ESHTA

ESHTA

¹ India mung kaw nna, Hkusha mung du hkra, mungdaw latsa e hkun sanit a ntsa e up ai hkawhkam Ahasuru a lakhtak e, ² dai hkawhkam wa gaw, Shushan mare e nga ai htingnu kata na mungdan tingnyang ntsa e dung nga nna, ³ shi hkaw dung ai masum ning hta e, shi a du salang ni hte ali ama ni mahkra a matu poi galaw nga ai Persi, Medi hpyenbu ni, mungdaw ni a agyi salang ni hte du ni gaw, shi a man e nga nga ma ai: ⁴ Dai shaloi e shi gaw, nhtoi na na ngu ai, nhtoi latsa e matsat shi ya tup, shi a galu kaba ai mungdan a sutgan hpe mung, shi a daru magam kaba htum ai arawng sadang hpe mung, shanhte hpe madun dan mu ai. ⁵ Dai aten lai jang hkawhkam wa gaw, Shushan htingnu e hpawng nga ai masha kaji kaba mahkra a matu, hkawhkam htingnu na sun wing kata e sanit ya tup poi galaw nga ai. ⁶ Dai yang e, lung hpraw shadaw hta gumhpraw shanghkawng noi nna, mani ai lachyit ri, hkyeng sawm ai sumri ni hte grang ai, ahpraw, atsit, amut nsan ai nba grang ni grang nga ai; yupku ni gaw, aja gumhpraw rai nna, hkyeng ai, hpraw ai, tsit ai, chyang ai lung nep ntsa e tawn da nga ai. ⁷ Shanhte gaw ja gawm hta na tsabyi lu ma ai; gawm ni gaw langai hte langai kaga ga rai nga ai: hkawhkam wa daw mayu ai hte maren, hkawhkam wa tsabyi n taw n tsang rai nga ai. ⁸ Tsabyi lu ai lam gaw htung hte maren rai nga ai; kadai hpe mung shagwi jaw lu na n rai; langai hte langai tinang ra ai hku daw jaw na lam, hkawhkam wa gaw shi a bu ni hte ali ama ni hpe hkangda mu ai. ⁹ Ya hkawhkam jan Washti mung, hkawhkam Ahasuru a htingnu na numsha ni a matu, poi galaw nga ai. ¹⁰ Sanit ya ngu ai nhtoi hta e, hkawhkam wa gaw tsabyi lu ai hte myit pyaw nga ai shaloi jang, mung masha ni hte du ni hpe, hkawhkam jan Washti a hpraw tsawm ai hpe madun dan na matu, ¹¹ hkawhkam janmau gup let, hkawhkam wa hpang de shashawn na lam, Mehuman, Bizhta, Harabona, Bighta, Abaghta, Zehtara, Hkarahka ngu ai, unuk masha marai sanit hpe hkangda mu ai: kaning rai nme law, shi gaw grai ahpraw tsawm ai num rai nga ai. ¹² Raitimung, hkawhkam jan Washti gaw, unuk ni a n-gup hta hkawhkam hkangda ai ga hpe lale kau nna, n sa ai nga nga ai; dai re ai majaw hkawhkam wa grai pawt bu nna sindawng kahtet nga ai. ¹³ Dai rai nna, hkawhkam wa man e tut tut nga ai hte tara htunghking chye ai, Persi, Medi mung hta grau kaba ai hpaji byeng-ya rawng nna, aten ladaw chye yu ai du sanit ngu ai, ¹⁴ Hkarashena, Shehta, Admahta, Tarshisha, Mere, Marasena, Memuhkan hte hpe shaga nna, hkawhkam wa bawng yu ai htung hte maren, ¹⁵ Hkawhkam jan Washti gaw unuk ni a n-gup hte hkawhkam Ahasuru hkangda ai ga hpe lale kau ai majaw, tara htung hte maren shi hpe kaning di na rai ta? ngu nna shanhte hpe san mu ai. ¹⁶ Shaloi Memuhkan gaw hkawhkam wa hte du ni a man e, hkawhkam jan Washti gaw hkawhkam hpe sha shut ai n rai; hkawhkam Ahasuru a mungdaw ni ting hta nga ai du ni mahkra hte amyu masha ni hpe mung, shut nga ai. ¹⁷ Kaning rai nme nga yang, Hkawhkam Ahasuru gaw hkawhkam jan Washti hpe shi hpang de shashawn na lam hkangda timung, shi n sa hkraw ai, nga nna mung shagu hta kajai gara wa ai hpe numsha ni na jang, shanhte gaw tinang a madu wa ni hpe n kaw n law di kau na mara ai. ¹⁸ Hkawhkam jan galaw ai lam, Persi, Medi du jan ni, dai ni pyi na jang, shanhte mung dai hte maren hkawhkam a du ni mahkra hpe di kau nna, asawng asang hte pawt bu kaba pru na ra ai. ¹⁹ Hkawhkam wa hkraw n yang, gaw, htawmhpang e Washti gaw hkawhkam a man de shang na ahkang n lu u ga, nga nna hkawhkam wa jaw dat ai mungga gaw, n gale n galai mat lu hkra, Persi yan Medi a tara laika hta ka da u ga; dai hta kaga hkawhkam wa gaw, shi a hkawhkam jan aya hpe, shi hta grau kaja ai num hpe jaw kau u ga. ²⁰ Shingrai hkawhkam a mungga gaw, shi a galu kaba ai mungdan ting hproi hkra chyam wa sayang, dinghku num ni nlang hte gaw, tinang a madu wa ni, arawng lu ai n lu ai raitimung, hkungga lara na mara ai, ngu mu ai. ²¹ Dai ga hpe hkawhkam wa hte du salang ni na ra nna, hkawhkam wa gaw Memuhkan a ga hte maren galaw wu ai: ²² Shi gaw, masha langai hte langai tinang a nta up na hte, tinang a amyu ga hku tsun nga na matu, amyu langai hte langai a tsun ai ga hku hkan nna, hkawhkam mungdaw ni hproi hkra, mungga laika shabra dat wu ai.

