HKAWHKAM LAIKA LANGAI

HKAWHKAM LAIKA LANGAI

¹ Ya hkawhkam Dawi gaw dingla ugut gu prat shanut nu sayang, shanhte gaw shi hpe hpun nba jahpun mu timung, shi hkum n lum hkraw ai. ² Dai re ai majaw shi a mayam ni gaw, Nye a madu hkawhkam wa a matu hkawhkam a man e tsap nga nna, shi hpe lanu lahku ya u ga: nye a madu hkawhkam wa a hkum lum lu hkra, na a lahpyen hta shi yup u ga, ngu nna shi hpe tsun wu ai. ³ Shaloi shanhte gaw, Israela mung ting hta e ahpraw tsawm htap ai mahkawn langai mi tam nna, Shunem num Abishaga hpe mu jang, shi hpe hkawhkam wa hpang de wa woi tawn mu ai. ⁴ Dai mahkawn jan gaw, ahpraw nachying tsawm htap nga ai; shi gaw hkawhkam wa hpe yu lanu lahku nna, bau ya wu ai; hkawhkam wa chyawm gaw shi hte n hkrum mazum yu ai. ⁵ Ya Hagit a kasha Adoniya gaw shi hkum hpe shagrau nna, Ngai hkawhkam tai na nngai, nga nna tsun nhtawm, hpyen leng mung, gumra jawn ai ni mung, shi a man e gat hkawm na marai manga shi hpe mung, san tawn da mu ai. ⁶ Shi a kawa gaw, Nang hpa majaw ning rai galaw nga n ta? ngu nna shi hpe myit machyi hkra kalang ni muk n daru yu wu ai; dai wa gaw gawng shingyan hpung nachying rawng nga ai; Absalom a kanau mung rai nga ai. ⁷ Shi gaw Zerula kasha Yoab yan hkinjawng Abiahta hte bawng nna, shan gaw Adoniya kaw hkan nang let, shi hpe karum ya mu ai. ⁸ Raitimung, hkinjawng Zadok, Yehoiada kasha Benaia, myihtoi wa Nahtan, Shimi yan Rei hte, Dawi kaw hkan nang ai share shagan ni gaw, Adoniya hpe n maga nga ma ai. ⁹ Adoniya mung, Enrogela maga e nga ai Zohelet nlung makau e, sagu, dumsu hte hpum sau ai yamnga hpe sat nawng ya wu ai rai nna, hkawhkam a kasha ni ngu ai, shi a kahpu kanau ni yawng hte hte, hkawhkam a ali ama ni ngu ai, Yuda mung na ni nlang hte hpe shaga la mu ai: ¹⁰ raitimung, myihtoi Nahtan yan Benaia, share shagan ni hte shi a kanau Shawlulon hpe shi n shaga wu ai. ¹¹ Shaloi Nahtan gaw Shawlulon a kanu Batsheba hpe, Ataw, Hagit a kasha Adoniya kawhkam tai wa sai rai nna, anhte a madu Dawi dai lam n chye wu ai, nang n na nu ni? ¹² Ya dai re ai majaw, nang mung, na nsha Shawlumon mung asak hkrung nga lu hkra, ngai nang hpe hpaji daw ya de ga. ¹³ Hkawhkam Dawi hpang de sa shang nna, Nang nye a madu hkawhkam wa e, Na nsha Shawlumon gaw teng teng gaja wa nye a malai hkawhkam tai nna, nye a tingnyang hta dung nan ra ai, nga nna na a mayam jan hpe nang n dagam da nu ni? Dai rai yang, hpa majaw ya Adoniya hkaw dung nga a ni? ngu nna tsun u: ¹⁴ yu u, nang hkawhkam wa hpe ga naw tsun nga yang, ngai hkan shang nna, na a ga hpe shadaw ya na de ai, ngu nna sa tsun wu ai. ¹⁵ Shaloi Batsheba gaw, kata gawk de, hkawhkam wa hpang de shang wu ai; hkawhkam wa chyawm gaw nachying dingla la sai: Shunem num jan Abishaga mung hkawhkam wa hpe yu lanu lahku wu ai. ¹⁶ Batsheba gaw gum dagup nna hkawhkam wa hpe naw wu ai. Hkawhkam wa mung, Nang hpa tsaw n ta? ngu nna san wu ai. ¹⁷ Shi gaw teng teng gaja wa nye a malai hkawhkam tai nna, nye a tingnyang hta dung na ra ai, nga nna na a Karai Kasang