SAMUELA LAIKA LANGAI

SAMUELA LAIKA LANGAI

¹ Ya Ehprim masha, Zuhpa, Tohu, Elihu, Yeroham kaw nna prat hkrat wa ai, Ehprim bum ga, Ramahtim zohpim mare na, Elakana ngu ai wa langai mi nga ai: ² dai wa gaw num lahkawng lu ai; langai mi a amying gaw Hana, langai mi a Penina rai lua ai. Penina mahtang kasha shaprat nga ai; Hana chyawm gaw maudung rai nga ai. ³ Dai la wa gaw, Zaw nawng zaw wa up ai Yehowa hpe nawku nna hkungga nawng jau na nga, shi a nga shara mare kaw nna, Shilo mare de, shaning shagu a lung nga ai. Dai yang e, Yehowa a hkinjawng Eli a kasha Hopni yan Hpineha nga ma ai. ⁴ Ya Elakana hkungga jaw ai shani e madu jan Penina hta shi a kasha ni hpe kumhtaw shagu nna jaw wu ai: ⁵ Hana hpe tsawra timung, kumhtaw langai sha jaw lu ai majaw yawn nga ai: kaning rai nme law, Yehowa Hana hpe maudung dung shangun da wu ai. ⁶ Yehowa shi hpe maudung dung shangun ai majaw, shi a masin machyi hkra, lashi jan e shi e roi rip shatsang wu ai. ⁷ Shaning shagu Yehowa nta de lung wa jang, kanau jan e hkrai roi shatsang nna, Hana gaw shat na sha hkra hkrap nna sha nga nga re ai. ⁸ Madu wa Elakana chyawm gaw, Hana e, hpa rai hkrap n ta? hpa rai shat n sha n ta? nang hpa majaw, yawn n ta? shadang sha shi lu ai hta, ngai na a matu akyu grau nga ai n rai ni? ngu nna shi hpe shalan wu ai. ⁹ Shingrai Shilo mare e lusha ngut jang Hana rawt sa wa ai. Dai shaloi e hkinjawng Eli gaw, Yehowa nawku nta chyinghka hkadun makau e, shi a tingnyang hta dung nga ai. ¹⁰ Hana gaw yawn la ai hte grai hkrap let Yehowa kaw akyu hpyi nga ai. ¹¹ Shi gaw, Zaw nawng zaw wa up ai Yehowa e, Na mayam jan hpe n malap kau ai sha, na mayam jan a matsan shagoi hpe mada mara dum ya nna, na a mayam jan hpe shadang sha jaw n yang gaw, shi a kara galoi mung n doi ya ai sha, shi a prat dingsa, nang Yehowa hpe ap ya na nngai, ngu nna shaka hpyi wu ai. ¹² Shingrai Hana Yehowa man e na na akyu hpyi nga yang, Eli gaw shi a n-gup yu da wu ai. ¹³ Hana chyawm gaw shi a myit hta sha hpyi ai rai nna, n-gup shamu timung, nsen n pru ai majaw, shi tsabyi nang nga ai, ngu nna Eli myit wu ai. ¹⁴ Dai rai nna Eli gaw, Nang gaten du hkra naw nang nga na n ta? Na tsabyi jahku gam kau u, ngu nna shi hpe tsun wu ai. ¹⁵ Hana chyawm gaw, Nrai madu e; ngai gaw myit kaji ai numsha rai nga nngai; tsabyi n lu nngai, chyaru mung n lu nngai; Yehowa hpang de nye a myit masin nawng jau nngai. ¹⁶ Na mayam jan hpe n shawp ai num re ai, nga nna hkum myit et; sharung shayawt shara, yawnhkyen shara nau law nna, ya du hkra hpyi nga ai she rai nngai, ngu nna htan wu ai. ¹⁷ Shaloi Eli gaw, Apyaw sha wa nu; ya nang hpyi ai hte maren, Israela Karai Kasang nang hpe jaw nit ga law, ngu nna tsun dat wu ai. ¹⁸ Hana mung, Na a mayam jan na a man e myiman pa wa ni ga law, ngu nna tsun ngut jang, myiman lai ai hte wa nna, shat sha wu ai. ¹⁹ Ya shanhte jahpawt jau jau rawt nna, Yehowa hpe nawku ngut jang Rama shara nga ai shanhte a nta de bai wa ma ai: Elakana mung shi a madu jan Hana hte kanawn nna, Yehowa shi hpe dum ya wu ai. ²⁰ Shingrai Hana na-um nasin rai nna, nhtoi gu jang shadang sha shangai wu ai; dai wa hpe Yehowa kaw hpyi la ai re ai majaw, Samuela ngu nna shamying wu ai. ²¹ Ya Elakana gaw, shi a nta masha ni yawng hte rau, shaning shagu na hkungga jau na hte ga shaka raw na matu lung wa ai. ²² Hana chyawm gaw, madu wa hpe, Ma chyu garai n hka yang, ngai n lung na nngai; chyu hka jang she, Yehowa man e prat tup anga nga na matu sa da ai hte hpawn, woi lung na nngai, nga nna nta e anga nga ai. ²³ Madu wa Elakana mung, Nang ra ai hku galaw u; chyu hka hkra naw nga u: Yehowa a ga shaka sha grin u ga, ngu wu ai. Dai rai nna dai numsha gaw ma hpe chyu shachyu let, chyu hka ai du hkra n sa ai nga nga ai. ²⁴ Chyu jahku kau jang she, usu nga masum, shadung bye mi, tsabyi tau mi hte hpawn, ma hpe woi lung wa nna, Shilo shara na Yehowa nta de du ma ai: dai ma chyawm gaw naw kaji nga la ai. ²⁵ Dai usu hpe sat nhtawm, ma dai hpe Eli kaw woi shawn tawn mu ai. ²⁶ Shaloi Hana gaw, Nye a madu e, nang hkrung nga ndai hte maren, ngai gaw shawng de lang mi, ndai yang, na makau e tsap let Yehowa hpe akyu hpyi ai numsha rai nga nngai. ²⁷ Ma ndai lu la na matu ngai hpyi nngai: ngai hpyi hte maren Yehowa ngai e jaw ni ai: ²⁸ dai re ai majaw, ngai shi hpe Yehowa e jaw da ni ai; shi hpe si ai nhtoi du hkra Yehowa a matu jaw da ai rai sai, nga nna tsun ngut jang, dai yang e Yehowa hpe nawku ma ai.

¹ Shaloi Hana akyu hpyi let shakawn wu ai gaw, Nye a myit masin Yehowa hta kabu nga li ai: Yehowa majaw nye a nrung tsaw nga li ai; Shi a hkyehkrang la ai chyeju hta kabu nngai majaw, Nye a hpyen ni a man e ngai grang lu ni ai. ² Yehowa zawn chyoi pra ai kadai n nga ai; Nang hta kaga Karai shaje n nga ai, Anhte Karai Kasang zawn, lunghkrung shaje n nga ai. ³ Grang dagat ai ga hkum tsun manit, Tinang n-gup na gumrawng ai gaw hkum shapraw manit: Yehowa chye ningchyang Karai rai nga ai, Amu lam magup hpe shen yu nga ai. ⁴ Share ni a ndan daw mat nna, Kataw mat sai ni mahtang, n-gun atsam kyit nga masai. ⁵ Hkru kat nga ai ni mahtang, sha hpa tam na nchyang shang masai, Kawsi nga ai ni chyawm gaw, hkru kat lu masai: Maudung jan mahtang kasha sanit shangai nu ai, Kasha law ai jan chyawm gaw, n-gun yawm mat nu ai. ⁶ Katsan ga de jahkrat kau ai hte sharawt la ai wa rai nga ai. ⁷ Yehowa gaw, matsan shangun ai hte lu su shangun ai, Shagrit ai hte shagrau ai wa rai nga ai. ⁸ Matsan mayan ni hpe ga nhpu kata na, Kawsi jaren ni hpe hkumpup kata na, Shi sharawt la nna, du magam kasha ni hte rau dung let, Magam tingnyang sali dagraw lu ai ahkang jaw wu ai: Ginding aga madi wa daw ni hpe Yehowa madu nga ai rai nna, Dai ni a ntsa e mungkan aga de tawn wu ai. ⁹ Shi a chyoi pra ai ni a lagaw, shi shading ya na ru ai; Tara n lang ai ni chyawm gaw, nsin kata e tsin nga na masai; Tinang a atsam n-gun hte dang lu ai kadai n nga ai. ¹⁰ Yehowa hpe daw ai ni, agrawp kau ai hkrum na mu ai; shanhte a ntsa e mu shangoi dat na wu ai: Yehowa lamu ga htum hkra tara dara nna shi a hkawhkam wa hpe n-gun shaja na wu ai, Shi a Namman chya ai wa a nrung sharawt ya na wu ai, nga nna shakawn wu ai. ¹¹ Dai ngut jang, Elakana gaw, Rama shara e nga ai shi a nta de bai wa nna, ma dai mung, hkinjawng Eli man e, Yehowa kaw amu gunhpai nga ai. ¹² Eli a kasha ni chyawm gaw n shawp n kap ai masha rai ma ai; shanhte Yehowa hpe n chye ma ai. Mung masha ni hta shanhte galaw ai htunghking ning rai malu ai: hkungga nawng na nga masha ni shan shadu tawn jang, hkinjawng wa a shangun ma sa nna, masum bra re ai shan lakung lang nna, dai hte shan di ni hta galun nhtawm, dai hta noi wa ai made shaw la la di mu ai. Shilo e sa ai Israela nlang hte hpe shing di ma ai. ¹⁵ Dai hta n-ga, sau man garai n nawng yang, hkinjawng wa shangun ma sa nna, Hkinjawng wa a matu kakang na shan jaw rit; shadu sai n la mayu ai, katsing she ra ai da, ngu nna hkungga sa nawng ai wa hpe tsun tsun di mu ai. ¹⁶ Dai wa gaw, Sau man naw nat nawng kau n ga; dai hpang ra ai made la u, ngu mu timung, N rai, ya she jaw rit, dai n rai, kashun la na nngai, ngu nna tsun tsun di nu ai. ¹⁷ Shingrai dai hkinjawng shabrang ni gaw, Yehowa man e yubak nachying kaba ai ni rai ma ai: kaning rai nme law, shan gaw Yehowa hpe jaw jau ai lam jahpoi kau mu ai. ¹⁸ Dai ma Samuela chyawm gaw, hpa hkai palawng hpun nna, Yehowa man e amu gunhpai nga ai. ¹⁹ Bai, shi a kanu gaw, shi a matu lawng wawng kaji chywi nna, shaning shagu na hkungga jaw na nga, shi a madu wa hte lung wa jang, jaw da da di wu ai. ²⁰ Shaloi Eli gaw Elakana yan la hpe, Yehowa kaw nang ap da ai kasha a malai, num ndai hta matu mara, Yehowa nang hpe naw jaw lit ga law, ngu nna shaman ya dat wu ai. Shingrai shan gaw tinang a nta de bai wa ma ai. ²¹ Yehowa mung Hana hpe mada mara yu wu ai rai nna, shi naum nasin rai wa ai; shingrai, shadang sha masum, shayi sha lahkawng, bai shaprat wu ai. Ma Samuela mung Yehowa man e kaba wa ai. ²² Ya Eli gaw aprat grai kaba mat sayang, shi a kasha ni Israela amyu masha ni nlang hta galaw ai lam mung, shawa sum chyinghka makau e amu galaw ai num ni hte shut hpyit ai lam mung, na wu ai. ²³ Dai rai nna Eli gaw, Taw, nan hpa rai shingrai myit ta? Nan a n shawp ai lam masha yawng kajai ai, nga na ni ai. ²⁴ Dai gaw n mai sai, ngai sha yan e; ngai na ai shi gaw kaja ai shi n rai: Yehowa a masha ni shut mat na hku nan galaw myit hka. ²⁵ Masha langai hte langai chyaw shut hkat ai rai yang gaw, Karai Kasang dawdan ya na rai nga ai; raitimung, Yehow hpe shut kau yang, dai wa a matu kadai nem ya na rai ta? ngu nna daru sharin wu ai. Raitimung, shan gaw kaw a ga n madat ma ai: kaning rai nme law, Yehowa mahtang, shan hpe sat kau mayu wu ai. ²⁶ Ma Samuela chyawm gaw, kaba wa nna, Yehowa man e mung, masha a man e mung, myiman pa nga ai. ²⁷ Dai shaloi e Karai Kasang a masha langai mi Eli kaw sa du nna, Yehowa ning nga ai: Egutu mung e, Hpara-u a nta e naw rawng nga yang, na nji nwa ni kaw ngai danpru ai n rai ne? ²⁸ nye a tawn hkungri ntsa e jaw jau ai amu, manam pyaw nat ai amu, nye a man e hpa hkai lawng hpun nna, hkinjawng amu gunhpai na matu, ngai shi hpe Israela amyu danghta hta na lata san tawn we ai n rai ne? dai hta kaga, Israela masha ni wan hte nat jau ai hkungga yawng mayawng na nji nwa ni hpe ngai jaw se ai n rai ni? ²⁹ Nye nta e ngai hkangda ai hkungga hte nye shadung kumhpa hpe, hpa rai htawng kau myit ta? nye a amyu Israela masha ni jaw jau ai kumhpa yawng mayawng hta na, kaja htum ai arai ni hpe hkru hkru kat kat sha shangun nna, na nsha ni hpe nye ntsa e hpa rai shagrau n ta? ³⁰ Dai hku galaw myit dai majaw, Israela Karai Kasang Yehowa tsun ai gaw, Na amyu, nanhte lakung gaw nye a man e tut tut hkawm sa lu na ra ai, ngu nna ngai tsun kau raitimung, Yehowa bai tsun u ga: ngai e shagrau ai ni hpe sha ngai shagrau na we ai; ngai hpe n gawn n sawn re ai ni gaw arawng hpoi mat na mara ai. ³¹ Yu u, na a amyu hta aprat hpungngang nga ai masha n nga hkra, na a lahpum ta hte na amyu a lahpum ta hpe ngai daw kau ya ai nhtoi du na ra ai. ³² Israela amyu hta Karai Kasang sutgan sha-ing tawn ai shaloi e, nye nta hta du ai ru tsang ari nang mu na rin dai: na amyu hta galoi mung prat hpungngang nga na masha pra lu sana n rai. ³³ Na a matu mara langai ngai hpe, nye a tawn hkungri na ngai n shamyit kau ai rai yang, dai gaw, na a myi shakyaw na hte, na a myit shayawn na matu rai nga ai: raitimung na a matu mara ni yawng, mangan n nga ai si na mara ai. ³⁴ Da ndai gaw, na nsha Hopni yan Hpineha hta du nna, nang hpe madun ai kumla tai na ra ai; shan lahkawng lani jang sha si na mara ai. ³⁵ Bai, nye a myit, nye a kraw lawang na ra ai hku hkan ya ai kang ka re ai hkinjawng, ngai paw pru shangun na we ai: shi a matu ngang ai nta ngai gaw ya nna, shi gaw nye a namman chya ai wa a man e tutnawng e hkawm sa lu na ra ai. ³⁶ Na a matu mara ni hta naw nga ai hkum shagu, shi hpang de sa nna, ngai muk ahkyep arang sha lu n ga, hkinjawng aya langai ngai hta ngai hpe tawn da e, ngu nna gumhpraw kachyi kapu, muk hkyep arang na matu, naw dagup hkra hpyi na ra ai, ngu nna tsun da wu ai.

¹ Dai ma Samuela chyawm gaw Eli man e, Yehowa amu gunhpai nga ai. Dai aprat e Yehowa a mungga nau n du yu sai; danhkung ai shingran mung nau n pru yu sai. ² Kalang mi na Eli gaw shi a shara e yup nga nna, shi a myi amam mat ai majaw n mu lu ai shaloi e, ³ Karai Kasang a pyengdin garai n si, Samuela mung, Karai Kasang a sumpu nga ai Yehowa a nawku nta e yup nga yang, ⁴ Yehowa, Samuela hpe shaga wu ai: Samuela gaw, Ngai nga nga nngai, nga nna htan let, ⁵ Eli, hpang de gat wa nna, Nang shaga ai majaw, wa ring ngai, ngu wu ai. Eli gaw, Ngai n shaga, naw yup nga su, ngu wu ai. Shaloi shi wa nna bai yup nga ai. ⁶ Bai Yehowa, Samuela e, ngu nna shaga wu ai. Samuela mung rawt nna Eli hpang de wa nhtawm, Nang shaga ai majaw wa ring ngai, ngu wu yang, Eli gaw, Ngai sha e, ngai n shaga, bai wa yup nga su, ngu dat wu ai. ⁷ Ya Samuela gaw Yehowa hpe garai n chye wu ai; Yehowa mung, shi a ga shi kaw garai n shapraw yu wu ai. ⁸ Masum lang ngu na hta Yehowa gaw Samuela hpe shaga wu ai. Shi mung rawt nna Eli hpang de wa nhtawm, Nang shaga ai majaw, wa ring ngai, ngu wu yang, dai ma hpe Yehowa shaga ai gaw Eli dum wu ai. ⁹ Dai re ai majaw Eli gaw Samuela hpe, Naw wa, yup nga su; ya na lang bai shaga jang, Yehowa e, tsun rit, na mayam madat nga nngai, ngu nna htan u, ngu dat wu ai. Shingrai Samuela bai wa nna, shi a shara e yup nga ai. ¹⁰ Shaloi Yehowa sa tsap nna, shawng na zawn, Samuela, Samuela, nga nna shaga wu ai. Samuela mung, Tsun rit, na a maym madat nga nngai, ngu nna htan wu ai. ¹¹ Shaloi Yehowa gaw Samuela hpe, Yu u, ashi na mana ni yawng, ana maga lahkawng kachyeng hkra, Israela amyu hta amu lama mi ngai shapraw na we ai. ¹² Dai shani e, Eli nta masha ni hpe ngai te nna tsun matsun hte maren, npawt nna ndung hkren ngai shapraw na we ai. ¹³ Kaning rai nme law, dai wa a kasha ni tinang hkum shayuk ai du hkra, tinang a n shawp ai yubak mu chye ninglen, shan hpe n hkum kau ai majaw, shi a nta masha ni hta ngai tut tut ari jaw na, ngu nna ngai tsun se ai. ¹⁴ Dai re ai majaw, Eli nta masha ni yubak gaw, hkungga hte shadung kumhpa e sha shaprai lu sai n rai, tut tut rai nga nu ga, ngu nna shanhte a lam ngai dagam kau se ai, ngu wu ai. ¹⁵ Samuela chyawm gaw jahpawt du hkra yup nga nna, Yehowa nta chyinghka ni hpaw wu ai. Dai shingran Eli hpe tsun dan na, Samuela n wam wu ai. ¹⁶ Shaloi Eli gaw, Ngai sha, Samuela e, ngu nna Samuela hpe shaga wu yang, shi gaw, Nga nga nngai, ngu nna htan wu ai. ¹⁷ Bai Eli gaw, Nang hpe hpa lam sun a ta? ngai e hkum ip da et; Karai Kasang nang hpe tsun matsun hta na lama ma ip da n yang gaw, shi tsun ai hta n-ga nang hpe di u ga, ngu wu ai. ¹⁸ Samuela mung lama mi muk n ip da ai sha, atsai awai tsun dan wu ai. Eli gaw, Yehowa she rai nga ai gaw, shi ra ai hku galaw u ga, ngu nna yin wu ai. ¹⁹ Samuela chyawm gaw kaba wa nna, Yehowa shi hte rau rai nga ai; shi a ga langai mu muk, ga jahkrat ya wu ai n rai. ²⁰ Samuela Yehowa a myihtoi majing rai nga ai gaw, Israela masha ni nlang, Dan shara kaw nna Bera-sheba shara du hkra chye ma ai. ²¹ Yehowa mung Shilo shara e bai danpru nga ai: kaning rai nme law, Yehowa gaw shi a mungga hte, Shilo shara e, Samuela kaw shi hkum shapraw dan wu ai. Samuela aga mung Israela mung ting chyam nga ai.

¹ Ya Israela masha ni Hpilisti masha ni hpe gasat na sa wa nna, Ebeneza shara e dap jung ma ai; Hpilisti masha ni gaw Ahpek shara e dap jung ma ai. ² Hpilisti masha ni hpyen hkyen la nna, Israela masha ni hpe gasat mu yang, Israela masha ni Hpilisti masha ni a man e sum nna, masha hpyen ni a lata hte marai hkying mali daram si mat ma ai. ³ Masha ni dap de bai du wa ma jang, Israela agyi salang ni gaw, Dai ni Yehowa anhte hpe, Hpilisti masha ni a man e hpa rai jasum mi ai i? Yehowa a ga shaka sumpu sa nna, masha hpyen ni a lata na anhte hpe hkye la mi ga, Shilo mare na wa la saga, nga nna bawng ma ai. ⁴ Shingrai masha ni Shilo de masha shangun dat nna, Hkerubim lapran e dung ai, Zaw nawng zaw wa up ai Yehowa a ga shaka sumpu la sa mu ai: Karai Kasang a ga shaka sumpu hte rau, Eli a kasha Hopni yan Hpineha mung lawm ma ai. ⁵ Yehowa a ga shaka sumpu dap de du jang, Israela masha ni nlang, lamu ga kanan hkra, nachying hkap garu ma ai. ⁶ Hpilisti masha ni dai garu ai na jang, Hebre dap e kadu ai nsen gaw hpa re ai i? Nga nna san let, dai dap de Yehowa sumpu du sai chye ma ai. ⁷ Karai Kasang dai dap de du sai, nga nna tsun let, Hpilisti masha ni hkrit nna, Anhte gaw n rai saga ai; kalang mi muk dai zawn n byin yu ai; ⁸ anhte gaw n rai saga ai: ndai hpung dagu rawng ai Hpara ni a lata na, anhte hpe kadai hkyelu na rai ta? nam mali hkan e, Egutu masha ni hpe ari zinli baw magup jaw ai gaw, Hpara ndai ni rai nga ma ai. ⁹ Hpilisti masha ni e, Hebre masha ni nanhte kaw yam ai zawn, shanhte kaw n yam hkra, nden shaja nna dakan mu: dakan let gasat mu, nga ma ai. ¹⁰ Shingrai, Hpilisti masha ni gasat nna, Israela masha ni bai sum ma ai: langai hte langai tinang a sum de hprawng ma ai: gasat kaba rai kahtam nna, Israela hpyen masha mun masum si ma ai. ¹¹ Karai Kasang a sumpu mung masha hpyen ni a lata de shang mat nna, Eli a kasha Hopni yan Hpineha mung si mat ma ai. ¹² Shaloi Ben-yamin amyu masha langai mi, hpyen ginra na gat wa nna, shi a palawng gang je kau ai hte baw e ga nhpu hte bun let, dai shani jang Shilo de du wa ai. ¹³ Shi du wa yang, Eli gaw, shi a tingnyang hta lam makau e dung let ala nga ai; kaning rai nme law, Karai Kasang sumpu a matu shi myit ru nga ai. Gat wa ai wa, mare du nna, ashi tsun dan wu yang, mare ting jahtau kachyi nga ai. ¹⁴ Dai jahtau kachyi ai Eli na jang, ndai jahtau kachyi ai nsen gaw hpa re ai i? Nga nna san yang, dai wa alawan du nna, Eli hpe tsun dan wu ai. ¹⁵ Dai shaloi Eli gaw, asak jahku shi matsat ning du sai rai nna, shi myi n mu lu hkra, myi sha si mat salu ai. ¹⁶ Dai wa gaw, Hpyen gasat kaw na wa ai wa ngai rai nngai; hpyen gasat ai kaw na dai ni hprawng wa nngai, ngu nna tsun dan wu yang, Eli gaw, Ngai sha e, amu gaw kaning rai wa sata? ngu nna san wu ai. ¹⁷ Ashi gun ai wa gaw, Israela masha ni Hpilisti masha ni a man na hprawng nna, gasat kaba rai kahtam ai hkrum ga ai: na nsha Hopni yan Hpineha mung si masai; Karai Kasang a sumpu mung hpyen lata de shang mat sai, ngu nna htan wu ai. ¹⁸ Karai Kasang a sumpu a lam na jang, Eli gaw, chyinghka makau e shi dung ai tingnyang nna shingdu de nga hkrat wa ai hte du daw nna si mat ai: kaning rai nme law, shi gaw asak kaba sai hte hkum majun ai wa rai nga ai. Shi gaw mali shi ning ting Israela amyu hpe tara dara ya wu ai. ¹⁹ Ya Eli kanam, Hpineha a madu jan na-um nasin hkum nhtoi gu wa sai rai nna, Karai Kasang a sumpu hpyen lata shang mat ai hte kaku yan madu wa si mat ai lam na jang, shinggyim machyi hkrum rau nna, mashi dingkaw let kasha shangai wu ai. ²⁰ Shi si wa magang yang, makau e tsap nga ai num ni, Hkum tsang et; shadang sha shaprat nit dai, ngu mu timung, shi n htan mat ai hte hpa zawn mung n rai mat sai. ²¹ Bai shi gaw, dai kasha hpe Ihkabu ngu nna shamying da wu ai: kaning rai nme law, Karai Kasang a sumpu hpyen lata shang mat ai majaw mung, kaku yan madu wa si mat ai majaw mung, Israela hpung shingkang hkoi mat sai, nga ai rai lu ai. ²² Karai Kasang a sumpu hpyen lata shang mat ai majaw, Israela hpung shingkang hkoi mat sai, nga nna shi bai tsun wu ai.

