TARA AGYI

TARA AGYI

¹ Ya Yawshu si mat ai hpang, Israela kashu kasha ni gaw Yehowa hpe, Hkanani masha ni hpe sa gasat na, anhte hpe kadai mahtang woi shawng na rai ta? ngu nna san mu ai. ² Yehowa gaw, Yuda mahtang woi shawng na re ai: shi a lata dai mungdan hpe ngai ap kau se ai, ngu nna tsun wu ai. ³ Shaloi Yuda gaw shi a kahpu Simun hpe, Hkanani masha ni hpe sa gasat na, nye a hkambum ga de ngai hpe naw sa karum rit; dai hpang na a hkambum ga de mung ngai hkan nang na nngai, ngu wu ai. Simun mung, shi kaw hkan nang sa wa ai. ⁴ Shingrai Yuda hpyen rawt wu ai. Yehowa mung, Hkanani hte Perizi masha ni hpe shi a lata hta ap wu ai rai nna, shanhte gaw Bezek mare e masha mun mi hpe gasat kau mu ai. ⁵ Adoni-bezek hpe Bezek mare e shanhte mu hkrup mu ai; shanhte shi hpe gasat nna Hkanani hte Perizi masha ni hpe dang kau mu ai. ⁶ Adoni-bezek chyawm gaw hprawng mat wa ai; shanhte mung shi hpe hkan shachyut rim la nna, lata yung nu lagaw yung nu ni hpe krum kau ya mu ai. ⁷ Shaloi Adoni-bezek gaw Lata yung nu hte lagaw yung nu krum kau mana ai hkawhkam sanit shi hte nye a shaku npu e shat hkyep shat hkap hta sha ma ai; ngai di ai hte maren Karai Kasang ngai hta bai tai ni ai, nga ai Dai wa hpe shanhte Yerusalem mare de sa kau mu ai rai nna, dai yang shi si mat ai. ⁸ Bai Yuda kashu kasha ni gaw Yerusalem mare hpe gasat la nna, nhtu hte hpya sat kau nhtawm wan hte nat kau mu ai. ⁹ Dai hpang Yuda kashu kasha ni gaw, bum ga hkan na, Dingda maga hkan na hte pa ga hkan na Hkanani masha ni hpang de gasat na, yu sa wa ma ai. ¹⁰ Bai Yuda masha ni gaw Hebron e nga ai Hkanani masha ni hpe sa gasat nna, Sheshai, Ahiman hte Talamai hpe sat kau mu ai: Hebron mare a shawng na amying gaw Kiriat-arba rai nga ai. ¹¹ Dai kaw nna shanhte gaw Debira mare masha ni hpe sa gasat ma ai: dai Debira gaw shawng e Kiriat-sehpera mying ai rai nga ai. ¹² Shaloi Hkaleb gaw, Kiriat-sehpera gasat la lu ai wa hpe, ngai shayi sha Aksa ya sha na, ngu wu ai. ¹³ Dai rai nna, Hkaleb a kanau Kenaza a kasha Otniela gaw dai mare hpe gasat la wu ai rai nna, Hkaleb gaw dai wa hpe shi a shayi sha Aksa ya sha wu ai. ¹⁴ Dai numsha gaw rawt wa ai shaloi e, kawa kaw yi hpyi na lam madu wa hte bawng nna, lawze dinghkung na yu hkrat wa ai: shaloi Hkaleb gaw, Nang hpa ra n ta? ngu wu yang, ¹⁵ Shi gaw, Chyeju shaman ya e: nang ngai e Dingda ga e tawn da nit dai majaw, hka hpawk mung naw jaw e law, ngu nna shi hpe hpyi wu ai. Hkaleb mung, lahta hka hpawk hte lawu hka hpawk shi e jaw wu ai. ¹⁶ Ya Mawshe a kahkau a kashu kasha Keni masha ni mung, Yuda kashu kasha ni hte rau, namhtam hpun mare na lung wa nhtawm, Arad shara dingda maga na Yuda nam mali de du nna, dai hkan e shanhte hte rau nga nga ma ai. ¹⁷ Bai Yuda gaw kahpu Simun kaw hkan sa nna, Zephat mare nga ai Hkanani masha ni hpe sat kau nhtawm, mare hpe atsai awai hpya kau mu ai: mare dai hpe mung, Horma ngu nna shamying mu ai. ¹⁸ Yuda mung, Gaza hte de a ginwang, Askelon hte de a ginwang, Ekron hte de a ginwang ni hpe gasat kau ya wu ai. ¹⁹ Yehowa mung Yuda hte rau nga nga ai rai nna, shi gaw bum ga e nga ai ni hpe shachyut kau wu ai: layang ga na ni hpe chyawm gaw hpri leng lu ai majaw n gawt kau lu mu ai. ²⁰ Mawshe hkangda ai hte maren Hkaleb hpe Hebron mare jaw mu ai rai nna, shi gaw dai mare na Anak a kasha masum hpe shaden kau mu ai. ²¹ Ben-yamin a kashu kasha ni gaw Yerusalem mare nga ai Yebusi masha ni hpe n shachyut kau lu mu ai rai nna, Yebusi masha ni dai ni du hkra Yerusalem mare Ben-yamin kashu kasha ni hte rau nga nga ma ai. ²² - ²³ Yosep a kashu kasha ni mung, Behtela de hpyen rawt ma ai rai nna, Yehowa shanhte hte rau rai nga ai. Behtela de kin-yu yu na Yosep a kashu kasha ni masha shangun dat mu ai. (Dai mare a amying chyawm gaw, moi shawng e Luza rai nga ai.) ²⁴ - ²⁵ Sin yu ai masha ni gaw mare na pru wa ai masha langai mi hpe mu nna, Mare de shang wa ai lam anhte hpe madun rit; madun yang gaw nang hpe chyamsa jaw na ga ai, ngu mu ai. Dai wa mung mare de shang ai lam madun wu ai rai nna, shanhte gaw dai mare a masha ni hpe nhtu hte sat kau mu ai: dai wa hte shi a nta masha ni mahkra hpe chyawm gaw, shanhte dat dat mu ai. ²⁶ Dai wa gaw Hiti mung de sa nna, mare de nhtawm Luza shamying wu ai; dai ni du hkra shing nga mying nga ai. ²⁷ Manashe masha ni chyawm gaw, Bet-shean hte de a kahtawng ni, Tanak hte de a kahtawng ni, Dora hte de a kahtawng ni, Iblam hte de a kahtawng ni, Megido hte de a kahtawng ni hta nga ai masha ni hpe n shachyut kau mu ai rai nna, Hkanani masha ni dai mung hta nga nga ma ai. ²⁸ Israela masha ni n-gun ja wa ma jang, shanhte Hkanani masha ni hpe amu bungli gunhpai shangun nna, shanhte hpe atsai awai shamyit kau mu ai n rai. ²⁹ Dai zawn Ehprim masha ni mung Gezera mare na Hkanani masha ni hpe n shachyut kau mu ai rai nna, Hkanani masha ni gaw Gezera mare hta shanhte hte rau nga nga ma ai. ³⁰ Dai zawn Zebulun masha ni mung, Kitron mare masha ni hte Nahalola mare masha ni hpe n shachyut kau mu ai rai nna, Hkanani masha ni shanhte hte rau nga nga let, amu bungli gunhpai ya nna nga ma ai. ³¹ Dai zawn Ashe masha ni mung Ahko mare, Sidon mare, Alab mare, Akzib mare, Helaba mare, Ahpik mare hte Rehob mare masha ni hpe n shachyut kau mu ai sha, ³² dai mung madu Hkanani masha ni hte rau Ashe masha ni nga nga ma ai: shanhte hpe shachyut kau mu ai n rai. ³³ Dai zawn Naphtali masha ni mung, Bet-sheme mare masha ni hte Bet-anat mare masha ni hpe n shachyut kau mu ai sha, mung madu Hkanani masha ni hte rau, shanhte nga nga ma ai: raitimung, Bet-sheme hte Bet-anat masha ni gaw amu bungli gunhpai ya nna nga nga ma ai. ³⁴ Amori masha ni gaw, Dan a kashu kasha ni hpe bum ga de nga nga shangun mu ai; pa ga de nga na hkraw ya mu ai n rai. ³⁵ Amori masha ni chyawm gaw Here bum, Aiyalon hte Shalabim hkan e nga nga ma ai: raitimung, Yosep a kashu kasha ni dang kau mu ai rai nna, Amori masha ni gaw amu bungli gunhpai ya nna nga ma ai. ³⁶ Amori masha ni a lamu ga jarit gaw, Akrabim kadawng lunghkrung kaw nna lahta daw rai nga ai.

¹ Shaloi Yehowa a kasa gaw, Gilgala shara kaw nna, Bohkim shara de lung wa nna, Ngai nanhte hpe Egutu mung na woi shapraw wa ai hte, nanhte a nji nwa ni hpe dagam shaka da ai mung hta shawn tawn masade ai; nanhte hte tawn da ai ga shaka dai hpe ngai galoi mung n hpya na nngai: ² nanhte mung, ndai mung na masha ni hte ga shaka tawn da lu na n rai; shanhte a tawn hkungri ni hpe nanhte hpya kadawng kau ya na rai myit dai, ngu nna ngai tsun masade ai. Raitimung, nanhte nye a ga n madat myit dai; hpa majaw shingrai galaw myit ta? ³ Dai rai nna, ngai tsun made ga, ndai mung na masha ni hpe, ngai nanhte kaw na shachyut kau ya sa na n rai; shanhte gaw nanhte a garep hta aju, shanhte a Hpara ni mung nanhte a mahkam tai na mara ai ngu nna tsun wu ai. ⁴ Yehowa a kasa, Israela kashu kasha ni nlang hpe shing ngu tsun wu yang, amyu masha ni jahtau hkrap shajang ma ai. ⁵ Dai re ai majaw shara dai hpe Bohkim ngu nna shamying mu ai: dai yang e mung shanhte Yehowa hpe hkungga jaw ma ai. ⁶ Ya Yawshu gaw mung masha ni hpe dat dat ngut jang, Israela kashu kasha ni langai hte langai tinang lu la ang ai sali ga madu la na nga, pru wa ma ai. ⁷ Yawshu a prat tup hta mung, Israela masha ni a matu Yehowa galaw ai lam kaba yawng hpe mu mada nna, Yawshu a hpang e shi hpe mu dep ai salang ni a prat tup hta mung, amyu masha ni Yehowa hpe jaw jau ma ai. ⁸ Shaloi Yehowa a shangun kasa, Nun a kasha Yawshu gaw, asak latsa e shi ning du nna, si mat sai. ⁹ Shi hpe Ehprim bum ga, Gasha kawng dingdung maga e nga ai, shi a lamu ga sali Timnat-here mare ginwang na ga hta makoi mayang mu ai. ¹⁰ Shingrai, Yawshu aprat dep ai masha ni nlang kaji kawa ni hpawng nga ai de du ma masai: dai ni a hpang e, Yehowa hpe mung n chye, Israela matu shi galaw ya ai amu lam ni hpe mung n chye re ai, htawmhpang na kashu kasha ni a aprat du ra ai. ¹¹ Dai prat e Israela kashu kasha ni gaw, Yehowa man e n shawp ai hku galaw nna Bala hpara ni hpe jaw jau ma ai. ¹² Egutu mung na shanhte hpe woi wa ai, kaji kawa ni a Karai Kasang Yehowa hpe kau da nna, grupyin na masha amyu ni a Hpara ni hpang de hkan mat wa let nawku dagup ai hte Yehowa a masin shapawt ya mu ai. ¹³ Rai sa, shanhte Yehowa hpe kau da nna, Bala hpara hte Ashtarot hpe jaw jau mu ai. ¹⁴ Dai majaw Yehowa a pawt bu ai sindawng Israela hta du nna, shi shanhte hpe hpya sha na kashun kashe ai ni a lata de ap kau mu ai: shingrai grupyin na masha hpyen ni kaw dut kau mu ai rai nna, dai hpyen ni a man e shanhte bai n rawt lu ma ai. ¹⁵ Shanhte hkawm sa wa ai lam magup hta, Yehowa tsun nna shanhte hpe dagam kau sai hte maren, Yehowa a lata ban dim ai hte katut nna, nachying matsan mayan hkrum mat ma ai. ¹⁶ Shingrai jang, hpya lu hpya sha ai ni a lata na, shanhte hpe hkye la ai tara agyi ni hpe Yehowa paw pru shangun ya mu ai. ¹⁷ Raitimung, dai tara agyi ni a ga shanhte n madat hkraw ma ai: Hpara shaje ni kaw shanhte sa nna shut hpyit lam hkan let nawku dagup ma ai: kaji kawa ni hkan sa ai Yehowa a matsun maroi lam hta na, shanhte alawan yit mat wa nna, kaji kawa ni sa ai hku n hkan ma ai. ¹⁸ Yehowa shanhte a matu tara agyi paw pru shangun yang, dai wa hte rau shi nga nga nna, tara agyi wa lakhtak ting hpyen ni a lata na shanhte hpe hkye la wu ai: kaning rai nme law, shanhte sharu shatsang zingri zingrat hkrum sha ai majaw jahtau shaga jang, Yehowa myit kayin ai rai nga ai. ¹⁹ Bai, tara agyi wa si mat ai hpang rai jang, shanhte bai yit nna, kaji kawa ni hta grau n shawp ai hku galaw let, Hpara shaje ni hpang de hkan mat wa nna, dai ni hpe jaw jau ai hte nawku dagup ma ai: tinang a n shawp ai arawn alai hte tinang a myit ja ai lam hpe kau hkraw ma ai n rai. ²⁰ Shaloi Yehowa Israela hpe pawt bu let tsun wu ai gaw, Amyu ndai, nye a ga n madat sha ya ai hte, shanhte a kaji kawa ni hpe ngai tawn da ai ga shaka tawt lai ma ai majaw; ²¹ ngai mung, Yawshu si mat ai shaloi, naw ngam ai masha amyu langai ngai hpe shanhte kaw na n shachyut kau ya na ni ai: ²² shing di, shanhte a kaji kawa ni Yehowa lam hkan shatsup ai zawn, shanhte hkan nang na kun, n hkan nang na kun gaw, naw ngam ai amyu ni a lata hte Israela hpe ngai chyam yu na we ai, nga ai. ²³ Dai hte maren, masha amyu dai ni hpe, Yawshu a lata de mung n ap, alawan mung n shachyut kau ya ai, nga nga ai.

¹ Da ndai gaw, Hkanan mung na majan amu n chye lawm ai Israela masha ni hpe chyam yu na matu mung; ² majan n chye gun ai Israela kashu kasha prat mi hte prat mi na ni, majan amu sharin nna, gasat chye wa mu ga mung, Yehowa ngam da ai amyu ni rai nga ai: ³ dai ni gaw, Hpilisti du manga hte hte, Hkanani amyu ni yawng; Sidon masha ni, Bala-hermon bum kaw nna Hamat mare ringhpung du hkra nga ai Lebanon bum na Hiwi masha ni rai nga ma ai. ⁴ Yehowa, Mawshe a n-gup hta shanhte a kaji kawa ni hpe hkangda ai matsun maroi ga hte maren, hkan na n hkan na chye lu hkra, Israela hpe chyam yu na matu ngam da ai rai nga ai. ⁵ Israela kashu kasha ni chyawm gaw, Hkanani, Hiti, Amori, Perizi, Hiwi hte Yebusi amyu ni hte rau nga nga nna, ⁶ shanhte a shayi sha ni hpe la ya let, tinang a shayi sha ni hpe mung shanhte a shadang sha ni hpe ya sha let, shanhte a Hpara ni hpe jaw jau lawm ma ai. ⁷ Ya Israela kashu kasha ni gaw, Yehowa man e n shawp ai amu galaw let, shanhte a Karai Kasang Yehowa hpe malap kau nna Bala hpara ni hte Asherot hpe jaw jau ma ai. ⁸ Dai majaw Yehowa Israela kashu kasha ni hpe pawt bu ai hte, Mesopotami hkawhkam Hkushan-re-shahtim a lata hta shanhte hpe dut kau mu ai rai nna, Israela kashu kasha ni gaw matsat ning tup Hkushan-re-shahtim kaw yamnga ma ai. ⁹ Shaloi, Israela kashu kasha ni Yehowa hpe jahtau jang, Yehowa gaw shanhte hpe hkye la ai wa, Hkaleb a kanau Kenaza kasha Otniela hpe paw pru shangun wu ai rai nna, shi shanhte hpe hkye la wu ai. ¹⁰ Yehowa a Wenyi shi hta dung nga ai rai nna, shi gaw Israela masha ni hta tara dara ya nga ai: hpyen gasat mung shi woi awn nna, Yehowa gaw Mesopotami hkawhkam Hkushan-re-shahtim hpe shi a lata de ap kau wu ai: shi a lata hte dai hkawhkam hpe dang kau wu ai. ¹¹ Shaloi, mung ting mali shi ning tup majan sim mat ai. Kenaza kasha Otniela mung si mat ai. ¹² Bai, Israela kashu kasha ni gaw Yehowa man e n shawp ai amu galaw ma ai: shingrai Yehowa man e n shawp ai amu galaw ai majaw, Israela hpe ari jaw na matu Yehowa gaw Moba hkawhkam Eglon hpe n-gun shaja wu ai. ¹³ Dai wa gaw Amon masha ni hte Amalek masha ni hpe grau la nna, hpyen rawt nhtawm, Israela masha ni hpe gasat nna namhtan hpun mare dip la kau ya mu ai. ¹⁴ Shingrai, Israela kashu kasha ni gaw shi matsat ning tup Moba hkawhkam Eglon kaw yamnga ma ai. ¹⁵ Bai, Israela kashu kasha ni Yehowa hpe jahtau yang, Yehowa gaw shanhte a matu hkye la ai wa ngu ai, Ben-yamin amyu, Gera kasha, lata lapai ai wa Ehud hpe paw pru shangun ya wu ai: Israela kashu kasha ni gaw shi a lata hta, Moba hkawhkam Eglon hpang de shawa jahkawn shagun dat mu ai. ¹⁶ Ehud gaw dawng mi galu nna, nshan lahkawng dai ai nhtu galaw nna, hkra magyi na labu kata e tsat tawn mu ai. ¹⁷ Shingrai, Moba hkawhkam Eglon kaw jahkawn shang sak wu ai: Eglon chyawm gaw nachying hpum ai wa rai nga ai. ¹⁸ Jahkawn sak da ngut jang, jahkawn gun sa ai ni hpe dat dat mu ai. ¹⁹ Shi chyawm gaw Gilgala shara makau na nlung mahtan du jang, bai nhtang sa nhtawm, hkawhkam hpe, Hkawhkam wa e, ngai nang hpe lagyim tsun na ga lu nngai, ngu wu ai. Hkawhkam wa gaw, Naw tsin u, ngu wu yang, shi kaw tsap nga ai ni nlang pru mat wa ma ai. ²⁰ Ya hkawhkam wa gaw shi chyu nga nga re ai katsi ai ntsa kawk hta dung nga yang, Ehud gaw shi hpang de sit sa nna, Karai Kasang kaw na nang hte seng ai ga ngai gun nngai, ngu wu ai. Shaloi shi rawt tsap wa jang, ²¹ Ehud mung shi a pai lata hte hkra magyi de tsat tawn ai nhtu shaw nhtawm, hkawhkam a kan galun baw ya wu ai: ²² nhtu dai mung nhku lawm hkra shang wa nna, shi a kan na n shaw sai majaw, nhtu dai hpe sau e galup tawn nna, shingdu de hkrang hkra rai nga ai. ²³ Shaloi Ehud gaw shinggan jan de pru nhtawm, dai ntsa kawk chyinghka ni hpe la nna, htinggrang kau da wu ai. ²⁴ Ya Ehud pru mat wa ai hpang, hkawhkam wa a shangun ma ai wa yu nna, yu u, chyinghka htinggrang nga la nga ai hpe mu jang shanhte gaw, Gaja wa, ntsa kawk e hkum tsan ai she rai sam ai, nga ma ai. ²⁵ Shanhte jin hkra la yu timung, ntsa kawk na chyinghka n hpaw ya ai majaw, shanhte sumtsaw la nna, hpu yu mu yang, yu u, shanhte a Madu ga e si taw nga ai hpe mu mu ai. ²⁶ Shanhte shingrai naw la nga ai laman e Ehud gaw hprawng lawt lu nna, nlung mahtan tu ai shara lai kau da ai hte Seira de du mat wa ai. ²⁷ Shaloi shi du wa jang Ehprim bum ga e, shi pahtau dum dat wu ai rai nna, Israela kashu kasha ni mung shi kaw hkan nang let bum ga de na yu wa ma ai. ²⁸ Shi mung, Ngai kaw hkan marit; Yehowa gaw nanhte a hpyen, Moba masha ni hpe nanhte a lata hta ap ya manit dai, ngu wu ai. Shanhte mung shi kaw hkan nang nna, Moba mung de sa ai lam Yawdan hka rap ai uhkan e hkap nna langai mi hpe muk n rap kaw shangun mu ai. ²⁹ Dai shaloi, n-gun ja ai Moba share mun mi hpe, langai mi mung n lawt hkra, sat kau mu ai. ³⁰ Shingrai, Israela masha ni Moba masha ni hpe dang kau mu ai. Dai kaw nna matsat shi ning tup mung ting, majan sim mat ai. ³¹ Ehud a hpang e Anat a kasha Shamga paw pru nna, majawn hte Hpilisti masha marai kru tsa hpe sat kau nna, Israela masha ni hpe hkye la wu ai.

