ESAIA

ESAIA

¹ Yuda hkawhkam Uzia, Yohtam, Ahaza hte Hezekia aprat e, Amot a kasha Esaia gaw, Yuda mung hte Yerusalem mare a lam, mu ai shingran gaw, da ndai rai nga ai. ² Yehowa ga tsun nga ai majaw, sumsing lamu e, na la u, ginding aga e, madat u: ngai gaw kashu kasha hpe lanu lahku nna, kaba wa shangun timung, shanhte ngai hpe gumlau ma ai. ³ Dumsu gaw tinang madu hpe chye nga ai; lawze mung tinang madu a wakang hpe dum ma ai: Israela amyu chyawm gaw, ngai hpe n chye ma ai, hpa mung n dum ma ai. ⁴ N shawp ai amyu e, nang gaw yubak lit gun ai amyu, n hkru n hkra ai aru arat, myit magaw ai kashu kasha rai nga n hka! Shanhte Yehowa hpe kau da masai; Israela a Chyoi pra ai wa hpe n gawn n sawn di kau manu ai; shanhte kayin nna kanut mat wa masai. ⁵ Nanhte ari naw hkrum hkra, hpa majaw gumlau shanang nga myit ta? baw ting hpye nga ai, kraw lawang mung, gawngkya nga ai. ⁶ Lagaw lahpan kaw nna baw pungding du hkra, hkam kaja ai hpa mung n nga ai; nma hpye ai, hkala nba ai hte kayat ai hkang katsing hkrai rai nga ai: dai hpe mazang lu ai n rai; ahkang kayawp nga ai n rai; namman hte garai n shakya lu ai. ⁷ Nanhte a mungdan gaw katsi katsang rai nga ai; nanhte a mare ni hkru mat sai; maigan masha ni, nanhte a ga dachyawk ni hpe nanhte a man e sha kau nga ma ai: tsasam masha ni hpya kau ai ga zawn, dai de katsi katsang rai nga ai. ⁸ Ziun shayi sha gaw, tsabyi sun wa, kumgyin sun sum hte, wang tawn hkrum ai mare zawn, gram nga ai. ⁹ Zaw nawng zaw wa up ai Yehowa, anhte hta madat dingsat kaji n ngam da taw gaw, anhte nan Sodom mare zawn rai nna, Gomora mare hte bung na ga ai. ¹⁰ Sodom du ni e, . Yehowa a ga madat mara mu; Gomora masha ni e, anhte a Karai Kasang a tara hpe na la mu. ¹¹ Yehowa tsun ai gaw, Nanhte a shagu hkungga ga daga, ngai hte kaning rai seng a ta? wan nat hkungga nawng ai sagu la hkrawng, hpum sau hkra kawn da ai yamnga sau hte, ngai hkru kat ni ai; usu, sagu kasha hte bainam la asai hpe ngai n ra nngai. ¹² Nanhte gaw, nye a myiman mu lu hkra, nye a wing ni hpe shang kabye kau na, kadai shangun a ta? ¹³ Kaman lila shagu hkungga hpe hkum jaw kahtap myit; manam pyaw ai kumhpa hpe ngai matsat nngai: shata praw shani, laban nhtoi, shawa zuphpawng hpe, ngai n ra nngai: nawku zuphpawng let, yubak hkrai galaw ai hpe, ngai n sharang lu nngai. ¹⁴ Nanhte a shata praw shani ni hte ladaw da ai poi ni hpe, ngai ndawng nngai: dai gaw ngai hpe sharu shayak ai sha rai nga ai; hkam sharang ai hte hki ba la nngai. ¹⁵ Nanhte lata ladawn yang, ngai myiman makoi mat na nngai; gaja wa, nanhte akroi anoi akyu hpyi timung, ngai n madat na nngai: nanhte a lata sai hte hpring nga ai. ¹⁶ Tinang hkum kashin kau mu; tinang dai jasan jaseng mu; nanhte a n hkru ai amu hpe, nye a myiman kaw na yeng seng kau mu; n shawp ai arawn alai kau da mu. ¹⁷ Kaja ai amu galaw na sharin la mu; dinghpring ai hpe hkan shachyut mu; nni nkri hkrum ai ni hpe karum mu; chyahkrai ma ni a mata tengman ai hku jeyang mu: gaida gaina ni hpe tau mu. ¹⁸ Yehowa tsun ai gaw, Sa marit, anhte dangrang hkat ga; nanhte a yubak gaw, sai zawn hkyeng timung, hkyen zawn hpraw na ra ai; hkyi hkang zawn hkyeng mang timung, sagu mun zawn rai na ra ai. ¹⁹ Nanhte ga madat hkraw nga myit yang gaw, lamu ga na nsi naisi sha lu na myit dai: ²⁰ Shing n rai, nyet kau let gumlau myit yang gaw, ri nhtu hte si na myit dai, nga nna Yehowa n-gup nan tsun nga ai. ²¹ Shawng e tara ding ai hte hpring nga ai, kangka re ai mare gaw, kaning rai shawa num tai a hka! Dinghpring ai gaw dai kata e shanu nga sai; ya chyawm, masha sat ai ni hkrai dè nga ma ai. ²² Na a gumhpraw gaw, gumhpraw hkyi tai mat sai; na a tsabyi jahku jet gaw, ntsin hte kayau mat nga ai. ²³ Na a du ni gumlau let, lagu lagut ni a kanawn manang tai wa masai; shanhte yawng kumhpa ra nna, sake manawn sha nga ma ai; shanhte gaw chyahkrai nmai ni a matu tara ding ai hku n jeyang ai hte, gaida gaina ni a amu hpe hpa n nawn ya ma ai. ²⁴ Dai re ai majaw, Israela amyu hta Daru Magam rawng ai, Zaw nawng zaw wa up ai, Madu Yehowa gaw, Gaja wa, ngai e hpyen ai ni hpe ngai yeng kau nna, ngai e ndawng ai ni hpe, matai dawp na nngai. ²⁵ Ngai nang hpe dun la nhtawm, na a gumhpraw hkyi atsai awai jen kau nna, nang hta kap ai jang yawng hpe mung, seng kau na nngai. ²⁶ Moi na tara agyi ni zawn re ai, ngai bai san da nna, nang hpe hpaji daw ya ai ni gaw, shawng na ni hte bung na mara ai: dai hpang na a mying hpe, Dinghpring ai mare, kangka re ai shara, nga nna kajai na mara ai. ²⁷ Ziun gaw tara hte mung, shi hpang de kayin wa ai ni gaw, dinghpring ai hte mung, hkyehkrang la ai hkrum na mara ai. ²⁸ Gumle gumlau re ai ni hte yubak galaw ai ni chyawm gaw, rau hten byak hkrum nna, Yehowa hpe kau da ai ni htum mat na mara ai. ²⁹ Kaning rai nme law, nanhte ra yu ai wanmyi hpun ni a majaw, shanhte kaya dum nna, nanhte lata la ai sun ni a majaw, myiman sum mat na marin dai. ³⁰ Hpa majaw nga yang, nanhte gaw alap nyip mat ai wamyi hpun hte, hka n nga ai sun zawn tai mat na marin dai. ³¹ Wangan wa gaw lachyit zawn, shi a amu gaw wan n-yang zawn tai mat nna, dai yan rau hkru mat na ra ai; dai wan hpe kadai mung n sat lu ai, nga ai.

¹ Amot a kasha Esaia gaw, Yuda mung hte Yerusalem mare a lam mu ai mungga gaw, da ndai rai nga ai. ² Hpang jahtum na prat hta e, Yehowa nta bum gaw, bum kaga ni a baw tai wa nna, kawng ni hta grau tsaw wa ai hte, amyu baw mahkra gaw, dai de yan bang na mara ai. ³ Masha amyu ga daga, Sa marit, Yehowa a bum, Yaku a Karai Kasang a nta de lung wa saga; shi gaw shi a lam anhte hpe sharin ya nna, shi a lam hku anhte hkan sa na ra ga ai: Ziun bum na jep ai tara, Yerusalem mare na Yehowa mungga pru na ra ai, nga nna hkawm let tsun shajang na ma ai. ⁴ Shi gaw amyu ni a lapran e tara dara nna, amyu baw ga daga hpe jeyang na ra ai: shanhte gaw tinang a nhtu ni hpe najawn, tinang a ri ni hpe nhkyau dup kau na mara ai: amyu mi gaw amyu mi hpe nhtu n shaw ai hte, htawmhpang e hpyen majan sharin sa na, n rai. ⁵ Yaku a dap ni e, sa marit; Yehowa a nhtoi hta hkan hkawm sa ga. ⁶ Gaja wa, nang gaw Yaku a dap ngu ai, na a amyu hpe kau da ndai: kaning rai nme law, shanhte gaw sinpraw mung na arawn alai hkan shatup let, Hpilisti masha ni zawn shaba wawt nna, tsasam masha ni a kashu kasha ni hte kanawn mazum ma ai. ⁷ Shanhte a mungdan gaw, aja gumhpraw hte hpring nna, shanhte a sutgan hti n dang law nga ai; shanhte a mungdan gaw gumra hte hpring nna, gumra leng ni hti n dang law nga ai. ⁸ Bai shanhte a mungdan gaw hpara sumla ni hte hpring nga ai; shanhte gaw tinang lata a amu hte, tinang layung ni shachyen ai amu hpe, nawku ma ai. ⁹ Dai rai nna, ga ntsa masha gaw gum dagup nna, shinggyim masha gaw dingnyawm nga ai majaw, nang shanhte a mara hpe raw dat kau ya mu ai n rai. ¹⁰ Yehowa a daru magam hte shi a hpung shingkang danhkung ai a majaw, lungpu de shang nna, ga nhpu hta makoi nga u. ¹¹ Gumrawng gumtawng ai wa gaw, shagrit kau ai, myit kaba ai wa gaw, shanem kau ai, hkrum nna, Yehowa shi chyu sha, dai shani e shagrau shaa ai hkrum na ra ai. ¹² - ¹⁶ Kaning rai nme law, myit kaba nna gumrawng gumtawng re ai ni mahkra a ntsa e mung, rai la dum ai ni nlang hte a ntsa e mung, tsaw nna reng dum ai Lebanon arit hpun ni mahkra a ntsa e mung, Bashan wamyi hpun ni mahkra a ntsa e mung; tsaw dum ai bum ni a ntsa e mung, tsaw la ai kawng ni a ntsa e mung; tsaw ai langchyi shagu a ntsa e mung, mare bunghku shagu a ntsa e mung, Tarshi shanghpaw li shagu a ntsa e mung, tsawm la ai dawnghkawn shagu a ntsa e mung, Zaw nawng zaw wa up ai Yehowa a nhtoi du na ra ai rai nna, dai hte yawng shagrit kau ai hkrum na ra ai. ¹⁷ Dai shaloi gumrawng gumtawng dum ai wa gaw shagrit kau ai, myit kaba ai wa gaw shanem kau ai hkrum nna, Yehowa shi chyu sha, dai shani e shagrau shaa ai hkrum na ra ai. ¹⁸ Hpara sumla ni yawng hte gaw atsai awai mat mat na ra ai. ¹⁹ Yehowa gaw ginding aga hpe ashun awam dat na nga, shi rawt wa yang, shi a hkrithpa hte danhkung nga ai hpung shingkang majaw, masha ni gaw lungpu ni hte ginlawng hku ni hta shang na mara ai. ²⁰ Dai shani e masha ni gaw tinang nawku na matu galaw da ai aja hpara sumla ni hte, gumhpraw hpara sumla ni hpe, sharu ni hte patsip ni hpang de kabai kau na mara ai: ²¹ gaja wa, ginding aga hpe ashun awam dat na nga, Yehowa rawt wa yang, shi a hkrithpa hte danhkung nga ai hpung shingkang majaw, masha ni gaw sharut n-gam hte lungbra re ai shara de shang na mara ai. ²² Ladi hte nsa sa ai shinggyim masha hpe hkum hpa myit; shi hpa hkaw a ta?

¹ - ³ Kaning rai nme law, yu mu, Zaw nawng zaw wa up ai Madu Yehowa gaw, Yerusalem mare hte Yuda mung na, myit manoi shara hte shamyet shanat shara hpe dawm kau na ra ai: lusha jarit yawng hpe mung, hka lu yawng hpe mung, n-gun atsam rawng ai wa, hpyen majan chye ai wa, tara agyi wa, myihtoi wa, n-wawt wa, salang wa; hpyen manga shi up ai bu, arawng lu ai wa, hpaji daw chye ai wa, hpaji maka pru ai wa, mandan chye bau ai ni yawng hpe, jahtum kau na ra ai. ⁴ Shanhte a ntsa e ma kaji ni hpe ngai du shatai nna, shanhte gaw chyu chyu ai ma a myit hte, shanhte a ntsa e up na mara ai. ⁵ Mung masha ni langai hte langai, htingbu ni langai hte langai shada da adip arip na mara ai: ma kaji gaw dingla wa hpe, hpa n hkaw ai wa gaw, arawng lu ai wa hpe, gumrawng gumtawng di na ra ai. ⁶ - ⁷ Masha langai mi gaw kawa a nta hta shi a kanau wa hpe dun la let, Nang gaw hpun palawng naw lu ndai; nang anhte a du tai nna, ndai hten rum ai hpe na a lata hte sharai u ga, nga nna tsun yang, kanau wa gaw, Ngai nan sharai lu nngai n rai; nye a nta hta muk mung, hpun palawng mung, n nga ai: mung masha ni a du ngai hpe hkum shatai myit, nga nna dai shani e dan dan tsun na ra ai. ⁸ Kaning rai nme law, Yehowa a hpung rawng ai myi hpe kamau shangun na matu, shanhte a tsun ai ga hte arawn alai shi hte nhtan shai nga ai majaw, Yerusalem mare gaw hten run mat sai; Yuda mung gaw kadawng mat sai. ⁹ Shanhte a myiman nsam, shanhte a lam sakse hkam nga ai; shanhte gaw tinang a yubak hpe Sodom masha ni zawn dan dan galaw nna, makoi magap ma ai n rai; shanhte gaw tinang hkum hpe shaza kau ma ai majaw, tinang a myit masin dingnye hkrum mu ga. ¹⁰ Dinghpring ai wa gaw, shi shapraw ai si sha lu ai majaw, shi hta a nga ai, ngu nna tsun mu. ¹¹ Tara n lang ai wa gaw, dingnye hkrum u ga; shi lata galaw ai amu, shi nan hkrum sha ai majaw, shi hta yak la nga ai. ¹² Nye a amyu masha ni hpe chyawm gaw, ma kaji ni shanhte hpe adip arip di nna, num ni shanhte a tsa e up ma ai. Nye a amyu e, nanhte hpe lam madun ai ni, nanhte hpe lam shadam nna, nanhte sa wa ai lam hpe, jahten kau ma ai. ¹³ Yehowa gaw mung masha ni hpe dawdan na matu, rawt tsap nga ai. ¹⁴ Yehowa gaw shi amyu a du salang ni hte dawdan hkat nga ai; dai tsabyi sun sha kau ai ni, nanhte nan rai nga myit dai: matsan mayan ni kaw na kashun la ai rai ni hpe, nanhte a nta ni hta mahkawng da ma ni ai: ¹⁵ nye a amyu masha ni hpe adip arip di kau nna, matsan mayan ni hpe myiman jasum ai gaw, hpa majaw rai ta? nga nna Zaw nawng zaw wa up ai, Madu Yehowa tsun nga ai. ¹⁶ - ¹⁷ Bai Yehowa gaw, Ziun shayi sha ni myit kaba ai hte, tinang du shadap let myi le le rai nawt hkawm nna, tinang lagaw lahkawn sharat ma ai majaw, Madu gaw, Ziun shayi sha ni a baw pungding hpe hpye shakan kau ya ai hte, Yehowa gaw shanhte a hpun palawng sharun kau ya nna, kaya jahkrum na mu ai. ¹⁸ - ²³ Dai shani e Madu gaw, shanhte a tsawm ai lagaw lahkawn ni, htanbam awa ni, gumrit ni, lakan ni, lahkawn ni, myiman magap ni, baw chyawp ni, hkarutum saidawng ni, shingkyit ni, lawban yep ni, lakhpoi ni, lachyawp ni, ladi shanghkawng ni, nhpau lawng ni, hpajawng ni, baw htinggrum ni, tingsan ni, jam na ni, kata palawng ni, bunghkaw ni hte myiman awa ni hpe, htawm kau na ra ai. ²⁴ Dai shaloi e manam pyaw ai baw a malai yat manam ai, shingkyit a malai sumri, kara hkri ai a malai baw hpye kan ai, lawai ai nba a malai lachyit sumding, tsawm htap ai a malai wan hkru ai hkang pru na ra ai. ²⁵ Na a lasha ni ri nhtu hte, na a share ninghkrin ni, hpyen majan hta, si mat na mara ai. ²⁶ Shi a chyinghka ni gaw hkrapngu hkrapngoi let sharung shayawt na mara ai: shi gaw shingran katsi ai shara e ga hta dung nga na ra ai.

¹ Dai shani e numsha sanit la langai mi hpe dun la nhtawm, Anhte gaw tinang a muk sha, tinang a hpun palawng bu hpun na ga ai; anhte hpe na a jan ni sha shamying la nna, anhte ntsa na kaya kahpa jahkoi kau ya mi, nga nna hpyi na mara ai. ² Dai shani e Yehowa a Makrung gaw tsawm pra ai hte arawng sadang pu na ra ai rai nna, mungdan a namsi gaw, lawt lu ai Israela masha ni a matu, kaja htum ai hte htaphtuk na ra ai. ³ - ⁴ Yehowa gaw tara dara ai wenyi, wan hkru ai wenyi hte, Ziun shayi sha ni a agang chyalang hpe kashin kamun kau nna, Yerusalem mare ka-ang na asai hpe yeng seng kau nhtawm, Ziun bum e hti nga nna, Yerusalem mare e ngam nga ai wa ngu ai, asak jahpan hta lawm ai, Yerusalem masha langai hte langai hpe, Chyoi pra ai wa, ngu na maru ai. ⁵ Yehowa gaw Ziun bum na nta ni hte de a shawa hpawng ni a ntsa e, shani e wanhkut sumwi, shana e htoi kabrim ai wan shinglet hpan da nna, de a arawng sadang yawng a ntsa e magap ka-up nga na ra ai. ⁶ Shani e jan kahtet yang, nbung laru hte marang htu yang, shingbyi shinggang na matu, sum langai mi kaap na ra ai.

¹ Ngai tsawra ai wa a tsabyi sun hpe lakap nna, tsawra ai wa hpe mahkawn mangoi ga, ngai mahkawn n ga. Ngai tsawra ai wa gaw su kawng e tsabyi sun langai mi lu ai: ² shi dai hpe htu lajang nna, nlung ni rawm kau nhtawm, kaja htum ai tsabyi ru ni hkai da wu ai; de a ka-ang e shi langchyi gap da nna, tsabyi shup ai htumrin tawk da wu ai: dai sun hta tsabyi si kaja si na shi myit mada nga timung, tsabyi chyalam hkrai si nga a hka. ³ Ya chyawm, Yerusalem mare na ni hte Yuda masha ni e, ngai hte nye a tsabyi sun lapran, hparan ya mi. ⁴ Ngai nye a tsabyi sun hta n galaw nna, naw galaw ra ai lam lama ma nga dam a ni? Ngai tsabyi si lu la na myit mada nga yang, hpa majaw tsabyi chyalam si nga a ta? ⁵ Ya nye a tsabyi sun hta ngai galaw na lam ngai nanhte hpe tsun dan made ga: de a nhpan hpe ngai run kau nna, masha ni dai hpe sha kau na mara ai: de a bunghku hpe ngai hpya kau nna, dai gaw kabye kau ai hkrum na ra ai. ⁶ Ngai dai hpe shakrin kau na we ai; kadai mung lakung ni hpe n krum kau ai hte, aga hpe htu kapun na n rai: ju hpun amyu myu tu pru na ra ai; de a ntsa e marang n htu u ga, ngai sumwi ni hpe hkangda na we ai. ⁷ Zaw nawng zaw wa up ai Yehowa a tsabyi sun chyawm gaw, Israela amyu rai nga ai; shi tsawra mai ai bawng gaw, Yuda masha ni rai nga ma ai: shi gaw tara ding ai hku myit mada timung, yu u, adip arip ai hkrai mu nga ai; dinghpring ai hpe myit mada timung, yu u, jahtau shabam ai hkrai na nga ai. ⁸ Tinang ni hkrai lamu ga ka-ang e dè nga nna, man ai shara n nga lu hkra, nta mi hte nta mi, hkauna mi hte hkauna mi matut la ai ni gaw, dingnye lu ma ai. ⁹ Zaw nawng zaw wa up ai Yehowa, nye a na hta tsun ai gaw, Gaja wa, galu kaba ai hte hkik la ai nta law law hta, rawng ai masha n nga nna, katsi katsang rai na ra ai. ¹⁰ Kaning rai nme law, tsabyi sun lawk shi gaw, lawk mi daram sha shapraw lu nna, nli htamshi hta na, htammi sha pru na ra ai. ¹¹ Chyaru lu na matu jahpawt jau jau rawt nna, chyaru nang let shana shalai dat ai ni gaw, dingnye lu ma ai. ¹² Shanhte a poi hta tingse, pahke, shupsheng, sumpyi hte tsabyi machyan lawm nga ai: Yehowa a magam bungli hpe chyawm gaw, shanhte hpa n nawn ai hte, shi a lata shachyen ai amu hpe hpa n dum ma ai. ¹³ Dai rai nna, nye a amyu masha ni gaw chye chyang ai myit n lu ai majaw, bawng rim mat wa ai hkrum nna, arawng lu ai ni kawsi kyet ai, yu maya ni gaw hpang kara let ai, hkrum ma ai. ¹⁴ Dai majaw Katsan ga gaw tinang a lawhpa ai hpe shalaw let, tinang a n-gup shadawn sharam n nga hkra mahka dat nna, shanhte a hpung shingkang, wunawng wuwa ni jahtau garu ai ni hte shanhte hte rau kabu gara ai ni gaw, dai de ru mat wa ma ai. ¹⁵ Shingrai hpa n hkaw ai ni gum dagup ai, arawng lu ai ni shagrit kau ai, myit kaba ai ni myiman sum ai, hkrum na ma ai. ¹⁶ Zaw nawng zaw wa up ai Yehowa chyawm gaw, tara hte shagrau ai hkrum nna, Chyoi pra re ai Karai Kasang gaw, dinghpring ai hte chyoi pra na ra ai. ¹⁷ Dai shaloi e sagu kasha ni gaw, tinang a udat shara e zawn, dai hta sha lu nna, katsi katsang tai wa ai sahti kunmi ni madu yu ai shara ni hta, malet nhprang manam ni shang sha lu na mara ai. ¹⁸ - ¹⁹ Masu ngu ai sumri hte mara dun nna, leng hpe sumri hte karawt ai zawn, yubak hpe dun karawt let, Yehowa lawan ruga; shi a amu anhte mu lu hkra, tin shapun shabyin u ga; anhte chye na lu hkra, Israela a Chyoi pra ai Wa a hpaji daw ai gaw ni wa ai hte dik wa ruga, nga nna tsun ai ni gaw dingnye lu ma ai. ²⁰ N kaja ai hpe kaja ai, kaja ai hpe n kaja ai, nga nna tsun ai ni; nhtoi a malai nsin, nsin a malai nhtoi; dwi ai a malai hka ai, hka ai a malai dwi ai hte galai kau ai ni gaw, dingnye lu ma ai. ²¹ Ngai hpaji rawng nngai, nga nna myit ai ni hte, tinang hkrum rai dum la ai ni gaw, dingnye lu ma ai. ²² - ²³ Tsabyi ru kru ni hte, tsi kayau ai chyaru mana maka lu let, sake manawn sha ai hte, tara n lang ai ni hpe shalawt dat nna, dinghpring ai ni a dinghpring ai lam hpe shingkan ai ni gaw, dingnye lu ma ai. ²⁴ Dai rai nna shanhte gaw Zaw nawng zaw wa up ai Yehowa a tara hpe gangkau nna, Israela a Chyoi pra ai Wa a mungga hpe n kaw n law di kau ma ai majaw, wan shinglet gaw yi hku hpe hkru kau ai hte, tsingdu chyahkraw gaw wan mang hta hkat mat wa ai zawn, shanhte a ru ni tsam mat wa nna, shanhte a pu ni, ga nhpu zawn kamawng mat na ra ai. ²⁵ Dai re ai majaw Yehowa gaw shi a amyu hpe pawt bu let, shi a lata ladawn nna, shanhte hpe adup kau mu ai; bum ni mung gari wa nna, amyu masha ni a si mang ni mare lam hkan e shanut shanaw zawn jawng nga ai: raitimung, shi a pawt sindawng ai gaw sim wa sai n rai; shi a lata naw a ladawn nga ai. ²⁶ Bai shi gaw sumtsan mung na amyu ni a matu dawnghkawn sharawt nhtawm, lamu ga htum ai kaw na ni hpe lahpyaw shaga nna, yu mu, shanhte gaw alawan du bang na mara ai: ²⁷ shanhte hta hki ba ai wa, kataw ai wa, yup nga ai wa hte yup pyaw ai wa, kadai mung n lawm nga ai; shanhte a shingkyit mung raw na n rai, shanhte a kyepdin sumri mung dut na n rai; ²⁸ shanhte a pala ni masen nga nna, ndan ni mung shachyen nga ai: gumra lahkru ni gaw hpai lung hte bung nna, leng dingsen ni gaw bungsha zawn chyai nga ai: ²⁹ shanhte a shabam ai nsen gaw, hkanghkyi yi a nsen hte bung nna, hkanghkyi hkalung zawn shabam na mara ai; rai sa, shanhte garu shabam let tinang shahpa hpe magra la na mara ai rai nna, hkye mawai la ai wa n nga ai majaw, dai hpe hpai la kau na mara ai. ³⁰ Dai shani e shanhte gaw nammukdara wu kadu ai nsen hte zawn, shanhte hpe wu atet nna, dai mung hpe mada yu yang, yu u, nsin sin ai hte shoihpa shoirang hkrai rai nga ai; de a sumwi de na nhtoi pyi, nsin chyip rai mat sai.

¹ Hkawhkam Uzia si ai shaning hta, Madu gaw, galu kaba nna tsaw htum ai tingnyang hta dung nga ai hpe ngai mu nngai; shi lawai ai hpun nba gaw nawku Htingnu ting hpring nga ai. ² Shi a ntsa e Serahpim tsap nga ma ai: langai hte langai singkaw kru kru tu ma ai; singkaw lahkawng hte tinang myiman magap; lahkawng hte tinang lagaw magap; lahkawng hte pyen ma ai. ³ Langai wa mi langai wa hpe, Zaw nawng zaw wa up ai Yehowa gaw, chyoi pra, chyoi pra, chyoi pra, rai nga ai; ginding aga ting shi a hpung shingkang hte hpring nga ai law, nga nna tsun jahtau ma ai. ⁴ Shing nga tsun jahtau ai wa a nsen majaw, chyinghka hkinbawng ni ashun awam nga nna, nta ting wanhkut hte hpring nga ai. ⁵ Dai rai nna ngai gaw, Ngai wa dingnye lu nngai; ngai htum mat ni ai; ngai nan n san n seng ai n-gup tu ninglen, n san n seng ai n-gup tu ai amyu ka-ang e dè nga timung, Zaw nawng zaw wa up ai Yehowa ngu ai, Hkawhkam wa hpe, nye myi hte nan mu lu se hka, nga nna tsun nngai. ⁶ - ⁷ Shaloi Serahpim langai mi gaw, tawn hkungri ntsa na, lakap hte matep la ai wan n-ga, shi a lata hta lang let, ngai hpang de pyen sa nhtawm, dai hte nye a n-gup ahtawk let, Yu u, dai gaw na a nten hpe hkra sai; na a mara hpe yeng seng kau sai; na a yubak hpe mung raw dat kau nu ai, nga ai. ⁸ Bai ngai gaw, Ngai kadai hpe shangun dat na I? anhte a matu kadai wa sa na I? nga nna Madu san ai nsen hpe na nngai. Dai rai nna ngai gaw, Ngai nga nga nngai, ngai hpe shangun dat e, ngu nna htan we ai. ⁹ Shi gaw, Ndai amyu hpang de sa nhtawm, Nanhte na ninglen n chye na lu na mu ai; mu ninglen n mu lu na mu ai, ngu nna tsun mu. ¹⁰ Shanhte gaw, tinang myi hte n mu lu na hte, na hte n na lu nna, myit hte n chye na lu mu ga she, myit n kayin nna, shamai shatsai ai n hkrum lu hkra, shanhte a myit masin hpe shamak kau ya nna, shanhte a na hpe lahpang kau ya ai hte, shanhte a myi hpe pat kau ya mu, nga ai. ¹¹ - ¹² Shaloi ngai gaw, Madu e, gade wa na na rai ta? ngu nna san we yang, shi gaw, Mare ni hte nta ni hta masha n nga hkra shaza kau ai hkrum ai hte, mungdan ting atsai awai katsi katsang rai nga nna, Yehowa gaw mung masha ni hpe sumtsan mung de jahtawt kau nna, shingran katsi ai shara ni dai mungdan ka-ang e law wa ai du hkra, na na ra ai. ¹³ Dai mungdan hta htamshi na htammi naw ngam nga timung, dai pyi shaza kau ai hkrum na ra ai: raitimung, magyeng hpun hte wamyi hpun hpe kran kau nna, hpun du naw tu nga ai zawn, dai hpundu hta chyoi pra ai aru arat naw prut na ra ai.

¹ Yuda hkawhkam, Uzia a kashu, Yohtam a kasha Ahaza a lakhtak e, Suri hkawhkam Rezin hte, Israela hkawhkam Remalia kasha Peka gaw, Yerusalem hpe lung gasat timung, dai hpe dang kau lu mu ai n rai. ² Shingrai, Suri mung gaw Ehprim mung hte matut nga ai, ngu nna Dawi dap na wa hpe tsun shana mu yang, nam maling na hpun lap gaw nbung e shamu shamawt ai zawn, shi a myit masin hte mung masha ni a myit masin gari nga malu ai. ³ - ⁴ Shaloi Yehowa gaw Esaia hpe, Nang hte rau na nsha Sheara-yashub pru mu; hpun nba jaw ai wa a ga dachyawk lam a lahta singgat baw e Ahaza hpe tau la nhtawm, Sadi let, asim sha nga u; wanhkut sha mawng ai, ndai wanhtaw daw lahkawng ngu ai, Suri mung na Rezin hte Remalia kasha pawt sindawng bu ai a majaw, hkum hkrit et, gawng hkum run et. ⁵ - ⁷ Suri mung, Ehprim mung hte Remalia kasha, na a lam n hkru ai hpaji daw nna, (v 6) Anhte gaw Yuda mung hpe lung shatsang ga; dai hpe shang gasat la nna, Tabela kasha hpe de a hkawhkam shatai ga, nga nna tsun timung, (v 7) Madu Yehowa gaw, Dai lam grin lu na n rai, gaja wa byin lu na n rai; ⁸ - ⁹ kaning rai nme law, Suri mung a baw Damasku, mare, Damasku mare a baw Rezin; (v 9) Ehprim mung a baw Samari mare, Samari mare a baw Remali kasha rai nga timung, Ehprim mung hta amyu n tai hkra, kru shi manga ning laman e agrawp kau ai hkrum na ra ai. Nanhte n kam myit yang gaw, gaja wa grin lu na n rai, nga nna tsun ai. ¹⁰ - ¹¹ Dai hta kaga Yehowa gaw Ahaza hpe, (v 11) Na a Karai Kasang Yehowa kaw lamik kumla hpyi u; sung ai shara e raitimung, matsaw lahta tang e raitimung, hpyi u, ngu wu ai. ¹² Ahaza chyawm gaw, Ngai n hpyi na nngai; Yehowa hpe n chyam yu na nngai, nga ai. ¹³ Shaloi shi gaw, Dawi a dap ni e, madat mu: nanhte gaw masha hpe n kaw n law di na, hpa n nawn ai hta n-ga, nye a Karai Kasang hpe mung, n kaw n law di na myit ni? ¹⁴ Dai re ai majaw Madu shi nan nanhte hpe lamik kumla madun dan na ra ai: yu mu, shayi hkawnsek gaw gawng li nga nna, shadang sha shangai na ra ai; shi a amying hpe, Emanuela shamying ya na ru ai. ¹⁵ Shi gaw n kaja ai hpe chye gangkau nna, kaja ai hpe chye lata la jang, htawbat hte lagat jahku sha lu na ra ai: ¹⁶ kaning rai nme law, dai ma gaw n kaja ai hpe gangkau na, kaja ai hpe lata la na, garai n chye ai laman e, nang hkrit gari ai hkawhkam yan a mungdan gaw, gram mat na ra ai. ¹⁷ Ehprim amyu gaw Yuda amyu hte hka wa ai shani kaw nna, ya du hkra n byin yu ai shani nhtoi ni, Yehowa gaw na a ntsa e mung, na a amyu baw a ntsa e mung, na nwa a nta ntsa e mung, shapraw na ra ai: dai gaw Asuri hkawhkam nan rai nga ai. ¹⁸ - ¹⁹ Dai shani e Yehowa gaw, Egutu hka gai ni htum ai maga de nga ai jinu hte, Asuri mung e nga ai lagat hpe lahpyaw shaga ai majaw, shanhte nlang sa du nna, mahkra gaw shingran katsi ai kadit ni hta mung, lungbra shara ni hta mung, ju hpun nhpan ni yawng hta mung, udat shara ni yawng hta mung, shanu nga na mara ai. ²⁰ Dai shani e, hka kaba wora hkran e nga ai, Asuri hkawhkam ngu ai, shap la ai kara nhkyi hte; Madu gaw baw kara hte lagaw mun hpe shangun kau nna, n-gup mun hpe pyi shakrin kau na ra ai. ²¹ - ²² Dai shani e masha wa gaw, dumsu langai mi hte sagu yi lahkawng rem da yang, shi nga chyu nhpaw n-ya lu la ai majaw htawbat sha lu na ra ai: kaning rai nme law, dai mung hta ngam nga ai ni nlang hte gaw, htawbat hte lagat jahku sha lu na mara ai. ²³ Dai shani e, gumhpraw lap hkying mi ging ai, tsabyi ru hkying mi tu ai sun shagu hta e, ju hpun hte tsing hkrai tu na ra ai. ²⁴ Mungdan ting hta ju hpun hte tsing hkrai ka-up nga ai majaw, ndan hte pala lang let, dai de sa na mara ai. ²⁵ Shanghkawp hte chye kapun ai hkai bang mahkra hta, ju hpun hte tsing hkrai tu ai majaw, kadai n shang lu nna, dai yang dumsu ni a udat shara, sagu ni a kabye shara, tai na ra ai, nga nna tsun ai.

¹ Bai Yehowa gaw, Hpunpyen kaba la nhtawm, dai hta e, “Mahera-shalala-hash-bat a matu,” ngu nna masha ka ai hku ka da u; ² sakse hkam na matu kangka re ai sakse ngai shaga na nngai; dai gaw hkinjawng Uria hte Yeberehki a kasha Zehkaria yan rai nga ma ai, nga nna ngai hpe tsun ai. ³ Dai hpang myihtoi jan kaw ngai shang nna, shi na-um nasin re ai hte shadang sha shangai wu ai. Shaloi Yehowa gaw, Dai ma hpe Mahera-shalala hash-bat, ngu nna shamying u. ⁴ Kaning rai nme law, dai ma gaw, Nu e, wa e, nga nna garai n chye shaga yang, Damasku mare na sutgan hte, Samari mung na kashun la ai lanep hpe, Asuri hkawhkam magawn la kau na ra ai, nga ai. ⁵ - ⁸ Bai Yehowa ngai hpe tsun ai gaw, (v 6) Ndai amyu gaw angwi sha lwi ai Shilo hkaraw na hka hpe gangkau nna, Rezin hte Remalia kasha hta kabu ma ai majaw, (v 7) yu mu, Madu gaw, Asuri hkawhkam hte shi a hpung shingkang ting ngu ai, galu kaba ai hte hpungla ja la ai hkanu hpe, shanhte a ntsa e lwi shangun nna, dai gaw hka hkin-gau hte daru ni hpe lim kau ai hte, (v 8) Yuda mung du hkra dep nhtawm, dai hpe mung lwi ka-up nna, adu du hkra dep na ra ai: Emanuela e, de a singkaw ni kahpyen dat nna, na a mung ting ka-up nga na ra ai law, nga ai. ⁹ - ¹⁰ Amyu baw ni e, kabring kabrawng nga timung, agrawp kau ai hkrum mu; sumtsan mung na ni e, madat mara nga mu; shingkyit kyit timung, agrawp kau ai hkrum mu; (v 10) Hpaji daw mu, dai gaw byak mat na ra ai; hpajang da mu, dai gaw grin lu na n rai: kaning rai nme law, Karai Kasang anhte hte rau rai nga ai. ¹¹ - ¹² Ndai amyu masha ni a lam hta n hkan hkawm hkra, Yehowa nan n-gun ja ai lata hte ngai hpe sharin let tsun ai gaw, (v 12) Gumle gumlau re ai, nga nna ndai amyu masha ni tsun ai lam shagu hta, Gumle gumlau hkum tsun lawm myit: shanhte hkrit ga ai lam hpe hkum hkrit myit, hkum kajawng myit. ¹³ Zaw nawng zaw wa up ai Yehowa hpe hkungga lara mu; shi hpe hkrit kamyin mu, shi a lam kajawng nga mu. ¹⁴ Dai rai yang shi gaw chyoi pra ai shingbyi shara tai na ra ai: raitimung, Israela dap lahkawng a matu, ahtu kataw na nlung hte, myit kataw shangun ai lunghkrung, Yerusalem masha ni a matu, mahkam hte ndaw, shi tai na ra ai: ¹⁵ law law wa dai hta ahtu kataw nna, kadawng hkrat ai, agrawp kau ai, mahkam hte ndaw hta lu ai, hkrum na mara ai, nga ai. ¹⁶ Nye a sape ni kaw, ndai sakse ga hpe kyem da u, ndai tara hpe dazik shakap da u. ¹⁷ Ngai mahtang, Yaku a nta hpe myiman makoi kau ai Yehowa hpe ala nga nna, shi hpe myit mada na nngai. ¹⁸ Yu u, ngai mung, Yehowa jaw ai ngai sha ni mung, Ziun bum e shanu nga ai Zaw nawng zaw wa up ai Yehowa kaw na, Israela amyu hta, lamik kumla hte mauhpa lam tai nga ga ai. ¹⁹ Nat shung ai ni hte, mandan bau jawp kahte ai ni hpe tam mu, nga nna nanhte hpe tsun myit yang, masha amyu gaw tinang a Karai Kasang hpe tam mai na, n rai ni? hkrung nga ai ni a amu, si mat ai ni hpe mai san na rai ni? ²⁰ Tara hte sakes ga hpe madat mara mu; shanhte tsun ai lam ndai ga hte nbung yang, gaja wa, shanhte a matu jahpawt manap n nga ai. ²¹ Shanhte gaw hki ba ai hte kawsi hkrum let lai mat wa na mara ai: kawsi hkrum yang, shanhte myit kahtet nna, ntsa de dap mada yu let, tinang a hkawhkam wa hte, tinang a Karai Kasang hpe dagam kau na mara ai: ²² ga de mada yu yang, yu mu, ru tsang ai, nsin sin ai hte myit htum ai sin mang hkrai rai nga ai: shanhte gaw nsin htat ai shara de gawt kau ai hkrum na mara ai. ²³ Raitimung, myit htum hkrum ai mung hta, ya gaw sin mang n nga sai: moi shawng de Zebulun mung hte Naphtali mung hpe shagrit kau timung, htawmhpang e, nawng makau lam, Yawdan hka wora hkran na, amyu kaga ni nga ai Galile mung, hpe, arawng sadang hte hpring shangun wu ai.