¹ Ya Hpilisti masha ni Karai Kasang a sumpu la nna, Ebeneza kaw nna Ashdod mare de la wa mu ai. ² Shingrai Hpilisti masha ni Karai Kasang a sumpu la nna, Dagon a nta de shawn nhtawm, Dagon a makau e tawn da ma ai. ³ Hpang jahpawt jau jau e Ashdod masha ni rawt yu mu yang, yu mu, Dagon gaw Yehowa a sumpu man e, ga hta dagup let taw nga ai. Shaloi shanhte Dagon hpe sharawt nna, shi a shara e bai shadun tawn mu ai. ⁴ Hpang jahpawt jau jau bai rawt yu yang mung, Dagon gaw, Yehowa sumpu man e, ga hta dagup let taw nga ai: Dagon a baw hte lata maga lahkawng a lahpan gaw chyinghka hkinbawng e taw mara mat nna, Dagon hkum kaman tum tum e taw nga la ai. ⁵ Dai re ai majaw, Dagon a hkinjawng ni raitimung, Dagon a nta de shang ai ni kadai raitimung, Ashdod e nga ai nta chyinghka hkinbawng hpe, dai ni du hkra n kabye ma ai. ⁶ Ya Yehowa a lata Ashdod masha ni hpe grai wa sharu shatsang nna, shanhte hpe hpya sat wa ai hte, Ashdod mare hte de a ginwang masha ni hpe, mu shakrawi hte adup wu ai. ⁷ Ya, ning rai byin wa ai gaw Ashdod masha ni mu jang, shanhte gaw, Israela Karai Kasang a sumpu anhte kaw n nga mai sai: shi a lata gaw anhte a ntsa e mung, anhte a Hpara Dagon a ntsa e mung li la mali ai. ⁸ Dai re ai majaw shanhte Hpilisti du ni nlang hpe shaga nna, Israela Karai Kasang a sumpu ndai hpe kaning di na rai ta? nga nna san ma ai. Shanhte gaw, Israela Karai Kasang a sumpu dai hpe, Gat mare de sa tawn da mu, ngu nna htan mu ai. Dai hte maren shanhte Israela Karai Kasang a sumpu, dai de sa tawn da mu ai. ⁹ Ya dai de sa tawn da ai hpang, Yehowa a lata dai mare hpe mung grai sharu shatsang da su ai: mare masha kaji kaba ni hpe sin adup nna, shanhte mu shakrawi hkrum ma ai. ¹⁰ Bai, Karai Kasang a sumpu hpe, Ekron de shagun dat mu ai. Karai Kasang a sumpu Ekron de du jang, Ekron masha ni gaw, Anhte hte anhte a masha ni hpe sat kau na matu, Israela Karai Kasang a sumpu la sa wa marin hka i, nga nna jahtau let tsun ma ai. ¹¹ Dai re ai majaw, shanhte Hpilisti du ni nlang hpe shaga la nna, Israela Karai Kasang a sumpu ndai, anhte hte anhte a masha ni hpe n sat kau mi ga, dat kau gaw, shi a shara de wa u ga, nga ma ai; kaning rai nme law, Karai Kasang a lat dai shara hta nachying li la ai rai nna, dai mare ting hta si wa hkra ja la ai zinli pri rai nga ai. ¹² N si lu ai ni mung, mu shakrawi e adup nna, dai mare na jahtau ai nsen gaw, sumsing lamu de lung wa ai.

¹ Ya Yehowa a sumpu Hpilisti mung e shata sanit nga nga sai. ² Shaloi Hpilisti masha ni gaw hkinjawng ni hte ningwawt ni hpe shaga nna, Yehowa sumpu ndai hpe kaning di na rai ta? shi a shara de hpa hte dat dat na, madun marit, ngu mu ai. ³ Shanhte gaw, Israela Karai Kasang a sumpu dat dat na rai yang, kaman san san hkum dat myit: mara raw ai kumhpa teng teng lawm ra na re ai; shaloi she nanhte mai na myit dai; shingrai jang, hpa majaw shi a lata n dawm la ai chye na marin dai, ngu nna tsun mu ai. ⁴ Bai masha ni gaw, Shi hpe jaw dat na mara raw kumhpa gaw, hpa baw rai na rai ta? ngu nna san ma yang, shanhte gaw, Hpilisti du ni a nambat hkan nna, aja mu shakrawi sumla manga, aja yu sumla manga, jaw dat na rai myit dai: kaning rai nme law, nanhte hte nanhte a du ni hta, kap ai zinli baw sha rai nna lit dai. ⁵ Dai re ai majaw, nanhte hta na mu shakrawi sumla hte, ga jahten chye ai yu li sumla, nanhte galaw lu na rai nna, Israela Karai Kasang a arawng shagrau ya na rai myit dai: shaloi shi a lata nanhte hte nanhte a Hpara ni ntsa na mung, nanhte a lamu ga hta n mung, dawm la na ra ai nhten. ⁶ Egutu masha ni hte Hpara-u hkawhkam tinang myit shaja ai zawn, nanhte hpa rai myit shaja nga myit ta? Shi shanhte hpe nau wa shachyum wa jang, shanhte Israela masha ni hpe dat dat mu ai rai nna, shanhte pru wa ma ai, n rai ni? ⁷ Ya raitimung law ningnan shachyaw nna, gan garai n shagun yu ai hte kasha woi ai dumsu kanu lahkawng hpe law shagun nna dumsu kasha hpe de a ulawng e dun kau mu: ⁸ Yehowa a sumpu dai law hte mara n-htawm, shabawn ai mara raw kumhpa aja rai ni hpe, dai sumpu makau e, sumpu kaji langai mi hta bang nna, dat dat mu, shi chyu wa u ga. ⁹ Sumpu dai, tinang buga de wa ai lam, Bet-sheme maga de yawng wa sayang gaw, dai zinli kaba shabying ai, Shi nan rai na re ai: shing n rai, shi e lashum ai majaw anhte adup hkrum sha ai n rai, majoi byin nna hkrum ai re ai gaw, anhte chye na ga ai, nga nna bawng ma ai. ¹⁰ Dai hte maren mung masha ni galaw nna, kasha woi ai dumsu kanu lahkawng hpe law shagun nhtawm, dumsu kasha yan hpe ulawng e dun kau mu ai: ¹¹ Yehowa a sumpu hpe dai law hta mara nhtawm, ja yu sumla ni hte, ja mu shakrawi sumla ni rawng ai sumpu hpe mung, mara dat mu ai. ¹² Shaloi dumsu kanu yan gaw, Bet-sheme lam hkrawn hkrawn hkan nna, nmaw lam dingyang pai de hkra de n shang ai sha, nbaw let sa wa ai: Hpilisti du ni mung Bet-sheme lamu ga jarit du hkra hkan nang ma ai. ¹³ Ya Bet-sheme masha ni gaw, kadit pa e tinang hkaulan mam dan nga ma ai: shaloi shahte sharawt mada yu nna, sumpu dai hpe hkap mu jang, kabu nga ma ai. ¹⁴ Law dai mung, Bet-sheme masha Yawshu a yi de shang wa nna, lunghtawn kaba makau e tsap nga ai: shaloi shanhte gaw law dai hpe agrawp nna, dumsu kanu yan hpe, Yehowa matu wan nat hkungga di nat nawng mu ai. ¹⁵ Lewi masha ni mung Yehowa sumpu hte dai hte rau na aja rai rawng ai sumpu hpe shayu nna, dai lunghtawn hta mara tawn mu ai: Bet-sheme masha ni mung, dai shani jang Yehowa hpe wan nat hkungga hte mahku hkungga nawng jau mu ai. ¹⁶ Hpilisti du manga hte mung, dai amu hpe mu kau da nna, dai shani jang, Ekron de bai wa ma ai. ¹⁷ Yehowa hpe shabawn dat ai mara raw kumhpa ngu na, mu shakrawi aja sumla ni gaw, Ashdod a matu langai mi, Gaza matu langai mi, Ashkelon matu langai mi, Gat a matu langai mi, Ekron a matu langai mi rai nga ai: ¹⁸ bai, aja yu sumla ni gaw, Yehowa sumpu mara tawn ai lunghtawn kaba du hkra lapran hte na, Hpilisti du manga hte seng ai bunghku kum ai mare ni hte num kahtawng ni nambat rawng ai made rai nga ai: lunghtawn dai gaw, Bet-sheme masha Yawshu a yi e nga nga ai. ¹⁹ Ya Bet-sheme masha ni dai sumpu hta yu yu ai majaw, Yehowa shanhte hta na marai sanit shi hte, masha mun manga hpe sat kau mu ai: shingrai Yehowa shanhte hpe ari kaba jahkrum mu ai majaw, masha ni sharung shayawt nga ma ai. ²⁰ Shaloi Bet-sheme masha ni gaw, Ndai chyoi pra htum ai Karai Kasang Yehowa man e kadai wa tsap lu na a ta? anhte kaw nna kadai hpang de sa wa na wu ai i? Nga nna tsun ma ai. ²¹ Bai shanhte gaw Kiriat-yarim masha ni hpang de masha shangun nna, Hpilisti masha ni Yehowa sumpu sa sa ya mara ai; nanhte yu wa nna sa la manu, ngu nna htet dat mu ai.

¹ Dai rai nna, Kiriat-yarim masha ni sa nna, Yehowa a sumpu bai la nhtawm, bum ga na Abinadab a nta e shawn tawn da mu ai: Yehowa a sumpu hpe sin na matu mung, shi a kasha Eliaza hpe shachyoi shapra ma ai. ² Dai sumpu gaw Kiriat-yarim du ai shani kaw nna, nga nga ai hkun ning htep na mat wa sai: Israela amyu ting mung Yehowa e yawn yawn nna madai nga ma ai. ³ Shaloi Samuela gaw Israela amyu ting hpe, Nanhte myit masin mahkra hte Yehowa hpang de kayin wa marin dai rai yang gaw, nanhte jau tawn ai maigan Hpara hte Ashtarot ni hpe kau tawn da nhtawm, Yehowa hpe myit manoi nna shi hpe chyu sha jaw jau mu: shaloi, Hpilisti masha ni a lata na shi nanhte hpe hkye la na ra ai, ngu wu ai. ⁴ Dai rai nna Israela kashu kasha ni gaw Bala hte Ashtarot Hpara ni hpe kau da nhtawm, Yehowa hpe chyu sha jaw jau mu ai. ⁵ Bai Samuela gaw, Israela masha ni yawng hpe Mizpa shara e jahpawng mu; nanhte a matu Yehowa kaw ngai hpyi ya na nngai, ngu nna hkangda wu ai. ⁶ Shanhte mung Mizpa shara e zuphpawng nna, hka ja la nhtawm Yehowa man e ru hkaw ai hte, dai shani e lusha gam let, Anhte Yehowa hpe shut saga ai law, nga nna yin ma ai, Samuela mung, Mizpa shara e Israela masha ni hpe tara dara ya mu ai. ⁷ Ya Israela kashu kasha ni Mizpa shara e zuphpawng ai lam Hpilisti masha ni na ma yang, Hpilisti du ni gaw Israela masha ni hpang de hpyen rawt ma ai. Israela kashu kasha ni dai lam na jang, Hpilisti masha ni hpe hkrit ma ai. ⁸ Dai rai nna Israela kashu kasha ni gaw Samuela hpe, Anhte a Karai Kasang Yehowa, Hpilisti masha ni a lata na anhte hpe hkye la mi ga, anhte a matu akyu ahpyi ya nga mi, nga ma ai. ⁹ Shaloi Samuela gaw chyu garai n hka ai sagu kasha la nna, Yehowa hpe hkum dingyawng wan nat hkungga di nna nawng ya wu ai: Samuela mung Israela amyu matu mara Yehowa hpe hpyi jahtu wu ai rai nna, Yehowa shi a ga madat ya wu ai. ¹⁰ Samuela dai wan nat hkungga nawng nga yang, Hpilisti masha ni Israela hpe gasat na, sit sa ma ai; Yehowa chyawm gaw dai shani e Hpilisti masha ni a ntsa e mu adu shangoi dat nna, shanhte hpe jahkrit shama kau mu ai: shingrai Israela masha ni a man e sum mat ma ai, ¹¹ Israela masha ni mung, Mizpa shara na pru nna Hpilisti masha ni hpe Bet-hkara du hkra shachyut kahtam kau mu ai. ¹² Dai shaloi e Samuela nlung la nna, Mizpa hte Shen lapran e jung tawn nhtawm, Yehowa anhte hpe ya du hkra karum ma ni ai, nga nna nlung dai hpe Eben-eza ngu shamying wu ai. ¹³ Shingrai Hpilisti masha ni sum mat ai hkrum nna Israela ga de bai n shang masai: Samuela prat tup Yehowa lata gaw Hpilisti masha ni hpe ban shadang nga ai. ¹⁴ Hpilisti masha ni gaw, shanhte kashun la ai Israela mare ni hpe, Ekron kaw nna Gat du hkra bai ya lu ma ai: de a ginwang ga ni hpe mung, Hpilisti masha ni a lata na, Israela mashi ni bai lu la ma ai. Israela hte masha ni a lapran gaw, majan nnga malu ai. ¹⁵ Samuela mung, shi a prat tup Israela masha ni hpe tara dara ya nga ai. ¹⁶ Shaning shagu Betela, Gilgala, hte Mizpa shara hkan e kawan du hkawm nna, dai hkan na Israela masha ni hpe tara dara ya wu ai. ¹⁷ Bai wa yang, Rama de wa du du re ai; dai yang e shi a nta rai nga sai: dai kaw mung Israela masha ni hpe tara dara ya let, Yehowa matu tawn hkungri gaw da nna nga nga ai.

¹ Ya Samuela dingla jang, kasha yan hpe Israela masha ni a ntsa e tara agyi dang da wu ai. ² Kasha alat a amying gaw Yoela rai nga ai; la nnaw amying gaw Abiya rai nga ai: shan lahkawng gaw Bera-sheba e dung ma ai. ³ Raitimung, shi a kasha yan gaw kawa a lam n hkan ma ai: gumhpraw marin ai hte dam mat wa nna, kumhpa sha let tara jahten ma ai. ⁴ Dai re ai majaw Israela agyi salang ni yawng zuphpawng nna, Samuela hpang de Rama de sa nhtawm, ⁵ Yu u, nang dingla mat nit dai; na nsha yan mung na a lam n hkan ma ai: dai rai nna, masha amyu danghta a htung hte maren, anhte hpe up na hkawhkam sharawt ya mi, ngu nna shi hpe hpyi mu ai. ⁶ Anhte hpe tara dara na matu, hkawhkam jaw mi, nga nna hpyi ai lam hpe Samuela n ra wu ai rai nna, Yehowa kaw hpyi san wu ai. ⁷ Yehowa mung Samuela hpe, Amyu masha ni nang hpe tsun matsun madat ya mu: shanhte nang hpe kau ai n rai; ngai shanhte a hkawhkam n tai na hku, ngai hpe kau ai she rai ma ai. ⁸ Ngai shanhte hpe Egutu mung na shaw woi wa ai shani kaw nna, dai ni du hkra ngai hpe kau nna maigan Hpara ni hpe jaw jau ga ai akyang hte maren, nang hpe mung di da ndai. ⁹ Ya shanhte a ga madat ya mu; raitimung, shadum shahprang nna shanhte hpe up na hkawhkam wa a htunghking madun dan u, ngu wu ai. ¹⁰ Shaloi Samuela gaw, hkawhkam hpyi ai masha ni hpe, Yehowa a ga htawn shana ya wu ai. ¹¹ Shi gaw, Nanhte a ntsa e up na Hkawhkam wa htunghking gaw ndai rai na ra ai: shi nanhte a shadang sha ni hpe shaga la nna, shi a leng ni, shi a gumra ni hta jawn ai amu madun tawn nhtawm, shi a leng ni a shawng de shanhte gat lu na rai mu ai; ¹² bai, shi a hpyenbu shatai na, masha hkying mi up na, manga shi up na matu, aya tawn da na mu ai, manga shi up na matu, aya tawn da na mu ai; bai, nkaw mi hpe, shi a yi hkauna galaw, shi a mam dan shu na hte, shi a hpyen ti nhtu, shi a hpyen leng tup shachyaw amu hta hpajang tawn na ru ai. ¹³ Nanhte a shayi sha ni hpe mung shaga nna, shanhte hpe manam pyaw ai baw lajang ai ni, shat shadu ai ni, muk kabaw ai ni, shatai na mara ai. ¹⁴ Nanhte a kaja htum ai yi hkauna, tsabyi sun, tsanlun sun ni hpe gare la nna, shi a shangun ma ni hpe kara jaw na mu ai. ¹⁵ Nanhte a nsi naisi hte tsabyi htamshi na htammi shi la nna, shi a bu hkring-mang ni hte shangun ma ni hpe jaw na mu ai. ¹⁶ Nanhte a la yam, num yam ni hte kung grau ai shabrang ni hpe mung, nanhte a lawze ni hpe mung gare la nna shi a makan galaw shangun na ru ai. ¹⁷ Nanhte sagu bainam hpung hta na, htamshi hta htammi shi la na wu ai rai nna, nanhte shi kaw yam na rai myit dai. ¹⁸ Nanhte hpyi la ai hkawhkam a majaw, dai shani e nanhte jahtau hkrap timung, Yehowa nanhte hpe madat sana n rai, ngu nna shadum wu ai. ¹⁹ Mung masha ni chyawm gaw Samuela ga n madat ai sha, N rai law, anhte masha amyu nlang hte bung hkra, ²⁰ anhte hpe tara dara ya na hte, majan shani e anhte hpe woi awn nna gasat lu na matu, anhte a ntsa e up na hkawhkam anhte ra ga ai, nga ma ai. ²¹ Shingrai Samuela gaw mung masha ni a ga mahkra na la nna, Yehowa kaw htawn tsun wu ai. ²² Yehowa mung, shanhte a ga hkan nna, shanhte a matu hkawhkam sharawt ya u, ngu wu ai. Dai rai nna Samuela gaw Israela masha ni hpe, Nanhte langai hte langai tinang a mare de naw wa manu, ngu wu ai.

¹ Ya, Ben-yamin amyu, Ahpia, Behkora, Zerora, Abiela kaw nna prat hkrat ai, Kisha ngu ai Ben-yamin masha langai mi nga ai dai wa gaw share ninghkrin rai nga ai. ² Shi gaw shadang sha langai mi lu ai rai nna, shi a amying Shawlu rai lu ai: dai wa gaw ahpraw tsawm ai hte n-grau ai wa rai nga ai; Israela kashu kasha ni yawng hta dai wa zawn ahpraw rawng ai langai mi muk n nga ma ai: masha yawng shi a lahpa nhtawng ai hkrai rai ma ai. ³ Ya Shawlu a kawa Kisha lawze ni mat ai majaw, Kisha gaw kasha Shawlu hpe, Ma langai mi woi nna, lawze sa tam masu, ngu nna shangun dat wu ai, ⁴ Shaloi shi gaw Ehprim bum ga hte Shalisha ga ting tam kau timung n mu mu ai: bai shan gaw Shalim ga lai hkra tam timung, dai yang e n nga malu ai; dai kaw nna Ben-yamin ga ting tam timung n mu ma ai. ⁵ Ya Zuhpa ga du jang Shawlu gaw, Bai nhtang wa saga; dai n rai yang, wa gaw lawze ni a majaw gaw n myit ru; an a majaw mahtang myit rai na sai, ngu nna shi kaw hkan nang ma hpe tsun wu ai. ⁶ Shaloi ma dai gaw, Yu u, ndai mare e kajai gumhkawng ai Karai Kasang a masha langai mu nga ai; shi tsun matsun kang lu ai: shi hpang de sa saga; an sa ai lam shi madun lu a nhten, ngu wu ai. ⁷ Shawlu chyawm gaw, Taw, an sa yang, shi hpe hpa kumhpa shaw na rai? An gun ai muk ma mat sai: dai Karai Kasang masha a matu kumhpa di na hpa n nga ai; hpa naw lu nga ga ta? ngu nna shi a ma hpe htan mu ai. ⁸ Ma gaw, Ngai kaw gumphraw hti lahkawng rawng nga ai: an hpe lam madun na matu, dai Karai Kasang a masha hpe ndai jaw na re ai, ngu nna Shawlu hpe tsun wu ai. ⁹ ( Moi prat e, Israela masha ni Karai Kasang kaw lama ma san na nga sa wa yang, Sa, myi san wa hpang de sa saga, nga nna tsun mu ai: ya na myihtoi ngu ai wa hpe, moi prat e myi san wa nga ma ai. ) ¹⁰ Shaloi Shawlu gaw, Ma sa, sa saga, nga nna ma hpe htan let, Karai Kasang a masha nga ai mare de sa wa ma ai. ¹¹ Yan shan gaw, mare ringhpung kadawng lung wa yang, hka ja sa numsha ma ni hpe hkrum nna, Ndai yang e myi san wa n nga n ni? Ngu nna san mu yang, shanhte gaw, ¹² Nga nga ai; na a shawng e sha rai nga ai; lawan sa wa mu; dai ni ndai mare de wa ra ai; mare masha ni mung, dai ni kawng tsaw ntsa e hkungga nawng jau na ma ai; dai myi san wa, shan sha na matu dai kawng tsaw de garai n lung mat jang; nang mare de rau yang gaw, hkrum shayan na myit dai: ¹³ shi garai n du yang, kadai n sha ma ai: dai hkungga shan shi nawng nawng re ai; nawng ngut yang she shaga tawn ai ni sha ma ai. Dai majaw lung wa mu; ya e hkrum na myit dai, ngu nna htan mu ai. ¹⁴ Shaloi shan gaw mare de lung wa ma ai; ya shan gaw mare de shang wa yang, Yu mu, Samuela dai kawng tsaw de lung wa nga yang, shan hte hkrum wu ai. ¹⁵ Ya Shawlu du na shawng shani e sha, Yehowa, Samuela hpe, ¹⁶ Hpawt de ndai ten e, Ben-yamin ga na masha langai mi, nang hpang de ngai shangun dat na ring ngai; dai wa hpe nye a amyu Israela du shatai nna, namman chya aya dang na rai ndai; shi gaw nye a amyu masha ni hpe, Hpilisti masha ni a lata na hkye la na ra ai: kaning rai nme law, shanhte a jahtau shaga ai nsen, nye a na hta hkrang ra ai rai nna, nye a amyu hpe ngai mada mara se ai, ngu nna shi hpe shadan dan ya wu ai, ¹⁷ Dai rai nna, Samuela Shawlu hpe mu jang, Yehowa gaw, Yu u, ngai tsun ai gaw, dai wa rai sai; dai wa gaw nye a masha ni hpe uphkang lu na ra ai, ngu wu ai. ¹⁸ Shaloi Shawlu, chyinghka lam e nga ai Samuela hpang de sit sa wa nna, Myi san wa a nta gara rai ta? madun e, ngu nna hpyi wu ai. ¹⁹ Samuela gaw, Myi san wa ngai rai nga nngai; htaw kawng tsaw de ngai hte rau lung wa rit, dai ni ngai hte rau shat sha na re ai: hpawt de she dat dat na made ai; na a myit gun sa ai lam yawng mung, tsun dan na nngai. ²⁰ Ma ni mat ai lawze hpe hkum myit nit; mu la manu ai. Israela amyu hta na ra hpa rai yawng mayawng gade a matu rai ta? Nang hte na nta dap ni a matu rai nga ai, n rai ni? Ngu wu ai. ²¹ Shawlu chyawm gaw, Ngai wa mi, Israela amyu ni hta kaji htum ai Ben-Yamin amyu she n rai n ni? Ngai dap mung, Ben-yamin amyu dap lakung yawng hta na, kaji htum ai dap she n rai n ni? Dai rai nna, nang ngai hpe hpa rai shing nga tsun n ta? ngu nna san wu ai. ²² Shaloi Samuela gaw Shawlu hte shi a ma hpe manam gawk de shashawn nna, shaga tawn masha ni hta reng grau ai shara e shadun wu ai: shaga tawn ai ni chyawm gaw marai sumshi daram rai ma ai. ²³ Bai Samuela gaw shat shadu wa hpe, Nang hpe kaga di matsing da u, ngu nna nang hpe ngai ap da ai gumhtaw la wa rit, ngu wu ai. ²⁴ Shat shadu wa mung, magyi shan hte dai hta lawm ai shan shatmai la wa nna, Shawlu a man e tawn ya wu ai. Samuela mung, Nang hpe tawn ya ai, dai gaw matsing da ai re ai; sha u; ngai masha ni hpe shaga ni ai, ngu ai kaw nna, na matu man da ya sai re ai, ngu wu ai. Shingrai Shawlu dai shani e Samuela hte rau sha wu ai. ²⁵ Ya shanhte dai kawng tsaw na yu wa nna, mare de shang wa nhtawm, Samuela yan Shawlu gaw nta ntsa e shaga chyai nga ma ai. ²⁶ Hpang jahpawt shanhte jau jau rawt nna nhtoi leng yang Samuela gaw, Rawt u, nang hpe ngai shabawn dat de ga, ngu nna Shawlu hpe nta ntsa de shaga wu ai. Shaloi Shawlu rawt nna, Samuela hte shan lahkawng pru wa ma ai. ²⁷ Mare shingnawm du jang Samuela gaw, Na ma hpe shawng magang na tsun u, ngu wu ai; ma mung shawng magang mat wa ai; bai Samuela gaw, Hkring mi naw tsap u; Ngai nang hpe Karai Kasang a mungga htawn tsun de ga, ngu wu ai.

