HABAKU

HABAKU

¹ Myihtoi Habaku mu ai shingran, da ndai rai nga ai. ² Yehowa e, nang n madat ya ai, ngai gaten du hkra hpyi jahtau na rai ta? Kashun kashe hkrum ai majaw, ngai nang hpe marawn jahtau timung, nang karum la ai, n rai. ³ Nang hpa majaw n shawp n kap ai amu, ngai hpe madun dan nna, myit magaw ai lam mu shangun nga n ta? hten byak ai hte kashun kashe, nye a man e rai nga nna ndang kalang hkat ai hte, ga law ga la ai, law htam nga ai. ⁴ Dai re ai majaw tara tang mat nna, tara malang ai hku galoi n pru hkraw ai; tara n lang ai wa gaw, dinghpring ai wa hpe wang tawn nna, tara dara yang, n jaw ai hku hkrai pru nga ai. ⁵ Htak mat ai ni e, maigan amyu ni hta mada mu nna, gaja wa mau mat nga mu: kaning rai nme law, nanhte hpe tsun dan timung nanhte n kam lu ai amu gaw, nanhte a prat e ngai shabyin nngai: ⁶ yu mu, gumshem ai hte larau ladau nga nna, tinang a buga n re ai lamu ga hpe madu lu na matu, ga ntsa ting hta hproi hkawm ai Hkalde amyu masha ni hpe, ngai sharawt nngai. ⁷ Dai gaw sheng mareng hte hkrit mai ai amyu rai nga ai; shanhte a tara, shanhte a arawng sadang, tinang ra ai hku hkrai rai nga ai. ⁸ Shanhte a laring gumra ni gaw, rawng gawk hta grau lawan chye nna, shana na chyahkyawn ni hta grau n hkru ma ai; gumra jawn ai ni, sumtsan kaw na du nna, pri rai nga ma ai: dai ni gaw, hpya lu hpya sha na matu, lawan ai langda zawn, htim ma ai. ⁹ Nlang hte gaw lanep kashun la na matu du ma ai. shanhte gaw myiman yawng ai de, ding yang sa wa nna, zaibru daram law ai bawng ni hpe, shinggyin da mu ai. ¹⁰ Gaja wa, shi gaw, hkawhkam ni hpe jahpoi kau nna, du ni hpe n kaw n law di kau mu ai: hpyendap yawng hpe shi hpa n nawn nga ai; shi kaduk htu nna, dai hpe gasat la nga ai. ¹¹ Dai hpang nbung zawn, shi lai mat nna, hkoi mat na ra ai: tinang a n-gun hpe hpara shatai ai wa gaw, mara kap nga ai. ¹² Nye a Karai Kasang Yehowa e, nang gaw moi chyaloi nhkoi kaw nna, nye a Chyoi pra ai Wa rai nga ndai, n rai ni? anhte gaw si na ga ai, n rai. Yehowa e, dawdan na matu nang shi hpe san da nu ai; Lunghkrung e, anhte hpe sharin achyin ya na matu nang shi hpe tawn da nu ai. ¹³ N hkru n hkra ai hpe n yu hkra, myit magaw ai lam n mada hkra, sanseng ai myi tu ai wa e, nang hpa majaw hkalem hkalau ai wa hpe a mada nga ai hte, tara n lang ai wa gaw, shi hta grau dinghpring ai wa hpe jahtum kau nna, ¹⁴ shinggyim masha ni hpe nammukdara nga ai hte, du n lu ai ga ntsa gumrawt hkawm ai baw hpe zawn, shatai kau yang, nang hpa majaw atsin sha yu nga n ta? ¹⁵ Dai wa gaw, yawng hpe nga myit hte dawn nga ai; sumgawn hte dagup nna, byek hte shinggyin la nhtawm, shi kabu nna myit pyaw nga ai. ¹⁶ Dai re ai majaw, shi a sumgawn hpe, shi hkungga nawng ya nna, shi a byek matu, manam pyaw ai baw nat nawng ya ai: kaning rai nme law, de a majaw shi sutgan lu nna, hkru hkru kat kat sha lu nga ai. ¹⁷ Dai rai yang, dai wa gaw, shi a sumgawn hta lu ai nga ni hpe htawk kau nna, masha amyu ni hpe, lahpawt n dum ai, tutnawng e sat kau na a ni?

