SAMUELA LAIKA LAHKAWNG

SAMUELA LAIKA LAHKAWNG

¹ Ya Shawlu si ai hpang e, Dawi gaw Amalek masha ni hpe hkan gasat ai kaw na bai wa nna Zikla mare e ni ni wa nga sayang; ² masum ya ngu na shani hta, masha langai wa mi tinang a palawng gang je kau let, shi a baw e ga nhpu hte bun let, Shawlu a dap na wa nna, Dawi hpang de du jang, ga e dingnyawm dagup nawku nga ai. ³ Dawi mung, Kanang nna sa wa n ta? ngu nna san wu yang, dai wa gaw, Israela dap nna lawt sa wa nngai, ngu nna htan wu ai. ⁴ Bai Dawi gaw, Amu gaw kaning rai wa sata? ngai e atsawm sha tsun e, ngu nna tsun wu yang, shi gaw, Israela masha ni mahtang n daw lu nna hprawng htaw wa masai; law law wa si agrawp mat shajang ma ai: Shawlu hte shi a kasha Yonahtan mung si mat masai, ngu nna tsun dan wu ai. ⁵ Bai Dawi gaw dai ashi sa tsun ai shabrang wa hpe, Shawlu yan shi a kasha Yonahtan si ai gaw, nang kaning di chye wu ta? ngu nna san wu ai. ⁶ Shaloi ashi sa tsun ai shabrang wa gaw, Ngai dai Gilboa bum de majoi mi a hkawm du yu yang, yu u, Shawlu gaw shi a ri hta shadaw nna nga nga la ai; hpyen leng ni hte gumra hpyen ni mung gasat chyi rai nga ma ai. ⁷ Shi hpang de kayin yu yang, shi ngai e mu nna shaga nngai: ngai mung, Nga nga nngai, ngu nna htan we ai. ⁸ Shaloi shi gaw, Nang kadai rai n ta? ngu nna san nngai; ngai gaw, Amalek masha rai nga nngai, ngu nna htan we ai. ⁹ Shaloi Shawlu gaw, Nye makau e tsap nna, ngai e sat kau e; nye a nsa n hti hkraw nna, machyi chyum nga nngai, ngu nna ngai e tsun nngai. ¹⁰ Dai rai nna, shi kadawng taw mat ai hpang, shi hkrung nga lu na n rai, ngai chye lu nngai majaw, shi makau e ngai tsap nna, shi hpe sat kau se ai: shi gup ai janmau hte shi a lata na lahkawn raw la nna, nang madu kaw la sa ring ngai, ngu nna tsun dan wu ai. ¹¹ Shaloi Dawi shi a palawng gang je kau wu ai rai nna, shi a masha ni mahkra dai hte maren galaw ma ai: ¹² Shawlu hte shi a kasha Yonahtan yan wa mung, Yehowa a amyu masha ni mung, Israela amyu masha ni mung, nhtu hte sat kau hkrum ma ai majaw, shanhte gaw shana du hkra sharung shayawt hkrapngu hkrapngoi ai hte lusha gam nga ma ai. ¹³ Bai Dawi gaw, ashi dai htawn tsun ai shabrang wa hpe, nang kanang nna sa ndai aw? ngu wu yang, dai wa gaw, Ngai gaw shingbyi manam Amalek la wa rai nga nngai shi ngu nna htan wu ai. ¹⁴ Bai Dawi gaw, Yehowa a namman jaw hkam ai wa hpe sat lu na gaw, na a lata kaning rai dawn gwi a ta? ngu nna tsun let, ¹⁵ shabrang langai mi hpe shaga nna, Sa rit, ndai wa hpe sat kau su, ngu wu ai. Dai shabrang wa mung, shi hpe sa sat kau wu ai. ¹⁶ Dawi mung, na a sai gaw na a baw ntsa e she nga u ga; kaning rai nme law, Yehowa a ahkang hte namman jaw hkam ai wa hpe ngai sat kau se ai, nga nna na a n-gup nan sakse hkam salit dai, ngu nna tsun wu ai. ¹⁷ Ya Dawi gaw ndai sharung shayawt ai ga, Shawlu yan kasha Yonahtan a matu sharung shayawt ya nna, ¹⁸ Ndan pala ngu ai, ndai mahkawn mangoi ga hpe, Yuda amyu masha ni hpe sharin ya na, hkangda wu ai: yu u, dai ga gaw, Yasha Laika hta ka lawm nga ai ¹⁹ Israela e, na a arawng, na a tsaw ai kawng ni hta, sat kau ai hkrum nga ai! Share ninghkrin ni kadawng si mat masahka! ²⁰ Hpilisti shayi sha ni n kabu lu mu ga, Matu n gadoi ai amyu a num ni n awng lu mu ga, Ashi dai hpe Gat mare hta e hkum tsun myit, Ashkelon mare lam hkan e, hkum kajai myit. ²¹ Gilboa kawng ni e, nanhte a ntsa e, Mari hkum hkrat, marang hkum htu u ga: Jaw jau kumhpa nawng ai yi hkauna hkum tai u ga. Kaning rai nme law, dai yang e share ni a n-gang, Namman n chya ai rai hpe zawn, Shawlu a n-gang gaw, N sawn n sang di kabai kau ai hkrum nu hka. ²² Sat kau hkrum ai ni a asai hta na mung, Share ni a sau tung kaw na mung, Yonahtan a ndan pala majoi n kanut yu ai; Shawlu a nhtu mung, kaman majoi n wa ga ai. ²³ Shawlu yan Yonahtan, hkrung nga dingsa tsawra nja, Si wa sai mung n daw n hka; Shan gaw, wa hpai kalang hta grau laram, Hkanghkyi hta n-gun grau ningtsam rai ma ai. ²⁴ Israela shayi sha ni e, Shawlu a majaw hkrap mu: Shi nanhte hpe bujung hpajap shabu jahpun nna, Nanhte a hpun palawng ni hta aja mawn sumli ya manit dai. ²⁵ Hpyen gasat ai hta share ninghkrin ni kadawng si mat masahka! Yonahtan e, na a tsaw ai kawng ni hta, nang si ai hkrum nit hke! ²⁶ Ngai hpu Yonahtan e, na a majaw ngai gawng run nga nngai law: Nang hta ngai myit grai kaba nngai: Na a tsawra ai myit gaw, mauhpa myit, Shayi chyinghkawn hpe tsawra ai hta grau lit dai law. ²⁷ Share ninghkrin ni kadawng si mat masahka! Hpyen ri nhtu ni mung, agrawp mat sahka! Nga ai.

¹ Dai hpang Dawi gaw, Yehowa hpe, Ngai Yuda mare langai ngai de sa wa mai na a ni? Ngu nna san yu wu ai. Yehowa mung, Wa su, nga ai. Bai Dawi gaw, Gara mare de wa yang mai na a ta? ngu nna bai san wu yang, Hebron mare de wa su, nga ai. ² Dai rai nna Dawi gaw, shi a madu jan, Yezrela num Ahinoam hte Hkarmela shara na Nabala gaida Abigala hpe woi nna lung wa ai. ³ Dai hta kaga shi kaw hkannang ai masha ni hpe mung, mayawng htinggaw hte hpawn woi lung wa nna, shanhte gaw dai Hebron mare ginwang kahtawng ni hta nga nga ma ai. ⁴ Shaloi Yuda amyu masha ni sa nhtawm, Dawi hpe namman jaw let, Yuda amyu hta hkawhkam aya dang mu ai. Ya, Gilead mung na Yabesha mare masha ni, Shawlu hpe makoi mayang kau sai lam Dawi hpe sa tsun shana mu ai. ⁵ Dai rai nna Dawi gaw Gilead mung Yabesha masha ni hpang de kasa shangun nna, Nanhte a madu hta chyeju ndai nanhte galaw nna, shi a moi mang hpe makoi mayang myit dai majaw, Yehowa a chyeju nanhte lu la myit ga. ⁶ Rai sa, Yehowa gaw nanhte hpe matsan dum ai hte kangka ai chyeju htang jaw myit ga law; nanhte ning rai galaw ai majaw, ngai mung nanhte hpe chyeju htang na nngai. ⁷ Ya chyawm gaw n-gun dating nna, nden shaja nga ai nanhte a madu Shawlu si mat sai; Yuda amyu masha ni ngai hpe namman jaw nna ngai e shanhte a ntsa e hkawhkam aya dang mani ai, ngu nna hkang dat mu ai. ⁸ Raitimung, Nira kasha, Shawlu a jaubu kaba wa Abna gaw, Shawlu a kasha Ish-boshet hpe Mahanim mare de woi wa nhtawm, ⁹ Gilead mung, Ashuri masha, Yezrela ginwang, Ehprim mung, Ben-yamin ginwang hte Israela mung ting a hkawhkam shatai wu ai. ¹⁰ Shawlu a kasha Ish-boshet gaw asak mali shi ning hta hkaw dung nna, ni ning dung sha lu ai. Yuda amyu chyawm gaw Dawi kaw hkan ma ai. ¹¹ Dawi gaw, Yuda amyu hpe up nna Hebron mare e dung nga ai gaw, sanit ning e shata kru rai nga ai. ¹² Ya Nira kasha Abna gaw Shawlu a kasha Ish-boshet a ali ama ni hte rau, Mahanim mare kaw nna Gibeon mare de wa ma ai. ¹³ Zeruia kasha Yoab mung Dawi a ali ama ni hte hkap tau nna, Gibeon hkalawng makau e shanhte hpe hkrum ma ai. Dai hkalawng a hkin-gau ndai hkran wora hkran rai dung nga ma ai. ¹⁴ Shaloi Abna gaw, Shabrang ni rawt nna anhte a man e ginsup dan yu mi ga, ngu nna Yoab hpe tsun wu ai. Yoab mung, Rawt mu ga, ngu wu ai. Yoab mung, Rawt mu ga, ngu wu ai. ¹⁵ Shingrai, Ben-yamin amyu hte Shawlu a kasha Ish-boshet a matu marai shi lahkawng, Dawi a ali ama ni hta na marai shi lahkawng, rawt nna rap sa wa ai. ¹⁶ Shanhte gaw langai hte langai chyaw chyaw rai nna, kadai mung tinang hte gasat ai wa a kara laji magra nna, shada da a garep galun ai hte nlang hte kalang ta si jawng mat ma ai; dai re ai majaw Gibeon ginwang na shara dai hpe, Helakat-nazurim ngu nna shamying mu ai. ¹⁷ Dai shani e tsam mari gasat nna, Abna hte Israela masha ni gaw, Dawi a ali ama ni a man e sum mat ma ai. ¹⁸ Dai majan hta Zeruia kasha ni masum, Yoab, Abishai, Asahela hte lawm ma ai: Asahela gaw nam shan zawn laram ai wa rai nga ai. ¹⁹ Ya Asahela mahtang, pai de hkra de n yit ai sha, Abna a hpang e shachyut nang nga ai. ²⁰ Shaloi Abna kayin yu nna, Nang Asahela n rai n ni? ngu wu yang, shi gaw, Rai nngai, ngu wu ai. ²¹ Bai Abna gaw, Pai de rai tim hkra de rai tim kayin nna shabrang langai mi hpe rim la nhtawm, shi a hpyen hking kashun la u, ngu wu timung, Asahela gaw n kayin ai sha a shachyut nga ai. ²² Dai rai nna Abna gaw, Ngai e hkum shachyut sa; nhtang wa nu; nang hpe ngai hpa di ga jahkrat na rai ta? ngai shing di yang, na nhpu Yoab a myiman kaning rai mada lu na rai ta? ngu wu ai. ²³ Raitimung, Asahela mahtang n madat hkraw ai; dai re ai majaw Abna mung ri machyaw hte sha shi e galun wu yang, kan e hput rai nna, shingma de hkrang hkra rai nga ai majaw, Asahela kadawng nna dai yang e si mat sai: shingrai Asahela si ai shara du ai ni mahkra dai yang tsap hkring nga ma ai. ²⁴ Yoab yan Abishai chyawm gaw, Abna hpe hkan shachyut nna, Gibeon mali de sa ai lam makau na Gia shara e nga ai Ama kawng du jang, jan shang sai. ²⁵ Ben-yamin masha ni chyawm gaw, Abna a hpang e jahpawng nna, hpung langai sha tai let, kawng e tsap nga ma ai. ²⁶ Shaloi Abna gaw Yoab hpe jahtau nna, Nhtu nshan dai tut tut a kawa sha nga na rai ni? Jahtum e hka ai sha hkrup na ra ai gaw, n chye wu ni? Dai masha ni tinang a hpunau ni hpe n shachyut ai, bai nhtang wa na lam nang n hpajang ai, galoi du hkra nga nga na wu ta? ngu wu ai. ²⁷ Yoab mung, Karai Kasang hkrung nga ai hte maren, nang n shadum taw gaw, nhtoi htoi jang she, hpunau ni hpe n shachyut ai nga na ma ai, nga nna htan let, ²⁸ pahtau dum dat nna, shi a masha ni Israela masha ni hpe n shachyut ai sha, da kau nna tsap nga ma ai. ²⁹ Abna hte shi a masha ni gaw shana tup dai pa hku ga wa nna, Yawdan hka rap nhtawm, Bihtron mung tawng mat wa nna, Mahanim mare du wa ma ai. ³⁰ Yoab mung Abna shachyut ai kaw na nhtang nna, masha mahkra jahkum yu yang, Asahela hte Dawi a masha marai shi jahku yet mat ma ai. ³¹ Dawi a masha ni mung, Ben-yamin amyu hte Abna masha masum tsa e kru shi sat kau lu mu ai. ³² Shanhte gaw Asahela moi mang hpe hpai wa nna, Betlehem mare na shi kawa a lup hta makoi mayang mu ai. Yoab hte sai a masha ni mung shana tup hkawm wa nna, nhtoi htoi jang, Hebron mare de du ma ai.

¹ Shingrai Shawlu a amyu hte Dawi a amyu gaw, na na wa majan gasat nga nna, Dawi mahtang n-gun ja wa nna, Shawlu amyu gaw le le yawm mat ma ai. ² Hebron mare e shaprat ai Dawi a kasha ni gaw: La N-Gam ngu na Yezrela num Ahinoam kaw na Amon rai nga ai; ³ La N Naw ngu na gaw, Hkarmela shara na Nabala gaida jan Abigala kaw na Hkilab rai nga ai; La Nla ngu na, Geshura hkawhkam Talamai a shayi sha Mahka kaw na Absalom rai nga ai: ⁴ La Ntu ngu na, Hagit kaw na Adoniya; La Ntang ngu na, Abitala kaw na, Shehpati; ⁵ La N-yaw ngu na, Dawi a numdung jan Egla kaw na Itream rai nga ma ai. Ndai hte gaw, Hebron mare e naw nga yang, Dawi shaprat ai kasha ni rai nga ma ai. ⁶ Ya Shawlu a amyu hte Dawi a amyu majan baw nga ai hte yang, Abna gaw Shawlu amyu a maga de n-gun shaja nga ai. ⁷ Ya Shawlu gaw, Aia a shayi sha, Rizpa ngu ai lashi num langai mi lu ai: shaloi Ish-boshet gaw, Abna hpe, Nang nye wa a lashi num, hpa majaw hta n ta? ngu nna deng wu ai. ⁸ Ga de a majaw Abna gaw Ish-boshet hpe nachying masin pawt nna, Ngai Yuda amyu na gwi baw rai ni? Dai ni du hkra, na nwa Shawlu a amyu na ni hte, shi a kahpu kanau, makying jinghku ni hpe ngai makawp maga nna, Dawi a lata hta nang hpe n ap kau ninglen, num de a majaw nang ngai e mara shagun mayu a hka. ⁹ Yehowa gaw, Ndai mungdan hpe Shawlu a amyu na shaw la nhtawm, Dan mare kaw nna Berasheba mare du hkra ngu ai, Israela hta Yuda mung ting ntsa e, Dawi a tingnyang tawn da na, nga nna dagam ai hte maren, ¹⁰ ngai mung Dawi hpe n shagrau ai she nga yang gaw, Yehowa dai hta grau nna, Abna hpe mara shagun ruga, ngu nna htan wu ai. ¹¹ Ish-boshet chyawm gaw, Abna hpe hkrit wu ai majaw, ga hkaw mi muk n htan gwi wu ai. ¹² Shaloi jang Abna gaw Dawi hpang de kasa dat dat nna, Ndai mungdan gaw, gade a mungdan rai sata? Ngai hte htingrat ga; Israela amyu yawng hpe, nang hpang de kayin wa hkra, ngai nang hpang de shang n ga, ngu nna tsun dat wu ai. ¹³ Dawi mung, Mai sa, ngai nang hte htingrat na nngai; raitimung, ngai hpyi ai lam langai mi nga ai; nang ngai kaw myiman pru dawng na rai yang, Shawlu a kasha Mihkala hpe mung woi sa ya lu na ndai; dai n rai yang, nye myiman n mu lu na ndai, ngu dat wu ai. ¹⁴ Dawi mung Ish-boshet hpang de kasa dat dat nna, Hpilisti masha ni a hpyi matu latsa hte ngai mari la ai, nye a madu jan Mihkala hpe ap ya dat rit, ngu nna htet dat wu ai. ¹⁵ Dai majaw Ish-boshet mung masha shangun nna, num dai hpe, Laisha a kasha Patiela mying ai madu wa kaw na shaw la wu ai. ¹⁶ Madu wa mung hkrap let, Bahurim mare du hkra hkannang ai. Shaloi Abna gaw, Wa nu, ngu nna shabai dat wu ai majaw, shi bai nhtang wa ai. ¹⁷ Ya, Abna gaw Israela salang ni hte bawng nna, Nanhte shawng de pyi Dawi hpe hkawhkam aya dang mayu myit dai hte maren, ya shi hpe aya dang manu; ¹⁸ Yehowa mung, Nye a mayam Dawi a lata hte, nye amyu Israela hpe, Hpilisti masha ni a lata na mung, masha hpyen ni yawng a lata na mung, ngai hkye mawai la na we ai, nga nna Dawi hpe lakap nna tsun nu ai. ¹⁹ Bai Abna gaw Ben-yamin amyu hpe mung, sa woi awn nu ai: dai hpang Abna gaw Israela masha ni nlang hte Ben-yamin amyu ni myit hkrum ai lam yawng mayawng, Hebron mare hta Dawi hpe sa shana ya wu ai. ²⁰ Shingrai Abna gaw, marai hkun hte rau, Dawi hpang de Hebron mare de sa du ai. Dawi mung Abna hte shi a masha ni matu, poi hkap galaw daw wu ai. ²¹ Bai Abna gaw Dawi hpe, Israela masha ni yawng, nang hte ga shaka shangang lu na matu mung, nang madu myit hte tup up sha nga lu na matu mung ngai rawt sa wa nna, dai ni mahkra hpe nye madu nang hkawhkam wa kaw woi jahpawng na nngai ngu wu ai. Dawi mung Abna hpe dat dat nna, shi gaw ngwi pyaw ai hte sa wa ai. ²² Dai shaloi Yoab hte Dawi a masha ni gaw, masha hpyen daw wa hpe hkan shachyut ai kaw na nhtang wa ma ai rai nna, lanep law law magawn wa ma ai: Abna chyawm gaw Hebron mare e Dawi kaw n nga sai; Dawi shi hpe dat dat nu ai rai nna, shi gaw apyaw sha bai pru wa sai. ²³ Ya Yoab hte shi kaw hkannang ai masha ni nlang hte du wa ma yang, Nira a kasha Abna gaw, hkawhkam wa kaw shang sai. Hkawhkam wa mung shi hpe dat dat nna, shi apyaw sha sa wa sai, ngu nna Yoab hpe hkap tsun dan mu ai. ²⁴ Dai re ai majaw Yoab gaw hkawhkam wa kaw shang nna, Nang hpa maw nga n ta? Yu u, Abna wa nang kaw du sayang, hpa rai apyaw sha bai dat dat n ta? ²⁵ Nira a kasha Abna dai, nang hpe masu hkalem nna, na a pru wa shang wa ai lam ni hte, na a hpajang ai lam mahkra hpe chye kau lu na matu sha nang kaw sa ai gaw, nang chye na ndai le, ngu nna tsun kau wu ai. ²⁶ Ya Yoab gaw Dawi kaw na pru yang, shi Abna a hpang e kasa hkan shangun dat wu ai rai nna, shanhte gaw Sira hkahtung hkan kaw nna shi hpe wa nhtang shaga mu ai: Dawi chyawm gaw dai lam n chye wu ai. ²⁷ Ya abna gaw Hebron mare de bai du jang Yoab shi hpe angwi sha shachyen shaga ai wa zawn di nna, mare chyinghka lam ka-ang e woi sa nhtawm shi a kanau Asahela hpe sat kau ya ai matai, Abna a kan hpe galun ya wu ai rai nna, shi mung si mat sai. ²⁸ Dai lam Dawi na jang, Nira a kasha Abna hpe sat kau ai yubak gaw, ngai hta mung, nye a mungdan hta mung, Yehowa a man e galoi mung mara shagun shara n nga u ga: ²⁹ Yoab hte shi kawa dap ni yawng a ntsa e mara malu ga; Yoab amyu matu ni hta, kwi ana kap ai, manggang kap ai, mashi htingkung ai, lasa si ai hte kawsi chyaren ai masha n htum malu ga, ngu nna dagam wu ai. ³⁰ Shingrai Yoab hte Abishai yan nau gaw, Abna hpe sat kau ma ai: kaning rai nme law, nga yang, Abna gaw shan a kanau Asahela hpe, Gibeon makau na gasat kala hta, sat kau ya ai rai nga ai. ³¹ Dawi chyawm gaw, Yoab hte shi kaw hkannang ai masha ni nlang hte hpe, Nanhte a hpun palawng gang je kau nna, lachyit nba lawai let, Abna a matu hkrapngu hkrapngoi nga mu, ngu nna hkang dat wu ai. Hkawhkam Dawi shi hkum nan, dai mang lup ai de hkan sa wu ai. ³² Shingrai shanhte Abna hpe Hebron mare de lup makoi mu ai: hkawhkam wa mung, Abna a lup makau e jahtau hkrap nga ai; masha ni mahkra mung, hkrapngu hkrapngoi nga ma ai. ³³ Hkawhkam wa mung Abna a matu hkrap sharung nga nna, Masha angawk si ai zawn, Abna si mai a ni? ³⁴ Na a lata hpe gyit ai n nga, Na a lagaw hpri sumri kata: N hkru ai wa a lata e si ai hkrum ai zawn, nang si hkrum nit hka! nga ai. Masha ni nlang hte mung bai hkrap shajang ma ai. ³⁵ Jan garai n du yang, Dawi hpe, Shat sha ga nga, nga nna masha nlang sit sa shagwi mu timung, Dawi gaw, Jan garai n shang yang shat n re ai shahpa lama mi sha a chyim we yang gaw, dai hta grau nna Karai Kasang ngai hpe deng ruga, ngu nna dagam wu ai. ³⁶ Dai lam masha nlang mu matsing nna, yu sharawng ya mu ai; hkawhkam wa galaw ai lam magup hpe masha ni nlang yu sharawng nga ma ai. ³⁷ Hkawhkam wa gaw Nira a kasha Abna hpe sat kau mayu ai myit n rawng ai gaw, dai shani e, Israela amyu masha ni hte masha nlang chye nga ma ai. ³⁸ Bai hkawhkam wa gaw shi a ali ama ni hpe, Israela amyu hta, dai ni du agyi hte magam ninggrau wa langai mi si wa sai, nanhte n chye myit ni? ³⁹ Ngai gaw namman jaw hkam nna hkawhkam tai hkra raitimung, dai ni ngai gawngkya nngai. Ndai Zeruia kasha ni mahtang myit nau ja masai. N hkru n hkra ai hku galaw ai wa hpe tinang a mara hte maren, Yehowa htang ya u ga law, ngu nna tsun mu ai.