¹ Shaloi Samuela gaw, namman tauba la nna, Shawlu a baw e jaw bun nhtawm shi hpe pup nna, Yehowa gaw, shi a Sali amyu a du tai na matu, nang hpe namman chya ya nit dai, n rai ni? ² Dai ni ngai hte hka nna wa yang, Ben-yamin lamu ga jarit, Zelza shara na Rahkela lup du jang, masha lahkawng hte nang hkrum na rin dai: shaloi dai yan, Nang sa tam ai lawze ni, mu la sai; na nwa gaw lawze ni hpe n myit; na a lam myit tsang nna, Ngai sha matu kaning di na i? nga ai, nga nna tsun na ma ai. ³ Dai kaw nna lai sa wa yang, Tabora wamyi hpun de du na rin dai: dai yang e, bainam kasha masum gun ai marai langai mi, muk pa masum gun ai marai langai mi, tsabyi tau gun ai marai langai mi, Betela shara na Karai Kasang kaw lung wa ai, dai masha masum hte hkrum na rin dai: ⁴ shanhte mung nang hpe shachyen nna, muk pa lahkawng jaw ai hpe, nang hkap la na rin dai. ⁵ Dai kaw na lai wa yang, Hpilisti dap nga ai Karai Kasang a kawng de nang du na ra ai: dai kaw nna mare de shang wa yang myihtoi hpung mi shupsheng, bau bre, sumhpyi hte tingse dum let, myihtoi htoi nns, kawng tsaw de na yu wa ai hte, nang hkrum na rin dai: ⁶ shaloi Yehowa a wenyi na ntsa e aze du nna, nang shanhte hte rau myihtoi htoi na hte, nang lak lai na rin dai. ⁷ Kumla dai ni nang hta dik wa jang, ang ai hku hkan nna galaw nga u: Karai Kasang mung nang hte rau rai nga ai. ⁸ Bai Gilgala de nye a shawng e yu wa magang u; ngai mung, wan nat hkungga hte mahku hkungga nawng na matu, nang hpang de yu wa na ring ngai: nang hpang de ngai du nna, nang galaw na amu nang hpe madun ai du hkra, sanit ya naw la nga u, ngu wu ai. ⁹ Shingrai Samuela kaw na rawt wa na nga, yin sha naw rai yang, Karai Kasang gaw shi hta myit ningnan jaw wu ai rai nna, dai kumla ni yawng dai shani jang dik mat ai. ¹⁰ Ya shan gaw dai kawng de du jang, myihtoi hpung masha ni hte hkrum nna, Karai Kasang a wenyi shi a ntsa e aze du ai majaw, shanhte hte rau myihtoi htoi nang nga ai. ¹¹ Shingrai, Shawlu myihtoi ni hte rau myihtoi htoi ai hpe, shawng e shi e chye chyap ai ni mu jang, Kisha a kasha hpa byin ai kun? Shawlu mung myihtoi ni hta lawm a ni? nga nna san shajang ma ai. ¹² Dai yang na masha langai mi mung, Shan a kawa mahtang kadai rai nga a ta? ngu nna hkap htan wu ai. Dai re ai majaw, Shawlu mung myihtoi ni hta lawm a ni? Nga ai ga gaw, ga malai tai mat wa ai. ¹³ Myihtoi htoi ngut jang, kawng tsaw de lung wa ai. ¹⁴ Shawlu a kawa doi gaw, Nan gade sa myit ta? ngu nna Shawlu hte shi a ma hpe san mu yang, Shawlu gaw, Lawze ni sa tam ga ai: n mu ai majaw Samuela kaw mung, du ga ai, ngu nna tsun dan wu ai. ¹⁵ Bai Shawlu a kawa doi gaw, Samuela nang hpe kaning nga tsun a ta? ngai e tsun dan e, ngu mu yang, ¹⁶ Shawlu gaw, Lawze mu la manu ai, nga nna an hpe dan dan leng leng tsun dat mi ai, ngu nna kawa doi hpe tsun dan mu ai. Samuela tsun ai mungdan a amu lam chyawm gaw, kawa doi hpe n tsun dan ai nga nga ai. ¹⁷ Shaloi Samuela gaw mung masha ni hpe Mizpa shara e Yehowa kaw shaga jahpawng wu ai. ¹⁸ Bai, Israela kashu kasha ni hpe shi tsun wu ai gaw, Israela Karai Kasang Yehowa ning nga nga ai: Nanhte Israela masha ni hpe Egutu mung na ngai shaw woi wa nna, Egutu masha ni a lata hte, nanhte hpe zingri zingrat di ai mungdan hkawhkam ni a lata na hkyehkrang la manit dai: ¹⁹ raitimung, nanhte a ru tsang hte tsin-yam tsindam yawng hta na nanhte hpe tsin-yam tsindam yawng hta na nanhte hpe hkye shaw la ai nanhte a Karai Kasang hpe, dai ni nanhte kau da nna, Anhte a ntsa e hkawhkam shadun ya mi, nga nnga shi kaw tsun myit dai. Dai re ai majaw, amyu langai hte langai, nta dap langai hte langai, Yehowa man de sit sa marit, ngu wu ai. ²⁰ Shingrai Samuela gaw, Israela amyu nlang hte hpe sit wa shangun nna, Ben-yamin amyu hpe lata la ang wu ai. ²¹ Bai Ben-yamin amyu hta na nta dap langai hte langai hpe sit wa shangun yang, Matri dap lata la ang wu ai: bai Kisha kasha Shawlu hpe lata la ang wu ai: shi hpe tam yang, n mu mu ai. ²² Dai re ai majaw shanhte, Dai wa nang de n sa a ni? Ngu nna Yehowa hpe naw san mu yang, Yehowa gaw, Yu mu, shi, arai ni a kata e makoi nga ai, ngu nna tsun dan wu ai. ²³ Shaloi shanhte gat wa nna, shi hpe shapraw la mu ai; masha ni hta shi tsap yang, shi a lahpa htawng ai masha kadai mung n nga ma ai. ²⁴ Shaloi Samuela gaw, Yehowa lata la ai wa hpe, nanhte mu da mu ni? Masha yawng hta shi hte bung ai kadai mung n nga ma ai, ngu nna mung masha ni hpe tsun wu ai. Mung masha ni nlang hte chyawm gaw, Hkawhkam asak galu kaba nga u ga law, nga nna garu ma ai. ²⁵ Samuela mung, dai mungdan htung tara masha ni hpe tsun dan nna, laika hta ka da nhtawm, Yehowa man e tawn da wu ai. Shingrai, mung masha ni mahkra hpe tinang a dum nta de dat dat mu ai. ²⁶ Shawlu mung, Gibea mare na shi a nta de bai wa ai: Karai Kasang woi awn ya ai masha hpung daw wa mung, shi kaw hkan nang ma ai. ²⁷ Raitimung, je hpre ai masha nkau mi gaw, Ndai wa sha mi anhte hpe kaning rai hkye la lu na a ta? nga nna shi hpe n gawn n sawn rai let, kumhpa n sak ai nga nga ma ai: shi chyawm gaw atsin sha nga nga ai.

¹ Dai shaloi e Amon masha Nahasha lung wa nna, Giliad mung Yabesha mare man e dap sa jung wu ai: Yabesha masha ni nlang Nahasha hpe, Anhte hte htinglu htinglai gaw, nang kaw a yam na ga ai, ngu mu ai. ² Raitimung, Amon masha Nahasha gaw, Nanhte mahkra a hkra maga na myi baw kau ya nna, Israela amyu ting hpe ngai jahpoi kau shangun lu yang she, nanhte hte htinglu hkraw na nngai, ngu dat mu ai. ³ Dai rai nna Yabesha agyi salang ni gaw, Dai rai taw, anhte Israela mung ting de kasa dat dat lu hkra, sanit ya naw hkring u; shaloi e hkye la masha n pru sayang gaw, nang kaw pru na raga ai, ngu mu ai. ⁴ Shingrai kasa ni Shawlu nga ai Gibea mare e du nna, dai shi masha ni hpe shana ya mu ai: dai masha ni nlang jahtau hkrap ma ai. ⁵ Ya Shawlu nga gawt nna yi de na du wa ai: shaloi, mare masha ni hpa rai hkrap ma ta? ngu nna san mu yang, Yabesha masha ni a lam tsun dan mu ai. ⁶ Shawlu dai shi na jang, Karai Kasang a wenyi shi hta aze du nna, shi ja ja masin pawt bu nga ai. ⁷ Nga usu gap mi mung shi la sat kahtum nna, Israela mung ting de, kasa ni a lata hte ya dat nhtawm, Shawlu yan Samuela kaw n pru sa ai wa a nga hpe gaw, ning di na, nga nna ga htet shapra dat mu ai. Mung masha ni mung Yehowa hpe hkrit nna, myit langai sha hte pru sa ma ai. ⁸ Shi gaw Bezek shara e shanhte hpe hti yu wu yang, Israela kasha kasha ni hta na sen masum, Yuda amyu hta na mun masum, du ma ai. ⁹ Ga tsun ai kasa ni hpe mung, Gilead mung na Yabesha masha ni hpe, Hpawt de jan ja ai aten e hkyamsa lu la na ra ai, ngu nna wa tsun mu, ngu nna htet dat mu ai. Kasa ni mung wa tsun nna, Yabesha masha ni kabu ma ai. ¹⁰ Dai rai nna, Yabesha masha ni gaw, Nahasha hpe mung, Hpawt de nang kaw anhte pru sa na ra a ai, shaloi nanhte ra ai myit di mi, ngu nna tsun mu ai. ¹¹ Hpang jahpawt e Shawlu gaw masha ni hpe hpung masum di karan nhtawm, jahpawt manap e masha hpyen ni a dap de htim shang nna, jan ja ai ten du hkra, Amon masha ni hpe kahtam mu ai: naw ngam ai ni mung, shada da n kahkyin lu hkra bra mat ma ai. ¹² Dai rai nna mung masha ni gaw, Shawlu sha mi anhte a ntsa e up lu na kun? Nga nna tsun ai wa kadai rai ta? shing nga ai ni hpe woi la nna sat kau gaw, ngu nna Samuela hpe tsun mu ai. ¹³ Shawlu chyawm gaw, Dai ni masha langai mi hpe muk, sat lu na n rai; kaning rai nme law Yehowa dai ni Israela amyu hpe hkye la wu ai, nga ai. ¹⁴ Bai Samuela gaw mung masha ni hpe, Sa, anhte Gilgala de wa nna, dai mungdan hpe shagrin saga, ngu wu ai. ¹⁵ Masha nlang hte mung Gilgala de wa nna, dai yang e Yehowa man e Shawlu hpe hkawhkam aya dang ya mu ai: dai yang, Yehowa man e mahku hkungga mung nawng jau mu ai; Shawlu hte Israela masha ni nlang hte mung, dai yang e ja ja kabe gara nga ma ai.

¹ Shaloi Samuela Israela masha ni mahkra hpe tsun wu ai gaw, Nanhte tsun matsun ngai madat nna, nanhte a ntsa e hkawhkam shadun masade ai. ² Ya, yu mu, dai hkawhkam wa nanhte a man e rai nga ai; ngai chyawm gaw, aprat kaba nna baw hpraw mat ni ai: ngai sha ni mung nanhte hte rau rai nga ma ai; naw kaji kaw nna dai ni du hkra, ngai nanhte a man e hkawm wa ni ai. ³ Ya ngai nang rai nga nngai: gade a dumsu ngai kashun la yu a ta? gade a lawze kashun la yu a ta? kadai hpe maw sha yu a ta? kadai hpe zingri zingrat yu a ta? tinang a myi magap na matu, kadai kaw na manawn kumhpa hkap la yu a ta? Yehowa hte shi a namman chya ai wa a man e nye a lam sakse hkam yu mu; gade a rai kashun la ai rai yang bai wa made ga, ngu nna tsun mu ai. ⁴ Shanhte mung, nang chyawm gaw anhte hpe n maw sha, zingri zingrat n rai ya, gade a arai mung n kashun la yu ndai, ngu nna htan mu ai. ⁵ Shi gaw, Rai sa, nanhte nye a lata e masha wa a arai n mu gawn manit dai gaw, Yehowa ngai hpang maga sakse rai nga nu ga; shi a namman chya ai wa mung, sakse rai u ga, ngu wu ai. Shanhte gaw, Rai sai, Shi sakse rai nga ai, ngu mu ai. ⁶ Bai Samuela gaw, Yehowa, Mawshe yan Arun hpe aya dang tawn nna, nanhte a nji nwa ni hpe Egutu mung na shaw woi wa manit dai. ⁷ Ya atsin sha madat yu mu; Yehowa, nanhte hte nanhte a kaji kawa ni hta dinghpring ai amu a lam shagu, Yehowa a man e ngai nanhte hpe shadum shahprang made ga. ⁸ Yaku Egutu mung de du nna, nanhte a kaji kawani Yehowa hpe jahtau shaga myit dai shaloi, Yehowa Mawshe yan Arun hpe shangun dat nna, nanhte a kaji kawa ni hpe Egutu mung na shaw woi wa nhtawm, ndai mung e nga nga shangun nu ai. ⁹ Shanhte chyawm gaw tinang a Karai Kasang Yehowa hpe malap kau mu ai; shaloi Karai Kasang gaw, Hazora hpyen laba du, Sisera lata de mung, Hpiliasti masha ni a lata de mung, Moba hkawhkam a late de mung, shanhte hpe dut kau wu ai rai nna, dai masha hpyen ni ahpya sha ai hkrum ma ai. ¹⁰ Shaloi shanhte Yehowa hpe jahtau shaga let, Anhte nang Yehowa hpe kau da nna, Bala Hpara ni hte Ashtarot Hpara ni jaw jau ai majaw, shut saga ai law; ya raitimung, masha hpyen ni a lat na sha, anhte hpe hkye la mi, nang hpe sha jaw jau na ga ai, ngu nna hpyi nem mu ai, ¹¹ Dai re ai majaw Yehowa mung, Yerubala, Bedan, Yephta, Samuela hte hpe shangun nna, grupyin masha hpyen ni a lata na, nanhte hpe hkye tawn myit dai rai nna, nanhte apyaw sha rai nga myit dai. ¹² Dai hpang, Amon kashu kasha ni a hkawhkam Nagasha, nanhte hpe gasat sa wa ai mu jang, Shawng na zawn n rai saga, anhte a ntsa e hkawhkam she up mi ga, nga nna, nanhte a Karai Kasang Yehowa nanhte a hkawhkam rai nga ninglen, ngai kaw shing nga hpyi myit dai. ¹³ Ya chyawm gaw nanhte ra nna, lata la ai hkawhkam wa hpe yu yu mu: nanhte a ntsa e hkawhkam tai na matu, Yehowa shadun ya manit dai. ¹⁴ Nanhte Yehowa hpe hkrit hkungga let, shi hpe jaw jau nga nna, shi hte nhtan n shai ai sha shi hkangda ai ga madat let, nanhte mung, nanhte a ntsa e up ai hkawhkam wa mung, nanhte a Karai Kasang Yehowa kaw hkan nang nga myit yang gaw, mai na manit dai: ¹⁵ dai n rai, nanhte Yehowa ga n madat shi a hkangda ai ga hpe nhtan jashai myit yang gaw, Yehowa a lata nji nwa ni hpe numdan ai zawn, nanhte hpe mung numdan na wu ai. ¹⁶ Dai re ai majaw, Yehowa nanhte a man e galaw dat na amu kaba hpe asim sha yu yu ma la. ¹⁷ Dai ni nhtoi gaw, hkaulan mam dan ai ta rai nga ai, n rai ni? Yehowa hpe ngai hpyi nna, mu shangoi ai hte marang jahtu dat na ri ai; dai hta e, nanhte hkawhkam hpyi ai lam, Yehowa man e shut hpyit mara kaba nga malit dai gaw, nanhte mu chye na marin dai, ngu nna mung masha ni hpe tsun wu ai. ¹⁸ Shingrai Smuela Yehowa hpe hpyi shaga nna, dai shani e Yehowa gaw, mu ngoi ai hte marang jahtu dat mu ai: dai majaw mung masha ni nlang, Yehowa hte Samuela hpe nachying hkrit mat ma ai. ¹⁹ Mung masha ni nlang hte mung, Samuela hpe, Na a mayam ni n si n ga, na a Karai Kasang Yehowa kaw anhte a matu hpyi nem ya mi: anhte hkawhkam hpyi kau ai majaw, shawng na shut ai mara ni a ntsa e, bai shut jat sagaw ai, ngu mu ai. ²⁰ Samuela chyawm gaw, Hkum tsang myit: ndai hte shut hpyit myit timung, Yehowa kaw na sha hkum yit myit, Yehowa hpe myit masin mahkra hte jaw jau mu: ²¹ chyeju n jaw lu ai hte, n hkye la lu ai kaman lila rai ni hpang de, hkum yit, hkum dam wa myit: dai ni gaw kaman sha rai nga ai. ²² Yehowa gaw shi a ningsang mying hpe tau nna, shi a masha ni hpe n kau na wu ai: kaning rai nme law, nanhte hpe shi a amyu shatai da na matu, Yehowa ra da wu ai. ²³ Ngai chyawm gaw, nanhte a matu n hpyi nna, Yehowa hpe shut ai lam gaw, ngai hte tsan nga u ga law: dai mai kaja ai hte tengman ai lam hpe ngai nanhte hpe naw madun na nngai. ²⁴ Yehowa hpe hkrit hkungga nna, kangka rai let myit masin mahkra hte jaw jau nga mu: nanhte a matu gade kaning di ya sai gaw adum nga mu. ²⁵ Shing n rai, nanhte n shawp ai amu naw galaw nga myit yang gaw, hkawhkam wa hte hpawn, hten bya ai kaw du na marin dai, ngu nna mung masha ni hpe tsun wu ai.

¹ Ya Shawlu gaw ( asak 40 ) ning e hkawhkam tai nna, Israela amyu hta ni ning up ai hpang e, Israela masha hkying masum lata la nna, shi nga ai, Mikmasha hte Betela bum ga e masha hkying lahkawng, Ben-yamin ga Gibea mare e Yonahtan kaw, masha hkying mi, tawn da nhtawm, gale ni hpe tinang nta de dat dat mu ai. ³ Ya Yonahtan gaw Geba e nga ai Hpilisti dap shang gasat wu ai; dai lam Hpilisti masha ni na ma ai. Shawlu mung, Hebre masha ni na mu ga, nga nna mung ting pahtau dum shangun wu ai. ⁴ Shingrai, Shawlu gaw, dai Hpilisti dap hpya wu ai lam hte, Hpilisti dap hpya wu ai lam hte, Hpilisti masha ni Israela masha ni hpe n ju ai lam, Israela masha ni yawng na ma ai. Dai re ai majaw mung masha ni Gilgala e Shawlu kaw sa zuphpawng nga ma ai. ⁵ Shaloi Hpilisti masha ni gaw Israela masha ni hpe gasat na nga, hpyen leng mun masum, gumra hpyen hkying kru hte, nammukdara zaipru zawn law ai masha hpe jahpawng la nna, rawt sa wa nhtawm, Bet-awen sinpraw maga Mikmasha e dap jung ma ai. ⁶ Ya Israela masha ni ruyak hkrum nna, nau wa kyindut dum wa jang, mung masha ni gaw lunghpu hku, nam maling kata, lunggrawp lungwawp, langhkyi hte ga nhkun hkan e hprawng makoi nga ma ai. ⁷ Hebre masha ni nkau mi mung, Yawdan hka rap nna, Gad mung, Gilead mung de hprawng mat wa ma ai; Shawlu chyawm gaw, Gilgala shara e naw nga nga ai rai nna, masha ni nlang shi kaw e hkrit gari let hkan nang ma ai. ⁸ Samuela madat da ai aten hte maren Shawlu gaw sanit ya htep la nga ai: raitimung, Samuela Gilgala de lau n du ai hte, masha ni mung hprawng mat wa shajang ma ai. ⁹ Shaloi Shawlu gaw, Wan nat hkungga hte mahku hkungga la wa marit, nga nna, wan nat hkungga nawng wu ai. ¹⁰ Ya, dai wan nat hkungga nawng myit yang she, yu u, Samuela du sai: Shawlu gaw, shaman ya ruga nga, shi hpe tau la na rawt sa wa ai. ¹¹ Shaloi Samuela gaw, Nang hpa galaw n ta? ngu wu yang, Shawlu gaw, Masha ni ngai kaw na hprawng mat wu ai hte nang mung madat da ai ahkying hta n du rai nna, Hpilisti masha ni Mikmasha e hpawng nga ai, ngai mu we ai majaw, ¹² Ngai gaw, Hpilisti masha ni ndai ngai nga ai Gilgala de du na mara ai: Yehowa kaw chyeju garai n hpyi ngai wa, ngu myit nna, ngai hkum dai ngai shadang nna, wan nat hkungga nawng kau se ai, ngu nna htan wu ai. ¹³ Samuela gaw, Nang shut nit dai; na a Karai Kasang Yehowa nang hpe hkangda ai ga matsun n hkan nit hka; hkan nu taw gaw, Yehowa, Israela amyu hta na a mungdan magam prat dingnawng shagrin ya na nit dai; ¹⁴ ya chyawm gaw na a magam grin sa na n rai: Yehowa gaw shi a myit dik ai masha tam nga ai; nang mahtang, Yehowa nang hpe hkangda ai ga matsun n hkan nang ndai majaw, Yehowa gaw dai wa hpe shi a amyu Israela du shatai na, san da nu ai, ngu wu ai. ¹⁵ Shaloi Samuela rawt nna, Gilgala kaw nna, Ben-yamin ga Gibea de wa mat ai. Shawlu mung, shi kaw na masha ni hpe hti yu wu yang, marai kru tsa daram rai ma ai. ¹⁶ Shingrai Shawlu yan kasha Yonahtan hte shan a masha ni nlang hte gaw, Ben-yamin ga Geba e nga nga ma ai: Hpilisti masha ni chyawm gaw Mikmasha e dap jung ma ai. ¹⁷ Ya Hpilisti dap hta na hpya sha ai hpyen hpung masum pru nna, hpung mi gaw, Shuala mung Ohpra lam hku sa wa ma ai; hpung mi gaw, Bet-horon lam hku sa wa ma ai; bai hpung mi gaw, Zeboim kadit ang na, lamu ga jarit hprang ai nam mali lam hku sa wa ma ai. ¹⁹ Hpilisti masha ni mahtang, Hebre masha ni hpe ri nhtu hkum dup nga nna hkrai hkang shadang ai majaw Israela mung ting hta ndup langai mi muk n nga ai. ²⁰ Israela masha ni nlang hte gaw, na jawn, shanghkawp, nwa, shingban re ai ni dup gram na matu pyi, Hpilisti masha ni hpang de sa ra ma ai: ²¹ hpang e dai shingban, shanghkawp, labra, nwa hte hpri shingju ni tawn htum mat ma malu ai. ²² Dai rai nna majan sat ai shani e, Shawlu yan Yonahtan hte rau nga ai; masha gade a lata hta mung ri nhtu n nga malu ai: Shawlu yan Yonahtan chyu sha lu ma ai. ²³ Ya Hpilisti masha ni a dap sin ai hpyen langa ni gaw, Mikmasha lam hku pru nna, nga nga ma ai.

