EZEKELA

EZEKELA

¹ Ya sumshi ning ngu na hta, shata mali a manga ya shani e, Hkebara hka kau e bawngdung ai ni hte rau ngai nga nga yang, sumsing lamu hpaw malang wa nna, Karai Kasang a shingran hpe ngai mu nngai. ² - ³ Gaja wa, hkawhkam Yehoiahkin bawngdung ai, manga ning hta na shata mali a manga ya shani e, Hkalde mung na Hkebara hka kau e, Yehowa mungga gaw, Buzi a kasha, hkinjawng Ezekela hpang de du nna, Yehowa a lata gaw, dai yang e, shi a ntsa e nga nga ai. ⁴ Ya ngai mada yu yang, yu u, ja ai nbung, sumwi kaba hte grupyin htoi gala ai wan dingsen, dingdung maga de na dawng pru nga ai: de a ka-ang na wan kata de na kung byawng abya htoi tu nga ai. ⁵ Dai kata de na, dusat nsan ai mali dawng pru nga ai: dai ni a gawng shing-yan gaw, shinggyim masha a gawng shing-yan hte bung nga ai. ⁶ Langai hte langai myiman mali li, bai langai hte langai singkaw mali li tu ma ai. ⁷ Shanhte a lagaw ni gaw, malang ai lagaw rai nga ai; de a lahpan ni gaw, dumsu kasha a lahkru zawn rai nna, htoi kabrim ai magri zawn tu ala nga ai. ⁸ Hkum man mali a singkaw npu e, masha lata tu nga ai; dai dusat mali a myiman hte singkaw ni gaw ning rai nga ai: ⁹ singkaw ni shada matut ma ai; hkawm wa yang shanhte kayin ra ai, n rai; langai hte langai myiman ang ang hkawm wa ma ai. ¹⁰ Dai mali gaw, myiman maga de, masha myiman, hkra maga de hkanghkyi myiman, pai maga de usu myiman tu nna, dai mali gaw langda myiman mung tu ma ai. ¹¹ Bai shanhte a myiman hte singkaw ni gaw, baw daw de karan nga ai: langai hte langai a singkaw lahkawng shada matut nna, lahkawng hte tinang hkum hpe ka-up nga ma ai. ¹² Shanhte langai hte langai myiman ang ang hkawm wa ma ai; wenyi hkawm mayu ai hte maren, shanhte hkawm wa ma ai; hkawm wa ma yang shanhte kayin ra ai n rai. ¹³ Bai dai dusat ni a ahpraw nsam gaw, grung nga ai wan n-ga hte htoi tu ai shanan zawn rai nga ai; dai wan gaw dusat ni a ka-ang e lung wa yu wa rai nga ai; dai hta n-ga dai wan gaw, htoi kabrim nga ai hte, de a kata de na myihprap gala nga ai. ¹⁴ Dai dusat ni gaw, myihprap gala ai zawn gat sa nna nhtang wa ma ai. ¹⁵ Ya dai dusat ni hpe ngai mada yu yang, yu u, langai hte langai a myiman mali ang ang, ga ntsa e mara ai leng dingsen ngai mu nngai. ¹⁶ Dai leng dingsen ni ahpraw nsam hte maka ka ai gaw, mek-yoi lungseng hte bung nga ai; dai mali gaw maren rai nga ai: de a hkrang hte shachyaw ai gaw, dingsen kata e dingsen chyai ai zawn rai nga ai. ¹⁷ Dai ni hkawm wa yang, de a man mali ang ang hkawm nna, kayin ra ai n rai. ¹⁸ De a leng hkawp ni mung grai tsaw ai hte hkrithpa rai nga ai; dai leng hkawp mali a grupyin e myi hkrai hpring nga ai. ¹⁹ Dai dusat ni hkawm wa yang, leng dingsen ni mung shanhte a makau e chyai nga ma ai; dusat ni gaw ga hte hka nna lung wa yang, dingsen ni mung lung wa ma ai. ²⁰ Wenyi hkawm ai hte maren shanhte hkan hkawm ma ai; dai gaw wenyi hkawm ai lam rai nga ai; dingsen ni mung shanhte hte htep hkan lung nang ma ai: kaning rai nme law, dusat ni a wenyi gaw, dingsen ni hta rawng nga ai. ²¹ Shanhte sa wa yang, dingsen ni sa wa ma ai; shanhte hkring yang, dingsen ni mung hkring nga ma ai; shanhte ga hte hka nna lung wa yang, dingsen ni mung shanhte hte htep hkan lung wa ma ai: kaning rai nme law, dusat ni a wenyi gaw dingsen ni hta rawng nga ai. ²² Dai dusat ni a baw ntsa e, hkrit na nsan ai, pat zawn re ai lamu madin din nga ai. ²³ Dai lamu madin npu e shanhte a singkaw langai hpang de langai, ang ang kahpyen nga ai: langai hte langai gaw tinang hkum hpe ka-up na matu, ndai maga de singkaw man mi, wora maga de man mi, tu nga ai. ²⁴ Shanhte hkawm wa yang, shanhte a singkaw ngoi ai gaw, nammukdara nsen zawn, N-gun Chyalai rawng ai wa a nsen hte, hpyen luksuk ni a nsen zawn wu kadu ai hpe ngai na nngai: shanhte tsap nga yang, tinang singkaw hpe jahkrat ma ai. ²⁵ Bai, shanhte a baw ntsa, lamu madin kata na, nsen ngoi pru nga ai: shanhte tsap nga yang, tinang singkaw hpe jahkrat ma ai. ²⁶ Bai shanhte a baw lahta tsang, lamu madin ntsa e, nila lungseng nsan ai tingnyang hkrang dawng pru nga ai: dai tingnyang hkrang ntsa e mung, masha hkrang nsan ai wa langai mi dawng pru nga ai. ²⁷ Dai tingnyang kata e mung, grupyin e mung, dai wa a nshang kaw nna baw daw de, byawng mat ai kung zawn tu ala ai wan hpe, ngai mu nngai: bai, shi a nshang kaw nna lagaw daw de, wan nsan ai ngai mu nna, shi a grupyin e htoi kabrim nga ai. ²⁸ Shingrai grupyin htoi kabrim ai gaw, marang htu ai shani e sumwi ni hta dan ai n-goilatum hte bung nga ai. Da ndai gaw, Yehowa a hpung shingkang danhkung ai ahpraw nsam rai nga ai. Dai shingran hpe mu yang, ngai gum dagup nngai; shaloi ngai hpe shaga ai nsen ngai na nngai.

¹ Ngai hpe shaga ai wa gaw, Masha kasha e, jan rai tsap u; ngai nang hpe ga tsun na de ai, nga ai. ² Shing nga ngai hpe tsun yang, Wenyi ngai hta shang nna, shi ngai hpe tsap shangun nngai: ngai hte tsun ai wa a ga mung, ngai na nngai. ³ Shaloi shi gaw, Masha kasha e, ngai hpe gumlau ai amyu ngu ai, dai ni du hkra kaji kawa ni hte hpawn ngai hpe tut gumlau nna, shut hpyit nga ai Israela kashu kasha ni hpang de ngai nang hpe shangun dat na nngai. ⁴ Kashu kasha ni mung n kaw n law hte myit ja ai ni rai nga ma ai: ngai nang hpe shanhte hpang de shangun nna, nang gaw, Madu Yehowa ning nga ai, ngu nna shanhte hpe tsun mu. ⁵ Shanhte gaw gumlau ai amyu rai nga nna, madat timung, n madat timung, tinang hta myihtoi nga nga ai hpe, shanhte chye lu na mara ai. ⁶ Nang mung, masha kasha e, ju hpun hte tsamat hkrum nna, n-gawgawk hte shanu nga timung, shanhte hpe hkum hkrit, shanhte a ga hpe hkum kamang et; shanhte gumlau ai amyu rai nga timung, shanhte a ga hpe hkum hkrit, shanhte a n yawt ai myiman hpe hkum mak mat et. ⁷ Shanhte grai gumlau ai ni rai nga nna, madat timung, n madat timung, nang shanhte hpe nye a ga tsun dan na rai ndai. ⁸ Nang mahtang, masha kasha e, ngai tsun ai ga madat u; dai gumlau ai amyu zawn, gumlau myit hkum rawng et; na a n-gup mahka nna, ngai jaw ai hpe sha u, nga ai. ⁹ Ya ngai mada yu yang, yu u, laika katsu lang ai lata ngai hpang de ladawn nga ai: ¹⁰ shi dai laika katsu hpe nye a man e hpyan yang, dai man lahkawng hta, sharung shayawt ai yawnhkyen ai hte dingye ga hpring nga ai.

¹ Bai shi gaw, Masha kasha e, nang mu ai hpe sha u; ndai laika katsu hpe sha nna, Israela amyu masha ni hpe sa hkaw tsun u, nga nna ngai hpe tsun ai. ² Shingrai ngai n-gup mahka nna, shi dai laika katsu ngai hpe sha shangun nngai. ³ Shaloi shi gaw, Masha kasha e, ngai nang hpe jaw ai ndai laika katsu hpe sha kau nna, na a kan hpe jahpring u, nga nna tsun ai hte maren ngai sha nngai: dai gaw nye a n-gup hta e lagat jahku zawn dwi nga ai. ⁴ Bai shi gaw, Masha kasha e, Israela masha ni hpang de pru sa nna, nye a ga shanhte hpe hkaw tsun mu. ⁵ Ga tsasam hte, chye na yak ai ga tsun ai amyu hpang de, ngai nang hpe shangun dat ai, n rai: Israela amyu hpang de sha shangun dat nngai: ⁶ ga tsasam hte chye na yak ai majaw nang n chye na lu ai ga tsun ai amyu baw ni hpang de, ngai nang hpe n shangun dat nngai: gaja wa, nang hpe shanhte hpang de shangun dat yang, shanhte gaw na a ga hpe madat na mara ai. ⁷ Israela amyu chyawm gaw, na a ga hpe madat na n rai; nye a ga hpe pyi n madat ma ai; Israela amyu ting, man htat ai hte myit ja ai amyu rai nga ai. ⁸ Yu u, shanhte a myiman htat ai majaw, na a myiman hpe ngai htat shangun nngai, shanhte a lahtan ja ai majaw, na a lahtan hpe ngai shaja ni ai. ⁹ Ngai na a lahtan hpe nhpai lung hta grau nna shaja ni ai: shanhte gumlau ai amyu rai nga timung, shanhte hpe hkum hkrit, shanhte n yawt ai myiman majaw hkum mak mat et, nga ai. ¹⁰ Bai shi gaw, Masha kasha e, ngai nang hpe tsun na ra de ai ga mahkra, madat mara nna, hkaw lawang hta matsing da u. ¹¹ Bawngdung hkrum ai, na a baw sang ni hpang de sa nhtawm, Madu Yehowa ning nga ai, ngu nna, shanhte madat timung, n madat timung, hkaw tsun u, nga nna ngai hpe tsun ai. ¹² Shaloi Wenyi gaw ngai hpe pawn nna, nye a shingdu de, “Yehowa a hpung shingkang, shi a shara hta e a nga u ga law,” nga nna wu kadu ai nsen kaba, ngai na nngai. ¹³ Bai, langai hte langai matut nga ai dusat ni a singkaw wu ngoi ai hpe mung, shanhte a makau na leng dingsen wu ngoi ai hpe mung, grai wa ngoi kadu ai hpe ngai na nngai. ¹⁴ Shingrai Wenyi gaw ngai hpe pawn mat wa nna, ngai gaw myit ru ai hte nye a wenyi kahtet let hkan nang nngai; Yehowa a lata gaw nye a ntsa e li nga ai. ¹⁵ Shaloi ngai gaw, bawngdung hkrum nna, Hkebara hka kau, Telabiba shara e shanu nga ai ni hpang de sa du nna, dai yang e sanit ya tup mau mat let dung nga nngai. ¹⁶ - ¹⁷ Ya, sanit ya lai yang, Yehowa a mungga ngai kaw du nna, Masha kasha e, ngai gaw Israela amyu hta nang hpe sin langa shatai nngai; dai re ai majaw nye a n-gup ga madat nna, shanhte hpe htawn tsun u. ¹⁸ Ngai gaw tara n lang ai wa hpe, Nang teng teng si na ndai, nga nna shi hpe tsun ninglen, nang shi hpe n shadum, tara n lang ai wa asak lawt na matu, nang shi hpe lam madun ai ga n tsun ai nga yang, dai tara n lang ai wa gaw, tinang a yubak hta si wa na ra ai: shi a asai chyawm gaw, na a lata na ngai hpyi la na nngai. ¹⁹ Shing n rai, tara n lang ai wa hpe nang shadum ninglen, shi gaw tinang shut hpyit ai hte n hkru ai lam hpe n koi kau yang, dai wa gaw tinang a yubak hta si na ra ai: nang chyawm gaw, na a asak hpe hkrang la nu ai. ²⁰ Bai, dinghpring ai wa gaw htak mat nna, dinghpring ai lam yit kau ai hte shut hpyit nga yang, ngai gaw shi a man e ahtu kataw shara tawn da nna, shi si na ra ai; nang shi hpe n shadum ai majaw, dai wa gaw tinang a yubak hta si na ra ai; shi galaw yu ai dinghpring ai amu hpe nawn na n rai: shi a asai hpe chyawm gaw, na a lata na ngai hpyi la na nngai. ²¹ Shing n rai, dinghpring ai wa gaw yubak n galaw hkra, nang shi hpe shadum shahprang nga ai rai yang, shadum shahprang ai ga madat ai majaw, shi teng teng hkrung nga na ra ai; nang mung na a asak hpe hkrang la nu ai, nga ai. ²² Bai Yehowa a lata nye a ntsa e mara nga nna, shi gaw, Rawt u, pa ga de sa wa su; dai yang e ngai nang hpe ga tsun na de ai, nga ai. ²³ Shaloi ngai rawt nna, pa ga de sa wa nngai: dai de du yang, yu u, Hkebara hka kau e, ngai mu yu ai Yehowa a hpung shingkang gaw, dai yang e danhkung nga ai hpe, ngai mu nna, ngai gaw myiman gum dagup nngai. ²⁴ Wenyi mung ngai hta shang nna, ngai hpe jan rai shatsap nngai: bai shi gaw ngai hpe ga tsun nna, Sa wa su, na a nta hta arawng nga u. ²⁵ Nang, masha kasha e, yu u, shanhte nang hpe rim la nna, sumri hte gyit hkang hkrum ai majaw, nang shanhte hta kawan hkawm lu na n rai: ²⁶ nang shanhte hpe n sharin nga lu hkra, nang maa mat nna, na a shinglet hpe gumra hta kap mat shangun na nngai; kaning rai nme law, shanhte gaw gumlau ai amyu rai nga ma ai. ²⁷ Raitimung, ngai nang hpe ga tsun yang na a n-gup hpe ngai hpaw nna, nang gaw, Madu Yehowa ning nga ai, ngu nna shanhte hpe hkaw tsun na rai ndai: madat ai wa gaw madat u ga, n madat ai wa gaw n madat nga u ga; shanhte gaw gumlau ai amyu rai nga ma ai, nga ai.

¹ Nang mung, masha kasha e, wut pa la nna, na a man e tawn da nhtawm, Yerusalem mare sumla hpe tawk ka u: ² dai mare hpe wang tawn u; de a man e dap jung u, kaduk htu mu; hpyen masha ni de a man e but nga nna, grupyin e bunghku sharun ai gawng tawn da mu. ³ Dai hta kaga hpri pa la nna, nang hte mare a lapran e hpri bunghku tai na matu shadun da u: dai mare maga de nang myiman yawng u; shingrai mare gaw wang da ai hkrum nna, nang dai hpe wang tawn da na ndai. Dai gaw Israela amyu a matu kumla tai na ra ai. ⁴ Dai hta kaga nang gaw, pai maga nhkrem de hkrawn taw nna, Israela amyu a shut hpyit ai hpe de a ntsa e mara da u; shingrai nang hkrawn taw nga ai nhtoi nambat hte maren, nang shanhte a shut hpyit ai hpe gunhpai na ndai. ⁵ Kaning rai nme law, shanhte yubak hkrum sha ai shaning ni a nambat hpe ngai na a matu shani san da nna, dai gaw nhtoi masum tsa jahku shi rai nga ai: dai laman e nang gaw Israela amyu shut hpyit ai hpe gunhpai na ndai. ⁶ Bai, dai nhtoi ni gu ai hpang, nang hkra maga nhkrem de hkrawn taw nna, mali shi ya tup, Yuda amyu a shut hpyit ai hpe gunhpai na ndai: laning mi a malai lani mi, ngai na a matu san da nngai. ⁷ Bai, Yerusalem mare hpe wang tawn ai lam lahpum shada let shaja nna, dai mare hten wa na lam myihtoi htoi u. ⁸ Dai hta kaga, yu u, ngai nang hpe sumri hte gyit hkang nna, dai mare hpe nang gasat la ai shani du hkra, nang hkum kayin lu na n rai. ⁹ Bai, nang gaw, hkaulan mam, mukyaw mam, shapre, nawkyu, hkauya hte shagyi ni hpe la nna, dibu langai mi hta kayau bang da nhtawm, muk tawng galaw u; nang hkrawn taw nga ai nhtoi, masum tsa jahku shi ya tup, dai hta na nang sha lu na ndai. ¹⁰ Na a shahpa ni hpe nang lani hte lani hkan lahkawng hkawng shen nna sha u: madat da ai aten e dai hpe sha u: ¹¹ ntsin mung shadang nna, htinggap mi sha lu u: madat da ai aten e dai hpe lu u. ¹² Shahpa hpe muk-yaw pa sha ai zawn, sha na matu, shanhte a man e masha hkyi hte kabaw na ndai. ¹³ Shingrai, Israela kashu kasha ni gaw, ngai shanhte hpe shaden kau dat ai maigan amyu ni a ka-ang e awu asin re ai muk hpe sha na mara ai, nga nna Yehowa tsun ai. ¹⁴ Shaloi ngai gaw, Aha, Madu Yehowa e, nye a myit masin awu asin garai n hkrum ai; ngai gaw brang ram prat kaw nna dai ni du hkra, shi hkrai si ai hpe mung, rai matse kawa sat ai hpe mung, n sha yu nna, matsat shabat ngu ai shan hpe nye a n-gup hta n bang yu nngai, ngu nna tsun nngai. ¹⁵ Shaloi shi gaw, Yu u, masha hkyi malai, dumsu hkyi ngai jaw na nngai; dai hte na a muk hpe kabaw u, ngu we ai. ¹⁶ Bai shi gaw, Masha kasha e, yu u, Yerusalem mare hta, muk ngu ai dawhkrawng hpe, ngai daw kau na nngai: mare masha ni gaw muk hpe shen nna, myit hkrit let sha na ma ai; ntsin hpe shadang nna, mak mat let lu na ma ai: ¹⁷ shingrai muk hte ntsin taw ai majaw, shanhte gaw rau mak mat nna, tinang a shut hpyit ai a jaw e akyawm mat na mara ai, nga ai.

¹ Bai, nang masha kasha e, dai ai nhtu la u: baw doi ai wa a nhkyi la nna, na a kara hte nmun hpe shangun kau nhtawm, joi hte shen yu nna, dai hpe karan tawn u. ² Mare hpe gasat la lu ai shani e, majaw masum hta na majaw mi, dai mare ka-ang e nat kau u; majaw mi hpe nhtu hte marat dut kau u; majaw mi hpe nbung hta shapoi kau u: dai hta kaga ngai gaw, shanhte a hpang e nhtu naw shaw na nngai. ³ Bai, dai kara hte nmun kachyi mi la nna, na a palawng hte makai u. ⁴ Dai hta na nkau mi bai la nna, wan hta kabai nat kau u: dai wan hta na, Israela dap ting hpe hkru kau na wan pru na ra ai. ⁵ Madu Yehowa ning nga ai: Da ndai gaw Yerusalem mare rai nga ai; ngai gaw dai mare hpe amyu baw ni a ka-ang e tawn da nna, de a grupyin e mungdan ni dè nga ma ai. ⁶ Shi chyawm gaw, maigan amyu ni hta, grau shut hpyit nna, ngai dawdan ai ga hpe gumlau ai hte, nye a matsun maroi ga hpe, grupyin na mungdan ni hta, grau nna lale kau nga ai: mare masha ni gaw, nye a dawdan ai ga hpe nyet kau nna, nye a matsun maroi ga hpe n hkan hkraw ma ai. ⁷ - ⁸ Dai re ai majaw Madu Yehowa ning nga ai: Nanhte gaw grupyin na amyu baw ni hta grau nna kabring kabrawng rai let, nye a matsun maroi ga hpe mung, ngai hkangda ai ga hpe mung, grupyin na amyu baw ni a htunghking daram pyi n hkan nang ai majaw, yu u, ngai hkum nan nang hpe hkap daw na nngai: ngai gaw maigan amyu ni a man e na a ka-ang e tara dara na nngai: ⁹ Nang galaw yu ai matsat shabat amu majaw, shawng e mung, htawmhpang de mung, ngai n galaw yu ai ari jaw ai amu hpe, nang hta ngai galaw na nngai, nga nna Madu Yehowa tsun ai. ¹⁰ Dai re ai majaw na a ka-ang e, kawa ni gaw kasha ni hpe, kasha ni gaw kawa ni hpe, sha na mara ai; ngai nang hpe dawdan nna, naw ngam nga ai ni mahkra hpe, nbung bung shagu de shapoi kau na nngai. ¹¹ Dai re ai majaw, Madu Yehowa ning nga ai: Nang gaw na a n san n seng ai, matsat shabat amu mahkra hte nye a Chyoi pra ai shara hpe awu asin di kau ai majaw, ngai hkrung nga ai hte maren, ngai nang hpe shayawm na de ai: nye a myi lahpawt dum na n rai; ngai mung matsan dum na n rai. ¹² Na a htam masum hta htammi ana zinli hte si wa nna, na a ka-ang e kawsi ai hte htum mat na mara ai; htammi gaw, na a grupyin e kahtam ai nhtu hte si wa na mara ai; htammi hpe nbung bung shagu de ngai shapoi kau na nngai: shanhte a hpang e nhtu hpe mung ngai naw shaw na nngai. ¹³ Shingrai ngai pawt bu ai myit dik na ra ai: shanhte a majaw, nye myit kahtet ai, ngai jasim nna, ngai myit pyaw lu na nngai; shanhte a ntsa e nye pawt bu ai myit shadik yang, ngai Yehowa gaw sindawng kahtet nna, tsun ai hpe, shanhte chye lu na mara ai. ¹⁴ Dai hta n-ga, na a grupyin e dè nga ai amyu baw ni hte, makau hku lai wa ai ni mahkra a man e, ngai nang hpe shingran katsi ai shara hte shatan nhkan shara shatai na nngai. ¹⁵ Shingrai, pawt bu ai, myit kahtet nna daru sharin ai myit hte, ngai nang hpe dawdan yang, dai gaw na a grupyin e dè nga ai amyu baw ni a matu, shatan nhkan, asawng asang, sharin achyin ai hte mauhpa shara tai na ra ai: ngai Yehowa nan dai ga tsun ni ai: ¹⁶ nanhte hpe jahten na matu, hku wa ngu ai n hkru ai pala ni hpe ngai dat dat yang, nanhte hta kawsi hpang kara jat wa nna, muk ngu ai dawhkrawng hpe ngai daw kau na nngai: ¹⁷ ngai nanhte a ntsa de, hku wa hte matse labye shangun dat nna, matu mara htum mat na ra ai: ana zinli hte sai jahkaw ai gaw, nang hta ga lai wa na ra ai: ngai na a ntsa e nhtu shapraw na nngai: ngai Yehowa nan dai ga tsun ni ai.

¹ - ² Bai Yehowa a mungga ngai kaw du nna, Masha kasha e, Israela bum ga de myiman yawng nna, de a lam myihtoi htoi u: ³ Israela bum ni e, Madu Yehowa a ga madat mara mu: Madu Yehowa gaw, bum ni, kawng ni, hkaraw ni hte kadit ni hpe ning nga ai: yu mu, ngai nan, nanhte a ntsa e nhtu shapraw nna, nanhte a tsaw ai kawng ni a shara ni hpe shaza kau na nngai. ⁴ Nanhte a tawn hkungri ni shingran katsi mat nna, nanhte a jan sumla ni agrawp mat na ra ai; nanhte a hpara sumla ni a man e hkala nba si hkrum ai ni hpe, ngai jahkrat kau na nngai; ⁵ shanhte a hpara sumla ni a man e, Israela kashu kasha ni a moi mang ni hpe ngai tawn da nna, nanhte a tawn hkungri ni a grupyin e, nanhte a nrut nra ni hpe ayai kau na nngai. ⁶ Nanhte a tawn hkungri ni shaza kau ai hte, shingran katsi mat nna, nanhte a hpara sumla ni agrawp kau ai hkrum nna n nga lu hkra, nanhte a jan sumla ni hran kau hkrum nna, nanhte a lata amu htum mat hkra, nanhte shanu nga ai shara shagu hkan e, nanhte a mare ni marawng marang tai mat nna, tsaw ai kawng ni a shara ni, katsi katsang rai mat na ra ai. ⁷ Hkala nba si hkrum ai ni, nanhte a ka-ang e kadawng taw nna, ngai Yehowa rai nga nngai, nanhte chye lu na marin dai. ⁸ Raitimung, nanhte gaw mungdan shagu hta bra nga yang, masha amyu baw ni a nhtu hte lawt lu ai ni nkau mi nga lu hkra, naw ngam nga ai ni hpe ngai tawn da na nngai. ⁹ Shingrai, ngai hpe kau da nna, n se ai myit masin hpe mung, hpara sumla ni hte shut mayu nna, hkan yu ai myi ni hpe mung, ngai kaning rai agrawp kau ai hpe, nhtu lawt lu ai ni gaw, bawngdung ai mung hta matsing nga ma yang, shanhte ngai hpe maigan amyu ni hta dum lu nna, tinang galaw hkrup ai matsat shabat amu mahkra a majaw, tinang myiman hpe pyi, matsat kau na mara ai. ¹⁰ Shingrai, Ning re ai ari ngai shanhte hpe jaw na nngai, nga nna ngai Yehowa kaman n tsun ai hpe, shanhte chye lu na mara ai. ¹¹ Bai, Madu Yehowa ning nga ai: Israela amyu galaw hkrup ai matsat shabat amu mahkra a majaw, Dingnye nga u ga law, nga nna lata kahpret u, lagaw shingdit u: kaning rai nme law, shanhte gaw, ri nhtu, hku wa wa ai, ana zinli hte kadawng si na mara ai; ¹² tsan tsan e nga ai wa, ana zinli hte si na ra ai; ani sha nga ai wa, ri nhtu hte kadawng si na ra ai; dai tsinyam lawt nna, naw ngam nga ai wa, hku wa hte si na ra ai: shingrai ngai gaw, shanhte a ntsa e, nye a sindawng kahtet ai shadik na nngai. ¹³ Tawn hkungri ni a grupyin e hpara sumla ni hte hpawn, tsaw ai kawng shagu a ntsa e mung, bum pungding shagu a ntsa e mung, tsit lali ai hpun shagu a npu e mung, shingnip tsawm ai wamyi hpun shagu a npu e mung, hpara ni hpe manam pyaw ai baw nat nawng ai shara shagu hta mung, shanhte a hkala nba si hkrum ai moi mang ni jawng nga ma ai hpe, mu myit yang, ngai Yehowa rai nga nngai, nanhte chye lu na marin dai. ¹⁴ Ngai gaw shanhte a ntsa e nye a lata ladawn nna, shanhte shanu nga ai shara shagu hpe, dibla nam mali ga hta grau nna shingran katsi ai hte hkraw hkun ai shara shatai na nngai: shaloi ngai Yehowa rai nga ai hpe, shanhte nan chye lu na mara ai, nga ai.

¹ - ² Bai, Yehowa a mungga ngai kaw du nna, Masha kasha e, Madu Yehowa gaw Israela mungdan hpe lakap nna ning nga ai: Htum mat sai; mung jut mali ntsa e htum mat ai du ra ai. ³ Ya nang htum mat nit dai; ngai gaw na ntsa e nye a pawt bu ai shangun dat nna, na a arawn alai hte maren dawdan na nngai: nang galaw ai matsat shabat amu mahkra hpe, ngai na ntsa e nhtang dat na nngai. ⁴ Nye a myi nang hpe lahpawt dum na n rai; ngai matsan dum na n rai; na arawn alai hte maren ngai nang hpe nhtang jaw nna, nang galaw ai matsat shabat amu, na a ka-ang e jung nga na ra ai: shaloi, ngai Yehowa rai nga ai hpe, nanhte chye lu na marin dai. ⁵ Madu Yehowa ning nga ai: Tsin-yam tsindam, tsin-yam tsindam langai mi, _ yu u, dai du ra ai. ⁶ Htum mat ai du ra ai, dai htum mat ai du ra ai; nang hpe la let du ra ai; yu u, dai gaw du ra ai. ⁷ Mung e shanu ai wa e, nang hkrum sha na ari du ra ai; aten du sai, nhtoi gu sai; dai gaw hpyen garu ai shani rai nga nna, bum lang ntsa e kabu jahtau ai nsen n na lu sai. ⁸ Ngai gaw, gade n na yang, nye a sindawng kahtet ai, na ntsa e ru bun nna, nye a pawt bu ai hpe, nang hta shadik na nngai: na arawn alai hte maren ngai nang hpe dawdan nna, nang galaw ai matsat shabat amu mahkra hpe, na ntsa e nhtang dat na nngai. ⁹ Nye a myi lahpawt dum na n rai, ngai matsan dum na n rai: na a arawn alai hte maren, ngai nang hpe ari jaw na nngai; nang galaw ai matsat shabat amu, na a ka-ang e jung nga na ra ai: shingrai, ngai Yehowa ari jaw ai hpe, nanhte chye lu na marin dai. ¹⁰ Dai nhtoi hpe yu u; gaja wa dai du ra ai; nang ari hkrum sha na, dawdan ngut sai; shingna pu pu sai, gumrawng gumtawng asi si sai. ¹¹ Kashun kashe gaw tara n lang ai wa a dawhkrawng tai wa sai; raitimung, shanhte hta na mung, shanhte a wunawng wuwa ni hta na mung, shanhte a arung arai hta na mung, langai mi ngam nga na n rai; shanhte hta hpung rawng ai mung nga lu na, n rai. ¹² Aten du sai, nhtoi gu sai; mari ai wa gaw hkum kabu et, dut ai wa mung hkum yawn et; kaning rai nme law, yawng mayawng a ntsa e sindawng kahtet ai jung nga ai. ¹³ Dut ai wa gaw, asak lawt lu timung, tinang dut ai ga de nhtang wa lu na, n rai; dai shingran gaw shawa hpung ting hte seng nga ai; n dik ai nga lu na n rai; kadai raitimung, tinang n tara ai amu hta, kaba wa lu ai n rai. ¹⁴ Shanhte pahtau dum nna, hpyen hkyen timung, hpyen gasat na kadai n pru nga ai; kaning rai nme law, nye a sindawng kahtet ai gaw, dai shawa hpung ting a ntsa e rai nga ai. ¹⁵ Shinggan de ri nhtu, kata de ana zinli hte hku wa, rai nga ai; pa e nga ai wa gaw nhtu hte si na ra ai; mare kata e nga ai wa gaw, hku wa hte ana zinli e htum mat na ra ai. ¹⁶ Lawt lu ai ni mahtang lawt lu timung, langai hte langai tinang a yubak majaw madai let, kadit na hkrudu zawn, bum ntsa e nga mat na mara ai. ¹⁷ Lata shagu kya noi nga nna, lahput shagu ntsin zawn tai mat na ra ai. ¹⁸ Shanhte gaw tinang hkum hpe lachyit nba lawai nna, hkrithpa shanhte hpe htinggrum na ra ai: myiman yawng sum mat nna, baw shagu kara doi kau ai hkrum na mara ai. ¹⁹ Shanhte gaw tinang a gumhpraw hpe mare lam ni hta kabai kau nna, tinang a aja hpe n san n seng ai arai zawn, nawn na maru ai; Yehowa n-yun bu ai shani e, shanhte a aja gumhpraw shanhte hpe mawai la lu ai n rai: dai gaw, shut hpyit ai amu galaw hkra, shanhte a myit kataw shara rai nga ai majaw, shanhte a myit masin hpe jahkru shakat lu na n rai, tinang kan hpe mung, jahpring lu na n rai. ²⁰ Shanhte a tsawm htap ai gali lakai ni hta shanhte gumrawng nna, shanhte a n san n seng ai hpara sumla ni hte, matsat shabat arai ni hpe, dai hte galaw ma ai majaw, ngai shanhte a aja gumhpraw hpe awu asin re ai arai zawn shatai na nngai. ²¹ Masha tsasam ni dai hpe kashun la lu nna, dai gaw ga ntsa gumshem ai ni a lanep tai wa lu hkra, ngai dai hpe shanhte a lata de ap kau nna, shanhte gaw dai hpe awu asin di kau na maru ai. ²² Ngai gaw nye a myiman kayin kau nna, shanhte gaw nye a chyoi pra shim ai shara hpe, awu asin di kau na mara ai: damya ni mung dai hta shang lu nna, awu asin di kau na mara ai. ²³ Hpri sumri hpe galaw u; mungdan gaw masha sat ai yubak hte hpring nga nna, mare gaw kashun kashe hte chyat nga ai. ²⁴ Dai re ai majaw ngai gaw gum shen htum ai amyu ni hpe shashawn nna, shanhte gaw nta ni hpe, madu la na mara ai: n-gun ja ai ni a gumrawng gumtawng hpe, ngai jasim kau na nngai; shanhte a chyoi pra ai shara ni, awu asin rai mat na ra ai. ²⁵ Hten byak ai du ra ai; shanhte ngwi pyaw ai tam timung, n mu ma ai. ²⁶ Tsin-yam langai hpang langai, shiga langai hpang langai, paw pru na ra ai; shanhte gaw myihtoi grau timung, shingran n mu lu ma ai; hkinjawng wa gaw tara tsun na ahkang, salang ni gaw hpaji daw na ahkang, n lu na mara ai. ²⁷ Hkawhkam wa gaw sharung shayawt na ra ai; hkawhkam kasha ni gaw mak mat ai pahpun bu hpun na mara ai; mung masha ni a lata gaw gari na ra ai: shanhte a arawn alai hte maren, ngai shanhte hpe nhtang tai nna, hkam ging ai hte maren, dawdan na nngai: shingrai, ngai Yehowa rai nga ai hpe, shanhte chye lu na mara ai.

¹ Ya kru ning na, shata kru a manga ya shani e, ngai gaw nye a nta e dung nga nna, Yuda salang ni nye a man e dung nga ma yang, Madu Yehowa a lata, nye a ntsa e du ai. ² Shaloi ngai mada yu nna, yu u, wan nsan ai hkrang danpru nga ai; nshang kaw nna lagaw daw de wan nsan ai mung, nshang kaw nna baw daw de, byawng mat ai kung zawn htoi kabrim nga ai. ³ Shi gaw lata hkrang ladawn nna, nye a kara latsin mi lang nga ai: shaloi Wenyi gaw aga hte lamu lapran e ngai hpe pawn shalun nna, Karai Kasang kaw na shingran hte, Yerusalem mare a dingdung maga ang ai kata wing chyinghka de, ngai hpe woi wa nngai: dai yang e, nsu nnawn shangun ai, nsu nnawn ngu ai sumla tingnyang rai nga ai. ⁴ Shaloi, yu u, pa ga e ngai mu yu ai shingran zawn, Israela Karai Kasang a hpung shingkang, dai yang e mung, danhkung nga ai. ⁵ Shaloi shi gaw, Masha kasha e, dingdung lam de mada yu u, nga nna ngai hpe tsun ai hte maren, dingdung lam de ngai mada yu nna, yu u, tawn hkungri chyinghka lam a dingdung maga de, ndai nsu nnawn ngu ai sumla nga nga ai. ⁶ Shaloi shi gaw, Masha kasha e, ngai gaw nye a chyoi pra ai shara hte grau tsan mat wa hkra, Israela amyu masha ni gaw, ndai yang e galaw ai matsat shabat amu kaba hpe, nang mu nu ni? raitimung, grau kaba ai matsat shabat amu ni hpe, nang naw mu na rin dai. ⁷ Bai shi gaw, wing chyinghka lam de, ngai hpe woi sa wa nna, ngai mada yu yang, yu u, wing bunghku hta hku waw nga ai. ⁸ Shaloi shi gaw, Masha kasha e, wing bunghku hpe htu u, nga nna tsun ai hte maren ngai htu yang, yu u, chyinghka lam hpe ngai mu nngai. ⁹ Bai shi gaw, Shang u; ndai shara e shanhte galaw ai n hkru ai matsat shabat amu ni hpe yu u, nga ai. ¹⁰ Shingrai ngai shang yu yang, yu u, gumrawt hkawm ai baw hte matsat shabat re ai matse labye amyu myu hpe mung, Israela amyu nawku ai sumla ni nlang hte hpe mung, bunghku hta ka da nga ai hpe, ngai mu nngai. ¹¹ Dai ni a man e Israela dap na salang sanit shi hte hpawn, Shahpan a kasha Yaznia gaw, shanhte a ka-ang e, tsap nga ma ai; langai hte langai ban lang let, manam pyaw ai baw nat nna, htat ai wanhkut mawng lung wa ai. ¹² Shaloi shi gaw, Masha kasha e, Israela dap na agyi salang ni langai hte langai gaw, nsin kata e, sumla ka ai gawk hta hpa galaw nga ma ai hpe, nang mu nit ni? shanhte gaw, Yehowa n mu ai: Yehowa gaw dai mung hpe kau da nu ai, nga nna tsun ma ai. ¹³ Bai shi gaw, Shanhte galaw ai, grau kaba ai matsat shabat amu hpe, nang naw mu na rin dai, nga nna ngai hpe tsun ai. ¹⁴ Shaloi shi gaw, Yehowa a nta dingdung chyinghka lam de, ngai hpe woi wa nna, yu u, dai yang e, Tamuza matu sharung shayawt ai num ni, dung nga ma ai. ¹⁵ Dai rai nna shi gaw, Masha kasha e, ndai amu hpe nang mu nu ni? dai hta grau kaba ai matsat shabat amu hpe, nang naw mu na rin dai, nga nna ngai hpe tsun ai. ¹⁶ Bai shi gaw, Yehowa nta kata wing de ngai hpe woi wa nna, yu u, Yehowa a nawku Htingnu chyinghka lam, ajan hte tawn hkungri lapran e, marai hkun manga daram rai nga nna, shanhte gaw Yehowa a nawku Htingnu hpe shingdu dat kau nna, sinpraw maga de yawng let, jan hpe nawku ma ai. ¹⁷ Dai rai nna shi gaw, Masha kasha e, dai amu hpe nang mu nu ni? Yuda dap ni gaw, ndai yang e galaw ai matsat shabat amu, kaji nga a ni? shanhte gaw mung ting hpe kashun kashe hte jahpring nna, ngai hpe bai pawt bu shangun ma ni ai: yu mu, shanhte gaw tsabyi ru lakung hpe ladi nchyun e lang ma ai. ¹⁸ Dai re ai majaw, ngai pawt bu let ari jaw na nngai; nye a myi lahpawt dum na n rai, ngai matsan n dum na nngai; shanhte aja awa jahtau timung, ngai n madat na nngai, nga ai.