¹ Hebron mare e Abna sa si mat ai lam, Shawlu a kasha na jang, shi a myit daw mat sai. Israela masha ni nlang hte mung, myit ru nga ma ai. ² Ya Shawlu a kasha kaw hpyenbu lahkawng naw nga ma ai: langai mi a amying gaw Bana, langai mi Renkab, rai ma ai; shan gaw Ben-yamin amyu, Berot shara na Rimon a kasha yan rai ma ai; --Berot mare chyawm gaw Ben-yamin lamu ga hta lawm nga ai; ³ Berot masha ni mahtang, Gitim mare de hprawng nna, dai ni du hkra dai shara e shingbyi manam rai nga ma ai. ⁴ Bai Shawlu a kasha Yonahtan kaw, lagaw hten ai kasha langai mi ngam nga ai. Yezrela shara na Shawlu yan Yonahtan a ashi du jang, ma dai gaw manga ning du sai; shi a nbat jan mung shi hpe woi pawn hprawng wu ai; hprawng wa yang shi nau lamang kau nna, ma dai di hkrat ai majaw, shi a lagaw daw mat ai rai lu ai. Ma de a amying gaw Mehpiboshet rai lu ai. ⁵ Shaloi dai Berot shara na Rimon a kasha rehkab yan Bana gaw sa nna, jan pungding madi yang, Ish-boshet a nta de sa ma ai; shi mung dai ten e yup taw nga ai. ⁶ Shingrai dai yan gaw, nta ka-ang de shang nhtawm, mam shang htawk la na zawn di masu nna, shi hpe kan galun ai hte sat kau mu ai: Rehkab yan shi a kanau Bana, lawt lu ma ai. ⁷ Ya shan lahkawng gaw, dai nta de shang nna Ishboshet shi a yup gawk e yup nga yang, shan gaw shi hpe adup sat kau nna, shi a baw daw la ya nhtawm, shana tup dai pa hku, gat sa wa ma ai. ⁸ Shingrai, Ish-boshet a baw hpe, Hebron mare e Dawi kaw la sa nna, Nang madu a asak hpe gyam ai, na a hpyen wa Shawlu a kasha Ish-boshet a baw re ai, yu yu u: nang madu hkawhkam wa hkrum ai matai gaw, Shawlu hta mung, shi a amyu matu ni hta mung, Yehowa dai ni htang jaw manu ai, ngu nna shi kaw sa sak mu ai. ⁹ Dawi chyawm gaw, Berot shara na Rimon a kasha Rehkab yan shi a kanau Bana hpe, Nye a asak hpe ruyak shohpa lam yawng hta na hkyehkrang la ya ai Yehowa ahkrung nga ai hte maren; ¹⁰ shawng de kalang mi masha langai mi sa nhtawm, kabu hpa shiga tsun dan na nga myit nna, Shawlu si sai, nga nna ngai e tsun dan yang, ngai shi hpe magra la nna, Zikla mare e sat kau we ai: dai gaw sa tsun ai shiga majaw, ngai shi e jaw ai shabrai rai nga ai. ¹¹ Ya dai hta n-ga, n hkru ai masha ni dingman ai wa hpe shi a nhku kata yupra e naw sat ai rai yang, grau nna sat mai ai n rai ni? ya jang shi a sai nan kaw ngai hpyi nna, nan hpe mungkan ga na seng kau mai sai, n rai ni? ngu nna daru mu ai. ¹² Shingrai Dawi gaw shi a shabrang ni hpe hkang dat nna, shan hpe sat kau mu ai: lagaw lata ni hpe daw la nna, Hebron hkalawng makau e noi da mu ai. Ishboshet a baw hpe chyawm gaw, la nna Hebron mare e, Abna a lup hta lup makoi ya mu ai.

¹ Dai shaloi e Israela amyu lakung ni yawng hte gaw, Hebron mare de Dawi kaw sa nna, Yu u, anhte gaw na a nrut nra, na a hkumshan, rai nga ga ai. ² Moi shawng de, anhte a ntsa e Shawlu naw up nga yang nna, nang hkum nan Israela amyu hpe, woi pru woi shang ai wa rai nga nitdai: Yehowa mung, Nang gaw nye a amyu Israela hpe, woi rem na wa hte nye amyu Israela ntsa e Du magam nang tai lu na ndai, nga nna nang madu hpe tsun nitdai, ngu nna sa shang sa wang wu ai. ³ Shingrai Israela agyi salang ni yawng, Hebron mare de hkawhkam wa kaw du sa ma ai: Dawi hkawhkam mung, dai Hebron mare hta Yehowa a man e shanhte hte ga shaka tawn da wu ai rai nna, shanhte mung Dawi hpe namman chya ya ai hte Israela hkawhkam aya dang mu ai. ⁴ Ya Dawi gaw hkaw dung ai shaning hta asak sumshi ning du sa lu ai; mali shi ning dung sha wu ai. ⁵ Hebron e dung nna Yuda mung hpe sanit ning e shata kru up nu ai; Yerusalem e dung nna Yuda mung hte Israela mung ting hpe sumshi masum ning up wu ai. ⁶ Ya hkawhkam wa hte shi a masha ni gaw, mungdan chyanu Yebusi masha ni nga ai Yerusalem mare de lung wa ma ai: shaloi dai masha ni gaw Dawi hpe, Myi hten ai hte lagaw hten ai ni hpe sha pyi nang n yeng kau lu yang gaw, nang e n shang lu na ndai, nga nna shi n shang lu na sawn nawn ai majaw, hkap daw shatan mu ai. ⁷ Dawi chyawm gaw Ziun ngu ai hpyendap hpe gasat la lu ai; dai gaw Dawi a mare ngu ai, rai nga ai. ⁸ Dai shani e Dawi gaw, Kadai wa Yebusi masha ni hpe gasat dang kau lu gwi yang, Dawi n tsaw n ra ai, lagaw hten myi hten ai ni hpe sat kau lu hkra, hka hkawng rum hku htim lung mu, ngu wu ai. Dai kaw nna, Myi hten ai ni hte lagaw hten ai ni nga ma ai, nhku de n shang lu na ndai, nga nna ga malai tsun ma ai. ⁹ Dawi mung dai hpyendap hta dung nna, Dawi a mare ngu nna shamying wu ai. Bai Dawi gaw Milo dap kaw nna, grupyin e, kata maga de, nta gap galaw lajang wu ai. ¹⁰ Dawi chyawm gaw grau nna galu kaba jat wa nga ai; kaning rai nme law, Zaw nawng zaw wa up ai Karai Kasang Yehowa gaw shi hte rai nga ai. ¹¹ Ya Turu hkawhkam Hiram gaw, kasa hte rau, marau hpun, lasama hte wut gaw ai ni, Dawi hpang de shangun dat nna, shanhte gaw Dawi a matu hkaw gap ma ai. ¹² Dai rai nna, Yehowa gaw, shi hkum nan hpe Israela hkawhkam aya hta dang shagrin tawn ai hte, Dawi nan chye wu ai. ¹³ Ya Dawi, Hebron mare na htawt ai hpang, Yerusalem mare kaw na, lashi num hte num dung bai la jat nna, shayi shadang sha naw shaprat wu ai. ¹⁴ Yerusalem e nga ai hte yang, lu ai kasha ni a amying gaw, Shamua, Shoba, Nahtan, Shawlumon; ¹⁵ Iba, Elishua, Nehpeg, Yahpia; ¹⁶ Elishama, Eliada, Elihpelet hte rai ma ai. ¹⁷ Dawi hpe namman jaw nna, Israela amyu ntsa e hkawhkam aya dang ai lam, Hpilisti masha ni na ma yang, shanhte nlang Dawi hpe tam sa wa ma ai: dai lam Dawi na nna hpyendap de sa nga nga ai. ¹⁸ Hpilisti masha ni chyawm gaw sa wa nna, Rehpim kadit e hpring nga ma ai. ¹⁹ Shaloi Dawi Yehowa kaw, Ngai Hpilisti masha ni hpe sa gasat lu na rai ni? Nang shanhte hpe nye a lata hta ap ya na n ni? ngu nna san wu ai. Yehowa mung, Lung wa su; Hpilisti masha ni hpe na a lata de teng teng ap ya na de ai, ngu nna Dawi hpe htan wu ai. ²⁰ Shaloi Dawi gaw Bala-perazim shara e du nna, shanhte hpe hkap sat kau dat mu ai: dai rai nna shi gaw, Hka mawru hte shaza kau ai zawn, nye a hpyen ni hpe Yehowa nye a man na agrawp kau ya ni ai, ngu nna, dai shara hpe, Bala-perazim shamying wu ai. ²¹ Dai yang e shanhte gaw tinang a sumla ni hpe kau da mu ai: Dawi hte shi a masha ni mung dai sumla ni hpe magawn la ma ai. ²² Bai Hpilisti masha ni sa nna Rehpim kadit e, hpring nga ma ai. ²³ Dawi mung bai san yu wu yang, Yehowa gaw, Man chyaw rai hkum lung et; shanhte a hpang hku wang nna, labri maling tawtap hku shanhte hpe htim u. ²⁴ Labri hpun ni a ndung e hpyen hkawm sharat na jang chyawm gaw, shaja nu: shaloi Yehowa gaw Hpilisti masha ni gasat na nga, na a shawng e sa wa na ra ai, ngu nna htan dat wu ai. ²⁵ Shingrai, Yehowa hkangda ai hte maren, Dawi galaw wu ai rai nna, Geba kaw nna Gezera du hkra Hpilisti masha ni hpe hkan gasat kau mu ai.

¹ Bai Dawi gaw lata la ai Israela masha mun masum shaga jahpawng wu ai. ² Shingrai Dawi rawt nna, shi kaw na masha ni nlang hte rau, Hkerubim ntsa e dung ai, zaw nawng zaw wa up ai, Yehowa Amying ningsang mying ai Karai Kasang a sumpu hpe, Bale-Yuda mare na htawt la na, sa wa ma ai. ³ Dai Karai Kasang sumpu hpe nga leng ningnan hta mara nna, kawng na Abinada a nta na shapraw mu ai; Abinada a kasha Uza yan Ahio gaw dai nga leng ningnan hpe gau ma ai. ⁴ Shingrai shanthe gaw kawng e nga ai Abinada nta na, dai leng hpe Karai Kasang a sumpu hte shapraw sa wa ma ai: Ahio chyawm gaw dai sumpu a shawng e hkawm sa wa nga ai. ⁵ Dawi hte Israela amyu masha ni nlang hte gaw, marau sumpyi, tingse, doria, shupsheng, chying hte pahke amyu myu lang nna Yehowa man e dum shaja let sa wa nga ma ai. ⁶ Ya Nahkon a chyarang du jang, usu yan kadawng ai majaw, Uza gaw shi a lata ladawn nna Karai Kasang a sumpu hpe jum shadang wu ai. ⁷ De a majaw Yehowa Uza hpe masin pawt nna, shi a mara majaw, Karai Kasang shi hpe ari jaw nna, Karai Kasang a sumpu makau e shi si mat sai. ⁸ Shingrai Yehowa Uza hpe anu sat kau ai majaw, Dawi myit n pyaw nga ai rai nna, dai shara hpe ya du mateng Pere-Uza ngu nna shamying da wu ai. ⁹ Dai shani e Dawi gaw Yehowa hpe hkrit nna, Yehowa a sumpu ngai kaw kaning rai du lu na i? Nga ai. ¹⁰ Shingrai Dawi gaw Yehowa a sumpu hpe Dawi mare de n hpai wa ai, Giti masha Obed-edom a nta de hpai koi mat wa ai. ¹¹ Shingrai Yehowa a sumpu gaw shata masum tup Giti masha Obed-edom a nta e nga nga ai: Yehowa mung Obed-edom hte shi a masha ni nlang hpe shaman ya mu ai. ¹² Dai Karai Kasang a sumpu majaw Yehowa, Obed-edom hte shi kaw nga manga ni hpe shaman ya ai lam hkawhkam Dawi na jang, Dawi bai sa wa nna, Karai Kasang a sumpu hpe Obed-edom a nta na la wa nna, kabu gara ai hte Dawi mare de shawn la ma ai. ¹³ Shingrai, Yehowa a sumpu hpai ai ni lahkam kru htawt yang, usu hte hpum sau ai nga langai mu, hkungga jaw jau mu ai. ¹⁴ Dawi mung sumpan hpa hkai lawng hpun nna, Yehowa man e ka manau nga ai. ¹⁵ Dawi hte Israela masha ni nlang garu jahtau ai hte pahtau dum let Yehowa sumpu la wa ma ai. ¹⁶ Ya Yehowa a sumpu Dawi mare de shang wa nga yang, Shawlu a kasha Mihkala gaw hkuwawt hku mada yu nna, hkawhkam Dawi Yehowa man e ka let manawt let, wa ai mu wu jang, shi hpe hkyet yu rung wu ai. ¹⁷ Yehowa a sumpu hpe shawn nna, Dawi gap tawn ai sum a ka-ang, shi a shara ngu na kaw tawn da ngut jang, Dawi gaw wan nat hkungga hte mahku hkungga, Yehowa hpe natnawng wu ai. ¹⁸ Dai wan nat hkungga hte mahku hkungga jau nawng ai amu ngut jang, Dawi gaw, Zaw nawng Zaw wa up ai Yehowa a Mying ningsang gang nna, shawa masha ni hpe shaman ya mu ai. ¹⁹ Israela shawa masha, numsha lasha yawng hpe, muk pa pa, shan tau langai ngai, tsabyi si dik pye pye hpra di karan jaw mu ai. Dai hpang masha ni nlang tinang shara de wa mat ma ai. ²⁰ Bai Dawi gaw shi a hkaw nhku na ni hpe shaman ya na nga, wa nna du jang, Shawlu a kasha Mihkala gaw hkap tau hkra rai nna, Dawi hpe, myit n rawng ai, kaya kahpa n chye hkra hkra, tinang hpun palawng pyi n mazang ai, tinang a ali ama ni a mayam num ni a man e labu hpaw rawng ai, Israela a hkawhkam wa, dai ni arawng gade wa kaba sahka! Ngu wu ai. ²¹ Dawi chyawm gaw, Na nwa hte shi a amyu matu ni yawng a malai ngai hpe lata la nna, Yehowa amyu Israela masha ni hpe uphkang ai du aya hta ngai hpe dang tawn ai Yehowa a man e ka ai, n rai nga a ni? Yehowa a man e ngai ka manau na we ai. ²² Dai hta grau nna pyi ngai naw shayuk n ga; ngai dai ngai, nye hkum hpe grau naw shagrit na we ai: nang tsun ai, mayam num ni chyawm gaw, ngai e naw shakawn na ma ai, ngu nna Mihkala hpe htan wu ai. ²³ Ya Shawlu a kasha Mihkala gaw, prat tup kashu kasha n shaprat mat ai.

¹ Ya Hkawhkam wa gaw jut magup na masha hpyen ni yawng a lata na, Yehowa a hkyela ai chyeju lu la nna, shi a hkaw e ban sa lu ai shaloi, ² shi gaw, myihtoi Nahtan hpe, Yu u, ngai wa gaw, marau hpun nta rawng nga ni ai; Karai Kasang a sumpu chyawm gaw, sumpan sum npu e rawng nga ai, ngu nna tsun wu ai. ³ Shaloi Nahtan gaw, Nang myit lu ai hte maren galaw u; Yehowa nang hte rau rai nga ai, ngu nna hkawhkam wa hpe htan ya wu ai. ⁴ Dai shana e pyi Yehowa a mungga Nahtan kaw du nna tsun ai gaw: ⁵ Nye a shangun ma Dawi kaw sa tsun su; Yehowa ning nga ai, Nang nye a nga shara matu nta galaw na rai ni? ⁶ Israela amyu hpe shaw woi wa ai shani kaw nna dai ni du hkra nta hta ngai n rawng nngai; sum hte htingwat hta ngai dung nga nngai. ⁷ Israela amyu ting hte ngai htawt hkawm wa ai shara magup hkan e, nye a amyu Israela hpe bau rem na matu, ngai shangun ai Israela amyu lakung kadai mahtang hpe, Nang nye a matu marau hpunpyen nta hpa rai n shachyaw myit ta? ⁸ Dai re ai majaw, nye a shangun ma Dawi hpe ning ngu u: Zaw nawng Zaw wa up ai Yehowa tsun ai gaw, Nye a amyu Israela ntsa e up ai du aya hta nang hpe tawn da na matu, nang sagu naw rem kaw nna sagu lawng hta na ngai nang hpe shaw la sade ai; ⁹ nang sa wa ai shara magup de nang hte rau ngai nga nga nna, nang hpe hpyen ai ni nlang hpe na a man na ngai seng kau ya sade ai: shingrai, ga ntsa na danhkung ai ni a galu kaba ai amying zawn, ngai na a amying hpe mung, galu kaba shangun ya na de ai. ¹⁰ Nye a amyu Israela matu mung, nga shara ngai tawn da nna, htawmhpang de shanhte shamu shamawt n re ai sha, tinang shara e nga grin lu hkra, ngai shanhte hpe shangang na we ai: ¹¹ n shawp ai masha moi shawng de na prat hte, nye a amyu Israela hta tara agyi ni hpe tawn da ai prat e zingri zingrat lu ai zawn, htawmhpang de zingri lu sana n rai; nang hkum hpe mung, masha hpyen ni yawng a lata na hkyela nna, ban sa shangun sade ai. Na a amyu matu hpe mung, ngai shagrin da ya sa na, nga nna Yehowa tsun sai. ¹² Nang aprat nhtoi htum nna, na nji nwa ni hte rau yup pyaw lu jang, na a hkritung hkriwang, na a nshang na hkrat ai kasha hpe ngai sharawt nna, shi a mungdan shagrin ya na we ai. ¹³ Dai nsha wa she, nye ningsang mying a matu, nta shachyaw na wu ai: shi a magam tingnyang, shi a mungdan hta, prat dingsa ngai shagrin da na we ai. ¹⁴ Ngai gaw shi a kawa tai nna, shi gaw nye a kasha rai na ra ai: shi n shawp ai amu galaw yang, shinggyim masha lang ga ai lasik hte ngai sharin na we ai; shinggyim masha kayat ai hku kayat na we ai: ¹⁵ raitimung, na a man na ngai seng kau ai Shawlu kaw na, nye a n-gaw nwai ai myit ngai dawm la ai zawn, na a nsha hta na ngai n dawm la na nngai, ¹⁶ Na amyu matu hte na a mungdan chyawm gaw, na a man e dinggrin anga nga na ra ai: na a magam tingnyang mung htani htana dinggrin anga nga na ra ai, ngu u, ngu wu ai. ¹⁷ Shingrai Nahtan gaw, ndai ga mahkra hte, ndai shingran mahkra, Dawi hpe htawn tsun ya wu ai. ¹⁸ Shaloi Dawi hkawhkam gaw nhku kata de shang nna, Yehowa a man e dung let, Yehowa Madu e, nang ngai hpe ndai hte wa shagrau da ai gaw, ngai hpa hkaw ai wa rai ta? nye a nta dap mung hpa rai nga a ta? nye a nta dap mung hpa rai nga a ta? ¹⁹ Dai hta n-ga Madu Yehowa e, dai chyeju hpe naw n ram ai zawn, nawn wu ai majaw, na mayam a amyu matu ni a mara, ju majat prat janat, shinggyim masha a tsun ai hku hta, nang Yehowa Madu e, tsun ya ni hka! ²⁰ Dawi chyawm gaw hpa mi naw jat tsun lu sata? Yehowa Madu e, na a mayam wa hpe nang chye nga ndai. ²¹ Na a mungga hte nang myit ra ai hku hpe, na a mayam wa chye nga lu hkra, ndai amu kaba mahkra hpe nang shabyin nu ai. ²² Dai re ai majaw, Yehowa Karai Kasang e, nang galu kaba nga ndai law. Anhte na yu sai lam yawng mayawng hte maren, nang hte bung ai mi n nga ai, nang hta kaga Karai Kasang shaje n nga ai. ²³ Na a amyu masha ni hte, na a mungdan a matu mara mauhpa amu kaba madun dan na nga, Karai Kasang yu wa nna, na ningsang mying danhkung na matu, Egutu mung hte mungdan daga ni yawng hta, shanhte a Hpara ni a lata na hkye mawai la ai, nang lata la ai amyu Israela hte bung ai amyu gaw, dinghta ga ntsa e kadai amyu rai nga a ta? ²⁴ Kaning rai nme law, nang gaw na a amyu Israela hpe, htani htana prat dingsa, na a amyu masha shatai na nga, shanhte hpe na a matu shangang shakang da nna, nang, Yehowa e, shanhte a Karai Kasang tai nitdai. ²⁵ Ya chyawm gaw, Yehowa Karai Kasang e, na a mayam wa hte shi a nta masha ni a lam nang tsun ai ga, tutnawng shagrin da ya mi law; nang tsun ai hte maren shadik ya mi. ²⁶ Zaw nawng zaw wa up ai Yehowa gaw, Israela amyu ntsa e Karai Kasang rai nga ai, nga nna, na a Ningsang Mying gaw prat dingnawng shagrau sha-a ai mying rai nga nu ga law; na a mayam Dawi a amyu matu mung, na a man e grin nga nu ga law. ²⁷ Kaning rai nme law, Zaw nawng zaw wa up ai, Israela Karai Kasang, Yehowa e, nang mahtang na a mayam wa hpe, Na a amyu matu ngai shagrin da ya na nngai, nga nna madun dan nitdai majaw, na a mayam wa, na a man e ning nga akyu hpyi wam ai rai nga ai. ²⁸ Ya chyawm gaw, Yehowa Madu e, nang Karai Kasang rai nga ndai; na a ga tengman ai ga rai nga ai rai nna, ndai mai kaja ai lam nang na a mayam wa hpe shaka da nitdai: ²⁹ dai rai nna, na a mayam a amyu matu ni na a man e prat dingsa grin nga lu hkra, shanhte hpe shaman ya mu law: Yehowa, Madu e, ga ndai nang tsun nitdai; na a chyeju shaman ai gaw na mayam a amyu matu ni hta prat dingnawng anga nga nu ga law, ngu nna hpyi wu ai.