¹ Ya lani mi na Shawlu a kasha Yonahtan gaw, kawa kaw ahkang n hpyi ai she, shi a ri nhtu lang ai hpyen ma hpe shaga woi nna, Wora Hpilisti dap de sa saga, ngu wu ai. ² Shawlu chyawm gaw, Gibea mare shingnawm, Migron shara na, hkainu si hpun nhpang e naw nga nga ai: shi hte rau nga ai ni gaw, marai kru tsa daram rai ma ai; ³ hkinjawng palawng hpun nna, Shili mare e Yehowa hkinjawng amu gun ai Eli, Hpineha kaw na hkrat ai, Ihkabo a kahpu Ahitub a kasha Ahiya mung lawm nga ai. Yonahtan hkawm mat wa ai gaw kadai mung nchye ma ai. ⁴ Yonahtan Hpilisti dap de shang wa na lam lapran e, gade nde lunghkrung masen nga nga ai: langai mi a amying gaw Boze, langai mi a amying gaw Zene rai nga ai. ⁵ Langai mi gaw dingdung maga, Mikmasha de man yawng nga ai; langai mi gaw dingda maga Geba de man yawng nga ai. ⁶ Ya Yonahtan gaw, Sa, wora, matu n gadoi ai masha ni a dap de sa saga; Yehowa an hpe a karum na ra ai; Yehowa hkye hkran la ai lam gaw, masha law ai n law ai hta, hkan ai n rai, ngu nna shi a ri nhtu lang ai wa hpe tsun wu ai. ⁷ Shi a ri nhtu lang ai wa mung, Nang ra ai hte maren galaw u; she sa sa u; nang ra ai hku ngai mung hkan na nngai, ngu wu ai. Dai rai nna Yonahtan gaw, Law, an gaw wora ni kaw sa nna, pru dawng dan ga; ⁹ shaloi shanhte, Hkap ma la, du na ra ga ai, nga ma yang gaw, shanhte hpang de n sa ai sha, hkap nga ga; ¹⁰ shing n rai, Du marit, nga ma yang gaw, an mahtang lung ga; Yehowa shanhte hpe an a lata hta ap ma ni ai: kumla gaw dai hku rai na rai nga ai, ngu wu ai. ¹¹ Shingrai shan lahkawng, Hpilisti dap de shan a hkum pru dawng dan mu yang, Hpilisti masha ni gaw, Yu mu, Hebre masha ni tinang makoi nga ai nhkun kaw na pru mara hka, nga shajang ma ai. ¹² Dai hpyendap masha ni mung, Du marit, lama mi madun made ga, nga nna Yonahtan yan shi a ri nhtu gun ai wa hpe tsun mu ai. Shaloi Yonahtan gaw, nye hpang e hkan rit, Yehowa shanhte hpe Israela masha ni a lata de ap kau nu ai, ngu nna shi a gun ai wa hpe tsun wu ai. ¹³ Shaloi Yonahtan gaw, wa hkawm hkawm let gumrawt lung wa nna, shi a ri nhtu gun ai wa hkan nang nga ai: Yonahtan man e Hpilisti masha ni si daw shajang ma ai rai nna, shi a ri nhtu gun ai wa mung, shi hpang hkan nna, sat nang wa wu ai. ¹⁴ Shingrai, Yonahtan yan shi a ri nhtu gun ai wa e shawng gasat htim ai hta, sat lu ai ngu na, usu gap mi hte lani mi galau ai ngut ai yi ngam a ka-ang hkup daram dam ai shara hta marai hkun dang si ma ai. ¹⁵ Dai rai nna, dap kata na ni da, yi hkauna na ni da, masha kaga nlang hte da, hkrit gari nga ma ai; sin langa ni hte hpya sha damya ni mung, hkrit gari nga ma ai: lamu ga du kanan ai hte, nachying hkrit gari wa ma ai. ¹⁶ Ya Ben-yamin ga, Gibea mare da ai Shawlu a sin langa ni yu yu mu yang, yu mu, Hpilisti masha wunawng wuwa yawm mat nna, dumbru dumbra rai mat wa ma ai, mu mu ai. ¹⁷ Shaloi Shawlu gaw, Kadai pru mat ai chye lu hkra, masha ni hpe hti yu mu, ngu nna shi hte rau nga ai ni hpe tsun wu ai. Shingrai hti yu mu yang, Yonahtan hte shi a ri nhtu gun ai wa n nga sai. ¹⁸ Dai aten e Karai Kasang a sumpu Israela masha ni gaw nga ai rai nna, Shawlu gaw, Karai Kasang a sumpu la wa rit, ngu nna Ahiya hpe tsun wu ai. ¹⁹ Shingrai Shawlu hkinjawng wa hte shaga nga yang, Hpilisti dap de grau nna garu kachyi wa ai majaw, Shawlu gaw hkinjawng wa hpe Naw rai nu ga, ²⁰ nga nna tsun ai lata, Shi hte shi a masha ni nlang, shada da ginrawn la nna, hpyen de htim sa wa ma ai: shanhte du jang, Hpilisti masha ni gaw shada da kahtam hkat nna, grai bra mat masai. ²¹ Shawng de Hpilisti masha ni a hpang maga de lawm nna, shara shagu hkan na dai dap de shang wa ai Hebre masha ni mung, Shawlu hte Yonahtan kaw hkan ai Israela masha ni hpang de, bai kayin shang ma ai. ²² Hpilisti masha ni hprawng sai, nga ai, na jang, Ehprim bum hkan e makoi nga ai Israela masha ni nlang hte mung Hpilisti masha ni hpe hkan shachyut kahtam mu ai. ²³ Shingrai Yehowa dai shani e Israela masha ni hpe hkye la wu ai rai nna, dai hpyen gasat ai gaw Bet-awon lai hkra rai mat wa ai. ²⁴ Dai shani e Israela masha ni tsinyam grai hkrum ma ai: kaning ai nme law, Shawlu mahtang, Ngai nye a hpyen ni hpe masin si hkra di lu na matu, jan garai n du yang, lusha sha ai wa gaw dagam dala hkrum u ga, ngu nna masha ni hpe dagam shalawm kau wu ai majaw, kadai mung hpa n sha lu ma ai. ²⁵ Masha ni nlang nam maling de du nna, ga de lagat jahku jawng nga ai. ²⁶ Dai nam maling de masha ni du nna, lagat jahku abya nga ai, mu ma timung, dai dagam ga hpe hkrit ai majaw, kadai mung n chyim lu ma ai. ²⁷ Yonahtan chyawm gaw, kawa masha ni hpe dagam tawn ai ga n na wu ai majaw, shi lang ai ri hte gitpa hta galun shakap la nhtawm, shi a lata hte mayut sha wu ai rai nna, shi a myi san wa lu ai. ²⁸ Shaloi masha langai mi, Nwa, dai ni, shahpa sha ai wa dagam dala hkrum u ga, nga nna aja awa dagam tawn sai, ngu nna shi hpe tsun dan wu ai. Masha ni nlang mung ba galawp ai hkrai rai masai. ²⁹ Shaloi Yonahtan gaw, Nye wa masha ni hpe shatsang kau nu ai: yu u, lagat jahku kachyi mi ngai chyim yu ai majaw, nye a myi san sali ai. ³⁰ Masha ni, dai ni, hpyen ni a rai mu mamu sha lu taw gaw, gade wa akyu kaba na rai ta? Hpilisti masha ni hpe grau nna sat lu na n re a hka, ngu wu ai. ³¹ Dai shani e shanhte Hpilisti masha ni hpe Mikmasha kaw nna Aiyalon du hkra shachyut kahtam mu ai. Hkan shachyut ai masha ni mung nau ba mat nna, ³² hpyen ni kaw na kashun la lu ai lanep, sagu, dumsu, dumsu kasha re ai ni hpe, ga hta sat tawn nna, katsing hprap hprap sha ma ai. ³³ Shingrai, Masha ni shan katsing sha ai majaw, Yehowa hpe shut masai, ngu nna Shawlu hpe tsun dan mu ai. Shawlu mung, Nanhte ga shaka run kau manu ai: nlung kaba ngai hpang de galau wa marit, ngu wu ai. ³⁴ Bai Shawlu gaw, sa mu, shara shagu hkan na masha ni hpe, langai hte langai tinang a sagu dumsu nang de la wa nna, nang e sat sha maru; katsing hprap hprap sha nna, Yehowa hpe hkum shut myit, ngu nna tsun ma su, ngu dat wu ai. Dai rai nna, masha hkum shagu dai shana e, tinang a sagu dumsu la sa nna, dai yang sat sha ma ai. ³⁵ Shawlu mung, Yehowa mung, Yehowa matu tawn hkungri gaw wu ai: dai gaw Yehowa matu shi nnan gaw hpang ai hkungri rai lu ai. ³⁶ Bai Shawlu gaw, sa, dai na anhte Hpilisti masha ni hpe hkan shachyut nna, langai mi muk n ngam tawn ai sha, nhtoi hkra hkan hpya saga, ngu wu ai. Masha ni mung, Nang ra ai hku mi di u, ngu nna htan mu ai. Hkinjawng wa chyawm gaw, Karai Kasang kaw naw sit wa yu saga, ngu wu ai. ³⁷ Shingrai Shawlu Karai Kasang kaw, Ngai Hpilisti masha ni hpe naw shachyut lu na rai ni? Shanhte hpe Israela masha ni a lata hta ap na a ni? Ngu nna lam san wu ai, Karao Kasang chyawm gaw dai shani e n htan ya wu ai. ³⁸ Shaloi Shawlu gaw, Agyi salang ni nlang hte e, dai ni kadai shut ai chye lu hkra, nang de sit wa yu marit. ³⁹ Israela hpe hkyehkrang la ai Yehowa nga nga ai hte maren, ngai sha Yonahtan hta ang timung, teng teng si lu na rai nga ai, ngu wu ai. Dai hpe kadai mung n htan wam mu ai. ⁴⁰ Bai Shawlu gaw, Nanhte maga mi zeng; Yonahtan an wa maga mi zeng, rai yu ga, ngu nna masha ni nlang hte hpe hkang wu yang, masha ni mung, Nang ra ai hku mi di u, ngu nna Shawlu hpe htan mu ai. ⁴¹ Dai re ai majaw Shawlu gaw, Tengman ai hku dawdan rit, ngu nna, Israela Karai Kasang Yehowa hpe hpyi wu yang, Yonahtan yan Shawlu hta ang wa nna, masha ni gaw lawt lu ma ai. ⁴² Bai Shawlu gaw, Ngai hte ngai sha Yonahtan lapran bai lata yu mi, ngu wu yang, Yonahtan hta ang wa ai. ⁴³ Shaloi Shawlu gaw Yonahtan hpe, Nang hpa shut n ta, tsun u, ngu wu ai. Yonahtan gaw, Ngai lang ai ri lap hte lagat jahku kachyi mi achyaw la nna chyim we ai; dai jaw e sha si na rai ni ai, nga nna htan wu ai. ⁴⁴ Shawlu chyawm gaw, Yonahtan e, nang teng teng n si lu ai nga yang gaw, Karai Kasang dai hta grau ngai hpe di nu ga, ngu wu ai. ⁴⁵ Mung masha ni mahtang, Israela amyu matu nde wa hkyehkrang la ai chyeju shapraw ai wa. Yonahtan, si lu na rai ni? Dai gaw n rai u ga; Yehowa anga nga ai hte maren, shi a kara sing-gawng mi muk, ga n hkrat lu na re ai; kaning rai nme law, shi dai ni Karai Kasang hte rau, jawm shaja nu ai, ngu mu ai. Shing di masha ni gaw, Yonahtan hpe, si ai kaw na hkrang la mu ai. ⁴⁶ Dai hpang Shawlu gaw, Hpilisti masha ni hpe n shachyut ai bai wa mat ai; Hpilisti masha ni mung tinang buga de wa mat ma ai. ⁴⁷ Shingrai Shawlu gaw, Israela mungdan hpe up nga ai hte yang, grupyin na masha hpyen ni ngu ai, Moba masha, Amon a kashu kasha ni, Edom masha, Zoba hkawhkam ni hte Hpilisti masha ni hpe shi gasat nna, rawt ai shara shagu hkan e shanhte hpe jahtaw kau lu mu ai. ⁴⁸ Majan magam gun shaja nna, Amalek masha ni hpe dang kau ai hte, Israela amyu hpe hpya sha shatsang ai ni a lata na hkye la wu ai. ⁴⁹ Ya Shawlu a shadang sha ni gaw, Yonahtan, Ishwi, Mahkishua rai ma ai: shayi sha yan lahkawng hta, kana gaw Merab, kanau gaw Mihkala, mying rai nga ma ai: ⁵⁰ Shawlu a madu jan gaw, Ahimaya shai sha Ahinoam rai nga ai. Shi a hpyen laba ni a langang wa gaw, kawa doi Nera a kasha Abna rai nga ai. ⁵¹ Kisha chyawm gaw Shawlu a kawa rai nga ai: Abna kawa Nera gaw Abiela kasha rai nga ai. ⁵² Shawlu a prat tup Hpilisti masha ni hte majan kaba rai nga ai rai nna, Shawlu gaw n-gun ja ai hte nden ja ai masha hkrup mahkrup hpe lata san da wu ai.

¹ Shaloi Samuela gaw Shawlu hpe, Yehowa amyu Israela hpe up na matu, nang hpe namman chya su, nga nna Yehowa ngai hpe shangun ni ai: dai re ai majaw, Yehowa tsun ai ga ya madat u. ² Zaw nawng zaw wa up ai Yehowa ning nga ai: Israela masha ni Egutu mung na pru wa ai shaloi na, Amalek masha ni hkap hpya ai amu hpe ngai matsing da we ai. ³ Dai majaw ya sa nna, dai amyu hpe sa gasat su; lahpawt ai myit n rawng ai sha, atsai awai hpya kau nna, numsha lasha, ma kaji ma chyangai, sagu dumsu, gawlauk lawze nlang sat kau mu. ⁴ Shawlu mung masha jahpawng nna, Telim shara e hti yu mu yang, lagaw hpyen sen lahkawng, Yuda amyu hta na mun mi rai nga ai. ⁵ Shaloi Shawlu gaw Amalek mare de du nna, kadit e lagyim nga ai. ⁶ Shawlu mung Keni masha ni hpang de kasa shangun nna, Ngai nanhte hpe Amalek masha ni hte hpawn ngai n sat kau lawm hkra, shanhte kaw na pru nna bu htawt mu: kaning rai nme law, Israela kashu kasha ni Egutu mung na pru wa ai shaloi, nanhte matsan hkap dum la manit dai, ngu nna htet dat wu ai. Dai rai nna, Keni masha ni mung, Amalek masha ni kaw na pru mat wa nga ai. ⁷ Shingrai Shawlu gaw, Amalek masha ni hpe, Hawila kaw nna, Egutu mung hte tawtap na Shura du hkra gasat kahtam wu ai. ⁸ Amalek hkawhkam Agag hpe jahkrung rim la lu muai; shi a masha ni nlang hpe chyawm gaw atsai awai sat kau mu ai. ⁹ Raitimung, Shawlu hte shi a masha ni gaw, Agag hte hpawn, sagu dumsu grau kaja ai, hpum sau ai yamnga, sagu kasha hte kaja hkik ai arai yawng mayawng hpe gaw, lahpawt ai myit hte n shaza kau mu ai: Asung n shang ai hte n mai n tai re ai rai ni hpe sha atsai awai shaza kau mu ai. ¹⁰ Ya, Yehowa a ga Samuela kaw du nna, Ngai Shawlu hpe hkawhkam shatai we ai majaw, myit malai lu se ai; ¹¹ shi myit yit mat wa nna nye a hpang n hkan ai hte ngai hkangda ai ga n shatup nu ai, ngu wu ai. ¹² Bai Samuela gaw, Shawlu hpe sa tau na nga, jahpawt jau jau e rawt sa wa ai: rawt sa wa yang, Shawlu mahtang Hkamela shara de du wa nna, padang dawnghkawn jung kau da nhtawm, kayin mat wa nna, Gilgala de yu mat wa sai, Samuela na wu ai. ¹³ Dai rai nna Samuela Shawlu nga ai de hkan nang sa w ai: Shawlu mung, Yehowa nang hpe shaman ya u ga; Yehowa hkang dat ai ga ngai shatup se ai, ngu wu ai. ¹⁴ Samuela chyawm gaw, Ataw, sagu ngoi ai nsen mi ana, dumsu nbaw ai nsen mi akra, kaning re ai rai ta? ngu wu ai. ¹⁵ Shaloi Shawlu gaw, Amalek masha ni kaw na la wa ma ai: masha ni mahtang, na a Karai Kasang Yehowa hpe hkungga nawng jau na nga, kaja htum ai sagu dumsu ni hpe lahpawt nna, gale yawng hpe gaw atsai awai shaza kau manu ai, ngu wu ai. ¹⁶ Dai rai nna Samuela gaw, Naw hkring u, mana e Yehowa ngai hpe tsun ai ga hti dan de ga, ngu nna Shawlu hpe tsun wu ai. Shawlu mung, Tsun u, ngu wu ai. ¹⁷ Shaloi Samuela gaw, Nang gaw, nang hkum dai pyi, kaji dum ai wa rai nga ninglen, Israela amyu ni a baw nang tai nit dai, n rai ni? Yehowa nang hpe Israela amyu ntsa e hkawhkam shatai na namman chya nit dai; ¹⁸ bai, Yehowa nang hpe, Sa su, mara law ai Amalek masha ni hpe atsai awai sat kau su; shanhte amyu matu n htum dingsa a gasat nga u, nga nna she, lam madun dat ai rai yang me, ¹⁹ Yehowa a ga na madat ai mi, masha hpyen ni a rai htawm wa nna, Yehowa man e n shawp ai amu shapraw ai gaw, hpa majaw rai ta: ngu nna tsun wu ai. ²⁰ Shawlu mung, Yehowa a ga ngai teng teng madat ni ai; Yehowa ngai hpe shangun dat ai lam de ngai sa ni ai; Amalek hkawhkam Agag hpe ngai la wa nna, Amalek masha ni hpe atsai awai sat kau se ai. ²¹ Masha ni chyawm gaw, Gilgala e, na a Karai Kasang Yehowa hpe nawng jau na nga, dai majai kau sai, kaja htum ai lanep, sagu dumsu ni hpe la wa manu ai, ngu nna htan wu ai. ²² Bai Samuela gaw, Yehowa gaw, shi a ga madat ai hta awng sharawng ai zawn, wan nat hkungga hte hkungga amyu hta awng sharawng na a ni? Yu u, madat mara ai gaw hkungga shan hta grau nga ai; tsun ai hku hkan ai gaw, sagu la sau dung hta grau kaja nga ai. ²³ n madat ai myit chyawm gaw, hpyi shung shung sha ai zawn, je hpre ai myit gaw, mandan lakle hte sumla nawku ai zawn, mara kaba nga ai. Nang Yehowa a ga kabai kau ndai majaw, Yehowa mung nang hpe hkawhkam aya hta na jahkrat nna, kabai kau nit dai, ngu wu ai. ²⁴ Shaloi Shawlu gaw, Ngai shut ni ai; masha ni hpe hkrit nna, shanhte a ga madat kau ai majaw, Yehowa a ga hpe mung, na a ga hpe mung, tawt kau ni ai. ²⁵ Ya, nye a mara sharang kau ya e; Yehowa hpe ngai nawku lu n ga, ngai hte rau wa saga, ngu nna Samuela hpe hpyi wu ai. ²⁶ Samuela chyawm gaw, Ngai nang hte rau n wa na nngai; nang Yehowa ga kabai kau ndai majaw, Yehowa nang hpe Israela hkawhkam aya hta na jahkrat nna, kabai kau nit dai, ngu nna Shawlu hpe tsun let, ²⁷ kayin mat wa wu yang, Shawlu gaw Samuela palawng matu hkan gang wu ai majaw, dai palawng je mat wu ai. ²⁸ Dai majaw Samuela gaw, Dai ni Yehowa Israela mungdan, nang kaw na gang je la nna, nang hte grau kaja ai, na a htingbu wa langai mi hpe, jaw kau nu ai. ²⁹ Dai hta n-ga, Israela Daru shingkang magam gaw, masu chye ai n rai, myit galai chye ai n rai; myit galai bai lu na gaw, shi shinggyim masha n rai, ngu wu ai. ³⁰ Bai Shawlu gaw, Ngai shut kau ni ai; raitimung, nye a amyu agyi salang ni hte Israela man e, ngai e hkungga lam naw madun dan ya nna, ngai na a Karai Kasang Yehowa hpe nawku lu hkra, ngai hte rau wa ga, ngu nna hpyi wu ai. ³¹ Shingrai Samuela Shawlu hte rau wa ai rai nna, Shawlu Yehowa hpe nawku wu ai. ³² Bai Samuela gaw, Amalek masha ni a hkawhkam Agag hpe ngai kaw woi wa marit, ngu wu ai. Agag mung, Gaja wa, si hkrung hkrithpa gaw, boi mat sai, nga nna myit pyaw let shi hpang de sa wa ai. ³³ Samuela chyawm gaw, Na nhtu hte ma kanu ni kasha sum ai zawn, na nnu mung kasha sum ai kanu tai lu na rai sai, nga nna tsun let, Gilgala shara Yehowa man e, Agag hpe kahtum gadaw azat kau wu ai. ³⁴ Dai hpang Samuela gaw Rama de wa nna, Shawlu mung, shi nga ai Gibea mare shi a nta de wa mat ai. ³⁵ Samuela mung Shawlu si ai shani du hkra, shi hpang de kawan katsan bai na sa yu nu ai; raitimung, Samuela gaw Shawlu majaw myit yawn nga ai: Yehowa mung, Shawlu hpe Israela hkawhkam shatai ai lam myit malait la wu ai.

¹ Dai rai nna Yehowa Samuela hpe, Israela hkawhkam aya na ngai jahkrat kau ai Shawlu a majaw, nang gaten du hkra yawn nga na n ta? Na a tau hta namman bang jahpring nna sa su; Betlehem masha Yese hpang de shangun dat de ga; shi a kasha ni hta na langai mi, nye a matu hkawhkam shatai na, ngai san da se ai, ngu wu ai. ² Samuela chyawm gaw, Ngai kaning rai sa lu na rai ta? Shawlu na jang, ngai hpe sat kau na ring ngai, ngu wu ai. Yehowa gaw, Dumsu upra langai mi la nna, Yehowa hpe hkungga jaw na sa wa nngai, ngu nna tsun u. ³ Yese hpe mung hkungga jaw ai de shaga u; dai yang nang kaning rai galaw na ngai madun na de ai; ngai amying gang nna shapraw dat ai wa hpe, nye a matu namman chya u, ngu wu ai. ⁴ Samuela mung, Yehowa tsun ai hte maren galaw nna, Betlehem mare de sa du ai. Betlehem na agyi salang ni gaw, shi hpe hkrit gari let sa tau nna, Nang ngwi pyaw lam hte sa rin ni? Ngu nna san mu ai. ⁵ Shi gaw, Ngwi pyaw lam hte hpawn, Yehowa hpe hkingga jaw na du ring ngai; tinang hkum shachyoi shapra nna, ngai hte rau hkungga poi shang na sa marit, ngu wu ai. Yese hte shi a kasha ni hpe mung shi shachyoi shapra nna, hkungga poi de shaga mu ai. ⁶ Ya shanhte du ma jang, shi Eliaba hpe hkap yu nna, Gaja wa, Yehowa a namman chya hkam na wa gaw, shi a man e rai sai, nga ai. ⁷ Yehowa chyawm gaw, Shi a myiman, shi a hkum shingyan hkum yu et; ngai shi e n la we ai; Yehowa gaw masha mu de nna mu ai n rai; masha gaw ahpraw asam sha yu chye ma ai, Yehowa chyawm gaw myit masin she yu ai, ngu nna Samuela hpe tsun wu ai. ⁸ Bai Yese gaw Abinadab hpe shaga nna, Samuela man e shalai dat wu ai. Samuela gaw, Ndai wa hpe mung Yehowa n la wu ai, ngu wu ai. ⁹ Bai Yese gaw, Shama hpe shalai dat wu ai; Samuela gaw, Ndai wa hpe mung Yehowa n la wu ai, ngu wu ai. ¹⁰ Shingrai Yese gaw shi a kasha sanit hte du hkra Samuela man de shalai ya yu wu timung, Samuela gaw, Ndai ni hpe Yehowa n la wu ai, ngu wu ai. ¹¹ Bai Samuela gaw, Na nsha ni ndai hte sha rai ni? Ngu nna Yese hpe san wu yang, shi gaw, Hpungdim shadoi langai mi gaw naw nga ai; shi gaw sagu rem nga ai, ngu nna tsun dan wu ai. Shaloi Samuela gaw, Shi hpe shaga shangun dat u; shi garai n du yang, poi de shang dung na ga ai n rai, ngu nna Yese hpe tsun wu ai. ¹² Shingrai shi hpe shaga wa ma ai. Shi gaw myiman hkyeng nna, ahpraw tsawm ai hte hkum hkrang hking ai wa rai nga ai. Yehowa mung, Ndai wa re ai; rawt nna shi hpe namman chya u, ngu wu ai. ¹³ Samuela mung shi a namman tau la nna, kahpu ni a hpawng ka-ang e, shi hpe namman chya wu ai; dai shani kaw nna Yehowa a wenyi Dawi a ntsa e adung nga ai. Shingrai Samuela rawt nna, Rama de bai wa ai. ¹⁴ Ya Yehowa a wenyi Shawlu kaw na pru mat wa ai rai nna, Yehowa kaw na na hkru ai nat shi hpe shatsang tsang rai nga ai. ¹⁵ Dai rai nna, Shawlu a ali ama ni gaw, Yu u, Karai Kasang kaw na n hkru ai nat, nang hpe shatsang tsang rai nga ai. ¹⁶ Dai re ai majaw, anhte nang madu a man e nga ai ali ama ni, tingse atsawm sha dum shapyaw chye ai wa langai mi hpe tam na ahkang jaw mi; shingrai Karai Kasang kaw na dai n hkru ai nat nang kaw du jang, dai wa tingse dum nna, nang hpe shabran na rai nga ai, ngu mu ai. ¹⁷ Shawlu mung, Mai sa, dum shapyaw chye ai wa hpe, nye a matu tam nna, ngai kaw shaga wa marit, ngu nna ali ama ni hpe tsun wu ai. ¹⁸ Shaloi shabrang wa mi tsun ai gaw, Betlehem masha Yese a kasha langai mi gaw ngai mu yu se ai; dai wa gaw tingse dum shapyaw chye ai hte, nden ja nna majan gasat kung ai wa, mungga hpaji rawng nna ahpraw tsawm ai wa rai nga ai; Yehowa mung shi hte rau nga nga ai; ngu nna tsun dan wu ai. ¹⁹ Dai majaw shawlu gaw Yese hpang de masha shangun dat nna, Sagu rem ai, na nsha Dawi hpe ngai hpang de dat ya rit, ngu dat wu ai. ²⁰ Yese mung, lawze daw hta muk shagun nna, tsabyi tau hte bainam kasha la nhtawm, shi a kasha Dawi a lata hta Shawlu hpang de shagun dat wu ai. ²¹ Dawi mung Shawlu kaw du nna, shi a man e tsap nga ai: Shawlu gaw shi hpe nachying tsawra nna, shi a ri nhtu gun ai wa shatai wu ai. ²² Shingrai, Shawlu gaw, Yese hpang de masha shangun nna, Dawi hpe ngai ra se ai majaw, ngai kaw nga nga u ga, nga nna hpyi dat wu ai. ²³ Dai rai nna, Karai Kasang kaw na ndai n hkru ai nat Shawlu ntsa de du jang, Dawi gaw dai tingse la nna, dum shapyaw pyaw di ai majaw, dai n hkru ai nat Shawlu kaw na pru mat wa nna, bai bran wa ai hte mai mat mat rai nga ai.