¹ Ya, Ehud si mat ai hpang, Israela kashu kasha ni gaw, Yehowa man e n shawp ai amu bai galaw ma ai. ² Shaloi Yehowa gaw shanhte hpe Hazora e dung ai Hkanan mung na hkawhkam Yabin a lata de dut kau mu ai: dai hkawhkam a hpyenbu gaw, Maigan amyu ni a Haroshet mare e dung ai, Sisera rai nga ai. ³ Dai wa gaw hpri hpyen leng jahku tsa lu nna, Israela kashu kasha ni hpe hkun ning tup zingri zingrat wu ai majaw, Israela kashu kasha ni Yehowa hpe hpyi jahtau mu ai. ⁴ Dai prat e, Lapidat a madu jan, myihtoi num Debora gaw Israela masha ni hpe tara dara ya nga ai. ⁵ Shi gaw Ehprim bum ga na, Rama hte Bet-ela lapran na, Debora ngu ai namhtan hpun nhpang e dung nga ai: Israela kashu kasha ni mung, myihtoi num dai kaw amu tsun na sa sa rai ma ai. ⁶ Shaloi Debora gaw masha shangun dat nna, Naphtali ga Kedesha mare na Abinoam a kasha Barak hpe shaga la nhtawm, Naphtali amyu hte Zebulun amyu hta na masha mun mi saw woi nna, Tabora bum de lung wa su; ⁷ ngai mung, Yabin hkawhkam hpyenbu Sisera hte shi a hpri leng, hpyen laba ni hpe Kishon hka de nang hpang de shadut dat nna, na a lata hta ap kau na we ai, nga nna Israela Karai Kasang Yehowa tsun sai, n rai ni? ngu nna shi hpe tsun wu ai. ⁸ Barak gaw, Nang ngai hte rau sa yang chyawm gaw ngai sa na nngai; nang n lawm yang gaw n sa na nngai, ngu nna htan wu ai. ⁹ Shi mung, Ngai nang hte rau teng teng sa na nngai: raitimung, nang sa ai lam hta arawng lu na nit dai n rai; Yehowa gaw numsha lata hta sha Sisera hpe dut kau na nu ai, ngu wu ai. Shing nga tsun ngut jang Debora rawt nna, Barak hte rau Kedesha de sa wa ai. ¹⁰ Shaloi Barak gaw, Zebulun hte Naphtali masha ni hpe Kedesha de shaga la nna, dai kaw nna hkan nang ai masha mun mi sa wa ma ai: Debora mung shanhte hte rau sa wa ai. ¹¹ Dai hte yang, Mawshe a katsa Hoba a amyu matu hta na, Keni masha Hebera gaw, Keni masha gale hte hka nna, Kedesha makau, Zananim masha ni a shara na wa myi hpun nhpang e, sum gap nna nga nga sai. ¹² Ya Abinoam a kasha Barak Tabora bum de lung wa ai lam, Sisera hpe shana ya mu ai rai nna, ¹³ Sisera gaw, shi a hpri leng jahku tsa ting hte, maigan amyu ni a Haroshet shara kaw nna Kishon hka du hkra, shi a masha ni hpe hpawng tawn wu ai. ¹⁴ Shaloi Debora gaw, Rawt u; dai ni nhtoi gaw, Yehowa na a lata de Sisera hpe ap kau na nhtoi rai ra ai; Yehowa na a shawng e rawt sai, n rai ni? ngu nna Barak hpe shaja wu ai. Dai rai nna Barak gaw, Tabora bum kaw nna, masha mun mi hte rau, yu wa ai. ¹⁵ Yehowa mung, Sisera hte shi a hpyen leng ni, hpyen laba hpung ni nlang hte hpe, Barak a nhtu hte shama kau mu ai majaw, Sisera gaw shi a leng na yu nna lagaw hte hprawng wu ai. ¹⁶ Barak chyawm gaw dai leng ni hte hpyen masha ni hpe, maigan amyu ni a Haroshet du hkra hkan shachyut mu ai rai nna, Sisera hpyen masha ni nlang, langai mi muk n ngam hkra, nhtu hte si mat ma ai. ¹⁷ Shingrai, Sisera gaw lagaw hte hprawng nna, Keni masha Hebera a madu jan Yaela sum de hprawng shang wa ai: kaning rai nmelaw, dai hte yang Hazora hkawhkam Yabin gaw, Keni amyu na Hebera masha ni hpe jinghku rai nga ai. ¹⁸ Yaela chyawm gaw, Sisera hpe hkap tau la na pru nna, Nye a madu e, shang rit; ngai hpang de shang wa rit; hkum hkrit et, ngu nna shi e shaga wu ai. Shi mung Yaela sum de shang wa ai rai nna, Yaela gaw shi hpe hpajawng hkap jahpun wu ai. ¹⁹ Bai shi gaw, Ngai hpang kara la nngai; ntsin loi mi jaw e, ngu wu yang dai numsha gaw, nga chyu tau hpaw nna jaw lu wu ai; lu ngut jang, bai jahpun tawn wu ai. ²⁰ Bai shi gaw, Sum chyinghka lam e sin nga u; masha langai ngai, Kadai n nga a ni? nga nna san yang, N nga ai, ngu u, ngu nna tsun da wu ai. ²¹ Shaloi Hebera madu jan Yaela gaw, Sisera ba nna yup pyaw nga jang, sum mailak langai mi hte batbau la nna, shi hpang de asim sha sit sa nhtawm, dai mailak hpe ga de hkrang hkra, shi a baw sha galawp e kayat jung ya wu ai: dai rai nna shi htan nna si mat ai. ²² Ya Barak Sisera hpe hkan shachyut pru jang, Yaela mung pru nna, Shang rit, nang tam ai wa hpe ngai madun de ga, ngu wu yang, Barak shi kaw shang yu nna, yu u, Sisera gaw, mailak htinggrang let si taw nga ai hpe mu wu ai. ²³ Shingrai Karai Kasang gaw Hkanan hkawhkam Yabin hpe Israela kashu kasha ni a man e, dai shani e shagrit kau wu ai rai nna; ²⁴ Israela kashu kasha ni mung, Hkanan hkawhkam Yabin hpe hpya kau lu ai du hkra, shagu lang na hta, a dang kau nga ma ai.

¹ Dai shani e Debora hte Abinoam a kasha Barak gaw, ning nga mahkawn mangoi ma ai. ² Israela hta du gyi ni woi awn nna, Hkringmang sha ni tinang hkum n lahpawt ai majaw, Yehowa hpe shagrau sha-a mu. ³ Hkawhkam ni e, na la mu; du sha ni e, madat mu; Ngai nan, Yehowa hpe ngai shakawn na we ai, Israela Karai Kasang Yehowa hpe, kungdawn na nngai. ⁴ Yehowa e, nang Seira bum shagawng na yu wa nna, Edom pa na rawt ndai shaloi, Ginding aga gari nna, sumsing lamu ninghte abya, Sumwi man na mung, sin marang shaya nga ai. ⁵ Yehowa man e, bum ni awam nga ai; Israela Karai Kasang Yehowa a man e, wora Sina bum pyi ashun nga ai. ⁶ Anat a kasha Shamga a lakhtak hte, Yaela aprat hte ting, Nmaw lam ni katsi mat nna, Bu hkawm ai ni masun lam she hkan masai. ⁷ Israela amyu hta du madu htum sai; Ngai Debora garai n yu, Israela kanu tai na ngai garai n pru yang, Du madu htum mat nga sai. ⁸ Shanhte Hpara ningnan lata la masai; Shaloi jang, shanhte a chyinghka ni hta majan pru ra ai: Israela mun mali hta, n-gang langai mi mahtan a hka? Ari langai mi shanan a hka? ⁹ Tinang a asak n lahpawt ai darat kasha ni hte, Israela du agyi ni hpe, ngai manoi nngai: Yehowa hpe shagrau sha-a mu. ¹⁰ Lawze hpraw jawn ai ni, Panep mani hta dung ai ni hte, Hkrun lam hkawm ai ni e, tsun dan mu. ¹¹ Ndan pala garu ai hte tsan ai shara, Hka ja ai hka hpawk mahka e, Shanhte gaw, Yehowa a tengman ai magam, Israela hpe dingman ai hku up ai lam, hkai dan na mara ai: Dai shaloi e, Yehowa amyu gaw, chyinghka lam de yu wa na ra ai. ¹² Hprang u, hprang u, Debora e; Hprang u, hprang u, mahkawn mangoi u; Barak e rawt u; Abinoam a kasha e; Rim la lu ai bawng ni hpe sharen tawn u. ¹³ Shaloi e, mung masha ni hta arawng lu ai ni nkau mi, Share laba ni hta Yehowa pyi ngai hpang de yu ra ai. ¹⁴ Ehprim hta na, Amalek htingra manat ai ni du ma ai, Hpang ningdim pat ai gaw, Ben-yamin rai nga ai; Mahkira lakung na du agyi pru wa nna, Zebulun kaw na sundoi lang ai ni yu ma ai. ¹⁵ Yisahka du ni mung, Debora hta lawm nna, Yisahka amyu zawn, Barak mung rai nga ai; Lera kadit e shi kaw gat nang ma ai. Rubin a hka gai ginwang hkan e, Myit aru shara law nga malu ai. ¹⁶ Sagu hpung hpe shangwi ai sumhpyi mahku hta len nna, Sagu hpung a ka-ang e hpa majaw dung nan nga nit ta? Rubin a hka gai ginwang hkan e, Myit dawdan wa gaw, kaba nga malu ai. ¹⁷ Gilead mung, Yawdan hka wora hkran e nga nga ma ai. Dan gaw, shi a li hta hpa rai dung nan nga a ta? Ashe mung shi a li daru e n shamu ai sha, Shi a hka shi ni a makau e, dung nan nga a hka. ¹⁸ Zebulun chyawm gaw, asak n lahpawt hkra nden rawng nna, Naphtali mung, kawng jinghkang ntsa e, dai zawn rai nga ai. ¹⁹ Hkawhkam, ni sa gasat mara ai; Hkanan hkawhkam ni, Tanak shara, Megido hka kau e sa gasat ma timung, Gumhpraw lanep mi n lu mu ai. ²⁰ Sumsing lamu nna gintawng shagan ni mung, Tinang lam hta Sisere hpe gasat nga ai. ²¹ Kishon hka, moi chyaloi na Kishon hka, Hpyen ni hpe shayawng kau mu ai; Nye myit masin e, shanang sa u law. ²² Shanhte a share laba ni htaw hkrai htaw ma yang, Gumra ni a lagaw duk dak ai she kadu malu ai. ²³ Mero mare hpe gaw Yehowa hpang maga, Hpyen laba ni hte rau Yehowa hpang de n karum ai majaw, dagam kau mu; Dai mare masha ni hpe aja awa dagam kau mu, nga nna Yehowa a kasa tsun da sai. ²⁴ Keni masha Hebera madu jan Yaela gaw, Numsha danghta hta grau ai a lu nu ai; Sum e rawng ai numsha hta grau ai a lu nu ai. ²⁵ Dai wa ntsin she hpyi, shi gaw chyu nan jaw lu nu ai; Du magam gawm hta, madoi chyu sakjaw wu ai. ²⁶ Dai sum mailak shi la nna, Hkra lata hte nan batbau lang let, Sisera hpe adup nna, Shi a baw dit jung ya wu ai: Rai sa, shi a sha galawp hkrang hkra dit dinghkren ya wu ai. ²⁷ Yaela lagaw nhpang e shi dagup daw nna gadawng daw nga ai; Shi a lagaw nhpang e, dagup daw nna gadawng mat sai: Shi gadawng daw ai shara e si taw mat sai. ²⁸ Sisera a kanu gaw, hkuwawt hku yu let, Nba grang a kata na shi azi yu nna, Shi a leng hpa rai lau n du wa hkraw a i? Leng dingsen ni hpa majaw lanyan nga sai i? nga nna nyaw nga ai. ²⁹ Hpaji grau rawng ai shingnan num ni htan ai hta n-ga, Shi dai shi htan wu ai gaw, ³⁰ Shanhte lu la ai lanep karan nga ma ai n rai ni? Hpyen ma ni hpe mahkawn langai hpra lahkawng hpra, Sisera matu, jaw shatsawm ai sumpan, Jaw nna maka ka ai hpun palawng; Ninglaw wa ai wa a du hta mawn ya na matu, jaw nna maga lahkawng maka ka ai hpun palawng, karan nga ma ai n rai ni? nga ma ai. ³¹ Yehowa e, nang hpe hpyen ai ni nlang, dai zawn hten bya ga du mu ga law, Yehowa hpe tsawra ai ni, hpung shingkang hte rawt pru a Ningju jan zawn, kang nga manu ga law, n ga nna shakawn kungdawn nga ma ai. Dai kaw nna mali shi ning tup mung ting majan sim mat ai.

