe tawn da na mara ai. ¹⁶ Mung masha ni gaw ngai hpe kau da ai hte, hpara kaga hpe lawban natnawng nna, tinang a lata hte galaw ai rai hpe nawku ai mara mahkra a majaw, ngai shanhte hpe dawdan nna ari jaw na mawe ai. ¹⁷ Dai re ai majaw nang gaw, shingkyit kyit nna rawt u; ngai nang hpe hkangda mada, shanhte hpe tsun dan mu: shanhte a man e ngai nang hpe n jahkrit shama kau u ga, shanhte hpe hkum hkrit et. ¹⁸ Yu u, mungdan ting a man e mung, Yuda hkawhkam ni a man e mung, de a du salang ni a man e mung, de a hkinjawng ni a man e mung, mung masha ni a man e mung, ngai nang hpe dai ni jang, bunghku kum ai mare, hpri shadaw hte magri shakum a malai shatai na de ai. ¹⁹ Shanhte nang hpe hkap gasat timung, dang kau lu na n rai; nang hpe mawai la na matu, ngai nang hte rau rai nga nngai, nga nna Yehowa tsun ai.

¹ Bai Yehowa a mungga ngai kaw du nna, Yerusalem mare hpe ning ngu jahtau tsun u: ² Yehowa ning nga ai; Na a ram prat e hkamla ai chyeju hpe mung, nang mahtan da ai tsawra myit hpe mung, nli n mai gat ai hkunhkraw ai shara hta e, nang ngai kaw hkannang nga ai hpe mung, ngai dum nngai. ³ Dai shaloi e Israela gaw Yehowa a matu chyoi pra nga ai hte, shawng si ai nsi naisi rai nga ai; shi hpe map sha maw sha ai ni yawng mara kap nga ma ai; shanhte a ntsa e shoihpa shoirang du na ra ai, nga nna Yehowa tsun ai. ⁴ Yaku a dap hte, Israela dap na htinggaw yawng hte e, Yehowa a ga madat mu: ⁵ Yehowa ning nga ai, Nanhte a nji nwa ni gaw, ngai hte tsan wa nna, be be kaman lam hkan let, be be kaman tai wa hkra, ngai hta kaning re mara mu hkrup ma ta? ⁶ Shanhte gaw, Egutu mung na anhte hpe woi wa nna, nam mali hku, zaibru jang hte nhkun sawng ai mung, hkunhkraw ai hte si du a shingnip ka-up ai mung, kadai n lai yu ai hte masha kata ai mung hku woi ga wa ai Yehowa gaw kanang rai nga a ta? nga nna n san ma ai. ⁷ Ngamu ngamai ai mung a nsi naisi hte, sau hpum ai hpe sha na matu, ngai nanhte hpe woi shashawn nna, nanhte shang myit yang nanhte gaw nye a mungdan hpe awu asin di kau nna, nye a sali wunli ga hpe matsat shabat ga shatai kau manu ai. ⁸ Hkinjawng ni gaw, Yehowa kanang rai nga a ta? nga nna n san ma ai; tara agyi ni ngai hpe n chye ma ai; agyi salang ni gaw ngai hpe shut hpyit ma ai; myihtoi ni gaw Bala hpe hpa let htoi nna, akyu n rawng ai lam hkannang ma ai. ⁹ Dai re ai majaw ngai nanhte hte naw dangrang hkat na nngai; nanhte a kashu kasha ni hte mung dangrang hkat na nngai; nga nna Yehowa tsun ai. ¹⁰ Kitim zunlawng ni de rap nna mada yu mu; Kedara de shangun nna atsawm sha gawn yu mu: dai zawn re ai amu byin yu sai kun, sumru yu u. ¹¹ Masha amyu mi gaw tinang a hpara ni hpe, hpa n re hpara ni hte galai ma ai kun? nye a amyu masha ni chyawm gaw, akyu n rawng ai baw hte, tinang a arawng sadang hpe galai kau ma hka. ¹² Sumsing lamu ni e, dai lam majaw mau mat nna, ja ja hkrit gari let katsi katsang rai nga mu, nga nna Yehowa tsun ai. ¹³ Kaning rai nme law, nye a amyu gaw lam lahkawng hta shut masai: shanhte gaw, asak hka hpawk ngu ai, ngai hpe kau da nna, hka n rawng lu ai ntsin htung, gaja wa, ga mat ai ntsin htung, tawk manu ai. ¹⁴ Israela gaw mayam rai ni? mayam kasha rai ni? hpa majaw kashun kashe hkrum nga a ta? ¹⁵ Hkanghkyi hkalung ni shi hpe shabam nna nying nga ma ai; shanhte gaw shi a mungdan hpe shaza kau manu ai: shi a mare ni, kadai n nga lu hkra hkru mat sai. ¹⁶ Nopa hte Tahpan a kashu kasha ni mung, na a baw pungding hpe shakrin kau manu ai. ¹⁷ Nang hpe woi wa ai, na a Karai Kasang Yehowa hpe kau da ndai majaw, nang nan shingre ai ari hkrum nga ndai, n rai ni? ¹⁸ Ya chyawm, nang gaw Sihora hka lu na matu, Egutu lam de hpa majaw sa n ta? Uhprat hka lu na matu, Asuri lam de hpa majaw sa n ta? ¹⁹ Na a shut hpyit ai gaw nang hpe sharin na ra ai; na a htak mat ai lam, nang hpe shari na ra ai: dai rai nna, na a Karai Kasang Yehowa hpe, nang kau da ai hte, shi hpe hkrit hkungga ai myit nang hta n rawng ai gaw, yak la ai hte yawn hpa lam rai nga ai hpe, dum nna chye nga u, nga nna Zaw nawng zaw wa up ai Madu Yehowa tsun nga ai. ²⁰ Nang mahtang moi kaw nna na a kandang hpe daw kau nna, nang hpe gyit ai sumri gang dut kau nhtawm, Ngai gaw mayam amu n galaw na nngai, nga nna tsun ndai: kaning rai nme law, tsaw ai kawng shagu a ntsa e mung, tsit lali ai hpun shagu a npu e mung, nang gum nna shawa num tai nga ndai. ²¹ Raitimung, kaja htum ai tsabyi ru jet, tengman ai nli ngu ai nang hpe ngai hkai da ni ai: dai rai yang, nang nye a man e ru chyalam a lakung lakying zawn, kaning rai tai wa n ta? ²² Nang gaw shau hte shin nna, sabya law law lang timung, na a mara gaw nye a man e dandawng nga ai, nga nna Madu Yehowa tsun ai. ²³ Ngai gaw awu asin n re ai hte, Bala hpara ni hpang de n hkan nngai, nga nna nang kaning rai tsun lu n ta? kadit e nang lai ai lam hpe yu u; nang galaw ai amu hpe dum u: ²⁴ nang gaw gat chyang nna nwan hkawm ai gawla-uk yi rai nga ndai; nam mali e shanu nga nna tinang gasit ai myit hte nbung hpe marawp ai lawze yi nhprang rai nga ndai: ra kayut yang, kadai hkum da lu a ta? shi hpe hkan tam ai ni yawng, hki ba na n rai; shi a aten du yang shi hpe mu na ra ai. ²⁵ Na a kyepdin hkum jahtum et; na a mayu hkun hkra hkum rai et; ngu yang, nang mahtang, Myit mada shara n nga ni ai; gaja wa n nga ni ai: ngai gaw tsasam masha ni hpe tsawra nna, shanhte hpang de hkannang na nngai, nga nna htan ndai. ²⁶ Rim la hkrum ai lagu lagut wa kaya hkrum ai zawn, Israela hkawhkam ni, du salang ni, hkinjawng ni, myihtoi ni hte hpawn, amyu masha ni kaya kahpa hkrum ma ai: ²⁷ shanhte gaw hpun tawng hpe, Nang gaw nye a kawa, nlung hpe, Nang ngai hpe shaprat ni ai, nga nna tsun let, shanhte a myiman n rai, ngai hpe shingdu dat kau ma timung, ruyak hkrum yang, Rawt u, anhte hpe hkyehkrang la mi, nga nna hpyi na ma ai. ²⁸ Ataw, tinang a matu nang galaw ai hpara ni, kanang rai nga ma ta? nang ruyak hkrum ai aten e, shanhte rai lu yang, rawt nna, nang hpe hkyehkrang la mu ga: kaning rai nme law, Yuda mung e, na a mare ni law nga ma ai hte maren, na a hpara ni mung law nga ma ai lè. ²⁹ Yehowa ning nga ai: Nanhte hpa majaw ngai hte dangrang hkat nga myit ta? nanhte yawng ngai hpe shut hpyit nga myit dai. ³⁰ Ngai gaw be be kaman sha nanhte a kashu kasha ni hpe ari jaw ni ai: shanhte gaw sharin achyin ai n hkamla ma ai; nanhte a nhtu gaw, amya sha ai hkanghkyi zawn, nanhte a myihtoi ni hpe shaza kau manu ai. ³¹ Amyu masha ni e, Yehowa a ga hpe sumru yu mu: ngai gaw Israela amyu a matu nam mali, shing n rai, nsin htat ai mungdan tai yu ni ni? nye a amyu masha ni gaw, Anhte prang mat saga ai; nang hpang de bai wa na n rai, nga nna hpa majaw tsun nga ma ta? ³² Mahkawn gaw, tinang mawn sumli ai gali lakai hpe, num ningnan gaw tinang a shingkyit hpe, malap kau lu a ni? nye a amyu masha ni chyawm gaw, n dang hti hkra law ai nhtoi tup, ngai hpe malap mali kau ma ni ai. ³³ Sumtsaw sumra tam na matu, na a lam hpe gade lajang nga n hka! Dai rai nna nang gaw n hkru ai num ni hpe pyi, na a lam sharin ya manu ai. ³⁴ Dai hta kaga, mara n kap ai matsan mayan ni a asai, na a hpun palawng hta kap nga ai hpe mu hkrup sai; shanhte gaw kashun kashe amu n galaw ma ai: raitimung dai zawn re ai ni mahkra hpe nang sat kau ndai. ³⁵ Shingre ai mara lu timung, Ngai mara n kap nngai; gaja wa Karai Kasang a pawt sindawng ai, ngai kaw na lai mat wa sai; nga nna nang tsun ndai. Yu u, Ngai yubak n galaw nngai, nga nna tsun ndai majaw, ngai nang hpe tara dara na de ai. ³⁶ Na a lam hpe galai na, hpa majaw jawp nga n ta? Nang gaw Asuri mung hpe kaya ai zawn, Egutu mung hpe mung, kaya na rin dai. ³⁷ Nang gaw, na a baw ntsa e lata mara let, dai mung na pru wa lu na ndai: kaning rai nme law, nang shamyet shanat ai ni hpe, Yehowa yeng kau wu ai rai nna, nang shanhte hte rau awng wa lu na n rai.

¹ Masha langai ngai, madu jan hpe kabai kau nna, num dai pru nhtawm, kaga wa hte nga sha ai hpang, shawng na madu wa gaw, dai num hpe bai kahkyin la mai a ni? shingrai galaw ai mungdan gaw, awu asin rai nga ai, n rai ni? nga nna masha ni tsun ninglen, nang gaw sumtsaw sumra law law hte mazum timung, ngai hpang de bai wa rit law, nga nna Yehowa tsun ai. ² Krin ai kawng ni hpe mada yu u; nang la hte n kanawn ai shara langai ngai, nga a ni? zaibru jang na Arabi masha zawn, lam makau e dung nga let, nang shanhte hpe hkap lau nna, na a shawa num a amu hte, n san n seng ai amu majaw, mung ting awu asin rai nga ai. ³ Dai re ai majaw lanam n shang ai hte, hpang shadoi na marang mung, n htu hkraw ai; nang chyawm gaw shawa num a lahtan htan nna, man htat mat nitdai. ⁴ Ya kaw nna nang gaw, Nye wa e, brang ram prat na nye a manang rai nga nitdai, nga nna n tsun na n ni? ⁵ Shi gaw tutnawng pawt nga na a ni? prat htum hkra yubak matsing da na a ni? nang tsun ninglen, yubak galaw lu ai daram, galaw nga n hka. ⁶ Bai, hkawhkam Yoshia lakhtak e, Yehowa ngai hpe ning nga ai: Htak mat sai Israela amyu hpe nang mu nu ni? shi gaw, tsaw ai bum shagu a ntsa e mung, tsit lali ai hpun shagu a npu e mung, shawa num tai wa sai. ⁷ Ndai amu mahkra hpe shi galaw ai hpang, shi ngai hpang de nhtang wa na ra ai, nga nna ngai tsun timung, shi n wa hkraw ai: myit magaw ai, shi a kana Yuda gaw, dai amu hpe mu nga ai. ⁸ Htak mat sai Israela gaw, la shaw ai hte shut ai amu galaw ai majaw ngai shi hpe kau da nna, jahka ai laika jaw timung, myit magaw ai, shi a kana Yuda gaw, n hkrit ai sha sa nna, shi mung shawa num tai nga ai hpe, ngai mu nngai. ⁹ Shingrai, shi ladu lai ai shawa num amu hte mungdan hpe awu asin di kau nna, nlung hte mung, hpun tawng hte mung, shut hpyit nga ai. ¹⁰ Dai daram yubak law nga timung, myit magaw ai, shi a kana Yuda gaw, myit masin mahkra hte n rai, sawt ai hte sha, ngai hpang de wa ai, nga nna Yehowa tsun ai. ¹¹ Bai Yehowa ngai hpe ning nga ai, Htak mat sai Israela gaw, myit magaw ai Yuda hta, grau nna dinghpring nga ai. ¹² Sa su, dingdung maga de myiman yawng let, ndai ga jahtau tsun u: Htak mat ai Israela e, bai wa rit, nga nna Yehowa tsun ai; ngai nanhte hpe masin pawt na n rai; ngai myit galu nga nngai; tutnawng pawt nga na n rai, nga nna Yehowa tsun ai. ¹³ Nang gaw shut hpyit nna, na a Karai Kasang Yehowa a tara tawt lai ai hte, tsit lali ai hpun shagu npu e, tsasam masha ni hte kahkrang hkawm nna, nye a nsen n madat ai hpe, yin la u, nga nna Yehowa tsun ai. ¹⁴ Htak mat ai ma ni e, bai wa marit, nga nna Yehowa tsun ai: ngai gaw nanhte a madu nan rai nga nngai; ngai gaw mare mi hta na langai mi, htinggaw mi hta na lahkawng, lata la nna, Ziun mare de woi wa na nngai. ¹⁵ Bai ngai gaw, ngai tsawra ai hpung up ni hpe dang da nna, shanhte gaw chye chyang ai nyan hpaji hte nanhte hpe woi up na mara ai. ¹⁶ Dai aten e nanhte mayat maya wa nna, mungdan hta law htam wa yang, nanhte gaw, Yehowa a ga shaka sumpu, nga nna tsun na n rai; kadai mung dai hpe dum na n rai; kadai mung dai hpe matsing na n rai; dai hpe lahpawt dum na n rai; dai hpe mung bai galaw na n rai, nga nna Yehowa tsun ai. ¹⁷ Dai aten e shanhte gaw Yerusalem mare hpe, Yehowa a tingnyang, ngu nna shamying na maru ai: amyu baw ni yawng, Yehowa amying hpe hpa let, Yerusalem mare de zuphpawng na mara ai; shanhte gaw htawmhpang de tinang a myit masin a je hpre ai hta hkawm na n rai. ¹⁸ Dai aten e Yuda dap na ni gaw, Israela dap na ni hte rau hkawm na mara ai rai nna, shanhte gaw dingdung maga na mungdan kaw nna rau pru wa nhtawm, nanhte a nji nwa ni hpe ngai jaw ai sali wunli ga de du na mara ai. ¹⁹ Raitimung ngai gaw, Nang hpe kasha ni hta kaning di yin la nna, ngamu ngamai ai mungdan, maigan amyu baw ni a kaja htum ai sali wunli ga, nang hpe kaning di jaw na rai ta? ngu nna san yang, Nang gaw ngai hpe, Nye Wa, nga na rin dai; ngai kaw na mung, yit mat wa lu na n rai, nga nna ngai htan nngai. ²⁰ Israela dap e, madu jan gaw madu wa hta sadi n dung ai hte maren, gaja wa nanhte gaw ngai hta sadi n dung myit dai, nga nna Yehowa tsun ai. ²¹ Israela kashu kasha ni gaw, Krin ai kawng ni a ntsa e hkrapngu hkrapngoi nna, tawng ban ai nsen hpe, ngai na ni ai: kaning rai nme law, shanhte gaw lam yit nna, tinang a Karai Kasang Yehowa hpe, malap mali kau masai. ²² Htak mat ai ma ni e, bai wa marit; nanhte a htak mat ai hpe ngai shamai shatsai na nngai. Yu u, anhte nang hpang de wa ga ai; nang gaw anhte a Karai Kasang Yehowa rai nga ndai. ²³ Gaja wa, kawng ni hte bum ni a wu ngoi ai gaw, kaman lila rai nga ai: gaja wa, anhte a Karai Kasang Yehowa gaw, Israela amyu hpe hkyehkrang la ai lam rai nga ai. ²⁴ Dai kaya kahpa lam chyawm gaw, anhte a ram prat kaw nna, ji wa ni a sutgan ngu ai, sagu dumsu hpung ni hte shayi shadang sha ni hpe shamyit kau nu ai. ²⁵ Anhte gaw kaya la let kaleng taw nna, anhte a mak mat ai gaw, anhte hpe ka-up u ga; kaning rai nme law anhte gaw, ram prat kaw nna dai ni du hkra, ji wa ni hte rau, anhte a Karai Kasang hpe yubak galaw saga ai: anhte gaw, anhte a Karai Kasang Yehowa a nsen hpe n madat ga ai, nga ma ai.

¹ Israela amyu e, nang bai wa mayu yang, gaja wa ngai hpang de bai wa nna, na a matsat shabat amu, ngai kaw na htawm kau ai rai yang gaw, nang hpe kadai sa shamawt lu na n rai; ² dai hta kaga nang gaw, hkrung nga ai Yehowa amying gang let, tengman ai hku, tara ding ai hku, dinghpring ai hku dagam lu nna, maigan amyu ni gaw, shi a amying hta tinang hkum hpe shaman ya nna, shi hta hpa let gumrawng na mara ai, nga nna Yehowa tsun ai. ³ Kaning rai nme law, Yehowa gaw Yuda hte Yerusalem masha ni hpe ning nga ai: Nanhte jahkam tawn ai hkauna ni hpe bai galau mu; ju hpun hta nli hkum gat myit. ⁴ Yuda hte Yerusalem masha ni e, Yehowa matu mara tinang dai matu gadoi hkam mu; nanhte a myit masin a hpyi magap hpe hkoi kau mu; shing n rai, nanhte a n hkru n hkra ai amu majaw, nye a pawt sindawng ai gaw wan zawn pru nna, kadai n sat lu hkra hkru na ra ai. ⁵ “Mungdan hta e pahtau dum mu; jahtau garu nna, zuphpawng mu; bunghku kum ai mare ni de anhte lung ga,” nga nna tsun ai ga hpe, Yuda mung hta e shana ya mu, Yerusalem mare hta shabra dat mu. ⁶ Ziun bum tawtap e dawnghkawn sharawt mu; hprawng mu, hkum hkring myit; kaning rai nme law, ngai gaw dingdung maga de na ruyak ai hte, grai kaba ai hten byak ai hpe, shapraw na nngai, ⁷ Amyu baw ni hpe jahten shabyak na, hkanghkyi ngu ai wa gaw, tinang a wuyup na lung wa sai; shi gaw du magang ra ai; na a mungdan hpe katsi katsang shatai na hte, na a mare ni hpe kadai n nga lu hkra marawng marang di kau na matu, shi gaw tinang shara kaw na pru wa sai. ⁸ Dai majaw, lachyit nba buhpun let, hkrapngu hkrapngoi, sharung shayawt nga mu: kaning rai nme law, Yehowa a pawt kahtet ai gaw anhte kaw na garai n dawm la nga ai. ⁹ Dai shani e, hkawhkam ni hte du salang ni gaw, myit htum mat na mara ai; hkinjawng ni gaw mak mat nna, myihtoi ni gaw mau mat na mara ai, nga nna Yehowa tsun ai. ¹⁰ Ngai chyawm gaw, Madu Yehowa e, ntawng nhtu gaw lareng hkra hkra shang timung, Nanhte ngwi pyaw nga na myit dai, nga nna ndai amyu masha ni hte Yerusalem na ni hpe tsun ndai majaw, nang shanhte hpe grai hkalau kau manu hka, nga nna tsun nngai. ¹¹ Dai aten hta e, ndai amyu masha ni hte Yerusalem mare na ni hpe lakap nna tsun ai gaw: Zaibru jang na krin ai kawng ni kaw nna, nye amyu shayi sha hpang de, kahtet ai nbung bung wa na ra ai; dai gaw nbun shapoi na hte sanseng na matu wa ai nbung n rai: ¹² nye myit shadik na matu, dai kawng ni hta na, ja dik ai nbung bung wa na ra ai; ya pyi ngai nan shanhte hpe jeyang na nngai. ¹³ Yu u, sa wa ai hkawhkam gaw sumwi zawn du na ra ai; shi a leng ni gaw, bungsha zawn rai nga ai; shi a gumra ni gaw, langda hta grau laram nga ma ai; anhte gaw dingnye lu ga ai: hten byak ai hkrum saga ai. ¹⁴ Yerusalem e, nang hkyehkrang la ai hkrum lu hkra, na a kraw lawang na n hkru n hkra ai hpe kashin kau u: na a n shawp ai myit mang gaw, gaten du hkra nang hta shanu nga na rai ta? ¹⁵ Dan mung na ga shana ai nsen na lu ai; Ehprim bum ga e ruyak ai shi bra nga ai: ¹⁶ amyu baw ni hpe shi shana ya mu: yu u, sin langa ni gaw sumtsan mung na sa nna, Yuda mare ni a hpang maga e garu nga ma ai, ngu nna Yerusalem hpe shana ya mu. ¹⁷ Yuda mung ngai hpe gumlau ai majaw, shanhte gaw hkauna sin ai ni zawn, dai mung hpe wang tawn da mu ai. ¹⁸ Nang hkan nga ai lam hte arawn alai majaw, ndai nang hkrum sha nu ai: dai gaw na a n hkru n hkra ai lam rai nga ai: dai gaw hka jap ai hte myit masin hta chyung nga ai, nga nna Yehowa tsun ai. ¹⁹ Myit htum nngai law, myit htum nngai law! Nye a kraw lawang machyi nga ai law; nye a myit masin aru ara rai nga ai; ngai atsin sha nga lu ai n rai: nye a wenyi e, nang gaw pahtau dum ai hte hpyen htim garu ai hpe na lu n hka. ²⁰ Hten mat sai, hten mat sai, nga nna kajai gara ma ai; mung ting katsi katsang rai nga ai: nye a sum ni jahkring sha, nye a nba grang ni akajawng sha, hten mat sai. ²¹ Ngai gaw gaten du hkra, dawnghkawn hpe mu lu nna, pahtau ngoi ai nsen na lu na rai ta? ²² Gaja wa, nye a amyu masha ni myit n su ma ai; shanhte ngai hpe n chye ma ai; n shawp ai kasha tai nna, nyan n rawng ma ai; n kaja ai amu hta let nga ma ai; kaja ai amu n chye galaw ma ai. ²³ Ginding aga hpe ngai mada yu yang, dai gaw akrin ayang hte asan awan rai nga ai; sumsing lamu hpe mada yu yang, nhtoi n nga ai. ²⁴ Bum ni hpe ngai mada yu yang, dai ni gari kawa rai nga nna, kawng ni yawng, ashun awam nga ma ai. ²⁵ Ngai mada yu yang, yu u, masha n nga ai; ntsa malen u ni yawng, hkoi mat masai. ²⁶ Ngai mada yu yang, yu u, ngamu ngamai ai mung gaw, nam mali tai mat sai; de a mare ni yawng, Yehowa hte shi a pawt kahtet ai man e, marawng marang rai nga ai. ²⁷ Kaning rai nme law, Yehowa ning nga ai; Mung ting katsi katsang rai mat timung, ngai dai hpe htum hkra jahten na n rai. ²⁸ Shingrai lamu ga sharung shayawt nna, sumsing lamu chyang mat na ra ai: dai gaw nye a mungga rai nga ai; dai lam ngai myit shatawng da nna, myit malai nga ai, n rai; ngai dai n galaw ai, nga na n rai. ²⁹ Gumra jawn ai ni hte ndan lang ai ni a wu ngoi ai nsen majaw, mare masha ni yawng hprawng wa ma ai: shanhte gaw nam mali e makoi nna, lunghkrung ni a ntsa de lung wa ma ai: mare yawng hpe kau da nna, masha langai mi muk n hti nga ai. ³⁰ Nang mahtang, hten byak hkrum ai num e, nang kaning rai na n ta? Nang gaw hkyeng mang ai nba buhpun nna, aja arai mawn sumli ai hte, na a myiman kaprang hkra tsi chya timung, na a tsawm htap ai gaw kaman lila sha rai nga ai; na a sumtsaw sumra ni gaw nang hpe kau da nna, na a asak hpe tam nga ma ai. ³¹ Kaning rai nme law, shinggyim machyi ai num a nsen, kasha alat shaprat ai num madai ai nsen zawn, Ziun shayi sha ba galawp ai nsen hpe, ngai na nngai; shi gaw, Ngai hta dingnye nga ai law; masha sat ai ni a man e ngai myit htum nngai, nga nna lata lalam let shabam nga ai.

¹ Ngai gaw, Yerusalem mare hpe yubak shalawt dat lu hkra, dinghpring ai hku hkan nna, kangka lam tam ai wa langai ngai nga yang, dai wa hpe mu hkrup hkra, mare lam ni hte htingwan hkan e gat kahkrang hkawm nna sawk yu mu: ² Shanhte gaw, “Yehowa hkrung nga ai hte maren,” nga nna dagam timung, gaja wa masu let dagam ma ai. ³ Yehowa e, na a myi kangka lam hpe tau yu nga ai, n rai ni? Nang shanhte hpe kayat timung, shanhte hpa n nawn ma ai; shaza kau timung, sharin achyin ai n hkam hkraw ma ai: tinang a myiman hpe nlung hta grau shaja ma ai; shanhte bai wa na, n hkraw ma ai. ⁴ Dai rai ngai gaw, Gaja wa, ndai ni gaw matsan mayan ni hkrai rai nga ma ai; Yehowa a lam hpe mung, tinang a Karai Kasang a tara hpe mung n chye ma ai majaw, angawk angak rai nga ma ai: ⁵ Shingrai salang ni hpang de ngai sa tsun na nngai; shanhte gaw Yehowa a lam hpe mung, tinang a Karai Kasang a tara ding ai lam hpe mung chye na ma ai, nga nngai raitimung shanhte gaw myit langai sha hte kandang hpe daw kau nna, sumri ni hpe gang dut kau manu ai. ⁶ Dai re ai majaw, maling na hkanghkyi shanhte hpe sat kau na ra ai; shana e hkawm ai chyahkyawn, shanhte hpe kawa sha kau na ra ai; rawnggawk gaw shanhte a mare ni hpe sin nga nna, shinggan de pru ai ni yawng amya sha kau ai hkrum na mara ai; kaning rai nme law, shanhte a shut hpyit ai yubak law nga ai hte, shanhte grau nna htak mat wa ma ai. ⁷ Ngai na a yubak hpe kaning rai raw dat kau lu na rai ta? na a kashu kasha ni gaw ngai hpe kau da nna, hpa n re ai hpara ni hpe gang let dagam masai: ngai shanhte hpe jahkru shakat ngut yang, shanhte gaw numshaw lashaw amu galaw nna, shawa num a nta hta ju nga ma ai. ⁸ Shanhte gaw ushat hkru ai gumra zawn nwan hkawm nga ma ai: shanhte langai hte langai htingbu wa madu jan hpe masem nga ma ai. ⁹ Dai yubak hpe ngai n dawdan na rai ni? dai zawn re ai amyu hpe ngai matai n dawp na rai ni? nga nna Yehowa tsun ai. ¹⁰ De a bunghku ntsa e lung nna jahten shabyak mu; raitimung htum hkra hkum di mu: de a lakung ni hpe krum kau mu; dai ni Yehowa hte n seng nga ai. ¹¹ Israela dap raitimung, Yuda dap raitimung, ngai hpe myit magaw ai hku grai galaw ma ai, nga nna Yehowa tsun ai. ¹² Shanhte gaw Yehowa n nga ai; anhte a ntsa e tsin-yam tsindam du na n rai; nhtu mung, hku wa mung, hkrum na n rai: ¹³ myihtoi ni gaw nbung sha rai nga ma ai; shanhte hta mungga n rawng nga ai: shanhte tsun ai hte maren hkrum sha na mara ai, nga nna Yehowa hpe nyet kau let tsun nga ma ai. ¹⁴ Dai rai nna, Zaw nawng zaw wa up ai Karai Kasang Yehowa ning nga ai: Nanhte shing nga tsun ai majaw, yu u, nye a ga na a n-gup hta wan, ndai amyu masha ni hpe hpun, ngai shatai nna, dai gaw shanhte hpe hkru kau na ra ai. ¹⁵ Yehowa ning nga ai: Israela amyu e, nang hpe gasat na matu, sumtsan mung na amyu langai mi hpe ngai woi wa na nngai: dai gaw, n-gun atsam rawng ai amyu, moi chyaloi nhkoi na amyu, rai nga ai; dai amyu a ga hpe nang n chye, shanhte tsun ai hku, nang n chye na ndai. ¹⁶ Shanhte a pala ndum gaw hpaw nga ai lup rai nga ai; shanhte yawng share ninghkrin ni rai nga ma ai. ¹⁷ Na a shayi shadang sha ni sha ang ai nsi naisi hte muk hpe, shanhte sha kau na mara ai; na a sagu dumsu hpung ni hpe mung, na a tsabyi ru ni hte lakum hpun ni hpe mung, sha kau na mara ai; nang shingbyi nga ai bunghku kum ai mare ni hpe, shanhte gasat nna, shaza kau na mara ai. ¹⁸ Raitimung, ndai aten hta e nan, ngai nanhte hpe atsai awai jahtum kau na n rai, nga nna Yehowa tsun ai. ¹⁹ Shingrai, Anhte a Karai Kasang Yehowa gaw, hpa majaw ndai lam mahkra anhte hpe di kau a ta? nga nna, nanhte san myit yang, nang gaw, Nanhte ngai hpe kau da nna, nanhte a mungdan hta hpara tsasam ni hpe dawjau nga ai hte maren, nanhte n madu ai mungdan hta, nanhte gaw tsasam masha ni hpe dawjau na myit dai, nga nna shanhte hpe htawn tsun na ndai. ²⁰ Yaku a dap hta e, ndai ga shana mu, Yuda mung hta e, ndai shi shabra mu: ²¹ myi tu ninglen n mu, na tu ninglen n na ai, nyan kata ai, angawk angak re ai amyu e, ndai ga madat mu: Yehowa ning nga ai: ²² Nanhte ngai hpe n hkrit hkungga myit ni? Nammukdara hkaleng ni n lai lu hkra, zaibru hpe jarit shatai na, htani htana mungga tawn da ai, nye man e wa, n hkrit gari nga myit ni? dai hkaleng ni hta wa timung, dang lu ai n rai; wu dadu timung, lai lu ai n rai. ²³ Ndai amyu masha ni chyawm gaw, shut hpyit ai hte gumlau myit rawng nna, tutnawng gumle gumlau nga ma ai. ²⁴ Shanhte gaw, Marang htu shangun nna, marang nhpaw hte hpang shadoi marang, anhte hpe jaw ya nna, nmut ta aten anhte a matu san da ai, anhte a Karai Kasang Yehowa hpe, ya hkrit hkungga nga ga, nga nna tinang a myit masin hta n tsun ma ai. ²⁵ Nanhte a shut hpyit ai gaw ndai lam ni hpe shabai kau nna, nanhte a yubak gaw, nanhte a ngamu ngamai lam, pat kau manu ai. ²⁶ Kaning rai nme law, nye a amyu masha ni hta tara n lang ai ni hkran nga ma ai; shanhte gyam yu let, u hkam ai ni zawn gawp nga ma ai: masha hpe hkam na matu mahkam tawn da ma ai. ²⁷ U raw hta u ni hpring nga ai hte maren, shanhte a nta ni gaw hkalem hkalau ai hte hpring nga ai: dai re ai majaw shanhte kaba wa nna, sut su nga ma ai. ²⁸ Shanhte sau hpum nna, myiman kabrim wa ma ai; shanhte gaw n hkru ai hta ladu lai ma ai; jahkrai nmai ni ngamu ngamai na matu, shanhte a amu hpe tsun ya hkraw ma ai n rai; matsan mayan ni hpe mung, tara ding ai hku tara dara ya, hkraw ma ai n rai. ²⁹ Dai yubak hpe ngai n dawdan na rai ni? dai zawn re ai amyu hpe ngai matai n dawp na rai ni? nga nna Yehowa tsun ai. ³⁰ Mauhpa matsat shabat amu langai mi mungdan hta byin wa sai: ³¹ myihtoi ni masu ai ga htoi nna, hkinjawng ni dai lam hkan let, up nga ma ai; nye a amyu masha ni mung dai lam hpe ra ma ai; dai rai nna, hpang jahtum e nanhte hpa galaw na myit ta?

¹ Ben-yamin a kashu kasha ni e, Yerusalem mare na pru nna, lawt hkra hprawng mu; Tekoa kahtawng e pahtau dum mu; Bet-hahkerem e kumla sharawt mu: kaning rai nme law, ruyak ai hte jahten shabyak kaba, dingdung maga de na dawng pru nga ai. ² Ahpraw tsawm nna hkum hkalung ai Ziun shayi sha hpe ngai jahtum kau na nngai. ³ Sagu rem ni gaw tinang a sagu hpung ni hte shi hpang de sa nhtawm, shi a grupyin e tinang janghpang gap nna, langai hte langai tinang a udat shara hta shayaw na mara ai. ⁴ Shi hpe hpyen gasat na hkyen mu: rawt ga, jan pungding e lung ga; anhte dingnye lu ga ai; jan kadang sai, shana de na shingnip galu wa sai. ⁵ Rawt ga, shana e lung nna, shi a htingnu ni hpe shaza kau ga, nga ma ai. ⁶ Kaning rai nme law, Zaw nawng zaw wa up ai Yehowa ning nga ai: Hpun ni hpe kran kau mu; Yerusalem makau e kaduk htu mu; ndai mare gaw shari mai ai mare rai nga ai: de a kata de zingri zingrat ai hkrai rai nga ai. ⁷ Hka hpawk mahka e hka lwi pru ai zawn, dai mare gaw n hkru n hkra ai hpe shalawi dat nga ai; de a kata de kashun kashe hte jahten shabyak ai nsen na lu ai; machyi makaw hte hkala nba hpe ngai tutnawng mu nngai. ⁸ Yerusalem e, sharin achyin ai hkamla u: shing n rai, nye a myit masin nang hte tsan wa nna, nang hta kadai n shanu hkra, nang hpe marawng marang di kau na de ai. ⁹ Zaw nawng zaw wa up ai Yehowa ning nga ai: Tsabyi si nlim gut ai zawn, shanhte gaw ngam nga ai Israela masha ni hpe atsai awai gut kau na mara ai; tsabyi si di ai wa zawn, na a ka hta lata naw bang u. ¹⁰ Shanhte madat mara lu hkra, ngai kadai hpe ga tsun nna, sakse shatai na rai ta? yu u, shanhte a na matu gadoi n hkam ai na rai nna, n madat mara lu ma ai; Yehowa a mungga gaw shanhte a jahpoi shara rai nga ai; dai hta sharawng awng ma ai n rai. ¹¹ Dai re ai majaw, Yehowa a myit kahtet ai hte ngai hpring nga nngai; naw sharang nga lu ai n rai; mare lam e nga ai ma ni a ntsa e mung, zuphpawng nga ai shabrang ni a ntsa e mung, dai hpe ru dat u: madu wa hte madu jan mung, aprat kaba ai hte dingla u-gut gu ai ni mung, rim la ai hkrum na mara ai. ¹² Shanhte a nta ni hte hpawn, yi hkauna ni, madu jan ni gaw, tsasam masha ni a lata hta du na mara ai; kaning rai nme law, ngai gaw ndai mungdan masha ni a ntsa e, nye a lata hpe ladawn na nngai, nga nna Yehowa tsun ai. ¹³ Shanhte yawng, kaji htum ai wa kaw nna, kaba htum ai wa du hkra, lawhpa myit rawng ma ai; myihtoi wa kaw nna hkinjawng wa du hkra, langai hte langai, masu magaw lam hkan ma ai. ¹⁴ Ngwi pyaw n nga timung, Ngwi pyaw nga ai, ngwi pyaw nga ai, nga nna tsun let, shanhte gaw nye a amyu masha ni a nma hpe, loi mi sha shamai masu nga ma ai. ¹⁵ Shanhte gaw matsat shabat amu galaw nhtawm, kaya nga ma ni? gaja wa, n kaya nga ma ai, myiman mung n sum ma ai; dai rai nna shanhte gaw kataw ai ni hte rau, kataw na mara ai; ngai shanhte hpe kawan katsan yu ai aten e, shanhte jahkrat kau ai hkrum na mara ai, nga nna Yehowa tsun ai. ¹⁶ Yehowa ning nga ai: Lam mashe makau e tsap nna mada yu mu; myi na lam dingsa ni hpe tam let, Kaja ai lam gara mahtang rai ta? nga nna san let, dai hku hkan mu; shingrai yang, nanhte a myit masin ban sa na ra ai; raitimung, Anhte n hkan na ga ai, nga nna shanhte htan ma ai. ¹⁷ Bai, nanhte a ntsa e sin langa ni ngai tawn da nna, Pahtau dum ai nsen hpe madat mara mu, nga nna tsun yang, shanhte gaw, Anhte n madat na ga ai, nga nna htan ma ai. ¹⁸ Dai re ai majaw, Maigan amyu ni e, shanhte hta hpa byin na ra ai lam, na la mu; masha hpung ni e, chye na mu. ¹⁹ Ginding aga e, na la u: yu u, ndai amyu gaw nye a ga n madat ai hte, nye a tara hpe n hkan hkraw ai majaw, shanhte myit mang ai lam hte maren, ngai shanhte a ntsa e tsin-yam tsindam shapraw na nngai. ²⁰ Sheba mung na lawban hpe mung, sumtsan mung na maza hpun hpe mung, hpa majaw ngai hpang de la sa n ta? nanhte a wan nat hkungga hpe ngai n ra nngai, nanhte a shagu hkungga hpe ngai n sharawng nngai. ²¹ Dai re ai majaw Yehowa ning nga ai: ndai amyu masha ni a man e ahtu kataw shara ngai tawn da na nngai: kawa hte kasha ni rau ahtu kataw na mara ai: htingbu ni hte jinghku ni rau, hten byak hkrum na mara ai. ²² Yehowa ning nga ai: Yu u, masha amyu langai mi dingdung mung maga de na du ra ai; masha amyu kaba langai mi hpe, lamu ga htum ai de na, ngai jasu na nngai. ²³ Shanhte gaw ndan hte ri lang ma ai; gumshem ai amyu rai nna, matsan n chye dum ma ai; shanhte a nsen gaw, nammukdara zawn wu kadu nga ai; Ziun shayi sha e, nang hpe hpyen htim na matu, shanhte gaw gumra jawn let, langai hte langai hkyen nga ma ai. ²⁴ Dai shi anhte na lu saga ai; anhte a lata kya mat sai; shinggyim machyi ai num zawn, anhte tsin-yam tsindam hkrum ga ai. ²⁵ Yi hkauna de hkum sa myit, lam hkum hkawm myit: hpyen wa a nhtu hte shoihpa shoirang, shara magup rai nga ai. ²⁶ Nye a amyu shayi sha e, lachyit nba buhpun nna, wan dap hta galwi nga u: kasha shingtai si ai zawn, yawn nga nna aja awa sharung shayawt nga u: jahten shabyak ai wa gaw, anhte a ntsa e akajawng sha du na ra ai. ²⁷ Nang gaw, nye a amyu masha ni a arawn alai hpe chyam yu nna, chye wa lu hkra, dinglik yu ai wa hte hpyendap, ngai nang hpe shanhte a man e san da ni ai. ²⁸ Shanhte yawng, gumle gumlau hte shi htawn ai ni rai nga ma ai; magri hte hpri hkrai rai nga ma ai; nlang hte gaw maw sha map sha ai ni hkrai rai nga ma ai. ²⁹ Sumhting wut wut rai nga ai: achyu gaw wan hta byawng mat timung, naw jen na akyu n nga ai: n kaja ai ni hpe shaw kau lu ai, n rai. ³⁰ Yehowa shanhte hpe kau da ai majaw, kau da mai ai gumhpraw, ngu nna shanhte hpe shamying na ra ai.