Yehowa hpe gang let, na a mayam jan hpe nang dagam da nu ai. ¹⁸ Ya yu u, Adoniya gaw hkaw dung nga ai; nang madu hkawhkam wa dai lam hpe n chye ndai. ¹⁹ Shi gaw usu, hpum sau ai yamnga hte sagu ga daga hpe sat nawng ya wu ai rai nna, hkawhkam a kasha ni yawng hte hte, hkinjawng Abiahta yan hpyenbu wa Yoab hpe shaga la mu timung, na a mayam Shawlumon hpe gawn shaga wu ai. ²⁰ Ya chyawm gaw, nye a madu hkawhkam wa e, na malai hkawhkam tingnyang hta kadai dung ga, shanhte yawng a myi nang hpe a mada nga ma ai. ²¹ Shing n rai yang, nye a madu hkawhkam wa gaw ji wa ni hte rau yup pyaw nga yang, ngai hpe mung, ngai sha Shawlumon hpe mung, gumlau yan ngu shadu na mi ai, ngu nna htan wu ai. ²² Batsheba gaw hkawhkam wa hte ga naw tsun nga yang, yu u, myihtoi Nahtan mung shang wa sai. ²³ Shaloi shanhte gaw hkawhkam wa hpe, Myihtoi Nahtan du ra ai, ngu nna tsun mu ai. Nahtan gaw hkawhkam wa hpang de shang nna, ga du hkra myiman gum dagup wu ai. ²⁴ Bai Nahtan gaw, nye a malai hkaw dung nna, nye a tingnyang hta dung na ra ai, nga nna nang tsun da nit ni? ²⁵ Shi gaw dai ni jang yu wa nhtawm, usu, hpum sau ai yamnga hte sagu ga daga sat nawng ya wu ai rai nna, hkawhkam wa a kasha ni yawng hte hte, hpyenbu ni hte hkinjawng Abiahta hpe shaga la mu ai rai nna, shanhte gaw shi a man e lusha let, Hkawhkam Adoniya gaw ahkrung nga u ga law, nga nna tsun shajang ma ai. ²⁶ Na a mayam ngai hpe mung, hkinjawng Zadok, Yehoiada kasha Benaia hte, na a mayam Shawlumon hpe mung, shi n shaga mi ai. ²⁷ Ya dai lam gaw, nye a madu hkawhkam wa kaw na pru ninglen, na a malai hkawhkam tai nna na a tingnyang hta kadai dung nga lu na, na a mayam ni hpe nang n madun dan ai gaw, teng a ni? ngu nna tsun wu ai. ²⁸ Shaloi hkawhkam Dawi gaw, Batsheba hpe shaga wa marit, ngu nna htan mu ai. Shi mung hkawhkam a man e shang tsap nga ai. ²⁹ Bai hkawhkam wa gaw, Nye a asak pe tsin-yam tsindam yawng hta na hkyehkrang la ya ai Yehowa asak hkrung nga ai hte maren. ³⁰ Teng teng gaja wa, na nsha Shawlumon gaw nye a malai hkaw dung nna, nye a tingnyang hta dung na ra ai, nga nna Israela Karai Kasang Yehowa hpe gang let ngai dagam da ni ai hte maren, dai ni pyi ngai galaw na nngai, ngu nna bai dagan wu ai. ³¹ Shaloi Batsheba gaw ga du hkra myiman gum dagup let hkawhkam wa hpe naw nna, Nye a madu hkawhkam Dawi gaw tutnawng prat dingsa ahkrung nga u ga law, ngu na tsun wu ai. ³² Bai hkawhkam Dawi gaw, Hkinjawng wa Zadok ma, myihtoi wa Nahtan hte Yehoiada kasha Benaia hte hpe shaga ya mi, ngu nna tsun mu ai. Shanhte mung hkawhkam wa man de shang wa ma ai. ³³ Shaloi hkawhkam wa gaw, Nanhte a madu a ali ama ni hpe shaga la nhtawm, ngai sha Shawlumon hpe ngai jawn ai lawze hta jawn shangun nna, Gihon shara de soi yu wa mu: ³⁴ dai shara hta w hkinjawng Zadok yan myihtoi Nahtan gaw, shi hpe Israela hkawhkam shatai na matu, namman chya ya mu ga: pahke dum let, hkawhkam Shawlumon gaw ahkrung nga u ga law, ngu nna tsun mu; ³⁵ dai hpang nanhte gaw shi hpang de hkan lung nna, shi nye a