¹ Bai, Israela kashu kasha ni gaw Yehowa a man e n shawp ai amu galaw ma ai: dai rai nna Yehowa gaw shanhte hpe Midian masha ni a lata hta sanit ning tup ap kau wu ai. ² Shingrai Midian masha ni Israela hpe dang kau mu ai rai nna, Midian masha ni zingri zingrat ai majaw, Israela masha ni bum ga hkan e, ngang ai lungpu hku, ga ginlawng hku, hte hpyendap galaw rawng ma ai. ³ Israela masha ni, yi hkauna galaw tawn ngut jang, Midian masha ni, Amalek masha ni hte sinpraw mung masha ni sa wa nna, ⁴ dap jung nhtawm, Gaza mare du hkra nsi naisi nlang jahten kau ya nna, sha ai baw baw hte sagu bainam yamnga hpa mung, Israela mung hta n ngam da ma ai. ⁵ Shanhte gaw tiinang yamnga, tinang sum hte lung wa nna, dinggamyaw zawn kanawng ai hte, shanhte hte shnhte a gawla-uk ni gaw hti n dang hkra law nga malu ai: dai mung hpe shaza kau na matu, shanhte lung wa ma ai. ⁶ Shingrai, Israela masha ni Midian masha ni majaw, mala la matsan mat nna, Israela kashu kasha ni gaw Yehowa hpe hpyi jahtau ma ai. ⁷ Ya Israela kashu kasha ni Midian masha ni a majaw Yehowa hpe hpyi jahtau ma yang, ⁸ Yehowa Israela kashu kasha ni hpang de myihtoi langai mi shangun dat nna, dai wa gaw, Israela Karai Kasang Yehowa ning nga ai: Ngai nanhte hpe Egutu mung hte mayam tai nga ai nta na shaw woi wa masade ai: ⁹ Egutu masha ni a lata na mung, nanhte hpe adip akrip di ai masha ni a lata na mung, ngai nanhte hpe mawai la nna, shanhte hpe shachyut kau nhtawm, shanhte a lamu ga nanhte hpe karan jaw masade ai: ¹⁰ bai Nanhte a Karai Kasang Yehowa ngai rai nga nngai; nanhte nga ai Amori mung masha ni a Hpara ni hpe hkum hkrit myit, ngu nna ngai nanhte hpe jet da made timung, nanhte nye a ga n madat myit dai, nga ai, ngu wu ai. ¹¹ Bai, Yehowa a lamu kasa gaw sa nna, Ohpra shara na, Abiezra lakung Yoashu ngu ai wa a wamyi hpun nhpang e dung nga ai: shi a kasha Gidon gaw, Midian masha ni n mu hkra nga, tsabyi shup ai htumbyen hta hkulan mam dup wu ai. ¹² Shaloi Yehowa a lamu kasa gaw, shi kaw danpru nna, N-gun ja ai share wa e, Yehowa nang hte rau nga nga ai, ngu wu ai. ¹³ Gidon chyawm gaw, Nye a Madu e, Yehowa anhte hte rau nga nga ai rai yang gaw, hpa majaw ndai hte chyum ai hkrum a ta? Yehowa anhte hpe Egutu mung na shaw la sai n rai ni? nga nna anhte a ji wa ni hkai dan ai mauhpa amu yawng mayawng gaw, ya kanang rai wa sata? ya e Yehowa anhte hpe kau da nna, Midian masha ni a lata hta ap kau ma ni ai n re hka, ngu wu ai. ¹⁴ Shaloi Yehowa shi hpe galaw yu nna, Nang hta rawng ai nsam hte sa nna, Israela masha ni hpe Midian masha ni a lata na hkye la su: ngai nang hpe shangun dat se ai, n rai ni? ngu wu ai. ¹⁵ Gidon chyawm gaw, Madu e, Ngai wa mi Israela masha ni hpe hpa hte hkye la lu na rai ta? yu u, nye a amyu lakung gaw, Manashe amyu hta matsan grau ai lakung rai nga ai; ngai hkum mung, anhte dap hta n tai htum ai wa rai nga ai, ngu nna htan wu ai. ¹⁶ Bai Yehowa gaw, Gaja wa teng teng ngai nang hte rau nga nga na rai nna, marai langai hpe sha zawn, Midian masha ni hpe, nang sat kau lu na rin dai, ngu wu ai. ¹⁷ dai rai nna Gidon gaw, Ngai nang kaw myiman pa ni ai rai yang gaw, ngai hte shaga ai wa, Nang nan rai ngai ai gaw, kumla madun yu e; ¹⁸ ngai bai sa nna, na a man e nye a kumhpa garai n jau jau gaw, ndai yang na hkum wa mat yaw, ngu nna hpyi wu yang, dai wa gaw, Nang bai n sa sagaw ngai anga nga na nngai, ngu wu ai. ¹⁹ Shaloi Gidon wa nna, bainam kasha langai mi hte shadung bye mi a matsi n rawng ai muk pa shadu wu ai: ashan hpe ka hta, shan jahku hpe di hta bang nhtawm, wa myi hpun nhpang de dai wa kaw sa jau wu ai. ²⁰ Karai Kasang a lamu kasa mung, dai shan hte matsi n rawng ai muk pa hpe ndai lung htawn e mara tawn u; shan jahku hpe mung dai hta ru bun u, ngu wu ai. ²¹ Gidon mung shingrai galaw wu ai. Shaloi Yehowa a lamu kasa gaw, shi lang ai dawhkrawng a matu hte ashan hte matsi n rawng ai muk hpe ahtawk wu ai rai nna, nlung na wan grung nna, ashan hte matsi nrawng ai muk hpe hkru kau nga ai: Yehowa a lamu kasa mung, shi kaw na wa ai. ²² Dai wa Yehowa lamu kasa rai nga ai Gidon chye wu yang, shi gaw, Ala, Madu Yehowa e ngai wa, nang Yehowa a lamu kasa hpe myiman chyaw, mu kau se hka! ngu wu ai. ²³ Yehowa chyawm gaw, Ngwi pyaw nit ga; hkum tsang et; nang n si na ndai, ngu wu ai: ²⁴ Dai rai nna Gidon gaw dai yang e Yehowa a matu tawn hkungri gaw nna, Yehowa-shalom ngu nna shamying wu ai: dai gaw, dai ni du hkra, Abiezara kasha ni a Sali Ohpra shara e naw nga nga ai. ²⁵ Dai shana e Yehowa gaw shi hpe, Na nwa a usu hte, lahkawng ngu na sanit ning du ai usu hpe la nna, na nwa jau ai Bala tawn hkungri hpe run kau nna, de a makau na Ashera hpe kran kau u: ²⁶ na a Karai Kasang Yehowa matu, htung nga ai hte maren, dai lunghtawn ntsa e tawn hkungri gaw da nna, nang kran kau ai Ashera hpun hte lahkawng ngu na usu hpe wan nat hkungga di nna, nawng jau u, ngu wu ai. ²⁷ Gidon mung shi a shangun ma marai shi shaga nna, Yehowa tsun ai hte maren galaw wu ai: shi a kahpu kanau ni hte mare masha ni hpe hkrit nna, shani e n galaw wam ai majaw, shana e sa galaw wu ai. ²⁸ Jahpawt jau jau mare masha ni rawt ma yang, yu u Bala a tawn hkungri run mat ai hte, makau na Ashera hpe kran kau nna, kaga gaw tawn ai tawn hkungri hta lahkawng ngu na usu nawng da nga la ai hpe, mu mu ai. ²⁹ Dai mu jang shanhte gaw, Ndai kadai galaw ai rai ta? nga nna shada da gawn pru ma ai. Shaloi nkau mi, Yoasha kasha Gidon dai hpe galaw ai rai nga ai, ngu nna tsun dan mu ai. ³⁰ Shaloi mare masha ni gaw, Yoasha hpe, Na a kasha gaw Bala tawn hkungri hpe run kau nna, makau na Ashera hpe kran kau ai majaw, shi hpe sat kau ga, shapraw dat u, ngu mu ai. ³¹ Yoasha chyawm gaw, Nanhte mahtang Bala hpang de karum na myit ni? shi hpe hkye la na myit ni? shi hpe karum ai wa mahtang dai hpawt na nhtoi garai n lai yang si ai hkrum u ga, Bala wa Karai teng yang gaw, shi a tawn hkungri marai langai ngai jahten ya ai rai yang, shi a matu shi tsang u ga, ngu nna dai ni hpe htan kau wu ai. ³² Shing nga Bala wa shi a tawn hkungri marai langai ngai run kau ya ai rai yang, Bala shi hkum nan dai wa hpe deng u ga, nga ai ga hkan nna, shi a kasha hpe dai shani e Yerubala ngu nna shamying wu ai. ³³ Shaloi Midian masha, Amalek masha ni hte sinpraw maga na masha ni yawng jawm hpawng nna, Yawdan hka rap nhtawm, Yezrela pa e dap jung ma ai. ³⁴ Yehowa a Wenyi chyawm gaw Gidon hta dung nga nna, shi pahtau dum dat wu yang, Abiezra kasha ni hkan nang ma ai. ³⁵ Manashe mung ting de mung shi kasa shangun dat wu ai rai nna, dai amyu masha ni mung shi kaw hkan nang ma ai: bai, Ashe, Zebulum, Naphtali ga de mung kasa shangun wu ai rai nna, shan hte mung shi hpang de zup sa ma ai. ³⁶ Raitimung, Gidon gaw Karai Kasang hpe, Nang madu tsun ai hte maren, Israela amyu hpe nye a lata hte hkye la na teng yang gaw; yu u, ³⁷ sagu langai mi a hpyi hpe chyarang e ngai kahpyen tawn na we ai: shaloi sagu mun hta sha mari madi nna, ga ting hkunhkraw ai rai yang gaw, nang tsun ai hte maren, Israela amyu hpe nye a lata hte hkye la na we ai, ngai chye na we ai, ngu nna hpyi wu ai. ³⁸ Dai hte maren byin nga ai: jahpawt jau e shi rawt nna, sagu mun shup yu yang, mari tsin ang mi hpring hkra rawng nga ai. ³⁹ Bai Gidon gaw, Karai Kasang hpe, Masin hkum pawt et; ya kalang sha mi ngai naw tsun n ga; sagu hpyi hte kalang sha mi naw chyam yu shangun e; ga ting mari madi nna, sagu mun hta ahkun ahkraw rai u ga, ngu nna hpyi wu ai. ⁴⁰ Dai hte maren dai shana mung, Karai Kasang shabyin wu ai rai nna, ga ting madi nga timung, sagu mun ahkun ahkraw rai nga ai.

¹ Shaloi Yerubala ngu ai wa Gidon gaw, shi kaw du ai masha nlang hte rau, jahpawt jau jau rawt nna, Harod hka pawk makau e dap jung wu ai: Midian dap gaw shanhte a dingdung maga, More kawng lagaw na kadit e rai nga ai. ² Shaloi Yehowa Gidon hhpe, Nang hte rau nga ai masha ni nau law ma ai; shanhte a lata hta Midian masha ni hpe ngai n ap lu na nngai; ap ya jang, Nye a lata nan ngai hpe hkye la ni ai, nga nna Israela amyu nye a man e grang na ra ai. ³ Dai rai nna, Masin kaji ai hte hkrit gari ai ni, Gilead bum kaw na nhtang wa mat mu, ngu nna masha ni hpe jahtau tsun u, ngu wu ai. Dai majaw masha mun lahkawng e hkying lahkawng wa mat sai rai nna, mun mi sha ngam mat ai. ⁴ Bai Yehowa Gidon hpe, Masha nau naw law lit dai; hka danam de shanhte hpe na a matu ngai dinglik yu we ga: shaloi, Ndai wa nang kaw hkan mai ai, ngu nna ngai nang hpe tsun jang dai wa hkan lu na rai nga ai; bai, Ndai wa n sa mai ai, ngu nna tsun jang, dai wa hti mat lu na rai nga ai, ngu wu ai. ⁵ Dai hte maren Gidon gaw masha ni hpe hka de woi sa wa ai rai nna, Yehowa Gidon hpe, Gwi ni ntsin mata lu ai zawn, shinglet hte mata lu ai masha nlang hpe hpung mi; hput di nna dagup lu ai masha nlang hpe hpung mi, di nna karan tawn ai rai ndai, ngu wu ai. ⁶ Shaloi tinang a lata laku hte ntsin shagawt la nna mata lu ai masha masum tsa rai ma ai: gale ni yawng gaw, hput di nna dagup lu ai hkrai rai ma ai. ⁷ Shingrai Yehowa Gidon hpe, Mata nna ntsin lu ai masha, dai masum tsa hte ngai nang hpe hkye la nna, Midian masha ni hpe na a lata hta ap kau na we ai: gale mahkra hpe gaw tinang a shara de nhtang wa shangun dat u, ngu nna tsun wu ai. ⁸ Shingrai, dai masha ni tinang a sha jarit hte pahtau la lang nna, Gidon mung, dai masha masum tsa hte hpe di la nhtawm, Israela masha gale mahkra hpe tinang a sum de nhtang wa shangun wu ai: Midian masha ni a dap chyawm gaw, shi a lawu na kadit e rai nga ai. ⁹ Dai shana e pyi Yehowa gaw Gidon hpe, Rawt u; hpyen ni a dap de sa mu; na a lata hta dai hpe ngai ap kau se ai. ¹⁰ Nang garai n gwi n yang gaw, na a shangun ma Pura hte dai dap de naw sa su: ¹¹ shanhte kaning nga tsun ai mung, na lu na marin dai; shaloi she dai dap hpe htim na matu, na a lata n-gun rawng na ra ai, ngu wu ai. Dai rai nna shi gaw shi a shangun ma Pura hte hpyen ni a dap matu na sin langa ni kaw sa wa ma ai. ¹² Ya Midian masha ni, Amalek masha ni hte sinpraw hkran masha ni nlang hte gaw, dai kadit e but nga nna, dinggamyaw zawn law nga ma ai: shanhte gawla-uk ni mung, nammukdara zaipru made hti n dang hkra law nga malu ai. ¹³ Gidon shi du yang, yu u, masha langai mi manang wa hpe yupmang hkai dan wu ai gaw: Ngai yupmang mu nngai; muk-yaw mukpa mi Midian dap de daleng hkrat wa nna, sum hta wa hkra jang, sum dai hpe kamyet daw agrawp shapa kau ai, mu nngai, ngu wu ai. ¹⁴ Manang wa gaw, Muk pa dai kaga n rai, Israela masha Yoasha kasha Gidon a n-htu rai nga ai: Karai Kasang gaw dai wa a lata hta, Midian masha ni hte hpyen laba ni hpe ap kau nu ai, ngu nna htai ya wu ai. ¹⁵ Shaloi Gidon gaw yupmang dai hte de a lachyum na lu jang, shi nawku nna, Israela dap de bai wa nhtawm, Rawt manu; Yehowa Midian hpyen laba ni hpe nanhte a lata hta ap kau nu ai, ngu nna wa tsun mu ai. ¹⁶ Ya, dai masha masum tsa hpe hpung masum di karan nna, masha hkum shagu hpe, pahtau hte wan rawng ai di bu, langai hpra lang shangun mu ai. ¹⁷ Shing di nhtawm, Ngai e yu nna, ngai zawn di mu; ngai dap matu de du jang, ngai di ai zawn nanhte mung di mu: ¹⁸ Ngai hte ngai kaw lawm ai ni nlang, pahtau dum dat jang, dap grupyin e, nanhte mung dum dat nna, Yehowa hte Gidon a matu law, ngu nna marawn mu, ngu nna shanhte hpe tsun da wu ai. ¹⁹ Shingrai, Gidon hte shi kaw lawm ai marai latsa hte gaw, yup dung hpawa lahkawng ngu na sin langa nnan galai tawn ai ten e, dap matu de du nna, pahtau dum dat ai hte tinang a lata e lang ai di bu ni hpe kayat ga kamawng dat mu ai. ²⁰ Dai hte maren hpung masum ting pahtau dum nna, di bu ni kayat ga ai hte, pai lata de wan shanan lang let, hkra lata de pahtau lang nna, Yehowa hte Gidon nhtu law, ngu nna garu dat mu ai. ²¹ Dai dap grupyin e langai hte langai tinang nang a shara e tsap nga ma ai rai nna, dap ting na hpyen laba ni kajawng rawt nna, jahtau let hprawng htaw wa ma ai. ²² Dai pahtau masum tsa dum dat jang, Yehowa gaw dai dap na hpyen laba ni nlang hte hpe shada da sat hkat shagun mu ai rai nna, shanhte gaw, Zerera shara na Bet-shita mare hte Tabat makau na Abel-me-hola du hkra hprawng wa ma ai. ²³ Israela masha ni mung, Naphtali, Ashe hte Manashe ting ga hkan na zup sa wa nna, Midian masha ni hpe shachyut nga ma ai. ²⁴ Gidon mung, Ehprim bum ga ting de kasa shangun dat nna, Midian masha ni hpe hkap shadang na matu, Yawdan hka uhkan, Bet-bara du hkra hkap magang nga ma la, ngu nna htet dat wu ai. Shingrai Ehprim masha ni yawng zuphpawng nna, Bet-bara du hkra Yawdan hka uhkan e hkap sin ma ai. ²⁵ Shanhte gaw Oreb hte Zeeb ngu ai, Midian du lahkawng rim la lu nna, Oreb hpe Oreb lung htawn ntsa e, Zeeb hpe, Zeeb tsabyi htumbyen hta sat kau nhtawm, Midian masha ni hpe hkan shachyut let, Oreb yan Zeeb a baw hpe Yawdan hka wora hkran, Gidon hpang de la wa ma ai.

¹ Shaloi Ehprim masha ni gaw Gidon hpe, Nang Midian gasat sa wa yang, anhte hpe n jahpu ai gaw, hpa lam rai ta? ngu nna shi e aja awa mara shagun mu ai. ² Gidon chyawm gaw, Nanhte di lu ai hta ngai hpa jan di lu a ta? Abiezra tsabyi si shu ai hta, Ehprim nlim gut ai mahtang grau sai n rai ni? ³ Karai Kasang gaw nanhte a lata hta Midian du Oreb yan Zeeb hpe ap kau nu ai: nanhte di lu ai zawn ngai hpa di lu a ta? ngu nna shanhte hpe htan wu ai. Ga dai na jang, shanhte masin kawp mat ma ai. ⁴ Ya Gidon hte shi a masha masum tsa hte gaw Yawdan hka du rap nna, ba let naw shachyut nang ma ai, ⁵ Shaloi shi gaw Suhkut masha ni hpe, Ngai kaw hkan nang ai ni e muk jaw ya mi; shanhte nau ba mat masai; ya ngai, Midian hkawhkam Zeba yan Zalmuna hpe hkan shachyut nga nngai, ngu nna hpyi wu ai. ⁶ Raitimung Suhkut du ni gaw, Anhte na a ma ni hpe muk jaw sha na gaw, Zeba yan Zalmuna lata nang manat tawn nu ni? ngu nna htan mu ai. ⁷ Gidon mung, Dai rai yang gaw, Yehowa, Zeba yan Zalmuna hpe nye a lata hta ap ya yang she, ngai nanhte hpe nam na ju hpun amyu myu hte adup made ga, ngu nna tsun da wu ai. ⁸ Bai Penuela mare de shi lung wa nna, dai zawn hpyi wu yang, Penuela masha ni mung, Suhkut masha ni htan ai hku hkap htan ma ai. ⁹ Dai rai nna shi gaw, Ngai angwi sha bai wa lu n ga, langhkyi ndai hpe adawt kau na we ai, ngu nna Penuela masha ni hpe hkap da wu ai. ¹⁰ Dai shaloi e, Zeba yan Zalmuna hte shan a dap ngu na hpyen mun mi hkying manga hte rau Kakora shara e nga nga ma ai; sinpraw maga na masha ni yawng hta ngam ai ngu na dai hte sha rai masai; kaning rai nme law, nhtu chye lang ai masha sen mi mun lahkawng gaw si mat masai. ¹¹ Gidon chyawm gaw Noba hte Yibeha mare yan a sinpraw maga na, sum hta nga ai masha ni a hpang hku lung nna, ndum shami nga nga ai hpyendap hpe shang gasat mu ai. ¹² Zeba yan Zalmuna rawt hprawng ma yang, Gidon mung shan hpe hkan shachyut nna, Midian hkawhkam Zeba yan Zalmuna hpe rim la ai hte, shan a hpyen laba ni yawng shabra kau wu ai. ¹³ Shingrai Yoasha kasha Gidon gaw dai hpyen gasat kaw nna Here de lung wa ai lam pru wa ai. ¹⁴ Dai yang e, Suhkut mare na ma langai mi hpe shi rim la nna, shi e san yu wu yang, dai ma gaw Suhkut shara na du hte salang sanit shi sanit a amying tsun dan wu ai. ¹⁵ Shaloi Suhkut masha ni hpang de shi wa nna, Nanhte ngai e, Na a hki ba ai ma ni hpe anhte muk jaw sha na gaw, Zeba yan Zalmuna lata nang manat tawn nu ni? nga nna ngai hpe asawng let tsun ai, ndai Zeba yan Zalmuna hpe ya yu yu mu, ngu wu ai. ¹⁶ Shingrai dai mare na agyi salang ni hpe shi shaga la nna, nam na ju hpun hte Suhkut masha ni hpe sharin mu ai. ¹⁷ Penula langhkyi mung wa adawt sharu kau nna, mare masha ni hpe sat kau wu ai. ¹⁸ Dai hpang Gidon gaw Zeba yan Zalmuna hpe, Tabora bum e nanhte sat kau ai ni gaw kaning nsan ai ni rai ma ta? ngu nna san wu yang, shan gaw, Nang zawn re ai hkrai rai ma ai; langai hte langai hkawhkam kasha zawn ahpraw rawng ma ai, ngu nna htan mu ai. ¹⁹ Shaloi Gidon gaw, Dai ni gaw, ngai nu a kasha, ngai hpu ngai nau ni rai ma hka; Yehowa anga nga ai hte maren, nan shanhte hpe jahkrung da taw gaw, ngai nan hpe sat na se ai, ²⁰ nga nhtawm, shi a kasha a lat Yehta hpe, Rawt nna, ndai yan hpe sat ru, ngu wu timung, dai ma mahtang aprat garai n kaba ai majaw, hkrit ai hte nhtu pyi n shaw gwi wu ai. ²¹ Zeba yan Zalmuna chyawm gaw, Nang nan rawt nna, an hpe sat kau mi; wa-ngan hpe gaw wa-ngan n-gun hte she rai law, ngu mu ai. Shaloi Gidon rawt nna, Zeba yan Zalmuna hpe sat kau n-htawm, shan a gawla-uk du na shata sumla ni hpyu la wu ai. ²² Ya Israela masha ni gaw Gidon hpe, Nang anhte hpe Midian masha ni a lata na hkye la mi ai majaw, shu mashi shu masha prat du hkra anhte a ntsa e up nga mi, ngu nna, hpyi mu ai. ²³ Gidon chyawm gaw, Ngai nanhte a ntsa e up na n rai; ngai sha mung up na n rai: Yehowa shi nanhte a ntsa e up nga ai. ²⁴ Raitimung nanhte nlang hta na, na ladan lanep chyawm gaw ngai hpyi mayu nngai, ngu wu ai. (Hpyen ni mahtang. Ishmaela amyu rai ma ai majaw, aja na ladan kai ma ai.) ²⁵ Shanhte mung, Dai gaw gaja wa jaw na ga ai, nga nna tsun let, hpajawng kahpyen tawn nna, shanhte nlang tinang nan lu la ai na ladan lanep ni shaw tawn shajang ma ai: ²⁶ Shingrai shi hpyi la ai aja na ladan ni gaw ajoi shi sanit rai lu ai: dai hta kaga Midian hkawhkam ni mawn ai shata sumla ni, na ladan ni, hkyeng ai hpun nba hte, tinang a gawla-uk ni du hta na noi ai saidawng ni mung naw lu la wu ai. ²⁷ Gidon gaw arai dai ni hte, Hpa hkai palawng galaw nna, shi nga ai Ohpra mare e tawn da wu ai: hpa hkai palawng de a majaw Israela amyu ting lam dam mat wa ai rai nna, dai gaw Gidon hte shi a amyu matu ni a shut n-hpang tai malu ai. ²⁸ Shingrai Midian amyu gaw Israela masha ni a man e grit mat ma ai; dai kaw nna bai n rawt lu masai. Gidon a lakhtak e mali shi ning tup mung ting majan sim mat ai. ²⁹ Ya Yoasha kasha Yerubala gaw shi a nta de wa nna nga nga ai. ³⁰ Gidon gaw, num law ai rai nna, shi shaprat ai kasha hkrai, sanit shi rai lu ai. ³¹ Shehkem mare e nga ai lashi num mung, shadang sha shangai ya nna, dai wa hpe Abimelek ngu nna shamying wu ai. ³² Ya, Yoasha kasha Gidon gaw, aprat ugut gu nna si mat ai; Abiezra kashu kasha ni a mare Ohpra e, kawa Yoasha lup hta shi e makoi mayang mu ai. ³³ Ya Gidon si mat jang Israela kashu kasha ni gaw lam bai dam mat wa nna Bala hpara ni hta bai shut ai hte Bala-berit hpe tinang Karai shatai mu ai. ³⁴ Israela kashu kasha ni gaw, masha hpyen ni a lata na yawng Shanhte hpe hkye la ai, shanhte a Karai Kasang Yehowa hpe n dum kau ai hte, ³⁵ Gidon ngu ai Yerubala, Israela hta galaw ya ai chyeju hte maren, shi a amyu matu ni hte chyeju bai n dawp ya mu ai.

