TARA JAHPRANG

TARA JAHPRANG

¹ Da ndai gaw, Yawdan hka wora hkran, nam mali ga e, Paran, Tohpela, Laban, Hazerot hte Di-zahab a lapran, Suhpa hte tawtap na layang ga hta, Mawshe, Israela masha ni mahkra hpe tsun ai ga rai nga ai. ² Horeb bum kaw nna Siera bum hku lung wa yang, Kade-sha-barnea du hkra nhtoi shi langai ya sat rai nga ai. ³ Hesbon e dung ai Amori hkawhkam Sihon hte, Edri makau e, Ashtarot e dung ai Bashan hkawhkam Oga hpe sat kau wu ai hpang e, ⁴ Mawshe gaw, mali shi ning shaning, shata shi langai a nhtoi langai ya shani e, Yehowa shi hpe hkangda made hte maren, Israela kashu kasha ni hpe htawn tsun wu ai. ⁵ Yawdan hka wora hkran Moba mung hta e, ndia tara ga Mawshe tsun hpaw wu ai gaw: ⁶ Anhte a Karai Kasang Yehowa Horeb bum e anhte hpe, Nanhte ndai bum e nga ai gaw ram ma salit dai; ⁷ rawt mu, hkawm sa wa manu; Amori masha nga ai bum ga hte de a makau hkan na layang ga, bum ga, apa ga, Dingda ga, nammukdara hka kau ga ngu ai, Yhprat hka kaba du hkra dam ai Hkanan masha ni a mung hte Lebanon bum de, sa wa ma su. ⁸ Yu mu, dai mungdan nanhte a man e ngai tawn ya se ai; nanhte a kaji kawa Abraham, Isak, Yaku hte hte, shanhte a hpang na matu mara ni hpe jaw na, nga nna Yehowa dagam da ai mung de shang nna madu la ma su, nga nna tsun ma ni ai. ⁹ Dai shaloi e ngai nanhte hpe tsun made ai gaw, Ngai hkrai sha nanhte hpe n dang gun nngai: ¹⁰ nanhte a Karai Kasang Yehowa nanhte hpe shalaw jahtam manit dai rai nna, yu mu, dai ni nanhte sumsing lamu a shagan ni zawn law htam nga myit dai. ¹¹ Nanhte a nji nwa ni a Karai Kasang Yehowa gaw, yha na hta htam hkying mun nanhte hpe naw shalaw jahtam nna, shi a ga ndat nga nga ai hte mare, shaman ya nga myit ga law! ¹² Nanhte a ru tsang lam, bungli lit gunhpai lam, gasat ningjet lam re ai ni hpe ngai hkrai kaning rai gun na rit ta? ¹³ Nanhte a amyu shagu hta myit hpaji hte zai byeng-ya rawng nna, sadang pru ai masha lata tawn mu; ngai shanhte hpe nanhte a ntsa na agyi dang ya made ga, ngu we ai. ¹⁴ Nanhte mung, Nang tsun ai hte maren galaw mai nga ai, nga nna htan myit dai. ¹⁵ Dai majaw nanhte a amyu shagu hta, myit hpaji rawng ai hte sadang pru ai masha hpe ngai lata la nna, nanhte a du agyi ngu na, masha hkying mi a agyi, latsa a agyi, manga shi a agyi, marai shi a agyi re ai ni hpe nanhte a ntsa e dang da ya masade ai. ¹⁶ Dai shaloi e nanhre a tara agyi ni hpe mung, Nanhte gaw, nanhte a nhpu nnau ni a arau lam madat ya nna, amyu madung shada na lapran raitimung, tsasam amyu hte na lapran raitimung, dingman ai hku tara dara mu. ¹⁷ Tara dara ai a lam hta masha a myiman tau yu lu na rai; masha kaji a ga hpe masha kava a ga zawn madat ya na rai myit dai; kadai wa hpe mung nanhte hkrit agam lu na n rai: kaning rai nme law, tara lam gaw Karai Kasang hte seng nga ai; nanhte n dang lu ai amu chyawm gaw ngai hpang de shashawn marit; ngai dai hpe madat ya na ring ngai, gai ngu nna hkangda we ai. ¹⁸ Nanhte hkan galaw na lam magup mung, dai shaloi e ngai nanhte hpe hkangda masade ai. ¹⁹ Dai hpang Horeb bum na anhte htawt hkawm wa nhtawm, anhte a Karai Kasang Yehowa hkang dat mi ai hte maren, Amori masha ni nga ai bum hprang ai lam hku sa wa yang, nanhte mu da ai dai hkrithpa nam mali kaba ting hpe anhte ga lai kau da nna, Kadesha harnea de du ga ai. ²⁰ Shaloi ngai nanhte hpe, Anhte a Karai Kasang Yehowa anhte hpe jaw ai Amori masha ni nga ai bum ga de nanhte du manit dai. ²¹ Yu u, na a Karai Kasang Yehowa gaw na a man e dai mungdan tawn ya nit dai: lung wa su, na nji nwa ni a Karai Kasang Yehowa nang hpe tsun dat ai hte maren, wa madu la nu; hkum hkrit et, myit mung hkum mang et, ngu made ai. ²² Shsloi nanhte a shawng e masha naw shangun yu ga; shanhte dai mung hpe lung yu nhtatwm, anhte gara hku lung lu na hte, kaning re ai mare de du na gaw, anhte hpe wa tsun dan maru ga, nga nna ngai hpe tsun myit dai. ²³ Dai hku ngai mung na ra nna, nanhte hta amyu mi na marai langai ngai di nna, marai shi lahkawng lata la we ai: ²⁴ shanhte mung bum ga hku kayin lung waw nna, Eshhkola kadit du hkra yu kau da mu ai. ²⁵ Shingrai dai mung na namsi shanhte di hpai nna, anhte hpang de la wa let, Anhte a Karai Kasang Yehowa anhte hpe jaw ai mungdan gaw mung kaja rai nga ai, ngai nna, wa tsun mi ai. ²⁶ Raitimung, nanhte gaw n lung hkraw myit dai hte, nanhte a Karai Kasang Yehowa hkangda ai ga hpe nhtan jashai nna, ²⁷ Yehowa gaw anhte hpe ndawng mi ai majaw, anhte hpe shabya kau lu hkra, Amori masha ni a lata hta up kau na nga, Egutu mung na anhte hpe shaw wa mi hka. ²⁸ Anhte gade wa lung wa na i? anhte a hpunau ni mung, Dai mung na masha ni gaw, anhte hta grau kaba ma ai, shing-yan mung grau galu ma ai; mare ni mung kaba ai hte, bunghku ni gaw lamu dep malu ai; dai hta kaga, dai mung hta e Anakim amyu masha ni hpe anhte mu gaw ai, nga nna anhte hpe minla bytaw shangun ma ni ai, nga nna nanhte gaw tinang a sum ni hta aput myit dai. ²⁹ Shaloi ngai gaw, Myit hkum kahpra myit; shanhte hpe hkum hkrit myit; ³⁰ Nanhte a shawng e hkawm sa wa ai, nanhte a Karai Kasang Yehowa gaw, nanhte a man e Egutu mung hta e mung, ³¹ nanhte hkawm sa wa ai nam mali lam dingdung hta mung, ndai shara du hkra, kawa gaw kasha hpe pawn lahku ai zawn, na a Karai Kasang Yehowa gaw nang hpe pawn lahku ai lam shagu hpe lu ai hte maren, nanhte hpang maga e naw gasat ya na ra ai, ngu nna nanhte hpe tsun made ai. ³² Raitimung, nanhte sum gap na dabang tam nna, nanhte sa wa na lam hpe madun ya na nga, shana e wan hta, shani e sumwi hta nanhte a shawng e hkawm sa wa ai nanhte a Karai Kasang Yehowa hpe ³³ ndai amu a lam hta nanhte kamsham myit dai n rai. ³⁴ Shaloi Yehowa nanhte a ga nsen hpe na nna masin pawt let, ³⁵ Nanhte a nji nwa ni hpe jaw na, ngu nna ngai dagam di ai mung dan kaja hpe, Yehpun a kasha Hkaleb hta kaga, ndai n hkru ai amyu hta na marai langai mi muk gaja wa teng teng mu lu na n rai; ³⁶ dai wa chyawm gaw mu lu na ru ai: shi gaw Yehowa hpe htep lahti hkan nang ai majaw, shi kabye lu sai ga hpe shi hte shi a kashu kasha ni hpe ngai jaw na mawe ai, nga nna dagam da wu ai. ³⁷ Nanhte a jaw e Yehowa gaw ngai hpe mung pawt nna, Nang pyi dai mungdan hta shang lu na n rai: ³⁸ na a man e tsap nga ai Nun a kasha Yawshu gaw shang lu na re ai; dai wa gaw Israela amyu masha ni hpe dai mungdan madu shangun lu na majaw, shi hpe shadaw shalan u. ³⁹ Dai hta n-ga, hpyen ni rim la na matu sha rai nga ma ai, nga nna nanhte tsun ai ma chyangai ni hte dai shani e kaja n kaja pyi garai n chye ginhka ai, nanhte a ma ni gaw, dai mung hta e shang lu nna, dai mung ngai shanhte hpe ap ya na mawe ai rai nna, shanhte dai hpe madu lu na mara ai. ⁴⁰ Nanhte chyawm gaw, kayin wa mu, Nawng hkying hku hkan nna dai nam mali de hkawm wa mu, nga ai. ⁴¹ Shaloi nanhte gaw, Anhte Yehowa hpe shut kau sagaw ai; Yehowa anhte hpe hkangda ai hte maren, anhte lung gasat na ga ai, nga nna ngai hpe htan let, langai hte langai tinang a ri nhtu lang nna, bum de lung na nga katu wa myit dai. ⁴² Yehowa chyawm gaw, Shanhte hpe ning ngu tsun u, Ngai nanhte kaw n lawm nngai majaw, hkum lung mu, hkum gasat myit: gasat yang nanhte a hpyen ni nanhte hpe dang kau na myit dai; ⁴³ nga nna ngai e tsun ai hte maren, ngai nanhte hpe htawn tsun made ai raitimung, nanhte madat myit dai n rai: nanhte Yehowa a hkangda ai ga ahpe tawt lai nna, gumrawng ai myit hte dai bum ga de lung wa myit dai. ⁴⁴ Dai bum ga e nga nga ai Amori masha ni gaw lagat jawm ai zawn nanhte hpe hkan ginbawm nna, Seira bum hte Horma shara du hkra hkan gasat kau dat myit dai. ⁴⁵ Shaloi nanhte bai wa nna, Yehowa man e hkrapngu hkrapngoi rai myit dai; raitimung Yehowa gaw nanhte a nsen hpe n madat wu ai hte, nanhte a ga n na wu ai. ⁴⁶ Shingrai nanhte gaw Kadesha shara e nga nga nna, dai kaw e na na wa hkring kau mu ai.

¹ Bai, Yehowa ngai hpe tsun da ai hte maren, anhte bai nhtang sa wa nna, Nawng hkyeng hprang ai lam hku hkan yang, dai nam mali de hkawm du ga ai; shingrai nhtoi na na wa, Seira bum hpe anhte kayin hkawm nga ga ai. ² Shaloi Yehowa ngai hpe tsun nngai gaw, ³ Ndai bum hpe nanhte kayin hkawm ai gaw ram ma salit dai; dingdung maga de lung wa manu: ⁴ amyu mash ni hpe mung ning mgu hkangda mu:Seira bum e nga nga ai nanhte a nhpu nnau Esaw a kashu kasha ni a lamu ga jarit hku nanhte hkawm lai wa na rai nna, shanhte nanhte hpe hkrit na ma ai; dai re ai majaw nanhte nan grai sadi nga mu. ⁵ Shanhte hpe hkum shatsang mu; Seira bum gaw Esaw hpe ngai ap ya kau se ai re ai majaw, shanhte a lamu ga hta na, ngai nanhte hpe karan jaw na nngai n rai; lagaw kabye na shara pyi karen jaw na n rai. ⁶ Sha na matu lusha gaw gumhpraw hte nanhte mari lu na myit dai; lu na ntsin mung, gumhpraw hte mari lu na rai myit dai. ⁷ Kaning rai nme law, na a Karai Kasang Yehowa gaw lam shagu hta nang hpe shaman ya nit dai; ndai nam mali kaba hta e nang hkawm sa wa ai lam hpe shi dum ya nga ia; ndai mali shi ning tup na a Karai Kasang Yehowa gaw nang hte rau nga nga sai rai nna, nang hpa mung n ra hkra rai nit dai, ngu nngai. ⁸ Shingrai, Seria bum hta nga nga ai anhte a hpunau Esaw a kashu kasha ni a makau hku anhte lai wa nna, Elat hte Ezion-geba mare kaw nna sa wa ai layang lam hku hkan sa wa nhtawm, bai kayin nna Moba nam mali lam hku lung mat wa ga ai. ⁹ Shaloi Yehowa gaw, Moba masha ni hpe hkum shatsang mu; shanhte hte majan hkum galaw myit: Ara mare hpe gaw Lawt a kashu kasha ni hpe ngai ap ya mase ai re ai majaw, shanhte a mung hta na ngtai nanhte hpe madu shangun na made ai n rai, nga nna ngai hpe tsun ai. ¹⁰ (Moi shawng de, Anakim masha ni zawn hkum shing-yan tsaw ai hte galu kaba nna law htam nga ai Emim amyu masha ni gaw dai mung hta e nga nga ma ai. ¹¹ shanhte gaw Anakim masha ni zawn Rehpim ngu ai ni rai nga ma ai; Moba masha i chyawm gaw shanhte hpe Emim ngu shamying mu ai. ¹² Seira bum hta e Hori masha ni moi shawng de nga nga ma timung, Esaw a kashu kasha ni shanhte a hpang e sa nga ma ai: Yehowa gaw Israela mahsa ni hpe ap ya ai mung hta shanhte galaw ai hte maren, Esaw a masha ni Hori masha ni hpe gasat kamang kau nhtawm shanhte a shara hpe up sha kau ya mu ai.) ¹³ Ya rawt nna Zered hkaraw hpe rap mu, nga nna tsun ai hte maren Zered hkaraw hpe anhte rap ga ai. ¹⁴ Yehowa dagam kau wu ai hte maren, ndai hpyendap hta lawm ai dai prat na hpyen masha nlang hte si grawm mat ma hkra, Kadesha Barnea de ningnan du ai shani kaw nna, Zered hkaraw tap ai nhtoi du yang, sumshi matsat ning na wa sai, rai nga ai. ¹⁵ Shingrai dai ni n si grawm mat dingsa, shanhte hpe ndai dap hta na shamyit kau lu hkra nga, Yehowa a lata gaw shanhte hpe htim shadang nga ai. ¹⁶ Shingrai, dai hpyen masha ni nlang hte shawa hpung hta na si grawm mat ma jang she, ¹⁷ Yehowa ngai hpe tsun nngai gaw, ¹⁸ Nang dai ni Moba lamu ga jarit na Ara ginwang hku ga lai wa na rai ndai. ¹⁹ Ammon masha ni nga ai de du wa jang shanhte hpe hkum shatsang myit, shanhte hte hkum gasat mhyit: Ammon a kashu kasha ni a lamu ga hta na ngai nang hpe madu shangun na n rai: dia gaw Lawt a matu ni hpe ngai jaw ka mase ai, nga ai. ²⁰ (Dai yang e mung Rehpim ngu ai masha ni a lamu ga re ai nga myit ma ai; Rehpim ngu ai ni moi prat e dai yang nga ma ai; Ammon masha ni chyawm gaw dai ni hpe Zamzumim masha nga nna shamying ma ai: ²¹ dai ni gaw galu kaba nna, law htam ai hte Anakim masha ni zawn hkum shing-yan tsaw ai amyu rai ma ai: ²² raitimung, Seria bum e nga ai Esaw a kashu kasha ni a man na Hori masha ni hpe Yehowa shamyit kau nna shanhte a shara e dai ni du hkra Esaw a kashu kasha ni nga lu ai zawn, Ammon masha ni hpe shamyit kau wu ai rai nna, shanhte a shara e Ammon masha ni nga ma ai: ²³ dai hte maren, Hkaphtora mung na pru ai Hkaphtori masha ni mung Gaza mare du hkra nga ai kahtawng ni hta na Awim masha ni hpe wa shamyit kau nna, shanhte a shara hta galai nga ma ai.) ²⁴ Ya rawt nna hkawm sa wa mu; Arnon hkaraw rap manu: yu u, Amori masha Heshesbon hkawhkam Sihon hte shi a lamu ga na a lata hta ngai ap ya sade ai; ga dai madu la magang na shi hpe sa gasat u. ²⁵ Sumsing lamu a npu e nga ai masha amyu nlang hte hpe, dai ni kaw nna nang hpe hkrit gari ai hte ma shajang shangun na mawe ai; shanhte gaw na a shi na jang, na a majaw shanhte gari kanan nna myit htum shajang na ma ai, nga nna tsun dat nngai. ²⁶ Shaloi ngai gaw Kedmot mali kaw nna Hesbon hkawhkam Sehon hpang de kasa shangun dat nna, ²⁷ Na a mung ka-ang hku ngai ga lai wa n ga; nmaw lam hku sha ngai hkan na nngai; pai de hkra de ngai n yit na nngai. ²⁸ Anhte a Karai Kasang Yehowa anhte hpe jaw ai mungdan de Yawdan hka rap nna, du wa lu ai du hkra, ngai sha na shat, ngai lu na ntsin gaw, ²⁹ Seira bum e nga ai Esaw a kashu kasha ni hte, Ara e ngai ai Moba masha ni ngai hta galaw ai zawn, nang mung gumhpraw hte dut jaw e, lagaw hte sha ngai kabye lai lu n ga, ngu nna ga ngwi ga pyaw hte tsun we timung, ³⁰ Hesbon hkwhkam Sihom gaw anhte law wa na ahkang n jaw mi ai: kaning rai nme law, dai ni mu nga ai hte maren, nanhte a Karai Kasang Yehowa gaw, dai hkawhkam wa hpe nanhte a lata hta ap kau na matu, shi a wenyi hpe shaja ya nna, shi a myit hta nhtan shashai ya nu ai. ³¹ Bai Yehowa gaw, Yu u, Sihon hkawhkam hte shi a lamu ga ngai nang hpe jaw magang de ga; dai hpe sali ga matu, madu la magang u, nga nna ngai hpe tsun nngai. ³² Shaloi Sihon gaw shi a masha ni nlang hte hte, Yahat shara e anhte hpe hkap gasat na nga pru sa wa ai. ³³ Anhte a Karai Kasang Yehowa mung, shi hpe anhte a lata hta ap mi ai rai nna, shi hkum hte shi a kasha ni hpe mung, shi a masha ni nlang hte hpe mung, anhte st kau lu ga ai. ³⁴ Dai shaloi e shi a mare nga manga anhte kashun la nna, mare ninghkrin nlang hte hta na, numsha, lasha, ma kaji yawng hpe atsai awai hpya kau gaw ai; langai mi muk ngam da ga ai n rai: ³⁵ Yamnga ni hte kashun la lu ai mare kata na lanep rai ni hpe sha anhte magawn la kau ga ai. ³⁶ Shingrai, Arnon hkaraw makau na Aroera hte dai hkaraw kata na mare kaw nna, Gilead ga du hkra anhte n dang lu ai mare langai mi muk n nga ai; anhte a Karai kasang Yehowa gaw yawng mayawng anhte hpe ap kau ma ni ai: ³⁷ raitimung, Amon masha ni a lamu ga, Yabok hka ginwang ting hte bum ga na mare ni yawng ngu ai, anhte a Karai Kasang Yehowa hkum da mada hte chyawm gaw, nang n hkra ndai.

¹ Bai anhte kayin nna Basham mung lam hku lung wa ga ai: Bashan hkawhkam Oga mung shi a masha ni nlang hte hte Edri shara e anhte hpe hkap gasat na nga pru sa wa ai. ² Yehowa chyawm gaw, Shi hpe hkum hkrit et; shi hpe mung, shi a masha ni hte hpawn, shi a lamu ga mung na a lata hta ngai ap ya sade ai: Hesbon e dung ai Amori hkawhkam Sihon hpe di ai zawn, dia wa hpe mung di na rai ndai, nga nna ngai hpe tsun ai. ³ Shing nga anhte a Karai Kasang Yehowa gaw Bashan hkawhkam Oga hte shi a masha ni nlang hte mung, anhte a lata hta ap mi ai rai nna, shi a matu ngu na langai mi muk n ngam hkra sat kau gaw ai. ⁴ Dai shaloi e anhte gaw shi a mare ni nlang kashun la kau ga ai; shanhte kaw na n dang la lu ai mare langai mi muk ngam sai n rai: dia hte gaw Bashan mung hta Oga a mungdan ngu na mare kru shi rawng ai Argoba ginwang ting rai nga ai. ⁵ Dai mare ni yawng gaw bunghku tsaw ai hte chyinghka hkik nna htinggrang brep brep rai kum ai hkrai rai nga ai; dai hta kaga bunghku n kum ai kahtawng law law mung naw lawm nga ai. ⁶ Hesbon hkawhkam Sihon hpe di ai zawn, dai mare ni hpe mung, anhte di gaw ai: mare ninghkrin nlang hte hta na, numsha, lasha, ma kaji yawng hpe atsai awai hpya kau gaw ai. ⁷ Yamnga ni yawng hte mare ni hta na lanep rai ni hpe sha, anhte magawn la kau ga ai. ⁸ Dai shaloi e Arnon hkaraw kaw nna Hermon bum du hkra re ai, Yawdan hta wora hkran na Amori hkawhkam lahkawng a mungdan hpe anhte madu la ga ai: ⁹ (dai Hermon bum hpe Sidon masha ni gaw Sirion, Amori masha ni chyawm gaw Senira, nga nna shamying ma ai:) ¹⁰ shingrai, layang ga na mara ni nlang hte hte, Gilead mung ting, Bashan mung ting, Bashan mung hta Oga a mungdan hte seng ai Saleka hte Edri mare hkan du hkra, anhte madu la ga ai. ¹¹ (Kaning rai nme law, Rehpim ngu ai mayu hta na hkrat ai, Bashan hkawhkam Oga chyu sha ngam nga sai; yu u, shi a yupku gaw hpri yupku rai nga ai: dai gaw Amon kashu kasha ni a mung na Raba mare hta nga nga lu ai n rai ni? masha a dawng hku sawn yang, dai gaw galu de dawng jahku, nda de dawng mali rai nga ai.) ¹² Rai sa, lamu ga dai hte gaw dai shaloi e anhte madu la lu sagaw ai: dai hpe Arnon hkaraw makau na Aroera mare kaw nna, Giled bum ga ka-ang hprut hte dai hta lawm ai mare ni gaw, Rubin matu ni hte Gad matu ni hpe ngai jaw mase ai: ¹³ Naw ngam ai Gilead mungdaw mi hte Oga a mungdan ngu ai Bashan ga ting gaw Manashe amyu chyen ni hpe ngai jaw mase ai: dai gaw Bashan mung hta na Argoba ginwang hte rai nga ai. ( Dai mung Rehpim masha ni a lamu ga re ai, nga ma ai. ¹⁴ Manashe a kasha Ya-ira gaw Argoba ginwang ting hpe, Geshuri hte Mahkahti masha ni a lamu ga jarit du hkra madu la nhtawm, shi a mying hkan nna, dai ni du hkra dai Bashan mung a mare ni hpe Hawot-Y-ira ngu nna shamying da wu ai.) ¹⁵ Bai Gilead mung gaw Mahkira hpe ngai jaw se ai. ¹⁶ Gilead mung kaw nna, Arnon hkaraw du hkra, dai hkaraw nna ran, Amon masha ni a lamu ga jarit rai nga ai. Yabok hka htep re ai aga ting: ¹⁷ Genesaret nawng kaw nna, layang ga ting ngu na Yawdan hka kau dingyang hte layang ga na jum Nawng, sinpraw hkran Pisga bum manep du hkra, Rubin matu ni hte Gad matu ni hpe ngai jaw mase ai. ¹⁸ Dai aten e ngai gaw, Nanhte a Karai Kasang Yehowa nanhte hpe dai lamu ga jaw madu manit dai; raitimung, majan gun chye ai ni nlang hte gaw hpyen ri nhtu lang nna, nanhte a hpunau Israela kashu kasha ni a man e rap sa wa na rai myit dai. ¹⁹ Yehowa nanhte hpe ban sa ai jaw manit dai hte maren, nanhte a hpunau ni hpe mung ban sa shangun ai du hkra, nanhte a Karai Kasang Yehowa jaw ai Yawdan hka wora hkran ga shanhte madu la lu na matu, ²⁰ Nanhte a madu jan kasha ni hte nanhte a yamnga ni gaw, ngai jaw da sai mare ni hta nga nga lu na rai ma ai: nanhte hta yamnga law nga malit dai gaw ngai chye nga nngai: amu ngut ma jang she nanhte yawng gaw ngai jaw da sai hte maren, langai hte langai tinang madu ai Sali ga de bai wa lu na rai myit dai, ngu nna nanhte hpe ngai hkangda made ai. ²¹ Shaloi e Yawshu hpe mung, Nanhte a Karai Kasang Yehowa ndai hkawhkam yan hta galaw ai lam yawng mayawng hpe nang hkum nan mu manit dai: ndai hte maren nang du hkawm sa wa ai mungdan shagu hta Yehowa galaw ya na ra ai. ²² Dai ni hpe hkum hkrit myit: kaning rai nme law, nanhte a Karai Kasang Yehowa gaw nanhte hpang maga majan gasat nga ai, ngu nna hkangda we ai. ²³ Dai aten e Yehowa hpemung ngai hpyi nem we ai gaw, ²⁴ Yehowa Madu e, Nang gaw na a mayam hpe na a galu kaba ai hte, na a n-gun ja ai lata madun hpang nit dai: nang zawn daru magam bungli hte hpung dagu amu shapraw lu ai Karai Kasang gaw, sumsing lamu hte ginding aga ntsa e kadai wa nga a ta? ²⁵ Yawdan hka wora hrkan de nga ai kaja ai bum ga hte Lebanon bum hpe mu lu n ga, ngai hpe rap wa lu na ahkang jaw e, ngu nna hpyi we ai. ²⁶ Yehowa chyawm gaw nanhte a majw ngai hpe pawt nga ai rai nna, nye a ga madat ya sai n rai: shingrai Yehowa gaw, Dai hte ram nu ga; htawmhpang de dai hte seng ai lam ngai e hkum hpyi nit; ²⁷ Raitimung, Pisga bum pungding de lung nhtawm, sinpraw sinna, dingdung dingda mada nna, dai mungdan hpe yu la u; Yawdan hka chyawm gaw nang rap lu na n rai. ²⁸ Yawshu hpe mahtang hkangda nna, shi hpe shaja da u, shadaw shangang tawn u: shi gaw ndai amyu a man e hkawm sa nna, nang mu da na rin dai mungdan hta Sali wunli woi dagraw lu na ra ai, nga nna ngai hpe hkangda nngai. ²⁹ Shingrai anhte gaw Bet-Peora hte tawtap na kadit e but nga ga ai.