¹ - ² Yehowa kaw na Yeremia hpang de du ai mungga gaw: Yehowa nta chyinghka lam e tsap let, ndai ga hpe hkaw dan nna, Yehowa hpe nawku na matu ndai chyinghka lam de shang ai, Yuda masha yawng hte e, Yehowa a ga madat mara mu, ngu u. ³ Israela Karai Kasang, Zaw nawng zaw wa up ai Yehowa ning nga ai: Nanhte a htunghking hte arawn alai hpe, galai kau mu: shaloi ngai nanhte hpe ndai shara hta nga shangun na nngai. ⁴ Ndai nta ni gaw Yehowa a nawku Htingnu, Yehowa a nawku Htingnu, Yehowa a nawku Htingnu rai nga ai, nga nna masu ga tsun ai ni hta hkum hpa nga myit. ⁵ - ⁷ Nanhte gaw teng teng gaja wa, nanhte a htunghking hte arawn alai hpe galai kau yang mung, kahtawng masha hte htingbu wa a lapran e tengman ai tara hkan let, jeyang ya yang mung; malet nhprang manam, jahkrai nmai hte gaida gaina ni hpe adip arip n di ai hte, ndai shara hta mara n kap ai sai n jahkaw kau nna, nanhte yubak hkrum hkra hpara tsasam ni hpang de n hkan hkawm yang mung, nanhte a nji wa ni hpe prat tup jaw lup, jaw da ai, ndai shara hte mungdan hta, ngai nanhte hpe shanu nga shangun na made ai. ⁸ Yu u, nanhte gaw akyu n rawng ai masu ga hta hpa nga myit dai. ⁹ - ¹⁰ Nanhte gaw masha rai lagu ai, masha sat ai, numshaw lashaw ai, n teng n man ai hku dagam ai, Bala man e manam pyaw ai baw natnawng nna, tinang n chye ai hpara hpang de hkannang let, nye amying mying ai ndai nta hta, nanhte nye a man e shang tsap let, ndai matsat shabat amu mahkra hpe galaw nhtawm, Anhte gaw hkyehkrang la ai hkrum saga ai, nga nna tsun lu na myit ni? ¹¹ Ndai nye a mying mying ai nta hpe, nanhte damya lungpu zawn nawn myit ni? Yu u, ndai amu hpe ngai hkum nan mu se ai, nga nna Yehowa tsun ai. ¹² Shawng ningnan e nye a amying shanu ai, Shilo shara de sa nna, nye a amyu Israela shut hpyit ai a majaw, dai nye a shara hpe ngai kaning di kau ai gaw, mada yu mu. ¹³ - ¹⁴ Ya, Yehowa ning nga ai, Nanhte gaw ndai amu mahkra hpe galaw ai majaw mung, ngai jau jau rawt nna, nanhte hpe shadum jahprang timung, nanhte n madat ai hte, ngai shaga yang, n htan hkraw ai majaw mung, Shilo shara hpe ngai di kau ai zawn, nanhte shamyet shanat ai, nye a mying mying ai nta hte, nanhte hpe mung, nji nwa ni hpe mung, jaw da ai shara hpe, ngai di kau na we ai. ¹⁵ Nanhte a kahpu kanau, Ehprim amyu masha yawng hpe, ngai shaden kau ai hte maren, nanhte hpe mung, nye a myiman na, ngai shaden kau na nngai. ¹⁶ Nang mung, ndai amyu masha ni a matu akyu hkum hpyi et; shanhte a matu mara hkum hpyi jahtau et; shanhte a matu ngai hpe hkum tawng ban et; ngai na a ga madat na n rai. ¹⁷ Yuda mare ni hte, Yerusalem mare lam ni hta, shanhte hpa galaw nga ma ai hpe, nang n mu n ni? ¹⁸ Ngai hpe pawt shangun hkra, shanhte gaw lamu hkawhkam jan a matu muk pa kabaw nna, hpara tsasam ni a man e dumhpung ru jaw na matu, ma kaji ni gaw hpun hta, kawa ni gaw wan wut, num ni gaw muk shadung gumchya nga ma ai. ¹⁹ Ngai hpe pawt shangun ai sha, rai kun? Tinang myiman hpe jasum na, tinang hkum hpe zingri ai, n rai nga a ni? nga nna Yehowa tsun ai. ²⁰ Dai re ai majaw, Madu Yehowa ning nga ai: Yu u, ndai shara ntsa e mung, masha hte yamnga ntsa e mung, pa ga na hpun ni hte yi hkauna nsi naisi a ntsa e mung, nye a pawt sindawng ai hte myit kahtet ai hpe ngai ru dat nna, dai gaw n hkip ai, hkru nga na ra ai. ²¹ Israela Karai Kasang, Zaw nawng zaw wa up ai Yehowa ning nga ai: Nanhte a wan nat hkungga ni hte mayu hkungga ni hpe, rau tawn da nna shan sha mu. ²² Kaning rai nme law, ngai gaw nanhte a nji nwa ni hpe Egutu mung na shapraw wa ai shani e, wan nat hkungga hte mayu hkungga lam, shanhte hpe ga tsun nna htet da ai n rai; ²³ - ²⁴ ngai shanhte hpe htet da ai lam chyawm gaw, Nye a ga madat mu; shingrai yang, ngai gaw nanhte a Karai Kasang, nanhte gaw nye a amyu tai na myit dai; nanhte ngamu ngamai hkrum lu hkra, ngai nanhte hpe htet da mada hkannang nga mu, nga nngai raitimung, shanhte gaw n madat ai hte na mung n na la ai sha, tinang a hpaji daw ai hte myit ja ai hku hkannang let, myiman n yawng ai, shingdu dat kau ma ai. ²⁵ - ²⁶ Nanhte a nji nwa ni gaw, Egutu mung na pru wa ai shani kaw nna dai ni du hkra, ngai gaw shani shagu jau jau rawt nna, nye a shangun ma myihtoi ni mahkra hpe, nanhte hpang de shangun dat dat raitimung, nanhte gaw nye a ga n madat, na mung n na la ai sha, tinang a du hpe shaja ai hte, nji nwa ni hta grau nna n hkru nga myit dai. ²⁷ Nang gaw ndai ga mahkra shanhte hpe tsun lu timung, shanhte nang hpe n madat na ma ai; nang shaga timung, shanhte n htan na ma ai. ²⁸ Dai rai nna nang gaw, Ndai amyu gaw tinang a Karai Kasang Yehowa a nsen hpe n madat ai hte, sharin achyin n hkamla ai amyu, kangka hpe jahten nna, tengman ai ga n chye tsun ai amyu rai nga ai, ngu nna shanhte hpe tsun u. ²⁹ Na a ga shaka kara hpe doi kabai kau u; krin ai kawng ni a ntsa e sharung shayawt hkawm u: kaning rai nme law, pawt sindawng hkrum ging ai amyu hpe, Yehowa kau da nna gangkau nu ai. ³⁰ Yehowa ning nga ai: Yuda kashu kasha ni gaw, nye a man e n hkru ai amu galaw masai; nye a amying mying ai nta hpe awu asin di na nga, matsat shabat re ai arai ni hpe, shashawn da manu ai. ³¹ Shanhte gaw Hinom kasha a kadit e, tsaw ai shara ngu ai Tohpet hpe gaw da nna, dai yang e tinang a shayi shadang sha ni hpe wan hte nawng kau manu ai; dai lam hpe ngai htet da ai n rai; gaja wa n ra nngai. ³² Dai re ai majaw, Yehowa ning nga ai: yu u, dai shara hpe Tohpet mung, Hinom kasha kadit mung, ngu na n rai: Masha sat ai kadit, ngu na aten du na ra ai; shanhte gaw, Tohpet shara hta man ai ga n nga hkra, mang lup kau na mara ai. ³³ Ndai amyu ni a moi mang ni gaw, ntsa malen u ni hte nam na matse labye ni a shat tai na ra ai; dai ni hpe kadai gawn kau ai n rai. ³⁴ Dai shaloi e ngai gaw, Yuda mare ni hte Yerusalem mare lam ni hta na, kabu gara ai nsen, mani pyaw ai nsen, la ningnan a nsen, num ningnan a nsen, jasim kau na nngai; kaning rai nme law, mung ting katsi katsang tai mat na ra ai, nga ai.

¹ - ² Yehowa ning nga ai: Dai aten e shanhte gaw Yuda hkawhkam ni a nrut nra, du salang ni a nrut nra, hkinjawng ni a nrut nra, myihtoi ni a nrut nra ni hte, Yerusalem masha ni a nrut nra ni hpe, tinang a lup ni hta na shapraw kau nhtawm, shanhte tsawra ai, dawjau ai, hkannang ai, hkan tam nna nawku ai ajan, shata hte lamu na zaw nawng zaw wa ni a man e lam da na mara ai. Dai nrut nra ni hpe sumpum da na mung n rai, lup kau na mung n rai, ga ntsa e namhpun tai na mara ai. ³ Ngai shaden kau dat ai shara ni hta e naw ngam nga ai, ndai n hkru ai amyu masha ni gaw, asak hkrung nga na hta sihkrung sihtan hpe lata la na mara ai, nga nna Zaw nawng zaw wa up ai Yehowa tsun nga ai. ⁴ Bai shanhte hpe ning ngu tsun u, Yehowa ning nga ai: Kataw ai wa gaw, bai n rawt na a ni? Lam yit mat wa ai wa gaw, n htang wa na a ni? ⁵ Dai rai yang, ndai amyu ngu ai, Yerusalem masha ni gaw, hpa majaw htani htana htak mat wa ma ta? shanhte gaw hkalem hkalau ai hta len nga ma ai; bai n htang wa hkraw ma ai. ⁶ Ngai atsawm sha madat yu yang, shanhte gaw malang ai ga n tsun ma ai; Ngai hpa galaw hkrup se ai I? nga nna tinang shut ai hpe dum let, kadai mung myit nem ai n rai; hpyen htim ai gumra zawn, langai hte langai tinang lam hta gat hkawm ma ai. ⁷ Gaja wa, ntsa malen na u kawp gaw, tinang a du hkra ladaw hpe chye nga ai; hkrudu, pilan hte mali tau ni gaw tinang bai wa na aten chye matsing ma ai: nye a amyu masha ni chyawm gaw, Yehowa a tara dara ai lam hpe n chye na ma ai. ⁸ Dai rai yang, Anhte hpaji lu ga ai; Yehowa a tara anhte hta rai nga ai, nga nna nanhte kaning rai tsun lu na myit ni? gaja wa chyare ni a masu ai kanyit gaw, masu ai lam shapraw nga ai. ⁹ Hpaji rawng ai ni kaya kahpa hkrum ma ai: mak mat nna, mahkam hta lu masai; yu u, shanhte gaw Yehowa mungga hpe gangkau manu ai: shanhte hta hpa baw hpaji rawng a ta? ¹⁰ Dai re ai majaw, shanhte a madu jan ni hpe tsasam masha ni a lata de ngai ap kau na nngai; shanhte a yi hkauna ni hpe masha kaga ni madu sha na mara ai: kaning rai nme law, kaji htum ai wa kaw nna kaba htum ai wa du hkra, yawng hte gaw lawhpa myit rawng ma ai: myihtoi wa kaw nna hkinjawng wa du hkra, langai hte langai masu magaw lam hkan ma ai. ¹¹ Ngwi pyaw n nga timung, Ngwi pyaw nga ai, ngwi pyaw nga ai, nga nna tsun let, shanhte gaw nye a amyu shayi sha a nma hpe loi mi sha shamai masu nga ma ai. ¹² Shanhte gaw matsat shabat amu galaw nhtawm, kaya nga ma ni? gaja wa, n kaya nga ma ai, myiman mung n sum ma ai; dai rai nna shanhte gaw kataw ai ni hte rau, kataw na mara ai; ngai shanhte hpe kawan katsan ai aten e, shanhte jahkrat kau ai hkrum na mara ai, nga nna Yehowa tsun ai. ¹³ Ngai shanhte hpe atsai awai shamyit kau na nngai; tsabyi ru hta tsabyi si si lu na n rai; lakum hpun hta lakum si si lu na n rai; alap mung nyip mat na ra ai; shanhte a ntsa e kabye lai ai ni hpe, ngai san da nngai, nga nna Yehowa tsun ai. ¹⁴ Anhte hpa majaw dung nga ga ta? zuphpawng ga; bunghku kum ai mare ni hta shang nna, atsin sha nga ga; anhte gaw Yehowa hpe shut kau ai majaw, anhte a Karai Kasang Yehowa gaw anhte hpe atsin sha nga shangun nna, gung hte kayau ai ntsin lu shangun mi ai. ¹⁵ Anhte ngwi pyaw lam myit mada timung, mai kaja ai n mu ga ai; gan ga ai aten hpe myit mada timung, mak mat ai hkrai hkrum ga hka! ¹⁶ Shi a gumra ni a ladi sharat ai hpe, Dan mung kaw nna na lu ai; shi a hpyen gumra ni shabam ai nsen majaw, mung ting gari kawa nga ai: dai ni shang nna, mungdan hte hpawn, dai hta rawng marawng hpe mung; mare hte hpawn, dai hta shanu nga ai ni hpe mung, sha kau manu ai. ¹⁷ Yu u, Mandan hte n bau shangap lu ai pu htum amyu, ngai nanhte hpang de shangun dat nna, dai ni gaw nanhte hpe kawa na mara ai, nga nna Yehowa tsun ai. ¹⁸ Ngai yawn bran hkra kaning di na law e; ngai gawng run la nngai. ¹⁹ Yu u, nye amyu shayi sha a shabam ai nsen hpe, sumtsan mung kaw nna ngai na nngai: Yehowa gaw Ziun mare hta n nga a ni? de a hkawhkam wa gaw, mare kata e n nga a ni? De a tawk la ai hpara sumla ni hte, sumtsan mung na kaman lila lam hkan let, hpa majaw ngai hpe pawt sindawng shangun ma ta? ²⁰ Nmut ta lai sai, nlum ta htum sai; anhte mahtang hkyehkrang la ai n hkrum saga ai. ²¹ Nye amyu shayi sha hkala nba hkrum ai majaw, ngai mung hkala nba hkrum nngai: ngai yawn nga ngai; mak mat ai hpe ngai hkrum nga nngai. ²² Gilead mung hta tsi mawan hpun naw n nga a ni? dai mung hta tsi sara n nga a ni? Dai rai yang, nye amyu shayi sha hpa majaw machyi kaw na n rawt lu a ta?

¹ Nye amyu shayi sha hte seng ai sat kau hkrum ai ni majaw, ngai gaw shani shana hkrapngu hkrapngoi nga lu hkra, nye a baw ntsin hkrai, nye a myi gaw myi prwi lwi ai hka hpawk, tai u ga law. ² Ngai gaw, nye a amyu hpe kau da nna pru mat wa lu hkra, nam mali hkan e jarawp lu n ga lè: shanhte yawng numshaw lashaw ai ni hte, myit magaw ai hpung rai nga ma ai. ³ Shanhte gaw masu ai ga tsun lu hkra, tinang shinglet hpe ndan zawn shachyen ma ai; dai mungdan hta shanhte galu kaba wa timung, kangka lam hta galu kaba wa ai, n rai; gaja wa, shanhte je je n hkru wa nna, ngai hpe n chye ma ai nga nna Yehowa tsun ai. ⁴ Langai hte langai tinang a htingbu wa hpe makran u ga; kahpu kanau wa hpe mung n kam u ga; kahpu kanau ni yawng hkalem hkalau sha ai hkrai rai nga ma ai; htingbu htingpyen ni gaw shi htawn hkawm ai ni rai nga ma ai. ⁵ Langai hte langai tinang htingbu wa hpe hkalem sha nna, tengman ai ga n tsun ma ai; shanhte gaw tinang a shinglet hpe masu ga sharin ya ma ai; n hkru n hkra ai amu galaw nna, tinang hkum hpe jahki shaba kau ma ai. ⁶ Na a shanu shara gaw hkalem hkalau ka-ang e rai nga ai; hkalem hkalau a majaw, shanhte ngai hpe n chye mayu ma ai, nga nna Yehowa tsun ai. ⁷ Dai rai nna, Zaw nawng zaw wa up ai Yehowa ning nga ai: Ngai shanhte hpe shabyawng nna, dinglik yu na nngai: shing n rai, nye amyu shayi sha hpe ngai kaning di na rai ta? ⁸ Shanhte a shinglet gaw sat kau chye ai pala rai nga ai; dai gaw hkalem hkalau tsun nga ai; htingbu shada ngwi pyaw ga tsun timung, kraw kata e shada gyam yu nga ai. ⁹ Dai yubak hpe ngai n dawdan na rai ni? dai zawn re amyu hpe ngai matai n dawp na rai ni? nga nna Yehowa tsun ai. ¹⁰ Bum ni a lam ngai hkrapngu hkrapngoi nna, shabam na nngai; nam mali na udat shara ni a lam, ngai sharung shayawt na nngai: kaning rai nme law, kadai n lai lu hkra, dai shara ni wan hkru mat sai; sagu dumsu hpung ni a nsen mung, kadai n na lu ai; ntsa malen u ni mung, yamnga ni mung, hprawng mat nna n nga masai. ¹¹ Ngai gaw Yerusalem mare hpe marawng marang hte, nam gwi ni shanu ai shara shatai na nngai; Yuda mare ni hpe masha shingran katsi ai shara shatai kau na nngai. ¹² Ndai lam chye na lu ai hpaji rawng ai wa, kadai wa rai ta? Yehowa a mungga hkamla nna, ndai lam tsun lu ai wa, kadai wa rai ta? kadai n lai lu hkra, mung ting nam mali zawn hkru mat nna hten mat ai gaw, hpa majaw rai ta? ¹³ - ¹⁵ Yehowa ning nga ai: Shanhte gaw nye a nsen n madat ai hte, ngai shanhte hpe jaw da ai tara kau da nna, dai hta n hkan hkawm ai sha, tinang a je hpre ai myit masin hte maren, kaji kawa ni shanhte hpe nawku shangun ai Bala hpara ni hpe dawjau ma ai majaw, Israela Karai Kasang Zaw nawng zaw wa up ai Yehowa ning nga ai: Yu u, ngai gaw ndai amyu masha ni hpe lashi pila sha shangun nna, gung hte kayau ai ntsin lu shangun na nngai: ¹⁶ Shanhte mung, shanhte a kaji kawa ni mung, n mu yu ai amyu ni a ka-ang e, ngai shanhte hpe shabra kau nna, atsai awai htum mat hkra, shanhte hpang de nhtu shangun dat na nngai. ¹⁷ Zaw nawng zaw wa up ai Yehowa ning nga ai: Sumru yu mu; sharung shayawt chye ai num ni hpe shaga mu; hpaji rawng ai num ni hpe shaga nna, shanhte sa maru ga: ¹⁸ anhte myi prwi pru nna, anhte a myi hpyi ntsin lwi hkra, shanhte lawan nna, anhte a matu mara hkrapngu hkrapngoi mu ga. ¹⁹ Kaning rai nme law, Anhte gade wa hten mat hkrum nga ga hka! Shanhte gaw anhte shanu nga ai shara ni hpe run kau ai majaw, anhte gaw tinang mungdan hpe kau da nna, grai wa mak mat saga ai, nga nna Ziun kaw na sharung shayawt ai nsen pru nga ai. ²⁰ Raitimung, num ni e, Yehowa a ga madat mu; shi a n-gup na pru ai ga na la mu: nanhte a shayi sha ni hpe, hkrapngu hkrapngoi ai lam, htingbu htingpyen ni hpe, sharung shayawt ai lam, sharin ya mu. ²¹ Kaning rai nme law, si du gaw anhte a hkuwawt hku lung nna, anhte a htingnu ni hta shang nhtawm, ma kaji ni hpe ndaw hkan, shabrang ni hpe mare htingwan hkan e shaza kau manu ai. ²² Tsun u, Yehowa ning nga ai: Masha si mang ni gaw, hkauna pa na namhpun hte, mam dan ai wa a hpang e, lahkawn ai wa n nga ai, hkauling zawn, taw nga na mara ai. ²³ Yehowa ning nga ai: Hpaji rawng ai wa gaw, tinang a hpaji hta hkum gumrawng u ga; n-gun rawng ai wa gaw tinang a n-gun hta hkum gumrawng u ga; sut su ai wa gaw tinang a sutgan hta hkum gumrawng u ga: ²⁴ gumrawng ai wa chyawm gaw, ga ntsa e n-gaw n wai ai myit, tara jeyang ai myit, dinghpring ai myit madun ai wa gaw, ngai Yehowa nan rai nga ai, nga nna nye a lam chye na lu ai hta she gumrawng nga u ga: dai lam hta ngai sharawng awng nga nngai, nga nna Yehowa tsun ai. ²⁵ Yu u, Yehowa ning nga ai: Matu gadoi hkam timung, gadoi n hkam ai hte maren, rai nga ai. ²⁶ Egutu, Yuda, Edom, Ammon, Moba amyu ni hte, tinang a na labying kara doi ai, zaibru jang na amyu ni mahkra hte hpe ari jaw na aten du na ra ai: kaning rai nme law, amyu ni yawng nye a man e matu gadoi n hkam ai ni rai nga nna, Israela dap na ni yawng, tinang a myit masin matu n gadoi ai amyu rai nga ma ai.

¹ Israela dap na ni e, Yehowa nanhte hpe tsun dan ai ga madat mara mu; ² Yehowa ning nga ai: Maigan amyu ni a lam hkum sharin la myit; shanhte hkrit kajawng ai, sumsing lamu na kumla ni hpe, nanhte hkum hkrit kajawng myit. ³ - ⁴ Maigan amyu ni a htunghking gaw kaman lila hkrai rai nga ai: shanhte gaw maling na hpun kran nna, lasama wa dai hpe nwa hte tawk ka ai hte, aja gumhpraw sup nhtawm, n shanu, shamawt hkra, sumdu hte hpri masen dit da mu ai. ⁵ Dai ni gaw maka ka ai maun hpun hte bung nna, n chye shaga ma ai: tinang hkrai n chye hkawm ai majaw, hpai hkawm ra ai. Dai ni hpe hkum hkrit myit; ruyak jahkrum lu ai n rai; kaja ai mung n chye galaw ma ai. ⁶ Yehowa e, nang hte bung ai wa kadai n nga ai; nang galu kaba nga ndai; na a mying nsang mung, hpung dagu hte galu kaba nga ai. ⁷ Amyu baw ni a hkawhkam wa e, nang hpe hkrit hkungga mai ai rai nna, nang hpe n hkrit hkungga na kadai wa rai ta? amyu baw ni a hpaji rawng ai ni mahkra hta mung, shanhte a daru magam rawng ai ni mahkra hta mung, nang hte bung ai wa n nga ai. ⁸ Shanhte yawng dusat myit rawng nna, mana bu ai ni rai nga ma ai; sumla ni a lam sharin ai gaw hpun a lam sharin ai sha rai nga ai. ⁹ Tawk chye ai wa hte janghkam wa a lata e galaw ai gumhpraw pa gaw Tarshi mare na, aja gaw Uhpaza shara na rai nga ai; buhpun na matu mut ai hte hkyeng mang ai sumpan rai nga ai: yawng hte gaw maka kumla pru ai wa a amu hkrai rai nga ai. ¹⁰ Yehowa chyawm gaw tengman ai Karai Kasang rai nga ai; shi gaw ahkrung nga ai Karai Kasang hte, htani htana hkawhkam rai nga ai; shi pawt sindawng yang, lamu ga gari kawa nga ai; shi myit kahtet ai hpe, amyu baw ni n hkam lu ma ai. ¹¹ Sumsing lamu hte ginding aga hpe n hpan da ai hpara ni gaw, sumsing lamu npu, gingding aga ntsa na hkoi mat na mara ai, ngu nna shanhte hpe sa tsun dan mu. ¹² Yehowa gaw shi a n-gun atsam hte ginding aga hpe hpan da nu ai; shi a hpaji byeng-ya hte mungkan ga hpe shagrin da nu ai; shi a nyan hte sumsing lamu hpe hpyen da nu ai: ¹³ shi nsen shangoi dat yang, sumsing lamu hta e hka hpung ni wu kadu nna, lamu ga htum ai kaw na salu rawt nga ai; marang htu ai hte rau myihprap gala nga ai; nbung hpe mung shi a sutdek na shapraw dat wu ai. ¹⁴ Masha yawng dusat myit rawng nna, nyan kata ma ai; janghkam ni yawng tinang tawk ka ai sumla majaw kaya kahpa hkrum ma ai: shi jaw ai sumla gaw masu magaw hkrai rai nga nna, shanhte hta nsoi nsa n rawng nga ai. ¹⁵ Dai ni gaw kaman lila rai nga ma ai; sawt ai ni hkrai rai nga ma ai; dawdan hkrum ai aten e shanhte hkoi mat na mara ai. ¹⁶ Yaku a kamhtaw chyawm gaw, dai hte n bung nga ai; Shi gaw yawng mayawng hpe hpan da ai wa rai nga ai; Israela gaw shi a sali wunli amyu rai nga ai; shi a amying gaw, Zaw nawng zaw wa up ai Yehowa rai nga ai. ¹⁷ Wang tawn hkrum ai wa e, na a arung arai hpe, mungdan hta na shinggyin la u: ¹⁸ kaning rai nme law, Yehowa ning nga ai: Ngai gaw ya e pyi mung masha ni hpe, ndai mungdan kaw na shaden shapraw kau nna, shanhte hpe machyi dum hkra zingri zingrat na nngai, nga ai. ¹⁹ Ngai hkrum ai hkala nba majaw, dingnye lu na nngai; nye a nma sawng la nga ai: raitimung, Ngai hkrum ai ari, ndai rai nga ai; ngai hkam mana na nngai, nga nna ngai tsun nngai. ²⁰ Nye a sum hten mat sai; nye a sumri ni yawng dut mat sai: ngai sha ni mung, ngai kaw na pru nna mat mat masai; nye sum hpe gap ai wa, nye nba grang ni hpe grang ai wa, ya kaw nna n nga sai. ²¹ Kaning rai nme law, sagu rem ni dusat myit rawng nna, Yehowa hpe n tam ma ai: dai re ai majaw shanhte n awng lu ai hte, shanhte a sagu hpung ni yawng, dumbru dumbra rai nga ma ai. ²² Kajai gumhkawng ai nsen na lu ai: yu u, Yuda mare ni hpe shingran katsi ai shara hte nam gwi ni a shanu shara shatai na matu, wu kadu ai wunawng kaba, dingdung mung de na du ra ai. ²³ Yehowa e, shinggyim masha gaw tinang lam hpe n up nga ai, ngai chye nngai; hkawm wa yang pyi, shi gaw tinang lagaw lahkam hpe hkang lu ai n rai. ²⁴ Yehowa e, ngai hpe sharin e; raitimung, ngai n htum mat hkra, na a pawt sindawng ai hte n rai; shadawn sharam hte sha, sharin e. ²⁵ Nang hpe n chye ai maigan amyu ni a ntsa e mung, na a mying hpe n shaga ai, dap lakung ni a ntsa e mung, na a myit kahtet ai hpe ru bun u; kaning rai nme law, shanhte gaw Yaku hpe sha kau manu ai; gaja wa, sha kau nna, shamyit kau ai hte shi a shanu shara hpe, katsi katsang shatai kau manu ai.

¹ - ² Yehowa kaw na Yeremia hpang de du ai mungga gaw: Ndai ga shaka mungga hpe madat mu; Yuda mung hte Yerusalem masha ni hpe sa tsun dan nna, shanhte hpe ning ngu mu; ³ - ⁴ Israela Karai Kasang Yehowa gaw ning nga ai: Dai ni rai nga ai hte maren, nga chyu hte lagat jahku lwi ai mung hpe, ngai jaw na ngu nna nanhte a nji nwa ni hta dagam da ai ga sadi hpe shagrin da lu na matu, nanhte gaw nye a amyu masha ni, ngai gaw nanhte a Karai Kasang tai wa lu hkra, Nye a ga hpe madat mara nna, ngai hkangda mada hpe hkan shatup mu, ⁵ nga nna hpri wanhtung ngu ai Egutu mung kaw na nanhte a nji nwa ni hpe shaw woi wa ai shani e, nanhte hta ngai hkangda ai ga shaka hpe n madat ai wa gaw dagam dala hkrum mu ga, nga nna tsun yang, ngai gaw, Yehowa e, Amen, ngu nna htan we ai. ⁶ Bai Yehowa ngai hpe tsun ai gaw, Ndai ga shaka mungga hpe madat mara nna hkan shatup mu, ngu nna Yuda mare ni hta mung, Yerusalem mare lam ni hta mung, hkaw tsun dan mu. ⁷ - ⁸ Kaning rai nme law, nanhte a nji nwa ni hpe Egutu mung na shapraw woi wa ai shani kaw nna dai ni du hkra, ngai jau jau rawt nna, Nye a ga madat mara mu, ngu nna shanhte hpe atit anang shadum shahprang timung, shanhte n madat ai hte n na la ai sha, langai hte langai tinang a n hkru ai myit ja ai hte maren hkan hkawm nga ma ai: dai re ai majaw, ngai shanhte hpe hkangda timung, shanhte n hkan shatup ai, ndai ga shaka mungga mahkra hpe, ngai shanhte a ntsa e shadu na we ai, nga ai. ⁹ Bai Yehowa ngai hpe tsun ai gaw Yuda mung na ni hte Yerusalem mare na ni gaw, gumle gumlau nga ma ai. ¹⁰ Nye a ga hpe lale kau ai, kaji kawa ni a shut hpyit ai hpang de, shanhte nhtang wa masai; hpara tsasam ni hpe dawjau na nga, hkannang mat wa masai; Israela dap na ni hte Yuda dap na ni gaw, shanhte a kaji kawa ni hte ngai tawn da ai ga shaka hpe, run kau manu ai. ¹¹ Dai rai nna Yehowa ning nga ai: yu u, Ngai shanhte a ntsa e tsinyam tsindam shadu nna, shanhte lawt wa lu na n rai; shanhte ngai hpe jahtau timung, ngai n madat na nngai. ¹² Shaloi Yuda mare masha ni hte, Yerusalem masha ni gaw, shanhte manam pyaw ai baw natnawng ya ai hpara ni hpang de sa jahtau timung, dai hpara ni gaw, ruyak hkrum ai aten hta e, shanhte hpe hpa mung hkyehkrang la lu ai n rai. ¹³ Yuda mung e, na a mare ni law nga ai made, na a hpara ni mung, law nga ma ai; Yerusalem mare lam ni law nga ai made, nanhte gaw, kaya kahpa ngu ai Bala hpe manam pyaw ai baw natnawng na matu, hkungri ni hpe gaw da manu ai. ¹⁴ Nang mung, ndai amyu masha ni a matu akyu hkum hpyi et; shanhte a matu mara hkum hpyi jahtau et; ruyak hkrum ai majaw, shanhte shabam ai ga hpe ngai n madat na nngai. ¹⁵ Nye a sumtsaw gaw, masha law law hte nga sha ai majaw, nye a nta hte kaning rai seng a ta? nang jaw ai chyoi pra ai shan akyu n nga ai; n kaja ai amu galaw ninglen, kabu gara nga n hka. ¹⁶ Tsit lali nna, ja ai si si ai, tsawm htap ai tsanlun hpun nga nna, Yehowa nang hpe shamying timung, wu kadu ai nsen kaba hte dai hpun hpe wan nat nna, lakung lakying ni daw mat masai. ¹⁷ Kaning rai nme law, Israela dap hte Yuda dap ni, Bala hpara man e manam pyaw ai baw natnawng nna, ngai hpe pawt sindawng shangun ai n kaja ai amu majaw, nang hpe hkai da ai Zaw nawng zaw wa up ai Yehowa gaw, nang hpe dawdan na de ai, nga ai. ¹⁸ Yehowa ngai hpe madun dan nna, ngai chye lu nngai; shanhte galaw ai amu ni gaw, nang ngai hpe madun dan nitdai. ¹⁹ Ngai mahtang, sat na matu woi sa wa ai sumnung ai sagu kasha zawn rai nga nngai; shanhte gaw, Shi a amying hpe kadai n dum lu hkra, asi hte hpawn hpun hpe mung, dinghta ga na shaprai kau gaw, nga nna nye a lam shanhte myit mang ai hku, ngai n chye nngai. ²⁰ Kraw lawang hte myit masin hpe manaw yu nna, dinghpring ai hku dawdan ai, Zaw nawng zaw wa up ai Yehowa e, nang shanhte hpe matai dawp ai lam, ngai mu lu na nngai: nye a amu ngai nang hpe sa shawk ni ai. ²¹ Dai re ai majaw, Nang anhte a lata hte n si n ga, Yehowa mying gang nna myihtoi hkum htoi et, nga nna na a asak hpe tam ai Anahtot masha ni a lam Yehowa ning nga ai: ²² Yu u, ngai shanhte hpe kawan katsan yu na nngai; shabrang ni gaw nhtu hte si na mara ai; shayi shadang sha ni gaw kawsi hpang gara hte si na mara ai: ²³ shanhte hta langai mi ngam nga na n rai; shingrai ngai kawan katsan yu ai shaning hta, ngai gaw Anahtot masha ni a ntsa e tsin-yam tsindam shapraw na nngai, nga nna Zaw nawng zaw wa up ai Yehowa tsun nga ai.

¹ Yehowa e, ngai nang hte dangrang htat yang, nang gaw dinghpring nga ndai; raitimung, tara dawdan ai lam nang hpe san yu na nngai: ataw, tara n lang ai ni gaw, hpa majaw awng lu ma ta? grai myit magaw ai ni yawng, hpa majaw ngwi pyaw nga lu ma ta? ² Nang shanhte hpe hkai da nna, shanhte ru jung ma ai; shanhte kaba wa nna asi si ma ai: nang gaw shanhte a n-gup hte ni nna, shanhte a myit masin hte tsan nga ndai. ³ Nang chyawm gaw, Yehowa e, ngai hpe chye nga ndai; ngai nang hte myit hkrum ai hpe, nang dinglik yu nna mu ndai: sat kau na matu sagu ni hpe dun shapraw ai zawn, tara n lang ai ni hpe dun shapraw nna, sat na shani a matu san da mu. ⁴ Mungdan gaw yawng hkyen nna, mung ting a namlaw namlap gaten du hkra nyip mat na rai ta? mung masha ni gaw, Karai Kasang, anhte htum mat ai hpe, yu lu na n rai, nga nna n kaja ai ga tsun ai majaw, ashu ashan ni hte u ni pyi myit mat masai. ⁵ Nang gaw lagaw hkawm ai ni hte gat shingjawng nna, hki ba dum yang, gumra ni hte kaning rai gat shingjawng lu na n ta? Hpyen garai n hkrum ai mung hta dung nga timung, Yawdan hka tung wa yang, kaning di na rai ta? ⁶ Kaning rai nme law, na a nhpu nnau ni hte na nwa dap na ni pyi, nang hpe hkalem hkalau kau nna, na a hpang e aja awa jahtau let hkannang ma ai: shanhte kaja ai ga tsun timung, shanhte hpe hkum kam et. ⁷ Ngai gaw nye a nta hpe kau da nngai; nye a sali wunli hpe kabai kau ni ai; nye a sumtsaw sumra hpe, shi hpe hpyen ai ni a lata hta, ap kau ni ai. ⁸ Nye a sali wunli gaw maling e hkrum ai hkanghkyi zawn tai wa sai; ngai hpe daru shabam ai majaw, ngai shi hpe ndawng n yawt nngai. ⁹ Nye a sali wunli gaw ka ka re ai u matse tai wa sai I? u matse ni shi a grupyin e wang tawn nga ma ni? gaja wa, shan sha na matu pa ga na matse labye ni yawng, zuphpawng mu ga. ¹⁰ Law la ai sagu rem ni gaw, nye a tsabyi sun hpe jahten kau manu ai; shanhte gaw nye a sali wunli hpe kabye kau manu ai; nye a pyaw la ai kumhtaw hpe, shingran katsi ai zaibru jang shatai kau manu ai. ¹¹ Shanhte gaw dai hpe shingran katsi ai shara shatai manu ai; shingran katsi ai shara tai nga ai majaw, nye a man e yawn nga ai; kadai n nawn nga ai majaw, mung ting shingran katsi ai shara tai wa sai. ¹² Nam mali na krin ai kawng ni mahkra ntsa e, kashun kashe re ai ni du masai; gaja wa, mung maga mi kaw nna mung maga mi du hkra, Yehowa nhtu hte shaza kau nga ai rai nna, kadai mung ngwi pyaw lu ai n rai. ¹³ Shanhte hkaulan mam gat nna, ju hpun dan la ma ai; tinang hkum hpe jahki shaba timung, hpa akyu n pru nga ai; Yehowa n-yun bu ai myit majaw, nanhte gaw tinang shapraw ai amu hpe tau yu let, kaya kahpa dum na marin dai. ¹⁴ Nye a amyu Israela hpe ngai madu shangun ai sali wunli hpe sa jahten ai, n hkru n hkra ni htingbu htingpyen ni mahkra a lam, Yehowa ning nga ai: Yu u, ngai gaw shanhte hpe tinang a mungdan kaw na baw kau nna, shanhte hta na Yuda masha ni hpe shaw kau na nngai. ¹⁵ Raitimung, shanhte hpe baw kau ai hpang ngai kayin matsan dum nna, langai hte langai tinang a mungdan de woi nhtang wa na nngai. ¹⁶ Shingrai, shanhte gaw Bala mying gang nna, nye a amyu masha ni hpe dagam sharin ai hte maren, Yehowa hkrung nga ai, nga nna nye a mying gang dagam let, nye a amyu masha ni a lam azin ayang sharin la ma yang gaw, shanhte gaw nye a amyu masha ni a ka-ang e dè nga lu na mara ai. ¹⁷ N madat hkraw yang chyawm gaw, ngai dai amyu hpe baw kau nna, baw kau let jahten shabyak kau na nngai, nga nna Yehowa tsun ai.

¹ Bai Yehowa gaw, Lachyit shingkyit sa mari nna, na nshang hta kyit u; ntsin hte hkum hkrut kau et, nga nna ngai hpe tsun ai. ² Shingrai ngai gaw, Yehowa ga hte maren, shingkyit mari la nna, kyit nga nngai. ³ - ⁴ Bai Yehowa mungga lahkawng lang ngu na ngai kaw du nna, Nang mari kyit ai shingkyit hpe la nhtawm, Uhprat hka de rawt sa wa su; lungpu langai mi hta dai hpe makoi da u, nga nna ngai hpe tsun ai. ⁵ Shingrai, Yehowa hkangda ai hte maren, ngai sa nna, dai hpe Uhprat hka kau e makoi da we ai. ⁶ Dai hpang nhtoi tsawmra na jang, Yehowa gaw, Rawt u, Uhprat hka de sa su; ngai hkangda ai hte maren, dai yang e nang makoi da ai shingkyit hpe shaw la su, nga nna ngai hpe tsun ai. ⁷ Ngai mung, Uhprat hka kau de sa nhtawm, ngai makoi da ai shara na, shingkyit hpe htu shaw la we ai: shaloi yu u, dai shingkyit gaw tsam mat nna hpa akyu n nga sai. ⁸ Shaloi Yehowa a mungga ngai kaw du nna, Yehowa ning nga ai: ⁹ Dai hte maren Yuda mung na gumrawng gumtawng hpe mung, Yerusalem mare na kaba la ai gumrawng gumtawng hpe mung, ngai shatsam kau na we ai. ¹⁰ Nye a ga n madat hkraw ai, tinang a myit ja ai hta hkan hkawm nna, hpara tsasam ni hpe nawku ai hte, dawjau na matu hkannang ai, ndai n hkru ai amyu gaw, akyu n rawng ai, ndai shingkyit zawn tai mat na ra ai. ¹¹ Kaning rai nme law, shingkyit gaw masha nshang hta kyit nga ai zawn, Israela dap na ni yawng, Yuda dap na ni yawng, nye a amyu, nye a mying shingteng, nye a shakawn kungdawn shara hte arawng sadang tai wa lu hkra, ngai shanhte hpe ngai hta manoi shangun timung, shanhte n madat hkraw ma ai, nga nna Yehowa tsun ai. ¹² Dai reai majaw, Israela Karai Kasang Yehowa gaw, Namtau shagu tsabyi jahku hte hpring na ra ai, nga ai, ngu nna shanhte hpe tsun mu: shaloi shanhte gaw namtau shagu tsabyi jahku hte hpring na ra ai lam hpe, anhte gaja wa n chye ga ni? nga nna nang hpe htan na mara ai. ¹³ Shaloi nang shanhte hpe, Yehowa ning nga ai: Yu mu ndai mungdan masha ni yawng hpe mung, Dawi tingnyang hta dung ai hkawhkam ni kaw nna, hkinjawng ni, myihtoi ni hte Yerusalem masha ni yawng hpe mung, ngai chyaru nang shangun na nngai: ¹⁴ shaloi kahpu kanau shada mung, kawa hte kasha ni hpe mung, shada ahkawk hkat shangun na nngai: ngai matsan dum na n rai, lahpawt lama na n rai, karum la na n rai; shanhte yawng hpe shamyit kau na nngai, ngu u, nga nna Yehowa tsun ai. ¹⁵ Yehowa mungga tsun ai majaw, madat mara mu, na la mu; gumrawng gumtawng hkum rai myit. ¹⁶ Karai Kasang gaw, nsin hpe garai n shangun ai hte, nanhte a lagaw nsin sin ai bum ni a ntsa e garai n ahtu kataw nna, nanhte nhtoi hpe myit mada nga yang, shi dai hpe si du a shingnip hte htat ai nsin garai n shatai dingsa, nanhte a Karai Kasang Yehowa hpe shagrau sha-a mu. ¹⁷ Nanhte dai ga hpe n madat mara nga ai rai yang, nanhte a gumrawng gumtawng ai majaw, nye a myit masin n dan n leng ai shara e hkrap nga na ra ai; Yehowa sagu hpung hpe rim la ai majaw, nye a myi grai hkrap nna, myi prwi lwi na ra ai. ¹⁸ Tinang hkum hpe shagrit nna dung nga mu; nan a arawng sadang janmau gaw, nan a baw na malaw mat sai, ngu nna hkawhkam wa hte kanu hpe tsun nu; ¹⁹ dingda mare ni gaw pat kau ai hkrum nna, kadai hpaw lu ai n rai; Yuda mung ting bawngdung hkrum nga ai; atsai awai bawngdung hkrum masai. ²⁰ Mada yu mu, dingdung maga de na sa wa ai ni hpe azi yu mu: ngai nang hpe jaw ai, tsawm htap ai sagu hpung, kanang rai nga a ta? ²¹ Nang nan sharin ai, na a jinghku jing-yu ni, na ntsa e du tai na, shi san da ai rai yang, nang hpa tsun shara nga a ta? shinggyim machyi ai num zawn, nang myit ru hkrum na n rai ni? ²² Bai nang gaw, Hpa majaw ngai dai lam hkrum ai i? nga nna na a kraw e dum yang, na a ladu lai ai shut hpyit majaw, na a labu raw kau hkrum nna, na a lahtin ahpye a lam hkrum nga ai. ²³ Ehtiopi wa gaw tinang a ahpraw asam, rawng gawk gaw tinang a ateng apang ka ai hpe, galai kau lu na a ni? dai rai yang, n hkru n hkra galaw man ai ni, nanhte nan, kaja ai amu galaw lu na myit dai. ²⁴ Dai re ai majaw poi mat ai mahkaw zawn, ngai shanhte hpe zaibru jang na nbung hte ahpawt shabra kau na nngai. ²⁵ Nang ngai hpe malap kau nna, masu magaw ga hta shamyet shanat ndai majaw, ndai gaw na a daw mi, na a matu ngai shadang da ai kamhtaw rai nga ai. ²⁶ Dai re ai majaw, ngai na a labu hpe raw kau nna, na a kaya kahpa dawng na ra ai. ²⁷ Pa ga na kawng ni a ntsa e nang galaw ai matsat shabat ngu ai, numshaw lashaw ai, nying sharung ai hte n san n seng hpye ai amu hpe, ngai mu ni ai: Yerusalem e, nang dingnye lu ndai; nang n san n seng ai gaten du hkra naw rai nga na a ta? nga nna Yehowa tsun ai.

