HKAWHKAM LAIKA LAHKAWNG

HKAWHKAM LAIKA LAHKAWNG

¹ Ya Ahab si mat ai hpang, Moba masha ni gaw Israela hpe gumlau ma ai. ² Ya Ahazia gaw, Samari mare hta e nga ai, shi a ntsa gawk na hkuwawt hku kaw nna di hkrat ai majaw machyi nga ai; shaloi shi gaw kasa shaga la nna shanhte hpe, Ngai ndai machyi ai kaw na mai wa lu na kun? Ekron mare e nga ai Balazebu hpara hpe sa san yu ma su, ngu dat mu ai. ³ Yehowa a lamu kasa chyawm gaw, Tishbi masha Elia hpe, Rawt u, Samari hkawhkam a kasa ni hpe sa tau la nna, Ataw, Israela mung hta e Karai Kasang n nga ai majaw, Ekron mare na Balazebu hpara hpe sa san yu na, rai myit ni? ⁴ Dai re ai majaw Yehowa gaw ning gna ai, Nang taw nga ai yupku hta na, nang yu wa lu na n rai: gaja wa teng teng si na rin dai, ngu nna shanhte hpe hkap tsun mu, ngu dat wu ai. Shaloi Elia pru wa sai. ⁵ Shingrai kasa ni shi hpang de bai wa nna, shi gaw, Ataw, nanhte hpa majaw bai wa myit ta? ngu nna shahte hpe san mu yang, shanhte gaw, ⁶ Marai langai mi anhte hpe hkap tau la nna, Nhtang wa ma su, nanhte hpe shangun dat ai hkawhkam wa hpe ning ngu wa tsun mu, Yehowa gaw ning nga ai, Israela mung hta e Karai Kasang n nga ai majaw, Ekron mare e nga ai Balazebu hpe nang sa san yu ai, rai n ni? Dai re ai majaw, nang taw nga ai yupku hta na, nang yu wa lu na n rai; gaja wa teng teng si na rin dai, ngu mu, ngu dat mi ai. ⁷ Shaloi hkawhkam wa gaw, Nanhte hpe tau la nna shing nga tsun ai wa gaw, kaning san ai wa rai ta? ngu nna san mu yang, ⁸ Shanhte gaw, Dai wa gaw mun grai tu nna, shanhpyi shingkyit kyit ai wa re ai, ngu, nna htan mu ai. Shi gaw, Dai wa Tishbi masha Elia nan rai nga ai, nga ai. ⁹ Ya hkawhkam wa gaw hpyen ma manga shi up ai bu hte shi a hpyen ma manga shi hpe shangun dat mu ai: shi gaw Elia hpang de du sa nna, yu u, Elia gaw kawng ntsa e dung nga ai. Hpyenbu wa mung, Karai Kasang a masha wa e, hkawhkam wa gaw, Yu wa rit da, ngai ai, ngu wu ai. ¹⁰ Shaloi Elia gaw, Ngai wa Karai Kasang a masha wa rai nga ai teng yang gaw, sumsing lamu de na wan hkrat nna, nang hte na a masha manga shi hte hpe hkru kau mu ga, ngu nna hpyenbu wa hpe tsun wu yang, sumsing lamu de na wan hkrat ai hte shi hpe mung, shi a hpyen ma manga shi hte hpe mung, hkru kau mu ai. ¹¹ Bai shi gaw, hpyen ma manga shi up ai hpyenbu kaga hte hpyen ma manga shi hte hpe shangun dat wu ai. Dai wa mung Elia hpe, Karai Kasang a masha wa e, hkawhkam wa gaw, Alawan yu wa rit da, nga ai, ngu wu ai. ¹² Shaloi Elia gaw, Ngai wa Karai Kasang a masha wa teng yang gaw, sumsing lamu de na wan hkrat nn, a nang hte na a masha manga shi hte hpe hkru kau mu ga, ngu nna shanhte hpe tsun mu yang, sumsing lamu de na Karai Kasang a wan hkrat nna, shi hpe mung, shi a hpyen ma manga shi hte hpe mung, hkru kau mu ai. ¹³ Bai shi gaw masum ngu na hpyen ma manga shi hte hpe shangun dat mu ai. Dai wa gaw lung wa nna Elia man e lahput hput di let, Karai Kasang a masha wa e, nye a asak hpe, na a man e jahpu ya mi: ¹⁴ yu mu, sumsing lamu de na wan hkrat nna, shawng de na manga shi up ai hpyenbu yan hte shan a masha manga shi shi hpe hkru kau timung ya nye a asak gaw na a man e jahpu ya e, ngu nna shi hpe hpyi nem wu ai. ¹⁵ Shaloi Yehowa lamu kasa gaw Elia hpe Shi hte rau yu wa su; shi hpe hkum hkrit et, ngu nna tsun wu yang, shi rawt nna hpyenbu wa hte rau hkawhkam wa man de shang wa ai. ¹⁶ Dai rai nna Elia gaw hkawhkam wa hpe, Yehowa ning nga ai, Israela mung hta e mung ga sa san yu na Karai Kasang n nga ai majaw, Ekron mare na Balazebu hpara hpe sa san yu na kasa shangun dat ai, rai u ni? dai re ai majaw, nang taw nga ai yupku hta na yu wa lu na n rai; gaja wa teng teng si na rin dai, nga ai, ngu nna htawn tsun wu ai. ¹⁷ Shingrai hkawhkam wa gaw, Elia htawn tsun ai Yehowa a ga hte maren si wa ai rai nna, shi gaw kasha n lu ai majaw, shi a kanau Yehoram gaw, shi a malai tai nna, Yuda hkawhkam Yehosahpat a kasha Yehoram hkaw dung ai ni ning hta e, hkaw dung hpang nga ai. ¹⁸ Ahazila a lam naw gawn ra ai, shi galaw ai amu mahkra gaw, Israela hkawhkam ni a Labau laika hta ka ga nga ai, n rai ni?

¹ Ya Yehowa gaw Elia hpe bungsha hte sumsing lamu de shalun la na mahka e, Elia gaw Elisha hte rau Gilgala mare na pru wa ai. ² Shaloi Elia gaw Elisha hpe, Nang e naw hkring nga u; Yehowa ngai hpe Behtela du hkra shangun dat ai, ngu wu ai. Elisha gaw, Yehowa hkrung nga nna, na asak mung hkrung nga ai hte maren, ngai nang hte n hka na nngai ngu nna htan wu yang, shan lahkawng rau Behtela de yu wa ma ai. ³ Ya Behtela mare e nga ai myihtoi ma ni gaw Elisha hpang de pru sa nna, Yehowa gaw dai ni jang na madu hpe nang kaw na dawm la na gaw, nang chye nga n ni? ngu nna san mu yang, shi gaw, Rai sa, ngai chye nga nngai; atsin sha nga mu, ngu nna shanhte hpe tsun mu ai. ⁴ Bai Elia gaw, Elisha e, nang e naw hkring nga u; Yehowa ngai hpe Yerihko de shangun dat ai, ngu wu ai. Elisha gaw, Yehowa hkrung nga nna, na asak mung hkrung nga ai hte maren, ngai nang hte n hka na nngai, ngu nna htan wu yang, shan lahkawng ran Yerihko mare de du ma ai. ⁵ Yerihko mare e nga ai myihtoi ma ni mung, Elisha hpang de sit sa nna, Yehowa gaw dai ni jang, na madu hpe nang kaw na dawm la na gaw, nang chye nga n ni? ngu nna san mu yang, dhi gaw, Rai sa, ngai chye nga nngai; atsin sha nga mu, ngu mu ai. ⁶ Bai Elia gaw, Nang e naw hkring nga u; Yehowa ngai hpe Yawdan hka de shangun dat ai, ngu nna, Elisha hpe tsun wu ai. Shi gaw, Yehowa hkrung nga nna, na asak mung hkrung nga ai hte maren, ngai nang hte n hka na ngai, ngu nna tsun wu yang, sha lahkawng rau sa wa ma ai. ⁷ Ya myihtoi ma ni kaw na marai manga shi tsan tsan kaw nna sa yu na nga, sa du nna tsap nga ma ai; shan lahkawng mung, Yawdan hka makau e tsap nga ma ai. ⁸ Elia gaw shi a hpajawng hpe la katsu nhtawm, hka hpe kayat nna, hka gaw gade de ga ka ran mat wa ai; shingrai, shan lahkawng gaw hkarang hku ga rap wa ma ai. ⁹ Ya shan lahkawng rap tawng ngut jang, Elia gaw Elisha hpe, Ngai nang hte garai n hka yang, nang hpe hpa gam jaw na, hpyi rit, ngu nna tsun wu yang, Elisha gaw, Na a wenyi htam lahkawng nye a ntsa e anga nga li ga, ngu nna hpyi wu ai. ¹⁰ Shaloi Elia gaw, Yak la ai lam nang hpyi ndai; raitimung, nang kaw na ngai shalun la hkrum ai shaloi e, nang ngai hpe mu yang, byin na ra ai; shing n rai yang, byin na ra ai n rai, ngu wu ai. ¹¹ Shingrai shan lahkawng, tsun chyai let, naw kwam nga ma yang, yu u, wan re ai leng, wan re ai gumra ni paw pru nna shan lahkwang hpe karan jahka kau nhtawm, Elia gaw bungsha hte sumsing lamu de lung wa ai. ¹² Elisha gaw dai hpe mu nna, Nye awa e, nye a wa e, Israela hpyen leng hte de a gumra jawn ai ni re a hka! nga nna jahtau timung, htawmhpang de shi hpe bai n mu lu nu ai: Elisha mung shi a hpun palawng hpe daw lahkawng di nna, gang je kau wu ai. ¹³ Bai shi gaw Elia kaw nna hkrat wa ai hpajawng hpe mung hta la nhtawm, bai wa nna, Yawdan hka hkin-gau e tsap nga ai. ¹⁴ Elia gaw nna hkrat wa ai hpajawng hpe la nhtawm, hka hpe kayat let, shi gaw, Elia a Karai Kasang Yehowa gaw kanang rainga a ta? ngu wu ai: shingrai dai hka hpe kayat yang, hka gaw gade de karan mat wa nna, Elisha gaw rap tawng mat wa ai. ¹⁵ Ya shi a tawtap e rai nga ai, Yerihko mare na myihtoi ma ni gaw shi hpe mu ma yang, shanhte gaw, Elia a wenyi nan Elisha ntsa e shanu nga ai, nga nna, shi hpe sa tau la ai hte, shi a man e ga de dingnyawm dagup nga ma ai. ¹⁶ Bai shanhte gaw, Yu u, na a mayam ni hta n-gun ja ai masha marai manga shi rai nga ma ai; shanhte gaw na a madu hpe satam mu ga: Yehowa a Wenyi gaw shi hpe shapoi la nna, bum langai ngai a ntsa e, shing n rai, kadit langai ngai a kata e, mahkoi wa jahkrat kau da wu ai nhten, ngu nna hpyi mu yang, shi gaw, Hkum sa tam myit, ngu mu ai. ¹⁷ Raitimung, shi hpe n-gun yawm hkra akroi anoi hpyi mu yang shi gaw, Sa tam ma su, ngu dat mu ai. Shingrai shanhte gaw marai manga shi shangun dat nna, dai ni gaw masum ya tup tam ma timung shi hpe nmu mu ai. ¹⁸ Elisha gaw Yerihko mare e naw hkring nga ai laman e, shanhte gaw shi hpang de bai wa nna, shi gaw, Ataw, hkum satam myit, ngu nna, ngai nanhte hpe hkum da made ai, n rai ni? ngu mu ai. ¹⁹ Bai mare masha ni gaw, Elisha hpe, Yu u, nang madu mu nga ai hte maren, ndai mare a htingra gaw pyaw nga ai; raitimung, hka n kaja ai, aga mung nvya ubya bya shangun nga ai, ngu mu ai. ²⁰ Shi gaw, Dibu nnan hta jum bang nna la sa marit, ngu nna tsun mu yang, shanhte la sa ma ai. ²¹ Shaloi shi gaw hka hpawk de sa nna, dai hta e jum bang let, Yehowa ning nga ai, Ngai gaw dai hka hpe mu shangun nna, ya kaw nna si ai mung, nbya ubya mung byin sa na n rai, nga ai. ²² Shingrai Elisha htawn tsun ai hte maren, dai hka gaw dai ni du hkra mu nga ai. ²³ Dai hpang shi gaw Behtela de lung wa ai; lam e lai wa yang, mare de na shabrang ma ni pru sa nna, shi hpe shatan let, Pung krin wa e, lung rit, pung krin wa e, lung rit, nga ma ai. ²⁴ Shi mahtang kayin yu nna, shanhte hpe mada yu let, Yehowa a amying hte dagam kau mu ai. Shingrai tsap yi lahkawng, maling de na pru nna ma mali shi lahkawng hpe kawa sat kau mu ai. ²⁵ Shi gaw, dai kaw nna Hkaramela bum de sa wa nhtawm, Samari mare de bai wa nga ai.

¹ Ya Ahab a kasha Yehoram gaw, Yuda hkawhkam Yehosahpat a hkaw dung ai shi matsat ning e, Samari mare hta e hkaw dung hpang nga ai rai nna, Israela mung ntsa e shi lahkawng ning a up nga ai. ² Shi gaw Yehowa man e n hkru ai amu galaw timung, kanu yan kawa zawn n rai: shi a kawa sharawt da ai Bala shadaw hpe shi htawm kau wu ai. ³ Raitimung, Israela amyu hpe shtu shangun ai, Nebat a kasha Yeroboam a shut hpyit ai lam hta, shi manoi nga ai rai nna, dai hta na yit wa ai, n rai. ⁴ Ya Moba hkawhkam Mesha gaw, sagu rem ai wa rai nga nna, Israela hkawhkam hpe sagu kasha sen mi hte sagu la sen mi a mun sakjaw wu ai. ⁵ Ahab si mat ai hpang, Moba hkawhkam Israela hkawhkam wa hpe gumlau wu ai. ⁶ Shaloi hkawhkam Yehoram dai aten e Samari kaw na pru nna Israela amyu ting hpe hpyen saw mu ai. ⁷ Dai hta kaga shi gaw, Yuda hkawhkam Yehosahpat hpang de shangun dat nna, Moba hkawhakm ngai hpe gumlau nga ai; Moba amyu hpe gasat na, nang ngai hte rau sa hkraw na n ni? ngu nna san wu yang, shi gaw, Ngai lung wa na nngai; ngai gaw nang zawn, nye a amyu na a amyu zawn, nye a gumra ni na a gumra zawn rai nga ma ai, ngu wu ai. ⁸ Bai shi gaw, Gara hku lung wa na rai ta? ngu nna san wu yang, Yehosahpat, Edom mung na zaibru jang hku lung wa na re ai, ngu wu ai. ⁹ Shingrai Israela hkawhkam, Yuda hkawhkam hte Edom hkahkam pru sa nna, sanit ya tup kawan hkawm nga ma yang, hpyen ma ni a matu mung, shanhte kaw hkan nang ai yamnga ni a matu mung, lu na ntsin n nga ai. ¹⁰ Shaloi Israela hkawham gaw, Aga! Yehowa gaw ndai hkawhkam masum hpe Moba masha ni a lata hta ap ya na nga, shapraw dat nu hka, nga ai. ¹¹ Yeoasahpat chyawm gaw, Yehowa hpe san yu na matu, Yehowa a myihtoi langai ngai n nga ai kun? ngu nna san wu yang, Israela hkawhakm a mayam langai mi gaw, Elia a nrum ntau wa, Shahpat a kasha Elisha nga nga ai, ngu wu ai. ¹² Bai Yehosahpat gaw, Yehowa a mungga dai wa hte rau rai nga ai, ngu nna tsun wu yang, Israela hkawhkam, Yehosahpat hte Edom hkawhkam hte gaw shi hpang de yu wa ma ai. ¹³ Shaloi Elisha gaw Israela hkahkam wa hpe, Ngai nang hte hpa daw ga ta? Na nwa a myihtoi ni hte, nnu a myihtoi ni hpang de sa san su, ngu wu yang, Israela hkawhkam wa gaw, n rai law, Yehowa gaw ndai hkawhkam masum hpe Moba masha ni a lata hta hpa ya na nga, shaga tawn mu hka, ngu wu ai. ¹⁴ Bai Elisha gaw, Ngai dawjau nga ai, zaw nawng zaw wa up ai Yehowa hkrung nga ai hte maren, gaja wa, Yuda hkawhkam Yehosahpat a myiman hpe ngai n tau yu yang, ngai nang hpang de myiman yawng na n rai, pyi mada mu na n rai: ¹⁵ raitimung tingse dum ai wa hpe shaga wa rit, ngu wu ai. Ya tingse dum ai wa gaw dum dat yang, Yehowa a lata gaw Elisha ntsa e du nga ai. ¹⁶ Dai rai nna shi gaw, Yehowa ning nga ai, Dai kadit ting hta hka hkawng htu mu: ¹⁷ hpa majaw nga yang, nanhte gaw nbung laru hkrum na n rai; marang pyi mu na n rai; raitimung ndai kadit gaw hka hte lim wa ra ai rai na, nanhte mung, nanhte a yamnga ni mung, lu lu na mara ai, nga nna Yehowa tsun nga ai. ¹⁸ Dai amu chyawm gaw Yehowa a man e amu kaji naw rai nga ai: shi gaw Moba masha ni hpe mung nanhte a lata hta ap ya na ra ai. ¹⁹ Shingrai nanhte gaw bunghku kum ai mare yawng hte, pyaw la ai mare yawng hpe shaza kau nna, hpun kaja mahkra hpe kran kau nhtawm, hka hpawk mahkra hpe pat kau nna, lamu ga kaja yawng hta nlung ayai tawn nna jahten kau na maru ai, ngu mu ai. ²⁰ Ya jahpawt manap lusha hkungga jaw na aten e Edom lam hku hka lwi pru wa ai rai nna, dai mung ting hta hka lim nga ai. ²¹ Ya hkawhkam ni gaw hpyen gasat na matu lung wa mara ai, nga ai hpe Moba masha ni yawng na ma yang, shanhte gaw hpyen hpun palawng bu hpun lu ai yawng hte hpe shaga tawn mu ai rai nna, shanhte gaw lamu ga jarit makau e tsap nga ma ai. ²² Shanhte gaw jahpawt manap e rawt yu mu yang, hka ntsa e jan a shingkang dan nna, ahka gaw sai zawn hkyeng nga ai hpe mada mu na yang, ²³ Asai rai nga ai; gaja wa hkawhkam ni shada da sat hkat masai rai nna si ma masai: ya Moba masha ni e. lanep sa karan ga, nga ma ai. ²⁴ Shanhte gaw Israela hpyendap de du yang, Israela masha ni rawt wa nna, Moba masha ni hpe hkap gasat mu ai rai nna, shanhte hpe jahtaw kau mu ai hte, shanhte a lamu ga shang hkra hkan gasat mu ai. ²⁵ Shingrai shanhte gaw mare ni hpe shaza kau mu ai; ga dachyawk kaja shagu hta langaihte langai tinang a nlung hte kabai jahpring da mu ai: hka hpawk shagu mung shanhte pat kau nna, hpun kaja mahkra hpe kran kau mu ai: shingrai Kira-harreset du hkra nlung hkrai jawng nga ai rai nna, laili nwat kabai ai ni gaw dai mare hpe wang tawn ai hte gasat mu ai. ²⁶ Moba hkawhkam wa gaw n dang lu nga ai hpe chye wu yang, nhtu hpye ai masha sanit tsa shaga la nna, Edom hkawhka wa hpang de dep lu kra shaja ma timung, shanhte n dang ma ai. ²⁷ Shingrai shi gaw, shi a malai hkaw dung na ra ai kasha alat hpe la nhtawm, mare bunghku ntsa e wan nat hkungga shatai nna nawng kau wu ai: dai re ai majaw Israela ntsa e pawt sindawng kaba du ra ai rai nna, shanhte gaw shi kaw na pru wa nhtawm, tinang a mung de bai wa mat ma ai.