¹ Ya, Israela amyu e, nanhte asak hkrung nga lu nna, nanhte a nji nwa ni a Karai Kasang Yehowa nanhte hpe jaw da ai mungdan hta shang madu sha lu hkra, nanhte hkan shatsup nga na matu ngai sharin achyin da ai matsun maroi ga hte hkangda ai tara ga hpe madat mara la mu. ² Dai ngai nanhte hpe hkangda ai hte hta ga ningnan jat lu na n rai, ndai hta na langai mi muk lat kau lu na n rai: ngai nanhte hpe hkangda sai nanhte a Karai Kasang Yehowa a tara matsun ni hpe nanhte hkan shatsup nga lu na rai myit dai. ³ Bala-Peora majaw Yehowa dikau ai lam hpe nanhte hkum nan mu ma manit dai: Bala-Peora lam hkannang ai ni nlang hpe nanhte a Karai Kasang Yehowa hta manoi nga ai nanhte ni chyawm gaw dai ni du hkra hkrung nga lu manit dai. ⁴ Nanhte a Karai Kasang Yehowa hta manoi nga ai nanhte ni chyawm gaw dai du hkra hkrung nga lu manit dai. ⁵ Yu u, nanhte wa nna shang sha lu ai mungdan hta hkan nang nga na matsun maroi ga hte hkang ai tara gaw, nye a Karai Kasang Yehowa tsun da ai hte maren ngai nanhte hpe sharin achyin da ma masade ai. ⁶ Dai rai nna dai ga hpe hkan shatsup nga mu; dai rai jang, ndai matsun maroi ga nlang hte hpe na yu nna, Gaja wa ndai galu kaba ai amyu gaw, hpaji byeng-ya hte kunghpan ai amyu rai nga ai, nga nna nanhte a lam kajai tsun na maigan amyu ni a man e, dai gaw nanhte a paji byeng ya hte kunghpan ai lam tai na rai nga ai. ⁷ Kaning rai nme law, anhte hpyi gang ai lam shagu hta anhte a Karai Kasang Yehowa anhte hte ni nga ai zawn, amyu kaba gale ni hta dai zawn ni ai Hpara kadai lu a ta? ⁸ Dai hta kaga, dai ni ngai nanhte hpe tawn da ya ai tara made dinghpring ai matsun maroi ga hte hkang ai tara ga gaw, amyu kaga gale ni hta kadai wa lu a ta? ⁹ Dai rai nna, nang hkum nan myi chyi mu lu sai lam ni hpe nang n malap kau ai sha, prat dingsa matsing gun nga lu n ga, tinang hkum nan sadi nna, tinang myit masin hta a maja nga u; dai lam ni hpe na a nshu nsha ni e mung sharin achyin ya nga u: ¹⁰ Dai gaw, Horeb bum hta na a Karai Kasang Yehowa a man e nang tsap nga yang, Amyu masha ni hpe ngai kaw jahpawn tawn ru; dinghta ga ntsa e shanhte hkrung nga prat dingsa ngai e hkrit hkungga ai hte kashu kasha ni hpe sharin achyin ya nga lu hkra, nye a mungga ngai shanhte hpe na la shangun na mawe ai, nga nna Yehowa ngai hpe tsun ai lam rai nga ai. ¹¹ Nanhte mung sit sa wa nna, dai bum lagaw e tsap nga myit dai; dai bum mung lamu du hkra wan grung nna, nsin sin ai, sumwi mawng ai hte achyang amang rai sin mak nga ai. ¹² Shaloi Yehowa gaw dai wan kata kaw nna nanhte hpe saga myit dai: ga ningsen nanhte na lu myit dai, raitimung hkum hkrang n mu ya myit dai: nsen sha nanhte na myit dai. ¹³ Nanhte hkan nga lu na matu, hkangda ai ga shaka ngu na tara ga kanu shi mung, shi nan nanhte hpe tsun dan nna, lungpa lahkawng hta ka da nu ai. ¹⁴ Nanhte wa nna madu sha nga na mungdan hta hkan nang lu na matu, ngai nanhte hpe sharin achyin ya na matsun maroi ga hte hkang ai tara ga ni hpe, dai shaloi e Yehowa ngai hta hkangda ni ai. ¹⁵ Horeb bum e wan kata nna, Yehowa nanhte hpe shaga myit dai shaloi, hpa zawn san ai hkrang mung nanhte n mu myit dai hte maren, ¹⁶ Htawmhpang de nanhte htak byak wa nna, ala nsan ai, anum nsan ai shinggyim masha hkrang hte bung ai tawk ai sumla; ¹⁷ Ga ntsa e nga ai yamnga baw a hkrang; ntsa malen e pyen ai u a hkrang; ¹⁸ Ga hta gumrawt hkawm ai dust amyu a hkrang; ga a manep hka hta nga ai anga baw a hkrang hte bung ai tawk ai sumla, tinang a matu n galaw hkrup myit ga gaw: sumsing lamu de mada yu nna mung, na a Karai Kasang Yehowa gaw sumsing lamu a npu na shinggyim masha ni a matu san da ai ja, shata, shagan ni ngu ai sumsing lamu a zaw nawng zaw wa ni hpe mu lu myit dai shaloi, daihpe nawku ga nga yang, nanhte n naw n ku na hte n hkannang shut lu hkra, tinang dai dai tinang sadi nga mu. ¹⁹²⁰ Nanhte hta, dai ni rai nga ai hte maren, Yehowa a matu Sali wunli amyu tai myit ga nga, Egutu mung a hpri wan mang na shi nanhte hpe gare la manit dai. ²¹ Dai hta kaga nanhte a majaw Yehowa ngai hpe masin pawt nna, Yawdan wora hkran de ngai n rap sa lu n hte, nanhte a Karai Kasang Yehowa nanhte hpe Sali wunli matu jaw ai dai reng ai mungdan n shang sha lu na lam, dagam kau nu ai: ²² Dai rai nna, ndai ga e ngai si na ni ai; Yawdan hka ngai rap lu sa na n rai; nanhte chyawm gaw rap sa wa nna dai mai kaja ai mungdan shang sha lu na manit dai. ²³ Dai re ai majw, nnahte Karai Kasang Yehowa nanhte hte tawn da ai ga shaka hpe malap kau nna, nanhte a Karai Kasang Yehowa hkum da ai arai ni a hkrang hte bung ai tawk ai sumla n galaw hkrup myit ga, tinang dai dai tinang sadi nga mu. ²⁴ Kaning rai nme law, nanhte a Karai Kasang Yehowa gaw grung nga ai wan, nsu nnawn loi ai Karai Kasang rai nga ai. ²⁵ Nanhte kashu kasha shaprat nna, dai mungdan hta nga na wa jang, bai htak byak nna lama ma a hkrang hte bung ai sumla tawk tawn nna, nanhte a Karai Kasang Yehowa a masin shapawt ya na hku shi a man e n shawp ai amu galaw myit yang gaw: ²⁶ Sumsing lamu hte ginding aga e gang nna dai ni ngai nanhte hpe madat tsun da made ga, Yawdan hka rap nna nanhte shang sha ai mungdan hta gade n na yang teng teng htum mat na myit dai; dai mung hta na na wa hkrung nga lu na myit dai n rai: atsai awai htum mat kaw du na marin dai. ²⁷ Yehowa nanhte hpe tsasam amyu ni hta shabra kau dat nna, nanhte hpe woi mat wa ai amyu ni a hpawng kata e, nanhte gaw kachyi sha rai mat hkra kaji mat na myit dai. ²⁸ Dai hkane myi n mu, na n na, n lu n sha chye ai hte manam n chye ai, masha lata hte tawk la ai hpun hpara nlung hpara re ai ni hpe nanhte nawku lu na marin dai. ²⁹ Raitimung, dai hkan e nanhte a Karai Kasang Yehoa hpe bai tam myit dai shaloi, myit masin, kraw lawang ting hte shi hpe tam myit yang chyawm gaw, mu lu na marin dai. ³⁰ Htawmhpang prat e ndai lam yawng mayawng hte katut nna ruyak kyindut ai hkrum sha ai shaloi, na a Karai Kasang Yehowa hpang de bai wa nna, shi a nsen madat lu na marin dai: ³¹ Kaning rai nme law, na a Karai Kasang Yehowa gaw matsan dum chye ai Karai Kasang rai nga ai: nang hpe shi kabai kau rap di na wu ai n rai; atsai awai nan di kau na n rai; na nji nwa ni hta dagam da ai ga shaka hpe malap na wu ai n rai. ³² Ginding aga ntsa e Karai Kasang shinggyim masha hpan da ai nhtoi kaw nna, nanhte garai n pra yang na lai mat wa sai prat hte ting hta, lamu htum maga mi kaw nna maga mi de du hkra gawn yu mu; ndai daram kaba ai amu byin yu sa ni? ndai zawn re ai shiga na yu mit ni? ³³ Karai Kasang wan kata na tsun dat ai nsen hpe na lu ninglen nang hkrung nga lu ai zawn, amyu gale ni hta nga nga a ni? ³⁴ Nanhte a Karai Kasang Yehowa Egutu mung hta nanhte a man e galaw dan ai zawn chyam dinglik ai, lamik kumla hte mauhpa amu madun ai, hpyen majan shapraw ai, n-gun ja ai lata hte ladawn ai lahpum sharawt ai, hkrithpa shingran madun ai di nna, Hpara shaje langai wa mi masha amyu mi hta na masha amyu mi hpe tinang a matu nga nna shaw la yu ai, nga a ni? ³⁵ Yehowa chyu sha Karai Kasang rai nga ai hte shi hta kaga Karai Kasang shaje n nga ai gaw nanhte chye lu myit ga she, nanhte hpe dai hte madun ai rai nga ai. ³⁶ Nang hpe sharin achyin na nga, sumsing lamu de nna shi a ga nsen nan na lu shangun nit dai; ga ntsa e shi a grung ai wan kaba mu lu shangun wu ai rai nna, nang mung dai wan kata na shi a ga na lu lit dai. ³⁷ Na nji nwa ni hpe shi tsawra wu ai majaw shanhte a amyu matu ni hpe lata la nu ai; ³⁸ nang hta grau kaba nna grau law ai amyu ni hpe na a man na shi shaden kau ya nna, dai ni rai nga ai hte maren shanhte a lamu ga hta nang hpe woi shawn nna, Sali wunli madu shangun na nga, shi a nsam kaba hte Egutu mung kaw nna shi a man de shaw wa nit dai. ³⁹ Dai rai nna, Yehowa gaw sumsing lamu lahta tang hte ginding dinghta ga ntsa e Karai Kasang rai nga ai mung, Karai shaje mi n nga sai mung, dai ni dumhprang nna kraw lawang kata e matsing gun nga mu law. ⁴⁰ Nang hte na a nshu ni ngamu ngamai lu hkra mung, na a Karai Kasang Yehowa prat tup matu nang hpe jaw tawn ai mungdan hta nang asak galu n ga mung, dai ni tsun da ai matsun maroi ga hte hkang ai tara ga hpe hkan shatsup nga lu na rai myit dai, nga nna Mawshe hkaw tsun da ai rai. ⁴¹ Dai tsun ngut jang Mawshe gaw, htingbu manang wa ndawng ai myit n rawng ai she, n dum shami sat kau hkrup ai wa hprawng shingbyi lu na mare masum, ⁴² Yawdan hka sinpraw, jan pru maga hkran e lata san da wu ai: ⁴³ dai mare ni gaw, Rubin amyu a matu nam mali pa hta nga ai Bezera; Gad amyu a matu Gilead mung na Ramot; Manashe amyu na ni matu Bashan mung na Golan rai nga ai. ⁴⁴ Da ndai gaw Israela kashu kasha ni hpe Mawshe tawn da ya ai Tara rai nga ai: ⁴⁵ Egutu mung na shanhte pru wa ma yang, Hesbon e dung ai Amori hkawhkam Sihon a lamu ga, Yawdan hka sinpraw hkran, Bet-peora hte tawtap na kadit e, Mawshe, Israela kashu kasha ni hpe tsun da ai sakse ga, matsun maroi ga hte hkangda ai tara ga rai nga ai: ⁴⁶ Egutu mung na pru wa ma yang Mawshe hte Israela kashu kasha ni gaw dai hkawhkam hpe sat kau nna, ⁴⁷ shi a lamu ga mung, Bashan hkawhkam Oga a lamu ga hpe mung madu la kau ma ai: ⁴⁸ shan gaw, Arnon hkaraw makau na Aroera mare kaw nna, Hermon ngu ai Sion bum htep, Yawdan hka sinpraw hkran na pa hte hpawn, ⁴⁹ dai pa a matu nawng makau na Pisga a bum manep du hkra up ai Yawdan ha wora hkran sinpraw maga de na Amori hkawhkam lahkawng yan rai ma ai.

¹ Shaloi Mawshe gaw Israela kashu kasha ni nlang hte hpe shaga nna, Israela amyu e, dai ni ngai nanhte hpe shana da ai matsun maroi ga hte hkangda ai tara ga hpe sharin la nna hkan nang lu hkra sadi nga na matu, madat mara la maru. ² Anhte a Karai Kasang Yehowa gaw, Horeb bum e anhte hte ga shaka da mi ai. ³ Yehowa gaw dai ga shaka, anhte a ji wa ni hte tawn da wu ai n rai; dai ni asak hkrung let ndai yang e nga ai anhte nlang hte nan tawn da ma ni ai. ⁴ Yehowa gaw dai bum e wan hta nna nanhte hte myiman tut rai tsun manit dai. ⁵ Dai shaloi e, nanhte wan dai hpe hkrit nna, bum de n lung gwi myit dai majaw, ngai gaw Yehowa a ga nanhte hpe htawn tsun ya na matu Yehowa hte nanhte a lapran e tsap nga nngai; tsun dat ai gaw: ⁶ Ngai gaw, Egutu mung hte mayam tai nga ai nta na nang hpe shapraw la ai, na a Karai Kasang Yehowa rai nga nngai. ⁷ Ngai hta kaga Karai Kasang shaje hpe hkum naw hkum du et. ⁸ Lamu a lahta tang, lamu a npu ga ntsa tsang, ga a npu hka hpungtang hta rawng ai baw a hkrang hte bung ai sumla, nang na a matu hkum galaw hkum shachyaw et; ⁹ dai hpe hkum naw hkum ku, hkum jaw hkum jau et: kaning rai nme law, ngai na a Karai Kasang Yehowa gaw, nsu nnawn loi ai Karai Kasang rai nga nngai rai nna, ngai hpe ndawng n yawt ai ni a amyu lakung hpe gaw kawa ni a yubak kasha ni hta prat masum prat mali du hkra jaw nga nngai; ¹⁰ ngai hpe tsawra nna ngai hkangda ai matsun hkan nang ai ni hpe gaw, lamun latsa prat du hkra matsan dum ai hku a galaw nga nngai. ¹¹ Na a Karai Kasang Yehowa a mying ningsang hpe kaman lila hkum gang hkum tsun et; kaning rai nme law, shi a mying ning sang kaman lila gang ai wa hpe, Yehowa mara n shagun ai, nga na wu ai n rai. ¹² Na a Karai Kasang Yehowa nang hpe hkangda sai hte maren, laban nhtoi hpe shachyoi shapra na, dai hpe matsing nga u: ¹³ kru ya nhtoi tup nang amu bungli galaw nna na a makan lam shachyuen nga na rai ndai; ¹⁴ sanit ya nhtoi gaw na a Karai Kasang Yehowa a matu laban nhtoi rai nga ai; dai shani e nang hte na a shayi shadang sha ni mung, na a mayam num mayam la mung, na a dumsu, lawze re ai na a yamnga ni mung, na a chyinghka kata e rawng ai tsasam manam mung amu bungli galaw lu na n rai; nang ban sa nga ai hte maren, na a mayam num mayam la ni mung ban sa lu na rai nga ai. ¹⁵ Nang Egutu mung e mayam tai nga rawng nit dai mung, na a Karai Kasang Yehowa n-gun ja ai lata, shada ngai ai lahpum hte dai daw na nang hpe shapraw la nit dai mung, nang dum nga lu na rai ndai; de a majaw, laban nhtoi matsing nga lu na, na a Karai Kasang Yehowa nang hpe hkangda nit dai. ¹⁶ Na a Karai Kasang Yehowa nang hpe jaw ai mungdan hta, na a asak galu nna ngamu ngamai lit ga, na a Karai Kasang Yehowa nang hpe hkangda sai hte maren, na nnu yan nwa hpe hkungga lara di u. ¹⁷ Masha hkum sat et. ¹⁸ Masha num mung hkum shaw et. ¹⁹ Masha arai mung hkum lagu et. ²⁰ Na a htingbu manang wa a lam mung, n teng n man ai sakse hkum hkam et. ²¹ Na a htingbu manang wa a madu jan hpe mung, ra marit ai myit hkum rawng et; na a htingbu manang wa a ndum nta, yi hkauna, mayam num mayam la, dumsu lawze re ai, na htingbu manang wa lu ai arai hpa hpe mung ra marit ai myit hkum rawng et, nga ai. ²² Ga dai ni gaw dai bum e awan, sumwi hete htat ai nsin kata nna, Yehowa shi nan nsen kaba hte nanhte hpawng nga shawa ting hpe tsun dat nu ai: dai hte hta tsun jat sai n rai: ga dai ni hpe mung lungpa lahkawng hta shika nna ngai e ap ya ni ai. ²³ Nsin kata na nsen nanhte na lu ai hte, dai bum wan grung nga ai shaloim nanhte hta na amyu ladung agyi ni hte salang ni nlang hte gaw ngai kaw sit sa nna, ²⁴ Yu u, anhte a Karai Kasang Yehowa shi a hpung shingkang hte daru magam anhte hpe madun dan ma ni ai; wan grung ai kata na shi a ga ningsen mung, anhte na lu saga ai: Karai Kasang Yehowa shi nan masha hte shaga nga ninglen, masha naw hkrung nga lu ai gaw, dai ni anhte mu chye saga ai. ²⁵ Ya, anhte hpa rai si wa na rai ta? Ndai grung la ai wan hte anhte si ma na ra ga ai: anhte a Karai Kasang Yehowa shaga ai nsen anhte naw a na nga yang gaw si lu na ga ai. ²⁶ Kaning rai nme law, ahkrung nga ai Karai Wa shi nan wan hta nna shaga ai nsen hpe anhte na lu ai zawn, shinggyim masha hta kadai wa na ninglen hkrung lu a ta? ²⁷ Nang madu mahtang sit sa nna, anhte a Karai Kasang Yehowa tsun matsun madat la su: anhte a Karai Kasang Yehowa nang hpe tsun matsun anhte hpe htawn tsun mi; anhte madat la nna hkan galaw na ga ai, nga nna hpyi myit dai. ²⁸ Shing nga nanhte ngai e hpyi ai lam Yehowa na wu ai rai nna, Yehowa mung, Dai amyu masha ni nang hpe hpyi ai ga ngai na se ai; shnhte a ga nlang mung htuk nga malu ai. ²⁹ Shanhte hte shanhte a kashu kasha prat dingsa ngamu ngamai lu hkra, ngai e hkrit hkungga nna ngai hkangda mada hkan sa mayu ai myit tutnawng rawng nga mu ga. ³⁰ Shanhte hpe, Nanhte a sum de wa manu, ngu nna wa tsun dat u. ³¹ Nang chyawm gaw ndai yang nye a makau e tsap nga ru; ngai shanhte hpe jaw tawn ai mung hta shanhte hkan nga na matu, nang shanhte hpe sharin achyin ya na hkangda mada, matsun maroi hte dawdan ai tara mahkra ngai nang hpe tsun hti de ga, nga nna ngai hpe tsun nngai. ³² Dai rai nna, nanhte a Karai Kasang Yehowa nanhte hpe hkangda sai hte maren, nanhte hkan nang lu na rai myit dai: pai de hkra de yit lu na myit dai n rai. ³³ Nanhte madu sha na marin dai mungdan hta nanhte hkrung nga lu nna, ngamu ngamai na hte asak galu malit ga gaw, nanhte a Karai Kasang Yehowa nanhte hpe hkang d ai lam magup hta nanhte hkan sa lu na rai myit dai.

¹ Nang hkum nan hte na a kashu kasha ni, na a Karai Kasang Yehowa hpe hkrit hkungga let, ngai nang hpe hkangda ya sai matsun maroi hte hkangda ai tara nlang hte hpe prat dingsa hkan nang lu na hte na a prat galu nga lit ga nga; ² nanhte sa nna madu sha na marin dai mung hta hkan lang nga na matu, nanhte hpe sharin achyin ya na nanhte a Karai Kasang Yehowa a hkangda ai ga, matsun maroi hte dawdan ai tara gaw, ndai rai nga ai. ³ Israela amyu e, na nji nwa ni a Karai Kasang Yehowa a ga ndat nga nga sai hte maren, nga chyu hte lagat jahku lwi ai mung hta nanhte ngamu ngamai nna law htam wa myit ga, madat mara la nna la nna hkan nang nga u. ⁴ Israela amyu e, madat la u: anhte a Karai Kasang Yehowa gaw, shi chyu sha Yehowa rai nga ai: ⁵ dai, na a Karai Kasang Yehowa hpe, na a myit masin mahkra hte, na a kraw lawang mahkra hte, na a n-gun lagawng mahkra hte tsawra nga u. ⁶ Dai ni ngai nang hpe hkang d ai ga ndai hpe na a kraw lawang e gun nga u: ⁷ ga ndai, na nsha ni hpe nang sharin achyin ya nga lu na rai ndai; nta e dung nga let mung, lam e hkawm sa let mung, taw nga rawt wa let mung, ga dai a tsun nga lu na rai ndai. ⁸ Ga dai hpe na a lata hta kumla tai nga na matu hkawn da nga nna, na a myi lapran e masat dingdat laika tai nga na rai lit dai: ⁹ ga dai hpe na nta chyinghka hkadun hte na mare chyinghka hta mung ka da na rai ndai. ¹⁰ Na a Karai Kasang Yehowa na nji nwa Abraham, Isak, Yaku hte hpe dagam da ai mungdan hta nang hpe woi shawn nna, nang n de tawn ai sutgan hkum ai mare kaba ni, ¹¹ nang n tam bang kun rai hpring chyat nga ai nta ni, nang n tawk n htu ra ai hka htung ni, nang n hkai tawn ai tsabyi sun hte tsanlun hpun ni, nang hpe jaw nna, nang hkru hkru kat kat sha nga lu ai shaloi; ¹² Egutu mung hte mayam nta na nang hpe shaw woi wa ai Yehowa hpe nang n malap kau n ga, sadi nga u. ¹³ Na a Karai Kasang Yehowa hpe nang hkrit hkungga nna, shi hpe hkrai dawjau lu na ndai; dagam ai hta mung shi a mying ningsang gang lu na rai ndai. ¹⁴ Nanhte hta rawng nga ai nanhte a Karai Kasaang Yehowa gaw, nsu nnawn loi ai Karai Kasang rai nga ai majaw, na a Karai Kasang Yehowa nang hpe pawt bu nna, ga ntsa na nang hpe n jahtum kau u ga gaw, ¹⁵ ngnhte a grupyin e nga ai masha amyu ni a Hpara ngu ai Hpara shaje ni kaw hkum hkan kasawt myit. ¹⁶ Masa shata na zawn, nanhte a Karai Kasang Yehowa hpe chyam dinglik lu na n rai. ¹⁷ Nanhte a Karai Kasang Yehowa nang hpe tawn da ya ai hkangda ai ga, sakse ga hte matsun maroi ga hpe nanhte teng teng hkan nang lu na rai myit dai. ¹⁸ Nang ngamu ngamai mga lu na hte Yehowa a ga ndat nga ai hte maren masha hpyen ni nlang hpe na a man na shaden kau nna, na nji nwa ni hpw kagam da ai chyeju mungdan de shang sha lu n ga gaw, ¹⁹ Yehowa a man e dinghpring htaphtuk ai amu nang galaw nga na rai ndai. ²⁰ Htawmhpang prat e na nsha gaw nang hpe, Anhte a Karai Kasang Yehowa tawn da ya ai ndai sakse ga, matsun maroi hte dawdan ai tara gaw kaning re ai rai ta? ²¹ nga nna san n yang, nang gaw na nsha hpe, Anhte Egutu mung e Hparau a mayam ni rai nga yang, Yehowa gaw n-gun ja ai lata hte Egutu mung na anhte hpe shaw woi wa mi ai: ²² Yehowa gaw nachying kaba ai kumla hte mauhpa amu Egutu mung ting a ntsa e mung, Hpara-u hte shi a nta masha ni a ntsa e mung anhte a man pra madun dan nna, ²³ ji wa ni hpe dagam da ai mungdan hta wa shawn da lu hkra nga dai yang na shaw wa ni ai. ²⁴ Shingrai dai ni rai nga ai hte maren anhte a asak hpe bau ya nga na matu, anhte a tutnawng na ngamai nhpang tai lu hkra, anhte a Karai Kasang Yehowa hpe hkrit hkungga nga mu ga nga, Yehowa gaw ndai matsun maroi ga nlang anhte hpe tawn da ya ai, rai nga ai. ²⁵ Dai rai nna, anhte a Karai Kasang Yehowa anhte hpe hkangda sai hte maren, ndai hkangda sai matsun maroi ga nlang shi a man e hkan shatsup ga yang gaw, anhte a dinghpring ai tai na rai nga ai, ngu nna tsun dan na rai ndai.

¹ Na a Karai Kasang Yehowa nang madu sha na rin dai mung de nang hpe woi shawn nna, Hiti, Gergashi, Amori, Hkanani, Perizi, Hiwi hte Yebusi ngu ai nang hta grau kaba nna law htam ai amyu sanit ting hpe na a man na gawt kau na, ² na lata de ap ya ndai shaloi, shanhte hpe atsai awai sat kau na rai myit dai: shanhte hte ga shaka nang tawn da lu na n rai; matsan dum ai myit mung madun lu na n rai: ³ shanhte hte mayu dama shaw hkat lu na n rai: na a shayi sha hpe shi a shadang sha hte mung, na a shadang sha hte dhi a shayi sha hpe mung, ya sha hkungran lu na n rai. ⁴ Kaning rai nme law, Hpara shaje hpe nawku shangun lu hkra, shi na nsha hpe nye a lam hta na shayit na ru ai: shaloi Yehowa nanahte hpe pawt bu nna, akajawng sha nang hpe sat kau na ndai. ⁵ Dai re ai majaw shanhte hpe nung di mu: shanhte a tawn hkungri ni hpe agrawp kau ya mu; shanhte a sumla shadaw ni hpe adawt daw kau ya mu; shanhte a Asherim sumla ni hpe kran daw kau ya mu; tawk la ai sumla ni hpe mung nat kau ya mu. ⁶ Kaning rai nme law, nang gaw na a Karai Kasang Yehowa a matu chyoi pra ai amyu rai nga ndai: na a Karai Kasang Yehowa madu ging ai amyu shatai na nga, ga ntsa ting na masha amyu ni hta na, shi nang hpe lata la nit dai. ⁷ Nanhte masha amyu gale mahkra hta nanhte grau law ai majaw nang hpe Yehowa nja nna lata la ndai n rai: amyu gale mahkra hta nanhte garau kaji nga myit dai. ⁸ Yehowa nanhte hpe tsawra ai majaw mung, na nji nwa ni hpe dagam da ai ga shaka shatup mayu wu ai majaw mung, nang yamnga ai Egutu mung na hkawhkm Hpara-u a lata na, shi a n-gun ja ai lata hte nang hpe hkye la nna woi wa nit dai. ⁹ Dai rai nna, na a Karai Kasang Yehowa gaw Karai Kasang rai nga ai chye nga u: shi gaw kangka re ai Karai Wa, shi hpe tsawra ai hte shi a hkangda ai ga hkan nang ai ni hpe prat hkying mun du hkra ga shaka shagrin nga nna matsan dum ai myit madun ai Karai Wa; ¹⁰ shi hpe ndawng ai ni e gaw jahten kau na nga, shanhte a man pa ari jaw ai Karai Wa rai nga ai: shi hpe ndawng ai wa e agam ai myit n rawng ai sha, dai wa hpe man pa ari jaw na wu ai. ¹¹ Dai re ai majaw, dai ni ngai nang hpe tawn da ya ai hkangda ai ga, matsun maroi ga hte dawdan ai tara hpe shatsup lu hkra hkan nga na rai ndai. ¹² Dai dawdan ai tara ga ni hpe nanhte hkan nang na nga, madat mara ai myit rawng myit yang gaw, na a Karai Kasang Yehowa na nji nwa ni hpe dagam da ai ga shaka hte matsan dum na lam hpe shagrin nga na ra ai: ¹³ shingrai shi nang hpe tsawra ai hte shaman ya nna shalaw jahtam na rin dai; nang hpe jaw na nga na nji nwa ni hpe da gam da ai mung hta, nang shaprat ai kashu kasha ni hpe mung, na a lamu ga na nsi nai si ngu na, na a nai mam, tsabyi jahku, sau namman hte, na a sagu dumsu yamnga re ai sut hta mung shaman ya na rai ai. ¹⁴ Nang gaw masha amyu danghta hta gumring gumrat grau lu la ai wa rai nga ndai rai nna, nang hta ala maudung anum maudung langai mi muk, na a yamnga hta uhtum langai mi muk pru lu na n rai. ¹⁵ Yehowa gaw nang kaw na ana ahkya yawng mayawng yeng seng kau ya nna, nang mu yu ai Egutu mung na hkrithpa zinli nang hta kap shangun na wu ai n rai; nang hpe ndawng n yawt ai ni yawng hta shakap na wu ai. ¹⁶ Na a Karai Kasang Yehowa nang hpe ap ya ai masha amyu nlang hte hpe sha kau lu na rai ndai; na a myi gaw shanhte hpe matsan dum lu na n rai; shanhte hpe matsan dum lu na n rai; shanhte a Hpra ni hpe mung nang jaw jau lu na n rai; jaw jau n yang, dai gaw na a mahkam tai na ra ai. ¹⁷ Wora amyu ni ngai hta grau law nga ma ai mi, ngai shanhte hpe kaning di dang lu na i? nga nna na a kraw e myit la let, shanhte hpe hkum hkrit nga et: ¹⁸ na a Karai Kasang Yehowa Hpara-u hte Egutu mung ting hta galaw nu ai amu ni, nang dai myi chyi mu lu ai chyam dinglik lam kaba ni; ¹⁹ na a Karai Kasang Yehowa nang hpe shaw woi wa ai shaloi na, shi madun ai lamik kumla, mauhpa lam ni hte shi a n-gun ja ai lata, shada nga ai lahpum hpe azin ayang dum nga na rai ndai: dai zawn, nang hkrit ai amyu yawng hte hta na a Karai Kasang Yehowa di ya na ru ai. ²⁰ Dai hta kaga naw ngam nna, na a man na hprawng makoi nga ai ni hpe mung n htum mat dingsa gaw, na a Karai Kasang Yehowa shanhte hpang de git shang shangun dat na wu ai. ²¹ Nang hta rawng nga ai na a Karai Kasang Yehowa gaw galu kaba ai hte hkrithpa Karai Wa rai nga lit dai majaw, nang shanhte hpe hkrit ra ndai n rai. ²² Na a Karai Kasang Yehowa gaw dai amyu ni hpe yat yat gawt kau ya na ra ai: nam na matse labye ni nau law wa na hpe tsang ra ai majaw, shanhte hpe alawan shamyit kau mai na n rai. ²³ Raitimung, na a Karai Kasang Yehowa gaw shanhte hpe na a lata hta ap ya nna, shanhte a ningli n myit dingsa shanhte hpe jahtaum kau na lam hpajang nga na nu ai. ²⁴ Shanhte a hkawhkam ni hpe mung na a lata hta ap kau nna, shanhte a nsang mying ni hpe pyi sumsing lamu npu na seng kau na rai nga ai: shanhte hpe n shamyit kau lu dingsa na aman e kadai tsap lu na n rai. ²⁵ Shanhte a tawk la ai sumla ni hpe nat kau ya mu: dai hta kap ai aja gumhpraw ni hpe hkum marit et; dai hpe hkum hta la et; hta la n-yang, dai gaw na a mahkam tai na ra ai: dai hpe na a Karai Kasang Yehowa matsat nga ai. ²⁶ Dai matsat shabat re ai rai hpe na nta nhku de hkum shawn et; shawn n yang gaw, nang hkum mung rai dai zawn jahten kau hkrum ging ai tai na rin dai; dai zawn re ai arai hpe nang gaja wa matsat ai hte koi kau lu na rai ndai: dai gaw jahten kau ging ai arai rai nga ai.