¹ Dai hpang hkawhkam Ahasuru gaw myit kawp yang, Washti hte, shi galaw ai lam mung, shi hpe dawdan ai lam mung, shi dum wu ai. ² Shaloi hkawhkam wa hpe dawjau ai shi a ali ama ni gaw, hkawhkam wa matu ahpraw tsawm ai hkawnsek ni hkan tam mu ga; hpraw tsawm ai hkawnsek ni yawng hpe, Shushan htingnu na numsha ni a nta hta jahpawng da nna, ³ numsha ni hpe up ai, hkawhkam wa a unuk Hege a lata hta ap ya mu ga, mungdaw langai hte langai hta hkan tam na agyi ni hpe san da mu ga; shanhte hpe jasan jaseng na matu tsi amyu myu jaw mu ga, ⁴ hkawhkam wa grau ra ai hkawnsek hpe Washti a malai hkawhkam jan shatai u ga, ngu nna shi hpe tsun mu ai. Hkawhkam wa gaw dai lam na ra nna, dai lam galaw wu ai. ⁵ Dai aten e, Shushan htingnu hta, Ben-yamin amyu, Kisha dap lakung, Shime a kashu Yaira kasha Mordehkai mying ai Yuda masha langai mi nga ai; ⁶ Dai wa gaw, Yuda hkawhkam Yehkonia hte rau, Babelon hkawhkam Nebuhkadneza lata hte rim wa ai hkrum nna, Yerusalem mare na bawngdung ai ni hta lawm nga ai. ⁷ Shi gaw kawa di a kasha Hadasa mying ai Eshta hpe bau maka la wu ai; dai ma gaw kanu kawa n lu sai; shi a hkum shing-yan tsawm ai hte hpraw htap rai nga ai; kanu yan kawa si ai hpang, Mordehkai gaw shi hpe kasha majing yin la wu ai. ⁸ Ya, hkawhkam wa a mungga hte shi hkangda ai ga kajai nga ma ai rai nna, mahkawn law law wa Shushan htingnu e zuphpawng shangun ai hte Hegai a lata de ap ya hkrum ai shaloi jang, Eshta hpe mung hkawhkam htingnu de shaga nna, numsha ni hpe up ai Hegai a lata de ap ya mu ai. ⁹ Dai mahkawn gaw shi a myit hte htuk nna, myiman pa ai hkrum wu ai; shi hkum mawn sumli na matu, lang ra ai baw amyu ni, jarit hte hkawhkam nta na san da ai, shi kaw hkan mai ai shingnan num marai sanit alawan jaw wu ai; bai shi gaw, numsha nta na grau kaja ai shara hta, shingnan num ni hte rau shi hpe htawt tawn da mu ai. ¹⁰ Eshta gaw shi a amyu hte kahpu kanau ni a lam hpa mung n tsun shapraw na lam, Mordehkai hkangda ai majaw, hpa mung tsun shapraw ai, n rai. ¹¹ Eshta gaw kaning rai nga ai mung, shi hta hpa byin na ra ai mung, chye na matu, Mordehkai gaw numsha ni a nta wing ndaw e, shani shagu hkawm nga ai. ¹² Ya, numsha ni a lam tawn da ai tara hte maren, shata shi lahkawng tup, tinang hkum hpe jasan jaseng na matu, shata kru sau hte mura, shata kru manam pyaw ai hte numsha ni lang ra ai shatsawm ai baw hte mawn sumli ngut jang mahkawn ni langai hte langai hkawhkam Ahasuru man de shang na aten du ra ai; ¹³ Mahkawn ni gaw ning re ai lam hkan nna, hkawhkam wa man de shang ma ai; hkawhkam htingnu na numsha ni a nta na pru wa yang ra mara hte maren, shi hpe jaw mai nga ai. ¹⁴ Shana e shi shang nna, hpang jahpawt e, lashi num ni hpe up ai Shagaza hpang de nhtang wa nna, lahkawng ngu na nta hta rawng nga ai: hkawhkam wa ra nna n shaga dingsa, shi kaw bai shang lu na n rai. ¹⁵ Ya, kasha zawn yin la ai, Mordehkai a kawa di Abihala kasha Eshta gaw, hkawhkam kaw shang ang ai shaloi e, numsha ni hpe up ai, hkawhkam a unuk Hegai gaw shi a matu san da ai hta kaga, hpa mung n hpyi nga ai. Eshta hpe mu mamu ni yawng, shi hpe yu ra ma ai. ¹⁶ Shingrai hkawhkam Ahasuru hkaw dung ai sanit ning na, Tebet ngu ai shata shi hta, Eshta hpe shi a hkawhkam htingnu hta shi hpang de shashawn la wu ai; ¹⁷ Hkawhkam wa gaw numsha ni mahkra hta, Eshta hpe grau tsawra wu ai rai nna, shi gaw hkawnsek ni mahkra hta, shi a man e chyeju hte myiman pa nga ai; shingrai, shi hpe hkawhkam janmau shagup ya nna, Washti a malai hkawhkam jan shatai wu ai. ¹⁸ Dai hpang hkawhkam wa gaw, Eshta poi ngu ai, poi kaba, shi a du salang ni hte ali ama ni matu galaw nna, mungdaw ni hta lahkawn hkanse shayawm ai hte, hkawhkam a chyeju myit hte maren, kumhpaw kumhpa karan jaw nga ai. ¹⁹ Hkawnsek ni gaw lahkawng lang hpawng ai shaloi e, Mordehkai gaw hkawhkam chyinghka hta dung nga ai. ²⁰ Eshta chyawm gaw, Mordehkai shi hpe bau maka nga yang, sharin achyin ya ai hte maren, naw a madat nga ai rai nna, shi a kahpu kanau ni hte shi a amyu a lam, hpa mung n tsun shabrawng nga ai. ²¹ Ya Mordehkai hkawhkam wa a chyinghka hta e dung nga ai aten hte yang, chyinghka sin ai ni hta na, hkawhkam a unuk Bightan yan Tere gaw, myit machyi nga nna, hkawhkam wa hpe sat kau na dakat nga ma ai. ²² Dai lam Mordehkai chye wa nna, hkawhkam jan Eshta hpe madun dan wu ai: shingrai Mordehkai madun dan ai lam hpe Eshta gaw hkawhkam wa hpe tsun dan wu ai. ²³ Dai amu hpe sagawn yu nna, dan leng nga ai hpe chye jang, dai yan hpe hpun hta shadau sat kau nhtawm, hkawhkam a man e labau laika hta ka matsing da mu ai.