¹ Ya Hpilisti masha ni gaw, hpyen gasat na nga tinang a luksuk laba lahkawn nna, Yuda ga Sohko hte Azeka lapran na, Ehpe-damim shara e dap jung nga ma ai. ² Shawlu hte Israela masha ni mung zuphpawng nna, Ela kadit e dap jung n-htawm, Hpilisti masha ni hpe gasat na hkyen nga ma ai. ³ Shingrai Hpilisti masha ni, maga mi de na kawng hta, Israela masha ni, maga mi de na kawng hta tsap nga nna, shanhte a lapran e hkaraw din nga ai. ⁴ Shaloi Hpilisti dap na dawng kru e lahkam mi tsaw ai, Gat mare na Goliat ngu ai share langang langai mi pru sa wa ai. ⁵ Dai wa gaw, magri gup du ru grup nna, magri palawng hpun wu ai; dai palawng gaw, magri shekela hkying manga li ai rai lu ai. ⁶ Magri laraw raw nna, lahpa hta magri ri kaba hpai nga ai. ⁷ Shi a ri numdu gaw da hkaw daram kaba nna, ri lap gaw hpri joi kru li lu ai: shi a n-gang lang ya ai wa mung, shi a shawng e sa wa nga ai. ⁸ Dai wa gaw sa tsap nna, Israela hpyen laba ni hpe, Nanhte hpa majaw hpyen gasat na hkyen nga myit ta? Ngai gaw Hpilisti masha, nanhte chyawm gaw, Shawlu a mayam ni rai nga ai, n rai ni? Marai langai mi lata la nna, ngai hte sat hkat shangun mi. ⁹ Shi ngai e gasat nna sat kau lu sayang gaw, anhte nanhte a mayam ni tai na ga ai; ngai mahtang shi hpe dang nna sat kau lu yang gaw, nanhte anhte a mayam tai nna anhte a amu gunhpai lu na rai nga ai, ngu nna jahtau wu ai. ¹⁰ Dai Hpilisti wa gaw, Ngai dai ni Israela hpyen laba ni hpe dakat nga nngai; langai chyaw shada sat hkat lu na, marai langai mi dat dat mu le, ngu wu ai. ¹¹ Dai Hpilisti wa dakat ai ga, Shawlu hte Israela masha ni na ma yang, shanhte gaw myit htum nna grai hkrit ma ai. ¹² Ya Dawi gaw Ehprahta ngu ai, Yuda ga Betlehem masha Yese a kasha rai nga ai: dai Yese gaw shadang sha matsat lu ai rai nna, Shawlu a lakhtak e, dingla ugut gu ai prat rai sai. ¹³ Dai kasha kaba masum gaw, majan amu gun ai rai nna, Shawlu kaw hkan nang nga ma ai: majan de lawm ai shadang sha masum a amying gaw, La N-gam, Eliaba; la N-Naw, Abinadab; la N-La, Shama, rai nga ai. ¹⁴ Dawi chyawm gaw hpungdim uma rai nga ai; kahpu masum hte Shawlu kaw hkan nang ma ai. ¹⁵ Ya Dawi gaw, Betlehem de kawa a sagu mung wa rem, Shawlu kaw mung sa rai nna, dinghtan nga ai. ¹⁶ Dai Hpilisti wa chyawm gaw, mali shi ya tup, jahpawt shana sa pru dan dan di mu ai. ¹⁷ Ya Yese gaw shi a kasha Dawi hpe, Na nhpu ni a matu ndai mam npaw bye mi, dai muk tawng shi la nna, dap de nga ai na nhpu ni kaw gat su; ¹⁸ ndai nga chyu shage tawng shi mung, shanhte a hpyenbu kaba wa hpe jaw u; na nhpu ni kaja ai n kaja ai yu nna, shanhte kaw na kumla la wa rit, ngu dat wu ai. ¹⁹ Dai hte yang, Shawlu, Dawi a kahpu ni hte Israela masha ni nlang hte gaw, Ela kadit e nga nna, Hpilisti masha ni hpe gasat nga ma ai. ²⁰ Shaloi Dawi jahpawt jau jau e rawt nna, sagu ni hpe sagu rem ai wa langai mi a lata hta ap kau da nhtawm, kawa Yese hkang dat ai hte maren shahpa la gun nna sa wa ai: shingrai, hpyen luksuk ni hpyen hkyen garu let, gasat na pru ma yang, dai hpyendap na leng ni nga ai shara de shi du ai. ²¹ Shingrai, Israela luksuk ni hte Hpilisti luksuk ni man jahkrum nna, gasat na hkyen ma ai. ²² Ya Dawi gaw shi gun ai arai ni, arai sin ai wa a lata hta ap da nhtawm, luksuk hpawng de gat shang nna, kahpu ni hpe shachyen wu ai. ²³ Ya shanhte hte shaga nga yang, Hpailisti masha ni a share langang, Gat mare na Goliat ngu ai wa, Hpilisti dap na pru nna, shawng na zawn sa dakat nga ai: dai hpe Dawi e na wu ai. ²⁴ Israela masha ni yawng dai wa hpe mu jang, nachying hkrit ai hte hprawng ma ai. ²⁵ Israela masha langai mi mung, Lera lung wa ai wa hpe, nanhte mu myit ni? Gaja wa, Israela amyu hpe roi na lung wa ai, rai nga ai: dai wa hpe sat kau lu ai wa e gaw, hkawhkam wa sutgan kaba hte shagrau nna, shi a shayi sha ya sha na da, dai wa a nta dap ni hpe mung, Israela mungdan hta lahkawn shalawt na da, nga nna tsun nga ai. ²⁶ Dawi mung, Dai Hpilisti wa hpe sat kau nna, Israela amyu hkrum ai kaya shara yen kau ai wa, hpa lu la na da aw? Dinggrin anga nga ai Karai Kasang a luksuk ni hpe roi lu ai gaw, ndai matu n gadoi ai Hpilisti wa gaw, kadai wa rai ta? ngu nna shi a makau e tsap nga ai ni hpe san wu ai. ²⁷ Masha ni gaw, Dai wa hpe sat lu ai wa gaw, dai lu la na da, ngu nna shawng na zawn tsun dan mu ai. ²⁸ Ya shanhte hte shaga nga ai hpe kahpu kaba Eliaba na wu yang, shi Dawi hpe masin pawt nna, Nang hpa majaw sa n ta? dai n law la ai sagu ni hpe, gade a lata hta nam mali e ap da nu ta? Na a myit kaba ai hte n shawp ai, ngai chye ya da de ai; majan yu na sa ai chyu sha, rai nga lit dai, ngu nna daru wu ai. ²⁹ Dawi mung, Ngai hpa shut a ta? taw, tsun shara n nga a ni? Ngu nna htan nhtawm, ³⁰ kaga ni hpang de kayin nna, shawng na zawn bai san wu ai: masha ni mung, shawng na hku htan nna, bai tsun dan mu ai. ³¹ Ya shing nga Dawi tsun ai ga masha ni na mu yang, Shawlu kaw htawn tsun shana mu ai: shaloi shi hpe shaga wu ai. ³² Dawi chyawm gaw, Kadai mung dai wa a majaw myit hkum hkum et; na a mayam sa nna, dai Hpilisti wa hpe gasat na we ai, ngu nna Shawlu hpe tsun wu ai. ³³ Shawlu gaw, Nang dai Hpilisti masha hpe n sa gasat lu law; nang ma sha naw rai nga ndai; dai wa gaw, kaji kaw nna majan gun man sai, ngu nna Dawi hpe tsun wu ai. ³⁴ Bai Dawi gaw, Na a mayam nye wa a sagu ni rem nga ai shaloi, hkanghkyi atsap sa nna, sagu hpung na sagu kasha la sha mat wa yang, ³⁵ ngai hkan shachyut nna, sagu kasha hpe shi a n-gup na shaw la we ai: ngai e htim kawa wa yang, shi a mun hta magra shadang nna, kayat sat kau we ai. ³⁶ Shingrai, na a mayam hkanghkyi hpe mung, tsap hpe mung sat kau lu ai: dai matu n gadoi ai Hpilisti wa mung, ahkrung nga ai Karai Kasang a hpyen laba ni hpe jahpoi ai majaw, dai zawn rai na ra ai, ngu wu ai. ³⁷ Bai Dawi gaw, Hkanghkyi hte tsap a lata na ngai hpe hkye la ai Yehowa gaw, dai Hpilisti wa a lata na mung hkye la na ra ai, ngu wu ai. Shawlu mung, Sa sa, Yehowa nang hte rau nga na ra ai, ngu nna Dawi hpe tsun wu ai. ³⁸ Shawlu mung Dawi hpe shi a hpun palawng jahpun nna, shi a baw hta magri gup du gup ya; hpri palawng mung jahpun di wu ai. ³⁹ Dawi mung, hpun palawng ntsa e nhtu hpye nna, hkawm chyam yu wu yang, n man ai majaw, n dang wu ai. Dai rai nna Dawi gaw, Dai hpyen hking ni hte ngai n sa lu nngai; garai n man nngai, ngu nna Shawlu hpe tsun let raw kau wu ai. ⁴⁰ Shingrai, shi a dawhkrawng lang nna, hkaraw na manen tsawm ai lungdin manga hta la nhtawm, shi hpye ai sagu rem tingsan hta bang gun let, shi a lata hta lakli lang nna, Hpilisti wa hpang de sit sa wa ai. ⁴¹ Dai Hpilisti wa mung Dawi hpang de sit sa wa ai rai nna, shi a n-gang lang ai wa shi a shawng e sa wa nga ai. ⁴² Dai Hpilisti wa chyawm gaw Dawi hpe mu jang n gawn n sawn rai nga ai; kaning rai nme law, Dawi mahtang hkum naw hkalung ai hte, myiman hkyeng nna, ahpraw tsawm nga ai. ⁴³ Dai Hpilisti wa gaw Dawi hpe, Nang dawhkrawng hte ngai hpang de sa ai gaw, ngai gwi rai ni? Nga nna tsun let, tinang a Hpara ni a mying gang nna Dawi hpe dagam wu ai. ⁴⁴ Bai dai Hpilisti wa gaw Dawi hpe, Sa rit, na a shan ntsa malen u ni hte nam na rai matse ni hpe jaw kau de ga, ngu wu ai. ⁴⁵ Dawi mung, Nang gaw ri nhtu hte ngai hpang de sa ndai; ngai chyawm gaw, nang roi rip ai, Israela hpyen laba ni a Karai Kasang, Zaw nawng zaw wa up ai Yehowa a mying ningsang hte nang kaw sa ring ngai. ⁴⁶ Yehowa, dai ni nye a lata hta nang hpe ap nna, nang hpe ngai sat nhtawm, na baw daw la na we ai: shing di, Hpilisti hpyen laba ni a mang hpe, ntsa malen u ni hte nam rai matse ni hpe, dai ni ngai jaw kau na we ai: shaloi, Israela amyu hta Karai Kasang nga nga ai gaw, mungkan ga ting chye lu na mara ai: ⁴⁷ Yehowa gaw, ri nhtu hte sha hkye la lu ai n re ai gaw, ndai shawa masha ni yawng chye lu na mara ai: majan ndai Yehowa gun nga ai rai nna, shi nanhte hpe anhte a lata hta ap kau na ra ai, ngu nna Hpilisti wa hpe htan wu ai. ⁴⁸ Ya dai Hpilisti wa gaw Dawi hpang de htim sa wa jang, Dawi mung Hpilisti wa hpe hkrum hkra hpyen laba de gat sa wa nna, ⁴⁹ shi a tingsan na lungdin langai mi shaw la nhtawm, nwat kabai dat wu ai rai nna, Hpilisti wa a lahtan hpe hpawk di ya wu ai: baw kata de nlung dai hkawn shang wa nna, dai wa gaw, ga de kadawng daw mat wa ai. ⁵⁰ Shingrai Dawi gaw lakli hte nlung langai mi e sha, dai Hpilisti wa hpe dang kau nna shi e sat kau wu ai: Dawi a lata hta nhtu n lang lu ai. ⁵¹ Shaloi Dawi gat sa wa nna, Hpilisti wa makau e tsap let, shi a n-ga na nhtu shaw la n-htawm, shi hpe du htau daw nna sat shakre wu ai: Hpilisti masha ni mung, shanhte a share langang wa si ai mu jang, htaw mat wa ma ai. ⁵² Shaloi she Israela masha ni hte Yuda masha ni rawt nna, garu let, Hpilisti masha ni hpe Gai hte Ekron mare chyinghka du hkra hkan shachyut mu ai. Hpilisti masha ni a hkala nba hkrum ai ni gaw, Sharim lam makau kaw nna, Gat hte Ekron du hkra si taw nga ma ai. ⁵³ Israela masha ni chyawm gaw Hpilisti masha ni hpe hkan shachyut ai kaw na bai wa nna, shanhte a dap na rai ni hpe magawn la mu ai. ⁵⁴ Dawi chyawm gaw Hpilisti wa a baw la nna, Yerusalem mare de la wa wu ai: dai wa a hpyen hking palawng chyawm gaw, shi a sum e tawn da wu ai. ⁵⁵ Ya Dawi, dai Hpilisti wa hpang de htim sa wa ai Shawlu mu jang, shi a luksuk ni a bu Abna hpe, Abna e, wora shabrang wa gade a kasha rai ta? ngu nna san wu yang, Abna gaw, Hkawhkam wa e, nang hkrung nga ai hte maren, ngai n chye nngai, ngu wu ai. ⁵⁶ Bai hkawhkam wa gaw, Dai ma gaw, gade a kasha re ai kun gawn yu mu, ngu wu ai. ⁵⁷ Shingrai Dawi Hpilisti wa hpe sat nna, baw daw lang let bai wa jang, Abna shi e shaga nna, Shawlu hpang de woi wa wu ai. ⁵⁸ Shingrai, Shawlu gaw, Shabrang wa e, nang gade a kasha rai n ta? ngu nna san wu yang, Dawi gaw, Ngai gaw, na a mayam, Betlehem masha Yese a kasha rai nngai, ngu nna htan wu ai.

¹ Shingrai Shawlu hte ga tsun ngut ai hpang, Yonahtan a myit gaw Dawi a myit hte makyit mat lu ai rai nna, Yonahtan gaw Dawi hpe shi hkum hte maren tsawra wu ai. ² Dai shani e Shawlu gaw shi hpe nga nga shangun nna, kawa nta de wa na ahkang bai n jaw wu ai. ³ Ya Yonahtan Dawi hpe shi a hkum hte maren tsawra wu ai majaw, shan gaw ga shaka tawn da ma ai. ⁴ Yonahtan mung shi a palawng galu raw nna, dai hte hpawn ri nhtu, ndan hte shingkyit Dawi hpe jaw wu ai. ⁵ Dawi mung, Shawlu shangun ai lam shagu de sa nna, hpaji byent-ya hte galaw wu ai: Shawlu mung, shi hpe hpyenbu shatai wu ai rai nna, dai hpe mung masha ni hte Shawlu a ali ama ni yu kabu nga ma ai. ⁶ Shingrai, Dawi Hpilisti ni hpe sat kau ngut nna, bai wa yang, du wa ai Israela mare shagu hkan na, Shawlu hkawhkam hpe tau la na nga, numsha ni kabu gara myit hte mahkawn mangoi let, shupsheng hte tingse dum nna, ka pru wa ma ai. ⁷ Dai numsha ni gaw, Shawlu sat ai gaw hkying, Dawi sat ai gaw, mun ging, nga nna dum let htingli htinglai mahkawn mangoi nga ma ai. ⁸ Shaloi Shawlu gaw, Shanhte Dawi hpe mun mun, ngai e gaw hkying hkying sha nga i? Dai mungdan sha n rai yang, kaga hpa jaw lu na ma ta? nga nna grai pawt bu ai hte ga dai majaw myit n pyaw nga ai. ⁹ Dai shani kaw nna Shawlu gaw Dawi hpe sha a gyam nga nu ai. ¹⁰ Dai hpang jahpawt e Karai Kasang kaw na n hkru ai nat langai mi, Shawlu kaw du nna, shi gaw shi hkaw kata e myihtoi shung nga ai: Dawi mung shawng na zawn tingse dum shapyaw wu ai. Ya Shawlu nri lang da wu ai rai nna, ¹¹ Ngai Dawi hpe shakum hte jinghkyen shakap we ga, nga nna tsun ai hte ran, shi a ri tu jinghkyen dat wu ai. Dawi chyawm gaw lahkawng lang yen kau wu si. ¹² Shingrai, Yehowa Shawlu kaw na htawt nna, Dawi hte rau nga nga ai majaw, Shawlu Dawi hpe hkrit wu ai. ¹³ Dai rai nna Shawlu gaw shi kaw na jahka nhtawm, marai hkying mi up ai bu shatai wu ai; Dawi mung, masha ni a man e pru pru shang shang rai nga ai. ¹⁴ Dawi gaw lam shagu hta hpaji byeng-ya hte galaw wa ai rai nna, Yehowa shi hte rau rai nga ai. ¹⁵ Shingrai, grau nna hpaji byeng-ya hte galaw wa ai hpe Shawlu mu magang, shi e grau nna hkrit wu ai. ¹⁶ Raitimung, Israela amyu ting hte Yuda amyu Dawi hpe tsawra ma ai; kaning rai nme law, shanhte a man e shi pru wa shang wa rai nga ai. ¹⁷ Bai Shawlu Dawi hpe, Nye a shayi sha kaba Merab hpe yu yu u; nang hpe ya sha na de ai: nye a matu nden ja ai hte Yehowa majan gasat nga u, ngu wu ai: dai gaw, Nye a lata e nan shi hpe n hkra n ga; Hpilisti masha ni a lata e she si u ga, nga nna Shawlu myit ai rai lu ai. ¹⁸ Dawi chyawm gaw, Ngai wa, hkawhkam wa a kahkri tai na gaw, ngai hkum hte nye a marai, nye a amyu dap ni wa mi, Israela mungdan hta, hpa grau ga ta? ngu nna Shawlu hpe tsun wu ai. ¹⁹ Raitimung, Shawlu a shayi sha Merab hpe Dawi kaw ya sha na nhtoi du jang, Meholahti masha Adriela hpe ya sha kau wu ai. ²⁰ Shawlu a shayi sha Mihkala gaw Dawi hpe tsaw da wu ai: dai la mShawlu hpe tsun dan mu yang, shi na kabu nga ai. ²¹ Dai rai nna, Shawlu gaw, Ngai sha hpe Dawi a mahkam shatai nna, Hpilisti masha ni a lata de shang hkra, shi hpe ya sha na we ai, nga nna myit lu ai. Shaloi Shawlu gaw, Dai ni, nang nye a kahkri lahkawng lang ngu na tai nit dai, ngu nna Dawi hpe tsun wu ai. ²² Bai Shawlu gaw shi a ali ama ni hpe, Dawi hpe ning ngu kahte tsun mu: Hkawhkam wa nang hpe ra nga ai; shi a ali ama ni mahkra mung nang hpe tsawra ma ai; dai rai nna, hkawhkam a kahkri tai u, ngu mu, ngu nna hkangda mu ai. ²³ Shawlu a ali ama ni mung, Dawi hpe shing ngu tsun mu ai. Dawi chyawm gaw, Ngai zawn re ai, arawng n lu ai matsan masha wa mi, hkawhkam a kahkri tai lu na gaw, amai sha rai nga a ni? ngu nna htan mu ai. ²⁴ Shawlu a ali ama ni mung, Dawi shing nga ai, ngu nna wa tsun dan mu ai. ²⁵ Bai Shawlu gaw, Ning ngu Dawi hpe bai tsun mu: Hkawhkam wa shi a hpyen ni hta masin jasat lu hkra, Hpilisti masha ni a hpyi matu latsa hta kaga, hpu ja shaje n ra ai da, ngu nna tsun dat wu ai. Dai gaw, Dawi hpe Hpilisti masha ni a lata hta si u ga, nga nna Shawlu myit ai rai nga ai. ²⁶ Ali ama ni Dawi hpe dai tsun dan mu yang, Dawi mung hkawhkam a kahkri tai na, grai ra nga ai. Ya nhtoi garai ndu yang, ²⁷ Dawi gaw shi a masha ni hte rawt sa nna, Hpilisti masha ni tsa sat kau nhtawm, hkawhkam a kahkri tai lu na matu, dai ni a hpyi matu la wa nna, ahkum sha hkawhkam wa hpe wa hti ya mu ai. Shawlu mung shi a shayi sha Mihkala ya sha lu wu ai. ²⁸ Shingrai Yehowa Dawi hte rau rai nga ai mung, Shawlu mu nna chye wu ai: Shawlu a shayi sha Mihkala mung Dawi hpe tsawra wu ai. ²⁹ Dai re ai majaw, Shawlu Dawi hpe grau nna hkrit ai hte, shi hpe tutnawng ndawng ai myit a rawng nga ai. ³⁰ Ya Hpilisti du ni sat sa wa ma ai: dai ni pru shagu Dawi gaw, Shawlu a ali ama ni hta grau nna hpaji ai hku galaw law di wu ai majaw, shi a amying grai kajai gumhkawng wa lu ai.

¹ Shaloi Shawlu gaw, shi a kasha Yonahtan hte shi a ali ama ni mahkra hpe, Dawi hpe sat kau na lam, tsun da mu ai. Shawlu a kasha Yonahtan chyawm gaw, Dawi hpe nachying tsawra wu ai. ² Dai majaw Yonahtan Dawi hpe, Nye wa gaw, nang hpe sat na maw nga ai: dai rai nna hpawt de du hkra na hkum hpe sadi let, shim ai shara e makoi nga u: ³ ngai pru nna, nang nga ai pa e nye wa makau e ngai tsap nna, na a lam wa hte tsun na we ai; shaloi ngai chye mchye nang hpe tsun dan na ring ngai, ngu wu ai. ⁴ Shaloi Yonahtan gaw, kawa Shawlu kaw Dawi hpang de maga nna tsun wu ai gaw, Hkawhkam wa gaw shi a mayam Dawi hpe n shut u ga: shi nang hpe hpa n shut ai; shi galaw ai chyeju mung nang hta grai kaba sai: ⁵ shi a asak pyi n lahpawt hkra, Hpilisti wa hpe sat kau nna Yehowa Israela amyu ting a matu hkyehkrang la ai lam kaba Hpaw ya ma ni ai: nang mu nna kabu nit dai: dai rai yang, mara kata ai, Dawi hpe sat nna, mara n rawng ai sai hpa majaw hkaw kau na rai ta? ngu nna kawa Shawlu hpe tsun wu ai. ⁶ Shawlu mung Yonahtan ga madat wu ai rai nna, Yehowa nga nga ai hte maren, shi si lu na n rai, ngu nna dagam wu ai. ⁷ Shaloi Yonahtan gaw Dawi hpe shaga nna, dai lam mahkra shi hpe tsun dan wu ai; Yonahtan mung Dawi hpe Shawlu hpang de bai shashawn nna, shi shawng na zawn bai nga nga wu ai. ⁸ Shaloi majan bai paw ai rai nna, Dawi gaw Hpilisti masha ni hpe pru gasat wu ai hte, shanhte hpe grai di kahtam wu ai majaw, shanhte gaw shi a man na htaw mat wa ma ai. ⁹ Ya Shawlu ri tu lang nna, shi a hkaw e dung nga yang, Yehowa kaw na n hkru ai nat langai mi shi a ntsa e du nna, Dawi tingse dum shapyaw nga ai. ¹⁰ Shingrai nga yang, shi a ri tu hte Dawi hpe shakum hta shatai nna jinghkyen chyam yu wu ai: Dawi chyawm gaw Shawlu kaw na yen kau lu ai rai nna, ri tu dai gaw shakum hta jung nga ai: Dawi mung hprawng nna dai shana e lawt lu ai. ¹¹ Bai Shawlu gaw, shi hpe gyam nga nna jahpawt e sat kau na nga, Dawi a nta de masha shangun dat wu ai: raitimung, Dawi a madu jan Mihkala mahtang, Nang dai na, na a asak n hkye yang, hpawt de si na rin dai, ngu nna shi hpe tsun dan wu ai. ¹² Shingrai Mihkala Dawi hpe, hkuwawt hku yawn jahkrat datwu ai rai nna, shi hprawng lawt mat wa ai. ¹³ Mihkala chyawm gaw, dai terahpim sumla la nna, yupku hta kaleng tawn nhtawm, bainam mun hte da ai nba grang hpe nhtung de grang kau nna hpajawng jahpun tawn wu ai. ¹⁴ Dawi hpe rim la na matu, Shawlu dat dat ai shangun ma ni du jang, madu jan gaw, Dawi machyi nga ai, ngu mu ai. ¹⁵ Shawlu gaw, Shi hpe ngai sat kau we ga, yupku hte hpawn hpai wa marit, ngu nna Dawi hpe sa yu na, masha shangun dat wu ai. ¹⁶ Shangun ma ni shang yu yang, yu u, nhtung de bainam mun hte da ai nba grang, grang tawn nna, ku e terahpim sumla taw nga la ai sha, mu mu ai. ¹⁷ Shaloi Shawlu gaw, Ngai hpe masu nna, nye hpyen wa hpe hpa majaw dat kau n ta? Ya hprawng lawt mat sai, ngu nna Mihkala hpe daru wu ai. Mihkala mung, Shi mahtang, Ngai e dat dat e; dai n rai, nang hpe sat kau na nngai, nga nna ngai e tsun ai, ngu nna Shawlu hpe htan wu ai. ¹⁸ Shingrai Dawi hprawng lawt nna, Rama e nga ai Samuela kaw du jang, Shawlu shi hpe galaw ai lam yawng mayawng tsun dan wu ai. Samuela hte shan lahkawng Nayut shara e sa nga nga ma ai. ¹⁹ Ya, Dawi Rama ginwang Nayut shara e nga nga ai lam, Shawlu na wu ai. ²⁰ Shaloi Dawi hpe rim la na matu, Shawlu masha shangun dat wu ai: dai ni gaw, myihtoi hpung masha ni, myihtoi htoi nga nna, Samuela woi awn nga ai hpe, mu ma yang, Karai Kasang a Wenyi Shawlu a shangun ma ni a ntsa e du nna, shanhte mung myihtoi htoi ma ai. ²¹ Dai lam Shawlu na jang shangun ma kaga bai shangun dat wu ai, dai ni mung myihtoi htoi lawm mat ma ai. Masum lang ngu na hta bai shangun yang mung, dai zawn htoi mat ma ai. ²² Shaloi shi hkum nan raawt nna, Rama de sa wa yang, Sehku shara na hka htung kaba du jang, Samuela yan Dawi kanang nga ma ta? ngu nna san wu ai. Shaloi, marai langai mi, Rama ginwang na Nayut shara e nga nga ma ai, ngu nna tsun dan wu ai. ²³ Dai rai nna, shi gaw Rama ginwang na Nayut shara de sa wa ai rai nna, Karai Kasang a Wenyi shi a ntsa e mung du ai majaw, Rama ginwang na Nayut shara du hkra myihtoi htoi let sa wa ai. ²⁴ Shi gaw shi a hpun palawng raw kau nna, Samuela man e myihtoi htoi let, dai shani tup, dai shana tup, hpun palawng n kap ai taw nga ai. Dai re ai majaw, Shawlu mung myihtoi ni hta lawm a ni? Nga nna masha ni tsun shalai ma ai.