¹ Shaloi shi gaw, Ndai mare hpe uphkang ai ni, sit sa marit; langai hte langai jahten shabyak chye ai ri nhtu lang mu, nga nna aja awa jahtau ai hpe ngai na nngai. ² Shaloi, yu mu, dingdung maga ang ai, lahta chyinghka lam kaw na, marai kru pru nna, langai hte langai tinang a hpyen gasat nwa lang ma ai; shanhte a ka-ang e, lachyit nba lawai nna, laika tsi ndum nshang e noi ai wa, pru wa ai. Shanhte shang nna, magri hkungri makau e tsap nga ma ai. ³ Shaloi Israela Karai Kasang a hpung shingkang gaw, shanu nga ai Hkerub kaw na lung wa nna, Nta chyinghka hkinbawng de du nga ai; bai shi gaw, sumpan lawai nna, laika tsi ndum noi ai wa hpe, shaga wu ai. ⁴ Yehowa gaw, Yerusalem mare ka-ang hku lai wa nna, mare kata e galaw ai matsat shabat amu majaw madai nna, hkrapngu hkrapngoi ai ni a lahtan hpe, mahkret matsing u, ngu nna shi hpe tsun wu ai. ⁵ Dai marai kru hte hpe mung, Ndai wa hpang e mare hku ga wa let, kahtam sat kau mu; nanhte a myi lahpawt dum na n rai; matsan mung hkum dum myit: ⁶ dingla hpe mung, shabrang wa hte mahkawn, ma kaji hte numsha ni hpe atsai awai shaza kau timung, mahkret matsing ai wa langai mi hpe muk, hkum hkra et; dai amu hpe nye a Chyoi pra ai shara hta galaw hpang u, nga nna tsun ai ngai na nngai. Shingrai shanhte gaw Nta ndaw e nga ai salang ni hpe shawng sat kau mu ai. ⁷ Bai shi gaw, Nta hpe awu asin di kau mu; wing ni hpe sat kau hkrum ai ni a si mang hte jahpring mu; pru wa manu, nga nna tsun ai hte maren, shanhte pru wa nna, mare hpe shaza kau mu ai. ⁸ Shingrai shanhte shaza kau nna, ngai hkrai hti nga yang, ngai gum dagup nna, Madu Yehowa e, Yerusalem mare ntsa de na a pawt sindawng ai hpe ru dat yang, naw ngam nga ai Israela amyu ting hpe mung, shamyit kau na n ni? ngu nna jahtau tsun nngai. ⁹ Shaloi shi gaw, Israela hte Yuda dap ni shut hpyit ai gaw, nachying kaba la nga ai; mungdan gaw sai hte hpring chyat nga nna, mare gaw gumlu gumlang hte hpring nga ai: kaning rai nme law, shanhte gaw, Yehowa nan mungdan hpe kau da nna, shi mu lu ai, n rai, nga nna tsun shajang ma ai. ¹⁰ Dai rai nna ngai mung, yu lahpawt dum na n rai; shanhte galaw ai hte maren ngai matsan mung dum na n rai; shanhte a baw ntsa de shapraw na nngai, nga nna ngai hpe tsun ai. ¹¹ Bai yu u, sumpan lawai nna, laika tsi ndum noi ai wa gaw, Nang hkangda ai hte maren ngai galaw se ai, ngu nna ga htang wu ai.

¹ Bai ngai mada yu yang, yu u, Hkerubim ni a baw ntsa e din ai lamu madin hta, nila lungseng nsan ai hkawhkam tingnyang hkrang danpru nga ai. ² Shaloi shi gaw sumpan lawai ai wa hpe, Chyai kri nga ai leng dingsen lapran e, dai Hkerub npu de, sa shang u; Hkerubim lapran e nga ai wan n-ga ni hpe, na a lata lahkawng hte magawn la nhtawm, mare ntsa de gat dat u, nga nna tsun ai hte maren, shi gaw nye a man e shang wa ai. ³ Ya dai wa shang wa yang, Hkerubim ni Nta a hkra maga e tsap nga ma ai rai nna, kata wing gaw, sumwi hte hpring nga ai. ⁴ Shaloi Yehowa a hpung shingkang gaw, dai Hkerub ntsa na, Nta a chyinghka hkinbawng de sit lung wa ai: dai Nta gaw, sumwi hte hpring nna, dai wing gaw, Yehowa a tu kabrim ai hpung shingkang hte danhkung nga ai. ⁵ N-gun Chyalai rawng ai Karai Wa, ga tsun ai nsen zawn, dai Hkerubim a singkaw wu ngoi ai gaw, shinggan wing du hkra na lu nga ai. ⁶ Ya shi gaw, Chyai kri nga ai leng dingsen ni hte Hkerubim lapran na wan sa la su, nga nna sumpan lawai ai wa hpe tsun yang, dai wa gaw shang nna, leng dingsen makau e tsap nga ai. ⁷ Shaloi dai Hkerub gaw, Hkerubim hpawng kata de shi a lata ladawn nna, Hkerubim lapran e grung ai wan hpe la nhtawm, sumpan lawai ai wa a lata hta bang da wu ai: shi gaw dai hpe hkap la nna, pru wa ai. ⁸ Ya Hkerubim ni a singkaw npu e, masha lata nsan ai hkrang danpru nga ai. ⁹ Bai ngai mada yu yang, yu u. Hkerubim a makau e leng dingsen mali rai nga ai; Hkerub langai mi a makau e leng dingsen langai ngai rai nga ai: dai leng dingsen ni a ahpraw nsam gaw mek-yol lungseng hte bung nga ai. ¹⁰ Dai mali gaw hkrang langai sha rai nga nna, dingsen kata e dingsen chyai ai zawn, rai nga ai. ¹¹ Dai ni hkawm wa yang, de a man mali ang ang hkawm wa ma ai: dai ni hkawm wa yang, kayin ra ai n rai; man ang ai de n kayin ai hkawm wa ma ai; dai ni hkawm wa yang, kayin ra ai n rai. ¹² Dai dingsen mali hte hpawn, Hkerubim mali hte gaw, hkum ting, shingma, lata, singkaw ni hta, myi hkrai hpring nga ai. ¹³ Dai dingsen ni hpe, “Chyai kri nga ai dingsen ni,” ngu nna shamying ai, ngai na nngai. ¹⁴ Langai hte langai, myiman mali li tu nga ai; man mi gaw, Hkerub myiman; man mi gaw, masha myiman; man mi gaw hkang hkyi myiman; man mi gaw langda myiman, rai nga ai. ¹⁵ Bai Hkebara hka kau e ngai mu ai hkrung ai dusat ni rai nga ma ai. ¹⁶ Ya Hkerubim ni hkawm wa ma yang, leng dingsen ni shanhte a makau e hkawm wa ma ai; ga ntsa na lung wa na matu, Hkerubim ni singkaw hpyan yang, leng dingsen ni mung, htep htep hkan nang ma ai. ¹⁷ Shanhte hkring yang, dingsen ni hkring nga ma ai; shanhte ga hte hka nna lung wa yang, dingsen ni mung shanhte hte htep hkan lung wa ma ai: kaning rai nme law, dusat ni a wenyi gaw dingsen ni hta rawng nga ai. ¹⁸ Bai Yehowa a hpung shingkang gaw, Nta chyinghka hkinbawng na sit nna, Hkerubim ni a ntsa e jung nga ai. ¹⁹ Dai Hkerubim ni gaw, nye a man e singkaw ni hpe hpyan nhtawm, ga hte hka nna lung wa ma ai; makau de pru yang, dingsen ni hkan nang ma ai: shanhte gaw Yehowa a Nta sinpraw maga chyinghka lam de tsap nga nna, Israela Karai Kasang a hpung shingkang gaw, shanhte a ntsa e danhkung nga ai. ²⁰ Da ndai gaw Hkebara hka kau e, Israela Karai Kasang npu e, ngai mu ai dusat ni rai nga ma ai: dai ni gaw hkerubim rai nga ai hpe, ngai chye nngai. ²¹ Langai hte langai myiman mali li, singkaw mali li tu nna, singkaw npu e masha lata nsan ai tu ma ai. ²² Shanhte a myiman gaw, Hkebara hka kau e ngai mu yu ai myiman hkrang hte bung nga ai; ahpraw nsam mung langai sha rai nga ai; langai hte langai ang ang hkawm wa nga ma ai.

¹ Dai hpang wenyi gaw ngai hpe pawn let, sinpraw maga de man yawng ai, Yehowa nta sinpraw chyinghka lam de ngai hpe woi wa nngai: shaloi, yu u, dai chyinghka lam e marai hkun manga rai nga nna, shanhte hta Azura kasha Yazania hte Benaia kasha Pelatia lawm nga ma ai: shan gaw mung du rai nga ma ai. ² Shaloi shi gaw, Masha kasha e, ndai ni gaw n kaja ai hku maw nna, ndai mare hta n hkru ai lam hpaji daw ai ni rai nga ma ai: ³ shanhte gaw, Nta galaw na aten garai n du ai; ndai mare gaw di zawn, anhte gaw shan zawn rai nga ga ai, nga nna tsun ma ai. ⁴ Dai re ai majaw, masha kasha e, shanhte hpe hkap daw let, myihtoi htoi u, myihtoi htoi u, nga nna ngai hpe tsun ai. ⁵ Shaloi Yehowa a Wenyi nye a ntsa e du nna, shi gaw, Yehowa ning nga ai, ngu nna tsun u; Israela dap e, ndai lam nanhte tsun manit dai; nanhte a kraw lawang e rawng marawng hpe ngai chye nngai. ⁶ Nanhte gaw ndai mare hta si mang shajawng nna, mare lam ni gaw moi mang ni hte hpring nga ai. ⁷ Dai re ai majaw Madu Yehowa ning nga ai, Nanhte tawn da ai si mang ni, gaja wa shan rai nga ai; ndai mare di nan rai nga ai; raitimung ngai gaw nanhte hpe ndai mare na shapraw kau na nngai. ⁸ Nanhte ri nhtu hpe hkrit nga myit dai; dai hpe nanhte a ntsa e ngai shayu dat na nngai, nga nna Madu Yehowa tsun ai. ⁹ Ngai gaw nanhte hpe ndai mare ka-ang na shapraw kau nhtawm, tsasam masha ni a lata de ap kau nna, nanhte hpe dawdan na nngai. ¹⁰ Nanhte ri nhtu hte kadawng si na myit dai; Israela lamu ga jarit e, ngai nanhte hpe dawdan nna, ngai Yehowa rai nga ai hpe, nanhte chye lu na marin dai. ¹¹ - ¹² Ndai mare gaw nanhte a di tai lu na n rai; nanhte mung de a shan tai lu na n rai; Israela lamu ga jarit e ngai nanhte hpe dawdan nna, ngai Yehowa rai nga ai hpe nanhte chye lu na marin dai: kaning rai nme law, nanhte gaw nye a matsun maroi ga hpe n hkan, ngai hkangda ai ga hpe n hkan galaw ai sha, nanhte a grupyin e nga ai maigan amyu ni a arawn alai hpe hkan nang myit dai, nga ai. ¹³ Ya ndai myihtoi ga ngai naw tsun nga yang, Benaia kasha Pelatia si wa sai. Dai rai nna ngai gaw myiman gum dagup let, Aha Madu Yehowa e, naw ngam nga ai Israela amyu masha ni hpe nang atsai awai shagrawm kau na n ni? ngu nna nsen kaba hte jahtau tsun nngai. ¹⁴ - ¹⁵ Bai, Yehowa a mungga ngai kaw du nna, Masha kasha e, Yerusalem mare masha ni gaw, na nhpu nnau ni, kanawn manang ni, amyu masha ni hte Israela amyu ting hpe, Yehowa hte tsan mat mu; ndai lamu ga anhte hpe ap ya ma ni ai, nga nna tsun ma ai. ¹⁶ Dai re ai majaw, Madu Yehowa ning nga ai, Ngai shanhte hpe sumtsan mung na amyu ni hpang de htawt kau nna, mungdan ni hta ayai kau timung, shanhte sa nga ai mung ni hta, ngai shanhte a matu, tawng marang mi, nawku shara tai na nngai: ¹⁷ dai hta n-ga, Madu Yehowa ning nga ai, Amyu masha ni hta na ngai nanhte hpe shing gyin la nna, nanhte ayai nga ai mungdan ni hta na zuphpawng shangun nhtawm, Israela mungdan nanhte hpe ap ya na nngai. ¹⁸ Shanhte gaw dai de du nna, awu asin re ai hte matsat shabat amu mahkra hpe dai hta na htawm kau na mara ai. ¹⁹ Ngai shanhte hpe myit masin langai sha hte, nanhte a kraw e wenyi ningnan bang ya na nngai: ²⁰ shanhte gaw nye a matsun maroi ga hpe hkan nang nna, ngai hkangda ai ga hpe hkan galaw lu hkra, shanhte hkum hkrang na nlung salum hpe ngai shaw kau nna, shan salum bang ya na nngai: shingrai shanhte gaw gaw nye a amyu tai nna, ngai gaw shanhte a Karai Kasang tai na nngai. ²¹ Raitimung, shanhte a awu asin re ai matsat shabat nyan hpe, myit masin hte hkan sharau ai ni a yubak, shanhte a baw ntsa e ngai shapraw na nngai, nga nna Madu Yehowa tsun ai. ²² Shaloi Hkerubim ni singkaw hpyen nna, dingsen ni mung hkan nang ma ai; Israela Karai Kasang a hpung shingkang mung shanhte a ntsa e rai nga ai. ²³ Yehowa a hpung shingkang gaw, mare ka-ang na lung nna, mare sinpraw maga e nga ai bum ntsa e tsap nga ai. ²⁴ Shaloi Wenyi gaw ngai hpe pawn nna, Karai Kasang a Wenyi a shingran hte, Hkalde mung na bawngdung ai ni hpang de, woi wa nngai. Shingrai ngai mu yu ai shingran gaw, ngai hte hka nna lung wa ai. ²⁵ Yehowa ngai hpe madun dan ai lam yawng mayawng hpe, bawngdung ai ni hpe ngai tsun dan nngai.

¹ - ² Bai Yehowa mungga ngai kaw du nna, Masha kasha e, nang gaw gumlau chye ai amyu a ka-ang e shanu nga ndai; shanhe gaw, mu na matu myi tu timung, n mu ma ai; na la na matu na tu timung, n na ma ai: kaning rai nme law, shanhte gaw gumlau chye ai amyu rai nga ma ai. ³ Dai rai nna, masha kasha e, kaga de htawt wa na matu, arung arai hkyen nna, shani aten e shanhte a man na htawt wa u: shanhte a man na, nang nga ai shara kaw na kaga shara de htawt u: shanhte gumlau chye ai amyu rai nga timung, myit dum dam ma nhten. ⁴ Bai nang gaw, htawt wa na matu, nang hkyen tawn ai arung arai hpe, shanhte a man e shani aten e shapraw u; nang hkum nan bawngdung woi wa hkrum ai wa zawn, shana aten e shanhte a man e pru wa u: ⁵ shanhte a man e bunghku htu waw nna, arung arai ni hpe shapraw u. ⁶ Dai arung arai ni hpe shanhte man e hpai la nna, nsin htat ai aten e shapraw u; ga n mu lu hkra, na a myiman hpe htinggrum u: kaning rai nme law, Israela dap a matu ngai nang hpe kumla shatai ni ai, nga ai. ⁷ Ngai gaw htet da ai hte maren galaw nngai; htawt na matu hkyen tawn ai arai ni hpe, shani aten e ngai shapraw nna, shana aten e, nye a lata hte bunghku htu waw nhtawm, nsin htat ai aten e, shanhte a man e hpai mat wa nngai. ⁸ - ⁹ Hpang jahpawt e Yehowa a mungga ngai kaw du nna, Masha kasha e, gumlau chye ai Israela amyu gaw, Nang hpa galaw n ta? nga nna nang hpe san yu ai, n rai ni? ¹⁰ Shanhte hpe ning ngu tsun u: Madu Yehowa ning nga ai, Ndai shingran gaw Yerusalem mare hpe up ai du hte, dai yang e shanu nga ai Israela dap ting hte seng nga ai. ¹¹ Ngai gaw nanhte a kumla rai nga nngai: ngai madun dan ai hte maren, shanhte hkrum na mara ai: bawngdung ai hte sharen da hkrum na matu, woi wa hkrum na mara ai. ¹² Shanhte hpe up ai du gaw, tinang a lahpa hta hpai nna, nsin htat ai aten e pru na ra ai; shanhte gaw bunghku hpe htu waw nna, arung arai hpe shapraw na mara ai: shi gaw ga n mu lu hkra, tinang myiman hpe htinggrum na ra ai. ¹³ Ngai gaw nye a sumgawn hte shi hpe ka-up nna, nye a mahkam hta lu shangun na nngai: Hklde a mung, Babelon mare de ngai shi hpe woi wa na nngai: dai mung hta e shi si timung, dai hpe mu lu na n rai. ¹⁴ Shi hpe karum na matu, shi a grupyin e nga ai yawng hte hte, shi a hpyen masha ni mahkra hpe, nbung bung shagu de ngai ayai kau nna, shanhte a hpang e nhtu shaw na nngai. ¹⁵ Shingrai ngai gaw shanhte hpe masha amyu ni hta shabra kau nna, mungdan shagu de ayai kau yang, ngai Yehowa rai nga ai hpe, shanhte chye lu na mara ai. ¹⁶ Raitimung, ngai gaw, shanhte hta na nkau mi hpe, ri nhtu, hku wa hte ana zinli kaw na shalawt dat nna, shanhte du na ra ai masha amyu ni hta, shanhte gaw tinang a matsat shabat lam mahkra hpe shapraw dan hkat na mara ai: shaloi, ngai Yehowa rai nga ai hpe shanhte chye lu na mara ai, nga ai. ¹⁷ - ¹⁸ Dai hta n-ga Yehowa mungga ngai kaw du nna, Masha kasha e, gari let na a muk hpe sha u, gari nna hkrit let na a ntsin hpe lu u: ¹⁹ mung masha ni hpe ning ngu u, Madu Yehowa gaw Yerusalem mare hte Israela mungdan hta shanu nga ai ni hpe lakap nna ning nga ai: Shanhte gaw hkrit gari let, muk sha nna, mak mat let, ntsin lu na mara ai; dai mungdan gaw shingran katsi ai shara tai nna, mung masha ni a kashun kashe amu majaw, atsai awai shaza kau ai hkrum na ra ai. ²⁰ Masha rawng ai mare ni gaw, marawng marang tai mat nna, mungdan gaw shingran katsi ai shara tai na ra ai; shingrai ngai Yehowa rai nga ai hpe nanhte chye lu na marin dai, nga ai. ²¹ Bai Yehowa a mungga ngai kaw du nna, Masha kasha e, Aten ladaw galu nga timung, shingran yawng hten mat sai, nga nna Israela mungdan hta tsun ai ga malai gaw, hpa rai ta? ²³ Dai re ai majaw Madu Yehowa ning nga ai. Dai ga malai hpe ngai shamat kau nna, htawmhpang de Israela amyu hta tsun lu na n rai: aten ladaw ni wa sai. Shingran yawng dik wa na ra ai. ngu nna shanhte hpe htawn tsun mu. ²⁴ Kaning rai nme law, htawmhpang e Israela amyu hta kaman lila shingran hte, hkalau ai shaba wawt ai lam nga na n rai. ²⁵ Ngai Yehowa rai nga nngai; ngai ga tsun nna, ngai tsun ai ga gaw, dik na ra ai: dai gaw hkring nga lu na n rai; gumlau chye ai amyu e, nanhte a lakhtak e ngai ga tsun nna, dai hpe shadik na we ai, nga nna Madu Yehowa tsun ai. ²⁶ - ²⁷ Bai Yehowa mungga ngai kaw du nna, Masha kasha e, Israela amyu gaw, Shi mu ai shingran naw tsun nga ai; shi htoi ai myihtoi ga htawmhpang prat hte seng nga ai, nga nna tsun ma ai. ²⁸ Dai re ai majaw Madu Yehowa ning nga ai, Nye a ga langai mi muk, naw hkring nga lu na n rai; ngai tsun ai ga gaw dik na ra ai, ngu nna shanhte hpe tsun mu, nga ai.

¹ - ² Bai Yehowa mungga ngai kaw du nna, Masha kasha e, tinang myit hkan nna htoi ai Israela myihtoi ni hpe lakap nna, Yehowa a ga madat mara mu, ngu nna shanhte hpe hkaw tsun mu. ³ Madu Yehowa ning nga ai, Hpa shingran n mu ai sha, tinang a wenyi hkan ai myihtoi mana ni gaw, dingnye lu ma ai. ⁴ Israela amyu e, na a myihtoi ni gaw, akrin akraw re ai shara ni hta rawng ai nam gwi ni hte bung nga ma ai. ⁵ Yehowa a hpyen gasat ai nhtoi hta, Israela nta a bunghku ngang nga lu hkra, de a waw ai shara ni de nanhte n lung, dai hpe mung n kum shangut myit dai. ⁶ Yehowa shanhte hpe n shangun timung, Yehowa ning nga ai, nga nna tsun ai ni gaw, kaman lila shingran mu nna, masu ai lam shaba wawt ai ni, rai nga ma ai; tinang a ga dik na ra ai, nga nna masha ni hpe myit mada shangun mu ai. ⁷ Ngai hkum nan ga n tsun timung, Yehowa ning nga ai, nga nna tsun yang, nanhte gaw kaman lila shingran mu nna, masu ai lam shaba wawt ai, n rai myit ni? ⁸ Dai re ai majaw, Madu Yehowa ning nga ai: Nanhte kaman lila ga tsun nna, masu ai shingran mu ai majaw, yu mu, ngai Madu Yehowa nanhte hpe hkap daw na nngai. ⁹ Kaman lila shingran mu nna, masu lam shaba wawt ai myihtoi ni hpe, nye a lata hkap gasat na ra ai; shanhte gaw nye amyu a salang hpawng hta lawm lu na, n rai, shanhte a amying hpe Israela amyu a jahpan hta ka shalawm lu na, n rai; Israela mungdan hta mung shang lu na, n rai; shingrai, ngai Madu Yehowa rai nga ai hpe, nanhte chye lu na marin dai. ¹⁰ Gaja wa, ngwi pyaw n nga timung, Ngwi pyaw nga ai, nga nna tsun let, shanhte gaw nye a amyu hpe hkalem kau ma ai; langai wa mi bunghku kum nna, shanhte gaw namhtun hte sha dai hpe chya ma ai; ¹¹ Dai gaw daw wa na ra ai, ngu nna namhtun chya ai ni hpe tsun mu; marang kaba htu lim na ra ai; sin kaba hkrat na ra ai; bungsha gaw dai hpe agrawp kau na ra ai. ¹² Dai bunghku daw mat hpang, Nanhte chya ai namhtun gaw ya kanang rai nga a ta? nga nna nanhte hpe san na mara ai, n rai ni? ¹³ Dai rai nna, Madu Yehowa ning nga ai: Ngai pawt sindawng ai bungsha hte, dai bunghku hpe agrawp kau na nngai; ngai pawt bu ai majaw, marang htu lim nna, myit kahtet ai majaw, sin kaba hte jahtum kau na nngai. ¹⁴ Shingrai, namhtun chya ai bunghku hpe, ga du hkra ngai sharu kau nna, de a npawt nhpang ni dawng pru na ra ai; dai ru hkrat nna, nanhte kamyet si ai hkrum na myit dai: shaloi ngai Yehowa rai nga ai hpe, nanhte chye lu na marin dai. ¹⁵ Shingrai, ngai gaw, dai bunghku hta mung, namhtun chya ai ni hta mung, nye a pawt sindawng ai myit jasim na nngai: ¹⁶ Bunghku mung, dai hpe chya ai ni nga ai, Ngwi pyaw n nga timung, Yerusalem a matu ngwi pyaw ai shingran mu nna, htoi ya ai Israela myihtoi ni, ya kaw nna n nga na masai, ngu nna ngai shanhte hpe tsun na nngai, nga nna madu Yehowa tsun ai. ¹⁷ Dai hta kaga, masha kasha e, tinang myit hkan nna myihtoi htoi ai, na amyu shayi sha ni hpe hkap daru u; shanhte hpe lakap nna myithtoi htoi u: ¹⁸ Madu Yehowa ning nga ai, Myit masin hpe rim la na nga, yawng mayawng a machyang ndum matu, bunghkum chywi nna, kaji kaba ni a baw ntsa e baw magap htinggrum ai num ni gaw, dingnye lu ma ai. Nanhte gaw nye amyu masha ni a myit masin hpe rim la nna, nanhte hte seng ai ni hpe jahkrung da na myit ni? ¹⁹ Masu ga madat mayu ai nye a amyu masha ni hpe nanhte masu kau nna, n si ging ai ni hpe sat kau, si ging ai ni hpe mahtang jahkrung da ai majaw, nanhte gaw muk-yaw mam latup mi hte muk n-gup mi a jaw e, nye a amyu masha ni a man e ngai hpe jahpoi kau myit dai. ²⁰ Dai re ai majaw Madu Yehowa ning nga ai, Yu mu, myit masin hpe u zawn rim la lu hkra, nanhte lang ai bunghkum ni hpe ngai ndawng nna, nanhte a machyang ndum na karawt la nhtawm, nanhte tam rim la ai myit masin ni hpe, dat dat na nngai. ²¹ Nanhte a baw magap ni hpe mung, ngai gang je kau nna, nye a amyu masha ni hpe nanhte a lata na mawai la na nngai: shanhte gaw htawmhpang e rim la ai n hkrum nna, ngai Yehowa rai nga ai hpe, nanhte chye lu na marin dai. ²² Kaning rai nme law, ngai n shayawn yu ai dinghpring ai wa a myit masin hpe, nanhte masu ga hte shayawn kau nna, tara n lang ai wa gaw hkye la ai n hkrum lu hkra, tinang a n hkru ai lam n kau da na matu, shi a lata hpe n-gun shaja ya mu ai: ²³ dai re ai majaw, nanhte htawmhpang de kaman lila shingran mu lu na n rai; shaba mung wawt lu na n rai: nye a amyu masha ni hpe nanhte a lata na ngai mawai la na nngai: ngai Yehowa rai nga ai hpe nanhte chye lu na marin dai, nga ai.

¹ Dai shaloi e agyi salang nkau mi, ngai kaw du nna, nye a man e dung nga ma ai. ² - ³ Shaloi Yehowa a mungga ngai kaw du nna, Masha kasha e, Ndai ni gaw tinang a hpara ni hpe, tinang kraw lawang e dè da nna, tinang a shut hpyit ai ahtu kataw shara hpe, tinang a man e tawn da mu ai: shanhte san ai ga hpe ngai htan na rai ni? ⁴ Dai re ai majaw shanhte hpe tsun mu, Yehowa ning nga ai: Tinang a hpara ni hpe, tinang a kraw lawang e dè da nna, tinang a man e tawn da let, myihtoi wa hpe sa san yu ai Israela masha kadai hpe mung, shi hta hpara sumla law nga ai hte maren, ngai Yehowa shi hpe htan na nngai; ⁵ shingrai ngai gaw Israela amyu hpe tinang a myit masin hte maren bai tai na nngai; kaning rai nme law, shanhte nlang hte gaw, tinang a hpara ni a majaw ngai hte tsan gang wa masai. ⁶ Dai re ai majaw Israela dap hpe tsun u, Madu Yehowa ning nga ai: Kayin wa marit; hpara sumla ni kaw na kayin wa marit; nanhte a matsat shabat amu nlang hte hpe kau da manu. ⁷ Kaning rai nme law, ngai hte hka nhtawm, tinang a hpara ni hpe, tinang a kraw lawang e dè da nna, tinang a shut hpyit ai ahtu kataw shara hpe, tinang a man e tawn da ninglen, nye a myit hpe san yu na matu, myihtoi wa hpang de sa du ai Israela masha kadai hpe mung, Israela mung hta sa manam nga ai kadai hpe mung, ngai Yehowa nan shi hpe htan na nngai: ⁸ ngai dai wa hpe hkap daw nna, mauhpa shara, kumla hte ga malai shatai let, nye a amyu masha ni hta na shi hpe shapraw kau nna, ngai Yehowa rai nga ai hpe, nanhte chye lu na marin dai. ⁹ Myihtoi wa gaw myihtoi htoi shut yang, ngai Yehowa nan dai wa hpe shut shangun nngai: ngai gaw dai wa ntsa e nye a lata ladawn nna, nye a amyu Israela kaw na shamyit kau na nngai: ¹⁰ Shanhte gaw mara hte maren ari hkrum na mara ai; myihtoi wa hkrum na ari gaw, shi hpe sa grau ai wa a ari hte bung na ra ai: ¹¹ shingrai htawmhpang de Israela amyu gaw ngai hpe n kau da, lam n dam, tinang a shut hpyit ai hte tinang hkum hpe awu asin n di kau ai sha, shanhte gaw nye a amyu, ngai gaw shanhte a Karai Kasang tai na nngai, nga nna Madu Yehowa tsun ai. ¹² - ¹⁴ Bai Yehowa mungga ngai kaw du nna, Masha kasha e, mungdan gaw ngai hpe yubak galaw nna, tara hpe grai tawt lai ai majaw, ngai gaw de a ntsa e nye a lata ladawn nna, muk ngu ai dawhkrawng hpe agrawp kau ai hte, hku wa wa shangun nna, dai mung na masha hte yamnga ni hpe shamyit kau yang, Noa, Daniela hte Yoba mying ai marai masum gaw, dai yawng lawm nga timung, tinang a dinghpring ai hte, tinang a asak hpe sha mawai la lu na mara ai, nga nna Madu Yehowa tsun ai. ¹⁵ - ¹⁶ Ngai gaw matse labye ni hpe dai mungdan hta paw pru shangun nna, dai ni a majaw shingran katsi ai shara tai mat nna, kadai mung n lai lu ai rai yang; ndai marai masum dai yang e lawm nga timung, Ngai hkrung nga ai hte maren, shanhte gaw shayi shadang sha ni hpe pyi, mawai la lu na n rai; tinang hkum hkrai lawt lu nna, mungdan gaw shingran katsi ai shara tai na ra ai, nga nna Madu Yehowa tsun ai. ¹⁷ - ¹⁸ Bai ngai gaw, dai mungdan ntsa e ri nhtu shangun nna, Ntawng nhtu e, ndai mungdan hta masha hte yamnga n nga lu hkra, dai hpe shaza kau u, nga nna ngai tsun yang, ndai marai masum ndai yang e lawm nga timung, ngai hkrung nga ai hte maren, tinang shayi shadang sha ni hpe pyi, mawai la lu na n rai; tinang hkum hkrai lawt lu na mara ai, nga nna Madu Yehowa tsun ai. ¹⁹ - ²⁰ Bai ngai gaw ndai mungdan hta e ana zinli shangun dat nna, masha hte yamnga n nga lu hkra, nye pawt sindawng ai sai, de a ntsa e ru dat yang; Noa, Daniela hte Yoba dai yang e nga timung, Ngai hkrung nga ai hte maren, shanhte gaw shayi shadang sha ni hpe pyi mawai la lu na n rai; tinang a dinghpring ai hte tinang a asak hpe sha, shalawt lu na mara ai, nga nna Madu Yehowa tsun ai. ²¹ Dai majaw Madu Yehowa ning nga ai: Yerusalem mare hta na masha hte yamnga hpe shamyit kau na matu, ri nhtu hku wa, matse labye hte ana zinli ngu ai, yak la ai ari mali hpe de a ntsa e ngai shangun dat yang, dai hta grau nna yak wa na, n rai ni? ²² Gaja wa, naw ngam nga ai shayi shadang sha nkau mi hti nga timung, shanhte gaw nanhte hpang de du nna, nanhte gaw shanhte a arawn alai hte htunghking hpe mu na marin dai: dai hpe yu yang, nanhte gaw, Yerusalem mare ntsa e ngai shapraw ai tsin-yam tsindam mahkra a lam, shalan shabran hkrum na myit dai. ²³ Shanhte a arawn alai hte htunghking hpe mu myit yang, nanhte shalan shabran ai lu la nna, ngai dai mare hta e galaw ai amu mahkra hpe, mayu lata e n galaw nngai, nanhte chye lu na marin dai, nga nna Madu Yehowa tsun ai, nga ai.

¹ - ² Bai Yehowa a mungga ngai kaw du nna, Masha kasha e, tsabyi ru gaw hpun kaga hte, tsabyi lakung lakying gaw maling na hpun ni hta grau kaja nga ai. rai ni? ³ Lama ma galaw na matu dai hta na hpunpyen lu la n ni? arai noi na matu, chyinghkyi galaw ga a ni? ⁴ Yu u, dai gaw ju na matu hpun hkrai rai nga ai; wan gaw de a npawt ndung hte ka-ang hpe hkru kau nga ai: dai gaw asung shang a ni? ⁵ Yu u, dai gaw majing naw rai nga yang, hpa asung n shang nga ai: ya wan hte hkru nna hkat mat yang, grau nna asung n shang ai, n rai ni? ⁶ Dai re ai majaw Madu Yehowa ning nga ai: Maling na hpun ni hta na, ju na hpun matu ngai ap kau ai tsabyi ru hpe zawn, Yerusalem mare na ni hpe ngai ap kau na nngai. ⁷ Ngai shanhte hpe hkap gasat na nngai; shanhte gaw wan mang mi na pru nna, wan mang mi hta hkru na mara ai; shingrai, ngai shanhte hpe hkap gasat yang, ngai Yhowa rai nga ai hpe, nanhte chye lu na marin dai. ⁸ Shanhte grai wa shut hpyit ai majaw, dai mungdan hpe shingran katsi ai shara ngai shatai na nngai, nga nna Madu Yehowa tsun ai.