¹ Nsin hta hkawm nga ai amyu gaw, nhtoi kaba mu lu ma ai; si hkrung si htan mung na shingnip kata e shanu nga ai ni a ntsa e, nhtoi dawng pru wa sai. ² Nang gaw mung masha ni hpe shalaw nna, shanhte kabu gara ai hpe jat ya mu ai: shanhte gaw nmut ta e kabu gara ai hte, lanep karan ai ni kabu jahtau ai zawn, na a man e kabu gara nga ma ai. ³ Kaning rai nme law, shi shanhte hpe hpai shangun ai kandang, shanhte hpe adup ai hkawn hte, hpareng wa a ri hpe, Midian lakhtak e byin ai zawn, nang agrawp kau nu ai. ⁴ Hpyen luksuk laba ni a hpyen kyepdin hte, sai galu ai hpun nba ni yawng, wan nat na matu wan shat tai na ra ai. ⁵ Kaning rai nme law, anhte a matu kasha shangai nna, anhte hpe shadang sha jaw mi ai: shi a lahpa ntsa e up ai ahkang mara nga na rai nna, shi a amying hpe, Mauhpa wa, Hpaji daw ai wa, Daru Magam Karai Wa, Htani htana Kawa, Ngwi pyaw Madu, ngu nna shamying na mu ai. ⁶ Shi a ahkang aya hte, shi tawn da ai ngwi pyaw lam gaw law htam wa nna, htum ngu ai n nga na sai; Dawi a tingnyang ntsa e dung let, dai mungdan hpe shi shagrin tawn da nna, tara hte dinghpring ai hku hkan ai majaw, dai gaw htani htana prat dingsa e grin nga na ra ai. Zaw nawng zaw wa up ai Yehowa a nsu nnawn myit dai lam shabyin nu ai. ⁷ Madu gaw Yaku hpang de mungga shangun dat nna, dai gaw Israela ntsa e di hkrat nga ai. ⁸ - ⁹ Wut bunghku ni run mat timung, anhte tawk ai nlung hte gaw da na ga ai; lakum hpun ni kran kau timung, de a malai arit hpun hkai na ga ai, nga nna gumrawng ai hte myit kaba let, ga tsun ai Ehprim amyu hte, Samari masha ni nlang hte gaw, dum chye lu na mara ai. ¹⁰ - ¹¹ Dai re ai majaw Yehowa gaw Rezin a hpyen ni hpe shi hpang de sharawt nna, Ehprim a hpyen ni hpe shadut nhtawm, Suri masha ni man de, Hpilisti masha ni shingdu de, n-gup mahka nna, Israela amyu hpe araw sha kau na mara ai. Raitimung, shi a pawt sindawng ai gaw sim wa sai n rai; shi a lata naw a ladawn nga ai. ¹² Amyu masha ni chyawm gaw, ari jaw ai wa hpang de kayin wa ai n rai; Zaw nawng zaw wa up ai Yehowa hpe tam ma ai n rai. ¹³ Dai re ai majaw Yehowa gaw Israela amyu hta na, baw hte nmai hpe mung, maun lakung hte mai-aw hpun hpe mung, lani mi hta sha kran kau na ra ai. ¹⁴ Salang wa hte arawng lu ai wa, abaw rai nga ai; masu ga sharin ai myihtoi chyawm gaw, nmai rai nga ai. ¹⁵ Dai amyu hpe woi awn ai ni, shanhte hpe lam shayit mu ai; shanhte hpe hkan nang ai mung, shamyit kau ai hkrum ma ai. ¹⁶ Dai re ai majaw Madu gaw shanhte shabrang ni hta n kabu lu ai hte, shanhte a chyahkrai ma ni hte gaida ni hpe, matsan n dum nga ai: kaning rai nme law, yawng hte gaw matsa mawa ga tsun ai hte, n shawp ai amu galaw ai ni hkrai rai nga nna, n-gup shagu angawk ai ga tsun nga ma ai. Dai rai nna shi a pawt sindawng ai gaw sim wa sai n rai; shi a lata naw a ladawn nga ai. ¹⁷ N hkru n hkra ai gaw wan zawn hkru nga nna, ju hpun hte tsing hpe shamyit kau mu ai; dai gaw maling na singwum ni hta mung kap nna, wanhkut shadaw ntsa de mawng nga ai. ¹⁸ Zaw nawng zaw wa up ai Yehowa a pawt sindawng ai a majaw, mungdan gaw hkat mat wa nna, mung masha ni gaw wan shat zawn rai nga ma ai: kadai mung tinang kahpu kanau wa hpe pyi n lahpawt ma ai. ¹⁹ Hkra maga gare sha timung, kawsi naw kyet na ra ai; pai maga kawa sha timung hkru kat na n rai; langai hte langai tinang a lata shan hpe, kawa sha na mara ai. ²⁰ Manashe amyu gaw Ehprim amyu hpe, Ehprim amyu gaw Manashe amyu hpe kawa sha na mara ai; shan lahkawng gaw rau, Yuda amyu hpe gumlau na mara ai: raitimung, shi a pawt sindawng ai gaw sim wa sai n rai; shi a lata naw a ladawn nga ai.

¹ - ² Matsan mayan ni hpe sum shangun nna, nni nkri hkrum ai, nye a amyu masha ni hpe, map sha maw sha ai hte, gaida gaina ni hpe lanep shatai let, chyahkrai nmai ma ni a sutgan kashun la lu hkra, n teng n man ai tara tawn da ai ni hte, myit magaw ai laika ka da ai chyare ni gaw, dingnye lu ma ai. ³ Nanhte hpe kawan katsan yu ai shani hte, sumtsan mung de na nanhte a ntsa e du na ra ai hten byak ai hta, nanhte kaning rai na myit ta? karum ai lu la hkra, kadai hpang de hprawng na myit ta? nanhte a sutgan hpe kanang mahkawng da na myit ta? ⁴ Ngai n lawm yang, bawngdung ai ni npu e shanhte gum dagup nna, sat kau hkrum ai ni a npu e taw na mara ai; raitimung, shi a pawt sindawng ai gaw sim wa sai n rai; shi a lata naw a ladawn nga ai. ⁵ Asuri wa e, nye a pawt sindawng ai ri nang rai nga nna, nang lang ai hkawn, nye n-yun bu ai myit rai nga ai. ⁶ Awu asin re ai amyu hpang de ngai shi hpe shangun dat nna, ngai ndawng ai amyu hpe, kashun kashe hpya kau nhtawm, lanep la na hte, mare lam hkumpup zawn shanhte hpe kabye kau na lam, hkangda na we ai. ⁷ Raitimung, shi gaw dai lam n nawn, shi a kraw e dai hku n myit nga ai: masha amyu law law hpe jahten shabyak na hte shamyit kau na hkrai, shi myit ra nga ai. ⁸ Kaning rai nme law, shi gaw, Nye a hpyenbu ni yawng, hkawhkam rai masai, n rai ni? ⁹ Hkalna mare gaw Hkarahkeme zawn, Hamat mare gaw Arpad zawn, Samari mare gaw Damasku zawn rai nga ai, n rai ni? ¹⁰ - ¹¹ Yerusalem hte Samari mung na hpara sumla ni hta, grau kaja ai hpara sumla ni hpe, nawku ai mungdan ni hpe ngai kashun la ai zawn, Samari hte de a hpara sumla ni hpe ngai di lu ai hte maren, Yerusalem hte de a hpara sumla ni hpe di lu na, n rai ni? nga ai. ¹² Dai re ai majaw, Madu gaw, Ziun bum hte Yerulalem ntsa e, shi a magam bungli mahkra hpe shangut nhtawm, Asuri hkawhkam a gumrawng gumtawng ai myit hte, grang nna dap mada ai myiman hpe, ngai kawan katsan yu na we ai. ¹³ Kaning rai nme law, shi gaw, Nye a lata a n-gun, nye a hpaji hte, ndai ngai galaw se ai; ngai mahtang nyan rawng nngai; masha amyu ni a lamu ga jarit ngai sit kau nna, shanhte a arung arai hpe ngai kashun la nngai; share ninghkrin wa zawn, tingnyang hta dung ai ni hpe ngai shayu kau nngai. ¹⁴ Utsip mu ai zawn, nye a lata gaw amyu masha ni a aja gumhpraw hpe mu hkrup sai: kau da ai udi magawn la ai zawn, ngai gaw mungkan ting hpe magawn la nngai: singkaw shamu ai mung, n-gup mahka nna jawp ai mung, langai mi muk n nga ai, nga ai. ¹⁵ Nwa gaw, lang ai wa hpe gumrawng lu a ni? zingret gaw ret ai wa hta, grau a ni? daw hkrawng gaw tinang madu hpe shadaw mai ai hte, ri tawng gaw lang ai wa hpe shamawt lu a ni? ¹⁶ Dai re ai majaw, Zaw nawng zaw wa up ai Madu Yehowa gaw, dai hkawhkam a hpum bawng ai ni a ka-ang e, lasi lamun shashawn na ra ai; shi a arawng sadang npu e wan hkru ai zawn hkru na ra ai. ¹⁷ - ¹⁸ Israela amyu a nhtoi gaw, awan, shi a Chyoi pra ai wa gaw, wan shinglet tai na ra ai: dai gaw lani mi hta sha, dai hkawhkam wa a ju hpun ni hte tsing hpe hkru nna, Yehowa gaw shi arawng lu ai maling hpe mung, nsi naisi tu ai hkauna hpe mung, aru hte nawng, jahtum kau ai majaw, machyi hkrum ai wa zawn shi n-gun yawm mat na ra ai. ¹⁹ Naw ngam nga ai maling na hpun ni gaw, n law nga ai majaw, ma kaji ka matsing lu na ra ai. ²⁰ Dai shani kaw nna naw ngam nga ai Israela masha ni hte, lawt lu ai Yaku a masha ni gaw shanhte hpe zingri ai wa hta bai n shamyet nga ai sha, kangka re ai myit hte, Israela Chyoi pra ai Wa Yehowa hta shamyet shanat nga na mara ai. ²¹ Madat dingsat ngu ai, Yaku amyu hta ngam nga ai ni gaw, Daru Magam Karai Wa hpang de nhtang wa na mara ai. ²² Israela amyu e, na a masha ni gaw nammukdara zaibru daram law nga timung, madat dingsat chyu sha nhtang wa na ra ai: dinghpring ai hte tawn da sai dawdan ai lam dik wa na ra ai. ²³ Kaning rai nme law, Zaw nawng zaw wa up ai Madu Yehowa myit shatawng da sai hte maren, mungkan ga ka-ang e ngut hkra shabyin na ra ai. ²⁴ Dai re ai majaw, Zaw nawng zaw wa up ai Madu Yehowa gaw, Ziun bum e shanu nga ai nye a amyu e, Asuri wa gaw ri tawng hte nang hpe kayat nna, Egutu masha ni zawn ri numdu hte adup timung, shi hpe hkum hkrit et: ²⁵ Kaning rai nme law, gade n na yang nang hpe shaang ai pawt bu ai gaw sim mat nna, shanhte hpe jahten na nga pawt bu na ra ai, nga ai. ²⁶ Shingrai, Oreb lunghkrung makau e Midian masha ni hpe sat kau ai zawn, ndai wa hpe zingri zingrat na matu, Zaw nawng zaw wa up ai Yehowa gaw, gumlau sharawt na ra ai: shi a dawhkrawng gaw nawng ntsa e ladawn nga ai hte maren, Egutu mung e di ai zawn, dai hpe bai ladawn na ra ai. ²⁷ Dai shani e, shi nang hpe gun shangun ai lit, na a lahpa hta na, nang hpe hpai shangun ai kangdang, na a du hta na, shayu kau na ra ai: du bau ai majaw, dandang agrawp mat nga ai. ²⁸ Shi gaw Aiat mare de du sai; Migron mare ga lai wa sai; Mikma mare e hpyen arung arai ni hpe tawn da nu ai; ²⁹ bum lapran hku lai masai; Geba mare e but nga ma ai; Rama mare hkrit kajawng nga ai; Shawlu a mare Gibea hprawng nga ai; ³⁰ - ³¹ Galim shayi sha e, garu jahtau u; Laisha mare e, madat mara u; nni nkri hkrum ai Anahtot e; Madmena mare hprawng htawt mat sai; Gebim masha ni gaw lawt lu hkra hprawng ma ai. ³² Dai ni e pyi Noba mare e shi but na ra ai: Ziun shayi sha a bum ngu ai, Yerusalem kawng hpe shaang nna, shi a lata shada nga ai. ³³ Yu mu, Zaw nawng zaw wa up ai Madu Yehowa gaw hkrithpa atsam hte lakung lakying ni hpe krum kau na ra ai; tsaw la ai ni hpe kran kau nna, kaba ai ni hpe shanem kau na ra ai. ³⁴ Shi gaw nam maling na singwum ni hpe, nhtu hte hkyen kau nna, Lebanon hpun ni gaw n-gun ja ai wa a lata hte kadawng mat na mara ai.

¹ Raitimung, Yese amyu a ndu hta nnaw rawt nna, shi a aru ni hta na makrung gaw, asi si na ra ai. ² Yehowa a wenyi ngu ai, hpaji byeng-ya hte nyan jaw ai wenyi, hpaji daw ai hte daru magam rawng ai wenyi, chye chyang ai hte Yehowa hpe hkrit hkungga ai wenyi, shi a ntsa e shanu nga na ra ai: ³ shi gaw Yehowa hpe hkrit hkungga ai hta awng sharawng nga ai rai nna, shi mu hkrup ai hte maren n dawdan ai hte, na hkrup ai hte maren n jeyang na ra ai: ⁴ shi gaw, dinghpring ai hku hkan let, matsan mayan ni hpe tara dara nna, myit malang ai hku hkan let, ga ntsa na myit gyip ai ni a hpang maga de dawdan na ra ai; shi n-gup ngu ai shingna hte ga ntsa hpe ari jaw nna, shi nten na pru ai nsoi nsa hte, tara n lang ai ni hpe sat kau na ra ai. ⁵ Dinghpring ai gaw shi nshang a shingkyit, kangka re ai gaw shi hkum hkrang a shingkyit, rai nga ai. ⁶ Shingrai chyahkyawn gaw sagu kasha hte rau shanu nga nna, rawng gawk gaw bainam kasha hte rau hpum nga na ra ai; dumsu kasha, hkanghkyi hkalung hte hpum sau ai yamnga gaw, rau hkawm sa nna, ma kaji shanhte hpe dun woi na ra ai. ⁷ Dumsu hte tsap rau ushat sha nna, de a hkalung ni rau hpum nga na mara ai: hkanghkyi gaw dumsu zawn yi hku sha na ra ai. ⁸ Chyu chyu ai ma gaw, pu htum a tsip ntsa e ginsup lu nna, chyu hka ai ma gaw, pu hkram hku hta shi a lata manaw bang lu na ra ai. ⁹ Nye a chyoi pra ai bum ting hta, shada da zingri ai hte jahten shaza hkat na n rai; kaning rai nme law, nammukdara hka gaw shi a shara hpe lim kau ai zawn, Yehowa hpe chye chyang ai lam, mungkan ting pri rai na ra ai. ¹⁰ Dai aten e Yese a aru gaw, amyu baw ni a matu danhkung ai dawnghkawn rai nga na hte, maigan amyu ni shi hpang de ju wa nna, shi shanu nga ai shara gaw, hpung shingkang rawng na ra ai. ¹¹ Dai aten e, Madu gaw, lahkawng lang ngu na, shi a lata bai ladawn nna, naw ngam nga ai, shi a amyu masha ni hpe, Asuri mung, Egutu mung, Pahtro mung, Hkusha mung, Elam mung, Shina mung, Hamat mung hte nammukdara zunlawng ni hta na, mawai la na ra ai. ¹² Bai shi gaw, masha amyu ni a matu dawnghkawn sharawt nhtawm, shapraw kau hkrum ai Israela amyu masha ni hte, shabra kau hkrum ai Yuda masha ni hpe lamu ga man mali kaw na shaga jahpawng la na maru ai. ¹³ Ehprim amyu a manawn masham myit sim mat nna, Yuda amyu hpe sharu shatsang ai ni mung, htum mat hkrum na mara ai: Ehprim amyu gaw Yuda amyu hpe manawn masham lu na n rai; Yuda amyu mung Ehprim amyu hpe sharu shatsang na, n rai. ¹⁴ Shanhte gaw sinna maga de nga ai Hpilisti masha ni hpe htim gasat na mara ai; sinpraw maga na kashu kasha ni a sutgan hpe, rau kashun la na mara ai: Edom hte Moba hpe, shanhte gasat dang kau nna, Ammon a kashu kasha ni gaw, shanhte hpe madat mara na mara ai. ¹⁵ Yehowa mung, Egutu panglai a shinglet hpe atsai awai dawm kau nna, shi a kahtet la ai nbung hte rau, dai Hkanu ntsa e shi a lata nwat ai hte, dai hpe hkaraw sanit kayat shatai kau nhtawm, masha ni hpe hkarang ntsa hku rap wa shangun na ra ai. ¹⁶ Israela amyu gaw Egutu mung na pru lung wa yang na zawn, Asuri mung na naw ngam nga ai, shi a amyu masha ni a masat dingsat matu, nmaw lam naw tai na ra ai.

¹ Dai shani e nang gaw, Yehowa e, ngai nang hpe shakawn na de ai; nang ngai hpe pawt bu timung, myit bai kawp wa nna, ngai hpe shangwi shapyaw ya ndai. ² Yu mu, Karai Wa gaw ngai hpe hkyehkrang la ai wa rai nga ai; ngai shi hta shamyet shanat nga nna, hkrit kajawng na n rai: kaning rai nme law, Yehowa gaw, rai sa, Yehowa nan, nye a n-gun lagaw hte mahkawn mangoi lam rai nga ai: shi gaw, ngai hpe hkyehkrang la ai Madu tai wa sai, nga nna tsun na ndai. ³ Dai re ai majaw nanhte gaw, hkyehkrang la ai hka htung ni hta, kabu gara ai myit hte, hka ja lu na marin dai. ⁴ Bai, dai shani e nanhte gaw, Yehowa a chyeju dum mu; shi a amying ningsang hpe kajai gumhkawng mu; shi a uphkang ai lam, amyu baw ni hpe shana ya mu; shi amying ningsang galu kaba nga ai hpe, chye shangun mu. ⁵ Yehowa hpe mahkawn mangoi mu; shi gaw daru magam bungli shachyen nu ai: mungkan ting dai hpe chye na mu ga. ⁶ Ziun bum hta shanu ai jan e, na a ka-ang e Israela Chyoi pra ai Wa gaw galu kaba nga ai majaw, garu jahtau u, kabu ninglaw u, nga nna tsun na ra ai.

¹ Amot a kasha Esaia gaw, Babelon mare hpe shaang nna, shapraw ai myihtoi ga, da ndai rai nga ai: ² Krin ai bum ntsa e dawnghkawn sharawt mu; nsen kaba hte shanhte hpe jahtau mu; shanhte gaw du magam ni a chyinghka ni hta shang lu hkra, lata wak mu. ³ Nye a lam hta tinang hkum nawng kau ai ni hpe ngai htet da nna, ngai pawt sindawng ai shakawp na matu, nye a share ninghkrin ni hte nye a arawng sadang hta ninglaw ai ni hpe, ngai shaga la ni ai. ⁴ Masha wunawng wuwa kaba wu ngoi ai zawn, bum ni a ntsa e wu ngoi a hka! Masha amyu ni a mungdan ni zuphpawng nga ma ai majaw, wu kadu a hka! Zaw nawng zaw wa up ai Yehowa gaw hpyen gasat na matu amyu baw ni hpe hpyen saw nga ai. ⁵ Mungdan ting hpe jahten shabyak na matu, Yehowa hte rau, pawt sindawng ai hpyen ri nhtu ni gaw, sumtsan mung kaw nna, lamu htum ai de na, du shajang ma ai. ⁶ Yehowa a nhtoi ni wa ai majaw, sharung shayawt nga mu; dai gaw, N-gun Chyalai rawng ai wa kaw na shoihpa shoirang zawn, du na ra ai. ⁷ Dai re ai majaw, lata yawng kya noi mat nna, minla shagu byaw mat na ra ai: ⁸ shanhte mak mat na mara ai; ru tsang ai hte yawnhkyen ai hkrum na mara ai; shinggyim machyi ai num zawn, machyi hkrum na mara ai; shanhte mau mahka let, shada da azi yu na mara ai; shanhte a myiman gaw wan zawn hkyeng na ra ai. ⁹ Yu u, dai mungdan hpe katsi katsang shagram kau nna, dai hta nga ai yubak kap ai ni hpe shamyit kau na matu, yak la ai Yehowa a nhtoi gaw, pawt sindawng nna n-yun bu ai hte, du na ra ai. ¹⁰ Kaning rai nme law, sumsing lamu na shagan ni hte, de a maka kumla ni gaw nhtoi htoi na n rai; ajan pru timung nsin sin nna, shata gaw nhtoi n htoi nga ai. ¹¹ Ngai gaw mungkan ga a yubak hpe mung, tara n lang ai ni a shut hpyit ai hpe mung, sagawn yu nna, gumrawng ai ni a gumrawng gumtawng ai hpe shasim kau ai hte, n hkru ai ni a myit kaba ai hpe shagrit kau na we ai. ¹² Shinggyim masha gaw ja jet daram, yu maya wa gaw Ohpira ja daram, n law mat hkra, ngai shabyin na we ai. ¹³ Dai re ai majaw, Zaw nawng zaw wa up ai Yehowa a pawt sindawng ai hte shi n-yun bu ai nhtoi hta e, ngai gaw sumsing lamu hpe ashun awam dat nna, ginding aga gaw de a shara na gari htawt mat na ra ai. ¹⁴ Shingrai mung masha ni gaw, mai jawm na shan nga hte, kadai n rem ai sagu zawn, langai hte langai tinang htingbu wa hpang de myiman yawng nna, tinang buga de hprawng wa na mara ai. ¹⁵ Mu hkrup ai ni yawng hpe ri hte galun htinggrang kau nna, rim la hkrum ai ni nlang, nhtu hte si na mara ai. ¹⁶ Shanhte a ma kaji ni hpe mung, tinang man e adit sat kau nhtawm, nta ni hpe hpya kau ya nna, madu jan ni hpe kamu roi kau ya ai, hkrum na mara ai. ¹⁷ Yu u, shanhte hpe gasat na matu, Medi masha ni hpe ngai sharawt na nngai; shanhte gaw gumhpraw hpe n nawn, aja hpe mung n ra ma ai. ¹⁸ Shanhte a ndan ni shabrang ni hpe adup agrawp kau nna, ma chyangai ni hpe matsan n chye dum na hte, shanhte a myi gaw ma kaji ni hpe n yu lahpawt nga ai. ¹⁹ Shingrai, mungdan ni a baw, Hkalde masha ni a danhkung ai hpung shingkang ngu ai, Babelon mare gaw, Karai Kasang jahten kau ai Sodom yan Gomora zawn rai na ra ai. ²⁰ Dai mare hta prat dingsa e galoi mung n dè nga nna, prat mi hte prat mi, kadai mung n shanu nga na masai: Arabi masha ni gaw dai dingsa hta sum n gap ai hte, sagu rem ai ni gaw tinang a sagu hpung ni hpe, dai yang hpum shangun sa na n rai. ²¹ Zaibru jang na matse labye ni dai yang yup nga nna, de a nta ni hta, shaga n pyaw ai dusat amyu ni hpring nga na mara ai: u gawla-uk ni mung dai yang shanu nga nna, ya ni dai hta ginsup nga na mara ai. ²² Chyahkyawn ni mung de a hpyendap ni hta wau nga nna, nam gwi ni gaw, hkik htum ai htingnu ni hta, shaga nga na mara ai; shi ari hkrum na aten ni wa sai; shi a nhtoi ni naw galu nga na n rai.

¹ Kaning rai nme law, Yehowa gaw Yaku hpe matsan dum nna, Israela amyu hpe naw lata la nhtawm, shanhte hpe tinang a buga hta nga shangun na ra ai: malet nhprang manam ni mung, shanhte hte rau kanawn nga nna, Yaku a dap hta manoi nga na mara ai. ² Maigan amyu ni gaw shanhte hpe woi wa nna, tinang a buga de wa sa na mara ai; shingrai Israela amyu gaw, Yehowa a mungdan hta, maigan ni hpe mayam la mayam num shatai nna, shanhte hpe bawngdung shangun ai ni hpe, bawng bai dung shangun na maru ai; tinang hpe sharu shatsang ai ni a ntsa e mung, up nga na mara ai. ³ - ⁴ Ya Yehowa gaw, nang hkrum ai yawnhkyen ai, tsin-yam tsindam hte yak la ai mayam amu hta na, nang hpe sa ban shangun ai shaloi jang, nang gaw Babelon hkawhkam hpe shaang let, ndai ga shagawp ning nga tsun na ndai: Adip arip re ai wa gaw htum mat sahka! Ja mare gaw nyawp mat sahka! ⁵ Yehowa gaw tara n lang ai ni a dawhkrawng hpe mung, uphkang ai ni a sumdoi hpe mung, gang daw kau nu ai: ⁶ masin pawt ai hte masha amyu ni hpe n sim n sa kayat nna, pawt bu ai hte amyu baw ni hpe uphkang ai wa gaw, ya zingri zingrat ai hkrum nna, shi hpe maga ai wa n nga a hka! ⁷ Mungkan ting ban sa ngwi pyaw nga ai; mung masha ni nlaw mahkawn ma ai. ⁸ Gaja wa, marau hpun ni hte, Lebanon arit hpun ni gaw, Nang kataw hkrum ai hpang, anhte hpe kran kau ai wa n lung n sa na sai, nga nna nang hpe shaang let kabu gara ai hte tsun ma ai. ⁹ Nang du sa wa ai shaloi, lawu tsang katsan ga gaw, nang hpe tau la na nga, kaming kamawng rai nga nna, na a matu ga ntsa na daru magam rawng ai ni a tsu ni hpe jasu mu ai; amyu baw ni a hkawhkam ni yawng hpe, tinang a tingnyang ni hta na rawt shangun mu ai. ¹⁰ Shanhte n lang hte gaw, Nang mung anhte zawn n-gun kya nit ni? anhte hte maren tai wa nit ni? ¹¹ Na a daru magam hte, na tinges ngoi ai gaw, katsan ga de du hkrat wa sahka; na a panep byet, na a nba byet tsu rai nga a hka, nga nna nang hpe shachyen let tsun na mara ai. ¹² Jahpawt manap a kasha, nhtoi gintawng e, nang gaw sumsing lamu na di hkrat wa nit hka! Amyu baw ni hpe zingri ai wa e, ga du hkra kran daw kau ai hkrum nit hka! ¹³ Nang mahtang, Sumsing lamu de ngai lung na nngai; Karai Wa a shagan ni a ntsa e, nye a tingnyang ngai shadun na we ai; dingdung maga htum, majoi shingra bum ntsa e ngai dung na nngai; sumwi ni a ntsa e ngai lung na nngai; Tsaw Htum ai wa zawn ngai nga na nngai, nga nna, na a kraw e tsun nit dai. ¹⁵ Raitimung, Katsan ga na sung htum ai nhkun de jahkrat kau ai, nang hkrum nit dai. ¹⁶ Nang hpe mu yu ai ni gaw, nang hpe azi yu nna, na a lam aru yu let, Ataw, ginding aga hpe ashun awam shangun nna, de a mungdan ni hpe gari shangun ai wa gaw, ndai wa rai ni? ¹⁷ Mungkan ga hpe nam shatai kau ai hte, de a mare ni hpe run shabyak kau nhtawm, bawngdung ai ni hpe, tinang nta de wa na ahkang n jaw ai wa gaw, ndai wa rai ni? ¹⁸ Amyu baw ni a hkawhkam ni yawng hte gaw, langai hte langai tinang a lup nta ni hta, arawng sadang hte yup nga ma ai. ¹⁹ Nang mahtang matsat shabat re ai lakung zawn, na a lup na shapraw kau ai hkrum ndai: ri nhtu hte galun sat hkrum nna, lup nlung ni hta kabai tawn ai si mang ni hte rau, na a moi mang mung kabye kau hkrum nga ai. ²⁰ Nang gaw na a mungdan hpe jahten shabyak kau nna, na a mung masha ni hpe sat kau ndai majaw, shanhte hte rau makoi mayang hkrum na ndai n rai: tara n lang ai ni a aru arat gaw, prat dingsa matu mara dap lu na n rai, nga nna tsun na mara ai. ²¹ Kashu kasha ni gaw n rawt wa lu na hte, lamu ga hpe n madu lu nna, mung kan ga hpe mare hte n jahpring lu hkra, kanu kawa ni a shut hpyit ai a majaw, shanhte hpe sat kau na, hkyen nga mu. ²² Zaw nawng zaw wa up ai Yehowa gaw, Ngai shanhte hpe rawt gasat nna, Babelon mare a amying hte naw ngam nga ai ni hpe mung, kashu kasha ni hte aru arat hpe mung, shamyit kau na we ai, nga ai. ²³ Bai ngai gaw dai mare hpe dumsi ni a nga shara hte, hka ing ai shara shatai na we ai. Ngai gaw hten byak ai ding-ye hte dai mare hpe ye kau na we ai, nga nna Zaw nawng zaw wa up ai Yehowa tsun ai. ²⁴ Gaja wa, ngai myit aru yu ai hte maren byin na ra ai; ngai myit shatawng da ai hte maren tai na ra ai: ²⁵ ngai gaw nye a mungdan hta Asuri wa hpe agrawp kau nna, nye a bum ni a ntsa e shi hpe kabye kau na we ai: shaloi jang, shi shanhte hpe hpai shangun ai kandang shanhte kaw na, shanhte hpe gunhpai shangun ai lit shanhte a lahpa hta na, yu kau na ra ai, nga nna Zaw nawng zaw wa up ai Yehowa dagam nga ai. ²⁶ Da ndai gaw, ga ntsa ting hta e myit shatawng da ai lam rai nga ai: amyu baw ni mahkra ntsa e ladawn da ai lata, ndai rai nga ai. ²⁷ Kaning rai nme law, Zaw nawng zaw wa up ai Yehowa myit shatawng da ai hpe, kadai hkum lu na rai ta? shi ladawn da ai lata hpe, kadai dawm kau lu na rai ta? ²⁸ Hkawhkam Ahaza si ai shaning hta e, ndai myihtoi ga pru nga ai: ²⁹ Hpilisti mung, ting e, nang hpe kayat ai ri tawng daw mat ai majaw, hkum kabu et; kaning rai nme law, dai lapu amyu hta na pu htum pru nna, de a hkalung ni gaw pyen chye ai wan lapu tai na mara ai. ³⁰ Matsan mayan ni a kasha alat ni gaw shat lusha nna, sut n su ai ni gaw, a pyaw sha yup lu na mara ai; ngai gaw na a aru hpe jahkraw sat kau nna, na a matu mara ni sat kau hkrum na mara ai. ³¹ Chyinghka e, sharung shayawt nga u; mare e, hkrapngu hkrapngoi nga u: Hpilisti mung, ting e, nang yawn du krung nga ndai: kaning rai nme law, dingdung maga de na wanhkut mawng nga ai; shi lai wa ai hku kadai mung n ngam nga ai. ³² Dai re ai majaw, sumtsan mung na kasa ni hpe, kaning ngu htan na rai ta? Yehowa gaw, Ziun mare hpe gaw da ai rai nna, shi a amyu hta nni nkri hkrum ai ni gaw, dai hta e shingbyi nga na mara ai.

¹ Moba mung hta ang ai Myihtoi ga: kaning rai nme law, lana mi hta sha Moba mung na Ara mare gaw shaza kau ai hkrum nna, marawng marang tai wa sai; lana mi hta sha Moba mung na Kira mare gaw shaza kau ai hkrum nna, marawng marang tai wa sai. ² Mung masha ni gaw hkrapngu hkrapngoi na matu, Bayit yan Dibon shara na, tsaw ai kawng ni de lung wa masai; Moba masha ni gaw Nebo yan Medeba shara a lam sharung shayawt nga ma ai; langai hte langai baw krin nna, nhka mun yawng doi kau hkrum masai. ³ Shanhte gaw mare lam hkan e lachyit nba lawai nna, nta ni a ntsa e mung, mare htingwang hkan e mung, yawng sharung shayawt nga nna, ja ja hkrapngu hkrapngoi ma ai. ⁴ Heshbon hte Eleale gaw jahtau hkrap nna, de a nsen gaw Yahaza mare du hkra na lu ma ai: dai re ai majaw Moba share ninghkrin ni a aja awa marawn ma ai: shi a myit masin gaw shi a kraw lawang e gari nga ai. ⁵ Nye a myit masin mung Moba matu hkrap nga ai; hprawng gat ai ni gaw Zoara hte Eglat-shelishe de hprawng wa ma ai, shanhte myi prwi pru let, Luhit lam de lung wa ma ai; hten byak hkrum ai majaw, hkrap shabam let, Horona-im lam de hkawm wa ma ai. ⁶ Kaning rai nme law Nimrim hka lawng ni katsi katsang rai mat sai; tsingdu tsingman hkraw mat sai; maku ni si mat sai, tsit lali ai baw hpa mung n tu hkraw ai. ⁷ Dai re ai majaw shanhte gaw tinang lu ai sutgan hte, mahkawng da ai arung arai ni hpe, mu mahka hpun hkaraw lai hkra la mat wa na mara ai. ⁸ Shanhte hkrap ai nsen gaw, Moba mung ting pri rai nga ai; sharung shayawt ai nsen gaw, Eglim hte Beraelim du hkra, du nga ai. ⁹ Kaning rai nme law, Dimon a hka lawng ni sai hte hpring nga ai; dai hta grau nna, Dimon ntsa e ngai shapraw na we ai; hprawng lawt lu ai Moba masha ni hte naw ngam nga ai mungdan a ntsa e, ngai hkanghkyi shangun dat na nngai.

¹ Dai mungdan hpe up ai wa a matu, Sela mare kaw na sagu kasha ni hpe, nam mali lam hku, Ziun bum na shayi sha hpang de, sakjaw dat mu. ² Kaning rai nme law, tinang tsip run nna, nwan hkawm ai u shingtai zawn, Moba shayi sha ni gaw Arnon hka kau hkan e nga nga na mara ai. ³ Hpaji daw mu, hparan ya mu; jan pungding a nhtoi hta, na a shingnip, shana zawn nip shangun u; shapraw kau ai ni hpe makoi da mu; hprawng lawt ai ni hpe hkum madun et. ⁴ Ngai hte seng ai shapraw kau hkrum ai ni gaw, nang hte rau anga nga mu ga; nang gaw, Moba hpe zingri zingrat ai ni a man e shingbyi shingwung shara tai u ga; kaning rai nme law, Kashun kashe re ai wa gaw kaman sha rai nga nna, hten byak ai lam sim wa sai; adip arip re ai ni gaw dai mungdan hta shaza kau ai hkrum ma ai: ⁵ tingnyang langai mi gaw n-gaw nwai ai hta jung nga nna, marai langai mi gaw, Dawi a sum hta, kangka re ai myit hte dai ntsa e dung nga na ra ai: shi gaw tara dara nna, dinghpring ai hku hkan let, alawan dawdan na ra ai. ⁶ Moba amyu a myit kaba ai lam anhte na yu sagaw ai; grai kaba ai myit rai nga ai: shi a gumrawng gumtawng ai, myit kaba ai hte pawt sindawng ai gaw kaba nga timung, shi grang ai ga kaman sha rai nga ai. ⁷ Dai re ai majaw Moba amyu gaw Moba mungdan a lam sharung shayawt na ra ai; langai hte langai sharung shayawt na mara ai; atsai awai shamyit kau hkrum ai majaw, nanhte gaw Kira-hareset mare na tsabyi si gumpye ni hpe marit na marin dai. ⁸ Kaning rai nme law, Heshbon a yi hkauna ni hte Sibma tsabyi ru ni gaw, nyui mat nga ai; amyu baw ni a du ni gaw, Yazera shara hte nam mali de hkrawn du ai lakung lakying ni hpe daw kau mu ai; de a makrung ni gaw nawng hpe pyi hkrawn lai nga ai. ⁹ Dai re ai majaw, Sibma tsabyi ru a lam, Yazera ni hkrap ai zawn, ngai mung hkrap na nngai; Heshbon yan Eleale e, nye myi prwi hte nan hpe ntsin jaw na nngai: kaning rai nme law, mangai ta e si ai asi hte, nmut ta e shu ai nsi naisi ni gaw, hpyen garu ai nsen hkrum masai. ¹⁰ Kaja htum ai yi hkauna ni hta kabu gara, n nga sai; tsabyi sun ni hta mahkawn mangoi ai hte kabu gara nsen, n nga sai; tsabyi si htumbyen ni hta tsabyi si kabye ai wa, n nga sai; kabu jahtau ai nsen hpe ngai jasim kau we ai. ¹¹ Dai re ai majaw, Moba a matu nye a myi masin gaw, Kira-heret a matu, nye a kraw lawang gaw, tingse zawn yawn ngoi nga ai. ¹² Moba gaw dawng pru nna, tinang a tsaw ai kawng hta, tinang hkum hpe shaba kau ai hte, tinang a nawku ai shara hta akyu hpyi timung, hpa lam la ai n rai. ¹³ Da ndai gaw, moi shawng e, Moba a lam, Yehowa tsun ai ga rai nga ai. ¹⁴ Ya Yehowa bai tsun ai gaw, Shabrai sha ai wa hti ai hte maren, masum ning lai jang, Moba arawng sadang hte hpawn, de a wunawng wuwa ni gaw, jahpoi kau ai hkrum nna, naw ngam nga ai ni gaw, n law ai hte, hpa n tai mat na mara ai, nga ai.

¹ Damasku mare hta ang ai myihtoi ga: Yu u, Damasku shara gaw, mare n tai hkra, marawng marang sumpum tai na ra ai. ² Aroera mare ni hpe kau da masai; de a mare dingsa ni hta sagu hpung ni hpum nga nna, shanhte hpe jahkrit ai kadai mung n nga ai. ³ Ehprim mung na hpyendap n nga na sai; Damasku a mungdan hte Suri mung hta matu mara n nga na sai: shanhte gaw Israela kashu kasha ni a arawng sadang zawn tai na mara ai, nga nna Zaw nawng zaw wa up ai Yehowa tsun nga ai. ⁴ Dai shani e Yaku a arawng sadang gaw yawm wa nna, shi a sau hpum ai hkumshan gaw lasi wa na ra ai. ⁵ Mam dan ai wa gaw hkauling lahkawn nna, shi a lata hte mam nsi shu la ai zawn, rai na ra ai; gaja wa, Rehpim kadit e nlim gut la ai zawn, tai na ra ai. ⁶ Raitimung, tsanlun hpun ashun ai hpang, hpun ndung e tsanlun si lahkawng masum, kung dam htum ai lakung ni hta mali manga naw noi nga ai hte maren, dai mungdan hta naw hti nga ai ni ngam nga na mara ai, nga nna Israela Karai Kasang Yehowa tsun nga ai. ⁷ Dai shani hta e, mung masha ni gaw, tinang a Hpan Madu hpe mada yu nna, shanhte a myi gaw Israela Chyoi pra ai Wa hpe hkungga lara na mara ai. ⁸ Tinang a lata hte galaw da ai, tawn hkungri ni hpe mada yu na n rai; tinang layung hte galaw ai Asherim sumla ni hte jan sumla ni hpe hkungga lara na n rai. ⁹ Dai shani e shanhte a ngang ai mare ni gaw, nam mali hte kawng pungding hkan e, Israela kashu kasha ni a man e kau tawn da ai mare ni hte bung nna, dai mung gaw katsi katsang rai nga ai. ¹⁰ Kaning rai nme law, nang hpe hkyehkrang la ai Karai Kasang hpe nang malap kau nna, nang hpe n-gun jaw ai lunghkrung hpe n dum ndai; dai majaw manam pyaw ai nampan nang hkai nna, sumtsan mung na bawng hte shatsawm wu ai: ¹¹ hkai ai shani e nang dai hpe kum da nna, jahpawt manap e nampan pu shangun wu ai; raitimung, yawnhkyen ai hte sharung shayawt bu ai shani e, mam dan shara n nga ai. ¹² Aka, nammukdara wu kadu ai zawn, masha amyu law law wu kadu nna, amyu baw ni gaw hka rum kaba zawn, wu nga ma ai: ¹³ gaja wa amyu baw ni gaw hka kaba law law zawn wu kadu timung, shi shanhte hpe daru kau nna, shanhte tsan tsan de hprawng mat wa masai; shanhte gaw bum ntsa e, nbung ahpawt nna poi mat wa ai mahkaw hte, bungsha hta lawm ai ga nhpu zawn, hkoi mat wa na mara ai. ¹⁴ Shana aten e rai yang shanhte hkrit kajawng nna, jahpawt manap garai n du yang, shanhte n nga masai. Dai gaw anhte hpe jahten shabyak ai ni a kumhtaw, anhte hpe hpya lu hpya sha ai ni a sali wunli rai nga ai.