¹ Ya mahihtoi ma langai mi a madu jan gaw Elisha hpang de sa nna, Na mayam rai nga ai nye a madu wa si mat sai; na a mayam wa, Yehowa hpe hkrit hkungga nga ai gaw, nang chye nga ndai: ya hka madu gaw sa du nna, ngai sha yan he mayam shaya na nga la mayu nga ai, ngu nna tsun jahtau wu ai. ² Elisha gaw, ngai na a matu hpa galaw na rai ta? tsun rit; na a nta hta hpa nga lit ta? ngu nna san wu yang, shi gaw, Na a mayam jan gaw, Nmman di bu langai mi hta kaga hpa mung n lu nngai, ngu nna htan wu ai. ³ Shaloi Elisha gaw, Wa su, na a htingbu ni yawng kau na man ai di bu ni shap tawn u: law law wa shap tawn u. ⁴ Na nta de du jang, na nsha yan hpe shaga la nna, chyinghka he la da nhtawm, ndai di bu mahkra hta namman ru bang nna, hpring ma jang she la tawn da u, ngu wu ai. ⁵ Shingrai shi gaw myihtoi w kaw na pru wa nhtawm, kasha yan hpe shaga nna, chyinghka hpe la da yang, shan gaw dai di bu ni hpe shapraw tawn ma ai; shi gaw dai hta ru bang wu ai. ⁶ Ya di bu ni hpring ma jang, Di bu kaga langai mi naw la wa rit, ngu nna kasha hpe tsun wu yang, shi gaw, Man ai di bu n nga sai, ngu wu ai. Shaloi jang namman gaw lwi ai sim mat ai. ⁷ Bai shi gaw, dai lam Karai Kasang a masha wa hpe sa tsun wu yang, myihtoi wa gaw, Dai namman hpe dut nna hka wa u; ngam ai hte gaw nang hte nsha ni a asak bau u, ngu wu ai. ⁸ Ya lani mi hta e Elisha gaw Shunem mare de lai sa wa ai; dai yang e arawng lu ai numsha langai mi nga ai; shi gaw Elisha hpe hkap galaw daw wu ai: shingrai, shi gaw galoi mung dai lam hku lai wa yang, dai nta hta shang manam nga ga ai. ⁹ Bai dai numsha gaw madu wa hpe, Yu u, ndai hku lai lai re ai wa gaw, Karai Kasang a chyoi pra ai masha rai nga ai hpe, ngai dum se ai. ¹⁰ Dai rai nna bunghku ntsa e gawk kaji langai mi galaw nna, shi a matu yupku, sha ku, lahkum hte pyengdin ni tawn da ga: shingrai an kaw shang manam yang, dai gawk hta shang yup na ra ai, ngu wu ai. ¹¹ Gaja wa dai lam hku bai lai ai shani e, shi dai gawk hta shang nna, yup nga ai. ¹² Shaloi Elisha gaw shi a shangun ma Gehazi hpe, Shunem num hpe shaga la su, ngu wu ai. Dai num gaw Elisha man e sa tsap nga ai. ¹³ Bai Elisha gaw shangun ma hpe, dai num hpe ningngu tsun su: Yu u, nang an hpe ndai zawn hkap hkalum la ai majaw, na a matu hpa galaw na rai ta? Hkawhkam wa hpe, sing n rai, hpyenbu wa hpe, na a lam hpyi shara nga ai kun? ngu u, ngu nna tsun dat wu ai. Num jan mahtang gaw, Ngai gaw nye a amyu hte nga nga na nngai, ngu nna htan wu ai. ¹⁴ Dai rai nna Elisha gaw, Ataw, shi a matu hpa galaw na ga ta? ngu nna san wu yang, Gehazi gaw, Gaja wa, shi kasha n lu nga ai, madu wa mung dingla sai, ngu wu ai. ¹⁵ Shaloi Elisha gaw, Bai shaga u, ngu wu yang, num jan gaw chyinghka lam e tsap nga ai. ¹⁶ Shingrai myihtoi wa gaw, Nang htaning, ndai aten hta e, shadang sha ba na rin dai, ngu wu ai. Numsha gaw, Nye madu, Karai Kasang a masha wa e, na nchyang jan hpe masu ga hkum tsun et, ngu nna htan wu ai. ¹⁷ Ya dai numsha gaw na-um nasin ai wa nna, Elisha shi hpe tsun da ai hte maren, ladu hkrum jang, shadang sha shangai wu ai. ¹⁸ Dai ma gaw kaba wa sayang, lani mi hta e shi a kawa hte mam dan ai ni hpang de hpang de sa yu nna, ¹⁹ shi gaw kawa hpe, Baw machyi ai law, baw machyi ai law, ngu nna tsun wu yang, kawa gaw, Shi hpe kanu hpang de woi wa su, ngu nna shangun ma hpe tsun wu ai. ²⁰ Dai ma hpe kanu hpang de woi wa ngut jang, shi gaw, jan pungding ga ai aten du hkra kanu a lahpyen e dung nga nna si mat sai. ²¹ Shingrai kanu gaw ntsa de lung wa nna, dai ma hpe Karai Kasang masha wa a yupku hta tawn da n htawm, chyinghka la kau da nna pru mat wa ai. ²² Bai shi gaw madu wa hpe shaga la nna, Ngai Karai Kasang a masha wa hpang de gat sa nna, bai wa lu hkra, shangun dat rit, ngu nna htet da wu ai. ²³ Madu wa gaw, Nang dai ni hpa majaw sa mayu n ta? Shata praw mung n rai, laban nhtoi mung n rai, ngu nna tsun wu yang, madu jan gaw, Mai na re ai, ngu nna htan wu ai. ²⁴ Shaloi shi lawze langai mi byau nna shi a shangun ma hpe, Nang hkan sa su; ngai n tsun yang hkum lanyan et, ngu wu ai. ²⁵ Shingrai shi wa wa nna, Hkarmela bum de nga ai Karai Kasang a masha wa kaw du ai. Ya Karai Kasang a masha wa gaw tsan tsan kaw nna shi hpe mu mada jang, shi gaw shi a shangun ma Gehazi hpe, Yu u, Shunem num gaw wora de du ra ai: ²⁶ shi hpe tau la na gat su; Nang mung, na madu wa hte ma mung hkam kaja nga myit ni? ngunna san yu u, ngu dat wu ai. Num jan gaw, Hkam kaja nga ga ai, ngu nna htan wu ai. ²⁷ Bai shi gaw dai bum ntsa e nga ai Karai Kasang a masha wa kaw du jang, shi a lagaw hpe ginshum ya wu ai. Gehazi mahtang shi hpe hkum da na nga sit sa wa timung, Karai Kasang a masha wa gaw, Shi anga nga u ga: shi a myit masin kahtet la nga lu ai; Yehowa chyawm gaw dai lam makoi da nna, ngai hpe n madun dan nga ai, ngu wu ai. ²⁸ Shaloi num jan gaw, Ngai nye madu kaw na shadang sha hpyi n ni? Ngai hpehkum hkalem kau et, ngu ni ai, n rai ni? ngu wu ai. ²⁹ Shaloi Elisha gaw Gehazi hpe, Shingkyit kyit u, nye a dawhkrawng lang nna sa wa su: langai ngai hte hkrum yang, hkum shachyen et, nang hpe shachyen yang hkum htan et; nye a dawhkrawng hpe ma a myiman ntsa e mara da u, ngu dat wu ai. ³⁰ Ma a kanu chyawm gaw, Yehowa hkrung nga ai zawn, na asak mung hkrung nga ai hte maren, ngai gaja wa nang hte n hka na nngai, ngu wu yang, shi hkum nan rawt nna hkan nang nga ai. ³¹ Gehazi mahtang shan a shawng e sa wa nna, dawhkrawng hpe ma a myiman ntsa e mara da wu timung, ma gaw n shaga, hpa mung n dum nga ai. Dai rai nna shi gaw Elisha hpe sa tau let, Ma gaw n hprang hkraw nga ai, ngu nna shi hpe tsun wu ai. ³² Ya Elisha gaw nta de du jang, yu u, ma gaw si nga nna yupku hta taw nga ai. ³³ Dai re ai majaw shi shang nna, chyinghka hpe la da nhtawm, Yehowa hpe akyu hpyi wu ai. ³⁴ Shingrai shi gaw lung wa nna, n-gup hte n-gup, myi hte myi, lata hte lata hkrum di nna, shi a hkum hpe ma ntsa e dagap nna, ma a hkumshan gaw lum wa ai. ³⁵ Bai shi gaw nta kata e lang ma kahkrang hkawm nna, bai wa yang ma ntsa e shi a hkum hpe dagap wu yang, ma gaw sanit lang kahti nna myi hpaw wa ai. ³⁶ Ya Elisha gaw Gehazi hpe, Shunem num hpe shaga u, ngu wu ai. Shingrai shi shaga nna, dai num jan du jang, Elisha gaw, Na nsha hpe pawn la u, ngu wu ai. ³⁷ Shaloi shi shang nna, shi a lagaw nhpang e ga du hkra gum dagup nhtawm, shi a kasha hpe pawn la nna, pru wa ai. ³⁸ Ya Elisha gaw Gilgala shara de wa yang, dai mung e hku wa wa nga ai; myihtoi ma ni mung shi a man e dung nga ma ai rainna, shi gaw, Di kaba mazing da nna, myihtoi ma ni a matu shatmai shadu u, ngu nna shi a shangun ma hpe hkangda wu ai. ³⁹ Marai langai mi gaw, shat mai lap di na nga, pa de sa wa yang, ru chyalam mu nna, dai hta na taupa si chyalam, hpai lu ai daram di wa nhtawm, dai si hpe n chye ai wa, shatmai di hta ahkyep bang wu ai. ⁴⁰ Shingrai sha na matu shanhte ru tawn nna, dai shatmai hpe sha nga ma yang shanhte gaw, Karai Kasang a masha wa e, di hta e si hpa lawm nga ai, nga nna jahtau let, n shalu ai nga nga ma ai. ⁴¹ Shaloi Elisha gaw, Rai taw, muk shadung la wa rit, ngu nna, dai muk shadung hpe di hta bang nhtawm, Ya sha dung hpe si hta bang nhtawm, Ya sha na matu ru tawn u, ngu wu yang, di hta e nang hpa n lawm nga ai. ⁴² Bai lang mi Bala-shalisha kaw nna masha langai mi gaw, Karai Kasang a masha wa hpe, shawng ngai ai mukyaw mam muk tawng hkun hte shi a htingpa hta nlung nnan sa jaw wu ai. ⁴³ Shaloi shi gaw, Ndai masha ni hpe karan jaw mu, ngu wu ai. Shi a hkringmang wa mahtang, Ndai gaw masha latsa hpe kaning di karan jaw lu na rai ta? ngu wu yang, Elisha gaw, She karan jaw mu: Yehowa ning nga ai, Shanhte sha lu nna naw ngam nga na ra ai, nga ai, ngu nna tsun wu yang, ⁴⁴ shi gaw, masha ni a man e karan tawn nna, shanhte gaw, Yehowa a ga hte maren, sha lu nna naw ngam nga ai.

¹ Ya Suri hkawhkam a hpyenbu wa Naman gaw, shi a man e myiman pa ai hte arawng lu ai wa rai nga ai: hpa majaw nga yang, Yehowa gaw shi a lata hte Suri masha ni hpe ning law ra lam hpaw ya wu ai: shi gaw share kaba rai nga ai. ² Suri masha ni gaw gumlau shang lau nna, Israela mung hta na mahkwan ma langai hpe rim woi wa ma ai; shi gaw Naman a madu jan hpe galaw jaw nga ai. ³ Shi gaw shi a nta madu num hpe, Alaw, nye madu Samari mare e nga ai myi htoi w ahpang de du taw! Shi gaw shi a ana hpe shamai ya na re ai, ngu wu ai. ⁴ Dai rai nna marai langai mi gaw, Israela mung na mahkawn ma ning nga a tsun nga ai, ngunna shi a madu hpe shang tsun wu ai. ⁵ Shaloi Suri hkawhka gaw, Sa su, ngai Israela hkawham hpe laika shagun dat na nngai, ngu wu yang, Naman gaw pru nna, gumhpraw joi mali tsa, ja den-ga hkying kru hte hpun palawng man shi, la sa wu ai. ⁶ Dai hta kaga, Ya, yu u, ndai laika na a lata de du jang, nang nye a hkringmang wa Naman hpe, shi hta kap ai manggang shamai ya na matu, ngai shi hpe nang hpang de shangun dat se ai, nga nna Israela hkawhkam wa hpe ka dat ai laika mung, shi lang wu ai. ⁷ Ya Isaraela hkawham wa dai laika hpe hti ngut jang, shi a hpun palawng gang je kau nna, Ataw, ngai gaw sat kau lu ai hte jahkrung ya lu ai Karai daw rai nga ai majaw, ndai wa a manggang shamai ya u ga nga, shi ngai hpang de shangun dat a hka? Gaja wa shi gaw ngai hpe jahte tam nga ai gaw, matsing da mu, nga ai. ⁸ Israela hkawhkam wa gaw shi a hpun palawng gang je kau nga ai hpe, Karai Kasang a masah wa Elisha na wu yang, shi gaw hkwahkam wa hpang de shangun dat nna, Nang hpa majaw na a hpun palawng gang je kau nga n ta? Dai wa hpe ngai hpang de shangun dat rit, Israela amyu hta e myihtoi nga nga ai gaw shi chye lu na ra ai, ngu nna htet dat wu ai. ⁹ Dai rai nna Naman gaw shi a gumra ni hte, shi a leng ni hte, sa du nna, Elisha a nta ndaaw e tsap nga ai. ¹⁰ Shaloi Elisha gaw shi hpang de shangun ma dat nna, Nang gaw Yawdan hka hta e sanit lang sa shin u; shaloi na a hkumshan galai wa nna, nang san pra na rin dai, ngu nna tsun shangun wu ai. ¹¹ Naman chyawm gaw masin pawt nna pru wa let, Gaja wa, myihtoi wa nan ngai hpang de pru nna, shi a Karai Kasang Yehowa amying gang let, shi a lata hte machyi ai shara e masawp nna, manggang kap ai wa hpe jasan shapra ya na ra ai, ngu nna ngai myit nga nngai. ¹² Damasku mare na Abana hka hte Hparpa hka yan gaw, Israela mungdan ting na hka hpung mahkra hta grau kaja nga ai n rai ni? Dai hka yan hta ngai mai shin nna, san pra wa lu na n rai hka? Nga nna pawt bu ai hte wa mat ai. ¹³ Shaloi shi a mayam ni gaw sit sa nna, Wa e, myihtoi wa gaw magam kaba galaw shangun yang, galaw na n rai ni? Hka shin nna san pra wa u, nga nna nang hpe tsun yang, grau galaw mai ai, n rai ni? ngu mu ai. ¹⁴ Shingrai shi gaw, Karai Kasang a masha wa tsun ai hte maren, Yawdan hka de yu wa nna, shi hkum hpe sanit lang kapruk jang, shi a hkumshan gaw ma kaji a hkumshan zawn rai mat nna, shi gaw san pra wa ai. ¹⁵ dai rai nna shi gaw si a hkan bawp hkan nang ai ni hte rau, Karai Kasang a masha wa hpang de bai sa nna, shi a man e tsap let, Yu u, Israela mungdan hta kaga, ga ntsa ting hta e Karai Kasang shaje n nga ai gaw, ya ngai chye se ai: dai rainna na a mayam wa a kumhpaw kumhpa hpe hkap la u, ngu wu ai. ¹⁶ Myihtoi wa chyawm gaw, Ngai dawjau nga ai Yehowa hkrung nga iahte maren, ngai n hkap la na nngai, ngu wu ai. Naman shadut wu timung, shi ndang kau wu ai. ¹⁷ Bai Naman gaw, Nang n la timung, na a mayam wa hpe ga shingbut lawze daw lahkawng jaw dat e; na a mayam wa gaw ya kaw nna wan nat hkungga raitimung, hkungga amyu kaga raitimung, Yehowa hta kaga, hpara shaje hpe nawng ya na n rai. ¹⁸ Raitimung, Yehowa gaw na a mayam wa hpe lam langai mi hta mara raw dat ya u ga: nye a madu gaw nawku na matu, Rimon a nta kata e gum dagup nga yang, ning rai gum dagup lawm ai mara, Yehowa raw dat kau ya u ga, ngu nna hpyi wu ai. ¹⁹ Myihtoi wa gaw, Angwi apyaw sha wa nu, ngu wu ai. Shingrai shi pru nna, lam daw mi kaw du ai. ²⁰ Raitimung, Karai Kasang a masha Elisha a shangun ma Gehazi gaw, Yu u, nye a madu gaw, ndai Suri masha Naman lang ai kumhpaw kumhpa hpe n hkap la ya ai, shi hpe matsan nau dum nu ai: Yehowa hkrung nga ai hte maren, ngai shi kaw hkan gat nang nna lama ma hpyi la na we ai, nga ai. ²¹ Shingrai Gehazi gaw Naman a hpang e hkan nang nga ai. Ya Naman gaw, marai langai mi han gat nang nga ai mu jang, shi a leng hta na yu nhtawm, sa tau let, Yawng ngwi pyaw nga myit ni? ngu nna san wu ai. ²² Gehazi gaw, Yawng ngwi pyaw nga ga ai. Nye a madu gaw ngai hpe shangun dat nna ning nga ai: Ehprim bum ga kaw na myihtoi ma lahkawng ya e ngaikaw du masai; shan a matu gumhpraw talenta langi mi hte hpun palawng man lahkawng karan jaw dat rit, nga ai, ngu wu ai. ²³ Naman gaw, Rai sa, talenta lahkawng la u, ngu wu ai. Shi dai lam shadut nna, gumhpraw talenta lahkawng hpe tingsan lahkwang hta bang nna, hpun palawng man lahkawng hte rau gyit tawn nhtawm, shi a shangun ma lahkawng hpe hpai shangun nna, dai yan gaw Gehazi a shawng e hpai wa mu ai. ²⁴ Ya dai kawng de du yang, Gehazi dai arai hpe shan a lata na la nna, nta nhku e kyem da nhtawm, shan lahkawng hpe shabawn dat nna, shan wa mat ma ai. ²⁵ Gehazi chyawm gaw shang nna shi madu a man e tsap nga ai. Shaloi Elisha gaw, Gehazi e, nang kanang na bai wa n ta? ngu nna san wu yang, shi gaw, Na a mayam wa kanang mung n sa nngai, ngu nna htan wu ai. ²⁶ Bai Elisha gaw, Dai wa nang hpe tau la na nga, shi a leng hta na kayin yu wa yang, nye a myit masin nang hte rau n hkan nga a ni? Ya gaw, aja gumhpraw, hpun palawng, tsanlun sun, tsabyi sun, sagu, dumsu, mayam la, mayam num hkm la na aten rai nga a ni? ²⁷ Dai re ai majaw, Naman a manggang gaw nang hte na a aru arat hta tutnawng prat dingsa e a kap nga na ra ai, ngu wu ai. Dai rai nna Gehazi gaw hkyen zawn hpraw ai, manggang kap ai wa tai nna, shi madu a man kaw na pru mat wa ai.

¹ Ya myihtoi ma ni gaw Elisha hpe, Yu u, anhte nang hte rau shanu nga ai shara gaw gyeng la nga ai. ² Dai rai nna anhte gaw Yawdan hka kau de sa nhtawm, langai hte langai ngau shaw nna, dai yang e nga nga na shara galaw ga, ngu nna hpyi mu ai. Shi gaw, Sa wa ma su, ngu mu ai. ³ Bai langai mi gaw, Nang madu na a mayam ni hte rau sa wa ga, ngu nna hpyi wu yang, shi gaw, Sa na nngai, ngu nna htan wu ai. ⁴ Shingrai shi shanhte hte rau sa wa nna, Yawdan hka du jang, ngau kran nga ma ai. ⁵ Marai langai mi mahtang gaw, hpun kran nga yang, shi a nwa hka de malaw hkrat bang mat lu ai; shingrai shi gaw, Nye madu e, dai gaw shap la ai nwa re ai law, ngu wu ai. ⁶ Shaloi Karai Kasang a masha wa gaw, Gara kaw hkrat a ta? san wu yang, shi hpe hkrat ai shara madun dan wu ai. Shingrai myihtoi wa gaw, hpun dingshan langai mi kahtam la nna, dai shara de kabai bang dat wu yang, dai hpri gaw waw pru wa ai. ⁷ Bai myihtoi wa gaw, Ya sai la u, ngu nna tsun wu ai hte maren, myihtoi ma gaw shi a lata ladawn nna sai la wu ai. ⁸ Dai laman e Suri hkawhkam gaw Israela masha ni hte hpyen gasat nga nna, Ndai shara, wora shara hta e dap jung ga, nga nna shi a ali ama ni hte bawng yu nga ai. ⁹ Shaloi Karai Kasang a masha wa gaw, Israela hkawhkam hpang de masha shangun dat nn, Ndai shara, wora shara de Suri masha ni yu wa na maw nga ma ai majaw, dai shara hpe koi kau nga u, ngu nna shadum wu ai. ¹⁰ Israela hkawhkam mung, Karai Kasang a masha wa shi hpe madun dan ai shara de masha shangun dat nna, shi a hkum law law lang hpyen ni hpe koi kau lu wu ai. ¹¹ Dai lam majaw Suri hkawhkam myit grai kahtet nga nna, shi a ali ama ni hpe shaga la nhtawm, Israela hkawhkam hpang maga de kadai wa mahtang rai nga ai hpe, ngai e n tsun dan ai, nga nga myit ni? ngu nna san mu ai. ¹² Shaloi shi a ma langai mi gaw, N rai law, nye a madu hkawhkam wa e; nang madu yup gawk hta tsun ai ga gaw, Israela mung hta nga ai myihtoi Elisha nan, Israela hkawhkam wa hpe shapraw dan nga ai, ngu wu ai. ¹³ Dai re ai majaw hkawhkam wa gaw, Ngai shi hpe sa rim la lu hkra, shi kanang nga ai gaw sa tam yu mu, ngu mu yang, marai langai mi gaw, Yu u, shi gaw Dohtan mare e nga nga ai, ngu nna tsun dan wu ai. ¹⁴ Dai rai nna shi gaw dai mare de gumra, hpyen leng hte luksuk kaba shangun dat nna, shanhte gaw shana sa du nhtawm, dai mare hpe wang tawn da mu ai. ¹⁵ Ya Karai Kasang masha a hkringmang wa gaw jahpawt jau jau rawt nna pru wa yang, yu u, gumra hte hpyen leng ni rau luksuk hpung mi gaw dai mare hpe wang tawn nga ma ai rai nna, shi a shangun ma gaw, Alaw, nye a madu e, an kaning rai na ga ta? ngu nna tsun wu ai. ¹⁶ Shi gaw, Hkum hkrit et; anhte hpang maga de nga ai ni gaw, shanhte hpang maga de nga ai ni hta grau law nga ma ai, ngu wu ai. ¹⁷ Bai Elisha gaw, Yehowa e shi mu lu u ga, shi a myi hpaw ya u, ngu nna hpyi wu ai. Shaloi Yehowa gaw dai shangun ma a myi hpe hpaw ya wu ai rai nna, shi mu wu yang, yu u, Elisha grupyin e, bum ting hta e, wan gumra hte wan leng ni hpring chyat nga ma ai. ¹⁸ Bai Suri masha ni shi kaw yu wa ma yang Elisha gaw Yehowa hpe, ndai masha ni n mu lu mu ga, shanhte a myi shamak kau ya mu, ngu nna hpyi wu yang, Yehowa gaw Elisha hpyi ai hte maren, shanhte a myi hpe shamak kau ya mu ai. ¹⁹ Bai Elisha gaw, Ndai lam, ndai mare, n rai: ngai kaw she hkan marit; nanhte tam ai wa nga ai de ngai woi wa made ga, ngu nna shanhte hpe tsun nhtawm, Samari mare de woi wa mu ai. ²⁰ Ya shanhte gaw Samari mare kata de du ma yang, Elisha gaw Yehowa hpe, Ndai ni mu lu mu ga shanhte a myi hpe hpaw ya mu, ngu nna hpyi wu ai. Shaloi Yehowa shanhte a myi hpaw ya mu ai rai nna, shanhte mada yu ma yang, yu mu, shanhte gaw Samari mare kata e rai nga ma ai. ²¹ Israela hkawhkam shanhte hpe mada mu jang, shi gaw, Elisha hpe, Nye wa e, ngai shanhte hpe sat kau na rai kun? Sat kau na rai kun? Ngu nna san wu ai. ²² Shi gaw, Nang shanhte hpe sat kau lu na, nrai; na a ri nhtu ndan pala ni hte rim la lu ai ni hpe, sat kau mai na, rai ni? shanhte lusha nna tinang a madu hpang de bai wa lu hkra, shanhte hpe muk hte ntsin daw jaw mu, ngu nna htan wu ai. ²³ Shaloi shi gaw shanhte hpe lusha grai daw jaw nna, shanhte lusha ngut jang shabawn dat mu ai; shanhte mung tinang a madu hpang de bai wa ma ai. Dai hpang e Suri gumlau hpung ni Israela mung hta bai n shang ma ai. ²⁴ Dai hpang Suri hkawhkam Benhada gaw shi a luksuk ni nlang shaga jahpawng la nhtawm, Samari mare hpe wang tawn da mu ai. ²⁵ Shingrai Samari mare hta hku wa kaba hku wa nna, na na wa wang tawn ai majaw, lawze baw langai mi gaw gumhpraw lap matsat shi, hkrudu hkyi jare mi gaw lap manga hte dut lu nga ai. ²⁶ Ya Israela hkawhkam wa gaw mare bunghku ntsa e lai hkawm nga yang num langai mi gaw, Nye a madu, hkawhkam wa e, karum la e law, ngu nna shi hpe jahtau wu ai. ²⁷ Hkawhkam wa mahtang, Yehowa nang hpe n karum yang, ngai nang hpe mam chyarang hte tsabyi htumbyen hta na kaning rai karum lu na rai ra? Ngu nna htan wu ai. ²⁸ Bai hkawhkam wa gaw, Nang hpa hkrum nga n ta? ngu nna dai numsha hpe san wu yang, shi gaw, Ndai manang jan ngai kaw sa nna, Dai ni an sha na matu na nsha hpe shapraw u; hpawt de gaw ngai sha hpe sha ga. ²⁹ nga nna tsun ai majaw, ngai sha hpe shadu sha sagaw ai: hpang shani e ngai gaw, Sha na matu na nsha hpe ya shapraw u, ngu nna shi hpe tsun we yang, shi gaw shi a kasha hpe makoi kau wu ai, ngu nna hkawhkam wa hpe htan wu ai. ³⁰ Hkawhkam wa gaw dai ga na jang, shi a hpun nba gang je kau wu ai: ya shi gaw mare bunghku ntsa e hkawm nga ai rai nna, mare masha ni mada yu mu yang, yu u, shi gaw lachyit nba bu hpun nga ai hpe mu chye mu ai. ³¹ Shaloi hkawhkam wa gaw, Shahpat a kasha Elisha a baw hpe ngai dai ni n htau kau lu yang, Karai Kasang ngai hpe grau nna ari jaw u ga, nga ai. ³² Ya Elisha gaw shi a nta e nga nga nna, salang ni shi hte rau dung nga ma ai: hkawhkam wa mung kasa langai mi shi a shawng e shangun dat wu timung, kasa wa garai n du yang, Elisha gaw, Masha sat ai wa a kasha, ndai wa gaw, nye a baw htau kau na nga du sa ra ai gaw, nanhte mu mada nga myit ni? yu mu, dai kasa wa du yang, chyinghka la da nna, chyinghka lam e shi hpe hkum da mu: shi madu a lagaw nsen shi a hpang e ngoi nang nga ai n rai ni? ngu nna salang ni hpe tsun mu ai. ³³ Shi shanhte hte ga naw tsun nga yang, kasa wa gaw shi hpang de sa du nna, Yu u, ndai shoihpa shoirang gaw Yehowa kaw na rai nga ai rai nna ngai hpa majaw Yehowa hpe naw a mada nga n rai ta? ngu nna tsun wu ai.