¹ - ² Bai Yehowa mungga ngai kaw du nna, Masha kasha e, Yerusalem mare gaw tinang a matsat shabat lam chye lu hkra, tsun u; ³ Madu Yehowa Yerusalem mare hpe lakap nna ning nga ai: Na a daju hte dai daw ai shara Hkanan mung hta rai nga ai: Na nwa gaw Amori masha, nnu gaw Hiti num rai nga ai. ⁴ Nang shangai wa ai shani e, na shadai hpe kadai n daw, nang hpe kashin shatsawm na wa n nga, jum hte nang hpe n arut, sanen hte n kayawp ma ai; ⁵ shingrai galaw na matu, nang hpe mu nna matsan dum ai wa langai mi n nga ai; nang shangai ai nhtoi hta, na hkum hpe matsat ai majaw, pa ga de kabai kau ai hkrum ndai. ⁶ Ngai dai hku lai hkawm nna, nang gaw na a sai hta galu nga ai hpe ngai mu yang, ngai gaw, Asak hkrung u, gaja wa asak hkrung u, ngu nna, na asai hta galu nga yang, nang hpe tsun nngai. ⁷ Pa ga na tsingdu hpe zawn ngai nang hpe shalaw nngai: nang kaba wa nna, kunghpan wa nga ndai; tsawm htap ai gali lakai mawn sumli nga ndai; na madoi chyuhpang gawng wa nna, na a hkum hta mun tu nga ai; raitimung, nang singgu krin naw rai nga ndai. ⁸ Ya dai hku ngai lai nna, nang hpe mada yu yang, yu u, nang hkawn ram prat du ai majaw, ngai gaw nye a palawng galu hpyan nna, na a singgu krin hpe gagap nngai; shaloi ngai na a matu dagam nna, ga shaka tawn da ai hte, nang nye a num tai ndai, nga nna Madu Yehowa tsun ai. ⁹ Shaloi ngai nang hpe hka shin ya nngai; nang hta kap ai sai ngai tsai tsai hka shin kau ya nna, namman hte nang hpe chya ya nngai. ¹⁰ Maka ai hpun palawng hte ngai nang hpe jahpun nna, tahkisha hpyi kyepdin shadin nngai; mani ai lachyit sumpan hte ngai nang hpe lawai nna, lai palawng jahpun nngai. ¹¹ Gali lakai hte ngai nang hpe mawn sumli nna, lata hta lahkawn hkawn, du hta saidawng gali ya nngai. ¹² Na a ladi hta shang hkawng, na a na hta lakan ngai bang nna, na a baw ntsa e tsawm htap ai janmau shagup nngai. ¹³ Shingrai aja gumhpraw hte nang mawn sumli nga ndai; na a hpun palawng gaw, mani ai lachyit sumpan, alai hte maka ka ai sumpan rai nga ai; mani ai shadung, lagat jahku hte sau sha let, grai tsawm htap ai ahpraw nsam pru nna, nang gaw hkawhkam jan aya hkam la nga ndai. ¹⁴ Ngai gaw nye a arawng sadang hpe, nang hta dagraw nngai majaw, na a tsawm htap ai ahpraw hkum tsup nga nna, maigan amyu ni hta de a lam kajai gumhkawng nga ma ai, nga nna Madu Yehowa tsun ai. ¹⁵ Raitimung, nang gaw na a tsawm htap ai hta machyu nga nna, nang kajai gumhkawng hkrum ndai majaw shawa num tai nna, hkawm lai wa ai ni yawng hte shut hpyit nga ndai: la shagu hte nang hkrum ndai. ¹⁶ Dai hta kaga nang gaw, na a hpun palawng raw nna, ahpraw asam amyu myu pru ai sumpan hte tsaw ai shara ni hpe mawn nna, de a ntsa e shawa num amu galaw ndai: dai lam galoi n byin yu ai hte, htawmhpang de mung n byin na ra ai. ¹⁷ Bai nang gaw, nye a aja gumhpraw hte galaw nna, ngai nang hpe jaw ai, tsawm htap ai gali lakai hpe, nang la nna, la sumla galaw nhtawm, shanhte hte shut hpyit nga n hka: ¹⁸ na a maka ka ai sumpan nang la nna, shanhte hpe jahpun nhtawm, nye a sau hte manam pyaw ai baw, shanhte a man e tawn da nu ai. ¹⁹ Ngai nang hpe jaw ai muk hpe mung, ngai nang hpe sha shangun ai mani ai shadung, asau hte lagat jahku hpe mung, nang la nna, ngwi ai sangau tai na matu, shanhte a man e pyi tawn da nu ai; dai lam tut rai nga ai, nga nna Madu Yehowa tsun ai. ²⁰ Dai hta n-ga, nye a matu nang shangai ai, na a shayi shadang sha ni hpe nang la nna, sha kau hkrum na matu, sumla ni hpe nawng ya kau mu ai: nang hkan ai shawa num amu gaw, amu kaja rai nga a ni? ²¹ Nye a kashu kasha ni hpe nang sat kau nna, sumla ni a man e wan nat hkungga tai shangun ai rai hka! ²² Dai hta n-ga, nang matsat shabat hte shawa num amu mahkra hpe galaw nga yang, hkawn ram prat e nang singgu krin rai nga ai hte, na a sai hta galu nga ai hpe, nang n dum n hka. ²³ - ²⁴ Nang dingnye lu ndai, dingnye lu ndai, nga nna Madu Yehowa tsun timung, ndai shut hpyit ai amu mahkra hta n-ga, nang rawng na matu wahpang galaw nna, mare lam shagu hta tsaw ai shara dè da ndai. ²⁵ Nang gaw lam she shagu hta na a tsaw ai shara ni hpe de da nna, na a tsawm htap ai hkum hpe matsat shabat di kau hkra, dai lam lai wa ai ni yawng hpe lagaw shadawng dan nna, shut hpyit ai amu shalaw dat wu ai. ²⁶ Bai, nang gaw, na a htingbu ni ngu ai, hkum kaba ai Egutu masha ni hte hpye ai amu galaw nna, ngai hpe pawt bu shangun hkra, na a shut hpyit ai amu shalaw dat wu ai. ²⁷ Dai re ai majaw, yu u, ngai gaw nye a lata, na ntsa e ladawn let, na a sha jarit hpe dawm kau nna, na n se ai amu majaw, na a lam, kaya dum ai hte, nang hpe ndawng n yawt ai Hpilisti shayi sha ni a lata de ap kau nngai. ²⁸ Na kayut ai myit n dik hkraw ai majaw, Asuri masha ni hte mung nang shut hpyit ndai: gaja wa, nang shanhte hte shut hpyit ndai: gaja wa, nang shanhte hte shut hpyit timung, myit dik lu ai n rai. ²⁹ Dai hta kaga, Hkannan mung kaw nna Hkalde mung du hkra, shawa num amu nang shalaw dat timung, myit dik lu ai n rai. ³⁰ Kaya n chye ai shawa num zawn, ndai lam yawng nang galaw ndai majaw, na a myit masin gade ngawk nga a hka: ³¹ lam she shagu hta, na wahpang hpe nang gaw da nna, mare lam shagu hta na a tsaw ai shara hpe dè da ai hte, jahpu n hpyi ai majaw, shawa num kaga hte n bung ndai. ³² Tsasam la hpe na a madu wa a malai hkap la ai majaw, la shaw ai num hte bung ndai. ³³ Shawa num yawng gaw kumhpa la ma ai; nang chyawm gaw, na sumtsaw sumra ni hpe kumhpa jaw ndai; shara shagu na ni sa nna, nang hte kanawn nga lu hkra, shanhte hpe kumhpa hte lau la mu ai. ³⁴ Dai rai nna, nang gaw kaga shawa num hte shai nna galaw ndai; nang hpe tam ai wa kadai n nga ai; nang mahtang kumhpa jaw nna, nang hpe jaw ai wa n nga ai majaw, shawa num kaga hte shai nga ndai, nga nna Madu Yehowa tsun ai. ³⁵ Dai re ai majaw shawa num e, Yehowa a ga madat mara u: ³⁶ - ³⁷ Madu Yehowa ning nga ai, Nang gaw na a magri den-ga hpe ru kau nna, na a sumtsaw sumra ni hte shut hpyit let, na a singgu krin shadawng dan ndai majaw mung, na a matsat shabat sumla ni yawng hte, nang shanhte hpe nawng ya ai, nshu nsha ni a asai majaw mung, ngai gaw, nang hte pyaw chyai ai, na a sumtsaw sumra ni mahkra hpe mung, nang tsawra ai ni hte, nang ndawng n yawt ai ni mahkra hpe mung, jahpawng tawn na nngai; ngai shanhte hpe na grupyin e hpawng shangun nna, shanhte na a kaya kahpa hpe mu lu hkra, na a singgu krin shanhte a man e shadawng dan na nngai. ³⁸ La shaw ai hte masha sat ai num ni hpe dawdan ai zawn, ngai nang hpe dawdan nna, pawt kahtet ai hte n-yun bu ai sai, jaw na nngai. ³⁹ Dai hta kaga ngai gaw shanhte a lata de nang hpe ap kau nna, shanhte gaw na a wahpang hpe run kau ai hte, na a tsaw ai shara ni hpe agrawp kau na mara ai; na a hpun palawng hpe raw kau nna, na a tsawm ai gali lakai ni hpe hpyu la nhtawm, nang hpe singgu krin kau da na mara ai. ⁴⁰ Masha wunawng hpe mung shanhte shaga nna, dai ni gaw nlung hte nang hpe kabai sat nhtawm, nhtu hte azat kau na mara ai. ⁴¹ Shanhte gaw na a nta ni hpe nat kau nna, numsha law law a man e nang hpe ari jaw na mara ai; nang htawmhpang e shawa num n tai lu hkra, ngai galaw na nngai: htawmhpang de kumhpa hte masha hpe lau lu na n rai. ⁴² Shingrai, nang hpe kahtet ai myit ngai shakawp na nngai; nang hpe n-yun bu ai myit ngai dawm la ai hte, atsin sha nga nna, htawmhpang e pawt bu na n rai. ⁴³ Kaning rai nme law, nang gaw na a hkawn ram prat hpe n dum ndai; ndai lam shagu hta ngai hpe gumlau ndai: dai re ai majaw, yu u, na a yubak hpe na a baw ntsa de ngai shapraw na nngai; na matsat shabat amu mahkra a ntsa e, ndai n san n seng ai hpe galaw kahtap lu sa na n rai, nga nna Madu Yehowa tsun ai. ⁴⁴ Yu u, ga malai tsun ai wa kadai mung, “Kanu zawn re ai, shayi sha,” nga nna nang hpe lakap let, ga malai tsun shajang na mara ai. ⁴⁵ Nang gaw, madu wa hte kashu kasha ni hpe matsat ai num a shayi sha, rai nga ndai; tinang a madu wa hte kashu kasha ni hpe matsat ai num ni a kanau mung rai nga ndai: na nnu gaw Hiti num, na nwa gaw Amori masha rai nga ai. ⁴⁶ Na a kana gaw, tinang a shayi sha ni hte rau, na a pai maga de shanu nga ai, Samari mare rai nga ai; na a kanau gaw, tinang a shayi sha ni hte rau, na a hkra maga de shanu nga ai Sodom mare rai nga ai. ⁴⁷ Raitimung, nang gaw, shanhte a htunghking hte matsat shabat lam sha hkan ai n rai; dai hpe kaji sha zawn nawn nna, lam shagu hta shanhte hta grau n se nga ndai. ⁴⁸ Ngai hkrung nga ai hte maren, nang gaw na a shayi sha ni hte rau galaw yu ai zawn, na a kanau Sodom hte shi a shayi sha ni galaw yu ai, n rai. ⁴⁹ Yu u, na nnau Sodom a yubak chyawm gaw, shi hte shi a shayi sha ni gaw, myit kaba ai, nhpaw n-ya lusha ai hte a ngwi apyaw ningngai nga nna, nni nkri hkrum ai ni hte matsan mayan ni hpe n shadaw shalan ai rai nga ai. ⁵⁰ Shanhte gaw nye a man e myit kaba nna, matsat shabat amu galaw ma ai; dai lam hpe ngai mu yang, ngai shanhte hpe htawm kau nngai. ⁵¹ Samari mare mung, nang galaw ai yubak chyen mi daram n galaw yu ai; nang gaw, na a matsat shabat lam ni hpe, shanhte hta grau shalaw nna, nang galaw ai matsat shabat lam ni a majaw, na nnau nna ni gaw awlaw ai hkrum ma ai. ⁵² Na nnau nna ni hpe nang awlaw shangun ndai majaw, nang hkrum na ra ai kaya kahpa hpe hkam la u: shanhte galaw yu ai yubak hta, nang galaw yu ai matsat shabat lam, grau kaba nga ai majaw, shanhte gaw nang hta grau dinghpring nga ma ai: gaja wa, nang gaw na nnau nna ni hpe awlaw shangun ndai majaw, nang mak mat nna, hkrum na ra ai kaya kahpa hpe hkam la u, nga nna madu Yehowa tsun ai. ⁵³ - ⁵⁴ Shingrai, nang hkrum na ra ai kaya kahpa hpe, nang hkam la nna, nang galaw yu ai lam yawng gaw, nnau nna ni a matu shalan shara tai wa ai majaw, nang galaw yu ai kaya kahpa lam dum nga lu hkra, bawngdung hkrum ai Sodom hte shi a shayi sha ni hpe mung, Samari hte shi a shayi sha ni hpe mung, ngai nhtang woi wa nna, bawngdung hkrum ai, na a masha ni hpe mung, shanhte hte rau woi wa na nngai. ⁵⁵ Shingrai, na nnau Sodom hte shi a shayi sha ni, Samari hte shi a shayi sha ni, nang hte na a shayi sha ni gaw, moi na buga de nhtang wa na mara ai. ⁵⁶ - ⁵⁷ Kaning rai nme law, nang galaw ai yubak hpe garai n shadawng dan nna, Suri shayi sha ni hte shanhte grupyin e nga ai ni gaw, nang hpe asawng nna, na a grupyin na Hpilisti shayi sha ni gaw, nang hpe n kaw n law di ai aten garai n du yang, nang myit kaba nna, na nnau Sodom a amying hpe n kajai hkraw ndai. ⁵⁸ Ya chyawm gaw na a n se ai amu hte matsat shabat amu a asi hpe, nang hkam la ndai, nga nna Yehowa tsun ai. ⁵⁹ Kaning rai nme lae, Madu Yehowa ning nga ai: Ga shaka hpe sharun kau na matu, dagam ai ga hpe n kaw n law di kau ai majaw, nang di ai hte maren ngai nang hpe di kau na de ai. ⁶⁰ Raitimung, na a ram prat e ngai nang hte tawn da ai ga shaka hpe ngai naw dum nna, htani htana ga shaka nang hte tawn da na nngai. ⁶¹ Nang gaw yin la ai ga shaka hpe n hkan timung, na nnau nna ni hpe na a shayi sha tai na matu, ngai nang hpe jaw nna, nang shanhte hpe hkap la yang, na a arawn alai hpe nang myit dum nna, kaya nga na ndai. ⁶² Shingrai, nye a ga shaka hpe ngai nang hte tawn da nna, ngai Yehowa rai nga ai hpe, nang chye lu na ndai: ⁶³ nang galaw yu ai yubak mahkra hpe, ngai raw dat kau yang, nang myit dum nna, kaya ai hte mak mat ai majaw, htawmhpang de n-gup n hpaw ai nga nga na ndai, nga nna Madu Yehowa tsun ai, nga ai.

¹ - ² Bai Yehowa a mungga ngai kaw du nna, Masha kasha e, Israela dap hpe gumwai ga hte ga shadawn hku tsun u; ³ - ⁴ Madu Yehowa ning nga ai: Lak lai ai ahpraw asam hte, mun law law tu nna, singkaw galu kaba ai langda kaba gaw, Lebanon bum de du nna, arit hpun ndung makrang let, tsaw htum ai makrung ni hpe di la nna, hpaga ga ai mare de hpai wa nhtawm, rai dut sha ai ni a mare hta tawn da wu ai. ⁵ Dai mung na nli hpe mung shi la nna, sau ai lamu ga hta gat da wu ai; hka law ai na lawk hta shi dai hpe ban da nna, mu mahka hpun zawn hkai da wu ai. ⁶ Dai gaw anem sha hkrawn ai tsabyi ru zawn tu nna, de a lakung lakying ni gaw langda nga ai de hkrawn wa nna, shi a npu e ru jung wa ai: shingrai dai gaw, lakung lakying kying ai hte makrung krung ai tsabyi ru tai wa sai. ⁷ Bai, mun law law tu nna, singkaw galu kaba ai langda kaba kaga langai mi nga ai; shaloi, yu u, ndai tsabyi ru gaw, ntsin lu lu na matu, shi tu ai na lawk kaw nna, dai langda hpang de ru hkram wa ai hte lakung lakying kying nga ai. ⁸ Dai tsabyi ru chyawm gaw, ru kaja tai nna, lakung lakying kungdam wa na hte si si na matu, hka law ai shara, ga sau rawng ai na lawk hta, hkai da nu ai. ⁹ Dai rai nna tsun u, Madu Yehowa ning nga ai, Dai ru gaw kaba wa lu na kun? Nyip mat na matu, shi gaw de a aru baw kau nna, asi di la na, n rai ni? De a lap mahkra nyip mat wa na ra ai, n rai ni? N-gun ja ai lahpum hte, masha law nga timung, dai ru gaw kaba wa lu na, n rai. ¹⁰ Gaja wa, yu u, hkai da hkrum sai majaw, kaba wa na rai ni? sinpraw nbung wa yang, yawng nyip mat wa na, n rai ni? dai gaw tu kaba wa ai na lawk hta, nyip mat na ra ai, nga ai. ¹¹ - ¹² Bai Yehowa mungga ngai kaw du nna, Gumlau chye ai amyu hpe tsun u, Ndai ga lachyum nanhte n chye na nga myit ni? shanhte hpe tsun u: Babelon hkawhkam gaw Yerusalem mare de du nna, Yerusalem hkawhkam hte de a agyi salang ni hpe rim la nna, Babelon mare de woi wa manu ai: ¹³ - ¹⁴ hkawhkam amyu masha langai mi hpe mung shi la nna, shi hte, ga shaka tawn da wu ai; dai mungdan gaw n-gun kya nna, n gumlau lu na hte, shi hte tawn da ai ga shaka majaw sha nga nga lu hkra, shi dai wa hpe dagam shangun nna, mungdan hta daru magam rawng ai ni hpe, rim woi mat wa manu ai. ¹⁵ Raitimung shi gaw gumra hte hpyen masha law law hpyi na matu, Egutu mung de kasa shangun nna, Babelon hkawhkam hpe gumlau sai. Shi awng wa lu na kun? Dai zawn galaw ai wa gaw lawt lu na kun? ga shaka run kau nhtawm, lawt lu na kun? ¹⁶ Madu Yehowa ning nga ai: Ngai hkrung nga ai hte maren, gaja wa, shi hpe hkawhkam aya hta dang da ai wa a ga shaka hpe run kau nna, dagam da ai ga hpe n gawn n sawn di kau ai majaw, shi gaw dai hkawhkam wa a shara, Babelon mare ka-ang e, shi a man e si na ra ai. ¹⁷ Babelon masha ni gaw hpyen gasat nna, masha law law hpe sat kau na matu, kaduk htu nna hpyendap jung yang, Hpara-u hte shi a law la ai luksuk laba wunawng wuwa ni gaw, Zedekia hpe karum lu ai n rai. ¹⁸ Kaning rai nme law, shi gaw, ga shaka hpe run kau nna, dagam ai ga hpe n kaw n law di kau nu ai; yu u, shi gaw lata matut nhtawm, dai lam mahkra hpe galaw nu ai: shi lawt lu na, n rai. ¹⁹ Dai re ai majaw Madu Yehowa ning nga ai, Ngai hkrung nga ai hte maren, gaja wa, nye dagam ai ga hpe n kaw n law di ai hte, nye ga shaka hpe run kau ai yubak gaw, shi a baw ntsa e ngai shapraw na nngai. ²⁰ Ngai gaw nye a sumgawn hte shi hpe ka-up nna, nye a mahkam hta lu shangun nhtawm, Babelon mare de shi hpe woi wa nna, nye a ga hpe tawt lai kau ai yubak majaw, dai yang e shi hpe dawdan na nngai. ²¹ Shi hte rau hprawng mat wa ai ni hte, shi a hpyen masha ni yawng, nhtu hte si nna, naw ngam nga ai ni gaw, nbung bung shagu de bra mat na mara ai: shaloi, ngai Yehowa nan dai lam tsun nga ai hpe, nanhte chye lu na marin dai, nga ai. ²² Madu Yehowa ning nga ai: Dai arit hpun na tsaw htum ai makrung hpe mung ngai la nna, hkai da na nngai; bai, tsaw htum ai makrung ni hta na, gunglung maku langai mi hpe, ngai di la nna, tsaw ai bum ntsa e hkai da na nngai: ²³ tsaw htum ai Israela bum ntsa e ngai dai hpe hkai da na nngai; dai gaw lakung lakying kying wa nna, asi si ai hte reng htum ai arit hpun tai na ra ai: de a npu e u amyu shagu nga nga nna, de a lakung lakying ni a shingnip hta shanu nga na mara ai. ²⁴ Shingrai, ngai Yehowa gaw, tsaw ai hpun hpe shanem kau nna, nem ai hpun hpe shatsaw nngai mung, tsit lali ai hpun hpe jahkraw kau nna, hkraw ai hpun hpe tsit lali shangun nngai mung, nam mali na hpun ni yawng chye lu na mara ai: ngai Yehowa nan tsun ai hte maren shabyin nngai, nga ai.

¹ - ² Bai Yehowa a mungga ngai kaw du nna, Kaji kawa ni gaw hkri ai tsabyi si sha nna, kashu kasha ni a wa makrim ai, nga nna, Israela mung hpe lakap let, nanhte tsun ai ga malai gaw, hpa nga ai rai ta? ³ Madu Yehowa ning nga ai: Ngai hkrung nga ai hte maren, htawmhpang de Israela mungdan hta, dai ga malai tsun shara n nga na sai. ⁴ Yu mu, myit masin yawng hpe ngai madu nga nngai; kaji kawa a myit masin hpe ngai madu ai zawn, kashu kasha a myit masin hpe mung madu na nngai: yubak galaw ai myit masin gaw, si na ra ai. ⁵ - ⁹ Masha langai ngai dinghpring nga nna, tara dara ai hte dinghpring ai hku shatup ai rai yang, bum ntsa e shat n sha, Israela dap a hpara ni hpe n mada, masha jan n shaw, nba lang ai num hte n kanawn, kadai hpe mung n zingri, tang da ai arai, madu hpe bai hkin ya, kashun kashe ai amu n galaw, kawsi hkrum ai wa hpe shat jaw, hpun palawng n lu ai wa hpe shabu shahpun nna; amyat hte gumhpraw n hkoi, law htam na matu arai n boi, n hkru ai amu hta n lawm, masha wa a lapran e tengman ai hku tara dara let, kangka re ai amu shachyen lu hkra, nye a matsun maroi ga hpe dum nna, ngai hkangda ai ga hpe hkan nang ai rai yang, dai wa gaw dinghpring nga nna, gaja wa teng teng hkrung nga na ra ai, nga nna Madu Yehowa tsun ai. ¹⁰ - ¹³ Raitimung, dai wa a kasha gaw, damya wa, masha sat ai wa, shawng de tsun ai yubak langai ngai galaw nna, yubak langai mi n koi kau ai sha, bum ntsa e shat sha, masha jan shaw, nni nkri hkrum ai hte matsan mayan ni hpe zingri, masha sut rai hpe kashun la nna, tang da ai arai, madu hpe n hkin ya; hpara ni hpe mada, matsat shabat amu galaw, amyat hte gumhpraw hkoi ya ai hte, law htam na matu bai ya ai wa rai yang, dai wa gaw hkrung nga na kun? Shi hkrung nga na n rai; ndai matsat shabat amu ni hpe galaw ai majaw, shi teng teng si na ra ai: shi a asai gaw shi a ntsa e mara na ra ai. ¹⁴ Bai dai wa a kasha gaw, kawa galaw ai yubak mahkra hpe dum nna, hkrit hkungga ai myit rawng ai majaw, dai zawn n galaw; bum ntsa e shat n sha, Israela dap a hpara ni hpe n mada, masha num n shaw, kadai hpe mung n zingri, tang da ai arai n la, masha rai hpe n kashun la, kawsi ai wa hpe jaw sha nna, hpun palawng n lu ai wa hpe shabu jahpun; nni nkri hkrum ai wa hpe n sharu, amyat hte gumhpraw n hkoi ya ai sha, nye a tara ga shatup nna, hkangda ai matsun maroi ga hkan nga ai rai yang, dai wa gaw kawa a yubak majaw si wa na n rai, shi teng teng hkrung nga na ra ai. ¹⁸ Kawa chyawm gaw, tinang kahpu kanau wa hpe adip arip, maw lu maw sha nna, tinang a amyu hta n kaja ai amu galaw ai majaw, yu u, shi gaw tinang a shut hpyit ai hta si na ra ai. ¹⁹ Nanhte mahtang, Ataw, kasha gaw, kawa a yubak hpe, hpa majaw n hkam na rai ni? nga nna san yang, Kasha gaw tara hkan nna, dinghpring ai amu galaw let, nye a matsun maroi ga mahkra hpe hkan shatup ai majaw, shi gaw teng teng hkrung nga na ra ai. ²⁰ Yubak galaw ai myit masin gaw, si na ra ai: kasha gaw kawa a yubak hpe, kawa gaw kasha a yubak hpe, hkam na, n rai; dinghpring ai wa a dinghpring ai gaw, shi a ntsa e, tara n lang ai wa a tara n lang ai gaw, shi a ntsa e, mara na ra ai. ²¹ Raitimung, tara n lang ai wa gaw, tinang galaw ai yubak mahkra hpe koi kau let, nye a matsun maroi ga yawng hpe hkan shatup nna, tara hte dinghpring ai hku hkan yang, dai wa gaw teng teng hkrung nga na ra ai: shi si na, n rai. ²² Shi galaw yu ai tawt lai ai amu langai mi hpe matsing na n rai; shi hkan galaw ai dinghpring ai amu majaw, shi hkrung nga na ra ai. ²³ Tara n lang ai wa a si na lam hta ngai sharawng awng nga n hka; shi gaw shi a arawn alai hpe kau da nna, hkrung nga na hpe, sharawng awng nga nngai, n rai ni? nga nna Madu Yehowa tsun ai. ²⁴ Raitimung, dinghpring ai wa gaw htak mat nna, shut hpyit nga ai hte, tara n lang ai wa a matsat shabat lam mahkra hte maren hkan galaw yang, shi hkrung nga na rai ni? Shi galaw yu ai dinghpring ai amu langai mi muk matsing da na, n rai: shi tawt lai ai amu hte, shi galaw ai yubak majaw, shi si na ra ai. ²⁵ Raitimung nanhte gaw, Madu jeyang ai lam ding ai n rai, nga nna tsun myit hka; Israela dap e, madat mara u; nye a lam ding nga ai, n rai ni? nanhte a lam mahtang n ding nga ai, n rai malit ni? ²⁶ Dinghpring ai wa gaw htak mat nna, shut hpyit ai amu galaw yang, dai amu majaw shi si na ra ai; shi galaw yu ai shut hpyit ai hte shi si na ra ai. ²⁷ Bai, tara n lang ai wa gaw, tara n lang ai lam kau da nna, tara hte tengman ai hku hkan yang, shi gaw shi a asak hpe mawai la lu na ra ai. ²⁸ Shi galaw yu ai, tawt lai ai yubak mahkra hpe sumru yu nna kau da ai majaw, shi teng teng hkrung nga na ra ai; shi si na, n rai. ²⁹ Raitimung, Israela dap gaw, Madu jeyang ai lam ding ai n rai, nga nna tsun ai. Israela dap e, nye a lam ding nga ai, n rai ni? nanhte a lam mahtang magaw nga ai, n rai malit ni? ³⁰ Dai rai nna, Israela dap e, nanhte langai hte langai a arawn alai hte maren, ngai nanhte hpe jeyang na nngai, nga nna Madu Yehowa tsun ai. Kayin marit; nanhte a tawt lai ai lam mahkra hta na kayin marit: shingrai nanhte gaw, yubak mara majaw, ahtu kataw hkrum na n rai. ³¹ Nanhte galaw yu ai tawt lai ai amu mahkra hpe kau da nna, myit ningnan hte wenyi ningnan hkam la mu: Israela dap e, hpa majaw si mayu myit ta? ³² Si hkrum ai wa a si hkam ai hta, ngai sharawng awng nga ai n rai: dai re ai majaw, kayin nna hkrung nga mu law, nga nna, Madu Yehowa tsun ai.

¹ Dai hta n-ga, Israela hkawhkam kasha ni a matu, sharung shayawt let tsun u: ² Na nnu kadai rai ta? Hkanghkyi kanu rai nga ai: shi gaw hkanghkyi hpung hta hpum nga ai; hkanghkyi hkalung ni hta, tinang a kasha ni hpe kaba wa shangun wu ai. ³ Shi kaba wa shangun ai kasha langai mi gaw, hkanghkyi uram tai wa sai; shi gaw shan hpe chye tam ai; masha hpe mung kawa sat chye ai. ⁴ Maigan amyu ni shi a lam na masai; shanhte a nhkun hta shi rim la ai hkrum nna, shanhte gaw hpri chyinghkyi hte, Egutu mung de, shi hpe dun wa mu ai. ⁵ Ya kanu gaw ala nga nna, myit mada shara n nga ai chye yang, kasha kaga langai mi hpe shi la nna, hkanghkyi uram shatai wu ai. ⁶ Shi gaw hkanghkyi ni hte rau kanawn nna, hkanghkyi uram tai wa sai; shi gaw shan hpe chye tam nna, masha hpe mung kawa sat chye ai. ⁷ Shanhte a htingnu ni hpe shi chye nna, shanhte a mare ni hpe shaza kau wu ai: shi shabam ai nsen majaw, mungdan hte dai hta rawng marawng, katsi katsang tai mat sai. ⁸ Dai rai nna, mungdaw ni a amyu baw ni gaw, shi hpe wang tawn nna, shanhte a sumgawn hte ka-up nhtawm nhkun e rim la mu ai. ⁹ Bai shanhte gaw hpri chyinghkyi hte htung hta shi hpe dun bang nna, Babelon hkawhkam hpang de woi wa mu ai: Israela bum ni a ntsa e shi a nsen htawmhpang de n ngoi nga lu hkra, shanhte gaw hpyendap e shi hpe rawng da mu ai. ¹⁰ Na nnu gaw, nang hte bung nna, hka kau e hkai ai tsabyi ru zawn rai nga ai: hka law ai majaw, shi lakung lakying kying nna, asi si nga ai. ¹¹ Hkawhkam ni lang na sumdoi matu, ngang ai dawhkrawng, dai hta tu nga ai; langai mi a tsaw de chyawm gaw, sumwi ni hpe dep nga ai; shi gaw lakung lakying ni mahkra hta grau tsaw nna htawng nga ai. ¹² Raitimung, dai gaw pawt kahtet ai hte baw kau nna, ga de kadawng kau hkrum sai: sinpraw nbung gaw de a asi hpe jahkraw kau nu ai: de a ngang ai dawhkrawng ni daw mat nna, jahkraw kau ai hte wan hkru mat ai hkrum masai. ¹³ Ya chyawm dai gaw, hka n nga ai hkunhkraw ai zaibru jang e, hkai da ai hkrum nga ai. ¹⁴ De a lakung lakying na dawhkrawng langai mi hta na wan pru nna, de a asi hpe hkru kau wu ai; hkawhkam sumdoi tai na matu, ngang ai dawhkrawng langai mi ya n nga sai law. Dai gaw sharung shayawt ai ga rai nga nna, sharung shayawt na matu tai na ra ai.

¹ Ya sanit ning na, shata manga a shi ya shani e, Israela agyi salang ni nkau mi, Yehowa hpe san yu na matu, sa du nna, nye a man e dung nga ma ai. ² - ³ Shaloi Yehowa a ga ngai kaw du nna, Masha kasha e, Madu Yehowa ning nga ai, ngu nna Israela agyi salang ni hpe htawn tsun u: Nanhte ngai hpe san yu na matu, sa du myit ni? Ngai hkrung nga ai hte maren, nanhte san yu ai, ngai n hkam na nngai. ⁴ - ⁵ Masha kasha e, nang shanhte hpe dawdan u; shanhte hpe dawdan u: kaji kawa ni a matsat shabat lam shanhte hpe madun dan nna, Madu Yehowa ning nga ai, ngu nna shanhte hpe tsun u: Israela amyu hpe ngai lata la nna, Yaku dap na aru arat hpe ga shaka tawn da ai hte, Egutu mung hta nye hkum shanhte hpe shadan dan ai shani e, Ngai gaw nanhte a Karai Kasang Yehowa rai nga nngai, ngu nna shanhte hte dagam ai ga tawn da nngai: ⁶ shanhte hpe Egutu mung na shapraw la nhtawm, mungdan ni mahkra hta grau kaja nna, shanhte a matu ngai san da ai, nga chyu hte lagat jahku lwi ai mung de woi shashawn na lam, ngai shanhte hpe dagam da nngai: ⁷ dai shaloi ngai gaw, Nanhte langai hte langai, tinang yu ra ai matsat shabat amu kau da nna, Egutu mung na hpara ni hte, tinang hkum hpe awu asin hkum di kau myit: ngai gaw nanhte a Karai Kasang Yehowa rai nga nngai, ngu nna shanhte hpe tsun ni ai. ⁸ Shanhte chyawm gaw, nye a ga n madat mara ai hte, ngai hpe gumlau nga ma ai; shanhte langai hte langai tinang yu ra ai matsat shabat amu ni hpe mung, Egutu mung na hpara ni hpe mung, n kau da ma ai. Dai rai nna ngai gaw, Nye kahtet ai myit shanhte hta shakawp na matu, Egutu mung ka-ang e, shanhte a ntsa de, nye pawt bu ai hpe, ru dat na nngai, nga nna tsun nngai. ⁹ Raitimung, shanhte nga ai maigan amyu ni a man e, nye mying ningsang jahpoi kau ai n hkrum hkra, de a matu ngai shakut sharang nna, maigan amyu ni a man e, shanhte hpe nye hkum shadan dan let, shanhte hpe Egutu mung na shaw woi wa nngai. ¹⁰ Shingrai ngai gaw Egutu mung na shanhte hpe shaw la nna, nam mali de woi wa nngai. ¹¹ Dai yang e ngai shanhte hpe nye a matsun maroi ga jaw da nna, nye a tara dara ai lam madun dan nngai: dai gaw hkan nang ai wa a hkrung nga na lam rai nga ai. ¹² Dai hta n-ga, shanhte hpe shachyoi shapra nga ai Yehowa, ngai rai nga nngai, shanhte chye na lu hkra, ngai hte shanhte a lapran e kumla tai na matu, nye a Laban nhtoi ni hpe mung, ngai shanhte hpe jaw da nngai. ¹³ Raitimung, Israela dap gaw nam mali hkan e ngai hpe gumlau nga ai: shanhte gaw nye a matsun maroi ga hpe n hkan, nye a tara dara ai lam hpe kau da ma ai: dai lam ni chyawm gaw hkan nang ai wa a hkrung nga na lam rai nga ai; nye a laban nhtoi ni hpe mung shanhte grau awu asin di kau mu ai. Dai rai nna, shanhte hpe shamyit kau na matu, nye a pawt bu ai hpe, nam mali hkan e shanhte a ntsa e ru dat na, ngai tsun nngai. ¹⁴ Raitimung, shanhte hpe shaw wa ai chyeju hpe mu ai maigan amyu ni a man e, nye a amying ningsang jahpoi kau ai n hkrum hkra, de a matu ngai shakut sharang nngai. ¹⁵ Dai hta n-ga, mungdan ni mahkra hta grau kaja nna, ngai shanhte hpe jaw da sai, nga chyu hte lagat jahku lwi ai mung de, n woi wa na matu, nam mali e ngai shanhte hpe dagam ni ai: ¹⁶ kaning rai nme law, shanhte a myit masin tinang a hpara ni hta manoi nga ai majaw, shanhte gaw nye a matsun maroi ga hpe kau da, nye a tara dara ai lam hpe n hkan ai hte, nye a laban nhtoi ni hpe awu asin di kau mu ai. ¹⁷ Raitimung, ngai shanhte hpe lahpawt dum nna, nam mali hkan e shamyit mung n shamyit, jahtum mung n jahtum kau nngai. ¹⁸ Bai nam mali hkan e shanhte a kashu kasha ni hpe, Nanhte a nji nwa ni a matsun maroi ga hpe hkum hkan myit; shanhte a hpara ni hte awu asin hkum rai myit: ¹⁹ ngai gaw nanhte a Karai Kasang Yehowa rai nga nngai: nye a matsun maroi ga hpe hkan mu, nye a tara dara ai lam ni hpe hkan galaw mu: ²⁰ nye a laban nhtoi ni hpe shachyoi shapra mu: ngai gaw nanhte a Karai Kasang Yehowa rai nga nngai, nanhte chye lu hkra, dai laban nhtoi ni gaw, ngai hte nanhte a lapran e kumla tai na ra ai, nga nna ngai tsun ni ai. ²¹ Raitimung, shanhte kashu kasha ni gaw ngai hpe gumlau ma ai: shanhte gaw nye a matsun maroi ga hpe n hkan, nye a tara dara ai lam ni hpe n hkan galaw ma ai: dai lam ni chyawm gaw hkan nang ai wa a hkrung nga na lam rai nga ai: nye a laban nhtoi ni hpe mung, shanhte awu asin di kau ma ai. Dai rai nna, shanhte hta nye kahtet ai myit shakawp na matu, nam mali hkan e nye a pawt bu ai, shanhte a ntsa e ru dat na, ngai tsun nngai. ²² Raitimung, shanhte hpe shaw wa ai chyeju hpe mu ai maigan amyu ni a man e, nye a amying ningsang jahpoi kau ai n hkrum hkra, de a matu ngai shakut sharang nna, nye a lata dawm la nngai: ²³ dai hta kaga, masha amyu ni hta shanhte hpe shabra kau nna, mungdan ni hta ayai kau na matu, nam mali e ngai shanhte hpe dagam nngai: ²⁴ kaning rai nme law, shanhte gaw nye a tara dara ai lam ni hpe n hkan galaw, nye a matsun maroi ga ni hpe kau da, nye a laban nhtoi ni hpe awu asin di kau ai hte, shanhte a myi gaw kaji kawa ni a hpara ni hpe mada nga ai. ²⁵ Dai re ai majaw, n kaja ai tara ga hte, asak n jahkrung ya lu ai matsun maroi ga, ngai shanhte hpe jaw da nngai: ²⁶ ngai Yehowa rai nga ai hpe shanhte chye lu hkra, shanhte hpe shamyit kau na matu, kasha alat ni hpe wan nat hkungga shatai ai hta, shanhte a kumhpa ni hte nawng, ngai shanhte hpe awu asin di kau nngai. ²⁷ Dai re ai majaw, masha kasha e, Israela dap hpe ga tsun u; Madu Yehowa ning nga ai: Nanhte a nji nwa ni gaw, tara tawt lai ai hta n-ga, ngai hpe shatan nhkan ma ai: ²⁸ shanhte hpe jaw na ngu, ngai dagam da ai mung de, woi wa yang, shanhte gaw tsaw ai kawng shagu hte, wum ai hpun shagu hkungga nawng ya let, ngai hpe pawt bu shangun ai kumhpa ni jaw nga ma ai: dai yang e mung, shanhte manam pyaw ai baw nat nawng ya nna, dumhpung hkungga ru jaw mu ai. ²⁹ Shaloi ngai gaw, Nanhte sa ga ai, Tsaw ai shara gaw, hpa rai ta? ngu nna shanhte hpe san timung, dai ni du hkra dai shara hpe Tsaw ai Shara, ngu nna shamying da mu ai. ³⁰ Dai re ai majaw Israela dap hpe tsun u, Madu Yehowa ning nga ai: Israela dap e, nanhte gaw nji nwa ni a htunghking hte maren, tinang hkum hpe awu asin di let, shanhte a matsat shabat amu ni hpe hkan galaw nna shut hpyit ai, n rai nga myit ni? ³¹ Nanhte kumhpa jaw nna, nanhte a shadang sha ni hpe wan nat hkungga shatai let, dai ni du hkra nanhte a hpara ni hte tinang dai awu asin rai nga yang, ngai gaw nanhte a san yu ai hkam na rai ni? Ngai hkrung nga ai hte maren, nanhte san yu ai, ngai hkam na n rai, nga nna Madu Yehowa tsun ai: ³² anhte gaw maigan amyu ni hte, kaga mung na masha ni zawn, hpun nlung hpara ni hpe dawjau na ga ai, nga nna, nanhte myit maw ai hku byin lu na n rai. ³³ Madu Yehowa ning nga ai, Ngai hkrung nga ai hte maren, gaja wa, n-gun ja ai lata, shada da ai lahpum, ru bun ai pawt kahtet ai hte ngai nanhte a ntsa e up na nngai: ³⁴ nanhte bra nga ai amyu ni hta na mung, ayai nga ai mungdan ni hta na mung, ngai nanhte hpe n-gun ja ai lata, shada da ai lahpum, ru bun ai pawt kahtet ai hte shinggyin la nna jahpawng da na nngai: ³⁵ amyu baw ni a nam mali de ngai nanhte hpe woi shawn nhtawm, dai yang e myiman chyaw nanhte hpe dawdan na nngai. ³⁶ Nanhte a nji nwa ni hpe, Egutu mung na nam mali e dawdan ai hte maren, ngai nanhte hpe dawdan na nngai, nga nna Madu Yehowa tsun ai. ³⁷ Ngai nanhte hpe shingna npu e lai shangun nna, dai ga shaka hte gyit hkang na nngai: ³⁸ ngai hpe gumlau nna, tawt lai ai ni hpe, nanhte a kata na ngai tsan kau na nngai: shanhte shanu nga ai mungdan ni hta na, ngai shanhte hpe shapraw kau timung, Israela mungdan hta shang lu na n rai: shaloi ngai Yehowa rai nga nngai hpe, nanhte chye lu na marin dai. ³⁹ Israela dap e, na a lam Madu Yehowa ning nga ai: Sa wa mu, langai hte langai tinang a hpara ni hpe dawjau mu; raitimung, gaja wa, htawmhpang de nanhte nye a ga n madat sa na, n rai; nanhte jaw ai kumhpa ni hte hpara sumla ni e, nye a chyoi pra ai amying nsang hpe, awu asin di kau na n rai. ⁴⁰ Kaning rai nme law, nye a chyoi pra ai bum, Israela tsaw htum ai bum hta, Israela amyu masha ni yawng, ngai hpe dawjau na mara ai; ngai mung shanhte hpe hkap la na nngai: dai yang e, nanhte a kumhpaw kumhpa ni, nanhte a shawng ngai ai asi hta na lata la ai nsi naisi hte hpawn, nanhte a chyoi pra ai arai ni mahkra hpe, ngai hpyi na nngai. ⁴¹ Nanhte bra nga ai amyu ni hta na mung, nanhte ayai kau hkrum ai mungdan ni hta na mung, ngai nanhte hpe shinggyin la nna zuphpawng shangun yang, manam pyaw ai baw hpe zawn, ngai nanhte hpe hkap la nna, maigan amyu ni a man e, nanhte a jaw e, arawng sadang danhkung na nngai. ⁴² Nanhte a nji nwa ni hpe jaw na ngu, ngai dagam da ai Israela mung de, ngai nanhte hpe woi shashawn yang, ngai Yehowa rai nga ai hpe, nanhte chye lu na marin dai. ⁴³ Nanhte tinang hkum hpe awu asin di kau ai arawn alai mahkra hpe, dai mung hta nanhte myit dum nna, galaw hkrup ai yubak mahkra a majaw, tinang hkum hpe tinang nan matsat kau na marin dai. ⁴⁴ Israela dap e, nanhte a n hkru ai arawn alai hte, nanhte a n seng ai amu hte maren, ngai nanhte hpe n dawdan ninglen, nye a amying ningsan tau let, nanhte hpe dawdan yang, ngai Yehowa rai nga ai hpe, nanhte chye lu na marin dai, nga nna Madu Yehowa tsun ai.