¹ Nang hkrung nga nna law htam wa lit ga hte, Yehowa na a nji nwa ni hpe dagam da ai mung de sa nna shang sha lu n ga gaw dai ni ngai nang hpe hkangda ai matsun maroi nlang hte hpe hkan shatsup lu hkra sadi nga u. ² Na a Karai Kasang Yehowa nang hpe shagrit chyam yu nna, shi a hkangda ai ga hpe hkan nang mayu ai myit rawng ai n rawng ai chye lu hkra; lai mat wa sai mali shi ning tup woi hkawm ai nam mali lam dingdung hpe dum nga u. ³ Shi nang hpe shagrit nna kawsi jahkrum ai hte, shinggyim masha gaw muk hte sha hkrung nga lu ai n rai, Karai Kasang a n-gup na pru mapru hte hkrung nga lu ai gaw nang chye lu hkra nga, nang mung n mu yu, na nji nwa ni mung n mu yu ai manna hte nang hpe bau nit dai. ⁴ Lai mat wa sai mali shi ning ting hta, nang bu hpun ai hpun palawng n je n htum, na a lagaw mung n rawp n bum; ⁵ kawa gaw kasha hpe sharin shaga ai zawn, na a Karai Kasang Yehowa nang hpe sharin la nit dai gaw, na kraw lawang hta matsing gun nga u. ⁶ Dai re ai majaw, na a Karai Kasang Yehowa hpajang ai lam hkan nang nna shi hpe hkrit hkungga let, shi a hkangda ai ga shatup nga u. ⁷ Kaning rai nme law, na a Karai Kasang Yehowa gaw, nang hpe dai kaja grau ai mungdan, hkaraw nhkap bum shagawng ntsa hkan nna lwi hkrat ai hka nu hka shi, hka hpawk hka htung hpring ai ga; ⁸ hkaulan mam, muk-yaw mam, tsabyi ru, maihpang hpun, hkainu si hpun ningru ai ga; tsanlun sau hte lagat jahku ing ai ga; ra ai lam lama mi muk n nga hkra, hkru hkru hpring hpring sha lu ai ga; hpri rawng ai nlung hkrat chyat rai nna, bum kata na magri htu shaw lu ai ga de woi wa nit dai. ¹⁰ Shingrai nang hkru hkru kat kat sha lu na ra ai rai nna, nang hpe jaw da ai kaja htum ai mungdan a majaw, na a Karai Kasang Yehowa hpe shagrau shaa na rin dai. ¹¹ Dai ni ngai nang hpe htawn tsun ai hkangda ai ga, dawdan ai tara hte matsun maroi ga hpe n hkan kau nna, na a Karai Kasang Yehowa hpe malap kau ai kaw n du lit ga, sadi nga u: ¹² nang hkru hkru kat kat sha lu let, nta kaja shachyaw rawng nna nga nga yang; ¹³ na a sagu dumsu mayat maya wa ai hte, na a aja gumhpraw hpring wa nna, nang hta sutgan nlang law htam wa jang, ¹⁴ na a myit gumrawng wa nna, Egutu mugn mayan tai ai nta na nang hpe shaw woi wa ai wa; ¹⁵ wan lapu hte n-gaw gawk sawng nna lu na ntsin kata kawsi hpang gara let ai shata, dai hkrithpa mali kaba a ka-ang hku nang hpe woi wa nna, nhpai lung kring hta na ntsin shapraw jaw ai wa; ¹⁶ nang hpe shagrit ehyam yu nna, hpang jahtum e nang hpe ehyeju madun na nga, na a nji nwa ni pyi n chye ai manna hte dai nam mali kata e nang hpe bau maka ai na karai kasang Yehowa hpe nang malap kau nhtawn, ¹⁷ Nye a marai nye a atsam hte ndai sutgan ngai lu nnagi, nga nna na a kraw kata e myit kau ai yubak n pru lit ga sadi nga u. ¹⁸ Na a karai kasang Yehowa hpe chyu sha dam nga lu na rai ndai: kaning rai nme law, na a nji nwa ni e dagam da ai ga shaka hpe, dai ni rai nga ai hte maren shagrin da na nga, karai kasang Gaw sutgan lu su chye ai atsam nang hpe jaw nit dai. ¹⁹ Na a karai kasang Yehowa hpe nang malap kau nhtawm, hpara shaje ni kaw kasawt nna ku jaw Jau rai wa nit yang gaw, nanhte teng hten bya kaw du na manit dai, nga nna rai ni nanhte a lam ngai sakse hkam da se ai. ²⁰ Nanhte a karai kasang Yehowa a ga nanhte n madat myit dai majaw, nanhte a man na Yehowa Jahten kau ai amyu ni zawn, nanhte mung hten bya kaw du na manit dai.

¹ Israela amyu e, madat mara la u: nang hte grau kaba nna, n-gun grau ja ai amyu ni hpe mung, lamu ganghkau dep ai bunghku e shinggrup ai mare kaba ni hpe mung, ² Anak masha ni a man e kadai wa tsap lu a ta? nga ai ga nang na yu nna chye lu ai, dai Anakim ngu ai galu kaba ai hte shing-yan hkra ai amyu hpe mung gasat gawt kau lu na matu, dai ni Yawdan hka wora hkran rap lu ningtawn rai nit dai. ³ Dai rai nna, na a Karai Kasang Yehowa gaw, grung ai wan zawn, na a shawng e langang sa wa ai wa rai nga ai hpe dai ni chye nga u: shi nan shanhte hpe jahten kau nna na a man e shagrit kau na ru ai: shingrai nang shanhte hpe shaden kau lu nna, Yehowa nang hpe tsun ai hte maren, nang shanhte hpe alawan shamyit kau lu na rin dai. ⁴ Na a Karai Kasang Yehowa gaw na a man na dai amyu ni hpe shaden kau ya ai hpang, nang gaw, Nye a dinghpring ai majaw she Yehowa ngai hpe dai mungdan de woi shawn nna madu la shangun nngai mi, nga nna na a kraw e hkum myit et; dai amyu ni a n shawp ai amu majaw sha Yehowa gaw shanhte hpe na a man na shaden kau ya ai, rai nga ai. ⁵ Dai mungdan nang shang madu sha lu ai gaw, na a dinghpring ai a marang e mung n rai, na a myit masin tengman ai a marang e mung n rai: Yehowa na nji nwa Abraham, Isak, Yaku hte hpe dagam da ai ga shadik na majaw, na a Karai Kasang Yehowa gaw dai amyu ni hpe, tinang a n shawp ai a majaw na a man na shaden kau nu ai. ⁶ Dai rai nna, na a Karai Kasang Yehowa, na a dinghpring ai a marang e, dai kaja grau ai mungdan nang hpe jaw ai n re ai gaw, dum nga u: nang gaw du ja ai amyu rai nga ndai. ⁷ Nang na a Karai Kasang Yehowa hpe dai nam mali hkan e kaning rai shapawt pawt rai ndai gaw nang adum nga u, hkum malap kau et: Egutu mung na nang pru wa ai shani kaw nna ndai yang du ai du hkra, Yehowa hpe nang a gumlau nga nit dai. ⁸ Horeb bum e nanhte Yehowa hpe shapawt myit dai rai nna, nanhte hpe shamyit kau na daram shi pawt kau nu ai. ⁹ Yehowa nanhte hte tawn da ai ga shaka ka ai lungpa wa la na matu bum de ngai lung wa ai shaloi nhtoi mali shi ya tup dai bum ntsa e, shat n sha ntsin n lu ai wa nga nga nngai. ¹⁰ Nanhte sa hpawng ai shani bum ntsa e Yehowa wan kata na tsun dat ai ga nlang, Karai Kasang a layung hte nan ka ai lungpa lahkawng, Yehowa ngai hpe ap ya nngai. ¹¹ Dai nhtoi mali shi ya gu jang, dai ga shaka lungpa lahkawng Yehowa ngai e ap ya nhtawm; ¹² Yehowa gaw ngai e, Rawt u, alawan yu wa sit: Egutu mung na nang shaw wa ai na a masha ni gaw byak mat masai; ngai hkangda ai lam hta na shanhte alawan dam mat wa nna, jaw ai sumla galaw rau masai, nga nna tsun dat ai. ¹³ Bai Yehowa ngai e tsun ai gaw, Ndai amyu hpe ngai yu mase ai; yu u, dai gaw du ja ai amyu rai nga ai: ¹⁴ dai rai nna, ngai shanhte hpe jahten kau nna, shanhte a amying hpe sumsing lamu a npu na shaprai kau lu hkra, ngai hkrai chyu we ga: shingrai ngai nang hpe shanhte hta grau ja nna, grau law htam ai amyu shatai na de ai, nga nna tsun ai. ¹⁵ Shaloi ngai gaw kayin nna dai bum na yu wa nngai; dai bum mung wan grung nga ai; dai ga shaka lungpa yan hpe mung nye a lata maga hpra lang da we ai. ¹⁶ Shaloi ngai mada yu yang, yu mu, nanhte gaw nanhte a Karai Kasang Yehowa hpe shut kau manu ai, jaw ai dumsu kasha sumla galaw tawn myit dai; Yehowa nanhte hpe hkangda ai lam hta na nanhte alawan yit kau myit dai. ¹⁷ Shaloi nye lata hta lang tawn ai laungpa yan hpe nanhte a man e ngai kabai agrawp kau we ai. ¹⁸ Yehowa a man e nanhte n shawp ai amu shapraw nna, shi hpe shapawt ai mara nlang a majaw, shawng na zawn nhtoi mali shi ya tup Yehowa a man e ngai dingnyawm dagup nga nna, shat n sha ntsin n lu ai bai nga nga nngai. ¹⁹ Kaning rai nme law, Yehowa nanhte hpe shamyit kau sa na nga, pawt bu ai sindawng hpe ngai hkrit nga nngai: Yehowa chyawm gaw dai lang hta mung nye a ga madat ya ni ai. ²⁰ Arun hpe mung jahten kau na nga, Yehowa grai pawt bu wu ai; Arun a matu mung dai shaloi e ngai hpyi nem ya we ai. ²¹ Nanhte a yubak ngu na, nanhte galaw ai dumsu kasha hpe mung ngai la nna, wan hta ju nhtawm, ayun ayaw rai hkra arin ngut jang, dai ayun hpe bum na lwi hkrat ai hka hta kabai bang kau we ai. ²² Dai hta kaga, Tabera, Masa hte Kibrot-hatawa shara hkan e mung nanhte Yehowa hpe shapawt manit dai. ²³ Kadesha-barnea kaw nna Yehowa nanhte hpe shangun dat nna, Ngai nang hpe jaw ai mungdan madu sha na matu lung wa ma su, nga nna tsun ai shaloi mung, nanhte a Karai Kasang Yehowa hkang dat ai ga hpe nanhte ndang nna, shi hpe n kam n sham ai hte shi a ga n madat myit dai. ²⁴ Ngai she mu mu ai kaw nna nanhte Yehowa hpe gumlau hkrai gumlau myit dai. ²⁵ Shingrai, nanhte hpe shamyit kau na nga, Yehowa tsun ai majaw, dagup nga nga ai, nhtoi mali shi ya ting, Yehowa a man e ngai dingnyawn dagup nga kau nngai. ²⁶ Yehowa hpe ngai hpyi we ai gaw, Yehowa Madu e, na a hpung dagu hte nang hkrang la nna, na a n-gun ja ai lata hte Egutu mung na shaw woi wa ai, na a Sali wunli ngu na, na a amyu masha ni hpe hkum shaza kau et: ²⁷ na a mayam Abraham, Isak, Yaku hte hpe naw dum nga u: dai amyu a du ja ai, n shawp ai hte yubak mara hpe hkum dum ya et: ²⁸ dai n rai yang, anhte hpe shaw wa ai mung na ni, Yehowa gaw shi a ga ndat jaw da ai mung de shanhte hpe n shawn lu wu ai majaw mung, nam mali hkan e sat kau na nga shanhte hpe shaw wa mu hka, nga na mara ai. ²⁹ Ndai ni chyawm gaw, na n-gun kaba hte, na a shada tawn ai lahpum e shaw woi wa ai na amyu hte na a sali wunli rai nga ma ai, ngu nna ngai hpyi nem we ai.

¹ Dai shaloi e Yehowa gaw, Shawng na lungpa yan zawn lungpa lahkawng naw ga la su; dai bum e ngai hpang de lung wa rit; hpun sumpu mung galaw u: ² shawng na nang a grawp kau ai lungpa yan hta kap ai ga hte maren, dai lungpa ya hta ngai bai ka da we ga: dai yan hpe dai sumpu hta nang bang da na rai ndai, nga nna ngai hpe tsun ai. ³ Ngai mung marau hpun hte sumpu galaw nna, shawng na zawn lungpa lahkawng ga la ngut jang, dai lungpa yan hpe lang let dai bum de lung wa nngai. ⁴ Sa hpawng ai shani e, dai bum ntsa e wan hta nna Yehowa tsun dat ai ga kanu shi hpe, shawng na lungpa yan hta kap ai hte maren, Yehowa bai ka nna ngai hpe ap ya nngai. ⁵ Ngai mung kayin nna, dai bum na yu wa nhtawm, galaw ngut tawn sai sumpu hta lungpa dai yan hpe bang da we ai: shingrai Yehowa nga hpe hkang dat ai hte maren, dai sumpu hta ya rawng nga ai. ⁶ ( Ya Israela Kashu kasha ni gaw Berot Bene-yakan kaw nna Mosera du hkra htawt hkawm wa ma ai; dai yang e Arun si nna makoi mayang kau sai: shi kasha Eliaza gaw kawa hkringhtawng dagraw nna hkijawng amu galaw wu ai. ⁷ Dai kaw na htawt ai gaw Gudgoda e sa ma ai; Gdgoda kaw na htawt ai gaw ha shi law law lwi ai Yobahta e sa ma ai. ⁸ Dai shaloi e Yehowa gaw, shi a ga shaka sumpu hpai na matu mung, shi a man e tsap nna amu gunhpai na matu mung, shi a amying ning sang gang nna shaman ya lu mu ga mung, dai ni du hkra Lewi masha ni hpe san da nu ai. ⁹ Dai re ai majaw Lewi masha ni gaw kahpu kanau ni zawn gumhtaw madu lu na n rai, Sali wunli dagraw sha lu na n rai; na a Karai Kasang Yehowa shi hpe tsun dan ai hte maren, Yenowa gaw shi a Sali wumli rai nga ai.) ¹⁰ Ngai mung shawng na hte maren, nhtoi mali shi ya tup dia bum e nga nga nngai: shaloi na lam hta mung Yehowa nye a ga madat wu ai; Yehowa nang he n jahten kau nit dai. ¹¹ Yehowa mung ngai e, Rawt u, ndai amyu a shawng e sa wa su; shanhte hpe jaw na ngu nna, kaji kawa ni hpe dagam da ai mung de shanhte sa wa nna madu sha lu na rai ma ai, ngu nngai. ¹² Ya, Israela amyu e, na a Karai Kasang Yehowa hpe hkrit hkungga let, shi a lam nlang hkan nang na; na a Karai Kasang Yehowa hpe na a myit masin mahkra hte na a kraw lawang mahkra hte tsawra let, shi a magam gunhpai na; ¹³ na ngamai wunli matu, dai ni ngai nang hpe hkangda ai, Yehowa a hkangda ai ga hte matsun maroi ga ni hpe hkan shatup na lam ni hta kaga, na a Karai Kasang Yehowa shadut ai lam hpa naw nga a ta? ¹⁴ Yu u, sumsing lamu kte de a lahta tang, ginding aga hte dai hta pra mapra na a Karai Kasang Yehowa madu nga ai. ¹⁵ Yehowa gaw na nji nwa hpe chyu sha tsawra wu ai rai nna dai ni rai nga ai hte maren shanhte a amyu matu ngu ai nang hpe nan masha amyu danghta hta na lata la nit dai. ¹⁶ Dai re ai majaw na a myit masin a matu gadoi kau u, htawmhpang de du hkum ja nit. ¹⁷ Na a Karai Kasang Yehowa gaw Karai ni a Karai, Madu ni a Madu, galu kaba ai, daru magam re ai, hkrit kang mai ai Karai Wa rai nga ai; shi gaw myiman n tau, manawn kumhpa n sha ai; ¹⁸ jahkrai nmai, gaida gaina ni hpang maga tara dara ya nna, shingbyi zaw nam ni hpe tsawra ai hte lusha hpun palawng jaw ai wa rai nga ai. ¹⁹ Dai rai nna shingbyi zaw nam ni hpe tsawra mu: kaning rai nme law, nanhte nung Egutu mung e manam tai nga yu manit dai. ²⁰ Na a Karai Kasang Yehowa hpe hkrit hkungga nga u; shi a magam gunhpai u: shi hta shamyit shanat nna dagam ai hta shi a amying ning sang gang u. ²¹ Na a matu mara nga nna, na a myi chyi mu lu ai galu kaba ai hte mauhpa amu galaw ya ai wa gaw, nang shakawn kungdawn shara hte na a Karai Kasang rai nga ai. ²² Na nji nwa ni ngu na, masha marai sanit shi sha Egutu mung de yu wa ma ai; ya chyawm gaw na a Karai Kasang Yehowa sumsing lamu na shagan made nang hpe shalaw jahtam dat nit dai.

¹ Dai re ai majaw nang gaw na a Karai Kasang Yehowa hpe tsawra let, shi a ga madat hte matsun maroi, dawdan ai tara hte hkangda ai ga ni hpe hkan shatup nga na rai ndai. ² Nanhte a Karai Kasang Yehowa daru sharin ai lam hpe mung; shi a daru magam, shi a n-gun ja ai lata hte shada nga ai lahpum hpe mung; ³ shi a lamil kumla ni hte Egutu mung e Egutu hkawhkam Hpara-u hte shi a mungdan thing hta galaw da ai amu hpe mung, ⁴ Egutu mung na hpyen luksuk ni hte shanhte a gumra ni shanhte a hpyen leng ni hpe di ai amu hpe mung; nanhte hpe hkan shachyut nga yang Nawng Hkyeng hka gaw shanhte hpe galaup sat kau nna, dai ni du hkra Yehowa shanhte hpe jahtum kau wu ai lam hpe mung; ⁵ ndai yang garai n du ai laman nam mali hkan e nanhte hpe di ai lam ni hpe mung; ⁶ Rubin lakung Eliaba kasha Dahtan yan Abiram hpe di ai lam hpe mung; ga gaw shi a n-gup mahka nna shanhte hte shanhte a nta masha, shanhte a sum, shanhte lu malu hte hkan nang ai ni yawng hpe Israela amyu a ka-ang e mayu kau wu ai lam hpe mung, n mu n chye lawm ai nanhte a nshu nsha ni hpe ngai n tsun nngai: ⁷ nanhte chyawm gaw Yehowa galaw dan ai amu kaba yawng hpe tinang myi chyi mu lu manit dai, dai ni dum nga manu. ⁸ Dai re ai majaw, nang shang sha lu na mungdan hpe nsam kaba dat nna shang madu lu na hte, ⁹ Yehowa nanhte a nji nwa ni hta, shanhte hte shanhte a amyu matu ni hpe jaw na nga dagam da ai mungdan, dai nga chyu hte lagat jahku lwi ai mung hta nanhte asak galu malit ga gaw, dai ni ngai nang hpe tawn da ya ai hkangda mada ga hpe nanhte hkan shatup lu na rai myit dai. ¹⁰ Nang shang madu sha lu na mungdan gaw, nanhte pru kau da ai Egutu mung hte bung ai n rai; shat mai sun galaw ai zawn, nli gat nhtawm, lagaw hte ntsin jaw ra ai mungdan n rai: ¹¹ nanhte shang sha na mungdan chyawm gaw, kawng jinghkang hkaraw nhkap sawng ai hte marang ntsin lu lu ai ga rai nga ai: ¹² ga dai gaw nanhte a Karai Kasang Yehowa lajang da ai ga rai nga ai; shaning na nnan shani kaw nna hpang jahtum shani du hkra, na a Karai Kasang Yehowa lamu ga dai hpe tut tut a yu nga ai. ¹³ Shingrai, dai ni ngai nanhte hpe tawn da ya ai hkangda ai ga hpe nanhte azin ayang madat mara ai hte, nanhte a Karai Kasang Yehowa hpe tsawra let, nanhte a kraw lawang mahkra hte, nanhte a myit masin mahkra hte shi a amu magam gu hpai myit yang gaw; ¹⁴ na a nsi nai si, na a tsabyi jahku ningnan hte na a namman shu la lu hkra, nanhte a lamu ga hta, du hkra ladaw du jang, mahpawng hpaw marang hte hpang shadoi htu marang, ngai jahtu ya na ring ngai: ¹⁵ na a yamnga ni a matu pa e tsingdu mung ngai shatut ya nna, nang hkru hkru kat kat sha lu na rin dai: Raitimung, nanhte myit n shut nna, Hpra shade ni kaw n jaw n jau n naw n ku myit ga sadi nga mu; ¹⁶ - ¹⁷ dai n rai yang, Yehowa nanhte hpe masin pawt nna, na a lamu ga hta nai mam n tu lu na hku marang n htu lu hkra sumsing lamu hpe pat kau na wu ai: shaloi Yehowa nanhte hpe jaw ai kaja htum ai mungdan hta na, nanhte alawan htum mat na myit dai. ¹⁸ Dai rai nna, nye a ga ndai ni hpe na a kraw lawang e, na a myit masin hta nang gun da ai hte, nanhte a lata hta kumla tai nga na matu hkawn da nna, nanhte a myi lapran e masat dingsat laika tai nga na rai malit dai. ¹⁹ Ga ndai hpe nanhte a nshu nsha ni hpe sharin achyin let, nta e dung nga yang mung, lam e hkawm sa yang mung, taw nga rawt wa yang mung, ga dai a tsun nga lu na rai ndai. ²⁰ Ga dai hpe na nta chyinghka hkadun hte na mare chyinghka hta mung ka da na rai ndai: ²¹ shingrai jang, na nji nwa ni hpe jaw na nga, Yehowa dagam da ai mungdan hta, nang hta na nshu nsha ni a aprat gaw, ginding aga ntsa e sumsing lamu grin nga dingsa, galu nga na malit dai. ²² Nanhte a Karai Kasang Yehowa hpe tsawra let, shi a lam yawng hkan nang nna shi hpe manoi manat nga lu hkra, ngia nanhte hpe hkangda ai ga matsun yawng hpe azin ayang shatsup lu na nga hkan sharau nga myit yang gaw; ²³ Yehowa mung ndai amyu ni nlang hpe nanhte a man na shaden kau ya nna, nanhte hta grau galu kaba ai hte grau law htam ai amyu ani hpe madu lu na marin dai. ²⁴ Nanhte kabye du madu nanhte madu la lu nan, nam mali kaw nna Lebanon bum htep, Uhprat hka nu kaw na nammukdara hkingau e htuk, na a lamu ga jarit rai na ra ai. ²⁵ Kadai mung nanhte a man e tsap nga lu na nrai: nanhte a Karai Kasang Yehowa nanhte hpe tsun da sai hte mare, nanhte kabye du ai shara shagu na masha nlang hte, nanhte e hkrit gari ai hte ma mat shajang shangun na wu ai. ²⁶ Yu u, dai ni e chyeju lam hte dagam dala lam, ngai nanhte a man e tawn da se ai: ²⁷ dai ni ngai nanhte hpe tawn da ya ai, nanhte a Karai Kasang Yehowa a hkangda ai ga hpe nanhte madat mara myit yang gaw, chyeju lam rai nga ai: ²⁸ nanhte a Karai Kasang Yehowa a hkangda ai ga hpe nanhte n madat, dai ni ngai nanhte hpe tawn da ya ai lam hta tawt nna, tinang n chye ai Hpara shaje hpang de manoi mat wa myit yang chyawm gaw, dagam dala lam rai nga ai. ²⁹ Nang sa nna madu sha na mungdan de na a Karai Kasang Yehowa nang hpe woi shawn ngut jang, chyeju lam hpe Gerizim bum e, dagam dala lam hpe Ebala bum e jaw da na rai ndai. ³⁰ Dai bum yan gaw, Yawdan hka wora hkran, jan shang maga nmaw lam a shinggan, More wamyi hpun majau na Gilgala hte tawtap rai nga ai, layang ga na Hkanani masha ni a lamu ga hta rai nga ai, n rai ni? ³¹ Kaning rai nme law, nanhte a Karai Kasang Yehowa nanhte hpe jaw da ai mungdan hpe shang madu la na matu, nanhte Yawdan hta rap nna, mungdan dai up la let nga sha lu na rai myit dai. ³² Shingrai dai ni ngai nanhte hpe jaw da ai matsun maroi ga hte dawdan ai tara yawng mayawng hpe, nanhte hkan shatup lu na ria myit dai.