¹ Shaloi Dawi Rama ginwang Nayut shara na hprawng nna, Yonahtan kaw wa nhtawm, Ngai hpa galaw shut wa sata? ngai hta hpa mara rawng a ta? na nwa nye a asak gyam ai gaw, shi hpe hpa shut we ta? ngu nna san wu ai. ² Yonahtan chyawm gaw, Dai gaw n rai u ga; nang si lu na n rai: yu u, wa gaw ngai hpe n tsun ai amu kaji kaba hpa mung n galaw yu ai; dai lam teng yang gaw, ngai n chye hkra, npa majaw ip da na a ta? dai gaw teng ai n rai, ngu wu ai. ³ Dawi gaw, Ngai na a jinghku rai nga ai, na nwa chye da wu ai majaw, Yonahtan yawn na hpe tsang ai, ndai amu hkum chye shangun mu, nga nna shi tsun da nu ai. Gaja wa, Yehowa ahkrung nga ai hte, nang mung hkrung nga ndai hte maren, ngai hte si hkrung si htan a lapran gaw, kalang htawt sha rai sali ai, ngu nna dagam ai hte tsun wu ai. ⁴ Bai Yonahtan gaw, Na a myit ra ai hku hpa mung ngai galaw na nngai, ngu nna Dawi hpe tsun wu ai. ⁵ Bai Dawi Yonahtan hpe, Hpawt ni shata praw nhtoi rai nga ai rai nna, hkawhkam wa hte shat sha na matu shat ku e n dung n mai rai nngai: raitimung, masum ya shana du hkra nam e naw makoi nga n ga. ⁶ Na nwa ngai n lawm ai dum jang, Dawi nta dap ni nlang a matu, shaning shagu na hkungga nawng nhtoi du ai majaw, shi a mare Betlehem de gat wa na nga, akroi anoi hpyi ai, ngu nna tsun u. ⁷ Shaloi na nwa, Mai sa, nga yang gaw, na mayam pyaw lu na ni ai; dai n rai, pawt bu wa taw gaw, shi n hkru ai hku maw nga ai, ngu nna myit dum u. ⁸ Dai rai nna, na a mayam wa hpe matsan dum la e; Yehowa a shaka ga hta, na a mayam wa nang hte shaka nga nngai: raitimung, ngai hta ra rawng ai rai yang gaw, na lata hte nan sat kau ni; hpa majaw na nwa hpang de ngai e woi wa na rai ta? ngu nna tsun wu ai. ⁹ Yonahtan mung, Dai zawn gaw n rai u ga; nye wa nang hpe sat na maw ai, ngai teng teng chye yang, nang hpe n tsun ai nga na kun, ngu wu ai. ¹⁰ Bai Dawi gaw, Na nwa nang hpe aja awa nga htan yang, ngai hpe kadai shana na rai ta? ngu nna Yonahtan hpe san wu yang, ¹¹ Yonahtan gaw, Sa, an gaw pa ga de naw sa ga, ngu nna Dawi hpe tsun let, shan lahkawng pa ga de sa wa ma ai. ¹² Bai Yonahtan gaw Dawi hpe, Israela Karai Kasang Yehowa sakse wa rai nga u ga: hpawt ni, hpawt din, ndai ten e, nye wa myit ngai shaw yu yang, Dawi hta shi a myit kaja rawng ai rai yang, ngai nang hpe shana na n rai ni? ¹³ Dai n rai, nye wa nang hpe n hkru ai hku maw ai lam, ngai nang hpe n shana, ngwi pyaw ai hte nang hkawm wa lu hkra, nang hpe n dat dat de yang gaw, Yehowa Yonahtan hpe dai hta grau nna dawp u ga: Yehowa nye wa hta nga nga yu sai hte maren, nang hta mung nga nga u ga law. ¹⁴ Ngai naw hkrung nga yang sha, Yehowa myit ra ai hku hte maren, ngai hpe jahkrung da na chyeju lam madun lu na hta n-ga, ¹⁵ Dawi a hpyen ni nlang hpe ga ntsa na jahkoi kau ai hpang raitimung, nye amyu matu hta prat dingsa chyeju lam madun lu na ndai, ngu wu ai. ¹⁶ Shingrai Yonahtan gaw Dawi nta dap hte ga shaka da let, Ga shaka ndai hpe run kau wa nit yang gaw, Dawi hpe hpyen ai ni a lata hte Yehowa matai htang u ga law, nga nna, ¹⁷ Dawi hpe shi hkum tsawra ai zawn, tsawra wu ai majaw, tsawra myit kaba la ai hte, shing nga bai kahtap shaka ka di wu ai. ¹⁸ Bai Yonahtan gaw, Hpawt de shata praw shani rai nga ai: nang dung ai shara man na ra ai majaw, nang n nga ai chye na ra ai. ¹⁹ Nang masum ya naw makoi nga nna she, alawan yu wa nhtawm, shawng de amu rawng yang, nang sa makoi nga ai shara de du jang, Ezela lunghkrung makau e la nga u. ²⁰ Ngai mung ndan gap masu nna, lunghkrung dai makau de pala masum gap dat na ring ngai. ²¹ Yu u, pala dai sa tam su, ngu nna ma shangun dat na nngai. Shaloi, Pala dai, na makau e rai nga ai, hta la nu, ngu nna hkrang hkrang tsun yang gaw, wa rit; Yehowa hkrung nga ai hte maren, nang hta hpa ruyak n nga sai; pyaw nit dai. ²² Shing n rai, Dai pala nang hpe lai kau nit dai, ngu nna ma hpe tsun we yang gaw, hkawm wa nu; Yehowa nang hpe dat dat nit dai. ²³ Ya an tsun ai lam hta, nang hte nye a lapran e, Yehowa tutnawng e anga nga nu ga, ngu wu ai. ²⁴ Shingrai Dawi gaw pa hkan e makoi nga ai: ya praw shani rai jang, hkawhkam wa shat sha na dung nga ai. ²⁵ Shawoi na hte maren hkawhkam wa shakum makau e dung yang, Yonahtan rawt nna, Abna mahtang Shawlu a makau e dung nga ai: Dawi a dung shara chyawm gaw man nga ai. ²⁶ Raitimung Shawlu gaw, Lama mara nu ai; shi n san n seng sai; gaja wa n san n seng nu ai, nga nna myit la nhtawm, dai shani e atsin sha nga nga ai. ²⁷ Hpang shani ngu na praw ni ni e, Dawi a dung shara naw man nga ai majaw, Shawlu gaw, Dai Yese a kasha mani mung, shat n sa sha, dai ni mung n sa, hpa majaw rai ta? ngu nna kasha Yonahtan hpe san wu ai. ²⁸ Yonahtan gaw, Dawi Betlehem de naw wa na nga, akroi anoi ahkang hpyi wu ai. ²⁹ Ngai wa na ahkang jaw dat rit; nye nta dap ni, mare hta hkungga jaw poi de ma ai; nye hpu mung htet dat ai; nang kaw myiman pa nngai rai yang gaw, ngai wa nna hpu ni hpe hkrum lu na ahkang jaw e, nga nna akroi anoi hpyi ai: dai majaw hkawhkam wa a sha ku de shi n du ai rai nga ai, ngu nna Shawlu hpe htan wu ai. ³⁰ Shaloi Shawlu gaw Yonahtan hpe pawt bu nna, Myit magaw ai, gumlau num a kasha e, nang hkum nan hte na nnu kaya hkrum hkra, Yese a kasha hpe nang maga nga ai gaw, ngai n chye ai, sawn nawn wu ni? ³¹ Yese a kasha hkrung nga dingsa, nang hte na a mungdan grin lu na n rai. Ya alawan shangun nna shaga la su; shi teng teng si lu na re ai, ngu wu ai. ³² Bai Yonahtan gaw, Shi hpa majaw si na rai ta? shi hpa shut a ta? ngu nna kawa hpe htan wu yang; ³³ Shawlu gaw kasha Yonahtan hpe ri tu hte jinghkyen wu ai: dai re ai majaw, shi a kawa Dawi hpe sat na maw ai Yonahtan chye wu ai. ³⁴ Dai rai nna Yonahtan pawt bu ai hte sha ku na rawt mat nna, dai praw ni ni shani e shat n sha ai nga nga ai; kaning rai nme law, shi a kawa shi hpe kaya jahkrum wu ai majaw, Dawi a matu shi myit yawn nga ai. ³⁵ Hpang jahpawt Dawi hte ndat ai ten e, Yonahtan gaw ma kaji langai mi woi nna, pa de sa wa ai. ³⁶ Ma dai hpe mung, Gat su, ngai gap dat ai pala hkan tam sun ngu nna dat dat nhtawm, ma dai gat sa wa jang, shi hpe lai hkra, pala langai mi gap dat wu ai. ³⁷ Yonahtan gap dat ai pala hkrat ai shara de du mawt jang, Yonahtan gaw, Pala nang hpe lai kau nit dai, n rai ni? ³⁸ Gat su, lawan u, hkum hkring et, ngu nna dai ma hpe hkan jahtau wu ai. Yonahtan a ma mung, pala ni hta lang nna madu hpang de bai wa ai. ³⁹ Raitimung, ma dai gaw hpa galw ai lam n chye wu ai: Yonahtan yan Dawi chyu sha chye hkat ma ai. ⁴⁰ Bai Yonahtan gaw shi a ndan pala ni hpe shi ma a lata de ap nna, Mare de la wa su, ngu nna dat dat wu ai. ⁴¹ Ma dai wa mat ai hpang, Dawi gaw dingda maga de na pru nna, ga e gum dagup lwt, masum lang du hkra dagup nna, shada pup let, hkrap let, Dawi mahtang grau nna hkrap lai wu ai. ⁴² Shaloi Yonahtan Dawi hpe, Yehowa nang hte nye a lapran e mung, nye a amyu matu ni hte na a amyu matu ni a lapran e mung, tutnawng prat dingsa anga nga u ga, ngu nna Yehowa a amying ningsang hta an lahkawng dagam shaka ai majaw, dai hta tau nna ngwi pyaw ai hte hkawm wa sit, ngu nna dat dat wu ai. Shingrai Dawi rawt sa wa nna, Yonahtan mung mare de shang wa ai.

¹ Shaloi Dawi gaw Noba mare, hkinjawng Ahimelek kaw du ai: Ahimelek mung hkrit gari let Dawi hpe hkap tau nna, Manang langai mu muk n lawm ai, nang hkrai sha sa du ai gaw hpa majaw rai ta? ngu nna san wu yang, ² Dawi gaw, Hkawhkam wa amu lama mi ngai e ap dat nna, Ngai hkang dat ai amu kadai hpe mung hkum chye shangun, nga ai majaw, nye ma ni hpe wo nang le nang la nga mi, ngu nna shawng de dat dat magang mase ai. ³ Dai majaw shahpa lama ma n lu n ni? Muk tawng manga dang rai tim, shing n rai, hpa rai tim, naw jaw dat e, ngu nna hkinjawng Ahimelek hpe tsun wu ai. ⁴ Hkinjawng wa mung, Ngai kaw hkrup mara sha mai ai muk n nga ai; na a ma ni num hte n kasawt ai rai yang gaw, chyoi pra ai muk gaw, nga nga ai, ngu nna Dawi hpe htan wu ai. ⁵ Dawi mung hkinjawng wa hpe, Gaja wa teng teng, ndai lai wa ai masum ya ting, num hte anhte tsan saga ai: ngai galaw hkawm ai amu mungkan hte sha seng ai raitimung, ngai pru wa jang pyi, nye ma ni a arai sanseng malu ai: dai rai yang, dai ni grau nna sanseng na n rai ne? Ngu nna htan wu ai. ⁶ Hkinjawng wa mung, muk chyalum galai ang nna, Yehowa man na dawm kau ai, madun dan ai muk hta kaga, hpa mung n nga ai majaw, dai chyoi pra ai muk shi hpe jaw dat wu ai. ⁷ Dai shani e, Yehowa a man e hkring nga ai, Shawlu a shangun ma ni hta na yamnga rem agyi, Edom masha Doeg ngu ai wa langai mi nga nga ai. ⁸ Bai Dawi gaw Ahimelek hpe, Nang kaw ri nhtu n nga a ni? Hkawhkam wa a amu nau tin nna, ri nhtu hpa pyi n la lang lu nngai, ngu wu yang, ⁹ Hkinjawng wa gaw, Ela hkaraw e nang sat kau ai Hpilisti masha Goliat a nhtu gaw, sumpan hte kayawp nna hpa hkai palawng a shinggan e nga nga ai: ra yang gaw lu lang u: nhtu kaga gaw n nga ai, ngu wu ai. Dawi gaw, Dai hte bung ai gaw n nga sai; la ya mi, ngu wu ai. ¹⁰ Shaloi Dawi rawt nna, Shawlu hpe hkrit ai majaw, dai shani e Gat a hkawhkam Ahkisha hpang de hprawng sa wa ai. ¹¹ Shaloi Ahkisha a shangun ma ni gaw, Ndai Dawi she, Israela hkawhkam rai nga ai, n rai ni? Shawlu sat ai gaw hkying, q1 Dawi sat ai gaw, mun ging, nga nna ka let mahkawn ai gaw, ndai wa hpe n rai ne? Ngu nna tsun dan mu ai. ¹² Dawi mung ga dai chye na wu ai rai nna, Gat hkawhkam Ahkisha hpe grai hkrit wu ai majaw, ¹³ mana masu nna, shanhte a man e mana shachyoi dan let, chyinghka hta mahkret ai hte, shi a n-gup mun hta mayen shalawi tawn wu ai. ¹⁴ Dai rai nna Ahkisha gaw shangun ma ni hpe, Yu mu, dai wa gaw mana she rai nga ai: nye a man e mana shachyoi dan u ga, dai wa hpe nye a nta de woi shashawn myit ni? ngu nna daru mu ai. ¹⁵ Ngai gaw mana n mu yu ai sawn nawn nna, nye a man e mana shachyoi dan u ga, dai wa hpe nye a nta de woi shashawn myit ni? ngu nna daru mu ai.

¹ Dai rai nna Dawi gaw dai kaw na hprawng nhtawm, Adulam lungpu hku de du pru wa ai: shi a kahpu ni hte nta masha ni nlang mung dai na jang, shi kaw sa wa ma ai. ² Amu hkrum ai ni, ahka kap ai ni hte myit karen ai ni nlang hte shi kaw sa zup nna, shi shanhte a agyi tai nga ai; shing ai marai mali tsa daram shi kaw hkan nang ma ai. ³ Dai kaw nna Dawi gaw Moba mung Mizpa mare de sa wa nhtawm, Moba hkawhkam hpe, Karai Kasang ngai hta hpa hku shabyin ai garai n chye lu ai laman e, ngai nu ngai wa ni, nang kaw sa shingbyi nga na ahkang jaw e, ngu nna hpyi wu ai. ⁴ Shingrai shanhte hpe Moba hkawhkam kaw ap da mu ai rai nna, Dawi lungpu hpyendap hkan e nga hkawm ai nhtoi hte ting, kanu kawa ni gaw Moba hkawhkam kaw sa nga nga ma ai. ⁵ Shaloi myihtoi Gad gaw, Lungpu hpyendap hkan e hkum nga et; pru nna Yuda mung de wa u, ngu nna Dawi hpe tsun wu ai. Dai majaw Dawi wa nna, Heret nam mali e du nga ai. ⁶ Ya Dawi hte shi hte rau nga ai masha ni a lam brawng pru wa ai gaw Shawlu na wu ai: Shawlu chyawm gaw, Gibea mare na kawng a wa myi hpun npu e, ari tu lang let dung nna, shi a ali ama ni nlang, shi a grupyin e tsap nga ma ai. ⁷ Shaloi Shawlu gaw, Ben-yamin amyu masha ni e, madat mara mu, nang hte yawng ngai hpe gumlau nna, ngai sha wa Yese a kasha hte ga shaka da hkat ai lam ngai e n shana, nye matu kadai n yawn; nye sha wa nan nye a mayam hpe gumlau shangun ai lam, ngai e kadai mung n shadum ai gaw, ⁸ Yese a kasha gaw nanhte hpe yi hkauna tsabyi sun yit ra madun lu ai ngu nna rai myit ni? Nanhte hpe hkying up latsa up bu aya jaw lu na myit ni? ngu nna grupyin tsap nga ai shi a ali ama ni hpe daru wu ai. ⁹ Shaloi, Shawlu a ali ama ni a agyi, Edom masha Doeg gaw, Yese a kasha gaw, Noba mare de, Ahitub a kasha Ahimelek kaw du ai ngai mu nngai. ¹⁰ Ahimelek mung, Yese a kasha matu Yehowa kaw san ya nna, sha jarit mung, Hpilisti masha Goliat a nhtu mung la ya dat nu ai, ngu nna tsun dan wu ai. ¹¹ Dai rai nna hkawhkam wa gaw, Ahitub a kasha hkinjawng Ahimelek hte, shi a nta masha Noba hkinjawng ni mahkra hpe shaga wu ai rai nna, shanhtmung hkawhkam wa man de du sa ma ai. ¹² Ya Shawlu gaw, Ahitub a kasha madat u, ngu wu yang, Ahimelek mung, Madat nga nngai, madu e, ngu nna htan wu ai. ¹³ Shaloi Shawlu gaw, Yese a kasha hte nan hpa rai myit hkrum nna ngai hpe gumlau myit ta? Dai ni ndai zawn, ngai hpe gumlau shangun na ngu nna muk hte nhta jaw dat ai hte, Karai Kasang hpe shi a lam san ya nit hka? Ngu wu ai. ¹⁴ Ahimelek chyawm gaw, Na a shangun ma ni yawng hta, Dawi zawn kangka ai, kadai nga a ta? Na a nhkri mung rai nga ai; na a mung bawng manang, na a hkaw hta arawng grau kaba ai wa shi rai nga ai. ¹⁵ Shi a matu Karai Kasang kaw, dai ni sha san ya ai rai kun? Dai gaw ngai hte tsan u ga; nang hkawhkam wa raitimung, ngai na a mayam hte, na a mayam a hpunau ni kadai hpe mung, mara hkum shagun et; ngai na a mayam ndai lam kaji kaba hpa mung n chye nngai, ngu nna hkawhkam wa hpe htan wu ai. ¹⁶ Hkawhkam wa chyawm gaw, Ahimelek e, nang hkum nan hte, na nhpu nnau ni yawng teng teng si lu na ri myit dai, ¹⁷ nga nna tsun ngut jang, Yehowa a hkinjawng ni mung Dawi hpang maga nga nna, shi hprawng ai lam chye ninglen ngai e n tsun shana ma ai majaw, shanhte hpe mahtang sat mu, ngu nna shi kaw hkan nang ai sin langa ni hpe tsun mu ai. Raitimung, hkawhkam a ma ni gaw Yehowa hkinjawng ni hpe n sat hkraw ma ai. ¹⁸ Bai hkawhkam wa gaw, Nang mahtang hkinjawng ni hpe sat u, ngu nna Doeg hpe tsun dat wu ai. Dai majaw Edom masha Doeg rawt nna, sumpan hpa hkai lawng hpun ai hkinjawng matsat shi manga hte hpe, dai shani jan hta sha sat kau mu ai. ¹⁹ Hkinjawng ni hte seng ai Noba mare hpe mung, shi nhtu hte hpya kau nna, numsha lasha, ma kaji chyu chyu ai chyangai du teng, sagu dumsu, lawze ni hte hpawn sat kau mu ai. ²⁰ Raitimung Ahituba a kasha Ahimelek a kasha ni hta na Abiahta ngu ai wa langai mi lawt lu nna, Dawi hpang de hprawng sa wa ai. ²¹ Shawlu gaw Yehowa a hkinjawng ni hpe sat kau ai lam, Abiahta Dawi hpe tsun dan wu ai. ²² Shaloi Dawi gaw, Edom masha Doeg dai lam Shawlu hpe tsun dan na nu ai, ngu nna shi hpe mu ai shani kaw nna ngai dum se ai; na a amyu masha ni nlang hte hpe, ngai e sat kau shangun ai tai wa sahka gaw; ²³ ngai hte rau nga ga; hkum tsang et; ngai e sat gyam ai wa gaw, nang hpe mung gyam ai rai nga ai: ngai hte rau rai yang nang lawt lu na rin dai, ngu nna Abiahta hpe hkap tsun wu ai.

¹ Ya masha nkau mi gaw Dawi hpe, Yu u, Hpilisti masha ni Kila mare sa hpya nna, mum chyarang ni kashun la kau manu ai, ngu nna tsun dan mu ai. ² Dai re ai majaw Dawi gaw, Ngai wora Hpilisti masha ni hpe sa gasat na rai ni? Ngu nna Yehowa hpe san wu ai. Yehowa mung, Sa su, Hpilisti masha ni hpe sa gasat kau nna Kila mare hpe hkye la su, ngu nna Dawi hpe htan ya wu ai. ³ Dawi a masha ni chyawm gaw, Yu u, anhte Yuda mung e pyi hkrit ra nga yang, Kila mare de yu wa nna, Hpilisti hpyen laba ni hte gasat daw na gaw, grau hkrit shara rai nga ai, n rai ni? ngu nna shi e tsun mu ai. ⁴ Dai rai nna, Dawi gaw Yehowa hpe bai san wu ai. Yehowa chyawm gaw, Rawt u, Kila mare de yu wa su; Hpilisti masha ni hpe na a lata hta ngai ap ya na ring ngai, nga ai. ⁵ Dai hte maren Dawi hte shi a masha ni Kila mare de yu wa nna, Hpilisti masha ni hpe gasat kau nhtawm, shanhte a yamnga ni hpe la kau ya ai hte, lata laba hte sat kau mu ai. Shingrai Dawi gaw, Kila mare na masha ni hpe hkye la wu ai. ⁶ Ya Ahimelek a kasha Abiahta gaw Dawi hpang de Kila mare de hprawng yang, shi a lata hta hpa hkai palawng mung lang sa wa ai. ⁷ Ya Dawi Kila mare de du ai lam, Shawlu hpe shana ya mu ai. Dai rai nna Shawlu gaw, Chyinghka hte htingrang chyip ai mare de shang nu ai majaw, rawng tawn ai hku rai sai rai nna, Karai Kasang gaw shi hpe nye a lata de ap ya ni ai, nga ai. ⁸ Shingrai Shawlu gaw, Kila mare de hpyen rawt nna, Dawi hte shi a masha ni hpe wang tawn na nga, masha nlang hte hpe shaga wu ai. ⁹ Shawlu myit magaw ai hku maw nga ai gaw, Dawi chye wu ai rai nna, hkinjawng Abiahta hpe, Hpahkai lawng la wa rit, ngu wu ai. ¹⁰ Shingrai Dawi gaw, Israela Karai Kasang Yehowa e; Shawlu Kila mare de sa nna, nye a majaw dai mare hpe hpya kau na maw ai lam, na a mayam teng teng na se ai. ¹¹ Kila masha ni ngai hpe shi a lata de ap kau na mani? Na mayam na lu ai hte maren, Shawlu yu sa na rai ni? Israela Karai Kasang, Yehowa e, na a mayam hpe tsun dan e, ngai hpyi nga nngai, ngu wu ai. Yehowa mung, Shi yu sa na ra ai, nga ai. ¹² Bai Dawi gaw, Kila masha ni, ngai hte nye a ma ni hpe, Shawlu a lata de ap kau na mani? ngu wu yang, Yehowa gaw, Ap kau na marin dai, nga ai. ¹³ Shaloi Dawi, kru tsa daram re ai shi a masha ni hte rawt nna, Kila mare na pru nhtawm, hprawng lu ai made hkawm mat wa ma ai. Dawi Kila mare na hprawng pru mat wa ai lam, Shawlu na jang, shi hkum nan n hkan nang ai, nga mat ai. ¹⁴ Dawi chyawm gaw, Zihpa bum ga na hkaraw nhkap hkan e nga nga ai rai nna, Shawlu shani shagu tam nga timung, Karai Kasang gaw Dawi hpe shi a lata de n ap kau wu ai. ¹⁵ Shi hpe sat na nga, Shawlu pru sa wa ai gaw, Dawi chye wu ai; dai rai nna Dawi gaw, Zihpa nam mali na maling kata e nga nga ai. ¹⁶ Shaloi Shawlu a kasha Yonahtan rawt nna, Dawi nga ai maling de sa wa nhtawm, Karai Kasang hta shamyet shanat ngang na lam, shadaw shalan let, ¹⁷ Hkum hkrit et; nye wa Shawlu a lata nang kaw du lu na n rai; nang Israela hkawhkam tai lu na rin dai; ngai mung na a lawu na agyi rai na ring ngai: dai hku rai wa na gaw, nye wa Shawlu chye da wu ai, ngu wu ai. ¹⁸ Shaloi chye lahkawng gaw, Yehowa man e ga shaka tawn da ma ai: shingrai Dawi gaw dai maling e nga nga nna, Yonahtan mung hta de bai wa ai. ¹⁹ Dai shaloi e, Zihpa masha ni gaw Gibea mare de Shawlu kaw lung wa nna, Dawi gaw, anhte a ga, Yashimun shara dingda, Hahkila kawng na hkamwam nhkap maling mala hkan e makoi nga ai n rai ni? ²⁰ Dai re ai majaw, hkawhkam wa e, nang hkan shachyut mayu ndai hte maren, yu sa rit; shi hpe, na a lata hta ap ya na lam gaw, anhte a amu rai u ga, ngu nna sa tsun mu ai. ²¹ Shawlu gaw, Nanhte ngai hpe matsan dum manit dai majaw, Yehowa nanhte hpe shaman ya myit ga. ²² Ya wa nna, naw sagawn yu mu; shi makoi ai shara kanang re ai, shi e kadai mu ai, atsawm sha naw gawn la mu; shi hpaji grai rawng ai ngai chye nngai. ²³ Dai re ai majaw, shi makoi nga ai shara ni yawng hpe achyoi sha tam yu ngut jang she, ngai hpang de bai sa marit; shaloi ngai gaja wa nanhte hte rau pru sa na nngai; shi dai ga hkan e nga taw gaw, Yuda amyu hkying mun a kata na, ngai shi hpe tam shaw la na nngai, ngu dat mu ai. ²⁴ Shaloi shanhte rawt nna, Zihpa de, Shawlu a shawng e sa wa ma ai; Dawi hte shi a masha ni chyawm gaw, Maon nam ga, Yeshimun shara dingda maga na pa hkan e nga nga ma ai. ²⁵ Shingrai Shawlu hte shi a masha ni, shi hpe tam na pru sama ai. Dai lam Dawi hpe shana ya mu ai majaw, dai lunghkrung de shi yu wa nna, Maon nam mali e nga nga ai. Shawlu dai bai na jang, Maon nam mali de Dawi hpe hkan tam sa wa ai. ²⁶ Shaloi kawng maga mi de Shawlu sa wa nna, maga mi de Dawi hte shi a masha ni sa wa ma ai. Shingrai Shawlu hpe hkrit ai majaw, lawt lu hkra nga Dawi hprawng shaja nga ai; kaning rai nme law, Shawlu hte shi a masha ni, Dawi hte shi a masha ni hpe wang grup wa nna, ganoi noi rim la lu mu ai. ²⁷ Dai shaloi kasa du nna, Alawan wa rit; Hpilisti masha ni anhte ga de gasat shang wa mara ai, ngu nna Shawlu hpe sa tsun mu ai. ²⁸ Dai majaw Shawlu Dawi hpe shachyut ai kaw na nhtang nna, Hpilisti masha ni hpang de sa wa ai: dai rai nna, shara dai hpe, Sela-Hamalekot ngu nna shamying mu ai. ²⁹ Dawi mung dai kaw nna lung wa nna Engedi ginwang hkan na shim ai shara ni hta nga nga ai.