¹ Dai hpang Dawi gaw Hpilisti masha ni hpe gasat dang nna, shayu kau mu ai; shanhte a lashoi ngu na, Daju mare mung, shanhte a lata na kashun la kau wu ai. ² Moba mung hpe mung shi gasat nna, mung masha ni hpe ga e kaleng tawn nhtawm sumri hte shadawn jahka nna, htam masum na htam lahkawng sat kau wu ai; htammi sha jahkrung da wu ai. Shingrai Moba masha ni mung Dawi kaw yam nna, hkanse bang ma ai. ³ Bai, Dawi gaw hka nu ginwang e shi a mungdan bai lu la hkra nga, Zoba hkawhkam, Rohab a kasha Hadaeza hpe hkap gasat kau nna, ⁴ gumra hpyen hkying mi sanit tsa, lagaw hpyen mun lahkawng hte hpe rim la nhtawm, hpyen leng lats matu sha ngam da nna gumra gale mahkra hpe lahkap dan kau ya wu ai. ⁵ Ya Damasku mare na Suri masha ni, Zoba hkawhkam Hadaeza hpe sa karum ma yang, Dawi gaw Suri masha mun lahkawng e hkying lahkawng sat kau mu ai; ⁶ Shaloi Dawi gaw Suri mung na Damasku mare hta sin langa hpyendap tawn da wu ai: shingrai Suri masha ni Dawi kaw yam nna, hkanse bang ma ai; Dawi sa wa ai lam shagu hta Yehowa makawp maga nga ai. ⁷ Hadaeza mayam ni lang ai ja ninggang ni hpe Dawi kashun la nna, Yerusalem de la wa ma ai. ⁸ Bai Hadaeza hte seng ai mare Beta hte Berohti na magri law law wa, Dawi kashun la kau wu ai. ⁹ Ya Dawi gaw Hadaeza hpyen laba ni mahkra hpe dang kau lu ai lam Hamat hkawhkam To-I na jang, Dawi Hadaeza hpe dang kau lu ai majaw, ¹⁰ To-I gaw hkawhkam Dawi hpe hkap shachyen nna shaman ya na matu shi a kasha Yo-ram hpe shangun dat wu ai: kaning rai nme law, Hadaeza mung To-I hte hpyen majan rai nga ai. Yoram mung, aja arai, gumhpraw arai, magri arai gun nna sa wa ai. ¹¹ Dai aja gumhpraw rai ni hpe Dawi gaw Yehowa hpe nawng jau kau wu ai; ¹² dai hte maren, shi dang kau lu ai, Suri, Moba, Ammon a kashu kasha ni mung, Hpilisti hte Amalek mung hkan na lu la ai lanep ja gumhpraw mung, Rehoba a kasha, Zoba a hkawhkam Ha-daeza kaw na mung, kashun la lu ai lanep ja gumhpraw ni hpe mung, Yehowa kaw nawng kau wu ai. ¹³ Dai jum kadit e Suri masha mun mi hkying matsat sat kau lu nna bai nhtang wa jang chyawm gaw, Dawi hpung shingkang danhkung sa lu ai. ¹⁴ Edom mung shara shagu hkan e Dawi gaw sin langa hpyendap tawn da wu ai rai nna, Edom masha ni mahkra gaw Dawi a mayam ni tai nga ma ai. Dawi sa wa ai lam shagu hta Yehowa makawp maga nga ai. ¹⁵ Shingrai Dawi gaw Israela mungdan ting hpe up nna, shi a mung masha ni mahkra hpe tara dara ai hte dinghpring ai hku jeyang da wu ai. ¹⁶ Ze-ruia kasha Yoab gaw shi a jaubu kaba rai nga ai. Ahiluda kasha Yehoshahpat gaw labau ka da ai wa rai nga ai: ¹⁷ Ahituba a kasha Zadok yan, Abiahta a kasha Ahimelek gaw hkinjawng rai ma ai; Seraia gaw kunhting chyare rai nga ai. ¹⁸ Yehoiada kasha Benaia gaw Hkrehti yan Pelehti ni hpe up nga ai: Dawi a kasha ni mung, du magam lam hta tsap lawm nga ma ai.

¹ Bai Dawi gaw, Yonahtan a matu mara ngai chyeju htang lu hkra, Shawlu a lakung lama matu hta na langai ngai naw n ngam a ni? ngu nna san wu ai. ² Ya Shawlu a nta na, Ziba ngu ai mayam langai mi nga hkrup nna, shi hpe Dawi hpang de shaga shawn ya mu ai. Shaloi hkawhkam wa gaw, Nang Ziba rai n ni? ngu nna san wu yang, Na mayam rai nga nngai, ngu nna htan wu ai. ³ Bai hkawhkam wa gaw, Karai Kasang a myit ra ai hku hte maren ngai chyeju htang na, Shawlu a amyu matu langai ngai naw n nga a ni, ngu nna san wu yang, Ziba gaw, Yonahtan a kasha, lagaw hten ai langai mi naw nga ai, ngu nna htan wu ai. ⁴ Bai hkawhkam wa gaw, Shi kanang nga nga a ta? ngu nna san wu yang, Ziba gaw, Yu u, Lodeba kahtawng na Amiela kasha Mahkira nta e nga nga ai, ngu nna tsun dan wu ai. ⁵ Dai majaw Dawi hkawhkam masha shangun dat nna, Lodeba kahtawng Amiela a kasha Mahkira a nta na shi hpe sa woi la shangun wu ai. ⁶ Shingrai, Shawlu a kashu, Yonahtan a kasha Mehpiboshet, Dawi kaw du nna, shi a man e dingnyawm nawku nga ai. Dawi mung, Mehpiboshet e, ngu nna hkap shachyen shaga wu yang, shi gaw, Na a mayam nga nga nngai, ngu nna htan wu ai. ⁷ Bai Dawi gaw, Hkumtsang et; na nwa Yonahtan a matu ngai nang hpe teng teng chyeju htang na de ai; na ngi wa Shawlu a ga dachyawk mahkra ngai nang hpe bai jaw na de ai; na nji wa Shawlu a ga dachyawk mahkra ngai nang hpe bai jaw na de ai; nang gaw nye a sha ku hta tutnawng sha nga lu na rai ndai, ngu wu ai. ⁸ Shaloi Mehpiboshet gaw, Ngai zawn rai dam ai gwi chyasi hpe, nang madu mada mu na gaw, ngai na a mayam hpa hkaw ai wa rai nga a ta? ngu nna bai nawku let htan wu ai. ⁹ Dai shaloi hkawhkam wa Shawlu a mayam Ziba hpe shaga la nna, Shawlu hte shi a amyu matu ni lu la ging ai mahkra hte, na a madu a kasha hpe ngai ap ni ai. ¹⁰ Nang gaw, na a kashu kasha ni hte na a mayam ni hte rau, shi matu dai yi hkauna galaw nna, na madu a kasha sha na matu nsi nai si wa sak lu na rai ndai. Na madu kasha Mehpiboshet chyawm gaw shani shagu nye sha ku e sha na rai nga ai, ngu nna hkang dat wu ai. Ziba chyawm gaw, shadang sha shi manga hte, mayam hkun lu ai wa rai nga ai. ¹¹ Ziba mung, Nang madu hkawhkam, na a mayam hkang dat ai hte maren galaw na nngai, ngu nna hkamla wu ai. Mehpiboshet mahtang hkawhkam a kasha majing zawn, shi a sha ku hta sha nga lu ai. ¹² Mehpiboshet gaw, Mihka ngu ai shadang sha kaji langai mi lu ai. Ziba nta e nga ai ni mahkra gaw Mehpiboshet a mayam ni rai ma ai. ¹³ Shingrai Mehpiboshet gaw Yerusalem mare e nga nga nna, hkawhkam wa a sha ku hta shani shagu sha nga lu ai: lagaw lahkawng maga hten ai wa shi rai nga ai.

¹ Dai hpang Ammon a kashu kasha ni a hkawhkam si mat nna, kasha Hanun gaw kawa a malai hkaw dung nga ai. ² Shaloi Dawi gaw, Hanun a kawa Nahasha ngai hpe chyeju madun ai hte maren, ngai mung Hanun hta chyeju htang na we ai, nga nna, kawa a yawn shabran ya na matu, shi a ali ama ni hpe dat dat wu ai. Dawi a ali ama ni mung Ammon a kashu kasha ni a mungdan de du ma ai. ³ Ammon a kashu kasha ni a agyi salang ni chyawm gaw shanhte a madu Hanun hpe, Dawi gaw, na a myit shalan ya na matu kasa shangun ai nga ai gaw, na nwa hpe hkungga nna di ai zawn, nawn da wu ni? Ndai mare hpe sawk yu nna, kin-yu la na hte sa hpya na matu, shi a masha ni hpe shangun ai n rai nga a ni? Ndai mare hpe sawk yu nna, kin-yu la nahte sa hpya na matu, shi a masha ni hpe shangun ai n rai nga a ni? Ngu nna sa tsun mu ai. ⁴ Shingrai Hanun gaw Dawi a shangun ma ni hpe rim la nna, shanhte a nmun maga mi de shangun kau ya ai hte, dangbau du hkra shanhte a hpun palawng rep kau ya nhtawm, dat dat mu ai. ⁵ Dai shi Dawi na jang, dai masha ni grai grai kaya mat ai majaw, shanhte hpe tau la na masha shangun dat wu ai. Hkawhkam wa chyawm gaw, Nanhte a nmun garai n galu dingsa, Yerihko mare e naw nga nga mu, dai hpang e she wa marit, ngu nna tsun dat mu ai. ⁶ Shingrai Ammon a kashu kasha ni gaw, Dawi a man e matsat shabat rai nga ai lam shanhte dum chye la yang shanhte masha shangun dat nna, Bet–rehoba mare na Suri masha ni hte, Zoba mare na Suri masha mun lahkawng, Mahka hkawhkam kaw na masha hkying mi Toba a mare na masha mun lahkawng e hkying lahkawng saw la ma ai. ⁷ Dawi dai lam na wu jang, shi gaw Yoab hte shi a share luksuk ni mahkra hte hpe shangun dat mu ai. ⁸ Shingrai Ammon masha ni pru nna mare chyinghka lam e hpyen hkyen ma ai. Zoba, Rehoba, Toba mung hkan na sa ai Suri masha ni hte, Mahka hkawhkam a masha ni gaw, pa e kaga hkrai rai nga ma ai. ⁹ Yoab mung, ashawng ahpang hpyen man lahkawng tai nga ai mu jang, Israela masha ni mahkra hta na grau share ai ni yawng hpe lata la nna, Suri masha ni hpang maga de hkyen tawn mu ai: ¹⁰ ngam ai gale ni hpe gaw, Ammon masha ni hpang maga hkyen na lam, kanaw Abishai hpe dat wu ai. ¹¹ Bai Yoab gaw Suri masha ni ngai hpe dang wa jang, ngai hpe sa karum e; Ammon a kashu kasha ni nang hpe dang wa jang, ngai nang hpe sa karum na de ai. ¹² Nden ja dating u; anhte a amyu hte, anhte Karai Kasang a mare ninghtawn ni a matu n-gun marai dat gasat ga: Yehowa gaw shi ra ai hku hte maren galaw u ga, ngu wu ai. ¹³ Shingrai Yoab gaw shi a masha ni hte rau, Suri dap hpe gasat na htim mu ai rai nna, Suri masha ni shi a man na hprawng mat wa ma ai. ¹⁴ Suri masha ni htaw mat wa ai hpe Ammon a kashu kasha ni mu jang, shanhte mung Abishai a man na hprawng mat wa nna mare de shang mat wa ma ai. Yoab mung, Ammon a kashu kasha ni hpe gasat ai kaw na, Yerusalem mare de nhtang wa ai. ¹⁵ Suri masha ni gaw, Israela masha ni a man e sum ai chye jang bai zuphpawng nga ma ai. ¹⁶ Shingrai Hadaeza kasa shangun nna, hkanu wora hkran na Suri masha ni hpe shaga mu ai: shanhte mung sa nna Helam mare de du ma ai; Sobak mung, Hadaeza hpyen luksuk ni a jaubu kaba rai nga ai. ¹⁷ Dawi dai lam na jang, Israela masha ni yawng hpe jahpawng la nhtawm, Yawdan hka rap nna Helam mare de du ma ai. Suri masha ni mung Dawi a man e hpyen hkyen nna shi hte gasat mu ai. ¹⁸ Suri masha ni mung Israela masha ni a man e hprawng wa ma ai rai nna, Dawi gaw, Suri masha ni a gumra leng hpyen sanit tsa, gumra jawn ai hpyen mun mali hte hpe sat kau mu ai; shanhte a jaubu Sobak hpe mung hkala nna, dai yang shi si mat sai, ¹⁹ Shingrai Hadaeza kaw yam ai hkawhkam ni nlang, Israela man e sum ai mu jang, shanhte Israela masha ni hte htinglu nna shanhte kaw yam ma ai. Dai rai nna, Suri masha ni htawmhpang de Ammon kashu kasha ni hpe hpyen karum na n gwi mu ai.

¹ Ya shaning galai nna, hkawhkam ni hpyen gasat na ladu bai hkrum jang, Dawi gaw Yoab hte shi a ali ama ni, Israela masha nlang hte hpe shangun dat nna, Ammon a kasha ni hpe gasat dang kau nhtawm, Raba mare hpe wang tawn da mu ai. Dawi chyawm gaw Yerusalem mare e anga nga ai. ² Lani mi na shana de Dawi gaw yupra kaw na rawt nna, shi hkaw magaw ntsa e sat hkawm chyai yang, num langai mi hka shin nga ai hpe mu wu ai: dai numsha mung nachying hpraw tsawm nga ai. ³ Dai num kadai re ai, Dawi sa san shangun wu yang, masha langai mi gaw, Ndai num gaw, Eliam a shayi sha, Hiti la wa Uria madu jan Batsheba re ai n rai ni? ngu nna tsan dan wu ai. ⁴ Shaloi Dawi kasa shangun nna, num dai hpe shaga wu ai rai nna, num dai sa jang, shi hpe woi yup kau wu ai: num dai mung shi a n san n seng ai hkum jasan jaseng kau nna, shi a nta de wa mat ai. ⁵ Num dai mung na-um nasin rai wa sai rai nna, Dawi hpang de, Ngai hta na-um nasin hkum rai sai, nga nna sa tsun shangun mu ai. ⁶ Shaloi Dawi Yoab hpang de masha shangun dat nna, Hiti masha Uria hpe ngai hpang de wa shangun dat rit, ngu nna hkang dat wu ai. Dai rai nna Yoab gaw, Uria hpe Dawi hpang de shangun dat wu ai. ⁷ Ya Uria du wa jang Dawi gaw, Yoba kaja nga a ni? Ali ama ni kaja nga ma ni? Majan gasat dang lu myit ni? Ngu nna hkap shachyen wu ai. ⁸ Bai Dawi gaw, Na nta wa nna na lagaw kashin u, ngu nna Uria hpe tsun dat wu ai. Uria mung, hkaw na pru wa jang, shi a hpang e lusha shahpa hkan jaw dat wu ai. ⁹ Uria chyawm gaw, shi a nta de n wa ai sha, madu du a ali ama ni hte rau, hkaw chyinghka e yup nga ai. ¹⁰ Uria shi a nta de n wa ai lam Dawi hpe tsun dan mu yang, Dawi gaw, Nang bu hkawm ai de na wa ai wa n rai n ni? Na nta de n wa ai, hpa rai nga nga a ta? ngu nna Uria hpe tsun wu ai. ¹¹ Uria chyawm gaw, Karai Kasang a sumpu mung, Israela hte Yuda masha ni mung sum hta sha nga nga ma ai; nye du Yoab hte nye madu a mayam ni mung, pa hkan e she but nga ma ai; ngai wa mi tinang nta de wa nna lu let sha let, madu jan hte pyaw let nga mai na a ni? Nang madu hkrung nga ai hte, na wenyi hkrung nga ai hte maren, ngai shing n rai na nngai, ngu nna Dawi hpe htan wu ai. ¹² Dai rai nna Dawi gaw, Dai ni nang mare e naw nga nga u; hpawt de she shangun dat de ga, ngu nna Uria hpe tsun wu ai. Shingrai Uria gaw, dai shani hte hpang shani Yerusalem mare e nga nga ai. ¹³ Shaloi Dawi gaw shi hpe shaga la nhtawm, shi kaw shat jaw sha wu ai rai nna, nang hkra lu kau wu ai; raitimung, shana de rai jang, shi a nta de n wa ai sha, shi madu a ali ama ni hte rau yup nga ai. ¹⁴ Hpang jahpawt e Dawi gaw, Yoab hpang de laika ka dat nna, Uria lata hta shagun ya dat wu ai. ¹⁵ Dai laika hta rawng ai gaw, Hpyen gasat laja grau ai shara e, Uria hpe dat nna shawng de shanang shangun u; shingrai shi hpyen ni a lata de shang nna si lu hkra, hpyen masha ni hpe hpang de htingnut la u, nga nna ka dat ai. ¹⁶ Yoab mung, dai lam galaw nna mare hpe yaw yu yang, hpyen n-gun grau ja ai shara e Uria hpe dat wu ai. ¹⁷ Shaloi mare masha ni pru nna, Yoab hpe gasat mu yang, Dawi a ali ama masha ni nkau mi si ma ai: Hiti masha Uria mung si lawm mat ai. ¹⁸ Ya Yoab gaw majan shiga wa tsun shana ya na matu masha san la nna, ¹⁹ Ya hkawhkam wa hpe hpyen majan a lam azin ayang hkai dan su; ²⁰ shaloi hkawhkam wa masin pawt wa nna, Nanhte htim yang, hpa rai mare de shade de wa shani sa myit ta? Bunghku ntsa de wa shani sa myit ta? Bunghku ntsa de na kabai na re ai gaw n chye myit ni? ²¹ Yerubeshet a kasha Abimelek hpe kadai sat a ta? Htebeza mare hta num langai htumrin ntsa lungchyen hte bunghku ntsa de na kabai bun ai majaw shi si ai, n rai ni? Bunghku de hpa rai sa shani myit ta? nga nna daru jang, Na mayam Hiti masha Uria mung si sai, ngu nna tsun dan su, ngu nna kasa hpe shangun dat wu ai. ²² Shingrai dai kasa wa sa nna, Yoab shi hpe tsun shangun ai ga mahkra Dawi hpe tsun dan wu ai. ²³ Dai kasa wa mung Dawi hpe, Hpyen ni mahtang anhte hpe dang kau nna, pa de du hkra shachyut kau mi ai: anhte mung mare chyinghka du hkra nhtang gasat lu ga ai. ²⁴ Ndan jaugawng ni mung bunghku ntsa nna, na a mayam ni hpe gap ai majaw, na a mayam ni nkau mi si ga ai: na a mayam Hiti masha Uria mung si mat sai, ngu wu ai. ²⁵ Dawi chyawm gaw dai kasa wa hpe, Yoab hpe ning ngu u: dai majaw sha myit gawng hkum run et; majan ngu ai hta kadai si na n chye ga ai; mare dai hpe tsam mari di gasat anin nna dai hpe hpya kau mu, ngu nna shi hpe n-gun shakang u, ngu dat wu ai. ²⁶ Uria si mat ai lam shi a madu jan na wu yang, shi gaw shi a madu wa a majaw sharung sharawt rai nga ai. ²⁷ Shi a sharung shayawt ai ladaw lai wa jang, Dawi masha shangun nna, num dai hpe hkaw de shaga la wu ai; shingrai shi gaw shi a madu jan tai nna, shadang sha shangi ya wu ai. Raitimung, Dawi galaw ai lam gaw, Yehowa a man e n shawp ai amu rai nga ai.

