EZRA

EZRA

¹ Ya Yeremia htawn tsun ai Yehowa ga dik wa na matu, Persi hkawhkam hkaw dung ai shawng shaning hta e, Yehowa gaw shi a myit masin hpe shamu shamawt ya nna, shi gaw shi a mungdan ni mahkra hproi hkra hkang dat ai laika shabra dat nna, ² Persi hkawhkam Kuru ning nga ai: Sumsing lamu na Karai Kasang Yehowa gaw, ga ntsa mungdan ni mahkra hpe nye a lata hta ap ya ni ai; Yuda mung na Yerusalem mare hta e, shi a matu nta langai mi galaw na, shi ngai hpe hkangda ni ai. ³ Ya shi hte seng ai amyu masha ni kadai hte mung, shi a Karai Kasang shi hte rau nga nga nna, Israela Karai Kasang Yehowa a matu nta galaw na nga, Yuda mung na Yerusalem mare de lung wa u ga; Yerusalem mare e nga nga ai Karai Kasang gaw Karai Kasang nan rai nga ai. ⁴ Shara shagu hkan shingbyi nga nna, naw ngam nga ai ni gaw, Yerusalem mare na Karai Kasang a nta matu, dingsa hkungga hte hpawn, aja, gumhpraw, sut rai, yamnga hte karum dat mu ga, ngu nna ka dat wu ai. ⁵ Dai rai nna, tinang a wenyi hta Karai Kasang a shamu shamawt hkrum ai Yuda amyu hte Ben-yamin amyu na dap lakung ni a agyi ni hte rau, hkinjawng ni hte Lewi masha ni nlang hte gaw, Yerusalem e nga ai Yehowa nta hpe galaw na matu rawt ma ai. ⁶ Grupyin e nga ai ni mung, dingsa jaw ai kumhpa hta kaga, aja, gumhpraw arai ni hte, sut rai, yamnga, manu hpu ai baw hte, shanhte a lata hpe n-gun sharawng ya mu ai. ⁷ Dai hta kaga Nebuhkadneza gaw Yerusalem mare na magawn wa nna, shi a Hpara ni a nta hta tawn da ai, Yehowa a nta hte seng ai arai ni hpe, ⁸ Persi hkawhkam Kuru gaw sutdek up ai Mitreda lata hte shaw la nna, hti yu nhtawm, Yuda agyi wa Shebaza hpe ap ya wu ai. ⁹ Arai ni a jahpan ndai rai nga ai: aja ban sumshi, gumhpraw ban hkying mi, nhtu hkun jahku; ¹⁰ aja gawm sumshi, manu grit ai gumhpraw gawm mali tsa e shi, kaga arai hkying mi rai nga ai: ¹¹ shingrai aja gumhpraw arai ni yawng, hkying manga mali tsa rai nga ai. Bawngdung ai ni gaw, Babelon mare kaw nna, Yerusalem mare de bai wa ma yang, Shebaza gaw dai rai ni mahkra hpe shanhte hte rau la wa wu ai.

¹ Da ndai gaw, Babelon hkawhkam Nebuhkadneza, Babelon mare de rim wa ai bawngdung ai ni hta na pru wa nna, Zerubabela, Yeshua, Nehemia, Seraia, Relaia, Mordehkai, Bilshan, Mispa, Biggwai, Rehum, Bana hte rau, ² Yerusalem kaw nna Yuda mung hta langai hte langai seng ai mare de du wa ai mung masha ni a jahpan rai nga ai. Israela kashu kasha ni a jahpan nambat gaw, ndai rai nga ai: ³ Parosha a kashu kasha ni gaw, hkying lahkawng latsa e sanit shi lahkawng rai ma ai. ⁴ Shepatia kashu kasha ni gaw masum tsa e sanit shi lahkawng rai ma ai. ⁵ Ara kashu kasha ni gaw sanit tsa e sanit shi manga rai ma ai. ⁶ Yeshua yan Yoab a dap lakung na Pahat-moba kashu kasha ni gaw, hkying lahkawng matsat tsa e shi lahkawng rai ma ai. ⁷ Elam a kashu kasha ni gaw, hkying mi ni tsa e manga shi mali; ⁸ Zatu a kashu kasha ni gaw, jahku tsa e mali shi manga; ⁹ Zahkai a kashu kasha ni gaw, sanit tsa e kru shi; ¹⁰ Bani a kashu kasha ni gaw kru tsa e mali shi lahkawng; ¹¹ Bebai a kashu kasha ni gaw, kru tsa e hkun masum; ¹² Azgad a kashu kasha ni gaw, hkying mi ni tsa e hkun lahkawng; ¹³ Adonikam a kashu kasha ni gaw, kru tsa e kru shi kru; ¹⁴ Bigwai a kashu kasha ni gaw, hkying lahkawng e manga shi kru; ¹⁵ Adin a kashu kasha ni gaw, mali tsa e manga shi mali; ¹⁶ Hezekia dap lakung na Atera kashu kasha ni gaw, jahku shi matsat; ¹⁷ Bezai a kashu kasha ni gaw, masum tsa e hkun masum; ¹⁸ Yora a kashu kasha ni gaw, latsa e shi lahkawng; ¹⁹ Hashum a kashu kasha ni gaw, ni tsa e hkun masum; ²⁰ Gibara kashu kasha ni gaw, jahku shi manga; ²¹ Betlehem a kashu kasha ni gaw, latsa e hkum masum; ²² Netohpa masha ni gaw manga shi kru; ²³ Anahtot masha ni gaw, latsa e hkun matsat; ²⁴ Azmawet a kashu kasha ni gaw, mali shi lahkawng; ²⁵ Kirait Yarim, Hkehpira hte Berot a kashu kasha ni gaw, sanit tsa e mali shi masum; ²⁶ Rama hte Geba kashu kasha ni gaw, kru tsa e hkun langai; ²⁷ Mikma masha ni gaw, latsa e hkun lahkawng; ²⁸ Betela hte Ai masha ni gaw, ni tsa e hkun masum; ²⁹ Nebo a kashu kasha ni gaw, manga shi lahkawng; ³⁰ Magbisha kashu kasha ni gaw, latsa e manga shi kru; ³¹ Elam kaga a kashu kasha ni gaw, hkying mi ni tsa e manga shi mali; ³² Harim a kashu kasha ni gaw, masum tsa e hkun; ³³ Lodo, Hadi hte Ono a kashu kasha ni gaw, sanit tsa e hkun manga; ³⁴ Yerihko a kashu kasha ni gaw, masum tsa e mali shi manga; ³⁵ Sena a kashu kasha ni gaw, hkying masum kru tsa e sumshi rai ma ai. ³⁶ Bai, hkinjawng ni hta, Yeshua dap lakung na Yedaia kashu kasha ni gaw, jahku tsa e sanit shi masum; ³⁷ Imera kashu kasha ni gaw, hkying mi manga shi lahkawng; ³⁸ Pashura kashu kasha ni gaw, hkying mi ni tsa e mali shi sanit; ³⁹ Harim a kashu kasha ni gaw, hkying mi shi sanit rai ma ai. ⁴⁰ Bai Lewi masha ni hta, Hodawia dap lakung na Yeshua yan Kadmiela kashu kasha ni gaw, sanit shi mali; ⁴¹ mahkawn mangoi re ai, Asap a kashu kasha ni gaw latsa e hkun matsat, rai ma ai. ⁴² Chyinghka ni sin nga ai, Shalum, Atera, Talmon, Akub, Hatita hte Shobai a kashu kasha ni yawng, latsa e sum shi jahku rai ma ai. ⁴³ Nehtinim masha ni hta na, Ziha kashu kasha ni, Hasuhpa kashu kasha ni, Tabaot a kashu kasha ni; ⁴⁴ Kero a kashu kasha ni, Siaha kashu kasha ni, Padon a kashu kasha ni, ⁴⁵ Lebana kashu kasha ni, Hagaba kashu kasha ni, Akub a kashu kasha ni; ⁴⁶ Hagab a kashu kasha ni, Shamlai a kashu kasha ni, Hanan a kashu kasha ni; ⁴⁷ Gidela kashu kasha ni, Gahara kashu kasha ni, Reaia kashu kasha ni; ⁴⁸ Rezin a kashu kasha ni; Nekoda kashu kasha ni, Gazam a kashu kasha ni; ⁴⁹ Uza kashu kasha ni, Pasea kashu kasha ni, Besai a kashu kasha ni; ⁵⁰ Asna kashu kasha ni, Meunim a kashu kasha ni, Nehpisim a kashu kasha ni; ⁵¹ Bakbuk a kashu kasha ni, Hakuhpa kashu kasha ni, Harahura kashu kasha ni; ⁵² Bazluhta