¹ - ² Jan gri ai lam lakap nna, Yeremia kaw du ai Yehowa mungga gaw: Yuda mung sharung shayawt nga nna, de a mare chyinghka ni gawngkya nga ma ai; mung masha ni gaw chyang ai hpun palawng buhpun let ga hta dung nga nna, Yerusalem masha ni hkrap shabam ai nsen lung wa sai. ³ Arawng lu ai ni tinang a ma ni hpe hka ja shangun nna, shanhte ntsin htung de du jang ntsin n mu ma ai; di bu kaman sha hte bai nhtang wa ma ai; shanhte baw htinggrum let kaya kahpa hte mak mat ai hkrum ma ai. ⁴ Jan gri nna, ga ga kaprang ai majaw, hkauna galaw ai ni gaw tinang baw htinggrum let kaya dum ma ai. ⁵ Pa ga e hkalung woi ai ashan gaw, ushat n nga ai majaw, kasha hpe kau da nga ai. ⁶ Lawze nhprang ni gaw, krin ai kawng ni a ntsa e tsap let, nam gwi zawn nbung hpe marawp ma ai: namlaw namlap n nga ai majaw, shanhte a myi amam mat sai. ⁷ Yehowa e, anhte a shut hpyit ai mara gaw, anhte a lam sakse hkam timung, na a amying nsang hpe tau yu nna, naw sharang u law; anhte law law lang htak mat saga ai; nang hpe shut kau saga ai. ⁸ Israela amyu a myit mada ai wa rutsang hkrum ai aten e, Hkyehkrang la ai wa e, nang gaw ndai mung hta manam hte, shana shalai na dabang tam ai malet nhprang wa zawn, hpa majaw tai nga n ta? ⁹ Mak mat ai wa hte, n mawai la lu ai share wa zawn, hpa majaw tai nga n ta? gaja wa, Yehowa e, nang gaw anhte a ka-ang e shanu nga ndai; anhte gaw na a mying hte shamying ai ni tai saga ai; anhte hpe hkum kau da mi law. ¹⁰ Yehowa gaw ndai amyu masha ni hpe ning nga tsun ai: Shanhte nwan hkawm na sharawng ma ai; tinang a lagaw hpe n hkang ma ai; dai majaw Yehowa shanhte hpe n ra nga ai; ya shi gaw shanhte a shut hpyit ai hpe dum nna, shanhte a yubak majaw ari ahpri jaw na ra ai. ¹¹ Bai Yehowa ngai hpe ning nga ai: Ngamu ngamai lu la hkra, ndai amyu a matu akyu hkum hpyi et; ¹² shanhte lusha gam yang, shanhte a hpyi jahtau ai hpe ngai madat na n rai; shanhte a wan nat hkungga hte lusha hkungga hpe, ngai hkapla na n rai; ngai gaw, nhtu tsin-yam, kawsi hpang gara ai, ana zinli hte shanhte hpe shamyit kau na nngai. ¹³ Dai rai nna ngai gaw, Aga, Madu Yehowa e, myihtoi ni mahtang, Nanhte nhtu hkrum na n rai, kawsi hpang gara mung hkrum na n rai; ngai gaw ndai yang e nanhte hpe tut ngwi pyaw nga shangun na nngai, nga nna shanhte hpe hkaw tsun ma ai, nga nngai. ¹⁴ Shaloi Yehowa gaw, Dai myihtoi ni nye a mying gang nna, masu ga htoi ma ai; ngai shanhte hpe shangun ai n rai, hkangda ai mung n rai, shingran madun ai mung n rai: shanhte nanhte hpe htoi ai lam gaw, masu ai shingran, shaba wawt ai ga, myi le le ai hte tinang a n hkru ai nyan maw ai hku hkrai, rai nga ai. ¹⁵ Dai re ai majaw, Ndai mung hta nhtu hte kawsi hpang gara shang lu na n rai, nga nna ngai n shangun tim, nye amying gang nna htoi ai myihtoi ni a lam Yehowa ning nga ai: Dai myihtoi ni gaw nhtu tsin-yam kawsi hpang gara hte htum mat na mara ai. ¹⁶ Bai, shanhte a myihtoi ga hta la ai shawa masha ni gaw, kawsi hpang gara ai hte nhtu tsin-yam majaw, tinang nan kaw nna madu jan ni, shayi shadang sha ni hte hpawn, Yerusalem mare lam ni hta kabai kau ai hkrum nna, shanhte hpe lup makoi na kadai n nga ai: shanhte a ntsa e tinang a mara hpe ngai ru bun na nngai. ¹⁷ Nang shanhte hpe ndai ga tsun mu: Nye amyu shayi hkawnsek gaw hkala nba kaba hkrum nna, shi a nma grai baw wa ai majaw, nye a myi prwi shani shana lwi nna, galoi n sim u ga. ¹⁸ Ngai pa ga de hkawm yang, si ai ni hkrai jawng ma ai; mare kata de shang yu yang, kawsi hpang gara majaw machyi hkrum ai ni hkrai rai nga ma hka! Myihtoi wa hte hkinjawng wa pyi, hpa n chye ai, shara magup hkan e jawt hkawm ma ai. ¹⁹ Nang gaw Yuda mung hpe atsai awai kau da nu ni? na a myit masin Ziun hpe matsat kau nu ni? anhte n mai wa lu hkra, nang anhte hpe hpa majaw adup kau n ta? Anhte ngwi pyaw lam myit mada timung, mai kaja ai n mu ga ai; gan ga ai aten hpe myit mada timung, mak mat ai hkrai hkrum ga hka! ²⁰ Yehowa e, anhte tara tawt lai ai hte, ji wa ni a shut hpyit ai hpe, anhte yin la ga ai: anhte nang hpe shut kau saga ai. ²¹ Na amying ningsang majaw, anhte hpe hkum matsat kau et; na a arawng sadang tingnyang hpe, hkum shayuk kau et; dum u, anhte hte tawn da ai ga shaka hpe, hkum run kau et. ²² Maigan masha ni a hpara sumla ni hta, marang jahtu lu ai wa, nga a ni? lamu gaw shi hkrai marang htu lu a ni? Anhte a Karai Kasang Yehowa e, ndai lam nang hkrai shabyin lu ai, n rai ni? dai re majaw, anhte nang hpe ala nga ga ai; ndai lam yawng nang tawn da nitdai.

¹ Bai Yehowa ngai hpe tsun ai gaw, Mawshe yan Samuela pyi nye a man e tsap timung, ndai amyu hpe ngai matsan dum na, n rai: ngai kaw na shanhte hpe shaden kau mu; shanhte pru wa mu ga. ² Shaloi shanhte gaw, Anhte gade pru wa na rai ta? nga nna nang hpe san yang, nang gaw, Yehowa ning nga ai: Si ang ai ni gaw si ai de, sat kau hkrum ang ai ni, sat kau ai de, kawsi hpang gara hkrum ang ai ni, kawsi hpang gara ai de, bawngdung hkrum ang ai ni, bawngdung ai de pru wa mu ga, ngu nna shanhte hpe htawn tsun mu. ³ - ⁴ Shanhte hpe sat kau na matu nhtu, karawt sha na matu gwi, sha kau nna shaza kau na matu ntsa malen u ni hte pa ga na matse labye ngu ai tsin-yam amyu mali, ngai shanhte a ntsa e tawn da nna, Yuda hkawhkam, Hezekia a kasha Manashe gaw, Yerusalem mare galaw ai amu majaw, ga ntsa mungdan ni mahkra hta, ngai shanhte hpe hkrithpa kumla shatai na nngai, nga nna Yehowa tsun ai. ⁵ Yerusalem e, nang hpe kadai matsan dum na rai ta? Na a matu kadai yawn na rai ta? Nang hkam kaja nga n ni? nga nna kadai wa shayan san na rai ta? ⁶ Yehowa ning nga ai: Nang ngai hpe kau da nitdai; nang kanut mat wa ndai; dai majaw ngai nye a lata ladawn nna, nang hpe shamyit kau de ai; ngai nang hpe matsan dum jin ni ai. ⁷ Mung chyinghka lam hta e ngai shanhte hpe hkuwawn hte katsap ni ai; shanhte a matu mara ni hpe ngai jahtum kau ni ai; nye a amyu hpe ngai jahten shabyak nngai; shanhte tinang lam hta na nhtang wa hkraw ai n rai. ⁸ Shanhte a gaida ni gaw, nammukdara zaibru zawn, nye a man e law wa ma ai; ngai gaw shabrang ni a kanu gasat ai wa hpe, jan pungding aten e shashawn ni ai; yawn madai ai hte hkrit gari ai gaw, shi a ntsa e akajawng sha du shangun nngai. ⁹ Kasha sanit shangai ai num gaw, gawngkya nga ai; shi nsa hti mat sai; shana garai n du yang, shi a jan shang wa sai; shi gaw kaya kahpa hte myiman sum ai hkrum nu ai: naw ngam nga ai ni hpe mung, hpyen ni a man e nhtu hta ngai ap kau ni ai, nga nna Yehowa tsun ai. ¹⁰ Nu e, mung ting a dangrang hkat ai wa hte ndang kalang hkat ai wa tai u ga nga, nang ngai hpe shaprat ai majaw, ngai dingnye lu nngai: ngai gaw a myat sha ai wa n rai, hka kap ai wa mung n rai; raitimung yawng mayawng ngai hpe dagam matsa ma ai. ¹¹ Shaloi Yehowa gaw, Gaja wa, nga mu ngamai hkrum na matu, ngai nang hpe n-gun shaja nga nngai; gaja wa, ruyak ai aten e, kyindut hkrum ai aten e, ngai gaw na a man e hpyen wa hpe sa tawngban shangun na nngai. ¹² Hpri hpe daw kau lu a ni? dingdung mung na hpri hte de a magri hpe pyi daw kau lu a ni? ¹³ Na a mung ting hta nang galaw ai yubak majaw, na a sutgan hte arung arai hpe, ngai n lahpawt ai sha, lanep shatai na nngai. ¹⁴ Nang n chye ai mung de hpyen ni hte rau, ngai nang hpe sa shangun na nngai; nanhte hpe hkru kau ai wan gaw, nye a myit kahtet ai hte nat dat nga nngai, nga ai. ¹⁵ Yehowa e, nang chye nga ndai; ngai hpe dum let, kawan katsan yu nna, ngai e hkan shachyut ai ni hpe matai dawp u: shanhte hpe sharang let, ngai hpe hkum dawm la et; na a majaw ngai shatan nhkan hkrum ai hpe, dum u. ¹⁶ Zaw nawng zaw wa up ai Karai Kasang Yehowa e, na a mungga hpe ngai mu hkrup nna, sha kau se ai; ngai gaw na amying mying ai wa rai nga ai majaw, na a mungga gaw nye a kabu gara shara hte, nye myit sharawng awng ai lam, tai wa sai. ¹⁷ Ngai gaw poi galaw ai ni a hpung hta n dung lawm nngai: kabu mung n kabu nngai; na a lata n-yun bu ai hte ngai hpe jahpring ai majaw, ngai hkrai sha dung nga nngai. ¹⁸ Ngai hpa majaw tutnawng kawa machyi hkrum n ni? nye nma hpa majaw baw wa nna, n mai hkraw a ta? gaja wa, nang gaw nye a man e hkyet mat ai hka shi zawn, masu nga n ni? ¹⁹ Dai majaw Yehowa ning nga ai, Nang dai ga shabai la yang, ngai nang hpe bai woi wa nna, nang nye a man e naw tsap lu na ndai; nang gaw hpu ai hte n hpu ai hpe karan da yang, nye a n-gup hte maren nang tai na ndai; shanhte nang hpang de nhtang wa na mara ai, nang gaw shanhte hpang de sa ra ai, n rai. ²⁰ Ngai gaw nang hpe, ndai amyu masha ni a man e, ngang ai magri bunghku shatai na de ai: shanhte nang hpe hpyen gasat timung, dang lu na n rai: nang hpe shaw mawai la na matu, na a hpang maga e ngai rai nga nngai: ²¹ n hkru n hkra ai ni a lata na ngai nang hpe mawai la nna, gumshem ai ni a lata na hkrang la na nngai, nga nna Yehowa tsun ai.

¹ Bai, ngai kaw du ai Yehowa a mungga gaw: Nang gaw ndai shara hta e num la lu na, n rai; kashu kasha mung shaprat lu na n rai. ³ Ndai shara e shangai ai kashu kasha ni hpe mung, shanhte a kanu kawa ni hpe mung, Yehowa lakap nna ning nga tsun ai: ⁴ Shanhte gaw ana amyu myu hte si na mara ai; shanhte hpe sharung shayawt na n rai, lup makoi na mung n rai; ga ntsa e namhpun zawn tai na mara ai: shanhte gaw nhtu tsin-yam, kawsi hpang gara ai hte htum mat nna, si mang ni gaw ntsa malen u ni hte pa ga na matse labye ni a shahpa tai na ra ai. ⁵ Bai, Yehowa ning nga ai: Sharung shayawt ai nta hta hkum shang et; si ai ni a matu yawnhkyen ai myit madun nna, hkrapngu hkrapngoi na, hkum sa et; nye a ngwi pyaw ngu ai, n-gaw nwai hte matsan dum ai hpe ndai amyu masha ni kaw na ngai dawm la kau se ai. ⁶ Mung masha kaji kaba si na mara ai; shanhte hpe lup makoi na, n rai; shanhte a matu kadai mung sharung shayawt na, n rai, tinang hkum hpe jahpye na, n rai, tinang kara hpe mung rep kau na, n rai: ⁷ si ai ni a matu sharung shayawt ai ni hpe shalan shabran na nga, shanhte hte poi galaw na n rai; kanu kawa si timung, shangwi shapyaw ai gawm jaw ai wa nga na n rai. ⁸ Bai, nang gaw, poi galaw ai nta hta hkum shang et; shanhte hte kanawn nna hkum lu hkum sha et. ⁹ Kaning rai nme law, Israela Karai Kasang, Zaw nawng zaw wa up ai Yehowa ning nga ai: Yu u, ndai shara hta, kabu gara ai nsen, mani pyaw ai nsen, la ningnan a nsen, num ningnan a nsen, nanhte a man e, nanhte a prat hta, ngai jasim kau na we ai. ¹⁰ - ¹¹ Shingrai nang gaw ndai amyu masha ni hpe, ndai ga mahkra tsun dan nna, shanhte gaw, Ataw, Yehowa gaw anhte hpe ndai daram kaba ai yubak, hpa majaw jaw na rai ta? anhte hpa shut ga ta? anhte a Karai Kasang Yehowa hpe hpa yubak galaw ga ta? nga nna nang hpe san ma yang, nang gaw, Yehowa ning nga ai: Nanhte a nji nwa ni gaw ngai hpe kau da nna, hpara tsasam ni hpang de hkannang let, nawku dawjau ai hte, ngai hpe kau da nna, nye a tara n hkannang ma ai majaw, rai nga ai: ¹² bai nanhte gaw nji nwa ni hta grau nna n hkru ai amu galaw myit dai; yu mu, nanhte langai hte langai nye a ga n madat ai, tinang a n hkru ai myit ja ai hta hkan hkawm myit dai: ¹³ dai re ai majaw, nanhte hte nanhte a nji nwa ni pyi, n chye ai mung de, ngai nanhte hpe ndai mung kaw na shaden kau na nngai: dai mung hta nanhte gaw hpara tsasam ni hpe shani shana dawjau na myit dai; nye a chyeju hpe hkamla lu na myit dai, n rai, ngu nna htawn tsun mu. ¹⁴ - ¹⁵ Dai re ai majaw, yu u, Yehowa ning nga ai: Israela kashu kasha ni hpe, Egutu mung na shapraw woi wa ai Yehowa hkrung nga ai hte maren, nga nna n dagam ai sha, Israela kashu kasha ni hpe dingdung mung hte, shanhte hpe shaden kau ai mungdan ni yawng kaw nna, bai woi wa ai Yehowa hkrung nga ai hte maren, nga nna dagam ai aten du na ra ai: shanhte a kaji kawa ni hpe ngai jaw da ai mung de, ngai shanhte hpe bai woi wa na nngai. ¹⁶ Yehowa ning nga ai, Yu u; ngai gaw nga hkwi ai ni law law hpe shaga la nna, shanhte hpe hkwi shangun na nngai; dai hpang jaugawng law law hpe ngai shaga la nna, shanhte hpe bum shagu, kawng shagu hte bum ga na lungpu ni hta tam shangun na nngai. ¹⁷ Shanhte sa wa ai lam shagu hpe, ngai azi yu nga nngai: shanhte, ngai n mu ai hku, sa wa ma ai, n rai; shanhte shut hpyit ai nye a man e makoi da lu ai, n rai. ¹⁸ Shanhte gaw nye a mung hpe, tinang a n san n seng ai si mang ni hte awu asin di kau nna, nye a sali wunli ga hpe, matsat shabat hte jahpring ai majaw, ngai shanhte hpe ari htam lahkawng, shawng jaw na nngai. ¹⁹ Nye a n-gun atsam, nye a hpyendap, rutsang ai shani e nye a shingbyi shara Yehowa e, lamu ga htum ai de na masha amyu ni nang hpang de du nna, Anhte a ji wa ni gaw, masu ai hte kaman lila, lam n la ai sali wunli hkrai hkamla masai, nga nna tsun na mara ai. ²⁰ Masha gaw, Karai Wa n re ai hpara ni hpe, tinang a matu galaw mai a ni? ²¹ Dai re ai majaw, yu u, ngai shanhte hpe chye shangun na nme ai; nye a lata hte, nye a n-gun hpe, ndai lang mi ngai shanhte hpe chye shangun nna, nye a mying Yehowa rai nga ai, shanhte chye lu na mara ai.

¹ Yuda amyu a yubak gaw, hpri kanyit hte hpailung masen e ka da nga ai: dai gaw shanhte a kraw lawang na lungpa hta mung, shanhte a tawn hkungri ni a nrung hta mung, tawk ka da nga ai: ² shanhte a ma kaji ni pyi, tsaw ai kawng ni a tsit lali ai hpun makau e nga ai, tawn hkungri ni hte Asherim sumla ni hpe dum ma ai. ³ Pa ga e nga ai nye a bum e, na a sutgan hte mahkawng da ai arung arai ni hpe mung, mung ting hta nang shut hpyit ai majaw, na a tsaw ai kawng ni a nawku ai shara ni hpe mung, lanep tai na matu ngai ap kau na nngai. ⁴ Ngai nang hpe jaw ai sali wunli hta na, nang hkum nan htawt mat na ndai; nang n chye ai mung hta, nang hpe hpyen ai ni a mayam, ngai nang hpe shatai na de ai: kaning rai nme law, nye a pawt sindawng ai hte tutnawng hkru ai wan hpe, nanhte shachyi manu ai. ⁵ Yehowa ning nga ai: Shinggyim masha hta shamyet shanat nna, tinang n-gun shaja let, Yehowa hpe jagang kau ai wa gaw, dagam dala hkrum ging ai wa rai nga ai: ⁶ dai wa gaw zaibru jang e tu ai hpun chyahkraw hte bung nna, mai kaja du ai hpe n chye nga ai: shi gaw nam mali hkan na hkraw hkun ai shara hte, kadai n shanu lu ai jum ga hta, anga nga na ra ai. ⁷ Yehowa hta shamyet shanat ai wa, Yehowa hpe tinang a machyu shara shatai ai wa chyawm gaw a nga ai: ⁸ dai wa gaw hka masawn e hkai nna, hka kau e ru hkram ai hte, nlum ta du na hpe n hkrit nga ai, alap mung n nyip ai hpun hte bung nga ai: jan gri timung shi tsang shara n nga ai; asi n si ai galoi n nga lu ai. ⁹ Myit masin gaw, rai yawng mayawng hta magaw htum nna, grai n hkru nga ai: dai hpe kadai chye lu a ta? ¹⁰ langai hte langai hpe tinang a arawn alai hte maren, tinang hkam ang ai shabrai karan jaw na matu, ngai Yehowa gaw myit masin hpe sawk yu nna, nhkyun ni hpe manaw yu nngai. ¹¹ N tara ai sutgan hpe mahkawng da ai wa gaw, tinang n di ai udi hpum ai u preng hte bung nga ai: shi prat hpungngang garai n du yang, dai sutgan shi hte hka wa nna, shi a jahtum ai gaw angawk ai rai nga ai. ¹² Anhte a chyoi pra ai nta a shara gaw, moi kaw nna tsaw ai shara e tawn da ai, arawng sadang tingnyang rai nga ai. ¹³ Israela myit mada shara Yehowa e, nang hpe kau da ai ni yawng kaya kahpa hkrum na mara ai: ngai kaw na pru mat wa ai ni gaw, asak hka hpawk ngu ai Yehowa hpe kau da ai majaw, zaibru hta ka da ai hkrum na mara ai. ¹⁴ Yehowa e, ngai hpe shamai ya e, shaloi ngai mai wa na nngai; ngai hpe hkyehkrang la e, shaloi ngai hkyehkrang la ai hkrum na nngai: nang gaw nye a shakawn kungdawn shara rai nga ndai. ¹⁵ Yu u, mung masha ni gaw, Yehowa a mungga kanang rai nga a ta? ya shapraw mu ga, nga nna ngai hpe tsun ma ai. ¹⁶ Ngai chyawm gaw, na a malai sagu rem wa tai na, n hkan shachyut nngai; dai n kaja ai nhtoi hpe n marit nngai: nang chye nga ndai; nye a n-gup na pru ai ga gaw na a man e rai nga ai. ¹⁷ Ngai hpe hkum hkrit kajawng shangun et; ruyak hkrum ai nhtoi hta, nang gaw nye a shingbyi shara rai nga ndai. ¹⁸ Ngai hpe zingri zingrat ai ni kaya kahpa hkrum mu ga; ngai mahtang kaya kahpa n hkrum u ga; shanhte mak mat mu ga, ngai mahtang mak mat ai n hkrum u ga: rutsang hkrum ai shani shanhte a ntsa e du shangun nna, shanhte hpe atsai awai agrawp kau mu. ¹⁹ - ²⁰ Yehowa gaw ngai hpe ning nga tsun nngai: Yuda hkawhkam ni shang wa ai, pru wa ai, mung masha ni a mare chyinghka lam hta mung, Yerusalem mare chyinghka mahkra hta e mung sa tsap nna, Ndai chinghka hku shang ai Yuda hkawhkam ni, Yuda mung masha ni hte Yerusalem masha nlang hte e, Yehowa a ga madat mara mu; ²¹ Yehowa ning nga ai: Laban nhtoi hta nanhte lit n gunhpai ai hte Yerusalem mare chyinghka hku n shashawn myit ga, sadi mu: ²² dai hta kaga, laban nhtoi hta e nanhte a nta ni kaw na lit hkum shapraw myit, amu bungli hpa mung hkum galaw myit; nanhte a nji nwa ni hpe ngai hkangda ai hte maren, laban nhtoi hpe shachyoi shapra nga mu, ngu nna shanhte hpe htawn tsun u, nga ai. ²³ Shanhte mahtang n madat nna, na mung n na la ma ai; n na la ai hte, sharin achyin ai n hkamla lu hkra, shanhte gaw tinang a du shaja ma ai. ²⁴ - ²⁵ Yehowa ning nga ai: Nanhte gaw nye a ga gaja wa madat mara nna, laban nhtoi hta ndai mare a chyinghka lam hku lit n shashawn ai hte, amu bungli n galaw hkra, laban nhtoi hpe shachyoi shapra nga myit yang gaw, Dawi tingnyang hta dung ai hkawhkam ni hte du salang ni, ndai mare chyinghka hku shang lu na mara ai; shanhte mung, tinang a ali ama ni mung, Yuda mung hte Yerusalem mare masha ni mung, leng hte gumra jawn let, shang lu nna, dai mare gaw, prat dingsa e grin nga na ra ai. ²⁶ Dai hta n-ga shanhte gaw Yuda mare ni hta na mung, Yerusalem grupyin kahtawng ni hta na mung, Ben-yamin lamu ga de na mung, layang ga de na mung, bum ga de na mung, Dingda ga de na mung sa du nna, wan nat hkungga, mayu hkungga, lusha hkungga, manam pyaw ai baw lang let, shakawn kungdawn ai hte Yehowa nta kata de shashawn na mara ai. ²⁷ Raitimung nanhte gaw nye a ga n madat ai hte, laban nhtoi hpe n shachyoi shapra ai; dai nhtoi e Yerusalem mare chyinghka ni hta lit gunhpai shashawn nga ai rai yang gaw, dai mare chyinghka ni hpe ngai wan nat nna, dai wan gaw n krip ai, Yerusalem htingnu ni hpe hkru kau na ra ai, nga ai.

¹ - ² Yehowa kaw na Yeremia hpang de du ai mungga gaw: Rawt u, di bu sama a nta de yu wa su; dai yang e ngai nang hpe ga shana ya na de ai. ³ Shaloi ngai gaw di bu sama a nta de yu wa nna, yu u, dai wa gaw tinang a htang hta amu galaw nga ai. ⁴ Ga kagam hte galaw ai di bu gaw, sama a lata hta ga mat ai rai yang, di bu sama gaw, myit ra ai hte maren, di bu kaga bai galaw nga ai. ⁵ Shaloi Yehowa a mungga ngai kaw du nna, Yehowa ning nga ai: ⁶ Israela dap e, di bu sama zawn, ngai nanhte hpe n galaw lu na rai i? Israela dap e, yu u, ga kagam gaw di bu sama a lata hta rai nga ai zawn, nanhte gaw nye a lata hta rai nga myit dai. ⁷ - ⁸ Gara amyu, gara mungdan hpe, baw kau na, run kau na hte jahten shabyak kau na matu, ngai tsun nga yang, ngai lakap nna tsun ai amyu gaw, tinang a n hkru ai lam hpe kau da yang, ngai myit malai lu nna, shanhte hpe jaw na maw ai ari hpe n jaw na nngai. ⁹ - ¹⁰ Gara amyu, gara mungdan hpe, gaw da na hte hkai da na matu, ngai tsun nga yang, shanhte gaw nye a ga hpe n madat ai hte, nye a man e n hkru ai amu galaw nga ma yang, ngai myit malai nna, shanhte hpe tsun ai chyeju madun dan na n rai. ¹¹ Dai re ai majaw, ya Yehowa ning nga ai: Yu mu, ngai nanhte a lam n hkru ai hku maw nna, nanhte a matu tsin-yam mazing da nngai: ya langai hte langai tinang a n hkru ai lam hta na kayin wa mu; nanhte a htunghking hte arawn alai hpe shading mu, ngu nna Yuda mung na ni hte Yerusalem masha ni hpe htawn tsun u, nga ai. ¹² Shanhte mahtang, Lam n la ai; anhte ra ai hku anhte hkan sa nna, langai hte langai tinang myit ja ai hte maren galaw na ga ai, nga ma ai. ¹³ Dai re ai majaw Yehowa ning nga ai: Dai zawn re ai amu kadai na yu ai kun? ngu nna maigan amyu ni hpe san yu mu: Israela shayi hkawnsek gaw, grai n tsawm ai amu galaw nu ai. ¹⁴ Lebanon bum na hkyen gaw, pa ga na nlung hpe n madit na a ni? tsan ai kaw nna lwi ai katsi ai hka gaw, hkyet mat lu na rai ni? ¹⁵ Nye a amyu masha ni mahtang, ngai hpe malap kau ma ai; hpa n re ai hpara ni a man e manam pyaw ai baw natnawng ma ai: moi kaw nna hkan ai nmaw lam hta shanhte kataw wa nna, n lajang yu ai lam masun ni hta yit mat ma ai: ¹⁶ shingrai shanhte a mungdan gaw katsi katsang shara hte, tutnawng asawng shara tai nga ai; dai lam lai ai ni yawng mayawng mau mat nna tinang a baw kanga na mara ai. ¹⁷ Ngai gaw, sinpraw nbung hte zawn, hpyen ni a man e shanhte hpe kamawng kau na nngai: shanhte rutsang hkrum ai shani e myiman n rai, shingdu hkrai, shanhte hpe madun na nngai. ¹⁸ Shaloi shanhte gaw, Sa marit; Yeremia hpe hpaji daw ga; hkinjawng wa hte tara, hpaji rawng ai wa hte hpaji daw ai ga, myihtoi wa hte myihtoi ga, htum mat na n rai; sa marit; shinglet hte shi hpe kayat gaw; shi a ga langai mi muk n madat ga, nga nna tsun ma ai. ¹⁹ Yehowa e, ngai hpe mada yu e; ngai hte dangrang hkat ai ni a ga hpe, matsing u. ²⁰ Kaja ai a malai n kaja ai, htang mai a ni? shanhte gaw nye a asak matu nhkun htu masai: shanhte kaw na, na a pawt kahtet ai myit dawm mat hkra, shanhte a akyu matu tawngban let, na a man e ngai tsap nga ai hpe dum nga u. ²¹ Dai re ai majaw, shanhte a kashu kasha ni hku wa hkrum nna, shanhte hkum nan ri nhtu hte si mu ga: shanhte a num ni gaw, maudung dung nna, gaida tai mu ga; dinghku la ni sat kau ai hkrum nna, shabrang ni gaw, hpyen gasat kaw ri nhtu hte si mu ga. ²² Hpyen luksuk ni hpe, nang shanhte hpang de alawan shashawn ai majaw, shanhte a nta ni kaw na shabam ai nsen, ngoi pru u ga: kaning rai nme law, ngai hpe hkam na matu, shanhte nhkun htu masai: ngai sa wa ai lam hta, mahkam up da mu ai. ²³ Nang chyawm gaw Yehowa e, ngai hpe sat kau na nga, shanhte hpaji daw ai lam yawng, nang chye nga ndai; shanhte a shut hpyit ai hpe hkum dat kau et; shanhte a yubak hpe na a man na hkum arut kau et; na a man e shanhte htum mat mu ga; nang pawt bu ai aten e shanhte hpe dawdan mu.

¹ - ² Shaloi Yehowa gaw, Di bu sama a namtau langai mi sa mari la nhtawm, mung masha ni a salang nkau mi hte, hkinjawng ni a salang nkau mi hte hpawn, Harsit chyinghka makau e nga ai, Hinom kasha a kadit de sa nna, ngai nang hpe tsun dan na ra ai ga hpe, dai yang e htawn tsun u. ³ Yuda hkawhkam ni hte Yerusalem masha ni e, Yehowa a ga madat mara mu: Israela Karai Kasang, Zaw nawng zaw wa up ai Yehowa, ning nga ai: Shi ga na ai ni yawng, na kachyeng hkra, ndai shara ntsa e ngai tsin-yam shapraw na nngai. ⁴ Kaning rai nme law, shanhte ngai hpe kau da nna, shanhte mung, kaji kawa ni mung, Yuda hkawhkam ni mung, n chye ai hpara kaga ni a man e, ndai yang e, manam pyaw ai baw natnawng let, ndai shara hpe tsasam shara shatai kau manu ai; dai hta kaga, mara n kap ai ni a sai hte ndai shara hpe jahpring manu ai: ⁵ bai shanhte gaw, Bala hpara a man e, tinang a kasha ni hpe wan nat hkungga nawng ya na nga, Bala a matu tsaw ai kawng ni a nawku shara dè da manu ai; dai lam gaw ngai htet da ai n rai, tsun mung n tsun, gaja wa nye a myit hta n rawng nga ai: ⁶ dai rai nna yu u Yehowa ning nga ai: dai shara hpe Tohpet mung, Hinom kasha kadit mung, ngu na n rai; Masha sat ai kadit, ngu na aten du na ra ai. ⁷ Yuda hte Yerusalem masha ni a myit maw ai lam hpe, ndai yang e ngai shabyak kau na we ai; ngai shanhte hpe hpyen ni a nhtu hte mung, shanhte a asak tam ai ni a lata hte mung, shaza kau na nme ai: shanhte a moi mang ni hpe, ntsa malen u ni hte lamu ga na matse labye ni a shat, ngai shatai na we ai. ⁸ Ndai mare hpe mung, katsi katsang hte asawng shara, ngai shatai na we ai; dai lam lai ai ni yawng mayawng mau mat nna, ndai mare hkrum ai tsin-yam tsindam majaw, Yi lo, nga na mara ai. ⁹ - ¹¹ Hpyen ni hte shanhte a asak tam ai ni wang tawn nna, shanhte hpe kyindut jahkrum ai majaw, shanhte gaw tinang a shayi shadang sha ni a hkumshan hpe pyi sha nna, langai hte langai tinang manang wa a hkumshan sha na mara ai, ngu nna tsun nhtawm, nang hte rau sa wa ai ni a man e, dai namtau hpe ga kau nna, Zaw nawng zaw wa up ai Yehowa ning nga ai, Di bu sama a namtau hpe, bai n lajang lu hkra, ga kau ai hte maren, ndai mare masha ni hte, ndai mare hpe, ngai ga kau na nngai: shanhte gaw, Tohpet shara hta man ai ga n nga hkra, mang lup kau na mara ai. ¹² Ndai mare hpe mung, ndai mare masha ni hpe mung, Tohpet shara zawn, ngai shatai na we ai, nga nna Yehowa tsun ai: ¹³ nta magaw ni a ntsa e, sumsing lamu a zaw nawng zaw wa ni a matu manam pyaw ai baw natnawng nna, hpara kaga ni a man e dumhpung hkungga ru jaw ai nta ni mahkra hte hpawn, Yerusalem mare nta ni hte, awu asin re ai ni a Yuda hkawhkam ni a nta ni gaw, Tohpet shara zawn tai na ra ai, ngu nna shanhte hpe htawn tsun mu, nga nna htet da ai. ¹⁴ - ¹⁵ Shaloi, myihtoi ga tsun na matu, Yehowa shi hpe shangun dat ai Tohpet shara kaw na Yeremia bai wa nna, Yehowa nta wing kata e tsap let, Israela Karai Kasang Zaw nawng zaw wa up ai Yehowa ning nga ai: Yu mu, mung masha ni gaw nye a ga n madat hkra, tinang du shaja ma ai majaw, ngai tsun da ai tsin-yam tsindam yawng, ndai mare ntsa e mung, de a grupyin na mare ni a ntsa e mung, ngai shapraw na we ai, nga ai, ngu nna masha ni mahkra hpe htawn tsun mu ai.

¹ Ya Yeremia gaw ndai lam, htawn tsun ai hpe, Yehowa nta agyi wa, hkinjawng Imera kasha Pashura na wu ai. ² Dai rai nna Pashura gaw myihtoi Yeremia hpe kayat nna, Yehowa nta kata na, Ben-yamin lahta chyinghka makau e nga ai share hta sharen da wu ai. ³ Hpang jahpawt e Pashura gaw Yeremia hpe share hta na shalawt dat wu ai. Shaloi Yeremia gaw, Yehowa na amying hpe Pashura n rai, Magora-misabib ngu nna lai nu ai. ⁴ Kaning rai nme law, Yehowa ning nga ai: Yu u, ngai gaw nang hte na a jinghku ni mahkra hta, nang hpe hkrithpa lam shatai na de ai; shanhte gaw na a man e, hpyen ni a nhtu hte si na mara ai: Yuda mungdan ting hpe Babelon hkawhkam a lata de ngai ap kau nna, shi gaw mung masha ni hpe Babelon mare de rim wa nna, shanhte hpe nhtu hte sat kau na ra ai. ⁵ Dai hta n-ga ndai mare a sutgan mahkra hpe mung, atu amyat mahkra hpe mung, hpu ai baw mahkra hpe mung, Yuda hkawhkam a sutdek arung arai mahkra hpe mung, hpyen ni a lata hta ngai ap ya nna, shanhte gaw dai hpe lanep shatai nna, Babelon mare de la wa na maru ai. ⁶ Nang Pashura hte, na a nta masha ni mahkra mung, bawng rim mat wa ai hkrum na mara ai; nang gaw Babelon mare de du na rin dai; dai yang e nang mung, na a masu ai myihtoi ga madat ai, na a jinghku ni mahkra mung, si wa nna, lup makoi ai hkrum na mara ai, ngu nna shi hpe tsun wu ai. ⁷ Yehowa e, nang ngai hpe shagwi nna, ngai hkamla ni ai; nang gaw ngai hta n-gun grau ja nna dang kau nitdai; ngai gaw shani shanang asawng asang hkrum nna, nlang hte gaw ngai hpe aroi la ma ai. ⁸ Ngai ga tsun shagu shabam nngai: Kashun kashe hte hten byak na lam hkrai, ngai jahtau nngai; Yehowa mungga gaw ngai hta shatan nhkan hte jahpoi shara, shani shagu tai nga ai. ⁹ Dai majaw, Ngai gaw shi a mying hta hpa let, shi a mungga hpe n tsun sa na, ngu nna tsun timung, nye a myit masin hta wan zawn hkru nna, nye a nrut nra ni hta grung nga ai majaw, nye a myit grai gadau gadap nna, n sharang lu nngai. ¹⁰ Masha ni a shatan nhkan ai hpe ngai na lu nngai; shoihpa shoirang shara magup rai nga ai: nye a makyin jinghku ni pyi, Mara shagun mu, anhte shi hpe mara shagun na ga ai; anhte shi hpe lau lu nna, dang kau lu na nhten; shi hpe matai dawp lu nhten, nga nna ngai hpe gyam yu ai ni tsun ma ai. ¹¹ Raitimung Yehowa gaw, gumshem ai share wa zawn ngai hpang maga e rai nga ai: dai majaw ngai hpe zingri zingrat ai ni yawng, n dang lu nna, kadawng mat na mara ai: shanhte gaw myitsu ai hku n hkan ai majaw, grai kaya kahpa hkrum nna, prat dingsa e n malap kau lu hkra, arawng sadang sum na mara ai. ¹² Dinghpring ai ni hpe dinglik yu nna, myit masin hte kraw lawang hpe chye lu ai, Zaw nawng zaw wa up ai Yehowa e, nye a amu hpe na a man e ngai shapraw dan ai majaw, nang shanhte hpe matai dawp ai lam, ngai mu lu n ga. ¹³ Yehowa hpe mahkawn mangoi mu; Yehowa hpe shakawn kungdawn mu; shi gaw n hkru ai ni a lata kaw na, matsan mayan ni a myit masin hpe mawai lu nu ai. ¹⁴ Ngai shangai ai shani dagam dala hkrum mu ga; nye nu ngai hpe shangai ai shani, shaman ai n hkrum mu ga. ¹⁵ Nye wa hpang de sa nna, Nang la kasha lu nitdai, nga nna wa hpe grai kabu shangun ai wa gaw, dagam dala hkrum u ga. ¹⁶ Yehowa myit malai n lu ai, jahten kau ai mare ni zawn, dai wa tai u ga: jahpawt manap e jahtau ai nsen, shani chyingtung e shabam ai nsen, shi na u ga: ¹⁷ kaning rai nme law, shi gaw hkritung nna ngai hpe sat kau ai n rai; dai lam galaw taw gaw, nye nu a kan nye a lup tai wa nna, shi gaw tut na-um nasin rai nga na re ai. ¹⁸ Amu bungli hte yawnhkyen ai hkrum let, nye a nhtoi ni kaya kahpa hte lai wa hkra, ngai hpa majaw shangai wa n ta?

¹ - ² Hkawhkam Zedekia gaw, Malhkia kasha Pashura hte, hkinjawng Masea kasha Zehpania hpe, Yeremia hpang de shangun dat nna, Babelon hkawhkam Nebuhkadneza anhte hpe hpyen gasat nga ai: shi gaw anhte kaw na pru wa lu na matu, Yehowa gaw, shi galaw ai mauhpa amu mahkra hte maren, anhte hta bai galaw dam nhten, anhte a matu Yehowa hpe hpyi tawngban u, nga nna tsun yang, Yehowa kaw na Yeremia hpang de du ai mungga gaw, da ndai rai nga ai: ³ - ⁴ Yeremia mahtang, Nanhte gaw Zedekia hpe ning ngu tsun mu, Israela Karai Kasang Yehowa ning nga ai: Yu u, mare bunghku shinggan e wang tawn ai Babelon hkawhkam hte Hkalde masha ni hpe hpyen gasat na matu, nanhte lang ai hpyen rai ni hpe, ngai shabai kau nna, shanhte hpe ndai mare ka-ang e hpawng nga shangun na nngai. ⁵ Ngai hkum nan, pawt sindawng ai, myit kahtet ai, grai n-yun bu ai hte, ladawn ai lata, n-gun ja ai lahpum hte, nanhte hpe hkap gasat na nngai. ⁶ Ndai mare hta shanu nga ai shinggyim masha hte yamnga ni hpe, ngai sat kau na nngai; dai ni gaw ana zinli kaba hte si na mara ai. ⁷ Bai, Yehowa ning nga ai: Dai hpang e ngai gaw, Yuda hkawhkam Zedekia hpe mung, shi a ali ama ni hpe mung, ana zinli, ri nhtu, kawsi hpang gara ai lawt nna, ndai mare hta naw ngam nga ai mung masha ni hpe mung, Babelon hkawhkam Nebuhkadneza lata hta mung, hpyen ni a lata hta mung, shanhte a asak tam ai ni a lata hta mung ap kau nna, shi gaw shanhte hpe nhtu hte sat kau na mu ai: dai wa gaw lahpawt dum na n rai, matsan dum na n rai; yu machyi dum na n rai, ngu nna htawn tsun wu ai. ⁸ Bai, ndai mung masha ni hpe ning ngu tsun u, Yehowa ning nga ai: Yu u, ngai nanhte a man e asak hte si lam hpaw da nga nngai. ⁹ Ndai mare hta anga nga ai wa gaw, ri nhtu, kawsi hpang gara ai, ana zinli hte si na ra ai; pru wa nna, nanhte hpe wang tawn ai Hkalde masha ni kaw sa shang ai wa chyawm gaw, hkrung nga lu nna, shi a asak lanep zawn, shi a matu tai na ra ai. ¹⁰ Kaning rai nme law, ngai gaw dai mare hpe chyeju galaw na n rai; n kaja ai hkrai galaw na nngai; ngai gaw dai hpe Babelon hkawhkam a lata de ap kau nna, shi dai hpe nat kau na ru ai, nga nna Yehowa tsun ai. ¹¹ Dai hta kaga, Yuda hkawhkam a dap hpe lakap nna, Yehowa tsun ai ga madat mara mu; ¹² Dawi a dap e, Yehowa ning nga ai: jahpawt shagu dinghpring ai hku tara dara mu; kashun kashe hkrum ai wa hpe, zingri ai wa a lata na mawai la mu; shing n rai, nanhte a n hkru ai amu majaw, nye a pawt kahtet ai myit, kadai n sat lu ai wan zawn, hkru na ra ai. ¹³ - ¹⁴ Yehowa ning nga ai: Kadit e dung ai jan e, pa ga e nga ai lunghkrung e, ngai nang hpe hkap daw na nngai: anhte hpe kadai gasat dang lu na i? anhte a buga hta kadai shang lu na rai ta? nga nna nang tsun timung, nanhte a arawn alai hte maren, ngai nang hpe ari jaw na nngai; shi a maling hpe ngai wan nat nna, dai gaw shi a grupyin yawng mayawng hpe hkru kau na ra ai, nga nna Yehowa tsun ai.

¹ Yehowa ning nga ai: Nang gaw Yuda hkawhkam a nta de yu wa nna, ndai ga tsun u; ² Dawi a tingnyang hta dung ai Yuda hkawhkam wa e, nang mung, na a ali ama ni mung, ndai chyinghka hku shang ai, na a amyu masha ni mung, Yehowa a ga madat mara mu. ³ Yehowa ning nga ai: Tara hkan nna dinghpring ai hku galaw mu; kashun kashe hkrum ai wa hpe zingri ai wa a lata na mawai la u; malet nhprang manam wa hpe mung, chyahkrai nmai hpe mung, gaida gaina hpe mung, maw sha ai hte adip arip hkum rai myit; mara n kap ai asai ndai yang e hkum jahkaw kau myit. ⁴ Nanhte ndai lam galaw myit yang gaw, Dawi tingnyang hta dung ai hkawhkam ni ndai nta chyinghka hku shang lu na mara ai; shi mung, shi a ali ama ni mung, shi a amyu masha ni mung, leng hte gumra jawn let shang lu na mara ai. ⁵ Nanhte mahtang ndai ga n madat myit yang gaw, ndai nta gaw katsi katsang shara tai na ra ai, nga nna ngai Yehowa nan nye hkum hpe dagam ni ai. ⁶ Kaning rai nme law, Yehowa gaw Yuda hkawhkam a nta hpe lakap nna ning nga ai: Nang gaw nye a man e Gilead hte Lebanon bum pungding zawn rai nga timung, gaja wa ngai nang hpe nam mali hte masha n nga ai mare ni zawn shatai na de ai. ⁷ Nang hpe shamyit kau na matu, nhtu nwa lang ai hpyen ni hpe ngai san da nna, shanhte gaw na a tsawm htum ai arit hpun ni hpe kran kau nhtawm, wan hta kabai bang kau na mara ai. ⁸ Masha amyu ga daga, ndai mare hku lai sa wa let, Yehowa gaw ndai kaba ai mare hpe, hpa majaw ning rai galaw a ta? nga nna langai hte langai tinang manang shada san na mara ai. ⁹ Shaloi shanhte gaw, Ndai masha ni tinang a Karai Kasang Yehowa a ga shaka kau da nna, hpara kaga ni hpe nawku dawjau ma ai majaw, hkrum ma ai, nga nna htan na mara ai. ¹⁰ Si ai wa a matu hkum hkrap myit; shi a matu sharung shayawt hkum rai myit: pru mat wa ai wa a matu grai hkrap mu; shi bai nhtang wa lu na n rai; shi a dai daw ga hpe bai mu lu na n rai. ¹¹ Kaning rai nme law, kawa Yoshia malai hkaw dung nna, ndai mung na pru mat wa ai, Yuda hkawhkam Yoshia kasha Shalum hpe lakap nna Yehowa ning nga ai: Dai wa gaw bai nhtang wa lu na n rai: ¹² hpyen ni bawng rim wa ai mung hta shi si wa nna, ndai mung hpe bai mu lu na n rai. ¹³ Tinang a nta hpe n ding n hpring ai hku, tinang a ntsa gawk ni hpe hkalem ai hku galaw let, manang wa hpe kaman sha amu galaw shangun nna, shabrai n jaw hkraw ai wa gaw, dingnye lu u ga: ¹⁴ shi gaw, Nta kaba, dam lada ai gawk ni, ngai galaw na nngai, nga nna tsun let, hkuwawt hku waw nna, arit hpun hte galup nhtawm, hkyeng kabrim ai tsi hte chya nu hka! ¹⁵ Nang gaw arit hpun grau lu ai majaw, hkawhkam tai nga n ni? Na nwa gaw lusha nna, dinghpring ai hku dawdan ai, n rai ni? shingrai shi ningngai nga lu ai. ¹⁶ Shi gaw nni nkri hkrum ai ni hte, matsan mayan ni hpe, malang ai hku jeyang ai majaw, ngamu ngamai hkrum nga ai: dai gaw ngai hpe chye chyang ai lam n rai ni? nga nna Yehowa tsun ai. ¹⁷ Na a myi hte myit masin chyawm gaw, lawhpa ai hkrai tam nna, mara n kap ai asai hpe jahkaw kau na hte, adip arip ai, kashun kashe ai hta kaga, hpa amu hpe mung n dum nga ai. ¹⁸ Dai re ai majaw Yehowa gaw, Yuda hkawhkam Yoshia kasha Yehoiakim hpe lakap nna ning nga ai: Dai wa si yang, mung masha ni gaw, Aka, hpu e, ala, jan e, nga nna hkrap na ma ai n rai; bai, shi a matu mung, Aka, madu du e, ala, shi a arawng sadang e, nga nna sharung shayawt na ma ai n rai. ¹⁹ Yerusalem mare chyinghka shinggan de karawt kabai kau nhtawm, lawze hpe lup kau ai zawn, dai wa hpe lup kau na mu ai. ²⁰ Na a jinghku jing-yu ni yawng hten mat hkrum ai majaw, Lebanon bum de lung jahtau u, Bashan mung hta shabam u, Abarim mung e garu u. ²¹ Nang ngamu ngamai nga yang, ngai nang hpe shadum ni ai; nang mahtang, Ngai n madat na nngai, nga nna tsun nitdai. Brang ram kaw nna nye a ga n madat ai, na a lam rai nga lit dai. ²² Na a kanawn manang ni yawng, nbung sha na mara ai; na a makyin jinghku ni bawngdung hkrum na mara ai: gaja wa, na a n hkru n hkra ai lam majaw, nang kaya kahpa hkrum nna mak mat na rin dai. ²³ Arit hpun ni hta tsip tsip ai, Lebanon bum e shanu ai wa e, shinggyim machyi hkrum ai num zawn, nang machyi hkrum yang, matsan mayan gade wa hkrum nga n hka. ²⁴ Yehowa ning nga ai: Yuda hkawhkam Yehoiakim a kasha Hkonia gaw, nye a hkra lata dazik lachyawp rai nga timung, ngai hkrung nga ai hte maren, ngai nang hpe malaw kabai kau na nngai. ²⁵ Na a asak hpe tam ai wa, nang grai hkrit ai wa ngu ai, Babelon hkawhkam Nebuhkadneza hte Hkalde masha ni a lata hta, ngai nang hpe ap kau na de ai. ²⁶ Nang hte nang hpe shangai ai nnu hpe mung, nan a dai daw mung n re ai de, ngai nan hpe shaden kau nna, nan gaw dai yang e si na myit dai. ²⁷ Bai wa mayu katu ai mung de, shan nhtang wa lu na, n rai. ²⁸ Ndai wa Hkonia gaw, n gawn n sawn agrawp kau ai di zawn, rai nga a ni? Kadai n ra ai hka wan zawn, rai nga a ni? Shi hte hpawn, shi a kashu kasha ni hpe, hpa majaw shaden kau nna, shanhte n chye ai mung de kabai kau ai hkrum ma ta? ²⁹ Lamu ga e, lamu ga e, lamu ga e, lamu ga e, Yehowa a ga madat mara u. ³⁰ Yehowa ning nga ai: Ndai wa hpe, Kasha n lu ai wa, shi a prat hta n awng ai wa, ngu nna ka matsing u: kaning rai nme law, htawmhpang e shi kashu kasha langai mi muk, galu kaba wa nna, Dawi tingnyang hta dung let, Yuda mung hpe up lu na, n rai.