¹ - ² Bai Yehowa a mungga ngai kaw du nna, Masha kasha e, dingda maga de myiman yawng let, dingda maga de ang ang ga tsun nna, Dingda maga na pa ga maling hpe hkap daw let, myihtoi htoi u: ³ Dingda maga na maling hpe htawn tsun u, Yehowa a ga madat mara u; Madu Yehowa ning nga ai: Yu u, Ngai nang hta wan shachyi na nngai; dai wan gaw tsit lali ai hte hkraw mat ai hpun mahkra hpe, hkru kau na ra ai: de a wan shinglet krip na n rai: dingda maga kaw nna dingdung maga du hkra, myiman yawng mayawng hkru kau ai hkrum na ra ai. ⁴ Dai wan hpe ngai Yehowa nan shachyi ai hpe, yawng mayawng chye lu na mara ai; dai gaw krip wa na n rai, nga ai. ⁵ Shaloi ngai gaw, Ala, Madu Yehowa e, Ndai wa gaw ga shadawn hku hkrai tsun ai, n rai ni? nga nna nye a lam shanhte tsun ma ai, ngu nna htan nngai. ⁶ Bai Yehowa a mungga ngai kaw du nna, Masha kasha e, Yerusalem mare de myiman yawng let, chyoi pra ai shara ni de ang ang tsun nna, Israela mungdan hpe hkap daw let, myihtoi htoi u: ⁸ Israela mungdan hpe htawn tsun u, Madu Yehowa ning nga ai:Yu u, ngai nang hpe hkap gasat na nngai; ngai nye a nhtu shaw nna, dinghpring ai wa hpe mung, tara n lang ai wa hpe mung, nang hta na tsan kau na nngai. ⁹ Nang hta na dinghpring ai wa hpe mung, tara n lang ai wa hpe mung, tsan kau shara nga ai majaw, nye a nhtu n-ga na pru nna, dingda maga kaw nna, dingdung maga du hkra, hkrung mahkrung hpe shaza kau na ra ai: ¹⁰ shingrai, ngai Yehowa nan nye a nhtu hpe n-ga hta na shaw nga ai gaw, hkrung mahkrung chye lu na mara ai: dai gaw n-ga de bai nhtang wa na n rai. ¹¹ Dai rai nna, Masha kasha e, madai nga u: na a hkum kawa machyi hkra, shanhte a man e aja awa madai u. ¹² Shingrai shanhte gaw, Nang hpa majaw madai n ta? nga nna nang hpe san yang, nang gaw, Ngai shiga na ai majaw madai nngai; dai du ra ai; minla yawng byaw mat nna, lata yawng kya mat na ra ai; yawng gawngkya nna, lahput yawng, ntsin zawn n-gun n rawng na ra ai: yu u, dai gaw du nna byin na ra ai, nga nna Madu Yehowa tsun ai. ¹³ - ¹⁴ Bai Yehowa mungga ngai kaw du nna, Masha kasha e, Madu Yehowa ning nga ai, ngu nna myihtoi htoi u: Nhtu, nhtu du ra ai; dai gaw dai ai hte kabrim ai rai nga ai; ¹⁵ masha hpe sat na matu grai dai nga ai; myihprap zawn gala nna kabrim nga ai; dai rai yang, ngai Sha a hkawhkam sumdoi majaw, kabu mai na rai ni? dai nhtu gaw hpun yawng hpe hpa n nawn nga ai. ¹⁶ Hpyen ni lang na matu, dai hpe shatsawm na, ap da nu ai: gaja wa, sat na wa a lata hta ap ya na matu, dai nhtu hpe kabrim hkra karang shadai nu ai. ¹⁷ Masha kasha e, hkrap shabam u; kaning rai nme law, dai nhtu gaw nye a amyu masha ni a ntsa e mung, Israela hkawhkam kasha ni mahkra a ntsa e mung, du ra ai; dai nhtu majaw nye a amyu masha ni hkrit gari ai hkrum ma ai; dai re ai majaw na a magyi hpe kahpret u. ¹⁸ Dai gaw dinglik yu ai lam rai nga ai; nhtu gaw dai sumdoi hpe pyi n nawn ai rai yang, dai gaw nga lu na n rai, nga nna Madu Yehowa tsun ai. ¹⁹ Dai rai nna, masha kasha e, myihtoi htoi let, lata kahpret u; nhtu gaw lahkawng masum lang kahtap du ra ai: dai gaw si hkra hkala kau na nhtu rai nga ai; shanhte hpe wang tawn nna, kaba ai wa hpe pyi, si hkra hkala kau ai nhtu rai nga ai. ²⁰ Shanhte a minla byaw mat nna, shanhte a ahtu kataw shara law wa hkra, shanhte a chyinghka lam shagu makau e kabrim ai nhtu hpe, ngai tawn da ni ai: ala, dai gaw myihprap zawn gala nna, galun na matu masen nga ai. ²¹ N-gun dat u; hkra maga de kahtam u; hpyen hkyen u, pai maga de kayin u: na myiman yawng mayawng de kahtam u. ²² Ngai mung lata kahpret nna, nye a myit kahtet ai hpe jasim kau na nngai: ngai Yehowa nan dai ga tsun ni ai, nga ai. ²³ - ²⁴ Bai Yehowa mungga ngai kaw du nna, Nang mung, masha kasha e, Babelon hkawhkam a nhtu sa wa na lam lahkawng hpe san da u; dai lam lahkawng gaw mung mi kaw na pru na ra ai: mare de sa wa na lam nbraw e, shara langai mi hpe matsing u. ²⁵ Dai nhtu a matu, Ammon kashu kasha ni a Raba mare de lam langai mi, Yuda mung, bunghku kum ai Yerusalem mare de lam langai mi, san da u. ²⁶ Kaning rai nme law, Babelon hkawhkam gaw, shaba wawt yu na maru, dai lam lahkawng a nbraw e tsap nga ai: shi gaw pala ni hpe garu kayau nhtawm, hpara sumla ni hpe san yu nna, sinpai hpe yu nga ai. ²⁷ Bunghku sharun ai gawng hpe tawn da na mung, hpyen gasat na matu garu jahtau nna, marawn ai nsen sharawt let, mare chyinghka ni hpe sharun ai gawng tawn da nna, kaduk htu na hte dap jung na matu, shi a hkra lata hta Yerusalem mare hpe hpru ai pala rawng nga ai: ²⁸ Shanhte mahtang, dagam da ai ga majaw, dai shaba wawt ai lam hpe kaman lila zawn nawn ma ai: hkawhkam wa chyawm gaw, shanhte rim la ai hkrum lu hkra, shanhte a shut hpyit ai hpe, dum shangun mu ai. ²⁹ Dai rai nna Madu Yehowa ning nga ai, Nanhte tawt lai ai amu dan leng nga nna, nanhte galaw ai amu mahkra hta yubak hkrai dawng pru ai hte, masha ni nanhte a mara hpe dum nga ma ai majaw, nanhte gaw gaja wa rim la ai hkrum na marin dai. ³⁰ Nang mung, hkala nba hkrum ai, tara n lang ai Israela du e, n hkru ai amu majaw htum mat ai aten du jang, na aten mung du na ra ai; ³¹ Madu Yehowa ning nga ai, Htan bam hpe malaw kau u, janmau hpe raw kau u; ya gaw shawng na hte n bung ai; nem ai hpe shatsaw u, tsaw ai hpe shanem u. ³² Ngai gaw mungdan hpe galau kau na, galau kau na, galau kau na nngai: dai hpe up ging ai wa garai n du dingsa, dai gaw nga lu na n rai; shi du jang, ngai dai hpe shi a lata hta ap ya na nngai. ³³ Nang mung, masha kasha e, Ammon kashu kasha ni hte shanhte shatan nhkan ai lam hpe lakap nna myihtoi htoi u; Madu Yehowa ning nga ai; ngu nna tsun u: Nhtu, nhtu shaw nga sai; myihprap zawn gala nna, kahtam sat kau na matu kabrim nga ai. ³⁴ Kaman lila shingran nang hpe mu shangun nna, na matu masu ai lam shaba wawt ai laman e, dai nhtu gaw, ari ahpri hte jahtum kau hkrum ai, n hkru n hkra ai ni a si mang ntsa e, nang hpe mung shalawm na ra ai. ³⁵ Na nhtu hpe n-ga hta bai bang u; nang hpan da hkrum ai shara hte, na a dai daw ga hta, ngai nang hpe dawdan na nngai. ³⁶ Nye a pawt bu ai myit, ngai na ntsa e ru bun na nngai; wan hte nang hpe ahpawt na nngai; gumshem nna jahten shabyak chye ai masha ni a lata hta, nang hpe ap kau na nngai. ³⁷ Nang gaw wan a matu hpun tai na ndai; na a sai gaw mungdan ka-ang e rai na ra ai: htawmhpang e nang hpe kadai dum na, n rai, nga nna, ngai Yehowa tsun da ni ai.

¹ - ² Bai Yehowa a mungga ngai kaw du nna, Masha kasha e, nang hkum nan, dai sai kap ai mare hpe dawdan u, dawdan u; shi galaw ai matsat shabat amu mahkra hpe, madun dan u. ³ Htawn tsun u, Madu Yehowa ning nga ai: Tinang a aten du na matu, tinang a ka-ang e sai jahkaw kau nna, tinang hkum hpe awu asin di kau na matu, hpara sumla galaw ai mare, nang rai nga ndai. ⁴ Nang gaw sai jahkaw kau ai hte mara kap nga ndai; nang galaw ai hpara sumla ni hte awu asin hkrum nga ndai; na a nhtoi ni hpe nang du shangun nna, na shaning ni hpe pyi, nang nan jahtum nu ai: dai re ai majaw ngai nang hpe maigan amyu ni hta, shatan nhkan shara, mungdan shagu hta asawng asang shara, shatai de ai. ⁵ Arawng hpoi mat nna kashuk kashak hte hpring ai mare e, nang hte ni tsan ai ni, nang hpe asawng asang na mara ai. ⁶ Israela du salang ni hpe yu yu mu: langai hte langai tinang a ahkang aya hte maren, nang hta sai jahkaw kau mu ai. ⁷ Na a ka-ang e kanu kawa hpe n kaw n law di kau ma ai; malet nhprang manam ni hpe adip arip di ma ai; chyahkrai nmai hte gaida gaina ni hpe maw sha ma ai. ⁸ Nang gaw nye a chyoi pra ai arai ni hpe matsat nna, nye a laban nhtoi ni hpe awu asin di kau nu ai. ⁹ Sai jahkaw kau na matu, shi htawn ai ni nang hta nga nga ma ai; na a masha ni bum ntsa e shat sha ma ai; na a ka-ang e n se n sa ai amu galaw ma ai. ¹⁰ Kanu hpe shaw ai ni nang hta nga ma ai; nba lang ai num hpe mung roi ma ai. ¹¹ Langai mi gaw htingbu jan hpe shaw nga ai; langai mi gaw3 kanam hte shut hpyit nga ai; langai mi gaw kajan hte jaiwawng wawng nga ai. ¹² Sai jahkaw kau na matu, na a masha ni sake manawn sha ma ai; amyat sha na hte lu su na matu, gumhpraw hkoi ya ma ai; htingbu wa arai hpe lawhpa ai myit hte kashun la ndai: ngai hpe mung malap kau ndai, nga nna Madu Yehowa tsun ai. ¹³ Dai rai nna, yu u, nang mahkawng da ai n tara ai sutgan hte, na a ka-ang e ru kau ai sai majaw, ngai lata kahpret nngai. ¹⁴ Ngai nang hpe jeyang ai shani e, na a myit sharang lu nna, na lata n-gun ja lu na lit ni? Ngai Yehowa nan tsun ai hte maren shabyin na nngai. ¹⁵ Ngai gaw maigan amyu ni hta nang hpe shabra kau nna, mungdan ni hta ayai kau na nngai: nang hta kap ai agang chyalang hpe mung, ngai shatsai kau na nngai. ¹⁶ Nang hkum nan maigan amyu ni a man e kaya kahpa dum nna, ngai Yehowa rai nga ai hpe chye lu na ndai. ¹⁷ - ¹⁸ Bai Yehowa a mungga ngai kaw du nna, Masha kasha e, Israela dap gaw, nye a man e gumhpraw hkyi tai masai; shanhte nlang bunghkrawng hta rawng ai gagri, ajang, ahpri, achyu zawn rai nga nna, gumhpraw hte hka ai hkyi tai mat ma ai. ¹⁹ Dai re ai majaw Madu Yehowa ning nga ai, Nanhte yawng hkyi rai nga ai majaw, yu u, ngai nanhte hpe Yerusalem mare ka-ang e, shinggyin la na nngai. ²⁰ Gumhpraw, magri, ahpri, achyu hte ajang hpe shabyawng na matu, bunghkrawng hta bang da nna, wan wut ai zawn, ngai gaw nye a sindawng kahtet ai hte nanhte hpe dai mare hta shinggyin tawn nna, shabyawng na made ai. ²¹ gaja wa shinggyin tawn nhtawm, nye n-yun bu ngu ai wan hte, ngai nanhte hpe kawut nna, nanhte gaw mare ka-ang e bawng mat ai hkrum na myit dai. ²² Gumhpraw gaw bunghkrawng hta byawng mat ai hte maren, dai mare ka-ang e nanhte byawng mat nna, ngai Yehowa gaw nye pawt bu ai nanhte a ntsa e ru bun ai hpe nanhte chye lu na marin dai, nga ai. ²³ - ²⁴ Bai Yehowa mungga ngai kaw du nna, Masha kasha e, mungdan hpe htawn tsun u: Nang gaw ngai pawt bu ai nhtoi hta, jasan jaseng ai n hkrum nna, marang n hkam la ai mungdan rai nga ndai. ²⁵ De a ka-ang e shi a myihtoi ni gaw, shabam nna, ashan hpe gyam ai hkanghkyi zawn, gumlau amu shapraw ma ai: shanhte gaw masha ni hpe sha kau ma ai; sutgan hte hpu la ai baw kashun la ma ai; mung ka-ang e gaida jan ni hpe shalaw dat ma ai. ²⁶ Shi a hkinjawng ni gaw, nye a tara hpe run kau nna, nye a chyoi pra ai arai ni hpe awu asin di kau ma ai; chyoi pra ai hte n chyoi n pra ai hpe gin hka ma ai: sanseng ai hte n san n seng ai baw, mung masha ni hpe n chye shangun nna, nye a laban nhtoi ni hpe, koi kau ma ai: shanhte a ka-ang e ngai kaya kahpa hkrum nga nngai. ²⁷ Shi a du ni mung, n tara ai sutgan lu la hkra, shan gyam nna, sai jahkaw kau ai hte, masha hpe kawa sat kau ai chyahkyawn hte bung ma ai. ²⁸ Shi a myihtoi ni mung, Yehowa ga n tsun tim, Yehowa ning nga ai, nga nna, kaman lila shingran mu ai hte, masu ai hku shaba wawt let, dai du ni a matu namhtun sha chya ma ai. ²⁹ Mung masha ni gaw adip arip hpya lu hpya sha ai amu hkan galaw ma ai; gaja wa, nni nkri hte matsan mayan hkrum ai ni hpe, zingri mu ai; malet nhprang manam hpe mung, pagawn di kau mu ai. ³⁰ Dai mung hpe ngai n jahten lu hkra, dai hpe maga na matu, nye a man e tsap nga nna, de a waw malawng ai bunghku hpe lajang lu na wa langai mi, shanhte hta na ngai tam timung, n mu nngai. ³¹ Dai re ai majaw, nye a pawt sindawng ai hpe, shanhte a ntsa e ngai ru dat nngai; ngai n-yun bu ai wan hte, shanhte hpe shamyit kau nngai; shanhte a arawn alai hpe, tinang a baw ntsa de ngai shapraw nngai, nga nna Madu Yehowa tsun ai.

¹ - ² Bai Yehowa a mungga ngai kaw du nna, Masha kasha e, kanu rum ai num lahkawng nga ma ai: ³ shan gaw hkawn ram prat e, Egutu mung hta shawa num tai ma ai; dai yang e shan a madoi chyuhpang hpe jum nna, hkawn ram chyu si hpe manat darin ma ai. ⁴ Kana a amying gaw Ohola, shi a kanau gaw, Oholiba rai nga ai: shan gaw nye a num tai nna, shayi shadang sha shaprat ma ai. Ohola chyawm gaw, Samari mare, Oholiba gaw, Yerusalem mare rai nga ai. ⁵ Ya Ohola gaw nye a num rai nga timung, shawa num tai wa sai; shi a sumtsaw wa ngu ai, htingbu wa Asuri masha ni hpe, shi ra nga ai: ⁶ shanhte nlang hte gaw, mut ai hpun palawng bu hpun ai, munggyi ni, ayebeng ni, gumra jawn nna, shing-yan tsawm ai shabrang ni, rai nga ma ai. ⁷ Shi gaw Asuri mung na arawng lu ai ni mahkra hte shut hpyit nga ai: kadai hte mung kanawn yang, shanhte a hpara ni hte mung, tinang hkum hpe awu asin di kau nu ai. ⁸ Shingrai shi gaw, Egutu mung e nga ai prat kaw nna shi shut hpyit ai hpe kau da ai, n rai: shi a hkawn ji prat e shanhte gaw shi hte yup ma ai; shi a madoi chyuhpang shanhte manat darin nna, shi hte shut hpyit ma ai. ⁹ Dai re ai majaw ngai gaw, shi ra ai sumtsaw Asuri masha ni a lata de, shi hpe ap kau nngai. ¹⁰ Shanhte gaw shi a hpun palawng sharun kau ya mu ai; shi a shayi shadang sha ni hpe rim la nna, shi hpe nhtu hte sat kau mu ai; shingrai dawdan hkrum ai majaw, shi a amying num ni hta kajai shara tai wa ai. ¹¹ Ya shi a kanau Oholiba gaw dai lam mu timung, shi gaw kana hta grau nna kayut ai myit hte, kana hta grau shut hpyit nga ai. ¹² Shi mung reng htum ai hpun palawng bu hpun ai, htingbu wa ngu ai, Asuri masha ni a munggyi ni, ayebeng ni, gumra jawn ai ni hpe ra nga ai: shanhte nlang shing-yan tsawm ai shabrang ni hkrai rai nga ma ai. ¹³ Shingrai shi awu asin rai nga ai hpe, ngai mu nngai: shan lahkawng gaw, lam langai sha hkan nang ma ai. ¹⁴ Shi gaw grau nna shut hpyit nga ai: kaning rai nme law, nta shakum hta tsi hkyeng hte ka da ai, Hkalde masha sumla hpe shi mada mu nga ai; ¹⁵ dai ni gaw shingkyit kyit nna, bunghkaw kaba hkaw ma ai: nlang hte gaw, dai daw Hkalde a mung, Babelon mare masha zawn, hkawhkam kasha nsan ma ai: ¹⁶ dai sumla ni hpe shi mu jang, shi ra kayut nna, Hkalde a mung de kasa shangun dat wu ai. ¹⁷ Babelon masha ni mung shi kaw sa nna, shi a yupku de shang ma ai: shanhte gaw shut hpyit ai hte shi hpe awu asin di kau mu ai; shanhte hte n san n seng nga yang, shi a myit masin shanhte hpe matsat nga ai. ¹⁸ Shingrai shi gaw, shi a shut hpyit ai hte singgu krin kaya kahpa hpe, shadawng dan ai majaw, nye a myit masin, shi a kana hpe matsat ai hte maren, shi hpe mung matsat kau nngai. ¹⁹ Raitimung shi gaw, hkawn ram prat e Egutu mung hta shawa num tai ai aten hpe dum nna, shut hpyit ai amu shalaw nga ai. ²⁰ Lawgung a nsa lam hte bung ai nsa lam tu nna, gumra zawn zu law ai sumtsaw sumra ni hpe, shi ra nga a hka. ²¹ Shingrai Egutu mung masha ni gaw, na a hkawn ram prat e nang hte kanawn nna, na a madoi chyuhpang hpe arawng jahpoi ai lam, nang bai dum mayu ndai. ²² Dai re ai majaw, Oholiba e, Madu Yehowa ning nga ai: Yu u, nang matsat ai sumtsaw sumra ni hpe, ngai rawt shangun nhtawm, na a grupyin e wang tawn nna gasat shangun na nngai: ²³ Asuri masha ni hte hpawn, Babelon masha ni hte Hkalde masha ni yawng, Peku, Shoa hte Koa masha ni du na mara ai: nlang hte gaw shing-yan tsawm ai shabrang ni, munggyi ni, ayebeng ni, hkawhkam kasha ni hte daru magam rawng ai ni rai nga ma ai; shanhte yawng gumra jawn ma ai. ²⁴ Shanhte gaw ri nhtu, hpyen leng, rai htaw ai leng, masha wunawng wuwa hte hpawn sa wa nna, n-gang galu, n-gang kaji, hpri gup chyawp ni hte nang hpe wang tawn na mara ai: ngai shanhte hpe dawdan shangun nna, shanhte gaw tinang tara htung hte maren, nang hpe dawdan na mara ai. ²⁵ Ngai gaw ladu lai hkra nang hpe ari jaw nna, shanhte gaw myit kahtet ai hte nang hpe shari na mara ai; na a ladi hte ana hpe shanhte kahtam di kau nna, naw ngam nga ai ni gaw nhtu hte si na mara ai; na shayi shadang sha ni hpe shanhte rim la nna, naw ngam nga ai ni gaw, wan hkru kau ai hkrum na mara ai. ²⁶ Bai shanhte gaw na a hpun palawng hpe sharun kau nna, tsawm la ai gali lakai ni hpe hpyu la na mara ai. ²⁷ Shingrai, htawmhpang de nang n mada yu ai hte, Egutu mung hpe pyi n dum lu hkra, na a n se n sa ai myit hte, Egutu mung na nang la wa ai shawa num hking hpe, ngai jahtum kau na nngai. ²⁸ Kaning rai nme law, Madu Yehowa ning nga ai: Yu u, nang ndawng n yawt nna, nang matsat kau ai ni a lata de, ngai nang hpe ap kau na de ai; ²⁹ shanhte gaw ndawng ai myit hte nang hpe di kau nna, na arung arai mahkra hpe la kau nhtawm, nang hpe singgu krin jahti da na mara ai: dai rai nna, na a n se n sa ai myit hte kaya kahpa re ai singgu krin mung, nang galaw yu ai shawa num hking mung, dawng pru na ra ai. ³⁰ Nang gaw maigan amyu ni hte shut hpyit nna, shanhte a hpara sumla ni hte, tinang hkum hpe awu asin di kau nu ai majaw, ndai hte hpe nang hkrum na ndai. ³¹ Nang gaw, na nna a lam hpe hkan ndai majaw, shi lu ai gawm, ngai na a lata hta bang da na nngai. ³² Madu Yehowa ning nga ai, Nang gaw, nna a gawm hta na, lu na ndai; dai gaw dam nna sung nga ai; dai hta, nang n dang lu hkra, hpring nga ai rai nna, asawng asang hte mani kau ai, nang hkrum na ndai. ³³ Na nna Samari mare lu ai gawm, nang ai hte yawn hpa, mak mat ai hte shingran katsi ngu ai gawm hpe, nang lu na ndai. ³⁴ Dai hpe nang lu nna chyup nhtawm, gawm chyen hpe pyi kawa makret nna, na sinda hpe gang je kau na ndai: dai ga ngai tsun ni ai, nga nna Madu Yehowa tsun ai. ³⁵ Dai rai nna, Nang ngai hpe malap kau nna, na a shingdu de ngai hpe dat kau ai majaw, na n se n sa ai hte na shawa num amu a mara hpe hkam sha u, nga nna Madu Yehowa tsun ai. ³⁶ Bai Yehowa a mungga ngai kaw du nna, Masha kasha e, Ohola hte Oholiba yan hpe dawdan u; shan galaw yu ai matsat shabat amu, shan hpe madun dan u. ³⁷ Shan gaw la shaw masai; shan a lata hta sai kap nga ai; tinang a hpara sumla ni majaw, la shaw masai; nye a matu shaprat ai shadang sha ni hpe pyi, hpara sumla ni matu wan nat hkungga shatai masai. ³⁸ Dai hta n-ga, shanhte ngai hpe naw galaw ai gaw da ndai rai nga ai: shanhte gaw, dai shani jang nye a chyoi pra ai shara hpe n san n seng di kau nna, nye a laban nhtoi ni hpe awu asin di kau mu ai. ³⁹ Kaning rai nme law, shanhte gaw tinang a kasha ni hpe hpara sumla ni a man e sat nhtawm, dai shani jang, nye chyoi pra ai shara hpe awu asin di kau na matu, shanhte shang wa ma ai; gaja wa, dai amu hpe nye nta ka-ang e nan, shanhte galaw masai. ⁴⁰ - ⁴¹ Dai hta kaga, nang kasa shangun dat nna, sumtsan mung na la ni hpe shaga mu ai; shanhte mung du masai; nang gaw shanhte a matu hka shin nna, na a myi hpe tsi chya ai hte, gali lakai mawn sumli nhtawm, tsawm ai yupku hta dung nna, lajang da ai sha ku de a makau e nga nga ai; dai ku ntsa e nye a manam pyaw ai baw hte asau hpe nang mara da ndai. ⁴² Pyaw daw kadaw nga ai ni a nsen gaw, shi a nta hta ngoi nga ai; hkrup mara masha ni hte hpawn, nam mali na chyaru ya ni hpe mung shalawm nga ai: shanhte gaw shan a lata hta lahkawn hkawn ya nna, tsawm htap ai janmau shagup mu ai. ⁴³ Shaloi ngai gaw, Shanhte gaw ndai num hte pyi shut hpyit na ma ai kun? nga nna gumgai hkra shawa num amu galaw ai jan hpe lakap nna san nngai. ⁴⁴ Gaja wa, shawa num hpang de shang ai zawn, shanhte shi hpang de shang ma ai: n se n sa re ai num Ohola hte Oholiba yan hpang de shanhte shang ma ai. ⁴⁵ Dai rai nna, shan gaw la shaw ai hte sai kap ai num yan rai nga ma ai majaw, dinghpring ai ni gaw, la shaw ai hte masha sat ai num hpe dawdan ai zawn, shan hpe dawdan na mara ai. ⁴⁶ Kaning rai nme law, Madu Yehowa ning nga ai, Ngai shan hpang de masha wunawng woi wa nna, kashun kashe hpyu la shangun na nngai. ⁴⁷ Dai masha wunawng gaw shan hpe nlung hte kabai nna, nhtu hte kahtam sat na mara ai; shayi shadang sha ni hpe mung sat kau nna, nta ni hpe nat kau na mara ai. ⁴⁸ Shingrai kaga num ni yawng, nan zawn n galaw lu hkra, dai mungdan hta na, n se n sa ai lam hpe, ngai jahtum kau na nngai. ⁴⁹ Shanhte gaw nan a n se ai amu hte maren nan hpe bai tai na mara ai; nan a hpara sumla ni hte galaw ai yubak hpe, nan hkrum sha nna, ngai Madu Yehowa rai nga ai hpe, nan chye lu na marin dai, nga ai.

¹ - ² Ya jahku ning na shata shi a shi ya shani e, Yehowa mungga ngai kaw bai du nna, Masha kasha e, ndai shani a amying ka da nna, atsawm sha matsing u: Babelon hkawhkam gaw ndai shani hta nan, Yerusalem mare hpe wang tawn hpang nu ai. ³ Gumlau chye ai amyu hpe, Madu Yehowa ning nga ai, ngu nna ga shadawn hku htawn tsun u: Di hpe dun u, dun u; ntsin ru bang u; ⁴ shan tau shan pawm, magyi hte lahpa ngu ai shan kaja hte hpawn, lasawi rawng ai nra ni hte jahpring u: ⁵ sagu hpung na hpum sau ai sagu ni hpe lata la nna, nra hpe shapyaw na matu hpun bang u; atsawm sha shaprut u; de a kata e nra ni pyaw mat u ga, nga ai. ⁶ Dai re ai majaw Madu Yehowa ning nga ai, Nhkan kap nna galoi n tsai hkraw ai di ngu ai sai kap ai mare gaw dingnye lu u ga: shan tau mi hte tau mi shapraw u: hpaida da shara n nga ai. ⁷ Kaning rai nme law, shi sat kau ai ni a asai gaw de a ka-ang e rai nga ai; dai hpe nhpu hte magap na matu, ga ntsa e ru kau ai n rai: krin nga ai nlung ntsa e mara da nu ai. ⁸ Ngai ari jaw na matu, pawt kahtet ai pru hkra, dai sai hpe n makoi magap ai, krin ai nlung ntsa e mara da ni ai. ⁹ Dai re ai majaw, Madu Yehowa ning nga ai: Sai kap ai mare gaw dingnye lu u ga; wan mang kaba hpe ngai galaw na nngai. ¹⁰ Hpun bang u, wan shagrung u, ashan hpe atsawm sha shaprut u, shan jahku hpe shage u, nra ni hpe jahkat u. ¹¹ Dai hpang di kaman wan n-ga ntsa e tawn da u; de a magri byawng hkra, wan shagrung u: dai hta rawng ai agang chyalang byawng mat nna, dai hta kap ai nhkan mat mat u ga. ¹² Shi tinang hkum hpe jahki shaba timung, shi hta kap ai law la ai nhkan pru hkraw ai n rai, wan hte pyi pru hkraw ai n rai. ¹³ Nang hta kap ai agang chyalang hta n se n sa ai mung lawm nga ai; ngai nang hpe kashin timung, nang n tsai hkraw ndai majaw, nye pawt kahtet ai na a ntsa e garai n dik dingsa, na a agang chyalang tsai mat lu na n rai. ¹⁴ Ngai Yehowa nan dai ga tsun ni ai: ngai dai lam shabyin nna, shadik na nngai: ngai nye a ga shabai na, n rai; lahpawt dum na, n rai; myit malai mung lu na, n rai: na a lam hte, na a arawn alai hte maren, ngai nang hpe dawdan na nngai, nga nna Madu Yehowa tsun ai. ¹⁵ - ¹⁶ Bai Yehowa mungga ngai kaw du nna, Masha kasha e, Yu u, na nja nhpra wa hpe ngai akajawng sha shamyit kau na nngai: raitimung, nang gaw, sharung mung hkum sharung, hkrap mung hkum hkrap, myi prwi mung hkum pru et; ¹⁷ madai u, raitimung atsin sha nga u; si mat ai wa a matu hkum sharung shayawt et; bunghkaw hkaw nna kyepdin din u; n-gup hpe hkum magap et; masha ni jaw ai shat hkum sha et, nga nna tsun ai. ¹⁸ Shingrai ngai gaw jahpawt manap e mung masha ni hpe ga tsun nngai; shana e nye a madu jan si wa sai; ngai hpe hkangda ai hte maren, hpang jahpawt e ngai galaw nngai. ¹⁹ Mung masha ni mahtang, Nang ning rai galaw ai gaw, anhte hte kaning rai seng a ta? anhte hpe n tsun na n ni? nga nna ngai hpe san ma ai. ²⁰ Dai rai nna ngai gaw, Yehowa mungga ngai kaw du nna, Israela dap hpe htawn tsun nngai. ²¹ Madu Yehowa ning nga ai, Yu mu, nanhte a n-gun atsam gumrawng gumtawng shara, nanhte a nja nhpra nta hte, grai lahpawt dum ai shara ngu ai, nye a chyoi pra ai shara hpe, ngai awu asin di kau na nngai; nanhte jahti da ai shayi shadang sha ni mung, nhtu hte si na mara ai. ²² Ngai galaw ai zawn nanhte mung galaw na marin dai; nanhte n-gup hpe hkum magap, masha jaw ai shat hpe hkum sha myit. ²³ Nanhte bunghkaw hkaw nna, kyepdin din na marin dai; hkrapngu hkrapngoi sharung shayawt lu na n rai; nanhte gaw tinang yubak majaw agyawm mat nna, langai hte langai madai shajang na marin dai. ²⁴ Shingrai Ezekela gaw nanhte a kumla tai na ra ai; shi galaw ai hku mahkra hte maren, nanhte galaw na marin dai; dai amu byin yang, ngai Yehowa rai nga ai hpe nanhte chye lu na marin dai. ²⁵ - ²⁶ Nang mung, masha kasha e, shanhte a hpyendap, shanhte a danhkung ai kabu gara shara, shanhte a nja nhpra nta shanhte a myit manoi shara hte shayi shadang sha ni hpe ngai dawm kau ai shani e, lawt lu ai wa gaw nang hpang de sa nna, dai lam nang hpe shana ya na ra ai, n rai ni? ²⁷ Dai shani e nang gaw lawt lu ai wa hpe, atsin sha n nga ai, n-gup hpaw nna ga tsun na ndai: shingrai nang gaw shanhte a matu kumla tai nna, ngai Yehowa rai nga ai hpe, shanhte chye lu na mara ai, nga ai.

¹ - ² Bai Yehowa mungga ngai kaw du nna, Masha kasha e, Ammon a kashu kasha ni hpang maga myiman yawng let, shanhte hpe lakap nna myhtoi htoi u: ³ - ⁴ Ammon a kashu kasha ni hpe ning ngu u; Madu Yehowa a ga madat mara mu; Madu Yehowa ning nga ai: Nang gaw, awu asin hkrum ai, nye a chyoi pra ai shara hpe mung, masha shingran katsi mat ai, Israela mungdan hpe mung, bawngdung hkrum ai Yuda amyu hpe mung, Aha, nga nna tsun ndai majaw, yu u, sinpraw mung masha ni a lata de ngai nang hpe ap kau na nngai: shanhte gaw na a mung kata e dap jung nna, dai yang e shanu nga na mara ai; na a namsi hpe sha nna, nga chyu hpe lu na mara ai. ⁵ Raba mare hpe gawla-uk ulawng, Ammon kashu kasha ni a mung hpe, sagu hpung ni a hpum shara ngai shatai nna, ngai Yehowa rai nga ai hpe, nanhte chye lu na marin dai. ⁶ - ⁷ Kaning rai nme law, Madu Yehowa ning nga ai: Nang gaw Israela mung hpe grai wa ndawng let, lahpawk dum nna, lagaw shingdit ai hte, kabu gara nga ai majaw, yu u, ngai na a ntsa e nye a lata ladawn nna, maigan amyu ni a lanep, nang hpe shatai na nngai; masha amyu ni hta na ngai nang hpe jahtum kau nna, mungdan ni hta na shamyit kau na nngai: ngai nang hpe shaza kau nna, ngai Yehowa rai nga ai hpe, nang chye lu na rin dai. ⁸ - ¹⁰ Madu Yehowa ning nga ai: Moba mung hte Seira bum gaw, Yu u, Yuda amyu gaw maigan amyu kaga mahkra hte maren tai wa sai, nga nna tsun ai majaw, yu u, Moba lamu ga jarit makau e rai nga nna, mungdan a arawng sadang ngu ai, Bet-jeshimot, Bala-meon, Kiriahtim mare maga hku, Moba mung hpe ngai hpaw nna, Ammon kashu kasha ni hte hpawn, sinpraw mung masha ni a lata hta ap kau na nngai: shanhte gaw dai mung hpe up nga nna, Ammon kashu kasha ni gaw htawmhpang de masha amyu ni hta hti lawm na n rai: ¹¹ shingrai Moba mung hpe ngai dawdan nna, ngai Yehowa rai nga ai hpe shanhte chye lu na mara ai. ¹² - ¹³ Bai, Edom mung gaw Yuda amyu hpe matai htang ai hte, ndawng n yawt myit madun let, gumshem ai hku di kau mu ai majaw, Madu Yehowa ning nga ai: Edom mung ntsa e nye a lata hpe ngai ladawn nna, masha hte yamnga hpe jahtum kau na nngai; Teman shara kaw nna, dai hpe shingran katsi kau na nngai; shanhte gaw Dedan mare du hkra, nhtu hte htum mat na mara ai. ¹⁴ Ngai gaw, nye a amyu Israela lata hte, Edom amyu hpe ari jaw na nngai; shanhte gaw, ngai pawt bu nna, myit kahtet ai hte maren, Edom mung hpe shari na mara ai: shingrai shanhte gaw nye a matai htang ai lam hpe chye lu na mara ai, nga nna Madu Yehowa tsun ai. ¹⁵ - ¹⁶ Bai, Hpilisti masha ni gaw, matai htang ai hte, gumshem ai hku di kau nna, htani htana ndawng n yawt ai myit hte shaza kau mu ai majaw, Madu Yehowa ning nga ai: Yu u, Hpilisti masha ni a ntsa e nye a lata hpe ngai ladawn nhtawm, Hkerehti amyu hpe ngai jahtum kau nna, nammukdara makau e naw ngam nga ai ni hpe, shaza kau na nngai: ¹⁷ ja la ai sharin achyin ai hte, ngai shanhte hpe grai matai htang na nngai; shingrai, ngai shanhte hpe matai htang yang, ngai Yehowa rai nga ai hpe shanhte chye lu na mara ai, nga nna Madu Yehowa tsun ai.