kashu kasha ni, Mehida kashu kasha ni, Harsha kashu kasha ni; ⁵³ Barko a kashu kasha ni, Sisera kashu kasha ni, Tema kashu kasha ni; ⁵⁴ Nezia kashu kasha ni hte Hatihpa kashu kasha ni rai nga ma ai. ⁵⁵ Bai, Shawlumon a ali ama ni hta na Sotai a kashu kasha ni, Hasopheret a kashu kasha ni, Peruda kashu kasha ni; ⁵⁶ Yala kashu kasha ni, Darkon a kashu kasha ni, Gidela kashu kasha ni; ⁵⁷ Shehpatia kashu kasha ni, Hatila kashu kasha ni, Pohkerit-Nazebim a kashu kasha ni hte Ami a kashu kasha ni rai nga ma ai. ⁵⁸ Nehtinim masha ni hte Shawlumon a ali ama ni a kashu kasha ni yawng hte gaw, masum tsa e jahku shi lahkawng rai nga ma ai. ⁵⁹ Da ndai hte gaw, Tela-mela, Tela-harsha, Hkeruba, Adan hte Imera shara ni kaw na pru timung, tinang a kawa ni a dap lakung ni hte, Israela amyu ni hta na ahtik labau n chye gawn ai, ⁶⁰ Delaia kashu kasha ni, Tobia kashu kasha ni, Nekoda kashu kasha ni rai ma ai: yawng hte gaw marai kru tsa manga shi lahkawng rai ma ai. ⁶¹ Hkinjawng ni hta na, Habaia kashu kasha ni, Hakoza kashu kasha ni, Barazilai kashu kasha ni rai ma ai: dai Barazilai gaw, Gilead masha Barazilai a shayi sha ni hta num la nna, shanhte a amying hpe hkan mying wu ai. ⁶² Shanhte gaw tinang a ahtik labau jahpan laika tam timung, n mu ma ai; dai re ai majaw shanhte hpe n san n seng ngu mu ai rai nna, hkinjawng amu n galaw lu ma ai. ⁶³ Urim hte Htumim chye lang ai hkinjawng garai n pru yang, shanhte gaw chyoi pra htum ai lusha hpe n lu n sha na nga, nga nna munggyi wa gaw shanhte hpe hkangda mu ai. ⁶⁴ Dai shawa hpawng ting hta, marai mun mali hkying lahkawng masum tsa e kru shi lawm ma ai; ⁶⁵ dai hta kaga num mayam ni hte la mayam ni hkying sanit, masum tsa e sumshi sanit rai nga ma ai: mahkawn mangoi chye ai numsha lasha, ni tsa mung, lawm ma ai. ⁶⁶ Shanhte a gumra ni, sanit tsa e sumshi kru; lawze ni, ni tsa e mali shi manga; ⁶⁷ gawla-uk ni, mali tsa e sumshi manga; lawgung ni, hkying kru sanit tsa e hkun law ma ai. ⁶⁸ Ya, kaji kawa ni a dap lakung ni a agyi nkau mi gaw, Yerusalem mare e nga ai Yehowa a nta de du ma yang, tinang a shara hta e Karai Kasang nta hpe bai de da na matu, myit dingsa kumhpa sakjaw mu ai: ⁶⁹ shanhte gaw tinang a ngamu ngamai lam hte maren, aja den-ga mun kru hkying mi, gumhpraw apa hkying manga, hkinjawng hpun palawng latsa, sutdek hta bang jaw ma ai. ⁷⁰ Shingrai hkinjawng ni, Lewi masha ni, mung masha ni nkau mi, mahkawn mangoi chye ai ni, chyinghka sin ai ni hte Nehtinim masha ni gaw, tinang a mare ni hta mung, Israela masha ni yawng, tinang a mare ni hta mung, nga nga ma ai.

¹ Ya shata sanit du nna, Israela kashu kasha ni gaw, tinang a mare ni hta nga ma yang, shanhte gaw lang lata sha Yerusalem mare de zuphpawng ma ai. ² Shaloi Yozadak a kasha Yeshua hte shi a kahpu kanau hkinjawng ni mung, Shelatila a kasha Zerubabela hte shi a kahpu kanau ni mung, rawt nna, Karai Kasang a masha wa Mawshe a tara hta ka da nga ai hte maren, wan nat hkungga hpe nat nawng ya na matu, Israela Karai Kasang a tawn hkungri hpe de da mu ai. ³ Mungdan ni e nga ai maigan amyu ni hpe hkrit ma ai majaw, shanhte gaw dai tawn hkungri hpe tinang a htingra hta de da nna Yehowa a matu jahpawt shana wan nat hkungga hpe nat nawng ya mu ai. ⁴ Bai, ka da nga ai hte maren, shanhte gaw sumpoi hpe mung galaw nna, wan nat hkungga a nambat shatup let, lani hte lani na hkungga nawng ya mu ai: ⁵ dai hpang tutnawng na wan nat hkungga hpe mung, shata praw shani hte, Yehowa a chyoi pra ai poi shagu na hkungga hpe mung, Yehowa hpe myit dingsa jaw mayu ai hkungga ni hpe mung nat nawng ya mu ai. ⁶ Shata sanit ngu na shawng shani kaw na, shanhte gaw Yehowa hpe wan nat hkungga nawng ya hpang mu ai: raitimung, Yehowa a nawku Htingnu hpe garai n gaw da hpang ma ai. ⁷ Bai shanhte gaw, wut gaw ai ni hte lasama ni hpe gumhpraw, Persi hkawhkam Kuru a ahkang hte maren, Yopa mare danam du hkra, Lebanon bum na arit hpun hpe shaw yawng na Sidon hte Turu masha ni hpe lusha jarit hte sau ni hpe jaw mu ai. ⁸ Ya, Yerusalem mare e nga ai, Karai Kasang a nta de du ai. ni ning na shata lahkawng ngu na hta, Shelahtila kasha Zerubabela, Yozadak a kasha Yeshua hte, shanhte a kahpu kanau hkinjawng ni hte Lewi masha kaga hte hpawn, bawngdung ai kaw na pru nna, Yerusalem de lung wa ai ni hte mung masha ni nlang rawt nna. Yehowa nta na amu hpe up na matu, hkun ning kaw nna asak kaba ai Lewi masha ni hpe san tawn da mu ai. ⁹ Dai rai nna, Yeshua hte shi a kashu kasha ni, kahpu kanau ni, Yuda amyu na Kadmiela hte shi a kasha ni, Lewi amyu Henada aru arat ni hte rau, Karai Kasang a nta hta amu galaw ai ni hpe woi awn na matu, myit langai sha hte rawt ma ai. ¹⁰ Amu galaw ai ni gaw, Yehowa a nawku Htingnu hpe gaw da hpang yang, Israela hkawhkam Dawi hkangda ai hte maren, Yehowa hpe shakawn kungdawn na matu, pahtau lang nna hkinjawng hpun palawng bu hpun ai hkinjawng ni hte, shupsheng lang ai Lewi amyu na Asap a kashu kasha ni hpe, tinang a shara hta tawn da mu ai. ¹¹ Shanhte gaw, Yehowa mai kaja nga nna, shi a chyeju Israela ntsa e htani htana anga nga ai, nga nna tsun let hpung mi hte hpung mi htingli htinglai mahkawn ma ai. Yehowa nta a npawt nhpang ni gaw da lu ai majaw, mung masha ni mahkra gaw, Yehowa hpe shakawn kungdawn let, nsen kaba hte jahtau garu nga ma ai. ¹² Raitimung, asak kaba nna, shawng na nta hpe mu yu ai hkinjawng ni, Lewi Masha ni hte dap lakung ni a agyi ni gaw, ndai nta a npawt nhpang ni hpe mada yu yang, ja ja hkrapngu hkrapngoi nga ma ai: masha law law wa chyawm gaw kabu gara ai hte jahtau marawn ma ai: ¹³ shingrai mung masha ni kabu gara jahtau garu ai hte, hkrapngu hkrapngoi wu ai nsen hpe, shanhte n chye ginhka mu ai: Kaning rai nme law, mung masha ni gaw ja ja jahtau garu nga ma ai rai nna, dai ngoi wu ai nsen gaw, tsan tsan kaw nna na ma ai.