¹ - ² Aka, Hkusha hka wora hkran na, ngoi ai singkaw tu nna, maiaw li hte nammukdara hka hku kasa shangun dat let, Larau ladau re ai shangun ma ni e, sa ma su; hkum shing-yan galu ai hte hkumshan manen ai amyu, moi npawt kaw nna ya du hkra gumshem ai amyu, hpareng reng nna kabye kau chye ai hte, hkanu ni jahka kau ai mungdan a amyu hpang de sa ma su, nga nna tsun ai mungdan e, madat u! ³ Mungkan e shanu nga ai, ga ntsa masha yawng hte e, bum ntsa e dawnghkawn sharawt nga yang, mada yu mu; pahtau dum yang, madat mara nga mu. ⁴ Kaning rai nme law, Yehowa ngai hpe ning nga ai: Jan a majaw kaning rai kahtet ai, sumwi majaw nmut ta e kaning rai mari hkrat ai hpe, nye a nga shara e ngai mada yu nna, atsin sha naw nga na nngai. ⁵ Pu an nna, tsabyi si shingchyaw magang wa timung, di la ai aten garai n du yang, shi gaw makrung ni hpe nhkyau hte dan kau nhtawm, kung dam ai lakung lakying ni hpe, kran htawm kau na ra ai. ⁶ Shanhte gaw, bum ga na u matse ni hte, ga ntsa na matse labye ni a matu tai wa nna, u matse ni gaw nlum ta e, ga ntsa na matse labye ni yawng kashung ta e, shanhte hpe amya sha na mara ai. ⁷ Dai aten e, hkum shing-yan galu ai hte hkumshan manen ai amyu, moi npawt kaw nna ya du hkra gumshem ai amyu, hpareng reng nna kabye kau chye ai hte, hkanu jahka kau ai mungdan a amyu kaw na, Zaw nawng zaw wa up ai Yehowa a matu, kumhpaw kumhpa langai mi, Zaw nawng zaw wa up ai Yehowa amying ningsang nga ai Ziun bum de, la sa na mara ai.

¹ Egutu mung hta ang ai myihtoi ga: Yehowa gaw lawan ai sumwi hta jawn nna, Egutu mung de du ai: Egutu hpara sumla ni shi a man e gari nna, Egutu mung na minla gaw, tinang kraw e byaw mat na ra ai. ² Ngai gaw Egutu masha ni hpe dumbru dumbra shangun nna, langai hte langai tinang a kahpu kanau wa hte, tinang a htingbu wa hpe gasat na hte, mare mi hte mare mi, mung mi hte mung mi, shada gasat na mara ai. ³ Egutu a myit gaw, shi a kraw e run wa nna, ngai gaw shi a hpaji daw ai hpe jahten na we ai; shaloi shanhte gaw, hpara sumla ni, mandan bau ai ni, nat shung ai ni hte shaba wawt ai ni hpe tam na mara ai. ⁴ Ngai gaw Egutu masha ni hpe, gumshem du ni a lata hta ap ya nna, n hkru ai hkawhkam gaw, shanhte a ntsa e up na ra ai, nga nna Zaw nawng zaw wa up ai Madu Yehowa tsun nga ai. ⁵ Shaloi nammukdara hka gaw yawm mat nna, Hkanu gaw hkyet kan mat na ra ai: ⁶ Hka shi ni gaw manam mat na ra ai; Egutu hka hkawng ni hkyet kan mat nna, maiaw hte kungji ni hkraw mat na ra ai; ⁷ Nila hka kau na udat shara ni hte hkauna ni yawng, hkraw mat nna, htawmhpang de n nga na sai. ⁸ Dai rai nna, nga hkwi ai ni sharung na mara ai; Nila hka hta nga dawn ai ni yawng yawm nna, sumgawn kabai ai ni gaw, myit htum na mara ai. ⁹ Dai hta kaga, lachyit ri ri ai ni hte, hpun nba ahpraw da ai ni gaw mak mat na mara ai. ¹⁰ Nlung shadaw ni gaw agrawp kau ai hkrum na mara ai; shabrai sha ai nchyang ni yawng myit kaji na mara ai. ¹¹ Gaja wa, Zoan du ni gaw mana wa masai; Hpara-u a bawmung ni hta hpaji grau rawng ai wa gaw, angawk ai hpaji daw nga ai; Ngai gaw hpaji rawng ai amyu, moi na hkawhkam ni a aru arat, rai nga nngai, nga nna Hpara-u hpe hpa majaw tsun myit ta? ¹² Na a hpaji rawng ai ni kanang rai nga ma ta? Ya shanhte nang hpe tsun dan mu ga; Zaw nawng zaw wa up ai Yehowa gaw, Egutu mung a lam myit shatawng da ai hpe, shanhte chye mu ga. ¹³ Zoan du ni gaw mana masai; Nopa du ni gaw, shut masai; Egutu mung a amyu ni a njut nlung ni gaw, shi hpe lam shadam mu ai. ¹⁴ Yehowa gaw Egutu mung ka-ang e nhtan shai ai wenyi kayau tawn da nna, chyaru nang ai wa gaw tinang a nhpat hta bai galawi ai hte maren, shanhte gaw Egutu hpe lam shagu hta shadam kau mu ai. ¹⁵ Egutu mung hta e abaw matu mung nmai matu mung, namhtan hpun lakung hte maiaw matu mung, galaw nga na amyu n nga na sai. ¹⁶ Dai shani e Egutu masha ni gaw num zawn tai nna, Zaw nawng zaw wa up ai Yehowa shanhte a ntsa e shada ai lata a majaw, shanhte hkrit kajawng nna gari mat na mara ai; ¹⁷ Zaw nawng zaw wa up ai Yehowa gaw, Egutu mung a lam myit shatawng da ai majaw, Yuda mung gaw Egutu mung a matu hkrithpa shara tai na ra ai; “Yuda mung,” nga nna tsun yang pyi, shanhte yawng hkrit gari na mara ai. ¹⁸ Dai shani e Egutu mung na mare manga hta, Hkanan ga hku tsun nna, Zaw nawng zaw wa up ai Yehowa hpe hpa let, dagam na mara ai; mare langai mi a amying gaw, Agrawp kau hjkrum ai mare rai na ra ai. ¹⁹ Dai shani e, Yehowa a matu, Egutu mung ka-ang e tawn hkungri, lamu ga jarit makau e mahtan daw, jung nga na ra ai: ²⁰ dai gaw Egutu mung hta e, Yehowa a lam kumla hte sakes tai na ra ai: kaning rai nme law, zingri zingrat hkrum ai majaw shanhte Yehowa hpe jahtau nna, shi gaw hkyehkrang la ai hte makawp maga re ai wa shangun dat ai hte, shanhte hpe hkye mawai la na mu ai. ²¹ Yehowa nan Egutu masha ni hpe shi hkum shadan dan nna, Egutu masha ni gaw, dai shani e, Yehowa hpe chye lu na mara ai; shanhte gaw shagu hkungga hte mahku hkungga nawng let Yehowa hpe nawku nna, shi a man e dagam da ai hte maren, galaw na mara ai. ²² Yehowa gaw Egutu mung hpe adup timung shamai na ra ai: shanhte gaw Yehowa hpang de kayin wa nna tawngban nga ma ai majaw, shi shanhte hpe shamai shatsai na ra ai. ²³ Dai shani e, Egutu mung kaw nna, Asuri mung du hkra nmaw lam hku na ra ai; Asuri wa gaw Egutu mung de, Egutu wa gaw Asuri mung de sa nna, Egutu masha ni gaw Asuri masha ni hte rau nawku na mara ai. ²⁴ Dai shani e Egutu amyu, Asuri amyu hte hpawn, masum ngu na Israela amyu gaw, lamu ga ka-ang e shaman ai chyeju shapraw lu na ra ai; ²⁵ Zaw nawng zaw wa up ai Yehowa mung, Nye a amyu Egutu, nye lata hpan da ai Asuri amyu, nye a sali wunli Israela amyu gaw a nga u ga law, nga nna shanhte hpe shaman ya na ra ai.

¹ - ² Asuri hkawhkam Sargon shangun dat ai Tartan gaw, Ashdod mare de lung gasat nna, dai mare hpe hkap la ai shaning aten e, Yehowa gaw Amot a kasha Esaia hpe, Sa su, na nshang na lachyit nba hte, na kyepdin raw kau u, nga nna tsun ai hte maren, shi galaw nna, singgu krin, kyepdin n din ai, hkawm nga ai. ³ - ⁴ Bai Yehowa gaw, Nye a mayam Esaia, Egutu mung hte Hkusha mung hpe shaang nna, kumla hte mauhpa lam tai na matu, masum ning tup singgu krin, kyepdin n din ai, hkawm nga ai hte maren, Egutu masha ni hpe kaya jahkrum na matu, Asuri hkawhkam gaw, rim la hkrum ai Egutu masha ni hte, bawngdung hkrum ai Hkusha masha kaji kaba ni hpe, singgu krin, kyepdin n din, dangbau pyi n magap ai, woi mat wa na maru ai. ⁵ - ⁶ Shingrai shanhte gaw, tinang myit hpa shara Hkusha hte, tinang a arawng ngu ai Egutu a lam mau mahka nna mak mat ai hte, ndai nammukdara hkingau e dè nga ai amyu ni gaw, Yu mu, Asuri hkawhkam kaw na hprawng lawt lu hkra, anhte myit hpa ai gaw, ndai rai nga ai; ya anhte kaning rai lawt lu na ga ta? nga nna dai aten e tsun shajang na mara ai, nga ai.

¹ Nammukdara makau na, zaibru jang hta ang ai myihtoi ga: Dingda laru ru wa ai zawn, hkrit na nsan ai zaibru jang de na laru ru wa ai. ² Hkrithpa shingran ngai mu nngai; myit magaw ai wa gaw, magaw ai hku galaw nga ai, jahten shabyak ai wa gaw jahten shabyak nga ai; Elam masha ni e, lung wa mu; Medi masha ni e, wang tawn mu: dai mare a majaw madai ai lam yawng, ngai jasim kau we ai. ³ Dai re ai majaw, nye a mashi machyi la nga ai; shinggyim machyi ai num zawn nni nkri hkrum nngai: na lahpang hkra laja nga ai, myi n mu hkra, mak mat nga ai. ⁴ Nye a salum aduk nga ai; hkrithpa hte ngai kajawng nngai; ngai marit ai shana nrim, nye a matu hkrit kahpra ai hkrai shapraw nga ai. ⁵ Shanhte sha ku lajang masai; sin langa tawn da masai; shanhte lusha nga ma ai: du ni e, rawt mu, n-gang hpe sau chya mu. ⁶ Kaning rai nme law, Madu gaw, Sa su, sin langa tawn da u; shi mu ai hte maren tsun dan u ga: ⁷ Hpyen luksuk hte hpyen gumra man man, lawze jawn ai ni hte gawla-uk jawn ai ni hpe mada mu yang, shi tsam mari madat mara yu u ga, nga nna ngai hpe tsun ai. ⁸ Shaloi shi gaw, Madu e, shani shana ngai gaw nye langchyi ntsa e tsap mada nga nngai; ⁹ Yu u, hpyen luksuk ni hte gumra jawn ai ni man man du mara ai, nga nna hkanghkyi zawn shabam nga ai. Bai shi gaw, Babelon mare kadawng mat sai, kadawng mat sai; shi tawk da ai shi a hpara sumla ni yawng, ga hta agrawp kau ai hkrum masai, nga ai. ¹⁰ Ngai kabye ai yi hku hte, nye a chyarang e pru ai mam e, Zaw nawng zaw wa up ai, Israela Karai Kasang Yehowa kaw na ngai na la ai hte maren, ngai nang hpe htawn tsun dan ni ai. ¹¹ - ¹² Duma hta ang ai myihtoi ga: Marai langai mi Seira bum nna, Sin ai wa e, shana aten garai n lai a ni? garai n lai a ni? nga nna ngai hpe san yang, Sin ai wa gaw, Jahpawt manap du ra ai; shana mung bai du ra ai; nanhte bai san mayu yang, jasan mu; nhtang wa manu, bai sa marit, nga ai. ¹³ Arabi mung hta ang ai myihtoi ga: Dedan mung na hpaga ga ai ni e, nanhte gaw Arabi mung na nam mali hta but nga na myit dai. ¹⁴ Hpang kara hkrum ai wa hpe ntsin hkap jaw mu; Tema mung masha ni e, hprawng wa hkrum ai ni hpe muk hkap jaw mu: ¹⁵ Shanhte gaw nhtu tsin-yam hta na mung, shaw tawn ai nhtu hta na mung, gap hkyen ai ndan hta na mung, yak la ai hpyen majan hta na mung, hprawng wa ma ai. ¹⁶ Kaning rai nme law, Madu ngai hpe tsun ai gaw, Shabrai sha ai wa aten hti yu ai hte maren, laning mi laman e, Kedera arawng sadang yawng mat mat nna, naw ngam nga ai ndan gap ai share ni hte, Kedera a kashu kasha ni a daru ni gaw, n law mat na mara ai, nga ai: da ndai gaw Israela Karai Kasang Yehowa tsun ai lam rai nga ai.

¹ Shingran kadit hta ang ai myihtoi ga: Na a mare ting gaw hpa lam majaw nta ni a ntsa e lung dè ma ta? ² Jahtau marawn ai hte hpring nna, kaming kamawng let ngwi pyaw dum ai mare e, nang hta hkala nba hkrum ai ni gaw, ri nhtu hte hkala nba hkrum ai n rai; na a si mang ni gaw, hpyen majan hta si ma ai n rai. ³ Na a agyi ni yawng, rau hprawng mat ma ai; ndan gap ai ni shanhte hpe gyit la mu ai; mu hkrup ai, na a masha ni nlang hte gaw, tsan tsan hprawng timung, gyit hkangda ai rai hkrum ma ai. ⁴ Dai re ai majaw, Ngai hpe hkum yu et; ngai ja ja hkrap na nngai; nye amyu a shayi sha hten byak hkrum nga yang me, ngai hpe shalan shabran na hkrum ti myit, nga nna ngai tsun nngai. ⁵ Kaning rai nme law, Zaw nawng zaw wa up ai Madu Yehowa a majaw, dai shani gaw, Shingran kadit hta e, kaming kamawng, kabye kau da nna, shoihpa shoirang hkrum ai hte, mare bunghku ni hpe run kau nna, bum ni hpe jahtau ai shani, rai na ra ai. ⁶ Elam amyu gaw pala ndum hte hpawn, hpyen leng ni hte gumra jawn ai ni hpe shangun nna, Kira amyu gaw n-gang shapraw dan wu ai. ⁷ Shingrai, na a pyaw htum ai kadit ni hta hpyen leng hte hpring chyat nga nna, gumra jawn ai ni gaw, mare chyinghka lam e dap jung nga ma ai. ⁸ Shi gaw Yuda magap hpe gun kau nna, nang gaw dai shani e nam mali nta e rawng ai ri nhtu ni hpe mada yu ndai. ⁹ Dawi a mare bunghku ni run waw ai shara law nga ai hpe nanhte matsing nga nna, lawu na hka lawng hta hka shaing da mu ai. ¹⁰ Nanhte gaw Yerusalem mare na nta ni hpe hti matsing nna, bunghku hpe shangang na matu nta ni hpe run kau mu ai. ¹¹ Hka lawng dingsa na hka hpe shalen na matu, bunghku lahkawng a lapran e nanhte hka lawng ningnan galaw myit dai: raitimung, dai lam shabyin ai wa hpe nanhte n dum nna, moi chyaloi nhkoi kaw nna dai lam hpajang da ai wa hpe, n gawn n sawn di kau mu ai. ¹² - ¹³ Dai shani e Zaw nawng zaw wa up ai Madu Yehowa gaw, hkrapngu hkrapngoi ai, sharung shayawt ai, kara doi ai hte lachyit nba lawai na lam htet da timung, yu mu, shanhte gaw, pyaw pyaw ngawn ngawn, kabu gara nga let, Sha ga, lu ga, hpawt ni she si na ga ai, nga nna sagu dumsu sat ai hte shan sha, tsabyi jahku lu rai ma hka. ¹⁴ Shingrai, Zaw nawng zaw wa up ai Yehowa gaw, Gaja wa, nanhte si ai nhtoi du hkra, ndai yubak tsai mat na n rai, nga nna nye a na hta madun dan ai: dai gaw Zaw nawng zaw wa up ai Madu Yehowa tsun ai ga rai nga ai. ¹⁵ - ¹⁶ Bai Zaw nawng zaw wa up ai Yehowa gaw, Hkawhkam a nta ntsa e up ai, ndai kunhting wa Shebna hpang de sa nna, Nang gaw nang e hpa galaw n ta? nang e, lup tawk da na lam, nang hpe kadai ahkang jaw a ta? ataw, tsaw ai shara e lupwa, tinang moi mang a matu, lunghkrung hta shanu shara, tawk da a hka! ¹⁷ - ¹⁸ Yu u, Yehowa gaw, n-gun ja ai wa zawn, nang hpe gumpye kau na ra ai; gaja wa, nang hpe magra la n-htawm, gumdin tarin nna dam lada ai mung de kabai kau na ra ai: na madu a nta ntsa e kaya kahpa shapraw ai wa e, dai mung hta nang si na ndai; dai yang e na a arawng sadang leng ni chyai na ra ai. ¹⁹ Ngai nang hpe aya jahkrat kau na de ai; nang gum-yu yu mat na rin dai. ²⁰ - ²¹ Dai shani e, ngai gaw nye a mayam Hklkia a kasha Eliakim hpe shaga nna, na a palawng galu shi hpe jahpun kau na we ai; nang kyit ai shingkyit ngai shi hpe shakyit nna, nang up ai ahkang shi a lata hta ap ya na we ai: shi gaw Yerusalem masha ni hte Yuda mung a kawa tai na ra ai. ²² Dawi dap nta a sumsaw hpe ngai shi a lahpa ntsa e mara da nna, shi gaw, kadai n la da lu hkra hpaw da na ra ai, kadai n la da lu hkra hpaw da na ra ai, kadai n hpaw lu hkra la da na ra ai. ²³ Grin nga ai shara hta ngai shi hpe hpri maina zawn dit da nna, shi gaw kawa nta dap ni a matu arawng sadang tingnyang tai na ra ai. ²⁴ Shanhte gaw kawa nta a arawng sadang hte, aru arat, matu mara hte hpawn, n-gawt hte ndum du hkra, arung arai kaji kaba yawng, shi hta noi da na mara ai. ²⁵ Zaw nawng zaw wa up ai Yehowa chyawm gaw, Grin nga ai shara hta dit da ai hpri maina gaw, dai shani e malaw mat nna, agrawp kau hkrum ai hte hkrat mat na ra ai; shi hta noi da ai lit gaw, gun kau ai hkrum na ra ai, nga ai: kaning rai nme law, ndai lam Yehowa tsun da sai.

¹ Turu mare hta ang ai myihtoi ga: Tarshi shanghpaw li ni e, sharung shayawt mu; nta mung n nga, mashang mung n nga hkra, Turu mare atsai awai hten mat sai; Kihtim mung kaw nna, dai shi na ma ai. ² Nammukdara rap chye ai, Sidon hpaga ni a gun rai hkap lu la ai, hka kau na amyu masha ni e, mau nga mu. ³ Sahora a nai mam hte Nila mung na nsi naisi ni gaw, hka kaba ni hta shi a amyat rai nga nna, shi gaw amyu baw ni a hpaga daju rai nga ai. ⁴ Sidon mare e, hkrit kaya nga u: kaning rai nme law, nammukdara ngu ai, nammukdara a mare daju gaw, Ngai shinggyim machyi n hkrum, kasha n shaprat nngai; mahkawn shabrang mung kaba wa shangun ai n rai, nga nna tsun ai. ⁵ Egutu masha ni dai shi na jang, shanhte gaw Turu mare a lam, ja ja myit kaji na mara ai. ⁶ Tarshu mare de rap wa mu; hka kau na ni e, sharung shayawt nga mu. ⁷ Moi chyaloi nhkoi kaw nna dè da ai hte, sumtsan mung de sa shingbyi na matu, chye hkawm ai, nanhte a kabu gara ai mare, ndai rai nga malit ni? ⁸ Turu mare a lam ndai myit shatawng da ai gaw, kadai wa rai ta? dai mare gaw hkawhkam janmau jaw chye ai hte, shi a hpaga ga ai ni du, dut sha ai ni, ga ntsa na arawng sadang grau htum ai ni, rai nga ma ai. ⁹ Gumrawng gumtawng re ai arawng sadang yawng hpe awu asin di kau na hte, ga ntsa arawng lu ai ni yawng hpe jahpoi kau na matu, Zaw nawng zaw wa up ai Yehowa ndai lam myit shatawng da nu ai. ¹⁰ Tarshu shayi sha e, Nila hka zawn na a mungdan ting lwi bra nga u; nang hpe hkum da ai wa ya n nga sai. ¹¹ Yehowa gaw nammukdara ntsa e shi a lata ladawn let, mungdan ni hpe ashun awam dat wu ai; Hkanan mung na hpyendap ni hpe jahten na matu, shi gaw ga hkangda sai. ¹² Bai shi gaw, Adip arip hkrum ai Sidon shayi hkawnsek e, nang gaw htawmhpang de kabu lu na n rai; rawt u, Kihtim mung de rap wa u; dai yang e pyi nang ban sa lu na n rai, nga ai. ¹³ Hkalde mung a lam aru yu u; dai amyu gaw shawng de n nga sai; Asuri wa gaw, zaibru jang e nga ai amyu ni a matu, dai mung hpe dè da nna, de a langchyi ni hpe shanhte sharawt ma ai; bai shanhte gaw de a htingnu ni hpe sharun shabyak kau nna, dai mungdan hpe marawng marang di kau mu ai. ¹⁴ Tarshi shanghpaw li ni e, sharung shayawt nga mu; nanhte a mare daju shingran katsi mat sai. ¹⁵ - ¹⁶ Shingrai, hkawhkam ban mi a aprat sanit shi ning tup, kadai mung Turu mare hpe dum na n rai; sanit shi ning lai yang she, Kadai n dum ai shawa num e, tingse lang nna mare hkan nwan hkawm u; Nang hpe bai dum lu hkra, ngwi pyaw ai nsen hte mahkawn mangoi ga law law mahkawn u, nga nna shawa num a lam shagawp ai machyun ga hta tsun ai hte maren, Turu hta byin na ra ai. ¹⁷ Dai sanit shi ning lai jang she, Yehowa gaw Turu mare hpe kawan katsan yu na ra ai; shi mung shi amyat lusha ai lam hta bai shang nna, mungkan ting a ntsa e nga ai mungdan mahkra ni a shawa num tai na ra ai. ¹⁸ Raitimung, shi hpaga ga ai hte shi lusha ai amyat, Yehowa matu chyoi pra nga na ra ai; dai hpe sutdek hta mahkawng da ai mung n rai, ga hta lup da ai mung n rai; Yehowa man e shanu nga ai ni gaw hkru hkru kat kat sha lu nna, tsawm ai hpun palawng bu hpun lu hkra, shi gaw hpaga ga na ra ai.

¹ Yu u, Yehowa gaw lamu ga hpe shakram kau nna, katsi katsang re ai shara shatai wu ai; shi dai hpe galau ka-up kau ai hte, mung masha ni hpe shabra kau mu ai. ² Dai shaloi e hkinjawng wa gaw, yu maya wa zawn, madu gaw mayam wa zawn, madu num gaw mayam num zawn, dut ai wa gaw mari ai wa zawn, hka madu gaw hka kap ai wa zawn, atu sha ai wa gaw atu jaw ai wa zawn, tai na ra ai. ³ Gaja wa lamu ga gaw kram nga nna, akrin akraw rai na ra ai: kaning rai nme law, Yehowa dai ga tsun da nga ai. ⁴ Lamu ga gaw yawn nga ai hte, nyui mat nga ai; mungkan ga gaw n-gun yawm ai hte, nyui mat nga ai; ga ntsa na dap tsaw ai amyu gaw, n-gun yawm nga ai. ⁵ Mung masha ni gaw tara hpe tawt lai nna, hkangda ai ga hpe galai kau ai hte, prat dingsa na ga shaka hpe shaprai kau ai majaw, lamu ga gaw awu asin hkrum nga ai. ⁶ Dai re ai majaw lamu ga gaw dagam dala hkrum sha nna, de a ntsa e shanu nga ai ni gaw mara kap ma ai; ga ntsa e nga ai masha ni hkru kau ai hkrum nna, ngam nga ai ni gaw n law ma ai. ⁷ Tsabyi jahku nnan gaw nsa n rawng nga ai; tsabyi ru gaw n-gun yawm nga ai; kabu gara myit rawng ai ni yawng, madai nga ma ai. ⁸ Ngwi pyaw ai shupsheng nsen sim mat sai; kabu gara ai ni a garu ai nsen n nga sai; ngwi pyaw ai tingse dum ai gaw sim mat sai. ⁹ Mahkawn mangoi let tsabyi lu na ma ai n rai; chyaru gaw lu ai ni a n-gup hta hka mat na ra ai. ¹⁰ Kram nga ai mare gaw, run agrawp mat sai; kadai n shang lu hkra, nta shagu la da nga ai. ¹¹ Tsabyi htum mat ai majaw mare lam ni hta sharung nga ma ai; kabu gara lam yawng hkoi mat sai; lamu ga a ngwi pyaw ai lam lai mat sai. ¹² Mare kata e shingran katsi ai hkrai ngam nga nna, mare chyinghka gaw agrawp run kau ai hkrum nga ai. ¹³ Kaning rai nme law, tsanlun hpun hpe ashun ai hte, tsabyi di ai hpang nlim gut ai zawn, ga ntsa na amyu baw ni a ka-ang e byin na ra ai. ¹⁴ Shanhte gaw tinang nsen sharawt let, nlaw jahtau na mara ai; Yehowa a daru magam majaw nammukdara kaw nna pyi, marawn jahtau na mara ai. ¹⁵ Dai re ai majaw, jan praw maga de na ni, Yehowa hpe, nammukdara zanlawng ni, Israela Karai Kasang Yehowa amying nsang hpe, shagrau shaa mu. ¹⁶ Dinghpring ai wa gaw hpung shingkang rawng u ga, nga ai mahkawn ga, lamu ga htum ai maga de na anhte na lu ga ai. Ngai chyawm gaw, Matsan nngai, matsan nngai; ngai hta dingnye nga u ga; myit magaw ai ni gaw, myit magaw ai lam galaw ma ai; gaja wa, myit magaw ai wa gaw myit magaw ai lam grai galaw sai. ¹⁷ Dinghta ga ntsa e shanu ai wa e, hkrit kajawng ai, nhkun hte mahkam, na a man e rai nga ai. ¹⁸ Shingrai, hkrit kajawng ai nsen kaw na hprawng lawt ai wa gaw, nhkun hta hkrat na ra ai; nhkun hta na lawt pru ai wa gaw, mahkam hta lu na ra ai: kaning rai nme law, matsaw ntsang na hkuwawt hku ni hpaw malang nga nna, ginding aga npawt ni gari nga ai. ¹⁹ Ginding aga gaw atsai awai grawp mat sai; ginding aga gaw ga mahka mat sai; ginding aga gaw ja ja gari nga ai. ²⁰ Ginding aga gaw chyaru nang ai wa zawn ndi nda rai nna, n-goi zawn goi lang nga ai; de a shut hpyit ai lit gaw, de a ntsa e li nga ai hte, shi ahtu kataw nga nna, bai rawt lu na n rai. ²¹ Dai shani e Yehowa gaw, matsaw ntsang na zaw nawng zaw wa hpe, tsaw ai shara hta, ga ntsa hkawhkam ni hpe, ga ntsa e, kawan katsan yu na ra ai. ²² Bawngdung ai ni hpe htawng hta sharawng da ai hte maren, shanhte hpe shinggyin la nna, htawng hta sharawng da nhtawm, nhtoi law law lai jang, shi shanhte hpe ari jaw na ra ai. ²³ Dai shaloi e shata gaw mak mat nna, ajan gaw kaya kahpa hkrum na ra ai; kaning rai nme law, Zaw nawng zaw wa up ai Yehowa gaw Ziun bum ntsa Yerusalem mare hta up nga nna, shi a salang ni a man e arawng sadang danhkung nga na ra ai.

¹ Yehowa e, nang gaw nye a Karai Kasang rai nga ndai; ngai nang hpe shagrau na nngai, na a mying nsang hpe shakawn na nngai; nang gaw mauhpa amu galaw nit dai; moi kaw nna nang hpaji daw ai lam ni, kangka ai hte tengman ai rai nga ai. ² Mare hpe nlung sumpum, bunghku kum ai mare hpe marawng marang, tsasam ni a htingnu ni, mare n tai hkra, nang shabyin kau nu ai: dai hpe galoi mung dè da lu na n rai. ³ Dai re ai majaw n-gun ja ai amyu gaw nang hpe shagrau shaa na ra ai; gumshem ai amyu ni a mare gaw nang hpe hkrit kamyin na ra ai. ⁴ Kaning rai nme law, nang gaw matsan mayan ni a shingbyi shara, nni nkri hkrum ai ni a shingwung shara, nbung laru ru yang makoi magap shara, gumshem ai ni gaw, shakum hpe adawt ai nbung laru zawn pawt kahtet bu yang, jan n-gang hte shingnip nang rai nga ndai. ⁵ Hkun hkraw ai shara hta jan kahtet ai hpe shakawp kau ya ai zawn, tsasam masha ni a wu ngoi ai hpe, nang jasim kau ya na ndai; htat ai sumwi hte jan shinggang kau ai zawn, gumshem ai ni a mahkawn mangoi ga sim mat na ra ai. ⁶ Zaw nawng zaw wa up ai Yehowa gaw ndai bum ntsa e amyu baw yawng a matu sau ai lusha hte tsabyi machyan poi galaw na ra ai; dai poi hta lasawi hpring ai sau ai baw hte, jet ai tsabyi machyan dingsa lusha na mara ai. ⁷ Bai shi gaw ndai bum ntsa e, masha amyu yawng a myiman magap hpe mung, amyu baw ni mahkra htinggrum ai yawn sumpan magap hpe mung, gun kau na ra ai. ⁸ Shi gaw si hkrung si htan hpe mayu kau nu ai; Madu Yehowa gaw myiman shagu a myi prwi katsut kau na ra ai; shi a amyu hkrum ai kaya kahpa hpe mung, ga ntsa ting na shaprai kau na ra ai: dai lam Yehowa tsun da sai. ⁹ Dai shani e, Yu u, ndai gaw anhte a Karai Kasang rai nga ai: anhte shi hpe myit mada nna, shi anhte hpe hkyehkrang la na ra ai; ndai gaw Yehowa nan rai nga ai; anhte shi hpe myit mada nna, shi a hkyehkrang la ai lam majaw anhte kabu gara awng sharawng nga na ra ga ai, nga nna tsun shajang na mara ai. ¹⁰ Kaning rai nme law, Yehowa a lata gaw ndai bum ntsa e ban sa na ra ai: yi hku hpe nga hkyi hte kabye kayau kau ai zawn, Moba mung gaw kabye kau ai hkrum na ra ai. ¹¹ Hka hpung-yawt ai wa gaw hpung-yawt na matu, shi a lata ladawn ai hte maren, Yehowa gaw Moba mung ka-ang e shi a lata ladawn nna, dai mung a gumrawng gumtawng ai hte hpawn, de a lata marai hpe shagit kau na ra ai. ¹² Na a tsaw ai hpyendap bunghku ni hpe, shi ga du hkra run kau nna, ga nhpu hta shayu agrawp kau nu ai.

¹ Dai shani e, ndai mahkawn mangoi ga, Yuda mung hta e mahkawn mangoi na ra ai: Anhte gaw ngang ai mare lu ga ai; shi gaw bunghku hte langchyi a malai, hkyehkrang la ai chyeju san da wu ai. ² Dinghpring ai hte kangka re ai amyu shang lu u ga, mare chyinghka ni hpe hpaw malang da mu. ³ Myit maju jung ai wa gaw, nang hta shamyet shanat nga ai majaw, nang ban sa nga shangun wu ai. ⁴ Yehowa hpe prat tup jaw lup kamsham nga mu: Madu Yehowa gaw htani htana lunghkrung rai nga ai. ⁵ Shi gaw tsaw ai shara hta shanu nga ai ni a myit kaba ai mare hpe shayu kau wu ai; shi dai hpe ga du hkra shagrit kau ai hte, ga nhpu du hkra shanem kau wu ai. ⁶ Masha lagaw dai hpe kabye kau na ra ai: gaja wa, matsan mayan ni a lagaw, hpa n lu ai ni a lahpan, dai hpe kabye kau na ra ai. ⁷ Dinghpring ai ni a lam gaw malang ai lam rai nga ai; nang gaw dinghpring nga nna, myit malang ai ni a lam lajang nga ndai. ⁸ Rai sa, Yehowa e, nang tara dara ai lam hta hkan sa let, anhte nang hpe myit mada nga ga ai; anhte a myit masin gaw, na a danhkung ai amying shingteng hpe marit nga ai; ⁹ shana e mung nye a myit masin nang hpe ala nga ai; gaja wa, nye a kraw lawang na wenyi hte, ngai nang hpe jau jau e tam na nngai: kaning rai nme law, ga ntsa e nang tara dara nga yang, mungkan ga na ni gaw dinghpring ai lam sharin la ma ai. ¹⁰ Tara n lang ai wa gaw, chyeju hkam la timung, dinghpring ai lam sharin la hkraw ai, n rai; malang ai hku hkan ai mung hta pyi, shi myit magaw ai hku maw nna, Yehowa a daru magam hpe nawn ai n rai. ¹¹ Yehowa e, nang lata sharawt timung, shanhte n matsing ma ai; raitimung, na a amyu a matu nang rawng ai nja nhpra myit hpe, shanhte mada mu nna, kaya hkrum na mara ai: nang hpe hpyen ai ni hkru mat na mara ai. ¹² Yehowa e, nang anhte a matu ngwi pyaw lam san da na ndai; kaning rai nme law, anhte a amu mahkra hpe pyi nang anhte a matu shachyen nu ai. ¹³ Anhte a Karai Kasang Yehowa e, nang hta shaje madu kaga ni anhte a ntsa e up masai; ya chyawm gaw, na a majaw sha, na a amying shingteng hpe anhte dum na ga ai. ¹⁴ Dai madu ni gaw si ma masai; bai hkrung lu na n rai; shanhte minla tai masai, bai rawt lu na n rai; dai lam majaw, nang shanhte hpe kawan katsan yu ai hte, shanhte hpe jahten shabyak kau nna, shanhte a masat dingsat pyi n nga lu hkra, shamyit kau manu ai. ¹⁵ Yehowa e, nang anhte a amyu hpe shalaw jahtam nu ai, gaja wa shalaw jahtam nu ai; nang hpung shingkang danhkung ndai; na mung a lamu ga jarit grup, nang maden jat nu ai. ¹⁶ Yehowa e shanhte nni nkri hkrum yang, nang hta myit manoi nga masai; nang shanhte hpe shari yang, shanhte hpyi madai masai. ¹⁷ Yehowa e, gawng li ai num gaw shangai nhtoi gu nna, shinggyim machyi hkrum ai majaw jahtau nga ai hte maren, anhte na a man e rai nga saga ai. ¹⁸ Anhte gawng li nna, shinggyim machyi timung, nbung hpe sha shangai saga ai; mung masha ni gaw hkyehkrang la ai kaw n du ma ai; mungkan ga na ni mung n kataw ma ai. ¹⁹ Na a si ai masha ni bai hkrung na mara ai; nye a moi mang ni bai rawt na mara ai: ga nhpu hta shanu nga ai ni e, hprang nna mahkawn mangoi mu; kaning rai nme law, nang hta hkrat ai mari gaw, namlaw namlap hta hkrat ai mari hte bung nna, lamu ga gaw si mat ai ni hpe bai shapraw na ra ai. ²⁰ Nye a amyu masha ni e, sa marit; kata gawk de shang nna, chyinghka la da u: pawt sindawng ai lai mat ai du hkra, na hkum hpe chyahkring mi makoi da u. ²¹ Kaning rai nme law, ga ntsa masha ni hpe, tinang a yubak majaw, ari jaw na matu, Yehowa gaw shi a shara kaw na pru wa ai; lamu ga gaw shi chyup ai asai bai shapraw dan nna, htawmhpang e sat kau hkrum ai ni hpe makoi magap na n rai.

¹ Dai shani e, Yehowa gaw, shi a ja la ai, galu kaba nna n-gun ja ai nhtu hte, lawan chye a baren lapu hte magyi magaw re ai baren lapu hpe, kawan katsan yu nna, nammukdara e rawng ai numraw hpe sat kau na ra ai. ² Dai shani e, tsabyi sun hpe lakap nna mahkawn mangoi mu. ³ Ngai Yehowa gaw sun sin ai wa rai nngai; n sim n sa ntsin jaw we ai; kadai n jahten lu hkra, ngai shani shana sin na we ai. ⁴ Ngai pawt ni ai, n rai; tsing hte ju hpun ni ngai hpe daw n ga lè; ngai dai ni hpe alawan htim nna, rau nat kau na we ai. ⁵ Shing n rai, shi nye a n-gun hta hpa nna, ngai hte jinghku hku u ga, rai sa, ngai hte jinghku hku u ga. ⁶ Yaku gaw htawmhpang prat e aru jung na ra ai; Israela gaw tsit lali nna pu majawm na ra ai: shan gaw mungkan ga hpe nsi naisi hte jahpring na mara ai. ⁷ Shan hpe adup kau ai ni, adup kau ai hkrum ai hte maren, shan gaw adup kau ai hkrum ma sa ni? shan hpe sat kau ai ni, sat kau hkrum ai hte maren, shan sat kau hkrum ma sa ni? ⁸ N rai law, nang shanhte hpe shapraw kau yang, sharam ai myit hte nang ari jaw nna, sinpraw nbung bung ai shani e shanhte hpe ahpawt kau manu ai. ⁹ Dai rai nna Yaku amyu gaw yubak raw dat kau ai hkrum nna, Asherum sumla ni hte jan sumla ni htawmhpang e n nga lu hkra, shi gaw tawn hkungri ni a nlung ni mahkra hpe namhtun lung zawn agrawp kau ai gaw, shi a yubak raw dat kau ai akyu rai na ra ai. ¹⁰ Kaning rai nme law, bunghku kum ai mare gaw katsi katsang rai nga ai hte, zaibru jang e kau tawn da ai mare dingsa hte bung nga ai: dai yang e dumsu kasha gaw ushat tam nna, hpum nga let, makrung matsun ni sha na mara ai. ¹¹ Lakung lakying ni hkraw mat yang, gang daw kau ai hkrum nna, num ni hpun hta ju kau na mara ai; kaning rai nme law, dai amyu gaw nyan tang ai amyu rai nga ai: dai re ai majaw, shanhte hpe hpan da ai wa gaw, matsan dum na n rai, hpan hpajang ai wa gaw, shanhte hpe myiman shapa na n rai. ¹² Dai shani e Yehowa gaw, Hka nu kaba kaw nna Egutu hka shi du hkra, shi hte seng ai nsi naisi dup la nhtawm, Israela kashu kasha ni e, nanhte langai hte langai hkauling zawn hta la ai hkrum na marin dai. ¹³ Dai shani e, pahtau kaba dum dat nna, Asuri mung e si mat magang ai ni hte, Egutu mung hta kau da hkrum ai ni gaw, sa du nna, shanhte gaw Yerusalem mare na chyoi pra ai bum ntsa e, Yehowa hpe nawku na mara ai.