¹ Mmu ga dai hta nanhte hkrung nga prat dingsa madu sha nga na matu, na nji nwa ni a Karai Kasang Yehowa jaw ai mungdan e nanhte hkan lang nga na matsun maroi ga hte dawdan ai tara gaw, ndai rai nga ai. ² Nanhte gawt kau na amyu ni, shanhte a Hpara ni hpe jaw jau ai shara ni ngu ai, tsaw ai bum ntsa hkan na, kawng ntsa hkan na hte tsit lali ai hpun shagu npu hkan na shara yawng hpe nanhte teng teng atsai awai di kau na rai myit dai: ³ shanhte a tawn hkungri ni hpe agrawp kau ya mu; sumla shadaw ni hpe adawt daw kau ya mu; shanhte a Asherim sumla ni hpe nat kau ya mu; shanhte a tawk la ai Hpara sumla ni hpe kran kau ya mu; dai yang na shanhte a amying du teng seng kau ya mu. ⁴ Shanhte galaw ai lam hkam nna, nanhte gaw nanhte a Karai Kasang Yehowa a matu galaw lu na n rai. ⁵ Nanhte a Karai Kasang Yehowa nanhte a amyu ting hta shi a amying ningsang nga nga na matu lata la ai shara ngu ai, shi shanu nga ai shara hpe nanhte tam nna dai de sa wa lu na rai myit dai: ⁶ dai de, nanhte a wan nat hkungga hte shagu hkungga; htamshi hta na htammi jaw ai kumhpa hte nanhte a lata na manawt kumhpa; ga shaka kumhpa hte mayu jaw jau ai kumhpa; sagu dumsu hpung ni hta na shawng hkrat ai kasha alat re ai kumhpa ni hpe la sa na rai myit dai: ⁷ dai yang e mung nanhte a Karai Kasang Yehowa man e nanhte lusha nga nna, nanhte a galaw ai lam magup hta nanhte a Karai Kasang Yehowa shaman ya myit dai majaw, nang hkum hte na a nta masha ni nlang kabu gara nga na rai myit dai. ⁸ Ya dai ni, ndai yang anhte galaw ai zawn, dai kaw e hkum shagu tinang ra ai hku galaw lu na n rai: ⁹ kaning rai nme law, ya gaw nanhte a Karai Kasang Yehowa jaw ai ban sa ai hte Sali wunli hta nanhte garai n shang myit dai. ¹⁰ Raitimung, nanhte Yawdan hta rap nna, Sali wunli matu nanhte a Karai Kasang Yehowa nanhte hpe jaw ai mungdan hta nanhte nga sha lu ai hte, grupyin masha hpyen ni yawng a lata na maga tawn nna, nanhte ngwi pyaw nga lu ai shaloi; ¹¹ shi a mying ningsang nga nga na matu, nanhte a Karai Kasang Yehowa san da ai shara de, ngai hkangda mada hte maren, nanhte a wan nat hkungga hte shagu hkungga; htamshi hta hkam mi jaw ai kumhpa hte nanhte a lata na manawt kumhpa; Yehowa hpe ga shaka da ai hte maren jaw jau ai kaja htum ai ga rai myit dai. ¹² Dai shaloi e nanhte ni mung, nanhte a mayam num mayam la ni mung, kumhtaw n htu nna Sali ga n lu ai, nanhte kaw shingbyi nga ai Lewi masha mung, nanhte a Karai Kasang Yehowa man e kabu gara nga na rai myit dai. ¹³ Hrup mahrup shara hkan e na a wan nat hkungga nang n jaw n ga sadi nga u: ¹⁴ nanhte a amyu langai mi kaw Yehowa san tawn ai shara e, na a wan nat hkungga nang jaw jau nna, ngai nang hpe hkangda mada galaw lu na rai ndai. ¹⁵ Raitimung, na a Karai Kasang Yehowa nang hpe shaman ya ndai hte maren, na a nga shara shagu hkan e sha mayu ai made mayu sat sha lu ai ahkang nga nga ai; atsu aya shan sha ai zawn, sanseng ai ni hte n san n seng ai ni rau sha lu na rai nga ai. ¹⁶ Raitimung asai gaw sha lu na myit dai n rai; ntsin ru kau ai zawn ga de ru kau na rai ndai. ¹⁷ Na a nai mam, tsabyi jahku, sau namman re ai ni a htamshi hta na nawng jau ai htammi; sagu dumsu hta na shawng hkrat ai kasha alat; ga shaka kumhpa, mayu a jau ai kumhpa hte na a lata na manawt kumhpa re ai ni hta na baw mi hpe mung, tinang a nga ai shara e nang sha lu na ndai n rai: ¹⁸ na a Karai Kasang Yehowa lata da ai shara hta, nang hkum dai hte, na a shayi shadang sha ni mung, na a mayam num mayam la ni hte, nang kaw shingbyi nga ai Lewi masha wa mung, na a Karai Kasang Yehowa man e dai hpe sha lu na rai nna, nang galaw ai lam magup hta na a Karai Kasang Yehowa man e kabu gara nga na rai ndai. ¹⁹ Dai lamu ga hta nang hkrung nga prat dingsa, Lewi wa hpe nang n kau n ga, sadi nga u. ²⁰ Na a Karai Kasang Yehowa nang hpe tsun da ai hte maren, na a lamu ga shadam ya ndai shaloi, nang shan sha mayu myit rawng nna, Ngai shan sha yu we ga, nga yang, sha mayu ai made sha lu na ahkang nga nga ai. ²¹ Na a Karai Kasang Yehowa, shi a amying ningsang tawn da na lata da ai shara dai, na a nga shara hte tsan la lit yang gaw, Yehowa nang hpe jaw ai na a sagu dumsu hpe, ngai hkangda ai hku nang sat nna, na a nga shara e sha mayu ai made sha lu na ahkang nga nga ai. ²² Atsu aya shan sha ai zawn nang sha lu na rai ndai; sanseng ai ni, n san n seng ai ni maren jawm sha lu na rai nga ai. ²³ Raitimung, asai n sha lawm myit ga gaw sadi nga mu, asak gaw asai hta rawng nga ai: dai rai nna ashan hpe asak hte hpawn sha lu na n rai. ²⁴ Dai majaw asai sha lu na nrai; ntsin ru kau ai zawn, ga de ru kau na rai ndai. ²⁵ Yehowa sharawng awng hpa amu nang galaw nna, nang hkum dai hte nshu nsha ni ngamu ngamai lit ga gaw, asai sha lu na n rai. Nang lu ai, na a chyoi pra ai kumhpa hte, na ga shaka kumhpa ni hpe sha nang la lang nna, Yehowa san da ai shara de sa lu na rai ndai; ²⁶ - ²⁷ shingrai, na a wan nat hkungga hpe, ashan hte asai nawng, na a Karai Kasang Yehowa a tawn hkungri ntsa e nang nat jau na rai ndai: hkungga gale chyawm gaw, asai hpe na a Karai Kasang Yehowa a tawn hkungri hta nang ru hkaw nna, ashan hpe gaw nang sha lu na rai ndai. ²⁸ Na a Karai Kasang Yehowa a ra sharawng ai hte tengman ai amu nang galaw nna, nang hte na nshu nsha prat dingsa ngamu ngamai lu lit ga, ngai nang hpe hkangda mada ga ndai ni hpe asin gyang madat nna hkan shatsup nga u. ²⁹ Nang sa nna madu sha na rin dai mung hta nga ai amyu masah ni hpe na a Karai Kasang Yehow ana a man na seng kau ya nna, shanhte a lamu ga hta nang madu sha nga ai shaloi e; ³⁰ shanhte na a man na hten bya mat ai hpang, shanhte a lailen nang hkan nna yubak n pru lit ga gaw, Dai amyu ni shanhte a Hpara ni hpe kaning rai jau ma ta? dai zawn ngai galaw yu na, nga nna shanhte a hking lam n san hkrup n ga sadi nga u. ³¹ Dai hku hkan nna, na a Karai Kasang Yehowa a lam hta nang galaw lu na n rai; kaning rai nme law, shanhte gaw, Yehowa ndawng n yawt ai lam shagu shanhte a Hpra ni hta galaw masai: tinang a shayi shadang sha ni hpe pyi shanhte a Hpara ni hpe jaw kau let, wan hte nat sat manu ai.

¹ Ngai nanhte hpe hkangda mada hkan shatsup nang nga mu; dai hta jat mung hkum jat et, Yawm mung hkum shayawm et. ² Myihtoi htoi ai wa, shing n rai, yupmang mu ai wa, nanhte hta paw pru nna, lamik kumla hte mauhpa amu nang hpe madun let, ³ Nang a chye ai Hpara shaje hpang de sti sa nna nawku ga nga tsun yang, dai nang hpe madun ai lamik mumla hte mauhpa amu byin lu ai raitimung, ⁴ dai myihtoi wa, dai yupmang mu ai wa ga nang madat lu na n rai: kaning rai nme law, nanhte hta nanhte a Karai Kasang Yehowa hpe kraw lawang mahkra hte myit masin mahkra hte tsawra ai myit rawng ai n rawng ai, nanhte a Karai Kasang Yehowa chyam yu ai rai nga ai. ⁵ Nanhte ga nanhte a Karai Kasang Yehowa a hpang hkan nang nna, shi hpe hkrit hkungga ai hte shi a hkangda ai ga hkan shatsup let, shi a nsen madat mara nga na rai myit dai; nanhte shi hpe chyu sha jaw jau nna shi hta manoi nga na rai myit dai. ⁶ Egutu mung na nang hpe shaw woi wa ai hte, mayam tai nga ai nta na nang hpe hkrang la ai, na a Karai Kasang Yehowa hpe gumlau ai hku tsun nna, na a Karai Kasang Yehowa nang hpe hkangda ai lam hta na shadam kau na maw ai majaw, dai myihtoi wa, dai yupmang mu ai wa, sat kau ai hkrum lu na rai nga ai. Shingrai nanhte hta na yubak mara seng kau lu na rai myit dai. ⁷ Na chyu rum hpunau wa, na a shayi shadang sha, na a lahpyen na nang nja ai madu jan, na hkum hte maren tsawra ai kinghku wa langai ngai, Sa, nang mung n chye, na nji nwa ni mung n chye ai Hpara shaje hpang de, ⁸ na a grupyin na, ni a tsan ai masha ni lamu htun maga mi de nna maga mi de du hkra nawku ai Hpara hpe jaw jau saga, nga nna nang hpe lagyim gunglau n yang, ⁹ nang hkraw lu n ndai n rai, shi a ga mung madat mai na n rai: jang shi hpe yu nna matsan dum lu na n rai: lahpawt ai hte na makoi da ai sha, ¹⁰ shi hpe teng teng sat kau lu na rai ndai: shi hpe sat na rai jang, na a lata shawng jahtim nna she, masha gale nlang jahtim na rai myit dai. ¹¹ Egutu mung hte mayam tai nga ai nta na nang hpe shaw woi wa ai na a Karai Kasang Yehowa kaw na dam mat ma na hku maw ai majaw, dai wa hpe nlung hte kabai sat kau na rai myit dai. Dai lam hpe Israela amyu ting na lu nna hkrit nga let htawmhpang de dai zawn re ai n shawp ai amu galaw wam sa na n rai. ¹³ Nanhte hta na n shawp ai masha nkau mi rawt pru nna, Sa, nanhte n chye ai Hpara shaje nawku saga, nga nna, shanhte hte rau nga ai mare masha ni hpe woi awn ai lam, ¹⁴ na a Karai Kasang Yehowa nang nga shara matu jaw ai mare langai ngai hta ashi pru dam yang; ¹⁵ dai amu lam hpe nang azin ayang san gawn lu na rai ndai; ashi pru ai hte maren dandawng nna gaja wa teng teng nanhte hta dai zawn re ai matsat shabat amu galaw hkrup ai rai yang gaw; ¹⁶ dai mare na masha ni hpe nhtu hte teng teng sat kau na rai myit dai; dai mare hpe dai hta rawng marawng hte hpawn yamnga nlang hpe nang atsai awai hpya kau na rai ndai. ¹⁷ Kashun la lu ai lanep rai yawng mayawng hpe dai mare a nmaw lam ka-ang e nang shajawng tawn nan mare hte hpawn lanep yawng mayawng hpe na a Karai Kasang Yehowa a matu nat kau na rai ndai; mare dai gaw prat dingsa shanut sumpum tai nga na rai nga ai; dai hpe bai de lu na n rai. Yehowa gaw shi a pawt bu ai masin hpe shakawp nna, na nji nwa ni hpe ndat da ai ga hte maren nang hpe matsan dum lama ai hte shalaw jahtam lit ga gaw, dai jahten kau mai ai arai lama mi muk n la ai sha: ¹⁸ na a Karai Kasang Yehowa a ga nang madat nna, dai ni ngai nang hpe hkangda ai hte maren, shi hkangda mada hpe hkan nang ai hte, na a Karai Kasang Yehowa sharawng awng hpa amu, shi a man e galaw nga na rai ndai.

¹ Nanhte gaw, nanhte a Karai Kasang Yehowa a kashu kasha ni rai nga myit dai; dai rai nna si ai wa a matu tinang hkum hpe gadoi jahpye lu na na rai, na a lahtan kara mung doi lu na n rai. ² Kaning rai nme law, nang gaw na a Karai Kasang Yehowa a matu chyoi pra ai amyu rai nga ndai; Yehowa madu ging ai amyu shatai na nga, ga ntsa ting na masha amyu ni hta na, shi nang hpe lata la nit dai. ³ Matsat ai baw nang sha lu na ndai n rai. ⁴ Nang sha mai ai shan gaw, dumsu, sagu, bainam: ⁵ shan hrang, shan nga, mailu, aya shahpa, atsu, chyahkyi re ai hte; ⁶ lahkru ga nna shat lai lai ai shan amyu ni rai na rai nga ai. ⁷ Raitimung, shat lai lai ai shan, lahkru ga ai shan ni hta na, gawlauk, prangtai, shahpan ni gaw, shat lai lai timung, lahkru n ga ai majaw, nanhte hta n san n seng rai nga ai. ⁸ We gaw lahkru ga timung shat lai n lai ai majaw nanhte hta n san n seng rai nga ai: de a shan mung hkum sha myit, si mang mung hkum hkra myit. ⁹ Hka e rawng ai nga amyu danghta hta na, singgung hte asep tu ai sha nanhte sha na rai myit dai; ¹⁰ singgung hte asep n tu ai baw sha lu na myit dai n rai; dai gaw nanhte hta n san n seng rai nga ai. ¹¹ Sanseng ai u amyu shagu sha lu na rai myit dai. ¹² Nanhte n sha mai ai u amyu ni gaw: wa hpai kalang, lang da, nga kalang; ¹³ langji kaba, maibra kalang, lang mut amyu myu; ¹⁴ u-hka amyu yawng: ¹⁵ u-gawla-uk, nsin kalang, hka u, lang ji amyu myu; ¹⁶ du du di di, u hku, u langang; ¹⁷ wunpu u, urum langda, hka u-hka; ¹⁸ gawn, u-gaw amyu myu, mu-u hte patsip re ai ni rai nga ai. ¹⁹ Singkaw tu nhtawm gumrawt hkawm chye ai gaw amyu shagu gaw nanhte hta n san n seng rai nga ai majaw, de a shan sha lu na n rai. ²⁰ Sanseng ai u amyu myu chyawm gaw sha lu na rai myit dai. ²¹ Shi hkrai si ai rai a shan hkum sha myit; nang kaw shingbyi nga ai tsasam wa sha lu na matu, shi hpe jaw mai ai; shing n rai masha bu de sa dut kau u; nang chyawm gaw, na a Karai Kasang Yehoaw matu chyoi pra ai amyu rai nga ndai. Bainam kasha hpe kanu a chyu hte hkum shapyaw et. ²² Na a yi hkauna hta na shaning shanan gshu la lu ai nsi naisi hpe htamshi hta htammi teng teng jahka da na rai ndai. ²³ Na a Karai Kasang Yehowa, shi a amying ningsang a matu san da ai shara e nai man, tsabyi jahku, san namman hte sagu dumsu ni hta na shawng hkrat ai kasha alat re ai htamshi na htammi hpe shi a man e sha lu na rai myit dai; shingrai jang na a Karai Kasang Yehowa hpe hkrit hkungga nga na lam sharin la lu na rin dai. ²⁴ Na a Karai Kasang Yehowa nang hpe shaman ya ndai shaloi, shi a amying ningsang a matu lata da ai shara tsn la ai majaw sa na lam galu ai hte, na a rai htamshi na htammi hpe n la sa lu n yang gaw; ²⁵ arai dai ni hpe gumhpraw hte galai nna, gumhpraw dai gun let na a Karai Kasang Yehowa lata da ai shara de sa na rai ndai: ²⁶ shingrai sha mayu ai hte maren, dumsu, sagu, tsabyi jahku hte chyaru re ai rai ra mara mari la nhtawm nanhte a Karai Kasnag Yehowa a man e tinang a nta masha ni yawng hte rau nang lusha na kabu gara nga na rai ndai. ²⁷ Nang kaw shingbyi nga ai Lewi wa hpe mung nang kau rap di lu na n rai: kaning rai nme law, shi gaw nang zawn kumhtaw hte Sali wumli lu nga ai n rai. ²⁸ Masum ning du shagu na, nang lu ai htamshi hta hkam mi hpe na a mare kata e shinggyin da na rai ndai: ²⁹ dai hpe, nang zawn kumhtaw hte Sali wunli n lu ai Lwi wa hte nang kaw sa nga ai tsasam manam wa, jahkrai ningmai ni hte gaida gaina ni sa nna hkru hkru kat kat sha lu na rai ma ai: shingrai jang, na a Karai Kasang Yehowa gaw, nang galaw ai lam shagu hta nang hpe shaman ya na ra ai.

¹ Sanit ning ningdaw shagu raw dat lam hpaw lu na rai ndai. ² Raw dat lam ngu ai gaw ndai rai nga ai: htingbu manang wa hpe arai hkoi ya ai hka madu kadai mung, ahka dai hpe raw dat lu na rai nga ai; Yehowa a raw dat ningdaw rai nga ai majaw htingbu manang kaw na mung, hpunau wa kaw na mung, ji la lu na n rai. ³ Maigan masha kaw na chyawm gaw ji la lu na ahkang nga nga ai: tinang a arai hpunau manang wa kaw kap makap raw dat lu na rai ndai. ⁴ Raitimung, na a Karai Kasang Yehowa a nsen hpe nang azin ayang madat mara nna, dai ni ngai nang hpe hkangda mada hte hpe hkan shatsup n yang gaw, ⁵ nang madu lu na matu na a Karai Kasang Yehowa nang hpe teng teng shaman ya na rai nna, nang hta matsan mayan masha n nga lu na rai nga ai. ⁶ Kaning rai nme law, na a Karai Kasang Yehowa, shi a ga ndat hte maren nang hpe shaman ya na ra ai: shaloi maigan amyu law law hpe nang hkoi shap lu na rin dai rai nna, nang hkoi la ra na n rai; masha amyu law law hpe nang up lu na rin dai rai nna, shanhte gaw nang hpe up lu na n rai. ⁷ Na Karai Kasang Yehowa nang hpe jaw ai mungdan na mare langai ngai hta, matsan mayan re a hpunau wa nga dam yang, dai na a hpunau matsan mayan wa hta, na a matsan dum ai myit hpe nang shim da lu na n rai, na a lata latup shangang lu na n rai: ⁸ na a lata hpe shi a matu dam lada hpyan tawn nna, shi a matsan bran ram hkra hkoi shap ya na rai ndai. ⁹ Na a kraw hta n shawp ai myit rawng nna, Sanit ning ngu na raw dat ningdaw du magang ra ai nga, dum let, dai matsan mayan hpunau wa hpe lahpawt ai myit hte hpa n jaw ai nga nna, dai wa Yehowa hpe jahtau shaga yang na ntsa e yubak n du lit ga, sadi nga u. ¹⁰ Gaja wa teng teng nang shi hpe jaw lu na rai ndai; jaw n yang mung lahpawt ai myit hte jaw lu na n rai: kaning rai nme law, dai chyeju a majaw na a Karai Kasang Yehowa gaw nang galaw ai lam shagu, na a lata shachyen ai lam magup hta shaman ya na ra ai. ¹¹ Na a mungdan hta matsan mayan htum lu na n rai! Dai re ai majaw, na a mungdan hte, na a hpunau, ruyak hkrum ai aw hte matsan chyaren ai wa a matu, na a lata hpe nang gaja wa teng teng dam lada hpyan da lu na ndai, nga nna nang hpe ngai hkangda de ai. ¹² Na a hpunau makyin Hebre amyu numsha, lasha yam nang mari yam ai rai yang, nang shi hpe kru ning sha yam sha lu na rai n dai; sanit ning ngu na hta shi hpe shabawn dat na rai ndai. ¹³ Shi hpe shabawn dat yang, kaman san san n dat dat ai sha, ¹⁴ na a sagu hpung, na a mam chyarang, na a tsabyi htumbyen hta na ram ging ai made jaw dat lu na rai ndai: na a Karai Kasang Yehowa nang hpe shaman ya nit dai hte maren jaw dat na rai ndai. ¹⁵ Egutu mung e nang mayam tai yu nit dai mung, na a Karai Kasang Yehowa nang hpe hkrang la nit dai mujg, nang dum lu na rai ndai: dai re ai majaw ndai lam, dai ni ngai nang hpe hkangda de ai. ¹⁶ Raitimung, mayam wa mahtang nang hte na a nta masha ni hpe tsawra nna, nga pyaw dum ai majaw, Ngai nang na n pru mayu nngai, nga nna tsun a yang gaw; ¹⁷ nang sumprang la nna shi a ana hpe chyinghka hta shatai nna shajut htinggrang ya na rai ndai; shingrai shi gaw prat tup na a mayam tai nga na rai nga ai. Mayam num hpe raitimung, shing di na rai nga ai. ¹⁸ Na a mayam shabawn kau na hpe yak dum lu na n rai: kaning rai nme law, kru ning tup na a amu shi galaw nna, nchyang lahkawng a jahpu shayet ya nit dai: na a Karai Kasang Yehowa mung nang galaw ai lam magup hta nang hpe shaman ya na ra ai. ¹⁹ Na a sagu dumsu hpung hta na shawng hkrat ai ala nlang na a Karai Kasang Yehowa a matu, nang chachyoi shapra na rai ndai: shawng hkrat ai kumsu kasha hpe nang marang sha lu na n rai; shawng hkrat ai sagu kasha a mun rep la lu na n rai. ²⁰ Yehowa lata da ai shara hta, nang hte na a nta masha ni gaw dai hpe shaning shanang na a Karai Kasang Yehowa man e jawm sha lu na rai ndai. ²¹ Dai sagu dumsu ni hta na lagaw hten ai, myi kyaw ai hte lama ma ra nna hkrang n hkum ai rai yang, na a Karai Kasang Yehowa hpe nawng jau lu na n rai. ²² Dai gaw na nta e sha lu na rai ndai: atsu aya shan sha ai zawn, sanseng ai ni, n san n seng ai ni yawng jawm sha lu na rai nga ai. ²³ Raitimung de a asai sha lu na n rai; ntsin ru kau ai zawn aga hta ru kau na rai ndai.

¹ Abi shata hpe matsing nna, na a Karai Kasang Yehowa a shalai dat ai poi hkan galaw u: kaning rai nme law, na a Karai Kasang Yehowa gaw Abi shata hta nang hpe Egutu mung na shana e shapraw la nit dai. ² Yehowa shi a amying ningsang tawn da na matu lata la ai shara e, sagu dumsu ngu na shalai dat ai poi hkungga, na a Karai Kasang Yehowa hpe nawng jau na rai ndai. ³ Dai poi hta matsi rawng ai muk nang sha lu na ndai n rai: nang hkrung nga prat dingsa, Egutu mung na pru wa ai lam hpe nang dum nga lu hkra, sanit ya tup nni nkri ngu na matsi n rawng ai muk nang sha lu na rai ndai: kaning rai nme law, Egutu mung na nang tin shapun pru wa nit dai. ⁴ Sanit ya tup na a mungdan ting hta matsi lang lu na n rai: nang shan e nawng ai hkungga a shan hpe, shana tup jawhpawt du hkra ngam da lu na n rai. ⁵ Na a Karai Kasang Yehowa nang hpe jaw ai shara magup hkan e shalai dat ai poi hkungga nawng lu na ndai n rai; ⁶ na a Karai Kasang Yehowa shi a amying ningsang tawn da na matu lata la ai shara hta sha, shalai dat ai poi hkungga hpe, Egutu mung na pru wa ai ta, shana de, jan shang mahka e nawng lu na rai ndai. ⁷ Na a Karai Kasang Yehowa lata la ai shara hta dai hpe kakang nna sha na rai ndai; jahpawt manap e tinang a sum de bai wa na rai ndai. ⁸ Kru ya tup matsi n rawng ai muk sha lu na rai ndai; sanit ya hta na a Karai Kasang Yehowa matu chyoi pra ai zuphpawng hpawng na rai ndai: dai shani e makan amu galaw lu na n ra. ⁹ Bai, nhtaoi bat sanit ningdaw nang tawn da na rai ndai: nmut nnan shang ai shani kaw nna, nthoi bat sanit du hkra hti na rai ndai. ¹⁰ Dai nhtoi gu jang na a Karai Kasang Yehowa a matu bat sanit ngu ai poi mung galaw na rai nna, na a Karai Kasang Yehowa nang hpe shaman ya ai made hta na mayu jaw jau kumhpa la sa na rai ndai: ¹¹ shaloi nang hte na a shayi shadang sha, na a mayam num mayam la, na a mare na Lewi wa, nang kaw shingbyi nga ai tsasam nanam wa hte nang kaw nga ai jahkrai nmai, gaida gaina ni yawng, Yehowa shi a amying nsang tawn da na matu san da ai shara hta na a Karai Kasang Yehowa man e sa kabu gara nga na rai myit dai. ¹² Nang Egutu mung e mayam tai nga rawng nit dai hpe nang dum nga nna, ndai matsun maroi ga hpe hkan shatup nga na rai ndai. ¹³ Na a chyarang na nai mam hte htumbyen na tsabyi jahku shu la tawm jang, sanit ya tup sum poi mung galaw na rai ndai: ¹⁴ shaloi e dai poi hta nang hte na a shayi shadang sha, na a mayam num mayam la, dai Lewi wa, tsasam manam hte nang kaw nga ai jahkrai nmai, gaida gaina ni yawng, kabu gara nga na rai myit dai. ¹⁵ Yehowa san da ai shara hta, sanit ya tup na a Karai Kasang Yehowa a matu poi galaw na rai ndai: kaning rai nme law, na a sut mayat wa na lam shagu hte, na a lata shachyen ai amu magup hta, na a Karai Kasang Yehowa nang hpe shaman ya na rai nna, nang gaw kabu hkrai kabu nga na rai ndai. ¹⁶ Laning mi hta masum lang ngu na, azuma poi, bat sanit poi, sum poi re ai aten ni hta, nanhte hta na lasha ni nalng hte gaw, na a Karai Kasang Yehowa san da ai shara, shi a man e myiman madun lu na rai myit dai: dai shaloi e kadai mung Yehowa man de kaman dawng pru lu na n rai: ¹⁷ na a Karai Kasang Yehowa nang hpe shaman ai chyeju jaw ai hte maren, langai hte langai gaw jaw lu ai made shapraw lu na rai myit dai. ¹⁸ Na a Karai Kasang Yehowa nang hpe jaw ai mare shagu hta, na a amyu e hkan nna, tara agyi hte du agyi tawn da na rai ndai; shanhte gaw amyu masha ni hpe dingman ai hku tara dara ya na rai mu ai. ¹⁹ Tara lam hta na nang shashai lu na n rai; masha myiman tau lu na n rai; manawn kumhpa mung sha lu na n rai: kaning rai nme law, manawn kumhpe gaw hpaji rawng ai ni a myit hpe dingga kau ya nna, dingman ai ni a ga hpe gale kau ya chye ai. ²⁰ Nang hkrung nga lu na hte na a Karai Kasang Yehowa nang hpe jaw ai mungdan madu sha lun ga gaw, dingman ai hku hkrai jeyang lu na rai ndai. ²¹ Na a Karai Kasang Yehowa a matu, nang gaw da ai hkungri a makau e kaning san ai Ashera hpun dung mung jung tawn lu na n rai. ²² Na a Karai Kasang Yehowa ndawng ai sumla shadaw mung shadun lu na ndai n rai.