¹ Ya, bawng lawt ai kashu kasha ni gaw, Israela Karai Kasang Yehowa a matu nawku Htingnu gaw da ai hpe, Yuda yan Ben-yamin hpe hpyen ai ni na ma yang, ² shanhte gaw Zerubabela hte dap lakung ni a agyi ni kaw sa nna, Anhte mung nanhte hte rau gaw da ga: anhte gaw nanhte hte maren Karai Kasang hpe hkan tam ga ai rai nna, anhte hpe ndai ga de woi wa ai Asuri hkawhkam Esarahadon aprat kaw nna dai Karai Kasang hpe shagu hkungga nawng ya ga ai, ngu nna tsun mu ai. ³ Zerubabela yan Yeshua hte Israela dap lakung ni a agyi kaga ni mahtang, Anhte a Karai Kasang a matu nta galaw na, nanhte gaw anhte hta lawm mai ai, n rai: Persi hkawhkam Kuru hkangda ai hte maren, Israela Karai KasangYehowa a matu anhte hkrai galaw na ga ai, ngu nna shanhte hpe tsun mu ai. ⁴ Dai rai nna mung masha ni gaw, Yuda masha ni hpe hkap shatsang nna, galaw ai amu hta n-gun yawm shangun mu ai: ⁵ Persi hkawhkam Kuru aprat kaw nna, hkawhkam Dari aprat du hkra, shanhte galaw maw ai lam jahten na matu, hpaji daw chye ai ni hpe shaga ma ai. ⁶ Bai shanhte gaw, Ahasuru hkaw dung hpang ai aten e, Yuda mung hte Yerusalem masha ni a lam mara shagun ai laika ka dat mu ai. ⁷ Ya Artahkere a prat e Bishlam, Mihtredat, Tabela hte shi a kanawn manang kaga hte gaw, Persi hkawhkam Artahkere hpang de laika ka dat mu ai; dai laika gaw Suri ga kanu hte Suri ga hku ka da nga ai: ⁸ mung up ai wa Rehum hte, chyare wa Shimshai gaw, Yerusalem masha ni a lam, hkawhkam Artahkere hpang de laika langai mi ka shagun dat mu ai. ⁹ shingrai mung up ai Rehum yan chyare wa Shimshai hte shan a kanawn manang ni ngu ai, kaba ai hte arawng lu ai Osnapa gaw woi wa nna Samari mare hta mung, hka sinna maga hta mung, ¹⁰ sa nga shangun ai Dina, Ahprasa, Tarpeli, Ahparsi, Arhkewi, Babelon, Shushan, Deha, Elam masha ni hte, naw nga ai amyu ni gaw, laika ka shagun dat ma ai. ¹¹ Shanhte gaw Artahkere hpang de shagun dat ai laika ning rai nga ai. Hka sinna hkran de nga ai na a mayam ni gaw ning nga ka dat ma ai. ¹² Hkawhkam wa gaw ndai lam chye u ga: nang kaw na pru ai Yuda masha ni gaw anhte kaw Yerusalem e du masai; shanhte gaw gumlau ai hte n shawp ai Yerusalem mare hpe de let, npawt nhpang ni lajang tawn da nna, mare bunghku ni hpe shangut wa masai. ¹³ Ya dai mare gaw grin wa nna, bunghku ni ngut wa sayang, shanhte gaw lahkawn, hkanse, akang n bang hkraw nna, hkawhkam ni gaw akyu yawm na ra ai hpe, hkawhkam wa dum chye u ga. ¹⁴ Dai rai nna, anhte gaw htingnu a jum sha ga ai hte, hkawhkam wa arawng sum wa ai hpe n yu lu ga ai majaw, ¹⁵ Ji wa ni a jahpan laika hpe sawk yu yang, ndai mare gaw gumlau chye ai hte hkawhkam ni hte mungdan ni a akyu hpe jahten chye ai mare; moi shawng e shanhte gaw gumlau lau nna, dai mare gaw shaza kau hkrum yu ai lam nang chye lu hkra, anhte ndai lam nang hkawhkam hpe ka dat ga ai. ¹⁶ Ndai mare gaw grin wa ai hte bunghku ni ngut wa jang, nang gaw hka sinna hkran de hpa up na ahkang n lu sana law, ngu nna anhte sakse hkam ga ai, nga nna laika hta rawng nga ai. ¹⁷ Shingrai hkawhkam wa gaw, Mung up ai Rehum yan chyare wa Shimshai hte, Samari mung hte hka sinna hkran de nga ai shan a manang ni hpang de htan ai laika shagun dat nna, Ngwi pyaw nga myit ga law. ¹⁸ Nanhte ngai hpang de shagun dat ai laika, nye a man e dan dan leng leng hti yu sai. ¹⁹ Ngai hkangda nna jahpan laika hpe sawk yu yang, ndai mare gaw moi shawng e hkawhkam ni hpe gumlau ai hte, mung hten nna kashuk kashak lam shapraw chye ai mare; ²⁰ lahkawn, hkanse, akang hta let, hka sinna hkran ting up nna, daru magam kaba ai hkawhkam ni gaw Yerusalem mare e dung nga yu sai lam, chye lu ga ai. ²¹ Dai rai nna, ngai ahkang garai n jaw ai du hkra, shanhte amu tawn da nna dai mare hpe n de lu na lam htawn tsun mu. ²² Ndai lam alawan galaw na sadi mu: hpa majaw hkawhkam ni akyu sum wa ai hkrum na rai ta? ngu mu ai. ²³ Ya hkawhkam Artahkere a laika hpe mung up ai Rehum yan chyare wa Shimshai hte shan a manang ni a man e hti nhtawm, shanhte gaw Yerusalem mare Yuda masha ni hpang de alawan sa nna, shanhte a amu hpe aja awa hkum da mu ai. ²⁴ Shingrai, Yerusalem mare na Karai Kasang a nta hpe n shangut ai tawn da mu ai; Persi hkawhkam Dari hkaw dung ai ni ning du hkra n shangut ai tawn da mu ai.