¹ Ya Shawlu Hpilisti masha ni hpe shachyut kau ai kaw na bai wa jang, Dawi Engedi shara e nga nga ai, ngu nna tsun dan mu ai. ² Shaloi Shawlu Israela amyu ting na lata la ai masha hkying masum woi nna, aya lung bra hkan e Dawi hte shi a masha ni hpe hkan tam na nga, sa w ai. ³ Shaloi lam makau na sagu lawng de shi du nna, dai yang e lungpu hku hku nga ai: Shawlu mung, hkum tsan na nga dai de shang wa ai. Dawi hte shi a masha ni mung, dai lungpu a kata htum maga de rawng nga ma ai. ⁴ Shaloi Dawi a masha ni gaw, Yu u, Yehowa nang hpe tsun ai, Na a hpyen wa hpe na a lata hta ngai ap ya na de ai; shi hta nang hpa di mayu yang di lu na rin dai, nga ai nhtoi ya du ra ai, ngu nna shi hpe tsun mu yang, Dawi rawt nna, Shawlu hpun nga ai palawng nshang daw hpe, atsin sha gadoi dut la ya wu ai. ⁵ Shingrai, Shawlu a palawng rep di la kau ai majaw, Dawi myit malai bai lu ai rai nna, ⁶ Yehowa a namman jaw hkam ai nye a Madu gaw, Yehowa a hkang hte namman jaw hkam ai wa rai nga ai majaw, dai nye a Madu hpe shing di na gaw, nye a lata e Yehowa hkum kau ya n ga, ngu nna shi a masha ni hpe tsun wu ai. ⁷ Shing nga nna Dawi gaw, shi a masha ni hpe tsun let, Shawlu hpe lata shadu na hkum kau wu ai. Shawlu mung rawt nna lungpu na pru hkawn wa ai. ⁸ Dai hpang Dawi mung rawt nna, dai lungpu na pru nhtawm, Nye a Madu, Hkawhkam wa e, ngu nna Shawlu a hpang e hkan jahtau wu ai. Shaloi Shawlu kayin mada yu wu yang, Dawi gaw ga e dingnyawm dagup let, nawku nga ai. ⁹ Shingrai Dawi gaw, Yu u, Dawi nang hpe sat na maw nga ai, nga nna masha ni kajai ai ga, hpa rai madat shut n ta? ¹⁰ Dai ni Yehowa, wora lungpu e nang hkum hpe, na a mayam a lata hta ap kau nit dai gaw, nang nan mu nit dai; nang hpe sat kau ga, nga nna manang ni nkau mi shadut ti pyi, ngai na asak hpe lahpawt ya nna, nye a Madu gaw Yehowa a namman jaw hkam ai wa re ai; dai wa hpe sat na, nye a lata n dawn yu we ga, ngu nna ngai myit nga nngai. ¹¹ Dai hta n-ga, nye wa e; nye a lata na, ndai na a palawng daw hpe mada yu u; ngai nang hpe n sat ai sha, na palawng daw sha gadoi dut la nngai majaw, nye lata hta yubak mara n nga li ai, tawt lai ai shara n rawng li ai gaw, dum chye nga u; nang ngai hpe sat na nga hkan gyam nga timung, ngai nang hpe hpa n shut nngai. ¹² Nang hte nye a lapran e Yehowa jeyang mi ga; ngai e shut ai mara matai gaw Yehowa htang jaw nit ga: raitimung nye a lata chyawm gaw, nang kaw n du li ga. ¹³ Moi na ni a ga malai gaw, N hkru ai ni kaw na n hkru ai sha pru chye ai, nga ai ga wa teng timung, nye a lata gaw nang kaw n shadu n ga. ¹⁴ Israela Hkawhkam wa mi ting, gade a majaw nawt hkawm wa n ta? Nang kadai hpe hkan shachyut hkawm nga n ta? gwi chyasi, wa hkalai, hkan tam n ni? ¹⁵ Dai re ai majaw Yehowa she tara agyi tai ya mi ga; nang hte nye a lapran e shi hparan ya mi ga; shi nan mada yu nna ngai hpe na a lata na hkrang la n ga, ngu nna Shawlu hpe tsun wu ai. ¹⁶ Dawi shing nga Shawlu hpe tsun ngut jang, Shawlu gaw, Ngai sha Dawi e, dai gaw na a nsen rai ni? nga nna san let, jahtau hkrap wu ai. ¹⁷ Bai shi gaw, Nang mahtang ngai hta grau ding nga nit dai; ngai nang hpe n hkru ai hku galaw nit dai; ngai nang hpe kaja ai hku htang nit dai. ¹⁸ Nang ngai hpe kaja ai lam, kaning rai galaw ai gaw, dai ni nang madun nit dai: kaning rai nme law, Yehowa ngai hpe na a lata hta ap ti pyi, nang ngai e n sat a hka. ¹⁹ Masha wa mi tinang hpyen hte katut sayang, apyaw sha a dat dat lu a ni? Dai rai nna, dai ni ngai hta nang madun ai chyeju gaw Yehowa htang ya nit ga law. ²⁰ Ya, yu u, Nang hkawhkam teng teng tai na ra ai mung, Israela mungdan na a lata hta grin na ra ai, ngu nna mung, ngai chye se ai. ²¹ Dai re ai majaw, nye a amyu matu ni hpe nang n shamyit kau ya ai sha, nye wa a lakung lama ni hta na nye a mying hpe n shamat kau ya na lam, Yehowa hta gang nna, ngai hpe dagam ya e, ngu nna Dawi hpe tsun wu ai. ²² Dawi mung, Shawlu a matu dagam ya wu ai; shingrai Shawlu gaw shi a nta de bai wa mat ai; Dawi hte shi a masha ni chyawm gaw, ngang shim ai shara ni de sa wa ma ai.

¹ Ya Samuela si mat sai rai nna, Israela masha ni yawng zuphpawng nna, hkrapngu hkrapngoi rai bru let, Rama shara na, shi a nta e makoi mayang mu ai. Dawi chyawm gaw rawt nna Paran nam mali de yu sa wa ai. ² Dai shaloi e Maon shara e nga nga nna, Hkarmela mare hta sut rai rem da ai wa langai mi nga ai: dai wa gaw sutgan grai lu ai rai nna, sagu hkying masum, bainam hkying mi rai lu ai; ya shi gaw Hkarmela shara e shi a sagu ni hpe mun rep nga ai. ³ Dai wa a mying gaw Nabala, shi madu jan a mying gaw Abigela rai lu ai; dai num gaw hpaji rawng ai rai nna, ahpraw mung tsawm nga ai; madu wa chyawm gaw, myit ja ai hte n hkru ai amu shapraw chye ai wa rai nga ai; shi gaw Hkaleb lakung hta na rai nga ai. ⁴ Ya Nabala sagu mun rep nga ai gaw, nam mali e Dawi na wu ai. ⁵ Shaloi Dawi shi a ma marai shi hpe shangun dat nna, Hkarmela mare de sa masu; Nabala hpang de sa nna nye a matu shacyen ya mi: ⁶ dai sut su ai wa hpe ning ngu tsun mu: Nang madu ngwi pyaw nga u ga; na nta masha ni mung ngwi pyaw u ga; nang hte seng maseng mung ngwi pyaw u ga, law. ⁷ Nang sagu mun rep ga saw ai lam ngai na nngai; na a sagu rem ai ni anhte hte rau nga yang, anhte shanhte hpe hpa mung n sharu ga ai: shanhte Hkarmela bum e nga nga ai hte yang, shanhte a arai hpa mung n mat malu ai. ⁸ Na shabrang ma ni hpe san yu u; shanhte tsun na ma ai: dai majaw nye a ma ni nang kaw myiman pa mu ga; anhte mung nhtoi kaja hta du saga ai; nang jaw ra ai made na a mayam ni hte nsha Dawi hpe jaw dat na, ngai hpyi nngai, nga ai, ngu nna tsun na lam hkang dat mu ai. ⁹ Ya Dawi a ma ni gaw Nabala hpang de du jang, Dawi htet dat ai ga mahkra sa tsun nna, atsin sha nga ma ai. ¹⁰ Dai rai nna Nabala gaw Dawi a shangun ma ni hpe, Dawi gaw kadai rai ta? Yese a kasha gaw kadai rai ta? ya hte yang, madu hpe gumlau ai mayam ni law nga ma hka. ¹¹ Ngai nye a sagu mun rep ai ni a matu hpajang tawn ai nye muk, nye ntsin hte ngai sat tawn ai shan hpe la nna, kanang na pru ai pyi n chye ai ni hpe jaw kau na kun? ngu nna htan mu ai. ¹² Shingrai Dawi a ma ni nhtang wa nna, dai ga mahkra shi hpe sa tsun dan mu ai. ¹³ Dawi chyawm gaw, Nhtu la hpye mu, ngu nna shi ma ni hpe tsun jang, yawng mayawng tinang a nhtu hpye mu ai: Dawi mung shi a nhtu hpye wu ai: shingrai, marai mali tsa daram Dawi kaw hkan ma ai; ni tsa gaw arai sin nga ma ai. ¹⁴ Raitimung, shabrang langai mi, Nabala madu jan Abigela kaw wa nna, Yu u, Dawi, anhte Madu hpe shachyen na nga, nam de nna kasa shangun dat mu ai; shi mahtang shanhte hpe hkap hta kau dat nu ai. ¹⁵ Dai masha ni chyawm gaw anhte hte grai hkau chyap nna, anhte hpe hpa mi n sharu mi ai: pa ga hkan e shanhte hte rau naw nga ai nhtoi hte anhte hpa mung n sum ga ai. ¹⁶ Anhte sagu rem let, shanhte hte kanawn ai nhtoi hte ting, shani shana anhte hpe magawp maga mi ai. ¹⁷ Dai rai nna, kaning mai di na gaw, du jan nang myit yu u: anhte a madu hpe mung, shi a nta masha ni yawng hpe mung, hpya kau na nga bawng ngut masai: madu mahtang hpa n hkaw ai wa re ai majaw, kadai mung shi hte n tsun wam ga ai, ngu wu ai. ¹⁸ Shaloi Abigela gaw, muk tawng ni tsa, tsabyi tau lahkawng, sat lajang ngut sai sagu hkum manga, mam npaw uma manga, tsabyi si chyahkraw sumbaw latsa, lakum si dik apye ni tsa alawan la nna, lawze hta htaw nhtawm, ¹⁹ shi a ma ni hpe, Sa wa magang mu; ngai hkan dep na ring ngai, ngu nna dat dat mu ai. Madu wa Nabala hpe chyawm gaw n tsun da wu ai. ²⁰ Ya shi gaw lawze jawn nna sa wa yang, bum na a katsi katsang nga ai shara e Dawi hte shi a masha ni yu hkrat wa ai hte, hkrum ma ai. ²¹ Shingrai hkrum ai shawng e Dawi gaw, Gaja wa nan, dai wa a rai lama mi muk n mat hkra, nam mali na shi a arai mahkra hpe, ngai kaman lila sin lawm kau se hke; nye a kaja ai matu, n kaja ai htang jaw a hka. ²² Hpawt de nhtoi htoi jang, shi hte seng ai nlang hta na, lasha ma langai mi she ngam da ai nga sayang gaw, dai hta grau nna, Dawi a hpyen ni hpe Karai Kasang di mu ga, ngu nan shaka kau mu ai. ²³ Ya Abigela Dawi hpe mu jang, lawze dinghkung na alawan yu wa n-htawm, Dawi a man e ga de dingnyawm dagup nga ai. ²⁴ Shi a lagaw nhpang e hput di let, Nye a madu e, yubak mara nye a ntsa e rai nga nu ga; na a mayam jan ga hkaw mi tsun lu na ahkang jaw e; na a mayam jan a ga she madat ya rit. ²⁵ Nye a madu wa, hpa n hkaw ai wa, Nabala hpe hkum nawn et; shi a mying mung shi a myit hte bung lu ai: shi a mying gaw Nabala, shi a myit mung myit ngawk gaw Nabala, shi a myit mung myit ngawk rai lu ai; nang madu shangun dat ai ma ni hpe, ngai na a mayam jan n mu kau we ai. ²⁶ Ya raitimung, nye a madu e, masha asak sat na de n sa n ga hte, tinang myit machyu nna, matai n htang n ga, Yehowa nang hpe hkum da nit dai majaw, Yehowa ahkrung nga nna, nang madu ahkrung nga ai hte maren, na a hpyen ni hte nang hpe jahten maw ai ni gaw, Nabala zawn, rai nga mu ga. ²⁷ Ya na a mayam jan la sa ai kumhpa, nang kaw hkan nang ai ma ni hpe, karan jaw shangun ya mi. ²⁸ Na a mayam jan a mara hpe sharang kau ya e: nye a madu nang, Yehowa a hpang maga majan gasat ndai majaw, na nta teng teng grin wa na ra ai: na a prat tup, nang hta mara shagun shara mung n rawng na ra ai. ²⁹ Nang hpe sat na nga, shachyut masha mi rawt pru timung, nye a madu a asak hpe na a Karai Kasang Yehowa a asak makai hta gyit shangang da na wu ai: nang hpe hpyen ai ni a asak hpe chyawm gaw, lahpaw hta na shinggyin hpe zawn gap shapoi kau na wu ai. ³⁰ Shingrai Yehowa na a lam ga ndat kaja tawn da ya ai, nga nga lit dai hte maren, lam shagu nang madu hta shatup ya nna, Israela amyu hpe up ai du aya lu la ai shaloi; ³¹ mara kata e masha asak sat kau hkrup ai majaw mung, timung myit machyu nna matai tawp kau ai majaw mung, myit malai lu ai yawn hte tinang hkum dai tinang mara shagun shara rawng nga na lam gaw, nye madu hta n nga lit ga law. Yehowa nang madu hpe ngamu ngamai shangun ai nhtoi e, na a mayam jan hpe mung dum rit law, ngu nna hpyi wu ai. ³² Dai rai nna Dawi Abigela hpe, Dai ni ngai hte hkrum u ga nga, nang hpe shangun dat ai Israels Karai Kasang Yehowa gaw, a nga u ga law; ³³ nang daw ya ai hpaji lam mung, ngai dai ni masha asak n sa sat hkrup na hte, tinang myit machyu nna, matai n sa tawp na lam sa tsun hkum ai jan, nang hta mung, a nga lit ga law. ³⁴ Gaja nan, nang hpe n sa hpya kau na lam hkum shadang ai Israela Karai Kasang Yehowa hkrung nga ai hte maren, nang ning rai alawan n du taw gaw, gaja wa teng teng hpawt de nhtoi htoi jang gaw, Nabala lasha ma langai mi hpe mung, n ngam da na se ai, ngu nna tsun wu ai. ³⁵ Shingrai, Dawi, shi la sa ai kumhpa shi a lata na la n-htawm, Na nta de ngwi ngwi wa nu; yu u, ngai na a ga madat ni ai; na a myiman tau nna nga nga na ni ai, ngu dat wu ai. ³⁶ Abigela mung, Nabala hpang de bai wa ai: shi chyawm gaw hkawhkam poi zawn, shi a nta e poi kaba de nna, shi chyaru ja ja nang ai majaw, shi grai pyaw nga ai: madu jan mung, hpang jahpawt nhtoi htoi hkra, hpa mung n tsun dan ai ip da wu ai. ³⁷ Ya nhtoi htoi nna Nabala tsabyi nang ai bran yang, madu jan dai lam mahkra shi e tsun dan wu ai; shaloi shi a masin chyat si nna, nlung zawn ja mat lu ai. ³⁸ Dai hpang shi ya dang rai jang, Yehowa Nabala hpe sat kau nna shi si mat sai. ³⁹ Ya Dawi Nabala si mat ai lam na jang, shi gaw, Ngai hkrum ai shatan nhkan hpe yu ya nna, Nabala lata na shaw la ai hte, shi a mayam wa hpe yubak mara hta na shalawt la ai Yehowa gaw a nga u ga law; Nabala galaw ai yubak hpe shi a baw hta, Yehowa nhtang dat ya nu ai, ngu nna shakawng wu ai: shingrai Dawi gaw masha shangun nna, Abigela hpe kahkyin na matu shaga dat wu ai. ⁴⁰ Dawi a shangun ma ni mung, Abigela nga ai Hkarmela shara e du nna, Dawi gaw, du jan nang hpe kahkyin la na nga, anhte hpe shangun dat mani ai, ngu nna tsun dat mu ai. ⁴¹ Shingrai Abigela rawt nna, ga de dingnyawm dagup let, Yu u, ngai gaw, nye madu a shangun ma ni a lagaw kashin ai mayam rai dam u ga, nga nna tsun nhtawm, ⁴² alawan rawt nna shi a mayam num marai manga hte lawze jawn let, Dawi shangun dat ai ni kaw hkan wa ma ai rai nna, Dawi a madu jan tai nga ai. ⁴³ Dawi gaw, Yezrela mare na Ahinoam hpe mung la wu ai rai nna, shan lahkawng Dawi a madu jan rai ma ai. ⁴⁴ Shawlu chyawm gaw, shi a shayi sha, Dawi a madu jan Mihkala hpe, Galim shara na Laisha kasha Palati e ya sha kau nu ai.

¹ Ya Zihpa msha ni gaw, Gibea mare de, Shawlu kaw sa nna, Dawi gaw Yeshimun tawtap na Hahkila kawng e makoi nga ai n rai ni? ngu nna sa tsun mu ai. ² Shaloi Shawlu rawt nna, san da ai Israela masha hkying masum hte rau, Zihpa nam de Dawi hpe tam na nga yu wa ma ai. ³ Ya Shawlu gaw Yeshimun tawtap na Hahkila kawng, lam nmaw makau e, dap jung nga ai. Dawi chyawm gaw, nam mali e nga nga nna, Shawlu shi hpe hkan shachyut ai lam mu chye wu ai. ⁴ Dai rai nna Dawi kin-yu shangun dat yu nna, Shawlu teng teng du ai gaw chye wu ai. ⁵ Shaloi Dawi rawt nna, Shawlu dap jung ai shara de du sa wa ai: ya Shawlu hte Nera kasha Abna yup ai shara hpe Dawi mu ya wu ai: Shawlu gaw leng dap Dawi mu ya wu ai: Shawlu gaw leng dap ka-ang e yup nga nna, shi a grupyin e hpyen masha ni dap jung nga ma ai. ⁶ Shaloi Dawi gaw, Ngai hte rau dap de Shawlu kaw, kadai hkan sa na myit ta? ngu nna Hiti masha Ahimelek yan Zeruia kasha Yoab a kanau Abishai hpe san mu yang, Abishai mahtang, Ngai hkan nang na nngai, ngu wu ai. ⁷ Shingrai Dawi yan Abishai gaw dai dap de shana e sa wa ma ai: shaloi, yu u, Shawlu gaw, leng dap a ka-ang e yup nga nna, shi a ri gaw baw nhtung e ga hta jung da wu ai: Abna hte shi a masha ni gaw grupyin e yup nga ma ai. ⁸ Shaloi Abishai gaw, Karai Kasang gaw, na a hpyen wa hpe na a lata hta dai ni ap ya ra ai: dai rai nna, aga de hkrang hkra ari hte kalang ta sha ngai shi hpe galun htinggrang kau we ga; lahkawng lang pyi, n kahtap na nngai, ngu nna Dawi hpe hpyi wu ai. ⁹ Dawi chyawm gaw, Shi hpe hkum hkra et; Yehowa a namman jaw hkam ai wa hpe kadai wa mi ra n rawng ai hkra lu na rai ta? ngu nna Abishai hpe daru wu ai. ¹⁰ Bai Dawi gaw, Yehowa ahkrung nga ai hte maren, Yehowa shi hpe sat kau na wu ai; shing n rai, shi a si ten du na ra ai; shing n rai, majan hta sa sum si na ra ai. ¹¹ Yehowa a namman jaw hkam ai wa hpe, ngai lata n du hkra, Yehowa hkum kau n ga law: ya chyawm gaw, shi a baw nhpang na ri hte ntsin namtau hpe, la wa ga, nga nna tsun let, ¹² Dawi gaw Shawlu a baw nhpang na ri hte ntsin namtau hpe la nna, shan lahkawng wa ma ai: kadai mung n mu n na dat mu ai; kadai sha mung n dum ma ai: kaning rai nme law, Yehowa gaw shanhte hpe yup kaba hte shayup mu ai majaw, shanhte nlang yup a nga ma ai. ¹³ Shaloi Dawi hkaraw wora hkran de rap nhtawm, tsawmra gang ai bum pungding e tsap da nna, ¹⁴ hpyen masha ni hte Nera kasha Abna hpe, E, Abna, nang gaja n htan n ni? ngu nna jahtau wu yang, Abna mung, Hkawhkam wa hpe jahtu ai gaw, kadai rai nga n ta? ngu nna htan wu ai. ¹⁵ Shaloi Dawi Abna hpe, Nang share la n rai n ni e? Israela amyu ni hta nang zawn re ai kadai nga a ta e? Dai rai yang, Na madu hkawhkam wa hpe hpa rai n sin n ta e? Na madu hkawhkam wa hpe sat na nga, masha langai mi shang wa sai law. ¹⁶ Nang galaw ai lam n sun nit dai: Yehowa a namman jaw hkam ai wa, nanhte a madu hpe n sin myit dai majaw, Yehowa hkrung nga ai hte maren, nanhte gaw si ging myit dai law. Hkawhkam baw nhpang na ri hte ntsin namtau, kanang nga ai gaw ya yu mu, ngu nna jahtau wu ai. ¹⁷ Shawlu chyawm gaw Dawi a nsen re ai chye nna, Ngai sha Dawi e, dai gaw na a nsen rai ni? ngu nna san wu yang, Dawi mung, Rai nga ai, nye a madu hkawhkam wa e, ngu nna htan wu ai. ¹⁸ Bai Dawi gaw, Nye a madu, na a mayam hpe hpa rai hkan shachyut hkawm nga n ta? Ngai hpa shut de ta? Nye a lata hpa mara nga nga a ta? ¹⁹ Nye madu, hkawhkam wa e, ya na a mayam a ga madat mara ya e: Yehowa nan ngai e hpyen na hku nang hpe shadut ndai rai yang gaw, shi hkungga hkap la u ga: shing n rai, shinggyim masha e shadut ai rai yang gaw, Yehowa man e dagam dala hkrum sha mu ga: kaning rai nme nga yang, shanhte ngai hpe, Hprawng u; Hpara shaje tam naw wa nu, nga nna Yehowa a Sali ga hta n nga lu hkra, dai ni pyi gawt kau nga myit hka. ²⁰ Dai re ai majaw nye a asai gaw, Yehowa a myiman hte tsan ai shara e, ga de n hkrat li ga: kaning rai nme law, masha gaw bum alang hkan e upreng tam shachyut ai zawn, Israela hkawhkam wa mi ting wa hkalai sa tam na nawt hkawm a hka, ngu wu ai. ²¹ Dai rai nna Shawlu gaw, Ngai shut ni ai; ngai sha Dawi e, bai wa rit; dai ni nang nye a asak hpe lahpawt ya nit dai majaw, ya hpang de n zingri na ni ai: ngai mahtang mana ni ai; ngai grai shut kau se ai, ngu wu ai. ²² Bai Dawi gaw, Hkawhkam a ari nang rai nga ai; ma langai mi hpe sa la shangun u. ²³ Dai ni Yehowa nang hpe nye a lata hta ap kau nit dai raitimung, shi a namman chya hkam ai wa hpe ngai n hkra nngai; Yehowa gaw kadai hpe raitimung, tinang a dinghpring ai hte kangka ai hta hkan nna, akyu htang jaw na ra ai. ²⁴ Dai rai nna, dai ni ngai na asak hpe lahpawt ya ai zawn, Yehowa nye a asak hpe lahpawt nna, ngai hpe ruyak lam shagu hta na shaw la n ga law, ngu nna tsun wu ai. ²⁵ Shaloi Shawlu gaw, Ngai sha Dawi e, nang a nga nit ga law: rai mung rai lu na nit dai, dang mung dang lu na nit dai, ngu nna htan wu ai. Shingrai Dawi hkawm mat wa nna, Shawlu mung shi a shara de bai wa ai.