¹ Dai hpang Yehowa gaw Nahtan hpe Dawi hpang de shangu ndat wu ai. Nahtan mung shi kaw shang nna, Hkawhkam wa e, mare langai mi hta marai lahkawng nga nga ma ai; langai mi gaw sahti kunmi, langai mi matsan mayan wa rai nga ai. ² Sahti wa gaw, sagu dumsu yamnga law law lu su nga ai; ³ matsan mayan wa chyawm gaw, shi mari la ai sagu yi kasha langai mi hta kaga hpa mung n lu wu ai: sagu yi kasha dai gaw shi a madu kaw mung, madu a shayi shadang sha ni hte mung, rau kanawn let kaba wa ai: madu a shat sha, madu a gawm hta lu, shi a lahpyen e yup nna, shayi sha zawn rai nga lu ai. ⁴ Ya kalang mi na sahti wa kaw manam du nna, sahti wa gaw manam wa hpe galaw jaw na matu, shi a sagu bainam ni hta na gaw lahpawt nna n la wu ai sha, matsan mayan wa kaw na sagu yi shingtai sha la nna, shi a manam wa hpe galaw jaw kau wu ai, ngu nna tsun dan wu ai. ⁵ Shaloi Dawi gaw dai sahti wa hpe masin grai pawt nna, Yehowa ahkrung nga ai hte maren, shingrai galaw ai wa gaw, si ging ai wa rai nga ai; ⁶ matsan dum ai myit n rawng nna, shingrai galaw ai majaw, sagu kasha hpe htam mali wa lu na re ai, ngu nna Nahtan hpe tsun wu ai. ⁷ Dai rai nna Nahtan gaw Dawi hpe, Nang nan rai nga ndai. Israela Karai Kasang Yehowa tsun ai gaw, Israela masha ni a hkawhkam tai na, ngai nang hpe namman chya ya ni ai; Shawlu a lata na mung nang hpe hkye tawn sade ai: ⁸ na madu a amyu matu ni hpe mung, na madu a madu jan ni hpe mung na a lahpyen e ngai ap ya sade ai: Israela amyu hte Yuda amyu hpe ngai nang hpe ap ya sade ai: dai hta n law yang rai kaga mung ngai nang hpe jaw mayu nga nngai. ⁹ Dai re ai mi Yehowa a tara hpe nang hpa rai n gawn n sawn rai nna, shi a man e n shawp ai amu galaw n ta? Hiti masha Uria hpe nang sat kau nna, shi a madu jan shaw la ya nu hka; gaja wa Ammon a kashu kasha ni a nhtu hte nang shi hpe sat kau nu ai. ¹⁰ Ya chyawm gaw, nang ngai e n gawn n sawn rai nna, Hiti masha Uria numshaw ndai majaw, na amyu matu ni mung nhtu hte hkrai kadup na manu ai. ¹¹ Yehowa tsun ai gaw, Yu u, nang hpe hpyen na masha gaw, na a kashu kasha ni hta na ngai shapraw na we ai: na a man e na a madu jan ni hpe ngai la kau nna, na a htingbu wa hpe ap ya na se ai; shi gaw shani chyingtung e nan na madu jan ni hte nga sha dan na ra ai. ¹² Nang dai amu hpe mayun mayaw galaw ai raitimung, ngai gaw Israela shawa hpung a man e raitimung, jan a ahtoi hta raitimung, dai hpe hpaw dan na we ai, ngu nna htawn tsun wu ai. ¹³ Shaloi Dawi gaw, Yehowa hpe ngai shut se ai, ngu nna Nahtan a man e yin la wu ai. Nahtan mung, Nang galaw ai yubak Yehowa raw kau nu ai: nang hkum si na n rai. ¹⁴ Raitimung, nang ning rai shut ai rai nna, Yehowa a hpyen ni a man e jahpoi shara kaba shatai ai majaw, ya shangai na kasha gaw teng teng si lu na rai nga ai, ngu wu ai. ¹⁵ Shaloi Nahtan gaw shi a nta de wa mat ai. Dai hpang Uria madu jan shangai ai, Dawi a kasha hpe, Yehowa ari jaw dat nna, shi grai machyi nga ai. ¹⁶ Dawi mung dai ma a matu Karai Kasang kaw hpyinem nga ai rai nna, lusha gam let, shana tup nhku kata e, ga hta kaleng taw nga ai. ¹⁷ Shi a hkaw na myitsu ai ni mung, shi hpe sa sharawt na nga sit sa timung, shi mahtang n hkraw nna, shanhte hte rau n lu n sha ai nga nga ai. ¹⁸ Shingrai, sanit ya du jang ma dai si mat ai; Dawi a ali ama ni mung, Ma dai naw hkrung nga yang pyi, anhte a ga na madat lu ai gaw, ma si ai lam tsun dan jang, je grau nna shi a hkum hpe zingri na ru ai, nga nna ma si ai lam Dawi hpe n tsun dan wam mu ai. ¹⁹ Raitimung ali ama ni kahte ai ga Dawi na nna, ma si sai, dum wu ai: dai rai nna, Dawi gaw, Ma si sani? ngu nna ali ama ni hpe san wu ai; shanhte mung, Si sai, ngu nna tsun dan mu ai. ²⁰ Shaloi Dawi ga na rawt nna, hka shin ai hte sau chya let hpun palawng galai wu ai; shingrai Yehowa a nta de sa nawku nhtawm, hkaw de bai wa nna, lusha hpyi wu yang, shanhte shachyip ya nna, shi sha nga ai. ²¹ Dai rai nna ali ama ni gaw shi hpe, Ataw, hpa majaw shingrai n ta? Ma naw hkrung nga yang pyi, ma majaw lusha gam let hkrapngu hkrapngoi rai nhtawm, ma si mat yang chyawm e, shat rawt sha n hka i? Ngu mu ai. ²² Dawi chyawm gaw, Ma naw hkrung nga yang, Karai Kasang ngai hpe matsan dum nna, ma shamai ya a nhten, myit nngai majaw, lusha gam ai hte hkrap nga ai, rai nga ai. ²³ Ya ma si mat sayang me, hpa matu lusha gam na rai ta? Ma hpe hkan shabai la lu na a ni? Shi hpang de mahtang ngai hkan na rai nga nngai; shi chyawm gaw ngai hpang de nhtang sa na n rai, ngu nna htan wu ai. ²⁴ Bai Dawi gaw shi a madu jan Bat-sheba hpe shalan shabran nna, shi hpe lashum wu ai; shi mung shadang sha shangai ya wu ai rai nna, ma dai hpe Shawlumon ngu nna, shi kawa nan shamying wu ai. Yehowa mung dai ma hpe tsawra wu ai rai nna, ²⁵ myihtoi Nahtan hpe shangun let, Yehowa a matu mara ngu nna, made a amying hpe, Jedidi ngu wu ai. ²⁶ Ya Yoab Ammon a kashu kasha ni a mare Raba hpe gasat nna, shanhte a hkawhkam mare lu la wu ai. ²⁷ Yoab mung Dawi hpang de kasa shangun dat nna, Ngai Raba mare gasat ni ai; gaja wa, dai hka lu mare lu la se ai. ²⁸ Ya gaw, naw ngam nga ai hpyen ma ni hpe jahpawng la nna, mare hpe wang tawn nhtawm, sat shakre la u: dai n rai, ngai gasat la nna, nye amying hte shamying na se ai, ngu dat wu ai. ²⁹ Dai rai nna Dawi gaw masha ni yawng jahpawng la nhtawm, Raba mare hpe gasat jahpawng la nhtawm, Raba mare hpe gasat nna lu la wu ai. ³⁰ Shanhte a hkawhkam a janmau hpe shi la wu ai; dai janmau gaw lungseng hpe n tsun ai, aja hkrai talenta langai mi rawng nga ai; dai hpe Dawi a baw hta shagup mu ai. Dai hta kaga, mare kata na mung, lanep law law wa magawn la lu ma ai. ³¹ Mare masha ni hpe mung shapraw la nna, zingret hte ret ai gaw ret, najawn hte shawt ai gaw shawt, nwa uhtawng hte abyen ai gaw abyen, wut nhkun hta kabaw ai gaw kabaw di sat mu ai. Dai zawn Ammon kashu kasha ni a mare kahtawng nlang hpe di mu ai. Shingrai Dawi hte masha ni nlang Yerusalem mare de bai wa ma ai.

¹ Ya dai amu byin ai hpang, Dawi a kasha Absalom kaw, Tama mying ai ahpraw tsawm ai kajan langai mi nga ai rai nna, Dawi kasha Amnon gaw shi hpe tsaw da wu ai. ² Amnon gaw Tama a majaw machyi hkra myit aru nga ai; num dai mung hkawnsek rai nna, Amnon gaw shi hte hkrum lu na yak la wu ai. ³ Raitimung Amnon gaw jinghku langai mi lu da wu ai; dai wa gaw, Dawi a kahpu Shimea kasha Yonadab rai nga ai; Yonadab gaw azai grai chye ai wa rai nga ai. ⁴ Dai wa gaw Amnon hpe, Nang hkawhkam a kasha rai da nhtawm e, hpa rai lani hte lani lasi wa nga n ta? Ngai e n tsun dan mayu n ni? ngu nna san wu yang, Amnon gaw, Ngai nau Absalom a kajan Tama hpe ra da we ai, ngu nna tsun dan wu ai. ⁵ Bai Yonadab gaw, Yupku hta taw nga nna machyi masu u law; shingrai na nwa kawan yu sa yang, Ngai jan Tama sa nna, galaw jaw shangun ya e; shi shadu ai shat ngai mu nna shi a lata na ngai sha lu hkra, nye a man e sa shadu na ahkang jaw e, ngu nna na nwa hpe hpyi u law, ngu nna shrin da wu ai. ⁶ Shingrai Amnon mung galaw nna, kaleng taw nga let machyi masu nga ai: hkawhkam wa sa kawan yu yang, Amnon gaw, Ngai jan Tama nye a matu muk pa lahkawng galaw lu nna, shi a lata na ngai sha lu hkra, shi hpe shangun ya e, ngu nna hkawhkam wa hpe hpyi wu ai. ⁷ Dawi mung Tama nta de masha shangun nna, Na nhpu Amnon a nta de sa nna shat shadu jaw u, ngu nna htet dat wu ai. ⁸ Tama mung shi kahpu Amnon a nta de sa wa ai; Amnon chyawm gaw taw nga ai: ya shi shadung la nna gumchya nhtawm, kahpu a man e muk pa galaw nna, muk pa hpe kaba wu ai. ⁹ Shingrai, di na ru htawk nhtawm, shi a man e tawn ya wu timung, shi na sha hkraw ai sha, Masha nlang shinggan de pru mat mu, ngu wu ai rai nna, masha mahkra pru mat ma ai. ¹⁰ Bai Amnon gaw Tama hpe mung, Na lata hta ngai sha lu u ga, ndai gawk de la wa rit, ngu wu ai. Tama mung shi galaw ai muk lang nna, kahpu Amnon a gawk de shang wa ai. ¹¹ Shingrai Amnon a matu muk la shang wa ya jang, shi gaw kajan hpe gang la let, Ngai jan e, ngai hte yup ga, ngu wu ai. ¹² Tama chyawm gaw, Hpu e, hkum rai; ngai e hkum jahpoi et; Israela amyu hta shingrai n galaw ma ai; shade wa n shawp ai gaw hkum galaw et; ¹³ nang shingrai yang, ngai kaning rai dang kaya na rai ta? nang mung, Israela amyu hta masha angawk tai na rin dai. Dai rai nna hkawhkam wa kaw hpyi u, n jaw ai mi n nga na re ai, ngu wu timung, ¹⁴ Amnon gaw n madat ai sha, kajan hta n-gun grau ja ai rai nna, kamu dip nna shut kau wu ai. ¹⁵ Shingrai nhtawm Amnon gaw kajan hpe grai bai ndawng mat wu ai: shawng na tsawra kaba ai hte shi hpe ya ndawng ai mahtang grau kaba mat nna, Rawt u, pru wa nu, nga nna shi hpe gawt wu ai. ¹⁶ Kajan chyawm gaw, Hpa n ga; ngai e ning di ai mara hta, bai gawt kau ai mara mahtang grau kaba salit dai, ngu nna htan wu ai. Amnon chyawm gaw n madat ai sha, ¹⁷ shi a shangun ma langai mi shaga la nna, Num dai hpe gawt shapraw nhtawm, chyinghka htinggrang kau u, ngu wu ai. ¹⁸ Shingrai hkawnsek rai nga ai hta, hkawhkam shayi sha ni buhpun ga ai hte maren, lak lai nna ka sawm ai hpun palawng galu buhpun ai Tama hpe, shangun ma e sha gawt shapraw nna, shi a hpang e chyinghka htinggrang kau wu ai. ¹⁹ Tama mung, shi a baw hta wan dap hte bun let, shi a ka sawm ai hpun palawng gang je kau nhtawm, baw e lata mara nna hkrap let wa ai. ²⁰ Shi a kayung makyin Absalom chyawm gaw, Nhpu wa Amnon, nang hpe roi kau a ni? Raitimung, ngai jan e, atsin sha she nga u; shi gaw na n-yung rai nga ai; dai lam hpe hpa hkum yawn et, ngu nna tsun wu ai. Shingrai Tama gaw kayung Absalom a nta e atsin sha nga nga ai. ²¹ Dai lam yawng hkawhkam Dawi na jang masin grai pawt wu ai. ²² Absalom chyawm gaw, kahpu Amnon hpe ga kaja n kaja hpa mung n tsun ai nga nga ai, raitimung, kajan Tama hpe jahpoi ya ai majw, Amnon hpe ndawng n yawt da wu ai. ²³ Dai hpang ni ning lai jang, Absalom gaw Ehprim mare makau na Balahazora shara e, sagu mun rep ga saw nna, hkawhkam a kasha ni nlang hpe mung shaga wu ai. ²⁴ Absalom shi nan hkawhkam wa kaw sa nna, Na a mayam sagu mun rep ga saw nga nngai; na a ali ama ni hpe woi nna, nang hkawhkam wa hkum nan, na mayam wa hte rau sa ga, ngu nna hpyi wu ai. ²⁵ Hkawhkam wa chyawm gaw, N rai na re ai, ngai sha e; nlang hpe wa gaw hkum woi et; nang nau hte na ndai, ngu wu ai. Absalom akroi anoi nga timung, shi n hkan hkraw ai sha, shaman ya dat wu ai. ²⁶ Shaloi Absalom gaw, Dai rai yang, ngai hpu Amnon hpe dat ya rit, ngu nna bai hpyi wu ai. Hkawhkam wa gaw, Shi hpa majaw nang hte sa ra n ta? ngu wu timung, ²⁷ Absalom mahtang akroi anoi nau hpyi ai majaw, Amnon hte rau kasha ni mahkra hpe dat dat ya wu ai. ²⁸ Absalom chyawm gaw shi a ali ama ni hpe, Amnon tsabyi lu nna, myit pyaw nga yang, hkyen nga mu: Amnon hpe sat kau manu, ngu nna ngai tsun jang, shi hpe sat kau mu; hkum hkrit myit; ngai nanhte hpe hkang masade ai, n rai ni? nden shaja nna dakan mu, ngu nna hkangda ngut nu ai. ²⁹ Absalom a ali ama ni mung shi hkangda ai hte maren Amnon hpe sat kau mu ai. Shaloi hkawhkam a kasha ni nlang hte gaw rawt nna, langai hte langai tinang lawze jawn let hprawng wa ma ai. ³⁰ Shanhte lam e naw rai nga yang, Absalom gaw hkawhkam kasha ni nlang hpe sat kau nu ai; langai ni muk n ngam sai, nga ai shi Dawi kaw du ai. ³¹ Dai majaw hkawhkam wa rawt nna, palawng gang je kau nhtawm ga e kaleng taw nga ai; shi a ali ama ni nlang hte mung, tinang a palawng gang je nna makau e tsap nga ma ai. ³² Shaloi Dawi a kahpu Shimea kasha Yonadab gaw, Hkawhkam wa kasha ni nlang sat kau nu ai, nga ai ga gaw, nye a madu n kam u ga; Amnon chyu sha she si sai; dai gaw, Absalom a kajan Tama hpe kamu roi ai shani kaw nna, shi a kayung wa ndai hku galaw na myit tawn nu ai. ³³ Dai rai nna, nye madu hkawhkam wa, na nsha ni mahkra si mat sai nga myit nna, hkum yawn et; Amnon chyu sha she si ai, ngu nna shalan wu ai. ³⁴ Absalom chyawm gaw hprawng mat wa ai. Ya dai sin langa shabrang wa mada dat yu yang, yu u, shi a shingdu maga na kawng lam e, masha law law wa ai, mu wu ai. ³⁵ Shaloi Yonadab gaw, Yu mu, hkawhkam wa kasha ni wa mara ai; na mayam tsun ai ga teng li ai, ngu nna hkawhkam wa hpe tsun wu ai. ³⁶ Dai ga htum ai hte rau hkawhkam wa kasha ni du wa nna, wa jahtau hkrap ma ai; hkawhkam wa hte shi a ali ama ni nlang hte mung ja ja hkrap ma ai. ³⁷ Absalom chyawm gaw hprawng nna Geshura hkawhkam Amihura kasha Talmai hpang de sa wa ai. Dawi mung kasha a majaw shani shagu yawn nga ai. ³⁸ Shingrai Absalom gaw Geshura de hprawng nna, masum ning nga nga ai. ³⁹ Dai laman e Dawi gaw Amnon a yawn bran nna, Absalom hpe myit nna nra nga ai.