¹ Ya Yerubala a kasha Abimelek gaw Shehkem mare de wa nna, kani katsa ni hte kanu a magyin jinghku ni hpe shachyen let, ² Yerubala kasha sanit shi hte ting nanhte hpe up na hte, langai sha up na, gara mahtang grau mai a ta? Ngai gaw nanhte a nra, nanhte a shan majing rai nga nngai, dum nga mu, nga ai, ngu nna Shehkem masha ni hpe tsun dan mu, ngu nna shi a amyu masha ni hpe hkang wu ai. ³ Katsa ni mung ga dai Shehkem masha ni hpe atsai awai tsun ya mu ai rai nna, shanhte mung, Abimelek gaw anhte hpunau wa rai nga ai, nga nna shi hpang de maga gum ai hte, ⁴ Bala-berit nta na gumhpraw lap sanit shi shaw ya dat wu ai: shaloi Abimelek gaw gumhpraw jaw nna, pagawn bra re ai masha hpe saw wu ai. ⁵ Shingrai, shi gaw Ohpra mare e nga ai, kawa nta de wa nna, Yerubala kasha, shi a hpunau, sanit shi hte hpe lunghtawn langai mi hta sat kaw wu ai: raitimung, Yerubala kasha hpungdim Yohtam gaw, makoi mat ai majaw ngam nga ai. ⁶ Shaloi Shehkem du ni nlang hte, Bet-Milo e nga ai ni yawng hte gaw jawm zuphpawng nna, Shehkem mare e nga ai, wa myi hpun a makau na, matsat shadaw nhpang e, Abimelek hpe hkawhkam aya dang mu ai. ⁷ Ya dai lam Yohtam hpe shana ya mu yang, Gerizim bum pungding e shi lung tsap nna, shi a nsen shaja let jahtau wu ai gaw, Shehkem masha ni e, nanhte a ga Karai Kasang madat ya malit ga, nye a ga madat la mu law. ⁸ Moi lang mi, hpun ni tinang hpe up na matu hkawhkam lata nna aya dang na nga pru sa ma ai: shaloi shanhte Tsanlum hpun hpe, Nang anhte a ntsa e up mi, ngu mu yang. ⁹ Tsanlun hpun gaw, Karai Kasang hpe mung, shinggyim masha hpe mung sharawng awng shangun ai, nye a sau tung hpe kau da nna, nanhte a ntsa e lung gram nga na rai ni? ngu nna htan wu ai. ¹⁰ Bai, maihpang hpun hpe, Sa rit, anhte a ntsa e up mi, ngu mu yang, maihpang hpun mung. ¹¹ Nye a dawi ai namta hte ja ai asi, ngai kau da nna, nanhte a ntsa e lung gram na rai ni? nga nna htan wu ai. ¹² Bai tsabyi ru hpe. Sa rit, anhte a ntsa e up mi, ngu mu yang, ¹³ tsabyi ru mung, Karai Kasang hpe mung, shinggyim masha hpe mung shangwi shapyaw chye ai, nye jahku machyan hpe, ngai kau da nna, nanhte a ntsa e lung gram na rai ni? ngu nna htan wu ai. ¹⁴ Shaloi hpun ni yawng mayawng ju hpun hpe, Sa rit, nang anhte a ntsa e up mi, ngu mu yang, ¹⁵ Ju hpun chyawm gaw, Nanhte ngai e teng teng hkawhkam shatai nna aya dang manit yang gaw, sa marit, nye a shingnip shingwung nga manu: dai n rai yang, ju hpun hta na wan pru nna Lebanon marau hpun ni hpe pyi hkru kau na lu, ngu nna hpun ni hpe htan wu ai. ¹⁶ Ya, nanhte Abimelek hpe hkawhkam aya dang ai gaw, tengman ai hte kangka re ai hku hkan nna, Yerubala hte shi a amyu matu ni hpe mai kaja ai lam galaw myit dai hte, shi galaw ai chyeju gingdan dai hku bai htang myit dai rai yang gaw, mai nga ai. ¹⁷ Nye wa nanhte a matu majan gun nna, tinang asak pyi n lahpawt hkra, Midian masha lata na nanhte hpe hkye la manit dai: ¹⁸ dai re ai mi, nanhte dai ni nye wa a amyu matu ni hpe gumlau nna, shi a kasha sanit shi ting hpe lunghtawn langai sha hta sat kau nhtawm, shi a nchyang num kaw na kasha Abimelek hpe, nanhte a hpunau re ai hku e, Shehkem masha ni a ntsa e hkawhkam shatai tawn manit hka; ¹⁹ Ya chyawm gaw, nanhte dai ni Yerubala hte shi a amyu matu hpe, tengman ai hte kangka re ai hku galaw manit dai rai yang gaw, Aabimelek hta kabu nga mu, shi mung nanhte hta kabu u ga: ²⁰ dai sha n rai yang, Abimelek hta na wan pru nna, Shehkem masha ni hte Milo nta e nga ai ni hpe hkru kau u ga; dai hte maren, Shehkem masha ni hte Milo nta e nga ai ni kaw na wan pru nna Abimelek hpe hkru kau u ga, ngu nna jahtau wu ai. ²¹ Dai ngut jang, Yohtam gat hprawng nna, kahpu Abimelek hpe hkrit ai majaw, Bera de du nna, nga nga ai. ²² Ya Abimelek gaw Israela masha ni hpe masum ning up lu wu ai. ²³ Karai Kasang gaw, Abimelek hte Shehkem masha ni a lapran e n hkru ai wenyi dat dat wu ai rai nna, Shehkem masha ni gaw Abimelek hpe n sun n ang ai hku galaw mu ai: ²⁴ Kaning rai nme law, Yerubala kasha sanit shi hpe sat kau ai yubak a matai htang na matu, shanhte hpe sat ai kahpu kanau wa Abimelek a ntsa e mung, shi a kahpu kanau ni hpe sat karum ai Shehkem a masha ni a ntsa e mung, shanhte hkaw kau ai sai galu na majaw rai nga ai. ²⁵ Shehkem masha ni gaw shi a gyam na matu, bum pungding hkan e masha tawn da mu ai rai nna, shanhte gaw bu hkawm ai ni nlang hpe hkap hpya kau mu ai: dai lam Abimelek hpe shana ya mu ai. ²⁶ Dai shaloi e, Ebed a kasha Gala gaw shi a kahpu kanau ni hte hpawn, Shehkem de du nna, Shehkem masha ni mung dai shan nau ni hta shamyet shanat ma ai. ²⁷ Shanhte mung yi hkauna de sa nna, tsabyi sun shu la, tsabyi si hpe kabye, poi galaw let tinang Hpara jawng de sa nna, lu let sha let Abimelek hpe matsa kau ma ai. ²⁸ Ebed a kasha Gala mung, Anhte Abimelek a magam gun na gaw, shi kadai wa rai ta? Shehkem mung kadai wa rai ta? Abimelek gaw Yerubala kasha n rai ni? shi a hkringmang gaw Zebula sha n rai ni? Shehkem a kawa, Hamora amyu matu ni a magam chyawm gaw gun nga mu; Abimelek a magam hpa majaw gun na rai ta? ²⁹ Ndai masha ni nye lata shang ma taw le; shaloi ngai Abimelek hpe yeng kau na we ai, nga ai. Bai, Abimelek hpe mung, Na a hpyen ma ni hpe saw shalaw nna du rit, ngu wu ai. ³⁰ Ya Ebed a kasha Gala ga dai hpe, mare up ai wa Zebula na wu yang, shi masin pawt nna, ³¹ Abemelek hpang de kasa lagyim shagun dat let, Yu u, Ebed a kasha Gala gaw shi a kahpu kanau ni hte hpawn Shehkem de sa nna, nang hpe gumlau na matu, mare hpe shangang nga ma ai. ³² Dai majaw nang kaw na masha ni hte rau, shana e rawt nna, nam e lagyim nga nhtawm, ³³ jahpawt jau jau jan pru ai hte rau mare hpe htim gasat ru: shingrai, Gala hte shi kaw hkan ai masha ni nang hpe hkap gasat na pru jang, ang ai hku galaw dat u, ngu nna shana dat wu ai. ³⁴ Shaloi Abimelek mung, shi kaw hkan nang ai masha ni hte rau shana e rawt nna, shi a dap hpe hpung mali di karan nhtawm, mare hpe gyam ma ai. ³⁵ Ya Ebed kasha Gala pru nna, mare chyinghka e tsap nga yang, Abimelek gaw shi a masha ni hte rau lagyim nga kaw nna rawt ma ai. ³⁶ Gala gaw dai ni hpe mada mu jang, Zebula hpe, Yu u, bum de nna masha yu wa ra ai, ngu wu ai. Zebula gaw, Bum a shingnip hpe masha zawn nawn da ndai, ngu nna htan wu ai. ³⁷ Bai, Gala gaw, Yu yu u, Masha nkau mi kadawng ka-ang nna, hpung mi gaw gumhpan wa myi hpun hku sa wa mara ai, ngu nna tsun wu ai. ³⁸ Zebula chyawm gaw, Anhte Abimelek a magam gun na gaw, shi kadai rai ta? nga nna, nang tsun ai n-gup ya kanang rai salit ta? wora ni gaw, nang n gawn n sawn ngu ai ni, n rai nga a ni? Ya pru nna, shanhte hpe hkap gasat u, ngu nna shi hpe tsun wu ai. ³⁹ Gala mung Shehkem masha ni man e pru nna, Abimelek hpe hkap gasat wu ai. ⁴⁰ Abemelek mahtang dang kau nna, Gala hprawng wu ai; shi a masha law law mung, mare chyinghka du hkra hkala nba hkrum nna si ma ai. ⁴¹ Abimelek chyawm gaw Aruma e nga ai: Zebula mung Gala hte shi a kahpu kanau ni hpe Shehkem mare na shachyut kau wu ai. ⁴² Hpang shani e mare masha ni pa de pru hkawm ma ai; dai lam Abimelek hpe shana ya wu ai. ⁴³ Shaloi Abimelek gaw shi a masha ni hpe hpung masum di karan nna, pa e gyam nga ma ai: shi mada yu yang, yu u, mare masha ni pru wa mara ai; shaloi shi rawt nna shanhte hpe hkap sat wu ai. ⁴⁴ Abimelek gaw shi a masha hpung mi hte htim nna mare chyinghka e tsap hkap ma ai: kaga hpung lahkawng gaw, pa e nga ai ni nlang hte hpe htim nna shanhte hpe sat kau mu ai. ⁴⁵ Abimelek mung dai shani tup mare gasat nna, dai hpe dang lu yang mare na ni hpe sat kau wu ai: dai mare hpe shi run kau nna, jum gat kau wu ai. ⁴⁶ Dai lam Shehkem langhkyi na ni nlang na ma yang, shanhte Hpara jawng na ngang ai gawk hta kahkyin rawng ma ai. ⁴⁷ Shingrai, Shehkem langhkyi na ni nlang shinggyin rawng nga ai lam, Abimelek hpe shana ya mu ai. ⁴⁸ Shaloi shi gaw shi a masha nlang hte Zalmon bum de lung nna, nwa hte hpun lakung kran hpai nhtawm, Ngai di ai zawn nanhte nlang alawan di mu, ngu nna hkan ai masha ni hpe tsun wu ai. ⁴⁹ Shi a masha ni mung, langai hte langai dai zawn hpun lakung kran hpai nna, Abimelek kaw hkan nang let, dai ngang ai gawk grup di tawn nna, dai hpe nat kau mu ai: shingrai, Shehkem langhkyi na ni nlang hte hpawn, numsha lasha hkying mi daram si mat ma masai. ⁵⁰ Dai hpang Abimelek gaw Htebe mare hpe wang gasat nna, dang la wu ai. ⁵¹ Raitimung, mare kata e ngang ai langhkyi langai mi nga ai rai nna, mare na numsha lasha nlang dai de hprawng shang mat ma ai; shanhte, chyinghka mung la kau nna, ntsa tsang de lung mat ma ai. ⁵² Abimelek mung, dai langhkyi hpe sa gasat let, de a chyinghka hpe nat kau na nga sit sa wa wu ai. ⁵³ Shaloi numsha langai mi htumrin lung magap hte Abimelek a baw ntsa e kabai jahkrat bun nna shi a pungkum nra ga mat lu ai. ⁵⁴ Shaloi shi gaw, shi a ri nhtu lang ai hpyen ma hpe alawan shaga nna, Anum e sha Abimelek hpe sat kau wu ai, nga nna tsun shara n rawng u ga, na nhtu shaw nna, ngai e sat kau e, ngu nna hkang wu ai. Dai hte maren shi a hpyen ma mung, shi hpe galun htinggrang nna, shi si mat ai. ⁵⁵ Abimelek si mat ai mu chye jang, Israela masha ni langai hte langai tinang nang a shara de bai wa mat ma ai. ⁵⁶ Shingrai, Abimelek gaw, shi a kahpu kanau sanit shi hpe sat kau nna, kawa hpe shut kau ai majaw, shi n hkru ai yubak matai Karai Kasang htang jaw wu ai: ⁵⁷ Shehkem masha ni galaw ai yubak nlang a matu mung, shanhte a baw ntsa e Karai Kasang htang jaw wu ai: dai rai nna, Zerubala kasha Yohtam dagam ai ga hte maren shanhte a ntsa e du malu ai.

¹ Abimelek a hpang e Israela amyu hpe hkye la na matu, Yisahka amyu, Dodo a kashu, Pua kasha Tola paw pru nna, Ehprim bum na Shamira shara e nga nga ai. ² Dai wa gaw Israela amyu hpe hkun masum ning tara dara ya nna si mat ai; shi hpe Shamira shara e lup makoi mu ai. ³ Shi a hpang e, Gilead masha Ya-ira paw pru nna, Israela amyu hpe hkun lahkawng ning tara dara ya wu ai. ⁴ Dai wa gaw shadang sha sumshi lu nna, shanhte gaw lawze kasha sumsi jawn ai hte mare sumshi up ma ai: dai mare ni gaw Gilead mung e nga ai rai nna, dai ni du hkra, Hawot-Ya-ira ngu nna shamying mu ai. ⁵ Ya-ira mang si mat nna, shi e Kamon shara e lup makoi mu ai. ⁶ Bai, Israela kashu kasha ni gaw, Yehowa man e n shawp ai amu galaw nna, Bala hpara ni hte Ashtarot hpara shayi, Suri mung na hpara ni, Sidon mare na hpara ni, Moba mung na hpara ni, Amon kashu kasha ni a hpara ni hte Hpilisti masha ni a hpara ni hpe jaw jau nna, Yehowa hpe n jaw n jau ai kau da mu ai. ⁷ Dai majaw Yehowa Israela amyu hpe pawt bu nna, Hpilisti masha ni a lata hta mung, Amon masha ni a lata hta mung, shanhte hpe dut kau mu ai. ⁸ Dai amyu yan gaw dai aprat e Israela kashu kasha ni hpe zingri zingrat nna shadip da mu ai; Gilead mung, Amori masha ni a lamu ga hta wa nga ai, Yawdan hka wora hkran na ni hpe, shi matsat ning tup dip da nu ai. ⁹ Amon masha ni gaw Yawdan hka rap nna, Yuda amyu, Ben-yamin amyu hte Ehprim masha ni hpe rap gasat mu ai rai nna, Israela masha ni matsan tsin-yam kaba hkrum ma ai. ¹⁰ Shaloi Israela kashu kasha ni Yehowa hpe, Anhte a Karai Kasang hpe kau da nna, Bala hpara ni hpe jaw jau gaw ai majaw, nang hpe shut kau sagaw ai law, ngu nna jahtau mu ai. ¹¹ Yehowa chyawm gaw Israela kashu kasha ni hpe, Ngai nanhte hpe Egutu masha, Amori masha Amon masha ni hte Hpilisti masha ni a lata na, hkye la masade ai, n rai ni? ¹² Sidon masha, Amalek masha hte Mao masha ni mung, nanhte hpe zingri zingrat myit dai; shaloi mung, nanhte ngai hpe jahtau nna, shanhte a lata na ngai nanhte hpe hkye la masade ai. ¹³ Raitimung, nanhte ngai hpe kau da nna, Hpara shaje sa jaw jau myit dai majaw, ngai nanhte hpe bai hkye la sa na n rai ¹⁴ Nanhte lata la ai Hpara ni hpe sa jahtau masu; ya ruyak ai nhtoi hta shanhte hkye la mu ga, ngu nna htan wu ai. ¹⁵ Dai rai nna, Israela kashu kasha ni Yehowa hpe, Anhte shut kau sagaw ai: nang ra ai hku mi anhte hpe di mi: ya, dai ni sha, anhte hpe hkye la mi, ngu nna hpyi mu ai. ¹⁶ Shingrai, maigan Hpara ni hpe mung shanhte kau da nna, Yehowa hpe jaw jau ma ai: Yehowa mung,Israela masha ni hkrum ai matsan tsin-yam hpe masin yu machyi ya wu ai. ¹⁷ Ya Amon kashu kasha ni gaw jawm hpawng na Gilead mung e dap jung nga ma ai. Israela kashu kasha ni mung hpawng nna, Mizpa shara e dap jung ma ai. ¹⁸ Shaloi Gilead mung na du ni bawng ma ai gaw, Amon masha ni hpe gasat na woi awn mayu ai wa kadai rai ta? Dai wa gaw Gilead masha ni nlang a du tai u ga, nga nna shada tsun ma ai.