¹ Yehowa gaw, ngai hte kaning nga tsun nna, ngai lajin ai ga hpe kaning nga htan ya na, chye lu hkra, nye a machya ntsa e, ngai tsap nga nna, nye a langchyi ntsa e, ala nga na nngai. ² Shaloi Yehowa ngai hpe htan nna, Shingran ga hpe ka da u; hti ai wa gaw gat let hti lu hkra, dai hpe lungpa hta dan dan pra pra ka da u. ³ Kaning rai nme law, ndai shingran gaw, ndat da ai aten hte seng nna. dik wa na matu, lawan nga ai hte, masu na n rai: ganung nga yang raitimung, ala nga u; dai gaw teng teng du na ra ai; hpang hkrat na, n rai. ⁴ Yu u, dai wa gaw, myit tsaw myit dap rai nga ai: shi a myit malang nga ai, n rai: dinghpring ai wa chyawm gaw, shi a kamsham ai hte hkrung nga lu na ra ai. ⁵ Dai hta n-ga, tsabyi jahku hkalem hkalau chye ai majaw, shi gaw myit kaba ai wa rai nga nna, tinang a buga hta n zim nga ai. shi gaw shi a lawhpa ai myit, katsan ga zawn maden dat nna, si du hte maren, myit n dik hkraw ai, maigan amyu ni mahkra hpe shi hpawng shangun nna, amyu baw ni hpe, shi a matu shinggyin la mu ai. ⁶ Shanhte nlang hte gaw, shi a lam ga shadawn hku tsun nna, shatan nhkan gumwai ga shapraw let, Tinang a n re ai sutgan mahkawng da nna, tinang a ntsa e ru hka shalaw ai wa gaw, dingnye lu u ga: gaten du hkra dai zawn nga nga na kun? nga nna tsun na ma ai, n rai ni? ⁷ Nang hpe hka ji ai ni alawan rawt nna, nang hpe sharu shatsang ai ni yup hprang nna, nang shanhte a lanep tai na, n rai ni? ⁸ Nang gaw masha amyu ni law law hpe, hpya lu hpya sha ndai majaw, masha sai jahkaw kau ai mara, mungdan hta kashun kashe re ai mara, mare hte dai hta shanu nga ai ni mahkra ntsa e galaw dan ai mara hpe, naw ngam nga ai amyu baw ni dum nna, nang hpe hpya lu hpya sha na mara ai. ⁹ Tinang tsip hpe matsaw ntsang de tsip da nna, ru tsang ai lata na lawt lu hkra, tinang a nta matu n tara ai amyat sha ai wa gaw, dingnye lu u ga. ¹⁰ Amyu law law hpe jahtum kau ai majaw, nang gaw kaya kahpa re ai hpaji, na nta ntsa e daw nna, na a myit masin hpe shut kau nu ai. ¹¹ Kaning rai nme law, shakum kaw na nlung ni jahtau nna, htingrim hta na, ngau hkrawn ni, htan na mara ai. ¹² Asai jahkaw ai hte, kahtawng de ai wa, myit magaw ai hte, mare shangang ai wa, dingnye lu u ga! ¹³ Yu u, amyu baw ni gaw, wan hkru kau ai hkrum na matu, makan galaw nna, masha amyu ni kaman lila matu, tinang hkum hpe jahki shaba na lam Zaw nawng zaw wa up ai Yehowa kaw na rai nga ai, n rai ni? ¹⁴ Kaning rai nme law, nammukdara hka gaw, shi a shara hpe lim kau ai zawn, Yehowa a hpung shingkang hpe chye chyang ai lam, mungkan ting pri rai na ra ai. ¹⁵ Tinang a htingbu wa singgu krin re ai hpe mu mayu nna, shi hpe shanang na matu, ndawng n yawt ai myit hte chyaru ru jaw ai wa gaw, dingnye lu u ga. ¹⁶ Nang gaw arawng sadang n rai, kaya kahpa hkrum ndai: nang nan lu nna, singgu krin rai nga u: Yehowa a hkra lata na gawm gaw, nang kaw galen du nna, ¹⁷ Lebnon bum hpe arip adip di ai mara, de a ashu ashan ni hpe jahkrit shama nna, shaza kau ai mara a matu mung, masha sai jahkaw ai mara, mungdan hta kashun kashe re ai mara, mare hte dai hta shanu nga ai ni mahkra ntsa e galaw dan ai mara matu mung, matsat shabat nhpat gaw, na a arawng sadang hpe ka-up na ra ai. ¹⁸ Laksama wa gaw tinang, a lata hte galaw ai tawk ai sumla hte, n shaga chye ai, jaw ai sumla ngu ai, lam shadam ai sara hpe, galaw nna, dai hta shamyet shanat nga ai gaw, hpa akyu nga a ta? ¹⁹ Hpun tawng hpe, Yup hprang u, n chye shaga ai nlung hpe, Rawt u. nga nna tsun ai wa gaw, dingnye lu ai. ²⁰ Dai sumla gaw sharin achyin lu a ni? Yu u, dai gaw aja gumhpraw hte sup nna, de a kraw lawang e nsoi nsa hpa n rawng nga ai. ²¹ Yehowa chyawm gaw shi a chyoi pra ai nawku Htingnu hta shanu nga ai; lamu ga ting, shi a man e a sim sha nga u ga.