¹ Dai hpang e hkawhkam Ahasuru gaw, Agag amyu na, Hamedahta kasha Haman hpe shagrau nna, shi hte rau nga ai du salang ni mahkra hta grau tsaw ai aya hta dang da wu ai. ² Hkawhkam wa gaw shi a lam hkangda ai majaw, hkawhkam chyinghka e nga ai, hkawhkam a ali ama ni mahkra gaw, gum dagup nna Haman hpe nawku ma ai. Mordehkai chyawm gaw, gum mung n gum dagup, naw mung n nawku nga ai. ³ Dai rai nna hkawhkam chyinghka e nga ai hkawhkam a ali ama ni gaw, nang hpa majaw hkawhkam a hkang dat ai ga hpe lale kau n ta? ngu nna Mordehkai hpe san mu ai. ⁴ Shanhte gaw shani shagu dai lam san mu timung, shi shanhte a ga n madat ai majaw, Mordehkai galaw ai lam htuk ai n htuk ai chye lu na matu, shanhte gaw Haman hpe sa shana ya mu ai: kaning rai nme law, Mordehkai gaw, shi Yuda masha re ai lam, shanhte hpe tsun dan sai. ⁵ Shingrai Mordehkai gaw, gum mung n gum dagup, naw mung n nawku nga ai hpe, Haman mu wu yang, shi grai pawt bu nga ai. ⁶ Raitimung, shanhte gaw Mordehkai amyu Haman hpe shapraw dan ai majaw, Mordehkai langai hpe sha sat kau yang, masin n kawp lu ai hte, Mordehkai amyu ngu ai, Ahasura mungdan ting hta nga ai, Yuda masha nlang hte hpe sat shagrawm kau na, maw nga ai. ⁷ Dai re majaw, Ahasuru hkaw dung ai shi lahkawng ning hta e, Nisan ngu ai, shawng shata kaw nna, Adara ngu ai, shata shi lahkawng du hkra, lani hte lani shata mi hte shata mi, Haman a man e Pura ngu ai hpaida, da nga ma ai. ⁸ Shingrai Haman gaw hkawhkam Ahasuru hpe, na a mungdan a mungdaw amyu ni mahkra hta amyu langai mi hkran nga ai; shanhte a tara gaw kaga amyu mahkra hta shai nga ai; shanhte gaw hkawhkam a tara hpe hkan nang ma ai, n rai: dai re ai majaw, shanhte anga nga na gaw, hkawhkam wa matu akyu nga ai n rai. ⁹ Hkawhkam wa hkraw n yang gaw, shanhte hpe sat shagrawm kau na nga, hkang dat ai laika ka u ga; ngai mahtang, hkawhkam a sutdek ni hta, bang da na matu, hkawhkam a amu galaw ai ni a lata hta, gumhpraw joi sen mi ap ya na nngai, ngu wu ai. ¹⁰ Dai rai nna hkawhkam wa gaw, shi a lachyawp malaw la nna, Yuda masha ni hpe hpyen ai wa, Agag amyu, Hamedahta kasha Haman hpe jaw wu ai. ¹¹ Bai hkawhkam wa gaw, Dai gumhpraw gaw na a gumhpraw rai nga ai; dai amyu masha ni mung na a lata hta rai nga nna, nang galaw mayu ai hte maren galaw u ga, ngu nna Haman hpe tsun wu ai. ¹² Shaloi jang, shawng shata na shi masum ya e, hkawhkam wa a chyare ni hpe shaga la nna, Haman hkang dat ai hte maren, hkawhkam a du ni hpe, mungdaw shagu a munggyi ni hte amyu masha ni a agyi ni hpe, mungdaw langai hte langai a laika ka ai hku hte, amyu langai hte langai a ga ga ai hku hkan nna, laika ka shabra dat mu ai: hkawhkam Ahasuru amying gang let ka nhtawm, hkawhkam a lachyawp hte dazik shakap wu ai. ¹³ Shingrai, Adara ngu ai shata shi lahkawng a shi masum ya shani jang, Yuda masha yawng, kaji kaba, ma kaji numsha mahkra hpe, atsai awai sat shagrawm shamyit kau nna, shanhte a arung arai ni hpe lanep shatai na nga, hkang dat ai laika ni hpe, laika sa ai ni a lata hte, hkawhkam a mungdaw shagu de shabra dat mu ai. ¹⁴ Masha amyu ni yawng, dai shni hta jin jin rai nga mu ga, mungdaw shagu hta amyu baw ni mahkra a matu, ning re ai laika hkap htawn ka shabra dat na, rai nga ai. ¹⁵ Dai hkang dat ai ga gaw Shushan htingnu hta chye ai shaloi jang, hkawhkam wa hkang dat ai hte maren, laika sa ai ni alawan sa wa ma ai. Shaloi hkawhkam wa hte Haman gaw tsabyi rau lu ma ai. Shushan mare chyawm gaw myit ung ang hkrum nga ai.