¹ Ya Gilead masha Yephta gaw n-gun ja ai share rai nga ai: shi a kawa Gilead rai nga ai; kanu gaw shawa num rai nga ai. ² Gilead a madu jan mung shadang sha shangai wu ai: dai shadang sha ni kaba wa jang, Nang gaw lik nga kasha rai ndai majaw, anhte matu hta sali jawm dagraw lu na n rai, ngu nna Yephta hpe shachyut kau mu ai. ³ Shaloi Yephta gaw kahpu kanau ni kaw na pru wa nna, Toba mung e nga nga ai: pakawn pra re ai masha mung, shi kaw sa zup nna, shi kaw hkan nang ma ai. ⁴ Ya tawng marang mi lai yang, Amon kashu kasha ni, Israela masha ni hpe hpyen gasat ma ai. ⁵ Amon a kashu kasha ni Israela masha ni hpe hpyen gasat nga ma yang, Gilead mung na agyi salang ni gaw Yephta hpe Toba mung na shaga la na sa nna, ⁶ Anhte Amon masha ni hpe sa gasat na matu, anhte a hpyenbu sa tai ya mi, ngu nna hpyi mu ai. ⁷ Yephta chyawm gaw, Nanhte ngai e n tsaw n ra nna she, nye wa nta na shachyut kau myit dai n rai ni? ya, matsan tsin-yam hkrum yang me, ngai kaw sa ai gaw hpa rai ta? ngu nna Gilead salang ni hpe htan wu ai. ⁸ Gilead salang ni mung, Dai majaw she anhte nang kaw bai du ra ga ai; anhte hte rau wa nna, Amon masha ni hpe gasat ga: shingrai, Gilead masha ni nlang a du wa tai ru, ngu nna Yephta hpe htan mu ai. ⁹ Bai Yephta gaw, Amon kashu kasha ni hpe gasat na matu, nanhte ngai hpe woi wa myit dai hte maren, Yehowa shanhte hpe nye a lata hta ap ya yang, nanhte a du ngai tai lu na rai ni, ngu nna Gilead salang ni hpe shaka wu ai. ¹⁰ Gilead salang ni mung, Yehowa anhte a lapran e sakse tai nga u ga: gaja wa, nang tsun ai hte maren anhte galaw na ga ai, ngu nna Yephta hpe bai tsun mu ai. ¹¹ Dai rai nna Yephta gaw, Gilead salang ni hte rau wa ai rai nna, mung masha ni shi hpe du hte hpyenbu shatai mu ai: Yephta mung, shi a lam nlang Mizpa shara e, Yehowa man e tsun da wu ai. ¹² Shaloi Yephta gaw, Amon kashu kasha ni a hkawhkam hpang de kasa shangun dat nna, Nang nye a mungdan sa gasat na gaw, ngai nang hte hpa ra rawng a ta? ngu nna san dat wu ai. ¹³ Amon kashu kasha ni a hkawhkam wa gaw, Israela masha ni Egutu mung na pru wa ai shaloi e, nye a lamu ga hpe Arnon hka na ran, Yabok hka hte Yawdan hka du hkra kashun la kau ya ai majaw di da we ai: lamu ga dai hpe angwi apyaw sha ya bai ya mi, ngu nn a Yephta kasa ni hpe htan dat wu ai. ¹⁴ Bai, Yephta gaw Amon kashu kasha ni a hkawhkam hpang de kasa shangun dat nna, ¹⁵ Yephta ning nga ai: Israela masha ni Moba ga, Amon ga kashun la mu ai n rai. ¹⁶ Israela amyu Egutu mung na pru wa ai shaloi, Hkyeng ai nawng du hkra nam mali hku ga lai wa nna, Kadesha shara du yang, ¹⁷ Edom hkawhkam hpang de kasa shangun dat nna, Na a mungdan hku ga lai wa n ga, ngu nna hpyi timung, Edom hkawhkam wa n madat wu ai: dai hte maren Mobe hkawhkam hpang de shangun dat yang, shi mung n madat wu ai: dai rai nna, Israela amyu Kadesha shara e hkring nga ma ai. ¹⁸ Dai hpang, nam mali lam ga sa wa let, Edom mung hte Moba mung hpe kawai nna, Moba mung a sinpraw maga garet wa nhtawm, Arnon hka wora hkran e dap jung ma ai: dai shaloi, Arnon hka gaw Moba mung a lamu ga jarit rai nga ai majaw, Moba mung de shanhte n kabye ma ai. ¹⁹ Bai Israela masha ni, Heshbon e dung ai, Amori masha ni a hkawhkam Sihon hpang de kasa shangun dat nna, Na a mungdan hku anhte lai wa n ga, nga nna hpyi timung, ²⁰ Sihon gaw Israela amyu hpe n kam nna, shi a mung hku ga lai wa na ahkang n jaw ai hta n-ga, shi a masha ni mahkra hpe japawng nna, Yahaza shara e Israela hpe hkap gasat wu ai. ²¹ Israela Karai Kasang Yehowa chyawm gaw, Sihon hte shi a masha ni nlang hte hpe, Israela masha ni a lata hta ap ya mu ai rai nna, shanhte hpe sat kau mu ai: dai rai nna Israela masha ni gaw, Amori mung ting hte mung masha ni nlang hte hpe madu la mu ai. ²² Amori mung ting hpe, Arnon hka nna ran Yabok hka du hkra, nam mali kaba kaw nna Yawdan hka du hkra, shanhte madu lu mu ai. ²³ Shingrai, Israela Karai Kasang Yehowa, shi a amyu Israela man e, Amori masha ni hpe, shanhte a sali ga hta na shaden kau ya ai she rai yang me, ya nang shanhte hpe madu mayu n ni? ²⁴ Na a Hpara Hkemosha nang hpe jaw ai made, nang mai madu na n rai ni? Dai hte maren anhte a Karai Kasang Yehowa anhte a man e shadip ya ai amyu ni hpe sha anhte madu ga ai. ²⁵ Nang gaw Moba hkawhkam, Zipora kasha Balak hta grau kaba n ni? shi galoi Israela amyu hte majan yu a ta? galoi shanhte hpe gasat yu a ta? ²⁶ Heshbon mare hte de a kahtawng ni hta, Aroera hte de a kahtawng ni hte hpawn, Arnon hka kau dingdung na kahtawng mare ni hta, Israela masha ni masum tsa ning tup nga nga ai laman hte ting, hpa rai n up la myit ta? ²⁷ Dai re ai majaw ngai nang hpe n shut nngai; nang mahtang ngai e sa gasat ai, shut ndai; tara agyi Yehowa gaw, Israela kashu kasha ni hte Amon kashu kasha ni a lapran e, dai ni tara agyi tai u ga, ngu nna htet dat wu ai. ²⁸ Raitimung, Amon kashu kasha ni a hkawhkam gaw, Yephta shagun dat ai ga n madat mu ai. ²⁹ Shaloi Yehowa a Wenyi Yephta kaw du nna, shi gaw Gilead mung hte Manashe mung lai sa wa nhtawm, Gilead mung na Mizpa shara mung du wu ai: dai kaw na Amon kashu kasha ni hpang de hpyen rawt sa wa ai. ³⁰ Ya Yephta gaw Yehowa kaw, Nang madu gaja wa teng teng Amon kashu kasha ni hpe nye a lata hta ap ya n yang gaw, ³¹ Amon kashu kasha ni kaw na angwi apyaw bai wa lu yang, ngai e hkap tau la na nga, nye nta chyinghka na pru ai hpa raitimung, nang Yehowa a matu tai na rai nna, wan nat hkungga di nawng jau na we ai, ngu nna shaka da we ai. ³² Shingrai, Amon kashu kasha ni hpe gasat na matu, Yephta rawt sa wa ai rai nna, Yehowa mung shanhte hpe shi a lata hta ap kau wu ai. ³³ Dai rai nna Aroera mare kaw nna Minit mare du hkra mung, tsabyi sun pa du hkra mung, mare hkun ting hta hkan gasat nna, shanhte hpe asi asat di kau mu ai. Shingrai Amon kashu kasha ni gaw, Israela kashu kasha ni a man e grit mat ma ai. ³⁴ Ya Yephta gaw, Mizpa mare e shi a nta de du wa ai: shaloi, yu u, shi a shayi sha gaw shupsheng dum nna ka let, shi hpe hkap tau la na nga, pru sa wa ai; shi gaw shayi shingtai rai nga ai: shi hta shaje, shayi shadan kaga, shi n lu ai. ³⁵ Yephta gaw shi hpe mu jang, shi a palawng gang je kau let, Ngai sha goi e; nang ngai hpe grai shagrit kau nit dai gaw; nang ngai e sharu ai langai mi re hka! Yehowa hpe ngai shaka kau se ai, shaw la mai sai n rai, ngu nna tsun wu ai. ³⁶ Kasha jan chyawm gaw, Nye wa e, Yehowa hpe shaka kau sayang gaw, Yehowa na a hpyen Amon kashu kasha ni hpe na masin si hkra matai htang ya sai majaw, nang shaka da sai hte maren ngai hta galaw e, ngu wu ai. ³⁷ Bai shi gaw, Ning naw rai ga; ngai nye a manang ni hte bum ga de lung chyai hkawm nna, nye a hkawn ram prat shagoi hpe hkrapngu hkrapngoi rai lu hkra, shata lahkawng, ngai e naw dat dat e, ngu nna kawa hpe hpyi wu ai. ³⁸ Kawa gaw, Sa wa su, ngu nna, shata lahkawng ndat nna dat dat nu ai: shaloi shi manang ni hte pru nna, bum ga hkan e shi a hkawn ram prat shagoi hpe hkrapngu hkrapngoi rai nga ai. ³⁹ Ya shata lahkawng lai jang, kawa hpang de bai wa ai rai nna, kawa gaw shaka da ai ga hte maren shi e galaw wu ai: shi gaw, la garai n kasawt yu ai num rai nga ai. ⁴⁰ Dai kaw nna, Israela shayi sha ni gaw, Gilead masha Yephta a shayi sha a majaw, shaning shagu mali ya ya sharung shayawt nga na re ai. Israela amyu hta htung tai malu ai.

¹ Ya Ehprim masha ni jawm hpawng nna, dingdung maga hku sa wa nhtawm, Yephta hpe Nang hpa rai anhte hpe n shaga ai mi, Amon kashu kasha ni hpe gasat sa mat wa n ta? na ntsa e, na a nta hpe anhte nat kau na gaw ai, ngu nna tsun mu ai. ² Yephta gaw, Ngai hte nye a masha ni Amon kashu kasha ni hte amu kaba rawng nga yang, nanhte hpe ngai jahpu timung, shanhte a lata na nanhte ngai hpe n hkye la myit dai. ³ Nanhte ngai e n hkye la sai, ngai mu chye jang, ngai nye a asak nawng kau nna,Amon a kashu kasha ni hpe gasat sa wa nngai; Yehowa mung shanhte hpe nye a lata hta ap kau ni ai: dai she rai yang me, ngai hpe gasat na, dai ni hpa rai sa wa myit ta? ngu nna htan wu ai. ⁴ Shingrai, Yephta Gilead masha ni mahkra hpe shaga la nna, Ehprim hpe gasat mu ai: Ehprim masha ni Gilead masha ni hpe, Nanhte Gilead masha gaw, Ehprim hta na ran pru nna, Ehprim hte Manashe amyu hta hkran ai ni sha rai myit dai, ngu nna jahpoi mu ai majaw, Ehprim masha ni hpe sat mu ai. ⁵ Gilead masha ni gaw Ehprim masha ni a wa lam de tau nna, Yawdan hka uhkan e hkap nga nhtawm, hprawng wa ai Ehprim masha, Ngai rap wa n ga, nga nna hpyi jang, Gilead mashani gaw, Nang Ehprim masha n rai n ni? ngu nna san mu yang, Nrai nngai nga jang, ⁶ Rai taw, Shibolet ngu yu u, ngu mu ai; shaloi Ehprim masha gaw, ga dai n brat lu ai majaw, Sibolet, ngu wu ai: shing nga ai wa hpe shanhte rim la nna, Yawdan hka uhkan e hkap sat kau kau di mu ai. Shaloi na gasat hta Ehprim masha mun mali e hkying lahkawng si mat ma ai. ⁷ Ya Yephta gaw Israela masha ni hpe kru ning tup tara dara ya wu ai. Shaloi Gilead masha Yephta si mat nna, Gilead mare langai mi hta makoi mayang wu ai. ⁸ - ⁹ Shi a hpang e Betlehem masha Ibzan, Israela masha ni hpe tara dara ya nga ai. Dai wa gaw shadang sha sumshi lu wu ai; shayi sha sumshi mung ya sha kau nna, shadang sha ni matu kanam sumshi la tawn wu ai. Shi gaw, Israela masha ni hpe sanit ning tup tara dara ya wu ai. ¹⁰ Shaloi Ibzan si mat nna, Betlehem mare e makoi mayang mu ai. ¹¹ Shi a hpang e Zebulen amyu masha Elon, Israela masha ni hpe tara dara ya wu ai; shi gaw Israela hpe shi ning tup tara dara ya wu ai. ¹² Shaloi Zebulun masha Elon si mat nna, Zebulun ga Aiyalon e makoi mayang mu ai. ¹³ Shi a hpang e, Pirahton shara na Hilela kasha Abdon Israela hpe tara dara ya wu ai. ¹⁴ Dai wa gaw kasha mali shi hte kashu sumshi lu nna, shanhte gaw lawze kasha sanit shi jawn ma ai: shi gaw Israela hpe matsat ning tup tara dara ya wu ai. ¹⁵ Shaloi Pirahton shara na, Hileda kasha Abdon si mat nna, Ehprim ga, Amalek bum na Pirahton shara e, makoi mayang mu ai.

¹ Ya Israela kashu kasha ni gaw Yehowa a man e n shawp ai amu bai galaw ma ai; dai rai nna Yehowa gaw shanhte hpe Hpilisti masha ni a lata hta mali shi ning tup ap kau ya mu ai. ² Dai shaloi e, Zora mare na, Dan amyu masha Mano ngu ai wa langai mi nga ai: shi a madu jan gaw maudung rai nna, kasha n shaprat wu ai. ³ Ya Yehowa a lamu kasa gaw dai numsha kaw danpru nna, Ya, yu u, nang maudung dung nna, kasha n shaprat ndai raitimung, nang na-um nasin rai nna, shdang sha shangai na rin dai. ⁴ Dai re ai majaw sadi u; tsabyi hkum lu et, chyaru mung hkum lu et; n san n seng ai baw hpa mung hkum sha et; ⁵ nang na-um nasin rai nna, shadang sha shangai na rin dai; ma dai gaw hkritung nna Karai Kasang a Naziri masha rai na ra ai majaw shi a baw doi ya lu na n rai; shi gaw Israela hpe Hpilisti masha ni a lata na hkye la hpang na ra ai. ngu nna tsun wu ai. ⁶ Shaloi dai numsha gaw madu wa hpang de wa nna, Yehowa a kasa myiman zawn hkrithpa myiman man ai, Karai Kasang a masha langai mi ngai kaw sa pru ai; shi kanang na sa ai mung ngai n san yu we ai; shi mung shi amying ngai e n tsun dan ai: ⁷ raitimung shi gaw, Yu u, nang na-um nasin rai nna, shadang sha shangai na rin dai: dai rai nna, tsabyi hkum lu et, chyaru mung hkum lu et: n san n seng ai baw hpa mung hkum sha et; ma dai gaw hkritung nna si ai shani du hkra, Karai Kasang a Naziri masha rai na ra ai, nga nna ngai e tsun ai. ⁸ Dai rai nna Mano gaw Yehowa hpe, Madu e, nang shangun dat ai Karai Kasang a masha hpe, an hpang de bai shangun dat nna, ya shangai na ra ai ma hta na an kaning rai galaw na naw sa sharin ya mi, ngu na hpyi nem wu ai. ⁹ Karai Kasang mung, Mano a ga madat ya wu ai rai nna, Karai Kasang a kasa gaw, dai numsha yi e dung nga yang, shi kaw bai sa wa ai: dai yang madu wa Mano n nga hkrup ai. ¹⁰ Dai rai nna numsha gaw alawan gat wa nna, shi a madu wa hpe, Ma ni ngai kaw danpru ai wa, ya bai sa ra ai, ngu nna tsun wu ai. ¹¹ Shaloi Mano rawt nna, madu jan hte rau dai wa hpang de sa wa nna, Ndai numsha hpe ga sa tsun ai, nang rai nga n ni? nga nna san wu yang, dai wa mung, Rai nga nngai, ngu wu ai. ¹² Bai Mano gaw, Na a ga dik wa lit ga law; ma dai kaning re ai wa tai na ra ta? shi hta an kaning ning di na rai ta? ngu nna san wu ai. ¹³ - ¹⁴ Yehowa a kasa chyawm gaw, Ngai numsha hpe tsun matsun, shi sadi u ga; tsabyi hta na tai matai sha lu na n rai; tsabyi jahku hte chyaru mung, hkum lu u ga; n san n seng ai baw hpa mung n sha u ga; ngai shi e tsun matsun hkan galaw nga u ga, ngu nna Mano hpe tsun wu ai. ¹⁵ Bai Mano gaw Yehowa a kasa hpe Na a matu bainam kasha langai mi sat shadu lu hkra, nang hpe naw hkum de ga, ngu wu yang, ¹⁶ Yehowa a lamu kasa gaw, Nang ngai e hkum timung, na lusha ngai n sha na nngai; wan nat hkungga nawng mayu yang, Yehowa hpe nawng ya mu, ngu nna Mano hpe bai tsun wu ai. ¹⁷ Dai wa Yehowa kasa re ai gaw, Mano garai n chye wu ai. Bai Mano gaw, Na a ga dik wa jang, an nang hpe shagrau sha-a lu hkra, na amying hpa ngu ai rai ta? ngu nna Yehowa a kasa hpe san wu ai. ¹⁸ Shaloi Yehowa a kasa gaw, Nye a mauhpa amying hpa rai san n ta? ngu wu ai. ¹⁹ Shingrai Mano bainam kasha hte shadung kumhpa la sa nna, dai lunghtawn ntsa e Yehowa hpe nawng ya wu ai: lamu kasa mung mauhpa amu galaw nna Mano yan la dai hpe mu mada ma ai; ²⁰ Kaning rai nme law, dai tawn hkungri kaw nna wan numli lamu de dingdung rai lung wa yang, Yehowa a lamu kasa gaw tawn hkungri na wan numli hta lung mat wa ai: Mano yan la mung dai hpe mu mada nna, shan gaw ga de myiman dagup ma ai. ²¹ Yehowa lamu kasa mung dai kaw nna Mano yan la kaw bai n du yu sai. Shaloi she, Yehowa lamu kasa re ai Mano chye wu ai. ²² Shaloi Mano gaw, An gaw Karai Kasang hpe mu kau sagaw ai majaw, teng teng si na saga ai, ngu nna madu jan hpe tsun wu ai. ²³ Madu jan chyawm gaw, Yehowa an hpe sat kau ma yu ai rai yang gaw, an na lata na wan nat hkungga hte shadung kumhpa hkap la ya na n rai; ning re amu lam yawng mayawng mung an hpe madun na n rai; ya yang e ning nga ai ga mung, tsun dan na n rai, ngu nna madu wa hpe tsun wu ai. ²⁴ Dai numsha mung, shadang sha shangai nna, shi a amying Samson ngu nna dai daw mu ai; dai ma kaba wa nna, Yehowa shi e shaman ya wu ai. ²⁵ Yehowa Wenyi gaw, Zora mare hte Eshtola lapran na Dan amyu dap hta shi hpe shadut magang wa da wu ai.