¹ Lama mara ai hte hkrang n tsawm ai sagu dumsu gaw, na a Karai Kasang Yehowa hpe nawng lu na n rai: dai zawn re ai hkungga gaw na a Karai Kasang Yehowa matu matsat shabat rai nga ai. ² Na a Karai Kasang Yehowa nang hpe jaw ai mare ni hta numsha, lasha langai ngai na a Karai Kasang Yehowa a ga shaka hpe tawt nna, ³ Hpra shaje kaw, shing n rai, ngai n hkangda ai ajan, shata hte sumsing lamu na zaw nawng zaw wa langai nga a lam hkan nang nna nawku jaw jau ai hte, shi a man e n shawp ai amu galaw ai rai yang gaw, ⁴ dai ashi nang hpe shana ya nna nang chye lu jang, dai lam hpe nang azin ayang gawn yu nna, Israela amyu hta dai zawn re ai matsat shabat amu pru ai teng yang gaw; ⁵ dai n shawp ai amu shapraw ai numsha, lasha hpe, na a mare chyinghka de woi sa nhtawm, dai numsha, shing n rai, dai lasha hpe nlung hte kabai sat kau na rai myit dai. ⁶ Sakse lahkawng masum a ga hte rai yang gaw, si ging ai wa gaw si ai hkrum na rai nga ai: sakse langai sha rai yang chyawm gaw si hkrum lu na n rai. ⁷ Dai wa hpe sat na rai yang, sakse ni a lata shawng jahtim nna she, dai hpang amyu masha nlang hte jahtim nang na rai mu ai: shingrai jang, nang kaw na n shawp ai amu seng kau lu na ra ai. ⁸ Na a mare hta ndang kalang hkat amu ngu ai, bunglat amu, ru hka amu, gasat ningjet amu langai ngai pru nna, amu nau kaba ai majaw nang n sat ya lu yang gaw, nang rawt nhtawm, na a Karai Kasang Yehowa san da ai shara de sa nna, ⁹ Lewi masha hkinjawng ni hte dai aten e tara agyi galaw ai wa hpang de sa gawn na rai ndai: shanhte mung nang hpran ya na lam madun na mara ai. ¹⁰ Yehowa san da ai shara na ni madun ai tara lam hku hkan nna galaw na rai ndai; shanhte nang hpe sharin ya ai hte maren hkan galaw na rai ndai: ¹¹ shanhte nang hpe madun ai tara hte maren mung, shanhte dawdan ya ai lam hku mung, nang hkan galaw na rai ndai; shanhte madun ai lam hta na pai de hkra de yit lu na n rai. ¹² Na a Karai Kasang Yehowa man e amu gunhpai ai hkinjawng wa hte tara agyi wa a ga n madat ai, dingsa sa tawt lai ai wa gaw sat kau ai hkrum na rai nna, Israela amyu hta na n shawp ai amu seng kau lu na rai ndai. ¹³ Shaloi amyu masha ni nlang dai shi na nna, hkrit gari let htawmhpang e tinang myit n hkan ai nga nga na mara ai. ¹⁴ Na a Karai Kasang Yehowa nang hpe jaw ai mungdan hta nang shang nna, madu sha nga lu ai nhtoi hta, nang gaw Nye a grupyin na masha amyu ni zawn ngai mung nye a ntsa e hkawhkam langai mi tawn da na nngai, nga nna tsun ndai rai yang; ¹⁵ Na a Karai Kasang Yehowa lata la ai wa, na a hkawhkam teng teng tai na rai nga ai: na a amyu hpunau wa hpe sha hkawhkam aya jaw lu na rai ndai; na a hpunau n re ai, maigan masha wa hpe na a hkawhkam shatai lu na n rai. ¹⁶ Raitimung, dai hkawhkam wa gaw gumra rem mai ai n rai; gumra law law lu la hkra nga, mung masha ni hpe Egutu mung de nhtang shangun lu na n rai: kaning rai nme law, Dai lam de nanhte galoi mung nhtang lu na myit dai n ra, nga nna Yehowa nanhte hpe tsun sai. ¹⁷ Shi a myit masin lam n dam lu ga, num law law mung la tawn lu na n rai; aja gumhpraw mung law wa mahkawng da lu na n rai. ¹⁸ Dai hta kaga dai wa gaw shi a shu mashi shu masha prat dingsa, Israela amyu a mungdan hta asak galu kaba nga lu hkra, shi a Karai Kasang Yehowa hpe hkrit hkungga nga nna, ¹⁹ ndai tara matsun maroi nlang shatsup lu hkra sharin na hte, shi a kahpu kanau ni hta gumrawng gumra n re ai sha, hkangda ai lam hta na pai ahkra n yit na matu, ²⁰ shi a mungdan a tingnyang ntsa dung nga lu ai shaloi, Lewi masha hkinjawng ni a lata e nga ai, ndai tara laika hpe shabawn mi ka htawt la nna, dai hpe lang nga let, shi hkrung nga ai prat dingsa hte matsing nga na rai wu ai.

¹ Lewi masha hkinjawng ni ngu ai Lewi amyu ting gaw Israela amyu gale zawn kumhtaw hte Sali wunli n lu ma ai rai nna, Yehowa hpe jaw jau ai wan nat hkungga hte shi a sinli wunli shanhte sha na rai ma ai. ² Dai rai nna shanhte gaw hpunau ni zawn sali ga madu lu ai n rai: shanhte hpe tsun da ai hte maren Yehowa gaw shanhte a sali wunli rai nga ai. ³ Mung masha ni hkungga jaw ai shaloi dumsu hta na raitimung, sagu hta na raitimung, hkinjawng wa a kumhtaw matu jaw na tara gaw ndai rai nga ai: jaw jau ai wa gaw hkinjawng wa hpe lahpa magyi mi, shabyi lahkawng maga hte pu hpam pu kan mung; ⁴ shawng shu la ai nai mam, tsabyi jahku hte namman mung; shawng rep ai sagu mum mung jaw na rai wu ai. ⁵ Kaning rai nme law, shi hte shi a kashu kasha prat dingsa Yehowa a amying hte shi a magam gunhpai na matu, na a Karai Kasang Yehowa, na a nhpu nnau ni nlang hta na shi hpe lata la nu ai. ⁶ Israela mung ting a mare ni hta shingbyi manam nga ai Lewi wa langai ngai, nja nhpra myit kaba hte Yehowa lata la ai shara de du sa yang, ⁷ Yehowa a man e tsap nga ai Lewi hpunau ni nlang hte maren, shi a Karai Kasang Yehowa a mying hte shi amu gunhpai lu nna; ⁸ shi a sali wunli dut nna lu ai arai hta kaga hpunau ni hte maren hkam sha lu na rai nga ai. ⁹ Na a Karai Kasang Yehowa nang hpe jaw ai mung hta nang shang sha lu ai shaloi, dai mung e nga ai masha amyu ni galaw ga ai matsat shabat lam hkan galaw na nga, nang sharin la lu na n rai. ¹⁰ Tinang a shayi shadang sha hpe wan hta nat nawng ai wa, shaba wawt ai wa, myihtaoi htoi ai wa, lawng dat chye ai wa, mandan bau chye ai wa, ¹¹ ahkyu hkyu chye ai wa, atsu hte shaga chye ai wa, shung sha chye ai wa hte gumhpan hpan ai wa langai mi muk nanhte hta nga lu na n rai. ¹² Kaning rai nme law, ndai lam galaw ai wa kadai mung Yehowa man e matsat shabat rai nga ai: dai matsat shabat lam a majaw, na a Karai Kasang Yehowa dai amyu ni hpe na a man na shachyut kau wu ai. ¹³ Nang gaw na a Karai Kasang Yehowa man e hkum tsup nga na rai ndai. ¹⁴ Nang madu lu na rin dai amyu ni gaw myihtoi htoi ai ni hte shaba wawt ai ni a ga madat ai ni rai ma ai: nang chyawm gaw shingrai galaw na, na a Karai Kasang Yehowa ahkang n jaw ndai. ¹⁵ Na a Karai Kasang Yehowa gaw, ngai zawn re ai myihtoi langai mi, na a hpunau ni hta na, na a matu paw pru shangun na ra ai: dai wa a ga nanhte madat lu na rai myit dai. ¹⁶ Horeb bum e hpawng ai shani e, nang tsun ndai gaw, Ngai n si n ga, ya hpang de nye a Karai Kasang Yehowa a nsen ngai bai n na lu ni ga, dai wan kaba hpe mung ngai bai n mu ni ga, nga nna na a Karai Kasang Yehowa hpe hpyi nem ndai hte maren, ¹⁷ Yehowa mung shanhte tsun ai ga htuk nga malu ai. ¹⁸ Shanhte a kahpu kanau ni hta na nang zawn re ai myihtoi langai mi, shanhte a matu ngai paw pru shangun na we ai rai nna, dai wa a n-gup hta nye a ga ngai hti bang na hte, ngai hkangda mada hte maren shi shanhte hpe htawn tsun na ra ai. ¹⁹ Dai wa nye a mying ningsang hte htawn tsun ai nye a ga hpe, kadai wa n madat yang, dai wa hpe ngai deng na we ai. ²⁰ Raitimung, ngai n hkangda ai, nye a ahkang hpyi hpun nna nden ja ai hte tsun pru ai myihtoi mung, Hpara shaje a amying hte tsun pru ai myihtoi mung, si lu na rai nga ai, nga nna ngai hpe tsun ai. ²¹ Yehowa tsun ai ga re ai n re ai gaw, anhte kaning di chye ginhka lu na rai ta? nga nna nang myit ung ang n yang, ²² dai myihtoi wa Yehowa a amying gang nna tsun ai hku amu n byin, shi tsun ai ga n dik lu yang gaw, dai gaw Yehowa tsun ai ga n rai nga ai: dai myihtoi wa nden ja ai hte gaw tsun nu ai: nang shi hpe hkrit ra ai n rai.

¹ Na a Karai Kasang Yehowa nan ghpe jaw ai mungdan hta nga nga ai masha amyu ni hpe, na a Karai Kasang Yehowa jahtum kau wu ai rai nna, shanhte a shara hta nang shang lu ai hte, shanhte a mare ni, shanhte rawng nga ai nta ni hta nang rawng nga lu ndai shaloi, ² na a Karai Kasang Yehowa nang hpe madu sha shangun ai mungdan a kata e mare masum nang san da na rai ndai. ³ Masha sat hkrup ai kadai mung, dai de hprawng lu hkra, na sali wunli matu na a Karai Kasang Yehowa nang hpe jaw ai mungdan hpe, masum hpai di karan nna, nmaw lam ni hpe mung gram kau na rai ndai. ⁴ Masha sat hkrup nna tinang asak lawt hkra dai de hprawng lu na wa a lam gaw ndai rai nga ai: masha langai ngai hpun kran na nga manang wa hte nam de sa nna, ⁵ hpun kran nga yang nwa malaw gan wa ai hte manang wa hpe hkra ai majaw, manang wa hpe si hkra sat kau ai hku shang yang, ndawng ai myit hte n re ai she manang wa hpe hkala sat kau ai wa gaw, dai mare langai ngai de hprawng shingbyi lu na rai nna, shi asak lawt na ra ai: ⁶ dai n rai yang gaw, matai htang ai wa pawt bu nga yang, dai wa hpe hkan chachyut nna, hprawng lam tsan ai majaw hkan dep yang sat kau na ra ai: shing mai rai na n rai; kaning rai nme law, shi gaw manang wa hpe ndawng ai myit n rawng ai majaw sat kau hkrum ging ai n rai. ⁷ Dai re ai majaw mare masum nang san da na lam ngai nang hpe hkangda de ai. ⁸ Dai ni ngai nang hpe hkangda mada ga mahkra shatup let, na a Karai Kasang Yehowa hpe tsawra ai myit hte shi a lam hta tutnawng hkan nga ai hta mung; ⁹ na a Karai Kasang Yehowa na nji nwa ni hpe jaw na nga ndat da ai mungdan nlang nang hpe jaw nna, na nji nwa ni hpe dagam da sai hte maren, na a mungdan hpe maden dat ya n yang mung; ¹⁰ na a Karai Kasang Yehowa na a sali wunli matu jaw ai mungdan hta n si ging ai wa si ai hkrum nna, masha sat ai yubak na a ntsa e n du lit ga gaw, ya tsun ngut sai mare masum hta kaga, mare masum naw jat san da na rai ndai. ¹¹ Lam mi gaw manang wa hpe ndawng ai myit hte gyam nna shi hpe si hkra anu kayat ai wa, dai mare langai ngai de hprawng nna du lu hkra raitimung, ¹² shi nga ai mare na agyi salang ni gaw masha shangun nna, dai wa hpe woi la nhtawm, shi si lu na matu, matai htang ai wa a lata hta ap kau na rai mu ai. ¹³ Na a myi gaw shi hpe matsan yu dum lu na n rai; nang ngamu ngamai lu n ga, masah sat ai yubak hpe Israela amyu hta na seng kau na rai ndai. ¹⁴ Nang madu sha lu na matu na a Karai Kasang Yehowa nang hpe jaw na mungdan e nang lu la ai sali ga hta, moi na ni jung tawn ai htingbu wa a arit bandung hpe tawt kau ya lu na n rai. ¹⁵ Marai langai ngai a galaw shut ai mara, tawt lai kau ai yubak sagawn yu n yang, sakse nangai sha hte ngut lu na n rai: sakse lahkawng masum a n-gup ga hte rai yang she grin lu na rai nga ai. ¹⁶ N teng n man ai sakse wa langai ngai, masha wa a lam n teng n man ai hku mara shagun ai rai yang, ¹⁷ amu rawng ai yan shan lahkawng Yehowa a man e, dai prat na hkinjawng ni hte tara agyi ni hpang de sa jeyang na rai nna; ¹⁸ dat tara agyi ni azin ayang sagawn yu yang, dai sakse wa masu ai sakse rai nga ai rai nna, shi manang wa a lam n teng n man ai sakse hkam ai teng yang gaw; ¹⁹ shi a manang wa hpe di maw ai hku hkan nna shi hpe mahtang di na rai ndai: shingrai n shawp ai yubak nang kaw na seng kau na rai ndai. ²⁰ Shaloi masha gale ni mung dai na nna hkrit ai hte htawmhpang de dai zawn re ai amu n shapraw ai nga na mara ai. ²¹ Na a myi gaw shi hpe matsan yu dum lu na n rai; asak a matu asak, myi a matu myi, wa a matu wa, lata a matu lata, lagaw a matu lawgaw, matai htang ya na rai ndai.

¹ masha hpyen ni hpe nang gasat sa wa ndai shaloi, gumra hte hpyen leng ni hpe mung, nang hta grau law ai masha ni hpe mung nang mu lu yang, nang shanhte hpe hkrit lu na n rai: kaning rai nme law, nang hpe Egutu mung na shaw woi wa ai, na a Karai Kasang Yehowa gaw nang hpang maga rai nga ai. ² Hpyen de htim na rai jang, hkinjawng wa gaw sit sa nna masha ni hpe ning ngu na rai wu ai: ³ Israela amyu e, madat u; masha hpyen ni hpe gasat na dai ni nanhte hkyen ngut manit dai: dai rai nna shanhte a majaw, myit hkum htum et; hkum hkrit, hkum gari, hkum kajawng hkum ma myit: ⁴ Kaning rai nme law, nanhte a Karai Kasang Yehowa gaw, masha hpyen ni hpe manga kau nna, nanhte hpe hkye la na nga, nanhte hte rau sa wa nga ai, ngu na rai wu ai. ⁵ Bai hpyen du ni mung masha ni hpe, Nta gap nna dingshawn garai n shang ai, kadai lawm nga a ta? dai wa gaw nta de wa u ga; dai n rai, majan e si dam yang, masha wa e shang la kau na, tsang ra ai. ⁶ Tsabyi sun hkai nna asi garai n di sha lu ai, kadai lawm nga a ta? dai wa gaw nta de naw wa u ga; dai n rai, majan e si dam yang, masha wa e dai si hpe sha kau na, tsang ra ai. ⁷ Num mahtan da nna garai n hkungran ai, kadai lawm nga a ta? dai wa gaw nta de naw wa u gaw; dai n rai, majan e si dam yang, num dai hpe masha wa e la kau na, tsang ra ai, ngu na rai mu ai. ⁸ Bai hpyen du ni gaw, Hkrit ai myit rawng nna myit htum ai masha kadai lawm nga a ta? dai wa gaw nta de wa u ga; dai n rai yang, shi a majaw, manang ni mung myit htum mat na, tsang ra ai, ngu nna masha ni hpe naw tsun na rai mu ai. Hpyen du ni gaw dai tsun ngut jang, masha ni hpe woi awn na matu hpyenbu karan san na rai ma ai. ¹⁰ Mare langai nga hpe gasat na du sa wa ndai shaloi, htinglu htinglai na lam nang shawng tsun na rai ndai. ¹¹ Dai mare na ni htinglu na hku htan nna, mare chinghka hpaw ya ma yang gaw, dai mare na masha nlang nang kaw jahkawn bang nna, na a amu gunhpai lu na rai ma ai. ¹² Dai na rai, htinglu ga n tsun ai sha, nang hpe hkap gasat ma yang gaw, dai mare hpe nang wang tawn nna, ¹³ na a Karai Kasang Yehowa na a lata de ap ya ndai shaloi, lasha nga manga hpe nhtu hte sat kau na rai ndai: ¹⁴ numsha hte ma kaji ni, yamnga ni hte mare e mu la ai arai nga manga hpe tinang a matu nang magawn la nna, na a Karai Kasang Yehowa jaw ai, nang hpe hpyen ai wa kaw na lu la ai lanep hpe nang sha lu na rai ndai. ¹⁵ Ndai amyu ni nga ai mare ni hta shing di na rai ndai. ¹⁶ Na a Karai Kasang Yehowa na a sali wunli matu jaw ai ndai amyu ni nga ai mare ni hta na nsa sa chye ai shinggyim masha langai mi hpe muk jahkrung da lu na n rai. ¹⁷ Hiti, Amori, Kanani, Perizi, Hiwi hte Yebusi masha ni, shanhte a Hpara hta galaw ai matsat shabat lam nanhte hpe sharin ya nna, nanhte a Karai Kasang Yehowa hpe n shut myit ga, ¹⁸ nanhte a Karai Kasang Yehowa hkangda sai hte maren, masha amyu ndai ni hpe atsai awai shamyit kau na rai myit dai. ¹⁹ Mare langai ngai hpe gasat la na nga, na na wang htawn n yang gaw, hpun ni hpe nang kran kau lu na n rai; kaning rai nme law de a namsi hpe nang sha lu na majaw kran kau lu na ndai n rai: masha hpe she wang ai rai yang, nam na hpun hpe wang ai rai wa sa ni? ²⁰ Asi n sha ai hpun ni hpe chyawm gaw, nang kran lu nna, nang gasat ai mare dang la lu ai du hkra, grupyin dap kum na matu, jahten lu na rai ndai.

¹ Na a Karai Kasang Yehowa nang hpe jaw ai mungdan hta shara ra mi kaw masha mang mu hkrup nna, kadai sat ai re ai n chye yang; ² nang kaw nga ai salang ni hte na a tara agyi ni pru sa nna, dai shara a grupyin nga ai mare ni de shadawn wa na rai ma ai: ³ si mang taw ai shara hte grau ni ai mare na salang ni gaw, daw garai n shagun, garai n marang sha yu ai dumsu upra la nna, ⁴ hkauna n galaw, nli n hkai ai hka lawt ai hkaraw de dun sa nhtawm, dai hkaraw e nga ai hpe du abyen daw ya na rai mu ai. ⁵ Lewi a kashu kasha hkinjawng ni mung sit sa na rai ma ai: kaning rai nme law, na a Karai Kasan gYehowa amu gunhpai na hte shi a amying nsang hta shaman ya na matu Yehowa shanhte hpe lata la nu ai rainna, ndang kalang hkat ai amu shagu hte anu hkat ai amu shagu hpe shanhte a ga hte shangut lu na rai ma ai. ⁶ Si mang taw ai shara hte grau ni ai mare na agyi salang ni gaw dai hkaraw e abyen sat ai nga upra a ntsa e tinang a lata shin kau let, ⁷ Anhte a lata gaw sai ndai n jahkaw ga ai, anhte a myi gawndai n mu ga ai: ⁸ Yehowa e, nang hkyehkrang la ai amyu Israela hpe matsan dum e law; n si ging ai wa hpe sat ai yubak gaw na a amyu Israela a ntsa e hkum shagun myit law, ngu nna htan tsun na rai mu ai. Shing di jang, masha sat ai yubak hta na lawt na ra ai. ⁹ Shingrai Yehowa a man e dinghpring ai hku galaw jang, n si ging ai wa a asai hpe nang hta na kashin kau lu na ra ai. ¹⁰ Nang masha hpyen ni hpe sa gasat nna, na a Karai Kasang Yehowa shahte hpe na a lata hta ap kau ai hte nang shanhte hpe rim la lu ndai shaloi, ¹¹ nang rim la ai bawng ni hta ahpraw tsawm ai num hpe mu nna, shi hpe tsawra ai hte na a madu jan shatai mayu n yang gaw, ¹² na a nta de shi hpe woi wa nhtawm, shi a kara shangun, lamyin doi kau ai hte, ¹³ rim la yang na hpun palawng shi raw kau nna, shata mi tup kanu kawa hpe hkrap lwt na nta e nga nga shangun na rai ndai: dai hpang shi hpe kahkyin la na rai nna shi gaw na a madu jan tai na rai nga ai. ¹⁴ Htawmhpang e nang shi hpe n tsaw n yang gaw, shi a myit machyu shangun na rai ndai: shi hpe arawng jahpoi kau nit dai majaw, shi hpe dut lu na n rai, mayam hku shangun sha lu na n rai. ¹⁵ Masha langai nga num lahkawng lu nna, langai mi hpe tsawra nhtawm, langai mi hpe n tsaw n ra wu ai; dai lahkawng yan kasha shaprat ai hta shawng shangai ai alat gaw n tsaw num a kasha mahtang re ai rai yang; ¹⁶ dai la wa gaw shi a sali wunli karan ya ai shani e, n tsaw num hta na alat hpe shagrit nna, tsaw ai num a kahsa hpe alat aya jaw lu na n rai: ¹⁷ n tsaw ai num a kasha hpe alat aya yin nna, sali wunli htam lahkawng jaw na rai wu ai: kaning rai nme law, dai wa mahtang she kawa n-gun ning shawng rai nga ai rai nna, alat aya gaw shi a rai nga ai. ¹⁸ Masha langai ngai n shawp ai hte n hkru myit rawng nna kanu kawa shaga n madat ai kasha, kanu kawa gade sharin timung, sharin n lu ai kasha lu ai rai yang, ¹⁹ kanu yan kawa gaw kasha hpe dun nna, mare na agyi salang ni nga ai shi a mare chyinghka de woi sa nhtawm: ²⁰ Ndai an a kasha gaw n shawp ai hte n hkru ai myit rawng nna, an kanu kawa shaga n madat ai ma rai mali ai: lu lai, sha lai ma-mung rai mali ai, ngu nna mare na agyi salang ni hpe tsun na rai mu ai. ²¹ Shaloi mare na lasha ni nlang hte gaw dai kasha hpe nlung hte kabai sat kau na rai ma ai: shing di nang hta na n shawp ai yubak seng kau nna, Israela amyu nlang hte gaw dai shi na ai hte hkrit kang nga na mara ai. ²² Masha langai ngai si ging ai yubak galaw ai majaw sat kau ai hkrum nna, hpun hta noi tawn ai rai yang, ²³ na a Karai Kasang Yehowa nang hpe sali wunli jaw ai mungdan awu asin n hkrum na matu, dai wa a si mang hpe dai shani jang, ga hta teng teng lup kau na rai ndai; hpun hta shana tp noi da lu na n rai: kaning rai nme law, noi kau hkrum ai wa gaw, Karai Kasang kaw na dagam dala hkrum ai wa rai nga ai.

¹ Na hpunau wa a sagu dumsu lam dam ai hpe nang myi matu yu nna da lu na n rai: na a hpunau wa hpang de teng teng sa sa ya na rai ndai. ² Na a hpunau wa hte tsan ai rai yang mung, shi hpe n chye ai rai yang mung, dai sagu dumsu hpe na nta de gawt wa na rai ndai; na hpunau wa tam pru nna, shi a lata de ap ya ai nhtoi du hkra na a nta e rem da na rai ndai. ³ Lawze raitimung, hpun nba raitimung, na a hpunau wa a rai lama ma mat nna nang mu ya yang, myi matu n yu ai sha, dai hte maren hkap ya na rai ndai. ⁴ Na nhpu nnau wa a lawze, utang, lam e kataw nga ai hpe myi matu yu nga lu na n rai: shi hpe nang teng teng sharawt karum na rai ndai. ⁵ Numsha gaw ala a hpun palawng bu hpun lu na n rai; lasha mung anum hpun palawng bu hpun lu na n rai: dai lam galaw ai ni gaw na a Karai Kasang Yehowa a man e matsat shabat rai nga ma ai. ⁶ Hpun ndung e raitimung, ga e raitimung u kanu gaw u tsip hta udi shing n rai, u hkai hkalung hpum nga ai hpe mu hkrup yang, u kanu hpe kasha ni hte hpawn la kau lu na n rai: ⁷ nang ngamu ngamai nna asak galu lit ga, kasha ni hpe la kau n yang mung, kanu hpe teng teng dat dat na rai ndai. ⁸ Nta magaw na masha hkrat ai a majaw, na nta hta masha sat ai yubak n du lit ga, nang nta nnan galaw ai shaloi, nta magaw ntsa hpe makau grup hkum ban na rai ndai. ⁹ Na a tsabyi sun hta amyu gale nli hkai kayau lu na n rai; shing di yang, dai nli gale a asi hte tsabyi si lahkawng yan nawng, nawku shara hta sum kau lu na rai ndai. ¹⁰ Utang hte lawze hpe dwi nna yi galau lu na n rai. ¹¹ Sagu hte lachyit kayau da ai hpun palawng bu hpun lu na n rai. ¹² Nang lawai ai nba a matu mali maga de shingman madat da na rai ndai. ¹³ Masha langai ngai num la nna hkungran nga sha ngut ai hpang, dai num hpe bai n tsaw nna, ¹⁴ Ngai ndai num hte nga sha we yang, shi a hkawn jet kumla ngai n mu we ai; nga nna dai numsha hta kaya shara shapraw ai hte shi a arawng jahpoi ya ai rai yang; ¹⁵ dai numsha a kanu kawa ni gaw kasha jan a hkawn jet sakse ngu na kumla la lang let, mare chyinghka e nga ai du gyi salang ni hpang de sa nhtawm: ¹⁶ dai mahkawn a kawa gaw agyi salang ni hpe, Ndai wa hpe nye a shayi sha ngai ya sha we ai; shi gaw nye a shayi sha hpe ndawng n yawt nna, ¹⁷ Na a shayi sha hta hkawn jet kumla ngai n mu we ai, nga nna kaya shara shapraw ya nngai: raitimung, yu mu, ndai gaw nye a shayi sha a hkawn jet kumla rai nga li ai, ngu nna tsun nhtawm, mare na agyi salang ni a man e dai nba hpyan dan na rai wu ai. ¹⁸ Shaloi dai mare na salang ni gaw dai la wa hpe kayat nhtawm, ¹⁹ gumhpraw joi mi shawa nna num jan a kawa hpe jaw na rai wu ai: kaning rai nme law, Israela amyu shayi sha a arawng hpe shi jahpoi nu ai: dai numsha mung shi a madu jan tai nga lu na rai nna prat tup hka lu na n rai. ²⁰ Shing n rai, la wa a ga mahtang teng nna, dai numsha hta hkawn jet kumla n nga lu yang gaw; ²¹ numsha dia hpe kawa nta chyinghkra de shanhte woi wa nna, dai mare na lasha ni nlang shi hpe nlung hte kabai sat na rai mu ai; kaning rai nme law, shi gaw kawa nta e nga nga yang shawa num tai nna, Israela amyu hta n htap ai lam galaw nu ai: shing di nang hta na n shawp ai amu, nang seng kau na rai ndai. ²² Dinghku num hte kaga la wa shut nga ai mu hkrup yang, dai la wa hte num jan, shan lahkawng gaw sat kau ai hkrum lu na rai nga ai: shing di, Israela amyu hta na n shawp ai yubak seng kau na rai ndai. ²³ Mahkawn langai ngai masha wa sa mahtan tawn sai hpang e la kaga hte mare e hkrum nna shut hpyit nga ai rai yang, ²⁴ shan lahkawng hpe mare chyinghka de woi shapraw nna, nlung hte kabai sat na rai myit dai: num jan mung mare e rai nga yang, n jahtau wu ai majaw, la wa mung masha num hpe shut ya ai majaw, sat kau ai hkrum lu na rai ma ai: shing di nang hta na n shawp ai amu nang seng kau na rai ndai. ²⁵ Raitimung, la wa gaw, dai mahtan tawn sai mahkawn hpe pa hkan e adip akrip di nna shut ai rai yang gaw la wa hkrai sha si lu na rai nga ai: ²⁶ dai mahkawn hpe hpa mung di lu na n rai; shi hta si ging ai yubak n nga lu ai: ²⁷ kaning rai nme law, la wa dai numsha hpe lam e hkrum nna num jan jahtau timung, hkye la na masha n nga ai majaw, dai gaw masha shada sat hkat ai amu zawn rai nga ai. ²⁸ Masha garai n mahtan tawn ai mahkawn hpe la langai ngai rim la nna shut hpyit nga ai mu yang, ²⁹ dai la wa gaw num jan a kawa hpe gumhpraw manga shi wa lu na rai wu ai; shi hpe arawng jahpoi kau wu ai majaw dai numsha mung shi a madu jan tai na rai nga ai: shi hpe prat tup jahka lu na n rai. ³⁰ Kadai mung tinang a kawa hte seng ai, kawa a madu jan hte nga sha lu na n rai.