¹ Tsabyi jahku nang nna, sau hpum ai kadit mahka e nga ai, Ehprim a chyaru ya ni a gumrawng ai janmau hte, nyui mat magang ai arawng sadang a nampan gaw, dingnye nga u ga. ² Yu u, Madu gaw n-gun ja ai hte atsam rawng ai wa hpe hkangda nna, dai wa gaw, sin lawm ai jahten ai nbung laru adawt ai hte, hka hpungla kaba lim ai zawn, tinang a lata hte shanhte hpe ga du hkra kadawng kau na ra ai. ³ Ehprim chyaru ya ni a gumrawng ai janmau gaw, kabye kau ai hkrum na ra ai; ⁴ sau hpum ai kadit mahka e nga ai nyui magang ai arawng sadang a nampan gaw, nlum ta garai n du yang, myin ai lakum si hte bung na ra ai: dai hpe mu hkrup ai wa gaw, lata e di lang let, kamaw kau na ra ai. ⁵ Dai shani e, Zaw nawng zaw wa up ai Yehowa gaw, naw ngam nga ai, shi a amyu masha ni a matu, arawng sadang janmau hte tsawm htap ai shanghkawng tai na ra ai. ⁶ tara tingnyang hta dung ai wa hpe tara ding ai nyan, mare chyinghka lam e hpyen hkap manga kau lu ai ni hpe n-gun atsam jaw na ra ai. ⁷ Raitimung shanhte pyi tsabyi majaw shut masai; chyaru majaw ndi nda hkawm masai; hkinjawng wa hte myihtoi wa gaw chyaru majaw shut masai; shanhte tsabyi jahku hta galu nna, chyaru majaw ndi nda hkawm ma ai; shanhte teng ai shingran n mu, tengman ai hku tara n dara ma ai. ⁸ Shanhte a sha ku ni yawng, nhpat hkrai hpring nga ai; sanseng ai shara n nga ai. ⁹ Dai myihtoi wa gaw kadai hpe sharin mayu a ta? shi tsun ai shiga, kadai hpe chye shangun a ta? Chyu chyu nna, kanu a madoi chyuhpang hta hka ai ni hpe, rai kun? ¹⁰ Shi chyawm gaw htet da ai ga ntsa e htet da ai ga, htet da ai ga ntsa e htet da ai ga, lam mi a ntsa e lam mi, lam mi a ntsa e lam mi, nang e kaji mi, wonang kaji mi tsun kahtap nga a hka! Nga nna shanhte tsun ma ai. ¹¹ - ¹² gaja wa, Dai gaw ban sa ai lam rai nga ai; hki ba hkrum ai wa hpe ban sa shangun u; dai gaw nsa awai ai lam rai nga ai, nga nna shanhte hpe tsun dan timung, n madat hkraw ma ai majaw, shi gaw, tsasam ga tsun ai nten hte, ga amyu kaga hku ndai amyu hpe tsun da na ra ai. ¹³ Dai re ai majaw, shanhte sa wa yang, nhtang chyaw kadawng ai, agrawp kau ai, mahkam hta lu ai hte rim la ai hkrum lu hkra, Yehowa mungga gaw shanhte a matu, htet da ai ga ntsa e htet da ai ga, htet da ai ga ntsa e htet da ai ga; lam mi a ntsa e lam mi, lam mi a ntsa e lam mi, nang e kaji mi wonang kaji mi rai na ra ai. ¹⁴ Dai rai nna, Yerusalem mare na amyu hpe up ai jahpoi ga chye tsun ai ni e, Yehowa a ga madat mu: ¹⁵ - ¹⁶ Anhte gaw si hkrung si htan hte ga shaka tawn da saga ai; katsan ga hte anhte myit hkrum ga ai: lim kau ai ari ahpri lwi wa timung, anhte kaw du lu na n rai; anhte gaw masu matsa ga hta shingbyi nna, hkalem ai ga npu e makoi nga ga ai, nga nna tsun myit dai majaw, yu mu, Madu Yehowa gaw, Ziun bum ntsa e kangka re ai, hpu la ai hte ngang ai njut nlung hpe, ngai npawt gaw da nna, kamsham ai wa gaw hprawng ra ai n rai. ¹⁷ Dai hta kaga ngai gaw, tara ding ai hpe mahkren sumri, dinghpring ai hpe shadawn chyu shatai nna, sin laru gaw masu matsa ga a shingbyi shara jahkoi kau ai hte, hka hpungla ni gaw makoi shara hpe lim kau na ra ai. ¹⁸ Si hkrung si htan hte nanhte tawn da ai ga shaka mung hten mat na ra ai; katsan ga hte myit hkrum ai lam mung grin nga na n rai; lim kau ai ari ahpri lwi wa yang, nanhte kabye kau ai hkrum na myit dai. ¹⁹ Dai galoi du jang, nanhte hpe dep na ra ai; lahpawt mi hte lahpawt mi, shani shana dai gaw du pru nna, de a lam shiga na yang pyi hkrit kajawng shara rai nga ai. ²⁰ Kaning rai nme law, yupku gaw latsawn n mai hkra gadun nga ai, hpajawng mung, hpun n mai hkra, kaji nga ai. ²¹ Yehowa gaw shi a amu ngu ai, mauhpa amu, shi a bungli ngu ai, lak lai ai amu shangut lu hkra, Perazim bum e rawt ai zawn shi rawt nna, Gibeon kadit e pawt bu ai zawn, pawt bu na ra ai. ²² Ya chyawm gaw nanhte gyit hkang ai grau nna n hkrum myit ga, jahpoi ai ga hkum tsun myit: kaning rai nme law, lamu ga ting hpe dawdan shamyit kau na nga ai ga, Zaw nawng zaw wa up ai Madu Yehowa kaw na, ngai na se ai. ²³ Na la mu, nye a nsen madat mu; matsing mu, ngai tsun ai ga, madat mara mu. ²⁴ Hkauna galau ai wa gaw, nli gat na matu, tutnawng a galau nga a ni? tutnawng ga hpe shawt ai hte a masit nga a ni? ²⁵ Dai hpe masit shara kau nhtawm, hpakgyi hte shingtawn pan, hkaulan mam hpe lam mi hte lam mi, muk-yaw mam hpe tinang hte ang ai shara e, shingnawm hkan e manggawng si gat hkai ga ai, n rai ni? ²⁶ Kaning rai nme law, shi a Karai Kasang gaw, shi hpe atsawm sha sharin ya ai hte, lam madun nga ai. ²⁷ Bai, hpakgyi tum hpe hpri tawng hte dup ai n rai; shingtawn pan ntsa e leng dingsen hpe shachyai ai n rai: hpakgyi tum hpe shingna hte, shingtawn pan hpe hkawn hte she, dup ga ma ai. ²⁸ Muk kabaw na matu mam rin ra ai; dai hpe tutnawng adup nna, leng hte gumra e kabye timung, shadung tai lu ai n rai. ²⁹ Dai amu gaw, Zaw nawng zaw wa up ai Yehowa kaw na rai nga ai: shi gaw hpaji daw ai lam hta mauhpa wa, hpaji hparat hta galu kaba htum ai wa, rai nga ai.

¹ Dawi but nga ai mare, Ariela e, Aw, Ariela e! laning mi a ntsa e laning mi kahtap mu: poi ladaw shagu mu; ² shaloi ngai gaw Ariela hpe sharu shatsang nna, sharung shayawt ai hte myit yawn ai pru na ra ai; raitimung shi gaw nye a man e Ariela zawn naw rai nga na ra ai. ³ Ngai gaw na a grupyin e dap jung na nngai; san da ai luksuk ni hte nang hpe wang tawn nna, kaduk htu na nngai. ⁴ Nang gaw shagrit kau ai hkrum nna, ga e taw let ga tsun ai hte, ga nhpu kaw nna ga gasa tsun na rin dai; na a nsen gaw, nat shung ai wa a nsen zawn, ga de na pru nna, nang gaw ga nhpu kaw nna ga kahte tsun na rin dai. ⁵ Raitimung, nang hpe hpyen ai wunawng wuwa ni gaw nbun zawn, hkrit na nsan ai wunawng wuwa ni gaw, poi mat ai mahkaw zawn, tai na mara ai: gaja wa dai gaw akajawng sha byin na ra ai. ⁶ Zaw nawng zaw wa up ai Yehowa gaw, mu ngoi ai, nnang nawn nawn ai, wu kadu ai nsen hte rau, nbung laru, marang mawru, hkru kau ai wan shinglet hte, dai mare hpe kawan katsan yu na ra ai. ⁷ Dai rai nna, Ariela hpe hpyen gasat ai hte, de a hpyendap ni hpe wang tawn let, shi hpe sharu shatsang ai masha amyu ni a wunawng wuwa ni yawng, yupmang hte shana na shingran zawn tai na mara ai. ⁸ Shingrai, kawsi kyet ai wa gaw, yupmang e sha lu timung, yup hprang wa yang, kan naw kyaw nga ai zawn, hpang gara let ai wa gaw, yupmang e lu lu timung, yup hprang wa yang, mayu naw hkun nna ntsin naw lu mayu ai hte maren, Ziun bum hpe hpyen gasat ai amyu masha ni a wunawng wuwa ni yawng hta byin na ra ai. ⁹ Mak mat nna mau nga mu; myi di nna n mu nga mu; shanhte tsabyi jahku hte nang ai n rai, chyaru hte ndi nda re ai n rai. ¹⁰ Kaning rai nme law, Yehowa gaw, nanhte hpe yup shamawi ai hte, myi di shangun nga ai: myihtoi ni hte nanhte a baw ngu ai, shingran mu ai ni a myi hpe, shi magap da wu ai. ¹¹ Shingran yawng nanhte a man e dazik kap ai laika hte bung nga ai: laika chye hti ai wa hpe, Ataw, dai hti yu u, ngu yang, shi gaw, Dazik kap ai majaw n hti lu nngai, nga ai; ¹² laika n chye hti ai wa hpe, Ataw, dai hti yu u, ngu yang, shi gaw, Ngai laika n chye nngai, nga ai. ¹³ - ¹⁴ Dai rai nna, Ndai amyu gaw tinang a n-gup hte ngai hpang de sit sa nna, nten hte ngai hpe hkungga lara ma timung, myit masin gaw ngai hte tsan gang nna, ngai hpe hkrit hkungga ai lam, masha sharin ya ai hkangda ai ga sha rai nga ai majaw, yu u, ndai amyu a ka-ang e ngai mauhpa amu galaw nna, gaja wa, mauhpa amu hte lamik kumla shachyen na nngai: shanhte a hpaji rawng ai ni a hpaji byeng-ya hten mat nna, shanhte a myitsu ai ni a nyan, makoi mat ai hkrum na ra ai, nga nna Madu Yehowa tsun ai. ¹⁵ Yehowa n mu lu hkra, tinang a sung ai hpaji daw ai lam makoi kau nna, nsin e amu galaw let, Anhte hpe dadai mu a ta? anhte a lam kadai chye a ta? nga nna tsun ai ni dingnye lu ma ai. ¹⁶ Nanhte gale galau rai nga myit hka! Di bu galaw ai wa hpe ga kagam zawn nawn mai a ni? galaw da ai arai gaw galaw da ai wa hpe, Shi ngai hpe n galaw ai; shachyaw da ai arai gaw shachyaw da ai wa hpe, Shi nyan n rawng ai, nga nna tsun mai a ni? ¹⁷ Gade n na yang, Lebanon bum gaw namsi sun tai nna, namsi sun gaw maling dinggram tai na ra ai, n rai ni? ¹⁸ Dai aten e na lahpang ai ni gaw chyum laika ga na lu na mara ai; myi kyaw ai ni gaw nsin e pyi mu lu na mara ai. ¹⁹ Myit kyip ai ni gaw, Yehowa hta hpa let kabu gara shalaw na mara ai; ga ntsa na matsan mayan ni gaw, Israela a Chyoi pra ai Wa hta awng sharawng na mara ai. ²⁰ Kaning rai nme law, gumshem ai wa gaw htum mat nna, jahpoi ai wa gaw n nga sai; ²¹ tara lam manai nna, chyinghka lam e sa shawk ai wa hpe mahkam hkam ai hte, dinghpring ai wa hpe pagawn gangkau let, n hkru n hkra galaw maw ai ni yawng, shamyit kau ai hkrum ma ai. ²² Dai re ai majaw, Abraham hpe hkyehkrang la ai Yehowa gaw, Yaku amyu hpe shaang nna, Yaku gaw kaya kahpa ya hkrum na n rai, myiman mung sum na n rai. ²³ Shi a kashu kasha ni gaw, ngai hpajang da ai amu hpe, shi a ka-ang e mu mada yang, shanhte gaw nye a mying hpe shagrau shaa na mara ai: gaja wa Yaku a Chyoi pra ai Wa hpe hkungga lara nna, Israela a Karai Kasang hpe hkrit kamyin na mara ai. ²⁴ Lam dam ai ni gaw chye na lu nna, je hpre ai ni gaw sharin achyin ai ga, hkam la na mara ai, nga ai.

¹ Yehowa ning nga ai: gumlau ai kashu kasha ni gaw dingnye lu ma ai: shanhte gaw ngai hta n hpa ai bawng yu nna, yubak kahtap hkra, nye a Wenyi n lawm ai, ga shaka tawn da ma ai: ² Hpara-u a n-gun atsam hte tinang a n-gun shaja nna, Egutu shingnip hta shingbyi nga na nga, shanhte ngai hpe n san yu ai, Egutu mung de yu wa ma ai. ³ Dai re ai majaw, Hpara-u a n-gun atsam, nanhte a kaya kahpa, Egutu a shingnip nanhte a mak mat ai lam tai na ra ai. ⁴ Shanhte a du ni gaw Zoan mare de, shanhte a kasa ni gaw Hanet mare de, du masai. ⁵ Shanhte hpe n karum lu ai hte, asung n shang nna, hpa akyu n rawng ai, kaya kahpa hte lam n la ai amyu majaw, shanhte yawng kaya kahpa hkrum na mara ai. ⁶ Dingda mung na numraw hpe ang ai myihtoi ga: Hkanghkyi yi hte hkanghkyi, pu htum hte pyen chye ai wan lapu sawng nna, yak la ai hte kyindut ai mungdan hku shanhte ga sa wa nna, shanhte a matu hpa asung n shang ai amyu hpang de, lawze dinghkung hta sutgan, gawla-uk ni a dabu ntsa e aja gumhpraw, htaw sa ma hka. ⁷ Kaning rai nme law, Egutu mung gaw, asung n shang ai hte kaman lila rai nga ai: dai re ai majaw ngai shi hpe, N shamu chye ai Rahab, ngu nna shamying we ai. ⁸ Nang ya sa su; ndai ga gaw htani htana prat dingsa agrin nga lu hkra, shanhte a man e lung pa hta tawk da u, laika shabawn hta ka da u: ⁹ kaning rai nme law, ndai amyu gaw, gumlau ai amyu rai nga ai hte, Yehowa a tara n madat hkraw ai kashu kasha ni rai nga ma ai: ¹⁰ shanhte gaw shingran mu ai wa hpe, Shingran hkum mu et; myihtoi ni hpe, Tengman ai hku hkum htoi myit; ga ngwi ga pyaw she tsun mu; hkalau ai lam htoi mu; ¹¹ lam yen mu, tengman ai hpe koi mu; Israela a Chyoi pra ai Wa a lam anhte a man e ip da mu, nga nna tsun ma ai. ¹² - ¹³ Dai re ai majaw, Israela a Chyoi pra ai Wa gaw, Nanhte nan ndai mungga hpe n kaw n law di nna, myit magaw ai lam hte adip arip re ai hpe kam let dai hta manoi nga myit dai majaw, nanhte a yubak gaw, run magang wa ai tsaw ai wut bunghku hte bung nna, dai gaw akajawng myi grip sha daw kadawng wa na ra ai. ¹⁴ Di bu ga mat ai zawn, matsan n dum ai, shi dai hpe ga kau na ra ai; shingrai, wan n-ga hta na matu mung, ntsin ja na matu mung, di hkyep mi pyi n ngam nga na ra ai, nga ai. ¹⁵ Bai, Israela a Chyoi pra ai Wa Madu Yehowa gaw, Nanhte myit kayin nna asim sha nga ai gaw, nanhte a hkyehkrang la ai lam rai nga ai; asim sha nga let kamsham ai hte nanhte n-gun lagaw lu la na myit dai; raitimung, dai lam nanhte n ra myit dai. ¹⁶ Nanhte mahtang, N rai law, anhte gumra hte hprawng na ga ai, nga nna tsun myit dai majaw, gaja wa hprawng na myit dai; Anhte laram ai gumra jawn na ga ai, nga myit dai majaw, nanhte hpe hkan shachyut ai ni, lawan na mara ai. ¹⁷ Nanhte gaw bum ntsa e jung ai mahtan daw, kawng ntsa e sharawt ai dawnghkawn hte bung hkra, marai langai mi kajet yang, hkying mi, marai manga kajet yang, nanhte yawng hprawng mat na myit dai, nga ai. ¹⁸ Raitimung, nanhte hpe chyeju myit madun na matu, Yehowa ala nga ai; nanhte hpe matsan dum na matu shi galu kaba nga ai: kaning rai nme law, Yehowa gaw tara ding ai Karai Kasang rai nga ai; shi hpe ala nga ai ni yawng, a lu ma ai. ¹⁹ Yerusalem mare na Ziun bum ntsa e shanu nga ai amyu e, nang gaw htawmhpang de hkrap sa na, n rai; nang jahtau ai nsen majaw, shi teng teng gaja wa nang hpe matsan dum na ra ai; dai nsen hpe na jang, shi htan na ra ai. ²⁰ Madu gaw nang hpe nni nkri muk jaw nna, ruyak ai ntsin lu shangun timung, na a sara ni gaw htawmhpang de makoi mat na n rai; tinang myi hte nan, na a sara ni hpe mu lu na rin dai. ²¹ Dai hta kaga, nanhte gaw hkra de pai de yit wa yang, Ndai gaw lam rai nga ai, ndai hku hkan mu, nga nna na a shingdu de tsun ai ga, na a na hte na lu na rin dai: ²² bai nanhte gaw, gumhpraw hte sup ai tawk la ai sumla ni hpe mung, ja sup ai jaw la ai sumla ni hpe mung, awu asin di kau nna, matsat shabat re ai rai zawn kabai kau nna, matsat shabat re ai rai zawn kabai kau let, Pru wa mu, nga nna tsun na myit dai. ²³ Bai, Yehowa gaw, na a yi hkauna hta nang gat ai nli a matu, marang jahtu nna, lamu ga a nsi naisi hta na muk law wa na ra ai; dai gaw dwi sau ai hte n taw n tsang rai nga ai: dai shani e na a yamnga ni gaw, dam lada ai udat shara hta sha nga na mara ai. ²⁴ Na a yi hkauna galau ai dumsu ni hte lawze ni gaw, atsawm sha katsap hking kau ai jum shum ai mam sha lu na mara ai. ²⁵ Masha law law sat kau ai hte langchyi ni hpe kadawng kau ai shani e, tsaw ai bum shagu a ntsa e mung, tsaw ai kawng shagu a ntsa e mung, hka shi hka gai ni lwi na ra ai. ²⁶ Dai hta n-ga, Yehowa gaw, shi amyu a nma hpe kayawp nna, shanhte a hkala nba hpe shamai shatsai ai shani e, shata a nhtoi gaw jan a nhtoi zawn, jan a nhtoi gaw, myi na hta, htam sanit htoi na ra ai. ²⁷ Yu u, Yehowa a mying nsang gaw sumtsan de na du ra ai; dai gaw shi a pawt bu ai hte hkru nna, htat ai wanhkut mawng nga ai: shi a n-gup gaw pawt kahtet ai hte hpring nna, shi a shinglet hkru ai wan rai nga ai; ²⁸ shi a nsoi nsa gaw du du hkra lim ai hka hpungla hte bung nna, shi gaw masha amyu ni hpe hten byak ngu ai hking hte hking kau na ra ai: masha amyu ni a n-gup hta mung, shanhte hpe lam shadam ai runghtung htung ya na ra ai. ²⁹ Chyoi pra ai poi galaw ai shana e zawn, nanhte mahkawn mangoi na marin dai; Israela lunghkrung ngu ai, Yehowa a bum de sumpyi dum let lung wa ai zawn, kabu gara na myit dai. ³⁰ Yehowa mung shi a daru magam nsen dat dat nna, pawt sindawng ai, wan hkru ai, nbung bung ai, laru ru ai, sin marang hte shi a lahpum shada na ra ai. ³¹ Kaning rai nme law, Yehowa a nsen majaw Asuri wa gaw mak mat na ra ai; hkawn hte adup ai mung hkrum na ra ai. ³² Yehowa gaw san da ai hkawn hte, shi hpe kayat hkra shagu, shupsheng, tingse mahku ngoi na ra ai; hpyen shani e, shada ai lahpum hte, shi hpe hpyen gasat na ra ai. ³³ Kaning rai nme law, moi chyaloi nhkoi kaw nna, Tohpet shara hpajang da sai; gaja wa, hkawhkam wa a matu lajang da sai; dai shara hpe sung ai hte dam lada di nu ai; de a sumpum gaw wan hte hpun law law rai nga ai: Yehowa a nsoi nsa gaw, byawng mat ai kan zawn, dai hpe shachyi na ra ai.

¹ Israela a Chyoi pra ai wa hpe n mada ai hte, Yehowa hpe n tam ai sha, hpyen karum la na matu, Egutu mung de yu wa nna, law la ai gumra ni hte hpyen leng ni hpe mung, n-gun grai ja ai gumra jawn ai ni hpe mung, shamyet shanat nga ai ni gaw, dingnye lu ma ai. ² Shi mahtang nyan rawng nna, nni nkri jahkrum na ra ai; shi a ga shabai la na n rai; n hkru n hkra ai amyu hpe mung, tara n hkan ai ni, sa karum na mung, hkap shadang na ra ai. ³ Egutu masha ni gaw Karai Wa n rai, masha hkrai rai nga ma ai; shanhte a gumra ni mung, wenyi n rai, shan hkrai rai nga ai; Yehowa gaw lata ladawn jang, karum ai wa mung ahtu kadawng nna, karum la ai wa mung di hkrat na ra ai: shanhte yawng rau htum mat na mara ai. ⁴ Kaning rai nme law, Yehowa ngai hpe ning nga ai: Hkanghkyi hte hkanghkyi hkalung gaw, magra la ai mang ntsa e nying nga yang, sagu rem ai masha wunawng jahtau marawn timung, shanhte a nsen hpe n hkrit ai hte, shanhte wu ngoi ai hpe n nawn ai hte maren, Zaw nawng zaw wa up ai Yehowa gaw, hpyen gasat na matu, Ziun bum hte dai hte seng ai kawng a ntsa e, yu wa na ra ai. ⁵ U gaw tinang a tsip sin nga ai hte maren, Zaw nawng zaw wa up ai Yehowa gaw Yerusalem mare hpe makawp maga na ra ai; makawp maga nna, mawai la na ra ai; yubak shalawt dat nna, shagrin da na ra ai. ⁶ Israela kashu kasha ni e, nanhte pagawn di kau ai wa hpang de, nhtang wa manu. ⁷ Gaja wa, yubak galaw na matu, masha langai hte langai tinang a lata hte galaw ai gumhpraw sumla hte, aja sumla ni hpe, dai shani e shanhte kabai kau da na mara ai. ⁸ Asuri wa mung, masha n lang ai nhtu hte si na ra ai; masha n lang ai nhtu gaw shi hpe shamyit kau na ra ai; shi gaw nhtu tsin-yam hta na hprawng nna, shi a wa-ngan ni mayam tai na mara ai. ⁹ Shi a lunghkrung gaw hkrit kajawng ai hte hten mat nna, dawnghkawn hpe mu ai majaw, shi a hpyenbu ni myit htum na mara ai, nga nna Ziun bum e wan shagrung nna, Yerusalem mare hta wanhtung tawn da ai Yehowa tsun nga ai.

¹ Yu mu, dinghpring ai hku hkan ai hkawhkam up nga nna, du ni gaw malang ai hku hkan let, tara dara na mara ai. ² Shanhte langai hte langai, nbung chyip nna laru marang shingbyi shara hte, hkraw hkun ai shara hta lwi ai hka, zaibru jang hta shingnip ai lunghkrung kaba, tai na mara ai. ³ Myi mu ai ni gaw, myi amam na n rai; na san ai ni gaw, madat mara na mara ai; ⁴ sadi n chye ai ni, aru yu nna nyan rawng na mara ai; maa ai ni a shinglet gaw, ga hkrang hkrang tsun chye na ra ai. ⁵ Mana ai wa hpe, salang wa, maji ai wa hpe, gam jaw gam ya ai wa, nga nna htawmhpang de tsun na n rai. ⁶ Kaning rai nme law, mana ai wa gaw, matsa mawa ga hte Yehowa hpe ga hku shut kau na matu mung, kawsi hkrum ai ni, grau kawsi kyet na hte, hpang kara hkrum ai ni ntsin n lu lu na matu mung, mana ga tsun nna n kaja ai hpaji daw na ra ai. ⁷ Maji ai wa a galaw ai lam mung, n hkru la nga ai: matsan mayan ni tara hte maren galaw timung, masu ai ga hte myit gyip ai ni hpe jahten na nga, shi n hkru ai hpaji daw nga ai. ⁸ Salang myit rawng ai wa chyawm gaw, salang hte ging ram ai hku bawng nna, dai baw amu hta grin nga na ra ai. ⁹ Apyaw sha nga ai num ni e, rawt mu; nye a nsen na la mu; n dum shami nga ai shayi sha ni e, ngai tsun ai ga madat mu. ¹⁰ N dum shami nga ai num ni e, laning mi daram lai yang, nanhte myit ru na marin dai; kaning rai nme law, tsabyi si shu ai aten htum mat na ra ai; nmut ta shang lu na n rai. ¹¹ Apyaw sha nga ai num ni e, hkrit gari mu; n dum shami nga ai ni e, myit ru nga mu; hpun palawng raw kau nhtawm, lachyit nba bu hpun mu: ¹² shanhte gaw ngwi pyaw ai yi hkauna ni hte, si law ai tsabyi ru ni a lam, sinda adup let sharung shayawt na mara ai. ¹³ Nye a amyu masha ni a mungdan ntsa e mung, ngwi pyaw ai mare na kabu gara ai nta ni mahkra a ntsa e mung, tsing hte ju hpun ka-up na ra ai. ¹⁴ Kaning rai nme law, hkawhkam thingnu gaw, kau da ai hkrum nna, masha law nga ai mare gaw, shingran katsi mat na ra ai: ¹⁵ matsaw ntsang de na wenyi gaw anhte a ntsa e ru bun nna, nam mali gaw nsi naisi hpring ai yi hkauna, nsi naisi hpring ai yi hkauna gaw maling zawn nawn ai shani du hkra, Ohpela kawng hte langchyi ni gaw, prat dingsa lungpu tai mat nna, lawze nhprang ni dai hta pyaw nga nna, dai gaw yamnga ni a udat shara tai wa na ra ai. ¹⁶ Dai shani e nam mali hta e tara ding ai shanu nga nna, nsi naisi hpring ai yi hkauna hta, dinghpring ai, grin nga na ra ai. ¹⁷ Dinghpring ai gaw, ngwi pyaw ai shabyin na ra ai: dinghpring ai a akyu gaw, htani htana ngwi pyaw ai hte myit maju jung ai, tai na ra ai. ¹⁸ Nye a amyu masha ni gaw ngwi pyaw ai buga, shim ai dum nta, asim sha re ai dabang e, shanu nga na mara ai. ¹⁹ Raitimung, sin hkrat ai hte dai maling kadawng daw nna, mare mung atsai awai shamyit kau ai hkrum na ra ai. ²⁰ Hkakau shagu hta nli gat lu nna, utang hte lawze dat dat lu ai, nanhte gaw, a lu myit dai.

¹ Jahten shabyak shabyin timung, jahten shabyak garai n hkrum ai, hkalem ai hku galaw timung, hkalem kau ai garai n hkrum ai wa e, nang dingnye lu ndai. Nang jahten shabyak shabyin ngut jang, nang nan jahten shabyak ai hkrum na rin dai; nang hkalem kau ai shatup ngut jang, shanhte gaw nang hpe hkalem kau na mara ai. ² Yehowa e, anhte hpe matsan dum mi; anhte nang hpe ala nga ga ai; jahpawt shagu anhte hpe n-gun jaw mi, ru tsang hkrum ai aten e, hkyehkrang la mi. ³ Wunawng wuwa nsen majaw, masha amyu ni hprawng mat ma ai; nang rawt wa yang, amyu baw ni bra mat ma ai. ⁴ Nanhte gaw dinggam-yaw zawn lanep mahkawng la nna, masha ni gaw hkagrit zawn, dai hpe lahkan hta la na mara ai. ⁵ Yehowa gaw galu kaba nga ai; shi gaw matsaw ntsang de dung nga ai; shi gaw Ziun bum hpe tara ding nna, dinghpring ai hte jahpring da wu ai. ⁶ N taw n tsang ai hkyehkrang la ai lam, hpaji byeng-ya hte chye chyang ai lam, na a prat dingsa e grin nga na ra ai; Yehowa hpe hkrit hkungga ai lam, na a sutgan rai nga ai. ⁷ Yu mu, shanhte a share ninghkrin ni shinggan de jahtau nga ma ai; htinglu ga tsun ai kasa ni gaw ja ja hkrap ma ai. ⁸ Ningmaw lam ni shingran katsi mat sai; lam hta lai hkawm ai kadai n nga ai; hpyen wa gaw ga shaka hten sai; mare ni hpe mung n nawn, masha ni hpe mung n sawn ma ai. ⁹ Mungdan gaw yawn nga nna nyui mat nga ai; Lebanon gaw mak mat nna, hkraw mat nga ai; Sharon gaw zaibru jang hte bung nna, Bashan hte Hkarmela gaw ashun awam nga ma ai. ¹⁰ Yehowa chyawm gaw, Ya ngai rawt na nngai; ya ngai danpru na nngai; ya ngai shagrau shatsaw hkrum na nngai, nga ai. ¹¹ Nanhte mahkaw hte gawng li nna, yi hku hkrai shangai na myit dai nanhte a nsoi nsa gaw nanhte hpe hkru kau na wan rai nga ai. ¹² Masha amyu ni gaw ju ai namhtun lung hte, hkyen nat kau ai ju hpun zawn, rai na mara ai. ¹³ Sumtsan mung na ni e, ngai galaw ai amu hpe matsing mu; ni nga ai ni e, nye a n-gun atsam hpe yin la mu. ¹⁴ Yubak kap ai Ziun masha ni, hkrit nga ma ai; tara n hkungga ai ni, hkrit gari ma ai: Anhte hta na kadai wa hkru ai wan hta nga lu na ga ta? htani htana wan mang hta kadai shanu lu na ga ta? ¹⁵ - ¹⁶ Dinghpring ai hku hkan ai wa, malang ai ga tsun ai wa; map lu map sha ai amyat matsat ai wa, sake manawn sha na lata gangkau ai wa, masha sat na amu n na mayu ai wa, n shawp ai amu hpe n mada yu ai wa gaw, matsaw ntsang e shanu nga na ra ai; shi gaw ngang ai nlung dap hta shingbyi nga na ra ai; lusha nhprut na n rai, ntsin mung nhtut na n rai. ¹⁷ Na a myi gaw hkawhkam wa hpe, shi a hpung shingkang hte hpawn mu lu nna, dam lada ai sumtsan mung hpe mada mu na rin dai. ¹⁸ Nang hkrithpa dum yang, Jahpan la ai wa gaw, kanang, kang shen ai wa gaw, kanang, langchyi ni hti yu ai wa gaw, kanang rai nga a ta? nga nna nang myitsumru yu na ndai. ¹⁹ Gumshem ai amyu hte, na n shang ai lapai ga hte, nang n chye na ai tsasam ga tsun ai amyu hpe, nang mu lu na ndai, n rai. ²⁰ Anhte poi dè ai Ziun hpe yu u; mailak langai mi pyi n baw ai hte, de a sumri langai mi n dut yu ai, galoi mung sit kau n hkrum ai sum ngu ai, ngwi pyaw Yerusalem mare hpe, nang gaja wa mu lu na rin dai. ²¹ Dai yang e, daru magam rawng ai Yehowa anhte hte rau rai nga nna, dam lada ai hka nu hka hkawng ni a malai tai na ra ai: lashap shap ai li gaw, dai de shang na n rai, daru magam shanghpaw li mung, dai de lai lu na n rai. ²² Kaning rai nme law, Yehowa gaw anhte a tara agyi rai nga ai; Yehowa gaw anhte hpe tara jaw ai wa rai nga ai; shi anhte a hkawhkam rai nga ai: shi anhte hpe hkyehkrang la na ra ai. ²³ Na a li sumri ni malaw mat sai; sumpan shadaw hpe shangang lu ai n rai; sumpan hpe mung hpyan lu ai n rai: dai rai nna, lanep law law karan la lu myit dai; lagaw hten ai ni pyi, lanep kashun la lu ma ai. ²⁴ Dai hta shanu ai wa gaw, Ngai machyi nga nngai, nga nna n tsun na ra ai: dai hta e dè nga ai amyu gaw yubak raw dat kau ai hkrum na ra ai.

¹ Amyu baw ni e, madat mara na matu sit sa marit; maigan amyu ni e, matsing mu; lamu ga hte de a yawng mayawng, mungkan ga hte dai hta na pru ai baw nlang, na la mu. ² Kaning rai nme law Yehowa gaw amyu baw ni mahkra hpe pawt sindawng nna, shanhte a wunawng wuwa yawng hpe myit kahtet bu nga ai: shi shanhte hpe shamyit kau ai hte, sat kau hkrum na matu ap kau wu ai. ³ Shanhte hta sat kau hkrum ai ni hpe, shinggan de kabai kau nna, shanhte a si mang ni manam mawng na ra ai; shanhte a sai hte bum ni dun mat na ra ai. ⁴ Sumsing lamu na wunawng wuwa ni yawng, hten mat nna, sumsing lamu gaw laika katsu zawn katsu mat na ra ai; de a wunawng wuwa ni yawng, tsabyi ru, lap nyui mat ai hte, lakum lap ru hkrat ai zawn, run hkrat mat na mara ai. ⁵ Kaning rai nme law, nye a nhtu gaw, sumsing lamu hta lu hkru nga ai; yu u, dai gaw Edom a ntsa e mung, ngai dagam ai amyu a ntsa e mung, ngai dagam ai amyu a ntsa e mung, ari jaw na matu du na ra ai. ⁶ Yehowa a nhtu gaw, sagu kasha hte bainam asai, sagu la a nhkyun sau hte, sai hkru nga nna, sau abya nga ai; kaning rai nme law, Yehowa gaw Bozra mare e shagu hkungga nawng ya nna, Edom mung hta sat poi kaba galaw nga ai; ⁷ shanhte hte hpawn hkawlam ni, usu ni hte utang ni kadawng taw nna, shanhte a lamu ga gaw asai hte nang nna, ga nhpu gaw sau man hte sau na ra ai. ⁸ Kaning rai nme law, Ziun a lam majaw matai htang na shani hte, ari jaw na shaning, Yehowa tawn da sai. ⁹ Edom mung a hka shi ni gaw marau sau, de a ga nhpu gaw kan tai mat nna, mung ting gaw wan hkru ai marau sau, tai na ra ai. ¹⁰ Shani shana wan krip na n rai; wanhkut mung tutnawng mawng na ra ai; dai mung gaw prat mi hte prat mi shingran katsi nna, prat dingsa tutnawng kadai ga lai wa na n rai. ¹¹ Wunpu u hte dumsi ni dai mung hpe madu nna, du du di di hte u hka ni dai hta shanu nga na mara ai: Yehowa gaw dai mung a ntsa e akrin ayang ngu ai shadawn sumri hte, asan awan ngu ai shadawn nlung hpe, dat dat na ra ai. ¹² Mungdan up na matu agyi salang shaga yang, langai mi muk n nga ai; de a du ni yawng htum mat na mara ai. ¹³ De a htingnu ni hta ju hpun, de a langchyi ni hta tsamat hte tsing tu nna, nam gwi ni dai hta shanu, u gawla-uk ni dai hta shingbyi nga na mara ai. ¹⁴ zaibru jang na matse labye ni gaw, dai yang e chyahkyawn ni hte hkrum nna, ya ni gaw tinang a manang hpe shaga na mara ai: gaja wa, lep palawng dai yang e shanu nna, ban sa shara mu na ra ai. ¹⁵ Pu hkram mung dai hkan e tsip tsip nna, di di na ra ai; di kraw nhtawm lapu hkalung ni hpe makawp maga na ra ai; gaja wa, lang da ni mung dai yang hpawng nga nna, ayi ala mazum nga na mara ai. ¹⁶ Yehowa a Chyum Laika hta sawk hti yu mu; dai dusat langai mi n pru ai, nga na n rai, manang n lu ai, langai mi nga na n rai; kaning rai nme law, Yehowa a n-gup dai hpe hkangda nna, shi a Wenyi dai ni hpe shinggyin la nga ai. ¹⁷ Shi gaw, shanhte a matu hpaida da let, shi a lata hte shadawn sumri gang nna, shanhte a shara hpe karan da wu ai: shanhte gaw dai mung hpe htani htana madu nna, prat mi hte prat mi shanu nga na mara ai.

¹ Nam mali hte hkraw hkun ai shara gaw, kabu gara na ra ai; zaibru jang mung awng sharawng nna, mari pan zawn pu na ra ai. ² Dai gaw grai wa pu an nna, sharawng let kabu gara ai hte mahkawn mangoi na ra ai: Lebanon a arawng sadang, Hkarmela hte Sharun a hpung shingkang, lu la na ra ai: shanhte gaw Yehowa a arawng sadang, anhte a Karai Kasang a hpung shingkang, mu lu na mara ai. ³ N-gun kya ai lata hpe n-gun shaja mu; gari ai lahput ni hpe shangang mu: ⁴ Da ting mu, hkum hkrit myit, ngu nna myit htum ai ni hpe tsun mu: yu mu, nanhte a Karai Kasang gaw matai htang na matu mung, shi kaw na ari jaw na matu mung, du na ra ai; nanhte hpe hkyehkrang la na matu shi nan du na ra ai. ⁵ Dai shaloi e myi hten ai ni, myi mu lu nna, na n na ai ni, na lu na mara ai. ⁶ Lagaw hten ai wa gaw shan nga zawn gumtawng lu nna, maa ai wa a shinglet gaw mahkawn mangoi na ra ai; kaning rai nme law, hkraw hkun ai shara e hka hpawk hpaw nna, zaibru jang e hka hpawk hpaw nna, zaibru jang e hka lwi na ra ai. ⁷ Kahtet kabrim ai zaibru jang hta hka lawng, hkraw hkun ai ga hta hka hpawk, hpaw na ra ai: nam gwi ni yup ai shara hta maiaw hte hka shaman hpawn tsingdu tu na ra ai. ⁸ Dai shara e, ningmaw lam mung, lam masun mung, hku na ra ai rai nna, dai hpe, Chyoi pra ai lam ngu na maru ai; n san n seng ai ni dai hku lai sa lu na n rai; bawng lawt ai ni hkrai sa lu nna, dai lam hkan ai ni hta angawk ai wa pyi, lam yit na n rai. ⁹ Dai lam hta hkanghkyi nga na n rai, matse labye mung lai na n rai; tam tim mu na n rai; bawng lawt ai ni hkrai dai hku lai na mara ai: ¹⁰ Yehowa majaw hkyehkrang la hkrum ai ni gaw nhtang wa nna, mahkawn mangoi let Ziun bum de du na mara ai: shanhte a baw ntsa e htani htana kabu gara gup na ra ai: shanhte awng sharawng let kabu gara nga nna, yawnhkyen ai hte madai ai gaw sim mat na ra ai.