¹ Shloi Elisha gaw, Yehowa a ga madat mara mu, Yehowa ning nga ai, Hpawt de ndai aten e, Samari mare chyinghka lam htae, muk shadung jik mi gumhpraw lap mi, muk-yaw mam hpai mi gumhpraw lap mi hte dut na ra ai, ngu nna htawn tsun wu ai. ² Hkawhkam wa shamyet shanat nga ai hkrinngmang wa mahtang, Yehowa gaw sumsing lamu hta e hkuwawt hku waw da yang pyi, dai lam byinlu na a ni? ngu nna Karai Kasang a masha wa hpe htan wu yang, shi gaw, Yu u, nang gaw na a myi hte nan mu lu timung, n sha lu na ndai, ngu wu ai. ³ Ya manggang gang ai masha mali mare chyinghka lam e nga nga ma ai, shanhte gaw, Ataw, anhte si hkra hpa majaw nang e adung nga ga ta? ⁴ Mare kata de shang ngu yang, dai yang e hku wa kaba hkrum nna si na ga ai, bai, nang e dung nga yang mung si ai hkrai hkrum na ga ai. Dai re ai majaw, sa marit, Suri luksuk ni hpang de shang bang wa saga, shanhte anhte hpe jahkrung da ni yang, hkrung nga na ga ai, sat kau mi yang, si na sha rai nga ai, nga nna shada da tsun hkat na ai. ⁵ Shingrai shanhte gaw Suri dap de shang na matu nhtoi garai n leng yang, rawt sa wa nna, Suri dap ndaw de du jang, yu mu, masha langai mi muk n nga nga ai. ⁶ Kaning nme law, Madu gaw Suri masha ni hpe, hpyen leng ngoi ai hpe mung, gumra ngoi ai hpe mung, wunawng wuwa kaba ngoi ai nsen hpe na shangun mu ai rai nna, shanhte gaw, Yu mu, Israela hkawhkam gaw anhte hpe gasat na matu, Hiti hkawhkam ni, Egutu mung na hkawhkam ni hpe shaga manu ai, nga nna shada da tsun kajawng nhtawm, ⁷ nhtoi garai n leng yang, rawt hprawng nna, tinang a sum ni, tinang a gumra ni lawze ni hte dap ting hpe kau tawn da nna, tinang a asak lawt hkra hprawng htaw mat wa ma ai. ⁸ Ya ndai manggang gang ai ni gaw, dap ndaw de du ma yang, shanhte sum langai mi hta shang nna, lusha nhtawm, dai kaw na aja gumhpraw hte hpun palawng ni hpe shaw la nna, sa makoi da mu ai, dai hpang sum kaga de mung wa shang nna arai ni hpe shaw la nhtawm sa makoi da mu ai. ⁹ Dai hpang shanhte gaw, Anhte galaw ai lam n mai nga ai, dai ni gaw kaja ai shiga htawn tsun ai shani rai nga timung, anhte atsin sha nga nga ga ai, nhtoi leng hkra naw hkring nga ga yang gaw ari ahpri hkrum na ga ai, dai rai nna, sa marit, hkawhkam a nta masha ni hpe sa tsun shana ya ga, nga nna shada bawng ma ai. ¹⁰ Shingrai shanhte gaw mare chyinghka sin ai ni hpe sa shaganna, Anhte gaw Suri masha ni ahpyen dap de du saga ai, raitimung, masha langai mi muk nnga ai, nasha a nsen mung n na ga ai, gumra ni hte lawze ni sha dun nga ma la ai rai nna, sum ni mung myi na ta rai nga ma ai, ngu nna shanhte hpe tsun shana mu ai. ¹¹ Chyinghka sin ai wa mung manang ni hpe shaga nna, shanhte gaw htingnu kata de sa shana ya mu ai. ¹² Shingrai hkawhkam wa gaw nsin naw sin nga yang rawt nna shi a ali ama ni hpe, Suri masha ni galaw maw ai lam gaw ngai nanhte hpe madun dan made ga: anhte kawsi hpang kara hkrum nga ai gaw shanhte chye nga ma ai; dai re ai majaw shanhte dap de na pru nhtawm, nam mali hkan e makoi nga let, Israela masha ni gaw mare de na pru ma jang, shanhte hpe jahkrung rim la nna mare de shang ga, nga nna tsun ma ai, ngu mu ai. ¹³ Raitimung, shi a ma langai mi gaw, Mare kata e naw ngam nga ai gumra hta na manga hpe ap ya e; dai gumra ni gaw mare kata e naw ngam nga ai Israela wunawng hte mung, hten bya hkrum sai Israela wunawng hte mung, bung nga ma ai majaw, dai ni hte sa yu ga, ngu nna hpyi wu ai. ¹⁴ Dai rai nna shanhte gaw gumra hte gumra leng lahkawng la mu ai: hkawhkam wa mung, Sa yu mu, ngu nna Suri masha ni a hpang e hkan nang shangun mu ai. ¹⁵ Shingrai shanhte gaw Yawdan hka du hkra hkan nang ma ai rai nna, yu u, Suri masha ni hprawng tin nna kabai kau da ai hpun palawng hte arung arai ni lam hkan e jawng nga ai. Kasa ni mung bai wa nna hkawhkam wa hpe shana ya mu ai. ¹⁶ Shaloi mare masha ni pru nna, Suri masha ni a hpyendap hpya kau mu ai. Shingrai, Yehowa a ga hte maren muk shadung jik mi gumhpraw lap mi, muk-yaw mam hpai mi gumhpraw lap mi hte dut ma ai. ¹⁷ Hkawhkam wa mung, shi shamyet shanat nga ai hkringmang wa hpe mare chyinghka sin na matu hkangda wu ai: mare masha ni chyawm gaw, mare chyinghka lam e shi hpe kabye anut kau mu ai rai nna hkawhkam wa gaw, Karai Kasang a masha wa kaw yu wa yang, shi tsun da ai hte maren si mat wa sai. ¹⁸ Shingrai, Karai Kasang a masha wa gaw, Hpawt de ndai aten e, Samari mare chyinghka lam hta e, muk-yaw mam hpai mi gumhpraw lap mi, muk shadung jik mi gumhpraw lap mi hte dut na ra ai, nga nna hkawhkam wa hpe htawn tsun ai hte maren dik wa sai. ¹⁹ Hpyenbu wa chyawm gaw, Yu u, Yehowa sumsing lamu hta e hkuwawt hku waw da yang pyi, dai lam byin lu na a ni? ngu nna Karai Kasang a masha wa hpe tsun wu yang, shi gaw, Yu u, nang gaw na a myi hte nan mu lu timung, n sha lu n ndai, ²⁰ ngu nna tsun wu ai hte maren, shi hta byin wa sai: kaning rai nme law, mare masha ni mare chyinghka lam e shi hpe kabye sat kau manu ai.

¹ Bai Elisha gaw, shawng de asak jahkrung ya ai ma kanu hpe shaga nn, Rawt u, nang hte na a nta masha ni hte rau, kanang raitimung nga mai ai shara e sa shingbyi nga u: kaning rai nme law, Yehowa gaw hku wa shangun dat nna, ndai mung ting hta sanit ning tup hkuwa wa na ra ai, ngu nna shadum da wu ai. ² Dai numsha mung rawt nna, Karai Kasang a masha wa tsun ai hte maren galaw wu ai rai nna, shi a nta masha ni hte rau, Hpilisti mung e sanit ning tup sa shingbyi nga ai. ³ Ya sanit ning ladu hkrum yang, dai numsha gaw Hpilisti mung na bai wa nna, shi a nta hte yi hkauna ni sa hpyi na nga, hkawhkam wa kaw sa shang wu ai. ⁴ Dai shaloi e hkawhkam wa gaw Karai Kasang a masha wa a shangun ma Gehazi hte ga tsun let; Elisha galaw ai magam amu mahkra a lam, ngai hpe gawn dan yu e, ngu nna hpyi wu ai. ⁵ Shaloi Gehazi gaw, Elisha si ai wa hpe pyi hkrung sharawt ya lu ai lam hkahkam wa hpe tsun dan nga yang, yu u, asak bai jahkrung ya ai ma a kanu gaw, shi a nta hte yi hkauna a lam hkawhkam wa hpe hpyi jahtau nga ai rai nna, Gehazi gaw, Nye a madu hkawhkam wa e, ndai numsha gaw, ya tsun ai num rai nga ai, ndai ma mung, Elisha jahkrung ya ai, shi a kasha rai nga ai, ngu wu ai. ⁶ Hkawhkam wa gaw numsha hpe san yu yang, shi mung sakse hkam ya wu ai. Dai rai nna hkawhkam wa gaw shi a matu agyi langai mi san da nna shawng e shi lu malu hte, shi pru wa ai shani kaw nna ya du hkra shi a yi hkauna hta na pru ai nsi naisi yawng hte hpe shi e bai hkin ya u, ngu nna hkangda wu ai. ⁷ Bai Elisha gaw Damasku mare de sa du ai; ya Suri hkawhkam Benhada gaw machyi nga ai rai nna, Karai Kasang a masha wa nang e du ra ai, ngu nna shi hpe shana ya wu ai. ⁸ Shingrai hkawhkam wa gaw, Hazaela hpe, Nang kumhpa la gun nna, Karai kasang a masha wa hpe sa tau nhtwm, Ndai machyi ai kaw na ngai rawt wa lu na kun? ngu nna shi a n-gup hte Yehowa hpe san yu ga, ngu nna tsun dat wu ai. ⁹ Dai rai nna Hazaela gaw shi hpe sa tau la na nga, Damasku mare na ngamu ngamai ai baw hkum sumhpa hpe kumhpa di nna, gawla-u mali shi hta htaw let, Elisha man e tsap nna, Na nsha Suri hkawhkam Benhada gaw nang hpang de ngai hpe shangun dat nna, Ngai gaw ndai machyi ai kaw na bai rawt wa lu na kun? Nga nna sa san shangun ai, ngu wu ai. ¹⁰ Shaloi Elisha gaw, Nang bran wa na ndai, ngu nna shi hpe wa tsun su; raitimung, shi teng teng si na gaw, Yehowa ngai hpe madun dan ni ai, ngu nna htan wu ai. ¹¹ Bai Elisha gaw, Hazaela myiman sum hkra shi hpe azi yu nna, Karai Kasang a masha wa gaw myi pruwi pru nga ai. ¹² Shingrai Hazaela gaw, Nye madu du e, nang hpa majaw myi pruwi pru nga n ta? ngu nna san wu yang, shi gaw, Israela kashu kasha ni hpe nang galaw na ra ai n hkru ai amu hpe ngai chye nga nngai: shanhte a hpyendap ni hpe nang nat kau n ndai; shanhte a shabrang ni hpe nhtu hte sat kau na ndai; shanhte a ma kaji ni hpe gumpye sat kau na hte, na-um nasin re ai num ni hpe ahkri ga kau na ndai, ngu nna tsun wu ai. ¹³ Bai Hazaela gaw, Na a mayam wa gwi she rai nga ai mi, ndai daram kaba ai amu galaw lu na rai ni? ngu nna san wu yang, Elisha gaw, Nang Suri mung na hkawhkam tai na gaw, Yehowa ngai hpe madun dan ni ai, ngu nna htan wu ai. ¹⁴ Shaloi shi gaw Elisha kaw na pru wa nna shi a madu kaw du wa jang, shi gaw, Elisha nang hpe hpa tsun a ta? ngu nna hkap san wu yang, Hazaela gaw, Nang teng teng bran wa na re ai da, nga nna ngai e tsun dat ai, ngu wu ai. ¹⁵ Ya hpang jahpawt e shi gaw nba langai mi la nna, hka e kapruk nhtawm, hkawhkam wa a myiman hpe ka-up ya wu yang, shi si mat ai rai nna, Hazaela gaw shi a malai hkaw dung nga ai. ¹⁶ Yehosahpat gaw Yuda mung hta e hkaw naw dung nga yang, Israela hkawhkam Ahab a kasha Yoram hkaw dung ai manga ning hta e, Yehosahpat a kasha Yehoram gaw Yuda mung e hkaw dung hpang nga ai. ¹⁷ Shi gaw hkaw dung hpang ai shaloi e asak sumshi lahkawng ning rai lu ai rai nna, Yerusalem mare hta e matsat ning hkaw dung nga ai. ¹⁸ Shi gaw Ahab a shayi sha hpe la ai majaw, Ahab a nta masha ni zawn, Israela hkawhkam ni a lam hkan nna, Yehowa a man e n hkru n hkra ai amu galaw nga ai. ¹⁹ Raitimung, Yehowa gaw, shi a shangun ma Dawi a myiman tau nna, shi a kashu kasha ni a man e tutnawng pyengdin htoi tu nga u ga, nga nna shi hte ga ndat tawn da ai majaw, Yuda mung hpe jahten kau mayu ai n rai. ²⁰ Dai hkawhkam a aprat e Edom masha ni gaw Yuda hkawhkam hpe gumlau nna, tinang a amyu hkawhkam shadun mu ai. ²¹ Shaloi Yoram gaw shi a hpyen leng ni mahkra hte rau Zaira de rap shang nna, shi hpe sa wang ai Edom masha ni hte hpyen leng bu ni hpe, shana aten e rawt gasat dang mu ai rai nna, mung masha ni gaw tinang ni a sum de hprawng mat wa ma ai. ²² Raitimung Edom mung gaw dai ni du hkra Yuda hkawhkam hpe gumlau nga ai. Dai aten e Libna mung gumlau nga ai. ²³ Ya naw gawn ra ai Yoram a amu ni hte shi galaw ai lam mahkra gaw, Yuda hkawhkam ni a Labau gawn ai laika hta ka da nga ai, n rai ni? ²⁴ Shingrai Yoram gaw kaji kawa ni hte rau yup pyaw wa nna, Dawi a mare hta e, kaji kawa ni hte rau, makoi mayang di ai hkrum wu ai rai nna, shi a kasha Ahazia gaw hkaw dung nga ai. ²⁵ Ya, Israela hkawhkam Ahab a kasha Yoram hkaw dung ai shi lahkawng ning hta e, Yuda hkawhkam Yehoram a kasha Ahazia, hkaw dung hpang nga ai. ²⁶ Ahazia gaw hkaw dung hpang ai shaloi e, asak hkun lahkawng ning rai nga nna, Yerusalem mare hta e laning mi up nga ai. Shi kanu a amying Ahtalia rai nga nna, shi gaw, Israela hkawhkam Omri a kasha rai nga ai. ²⁷ Ahazia gaw Ahab a kahkri rai nga ai majaw, Ahab dap ni hkan nang ai lam hkan nna, Ahab a nta masha ni zawn, Yehowa a man e n hkru n hkra ai amu galw wu ai. ²⁸ Ya shi gaw, Ramot-gilead de Suri hkawhkam hpe gasat na matu, Ahab a kasha Yoram hte rau, sa wa ai rai nna, Suri masha ni gaw Yoram hpe hkala kau mu ai. ²⁹ Shingrai, Suri hkawhkam Hazaela hpe gasat yang, Suri masha ni gaw, Rama shara e, shi hpe jahkrum ai hkala nba hpe shamai na matu, hkawhkam Yoram gaw Yezrela mare de bai wa nna, shi machyi nga ai majaw, Yehoram a kasha Yuda hkawhkam Ahazia gaw, Ahab a kasha Yoram hpe sa hpu yu na nga, Yezrela mare de yu wa ai.

¹ Dai shaloi myihtoi Elisha gaw, myihtoi ma ni hta na langai mi hpe shaga la nna, Shingkyit kyit u; ndai namman tau lang nna Ramot-gilead de sa wa su. ² Dai de du yang, Nimshi a kashu, Yehosahpat a kasha Yehu hpe tam u: shi kaw shang yang, shi a kahpu kanau ni kaw na shi hpe shapraw la nna, kata gawk de shaga woi la nhtawm, ³ dai namman tau la nna, shi a baw hta ru bun let, Yehowa ning nga ai: Nang Israela hkawhkam tai na matu, ngai nang hpe namman chya ya sade ai, nga nna tsun ngut jang, hpa n hkring nga ai sha, chyinghka hpaw nna gat sa su, ngu dat wu ai. ⁴ Shingrai myihtoi ma ngu ai shabrang wa gaw, Ramot-gilead de sa ai. ⁵ Ya shi du yang, yu u, hpyenbu ni rau dung nga ma ai rai nna, shi gaw, Hpyenbu wa e, ngai nang hpe tsun na ga gun nngai, ngu wu yang, Yehu gaw, Anhte hta na kadai hpe mahtang tsun mayu n ta? ngu nna san wu yang, shi gaw, Nang hpyenbu wa hpe nan rai nga ai, ngu wu ai. ⁶ Shaloi shi rawt nna nta nhku de shang wa yang, myihtoi ma gaw shi a baw ntsa e namman ru bun let, Israela Karai Kasang Yehowa ning nga ai: Nang gaw Yehowa a amyu, ngu ai, Israela amyu ntsa e hkawhkam tai na matu, nang hpe namman chya ya ni ai. ⁷ Yezebela a lata hte ru kau ai, nye a ali ama ni ngu ai myihtoi ni a asai hte, Yehowa a ali ama ni mahkra a asai hpe, matai dawp na matu, na a madu Ahab a nta masha ni hpe, nang sat kau na ndai. ⁸ Ahab a dap lakung ni yawng hten mat na mara ai rai nna, Ahab amyu hta na lasha ma nlang hte hte, Israela hta bawngdung nga bawng lawt pra ai ni hpe, htau di kau na mawe ai. ⁹ Ngai gaw Ahab a nta hpe, Nebat a kasha Yero boam a nta hte, Ahiya kasha Basha nta hpe zawn di kau na we ai. ¹⁰ Gwi ni gaw Yezrela ginwang hkan e Yezebela hpe sha kau na mu ai rai nna, shi hpe lup makoi kau na mu ai rai nna, shi hpe lup makoi kau na masha n nga na sai, nga nna htawn tsun ngut jang, chyinghka hpaw nhtawm bai gat wa ai. ¹¹ Ya Yehu gaw shi madu a ali ama ni hpang de sa du yang, langai wa mi gaw, Yawng ngwi pyaw nga a ni? Dai mana bu ai wa gaw hpa majaw nang kaw sa du a ta? ngu nna san wu yang, Yehu gaw, Nanhte nan dai wa hpe mung, shi tsun ai ga mung, chye nga myit dai, ngu mu ai. ¹² Bai shanhte gaw, N chye ga ai; tsun dan yu mi, ngu mu yang, shi gaw, Dai wa gaw wora lera hku tsun nna, Yehowa ning nga ai: Nang Israela hkawhkam tai na matu, ngai nang hpe chya ya sade ai, nga nna ngai hpe htawn tsun ai, ngu mu ai. ¹³ Dai rai nna shanhte gaw langai hte langai, tinang a hpun nba alawan raw nna, lakang ntsa, Yehu a npu e nep nhtawm, pahtau dum let, Yehu gaw hkawhkam rai nga ai law, nga nna tsun ma ai. ¹⁴ Shingrai Nimshi a kashu, Yehosahpat a kasha Yehu gaw Yoram hpe gumlau wu ai. Yoram chyawm gaw, Israela masha ni yawng hte rau, Suri hkawhkam Hazaela hpe hkap gasat yang, Ramot-gilead hpe sin nga ma ai. ¹⁵ Raitimung, hkawhkam Yoram gaw Suri hkawhkam Hazaela hpe hkap gasat yang, Suri masha ni shi hpe hkala nba di ai nma shamai na matu, Yezrela de bai wa mat sai. Dai rai nna Yehu gaw, Nanhte dai lam hkraw myit yang gaw, Yezrela mare de sa shana ya na matu, ndai mare kaw nna, kadai mung n pru hkawm u ga, ngu nna hkangda mu ai. ¹⁶ Shingrai Yehu gaw leng jawn nna Yezrela mare de sa wa ai; kaning rai nme law, Yoram gaw dai yang e machyi taw nga ai. Yuda hkawhkam Ahazia mung shi hpe hpu yu na, du yu wa ai. ¹⁷ Ya mare sin ai wa gaw, Yezrela langchyi ntsa e tsap nga ai rai nna, Yehu hte hkan nang ai ni hpe mu jang, Ngai masha wunawng mu nngai, ngu wu ai. Shaloi Yoram gaw, Gumra jawn ai wa langai mi hpe shaga la nhtawm shanhte hpe sa tau la let, Ngwi pyaw nga myit ni? ngu nna san yu su, ngu dat wu ai. ¹⁸ Shingrai shi hpe tau la na, gumra jawn ai wa langai mi pru nna, Hkawhkam wa tsun ai, Ngwi pyaw nga n ni, da? Ngu nna san wu yang, Yehu gaw, Ngwi pyaw ai lam nang hte hpa seng a ta? Nye a hpang de hkan nang rit, ngu wu ai. Mare sin ai wa mung, Kasa wa shanhte kaw sa du nhtawm, bai wa ai n rai, ngu nna hkawhkam wa hpe shana ya wu ai. ¹⁹ Bai shi gaw gumra jawn ai wa kaga hpe shangun dat nna, dai wa mung shanhte kaw sa du nna, Hkawhkam wa tsun ai, Ngwi pyaw nga n ni, da? Ngu nna san mu yang, Yehu gaw, Ngwi pyaw ai lam nang hte hpa seng a ta? Nye a hpang hkan nang rit, ngu nna htan wu ai. ²⁰ Bai mare sin ai wa gaw, Dai wa mung shanhte kaw sa du nhtawm, bai wa ai, n rai. Leng jawn du ai wa mung, Nimshi a kasha Yehu zawn jawn gat nga ai; shi gaw myi di na hpang jawn gat nga ai, ngu wu ai. ²¹ Shaloi Yoram gaw, Byau hkyen tawn mu, ngu mu yang, shanhte gaw shi a hpyen leng hkyen tawn ya mu ai. Shingrai Israela hkawhkam Yoram hte, Yuda hkawhkam Ahazia gaw, tinang a hpyen leng ni hta, Yehu hpe tau la na pru sa wa nna, Yezrela masha Nabot a ga dachyawk hkan e, shi hte hkrum ma ai. ²² Ya Yoram gaw Yehu hpe mu wu yang, shi gaw, Yehu e, ngwi pyaw nga n ni? ngu nna san wu ai. Yehu mahtang, Na nnu Yezebela hkan ai n se n sa ai lam hte, shi shung sha ai lam ni nde wa law nga ai hte yang, ngwi pyaw lam kaning rai nga lu na a ta? ngu nna hkap htan wu ai. ²³ shingrai Yoram gaw shi a lata sharawt nna kayin hprawng let, Ahazia e, gumlau amu rai nga a hka, ngu nna Ahazia hpe tsun wu ai. ²⁴ Yehu chyawm gaw shi a ndan aja awa shachyen nhtawm, Yoram a hpa dip marum e gap ya wu ai rai nna, pala gaw shi a salum e hkrang pru ai majaw, shi gaw shi a hpyen leng hta kadawng taw nga ai. ²⁵ Bai Yehu gaw shi a hpyenbu Bidka hpe, Shi hpe karawt la nna, Yezrela masha Nabot a ga dachyawk hkan e kabai tawn da u. An lahkawng shi a kawa Ahab a hpang e gumra rau jawn nna hkan nang nga yang, Yehowa shi a lam ning nga hkangda ai gaw, ²⁶ Ngai Yehowa mani e jang, Nabot a asai mung, shi a kasha ni a asai mung, mu da we ai majaw, ndai ga dachyawk hta e ngai nang hpe matai dawp na de ai, nga nna Yehowa tsun ai ga dum nga u. Dai re ai majaw, Yehowa a ga hte maren dai ga dachyawk hta e shi hpe kabai bang kau u, ngu nna hkangda wu ai. ²⁷ Ya Yuda hkawhkam Ahazia gaw dai hpe mu jang, sun nta na lam hku hprawng wa nga ai. Yehu chyawm gaw hkan shachyut let, Shi hpe mung hpyen leng hta e sat kau mu, ngu mu yang, Iblam makau na Gura kadawng e shi hpe hkala kau mu ai. Shi gaw Megido de hprawng wa nna dai yang e si wa sai. ²⁸ Shi a ali ama ni gaw shi a mang hpe, hpyen leng hta e, Yerusalem mare de la wa nhtawm, Dawi a mare hta e, kaji kawa hte rau, shi a lup hta e lup da mu ai. ²⁹ Ahab a kasha Yoram hkaw dung ai shi langai ning hta e, Ahazia gaw Yuda mung e hkaw dung hpang wu ai. ³⁰ Bai Yehu gaw Yezrela mare de du ra ai, Yezebela na wu ai rai nna, shi a myi mun tsi chya ai hte baw hpe mawn sumli nhtawm, hkuwawt hku e azi yu nga ai. ³¹ Shingrai Yehu gaw mare chyinghka e shang wa nga yang, shi gaw, Na madu hpe sat kau ai, Zimri e, ngwi pyaw nga n ni? ngu nna hkap san wu ai. ³² Yehu gaw hkuwawt hku de dawng yu nhtawm, Nye a hpang maga de kadai wa rai nga a ta? kadai? Ngu nna san wu yang, Htingnu sin ai ma lahkawng masum shi hpe mada yu ma ai. ³³ Dai rai nna shi gaw, Shi hpe kanawng jahkrat dat mu, ngu nna tsun mu yang, shi hpe kanawng jahkrat dat mu ai rai nna, shi a sai gaw nta shakum ntsa e mung, gumra ni hta mung, hkaw bun nga ai: Yehu mung shi hpe kabye kau wu ai. ³⁴ Shaloi shi shang nna lu lu sha sha rai nhtawm, Ndai dagam dala hkrum ai num hpe sa hta lup kau mu: shi gaw hkawhkam a shayi sha rai nga ai, ngu mu ai. ³⁵ Shingrai shi hpe lup kau na nga, shanhte sa yu ma yang, shi a pungkum, lagaw hte lata lahpan hta kaga, hpa mung n mu mu ai. ³⁶ Dai re ai majaw shanhte bai wa nna shi hpe shana ya mu ai. Shi gaw, Yezrela ga dachyawk hta e gwi ni gaw Yezebela ashan hpe sha kau na mu ai, nga nna Yehowa gaw shi a shangun ma Tishbi masha Elia n-gup hta htawn tsun ai ga dik wa sai. ³⁷ Ndai gaw Yezebela a lup rai nga ai, nga nna kadai mung n tsun lu hkra, shi a mang gaw Yezrela ga dachyawk hta e ga hpun zawn tai na ra ai, nga ai.