¹ Sat kau ai, shing n rai, daw kau ai a majaw lasha hkrang n hkum mat ai lasha kadai mung, Yehowa a shawa hpawng hta lawm lu na n rai. ² N-gyi ma kadai mung, Yehowa a shawa hpawng hta lawm lu na n rai: shi a kashu kasha prat shi du hkra Yehowa a shawa hpawng hta lawm lu na n rai. ³ A mmon amyu hte Moba amyu masha mung Yehowa a shawa hpawng hta shang lu na n rai; ⁴ nanhte Egutu mung na pru wa ai shaloi, muk hte ntsin gun nna n tau la ma ai majaw mung, nanhte hpe dagam na Mesopotami mung, Pehtora mare na Beora kasha Balam hpe shagta mu ai majaw mung, shanhte hta kadai mung prat shi n du dingsa Yehowa a shawa hpawng hta lawm lu na n rai. ⁵ Raitimung, na a Karai Kasang Yehowa gaw Balam a ga n hkan ai sha, na a Karai Kasang Yehowa nang hpe tsawra wu ai majaw, dagam ai lam hpe shaman ai shatai kau wu ai, ⁶ Dai re ai majaw, shanhte a ngamai wunli lam, shanhte a sutgan law wa nhpang hta galoi mung shadaw ya lu na n rai. ⁷ Edom masha hpe chyawm gaw n ju n yawt rai lu na n rai; shi gaw na hpunau wa rai nga ai: Egutu masha hpe mung n ju n yawt rai lu na n rai: nang shi a mungdan hta manam tia nga yu nit dai. ⁸ Shan a amyu matu gaw prat masum du jang she Yehowa a shawa hpawng hta shang lu na rai ma ai. ⁹ Nang masha hpyen ni hpe gasat na sa wa ndai shaloi, n san n seng ai lam shagu koi gam na rai ndai. ¹⁰ Shana e byin chye ai n san n seng ai lam a majaw, n san n seng ai wa nanhte hta lawm yang, dai wa gaw dap shinggan de pru nga na rai wu ai; dap kata e nga lu na n rai: ¹¹ jan du jang, shi hkum shin kau nna, jan shang jang she, dap de shang na rai wu ai. ¹² Na a nam sa shara mung, dap shinggan e rai lu na rai nga ai. ¹³ Nang lang ai hpyen arai ni hta shingban kaji mung nang shalawm nna dap shinggan de nang hkum sa tsan yang dai hte htu nhtawm na a shat sa hpe bai kaput kau da na rai ndai: ¹⁴ kaning rai nme law, na a Karai Kasang Yehowa, nang hpe hkye la nna, masha hpyen ni hpe na a lata hta ap kau na nga, na a dap e hkawm nga ai: dai re ai majaw nang kaw na n san n seng ai lama ma mu nnga, nang hpe n koi iau da n ga gaw, na a dap chyoi pra nga na rai lit dai. ¹⁵ Madu kaw na nang kaw hprawng pru ai mayam hpe madu a lata de bai ap ya lu na n ra: ¹⁶ dai wa gaw, shi nga mayu ai shara na a mare langai ngai hta nang kaw shingbyi nga lu na rai nga ai; shi hpe zingri zingrat di lu na n rai. ¹⁷ Israela amyu shayi sha ni hta na hpara shawa num da lu na n rai; Israela amyu shadang sha ni hta na mung hpara shaw la da lu na n rai. ¹⁸ Shawa num shabrai gumhpraw hte, gwi shabrai gumhpraw hpe ga shaka raw na matu, na a Karai Kasang Yehowa a htingnu de shawn lu na n rai: shing re ai gumhpraw amyu lahkawng gaw na a Karai Kasang Yehowa a man e, matsat shabat re ai lam rai nga ai. ¹⁹ Na a mayu shada, gumhpraw, shahpa hte hkoi shap ai hpa baw hta mung, atu amyat hpyi lu na n rai: ²⁰ maigan masha hpe chyawm gaw hpyi lu na rai myit dai: nang shang sha na rin dai mungdan e nang galaw ai lam magup hta na a Karai Kasang Yehowa nang hpe shaman ya n ga gaw, na amyu shada atu amyat hte hkoi shap ai lam koi gam na rai ndai. ²¹ Na a Karai Kasang Yehowa hpe ga shaka da n yang gaw, dai hpe lau n shatup ai hkring nga lu na n rai; kaning rai nme law, na a Karai Kasang Yehowa gaw nang kaw dai lam teng teng hpyi na rin dai: n shatup n yang gaw nang hta yubak pru na ra ai. ²² Ga shaka da ai n rai yang chyawm gaw, yubak pru na n rai. ²³ Na a Karai Kasang Yehowa hpe na a myit ra ai hku hte maren nang ga shaka tawn da nit dai rai nna, tinang n-gup hte tsun sai ga hpe nang shagrin lu na hte, da ngut sai ga hte maren galaw lu na rai ndai. ²⁴ Na a htingbu manang wa a tsabyi sun de nang shang n yang, nang hkru hkra sha lu nga ai; raitimung gun na lawm hkra la lu na n rai. ²⁵ Htingbu wa a yi hkauna hta shang n yang, mam nsi hpe lata hte di sha mai nga ai; raitimung, nhkyau hte dan la lu na n rai.

¹ La langai ngai num la nna nga sha nhtawm, dai numsha hta mara shagun shara lama ma rawng nna, myit n htuk lu yang gaw jahka ai laika jaw nna dat dat na rai wu ai: ² shaloi dai numsha gaw madu wa a nta na pru wa ai hpang, lasha kaga kaw wa lu na ahkang nga nga ai. ³ Hpang na la wa mung shi hpe n ra ai majaw, jahka ai laika jaw nna shabawn kau ai rai yang rai, dai madu wa si mat ai rai yang rai, ⁴ shawng na madu wa dingsa gaw dai n san n seng sai num hpe bai hta num la na n rai: dia gaw Yehowa man e matsat shabat rai nga ai: na a Karai Kasang Yehowa nang hpe sali wunli jaw ai mungdan hta yubak mara shapraw lu na n rai. ⁵ Dinghku ningnan shang sha ai wa gaw, majan gasat sa lu na n rai; du ni a magam mung gunhpai lu na n rai: laning mi tup tinang a nta e san san nga nna, madu jan hpe bau maka nga na rai wu ai. ⁶ Htum rin hpe nang tanga la ya lu na n rai; ntsa magap lung pyi la ya lu na n rai: kaning rai nme law, dai gaw masha asak tang la ai hku ang nga ai. ⁷ Mahsa langai ngai tinang hpunau Israela amyu hpe lagu la nna, mayam yam ai, shing n rai dut sha ai rai yang, dai lagut wa hpe sat kau na rai ndai: shing di nang hta na n shawp ai amu nang seng kau na rai ndai. ⁸ Manggang an lam hta, Lewi masha hkinjanwg ni nang hpe madun na ra ai hku hkan nna galaw lu na, sadi nga u: ngai shanhte hpe hkangda ai hku hte maren nanhte galaw lu na rai myit dai. ⁹ Egutu mung na nanhte pru nna lam e hkawm sa wa nga yang, na a Karai Kasang Yehowa Meriam hta shakap ai lam hpe dum nga u. ¹⁰ Na a htingbu wa hpe lama ma hkoi ya ai rai yang, shi tang kau sai rai la na nga, shi a nta nhku de shang lu na n rai. ¹¹ Nang shinggan e tsap nga nna, dai wa gaw shi tang ai rai shing gan de nang kaw la shapraw na rai wu ai. ¹² Dai wa matsan la ai rai yang gaw, shi tang kau ai rai hpe bai n ya ai nhtoi jahtoi lu na n rai: shi gaw tinang a hpun nba hpun let yup ypaw lu nna, nang hpe shaman ya n ga, shi tang tawn ai arai hpe jan garai n du yang teng teng bai ya lu na rai ndai: dai gaw na a Karai Kasang Yehowa a man e dinghpring ai amu rai na ra ai. ¹⁴ Na a hpunau hta na raitimung, nang kaw sa shingbyi nga ai amyu kaga ni hta na raitimung, matsan mayan re ai hte n lu n lawm nna nchyang chyang ai wa hpe adip akrip di lu na n rai; ¹⁵ shani shagu na, shi a shabrai jaw lu na rai ndai; n jaw ai jan hkum shadu et: kaning rai nme law, shi ga matsan ai majaw lu la ging ai shabrai hpe sha myit mada nga na ra ai: n jaw ai nga n yang gaw na a majaw Yehowa hpe shi jahtau nna nang hta mara rawng na ra ai. ¹⁶ Kasha ni a majaw kawa, kawa a majaw kasha si ai hkrum lu na n rai: kadai mung tinang a mara hte sha si ai hkrum lu na rai nga ai. ¹⁷ Ndang kalang hkat ai amu hta amyu kaga wa hte jahkrai nmai ma hpe jasum lu na n rai; gaida jan a hpun palawng hpe tang la kau lu na n rai: ¹⁸ Egutu mung e nang yamnga yu nit dai mung, na a Karai Kasang Yehowa dai kaw na ang hpe hkrang shaw wa nit dai mung, nang dum nga lu na rai ndai: dia re ai majaw ndai tara matsun ngai nang hpe tawng da ya se ai. ¹⁹ Na a yi hkauna hta nsi naisi shu la ai shaloi, malap kau da sai hkauling hpe bai hta la lu na n rai; nang galaw ai lam magup hta na a Karai Kasang Yehowa nang hpe shaman ya n-ga gaw, dai hpe amyu kaga wa, jahkrai nmai, gaida gaina ni a matu ngam da lu na rai ndai. ²⁰ Na a tsanlun si hpe kayat sharun la ndai shaloi, naw si ngam ai tsanlam si hpe bai kayat sharun la lu na n rai: dai gaw amyu kaga wa, jahkrai nmai, gaida gaina ni a matu ngam da na rai ndai. ²¹ Na a tsabyi sun na tsabyi si di la ndai shaloi, nlim bai gut lu na n rai; dai gaw amyu kaga wa, jahkrai nmai, gaida gaina ni a matu tai na rai nga ai. ²² Egutu mung e nang yamnga yu sai hpe dum lu na rai ndai: dai re ai majaw ndai tara matsun ngai nang hpe tawn da ya se ai.

¹ Marai Lahkawng shada amu rawng ai maujaw, tara agyi ni kaw sa shawk nna, tara agyi ni shan a lam hparan yang, ding manai wa hpe shaawng nna, n dingman ai wa hpe jasum na rai mu ai. ² N shawp ai wa shingna hkrum ging ai rai yang, tara agyi wa gaw dai wa hpe shi a man e shagum tawn nna, shia a mara hte ging ai made kayat shangun na rai wu ai. ³ Mali shi lang tup shi hpe kayat na mai nga ai; raitimung, dai hpe lai lu na n rai: dai hta lai nna law wa kayat yang gaw, na a hpunau wa hpe na a man e nau wa n jahpu ai hku tai na lit dai. ⁴ Mam kabye nga ai nga n-gup hpe magum ya lu na n rai. ⁵ Nta langai sha na shan hpu shan nau ni hta langai wa mi matu mara n nga ai si mat yang, dai si ai wa a gaida hpe masha kaga hta lu na n rai: shi a karat gaw shi hpe hta kahkyin la nna, karat hpe lashum ang ai hte maren lashum na rai wu ai. ⁶ Shingrai Israela amyu hta kahpu a amyu matu n mat hkra, shawng shangai ai kasha gaw si mat sai kawa di a matu mara tai na rai nga ai. ⁷ Kanau wa mahtang karat hpe n hta hkraw ai rai yang, dai numsha gaw agyi salang ni nga ai mare chyinghka de sa nn, nye a karat wa ga, kahpu wa a amying hpe Israela amyu hta n matut mayu nga ai; lashum lanoi ang ai hte maren, n shum n noi hkraw nga ai, ngu nna sa tsun dan na rai wu ai. ⁸ Shaloi mare na agyi salang ni gaw dai wa hpe shaga la nna san yu na rai mu ai: shi mung, Num ndai hpe ngai n hta mayu nngai, nga nna ndang ting ting re ai rai yang gaw; ⁹ dai numsha, agyi salang ni a man e shi kaw sit sa nna shi a kyepdin raw kau ya ai hte, shi a myiman hta mayen mahtaw bun ya let, Tinang kahpu a nta n gap mayu ai wa hpe gaw, ning di ma ai, ngu nna shi hpe tsun na rai wu ai. ¹⁰ Dai kaw nna Israela amyu ting hta, dai wa a nta hpe, Kyepdin raw kau lakung ngu nna shamying nga na rai nga ai. ¹¹ Lasha shada kamu hkat nga ai kaw, langai wa a madu jan dai de sit sa nna, shi a madu wa hpe hkye la na matu, langai wa a nsa lam hpe gang ya wu ai rai yang; ¹² dai num a lata hpe daw kau ya na rai ndai: na a myi gaw shi hpe matsan dum lu na n rai. ¹³ Na a tingsan hta kaba ai joi si hte kaji ai joi si ngu ai, n bung ai joi si gun lu na n rai. ¹⁴ Na a nta hta dang hteng kaji kaba ngu ai, n bung ai shadang rem lu na n rai. ¹⁵ Na a Karai Kasang Yehowa nang hpe jaw ai mungdan hte na a asak galu lit ga gaw, teng ma ai joi si, tengman ai shadang, nang ren lu na ndai. ¹⁶ Kaning rai nme law, maw sha map sha ngu ai n teng n man ai lam hkan ai ni nlang hte hpe na a Karai Kasang Yehowa matsat nga ai. ¹⁷ Nang Egutu mung na pru wa nna, bu lam hkawm wa ndai shaloi, Amalek masha ni nang hpe hkap tau ai hte, ¹⁸ nang n-gun yawm nna ba galawp nga yang, n-gun lagaw kya nna hpang hkrat nga ai ni hpe hkan hpya la ai loam hte Karai Kasang hpe n hkrit n kang ma ai lam hpe adum nga mu. ¹⁹ Dai re ai majaw, na a Karai Kasang Yehowa nang hpe sali wunli matu jaw ai mungdan hta, na a grupyin nga masha hpyen ni a lata na, na a Karai Kasang Yehowa nang hpe sim sa nga shangun ndai shaloi, Amalek hpe n dum lu hkra, sumsing lamu npu na atsai awai shamyit kau na rai myit dai; nang dai hpe malap kau lu na n rai.

¹ Na a Karai Kasang Yehowa nang hpe sali wunli matu jaw ai mungdan de nang shang madu sha lu ndai shaloi, ² na a Karai Kasang Yehowa nang hpe jaw ai mungdan hta shawng myin ai nsi naisi amyu shagu hta na nang la nhtawm, ka hta bang da nna, na a Karai Kasang Yehowa a mying ningsang tawn da na matu san da ai shara de sa na rai ndai. ³ Shingrai dai prat na hkinjawng agyi wa hpang de nang sa nhtawm, Yehowa anhte hpe jaw na nga ji wa ni hpe dagam da ai mung de ngai du ring ngai gaw, na a Karai Kasang Yehowa a man e dai ni ngai yin la nga nngai, ngu nna hkinjawng wa hpe tsun na rai wu ai. ⁴ Hkinjawng wa mung ka dai hpe na a lata na la nna, na a Karai Kasang Yehowa a hkungri man e tawn da na rai wu ai. ⁵ Shingrai na a Karai Kasang Yehowa man e nang tsun na gaw, Nye wa gaw let hkawm manam Arame masha rai li ai; shi gaw Egutu mung de yu wa nna dai yang, n law n htam hte sha, shingbyi nga ai kaw na galu kaba ai hte n-gun atsam rawng nna law htam wa ai amyu tai wa ai. ⁶ Egutu masha ni mung anhte hpe nhtum nni, zingri zingrat ai hte aja awa yam sha kau mi ai: ⁷ shaloi anhte gaw anhte a ji wa ni a Karai Kasang Yehowa hpe shaga gaw ai rai nna, Yehowa anhte a nsen madat mara ya ai hte anhte hkrum ai bungli lit hte nni nkri hpe yu ya mi ai. ⁸ Shaloi Yehowa gaw n-gun ja ai lata hte shada da ai lahpum, hkrithpa lam law law hte lamik kumla, mauhpa amu madun nna, ⁹ Egutu mung na anhte hpe shaw owi wa nthawm, nga chyu hte lagat jahku lwi ai ndai mungdan hta woi shawn tawn da ma ni ai. ¹⁰ Ya, Yehowa e, nang ngai hpe jaw ai yi hkauna a shawng myin ai nsi naisi ngai la sa ring ngai law, ngu nna na a Karai Kasang Yehowa a man e nawng let, na a Karai Kasang Yehowa hpe dingnyawm nawku na rai ndai: ¹¹ shingrai, na a Karai Kasang Yehowa nang hte na a nta masha ni hpe jaw ya ai chyeju nlang hte hta nang mung, nang hte rau nga ai Lewi wa hte amyu kaga wa mung jawm kabu nga lu na rai myit dai. ¹² Jahkawn hta ai shaning ngu na masum ning ningdaw hta, lu malu hta na htamshi na htammi lahkawn shinggyin tawn nhtawm, na a mare na Lewi wa hte amyu kaga wa, jahkrai nmai ma hte gaida gaina ni hkru hkru kat kat sha lu hkra, shanhte hpe gam jaw na rai ndai. ¹³ Shaloi e, na a Karai Kasang Yehowa man e, Nang ngai hpe hkangda sai hte maren, chyoi pra ai arai ni hpe nye a nta na ngai shapraw nna, Lewi wa hte amyu kaga wa hpe mung, jahkrai nmai ma hte gaida ngaina ni hpe mung, gam jaw mase ai: nang hkangda mada ga ni hpe ngai n tawt n lai, malap mali n di kau nngai. ¹⁴ Si hkrung bungli rawng yang dai hta na ngai n lang; n san n seng nga yang dai hpe ngai n hkra; si mang shakru ai hta dai hpe ngai n lang shalawm nngai: nye a Karai Kasang Yehowa a ga ngai madat ni ai: nang hkangda mada hte maren ngai hkan nang nngai. ¹⁵ Na a chyoi pra ai shara, sumsing lamu na gum yu nna, na amyu Israela hpe mung, ji wa ni hpe dagam da ai hte maren, anhte hpe jaw mi ai mungdan, nga chyu hte lagat jahku lwi ai ga hpe mung, shaman ya mi law, ngu na rai ndai. ¹⁶ Ndai matsun maroi ga hte dawdan ai ga hpe hkan nang lu na nga nna, na a Karai Kasang Yehowa dai ni nang hpe hkangda nit dai: dia rai nna, na a myit masin mahkra hte na a kraw lawang mahkra hte dai ga hpe nang hkan shatsup lu na rai ndai. ¹⁷ Yehowa hpe, na a Karai Kasang rai nga ai, nga nna mung, shi a lam hta hkawm nga na nngai, shi a matsun maroi, hkangda ai ga hte dawdan ai tara hpe hkan sahtsup na nngai, shi a nsen madat mara na ni ai, nga nna mung, dai ni nang yin la nit dai: ¹⁸ Yehowa mung, shi a ga ndat hte maren, nang shi a hkangda ai matsun maroi ga nlang hte hpe hkan shatsup lu n ga nga, shi a sali amyu shatai sa na nga nna mung, ¹⁹ shi hpan da sai masha amyu danghta hta, na a kajai gumhkawng ai, na a nsang mying, na a arawng sadang shagrau ya na nga nna mung, shi tsun tawn da sai hte maren, na a Karai Kasang Yehowa a matu nang hpe chyoi pra ai amyu shatai na nga nna mung, Yehowa dai ni yin la nu ai, nga nna Israela amyu hpe tsun wu ai.

¹ Bai Mawshe hte Israela amyu hta na salang ni gaw, amyu masha ni hpe ning ngu hkangda mu ai: Dai ni ngai nanhte hpe tawn da ya ai hkangda mada ga ni hpe hkan shatsup nga mu. ² Nanhte Yawdan hka wora hkran rap nna, na a Karai Kasang Yehowa nang hpe jaw ai mungdan de du ndai shaloi, nlung kaba ni nang sharawt shadun nna anggadi chya na rai ndai: ³ na nji nwa ni a Karai Kasang Yehowa ga ndat nga ai hte maren, nang hpe jaw ai mungdan, nga chyu hte lagat jahku lwi ai ga de shang sha na rap kawt lu jang, ndai jep ai tara ga nlang hte hpe dai nlung ni hta nang ka da na rai ndai. ⁴ Yawdan hka rap kawt jang, dai ni ngai hkangda ai nlung ni hpe Ebala bum e sharawt jung nna anggadi chya na rai ndai. ⁵ Dai yang e mung, na a Karai Kasang Yehowa a matu, nlung hte tawn hkungri gaw na rai ndai: hpri rai hte n daw n ga la ai sha; ⁶ lung din lung bawng ni hte na a Karai Kasang Yehowa a matu tawn hkungri nang gaw da nna, dai hta na a Karai Kasang Yehowa a matu wan nat hkungga nawng na rai ndai: ⁷ mahku hkungga ni mung nang nawng nna, dai yang lusha let na a Karai Kasang Yehowa a man e kabu gara nga na rai ndai. ⁸ Dai nlung ni hta ndai jep ai tara ga nlang hte hpe, nang dan dan pra pra ka da na rai ndai, ngu nna tsun mu ai. ⁹ Bai Mawshe hte hkinjawng ni, Lewi masha ni gaw, Israela amyu ting hpe, Israela amyu e, atsin sha nga nna madat mara la mu: dai ni nang gaw na a Karai Kasang Yehowa a amyu tai nga nit dai. ¹⁰ Dai re ai majaw na a Karai Kasang Yehowa a ga madat nga nu; dai ni ngai htawn tsun ai hkangda ai ga hte matsun maroi hpe hkan shatsup nga u, ngu nna tsun mu ai. ¹¹ Bai Mawshe gaw dai shani e masha ni hpe hkangda nna, ¹² Nanhte Yawdan hka rap kawt ai hpang, shaman ai maga na matu Gerizim bum e tsap na ni gaw, Simon, Lewi, Yuda, Yishahka, Yosep hte Ben-yamin rai na rai nga ai. ¹³ Dagam dala ai maga na matu Ebala bum e tsap na ni gaw, Rubin, Gad, Ashe, Zebulun, Dan hte Naphtali rai na rai nga ai. ¹⁴ Shaloi Lewi a kashu kasha ni gaw nsen shaja nna Israela amyu lasha ni nlang hte hpe ning ngu jantau na rai ma ai. ¹⁵ Yehowa matsat ai rai ngu ai, sama chye ai wa a lata hte tawk la ai sumla, chyaw la ai sumla galaw nna shim ai kaw tawn da ai wa gaw, dingnye hkrum u ga le, nga nna dagam yang, amyu masha ni nlang hte gaw, Amen, ngu nna htan na rai ma ai. ¹⁶ Kanu kawa hpe roi ai wa gaw dingnye hkrum u ga le, nga nna dagam yang, amyu masha ni nlang hte gaw, Amen ngu nna htan na rai ma ai. ¹⁷ Htingbu wa a lamu ga jarit bandung sit kau ai wa gaw dingnye hkrum u ga le, nga nna dagam yang, amyu masha ni nlang hte gaw, Amen ngu nna htan na rai ma ai. ¹⁸ Myi n mu ai wa hpe lam shadam ai wa gaw, dingnye hkrum u ga le, nga nna dagam yang, amyu masha ni nlang hte gaw, Amen ngu nna htan na rai ma ai. ¹⁹ Tara dara ai hta amyu kaga wa hte jahkrai nmai, gaida gaina hpe, n sun n ang ai hku jasum ai wa gaw dingnye hkrum u ga le, nga nna dagam yang, amyu masha ni nlang hte gaw, Amen ngu nna htan na rai ma ai. ²⁰ Kawa hte sha seng ai kawa madu jan hte nga sha ai wa gaw dingnye hkrum u ga le, nga nna dagam yang, amyu masha ni nlang hte gaw, Amen ngu nna htan na rai ma ai. ²¹ Dusat yamnga lama ma hte nga sha ai wa gaw dingnye hkrum u ga le, nga nna dagam yang, amyu masha ni nlang hte gaw, Amen ngu nna htan na rai ma ai. ²² Kawa a shayi sha, kanu a shayi sha ngu ai, tinang a kanau kana hte nga sha ai wa gaw dingnye hkrum u ga le, nga nna dagam yang, amyu masha ni nlang hte gaw, Amen ngu nna htan na rai ma ai. ²³ Tinang a kani hte nga sha ai wa gaw dingnye hkrum u ga le, nga nna dagam yang, amyu masha ni nlang hte gaw, Amen, ngu nna htan na rai ma ai. ²⁴ Htingbu wa hpe mayun de nna gyam anu ai wa gaw dingnye hkrum u ga le, nga nna dagam yang amyu masha ni nlang hte gaw, Amen, ngu nna htan na rai ma ai. ²⁵ Mara n lu ai wa hpe sat na lam shabrai la sha ai wa gaw dingnye hkrum u ga le, nga nna dagam yang, amyu masha ni nlang hte gaw, Amen, ngu nna htan na rai ma ai. ²⁶ Ndai jep ai tara ga hpe n hkan galaw ai wa gaw dingnye hkrum u ga le, nga nna dagam yang, amyu masha ni nlang hte gaw, Amen, ngu nna htan na rai mu ai.