¹ Ya hkawhkam wa amyit Absalom hpang de lawm mat wa nga ai gaw, Zeruia kasha Yoab dum wu ai. ² Shaloi Yoab gaw Teko a mare na zai rawng ai numsha langai mi shaga la nna, Ya, nang gaw, namman hkum chya et; si ai wa a majaw na na wa sharung shayawt nga ai num zawn tai masu let ayawn hpun palawng buhpun nna, ³ hkawhkam wa man de shang nhtawm ning ngu tsun u, ngu nna dai numsha n-gup hta ga bang wu ai. ⁴ Dai numsha mung hkawhkam wa man de shang nna, ga e dingnyawm dagup let, Hkawhkam wa e, Hkye la rit law, ngu nna shi hpe nawku wu ai. ⁵ Hkawhkam wa mung, Hpa amu rawng n ta? ngu nna san wu yang, numsha gaw, Na mayam jan madu wa si mat ai gaida rai nga nngai. ⁶ Na a mayam jan shadang sha lahkawng lu nngai; ma dai yan pa hkan e shada gasat nna, je ai masha n nga ai majaw, langai wa e langai wa hpe abyen nna, shi si wa sai. ⁷ Ya rai yang mung, hpunau ni nlang rawt nna, na mayam jan hpe jawm let, Kahpu sat ai wa hpe, matai htang na matu ap ya lu na, Sali wunli mung, anhte dawm kau ya na, nga nga ma ai: dai hku rai yang, na mayam jan a naw ngam ai wan nhtaw hpe shanhte sat kau ya nna, nye madu wa a mying hpe mung, naw ngam ai matu mara hpe mung, ga ntsa na jahtum kau ya na mara ai, ngu nna tsun wu ai. ⁸ Hkawhkam wa chyawm gaw, Na nta de wa nu; na amu ngai jeyang na nngai, ngu nna dai numsha hpe tsun dat wu ai. ⁹ Bai dai Teko a mare na numsha gaw, Nye a madu hkawhkam wa e, ngai hte nye a amyu masha ni a ntsa e yubak mara nga u ga, hkawhkam wa hte shi a tingnyang hta chyawm gaw mara n nga u ga, ngu nna hkawhkam wa hpe tsun wu ai. ¹⁰ Bai hkawhkam wa gaw, Nang hpe mara shagun ai wa kadai hpe raitimung, ngai hpang de shaga wa rit; hpang de nang hpe zingri lu na n rai, ngu wu ai. ¹¹ Bai dai numsha gaw, Ngai sha hpe n sat ya lu mu ga, htawmhpang de matai htang na wa kadai mung matai n htang lu na, ngu nna na a Karai Kasang Yehowa hpe dum u ga, ngu wu ai. Shaloi Dawi gaw, Yehowa hkrung nga ai hte maren, na nsha a kara singgawng langai mi muk ga de hkrat lu na n rai, ngu nna tsun wu ai. ¹² Bai dai numsha gaw, Na mayam jan, nye madu hkawhkam wa hpe ga langai mi naw tsun shangun e, ngu nna hpyi wu yang, Hkawhkam wa mung, Tsun u, ngu wu ai. ¹³ Dai numsha mung, Dai rai yang gaw, Karai Kasang a amyu hpe, nang hpa rai shingrai jahte maw nga n ta? Nang hkawhkam wa tsun ai, dai hku rai yang gaw, nang hkum nan hta ra rawng nga ai: kaning rai nme nga yang, nang hkawhkam wa shachyut kau ai wa hpe, nang bai n shaga ndai. ¹⁴ Anhte chyawm gaw si chyalu ni rai nga ga ai; ga e ru kau sai hpe, bai n shagawt la lu ai ntsin hte bung mat saga ai: Karai Kasang chyawm gaw matai n dawp ai sha, shi kaw na hprawng mat ai wa, bai nhtang wa na hku, a maw nga ai. ¹⁵ Ya nye a madu hkawhkam wa a man e ngai ning nga sa tsun ai mung, masha ni ngai hpe jahkrit shama ai majaw rai nga ai. Na a mayam jan htan mawe ai gaw, Hkawhkam wa hpe ngai sa tsun na nngai; hkawhkam wa mung shi a mayam jan a hpyi ai ga she madat na a dawng: ¹⁶ kaning rai nme law, an nu hpe Karai Kasang a Sali ga hta na shamyit kau mayu ai wa a lata na, shi a mayam jan e shaw la na matu, hkawhkam wa madat ya na re ai, ngu we ai. ¹⁷ Dai re ai majaw, Nye madu hkawhkam wa gaw Karai Kasang a lamu kasa zawn, kaja ai hte n kaja ai chye ginhka nga ai rai nna, nye madu hkawhkam wa a ga hte lawt lu u ga, ngu nna, na a mayam jan ning nga hpyi wam ai rai nga ai: na a Karai Kasang Yehowa mung, nang hte rau anga nga u ga, ngu wu ai. ¹⁸ Shaloi hkawhkam wa gaw htan nna, Rai taw, ngai san ai lam hpe hkum ip shadang et, ngu wu ai. Dai numsha mung, Nye madu hkawhkam wa e, san rit, ngu wu ai. ¹⁹ Hkawhkam wa gaw, Alam dai hta Yoab lawm nga ai, n rai lit ni? ngu nna san wu yang, numsha mung, Madu hkawhkam wa e, nang ahkrung nga ai hte maren, nang madu hkawhkam wa tsun ai lam hta na kadai mung pai de hkra de n tawt lu law; gaja wa na a mayam Yoab ngai hpe hkangda nna, na a mayam jan a n-gup hta ndai ga mahkra bang ya ni ai. ²⁰ Dai amu hpe mye lu na majaw, na a mayam Yoab ndai galaw nu ai; nang madu mung, ga ntsa e nga manga hpe chye lu hkra, Karai Kasang a lamu kasa hpaji rawng ai zawn, hpaji rawng nga ndai, ngu nna bai htan wu ai. ²¹ Shaloi hkawhkam wa gaw Yoab hpe, Yu u, dai amu ngai hpajang ngut se ai; shabrang wa Absalom hpe sa shaga la su, ngu dat wu ai. ²² Dai rai nna Yoab gaw ga e dingnyawm dagup let hkawhkam wa hpe shakawn wu ai gaw, Nye a madu hkawhkam wa e, nang na a mayam a hpyi ai lam hte maren galaw ya ndai majaw, ngai na a man e myiman pa ai gaw, dai ni ngai chye se ai, ngu wu ai. ²³ Dai re ai majaw Yoab rawt nna, Geshura mare de sa wa nhtawm, Absalom hpe Yerusalem mare de woi la wu ai. ²⁴ Hkawhkam wa chyawm gaw, shi a nta de wa nga u ga, nye a man e hkum dawng pru shangun rit, ngu wu ai. Shingrai Absalom gaw shi a nta de nga nga nna, hkawhkam wa a myiman n mu lu wu ai. ²⁵ Ya Israela amyu ting hta Absalom zawn ahpraw tsawm nna shakawn hkamla ai wa langai mi muk n nga ma ai. Lagaw lahpan kaw nna baw pungding hkren, za ai shara langai mi muk n nga ai. ²⁶ Shi a njaw li ai majaw shaning shagu kara daw kau nna, shaning shagu na kara gaw, hkawhkam shen ai shekela hku rai yang, shekela ni tsa dang li lu ai. ²⁷ Absalom mung shadang sha masum hte, Tama mying ai shayi sha langai mi lu ai: num kasha dai mung myiman tsawm lu ai. ²⁸ Ya Absalom gaw Yerusalem mare e ni ning nga timung hkawhkam a myiman n mu lu ai. ²⁹ Absalom gaw, Yoab hpe hkawhkam hpang de shangun na nga, shaga timung Yoab n sa hkraw ai; lahkawng lang bat shaga timung n sa hkraw ai. ³⁰ Dai majaw Absalom gaw, shi a ali ama ni hpe, Yu u, Yoab a yi nye a hte ni nga ai; muk-yaw mam tu nga lu ai; sa nat kau ma su, ngu nna dat dat mu ai. Absalom a ali ama ni mung sa nat kau mu ai. ³¹ Shaloi she Yoab Absalom a nta de sa nna, Na ali ama ni nye a yi hpa majaw nat kau ma hka? ngu nna san wu yang, ³² Absalom gaw, Yu u, Ngai gaw Geshura mare na hpa majaw wa a ta? dai yang ya du hkra nga yang grau mai ai, ngu nna hkawhkam wa kaw sa tsun shangun na ngai nang hpe shaga de ai: ya mung hkawhkam wa a myiman ngai hpe mu shangun e; ngai hta mara nga yang mung shi ngai e sat kau ruga, ngu nna Yoab hpe htan wu ai. ³³ Shaloi Yoab hkawhkam wa hpe sa tsun wu ai rai nna, hkawhkam wa hpe sa tsun wu ai rai nna, hkawhkam wa Absalom hpe shaga wu ai; shi mung hkawhkam wa man e shang nna, dingnyawm dagup nga ai: hkawhkam wa mung Absalom hpe pup wu ai.

¹ Dai hpang e Absalom gaw leng hte gumra mazing tawn nna, shi a shawng e gat na masha marai manga shi san tawn wu ai. ² Absalom mung jau jau rawt nna, mare chyinghka lam e tsap nga nga re ai: ya amu rawng ai wa tara sa dara na nga, hkawhkam wa hpang de sa jang, Absalom mahtang dai wa hpe hkap shachyen let, Nang gara mare na rai n ta? ngu nna san wu ai. Dai wa mung, Na a mayam wa, dai wora Israela lakung na rai nga nngai, nga nna htan jang; ³ Absalom gaw, Na a amu gaw kaja ai hte tengman ai amu rai nga lit dai; raitimung, na amu dai hpe jeyang ya na masha, hkawhkam wa kadai hpe mung san da wu ai n rai, ngu nna hkap tsun tsun rai nga ai. ⁴ Dai hta n-ga Absalom gaw, Ngai la ma ndai mung e tara jeyang du rai n ga law; dai rai taw gaw amu rawng ai ni yawng mayawng ngai kaw sa jang, ngai kaw tengman ai hku jeyang ya na mawe ai, ngu nna tsun tsun di wu ai. ⁵ Shingrai marai langai ngai shi kaw hkungga lara rai sit sa jang, dai wa hpe hkap ahpum la nna a pup dat dat di wu ai. ⁶ Shingrai hkawhkam wa kaw tara dara na nga, sa ai Israela masha yawng mayawng hpe, Absalom dai hku hkap galaw law rai nna, Israela masha ni a myit hpe lagu la yu wu ai. ⁷ Ya mali shi ning lai yang, Absalom gaw hkawhkam wa kaw shang nna, Na a mayam Suri mung na Geshura mare e naw nga yang, Yehowa hpe ning nga ga shaka da sai; Yehowa ngai hpe Yerusalem de bai woi wa yang gaw, ngai Yehowa hpe jaw jau na nngai, ngu se ai. ⁸ Dai rai nna Yehowa hpe ngai shaka da se ai hte maren, Hebron mare de wa nna ga shaka rap wa raw na ahkang jaw dat e, ngu nna hpyi wu ai. ⁹ Hkawhkam wa mung, Angwi apyaw wa nu, ngu dat wu ai. Shingrai Absalom rawt nna Hebron mare de wa ai. ¹⁰ Raitimung, Absalom gaw, Israela amyu ni nlang hpang de gumlau kasa shangun dat nna, amyu masha ni hpe, Pahtau dum ai na jang, Absalom gaw Hebron mare e hkaw dung ai re ai chye mu, ngu nna tsun da mu, nga nna hkang dat ai. ¹¹ Yerusalem mare na mung, Absalom shi hte rau marai ni tsa woi saw pru wa mu ai; shanhte chyawm gaw hpa re ai mung n chye nna, myit kaja hte hkannang ma ai. ¹² Absalom mung, Dawi a mungbawng salang wa, Gilo mare masha Ahihto-hpela hpe, shi nga ai Gilo mare e hkungga jaw jau nga ai kaw na shaga la wu ai. Absalom hpang de hkannang ai ni grau grau jat wa ma ai majaw, gumlau amu gaw ja wa malu ai. ¹³ Shaloi masha langai mi gaw Dawi kaw sa nna, Israela masha ni a myit gaw Absalom hpang de lawm mat wa masai, ngu nna ashi tsun wu ai. ¹⁴ Dai majaw Dawi gaw, Yerusalem mare e shi hte rau nga ai ali ama ni mahkra hpe, Rawt mu, anhte hprawng ga: shing n rai yang, kadai mung Absalom hpe lawt lu na n rai; alawan pru saga; dai n rai yang, shi anhte hpe dep rau nna, anhte hpe sa sat ai hte mare hpe mung nhtu hte hpya kau na maru ai, ngu wu ai. ¹⁵ Hkawhkam a ali ama ni mung, Nang madu hkawhkam hpajang ai lam shagu, na a mayam ni hkannang na jin jin rai nga ga ai, ngu mu ai. ¹⁶ Shaloi hkawhkam wa gaw, shi a htingnu na ali ama yawng hte rau pru wa ma ai. Raitimung, shi a htingnu sin nga na matu lashi num ni marai shi tawn da wu ai. ¹⁷ Shingrai hkawhkam wa hte shi kaw nga ai masha nlang hte pru wa nna, shanhte gaw Bet-merhak e but nga ma ai. ¹⁸ Shi a ali ama ni nlang bawp let hkannang nga ma ai Hkrehti hte Pelehti masha ni mung, Gat mare na Giti masha marai kru tsa hte mung, hkawhkam wa a shawng e sa wa nga ma ai. ¹⁹ Shaloi hkawhkam wa gaw, Giti masha Itai hpe, Nang hpa rai anhte kaw hkannang nga n ta? nang gaw amyu kaga masha, maju n jung ai manam rai ndai majaw, wa nu: hkawhkam wa kaw wa nga su; na a shara de wa su. ²⁰ Mani mana sha du ai wa mi anhte kaw hkan hkawm na gaw hpa majaw rai ta? Ngai chyawm gaw hkawm wa ra ai lam rai nna hkawm wa ni ai; dai majaw na a masha ni hpe woi nna wa nu; chyeju hte kangka ai gaw nang hta anga nga u ga law, ngu wu ai. ²¹ Itai chyawm gaw, Yehowa mung, nang madu hkawhkam wa mung hkrung nga ai hte maren, nang madu hkawhkam wa si hkrung hkrum ai rai tim, lawt lai lu ai rai tim, nang du ai kaw na a mayam wa mung gaja wa du na ring ngai, ngu nna, tsun wu ai. ²² Shaloi Dawi gaw, Lai sa wa ga, ngu nna Itai hpe tsun wu ai. Giti masha Itai mung, shi kaw na masha kaji kaba mahkra hte rau lai sa wa ai. ²³ Mung masha ni nlang hte gaw grai hkrap sharung ma ai; shi kaw hkannang ai ni nlang sa wa nna, Hkawhkam wa nan Kidron hkaraw rap wu yang, masha nlang hkan rap wa nna, nam lam hku bawp mat wa ma ai. ²⁴ Zadok hte Lewi masha ni nlang mung Karai Kasang a ga shaka sumpu hpai let du ma ai rai nna, shanhte gaw Karai Kasang a sumpu tawn da nhtawm, masha nlang mare na pru ma tawm ai du hkra, Abiahta gaw kawng de lung wa la ai. ²⁵ Hkawhkam wa chyawm gaw Zadok hpe Karai Kasang a sumpu gaw mare de wa tawn da mu: Yehowa ngai hpe myit du dum ai rai yang gaw, shi ngai e bai woi wa nna, sumpu hpe mung, shi a shingwung shara hhpe mung, mu lu shangun na ra ai: ²⁶ shing n rai, Nang hpe ngai n ra sade ai, nga yang gaw, rai sa, nga nga nngai, shi ra ai hku ngai e di ruga, ngu nna tsun wu ai. ²⁷ Bai hkawhkam wa gaw, hkinjawng Zadok hpe, Nang gaw myihtoi rai ndai n rai ni? Na nsha Ahima yan Abiahta kasha Yonahtan woi nna, mare de apyaw sha wa nga nga u. ²⁸ Yu mu, nanhte a shana ai ga de hkra, nam mali shara na uhkan e ngai a la nga na nngai, ngu wu ai. ²⁹ Dai re ai majaw Zadok yan Abiahta gaw Karai Kasang a sumpu hpe Yerusalem de wa da nna dai yang e anga nga ma ai. ³⁰ Dawi mung, hkrap let, baw htinggrum nna kyepdin raw kau nhtawm Tsanlun bum de lung wa nga ai; shi kaw hkannang ai ni nlang hte mung, baw htinggrum nna hkrap let hkan lung wa ma ai; ³¹ masha langai mi mung Dawi hpe, Absalom hte gumlau lawm ai hpung hta Ahihtohpela mung lawm ai, ngu nna shana ya wu yang, Dawi gaw, Yehowa e, Ahihtohpela daw ya ai hpaji hpe shangawk kau ya u, ngu nna hpyi wu ai. ³² Ya Dawi gaw, dai bum jinghkang na Karai Kasang nawku ai shara de du jang, Arhki shara na Hushi mung, hpun palawng gang je kau nna, baw hta ga nhpu hte bun let, shi hpe hkap tau na pru sa ai. ³³ Dawi gaw shi hpe, Nang ngai kaw hkannang taw, ngai e shayak ai sha rai na ndai; ³⁴ mare de mahtang shang nna Absalom hpe, Madu hkawhkam wa e, Ngai gaw na nwa kaw yam rawng ni ai hte maren, nang kaw sha bai ayam na nngai, ngu u; shaloi Ahihtohpela daw ai hpaji hpe, ngai hpang maga gum nna, jahten ya lu na rai nga ai. ³⁵ Mare kata e, nang hte rau hkinjawng Zadok yan Abiahta nga nga ma ai n rai ni? Dai rai nna, Htingnu e nang na mana, hkinjawng Zadik yan Abiahta hpe wa tsun mu. ³⁶ Shan kaw Zadok a kasha Ahima yan, Abiahta kasha Yonahtan nga ma ai. Na la lu ai ga mahkra dai yan hpe hti nna, ngai hpang de shana dat rit, ngu nna tsun da we ai. ³⁷ Dai rai nna Dawi a jinghku Hushai gaw mare de sa wa ai; Absalom mung Yerusalem mare de shang wa ai.

¹ Ya Dawi gaw bum pungding wora hpyin loi mi lai jang, Mehpiboshet a mayam Ziba gaw, hking mawn sai lawze lahkawng hte, muk tawng ni tsa, tsabyi si sumbaw latsa, maihpang si dik apye latsa, tsabyi jahku shanhpyi tingsan mi lawze hta htaw nna, hkap tau la sa wa ai. ² Shaloi hkawhkam wa gaw Ziba hpe, Hpa di na ngu nna arai dai ni la sa n ta? ngu nna san wu yang, Ziba gaw, Lawze yan gaw, hkawhkam a masha ni jawn na matu; muk hte namsi gaw ali ama ni sha na matu; tsabyi jahku mung, nam hkan e hki ba ai ni lu na matu rai nga ai, ngu nna hta wu ai. ³ Bai hkawhkam wa gaw, Taw, na madu a kasha gaw kanang nga a ta? ngu nna san wu yang, Ziba mung, Yerusalem e nga nga ta sai; shi gaw, Dai ni chyawm gaw Israela masha ni ngai wa a mungdan ngai e bai ap na ma ni ai, nga ai, ngu nna tsun dan wu ai. ⁴ Dai majaw Hkawhkam gaw, mehpiboshet e seng ai arai yawng mayawng na a rai nu ga, ngu nna Ziba hpe tsun wu ai. Ziba mung, Nye a madu hkawhkam wa e, na a mayam na a man e myiman pa ni ga, ngu nna nawku hpyi nga nngai, ngu wu ai. ⁵ Dawi hkawhkam gaw Bahurim mare du yang, Shawlu a kahpu kanau ni hta na, Gera a kasha Shimi ngu ai wa langai mi, matsa let pru sa wa ai. ⁶ Dawi hte shi a ali ama ni nlang hpe lung din hte mung kabai wa ai: masha nlang hte shara jau bu ni mahkra gaw hkawhkam wa a pai de hkra de gumbawm let sa wa nga ma ai. ⁷ Shimi matsa ai ga gaw, Masha sat ai, n hkru ai wa e, hprawng u, hprawng u; ⁸ Shawlu a mungdan kashun la nna, shi a amyu matu ni hpe sat kau ai yubak nlang hte gaw, na ntsa e Yehowa nhtang dat ya nna, na a mungdan hpe na nsha Absalom a lata hta ap kau nu ai: hkrum sha u, nang masha sat ai wa rai nna she, matai dawp ai hkrum nga ndai, ngu wu ai. ⁹ Dai re ai majaw Zeruia kasha Abishai gaw hkawhkam wa hpe, Gwi chyasi wora, hpa nga nna me nye madu hkawhkam wa hpe matsa nga a ta? Ngai sa htau kau se ga, ngu nna hpyi wu ai. ¹⁰ Hkawhkam wa chyawm gaw, Zeruia kasha ni e, nanhte hte hpa seng a ta? Matsa nga u ga. Dawi hpe matsa su, ngu nna Yehowa shangun dat nu ai; dai rai nna nang hpa majaw shingrai n ta? nga nna kadai gawn lu a ta? ngu wu ai. ¹¹ Bai Dawi gaw Abishai hte shi a ali ama ni mahkra hpe, Yu mu, nye nshang na hkrat ai, ngai sha majing wa pyi ngai e sat na tam nga ai rai yang gaw, wora Ben-yamin amyu masha gaw dai hta grau na nrai ni? Ra mi nga nga u ga; matsa nga u ga; Yehowa hkangda ai majaw rai sai. ¹² Dai ni wora wa matsa ai a marang e, ngai hkrum sha ai shoi chyum ai hpe Yehowa mada mara nna, chyeju bai nhtang jaw na nhten, ngu wu ai. ¹³ Shingrai Dawi, shi a masha ni hte rau lam e sa nga ma yang, Shimi mung shi hte hkran hpra shada tawtap bum lanem e sa wa nna, matsa let nlung kabai ai hte ga nhpu hte shamawng di wu ai. ¹⁴ Hkawhkam wa hte shi a masha ni nlang hte gaw Ayehpim shara de du nna, dai yang nsa awai la ma ai. ¹⁵ Ya Absalom hte Israela masha ni nlang Yerusalem mare de du ma ai rai nna, Ahihtohpela mung lawm nga ai. ¹⁶ Dawi a jinghku Arhki masha Hushai mung Absalom kaw sa nna, Hkawhkam wa asak galu kaba nga nit ga law, galu kaba nit ga law, ngu nna shaman ya wu ai. ¹⁷ Absalom chyawm gaw, Na jinghku wa hpe chyeju dum ai gaw, dai rai ni? Na jinghku wa kaw, hpa rai n hkan n ta? ngu nna Hushai hpe daru kau wu ai. ¹⁸ Hushai mung, Shing hku nga et; Yehowa hte, ndai Israela amyu masha ni mahkra lata la ai wa kaw yam na nngai; dai wa kaw she nga na nngai: ¹⁹ Kadai wa kaw yam ai rai yang, dai wa a kasha kaw mung yam lu na n rai ni? Na nwa a man e ngai yam ai hte maren, na a man e mung yam na nngai, ngu nna Absalom hpe tsun wu ai. ²⁰ Shaloi Absalom gaw ahihtohpela hpe, Anhte kaning rai mai na, hpaji daw ya e, ngu wu ai. ²¹ Ahihtohpela mung, Htingnu sin na matu na nwa tawn da ai lashi num ni hpe shang madu u; shaloi na nwa nang hpe ndawng na lam, Israela amyu masha ni nlang chye jang, nang hpang maga nga ai ni nlang hte masin kaba na mara ai, ngu wu ai. ²² Dai hte maren dai htingnu ntsa e shanhte Absalom a matu sum gap nna, shi gaw Israela masha ni nlang hte a man e kawn a lashi num ni hpe shang madu wu ai. ²³ Dai prat e Ahihtohpela daw ya ai hpaji gaw, Karai Kasang kaw san la lu ai ga zawn kang nga lu ai; Dawi a man e raitimung, Absalom a man e raitimung, Ahihtopela daw ya ai hpaji ga gaw dai zawn kang nga lu ai.