¹ Ya Ahab a shadang sha sanit shi, Samari mare hta e nga nga ma ai. Dai rai nna Yehu gaw Samari mare e nga ai Yezrela ntsa e up ai ni ngu ai, agyi salang ni hte Ahab a kasha ni hpe bau nga ai ni hpang de laika shagun dat nna, ² Ya ndai laika gaw nanhte hpang de du yang, nanhte a madu a kasha ni mung, hpyen leng hte gumra ni mung, bunghku kum ai mare hte ri nhtu ni mung, nanhte hta naw rawng nga ai majaw, ³ nanhte a madu a shadang sha ni hta na grau kaja ai hte grau let ai wa hpe lata la nna, shi kawa a tingnyang hta dung shangun n-htawm, nanhte a madu a amyu matu hkap gasat nga mu, ngu nna htet dat mu ai. ⁴ Shanhte mahtang ja ja hkrit gari let, Yu mu, ndai hkawhkam lahkawng pyi shi a man e n tsap nga lu yang gaw, anhte kaning rai tsap nga lu na rai ta? nga nna tsun shajang ma ai. ⁵ Dai rai nna htingnu up ai wa mung, mare up ai wa mung, agyi salang ni hte hkawhkam kasha ni hpe bau nga ai ni gaw, Yehu hpang de, Anhte gaw na a mayam ni rai nga ga ai: nang anhte hpe tsun matsun anhte galaw na ga ai; anhte kadai wa hpe mung hkawhkam shatai na n rai; nang ra ai hku hte maren galaw u, ngu nna ka dat mu ai. ⁶ Shaloi Yehu gaw shanhte hpang de laika bai htang dat nna, Nanhte gaw ngai hpang maga e rai nga ai hte nye a nsen madat nga myit yang gaw, nanhte a madu a shadang sha ni a baw hpe htau kau nna, hpawt ni ndai aten e Yezrela de la sa marit, ngu nna htet dat mu ai. Hkawhkam kasha ni marai sanit shi chyawm gaw, mare na agyi salang ni hte shanhte hpe woi kaba wa ai ni hte rau rai nga ma ai. ⁷ Ya dai laika shanhte hpang de du yang, shanhte gaw hkawhkam a kasha marai sanit shi hpe rim la sat kau nhtawm, shanthe a baw ni hpe ka hta bang da nna, Yezrela mare Yehu hpang de shagun dat mu ai. ⁸ Shaloi kasa langai mi, Shanhte gaw hkawhkam kasha ni a baw ni hpe la sa mara ai, ngu nna shang tsun wu yang, shi gaw, Mare chyinghka lam e jahpawt du hkra, sumpum lahkawng di nna tawn da mu, ngu dat wu ai. ⁹ Bai hpang jahpawt e shi pru tsap nna shawa masha ni mahkra hpe, Nanhte tengman ai ni rai nga myit dai: ngai gaw nye a madu hpe gumlau nna sat kau se ai; ndai hte hpe gaw, kadai wa sat kau a ta? ¹⁰ Yehowa gaw Ahab a amyu masha ni hpe tsun da ai ga mahkra hta na, langai mi muk hten lu na n rai, chye nga mu: Yehowa gaw shi a shangun ma Elia n-up hte htawn tsun da ai hte maren, shadik da nu ai, ngu mu ai. ¹¹ Shingrai Yehu gaw, Yezrela mare hta e, naw ngam nga ai Ahab a amyu masha ni hte shi a agyi salang ni, makyin jinghku ni hte hkinjawng ni hpe, langai mi muk n ngam hkra, atsai awai sat kau mu ai. ¹² Dai hpang shi rawt nna Samari mare de sa wa yang, lam makau e nga ai sagu rem ai ni a sagu mun rep ai nta de dy yang, ¹³ Yehu gaw Yuda hkawhkam Ahazia kahpu kanau ni hte hkrum nna, Nanhte kadai ni rai myit ta? ngu nna san mu yang, shanhte gaw, Ahazia kahpu kanau ni rai ga ai; hkawhkam wa a kashu kasha ni hte, hkawhkam jan a kashu kasha ni hpe sa jahkrum na matu yu wa ga ai, ngu nna htan mu yang, ¹⁴ Yehu gaw, Jahkrung rim la mu, ngu nna hkangda mu ai majw, shanhte hpe jahkrung rim la nhtawm, sagu mun rep ai ni a nta a nhkun makau e marai mali shai lahkawng hpe sat kau mu ai; langai mi hpe muk ngam da mu ai n rai. ¹⁵ Dai kaw na shi pru wa yang, shi hpe tau la na nga, pru sa wa ai Rehkab a kasha Yehonadab hte hkrum nna, Nye a myit masin gaw na a myit masin hte langai sha rai nga ai hte maren, na a myit masin mung rai nga lit ni? ngu nna hkap shachyen let, san wu ai. Yehonadab gaw, Maren rai nga li ai. Ngu nna htan wu ai. Yehu gaw, Dai rai yang lata matut ga, ngu nna tsun wu ai. Shaloi shi gaw shi hte lata matut let, Yehu gaw shi hpe leng hta e woi shajawn wu ai rai nna, ¹⁶ Ngai kaw hkan rit; ngai gaw Yehowa a lam nja nhpra myit gade wa rawng nga ai gaw sa yu rit, ngu nna shi a leng hta e jawn shangun wu ai. ¹⁷ Samari mare de du yang, Elia n-gup hte Yehowa tsun da ai ga hte maren, shi gaw Samari mare hta e naw ngam nga ai, Ahab a amyu masha ni mahkra hpe, atsai awai sat kau mu ai. ¹⁸ Bai Yehu gaw mung masha ni mahkra hpe jahpawng tawn nhtawm, Ahab gaw Bala Hpara hpe loi mi sha dawjau timung, ngai Yehu gaw grai wa dawjau na we ai. ¹⁹ Dai re ai majaw, Bala myihtoi ni mahkra hpe mung, shi hpe nawku ai ni mahkra hpe mung, shi a hkinjawng ni mahkra hpe mung, shaga mu; langai mi hpe mung hkum ngam da myit: ngai gaw Bala hpe shagu hkungga law law nawng ya na rai nna, n lawm ai wa kadai mung hkrung nga lu na n rai, ngu nna shanhte hpe tsun timung, Bala nawku ai ni nlang hte hpe sat kau lu hkra, hkalem ai hku, ndai lam galaw ai rai nga ai. ²⁰ Bai Yehu gaw, Bala matu chyoi pra ai zuphpawng shachyip mu, ngu nna hkang dat mu ai hte maren shanhte galaw ma ai. ²¹ Shingrai Yehu gaw Israela mungdan ting hproi hkra shaga mu ai: Bala hpe nawku ai ni nlang sa du ma ai rai nna, langai mi muk n ngam hkra lawm nga ma ai. Shanhte gaw Bala nta hta shang nna, Bala nta nbang npan hpring chyat rai nga ma ai. ²² Bai Yehu gaw, Bala hpe nawku ai ni mahkra a matu hpun palawng shapraw ya mu, ngu nna hpun palawng gawk up ai wa hpe htet da wu ai rai nna, shi gaw shanhte a matu shapraw ya mu ai. ²³ Shaloi Yehu hte Rehkab a kasha Yehonadab, Bala nta de shang nna, Bala hpe nawku ai ni hta Yehowa hpe nawku ai ni langai mi muk n lawm hkra, atsawm sha hkan sawk yu mu, ngu nna Bala nawku ai ni hpe hkangda mu ai. ²⁴ Bai shan gaw shagu hkungga hte wan nat hkungga nawng ya na matu shang ma ai. Yehu chyawm gaw Bala nta shinggan e marai matsat shi tawn da nna, Ngai nanhte a lata e ap ya ai masha ni hta na langai mi hpe pyi shalawt kau yang, shalawt dat ai wa gaw lawt ai wa a malai asak sum na ra ai, ngu nna hkangda mu ai. ²⁵ Ya wan nat hkungga nawng ya ngut jang, Yehu gaw sin langa ni hte hpyenbu ni hpe, Shang nna sat kau mu; langai mi muk shalawt dat lu na n rai, ngu mu yang, shanhte hpe nhtu hte kahtam sat kau nna, sin langa ni hte hpyenbu ni gaw shanhte a si mang ni hpe shinggan de htawm kau nna, Bala nta na kata gawk du hkra shang let, ²⁶ Dai hta n-ga, Bala shadaw hpe mung, Bala a nta hpe mung, shanhte run agrawp kau mu ai rai nna, dai ni du hkra nam dum shatai kau mu ai. ²⁸ Shingrai Yehu gaw Israela mungdan hta na Bala hpe shamyit kau wu ai. ²⁹ Raitimung, Israela masha ni hpe shut shangun ai, Nebat a kasha Yeroboam gaw, Behtela hte Dan mare e tawn da ai aja dumsu kasha ni hpe nawku na lam, Yehu shi nan koi kau wu ai n rai. ³⁰ Yehowa chyawm gaw Yehu hpe, Nang nye a man e tengman ai hku hkan galaw ndai hte, ngai ra mara hte maren Ahab a dap lakung ni hta shachyen ndai majaw, Israela tingnyang hta dung nga lu na mara ai, ngu nna tsun wu ai. ³¹ Raitimung Yehu gaw, Israela Karai Kasang Yehowa a tara hpe, shi a myit masin mahkra hte hkan shatup wu ai, n rai: Israela masha ni hpe shut shangun ai, Yeroboam a arawn alai hpe koi kau wu ai, n rai. ³² Ndai aten e Yehowa gaw Israela mungdan hpe daw la hpang wu ai rai nna, Hazaela gaw Israela lamu ga jarit hkan nna, ³³ Yawdan hka sinpraw maga na Geliad mung, Gadi mung, Rubin hte Manashe mung ngu ai, Arnon kadit e nga ai Aroera mare kaw nna, Geliad hte Bashan mung ting gasat la wu ai. ³⁴ Ya naw gawn ra ai Yehu a amu ni mung, shi galaw ai lam mahkra hte shi a hpung dagu yawng, Israela hkawhkam ni a Labau gawn ai laika hta ka da nga ai, n rai ni? ³⁵ Shingrai Yehu gaw kaji kawa ni hte rau yup pyaw wa nna, Samari mare hta e makoi mayang di ai hkrum wu ai. Shi a kasha Yehoaza shi a malai hkaw dung nga ai. ³⁶ Yehu gaw Samari mare e hkaw dung nna Israela mung ntsa e up ai aten gaw, hkun matsat ning rai nga ai.

¹ Ahazia kanu Ahtalia gaw, shi a kasha si nga ai hpe mu wu yang, shi rawt nna hkawhkam a dap lakung ni nlang hte hpe sat kau mu ai. ² Raitimung, hkawhkam Yoram a shayi sha, Ahazia kanau Yehosheba gaw sat kau hkrum ai hkawhkam kasha ni hta na, Ahazia kasha Yosha hpe mayun shaw la nhtawm, shi hte shi a masut num hte rau, yup gawk hta e tawn da wu ai rai nna, shi sat kau ai n hkrum hkra, Ahtalia myiman kaw na makoi kau wu ai. ³ Shingrai shi gaw masut num hte rau, Yehowa a nta e kru ning makoi nga nna, Ahtalia gaw dai mung ntsa e up nga ai. ⁴ Ya sanit ning ngu na hta e Yehoiada gaw hpyen latsa up ai bu ni, mang galang ni hte sin langa ni hpe shaga la nhtawm, Yehowa a nta nhku de shashawn da mu ai. Dai hta kaga, shi gaw Yehowa a nta nhku e shanhte hte ga shaka tawn da ai hte dagam da shangun ngut jang, hkawhkam kasha hpe shapraw dan mu ai. ⁵ Bai Yehoiada gaw shanhte hpe, Nanhte ndai lam galaw mu: Laban nhtoi hta na sin langa, hpung masum hte hpe karan nhtawm, hpung mi gaw hkawhkam a nta hpe sin mu; ⁶ bai hpung mi gaw Sura chyinghka hpe sin nga mu; bai hpung mi gaw chyinghka makau na sin langa ni a shara hta e sin nga nna, nanhte dai nta hpe sin kawan kum da nga mu. ⁷ Bai, laban nhtoi e pru ai hpung masum hta na hpung lahkawng gaw, hkawhkam rawng nga ai, Yehowa nta grupyin e sin nga na mara ai. ⁸ Langai hte langai gaw tingang a ri nhtu lang let, hkawhkam grupyin e sin nga nna, shang mashang kadai hpe mung sat kau mu: hkawhkam wa gaw shang wa pru wa yang, hkan sin nga mu, ngu nna hkang dat mu ai. ⁹ Ya hpyen latsa up ai bu ni gaw, hkinjawng Yehoiada hkangda ai lam shagu hte maren galaw ma ai rai nna, langai hte langai gaw, laban nhtoi hta e shang wa ai ni hpe mung, pru wa ai ni hpe mung, shaga la nna hkinjawng Yehoiada hpang de woi wa mu ai. ¹⁰ Bai hkinjawng wa gaw, Yehowa nta hta rawng nga ai, hkawhkam Dawi a ri nhtu ni hte n-gang ni, hpyen latsa up ai bu ni hpe ap ya mu ai. ¹¹ Shingrai sin langa ni gaw, tinang a ri nhtu lang let, nta a hkra maga kaw nna pai maga du hkra, tawn hkungri hte nta makau hku, hkawhkam wa grupyin e tsap nga ma ai. ¹² Shaloi shi gaw hkawhkam kasha hpe shapraw nhtawm, ja janmau shagup ya let, sakse ga jaw nna, shi hpe hkawhkam shatai ai hte namman chya wu ai rai nna, shanhte gaw lata lahpawk dum let, Hkawhkam wa gaw asak galu u ga law, nga nna jahtau ma ai. ¹³ Ahtalia gaw sin langa ni hte mung masha ni a garu ai nsen na wu yang, shi gaw Yehowa nta kata e nga ai masha ni kaw sa du nna, ¹⁴ mada yu wu yang, yu u, hkawhkam wa gaw, htung hte maren, dai shadaw makau e tsap nga nna, shi a makau e hpyenbu ni hte pahtau dum ai ni rai nga ma ai; mung masha ni nlang hte mung kabu gara nga ai hte pahtau dum nga ma ai. Shaloi Ahtalia gaw shi a hpun nba gang je kau let, Gumlau law, gumlau law, nga nna jahtau nga ai. ¹⁵ Hkinjawng Yehoiada mahtang, Shi hpe Yehowa a nta kata e n sat u ga, nga nna mung, Dap shinggan de shapraw nna shi kaw hkan nang ai wa kadai hpe mung, nhtu hte sat kau mu, nga nna mung, hpyen luksuk ni a hpyen latsa up ai bu ni hpe hkangda mu ai. ¹⁶ Shingrai shanhte gaw shi hpe lam yen ya nna, hkawhkam a nta na gumra ni shang ai lam de du jang, dai yang e shi hpe sat kau mu ai. ¹⁷ Dai hta kaga Yehoiada gaw, hkawhkam wa hte mung masha ni gaw, Yehowa a masha tai mu ga nga, Yehowa hte ga shaka tawn da shagun mu ai;bai, hkawhkam wa hte mung masha ni hpe mung, ga shaka tawn da shagun mu ai. ¹⁸ Mung masha ni mahkra gaw Bala nta de sa nna dai hpe run kau mu ai; de a tawn hkungri ni hte sumla ni hpe atsai awai agrawp kau nna, Bala a hkinjawng Matan hpe, hkungri ni a man e sat kau mu ai. Dai hta kaga hkinjawng wa gaw Yehowa nta ntsa e up na du ni hpe san da mu ai. ¹⁹ Bai shi gaw hpyen latsa up ai bu ni, mang galang ni, sin langa ni hte mung masha ni mahkra hpe shaga la nhtawm, shanhte gaw hkawhkam wa hpe, Yehowa a nta na woi bawp wa nna, sin langa ni nga ai chyinghka lam hku e, hkawhkam a nta de shang wa ma ai. Shaloi shi gaw hkawhkam ni a tingnyang hta dung nga ai. ²⁰ Shingrai mung masha ni ma hkra gaw kabu gara nga ma ai rai nna, dai mare gaw asim sha rai nga ai. Shanhte gaw Ahtalia hpe hkawhkam a nta makau e nhtu hte sat kau manu ai.

¹ Yosha gaw asak sanit ning hta e hkaw dung hpang nga ai. ² Yehu hkw dung ai sanit ning hta e, Yerusalem mare hta e mali shi ning tup a up nga ai; shi a kanu gaw, Barasheba masha Zibia rai lu ai. ³ Yosha gaw hkinjawng Yehoiada shadum shahprang ai aten laman e Yehowa man e dingman ai amu galaw nga ai. ⁴ Raitimung, tsaw ai kawng ni a shara ni hpe shi n kau da ai rai nna, mung masha ni gaw dai shara ni hta e, shagu hkungga hte manam pyaw ai baw, nat nawng ya nga ma ai. ⁵ Dai shaloi e Yosha gaw hkinjawng ni hpe, Yehowa nta hta shashawn ai, chyoi pra ai arai ni hte seng ai, gumhpraw ngu ai, jahpan hte maren man man jaw ang ai gumhpraw mung, langai ngai tinang a myit hte Yehowa nta hta shashawn ai gumhpraw mahkra mung, ⁶ hkinjawng ni langai hte langai tinang hte chye chyap ai ni kaw na lahkawn la nhtawm, dai nta hta hten run ai shara shagu hkan e galaw lajang mu, ngu nna hkangda mu ai. ⁷ Raitimung hkinjawng ni gaw hkawhkam Yosha hkaw dung ai hkun masum ning hta e pyi, dai nta na hten run ai shara ni hpe hpa mung garai n galaw nga ma ai. ⁸ Dai re ai majaw hkawhkam Yosha gaw hkinjawng Yehoiada hte kaga hkinjawng ni hpe shaga la nna, Ndai nta a hten run ai shara ni hpe hpa majaw n galaw lajang nga myit ta? Ya kaw nna nanhte a chye chyap ai ni kaw na gumhpraw kaga hkap la lu na, n rai; nta hten run ai shara ni a matu, ya lu ai made ap ya mi, ngu nna hkangda mu ai majaw, ⁹ hkinjawng ni gaw, mung masha ni kaw na gumhpraw kaga mung n hkap la na saga ai, nta hten run ai shara ni hpe mung, n galaw na ga ai, ngu nna hkap yin la mu ai. ¹⁰ Dai rai nna hkinjawng Yehoiada gaw sumpu langai mi la nna, de a magap hta hku waw nhtawm, Yehowa a nta de shang ai lam a hkra maga na tawn hkungri makau e shadun da wu ai rai nna, Yehowa a nta chyinghka sin ai hkinjawng ni gaw, dai nta a matu la sa ai gumhpraw nlang hte hpe dai hta e bang da mu ai. ¹¹ Ya dai sumpu hta e gumhpraw law law rawng nga ai hpe shanhte mu ma yang, hkawhkam a chyare wa hte hkinjawng agyi wa gaw sa du nna, Yehowa a nta hta rawng nga ai gumhpraw hpe hti yu nna, makai da mu ai. ¹² Shingrai shan gaw dai shen tawn da ai gumhpraw hpe Yehowa a nta hta amu galaw ai ni hpe up ai ni a lata hta ap ya mu ai rai nna shanhte gaw Yehowa a nta hta amu galaw ai, lasama ni, nta galaw ai ni, ¹³ wut gaw ai ni, nlung tawk ai ni hte, ngau ni mung, tawk tawn ai nlung ni hpe mung, Yehowa nta hta ra mara naw mari na matu mung, karan jaw mu ai. ¹⁴ Raitimung, Yehowa nta hta bang tawn da ai gumhpraw hte, Yehowa a nta matu, gumhpraw gawm, lakap ni, angdung ni, pahtau ni ngu ai, aja rai, gumhpraw rai, shanhte galaw ma ai, n rai: ¹⁵ kaning rai nme law, shanhte gaw dai gumhpraw hpe, Yehowa nta galaw lajang nga ai ni hpe karan jaw nna, dai nta hpe lajang na matu tawn da mu ai. ¹⁶ Dai hta n-ga, amu galaw ai ni hpe karan jaw na matu, gumhpraw sim da ai ni gaw, kangka rai nga ma ai majaw, shanhte hpe jahpan n hpyi mu ai. ¹⁷ Mara raw ai hkungga hte, yubak hkungga hte seng ai gumhpraw chyawm gaw, Yehowa nta hta n shashawn mu ai: dai gaw hkinjawng ni hte seng nga ai. ¹⁸ Dai shaloi e Suri hkawhkam Hazaela gaw, Gat mare hpe gasat la nhtawm, Yerusalem mare de bai lung gasat na maw nga ai. ¹⁹ Dai re ai majaw Yuda hkawhkam Yosha gaw, kaji kawa ni ngu ai, Yuda hkawhkam ni Yehosahpat, Yehoram hte Ahazia hte gaw, shachyoi shapra tawn da ai arai ni hte, shi hkum nan a chyoi pra ai arai ni hpe mung, Yehowa a nta na sutdek hta rawng ai aja mahkra hpe mung, hkawhkam nta na mahkra hpe mung la sa nna, Suri hkawhkam Hazaela hpang de shagun dat wu ai: dai rai nna shi gaw Yerusalem mare hpe lai kau da wu ai. ²⁰ Ya naw gawn ra ai Yosha a amu ni mung, shi galaw ai lam mahkra gaw, Yuda hkawhkam ni a labau gawn ai laika hta ka da nga ai, n rai ni? ²¹ Shi a shangun ma ni gaw gumlau nna, Sila de yu wa ai, lam makau na Milo dap na nta hta e shi hpe sat kau mu ai. ²² Shi a shangun ma yan, Shimeat kasha Yozahka hte Shome a kasha Yehozaba, shi hpe kahtam nna, shi si wa sai; Dawi mare hta e, shi a kaji kawa ni hte rau, shi hpe makoi mayang di mu ai rai nna, shi a kasha Amazin gaw shi a malai hkaw dung nga ai.