¹ Dai ni ngai nang hpe hkangda mada ga yawng hpe hkan nang lu hkra, na a Karai Kasang Yehowa a ga hpe nang azin ayang madat n yang gaw, na a Karai Kasang Yehowa, masha amyu nlang hte hta nang hpe shagrau na rin dai: ² na a Karai Kasang Yehowa a ga nang madat n yang gaw, ndai chyeju shaman nlang hte na ntsa e du nna nang kaw pru na ra ai. ³ Na a mare hta chyeju shaman lu la na ra ai; na a yi hkauna hte chyeju shaman lu la na ra ai. ⁴ Kashu kasha matu mara hta mung, na lamu ga nsi naisi hta mung, yamnga mayat maya ai hta na, na a dumsu hte sagu bainam ulung ni hta mung, chyeju shaman lu la na ra ai. ⁵ Na a shingnoi htingga hta mung, muk gumrin ai ban hta mung, chyeju shaman lu la na ra ai. ⁶ Nhku shang wa yang shaman lu la na ra ai, shinggan pru wa yang, chyeju shaman lu la na ra ai. ⁷ Yehowa gaw nang hpe hpyen ai gumlau ni hpe na a man e jasum kau na mu ai: shanhte nang hpang de lam langai sha hta shang ma ti mugn, lam sanit hku na a man na htaw mat na mara ai. ⁸ Na a sutdek hta mung, nang galaw ai lam magup hta mung, Yehowa gaw na a ntsa e chyeju shaman lu la na hku tsun ya na rin dai: na a Karai Kasang nang hpe jaw ai mung hta nang hpe shaman ya na ra ai. ⁹ Na a Karai Kasang Yehowa a hkangda ai ga nang shatup nna shi a lam hkan sa n yang gaw, shi nang hpe dagam da ai hte maren, nang hpe shi a matu chyoi pra ai amyu shatai nga na rin dai. ¹⁰ Shingrai nang hpe Yehowa a amying ningsang hte nan shamying ai wa rai nga ai, nga nna ga ntsa amyu nlang chye lu ai hte nang hpe hkrit gari nga na rai ai. ¹¹ Yehowa nang hpe jaw na nga, nji nwoi ni hpe dagam da ai mungdan hta, shayi shadang sut, yamnga sut, nai mam sut kaja, Yehowa nang hpe shakat ya na ra ai. ¹² Na a mungdan hta du hkra ladaw shagu lamu marang jahtu ya na matu, Yehowa gaw shi a sutdek kaja ngu ai Sumsing lamu hpaw ya nna, na lata galaw ai lam magup hta nang hpe shaman ya na ra ai: masha amyu law law hpe nang mahtang hkoi ya lu na rin dai, nang gaw hkoi la ra na n rai. ¹³ Dai ni ngai nan ghpe hkangda ai, na a Karai Kasang Yehowa hkangda mada ga ni hpe hkan shatup lu hkra, nang madat mara nna, ¹⁴ dai ni ngai nanhte hpe hkangda ai lam hta na pai de hkra de n yit, Hpara shaje ni a hpang n hkan, dai ni hpe n jaw n jau ai nga n yang gaw, Yehowa nang hpe nmai n shatai ai sha abaw shatai na rin dai: nang gaw npu taw na n rai, ntsa e hkrai nga lu na rin dai. ¹⁵ Bai, dai ni ngai nang hpe hkangda ai, na a Karai Kasang Yehowa hkangda ai ga hte matsun maroi nlang hte hpe hkan nang na, shi a nsen nang n madat n yang gaw, ndai dagam dala dingnye nlang hte gaw na ntsa e du nna nang kaw pru na ra ai. ¹⁶ Na a mare hta dingnye rawng na ra ai; na a yi hkauna de dingnye rawng na ra ai. ¹⁷ Na a shingnoi htingga hta mung, muk gumrin ai ban hta mung dingnye rawng na ra ai. ¹⁸ Kashu kasha matu mara hta mung, na lamu ga nsi naisi hta mung, yamnga mayat maya ai hta na, na a dumsu hte sagu bainam ulung ni hta mung, dingnye rawng na ra ai. ¹⁹ Nhku shang wa de mung dingnye rawng na ra ai, shinggan pru wa de mung, dingnye rawng na ra ai. ²⁰ Tinang galaw shut ai yubak hte ngai Yehowa hpe kau da ai mara majaw, nang hten byak nna alawan htum mat ga du hkra, na lata galaw ai lam magup hta, dagam dala, sharu shatsang, aroi arip, na ntsa e du shangun na we ai. ²¹ Nang shang sha na mungdan hta na nang hpe jahtum kau lu hkra, Yehowa gaw dai ana zinli nang hta shakap na wu ai. ²² Yehowa gaw nang hpe mang shakrawi krawi ai, ali awaw waw ai, nma bya ai, bungge ge ai, jan gri ai, hkau pyi pyi ai, mam maru ru ai hte tsin-yam dai ni gaw nang kaw hkan nang na mara ai. ²³ Na baw ntsa na sumsing lamu gaw magri, na npu na lamu ga gaw ahpri tai na ra ai. ²⁴ Yehowa gaw na a mungdan hta htu ai marang hpe ga nhpu hte nbun shatai nna, nang htum mat ai du hkra dai gaw lamu de na, na ntsa e htu na ra ai. ²⁵ Nang hpe hpyen ai ni a man e Yehowa gaw nang hpe jasum kau na ndai; lam langai sha hku nang shanhte hpang de htim sa wa ai raitimung, lam sanit hku shanhte a man na nang hprawng htaw lu na rin dai; shingrai, ga ntsa ting na mungdan shagu de nang htawt hprawng hkawm lu na rin dai. ²⁶ Na a si mang gaw ntsa malen u ni hte nam na matse labye ni a shat tai na ra ai: dai ni hpe gawn kau lu na kadai mung nga na n rai. ²⁷ Yehowa gaw nagn hpe Egutu mung na shakrawi hte du htau htau ai, machyit chyit ai hte maru ru ai ana ngu ai, n mai chye ai ana hte tisn-yam jaw na rin dai. ²⁸ Yehowa gaw nang hpe mana bu ai, myi hten ai, mau pung ngang ai hte tsin-yam jaw nna, ²⁹ myi hten ai wa gaw n sin e lamawm ai zawn, shani chyingtung e pyi nang lamawm hkawm na rin dia; nang galaw ai lam n byin ai hte, zingri zingrat kashun kashe ai sha hkrum na rin dai; nang hpe kadai mung hkye la lu na n rai. ³⁰ Nang num mahtan tawn timung, masha wa la kau na ra ai; nta gap tawn timung, nang nan rawng lu na n rai; tsabyi sun hkai tawn timung, nang nan di sha lu na n rai. ³¹ Na a nga hpe na a man e sat tawn timung, nang nan shan sha lu na n rai; na a lawze hpe adip akrip rai la mat wa nhtawm bai sa ya na n rai; na a sagu ni hpe gumlau wa lata de shang wa nga timung, nang hpe hkye la ai masha pru na n rai. ³² Na a shayi shadang sha ni masha tsasam a lata de shang mat wa nna, nang gaw shani tup shanhte hpe hkan mada let gawng run nga na rin dai; na a lata hta mung, lapyin rawng na n rai. ³³ Na a mungdan a nsi naisi hte nang galaw tawn ai sutgan yang gaw nang n mu n chye yu ai masha amyu sha kau na mara ai; nang chyawm gaw zingri zingrat hkrum sha ai tut rai na nit dai: ³⁴ shingrai, nang hkrum sha ai shoi hpa a majaw nang mana mat na rin dai. ³⁵ Yehowa gaw na a lahput hte shinglang hta sha n rai, lagaw lahpan kaw nna baw pungitng hkren, mai n chye ai shakrawi hte tsinyam jaw na rin dai. ³⁶ Yehowa gaw nang hte na a ntsa e nang shadun ai hkawhkam wa hpe, nang mung n chye, na nji nwa ni mung n chye ai amyu hpang de woi mat wa na marin dai rai nna, dai yang e hpun hpara, nlung hpara re ai Hpara shaje ni hpe nawku lu na marin dai. ³⁷ Yehowa nang hpe woi mat wa ai mungdan shagu hkan e, nang gaw masha ni a mau shara, abung shadawn chyai shara hte asawng shara tai na rin dai. ³⁸ Mam nli law law wa na a yi hkauna de nang la sa timung, dinggam ni sha kau ai majaw kachyi sha shu la lu na n dai. ³⁹ Tsabyi sun hkai sharing tawn timung, shingtai sha kau ai majaw tsabyi si di la lu na n rai tsagbyi jahku mung lu lu na n rai. ⁴⁰ Nang nga ai shara magup hta tsanlun hpun tu timung, si garai n myin yang run mat ai majaw tsanlun sau hte na hkum hpe chya lu na n rai. ⁴¹ Kashu kasha shaprat timung, shanhte bawngdung mat na re ai majaw, na a kasha ngu lu na n rai. ⁴² Na a mungdan a hpun tu matu hte lamu ga nsi naisi nga manga hpe dinggam ni sha kau na mara ai. ⁴³ Nang hte rau nga ai amyu kaga wa gaw grau tsaw wa nna na ntsa de nga na ra ai; nang chyawm gaw npu shang nna taw lu na rin dai. ⁴⁴ Shi mahtang nang hpe hkoi shap lu na ra ai, nang chyawm gaw shi hpe hkoi shap lu na n rai; shi mahtang baw tai nna nang gaw nmai tai na rin dai. ⁴⁵ Na a Karai Kasang Yehowa nang hpe hkangda mada hte matsun maroi ga ni hpe hkan nang na nga, shi a nsen hpe nang n madat ndai majaw, nang htum mat ga du hkra dai dagam dala dingnye nlang hta gaw na a ntsa e du nna nang kaw pru na ra ai: ⁴⁶ dai gaw na a ntsa e mung, na amyu matu ni a ntsa e mung, prat dingsa lamik kumla hte mauhpa amu tai nga na ra ai. ⁴⁷ Nang ngamu nga mai ai hte yang, na a Karai Kasang Yehowa hpe kabu gara ai myit hte n daw n jau ndai majaw, ⁴⁸ Yehowa nang hpang de shangun dat ai masha hpyen wa hpe, kawsi hpang kara, singgu krin, matsan tsin-yam hkrum let dawjau lu na ndai: nang hpe jahtum kau lu ai du hkra, dai wa gaw na a du hta hpri kandang jahpai na ra ai. ⁴⁹ Yehowa gaw, kalang htim ai zawn larau ai masha amyu mi, tsan ai shara lamu ga htum na, nang hpang de sa gasat shangun na ra ai; dai amyu a shaga ai ga nang chye na na n rai: ⁵⁰ dai amyu gaw ru ai myiman man nna, dinla wa hpe hpa n nawn, ma hpe mung n gawn; ⁵¹ nang htum mat ai du hkra shanhte gaw na a yamnga, na a nsi naisi sha na mara ai; nang kaw jahten kau lu hkra, nai mam, tsabyi jahku, tsanlun sau, dumsu kasha hte sagu bainam kasha re ai ni hpe, na a matu tawn da ya na n rai. ⁵² Na mungdan hkan na, nang shamyet kam da ai mare bunghku, dai tsaw ai hte ngang ai bunghku ni, ndaw nru mat dingsa, na a mare ni hpe wang tawn na maru ai: na a Karai Kasang Yehowa nang hpejaw ai mungdan shara shagu na mare nga manga hpe wang tawn na maru ai. ⁵³ Shingrai wang tawn ai hte masha hpyen ni e shinggyin tawn ndai shaloi, tinang hkritung hkriwang na, na Karai Kasang Yehowa nang hpe jaw ai shayi shadang sha ni a shan sha lu kaw du na rin dai. ⁵⁴ Na a mare yawng hpe masha hpyen ni wang tawn nna, nang hpe shakyin tawn ndai shaloi, nanhte hta nachying sumung shingdi ai la wa pyi, lusha htum ai majaw, tinang a kasha shan sha yang, ⁵⁵ tinang a kahpu kanau, tinang a lahpyen na madu jan hte naw ngam nga ai kasha ni hpe pyi manawn ai myit rawng nna, shanhte hte jawm sha hkraw na n rai. ⁵⁶ Na a mare yawng hpe masha hpyen ni e wang tawn nna, nang hpe shakyin tawn ndai shaloi, nanhte hta nachying hkik htap ai hte shingdi la nna, hkik htap shingdi man sai majaw ga pyi n kabye wam ai num jan pyi gaw, ⁵⁷ lusha hpa nan n nga ai majaw, tinang shangai ai ma chyangai hte tinang hkritung na ma manang hpe pyi, tinang hkrai lagyim sha kau nna, tinang a lahpyen na madu wa hte tinang a shayi shadang sah ni hpe jaw sha na pyi manawn na wu ai. ⁵⁸ Na a Karai Kasang Yehowa ngu ai hpung shingkang hte hkrithpa rai nga ai mying ningsang hpe, hkrit kang nga na matu, ndai laika hta ka da ai tara matsun yawng hpe nang n hkan ai nga n yang gaw; ⁵⁹ Yehowa gaw, nang hkrum sha na ana zinli hte na a amyu matu ni hkrum sha na ana zinli ngu na, mauhpa ana, nachying kaba nna na du ai ana, grai laja nna na du ai ahkya shakap na ndai. ⁶⁰ Dai hta kaga, nang hkrit kang ai Egutu mung na ana zinli yang mayawng shi na ntsa e du shangun nna, dai ana ni nang hta kap na ra ai. ⁶¹ Dai hta n-ga, ndai laika hta n ka lawm ai machyi makaw hte ana zinli amyu shagu mung, nang n htum mat dingsa, na ntsa e Yehowa shangun dat na ra ai. ⁶² Nanhte sumsing lamu shagan made law htam myit dai raitimung, na a Karai Kasang Yehowa a nsen hpe n madat myit dai majaw kachyi sha mi rai mat na marin dai. ⁶³ Nang hpe chyeju hte karum nna shalaw jahtam ai amu hta Yehowa awng sharawng wu ai zawn, nang hpe hpya nna shayawm shagrit ai amu hta awng sharawng na wu ai rai nna, nang wa shang sha na rin dai mung hta na ningli shamyit kau ai hkrum na rin dai. ⁶⁴ Yehowa gaw lamu htum maga mi kaw nna lamu htum maga mi du hkra masha amyu nlang hte hta shara magup de nanhte hpe shabra kau nna, nang mung n chye ai, nji nwa ni pyi n na yu ai hpun hpra, nlung hpara re ai Hpara shaje ni hpe nawku lu na rin dai. ⁶⁵ Dai amyu ni hta nang ngamu lu na n rai, kan zaw chying lu na n rai; Yehowa gaw nang hpe masin kahpra ai, myiman sum na hte minla byaw mat ai, jahkrum na ndai rai nna; ⁶⁶ na asak sum wa magang ai lam hpe myit ru nga na rin dai: shani shana hkrit gari nga let, na asak prawn na n prawn na lam myit ung ang nga na rin dai. ⁶⁷ Na a myit masin hta na hkrithpa lam hte, na myi e mu lu ai lam ni a majaw, jahpawt e rai yang, Jan lau du u ga le, shana e rai yang, Nhtoi lau htoi u ga le, nga nna marit nga na rin dai. ⁶⁸ Lam ndai nang galoi mung bai mu lu sa na n rai, nga nna tsun kau sai lam hku, Yehowa gaw nang hpe Egutu mung de shanghpaw lu hte bai woi sa wa nna, dai yang e mayam num mayam la sa tai nna, hpyen ni hpe tinang hkum dai sa dut timung, mari na kadai n nga ai. ⁶⁹ Ndai hte gaw Horeb bum e Yehowa Israela amyu hte shaka da ai ga shaka hta kaga, Moba mung e dai amyu hte shaka da na matu, Yehowa Mawshe hpe hkangda ai ga shaka rai nga ai.

¹ Bai, Mawshe gaw Israela amyu masha nlang hte hpe shaga nna, Yehowa Egutu mung e Hpara-u hkawhkam hta mung, shi a mayam ni nlang hte hta mung, shi a mungdan ting hta mung, nanhte a man e shi galaw sai lam nlang hte ngu ai: ² tinang myi hte mu lu ai nachying kaba ai chyam dinglik amu, nachying kaba ai lamik kumla hte mauhpa hpung dagu ni hpe nanhte mu yu manit dai: ³ raitimung, chye na lu ai myit masin, mu la lu ai shinggan myi, na la lu ai na gaw, dai ni du hkra Yehowa nanhte hpe garai n jaw myit dai. ⁴ Ngai gaw nanhte hpe mali shi ning tup dai nam mali lam hku woi wa made yang, ngai nanhte a Karai Kasang Yehowa rai nga nngai gaw nanhte chye lu hkra, nanhte a hpun pa;awng n tsam mat, nanhte din ai kyepdin mung n htum; ⁵ nanhte muk mung n sha, tsabyi hte chyaru mung n lu ra myit dai. ⁶ Nanhte ndai de pru myit dai shaloi, Hesbon hkawhkam Sihon hte Bashan hkawhkam Oga gaw anhte hpe hkap gasat na nga pru sa ma ai hpe, anhte mahtang shan hpe dang kau lu ga ai: ⁷ shingrai shan a lamu ga anhte kashun la nna, Itubin amyu, Gad amyu hte Manashe amyu chyen mi hpe sali ga matu jaw kau sagaw ai. ⁸ Dai rai nna, nanhte galaw ai lam magup hta nanhte awng wa lu myit ga, ga shaka ndai hpe hkan shatsup shaja nga mu. ⁹ Nanhte a Karai Kasang Yehowa gaw, dai ni nanhte hpe shi a amyu shatai na nga, nang hpe tsun da sai hte, na nji nwa Abraham, Isak, Yaku hte hta dagam da sai hte maren, ¹⁰ na a Karai Kasang tai nga na matu, dai ni na Karai Kasang Yehowa nang hte tawn da ai shaka ga hte dagam ga hpe yin la na nga, ¹¹ nanhte a amyu hta na baw mung ni, salang ni, du agyi ni hte Israela amyu numsha lasha ma kaji ni kaw nna, na dap kata e nga ai hpun hta hka ja shingbyi manam du hkra, ¹² nanhte a Karai Kasang Yehowa man e, yawng mayawng dai ni tsap nga myit dai. ¹³ - ¹⁴ Dai hta n-ga, ndai shaka ga hte, ndai dagam ga hpe nanhte hte tawn da ai sha n rai: dai ni anhte a Karai Kasang Yehowa a man e tsap nga ai ni hte mung, dai ni anhte hta n tsap lawm ai ni hte mung tawn da nngai: ¹⁵ kaning rai nme law, Egutu mung e anhte kaning rai nga nga ga ai mung, lam hkan e, masha amyu ni a kaang hku kaning rai ga lai wa ai mung nanhte chye myit dai: ¹⁶ shanhte a matsat shabat lam ni hte shanhte nawku ai hpun, nlung, aja, gumhpraw hpara sumla ni hpe mung nanhte mu manit dai: ¹⁷ dai re ai majaw, anhte a Karai Kasang Yehowa kaw na yit mat wa mayu ai myit pru nna, dai masha amyu ni a hpara hpe sa nawku ai numsha, lasha, shing n rai amyu lakung langai ngai nanhte hta n nga pru u ga mung; nanhte hta na agung hte pila si si chye ai aru npawt n tu pru u ga mung; ¹⁸ shing re ai wa ndai dagam dala ga na jang, Ngai gaw nye a myit ja ai lam hkan nna, katsing mi da chyahkraw mi da nlang hten mat wa hkra raitimung, ngai gaw pyaw na nngai, nga nna tinang myit hta awng nga ai wa n nga pru u ga mung, sadi nga mu. ¹⁹ Dai wa hpe Yehowa lahpawt na wu ai n rai; Yehowa pawt bu ai hte nsu ai myit gaw dai wa a ntsa e grung nga nna, ndai laika hta ka da ai dagam dala nlang hte hpe dai wa a ntsa e ru bun na wu ai; Yehowa mung dai wa a amying hpe sumsing lamu npu na arut kau na wu ai. ²⁰ Yehowa mung, ndai tara laika hta ka dai ai ga shaka dingnye nlang hte hte maren, dai wa hpe Israela amyu matu hta na lat kau nna arai jaw na matu jahku tawn na wu ai. ²¹ Dai mungdan hta Yehowa shakap tawn ai ana zinli hte machyi makaw lam hpe mung, ²² Yehowa a pawt ai n-yun bu nna galau kau ai Sodom, Gomora, Adma, Zeboim mare ni hten mat ai zawn, mungdan ting kan hte jum wan hkru nna, nli n gat, nai mam n si, tsingdu tsingman n tu ai lam hpe mung. ²³ htawmhpang prat na nanhte a kashu kasha ni hte sumtsan mung na sa ai tsasam wa mu ma yang, masha amyu myu ni gaw, Ndai mungdan hpe hpa majaw Yehowa ning di wu ai i? Nde wa pawt ai sindawng gaw kaning re ai i? nga nna san shajang na mara ai. ²⁴ Shaloi masha ni gaw, Shanhte a kaji kawoi ni nawku ai Karai Kasang Yehowa shanhte hpe Egutu mung na shaw woi-wa ai shaloi, shanhte hte tawn da ai ga shaka hpe run kau mu ai majaw mung, ²⁵ shawng de shanhte n chye ai, shanhte hpe mung n hkangda ai Hpara shaje ni hpe nawku jaw jau ma ai majaw mung, ²⁶ laika dai hta ka da ai dingnye nlang hte hpe ndai mung hta jahkrat nna, Yehowa a pawt bu ai sindawng grung nga ai hte, ²⁷ shanhte a mungdan kata na Yehowa shanhte hpe shaw kau nna, dai ni du hkra, kaga mungdan de gawt shapraw kau ai rai nga ai, nga nna tsun dan na mara ai. ²⁸ Maloi magap nga ai hte gaw anhte a Karai Kasang Yehowa hte seng nga ai: ndai tara matsun nlang hte gaw, anhte hkan nang nga lu hkra, dan shapraw ya sai lam ni gaw, anhte hte anhte a kashu kasha ni hte htani htana seng nga ai.

¹ Raitimung, ndai lam yawng mayawng ngu ai, na a man e ngai tawn da ai shaman chyeju hte dagam dala dingnye nlang hte gaw, na ntsa e du nna, na a Karai Kasang Yehowa nang hpe shacyut kau ai mungdan shagu hte hta ndai lam ni hpe dum nga let, ² na a Karai Kasang Yehowa a hpang de bai kayin nna, dai ni ngai nang hpe hkangda mada hte maren, nang hte na a nshu nsha ni shi a ga hpe myit masin kraw lawang ting hte madat mara yang gaw; ³ na a Karai Kasang Yehowa mung, nang hkrum ai bawng nan amu hpe jahtum ya nna, nang hpe matsan dum ai hte kayin nhtawm, nang hpe shabra kau ai mungdan shagu hta na nang hpe shinggyin la na rin dai. ⁴ Na a bawngdung manang nkau mi gaw sumsing lamu npu tsan htum ai shara de gawt kau ai hkrum timung, dai kaw nna na a Karai Kasang Yehowa nang hpe shinggyin la na ra ai: ⁵ shingrai na a nji nwa ni shang madu sha ai mungdan de na a Karai Kasang Yehowa nang hpe bai shawn tawn nna, dai hta nang shang sha lu na rin dai: shaloi shi nang hpe bai lahku ai hta, nji nwa ni hta nang hpe grau nna shalaw jahtam na rin dai. ⁶ Nang hkrung nga lu hkra, na a Karai Kasang Yehowa hpe na a myit masin kraw lawang mahkra hte tsawra lu na matu, na a Karai Kasang Yehowa gaw na a myit masin hte, na matu mara ni a myit masin hpe matu gadoi ya na ra ai. ⁷ Na a hpyen wa ngu ai, nang hpe ndawng n yawt ai hte zingri zingrat ai ni hpe mung, ndai dagam dala dingnye nlang, na a Karai Kasang Yehowa shanhte hpe jahkrum na wu ai. ⁸ Nang chyawm gaw bai wa nna, Yehowa a nsen madat mara let, dai ni ngai hkangda mada matsun maroi ni hpe hkan shatsup nga na rin dai. ⁹ Nang gaw na a Karai Kasang Yehowa hpang de na myit masin mahkra hte kraw lawang mahkra hte kayin wa n yang gaw; ¹⁰ nang galaw ai lam magup tai wa lu na hte, na a shayi shadang, sutgan yamnga, nsi naisi gumja wa na ra ai: kaning rai nme law, Yehowa gaw na nji nwa ni hta awng sharawng wu ai zawn, na a akyu matu nang hta mung awng sharawng na ra ai. ¹¹ Dai ni ngai nang hpe hkangda ai matsun maroi gaw, nang n hkan lu hkra yak ai n rai, nang hte tsan la ai mung n rai. ¹² Dai ttara hpe anhte madat nna hkan shatsup lu hkra, sumsing lamu de kadai lung nna anhte hpang de la sa na i? nga nna san na gaw, sumsing lamu de nga ai n rai. ¹³ Dai tara anhte madat nna hkan shatup lu hkra, Namumukdara wora hkran kadai rap nna anhte hpang de la sa na i? nga nna san na mung, nammudara wora hkran e nga ai n rai. ¹⁴ Dai mungga gaw nang hkan lul na matu nang hte htep rai nga ai: na n-gup hta mung na kraw lawang hta mung rawng nga lit dai. ¹⁵ Yu u, nang asak galu nna myat maya wa lu na hte, nang shang madu sha na mungdan hta, na a Karai Kasang Yehowa nang hpe shaman ya lit ga gaw, na a Karai Kasang Yehowa hpe tsawra ai hta, shi a lam hkan nga nna, shi a hkangda ai ga, shi a matsun maroi hte ga madat hpe hkan nang nga nu, ngu nna dai ni nang hpe hkangda ai ga hta, ¹⁶ asak hkrung lam hte ngamu lam, si hkrung si htan, lam hte matsan tsin-yam lam na a man e ngai dai ni tawn da ya sade ai. ¹⁷ Dai n rai, na a myit dam mat wa nna, madat mara myhit n rawng ai hte agung alau ai de hkan nang nna Hpara shaje sa nawku mat wa n yang gaw; ¹⁸ Yawddan hka rap nna shang sha na marin dai mungdan hta asak hpungngang n nga ai; nanhte teng teng hten byak mat na marin dai, ngu nna dai ni ngai nanhte hpe shadum da nga nngai. ¹⁹ Asak hkrung lam hte si htan lam, shaman ai chyeju lam hte dagam dala dingnye lam, na a man e dai ni ngai tawn da ya sade ai, ngu nna na a lam sumsing lamu hte ginding aga hpe ngai sakse da ya se ai: dai rai nna, nang hte na a amyu matu ni hkrung nga lu myit ga gaw, asak hrung ai lam lata la mu: ²⁰ na a Karai Kasang Yehowa hpe tsawra u, shi a nasen madat kaning rai n-me law, shi gaw na a asak hkrung lam hte na a prat galu na lam rai nga ai: dai rai jang, Yehowa Abraham, Isak, Yaku hte hpe jaw na nga dagam da ai mungdan hta nang anga nga lu na rin dai, ngu nna Israela amyu masha mi hpe tsun da wu ai.