¹ Laka hku shagawp nna, myihtoi Habaku a akyu hpyi ai ga: ² Yehowa e, ngai na a lam shiga na nna hkrit nga nngai; Yehowa e, ndai shaning laman e, na amu hpe bai shapraw u; Ndai shaning laman e, ndai hpe shadan dat u: Pawt sindawng timung, matsan dum ai lam dum u. ³ Karai Kasang gaw Teman mung kaw na, Chyoi pra ai Wa gaw Paran bum na, paw pru wa ai. [Selah.] Shi a hpung shingkang gaw, sumsing lamu hpe ka-up nna. Ginding aga gaw shi hpe shakawn ai lam hte hpring nga ai. ⁴ Shi a ahpraw nsam gaw, ahtoi zawn rai nga ai; Shi a lata na, jan lagaw htoi pru nna, Shi a hpung dagu, de a npu e shanu nga ai. ⁵ Ana zinli gaw shi a shawng e sa wa nna, Grung ai wan n-ga shi a lagaw na pru wa ai. ⁶ Shi tsap nna, lamu ga hpe shadawn wu ai; Shi mada yu nna, maigan amyu ni hpe shabra nu ai: Dinggrin anga nga ai bum ni gaw, ayai mat wa ai; Htani htana kawng ni gaw, gum dagup nga ma ai: Moi chyaloi nhkoi na zawn, shi bai pru nga ai. ⁷ Hkushan mung na sum ni, nni nkri hkrum ai hpe, ngai mu nngai; Midian mung na nba grang ni, ashun awam nga ai. ⁸ Yehowa gaw hka nu ni hpe, myit kahtet nga ai, rai ni? Na a gumra ni hte, hkyehkrang la ai hpyen leng ni a ntsa e, nang jawn wa ai du hkra, Hka nu ni hpe nang masin pawt wa nna, Nammukdara hpe n-yun bu nga ai, rai ni? ⁹ Nang gaw na ndan hpe shapraw dan ndai: Amyu dap ni hpe dagam ai ga dik wa sai. [Selah.] Nang gaw lamu ga hta hka nu ni hpe jahpaw ndai. ¹⁰ Bum ni nang hpe mu nna, hkrit gari nga ma ai; Hka hpungla ni lai mat wa ai; Sung htum ai shara gaw wu kadu let, Tinang a lata hpe ladawn nga ai. ¹¹ Na a kabrim kabram ai pala ni poi mat wa nna, Tu ala ai ri tu ni htoi gala ai majaw, Jan hte shata gaw tinang a shara hta hkring nga ai. ¹² Nang gaw pawt sindawng let, mungdan hta jawt hkawm ndai; Myit kahtet let maigan amyu ni hpe, kabye adup ndai. ¹³ Na a namman chya hkam ai wa ngu ai, Na a amyu hpe hkyehkrang la na matu, nang pru ndai; Tara n lang ai wa a nta hta na baw hpe, nang hkala kau ndai: De a npawt nhpang ni npawt ndung hkren shadawng da nu ai. [Selah.] ¹⁴ Nang gaw shi a dawhkrawng ni hte, shi a hpyen masha ni a baw hpe galun htinggrang kau ndai; Shanhte gaw, ngai hpe shapoi kau na matu, laru bungga zawn ahpawt ma ai: Matsan mayan ni hpe, n dum shami kawa sha na nga, shanhte myit makun nna kabu nga ma ai. ¹⁵ Gaja wa, na a gumra ni hpe jawn let, Kaba la ai nammukdara hka leng ni hta, nang kabye hkawm ndai. ¹⁶ Dai lam ngai na jang, nye hkum gari ashun nga ai; De a nsen majaw, nye a shakap gying mat sai: Ru tsang du na ra ai nhtoi hte, anhte hpe jahten shabyak ai amyu gaw, Du na ra ai shani du hkra, ngai atsin sha hti nga na majaw, Nye a nrut nra ni tsam mat nna, nye a lagaw gari mat nga ai. ¹⁷ Shingrai, lakum hpun gaw pu n pu, Tsabyi ru gaw asi n si, Tsanlun hpun gaw kaman sha tu, Yi hkauna mung nai mam n pru; Sagu lawng hta sagu hpung kata. Dumsu lawng hta dumsu n pra, timung, Ngai gaw Yehowa hta kabu gara nga na nngai; Ngai hpe hkyehkrang la ai Karai Kasang hta sharawng awng nga na nngai. ¹⁹ Madu Yehowa gaw, nye a n-gun atsam rai nga ai: Shi gaw nye a lagaw hpe shan lagaw zawn shatai nna, Nye a tsaw ai shara hta, ngai hpe hkawm shangun ai law. Sumpyi dum ai agyi a matu; nye a tingse ni hta mai dum ai mahkawn ga.