¹ Dai hpang Dawi gaw, Lani mi Shawlu a lata hta ngai asum na ring ngai; Hpilisti mung de hprawng yang she mai na sai; dai hta grau ai lam nye a matu n nga sai; shaloi she, Israela mung ting hta ngai e n mu tam ai, Shawlu chye nna myit jasat kau yang, shi a lata na ngai lawt na ni ai, ngu nna myit lu wu ai. ² Shaloi Dawi hte shi kaw hkan nang ai masha kru tsa hte gaw rawt nna, Gat hkawhkam Mohka a kasha Ahkisha hpang de rap mat wa ma ai. ³ Shingrai Dawi hte shi a masha ni gaw tinang madu jan kasha ni hte rau, Gat hkawhkam, Ahkisha kaw nga nga ma ai: Yezrela mare na Ahinoam ngu ai jan hte, Nabala a gaida Hkarmela shara na Abigela ngu ai Dawi a madu jan yan mung lawm ma ai. ⁴ Shingrai Dawi gaw Gat mare de hprawng mat wa ai lam, Shawlu hpe sa tsun mu ai: dai rai nna htawmhpang de shi hpe n tam nu ai. ⁵ Ya Dawi Ahkisha hpe, Ngai na a man e myiman pa ni ai rai yang gaw, ngai nga lu na matu, ndai mungdan na mare kahtawng langai mi hta ngai e nga shara jaw mi: na a mayam gaw hkawhkam mare hta hpa rai nga na rai ta? ngu nna hpyi wu ai. ⁶ Dai rai nna Ahkisha gaw dai shani e, Zikla mare jaw wu ai: dai re ai majaw Zekla mare gaw dai ni du hkra Yuda hkawhkam ni madu ma ai. ⁷ Dawi gaw Hpilisti mung e nga nga ai nhtoi gaw, laning mi shata mali tup rai nga ai. ⁸ Shaloi Dawi hte shi a masha ni gaw, Geshuri, Gerazi hte Amalek masha ni hpe sa hpya ma ai: kaning rai nme law, dai amyu ni gaw, moi nna Shura de sa ai lam dingdung, Egutu mung htep anga nga ai ni rai nga ma ai. ⁹ Dawi gaw dai mung hpe hpya kau nna, numsha lasha langai mi hpe mung n chyahkrung da ai sha, shanhte a sagu dumsu, lawze, gawla-uk hte hpun nba magawn la nhtawm, Ahkisha hpang de bai wa ai. ¹⁰ Shaloi Ahkisha gaw, Dai ni nanhte kadai hpe sa gasat myit ta? ngu nna san wu yang, Dawi gaw, Yuda mung Dingda, Yeramela mung Dingda, Keni mung Dingda maga hkan e sa gasat ga ai, ngu nna htan mu ai. ¹¹ Bai Dawi gaw, Dawi shingrai galaw ai, nga nna, Gat mare de shi wa tsun na masha n nga hkra, numsha lasha langai mi hpe muk chyahkrung da wu ai n rai: shingrai Dawi gaw, Hpilisti mung e nga ai nhtoi hte ting dai hku sha a galaw nga ai. ¹² Ahkisha mung Dawi hpe kam nna, Dawi gaw shi a amyu ni shi hpe nachying n ju mat hkra galaw nu ai: dai rai nna ngai kaw tut tut a yamnga na sai, nga ai.

¹ Ya dai hte yang, Hpilisti masha ni gaw, Israela masha ni hpe gasat na nga, tinang a hpyen luksuk ni hpe jahpawng ma ai. Shaloi Ahkisha gaw, Dawi hpe, Nang hte na masha ni mung, ngai hte rau hpyen luksuk hta lawm lu na, teng teng chye u, ngu wu yang, ² Dawi mung, Rai sa, na mayam wa hpa galaw lu na gaw, nang chye lu na rin dai, ngu nna Ahkisha hpe htan wu ai. Bai Ahkisha gaw, Dai rai yang, nang hpe tutnawng na nye a asak sin ai bu shatai na de ai, ngu nna Dawi hpe tsun wu ai. ³ Dai shaloi e Samuela n nga ai, si mat sai rai nna, Israela masha ni yawng shi a majaw hkrapngu hkrapngoi rai let, shi nga ai Rama mare e makoi mayang manu ai. Shawlu mung, atsu chye shaga ai ni hte gumhpan hpan ai ni hpe, mung ting na seng kau wu ai. ⁴ Ya Hpilisti masha ni zuphpawng nna, Shunem shara e dap jung nga ma ai: Shawlu mung Israela masha ni yawng zuphpawng nna, Gilaboa shara e dap jung nga ma ai. ⁵ Ya Shawlu gaw Hpilisti hpyen laba ni hpe mu jang shi hkrit nna, shi a masin ja ja gari nga lu ai. ⁶ Shawlu gaw Yehowa kaw san wu timung, Yehowa n htan ya wu ai; yupmang hta mung, Urim hta mung, myihtoi hta mung, n htan ya wu ai. ⁷ Dai rai nna Shawlu gaw, Atsu chye shaga ai num langai mi sa tam masu, ngai sa san se ga, ngu nna shi a shangun ma ni hpe, dat dat mu ai. Shangun ma ni mung, Endora shara e atsu chye shaga ai num langai mi nga ai, ngu nna tsun dan mu ai. ⁸ Shaloi Shawlu hpun palawng galai nna, lak lai ai hkum hte, manang lahkawng hte rau, dai numsha hpang de shana e sa nna, Nang kaw jawn ai nat hta hpa nna ngai tsun na wa hpe shapraw ya e, ngu wu ai. ⁹ Dai numsha chyawm gaw, Yu u, atsu chye shaga ai ni hte nat shung ai ni hpe, mung ting na seng kau ai, Shawlu galaw ai amu hpe nang chye da ntawm me, ngai e si u ga nga, nye asak hpe hpa majaw mahkam hkam ya n ta? ngu nna shi hpe htan wu ai. ¹⁰ Dai rai nna Shawlu gaw, Yehowa hkrung nga ai hte maren, dai amu a majaw nang hta hpa ari hkrum lu na n rai, ngu nna Yehowa hta dagam wu ai. ¹¹ Shaloi dai numsha gaw, Nang hpang de kadai hpe shapraw ya na ra n ta? ngu nna san wu yang, Shawlu gaw, Samuela hpe shapraw ya e, ngu wu ai. ¹² Ya dai numsha gaw Samuela hpe mu jang, aja awa shabam nna, Nang ngai e hpa rai hkalem n ta? Nang nan Shawlu rai nga ndai, ngu nna Shawlu hpe tsun wu ai. ¹³ Hkawhkam wa gaw, Hkum hkrit et; nang hpa mu n ta? ngu nna san wu yang, numsha gaw, Ga kata de nna Hpara lung wa ai, ngai mu se ai, ngu nna tsun wu ai. ¹⁴ Bai hkawhkam wa gaw, Hpa zawn san a ta? ngu nna bai san wu yang, Dingla langai mi pru ra ai; hpajawng lawai nga ai, ngu nna tsun dan wu ai. Dai wa gaw Samuela re ai Shawlu dum nna, ga e dingnyawm dagup nga nna, nawku nga ai. ¹⁵ Shaloi Samuela gaw, Ngai hpe shatsang na hpa rai sharawt n ta? ngu nan Shawlu hpe san wu yang, Shawlu gaw, Ngai nachying kyindut mat ni ai; Hpilisti masha ni ngai hpe gasat nga ma ai; Karai Kasang mung ngai hpe kabai kau ni ai; myihtoi hta mung n htan, yupmang hta mung n htan ya ni ai. Dai re ai majaw ngai kaning rai galaw na gaw, nang madun ri ga, ngu nan ngai nang hpe shaga nngai, ngu nna htan wu ai. ¹⁶ Samuela chyawm gaw, Yehowa nang hpe kabai kau nna, na a hpyen tai nga sai rai yang gaw, ngai hpe hpa majaw naw san n ta? ¹⁷ Yehowa ngai hta tsun ai hte maren, nang hta di nu ai: ndai mungdan hpe na a lata na Yehowa gare la nna, na htingbu wa Dawi hpe jaw kau nu ai. ¹⁸ Kaning rai nme law, nang Yehowa a ga n madat nna, Amalek masha ni hta shi a pawt bu ai masin n jasat ya ndai majaw, Yehowa dai ni amu ndai nang hta shapraw ya nit dai. ¹⁹ Dai hta kaga, nang hte nawng Israela amyu hpe, Hpilisti masha ni a lata de, Yehowa ap kau na nit dai: hpawt de nang hte na a shadang sha ni ngai hte rau nga lu na marin dai: Yehowa gaw Israela masha ni a hpyen luksuk hpe Hpilisti masha ni a lata hta ap kau na nu ai, ngu mu ai. ²⁰ Shaloi Shawlu gaw, Samuela a ga majaw nachying hkrit mat nna, ga e shagum de dagup taw nga ai: lani mi hte lana mi tup hpa mung n lu n sha ai majaw, shi hta n-gun n rawng salu ai. ²¹ Dai numsha gaw Shawlu hpang de sa nna, shi nau myit ru ai mu jang, Yu u, na a mayam jan na ga madat ni ai; tinang asak pyi n lahpawt hkra, nang tsun ai hku hkan galaw ni ai. ²² Dai majaw, ya na a mayam jan a ga mung, madat ya et; ngai shat lusha loi mi bawn tawn ya de ga; nang rawt hkawm sa wa yang, n-gun rawng na matu sha la u, ngu wu ai. ²³ Shi chyawm gaw, Ngai n sha na nngai, ngu nna ndang wu ai. Raitimung, shi a shangun ma ni mahtang dai numsha hte rau shi hpe jawm shagwi mu ai rai nna, shi mung shanhte a ga madat nna, ga na rawt nhtawm, yupku hta dung nga ai. ²⁴ Dai numsha mung shi a nta e kawn da ai dumsu kasha langai mi nga ai rai nna, dai alawan sat nu ai; shadung mung shi la nna, dai hpe gumchya nhtawm, matsi n rawng ai muk kabaw nna, ²⁵ Shawlu hte shi a ma ni hpe baw jaw wu ai; shanhte mung sha nna, dai shana jang rawt sa wa ma ai.

¹ Ya Hpilisti masha ni gaw tinang a luksuk laba ni nlang hpe Ahpek shara e jahpawng da mu ai; Israela masha ni mung, Yezrela hka hpawk makau e dap jung nga ma ai. ² Ya Hpilisti du ni gaw latsa dap, hkying dap lai sa wa nna, Dawi hte shi a masha ni mung hpang na dap hta Ahkisha hte rau hkan nang ma ai. ³ Shaloi Hpilisti du ni gaw, Ndai Hevre masha ni gaw nang de hpa sa galaw nga ma ta? ngu nna san mu ai. Ahkisha gaw, Dai wa gaw Israela hkawhkam Shawlu a shangun ma Dawi rai nga ai, n rai ni? Ngai kaw sa nga a ilaning ni ning nga wa sai; shi gumlau nna ngai kaw sa shingbyi ai shani kaw nna, ya du hkra shi hta mara shagun shara ngai n mu we ai, ngu nna Hpilisti du ni hpe htan wu ai. ⁴ Hpilisti du ni chyawm gaw shi hpe pawt shajang nna, Ndai wa, wa mat u ga; nang shi hpe san tawn ai shara de, shi wa nga nga nu ga; anhte kaw majan gasat ai shara de hkum hkan nang shangun et; majan ginra du jang anhte a hpyen maga de kayin mat na tsang ra ai. Shi gaw shi madu a myit kawp hkra kaning di lu a ta? anhte masha ni a baw ap ya ai hte sha shakawp lu na n rai ni? ⁵ Shawlu sat ai gaw hkying, Dawi sat ai gaw mun ging, nga nna ka let mahkawn namgoi ai gaw, ndai wa hpe shaang nna mahkawn ai n rai ma ni? Ngu nna daru kau mu ai. ⁶ Shaloi Ahkisha gaw Dawi hpe shaga nna, Yehowa ahkrung nga ai hte maren, dingman ai hku nang galaw nit dai; ngai hte rau hpyen majan bungli lawm ai amu hta, ngai nang hpe myit du sade ai; nang ngai kaw du ai shani kaw nna ya du hkra nang hta hpa mara mung ngai n mu se ai: raitimung, du agyi ni mahtang nang hpe n ra ma ai. ⁷ Dai re ai majaw, nang Hpilisti du ni hpe n shapawt hkra, apyaw sha naw nhtang wa su, ngu wu ai. ⁸ Dawi chyawm gaw, Taw, ngai na mayam wa, nang hkawhkam madu a hpyen ni hpe n sa gasat mai na gaw, ngai hpa shut a ta? Nang kaw nga ai nhtoi hte ting hta, dai ni du hkra, ngai hta hpa shut ai mu n ta? ngu nna Ahkisha hpe htan wu ai. ⁹ Ahkisha mung, Nang chye a man e Karai Kasang a lamu kasa gaw kaja nga ai gaw, ngai chye nga nngai; raitimung, Hpilisti du agyi ni gaw, Shi anhte hte rau, majan gasat ai hta lawm lu na n rai, nga nna tsun masai. ¹⁰ Dai rai nna, nang hte rau hkan nang ai, na madu a mashani hte rau, hkawn wa nna, hpawt de jau jau nhtoi htoi jang, bai nhtang wa masu, ngu nna Dawi hpe tsun wu ai. ¹¹ Dai rai nna Dawi mung, shi a masha ni hte rau, jau jau e rawt nna, Hpilisti mung de nhtang wa ma ai. Hpilisti masha ni chyawm gaw Yezrela shara de sa wa ma ai.

¹ Ya masum ya lai nna, Dawi hte shi a masha ni gaw Zekla mare de du wa yu yang, Amalek masha ni gaw, Dingda mung hte Zekla mare hpe gasat nna, Zekla mare hpe hpya la nhtawm nat kau da manu ai: ² mare na numsha ni hte, dai hta rawng ai kaji kaba mahkra hpe rim la mu ai; langai mi hpe mung n sat ai sha, magawn la nhtawm woi mat wa manu ai. ³ Dai rai nna, Dawi hte shi a masha ni dai mare de du wa yu yang, yu u, mare dai nat kau nna, tinang a madu jan ni hte shayi shadang sha ni hpe, magawn mat wa sai, wa hkrup mu ai. ⁴ Shaloi Dawi hte shi a masha ni gaw jahtau hkrap nna, ba htum mat hkra hkrap nga ma ai. ⁵ Dawi a madu jan Yezrela num Ahinoam hte Nabala gaida Hkarmela shara na Abigela mung lawm mat wa ma ai. ⁶ Dawi mung nachying myit yawn myit yak nga ai; kaning rai nme law, mare masha ni gaw, tinang a kashu kasha ni a majaw myit yawn nna, Dawi hpe nlung hte jawm kabai sat na tsun nga ma ai: Dawi chyawm gaw, shi a Karai Kasang Yehowa hta n-gun dating wu ai. ⁷ Shaloi Dawi gaw, Ahimelek a kasha hkinjawng Abiahta hpe, Dai hpahkai lawng ngai kaw la wa rit, ngu wu ai. Abiahta mung, dat hpahkai lawng hpe Dawi hpang de la wa nu ai. ⁸ Shaloi Dawi gaw, Yehowa hpe, Ngai dai hpyen laba ni hpe hkan shachyut yang, dep lu na kun? Ngu nna san wu ai: Yehowa gaw, Hkan shacyut u; nang shanhte hpe gaja wa teng teng dep lu na rin dai; gaja wa teng teng dep lu na rin dai; gaja wa teng teng arai yawng bai lu la na rin dai, ngu nna shi e htan wu ai. ⁹ Dai rai nna Dawi hte rau nga ai masha kru tsa sa wa nna, Besora hka shi du jang, kau mi gaw dai hka kau e hti nga mat ma ai. ¹⁰ Shaloi Dawi hte marai mali tsa hkan shachyut mu ai: marai ni tsa chyawm gaw, nau ba mat nna Besora hka shi n dang rap ai majaw hti nga mat ma ai. ¹¹ Dai pa e Egutu masha langai mi shanhte mu hkrup nna, Dawi hpang de woi wa nhtawm, muk jaw sha mu ai; dai wa mung sha wu ai; ntsin mung jaw lu mu ai: ¹² maihpang si pa mi, tsabyi si sumbaw lahkawng mung, jaw mu ai: dai wa mung sha ngut jang n-gun bai rawng lu ai: kaning rai nme law, shi gaw masum ya tup muk mung n sha, ntsin mung n lu ai sha kawsi hpang kara nga ai. ¹³ Shaloi Dawi gaw, Nang gade a masha rai n ta? kanang na sa n ta? ngu nna san wu yang, shi gaw, Ngai gaw Amalek masha kaw yamnga ai Egutu ma rai nga nngai. Lai wa sai masum ya e machyi ai majaw nye a madu e kau da nngai. ¹⁴ Anhte gaw, Hkerehti mung na dingda maga mung, Yuda mung hte seng ai lamu ga hte Hkaleb mung na dinda maga de gasat nna, Zekla mare hpe nat kau da mu ai, ngu nan tsun dan wu ai. ¹⁵ Bai Dawi gaw, Taw, dai hpyen laba ni nga ai shara de, nang ngai hpe lam madun lu na n ni? Ngu nna san wu yang, shi gaw, Nang ngai hpe n sat kau, nye madu a lata de mung n ap kau na lam, Karai Kasang hpe gang dagam e; shaloi rai jang gaw, dai hpyen laba nga ai de, lam madun na nngai, ngu nna htan wu ai. ¹⁶ Shingrai dai wa gaw shi hpe lam madun nna sa du yang, yu u, Hpilisti mung hte Yuda mung na magawn wa ai lanep rai ni nlang a majaw, Amalek masha ni lu let sha let, ka manau let, dai pa ting pri rai nga nga mala ai. ¹⁷ Dawi mung, nnan shana de kaw nna hpang shana de du hkra, shanhte hpe gasat mu ai rai nna, gawla-uk jawn ai shabrang mali tsa hprwng lawt lu ai hta kaga, langai mi muk n lawt hkra sat kau nna, ¹⁸ Amalek masha ni magawn wa ai lanep mahkra mung, Dawi bai lu la wu ai; shi a madu jan lahkawng hpe mung hkye la lu wu ai. ¹⁹ Masha kaji kaba, shayi shadang sha hte arung arai, shanhte magawn wa ai lanep rai ni yawng hta na, langai mi muk n yet hkra, yawng mayawng Dawi bai lu la wu ai. ²⁰ Dawi mung, gawt wa ai sagu dumsu hpung ni hta na, shawng de jahtum ai hpung hpe la nna, Ndai gaw Dawi a lanep rai nga ai, ngu wu ai. ²¹ Hki ba la mat nna n hkan nang lu ai majaw, Besora hka kau e hti nga ai marai ni tsa nga ai de Dawi du wa ai rai nna, shanhte mung Dawi hte shi kaw hkan nang ai masha ni hpe tau la na pru sa ma ai. Dawi mung shanhte hte ani sha rai jang, dai ni hpe hkap shachyen mu ai. ²² Shaloi Dawi kaw hkan nang ai ni hta na n hkru ai masha nlang hte gaw, Ndai ni, anhte hte rau n sa ai majaw, anhte lu la ai lanep hta na, shanhte a madu jan kasha ni hta kaga, arai gale shanhte hpe n jaw na re ai; tinang a madu jan kasha ni sha woi la nna wa mu ga, nga ma ai. ²³ Dawi chyawm gaw, Nye a hpunau ni e, anhte hpe hkan pau sin nna, anhte gasat sa wa ai hpyen laba ni hpe anhte a lata de ap ya ai Yehowa she jaw ai lanep hpe, shing di mai ai n rai. ²⁴ Dai nanhte tsun ai lam hku kadai madat na mara ta? gasat sa nna lu la ai hte maren, arai sin let hti nga ai ni mung, lu la mu ga; maga lahkawng maren ren lu la mu ga, ngu nna tsun hpajang mu ai. ²⁵ Dai shani kaw nna ya du hkra, Israela amyu hta shing re ai htung tai nga hkra, hpajang tawn da wu ai. ²⁶ Ya Dawi Zekla mare de du jang, dai lanep kau mi hpe, shi a jinghku, Yuda agyi salang ni hpang de shagun dat nna, Yehowa a hpyen ni kaw na lu la ai lanep hta na, nanhte hpe karan jaw dat ai kumhpa hpe yu yu mu, ngu nna htet dat wu ai: ²⁷ shingrai, Behtela, dingda maga na Ramot, Yatira, ²⁸ Aroera, Sipmot, Eshtamoa; ²⁹ Rahkala, Yeramela mare ni hta nga ai masha ni, Ken a mare ni hta nga ai masha ni, ³⁰ Horma, Bora-ashan, Ahtak, ³¹ Hebron mare ni hte, Dawi shi hkum hte shi a masha ni shingbyi nga ga ai kahtawng mare shagu de jaw dat wu ai.

¹ Ya Hpilisti masha ni Israela masha ni hpe gasat mu ai: Israela masha ni mahtang masha hpyen ni a man e hprawng nna, Gilaboa bum ga hkan e hkala nba hkrum ai hte si shajang ma ai. ² Hpilisti masha ni mung Shawlu hte shi a kasha ni hpe htep lahti hkan shachyut nna, Shawlu a kasha Yonahtan, Abinadab hte Mahki-shua hte hpe sat kau mu ai. ³ Shingrai dai gasat gala ai gaw Shawlu matu jin nga ai rai nna ndan gap ai ni shi hpe dep mu ai: dai ndan pala gap ai ni majaw shi nachying myit ru nga ai. ⁴ Dai rai nna Shawlu gaw shi a ri nhtu gunhpai ai wa hpe, Ndai matu n gadoi ai ni gaw ngai e na sa galun lu nna ngai e n roi lu ma ai du hkra, na nhtu shaw nna ngai e galun ya e, ngu wu timung, dai wa gaw grai hkrit nga ai majaw n hkraw nga ai. Dai rai nna Shawlu gaw shi a nhtu dai la nna, dai hta abraw ju si wu ai. ⁵ Ri nhtu lang ai wa gaw, Shawlu si mat sai hpe mu jang, shi mung Shawlu hte rau, shi a nhtu hta abraw ju si wu ai. ⁶ Shingrai dai shani hte yang, Shawlu mung, shi a kasha masum mung, shi a ri nhtu lang ai wa mung, shi a ma ni mahkra hte mung, rau si mat wa masai. ⁷ Ya Israela masha ni hprawng mat ma ai hte, Shawlu mung, shi a kasha ni mung si mat ma ai gaw, dai hkaraw wora hkran hte Yawdan hka sinpraw maga na Israela masha ni mu mu yang, shanhte gaw tinang a mare kahtawng ni hpe kau da ma ai rai nna, Hpilisti masha ni sa de nga ma ai. ⁸ Hpang jahpawt e Hpilisti masha ni, si mang ni hta na lanep hpyu la na nga pru sa wa ma yang, Shawlu hte shi a kasha masum Gilaboa bum ga e si taw nga ai hpe, shanhte mu ma ai. ⁹ Shawlu a baw hpe shanhte daw la kau nhtawm, shi a hpyen palawng raw la nna, shanhte a sumla hpara jawng hkan e mung, masha ni a man e mung kajai gumhkawng na matu, Hpilisti mung grupyin hkan e shagun dat mu ai. ¹⁰ Shi a hpyen palawng hpe mung Ashtarot hpara jawng e tawn da mu ai; amang hpe gaw Betshan mare na bunghku e noi da mu ai. ¹¹ Raitimung, Hpilisti masha ni Shawlu hpe shing di ai lam Yabesha-gilead masha ni na ma yang; ¹² share ni mahkra shana yuptung e rawt nna, Shawlu hte shi a kasha ni a mang ni hpe Begshan bunghku na shayu nna, Yabesha mare de hpai wa nhtawm wan hte nat makoi kau mu ai. ¹³ Nra ni hpe mung shanhte la nna Yabesha wa myi hpun npu e lup makoi nhtawm, sanit ya tup lusha gam ma ai.