¹ Dai shaloi e myihtoi Hagi yan Yido a kasha Zehkaria gaw Yuda mung hte Yerusalem mare e nga ai Yuda masha ni hpe htoi ya mu ai rai nna, Israela Karai Kasang a ahkang hte shanhte hpe hkaw dan mu ai. ² Dai rai nna Shelatila kasha Zerubabela yan Yozadak a kasha Yeshua rawt nna, Yerusalem mare e nga ai Karai Kasang a nta hpe galaw hpang ma ai: shan hpe shingtau na matu, Karai Kasang a myihtoi yan mung lawm nga ma ai. ³ Dai shaloi Hka sinna hkran up ai munggyi Tateni yan Shehta-bozenai hte shan a manang ni gaw shanhte hpang de sa du nna, Ndai nta hpe galaw nna, ndai bunghku ni hpe shangut na lam, kadai ahkang jaw a ta? ngu mu ai. ⁴ Dai rai nna anhte gaw ndai nta galaw ai ni a amying hpe sagawn nna, shanhte hpe tsun dan ga ai. ⁵ Raitimung, shanhte a Karai Kasang gaw Yuda agyi salang ni hpe mada yu mu ai rai nna, Dari hpang de laika shagun dat lu nna, shi kaw na nhtang dat ai ga garai n pru pru gaw, dai amu hpe tawn da ma ai n rai. ⁶ Hka sinna hkran up ai munggyi Tateni yan Shehta-bozenai hte shan a manang ni ngu ai, hka sinna hkran de nga ai Ahparsi masha ni gaw hkawhkam Dari hpe laika langai mi shagun dat mu ai. ⁷ Shanhte gaw shi hpang de ning nga ka dat ma ai: Hkawhkam Dari gaw tut ngwi pyaw nga u ga law. ⁸ Anhte gaw Yuda mungdaw na galu kaba re ai Karai Kasang a nta de du nna, ndai nta hpe nlung kaba hte gaw da nna, bunghku ni hta ngau mung mara da nga ai: dai amu hta shanhte shakut sharang nna, dai gaw shanhte a lata hta kaba wa nga ai gaw, hkawhkam wa chye matsing u ga. ⁹ Dai re ai majaw, Ndai nta hpe galaw nna, ndai bunghku ni hpe shangut na lam, kadai ahkang jaw n ta? ngu nna ndai salang ni hpe san yu ai hta n-ga, ¹⁰ ndai masha ni a mying ka nna, nang hpang de jahpan shagun dat lu hkra, shanhte a mying ni san yu mu ai. ¹¹ Shanhte mahtang, Anhte gaw sumsing lamu hte ginding aga a Karai Kasang a mayam ni rai nga ga ai: Israela hkawhkam kaba langai mi moi shawng e galaw shangut da ai nta hpe, ya anhte galaw lajang ga ai. ¹² Anhte a ji wa ni gaw sumsing lamu a Karai Kasang hpe pawt bu shangun ai majaw, shi shanhte hpe Hkaldea mung na Babelon hkawhkam Nebuhkadneza lata hta ap ya nna, shi gaw ndai nta hpe jahten kau ai hte, mung masha ni hpe Babelon mare de woi wa mu ai. ¹³ Raitimung, Babelon hkawhkam Kuru gaw, shi hkaw dung ai shaning hta, ndai Karai Kasang a nta hpe bai galaw na lam, hkangda mu ai. ¹⁴ Nebuhkadneza gaw, Yerusalem mare a nawku Htingnu na shaw la nhtawm, Babelon mare na nawku htingnu hta bang da ai, Karai Kasang a nta hte seng ai aja, gumhpraw arai ni hpe, Kuru hkawhkam gaw Babelon mare a nawku htingnu na shapraw la nna, shi munggyi shatai ai Shebaza a lata hta ap ya let, ¹⁵ Ndai arai ni hpe la wa su; Yerusalem mare na nawku htingnu hta bang da nna, Karai Kasang a nta hpe de a htingra hta de da u, ngu wu ai. ¹⁶ Ndai Shebaza mung sa du nna, Yerusalem mare e nga ai Karai Kasang a nta npawt nhpang ni hpe gaw da wu ai: dai aprat kaw nna ya du hkra ndai nta hpe anhte galaw timung, garai n ngut lu gaw ai, ngu nna htan mu ai. ¹⁷ Dai re ai majaw, hkawhkam wa hkraw n yang gaw, Yerusalem mare hta ndai Karai Kasang a nta hpe galaw na ahkang Kuru hkawhkam jaw da ai kun, Babelon mare na hkawhkam sutdek hta rawng ai jahpan laika ni hpe sawk yu nhtawm, hkawhkam myit ra ai hte maren, anhte hpang de laika shagun dat mi, nga nna laika hta rawng nga ai.

¹ Shaloi Dari hkawhkam a mungga hte shanhte gaw Babelon mare na sutdek hta bang da ai jahpan laika ni hpe sawk yu ma ai. ² Shingrai Medi mungdaw na Akmehta htingnu hta e laika katsu langai mi shanhte mu hkrup mu ai. Dai laika hta, matsing na matu ka da ai ga ni gaw: ³ Kuru hkawhkam hkaw dung ai shaning hta e ning ngu hkang dat wu ai: Yerusalem mare na, shanhte shagu hkungga nawng ya ai shara hta, Karai Kasang a nta hpe bai de da mu ga; de a npawt nhpang ni ngang ngang hkang hkang gaw da mu ga: de a tsaw de dawng kru shi, nda de dawng kru shi rai nna, ⁴ nlung kaba hte lam masum, ngau ningnan hte lam mi, htap mi hte htap mi galaw mu: hkawhkam a sutdek hta na lusha jarit shapraw mu: ⁵ Dai hta kaga, Yerusalem mare a nawku Htingnu na Nebuhkadneza shaw la nhtawm, Babelon mare de la wa ai, Karai Kasang a nta hte seng ai aja gumhpraw arai ni hpe, bai ya nna, langai hte langai hpe, Yerusalem mare na nawku Htingnu de la wa nna, Karai Kasang a nta hta tinang a shara e tawn da mu ga, nga ai. ⁶ Dai re ai majaw, Hka sinna hkran up ai munggyi Tateni yan Shehta-bozenai hte nanhte a manang ni ngu ai, Hka sinna hkran de nga ai Ahparsi masha ni e, nanhte dai shara na tsan wa mu; ⁷ ndai Karai Kasang a nta amu hpe hkum hkum da myit; Yuda masha ni a munggyi wa hte shanhte a agyi salang ni gaw, dai Karai Kasang a nta hpe, de a htingra hta de da mu ga. ⁸ Dai hta n-ga, ndai Karai Kasang a nta hpe galaw da ai Yuda agyi salang ni hpe nanhte kaning rai karum lu na lam, ngai naw hkangda made ga: shanhte hkum da ai n hkrum mu ga, Hka sinna hkran lahkawn la ai hkanse ngu ai hkawhkam a arung arai hta na, shanhte hpe n taw n tsang jaw ya mu ga. ⁹ Sumsing lamu na Karai Kasang hpe ngwi pyaw ai hkungga nawng ya lu nna, shanhte gaw hkawhkam wa hte shi a kashu kasha ni a asak matu akyu hpyi lu hkra, ¹⁰ sumsing lamu na Karai Kasang hpe wan nat hkungga nawng ya na matu, usu uram, sagu la, sagu kasha hpe mung; Yerusalem na hkinjawng ni hkangda ai hte maren, hkaulan mam, ajum, tsabyi jahku, asau hpe mung, shani shagu tut tut jaw ya mu ga. ¹¹ Dai hta kaga ngai naw hkangda made ga: kadai mung dai ga hpe lai kau yang, shi a nta na hpundung baw la nna, dai hta shi hpe noi da mu ga; dai lam a majaw shi a nta mung ngahkyi sumpum tai u ga. ¹² Yerusalem mare e nga ai Karai Kasang a nta hpe jahten na nga shi a lata sharawt ai hkawhkam hte masha amyu kadai hpe mung, dai shara e shi a amying tawn da ai Karai Kasang gaw shanhte hpe jahten kau mu ga. Ngai Dari nan dai lam hkang dat nngai; dai lam alawan galaw u ga, nga nna ka dat wu ai. ¹³ Shaloi jang, Hka sinna hkran up ai munggyi Tateni yan Shehta-bozenai hte shan a manang ni gaw, hkawhkam Dari hkang dat ai hte maren alawan galaw mu ai. ¹⁴ Yuda agyi salang ni mung, myihtoi Hagi yan Yido a kasha Zehkaria hkaw tsun ai ga majaw, dai nta hpe galaw nna awng wa ma ai. Shanhte gaw, Israela Karai Kasang a htet da ai ga majaw mung, Persi hkawhkam Kuru, Dari, Artahkere hkang dat ai ga majaw mung, dai nta hpe galaw shangut mu ai. ¹⁵ Dai nta gaw, hkawhkam Dari