¹ Ya hkawhkam Hezekia hkaw dung ai shi mali ning hta e, Asuri hkawhkam Senahkerib gaw, Yuda mung na bunghku kum ai mare ni mahkra hpe lung gasat nna lu la wu ai. ² Shaloi Asuri hkawhkam gaw Rabshake hpe san da nna, hpyen daw wa hte rau, Lahkisha mare kaw nna, Yerusalem mare hkawhkam Hezekia hpang de shangun dat wu ai: shi gaw hpun nba jaw ai wa a ga dachyawk lam a lahta singgat baw e tsap nga ai. ³ Shaloi kunhting wa ngu ai Hilkia kasha Eliakim, chyare wa ngu ai Shebna hte labau gawn ai laika hpe ka da ai Asap a kasha Yoa hte gaw, shi hpang de pru sa wa ma ai. ⁴ Shaloi Rabshake gaw shanhte hpe, Hezekia hpe ning ngu tsun mu: Galu kaba htum ai Asuri hkawhkam gaw ning nga ai: Nang gaw hpa hta shamyet shanat nga n ta? ⁵ Nang gaw, Majan gasat na matu hpaji byeng-ya mung, n-gun lagaw mung, rawng nga nngai, nga nna tsun timung, dai gaw kaman lila ga hkrai rai nga ai. Ataw, ngai hpe gumlau na nga, kadai hpe hpa nga n ta? ⁶ Ya, yu u, nang gaw daw mat ai maiaw dawhkrawng ngu ai Egutu hkawhkam hpe hpa nga n hka; dai dawhkrawng gaw shamyet shanat ai wa a lata hpe ju htinggrang na ra ai; shingrai, Egutu hkawhkam Hpara-u hpe shamyet shanat ai ni yawng hkrum na mara ai. ⁷ Bai nang gaw, Anhte a Karai Kasang Yehowa hta anhte shamyet shanat ga ai, nga nna ngai hpe htan yang, shi a tsaw ai kawng ni a shara ni hte tawn hkungri ni hpe Hezekia htawm kau nna, Yerusalem e nga ai tawn hkungri hta hkrai nanhte nawku lu na myit dai, nga nna Yuda hte Yerusalem hpe htet da sai, n rai ni? ⁸ Dai re ai majaw, nye a madu Asuri hkawhkam wa hpe ga sadi tawn da mu; nang gaw gumra jawn ai masha chye tam yang, ngai nang hpe gumra hkying lahkawng jaw na de ai. ⁹ Nang gaw nye a madu a kaji htum ai hpyenbu langai mi hpe pyi n dang kau lu ai mi, hpyen leng hte gumra lu la na nga, Egutu hkawhkam hpe shamyet shanat nga n hka? ¹⁰ Yehowa ahkang n jaw ai, ndai mung hpe jahten na, ngai lung wa n ni? Yehowa gaw ngai hpe, Ndai mung hpe lung gasat nna jahten kau u, ngu ni ai, ngu mu ai. ¹¹ Shaloi Eliakim hte Shebna yan Yoa gaw Rabshake hpe, Na a mayam ni hpe Suri ga hte tsun dan mi; dai ga anhte chye na ga ai: mare bunghku hta dung nga ai yu maya ni chye na lu hkra, Yuda ga hte hkum tsun mi, ngu nna hpyi mu ai. ¹² Rabshake mahtang, Nye a madu gaw, nang hte na madu hpe ndai ga tsun dan u nga, ngai hpe shangun dat ai rai kun? mare bunghku hta dung nga let, nanhte hte rau tinang a hkyi sha nna, tinang a jit lu ai ni hpang de shangun dat ai, n rai ni? ngu nna, shanhte hpe htan mu ai. ¹³ Bai Rabshake gaw rawt tsap nna, Yuda ga hte nsen kaba sharawt let, Galu kaba htum ai, Asuri hkawhkam a ga hpe madat mara nga mu law. ¹⁴ Hkawhkam wa ning nga ai: Hezekia gaw nanhte hpe hkum hkalem kau myit ga; shi gaw nanhte hpe nye a lata na mawai la lu na n rai: ¹⁵ dai hta n-ga, Hezekia gaw, Yehowa anhte hpe gaja wa teng teng hkye mawai la na rai nna, ndai mare hpe Asuri hkawhkam up lu na n rai, nga nna nanhte hpe Yehowa hta hpa shangun yang, hkum hkan nga myit. ¹⁶ - ¹⁷ Hezekia ga hpe hkum madat myit: Asuri hkawhkam gaw ning nga ai, Hpyen sim na lam hpyi mu, ngai hpang de pru marit; nanhte a mungdan hte bung ai, nai mam, tsabyi jahku hte hpring nga ai mung de, ngai nanhte hpe woi wa ai shani du hkra, langai hte langai tinang a tsabyi ru hte tsanlun hpun hta na sha nna, tinang a hka htung na ntsin lu nga mu: ¹⁸ Yehowa gaw anhte hpe hkye mawai la na ra ai, nga nna Hezekia nanhte hpe hkalau yang, hkum madat nga myit. Mung mi hte mung mi a Hpara ni hta, gara mahtang tinang a mung ni hpe Asuri hkawhkam a lata na hkye mawai la lu na rai ta? ¹⁹ Hamat yan Arpad a Hpara ni kanang nga ma ta? Sehparim a Hpara ni kanang nga ma ta? Shanhte gaw Samari mung hpe nye a lata na shaw la lu ma ni? ²⁰ Yehowa gaw Yerusalem mare hpe nye a lata na hkyehkrang la lu hkra, mung shagu na Hpara ni mahkra hta, gara mahtang tinang a mung hpe nye a lata na hkyehkrang la lu na rai ta? ngu nna jahtau tsun wu ai. ²¹ Mung masha ni chyawm gaw ga hkaw mi muk n htan ai, atsin sha nga ma ai: kaning rai nme law, Shi hpe hkum htan myit, ngu nna hkawhkam wa hkum da mu ai. ²² Shaloi Hilkia kasha kunhting wa Eliakim, chyare wa Shebna hte labau gawn laika hpe ka da ai, Asap a kasha Yoa hte gaw, tinang a hpun palawng gang je kau let, Hezekia hpang de sa du nna, Rabshake a ga shi hpe shana ya mu ai.

¹ Ya hkawhkam Hezekia gaw dai ga na jang, shi a hpun nba gang je kau nna, lachyit nba bu hpun let, Yehowa nta de shang wa ai. ² Bai shi gaw kunhting wa Eliakim yan chyare wa Shebna hte hkinjawng salang ni hpe, lachyit nba bu hpun let, Amot a kasha myihtoi Esaia hpang de shangun dat mu ai. ³ Shanhte gaw shi hpe, Hezekia ning nga ai: Dai ni gaw nni nkri, shatan nhkan, asawng asang hkrum ai nhtoi rai nga ai: ma shangai nhtoi gu timung, shangai lu na n-gun n nga ai. ⁴ Raitimung, ahkrung nga ai Karai Kasang hpe shatan na nga, Asuri hkawhkam shangun ai, shi a mayam Rabshake a ga yawng hpe, na a Karai Kasang Yehowa na la u ga; na a Karai Kasang Yehowa nan na la ai ga hpe hkap daru na nhten: dai re ai majaw, naw ngam nga ai ni a matu mara akyu hpyi ya mi law, ngu nna tsun mu ai. ⁵ Shing nga tsun yang, hkawhkam Hezekia shangun ma ni gaw Esaia hpang de du ma ai. ⁶ Esaia mung, Nanhte a madu du hpe ning ngu tsun mu; Yehowa ning nga ai: Nang na ai, Asuri hkawhkam a shangun ma ni ngai hpe shatan nhkan ai ga majaw, hkum hkrit et; ⁷ yu u, ngai shi hpe, myit kaga bang ya nna, shi gaw ashi na ai hte, tinang a mung de bai wa mat na ra ai; dai mung hta e ngai shi hpe nhtu hte sat kau na we ai, nga ai, ngu nna shanhte hpe tsun dat mu ai. ⁸ Shingrai Rabshake gaw bai wa yang, Asuri hkawhkam gaw Libna hpe gasat nga ai mu wu ai; kaning rai nme law, shi gaw Lahkisha kaw na htawt pru wa ai lam, na wu ai. ⁹ - ¹⁰ Bai, Ehtiopl hkawhkam Tirhaka nang hpe gasat na lung wa ra ai, nga ai ga na wu yang, shi gaw Hezekia hpang de kasa bai shangun dat nna, Yuda hkawhkam Hezekia hpe ning ngu tsun u: Yerusalem mare gaw Asuri hkawhkam a lata hta n shang lu na re ai, nga nna, nang shamyet shanat nga ai, na a Karai Kasang gaw, nang hpe n hkalem kau u ga. ¹¹ Yu u, Asuri hkawhkam ni gaw mung shagu hpe atsai awai shaza kau ai lam, nang yu nit dai: nang chyu lawt lu na n ni? ¹² Nye a ji wa ni e jahten kau ai amyu ni gaw, Gozan, Haran, Rezep hte Telasa ginwang hkan e nga ai Eden kashu kasha ni rai ma ai; tinang a Hpara ni shanhte hpe hkye mawai la lu manu ni? ¹³ Hamat hkawhkam, Arpad hkawhkam hte Sehparim mare, Hena hte Iwa mare ni hpe up ai hkawhkam ni gaw, kanang rai nga ma ta? ngu nna htet dat wu ai. ¹⁴ Shaloi Hezekia gaw dai laika hpe kasa wa a lata na hkap la hti yu nhtawm, Yehowa nta de shang nna, Yehowa man e hpyan tawn wu ai. ¹⁵ - ¹⁶ Shingrai Hezekia gaw Yehowa man e, Hkerubim ntsa e dung nga ai Israela Karai Kasang Yehowa e; ga ntsa mungdan mahkra a Karai Kasang nang chyu rai nga ndai: nang gaw sumsing lamu hte ginding aga hpe hpan da nu ai. ¹⁷ Yehowa e, na la nna madat mara ya e; Yehowa e, na a myi hpaw nna mada yu u; ahkrung nga ai Karai Kasang hpe shatan nhkan ai Senahkerib shagun ai ga mahkra hpe matsing nga u law. ¹⁸ - ¹⁹ Yehowa e, Asuri hkawhkam ni gaw gaja wa teng teng masha amyu ni yawng hte tinang a lamu ga hpe shaza kau manu ai rai nna, shanhte a Hpara ni hpe wan hta kabai bang kau mu ai; shanhte chyawm gaw Karai Kasang n rai; masha a lata hte galaw da ai hpun hte nlung sumla hkrai rai ma ai majaw, dai ni hpe jahten shabya kau mu ai. ²⁰ Ya chyawm gaw, anhte a Karai Kasang Yehowa e, nang Yehowa hkrai Karai Kasang rai nga ai gaw, ga ntsa mungdan ni nlang chye na lu mu ga, anhte hpe shi a lata na hkyehkrang la mi law, ngu nna hpyi nem wu ai. ²¹ - ²² Shaloi Amot a kasha Esaia gaw Hezekia hpang de shangun dat nna, Israela Karai Kasang Yehowa ning nga ai: Nang gaw Asuri hkawhkam Senahkerib a lam, nye a man e hpyi nem ai majaw, da ndai gaw, Yehowa shi a lam tsun ai ga rai nga ai: Ziun shayi hkawnsek gaw nang hpe jahpoi mani kau nga ai; Yerusalem mare shayi sha gaw na a hpang e baw kanga nga ai. ²³ Nang gaw kadai wa hpe matsa jahpoi kau wu ni? kadai wa hpe na a nsen sharawt nna, na a myiman hte gumrawng gumtawng di kau wu ta? Israela a Chyoi Pra re ai Wa hpe rai nga a hka! ²⁴ Nang gaw, na a mayam ni a n-gup hte dai Madu hpe shatan nhkan nna, Ngai gaw nye a law la ai hpyen leng ni hte bum pungding ni a ntsa de lung wa lu nna, Lebanon maling ka-ang de shang lu na nngai: ngai gaw de a tsaw htum ai arit hpun ni hte, hpu htum ai marau hpun ni hpe kran kau nna, de a tsan htum ai maling na nga pyaw ai shara de pyi shang wa na nngai. ²⁵ Ngai gaw hka htung htu nna lu lu nngai; nye a lagaw lahpan hte Egutu mung na hka nu hka shi yawng shahkyet kau na we ai, nga nna nang tsun hkrup nu hka. ²⁶ Ngai gaw chyaloi nhkoi kaw nna galaw yu ai lam hte, moi na prat kaw nna shabyin ai lam, nang n na yu n ni? Ya mung, nang gaw bunghku kum ai mare ni hpe sharun kau nna nlung sumpum shatai kau na lam gaw, ngai shabyin ai lam hkrai rai nga ai. ²⁷ Dai re ai majaw mare masha ni gaw n-gun yawm wa nna, myit mak ai hte myit htum mat masai; shanhte gaw nam na tsingdu hte tsit lali ai shatmai lap zawn, nta ntsa e tu ai tsing hte garai n kaba ai nyip mat wa ai mam maku zawn, rai nga ma ai. ²⁸ Raitimung, nang dung nga yang, pru wa shang wa yang, ngai hpe n-yun bu ai lam ngai chye nga nngai. ²⁹ Nang ngai hpe n-yun bu ai hte na a gumrawng gumtawng ga nye na hta e shang sai majaw, ngai nang hpe lashoi shoi nna runghtung dat nhtawm, nang du sa ai lam hku bai nhtang wa shangun na de ai. ³⁰ Da ndai gaw na a matu kumla tai u ga: nanhte gaw dai ning mam nhpan sha lu na marin dai; htaning mung dai hta na shi hkrai tu ai mam sha lu na myit dai: masum ning ngu na hta gaw nli gat hkai nna shu sha mu, tsabyi sun hta hkai nna de a asi si kungdam wa na mara ai: ³² kaning rai nme law, naw ngam nga ai ni Yerusalem mare kaw na, tsin-yam lawt ai ni Ziun bum kaw na, pru wa na mara ai: Yehowa a nja nhpra myit dai lam hpe shabyin na ra ai. ³³ Dai re ai majaw Yehowa gaw Asuri hkawhkam a lam ning nga tsun ai: Shi gaw ndai mare hta shang lu na n rai; dai kata de pala langai mi gap lu na n rai; de a man e nhtu n-gang n madun dan lu na hte, kaduk mung htu lu na n rai. ³⁴ Shi du sa ai lam hku shi nhtang wa nna, ndai mare hta shang lu na n rai. ³⁵ Kaning rai nme law, Yehowa tsun ai gaw, Ngai hkum nan a majaw mung, nye shangun ma Dawi a majaw mung, ndai mare hpe ngai makawp maga nna hkyehkrang la na we ai, nga ai, ngu dat mu ai. ³⁶ Shingrai Yehowa a lamu kasa pru sa nna, Asuri masha ni a hpyendap hta marai sen me mun matsat hkying manga hte hpe sat kau wu ai: jahpawt jau jau e rawt yu yang, yu mu, ndai ni nlang si mang rai nga ma ai. ³⁷ Bai Asuri hkawhkam Senahkerib gaw, dap brun mat wa nna, Ninewe mare de wa nhtang nga nga ai. ³⁸ Dai hpang shi gaw shi a Hpara Nisrok a nta hta nawku nga yang, shi a kasha Adramelek yan Shareze gaw shi hpe kahtam sat kau mu ai; shan gaw Ararat mung de hprawng mat wa nna, shi a kasha Esahadon, shi a malai hkaw dung nga ai.

¹ Dai aten hteyang Hezekia gaw si machyi hkrum nga ai rai nna, Amot a kasha myihtoi Esaia shi kaw sa du nna, Yehowa ning nga ai: Nang hkrung nga lu na n rai, si na ndai majaw, na a nta na dinghku lam hpajang da u, ngu wu ai. ² - ³ Dai rai nna Hezekia gaw shakum de myiman yawng let, Yehowa e, ngai gaw na a man e kangka nna myit ding ai hte hkawm nga nngai rai nna, nang sharawng awng ai lam shagu hpe hkan galaw ni ai gaw, dum ya e law, ngu nna hkrapngu hkrapngoi let, Yehowa hpe hpyi nem wu ai. ⁴ - ⁵ Shaloi Yehowa a ga Esaia kaw du nna, Bai nhtang u; Hezekia hpe ning ngu u; Na nwa Dawi a Karai Kasang Yehowa ning nga ai, Na akyu hpyi ai ga ngai na ni ai; na myi prwi ngai mu nngai: yu u ngai na a asak hpe shi manga ning naw jat ya na de ai. ⁶ Nang hpe mung, ndai mare hpe mung, Asuri mung na hkawhkam wa a lata na, ngai hkye mawai la na we ai: ndai mare hpe ngai makawp maga na we ai, nga ai. ⁷ Yehowa tsun dan ai hte maren ndai lam shabyin na ra ai, da ndai gaw na a matu Yehowa kaw na sakse kumla tai na ra ai: ⁸ yu u, Ahaza a hkying shadawn ai lakang hta, shingna n-gam shi sit lung sai hpe, ngai bai nhtang sit kau shangun na we ai, nga ai. Shing nga tsun ai hte maren, n-gam shi sit lung ai jan shingna gaw, n-gam shi bai nhtang nga ai. ⁹ Da ndai gaw Yuda hkawhkam, Hezekia machyi mai ai hpang, ka da ai laika rai nga ai: ¹⁰ Ngai gaw asak hpungngang e Katsan ga chyinghka de shang wa ni hka; Naw ngam nga ai nye a shaning ni hpe ngai n mu na nngai, nga nna ngai tsun nngai. ¹¹ Naw hkrung nga ai ni a shara e Yehowa hpe ngai n mu na nngai; Tsu ga hta e shinggyim masha hpe n mu lu na nngai, nga nna kahtap tsun nngai. ¹² Sagu rem ai wa a sum zawn, ngai rawng ai nta hpe, baw nna kaga de htawt kau nu ai; Da da ai wa zawn, nye a asak hpe ngai katsu kau nna, Da lang hta na shi ngai hpe rep kau na ra ai. Shana garai n du yang pyi, nang ngai hpe jahtum kau na ra ai. ¹³ Jahpawt du hkra ngai shakut sharang nga nngai; Hkanghkyi zawn shi nye a nrut nra ni hpe agrawp kau nu ai: Shana garai n du yang pyi, nang ngai hpe jahtum kau na ra ai. ¹⁴ Pilan hte mali tau zawn, ngai jawp nga nngai; Hkrudu zawn madai nga nngai: Nye a myi mada yu nna n-gun yawm mat sai. Yehowa e, nni nkri hkrum ai wa ngai rai nga nngai, Nye a pahkam wa nang tai u ga. ¹⁵ Ngai hpa tsun lu na rai ta? Shi ngai hpe ga tsun nna, shi hkum nan dai lam galaw nu ai. Nye shaning ni tup, nye myit masin nni nkri hkrum ai hpe ngai dum nna, angwi sha hkawm nga na nngai. ¹⁶ Madu e, na mungga hte shinggyim masha hkrung nga ma ai; Nye wenyi a asak mung, dai hta jung nga ai: Nang gaw ngai hpe shamai ya nna, asak jahkrung ya e law. ¹⁷ Yu u, ngwi pyaw lu la hkra, ngai ru tsang grai hkrum nngai; Nye myit masin hpe nang tsawra ndai majaw, hten byak nhkun kaw na dai hpe shaw la nu ai; Nye a yubak yawng, nang na a shingdu de kabai kau nu ai. ¹⁸ Gaja wa, Katsan ga gaw nang hpe shakawn lu ai, n rai; Si hkrung si htan gaw nang hpe shagrau lu ai, n rai: Nsung hku de shang ai ni, na tengman ai hpe myit mada lu ai, n ai. ¹⁹ Hkrung nga ai wa sha, gaja wa hkrung nga ai wa sha, dai ni ngai galaw ai hte maren, nang hpe shakawn na ra ai: Kawa gaw kashu kasha ni hpe, na a tengman ai lam sharin na ra ai. ²⁰ Yehowa gaw ngai hpe hkyehkrang la sai: Dai re ai majaw anhte gaw prat dingsa Yehowa a nta nhku e, tingse dum let, Nye a mahkawn mangoi ga hpe mahkawn mangoi na ga ai. ²¹ Esaia chyawm gaw, Maihpang si gumpa la nhtawm, tsi tai na matu shakrawi hta up ya mu; shaloi shi mai na ra ai da, nga nna tsun ai. Hezekia mung, Yehowa nta de ngai lung lu na gaw, hpa sakse kumla danpru na ra ta? ngu nna san wu ai.

¹ Dai aten e Babelon hkawhkam, Baladan a kasha, Berodak-baladan gaw, Hezekia machyi nga ai hte mai wa ai lam na nna, shi hpang de laika hte kumhpa shagun dat wu ai. ² Hezekia mung shanhte hpe hkap hkalum la nna, shi a arung arai nta na aja gumhpraw, manam pyaw ai baw, hpu la ai sau, hpyen laknak rawng ai nta hte shi a sutdek hta rawng marawng mahkra hpe madun dan mu ai: Hezekia gaw shi a nta hte shi a mungdan hta rawng marawng, shanhte hpe n madun dan ai, hpa mung n nga ai. ³ shaloi myihtoi Esaia gaw hkawhkam Hezekia hpang de sa du nna, Ndai manam ni gaw hpa lam tsun ma ta? kanang nna nang kaw sa du ma ta? ngu nna san wu yang, Hezekia gaw, Tsan tsan e nga ai Babelon mung na sa du ma ai, ngu nna htan wu ai. ⁴ Bai Esaia gaw, Shanhte na a nta hta hpa mu lu ma ta? ngu nna san wu yang, Hezekia gaw, Nye nta hta rawng marawng mahkra hpe mu masai; nye sutdek hta rawng marawng, ngai shanhte hpe n madun dan ai gaw, hpa mung n nga ai, ngu nna htan wu ai. ⁵ Dai rai nna Esaia gaw Hezekia hpe, Zaw nawng zaw wa up ai Yehowa a ga madat u, ⁶ Yu u, Yehowa ning nga ai, Na nta hta rawng marawng hpe mung, dai ni du hkra na nji nwa ni mahkawng da ai arai hpe mung, Babelon mare de htawm mat wa ai aten du na ra ai: hpa mung ngam da na n rai. ⁷ Nang shaprat ai, na a shadang sha ni hpe mung, shanhte woi wa nna, shanhte gaw Babelon hkawhkam a htingnu hta e unuk ngu ai ni tai na mara ai, ngu wu ai. ⁸ Shaloi Hezekia gaw, Nang htawn tsun ai Yehowa a ga mai kaja nga ai: bai, Gaja wa nye a aprat e ngwi pyaw ai hte sadi sahka rai na ra ai, ngu nna Esaia hpe tsun wu ai.

¹ Nye a amyu hpe shalan shabran mu, shalan shabran mu, nga nna nanhte a Karai Kasang tsun nga ai. ² Yerusalem mare hpe ngwi pyaw ga tsun mu: shi a hpyen majan ngut wa sai, shi yubak raw dat kau ai hkrum sai, yubak mara majaw ari hkrum ai hta, Yehowa lata hta na chyeju htam lahkawng hkam la nu ai, ngu nna shi hpe jahtau tsun mu. ³ Marai langai mi a jahtau ai nsen gaw: Nam mali e Yehowa a matu lam lajang da mu; zaibru jang e anhte a Karai Kasang a matu, nmaw lam shading mu: ⁴ hkaraw hkamwam shagu hpe, gaw shatsaw na ra ai; bum hte kawng shagu hpe shanem na ra ai; hkalik hkalawk re ai shara pri mat na ra ai; machyawk marawk re ai shara layang tai na ra ai: ⁵ Yehowa a hpung shingkang mungdan pru nna ahkrang ashan yawng dai hpe rau mu lu na mara ai, nga nna Yehowa a n-gup tsun nga ai. ⁶ Marai langai mi a nsen gaw, Jahtau u, nga nna tsun yang, ngai mahtang, Hpa jahtau na rai ta? ngu nna san nngai. Ahkrang ashan yawng tsingdu hkrai rai nga ai; de a tsawm htap ai yawng pa ga na nampan hte bung nga ai: ⁷ Yehowa a nbung dai hpe ahpawt ai majaw, tsingdu gaw hkraw mat nna, nampan gaw nyui mat wa ai; gaja wa amyu masha ni gaw tsingdu hkrai rai nga ma ai. ⁸ Tsingdu hkraw mat nna, nampan nyui mat nga ai; anhte a Karai Kasang a mungga chyawm gaw, htani htana grin nga na ra ai. ⁹ Ziun bum de kabu gara shiga htawn tsun ai wa e, tsaw ai bum de lung u; Yerusalem mare de kabu gara shiga htawn tsun ai wa e, na a nsen hpe tsam mari sharawt u; dai hpe sharawt u, hkum hkrit et; Nanhte a Karai Kasang hpe mada yu mu, ngu nna Yuda mare ni hpe tsun u. ¹⁰ Yu u, Madu Yehowa gaw hpung dagu hte du nna, shi a lahpum up nga na ra ai; shi karan jaw na kumhpa shi lang nna, shi gam jaw na shabrai shi a man e rai nga ai. ¹¹ Shi gaw sagu rem wa zawn, shi a sagu hpung ni hpe rem na ra ai; sagu kasha ni hpe shinggyin la nhtawm, hpai pawn na ra ai; hkalung woi ai sagu kanu ni hpe mung, angwi sha woi wa na ra ai. ¹² Nammukdara hka hpe lata lahkyawn hte shadawn ai wa, sumsing lamu hpe tinang lata hte lahkam yu ai wa, ga nhpu hpe dang bye hte hteng yu ai wa, bum ni hpe joi hte kawng ni hpe jang hte, shen yu ai wa, kadai wa rai ta? ¹³ Yehowa a Wenyi hpe kadai sagawn yu a ta? shi hte bung nna hpaji daw ai wa, kadai rai ta? ¹⁴ Shi kadai hte bawng nna, shi hpe sharin ai wa kadai: tara ding ai lam, chye chyang ai lam, nyan byeng-ya rawng ai lam madun nna shi hpe sharin ya ai wa, kadai rai ta? ¹⁵ Yu u, amyu baw ni gaw, nhtung hta hkrat ai, ntsin nsi hte bung nna, jang hta kap ai nbun zawn nawn nga ai; zunlawng ni mung shi a lata hta hpaw tsaw zawn rai nga ai. ¹⁶ Lebanon hpun ni gaw, wan ju na matu, n law nga ai; dai yang na ashu ashan ni mung, wan nat hkungga matu, n law ma ai. ¹⁷ Amyu baw ni yawng, shi a man e hpa n re ai zawn rai nga ai; shi gaw shanhte hpe lam n la ai kaman zawn, nawn nga ai. ¹⁸ Dai rai nna Karai Wa hpe hpa hte shadawn na myit ta? shi hpe hpa hkrang sumla hte shabung na myit ta? ¹⁹ Sumla rai yang, chye galaw ai wa gaw dai hpe jaw nhtawm, janghkam wa aja sup nna, de a matu gumhpraw saidawng jaw nga ai. ²⁰ Nau matsan nna, dai baw kumhpa n jaw lu ai wa gaw, greng ai hpun lata la nhtawm, kangu nga ai sumla hpe tawk na matu, hpaji rawng ai lasama tam nga ai. ²¹ Nanhte n chye myit ni? n na yu myit ni? moi npawt kaw nna nanhte hpe shapraw dan yu a ni? lamu ga nnan lat kaw nna, n chye na nga myit ni? ²² Lamu madin ntsa e dung nna, de a npu e shanu nga ai ni hpe, dinggam-yaw zawn nawn ai wa gaw, Shi nan rai nga ai: shi gaw sumsing lamu hpe nba zawn grang nna, shanu na matu sum zawn kahpyen da wu ai. ²³ shi gaw du ni hpe shayu kau nna, ga ntsa na tara agyi ni hpe shabu ladawng shatai kau mu ai. ²⁴ Shanhte hpe hkai, shahte hpe gat timung, ga hta ru garai n jung yang, shi shanhte a ntsa e kawut ai hte, shanhte hkraw mat na nna, bung sha gaw shanhte hpe mahkaw zawn shapoi kau na ra ai. ²⁵ Dai rai nna, ngai hpe hpa hte shadawn na mi ta? ngai gaw kadai hte bung nga n ta? nga nna Chyoi pra ai wa gaw san nga ai. ²⁶ Matsaw ntsang de mada yu mu: dai hte hpe hpan da ai wa gaw, kadai rai ta? shi gaw de a wunawng wuwa ni hpe nambat hte shapraw nna, yawng hpe amying shamying wu ai: shi gaw daru magam chyalai hte n-gun atsam rawng ai majaw, langai mi pyi yet lu ai n rai. ²⁷ Yaku amyu e, Yehowa nye a lam n dum nga ai, nga nna hpa majaw tsun n ta? Israela dap e, Nye a Karai Kasang ngai hpe matai dawp na n rai, hpa rai nga n ta? ²⁸ Nang n chye n ni? nang n na yu n ni? Nga yawng nga pra Hpan da Madu, n htum n wai Karai Kasang Yehowa gaw, n-gun yawm ai n rai; hki ba mung hkrum ai n rai; shi myit mang ai lam kadai sawk yu lu ai, n rai. ²⁹ Shi gaw n-gun yawm ai ni hpe n-gun shaja nna, atsam n rawng ai ni hpe, atsam shalaw wu ai. ³⁰ Shabrang ni mahtang n-gun yawm nna, hki ba hkrum na mara ai; wa-ngan ni gaja wa kataw na mara ai. ³¹ Yehowa hpe ala nga ai ni chyawm gaw, n-gun lu la nna, kalang zawn singkaw nnan hte pyen lung na mara ai: shanhte gat timung, hki ba na n rai, hkawm timung, n-gun yawm na n rai.

¹ Zunlawng ni e, nye a man e atsin sha nga mu; masha amyu ni gaw n-gun ningnan shaja mu ga; sit sa marit; shanhte ga tsun mu ga; tara dangrang hkat ga, rau zuphpawng ga. ² Dinghpring ai lam hkan chye ai langai mi hpe, sinpraw mung de na kadai sharawt a ta? shi gaw amyu baw ni hpe dai wa a lata hta ap ya nna, hkawhkam ni a ntsa e up shangun wu ai; shanhte gaw shi a nhtu man e ga nhpu zawn rai nna, shi a ndan majaw, poi mat ai yi hku hte bung ma ai. ³ Shi shanhte hpe hkan shachyut nna, shawng de n kabye yu ai lam hku, angwi apyaw lai wa lu ai. ⁴ Dai amu ni hpe hpan hpajang nna galaw da let, masha ban mi hte ban mi npawt kaw nna shaga tawn da ai wa gaw, kadai rai ta? Shawng na wa hte mung, hpang na ni hte mung rau nga ai, ngai Yehowa nan, dai wa rai nga nngai. ⁵ Zunlawng ni mu nna hkrit ma ai; lamu ga jahtum ni gari ma ai; shanhte sit sa nna du ra ma ai. ⁶ Langai hte langai tinang a htingbu wa hpe shadaw nna, kahpu kanau wa hpe, Da ting u, nga ma ai. ⁷ Shingrai lasama gaw janghkam wa hpe, sumdu lang ai wa gaw ndup wa hpe, shadaw let, Dai gaw namsan kaja rai nga ai, nga nna tsun ma ai: n shamu n shamawt lu hkra, shi dai sumla hpe hpri masen hte dit shakap nga ai. ⁸ - ⁹ Raitimung, lamu ga jahtum de na ngai lata la ai hte, de a njut maga de na ngai shaga la ai, nye a jinghku wa Abraham a aru arat ngu ai, nye a mayam Israela e, ngai lata la ai Yaku e, Nang gaw nye a shangun ma rai nga ndai; ngai nang hpe lata la ni ai; nang hpe gangkau na n rai: ¹⁰ hkum hkrit et, ngai nang hte rau rai nga nngai; hkum tsang et, ngai na a Karai Kasang rai nga nngai; ngai nang hpe n-gun shaja nna karum na de ai; gaja wa, nye dinghpring ai hkra lata hte, ngai nang hpe shadaw na de ai. ¹¹ Yu u, nang hpe pawt sindawng ai ni yawng, kaya kahpa hte myiman sum na mara ai; nang hpe hpyen ai ni, lam n la ai htum mat na mara ai. ¹² Nang hte nhtan shai ai ni hpe, nang tam timung, mu na n rai; nang hpe hpyen gasat ai ni gaw, lam n la ai kaman lila tai mat na mara ai. ¹³ Kaning rai nme law, Na a Karai Kasang ngai Yehowa gaw, Hkum hkrit et; ngai nang hpe karum na de ai, nga nna, na a hkra lata jum let, tsun na nngai. ¹⁴ Shingtai ngu ai Yaku e, Israela masha ni e, hkum hkrit myit; ngai nang hpe karum na nngai; Israela Chyoi pra ai Wa gaw na a Hkyehkrang la ai wa rai nga ai, nga nna Yehowa tsun nga ai. ¹⁵ Yu u, wa rawng ai mam dup ai gawng ningnan ngai nang hpe shatai nna, nang gaw bum ni hpe dup mani kau ai hte, kawng ni hpe mahkaw zawn shatai na mu ai. ¹⁶ Nang shanhte hpe katsap nna, nbung gaw dai ni hpe ahpawt kau na ra ai; laru gaw shanhte hpe kamawng kau na ra ai: nang chyawm gaw Yehowa hta kabu gara nga nna, Israela Chyoi pra ai Wa hta gumrawng nga na rin dai. ¹⁷ Nni nkri hkrum ai ni hte matsan mayan ni gaw, ntsin tam timung, n mu ma ai: shanhte a shinglet hpang kara ai hte hkraw mat yang, ngai Yehowa shanhte a ga madat mara nna, Israela Karai Kasang ngai gaw, shanhte hpe kau da na, n rai. ¹⁸ Ngai gaw krin ai kawng ni a ntsa e hka nu, kadit ni a ka-ang e hka hpawk, jahpaw na nngai; nam mali e hka lawng, hkraw hkun ai shara e hka deng, ngai shatai na we ai. ¹⁹ Bai ngai gaw nam mali hta e arit hpun, shitim hpun, mrutu hpun, tsanlun hpun ni hpe mung, zaibru jang e marau hpun, shinglim hpun hte chyamka hpun kayau hkai na we ai: ²⁰ shingrai Yehowa lata gaw dai amu shabyin nna, Israela chyoi pra ai Wa dai hpe hpan da ai lam, shanhte rau mu chye nna, aru yu let chye na lu na mara ai. ²¹ Nanhte a amu shapraw mu, nga nna Yehowa tsun nga ai; nanhte a kangka sakse ga madun mu, nga nna Yaku a hkawhkam wa tsun nga ai. ²² Shanhte myihtoi ga shapraw nna, hpa byin na ra ai hpe tsun dan maru ga; moi shawng de byin ai lam ni anhte myit aru yu nna, de a jahtum chye na lu hkra, tsun maru ga: shing n rai, byin na ra ai lam ni anhte hpe shana ya mi. ²³ Nanhte Hpara rai nga ai hpe, anhte chye na lu hkra, byin magang ra ai lam ni, tsun dan mi; gaja wa, anhte rau mu mada nna mau mat lu hkra, kaja ai, shing n rai, n kaja ai, galaw mu. ²⁴ Yu mu, nanhte a npawt gaw kaman lila rai nga nna, nanhte a amu bungli gaw be lagya rai nga ai; nanhte hpe lata la ai wa gaw, matsat shabat hkrai rai nga ai. ²⁵ Dingdung maga de na wa langai mi, nye a amying shaga ai wa sinpraw de na, ngai paw pru shangun nna, shi du ra ai: dai wa gaw munggyi ni hpe engade zawn rin nna, di bu sama a ga kagam zawn kabye kau na ra ai. ²⁶ Anhte chye lu hkra, moi npawt kaw nna dai lam tsun dan ai wa, Teng nga ai, nga nna anhte tsun lu hkra, ndai lam shapraw ai wa, kadai rai ta? gaja wa, tsun dan ai wa langai mi n nga ai, shapraw dan ai wa langai mi n nga ai, nanhte a ga na lu ai wa langai mi n nga ai. ²⁷ Yu mu, yu mu, dai lam byin na ra ai, ngu nna Ziun hpe shawng tsun ai wa ngai rai nga nngai; Yerusalem mare hpe kabu gara shiga htawn tsun ai wa ngai shapraw nngai. ²⁸ Shanhte hpe mada yu yang, masha ngu na n nga ai; shanhte hte bawng yu mayu yang, ga htan chye ai wa langai mi muk n nga ai. ²⁹ Yu mu, shanhte nlang hte a amu bungli gaw kaman lila hte be lagya hkrai rai nga ai; shanhte jaw ai sumla ni mung, nbung hte tuk shamak hkrai rai nga ai.

¹ Ngai shadaw ai nye a shangun ma, ngai lata la ai nye tsawra ai wa hpe, yu mu: nye a Wenyi shi a ntsa e ngai bang da ya nngai; shi gaw amyu baw ni hpe tara dara na ra ai. ² Shi jahtau na n rai, shi a nsen hpe sharawt na n rai, mare lam hta e na shangun na, n rai. ³ Bye dip kau ai maiaw hpe shi n shadaw na hte, kachyi mi sha tu ai wan shat hpe sat kau na n rai: shi gaw tengman ai hte tara ding ai hku shapraw na ra ai. ⁴ Shi a tara ding ai lam ga ntsa e garai n grin nga yang, shi n-gun yawm na n rai, gawng mung run na n rai: zunlawng ni shi a tara hpe a mada nga na ra ai. ⁵ Sumsing lamu hpe hpan nna kahpyan da ai wa, ginding aga hte dai hta nga manga hpe nep da ai wa, de a ntsa e nga ai amyu ni hpe asak, dai hta hkawm nga ai ni hpe wenyi jaw ai wa, Karai Kasang Yehowa ning nga ai: ⁶ - ⁷ Nang gaw myi kyaw ai ni a myi hpe hpaw ya na hte, htawng hta bawngdung ai ni hpe shapraw nna, nsin htawng hta dung nga ai ni hpe shalawt dat na matu, ngai Yehowa nan dinghpring ai hte nang hpe shaga la nna, na a lata hpe shadaw let, nang hpe makawp maga nna, masha amyu ni a matu ga shaka, maigan amyu ni a matu nhtoi, nang hpe san da de ai. ⁸ Ngai gaw Yehowa rai nga nngai; dai nye a amying shingteng rai nga ai: nye a hpung shingkang masha wa hpe, nye a arawng sadang hpara sumla ni hpe, ngai jaw na n rai. ⁹ Yu mu, shawng hkaw ai lam ni byin wa sai; lam ningnan ni hpe ya ngai tsun nngai; garai n byin pru yang, ngai nanhte hpe tsun shana ya ni ai. ¹⁰ Nammukdara rap ai ni hte dai hta nga manga hpawn, zunlawng ni hte dai hta shanu ai ni e, mahkawn mangoi ningnan hte Yehowa hpe mahkawn mu, lamu ga jahtum de nna shi hpe shakawn mu. ¹¹ Nam mali hte de a mare ni, Kedara masha ni shanu ai kahtawng ni, nsen sharawt mu ga; lungrawk e shanu ai ni mahkawn mangoi mu ga, bum pungding kaw nna garu mu ga. ¹² Shanhte gaw Yehowa hpe shagrau nna, zunlawng ni hta shi a arawng sadang hpe kajai mu ga. ¹³ Yehowa gaw n-gun ja ai wa zawn pru nna, share ninghkrin zawn shi a myit dakat na ra ai: shi jahtau nna, gaja wa garu na ra ai; hpyen ni hpe nhtum nni shaza kau na ra ai. ¹⁴ Ngai gaw na na wa atsin sha nga nga nngai; hpa n tsun ai litmus naw anga nga nngai: ya chyawm gaw shinggyim machyi ai num zawn ngai shaga na nngai; hki ba ai hte ba galawp hkra ari jaw na nngai. ¹⁵ Ngai gaw bum ni hte kawng ni hpe shakrin kau nna, tu matu yawng hpe jahkraw kau na nngai: hka nu ni hpe zunlawng ngai shatai nna, hka lawng ni hpe shahkyet kau na we ai. ¹⁶ Myi hten ai ni hpe, shanhte n chye ai lam hku ngai lakawn wa nna, shanhte n lai yu ai lam hta woi wa na nngai: shanhte a man na nsin hpe ngai nhtoi shatai nna, magaw ai lam hpe shading na we ai. Dai chyeju ngai galaw nna, shanhte hpe kau da na n rai. ¹⁷ Tawk la ai sumla ni hpe hpa nna, Nanhte gaw anhte a hpera ni rai nga myit dai, nga nna jaw ai sumla ni hpe tsun ai ni gaw, kanut mat wa nna, teng teng kaya kahpa hkrum na mara ai. ¹⁸ Na lahpang ai ni e, na la mu; myi hten ai ni e, nanhte mu lu hkra, mada yu mu. ¹⁹ Nye mayam wa hta kaga, myi hten ai wa kadai rai ta? ngai shangun dat ai kasa zawn, kadai na lahpang a ta? nye jinghku wa zawn, kadai myi hten a ta? Yehowa a mayam zawn kadai myi hten a ta? ²⁰ Nang gaw lam law law hpe mu timung, matsing nga ai n rai; shi a na hpaw nga timung, shi n chye madat ai. ²¹ Yehowa gaw, shi a dinghpring ai myit majaw, sharin shaga ai lam hpe shagrau nna, danhkung shangun wu ai. ²² Raitimung ndai amyu gaw hpya lu hpya sha hkrum ai amyu rai nga ai; shanhte nlang nhkun hta hkangda ai hkrum nna, htawng ni hta bawngdung nga ma ai: shanhte hten byak hkrum yang, hkrang la ai wa n nga ai; kashun kashe hkrum yang, Nhtang ya mu, nga nna tsun ai wa n nga ai. ²³ Nanhte hta kadai wa ndai ga madat na myit ni? htawmhpang na matu, kadai wa na la nna matsing na rai ta? ²⁴ Yaku hpe hpya lu hpya sha na matu, Israela hpe damya ni a lata de kadai ap kau a ta? Anhte shut kau ai Yehowa n rai ni? shanhte gaw shi a lam ni n hkan hkraw ai hte, shi a tara hpe n madat ma ai. ²⁵ Dai re ai majaw, shi a pawt sindawng ai hte shi hpyen gasat ai hpe shanhte a ntsa e shi ru bun nna, shanhte a grupyin e wan hkru timung, n dum ma ai, wan hkru hkrum timung, hpa n nawn ma ai.