¹ Yuda hkawhkam Ahazia kasha Yosha a hkaw dung ai hkun masum ning hta e, Yehu a kasha Yehoaza gaw, Samari mare hta e hkaw dung hpang nna, Israela amyu ntsa e shi sanit ning tup up nga ai. ² Shi gaw Yehowa man e n hkru ai amu galaw nga nna, Israela amyu hpe shut shangun ai, Nebat a kasha Yeroboam a shut hpyit ai lam hta hkan galaw nga nna, dai hpe koi kau wu ai, n rai. ³ Shingrai Yehowa gaw Israela hpe pawt sindawng nga ai rai nna, Suri hkawhkam Hazaela hte shi a kasha Benhada a lata hta e, shanhte hpe tutu tut ap kau mu ai. ⁴ Suri hkawhkam gaw Israela amyu hpe mam chyarang na nbun zawn shatai kau mu ai rai nna, Yehoaza masha ni hta na, gumra jawn ai ni manga shi, hpyen leng shi, lagaw hpyen ni mun mi sha, shia matu shangam tawn da mu ai. ⁵ Shaloi Yehoaza gaw Yehowa hpe tawng ban wu ai rai nna, Yehowa mung shi a ga madat ya wu ai; kaning rai nme law, Suri hkawhkam Israela amyu hpe zingri zingrat nga ai gaw, Yehowa shi nan mu da wu ai. ⁶ Dai rai nna, Israela gaw Suri masha ni a lata hta na lawt lu hkra, Yehowa gaw hkyehkrang la na wa langai mi shanhte hpe jaw dat wu ai rai nna, israela kashu kasha ni gaw, moi shawng de na zawn, tinang a sun nta ni hta bai shanu nga lu ma ai. ⁷ Raitimung, Israela amyu hpe shut shangun ai Yeroboam a nta na ni a yubak hpe shanhte koi kau mu ai, n rai: dai hta e shanhte hkan nang nga nna, Samari mare hta e Ashare sumla ni mung naw nga nga ai. ⁸ Ya naw gawn ra ai Yehoaza amu ni mung, shi galaw ai lam mahkra hte shi a hpung dagu gaw, Israela hkawhkam ni a labau gawn ai laika hta ka da nga ai, n rai ni? ⁹ Shingrai Yehoaza gaw kaji kawa ni hte yup pyaw nga nna, Samari mare hta e shi hpe makoi mayang di mu ai: shi a kasha Yehoasha gaw shi a malai hkaw dung nga ai. ¹⁰ Yuda hkawhkam Yosha hkaw dung ai sumshi sanit ning hta e, Yehoaza kasha Yehoasha gaw, Samari mare hta e hkaw dung hpang nna, Israela ntsa e shi kru ning up nga ai. ¹¹ Shi gaw Yehowa a man e n hkru ai amu galaw ai hte, Israela amyu hpe shut shangun ai Nebat a kasha, Yeroboam a yubak hpe n koi kau ai sha, dai hta hkan nang nga ai. ¹² Ya naw gawn ra ai, Yehoasha amu ni mung, shi galaw ai lam mahkra hte, Yuda hkawhkam Amazia hpe hkap gasat ai magam ni hpe mung, Israela hkawhkam ni a labau gawn ai laika hta ka da nga ai, n rai ni? ¹³ Shingrai Yehoasha gaw kaji kawa ni hte yup pyaw nga nna, Yeroboam gaw shi a malai tingnyang hta dung nga ai: bai Yehoasha hpe Israela hkawhkam ni hte rau, Samari mare hta e makoi mayang di mu ai. ¹⁴ Ya Elisha gaw si machyi hkrum nga yang, Israela hkawhkam Yehoasha gaw sa du nna shi a man e hkrap let, Nye wa e, nye wa e, Israela hpyen leng hte, de a gumra jawn ai ni re a hka! ngu wu ai. ¹⁵ Dai rai nna Elisha gaw, Ndan hte pala la u, ngu nna hkawhkam wa hpe tsun wu yang, shi ndan pala la nga ai. ¹⁶ Bai shi gaw, Ndan shachyen u, ngu nna Israela hkawhkam wa hpe tsun wu yang, shi shachyen nga ai. Elisha mung shi a lata hkawhkam wa a lata ntsa e mara da wu ai. ¹⁷ Bai Elisha gaw, Sinpraw maga na hkuwawt hku hpaw u, ngu nna tsun wu yang, shi hpaw wu ai. Bai shi gaw, Gap u, ngu nna tsun wu yang, hkawhkam wa gap dat wu ai. Shingrai Elisha gaw, Dai gaw Yehowa a pala ngu ai, Suri masha ni hpe dang kau ai pala rai nga ai: nang gaw Suri masha ni hpe Ahpek shara e, atsai awai sat shamyit kau na maru ai. ¹⁸ Bai shi gaw, Pala ni naw la u, ngu nna tsun wu yang, hkawhkam wa la wu ai. Bai shi gaw, Ga hta kayat u, ngu nna Israela hkawhkam wa hpe tsun wu yang, shi gaw masum lang sha kayat nna tawn da wu ai. ¹⁹ Dai re ai majaw Karai Kasang a masha wa gaw shi hpe masin pawt nna, Nang manga kru lang kayat taw gaw, Suri masha ni hpe htum hkra sat kau lu na mu ai: ya chyawm gaw, nang shanhte hpe masum lang sha dang kau lu na mu ai, ngu nna daru wu ai. ²⁰ Shaloi Elisha gaw si wa nna, shi hpe makoi mayang di mu ai. Ya shaning shagu mangai la de, Moba damya ni gaw, Israela mung de shang gasat sat rai ma ai. ²¹ Dai aten hta e mare masha ni gaw masha langai mi hpe lup makoi nga yang, damya hpung mi du ra ai hpe, shanhte mu ma ai rai nna, si mang hpe Elisha a lup hta gan tawn da mu ai: ya dai si mang gaw Elisha a nrut nra hta hkra jang, shi hkrung wa nna rawt tsap nga ai. ²² Ya Suri hkawhkam Hazaela gaw, Israela amyu hpe, Yehoaza a prat tup zingri zingrat da mu ai. ²³ Raitimung Yehowa gaw, Abraham, Isak, Yaku hte hte tawn da ai ga shaka majaw, shanhte hpe naw yu lanu lahku, matsan dum ai hte myiman tau mu ai rai nna, shanhte hpe shamyit kau na mung, shi a myiman kaw na jahka kau na mung, garai n hkraw nga ai. ²⁴ Shaloi Suri hkawhkam Hazaela si wa nna, shi a kasha Benhada gaw, shi a malai hkaw dung nga ai. Hazaela gaw hpyen gasat nna, Yehoasha a kawa Yehoaza lata na hkap la ai mare ni hpe, Yehoaza kasha Yosha gaw, Hazaela a kasha Benhada kaw na bai dawm la wu ai. Yehoasha gaw Benhada hpe masum lang dang kau nna Israela mare ni hpe dawm la wu ai.

¹ Israela hkawhkam Yehoaza a kasha Yehoasha hkaw dung ai ni ning hta e, Yuda hkawhkam Yehoasha a kasha Amazia gaw hkaw dung hpang nga ai. ² Shi hkaw dung hpang yang, asak hkun manga ning rai nga nna, Yerusalem mare hta hkun jahku ning up nga ai. Shi a kanu gaw Yerusalem numsha Yehoadan rai lu ai. ³ Shi gaw Yehowa a man e dingman ai amu galaw ri mung, kaji Dawi a lahkam n dep ai: shi a kawa Yosha galaw ai hte maren sha hkan galaw nga ai. ⁴ Raitimung, tsaw ai kawng ni a shara ni hpe shi n kau da wu ai rai nna, mung masha ni gaw dai shara ni hta e shagu hkungga hte manam pyaw ai baw nat nawng ya nga ma ai. ⁵ Ya shi gaw dai mungdan hta ahkang aya majing lu jang, shi gaw, shi a kawa hkawhkam wa hpe sat kau ai ali ama ni hpe sat kau mu ai: ⁶ raitimung, Kasha ni a majaw kawa, kawa a majaw kasha ni si ai hkrum lu na, n rai; kadai mung tinang a mara hte sha si ai hkrum lu na rai nga ai, nga nna Mawshe a tara laika hta ka da ai hku hkan nna, Yehowa hkangda ai hte maren, shi a kawa hpe sat kau ai ni a kashu kasha ni hpe sat kau mu ai, n rai. ⁷ Bai shi gaw hpyen gasat ai hte, jum kadit hta e Edom masha mun mi hpe sat kau nhtawm, Sela mare hpe kashun la wu ai rai nna, dai mare a amying hpe, dai ni du hkra, Yokhtela ngu nna shamying da wu ai. ⁸ Dai aten e Amazia gaw, Yehu a kashu Yehoaza kasha Yehoasha hpang de kasa shangun dat nna, An gaw shada myi mau chyaw gasat hkying ga, ngu nna tsun dat wu ai. ⁹ Shaloi Israela hkawhkam Yehoasha gaw, Yuda hkawhkam Amazia hpang de kasa shangun dat nna, Lebanon bum e tu ai ju singwum gaw, Lebanon bum na marau hpun hpe, Na a shayi sha hpe ngai sha hte ya sha gaw, ngu nna hpyi wu yang, Lebanon bum na matse langai mi gaw lai sa wa nna, ju singwum hpe kabye agrawp kau wu ai. ¹⁰ Nang gaw Edom amyu masha ni hpe dang kau ai majaw, gaja wa myit kaba nga n hka; nang dai gumrawng nna, na a nta e anga nga u: nang hkum nan hte Yuda mungdan gaw rau htum mat wa hkra, hpa majaw kajam galam amu shapraw nga n ta? ngu nna htan wu ai. ¹¹ Raitimung, Amazia gaw dai ga hpe n madat wu ai. Dai re ai majaw, Israela hkawhkam Yehoasha lung wa nna, Yuda mung hte seng ai Bet-sheme mare makau e, Yuda hkawhkam Amazia hte shada myiman chyaw gasat hkat ma ai. ¹² Yuda masha ni mahtang Israela masha ni a man e sum nna, langai hte langai tinang a sum nta de hprawng wa ma ai. ¹³ Shingrai Israela hkawhkam Yehoasha gaw, Yuda hkawhkam, Ahazia kashu, Yehoasha a kasha Amazia hpe, Bet-sheme mare makau e rim la nna, Yerusalem de sa du yang, Ehprim chyinghka lam kaw nna, jut chyinghka du hkra, Yerusalem mare a bunghku hpe dawng mali tsa run kau mu ai. ¹⁴ Dai hta kaga shi gaw, Yehowa a nta hta mung, hkawhkam htingnu na sutdek hta mung rawng ai aja gumhpraw hte arai ni hte hpawn, ama hkam masha woi la nna, Samari mare de bai wa ai. ¹⁵ Ya naw gawn ra ai Yehoasha galaw ai amu ni hte, shi a hpung dagu, Yuda hkawhkam Amazia hpe gasat ai lam ni gaw, Israela hkawhkam ni a labau gawn ai laika hta ka da nga ai, n rai ni? ¹⁶ Shingrai Yehoasha gaw shi a kaji kawa ni hte rau yup pyaw wa nna, Samari mare hta e Israela hkawhkam ni hte rau makoi mayang di ai hkrum nu ai; shi a kasha Yeroboam gaw shi a malai hkaw dung nga ai. ¹⁷ Israela hkawhkam, Yehoaza kasha Yehoasha si ai hpang, Yuda hkawhkam Yosha kasha Amazia gaw, shi manga ning naw hkrung nga ai. ¹⁸ Ya naw gawn ra ai Amazia amu ni a lam, Yuda hkawhkam ni a labau gawn ai laika hta ka da nga ai, n rai ni? ¹⁹ Yerusalem masha ni gaw shi hpe gumlau nna, shi gaw Lahkisha mare de hprawng wa ai; shanhte gaw Lahkisha de masha shangun nna, dai yang e shi hpe sat kau mu ai. ²⁰ Shi a moi mang hpe gumra ntsa e la wa nhtawm Dawi a mare, Yerusalem hta, kaji kawa ni hte rau makoi mayang de mu ai. ²¹ Yuda mung masha ni nlang hte gaw, asak shi kru ning kaba sai, Azaria hpe san da nna, shi a kawa Amazia malai, hkawhkam shatai mu ai. ²² Hkawhkam wa gaw kaji kawa ni hte rau yup pyaw nga ai hpang e, shi gaw Elat mare hpe de nhtawm, Yuda mung hta bai shalawm la wu ai. ²³ Yuda hkawhkam Yehoasha a kasha Amazia hkaw dung ai shi manga ning hta e, Israela hkawhkam Yehoasha a kasha Yeroboam gaw, Samari mare hta hkaw dung hpang nna, mali shi langai ning up nga ai. ²⁴ Shi gaw Yehowa man e n hkru ai amu galaw nna, Israela masha ni hpe shut shangun ai, Nebat a kasha Yeroboam a yubak hpe koi kau wu ai, n rai. ²⁵ Raitimung, Israela Karai Kasang Yehowa gaw, shi a shangun ma, Gat-hehpera masha Amiti a kasha, myihtoi Yona a n-gup hta htawm tsun ai hte maren, shi gaw Israela lamu ga jarit, Hamat de shang wa ai lam kaw nna, Araba nawng du hkra, gumlau ni a lata na bai dawm la mu ai. ²⁶ Kaning rai nme law, Israela masha ni hkrum ai nni nkri gaw, yak la nga ai hpe, Yehowa mu da wu ai; bawngdung nga bawng lawt pra ai mung, Israela amyu hpe karum ai wa mung n nga ai. ²⁷ Dai rai nna Yehowa gaw, Israela amying hpe lamu ga hta na n shaprai kau mayu ai, nga nna tsun da ai majaw, Yehoasha a kasha Yeroboam a lata hte shanhte hpe hkye mawai la mu ai. ²⁸ Ya naw gawn ra ai Yeroboam a amu ni, shi galaw ai lam mahkra mung, shi a hpung dagu hte shi kaning rai hpyen gasat nna, shawng e Yuda hkawhkam ni up ai Damasku hte Hamat ginwang ni hpe bai dawm la nhtawm, Israela mung hta shalawm lu ai lam ni mung, Israela hkawhkam ni a labau gawn ai laika hta ka da nga ai, n rai ni? ²⁹ Yeroboam gaw shi a kaji kawa ni ngu ai, israela hkawhkam ni hte rau yup pyaw wa nna, shi a kasha Zehkaria gaw shi a malai hkaw dung nga ai.

¹ Israela hkawhkam Yeroboam hkaw dung ai hkun sanit ning hta e, Yuda hkawhkam Amazia kasha Azaria gaw hkaw dung hpang nga ai. ² Shi gaw hkaw dung hpang yang asak shi kru ning rai nga nna, Yerusalem mare hta manga shi lahkawng ning up nga ai: shi a kanu gaw Yerusalem nusha Yehkolia rai lu ai. ³ Shi gaw kawa Amazia lam shagu hte maren Yehowa a man e dingman ai amu galaw nga ai. ⁴ Raitimung, tsaw ai kawng ni a shara ni hpe shi n kau da ai rai nna, mung masha ni gaw dai shara ni hta e shagu hkungga hte manam pyaw ai baw nat nawng ya nga ma ai. ⁵ Ya Yehowa gaw hkawhkam wa hpe ari jahkrum nna, shi si ai shani du hkra manggang kap ai hte nta kaga hta anga nga ai. Hkawhkam a kasha Yohtam gaw, mung masha ni hpe up nga let, htingnu ntsa e mung madu nga ai. ⁶ Naw gawn ra ai Azaria amu ni hte shi galaw ai lam mahkra gaw, Yuda hkawhkam ni a labau gawn ai laika hta ka da nga ai, n rai ni? ⁷ Shingrai Azaria gaw kaji kawa ni hte rau yup pyaw nga nna, Dawi mare hta e shanhte hte rau makoi mayang di mu ai; shi a kasha Yohtam gaw shi a malai hkaw dung nga ai. ⁸ Yuda hkawhkam Azaria hkaw dung ai sumshi matsat ning e, Yeroboam a kasha Zehkaria gaw, Samari mare hta hkaw dung nna, Israela ntsa e shata kru up nga ai. ⁹ Shi gaw kaji kawa ni hte maren, Yehowa man e n hkru ai amu galaw nna, Israela amyu hpe shut shangun ai, Nebat a kasha Yeroboam a yubak hpe koi kau wu ai, n rai. ¹⁰ Yabesha kasha Shalum gaw shi hpe gumlau nna, mung masha ni a man e shi hpe kahtam sat kau nhtawm, shi a malai hkaw dung nga ai. ¹¹ Naw gawn ra ai Zehkaria amu ni a lam, Israela hkawhkam ni a labau gawn ai laika hta ka da nga ai. ¹² Ning rai byin ai lam, Yehowa gaw, Na nshu nsha ni prat mali du hkra, Israela tingnyang hta dung nga na mara ai, nga nna Yehu hpe htawn tsun ai ga, dik wa na lam rai nga ai. ¹³ Yuda hkawhkam Uzia hkaw dung ai sumshi jahku ning e, Yabesha kasha Shalum hkaw dung hpang nna, Samari mare hta e shata mi daram up nga ai. ¹⁴ Shaloi Gadi a kasha Menahem gaw, Tirza mare kaw na lung wa nhtawm, Samari mare hta e Yabesha kasha Shalum hpe kahtam sat kau nna, shi a malai hkaw dung nga ai. ¹⁵ Naw gawn ra ai Shalum a amu ni hte, shi gumlau ai lam hte gaw, Israela hkawhkam ni a labau gawn ai laika hta ka da nga ai. ¹⁶ Shaloi Menahem Tirza mare kaw nna pru yang, Tipsa hte de a lamu ga jarit hkan e nga ai ni nlang hte hpe sat kau mu ai: shi a matu de a mare chyinghka ni n hpaw ya hkraw ai majaw, shi shanhte hpe sat kau nna, naum nasin re ai num ni hpe ahkri ga kau mu ai. ¹⁷ Yuda hkawhkam Azaria hkaw dung ai sumshi jahku ning hta e, Gadi a kasha Menahem gaw, Samari mare hta hkaw dung hpang nga ai rai nna, Israela ntsa e shi ning up nga ai. ¹⁸ Shi gaw Yehowa man e n hkru ai amu galaw nna, Israela masha ni hpe shut shangun ai, Nebat a kasha Yeroboam a yubak hpe, shi a aprat hta koi kau wu ai n rai. ¹⁹ Dai aprat e Asuri hkawhkam Pula gaw Israela mungdan hpe sa gasat wu ai rai nna, Menahem gaw dai mungdan hta grin wa lu hkra, Pula hpe gumhpraw talenta hkying mi sakjaw wu ai. ²⁰ Asuri hkawhkam hpe sakjaw na matu, Menahem gaw Israela mung ting na sut su ai ni kaw gumhpraw lahkawn wu ai rai nna, langai hte langai kaw na gumhpraw shekela manga shi shi hpyi la wu ai. Shingrai Asuri hkawhkam gaw shi a mung de bai wa ai; Israela mungdan hta nga nan nga ai, n rai. ²¹ Naw gawn ra ai Menahem a amu ni hte shi galaw ai lam mahkra gaw, Israela hkawhkam ni a labau gawn ai laika hta ka da nga ai, n rai ni? ²² Ya Menahem gaw kaji kawa ni hte rau yup pyaw wa nna, shi a kasha Pekahia gaw shi a malai hkaw dung nga ai. ²³ Yuda hkawhkam Azaria hkaw dung ai manga shi ning hta e, Menahem a kasha Pekahia gaw Samari mare hta hkaw dung hpang ai rai nna, Israela ntsa e ni ning up nga ai. ²⁴ Shi gaw Yehowa man e n hkru ai amu galaw nna, Israela masha ni hpe shut shangun ai, Nebat a kasha Yeroboam yubak hpe koi kau wu ai, n rai. ²⁵ Shaloi shi a hpyenbu, Remalia kasha Peka gaw shi hpe gumlau nna, Samari mare na hkawhkam htingnu kata e shi hpe mung, Argoba yan Aria hpe mung sat kau mu ai: shi hte rau Gilead masha manga shi rai nga nna, shi gaw hkawhkam wa hpe sat kau nhtawm, shi a malai hkaw dung nga ai. ²⁶ Naw gawn ra ai Pekahia amu ni hte shi galaw ai lam mahkra gaw, Israela hkawhkam ni a labau gawn ai laika hta ka da nga ai. ²⁷ Yuda hkawhkam Azaria hkaw dung ai manga shi lahkawng ning hta e, Remalia kasha Peka gaw, Samari mare hta hkaw dung hpang nna, Israela ntsa e hkun ning up nga ai. ²⁸ Shi gaw Yehowa man e n hkru ai amu galaw nna, Israela masha ni hpe shut shangun ai, Nebat a kasha Yeroboam a yubak hpe koi kau wu ai, n rai. ²⁹ Israela hkawhkam Peka aprat e, Asuri hkawhkam Tiglatpilese sa du nna, Iyon, Abela Bet Mahka, Yanoa, Kedesha, Hazora mare ni mung, Gilead mung hte Naphtali ngu ai Galile mung ting hpe mung gasat nna, mung masha ni hpe Asu ri mung de bawng rim wa mu ai. ³⁰ Shaloi Ela kasha Hoshea gaw, Remalia kasha Peka hpe gumlau nna, shi hpe sat kau nhtawm, Uzia kasha Yohtam a hkaw dung ai hkun ning hta e, Peka malai hkaw dung nga ai. ³¹ Naw gawn ra ai Peka amu ni hte, shi galaw ai lam mahkra gaw, Israela hkawhkam ni a labau gawn ai laika hta ka da nga ai. ³² Israela hkawhkam Remalia kasha Peka hkaw dung ai ni ning hta e, Uzia kasha, Yuda hkawhkam Yohtam gaw hkaw dung hpang nga ai. ³³ Shi gaw hkaw dung hpang yang asak hkun manga ning nga nna, Yerusalem mare hta e shi kru ning up nga ai: shi a kanu gaw Zadok shayi sha Yerusha rai lu ai. ³⁴ Shi gaw kawa Uzia lam mahkra hpe hkan let, Yehowa man e dingman ai amu galaw nga ai. ³⁵ Raitimung tsaw ai kawng ni a shara ni hpe n htawm kau wu ai rai nna, mung masha ni gaw dai shara ni hta shagu hkungga hte manam pyaw ai baw nat nawng nga ma ai. Shi gaw Yehowa nta na ntsa chyinghka galaw da wu ai. ³⁶ Naw gawn ra ai Yohtam a amu ni hte shi galaw ai lam mahkra gaw, Yuda hkawhkam ni a labau gawn ai laika hta ka da nga ai, n rai ni? ³⁷ Ndai aten e Yehowa gaw Suri hkawhkam Rezin hte Remalia kasha Peka hpe Yuda mung de gasat shangun dat mu ai. ³⁸ Ya Yohtam gaw kaji kawa ni hte rau yup pyaw wa nna, shi a kawa Dawi a mare hta e shanhte hte rau makoi mayang di mu ai: shi a kasha Ahaza gaw shi a malai hkaw dung nga ai.

¹ Remalia kasha Peka hkaw dung ai shi sanit ning hta e, Yuda hkawhkam Yohtam a kasha Ahaza gaw hkaw dung nga ai. ² Ahaza gaw hkaw dung hpang yang asak hkun ning rai nga nna, Yerusalem mare hta e shi kru ning up nga ai: shi gaw shi a kawa Dawi zawn, Yehowa a man e tengman ai amu n galaw ai hte, ³ Israela hkawhkam ni a arawn alai hta hkan hkawm nga ai rai nna, Yehowa gaw Israela kashu kasha ni a myiman kaw na shachyut shaden kau ai, maigan amyu ni a matsat shabat lam hkan let, shi a kasha hpe pyi wan nat hkungga shatai nna, ⁴ tsaw ai kawng ni a shara ni hta mung, kawng shagu a ntsa e mung, tsit lali ai hpun shagu a npu e mung, shagu hkungga hte manam pyaw ai baw nat nawng ya wu ai. ⁵ Dai shaloi e Suri hkawhkam Rezin hte, Israela hkawhkam, Remalia kasha Peka gaw, Yerusalem hpe lung gasat nna, Ahaza hpe wang tawn timung, shi hpe dang kau lu mu ai, n rai. ⁶ Raitimung, Suri hkawhkam Rezin gaw, Elat mare hpe Suri mung hta dai aten e bai shalawm la nna, Yuda masha ni hpe Elat mare kaw na shaden kau nhtawm, Suri masha ni gaw Elat de sa du nna, dai ni du hkra dai yang e anga nga ma ai. ⁷ Shingrai Ahaza gaw Asuri hkawhkam Tiglat-pilese hpang de kasa shangun dat nna, Ngai gaw na a mayam, na a nsha rai nga nngai: lung rit, ngai hpe majan galaw ai Suri hkawhkam hte Israela hkawhkam a lata na ngai hpe mawai la e, ngu nna hpyi wu ai. ⁸ Dai hta kaga Ahaza gaw, Yehowa a nta hte hakwhkam htingnu na sutdek hta rawng ai aja gumhpraw mung la wa nna, Suri hkawhkam hpang de kumhpa shagun dat wu ai. ⁹ Asuri hkawhkam mung shi a ga madat nna, Damasku mare hpe lung gasat la nhtawm, mung masha ni hpe Kira shara de bawng rim wa nna, Rezin hpe sat kau wu ai. ¹⁰ Bai hkawhkam Ahaza gaw, Asuri hkawhkam Tiglat-pilese hpe sa bawp la na nga, Damasku mare de lung wa yang, dai mare na tawn hkungri hpe mu da wu ai rai nna, hkawhkam Ahaza gaw de a kasi hte galaw tawn ai hkrang sumla hpe, hkinjawng Uria hpang de shagun dat wu ai. ¹¹ Hkinjawng Uria mung dai tawn hkungri hpe galaw da wu ai: hkawhkam Ahaza gaw Damasku mare na shagun dat ai kasi hte maren, hkinjawng Uria gaw lam shagu hpe, hkawhkam Ahaza garai n wa yang, galaw da ngut nu ai. ¹² Hkawhkam wa gaw Damasku mare na bai wa yang, dai tawn hkungri hpe mu nna, dai de sit sa nhtawm, de a ntsa e hkungga nawng ya wu ai. ¹³ Shi gaw shi a wan nat hkungga hte shadung hkungga nawng ya ai rai nna, dumhpung ru bun nhtawm, mahku hkungga a asai hpe tawn hkungri ntsa e lapri bun wu ai. ¹⁴ Shi a hkungri hta Yehowa nta lapran e nga ai magri hkungri hpe mung, shi gaw Yehowa nta ndaw de na htawt la nhtawm, shi a hkungri a dingdung maga de sit tawn da wu ai. ¹⁵ Bai hkawhkam Ahaza gaw hkinjawng Uria hpe, Jahpawt shagu na wan nat hkungga, hkawhkam wa a wan nat hkungga hte shadung hkungga hpe mung, mung masha ni a wan nat hkungga, shadung hkungga hte shanhte a dum-hpung hpe mung, dai tawn hkungri kaba ntsa e nat nawng nna, wan nat hkungga ni a asai hte, shagu hkungga a asai yawng hpe de a ntsa e lapri bun u: magri hkungri chyawm gaw, ngai jasan yu na matu rai nga ai, ngu nna hkangda wu ai. ¹⁶ Hkawhkam Ahaza hkangda mada hte maren, hkinjawng Uria hkan galaw wu ai. ¹⁷ Bai hkawhkam Ahaza gaw, magri punghkum ni hte seng ai pyen pa ni hpe gaw la nna, angdung ni hpe dai punghkum hta na sit kau nhtawm, magri hka lawng hpe mung, magri usu ni a ntsa na shayu la nna, lung nep hta e tawn da wu ai. ¹⁸ Yehowa a nta hta laban nhtoi e shang na matu galaw da ai jan lam hpe mung, wing kata de shang na hkawhkam wa a lam hpe mung, Asuri hkawhkam hpe hkrit ai majaw, Yehowa nta na arai kaga ni hte maren, galai kau wu ai. ¹⁹ Naw gawn ra ai Ahaza galaw ai amu ni a lam, Yuda hkawhkam ni a labau gawn ai laika hta ka da nga ai, n rai ni? ²⁰ Ya Ahaza gaw shi a kaji kawa ni hte rau yup pyaw wa nna, Dawi mare hta shanhte hte rau makoi mayang di mu ai: shi a kasha Hezekia gaw shi a malai hkaw dung nga ai.