hkaw dung ai kru ning na Ada shata masum ya shani e ngut wa sai. ¹⁶ Dai rai nna, Israela kashu kasha ni, hkinjawng Lewi masha ni hte kaga naw rai nga ai bawng lawt ai kashu kasha ni gaw, kabu gara ai myit hte Karai Kasang a nta hpe dingshawn shang ma ai. ¹⁷ Ndai Karai Kasang a nta hta dingshawn shang yang, shanhte gaw usu latsa, sagu la ni tsa, sagu kasha mali tsa hpe mung; Israela amyu shi lahkawng hkan nna, Israela amyu ting a mara raw na hkungga matu, namla latsa hpe mung, nawng ya mu ai. ¹⁸ Mawshe a laika hta ka da nga ai hte maren, Yerusalem e nga ai Karai Kasang hpe dawjau na matu, shanhte gaw hkinjawng ni hpe pang mi hte pang mi, Lewi masha ni hpe tinang a hpung ni hta tawn da mu ai. ¹⁹ Bai bawng lawt ai kashu kasha ni gaw, shata langai a shi mali ya shani e, Shalai wa ai poi hpe galaw mu ai. ²⁰ Kaning rai nme law, hkinjawng ni hte Lewi masha ni gaw tinang hkum hpe rau jasan jaseng ma ai; shanhte nlang sanseng ma ai rai nna, shanhte gaw bawng lawt ai kashu kasha ni mahkra a matu mung, tinang hpunau hkinjawng ni a matu mung, tinang hkum a matu mung, dai Shalai wa ai hkungga hpe sat nawng ya mu ai. ²¹ Bawngdung hkrum ai kaw na bai wa ai Israela kashu kasha ni hte, Israela Karai Kasang Yehowa hpe hkan tam na nga, tinang hkum hpe dai mung na amyu ni a matsat shabat lam koi kau ai ni nlang hte gaw, poi sha nna, ²² kabu gara myit hte sanit ya tup matsi n rawng ai muk poi sha ma ai: kaning rai nme law, Yehowa gaw shanhte hpe kabu shangun nna, Israela Karai Kasang a nta hpe galaw lu hkra, shanhte a lata hpe n-gun shaja ya na nga, Asuri hkawhkam a myit masin hpe shanhte hpang de kayin shangun wu ai.

¹ Ya dai amu ni ngut wa ai hpang, Persi hkawhkam Artahkere hkaw dung ai aprat e, ² hkinjawng agyi Arun, Eleaza, Pineha, Abishua, ³ Buki, Uzi, Zerahia, Meraiot, Azria, Amaria, ⁴ Ahitub, Zadok Shalum, Hilkia, Azaria, Seraia hte kaw na hkrat ai Ezra gaw, ⁵ Babelon mare na lung wa ai: ⁶ dai wa gaw Israela Karai Kasang Yehowa jaw ai, Mawshe a tara laika hta chyare kaba rai nga ai; shi a Karai Kasang Yehowa gaw, shi a matu shadut wu ai hte maren, hkawhkam wa gaw shi hpe hpyi mahpyi jaw wu ai. ⁷ Dai hta kaga Artahkere hkawhkam hkaw dung ai sanit ning hta e, Israela kashu kasha ni, hkinjawng ni, Lewi masha ni, mahkawn mangoi ai ni, chyinghka sin ai ni hte Nehtinim masha nkau mi gaw Yerusalem de hkan lung wa ma ai. ⁸ Ya Ezra gaw, hkawhkam hkaw dung ai sanit ning a shata manga hta Yerusalem mare de du ai. ⁹ Kaning rai nme law, shata langai a shawng shani hta e, Babelon mare na shi pru nna, shi a Karai Kasang hkan nang ai chyeju majaw, shata manga a shawng shani e Yerusalem de du ai. ¹⁰ Ezra chyawm gaw, Yehowa tara hpe hkan shatup na hte, Israela amyu hpe hkangda ai ga hte matsun maroi ga ni hpe sharin achyin ya na nga, myit shatawng da wu ai. ¹¹ Da ndai gaw hkawhkam Artahkere, Yehowa hkangda ai ga hte, Israela masha ni hpe shi a matsun maroi ga sharin ya ai, chyare wa rai nga ai, hkinjawng Ezra hpe jaw dat ai laika rai nga ai: ¹² Hkawhkam ni a hkawhkam Artahkere gaw, sumsing lamu a Karai Kasang a tara chyare wa rai nga ai, hkinjawng Ezra kaw, hkam kaja nga u ga law, ¹³ Ngai nan ning nga hkang dat nngai: nye a mungdan hta nga ai Israela masha hte, shanhte a hkinjawng, Lewi masha kadai mung, Yerusalem mare de bai wa na myit rawng yang, nang hte rau wa u ga. ¹⁴ Kaning rai nme law, nang hkan nang ai, na a Karai Kasang a tara hte maren, Yuda mung Yerusalem mare amu a lam san yu na nga, hkawhkam wa hte shi a agyi salang ni marai sanit nang hpe shangun dat ai hte; ¹⁵ Yerusalem mare shanu nga ai Israela Karai Kasang a matu, hkawhkam wa hte shi a agyi salang ni dingsa myit hte jaw da ai aja gumhpraw hpe mung; ¹⁶ Israela masha ni hte hkinjawng ni gaw, Yerusalem mare e nga ai shanhte a Karai Kasang a nta matu, dingsa myit hte jaw ai kumhpaw kumhpa hte hpawn, Babelon mungdaw ni mahkra hta, nang lu la ai aja gumhpraw mahkra hpe mung, nang gun na ahkang lu ndai majaw, ¹⁷ dai gumhpraw hte usu, sagu la sagu kasha hte hpawn, dai hta lawm ai lusha hkungga, dumhpung hkungga ni hpe alawan mari nna, Yerusalem mare e nga ai nanhte a Karai Kasang a nta na tawn hkungri ntsa e nawng ya lu na myit dai. ¹⁸ Naw ngam ai aja gumhpraw hpe, nang hte na a nhpu nnau ni galaw mayu ai hte maren, nanhte a Karai Kasang myit ra ai hku hkan nna, galaw mu. ¹⁹ Na a Karai Kasang nta a dawjau na amu matu, nang hpe jaw da ai wan ni hpe mung, Yerusalem e nga ai nan a Karai Kasang man e ap ya u. ²⁰ Na a Karai Kasang a nta matu naw lang ra ai arung arai ni hpe, hkawhkam a sutdek hta na shaw nna mari la u. ²¹ Ngai hkawhkam Artahkere nan, Hka sinna hkran aya lu ai sutdek up ai ni nlang hte hpe, ning nga hkang dat nngai: sumsing lamu a Karai Kasang a tara chyare wa, hkinjawng Ezra gaw, nanhte hpe hpyi mahpyi hte maren, ²² gumhpraw joi hkying mi, hkaulan mam dang latsa, tsabyi jahku bat latsa, asau bat latsa hte ajum ra mara du hkra, alawan shapraw jaw mu. ²³ Sumsing lamu a Karai Kasang hkangda ai hte maren, dai Karai Kasang a nta matu azin ayang galaw mu ga: hkawhkam wa hte shi a kashu kasha ni a mungdan ntsa e, hpa majaw pawt bu ai du na rai ta? ²⁴ Dai hta kaga, hkinjawng ni, Lewi masha ni, mahkawn mangoi ai ni, chyinghka sin ai, Nehtinim masha ni hte Karai Kasang a nta amu galaw ai ni langai mi kaw na pyi, lahkawn, hkanse, akang lahkawn la lu na n rai, ngu nna ngai hkang dat nngai. ²⁵ Nang Ezra mung, na a Karai Kasang a nyan hpaji nang hta rawng nga ai hte maren, na a Karai Kasang a tara hpe chye na ai, Hka sinna hkran de nga ai ni mahkra hpe, tara dawdan ya na matu mung, dai hpe garai n chye ai ni hpe, sharin achyin ya na matu mung, du ni hte tara agyi ni hpe san da mu. ²⁶ Na a Karai Kasang a tara hte hkawhkam wa ga hpe tawt lai kau ai ni kadai mung, sat kau ai, mungdan na shapraw kau ai, shi a sutgan magawn la kau ya ai hte, htawng hkrat ai ari, hpa baw raitimung, shi alawan hkrum u ga, nga nna laika hta rawng nga ai. ²⁷ Yerusalem mare e nga ai Yehowa nta hpe shatsawm na matu, hkawhkam wa a myit shadut ya ai hte, hkawhkam wa, shi a agyi salang ni hte daru magam rawng ai hkringmang ni mahkra a man e ngai hpe myiman pa shangun ai, ji wa ni a Karai Kasang Yehowa gaw a nga u ga law. ²⁸ Nye a Karai Kasang Yehowa lata gaw nye a ntsa e nga nga ai majaw, ngai n-gun rawng nga ai rai nna, ngai hte rau lung wa na matu, Israela agyi salang ni hpe hpawng shangun mu ai.