¹ Yehowa ning nga ai: Nye udat shara hta sha nga ai sagu hpung ni hpe, jahten shabra kau ai sagu rem ni gaw, dingnye nga ma ai. ² Dai majaw Israela Karai Kasang Yehowa gaw, nye a amyu masha ni hpe bau ai sagu rem ni hpe lakap nna ning nga ai: Nanhte gaw nye a sagu hpung hpe n kawan yu ai, shabra kau nna shaden kau mu ai majaw, nanhte a n hkru ai amu hte maren, ngai nanhte hpe kawan yu na nngai, nga nna Yehowa tsun ai. ³ Raitimung, ngai shapraw kau ai mung shagu hta, naw ngam nga ai, nye a sagu ni hpe, ngai shinggyin la nna, tinang a ulawng de bai woi wa na nngai: dai yang e, shanhte mayat maya wa nna, law htam wa na mara ai. ⁴ Shanhte hpe bau na sagu rem ni, ngai shanhte a ntsa e tawn da nna, shanhte htawmhpang e hkrit kajawng nna mak mat na n rai; langai mi muk mat mat na n rai, nga nna Yehowa tsun ai. ⁵ Yehowa ning nga ai: yu u, Dawi a matu dinghpring ai Makrung ngai shatut ai aten du na ra ai: dai wa gaw, nyan rawng nna hkawhkam zawn up na hte, mungdan hta dinghpring ai hku dawdan na ra ai. ⁶ Shi a prat hta Yuda mung hkyehkrang la ai hkrum nna, Israela gaw asim sha nga lu na ra ai: da ndai gaw, Anhte a dinghpring Madu Yehowa, ngu nna shi hpe shamying ai amying rai nga ai. ⁷ - ⁸ Dai rai nna, yu u, Yehowa ning nga ai: Israela kashu kasha ni hpe Egutu mung na shapraw woi wa ai Yehowa hkrung nga ai hte maren, nga nna n dagam ai sha, Israela kashu kasha ni hpe dingdung mung hte shanhte hpe shaden kau ai mung yawng kaw na, bai dun woi wa ai Yehowa hkrung nga ai hte maren, nga nna dagam ai aten du na ra ai: shanhte gaw tinang mung hta bai shanu nga na mara ai. ⁹ Myihtoi ni hte seng ai mungga: Nye a myit masin gaw nye a kraw e run mat wa nna, nye nrut nra ni yawng, gari nga ma ai; Yehowa majaw mung, shi a chyoi pra ai mungga majaw mung, ngai gaw chyaru nang ai wa hte, tsabyi jahku majaw ndi nda hkawm ai wa hte bung nga nngai. ¹⁰ Kaning rai nme law, mungdan ting numshaw lashaw ai ni hpring chyat nga ma ai; matsa mawa ga majaw, mungdan yawn nga ai; nam mali na udat shara ni, ahkun ahkraw rai nga ai: mung masha ni hkan shachyut ai lam gaw n shawp ai rai nga ai; shanhte a n-gun atsam gaw tara maga de nga ai n rai. ¹¹ myihtoi wa mung, hkinjawng wa mung, n san n seng rai nga ma ai; nye nta hta pyi, shanhte a n se ai amu hpe, ngai mu hkrup ni ai, nga nna Yehowa tsun ai. ¹² Dai re ai majaw shanhte a lam gaw, nsin hta manen ai lam zawn tai nna, shanhte kanawng dat ai hkrum ai hte, kataw na mara ai: ngai gaw shanhte hpe kawan katsan yu ai shaning hta, shanhte a ntsa e tsin-yam tsindam shapraw na nngai, nga nna Yehowa tsun ai. ¹³ Samari mung na myihtoi ni hta n htuk ai lam ngai mu nngai; shanhte gaw Bala hpe gang let, myihtoi htoi nna, nye a amyu Israela hpe lam dam shangun mu ai. ¹⁴ Yerusalem mare na myihtoi ni hta mung, matsat shabat amu ngai mu nngai: shanhte numshaw nna, masu ai lam hkannang ma ai; kadai mung tinang a shut hpyit ai hta na myit malai n lu hkra, shanhte gaw shut hpyit ai ni a lata hpe n-gun shaja ya mu ai; shanhte nlang hte gaw nye a man e Sodom zawn, mare masha ni gaw Gomora zawn, tai ma ai. ¹⁵ Dai re ai majaw Zaw nawng zaw wa up ai Yehowa gaw, myihtoi ni hpe lakap nna ning nga ai: Yerusalem myihtoi ni kaw na, tara n hkungga ai htung, mung ting hta pri rai wa sai majaw, yu u, ngai shanhte hpe lashi pila sha shangun nna, gung hte kayau ai ntsin lu shangun na nngai. ¹⁶ Zaw nawng zaw wa up ai Yehowa ning nga ai: Myihtoi htoi nna, nanhte hpe hkaw tsun ai myihtoi ni a ga hpe hkum madat myit; shanhte gaw nanhte hpe kaman lila hkaw tsun ma ai: Yehowa n-gup hta na pru ai mungga n rai, tinang myit hta na pru ai shingran hkrai, hkaw tsun ma ai. ¹⁷ Shanhte gaw, Yehowa ga tsun sai, nanhte ngwi pyaw nga lu na myit dai, nga nna ngai e n kaw n law di ai ni hpe, tut tut hkaw tsun ma ai; tinang myit ja ai hku hkan ai ni yawng hpe, Nanhte ari ahpri hkrum na n rai, nga nna tsun ma ai. ¹⁸ Yehowa mungga matsing lu nna chye na lu hkra, shi hte kadai bawng yu a ta? shi a ga hpe dum nna chye na lu ai wa gaw, kadai wa rai ta? ¹⁹ Yu u, Yehowa pawt bu ngu ai bungsha gaw, pru wa sai; dai gaw ja la ai bungsha rai nga nna, tara n lang ai ni a baw ntsa e ahpawt na ra ai. ²⁰ Yehowa pawt bu ai gaw, shi myit mamyit hte maren, garai n ngut n dik dingsa, sim wa na n rai: nanhte gaw htawmhpang e dai lam leng leng chye lu na myit dai. ²¹ Ndai myihtoi ni hpe ngai n shangun timung, shanhte gat masai; ngai shanhte hpe ga n tsun timung, shanhte myihtoi htoi ma ai. ²² Shanhte ngai hte bawng taw gaw, shanhte gaw nye a amyu masha ni hpe nye a ga na shangun nna, shanhte a n hkru ai lam hta na mung, shanhte a shut hpyit ai amu hta na mung, shanhte hpe shabai la na mu ai. ²³ Ngai gaw ni ai shara e hkrai, Karai Wa rai nga n ni? Tsan ai shara e mung Karai Wa rai nga nngai, n rai ni? nga nna Yehowa tsun ai. ²⁴ Ngai n mu lu hkra, shim ai shara hta kadai wa makoi nga lu a ta? nga nna Yehowa tsun ai. Ngai gaw sumsing lamu hte ginding aga hpe jahpring lu ai n rai ni? nga nna Yehowa tsun ai. ²⁵ Ngai yupmang mu ni ai, yupmang mu ni ai, nga nna nye a mying gang let masu ai hku htoi ai myihtoi ni a ga hpe ngai na ni ai. ²⁶ Masu ga htoi nna, tinang myit hkan ai myihtoi ni gaw, gaten du hkra dai zawn galaw na ma ta? shanhte gaw tinang myit hkan nna, hkalem ai hku htoi ai myihtoi ni rai nga ma ai: ²⁷ kaji kawa ni gaw Bala amying majaw, nye a mying hpe malap kau ai hte maren, shanhte gaw kanawn manang ni hpe hkai dan ai yupmang ni hte, nye a amyu masha ni hpe, nye a amying malap kau shangun na maw ma hka. ²⁸ Yup mang mu ai myihtoi gaw, yupmang hkai dan u ga; nye ga hkamla ai wa gaw, tengman ai hku htawn tsun u ga: yi hku gaw mam hte kaning rai kayau lu a ta? nga nna Yehowa tsun ai. ²⁹ Nye a mungga gaw wan zawn, nlung dup ai sumdu zawn, rai nga ai, n rai ni? nga nna Yehowa tsun ai. ³⁰ Dai rai nna, yu u, kanawn manang wa kaw na nye a mungga hpe lagu la ai myihtoi ni hpe, ngai hkap daw na nngai, nga nna Yehowa tsun ai. ³¹ Yu u, tinang a shinglet shamu shamawt nhtawm, Shi ning nga ai, nga nna tsun ai myihtoi ni hpe ngai hkap daw na nngai, nga nna Yehowa tsun ai. ³² Yu u, masu ai yupmang hkai dan nna, tinang a masu ga hte kaman lila grang ai ga majaw, nye amyu masha ni hpe lam dam shangun ai myihtoi ni hpe, ngai hkap daw na nngai: ngai shanhte hpe shangun ai, n rai, hkangda ai mung, n rai; shanhte gaw ndai amyu a matu, akyu n nga ai, nga nna Yehowa tsun ai. ³³ Ndai amyu raitimung, myihtoi wa raitimung, hkinjawng wa raitimung, Yehowa kaw na shingran hpa rai ta? nga nna nang hpe san yang, nang gaw, shingran da ndai rai nga ai: Ngai nanhte hpe kabai kau na nngai, nga nna Yehowa tsun ai, ngu nna shanhte hpe htan mu. ³⁴ Yehowa a Shingran, nga nna tsun ai myihtoi wa, hkinjawng wa, amyu masha kadai hpe mung, shi hte shi a nta hpe, ngai ari jaw na nngai. ³⁵ Nanhte langai hte langai, Yehowa kaning nga htan a ta? Yehowa hpa lam tsun a ta? nga nna htingbu wa hte kahpu kanau shada san mai nga ai. ³⁶ Yehowa shingran, nga nna htawmhpang de tsun lu na, n rai: kaning rai nme law, nanhte gaw, ahkrung nga ai Karai Kasang, Zaw nawng zaw wa up ai, anhte a Karai Kasang Yehowa ga hpe manai kau ai majaw, langai hte langai a ga gaw, tinang a shingran tai na ra ai. ³⁷ Yehowa nang hpe kaning nga htan a ta? Yehowa hpa tsun a ta? ngu nna myihtoi wa hpe san mai ai. ³⁸ Nanhte mahtang, Yehowa Shingran, nga myit yang gaw, Yehowa ning nga ai: Yehowa Shingran, nga nna n tsun mai ai lam, ngai nanhte hpe htet da timung, nanhte gaw, Yehowa Shingran naw tsun myit dai majaw, Yu mu, ngai nanhte hpe atsai awai malap kau nna, nanhte hte nji nwa ni hpe ngai jaw da ai mare hpe, nye myiman kaw na kabai kau na nngai: ⁴⁰ tutnawng n malap kau lu ai, prat dingsa shatan nhkan hte kaya kahpa, ngai nanhte a ntsa e shapraw na we ai.

¹ Yehowa ngai hpe madun ai gaw: Yu u, Babelon hkawhkam Nebuhkadneza gaw, Yuda hkawhkam, Yehoiakim a kasha Yehkonia hte, Yuda agyi salang ni, lasama ni, ndup ni hpe, Yerusalem kaw nna, Babelon mung de rim woi wa ai hpang, Yehowa Htingnu ndaw e lakum si rawng ai ka lahkawng ngai mu nngai. ² Ka langai mi hta, shawng myin ai, lakum si zawn, ja ai lakum si rawng nga ai; langai mi hta gaw, grai n ja ai, n sha mai ai lakum si rawng nga ai. ³ Shaloi Yehowa gaw, Yeremia e, nang hpa mu n ta? nga nna ngai hpe san yang, Ngai gaw, Lakum si mu nngai; ja ai lakum si gaw grai ja nga ai: n ja ai lakum si gaw, n sha mai hkra, grai n ja nga ai, ngu nna htan we ai. ⁴ - ⁵ Shaloi Yehowa mungga ngai kaw du nna, Israela Karai Kasang Yehowa ning nga ai: Ndai shara kaw na, Hkalde mung de ngai shangun dat nna, bawngdung hkrum ai Yuda masha ni hpe, ndai ja ai lakum si zawn, ngai nawn na nngai. ⁶ Ngai gaw shanhte hpe kaja ai hku matsing nna, ndai mung de bai wa shangun na nngai: htawmhpang de n run kau ai, shanhte hpe dè da na nngai; n baw kau ai, hkai da na nngai. ⁷ Ngai Yehowa rai nga ai hpe, shanhte chye lu na myit, ngai shanhte hpe jaw na nngai: shanhte gaw tinang myit masin mahkra hte, ngai hpang de kayin wa ai majaw, shanhte gaw nye a amyu, ngai gaw shanhte a Karai Kasang, tai na nngai. ⁸ Bai, Yuda hkawhkam Zedekia, shi a agyi salang ni, ndai mung hta naw ngam nga ai Yerusalem masha ni hte, Egutu mung e sa shingbyi ai ni hpe, n sha mai hkra, n ja ai lakum si zawn, ngai kau da na nngai: ⁹ ga ntsa e mungdan ni mahkra hta, dumbru dumbra hkrum ai du hkra, ngai shanhte hpe ap kau na nngai; ngai shanhte hpe shaden kau ai shara shagu hta, shanhte gaw, shatan nhkan shara, bung shadawn shara, asawng asang shara hte dagam dala shara tai na mara ai. ¹⁰ Shanhte hte kaji kawa ni hpe ngai jaw da ai mungdan hta na, shamyit kau ai du hkra, ngai shanhte hpang de, ri nhtu, kawsi hpang gara ai hte ana zinli shangun dat na nngai, nga nna Yehowa tsun ai.

¹ Yuda hkawhkam, Yoshia kasha Yehoiakim hkaw dung ai mali ning, Babelon hkawhkam Nebuhkadneza hkaw dung ai langai ning hta e, Yuda mung masha ni mahkra hpe lakap nna Yeremia kaw du ai ga da ndai rai nga ai: ² - ³ myihtoi Yeremia gaw ndai ga hpe Yuda mung masha ni hte Yerusalem masha ni mahkra hpe htawn tsun nna, Yuda hkawhkam Amon a kasha Yoshia hkaw dung ai shi masum ning kaw nna, dai ni du hkra, hkun masum ning tup, Yehowa mungga ngai kaw du ai hte maren, ngai gaw jau jau rawt nna, nanhte hpe atit anang htawn tsun timung, nanhte n madat myit dai. ⁴ Yehowa mung jau jau rawt nna, shi a shangun ma myihtoi ni mahkra hpe nanhte hpang de shangun dat timung, nanhte n madat myit dai, na mung n na la myit dai. ⁵ Dai myihtoi ni gaw, Langai hte langai tinang a n hkru ai lam hte, n shawp ai arawn alai hta na, kayin wa nna, nanhte hte nanhte a nji nwa ni hpe, prat tup jaw lup, Yehowa jaw da ai mungdan hta shanu nga mu: ⁶ hpara kaga ni hpe hkum dawjau, hkum nawku myit; tinang lata e galaw ai arai hte, ngai hpe hkum pawt bu shangun myit; shingrai ngai nanhte hpe zingri na n rai, nga nna htawn tsun ma ai. ⁷ Yehowa ning nga ai: Shingrai htawn tsun timung, nanhte gaw tinang akyu jahten na matu, tinang lata e galaw ai amu hte ngai hpe pawt bu shangun hkra, nye a ga hpe n madat myit dai. ⁸ - ⁹ Dai re ai majaw, Yu mu, ngai gaw dingdung mung na amyu ni mahkra hpe sa jahpawng la nna, shanhte hpe nye a shangun ma, Babelon hkawhkam Nebuhkadneza hpang de shangun dat nna, shanhte gaw ndai mung hte, de a mung masha ni mahkra hpe mung, grupyin e nga ai amyu ni mahkra hpe mung, lung gasat nhtawm, ngai shanhte hpe atsai awai jahtum kau nna, mak mat ai shara, hkrithpa shara hte prat dingsa katsi katsang shara shatai kau na nngai. ¹⁰ Dai hta n-ga, shanhte hta na kabu gara ai a nsen, num ningnan a nsen, htumrin rin ai nsen hte pyengdin a nhtoi hpe, ngai jasim kau na we ai. ¹¹ Ndai mung ting katsi katsang hte mauhpa shara tai na ra ai: ndai amyu ni gaw sanit shi ning tup Babelon hkawhkam a mayam ni tai na mara ai, nga nna Yehowa tsun ai. ¹² Bai Yehowa ning nga ai: Sanit shi ning ladu hkrum yang, ngai gaw Babelon hkawhkam hte, shi a amyu ngu ai Hkalde mung a yubak majaw, shanhte hpe ari jaw nna, dai mungdan hpe prat dingsa katsi katsang shara shatai na nngai. ¹³ Maigan amyu ni mahkra hpe lakap nna, Yeremia myihtoi htoi ai hte, ndai laika hta ka da mada hte maren, ndai mungdan hpe shaang ai, nye a ga mahkra hpe ngai shadik na nngai: ¹⁴ kaning rai nme law, amyu law law hte hkawhkam kaba ni gaw, Hkalde masha ni hpe pyi mayam yam na mara ai; shanhte a arawn alai hte, tinang hkum nan galaw ai amu hte maren, ngai matai dawp na nngai. ¹⁵ Kaning rai nme law, Israela Karai Kasang Yehowa ngai hpe ning nga ai: Ndai pawt sindawng ngu ai tsabyi gawm, nye a lata na hkapla nna, ngai nang hpe kawan yu shangun ai amyu ni mahkra hpe lu shangun u: ¹⁶ shanhte mung lu nna, ngai shanhte hpang de shangun ai nhtu majaw, ndi nda hkawm let nang na mara ai. ¹⁷ Shaloi ngai gaw Yehowa lata na, dai gawm hpe hkapla nna, Yehowa ngai hpe kawan yu shangun nngai. ¹⁸ - ²⁶ Dai amyu ni chyawm gaw: Dai ni rai nga ai hte maren, katsi katsang shara, mauhpa shata, hkrithpa shara hte dagam dala shara tai na matu, Yerusalem mare hte Yuda mung na mare ni, de a hkawhkam ni hte agyi salang ni yawng; Egutu hkawhkam Hpara-u hte, shi a ali ama ni, agyi salang ni, mung masha ni yawng; hkang kayau amyu ni mahkra hte, Uza mung na hkawhkam ni yawng; Hpilisti mung hte, Ashkelon, Gaza, Ekron hte naw ngam nga ai Ashdod masha ni a hkawhkam ni yawng; Edom, Moba hte Ammon kashu kasha ni yawng, Turu hkawhkam ni yawng, Sidon hkawhkam ni yawng, nammukdara wora hkran de nga ai zunlawng ni a hkawhkam ni yawng; Dedan, Tema, Buza hte, na labying kara doi ai amyu ni a hkawhkam ni yawng; Arabi hkawhkam ni yawng, nam mali e nga ai, hkang kayau amyu ni a hkawhkam ni yawng; Zimri hkawhkam ni yawng Elam hkawhkam ni yawng, Medi hkawhkam ni yawng; langai hte langai, ni ai tsan ai, dingdung mung na hkawhkam ni mahkra hte, mungkan ting hta nga ai, maigan mungdan ni yawng, rai nga ma ai: mahkra a hpang jahtum e Sheshak hkawhkam mung lu na ra ai. ²⁷ Israela Karai Kasang Zaw nawng zaw wa up ai Yehowa ning nga ai, Nanhte hpang de ngai shangun ai nhtu majaw, lu mu, nang mu, madawn mu, kataw nna hkum rawt myit, ngu nna shanhte hpe htawn tsun mu. ²⁸ Shanhte gaw lu na matu na a lata na dai gawm hpe n hkapla hkraw yang, nang gaw, Zaw nawng zaw wa up ai Yehowa ning nga ai, Nanhte teng teng lu lu na myit dai; ²⁹ nye a amying mying ai mare hpe ngai ari jaw hpang yang, nanhte gaja wa lawt lu na myit ni? nanhte lawt lu na n rai; ga ntsa ting hta nga ai ni mahkra ntsa e, ngai nhtu shapraw na nngai, nga nna Zaw nawng zaw wa up ai Yehowa tsun ai, ngu nna shanhte hpe htawn tsun mu. ³⁰ Dai re ai majaw nang myihtoi htoi let, Yehowa gaw matsaw de na shabam nna, shi a chyoi pra ai shara na nsen sharawt na ra ai; shi gaw shi a udat shara hpe shaang nna, aja awa shabam na ra ai; ga ntsa e nga ai ni mahkra a lam, tsabyi si kabye ai ni zawn, jahtau na ra ai. ³¹ Ngoi kadu ai gaw, lamu ga htum hkra chyam na ra ai; kaning rai nme law, Yehowa gaw masha amyu ni hte dangrang hkat nga ai; shi gaw hkrung mahkrung hpe tara dara na ra ai; tara n lang ai ni hpe nhtu jahkrum na ra ai, nga nna Yehowa tsun ai, ngu nna ndai ga mahkra shanhte hpe htawn tsun mu. ³² Zaw nawng zaw wa up ai Yehowa ning nga ai: Yu mu, amyu mi hte amyu mi hta, tsin-yam tsindam kap na ra ai; ga ntsa jahtum de na, bungsha kaba rawt pru na ra ai. ³³ Dai shani e, Yehowa lata hte sat kau hkrum ai ni gaw, lamu ga maga mi kaw nna maga mi du hkra, jawng na mara ai; shanhte hpe sharung shayawt na n rai; hta na mung n rai, lup makoi na mung n rai; ga ntsa e namhpun tai na mara ai. ³⁴ Sagu rem ni e, hkrap shabam mu; grau reng ai sagu ni e, dap hta galu nga mu: nanhte hpe sat kau na hte shabra kau na aten du ra ai rai nna, nanhte gaw hpu ai arai zawn, tai na marin dai. ³⁵ Sagu rem ni hprawng na lam n nga ai, grau reng ai sagu ni lawt na lam n mu ma ai. ³⁶ Yehowa pawt sindawng ai majaw, ngwi pyaw ai ulawng ni atsin sha rai mat sai. ³⁸ Shi gaw hkanghkyi zawn shi a wuyup kau da nu ai; shanhte a mungdan gaw, adip arip re ai nhtu hte, shi a pawt sindawng ai majaw, mauhpa shara tai mat sai.

¹ - ² Yuda hkawhkam, Yoshia kasha, Yehoiakim hkaw dung hpang ai shaning hta, Yehowa mungga du nna, Yehowa ning nga ai: Yehowa nta a wing kata e sa tsap nna, nawku na matu, Yehowa nta hta sa shang ai Yuda mare masha ni mahkra hpe ngai nang hpe htet da ai ga yawng, hkaw mi n shayawm ai, htawn tsun mu. ³ Shanhte a n hkru ai amu majaw, ngai shanhte hpe jaw na maw ai ari dawm la hkra, shanhte madat mara nna, langai hte langai tinang a n hkru ai lam hta na kayin wa dam m nhten. ⁴ - ⁶ Bai shanhte hpe, Yehowa ning nga ai: Nanhte ngai hpe n madat ai hte, nanhte hpe ngai jaw da ai tara n hkan, ngai jau jau rawt nna, nanhte hpang de shangun dat ai, nye a shangun ma myihtoi ni a ga hpe n madat ai zawn, ya mung n madat ai rai yang, ndai nta hpe Shilo zawn, ndai mare hpe ga ntsa amyu ni mahkra a man e dagam dala shara ngai shatai na nngai, ngu nna tsun mu, nga ai. ⁷ Yeremia gaw Yehowa nta kata e ndai ga tsun nga ai hpe, hkinjawng ni, myihtoi ni hte mung masha ni yawng na ma ai. ⁸ Ya, mung masha ni mahkra hpe htawn tsun na matu, Yehowa htet da ai ga yawng, Yeremia tsun ngut jang, hkinjawng ni, myihtoi ni hte mung masha ni gaw, shi hpe rim la nna, Nang teng teng si lu na ndai. ⁹ Ndai nta gaw Shilo zawn, ndai mare gaw, masha n nga ai, katsi katsang shara tai na ra ai, nga nna Yehowa mying gang let, nang hpa majaw htoi n ta? nga nna, mung masha ni yawng, Yehowa nta kata e Yeremia hpang de zuphpawng nga ma ai. ¹⁰ Ya Yuda agyi salang ni gaw, ndai amu a lam na jang, shanhte gaw htingnu de na, Yehowa nta de lung wa nna, Yehowa nta na nnan chyinghka lam kata e dung nga ma ai. ¹¹ Shaloi hkinjawng ni hte myihtoi ni gaw, Ndai wa gaw si ging ai wa rai nga ai; nanhte na lu ai hte maren, shi gaw, ndai mare hpe nhtan shai ai hku htoi nu ai, ngu nna, agyi salang ni hte mung masha ni mahkra hpe tsun dan mu ai. ¹² Shaloi Yeremia gaw, Nanhte na ai ga mahkra gaw, ndai nta hte ndai mare hpe nhtan shai ai hku tsun na matu, Yehowa ngai hpe shangun dat ni ai. ¹³ Dai re ai majaw, nanhte a lam hte arawn alai kau da nna, nanhte a Karai Kasang Yehowa nsen hpe madat mara mu; shingrai Yehowa gaw, nanhte hpe lakap nna tsun ai ari ahpri dawm la na ra ai. ¹⁴ Ngai chyawm gaw, nanhte a lata hta rai nga nngai; ngai hpe galaw mayu ai hte maren galaw mi. ¹⁵ Raitimung, ngai hpe sat kau myit yang gaw, mara n kap ai asai, nanhte a ntsa e mung, ndai mare a ntsa e mung, mare masha ni a ntsa e mung, du na ra ai, teng teng chye nga mu; ndai ga mahkra nanhte a man e tsun na matu, Yehowa ngai hpe gaja wa shangun dat ni ai, ngu nna agyi salang ni hte mung masha ni mahkra hpe tsun dan mu ai. ¹⁶ Shaloi agyi salang ni hte mung masha ni mahkra gaw, Ndai wa si ging ai wa n rai; shi gaw anhte a Karai Kasang Yehowa mying gang let, anhte hpe tsun mi ai, ngu nna hkinjawng ni hte myihtoi ni hpe tsun mu ai. ¹⁷ - ¹⁸ Shaloi mung masha ni a salang ni nkau mi gaw rawt nna, zuphpawng nga ai masha ni mahkra hpe, Yuda hkawhkam Hezekia aprat e, Morasni masha Mihka gaw, myihtoi htoi let, Zaw nawng zaw wa up ai Yehowa ning nga ai: Ziun gaw hkauna zawn galau ai hkrum na ra ai; Yerusalem gaw ga sumpum tai na ra ai; de a nta bum gaw, nam mali na kawng ni zawn, tai mat na ra ai, ngu nna Yuda mung masha ni mahkra hpe hkaw tsun mu ai. ¹⁹ Yuda hkawhkam Hezekia hte, Yuda mung masha ni gaw, dai myihtoi wa hpe sat ma ni? Shi gaw Yehowa hpe hkrit hkungga let, Yehowa hpe tawngban nga ai, n rai ni? Yehowa mung, shanhte hpe lakap nna tsun ai ari ahpri dawm la nu ai, n rai ni? Anhte chyawm gaw tinang akyu hten hkra, n hkru ai amu kaba galaw maw ga hka, ngu nna tsun mu ai. ²⁰ Raitimung, Kiriat-yerim mare na, Shemia kasha, Uria gaw, Yehowa mying gang let, myihtoi htoi nna, ndai mare hte mungdan hpe lakap nna, Yeremia tsun ai ga mahkra hte maren, htoi nga ai: ²¹ ya hkawhkam Yehoiakim hte, shi a share ninghkrin ni, agyi salang ni yawng, dai ga na jang, shi hpe sat kau na, hkawhkam wa tam nga ai; Uria chyawm gaw dai lam na jang, hkrit nna, Egutu mung de hprawng mat wa ai: ²² - ²³ shingrai hkawhkam Yehoiakim gaw, Akbora kasha Elnahtan hte rau masha nkau mi hpe Egutu mung de shangun dat nna, shanhte gaw Uria hpe Egutu mung na shapraw la nhtawm, hkawhkam Yehoiakim hpang de shashawn mu ai; hkawhkam wa gaw shi hpe nhtu hte sat kau nna, shi a moi mang hpe yu maya ni a lupwa hta kabai kau nu ai. ²⁴ Ya Shahpan a kasha Ahikam gaw, Yeremia hpe karum ai majaw, sat kau na matu, mung masha ni a lata hta, ap kau hkrum ai n rai.

¹ - ² Yuda hkawhkam, Yoshia kasha, Zedekia hkaw dung hpang ai shaning hta e, Yehowa kaw na ndai mungga gaw Yeremia hpang de du nna, Yehowa ngai hpe ning nga ai: Sumri hte kandang ni hpe galaw nna na a du hta gali u; ³ bai, dai sumri hte kandang ni hpe, Yuda hkawhkam Zedekia hpang de, Yerusalem mare de sa du ai kasa ni a lata hta, Edom hkawhkam, Moba hkawhkam, Ammon kashu kasha ni a hkawhkam, Turu hkawhkam, Sidon hkawhkam hpang de shangun dat u: ⁴ dai kasa ni gaw tinang a madu ni hpe ning ngu tsun mu ga: Israela Karai Kasang Zaw nawng zaw wa up ai Yehowa ning nga ai, Nanhte a madu ni hpe ning ngu tsun mu: ⁵ Ngai gaw, nye a n-gun lapyin kaba hte, nye a lahpum shada let, ginding aga hpe mung, de a ntsa e shanu nga ai shinggyim masha hte yamnga mahkra hpe mung, hpan da nna, ngai jaw mayu ai ni kadai hpe mung, jaw nngai. ⁶ Ya ndai mung ni yawng hpe, nye a shangun ma Babelon hkawhkam Nebuhkadneza a lata de ngai ap kau ni ai; shi hpe dawjau na matu, pa ga na ashu ashan ni hpe mung, ngai ap ya ni ai. ⁷ Shi a mungdan htum ai aten du hkra, masha amyu baw ni yawng, shi hpe mung, shi a kasha hpe mung, shi a kashu hpe mung, dawjau nna, shi a mungdan htum yang, amyu baw law law hte hkawhkam kaba ni, shi hpe mayam yam na mara ai. ⁸ Yehowa ning nga ai, Babelon hkawhkam Nebuhkadneza hpe, n dawjau mayu ai hte, ndai hkawhkam a kandang hpe, n hpai hkraw ai amyu hte mungdan hpe shi a lata hta, jahtum kau na matu, ri nhtu, kawsi hpang gara ai, ana zinli hte ngai ari jaw na nngai. ⁹ Dai rai nna, Nanhte gaw Babelon hkawhkam hpe dawjau na myit dai n rai, nga nna nanhte hpe tsun ai, myihtoi ni, shaba wawt ai ni, yupmang mu ai ni, mandan bau ai ni hte gumhpan hpan ai ni a ga hpe hkum madat myit: ¹⁰ nanhte a mungdan hta na nanhte hpe tsan tsan de htawt kau nna, nanhte htum mat na matu, ngai nanhte hpe shaden kau hkra, shanhte gaw masu ai ga hkrai, nanhte hpe htoi ma ai. ¹¹ Babelon hkawhkam a kandang hpe gunhpai nna, shi kaw yam ai amyu hpe, tinang a mung hta ngai nga nga shangun nna, shanhte gaw dai hta galaw sha nna, shanu nga na mara ai, nga nna Yehowa tsun ai. ¹² Bai ngai gaw, dai ga mahkra Yuda hkawhkam Zedekia hpe tsun nna, Babelon hkawhkam a kandang hpe hpai mu: shi hte shi a amyu masha ni hpe dawjau nna, hkrung nga mu. ¹³ Babelon hkawhkam hpe n dawjau mayu ai amyu hpe lakap nna, Yehowa tsun da sai hte maren, nang hte na a amyu masha ni gaw, ri nhtu, kawsi hpang gara, ana zinli hte, hpa majaw si mayu myit ta? ¹⁴ Nanhte gaw Babelon hkawhkam hpe dawjau na myit dai n rai, nga nna nanhte hpe tsun ai myihtoi ni a ga hpe hkum madat myit: shanhte gaw masu ai ga hkrai nanhte hpe htoi ma ai. ¹⁵ Ngai shanhte hpe shangun dat ai n rai; nanhte hte nanhte hpe htoi ya ai myihtoi ni hte hpawn, ngai shaden kau nna, nanhte rau hten mat na matu, shanhte gaw nye a mying gang let, masu ai ga hkrai htoi ma ai, nga nna Yehowa tsun ai. ¹⁶ Bai ngai gaw, hkinjawng ni hte mung masha ni hpe, Yehowa ning nga ai: Yu mu, gade n na yang, Yehowa nta na wan ni hpe, Babelon mare na la wa lu na ra ai, nga nna nanhte hpe tsun ai myihtoi ni a ga hpe, hkum madat myit; shanhte gaw masu ai ga hkrai, nanhte hpe htoi ma ai. ¹⁷ Shanhte a ga hpe hkum madat myit; Babelon hkawhkam hpe dawjau nna hkrung nga mu; ndai mare hpa majaw katsi katsang shara tai na rai ta? ¹⁸ Raitimung, shanhte myihtoi teng nna, Yehowa mungga hkamla ai rai yang gaw, Yehowa nta hta mung, Yuda hkawhkam a htingnu hte Yerusalem mare hta naw ngam nga ai wan ni hpe, Babelon mare de n la wa lu na lam, Zaw nawng zaw wa up ai Yehowa hpe, shanhte ya tawngban mu ga. ¹⁹ - ²² Kaning rai nme law, Babelon hkawhkam Nebuhkadneza gaw, Yuda hkawhkam Yehoiakim a kasha Yehkonia hte, Yuda mung hte Yerusalem mare na arawng lu ai ni mahkra hpe, Yerusalem na Babelon mare de rim woi wa yang, ndai mare hta naw jahti da ai shadaw ni, hkalawng, shadun ni hte naw ngam nga ai wan ni hpe lakap nna, Israela Karai Kasang Zaw nawng zaw wa up ai Yehowa ning nga ai: Yehowa nta e, Yuda hkawhkam a htingnu e, Yerusalem mare e naw nga ai wan ni hpe, Babelon mare de la wa na ra ai; ngai kawan katsan yu ai shani du hkra, dai mare hta nga nga na ra ai; shaloi e dai rai ni hpe ngai la wa nna, ndai shara hta bai tawn da na nngai, nga nna Yehowa tsun ai, nga ai.

¹ - ² Dai shaning ngu ai, Yuda hkawhkam Zedekia hkaw dung hpang ai, mali ning, shata manga hta e, Gibeon masha Azura kasha myihtoi Hanania gaw, Israela Karai Kasang, Zaw nawng zaw wa up ai Yehowa ning nga ai, Ngai gaw Babelon hkawhkam a kandang hpe agrawp kau ni ai. ³ Babelon hkawhkam Nebuhkadneza gaw, ndai shara e kashun la nna, Babelon mare de la mat wa ai, Yehowa nta na arai ni hpe, ni ning laman e ndai shara de ngai bai la wa na we ai: ⁴ dai hta n-ga, Babelon mare de rim mat wa hkrum ai, Yuda bawngdung ni mahkra hte hpawn, Yuda hkawhkam Yehoiakim a kasha Yehkonia hpe ndai shara de ngai woi wa na nngai; ngai gaw Babelon hkawhkam a kandang hpe agrawp kau na nngai, nga nna, Yehowa nta kata e, hkinjawng ni hte mung masha ni mahkra a man e ngai hpe tsun ai. ⁵ Shaloi myihtoi Yeremia gaw, Yehowa nta kata e tsap nga ai hkinjawng ni hte mung masha ni mahkra a man e, myihtoi Hanania hpe htan wu ai; ⁶ myihtoi Yeremia gaw, Amen, Yehowa dai lam galaw u ga; Yehowa nta na arai ni hte hpawn, Babelon mare e bawngdung ai ni nlang hte hpe ndai shara e bai woi wa nna, nang htoi ya ai myihtoi ga, Yehowa shadik u ga. ⁷ Raitimung, nang hte hpawn, mung masha ni mahkra hpe, ya ngai tsun ai ga hpe madat u: ⁸ Ngai hte nang garai n nga yang, moi shawng na myihtoi ni gaw, mung law law hte, kaba la ai mungdan ni hpe lakap nna, hpyen majan, shoihpa shoirang hte ana zinli pru na lam htoi ma ai. ⁹ Ngwi pyaw lam htoi ai myihtoi nga yang, shi a ga dik wa ai shaloi jang, gaja wa shi gaw Yehowa shangun dat ai myihtoi nan rai nga ai, danpru na ra ai, ngu wu ai. ¹⁰ - ¹¹ Shaloi myihtoi Hanania gaw, myihtoi Yeremia du na kandang hpe la nna, gang kaw kau let, Yehowa ning nga ai, Dai hte maren ngai gaw, amyu baw ni mahkra a du hta, Babelon hkawhkam Nebuhkadneza mara da ai kandang hpe, ni ning laman hta ngai gang daw kau na we ai, nga nna mung masha ni mahkra a man e tsun ai. Shaloi myihtoi Yeremia pru mat wa ai. ¹² - ¹³ Myihtoi Hanania gaw, myihtoi Yeremia du hta mara ai kandang hpe gang daw kau ai hpang, Yehowa mungga gaw Yeremia hpang de du nna, Sa su, Hanania hpe tsun u, Yehowa ning nga ai: Nang gaw hpun kandang gang daw kau nhtawm, de a malai hpri kandang galaw nu ai. ¹⁴ Kaning rai nme law, Israela Karai Kasang Zaw nawng zaw wa up ai Yehowa ning nga ai: ndai amyu ni yawng, Babelon hkawhkam Nebuhkadneza hpe dau jau na matu, ngai shanhte a du hta hpri kandang mara da se ai; shanhte gaw shi hpe dawjau na mara ai; pa ga na ashu ashan ni hpe mung, ngai shi hpe ap ya ni ai, ngu wu ai. ¹⁵ Bai myihtoi Yeremia gaw myihtoi Hanania hpe, Hanania e, ya madat u; Yehowa nang hpe shangun ai n rai; nang gaw dai amyu hpe masu ai hta shamyet shanat shangun ndai. ¹⁶ - ¹⁷ Dai re ai majaw Yehowa ning nga ai: Yu u, ga ntsa na ngai nang hpe dawm kau na nngai; nang Yehowa a lam gumlau ai ga tsun ndai majaw, dai ning nan nang si na ndai, ngu nna tsun wu ai hte maren, myihtoi Hanania gaw, dai shaning na shata sanit hta si wa sai.