¹ Dai byin wa ai lam mahkra hpe Mordehkai chye jang, shi a hpun nba gang je kau nhtawm, wan dap hta galu ai lachyit nba bu hpun let, mare ka-ang de sa du nna, nsen kaba hte hkrapngu hkrapngoi wu nga ai: ² Lachyit nba bu hpun ai hte, hkawhkam chyinghka de kadai n mai shang timung, shi gaw hkawhkam chyinghka ndaw e nan, sa tsap nga ai. ³ Hkawhkam a hkang dat ai tara laika du ai mungdaw shagu hta e, Yuda masha ni gaw, lusha gam let, hkrapngu hkrapngoi, sharung shayawt ai hte myit yawnhkyen nga ma ai: law law wa mung, wan dap hta galu ai lachyit nba hta, kaleng taw nga ma ai. ⁴ Eshta a shingnan num ni hte shi a gawk sin ai ni gaw dai lam shi hpe sa tsun dan ai majaw, hkawhkam jan gaw nachying myit yawn ai hte, Mordehkai a lachyit nba galai kau na matu, shi hpang de hpun palawng shagun dat timung, shi hkap la ai, n rai. ⁵ Dai rai nna Eshta gaw, hkawhkam san da ai hte shi hpe bau sin ai hkawhkam a unuk Hahtak hpe shaga nna, dai lam hpa re ai kun, hpa majaw rai kun, sa san yu na nga, shi hpe Mordehkai hpang de shangun dat wu ai. ⁶ Shingrai Hahtak gaw, hkawhkam chyinghka ndaw na, mare htingwang e nga ai, Mordehkai hpang de sa du ai. ⁷ Shaloi Mordehkai gaw, shi hkrum ai lam mahkra mung, Yuda masha ni hpe sat shagrawm kau nna, hkawhkam a sutdek hta, Haman bang da na nga ai, gumhpraw gade re ai mung, Hahtak hpe tsun dan wu ai. ⁸ Dai hta kaga, Yuda masha ni hpe sat shagrawm kau na nga, Shushan mare hta shapraw dat ai tara laika, Eshta hpe madun nna shi hpe hti dan na matu mung, Eshta gaw hkawhkam kaw shang nna, shi a amyu masha ni a matu mara hkawhkam wa hpe hpyi nem ya na matu mung, Mordehkai gaw, htawn ka ai laika, Hahtak hpe jaw dat wu ai. ⁹ Shaloi Hahtak gaw, Mordehkai a ga, Eshta hpe wa tsun dan wu ai. ¹⁰ Dai re ai majaw Eshta gaw Hahtak hpe Mordehkai hpang de bai shangun nna, ¹¹ Numsha, lasha, kadai raitimung, hkawhkam n shaga ai, kata wing e hkawhkam hpang de shang yang, hkawhkam wa gaw, dai wa hpe jahkrung da na matu, shi a ja sumdoi n ladawn ya yang, teng teng si ai hkrum na lam langai sha nga ai gaw, hkawhkam a ali ama ni hte, mungdaw amyu masha ni mahkra chye shajang ma ai: ngai mung, ya sumshi ya tup hkawhkam hpang de shang na, shaga hkrum ai n rai, ngu nna ga htang dat wu ai. ¹² Shanhte gaw Eshta a ga Mordehkai hpe htawn tsun mu ai. ¹³ Dai rai nna Mordehkai gaw Eshta hpe, kaga Yuda masha ni asak n lawt lu yang, nang hkawhkam htingnu e nga timung, lawt lu na zawn, hkum nawn et: ¹⁴ Ndai aten e nang atsin sha nga n yang gaw, kaga Yuda masha ni a matu lawt pru shara hku dam timung, nang hte na nwa a nta masha ni gaw, si na mara ai: ndai aten e ning re ai amu gunhpai lu na matu, nang hkawhkam jan tai lu ai, nawn shara nga ai, n rai ni? ngu nna ga htan dat wu ai. ¹⁵ Shaloi Eshta gaw Mordehkai hpe, ¹⁶ Sa wa su, Shushan e nga ai Yuda masha nlang hte hpe jahpawng da u; nye a matu lusha gam ya nna, shani shana masum ya tup hkum lu hkum sha myit; ngai hte nye a shingnan num ni mung, dai hte maren lusha gam na ga ai; dai hpang, tara tawt lai timung, hkawhkam hpang de ngai shang na nngai: si yang si hkam na nngai, ngu nna ga htang dat mu ai. ¹⁷ Shingrai Eshta hkang dat ai ga mahkra hte maren, Mordehkai wa galaw wu ai.

¹ Ya, masum ya e rai yang, Eshta gaw, shi a hkawhkam jan hpun palawng sumraw nna, hkawhkam htingnu tawtap, hkawhkam htingnu a kata wing e tsap nga ai; hkawhkam wa gaw, htingnu a chyinghka lam tawtap na, hkawhkam htingnu kata e, shi a hkawhkam tingnyang hta dung nga ai. ² Hkawhkam jan Eshta gaw wing kata e tsap nga ai hpe, hkawhkam wa mu wu yang, Eshta gaw shi a man e myiman pa nga ai rai nna, hkawhkam wa gaw shi a lata hta lang ai aja sumdoi Eshta hpang de ladawn dat wu ai. Shingrai Eshta sit sa nna, sumdoi a matu a htawk ya wu ai. ³ Shaloi hkawhkam wa gaw, hkawhkam jan Eshta e, nang hpa ra n ta? hpa hpyi mayu n ta? nye a mungdan chyen mi du hkra jaw na de ai, ngu nna shi hpe tsun wu ai. ⁴ Eshta chyawm gaw, hkawhkam wa hkraw n yang gaw, hkawhkam a matu ngai hkyen tawn ai poi de, Haman hte rau dai ni sa marit, ngu wu ai. ⁵ Shaloi hkawhkam wa gaw, Eshta tsun ai hte maren sa lu hkra, Haman hpe sa shatin mu, ngu mu ai. Dai re ai majaw, Eshta hkyen tawn ai poi de, hkawhkam wa yan Haman sa lawm ma ai. ⁶ Ya hkawhkam wa gaw poi tsabyi lu nga yang, Eshta hpe, nang hpa hpyi n ta? nang hpe jaw na de ai: nang hpa tam n ta? mungdan chyen mi du hkra, ap ya na de ai, ngu wu ai. ⁷ Dai rai nna Eshta gaw, ngai hpyi ngai tam ai lam, da ndai rai nga ai: ⁸ Hkawhkam a