¹ Ya chyawm gaw, Yaku amyu e, nang hpe hpan da ai wa, Israela dap e, nang hpe hpajang da ai wa Yehowa ning nga ai: Hkum hkrit et, ngai nang hpe hkrang la ni ai; na a amying hte ngai nang hpe shaga nna, nang nye a rai nga ndai. ² Nang hka rap wa yang, ngai nang hte rau rai nga nngai; hka nu hka shi ni hpe rap wa yang, lim wa na n rai; wan hpe kabye yang, hkru na n rai, wan shinglet mung galip na n rai. ³ Kaning rai nme law, ngai gaw, nang hpe Hkyehkrang la ai Madu, Israela a Chyoi pra ai Wa, na a Karai Kasang Yehowa rai nga nngai: na a gawng malai hkungga tai na matu Egutu mung hpe mung, na a malai Hkusha hte Seba mung hpe mung, ngai jaw ni ai. ⁴ Nang gaw nye a man e ging dan nna, arawng sadang lu ai hte, ngai nang hpe tsawra nngai majaw, na a malai masha ni hpe, na asak a malai masha amyu ni hpe ngai jaw na nngai. ⁵ Hkum hkrit et; ngai nang hte rau rai nga nngai: sinpraw maga de na, na a aru arat ni hpe ngai woi wa nna, sinna maga de na nang hpe shinggyin la na nngai; ⁶ ngai gaw, Ap ya u, ngu nna dingdung maga hpe mung, Hkum ndang u, ngu nna dingda maga hpe mung, tsun na nngai. ⁷ Sumtsan mung de na nye a shadang sha ni, lamu ga jahtum de na nye a shayi sha ni ngu ai, nye a amying mying ai wa, nye a arawng sadang matu ngai hpan da ai hte, ngai hpajang nna galaw da ai ni langai hte langai hpe woi wa marit. ⁸ Myi tu ninglen myi n mu ai amyu hte, na tu ninglen na lahpang ai ni hpe, woi shapraw marit. ⁹ Amyu baw ni yawng rau zuphpawng mu ga, masha amyu ni shinggyin nga mu ga: ndai amu hpe mung, moi shawng de byin ai lam ni hpe mung, shanhte hta na kadai tsun lu a ta? shanhte awlaw ai hkrum hkra, tinang a sakse shapraw mu ga; shing n rai, shanhte madat nna, Ndai gaw teng nga ai, nga nna yin la mu ga. ¹⁰ Nanhte dum lu nna, ngai hpe kamsham let, ngai nan dai wa rai nga nngai, chye na lu hkra, nanhte nye a sakse ni hte ngai lata la ai shangun ma ni rai nga myit dai, nga nna Yehowa tsun ai: nye a shawng e Karai Wa n nga ai, nye a hpang e mung pru na n rai. ¹¹ Ngai hkum nan, Yehowa rai nga nngai; ngai hta kaga hkyehkrang la ai wa n nga ai. ¹² Ngai tsun magang nna hkyehkrang la ni ai; ngai madun dan ai n rai; dai re ai majaw, nanhte nye a sakse ni rai nga nna, ngai nan Karai Wa rai nga nngai. ¹³ Gaja wa, aten ladaw garai n pra kaw nna, ngai dai wa nan rai nga nngai; nye a lata na mawai la lu ai wa n nga ai; ngai galaw ai amu hpe kadai hkum da lu a ta? nga nna Yehowa tsun ai. ¹⁴ Israela a Chyoi pra ai Wa, nanhte a Hkyehkrang la ai Madu Yehowa ning nga ai: Ngai gaw nanhte a matu Babelon mare de shangun nna, hprawng wa ai Hkalde masha ni yawng hpe, tinang machyu nga ai shanghpaw li ni hta, shayu dat na mu ai. ¹⁵ Ngai gaw, nanhte a Chyoi pra ai Wa Yehowa, Israela a Hpan wa Ningsang, nanhte a Hkawhkam wa rai nga nngai. ¹⁶ - ¹⁷ Nammukdara hta lam waw nna, hka kaba ni hta lam hpaw ai wa, hpyen leng ni, gumra ni hte hpawn, hpyen luksuk ni hte share ninghkrin ni hpe shapraw ai wa; shanhte n rawt lu hkra lang lata shayup kau ai hte, htum nna si mat ai wan shat zawn, shanhte hpe jasim kau ai wa Yehowa ning nga ai: ¹⁸ Moi na amu hpe nanhte n dum myit ni? chyaloi nhkoi na lam hpe n nawn myit ni? ¹⁹ Yu mu, amu ningnan ngai galaw na nngai; ya pyi byin pru na ra ai; dai hpe nanhte n chye myit ni? Gaja wa, nam mali hkan e nmaw lam, hkraw hkun ai shara e hka nu hka shi, ngai shapraw na we ai. ²⁰ - ²¹ Nam na ashu ashan ni mung, nam gwi ni hte u gawla-uk ni mung, ngai hpe shagrau na mara ai: kaning rai nme law, ngai lata la ai nye a amyu masha ni lu hpa lu nna, ngai hpe shakawn kungdawn nga na matu, ngai gaw nam mali hkan e hka hpung, hkraw hkun ai shara e hka nu hka shi shapraw na we ai. ²² Raitimung, Yaku e, nang ngai hpe n shaga; Israela e, nang nye a lam jin mat nit hka. ²³ Wan nat hkungga matu na a sagu ngai hpang de n la sa ndai; na a shagu hkungga hte ngai hpe shagrau ndai, n rai. Ngai nang hpe hkungga hpyi shatsang ai n rai; lawban hpyi nna nang hpe shaba ai n rai. ²⁴ Nang gaw nye a matu gumhpraw hte manam pyaw ai baw mari ai n rai; shagu hkungga sau man hte ngai hpe jaw jahkru ai n rai; nang chyawm gaw, na a yubak hte ngai hpe lit shali nna, na a mara hte hki ba shangun nga n hka. ²⁵ Nye a chyeju majaw, na a tara tawt lai ai lam arut kau ai hte, na a yubak hpe n dum ai wa gaw, ngai nan rai nga nngai. ²⁶ Ngai hpe shadum e; tara dangrang hkat ga: nang mara lawt lu hkra, na amu hpe tsun u. ²⁷ Na a shawng na nwa gaw yubak galaw sai; na a sara ni ngai hpe shut hpyit masai. ²⁸ Dai re ai majaw Chyoi pra ai shara na du ni hpe, ngai awu asin di kau se ai; Yaku hpe dagam dala, Israela hpe shatan nhkan shara, ngai shatai kau se ai.

¹ Ya chyawm gaw nye a shangun ma Yaku e, ngai lata la ai Israela e, madat mara nga u: ² nang hpe hpan da ai wa, hkritung kaw nna nang hpe shachyaw ai hte, nang hpe karum nga ai Yehowa ning nga ai: Nye a shangun ma Yaku e, ngai lata la ai Yeshurun e, hkum hkrit et; ³ kaning rai nme law, hpang kara ai wa ntsa e ngai ntsin ru bun nna, hkraw hkun ai ga hpe hka shalim na we ai: na a amyu a ntsa e nye a wenyi hpe, na a aru arat a ntsa e nye a shaman ai hpe, ngai ru bun na we ai: ⁴ shanhte gaw hka hkawng makau na mu mahka hpun zawn, tsingdu hte rau tu na mara ai. ⁵ Langai wa mi gaw, Ngai Yehowa a masha rai nga nngai; bai langai mi gaw, tinang hkum hpe Yaku a amying shamying na ra ai: bai kaga wa gaw, Yehowa a masha, nga nna tinang lata hta ka let, Israela amying shingteng shakap na ra ai. ⁶ Israela hkawhkam Yehowa, Israela hpe Hkyehkrang la ai Madu, Zaw nawng zaw wa up ya Yehowa gaw ning nga ai: Ngai gaw shawng numshawn hte hpang jahtum na wa rai nga nngai: ngai hta shaje Karai Kasang n nga ai. ⁷ Ngai gaw, ndai moi na amyu hpe san da ai shani kaw nna, ngai zawn myihtoi ga chye tsun ai hte, ngai hpe tsun dan lu na hpajang da ai wa gaw, kadai wa rai ta? byin na ra ai hte du magang ra ai lam ni, shanhte shapraw dan mu ga. ⁸ Nanhte hkum tsang myit, hkum hkrit myit; moi shawng kaw nna ngai nang hpe tsun madun da ni ai, n rai ni? nanhte nan nye a sakse ni rai nga myit dai. Ngai hta shaje Karai Kasang nga a ni? Gaja wa, Lunghkrung shaje nga ai gaw, ngai n chye nngai. ⁹ Hpara sumla tawk ai ni yawng, kaman lila rai nga ma ai; shanhte sharawng awng ai rai ni gaw, akyu shapraw lu ai n rai; shanhte kaya kahpa hkrum sha mu ga, tinang a lam sakse hkam ai ni gaw mu mung n mu, chye mung n chye ma ai. ¹⁰ Hpara shachyaw ai wa, akyu n rawng ai hpara sumla jaw ai wa, kadai wa rai ta? ¹¹ Yu u, shi a kanawn manang ni yawng, kaya kahpa hkrum na mara ai: tawk ka ai ni mung, masha hkrai rai nga ma ai: yawng zuphpawng nna rawt tsap mu ga; shanhte hkrit kajawng nna, kaya kahpa rau hkrum na mara ai. ¹² Ndup wa gaw, nwa dup na matu, nra wan hta ju nhtawm, lata lahpum n-gun dat let, sumdu hte dup ga ai; gaja wa, shi kawsi hkrum ai hte n-gun yawm wa ai; ntsin n lu ai majaw, gawngkya nga ai. ¹³ Bai, lasama wa gaw shadawn sumri gran let, kanyit hte mahkret nhtawm, lashawt shawt ai hte kumba hte shadawn wu ai: shi gaw masha sumla galaw nna, nta nhku de mai tawn da na matu, htap tsawm ai masha hkrang sumla hte bung hkra, tawk ka wu ai. ¹⁴ Shi gaw tinang a matu arit hpun kran nna, larawn hpun hte wa myi hpun lata la nhtawm, maling na hpun langai mi hpe san da wu ai: shi gaw marau hpun hkai nna, dai gaw marang a majaw kaba wa ai. ¹⁵ Shingrai dai gaw ju na hpun tai nga ai; masha mung dai hpe ju nna wan kra nga ai: gaja wa, shi wan wut nna, muk kabaw nga ai; bai, shi gaw Hpara galaw nna dai hpe nawku nga ai; gaja wa, Hpara sumla shi tawk ka nna, de a man e gum dagup nga ai. ¹⁶ Shi gaw chyen mi hpe wan ju nga ai, chyen mi hte shan shadu nga ai; shi shan kangau nna hkru hkra sha nga ai; dai hta n-ga shi wan kra nna, Ara, ngai lum ni ai, wan hte hkrum ni ai, nga nna tsun ai; ¹⁷ naw ngam ai hte sumla ngu ai Hpara hpe shi galaw wu ai; de a man e shi gum dagup nna nawku let, Nang gaw nye a Karai Wa rai nga ndai majaw, ngai hpe hkye la e law, ngu nna dai hpe akyu hpyi wu ai. ¹⁸ Shing re ai ni gaw chye chyang ai myit kata, hpa mung myit n pra nga ma ai; kaning rai nme law, shanhte n mu lu hkra tinang a myi hpe mung, n chye na lu hkra, myit masin hpe mung, shi pat kau ya mu ai. ¹⁹ Ataw, ngai gaw chyen mi hpe wan ju ni ai: de a wan n-ga ntsa e muk kabaw ni ai; ngai shan kangau nna, sha hkru ni ai; ya ngam ai chyen mi hpe mahtang, matsat shabat shatai na rai ni? ngai gaw hpun tawng man e gum dagup na rai ni? nga nna myit dum ai hte, aru yu lu nna hpaji rawng ai nyan, gaja wa, kadai n rawng a hka. ²⁰ Shi gaw wan dap amawp sha nga ai; n shawp ai myit hte lam dam wa sai; dai rai nna shi gaw shi a myit masin hpe n hkye la lu ai hte, Nye a hkra lata hta masu ai hkrai rawng nga ai, n rai ni? nga nna n chye tsun a hka. ²¹ Yaku hte Israela e, ndai lam ni hpe dum mu; nang gaw nye a shangun ma rai nga ndai; ngai nang hpe hpan da ni ai; nang gaw nye a shangun ma rai nga ndai: Israela e, ngai nang hpe malap mali kau ai n rai. ²² Ngai gaw na a tara tawt lai ai hpe htat ai sumwi zawn, na a yubak mara hpe saiwan zawn, jahkoi kau we ai: ngai hpang de wa rit; ngai nang hpe mawai la ni ai. ²³ Yehowa dai amu galaw ai majaw, sumsing lamu ni e, mahkawn mangoi nga mu; lawu tsang na gingding aga e, marawn jahtau mu: bum ni e, maling hte dai hta tu ai hpun yawng hte e, mahkawn mangoi nga mu: kaning rai nme law, Yehowa gaw Yaku hpe mawai la nna, Israela hta e tinang hkum hpe shagrau shaa na ru ai. ²⁴ Nang hpe mawai la ai wa, hkritung nna nang hpe shachyaw ai Yehowa ning nga ai: Yawng mayawng hpe hpan da ai Yehowa ngai rai nga nngai; ngai nan sumsing lamu hpe hpyan da nngai; ginding aga hpe ngai nep da nngai: ngai hte rau nga ai wa kadai? ²⁵ - ²⁸ Grang dakat ai ni a kumla ni hpe shayuk kau ai hte, shaba wawt ai ni hpe mana bu shangun ai wa; hpaji byeng-ya rawng ai ni hpe kanut shangun ai hte shanhte a hpaji hpe shagawk kau ai wa; shi shangun ma ni a ga hpe shagrin da ai hte, shi kasa ni a hpaji daw ai lam shabyin ya ai wa; Yerusalem mare hta masha bai nga nna, Yuda mare ni gaw dè da ai hkrum ai hte, marawng marang re ai htingra ni hpe ngai bai lajang na we ai, nga nna tsun ai wa; sung htum ai hka hpe, Hkyet mat u; ngai gaw na a hka nu ni hpe shahkyet kau na nngai, nga nna tsun ai wa; Kuru hkawhkam hpe lakap nna, Shi gaw nye a sagu ni hpe rem ai wa rai nga ai; ngai ra mara shi shadik ya nna, Yerusalem mare hpe bai dè da mu ga, nawku Htingnu a npawt nhpang ni gaw da mu ga, nga nna shi hpe tsun shangun ai Yehowa nan ngai rai nga nngai, nga ai.

¹ Yehowa gaw, shi a namman chya ya ai wa, Kuru hkawhkam hpe shaang nna ning nga tsun ai: Masha amyu ni hpe shi a man e shagrit kau nna, hkawhkam ni a shingkyit hpe ngai raw kau na matu mung, shi a man e chyinghka ni hpaw malang da nna, mare chyinghka ni n la da na matu mung, ngai gaw shi a lata hpe shadaw ya se ai: ² na a amying hte nang hpe shaga ai wa, Israela Karai Kasang, ngai Yehowa nan rai nga nngai gaw, nang chye na lu hkra, ngai gaw na a shawng e sa wa nna, kabawng kachyawng re ai shara ni hpe ara sha di na we ai; ³ magri chyinghka ni hpe ngai agrawp kau nna, hpri htinggrang ni hpe kahtum kadaw di kau na we ai: nsin kata na sutgan, shim ai shara e makoi da ai arung arai, ngai nang hpe jaw na de ai. ⁴ Nye shangun ma Yaku hte, ngai lata la ai Israela a matu mara, ngai na a amying hpe shaga nngai: nang ngai hpe n chye timung, ngai nan nang hpe amying ningnan kahtap jaw de ai. ⁵ Ngai nan Yehowa rai nga nngai, ngai hta kaga kadai n nga ai; ngai hta shaje Karai Kasang n nga ai. Nang ngai hpe n chye timung, ngai nang hpe shingkyit kyit ya na ring ngai; ⁶ dai rai nna, ngai hta kaga kadai n nga ai, sinpraw maga na ni mung, sinna maga na ni mung, chye na lu na mara ai: ngai Yehowa nan rai nga nngai, ngai hta kaga kadai n nga ai. ⁷ Ngai nan nhtoi hpe jahtoi nna, nsin hpe hpan da we ai; ngai nan ngwi pyaw lam shatai nna, gumle gumlau lam shabyin nngai: ndai lam yawng mayawng hpe shabyin ai Yehowa gaw, ngai nan rai nga nngai. ⁸ Sumsing lamu ni e, ntsa de na yun hkrat mu; sumwi ni dinghpring ai hpe htu mu ga: ginding aga gaw pu pu nna, hkyehkrang la ai chyeju si si u ga; dinghpring ai gaw rau tu wa u ga: ngai Yehowa gaw dai lam hpan da nngai. ⁹ Tinang hpe Hpan da ai wa hte dangrang hkat ai wa gaw, dingnye lu u ga; ga na di bu chyen ni hta, di bu chyen mi sha, shi rai nga a hka! Ga kagam gaw di bu sama wa hpe, Nang hpa galaw n ta? Nang galaw ai rai gaw, Shi lata n tu ai, nga nna tsun mai a ni? ¹⁰ Kawa hpe, Nang hpa hpe shaprat n ta? Kanu hpe, Nang hpa hte shinggyim machyi n ta? nga nna tsun ai wa gaw, dingnye lu u ga. ¹¹ Israela a Chyoi pra ai wa, dai amyu hpe hpan da ai Yehowa ning nga ai: Byin na ra ai lam ni hpe, ngai kaw san yu mu; nye a kashu kasha ni hte, nye a lata galaw ai amu ni a lam ngai hpe sagawn yu mi. ¹² Ngai gaw ginding aga hpe galaw da nna, de a ntsa e shinggyim masha hpe hpan da se ai: nye a lata nan sumsing lamu hpe hpyan da nna, de a Zaw nawng zaw wa up ai ni yawng hpe, ngai hkangda ni ai. ¹³ Ngai nan dai wa hpe dinghpring ai hte sharawt da nna, shi hkan sa ai lam ni yawng, ngai malan ya na we ai: shi gaw nye a mare hpe dè da nna, bawngdung ai nye a masha ni hpe, manu jahpu n hpyi ai, shalawt dat na ra ai, nga nna Zaw nawng zaw wa up ai Yehowa tsun nga ai. ¹⁴ Bai Yehowa gaw ning nga ai: Egutu mung na arung arai, hkum shing-yan galu ai Hkusha masha ni hte Sabea masha ni a hpaga kun rai, nang hpang de du nna, na a kun rai tai na ra ai. Shanhte gaw nang hpang de hkan nang na mara ai: hpri sumri gyit hkang ai hte shanhte sa du nna, na a man e gum dagup let, Gaja wa, Karai Wa nang hte rau rai nga ai; dai Karai Kasang hta kaga kadai n nga ai: ¹⁵ Israela Karai Kasang, Hkyehkrang la ai Wa e, makoi magap nga ai Karai Kasang nang teng teng rai nga ndai, nga nna hpyi nem na mara ai. ¹⁶ Hpara sumla galaw ai ni gaw, kaya kahpa hkrum ai hte yawng hte gaw mau mat nna, rau mak mat na mara ai. ¹⁷ Israela chyawm gaw, Yehowa a jaw e htani htana hkyehkrang la ai lam hkrum na ra ai; nanhte gaw htani htana prat dingsa e kaya kahpa hte mak mat ai n hkrum na myit dai. ¹⁸ Kaning rai nme law, sumsing lamu hpe hpan da ai Yehowa, ginding aga hpe hpajang tawn da ai hte shagrin da nhtawm, shanu nga na matu, akrin akraw n hpan da ai Karai Kasang, ning nga ai: Ngai gaw Yehowa rai nga nngai; ngai hta kaga kadai n nga ai. ¹⁹ Nsin sin ai lamu ga ginwang hkan e ngai mayun tsun ai, n rai; Ngai hpe kaman sha tam mi, nga nna Yaku a aru arat hpe ngai n tsun nngai: ngai Yehowa gaw dinghpring ai ga tsun nga nngai; tengman ai lam hpe ngai shana ya nngai. ²⁰ Masha amyu ni hta na lawt pru lu ai ni e, rau sa zuphpawng ga; sit sa marit: tinang tawk ai hpun tawng hpara sumla hpe hpai nna, hpa n karum lu ai hpara hpe akyu hpyi ai ni gaw, hpa mung n chye ma ai. ²¹ Ga sumtu tsun shana mu; dai hpe shapraw mu ga; gaja wa, shanhte rau bawng mu ga; moi kaw nna ndai lam hpe madun ai wa, kadai? Chyaloi nhkoi kaw nna dai hpe shana ya ai wa, kadai? Ngai Yehowa nan n rai ni? Ngai hta shaje Karai Kasang n nga ai: ngai gaw dinghpring ai Karai Kasang hte Hkyehkrang la ai Wa rai nga nngai. ²² Lamu ga htum hkra shanu nga ai ni e, ngai hpe mada yu nna, hkyehkrang la ai hkam la mu: ngai hkum nan Karai Kasang rai nga nngai; ngai hta kaga kadai n nga ai. ²³ Lahput shagu nye a man e hput di nna, shinglet shagu ngai hta hpa let dagam nga na gaw, nye hkum hpe ngai dagam da ai hte, ndai dinghpring ai ga gaw nye n-gup na pru wa sai rai nna, nhtang wa lu na n rai. ²⁴ Yehowa hta chyu sha dinghpring ai hte n-gun atsam rai nga ai da, nga nna nye a lam tsun da sai; masha ni gaw shi hpang de du na mara ai; shi hpe pawt sindawng ai ni yawng, kaya kahpa hkrum na mara ai. ²⁵ Israela kashu kasha ni yawng Yehowa a jaw e dinghpring ai hkrum nna, shakawn kungdawn nga na mara ai.

¹ Bela gaw gum dagup nga ai. Nebo gaw agrawp mat sai! De a sumla ni gaw matse labye ni hte yamnga ni a ntsa e mara nga ma ai: nanhte hpai hkawm ai arai ni gaw hki ba ai yamnga ni a matu lit tai wa sai. ² shan gaw gum dagup nna rau agrawp kau ai hkrum ma ai; dai lit hpe shan n shaw la lu ai hte, tinang hkum nan bawngdung hkrum nga ma hka! ³ Yaku a nta dap ni e, shangai shani kaw na ngai pawn ba ai hte, hkritung nna gunhpai hkrum ai, naw ngam nga ai Israela nta dap ni e, nye a ga madat mu. ⁴ Nanhte aprat kaba yang pyi, ngai rai nga nngai; dingla ugut gu timung, ngai pawn ba na nngai; ngai galaw da nngai, ngai gunhpai nngai; gaja wa, ngai pawn ba na nngai; ngai mawai la na nngai. ⁵ Nanhte ngai hpe kadai wa hte shabung nna, ngai shi hte bung hkra, kadai wa hte shadawn nna, shapre na myit ta? ⁶ Tingsan hta na aja law law shaw la nna, joi hte gumhpraw shen yu ai ni gaw, janghkam shaga nna, shi gaw hpara galaw da jang, shanhte gum dagup nna, nawku nga ma hka! ⁷ Shanhte gaw dai sumla hpe hpai nna, la wa ai hte de a shara hta tawn da mu ai; dai mung atsap nga nna shi a shara na n htawt lu nga ai; shi hpe jahtau timung htan lu ai n rai; ruyak kyindut hta na mung, hkye mawai la lu ai n rai. ⁸ Dai lam dum nna dakan nga mu; tara tawt lai ai ni e, dai hpe bai dum mu law. ⁹ Moi prat na lam ni hpe dum mu; ngai gaw Karai Kasang rai nga nngai; shaje n nga ai; ngai nan Karai Kasang rai nga nna, ngai hte bung ai n nga ai: ¹⁰ ngai gaw npawt kaw nna jahtum du hkra mung, moi chyaloi nhkoi kaw nna garai n byin ai amu ni hpe mung, shapraw dan nngai: Nye a hpaji daw ai lam grin nga na ra ai; ngai ra mara hpe shatup na nngai; ¹¹ sinpraw maga na u matse, sumtsan mung na ngai san da ai wa hpe, ngai shaga ni ai: gaja wa, ngai mungga tsun da nngai, ngai dai hpe shabyin na we ai; ngai myit shatawng da nna, dai hpe galaw na we ai, nga nna ngai tsun nngai. ¹² Myit ja nna dinghpring ai lam hte tsan ai ni e, nye a ga madat mu: ¹³ ngai gaw nye a dinghpring ai hpe shani la nna, dai gaw tsan nga ai n rai; nye a hkyehkrang la ai lam ganung nga ai n rai; ngai gaw Ziun bum hta hkyehkrang la ai lam, Israela hta e, nye a arawng sadang hpe, tawn da na we ai.

¹ Babelon shayi hkawnsek e, yu wa nna ga nhpu hta dung u; Hklde a shayi sha e, tingnyang hta n re ai sha, ga hta dung u: htawmhpang de nang hpe, Nu nu nai nai re ai jan, n ngu na masai. ² Htumrin la nna shadung rin mu; man magap gun kau u; palawng galu raw kau u; danggye htawk nna hka rap u: ³ nang singgu krin rai nna kaya kahpa hkrum na rin dai: ngai matai dawp yang, kadai hpe mung matsan dum na n rai. ⁴ Anhte hpe Shaw Hkrang la ai wa chyawm gaw, Israela a Chyoi pra ai Wa, Zaw nawng zaw wa up ai Yehowa mying nga ai. ⁵ Hkalde a shayi sha e, nsin sin ai shara e shang nna, atsin sha dung nga u: ya kaw nna nang hpe, Mungdan ni a du jan, n nga na masai. ⁶ Ngai gaw nye a amyu hpe pawt kahtet nna, nye a sali wunli hpe jahpoi kau ai hte, na a lata hta shanhte hpe ap kau nngai: nang chyawm gaw shanhte hpe matsan n dum nna, prat kaba ni a ntsa e pyi, li ai kandang mara da nu ai. ⁷ Dai hta kaga nang gaw, Ngai prat dingsa du jan rai nga nngai, nga nna dai lam ni hpe n sumru yu ai hte, hpa pru na ra ai gaw, nang n dum ndai. ⁸ Dai re ai majaw pyaw daw kadaw tam nna amu sha dung nga let, Ngai nan rai nga nngai; ngai hta kaga kadai n nga ai; ngai gaida jan zawn dung nga na n rai; kashu kasha si ai mung hkrum na n rai, nga nna kraw e tsun ai jan e, ndai ga madat u: ⁹ nang gaw lani chyahkring mi hta sha, kashu kasha si ai hte, madu wa si ai, ngu ai ari lahkawng hkrum na rin dai: shaba wawt ai hte mandan lakle amu mana maga galaw ai made, dai yawng mayawng na a ntsa e du na ra ai. ¹⁰ Nang gaw na a n hkru ai hta machyu nga ndai: Ngai hpe kadai n mu ai, nga nna nang tsun nit dai; na a hpaji byeng-ya hte na a nyan gaw, na a myit hpe gale kau ya nna, Ngai rai nga nngai, ngai hta kaga kadai n nga ai, nga nna na a kraw e nang tsun nit dai. ¹¹ Dai re ai majaw, tsin-yam tsindam na a ntsa e du nna, dai kanang na pru ai gaw, nang n chye ndai: shoihpa shoirang na ntsa e hkrat bun nna, nang dai hpe gangkau lu na n rai: nang n dum shami e, hten byak ai gaw na a ntsa e akajawng sha du na ra ai. ¹² Ram prat kaw nna nang galaw ai mandan lakle amu hte law la ai shaba wawt ai amu ni hta ya machyu nga u: nang akyu lu la na nhten; nang dang wa lu dam nhten. ¹³ Bawng yu ai lam nau law ai majaw, nang hki ba nga ndai: lamu hpe chye yu ai ni, shagan ni hpe azi yu ai ni, shata ladaw hte hkaw tsun ai ni gaw, rawt tsap nna, na ntsa e du na ra ai lam ni kaw na, nang hpe, ya, hkyehkrang la mu ga. ¹⁴ Shanhte yi hku zawn tai nna, nat kau ai hkrum na mara ai; shanhte nan tinang hkum hpe wan hta na gare la lu na, n rai: wan kra na matu wan n-ga mung, lum na matu wan nhtaw mung, ngam nga lu na, n rai. ¹⁵ Shingrai nang shakut sharang ai amu hta nang hten byak hkrum na ndai: na a ram prat kaw nna nang hte hpaga ga ai ni langai hte langai gaw tinang a buga de hprawng wa nna, nang hpe hkye la na wa n nga na sai.

¹ - ² Yaku a dap nta na ni e, Israela ngu ai amying mying ai ni, Yuda hka hpawk kaw na pru ai ni; Yehowa a amying hta dagam nna, Israela Karai Kasang a mying gang timung, tengman ai hte dinghpring ai hku n hkan ai ni; chyoi pra ai mare mying hkan nna tinang hkum hpe shamying ai hte, Israela Karai Kasang hta shamyet shanat ai ni e, ndai lam madat mara mu: shi a mying gaw, Zaw nawng zaw wa up ai Yehowa rai nga ai. ³ Ngai nan moi na lam ni moi kaw nna tsun dan ni ai; gaja wa, ndai lam ni gaw nye n-gup kaw na pru nna dan wa sai: ngai gaw akajawng sha ndai lam galaw nna, dai ni byin wa sai. ⁴ - ⁵ Nang gaw je hpre ai wa rai nna, na a du lasa ni ahpri, na a lahtan gaw magri rai nga ai hpe, ngai chye nngai majaw, ngai dai lam ni hpe moi kaw nna nang hpe tsun dan ni ai; dai n rai taw gaw, Nye a hpara sumla ndai galaw sai, ngai tawk la ai sumla, ngai jaw ai sumla, ndai lam ni shabyin sai, nga nna nang tsun na ndai. ⁶ Nang dai lam na yu nu ai; dai yawng mayawng hpe mada yu u; nanhte mahtang n tsun shana ai nga na myit ni? ningnan lam mung, nang n chye ai makoi magap da ai lam ni mung, ngai gaw ya kaw nna nang hpe madun dan ni ai. ⁷ Dai lam ni ya she byin nga ai, moi kaw nna n rai; dai ni du hkra nang n na yu ndai: dai rai nna, Yu u, ngai chye nga nngai, nga nna nang tsun lu na n rai. ⁸ Gaja wa, nang n na yu ndai; gaja wa, nang n chye ndai; gaja wa, moi kaw nna na a na hpaw ai n rai: kaning rai nme law, nang gaw gumle gumlau amu grai galaw nna, kanu a hkritung nna pyi, tara tawt lai ai, ngu ai mying mying ai hpe ngai chye nngai. ⁹ Raitimung, nang hpe n shamyit kau hkra, ngai gaw nye a amying nsang a marang e, nye a pawt bu ai myit dip kau nna, nye a arawng sadang matu, na a lam naw hkam sharang na nngai. ¹⁰ Yu u, ngai nang hpe jen yu ni ai, raitimung gumhpraw hpe zawn n rai; nni nkri ngu ai wanhtung hta ngai nang hpe dinglik yu ni ai. ¹¹ Nye a marang e, rai sa, nye a marang e, ndai lam ngai galaw na nngai; nye a amying hpa majaw jahpoi ai hkrum na rai ta? nye a arawng sadang hpe kaga wa e ap ya na n rai. ¹² Yaku e, ngai shaga la ai Israela e, nye a ga madat u; Ngai dai wa nan rai nga nngai: shawng na wa mung, hpang jahtum na wa mung ngai rai nga nngai. ¹³ Gaja wa nye a lata gaw ginding aga hpe gaw da sai, nye a hkra lata gaw sumsing lamu hpe hpyan da nu ai: ngai shaga yang, dai ni gaw rau tsap nga ma ai. ¹⁴ Nanhte yawng zuphpawng nna madat mara mu: shanhte hta na, ndai amu ni hpe, kadai chye tsun a ta? Yehowa tsawra ai wa gaw, Babelon mare ntsa e shi a myit shadik ya nna, shi a lata gaw Hkalde masha ni a ntsa e du na ra ai. ¹⁵ Ngai nan mungga hkangda ni ai; gaja wa, ngai shi hpe shaga ni ai: ngai gaw shi hpe lakawn wa nna, shi gaw shi a lam hta awng wa na ra ai. ¹⁶ Ngai hpang de sit sa nna, ndai ga madat mara mu; ngai gaw npawt kaw nna mayun e tsun ai n rai: byin pru ai shani kaw nna ngai lawm nga nngai; ya mung Madu Yehowa hte shi a Wenyi ngai hpe shangun dat nngai. ¹⁷ Nang hpe Hkyehkrang la ai wa, Israela Chyoi pra ai wa Yehowa ning nga ai: Ngai gaw, na a akyu matu nang hpe sharin achyin ya nna, nang mai hkan ai lam hta nang hpe lakawn wa ai, na a Karai Kasang Yehowa rai nga nngai. ¹⁸ Nang gaw nye a hkang ai ga hpe shatup nga u: dai rai yang na a ngwi pyaw ai lam hka nu zawn, na a dinghpring ai gaw, nammukdara hka leng ni zawn, tai wa na mara ai: ¹⁹ na a aru arat ni zaibru zawn, na a kashu kasha ni gaw hka kau na lung sha zawn tai wa na mara ai: shi a amying gaw nye a man e shamyit kau ai hte htum mat hkrum na n rai. ²⁰ Babelon mare na pru wa mu, Hkalde a masha ni kaw na hprawng wa mu: mahkawn mangoi ai nsen hte, Yehowa gaw shi a shangun ma Yaku hpe hkyehkrang la nu ai, nga nna lamu ga htum hkra tsun shabra mu. ²¹ Shi shanhte hpe akrin daleng hku woi wa yang, shanhte hpang kara hkrum ma ai n rai: shi shanhte a matu lunghkrung hta na ntsin lwi shangun wu ai: shi gaw lunghkrung hpe pyi shaga nna hka lwi nga ai. ²² Tara n lang ai ni kaw ngwi pyaw lam n nga ai, nga nna Yehowa tsun nga ai.

¹ Zunlawng ni e, nye a ga na la mu, sumtsan mung na amyu ni e, madat mara mu: Yehowa gaw hkritung nna pyi, ngai hpe shaga ni ai; nye nu a kraw lawang kaw nna, nye a amying hpe shabrawng ya ni ai; ² shi nye a n-gup hpe dai ai nhtu zawn shatai ya nna, shi a lata a shingnip hta ngai hpe ka-up da ni ai; atu nsan ai pala shi ngai hpe shatai nna, shi a pala ndum hta ngai hpe kyem da ni ai: ³ shi gaw, Israela e, nang gaw nye a shangun ma rai nga ndai; nye a hpung shingkang nang hta dan na ra ai, nga nna ngai hpe tsun sai. ⁴ Ngai mahtang, Ngai gaw kaman sha shakut sharang nngai; lila be lagya n-gun dat nngai; raitimung, nye a lam Yehowa man e rai nga nna, ngai hkam la na shabrai gaw, nye a Karai Kasang a lata hta rai nga ai, nga nna tsun nngai. ⁵ Ngai gaw Yehowa man e arawng sadang lu ai hte, nye a Karai Kasang gaw nye a n-gun tai wa nna, Yaku a amyu hpe shi hpang de bai wa shangun na hte, Israela masha ni hpe shi hpang de zuphpawng shangun na matu, shi a shangun ma tai na, hkritung nna ngai hpe hpan da ai Yehowa, ya ning nga ai: ⁶ Yaku a amyu ni hpe bai sharawt nna, naw ngam nga ai Israela masha ni hpe shagrin da na matu sha, nye a shangun ma tai na, na a matu amu kaji naw rai nga ai: maigan amyu ni a nhtoi tai na hte, lamu ga htum hkra nye a hkyehkrang la ai lam tai na matu, ngai nang hpe naw san da na nngai. ⁷ Bai, Israela a Hkyehkrang la ai wa, shi a chyoi pra ai wa Yehowa gaw, n kaw n law di kau hkrum nna, maigan masha ni matsat kau ai hte, mung du ni a mayam tai ai wa hpe, ning nga tsun ai: Hkawhkam ni mu mada nna rawt na mara ai; du ni mung nawku na mara ai: dai gaw kangka re ai Yehowa hte, nang hpe lata la ai, Israela a Chyoi pra ai wa a matu mara byin na ra ai, nga ai. ⁸ Yehowa ning nga ai: Ang wa ai aten e ngai na a ga htan ya de ai, hkyehkrang la ai nhtoi e ngai nang hpe karum de ai; ngai nang hpe makawp maga nna, dai mung hpe bai shagrin da na hte, katsi katsang re ai shara ni hpe bai madu na matu, mung masha ni a ga shaka nang hpe shatai na de ai: ⁹ shingrai nang gaw, bawngdung ai ni hpe, Pru wa mu, nsin e dung nga ai ni hpe, Dawng pru wa mu, ngu nna tsun na maru ai. shanhte gaw hkrun lam e shat lusha nna, krin ai kawng shagu ntsa e, shanhte a matu udat shara tai na ra ai. ¹⁰ Shanhte gaw kawsi hpang kara hkrum na, n rai; kahtet kamawt hte jan ja mung hkrum na, n rai: kaning rai nme law, shanhte hpe matsan dum ai wa gaw, shanhte hpe woi wa nna, hka hpawk makau hku lam madun na ra ai. ¹¹ Nye a bum ni yawng hpe ngai lam shatai nna, nye a nmaw lam ni hpe, gaw shatsaw na we ai. ¹² Yu u, ndai ni gaw sumtsan mung kaw nna wa na mara ai; bai yu u, ndai ni gaw dingdung maga hte sinna maga na mung, ndai ni gaw Sinim mung na mung, wa na mara ai, nga ai. ¹³ Sumsing lamu ni e, mahkawn mangoi mu; ginding aga e, kabu gara nga u; bum ni e, mahkawn mangoi garu mu: kaning rai nme law, Yehowa gaw shi a amyu masha ni hpe shalan shabran nna, nni nkri hkrum ai shi a masha ni hpe, matsan dum na ra ai. ¹⁴ Ziun chyawm gaw, Yehowa ngai hpe kau da ni ai, Madu gaw ngai hpe malap kau ni ai, nga nna tsun sai. ¹⁵ Numsha gaw tinang shangai ai kasha hpe matsan n dum ai hte, chyu chyu ai ma hpe malap kau lu na rai ni? gaja wa malap kau timung, ngai nang hpe malap kau lu na n rai. ¹⁶ Yu u, nye a lata lahpan hta ngai nang hpe ka da ni ai; na a mare bunghku ni, nye a man e tutnawng rai nga ai. ¹⁷ Na nshu nsha ni lawan wa na mara ai; nang hpe hpya lu hpya sha ai ni hte na a mung hpe shakrin kau ai ni gaw, nang kaw na pru mat wa na mara ai. ¹⁸ Grupyin shara shagu mada yu u: ndai ni yawng hpawng nna, nang hpang de du mara ai. Yehowa ning nga ai: Ngai hkrung nga ai hte maren, nang gaw na hkum hpe ndai ni hte mawn sumli nna, num ningnan zawn, shanhte hpe kyit na rin dai. ¹⁹ Na a akrin akraw, katsi katsang re ai shara ni hte, hten byak hkrum ai mungdan a malai, ya kaw nna masha law ai majaw, shara gyeng na ra ai; nang hpe mayu kau ai ni mung, tsan mat na mara ai. ²⁰ Na a nsha ni matu htum ai hpang, nang bai lu na kashu kasha ni gaw, Shara nau gyeng mat sai. Nga shara naw jaw mi, nga nna nang hpe naw hpyi na mara ai. ²¹ Shaloi nang gaw, Ndai ni hpe, ngai e, kadai shajprat ya a ta? ngai gaw matu htum ai wa, katsi katsang re ai wa, bawngdung ai hte let hkawm ai wa rai nga ninglen, ndai ni hpe kadai kaba wa shangun a ta? Yu u, ngai hkrai sha nga ai rai yang, ndai ni gaw kanang na rai ma ta? nga nna na a kraw e tsun na rin dai. ²² Madu Yehowa ning nga ai: Yu u, ngai gaw maigan amyu ni hpe nye a lata ladawn nna, amyu baw ni a man e nye a dawnghkawn sharawt na we ai: shaloi shanhte gaw na a shadang sha ni hpe pawn let, na a shaji sha ni hpe lahpa hta hpai let, woi wa na mara ai. ²³ Hkawhkam ni gaw na a kawa malai, hkawhkam jan ni na a chyu jaw kanu malai tai na mara ai: shanhte a man e gum dagup nna, na a lagaw na ga nhpu mata na mara ai: ngai gaw Yehowa rai nga nngai, nang chye na rin dai; ngai hpe ala nga ai ni kaya kahpa hkrum na n rai. ²⁴ share wa lata na lanep kashun la mai na a ni? Bawngdung ging ai wa hpe, dat dat mai na a ni? ²⁵ Yehowa chyawm gaw ning nga ai: Gaja wa, share ni rim la ai ni gaw lawt lu na mara ai rai nna, gumshem ni kashun la lu ai lanep hpe shaw la lu na mara ai: kaning rai nme law, nang hte dangrang hkat ai ni hpe ngai dangrang hkat nna, na a kashu kasha ni hpe hkyehkrang la na nngai. ²⁶ Nang hpe adip arip ai ni hpe, tinang a hkumshan ngai sha shangun na nngai: dwi ai tsabyi jahku zawn tinang a asai hpe nang hkra lu shangun na nngai; shingrai, ngai Yehowa gaw, nang hpe Hkyehkrang la ai Madu, Yaku a Daru Magam rawng ai wa gaw, nang hpe Shaw Mawai la ai wa rai nga ai hpe, hkrung mahkrung chye lu na mara ai, nga ai.