¹ - ² Ya shi langai ning na shawng shata a langai ya shani e, Yehowa mungga ngai kaw du nna, Masha kasha e, Turu mare gaw, Aha, mungdan ni a chyinghka nga ai, Yerusalem mare gaw daw mat sai; ngai shang na matu hpaw malang nga ai; dai mare gaw, ya katsi katsang rai nga ai rai nna, ngai sut su na nngai, nga nna tsun ai majaw. ³ Madu Yehowa ning nga ai: Yu u, Turu mare e, ngai nang hpe hkap daw na nngai: nammukdara hta wa ai hka leng zawn, masha amyu law law hpe ngai nang hpang de shangun dat na nngai. ⁴ Shanhte gaw Turu a bunghku ni hpe hpya kau nna, langchyi ni hpe run kau na mara ai: ga sau hpe ngai ahkut kau nna, krin ai nlung shatai kau na nngai. ⁵ Shi gaw, nammukdara ka-ang e, sumgawn lam ai shara tai na ra ai; dai lam ngai tsun ni ai, nga nna Madu Yehowa tsun ai: shi gaw amyu baw ni a lanep tai na ra ai. ⁶ Yi hkauna e nga ai shayi sha ni gaw nhtu hte si nna, ngai Yehowa rai nga ai hpe shanhte chye lu na mara ai, nga ai. ⁷ Kaning rai nme law, Madu Yehowa ning nga ai: Yu u, ngai gaw hkawhkam ni a hkawhkam ngu ai, Babelon hkawhkam Nebuhkadneza hpe, hpyen gumra, hpyen leng, gumra jawn ai ni, luksuk wunawng wuwa hte hpawn, dingdung mung kaw nna Turu mare de woi wa na nngai. ⁸ Shi gaw yi hkauna e nga ai, na a shayi sha ni hpe, nhtu hte sat kau na ra ai; nang hpang maga shi hpyendap jung nna, kaduk htu nhtawm, n-gang ni hpe grang da na ra ai. ⁹ Na a bunghku ni hpe sharun ai gawng shi tawn da nna, na a langchyi ni hpe shingban hte htu sharu kau na ra ai. ¹⁰ Shi a gumra ni law nga ai majaw, ga nhpu nang hpe ka-up na ra ai; gasat nna waw malawng ai mare kata de masha ni ru bang wa ai zawn, shi gaw na a mare chyinghka hku shang yang, gumra jawn ai ni, hpyen leng ni hte arai htaw ai leng ni wu kadu ai majaw, na a bunghku ni gari awam na ra ai. ¹¹ Shi a gumra lahkru ni, na a mare lam ni yawng hpe kabye na ra ai; na a masha ni hpe, nhtu hte sat kau na ra ai; nang awng sharawng nga ai mahtan daw ni gaw, ga de kadawng mat na ra ai. ¹² Na a sutgan hpe shanhte kashun la nna, na a gun rai hpe lanep shatai na mara ai: na a shakum ni hpe shanhte run kau nna, ngwi pyaw ai nta ni hpe hpya kau nhtawm, na a nlung ni, ngau ni hte shingbut hpe, hka hta kabai bang na mara ai. ¹³ Nang hta mahkawn mangoi ai nsen hpe ngai jasim kau nna, na a tingse mahku hpe htawmhpang e kadai na lu na n rai. ¹⁴ Ngai nang hpe krin ai nlung shatai na nngai; sumgawn lam ai shara nang tai na ndai; hpang de bai dè da na n rai: ngai Yehowa nan dai lam tsun ni ai, nga nna Madu Yehowa tsun ai. ¹⁵ Madu Yehowa gaw Turu mare hpe ning nga ai: Na a ka-ang e shaza kau ai amu byin nna, hkala nba hkrum ai ni shabam nga yang, nang kadawng wa ai nsen majaw, zunlawng ni gari awam na mara ai, n rai ni? ¹⁶ Dai shaloi e nammukdara agyi ni yawng tinang tingnyang na yu nna, palawng galu hpe raw kau nhtawm, maka ka ai palawng hpe raw kabai kau na mara ai; shanhte gaw hkrit gari ai bu hpun na mara ai: ga hta dung nga nna tut hkrit gari let, nang hta byin ai amu majaw, shanhte mak mat na mara ai. ¹⁷ Dai rai nna shanhte gaw, Nammukdara hta bungli chye shachyen nna, nammukdara majaw n-gun ja ai hte, shi hta shanu nga ai ni mahkra hpe jahkrit shama chye ai, danhkung ai mare e, nang ning rai hten byak hkrum n hka! ¹⁸ Nang kadawng ai shani e zunlawng ni yawng hkrit gari na mara ai; gaja wa, nang mat mat wa ai majaw, nammukdara na zunlawng ni mak mat na mara ai, nga nna na a lam sharung shayawt ai ga jahta na mara ai. ¹⁹ - ²⁰ Kaning rai nme law, Madu Yehowa ning nga ai: Masha n rawng ai mare ni zawn, ngai nang hpe shingran katsi ai mare shatai kau nna, nang hpe lim kau na matu, sung ai hka kaba ni hpe na ntsa e shatung yang, moi na ni a shara ngu ai, nsung hku de yu wa ai ni hte rau, ngai nang hpe shagrit kau na nngai; nang hta masha n shanu nga lu hkra, nsung hku de yu wa ai ni hte rau, moi chyaloi kaw nna shingran katsi ai ga kata de, ngai nang hpe nga shangun na nngai: shaloi hkrung nga ai ni a mungdan hta nye a arawng hpe ngai jahpaw na nngai: ²¹ ngai nang hpe hkrithpa kumla shatai nna, htawmhpang e nang nga pra lu na n rai: nang hpe tam timung, galoi bai mu lu na, n rai, nga nna Madu Yehowa tsun ai.

¹ - ³ Bai, Yehowa mungga ngai kaw du nna, Nang masha kasha e, Turu mare a lam sharung shayawt nna, Turu mare hpe htawn tsun u: Nammukdara daru e dè nga nna, zunlawng amyu ni law law a matu hpaga ga ai mare e, Madu Yehowa ning nga ai: Turu e, Ngai tsawm htum nga nngai, nga nna nang grang nit dai. ⁴ Gaja wa, na a lamu ga jarit nammukdara ka-ang e rai nga ai; na a shanghpaw li chachyaw ai ni gaw, nang hpe tsawm dik hkra galaw masai. ⁵ Na a hpunpyen ni yawng hpe, Senira marau hpun hte galaw ma ai; dawnghkawn shadaw matu, Lebanon a arit hpun lata la ma ai. ⁶ Bashan wamyi hpun hte lashap ni galaw ma ai; Kihtim zunlawng na la wa nna, magwi kawng hte hkrep ai chyamka hpun hte, na a li hpe nep ma ai. ⁷ egutu mung na mani ai lachyit nba hte maka ka ai sumpan gaw, na a li hta nang hpyan sharawt nna, dai gaw na a dawnghkawn mung tai wa sai; Elisha zunlawng ni a mut ai hte hkyeng sawm ai sumpan gaw na a li magap tai nga ai. ⁸ Sidon hte Arwadi masha ni gaw, na a li shap ai ni tai nna, Turu mare na hpaji rawng ai ni gaw, li hkang ai ni tai ma ai. ⁹ Gebala dingla ni hte, de a hpaji rawng ai ni gaw, na a li hkan lajang nga ma ai; nang hte hpaga ga na matu, nammukdara shanghpaw li ni hte li ma ni yawng, nang hta sek nga ma ai. ¹⁰ Persi, Luda hte Put masha ni gaw, na a luksuk ni hta lawm nna, na a hpyen ma ni tai nga ma ai; shanhte gaw tinang a n-gang hte hpri gup chyawp ni, na a hpyendap hta noi da nna, na a arawng sadang hpe danhkung shangun ma ai. ¹¹ Na a hpyen luksuk ni hta lawm ai Arwadi masha ni gaw, na a bunghku grupyin e sin nga nna, share ni gaw na a langchyi ni hta rawng nga ma ai; shanhte gaw dap shakum ni a grupyin e tinang a hpyen rai ni hpe noi da nna, nang hpe dik hkra shatsawm ma ai. ¹² Nang hta hpaga gun rai amyu myu nga ai majaw, Tarshi mare gaw nang hte hpaga ga nna, na a gun rai hte, gumhpraw, ahpri, ajang, achyu, galai hkat ma ai. ¹³ Yawan, Tubala, Meshek masha ni gaw, nang hte hpaga ga ma ai: shanhte gaw na a gun rai hte, mayam, magri gawm ni galai hkat ma ai. ¹⁴ Htugama masha ni gaw, na a gun rai hte, jawn ai gumra, hpyen gumra, lawze ni galai hkat ma ai. ¹⁵ Dedan masha ni gaw nang hte hpaga ga ma ai; zunlawng ni law law na a gat ni rai nga ai; shanhte gaw na a arai mari nna, nrung, magwi kawng, hpun chyang dut ya ma ai. ¹⁶ Nang galaw ai sut rai law nga ai majaw, Suri mung gaw nang hte hpaga ga nna, na a gun rai hte, lung tsit, hkyeng sawm ai sumpan, maka ka ai sumpan, mani ai lachyit nba, danda hte lungseng hkyeng, galai hkat ma ai. ¹⁷ Yuda hte Israela mung gaw, nang hte hpaga ga ma ai: shanhte gaw na a gun rai hte, Manit ga na hkaulan mam, git baw, lagat jahku, sau, balsam naw, galai hkat ma ai. ¹⁸ Nang galaw ai sut rai law nga nna, arung arai amyu myu dut nga ai majaw, Damasku mare gaw, Helbon tsabyi jahku hte hpraw ai sagu mun galai hkat let, nang hte hpaga ga ai. ¹⁹ Wedan hte Yawan mung gaw na a gun rai hte, ari galai hkat ma ai: kabrim ai hpri, maza hpun hte gumshu nang dut ndai. ²⁰ Dedan mare gaw, gumra jawn ai ni lang ai tsawm ai nba dut nna, nang hte hpaga ga ai. ²¹ Arabi masha ni hte Kedara du ni yawng, nang galaw ai sut rai lu la na matu, sagu kasha, sagu la, bainam dut nna, nang hte hpaga ga ma ai. ²² Sheba hte Rama hpaga ni gaw, nang hte hpaga ga nna, na a gun rai hte, hpu htum ai manam pyaw ai baw, lungseng amyu myu, aja, galai hkat ma ai. ²³ Haran, Hkane, Eden, Sheba, Asuri, Hkitmada hpaga ni gaw, nang hte hpaga ga ma ai. ²⁴ Shanhte gaw hpu la ai sut rai, mut ai hte maka ka ai sumpan hta kayawp ai arai hpe mung, tsawm ai hte sumri ahkyen ai arit sumpu hta rawng ai gun rai hpe mung, nang hpang de shashawn ma ai. ²⁵ Tarshi shanghpaw li ni gaw, na a gun rai htaw ma ai: shingrai nang gaw nammukdara ka-ang e hkru kat nna, hpung shingkang kaba rawng nga ndai. ²⁶ Ya chyawm, na a li shap ai ni gaw, hka kaba ka-ang de nang hpe woi wa nna, sinpraw nbung gaw, nammukdara ka-ang e, nang hpe agrawp kau nit dai. ²⁷ Nang hten wa ai shani e, na a sutgan, na a gun rai, nang dut ai arai, na a li ma ni, li hkang ai ni, li lajang ai ni, nang hte hpaga ga ai ni, nang hta lawm ai hpyen luksuk ni mahkra hte, nang hta manoi ai shawa masha ni yawng, nammukdara ka-ang e gumpye bang mat na mara ai. ²⁸ Na a li hkang ai ni shabam ai nsen majaw, grupyin na ni gari awam na mara ai. ²⁹ - ³⁰ Li shap ai ni, li ma ni, li hkang ai ni yawng, li de na pru nna, hkarang e tsap let, na a matu shabam nna, ja ja hkrap na mara ai; shanhte gaw tinang baw hta nhpu htè bun nna, wan dap hta galu na mara ai: ³¹ dai hta n-ga shanhte gaw, na a matu kara doi kau nna, lachyit nba bu hpun let, yawnhkyen ai myit hte hkrup ngu hkrap ngoi nna, ja ja sharung shayawt na mara ai. ³² Ya shanhte gaw hkrapngu hkrapngoi let, nang hpe lakap ai sharung shayawt ga sharawt nna, Atsin sha nga mat hkra, nammukdara ka-ang e htum mat ai mare ngu ai, Turu mare hte, kadai bung a ta? ³³ na a gun rai gaw nammukdara lam hku pru wa yang, masha amyu law law hpe nang jahkru shakat nna, law law hpe nang jahkru shakat nna, law la ai sutgan gun rai ni hte, ga ntsa hkawhkam ni hpe lu su shangun ndai. ³⁴ Ya chyawm, sung ai nammukdare e nang bunghkup hkrum ai shani e, na a hpaga rai ni hte, nang hta manoi ai ni yawng, na a ka-ang e htum mat masai. ³⁵ Zunlawng ni hta shanu nga ai ni yawng, nang hkrum ai lam majaw, mau mat ma ai: shanhte a hkawhkam ni gaw nachying hkrit gari nna, myiman sum let nshung si bun ma ai. ³⁶ Amyu baw ni a hpaga ni gaw, nang hpe asawng ma ai; nang gaw hkrithpa kumla tai nna, htawmhpang de galoi mung, nga pra lu na n rai, nga nna tsun na mara ai, nga ai.

¹ - ³ Bai Yehowa mungga ngai kaw du nna, Masha kasha e, turu hkawhkam hpe htawn tsun u; Madu Yehowa ning nga ai: Nang gaw myit kaba nna, Ngai Karai Wa rai nga nngai; nammukdara ka-ang e Karai Wa zawn nawn nga timung, Karai wa n rai, masha chyu sha rai nga ndai majaw, Yu u, nang gaw Daniela hta hpaji grau lu nna, na a man e makoi magap da ai lam n nga a hka! ⁴ Na a nyan hpaji hte nang sutgan lu nna, aja gumhpraw hpe na a sutdek hta mahkawng da nu ai; ⁵ kaba htum ai hpaji hte hpaga chye ga ai majaw, na a sutgan hpe nang shalaw nna, dai sutgan majaw, myit kaba nga ndai; ⁶ - ⁷ dai rai nna Madu Yehowa ning nga ai: Nang gaw na a hkum hpe Karai Wa zawn nawn ndai majaw, yu u, gumshem ai tsasam amyu ni hpe, ngai nang hpang de woi wa nna, shanhte gaw na a hpaji a arawng hpe nhtu hte kahtam kau nna, na a htoi kabrim ai hpe awu asin di kau na mara ai: ⁸ nsung hku de nang hpe shayu dat nna, nammukdara ka-ang e si mat hkrum ai ni zawn, nang si na ndai. ⁹ Ngai Karai Wa rai nga nngai, nga nna nang hpe sat kau ai wa a man e, nang naw tsun lu na n ni? Gaja wa, nang hpe hkala kau ai wa a lata hta, nang gaw Karai Wa n rai, masha chyu sha rai nga ndai. ¹⁰ Nang gaw tsasam masha ni a lata hte, matu gadoi n hkam ai wa zawn si na ndai: ngai nan dai ga tsun ni ai, nga nna Madu Yehowa tsun ai. ¹¹ - ¹³ Dai hta n-ga Yehowa ga ngai kaw du nna, Masha kasha e, Turu hkawhkam a matu sharung shayawt ai ga htawn tsun u; Madu Yehowa ning nga ai: Hpaji hte hpring nna, tsawm htap htum ai hte, hkum sumhpa shangut lu ai dazik e, nang gaw Karai Kasang a sun ngu ai, Eden hta, rawng nga ndai: lungseng amyu myu, lungseng hkyeng, utahpaya, sin, myekyoi, chyawng, negahtoi, nila, mya, patemya ni hpe, ja hta hkrep nna na hkum hpe mawn sumli ndai: shupsheng hte sumpyi chye galaw ai ni mung, nang hta lawm nna, nang shangai wa ai shani e na a matu lajang da masai. ¹⁴ Nang gaw namman chya hkam nna, yawng hpe ka-up ai Hkerub rai nga ndai; nye a ahkang hte Karai Kasang a chyoi pra ai bum ntsa e nang nga lu ndai: htoi kabrim ai lungseng ni a lapran e, nang hkawm chyai nga ndai. ¹⁵ Nang shangai ai shani kaw nna, nang hta yubak mu hkrup ai shani du hkra, na a arawn alai hkum tsup nga ai. ¹⁶ Raitimung, na a law la ai hpaga majaw, kashun kashe amu hte nang hpring chyat nga nna, nang yubak galaw ndai; dai re ai majaw n san n seng ai wa hpe zawn, Karai Kasang a bum de na, ngai nang hpe kabai kau nngai: yawng hpe ka-up ai Hkerub e, htoi kabrim ai lungseng ni a ka-ang na, ngai nang hpe yeng kau nngai. ¹⁷ Nang tsawm htap ai majaw myit kaba nga ndai; htoi kabrim ai majaw na a hpaji gale mat sai; ngai nang hpe ga du hkra shagrit kau nngai; hkawhkam ni nang hpe mu lu hkra, ngai nang hpe shanhte a man e jahkrat tawn nngai. ¹⁸ N tara ai hpaga amu nang galaw nna, na a law la ai shut hpyit ai hte, na a chyoi pra ai shara ni hpe pyi, nang awu asin di kau ndai, dai re ai majaw na a ka-ang e ngai wan shachyi nngai: dai gaw nang hpe hkru kau nna, nang hpe mada mu ai ni nlang hte a man e, ngai nang hpe ga ntsa e wan dap shatai nngai. ¹⁹ Amyu baw ni hta nang hpe chye ai ni yawng, na a lam mau mat na mara ai: nang gaw hkrithpa kumla tai nna, htawmhpang de galoi mung, nga pra lu na n rai, nga ai. ²⁰ - ²¹ Bai Yehowa mungga ngai kaw du nna, Masha kasha e, Sidon mare de myiman yawng let, myihtoi htoi nna htawn tsun u, ²² Madu Yehowa ning nga ai: Yu u, Sidon mare e, ngai nang hpe hkap daw na nngai; na a ka-ang e nye a hpung shingkang danhkung na ra ai: ngai shi hpe dawdan nna, shi hta e nye a Chyoi pra ai myit shapraw yang, ngai Yehowa rai nga ai hpe, shanhte chye lu na mara ai. ²³ Dai mare hpang de ana zinli hte, de a mare lam ni hta gasat gala, ngai shangun na nngai: grupyin gasat ai nhtu hte hkala nba hkrum ai ni, de a ka-ang e kadawng taw yang, ngai Yehowa rai nga ai hpe, shanhte chye lu na mara ai. ²⁴ Shingrai, Israela amyu grup ying e dè nga nna, shanhte hpe n kaw n law di ai ni hta na, ju chye ai ju hpun, zingri zingrat ai masawn, htawmhpang de n nga lu nna, ngai Yehowa rai nga ai hpe, shanhte chye lu na mara ai. ²⁵ Madu Yehowa ning nga ai: Israela amyu hpe, shanhte bra nga ai amyu baw ni hta na, ngai shinggyin la nna, shanhte a jaw e maigan amyu ni a man e, ngai awlaw ai hkrum nga yang, nye a shangun ma Yaku hpe ngai jaw da ai tinang a mungdan hta, shanhte nga nga lu na mara ai. ²⁶ Dai yang e shanhte pyaw pyaw nga lu na mara ai; gaja wa, shanhte a grupyin e nga nna, shanhte hpe n kaw n law di kau ai ni e, ngai dawdan ngut jang, shanhte gaw nta galaw ai hte tsabyi sun hkai nna, ngai shanhte a Karai Kasang Yehowa rai nga ai hpe, shanhte chye lu na mara ai, nga ai.

¹ - ² Ya shi ning na shata shi a, shi lahkawng ya shani e, Yehowa mungga ngai kaw du nna, Masha kasha e, Egutu hkawhkam Hpara-u hpang maga myiman yawng let, shi hte Egutu mung ting hpe lakap nna myihtoi htoi u; ³ Madu Yehowa ning nga ai: Nila hka ka-ang e hpum nga nna, Nila hka gaw nye a hka rai nga li ai, ngai nan dai hpe nye a matu hpan da ni ai, nga nna tsun ai, baren kaba ngu ai, Egutu hkawhkam Hpara-u e, ngai nang hpe hkap daw na nngai. ⁴ Ngai gaw na a shinggyeng hpe hpri chyinghkyi hte mahkai nna, na a hka hta rawng ai nga ni hpe, na a sep hta kap mat shangun na nngai; na a sep hta kap ai nga ni yawng hte hpawn, ngai nang hpe na a hka ka-ang na karawt shapraw kau na nngai. ⁵ Nang hte na a hka hta rawng ai nga ni mahkra hpe, zaibru jang e ngai kabai tawn kau na nngai: pa ga e nang taw nga nna, kadai mung sa lahkawn shinggyin la na n rai: ga ntsa na matse labye ni hte ntsa malen u ni a shahpa matu, ngai nang hpe ap kau na nngai. ⁶ Shingrai, ngai Yehowa rai nga ai hpe Egutu masha ni yawng chye lu na mara ai: kaning rai nme law, shanhte gaw Israela amyu a matu, maiaw dawhkrawng sha, tai masai: ⁷ Israela masha ni nang hpe jum jang, nang gumba mat nna, shanhte a lahpa shingban kashai mat sai; nang hta shamyet shanat jang, nang daw mat nna, shanhte a mashi kabun mat sai. ⁸ Dai rai nna, Madu Yehowa ning nga ai: Yu u, ngai na a ntsa e nhtu shangun nna, masha hte yamnga hpe shamyit kau na nngai. ⁹ - ¹⁰ Egutu mung gaw akrin akraw hte katsi katsang shara tai mat nna, ngai Yehowa rai nga ai hpe, shanhte chye lu na mara ai. Shi gaw, Nila hka gaw nye a hka rai li ai, ngai nan dai hpe hpan da ni ai, nga nna tsun ai majaw, yu u, nang hte na a hka nu ni hpe ngai hkap daw na nngai. Egutu mung hpe Sewene langchyi kaw nna, Hkusha lamu ga jarit du hkra, akrin akraw hte shingran katsi kau na nngai. ¹¹ Mali shi ning tup, masha mung, yamnga mung, dai hku n lai lu nna, kadai mung shanu nga lu na n rai. ¹² Katsi katsang tai mat ai mungdan ni a ka-ang e, Egutu hpe mung katsi katsang di kau na nngai; marawng marang tai mat ai mare ni hta, shi a mare ni gaw, mali shi ning tup marawng marang tai mat na mara ai: Egutu masha ni hpe, maigan amyu ni hta, ngai shabra kau nna, mungdan ni hta ayai kau na nngai. ¹³ Raitimung Madu Yehowa ning nga ai: Mali shi ning ladu hkrum yang, bra nga ai amyu baw ni hta na, Egutu masha ni hpe, ngai shinggyin la na nngai: ¹⁴ bawngdung hkrum ai Egutu masha ni hpe ngai nhtang woi wa nna, shanhte a buga Pahtru ngu ai mung de, bai wa shangun na nngai: dai yang e shanhte gaw n-gun kya ai mungdan tai na mara ai. ¹⁵ Dai gaw mungdan ni hta n-gun grau kya ai mungdan tai na ra ai; amyu baw ni a ntsa e, htawmhpang e grau kaba wa lu na n rai: shanhte gaw htawmhpang e grau kaba wa lu na n rai: shanhte gaw htawmhpang e maigan amyu ni ntsa e n up lu hkra, ngai shanhte hpe shayawm na nngai. ¹⁶ Israela amyu gaw shanhte kaw hkan nang yang, tsinyam tsindam hkrai hkrum ai hpe, myit dum nna, htawmhpang e shanhte hta shamyet shanat nga na n rai; shingrai ngai Yehowa rai nga ai hpe, shanhte chye lu na mara ai, nga ai. ¹⁷ - ¹⁸ Ya hkun sanit ning na shawng shata a langai ya shani e, Yehowa mungga ngai kaw ku nna, Masha kasha e, Babelon hkawhkam Nebuhkadneza gaw, Turu mare hpe hkap gasat let, shi a hpyen luksuk ni hpe amu kaba galaw shangun mu ai; baw yawng krin wa sai, lahpa shagu hpye wa sai: raitimung Turu mare hpe hkap gasat shakut ai mu matu, hkawhkam wa hte hpyen masha ni gaw, dai mare kaw na hpa shabrai n lu la ma ai. ¹⁹ Dai rai nna Madu Yehowa ning nga ai: Yu u, Babelon hkawhkam Nebuhkadneza hpe, Egutu mung ngai ap ya na nngai: shi gaw de a wunawng wuwa ni hpe mung, de a arung arai hte lanep hpe mung, la wa nna, dai gaw shi a luksuk ni a shabrai tai na ra ai. ²⁰ Shanhte gaw nye a amu gunhpai nna, Turu mare hta shakut sharang ai majaw, ngai shi hpe Egutu mung ap ya ni ai, nga nna Madu Yehowa tsun ai. ²¹ Dai shani e Israela amyu a matu, ngai nrung tu shangun nna, shanhte a ka-ang e n-gup hpaw na ahkang nang hpe jaw na nngai: shingrai ngai Yehowa rai nga ai hpe, shanhte chye lu na mara ai, nga ai.

¹ - ² Bai Yehowa mungga ngai kaw du nna, Masha kasha e, myihtoi htoi nna htawn tsun u, Madu Yehowa ning nga ai: Du ra ai nhtoi gaw dingnye nga ai law, ngu nna shabam u. ³ Dai nhtoi ni sa, gaja wa, Yehowa nhtoi ni sai; dai gaw sumwi htat ai shani, maigan amyu ni matu madat da ai aten, rai na ra ai. ⁴ N-htu tsin-yam gaw Egutu mung ntsa e du nna, hkala nba hkrum ai ni gaw, Egutu mung hta kadawng taw ma yang, Hkusha mung gaw myit ru na ra ai: shanhte gaw shi a wunawng wuwa ni hpe woi la kau nna, shi a npawt nhpang ni agrawp mat ai hkrum na ra ai. ⁵ Hkusha, Put, Luda hte kayau kaya amyu ni yawng, Hkuba mung na ni hte, shada da ga shaka tawn da ai mung masha ni gaw, Egutu masha ni hte hpawn nhtu hte si na mara ai. ⁶ Madu Yehowa ning nga ai: Egutu mung hpe shadaw ai ni mung, kadawng taw na mara ai; shi gumrawng ai daru magam gum-yu yu mat na ra ai: Sewene langchyi gaw nna, mung masha ni gaw, nhtu hte si na mara ai, nga nna Madu Yehowa tsun ai. ⁷ Katsi katsang tai mat ai mungdan ni a ka-ang e shanhte mung katsi katsang tai mat na mara ai: marawng marang tai mat ai mare ni a ka-ang e, shi a mare ni mung tai mat na mara ai. ⁸ Egutu mung hta e ngai wan shachyi nna, shi hpe karum ai ni yawng hten byak hkrum yang, ngai Yehowa rai nga ai hpe, shanhte chye lu na mara ai. ⁹ Dai shani e, hpa n nawn ai Hkusha masha ni hpe jahkrit shama na matu, ngai shangun dat ai kasa ni gaw, shanghpaw li hte pru sa wa nna, Egutu mung ari hkrum ai shani na zawn, Hkusha masha ni myit ru na mara ai: gaja wa, dai gaw du ra ai, nga ai. ¹⁰ Madu Yehowa ning nga ai: Ngai gaw Babelon hkawhkam Nebuhkadnera a lata hte, Egutu mung na wunawng wuwa ni hpe jasim kau na nngai. ¹¹ Dai mung hpe jahten na matu, shi hte shi a amyu masha ni hte hpawn, maigan amyu masha ni hta gumshem ai ni hpe ngai woi shashawn nna, shanhte gaw tinang a nhtu shaw nna, Egutu mung hpe si mang hte jahpring na mara ai. ¹² Ngai gaw hka nu hka shi ni hpe shahkyet kau nna, dai mungdan hpe n hkru ai ni a lata hta dut kau na nngai; mungdan hte dai hta rawng marawng hpe, tsasam masha ni a lata hte, ngai shaza kau na nngai: ngai Yehowa nan dai ga tsun ni ai. ¹³ Madu Yehowa ning nga ai: Ngai gaw hpara sumla ni hpe jahten kau nna, Memhpi mare na kaman re ai arai ni hpe htawm kau na nngai; htawmhpang e Egutu mung na du nga lu sa na, n rai; ngai gaw Egutu mung hpe jahkrit shama na nngai. ¹⁴ Ngai gaw Pahtru shara hpe katsi katsang di kau na nngai; Zoan mare hpe nat kau nna, No a mare hpe dawdan na nngai. ¹⁵ Sin mying ai Egutu hpyendap ntsa e, nye a myit kahtet ai hpe ngai ru bun nna, No a wunawng wuwa ni hpe shamyit kau na nngai. ¹⁶ Egutu mung hta ngai wan shachyi na nngai; Sin gaw myit ru kaba hkrum nna, No a gaw agrawp kau ai hkrum na ra ai: Memhpi mare gaw shani chyingtung e pyi, hpyen hkrum na ra ai. ¹⁷ Awen hte Pibeset mare na shabrang ni gaw nhtu hte si nna, num ni gaw bawngdung hkrum na mara ai. ¹⁸ Egutu mung na kandang hpe Tehpan mare hta ngai agrawp kau yang, dai mare a ntsa e nsin sin nna, de a daru magam a gumrawng gumtawng ai, htum mat na ra ai: sumwi gaw dai mare hpe ka-up nna, de a shayi sha ni gaw, bawngdung sa wa na mara ai. ¹⁹ Shingrai Egutu mung hpe ngai dawdan nna, ngai Yehowa rai nga ai hpe, shanhte chye lu na mara ai, nga ai. ²⁰ - ²¹ Ya shi langai ning na shawng shata sanit ya shani e, Yehowa a mungga ngai kaw du nna, Masha kasha e, Egutu hkawhkam Hpara-u a lahpum hpe ngai daw kau se ai; tsi tsi nna kayawp lu na n rai; nhtu lang na matu, n-gun rawng hkra, sumpan hte ahkyen lu na, n rai. ²² Dai re ai majaw, Madu Yehowa ning nga ai: Yu u, ngai gaw Egutu hkawhkam Hpara-u hpe hkap daw na nngai; shi a lahpum ngu ai, ja ai lahpum hte, shawng de daw ai lahpum hpe, ngai agrawp kau nna, shi a lata na nhtu hpe jahkrat kau na nngai. ²³ Egutu masha ni hpe maigan amyu ni hta ngai shabra kau nna, mungdan ni hta ayai kau na nngai. ²⁴ Babelon hkawhkam a lahpum hpe, ngai n-gun shaja nna, nye a nhtu hpe, shi a lata hta ap ya na nngai: Hpara-u a lahpum hpe chyawm gaw, ngai agrawp kau nna, shi gaw si hkra hkala nba hkrum ai wa zawn, shi a man e madai na ra ai. ²⁵ Babelon hkawhkam a lahpum hpe ngai n-gun shaja nna, Hpara-u a lahpum gaw kya mat na ra ai; nye a nhtu hpe Babelon hkawhkam a lata hta ngai ap ya nna, shi gaw dai nhtu hpe Egutu mung ntsa e shada da yang, ngai Yehowa rai nga ai hpe shanhte lu na me ra ai. ²⁶ Egutu masha ni hpe maigan amyu ni hta ngai shabra kau nna, mungdan ni hta ayai kau na nngai: shingrai ngai Yehowa rai nga ai hpe, shanhte chye lu na mara ai, nga ai.

¹ - ² Ya shi langai ning na shata masum a langai ya shani e, Yehowa mungga ngai kaw du nna, Masha kasha e, Egutu hkawhkam Hpara-u hte shi a wunawng wuwa ni hpe, Na a daru magam, kadai hte bung a ta? ngu nna tsun u. ³ yu u, Asuri masha ni gaw Lebanon a arit hpun hte bung ma ai; lakung lakying ni gaw gung dam nna, awum nga ma ai; de a shing-yan tsaw la nga nna, de a ndung ni sumwi ni hpe dep ma ai. ⁴ Ahka majaw dai kaba wa nna, sung ai hka majaw tsaw la wa ai; hka shi hka gai ni de a grupyin e lwi nga ma ai; de a hka hkawng ni pa ga na hpun mahkra hpang de lwi bra nga ai. ⁵ Dai re ai majaw de a shing-yan gaw pa ga na hpun ni mahkra hta grau tsaw nga ai; de a lakung ni law htam wa nna, hka law law nga ai majaw, galu ai lakying ni tu ma ai. ⁶ De a lakung lakying ni hta, ntsa malen u ni yawng, tsip tsip ma ai; de a npu e pa ga na ashu ashan ni yawng, hkalung wai ma ai; de a shingnip npu e amyu baw kaba ni yawng, shanu nga ma ai. ⁷ Shingrai, hka law ai shara hta de a ru jung wa ai majaw, dai hpun gaw galu kaba wa nna, tsawm la ai hte gung dam wa nga ai. ⁸ - ⁹ Karai Kasang a sun hta tu ai arit hpun ni gaw, dai hpe htawng lu ai n rai; marau hpun gaw de a lakung ni hte, armun hpun gaw de a lakying ni hte, bung nga ai n rai: Karai Kasang a sun hta tu ai hpun langai mi gaw, dai zawn tsawm lu ai n rai: Karai Kasang a sun hta tu ai Eden hpun mahkra gaw, dai hpe manawn ai du hkra, de a gung dam ai lakung lakying ni hte, ngai dai hpe tsawm shangun nngai. ¹⁰ - ¹¹ Dai re ai majaw Madu Yehowa ning nga ai: Shi gaw shing-yan tsaw ai hte, shi a ndung ni sumwi dep nna, shi myit kaba nga ai majaw, maigan amyu ni a n-gun ja ai wa a lata de ngai shi hpe ap kau nna, dai wa gaw teng teng shi hpe shari na ra ai; shi a n hkru ai amu majaw, ngai shi hpe shaden kau nngai. ¹² Maigan amyu ni a gumshem ai tsasam masha ni gaw, shi hpe kran daw nna, kabai tawn manu ai: de a lakung ni gaw bum ntsa e mung, kadit shagu kata e mung, hkrat taw nna, de a lakying ni gaw, mung ting na hka kau e agrawp kau ai hkrum masai: ga ntsa amyu ni yawng, shi a shingnip na pru nna, shi hpe kau da manu ai. ¹³ Shi a marawng marang ni a ntsa e, ntsa malen u ni yawng ju nga nna, pa ga na ashu ashan ni yawng, de a lakung lakying ni a ntsa e nga nga na mara ai: ¹⁴ shingrai, hka e tu ai hpa hpun mung, tinang tsaw kaba ai majaw, n gumrawng na ra ai; tinang a ndung ni hpe sumwi de n shadep nna, hka majaw kaba wa ai daru magam wa kadai mung, tinang myit kaba ai hta tsap nga na n rai: kaning rai nme law, nlang hte gaw nsung hku de shang wa ai shinggyim kasha ni hte hpawn, lamu ga lawu tsang e, si hkrung si htan du hpang de yu wa na matu, ap kau ai hkrum masai. ¹⁵ Madu Yehowa ning nga ai: Shi katsan ga de yu wa ai shani e, sharung shayawt ai lam ngai sharai nngai; shi a jaw e sung htum ai shara hpe ngai htinggrum da nna, de a hka shi hka gai ni hpe jasim kau nngai: hka kaba ni gaw asim sha nga ma ai; shi a jaw e mung, Lebanon bum hpe ngai yawn shangun nna, pa ga na hpun ni yawng, nyui mat ma ai. ¹⁶ Shi kadawng taw nna, nsung hku hta shang ai ni hte rau, katsan ga de yu wa mat yang, shi a ngoi kadu ai majaw, amyu baw ni yawng hpe, ngai hkrit gari shangun nngai: shingrai, Lebanon bum e tu nna, hka law ai majaw Eden sun hta tsawm la ai hte kaba wa ai hpun ni yawng, lamu ga a lawu tsang e myit shalan ai hkrum ma ai. ¹⁷ Dai ni mung nhtu hte si mat nna, katsan ga de yu wa sai ni hpang de, shi hte rau yu wa ma ai; gaja wa shanhte gaw, maigan amyu ni a ka-ang e, shi a shingnip npu e dè nga nna, shi a lahpum ngu ai ni rai nga ma ai. ¹⁸ Dai rai nna, Eden sun hta tu ai, galu kaba ai hte arawng lu ai hpun ni hta, nang gara mahtang hte bung n ta? nang mung, Eden sun na hpun ni hte rau, lamu ga a lawu tsang de yu wa na ndai: nhtu hte si mat hkrum ai, matu n gadoi ai ni a ka-ang e, nang kaleng taw nga na ndai. Da ndai gaw, Hpara-u hte shi a wunawng wuwa ni rai nga ma ai, nga nna Madu Yehowa tsun ai.