¹ Yuda hkawhkam Ahaza hkaw dung ai shi lahkawng ning hta e, Ela kasha Hoshea gaw, Samari mare hta hkaw dung hpang nna, Israela ntsa e jahku ning up nga ai. ² Shi gaw Yehowa man e n hkru ai amu galaw timung, shi a shawng de na Israela hkawhkam ni daram wa galaw ai n rai. ³ Shi hpe gasat na matu Asuri hkawhkam Shalmanese sa du nna, Hoshea gaw shi a shangun ma tai wa ai hte shi hpe hkansi bang da wu ai. ⁴ Dai hpang Asuri hkawhkam gaw Hoshea hta gumlau myit mu hkrup wu ai: kaning rai nme law, shi gaw Egutu hkawhkam So hpang de kasa shangun dat ai hte, shawoi na hte maren, shaning shagu na hkansi n bang wu ai: dai re ai majaw Asuri hkawhkam shi hpe rim la nna htawng hta gyit bang da wu ai. ⁵ Shingrai Asuri hkawhkam, Israela mungdan ting hta gasat sa wa nna, Samari mare de du jang, masum ning tup wang tawn da mu ai. ⁶ Hoshea hkaw dung ai jahku ning hta e, Asuri hkawhkam gaw Samari mare hpe lu la nna, Israela masha ni hpe Asuri mung de bawng rim wa ai hte, shanhte hpe Hala shara e, Gozan hka makau na Habora ginwang hte, Mede masha ni a mare ni hta nga shangun mu ai. ⁷ Shingrai byin wa ai lam gaw, Israela kashu kasha ni hpe Egutu mung hte, Egutu hkawhkam Hpara-u a lata hta na hkrang shaw la ai, shanhte a Karai Kasang Yehowa hpe shanhte shut hpyit kau nna, hpara shaje ni hpe hkrit kang ai hte, ⁸ shanhte a man na Yehowa shaden kau ai maigan amyu ni a arawn alai hpe mung, Israela hkawhkam ni hkan galaw ai lam hpe mung, hkan nang ma ai majaw byin ai rai nga ai. ⁹ Shingrai Israela kashu kasha ni gaw, shanhte a Karai Kasang Yehowa hpe n ding n man ai amu mayun e galaw mu ai rai nna, langchyi sin ai shara kaw nna bunghku kum ai mare shagu du hkra, tsaw ai kawng ni a shara ni hpe de da mu ai hte, ¹⁰ kawng shagu a ntsa e mung, tsit lali ai hpun shagu a npu e mung, sumla shadaw ni hte Asherim sumla ni hpe shadun da mu ai: ¹¹ dai yang e shanhte gaw, Yehowa shanhte a man na shaden kau ai maigan amyu ni hte maren, tsaw ai kawng shara ni hta, manam pyaw ai baw nat nawng ya nna, Yehowa hpe pawt sindawng shangun na nga, n hkru ai amu galaw ma ai. ¹² Yehowa gaw, Nanhte hpara sumla ni hpe daw jaw lu na n rai nga nna shanhte hpe hkangda timung, hpara sumla ni hpe daw jaw ma ai. ¹³ Raitimung Yehowa gaw, Nanhte a n hkru ai lam ni kaw na kayin wa mu; nanhte a nji nwa ni hpe ngai hkangda ai hte, nye a shangun ma myihtoi ni a n-gup hta nanhte kaw shagun dat ai tara yawng hte maren, ngai hkangda ai lam ni hte matsun maroi ga hpe hkan nang nga mu, ngu nna myihtoi shagu hte, myi san ai ni yawng a n-gup e, Israela amyu masha ni hte Yuda amyu masha ni hpe sakse hkam ya mu ai. ¹⁴ Shanhte mahtang n madat mara nga ai hte, Karai Kasang Yehowa hpe n kam n sham nga ai, tinang a kaji kawa ni hte maren, tinang du shaja nga ma ai. ¹⁵ Yehowa gaw shanthe a kaji kawa ni hte tawn da ai matsun maroi ga hte ga shaka hpe mung, shanhte hpe hkam ya ai sakse ga hpe mung, shanhte kau da ai hte, sawse lawklek ai lam hkan let myit kaba wa nna Yehowa hkum da ai grupyin e nga ai maigan amyu ni a arawn alai hpe, hkan shachyut nga ma ai. ¹⁶ Shanhte a Karai Kasang Yehowa hkangda mada hpe shanhte kau da nna, jaw ai dumsu kasha sumla lahkawng jaw nhtawm, Ashera sumla hpe mung galaw da nna, sumsing lamu na shagan ni hpe nawku let, Bala Hpara hpe dawjau nga ma ai. ¹⁷ Shanhte a shadang sha ni hpe mung, shayi sha ni hpe mung, wan nat hkungga shatai nna, shaba wawt ai hte mandan bau ai lam hkan let, Yehowa hpe pawt sindawng shangun na nga, shi a man e n hkru ai hku galaw na, tinang hkum hpe dut kau mu ai. ¹⁸ Dai re ai majaw Yehowa gaw Israela amyu hpe grai pawt sindawng nga nna, shi a myiman kaw na shanhte hpe yeng seng kau mu ai: Yuda amyu hta kaga kadai hpe mung ngam da mu ai n rai. ¹⁹ Yuda amyu mung, shanthe a Karai Kasang Yehowa a hkangda ai ga hpe n hkan nang ai sha, Israela masha ni hkan ai matsun maroi lam ni hta, hkan hkawm nga ma ai. ²⁰ Yehowa gaw Israela amyu masha ni yawng hte hpe kau da nhtawm, shanhte hpe zingri zingrat nna, shi a myiman kaw na yeng seng kau ai du hkra, hpyen ni a lata hta ap ya kau mu ai. ²¹ Kaning rai nme law, shi gaw Dawi a nta kaw na, Israela amyu ni hpe jahka kau nna, shanhte gaw Nebat a kasha Yeroboam hpe hkawhkam shatai mu ai: Yeroboam gaw Israela amyu ni hpe Yehowa a lam hta na shayit kau nhtawm, shanhte hpe yubak kaba galaw shangun mu ai. ²² Shingrai Yehowa gaw shi a shangun ma myihtoi ni yawng a n-gup hte tsun ai hte maren, shi a myiman kaw na Israela amyu hpe yeng seng kau ai shani du hkra, ²³ Israela kashu kasha ni gaw Yeroboam a yubak lam mahkra hta hkan hkawm nna, dai lam ni hpe koi kau mu ai n rai. Dai rai nna, Israela amyu gaw tinang a mungdan kaw nna bawng rim mat wa ai hkrum ai hte, dai ni du hkra Asuri mung hta e anga nga ma ai. ²⁴ Ya Asuri hkawhkam gaw, Babelon, Hkuhta, Awa, Hamat hte Sehparim masha ni hpe woi wa nna, Israela masha ni a malai, shanhte hpe Samari mare ni hta nga shangun mu ai; shanhte gaw Samari mung hpe up nga nna, de a mare ni hta nga nga ma ai. ²⁵ Shanhte gaw dai mung hta e nga hpang wa ai shaloi e, Yehowa hpe n hkrit hkungga ai majaw, Yehowa shanhte hpang de hkanghkyi shangun dat nna, nkau mi hpe kawa sat kau mu ai. ²⁶ Dai rai nna, shanhte gaw Asuri hkawhkam wa hpe, Samari mare ni hta nang woi htawt tawn da ai masha amyu ni gaw, dai mung na Karai Kasang a htunghking hpe n chye na mu ai majaw, shi gaw shanhte hpang de hkanghkyi shangun dat nna, dai mung na Karai Kasang a htunghking hpe n chye mu ai majaw, nkau mi sat kau ai hkrum masai, nga na tsun ma ai. ²⁷ Dai rai nna Asuri hkawhkam gaw, Dai mung hta na nanhte bawng rim wa ai hkinjawng langai mi hpe dai de bai shangun dat mu; shi gaw dai mung hta nga nga nna, dai mung na Karai Kasang a htunghking lam, shanhte hpe sharin ya mu ga, ngu nna htet dat mu ai. ²⁸ Shingrai Samari mung na bawng rim wa ai hkinjawng langai mi gaw, Behtela mare e bai wa nna, Yehowa hpe hkrit hkungga na lam shanhte hpe sharin ya mu ai. ²⁹ Raitimung, amyu langai hte langai tinang a Hpara sumla ni hpe galaw nna, tinang nga ai mare ni hta, Samari masha ni de da ai tsaw ai kawng ni a nta ni hta e, dai ni hpe shadun da mu ai. ³⁰ Babelon masha ni gaw Suhko-benot, Hkuhta masha ni gaw Nergala, Hamat masha ni gaw Ashima, ³¹ Awa masha ni gaw Nibhaza yan Tartak hpe galaw ma ai: Sehparim masha ni gaw Sehparim Hpara ngu ai Adramelek yan Anamelek a matu, tinang a kashu kasha ni hpe, wan nat hkungga shatai mu ai. ³² Shingrai shanhte gaw Yehowa hpe hkrit hkungga ma timung, tinang a amyu masha ni hta na, hkinjawng shaga nna, shanhte gaw tsaw ai kawng ni a nta ni hta, mung masha ni matu shagu hkungga nawng ya mu ai. ³³ Shanhte gaw Yehowa hpe hkrit hkungga ma timung, tinang buga hte seng ai amyu hku hkan nna, tinang Hpara ni hpe mungdaw jau nga ma ai. ³⁴ Dai ni du hkra pyi shanhte gaw moi na htunghking hte maren hkan galaw ma ai: shanhte gaw Yehowa hpe mung n hkrit hkungga ai hte, shi gaw Israela ngu nna shamying ai Yaku a kashu kasha ni hpe hkangda ai matsun maroi ga, madat da ai ga, jep ai tara hte htet da ai ga hpe hkan nang ma ai, n rai. ³⁵ Yehowa gaw Israela hpe, Nanhte gaw Karai Kasang shaje hpe hkrit hkungga lu na n rai; shanhte hpe nawku na mung, dawjau na mung, shagu hkungga mung, jaw lu na n rai; ³⁶ n-gun kaba hte shada da ai lahpum dan let, nanhte hpe Egutu mung na shapraw woi wa ai Yehowa hpe hkrai nanhte hkrit hkungga nna, shi hpe nawku let shagu hkungga nawng ya lu na myit dai: ³⁷ shi gaw nanhte a matu ka da ai matsun maroi ga, madat da ai ga, jep ai tara hte htet da ai ga ni hpe nanhte a prat dingsa hkan nang nga nna, Karai Kasang shaje hpe hkrit hkungga lu na n rai: ³⁸ ngai nanhte hte tawn da ai ga shaka hpe nanhte malap kau lu na, n rai: Karai Kasang shaje hpe mung hkrit hkungga lu na n rai: ³⁹ nanhte a Karai Kasang Yehowa hpe hkrai hkrit hkungga nga mu; shi gaw nanhte hpe hpyen ni yawng a lata na shaw mawai la na ra ai, nga nna ga shaka tawn da timung, ⁴⁰ shanhte n madat mara ai hte, moi na htunghking hte maren hkan galaw nga ma ai. ⁴¹ Shingrai ndai amyu ni gaw Yehowa hpe hkrit hkungga ai hte rau, tinang jaw ai sumla ni hpe dawjau nga ma ai; shanhte a kashu kasha ni mung, kaji kawa ni hte maren, dai ni du hkra, dai lam naw a galaw nga ma ai.

¹ Ya, Israela hkawhkam Ela kasha Hoshea hkaw dung ai masum ning hta e, Yuda hkawhkam, Ahaza kasha Hezekia hkaw dung hpang nga ai. ² Shi hkaw dung hpang yang, asak hkun manga ning rai nna, Yerusalem mare hta e hkun jahku ning up nga ai: shi a kanu gaw zehkaria shayi sha Abi rai lu ai. ³ Shi gaw kawa Dawi hte maren, Yehowa man e dingman ai amu galaw nna, ⁴ tsaw ai kawng ni a shara ni hpe agrawp kau nna Ashera sumla ni hpe kran daw kau wu ai: Mawshe galaw da ai magri lapu hpe mung kahtum kadaw di kau wu ai; kaning rai nme law, Israela masha ni gaw dai aten du hkra, de a man e manam pyaw ai baw nat nawng ya nga ma timung, shi gaw dai hpe, Magri hkyep, ngu nna shamying kau wu ai. ⁵ Shi gaw Israela Karai Kasang Yehowa hpe shamyet shanat nga ai rai nna, Yuda hkawhkam ni mahkra hta shi zawn re ai, shawng de mung hpang de mung kadai n nga ai. ⁶ Shi gaw Yehowa hta manoi manat nga nna, shi hte n daw n hka let, Yehowa Mawshe hpe hkangda ai tara lam hpe hkan shatup nga ai. ⁷ Shingrai Yehowa gaw shi hte rau nga nga ai; lam shagu hta shi awng wa lu ai; shi Asuri hkawhkam hpe gumlau nna, shi hpe dawjau wu ai, n rai. ⁸ Hpilisti masha ni hpe mung shi gasat nna, Gaza mare hte de a ginwang ting, langchyi sin ai shara kaw nna bunghku kum ai mare du hkra, dang kau wu ai. ⁹ Ya Hezekia hkaw dung ai mali ning ngu na, Israela hkawhkam Ela kasha Hoshea hkaw dung ai sanit ning hta e, Asuri hkawhkam Shalmanese gaw Samari mare hpe lung gasat nna wang tawn wu ai. ¹⁰ Masum ning ladu hkrum jang, dai mare hpe lu la mu ai: Hezekia hkaw dung ai kru ning ngu na hta, Israela hkawhkam Hoshea hkaw dung ai jahku ning hta e, Samari mare hpe lu la mu ai. ¹¹ Shingrai Asuri hkawhkam gaw Israela masha ni hpe Asuri mung de bawng rim wa nna, Hala shara de, Gozan hka makau na Habora ginwang hte, Mede masha ni a mare ni hta nga shangun mu ai: ¹² kaning rai nme law, shanhte a Karai Kasang Yehowa a nsen hpe shanhte n madat mara ai sha, shi a ga shaka hte shi a shangun ma Mawshe htet da mada hpe, shanhte gangkau nna n hkan galaw ma ai. ¹³ Ya hkawhkam Hezekia hkaw dung ai shi mali ning hta e, Asuri hkawhkam Senahkerib gaw, Yuda mung na bunghku kum ai mare ni mahkra hpe lung gasat nna lu la wu ai. ¹⁴ Shaloi Yuda hkawhkam Hezekia gaw, Asuri hkawhkam nga ai Lahkisha mare de shangun nna, Ngai shut ni ai; bai wa nu; nang ngai hpe shagun ai hte mare ngai gunhpai na nngai, nga nna tsun ai majaw, Asuri hkawhkam gaw, Yuda hkawhkam Hezekia hpe gumhpraw talenta masum tsa, aja talenta sumshi shawa wu ai. ¹⁵ Sing rai Hezekia gaw Yehowa nta hte hkawhkam htingnu a sutdek hta rawng ai gumhpraw mahkra hte wa wu ai. ¹⁶ Dai aten e mung Hezekia gaw, Yehowa a nawku Htingnu na chinghka ni hte, shi hkum nan sup da ai shadaw ni a aja hpe, gaw la nna, Asuri hkawhkam wa hpe wa kau wu ai. ¹⁷ Shaloi Asuri hkawhkam gaw, Tartan, Rabsari, Rabshake ni hte rau hpyen luksuk kaba hte hpe, lahkisha mare kaw nna, Yerusalem mare hkawhkam Hezekia hpang de shangun dat mu ai: shanhte gaw Yerusalem mare de lung wa nna, dai de du jang, hpun nba jaw ai: shanhte gaw Yerusalem mare de lung wa nna, dai de du jang, hpun nba jaw ai wa a ga dachyawk lam a lahta sin-gat baw e tsap nga ma ai. ¹⁸ Shanhte gaw hkawhkam wa hpe shga yang, kunhting wa ngu ai Hilkia kasha Eliakim, chyare wa ngu ai Shebna hte labau gawn ai laika hpe ka da ai, Asap a kasha Yoa hte gaw, shanhte hpang de pru sa wa ma ai. ¹⁹ Shaloi Rabshake gaw shanhte hpe, Hezekia hpe ning ngu tsun mu: Galu kaba htum ai Asuri hkawhkam gaw ning nga ai: Nang gaw hpa hta shamyet shanat nga n ta? ²⁰ Nang gaw, Majan gasat na matu hpaji byeng-ya mung, n-gun lagaw mung rawng nga nngai, nga nna tsun timung, dai gaw kaman lila ga hkrai rai nga ai. Ataw, ngai hpe gumlau na nga, kadai hpe hpa nga n ta? ²¹ Ya, yu u, nang gaw daw mat ai malaw dawhkrawng ngu ai, Egutu hkawhkam hpe hpa nga n hka; dia dawhkrawng hpe hpa nga n hka; dai dawhkrawng gaw shamyet shanat ai wa a lata hpe ju htinggrang na ra ai; shingrai, Egutu hkawhkam Hpara-u hpe shamyet shanat ai ni yawng hkrum na mara ai. ²² Bai nanhte gaw, Anhte a Karai Kasang Yehowa hta anhte shamyet shanat ga ai, nga nna ngai hpe htan yang, shi a tsaw ai kawng ni a shara ni hte tawn hkungri ni hpe Hezekia htawm kau nna, Yerusalem e nga ai tawn hkungri hta hkrai nanhte nawku lu na myit dai, nga nna Yuda hte Yerusalem hpe htet da sai, n rai ni? ²³ Dai re ai majw, nye a madu Asuri hkawhkam wa hpe ga sadi tawn da mu; nang gaw gumra jawn ai masha chye tam yang, ngai nang hpe gumra hkying lahkawng jaw na de ai. ²⁴ Nang gaw nye a madu a kaji htum ai hpyenbu langai mi hpe pyi n dang kau lu ai mi, hpyen leng hte gumra lu la na nga, Egutu hkawhkam hpe shamyet shanat nga n hka? ²⁵ Yehowa ahkang n jaw ai, ndai mung hpe jahten na, ngai lung wa n ni? Yehowa gaw ngai hpe, Ndai mung hpe lung gasat nna jahten kau u ngu ni ai, ngu mu ai. ²⁶ Shaloi Hilkia kasha Eliakim hte Shebna yan Yoa gaw Rabshake hpe, Na a mayam ni hpe Suri ga hte tsun dan mi; dai ga anhte chye na ga ai: mare bunghku hta dung nga ai yu maya ni chye na lu hkra, Yuda ga hte hkum tsun mi, ngu nna hpyi mu ai. ²⁷ Rabshake mahtang, Nye a madu gaw, nanghte na madu hpe ndai ga tsun dan u nga, ngai hpe shangun dat ai rai kun? Mare bunghku hta dung nga let, nanhte hte rau tinang a hkyi sha nna, tinang a jit lu ai ni hpang de shangun dat ai, n rai ni? ngu nna shanhte hpe htan mu ai. ²⁸ Bai Rabshake gaw rawt tsap nna, Yuda ga hte nsen kaba sharawt let, Galu kaba htum ai, Asuri hkawhkam a ga hpe madat mara nga mu law, ²⁹ Hkawhkam wa ning nga ai: Hezekia gaw nanhte hpe hkum hklem kau myit ga; shi gaw nanhte hpe nye a lata na mawai la lu na n rai: ³⁰ dai hta n-ga, Hezekia gaw, Yehowa anhte hpe gaja wa teng teng hkye mawai la na rai nna, ndai mare hpe Asuri hkawhkam up lu na n rai, nga nna nanhte hpe Yehowa hta hpa shangun yang, hkum hkan nga myit. ³¹ Hezekia ga hpe hkum madat myit: Asuri hkawhkam gaw ning nga ai, Hpyen sim na lam hpyi mu; ngai hpang de pru marit; nanhte n si ai, hkrung nga lu hkra, nanhte a mungdan hte bung ai, nai mam, tsabyi jahku hte hpring nga ai mung, muk hte tsabyi sun, tsanlun hpun hte lagat jahku hpring ai mung de, ngai nanhte hpe woi wa ai shani du hkra, ³² langai hte langai tinang a tsabyi ru hte tsanlun hpun ta na sha nna, tinang a hka htung na ntsin lu nga mu: Yehowa gaw anhte hpe hkye mawai la na ra ai, nga nna Hezekia nanhte hpe hkalau yang, hkum madat nga myit. ³³ Mung mi hte mung mi a Hpara ni hta, gara mahtang tinang a mung ni hpe Asuri hkawhkam a lata na hkye mawai la lu na rai ta? ³⁴ Hamat yan Arpad a Hpara ni kanang nga ma ta? Sehparim, Hena hte Iwa Hpara ni kanang nga ma ta? Shanhte gaw Samari mung hpe nye a lata na shaw la lu ma ni? ³⁵ Yehowa gaw Yerusalem mare hpe nye a lata na hkyehkrang la lu hkra, mung shagu na Hpara ni mahkra hta, gara mahtang tinang a mung hpe nye a lata na hkyehkrang la lu na rai ta? ngu nna jahtau tsun wu ai. ³⁶ Mung masha ni chyawm gaw ga hkaw mi muk n htan ai, atsin sha nga ma ai: kaning rai nme law, Shi hpe hkum htan myit, ngu nna hkawhkam wa hkum da mu ai. ³⁷ Shaloi Hikia kasha kunhting wa Eliakim, chyare wa Shebna hte labau gawn laika hpe ka da ai, Asap a kasha Yoa hte gaw, tinang a hpun palawng gang je kau let, Hezekia hpang de sa du nna, Rabshake a ga shi hpe shana ya mu ai.