¹ - ³ Hkawhkam Yehkonia hte rau, hkawhkam kanu gaw, unuk ni, Yuda mung hte Yerusalem a agyi salang ni, lasama ni hte ndup ni, Yerusalem kaw na pru wa ai hpang, Yuda hkawhkam Zedekia gaw Babelon hkawhkam Nebuhkadneza hpang de, Babelon mare de shangun ai Shahpan a kasha Elasa yan Hilkia kasha Gamaria lata hta lang nna, Nebuhkadneza gaw Yerusalem na Babelon de rim woi wa ai, bawng naw dung nga ai, agyi salang ni, hkinjawng ni, myihtoi ni hte mung masha ni mahkra hpang de, Yerusalem kaw nna, myihtoi Yeremia ka shagun dat ai laika a ga, da ndai rai nga ai: ⁴ Israela Karai Kasang Zaw nawng zaw wa up ai Yehowa gaw, Yerusalem na Babelon de ngai rim woi wa shangun ai bawngdung ai ni nlang hte hpe ning nga ai: ⁵ Nta galaw nna dè nga mu; sun ni hkai nna, namsi sha mu; ⁶ num la nna shayi shadang sha shaprat mu; nanhte a shayi shadang sha ni hpe, num la num wa shangun mu; shanhte mung mayat maya wa mu ga: dai yang e law htam wa mu, hkum yawm wa myit. ⁷ Ngai nanhte hpe rim woi wa shangun ai mare a ngwi pyaw lam tam nna, de a matu Yehowa hpe akyu hpyi mu: de a ngwi pyaw ai hta nanhte mung ngwi pyaw nga lu na myit dai: ⁸ Kaning rai nme law, Israela Karai Kasang Zaw nawng zaw wa up ai Yehowa ning nga ai: Nanhte hte rau nga ai myihtoi ni hte shaba wawt ai ni gaw, nanhte hpe n hkalem kau myit ga; nanhte mu shangun ai yupmang ni hpe, hkum kam myit. ⁹ Yehowa ning nga ai: Shanhte gaw nye a mying gang let, masu ai lam hkrai nanhte hpe htoi ma ai; ngai shanhte hpe shangun dat ai n rai. ¹⁰ Bai Yehowa ning nga ai: Babelon mare hta sanit shi ning ladu hkrum jang, ngai nanhte hpe kawan katsan yu na nngai; ngai tawn da ai ga sadi hpe ngai nanhte a matu shadik nna, ndai ga de nanhte hpe bai wa shangun na nngai. ¹¹ Yehowa ning nga ai: Nanhte a lam ngai myit ai hku, ngai chye nga nngai: nanhte hpe jahten na n rai; nanhte myit mada ai lam, htawmhpang e lu la hkra, ngwi pyaw ai hku hkrai ngai myit nga nngai. ¹² Nanhte ngai hpe sa shaga nna, ngai hpang de akyu sa hpyi nga yang, ngai nanhte a ga madat na nngai. ¹³ Myit masin mahkra hte ngai hpe hkan tam yang, nanhte ngai hpe mu na myit dai. ¹⁴ Ngai mung nanhte hpe mu shangun na nngai; nanhte hkrum ai bawngdung ai hpe ngai shabai kau nna, nanhte hpe shaden shabra kau dat ai mung shagu hte shara shagu hta na, nanhte hpe shinggyin la nhtawm, moi shawng de nanhte hpe shaden shabra kau ai mung de, ngai nanhte hpe bai woi wa na nngai, nga nna Yehowa tsun ai. ¹⁵ - ¹⁶ Yehowa gaw, Babelon mare hta e anhte a matu myihtoi san da sai, nga nna nanhte tsun myit dai majaw, Dawi a tingnyang hta dung ai hkawhkam wa hte, ndai mare hta naw shanu nga ai ni, ngu ai, nanhte hte rau bawngdung garai n hkrum ai kahpu kanau amyu masha ni mahkra hpe lakap nna, Zaw nawng zaw wa up ai Yehowa ning nga ai: ¹⁷ Yu mu, ngai shanhte a ntsa e ri nhtu, kawsi hpang gara hte ana zinli shapraw na nngai; n sha mai hkra, grai n ja ai lakum si zawn, ngai shanhte hpe shatai na nngai. ¹⁸ Ri nhtu, kawsi hpang gara ai, ana zinli hte ngai shanhte hpe hkan shachyut nna, ga ntsa e mungdan ni mahkra hta dumbru dumbra hkrum ai du hkra, ap kau na nngai; ngai shanhte hpe shaden kau ai shara shagu hta, shanhte gaw dagam dala shara, mauhpa shara, asawng asang shara hte shatan nhkan shara tai na mara ai; ¹⁹ Kaning rai nme law, shanhte gaw n madat ai hte, ngai jau jau rawt nna, shanhte hpang de shangun dat ai, nye shangun ma myihtoi ni a ga hpe n madat ai zawn, ya mung n madat ma ai, nga nna Yehowa tsun ai. ²⁰ Dai re ai majaw, Yerusalem mare na Babelon mare de ngai shangun dat nna, bawngdung hkrum ai ni yawng hte e, Yehowa a ga madat mara mu. ²¹ Nye a amying gang let, nanhte hpe masu ga htoi ya ai, Kolaia kasha Ahab hte Masea kasha Zedekia hpe lakap nna, Israela Karai Kasang Zaw nawng zaw wa up ai Yehowa ning nga ai: Yu u, Babelon hkawhkam a lata hta ngai shan hpe ap kau nna, shi gaw shan hpe nanhte a man e sat kau na ra ai; ²² shingrai, Babelon hkawhkam gaw wan hte sat kau ai, Zedekia hte Ahab zawn, Yehowa nang hpe shatai u ga, nga nna Babelon mare hta bawngdung hkrum ai Yuda masha ni mahkra gaw, shan a amying hpe dagam dala shara shatai na mara ai: ²³ kaning rai nme law, shan gaw Israela amyu hta angawk angak amu galaw masai; htingbu jan shaw masai; ngai n htet da ai, nye a mying gang let, masu ai ga htoi masai: chye ai wa ngai rai nga nngai, sakse wa mung ngai rai nga nngai, nga nna Yehowa tsun ai. ²⁴ Bai Nehela masha Shemaia lam ning ngu tsun u: Israela Karai Kasang Zaw nawng zaw wa up ai Yehowa ning nga ai; ²⁵ - ²⁶ Nang gaw na a amying gang let, Yerusalem masha ni mahkra hpe mung, hkinjawng Masea kasha Zehpania hte hkinjawng ni mahkra hpe mung, laika shagun dat nna, Yehowa nta hta sin langa tawn da nhtawm, myihtoi mana ni mahkra hpe share hte htawng hta bang da na matu, Yehowa gaw hkinjawng Yehoiada a malai, nang hpe hkinjawng aya dang da nitdai. ²⁷ Dai rai nna, nanhte hta e tinang hkum hpe myihtoi shatai ai, Anahtot masha Yeremia hpe, nang hpa majaw n daru kau n ta? ²⁸ Shi gaw, Bawngdung ai aten na na ra ai; nta galaw nna dè nga mu, sun galaw nna namsi sha mu, nga nna Babelon mare e nga ai anhte hpe laika shagun dat a hka! ²⁹ Hkinjawng Zehpania gaw, Shemaia shagun dat ai laika hpe, myihtoi Yeremia man e hti nga ai. ³⁰ - ³² Shaloi Yehowa a mungga Yeremia kaw du nna, Bawngdung ai ni mahkra hpe ning ngu ga shagun dat u: Nehela masha Shemaia hpe lakap nna Yehowa ning nga ai, Ngai Shemaia hpe n shangun timung, shi nanhte hpe myihtoi htoi nna, masu ga hta hpa shangun ai majaw, Yehowa ning nga ai, Yu mu, ngai gaw Nehela masha Shemaia hte shi a aru arat hpe ari jaw na nngai; shi a amyu masha ni hta matu mara pra na n rai; shi gaw Yehowa hpe gumlau ga tsun ai majaw, nye a amyu masha ni hpe ngai galaw na mai kaja ai lam, shi mu lu na n rai, nga nna Yehowa tsun ai.

¹ - ² Yehowa kaw na Yeremia hpang de du ai mungga gaw, Israela Karai Kasang Yehowa ning nga ai, Ngai nang hpe tsun ai ga mahkra hpe, laika hta ka da u. ³ Kaning rai nme law, yu mu, bawngdung hkrum ai nye a amyu Israela hte Yuda masha ni hpe, ngai nhtang wa shangun ai aten du na ra ai; shanhte a kaji kawa ni hpe ngai jaw da ai mung de, ngai shanhte hpe nhtang wa shangun nna, shanhte gaw dai hpe madu sha lu na mara ai, nga nna Yehowa tsun ai. ⁴ Yehowa gaw Israela hte Yuda amyu hpe lakap nna tsun ai ga, da ndai rai nga ai. ⁵ Yehowa gaw ning nga ai: Anhte gaw kajawng kahpra ai nsen na saga ai; ngwi pyaw ai n nga ai, hkrithpa hkrai rai nga ai. ⁶ Lasha gaw shinggyim machyi hkrum yu a ni? ngu nna san yu mu; dai rai nna, shinggyim mashyi ai num gaw, shi a nshang hpe jum ai zawn, la ni yawng jum nna myiman sum nga ai hpe, hpa majaw ngai mu hkrup a ta? ⁷ Ala, dai gaw kaba ai nhtoi rai nga ai; dai hte bung ai n nga ai; dai gaw Yaku amyu tsin-yam tsindam hkrum ai aten rai nga ai; raitimung shi gaw hkyehkrang la ai, hkrum na ra ai. ⁸ Zaw nawng zaw wa up ai Yehowa ning nga ai: Dai shani e, shi a du hta mara da ai kandang hpe, ngai gang daw kau nna, shi e gyit ai sumri ni hpe, gang dut kau na nngai; tsasam amyu ni gaw htawmhpang de shanhte hpe mayam yam na n rai: ⁹ shanhte gaw tinang a Karai Kasang Yehowa hpe mung, shanhte a matu ngai paw pru shangun ai, shanhte a hkawhkam Dawi hpe mung, dawjau na mara ai. ¹⁰ Dai re ai majaw, nye a shangun ma Yaku e, hkum hkrit et; Israela amyu e, masin hkum kahpra et, nga nna Yehowa tsun ai: kaning rai nme law, yu u, ngai nang hpe sumtsan mung de na, na a aru arat hpe bawngdung ai shara kaw na, hkyehkrang la na nngai; Yaku gaw bai wa nna, kadai mung shi hpe n jahkrit ai, ngwi pyaw ai hte ban sa nga na ra ai. ¹¹ Nang hpe hkyehkrang la na nga, ngai nang hte rau rai nga nngai; nang hpe dumbru dumbra nga shangun ai mungdan ni yawng hpe, ngai jahtum kau na nngai; nang hpe chyawm gaw, jahtum kau na n rai; raitimung, ngai nang hpe mara n kap ai wa n ngu lu nna, nang hpe ram ram naw shari na de ai, nga nna Yehowa tsun ai. ¹² Yehowa ning nga ai: Nang hkrum ai hkala nba mai yak la ai; na a nma gaw machyi la nga ai; ¹³ dai hpe kayawp na matu, karum ai wa n nga ai: mai wa lu na tsi nang n lu ndai. ¹⁴ Na a jinghku ni yawng, nang hpe malap kau ma ai; nang hpe tam ma ai, n rai: na a yubak kaba nga ai hte, na a shut hpyit ai law htam wa ai majaw, ngai gaw hpyen wa zawn nang hpe jahpye nna, gumshem wa zawn ari jaw de ai. ¹⁵ Nang hkala nba hkrum nna, hpa majaw hkrap n ta? na a machyi ai mai wa lu na, n rai; na a yubak kaba nga ai hte, na a shut hpyit ai law htam wa ai majaw, ndai lam yawng ngai nang hpe galaw de ai. ¹⁶ Raitimung, nang hpe kawa sha ai ni yawng, kawa sha ai, nang hpe hpyen ai ni langai hte langai bawngdung ai, nang hpe hpya lu hpya sha ai ni, hpya lu hpya sha ai, nang hpe adip arip ai ni yawng, adip arip ai, hkrum na mara ai. ¹⁷ Kaning rai nme law, masha ni gaw, kau da hkrum ai wa, nga nna mung, kadai n kawan katsan yu ai Ziun, nga nna mung, nang hpe tsun aroi ai majaw, ngai nang hpe shamai shatsai nna, hkam kaja shangun na de ai, nga nna Yehowa tsun ai. ¹⁸ Yehowa ning nga ai: bawngdung hkrum ai Yaku a sum ni hpe, ngai bai wa shangun nna, shi a buga hpe matsan dum na nngai: mare mung tinang kawng ntsa e dè nga nna, htingnu ni hta, htung hte maren, nga nga na mara ai. ¹⁹ Dai ni a kata de na chyeju dum ai nsen hte kabu gara ai nsen pru na ra ai; ngai shanhte hpe shalaw jahtam nna, shanhte yawm wa na n rai; shanhte hpe galu kaba shangun nna, shanhte kaji wa na n rai. ²⁰ Shanhte a kashu kasha ni gaw shawng na zawn rai nga nna, de a shawa hpawng nye a man e grin nga na ra ai; shanhte hpe adip arip re ai ni yawng hpe ngai ari jaw na nngai. ²¹ Shanhte a du gaw shanhte a amyu rai na ra ai; shanhte a ntsa e up ai wa gaw, shanhte kaw na pru na ra ai; ngai shi hpe lau la nna, shi ngai hpang de sit sa na ra ai; ngai hpang de sit sa na nga, kadai wa tinang myit hpe shagwi a ta? nga nna Yehowa tsun ai. ²² Nanhte gaw nye a amyu, ngai gaw nanhte a Karai Kasang rai nga nngai. ²³ Yu u, Yehowa pawt bu ngu ai bungsha gaw bung wa sai; dai gaw ja la ai bungsha rai nga nna, tara n lang ai ni a baw ntsa e ahpawt na ra ai; ²⁴ Yehowa pawt bu kahtet ai gaw, shi myit mamyit hte maren, garai n ngut n dik dingsa sim wa na n rai: nanhte gaw htawmhpang e dai lam chye lu na myit dai.

¹ Yehowa ning nga ai; Ndai aten e ngai gaw, Israela dap ni mahkra a Karai Kasang tai nna, shanhte gaw nye a amyu tai na mara ai. ² Bai Yehowa ning nga ai: Nhtu tsin-yam lawt ai amyu gaw, nam mali hkan e chyeju hkamla masai; ngai yu sa nna, Israela amyu hpe ban sa shangun nngai. ³ Yehowa gaw tsan tsan de na ngai kaw danpru nna, Gaja wa, htani htana tsawra ai hte ngai nang hpe tsawra de ai; dai re ai majaw n-gaw nwai myit hte, ngai nang hpe dun la ni ai. ⁴ Israela shayi sha e, ngai nang hpe bai dè da nna, nang dè da ai hkrum na ndai. Nang gaw chying hte mawn sumli nna, poi galaw ai ni hte rau bai ka manawt na ndai; ⁵ nang gaw Samari bum ga e tsabyi sun bai hkai na ndai; sun galaw ai ni gaw hkai nna, tsabyi si sha na mara ai. ⁶ Kaning rai nme law, Ehprim bum ga e sin nga ai ni gaw, Rawt mu, anhte a Karai Kasang Yehowa nga ai Ziun bum de lung wa ga, nga nna garu ai aten du na ra ai. ⁷ Bai Yehowa ning nga ai: Yaku a lam kabu gara ai hte mahkawn mangoi mu; masha amyu ni a agyi wa a lam garu mu: Yehowa e, na amyu ngu ai, naw ngam nga ai Israela hpe hkyehkrang la u, nga nna kajai gumhkawng let, shakawn kungdawn mu. ⁸ Yu mu, ngai shanhte hpe dingdung mung de na woi wa nna, lamu ga htum ai de na shinggyin la na nngai: shanhte hte rau myikyaw ai wa hte lagaw hten ai wa, gawngli ai num hte shinggyim machyi hkrum ai num, lawm nna, wunawng wuwa kaba wa na mara ai. ⁹ Shanhte hkrap let wa na mara ai; akyu hpyi tawngban ai ni hpe, ngai woi wa na nngai; hka kau lam hte, ahtu kataw shara n nga ai, malang ai numda lam hku, ngai shanhte hpe lakawn wa na nngai; kaning rai nme law, ngai gaw Israela kawa rai nga nngai; Ehprim gaw nye a kasha alat rai nga ai. ¹⁰ Masha amyu ni e, Yehowa a ga madat mara mu; Israela masha ni hpe shabrai kau ai wa gaw, shanhte hpe bai shinggyin la nhtawm, sagu rem wa tinang sagu hpung hpe sin nga ai zawn, shanhte hpe sin nga ai zawn, shanhte hpe sin nga na ra ai, ngu nna sumtsan zunlawng du hkra tsun shana mu. ¹¹ Kaning rai nme law, Yehowa gaw, Yaku hpe hkrang shaw la nna, shi hta n-gun grau ja ai wa a lata na, mawai la nu ai. ¹² Shingrai shanhte gaw, Ziun bum pungding e sa mahkawn mangoi nna, Yehowa chyeju ngu ai, nai man, tsabyi jahku, sau, sagu kasha hte dumsu kasha lu la na matu zuphpawng na mara ai: shanhte a myit masin gaw, ntsin jaw ai sun zawn rai nga nna, shanhte htawmhpang de hpa yawnhkyen hkrum na n rai. ¹³ Dai shaloi e mahkawn ni ka gumlawt let kabu nna, shabrang ni hte dingla ni rau pyaw na mara ai: shanhte a sharung shayawt ai a malai, kabu gara ai, ngai shatai na nngai; ngai shanhte hpe shangwi shapyaw nna, shanhte yawng hkyen hkrum ai hta kabu shangun na nngai. ¹⁴ Hkinjawng ni hpe mung hpum sau ai shan hte ngai jaw jahkru na nngai; nye a amyu masha ni gaw, nye a chyeju hte hkru kat na mara ai, nga nna Yehowa tsun ai. ¹⁵ Yehowa ning nga ai: Rama shara hta e ngoi ai nsen, sharung shayawt ai hte hkrapngu hkrapngoi ai nsen, na lu ai; Rahkela, shi a kasha ni hpe hkrap nga ai rai nna, shanhte n nga ai majaw, shalan shabran n rai lu sai. ¹⁶ Bai Yehowa ning nga ai: Nang hkrap ai nsen ngap u; myi prwi hkum pru et; nang galaw ai amu hte maren shabrai hkamla na rin dai; na nsha ni gaw hpyen ni a mung na, bai nhtang wa na mara ai. ¹⁷ Na a jahtum e myit mada shara nga ai; na nsha ni gaw tinang buga de bai wa na mara ai, nga nna Yehowa tsun ai. ¹⁸ Ehprim mahtang, Nang ngai hpe gaja wa sharin nitdai; ngai gaw, garai n bik ai usu zawn, sharin ai hkrum ni ai; ngai hpe lau la e; shingrai yang, ngai nhtang wa na nngai: nang gaw nye a Karai Kasang Yehowa rai nga ndai. ¹⁹ Gaja wa, ngai nhtang wa ai hpang myit malai lu nngai; sharin hkrum ai hpang, nye magyi hpe kahpret nngai; ram prat e galaw hkrup ai yubak majaw, ngai kaya dum nna, mak mat ai hte myiman sum ai hkrum nngai, nga nna tinang hkum hpe mara shagun ai ga, ngai gaja wa na nngai. ²⁰ Ehprim gaw ngai tsawra ai kasha, n rai ni? grai tsawra ai ma, n rai ni? shi hpe daru shagu grai wa naw dum nga nngai; dai re ai majaw, ngai shi a matu myit ndawt nga nngai; gaja wa ngai shi hpe matsan dum na nngai, nga nna Yehowa tsun ai. ²¹ Lam e mahtan daw ni hpe jung u; lam madun ai shadaw ni hpe sharawt u; nang sa wa ai nmaw lam hpe marit u: Israela shayi sha e, ndai na a mare ni hpang de, bai nhtang wa u. ²² Htak mat ai shayi sha e, gaten du hkra kahkrang hkawm nga na n ta? Yehowa gaw ga ntsa e htung nnan tawn da nna, numsha gaw la wa hpe makawp lu na ra ai. ²³ Israela Karai Kasang, Zaw nawng zaw wa up ai Yehowa ning nga ai: Bawngdung hkrum ai ni hpe ngai bai woi wa ai shaloi jang, Yuda mung hte de a mare ni hta nga ai ni gaw, Dinghpring ai shara e, Chyoi pra ai bum e, Yehowa nang hpe shaman ya u ga, nga nna bai tsun lu na mara ai. ²⁴ Yuda mung na ni hte de a mare na ni gaw, yi hkauna galaw ai ni hte, sagu bainam rem ai ni rau, dai shara e nga na mara ai. ²⁵ Hki ba hkrum ai myit masin hpe ngai jahkru shakat nngai; yawnhkyen hkrum ai ni yawng hpe, ngai shalan shabran nngai. ²⁶ Dai hpang ngai yup hprang nna mada yu yang, yup pyaw ai gaw, nye a matu mai kaja nga ai. ²⁷ Yehowa ning nga ai: Yu u, ngai gaw Israela mung hte Yuda mung hta, masha nli hte yamnga nli gat ai aten du na ra ai. ²⁸ Shanhte hpe baw kau na, agrawp kau na, gale galau kau na, jahten kau na hte adip arip di na matu, ngai yaw yu ai hte maren, dè da na hte hkai da na matu, ngai shanhte a ntsa e ya yaw yu na nngai. ²⁹ Dai aten e, Kaji kawa ni gaw hkri ai tsabyi si sha nna, kashu kasha ni wa makrim ai, nga nna tsun lu na n rai. ³⁰ Langai hte langai tinang a yubak majaw si na ra ai; hkri ai tsabyi si sha ai wa kadai mung, wa makrim ai hkrum na ra ai. ³¹ Yehowa ning nga ai: Yu mu, Israela nta hte Yuda nta ntsa e ga shaka ningnan ngai tawn da na nhtoi du na ra ai; ³² shanhte a kaji kawa ni hpe lata hte dun la nna, Egutu mung na woi wa ai shaloi na, shanhte hte tawn da ai ga shaka hte maren, n rai: kaning rai nme law, ngai shanhte a Madu rai nga timung, shanhte gaw, ndai, nye a ga shaka hpe run kau ma ai, nga nna Yehowa tsun ai. ³³ Da ndai gaw, dai nhtoi ni a hpang e, Israela nta hte ngai shaka na ga shaka rai nga ai: Nye a tara hpe shanhte a kraw lawang hta ngai bang da nna, shanhte a myit hta ka da na we ai: ngai shanhte Karai Kasang tai na nngai; shanhte mung nye a amyu tai na mara ai: ³⁴ dai ni gaw, Yehowa hpe chye u, nga nna langai hte langai tinang a htingbu wa hte, tinang hpunau wa hpe, sharin achyin ya nga na ma ai n rai; kaning rai nme law, kaji htum ai wa kaw nna, shanhte a kaba htum ai wa du hkra, nlang hte gaw ngai hpe chye ma na mara ai, nga nna Yehowa tsun ai: shanhte mara hpe ngai dat kau nna, shanhte a yubak hpe bai dum ya na ni ai, n rai, nga nna Yehowa tsun ai. ³⁵ Shani e htoi ya na matu ajan, shana e up na matu shata hte shagan ni hpe tawn da nna, hkaleng ni wu kadu hkra, nammukdara hpe kabrawng shangun ai, Zaw nawng zaw wa up ai Yehowa mying ai wa gaw, ning nga ai: ³⁶ Dai ngai tawn da ai lam ni, nye a man e hten mat lu ai rai yang, Israela gaw nye a man e amyu htum mat nna, prat dingsa hkoi mat na ra ai. ³⁷ Bai Yehowa ning nga ai: Lahta tang na sumsing lamu hpe shadawn lu nna, lawu tsang na ginding aga npawt nhpang ni hpe sawk yu lu ai rai yang, Israela kashu kasha ni mahkra hpe, shanhte galaw ai amu majaw, ngai kabai kau na nngai, nga ai. ³⁸ Bai Yehowa ning nga ai: Hananela langchyi kaw nna, mare jut chyinghka du hkra, mare daju hpe Yehowa matu dè da na nhtoi ni du na ra ai. ³⁹ Mare jarit gaw, dai kaw na Gareb kawng hpe lai nna, Goa shara hpe shinggrup na ra ai. ⁴⁰ Bai, sinpraw maga, gumra chyinghka nga ai mare jut du hkra, si mang ni hte wan dap kabai kau ai kadit ting hte, Kidron hkaraw du hkra hkaibang ni mahkra gaw, Yehowa a matu chyoi pra ai shara tai na ra ai: dai hpe bai baw kau na n rai; prat dingsa e run kau na n rai, nga ai.

¹ Nebuhkadneza hkaw dung ai shi matsat ning ngu ai, Yuda hkawhkam Zedekia hkaw dung ai, shi ning hta e, Yehowa kaw na, Yeremia hpang de du ai mungga, da ndai rai nga ai. ² Dai aten e Babelon hkawhkam a luksuk ni gaw, Yerusalem mare hpe wang tawn manu ai: myihtoi Yeremia gaw, Yuda hkawhkam a htingnu e nga ai htawng a wing kata e rawng nga ai. ³ Kaning rai nme law, Yuda hkawhkam Zedekia gaw Yeremia hpe, Yu u, Yehowa gaw ndai mare hpe Babelon hkawhkam a lata hta ap ya nna, shi dai hpe hkapla na ra ai; ⁴ Yuda hkawhkam Zedekia mung Hkalde masha ni a lata na lawt lu na n rai; shi gaw Babelon hkawhkam a lata hta ap kau ai teng teng hkrum nna, myiman hkrum, ga tsun let, shada myiman mu lu na mara ai: ⁵ shi gaw Zedekia hpe Babelon de woi wa nna, Yehowa shi hpe kawan yu ai nhtoi du hkra, dai yang e shi nga nga na ra ai: nanhte gaw Hkalde masha ni hpe hkap gasat timung, awng wa lu na n rai, nga nna Yehowa tsun ai lam nang hpa majaw myihtoi htoi nga n ta? ngu nna shi hpe htawng hta sharawng da wu ai. ⁶ - ⁷ Shaloi Yeremia gaw, Yehowa a ga ngai kaw du nna, Yu u, na nwa di Shalum a kasha Hanamela gaw, nang hpang de sa du nna, Anahtot mare e nga ai, nye a ga dachyawk hpe mari la u; nang shaw la ang ai majaw, mari na ahkang lu ndai, nga nna nang hpe hpyi na ra ai, ngu wu ai. ⁸ Shingrai, Yehowa ga hte maren, wa di a kasha Hanamela gaw, ngai nga ai htawng wing kata de, ngai kaw sa du nna, Ben-yamin mung, Anahtot mare e nga ai, nye a ga dachyawk hpe mari la u; nang gaw sali wunli madu ang ai hte, shaw la na ahkang lu ndai; na a matu mari la u; nga nna ngai hpe tsun ai. Shaloi dai gaw Yehowa a ga rai nga ai hpe ngai chye nngai. ⁹ Dai rai nna ngai gaw, Anahtot e nga ai ga dachyawk hpe, wa di a kasha Hanamela kaw na mari la nna, gumhpraw shekela shi sanit, shi a matu shen ya we ai. ¹⁰ Ga sadi laika hpe mung, ngai mying shakap nna, dazik dawk nhtawm, sakse ni hpe shaga la nna, gumhpraw hpe joi hte shen ya we ai. ¹¹ - ¹² Shingrai tara hte htung nga ai hte maren, dazik kap ai ga sadi laika hpe mung, dazik kap ai laika katsu hpe mung ngai la nna, wa di a kasha Hanamela man e mung, ga sadi laika hta tinang mying shakap ai sakse ni a man e mung, htawng wing hta dung nga ai Yuda masha ni mahkra a man e, Masea kashu Neria kasha Baruk hpe ap ya nngai. ¹³ Dai hta kaga, Israela Karai Kasang Zaw nawng zaw wa up ai Yehowa ning nga ai. ¹⁴ Mari la ai ga dachyawk hte seng ai dazik kap ai ga sadi laika hte, dazik n kap ai laika katsu hpe la nna, na na wa grin nga lu na matu, ga dibu hta bang da u. ¹⁵ Kaning rai nme law, Israela Karai Kasang Zaw nawng zaw wa up ai Yehowa ning nga ai: Nta mung, yi hkauna mung, tsabyi sun mung, ndai mung hta bai mari lu na ra ai, nga nna ngai shanhte a man e, Baruk hpe htet da nngai. ¹⁶ - ¹⁷ Shingrai, Neria kasha Baruk hpe, dai ga sadi laika ap ya nhtawm, Yehowa hpe ngai akyu hpyi nna, Madu Yehowa e, yu u, nang gaw na a n-gun atsam kaba hte lahpum shada nna, sumsing lamu hte ginding aga hpe hpan da nu ai: nang n di lu ai, hpa mung n nga ai; ¹⁸ nang gaw masha hkying mun hpe n-gaw nwai myit madun nna, kaji kawa ni a yubak hpe, kashu kasha ni a lahpyen e shapraw nu ai; daru magam hte hpung dagu rawng ai Karai Kasang, shi a amying Zaw nawng zaw wa up ai Yehowa rai nga ai: ¹⁹ hpaji daw ai hta mauhpa, amu shachyen ai hta kaba ai wa, nang rai nga ndai; langai hte langai tinang hkan ai lam, tinang galaw ai arawn alai hte maren, nhtang jaw na matu, na a myi gaw shinggyim masha ni hkawm sa ai lam mahkra hpe azi yu nga ai; ²⁰ nang gaw, dai ni du hkra, Egutu mung hta e, Israela hte masha kaga ni a mung hta e, lamik kumla hte mauhpa amu madun dan nna, ya na hte maren, na a mying nsang danhkung wa sai; ²¹ - ²³ nang gaw lamik kumla hte mauhpa amu madun let, n-gun ja ai lata, lahpum shada nna hkrit mai ai nsam hte, na a amyu Israela hpe, Egutu mung na shapraw la nhtawm, shanhte hpe jaw na, nga nna kaji kawa ni hpe dagam da ai mung ngu ai, nga chyu hte lagat jahku lwi ai, ndai mung, nang shanhte hpe jaw nna, shanhte shang madu nga ma ai: shanhte chyawm gaw na a nsen n madat, na a tara n hkan ma ai; nang shanhte hpe htet da mada langai mi muk, n hkan ma ai: dai re ai majaw ndai shoihpa shoirang nlang, nang shanhte a ntsa e shapraw nu ai. ²⁴ Kaduk ni hpe yu u, mare daju hpe gasat la na matu shanhte du masai; ri nhtu, kawsi hpang gara, ana zinli hte, hkap gasat ai Hkalde masha ni a lata de, ndai mare hpe ap kau nu ai: nang tsun ai hte maren dik wa sai; nang nan dai hpe mu ndai. ²⁵ Raitimung, Madu Yehowa e, Mare gaw Hkalde masha ni a lata hta ap kau ai hkrum ninglen, Gumhpraw hte ga dachyawk mari nna, sakse ni hpe shaga la su, nga nna nang hkum nan ngai hpe tsun n hka, ngu we ai. ²⁶ - ²⁷ Shaloi Yehowa mungga gaw Yeremia kaw du nna, Yu u, ngai gaw hkrung mahkrung hpe up ai Karai Kasang Yehowa rai nga nngai; ngai n di lu ai lama ma nga na a ni? ²⁸ Dai rai nna Yehowa ning nga ai: Yu u, ngai gaw ndai mare hpe Hkalde masha ni a lata de mung, Babelon hkawhkam Nebuhkadneza lata de mung, ap kau nna, shi gaw dai hpe hkapla na ra ai: ²⁹ dai mare hpe gasat ai Hkalde masha ni gaw, shang nna dai hpe nat kau na mara ai: ngai hpe pawt sindawng shangun na nga, nta ni a ntsa e Bala matu manam pyaw ai baw natnawng nna, hpara kaga ni a matu dumhpung hkungga ru nawng ai nta ni hte hpawn, mare ting wan hkru na ra ai. ³⁰ Israela kashu kasha ni hte, Yuda kashu kasha ni gaw, brang ram prat kaw nna, nye a man e n hkru ai amu hkrai, galaw masai; Israela kashu kasha ni gaw, tinang a lata a amu hte ngai hpe pawt shangun na hkrai, galaw ma ai, nga nna Yehowa tsun ai. ³¹ Kaning rai nme law, ndai mare gaw, dè hpang ai shani kaw nna dai ni du hkra, ngai hpe pawt bu shangun ai hte myit kahtet shara tai wa sai; ³² dai re ai majaw, Israela hte Yuda kashu kasha ni hte hpawn, shanhte a hkawhkam ni, du salang ni, hkinjawng ni, myihtoi ni, Yuda mung masha ni hte Yerusalem na ni gaw, tinang a n hkru ai amu mahkra hte ngai hpe pawt sindawng shangun ai majaw, ndai mare hpe nye a man na ngai htawm kau na we ai. ³³ Shanhte gaw tinang a myiman n rai, shingdu hkrai, ngai hpang de dat ma ai: ngai jau jau rawt nna, shanhte hpe sharin achyin timung, shanhte gaw sharin achyin ai n hkamla hkraw ma ai. ³⁴ Nye a amying mying ai nta hpe, awu asin di kau na matu, shanhte gaw tinang a matsat shabat re ai arai ni hpe, dai hta shashawn ma ai. ³⁵ Shanhte a shayi shadang sha ni hpe, Molek hpara a wan nat hkungga shatai na matu, shanhte gaw Hinom kasha a kadit e Bala a tsaw ai kawng ni hpe, dè da manu ai; dai lam ngai shanhte hpe htet da ai n rai; Yuda amyu yubak hkrum na matu, shingre ai matsat shabat amu galaw na ngai n myit nngai. ³⁶ Dai re ai majaw, ri nhtu, kawsi hpang gara, ana zinli hte, ndai mare gaw Babelon hkawhkam a lata hta ap kau ai hkrum sai, nga nna nanhte tsun ai mare a lam, Isralela Karai Kasang Yehowa ya ning nga ai: ³⁷ Yu mu, nye pawt bu ai, myit kahtet nna n-yun bu ai hte, ngai shanhte hpe shaden shabra kau ai mungdan ni yawng hta na, ngai shanhte hpe shinggyin la nna, ndai shara de bai woi wa nhtawm, asim sha nga nga shangun na nngai: ³⁸ shanhte gaw nye a amyu, ngai gaw shanhte a Karai Kasang tai na nngai: ³⁹ shanhte hte shanhte a kashu kasha ni ngamu ngamai na matu, ngai hpe tutnawng hkrit hkungga nga lu hkra, ngai shanhte hpe myit langai sha hte lam langai sha jaw da na nngai: ⁴⁰ ngai shanhte hpe n kau da, ngamu ngamai shangun na nga, ngai shanhte hte htani htana prat dingsa ga shaka tawn da na nngai; shanhte ngai kaw na n pru mat wa hkra, ngai hpe hkrit hkungga ai myit, shanhte a kraw lawang hta ngai bang da na nngai. ⁴¹ Gaja wa, ngamu ngamai ai hku shanhte hpe galaw na matu, ngai shanhte a lam kabu nga nna, ngai gaw nye a myit mahkra hte kraw lawang mahkra lawm let, shanhte hpe ndai mung hta teng teng hkai da na nngai. ⁴² Kaning rai nme law, Yehowa ning nga ai: Ndai tsin-yam tsindam kaba mahkra hpe, ndai amyu a ntsa e ngai shapraw ai zawn, ngai ndat da ai chyeju mahkra hpe mung, shanhte a ntsa e shapraw na nngai. ⁴³ Masha mung, yamnga mung kata, katsi katsang rai nga nna, Hkalde masha ni a lata hta ap kau hkrum sai, nga nna nanhte tsun ai, ndai mungdan hta, yi hkauna naw mari lu na mara ai. ⁴⁴ Ben-yamin mung hta, Yerusalem mare ginwang ni hta, Yuda mung a mare ni hta, bum ga na mare ni hta, layang ga na mare ni hta, Dingda mung na mare ni hta, masha ni gaw yi hkauna ni hpe gumhpraw hte mari lu nna, ga sadi laika ka ai hte dazik dawk nhtawm, sakse ni hpe shaga na mara ai: kaning rai nme law, Bawngdung hkrum ai ni hpe, ngai bai wa shangun na nngai, nga nna Yehowa tsun ai.

¹ - ² Dai hta kaga, Yeremia gaw htawng wing kata e bawng naw dung nga yang, Yehowa a mungga lahkawng lang ngu na shi kaw du nna, Ndai amu galaw ai Yehowa, ndai lam shabyin nna shagrin da ai Yehowa, Yehowa mying ai wa gaw ning nga ai: ³ Ngai hpe shaga e, ngai nang hpe htan na de ai; nang n chye na ai, galu kaba ai hte yak la ai amu, ngai nang hpe madun na de ai. ⁴ Kaning rai nme law, hpyen kaduk ni hte ri nhtu ni hpe hkap gang na matu, run kau hkrum ai, ndai mare a nta ni hte Yuda hkawhkam a nta ni a lam lakap nna, Israela Karai Kasang Yehowa ning nga ai; ⁵ - ⁶ Hkalde masha ni hpyen gasat na sa wa ma ai; pawt bu nna myit kahtet ai hte, ngai sat kau ai, ndai mare masha ni a mang ni hte, ndai nta ni hpe jahpring na ra ai; ndai masha ni a yubak majaw, ndai mare hta na nye a myiman ngai makoi da timung, Yu mu, ndai mare a matu ngai tsi shapraw nna, shanhte hpe shamai shatsai na nngai; ngwi pyaw ai hte tengman ai lam, ngai shanhte hpe madun dan na nngai. ⁷ Yuda amyu hte Israela amyu hta na bawngdung hkrum ai ni hta na bawngdung hkrum ai ni hpe, ngai bai woi wa nna, shawoi na hte maren dè da na nngai. ⁸ Shanhte ngai hpe shut kau ai mara yawng, ngai arut kau na nngai; ngai hpe shut kau nna, nye a tara hpe tawt lai ai mara yawng, ngai raw dat kau na nngai. ⁹ Ndai mare masha ni hpe ngai galaw ai ngamu ngamai lam yawng, ga ntsa amyu ni mahkra na lu nna, ndai mare a matu ngai shapraw ai mai kaja ai hte ngwi pyaw ai lam hpe tau yu nna, hkrit gari let mau mahka nga ma ai majaw, ndai mare gaw nye a matu kabu gara ai mying, shakawn kungdawn shara hte arawng sadang, shanhte a man e tai na ra ai. ¹⁰ - ¹¹ Yehowa ning nga ai: Masha mung, yamnga mung n nga ai, shingran katsi ai shara, nga nna nanhte tsun ai, ndai shara hta mung; shanu nga ai wa, mare masha, hte yamnga pyi n nga ai, shingran katsi ai Yuda mare ni hte Yerusalem mare lam ni hta, kabu gara ai nsen, mani pyaw ai nsen, la nnan a nsen, num nnan a nsen hte, Zaw nawng zaw wa up ai Yehowa hpe shakawn kungdawn mu, shi gaw mai kaja ai hte shi a n-gaw nwai ai myit hkani htana agrin nga ai, nga nna mahkawn mangoi ai ni a nsen hte, Yehowa nta nhku de mahku hkungga hpe shashawn ai ni a nsen mung, na lu na ra ai: kaning rai nme law, bawngdung hkrum ai ni hpe, moi shawng na hte maren, ngai bai wa shangun na nngai, nga nna Yehowa tsun ai. ¹² Bai, Zaw nawng zaw wa up ai Yehowa ning nga ai: Masha mung, yamnga mung n nga ai, shingran katsi ai, ndai shara hte de a mare ni yawng hta, sagu rem ni tinang a hpung ni hpe hpum shangun ai udat shara bai nga na ra ai. ¹³ Bum ga na mare ni hta, layang ga na mare ni hta, Dingda mung na mare ni hta, Ben-yamin mung hta, Yerusalem mare ginwang ni hte Yuda mung na mare ni hta, sagu hpung ni hpe hti yu ai wa a lata npu e, sagu ni bai lai na mara ai, nga nna Yehowa tsun ai. ¹⁴ Yu mu, Israela dap hte Yuda dap hpe lakap nna, ngai tsun ai ga kaja mahkra hpe, ngai shadik na aten du na ra ai, nga nna Yehowa tsun ai. ¹⁵ Dai shani e, dai aten e, Dawi a matu dinghpring ai Makrung ngai shatut nna, dai wa gaw mungdan hta dinghpring ai hku dawdan na ra ai. ¹⁶ Ndai aprat e Yuda mung hkyehkrang la ai hkrum nna, Yerusalem mare gaw asim sha nga lu na ra ai; da ndai gaw, Anhte a dinghpring Madu Yehowa, nga nna ndai mare hpe shamying ai amying rai nga ai. ¹⁷ Kaning rai nme law, Israela amyu a tingnyang hta dung ai, Dawi a kasha langai mi, galoi mung nhtut na n rai; ¹⁸ nye a man e wan nat hkungga, lusha hkungga hte tutnawng na hkungga amyu hpe natnawng na matu, hkinjawng ni hte Lewi masha ni hta na, nye a man e dawjau ai wa, nhtut na n rai, nga nna Yehowa tsun ai. ¹⁹ Bai Yehowa a mungga Yeremia kaw du nna, Yehowa ning nga ai: ²⁰ - ²¹ Shani hte shana aten ladaw seng ai, ngai tawn da ai ga shaka hpe, nanhte run kau lu nna ang wa ai hte maren shani shana n galai hkra, galaw lu ai rai yang, nye a shangun ma Dawi a tingnyang hta shi a kasha langai mi tutnawng adung nga na ra ai, ngu nna ngai shi hte tawn da ai nye a ga shaka mung, nye a shangun ma Lewi masha hkinjawng ni hte ngai tawn da ai nye a ga shaka mung, hten mat lu na ra ai. ²² Sumsing lamu na zaw nawng zaw wa ni hpe n hti yu lu ai hte, nammukdara zaibru hpe n hteng yu lu ai zawn, nye shangun ma Dawi a aru arat hpe mung, nye a man e dawjau nga ai Lewi masha ni hpe mung, ngai shalaw jahtam na we ai, nga ai. ²³ - ²⁴ Bai Yehowa a mungga Yeremia kaw du nna, Yehowa lata la ai, ndai amyu lahkawng hpe shi bai yeng kau nu ai, nga nna ndai masha ni tsun ai ga hpe nang n myit yu nu ni? shingrai shanhte gaw nye a amyu hpe masha zawn n nawn, n kaw n law di kau manu ai. ²⁵ - ²⁶ Yehowa ning nga ai: Shani hte shana seng ai, nye a ga shaka n grin nga nna, sumsing lamu hte ginding aga hkam ai lam ngai n tawn da ai rai yang gaw, Abraham, Isak, Yaku a kashu kasha ni a ntsa e up na matu, Yaku hte nye shangun ma Dawi a aru arat hta na du, ngai n san da ai, shanhte hpe kabai kau na nngai: ngai chyawm gaw, shanhte hta na bawngdung hkrum ai ni hpe bai woi wa nna, shanhte hpe matsan dum na nngai, nga ai.

¹ - ² Babelon hkawhkam Nebuhkadneza gaw, shi a luksuk ni yawng, shi up ai ga ntsa mungdan ni hte amyu baw ni yawng hte rau, Yerusalem mare hte de a ginwang mare ni mahkra hpe hpyen gasat nga ai shaloi yang, Yehowa kaw na mungga Yeremia hpang de du nna, Israela Karai Kasang Yehowa ning nga ai: Yuda hkawhkam Zedekia hpe ning ngu sa tsun su, Yehowa ning nga ai, Yu u, ndai mare hpe Babelon hkawhkam a lata de ngai ap kau nna, shi dai hpe nat kau na ru ai: ³ nang gaw shi a lata na lawt lu na, n rai; gaja wa nang hpe rim la nna, shi lata de ap kau na mara ai; na a myi gaw Babelon hkawhkam a myiman hpe mu lu nna, shi nang hte ga tsun lu na ra ai; nang nan Babelon mare de sa wa na rin dai. ⁴ Raitimung, Yuda hkawhkam Zedekia e, Yehowa a ga madat u; nang hpe lakap nna Yehowa ning nga ai, Nang gaw nhtu hte si na n rai; ⁵ angwi apyaw si wa nna, na a shawng e up ai nji nwa hkawhkam ni matu, pyaw ai baw natnawng ai hte maren, na a matu mung natnawng let, Aka, madu du e, nga nna na a lam sharung shayawt na mara ai: kaning rai nme law, ndai ga ngai tsun da ni ai, nga nna Yehowa tsun ai. ⁶ - ⁷ Shingrai, Yerusalem mare hpe mung, Yuda mung e naw ngam nga ai mare ni mahkra hpe mung, Lahkisha hte Azeka ngu ai, Yuda mung e naw ngam nga ai bunghku kum ai mare yan hpe mung, Babelon hkawhkam a luksuk ni hpyen gasat nga ai shaloi jang, myihtoi Yeremia gaw, ndai ga mahkra, Yuda hkawhkam Zedekia hpe htawn tsun wu ai. ⁸ - ⁹ Mung masha ni langai hte langai, yam sha ai Hebre la hte Hebre num ni hpe dat dat nna, Yuda wa gaw tinang hpunau wa hpe, htawmhpang e mayam n yam na, nga nna hkawhkam Zedekia gaw Yerusalem masha ni mahkra hte ga sadi tawn da ai hpang, Yehowa kaw na Yeremia hpang de du ai mungga gaw da ndai rai nga ai. ¹⁰ Kaning rai nme law, tinang a la mayam hte num mayam ni hpe dat dat nna, htawmhpang e n yam na lam, ga sadi yin la ai du salang ni hte, mung masha ni yawng madat nna, mayam ni hpe dat dat mu ai: ¹¹ raitimung, dai hpang shanhte myit kayin nna, dat kau sai la mayam hte num mayam ni hpe shaga la nna, shanhte hpe bai yam da mu ai. ¹² Dai re ai majaw, Yehowa a mungga Yeremia kaw du nna, Israela Karai Kasang Yehowa ning nga ai: ¹³ - ¹⁴ Nanhte a nji nwa ni hpe, mayam tai ai Egutu mung na ngai shapraw wa ai shaani e, nanhte langai hte langai mari ai hpunau Hebre masha ni gaw, kru ning tup nanhte a mayam tai ai hpang sanit ning ladu hkrum yang, shanhte hpe jahpu n hpyi ai dat dat lu na nga nna, ngai ga sadi tawn da timung, nanhte a nji nwa ni gaw, n madat ai hte na pat kau ma ai. ¹⁵ - ¹⁶ Nanhte chyawm gaw ya myit kayin nna, langai hte langai htingbu shada dat dat na lam tsun dan let, nye a man e kaja ai amu galaw ai hte, nye a mying mying ai nta hta, nye a man e ga shaka yin la timung, nanhte myit bai kayin nna, nye a amying hpe awu asin di kau ai hte, langai hte langai jahpu n hpyi ai sha dat kau ai, tinang a mayam num mayam la ni hpe, bai shaga la nhtawm, shanhte hpe bai yam da mu hka! ¹⁷ Dai re ai majaw Yehowa ning nga ai: Nanhte gaw langai hte langai, tinang hpunau shada, htingbu shada, dat dat na lam shapraw dan hkra, nye a ga n madat ai majaw, yu mu, Yehowa ning nga ai: Ngai gaw nanhte a matu ri nhtu, ana zinli hte kawsi hpang gara ai tsin-yam dat dat na lam htet da nna, nanhte hpe ga ntsa mungdan ni mahkra hta kahkrang hkawm shangun na nngai. ¹⁸ - ²⁰ Nanhte gaw dumsu kasha hpe ka-ang brang ga nna, lapran hku lai wa let, nye a man e yin la ai ga shaka hte maren, n hkan, nye a ga shaka tawt lai kau ai ni ngu ai, Yuda agyi salang ni Yerusalem agyi salang ni, hpyenbu ni, hkinjawng ni hte, ka-ang brang ga ai dumsu kasha lapran hku lai wa ai, mung masha ni mahkra hpe, hpyen ni a lata hta mung, shanhte a asak hpe tam ai ni a lata hta mung, ngai ap kau nna, shanhte a si mang ni gaw, ntsa malem u ni hte ga ntsa matse labye ni a shahpa tai na ra ai. ²¹ Yuda hkawhkam Zedekia hte shi a agyi salang ni hpe, hpyen ni a lata hta mung, shanhte a asak hpe tai ai ni a lata hta mung, tawng marang mi sha nanhte kaw na pru mat wa ai Babelon hkawhkam a luksuk ni a lata hta mung, ngai ap kau na nngai. ²² Yu mu, ngai htet da nna, shanhte dai mare hpe bai wang tawn na mara ai; shanhte dai hpe gasat la nna, nat kau na mara ai; ngai gaw Yuda mare ni hpe masha n nga ai, katsi katsang shara shatai kau na we ai, nga nna Yehowa tsun ai.