¹ Yehowa ning nga ai: Na nnu hpe jahka kau na matu, jahka kau laika kanang nga a ta? Ngai hka kap nna kadai hka madu kaw nanhte hpe dut kau n ta? Nanhte gaw, tinang mara majaw, dut kau ai hkrum nna, nanhte tara tawt lai ai majaw, nanhte a kanu gaw jahka kau ai hkrum sai. ² Ngai sa du yang hpa majaw masha kata, ngai shaga yang, htan ai wa hpa majaw n nga a ta? Nye a lata gaw gadun nna, n hkyehkrang la lu ai rai ni? ngai gaw mawai la lu na atsam n rawng a ni? Yu u, ngai daru yang, nammukdara ni hkyet kan mat nna, hka nu ni zaibru jang, tai mat wa ai: hka n nga ai majaw, nga ni hpang kara ai hte si wa nna, manam hkying nga ma ai. ³ Ngai gaw sumsing lamu hpe chyang ai hpun nba hte jahpun nna, lachyit sumpan hte htinggrum nngai. ⁴ Hki ba hkrum ai wa hpe shalan shabran na chye wa lu hkra, Madu Yehowa gaw, sharin achyin hkam la ai ni a shinglet, ngai hpe jaw ni ai; jahpawt shagu shi ngai hpe jasu nga ai: sharin achyin hkam la ai ni, na la lu ai zawn, shi nye a na hpe jasu ya nga ai. ⁵ Madu Yehowa gaw nye a na hpe hpaw ya nna, ngai mung lale kau ai hte, kanut mat wa ai n rai. ⁶ Ngai gaw kayat ai ni hpe nye a shingma, shabyi mun baw ai ni hpe nye a shabyi, ap ya nngai: kaya jahkrum ai hte mayen mahtaw bun ai kaw na, nye a myiman kayin kau ai n rai. ⁷ Madu Yehowa gaw ngai hpe karum na ra ai; dai re ai majaw, ngai mak mat ai n rai; nye a myiman mung nhpai lung zawn ngai shatai nna, ngai kaya kahpa n hkrum na, ngai chyenngai. ⁸ Nye mara dat ya ai wa gaw, saw e rai nga ai: kadai wa ngai hte dangrang hkat na rai ta? shingjawng hkat ga; ngai hpe ra baw shangun ai wa, kadai wa rai ta? dai wa ni wa ruga. ⁹ Yu u, Madu Yehowa ngai hpe karum na ra ai; ngai hpe dawdan ai wa gaw kadai rai ta? dai ni yawng hpun nba zawn dingsa mat na mara ai; manut e mung sha kau na maru ai. ¹⁰ Yehowa hpe hkrit kamyin let, shi a shangun ma a nsen madat mara ai wa gaw, nanhte hta kadai wa rai ta? Nsin hta hkawm nna, nhtoi n mu ai wa gaw, Yehowa a amying hta hpa nna, tinang a Karai Kasang hta shamyet shanat u ga. ¹¹ Wan shachyi nna, tinang hkum hpe wan n-yang hte shinggrup ai ni mahkra e, nanhte a wan shinglet hta mung, nanhte wut ai wan n-yang ni hta mung, hkawm nga mu. Nye a lata na nanhte hkam la ai lam chyawm gaw, da ndai rai nga ai: nanhte yawnhkyen let, yup kaleng wa na marin dai.

¹ Dinghpring ai hku hkan nang nna, Yehowa hpe hkan tam ai ni e, nye a ga madat mara mu: nanhte hpe tawk la ai lunghkrung hte, nanhte hpe htu shapraw la ai nhkun hpe mada yu mu. ² Nanhte a kawa Abraham hte, nanhte hpe shangai ai Sara hpe, mada yu mu: shi hkrai sha naw nga yang, ngai shi hpe shaman ya ai hte, shalaw jahtam we ai. ³ Kaning rai nme law, Yehowa gaw Ziun hpe shalan shabran ya wu ai: shi gaw Ziun a katsi katsang re ai shara ni mahkra hpe shaman ya ai hte, de a nam mali hkan e Eden zawn, de a zaibru jang e Yehowa a sun zawn, shatai wu ai: sharawng awng ai hte kabu gara ai, chyeju dum ai nsen hte mahkawn mangoi ai, de a kata e hpring na ra ai. ⁴ Nye a amyu e, nye a ga madat mara la mu; nye a amyu baw ni e, nye a ga na la mu: tara langai mi ngai kaw nna pru na ra ai rai nna, nye a dinghpring ai lam amyu baw ni a nhtoi tai na ra ai. ⁵ Nye a dinghpring ai tara ani sha rai nga ai; nye a hkyehkrang la ai lam pru wa sai; nye a lata gaw amyu baw ni hpe tara dara na ra ai; zunlawng ni gaw ngai hpe ala nga nna, nye a lata hta shamyet shanat na mara ai. ⁶ Sumsing lamu hpe mada yu mu, ginding aga hpe gum yu mu: sumsing lamu gaw wanhkut zawn hkoi mat nna, ginding aga gaw hpun nba zawn dingsa mat na ra ai; dai hta shanu nga ai ni mung jigrawng zawn si mat na mara ai: nye a hkyehkrang la ai lam chyawm gaw, prat dingsa nga nga nna, nye a dinghpring ai lam mat mat na n rai. ⁷ Dinghpring ai lam chye nna, nye a tara hpe myit masin hta kyem da ai amyu e, nye a ga madat mara mu: masha ni a n kaw n law di ai lam hkum tsang myit; shanhte shatan nhkan ai a majaw, myit hkum htum myit: ⁸ kaning rai nme law, hpun nba hpe manut e sha kau ai zawn, shanhte hpe sha kau nna, sagu mun hpe shingtai e sha kau ai zawn, shanhte hpe sha kau na mara ai: nye a dinghpring ai lam chyawm gaw, htani htana e, nye a hkyehkrang la ai lam gaw, prat mi hte prat mi, agrin nga na ra ai. ⁹ Yehowa a lata e, rawt u, na a atsam dagraw u; moi chyaloi nhkoi na prat nhtoi ni hta zawn, rawt u; Rahab hpe kahtum gadaw di nna, baren numraw hpe galun ai wa gaw, nang rai nga ai, n rai ni? ¹⁰ Sung htum ai shara na nammukdara hka hpung ni hpe shahkyet kau nna, hkye mawai la hkrum ai ni lai lu na matu, nammukdara htumpa hku lam waw ai wa gaw, nang rai nga ai, n rai ni? ¹¹ Shingrai, Yehowa a lata hte hkye mawai la hkrum ai ni bai wa nna, Ziun bum de mahkawn mangoi let du na mara ai: shanhte a baw ntsa e, prat dingsa na kabu gara ai gaw, mara nga na ra ai; shanhte gaw sharawng awng nna, ngwi pay ai lu la na mara ai; yawnhkyen ai hte madai ai gaw hkoi mat na ra ai. ¹² - ¹³ Nanhte hpe shalan shabran ai wa gaw, kaga wa n rai, ngai nan rai nga nngai: si ang ai masha hpe mung, tsingdu zawn tai wa na shinggyim masha a kasha hpe mung, hkrit kamyim masha a kasha hpe mung, hkrit kamyin nna, sumsing lamu hpe hpyan da ai hte, ginding aga npawt ni gaw da ai, nang hpe Hpan da ai wa Yehowa hpe malap kau ai hte, jahten shabyak maw ai wa a n-yun bu ai hpe shani shagu tutnawng hkrit ai wa, nang gaw, hpa wa rai nga n ta? jahten shabyak maw ai wa a n-yun bu ai mung, ya kanang rai nga a ta? ¹⁴ Bawngdung ai wa gaw htawng kata e n si, kawsi hpang kara n hkrum na hte, alawan, hkyehkrang la ai hkrum na ra ai. ¹⁵ Kaning rai nme law, ngai gaw, nammukdara hpe daru nna, hka leng ni hta shangun ai, na a Karai Kasang Yehowa rai nga nngai: shi a mying gaw, Zaw nawng zaw wa up ai Yehowa nan rai nga ai. ¹⁶ Sumsing lamu hpe gap da nna, ginding aga hpe npawt gaw da na matu mung, Nang gaw nye a amyu rai nga ai, nga nna Ziun hpe tsun lu na matu mung, ngai gaw, nye a mungga na a n-gup hta bang ya nna, nye lata a shingnip hte nang hpe ka-up da ni ai. ¹⁷ Yehowa a lata hta na n-yun bu ai gawm lu sai, Yerusalem e hprang u, hprang nna rawt u: nang gaw n di n da hkawm shangun ai gawm hpe lu kau nna, jabu du hkra shup lu kau nu ai. ¹⁸ Shi shaprat ai kashu kasha ni mahkra hta na, shi hpe lam madun ai wa langai mi n nga ai: shi kaba wa shangun ai shadang sha ni mahkra hta na, shi hpe dun la ai wa langai mi n nga ai. ¹⁹ Katsi katsang hte marawng marang, hku wa hte ri nhtu, ndai lam lahkawng nang hkrum sha nna, na a matu sharung shayawt na kadai? Ngai nang hpe kaning rai shalan shabran lu na rai ta? ²⁰ Na a shadang sha ni gaw htan mat masai; shanhte gaw mahkam hta lu ai shan zawn, mare lam mashe shagu hta taw nga ma ai: shanhte gaw Yehowa a n-yun bu ai, na a Karai Kasang a daru jet ai hte hkru nga ma ai. ²¹ Dai rai nna nni nkri hkrum ai hte, tsabyi jahku hta kaga nang ai wa e, ya ndai madat u: ²² shi a amyu a matu, bawmung tai ai, na a Karai Kasang Madu Yehowa gaw ning nga ai: Yu u, n di n da hkawm shangun ai gawm ngu ai, nye a n-yun bu ai gawm hpe, ngai na a lata na dawm la kau nna, htawmhpang de nang lu lu sa na n rai: ²³ nang gaw na a shingma hpe lam lai ai ni a matu hkrun lam zawn shatai nna, Anhte lai lu hkra, ga e gum-yan taw nga u, nga nna nang hpe zingri zingrat let, tsun ai ni a lata hta, ndai gawm hpe ngai tawn da na nngai.

¹ Ziun e hprang u, hprang u, na a n-gun atsam dagraw u; chyoi pra ai mare Yerusalem e, na a tsawm htap ai hpun palawng hpe mawn sumli u: kaning rai nme law, ya kaw nna matu n gadoi ai hte n san n seng ai wa kadai mung, nang kaw shang lu na n rai. ² Yerusalem e, nang hta kap ai ga nhpu hpe ahpu kau u; rawt u, na a tingnyang hta dung u: bawngdung ai Ziun shayi sha e, na a du na sumri raw kau u. ³ Kaning rai nme law, Yehowa ning nga ai: Nanhte gaw jahpu n hpyi ai, dut kau hkrum ai rai nna, gumhpraw n hkrat ai, hkyehkrang la ai hkrum na marin dai. ⁴ Bai Madu Yehowa ning nga ai: Nye a amyu masha ni gaw, Egutu mung e shanu nga na matu, moi shawng e yu wa ma ai; dai hpang Asuri masha ni gaw, shanhte hpe pagawn adip arip di kau mu ai. ⁵ Dai rai nna Yehowa ning nga ai: Nye amyu masha ni hpe mayu la dik e rim mat wa nna, shanhte a ntsa e up ai ni gaw shabam let, nye a mying nsang hpe tutnawng e jahpoi ma ai majaw, ya ngai kaning mai di na rai ta? ⁶ Nye a amyu mahtang, nye a amying nsang hpe chye na ra ai: ga tsun ai wa gaw ngai nan rai nga nngai, dai shani e jang, shanhte chye lu na mara ai: yu u, ngai nang e rai nga nngai, nga nna Yehowa tsun nga ai. ⁷ Shi ga kaja gun nna, ngwi pyaw ai lam shana, kaja ai shiga kajai gumhkawng ai hte, hkyehkrang la ai lam shana ya let, Na a Karai Kasang up nga ai, nga nna Ziun hpe tsun shana ai wa a lagaw gaw, bum lang ntsa e gade tsawm htap nga a hka! ⁸ Na a sin langa ni a nsen madat u: shanhte nsen sharawt nna, kabu gara ai hte rau garu ma ai: kaning rai nme law, Yehowa gaw Ziun mare de nhtang wa ai hpe, tinang nan myi chyaw mu lu na ma ai. ⁹ Yerusalem na katsi katsang shara ni e, mahkawn mangoi let, rau garu mu: Yehowa gaw shi a amyu hpe shalan shabran ai hte, Yerusalem mare hpe hkye mawai la wu ai. ¹⁰ Yehowa gaw masha amyu baw ni mahkra a man e shi a chyoi pra ai lahpum shadawng dan nna, anhte a Karai Kasang a hkyehkrang la ai lam gaw, lamu ga htum hkra dan leng wa sai. ¹¹ Pru mu, pru mu, dai shara kaw na pru wa mu; n san n seng ai hpe hkum hkra myit; dai mare kata na pru wa mu: Yehowa a arung arai hpai ai ni e, tinang hkum hpe jasan jaseng mu. ¹² Kaning rai nme law, nanhte tin shapun pru wa na n rai; hprawng ai zawn mung pru wa na n rai, Yehowa nan nanhte a shawng e sa wa nna, Israela Karai Kasang gaw nanhte a hpang e sin langa tai na ra ai. ¹³ Yu mu, nye a shangun ma gaw awng wa na ra ai: shi gaw shagrau shatsaw hkrum ai hte, hpung shingkang rawng nna, nachying galu kaba na ra ai. ¹⁴ Na a lam masha law law wa mau mahka nga ma ai: shi a myiman gaw masha a myiman hta, shi a gawng shing-yan gaw shinggyim masha ni a hkum hkrang hta, ahpraw nsam grau hten wa ai; ¹⁵ shingrai shi gaw, amyu baw law law hpe kamawng shabra kau na ra ai; hkawhkam ni mung shi a man e tinang n-gup pat kau na mara ai: kaning rai nme law, shanhte hpe garai n tsun dan ai lam shanhte mu lu nna, garai n na yu ai lam chye na lu na mara ai.

¹ Anhte shana ya ai shiga hpe, kadai kamsham a ta? Yehowa a lahpum, kadai hpe shadan dan a ta? ² Kaning rai nme law, Yehowa a shangun ma gaw, shi a man e matsun zawn mung, hkraw hkun ai ga na maku zawn mung, tu prut nga ai: shi gaw gawng shingyan mung, ahpraw nsam mung, tsawm htap ai n rai: shi hpe yu yang, tsawra mai ai myiman ningchya n rawng nga ai. ³ Shi gaw masha ni e shatan nhkan ai hte, n kaw n law di ai hkrum nga ai: yawnhkyen hkrum ai hte nji nmu chye ai wa, shi rai nga ai: myiman kayin kau hkrum ai wa zawn shi rai nga nna, shatan nhkan hkrum nga ai; anhte mung shi hpe hpa n nawn ga ai. ⁴ Gaja wa, shi gaw anhte a ana ahkya gun kau ya nna, anhte a yawnhkyen ai hpe, hpai kau nu ai; shi gaw Karai Kasang a lata hte ari ahpri, adup htwi ai hte nni nkri hkrum sha ai wa rai nga ai, nga nna anhte mahtang myit nawn ga ai. ⁵ Raitimung, shi gaw anhte a tara tawt lai ai a jaw e hkala nba hkrum nna, anhte shut hpyit ai a majaw ahpye a lam hkrum sha nga ai: anhte ngwi pyaw nga lu hkra, shi ari ahpri hkrum sha nga ai; shi a nma majaw, anhte mai tsai lu ga ai. ⁶ Anhte yawng sagu zawn lam dam mat saga ai; langai hte langai tinang lam hkan mat ga ai: Yehowa chyawm gaw anhte mahkra a yubak mara hpe, shi a ntsa e mara da nu ai. ⁷ Shi adip arip hkrum timung, nni nkri hkrum yang, n-gup n hpaw ai nga nga ai; sat na matu dun sa wa ai sagu kasha zawn, mun rep ai wa a man e, atsin sha nga ai sagu zawn, shi n-gup n hpaw ai nga nga ai. ⁸ N tara ai hku dawdan ai hte shi hpe shapraw kau ma ai: shi gaw, nye a amyu masha ni tara tawt lai ai majaw, hkrung nga ai ni a ga hta na htawm kau ai hkrum nna, shanhte a gawng malai hkungga tai wa ai gaw, shi a rau ram manang ni hta kadai wa mahtang chye gawn lu a ta? ⁹ Shanhte gaw, tara tawt lai ai ni hte rau shi a matu lup galaw da nna, sut mahkawng da ai wa hpe zawn, makoi mayang di mu ai: raitimung, shi gaw adip arip hpa n galaw ai hte, shi a n-gup hta hkalem hkalau ai hpa mung n rawng nga ai. ¹⁰ Yehowa chyawm gaw shi hpe ahpye a lam di na ra nna, machyi shangun wu ai; nang gaw, shi a myit masin hpe gawng malai hkungga shatai ngut jang she, shi gaw shi a aru arat hpe mu lu na ra ai; shi a nhtoi ni galu wa nna, Yehowa ra ai hku shi a lata hta awng wa na ra ai: ¹¹ Shi myit masin a shakut sharang ai a akyu shi mu lu nna, myit dik na ra ai: nye a dinghpring ai shangun ma gaw, shi chye chyang ai nyan hte, masha law law hpe dinghpring shangun na ra ai rai nna, shanhte a yubak mara hpe shi nan gunhpai na ra ai. ¹² Dai re ai majaw ngai gaw, daru magam rawng ai ni hte rau, shi hpe kamhtaw karan jaw nna, shi gaw n-gun atsam rawng ai ni hte rau, lanep karan na ra ai: kaning rai nme law, shi gaw si du hkra shi a myit masin hpe ru kau nna, tara tawt lai ai ni hta hti lawm nga ai: raitimung shi gaw; masha law law a yubak hpe gunhpai nna, tara tawt lai ai ni a matu mara htinglu htinglai ya ai.

¹ Kasha n shaprat ai maudung num e, mahkawn mangoi u; shinggyim machyi n hkrum ai num e, mahkawn mangoi let kabu jahtau u: kaning rai nme law, gram nga ai num gaw, madu wa lu ai num hta kashu kasha grau lu nga ai, nga nna Yehowa tsun ai. ² Na a sum htingra maden jat u; nang shanu ai shara a nba grang ni hpe, shanhte naw hpyan jat mu ga; lahpawt ai myit hkum rawng et; sumri ni hpe sharen dat u; mailak ni hpe shangang shakang u; ³ kaning rai nme law, nang gaw hkra de pai de maden jat wa na rin dai; na a kashu kasha ni gaw maigan amyu ni hpe madu nna, katsi katsang re ai mare ni hta shanu nga na mara ai. ⁴ Hkum tsang et, nang gaw kaya kahpa hkrum na n rai; myiman hkum sum et, hkrit kaya hkrum na n rai: kaning rai nme law, ram prat e hkrum ai kaya kahpa hpe, nang malap kau nna, gaida nna hkrum ai shatan nhkan hpe, htawmhpang de dum na n rai. ⁵ Kaning rai nme law, nang hpe Hpan da ai wa gaw, na a madu wa rai nga ai; shi a amying gaw, Zaw nawng zaw wa up ai Yehowa rai nga ai: nang hpe Hkyehkrang la ai wa gaw Israela a Chyoi pra ai wa rai nga ai; mungkan ting a Karai Kasang shi hpe ngu na maru ai. ⁶ Kabai kau hkrum nna gawng run hkawm ai hte, ram prat e jan tai nna, jahka kau hkrum ai num hpe zawn, madu jan bai tai na, Yehowa nang hpe shaga nit dai, nga nna na a Karai Kasang tsun nga ai. ⁷ Kaning rai nme law, chyahkring mi sha ngai nang hpe kau da timung, matsan dum ai myit kaba hte kahkyin na nngai: ⁸ pawt sindawng let, ngai nye a myiman nang kaw na hkring mi sha kayin kau timung, prat dingsa n-gaw nwai myit hte nang hpe matsan naw dum na ra ai, nga nna nang hpe Hkyehkrang la ai Wa, Yehowa tsun nga ai. ⁹ Kaning rai nme law, dai lam gaw, Noa aprat e ing ai shau zawn rai nga ai: Noa aprat na hka hpungla ni gaw htawmhpang de aga hpe n lim kau nu ga, nga nna ngai dagam da ai hte maren, nang hpe pawt mung n pawt, daru mung n daru sa na, nga nna ngai dagam da ni ai. ¹⁰ Bum ni sit wa nna, kawng ni htawt mat lu timung, nye a n-gaw nwai ai myit nang kaw na sit lu na n rai, nye a ngwi pyaw ai ga shaka hpe mung, dawm la lu na n rai, nga nna nang hpe matsan dum ai Yehowa tsun nga ai. ¹¹ Nni nkri hte, laru e ahpawt hkrum nna, shalan shabran n hkrum ai wa e, ngai gaw na a nlung ni hpe engade achyang hte, na a npawt nhpang ni hpe nila nlung hte gaw da na nngai: ¹² na a langchyi ni lungseng hkyeng, na a chyinghka ni patamya, na a bunghku ni yawng lungseng hkrai rai na ra ai. ¹³ Na a kashu kasha ni yawng, Yehowa a sharin achyin ai hkam la nna, shanhte a ngwi pyaw ai lam gaw, kaba la nga ai. ¹⁴ Nang gaw dinghpring ai hte grin nga na rin dai: zingri zingrat ai gaw, nang hte tsan wa nna, nang hkrithpa hkrum na n rai: hkrit kajawng ai mung, nang hte tsan wa nna, na a makau de ni lu na n rai. ¹⁵ Yu mu shanhte zuphpawng timung, ngai lawm na n rai; nang hpe hpyen na matu zuphpawng ai ni kadai mung, na a gawp e kataw na mara ai. ¹⁶ Yu mu, wan wut nna, tinang a amu matu ri ntu dup ai ndup wa hpe mung, ngai hpan da ni ai; jahten shabyak na matu, zingri zingrat ai wa hpe mung, ngai hpan da ni ai. ¹⁷ Nang hpe hpyen na matu galaw ai ri nhtu, langai mi tai na n rai; nang hpe sumri dan na matu rawt ai tara agyi kadai hpe mung, nang dawdan na ra ai. Dai gaw Yehowa a shangun ma ni a sali wunli hte, ngai kaw na pru ai dinghpring ai lam rai nga ai, nga nna Yehowa tsun ai.

¹ Hpang kara hkrum ai ni yawng hte e, ntsin ga ai de sa marit; gumhpraw n lu ai ni e, sa marit, mari nna lusha mu; gaja wa, sa marit, gumhpraw mung, manu jahpu mung, n hkrat ai sha, tsabyi jahku hte nga chyu hpe mari lu mu. ² Shahpa n re ai a matu, nanhte a gumhpraw hpe mung, hkru kat n chye ai arai a matu, nanhte a n-gun hpe mung, hpa majaw ginlut kau nga myit ta? nye a ga atsawm sha madat mara let, mai kaja ai hpe sha nna, nanhte a myit masin sau hpum ai hta awng sharawng nga mu ga. ³ Na la nna ngai hpang de sa marit; madat mara mu, shingrai yang nanhte a myit masin hkrung nga na ra ai: ngai mung nanhte hte htani htana ga shaka tawn da nna, Dawi hta grin nga ai chyeju hpe nanhte hta shagrin da na nngai. ⁴ Yu u, amyu baw ni a sakes wa tai na mung, amyu baw ni a du hte uphkang ai wa tai na mung, ngai shi hpe san da ni ai. ⁵ Nang n chye ai amyu hpe nang shaga la nna, nang hpe n chye ai amyu mung, na a Karai Kasang Yehowa hte Israela a Chyoi pra ai wa a majaw, nang hpang de gat bang wa na ra ai: kaning rai nme law, shi gaw nang hpe shagrau shatsaw nga ai. ⁶ Yehowa hpe mu lu ai aten e shi hpe tam mu; shi naw ni nga yang, shi hpe hpyi shaga mu: ⁷ tara n lang ai wa gaw shi a lam hpe, n hkru ai wa gaw shi a myit mang ai hku kau da nna, Yehowa hpang de kayin wa u ga; shingrai yang shi gaw dai wa hpe matsan dum na ra ai; anhte a Karai Kasang hpang de mung kayin wa u ga; shi gaw yubak hpe htum hkra raw dat kau ya na ra ai. ⁸ Kaning rai nme law, ngai myit mang ai hku, nanhte myit mang ai hku n rai; nanhte a lam ni nye a lam ni zawn n rai, nga nna Yehowa tsun ai. ⁹ Sumsing lamu gaw ginding aga hta tsaw nga ai hte maren, nye a lam ni nanhte a lam ni hta, ngai myit mang ai hku, nanhte myit mang ai hta, grau tsaw nga ai. ¹⁰ - ¹¹ Kaning rai nme law, marang hte ahkyen gaw, lamu de na htu hkrat nna, dai de bai n wa ai sha, nli gat ai wa hpe nli, makan galaw ai wa hpe shahpa jaw lu hkra, aga hpe madit let, matsun hte maku shaprut nna, asi si shangun ai zawn, nye n-gup kaw na pru ai mungga mung, dai hte maren tai na ra ai: dai gaw ngai hpang de kaman nhtang wa na n rai; ngai ra ai hku shadik ya na ra ai; ngai shangun ai amu hta, awng wa na ra ai. ¹² Nanhte gaw kabu gara let pru wa nna, ngwi pyaw ai hte woi wa ai hkrum na myit dai; bum ni hte kawng ni, nanhte a man e, mahkawn mangoi ai nsen hte garu nna, nam mali na hpun ni yawng, lahpawk dum na mara ai. ¹³ Ju hpun a malai marau hpun, ju singwum a malai jangnai hpun tu na ra ai: dai gaw Yehowa man e n hten n run ai, htani htana amying shingteng hte sakes kumla tai na ra ai.

¹ Yehowa ning nga ai: Nye a hkyehkrang la ai chyeju du na aten, nye a dinghpring ai lam shadan dan na aten, du magang ra ai majaw, tara hpe shatup nna, dinghpring ai amu galaw mu. ² Shingrai galaw ai wa, dai lam hkan nang ai masha kasha gaw, laban nhtoi hpe awu asin n di ai hte, n hkru ai amu hpa mung n galaw hkra, tinang lata hpe hkangda ai rai yang, a nga ai. ³ Yehowa hta manoi manat ai tsasam wa gaw, Teng teng gaja wa, Yehowa ngai hpe shi a amyu masha ni hte jahka kau ni ai, nga nna mung, unuk wa gaw, Ngai hkum hpun chahkraw rai nga nngai, nga nna mung, hkum tsun mu ga. ⁴ Kaning rai nme law, nye a laban nhtoi ni hpe hkan nang nna, ngai ra ai hku lata la ai hte, nye a ga shaka hpe shatup ai unuk ni a lam, Yehowa ning nga ai: ⁵ Ngai gaw nye a nta nhku e mung, nye a bunghku ni a kata e mung, kashu kasha hta grau hpu nna dum mai ai amying shingteng, shanhte hpe jaw na nngai; n hten n run ai, htani htana amying shingteng ngai shanhte hpe jaw na nngai. ⁶ - ⁷ Dai hta kaga, Yehowa hpe dawjau na matu, shi a amying hpe tsawra ai hte, shi a ali ama ni tai wa nna, laban nhtoi hpe awu asin n di kau ai hte, nye a ga shaka hkan shatup let, Yehowa hta manoi manat nga ai tsasam masha ni mahkra hpe mung, ngai gaw nye a chyoi pra ai bum de woi shashawn nna, nye a akyu hpyi ai nta hta kabu gara shangun na nngai: shanhte wan nat hkungga hte mayu hkungga hpe nye hkungri ntsa e hkap la na nngai; kaning rai nme law, nye a nta gaw amyu baw shagu baw shagu a matu akyu hpyi ai nta ngu na mu ai. ⁸ Dumbru dumbra rai nga ai, Israela masha ni hpe shinggyin la ai Madu Yehowa gaw, Ngai hte seng ai ni hpe shinggyin la ai hta kaga, shanhte hte rau tsasam amyu ni hpe mung ngai naw shinggyin la na nngai, nga nna tsun ai. ⁹ Pa hkan na matse labye ni hte, maling dinggram na matse labye ni e, kawa sha na matu, sa marit. ¹⁰ Shi a sin langa ni gaw, myi kyaw nga ma ai: shanhte yawng du ladi rai nga ma ai: shanhte nlang maa nna, n wau lu ai gwi rai nga ma ai: yupmang mu let hpum yup nga na, grau ra nga ma ai. ¹¹ Ndai gwi ni gaw lawhpa myit rawng nna, n hkru hkraw ma ai: ndai ni gaw nyan n rawng ai sagu rem ai ni rai nga ma ai; shanhte yawng lam yit nna, langai hte langai tinang akyu hkrai hkan shachyut ma ai: ¹² shanhte gaw, Sa marit, ngai tsabyi jahku shapraw la nna, anhte chyaru nang hkra lu ga; hpawt ni mung dai ni zawn rai na ra ai; dai hta grau nna pyi pyaw na ra ai, nga nna tsun ma ai.

¹ Dinghpring ai wa gaw hten mat hkrum nna, kadai mung n nawn nga ai; matsan dum chye ai wa gaw, dawm la ai hkrum nna, dai wa gaw du na ra ai tsinyam hpe lawt lu hkra, dawm la ai hkrum sai, nga nna kadai mung n myit ma ai: ² shi gaw ngwi pyaw ai de shang lu sai: malang ai lam hkan ai ni langai hte langai, tinang yupra hta, ban sa nga ma ai. ³ Ataw, hpyi num a kasha ni, num shaw ai wa hte shawa num a matu mara ni e sit sa marit; ⁴ nanhte kadai hpe n-gup mahka nna, shinglet shaw dan myit ta? nanhte gaw tara tawt lai ai wa a kashu kasha ni, hkalem hkalau ai wa a matu mara ni, n rai nga myit ni? ⁵ nanhte gaw, wa myi hpun hte tsit lali ai hpun shagu a npu e pyaw daw kadaw hkawm ai hte, hkaraw kadit lunghkrung ni a npu e, kasha ni hpe sat kau ai ni, n rai nga myit ni? ⁶ Hkaraw kadit na manen ai nlung ni hta na a kamhtaw rai nga ai; dai gaw na a sali wunli tai nga ai: dai ni a ntsa e nang gaw na a dumhpung hkungga hte lu hpa hkungga hpe ru jaw nu ai: dai amu ni hta ngai sharawng awng nga na rai ni? ⁷ Nang gaw tsaw la ai bum ntsa e na a yupku hpe tawn da nu ai: hkungga nawng na matu mung, nang dai de lung wa nit dai. ⁸ Na a masat dingsat hpe, chyinghka ni hte shadaw ni a shinggan maga de, nang tawn da nu ai: nang hpun palawng hpe raw nna, ngai hta kaga wa a yupra de lung wa nit dai; na a yupra hpe nang shagang dat nna, shanhte hte ga shaka tawn da nit dai; shanhte a yupra hpe nang ra nna, shara tam nga ndai. ⁹ Nang gaw sau lang let hkawhkam wa hpang de sa wa nna, manam pyaw ai baw shalaw ai hte, na a kasa ni hpe sumtsan mung de shangun dat nna, Katsan ga du hkra, tinang dai shagrit kau nit dai. ¹⁰ Na a lam galu ai majaw, nang hki ba hkrum timung, Dai gaw kaman sha rai nga ai, nga nna nang n tsun ndai: na a lata hta n-gun naw nga yang, gawngkya n dum ndai. ¹¹ Nang gaw masu nga ai hte, ngai hpe malap kau nna, hpa n nawn ai majaw, kadai hpe hkrit kamyin nga n ta? Ngai na na wa atsin sha nga ai majaw, nang ngai hpe n hkrit nga ai, rai ni? ¹² Na a dinghpring ai lam ngai shapraw dan na nngai: nang galaw sai amu gaw, hpa akyu shabyin lu ai n rai. ¹³ Nang jahtau yang, na a hpara wunawng ni nang hpe mawai la mu ga: nbung gaw shanhte hpe ahpawt kau na maru ai; bung sha gaw shanhte hpe shapoi kau na ra ai: ngai hta shingbyi nga ai ni chyawm gaw, mungdan hpe madu lu nna, nye a chyoi pra ai bum hpe sali hkam la na mara ai. ¹⁴ Bai shi gaw, Nye a amyu masha ni numdaw numdan n hkrum mu ga, htu kau mu, htu kau mu, lam hpe lajang mu ga, nga nna tsun ai. ¹⁵ Kaning rai nme law, Htani htana anga nga nna, Chyoi pra mying ai wa, Matsaw Ntsang na Daru Magam rawng ai wa gaw, ning nga ai: Ngai gaw tsaw htum ai shara hte chyoi pra htum ai shara hta shanu nga nna, myit gyip ai wa a wenyi hpe shalan shabran na matu mung, myit nem ai wa a myit masin hpe shalan shabran na matu mung, myit nem ai wa hte myit gyip ai wa hte rau, ngai shanu nga nngai. ¹⁶ Ngai gaw tutnawng dangrang hkat na n rai, tutnawng pawt sindawng na n rai; shing n rai yang, wenyi gaw nye a man e mat mat nna, ngai hpan da ai myit masin gaw, hten mat hkrum na ra ai. ¹⁷ Shi a n hkru ai lawhpa myit majaw, ngai masin pawt nna, shi hpe ari jaw we ai: ngai myiman makoi nna pawt sindawng nga nngai; shi mung tinang ra ai hku hkan nna, nhtang mat wa sai. ¹⁸ shi a arawn alai ngai mu se ai; ngai shi hpe shamai shatsai na nngai; ngai hpe hpe woi wa nna, shi a matu mung, shi hte rau sharung shayawt ai ni matu mung, ngwi pyaw lam bai shatai na nngai. ¹⁹ N-gup a asi hpe ngai hpan da nngai; sumtsan mung na wa hta mung, ni nga ai wa hta mung, ngwi pyaw lam, gaja wa, ngwi pyaw lam, rai nga u ga; ngai shi hpe shamai shatsai na nngai, nga nna Yehowa tsun ai. ²⁰ Tara n lang ai ni chyawm gaw, hta wa ai nammukdara hte bung ma ai; shanhte a sim sha n nga lu nna, de a hka hkanu ai hte hkumpup sha shapraw nga ai. ²¹ Tara n lang ai ni kaw, ngwi pyaw lam n nga ai, nga nna nye a Karai Kasang tsun nga ai.

¹ Aja awa jahtau u; atsin sha hkum nga et; pahtau zawn na a nsen sharawt nna, nye a amyu hpe shanhte a shut hpyit ai lam, Yaku a nta na ni hpe tinang a yubak lam, shapraw dan mu. ² Raitimung shanhte gaw shani shagu ngai hpe hkan tam nna, nye a lam ni chye lu hkra, awng sharawng ma ai: dinghpring ai lam hkan nna, tinang Karai Kasang hpang de sit sa na, sharawng nga ma hka! ³ Anhte lusha gam yang, nang hpa majaw n mu n ta? Anhte hkum shagrit kau yang, nang hpa majaw n matsing n ta? nga nna tsun ma yang, yu mu, nanhte lusha gam ai shani e, tinang pyaw ai lam nanhte tam nna, nchyang ni hpe amu galaw shaja shangun myit dai. ⁴ Nanhte gaw dangrang hkat ai hte, ga law ga la nna, n hkru ai lata latup hte htwi let, lusha gam myit dai: nanhte a nsen gaw, matsaw ntsang de hkrang lu na matu, nanhte dai ni lusha gam ai n rai. ⁵ Ngai ra ai lusha gam ai gaw dai lam rai ni? masha wa shi myit masin hpe shagrit kau ai shani, dai zawn rai ni? maiaw zawn tinang baw hpe gum nna, lachyit nba hte wan dap nep ai gaw, Yehowa man e lusha gam ai hte, sharawng awng ai shani rai ni? ⁶ - ⁷ N rai law: tara n lang ai wa a sumri hpe raw kau na hte, kandang a sumri ni hpe raw kau nna, zingri zingrat hkrum ai wa hpe dat dat na hte, kandang yawng hpe agrawp kau nhtawm, kawsi hkrum ai wa hpe lusha jaw nna, shapraw kau hkrum ai matsan mayan wa hpe na nta de woi shashawn na hte, hpun palawng n lu ai wa hpe shabu jahpun nna, tinang manang ni hpe n koi kau na gaw, ngai sharawng awng ai lusha gam ai lam rai nga ai, n rai ni? ⁸ Shingrai na a nhtoi gaw, jahpawt manap na nhtoi zawn, htoi wa nna, na a hkam kaja ai gaw alawan tu na ra ai; na a dinghpring ai lam na a shawng e sa wa nna, Yehowa a hpung shingkang na a hpang e sin langa tai na ra ai. ⁹ - ¹⁰ Shaloi nang shaga yang, Yehowa htan na ra ai; nang hpyi jahtau yang, Ngai nang e rai nga nngai, nga nna shi tsun na ra ai. Nang gaw, na a kata na kandang hpe mung, layung ladawn ai hte n hkru ai ga hpe mung, yeng kau nna, kawsi hkrum ai wa hpe yu machyi ai hte, nni nkri hkrum ai wa hpe shalan shabran nga ai rai yang, na a nhtoi gaw nsin hta htoi wa nna, na a sin mak ai gaw, jan pungdin zawn htoi na ra ai; ¹¹ Yehowa gaw nang hpe tutnawng woi wa nna, hkraw hkun ai shara e na a myit masin hpe jahkru shakat ya ai hte, na a nrut nra ni hpe n-gun shaja ya na ra ai: nang gaw hka rawng ai sun hte, galoi n hkyet mat ai hka hpawk zawn, tai na rin dai. ¹² Na a amyu anoi ni gaw moi na marawng marang ni hpe bai dè na mara ai; nang gaw moi chyaloi nhkoi na npawt nhpang ni hpe, gaw kahtap na ra ai: shingrai, Run ai bunghku hpe lajang ai wa, Shanu na matu lam ni hpe lajang ai wa, nga nna nang hpe shamying na ra ai. ¹³ - ¹⁴ Nang gaw laban nhtoi hpe awu asin n di kau ai hte, nye a chyoi pra ai nhtoi hta, nang ra ai hku n hkan ai sha, laban nhtoi gaw ngwi pyaw ai nhtoi, Yehowa matu chyoi pra ai shani, arawng lu ai nhtoi, nga nna shamying nhtawm, dai hpe hkungga lara let, na a amu bungli n galaw ai hte, nang ra ai hku n hkan, nang hte seng ai ga n tsun nga ai, rai yang gaw Yehowa hta nang awng sharawng nna, ga ntsa na tsaw htum ai shara ni a ntsa e, ngai nang hpe jawn shangun ai hte, na nwa Yaku a sali wunli hta nang hpe bau na de ai: kaning rai nme law, Yehowa a n-gup, dai ga tsun nga ai.