¹ Dai hta kaga Ahihtopela gaw Absalom hpe, Ngai masha mun me hkying lahkawng san lu n ga; shingrai ngai rawt nna dai na e pyi Dawi hpe hkan shachyut ni ga: ² shi ba galawp nna gawngkya nga yang, shi hpe ngai htim gasat nna kajawng dat na we ai; shaloi shi hte rau nga ai ni nlang hprawng ma jang, hkawhkam wa hpe chyu sha sat kau na we ai: ³ nang tam ai wa langai mi hpe lu kau jang, gale nlang hte chyawm gaw bai wa nna, mung masha ni yawng asim sha nga na mara ai, ngu nna hpaji daw ya wu ai, ⁴ Ga dai hpe Absalom hte Israela du gyi salang ni yawng na htuk dum ma ai. ⁵ Raitimung Absalom gaw, Arhki masha Hushai hpe mung shaga wa rit; shi a ga mung anhte madat yu ga, ngu wu ai. ⁶ Ya Hushai Absalom hpang de du jang, Absalom gaw, Ya Ahihtohpela ndai hku tsun sai; shi a ga madat sa na kun? Shing n rai, nang tsun yu u, ngu wu yang, ⁷ Hushai gaw, Ahihtohpela daw ai hpaji gaw, ndai lang hta n htuk sai: ⁸ nang chye ai hte maren na nwa hte shi a masha ni gaw lapyin rawng ai share hkrai rai ma ai; dai hta ya grau nna, nam e kasha magra ai tsap kanu zawn n-yun bu ai myit rawng nga ma ai; na nwa mung share rai nna, masha ni hte rau n yup ga ai. ⁹ Ya gaw ginlawng hku langai ngai hte, shing n rai shara me, makoi nga a dawng re ai; dai rai yang, shawng sa wa ai, na masha nkau mi kadawng jang, dai shi na ai wa gaw, Absalom kaw hkannang ai ni sum mat masai, nga nna kajai na mara ai. ¹⁰ Shaloi hkanghkyi masin zawn nden ja ai myit rawng ai ni pyi minla byaw mat na mara ai; kaning rai nme law, na nwa nden ja ai share rai nga ai mung, shi kaw na masha ni yawng, nden ja ai wa-ngan hkrai rai nga ai mung, shi kaw na masha ni yawng, nden ja ai wa-ngan hkrai rai nga ai mung, Israela masha ni nlang chye ma ai. ¹¹ Dai re ai majaw ngai hpaji daw ya de ga: Dan mare kaw nna berasheba mare du hkra, Israela masha nlang hpe, nammukdara makau na zai bru daram na a man e jahpawng la nna, nang hkum nan langang sa u. ¹² Shingrai na nwa hpe shara langai ngai hta katut jang, ga ntsa e mari hkrat ai zawn, anhte shi a ntsa e galup nna shi hte shi a masha ni langai mi muk n lawt hkra di na rai nga ai. ¹³ Mare langai ngai de shang ai rai yang mung, Israela masha ni yawng dai mare de sumri la sa nna, lung din langai mi muk n ngam hkra, mare dai hpe hkaraw de karawt jahkrat kau na rai nga ga ai, ngu nna Absalom hpe hpaji daw ya wu ai. ¹⁴ Dai na jang, Absalom hte Israela masha ni nlang hte gaw, Arhki masha Hushai daw ai hpaji mahtang, Ahihtohpela daw ai hpaji hta grau htuk nga ai, nga ma ai. Kaning rai nme law, Absalom hpe jasum na matu, Ahihtopela daw ai hpaji kaja hpe jahten lu hkra, Yehowa hpajang ai rai nga ai. ¹⁵ Ya Hushai gaw hkinjawng Zadok yan Abiahta hpe, Ahihtohpela gaw, Absalom hte Israela agyi salang ni hpe ndai hku hpaji daw ya nu ai; ngai mung ndai hku daw ya se ai. ¹⁶ Dai majaw Dawi hhpang de alawan shangun nna, Dai na, nam mali na uhkan hkan e hkum hkring nga et; alawan rap wa nu: dai n rai yang, hkawhkam wa hte masha ni nlang sum mat na marin dai, ngu nna sa tsun na matu hkang dat wu ai. ¹⁷ Ya Yonahtan yan Ahima gaw, mare de shang yang masha ni mu na tsang ai majaw, En-rogela hka makau e a la nga nna, shangun ma num langai mi shan hpe sa tsun dan mu ai hte maren, shan gaw hkawhkam Dawi hhpe sa tsun na nga sa wa ma ai. ¹⁸ Raitimung, ma langai mi shan hpe mu dat nna Absalom hpe wa tsun dan wu ai: shan mung alawan wan sa wa nna, Bahurim mare e hkahtung nga ai nta wang langai mi de shang nhtawm, dai hkahtung kata e shang makoi nga ma ai. ¹⁹ Numsha mung hkahtung mahka hpe magap nhtawm, de a ntsa e mam lam tawn nu ai majaw, hpa mung n chye kau mu ai. ²⁰ Absalom a ali ama ni mung, dai nta na numsha hpang de du nna, Ahima yan Yonahtan gade rai wa masata? ngu nna san mu yang, shi gaw, Hkaraw wora hkran de rap wa masai, ngu nna tsun dan mu ai. Shanhte mung tam yu nna n mu jang, Yerusalem mare de bai wa ma ai. ²¹ Ya shanhte wa mat ai hpang, shan gaw hkahtung kata na pru nna, Dawi hpang de sa wa nhtawm, Ahihtohpela gaw nanhte hpe shachyut na hpaji ning nga daw ya nu ai; dai re ai majaw rawt mu, hka wora hkran de alawan rap mu, ngu nna Dawi hpe tsun dan wu ai. ²² Shaloi Dawi hte rau, shi kaw hkannang ai ni nlang rawt nna, Yawdan hka rap ma ai: nhtoi htoi jang Yawdan hka hpe n rap lu ai langai mi mung n ngam sai. ²³ Ahihtohpela chyawm gaw, shi daw ya ai hpaji hku n hkan ai mu jang, shi a lawze byau nna, shi nga ai mare, shi a nta de wa nhtawm, dinghku amu hpajang da ngut jang, shi dai dau si mat ai; shi kawa lup hta e, shi hpe makoi mayang di mu ai. ²⁴ Shaloi Dawi gaw Mahana-im de du ai. Absalom hte shi kaw hkannang ai Israela masha ni nlang Yawdan hka rap ma ai. ²⁵ Ya Absalom gaw Yoab a malai, Amasa hpe hpyen luksuk ni a jau bu shatai wu ai; dai Amasa chyawm gaw, Yoab a kanu Zeruia a kanaw, Nahasha a shayi sha Abigala hte nga sha ai Israela amyu na Ihtra ngu ai wa a kasha rai nga ai. ²⁶ Shingrai Israela masha ni hte Absalom gaw gilead mung e dap jung nga ma ai. ²⁷ Ya Dawi gaw Mahana-im mare de du jang, Ammon kashu kasha Shobi, Lodiba mare na Amiela a kasha Mahkira hte, Gilead shara Rogelim mare na Barazili hte gaw, ²⁸ Hkannang ai masha ni nam mali e kawsi hpang gara let hki ba nga ma hka, nga nna Dawi hte shi a masha ni sha na matu hkaulan mam, muk-yaw mam, shadung, mam npaw, shapre, naw kyu, san du kangau; ²⁹ lagat jahku, htawbat, sagu uhkrawng, nga chyu chyage re ai ni hte, panep, n-gawt, hka wan ni, sa sak ma ai.

¹ Shaloi Dawi shi a masha ni hpe hti yu nna, hkying mi up ai, latsa up ai jau bu ni hpe san da wu ai. ² Dawi mung masha ni hpe hpung masum di karan nna, hpung mi hpe Yoab a lata hta, hpung mi hpe Zeriz kasha, Yoab a kanau Abishai a lata hta, bai hpung mi hpe Giti masha Itai a lata hta ap ya nhtawm, Ngai hkum nan gaja wa teng teng nanhte hte rau sa na nngai, ngu nna masha ni hpe tsun wu ai. ³ Masha ni chyawm gaw, Nang hkum nan n sa u ga; anhte hprawng timung shanhte da na n rai; anhte chyen mi si wa timung, shanhte tawn na n rai; nang gaw anhte mun mi hta grau hpu nga ndai: dai rai nna, mare kaw nna anhte hpe karum na shajin nga yang grau mai na re ai, ngu nna tsun mu ai. ⁴ Hkawhkam wa mung, Nanhte ra ai hku hkan na nngai, nga nna tsun let mare chyinghka e tsap nga ai; masha nlang hte gaw latsa dap hkying dap rai nna pru sa wa ma ai. ⁵ Shaloi hkawhkam wa gaw, Nye a myiman tau nna, ngai sha Absalom hpe ngwi ai hku galaw ya mi, ngu nna Yoab, Abishai hte Itai hte hpe hkang dat wu ai. Shing nga hkawhkam wa Absalom a matu jau bu ni nlang hpe hkang dat wu ai gaw, masha ni nlang na ma ai. ⁶ Shingrai Dawi a masha ni gaw, Israela masha ni hpe gasat na matu pa de pru wa ma ai: Ehprim maling e shanhte hte hkrum gasat ma ai. ⁷ Israela masha ni mahtang, Dawi ali ama ni a man e sum nna, dai shani jang tsam mari gasat nna masha mun lahkawng si ma ai. ⁸ Mung ting dumbru dumbra rai gasat nna, dai shani e ri nhtu hte si ai hta, maling na nhkun nhkaw hkan e hkala si ai mahtang grau law ma ai. ⁹ Absalom mung Dawi a ali ama ni hte hkrum kadup wu ai. Shi gaw shi a lawze hpe jawn wu ai rai nna, dai lawze gaw wa myi hpun kaba langai mi a lakung lakying ni a npu hku gat gale mat wa ai majaw, dai wa myi hpun hta Absalom a baw chyat mat nna, ga de n hkap ai noi goi wat nga ai: lawze gaw shi chyu lai mat wa ai. ¹⁰ Marai langai mi dai mu nna, Yoab hpang de sa nhtawm, Absalom gaw wa myi hpun hta noi nga ai ngai mu da se ai, ngu nna tsun dan wu ai. ¹¹ Yoab chyawm gaw, Nang mu ai rai yang, hpa rai shi hpe n galun jahkrat kau da n ta? Dai rai taw, ngai nang hpe gumhpraw lap shi hte shingkyit jaw na sade ai, ngu nna dai wa hpe hkap htan wu ai. ¹² Bai dai wa gaw Yoab hpe, Nang nye a lata hta lap hkying wa mi jaw timung hkawhkam wa kasha hpe ngai n hkra lu nngai: kaning rai nme law, anhte mahkra na ai hte maren hkawhkam wa mahtang, Kadai mung ngai sha Absalom hpe n hkra hkra sadi nga mu, nga nna nang madu hte Abishai, Itai hte hpe hkangda sai. ¹³ Ngai nan she hkala kau we yang gaw, shi a asak hhpe ngai shut kau ai tai na ra ai; hkawhkam wa n chye lu na lam hpa mung n nga ai; nang mung shi hpang maga sakse tai mat na rai nga ai, ngu nna tsun wu ai. ¹⁴ Yoab chyawm gaw, Ngai na ga galoi n madat rau ni ai, nga nna tsun let, ri namkyap masum magra lang nna, wa myi hpun npu e naw hkrung nga ai Absalom a masin hpe galun htinggrang ya wu ai. ¹⁵ Yoab a ri nhtu lang ya ai shabrang marai shi mung wang nna Absalom hpe sat shakre mu ai. ¹⁶ Yoab mung pahtau dum ai hte, masha ni hpe shabai nna, shanhte gaw Israela masha ni hpe shachyut ai kaw na bai wa ma ai. ¹⁷ Shanhte Absalom a mang hpe dai maling na nhkun kaba hta jahkrat ban nhtawm, nlung sumpum kaba sumpum da mu ai: Israela masha ni nlang hte mung, tinang nang a nta de hprawng wa ma ai. ¹⁸ Absalom chyawm gaw, shi naw hkrung nga yang, Nye a amying matut na matu mara n nga ai, nga nna Hkawhkam kadit e nga ai nlung mahtan hpe sharawt jung nna, shi a amying hte shamying da wu ai: dai nlung mahtan hpe mung dai ni du hkra Absalom a masat dingsat, ngu nna shamying da mu ai. ¹⁹ Shaloi Zadok a kasha Ahima gaw, Yehowa, hkawhkam wa a hpyen ni hpe mara hte maren matai dawp sai lam ngai gat wa nna hkawhkam hpe wa tsun dan se ga, ngu nna ahkang hpyi wu ai. ²⁰ Yoab chyawm gaw, Nang dai ni ashi wa tsun mai ai n rai; hpawt ni hpawt din tsun na rai nga ai: hkawhkam wa a kasha si ai re ai majaw, nang dai ni ashi gun mai ai n rai, nga nna hkum nhtawm, ²¹ dai Hkusha masha hpe mahtang, Nang mu mamu hkawhkam wa hpe sa tsun dan su, ngu wu ai. Dai Hkusha masha mung Yoab hpe naw kau da nna gat wa ai. ²² Bai Zadok a kasha Ahima gaw, Hpa byin yang byin, ngai mung dai Hkusha masha hpang e gat ni ga, ngu nna Yoab hpe bai hpyi wu ai. Yoab chyawm gaw, Ngai sha e, kabu hpa shiga mung n rai yang me, hpa rai gat wa mayu n ta? ngu wu timung, ²³ Hpa byin yang byin, she gat wa n ga, nga nna naw hpyi ai majaw, Yoab gaw, Gat su, ngu nna dat dat wu ai. Shaloi Ahima gaw, dai pa lam hku gat wa nna, Hkusha masha hpe lai kau da wu ai. ²⁴ Dawi chyawm gaw chyinghka tau lahkawng a lapran e dung nga ai: sin langa wa mung, mare chyinghka ntsa na hpadu lung nna, mada yu yang, masha langai sha gat wa ai mu wu ai. ²⁵ Sin langa wa gaw dai lam hkawhkam hpe jahtau tsun wu ai. Hkawhkam wa mung, Langai sha rai yang gaw shi lawm na ra ai, ngu wu ai. Dai wa gaw makau du wa ra ai. ²⁶ Bai sin langa wa gaw, kaga langai mi gat wa ai bai mu nna, Kaga langai mi bai gat wa ra ai, ngu nna chyinghka sin ai wa hpe jahtau tsun ai. Hkawhkam wa gaw, Dai wa mung ashi gun ai re ai, ngu wu ai. ²⁷ Bai chyinghka sin ai wa gaw, Shawng na wa a sat gaw, Zadok a kasha Ahima zawn re ai, ngu we ai, ngu nna tsun wu yang, Hkawhkam wa mung, Dai wa masha kaja re ai, ashi kaja gun na ra ai, ngu nna bai tsun wu ai. ²⁸ Ya Ahima gaw jahtau nna, Dang saga ai, hkawhkam wa hpe tsun wu ai. Bai hkawhkam wa a man e dingnyawm dagup let, Nye madu hkawhkam wa hpe gumlau ai ni hpe ap ya ai na a Karai Kasang Yehowa gaw a nga u ga law, ngu nna tsun wu ai. ²⁹ Hkawhkam wa chyawm gaw, Ngai sha Absalom kaja nga a ni? ngu nna san wu yang, Ahima gaw, Jau bu Yoab ngai hpe ngu ai na a mayam wa hpe shangun ai shaloi, kabrawng kabrang kaba re ai gaw ngai mu nngai; raitimung, hpa lam re ai ngai n chye nngai, ngu nna htan wu ai. ³⁰ Hkawhkam wa gaw, Nang makau de sit nga su, ngu wu ai rai nna, shi mung sit nna nga nga ai. ³¹ Bai Hkusha masha gaw du wa nna, Nye madu hkawhkam wa a matu ashi gun wa nngai; nang e gumlau ai ni nlang hpe, shanhte a mare hte maren, Yehowa dai ni matai dawp nu ai, ngu nna tsun dan wu ai. ³² Shaloi hkawhkam wa gaw dai Hkusha wa hpe, Ngai sha Absalom kaja nga a ni? ngu nna san wu yang, Hkusha wa gaw, Madu hkawhkam wa hpe hpyen nna, nang madu hpe zingri zingrat na nga gumlau rawt ai ni yawng gaw, dai shabrang wa zawn rai nga mu ga law, ngu nna bai htan wu ai. ³³ Shaloi hkawhkam wa masin kahpra nna, mare chyinghka ntsa na gawk de lung wa let hkrap nga ai: shingrai lung wa yang, Ngai sha Absalom e, ngai sha, ngai sha absalom e! nang si na malai ngai si n ga law e; ngai sha. ngai sha, Absalom e, nga nna hkrap sharung nga ai.