¹ Ya, Samson gaw Timna de yu wa nna, dai yang na Hpilisti num langai mi hpe mu wu ai, ² Shaloi shi bai wa nna kanu kawa hpe, Timna e Hpilisti num langai mi mu da se ai; nye matu hpyi ya mi, ngu nna tsun wu ai. ³ Kanu yan Kawa chyawm gaw, Matu n gadoi ai Hpilisti amyu num nang sa la na gaw, anhte amyu shada hta na, na a mayu kasha num langai mi mung n nga sa ni? ngu mu timung, Samson mahtang, Nan dai she hpyi ya mi, ngai grai ra da we ai, ngu nna kawa hpe tsun wu ai. ⁴ Shi gaw, Hpilisti masha ni hte jahte tam ai rai nga ai hte dai lam Yehowa kaw na rai nga ai gaw, kanu yan kawa chyawm gaw n chye ma ai. Dai aten e Hpilisti masha ni gaw, Israela amyu hpe up nga ma ai. ⁵ Shaloi Samson gaw kanu yan kawa hte rau Timna de yu wa yang, Timna na tsabyi sun ni du jang, hkanghkyi uram langai mi, shi hpe shabam htim wu ai. ⁶ Shaloi shi a lata hta hpa n lang timung, Yehowa Wenyi shi hta aja awa du nna, bainam kasha gang je kau ai zawn di nna, hkanghkyi dai hpe gang je kau wu ai: shi galaw ai lam kanu kawa hpe mung n tsun dan wu ai. ⁷ Shaloi Samson dai numsha kaw sa chyai nna, shi e grai tsawra wu ai. ⁸ Dai hpang gade n na jang, num dai hpe hkungran na sa wa ai shaloi, hkanghkyi mang sa yu na mashe shang nna, yu yu yang, hkanghkyi hkrang kata e lagat shang nna lagat jahku rawng nga ai, mu wu ai. ⁹ Shaloi shi manaw la nna sha let sa wa ai; kanu kawa hpe wa jaw nna shan sha ma ai: raitimung, lagat jahku dai, hkanghkyi kata na re ai gaw n tsun dan mu ai. ¹⁰ Kawa mung dai numsha hpang de sa ai rai nna, Samson gaw, sabrang ni a htung hte maren poi galaw wu ai. ¹¹ Shanhte, shi sa ai mu jang, shi kaw poi shang lawm na manang sumshi shaga ya mu ai. ¹² Shaloi Samson, Ngai nanhte hpe gumwoi ga hkaw mi tsun yu made ga; ndai poi nhtoi sanit ya hta, nanhte htai dan lu yang, lachyit hpajawng sumshi, palawng nnan sumshi, ngai jaw na made ai: ¹³ n htai lu myit yang gaw, nanhte ngai hpe lachyit hpajawng sumshi, hpun palawng nnan sumshi, jaw lu na myit dai, ngu wu ai. Shanhte mung, Mai ai le, na gumwai ga anhte hpe tsun yu mi, ngu nna hkam la mu ai. ¹⁴ Shaloi shi gaw, Sha chye ai wa kata na shahpa, N-gun ja ai wa kata na dwi apa pru ai hpa? ngu nna tsun wu ai. Gumwai de a lachyum hpe shahte masum ya tup myit timung n chye mu ai. ¹⁵ Ya sanit ya nhtoi hta shanhte gaw Samson a madu jan hpe, Na madu wa, anhte hpe gumwai ga lachyum tsun dan hkra, shi kaw na akraw la u; dai n rai yang, nang hte hpawn nanhte dap hte nat kau na gaw ai: anhte a arai kashun la na nga nna, anhte hpe shaga ai rai myit ni? ngu nna shama mu ai. ¹⁶ Dai majaw Samson a madu jan shi a man hkrap nna, Nang ngai hpe tsaw ai n rai ndai, ndawng ai she rai ndai; nye amyu masha ni hpe gumwai wai nhtawm, ngai e pyi n tsun dan ndai, ngu wu ai. Shi chyawm gaw, Ngai nu ngai wa hpe pyi n tsun nga yang me, nang hpe tsun dan na rai ni? ngu nna shi e tsun wu ai. ¹⁷ Raitimung, poi nhtoi sanit ya tup, madu wa man e a hkrap nga ai rai nna, sanit ya shani e chyawm gaw, shi nau aput ai majaw, tsun dan kau wu ai: shi mung shi a amyu masha ni hpe gumwai lachyum dai sa tsun dan wu ai. ¹⁸ Shaloi mare masha ni gaw sanit ya shani e, jan garai n du yang sa nhtawm, Lagat jahku hta hpa grau dawi a ta? Hkanghkyi hta hpa grau ja a ta? ngu nna htai mu ai. Dai rai nna shi gaw, Nanhte nye a nga upra hte n galau yang, kanang na nye gumwai lachyum mi n mu law, ngu nna shanhte hpe tsun wu ai. ¹⁹ Ya Yehowa a Wenyi shi hta aja awa du nna, shi Ashkelon de sa nhtawm mare masha sumshi sat kau wu ai: shingrai, dai masha ni a arai shi kashun la nna, gumwai lachyum htai ai ni hpe labu hte palawng yep yep wa jaw kau nhtawm, shi masin pawt let kawa nhta de wa mat ai. Samson a madu jan hpe chyawm gaw, shi a kanawn manang wa hpe ya sha kau mu ai.

¹ Dai hpang, hkaulan mam dan ai ta e, Samson gaw, bainam kasha dun let, shi a madu jan hpe kawan ai sa wa ai; ya shi gaw, Gawk kata e nye a madu jan kaw ngai shang nga n ga, ngu wu yang, katsa wa chyawm gaw n hkraw ai hte, ² Nang ngai sha hpe gaja wa teng teng ndawng nu ai, ngu nna ngai myit nngai majaw, na a manang wa hpe ya sha kau se ai: raitimung, kanau jan shi hta grau tsawm nga ai n rai ni? kana a malai kanau jan hpe la u, ngu nna tsun wu ai. ³ Dai rai nna Samson gaw, Hpilisti masha ni hpe ndai lang mi nsam dat yang, ngai hta mara shagun shara n nga malu ai, ngu nna shanhte hpe tsun wu ai. ⁴ Dai hte maren shi sa wa nna, nam gwi masum tsa rim la nhtawm, shingnan tam la nna, dai gwi ni a nmai hpe lahkawng yep yep di shachyup let, de a lapran e shingnan shakap nna; ⁵ dai shingnan hta wan shachyi ngut jang Hpilisti masha ni a yi de dat dat ya mu ai; dai rai nna, mam hte mam hkauling mung, tsanlun sun ni mung hkru mat wa ai. ⁶ Shaloi Hpilisti masha ni gaw, Ndai kadai di ai rai ta, ngu nna san hkat ma yang, Timna na wa a kahkri Samson di ai rai nga ai; shi a madu jan manang wa hpe ya sha kau ai majaw rai nga ai, ngu nna tsun dan mu ai. Shaloi Hpilisti masha ni sa nna dai numsha yan wa hpe nat kau mu ai. ⁷ - ⁸ Dai majaw Samson gaw, Nanhte dai hku galaw myit yang gaw, ngai mung masin si hkra naw tai na made ai; masin si yang she da na we ai, ngu nna, shanhte hpe tsun ai hte rau, shanhte hpe a mani n di sat kau mu ai: dai hpang shi yu wa nna, Etam e nga ai lungpu hta sa rawng nga ai. ⁹ Shaloi Hpilisti masha ni lung wa nna, Yuda mung hta dap jung ai hte Lehi du hkra chyat rai wa ma ai. ¹⁰ Dai rai nna Yuda mung na ni gaw, Ataw, hpe majaw anhte hpe gasat sa wa myit ta? ngu nna san mu yang, Samson shi anhte hpe di ai zawn, shi hpe gyit la nna matai htang na matu lung wa ra ga ai, ngu mu, htan ma ai. ¹¹ Shaloi Yuda mung na masha hkying masum hte gaw Etam lungpra na lungpu de yu wa nhtawm, Samson hpe, Hpilisti masha ni anhte a madu rai nga ai, nang nchye nni? Dai rai yang, anhte hta hpa rai ning di galaw n ta? ngu mu ai. Shi gaw, Shanhte ngai hpe di ai hku, ngai shanhte hpe di mawe ai, ngu nna htan wu ai. ¹² Bai shanhte gaw, Nang hpe gyit la nna, Hpilisti masha ni a lata de ap kau na, anhte sa ra ga ai, ngu mu ai. Samson gaw, Nanhte lata hte nan ngai hpe n sat na, naw dagam mu, ngu wu ai. ¹³ Shanhte mung, N sat na ga ai; ngang ngang gyit hkang nna, shanhte a lata hta ap ya na ga ai; gaja wa teng teng anhte nang hpe n sat na ga ai, ngu nna tsun nhtawm, sumri nnan lahkawng hte gyit nna, dai lungpra na woi wa ma ai. ¹⁴ Ya Lehi shara de du jang Hpilisti masha ni shi hpe tau la let garu ma ai: shaloi Yehowa a Wehyi shi kaw aja awa du nna shi a lahpum na sum ri ni gaw wan kap ai lachyit zawn dut wa nna, shi a lata na sumri ni raw mat lu ai. ¹⁵ Shi mung, dai yang lawze shakap katsing mu hkrup nna, dai hta la nhtawm, masha hkying mi sat kau wu ai. ¹⁶ Dai rai nna Samson gaw, Lawze shakap hte sumpum sumda, Lawze shakap hte, masha hkying mi sat kau sahka, nga nna jahta wu ai. ¹⁷ Ning nga jahta ai hpang, dai lawze shakap hpe kabai kau nna, shara dai hpe, Ramat-lehi, ngu nna shamying wu ai. ¹⁸ Dai hpang shi grai hpang kara nna, Yehowa hpe hpyi wu ai gaw, Nde wa kaba ai hkye la ai lam, nang na a mayam wa lata hte hpaw ya nhtawm, ya hpang kara ai hte ngai si wa nna, matu n gadoi ai ni a lata de shang mat na rai ni? ngu wu ai. ¹⁹ Karai Kasang chyawm gaw Lehi shara na hkamwam hpaw ya wu ai rai nna, dai kaw na ntsin pru wa ai; shaloi shi ntsin lu ngut jang, nsa awai lu nna bran wa ai: dai re ai majaw hkamwam dai hpe Em-hakore ngu nna shamying da wu ai: dai gaw dai ni du hkra Lehi shara e nga nga ai. ²⁰ Shingrai Samson gaw, Hpilisti masha ni up ai prat e, Israela amyu hpe hkun ning e tara dara ya wu ai.

¹ Dai hpang Samson gaw Gaza mare de sa wa nna, shawa num langai mu hkrup yang shi kaw shang nga ai. ² Shaloi, Samson du ra ai, nga nna Gaza masha ni hpe shana ma yang, shanhte shi e wang tawn ai hte, shana tup mare chyinghka e lagyim hkap nga nna, Nhtoi htoi jang she shi hpe sat na ga ai, nga nna tsun let, shana tup asim sha nga ma ai. ³ Samson chyawm gaw yuptung du hkra yup la nhtawm, yuptung e rawt nna, mare chyinghka ni hpe hkadun lahkawng hte htinggrang pawn malaw la nna, lahpa hta mara hpai wa nhtawm, Hebron mare tawtap na bum jinghkang e wa tawn kau wu ai. ⁴ Dai hpang Samson gaw, Sorek kadit e nga ai, Delila mying ai num langai mi hpe tsawra wu ai. ⁵ Shaloi Hpilisti du ni gaw num dai hpang de sa nna, Samson a n-gun kaba gaw hpa hta madung ai kun; shi hpe gyit nna dip lu hkra kaning di yang dasng na kun, shi hpe abawk nna sagawn yu u: anhte langai hte langai nang hpe gumhpraw hkying mi latsa tsa jaw na ga ai, ngu nna tsun mu ai. ⁶ Dai rai nna, Delila mung Samson hpe, Nang hta rawng ai n-gun kaba gaw, hpa hta madung lit dai mung, nang hpe dip lu hkra, kaning di gyit yang dang na mung, ngai e tsun dan rit ngu nna hpyi wu ai. ⁷ Samson gaw, Garai n hkraw mat yu ai yang lasa katsing sumri sanit hte ngai hpe hyit hkang yang, ngai hta n-gun daw mat nna, masha gale zawn rai na ring ngai, ngu nna shi e tsun wu ai. ⁸ Shaloi Hpilisti du ni gaw, garai n hkraw mat yu ai yang lasa sumri sanit la sa ya mu ai rai nna, dai numsha gaw shi hpe gyit tawn wu ai. ⁹ Ya dai numsha gaw nhku gawk kata e lahyim nga ai masha tawn da nhtawm, shi gaw, Samson e, Hpilisti masha ni nang hpe htim mara ai, ngu wu ai. Shi chyawm gaw sumri dai ni hpe, wan kap ai lachyit ri zawn gang dut kau wu ai. Dai rai nna, shi a n-gun ja nhpang n chye ya mu ai. ¹⁰ - ¹¹ Bai Delila gaw Samson hpe, Nang ngai hpe shatu nna masu ai sha rai ndai: nang hpe kaning di gyit na, ya tsun dan rit, ngu wu ai. Shi gaw, Garai n lang yu ai sumri nnan hte ngai hpe gyit kau yang, ngai hta n-gun daw nna, masha gale zawn rai na ring ngai, ngu nna shi e tsun wu ai. ¹² Shingrai, Delila sumri nnan la nna shi e gyit tawn nhtawm, Samson e, Hpilisti masha ni nang hpe htim mara ai, ngu wu ai. Lagyim nga ai ni chyawm gaw, nhku gawk kata e nga nga ma ai. Shi gaw shi a lahpum na sumri dai hpe ri samyan zawn gang dut kau wu ai. ¹³ Bai Delila gaw Samson hpe, Ya du hkra nang ngai hpe shatu nna masu kau nit dai; nang hpe kaning di gyit na, tsun dan rit, ngu wu ai. Shi gaw, Nye a kara shan tsing sanit hpe da shan hta da shalawm yang, rai na re ai. ¹⁴ Shaloi shi dai di nna da lim hte da hku bang nhtawm, Samson e, Hpilisti masha ni nang hpe htim mara ai, ngu wu ai. Shi mung yup kaw na hprang nna, da rung, da rai, da shan ni hte hpawn, gang di dun mat wa wu ai. ¹⁵ Dai re ai majaw numsha gaw shi hpe, Ngai nang hpe tsawra ai, nga nna myit n lawm ai, hpa rai tsun n ta? Ya masum lang nang ngai hpe shatu nna, na n-gun kaba hpa hta madung ai, n tsun dan ndai, ngu wu ai. ¹⁶ Shing nga nna shani shagu shi hpe aput shatsang ai majaw, si na daram shi myit ru wu ai. ¹⁷ Dai rai nna, shi a myit hta rawng marawng tsun dan wu ai gaw, Ngai gaw nu a hkritung kaw nna, Karai Kasang a Naziri masha rai nngai majaw, nye a kara kalang mi muk garai n doi yu ai: nye a kara doi kau jang, ngai n-gun daw nna gawngkya ai hte masha gale zawn rai na ring ngai, ngu nna shi hpe tsun dan wu ai. ¹⁸ Shing nga shi a myit hta rawng marawng tsun dan ai Delila chye jang, Hpilisti du ni hpe, Ya kalang mi naw sa marit; shi a myit hta rawng marawng ngai e tsun dan ni ai, ngu nna bai shaga dat wu ai. Dai rai nna Hpilisti du ni mung gumhpraw gun let shi hpang de du ma ai. ¹⁹ Shaloi Delila gaw shi a lahpyen e Samson hpe yup shangun nhtawm, masha langai mi hpe shaga la nna, shi a baw na kara shan tsing sanit hpe gadoi kau ya wu ai: shingrai shi hpe adip hpang wa nu ai rai nna, shi a n-gun daw mat lu ai. ²⁰ Dai numsha gaw, Samson e, Hpilisti masha ni nang hpe htim mara ai, ngu wu ai. Shaloi shi yup hprang nna, Shawoi na hte maren ngai pru wu nna, n-gun dat we ga, nga nna tsun wu ai. Raitimung, Yehowa shi hpe tawn kau nu ai gaw shi n chye wu ai. ²¹ - ²² Dai rai nna Hpilisti masha ni gaw shi hpe rim la nhtawm, shi a myi achyaw baw kau ya mu ai; shing di, Gaza mare de la wa nna, magri sumri hte gyit tawn let, htawng kata e htumrin rin shangun mu ai. Raitimung, shi a doi kau ai kara, bai tu wa ra ai. ²³ Shaloi Hpilisti du ni gaw, Anhte a Hpara anhte a hpyen wa Samson hpe anhte a lata de ap ya ma ni ai, nga nna shanhte a Hpara Dagon hpe hkungga kaba jaw na hte padang poi galaw na matu zuphpawng nga ma ai. ²⁴ Mung masha ni mung Samson hpe mu jang, Anhte a Hpara gaw, anhte a mungdan jahten ai hte, anhte a masha law law sat kau ya ai hpyen wa hpe anhte a lata de ap ya mani ai, nga nna shanhte a Hpara hpe shakawn ma ai. ²⁵ Ya shanhte myit pyaw bu nga ma ai rai nna, Samson hpe woi wa marit; anhte a man e ginsup dan lu ga, nga ma ai. Shingrai, Samson hpe htawng na woi wa mu ai rai nna, shi shanhte a man e ginsup nga ai: shi hpe dai jawng shadaw lapran e tawn da mu ai. ²⁶ - ²⁷ Shaloi Samson gaw, Ngai shadaw hta shamyet nga n ga, nye lata hpe shadaw hte jahkrum ya e, ngu nna shi e dun ai ma hpe tsun wu ai, Dai nta numsha lasha hpring chyat rai nga ma ai; Hpilisti du ni nlang mung lawm nga ma ai; de a ntsa htap hta mung, numsha lasha hkying masum daram, Samson ginsup ai yu nna de nga ma ai. ²⁸ Shaloi Samson gaw, Yehowa, Madu e, ngai e dum e law; nye myi maga lahkawng baw kau ya ai, ndai Hpilisti masha ni hpe lang lata matai htang lu n ga, Karai Kasang e, ndai lang sha mi n-gun shaja e law, ngu nna Yehowa hpe hpyi shaga wu ai. ²⁹ Shing nga hpyi ngut jang, dai jawng a magaw daw yan hpe apai ahkra hpra di ahpum da let, ³⁰ Hpilisti masha ni hte rau ngai si wa ni ga, nga nna tsun let, gum nna n-gun shadat dat wu ai; shaloi dai nta gaw du ni a ntsa e mung, dai hta rawng ai ni yawng a ntsa e mungdaw agrawp kamyet sat mu ai. Shingrai, hkrung nga yang sat kau lu ai hta, si ai shani grau law nna sat kau wu ai. ³¹ Shaloi shi a kanau ni hte shi a nta masha ni nlang sa nna, amang sa hpai la nhtawm, Zora hte Eshtaola lapran na kawa Mano a lup hta lup makoi mu ai. Shi gaw Israela amyu hpe hkun ning tara dara ya wu ai.