¹ Yuda hkawhkam Yoshia kasha Yehoiakim a lakhtak e Yehowa kaw na Yeremia hpang de du ai mungga gaw, Rehkab dap ni a nta de shang nna, shanhte hpe shachyen nhtawm, Yehowa nta na gawk langai mi hta shaga bang nna, shanhte hpe bai tsabyi jahku karan jaw mu, nga nna tsun ai hte maren, ngai gaw, Habazia kashu, Yeremia kasha, Yazania hte shi a kahpu kanau ni, kashu kasha ni mahkra hte, Rehkab amyu dap ni yawng hpe shaga la nna, Yehowa nta kata, chyinghka sin ai Shalum a kasha Masea gawk ntsa, du salang ni hpawng nga ai gawk makau e, Karai Kasang a masha Igdala a kasha Hanan a kasha ni a gawk kata de woi shashawn nhtawm, Rehkab amyu dap ni a man e tsabyi jahku hpring ai gawm tawn da nna, Tsabyi jahku lu mu, ngu nna shanhte hpe tsun mu ai. ⁶ Shanhte mahtang, Anhte tsabyi jahku n lu ga ga ai; kaning rai nme law, anhte a wa ngu ai, Rehkab a kasha Yonadab gaw, Nanhte hte nanhte a nshu nsha ni gaw, shu mashi shu masha prat du hkra, tsabyi jahku hkum lu myit; ⁷ nta mung hkum galaw, nli mung hkum gat, tsabyi sun mung hkum hkai, hkum lu myit; nanhte malet nhprang manam tai nga ai mung hta, asak galu nga lu hkra, prat tup sum hta rawng nga mu, nga nna anhte hpe htet da mi ai. ⁸ Anhte gaw, anhte a wa ngu ai, Rehkab a kasha Yonadab, anhte hpe htet da mada hte maren madat mara let, anhte mung, kasha ni a kanu ni mung, shayi shadang sha ni mung, prat tup tsabyi jahku n lu ga ai; ⁹ nga na matu nta mung n galaw, tsabyi sun n hkai, yi hkauna n galaw, nli mung n gat; anhte sum hta nga nga nna, anhte a wa Yonadab htet da mada hte maren, galaw saga ai. ¹¹ Raitimung, Hkalde masha ni hte Suri masha ni a luksuk ni hpe hkrit ga ai majaw, Babelon hkawhkam Nebuhkadneza ndai mung de lung wa yang, anhte gaw, Sa marit, Yerusalem mare de lung wa ga, nga nna shada tsun let, ya Yerusalem mare hta nga nga ga ai, nga ma ai. ¹² - ¹³ Shaloi Yehowa a mungga Yeremia kaw du nna, Israela Karai Kasang Zaw nawng zaw wa up ai Yehowa ning nga ai, Yuda mung masha ni hte Yerusalem mare na ni hpe ning ngu sa tsun mu: Yehowa ning nga ai, Nanhte nye a ga madat na matu, sharin achyin ai n hkam myit ni? ¹⁴ Tsabyi jahku n lu na matu, Rehkab a kasha Yonadab gaw, shi a kashu kasha ni hpe htet da ai ga grin nga nna, shanhte gaw tinang a kawa htet da ai hte maren, dai ni du hkra tsabyi jahku n lu ma ai: ngai chyawm gaw jau jau rawt nna, nanhte hpe a tsun nga timung, nanhte nye a ga n madat myit dai. ¹⁵ Dai hta kaga ngai gaw jau jau rawt nna, nye a shangun ma myihtoi ni mahkra hpe mung, nanhte hpang de shangun dat nna, Nanhte langai hte langai hkan ai n hkru ai lam hpe koi kau mu; nanhte a arawn alai hpe shading mu; hpara tsasam ni hpe dawjau na matu hkum hkan myit; shingrai nanhte hte nanhte a nji nwa ni hpe ngai jaw da ai mungdan hta, nanhte shanu nga lu na myit dai, ngu tsun da timung, nanhte gaw tinang na pat kau nna, nye a ga n madat myit dai. ¹⁶ - ¹⁷ Rehkab a kasha, Yonadab a kashu kasha ni gaw, tinang kawa a htet da ai ga hkan shatup ma ai rai nna, ndai amyu masha ni gaw nye a ga n madat ma ai majaw, Israela Karai Kasang Yehowa ning nga ai: Yu mu, ngai tsun ai tsin-yam tsindam mahkra hpe, Yuda mung hte Yerusalem mare ntsa e ngai shapraw na nngai: kaning rai nme law, ngai tsun timung shanhte n madat ma ai; ngai shaga timung, shanhte n htan hkraw ma ai, nga ai. ¹⁸ - ¹⁹ Bai Yeremia gaw Rehkab a nta dap na ni hpe, Israela Karai Kasang Zaw nawng zaw wa up ai Yehowa ning nga ai: Nanhte gaw nanhte a nwa Yonadab a htet da ai ga madat nna, shi nanhte hpe hkangda mada hkan shatup myit dai majaw, Israela Karai Kasang Zaw nawng zaw wa up ai Yehowa ning nga ai: Rehkab a kasha Yonadab a matu mara ni gaw, nye a man e tsap nga na, galoi htum na n rai, ngu nna htawn tsun mu ai.

¹ - ² Yuda hkawhkam Yoshia kasha Yehoiakim hkaw dung ai mali ning hta e, ndai ga gaw Yehowa kaw na, Yeremia hpang de du nna, Laika katsu la nhtawm, Yoshia aprat e ngai nang hpe ga tsun ai shani kaw nna, dai ni du hkra, Israela amyu, Yuda amyu hte amyu baw yawng hpe lakap nna ngai tsun sai ga mahkra ka da u: ³ Yuda nta dap ni hta ngai galaw na maw ai tsin-yam tsindam mahkra a lam, shanhte na ma yang, shanhte a shut hpyit ai mara hpe ngai raw dat kau lu hkra, shanhte langai hte langai tinang hkan ai n hkru ai lam ni hpe kau da dam ma nhten, nga nna tsun ai. ⁴ Shaloi Yeremia gaw Neria kasha Baruk hpe shaga la nna, Baruk gaw, Yehowa a ga mahkra Yeremia hpe tsun dan sai hte maren, Yeremia htawn tsun ai hku hkan nna, laika katsu hta ka da wu ai. ⁵ Bai Yeremia gaw Baruk hpe, Ngai gaw bawngdung nga nngai; Yehowa nta hta n shang lu nngai; ⁶ dai majaw nang sa su; ngai htawn tsun ai hte maren, na a laika katsu hta nang ka da ai Yehowa mungga hpe, lusha gam ai shani hta Yehowa nta e nga ai masha ni hpe hti dan u; mare kahtawng shagu na sa ai Yuda masha ni hpe mung hti dan u: ⁷ shanhte langai hte langai tinang hkan ai n hkru ai lam hpe koi kau let, Yehowa hpe hpyi tawngban dam ma nhten; ndai amyu hpe Yehowa tsun ai myit kahtet ai hte pawt sindawng ai gaw, grai ja la nga ai, ngu nna htet da wu ai. ⁸ Shingrai myihtoi Yeremia hkangda mada hte maren, Neria kasha Baruk galaw nna, Yehowa ga rawng ai laika hpe, Yehowa nta nhku e hti dan wu ai. ⁹ Ya Yuda hkawhkam Yoshia kasha Yehoiakim hkaw dung ai manga ning na shata jahku hta e, Yerusalem masha ni mahkra hte, Yuda mare kahtawng na Yerusalem mare de lung wa ai masha ni mahkra gaw, Yehowa man e lusha gam na aten tsun shana ma ai. ¹⁰ Shaloi Baruk gaw, Yehowa nta chyinghka nnan makau na, ntsa wing kata e nga ai, chyare wa Shahpan a kasha Gemaria gawk kata e, mung masha ni mahkra a man e, Yeremia laika hta rawng ai ga hti dan mu ai. ¹¹ - ¹² Ya Shahpan a kashu Gemaria kasha Mihkaia gaw, dai laika hta rawng ai Yehowa ga mahkra hpe na wu yang, shi gaw hkawhkam htingnu na chyare wa a gawk de yu wa ai: ya dai gawk kata e du salang ni ngu ai, chyare wa Elshama, Shemaia kasha Delaia, Akbora kasha Elnahtan, Shahpan a kasha Gamaria, Hanania kasha Zedekia hte du salang ni yawng dung nga ma ai. ¹³ Shingrai, mung masha ni hpe Baruk hti dan ai laika ga, Mihkaia na la ai hte maren, shi gaw du salang ni a man e hkai dan mu ai. ¹⁴ Dai re ai majaw du salang ni mahkra gaw, Hkushi, Shelemia hte Nahtania kaw na hkrat ai Yehudi hpe Baruk hpang de shangun dat nna, Mung masha ni hpe nang hti dan ai laika lang let, sa wa rit, ngu nna shaga mu ai. Shingrai Neria kasha Baruk gaw dai laika katsu lang nna, shanhte hpang de sa wa ai. ¹⁵ Shaloi shanhte gaw, Dung u, anhte hpe hti dan mi, nga nna tsun ai hte maren, Baruk gaw shanhte a man e hti dan nga ai. ¹⁶ Ya shanhte gaw ndai ga mahkra na ngut jang shanhte hkrit gari let shada mada yu nna, Anhte gaw ndai ga mahkra hkawhkam wa hpe teng teng tsun dan na ga ai, ngu nna Baruk hpe tsun mu ai. ¹⁷ Bai shanhte gaw Baruk hpe, Ndai ga mahkra, shi hkai dan ai hte maren, nang kaning rai ka da n ta? ngu nna san mu yang, Baruk gaw, Shi ndai ga mahkra hpe hkai dan nna, ngai gaw tsi hte laika hta ka da ni ai, ngu nna shanhte hpe htan wu ai. ¹⁹ Shaloi du salang ni mahkra gaw, Wa su, nang mung, Yeremia mung, sa makoi nga mu; kanang makoi nga ai kadai hpe mung hkum tsun et, ngu nna Baruk hpe tsun mu ai. ²⁰ Ya shanhte gaw chyare wa Elishama gawk e dai laika katsu hpe tawn da nhtawm, wing kata e nga ai hkawhkam wa hpang de shang nna, ndai ga mahkra hkawhkam wa hpe shana ya mu ai. ²¹ Shingrai hkawhkam wa gaw dai laika katsu sa la na matu, Yehudi hpe shangun dat nna, shi gaw dai hpe chyare wa Elishama gawk na shaw la nhtawm, hkawhkam wa hte shi a makau e tsap nga ai du salang ni mahkra a man e hti wu ai. ²² Ya shata jahku rai nga ai majaw, hkawhkam wa gaw kashung ta e rawng ai nta hta dung nga nna, shi a man e wanban hta wan grung nga ai. ²³ Yehudi gaw laika daw masum mali hti ngut jang, hkawhkam wa gaw chyare wa nhkyi hte, dai hpe gadoi dut nhtawm, wanban ntsa e grung ai wan hta kabai bang kau nna, laika katsu ting hkru mat sai. ²⁴ Hkawhkam wa hte ndai ga na ai, shi a ali ama ni kadai mung n hkrit; tinang a hpun palawng mung, n gang je ma ai. ²⁵ Ndai laika katsu hpe n nat kau na matu, Elnahtan, Delaia hte Gemaria gaw hkawhkam wa hpe tawngban timung, shi shanhte a ga n madat nga ai. ²⁶ Bai chyare wa Baruk hte myihtoi Yeremia hpe rim la na matu, hkawhkam wa gaw shi a kasha Yeramela, Azriela kasha Seraia hte Abdela kasha Shelemia hpe hkang dat timung, Yehowa gaw shan hpe makoi da mu ai. ²⁷ - ²⁸ Ya, Yeremia hkai dan ai hte maren, Baruk ka da ai laika katsu hpe, hkawhkam wa nat kau ai hpang, Yehowa mungga gaw Yeremia kaw du nna, Kaga laika katsu hpe la nhtawm, Yuda hkawhkam Yehoakim nat kau ai, shawng na laika katsu hta rawng ai ga mahkra hte maren, bai ka da u. ²⁹ Dai hta n-ga, Yuda hkawhkam Yehoiakim hpe lakap nna ning ngu tsun u: Yehowa ning nga ai, Babelon hkawhkam gaw ndai mung hpe gaja wa sa jahten nna, dai hta e masha mung, yamnga mung, rawng nga lu na n rai, nga ai ga hpe hpa majaw nang ka da n ta? nga nna tsun let, ndai laika katsu hpe nang nat kau ndai. ³⁰ Dai re ai majaw Yehowa gaw, Yuda hkawhkam Yehoiakim hpe lakap nna ning nga ai: Shi a aru arat hta, Dawi a tingnyang hta dung lu na wa, n nga na sai; shi a moi mang hpe shani e jan nprang hta, shana e hkyen hta, kabai kau ai hkrum na ra ai. ³¹ Ngai gaw shi hte shi a kashu kasha ni hpe mung, shi a ali ama ni hpe mung, tinang shut hpyit ai lam hte maren, ari jaw na nngai; shanhte mung, Yerusalem masha ni hte Yuda mung masha ni gaw, n madat mara ma ai majaw, ngai ndat da ai shoihpa shoirang mahkra hpe shanhte a ntsa e shapraw na nngai, nga ai. ³² Shaloi Yeremia gaw laika katsu kaga la nhtawm, Neria kasha, chyare wa Baruk hpe ap ya nna, shi gaw, Yuda hkawhkam Yehoiakim nat kau ai ga mahkra hpe, Yeremia hkai dan ai hte maren, bai ka da wu ai; dai hte bung ai ga law law hpe mung, naw set wu ai.

¹ Babelon hkawhkam Nebuhkadneza gaw, Yoshia kasha Zedekia hpe, Yuda mung hta hkaw3 hkam shatai ai majaw, shi gaw Yehoiakim a kasha Hkonia malai hkaw dung nga ai. ² Raitimung, myihtoi Yeremia n-gup hte Yehowa tsun ai ga hpe, shi mung, shi a ali ama ni mung, amyu masha ni mung, n madat ma ai. ³ Ya hkawhkam Zedekia gaw, Shelemia kasha Yehuhkala hte hkinjawng Masea kasha Zehpania hpe myihtoi Yeremia hpang de shangun dat nna, Anhte a matu mara, anhte a Karai Kasang Yehowa hpe akyu hpyi ya mi, ngu nna htet dat wu ai. ⁴ Ya Yeremia gaw htawng garai n hkrat ai mung masha ni hte rau, naw kanawn mazum nga ai. ⁵ Hpara-u a luksuk ni mung Egutu mung na pru wa masai; Yerusalem mare hpe wang tawn ai Hkalde masha ni gaw, dai lam shi na yang, dai mare na pru wa masai. ⁶ - ⁷ Shaloi Yehowa a mungga myihtoi Yeremia hpang de du nna, Israela Karai Kasang Yehowa ning nga ai: Ngai hpe san yu na matu, nan hpe shangun dat ai Yuda hkawhkam wa hpe ning ngu tsun mu: Nanhte hpe hpyen karum na matu, Egutu mung na pru wa ai, Hpara-u a luksuk ni gaw, tinang a mung de bai nhtang mat wa na mara ai. ⁸ Hkalde masha ni bai wa nna, ndai mare hpa gasat la nhtawm, nat kau na mara ai. ⁹ Yehowa ning nga ai: Gaja wa, Hkalde masha ni anhte kaw na pru mat wa na mara ai, nga nna tinang hkum hpe hkum hkalem kau myit; shanhte pru mat wa na n rai. ¹⁰ Dai hta n-ga, nanhte hpe gasat ai Hkalde luksuk laba ni mahkra hpe nanhte dang kau nna, hkala nba hkrum ai ni hkrai ngam nga timung, shanhte langai hte langai tinang janghpang hta na rawt nna, ndai mare hpe nat kau na mara ai, nga ai. ¹¹ - ¹² Ya Hkalde hpyen luksuk ni gaw, Hpara-u a hpyen luksuk ni hpe hkrit nna, Yerusalem mare na kanut mat wa jang, Yeremia gaw tinang a amyu hta tinang a sali wunli hkamla na matu, Ben-yamin mung de wa na myit nna, Yerusalem mare na pru wa ai. ¹³ Shingrai shi gaw Ben-yamin chyinghka lam de du yang, Hanania kashu, Shelemia kasha, sin langa ni a agyi, Iriya mying ai wa gaw, Ya nang Hkalde masha ni hpang maga de rap mat wa nitdai, nga nna tsun let, myihtoi Yeremia hpe rim la mu ai. ¹⁴ Yeremia chyawm gaw, N rai law; Hkalde masha ni hpang de n rap wa nngai, ngu wu timung, Iriya gaw shi a ga n madat ai, Yeremia hpe rim la nna, du salang ni hpang de shashawn wu ai. ¹⁵ Du salang ni mung Yeremia hpe masin pawt ai hte shi hpe kayat nhtawm, chyare wa Yonahtan a nta hta sharen da mu ai; kaning rai nme law, shanhte dai nta hpe htawng shatai mu ai. ¹⁶ - ¹⁷ Ya Yeremia gaw nta kata na nhkun hte gawk kaji ni hta, nhtoi tsawmra wa rawng nga ai hpang, hkawhkam Zedekia gaw masha shangun nna, Yeremia hpe shaw la nhtawm, hkawhkam wa htingnu nhku e, Yehowa mungga nga a ni? ngu nna shi hpe mayun san wu ai; Yeremia gaw, Yehowa mungga nga ai; nang gaw Babelon hkawhkam a lata hta ap kau ai hkrum na rin dai, ngu nna htan wu ai. ¹⁸ Bai Yeremia gaw hkawhkam Zedekia hpe, Nang hpe mung, na a ali ama ni hte ndai amyu masha ni hpe mung, ngai kaning rai shut n ta? hpa mara majaw ngai hpe sharen da myit ta? ¹⁹ Babelon hkawhkam gaw, nanhte hte ndai mung hpe sa gasat lu na n rai, nga nna htoi ya ai, nanhte a myihtoi ni gaw, ya kanang rai nga ma ta? ²⁰ Dai re ai majaw, nye madu hkawhkam wa e, madat mara u; ngai hpyinem tawngban ai ga na la ya e; ngai gaw chyare wa Yonahtan a nta hta n si u ga, dai de ngai hpe hkum nhtang wa shangun et, ngu nna tsun wu ai. ²¹ Shaloi hkawhkam Zedekia hkangda nna, shanhte gaw Yeremia hpe sin langa ni a wing kata e tawn da mu ai; dai hta n-ga, mare na muk yawng ma ai du hkra, shanhte gaw shani shagu muk kabaw ai seng na, muk tawng tawng, shi hpe a jaw nga ma ai: shingrai Yeremia gaw sin langa ni a wing kata e anga nga ai.

¹ - ³ Ya, Yehowa ning nga ai: Ndai mare hta anga nga ai wa gaw, ri nhtu, kawsi hpang gara ai, ana zinli hte si na ra ai; Hkalde masha ni kaw shang wa ai wa chyawm gaw, hkrung nga lu nna, shi a asak lanep zawn, shi a matu tai na ra ai, nga nna mung, Ndai mare hpe Babelon hkawhkam a luksuk ni a lata hta ap kau ai teng teng hkrum nna, shi dai hpe hkapla na ra ai, nga nna Yehowa tsun ai, nga nna mung, Yeremia amyu masha ni mahkra hpe hkaw tsun ai ga hpe, Matan a kasha Shehpatia, Pashura kasha Gedalia, Shelemia kasha Yuhkala hte Malhkia kasha Pashura hte na ma ai. ⁴ shaloi ndai du salang ni gaw, hkawhkam wa, Ndai wa hpe sat kau u ga; shi gaw ning re ai ga tsun ai majaw, mare e naw ngam nga ai hpyen masha ni hte, mung masha ni mahkra a lata hpe n-gun shayawm nga ai; ndai wa gaw ndai amyu a ngamai wunli n yaw, jahten kau na she maw nga ai, ngu mu ai. ⁵ Dai rai nna hkawhkam Zedekia gaw, Yu mu, shi nanhte a lata hta rai nga ai; hkawhkam wa gaw nanhte ra ai hku hkum da lu ai n rai, ngu mu ai. ⁶ Shaloi shanhte gaw Yeremia hpe woi la nna, sin langa ni a wing kata na, hkawhkam kasha Malhkia nhkun hta, sumri hte gyit nhtawm, shayu dat mu ai. Dai nhkun hta hka n rawng ai, hkumpup hkrai rai nga nna, Yeremia gaw hkumpup hta chyat galwi nga ai. ⁷ - ⁹ Shingrai Yeremia hpe nhkun hta jahkrat bang kau ai lam, hkawhkam nta hta aya lu ai wa, Hkusha masha Ebedmelek na wu yang, Shi gaw hkawhkam nta na pru nhtawm, Ben-yamin chyinghka lam e dung nga ai hkawhkam wa hpang de sa nna, Nye a madu hkawhkam wa e, myihtoi Yeremia hpe, shanhte galaw ai lam nlang shut masai; shi hpe nhkun hta jahkrat bang kau manu ai; mare na muk ma ai majaw, dai nhkun hta kawsi ai hte shi si na ra ai, ngu nna tsun wu ai. ¹⁰ Shaloi hkawhkam wa gaw, Myihtoi Yeremia garai n si yang, ndai shara na marai sumshi hpe shaga la nhtawm, nhkun kata na shi hpe shaw la u, ngu nna Hkusha masha Ebed-melek hpe hkang dat wu ai. ¹¹ Shingrai Ebed-melek gaw dai masha ni hpe shaga la nna, hkawhkam nta kata e sutdek npu na gawk de shang nhtawm, tsupni hte palawng dingsa la nna, Yeremia nga ai nhkun kata de sumri hte shayu dat wu ai. ¹² Bai Hkusha masha Ebed-melek gaw Yeremia hpe, Dai tsupni hte palawng dingsa hpe, na lahpa npu e sumri hpe tsi u, ngu nna tsun ai hte maren Yeremia galaw wu ai. ¹³ Shingrai shanhte gaw Yeremia hpe nhkun kata de na sumri hte dun shapraw la mu ai: dai hpang Yeremia gaw, htawng wing kata e nga nga ai. ¹⁴ Dai hpang hkawhkam Zedekia gaw masha shangun nna, Yehowa nta gawk masum a kata de, Yeremia hpe shaga la nhtawm, hkawhkam wa gaw, Ngai nang hpe lam langai ngai san yu na nngai; hpa mung hkum makoi da et, ngu nna Yeremia hpe tsun wu ai. ¹⁵ Shaloi Yeremia gaw, Ngai tsun yang, nang ngai hpe teng teng n sat kau na n ni? ngai nang hpe hpaji daw ya yang, nang nye a ga madat na n rai, ngu nna Zedekia hpe htan wu ai. ¹⁶ Dai re ai majaw hkawhkam Zedekia gaw, Anhte hpe nsoi nsa ban da ai Yehowa hkrung nga ai hte maren, ngai nang hpe sat kau na n rai, na a asak hpe tam ai ni a lata hta mung, nang hpe ap kau na n rai, ngu nna Yeremia hpe mayun e dagam da wu ai. ¹⁷ Dai rai nna Yeremia gaw Zedekia hpe, Israela Karai Kasang, Zaw nawng zaw wa up ai Karai Kasang Yehowa, ning nga ai, Nang gaw Babelon hkawhkam a du salang ni hpang de sa shang yang, nang asak lawt lu na ndai; ndai mare mung nat kau ai hkrum na n rai; nang mung, na a nta masha ni mung, hkrung nga lu na mara ai: ¹⁸ shing n rai, nang gaw Babelon hkawhkam a du salang ni hpang de n sa shang yang, ndai mare gaw Hkalde masha ni a lata hta ap kau ai hkrum nna, shanhte gaw dai hpe nat kau na mara ai; nang mung shanhte a lata na lawt lu na, n rai, ngu nna tsun wu ai. ¹⁹ Shaloi hkawhkam Zedekia gaw, Hkalde masha ni hpang de rap wa ai Yuda masha ni hpe ngai hkrit nngai; ngai hpe shanhte a lata hta ap kau nna, ngai gaw shatan nhkan hkrum na hpe, ngai tsang nngai, ngu nna Yeremia hpe tsun wu ai. ²⁰ Yeremia chyawm gaw, Shanhte nang hpe ap kau lu na n rai; ngai nang hpe htawn tsun ai Yehowa nsen hpe madat mara u: shingrai, nang lawt lu nna asak hkrung nga lu na ndai. ²¹ Shing n rai, nang mahtang n sa shang hkraw n yang gaw, Yehowa ngai hpe madun ai ga, da ndai rai nga ai: ²² Yu u, Yuda hkawhkam htingnu e naw ngam nga ai num ni hpe, Babelon hkawhkam a du salang ni hpang de woi wa na mara ai; bai dai num ni gaw, Na a makyin jinghku ni nang hpe lau la nna, dang kau masai; na a lagaw hkumpup hta chyat jang, shanhte kanut mat wa masai, nga nna nang hpe asawng na mara ai. ²³ Dai hta n-ga shanhte gaw, na nsha kanu ni hte nshu nsha ni mahkra hpe, Hkalde masha ni hpang de woi mat wa na mara ai; nang mung shanhte a lata na lawt lu na n rai; Babelon hkawhkam a lata hta nang shang lu na ndai; shingrai na a majaw ndai mare nat kau ai hkrum na ra ai, ngu wu ai. ²⁴ shaloi Zedekia gaw, Ndai ga kadai hpe mung hkum na hkum chye shangun et; shingrai yang, nang n si na ndai. ²⁵ - ²⁶ Raitimung, ngai nang hte ga tsun ai lam, du salang ni na la nna, nang hpang de sa du nhtawm, Hkawhkam wa hpe nang kaning nga sa tsun ai mung, hkawhkam wa nang hpe kaning nga hkang dat ai mung, n makoi da ai sha anhte hpe tsun dan mi, shaloi anhte nang hpe n sat kau na ga ai, nga nna nang hpe tsun ma yang, nang gaw, Ngai n si hkra, Yanahtan a nta de ngai hpe bai n shangun na lam, hkawhkam wa hpe tawngban hpyinem nngai, ngu nna shanhte hpe tsun mu, ngu nna Yeremia hpe hkangda wu ai. ²⁷ Shaloi du salang ni yawng Yeremia hpe sa san nna, shi gaw hkawhkam wa hkangda mada hte maren, shanhte hpe tsun dan mu ai. Shingrai shanhte gaw, shi hpe hpa mung n san ai, nga mat ma ai: dai amu a lam kadai mung n myit dum ma ai. ²⁸ Ya Yeremia gaw, Yerusalem mare hpe gasat dang la ai shani du hkra, htawng wing kata e anga nga ai.

¹ Ya Yuda hkawhkam Zedekia hkaw dung ai jahku ning, shata shi hta e, Babelon hkawhkam Nebuhkadneza gaw hpyen luksuk laba ni mahkra hte sa wa nna, Yerusalem mare hpe wang tawn da mu ai. ² Shanhte gaw, Zedekia hkaw dung ai shi langai ning shata mali man a jahku ya shani e, mare hpe tawk waw mu ai. ³ Shingrai Yerusalem mare hpe dang la lu ai shani e, Babelon hkawhkam a du salang ni mahkra gaw mare de shang nna, mare ka-ang chyinghka lam e dung nga ma ai: dai ni gaw, Nergala-shareze, Samgara-nebo, Sa-shehkim, Rab-sari, Nergala-shareze, Rab-maga hte rai ma ai: shanhte hte rau Babelon hkawhkam a du salang ni mahkra lawm ma ai. ⁴ Ya Yuda hkawhkam Zedekia hte hpyen masha ni mahkra gaw dai ni hpe mu jang, shanhte gaw hkawhkam wa sun makau na, bunghku lahkawng a lapran chyinghka lam hku, shana aten e dai mare hta na hprawng pru nna, layang ga hku hprawng mat wa ma ai. ⁵ Hkalde luksuk ni chyawm gaw shanhte hpe hkan shachyut nna, Yerihko pa hta e Zedekia hpe dep mu ai; shi hpe rim la nhtawm, Hamat mung na Ribla mare e nga ai, Babelon hkawhkam Nebuhkadneza hpang de woi wa mu ai; shingrai shi gaw Zedekia hpe dawdan wu ai. ⁶ Ya Babelon hkawhkam gaw, Ribla mare e, Zedekia kashu kasha ni mahkra hpe kawa a man e sat kau mu ai; dai hta kaga Babelon hkawhkam gaw, Yuda mung na arawng sadang lu ai ni mahkra hpe mung, sat kau mu ai. ⁷ Bai shi gaw Zedekia myi hpe achyaw baw kau ya nna, Babelon mare de shi hpe woi wa na matu, hkang hkyihkyang hte gyit wu ai. ⁸ Dai hta kaga Hkalde masha ni gaw, hkawhkam htingnu hte mung masha ni a nta ni hpe nat kau nna, Yerusalem mare bunghku ni hpe run kau mu ai. ⁹ Shaloi sin langa ni a hpyenbu Nebuzaradan gaw, mare kata e naw ngam nga ai ni, shi hpang de rap wa ai ni hte, naw ngam nga ai yu maya ni hpe, Babelon mare de bawng rim mat wa mu ai. ¹⁰ Raitimung sin langa ni a hpyenbu Nebuzaradan gaw, Yuda mung hta sali n lu ai matsan mayan masha ni hpe, ngam tawn da nna, shanhte hpe dai aten e tsabyi sun hte yi hkauna hpe jaw da mu ai. ¹¹ - ¹² Ya Babelon hkawhkam Nebuhkadneza gaw, sin langa ni a hpyenbu Nebuzaradan hpe Yeremia lam hkangda nna, Shi hpe woi la u, atsawm sha yu lahku u, hpa mung hkum zingri et; shi nang hpe tsun ai hte maren galaw u, ngu wu ai. ¹³ - ¹⁴ Shingrai, sin langa ni a hpyenbu Nebuzaradan, Nebushaban, Rabsari, Nergala-shereza, Rab-maga hte hte, Babelon hkawhkam a du kaba ni mahkra gaw, masha shangun nna, Yeremia hpe htawng wing na shaw la nhtawm, Shahpan a kashu Ahikam a kasha Gedalia hpe ap ya mu ai: dai wa gaw shi a nta de Yeremia hpe woi wa nna, shi gaw mung masha ni hte rau nga nga ai. ¹⁵ - ¹⁶ Ya Yeremia gaw htawng wing e bawngdung nga yang, Yehowa mungga shi kaw du nna Hkusha masha Ebed-melek hpe ning ngu sa tsun u; Israela Karai Kasang Zaw nawng zaw wa up ai Yehowa ning nga ai: Yu u, ndai mare a lam ngai tsun ai kaja ai hte n kaja ai ga, ngai shagrin da na we ai; aten du jang dai ga na a man e dik wa na ra ai. ¹⁷ Raitimung, ndai shani e ngai nang hpe mawai la na de ai; nang hkrit ai masha ni a lata hta ap kau ai hkrum na n rai. ¹⁸ Gaja wa ngai nang hpe mawai la na de ai; nhtu hte nang si lu na n rai; nang ngai hta shamyet shanat nga ndai majaw, na a asak lanep zawn na a matu tai na ra ai, nga nna Yehowa tsun ai, nga ai.

¹ Ya sin langa ni a hpyenbu Nebuzaradan gaw, Babelon mare de rim woi wa ang ai, Yerusalem mare hte Yuda mung na bawngdung ai ni hte hpawn, Yeremia hpe hpri sumri hte gyit tawn nhtawm, Rama mare e shi hpe dat tawn ai hpang, Yehowa mungga Yeremia kaw du pru ai. ² Sin langa ni a hpyenbu wa gaw Yeremia hpe shaga la nna, Na a Karai Kasang Yehowa gaw, ndai shara ntsa e, ndai tsin-yam tsindam shapraw nu ai: ³ Yehowa tsun da ai hte maren shi galaw nna shabyin nu ai; nanhte gaw Yehowa hpe shut hpyit nna, shi a nsen n madat ai majaw, ndai tsin-yam nanhte a ntsa e du sai. ⁴ Raitimung, na a lata hta gyit nga ai hpri sumri hpe, dai ni ngai raw kau ya nga nngai; ngai hte rau Babelon mare de hkannang mayu yang, hkannang rit; ngai nang hpe atsawm sha yu lahku na de ai; ngai hte rau Babelon mare de n hkan mayu yang n hkannang u ga; mungdan ting na a man e dam nga ai; nang htuk dum ai shara de sa wa su, ngu wu ai. ⁵ Ya Yeremia gaw naw ganung nga yang, shi gaw Babelon hkawhkam Yuda mare ni a ntsa e du aya dang da ai, Shahpan a kashu, Ahikam a kasha Gedalia hpang de wa nna, mung masha ni hte rau nga nga u; shing n rai, nang htuk dum ai hte maren sa wa su, ngu nna sha jarit hte kumhpaw kumhpa shagun nna, shabawn dat wu ai. ⁶ Dai rai nna Yeremia gaw Mizpa mare e nga ai Ahikam a kasha Gedalia hpang de wa nna, dai mungdan hta naw ngam nga ai ni hte rau nga nga ai. ⁷ - ⁸ Ya Babelon hkawhkam gaw, Ahikam a kasha Gedalia hpe, dai mung ntsa e du aya dang da nna, Babelon mare de bawng n rim wa lawm ai lasha, numsha, ma kaji ni hte mungdan hta matsan mayan htum ai ni hpe shi kaw ap ya ai lam, nam ginwang e nga ai hpyenbu ni hte hpyen luksuk ni na ma yang, shanhte gaw tinang masha ni hte rau, Mizpa mare e nga ai Gedalia hpang de du ma ai: dai ni gaw Nehtania kasha Ishmaela, Karea kasha Yohanan hte Yonahtan, Tanhumeta kasha Seraia, Netohpa amyu Ehpai a kashu kasha ni hte Mahka amyu Yezania hte rai ma ai. ⁹ Dai rai nna Shahpan a kashu Ahikam a kasha Gedalia gaw, Hkalde masha ni hpe dawjau na hkumtsang myit; ndai mung hta shanu nga nna, Babelon hkawhkam hpe dawjau mu; shingrai yang, ngwi pyaw na myit dai. ¹⁰ Ngai chyawm gaw, Mizpa mare e nga nga nna anhte hpang de du na ra ai Hkalde masha ni a man e tsap nga na nngai: nanhte mahtang, tsabyi jahku mung, nlum ta namsi hte asau hpe mung, shu la nna tinang a di bu ni hta mahkawng da mu; ya shang wa lu ai mare kahtawng ni hta shanu nga mu, ngu nna shanhte hpe ga shaka tawn da mu ai. ¹¹ - ¹² Dai hte maren, Babelon hkawhkam gaw Yuda mung hta masha nkau mi hpe naw ngam da nna, Shahpan a kashu, Ahikam a kasha Gedalia hpe, shanhte a ntsa e du aya dang da ai lam, Moba mung, Ammon kashu kasha ni a mung, Edom mung hte mungdan shagu hta bra nga ai Yuda masha ni mahkra na jang, shanhte hpe shapraw kau dat ai mung shagu na bai nhtang wa nhtawm, Yuda mung Mizpa mare e Gedalia hpang de sa du ma ai; shanhte gaw dai yang nna, tsabyi jahku hte nlum ta myin ai namsi law law shu la ma ai. ¹³ - ¹⁴ Dai hpang Karea kasha Yohanan gaw, nam ginwang e nga ai hpyen luksuk ni a hpyenbu ni mahkra hte rau, Mizpa mare e Gedalia hpang de sa du nna, Ammon kashu kasha ni a hkawhkam Bali gaw, nang hpe sat kau na nga, Nehtania kasha Ishmaela hpe shangun dat ai lam, nang chye nga n ni? ngu nna tsun wu timung, Ahikam a kasha Gedalia gaw dai ga hpe n kam nga ai. ¹⁵ Karea kasha Yohanan chyawm gaw, Nehtania kasha Ishmaela hpe ngai sa sat kau na ahkang jaw e; kadai mung dai lam chye lu na n rai; shi gaw nang hpe sat kau nna, nang kaw hpawng nga ai Yuda masha ni mahkra gaw dumbru dumbra rai mat nna, Yuda mung hta naw ngam nga ai ni, hpa majaw htum mat hkrum na ma ta? ngu nna Mizpa mare e Gedalia hpe mayun tsun wu ai. ¹⁶ Raitimung, Ahikam a kasha Gedalia gaw, Nang dai hku galaw lu na n rai; Ishmaela lam n teng ai ga nang tsun nitdai, ngu nna Karea kasha Yohanan hpe htan wu ai.

¹ Ya shata sanit hta e, hkawhkam amyu rai nga ai, hkawhkam a hpyenbu kaba Elishama kashu, Nehtania kasha Ishmaela gaw, marai shi hte rau, Mizpa mare e dung nga ai Ahikam a kasha Gedalia hpang de sa du nna, shanhte gaw Mizpa mare hta rau lusha nga ma ai. ² Shaloi Nehtania kasha Ishmaela gaw, dai marai shi hte rau rawt nna, Babelon hkawhkam a ahkang hte munggyi tai nga ai Shahpan a kashu Ahikam a kasha Gedalia hpe nhtu hte kahtam sat kau mu ai. ³ Dai hta n-ga Ishmaela gaw, Mizpa mare e Gedalia hte rau nga ai Yuda masha ni mahkra hpe mung, dai yang e rai nga ai Hkalde hpyen masha ni hpe mung, sat kau mu ai. ⁴ - ⁵ Ya Gedalia hpe sat kau ai hpang, ni ni lai timung, kadai mung garai n chye ai majaw, Shehkem, Shilo hte Samari mare kaw na marai matsat shi hte gaw, tinang a mun shangun kau nhtawm, hpun palawng jaje buhpun let, tinang hkum jahpye kau nna, Yehowa nta hta shashawn na matu, lusha hkungga hte manam pyaw ai baw lang let, pru sa wa ma ai. ⁶ Shaloi Nehtania kasha Ishmaela gaw, dai ni hpe tau la na nga, hkrapngu hkrapngoi let Mizpa mare na pru wa nna, shanhte hpe mu yang, Ahikam a kasha Gedalia hpang de sa wa marit law, ngu nna shanhte hpe shaga mu ai. ⁷ Ya shanhte gaw mare ka-ang e du jang, Nehtania kasha Ishmaela hte, shi hte rau nga ai masha ni gaw, shanhte hpe sat kau nna, nhkun hta kabai bang kau mu ai. ⁸ Dai ni hta lawm ai marai shi chyawm gaw, Anhte hpe hkum sat kau mi; anhte mahkawng da ai sut ngu ai, hkaulan mam, mukyaw mam, sau hte lagat jahku pa ga e makoi nga ai, ngu nna Ishmaela hpe tsun mu ai majaw, shi dai ni hpe tawn da nna, kahpu kanau ni hte rau n sat kau mu ai. ⁹ Ya Ishmaela gaw, Gedalia hte rau sat kau ai ni a mang ni hpe kabai bang kau ai nhkun gaw, hkawhkam Asa, Israela hkawhkam Basha hpe hkrit ai majaw, htu ai nhkun rai nga ai; Nehtania kasha Ishmaela gaw dai nhkun hpe si mang hte jahpring da wu ai. ¹⁰ Shaloi Nehtania kasha Ishmaela gaw, Ahikam a kasha Gedalia a lata hta, sin langa ni a hpyenbu Nebuzaradan ap kau ai, hkawhkam shayi sha ni hte Mizpa mare e naw ngam nga ai mung masha ni mahkra hpe rim woi wa nna, Ammon kashu kasha ni hpang de sa wa na maw nga ai. ¹¹ - ¹² Ya Nehtania kasha Ishmaela galaw ai n hkru ai amu mahkra hpe, Karea kasha Yohanan hte, shi hte rau nga ai luksuk ni a bu ni na ma yang, shanhte gaw hpyen masha ni mahkra hpe shaga la nhtawm, Nehtania kasha Ishmaela hpe gasat na nga, pru sa wa nna, Gibeon hkalawng kaba makau e shi hpe mu hkrup mu ai. ¹³ Ya Ishmaela hte rau nga nga ai masha ni mahkra gaw, Kareas kasha Yohanan hte shi kaw hkannang ai hpyenbu ni hte luksuk ni hpe mu jang, shanhte gabu gara nga ma ai. ¹⁴ Shingrai Mizpa mare na Ishmaela rim woi wa ai masha ni mahkra gaw, shi kaw na pru nna, Karea kasha Yohanan hpang de kayin mat wa ma ai. ¹⁵ Raitimung, Nehtania kasha Ishmaela gaw marai matsat hte rau Yohanan a lata na hprawng lawt nna, Ammon a kashu kasha ni hpang de shang mat wa ai. ¹⁶ - ¹⁷ Shingrai Ahikam a kasha Gedalia hpe sat kau ai hpang, Karea kasha Yohanan hte shi kaw hkannang ai luksuk ni a bu ni mahkra gaw, Nehtania kasha Ishmaela lata na mung, Mizpa mare na mung, naw ngam nga ai ni ngu ai, hpyen ma ni, num ni, ma kaji ni hte unuk ni hpe, Gibeon mare na bai shaw woi la nna, Hkalde masha ni a majaw Egutu mung de htawt wa na maw let, Betlehem mare makau na Hkimham dabang e nga nga ma ai: ¹⁸ kaning rai nme law, Babelon hkawhkam munggyi aya dang da ai, Ahikam a kasha Gedalia hpe, Nehtania kasha Ishmaela sat kau ai majaw, shanhte gaw Hkalde masha ni hpe hkrit nga ma ai.