¹ - ² Ya shi lahkawng ning na, shata shi lahkawng a langai ya shani e, Yehowa mungga ngai kaw du nna, Masha kasha e, Egutu hkawhkam Hpara-u a matu sharung shayawt nna, shi hpe htawn tsun u: Nang gaw maigan amyu ni hta hkanghkyi uram zawn rai nga ndai; raitimung, hka kaba na baren hte sha nang bung ndai; nang gaw na a hka shi hka gai ni hta hpung-yawt hkawm nna, na a lagaw hte, de a hka hkawng ni hpe kapun hkanu shangun ndai. ³ Madu Yehowa ning nga ai: Amyu baw law law hte hpawn, nye a sumgawn hte ngai nang hpe ka-up nna, shanhte gaw nye a byek hte, nang hpe karawt shapraw na mara ai. ⁴ Ngai gaw nang hpe hkarang de shapraw nna, pa ga de kabai tawn na nngai: ntsa malen u ni yawng hpe, na ntsa e ngai dung shangun nna, mungkan ga na matse labye ni hpe na a si mang hte jahkru na nngai. ⁵ Na a shan hpe bum lang ntsa e ngai nep nna, kadit ni hpe na a hkum hkrang hte jahpring na nngai. ⁶ Dai hta n-ga ngai gaw na a ru hkaw ai sai hte, mungdan ting hpe, bum ga du hkra, madi shangun nna, hkaraw shagu na a sai hte hpring na ra ai. ⁷ Ngai nang hpe shamyit kau yang, sumsing lamu hpe ngai magap kau nna, shagan ni hpe jasin kau na nngai; ajan hpe sumwi hte ngai ka-up nna, shata mung n htoi mat na ra ai. ⁸ Sumsing lamu na tu ala ai nhtoi hkum ni yawng hpe, ngai na ntsa e jasin nna, na a mungdan hpe nsin hte ka-up na nngai, nga nna Madu Yehowa tsun ai. ⁹ Nang n chye ai mungdan amyu ni hta, nang hten byak wa ai lam ngai shana ya yang, amyu baw law law hpe ngai myit ru shangun na nngai: ¹⁰ gaja wa, amyu baw law law na a lam mau mat na mara ai; shanhte a hkawhkam ni a man e ngai nhtu shada yang, shanhte gaw na a lam majaw, nachying hkrit gari na mara ai: nang kadawng taw ai shani e, masha langai hte langai, tinang a asak majaw, tut tut hkrit gari na mara ai. ¹¹ Kaning rai nme law, Madu Yehowa ning nga ai: Babelon hkawhkam a nhtu na ntsa e du na ra ai. ¹² Share ninghkrin ni a nhtu hte, na a wunawng wuwa ni hpe, ngai kadawng kau na nngai: shanhte yawng maigan amyu ni a gumshem ai ni rai nga nna, Egutu mung na gumrawng gumtawng ai hpe, shanhte kaman shatai kau na hte, de a wunawng wuwa ting hten byak hkrum na mara ai. ¹³ Hka kaba ni a makau e shanu nga ai ashu ashan yawng hpe mung, ngai shamyit kau na nngai: htawmhpang e masha lagaw mung, ashu ashan ni a lahkru mung, dai hka ni hpe hkanu na, n rai. ¹⁴ Dai shaloi e, de a hka hpe ngai jasan nna, de a hka nu ni hpe, sau zawn lwi shangun na nngai, nga nna Madu Yehowa tsun ai. ¹⁵ Ngai gaw Egutu mung hpe katsi katsang hte akrin akraw shara shatai let, dai hta rawng marawng hpe dawm la nna, dai hta shanu nga ai ni yawng hte hpe shaza kau yang, ngai Yehowa rai nga ai hpe, shanhte chye lu na mara ai. ¹⁶ Da ndai gaw sharung shayawt ai ga rai nga nna, amyu baw ni a shayi sha ni gaw, Egutu mung hte de a wunawng wuwa ni a matu, dai ga hkan nna sharung shayawt na mara ai, nga nna Madu Yehowa tsun ai. ¹⁷ - ¹⁸ Ya shi lahkawng ning na shata shi lahkawng a shi manga ya shani e, Yehowa mungga ngai kaw du nna, Masha kasha e, Egutu wunawng wuwa ni a matu sharung shayawt nna, shanhte hpe shayu dat u: nsung hku de yu wa ai ni hte hpawn, shi hpe mung, daru magam rawng ai maigan amyu ni a shayi sha ni hpe mung, lamu ga a lawu tsang de shayu dat u. ¹⁹ Nang gaw kaga wa hte grau tsawm n ni? Yu wa u, matu gadoi n hkam ai ni hte rau kaleng taw nga u. ²⁰ Nhtu hte si hkrum ai ni a ka-ang e shanhte kadawng taw masai; nhtu hkrum na, shi a auba rai nga ai; shi hte shi a wunawng wuwa ni yawng hte hpe, karawt kabai kau mu. ²¹ Daru magam rawng ai n-gun ja ai ni gaw, Katsan ga ka-ang nna, shi a shingtau ni hte hpawn, shi hpe shachyen na mara ai: Shanhte mung yu wa masai; shanhte kaleng taw ma ai; nhtu hte si ai, matu n gadoi hkam ai ni zawn, shanhte rai ma ai. ²² Asuri hte shi a zaw nawng zaw wa ni yawng, dai yang e nga nga ma ai; de a lup ni gaw grupyin e marawk nga ai: nlang hte gaw nhtu hte kadawng si ai ni rai nga ma ai; ²³ shanhte lup ni gaw, jat na ga a tsan htum ai jut e nga nga nna, shi a zaw nawng zaw wa ni dai lup grup ying e dinggreng nga ma ai; nlang hte gaw dinghta ga e hkrithpa tai timung, ya gaw nhtu hte kadawng si ai ni hkrai rai nga ma ai. ²⁴ Dai yang e, Elam hte shi a lup grupyin e, shi a wunawng wuwa ni yawng, nga nga ma ai: nlang hte gaw nhtu hte kadawng si nna, matu gadoi n hkam ai ni zawn, lamu ga a lawu tsang de yu hkrat wa ai ni rai nga ma ai: shanhte gaw dinghta ga e hkrithpa tai ma timung, nsung hku de yu wa ai ni hte rau, kaya kahpa hkrum masai. ²⁵ Shanhte gaw, shi a wunawng wuwa ni hte rau, kadawng si ai ni a ka-ang e, shi a matu yupku lajang da masai; shi a lup ni grupyin e marawk nga ma ai; nlang hte gaw, nhtu hte si ai, matu gadoi n hkam ai ni, rai nga ma ai: shanhte gaw dinghta ga e hkrithpa tai timung, nsung hku de yu wa ai ni hte rau, tinang nan kaya kahpa hkrum sha masai; shi gaw kadawng si ai ni a ka-ang e taw nga ai. ²⁶ Meshek yan Tubala hte shan a wunawng wuwa ni yawng, dai yang e nga nga ma ai; shan a lup ni gaw grupyin e marawk nga ai; nlang hte gaw nhtu hte si ai, matu gadoi n hkam ai ni, rai nga ma ai: kaning rai nme law, shan gaw dinghta ga e hkrithpa tai masai. ²⁷ Shan gaw moi si wa ai, matu gadoi n hkam ai share ninghkrin ni hte rau pyi taw nga lu na n rai: dai ni gaw, katsan ga de tinang a ri nhtu hte rau yu wa nna, tinang a nhtu hpe bunghkum ma ai: shan a n hkru n hkra ai amu chyawm gaw, shan a nrut nra ni hpe magap na ma ai; kaning rai nme law, shan gaw dinghta ga a daru magam ni a hkrithpa rai nga ma ai. ²⁸ Nang mung, Egutu e, matu gadoi n hkam ai ni a ka-ang e, agrawp kau ai hkrum nna, nhtu hte kadawng si hkrum ai ni hte rau, taw nga na ndai. ²⁹ Dai yang e, Edom mung rai nga ai: shi a hkawhkam ni hte du salang ni gaw, tinang a n-gun an ai aten e, nhtu hte kadawng si ai ni hte rau kaleng taw hkrum masai; shanhte gaw matu gadoi n hkam ai, nsung hku de yu wa ai ni hte rau, kaleng taw na mara ai. ³⁰ Dai yang e, dingdung mung na du salang ni yawng hte hte, kadawng si hkrum ai ni hte rau yu wa ai Sidon masha ni nlang, nga nga ma ai; tinang a n-gun atsam hte shapraw ai hkrithpa majaw, shanhte kaya kahpa hkrum ma ai: nhtu hte kadawng si ai ni hte rau, shanhte matu gadoi n hkam ai, kaleng taw nna, nsung hku de yu wa ai ni hte rau, tinang nan a kaya kahpa hkrum sha ma ai. ³¹ Hpara-u gaw shanhte hpe mu nna, shi a wunawng wuwa ni a lam, myit shalan ai lu la lu ai; gaja wa, Hpara-u hte shi a hpyen luksuk ni yawng, nhtu hte kadawng si na mara ai, nga nna Madu Yehowa tsun ai. ³² Kaning rai nme law, dinghta ga hta e ngai shi hpe hkrithpa shatai timung, Hpara-u hte shi a wunawng wuwa ni yawng, matu gadoi n hkam ai, nhtu hte kadawng si ai ni a ka-ang e kaleng taw nga na mara ai, nga nna Madu Yehowa tsun ai.

¹ - ⁴ Bai Yehowa mungga ngai kaw du nna, Masha kasha e, na a amyu Israela kashu kasha ni hpe htawn tsun u: Ngai gaw mung langai ngai de nhtu tsin-yam shangun dat nna, mung masha ni gaw, manang ni hta na, sin ai wa langai mi lata la ma yang, dai wa gaw nhtu du ai hpe mu jang, pahtau dum nna, mung masha ni hpe shadum timung, marai langai ngai pahtau nsen na ninglen hpa n nawn ai majaw, nhtu hkrum nna si wa yang, dai wa a asak sum ai mara gaw shi nan hkam u ga. ⁵ Shi gaw pahtau nsen na ninglen, hpa n nawn ai majaw, shi a asak sum ai mara shi nan hkam u ga: pahtau nsen madat taw gaw, tinang a asak hkye la na wu ai. ⁶ Shing n rai, sin ai wa gaw nhtu du ai hpe mu ninglen, pahtau n dum, mung masha ni hpe n shadum ai majaw, shanhte hta na langai ngai nhtu hkrum nna si wa yang, dai wa gaw tinang a yubak hta si wa timung, shi a asai hpe sin ai wa a lata na ngai hpyi la na nngai. ⁷ Dai hte maren, masha kasha e, Israela dap ntsa e sin ai wa tai na matu, ngai nang hpe san da ni ai; dai re ai majaw nye a n-gup ga madat nna, nye a ga hte shanhte hpe shadum shahprang u. ⁸ Ngai gaw tara n lang ai wa hpe, Tara n lang ai wa e, nang teng teng si lu na ndai, ngu nna tsun yang, nang dai wa hpe, shi a lam na nhtang wa hkra, n shadum yang, tara n lang ai wa gaw shi yubak hta si wa timung, shi a asai hpe na a lata na ngai hpyi la na nngai. ⁹ Shing n rai, tara n lang ai wa hpe, shi a lam na nhtang wa hkra, nang shadum timung, shi myit n kayin hkraw yang, dai wa gaw shi a yubak hta si wa timung, nang gaw na a asak hpe hkye la nu ai. ¹⁰ Dai rai nna, masha kasha e, Israela dap hpe htawn tsun u: Nanhte gaw, “Ataw, anhte tara tawt lai ai hte yubak gaw, anhte a ntsa e mara nga nna, dai hta anhte gawngkya nga ga ai: dai rai yang, anhte kaning rai hkrung nga lu na ga ta?” nga nna tsun myit dai. ¹¹ Shanhte hpe htawn tsun mu, Madu Yehowa ning nga ai: Ngai hkrung nga ai hte maren, tara n lang ai wa a si na lam hta ngai sharawng awng nga ai, n rai; tara n lang ai wa gaw, shi a arawn alai hpe kau da nna, hkrung nga na hpe, ngai sharawng awng nga nngai: kayin wa marit, nanhte a n hkru ai arawn alai hta na kayin wa marit; Israela dap e, hpa majaw si mayu myit ta? ¹² Bai nang gaw, masha kasha e, na a amyu kashu kasha ni hpe tsun u, dinghpring ai wa gaw shut hpyit yang, shi a dinghpring ai gaw shi hpe mawai la lu na, n rai; tara n lang ai wa gaw shi a arawn alai hpe kau da yang, hten byak hkrum na, n rai; dinghpring ai wa mung, yubak galaw yang, shi a dinghpring ai hte hkrung nga lu na, n rai. ¹³ Dinghpring ai wa gaw teng teng hkrung nga na ra ai, nga nna ngai tsun timung, shi gaw tinang a dinghpring ai hpe hpa nna, yubak galaw yang, shi a dinghpring ai amu langai mi hpe, dum ya na n rai: shi galaw ai yubak hta shi si na ra ai. ¹⁴ - ¹⁵ Bai, tara n lang ai wa hpe, Nang teng teng si lu na ndai, nga nna ngai tsun timung, dai wa gaw tinang a yubak hpe koi kau nna, tara hkan ai hte tengman ai amu galaw let, tang da ai arai hpe hkin ya, kashun la ai arai hpe nhtang ya nna, adip arip n galaw ai sha, hkrung ai lam hte seng ai tara hpe hkan yang, si na n rai, teng teng hkrung nga na ra ai. ¹⁶ Shi galaw yu ai yubak langai mi hpe matsing na n rai; shi tara hkan nna, tengman ai amu galaw sai: shi teng teng hkrung nga na ra ai. ¹⁷ Raitimung, Madu jeyang ai lam ding ai n rai, nga nna, na amyu kashu kasha ni tsun ma ai; shanhte a lam mahtang n ding nga a hka. ¹⁸ Dinghpring ai wa gaw, tinang a dinghpring ai lam kau da nna, shut hpyit ai amu galaw yang, dai amu majaw shi si na ra ai. ¹⁹ Tara n lang ai wa gaw, tara n lang ai lam kau da nna, tara hte tengman ai lam hku hkan yang, shi gaw de a majaw hkrung nga na ra ai. ²⁰ Raitimung, nanhte gaw, Madu jeyang ai lam ding ai n rai, nga nna tsun myit hka. Israela dap e, nanhte langai hte langai a arawn alai hte maren, ngai nanhte hpe jeyang na nngai, nga ai. ²¹ Ya, anhte a bawngdung wa ai shi lahkawng ning na, shata shi a, manga ya shani e, Yerusalem mare na lawt lu ai wa langai mi, ngai kaw du nna, Mare hpe jahten kau manu ai, nga nna tsun ai. ²² Dai wa du ningtawn shana kaw nna, shi du ai hpang jahpawt du hkra, Yehowa lata nye a ntsa e nga nga nna, nye a n-gup hpaw magang ya ai hte, nye a n-gup hpaw nga nna, ngai atsin sha nga ai n rai. ²³ - ²⁴ Shaloi Yehowa ga ngai kaw du nna, Masha kasha e, marawng marang tai mat ai Israela mung hta e naw shanu nga ai ni gaw, Abraham shi hkrai sha nga timung, dai mungdan hpe sali wunli hkam la lu ai: anhte mahtang law nga ga ai; dai mungdan hpe anhte a matu sali wunli jaw da ma ni ai, nga nna tsun ma ai. ²⁵ Dai re ai majaw shanhte hpe tsun mu, Madu Yehowa ning nga ai: Nanhte gaw sai hte hpawn shan sha nna, hpara sumla ni hpe mada yu let, masha hpe sat kau ninglen, ndai mungdan hpe madu lu na myit ni? ²⁶ Nanhte gaw nhtu hpe hpa nna, matsat shabat amu galaw let, htingbu jan shaw ninglen, ndai mungdan hpe madu lu na myit ni? ²⁷ Shanhte hpe ning ngu tsun u, Madu Yehowa ning nga ai: Ngai hkrung nga ai hte maren, marawng marang tai wa ai shara ni hta naw shanu nga ai ni gaw, nhtu hte teng teng si na mara ai; pa ga e shanu nga ai wa hpe, matse labye hkrum na matu, ap kau nu ai; hpyendap hte ginlawng hku ni hta rawng nga ai ni gaw, ana zinli hte si na mara ai. ²⁸ Ngai gaw dai mungdan hpe katsi katsang hte mauhpa shara shatai na nngai; n-gun ja ai ni a gumrawng gumtawng sim mat na ra ai: Israela bum ga hta kadai n lai lu hkra, shingran katsi shara tai na ra ai. ²⁹ Shingrai, mung masha ni galaw yu ai matsat shabat amu majaw, mungdan hpe katsi katsang hte mauhpa shara ngai shatai ai shaloi e, ngai Yehowa rai nga ai hpe, shanhte chye lu na mara ai. ³⁰ Dai hta kaga, masha kasha e, na a amyu kashu kasha ni gaw, Sa saga, Yehowa kaw na pru ai mungga sa madat saga, shakum makau hkan, chyinghka lam hkan e, langai hte langai nang hpe lakap nna, tsun hkat shajang ma ai. ³¹ Shanhte gaw shawa hpawng sa nna, nye a masha ni zawn na a man e dung nga ninglen, na a ga na la timung, n galaw hkraw ma ai: shanhte gaw tinang a n-gup hte ga ngwi grai tsun timung, tinang a lawhpa myitsutgan hta jung nga malu ai. ³² Yu u, na a ga gaw mahku grai pyaw nna, atsawm sha chye dum ai laka ka ai wa a ga hte maren, shanhte a man e rai nga ai: shanhte gaw na a ga na la timung, n galaw hkraw ma ai. ³³ Dai amu chyawm gaw byin nna, dai du yang, shanhte a ka-ang e myihtoi nga nga ai hpe, shanhte chye lu na mara ai, nga ai.

¹ - ² Bai Yehowa mungga ngai kaw du nna, Masha kasha e, Israela amyu a sagu rem ni hpe shaang nna myihtoi htoi u; myihtoi htoi nna sagu rem ni hpe htawn tsun u, Madu Yehowa ning nga ai: Tinang hkum hpe sha bau ai Israela sagu rem ni gaw, dingnye lu mu ga; sagu rem wa gaw, sagu ni hpe bau mai ai, n rai ni? ³ Nanhte mahtang sagu sau man sha nna, sagu mun bu hpun ai hte, sau hpum ai sagu hpe sat sha timung, sagu ni hpe n bau myit dai. ⁴ Gawngkya ai sagu ni hpe, nanhte n-gun shaja ai, n rai; machyi hkrum ai sagu hpe, shamai ya ai, n rai; nra daw ai sagu hpe, ahkyen kayawp ai, n rai; masha gau mat wa ai sagu hpe, hkan mawai la ai, n rai; dam mat ai sagu hpe, tam la ai, n rai: nanhte gaw myit ja nna adip arip hte shanhte hpe reng myit dai. ⁵ Sagu rem wa n nga ai majaw, sagu ni bra wa nna, ayai nga yang, pa ga na matse labye yawng a shat tai ma ai. ⁶ Nye a sagu ni gaw bum lang shagu, tsaw ai kawng shagu ntsa e brak hkawm nga ma ai; gaja wa nye a sagu ni gaw ga ntsa ting hta bra wa nna, shanhte hpe hkan sawk tam ai wa n nga ai. ⁷ Dai re ai majaw, sagu rem ni e, Yehowa ga madat mara mu; Madu Yehowa ning nga ai: ⁸ - ⁹ Ngai hkrung nga ai hte maren, gaja wa, sagu rem wa n nga ai majaw, nye a sagu ni pa ga na matse labye ni yawng a matu shahpa tai nna, nye a sagu rem ni gaw, nye a sagu ni hpe n hkan tam ai hte, sagu ni hpe bau ai n rai, tinang hkum hpe sha bau ma ai majaw sagu rem ni e, Yehowa ga madat mara mu. ¹⁰ Madu Yehowa ning nga ai: Sagu rem ni hpe ngai hkap daw na nngai: nye a sagu ni hpe shanhte a lata na ngai hpyi la nna, sagu rem aya dawm la na nngai; sagu rem ni gaw htawmhpang de tinang hkum hpe bau lu na, n rai: nye a sagu ni gaw htawmhpang de shanhte a shahpa n tai lu hkra, shanhte a n-gup na sagu ni hpe gare la na nngai. ¹¹ Kaning rai nme law, Madu Yehowa ning nga ai: Yu u, Ngai hkum nan, nye a sagu ni hpe sawk yu nna, hkan tam na nngai. ¹² Sagu rem wa gaw, bra nga ai sagu ni hpe hkan tam shakut ai hte maren, ngai mung nye a sagu ni hpe hkan tam na nngai: lamu mu nna sin ai shani e, shanhte bra wa ai shara shagu hkan na, ngai shanhte hpe shaw woi wa na nngai. ¹³ Amyu baw ni hta na, ngai shanhte hpe shapraw la nna, mungdan ni hta na shinggyin la nhtawm, tinang a buga de woi wa na nngai; Israela bum ga ntsa e mung, hka kau hkan e mung, masha shanu ai shara shagu hkan e mung, ngai shanhte hpe rem na nngai. ¹⁴ Udat shara kaja hta ngai shanhte hpe rem na nngai; tsaw ai Israela bum ntsa e shanhte a jlawng rai na ra ai; dai yang e ulawng kaja hta, shanhte hpum nga nna mara ai; Israela bum ntsa e, tsit lali ai udat shara hta shanhte sha nga na mara ai. ¹⁵ Ngai hkum nan nye a sagu ni hpe bau na nngai; shanhte hpe hpum shangun na nngai; ¹⁶ dam mat ai sagu hpe hkan tam na nngai; masha ni gau mat wa ai sagu hpe, hkan mawai la na nngai: nra daw ai sagu hpe ahkyen kayawp na nngai: gawngkya ai sagu hpe n-gun shaja na nngai; sau hpum ai ni hte n-gun ja ai ni hpe chyawm gaw ngai jahten na nngai: tara hte maren ngai shanhte hpe bau na nngai, nga nna Madu Yehowa tsun ai. ¹⁷ Madu Yehowa ning nga ai; Nye a sagu hpung e, Yu u, sagu mi hte sagu mi hpe, sagu la ni hte bainam la ni hpe, ngai ginhka dawdan na nngai. ¹⁸ Nanhte gaw kaja ai udat shara hta ushat sha ai hta n-ga, naw ngam nga ai tsingdu hpe nanhte a lagaw hte kabye kau nna, san ai ntsin hpe lu lu ai hta n-ga, naw ngam nga ai hka hpe kabye hkanu kau na gaw, nanhte a matu amu kaji zawn nawn nga myit ni? ¹⁹ Nye a sagu ni gaw, nanhte kabye kau ai tsingdu hpe sha nna, nanhte a lagaw hte hkanu kau ai hka hpe lu ma ai. ²⁰ Dai rai nna Madu Yehowa shanhte hpe ning nga ai: Yu mu, sau hpum ai sagu hte lasi ai sagu hpe, ngai nan ginhka dawdan na nngai. ²¹ - ²² Nanhte gaw gawngkya ai sagu ni hpe shara shagu de shabra kau hkra, nhkrem hte lahpa e htu nna, nrung hte daru kau myit dai majaw, ngai gaw nye a sagu ni hpe mawai la nna, shanhte gaw htawmhpang de kashun kashe hkrum na n rai; sagu mi hte sagu mi hpe ngai ginhka dawdan na nngai. ²³ Sagu rem wa langai mi hpe mung ngai san da nna, sagu ni hpe shi rem nga na ra ai: dai wa gaw nye a shangun ma Dawi rai na ra ai: shi sagu ni hpe bau nna, dai ni a sagu rem wa tai na ra ai. ²⁴ Ngai Yehowa gaw shanhte a Karai Kasang, nye a shangun ma Dawi gaw shanhte a du, tai na ra ai; ngai Yehowa nan dai ga tsun ni ai. ²⁵ Bai, ngai gaw shanhte hte ngwi pyaw ga shaka tawn da nna, shanhte a mungdan hta na matse labye hpe shamyit kau na nngai; shingrai shanhte gaw nam mali hkan e a pyaw sha shanu nga nna, maling dinggram hkan e yup nga lu na mara ai. ²⁶ Ngai gaw shanhte hpe mung, nye a kawng grupyin na shara ni hpe mung, wunli wun-gau shara shatai na nngai; aten ladaw du jang marang jahtu na nngai: gaja wa chyeju marang mahpawng htu na ra ai. ²⁷ Nam mali na hpun gaw, asi si na ra ai; lamu ga gaw nsi naisi shapraw na ra ai; shanhte gaw dai mungdan hta apyaw sha shanu nga na mara ai: shanhte hpe zingri ai kandang hpe ngai agrawp kau nna, shanhte hpe yam ai ni a lata na mawai la yang, ngai Yehowa rai nga ai hpe shanhte chye lu na mara ai. ²⁸ Maigan amyu ni, htawmhpang e shanhte hpe kashun kashe di lu na n rai; mungdan a matse labye ni, shanhte hpe amya sha lu na n rai; shanhte a pyaw sha nga lu nna, shanhte hpe jahkrit shama ai wa n nga lu ai. ²⁹ Ngai gaw kajai gumhkawng ai sun langai mi, shanhte a matu lajang da nna, shanhte gaw dai mungdan hta, htawmhpang de hku wa hkrum na n rai; maigan amyu ni a man e mung, shatan nhkan hkrum na n rai. ³⁰ Shanhte a Karai Kasang ngai Yehowa gaw, shanhte hte rau rai nga ai hpe mung, Israela dap gaw, nye a amyu rai nga ai hpe mung, shanhte chye lu na mara ai, nga nna Madu Yehowa tsun ai. ³¹ Nye a udat shara hta nga ai, nye a sagu hpung e, nanhte shinggyim masha hkrai rai nga timung, ngai gaw nanhte a Karai Kasang rai nga nngai, nga nna Madu Yehowa tsun ai.

¹ - ² Bai Yehowa mungga ngai kaw du nna, Masha kasha e, Seira bum de myiman yawng nna, myihtoi htoi let htawn tsun u, ³ Madu Yehowa ning nga ai: Yu u, Seira bum e, ngai nang hpe hkap daw na nngai; ngai gaw na a ntsa e nye a lata ladawn nna, nang hpe katsi katsang hte mauhpa shara shatai na nngai. ⁴ Ngai gaw na a mare ni hpe, marawng marang di kau na nngai; nang gaw shingran katsi ai shara tai nna, ngai Yehowa rai nga ai hpe, nang chye lu na ndai. ⁵ - ⁶ Nang gaw tutnawng ndawng n yawt nga nna, Israela kashu kasha ni gaw, tsin-yam tsindam, arai ahpri hkrum jahtum ai shani e, shanhte hpe nhtu hte sat kau ndai majaw, Madu Yehowa ning nga ai: Ngai hkrung nga ai hte maren, sat kau hkrum na matu, ngai nang hpe hkyen da nna, nang sat kau hkrum na ndai: nang gaw asai hpe n koi kau ndai majaw, asai gaw nang hpe hkan shachyut na ra ai. ⁷ Shingrai ngai gaw Seira bum hpe mauhpa hte shingrai katsi ai shara shatai na nngai: dai lam kadai n lai hkra, sa sa wa wa re ai ni hpe ngai jahtum kau na nngai. ⁸ De a bum ni hpe si mang hte ngai jahpring na nngai; na a kawng ni, na a kadit ni, na a hkaraw ni yawng hte hta, nhtu hte sat kau hkrum ai ni kadawng taw na mara ai. ⁹ Ngai nang hpe htani htana katsi katsang shara shatai na nngai; na a mare ni hta kadai mung shanu nga na n rai; shingrai ngai Yehowa rai nga nngai hpe, nanhte chye lu na marin dai. ¹⁰ - ¹¹ Dai mung hta Yehowa shanu nga ninglen, nang gaw, Ndai amyu lahkawng hte, ndai mungdan lahkawng hpe, ngai madu na nngai, nga nna tsun ndai majaw Madu Yehowa ning nga ai: Ngai hkrung nga ai hte maren, nang shanhte hpe ndawng n yawt nna, sindawng kahtet ai hte manawn masham ai myit madun dan ndai hte maren, ngai nang hpe matai dawp na nngai: nang hpe dawdan ai shani e ngai shanhte hta danpru na nngai. ¹² Shingrai, nang gaw, Israela bum ni katsi katsang tai mat nna, anhte a shahpa tai mat sai, nga nna dai bum ni a lam shatan nhkan let, nang tsun ai ga mahkra hpe, ngai Yehowa nan na ni ai, nang chye lu na ndai. ¹³ Nanhte gaw nanhte a n-gup hte nye a lam ga kaba tsun nna, nye a man e gumrawng grang nga myit dai: ngai dai lam na ni ai. ¹⁴ Madu Yehowa ning nga ai: mungkan ting kabu nga lu hkra, ngai nang hpe katsi katsang shara shatai na nngai. ¹⁵ Israela dap a sali wunli ga katsi katsang tai mat ai hpe, nang kabu nga ndai majaw, dai hte maren ngai nang hpe di na nngai: Seira bum e, nang hte Edom mung ting, katsi katsang tai mat nna, ngai Yehowa rai nga ai hpe, shanhte chye lu na mara ai, nga ai.

¹ Bai nang gaw, masha kasha e, Israela bum ni hpe myihtoi htoi nna tsun u: Israela bum ni e, Yehowa ga madat mara mu: ² - ⁴ Madu Yehowa ning nga ai, hpyen wa gaw, Aha, htani htana tsaw ai kawng ni gaw, anhte madu lu na lamu ga tai wa sai, nga nna nanhte a lam tsun ai majaw, myihtoi htoi nna htawn tsun u: Madu Yehowa ning nga ai: Nanhte gaw naw ngam nga ai maigan amyu ni a sali wunlui tai mat ai du hkra, shanhte gaw nanhte hpe katsi katsang shara shatai nna, grupyin e kawa sha kau ai majaw mung, bawlaw ai ni a tsun chyai shara hte, mung masha ni a shatan nhkan shara tai myit dai majaw mung, Israela bum ni e, Madu Yehowa ga madat mara mu: bum ni hte kawng ni hpe, hkaraw ni hte kadit ni hpe, grupyin e nga nna, naw ngam nga ai maigan amyu ni a man e lanep hte shatan nhkan shara tai ai, katsi katsang shara ni hte marawng marang tai mat ai mare ni a lam, Madu Yehowa ning nga ai: ⁵ Gaja wa, nye a mungdan hpe up na matu, kabu gara ai myit hte kashun kashe la nna, manawn masham ai myit hte dai hpe lanep shatai lu hkra, pagawn re ai maigan amyu ni hte Edom amyu ting hpe, nye a myit sindawng kahtet ai wan hte ngai daru kau na nngai. ⁶ Dai re ai majaw Israela mung hpe lakap nna myihtoi htoi let, bum ni hte kawng ni hpe, hkaraw hte kadit ni hpe htawn tsun u, Madu Yehowa ning nga ai: Yu u, nanhte gaw maigan amyu ni a shatan nhkan hkrum ai majaw, ngai myit na machyi nna, sindawng kahtet ai hte ga tsun ni ai: ⁷ Madu Yehowa ning nga ai: Gaja wa nanhte a grupyin e nga ai amyu ni gaw, tinang nan shatan nhkan hkrum na mara ai, nga nna ngai dagam ni ai. ⁸ Nanhte mahtang, Israela bum ni e, hpun tu nna, nye a amyu Israela matu asi si na marin dai: shanhte nhtang wa na aten ni wa sai. ⁹ Kaning rai nme law, yu u, nanhte hpang maga ngai rai nga nngai; nanhte nga ai de ngai nhtang wa nna, nanhte a ntsa e yi hkauna galaw lu ai hte, nli gat na mara ai! ¹⁰ nanhte a ntsa e Israela amyu masha ga daga hpe ngai shalaw jahtam nna, shanhte gaw mare ni hta shanu nga nna, katsi katsang re ai shara ni hpe bai dè da na mara ai; ¹¹ nanhte a ntsa e masha hte yamnga hpe ngai shalaw na nngai; dai ni gaw mayat maya nna, law htam wa na mara ai; moi shawng e shanu nga ai zawn, ngai nanhte hpe bai shanu nga shangun nna, shawng ningnan e nanhte hpe shaman ya ai hta, grau nna shaman ya na nngai: shingrai ngai Yehowa rai nga ai hpe, nanhte chye lu na marin dai. ¹² Gaja wa, nye a amyu Israela masha ni hpe, ngai nanhte a ntsa e hkawm chyai shangun na nngai; shanhte gaw nanhte hpe madu lu nna, nanhte gaw shanhte a sali wunli ga tai na myit dai: htawmhpang e nanhte a majaw shanhte a kashu kasha ni si na n rai. ¹³ - ¹⁴ Madu Yehowa ning nga ai: Maigan masha ni gaw, Mungdan e, nang gaw masha hpe amya sha kau nna, tinang amyu hpe kadawng si shangun ndai, nga nna tsun ai majaw, htawmhpang de masha hpe nang amya sha kau lu na, n rai; na a amyu hpe mung, kadawng si shangun lu na, n rai, nga nna Madu Yehowa tsun ai; ¹⁵ htawmhpang de maigan amyu ni a shatan nhkan ga hpe, nang na lu na, n rai; shanhte a jahpoi ai mung hkrum na, n rai; na a amyu hpe kadawng si shangun na, n rai, nga nna Madu Yehowa tsun ai. ¹⁶ - ¹⁷ Bai Yehowa mungga ngai kaw du nna, Masha kasha e, Israela amyu gaw tinang a mungdan hta naw shanu nga yang, shanhte gaw tinang hkan galaw ai arawn alai hte dai mung hpe awu asin di kau manu ai: shanhte a htunghking gaw, nye a man e, nba lang ai num a n san n seng ai hte bung nga ai. ¹⁸ Dai rai nna, dai mung ntsa e shanhte jahkaw kau ai asai majaw mung, tinang a hpara sumla ni hte dai hpe awu asin di kau ai majaw mung, ngai shanhte a ntsa e nye a sindawng kahtet ai hpe ru dat ni ai: ¹⁹ maigan amyu ni hta, ngai shanhte hpe shabra kau nna, shanhte gaw mungdan ni hta ayai kau ai hkrum masai: tinang hkan galaw ai arawn alai hte maren ngai shanhte hpe dawdan ni ai. ²⁰ Ya shanhte gaw maigan amyu ni hpang de du bra wa yang, Ndai ni gaw Yehowa masha ni rai nga ma ai, shi a mungdan na pru wa masai, nga nna maigan masha ni shanhte a lam tsun ai majaw, nye a chyoi pra ai mying ningsang, shanhte a jaw e, awu asin hkrum nga ai. ²¹ Ngai chyawm gaw, Israela masha ni du ai, maigan mung shagu hta awu asin hkrum nga ai, nye a chyoi pra ai mying ningsang hpe, lahpawt dum nga nngai. ²² Dai rai nna Israela dap hpe htawn tsun u, Madu Yehowa ning nga ai: Israela dap e, nanhte hpe tau nna ndai amu hpe ngai galaw nngai, n rai; nanhte bra wa ai maigan amyu ni a man e nanhte a jaw e awu asin hkrum ai nye a chyoi pra ai amying ningsang hpe tau nna, ngai galaw nngai. ²³ Maigan amyu ni a ka-ang e, nanhte awu asin di kau ai, nye a galu kaba ai mying hpe ngai shagrau shaa na nngai: ngai gaw nanhte a jaw e shanhte a man e, shagrau shaa ai hkrum nngai shaloi e, ngai Yehowa rai nga ai hpe, maigan amyu ni chye lu na mara ai, nga nna Madu Yehowa tsun ai. ²⁴ Kaning rai nme law, ngai nanhte hpe maigan amyu ni hta na shapraw la nna, mungdan ni yawng hta na shinggyin la nhtawm, nanhte a mung de woi shashawn na nngai. ²⁵ Ngai nanhte a ntsa e sanseng ai ntsin lapri nna, nanhte sanseng na myit dai; nanhte hta kap ai agang chyalang yawng hte, nanhte a hpara sumla ni hta na ngai nanhte hpe jasan jaseng na nngai. ²⁶ Myit masin ningnan ngai nanhte hpe jaw nna, nanhte a kraw lawang hta, wenyi ningnan bang ya na nngai: nanhte a hkum hkrang na nlung salum hpe ngai shaw kau nna, shan salum bang ya na nngai. ²⁷ Nanhte a kraw lawang e nye a Wenyi hpe ngai bang ya nna, nye a matsun maroi ga hpe hkan shangun na nngai: shingrai nanhte gaw nye a hkangda ai ga hpe hkan galaw nna shatup na marin dai. ²⁸ Nanhte a nji nwa ni hpe ngai jaw da ai mungdan hta, nanhte shanu nga lu nna, nanhte gaw nye a amyu, ngai gaw nanhte a Karai Kasang, tai na nngai. ²⁹ Nanhte a agang chyalang yawng hpe ngai shatsai kau na nngai: nanhte hku wa n hkrum hkra, ngai nai mam tu shangun nna, shalaw na nngai. ³⁰ Nanhte hku wa hkrum ai lam, htawmhpang e maigan amyu ni nanhte hpe n shatan lu hkra, namsi hpun a namsi hte yi hkauna a nai mam hpe, ngai shalaw jahtam na nngai. ³¹ Shaloi nanhte gaw, nanhte a n hkru n hkra ai lam hte, n hpru n mai ai arawn alai hpe myit dum nna, tinang a n hkru n hkra ai lam hte matsat shabat amu majaw, tinang a myiman hpe pyi, matsat kau na marin dai. ³² Madu Yehowa ning nga ai: Nanhte hpe tau nna, ndai amu ngai galaw nngai, n rai, ngu nna dum chye mu: Israela dap e, nanhte a arawn alai majaw, kaya dum nna mak mat mu. ³³ Madu Yehowa ning nga ai: Nanhte a shut hpyit ai yawng hta na, ngai nanhte hpe jasan jaseng ai shani e, nanhte gaw mare ni hta bai shanu nga nna, katsi katsang re ai shara ni hpe bai dè da na marin dai. ³⁴ Lai wa ai ni mahkra a man e katsi katsang kau da ai lamu ga gaw, yi hkauna bai tai na ra ai. ³⁵ Shaloi shanhte gaw, Ndai shingran katsi ai ga gaw, Eden sun zawn tai sai; akrin akraw, shingran katsi ai hte marawng marang tai mat ai mare ni mung, bunghku kum nna, masha dè nga ma ai, nga nna tsun na mara ai. ³⁶ Shingrai ngai Yehowa gaw, marawng marang tai mat ai shara ni hpe bai dè da ai mung, katsi katsang kau da ai lamu ga hta yi hkauna galaw ai hpe mung, nanhte a grupyin e naw hti nga ai maigan amyu ni chye lu na mara ai: ngai Yehowa nan dai ga tsun nna, dai hpe shatup na nngai. ³⁷ Madu Yehowa ning nga ai: Israela masha ni a tawng ban ai ga hpe, ngai lang mi naw madat na nngai; ngai shanhte a masha ni hpe sagu zawn shalaw jahtam na nngai. ³⁸ Madat da ai poi aten e Chyoi pra hkungga nawng ya na matu, Yerusalem mare hta sagu hpung hpring nga ai hte maren, marawng marang tai mat ai mare ni hpe, masha wunawng wuwa hte ngai jahpring na nngai: shingrai ngai Yehowa rai nga ai hpe, shanhte chye lu na mara ai, nga ai.