¹ Shingrai, Hkawhkam wa Absalom a majaw hkrap sharung nga ai, ngu nna Yoab hpe tsun dan mu ai. ² Dai shani na padang gaw, masha ni yawng a matu yawn shara tai mat malu ai; kaning rai nme law, Hkawhkam wa kasha a majaw yawnhkyen nga ai gaw, dai shani e masha nlang na lu ma ai rai nna; ³ majan ginra na hprawng ai ni kaya dum nna lagyim hkawm ai zawn, shanhte gaw dai shani e mare de lagyim let sha shang wa ma ai. ⁴ Hkawhkam wa mung myiman magap kau nna, Ngai sha Absalom e, Absalom e, ngai sha, ngai sha! Nga nna shabam hkrap nga ai. ⁵ Dai re ai majaw Yoab gaw hkawhkam wa kaw shang sa nna, Nang madu a asak hte, na a shayi shadang, na a num dung madu jan ni hte lashi labai jan ni a asak hpe hkye ya ai, anhte na a mayam ni nlang hpe dai ni kaya jahkrum nitdai: ⁶ hpyen ni hpe mahtang tsawra nna, jinghku ni hpe gaw ndawng kau nitdai. Na agyi salang ni hte ali ama ni hpe hpa n sawn ai gaw, nang dai ni dan dan madun nitdai: Absalom hkrung nga nna, na a mayam ni nlang dai ni si yang mahtang, nang grai kabu na gaw, dai ni ngai chye se ai. ⁷ Ya mung rawt u; pru nna na a mayam ni hpe shalan shabran mi: dai n rai yang, dai na, nang kaw masha langai mi muk n nga na saga ai, nga nna Yehowa a amying hpe gang let ngai dagam nga nngai: dai mahtang, nang brang ram prat kaw nna ya du hkra hkrum ai shoihpa yawng hta, grau yak na ra ai, ngu nna shadum wu ai. ⁸ Shaloi she hkawhkam wa rawt nna mare chyinghka e dung nga ai. Hkawhkam wa mare chyinghka lam e wa dung ra ai, nga nna kajai shajang ma yang, masha nlang hte hkawhkam wa a man e sit sa ma ai. Israela masha ni chyawm gaw tinang a shara de hprawng wa masai. ⁹ Israela amyu lakung yawng hte gaw, Hkawhkam wa anhte hpe masha hpyen ni yawng hte, Hpilisti masha ni a lata na hkye tawn ma ni ai: ya shi gaw Absalom a majaw sha mungdan na hprawng hkawm nga ai. ¹⁰ Anhte namman jaw nna Absalom hpe shadun ai mung, majan e si mat sai. Ya mung hkawhkam wa hpe sa woi la na n bawng ai, hpa rai nga nga myit ta? nga nna shada nawng hkat nga ma ai. ¹¹ Ya hkawhkam Dawi gaw, hkinjawng Zadok yan Abiahta hpang de masha shangun nna, Yuda agyi salang ni hpang de sa nhtawm ning ngu mu: Hkawhkam wa hpe Htingnu de woi la na lam, Israela masha ni yawng bawng ai ga hkawhkam wa na wu ai: nanhte gaw hpa rai hpang hkrat nga myit ta? ¹² Nanhte gaw nye a hpunau, nye nra nye shan rai nga myit dai, nga nga ai: dai re ai majaw hkawhkam wa hpe bai woi la na hpa rai hpang hkrat nga myit ta? ngu nna mung, ¹³ Amasa hpe mung, Nang nye nra nye shan rai ndai n rai ni? Nang hpe nye a man e Yoab malai tut tut na jau bu n shatai de yang gaw, dai hta grau nna Karai Kasang ngai hpe deng u ga, nga ai, ngu nna mung, tsun mu, ngu nna htet dat wu ai. ¹⁴ Shingrai Yuda amyu masha yawng hpe lang lata sha, shanhte a myit shi hpang de kayin la wu ai rai nna, shanhte mung, Nang madu a mayam ni yawng hte hpawn, nang hkum nan bai wa rit, ngu nna hkawhkam wa hpe sa woi na shangun dat mu ai. ¹⁵ Shaloi hkawhkam wa bai wa nna Yawdan hka du wa ai. Yuda amyu masha ni gaw hkawhkam wa hpe sa tau la nna, Yawdan hka sharap la na nga, Gilgala shara de sa wa ma ai. ¹⁶ Shaloi Bahurim mare e nga ai, Ben-yamin lakung, Gera kasha Shimi gaw, Yuda masha ni hte rau hkawhkam Dawi hpe sa tau la na nga, tin tin pru sa wa ai. ¹⁷ Ben-yamin masha hkying mi mung shi hte rau nga nga ma ai; Shawlu a npan dap Ziba hte kasha ni marai shi manga, mayam ni marai hkun hte rau sa wa nna, shanhte gaw hkawhkam wa a man e Yawdan hka rap ma ai. ¹⁸ Hkawhkam wa nta masha ni hpe sharap na hte, shi ra ai hku galaw na matu, wawn langai mi sharap ma ai. Ya Yawdan hka rap tawng ngut jang Gera kasha Shimi gaw hkawhkam a man e dingnyawm dagup nna, ¹⁹ Nye a madu ngai hpe hkum deng et: nang madu hkawhkam wa Yerusalem mare na pru ai shani e, na a mayam nang hpe shut ai amu hpe hkum dum et; hkawhkam wa e, kraw e hkum matsing et: ²⁰ na a mayam wa shut kau ai re ai, chye nga nngai; dai re ai majaw, Yosep lakung ni yawng a shawng e, nang madu hkawhkam wa hpe tau la na matu, na mayam dai ni pru sa wa ring ngai, ngu nna nem wu ai. ²¹ Raitimung, Zeruia kasha Abishai gaw, Yehowa ahkang hte majaw, Shimi gaw si lu na n rai ni? ngu nna san wu ai. ²² Dawi chyawm gaw, Zeruia kasha ni e, Dai ni nanhte ngai hpe hpyen na gaw, ngai hte hpa seng a ta? Dai ni Israela masha langai ngai si yang she mai a ni? Dai ni ngai Israela hkawhkam rai nga nngai gaw, ngai chye nga ai, n rai ni? Dai ni ngai Israela hkawhkam rai nga nngai gaw, ngai chye nga ai, n rai ni? ngu nna daru kau nhtawm, ²³ Shimi hpe mung, Nang si lu na n rai, ngu na dagam da wu ai. ²⁴ Shawlu a kasha Mehpiboshet mung, hkawhkam wa hpe tau la na nga sa wa ai; hkawhkam wa pru mat wa nga sa wa ai; hkawhkam wa pru mat wa ai shani kaw nna, angwi apyaw bai wa lu ai du hkra, shi gaw lagaw n mazang, n-gup mun n lajang, hpun palawng mung n hkrut ai sha nga nga nu ai. ²⁵ Hkawhkam wa hpe tau la na Yerusalem mare ting pru sa wa ma yang, hkawhkam wa gaw, mehpiboshet nang ngai kaw hpa rai n hkan n ta? ngu nna san wu yang; ²⁶ shi gaw, Madu hkawhkam wa e, Na a mayam wa lagaw hten nngai majaw, nang kaw hkannang na ngu nna lawze hking byau na maw nga yang, nye a mayam wa ngai hpe hkalem kau nngai; ²⁷ shi gaw na a mayam wa hpe, nang madu hkawhkam wa kaw gumlau kau ni ai: raitimung, nang madu hkawhkam gaw Karai Kasang a lamu kasa zawn rai nga ndai; nang ra ai hku galaw u ga. ²⁸ Nye amyu matu ni nlang nang madu hkawhkam a man e chyasi hkrai rai ga timung, na a sha ku e lusha ai ni hte rau, na a mayam hpe shara yen ya nitdai. Dai rai nna, hkawhkam wa kaw ngai aput shara hpa naw nga sata? ngu nna htan wu ai. ²⁹ Hkawhkam wa chyawm gaw, Na amu a lam hpa tsun shara naw nga a ta? Nang hte Ziba dai lamu ga karan lu na rai myit dai, ngai hpajang se ai, ngu wu ai. ³⁰ Mehpiboshet mung, Nang madu hkawhkam wa htingnu de angwi apyaw bai wa lu sai majaw, mahkra shi la kau timung, mai ai, bai ngu wu ai. ³¹ Ya Gilead masha Barazili gaw, Rogelim shara na sa nna, hkawhkam wa hpe Yawdan hka sharap na matu, shi hte rau rap wa wu ai. ³² Barazili mung asak matsat shi ning du nna dingla ngut gu sai re ai; shi gaw daru magam grai lu ai wa re ai majaw, hkawhkam wa Mahana-im e dap jung ai nhtoi hte ting shi hpe lusha hkap daw wu ai. ³³ Shaloi hkawhkam wa gaw Barazili hpe, Ngai kaw hkannang rit; Yerusalem mare e ngai nang hpe bau na de ai, ngu wu yang; ³⁴ Barazili gaw, Nang hkawhkam wa hte rau Yerusalem mare de wa nga na gaw, nye asak gade ning naw ngam na a ta? ³⁵ Dai ni nye a asak matsat shi ning rai sali ai. Kaja ai hte n kaja ai naw chye ginhka na a ni? Na a mayam lusha mu n mu naw chye na na a ni? Mahkawn shabrang ni a mahkawn mangoi ai nsen na lu na a ni? Dai rai nna, na a mayam nang hkawhkam wa hpe hpa majaw naw shatsang na rai ta? ³⁶ Na mayam, Yawdan hka wora hkran de nang hkawhkam wa hpe loi mi hkan sa na nngai: ndai hte kaba ai kumhpa, hkawhkam wa hpa majaw htang na n ta? ³⁷ Na a mayam wa, nye dai daw mare, nu wa lupwa makau e si lu n ga, nhtang wa na ahkang she jaw rit; yu u, na a mayam Hkimham lawm nga ai; nang hkawhkam hte rau shi hkannang u ga; nang ra ai hte maren shi hta galaw u, ngu nna htan wu ai. ³⁸ Hkawhkam wa mung, Rai sa, Hkimham ngai hte rau wa na re ai; nang ra ai hte maren shi hta ngai galaw na we ai: nang hpyi mahpyi mung, na matu ngai galaw na we ai, ngu wu ai. ³⁹ Shingrai masha ni mahkra Yawdan hka rap ma ai; hkawhkam wa mung shi hkum nan rap nna, Barazili hpe pup let shi hpe shaman ya wu ai; bai shi gaw shi a shara de nhtang wa ai. ⁴⁰ Ya hkawhkam wa Gilgala mare de du nna, Hkimham mung shi kaw hkannang nga ai. Ya Yuda amyu masha ni mahkra hte, Israela amyu masha chyen mi sha hkawhkam wa hpe woi ma ai. ⁴¹ Shaloi Israela amyu masha ni mahkra gaw hkawhkam wa hpang de sa nna, Anhte a hpunau Yuda amyu masha ni gaw, nang hpe lagu la nna, nang hte na a nta masha, na a ali ama yawng hpe, Yawdan hka sa sharap la ai gaw, hpa majaw rai ma ta? ngu nna hkawhkam wa hpe daru mu ai. ⁴² Dai rai nna Yuda amyu masha ni nlang hte gaw, Israela amyu masha ni hpe, Hkawhkam wa gaw anhte a hpunau re ai majaw rai nga ai: dai rai yang, nanhte dai lam hta hpa pawt shara nga a ta? Hkawhkam wa a jarit anhte sha ga ni? anhte hpe kumhpa lama ma jaw a ni? ngu nna htan mu ai. ⁴³ Bai Israela amyu masha ni gaw Yuda amyu masha ni hpe, Anhte gaw htamshi ting hkawhkam wa hte seng nga ga ai; Dawi hte nanhte seng ai hta anhte grau seng ga ai: dai re ai mi, anhte a hkawhkam wa woi ai lam hta, anhte hte shawng n bawng ai, anhte hpe n sawn ai hku hpa rai galaw myit ta? nga nna bai htan ma ai. Bai Yuda amyu masha ni tsun ai ga mahtang, Israela amyu masha ni a ga hta grau nna ja la malu ai.

¹ Dai shaloi, Ben-yamin amyu Bihkri a kasha, Sheba mying ai n hkru ai wa langai mi nga ai: dai wa gaw, pahtau dum nna, Israela masha ni e, Anhte gaw Dawi hte hpa mung n seng ga ai; Yese a kasha hta hpa Sali mung n lu ga ai: Israela masha ni e, langai hte langai tinang a sum de wa mu, ngu wu ai, ² rai nna Israela masha ni nlang Dawi kaw na pru nna, Bihkri a kasha Sheba kaw hkannang mat wa ma ai; Yuda amyu masha ni chyawm gaw, Yawdan hka kaw nna Yerusalem mare du hkra tinang a hkawhkam wa kaw hkannang nga ma ai. ³ Shingrai Dawi gaw Yerusalem mare na shi a htingnu de bai du wa ai: shaloi hkawhkam wa gaw, shi a htingnu sin shangun da ai lashi num marai shi hpe, nta langai mi hta rawng da nna bau wu ai; raitimung, shanhte hpe n shum nu ai. Shanhte gaw si ai nhtoi du hkra rawng da ai hkrum nna, gaida zawn nga nga ma ai. ⁴ Shaloi hkawhkam wa gaw Amasa hpe, Yuda amyu masha ni yawng jahpawng la nna, masum ya e shanhte hte rau nang hkum nan ngai kaw sa wa rit, ngu nna htet dat wu ai. ⁵ Amasa mung sa wa nna, Yuda masha ni hpe shaga ginrawn nga ai hta, madat dat ai nhtoi shalai kau wu ai. ⁶ Dai majaw Dawi gaw Abishai hpe, Absalom anhte hpe sharu ai hta, dai Bihkri a kasha Sheba sharu ai mahtang grau yak na ra ai: na a madu a ali ama ni hpe woi nna dai wa hpe shachyut su; dai n rai yang, bunghku ngang ai mare langai ngai de shang jang, shi anhte a lata na lawt na ra ai, ngu nna htet da wu ai. ⁷ Dai rai nna Abishai gaw, Yoab a masha ni hte Hkrehti masha, Pelehti masha, n-gun ja ai share ni yawng hte rau, Bihkri a kasha Sheba hpe hkan shachyut na matu, Yerusalem mare na pru wa ma ai. ⁸ Ya Gibeon makau na lunghtawn du jang, Amasa shanhte hpe sa tau la wu ai. Ya Yoab gaw shi a hpyen hpun palawng sumraw nna, nshang shingkyit hta shi a nhtu n-ga noi da wu ai: shingrai sa wa nga yang, nhtu gaw shi chyu shaw hkrat lu ai. ⁹ Shaloi Yoab gaw Amasa hpe, Hpu e, kaja nga n ni? nga nna shachyen let, pup na matu, hkra lata hte Amasa a mun hpe jum wu ai. ¹⁰ Pai lata de lang ai nhtu hpe, Amasa hpa di na zawn n nawn wu ai majaw, Yoab gaw shi a kan galun baw ya nna, pu ayai hkra rai nga ai; bai n kahtap galun timung, Amasa si mat sai. Yoab yan Abishai yan nau chyawm gaw Bihkri a kasha Sheba hpe shachyut na sa wa ma ai. ¹¹ Amasa a makau e Yoab a shangun shabrang langai mi tsap nga nna, hkannang ai masha ni hpe, Yoab yan Dawi hpang maga nga ai wa rai yang gaw, Yoab kaw hkan mu, ngu nna tsun wu ai. ¹² Amasa chyawm gaw nmaw lam ka-ang e shi a sai hta galawi taw nga ai. Lam e sa wa ai ni nlang, dai yang tsap gadawn nga ma ai hpe, Yoab a masha langai mi mu jang, Amasa a mang hpe lam shinggan de hpai sit kau nhtawm, nba hte magap da wu ai. ¹³ Shingrai sit kau ngut jang she masha ni nlang lai nna, Bihkri a kasha Sheba hpe hkan shachyut na, Yoab kaw hkannang ma ai. ¹⁴ Shingrai Yoab gaw, Bet-mahka ginwang Abela mare du hkra, Israela mung ting ga sa wa nna, Beri masha ni nlang mung shi kaw hkannang ma ai. ¹⁵ Sheba shingbyi nga ai Bet-mahka ginwang na Abela mare hpe wang tawn nna, shinggan na bunghku hte tawtap e kaduk htu ma ai; Yoab a masha ni nlang hte mung, mare bunghku hpe sharun na nga, bunghku npawt htu gawt ma ai. ¹⁶ Shaloi hpaji rawng ai numsha langai mi mare na pru jahtau ai gaw, Madat yu mu, madat yu mu; ngai Yoab hte shaga lu n ga, Yoab hpe nang de sit sa yu na da, ngu nna tsun ya mi, nga ai. ¹⁷ Dai majaw Yoab sit sa wa yu yang, dai numsha gaw, Nang Yoab rai nga n ni? ngu wu yang, Rai nga nngai, ngu wu ai. Bai dai numsha gaw, Na a mayam jan a ga madat la ya rit, ngu wu ai. Yoab mung, Madat na nngai, ngu nna htan wu yang, ¹⁸ numsha gaw, Gaja wa Abela mare e bawng la nna, amu shangut mu ga, nga nna moi na aprat hta tsun ga ma ai. ¹⁹ Israela amyu hta ngwi pyaw lam hkan nna kangka dingman ai jan langai mi rai nga nngai: nang chyawm gaw, Israela mi rai nga nngai: nang chyawm gaw, Israela mare, Israela kanu langai mi hpe hpya kau na maw nga ndai: Yehowa sali wunli hpe hpa rai mayu kau mayu n ta? ngu wu ai. ²⁰ Yoab mung, Mayu kau ai hte hpya kau ai ngu ai gaw, ngai hte tsan u ga, gaja wa tsan u ga. ²¹ Dai hku n rai; Ehprim bum ga na, Bihkri a kasha Sheba ngu ai wa, hkawhkam Dawi hpe gumlau sai: dai wa hpe ap ya mi; shaloi rai yang gaw, dai mare na ngai wa na nngai, ngu nna htan wu ai. Shaloi dai numsha gaw Yoab hpe, Shi a baw nang hpang de kabai jahkrat ya na nngai, ngu nna tsun da wu ai. ²² Shaloi dai numsha gaw shi a hpaji hte maren mare masha ni hpang de wa nhtawm, shanhte gaw, Bihkri a kasha she da a baw daw la nna, Yoab kaw kabai jahkrat ya ma ai. Shaloi she shi pahtau dum nna, masha ni mung, dai mare na tinang nta de wa mat ma ai. Yoab mung Yerusalem mare de, hkawhkam hpang de bai wa ai. ²³ Yoab gaw Israela hpyen luksuk ni nlang hte up ai jau bu rai nga ai: Yehoiada kasha Benaia gaw Hkrehli hte Pelehti masha ni hpe up ai wa rai nga ai. ²⁴ Adoram gaw lahkawn ningdaw du rai nga ai. Abiluda kasha Yehoshahpat gaw labau ka da ai wa rai nga ai. ²⁵ Shewa gaw kunhting chya e rai nga ai. Zadok yan Abiahta gaw hkinjawng rai nga ma ai; Yairi masha Ira mung Dawi a hkringmang kaba rai nga ai.

¹ Ya Dawi a aprat e masum ning tup hku hku ai rai nna, Dawi gaw Yehowa kaw san yu wu yang, Yehowa tsun ai gaw, Gibeon masha ni hpe sat ai Shawlu hte masha asai hkaw kau ai, shi a amyu majaw rai nga ai, nga ai. ² ( Gibeon masha ni chyawm gaw Israela amyu n rai; ngam nga ai Amori masha rai nga ma ai: Israela masha ni shanhte hte ga shaka dagam manu ai; Shawlu mahtang Israela hte Yuda amyu masha ni a akyu matu tau nna shanhte hpe sat shamyit kau na maw wu ai. ) ³ Shaloi hkawhkam wa gaw Gibeon masha ni hpe shaga nna, Nanhte a matu ngai kaning di na ra myit ta? Yehowa a sali wunli hpe, nanhte shaman ya lu myit ga, hpa hte htingrat na rai ta? ngu nna san wu yang, ⁴ Gibeon masha ni gaw, Shawlu hte shi a amyu matu ni hpe aja gumhpraw anhte n hpyi na ga ai; Israela amyu masha hpe sat na mung anhte ahkang n lu ga ai, ngu nna htan mu ai. Hkawhkam wa chyawm gaw, Nanhte ra ai hku ngai galaw na nngai, ngu wu ai. ⁵ Dai rai nna shanhte gaw hkawhkam wa hpe, Anhte hpe zingri nna, Israela mungdan kata e n nga lu hkra, anhte hpe shamyit kau na maw ai wa a kashu kasha sanit hpe anhte a lata de ap ya mi: ⁶ dai rai yang, Yehowa lata la ai Shawlu nga ai Gibea mare e anhte shanhte hpe Yehowa a matu noi da na ga ai, ngu nna htan mu ai. Hkawhkam wa mung, Ngai ap ya na ring ngai, ngu wu ai. ⁷ Raitimung, Shawlu a kasha Yonahtan hte shan a lapran e, Yehowa amying hte dagam da ai ga shaka nga malu ai majaw, hkawhkam wa gaw Shawlu a kasha Yonahtan shaprat ai Mehpiboshet shp lahpawt nna di da wu ai. ⁸ Hkawhkam wa chyawm gaw Aia kasha Rizpa kaw na Shawlu shaprat ai Armoni yan Mehpiboshet hpe mung, Shawlu a kasha Mihkala kaw na, Meholi masha Barazila a kasha Adriela shaprat ai shadang sha manga hpe mung la nna, ⁹ Gibeon masha ni a lata de ap ya mu ai; shanhte gaw dai kawng ntsa Yehowa a man e shanhte hpe noi kau mu ai rai nna, dai marai sanit hte ting lang ta si mat ma ai: shanhte hpe sat ai shani gaw, muk-yaw mam dan hpang ai shani rai nga ai. ¹⁰ Ya Aia kasha Rizpa gaw lachyit nba la nhtawm, lunghtawn ntsa e nep da nna, mam dan hpang ai shani kaw nna, dai mang ni a ntsa e marang htu ai du hkra, shani e u e n sha, shana e rai matse n kawa hkra, gawn nga wu ai. ¹¹ Shawlu a lashi num, Aia a kasha Rizpa galaw ai lam hpe Dawi na wu ai. ¹² Dai rai nna Dawi gaw, Hpilisti masha ni Gilboa kawng e Shawlu hpe sat nna, shi a moi mang hpe Bet-shan shara e noi da ai kaw na sa lagu la ai Gilead mung na Yebesha masha ni hpang de sa nna, Shawlu a nrut nra hte kasha Yonahtan a nrut nra ni hpe la wa nhtawm; ¹³ dai noi da ai masha ni a nrut nra hpe mung shinggyin la ngut jang, ¹⁴ nlang hte hpe, Ben-yamin mung, Zela shara na Shawlu a kawa Kisha a lup hta makoi mayang mu ai: shingrai hkawhkam wa hkangda ai lam yawng mayawng hpe galaw ngut ai hpang e she, mungdan a matu akyu hpyi ai ga, Karai Kasang madat mara ya wu ai. ¹⁵ Ya Hpilisti masha ni Israela masha ni hpe bai gasat nga ai rai nna, Dawi hte shi a ali ama ni shanhte hpe hkap gasat ma ai: Dawi chyawm gaw gawngkya mat nga ai. ¹⁶ Dai re ai majaw, Rehpim amyu matu rai nna, magri shekela latsa li ai ri tu lang let, hpyen hking ningnan sumraw ai Ishbi-beno gaw Dawi hpe sat na maw nga ai. ¹⁷ Zeruia kasha Abishai chyawm gaw shi hpe makawp maga nna, Hpilisti share wa hpe sat kau wu ai. Dai kaw nna Dawi a masha ni gaw, Nang Israela pyengdin na shanip kau n ga, htawmhpang de galoi mung, anhte hte rau nna dagam ai hte hkum da mu ai. ¹⁸ Dai hpang, Goba shara e Hpilisti masha ni hte bai gasat nga yang mung, Husha masha Sibehkai gaw Rehpim amyu masha Sap hpe sat kau wu ai. ¹⁹ Bai Goba shara e Hpilisti masha ni hpe gasat mu ai; dai shaloi e Betlehem mare na Yare-oregim a kasha Elhanan gaw, dahkaw daram kaba ai ri numdu lang ai Giti masha Goliat hpe sat kau wu ai. ²⁰ Bai kalang mi Gat mare hta e gasat nga ai rai nna, hkum shing-yan galu ai hte lata maga mi layung kru kru, lagaw maga mi layung kru kru, yawng layung hkun mali tu ai, Rehpim masha langai mi mung, ²¹ Israela masha ni hpe grang dakat wu yang, Dawi a kahpu Shimi kasha Yonahtan gaw dai wa hpe sat kau wu ai. ²² Dai masha mali hte gaw Gat mare e nga ai Rehpim masha langai mi a kasha ni rai nga ma ai: shanhte nlang Dawi a lata hte shi a ali ama ni a lata hte si ai hkrum ma ai.