¹ Ya hkawhkam Hezekia gaw dai ga na jang, shi a hpun nba gang je kau nna, lachyit nba bu hpun let, Yehowa nta de shang wa ai. ² Bai shi gaw kunhting wa Eliakim yan chyare wa Shebna hte hknjawng salang ni hpe, lachyit nba bu hpun let, Amot a kasha myihtoi Esaia hpang de shangun dat mu ai. ³ Shanhte gaw shi hpe, Hezekia ning nga ai: DAi ni gaw nni nkri, shatan nhkan, asawng asang hkrum ai nhtoi rai nga ai: ma shangai nhtoi gu timung, shangai lu na n-gun n nga ai. ⁴ Raitimung, ahkrung nga ai Karai Kasang hpe shatan na nga, Asuri hkawhkam shangun ai, shi a mayam Rabshake a ga yawng hpe na a Karai Kasang Yehowa na la u ga; na a Karai Kasang Yehowa nan na la ai ga hpe hkap daru na nhten: dai re ai majaw, naw ngam nga ai ni a matu mara akyu hpyi ya mi law, ngu nna tsun mu ai. ⁵ Shing nga tsun yang, hkawhkam Hezekia shangun ma ni gaw Esaia hpang de du ma ai. ⁶ Esaia mung, Nanhte a madu du hpe ning ngu tsun mu: Yehowa ning nga ai: Nang na ai, Asuri hkawhkam a shangun ma ni ngai hpe shatan nhkan ai ga majaw, hkaum hkrit et; ⁷ yu u, ngai shi hpe myit kaga bang ya nna, shi gaw ashi na ai hte tinang a mung de bai wa mat na ra ai; dai mung hta e ngai shi hpe nhtu hte sat kau na we ai, nga ai, ngu nna shanhte hpe tsun dat mu ai. ⁸ Shang rai Rabshake gaw bai wa yang, Asuri hkawhkam gaw Libna hpe gasat nga ai mu wu ai; kaning rai nme law, shi gaw Lahkisha kaw na htawt pru wa ai lam, na wu ai. ⁹ Bai, Ehtiopi hkawhkam Tirhaka nang hpe gasat na lung wa ra ai, nga ai ga na wu yang, shi gaw Hezekia hpang de kasa bai shangun dt nna, ¹⁰ Yuda hkawhkam Hezekia hpe ning ngu tsun u: Yerusalem mare gaw Asuri hkawhkam a lata hta a shang lu na re ai, nga nna, nang shamyet shanat nga ai, na a Karai Kasang gaw, nang hpe n hkalem kau u ga. ¹¹ Yu u, Asuri hkawhkam ni gaw mung shagu hpe atsai awai shaza kau ai lam, nang na yu nit dai; nang chyu lawt lu na n ni? ¹² Nye ji wa ni e jahten kau ai amyu ni gaw, Gazon, Haran, Rezep hte Telasa ginwang hkan e nga ai Eden kashu kasha ni rai ma ai; tinang a Hpara ni shanhte hpe hkye mawai la lu manu ni? ¹³ Hamat hkawhkam, Arpad hkawhkam hte Sehparim mare, Hena hte Iwa mare ni hpe up ai hkawhkam ni gaw kanang rai nga ma ta ? ngu nna htet da wu ai. ¹⁴ Shaloi Hezekia gaw dai laika hpe kasa wa a lata na hkap la hti yu nhtawm, Yehowa nta de shang nna, Yehowa man e hpyan tawn wu ai. ¹⁵ Shingrai Hezekia gaw Yehowa man e, Hkerubim ntsa e dung nga ai Israela Karai Kasang Yehowa e; ga ntsa mungdan mahkra a Karai Kasang nang chyu rai nga ndai: nang gaw sumsing lamu hte ginding aga hpe hpan da nu ai. ¹⁶ Yehowa e, na la nna madat mara ya e; Yehowa e, na a myi hpaw nna mada yu u; ahkrung nga ai Karai Kasang hpe shatan nhkan ai Senahkerob shagun ai ga mahkra hpe matsing nga u law. ¹⁷ Yehowa e, Asuri hkawhkam ni gaw gaja wa teng teng masha amyu ni hte tinang a lamu ga hpe shaza kau manu ai rai nna, ¹⁸ Shanhte a Hpara ni hpe wan hta kabai bang kau mu ai; shanhte chyawm gaw Karai Kasang nrai; masha a lata hte galaw da ai hpun hte nlujng sumla hkrai rai ma ai majaw, dai ni hpe jahten shabya kau mu ai. ¹⁹ Ya chyawm gaw, anhte a Karai Kasang Yehowa e, nang Yehowa hkrai Karai Kasang rai nga ai gaw, ga ntsa mungdan ni nlang chye na lu mu ga, anhte hpe shi a lata na hkyehkrang la mi law, ngu nna hpyi nem wu ai. ²⁰ Shaloi Amot kasha Esaia gaw Hezekia hpang de shangun dat nna, Israela Karai Kasang ning nga ai: Nang gaw Asuri hkawhkam Senahkereb a lam, nye a man e hpyi nem ai ga, ngai na ni ai. ²¹ Da ndai gaw, Yehowa shi a lam tsun ai ga rai nga ai: Ziun shayi hkawnsek gaw nang hpe jahpoi mani kau nga ai; Yerusalem mare shayi sha gaw na a hpang e baw kanga nga ai. ²² Nang gaw kadai wa hpe matsa jahpoi kau wu ni? kadai wa hpe na a nsen sharawt nna, na a myiman hte gumrawng gumtawng di kau wu ta? Israela a Chyoi Pra re ai Wa hpe rai nga a hka! ²³ Nang gaw, na a kasa ni a n-gup hte dai Madu hpe shatan nhkan nna, Ngai gaw nye a law la ai hpyen leng ni hte bum pungding ni a ntsa de lung wa lu nna, Lebanon maling ka-ang de shang lu na nngai: ngai gaw de a tsaw htum ai arit hpun ni hte, hpu htum ai marau hpun ni hpe kran kau nna, de a tsan htum ai maling na nga pyaw ai shara de pyi shang wa na nngai. ²⁴ Ngai gaw tsasam mung ni hta hka htung htu nna lu lu nngai; nye a lagaw lahpan hte Egutu mung na hka nu hka shi yawng shahkyet kau na we ai, nga nna nang tsun hkrup nu hka. ²⁵ Ngai gaw chyloi nhkoi kaw nna galaw yu ai lam hte, moi na prat kaw nna shabyin ai lam, nang n na yu n ni ? Ya mung, nang gaw bunghku kum ai mare ni hpe sharun kau nna nlung sumpum shatai kau na lam gaw, ngai shabyin ai lam hkrai rai nga ai. ²⁶ dai re ai majaw mare masha ni gaw n-gun yawm wa nna, myit mak ai hte myit htum mat masai; shanhte gaw nam na singdu hte sit lali ai shatmai lap zawn, nta ntsa e tu ai tsing hte garai n kaba ai nyip mat wa ai mam maku zawn, rai nga ma ai. ²⁷ Raitimung, nang dung nga yang, pru wa shang wa yang, ngai hpe n-yun bu ai lam ngai chye nga nngai. ²⁸ Nang ngai hpe n-yun bu ai hte na a gumrawng gumtawng ga nye na hta e shang sai majaw, ngai nang hpe lashoi shoi nna runghtung dat nhtawm, nang du sa ai lam hku bai nhtang wa shangun na de ai. ²⁹ Da ndai gaw na a matu kumla tai u ga: nanhte gaw dai ning mam nhpan sha lu na marin dai; htaning mung dai hta na shi hkrai tu ai mam sha lu na myit dai: masum ning ngu na hta gaw nli gat hkai nna de a asi sha mu. Tsabyi sun hta hkai nna de a asi sha mu. ³⁰ Tsin-yam lawt ai Yuda dap lakung ni mung, ru bai jung nna, asi si kungdam wa na mara ai: ³¹ kaning rai nme law, naw ngtam nga ai ni Yerusalem mare kaw na, tsin-yam lawt ai ni Ziun bum kaw na, pru wa na mara ai: ³² Dai re ai majaw Yehowa gaw Asuri hkawhkam a lam ning nga tsun ai: Shi gaw ndai mare hta shang lu na nrai; dai kata de pala langai mi gap lu na n rai; de a man e nhtu n-gang n madun dan lu na hte kaduk mung htu lu na nrai. ³³ Shi du sa ai lam hku shi nhtang wa nna, ndai mare hta shang lu na n rai. ³⁴ Kaning rai nme law, Yehowa tsun ai gaw, Ngai hkum nan a majaw mung, nye shangun ma Dawi a majaw mung, ndai mare hpe ngai makawp maga nna hkyehkrang la na we ai, nga ai, ngu dat mu ai. ³⁵ Dai shana jang Yehowa a lamu kasa pru sa nna, Asuri masha ni a hpyendap hta, marai sen me mun matsat hkying manga hte hpe sat kau wu ai: jahpawt jau jau e rawt yu yang, yu mu, ndai ni, nlang si mang rai nga ma ai. ³⁶ Shingrai Asuri hkawhkam Senahkereb gaw, dap brun mat wa nna, Ninewe mare de wa nhtang nga nga ai. ³⁷ Dai hpang shi gaw shi a Hpara Nisrok a nta hta nawku nga yang, shi a kasha Adramelek yan Shareze gaw shi hpe kahtam sat kau mu ai; shan gaw Ararat mung de hprawng mat wa nna, shi a kasha Eshadon, shi a malai hkaw dung nga ai.

¹ Dai aten hte yang Hezekia gaw si machyi hkrum nga ai rai nna, Amot a kasha myihtoi Esaia shi kaw sa du nna, Yehowa ning nga ai: Nang hkrung nga lu na n rai, si na ndai majaw, na a nta na dinghku lam hpajang da u, ngu wu ai. ² Dai rai nna Hezekia gaw shakum de myiman yawng let, ³ Yehowa e, ngai gaw na a man e kangka nna myit ding ai hte hkawm nga nngai rai nna, nang sharawng awng ai lam shagu hpe hkan galaw ni ai gaw, dum ya e law, ngu nna hkran ngu hkrap ngoi let, Yehowa hpe hpyi nem wu ai. ⁴ Ya Esaia gaw mare ka-ang garai n du lu yang, Yehowa a ga shi kaw du nna, ⁵ Bai nhtang u; nye a amyu du Hezekia hpe ning ngu u; Na nwa Dawi a Karai Kasang Yehowa ning nga ai, Na akyu hpyi ai ga ngai na ni ai, na myi pruwi ngai mu nngai: yu u, ngai nang hpe shamai ya nna, masum ya laman e Yehowa a nta hta nang shang lu na ndai. ⁶ Ngai na asak hpe shi manga ning naw jat ya na de ai; nang hpe mung, ndai mare hpe mung, Asuri mung na hkawhkam wa a lata na hkye mawai la na we ai; ngai hkum nan a majaw mung, nye shangun ma Dawi a majaw mung, ndai mare hpe ngai makawp maga na we ai, nga ai, ngu wu ai. ⁷ Bai Esaia gaw, Maihpang si gumpa mi la wa rit, ngu wu ai; shaloi shanhte la wa nna, shakrawi hta up ya wu yang, shi mai wa ai. ⁸ Raitimung Hezekia gaw, Yehowa ngai hpe shamai ya nna, masum ya laman e Yehowa nta hta ngai lung lu na gaw, hpa sakse kumla danpru na ra ta? ngu nna Esaia hpe san wu ai. ⁹ Shaloi Esaia gaw, Yehowa tsun dan ai hte maren, ndai lam shabyin na ra ai, da ndai gaw na a matu Yehowa kaw na sakse kumla tai na ra ai: hkying shadawn ai shingna gaw n-gam shi sit lung wa na kun? Shing n rai, n-gam shi bai nhtang wa na kun? ngu nna san wu ai. ¹⁰ Hezekia mahtang, shingna gaw n-gam shi sit lung na loi nga ai; dai lam n rai, n-gam shi nhtang wa u ga, ngu nna hkap htan wu ai. ¹¹ Shaloi myihtoi Esaia gaw Yehowa hpe hpyi jahtau wu ai rai nna, shi gaw Ahaza a hkying shadawn ai lakang hta, shingna n-gam shi sit lung sai hpe, bai nhtang sit kau dat wu ai. ¹² Dai aten e Babelon hkawhkam, Baladan a kasha, Berodak-baladan gaw, Hezekia machyi nga ai lam na nna, shi hpang de laika hte kumhpa shagun dat wu ai. ¹³ Hezekia mung shanhte hpe hkap hkalum la nna, shi a arung arai nta na aja gumhpraw, manam pyaw ai baw, hpu la ai sau, hpyen laknak rawng ai nta hte shi a sutdek hta rawng marawng mahkra hpe madun dan mu ai: Hezekia gaw shi a nta hte shi a mungdan hta rawng marawng, shanhte hpe n madun dan ai, hpa mung n nga ai. ¹⁴ Shaloi myihtoi Esaia gaw hkawhkam Hezekia hpang de sa du nna, Ndai manam ni gaw hpa lam tsun ma ta? kanang nna nang kaw sa du ma ta? ngu nna san wu yang, Hezekia gaw, Tsan tsan e nga ai Babelon mung na sa du ma ai, ngu nna htan wu ai. ¹⁵ Bai Esaia gaw, Shanhte na a nta hta hpa mu lu ma ta? ngu nna san wu yang, Hezekia gaw, Nye nta hta rawng marawng mahkra hpe mu masai; nye sutdek hta rawng marawng, ngai shanhte hpe n madun dan ai gaw, hpa mung n nga ai, ngu nna htan wu ai. ¹⁶ Dai rai nna Esaia gaw Hezekia hpe, Yehowa a ga madat u. ¹⁷ Yu u, Yehowa ning nga ai, Na nta hta rawng marawng hpe mung, dai ni du hkra na nji nwa ni mahkawng da ai arai hpe mung, Babelon mare de htawm mat wa ai aten du na ra ai: hpa mung ngam da na n rai. ¹⁸ Nang shaprat ai, na nshu nsha ni hpe mung, shanhte woi wa nna, shanhte gaw Babelon hkawhkam a htingnu hta e unuk ngu ai ni tai na mara ai, ngu wu ai. ¹⁹ Shaloi Hezekia gaw, Nang htawn tsun ai Yehowa a ga mai kaja nga ai: bai, Gaja wa nye a aprat e ngwi pyaw ai hte sadi sahka rai nga yang, mai nga ai n rai ni? ngu nna Esaia hpe tsun wu ai. ²⁰ Naw gawn ra ai Hezekia amu ni, shi a hpung dagu mahkra hte, dai hka lawng hte hka hkawng hpe, shi kaning rai galaw nna, mare kata de hka shalen ai lam, Yuda hkawhkam ni a labau gawn ai laika hta ka da nga ai, n rai ni? ²¹ Shingrai Hezekia gaw shi a kaji kawa ni hte rau yup pyaw wa nna, shi a kasha Manashe gaw shi a malai hkaw dung nga ai.

¹ Manashe gaw hkaw dung hpang yang, asak shi lahkawng ning kaba nna, Yerusalem mare hta manga shi manga ning up nga ai: shi a kanu gaw Hepziba mying lu ai. ² Shi gaw, Israela kashu kasha ni a man na, Yehowa shaden kau ai, maigan amyu ni a matsat shabat lam hkan let, Yehowa man e n hkru ai amu galaw nga ai. ³ Shi a kawa Hezekia run kau ai tsaw ai kawng ni a shara ni hpe shi bai de da nna, Israela hkawhkam Ahab hte maren, Bala hkungri ni galaw tawn nna, Ashera sumla galaw ai hte, sumsing lamu na shagan ni yawng hte hpe nawku nna, dawjau wu ai. ⁴ Yehowa gaw, Yerusalem mare hta e nye a amying ningsang tawn da na we ai, nga timung, shi gaw Yehowa a nta hta tawn hkungri shaje galaw da wu ai. ⁵ Bai shi gaw Yehowa a nta wing lahkawng hta, sumsing lamu na shagan ni yawng a matu, tawn hkungri galaw da wu ai. ⁶ Dai hta n-ga shi gaw shi a kasha hpe wan nat hkungga shatai nna, shaba wawt ai hte mandan lakle amu galaw nna, gum-hpan hpan ai ni hte nat shung ai ni hte rau kanawn let, Yehowa hpe pawt sindawng shangun na nga, shi a man e n hkru ai amu law law galaw wu ai. ⁷ Israela amyu ni yawng hta na ngai lata la ai, ndai nta hta mung, Yerusalem mare hta mung, nye a amying hpe ngai tutnawng e tawn da nga ai rai nna, ⁸ ngai mung, nye shangun ma Mawshe mung, shanhte hpe htet da mada mahkra hkan galaw nna shatup nga ma yang gaw, shanhte a kaji kawa ni hpe ngai jaw da ai mung hta na, ngai shanhte hpe lam bai shadam na n rai, nga nna Yehowa gaw Dawi hte shi a kasha Shawlumon hpe tsun da timung, shi gaw shi tawk ai Ashera sumla hpe, Yehowa nta hta tawn da wu ai. ⁹ Raitimung, shanhte n madat mara nga ma ai hte, Israela kashu kasha ni a man na, Yehowa shaza kau ai maigan amyu ni galaw ai n hkru ai lam hta grau nna galaw mu ga nga, Manashe gaw shanhte hpe lau da mu ai. ¹⁰ Dai re ai majaw Yehowa gaw shi a shangun ma myihtoi ni a n-gup hte, ¹¹ Yuda hkawhkam Manashe gaw matsat shabat amu galaw nna, shi a shawng e nga ai Amori masha ni hta grau nna n hkru ai amu shachyen ai hte, shi a sumla ni e Yuda amyu hpe mung shut shangun ai majaw, ¹² Israela Karai Kasang Yehowa ning nga ai, Yu mu, shiga na lu ai ni a na lahkawng maga na mau hkra, Yerusalem hte Yuda ntsa e ngai ari ahpri shapraw na we ai. ¹³ Samari mung hpe shadawn yu ai sumri hte, Ahab a nta na ni hpe shadawn yu ai chyu noi ai sumri e nan, Yerusalem mare ntsa e ngai shadawn yu nna, masha gaw wan hpe katsut kau nhtawm ka-up kau ai zawn, ngai Yerusalem hpe di na we ai. ¹⁴ Naw ngam nga ai nye a Sali wunli amyu hpe ngai kau da nna, shanhte hpe hpyen ni a lata hta ap kau na mawe ai; hpyen ni mung shanhte hpe kashun kashe zingri zingrat di na mu ai. ¹⁵ Kaning rai nme law, shanhte a kaji kawa ni gaw Egutu mung na pru wa ai shani kaw nna dai ni du hkra, shanhte nan nye a man e n hkru ai amu galaw nna, ngai hpe pawt sindawng shangun mi ai, ngu nna tsun mu ai. ¹⁶ Shingrai Manashe gaw Yehowa a man e n hkru ai amu galaw ai hte, Yuda masha ni hpe shut shangun ai hta n-ga, mara n kap ai ni law law hpe sat kau nna, dai ni a asai gaw Yerusalem mare maga mi kaw nna maga mi du hkra hpring nga ai. ¹⁷ Naw gawn ra ai Manashe a amu ni, shi galaw ai lam ni hte shut hpyit ai amu gaw, Yuda hkawhkam ni a labau gawn ai laika hta ka da nga ai, n rai ni? ¹⁸ Shingrai Manashe gaw shi a kaji kawa ni hte rau yup pyaw wa nna, shi a nta hte seng ai, Uza ngu ai sun hta makoi mayang de ai hkrum wu ai: shi a kasha Amon gaw shi a malai hkaw dung nga ai. ¹⁹ Amon gaw hkaw dung hpang yang, asak hkun lahkawng ning rai nna, Yerusalem mare hta ni ning up nga ai; shi a kanu gaw, Yotba mare na Haruze a shayi sha Meshulemet rai lu ai. ²⁰ Amon gaw shi a kawa Manashe hte maren Yehowa a man e n hkru ai amu galaw nga ai. ²¹ Shi gaw, shi a kawa hkan hkawm ai lam mahkra hta hkan nang nna, kawa dawjau ai sumla ni hpe dawjau nna nawku nga ai: ²² shi a kaji kawa ni a Karai Kasang Yehowa hpe shi kau da nna, Yehowa a lam hta n hkawm nga ai. ²³ Shingrai Amon a ali ama ni gaw shi hpe gumlau nna, shi a nta kata e shi hpe sat kau mu ai. ²⁴ Mung masha ni chyawm gaw hkawhkam Amon hpe gumlau ai ni nlang hte hpe sat kau nhtawm, shi a kasha Yoshia hpe kawa a malai hkawhkam shatai mu ai. ²⁵ Naw gawn ra ai, Amon galaw ai amu ni mahkra gaw, Yuda hkawhkam ni a labau gawn ai laika hta ka da nga ai, n rai ni? ²⁶ Shi gaw Uza a sun hta shi a lup kata e makoi mayang di ai hkrum wu ai rai nna, shi a kasha Yoshia gaw, shi a malai hkaw dung nga ai.

¹ Yoshia gaw hkaw dung hpang yang asak matsat ning rai nna, Yerusalem mare hta sumshi langai ning up nga ai: shi a kanu gaw Bozakat mare na Adaia shayi sha Yedida rai lu ai. ² Yoshia gaw Yehowa a man e tengman ai amu galaw nna, pai de hkra de n yit ai sha, kawa Dawi a lam mahkra hta hkan hkawm nga ai. ³ Ya hkawhkam Yoshia gaw, shi hkaw dung ai shi matsat ning e, Meshulam a kashu, Azalia kasha, chyare wa Shahpan hpe shangun dat nna, Yehowa nta hta nga ai hkinjawng agyi wa Hilkia hpang de lung wa su: ⁴ Shi gaw, Yehowa nta hkinbawng sin ai ni, mung masha ni a lata na lahkawn la ai gumhpraw hpe hti sawn yu u ga: ⁵ bai, dai gumhpraw hpe, Yehowa nta amu up ai ni a lata hta ap ya u ga; shanhte gaw Yehowa nta run hten ai shara ni hpe galaw nga ai ni hpe karan jaw mu ga: ⁶ lasama ni, nta galaw ai ni, wut nep ai ni a matu mung nta hpe lajang na nga, ngau hte tawk ai nlung mari na matu mung, gumhpraw dai rai u ga, ngu dat wu ai. ⁷ Raitimung, shanhte kangka rai nga ai majaw, shanhte a lata hta ap ya ai gumhpraw hpe, hpa jahpan hpyi wu ai, n rai. ⁸ Bai hkinjawng agyi wa Hilkia gaw, Yehowa a nta kata e dai tara laika hpe ngai mu hkrup se ai, ngu nna chyare wa Shahpan hpe tsun wu ai. Hilkia gaw dai laika Shahpan hpe ap ya nna, shi gaw dai hpe hti wu ai. ⁹ Chyare wa Shahpan mung hkawhkam wa hpang de sa nna, na a shangun ma ni gaw, dai nta hta na gumhpraw hpe shaw la nna, Yehowa nta amu galaw ai ni hpe up ai ni a lata hta ap ya manu ai, ngu wu ai. ¹⁰ Dai hta kaga chyare wa Shahpan gaw hkawhkam wa hpe, Hkinjawng Hilkia gaw laika langai mi ngai hpe ap ya ni ai, ngu nna hkawhkam wa hpe hti dan wu ai. ¹¹ Ya hkawhkam wa gaw dai tara laika a mungga na ngut jang, shi a hpun palawng gang je kau wu ai. ¹² Shingrai hkawhkam wa gaw hkinjawng Hilkia, Shahpan a kasha Ahikam, Mihkaia a kashu Akbora, chyare wa Shahpan hte hkawhkam wa shangun ma Asaia hpe hkangda nna, ¹³ Ndai mu hkrup ai laika a mungga lam, nye a matu mung, mare masha ni a matu mung, Yuda mung ting na amyu masha ni a matu mung, Yehowa hpe sa san yu mu: kaning rai nme law, ndai laika hta anhte a lam ka da mada hte maren, anhte a ji wa ni gaw n hkan galaw nga ma ai majaw, Yehowa gaw anhte hpe grai wa pawt sindawng bu nga ai, ngu dat mu ai. ¹⁴ Dai rai nna hkinjawng Hilkia, Ahikam, Akbora, Shahpan hte Asaia gaw, Hara a kashu, Tikwa a kasha, hkawhkam wa a hpun palawng sin ai, Shalum a madu jan num myihtoi Hulda hpang de sa shang nna shi hte ga tsun mu ai: shi gaw Yerusalem mare wing lahkawng ngu na daw hta nga nga ai. ¹⁵ Dai myihtoi num gaw, Israela Karai Kasang Yehowa ning nga ai: Ngai hpang de nanhte hpe shangun dat ai wa hpe ning ngu mu. ¹⁶ Yehowa ning nga ai: Yuda hkawhkam hti yu ai laika ga mahkra hte maren, ndai mare hte dai hta e nga ai ni mahkra a ntsa e, tsin-yam tsindam shapraw na we ai: ¹⁷ hpa majaw nga yang, shanhte ngai hpe kau da nna, shanhte a lata e galaw ai amu hte ngai hpe pawt sindawng shangun na nga, Hpara shaje ni a man e manam pyaw ai baw nat nawng ya ma ai. Dai re ai majaw ndai shara a lam nye a pawt sindawng ai wan grung nga nna krip wa na n rai. ¹⁸ Raitimung, Yehowa hpe san yu na nga, nanhte hpe shangun dat ai Yuda hkawhkam hpe ning ngu mu: Israela Karai Kasang Yehowa ning nga ai; Nang na yu ai mungga a lam da ndai rai nga ai: ¹⁹ ndai shara hte dai hta e nga ai masha ni gaw, katsi katsang shara hte dagam dala hkrum ai amyu tai na mara ai, nga nna ngai tsun ai ga hpe nang na ai shaloi, nang myit kya nna, Yehoa a man e myit shagrit nga ai hte, na a hpun palawng hpe gang je kau nna, nye a man e hkrapngu hkrapngoi nga ndai majaw, ngai Yehowa nan na a ga hpe madat mara ya sade ai. ²⁰ Dai re ai majaw, yu u, ngai nang hpe na a nji nwa ni hte rau jahpawng da nna, nang gaw ngwi pyaw ai hte na a lup hta shang lu na rin dai; ndai shara ntsa e ngai shapraw ai tsin-yam tsindam hpe na a myi hte mu lu na n rai, ngu mu, ngu nna tsun dat mu ai. Shingrai shanhte gaw bai wa nna, hkawhkam wa hpe dai ga htawn tsun dan mu ai.