¹ Da ndai gaw hkawhkam Artahkere a aprat e Babelon mare na ngai hte rau lung wa ai dap lakung ni a agyi ni hte shanhte a ahtik labau jahpan laika ni rai nga ai. ² Hpineha aru arat hta na Gershom. Ihtama aru arat hta na Daniela. Dawi a aru arat hta na Hatu. ³ Shehkani amyu Paru aru arat hta na, Zehkari hte, jahpan hta lawm ai lasha latsa e manga shi: ⁴ Pahat-moba aru arat hta na Zerahia kasha Elihonai hte lasha ni tsa; ⁵ Shehkani aru arat hta na, Yahaziela kasha hte lasha masum tsa; ⁶ Adin a aru arat hta na Yonahtan a kasha Ebed hte lasha manga shi; ⁷ Elam aru arat hta na Ahtalia kasha Yeshaia hte lasha sanit shi: ⁸ Shehpatia aru arat hta na, Mihkaela kasha Zebadi hte lasha matsat shi; ⁹ Yoab a aru arat hta na Yehiela kasha Obadia hte lasha ni tsa e shi matsat; ¹⁰ Shelomit aru arat hta na Yosihpi kasha hte lasha latsa kru shi: ¹¹ Bebai a aru arat hta na, Bebai a kasha Zehkaria hte lasha hkun matsat; ¹² Azga aru arat hta na, Hakatan a kasha Yohanan hte lasha latsa e shi, lawm ma ai. ¹³ Adonikam a kashu kasha ni gaw hpang jahtum ai ni rai nga ma ai: shanhte a amying ni Elihpelet, Yeuela, Shemaia rai nga ma ai; shanhte hte rau lasha kru shi lawm ma ai. ¹⁴ Bigwai a kashu kasha ni hta na, Uhtai yan Zabu hte, lasha sanit shi rai ma ai. ¹⁵ Shaloi Ahawa shara de lwi hkrat wa ai hka kau e ngai shanhte hpe zuphpawng shangun nna, anhte gaw dai yang e masum ya tup nga nga ga ai; shara e yu maya masha ni hte hkinjawng ni hpe mada yu yang, Lewi masha langai mi muk, n mu hkrup we ai. ¹⁶ Dai rai nna agyi ni ngu ai, Elieze, Ariela, Shemaia, Elnahtan, Jarib, Elnahtan, Nahtan, Zehkaria hte Meshulam hpe mung, sara rai nga ai Yoiarib yan Elnahtan hpe mung, ngai shaga la nna, ¹⁷ Hkasihpi mare agyi Ido hpang de shangun dat mu ai; Hkasihpi mare e nga ai, Ido hte shi a kahpu kanau Nehtinim masha ni gaw, anhte a Karai Kasang a nta amu matu, anhte kaw shangun ma shaga la na, shanhte hpe kaning ngu tsun na, ngai htet dat nngai. ¹⁸ Ya Karai Kasang a chyeju anhte hte rau rai nga ai majaw, shanhte gaw, Israela, Lewi hte Mali dap lakung ni a nyan rawng ai wa langai mi hte rau, ¹⁹ Sherebia hte shi a kashu kasha, kahpu kanau marai shi matsat; Merari a aru arat hta na Hashabia yan Yeshaia hte shi a kahpu kanau ni hte shanhte a kashu kasha ni, marai hkun; ²⁰ Lewi masha ni hpe karum tau na matu, Dawi hte agyi salang ni jaw da ai Nehtinim masha ni tsa e hkun shaga wa mu ai; shanhte nlang hte gaw jahpan hta mying lawm ai ni rai nga ma ai. ²¹ Shaloi e, anhte a Karai Kasang man e anhte myit nem lu nna, anhte a matu mung, anhte a ma kaji ni hte anhte lu ai arung arai mahkra a matu mung, malang pyaw ai lam shi hpe akyu hpyi na matu, Ahawa hka kau e lusha gam na aten, ngai hkangda nngai, ²² Kaning rai nme law, anhte a Karai Kasang a lata gaw, shi hpe hkan tam ai ni hpe karum na ra ai: shi hpe kau da ai ni a ntsa e shi a atsam hte pawt sindawng ai du na ra ai, ngu nna hkawhkam wa hpe anhte tsun da ai majaw, lam e anhte hpe hpyen ai ni a lata na makawp maga na matu, hkawhkam wa kaw sin langa hpyi na, ngai n wam ai kaya nga nngai. ²³ Shingrai anhte lusha gam let, dai lam anhte a Karai Kasang hpe akyu hpyi nga ga ai: Karai Kasang mung anhte hpe madat mara ya nga ai. ²⁴ Dai shaloi e hkinjawng agyi shi lahkawng ngu na, Sherebia yan Hashabia hte shan a kahpu kanau shi hte hpe ngai san da nna, ²⁵ hkawhkam wa hte shi a hpaji daw ai ni, agyi salang ni hte dai yang e nga ai Israela masha ni nlang, Karai Kasang a nta matu jaw ai aja gumhpraw arung arai ni hpe ngai shen nna shanhte a lata hta ap ya nme ai. ²⁶ Shanhte a lata hta ngai ap ya ai gaw gumhpraw joi hkying kru e manga; gumhpraw gawm joi latsa; aja joi latsa; ²⁷ ja gawm hkun; aja den-ga hkying mi; aja hte maren hpu nna jet tsawm ai magri gawm lahkawng rai nga ai. ²⁸ Bai ngai shanhte hpe, Nanhte gaw Yehowa matu chyoi pra nga myit dai; wan ni mung chyoi pra nga ma ai; aja gumhpraw gaw, nanhte a nji nwa ni a Karai Kasang Yehowa hpe dingsa myit hte jaw ai kumhpa rai nga ai. ²⁹ Yerusalem mare na Yehowa nta gawk kata e, hkinjawng agyi ni, Lewi masha ni hte Israela amyu a dap lakung agyi ni a man e dai hpe shen yu ai shani du hkra, maja let naw sin yu nga mu ngu nna hkangda mu ai. ³⁰ Shingrai shen yu ai aja gumhpraw arung arai ni hpe, Yerusalem e nga ai, anhte a Karai Kasang a nta de la wa na nga, hkinjawng ni hte Lewi masha ni hkap la mu ai. ³¹ Dai hpang anhte gaw, Yerusalem mare de lung wa na nga, shata langai a shi mali ya shani e Ahawa hka kau na pru wa ga ai anhte a Karai Kasang a lata anhte a ntsa e nga nga ai rai nna, lam hkan e makoi nga ai hpyen ni a lata na anhte hpe mawai la mi ai. ³² Shingrai anhte gaw Yerusalem mare de du ga ai rai nna, dai yang e masum ya but nga ga ai. ³³ Mali ya ngu na hta, hkinjawng Uria kasha Meremot, Hpineha kasha Eleaza hte Lewi masha Yeshua kasha Yozaba, Binui a kasha Nodi a lata hte, anhte a Karai Kasang nta kata e, ³⁴ dai aja gumhpraw arung arai ni hpe shen yu nna, dai shani jang, de a nambat hte gade li ai, jahpan laika hta ka matsing da mu ai. ³⁵ Dai hta kaga, bawngdung kaw na pru wa lu ai, bawng lawt ai kashu kasha ni gaw, Israela amyu ting a matu, usu shi lahkawng sagu la jahku shi kru, sagu kasha sanit shi sanit; mara raw na hkungga matu, namla shi lahkawng hte Israela Karai Kasang hpe wan nat hkungga nawng ya mu ai: dai nlang hte gaw, Yehowa matu wan nat hkungga rai nga ai. ³⁶ Bai shanhte gaw, hkawhkam wa hkang dat ai ga hpe, hkawhkam a hkringmang ni hte, Hka sinna hkran na munggyi ni hpe ap ya mu ai rai nna, shanhte gaw dai amyu hpe mung, Karai Kasang a nta hpe mung, awng wa lu hkra, lanu lahku ya mu ai.