¹ Dawi gaw, shi hpe ndawng n yawt ai ni nlang hte hte Shawlu a lata na, Yehowa shi hpe hkye mawai la ai nhtoi hta, mahkawn mangoi wu ai: ² Yehowa gaw, gaja wa, nye a lunghkrung, Nye a bunghku, nye a hkyela ai wa rai nga ai. ³ Karai Wa, nye a lunghkrung, shi hta ngai shingbyi nga nngai; Nye a n-gang, ngai hpe hkyela ai nrung, Nye a langchyi, ngai shingbyi shara: Nye a hkyela ai madu e, adip ahkrip kaw na Nang ngai hpe hkyela nitdai. ⁴ Shakawn mai ai Yehowa hpe ngai shaga nna, Gumlau ni a lata na hkyela ai hkrum ni ai. ⁵ Sihkrung sihtan hkaleng ni ngai hpe kawan tawn nna, N shawp ai hka hpungla ni a majaw, ngai kajawng nngai. ⁶ Katsan ga a sumri ni ngai hpe wang tawn nna, Sihkrung si htan mahkam gaw ngai hpe lu kau nga ai. ⁷ Ngai rutsang ai hta Yehowa hpe ngai shaga nna, Nye a Karai Kasang hpe hpyi jahtau we ai. Shi a Htingnu hta nna, shi nye a nsen madat ya nna, Ngai hpyi jahtau ai ga shi a na hta shang lu ai. ⁸ Shaloi lamr ga shamu nna awam nga ai: Sumsing lamu n npawt ni gari ashun nga ma ai: Shi myit kahtet ai majaw, dai hte kangi kanga rai ma ai. ⁹ Shi a ladi hta wan nhkut pru nna, Shi a n-gup na wan hkru nga ai: Grung ai wan n-ga dai hta tu nga ai. ¹⁰ Shaloi shi gaw sumsing lamu hpe Shanem nna yu hkrat ra ai; Shi a lagaw npu e htat ai nsin rai nga ai. ¹¹ Hkerub hta shi jawn nna pyen nga ai; Nbung a singkaw ntsa e danhkung nga ai. ¹² Shi gaw chyip mak re ai nsin, tawng chyat rai nga ai hka hte sumsing sumwi hpe, Shi a shingwung sum shatai wu ai. ¹³ Shi a man na kabrim ai shingkang hta, Nhprang wan chyi nga ai. ¹⁴ Yehowa, sumsing lamu de na mu shangoi dat nna, Tsawhtum ai wa gaw, shi a nsen shapraw dat wu ai. ¹⁵ Shi gaw pala gap dat nna, shanhte hpe shabra dat mu ai, Myihprap gala ai hte shamak kau mu ai. ¹⁶ Yehowa daru dat ai hte, Shi a ladi na nsa shaw dat ai majaw, Hka kaba ni a lam dawng pru nna, Lamu ga npawt nhpang ni danpru nga ai. ¹⁷ Matsaw de nna shi ladawn dat nna, ngai hpe sai la ni ai; Hka kaba hta na ngai hpe shaw la ni ai. ¹⁸ Nden ja ai gumle gumlau wa hte, Ngai hpe ndawng ai ni kaw na, shi ngai hpe mawai la ni ai; Shanhte gaw ngai hta n-gun grau ja ma ai. ¹⁹ Ngai tsin-yam hkrum ai nhtoi, ngai hpe dim shadang timung, Yehowa nye a shamyet shanat shara tai nga ai. ²⁰ Shi ngai hpe dam lada re ai shara de shapraw la nna Ngai hta awng nga ai majaw, mawai la ni ai. ²¹ Nye a dinghpring ai hte maren, Yehowa ngai e akyu jaw nna, Nye a lata sanseng ai hte bai htang ya ni ai. ²² Ngai mung Yehowa a lam a hkan nga nna, Nye a Karai Kasang hpe shut kau nngai, n rai; ²³ Shi a dawdan ai lam nlang ngai a hkan nga nngai, Shi hkangda ai lam hta na ngai n yit nngai. ²⁴ Shi a man e ngai ra n rawng nna, N hkru ai lam hpe koi kau nga nngai. ²⁵ Dai re ai majaw Yehowa nye a dinghpring ai hte, Shi a man e ngai sanseng nga ai hte maren, Ngai e chyeju htang jaw ni ai. ²⁶ Matsan dum chye ai wa hpe matsan dum ai myit, Myit dik ai wa hpe myit dik ai myit; ²⁷ Sanseng ai wa hpe sanseng ai myit, Myit magaw ai wa hpe nhtan shai ai myit, nang madun dan ndai. ²⁸ Rutsang hkrum ai amyu hpe nang hkyela ndai; Gumrawng ai ni hpe shagrit kau na nga, nang shanhte hpe mada nga ndai. ²⁹ Yehowa e, nye a pyengdin nang rai nga ndai; Yehowa, ngai kaw na nsin jahtoi ya ai. ³⁰ Nang hta hpa nna, hpyen laba hpe dang lu nngai; Nye a Karai Kasang hte bunghku hpe shingtawt lu nngai. ³¹ Karai Wa a lam ni chyip chyip rai nga ai; Yehowa a ga kangka rai nga ai: Shi hta shingbyi ai ni nlang hte a ngang shi rai nga ai. ³² Yehowa hta shaje kadai wa Karai Kasang rai nga a ta? Anhte a Karai Wa hta kaga, kadai wa lunghkrung rai nga a ta? ³³ Karai Kasang gaw nye a ngang ai bunghku rai nga ai; Hkum tsup ai wa hpe shi a lam hta lakawn nga ai. ³⁴ Shi a lagaw hpe ashan lagaw zawn shachyang ya nna, Tsaw ai shara e ngai hpe shalun da ni ai. ³⁵ Nye lata hpe hpyen amu sharin ya nna, Nye a lahpum magri ndan shachyen lu li ai. ³⁶ Na a hkyela ai n-gang nang ngai hpe jaw nitdai; Na a myit nem ai hku hta ngai kaba wa nngai. ³⁷ Ngai kabye lai na shara nang mazing ya nna, Nye a lagaw n kashawt li ai. ³⁸ Masha hpyen ni hpe ngai shachyut nna hpya kau lu nngai; Shanhte hpe n shamyit kau lu dingsa, bai nhtang wa na nngai, n rai. ³⁹ Ngai shanhte hpe hpya kau nna, Bai n rawt lu hkra, shamyit kau mawe ai: Gaja wa, nye a lagaw npu e shanhte taw mat ma ai. ⁴⁰ Nang ngai hpe majan gun na n-gun hte shingkyit kyit ya nna, Ngai hte nhtan shai ai ni nye a npu e kadawng taw nga ma ai. ⁴¹ Ngai hpe gumlau ai ni a shingdu nang ngai hpe madun ya nna, Ngai e ndawng ai ni hpe tsai tsai shamyit kau lu we ai. ⁴² Shanhte jahtau timung, hkyela ai wa n nga ai, Yehowa hpe shaga timung, shi shanhte hpe n htan ya mu ai. ⁴³ Shaloi ngai shanhte hpe ga nhpu zawn dup mani kau nna, Lam na shanut hpe zawn, kanen ayai kau we ai. ⁴⁴ Nye amyu masha ni a ru hka lam hta na, nang ngai hpe shalawt ni ai; Masha amyu ni a agyi tai na, nang ngai hpe san da nitdai: Ngai n chye ai amyu gaw ngai kaw yamnga ma ai. ⁴⁵ Tsasam masha ni nye a npu e taw nga ma ai. Nye a lam na ai hte pyi, nye ga madat rau ma ai. ⁴⁶ Tsasam masha ni nyip mat ma ai rai nna, Shanhte a shingbyi shara na, gari let pru wa ma ai. ⁴⁷ Yehowa ahkrung nga ai: nye a Lunghkrung a nga u ga law: Nye a hkyehkrang la ai Lunghkrung Karai Kasang gaw, galu kaba nga u ga law. ⁴⁸ Rai sa, ngai hpang maga e matai htang ya nna, Nye a npu e masha amyu ni hpe shagrit tawn da ai, Karai Kasang gaw, galu kaba nga u ga lao. ⁴⁹ Masha hpyen ni a lata na nang ngai hpe hkyela nna, Gaja wa, ngai hpe je hpre ai ni a ntsa e, nang ngai hpe sharawt tawn nngai: Kashun kashe ai ni a lata na mung shaw la nitdai. ⁵⁰ Dai re ai majaw, Yehowa e, masha amyu ni hta ngai nang hpe shakawn na de ai; Na a mying ningsang hpe mahkawn mangoi na nngai. ⁵¹ Shi gaw shi a hkawhkam wa hpe hkyehkrang la ai lam kaba shangun ya nna, Shi a namman chya ai wa ngu ai, Dawi hte shi a aru arat hpe, Htani htana chyeju a madun dan nga ai law, nga ai.

¹ Da ndai gaw hpang jahtum ngu na Dawi a ga madat rai nga ai. Yaku amyu a Karai Kasang a ahkang hte namman jaw hkam nna, N-grau magam tai wa ai, Israela amyu hta ningtam rawng ai laka wa ngu ai, Yese a kasha Dawi tsun ai gaw: ² Yehowa a wenyi ngai hta tsun nga ai: Shi a mungga nye a shinglet hta lawm nga ai. ³ Israela Karai Kasang gaw, Israela Lunghkrung, ngai hpe ning nga ai. Masha ni hpe dingman ai hku byeng nna, Karai Wa hpe hkrit hkungga ai myit hte uphkang ai wa gaw, ⁴ Marang hpawng ai hpang na ahtoi mahpaw hta, Ga na tsit lali ai tsingdu hpe shaprut ai, Lamu n mung ai jahpawt manap na Jan praw a tu kabrim ai ahtoi hte bung nga ai. ⁵ Gaja wa, Karai Kasang a man e nye a amyu matu dai zawn re ai n rai; Raitimung, htani htana ga shaka gaw, shi ngai hte tawn da, nna, Yawng mayawng hpe shachyip ai hte shagrin da nu ai: Dai gaw ngai hpe hkyela ai lam, nye a sharawng shara tai nna, Dai hpe shatut da ya nu ai n rai ni? ⁶ N shawp ai nlang hte chyawm gaw, Lata hte n hkra mai ai, yeng seng kau ai ju hpun zawn tai na mara ai: ⁷ Dai hpe yeng seng kau ai wa gaw, Hpri palawng hpun let, ri numdu lang nna, Dai ju hpun shi tu ai shara e nan, atsai awai nat kau ai hkrum na ra ai, nga ai. ⁸ Na ndai gaw, Dawi a magam ningsang gun shaja ai, jaubu hkringmang ni a amying rai nga ai: Tahkamoni lakung na Yoshe-bashebet gaw share ni hta ningtawn ningla rai nga ai: dai wa gaw Ezani masha Adino ngu ai wa hte langai sha rai nna, lang lata sha masha matsat tsa hpe sat wu ai. ⁹ Shi a lawu hprut gaw Ahohi lakung Dodai a kasha Eleaza rai nga ai: dai wa gaw Dawi kaw hkan ai share masum hta lawm nga ai: Hpilisti masha ni hpyen gasat na hpawng ma yang, Israela masha ni htingnut mat wa jang, shanhte hkrai hkap dakat nna, ¹⁰ dai wa gaw shi a lata tsu mat nna, nhtu hta madi shadaw let ba mat hkra, Hpilisti masha ni hpe sat kau wu ai: Yehowa gaw dai shani e padang kaba dang kau shangun wu ai: gale ni chyawm gaw lanep hta na chyu sha shi kaw hkan ma ai. ¹¹ Shi a lawu hprut e, Harari lakung, Age a kasha Shama rai nga ai. Hpilisti masha ni shapre yi e hpyen gasat hkyen nna, Israela masha ni hprawng mat wa jang, ¹² dai wa gaw yi ya e tsap da nna Hpilisti masha ni hpe hkap gasat shanga kau wu ai: Yehowa mung, padang kaba dang shangun mu ai. ¹³ Bai share sumshi ngu ai hpung hta lawm ai share ningtawn masum gaw, nmut ta e, Dawi nga ai Adulam ginlawng hku de sa du ma ai: Hpilisti luksuk ni mung Rehpim kadit e dap jung nga ma ai. ¹⁴ Dai shaloi e Dawi gaw shi a hpyendap hta rawng nga ai: Hpilisti masha ni mung Betlehem mare e sin langa dap jung da mu ai. ¹⁵ Dai shaloi Dawi gaw, Betlehem mare chyinghka makau na hkahtung ntsin ngai hpe kadai wa ja jaw lu sa na i? ngu nna marit wu ai. ¹⁶ Dai rai nna, dai share masum gaw Hpilisti masha ni a dap hpya nna, Betlehem chyinghka makau na hkahtung ntsin ja wa nhtawm, Dawi hpang de la wa ma ai: shi chyawm gaw n lu hkraw ai sha, Yehowa a man e ru kau let, ¹⁷ Yehowa e, ntsin ndai lu na lam gaw ngai hte tsan u ga: tinang a asak n lahpawt ai, masha ni a asai hpe ngai lu na rai ni? ngu nna dai hpe n lu wu ai. Dai share masum gaw shingrai galaw ma ai. ¹⁸ Bai Zeruia kasha, Yoab a kanau Abishai gaw, dai share masum hta na ningtawn ningla rai nga ai. Dai wa gaw, masha masum tsa hpe ri hte sat kau lu ai majaw, dai masum hta lawm nga ai. ¹⁹ Dai masum ngu na hta, shi arawng grau lu ai, n rai ni? Dai re ai majaw shi shanhte a agyi tai wa ai: raitimung, shawng na marai masum hpe dep ai n rai. ²⁰ Bai Kabazela mare kaw na, share re ai Yehoiada kasha Benaia mung lawm nga ai; dai wa galaw ai magam amu kaba gaw Moba masha Ariela a shadang sha lahkawng hpe sat kau wu ai: hkyen htat ai nshung ta aten e, nhkun de shang nna hkanghkyi hpe sat kau wu ai. ²¹ Hkum shing-yan kaba ai Egutu masha hpe mung sat kau wu ai: Egutu la wa ri lang timung, Benaia gaw hkawn hte sha htim nna, Egutu masha lata na ari kashun la nhtawm, dai hte shi hpe sat kau wu ai. ²² Shingre ai amu Yehoiada kasha Benaia galaw wu ai majaw, share masum lak hta lawm nga ai. ²³ Shi gaw share sumshi hta grau timung, shawng na share ninghkrin masum hpe n dep wu ai. Dawi chyawm gaw shi a sin langa agyi shi hpe shatai wu ai. ²⁴ Yoab kanau Asahela mung dai share sumshi hta lawm nga ai: kaga ni gaw, Betlehem masha Dodo a kasha Elhanan; ²⁵ Harodi lakung na Shama yan Elika; ²⁶ Palati lakung na Heleza; Teko lakung na Ikesha kasha Ira; ²⁷ Anahtot lakung na Abieza; Husha lakung na Mebunai; ²⁸ Ahohi a lakung na Zalmon; Nehtohpa lakung na Maharai; ²⁹ bai Nehtohpa lakung na Bana kasha Heleb; Ben-yamin amyu Gibea mare na Rebai a kasha Itai; ³⁰ Pirahtoni lakung Benaia; Gasha hkaraw na Hidai; ³¹ Arba lakung na Abi-alabon; Barahumi lakung na Azmawe; ³² Shalabona lakung na Eliaba; Yashen a kasha Yonahtan; ³³ Hara lakung hta na Shama; Ara lakung hta na Shara kasha Ahiam; ³⁴ Mahka lakung hta na Ahabai a kasha Elihpelet; Gilo lakung na Ahihtohpela kasha Eliam; ³⁵ Hkarmela lakung na Hezro; Arbi lakung na Parai; ³⁶ Zoba mare na Nahtan a kasha Igala; Gad lakung na Bani; ³⁷ Ammon masha Zelek; Zeruia kasha Yoab a hpyen hking lang ya ai wa, Bero lakung na Naharai; ³⁸ Ihtra lakung na Ira yan Gareb ³⁹ hte Hiti masha Uria hte rai ma ai: shanhte yawng marai sumshi sanit rai ma ai.

¹ Bai Yehowa gaw Israela amyu hpe pawt bu nna, shanhte hpe shut shangun na matu, Dawi hpe, Israela hte Yuda masha ni hpe hti yu na lam shadut wu ai. ² Hkawhkam wa mung, shi kaw nga ai luksuk ni a jaubu Yoab hpe, Masha gade nga ai ngai chye lu hkra, Dan mare kaw nna Berasheba mare du hkra, Israela amyu ting ga sa wa nna, mung masha ni hpe hti yu mu, ngu nna hkang dat wu ai. ³ Yoab chyawm gaw hkawhkam wa hpe, Na a Karai Kasang Yehowa gaw, na a masha ni hpe htam latsa de hkra shalaw jahtam ya nna, nang madu hkawhkam wa mu lu hkra rai u ga law; dai re ai gaw, nye madu hkawhkam wa hpa majaw dai lam ra n ta? ngu nna htan wu ai. ⁴ Raitimung hkawhkam wa a ga mahtang Yoab hte bu ni a ga hpe dang nna, Yoab hte bu ni gaw Israela masha ni hpe hti yu na nga, hkawhkam kaw na pru wa ma ai. ⁵ Ya shanhte gaw Yawdan hka rap nna, Gad hkaraw na Aroera mare sinpraw maga Yezera mare du hkra, dap jung nga ma ai: ⁶ dai hpang shanhte gaw Gilead mung hte Tahtim-hodshi mung du ma ai: dai hpang Dan-yan hte Sidon ginwang de woi wa nna, ⁷ Turu hpyendap hte Hiwi mare ni, Hkanani mare ni nlang hpe lai kau da nna, Yuda mung dingda maga na Berasheba mare e jahtum mu ai. ⁸ Shingrai shanhte gaw dai mung ting hproi kau da nna, shata jahku e nhtoi hkun ya hta, Yerusalem mare de du wa ma ai. ⁹ Yoab mung hkawhkam wa hpe masha jahpan laika a nambat wa sak ya wu ai rai nna, ri nhtu chye lang ai Israela wa-ngan sen matsat rai nga ma ai: Yuda amyu masha ni gaw sen manga rai nga ma ai. ¹⁰ Ya Dawi gaw, mung masha ni hpe hti ngut ai hpang myit malai lu nna, Ngai galaw ai amu nachying shut sai; raitimung, Yehowa e, na mayam wa a mara hpe raw dat kau ya e; ngai wa nachying ngawk ai amu galaw kau se ai, ngu nna Yehowa hpe hpyinem wu ai. ¹¹ Jahpawt manap Dawi rawt jang, Yehowa a ga, Dawi a myihtoi Gad kaw du nna, ¹² Dawi hpang de sa tsun su, Yehowa ning nga ai, Lam masum na a man e ngai madun dan de ga; nang hpe ari jaw na matu, lam langai mi lata la u, ngu nna tsun dat wu ai. ¹³ Dai rai nna Gad mung Dawi hpang de sa nna, Na a mungdan hta sanit ning hku hku na, nang ra n ni? shing n rai, masha hpyen ni nang hpe shachyut nna, shata masum hprawng hkawm na ra n ni? shing n rai, na a mungdan hta masum ya tup ana zinli kaba dat dat na mahtang ra n ni? Ngai e shangun ai wa hpe gara hku htan lu hkra, myit aru yu nna lata la u, ngu nna tsun wu ai. ¹⁴ Shaloi Dawi gaw, Ngai myit grai ru nngai; Yehowa a lata hta mahtang a rai u ga; shi a matsan dum ai myit kaba la sai; masha a lata hta ngai n du n ga, ngu nna myihtoi Gad hpe tsun wu ai. ¹⁵ Shingrai Yehowa gaw dai jahpawt kaw nna, madat da ai aten du hkra, Israela amyu hta ana zinli dat dat wu ai rai nna, Dan mare kaw nna berasheba mare du hkra, masha mun sanit si mat ma ai. ¹⁶ Ya dai lamu kasa gaw, Yerusalem mare de jahten shabya na nga shi a lata shada wu yang, Yehowa mahtang ari dai hte a majaw myit bai kayin nna, Ram sai, na lata dawm la nu, ngu nna masha ni hpe jahten shabya ai lamu kasa hpe tsun wu ai. Yehowa a lamu kasa chyawm gaw, Yebusi masha Arauna mam chyarang makau e hkring nga ai. ¹⁷ Ya Dawi, mung masha ni hpe ari jaw ai lamu kasa hpe mu jang, Ngai shut ni ai; ngai n shawp ai hku galaw kau se ai: ndai sagu ni chyawm gaw hpa lam shut nga ma ta? Na lata gaw ngai hte nye amyu hta sha jahkrat mi law, ngu nna Yehowa hpe hpyinem wu ai. ¹⁸ Dai shani jang Gad gaw Dawi hpang de sa nna, Sa su, Yebusi masha Arauna a chyarang, e, Yehowa a matu tawn hkungri galaw u, ngu nna hkangda wu ai. ¹⁹ Dai mung, Yehowa a ga Gad a n-gup hte htawn tsun ai hte maren, lung sa wa ai. ²⁰ Ya Arauna mada yu yang, hkawhkam wa shi a ali ama ni hte rau shi hpang de sa du ai gaw mu wu ai; Arauna mung shinggan de pru nna, hkawhkam wa a man e ga de gum dagup let, ²¹ Nye madu hkawhkam wa gaw hpa majaw na a mayam kaw sa du rin ta? ngu nna hkap san wu ai. Dawi gaw, Mung masha ni hta na dai ana zinli jasim na matu, Yehowa a matu tawn hkungri galaw na majaw, na a chyarang mari na sa nngai, ngu nna htan wu ai. ²² Arauna chyawm gaw, Nye madu hkawhkam wa ra ai made la nna jaw jau u ga: yu u, wan nat hkungga matu usu ni mung nga nga ai; hpun shatai na mam dup ai rai ni hte nga hking ni mung nga nga ai: ²³ Arauna gaw nga manga, nye a madu Hkawhkam wa hpe ap ya we ai rai nna, nang madu a Karai Kasang Yehowa gaw na a hkungga hkapla u ga law, ngu nna Dawi hpe tsun wu ai. ²⁴ Hkawhkam wa chyawm gaw, Dai hku n rai; manu jahpu ya nna she mari la na nngai; tinang a ja gumhpraw n hkrat ai gaw, nye Karai Kasang Yehowa hpe wan nat hkungga ngai n nawng na nngai, ngu nna Arauna hpe tsun wu ai. Shingrai Dawi gumhpraw shekela manga shi ya nna, dai chyarang hte usu ni hpe mari wu ai. ²⁵ Dawi mung dai yang e Yehowa a matu tawn hkungri galaw nna, wan nat hkungga hte mahku hkungga nawng jau wu ai. Yehowa gaw, Israela mung ting a matu hpyinem ai ga madat mara ya nna, ana zinli hpe jasim kau ya wu ai.