¹ Shaloi Mawshe gaw israela amyu ting hpe ndai ga madat tsun da wu ai. ² Shi shanhte hpe tsun wu ai gaw, Ngai gaw dai ni asak latsa e hkun ning du ni ai: ya kaw nna nanhte a man e ngai na hkawm n sa lu ni ai: Yehowa mung, Nang ndai Yawdan hka n rap lu na ndai, ngu ni ai. ³ Na a Karai Kasang Yehowa gaw na a shawng e rap sa wa nhtawm, dai mung na masha amyu nlang hpe shamyit kau nna shanthe a shara e nanhte shang sha lu na marin dai: Yehowa tsun da sai hte maren, Yawshu gaw na a mna e rap lu na ra ai. ⁴ Yehowa mung shi jahten kau ai Amori hkawhkam Sihon yan Oga a mungdan hte shan hpe di ai zawn, dia hkran na masha amyu ni hta mung di na wu ai. ⁵ Yehowa gaw shanhte hpe nanhte a lata de ap kau na ru ai rai nna, ngai hkangda mada hte maren shanhte hpe nanhte di lu na marin dai. ⁶ Dai rai nna, nanhte n-gun dating mu, myit nden shaja mu; hkum tsang myit, shanhte hpe hkum hkrit myit: nanhte hte rau hkawm sa nga ai wa gaw na a Karai Kasang Yehowa nan rai nga ai: shi nang hpe kau da na n rai, nang hpe kau rap rai na n rai, ngu nna tsun mu ai. ⁷ Shaloi Mawshe Yawshu hpe shaga la nna, Nang mung n-gun dating u, myit nden shaja u: Yehowa ndai ni hpe jaw na nga ji wa ni hpe dagam da ai mungdan nang shanhte hte rau rap sa nna, dai mungdan hpe madu sha shangun na rai ndai. ⁸ Na a man e hkawm sa ai wa Yehowa rai nga ai; shi nang hte rau nga nga ai rai nna, shi nang hpe kau da na n rai, nang hpe kau rap di na n rai; hku, tsang et, myit hkum htum e; ngu nna Israela amyu ting a man e tsu da wu ai. ⁹ Shaloi Mawshe gaw ndai tara ga nlang ka da nna, Yehowa a ga shaka supu hpai ai Lewi amyu hkinjawng ni hte Israela shalang ni nlang hte a lata hta ap da wu ai. ¹⁰ Shingrai Mawshe shanhte hpe hkangda mu ai gaw, Sanit ning du nna, mayam dat dat ai ningdaw ngu na sum poi du jang, ¹¹ nanhte a Karai Kasang Yehowa san da na ra ai shara e Israela amyu ting shi a man e tinang hkum pru dan na sa ma ai shaloi, ndai tara ga hpe Israela shawa hpawng nlang a man e hti dan na rai myit dai. ¹² Numsha, lasha ma kaji kaba nlang hte, na a mare na shingbyi manam ni chye na lu nna, na a Karai Kasang Yehowa hpe hkrit hkungga let ndai tara ga nlang hpe hkan nang nga mu ga, amyu masha ni hpe jahpawng tawn mu: ¹³ dai rai jang, garai n chye ai ma ni na la lu nna, nanhte Yawdan hka wora hkran e shan sha lu na marin dai mungdan hta nga pra lu prat dingsa, nanhte a Karai Kasang Yehowa hpe hkrit hkungga nga na matu sharin la lu na mara ai, ngu nna hkangda wu ai. ¹⁴ Bai, Yehowa Mawshe hpe tsun wu ai gaw Nang si na nhtoi du magang ra ai: Yawshu hpe shaga la su; ngai shi hpe hkangda we ga, shawa sum de pru s ama rit, ngu wu ai. Dai rai nna Mawshe yan Yawshu pru sa nna shawa sum de sa nga ma ai. ¹⁵ Yehowa mung dai sum e sumwi shdaw hta danpru nna, sumwi shadaw gaw sum chyinghka ntsa e jung nga ai. ¹⁶ Shaloi Yehowa Mawshe hpe, Yu u, nang gaw nji nwa ni hte yup pyaw nga na nit dai; ndai amyu masha ni chyawm gaw rawt nna, ya sa wa ai mung e nga ai tsasam amyu ni nawku ai Hpara ni hte shut hpyit nna, ngai e kau da let ngai tawn da ya ai ga shaka run kau na ra ai. ¹⁷ Dai shani e ngai shanhte hpe masin pawt nna shanthe hpe kabai kau na we ai; shanhte kaw na nye a myiman ngai makoi kau nna, shanhte hten bya hkrum ai hte ruyak kyindut amyu myu kadup na mara ai: dai shani shanhte gaw, Anhte a Karai Kasang anhte hta n nga ai majaw ndai yubak shoihpa anhte a ntsa e du ai n rai nga a ni? nga na mara ai. ¹⁸ Shanhte Hpara shaje hpang de rai mat wa nna, shut ai yubak nlang hte a majaw, dai shani e ngai gaw nye myiman shanhte kaw na teng teng makoi kau na we ai. ¹⁹ Dai rai nna, ndai mahkawn mangoi ga hpe ka tawn da nna, Israela kashu kasha ni hpe sharin ya mu: dai mahkawn mangaoi ga gaw Israela kashu kasha ni a man e nye a lam sakse tai nga na matu shanhte a n-gup hta rawng nga malu ga. ²⁰ Kaning rai nme law, shanthe a kaji kawa ni hpe ngai dagam da ai hte maren, nga chyu hte lagat jahku lwi ai mung de shanthe hpe ngai shaw tawn nna, shanthe hkru hkru kat kat sha lu ai hte hpum sau ai shani e, Hpara shje ni hpang de shanhte dam mat wa nna dawjau na mara ai; shanthe ngai hpe jahpoi nna nye a ga shaka run kau na mara ai. ²¹ Shingrai nna, yubak shoihpa nalng hte hte kadup ai shani dai mahkawn ga gaw shanthe a man e sakse tai nga na rai ai; shanthe a amyu lakung gaw dai hpe malap kau mai na n rai: ngai dagam ai mung de shanhte hpe garai n shawn yang nna pyi shanthe a myit hta maw mawn ai lam hpe ngai chye ya nga nngai, ngu na tsun wu ai. ²² Mawshe mung dai shani e ndai mahkawn mangoi ga ka da nna Israela kashu kasha ni hpe sharin yua wu ai. ²³ Num a kasha Yawshu hpe mung, N-gun dating u, myit nden shaja u; ngai dagam da ai mungdan de Israela kashu kasha ni hpe nang woi shawn na rai ndai; nang hte rau ngai nga nga na ring ngai, ngu nna hkangda wu ai. ²⁴ Mawshe gaw ndai tara ga hpe laika hta azin ayang ka da ngut jang, ²⁵ Yehowa a ga shaka sumpu hpai ai Lewi masha ni hpe Mawshe hkangda wu ai gaw, ²⁶ Ndai tara laika hpe lu na, nanhte a Karai Kasang Yehowa a ga shaka sumpu makau e tawn da mu; dai gaw na a matu sakse tai nga na rai nga ai. ²⁷ Kaning rai nme law, nang hta gumlau ai myit hte du ja ai myti rawng lit dai gaw ngai chye nga nngai; yu mu, ngai hkrung nga ai hte nanhte kaw naw nga nga yang pyi, nanhte Yehowa hpe gumlau manit dai; ngai si ai hpang dai hta grau nna gumlau na ni, n rai myit ni? ²⁸ Nanhte a amyu lakung ni a myitsu salang ni hte du agyi ni hpe ngai kaw jahpawng tawn maru; ngai shanteh hpe ndai ga nlang tsun da nna, shanhte a man e sumsing lamu hte gindaing aga hpe gang nna sakse tawn da we ga. ²⁹ Kaning rai nme law, ngai si mat ai hpang nanhte gaja wa htak mat nna, ngai hkangda ai lam hta na dam mat wa na marin dai gaw, ngai chye nga nngai; Yehowa a man e shut hpyit nna tinang lata e galaw ai amu hte shi hpe shapawt ai majaw, htawmhpang prat e nanhte ruyak tsin-yam hte kadup na marin dai, ngu nna shadum da wu ai. ³⁰ Shaloi Mawshe ndai mahkawn mangoi ga ma hkra, Israela shawa hpung a man e tsun hkai wu ai gaw:

¹ Sumsing lamu e, madat u, ngai tsun de ga, Ginding aga, ngai tsun ai ga na la u ga. ² Tsit lali ai tsingdu hta htu bun ai marang hte, Namlap hta htu hkrat ai marang ninghte zawn, Ngai sharin ai ga htu kahte nna, Nye a ga gaw mari zawn hkrat na ra ai. ³ Yehowa a mying ningsang hpe ngai hpaw dan ni ai; Anhte a Karai Kasang hpe shagrau mu. ⁴ Dai Lunghkrung, shi a magam hkum tsup nga ia. Shi a lam shagu dinghpring ai lam rai nga ai; Kangka re ai hte mara n rawng ai Karai Kasang, Dinghpring ai hte tengman, shi rai nga ai. ⁵ Shanhte hten byak masai, shi a kasha n rai, Agang chalang kap ai hkrai rai ma ai; Myit manai ai hte magaw ai amyu rai ma ai. ⁶ Angawk ai hte myit n su ai amyu e, Yehowa hpe dai hku htang na mu ni? Shi nang hpe hkrang la ai kawa n rai lit ni? Shi nang hpe hpan da nna shagrin da nit dai. ⁷ Moi chyaloi nhkoi na hpe dum mu, Lai mat wa sai prat ni hpe aru yu mu; Na nwa hpe san u, shi tsun na ra ai, Dingla ni hpe gawn yu u., shanhte hkai dan na mara ai. ⁸ Tsaw Htum ai Wa gaw amyu ni hpe ninghtawn karan na, Shinggyim masha ni hpe hpajang tawn ai shaloi; Israela amyu ni a nambat sawn nna, Mungkan amyu ni a lamu ga jarit tawn da nu ai. ⁹ Yehowa a kamhtaw chyawm gaw, shi a mayu rai nga ai, Yaku gaw shi a sali wunli rai nga ai. ¹⁰ Katsi katsang akrin ayang rai nna, Matse rai garu ai mali banda e, shi e mu la wu ai; Shi hpe makawp kawan, lahku lamai di ai hte Tinang myi sha hpe pawn maga wu ai. ¹¹ Kalang gaw shi a tsip hprun run nna, N kung u lung ni a ntsa e yan ai zawn, Shi shanthe hpe mapyen singkaw kahpyen nna pawn, Singkaw gumghtu e shalen nna awn wu ai: ¹² Shi hpe woi wa ai wa, Yehowa hkrai, Maigan Hpara kadai lawm ai n rai. ¹³ Ga ntsa tsaw grau ai shara hta shi hpe shajawn, Yi hkauna nsi naisi hte shi hpe shangawn wu ai: Machyu lunghtawn na lagat jahku, Nhpai lungkring na namman chyu mu shachyu wu ai. ¹⁴ Dumsu hta na htawbat hte sagu bainam hta na madoi chy shat, Sagu kasha a sau tung, Bashan sagu la hte bainam sau dung, Kaja htum ai hkaulan mam lung, jaw sha wu ai: Tsabyi jahku mung, tsabyi si sai hta na nang lu ndai. ¹⁵ Yeshurun chyawm ga hpum sau nna lahkat wu ai: Hpum sau ai hte shing-yan bawng nna di di tawng tawng nang rai nga ndai; Dai rai ti, hpan wa Karai hpe shi kau da nna, Shi e hkrang la ai Lunghkrung hpe n sawn wu ai. ¹⁶ Shanhte gaw Hpara shaje hte shi hpe n ju shangun mu ai, Matsat shabat lam hte shi hpe shapawt mu ai. ¹⁷ Karai Kasang n er ai nat ni hpe nau, Tinang n chye ai Hpara ni hpe jau mu ai: Kaji kawa ni n hkrit n kang yu ai, Ya sha shang ai Hpara ni hpe jaw jau mu ai. ¹⁸ Nang hpe sharat ai lunghkrung hpe n dum nit dai, Nang hpe shangai ai Kara Wa hpe malap nu ai. ¹⁹ Yehowa dai mu nna, shi a shayi shadang sha ni hpe, Shanhte a mara majaw, matsat kau mu ai. ²⁰ Shi tsun ai gaw, Shanhte myit magaw ai amyu, Kangka n re ai kashu kasha ni rai ma ai; Dai majaw, nye a myiman ngai makoi kau nna, Shanhte a lam jahtum hpe ngai yu yu na we ai. ²¹ Karai Kasang n re ai hte shanthe ngai e n ju shangun nna, Shanhte a rai dum la ai myit hte shapawt mi ai: Dai re ai majaw, hti n mai ai amyu hte ngai shanthe hpe manawn shangun nna, Angawk angak re ai amyu hte shapawt na mawe ai. ²² Nye a pawt bu ai hte wan nat dat nna, Sung htum ai katsan ga du hkra hkru wa ra ai: Ga hte de a nsi naisi hpe shakrawp kau nna, Bum ni a npawt pyi hkru mat nga ai. ²³ Shanhte a ntsa e ari zinli ngai data dat na we ai, Nye a pala shanthe hta sharut bun na we ai. ²⁴ Shanhte kawsi hpang kara, kahtet kamawt ari hkrum nna, Shoi hpa shoirang kaba hte nyawp mat na mara ai; Matse labye a kawng mung, ga na rai matse a tuk mung, Shanhte hpang de ngai dat dat na we ai. ²⁵ Ndaw shinggan de na ari nhtu, Nhku kata de na hkrithpa amyu gaw, Mahkawn hte shabrawng hpe n nga, Chyu chy ai ma hte baw hpraw ai dingla hpe n da hkra, hpya kau na ra ai, nga ai. ²⁶ Bai, ngai gaw, Masha hpyen wa myit tsaw wa na hpe, n tsang, Rawt gumlau ai ni gumrawng wa nna, Ndai amu nlang Yehowa di lu ai n rai, Anhte a lata nsam hte di sagaw ai, nga nna tsun na hpe n dang taw, ²⁷ Shanhte hpe tsan tsan ga de ngai shabra kau nna, Masha amyu hta na kadia n dum hkra shamyhit kau na, myit se ai. ²⁸ Shanhte gaw byak ai amyu rai nga, Shanhte hta myit hpaji n rawng malu ai. ²⁹ Shanhte hpaji byeng-ya lu la nna, ndai lam chye na lu mu ga law, Hpang jahtum e hpa byin hpa tai na, aru yuu mu ga le! ³⁰ Shanhte a shamyet lunghkrung shanhte e dut ya ai n rai yang, Yehowa nan shanthe kaw ap kau ai n rai yang, Marai langai sha masha hkying mi hpe, Marai lahkawng e sha mun mi hpe, kaning rai hkan jahtaw kau lu a ta? ³¹ Anhte e hpyen ai ni shanhte nan pyi, Anhte a Lunghkrung gaw shanthe a Lunghkrung hte dang bung ai n rai, nga nna tsun lu ma ia. ³² Shanhte a tsabyi ru gaw Sodom tsabyi ru, Gomora pa hkan e tu dam ai baw rai nga ai. Shanhte a tsabyi si gaw pila si rai nga ai, Tsabyi sumbaw mung hka ai hkrai rai nga ai. ³³ Shanhte a tsabyi jahku gaw lapu tuk, N hkru htum ai pu htum tuk rai nga ai. ³⁴ Ndai lam yawng ngai kaw htun da sai, Nye a sut dik hta dazik hte htep rai nga ai, n rai ni? ³⁵ Matai htang na ahkang ngai lu da we ai; Shanhte a lagaw kashawt ai shani e, ngai tai na we ai: Kyindut hkrum na nhtoi shanhte kaw du magang ra ai, Shanhte hkrum na ari gaw du lawan ra ai. ³⁶ Yehowa gaw shi a amyu hpe tara dara na wu ai; Shi a masha ni n-gun htum mat ai hte, Bawngdung ai mi n nga, bawng lawt ai mi n pra ai hpe shi mu jang, Shanhte a matu myit malai lu ya na wu ai. ³⁷ Shaloi shi gaw, Shanhte a shamyet lunghkrung tai, Shanhte nawng jau ai sau man sha ai. Shanhte a ru hkaw kumhpa tsabyi jahku lu sai, Shanhte a gumgun Hpara ni gaw ya kanang rai malu ai i? Shanhte ya rawt nna, nanhte hpe karum u ga, Nanhte hpe ya magawp maga maru ga. ³⁹ Ngai dai, ngai nan, Karai wa rai nga nngai, Ngai hta kaga, Karai shaje n nga ai gaw, yu yu mu: Jasi ai mung, ngai jahkrung ai mung, ngai, Jahpye ai mung, ngai shamai ai mung, ngai, Nye lata na kadai n shaw la lu ma ai. ⁴⁰ Sumsing lamu de nye a lata ngai ladawn nna, Htani htana ahkrung nga ai wa ngai rai nga nngai hte maren: ⁴¹ Nye a tu kabrim ai nhtu hpe ngai galaw karang nna, Nye a lata hpe tara dara na hkyen lang let, Gumlau ni hpe ngai matai htang nna, Ngai ndawng ai ni hpe ari jaw na mawe ai. ⁴² Si mana ai ni hte bawng yam ni a, Hpyenbu ni hte du gyi ni a asai hte, Nye a pala hpe ngai shanang na we ai; Nye a nhtu mung, shanthe a shan sha na ra ai, ngu nna ngai tsun nga nngai. ⁴³ Mai gan amyu ni e, shi a amyu hte rau kabu mu: Shi a ali ama ni a asai matai shi htang nna, Shi hpe gumlau ai ni e dawdan na mu ai; Shi a mungdan hte shi amyu a matu gawng mali hkungga shi jaw ya na ra ai, nga ai, rai nga ai. ⁴⁴ Mawshe mung, Nun a kasha Hoshea hte rau sa nna, mahkawn mangoi ga ndai hte ting, amyu masha ni hpe hkai dan mu ai. ⁴⁵ Shingrai Mawshe ndai ga mahkra Israela amyu nlang hte hpe azin ayang tsun shagut da nna, shanthe hpe, ⁴⁶ Dai ni ngai nanhte a man e hkam da ya ai sakse ga ndai hpe, nanhte a kraw lawang e mazing sumhting gun nga mu;p nanhte a kashu ni ndai matsun maroi tara ga nlang hte hpe hkan shatsup nna nga mu ga, shanhte hpe nanhte bai htawn hkai da u na rai myit dai ⁴⁷ Kaning rai nme law, ndai gaw nanhte a matu amai ahkai ga sha n rai; dia gaw nanhte a asak hkrung lam rai nga malit dai: Yawdan hka rap nna shang sha na marin dai mungdan hta nde a marang e nanhte aprat galu wa na rai malit dai, ngu nna tsun da wu ai. ⁴⁸ Bai Yehowa gaw, dai shani jang Mawshe hpe, ⁴⁹ Yerihko hte tawtap, Moba mung na, ndai Abarim bum a Nebu ngu ai bum pungting de lung nna, Israela. kashu kasha ni hpe ngai jaw ai Hkanan mung mada la u; ⁵⁰ na nhpu Arun, Hora bum e si ai rai nna shi a amyu hpawng nga ai de du wa ai zawn, nang mung, ndai nang lung wa ai bum e si nna, na amyu hpawng nga ai de wa nu: ⁵¹ kaning rai nmelaw, Zin nam mali, Kadesha shara na, Meriba hka kau e, Israela kashu kasha ni a hpawng ka-ang e nan ngai e n sagrau n sha-a myit dai. ⁵² Dai majaw, israela kashu kasha ni hpe ngai jaw ai mung, dai hta shang sha lu na ndai n rai, ngu nna tsun wu ai.

¹ Karai Kasang Masha Mawshe gaw, shi garai n si yang, ndai shaman ga hte Israela kashu kasha ni hpe ning nga shaman ya da wu ai. ² Shi gaw Yehowa, Sina bum nna yu wa ra ai, Seira bum shagawng kaw nna, shanhte a matu tu pru nga ai; Hparan bum ntsa e shi danhkung nga ai; Chyoi pra ai ni mun sen kaw na du sa ra ai: Shi a hkra lata nna shanthe a matu tara wan tu pra nga ai. ³ Rai sa, dai amyu ni hpe shi tsawra wu ai. Shanhte a chyoi pra ni yawng, na a lata hta rai nga ai: Na a lagaw nhpang e shanhte dung ma ai; Na a mungga madat la nga ma ai. ⁴ Mawshe anhte hpe jep ai tara, Yaku shawa hpawng a matu sali wunli, hkangda ya ma ni ai. ⁵ Amyu lakung ni a du gyi ni hte, Israela amyu ting rau hpawng nga ai shaloi, Yeshurun hta shi hkawhkam rai nga ai. ⁶ Rubin n si n htum, ahkrung nga u ga, Shi a kashu kasha ni chnyawm gaw n law n htam manu ga. ⁷ Yuda amyu hpe chyawm gaw: Yehowa e, Yuda a nsen madat nna, Shi a amyu ni hpan gde bai woi wa rait: Shi a lata gaw, shi a matu gasat nga ai; Masha hpyen ni a mjaw, nang shi hpe karum la na ndai. ⁸ Lewi hpe gaw, Na a Htumim hte Urim tengman ai ai wa lang nga ai; Masa shara e nang shi hpe dinglik yu nit dai, Meriba hka makau e nang shi hte ndang hkat yu nit dai: ⁹ Shi gaw kanu kawa hpe pyi, kanu kawa n nga, Tinang hpunau wa hpe mung n da, Kashu kasha hpe pyi n chye, nga hkra, Na a mungga madat mara nna, Na a ga shaka hkan nang masai. ¹⁰ Shanhte gaw na a matsun maroi ga Yaku hpe, Na a tara Israela hpe, sharin ya na mara ai: Manam pyaw hkungga na a man e, Wan nat hkungga na a tawn hkungri ntsa e, mara tawn na mara ai. ¹¹ Yehowa e, shi a kun dinghku shaman ya u, Shi a lata na magan amu hpe hkap la ya u; Shi e ndawng ai ni bai n rawt lu hkra agrawp kau u. ¹² Ben-yamin hpe gaw, Yehwoa a tsawra ai wa gaw, shi hte rau amu sha nga lu na ra ai: Shani tup shi hpe makawp maga na wu ai rai nna, Shi a du krang e shi dung nga lu na ra ai. ¹³ Yosep hpe gaw, Matsaw tsang na reng seng ai rai ni hte mari e mung, Lamu tang shim ai de na sung ai shara hte mung; ¹⁴ Guumhtu gummai jan a dawi sau ai namsi namsaw hte mung, Shata ndaw nman e tu ai nsi naisi hte mung; ¹⁵ Ju majat na bum ni a reng grau ai arai hte mung, Dinggrin anga nga ai kawng ni a reng ai sut hte mung, ¹⁶ Ginding ganai hta na ngamu kumhpa hte mung, Dai singwum e rawng ai wa kaw na myiman pa ai hte mung, Yehowa gaw shi a mungdan hpe shaman ya u ga: Dai shaman chyeju gaw Yosep a baw ntsa e, Kahpu kanau ni hte daw hka ai wa a majoi pungding hta e, anga nga nu ga. ¹⁷ Shi hta shawng hkrat ai usu gaw arawng sadang rai nga ai; Shi a nrung hpawlam nrung rai nga lu ai: Dai hte, masha amyu ni hpe lamu ga htum hkra, shachyut daru kau na mu ai. Dai ni gaw Ehprim a mun sen ni rai nga ma ai, Shanhte gaw Manashe a hkying mun ni rai nga ma ai. ¹⁸ Zebulun hpe gaw, Zebulun e, na a pru lu ai lam hta kabu nga u; Yisahka e, na a sum hta kabu gara nga u. ¹⁹ Shan gaw amyu masha ni hpe dai bum de shaga la nna, Dai de tengman ai hkungga jaw na mara ai. Nammukdara na ngamu ngamai hte Zai bru kata na sut hpungnung chyu lu na mara ai. ²⁰ Gad hpe gaw, Gad hpe maden dat ai wa gaw, a nga u ga law; Shi gaw hkanghkyi kanu zawn nga nga nna, Lata e sha n-ga baw hpe pyi amya ga kau wu ai. ²¹ Shawng san tawn ai kamhtaw shi lata la nna, Dai de, tara agyi wa a hkumbum madat da nga ai; Amyu ni a du agyi ni hte rau shi sa wa nna, Yehowa a dingman ai lam hte Israela hta tawn da ai tara lam hpe shatup wu ai. ²² Dan hpe gaw, Dan gaw hkanghkyi kasha rai nga ai rai nna. Bashan mung na htim na ra ai. ²³ Naphtali hpe gaw, Naphtali e, chyeju hte hkru kat nna, Yehowa jaw ai shaman hpring ai hte, Sinna hte dingda maga madu sha nit ga law. ²⁴ Ashe hpe gaw, Ashe gaw kashu kasha hte a nga u ga; Shi a kahpu kanau ni hte myuit hkrum u ga, Shi a lagaw namman hta madit nga u ga. ²⁵ Na a htinggrang ni gaw hpri hte magi rai na ra ai; Nang pra nga prat dingsa, na n-gun atsam mung ja nga na nit dai. ²⁶ Yeshurun e, Karai Kasang hte bung ai kadai n nga ai; Nang hpe karum n anga, sumsing lamu hta yawn, Shi a hpun gshingkang hte sumwi hta jawn nga ai. ²⁷ Chyi nma Karai Kasang gaw na shingbyi shara rai nga ai, Htani htana lahpum ta gaw nang hpe pawn la nga ia. Shi gaw, Jahten shabya kau mu, nga nna, Hpyen wa hpe na a man na jahtaw kau wu ai. ²⁸ Shingrai, nai mam hte tsabyi jahku ing ai mung hta e, Israela gaw nga ngawi nga pyaw rai nga nna, Yaku a hka hpawk chyu sha nga nga ai: Rai sa, shi a lamu de na mari hrat abya nga ai. ²⁹ Israela e, nang a nga ndai: Yehowa hkyehkrang la ai amyu e, nang hte kadai bung a ta? Shi gaw nang hpe makawp maga ai ninggang, Na a shingkang shapraw ai nhtu rai nga ai. Na a hpyen ni nang kaw nawm nna, Shanhte a tsaw ai shara ni hpe nang kabye lu n a rin dai, nga nna tsun shaman ya wu ai.

¹ Dai hpang Mawshe gaw Moba pa nna sa wa nhtawm, Yerihko hte tawtap na Nebo bum a Pisga kawng pungding de lung wa ai. Shaloi Yehowa gaw shi hpe Gilead mung ting hte Dan du hkra, ² Naphtali ginwang ting hte, Ehprim, Manashe, Yda mung ni hte tsan htum ai nammukdara du hkra, ³ Dingda mung hte, Zora mare du hkra, namhtan hpun mare ngu ai Yerihko mare de nga ai hkamwam hte pa ni hpe madun dan wu ai. ⁴ Shaloi Yehowa gaw, Abraham, Isak, Yaku hte hpe dagam nna, na amyu matu ni hpe jaw na ngu ndat da ai mungdan gaw dai rai nna ai; na amyi hte nan mu da lu ai ahkang ngai jaw de ai, raitimung, rap sa lu na n rai, ngu nna Mawshe hpe tsun wu ai. ⁵ Shingrai Yehoa tsun ai hte maren, Yehoa a shangun kasa Mawshe gaw, Moba mung na shara dai yang si lmat ai. ⁶ Shi hpe Bet-peora mare hte tawtap na Moba mung na hkaraw hta makoi mayan gnu ai; raitimung, dai ni du hkra Mawshe a lupwa hpe kadai n chye ya ai. ⁷ mawshe gaw si wa ai shaloi, asak latsa e hkun ning du sai; shi a myi garai n mam, shi a n-gun atsam mun garai n yawm lu ai. ⁸ Israela kashu kasha ni gaw Mawshe hpe dum nna Moba pa e nhtoi sumshi ya hkrapngu hkrapngoi rai nga ma ai: shingrai, Mawshe a matu sharung shayawt hkrap ai nhtoi gaw htum mat sai. ⁹ Ya Nun a kasha Yawshu gaw hpaji byeng-ya Wenyi hpring ai wa rai nga ai: kaning rai nme law, shi a baw hta Mawshe e lata Mara ya nu ai rai nna, Yehowa Mawshe hpe hkangda ya wu ai hte maren, Israela kashu kasha ni mung Yawshu a ga madat mara nga ma ai. ¹⁰ Yehowa e shangun dat nna, Egutu mung e Hparau kaw nna shi a hkringmang ni hte mungdan ting hta ¹¹ lamik kumla mauhpa amu hkum sumhpa galaw ai hte, Israela amyu masha ni nlang a man e shi a galu kaba ai lahpum ta hte hkrithpa amu ni madun wa ai lam hta e, ¹² Yehowa hte tinang hkum nan myiman chyaw hkrum lu ai myihtoi Mawshe zawn re ai gaw, Israela amyu hta htawmhpang e langai mi muk paw pru yu ai n rai.