¹ Dai re ai majaw hkawhkam wa gaw, Yuda mung hte Yerusalem mare na agyi salang ni nlang hte hpe shi hpang de shaga la nna, ² hkawhkam wa gaw Yuda amyu masha ni hte Yerusalem mare masha ni mahkra hte hpawn, hkinjawng ni, myihtoi ni hte mung masha kaji kaba mahkra hte rau, Yehowa nta de lung wa nna, shi gaw, dai yang e mu hkrup ai laika ga shaka mahkra hpe shanhte a man e hte dan mu ai. ³ Dai hta kaga hkawhkam wa gaw dai shadaw makau e tsap nga let ndai laika hta ka da nga ai ga shaka hpe shagrin tawn da na hte, Yehowa hpe hkan nang let, Yehowa a hkangda ai ga, sakse ga hte matsun maroi ga hpe, myit masin mahkra hte n-gun lagaw mahkra hte hkan shatup na nga, Yehowa a man e ga shaka tawn da wu ai: mung masha ni nlang hte mung dai ga shaka hpe yin la mu ai. ⁴ Bai hkawhkam wa gaw, Yehowa nawku Htingnu hta na, Bala Hpara matu mung, Ashera sumla matu mung, sumsing lamu shagan ni a matu mung galaw da ai arai ni yawng hpe shapraw kau mu, ngu nna hkinjawng agyi Hilkia hte hkinjawng hpunglum ni hte nta hkinbawng sin ai ni hpe hkangda mu ai rai nna, dai arai ni hpe Yerusalem mare shinggan, Kedron pa hta nat kau nhtawm, de a wan dap ni hpe Behtela du hkra hpai kau mu ai. ⁵ Dai hta kaga shi gaw, Yuda mare ni a tsaw ai kawng ni a shara ni hte, Yerusalem mare grupyin na shara ni hta manam pyaw ai baw nat nawng na matu, Yuda hkawhkam ni san da ai sumla ni a hkinjawng ni hpe mung, Bala Hpara, ajan hte shata, shagan sumla ni hte sumsing lamu na zaw nawng zaw wa hpe manam pyaw ai baw nat nawng ya ai ni hpe mung, shachyut kau mu ai. ⁶ Yehowa a nta na Ashera sumla hpe mung, Yerusalem mare shinggan, Kedron hkaraw de htawm la nna, dai yang e dai sumla hpe nat kau ai hte ayun ayaw adup kau nhtawm, yu maya ni a lupwa e ayai kau mu ai. ⁷ Bai shi gaw, Ashera sumla matu nba grang da ai num ni nga ai, Yehowa nta wing kata na shawa la shawa num ni a nta hpe mung agrawp kau wu ai. ⁸ Hkinjawng ni mahkra hpe mung, Yuda mare ni hta na, shi shapraw kau nhtawm, hkinjawng ni manam pyaw ai baw nat nawng ya ai tsaw ai kawng ni hpe, Geba mare kaw nna Berasheba du hkra, awu asin di kau wu ai: mare agyi wa Yoshua chyinghka lam makau na, mare chyinhka lam a pai maga de ang ai, chyinghka ni hte seng ai tsaw ai shara ni hpe mung, agrawp kau wu ai. ⁹ Tsaw ai kawng shara ni a hkinjawng ni chyawm gaw, Yerusalem mare na Yehowa a tawn hkungri de n ni lu timung, kahpu kanau ni hte rau matsi n rawng ai muk sha lu ma ai. ¹⁰ Kadai mung Molek Hpara a matu, tinang a shayi shadang sha hpe wan nat hkungga n shatai ya lu hkra, shi gaw Hinom kashu kasha ni a kadit e nga ai Tohpet shara hpe mung, awu asin di kau wu ai. ¹¹ Yuda hkawhkam ni, ajan hpe nawku na matu, Yehowa a nta de shang ang ai, hkringmang Nahtan-melek a wing na gawk makau e tawn da ai gumra ni hpe mung, shi htawm kau nna, jan leng ni hpe mung nat kau wu ai. ¹² Ahaza a ntsa gawk a ntsa e Yuda hkawhkam ni galaw tawn ai tawn hkungri ni hte, Yehowa nta na wing lahkawng hta manashe galaw da ai tawn hkungri ni hpe mung, hkawhkam wa run kau nna, ayun ayaw agrawp kau nhtawm, Kedron hkaraw hta kabai ayai kau wu ai. ¹³ Israela hkawhkam Shawlumon gaw, Yerusalem mare tawtap na hten run bum ngu ai hkra maga shara hta galaw da ai, Sidon a kaya kahpa lam ngu ai, Ashtoret Hpara shayi sha matu mung, Moba masha ni a kaya kahpa lam ngu ai, Hkemosha Hpara a matu mung, Ammon a kashu kasha ni a matsat shabat lam ngu ai, Milhkom a matu mung, galaw tawn ai tsaw ai kawng ni a shara ni hpe mung, hkawhkam wa awu asin di kau wu ai. ¹⁴ Bai shi gaw shadaw sumla ni hpe agrawp kau ai hte, Asherim sumla ni hpe kran kau nna, de a shara ni hta, si ai ni a nrut nra hte jahpring da wu ai. ¹⁵ Dai hta n-ga, Israela masha ni hpe shut shangun ai, Nebat a kasha Yeroboam gaw, Behtela shara e galaw da ai tawn hkungri hpe run kau ai hte, de a tsaw ai kawng shara hpe, nat kau nhtawm, ayun ayaw di kau ai hte, Ashera sumla hpe mung nat kau wu ai. ¹⁶ Ya Yoshia gaw kayin yu nna, dai bum ntsa e nga ai lup ni hpe mada mu wu yang, shi masha shangun nna, dai lup ni hta na nrut nra ni hpe lai la nhtawm, ndai amu ni a lam, Karai Kasang a masha wa htawn tsun da ai. Yehowa a ga hte maren, ndai nrut nra ni hpe, tawn hkungri ntsa e nat nna awu asin di kau wu ai. ¹⁷ Bai Yoshia gaw, Ndai ngai mu ai nlung mahtan daw gaw, kaning re ai rai ta? ngu nna san mu yang, mare masha ni gaw, Nang madu Behtela tawn hkungri hpe galaw ai hte maren, Yuda mung na pru nna, ndai lam htawn tsun ai, Karai Kasang a masha wa a lup rai nga ai, ngu nna shi hpe sha na ya mu ai. ¹⁸ Dai rai nna shi gaw, Dai anga nga u ga; shi a nrut nra ni hpe kadai mung n lai kau u ga, ngu nna tsun mu ai majaw, shi a nrut nra ni hpe kadai mung n lai kau u ga, ngu nna tsun mu ai majaw, shi a nrut nra ni hte, Samari mung na pru ai myihtoi wa a nrut nra ni hpe, rau nga nga shangun mu ai. ¹⁹ Israela hkawhkam ni gaw Yehowa hpe pawt shangun na nga, Samari mare ni hta na tsaw ai kawng shara ni hta de da ai nta ni mahkra hpe mung, Yoshia shaza kau nna, Behtela e galaw ai lam hte maren, dai shara ni hpe mung galaw wu ai. ²⁰ Tsaw ai kawng shara ni a hkinjawng ni mahkra hpe mung, de a tawn hkungri ni a ntsa e, shi sat kau nna, masha nrut nra hpe de a ntsa e nat kau nhtawm, Yerusalem mare de bai wa mat ai. ²¹ Bai hkawhkam wa gaw mung masha ni mahkra hpe, Ga shaka laika hta ka da nga ai hte maren, nanhte a Karai Kasang Yehowa a matu Shalai wa ai poi galaw mu, ngu mu ai. ²² Gaja wa Israela amyu ni hpe dawdan ya ai, tara agyi ni a aprat kaw nna, Israela hkawhkam ni a aprat hte, Yuda hkawhkam ni a aprat htum hkra, dai zawn re ai Shalai wa ai poi hpe galaw yu ai, n rai: ²³ hkawhkam Yoshia hkaw dung ai shi matsat ning e, dai Shalai wa ai poi hpe, Yehowa a matu, Yerusalem mare hta galaw sha mu ai. ²⁴ Dai hta n-ga Yehowa nta hta hkinjawng Hilkia mu hkrup ai tara laika hta ka da nga ai ga matsun hpe shatup shadik da na matu, Yoshia gaw, Yuda mung hte Yerusalem mare hta e nga nga ai nat shung ai ni hte gumhpan hpan ai ni hpe nat sumla ni hte hpara sumla ni rau hpawn matsat shabat lam amyu myu hpe yeng seng kau mu ai. ²⁵ Mawshe a tara mahkra hte maren, shi a myit masin mahkra hte, kraw lawang mahkra hte, n-gun lagaw mahkra hte, Yehowa a hpang e, Yoshia zawn hkan nang ai hkahkam, shi a shawng e n nga yu ai; shi a hpang e mung n pru nga ai. ²⁶ Raitimung, Yehowa hpe pawt shangun na nga, Manashe shut hpyit ai lam mahkra a majaw, Yehowa gaw Yuda amyu hpe grai wa pawt sindawng bu ai myit kawp lu ai, n rai. ²⁷ Yehowa gaw, Israela amyu hpe ngai shaden kau ai zawn, Yuda amyu hpe mung nye a myiman kaw na ngai shaden kau na we ai; ngai lata la ai, ndai Yerusalem mare hpe mung, Nye a amying shingteng nang e tawn da na we ai, nga nna ngai tsun ai nta hpe mung, ngai kau da na nngai, nga ai. ²⁸ Naw gawn ra ai Yoshia amu ni hte shi galaw ai lam mahkra gaw, Yuda hkawhkam ni a labau gawn ai laika hta ka da nga ai, n rai ni? ²⁹ Shi a aprat e, Egutu hkawhkam Hpara-u-niko gaw, Asuri hkawhkam hpe gasat na nga, U-hprat hka du hkra lung wa yang, hkawhkam Yoshia gaw shi hpe hkap hkum na pru sa wa ai: Egutu hkawhkam gaw Megido shara e shi hpe mu nna sat kau wu ai. ³⁰ Shi a ali ama ni gaw Megido shara kaw nna hpyen leng hta e shi a mang hpe Yerusalem mare de la wa nna, shi a lup hta e makoi mayang di mu ai. Mung masha ni gaw Yoshia kasha Yehoaha hpe shaga la nna, namman chya ya nhtawm, kawa malai shi hpe hkawhkam shatai mu ai. ³¹ Yehoaha gaw hkaw dung hpang yang, asak hkun masum ning rai nga nna, Yerusalem mare hta e shata masum up nga ai: shi a kanu gaw Libna mare na Yeremia shayi sha Hamutala rai lu ai. ³² Shi gaw kaji kawa ni hte maren, Yehowa man e n hkru ai amu galaw nga ai. ³³ Shi gaw Yerusalem mare hta e n up nga lu hkra, Hpara-u-niko shi hpe Hamat mung na Rebla mare hta e bawngdung shangun nna, Yuda mung hpe gumhpraw joi hkying mi hte aja joi shi shawa wu ai. ³⁴ Bai Hpara-u-niko gaw Yoshia kasha Eliakim hpe, kawa a malai hkawhkam shatai nna, shi a mying hpe Yehoiakim ngu nna lai kau ya wu ai: Yehosha hpe Egutu mung de woi wa nna, dai mung e shi si wa sai. ³⁵ Gumhpraw wa lu na matu, Hpara-u hkangda ai hte maren, Yehoiakim gaw mung masha ni hta na hkansi lahkawn nna, Hpara-u hpe aja hte gumhpraw sak ya wu ai: Hpara-u-niko hpe sak ya lu na matu, shi gaw dai aja gumhpraw hpe, mung masha ni langai hte langai kaw na, jaw lu ai hte maren, aja awa lahkawn la wu ai. ³⁶ Yehoiakim gaw hkaw dung hpang yang, asak hkun manga ning rai nga nna, Yerusalem mare hta shi langai ning up nga ai: shi a kanu gaw Ruma mare na Pedaia shayi sha Zebida rai lu ai. ³⁷ Shi gaw kaji kawa ni hte maren, Yehowa a man e n hkru ai amu galaw nga ai.

¹ Shi a lakhtak e Babelon hkawhkam Nebuhkadneza gaw gasat lung wa nna, Yehoiakim masum ning tup shi a mayam tai nga nhtawm, myit kayin nna shi hpe gumlau wu ai. ² Yehowa gaw, shi a shangun ma myithtoi ni a n-gup e tsun ai hte maren, Yuda mung hpe jahten na matu, Hkalde masha hpyen hpung ni, Suri masha hpyen hpung ni, Moba masha hpyen hpung ni hte, Ammon a kashu kasha ni a hpyen hpung ni hpe shangun dat wu ai. ³ Gaja wa, Manashe galaw ai yubak mahkra hte, mara n rawng ai ni a sai hpe hkaw kau nna, Yerusalem mare hpe mara n rawng ai sai hte jahpring wu ai majaw, ⁴ Yehowa gaw dai yubak hpe raw dat na n hkraw ai rai nna, yuda amyu hpe shi a myiman kaw na yeng seng kau na nga, Yehowa hkangda ai ga hte maren ndai lam ni byin pru wa sai. ⁵ Naw gawn ra ai Yehoiakim a amu ni hte, shi galaw ai lam mahkra gaw, Yuda hkawhkam ni a labau gawn ai laika hta ka da nga ai, n rai ni? ⁶ Shingrai Yehoiakim gaw shi a kaji kawa ni hte rau yup pyaw wa nna, shi a kasha Yehoiahkin shi a malai hkaw dung nga ai. ⁷ Dai aten kaw nna Egutu hkawhkam gaw shi a mungdan na pru wa lu ai, nrai: kaning rai nme law, Egutu hkawhkam up ai yawng hte hpe, Egutu hka shi kaw nna, Uhprat hka du hkra, Babelon hkawhkam kashun la kau wu ai. ⁸ Yehoiahkin hkaw dung hpang yang, asak shi matsat ning rai nga nna, Yerusalem mare hta shata masum up nga ai: shi a kanu gaw Yerusalem mare na Elnahtan a shayi sha, Nehushta rai lu ai. ⁹ Shi gaw shi kawa a lam mahkra hte mare4 n, Yehowa man e n hkru ai amu galaw nga ai. ¹⁰ Dai aten e Babelon hkawhkam Nebuhkadneza a ali ama ni gaw, Yerusalem mare hpe lung gasat nna, wang tawn da mu ai. ¹¹ Babelon hkawhkam Nebuhkadneza a ali ama ni gaw dai mare hpe naw wang tawn nga yang, shi hkum sa du nna, ¹² Yuda hkawhkam Yehoiahkin gaw, Babelon hkawhkam hpe sa tau la na nga, shi hkum hte shi a kanu, shi a ali ama ni, hkawhkam kasha ni hte agyi salang ni rau pru sa ma yang, Babelon hkawhkam gaw, shi hkaw dung ai matsat ning hta e, shi hpe rim la wu ai. ¹³ Dai hta kaga, Yehowa tsun da ai hte maren, shi gaw, Yehowa nta na sut rai nlang hpe mung, hkawhkam htingnu na sut rai nlang hpe mung, kashun la nna, Yehowa a nawku Htingnu matu Israela hkawhkam Shawlumon galaw da ai aja wan ni hpe mung agrawp kau wu ai. ¹⁴ Yerusalem masha ni mahkra hpe mung, hkawhkam kasha ni mahkra hte hpyen share hpung mun mi hpe mung, maka kumla pru ai ni hte ndup nhkap ni yawng hpe mung shi rim woi wa nna, dai mung na matsan mayan htum ai ni hta kaga, kadai hpe mung ngam da wu ai, nrai. ¹⁵ Yehoiahkin hpe mung, hkawhkam a kanu hte hkawhkam a num ni hpe mung, aya lu ai ni hte dai mung na agyi salang ni hpe mung, Yerusalem mare kaw nna Babelon mare de rim wa nhtawm bawngdung shangun mu ai. ¹⁶ Hpyen majan gasat ram ai, n-gun lagaw rawng ai wangan share hkying sanit hte maka kumla pru ai ni hkying mi hpe mung, Babelon hkawhkam gaw, Babelon mare hta bawngdung shangun mu ai. ¹⁷ Bai Babelon hkawhkam gaw, Yehoiahkin a kawa doi Matania hpe, Yehoiahkin a malai hkawhkam shatai wu ai rai nna, shi a amying hpe Zedekia, ngu nna lai ya wu ai. ¹⁸ Zedekia gaw hkaw dung hpang yang, asak hkun langai ning rai nga nna, Yerusalem mare hta shi langai ning up nga ai: shi a kanu gaw Libna mare na Yeremia a shayi sha Hamutala rai lu ai. ¹⁹ Shi gaw Yehoiakim a lam mahkra hte maren Yehowa a man e nhkru ai amu galaw nga ai. ²⁰ Kaning rai nme law, Yehowa gaw Yerusalem mare hte Yuda mung hpe shi a myiman kaw na tsan kau da ai shani du hkra, pawt bu nga ai majaw, ndai lam ni byin pru nga ai. Bai Zedekia gaw Babelon hkawhkam hpe gumlau wu ai.

¹ Dai rai nna Babelon hkawhkam Nebuhkadneza gaw, Zedekia hkaw dung ai jahku ning na, sha shi a, nhtoi shi ya hta e, shi a hpyen luksuk ni hte rau, Yerusalem mare hpe lung gasat nna, de a grup yhin e dap jung let, kaduk htu nhtawm ² Zedekia hkaw dung ai shi langai ning du hkra, dai mare hpe wang tawn da mu ai. ³ Shingrai shata mali a nhtoi jahku ya e mare kata e hku wa grai hku wa nna, mung masha ni a matu shahpa n nga nga ai. ⁴ Dai shaloi e Hkalde masha ni gaw dai mare grupyin e wang tawn nga ma ai rai nna, mare bunghku hpe tawk waw nhtawm, hpyen masha ni nlang hkawhkam wa a sun makau e nga ai, bunghku lahkawng a lapran a chying hka lam hku shana e hprawng pru nna, hkawhkam wa gaw layang ga hku hprawng mat wa ai. ⁵ Hkalde masha ni chyawm gaw hkawhkam wa hpe hkan shachyut nna, Yerihko pa hta e hkan dep mu yang, shi a hpyen masha nlang hte gaw hprawng bra mat ma ai. ⁶ Shanhte gaw hkawhkam wa hpe rim la nna, Ribla mare e nga ai Babelon hkawhkam hpang de woi wa mu ai: shingrai shi hpe saw dan mu ai rai nna, ⁷ Zedekia man e shi a kashu kasha ni hpe sat kau ai hte, shi a myi hpe achyaw baw kau ya nna, hkang hkyihkayang hte gyit nhtawm, Babelon mare de woi wa mu ai. ⁸ Ya Babelon hkawhkam Nebuhkadneza hkaw dung ai shi jahku ning ngu na, shata manga a sanit ya shani e, Babelon hkawhkam a hkringmang, sin langa ni a hpyenbu Nebuzaradan gaw Yerusalem mare de du lung wa ai. ⁹ Shi gaw Yehowa a nta hte hkawhkam htingnu hpe mung, Yerusalem mare e nga ai nta kaba ni nlang hte hpe mung, nat kau wu ai. ¹⁰ Shi hte rau nga ai Hkalde hpyen ma ni mung, Yerusalem mare a bunghku ni hpe rum kau mu ai. ¹¹ Sin langa ni a hpyenbu Nebuzaradan gaw, mare kata e naw ngam nga ai ni hte, Babelon hkawhkam hpang de rap wa ai ni9 hpe mung, naw ngam nga ai yu maya ni hpe mung, bawngdung shangun mu ai. ¹² Raitimung, shi gaw, tsabyi sun hte yi hkauna galaw na matu matsan mayan htum ai ni hpe ngam tawn da mu ai. ¹³ Bai Hkalde masha ni gaw, Yehowa nta kata e nga ai magri shadaw ni hpe mung, angdung npawt ni hte, magri hka lawng hpe mung, agrawp kau nna, dai magri hpe Babelon mare de la wa mu ai. ¹⁴ Bai, magri hte galaw ai di ni, shingban ni, lakap ni, chyaw ni hte, dawjau na matu kaga arai ni mahkra hpe mung la wa mu ai. ¹⁵ Bai, sin langa ni a hpyenbu wa gaw, aja hte mung, gumhpraw hte mung galaw ai awan ban ni hte angdung ni hpe mung la kau wu ai. ¹⁶ Shawlumon gaw Yehowa nta a matu galaw tawn ai shadaw lahkawng, hka lawng langai mi hte angdung npawt ni a magri ni gaw hti n dang law nga ai. ¹⁷ Shadaw langai mi gaw dawng shi matsat tsaw nga nna, de a ntsa e magri bandung rai nga ai: dai bandung gaw dawng masum tsaw ai hte, grupyin e magri awa hte hkainu si nampan sumbyau nga ai: lahkawng ngu na shadaw mung, dai hte maren awa sumbyau nga ai. ¹⁸ Bai, sin langa ni a hpyenbu wa Bebuzaradan gaw hkinjawng agyi wa Seraia hpe mung hpunglum wa ngu ai Zehpania hte Yehowa nta chyinghka sin ai agyi masum hpe mung, rim la wu ai: ¹⁹ hpyen luksuk ni a bu wa hpe mung mare hta e nga ai hkawhkam wa a salang manga hpe mung, chyare wa hpe mung, mung masha ni a jahpan hti yu ai luksuk ni a agyi wa hpe mung, dai mung na salang kru shi hpe mung, mare kata na shaga la nhtawm, ²⁰ Babelon hkawhkam nga ai Ribla mare de woi wa mu ai. ²¹ Babelon hkawhkam gaw, Hamat mung, Ribla mare hta e shanhte hpe kahtam sat kau mu ai. Shingrai Yuda amyu gaw tinang a mung hta na shapraw kau ai hkrum mat ma ai. ²² Raitimung, Babelon hkawhkam Nebuhkadneza gaw, Yuda mung hta e naw jahti da ai mung masha ni a ntsa e, Shahpan a kashu Ahikam a kasha, Gedalia hpe, munggyi shatai wu ai. ²³ Ya, Babelon hkawhkam wa gaw, Gedalia hpe munggyi shatai ai lam, hpyenbu ni hte shanhte a hpyen ma ni na mu yang, Nehtania kasha Isdhmaela, Karea kasha Yohanan, Netohpa amyu Tanhumet a kasha Seraia hte Mahka amyu na Yezania gaw, shanhte a masha ni hte rau, Mizpa mare e dung nga ai Gedalia hpang de du ma ai. ²⁴ Dai rai nna, Gedalia gaw, Hkalde masha ni a ali ama ni hpe hkum hkrit myit; ndai mung hta anga nga mu; Babelon hkawhkam wa hpe dawjau nga mu; shaloi nanhte ngwi pyaw lu na myit dai, ngu nna bu ni hte shanhte a masha ni hpe dagam da wu ai. ²⁵ Raitimung, shata sanit ngu na hta, hkawhkam, amyu na, Elishama a kashu, Nehtania kasha Ishmaela gaw, marai shi hte rau sa du nna, Gedalia hpe mung, Mizpa mare e shi hte rau rai nga ai Yuda masha ni hte Hkalde masha ni hpe mung, sat kau mu ai. ²⁶ Dai rai nna, mung masha ni kaji kaba mahkra hte, hpyen luksuk ni a bu ni gaw, Hkalde masha ni hpe hkrit ai majaw, rawt nna Egutu mung de hprawng mat ma ai. ²⁷ Ya, Yuda hkawhkam Yehoiahkin a bawngdung ai sumshi sanit ning hta, shata shi lahkawng a hkun sanit ya e, Babelon hkawhkam Ewila-merodak a hkaw dung ai shawng shaning hta e, shi gaw Yuda hkawhkam Yehoiahkin a baw shatsaw ya nna, htawng hta na shalawt dat nhtawm, ²⁸ shi hpe ngwi pyaw ga tsun dat nna, Babelon mare hta shi hte rau nga ai hkawhkam ni a ntsa e, shi a tingnyang hpe shagrau dat wu ai hte, shi a htawng hpun palawng galai kau ya wu ai. ²⁹ Shingrai Yehoiahkin gaw shi a prat dingsa e hkawhkam a man e lusha nga lu nna, ³⁰ shi hpe bau na matu, hkawhkam wa hparan da ai lusha jarit hpe tutnawng shani shagu shi hpe karan jaw mu ai.