¹ Ya Ehprim bum ga masha, Mihka mying ai wa langai mi nga ai. ² Shi gaw kanu hpe, Nu e, na gumhpraw hkying me latsa mat nna, dai hpe dagam kau sai nga nna, ngai e mung tsun dan ai gumhpraw dai, ngai kaw rai nga ai; ngai la kau we ai, ngu nna tsun wu yang, kanu gaw, Ngai sha e, Yehowa nang hpe shaman ya nit ga, ngu wu ai. ³ Shaloi dai gumhpraw hkying me latsa kanu hpe bai ya wu ai; kanu gaw, Tawk ai sumla hte jaw ai sumla galaw na ngu nna, gumhpraw ndai hpe ngai sha matu, Yehowa kaw ngai teng teng nawng kau se ai: dai rai nna, nang ngai sha hpe, dai gumhpraw bai ya de ga, ngu wu ai. ⁴ Kasha mahtang gumhpraw dai kanu hpe bai ya wu yang, kanu gaw gumhpraw ni tsa la nhtawm, janghkam kaw ap nna, dai wa gaw tawk ai sumla hte jaw ai sumla galaw ya wu ai: dai gaw Mihka nta e nga nga ai. ⁵ Dai Mihka ngu ai wa mung, Hpara jawng lu ai rai nna, hkinjawng palawng hte terahpim sumla galaw nna, shi a kasha langai mi hpe hkinjawng aya dang tawn da wu ai. ⁶ Dai aprat e Israela amyu hta hkawhkam n nga ai: langai hte langai tinang ra ai hku galaw ma ai. ⁷ Ya Yuda mung na Betlehem mare e, Yuda lakung langai mi hta na shabrang langai mi nga ai; dai wa Lewi masha rai nga nna, dai yang e shingbyi nga ai. ⁸ Dai ma gaw, Yuda mung Betlehem mare kaw na pru nna, shingbyi shara tam let hkawm wa yang, Ehprim bum ga na Mihka nta de du wu ai. ⁹ Shaloi Mihka gaw, Nang kanang na du n ta? ngu nna san wu yang, shabrang dai gaw, Ngai Yuda mung Betlehem mare na Lewi masha rai nga nngai; shingbyi shara tam hkawm nga nngai, ngu nna htan wu ai. ¹⁰ Mihka mung, Ngai kaw nga ga; nye a kawa, nye a hkinjawng tai u; ngai nang hpe gumhpraw shi, hpun palawng hte lusha jaw na de ai, ngu nna saw wu ai. Dai re ai majaw, dai Lewi masha shang nga nga ai. ¹¹ Shi kaw nga na dai Lewi masha ra nga ai rai nna, dai shabrang wa gaw shi a kasha langai mi zawn tai wu ai. ¹² Mihka mung dai Lewi masha hpe aya dang tawn wu ai rai nna, dai shabrang wa gaw shi hkinjawng tai let Mihka nta e nga nga ai. ¹³ Mihka chyawm gaw, Ya gaw, nye a hkinjawng Lewi masha rai nga ai majaw, Yehowa ngai hpe chyeju jaw na ni ai, ngai chye nngai, nga ai.

¹ Dai aprat e Israela amyu hta hkawhkam n nga ai: dai prat e Dan amyu matu ni gaw sali ga tam nga ma ai; kaning rai nme law, dai prat du hkra, Israela amyu gale ni hta shanhte lu la ang ai sali ga garai n lu la ma ai. ² Shaloi Dan amyu matu ni gaw, lamu ga yu shangun na matu, shanhte a shara Zora hte Eshtola kaw nna, shanhte a amyu ting hta na n-gun ja ai wa-ngan marai manga hpe, Dai mungdan sa yu ma su, ngu nna shangun dat mu ai: dai rai nna, shanhte Ehprim bum ga na Mihka nta de shang nhtawm, dai yang manam nga ma ai. ³ Mihka nta e nga nga ma yang, dai Lewi shabrang wa nsen shanhte chye nga ma ai rai nna, shi hpang de shang nhtawm, Nang ndai de kaning rai du n ta? ndai yang hpa galaw nga n ta? nang e hpa rai nga n ta? ngu nna san mu yang, ⁴ shi gaw, Mihka ngai hpe ndai amu ndai aya jaw na nga nna, ngai e saw ai majaw, sai a hkinjawng tai nga nngai, ngu nna shanhte hpe tsun wu ai. ⁵ Bai shanhte gaw, Ya anhte sa ai lam byin na n byin na, Karai Kasang kaw sa ya yu mi, ngu mu ai. ⁶ Hkinjawng wa chyawm gaw, Ngwi pyaw ai hte sa wa mu; nanhte sa ai lam Yehowa yu ya nga ai, ngu nna shanhte hpe tsun mu ai. ⁷ Ya dai marai manga hte gaw pru wa na, Lisha mare de du ma ai; dai yang na mare masha ni gaw Sidon masha ni zawn lukmu rai angwi apyaw n hkrit n tsang nga nga ma ai mung, shanhe hpe jep hkrang na matu up lu ai du n nga malu ai hte Sidon masha ni hte tsan nna, kadai hte magyit mahkai n nga malu ai mung, yu da mu ai. ⁸ Shingrai, Zora hte Eshtola shara e nga ai, shanhte a kahpu kanau ni hpang de shanhte bai wa ma ai rai nna, kahpu kanau ni gaw, Ya kaning rai nga a ta? ngu mu yang, ⁹ shanhte gaw, Rawt mu, shanhte hpe sa gasat ga; mung hpe anhte yu yu sagaw ai; dai gaw grai kaja ai mung rai nga ai: lukmu naw nga nga myit ni? dai mung hpe madu la na hkum ganung nga manit. ¹⁰ Sa wa jang, lukmu rai nga nga la ai masha amyu hte, dam lada re ai mungdan de du na ra gaw ai; ga ntsa na sutgan amyu hkum ai lamu ga, Karai Kasang nanhte hpe jaw na marin dai, ngu na tsun dan mu ai. ¹¹ Dai re ai majaw, Zora hte Eshtola shara kaw nna, Dan amyu masha marai kru tsa, hte gaw, ri nhtu hte htep rawt ma ai. ¹² Shingrai shanhte lung wa nna, Yuda mung na Kiriat-yerim e but nga ma ai: dai re ai majaw shara dai hpe dai ni du hkra Dan dap ngu nna shamying mu ai: dai gaw Keriat-yerim shinggan de rai nga ai. ¹³ Dai kaw nna bai rawt ai gaw, Ehprim bum ga Mihka nta de du ma ai. ¹⁴ Shaloi, Lisha mare kin-yu sa yu ai marai manga hte gaw, Ndai nta ni hta hkinjawng palawng hte, terahpim, tawk ai sumla, jaw ai sumla ni rawng ai, chye da mu ni? kaning di na yaw yu mu, ngu nna hpunau ni hpe tsun mu ai. ¹⁵ Dai majaw shanhte shayan shang nna, dai Lewi shabrang wa nga ai Mihka nta de du ma ai hte shi hpe shachyen mu ai. ¹⁶ Ri nhtu lang ai Dan amyu masha kru tsa gaw chyinghka lam e tsap la nga ma ai. ¹⁷ Dai mungdan hpe kin-yu yu ai marai manga gaw, nta nhku de shang nna, dai tawk ai sumla, hkinjawng palawng, terahpim hte jaw ai sumla ni hpe la kau mu ai, hkinjawng wa chyawm gaw, ri nhtu lang ai marai kru tsa hte rau dai chyinghka lam e tsap nga ai. ¹⁸ Ya dai masha ni gaw Mihka a nta de shang nna, dai tawk ai sumla, hkinjawng palawng, terahpim hte jaw ai sumla ni hpe la kau mu yang, hkinjawng wa gaw, Nanhte hpa di rai myit ta? ngu wu timung, ¹⁹ shanhte gaw, Atsin sha she nga u; na n-gup magum kau nna, anhte kaw she hkan rit; anhte a kawa hte hkinjawng wa tai ru; Israela amyu hta lakung langai mi ting a hkinjawng tai ai hta, htinggaw mi sha a hkinjawng tai ai gaw, na a matu akyu grau nga lit ni? ngu mu ai. ²⁰ Dai hkinjawng wa mung myit kabu nna, hkinjawng palawng, terahpim hte tawk ai sumla hpe la lang nna, dai masha ni a kata de shang mat ma ai. ²¹ shaloi shanhte kayin wa nna, tinang a ma kaji ni, yamnga ni hte lit ni hpe shawng magang shangun nna pru wa ma ai. ²² Ya shanhte Mihka nta hte ram ram tsan mat wa sayang, Mihka htingbu ni jawm hpawng nna Dan amyu masha ni hpe dep hkra hkan shachyut mu ai. ²³ Dep yang, shanhte Dan a kashu kasha ni hpe hkan jahtau mu jang, shanhte gaw kayin yu let, Mihka hpe, Nang hpa ra nna, nde wa law ai masha ni hte hkan shachyut n ta? ngu nna htau mu ai. ²⁴ Mihka gaw, Ngai galaw ai Hpara ni hte dai hkinjawng wa hpe, nanhte la kau myit htawm e, Nang hpa ra n ta? naw nga myit hka i? dai hta kaga, ngai hta hpa nga sata? ngu wu ai. ²⁵ Bai Dan amyu masha ni gaw, Anhte hpe hkum hkan shaga; loi hkring masin gadun ai ni nanhte hpe nhtang tai nna, nang hte na nta masha ni a asak jawm e sum na marin dai, ²⁶ nga nna shi hpe htan let, sa mat wa ma ai: Mihka mung, shanhte hpe kaning n di lu ai chye nna, shi a nta de bai wa mat ai. ²⁷ Shingrai Dan masha ni gaw Mihka galaw ai rai ni hte shi a hkinjawng wa hpe woi mat wa nna, angwi apyaw n hkrit n tsang nga nga ai Lisha masha ni hpang de du nna, shanhte hpe sat kau nhtawm, mare dai hpe nat kau wu ai. ²⁸ Mare dai gaw Sidon hte tsan ai majaw mung, kadai hte magyit mahkai n nga ai majaw mung hkye la ai masha n nga malu ai: dai gaw Bet-re-hob makau na kadit e de ai rai nga ai. Shanhte mung dai yang mare de nna, dai hta nga nga ma ai. ²⁹ - ³⁰ Mare dai hpe, shanhte a kaji daju, Israela kasha Dan a amying hkan nna, Dan ngu shamying mu ai: dai mare a shawng na amying chyawm gaw Lisha rai nga ai. Shingrai, Dan amyu masha ni gaw, dai tawk ai sumla hpe shadun jau mu ai rai nna, Mawshe a kashu Gershom a kasha Yonahtan hte shi a matu ni gaw, ndai mungdan masha ni bawngdung ai shani du hkra, Dan amyu masha ni hta hkinjawng galaw ma ai. ³¹ Karai Kasang a nawku nta gaw, Shilo mare e naw nga nga ai prat e ting, Mihka galaw ai tawk ai sumla mung, shanhte shadun jau nga ma ai.

¹ Ya Israela amyu hta Hkawhkam n nga ai aprat e, Ehprim bum ga malun e shingbyi nga ai Lewi masha langai mi gaw, Yuda mung Betlehem mare na num langai mi lashi di na la wu ai. ² Lashi num dai gaw madu wa hpe shut kau nna, Yuda mung Betlehem mare na kawa nta de hprawng mat wa nhtawm, shata mali nga nga mat ai. ³ Shaloi madu wa gaw shi hpe sa nem la na nga, shangun ma langai mi hte lawze lahkawng woi nna, rawt sa wa ai: shi du jang lashi num dai gaw kawa nta de shi hpe woi shawn wa ai rai nna, kawa gaw kahkri wa hpe mu jang, kabu gara ai hte hkap hkalum la wu ai. ⁴ Katsa mung kahkri wa hpe hkum da wu ai rai nna, shi gaw lu let sha let, masum ya tup chyai nga ma ai. ⁵ Mali ya du ai jahpawt jau jau shanhte rawt nna pru wa na hkyen wu yang, katsa gaw, Muk loi mi sha nna n-gun shaja la nna she rawt wa mu, ngu nna kahkri wa hpe tsun wu ai. ⁶ Shingrai shan lahkawng dung nna, rau lu rau sha ma ai; bai katsa wa gaw, Dai na sha naw hkring nna, pyaw pyaw naw nga u, ngu nna kahkri hpe tsun wu ai. ⁷ Kahkri wa chyawm gaw wa na nga rawt wu timung katsa wa nau shagwi ai majaw dai shana dai yang bai yup kau wu ai. ⁸ Manga ya ngu na jahpawt jau jau pru wa na nga rawt wu yang, katsa gaw, N-gun naw shaja la mu, jan, kayau hkra naw hkring nga mu, ngu wu ai: shingrai shan lahkawng rau bai lusha ma ai. ⁹ Ya dai wa gaw, shi a lashi num yan shangun ma hte wa sa na nga rawt ma yang, katsa gaw, Yu u, jan du wa sai, dai na naw hkring mu; shani nhtoi htum magang wa sai, nang e naw yup nna, pyaw pyaw nga nga mu; hpawt de she hkawn nna, nanhte ga de wa mu, ngu nna kahkri wa hpe tsun wu ai. ¹⁰ Kahkri wa chyawm gaw, dai shana n hkting hkraw ai sha rawt nna, daw htaw ai lawze lahkawng hte lashi num hpa woi let, Yerusalem ngu ai Yebu mare ang ai du wa ma ai. ¹¹ Yebu mare ang du jang, jan du sai majaw shangun ma gaw, Sa, ndai Yebusi masha ni a mare de shang yup saga, ngu nna madu hpe tsun wu ai. ¹² Madu chyawm gaw, Isrsela amyu n re ai, maigan amyu a mare de gaw n shang ga, Gibea mare de naw lai na re ai, ngu wu ai. ¹³ Bai dai wa gaw shangun ma hpe, Sa, Gibea hte Rama shara langai ngai hta yup lu hkra anhte naw lai saga, ngu wu ai. ¹⁴ Shingrai shanhte sa wa nna, Ben-yamin ga Gibea mare makau du jang jan shang sai. ¹⁵ Shaloi Gibea mare e yup na nga mare kata de shang nna shanhte hpe kadai n hkap la ai majaw, mare lam e dung nga ai. ¹⁶ Ya, Gibea masha ni gaw Ben-yamin rai ngai ma ai; raitimung, dai yang shingbyi nga ai Ehprim bum ga masha, dingla langai mi nga ai: dai wa gaw shana de shi a yi de na wa nna, ¹⁷ mada yu yang, mare lam e manam langai mi nga ai mu wu ai; shaloi dai dingla gaw, Ya gade sa ai rai n ta? kanang na sa n ta? ngu nna san wu ai. ¹⁸ Shi gaw, Anhte Yuda mung Betlehem nna, Ehprim bum malun de wa ai ni rai ga ai; ngai dai de na rai nna Yuda mung Betlehem mare de sa ai; ya Yehowa nta de bai wa nga nngai; ngai e kadai manam garai n hkap ma ai. ¹⁹ Raitimung, yihku hte lawze ushat gaw lu da gaw ai; ngai hte, ndai na mayam jan ngu ai, na a mayam yan hte hkan nang ai shangun ma matu, muk hte tsabyi law nga mali ai: hpa mung n ra ga ai, ngu nna shi e tsun wu ai. ²⁰ Dingla wa mung, Nang hta ngwi pyaw nga lit ga law; nang hta ra mara gaw ngai hta rai u ga; lam e gaw hkum yup myit, nga nna, ²¹ shi a nta de woi wa nhtawm lawze ni hpe ushat yaw wu ai: shnhte mung lagaw shin nna lusha nga ma ai. ²² Shingrai apyaw alaw nga nga ma yang, dai mare na n hkru ai masha nkau mi, nta dai hpe sa wang nna, chyinghka sa adup mu ai: nta madu dingla hpe mung shaga nna, Na nta de shang wa ai la wa hte nga sha mayu ga ai, shapraw dat ru, ngu mu ai. ²³ Nta madu wa mung pru nna, Hpunau ai e, dai zawn n shawp ai amu gaw hkum galaw myit; ndai wa gaw nye a nta na manam she re ai; myit n su ai hku hkum rai myit. ²⁴ Yu mu, nye a shayi sha mahkawn nga nga li ai, shi a lashi num mung nga nga lu ai; shan hpe shapraw ya made ga; shan hpe di mu, nanhte ra ai mi rai mu; dai la wa hpe nde wa myit n su ai hku gaw hkum di myit, ngu nna, ²⁵ nem timung shanhte n madat ma ai: dai re ai majaw, Lewi la wa gaw shi a lashi num shapraw ya dat wu ai; shaloi shanhte gaw shana tup jahpawt du hkra kra matsa di kau nhtawm, nhtoi htoi jang she dat dat mu ai. ²⁶ Nhtoi htoi jang num sha gaw wa nna, shi a madu wa nga ai nta chyinghka lam e nhtoi leng hkra taw nga ai. ²⁷ Jahpawt e rai jang shi a madu wa gaw rawt nna, nta chyinghka ni hpaw nhktawm, wa sa na nga pru yang, yu mu, shi a lashi num gaw chyinghka lam e taw nga nna, chyinghka hkinbawng hta lata mara let taw nga la ai. ²⁸ Shaloi madu wa gaw, Rawt u, wa saga, ngu wu timung, shi n htan sai: dai rai nna madu wa gaw shi a lawze hta shi e mara nna, shi a shara de wa mat ai. ²⁹ Nta de du jang, shi nhtu la hkawm, shi a lashi num mang dai hpe hkrihkraw hkan nna, shi lahkawng hkrawng di daw nhtawm, Israela mung ting de gumju gat dat wu ai. ³⁰ Dai hpe mu chye ai ni nlang hte gaw, Israela masha ni Egutu mung na pru wa ai shani gaw nna ya du mateng dai zawn re ai amu kadai n galaw yu ai, galoi n mu yu ga ai: myit yu mu, bawng mu, hpajang mu, nga nna tsun shajang ma ai.