man e ngai myiman pa ni ai rai nna, hkawhkam wa gaw ngai hpyi ai ga madat mayu ai hte, ngai tam ai lam shabyin na rai yang gaw, ngai bai hkyen tawn ai poi de hkawhkam wa hte Haman naw sa marit; shaloi she hkawhkam wa tsun ai hte maren, hpawt ni e galaw na nngai, ngu wu ai. ⁹ Dai shani e Haman gaw kabu gara ai myit kaba hte pru wa timung, hkawhkam chyinghka e dung nga ai Mordehkai gaw, shi a man e rawt mung n rawt, hkrit hkungga ai myit mung n madun ai hpe, Haman mu wu yang, shi gaw Mordehkai hpe grai pawt bu nga ai. ¹⁰ Raitimung Haman gaw shi a myit dip kau let, nta de wa nna, jinghku jing-yu ni hte madu jan Zeresha hpe shaga mu ai. ¹¹ Shingrai, Haman gaw, shi sutgan kaba ai lam mung, kashu kasha law ai lam mung, hkawhkam wa shi hpe kaba shangun nna, hkawhkam a du salang ni hte ali ama ni a ntsa e, shi hpe shagrau shatsaw da ai lam mahkra mung, shanhte a man e hkai dan mu ai. ¹² Bai Haman gaw, Rai sa, hkawhkam jan Eshta pyi, shi hkyen tawn ai poi hta, ngai hta kaga, hkawhkam wa hte rau kadai hpe mung n shalawm hkraw ai; hpawt ni mung, hkawhkam wa hte rau poi lawm na rai nga nngai. ¹³ Raitimung, Yuda masha Mordehkai gaw hkawhkam chyinghka hta dung nga ai ngai naw mu dingsa, ya ngai tsun wa a lam ni, nye a matu hpa akyu n nga ai, ngu mu ai. ¹⁴ Dai rai nna madu jan Zeresha hte jinghku jingyu ni mahkra gaw, dawng manga shi tsaw ai wudang sharawt jung da u; dai hta Mordehkai hpe shadau sat na matu, hpawt ni e hkawhkam wa hpe ahkang hpyi u; dai hpang kabu gara ai myit hte hkawhkam wa hte rau, poi sa lawm u, ngu nna shi hpe tsun mu ai. Haman mung dai ga hpe na ra nna, wudang sharawt jung shangun mu ai.

¹ Dai shani e hkawhkam wa gaw n yup lu nna, jahpan labau laika ni hpe shapraw na, hkawhkam wa hkangda ai hte, dai laika ni hpe shi a man e hti dan mu ai. ² Dai laika ni hta, hkawhkam Ahasuru hpe sat na nga, chyinghka sin ai ni hta na, hkawhkam wa unuk Bightana yan Tere gaw, tam dakat ai lam, Mordehkai shabrawng dan ai hpe, mu hkrup mu ai. ³ Dai rai nna hkawhkam wa gaw, Mordehkai dai lam shabrawng dan ai majaw, kaning re arawng sadang hte shagrau sha-a ai hkrum sata? ngu nna san mu yang, hkawhkam wa hpe dawjau ai ali ama ni gaw, shi a matu hpa mung n galaw yu ai, ngu mu ai. ⁴ Bai hkawhkam wa gaw, wing kata e kadai nga nga a ta? ngu nna san mu yang, Haman gaw, shi hkyen da ai wudang hta Mordehkai hpe shadau sat na matu, hkawhkam hpe ahkang hpyi na nga, htingnu na shinggan wing kata de shang ai majaw, ⁵ hkawhkam a ali ama ni gaw, Haman tsap nga ai, ngu mu ai. Hkawhkam wa gaw, shi shang ruga, ngu nna tsun mu ai. ⁶ Shingrai Haman shang wa ai. Shaloi hkawhkam wa gaw, hkawhkam wa shagrau shatsaw mayu ai wa hpe kaning di na rai ta? ngu nna san wu yang, Haman gaw, ngai hta kaga, hkawhkam wa shagrau shatsaw mayu ai wa, kadai wa mi rai na ta? nga nna shi a kraw e myit let, ⁷ hkawhkam wa shagrau shatsaw mayu ai wa a matu, ⁸ hkawhkam wa bu hpun ai hpun palawng hte, janmau gup ai, hkawhkam wa jawn ai gumra la nna, ⁹ dai rai ni hte gumra hpe, arawng htum ai hkawhkam du salang langai mi a lata hta ap ya nhtawm, hkawhkam wa shagrau shatsaw mayu ai wa hpe dai hpun palawng bu hpun shangun nna, gumra jawn let mare lam ni hta shapraw nna, Hkawhkam wa shagrau shatsaw mayu ai wa hpe ning rai galaw nga ai, ngu nna shi a shawng e garu jahtau ai masha shangun dat u, ngu nna hkawhkam wa hpe htan wu ai. ¹⁰ Dai rai nna hkawhkam wa gaw Haman hpe, nang tsun ai hte maren hpun palawng hte gumra hpe alawan la nhtawm hkawhkam chyinghka e dung nga ai, Yuda masha Mordehkai hpe galaw u: nang tsun ai hta langai mi muk, hkum shayawm kau et, ngu wu ai. ¹¹ Shaloi Haman gaw hpun palawng ni hte gumra hpe la nna, Mordehkai hpe bu hpun shangun nhtawm, mare lam ni hta gumra shajawn let, hkawhkam wa shagrau shatsaw mayu ai wa hpe ning rai galaw nga ai, nga nna shi a shawng e garu jahtau nga ai. ¹² Dai hpang Mordehkai gaw hkawhkam chyinghka de bai nhtang wa ai. Haman chyawm gaw, yawn nna baw magap let, shi a nta de alawan nhtang wa ai. ¹³ Shingrai Haman gaw, shi hta byin ai lam mahkra hpe, madu jan Zeresha hte jinghku jingyu ni yawng hpe hkai dan mu ai. Dai rai nna shi a hpaji rawng ai ni hte madu jan Zeresha gaw, Nang hpe sum hpang shangun ai Mordehkai gaw, Yuda aru arat hta na teng yang, nang shi hpe dang lu na n rai; nang shi a man e teng teng sum na ndai, ngu mu ai. ¹⁴ Shingrai shanhte gaw shi hte ga naw tsun nga yang, hkawhkam a unuk ni sa nna, Eshta hkyen tawn ai poi de Haman hpe alawan shaga mu ai.