¹ Yehowa a lata nye a ntsa e rai nga nna, shi a Wenyi hte ngai hpe woi shapraw nhtawm, kadit ka-ang e ngai hpe tawn da ni ai; dai kadit gaw, nrut nra hte hpring chyat nga ai. ² Dai nrut nra ni a grupyin e shi ngai hpe hkawm shangun nna, yu u, dai kadit hta nrut nra law law jawng nga nna, dai ni gaw grai wa hkraw mat nga ai. ³ Shingrai shi gaw, Masha kasha e, ndai nrut nra ni gaw hkrung lu na a ni? nga nna ngai hpe san yang, ngai gaw, Madu Yehowa e, nang chye nga ndai, ngu nna htan we ai. ⁴ Bai shi gaw, Ndai nrut nra ni a lam myihtoi htoi nna, hkaw tsun u: Hkraw mat ai nrut nra ni e, Yehowa ga madat mara mu; ⁵ ndai nrut nra ni hpe Madu Yehowa ning nga ai: Yu u, ngai nanhte a kata de nsoi nsa bang ya nna, nanhte asak hkrung na myit dai. ⁶ Nanhte a ntsa e lasaw lasa ngai gran da nna, ashan rawt shangun ai hte, ahpyi kayawp nhtawm, nanhte a kata de nsoi nsa bang ya nna, nanhte asak hkrung na myit dai: shingrai ngai Yehowa rai nga ai hpe, nanhte chye lu na marin dai, nga nna ngai hpe tsun ni ai. ⁷ Shingrai ngai hpe hkangda ai hte maren ngai myihtoi htoi nngai: ya ngai htoi nga yang, yu u, nsen ngoi nna, nnang nawn nawn wa ai; nrut nra ni gaw shamu shamawt nna, langai hte langai matut wa ma ai. ⁸ Ya ngai mada yu nga yang, yu u, lasaw lasa gran wa nna, ashan rawt wa ai hte, hpyi kayawp nga ai; raitimung nsoi nsa garai n rawng ma ai. ⁹ Shaloi shi gaw, Myihtoi htoi u, masha kasha e, nbung hpe myihtoi htoi u; nbung hpe htawn tsun u, Madu Yehowa ning nga ai: Nbung e, ga man mali de na pru nna, ndai si mang ni gaw hkrung wa lu hkra, shanhte a ntsa e ahpawt u, nga nna ngai hpe tsun ai. ¹⁰ Shingrai ngai hpe hkangda ai hte maren ngai htoi nngai; ya shanhte hta nsoi nsa shang ai hte, shanhte asak hkrung wa nna, tinang a lagaw hte tsap nga ma ai: shanhte gaw grai law ai wunawng kaba rai nga ma ai. ¹¹ Shaloi shi gaw, Masha kasha e, ndai nrut nra ni gaw, Israela dap ting rai nga ma ai: yu u, shanhte gaw, Anhte a nrut nra ni hkraw mat ma ai; anhte a myit mada shara hten mat sai; anhte htum mat saga ai, nga ma ai. ¹² Dai rai nna myihtoi htoi let, shanhte hpe htawn tsun u, Madu Yehowa ning nga ai: Nye a amyu e, yu u, nanhte a lup ni hpe ngai hpaw nna, nanhte hpe shapraw la nhtawm, Israela mung de nhtang woi wa na nngai. ¹³ Shingrai, nye amyu e, nanhte a lup ni hpe ngai hpaw nna, nanhte hpe shapraw la ai shaloi e, ngai Yehowa rai nga ai hpe, nanhte chye lu na marin dai. ¹⁴ Nye a Wenyi hpe nanhte a kraw e ngai bang ya nna, nanhte asak hkrung na myit dai: nanhte a mungdan hta ngai nanhte hpe tawn da nna, ngai Yehowa nan dai ga tsun da ai hte shatup nga ai hpe, nanhte chye lu na marin dai, nga nna Yehowa tsun ai. ¹⁵ - ¹⁶ Bai Yehowa mungga ngai kaw du nna, Nang, masha kasha e, hpun chyen langai mi la nna, Yuda hte shi a kanawn manang Israela kashu kasha ni a matu, ngu nna dai hta ka da u; bai hpun chyen kaga la nna, Yosep hte shi a kanawn manang Israela dap ni mahkra matu Ehprim hpun chyen ngu nna ka da u: ¹⁷ dai hpun chyen lahkawng hpe, na a lata hta langai sha tai hkra, matut nna lang u. ¹⁸ - ²⁰ Shingrai, Ndai nang galaw ai de a ga lachyawm gaw, anhte hpe n tsun dan mai a ni? nga nna na amyu kashu kasha ni nang hpe san ma yang, nang gaw, Madu Yehowa ning nga ai: Yu u, Ehprim lang ai, Yosep hte shi a kanawn manang, Israela amyu ni matu, ka da ai hpun chyen hpe ngai la nna, Yuda hpun chyen hte matut nhtawm, nye a lata hta langai sha shatai na nngai, ngu nna htan let, nang ka da ai hpun chyen lahkawng hpe shanhte a man e lang nga u. ²¹ Bai nang gaw shanhte hpe htawn tsun u, Madu Yehowa ning nga ai: Yu mu, maigan amyu ni hta bra nga ai, Israela kashu kasha ni hpe ngai shapraw la nna, shara shagu na shinggyin la nhtawm, tinang a mung de nhtang woi wa na nngai: ²² dai mung na Israela bum ni a ntsa e, ngai shanhte hpe amyu langai sha shatai nna, hkawhkam langai sha shanhte mahkra ntsa e up na ra ai: htawmhpang de shanhte gaw, amyu lahkawng tai na n rai; mungdan lahkawng galoi mung karan na n rai; ²³ tinang a hpara sumla ni, matsat shabat arai ni, shut hpyit ai htunghking hte tinang hkum hpe awu asin di kau na n rai; shanhte tawt lai ai yubak yawng hta na ngai shanhte hpe hkyehkrang la nna, jasan jaseng na nngai: shingrai shanhte gaw nye a amyu, ngai gaw shanhte a Karai Kasang tai na nngai. ²⁴ Shaloi nye a shangun ma Dawi shanhte a hkawhkam tai nna, shanhte yawng sagu rem wa langai sha lu na mara ai; nye a hkangda ai ga hpe shanhte hkan nang nna, nye a matsun maroi ga hpe hkan shatup na mara ai. ²⁵ Nye a shangun ma Yaku hpe ngai jaw da nna, nanhte a nji nwa ni shanu nga yu ai mungdan hta, shanhte shanu nga na mara ai: shanhte mung, kasha ni hte kashu ni mung, shu mashi shu masha prat dingsa du hkra, dai de shanu nga nna, nye a shangun ma Dawi, shanhte a du, prat dingsa tai na ra ai. ²⁶ Dai hta n-ga ngai shanhte hte ngwi pyaw ga shaka tawn da nna, dai gaw htani htana ga shaka tai na ra ai: ngai shanhte hpe dè da nna, shalaw jahtam na nngai: nye a chyoi pra ai shara hpe, shanhte a ka-ang e prat dingsa ngai tawn da na nngai. ²⁷ Nye a nawku sum shanhte hte rau anga nga nna, ngai gaw shanhte a Karai Kasang, shanhte gaw nye a amyu, tai na mara ai. ²⁸ Shingrai nye a chyoi pra ai shara gaw, shanhte a ka-ang e prat dingsa grin nga yang, Israela amyu hpe shachyoi shapra ai wa gaw, ngai Yehowa nan rai nga ai hpe, maigan amyu ni chye lu na mara ai, nga ai.

¹ - ² Bai Yehowa mungga ngai kaw du nna, Masha kasha e, Rosha, Meshek Tubala mung ni a du, Magoga masha Goga hpang de myiman yawng nna, myihtoi htoi let htawn tsun u; ³ Madu Yehowa ning nga ai: Rosha, Meshek, Tubala du Goga e, ngai nang hpe hkap daw na nngai: ⁴ ngai nang hpe kayin shangun nna, na a shakap hpe hpri chyinghkyi hte mahkai na nngai; na a luksuk laba ni yawng hpe, gumra ni hte gumra jawn ai ni hpe, hpyen hpun palawng bu hpun ai ni hte n-gang kaji n-gang kaba lang nna, nhtu shaw ai wunawng wuwa kaba hpe, nang hte hpawn ngai shapraw na nngai: ⁵ Persi, Hkusha hte Put masha ni yawng, n-gang lang ai hte hpri gup chyawp chyawp let, shanhte hta lawm ma ai: ⁶ Gome hte de a hpyen masha ni yawng, dingdung maga htum de na, Togarma hte de a hpyen masha ni yawng, amyu myu ngu ai ni, nang hta lawm ma ai. ⁷ Hkyen tawn u, nang kaw hpawng nga ai wunawng wuwa ni hte rau tinang hkum hpe hkyen tawn mu: nang gaw shanhte a sin langa wa tai u. ⁸ Nhtoi tsawmra na wa yang, nang ahkang aya lu la na ndai: shingrai, nhtu tsin-yam lawt nna, amyu baw ni hta na shaw la hkrum ai hte, nhtoi na na wa katsi katsang rai nga ai, Israela bum ni a ntsa e dè nga ai amyu hpang de, hpang jahtum ai aten e, nang lung gasat na ndai; raitimung, dai mung masha ni gaw maigan amyu ni hta na shaw la ai hkrum nna, yawng hte gaw apyaw sha shanu nga na mara ai. ⁹ Nang gaw laru marang zawn lung wa nna, nang hte, nang hta lawm ai hpyen masha wunawng wuwa yawng hte hpawn, dai mungdan hpe sumwi zawn ka-up na marin dai. ¹⁰ Madu Yehowa ning nga ai: Dai shani e, nang myit mang la nna, n hkru ai hku maw na ndai: ¹¹ nang gaw, Mare kahtawng bunghku n kum ai mung de ngai lung wa na nngai; gaja wa, asan apan shanu nga nna, shakum n kum ai, htinggrang n grang ai hte chyinghka pyi n ra ai mung de ngai lung gasat na nngai; ¹² lanep la na, sut rai kashun la na nngai: shawng e katsi katsang rai nga nna, ya masha rawng nga ai shara hpe mung, maigan amyu ni hta na shinggyin la hkrum nna, yamnga hte sut rai lu su ai hte, lamu ga ka-ang e shanu nga ai amyu hpe mung, lung gasat na nngai, nga nna nang tsun nit dai. ¹³ Sheba hte Dedan, Tarshi hpaga ga ai ni hte, de a hkanghkyi uram ni yawng, Lanep lu la na matu nang sa n ni? aja gumhpraw, yamnga hte arung arai, sutgan amyu myu kashun la na matu, na a wunawng wuwa ni hpe, jahpawng tawn n ni? nga nna nang hpe san na mara ai. ¹⁴ Dai rai nna, masha kasha e, myihtoi htoi let, Goga hpe tsun u, Madu Yehowa ning nga ai: Nye a amyu Israela gaw apyaw alaw shanu nga ai shani e, nang chye lu na, n rai ni? ¹⁵ - ¹⁶ Shaloi nang gaw, gumra jawn ai luksuk laba, wunawng wuwa, amyu myu hte rau dingdung maga de na lung wa nna, mungdan hpe sumwi ka-up ai zawn, nye a amyu Israela hpe lung gasat na ndai; shingrai, Goga e, maigan amyu ni a man e na a jaw e ngai shagrau shaa ai hkrum ai shaloi, shanhte ngai hpe chye lu hkra, hpang jahtum ai aten e ngai nang hpe nye a mungdan de woi shashawn na nngai. ¹⁷ Madu Yehowa ning nga ai: Ngai nang hpe shanhte hpang de lung gasat shangun na nngai, nga nna moi shawng e law law ning myihtoi htoi ai, nye a shangun ma Israela myihtoi ni hpe, ngai madun dan ai shingran gaw, nang hpe shaang ai, n rai ni? ¹⁸ Raitimung, Goga gaw nye a amyu Israela mungdan hpe sa gasat ai shani e, nye a sindawng kahtet ai rawt nna, pru na ra ai, nga nna Madu Yehowa tsun ai. ¹⁹ Gaja wa, dai shani e Israela mung ting hta, nnang nawn kaba nawn wa na ra ai, nga nna nye a n-yun bu ai wan hkru let, ngai tsun ni ai: ²⁰ nammukdara nga ni, ntsa malen u ni, nam na ashu ashan ni, ga ntsa e gumrawt hkawm ai baw amyu myu hte, ga ntsa e nga ai masha yawng mayawng hte gaw, nye a man e gari awam na mara ai: bum ni gaw gyi mat nna, hkaraw nhkap ni ru hkrat wa ai hte, bunghku ni yawng kadawng mat na mara ai. ²¹ Madu Yehowa ning nga ai: Nye a bum ni yawng hta na, shi hpe gasat na nhtu ngai htet da nna, langai hte langai tinang manang wa hpe pyi, kahtam na mara ai. ²² Ngai gaw ana zinli hte mung, sat kau ai hte mung, shi hpe dawdan na nngai; shi a ntsa e mung, shi a hpyen masha ni a ntsa e mung, sin kaba, wan hte kan, tung hkra jahtu na nngai. ²³ Shingrai ngai gaw, nye hkum hpe shagrau shatsaw nna, shachyoi shapra ai hte, maigan amyu law law a man e chye shangun na nngai: shaloi ngai Yehowa rai nga ai hpe, shanhte chye lu na mara ai.

¹ Nang gaw, masha kasha e, myihtoi htoi let Goga hpe htawn tsun u, Madu Yehowa ning nga ai: Yu u, Rosha, Meshek, Tubala du Goga e, ngai nang hpe hkap daw na nngai: ² ngai nang hpe kayin shangun nna, nang hpe woi awn ai hte, dingdung maga htum de na lung wa shangun na nngai: Israela bum ni a ntsa de, nang hpe woi shalun na nngai: ³ na a ndan hpe pai lata na ngai kayat jahkrat kau nna, hkra lata na pala ni hpe, tat kau shangun na nngai. ⁴ Nang hte na a hpyen masha ni mahkra mung, nang hte rau nga ai amyu baw ni mung, Israela bum ni a ntsa e kadawng si na mara ai: u matse amyu myu hte, pa ga na matse labye ni a shahpa matu, ngai nang hpe ap kau na nngai; ⁵ nang gaw pa ga e kadawng si na rin dai: ngai dai ga tsun ni ai, nga nna Madu Yehowa tsun ai. ⁶ Dai hta kaga ngai gaw, Magoga mung hte, zunlawng ni hta apyaw alaw shanu nga ai ni hpang de wan shangun dat nna, ngai Yehowa rai nga ai hpe, shanhte chye lu na mara ai. ⁷ Shingrai, nye a chyoi pra ai mying ningsang hpe, Israela amyu ka-ang e ngai danhkung shangun na nngai; htawmhpang e nye a amying ningsang awu asin hkrum na, ngai hkraw na n rai: ngai gaw Israela amyu a Chyoi pra ai wa ngu ai Yehowa rai nga ai hpe, maigan amyu ni chye lu na mara ai, nga ai. ⁸ Yu u, dai shani du ra ai, dai amu byin na ra ai; ngai madat da ai shani gaw ndai rai nga ai, nga nna Madu Yehowa tsun ai. ⁹ Israela mare ni hta shanu nga ai ni gaw, pru nna, hpyen rai ni, n-gang kaji, n-gang galu, ndan ni, pala ni, duk ni hte ri ni hpe lahkawn la nhtawm, sanit ning tup wan ju na mara ai; ¹⁰ dai laman e shanhte gaw nam na hpun n hta, maling na hpun n hkran ra na mara ai; hpyen rai ni hte wan ju na mara ai: hpya lu hpya sha ai ni hpe, shanhte hpya lu hpya sha nna, kashun kashe sha ai ni hpe, kashun kashe sha na mara ai, nga nna Madu Yehowa tsun ai. ¹¹ Dai shani e ngai gaw, Israela mung hta e, nawng a sinpraw maga sa wa ai nmaw lam kadit e, Goga hpe lup makoi na matu, lupwa jaw na nngai; dai hku Kadai n lai lu na mara ai; shanhte gaw dai yang e Goga hte shi a wunawng wuwa ni hpe lup makoi nna, dai shara gaw Hamon-goga nga nna mying na ra ai. ¹² Israela masha ni gaw, dai mung hpe jasan jaseng na matu, shata sanit tup shanhte hpe lup da na mara ai. ¹³ Gaja wa, mung masha ni yawng, shanhte hpe lup makoi na mara ai; ngai danhkung hkrum ai shani e, dai gaw shanhte a matu kajai gumhkawng shara tai na ra ai, nga nna Madu Yehowa tsun ai. ¹⁴ Shani shana hkan tam ai masha hpe shanhte san da nna, dai ni gaw lai sa wa ai ni hte rau, ga e naw taw nga ai si mang ni hpe lup makoi nna, mungdan hpe jasan jaseng na mara ai; shanhte gaw ndai shata sanit hpang e hkan tam na mara ai. ¹⁵ Shaloi dai lam lai mayu ai ni lai lu nna, si mang nra mu hkrup yang, lup makoi ai ni gaw, Hamon-goga kadit e dai hpe lup makoi ai aten du hkra, de a makau e mahtan daw jung da na mara ai. ¹⁶ Dai yang e dè ai mare mung, Hamona mying na ra ai: shingrai shanhte gaw mungdan hpe jasan jaseng na mara ai. ¹⁷ Nang, masha kasha e, Madu Yehowa ning nga ai; U amyu myu hte, pa ga na matse labye mahkra hpe htawn tsun u: Sa zuphpawng marit; shan lusha nna, asai lu lu hkra, Israela bum ni a ntsa e, nanhte a matu ngai lajang da ai shagu hkungga poi kaba de, shara shagu na sa zuphpawng marit. ¹⁸ Nanhte gaw share ninghkrin ni a shan sha nna, mung du ni a sai lu na marin dai; Bashan mung e hpum sau hkra kawn da ai sagu la, sagu kasha, bainam hte usu ni a asai ashan, lusha lu na marin dai. ¹⁹ Nanhte a matu ngai lajang da ai poi hta, hkru kat hkra sau man sha nna, lau hkra sai lu na myit dai. ²⁰ Nanhte gaw nye a sha ku makau e, gumra ni, leng jawn ai ni, share ninghkrin ni hte hpyen masha amyu myu hpe hkru kat hkra sha lu na marin dai, nga nna Madu Yehowa tsun ai. ²¹ Ngai gaw nye a arawng sadang hpe maigan amyu ni a ka-ang e danhkung shangun nna, ngai tara dara ai lam hte, shanhte a ntsa e nye a lata ngai mara da ai hpe, maigan amyu ni yawng, mu lu na mara ai. ²² Shingrai, ngai shanhte a Karai Kasang Yehowa rai nga ai hpe, dai shani kaw nna, Israela dap ni chye lu na mara ai. ²³ Israela dap ni gaw, tinang shut hpyit ai amu majaw, bawngdung hkrum wa ai hpe, maigan amyu ni yawng chye lu na mara ai: nye a tara hpe tawt lai kau ai majaw, shanhte kaw na nye a myiman hpe, ngai makoi kau nngai: ngai shanhte hpe hpyen ni a lata de ap ya nna, nlang hte gaw nhtu hte kadawng si hkrum ma ai. ²⁴ Shanhte a n san n seng ai amu hte, tara tawt lai ai hte maren, ngai matai dawp nna, shanhte kaw na nye a myiman makoi kau nngai. ²⁵ Dai re ai majaw Madu Yehowa ning nga ai: Bawngdung hkrum ai Yaku amyu hpe, ya ngai nhtang woi wa nna, Israela dap ting hpe matsan dum na nngai: nye chyoi pra ai mying ningsang hpe ngai maga na nngai. ²⁶ - ²⁷ Ngai shanhte hpe amyu baw ni kata na shapraw la nna, hpyen ni a mungdan hta na shinggyin la ai hte, shanhte a jaw e maigan amyu law law a man e ngai shagrau shatsaw ai hkrum nna, shanhte gaw tinang a mungdan hta apyaw alaw nga lu ai hte, jahkrit shama ai wa n nga yang, nye a man e shanhte shut hpyit ai lam mahkra hpe shanhte myit dum nna, shanhte hkrum ai kaya kahpa hkam sha na mara ai. ²⁸ Shingrai, ngai shanhte hkrum hpe maigan amyu ni hpang de bawngdung shangun nna, tinang mung hta bai shinggyin la ai lam dum yang, ngai shanhte a Karai Kasang Yehowa rai nga ai hpe, shanhte chye lu na mara ai; htawmhpang e shanhte hta na langai mi hpe ngai kau da na n rai; ²⁹ nye a myiman mung shanhte kaw na makoi kau na n rai: kaning rai nme law, ngai gaw Israela dap ntsa e nye a Wenyi ru bun ni ai, nga nna Madu Yehowa tsun ai.

¹ Ya Yerusalem hten wa ai shi mali ning ladu hkrum ai, anhte bawngdung wa ai hkun manga ning na, shawng shata a shi ya shani jang, Yehowa a lata nye a ntsa e rai nga nna, ndai mare de ngai hpe woi wa ai. ² Karai Kasang a shingran hte shi ngai hpe Israela mung de woi wa nna, grai tsaw ai bum ntsa e tawn da nngai; dai bum a dingda maga de mare nsan ai hkrang danpru nga ai. ³ Shi ngai hpe dai de woi wa nngai; shaloi, yu u, magri nsan ai wa langai mi dai yang e nga nga nna, shadawn na matu, shi a lata hta lachyit sumri hte maiaw nren lang let, chyinghka lam makau e tsap nga ai. ⁴ Shaloi dai wa gaw, Masha kasha e, mada yu u, na la u, ngai nang hpe madun na ra ai yawng hpe matsing u: nang hpe madun na matu, ndai shara de woi wa ni ai: nang mu mamu Israela dap hpe shana ya u, nga nna ngai hpe tsun ni ai. ⁵ Ya, yu u, nta grupyin e bunghku nga nga ai; dai wa a lata hta dawng kru galu ai maiaw nren lang nga ai; (dai dawng mi gaw lahkam masum hpe ngu ai rai nga ai;) shaloi shi gaw bunghku hpe shadawn nna, de a htat de nren mi, tsaw de nren mi rai nga ai. ⁶ Dai hpang sinpraw maga chyinghka de shi sa du nna, lakang lung nhtawm, chyinghka hkinbawng hpe shadawn yu ai; de a htat de nren mi; bai de a manang nren mi rai nga ai. ⁷ Sin langa gawk ni langai hte langai galu de nren mi, nda de nren mi rai nga ai; gawk ni a lapran e dawng manga gang ai lam din nga ai; ajan makau na kata chyinghka hkinbawng mung nren mi rai nga ai. ⁸ Bai shi gaw nta de ang wa ai chyinghka ajan hpe shadawn nna, dai gaw nren mi rai nga ai. ⁹ Dai hpang shi gaw chyinghka jan kaga hpe shadawn nna, dai gaw dawng matsat rai nga ai; de a shadaw gaw dawng lahkawng rai nga ai; chyinghka ajan gaw kata maga de rai nga ai. ¹⁰ Sinpraw chyinghka gade de sin langa gawk masum sum rai nga nna, dai masum maren kaba nga ai; shadaw ni mung maren kaba nga nga ma ai. ¹¹ Bai shi gaw chyinghka lam hpe shadawn nna, nda de dawng shi, galu de dawng shi masum rai nga ai. ¹² Sin langa gawk ni a ntawt e gade de dawng mi kaba ai shakau rai nga ai; sin langa gawk ni mung, gade de dawng kru kru rai nga ai. ¹³ Dai hpang shi gaw dai chyinghka lam hpe, gawk langai mi a magaw kaw nna, gawk kaga a magaw du hkra, shadawn nna, dai gaw dawng hkun manga gang nga ai; chyinghka ni gaw man ang ang rai nga ma ai. ¹⁴ Shi gaw chyinghka grupyin wing kata a njut shadaw du hkra, dawng kru shi gang hkra, shadaw ni hpe tawn da mu ai. ¹⁵ Shingrai shinggan chyinghka lam kaw nna, kata wing chyinghka lam du hkra, dawng manga shi rai nga ai. ¹⁶ Ya sin langa gawk ni, chyinghka kata grupyin na shadaw ni hte, wing kata na dingbat ni hta, hkuwawt chyinghka ni rai nga ai; dai hkuwawt chyinghka ni gaw kata maga de rai nga ma ai: shadaw ni hta namhtan hpun sumla tawk ka ma ai. ¹⁷ Dai hpang shi gaw shinggan wing kata de ngai hpe woi shashawn nna, yu u, de a grupyin e gawk ni rai nga nna, nlung nep nga ai: dai lung nep ntsa e gawk sumshi rai nga ai. ¹⁸ Chyinghka ni hkan nna, chyinghka lam hte maren gang ai lung nep gaw, lawu lung nep rai nga ai. ¹⁹ Shaloi shi gaw lawu chyinghka lam shinggan kaw nna, kata wing chyinghka du hkra shadawn nna, dai gaw dawng latsa gang nga ai: sinpraw maga hte dingdung maga, maren rai nga ai. ²⁰ Dai hpang shi gaw dingdung maga de ang ai, shinggan wing chyinghka lam a galu de hte nda de, shadawn wu ai. ²¹ Sin langa gawk ni gade de masum sum rai nga ai; de a shadaw ni hte dingbat ni, shawng na chyinghka kasi hte maren rai nga ai: de a galu de dawng manga shi, nda de dawng hkun manga rai nga ai. ²² Hkuwawt ni, dingbat ni, namhtan hpun sumla ni, sinpraw chyinghka a kasi hte maren rai nga ai; lakang n-gam sanit hte chyinghka de lung wa ai; dingbat ni gaw lakang hte yan sha rai nga ai. ²³ Dai hta kaga, kata wing e, dingdung chyinghka hte sinpraw chyinghka ang ai chyinghka lam rai nga ai: shingrai shinggan wing chyinghka kaw nna, kata wing chyinghka du hkra, dawng latsa gang nga ai. ²⁴ Shaloi shi gaw dingda maga de ngai hpe woi wa nna, yu u, dingda chyinghka hpe ngai mu nngai: shadaw ni hte dingbat ni hpe shadawn yang, shawng na kasi hte maren rai nga ai. ²⁵ Shawng na hkuwawt hku hte maren, hkuwawt hku ni hte dingbat ni rai nga ai: de a galu de dawng manga shi, nda de dawng hkun manga rai nga ai. ²⁶ Lakang n-gam sanit hte chyinghka de lung wa ai; dingbat ni gaw lakang hte yan sha rai nga ai: gade de shadaw ni hta namhtan hpun sumla tawk ka nga ai. ²⁷ Bai dingda maga de, kata wing chyinghka lam rai nga ai: shingrai, dingda maga shinggan wing chyinghka kaw nna, kata wing chyinghka du hkra, dawng latsa gang nga ai. ²⁸ Bai shi gaw dingda chyinghka hku e, kata wing de ngai hpe shashawn nna, shawng na kasi hte maren dai dingda chyinghka hpe shadawn wu ai. ²⁹ Sin langa gawk ni, shadaw ni hte dingbat ni gaw, shawng na kasi hte maren rai nga ai; chyinghka grupyin e mung, dingbat ni hta mung, hkuwawt hku rai nga ai: de a galu de dawng manga shi, de a nda de dawng hkun manga, rai nga ai. ³⁰ Galu de dawng hkun manga, nda de dawng manga re ai dingbat ni grupyin e rai nga ai. ³¹ Dingbat ni gaw shinggan wing de ang wa nna, de a shadaw ni hta namhtan hpun sumla tawk ka nga ai: lakang n-gam matsat hte dai de lung wa ai. ³² Bai shi gaw sinpraw maga kata wing de ngai hpe shashawn nna, dai chyinghka hpe shawng na kasi hte maren shadawn wu ai. ³³ Sin langa gawk ni, shadaw ni, dingbat ni gaw, shawng na kasi hte maren rai nga ai; chyinghka hte deingbat ni a grupyin e hkuwawt hku rai nga ai; de a galu de dawng manga shi, nda de dawng hkun manga rai nga ai. ³⁴ Dingbat ni gaw shinggan wing de ang nna, gade de shadaw ni a ntsa e namhtan hpun sumla tawk ka nga ai: lakang n-gam matsat hte dai de lung wa ai. ³⁵ Bai dingdung chyinghka de shi ngai hpe woi shashawn nna, shawng na kasi hte maren dai hpe shadawn wu ai: ³⁶ sin langa gawk ni, shadaw ni, dingbat ni, shawng na hte maren rai nga nna, grupyin e hkuwawt hku rai nga ai: de a galu de dawng manga shi, nda de dawng hkun manga rai nga ai. ³⁷ Shadaw ni gaw shinggan wing de ang nna, gade de shadaw ni hta, namhtan hpun sumla tawk ka nga ai: lakang n-gam matsat hte dai de lung wa ai. ³⁸ Ya chyinghka shadaw makau e gawk langai mi nga ai; dai yang e shanhte gaw wan nat hkungga hpe kashin ma ai. ³⁹ Bai, wan nat hkungga, mara raw hkungga, htingrai htingrat hkungga hpe sat na matu, chyinghka jan kata e gade de, ku lahkawng hkawng rai nga ai. ⁴⁰ Dingdung chyinghka lam de lung wa ai, chyinghka shinggan makau gade de, ku lahkawng, rai nga nna, chyinghka jan hte seng ai gade de, ku lahkawng rai nga ai. ⁴¹ Shingrai chyinghka makau e maga mi de ku mali, maga mi de ku mali rai nga ai: shagu hkungga hpe sat na matu ku matsat rai nga ai. ⁴² Bai wan nat hkungga matu, tawk shatsawm ai nlung ku mali rai nga ai; de a galu de dawng me lahkam mi, nda de dawng me lahkam mi, tsaw de dawng mi, rai nga ai: dai ku ni a ntsa e shanhte gaw wan nat hkungga hte shagu hkungga hpe sat na matu, lang ai arai ni hpe tawn da mu ai. ⁴³ Dai ku ntsa grupyin e lahpa mi gang ai shakau kau nga ai: ku ni a ntsa e, hkungga shan mara nga ai. ⁴⁴ Ya kata wing na chyinghka shinggan e, mahkawn mangoi ai ni matu, gawk lahkawng rai nga ai: gawk mi gaw dingdung chyinghka makau e nga nna, dingda de man yawng nga ai; gawk mi gaw dingda chyinghka makau e nga nna, dingda de man yawng nga ai. ⁴⁵ Shaloi shi gaw, Dingda de man yawng ai gawk gaw, nta hta dawjau ai hkinjawng ni a matu, rai nga ai; ⁴⁶ dingdung de man yawng ai gawk gaw, tawn hkungri e dawjau ai hkinjawng ni a matu, rai nga ai: dai ni gaw, Yehowa hpe dawjau na matu, Lewi amyu masha ni hta na lata la ai, Zadok a kashu kasha ni rai nga ma ai, nga nna ngai hpe tsun ai. ⁴⁷ Shaloi shi gaw dai wing hpe shadawn nna, galu de dawng latsa, nda de dawng latsa rai nga ai: mali maga maren rai nga nna, tawn hkungri gaw nta ndaw e rai nga ai. ⁴⁸ Bai shi gaw nta npan de ngai hpe woi wa nna, npan jut shadaw lahkawng hpe shadawn yang, dai gaw dawng manga nga gang nga ai: chyinghka yan a nda de dawng masum sum rai nga ai. ⁴⁹ Npan a galu de dawng hkun, nda de dawng shi langai rai nga ai: lung na matu lakang n-gam shi rai nga ai: npan jut makau gade de shadaw langai ngai jung nga ai.

¹ Dai hpang shi gaw nawku Htingnu de ngai hpe woi wa nna, chyinghka jut madin yan hpe shadawn yang, de a htat de gaw, nta a htat ai hte maren, dawng kru kru rai nga ai. ² Nta chyinghka lam gaw dawng shi gang nga ai: chyinghka lam gade de dawng manga nga gang nga ai; nta hpe shadawn yang, de a galu de dawng mali shi, nda de dawng hkun rai nga ai. ³ Dai hpang shi kata de shang nna, shadawn yang, chyinghka shadaw dawng lahkawng hkawng, chyinghka lam dawng kru, chyinghka lam htat ai gaw dawng sanit nit rai nga ai. ⁴ Bai shi gaw nawku Htingnu hte matut ai gawk hpe shadawn nna, de a galu de dawng hkun, nda de dawng hkun rai nga ai: shaloi dai wa gaw, Ndai gaw chyoi pra htum ai shara rai nga ai, nga nna ngai hpe tsun ai. ⁵ Dai hpang shi gaw nta shakum hpe shadawn yang, dai gaw dawng kru htat nga ai: nta a grupyin shakum a gawk ni gaw, nda de dawng mali li rai nga ai. ⁶ Shakum gawk ni gaw lam mi hte lam mi sumshi shi rai nga nna, tsang masum rai nga ai: dai gawk ni gaw shakum kata de n shang timung shakum hte matut nga ai. ⁷ Shakum gawk ni gaw, htap mi hte htap mi grau nna dam wa ai; kaning rai nme law, dai gawk ni gaw, nta grupyin e, htap mi hte htap mi dam lung wa nna, ntsa htap gaw grau dam nga ai: dai hta kaga lawu tsang kaw nna, lapran gawk lam hku e, ntsa de lung wa ma ai. ⁸ Shingrai, nta a grupyin tsaw ai madang hpe ngai mu nngai. Shakum gawk ni a npawt gaw, dawng kru tup galu ai nren mi dam nga ai. ⁹ Shakum gawk shinggan maga kum ai shakum gaw, dawng manga htat nga ai; naw man nga ai shara gaw, shakum gawk ni hte seng nga ai. ¹⁰ Shakum gawk ni kaw nna, nta grupyin e, dawng hkun gang ai wing rai nga ai. ¹¹ Shakum gawk chyinghka yan gaw, man ai shara de hpaw nna, langai mi dingdung maga de, langai mi dingda maga de man yawng nga ai: man ai shara gaw, grupyin nda de, dawng manga rai nga ai. ¹² Bai dai man ai shara, sinna maga de man yawng ai nta nda de gaw, dawng sanit shi gang nga ai; de a shakum a htat de gaw dawng manga, galu de dawng jahku shi, rai nga ai. ¹³ - ¹⁴ Shingrai shi gaw nta hpe shadawn nna, de a galu de dawng latsa, man ai shara hte nta a shakum ni dawng latsa; bai, sinpraw maga ang ai man ai shara hte, nta a nda de gaw, dawng latsa rai nga ai. ¹⁵ - ¹⁶ Shaloi shi gaw, man ai shara de yawng ai nta a nbang hte, de a gawk ni hpe shadawn nna, dai gaw gade de dawng latsa rai nga ai: dai hta kaga, kata na nawku htingnu hte de a wing a jan ni hpe, chyinghka hkinbawng ni hte la da na matu hkuwawt chyinghka ni, chyinghka hkinbawng a tawtap e ang nna, grupyin e nga ai shakum gawk a htap masum hpe shadawn yu ai: dai gaw ga kaw nna hkuwawt chyinghka du hkra hpynpyen hte magap nga ai; hkuwawt chyinghka ni mung magap nga ai; ¹⁷ chyinghka ntsa e, kata nta na nhku de hte shinggan grupyin e nga ai shakum ting, gade de, shadawn ai hte maren magap nga ai. ¹⁸ Dai gaw hkerubim hte namhtan hpun sumla tawk ka nga ai. Hkerub lahkawng a lapran e, namhtan hpun langai ngai tu nga ai; hkerub langai mi gaw myiman lahkawng hkawng tu nga ai; ¹⁹ shingrai, namhtan hpun a maga mi de masha myiman, maga mi de hkanghkyi uram myiman, yawng nga ai: nta grupyin ting dai hku rai nga ai. ²⁰ Ga kaw nna chyinghka ntsa du hkra, hkerubim hte namhtan hpun sumla tawk ka nga ai: nawku Htingnu a shakum ting dai zawn rai nga ai. ²¹ Ya nawku Htingnu a chyinghka shadaw ni gaw, jut mali rai nga ai: chyoi pra ai shara a man gaw, nawku htingnu a man hte bung nga ai. ²² Tawn hkungri gaw hpunpyen rai nga nna, de a tsaw de dawng masum, galu de dawng lahkawng rai nga ai; de a jut ni, madang hte shakum ni hpun rai nga ai: shingrai shi gaw, Da ndai gaw Yehowa man e tawn da ai ku rai nga ai, nga nna ngai hpe tsun ai. ²³ Naw ku ai Htingnu hte chyoi pra ai shara hta, chyinghka lahkawng hkawng rai nga ai. ²⁴ Chyinghka lam langai mi hta, chyinghka lahkawng hkawng noi nga ai. ²⁵ Naw ku htingnu shakum hta, tawk ka ai hte maren, chyinghka ni hta mung, hkerubim hte namhtan hpun sumla tawk ka nga ai: ntawt e rai nga ai nta htinggum gaw, hpun rai nga ai. ²⁶ Jan a shakum ni hta gade de, la da ai hkuwawt chyinghka ni hte, namhtan hpun sumla ni rai nga ai: dai nta a shakum gawk ni hte, chyinghka hkinbawng ni, dai zawn rai nga ai.

¹ Dai hpang shi gaw, dingdung lam hku shinggan wing de ngai hpe woi shashawn nna, nta dingdung maga, man ai shara ndaw e, nga ai gawk nhku de, ngai hpe woi wa nngai. ² Dai kaw nna dingdung chyinghka du hkra, de a wing gaw, galu de dawng latsa, nda de dawng manga shi, rai nga ai. ³ Kata wing hte seng ai dawng hkun, shinggan wing hte seng ai lungnep tawtap e, gade de, shakum gawk htap masum rai nga ai. ⁴ Dai gawk ni a ndaw e dawng mi gang ai lam hte, nda de dawng shi re ai jan rai nga ai: de a chyinghka ni gaw, dingdung maga de man yawng nga ai. ⁵ Ntsa gawk ni gaw gyip nga ma ai; de a htingnep ni gaw, lawu htingnep hte lapran htingnep hta grau chyum mat wa ai. ⁶ Kaning rai nme law, htap masum rai nga timung, dai gawk ni gaw, kaga wing zawn shadaw n nga ai: dai rai nna, ntsa tsang gawk gaw, lawu hte lapran gawk hta, grau gyip nga ai. ⁷ Shinggan wing ang nna, gawk ni a man e kum ai shakum gaw, dawng manga shi galu nga ai. ⁸ Kaning rai nme law, shinggan wing hte seng ai gawk ni gaw dawng manga shi galu nga ai: dai hta kaga nawku Htingnu ndaw gaw, dawng latsa galu nga ai. ⁹ Shinggan wing kaw na sa nna, dai gawk ni hta shang yang, dai gawk ni a npu sinpraw maga e shang ai lam rai nga ai. ¹⁰ Bai, sinpraw maga de ang nna, man ai shara hte sinna nta tawtap e nga ai wing shakum hta mung, gawk ni rai nga ai. ¹¹ De a man e nga ai lam gaw, dingdung maga nga ai gawk ni a lam hte maren rai nga ai: de a galu de, nda de, maren rai nga ai: pru wa shang wa ai chyinghka lam yawng gaw, dingdung gawk ni hte maren rai nga ai. ¹² Bai dingda maga de ang ai, dingda gawk chyinghka ni a lam baw e, chyinghka langai mi nga nna, dai lam gaw sinpraw shakum garet wa ai lam hta byawn, rai nga ai. ¹³ Shaloi shi gaw, Man ai shara de yawng ai, dingdung hte dingda gawk ni gaw, chyoi pra ai gawk rai nga nna, Yehowa man e dawjau ai hkinjawng ni gaw, chyoi pra ai shahpa hpe, dai gawk ni hta sha na mara ai: dai yang e chyoi pra htum ai arai ni hpe mung, shadung hkungga, mara raw hkungga hte htingrai htingrat hkungga hpe mung, shanhte tawn da na mara ai: dai shara gaw chyoi pra ai shara rai nga ai. ¹⁴ Hkinjawng ni gaw shang wa ngut jang, dawjau ai hpun palawng bu hpun let, chyoi pra ai shara kaw na shinggan wing de pru lu na n rai; dai hpun palawng chyoi pra nga ai majaw, kaga hpun palawng galai nhtawm, yu maya ni hte seng ai shara de pru lu na ma ai, nga nna ngai hpe tsun ai. ¹⁵ - ¹⁸ Ya kata nta hpe shadawn ngut jang, sinpraw chyinghka shinggan de shi ngai hpe shapraw nna, grupyin shadawn yu yang, sinpraw de maiaw nren manga tsa, dingdung de nren manga tsa, dingda de nren manga tsa rai nga ai. ¹⁹ Bai, shi kayin nna, sinna maga de shadawn yang, nren manga tsa rai nga ai. ²⁰ Shingrai shi gaw dai man mali hpe shadawn yu ai: chyoi pra ai shara hte n chyoi n pra ai shara na, ginhka na matu, grupyin e bunghku kum nga nna, de a galu de manga tsa, nda de manga tsa rai nga ai.