¹ Yu u, Yehowa gaw n hkye la lu hkra, lata gadun ai n rai; n na lu hkra, na lahpang ai n rai: ² nanhte a shut hpyit ai gaw, nanhte a Karai Kasang hte nanhte hpe jahka kau myit dai; shi n na lu hkra, nanhte a yubak gaw, shi a myiman hpe magap kau nga ai. ³ Nanhte a tara gaw asai hte, nanhte a layung ni shut hpyit ai hte, awu asin rai nga ai; nanhte a shinglet gaw n hkru ai ga kahte tsun nga ai. ⁴ Dinghpring ai hku hkan nna sa shawk ai gaw, kadai n nga ai; tengman ai hku hkan nna tara dara ai gaw, kadai n nga ai: shanhte kaman lila hta shamyet shanat nna masu ga tsun ma ai; shanhte gumlau gumle hte na-um nasin rai nga nna, masu magaw shangai dat mu ai. ⁵ shanhte pu hkram di hpum nna kraw kat ai hte, gindigram tsip da ma ai: shanhte a di ni hpe sha ai wa gaw si na ra ai; di kraw wa yang, pu htum hkrai pru na ra ai. ⁶ Shanhte da ai tsip hpun palawng n tai lu ai hte, shanhte galaw ai bungli gaw tinang hkum hpe jahpun lu ai n rai; shanhte bungli n hkru ai bungli rai nga nna, shanhte a lata hta kashun kashe hkrai rai nga ai. ⁷ Shanhte a lagaw n kaja ai amu galaw na matu gat nna, mara n kap ai asai ru kau na, larau nga ai: shanhte myit mang ai hku n hkru n hkra ai hku rai nga nna, shanhte a nmaw lam ni gaw, nni nkri hte hten byak ai hkrai rai nga ai. ⁸ Ngwi pyaw ai lam hpe shanhte n chye ma ai; shanhte sa wa ai lam hta tara n lawm nga ai; tinang sa wa na matu, magaw ai hku hkrai waw ma ai; dai hku hkan nang ai wa kadai mung ngwi pyaw lam n chye ma ai. ⁹ Dai re ai majaw tengman ai tara anhte hte tsan nga ai; dinghpring ai gaw anhte hpe n dep nga ai; anhte gaw nhtoi hpe myit mada timung, yu mu, nsin sin nga ai; htoi leng hpe myit mada timung, anhte sin mak hta hkawm nga ga ai. ¹⁰ Myi hten ai wa zawn, anhte shakum hpe tam masawp nga ga ai; myi n tu ai ni zawn, lamawm hkawm nga ga ai; shana e zawn, jan pungding e pyi, anhte ahtu kataw ga ai; ngamu ngamai ai ni hta anhte chyasi ni zawn rai nga ga ai. ¹¹ Anhte yawng tsap zawn shabam nna, hkrudu zawn madai nga ga ai; tengman ai tara hpe anhte myit mada timung, n lu ga ai; hkyehkrang la ai chyeju hpe myit mada timung, dai gaw anhte hte tsan la nga ai. ¹² Kaning rai nme law, anhte tara tawt ai lam, na a man e law htam wa nna, anhte galaw ai yubak gaw sakse tai nga ai; anhte a tara tawt lai ai lam ni anhte hta kap nga nna, tinang shut hpyit ai hpe tinang nan chye nga ga ai: ¹³ Yehowa a lam tawt lai ai hte, shi hpe nyet kau nna, anhte a Karai Kasang hpe kau da ga ai; adip arip, gumle gumlau ga anhte tsun nna, kraw lawang e maw ai masu magaw ga tsun shapraw ga ai. ¹⁴ Tengman ai tara gaw, kanut mat wa sai; dinghpring ai gaw, tsan tsan e tsap nga ai; tengman ai gaw mare lam hkan e kadawng mat sai; malang ai myit gaw shang lu ai n rai. ¹⁵ Gaja wa, tengman ai ga n nga ai; shut hpyit ai hpe koi mayu ai wa gaw, kashun kashe hkrum na ra ai. Shaloi Yehowa dai lam hpe mu nna, tengman ai tara n nga ai majaw, myit n pyaw nga ai. ¹⁶ Karum ai wa n nga ai gaw shi mu nna, htinglu htinglai ai wa n nga ai majaw, shi mau nga ai; dai rai nna shi a lata gaw, tinang matu hkyehkrang la ai lam shapraw nna, shi a dinghpring ai lam gaw, shi hpe shadaw ya nga ai. ¹⁷ Shingrai shi gaw, dinghpring ngu ai sinda magap dagap nna, hkyehkrang la ngu ai hpri gup chyawp chyawp nga ai; matai dawp ngu ai hpun palawng, shi bu hpun nna, nja nhpra myit ngu ai nba lawai nga ai. ¹⁸ Shanhte a arawn alai hte maren, gumlau ni hpe myit kahtet ai, hpyen ni hpe ari ahpri, shi htang jaw na ra ai; zunlawng ni hpe mung akyu hte yubak htang jaw na ra ai. ¹⁹ Shingrai shanhte gaw sinpraw maga kaw nna sinna maga du hkra, Yehowa a mying nsang hte hpung shingkang hpe hkrit hkungga na mara ai; kaning rai nme law shi gaw, Yehowa a nbung hte ahpawt kau ai hka hpungtun zawn, du na ra ai. ²⁰ Ziun hpang de mung, tara tawt lai ai kaw na myit kayin ai Yaku a amyu masha ni hpang de mung, Hkyehkrang la ai Madu du na ra ai, nga nna Yehowa tsun ai. ²¹ Bai Yehowa gaw, Ngai shanhte hte tawn da ai, nye a ga shaka gaw, da ndai rai nga ai: na ntsa e dung ai nye a wenyi mung, na n-gup hta ngai bang da ai nye a sumtu ga mung, na a n-gup hta na mung, na nshu nsha ni a n-gup hta na mung, na a shu mashi shu masha ni a n-gup hta na mung, ya kaw nna htani htana prat du hkra, htum mat na n rai, nga nna Yehowa tsun ai.

¹ Rawt u, htoi tu; na a nhtoi du ra ai; Yehowa a hpung shingkang na ntsa e danhkung nga ai. ² Kaning rai nme law, yu u, nsin gaw ginding aga hpe, htat ai nsin gaw amyu baw ni hpe, ka-up na ra ai; raitimung, na a ntsa e Yehowa paw pru nna, shi a hpung shingkang na a ntsa e danhkung na ra ai. ³ Maigan amyu ni gaw na a nhtoi de, hkawhkam ni gaw na a danhkung kabrim ai de, du na mara ai. ⁴ Grupyin mada yu u; shanhte yawng zuphpawng nna, nang hpang de wa mara ai; na a shadang sha ni gaw sumtsan mung de na wa nna, na a shayi sha ni gaw ba kaye ai hkrum na mara ai. ⁵ shaloi nang mu mada yang, nang htoi kabrim na rin dai; na a myit masin gaw kabu gara ai hte, kaba wa na ra ai; kaning rai nme law, nammukdara a sutgan gaw, nang hpang de kayin wa nna, maigan amyu ni a arung arai nang hpang de du na ra ai. ⁶ Gawla-uk wunawng ni, Midian hte Ehpa mung na gawla-uk hkalung ni gaw, nang hpe ka-up na mara ai; Sheba mung na ni yawng du na mara ai: shanhte gaw aja hte lawban lang nna, Yehowa hpe shakawn kungdawn na lam kajai gumhkawng na mara ai. ⁷ Kedara mung na sagu hpung ni yawng, nang hpang de du ju na mara ai; Nebaiot mung na nam la ni gaw, na a amu gunhpai nna, nye a tawn hkungri ntsa e hkap hkalum la ai hkrum na mara ai; ngai gaw nye a hpung shingkang rawng ai nta hpe, grau nna hpung shingkang rawng shangun na we ai. ⁸ Sumwi zawn mawng nna, tinang a tsip de pyen wa ai hkrudu zawn, pyen wa ai ni gaw, kadai ni rai ma ta? ⁹ Gaja wa, na a Karai Kasang Yehowa a amying nsang majaw mung, nang hpe hpung shingkang sharawng ya ai, Israela a Chyoi pra ai wa majaw mung, na a kashu kasha ni hte hpawn, shanhte a aja gumhpraw hpe sumtsan mung de na la wa na matu, zunlawng ni ngai hpe ala nga nna, Tarshi shanghpaw li ni shawng jin nga na mara ai. ¹⁰ Tsasam masha ni a kashu kasha ni gaw, na a bunghku ni hpe dè da nna, shanhte a hkawhkam ni nang hpe dawjau na mara ai: kaning rai nme law, ngai myit kahtet nna, nang hpe kayat timung, n-gaw nwai myit hte nang hpe matsan naw dum na nngai. ¹¹ Maigan amyu ni a sutgan nang hpang de shashawn lu nna, shanhte a hkawhkam ni hpe bawng rim wa lu hkra, na a chyinghka ni tutnawng hpaw malang nga nna, shani shana la da na n rai. ¹² Nang hpe dawjau na n hkraw ai amyu hte mungdan gaw, hten mat na ra ai; gaja wa, dai amyu ni gaw, atsai awai htum mat na mara ai. ¹³ Nye a chyoi pra ai shara hpe shatsawm na matu, Lebanon a arawng sadang ngu ai, marau hpun, shinglim hpun hte chyamka hpun, nang hpang de rau du na ra ai rai nna, ngai gaw nye a lagaw kabye shara hpe hpung sharawng na we ai. ¹⁴ Nang hpe zingri zingrat ai ni a kashu kasha ni gaw, sa nna na a man e gum dagup na mara ai; nang hpe n kaw n law di ai ni yawng, na a lagaw nhpang e dingnyawm na mara ai; dai hta kaga shanhte gaw, nang hpe, Yehowa a mare, Israela Chyoi pra ai wa a Ziun mare, nga nna shamying na mara ai. ¹⁵ Nang hta kadai mung n kabye lai mayu hkra, jahti da ai hte ndawng n yawt hkrum ai majaw, ngai nang hpe prat dingsa na arawng sadang, shu mashi shu masha ni a kabu gara, shara shatai na nngai. ¹⁶ Nang gaw maigan amyu ni a chyu chyu na rin dai; hkawhkam ni a madoi chyuhpang hpe chyu na rin dai; shingrai, ngai Yehowa gaw nang hpe Hkyehkrang la ai Madu, Yaku a Karu Magam rawng ai wa gaw, nang hpe Mawai la ai Madu rai nga ai hpe, nang chye lu na rin dai. ¹⁷ Magri a malai aja, hpri a malai gumhpraw, hpun a malai magri, nlung a malai ahpri, ngai shashawn na nngai: na a du salang ni hta, ngwi pyaw myit, nang hpe woi awn ai ni hta, dinghpring ai myit, ngai bang na nngai. ¹⁸ Na a mung hta kashun kashe, nang shanu ai shara hta, katsi katsang hte hten byak ai htawmhpang de n nga na sai; nang gaw na a bunghku ni hpe Hkyehkrang la ai lam, na a chyinghka ni hpe Shakawn Kungdawn ai shara, nga nna shamying na wu ai. ¹⁹ shani e nang hta htoi ai nhtoi gaw, ya kaw nna jan a nhtoi n rai; shata a htoi kabrim ai mung, nang hpe htoi ya na n rai: kaning rai nme law, Yehowa gaw na a matu htani htana nhtoi, na a Karai Kasang gaw na a arawng sadang, tai na ra ai. ²⁰ Ya kaw nna na a ajan shang na n rai, na a shata mung, si na n rai: Yehowa gaw na a htani htana nhtoi tai nna, nang sharung shayawt ai nhtoi ni lai mat sai. ²¹ Na a amyu masha ni gaw, hkum ting dinghpring ai ni, tai na mara ai; ngai gaw arawng sadang lu la na matu, shanhte gaw, ngai hkai da ai bawng, nye lata shabyin ai amu ngu ai mungdan hpe, prat dingsa madu na mara ai. ²² Ma kaji langai mi gaw, masha hkying mi, grau kaji ai wa gaw, n-gun atsam rawng ai amyu, tai na ra ai: ngai Yehowa gaw aten du jang, dai hpe shadut na nngai.

¹ - ³ Madu Yehowa a Wenyi gaw nyea ntsa e dung nga ai; kaning rai nme law nga yang, matsan mayan ni hpe kabu gara shiga hkaw tsun dan na matu, Yehowa ngai hpe namman chya ya ni ai; gawng run ai ni a nma hpe ahkyen kayawp na matu mung, bawngdung ai ni hpe shalawt dat na lam, gyit hkang hkrum ai ni hpe htawng chyinghka hpaw ya na lam, hkaw dan na hte, Yehowa sharawng awng ai shaning hte, anhte a Karai Kasang matai dawp ai shani hpe, hkaw dan na matu mung, yawnhkyen hkrum ai ni hpe shalan shabran na matu mung, Ziun mare hta sharung shayawt ai ni hpe, wan dap a malai nampan shanghkawng, sharung shayawt ai a malai kabu gara ai namman, myit kaji ai malai kabu gara ai hpun palawng jaw na matu mung, shi ngai hpe shangun dat nngai; shingrai, Yehowa gaw arawng sadang lu la na matu, shanhte gaw, shi hkai da ai dinghpring ai hpun ni ngu ai mying, mying na mara ai. ⁴ Shanhte gaw moi chyaloi nhkoi na akrin akraw shara hpe bai dè da nna, prat mi hte prat mi marawng marang re ai mare ni hte, katsi katsang re ai shara ni hpe lajang tawn da na mara ai. ⁵ Tsasam masha ni sa du nna, nanhte a sagu hpung ni hpe rem na mara ai; sumtsan mung na kashu kasha ni gaw, nanhte matu hkauna galaw nna, tsabyi sun lajang na mara ai. ⁶ Nanhte chyawm gaw, Yehowa a hkinjawng ni, nga nna mung, Anhte a Karai Kasang a ali ama ni, nga nna mung, mying na marin dai: nanhte gaw maigan amyu ni a sutgan sha lu nna, shanhte a arawng sadang hta gumrawng nga na myit dai. ⁷ Nanhte kaya kahpa hkrum ai a malai, akyu htam lahkawng lu la nna, arawng hpoi hkrum ai a malai, shanhte a kumhtaw hta kabu gara lu na myit dai: dai rai nna shanhte gaw tinang a mung hta akyu htam lahkawng lu la nna, htani htana kabu gara ai hkrum na mara ai. ⁸ Kaning rai nme law, ngai Yehowa gaw malang ai tara hpe sharawng nna, kashu kashe hte n hkru ai hpe ndawng nngai: tengman ai hku hkan let, ngai shanhte hpe nhtang jaw nna, htani htana ga shaka shanhte hte tawn da na nngai. ⁹ Shanhte a kashu kasha ni gaw maigan amyu ni hta, shanhte a matu mara ni, amyu baw ni hta, kajai gumhkawng ai hkrum na mara ai; shanhte gaw, Yehowa shaman ai aru arat ni rai nga ma ai, nga nna shanhte hpe mu ai ni nlang, yin la na mara ai. ¹⁰ Ngai gaw Yehowa hta aja awa kabu gara nga nna, nye a myit masin gaw, nye a Karai Kasang hta sharawng awng na ra ai; kaning rai nme law, la ningnan gaw nampan shanghkawng gup ai zawn mung, num ningnan gaw shi a lungseng ni hte shi a hkum hpe mawn sumli ai zawn mung, shi ngai hpe hkyehkrang la ai hpun palawng jahpun ya nna, dinghpring ai nba lawai ya ni ai. ¹¹ Lamu ga gaw apu pu shangun nna, sun gaw gat hkai ai nli hpe maku ku shangun ai hte maren, Madu Yehowa gaw Dinghpring ai hte shakawn kungdawn ai lam, amyu baw ni mahkra a man e tu pru shangun na ra ai.

¹ Ziun mare na dinghpring ai gaw, kabrim ala nga ai hte, Yerusalem mare na hkyehkrang la ai lam, pyengdin zawn htoi tu nga ai du hkra, ngai atsin sha nga na n rai, ban sa ai mung nga na n rai. ² Maigan amyu ni, na a dinghpring ai hpe, hkawhkam ni mahkra gaw, na a arawng sadang hpe, mu mada nna, Yehowa n-gup na pru ai mying nnan hte nang hpe shaga na mara ai. ³ Nang gaw Yehowa a lata hta, tsawm htap ai shanghkawng, na a Karai Kasang a lata hta, hkawhkam janmau, tai na rin dai. ⁴ Htawmhpang de nang hpe, Mare Dingsa ngu nna mung, na a mungdan hpe, Katsi Katsang shara ngu nna shamying sa na n rai; nang hpe, Hepziba, na a mungdan hpe Byula, ngu nna shamying na mu ai: kaning rai nme law, Yehowa gaw nang hta awng sharawng nna, na a mungdan gaw madu lu na ra ai. ⁵ Shabrang wa gaw mahkawn hte hkungran ai zawn, na a shadang sha ni gaw, nang hte hkungran na mara ai; la ningnan gaw num ningnan majaw kabu gara nga ai hte maren, na a Karai Kasang na a majaw kabu gara nga na ra ai. ⁶ Yerusalem e, ngai gaw na a bunghku ntsa e sin langa ni hpe tawn da nngai; shanhte gaw shani shana tutnawng atsin sha nga na n rai; Yehowa a lam shadum shahprang ai ni e, atsin sha hkum nga myit: ⁷ Shi gaw Yerusalem mare hpe garai n shagrin da ai hte, ga ntsa e shakawn kungdawn lam garai n shatai dingsa, shi hpe hkum sim shangun myit. ⁸ gaja wa ngai gaw, na a nai mam hpyen ni hpe htawmhpang e jaw na n rai; nang shakut nna lu ai tsabyi jahku hpe, maigan masha ni lu lu sa na n rai: ⁹ mam dan ai ni dai hpe sha lu nna, Yehowa hpe shakawn kungdawn na mara ai; shu la ai ni gaw nye a nawku nta a wing ni a kata e dai hpe lu lu na mara ai, nga nna Yehowa gaw shi a hkra lata hte, n-gun atsam rawng ai lahpum hpe dagam da nu ai. ¹⁰ Mare chyinghka na lai pru mu, lai pru mu; amyu masha ni a matu lam lajang mu; nmaw lam hpe gaw da mu, gaw da mu; nlung ni hpe htawm kau mu; amyu baw ni a matu dawnghkawn sharawt mu. ¹¹ Yehowa gaw, mungdan htum hkra ning nga ai, Yu u, nang hpe hkyehkrang la ai wa du ra ai; hkam ging ai shabrai shi a lata hta shi lang nna, karan jaw na kumhpa shi a man e rai nga ai, ngu nna, Ziun shayi sha hpe tsun mu. ¹² Shingrai amyu baw ni gaw shanhte hpe, Chyoi pra ai amyu, Yehowa a lata hte Hkyehkrang la hkrum ai amyu, ngu nna shamying na maru ai: nang hpe mung, Mare dingsa n rai, Shanu nga mai ai mare, nga nna shamying na mara ai.

¹ Reng htum ai hpun palawng bu hpun nna, daru magam hpung hte nawt hkawm let, Edom mung hte Bazra mare kaw nna, ahkyeng nsan ai hpun palawng hte sa du ai wa gaw, kadai wa rai ta? Dinghpring ai mungga tsun nna, hkyehkrang la na matu n-gun atsam rawng ai, ngai nan wa rai nga nngai. ² Na a hpun palawng hpa majaw hkyeng a ta? Na hpun nba gaw, tsabyi si kabye ai wa a hpun nba hte, hpa majaw bung a ta? ³ Tsabyi si htumbyen hpe ngai hkrai kabye ni ai; amyu baw ni hta na, ngai hte lawm ai wa langai mi n nga ai; gaja wa, ngai pawt sindawng ai hte shanhte hpe kabye kau nna, nye a myit kahtet ai hte, shanhte hpe kabye anut kau mawe ai: shanhte a sai gaw nye a hpun nba hta gatsit kap nna, nye a hpun palawng yawng, ateng apang rai mat sai. ⁴ Kaning rai nme law, ngai matai dawp ai shani hpe ngai myit dum nna, ngai mawai la ai ni a shaning, du ra ai. ⁵ Ngai mada yu yang, karum ai wa n nga ai; shadaw ai wa n nga ai majaw, ngai mau nga nngai; dai re ai majaw nye a lata gaw, nye a matu hkyehkrang la ai lam shapraw nna, ngai pawt kahtet ai gaw ngai hpe shadaw ya ai. ⁶ Shaloi nye a pawt sindawng ai hte, amyu baw ni hpe ngai kabye kau nna, nye a myit kahtet ai hte shanhte hpe nang shangun mawe ai; shanhte a asai hpe mung ga de ngai ru kau ya nngai. ⁷ Yehowa gaw anhte hpe chyeju galaw dan ai hte, shi a n-gaw nwai ai myit hte galu kaba ai matsan dum ai myit majaw, Israela nta dap ni hpe chyeju madun dan ai hte maren, ngai gaw Yehowa a n-gaw nwai myit hte shi hpe shakawn kungdawn mai ai lam ni hpe shana ya na nngai. ⁸ Shi gaw, Gaja wa shanhte nye a amyu masha ni rai nga nna, gumle gumlau n chye ai, ngai sha ni, rai nga ma ai, nga nna shanhte hpe Mawai la ai Madu tai wa sai. ⁹ Shanhte nni nkri hkrum shagu hta, shi mung nni nkri dum nna, shi a man na lamu kasa gaw, shanhte hpe hkyehkrang la mu ai: shi tsawra ai hte matsan dum ai myit majaw, shi shanhte hpe mawai la nna moi na prat shagu hta pawn ba mu ai. ¹⁰ Shanhte chyawm gaw gumlau nna, shi a chyoi pra ai Wenyi hpe shayawn mu ai: dai re ai majaw, shi shanhte hpe hpyen ai wa tai nna, shi nan shanhte hpe hpyen gasat mu ai. ¹¹ Shaloi Yehowa gaw moi na nhtoi ni hpe mung, Mawshe hte shi a amyu masha ni hpe mung dum nna, Tinang a masha ni hpe sagu rem ni hte hpawn, nammukdara na woi shapraw ai wa gaw, kanang rai nga a ta? shanhte a ka-ang e shi a chyoi pra ai Wenyi bang da ai wa gaw, kanang rai nga a ta? ¹² - ¹³ Mawshe a hkra lata makau e shi a danhkung ai lahpum shadan shangun ai hte, htani htana e shi a amying kaba wa lu hkra, nammukdara hka hpe shanhte a man e ga wa shangun nna, prang ga e gumra hpe gau ai zawn, abai ala n hkrum ai sha, sung htum ai shara hta shanhte hpe woi wa ai wa gaw, kanang rai nga a ta? nga ai. ¹⁴ Hkaraw de yu wa ai sagu dumsu ni zawn, Yehowa a Wenyi gaw shanhte hpe ban sa shangun mu ai: shingrai, na a amying danhkung wa lu hkra, nang gaw na a amyu masha ni hpe woi wa nu ai. ¹⁵ Sumsing lamu de nna gum yu u; na a danhkung ai hte chyoi pra ai shanu shara nna mada yu u: na a nja nhpra myit hte, daru magam re ai amu ni, kanang rai nga a ta? na a kraw lawang na chyeju myit hte, matsan dum ai myit, nang ngai hte shatsan kau nit dai. ¹⁶ Abraham anhte hpe n chye, Israela anhte hpe n hkap la timung, nang nan, Yehowa e, anhte a Wa rai nga ndai; gaja wa, nang anhte a Wa rai nga ndai; anhte hpe mawai la ai wa e, na a amying ningsang moi chyaloi kaw nna rai nga ai. ¹⁷ Yehowa e, na a lam kaw nna anhte hpe hpa majaw shayit kau n ta? nang hpe n hkrit hkungga hkra, anhte a myit masin hpe hpa majaw shaja ya n ta? Na a shangun ma ngu ai, na a sali wunli amyu ni a matu, bai wa rit. ¹⁸ Na a chyoi pra ai amyu gaw dai hpe chyahkring mi sha up lu ai hpang, anhte hpe hpyen ai ni, na a chyoi pra ai nawku nta hpe, kabye lai kau ma ai. ¹⁹ Anhte gaw, nang n up yu ai ni zawn mung, na a amying hpe n hkam la yu ai ni zawn mung, tai wa saga ai.

¹ Nang gaw sumsing lamu hpe hpaw malang nna, yu wa rit law e; bum ni na a man e ashun gari nga mu ga: ² nang hpe hpyen ai ni gaw, na a amying nsang hpe chye wa lu nna, maigan amyu ni, na a man e hkrit gari wa mu ga, shanut shanaw hkru kau ai hte, ntsin hpe shaprut kau ai wan zawn tai u law. ³ Anhte myit mada ai hta grau ai hkrithpa amu nang shapraw ai shaloi jang, nang yu wa nna, bum ni gaw na a man e ashun gari ma ai. ⁴ Kaning rai nme law, nang hpe myit mada ai wa a matu, nang zawn chyeju madun ai Karai Kasang shaje, kadai wa mung, moi chyaloi nhkoi kaw nna n na, n chye ai hte, myi hte mung, mu yu ai n rai. ⁵ Kabu gara ai myit hte dinghpring ai lam galaw nna, na a lam ni dum ai ni hpe, nang sa tau la ndai: yu u, nang pawt sindawng ndai, anhte yubak galaw saga ai; hkyehkrang la ai kaw du lu na rai ni? ⁶ Anhte yawng n san n seng ai wa zawn tai saga ai; anhte a dinghpring ai lam yawng, agang chyalang re ai hpun nba hte bung nga ai; anhte yawng namlap zawn nyip mat nna, anhte a shut hpyit ai gaw, nbung zawn, anhte hpe ahpawt kau ma ni ai. ⁷ Nang gaw na a myiman hpe makoi kau nna, anhte a shut hpyit ai hte anhte hpe shamyit kau ma ni ai majaw, na a amying nsang hpe shaga ai wa mung, nang hta manoi manat na nga, tinang hkum hpe shadut ai wa mung, n nga ai. ⁸ Raitimung, Yehowa e, nang gaw anhte a Kawa rai nga ndai; anhte gaw ga kagam rai nga ga ai, nang gaw di bu sama rai nga ndai; anhte yawng na a lata a amu rai nga ga ai. ⁹ Yehowa e, aja awa hkum pawt e; yubak mara hpe tutnawng hkum dum nga et; mada yu u, anhte yawng na a masha ni rai nga ga ai. ¹⁰ Na a chyoi pra ai mare ni, nam mali tai mat sai; Ziun bum mung, nam mali tai mat sai; Yerusalem mare gaw katsi katsang re ai shara tai mat sai. ¹¹ Ji wa ni nang hpe shakawn kungdawn ai shara, anhte a chyoi pra ai hte tsawm hkik ai nawku htingnu gaw, hkru mat sai; anhte a ngwi pyaw ai shara ni yawng, atsai awai rai mat sai. ¹² Yehowa e, ndai lam ni hpe nang naw sharang nna, atsin sha nga nga let, anhte hpe htum hkra matsan mayan jahkrum na rai ni?

¹ Nye a lam n san yu ai ni kaw, ngai danpru nngai, ngai hpe n tam ai ni gaw, ngai hpe mu ma ni ai: ngai gaw, Mada yu mi, mada yu mi, ngu nna nye a amying n shaga ai amyu hpe tsun nngai. ² Tinang myit ra ai hte maren, n kaja ai hku hkan ai gumle gumlau ai amyu hpe, nye a lata shani tup ngai ladawn wak nga nngai: ³ dai amyu gaw sun hkan e hkungga nawng nna, wut nep ai ntsa e lawban nat shamawng let, ngai hpe tutnawng pawt sindawng shangun ma ai: ⁴ shanhte gaw lupwa hkan e sa dung nna, nsung hku ni hta yup nga ma ai: shanhte gaw wa shan sha nna, tinang a hka wan ni hta matsat shabat shan jahku lu nga ma ai: ⁵ bai shanhte gaw, Nang hkrai kaga tsap nga u, ngai kaw hkum ni; ngai gaw nang hta grau chyoi pra nga nngai, nga nna tsun ma ai. shing re ai ni gaw nye a ladi hta wanhkut, tutnawng hkru nga ai wan zawn, rai nga ai. ⁶ Yu mu, nye a man e ka da nga ai rai nna, ngai atsin sha nga na n rai; ngai matai dawp na nngai; ⁷ gaja wa, nanhte a shut hpyit ai hte hpawn, bum ntsa e lawban nat nna, kawng ni a ntsa e ngai hpe shatan nhkan ai, nji nwa ni a shut hpyit ai hpe mung, ngai nanhte a lahpyen hta tai na nngai: shingrai ngai gaw, shanhte a arawn alai hte maren, shanhte a lahpyen hta shawng hteng ya na nngai, nga nna Yehowa tsun ai. ⁸ Bai Yehowa ning nga ai, Tsabyi sum baw hta tsabyi jahku mu yang, masha langai ngai, Hkum jahten et, shaman ai rawng nga ai, nga nna tsun ai hte maren, nye shangun ma hpe tau yu let, ngai galaw nna, mahkra jahten na n rai. ⁹ Ngai gaw Yaku a dap hta na nli, Yuda a dap hta na, nye a bum ni hpe sali hkam la ai wa hpe, shapraw na nngai; ngai lata la ai wa, dai hpe madu lu nna, nye a shangun ma ni dai hta e shanu nga na mara ai. ¹⁰ Ngai hpe tam ai, nye amyu a matu, Sharon layang gaw sagu udat, Ahkora kadit gaw, yamnga hpung ni a hpum shara, tai na ra ai. ¹¹ Yehowa hpe kau da nna, nye a chyoi pra ai bum hpe malap kau ai hte, Gam ngu ai hpara a man e sha ku lajang nna, Auba ngu ai hpara a man e dumhpung ru jaw ai ni e, nanhte a Auba gaw nhtu rai nga nna, sat kau hkrum na matu yawng gum dagup na marin dai: kaning rai nme law, ngai shaga yang, nanhte n htan, ngai tsun yang, nanhte n madat myit dai: nanhte gaw nye a man e n kaja ai hku galaw nna, ngai n ra ai hpe lata la myit dai. ¹³ Dai re ai majaw Madu Yehowa gaw, Yu mu, nye a shangun ma ni sha lu na mara ai, nanhte chyawm gaw kawsi hkrum na myit dai; yu mu, nye a shangun ma ni lu lu na mara ai, nanhte chyawm gaw hpang kara na myit dai; yu mu, nye a shangun ma ni kabu gara na mara ai, nanhte chyawm gaw kaya kahpa hkrum na myit dai; ¹⁴ yu mu, nye a shangun ma ni gaw kabu gara ai myit hte mahkawn mangoi na mara ai, nanhte chyawm gaw myit yawn ai hte jahtau hkrap nna, myit htum ai hte sharung shayawt na myit dai. ¹⁵ Nanhte gaw tinang a mying hpe, ngai lata la ai wa a matu, dagam dala lam shatai nna, Madu Yehowa gaw nanhte hpe sat kau na myit dai: shi a shangun ma ni hpe chyawm gaw, amying shingteng kaga shamying na ra ai: ¹⁶ shingrai, shawng na aru ara hpe malap kau ai hte, ngai dai hpe n mu nga ai majaw, ga ntsa e tinang hkum hpe shaman ai wa gaw, tengman ai Karai Kasang hta hpa nna shaman na ra ai; lamu ga hta dagam ai wa gaw, tengman ai Karai Kasang hta hpa nna dagam na ra ai, nga nna tsun ai. ¹⁷ Kaning rai nme law, yu mu, sumsing lamu ningnan ginding aga ningnan ngai hpan da nga nngai: shawng na lam ni hpe dum na mung n rai, myitsumru yu na mung n rai. ¹⁸ Ngai hpan da ai lam hta nanhte tutnawng kabu gara sharawng awng nga mu: kaning rai nme law, yu mu, Yerusalem hpe kabu gara ai shara, de a amyu masha ni hpe sharawng awng ai lam tai na, ngai hpan da nga nngai. ¹⁹ Ngai gaw Yerusalem mare hta kabu gara nga nna, nye a amyu masha ni hta awng sharawng nga na nngai: dai mare hta htawmhpang e hkrapngu hkrapngoi ai nsen hte, hkrap shabam ai nsen, na lu na n rai. ²⁰ Dai hta ma chyangai e si na n rai, asak n dik ai dingla mung nga na n rai; asak latsa hta si ai wa hpe, ma naw ngu na rai nga ai; yubak kap ai wa gaw asak latsa hta si yang, dagam dala hkrum ai wa, ngu na rai nga ai. ²¹ Shanhte gaw tinang galaw ai nta hta shanu nga nna, tinang hkai ai tsabyi sun na asi, sha na mara ai. ²² Shanhte nta galaw nna, masha kaga rawng na, n rai; shanhte tsabyi sun hkai nna, masha ni a asak gaw, hpun a asak zawn rai wa nna, ngai lata la ai amyu gaw, tinang lata amu a akyu, na na wa hkam la na mara ai. ²³ Shanhte gaw be be kaman sha amu galaw na n rai; shamyit kau hkrum na matu kasha shaprat na n rai: shanhte gaw Yehowa kaw na shaman lu la ai nli rai nga nna, shanhte a matu mara ni shanhte hte rau rai nga ma ai. ²⁴ Shanhte garai n shaga yang, ngai htan na nngai; ga naw tsun nga yang pyi, ngai madat na nngai. ²⁵ Chyahkyawn hte sagu kasha rau sha lu nna, hkanghkyi gaw dumsu zawn yi hku sha na ra ai; lapu a shahpa gaw, ga nhpu tai na ra ai: nye a chyoi pra ai bum ting hta e, shada da hkala nba ai hte jahten shabyak kau ai gaw, n nga na sai, nga nna Yehowa tsun ai.

¹ Yehowa gaw ning nga ai: Sumsing lamu gaw nye a tingnyang, ginding aga gaw nye lagaw a kabye lahkum rai nga ai: nye a matu kaning re ai nta galaw na myit ta? ngai ban sa ai shara, kaning re ai shara rai na a ta? ² Nye a lata dai lam yawng mayawng hpe galaw da nna, dai ni mahkra byin wa sai: raitimung ngai gaw, myit kyip ai hte gawng run nna, nye a ga majaw hkrit gari chye ai wa hpe, mada yu nngai. ³ Usu lang ai wa gaw, masha sat ai wa hte bung nga ai; sagu kasha hpe nawng ya ai wa gaw, gwi du htau ai wa hte bung nga ai; lusha hkungga jaw ai wa gaw, wa sai hkungga jaw ai wa hte bung nga ai; lawban nat nawng ya ai wa gaw, sumla hpe shaman ya ai wa hte bung nga ai. Gaja wa shanhte gaw tinang ra ai lam lata la nna, tinang a myit masin gaw, tinang matsat shabat lam hta pyaw nga ma ai. ⁴ Ngai mung, shanhte hkan ai kaman lila lam san da nna, shanhte hkrit nga ai hpe shanhte a ntsa e shapraw na nngai: kaning rai nme law, ngai shaga yang, htan ai wa n nga ai; ngai ga tsun yang, shanhte n madat ma ai: shanhte gaw nye a man e n hkru ai amu galaw nna, ngai n ra ai hpe lata la ma ai. ⁵ Yehowa mungga majaw hkrit gari ai ni e, shi a ga madat mu: Nanhte hpe ndawng n yawt ai hte, nye a amying majaw nanhte hpe kau da ai nhpu nnau ni gaw, Nanhte kabu gara nga ai, anhte mu lu hkra, Yehowa gaw hpung shingkang pru u ga, nga nna tsun jahpoi timung, shanhte nan kaya kahpa hkrum na mara ai. ⁶ Mare de na wu kadu ai nsen, nawku Htingnu de na ngoi ai nsen, hpyen ni hpe matai dawp ai Yehowa a nsen, ngoi pru nga ai. ⁷ Ziun shayi sha gaw, shinggyim machyi garai n hkrum yang, kasha shangai ai, machyi garai n dum yang, la kasha shaprat wu ai. ⁸ Shing re ai lam kadai mu yu a ta? Mungdan hpe lani mi hta sha shaprat lu a ni? mung masha ni hpe lang lata sha shangai lu a ni? Ziun chyawm gaw, shinggyim machyi hkrum magang yang, shi a kashu kasha ni hpe shaprat nu hka. ⁹ Kasha shaprat na lam ngai shabyin nna, n shangai shangun ai, nga na rai ni? nga nna Yehowa san nga ai; ngai na-um nasin shangun nna, kasha shangai na, hkum da na rai ni? nga nna na a Karai Kasang tsun nga ai. ¹⁰ Yerusalem hpe tsawra ai ni e, shi hte rau kabu gara ai hte myit pyaw nga mu; shi a lam sharung shayawt ai ni, yawng hte e, shi hte rau kabu gara ai myit hte awng sharawng nga mu: ¹¹ shingrai nanhte gaw, shi a shalan shabran ai madoi chyuhpang chyu nna, hkru kat na myit dai; nanhte chyu shup nna shi a n taw n tsang ngamu ngamai ai hta ngwi pyaw nga na marin dai. ¹² Kaning rai nme law, Yehowa gaw ning nga ai: Yu u, ngai gaw ngwi pyaw ai hpe hka nu zawn, maigan amyu ni a arawng sadang hpe, lim ai hka zawn, Yerusalem de shadu na nngai: nanhte chyu chyu nna, ba kaye ai hte lahput ntsa e makrai chyai ai, hkrum na myit dai. ¹³ Kanu gaw kasha hpe shangwi shapyaw ya ai hte maren, ngai nanhte hpe shangwi shapyaw nna, nanhte gaw Yerusalem mare hta, ngwi pyaw ai hkrum na myit dai: ¹⁴ Nanhte dai hpe mu lu ai hte, nanhte a myit masin kabu gara nna, nanhte a nrut nra ni tsit lali ai tsingdu zawn, tsang wa na ra ai; Yehowa a lata gaw shi a shangun ma ni hpe maga nna, hpyen ni hpe pawt sindawng ai myit madun dan na ra ai. ¹⁵ Kaning rai nme law, yu mu, myit kahtet ai hpe n-yun bu ai hte, daru jet ai hpe grung ai wan hte shapraw dan na matu, Yehowa gaw wan hte du nna, shi a leng ni bungsha zawn rai na ra ai. ¹⁶ Yehowa gaw wan hte mung, shi a ntu hte mung, hkrung mahkrung mahkra hpe tara dawdan nna, Yehowa sat kau ai ni, law na mara ai. ¹⁷ Wa shan, yu shan, matsat shabat shan sha let, sun ni a ka-ang e nga ai sumla langai mi a makau e, tinang hkum hpe shachyoi shapra nna, jasan jaseng ai ni gaw, rau htum mat na mara I, nga nna Yehowa tsun ai. ¹⁸ Kaning rai nme law, shanhte a arawn alai hpe mung shanhte a myit mang ai hku hpe mung, ngai chye nngai; masha amyu ni hte, ga amyu baw kaga tsun ai ni mahkra hpe, ngai zuphpawng shangun na aten du ra ai; shanhte mung sa du nna, nye a arawng sadang hpe mu lu na maru ai. ¹⁹ Ngai gaw shanhte a ka-ang e lamik kumla madun dan nna, shanhte hta na lawt lu ai ni hpe, ndan gap chye ai Tarshi, Pula, Luda amyu ni hpang de mung, Tubala yan Yawan hpang de mung, nye a lam garai n na yu ai hte, nye a hpung shingkang garai n mu lu ai, sumtsan mung na zunlawng ni hpang de mung, ngai shangun dat nna, shanhte gaw maigan amyu ni hpe, nye a hpung shingkang lam tsun dan na mara ai. ²⁰ Dai hta kaga, Israela masha ni gaw, tinang a lusha hkungga hpe sanseng ai wan hta Yehowa a nta de la sa ai hte maren, shanhte gaw, nanhte a kahpu kanau ni mahkra hpe, gumra hta mung, leng hta mung, krau ntsa e mung, lawze hte gawla-uk ntsa e mung htaw nna, Yehowa a lusha hkungga tai na matu, mung mi hte mung mi kaw na, nye a chyoi pra ai bum Yerusalem mare de woi wa na mara ai, nga nna Yehowa tsun ai. ²¹ Bai shanhte hta na, hkinjawng hte Lewi masha ni a aya hta ngai san da na nngai, nga nna Yehowa tsun ai. ²² Kaning rai nme law, ngai hpan da ai sumsing lamu ningnan hte, ginding aga ningnan gaw, nye a man e grin nga ai zawn, nanhte a aru arat hte nanhte a amying shingteng mung grin nga na ra ai, nga nna Yehowa tsun ai. ²³ Shingrai shata praw shagu, laban nhtoi shagu, hkrung mahkrung yawng, nye a man e nawku na matu, du na mara ai, nga nna Yehowa tsun ai. ²⁴ Shanhte gaw paw pru nna ngai hpe shut hpyit ai ni a moi mang hpe hpu yu na mara ai; kaning rai nme law shanhte hpe sha ai byet si ai, n rai, shanhte hpe hkru ai wan krip ai, n rai: shanhte gaw hkrung mahkrung yawng a man e, matsat shabat hkrai tai na mara ai, nga ai.