¹ - ² Shaloi hpyenbu ni nlang, Karea kasha Yohanan, Hoshaia kasha Yezania hte, mung masha ni kaji kaba mahkra gaw, myihtoi Yeremia hpang de sit sa nna, Shawng de anhte law ga timung, ya nang mu nga ai hte maren, kaji sha ngam mat saga ai rai nna, anhte hpyinem ai ga hpe hkum gangkau ya mi; ³ anhte sa wa na lam hte, anhte galaw na ra ai amu ni hpe, na a Karai Kasang Yehowa anhte hpe madun dan mi ga, naw ngam nga ai ni anhte a matu, na a Karai Kasang Yehowa kaw hpyinem tawngban ya mi, ngu nna hpyi mu ai. ⁴ Shaloi myihtoi Yeremia gaw, Ngai na ni ai; nanhte hpyi ai hte maren, nanhte a Karai Kasang Yehowa kaw hpyi na nngai: Yehowa nanhte hpe htan mahtan hte maren, ngai nanhte hpe htawn tsun na nngai: hpa mung makoi da na n rai, ngu nna shanhte hpe tsun mu ai. ⁵ Dai rai nna shanhte gaw, Na a Karai Kasang Yehowa, na a n-gup hte anhte hpe htet da mada hte maren, anhte galaw na ga ai, nga nna Yehowa gaw anhte a matu tengman ai hte kang ka ai sakse tai nga u ga; ⁶ anhte gaw anhte a Karai Kasang Yehowa a ga madat mara nna, ngamu ngamai nga lu hkra, anhte nang hpe shangun dat ai, anhte a Karai Kasang Yehowa a ga, kaja timung, n kaja timung, madat mara na ga ai, ngu nna Yeremia hpe tsun mu ai. ⁷ - ⁹ Dai hpang shi ya na jang, Yehowa mungga Yeremia kaw du nna, shi gaw, Karea kasha Yohanan, shi kaw hkannang ai hpyenbu ni mahkra hte, mung masha kaji kaba yawng hpe shaga la nhtawm, Nanhte ngai hpe shangun dat nna, ngai tawngban hpyinem ai Israela Karai Kasang Yehowa ning nga ai: ¹⁰ Nanhte gaw ndai mungdan hta naw shanu nga mayu yang, ngai nanhte hpe dè da na nngai, run kau na n rai; ngai nanhte hpe hkai da na nngai, baw kau na n rai; ngai nanhte hpe n hkru ai hku galaw ai lam, myit malai lu nngai: ¹¹ nanhte hkrit nga ai Babelon hkawhkam hpe hkum hkrit myit; Yehowa ning nga ai, Dai hkawhkam a lata na nanhte hpe hkyela nna mawai la na matu, ngai nanhte hte rau nga nga nngai majaw, shi hpe hkum hkrit myit. ¹² Shi nanhte hpe chyeju myit madun dan nna, nanhte a buga de nhtang wa shangun lu hkra, ngai nanhte hpe matsan dum na nngai. ¹³ - ¹⁶ Shing n rai, nanhte mahtang, Anhte gaw ndai mung e shanu nga na n rai, nga nna nanhte a Karai Kasang Yehowa a ga n madat let, N rai law, anhte Egutu mung de yu wa na ga ai; dai yang e anhte hpyen hkrum na n rai; pahtau nsen na lu na n rai; kawsi hpang gara hkrum na n rai; dai yang e anhte nga na ga ai, nga nna tsun myit yang gaw, naw ngam nga ai Yuda amyu masha ni e, Yehowa ga na la mu: Israela Karai Kasang Zaw nawng zaw wa up ai Yehowa ning nga ai: Nanhte Egutu mung de yu wa na myit dingren rai let, dai mung de gaja wa yu wa myit yang gaw, nanhte hkrit ai nhtu tsin-yam Egutu mung hta nanhte hpe dep na ra ai; nanhte hkrit ai kawsi hpang gara, Egutu mung de nanhte hpe hkan shachyut nna, dai mung hta nanhte si na myit dai. ¹⁷ Shingrai Egutu mung de sa shingbyi na nga, dai de myiman yawng ai ni mahkra gaw, ri nhtu, kawsi hpang gara ai hte ana zinli hte si na mara ai; shanhte a ntsa de ngai shapraw na tsin-yam tsindam hpe, kadai mung lawt lu na n rai. ¹⁸ Kaning rai nme law, Israela Karai Kasang Zaw nawng zaw wa up ai Yehowa ning nga ai: Ngai gaw Yerusalem masha ni a ntsa e, nye a pawt sindawng ai hte myit kahtet ai hpe ru bun ai hte maren, nanhte Egutu mung de shang jang, nye a myit kahtet ai hpe ngai nanhte a ntsa e ru bun nna, nanhte gaw matsa mawa, mauhpa shara, dagam dala shara hte shatan nhkan shara tai na myit dai; nanhte htawmhpang de ndai shara hpe mu lu na n rai. ¹⁹ Naw ngam nga ai Yuda amyu masha ni e, Egutu mung de hkum yu wa myit, nga nna nanhte a lam Yehowa tsun nga sai; ngai dai ni nanhte hpe sakse hkam nga nngai, teng teng dum nga mu. ²⁰ - ²¹ Nanhte nan tinang a myit masin hpe hkalem kau myit dai: kaning rai nme law, Anhte a Karai Kasang Yehowa hpe, anhte a matu akyu hpyinem ya mi, anhte a Karai Kasang Yehowa tsun matsun hte maren htawn tsun dan mi; anhte madat mara na ga ai, nga nna nanhte gaw nanhte a Karai Kasang Yehowa hpang de, ngai hpe shangun dat nna, ngai gaw dai ni nanhte hpe shi a ga tsun shana ni ai; nanhte mahtang ngai hpe shangun dat ai lam hta, nanhte a Karai Kasang Yehowa nsen madat myit dai n rai. ²² Dai re ai majaw, nanhte sa shingbyi mayu ai shara hta, ri nhtu, kawsi hpang gara, ana zinli hte nanhte si na myit dai, teng teng chye nga mu, ngu nna htan mu ai.

¹ - ² Ya Yeremia gaw, shanhte a Karai Kasang Yehowa hkangda mada hte maren, mung masha ni mahkra hpe htawn tsun nna, shana dat ngut jang, Hoshaia kasha Azaria, Karea kasha Yohanan hte myit kaba ai masha ni nlang, Yeremia hpe, Nang masu ga tsun ndai; Egutu mung hta shingbyi nga na matu, nanhte yu wa lu na myit dai n rai, nga nna anhte a Karai Kasang Yehowa nang hpe tsun shangun ai n rai; ³ - ⁴ Hkalde masha ni gaw, anhte hpe sat kau nna, Babelon mare de rim woi wa shangun hkra, shanhte a lata hta anhte hpe ap kau na matu, Neria kasha Baruk gaw, nang hpe anhte a lam gumlau nga ai, ngu nna tsun nhtawm, Karea kasha Yohanan, luksuk ni a bu ni hte mung masha ni mahkra gaw, Yuda mung hta shingbyi nga mu, nga ai Yehowa ga n madat ma ai. ⁵ - ⁷ Shingrai Karea kasha Yohanan hte, luksuk ni a hpyenbu ni mahkra gaw, mung shagu de shabra kau hkrum nna, Yuda mung hta bai shingbyi nga na matu, nhtang wa ai, Yuda amyu hta naw ngam nga ai, lasha, numsha ma kaji, hkawhkam shayi sha ni hte, sin langa ni a hpyenbu Nebuzaradan, Shahpan a kashu, Ahikam a kasha Gedalia lata hta ap ya ai mung masha ni mahkra hpe mung, myihtoi Yeremia hte Neria kasha Baruk hpe mung, woi la nna, Egutu mung de du ma ai; shanhte gaw Yehowa a nsen n madat ai, Tahpan mare e sa nga ma ai. ⁸ - ¹⁰ Shaloi Yehowa a mungga, Tahpan mare e Yeremia kaw du nna, Nlung kaba la nhtawm, Tahpan mare Hpara-u a htingnu chyinghka lam makau e nga ai, wut kabaw ai ga hta, Yuda masha ni a man e, engede hte lup makoi da nna shanhte hpe, Israela Karai Kasang Zaw nawng zaw wa up ai Yehowa ning nga ai: Yu mu, ngai gaw nye a shangun ma, Babelon hkawhkam Nebuhkadneza hpe shaga la nna, shi a tingnyang hpe, ngai lup makoi da ai nlung ni a ntsa e shadun da na nngai; shi gaw shi a hkawhkam sum hpe dai nlung ni a ntsa e hpyan tawn na ra ai. ¹¹ Shi gaw sa du nna Egutu mung hpe shaza kau na ra ai; si ging ai ni hpe si ai de, bawngdung ging ai ni hpe bawngdung ai de, sat kau ging ai ni hpe sat kau ai de ap kau na ra ai. ¹² Ngai gaw Egutu hpara ni a nta ni hpe nat kau na nngai; shi gaw nta ni hpe nat kau nna, sumla ni hpe hpai kau na ra ai: sagu rem wa gaw tinang nba lawai ai zawn, shi gaw Egutu mung hpe lawai nna, dai hta na ngwi pyaw ai hte pru na ra ai. ¹³ Dai hta kaga shi gaw, Egutu mung, Bet-sheme mare na nlung shadaw ni hpe agrawp kau nna, Egutu hpara ni a nta ni hpe nat kau na ru ai, nga ai.

¹ - ² Egutu mung na Migdola, Tahpan, Memhpi mare ni hte, Pahtru mung hta dè nga ai Yuda masha ni hpe lakap nna, Yeremia kaw du ai mungga gaw, Israela Karai Kasang Zaw nawng zaw wa up ai Yehowa ning nga ai: Yerusalem hte Yuda mare ni mahkra ntsa e ngai shapraw ai tsin-yam tsindam nlang hpe, nanhte mu yu manit dai; ³ Yu mu, shawng de nga ai ni gaw, tinang mung n chye, nanhte mung, nanhte a nji nwa ni mung, n chye ai hpara kaga ni hpe dawjau let, ngai hpe pawt sindawng shangun hkra, manam pyaw ai baw natnawng ai yubak a majaw, ndai mare ni gaw, dai ni, masha kata ai shingran katsi ai shara tai nga ai. ⁴ - ⁵ Ngai chyawm gaw, jau jau rawt nna, nye a shangun ma myihtoi ni mahkra hpe nanhte hpang de shangun dat yang, Ngai ndawng n yawt ai, ndai matsat shabat amu ni hpe hkum galaw myit, ngu nna tsun timung, shanhte gaw hpara kaga ni hpe, manam pyaw ai baw natnawng ai yubak hpe kau da hkra, madat mung n madat, na mung n na la ma ai. ⁶ Dai re ai majaw, nye a myit kahtet ai hte pawt sindawng ai hpe, ngai ru dat nna, dai gaw Yuda mare ni hte Yerusalem lam ni hta hkru nga nna, dai shara ni gaw, dai ni rai nga ai hte maren, akrin akraw shara tai mat nga ai. ⁷ - ⁸ Dai re ai majaw, Israela Karai Kasang, Zaw nawng zaw wa up ai Karai Kasang Yehowa, ya, ning nga ai: Nanhte gaw tinang hkum hpe shaza kau na matu mung, ga ntsa amyu baw ni hta dagam dala hte shatan nhkan shara tai na matu mung, nanhte sa shingbyi nga ai Egutu mung hta, hpara kaga ni hpe manam pyaw ai baw natnawng ya let, tinang lata galaw ai amu hte ngai hpe pawt sindawng shangun ai majaw, nanhte hta langai mi n ngam nga lu na matu, Yuda amyu lasha, numsha, ma kaji ni hte chyu chyu ai ma chyangai ni mahkra hpe shaza kau hkra, ndai yubak kaba hpe, tinang myit masin hta, hpa majaw galaw nga myit ta? ⁹ Yuda mung hte Yerusalem mare lam ni hta, nanhte a nji nwa ni galaw ai yubak, Yuda hkawhkam ni galaw ai yubak, hkawhkam jan ni galaw ai yubak, nanhte hkum nan galaw ai yubak hte nanhte a madu jan ni galaw ai yubak hpe, nanhte malap kau manu ni? ¹⁰ Shanhte gaw dai ni du hkra myit nem ai n rai; hkrit kamyin ai myit rawng nga ai n rai; nye a tara lam hkannang ma ai n rai; nanhte hte nanhte a nji nwa ni a man e tawn da ai matsun maroi ga hpe, hkan shatup ma ai n rai. ¹¹ Dai rai nna, Israela Karai Kasang, Zaw nawng zaw wa up ai Yehowa ning nga ai: Yuda amyu ting hpe shaza kau hkra, ngai nanhte hpe n hkru ai myiman madun na nngai. ¹² Egutu mung hta shingbyi nga na maru, myiman yawng ai, naw ngam nga ai Yuda amyu hpe ngai woi la nna, shanhte yawng htum mat na mara ai; shanhte gaw Egutu mung hta e kadawng mat na mara ai; ri nhtu, kawsi hpang gara hte za mat na mara ai; kaji htum ai wa kaw nna kaba htum ai wa du hkra, ri nhtu, kawsi hpang gara hte si na mara ai; shanhte gaw matsa mawa, mauhpa shara, dagam dala hte shatan nhkan shara, tai na mara ai. ¹³ - ¹⁴ Yerusalem mare hpe ri nhtu, kawsi hpang gara ana zinli hte ari jaw ai hte maren, Egutu mung de sa shingbyi ai ni hpe ngai ari jaw nna, Egutu mung hta sa shingbyi nga ai, ngam nga ai Yuda masha ni gaw, Yuda mung de bai nhtang wa mayu timung, langai mi muk tsin-yam lawt ai hte nhtang wa lu na n rai: hprawng lawt lu ai wa sha, nhtang wa lu na re ai, nga ai. ¹⁵ - ¹⁶ Shaloi, tinang a num ni, hpara kaga ni hpe manam pyaw ai baw natnawng ai lam chye nga ai lasha ni yawng hte hte, makau e tsap nga ai num ni, wunawng wuwa kaba ngu ai, Egutu mung na Pahtru shara e shingbyi nga ai Yuda masha ni mahkra gaw, Yeremia hpe, Yehowa amying gang let, nang anhte hpe tsun ai ga mahtang, anhte n madat na ga ai. ¹⁷ Anhte hte anhte a ji wa ni, anhte a hkawhkam ni hte du salang ni gaw, Yuda mare ni hte Yerusalem mare lam ni hta, galaw yu sai hte maren, sumsing lamu hkawhkam jan a matu, manam pyaw ai baw natnawng na hte dumhpung hkungga ru jaw na ga ai, nga nna tawn da ai ga ndat yawng hpe anhte shadik na ga ai: kaning rai nme law, dai shaloi e anhte hkru kat lu nna, ngamu ngamai nga ai hte ruyak n hkrum ga ai. ¹⁸ Sumsing lamu hkawhkam jan hpe, manam pyaw ai baw natnawng na hte, dumhpung hkungga ru jaw na hprai kau yang, anhte lam shagu hta matsan mayan hkrum nna, ri nhtu, kawsi hpang gara hte hten byak hkrum ga ai. ¹⁹ Sumsing lamu a hkawhkam jan hpe, manam pyaw ai baw natnawng nna, dumhpung hkungga ru jaw yang, shi a matu muk pa galaw nna, dumhpung hkungga ru jaw let, anhte a la ni n lawm ai, anhte nawku ga ni? ngu nna htan mu ai. ²⁰ - ²¹ Shaloi Yeremia gaw, ndai lam shi hpe htan ya ai numsha, lasha mahkra hpe, Nanhte hte nanhte a nji nwa ni, nanhte a hkawhkam ni, du salang ni hte mung masha ni gaw, Yuda mare ni hte Yerusalem mare lam ni hta, natnawng ai manam pyaw ai baw hpe, Yehowa malap mali kau nna, n matsing da na a ni? ²² Ndai nanhte galaw ai n hkru la ai matsat shabat amu ni hpe, Yehowa naw n sharang lu ai majaw, nanhte mungdan gaw dai ni rai nga ai hte maren, masha kata ai, shingran katsi ai, mauhpa shara hte dagam dala shara tai wa sahka. ²³ Nanhte gaw manam pyaw ai baw natnawng nna, Yehowa hpe shut kau ai majaw mung, Yehowa ga n madat ai hte, shi hkangda ai tara, matsun maroi ga hte sakse ga n hkannang ai majaw mung, dai ni rai nga ai hte maren, ndai tsin-yam tsindam nanhte a ntsa e du nga ai, nga mu ai. ²⁴ Bai Yeremia gaw mung masha ni hte num ni mahkra hpe ning ngu mu ai: Egutu mung de sa shingbyi nga ai, Yuda masha yawng hte e, Yehowa a ga madat mara mu: ²⁵ Israela Karai Kasang Zaw nawng zaw wa up ai Yehowa ning nga ai: Nanhte hte nanhte a num ni mahtang, Anhte gaw sumsing lamu hkawhkam jan hpe manam pyaw ai baw natnawng na hte dumhpung hkungga ru jaw na matu, tawn da ai ga ndat hte maren, teng teng galaw na ga ai, nga nna n-gup hte tsun nhtawm, tinang lata hte shangut manu ai: ya nanhte a ga ndat hpe shadik mu, nanhte a ga ndat hte maren galaw mu. ²⁶ Dai rai nna, Egutu mung hta sa shingbyi nga ai, Yuda masha yawng hte e, Yehowa ga madat mara mu; Yehowa ning nga ai, Yu mu Egutu mung ting hta shingbyi nga ai Yuda masha langai mi muk, Madu Yehowa hkrung nga ai hte maren, nga nna nye a mying n tsun lu hkra, ngai gaw nye a daru magam mying gang let dagam da ni ai. ²⁷ Yu mu, chyeju myit madun na n rai, yubak jahkrum na she, ngai shanhte hpe ala nga nna, Egutu mung hta sa shingbyi nga ai Yuda masha ni yawng, htum mat ai du hkra, ri nhtu kawsi hpang gara ai hkrum na mara ai. ²⁸ Dai rai nna, ri nhtu na hprawng lawt ai ni hkrai, Egutu;mung nna Yuda mung de nhtang wa lu na mara ai: shanhte mung law na n rai; shingrai, nye a ga mahtang, shanhte a ga mahtang, grin nga na kun? Egutu mung de sa shingbyi ai, naw ngam nga ai Yuda masha ni yawng, chye lu na mara ai. ²⁹ Ndai yang e ngai nanhte hpe sharin ya nna, nanhte hpe yubak jahkrum na, nga nna ngai tsun ai ga teng teng dik wa na lam, nanhte chye lu na matu, ngai madun ai kumla da ndai rai nga ai: ³⁰ Yuda hkawhkam Zedekia asak tam ai, hpyen ngu ai, Babelon hkawhkam Nebuhkadneza a lata hta, ngai shi hpe ap kau ai zawn, Egutu hkawhkam Hpara-u Hohpra a asak tam ai hpyen ni a lata hta, ngai shi hpe ap kau na we ai, nga nna Yehowa tsun ai, nga ai.

¹ - ² Yuda hkawhkam, Yoshia kasha Yehoiakim hkaw dung ai mali ning hta e, Neria kasha Baruk gaw, Yeremia n-gup hta na pru ai ga hte maren, laika hta ka da ai hpang, myihtoi Yeremia shi hpe htawn tsun ai mungga gaw, Baruk e, Israela Karai Kasang Yehowa nang hpe ning nga ai: ³ nang mahtang, Ngai dingnye lu nngai; Yehowa ngai gawng run ai hta yawnhkyen ai kahtap ya ni ai; ngai gaw yawn madai ai hte hki ba la nngai; ban sa n hkrum nngai, nga ndai. ⁴ Yehowa ning nga ai, Shi hpe ning ngu htawn tsun u: Yu u, ngai galaw da ai hpe, ngai run kau na nngai; ngai hkai da ai ngu ai, ndai mung ting hpe, ngai baw kau na nngai. ⁵ Nang gaw galu kaba ai lam, na a matu tam n ni? hkum tam et; Yu u, hkrung mahkrung mahkra ntsa e ngai tsin-yam tsindam, shapraw na nngai; raitimung, nang sa wa ai shara shagu hta, na a asak hpe lanep zawn, ngai nang hpe jaw na nngai, nga nna Yehowa tsun ai, nga ai.

¹ Maigan amyu ni a lam shaang nna, myihtoi Yeremia kaw du ai Yehowa mungga, da ndai rai nga ai. ² Egutu mung hte seng ai mungga: Yuda hkawhkam Yoshia kasha, Yehoiakim hkaw dung ai mali ning hta e, Babelon hkawhkam Nebuhkadneza gaw Hkarahkeme shara Uhprat hka kau e sat kau ai, Egutu hkawhkam Hpara-u-Niko a hpyen luksuk ni hpe lakap nna ning nga ai: ³ N-gang kaling hte n-gang galu hkyen nna, hpyen htim na sit sa wa mu. ⁴ Gumra hpyen ni e, gumra ni hpe byau nna, hpri gup chyawp chyawp let, jawn pru wa mu: ri nhtu ni hpe arut shatsawm mu, hpri palawng hpun mu. ⁵ Shanhte hkrit nna kanut mat wa ai hpe, hpa majaw ngai mu na rai ni? shanhte a share ninghkrin ni sum mat nna, n kayin yu wam ai, hprawng mat shajang ma ai: shara magup hkan e shoihpa shoirang hkrai rai nga ai, nga nna Yehowa tsun ai. ⁶ Laram ai wa hpe hkum jahprawng kau et; share ninghkrin wa hpe hkum shalawt kau et; dingdung maga Uhprat hka kau e shanhte ahtu kataw nna di hkrat masai. ⁷ Nila hka zawn tung rawt nna, hka nu hpungtun zawn lung wa ai wa gaw, kadai wa rai ta? ⁸ Egutu mung gaw Nila hka zawn tung rawt nna, de a hka hpung ni hka nu hpungtun zawn kaboi nga ai: dai rai nna shi gaw, Ngai rawt nna lamu ga hpe lim ka-up kau na nngai; ngai gaw mare ni hte hpawn, mare masha ni hpe shaza kau na nngai, nga ai. ⁹ Gumra ni e, lung mu; hpyen leng ni e wu kadu mu; share ninghkrin ni ngu ai, n-gang lang ai Hkusha hte Put amyu, ndan chye shachyen ai Ludi amyu masha ni, pru wa mu ga. ¹⁰ Kaning rai nme law, dai shani gaw, Zaw nawng zaw wa up ai Madu Yehowa gaw shi e hpyen ai ni hpe matai dawp ai shani rai nga ai: nhtu gaw hkru hkra kawa sha nna, shanhte a sai hpe nang hkra lu na ra ai; Zaw nawng zaw wa up ai Madu Yehowa matu, dingdung mung na Uhprat hka kau e, shagu hkungga nawng ya shara rai nga ai. ¹¹ Egutu shayi hkawnsek e, Gilead mung de lung wa nna, balsam hpun naw hpe la u; nang gaw kaman lila tsi law law tsi ndai: na a ana ahkya mai wa lu ai n rai. ¹² Nang kaya kahpa hkrum ai lam hpe masha amyu ni na masai; na a sharung shayawt ai nsen gaw mungkan ting hpring sai: share ninghkrin shada ahtu nna, shan rau kadawng taw masai, nga ai. ¹³ Babelon hkawhkam Nebuhkadneza gaw, Egutu mung hpe sa gasat na lam, Yehowa gaw myihtoi Yeremia hpe tsun dan ai ga, da ndai rai nga ai. ¹⁴ Nhtu gaw na a grupyin e nga ai ni hpe sha kau ai majaw, rawttsap nna tinang hkum hpe hkyen mu, ngu nna Egutu mung hta jahtau ai hte Migdola mare hta shi shana ya mu; rai sa, Memhpi mare hte Tahpan mare hta dai shi shana ya mu. ¹⁵ Na a n-gun ja ai usu, hpa majaw shaza kau ai hkrum a ta? Yehowa shi hpe gawt kau ai majaw, shi n tsap nga lu ai. ¹⁶ Shi gaw masha law law hpe kadawng shangun nna, langai hte langai manang wa ntsa e kadawng taw ma ai rai nna, shanhte gaw, Rawt ga, anhte hpe zingri ai nhtu majaw tinang a amyu, tinang a buga de nhtang wa saga, nga nna tsun ma ai. ¹⁷ Dai yang e shanhte gaw, Egutu hkawhkam Hpara-u lam n la sai; shi a ban lai wa sai, nga nna jahtau ma ai. ¹⁸ Zaw nawng zaw wa up ai, Yehowa mying ai hkawhkam wa ning nga ai, Gaja wa, ngai hkrung nga ai hte maren, bum ni hta na Tabora bum hte, nammukdara makau na Hkarmela bum zawn, Babelon hkawhkam du na ra ai. ¹⁹ Egutu mung e shanu nga ai shayi sha e, bawngdung sa wa na matu na arung arai ni hpe shajin u: kaning rai nme law, Memhpi mare gaw masha shingran katsi hkra, atsai awai nat kau ai hkrum na ra ai. ²⁰ Egutu mung gaw grai tsawm htap ai dumsu upra rai nga ai; raitimung, dingdung maga de na jinghkam gaw du ra ai, gaja wa du ra ai. ²¹ Shi a nchyang ni mung, ulawng hta kawn da ai dumsu kasha hte bung nga ma ai: kaning rai nme law, rutsang ai hte ari ahpri hkrum ai shani shanhte a ntsa e du ra ai majaw, dai ni gaw n tsap nga lu ai, rau kayin hprawng mat wa ma ai. ²² De a nsen gaw, lapu hkawm ngoi ai nsen hte bung nga ai: kaning rai nme law, shanhte gaw hpun kran ai ni zawn nwa lang let, hpyen luksuk ni hte shi hpang de du na mara ai. ²³ shanhte gaw n dang hti ai dinggamyaw hta grau law ai majaw, dai maling gade sin timung, gru kau lu na mara ai, nga nna Yehowa tsun ai. ²⁴ Egutu shayi sha gaw, kaya kahpa hkrum na ra ai; shi gaw dingdung mung masha ni a lata hta ap kau hkrum na ra ai. ²⁵ Israela Karai Kasang Zaw nawng zaw wa up ai Yehowa ning nga ai: yu mu, ngai gaw, Noa mare na Amon hpara hpe mung, Hpara-u hte Egutu mung, de a hpara ni hte hkawhkam ni ngu ai, Hpara-u hkawhkam hte shi hta shamyet shanat ai ni hpe, ngai shari na nngai: ²⁶ shanhte a asak hpe tam ai ni a lata hta mung, Babelon hkawhkam Nebuhkadneza hte shi a ali ama ni a lata hta mung, ngai shanhte hpe ap kau na nngai; dai hpang Egutu mung gaw, moi shawng na zawn, danhkung na ra ai, nga nna Yehowa tsun ai. ²⁷ Raitimung, nye a shangun ma Yaku e, hkum hkrit et; Israela e, masin hkum kahpra et; kaning rai nme law, yu u, ngai nang hpe sumtsan mung de na, na a aru arat hpe bawngdung ai mung kaw nna, hkyehkrang la na nngai: Yaku gaw bai wa nna, kadai mung shi hpe n jahkrit ai, ngwi pyaw ai hte ban sa nga na ra ai. ²⁸ Nye a shangun ma Yaku e, hkum hkrit et; ngai nang hte rau rai nga nngai; nang hpe shachyut dat ai mungdan ni yawng hpe, ngai jahtum kau timung, nang hpe jahtum kau na n rai; raitimung, ngai nang hpe mara n kap ai wa n ngu lu nna, nang hpe ram ram naw shari na de ai, nga nna Yehowa tsun ai.

¹ Hpara-u gaw Gaza mare hpe garai n shaza kau yang, Hpilisti masha ni hpe lakap nna, myihtoi Yeremia kaw du ai Yehowa mungga da ndai rai nga ai: ² Yehowa ning nga ai: Yu mu, dingdung maga de na hka rawt nna, mungdan hpe lim kau ai hka nu tai na ra ai: dai gaw mungdan hte rawng marawng hpe mung, mare hte nga manga hpe mung lim kau nna, masha ni shabam na mara ai; mungdan masha ni yawng sharung shayawt na mara ai. ³ Shi a hpyen gumra ni a lahkru nsen, shi a hpyen leng ni wu kadu ai hte leng dingsen ni ngoi ai majaw, kawa ni gaw lata n-gun yawm nna, kasha ni hpe pyi kayin yu ma ai n rai; ⁴ kaning rai nme law, Hpilisti masha ni mahkra hpe jahten kau na hte, Turu yan Sidon mare hpe hpyen karum lu ai, naw ngam nga ai ni yawng hpe shamyit kau na nhtoi du nna, Yehowa gaw Hkaphtora zunlawng na, naw ngam nga ai Hpilisti masha ni hpe, shamyit kau na ra ai. ⁵ Gaza mare gaw kara doi kau ai hkrum nga ai; Askelon hte naw ngam nga ai kadit ni gaw hten za mat sai; gaten du hkra tinang hkumshan hpe amup na rai ni? ⁶ Yehowa nhtu e, nang gaw gara aten e sim nga na n ta? Na n-ga hta shang rawng nga u: asim sha shanu nga u. ⁷ Askelon hte nammukdara hka kau hpe jahten kau na lam Yehowa hkangda ai majaw, nang gaw kaning rai asim sha nga lu na rai ta? Dai amu shabyin na shi san da nu ai.

¹ Moba hpe lakap nna, Israela Karai Kasang Zaw nawng zaw wa up ai Yehowa ning nga ai: Nebo mare gaw dingnye hkrum sai; dai gaw shingran katsi ai shara tai wa sai; Kiriahtim sum mat nna, kashun kashe hkrum sai; Misgaba sum mat nna, mak mat hkrum sai. ² Moba mung hpe htawmhpang e shakawn kungdawn lu na n rai; hpyen ni gaw, Sa marit, Moba gaw amyu n tai lu hkra, shi hpe shagrawm kau gaw, nga nna Heshbon mare hta e pyi shi a lam hpaji daw ma ai. Nang mung Madmen e, katsi katsang rai wa na ndai; nhtu gaw nang hpe shachyut na ra ai. ³ Horona-im mare mung shamyit kau ai hte run kau ai hkrum nna hkrap shabam nga ai. ⁴ Moba gaw hten byak hkrum nga ai; de a ma kaji ni hkrap kachyi ma ai. ⁵ Shanhte gaw myi prwi tut tut pru let Luhit lam de lung wa ma ai; Horona-im kadawng e yu wa ma yang, hten byak hkrum ai hkrapngu hkrapngoi ai nsen hpe shanhte na ma ai. ⁶ Asak lawt na matu hprawng mu; nam ga na Arora mare zawn tai mu. ⁷ Kaning rai nme law, nang gaw na a amu magam hte sutgan hta shamyet shanat nga ndai majaw, nang mung rim la ai hkrum na ndai; Hkemosha hpara mung shi a hkinjawng ni hte du salang ni hte rau, bawng rim wa ai hkrum na mara ai. ⁸ Jahten shabyak ai wa gaw mare shagu hta shang wa nna, mare langai mi pyi lawt lu na n rai; kadit ga gaw hten mat nna, layang ga gaw marawng marang tai na ra ai, nga nna Yehowa tsun ai hte maren byin na ra ai. ⁹ Moba hprawng lawt lu hkra, shi hpe singkaw shatut mu; de a mare ni gaw, masha kata, shingran katsi ai shara tai na ra ai. ¹⁰ Yehowa amu hpe pagawn gunhpai ai wa gaw, dagam dala hkrum u ga; masha sat na tinang nhtu dawm la ai wa gaw dagam dala hkrum u ga. ¹¹ Moba gaw brang ram prat kaw nna asan apan rai nga ai; shi gaw yam langai hte langai hta htawt ru bang ai n hkrum; shi a pa ntsa e shi grin nga nna, maigan mung de bawng wa dung ai n hkrum: dai re ai majaw shi a machyim myi na ta naw rai nga nna, shi manam ai bat n lai nga ai. ¹² Dai rai nna Yehowa ning nga ai, yu u, shi hpe n-gyeng kau ai ni hpe, ngai shi hpang de shangun dat na aten du na ra ai; shanhte shi hpe n-gyeng kau yang, shi a yam ni ru mat nna, ndum ni hpe abrep kau na maru ai. ¹³ Shingrai, Israela dap gaw tinang hpa ai Betela hpara majaw kaya dum ai zawn, Moba masha ni gaw Hkemosha hpara majaw, kaya dum na mara ai. ¹⁴ Anhte gaw n-gun ja ai ni, hpyen gasat lu ai share ni rai nga ga ai, nga nna nanhte kaning rai tsun lu na myit ta? ¹⁵ Moba gaw marawng marang tai mat sai; de a mare ni hkru hkat mat masai; shi san da ai shabrang ni gaw, sat kau hkrum na matu yu wa masai, nga nna Zaw nawng zaw wa up ai Yehowa mying ai Hkawhkam tsun nga ai. ¹⁶ Moba hpe zingri zingrat na aten ni wa sai; shi hkrum na nni nkri grai lawan nga ai. ¹⁷ Shi a grupyin e nga nna, shi a amying chye ai ni yawng, shi a lam sharung shayawt mu: Nagang ai sumdoi, tsawm la ai dawhkrawng kaning rai daw mat a hka! Ngu nna tsun mu. ¹⁸ Dibon shara e shanu nga ai shayi sha e, na a arawng sadang kaw na yu wa nna, hpang ga a hkrum let dung nga u: Moba hpe jahten shabyak ai wa gaw nang kaw du nna, na a hpyendap ni hpe run kau na ra ai. ¹⁹ Aroera mare e shanu ai wa e, lam makau e tsap nna mada yu u; Hpa byin a ta? ngu nna gat wa ai la hte asak lawt ai num hpe san yu u. ²⁰ Moba gaw mak mat nna, kaya kahpa hkrum nga ai: sharung shayawt nna hkrapngu hkrapngoi mu: Moba gaw katsi katsang rai nga ai hpe, Arnon shara hta tsun shana ya mu. ²¹ - ²⁴ Layang ga hte hpawn, Holon, Yaza, Mahpat, Dibon, Nebo, Bet-diblahtim, Kiriahtim, Bet-gamula, Bet-meon, Keriot, Bozra hte tsan ai ni ai Moba mare ni mahkra ntsa e dawdan ai du ra ai. ²⁵ Moba nrung daw mat sai, shi a lahpum daw mat sai, nga nna Yehowa tsun ai. ²⁶ Moba gaw Yehowa hpe gumrawng gumtawng ai majaw, shi hpe shanang kau mu: shi gaw shi a nhpat hta galu nga nna, shatan nhkan hkrum na ra ai. ²⁷ Nang mahtang Israela hpe shatan ai, n rai ni? shi gaw lagu lagut ni hte kanawn ai, nang mu yu n ni? raitimung, shi a lam tsun shagu, nang baw kanga n hka. ²⁸ Moba mung e shanu ai ni e, mare ni hpe kau da nna, lungpu hkan e rawng nga mu: n-gam mahka e tsip tsip ai hkrudu zawn tai nga mu. ²⁹ Moba amyu a myit kaba ai lam anhte na yu sagaw ai; grai kaba ai myit rai nga ai: shi a gumrawng gumtawng ai, myit kaba ai, myit tsaw ai hte myit dap ai, kaba la nga ai. ³⁰ Shi pawt sindawng ai gaw, hpa lam n la ai, ngai chye nngai; shi grang ai ga hpa mung n shabyin lu ai, nga nga nna Yehowa tsun ai. ³¹ Dai re ai majaw Moba a lam ngai sharung shayawt na nngai; Moba mung ting a matu, ngai hkrap shabam na nngai; shanhte gaw Kira-heret masha ni a lam yawn nga na mara ai. ³² Dai re ai majaw, Sibma tsabyi ru e, Yazera lam hkrap nga ai hta, na a lam grau nna hkrap na nngai: na a makrung ni gaw nawng hpe hkrawn lai nna, Yazera nawng de du ma ai: jahten shabyak ai wa gaw, mangai ta e ngai ai, na a nsi naisi hte, na a tsabyi si hpe jahten kau wu ai. ³³ Kaja htum ai yi hkauna ni hte, Moba mung ting hta, kabu gara ai, n nga sai: tsabyi si htumbyen ni hta tsabyi jahku n nga sai; kabu jahtau ai hte tsabyi si kabye na n rai; kabu jahtau ai nsen mung kabu jahtau ai zawn n rai. ³⁴ Heshbon kaw nna Eleale hte Yahaza du hkra, Zora kaw nna Horona-im hte Eglat-shileshe du hkra, shanhte a shabam ai nsen ngoi nga ai: kaning rai nme law, Nimrim hkalawng ni mung katsi katsang rai mat sai. ³⁵ Dai hta n-ga Moba mung hta tsaw ai kawng ntsa e shagu hkungga nawng ya ai wa hte, tinang a hpara ni hpe manam pyaw ai baw natnawng ya ai wa hpe, ngai jahtum kau na nngai, nga nna Yehowa tsun ai. ³⁶ Dai re ai majaw, Moba a matu nye a myit masin gaw sumpyi zawn, Kiraheret masha ni a matu nye a myit masin gaw sumpyi ni zawn, yawn ngoi na ra ai: shanhte mahkawng da ai sutgan gaw htum mat sai. ³⁷ Kaning rai nme law, masha yawng baw krin nna, nhka mun yawng doi kau hkrum masai: nlang lata jahpye nna, lachyit nba buhpun ma ai. ³⁸ Akyu n nga ai dibu hpe ga kau ai zawn, Moba mung hpe ngai ga kau ai majaw, Moba mung na nta shagu ntsa e mung, de a mare lam ni hta mung, sharung shayawt shajang ma ai, nga nna Yehowa tsun ai. ³⁹ Moba gaw gade grawp mat sahka! Shanhte sharung shayawt ma hka! Shi kaya nna kanut mat wa sahka! Shingrai Moba gaw grupyin e nga ai ni mahkra a man e asawng shara hte hkrithpa shara tai na ra ai. ⁴⁰ Kaning rai nme law, Yehowa ning nga ai: Yu u, hpyen wa gaw langda zawn pyen sa nna, shi a singkaw Moba mung ntsa e ka-up na ra ai. ⁴¹ Keriat hpe shaza kau nna, hpyendap ni hpe gasat la lu ai majaw, Moba a n-gun ja ai ni a myit gaw, shinggyim machyi hkrum ai num a myit zawn, dai shani e tai na ra ai. ⁴² Moba gaw Yehowa a man e gumrawng gumtawng nga ai majaw, htawmhpang e amyu n tai lu hkra, shaza kau ai hkrum na ra ai. ⁴³ Moba mung e shanu ai wa e, hkrit kajawng ai, nhkun hte mahkam, na ntsa e du ra ai, nga nna Yehowa tsun ai. ⁴⁴ Hkrit kajawng ai hta na hprawng lawt ai wa gaw nhkun hta hkrat na ra ai; nhkun hta na lawt pru ai wa gaw, mahkam hta lu na ra ai: kaning rai nme law, ngai gaw, Moba hpe ari nhpri jaw na shaning aten shapraw na nngai, nga nna Yehowa tsun ai. ⁴⁵ Hprawng pru ai ni gaw n-gun yawm ai majaw, Heshbon a shingnip hta shingbyi nga timung, Heshbon kaw na awan, Sihon ka-ang na wan shinglet grung pru nna, Moba mung na njut nnaw hkan e mung, hkru kau wu ai. ⁴⁶ Moba mung e, nang gaw dingnye lu ndai! Hkemosha amyu gaw htum mat sai: na a shayi shadang sha ni gaw bawng rim wa hkrum masai. ⁴⁷ Raitimung, hpang jahtum ai aten e ngai gaw, Moba bawngdung ai ni hpe, bai nhtang wa shangun na nngai, nga nna Yehowa tsun ai. Ndai yang du hkra, Moba dawdan hkrum ai ga rai nga ai.