¹ Ya dai amu ni ngut wa ai hpang, agyi salang ni ngai hpang de sit sa nna, Israela masha ni, hkinjawng ni, Lewi masha ni gaw, ndai mung ni e de nga ai amyu masha ni hta, tinang hkum hpe n daw n hka ai sha, Hkanan, Hiti, Perizi, Yebusi, Ammon, Moba, Egutu hte Amori masha ni a matsat shabat lam shagu hte maren hkan galaw nga ma ai. ² Kaning rai nme law, dai amyu masha ni a shayi sha ni hpe, tinang a matu mung, kashu kasha ni a matu mung, shanhte hkungran la nna, dai chyoi pra ai amyu gaw, maigan amyu ni hte kayau kaya nga ai hta n-ga, mung du ni hte agyi salang ni, grau nna dai lam hta shut hpyit nga ma ai, nga nna ngai hpe tsun dan mi ai. ³ Dai lam hpe ngai na jang, nye a palawng hte lawai ai nba hpe ngai gang je kau nna, kara hte nhka mun ni hpe baw kau ai hte, myit mak let dung nga nngai. ⁴ Shaloi bawngdung hkrum ai ni a yubak majaw, Israela Karai Kasang a mungga hpe hkrit kamyin ai ni nlang hte gaw, nye a man e hpawng nga nna, ngai gaw shana na dumhpung hkungga jaw na aten du hkra, myit mak let dung nga nngai. ⁵ Ya shana na dumhpung hkungga jaw na aten du jang, nye a myit yawn ai kaw na ngai rawt nna, palawng hte lawai ai nba shaje hte lahput hput di let, nye a Karai Kasang Yehowa man e nye a lata ladawn nna, ⁶ Nye a Karai Kasang e, anhte a yubak gaw baw lim hkra law nga nna, anhte a mara gaw sumsing lamu dep nga ai majaw, nye a Karai Kasang a man e nye a myiman sharawt mada yu na, ngai hkrit kaya ai hte myiman sum nga nngai. ⁷ Anhte a ji wa ni a aprat kaw nna, dai ni du hkra, anhte mara nachying wa kap saga ai: anhte tawt lai kau ai amu majaw, dai ni hkrum nga ai zawn, anhte mung, anhte a hkawhkam ni hte hkinjawng ni gaw, ri nhtu, bawng rim wa ai, hpya lu hpya sha ai hte myiman sum ai hkrum sha na matu, maigan mungdan hkawhkam ni a lata hta ap kau ai hkrum ma ai. ⁸ Ya hkring mi sha, anhte a Karai Kasang gaw, anhte a myi hpe jahtoi ya lu nna, anhte a bawngdung ai hta nsa kachyi mi awai la lu hkra, Karai Kasang Yehowa gaw naw ngam nga ai shanglawt ni hte, shi a chyoi pra ai shara hta noi mai na chyinghkyi, chyeju myit hte, anhte hpe jaw da mani ai. ⁹ Anhte gaw mayam rai nga ga ai: raitimung, anhte a Karai Kasang gaw, mayam amu hta, anhte hpe kau da mi ai n rai: anhte hpe bran shangun na hte, anhte a Karai Kasang a nta hpe galaw lu nna, de a marawng marang ni bai yu lajang na mung, Yuda mung hte Yerusalem mare hta bunghku naw sharawt lu na mung, shi gaw, chyeju myit hte, anhte hpe Persi hkawhkam a man e myiman pa shangun mi ai. ¹⁰ Ya chyawm gaw, anhte a Karai Kasang e, anhte hpa naw tsun lu na ga ta? Nang mahtang, Nanhte sa madu lu na mungdan gaw, ¹¹ masha ni a n san n seng ai hte, maga mi hte maga mi de hpring chyat rai nga ai matsat shabat amu majaw, awu asin re ai mungdan rai nga ai rai nna, ¹² nanhte a shayi sha ni hpe shanhte a shadang sha ni hte, shanhte a shayi sha ni hpe nanhte a shadang sha ni hte, hkum ya sha myit; nanhte n-gun ja lu na hte, dai mungdan a ngamai na hpe lusha lu nna, nanhte a kashu kasha ni hpe prat dingsa du hkra madu lu shangun na matu, shanhte a ngwi pyaw ai hte ngamu ngamai ai lam galoi mung hkum tam myit, nga nna na a shangun ma myihtoi ni a n-gup hta nang hkangda ai ga hpe, anhte kau da sagaw ai. ¹³ Ya raitimung, anhte a n shawp ai amu hte kaba la ai yubak majaw, anhte hkrum sha ai ari hpe yu yang, anhte ram ging ai daram nang anhte hpe ari n jaw ninglen ¹⁴ na a hkang dat ai ga hpe anhte bai tawt lai nna, matsat shabat lam hkan nang ai amyu ni a amu hpe bai hkan galaw yang, langai mi pyi n ngam n lawt hkra, anhte hpe ari jaw na n rai ni? ¹⁵ Israela Karai Kasang Yehowa e, nang gaw dingman rai nga ndai; anhte gaw, dai ni mu ai hte maren, asak lawt nna ngam nga ai ni rai nga ga ai: yu u, anhte hta yubak kap let, na a man e anhte rai nga ga ai: dai yubak majaw na a man e kadai mung tsap nga lu ai n rai, ngu nna tawngban wu ai.