¹ Shingrai hkawhkam wa yan Haman gaw, hkawhkam jan Eshta a poi hta lawm nga ma ai. ² Ya ni ni shani na tsabyi lu ai poi hta hkawhkam wa gaw Eshta hpe, Hkawhkam jan Eshta e, nang hpa hpyi n ta? nang hpe jaw na de ai; nang hpa tam n ta? mungdan chyen mi du hkra ap ya na de ai, ngu nna bai tsun wu ai. ³ Dai rai nna hkawhkam jan Eshta gaw, Hkawhkam wa e, ngai na a man e myiman pa ai hte hkawhkam wa hkraw n yang gaw, ngai hpyi ai hte maren, nye a asak, ngai tam ai hte maren, nye amyu masha ni a asak, jahkrung da ya mi; ⁴ ngai hpe mung, nye amyu masha ni hpe mung, atsai awai, sat shagrawm shamyit kau na nga, anhte dut kau ai hkrum saga ai. Mayam num mayam la tai na matu, dut kau hkrum ai rai yang, hpyen wa gaw hkawhkam wa sum ai malai, jahpu n jaw lu timung, ngai atsin sha nga na nngai, ngu nna htan wu ai. ⁵ Shaloi hkawhkam Ahasuru gaw, Ndai lam galaw gwi ai wa gaw, kadai wa rai ta? kanang rai nga a ta? ngu nna hkawhkam jan Eshta hpe san wu ai. ⁶ Eshta gaw, Gumlau wa hte hpyen wa gaw, ndai n hkru ai Haman nan rai nga ai, ngu wu ai. Dai rai nna Haman gaw, hkawhkam wa hte hkawhkam jan a man e hkrit gari nga ai. ⁷ Hkawhkam wa mung pawt bu ai hte, tsabyi poi na rawt nna, htingnu na sun de shang mat wa ai: Haman gaw shi a asak jahkrung da na lam, hkawhkam jan Eshta hpe hpyi nem na matu rawt tsap nga ai; kaning rai nme law, hkawhkam wa shi hpe ari jaw na, maw nga ai lam, shi chye da wu ai. ⁸ Shaloi hkawhkam wa gaw, htingnu sun kaw na tsabyi poi gawk de bai wa ai; Haman gaw Eshta taw nga ai yupku hta gum dagup nga ai majaw, hkawhkam wa gaw, Nye nta kata e, nye a man e nan, hkawhkam jan hpe kamu la na rai kun? nga nna ga naw tsun nga yang, shanhte gaw Haman a myiman magap ya mu ai. ⁹ Harabona mying ai hkawhkam wa unuk langai mi gaw, yu u, hkawhkam wa a lam, ga kaja tsun ai Mordehkai a matu, Haman sharawt jung ai, dawng manga shi tsaw ai wudang gaw, Haman a nta e jung nga ai, ngu wu ai rai nna, hkawhkam wa gaw, dai hta e shi hpe shadau sat kau mu, ngu mu ai. ¹⁰ Shingrai Mordehkai a matu jung da ai wudang hta, Haman hpe noi da mu ai. Shaloi hkawhkam wa a myit kawp wa sai.

¹ Dai shani jang hkawhkam Ahasuru gaw, Yuda masha ni hpe hpyen ai Haman a nta, hkawhkam jan Eshta hpe ap ya kau wu ai. Eshta gaw hkawhkam wa hpe, Mordehkai hte shi kaning rai daw hkat ai lam hkai dan ai majaw, Mordehkai gaw hkawhkam wa kaw shang lu ai. ² Hkawhkam wa mung, Haman kaw na dawm la ai lachyawp hpe shi a lata na malaw la nna, Mordehkai hpe ap ya nu ai. Eshta mung Mordehkai hpe, Haman a nta ntsa e up shangun wu ai. ³ Bai Eshta gaw, hkawhkam wa man e gum dagup nna, Agag masha Haman gaw Yuda masha ni hpe hkalem maw ai lam hkawhkam wa shabai kau u ga, nga nna hkrapngu hkrapngoi let, hkawhkam wa man e hpyi tawngban wu ai. ⁴ Shaloi hkawhkam wa gaw Eshta hpang de shi a ja sumdoi ladawn dat wu ai. Shingrai Eshta gaw rawt nna hkawhkam wa a man e tsap nga let, ⁵ hkawhkam wa hkraw nna ngai shi a man e myiman pa ai hte, hkawhkam wa dai lam ra nna, shi ngai hpe yu ra ai rai yang gaw, hkawhkam wa mungdaw shagu hta nga ai Yuda masha ni hpe sat shagrawm kau na nga, Agag amyu masha, Hamedahta a kasha Haman hpaji daw nna, ka shabra dat ai laika ni hpe, hkawhkam wa hkan ka shabai kau u ga. ⁶ Nye amyu a ntsa e du ai tsin-yam tsindam hpe mung, nye a kahpu kanau ni hten byak hkrum nga ai hpe mung, ngai kaning rai yu nga lu na rai ta? ngu wu ai. ⁷ Shaloi hkawhkam Ahasuru gaw, Haman gaw Yuda masha ni hpe sat kau mayu ai majaw, ngai shi a nta hkawhkam jan Eshta hpe ap kau ya se ai; dai wa hpe mung, wudang hta noi sat kau sai: ⁸ Raitimung, hkawhkam a amying gang let ka ai hte, hkawhkam lachyawp dazik shakap ai laika hpe, kadai mung n shabai kau lu nga ai majaw, nan mung myit ra ai hte maren, hkawhkam a mying gang let, Yuda masha ni a lam, ka shabra dat mu, ngu nna hkawhkam jan Eshta hte, Yuda masha Mordehkai hpe tsun mu ai. ⁹ Shaloi shata masum ngu na, Siwan shata nhtoi hkun masum ya e, hkawhkam wa a chyare ni hpe shaga la nhtawm, Mordehkai hpa lam hkang dat mayu ai hte maren, India mung kaw nna, Hkusha mung du hkra rai nga ai, mungdaw latsa e hkun sanit hta de nga ai Yuda masha ni, hpyenbu ni, munggyi ni hte du salang ni mahkra hpang de, mungdaw langai hte langai a laika