¹ Ammon kashu kasha ni hpe lakap nna Yehowa ning nga ai: Israela hta shadang sha n pra a ni? sali wunli dagraw na wa, shi n lu a ni? Dai rai yang, Malhkam hpara gaw, hpa majaw Gad mung hpe madu la a ta? shi a masha ni gaw de a mare ni hta, hpa majaw dè nga ma ta? ² Dai re ai majaw Yehowa ning nga ai: Yu mu, Ammon a kashu kasha ni nga ai Raba mare hta, hpyen gasat ai nsen ngai na shangun ai aten du na ra ai: dai mare gaw marawng marang sumpum tai nna, shi a shayi sha ni hkru mat na mara ai: shaloi Israela gaw shi e madu ai ni hpe bai madu na ra ai, nga nna Yehowa tsun ai. ³ Heshbon e, sharung shayawt u; Ai mare myit mat sai; Raba shayi sha ni e, hkrap shabam mu; lachyit nba buhpun mu; sharung shayawt let, sun nhpan makau hku gat kahkrang mu: kaning rai nme law, Malhkam hpara gaw, shi a hkinjawng ni hte du salang ni hte rau, bawng rim wa ai hkrum na ra ai. ⁴ Htak mat ai shayi sha e, Ngai hpang de kadai du lu na rai ta? nga nna tinang a sutgan hta machyu let, na a hka lwi ai kadit ni hta, hpa majaw gumrawng nga n ta? ⁵ Yu mu, Zaw nawng zaw wa up ai Yehowa ning nga ai: Na a grupyin e nga ai ni mahkra majaw, ngai na a ntsa e hkrit kajawng ai shabyin na nngai: nanhte langai hte langai ang ang shapraw kau ai hkrum na myit dai; bra nga ai ni hpe shinggyin la ai wa mung, n nga ai. ⁶ Raitimung, bawngdung hkrum ai Ammon a kashu kasha ni hpe, htawmhpang e ngai nhtang wa shangun na nngai, nga nna Yehowa tsun ai. ⁷ Edom mung hpe lakap nna, Zaw nawng zaw wa up ai Yehowa ning nga ai: Teman mung hta e hpaji ma sani? myitsu ai ni hpaji n daw lu ma ni? shanhte nyan htum sani? ⁸ Dedan masha ni e, kanut wa nna hprawng mu: sung ai shara ni hta shanu nga mu: ngai gaw Esaw hpe kawan katsan yu ai shani e, shi hkrum ang ai tsin-yam tsindam hpe shi a ntsa e shapraw na nngai. ⁹ Tsabyi si di ai ni nang kaw shang yang, shanhte nlim ngam da na ma ai, n rai ni? Shana na lagu lagut ni rai yang, shanhte myit hkru hkra sha lagu na ma ai, n rai ni? ¹⁰ Ngai chyawm gaw Esaw hpe singgu krin di kau nngai; shi n makoi nga lu hkra, shi a shim ai shara ni hpe ngai shadawng da nngai: shi a aru arat ni, kahpu kanau ni, htingbu htingpyen ni htum mat ma ai rai nna, shi n nga lu ai. ¹¹ Na a chyahkrai nmai ni hpe kau da mu, ngai shanhte hpe jahkrung da na nngai; na a gaida gaina ni gaw ngai hta shamyet shanat nga mu ga. ¹² Kaning rai nme law, Yehowa ning nga ai: Yu mu, dai gawm hpe n lu ging ai ni pyi, gaja wa lu na mara ai; dai rai yang, nang gaw ari ahpri lawt na rai ni? gaja wa, nang lawt lu na n rai, teng teng lu lu na ndai. ¹³ Bozra mung gaw mauhpa shara, shatan nhkan shara, shingran katsi ai shara hte dagam dala shara tai nna, dai hte seng ai mare ni yawng, tutnawng marawng marang re ai shara tai na mara ai, ngai hkum nan dagam da ni ai, nga nna Yehowa tsun ai. ¹⁴ Yehowa kaw na shiga ngai na lu ni ai: Zup hpawng manu, shi hpang de sa mu; shi hpe hpyen gasat na rawt ga, nga nna ga shabra ai kasa gaw, amyu baw ni hpang de shangun dat nu ai. ¹⁵ Kaning rai nme law, yu u, amyu baw ni hta amyu kaji, shinggyim masha ni hta n kaw n law hkrum ai wa, ngai nang hpe shatai ni ai. ¹⁶ Lungpu hta rawng nna, bum pungding e machyu ai wa e, nang hkrit mai ai wa rai nga timung, na a gumrawng ai myit nang hpe hkalem kau nitdai: langda zawn tsaw ai shara e nang tsip tsip timung, dai kaw nna ngai nang hpe shayu kau na de ai, nga nna Yehowa tsun ai. ¹⁷ Edom gaw mauhpa shara tai nna, dai lam lai ai ni nlang, mau mahka na mara ai; shi hkrum ai tsin-yam majaw shanhte gaw, Yi lo, nga nna tsun na mara ai. ¹⁸ Sodom yan Gomora hte grupyin na mare ni hpe jahten kau ai zawn, Edom mung hta masha n nga lu ai hte, shinggyim kasha dai hta shanu nga lu na n rai, nga nna Yehowa tsun ai. ¹⁹ Yu mu, Yawdan hka tung wa yang, hkanghkyi lung wa ai zawn, hpyen wa gaw Edom ung a ngang ai share de du na ra ai; ngai gaw shanhte hpe akajawng sha hprawng shangun na nngai; san da ai wa kadai hpe mung, dai mung ntsa e up shangun na nngai: kaning rai nme law, ngai hte bung ai wa kadai rai ta? nye a aten hpe kadai madat da a ni? nye a man e tsap nga lu ai sagu rem wa gaw, kadai wa rai ta? ²⁰ Dai re ai majaw, Yehowa gaw Edom mung hpe shaang nna hpaji daw ai lam, Tema shara e shanu nga ai ni hpe shaang nna, galaw na maw ai lam hpe, na la mu: gaja wa, hpyen ni gaw mung masha ni hpe sagu kasha zawn dun karawt la na mara ai; gaja wa shi gaw, shanhte a shanu nga ai ga hpe, shingran katsi ai shara, shanhte a ntsa e, shatai na ra ai. ²¹ Shanhte kadawng taw mat ai nsen majaw, lamu ga gari nga ai; shanhte shabam ai nsen Nawng Hkyeng du hkra na nga ai. ²² Yu u, hpyen wa gaw langda zawn pyen lung nna, shi a singkaw Bozra ntsa e ka-up na ra ai rai nna, Edom a n-gun ja ai ni a myit gaw, shinggyim mashyi hkrum ai num a myit zawn, dai shani e tai na ra ai. ²³ Damasku hpe lakap nna tsun ai ga: Hamat yan Arpad gaw, n kaja ai shi na lu ai majaw, mak mat nna minla byaw mat ma ai: nammukdara ndi nda rai nga ai; dai gaw asim sha nga lu ai n rai. ²⁴ Damasku gaw n-gun yawm wa sai; hprawng na matu kayin wa sai; shi hkrit gari nga ai; shinggyim machyi ai num zawn, shi gaw kawa machyi nna, yawnhkyen hkrum nga ai. ²⁵ Shakawn kungdawn mai ai mare, ngai sharawng awng ai mare gaw, mare dingsa kaning rai tai mat ai law e. ²⁶ Dai rai nna, shabrang ni gaw dai shani e mare lam ni hta kadawng taw mat nna, hpyen share ni yawng sum mat na mara ai. ²⁷ Ngai gaw Damasku a mare bunghku hpe wan nat nna, dai gaw Benhada htingnu du hkra hkru kau na ra ai, nga nna Zaw nawng zaw wa up ai Yehowa tsun ai. ²⁸ Babelon hkawhkam Nebuhkadneza shaza kau ai Kedara hte Hazora mungdan ni hpe lakap nna tsun ai ga: Yehowa ning nga ai, Rawt mu, Kedara de lung nna, sinpraw mung na kashu kasha ni hpe jahtum kau mu. ²⁹ Hpyen ni gaw, shanhte a janghpang ni hte sagu hpung ni hpe mung, shanhte a nba grang ni, arung arai ni hte gawla-uk ni hpe mung, kashun la kau nna, Shara magup hkan e shoihpa shoirang hkrai rai nga ai, nga nna shanhte hpe gintan na mara ai. ³⁰ Hozora mung hta shanu ai ni e, Babelon hkawhkam Nebuhkadneza gaw nanhte a lam hpaji daw nna, n kaja ai hku maw nga ai majaw, hprawng mu, tsan tsan de hprawng mu, sung ai shara ni hta shanu nga mu, nga nna Yehowa tsun ai. ³¹ Rawt mu, asan apan nga nga nna, myit ru myit ra n chye ai amyu, mare chyinghka hte htinggrang n ra ai, shi hkrai nga ai amyu hpang de lung wa mu, nga nna Yehowa tsun ai. ³² Shanhte a gawla-uk ni hte dumsu hpung ni gaw lanep tai na mara ai; tinang a na labying kara doi ai amyu hpe, shara shagu shabra kau na nngai; shara magup hkan na shanhte a ntsa e shoihpa shoirang ngai shapraw na nngai. ³³ Shingrai Hazora mung gaw chyahkyawn ni a shara hte, prat dingsa na shingran katsi ai shara tai na ra ai: masha kadai mung dai de nga na n rai; shinggyim masha kasha mung dai de shanu nga na n rai, nga nna Yehowa tsun ai. ³⁴ Yuda hkawhkam Zedekia hkaw dung hpang ai aten e, Elam mung hpe lakap nna, myihtoi Yeremia kaw du ai Yehowa a ga gaw da ndai rai nga ai: ³⁵ Zaw nawng zaw wa up ai Yehowa ning nga ai, Elam a ndan ngu ai, shi a n-gun atsam daju hpe ngai agrawp kau na nngai. ³⁶ Ngai gaw lamu ga man mali maga na nbung amyu mali hpe, Elam mung de woi wa nna, dai nbung mali a man e shanhte hpe ahpawt shabra kau na nngai: shingrai shabra kau dat ai Elam masha ni, n du ai mungdan langai mi muk n nga na sai. ³⁷ Dai hta kaga ngai gaw, Elam mung hpe hpyen ni a man e mung, de a asak tam ai ni a man e mung, shamak kau nna, nye a sindawng kahtet ai ngu ai tsin-yam tsindam hpe shanhte a ntsa e shapraw na nngai; shanhte myit mat ai du hkra, shanhte a hpang e nhtu shangun dat na nngai, nga nna Yehowa tsun ai; ³⁸ bai ngai gaw, nye tingnyang hpe Elam mung hta shadun da nna, de a hkawhkam wa hte du salang ni hpe shamyit kau na nngai, nga nna Yehowa tsun ai. ³⁹ Raitimung, bawngdung hkrum ai Elam masha ni hpe, hpang jahtum ai aten e ngai bai nhtang wa shangun na nngai, nga nna Yehowa tsun ai.

¹ Babelon mare hte Hkalde mung hpe lakap nna, myihtoi Yeremia n-gup hte Yehowa tsun ai mungga, da ndai rai nga ai. ² Amyu baw ni hpang de ashi tsun shana mu; dawnghkawn sharawt mu; tsun shana ya nna, hkum makoi myit: Babelon mare gasat la hkrum sai; Bela hpara kaya hkrum sai; Merodak hpara daw mat sai; de a hpara sumla ni kaya hkrum nna, nawku sumla ni mak mat masai, ngu nna tsun mu. ³ Kaning rai nme law, masha amyu mi gaw dingdung mung kaw na dai mare de sa du nna, de a mungdan hpe shamyit kau na ra ai; dai hta e masha nga lu na n rai: masha hte yamnga yawng, hprawng pru wa masai. ⁴ Yehowa ning nga ai, Dai shani, dai aten e, Israela kashu kasha ni gaw, Yuda kashu kasha ni hte rau, wa na mara ai; shanhte gaw hkrapngu hkrapngoi let, bai wa nna, tinang a Karai Kasang Yehowa hpe tam na mara ai. ⁵ Shanhte gaw, Sa marit, galoi n malap kau lu ai ga shaka Yehowa hte matut ga, nga nna Ziun de myiman yawng let, de a lam tam na mara ai. ⁶ Nye a amyu gaw dam mat ai sagu tai masai; sagu rem ni gaw shanhte hpe shadam kau manu ai; bum ga ntsa e shaprang kau manu ai; shanhte gaw bum kaw nna kawng du hkra kahkrang hkawm nna, shanhte a uyup hpe malap kau manu ai. ⁷ Shanhte hpe mu hkrup ai ni yawng, shanhte hpe sha kau manu ai: hpyen ni mahtang, shanhte gaw kaji kawa ni a myit mada shara ngu ai, Yehowa a dinghpring ai nga shara hpe shut kau ai majaw, anhte hta mara n kap ga ai, nga nna tsun ma ai. ⁸ Babelon mare na hprawng wa mu; Hkalde mung na pru wa mu; sagu hpung ni a shawng e sagu la zawn tai nga mu. ⁹ Kaning rai nme law, dingdung mung maga de na masha amyu ga daga hpe ngai shadut nna, Babelon mare de woi wa na nngai: shanhte gaw dai mare hpe wang tawn nna, shaloi jang gasat la na mara ai; shanhte gap ai pala gaw, ding htum ai wa gap ai pala hte bung nna, langai mi kaman lai mat na n rai. ¹⁰ Hkalde a mung gaw lanep tai nna, dai lanep sha ai ni nlang hkru kat na mara ai, nga nna Yehowa tsun ai. ¹¹ - ¹² Nye a sali wunli hpya sha ai ni e, nanhte kabu gumrawng ai hte, mam kabye ai nga upra zawn pagawn di nna, n-gun ja ai gumra zawn ngoi myit dai majaw, nanhte a kanu gaw teng teng kaya kahpa hkrum nna, nanhte hpe shangai ai num gaw, mak mat na ra ai: yu u, shi gaw mung ni yawng hta hpang hkrat ai mung, nam mali ahkun ahkraw ga hte zaibru jang tai na ra ai. ¹³ Yehowa a pawt sindawng ai majaw, dai mung hta masha nga lu ai n rai; dai gaw katsi katsang shara hkrai tai na ra ai: Babelon makau hku hprang wa ai ni yawng, mau mat nna, shi hkrum ai tsin-yam tsindam majaw, Yi lo, nga na mara ai. ¹⁴ Ndan gap ai ni e, Babelon mare grup wang tawn mu; shi gaw Yehowa hpe shut ai majaw, gap sat mu, pala n lahpawt ai gap mu. ¹⁵ Mare grupyin e garu mu; shi yin la sai; langchyi ni daw mat sai, bunghku ni run mat sai: dai gaw Yehowa a matai dawp ai lam rai nga ai majaw, shi hpe matai dawp mu; shi galaw yu ai hte maren, shi hpe galaw mu. ¹⁶ Babelon mare hta nli gat ai wa hte, nmut ta e nhkyau lang ai wa hpe, shagrawm kau mu: nhtu a tsin-yam hkrit nga ai majaw, langai hte langai tinang a amyu masha ni hpang de kayin wa nna, tinang a buga de hprawng wa na mara ai. ¹⁷ Israela gaw bra mat ai sagu rai nga ai, hkanghkyi ni gaw, shi hpe jahtaw kau mu ai; moi shawng e Asuri hkawhkam shi hpe kawa sha nu ai; ya htawmhpang e Babelon hkawhkam Nebuhkadneza gaw, shi a nrut nra ni hpe daw kau nu ai. ¹⁸ Dai re ai majaw, Israela Karai Kasang Zaw nawng zaw wa up ai Yehowa ning nga ai: yu mu, ngai gaw Asuri hkawhkam hpe ari jaw ai zawn, Babelon hkawhkam hte shi a mungdan hpe ari jaw na nngai. ¹⁹ Dai hta kaga ngai gaw Israela amyu hpe tinang a udat shara de nhtang wa shangun na nngai: shi gaw Hkarmela hte Bashan bum ga ntsa e ushat sha nna, Ehprim hte Gilead ginwang e, shi a myit masin hkru kat na ra ai. ²⁰ Ndai shani, ndai aten e, Israela a shut hpyit ai hpe sawk yu timung, hpa n nga na sai; Yuda a yubak hpe tam timung, n mu na ra ai; kaning rai nme law, ngai ngam tawn da ai ni a yubak hpe, ngai raw dat kau na nngai, nga nna Yehowa tsun ai. ²¹ Gumlau lau re ai mung de lung wa mu; ari hkrum ging ai mung masha ni hpe lung gasat mu: shanhte hpe shamyit kau nna, shanhte a aru arat hpe atsai awai shagrawm kau mu: ngai hkangda mada hte maren galaw mu, nga nna Yehowa tsun ai. ²² Dai mungdan hta e hpyen gasat ai nsen hte, jahten shabyak ai nsen kaba, ngoi nga ai. ²³ Ga ntsa ting hpe ndup ai sumdu gaw, kaning rai gyi mat nna, daw mat a hka! Babelon mare gaw, masha amyu ni hta shingran katsi ai shara, kaning rai tai mat a hka! ²⁴ Babelon mare e, na a matu ngai mahkam hkam da nna, nang ndum shami lu nitdai; Yehowa hpe nang gumlau ndai majaw, hpyen ni nang hpe mu hkrup nna, rim la manit dai. ²⁵ Zaw nawng zaw wa up ai madu Yehowa gaw, Hkalde a mung hta amu galaw shara nga ai majaw, shi gaw shi a hpyen rai dek hpe hpaw nna, shi a pawt sindawng ngu ai ri nhtu hpe shapraw nu ai. ²⁶ Lamu ga htum ai kaw na shi hpang de sa marit; shi a mam dum ni hpe hpaw mu; dai mare hpe sumpum shatai nna, atsai awai shaza kau mu; shi a matu hpa mung n ngam nga u ga: ²⁷ shi a usu ni mahkra hpe sat kau mu; sat ai shara de yu wa mu ga; shanhte nhtoi du nna, ari ahpri hkrum na aten du ra ai majaw, shanhte dingnye hkrum mu ga. ²⁸ Babelon mare kaw na hprawng pru nna, anhte a Karai Kasang Yehowa matai dawp ai aten hte, shi a nawku Htingnu a majaw matai htang ai lam, Ziun mare hta gat shana ya ai ni a nsen, madat mu law. ²⁹ Ndan gap ai ni nlang hte hpe, Babelon mare de shaga mu; ndan shachyen ai ni e, mare grupyin wang tawn mu; langai mi muk n lawt u ga; dai mare a arawn alai hte maren tai mu; shi galaw yu ai yawng hte maren, shi hpa galaw mu: kaning rai nme law shi gaw, Israela Chyoi pra ai Wa ngu ai Yehowa hpe gumrawng gumtawng nu hka! ³⁰ Dai re ai majaw, shi a shabrang ni gaw mare lam ni hta kadawng taw nna, shi a hpyen ma ni nlang hte gaw, dai shani e htum mat na mara ai, nga nna Yehowa tsun ai. ³¹ Zaw nawng zaw wa up ai Yehowa ning nga ai: Myit kaba ai wa e, yu u, ngai nang hpe hkap daw na nngai; gaja wa, na a nhtoi, nang hpe shari ai aten du ra ai. ³² Myit kaba ai wa gaw kadawng taw nna, shi hpe sharawt ai wa kadai n nga ai: ngai gaw shi a mare ni hpe wan nat nna, shi grupyin e nga ai ni mahkra hpe hkru kau na ra ai, nga ai. ³³ Zaw nawng zaw wa up ai Yehowa ning nga ai: Israela kashu kasha ni hte Yuda kashu kasha ni gaw, zingri zingrat ai rau hkrum masai; shanhte hpe rim la ai ni yawng, shanhte hpe sharen da nna, n dat dat hkraw ma ai. ³⁴ Raitimung shanhte hpe Hkyehkrang la ai wa gaw, n-gun lagaw rawng ai wa rai nga ai; shi a mying Zaw nawng zaw wa up ai Yehowa rai nga ai: shi gaw gaja wa shanhte a amu hpe maga let, mungdan ting hpe asan apan di shangun nna, Babelon mare masha ni hpe sharu shatsang na ra ai. ³⁵ Yehowa ning nga ai, Nhtu tsin-yam gaw Hkalde masha ni, Babelon masha ni, de a du salang ni hte hpaji rawng ai ni a ntsa e du u ga; ³⁶ nhtu tsin-yam gaw grang dakat ai ni a ntsa e du nna, shanhte mana bu na mara ai; nhtu tsin-yam gaw shanhte a daru magam ni a ntsa e du nna, shanhte mak mat na mara ai. ³⁷ Nhtu tsin-yam gaw shanhte a gumra ni, hpyen leng ni hte shanhte hta hkran nga ai masha amyu ni ntsa e du nna, shanhte gaw num zawn tai na mara ai; nhtu tsin-yam gaw mare a sutdek ni a ntsa e du nna, hpya lu hpya sha ai hkrum na mara ai. ³⁸ Hkraw hkun ai tsin-yam gaw mare a hka ni a ntsa e du nna, hkyet kan mat na mara ai: kaning rai nme law, ndai mung gaw, hpara sumla hpring ai mung rai nga nna, mung masha ni gaw, nawku sumla ni a lam mana bu ma ai. ³⁹ Dai re ai majaw, nam na matse labye ni gaw, chyahkyawn ni hte rau, dai shara e dè nga nna, u gawla-uk ni mung dai de shanu nga na mara ai: dai mare hta prat dingsa e galoi mung n dè nga nna, prat mi hte prat mi kadai mung n shanu nga na masai. ⁴⁰ Karai Kasang gaw Sodom, Gomora hte grupyin na mare ni hpe jahten kau nna shingran katsi ai zawn, Babelon mare hta kadai mung n nga ai hte, shinggyim kasha kadai mung n shanu nga na ra ai, nga nna Yehowa tsun ai. ⁴¹ Yu u, masha amyu langai mi dingdung maga de na du ra ai; masha amyu kaba langai mi hte hkawhkam law law wa, lamu ga htum ai de na ngai jasu na nngai. ⁴² Shanhte gaw ndan hte ri lang ma ai; gumshem ai amyu rai nna, matsan n chye dum ma ai; shanhte a nsen gaw nammukdara zawn wu kadu nga ai; Babelon shayi sha e, nang hpe hpyen htim na matu, shanhte gaw gumra jawn let, langai hte langai hkyen nga ma ai. ⁴³ Babelon hkawhkam gaw shanhte a shi na nna, shi a lata kya noi mat sai; shinggyim mashyi ai num zawn, shi gaw tsin-yam tsindam hkrum nga ai. ⁴⁴ Yu mu, Yawdan hka tung wa yang, hkanghkyi lung wa ai zawn, hpyen wa gaw Babelon mung a ngang ai shara de du na ra ai; ngai gaw shanhte hpe akajawng sha hprawng shangun na nngai; san da ai wa kadai hpe mung, dai mung ntsa e up shangun na nngai: kaning rai nme law, ngai hte bung ai wa kadai rai ta? nye a aten hpe kadai madat da a ni? nye a man e tsap nga lu ai sagu rem wa gaw, kadai wa rai ta? ⁴⁵ Dai re ai majaw, Yehowa gaw, Babelon hpe shaang nna hpaji daw ai lam, Hkalde a mung hpe shaang nna galaw na maw ai lam, na la mu: gaja wa hpyen ni gaw mung masha ni hpe sagu kasha zawn, dun karawt la na mara ai; gaja wa shi gaw, shanhte a shanu nga ai ga hpe, shingran katsi ai shara, shanhte a ntsa e shatai na ra ai. ⁴⁶ Babelon mare hpe gasat la ai nsen majaw, lamu ga gari nga ai; de a ngoi kadu ai nsen hpe, masha amyu ni na lu ma ai.

¹ Yehowa ning nga ai: Yu u; ngai gaw Babelon mare hte ngai e gumlau ai myit rawng ai ni hpe, shamyit kau na nbung sharawt na nngai. ² Ngai gaw hkuwawn katsap chye ai ni hpe, Babelon mare de shangun dat nna, shanhte gaw shi a mungdan hpe atsai awai katsap kau na mara ai: kaning rai nme law, ruyak hkrum ai aten e shanhte gaw grupyin hkan e, shi hpe hkap daw na mara ai. ³ Ndan lang ai wa e, hpri palawng hpun nna, ndan shachyen ai wa hpe gap sat u: shi a shabrang ni hpe hkum lahpawt et; shi a luksuk ni mahkra hpe shamyit kau mu. ⁴ Shanhte gaw Hkalde a mung hta kadawng taw nna, de a mare lam ni hta galun kau ai hkrum na mara ai. ⁵ Kaning rai nme law, Israela hte Yuda mung gaw, Israela a Chyoi pra ai Wa a man e shut hpyit ai mara hte hpring nga timung, shan a Karai Kasang, Zaw nawng zaw wa up ai Yehowa, shan hpe kau da ai n rai. ⁶ Babelon mare na hprawng pru mu; langai hte langai tinang asak hpe mawai la mu; mare masha ni a yubak hta, hkum lup mat lawm et; kaning rai nme law, dai gaw Yehowa a matai dawp na aten rai nga ai; shi gaw dai mare hpe matai dawp na ra ai. ⁷ Babelon mare gaw, Yehowa lang nna, mungkan ting hpe shanang kau ai ja gawm rai nga ai: masha amyu baw ni gaw, dai hta rawng ai tsabyi jahku lu ma ai majaw, mana bu ma ai. ⁸ Babelon mare gaw akajawng sha kadawng nna, hten mat sai; shi a matu sharung shayawt mu; shi a hkala nba mai wa lu yang, shamai na matu, balsam naw sa la mu. ⁹ Anhte gaw Babelon mare hpe shamai mayu timung, shi n mai hkraw ai: shi hpe kau da nna, anhte langai hte langai tinang a buga de nhtang wa ga; shi hkrum ai ari ahpri gaw, sumsing lamu de du nna, sumwi hpe dep nga ai. ¹⁰ Yehowa gaw anhte a dinghpring ai lam hpe shapraw dan sai: sa marit, anhte a Karai Kasang Yehowa a amu magam hpe, Ziun mare hta tsun shana ya ga. ¹¹ Pala ni hpe garang mu; n-gang ni hpe la lang mu: Yehowa gaw Medi hkawhkam ni a myit hpe jasu nu ai; shi gaw Babelon mare hpe shamyit kau na maw nga ai; dai gaw Yehowa a matai dawp ai lam, shi a nawku Htingnu a matai htang ai lam, rai nga ai. ¹² Babelon bunghku makau e dawnghkawn sharawt mu; sin langa ni hpe shalaw mu; sin ai ni hpe tawn da mu; kaduk ni hpe htu mu: kaning rai nme law, Babelon masha ni a lam shaang nna, Yehowa tsun ai hte maren, shi shadik nna galaw ngut nu ai. ¹³ Hka law law makau e nga nga nna, sut pungding e ningngai ai wa e, na a htum mat ai hte, na a lawhpa myit mak mat ai aten du sai. ¹⁴ Zaw nawng zaw wa up ai Yehowa gaw, Gaja wa ngai gaw dinggam-yaw kamawng ai zawn, nang hpe masha hte jahpring nna, shanhte gaw na a lam garu jahtau na mara ai, nga nna shi hkum hpe dagam da nu ai. ¹⁵ Shi gaw shi a n-gun atsam hte lamu hte lamu ga hpe hpan da nu ai; shi a hpaji byeng-ya hte mungkan ga hpe shagrin da nu ai; shi a nyan hte sumsing lamu hpe kahpyen da nu ai: ¹⁶ shi gaw shi a nsen hpe dat dat yang, sumsing lamu na hka hpung ni kabrawng nna, shi gaw lamu ga htum ai maga de na salu sharawt wu ai: marang htu lu hkra, shi myihprap gala shangun nna, nbung hpe de a sutdek hta na shapraw wu ai. ¹⁷ Masha shagu myit n gring nna n chye na ma ai; janghkam shagu tinang a sumla majaw kaya hkrum ma ai: kaning rai nme law, shi jaw ai sumla gaw, sawt ai hkrai rai nga nna, dai ni hta nsoi nsa n rawng ma ai. ¹⁸ Dai sumla ni gaw kaman lila hte hkalem ai arai hkrai rai nga ai; shanhte hpe kawan katsan yu ai aten e, shanhte hten mat na mara ai. ¹⁹ Yaku a matu rai nga ai wa chyawm gaw, dai ni hte bung ai n rai; shi gaw nga yawng nga pra hpe hpan da ai wa rai nga ai: Israela gaw shi a sali wunli amyu rai nga ai; shi a amying gaw, Zaw nawng zaw wa up ai Yehowa rai nga ai. ²⁰ Hpyen sumdu kaba e, nang gaw nye a hpyen gasat rai, rai nga ndai: nang hpe ngai lang nna, amyu baw ni hpe agrawp kau na nngai; nang hpe ngai lang nna, hkawhkam mungdan ni hpe jahten shabyak kau na nngai: ²¹ nang hpe ngai lang nna, gumra hte gumra jawn wa hpe, agrawp kau na nngai; ²² nang hpe ngai lang nna, hpyen leng hte dai hta jawn ai wa hpe mung, la wa hte numsha hpe mung, dingla hte ma ni hpe mung, shabrang hte mahkawn ni hpe mung, agrawp kau na nngi. ²³ Nang hpe ngai lang nna, sagu rem wa hte shi a sagu hpung hpe mung, hkauna galaw ai wa hte mung, usu gap mi hpe mung, hpyenbu ni hte du ni hpe mung, ngai agrawp kau na nngai. ²⁴ Shingrai ngai gaw Babelon mare hte Hkalde masha ni mahkra, Ziun mare hta nanhte a man e galaw ai n hkru ai lam yawng hte maren, shanhte hpe matai htang na nngai, nga nna Yehowa tsun ai. ²⁵ Yehowa ning nga ai: jahten shabyak myit rawng nna, lamu ga ting hpe jahten shabyak ai bum e, yu u, ngai nang hpe hkap daw na nngai; ngai gaw, nye a lata na a ntsa e ladawn let, lunghkrung kaw nna, nang hpe galau jahkrat kau nna, hkru hkat mat ai bum nang hpe shatai na ndai. ²⁶ Masha ni gaw, njut nlung hte, npawt nlung langai mi, nang kaw na shaw la na n rai; nang gaw htani htana katsi katsang shara tai mat na rin dai, nga nna Yehowa tsun ai. ²⁷ Dai mung hta dawnghkawn sharawt mu; amyu baw ni hta pahtau dum mu; shi hpe gasat na, masha amyu ni hpe hkyen tawn mu; shi hpe wang tawn na matu, Ararat, Minni, Ashkena mungdan ni hpe jahpawng mu; shi a ntsa e hpyen agyi san da mu: dinggam-yaw zawn kamawng ai gumra hpyen ni gaw, shi hpe gasat na matu lung wa mu ga. ²⁸ Shi hpe gasat na matu, masha amyu ni, Medi hkawhkam ni, de a munggyi ni, du salang ni hte shanhte up ai mungdaw ni mahkra hpe hkyen tawn mu. ²⁹ Babelon mung hpe masha kata ai, katsi katsang shara shatai na, nga nna Yehowa maw ai lam grin nga ai majaw, Babelon mungdan gari gara nna, kawa machyi hkrum nga ai. ³⁰ Babelon mare na share ninghkrin ni gaw, hpyen n gasat hkraw ai, hpyendap ni hta nga nga ma ai; shanhte gawngkya nna, num zawn tai mat masai; mare masha ni a shanu ai shara ni wan hkru nna, chyinghka htinggrang ni agrawp mat sai. ³¹ - ³² Mare daju gaw gade de hpyen gasat la ai hkrum nna, uhkan ni pat kau ai hte, hkalawng nta ni wan nat kau nna, hpyen masha ni hkrit gari nga ai lam, Babelon hkawhkam hpe shana ya lu hkra, gat chyang ai ni langai hte langai gat sa nna, kasa ni shada htinglu htinglai shang ma ai. ³³ Kaning rai nme law, Israela Karai Kasang, Zaw nawng zaw wa up ai Yehowa ning nga ai: Babelon shayi sha gaw, mam kabye na chyarang zawn rai nga ai; gade n na yang, shi hpe mam zawn kabye na ra ai. ³⁴ Babelon hkawhkam Nebuhkadneza gaw, anhte hpe kawa sha nna, adup kau mi ai; shi anhte hpe man ai namtau zawn shatai mi ai; baren zawn shi anhte hpe mayu kau nna, anhte a dawi sau ai shahpa hte, shi a kan hpe jahpring nu ai: shi anhte hpe shaden kau ma ni ai. ³⁵ Ngai hkum hte nye a hkumshan hkrum ai nni nkri gaw, Babelon ntsa e rai nga u ga, nga nna Ziun shayi sha tsun na ra ai; Hkalde masha ni a ntsa e nye a sai kap u ga, nga nna Yerusalem tsun na ra ai. ³⁶ Dai rai nna Yehowa ning nga ai: Yu u, ngai na a amu hpe, maga na nngai; ngai na a lam, matai htang na nngai: shi a nawng hpe ngai hkraw hkun shangun nna, shi a hka hpawk hpe shahkyet kau na nngai. ³⁷ Babelon mare gaw marawng marang hte, nam gwi ni a shanu ai shara, mauhpa shara hte, masha kata ai, shingran katsi ai shara, tai na ra ai. ³⁸ Mare masha ni gaw n-gun an ai hkanghkyi zawn rau shabam nna, hkanghkyi hkalung zawn, nying na mara ai. ³⁹ Shanhte pyaw daw kadaw yang, ngai shanhte a matu poi galaw nna, shanhte kabu gara nga timung, n hprang lu hkra prat dingsa yup pyaw na matu, shanhte hpe lu hpa jaw shanang na nngai. ⁴⁰ Ngai gaw shanhte hpe sat kau na matu, sagu kasha, sagu la hte namla zawn, dun la na nngai, nga nna Yehowa tsun ai. ⁴¹ Sheshak mare hpe gasat la manu hka! Mungkan ting danhkung ai mare gaw hpya la ai hkrum sahka; Babelon mare gaw masha amyu ni hta mauhpa shara tai wa sahka. ⁴² Nammukdara gaw Babelon mare de lung wa nna, law la ai hkaleng ni dai mung hpe lim ka-up nga ai. ⁴³ De a mare ni gaw shingran katsi ai shara, ga ahkun ahkraw hte zaibru jang tai wa sai; dai mung hta kadai mung n shanu nga ai rai nna, shinggyim masha langai mi muk dai hku lai wa ai n rai. ⁴⁴ Babelon mare na Bela hpara hpe ngai dawdan na nngai; shi mayu kau ai hpe, bai nhpat shangun na nngai; masha amyu ni htawmhpang e shi kaw hpawng lu na n rai: gaja wa, Babelon a bunghku run mat na ra ai. ⁴⁵ Nye a amyu e, dai mare kata na pru wa mu; Yehowa pawt bu ai kaw na, langai hte langai tinang a asak mawai la mu. ⁴⁶ Dai mung hta na lu ai ashi majaw, myit hkum hten myit, hkum hkrit nga myit; laning hte laning ashi pru na ra ai: mungdan hta kashun kashe hkrai rai nga nna, du langai mi du kaga hpe hkap daw nga ai. ⁴⁷ Dai re ai majaw, yu u, Babelon a tawk ka ai sumla ni hpe, ngai dawdan ai nhtoi du ra ai; mung ting gaw kashuk kashak rai wa nna, sat kau hkrum ai ni gaw shara magup si jawng na mara ai. ⁴⁸ - ⁴⁹ Dai shaloi e sumsing lamu, ginding aga hte dai hta rawng marawng gaw, Babelon a lam kabu gara ai hte mahkawn mangoi na mara ai: kaning rai nme law, shi hpe jahten shabyak ai ni, dingdung maga de na du na mara ai rai nna, Babelon majaw Israela share ni sat kau hkrum ai zawn, Babelon mare hta, mung shagu na share ni gaw sat kau hkrum na mara ai, nga nna Yehowa tsun ai. ⁵⁰ Nhtu tsun-yam lawt ai ni e, sa wa mu, hkum hkring nga myit: sumtsan mung hta Yehowa hpe dum nna, Yerusalem mare hta myit manoi nga mu. ⁵¹ Anhte shatan nhkan ai ga na ai majaw, anhte mak mat saga ai; kashuk kashak ai, anhte a myiman hpe htinggrum nga ai: kaning rai nme law, tsasam masha ni gaw Yehowa nta a chyoi pra ai shara ni hta shang wa masai. ⁵² Dai re ai majaw, yu u, shi a tawk ka ai sumla ni hpe, ngai dawdan ai nhtoi du na ra ai rai nna, shi a mung ting hta hkala nba hkrum ai ni gaw, madai nga na mara ai, nga nna Yehowa tsun ai. ⁵³ Babelon gaw sumsing lamu de dep nna, shi a tsawhtum ai shara hpe hpyendap shatai timung, shi hpe jahten shabyak ai ni gaw, ngai kaw na pru na mara ai, nga nna Yehowa tsun ai. ⁵⁴ Babelon mare na hkrap shabam ai nsen, Hkalde masha ni a mung na jahten shabyak kaba ai nsen, ngoi wu nga ai. ⁵⁵ Kaning rai nme law, Yehowa gaw Babelon mare hpe shamyit kau nna, de a nsen kaba hpe jasim kau wu ai: shanhte a hkaleng ni gaw hka hpungtun zawn kadu nna, shanhte a garu ai nsen kaba kashaw nga ai: ⁵⁶ jahten shabyak ai wa gaw, gaja wa, Babelon mare ntsa e sa du nna, shi share ninghkrin ni rim la hkrum ai hte, shanhte lang ai ndan ni agrawp kau ai hkrum nga ai: kaning rai nme law, Yehowa gaw matai htang ai Karai Kasang rai nga nna, shi teng teng matai htang na ra ai. ⁵⁷ Ngai gaw shi a hkawhkam kasha ni, hpaji byeng-ya rawng ai ni, mung gyi ni, du salang ni hte share ninghkrin ni hpe chyaru shanang nna, shanhte gaw n hprang lu hkra, prat dingsa yup pyaw nga na mara ai, nga nna Zaw nawng zaw wa up ai Yehowa mying ai Hkawhkam wa tsun nga ai. ⁵⁸ Zaw nawng zaw wa up ai Yehowa ning nga ai: Babelon mare a htat ai bunghku ni hpe, atsai awai agrawp kau nna, de a tsaw ai chyinghka ni hpe mung, wan nat kau na mara ai: amyu baw ni gaw kaman lila matu, mung masha ni gaw wan a matu hkrai, shakut sharang nna, shanhte gaw hki ba hkrum na mara ai. ⁵⁹ Masea kashu, Neria kasha Seraia gaw, Yuda hkawhkam Zedekia hkaw dung ai mali ning hta e, dai hkawhkam hte rau, Babelon mare de lung wa ai shaloi jang, myihtoi Yeremia shi hpe hkangda ai ga, da ndai rai nga ai. Seraia chyawm gaw kunhting agyi wa rai nga ai. ⁶⁰ - ⁶¹ Yeremia gaw Babelon mare hpe lakap nna, dai mare ntsa e du magang ra ai tsin-yam tsindam mahkra hpe laika shabawn hta ka da nna, Seraia hpe, Nang gaw Babelon mare de du jang, ndai ga mahkra hpe hti dan lu na, yu yu u: ⁶² dai hta kaga nang gaw, Yehowa e, ndai shara hta masha mung, yamnga mung, n shanu nga lu hkra, prat dingsa shingran katsi ai shara shatai nna atsai awai shamyit kau na lam, nang hkangda nitdai law, ngu nna tsun u. ⁶³ - ⁶⁴ Ya ndai laika hpe hti ngut jang, laika hta nlung gyit noi nna, Uhprat hka ka-ang e jahkrat bang let, Babelon mare gaw ndai zawn lup mat nna, ngai shi a ntsa e shapraw ai tsin-yam tsindam majaw, shi bai rawt lu na n rai: shanhte gaw hki ba hkrum na mara ai, ngu nna tsun u, ngu wu ai. Ndai yang du hkra Yeremia ga rai nga ai.

¹ Zedekia gaw hkaw dung hpang yang, asak hkun langai ning rai nga nna, Yerusalem mare hta shi langai ning up nga ai; shi a kanu gaw Libna mare na Yeremia a shayi sha Hamutala rai lu ai. ² Shi gaw Yehoiakim a lam mahkra hte maren Yehowa a man e n hkru ai amu galaw nga ai. ³ Kaning rai nme law, Yehowa gaw Yerusalem mare hte Yuda mung hpe shi a myiman kaw na tsan kau da ai shani du hkra, pawt bu nga ai majaw, ndai lam ni byin pru nga ai. Bai Zedekia gaw Babelon hkawhkam hpe gumlau wu ai. ⁴ - ⁵ Dai rai nna Babelon hkawhkam Nebuhkadneza gaw, Zedekia hkaw dung ai jahku ning na, shata shi a, nhtoi shi ya hta e, shi a hpyen luksuk ni hte rau, Yerusalem mare hpe lung gasat nna, de a grupyin e dap jung let, kaduk htu nhtawm, Zedekia hkaw dung ai shi langai ning du hkra, dai mare hpe wang tawn da mu ai. ⁶ Shingrai shata mali a nhtoi jahku ya e mare kata e hku wa grai hku wa nna, mung masha ni a matu shahpa n nga nga ai. ⁷ Dai shaloi e Hkalde masha ni gaw dai mare grupyin e wang tawn nga ma ai rai nna, mare bunghku hpe tawk waw nhtawm, hpyen masha ni nlang hkawhkam wa a sun makau e nga ai, bunghku lahkawng a lapran a chyinghka lam hku shana e hprawng pru nna, shanhte gaw layang ga hku hprawng mat wa ma ai. ⁸ Hkalde hpyen masha ni chyawm gaw hkawhkam wa hpe hkan shachyut nna, Yerihko pa hta e Zedekia hpe hkan dep mu yang, shi a hpyen masha nlang hte gaw hprawng bra mat ma ai. ⁹ - ¹⁰ Shanhte gaw hkawhkam wa hpe rim la nna, Hamat mung na Ribla mare e nga ai Babelon hkawhkam hpang de woi wa mu ai: shingrai shi hpe dawdan mu ai rai nna, Babelon hkawhkam Zedekia man e shi a kashu kasha ni hpe sat kau ai hte, Yuda du salang ni, Ribla e sat kau mu ai. ¹¹ Bai shi gaw Zedekia myi hpe achyaw baw kau ya nna, hkang hkyihkyang hte gyit nhtawm, Babelon mare de woi wa nna, si ai shani du hkra htawng hta rawng da mu ai. ¹² Ya Babelon hkawhkam Nebuhkadneza hkaw dung ai shi jahku ning ngu na, shata manga a shi ya shani e, Babelon hkawhkam a hkringmang, sin langa ni a hpyenbu Nebuzaradan gaw Yerusalem mare de du lung wa ai. ¹³ Shi gaw Yehowa a nta hte hkawhkam htingnu hpe mung, Yerusalem mare e nga ai nta kaba ni nlang hte hpe mung, nat kau wu ai. ¹⁴ Shi hte rau nga ai Hkalde hpyen ma ni mung, Yerusalem mare a bunghku ni hpe run kau mu ai. ¹⁵ Shaloi sin langa ni a hpyenbu Nebuzaradan gaw, mare kata e naw ngam nga ai matsan mayan htum ai ni hte, Babelon hkawhkam hpang de rap wa ai ni hpe mung, naw ngam nga ai yu maya ni hpe mung, bawngdung shangun mu ai. ¹⁶ Raitimung, sin langa ni a hpyenbu Nebuzaradan gaw, tsabyi sun hte yi hkauna galaw na matu matsan mayan htum ai ni hpe ngam tawn da mu ai. ¹⁷ Bai Hkalde masha ni gaw, Yehowa nta kata e nga ai magri shadaw ni hpe mung, angdung npawt ni hte magri hkalawng hpe mung, agrawp kau nna, dai magri yawng hpe Babelon mare de la wa mu ai. ¹⁸ Bai, magri hte galaw ai di ni, shingban ni, lakap ni, angdung ni, chyaw ni hte dawjau na matu magri arai ni mahkra hpe mung, la wa mu ai. ¹⁹ Bai, sin langa ni a hpyenbu wa gaw, aja hte mung, gumhpraw hte mung, galaw ai hka wan ni, awan ban ni, angdung ni, di ni pyengdin shadun ni, chyaw ni hte gawm ni hpe mung, la kau wu ai. ²⁰ Shawlumon gaw Yehowa nta matu galaw tawn ai shadaw lahkawng, Hkalawng langai mi hte angdung npawt ni a npu e magri usu shi lahkawng hta lawm ai magri ni gaw, hti n dang law nga ai. ²¹ Ya shadaw langai mi gaw, de a tsaw de dawng shi matsat rai nga ai; de a kaba de, dawng shi lahkawng grup rai nga ai: dai gaw hpungkraw rai nga nna, mali pyen htat nga ai. ²² De a ntsa e magri bandung rai nga ai: bandung langai mi dawng manga tsaw nga nna, de a grupyin e sumgawn awa hte hkainu si nampan sumbyau nga ai; yawng hte gaw magri rai nga ai: shadaw lahkawng ngu na mung, dai hte maren rai nga nna, hkainu si nampan sumbyau nga ai. ²³ Shadaw man mi hta hkainu si nampan jahku shi kru kru rai nga ai: grupyin na sumgawn awa ntsa e, hkainu si nampan latsa rai nga ai. ²⁴ Bai sin langa ni a hpyenbu wa Nebuzaradan gaw, hkinjawng agyi wa Seraia hpe mung, hpunglum wa ngu ai Zehpania hte Yehowa nta chyinghka sin ai marai masum hpe mung rim la wu ai: ²⁵ - ²⁶ hpyen luksuk ni a bu wa hpe mung, mare hta e nga ai hkawhkam wa a salang sanit hpe mung, mung masha ni a jahpan hti yu ai luksuk ni a agyi wa a chyare wa hpe mung, dai mare hta e mu hkrup ai mungdan salang kru shi hpe mung, mare kata na shaga la nhtawm, Babelon hkawhkam nga ai Ribla mare de woi wa mu ai. ²⁷ Babelon hkawhkam gaw Hamat mung Ribla mare hta shanhte hpe kahtam sat kau mu ai. Shingrai Yuda amyu gaw tinang a mung hta na shapraw kau ai hkrum mat ma ai. ²⁸ Da ndai gaw Nebuhkadneza bawngdung shangun ai masha ni rai nga ma ai: shi hkaw dung ai sanit ning hta e, Yuda masha hkying masum hkun masum hte hpe woi wa wu ai; ²⁹ shi matsat ning hta e, marai matsat tsa hkun masum hte hpe, Yerusalem mare na woi wa wu ai; ³⁰ hkun masum ning hta e, sin langa ni a hpyenbu Nebuzaradan gaw, Yuda masha sanit tsa mali shi manga hte hpe woi wa wu ai: masha yawng hkying mali kru tsa rai ma ai. ³¹ - ³² Ya, Yuda hkawhkam Yehoiahkin a bawngdung ai sumshi sanit ning hta, shata shi lahkawng a hkun manga ya e, Babelon hkawhkam Ewila-merodak a hkaw dung ai shawng shaning hta e, shi gaw Yuda hkawhkam Yehoiahkin a shabyi shatsaw ya nna, htawng hta na shalawt dat nhtawm, shi hpe ngwi pyaw ga tsun dat nna, Babelon mare hta shi hte rau nga ai hkawhkam ni a ntsa e, shi a tingnyang hpe shagrau dat wu ai hte, shi a htawng hpun palawng galai kau ya wu ai. ³³ Shingrai Yehoiahkin gaw shi a prat dingsa e hkawhkam a man e lusha nga lu nna, shi hpe bau na matu, Babelon hkawhkam wa hparan da ai lusha jarit hpe tutnawng shani shagu shi hpe karan jaw mu ai.