¹ Ya Ezra gaw Karai Kasang a nta ndaw e, hkum dagup nna myi prwi pru let akyu hpyi tawngban nga yang, Israela masha wunawng wuwa kaba numsha, lasha, ma kaji law law wa, shi hpang de sa hpawng nna, ja ja hkrapngu hkrapngoi nga ma ai. ² Shaloi Elam a dap lakung na, Yehiela kasha Shehkania gaw Ezra hpe, Anhte gaw ndai mung na maigan amyu ni a shayi sha ni hpe hkungran la ai hte, anhte a Karai Kasang hpe shut kau sagaw ai: raitimung, ndai amu hta, Israela masha ni a matu myit mada shara naw nga ai. ³ Dai re ai majaw, nang madu mung, anhte a Karai Kasang a hkangda ai ga hpe hkrit kamyin ai ni mung, anhte hpe hpaji daw ya ai hte maren, anhte a kasha kanu ni mahkra hte shanhte shaprat ai kashu kasha ni hpe kau tawn da na matu, anhte a Karai Kasang a man e ga shaka tawn da ga: dai hpe tara hte maren galaw ga. ⁴ Rawt u, dai amu nang hte seng nga ai anhte nang hte myit langai sha rai nga ga ai: dating dakan rai let dai lam galaw u, ngu nna htan wu ai. ⁵ Shaloi Ezra rawt nna, hkinjawng ni a agyi ni, Lewi masha ni hte Israela masha ni yawng, dai ga hte maren hkan galaw na nga, shanhte hpe dagam shangun mu ai. Shanhte mung dagam ma ai. ⁶ Dai hpang Ezra gaw, Karai Kasang nta ndaw na rawt nhtawm, Eliashiba kasha Yehohana gawk hta shang wa ai; dai de du jang muk mung n sha, ntsin mung n lu ai nga nga ai; kaning rai nme law, bawng lawt ai ni a shut hpyit ai a majaw shi yawn madai nga ai. ⁷ Dai rai nna shanhte gaw, Yuda mung hte Yerusalem mare hproi hkra, Bawng lawt ai kashu kasha ni nlang hte gaw, Yerusalem mare e hpawng nga na matu; ⁸ du ni hte agyi salang ni hpaji daw ai hte maren masum ya laman e n du ai wa kadai hpe, shi lu malu sum wa na hte, shi hkum nan bawng lawt ai ni a hpung na shapraw kau ai hkrum na ra ai, ngu nna htet da ai ga shabra dat mu ai. ⁹ Dai re ai majaw Yuda hte Ben-yamin mung na lasha ni nlang hte gaw, masum ya laman e Yerusalem mare hta zuphpawng nga nna, shata jahku a hkun ya shani hta e, mung masha ni nlang hte gaw, Karai Kasang a nta dam lada ai ndaw e dung nga let, dai amu a majaw mung, marang kaba htu ai majaw mung, kari kawa rai nga ma ai. ¹⁰ Shaloi hkinjawng Ezra rawt nna, Nanhte shut hpyit nna, Israela yubak shalaw ai du hkra, maigan amyu num ni hpe hkungran la manu hka. ¹¹ Dai re ai majaw, nanhte a nji nwa ni a Karai Kasang Yehowa hpe yubak tawngban nna, shi ra ai lam hkan galaw mu: dai mung na amyu ni hta, maigan amyu num ni hpe jahka kau mu, ngu nna shanhte hpe tsun mu ai. ¹² Shaloi dai shawa hpung ting, nsen kaba langai sha hte htan nna, Nang anhte hpe tsun dan ai hte maren anhte galaw na ga ai: ¹³ raitimung, masha ni law nga ma ai, marang mung grai htu nga ai, nta shinggan de n tsap nga lu ga ai; dai amu gaw lani ni ni sha ngut wa lu na n rai; anhte dai lam hta grai wa shut saga ai. ¹⁴ Dai re ai majaw, amyu ting a matu, anhte a du ni hpe lata san da nna, tinang a mare kahtawng shagu hta maigan num la ai ni gaw, madat da ai aten hta, mare kahtawng na agyi salang ni hte tara agyi ni hte rau sa du nna, anhte a Karai Kasang a pawt sindawng ai myit hpe shakawp ya ai du hkra, shanhte gaw dai amu hpe dawdan mu ga, ngu mu ai. ¹⁵ Asahela kasha Yonahtan yan Tikwa kasha Yazeia chyawm gaw dai lam hpe n hkraw ma ai; Meshulam yan Lewi masha Shabehtai mung, shan hte myit hkrum ma ai. ¹⁶ Bawng lawt ai kashu kasha ni gaw, dai lam yin la ma ai hte maren, hkinjawng Ezra gaw kaji kawa ni a dap lakung hkan nna, agyi nkau mi hpe lata la mu ai hte, shanhte a amying matsing da nna, san da mu ai. Shanhte gaw dai amu hpe jeyang na matu, shata shi a shawng shani e dung nga ma ai: ¹⁷ maigan num hkungran la ai ni mahkra hpe, shata langai a shawng shani e, jeyang shangut mu ai. ¹⁸ Ya, hkinjawng kashu kasha ni hta, maigan num la ai ni gaw, Yeshua dap na Yozadak a kasha hte shi a kanau ni Maseia, Elieze, Yarib, Gedalia hte rai ma ai. ¹⁹ Shanhte gaw tinang a kasha kanu ni hpe jahka kau na nga, ga sadi tawn da nna, yubak kap ai majaw, mara raw hkungga matu sagu la langai mi nawng ya mu ai. ²⁰ Bai, Imera kashu kasha ni hta na, Hanani yan Zebadi; ²¹ Harim a kashu kasha ni hta na, Masia, Elia, Shemaia, Yehiela, Uzia; ²² Pashura kashu kasha ni hta na, Elionai, Masia, Ishmaela, Nehtanela, Yozaba, Elasa hte rai ma ai. ²³ Bai, Lewi masha ni hta na, Yozaba, Shimei, Kelaia ngu ai Kelita, Pehtahia, Yuda, Elieze hte rai ma ai. ²⁴ Bai, mahkawn mangoi chye ai ni hta na, Eliaslib; chyinghka sin ai ni hta na Shalum, Telem, Uri hte rai ma ai. ²⁵ Bai Israela amyu hta na yu maya masha ni gaw: Parosha kashu kasha ni hta na, Ramia, Izia, Malhkia, Mijamin, Eleaza, Malhkia, Benaia hte rai ma ai. ²⁶ Elam a kashu kasha ni hta na, Matania, Zehkaria, Yehiela, Abdi, Yeremot, Elia hte rai ma ai. ²⁷ Zatu a kashu kasha ni hta na, Elionai, Ehashab, Matania, Yeremot, Zabad, Aziza hte rai ma ai. ²⁸ Bebai a kashu kasha ni hta na, Yehohanan, Hanania, Zabai, Atlai hte rai ma ai. ²⁹ Bani a kashu kasha ni hta na, Meshulam, Maluk, Adaia, Yashub, Sheala, Yeremot hte rai ma ai. ³⁰ Pahat-moba kashu kasha ni hta na, Adna, Hkela, Benaia, Maseia, Matania, Bezalela, Binui, Manase hte rai ma ai. ³¹ Harim a kashu kasha ni hta na, Ebeze, Ishiya, Malhkia, Shemaia Shimeon, ³² Ben-yamin, Maluk, Shemaria hte rai ma ai. ³³ Hashum a kashu kasha ni hta na, Matenai, Matata, Zaba, Eliphelet, Yeremai, Manashe, Shime hte rai ma ai. ³⁴ Bani a kashu kasha ni hta na, Madai, Amram, Uela, ³⁵ Benaia, Bedia, Hkelu, ³⁶ Wania, Meremot, Eliashib, ³⁷ Matania, Matenai, Yasu, ³⁸ Bani, Binui, Shime ³⁹ Shelemia, Nahtan, Adaia, ⁴⁰ Maknadebai, Shashai, Sharai, ⁴¹ Azarela, Shelemia, Shemaria, ⁴² Shalum, Amaria, Yosep hte rai ma ai. ⁴³ Nebo a kashu kasha ni hta na, Yeiela, Matihtia, Zaba, Zebina, Ido, Yoela, Benaia hte rai ma ai. ⁴⁴ Dai ni nlang hte gaw maigan num ni hpe hkungran la ma ai; shanhte a numsha ni nkau mi mung, kashu kasha shaprat ma ai.