ka ai hku, Yuda masha ni a laika ka ai hku hte ga tsun ai hku hkan nna, ga shabra dat mu ai. ¹⁰ Shi gaw hkawahkam Ahasuru a mying gang let ka nna, hkawhkam a lachyawp hte dazik shakap nhtawm, hkawhkam a amu matu kawn da ai, grai lawan chye ai gumra jawn ai ni a lata hta, laika shagun dat wu ai. ¹¹ Dai laika hta ka da ai gaw, Adara ngu ai shata shi lahkawng a shi masum ya shani jang, hkawhkam Ahasuru a mungdaw ni nlang hte hta, ¹² mare mi hte mare mi e nga ai Yuda masha ni gaw, zuphpawng nga nna, shanhte hte shanhte a ma kaji ni kanu ni hpe sat kau nna, shanhte a arung arai ni hpe lanep shatai maw ai mung masha ni kadai hpe mung, hkap gasat mai nna tinang a asak hkye la lu hkra, hpyen ni nlang hte hpe atsai awai sat shagrawm shamyit kau lu na ahkang rawng nga ai. ¹³ Yuda masha ni gaw dai shani hta e tinang a hpyen ni hpe hkap daw lu hkra, hkyen nga na matu, mungdaw shagu na masha amyu ni hpang de ndai tara laika htawn ka shabra dat nu ai. ¹⁴ Dai dawdan ai ga gaw, Shushan htingnu na pru nna, hkawhkam a hkang dat ai ga hte shanhte hpe tin shangun ai majaw, laika sa ai ni gaw, hkawhkam wa amu hta lang ai, grai lawan chye ai gumra jawn let, pru sa wa ma ai. ¹⁵ Ya Mordehkai gaw amut, ahpraw nsan ai, hkawhkam hpun palawng bu hpun nna, ja janmau kaba gup ai hte mani ai lachyit nba ahpraw hte hkyeng sawm ai nba lawai let, hkawhkam wa kaw na pru wa nna, Shushan mare masha ni gaw, kabu gara ai hte jahtau garu nga ma ai. ¹⁶ Yuda masha ni gaw, htoi leng ai hte kabu gara ai, sharawng awng ai hte arawng sadang hkrum masai. ¹⁷ Dai hta kaga, hkawhkam a dawdan ai ga hte hkang dat ai ga du ai mungdaw shagu hte mare shagu hta, Yuda masha ni gaw kabu gara ai hte sharawng awng nna, poi galaw ai hte nhtoi kaja mu lu masai. Mung masha ni gaw Yuda masha ni a lam hkrit ma ai majaw, mung masha law law wa Yuda masha tai wa masai.

¹ Ya hkawhkam wa hkang dat ai hte maren, dawdan ai aten ni wa nna, Yuda masha ni hpe hpyen ai ni gaw, shanhte hpe dang kau nna myit mada nga ai shani, Adara ngu ai shata shi lahkawng a shi masum ya shani du jang, ginwan gale mat nna, Yuda masha ni gaw shanhte hpe ndawng n yawt ai ni a ntsa e up nga lu ma ai: ² Yuda masha ni gaw, hkawhkam Ahasuru a mungdaw ni mahkra hta shanhte e zingri zingrat ai ni hpe hkap daw na matu, sa zup sa hpawng nga ma ai: mung masha ni kadai mung shanhte hpe hkrit mat ma ai majaw, n sa gasat gwi mat ma ai. ³ Mungdaw ni a du salang ni, hpyenbu ni, munggyi ni hte hkawhkam a amu gunhpai ai ni nlang hte gaw, Mordehkai hpe hkrit ma ai majaw, Yuda masha ni hpe karum nga ma ai. ⁴ Kaning rai nme law Mordehkai gaw hkawhkam htingnu hta kaba wa nna, shi a kajai gumhkawng ai gaw, mungdaw ni hta pri rai wa sai; dai la wa Mordehkai gaw lani hte lani grau nna kaba wa sai. ⁵ Yuda masha ni gaw shanhte e hpyen ai ni hpe nhtu hte sat shagrawm shamyit kau nna, shanhte e ndawng n yawt ai ni hpe di mayu ai hte maren di mu ai. ⁶ Shushan mare htingnu hta shanhte gaw marai manga tsa hpe sat shagrawm kau mu ai. ⁷ Dai hta n-ga, Yuda masha ni hpe hpyen ai wa, Hamedahta kasha Haman a shadang sha ni, marai shi ngu ai, Parshandahta, Dalahpon, Aspahta, ⁸ Porahta, Adalia, Aridahta, ⁹ Parmashata, Arisai, Aridai, Waizahta hte hpe mung sat kau mu ai; ¹⁰ raitimung, shanhte lanep n la ma ai. ¹¹ Dai shani e, Shushan mare htingnu hta sat kau hkrum ai ni a jahpan hpe, hkawhkam wa man e madun mu ai. ¹² Bai hkawhkam wa gaw hkawhkam jan Eshta hpe, Yuda masha ni gaw Shushan mare htingnu hta e, Haman a shadang sha marai shi hte rau, marai manga tsa tup sat shagrawm kau manu ai: dai rai yang, hkawhkam a mungdaw kaga ni hta, hpa naw galaw masai kun? Nang hpa hpyi n ta? nang hpe jaw na de ai; nang hpa naw tam n ta? lam shagu shabyin ya na de ai, ngu wu ai. ¹³ Dai rai nna Eshta gaw, hkawhkam wa hkraw n yang gaw, Shushan mare e nga ai Yuda masha ni gaw, dai ni galaw lu ai hte maren, hpawt ni e mung galaw lu nna, Haman a shadang sha marai shi hpe, wudang hta noi da na ahkang naw jaw e, ngu nna hpyi wu ai. ¹⁴ Dai lam galaw na nga hkawhkam wa hkang dat ai hte, Shushan mare hta dawdan laika shapraw nhtawm, shanhte gaw Haman a shadang sha marai shi hpe noi da mu ai. ¹⁵ Dai hta kaga, Shushan mare hta e nga ai Yuda masha ni gaw, Adara ngu ai