¹ Dai re ai majaw, Israela amyu masha ni nlang hte gaw, Gilead mung na ni hte rau lang lata rawt nna, Dan mare kaw nna Bera-sheba du hkra shawa masha nlang langai hkum sha zawn Mizpa mare e Yehowa man e zuphpawng nga ma ai. ² Israela amyu mahkra hta na, mung masha ni a du gyi ni gaw, Karai Kasang a shawa hpung hte rau sit sa ma ai; dai shawa hpung gaw, ri nhtu lang ai hpyen masha sen mali rai ma ai. ³ Israela amyu masha ni Mizpa de sa ma ai gaw, Ben-yamin amyu masha ni mung na ma ai.Ya Israela amyu masha ni, Dai n shawp ai amu kaning rai byin ai, anhte hpe tsun dan mi, ngu nna san mu ai. ⁴ Shaloi dai si ai num a madu wa Lewi masha gaw, Ngai nye a lashi num dai hte wa nna, Ben-yamin ga Gibea mare e wa yup nngai. ⁵ Dai shana e Gibea masha ni rawt nna, ngai yup ai nta hpe wang tawn let, ngai hpe hpya sat na maw mi ai; shing di nye a lashi num hpe si hkra roi kau ya mi ai. ⁶ Dai majaw, lashi num mang dai hpe ngai kahtum daw nna,Israela sali mungdan ting de gumju gat dat nngai: kaning rai nme law, Israela amyu hta n shawp ai hte myit n su ai amu shanhte galaw masai. ⁷ Yu mu, Israela kashu kasha ni e, yawng mayawng, bawng yu nna hpaji mu, ngu nna shanhte hpe htan mu ai. ⁸ Shaloi mung masha ni nlang langai hkum sha zawn rawt nna, Anhte langai mi muk tinang sum tinang nta de n wa saga. ⁹ Gibea mare hpe kaning di na nga yang, hpaida hte lata la nna sa gasat ga: ¹⁰ Ben-yamin ga Gibea masha ni Israela amyu hta di ai n shawp ai amu hte maren, masha mahkra dai de sa nna, matai htang lu hkra, dai ni hpe sa jarit sa jaw na matu, Israela amyu shagu hta na masha latsa hta na marai shi, hkying mi hta na latsa, mun mi hta na hkying mi lata san da na rai ga ai. ¹¹ Shingrai, Israela amyu masha ni mahkra gaw, langai hkum sha zawn dai mare a man e zuphpawng nga ma ai. ¹² Ya Israela amyu masha ni gaw Ben-yamin ga ting de masha shangun dat nna, Nanhte hta shapraw ai, ndai n shawp ai amu gaw, kaning re ai rai ta? ¹³ Ya dai Gibea mare na, n shawp ai masha dai ni hpe, anhte la sat kau nna, Israela amyu hta na yubak mara raw kau lu hkra, dai masha ni hpe anhte a lata de ap dat mi, ngu nna htet dat mu ai. Raitimung, Ben-yamin amyu gaw, shi a kahpu kanau Israela masha ni a ga n madat ai hta n-ga, ¹⁴ shanhte hpe hkap gasat na nga, mare kahawng shagu na pru nna, Gibea mare e zuphpawng nga ma ai. ¹⁵ Dai shaloi e, Gibea masha share ninghkrin marai sanit tsa hta kaga, mare kahtawng hkan na sa ai Ben-yamin amyu masha ni yawng gaw, ri nhtu lang ai masha mun lahkawng e hkying kru rai nga ma ai. ¹⁶ Dai masha ni yawng hte hta, lapai ta chye lang nna, kara singgawng mi pyi n shai hkra, lungdin chye nwat kabai ai masha sanit tsa lawm ma ai. ¹⁷ Ben-yamin amyu n lawm ai, ri nhtu lang ai Israela masha mahkra gaw sen mali rai ma ai: dai ni nlang hte gaw hpyen masha hkrai rai ma ai. ¹⁸ Ya Israela amyu masha ni rawt nna, Betela de lung wa nhtawm Karai Kasang hpe hpaji hpyi mu ai gaw, Ben-yamin amyu masha ni hpe gasat na anhte hta kadai mahtang shawng na rai ta? ngu nna san mu ai. Shaloi Yehowa gaw, Yuda mahtang shawng u ga, ngu wu ai. ¹⁹ Ya Israela masha ni jahpawt jau jau rawt nna, Gibea mare man e dap jung ma ai. ²⁰ Shingrai, Ben-yamin masha ni hpe gasat na nga, Israela masha ni sit sa wa ma ai: Israela masha ni mung, Gibea mare makau e shanhte hpe gasat na hkyen ma ai. ²¹ Ben-yamin kashu kasha ni mung, Gibea mare kaw na pru nna, dai shani e Israela masha mun lahkawng e hkying lahkawng, sat kau mu ai. ²² Raitimung, Israela amyu masha ni gaw myit nden shaja nna, shawng shani gasat ai shara e bai hkyen nga ma ai. ²³ Yehowa kaw mung shanhte sa nna, shana de du hkra hkrap let, Anhte a kanau Ben-yamin hpe, naw gasat na rai ni? ngu nna Yehowa hpe san wu yang, Yehowa mung, Sa gasat mu, ngu dat wu ai. ²⁴ Hpang shani e Israela kashu kasha ni Ben-yamin masha ni hpang de sit sa ma ai. ²⁵ Ben-yamin chyawm gaw Gibea mare na pru nna, dai shani e mung ri nhtu lang ai Israela masha mun me hkying matsat sat kau lu ma ai. ²⁶ Dai re ai majaw Israela amyu masha ni nlang hte gaw, Betela de sa nna, Yehowa man e dung nna hkrap let shana du hkra lusha gam ma ai hte, Yehowa man e wan nat hkungga, mahku hkungga nawng ya ma ai. ²⁷ Dai prat e Karai Kasang a ga shaka sumpu dai yang nga nga ai hte, Arun a kashu Eleaza kasha Hpinehat dai sumpu a man e amu gunhpai nga ai rai nna, ²⁸ Israela kashu kasha ni gaw, Anhte a kanau Ben-yamin hpe bai sa gasat na rai kun, tawn da sa na rai kun? ngu nna Yehowa hpe san mu ai; Yehowa gaw, Lung ma su; hpawt ni nhtoi shanhte hpe nanhte a lata de ap kau na we ai, ngu dat mu ai. ²⁹ Ya Israela amyu masha ni Gibea mare grupyin e hpyen lagyim up da manu ai. ³⁰ Shingrai masum ya ngu na shani e Israela kashu kasha ni gaw, Ben-yamin masha ni hpang de lung nna, shawng na zawn Gibea mare man e hpyen hkyen nga ma ai. ³¹ Ben-yamin kashu kasha ni mung, shanhte hpe hpyen hkap gasat na pru wa ma ai rai nna, mare hte tsan mat wa ai: dai rai nna, Bethela de lung wa ai lam hte Gibea pa kahtawng de sa ai lam hkan e, shawng na zawn, Israela hpyen masha ni hpe hkan gasat ma ai rai nna, masha sumshi daram sat kau lu mu ai. ³² Dai re ai majaw Ben-yamin masha ni gaw, Shanhte shawng na zawn, anhte a man e sum mat masai, nga ma ai. Israela kashu kasha ni chyawm gaw, She hprawng ya ga; mare hte tsan hkra, nmaw lam hku shalen mat wa ga, nga nna shada tsun let, ³³ Israela masha ni nlang hprawng yen nna, Bala-tama shara e hpyen hkyen ma ai: lagyim up nga ai Israela masha ni mung, tinang up ai shara Geba pa na rawt pru ma ai rai nna, Israela hpyen share ning hkrin mun mi ³⁴ Gibea mare lung gasat nga ma ai, Ben-yamin masha ni gaw shanhte hta gasat kyindut hkrum wa ra ai, n chye nna, tsam mari naw gasat nga ma ai. ³⁵ Shaloi Yehowa Ben-yamin masha ni hpe Israela man e jasum kau mu ai rai nna, dai shani e, Israela kashu kasha ni, ri nhtu lang ai Ben-yamin masha mun lahkawng, hkying manga e marai latsa sat shamyit kau ma ai. ³⁶ Shingrai, Ben-yamin kashu kasha ni jasum kau ai hkrum ma ai: kaning rai nme law, Israela masha ni Gibea makau e tawn da ai lagyim up nga ai ni hpe kam ma ai rai nna, nnan e Ben-yamin a man na hprawng kanut mat wa ai. ³⁷ Shaloi lagyim up nga ai ni rawt nna, Gibea mare de lang lata htim bang let, gasat shang wa nhtawm, dai mare ting hpe nhtu hte azat shagrawng kau mu ai. ³⁸ Ya, Israela hpyen ni hte lagyim up nga ai ni gaw, shanhte a lapran chye na matu, mare kata nna wanhkut kaba shamawng dat na lam, bawng hkut da manu ai. ³⁹ Dai rai nna, Israela masha ni gasat wa let htingnut ya jang, Ben-yamin masha ni gaw, Gaja wa, shawng na gasat hta sum ai zawn, anhte a man e shanhte bai sum masai, nga nna tsun let, Israela masha ni hpe kahtam nang wa nna, marai sumshi daram sat kau mu ai. ⁴⁰ Raitimung, wan grung wa nna, mare na wanhkut, sumwi zawn dingdung rai nga jang, Ben-yamin masha ni kayin yu nna, yu mu, mare ting wanhkut hkrai chyip rai nna, lamu de mawng lung nga ai. ⁴¹ Shingrai, Israela masha ni nhtang gasat wa jang, Ben-yamin masha ni gaw, shanhte hta kyindut wa ra ai ngu nna, mau mahka let, ⁴² Israela masha ni a man na nam mali de hprawng ma ai: raitimung, hkan shachyut ai ni dep lu ai hte mare kahtawng hkan na ni mung shanhte hpe hkap sat ma ai. ⁴³ Shingrai, shanhte Ben-yamin masha ni hpe wang ai hte shachyut ai hte, shanhte a nhtan dap Gibea makau kaw nna, sinpraw maga de kabye dip kau mu ai. ⁴⁴ Dai shaloi e Ben-yamin amyu na share ninghkrin mun me hkying matsat si mat ma ai. ⁴⁵ Naw ngam ai ni gaw kayin hprawng nna, nam mali na Rimon lungbra de hprawng wa ma ai: raitimung, shachyut nang ai ni dep nna, nmaw lam hkan e hkying manga rim la lu ma ai; Gidom du hkra mung hkan shachyut nna marai hkying lahkawng hkan sat lu ma ai. ⁴⁶ Shingrai, dai shani e si mat ai ri nhtu lang ai Ben-yamin masha gaw mun lahkawng e hkying manga rai ma ai: shanhte nlang share ninghkrin hkrai rai ma ai. ⁴⁷ Marai kru tsa chyawm gaw, nam mali na Rimon lung bra de du hkra hprawng lu ma ai rai nna, Rimon lunggrawp hkan e shata mali makoi nga ma ai. ⁴⁸ Bai Israela masha ni nhtang wa nna, Ben-yamin kashu kasha ni hpe gasat let, mare kahtawng hkan na masha da, yamnga da, hkrup mahkrup nhtu hte sat kau nna, du madu mare kahtawng ni hpe nat kau mu ai.

¹ Ya Israela masha ni gaw, Kadai mung tinang shayi sha Ben-yamin amyu masha ni hpe n jaw ya sha sa na, nga nna Mizpa mare e dagam kau manu ai. ² Shaloi amyu masha ni gaw, Betela shara de sa du nna, Karai Kasang a man e shana de du hkra dung nga let, ja ja jahtau hkrap ma ai gaw, ³ Israela Karai Kasang Yehowa e, dai ni Israela amyu ni hta na, amyu matu langai mi htum mat ma ai gaw, hpa majaw rai nga a ta? nga ma ai. ⁴ Hpang jahpawt e amyu masha ni gaw jau jau rawt nna, tawn hkungri gaw da nhtawm, wan nat hkungga hte mahku hkungga nawng jau ma ai. ⁵ Bai, Israela masha ni gaw, Israela amyu lakung yawng hta na, Mizpa e Yehowa a man de n sa ai wa gaw, gaja wa teng teng sat kau ai hkrum u ga nga nna ga kaba hte dagam kau manu ai majaw, Ya, Israela amyu yawng hta na Yehowa a shawa hpawng de n sa lawm ai kadai naw nga a ta? nga nna gawn ma ai. ⁶ Shingrai, Israela kashu kasha ni gaw, kanau Ben-yamin a matu myit malai lu nna, Dai ni Israela amyu lakung ni hta na, amyu langai mi htum mat sahka. ⁷ Anhte mahtang shanhte hpe tinang a shayi sha n jaw n ya, ngu nna Yehowa kaw dagam kau sagaw ai majaw, naw ngam nga ai ni a matu num kanang la ya sa na i? nga nna bawng ma ai. ⁸ Dai rai nna shanhte gaw, Israela amyu ni hta na, Mizpa de Yehowa a man e n lung pru ai gaw, kadai naw nga a ta? nga nna san ma yang, yu mu, Gilead mung Yabesha mare masha ni langai mi muk zuphpawng ai dap de n sa ai chye ma ai. ⁹ Kaning rai nme law, masha hti yu yang, Gilead mung Yebesha masha langai mi mung n lawm ma ai. ¹⁰ Shaloi zuphpawng nga ai ni gaw, nden grau rawng ai hpyen masha mun me hkying lahkawng dat dat nna, Nanhte sa nhtawm, Gilead mung Yabesha masha ni hpe, numsha, lasha ma kaji hte hpawn sat kau mu; ¹¹ bai, ning rai mu: Lasha mahkra hte, la hkrum yu sai num mahkra hpe atsai awai sat kau mu, ngu nna hkang dat mu ai. ¹² Dai hte maren shanhte gaw, Gilead mung Yebesha mare na, la garai n hkrum ai num hkawn jet mali tsa hte hpe mu hkrup nna Hkanan mung na nhtan dap Shilo shara de la wa ma ai. ¹³ Shaloi dai shawa hpung ting masha shangun nna, Rimon lunggrawp e makoi nga ai Ben-yamin kashu kasha ni hpe sa htinglu la mu ai. ¹⁴ Shingrai Ben-yamin masha ni bai wa ma ai rai nna, Israela masha ni gaw shanhte jahkrung da ai, Gilead mung Yabesha na num ni hpe ya sha mu ai: raitimung, shanhte a matu num garai n gu malu ai. ¹⁵ Yehowa Israela amyu lakung ni hta na, amyu langai mi jahtum kau wu ai majaw, Ben-yamin a matu shanhte myit malai lu ma ai. ¹⁶ Dai rai nna shawa hpung na agyi salang ni gaw, Ben-yamin amyu hta na num ni hpe shamyit kau sai majaw, naw ngam ai ni a matu num tam ya na, kaning di na rai ta? nga ma ai. ¹⁷ Bai shanhte gaw, Israela amyu ni hta langai mi n htum mat hkra, naw ngam ai Ben-yamin masha ni matu Sali ga mai mat na n rai. ¹⁸ Raitimung, Israela masha ni mahtang, Kadai wa Ben-yamin masha hpe tinang a shayi sha ya sha yang, dai wa gaw dagam dala hkrum u ga. nga nna dagam kau sai majaw, anhte mung tinang shayi sha ya lu ga ai n rai. ¹⁹ Dai re ai gaw Betela shara dingdung maga, Betela kaw nna Shehkem de sa ai lam sinpraw de, Lebona shara dingda, Shilo ginwang e, Yehowa a matu shaning shagu poi galaw ga ma ai, nga nna bawng ma ai. ²⁰ Shing nga bawng ngut jang, shanhte Ben-yamin kashu kasha ni hpe, Nanhte sa wa ma su, tsabyi sun hkan e makoi nga mu: ²¹ - ²² shingrai Shilo mare na shayi sha ni poi shang na nga, ka let pru wa yang, tsabyi sun hkan na htim nna, dai Shaloi mahkawn ni hpe langai hte langai tinang a madu jan shatai na matu, rim la nhtawm, Ben-yamin ga de woi mat wa mu. Shanhte a kayung kawa ni anhte kaw sa deng yang, anhte gaw, Anhte a myiman hpe tau yu nna, shanhte hpe a jaw a ya kau mu; dai numsha ni hpe majan hku, shanhte a matu anhte rim ya kau ai n rai; nanhte mung dingsa jaw ya ai n rai; dai re ai majaw nanhte hta hpa ra n rawng ai, ngu nna anhte nem ya na ga ai, ngu dan mu ai. ²³ Ben-yamin masha ni mung, shingrai galaw ma ai rai nna, poi shang ka pru wa ai num ni hpe, tinang hkum dek nna, madu jan shatai na matu rim la nhtawm, tinang a sali ga de woi wa nna, mare ni hpe bai de let, nga sha ma ai. ²⁴ Israela kashu kasha ni nlang hte mung, tinang amyu, tinang dap, tinang a sali ga de, dai aten e, dai shara kaw na pru wa mat ma ai. ²⁵ Dai aprat e Israela amyu hta hkawhkam n nga ai: langai hte langai tinang ra ai hku galaw ma ai.