¹ - ² Dai hpang shi gaw, sinpraw maga de yawng ai chyinghka lam de, ngai hpe woi wa nna, yu u, Israela Karai Kasang a hpung shingkang gaw, sinpraw maga de na pru wa ai: shi a nsen gaw, hka law law wu kadu ai nsen hte bung nna, lamu ga gaw, shi a hpung shingkang hte htoi tu nga ai. ³ Ngai mu ai shingran gaw, mare hpe jahten na matu danpru ai shingran hte, Hkebara hka kau e ngai mu yu ai shingran zawn, rai nga nna, ngai myiman gum dagup nngai. ⁴ Yehowa hpung shingkang gaw, sinpraw chyinghka hku e, nta kata de shang wa ai. ⁵ Shaloi Wenyi gaw ngai hpe pawn let, kata wing de woi wa nna, yu u, Yehowa a hpung shingkang gaw, nta ting hpring nga ai. ⁶ Marai langai mi, nta kata de na ngai hpe ga tsun ai, ngai na nngai; masha langai mi mung nye a makau e tsap nga ai. ⁷ Dai wa gaw, Masha kasha e, ndai shara gaw, nye a tingnyang dung ai shara, nye a lagaw lahpan kabye shara rai nga ai; ndai yang e Israela kashu kasha ni a ka-ang e, htani htana ngai nga nga na nngai: Israela amyu masha ni hte, shanhte a hkawhkam ni gaw, tinang a shut hpyit ai hte mung, hkawhkam ni a si mang ni hte mung, tsaw ai kawng ni a ntsa e, nye a chyoi pra ai mying ningsang hpe htawmhpang de awu asin di kau lu na n rai: ⁸ shanhte gaw tinang a chyinghka hkinbawng, nye a chyinghka hkinbawng makau e, tinang a hkadun daw, nye hkadun daw makau e jung da nna, ngai hte shanhte a lapran e shakum sha din nga ai; shingrai, shanhte galaw ai matsat shabat amu hte, nye a chyoi pra ai amying ningsang hpe awu asin di kau ma ai: dai re ai majaw, ngai pawt bu nna, shanhte hpe shamyit kau ni ai. ⁹ Ya chyawm gaw, tinang a shut hpyit ai amu hte, tinang a hkawhkam ni a si mang hpe, ngai kaw na shatsan kau mu ga: ngai mung shanhte a ka-ang e htani htana anga nga na nngai. ¹⁰ Nang gaw, masha kasha e, Israela amyu masha ni gaw tinang shut hpyit ai yubak majaw kaya dum hkra, dai nawku Nta hpe madun u; shanhte gaw nta hkrang hpe shadawn yu mu ga. ¹¹ Shanhte gaw tinang galaw ai yubak majaw teng teng kaya dum yang, dai nta hkrang hte de a kasi kamang, pru wa ai shang wa ai chyinghka lam, dai hte seng ai htunghking, hkangda ai ga, matsun maroi ga hte tara langai hte langai hpe madun dan u: shanhte gaw dai htunghking mahkra hte matsun maroi ga yawng mayawng hpe hkan galaw lu hkra, shanhte a man e dai lam ka da u. ¹² Naw ku Nta a tara gaw da ndai rai nga ai: bum pungding htingra hte de a grupyin e yawng, chyoi pra htum ai shara tai na ra ai. Yu u, dai gaw dai Nta a tara rai nga ai. ¹³ Da ndai gaw tawn hkungri a shadawn ai lam rai nga ai: lahkam masum hpe dawng ngu ai rai nga ai: tawn hkungri a npawt dawng mi tsaw nna, dawng mi gang nga ai; grupyin makau e lahkam mi gang na rai nga ai; dai gaw tawn hkungri a npawt rai na ra ai. ¹⁴ Npawt kaw nna, tsang langai du hkra dawng lahkawng tsaw nna dawng mi gyip nga ai; bai lapran tsang du hkra, dawng mali tsaw nna dawng mi gyip nga ai; ¹⁵ tawn hkungri majing ngu na gaw, dawng mali tsaw nga ai; de a htingnep kaw nna, nrung mali pru na ra ai. ¹⁶ Tawn hkungri gaw jut mali maren rai nga nna, galu de dawng shi lahkawng, nda de dawng shi lahkawng rai nga ai. ¹⁷ Npawt mung jut mali maren rai nga nna, galu de dawng shi mali, nda de dawng shi mali rai nga ai; makau grupyin mung lahkam mi tsaw nga ai; madang gaw tawn hkungri grupyin e dawng mi kra nna, de a lakang gaw sinpraw maga de yawng nga ai, nga ai. ¹⁸ Bai shi gaw, masha kasha e, Madu Yehowa ning nga ai: Wan nat hkungga nawng na hte sai lapri na matu, tawn hkungri gaw da ai shani e, hkan nang na tara gaw da ndai rai nga ai. ¹⁹ Ngai hpe dawjau na matu, ngai hte htep rai nga ai Lewi amyu, Zadok kashu kasha hkinjawng ni hpe, mara raw hkungga matu usu uram langai mi ap ya u: ²⁰ de a sai nkau mi nang la nna, tawn hkungri a nrung mali, jut mali hte makau grupyin hpe chya u: shingrai dai tawn hkungri hpe nang jasan jaseng nna, de a matu gawng malai hkungga nawng ya na ndai. ²¹ Mara raw hkungga matu usu hpe nang la nna, chyoi pra ai shara shinggan, nta kata san da ai shara hta, nat na ndai. ²² Hpang shani e, mara raw hkungga matu ra n rawng ai bai nam la nang nawng ya nna, tawn hkungri hpe usu hte jasan jaseng ai zawn, dai hte jasan jaseng na ndai: ²³ shingrai tawn hkungri hpe jasan jaseng ngut jang, ra n rawng ai usu hte, ra n rawng ai sagu la hpe, nawng ya u. ²⁴ Dai lahkawng hpe Yehowa man e nang dun la nna, hkinjawng ni gaw jum mun ai hte, Yehowa matu wan nat hkungga nawngh ya mu. ²⁵ Sanit ya tup lani hte lani, mara raw hkungga matu, bainam la langai ngai nawng ya u: shanhte mung usu uram hte, ra n rawng ai sagu la hpe, nawng ya na mara ai. ²⁶ Shanhte gaw sanit ya tup dai tawn hkungri hpe jasan jaseng nna, gawng malai hkungga nawng ya let, de a amu matu san da na mara ai. ²⁷ Shingrai sanit ya hpang, matsat ya ngu ai shani e, hkinjawng ni gaw nanhte a wan nat hkungga hte mahku hkungga hpe dai tawn hkungri ntsa e nawng ya nna, ngai nanhte hpe hkap la na nngai, nga nna Madu Yehowa tsun ai.

¹ Dai hpang shi gaw, chyoi pra ai shara a, sinpraw de yawng ai, shinggan chyinghka lam de, ngai hpe nhtang wa shangun nna, dai chyinghka gaw la da nga ai. ² Shaloi Yehowa gaw, Ndai chyinghka hpe a la da nga na ra ai; dai hpe hpaw lu na n rai, masha mung dai hku shang lu na n rai; Israela Karai Kasang Yehowa dai hku shang ai majaw, la da nga na ra ai. ³ Du wa chyawm gaw, du rai nga ai majaw, Yehowa man e lusha na matu dai chyinghka lam e dung lu na ra ai: raitimung shi gaw, chyinghka jan hku shang nna, dai hku bai pru na ra ai, nga nna ngai hpe tsun ai. ⁴ shaloi shi gaw, nta ndaw, dingdung chyinghka hku, ngai hpe woi shashawn nna, ngai mada yu yang, yu u, Yehowa a hpung shingkang gaw, Yehowa nta hta hpring nga nna, ngai gum dagup nga nngai. ⁵ Shaloi Yehowa gaw, Masha kasha e, azi yu nna matsing u; Yehowa a nta matu ngai nang hpe hkangda ai matsun maroi ga nlang hte hte, tara lam mahkra hpe na la u: nta de shang ai chyinghka lam hte, chyoi pra ai shara na pru wa ai lam yawng hpe, atsawm sha matsing u. ⁶ Gumlau chye ai Israela dap hpe htawn tsun u, Madu Yehowa ning nga ai: Israela dap e, nanhte a matsat shabat lam ram nu ga: ⁷ nanhte gaw nye a shahpa ngu ai sau man hte asai hpe nawng ya yang, nye a nta hpe awu asin di kau na matu, myit masin mung, ashan mung, matu gadoi n hkam ai tsasam masha ni hpe, nye a chyoi pra ai shara de nanhte shashawn nna, nanhte a matsat shabat lam mahkra hta naw kahtap jat hkra, shanhte gaw nye ga shaka hpe run kau manu ai. ⁸ Nanhte gaw nye a chyoi pra ai arai ni hpe n sin ai hte, nanhte a malai, dai tsasam ni hpe, nye a chyoi pra ai shara hta sin shangun myit dai. ⁹ Madu Yehowa ning nga ai: Israela kashu kasha ni hta hkran ai, myit masin mung, ashan mung, matu gadoi n hkam ai tsasam masha kadai mung, nye a chyoi pra ai shara hta shang lu na n rai. ¹⁰ Israela amyu gaw lam yit wa jang, tinang a hpara sumla ni hpe hkan nang ai majaw, ngai kaw na tsan mat wa ai Lewi masha ni gaw, tinang a yubak hkam sha na mara ai. ¹¹ Raitimung shanhte gaw nye a chyoi pra ai shara hta dawjau lu na mara ai; shanhte gaw nta chyinghka ni hpe sin nna, nta nhku e amu galaw lu na mara ai; wan nat hkungga hte shawa hkungga hpe shanhte sat nna, mung masha ni a malai dawjau na mara ai. ¹² Shanhte gaw tinang a hpara ni a man e, mung masha ni a amu galaw nna, shut hpyit ai lam hkan galaw hkra, Israela masha ni a matu ahtu kataw shara tai yu ai majaw, ngai Madu Yehowa gaw nye a lata shanhte hpang de sharawt nna, shanhte gaw tinang a yubak hpe hkam sha na mara ai. ¹³ Shanhte gaw nye a man e hkinjawng amu galaw na matu, chyoi pra htum ai shara na chyoi pra ai arai ni hpang de ni wa lu na n rai; shanhte gaw tinang a kaya kahpa hte, tinang galaw ai matsat shabat amu mahkra hpe, hkam sha na mara ai. ¹⁴ Raitimung, nye a nta hpe sin nna, dawjau ai amu yawng mayawng hpe hkan galaw na matu, ngai shanhte hpe ahkang aya jaw na nngai. ¹⁵ Lewi amyu na, Zadok a kashu kasha ni chyawm gaw, nye a man e dawjau na matu, sit sa na ahkang lu na mara ai: Israwla kashu kasha ni gaw, ngai kaw na lam yit mat wa yang, shanhte gaw nye a chyoi pra ai shara hpe sin nga ma ai: dai rai nna, sau man hte asai ngai hpe nawng ya na matu, nye a man e tsap nga na ahkang, shanhte lu na mara ai, nga nna Madu Yehowa tsun ai: ¹⁶ shanhte gaw nye a chyoi pra ai shara de shang lu nna, nye a amu gunhpai na matu, nye ku makau de sit sa nna, dawjau na mara ai. ¹⁷ Shanhte gaw kata wing chyinghka de shang yang, lachyit nba hkrai bu hpun na mara ai: dai yang e amu galaw nga yang, sagu mun bu hpun lu na n rai. ¹⁸ Lachyit bunghkaw hkaw nna, lachyit labu bu hpun na mara ai; salat pru ai hpun palawng lawai lu na n rai. ¹⁹ Shawa masha ni nga ai shinggan wing de pru wa yang, dawjau nga jang bu hpun ai hpun palawng hpe shanhte rau kau nna, chyoi pra ai gawk hta tawn da nhtawm, kaga hpun palawng galai na mara ai: shanhte gaw tinang a hkinjawng hpun palawng hte shawa masha ni hpe shachyoi shapra lu na n rai. ²⁰ Shanhte gaw kara shangun mai ai n rai; galu shangun lu na, n rai: kara daw mai nga ai. ²¹ Hkinjawng ni gaw kata wing de shang yang, tsabyi jahku lu lu na n rai. ²² Gaida jan hte madu wa jahka kau ai num hpe la lu na n rai: Israela amyu hkawnsek, shing n rai hkinjawng gaida hpe, la mai nga ai. ²³ Chyoi pra ai hte n chyoi n pra ai hpe chye ginhka lu nna, n san n seng ai hte sanseng ai hpe lata la lu hkra, shanhte gaw nye a amyu masha ni hpe sharin achyin ya na mara ai. ²⁴ Amu pru yang, shanhte tara dara na mara ai; nye hkangda ai ga hte maren shanhte jeyang na mara ai: ngai madat da ai poi ni hpe galaw yang, nye a tara hte matsun maroi ga ni hpe shanhte shatup nna, nye a laban nhtoi ni hpe chyoi pra shangun na mara ai. ²⁵ Si mang nga ai de shang nna, tinang hkum hpe awu asin di kau lu na n rai; raitimung kanu kawa, shayi shadang sha, kahpu kanau hte madu wa n lu ai kajan matu, awu asin di kau na ahkang nga ai. ²⁶ Jasan jaseng ngut ai hpang, nhtoi sanit ya tup naw ban nga ra ai. ²⁷ Chyoi pra ai shara hta dawjau na matu, kata wing de bai shang wa ai shani e, mara raw hkungga nawng ya ra ai, nga nna Madu Yehowa tsun ai. ²⁸ Shanhte gaw sali wunli lu na mara ai; ngai gaw shanhte a sali wunli rai nga nngai: Israela mung hta shanhte hpe sali ga jaw na n rai; ngai shanhte a sali ga rai nga nngai. ²⁹ Shanhte gaw shadung hkungga, mara raw hkungga hte htingrai htingrat hkungga a ashan hpe sha lu na mara ai: Israela amyu hta majai san da ai yawng mayawng hpe, shanhte lu la na mara ai. ³⁰ Shawng ngai ai nsi nai si amyu myu hte, shawng nawng ya ai nwat hkungga amyu myu hpe, hkinjawng wa lu la na ra ai; na nta ntsa e shaman ai nga nga u ga, shawng gumrin ai shadung hkinjawng wa hpe jaw u. ³¹ Hkinjawng wa gaw shi hkrai si ai hte, matse labye kawa sat ai shan, sha lu na n rai.

¹ Dai hta n-ga, nanhte gaw dai lamu ga hpe, sali hkam la na matu hpaida da nna karan yang, chyoi pra ai ga dachyawk Yehowa hpe nawng ya lu na myit dai: de a galu de nren mun lahkawng hkying manga, nda de nren mun mi rai na ra ai: dai gaw jarit grupyin e chyoi pra nga na ra ai. ² Dai ga dachyawk ka-ang e, galu de dawng manga tsa, nda de dawng manga tsa, jut mali maren rai nga ai ga dachyawk gaw, chyoi pra ai shara matu rai na ra ai: de a grupyin e dawng manga shi dam ai htingwan rai na ra ai. ³ Shingrai nang gaw, galu de mun lahkawng hkying manga, nda de mun mi rawng ai ga dachyawk hpe shadawn nhtawm, de a ka-ang e chyoi pra htum ai shara hte chyoi pra ai shara, tai na ra ai. ⁴ Dai gaw mungdan a chyoi pra ai shara rai nga nna, Yehowa hpe dawjau na matu sit sa ai hte, chyoi pra ai shara hta amu galaw ai hkinjawng ni a matu, tai na ra ai; dai shara gaw shanhte a nta htingra hte, chyoi pra ai nta matu chyoi pra ai wing, tai na ra ai. ⁵ galu de mun lahkawng hkying manga, nda de mun mi dam ai ga dachyawk gaw, nta kata e amu galaw ai Lewi masha ni rawng na matu, gawk hkun galaw na shara, rai na ra ai. ⁶ Mare daju hte seng ai lamu ga gaw, chyoi pra ai shara a masawn e, galu de mun lahkawng hkying manga, nda de hkying manga dam nna, Israela mung ting a matu rai na ra ai. ⁷ Dai hta kaga, chyoi pra ai ga dachyawk hte, mare matu san da ai ga dachyawk masawn e, sinna maga daw mi, sinpraw maga daw mi, du wa matu rai nga nna, de a dingdung dingda gaw, amyu langai hte langai lu la ai hte maren, rai na ra ai. ⁸ Dai lamu ga hpe, nye a du ni, Israela mungdan hta madu sha lu na mara ai; htawmhpang de shanhte gaw nye a amyu masha ni hpe zingri zingrat lu na n rai: shanhte gaw naw ngam nga ai lamu ga hpe, Israela amyu ni, langai hte langai hte hpe karan jaw na mara ai. ⁹ Madu Yehowa ning nga ai: Israela du ni e, ram manu ga; adip arip hte kashun kashe amu kau da nna, tara hte dinghpring ai lam hkan galaw mu: nye a amyu masha ni hpe zingri zingrat hkum rai myit, nga nna Madu Yehowa tsun ai. ¹⁰ Man ai joi, man ai ehpa hte bat lang mu. ¹¹ Ehpa hte bat maren rai na ra ai; lahkawng gaw home hpe hkan nna, ehpa gaw home hta htamshi hta htammi, bat gaw, home hta htamshi hta htammi, rai na ra ai. ¹² Shekela langai mi gaw gera hkun rai nga ai: bai manah ngu ai gaw, shekela hkun, hkun manga, shing n rai shi manga, rawng nga ai. ¹³ Nanhte jaw na ra ai lahkawn gaw da ndai rai nga ai; hkaulan mam raitimung, muk-yaw mam raitimung, home hte seng ai ehpa a htam kru hta htammi jaw na myit dai; ¹⁴ sau hte seng ai lahkawn gaw, hkora langai mi hta na bat shi hta htammi jaw na ra ai; bat shi chyawm gaw home langai mi rai nga ai; ¹⁵ shanhte a gawng malai hkungga matu, Israela a tsit lali ai udat shara e nga ai sagu kasha ni tsa hta na langai mi hpe, lusha kumhpa hte hpawn, wan nat hkungga hte mahku hkungga hpe shapraw ya na mara ai, nga nna Madu Yehowa tsun ai. ¹⁶ Mung masha ni yawng, Israela du hpe ndai lahkawn sakjaw na mara ai. ¹⁷ Du wa mahtang, poi shani e, shata praw shani e, laban nhtoi hte, Israela amyu masha ni madat da ai poi shagu hta, wan nat hkungga, shadung kumhpa hte dumhpung kumhpa hpe jaw na ra ai: Israela amyu matu htingrai htingrat na nga, shi gaw, mara raw hkungga, shadung kumhpa, wan nat hkungga hte mahku hkungga hpe shapraw ya na ra ai. ¹⁸ Madu Yehowa ning nga ai: Shawng shata a langai ya shani e, ra n rawng ai usu uram hpe nang la nna, dai chyoi pra ai shara hpe jasan jaseng u. ¹⁹ Hkinjawng wa gaw mara raw hkungga asai nkau mi hpe la nna, nta a chyinghka shadaw hta mung, tawn hkungri a lawu tsang jut mali hta mung, kata wing chyinghka shadaw hta mung, chya na ra ai. ²⁰ Dai hte maren lam dam ai wa hte myit n rawng ai wa a matu, sanit ya nhtoi hta nang galaw nna, nta a lam htingrai htingrat na ndai. ²¹ Shawng shata a shi mali ya shani e, nanhte gaw, sanit ya tup, Shalai wa ai poi galaw nna, dai laman e matsi n rawng ai muk sha na myit dai. ²² Dai shani e du wa gaw, shi hkum hte mung masha ni mahkra a matu, mara raw hkungga usu langai mi shapraw na ra ai. ²³ Poi shani sanit ya tup, shi gaw, Yehowa a matu, wan nat hkungga, ra n rawng ai usu sanit hte sagu la sanit hpe mung, mara raw hkungga matu, shani shagu nam la langai mi hpe mung, shapraw na ra ai. ²⁴ Bai shi gaw shadung kumhpa shapraw na ra ai: usu langai mi a matu ehpa langai mi, sagu la langai mi a matu ehpa langai mi, ehpa langai mi a matu, namman hin langai mi, shapraw na ra ai. ²⁵ Bai shata sanit a shi manga ya shani e galaw ai sum poi hta, shalai wa poi a sanit ya tup hkan ai htung hte maren, shi gaw, mara raw hkungga, wan nat hkungga, shadung kumhpa hte namman hkungga hpe shapraw na ra ai.

¹ Madu Yehowa ning nga ai: Sinpraw maga de yawng ai, kata wing chyinghka hpe, amu galaw ai kru ya tup, la da na ra ai; laban nhtoi hte shata praw shani e, hpaw da na ra ai. ² Du wa gaw, dai chyinghka jan shinggan hku shang nna, chyinghka shadaw makau e tsap nga na ra ai: hkinjawng ni gaw, shi a wan nat hkungga hte mahku hkungga hpe nawng ya nna, shi gaw chyinghka hkinbawng e nawku nhtawm, shinggan de pru wa na ra ai: raitimung, shana garai n du yang, chyinghka hpe la da lu na n rai. ³ Dai hte maren mung masha ni gaw, laban nhtoi hte shata praw shani e, ndai chyinghka lam e, Yehowa hpe nawku na mara ai. ⁴ Du wa gaw, laban nhtoi hta e Yehowa hpe nawng ya na wan nat hkungga matu, ra n rawng ai sagu kasha kru, sagu la langai mi, la sa na ra ai: ⁵ shadung kumhpa mung, sagu la langai mi a matu ehpa langai mi, sagu kasha matu jaw lu ai made jaw na ra ai: shadung ehpa langai mi matu, namman hin mi lawm na ra ai. ⁶ Shata praw shani e ra n rawng ai usu uram langai mi, sagu kasha kru, sagu la langai mi, shapraw ya na ra ai; ⁷ shadung kumhpa mung shapraw na ra ai: dai usu langai mi hte ehpa langai mi, dai sagu la hte ehpa langai mi, sagu kasha ni a matu jaw lu ai made, jaw na ra ai: shadung ehpa langai mi matu, namman hin mi lawm na ra ai: ⁸ Du wa shang yang, sinpraw chyinghka jan hku shang nna, dai hku bai pru wa na ra ai. ⁹ Mung masha ni chyawm gaw, madat da ai poi aten e, Yehowa man de shang yang, nawku na matu, dingdung chying hka hku shang ai wa gaw, dingda chyinghka hku pru wa na ra ai: dingda hku shang ai wa gaw, dingdung hku pru wa na ra ai; shang ai hku bai pru wa lu na n rai: shang ai ang ang hku bai pru wa na ra ai. ¹⁰ Mung masha ni shang yang, du wa mung shang na ra ai; shanhte pru wa yang, rau pru wa na ra ai. ¹¹ Shawa hpawng hte madat da ai poi galaw yang, shadung kumhpa gaw, usu langai mi a matu ehpa langai mi, sagu la langai mi a matu ehpa langai mi, sagu kasha ni a matu, jaw lu ai made, jaw na ra ai: shadung ehpa langai mi a matu, namman hin mi lawm na ra ai. ¹² Du wa gaw, mayu kumhpa, wan nat hkungga hte mahku hkungga hpe dingsa myit hte Yehowa matu shapraw ya yang, sinpraw de yawng ai chyinghka shi a matu hpaw na ra ai; shi gaw laban nhtoi e shapraw ai zawn, wan nat hkungga hte mahku hkungga hpe shapraw ya nhtawm, pru wa na ra ai: shi pru ai hpang chyinghka hpe la kau na ra ai. ¹³ Bai, shani shagu Yehowa hpe nawng ya na wan nat hkungga matu, ra n rawng ai hte ladu hkrum ai sagu kasha langai mi nang shapraw ya na ndai; jahpawt shagu dai hpe shapraw ya na ndai. ¹⁴ Dai hte hpawn, jahpawt shagu shadung kumhpa, ehpa htam kru hta htammi, shadung hte kayau ai, namman hin htam masum hta htammi shapraw ya na ndai: da ndai gaw, htani htana hkangda ai ga hkan nna, Yehowa matu tutnawng na shadung kumhpa rai nga ai. ¹⁵ Shingrai shanhte gaw, tutnawng na wan nat hkungga matu, sagu kasha hpe mung, shadung kumhpa hte namman hpe mung, jahpawt shagu lajang na mara ai. ¹⁶ Madu Yehowa ning nga ai: Du wa gaw shi a kasha hpe kumhpa jaw yang, dai kumhpa gaw shi a kasha ni madu mai ai sali wunli rai nga ai. ¹⁷ Mayam wa hpe jaw ai sali wunli kumhpa chyawm gaw, lawt lu ai shaning du hkra sha madu lu na ra ai: du wa gaw dai shaning hta dai hpe bai madu la na ra ai; kasha chyawm gaw tutnawng sali wunli hkam la na ra ai. ¹⁸ Dai hta n-ga du wa gaw, mung masha ni a sali ga hpe, adip arip kashun la nna, ga madu hpe shaden kau lu na n rai; nye a amyu masha ni gaw tinang a sali ga hta na ayai kau ai n hkrum hkra, du wa gaw tinang a kasha ni hpe tinang a sali ga hta na sali wunli karan jaw u ga. ¹⁹ Dai hpang shi gaw, chyinghka makau e nga ai, dingdung maga de yawng ai, hkinjawng ni a chyoi pra ai gawk de ngai hpe woi wa nngai: shaloi yu u, sinna maga jut e nga ai shara langai mi hpe ngai mu nngai. ²⁰ Shaloi shi gaw, Ndai shara gaw hkinjawng ni htingrai htingrat hkungga hte mara raw hkungga hpe shadu nna, shadung kumhpa hpe kabaw ai shara rai nga ai: mung masha ni hpe shachyoi shapra na matu, dai arai ni hpe shinggan wing de shapraw na n rai, nga nna ngai hpe tsun ai. ²¹ Dai hpang shi gaw, shinggan wing de ngai hpe woi shashawn nna, dai wing a jut mali hpe hkawm lai shangun nngai: dai wing a jut shagu hta wing kaji langai ngai rai nga ai hpe, ngai mu nngai. ²² Dai wing kaji ni gaw galu de dawng mali shi, nda de dawng sumshi rai nga nna, dai jut wing mali gaw maren rai nga ai. ²³ Dai jut wing mali a kata maga grupyin e lung yan gaw nna, dai lung yan npu e hkungga hpe shadu shara rai nga ai. ²⁴ Shaloi shi gaw, Naw ku nta hte seng ai hkinjawng ni gaw, mung masha ni a shagu hkungga ni hpe shadu ai shara ni da ndai rai nga ai, nga nna ngai hpe tsun ai.

¹ Dai hpang shi gaw nta chyinghka de ngai hpe bai woi wa nna, chyinghka hkinbawng npu e, sinpraw maga de lwi ai hka hpe, ngai mu nngai: nta npan gaw sinpraw maga de yawng nna, hka gaw nta a hkra maga npu na hpaw pru nna, tawn hkungri dingda maga de lwi wa ai. ² Bai shi gaw, dingdung chyinghka lam hku ngai hpe shapraw nna, shinggan hku kayin woi hkawm wa let, sinpraw maga de yawng ai shinggan chyinghka lam de du yang, hkra maga e hka lwi nga ai hpe, ngai mu nngai. ³ Shaloi sumri lang ai wa gaw, sinpraw maga de sa nhtawm, dawng hkying mi du hkra shadawn nna, ngai hpe rap shangun ai: hka gaw hkarutum du nga ai. ⁴ Bai shi gaw dawng hkying mi shadawn nna, ngai hpe rap shangun yang, hka gaw lahput du nga ai; bai dawng hkying mi shadawn nna, ngai hpe rap shangun yang, hka gaw nshang du nga ai. ⁵ Bai dawng hkying mi shadawn yang, ngai n rap lu ai hka nu tai wa sai: hka gaw tung wa nna, lagaw hte n rap lu ai majaw, hpungyawt rap ai hka nu tai nga ai. ⁶ Shaloi dai wa gaw, Masha kasha e, dai hpe mu nu ni? nga nna tsun nhtawm ngai hpe woi wa nna, hka kau de nhtang wa shangun ai. ⁷ Ya ngai nhtang wa nga yang, yu u, hka ndai hkran, wora hkran, hpun law law tu nga ai. ⁸ Shaloi dai wa gaw, Ndai hka gaw sinpraw maga de lwi wa nna, zaibru jang hku lai wa nhtawm, nawng de ang wa na ra ai: dai lwi ai hka gaw nawng hta shang nna, nawng hka gaw mu na ra ai. ⁹ Shingrai, dai hka lwi ai shara shagu hta, tsa nawn nga ai yawng mayawng, asak hkrung nga lu nna, grai law ai nga ni mung rawng na mara ai: dai hka gaw nawng du hkra lwi wa nna, nawng hka gaw mu na ra ai majaw, hka-lawi wa ai shara shagu hta, yawng mayawng hkrung nga na mara ai. ¹⁰ Nga hkan ai ni gaw, dai nawng makau e tsap nga nna, Engedi shara kaw nna, Engalim du hkra, sumgawn lam ai shara tai na ra ai: nga amyu myu mung, nammukdara nga zawn, grai law na mara ai. ¹¹ Shait hka hte, hkumpup nawng hta chyawm gaw, mu na n rai: dai gaw shum nna jum lu la na shara tai na ra ai. ¹² Dai hka nu hkin-gau maga mi hte maga mi de, sha mai ai hpun amyu myu tu na ra ai; de a lap mung n nyip, asi mung n wai na ra ai: dai hka nu gaw chyoi pra ai shara na lwi pru ai majaw, dai hpun ni gaw shata shagu asi ningnan si na mara ai: asi gaw sha na matu, alap gaw ana ahkya shamai shatsai na matu, tai na ra ai, nga nna ngai hpe tsun ai. ¹³ Madu Yehowa ning nga ai: Israela amyu shi lahkawng hkan nna, sali wunli karan la na matu, mungdan a lamu ga jarit, da ndai rai nga ai: Yosep gaw mungdaw lahkawng lu la na ra ai. ¹⁴ Nanhte a nji nwa ni hpe ngai dagam da ai hte maren, ndai mungdan gaw nanhte a sali ga tai wa nna, nanhte langai hte langai tinang hte seng ai sali wunli, maren hkam la na myit dai. ¹⁵ - ¹⁶ Ndai mungdan a lamu ga jarit da ndai rai nga ai: Dingdung maga jarit gaw, nammukdara kaw nna, Hetlon lam hku, Zedad byawn; Damasku hte Hamat lamu ga jarit lapran e nga ai Hamat, Berohta, Sibraim hte, Hauran lamu ga jarit makau e nga ai Hazera-hatihkun du hkra, rai na ra ai. ¹⁷ Shingrai dai lamu ga jarit gaw, nammukdara kaw nna, Damasku lamu ga jarit makau e nga ai, Hazaraenon du hkra dam nga ai: Hamat a lamu ga jarit gaw de a dingdung maga de rai nga ai. Dai gaw dingdung de na lamu ga jarit rai nga ai. ¹⁸ Sinpraw maga jarit gaw, Hauran, Damasku, Geliad mung hte Israela mungdan lapran e Yawdan hka din nga ai: dingdung jut kaw nna, sinpraw nawng du hkra shadawn yu mu. Dai gaw sinpraw de na lamu ga jarit rai nga ai. ¹⁹ Dingda maga jarit gaw, Tamara kaw nna, Meribot-kadesha hka htung ni hte Egutu hka shi lai, nammukdara kaba du hkra, rai na ra ai. Dai gaw dingda de na lamu ga jarit rai nga ai. ²⁰ Sinna maga jarit gaw, dingdung jut kaw nna, Hamat de shang ai lam tawtap du hkra, nammukdara kaba, rai na ra ai. Dai gaw sinna de na lamu ga jarit rai nga ai. ²¹ Shingrai nanhte gaw, ndai mungdan hpe, Israela amyu hpra hpra, karan la na myit dai. ²² Nanhte mung, nanhte hta shingbyi nga nna, nanhte hte rau htinggaw rawn ai tsasam masha ni mung, dai mungdan hta sali wunli lu la hkra, nanhte gaw hpaida da ai hte, dai hpe karan la na myit dai; tsasam masha ni gaw, dai mungdan hta shangai wa ai Israela kashu kasha majing zawn, rai na mara ai: shanhte gaw Israela amyu masha ni hte rau, sali wunli hkam la na mara ai. ²³ gara amyu hta raitimung, tsasam masha shingbyi nga yang, dai yang e shi hpe sali wunli jaw na ra ai, nga nna Madu Yehowa tsun ai.

¹ Ya Israela ginwang amying ni da ndai rai nga ai: dingdung maga de Hetlon lai, Hamat de shang ai lam du hkra, Damasku lamu ga jarit makau e nga ai Hamat hte Hazaraenon garet nna, sinpraw maga kaw nna sinna maga du hkra, Dan mungdaw rai nga ai. ² Dan mungdaw makau, sinpraw maga kaw nna sinna maga du hkra, Ashe mungdaw rai nga ai. ³ Ashe mungdaw makau sinpraw maga kaw nna sinna maga du hkra, Naphtali mungdaw rai nga ai. ⁴ Naphtali mungdaw makau, sinpraw kaw nna sinna du hkra, Manashe mungdaw rai nga ai. ⁵ Manashe mungdaw makau, sinpraw kaw nna sinna du hkra, Ehprim mungdaw rai nga ai. ⁶ Ehprim mungdaw makau, sinpraw kaw nna sinna du hkra, Rubin mungdaw rai nga ai. ⁷ Rubin mungdaw makau, sinpraw kaw nna sinna du hkra, Yuda mungdaw rai nga ai. ⁸ Yuda mungdaw makau, sinpraw kaw nna sinna du hkra, nanhte nawng ya na ga dachyawk rai nga ai: de a nda de nren mun lahkawng hkying manga, galu de gaw, sinpraw kaw nna sinna du hkra mungdaw hte maren rai nga ai: dai chyoi pra ai nta gaw, de a ka-ang e rai na ra ai. ⁹ Yehowa hpe nawng ya ai ga dachyawk chyawm gaw, galu de mun lahkawng hkying manga, nda de mun mi rai nga ai. ¹⁰ Dai chyoi pra ai ga dachyawk gaw, hkinjawng ni a matu rai nga nna, dingdung maga galu de mun lahkawng hkying manga; sinna maga nda de mun mi, sinpraw maga nda de mun mi, dingda maga galu de mun lahkawng hkying manga dam nna, Yehowa a chyoi pra ai nta gaw de a ka-ang e rai na ra ai. ¹¹ Dai nawng ya ai ga dachyawk gaw, nye a amu tut gunhpai ai, Zadok a chyoi pra ai kashu kasha hkinjawng ni matu, rai na ra ai: Israela masha ni lam dam wa yang, shanhte gaw Lewi masha ni zawn, lam dam mat wa ma ai n rai. ¹² Dai gaw nawng ya ai ga dachyawk hta, Lewi masha ni a lamu ga jarit makau e, hkinjawng ni a matu chyoi pra htum ai shara rai na ra ai. ¹³ Bai, hkinjawng ni a lamu ga jarit makau e, Lewi masha ni gaw, mun lahkawng hkying manga galu ai, mun mi kaba ai ga dachyawk lu la na mara ai: de a galu de mun lahkawng hkying manga, nda de mun mi tup rai nga ai. ¹⁴ Shanhte gaw dai ga hpe dut kau lu na n rai, galai kau lu na mung, n rai: mungdan hta shawng ngai ai nsi naisi hpe dawm la lu na, n rai: dai gaw Yehowa a matu chyoi pra nga ai. ¹⁵ Ya dai mun lahkawng hkying manga makau e naw ngam nga ai hkying manga dam ai ga dachyawk gaw, yu maya masha ni nga nna, mare dè na htingra hte mare ginwang tai na ra ai: mare gaw de a ka-ang e dè na ra ai. ¹⁶ Mare a dingdung dingda, dingdung de hkying mali manga tsa, dingda de hkying mali manga tsa, sinpraw de hkying mali manga tsa, sinna de hkying mali manga tsa, rai na ra ai. ¹⁷ Mare ginwang mung nga na ra ai: de a dingdung de ni tsa manga shi, dingda de ni tsa manga shi, sinpraw de ni tsa manga shi, sinna de ni tsa manga shi, rai na ra ai. ¹⁸ Chyoi pra ai ga dachyawk makau e, sinpraw de mun mi, sinna de mun mi galu nna, naw ngam nga ai ga gaw, mare hte seng nna, dai hta tu ai nsi naisi gaw, mare hta amu galaw ai ni a shahpa, tai na ra ai. ¹⁹ Mare hta amu galaw nga ai, Israela amyu masha ni yawng, dai hta galaw sha na mara ai. ²⁰ Shingrai dai ga dachyawk mahkra, mali maga maren rai nna, galu de mun lahkawng hkying manga, nda de mun lahkawng hkying manga rai na ra ai: mare hte seng ai lamu ga hte hpawn, dai chyoi pra ai ga dachyawk hpe, nanhte nawng ya na myit dai. ²¹ Bai, chyoi pra ai ga dachyawk hte, mare hte seng ai lamu ga a maga mi hte maga mi de naw ngam nga ai lamu ga gaw, du wa matu rai na ra ai; dai gaw, chyoi pra ai ga dachyawk a sinpraw maga de na mun lahkawng hkying manga, sinna maga de na mun lahkawng hkying manga dam nna, amyu langai hte langai lu la ai hte maren, du wa lu la na ra ai: chyoi pra ai ga dachyawk hte, chyoi pra ai nta gaw, dai lahkawng a lapran e rai na ra ai. ²² Shingrai lapran e rai nga ai, Lewi masha ni a lamu ga jarit hte, mare hte seng ai lamu ga jarit shinggan lahkawng maga, Yuda hte Ben-yamin lapran e ang ai ga yawng gaw, du wa matu rai nga ai. ²³ Naw ngam nga ai amyu ni hta, sinpraw maga kaw nna sinna maga du hkra, Ben-yamin mungdaw rai nga ai. ²⁴ Ben-yamin mungdaw makau, sinpraw kaw nna sinna du hkra, Simun mungdaw rai nga ai. ²⁵ Simun mungdaw makau, sinpraw kaw nna sinna du hkra, Yisahka mung daw3 rai nga ai. ²⁶ Yisahka mungdaw makau, sinpraw kaw nna sinna du hkra, Zebulun mungdaw rai nga ai. ²⁷ Zebulun mungdaw makau, sinpraw maga kaw nna sinna maga du hkra, Gad mungdaw rai nga ai. ²⁸ Ya Gad mungdaw dingda jarit gaw, Tamara kaw nna, Meribotkadesha hka htung ni hte Egutu hka shi lai, nammukdara kaba du hkra, rai na ra ai. ²⁹ Da ndai gaw, Israela amyu ni sali wunli lu la na matu, hpaida da ai hte karan la ai lamu ga rai nga nna, langai hte langai lu la ai mungdaw ni rai nga ai, nga nna Madu Yehowa tsun ai. ³⁰ Da ndai gaw mare na pru wa ai lam ni rai nga ai: mare a dingdung maga, nren hkying mali manga tsa dam nga ai: ³¹ mare chyinghka ni gaw Israela amyu mying mying nna, dingdung maga de Rubin chyinghka, Yuda chyinghka, Lewi chyinghka ngu ai, chyinghka masum rai nga ai. ³² Sinpraw maga de hkying mali manga tsa dam nna, Yosep chyinghka, Ben-yamin chyinghka, Dan chyinghka ngu ai, chyinghka masum rai nga ai: ³³ Dingda maga de hkying mali manga tsa dam nna, Simun chyinghka, Yisahka chyinghka, Zebulun chyinghka ngu ai, chyinghka masum rai nga ai. ³⁴ Sinna maga de hkying mali manga tsa dam nna, Gad chyinghka, Ashe chyinghka, Nahptali chyinghka ngu ai, chyinghka masum rai nga ai. ³⁵ Shingrai mare grupyin shadawn yang, nren mun mi hkying matsat rai na ra ai: dai shani kaw nna, dai mare hpe, Yehowa dung ai mare, nga nna mying na ra ai.