shata a shi mali hta e mung zuphpawng nna, Shushan mare masha marai masum tsa hpe sat kau mu ai; raitimung, shanhte lanep n la ma ai. ¹⁶ Hkawhkam a mungdaw ni hta nga ai, kaga Yuda masha ni gaw, zuphpawng nga nna, tinang a asak a matu hkap gasat let, hpyen ni hpe manga kau lu ai hte, shanhte hpe ndawng n yawt ai ni hta na marai mun sanit hkying manga hpe sat kau mu ai; raitimung shanhte lanep n la ma ai. ¹⁷ Dai gaw Adara shata a shi masum ya e byin nga ai; dai rai nna shanhte gaw dai shata a shi mali ya e ban sa nna, dai shani hpe poi sha ai hte kabu gara ai shani shatai mu ai. ¹⁸ Shushan mare e nga ai Yuda masha ni chyawm gaw, shi masum ya hte shi mali ya hta zuphpawng nga nna, dai shata shi manga ya e ban sa nga ai hte dai shani hpe poi sha ai hte kabu gara ai shani shatai mu ai. ¹⁹ Dai re ai majaw kahtawng ni hte bunghku n kum ai mare ni hta nga ai Yuda masha ni gaw, Adara shata shi mali ya e, kabu gara let poi sha ai shani hte sharawng awng ai nhtoi shatai nna, shada da kumhpa karan jaw hkat ma ai. ²⁰ Yuda masha ni gaw hpyen ni a lata na lawt wa lu ai majaw, yawnhkyen ai kaw nna kabu gara ai de, sharung shayawt ai kaw nna mai kaja ai de, gale ai nhtoi ngu ai, ²¹ Adara shata shi mali ya hte shi manga ya hpe, shaning shagu hkan matsing da nna, dai shani lahkawng hpe kabu gara nga let, poi sha na hte shada da kumhpa karan jaw nna, matsan mayan ni hpe gam jaw gam ya na shani shatai na matu, ²² Mordehkai gaw ndai lam ni hpe ka da nna, hkawhkam Ahasuru a ni ai tsan ai mungdaw ni mahkra hta nga ai, Yuda masha ni yawng hpang de, laika shagun dat wu ai. ²³ Yuda masha ni mung, galaw hpang ai hte, Mordehkai hkang dat ai hte maren, yin la nna galaw ma ai. ²⁴ Kaning rai nme law, Yuda masha ni yawng hpe hpyen ai wa, Agag amyu, Hamedahta kasha Haman gaw, Yuda masha ni hpe sat shagrawm kau na hte shamyit kau na matu, Pura ngu ai hpaida da nna, hpaji daw timung, ²⁵ hkawhkam wa dai lam chye jang, Yuda masha ni hpe, shi n hkru ai hpaji daw ai lam, shi a baw ntsa e nhtang dat nna, shi hte shi a shadang sha ni gaw, wudang hta noi da ai hkrum na ma ai, nga nna laika hte hkang dat wu ai. ²⁶ Dai re ai majaw, Pura mying hkan nna, dai nhtoi yan hpe Purim ngu shamying mu ai. Shingrai, ndai laika hta rawng ai ga mahkra majaw mung, ndai amu a lam shanhte mu ai hte hkrum mahkrum mung, ²⁷ Yuda kaji kawa ni, shanhte a kashu kasha ni hte, shanhte hta matut manoi ai ni yawng hte gaw, tutnawng laning hte laning, madat da ai aten gu yang, ndai nhtoi yan hpe, ka da ai hku hte maren, hkan matsing nna, ²⁸ prat mi hte prat mi htinggaw mi hte htinggaw mi, mungdaw shagu hta mung, mare shagu hta mung, dai nhtoi yan hpe dum na hte, Yuda masha ni gaw Purim ngu ai nhtoi yan hpe galoi n hprai kau ai sha, shu mashi shu masha du hkra malap mali kau na n rai, nga nna shanhte yin la ai hte, ga sadi tawn da ma ai. ²⁹ Shaloi Abihaila shayi sha hkawhkam jan Eshta hte Yuda masha Mordehkai gaw, Purim poi a lam, ndai lahkawng ngu na laika hpe shagrin da na matu, ahkang aya kaba hte ka dat mu ai. ³⁰ Shingrai, Yuda masha Mordehkai hte hkawhkam jan Eshta hkang dat nna, Yuda masha ni gaw, tinang a matu mung, kashu kasha ni a matu mung, ga sadi tawn da ai hte maren, madat da ai aten hta, lusha gam nna hkrapngu hkrapngoi let, Purim poi shani yan hpe matsing shagrin da na matu, ³¹ Ahasuru a mungdan hta lawm ai mungdaw latsa e hkun sanit hta nga ai, Yuda masha ni nlang hte hpang de, ngwi pyaw ai hte tengman ga rawng ai laika ni shagun dat wu ai. ³² Eshta hkangda ai ga mung, Purim poi a lam ni hpe shagrin da nna, dai hte gaw dai laika hta ka da nga ai.

¹ Ya hkawhkam Ahasuru gaw, hkarang na lamu ga hta mung nammukdara zunlawng ni hta mung, hkanse hta wu ai. ² Mordehkai galaw ai daru magam amu bungli mahkra hte, shi a hpung dagu, hkawhkam wa shi hpe shagrau shatsaw ai majaw, shi galu kaba danhkung ai lam, Medi yan Persi hkawhkam ni a labau laika ni hta azin ayang ka da nga ai, n rai ni? ³ Kaning rai nme law, Yuda masha Mordehkai gaw, hkawhkam Ahasuru a malai rai nga nna, Yuda masha ni hta shi galu kaba nga ai hte, shi a kahpu kanau ni law malaw gaw shi hpe yin la nna, shi gaw, shi a amyu masha ni a ngamu ngamai lam tam let, kashu kasha ni mahkra hpe ngwi pyaw ga tsun mu ai.