tingnyang hta dung na ra ai: shi gaw nye a malai hkaw dung nna, Israela amyu ni hte Yuda a amyu a ntsa e up ai du tai na, ngai shi hpe aya dang da se ai, ngu nna shanhte hpe hkangda mu ai. ³⁶ Shaloi Yehoiada kasha Benaia gaw, Amen: nye a madu hkawhkam a Karai Kasang Yehowa mung dai lam hkan ya u ga. ³⁷ Yehowa gaw nye a madu hkawhkam wa hte rau nga nga ai zawn, Shawlumon hte rau mungnga nga nna, shi a tingnyang gaw nye a madu hkawhkam Dawi a tingnyang hta grau nna galu kaba wa shangun u ga law, ngu nna hkawhkam wa hpe htan wu ai. ³⁸ Shingrai hkinjawng Zadok yan, myihtoi Nahtan, Yehoiada kasha Benaia hte Hkrehti yan Pelehti ngu ai ni yu wa nna, Shawlumon hpe hkawhkam Dawi a lawze shajawn let Gihon shara de woi yu wa mu ai. ³⁹ Hkinjawng wa Zadok mung nawku Sum hta na namman nrung la nna, Shawlumon hpe namman chya ya wu ai: pahke mung shanhte dum nna, amyu masha ni yawng hte gaw, Hkawhkam Shawlumon ahkrung nga u ga law, nga nna tsun shajang ma ai. ⁴⁰ Shanhte nlang shi hpang de hkan lung nna, sumpyi dum let, ja ja kabu gara nga ma ai rai nna, lamu ga gaw shanhte a garu marawn ai a jaw e kadu ashun ga wa ai. ⁴¹ Ya Adoniya hte shi a manam ni yawng shat sha ngut magang wa yang, dai lam hpe na mu ai: Yoab mung pahke ngoi ai nsen na wu yang, Mare ting garu kachyi nga ai gaw, hpa majaw rai ta? ngu nna san mu ai. ⁴² Shi ga naw tsun nga yang, yu u hkinjawng Abiahta a kasha Yonahtan du ra ai; shaloi Adoniya gaw, Shang rit, nang masha kaja rai ndai; ashi kaja mung gun nga ndai, ngu nna shi hpe tsun wu ai. ⁴³ Dai rai nna Yonahtan gaw Adoniya hpe, Anhte a madu hkawhkam Dawi gaw gaja wa teng teng Shawlumon hpe hkawhkam shatai nu ai. ⁴⁴ Hkawhkam wa gaw shi hte rau hkinjawng Zadok yan myihtoi Nahtan, Yehoiada kasha Benaia hte Hkrehti yan Pelehti ngu ai ni pe shangun dat nna, shanhte gaw hkawhkam wa a lawze hta shi pe jawn shangun mu ai. ⁴⁵ Hkingjawng Zadok yan myihtoi Nahtan gaw, shi hpe hkawhkam shatai na matu Gihon shara e namman chya ya mu ai, shanhte gaw mare garu kachyi hkra kabu gara nga let, dai shara kaw nna lung wa ma ai. Nanhte na lu ai nsen gaw dai rai nga ai. ⁴⁶ Ya Shawlumon gaw mungdan tingnyang hta dung nga ai. ⁴⁷ Dai hta n-ga, hkawhkam a ali ama ni mung, anhte a madu hkawhkam Dawi hpe shaman ya na matu sa du nna, Na a Karai Kasang gaw, Shawlumon a amying na a amying hta, shi a tingnyang na a tingnyang hta, grau kaba shangun u ga, ngai ma ai. Hkawhkam wa mung yupku hta nawku nga ai. ⁴⁸ Bai hkawhkam wa gaw, Nye a myi hte chyaw mu lu ai, dai ni nye a tingnyang hta dung nga ai wa hpe jaw ya ai Israela Karai Kasang Yehowa gaw, a nga u ga law, ngai ai, ngu nna tsun dan wu ai. ⁴⁹ Ya Adoniya manam ni yawng hkrit kajawng let rawt nna, shara shatu de bra mat wa ma ai. ⁵⁰ Adoniya mung Shawlumon hpe hkrit wu ai rai nna, rawt nhtawm tawn hkungri na jut nrung ni hpe sa jum nga ai. ⁵¹ Shingrai shanhte gaw, Yu u, Adoniya gaw hkawhkam Shawlumon hpe hkrit nga ai rai nna, tawn hkungri na jut nrung jum let, hkawhkam Shawlumon gaw shi a mayam hpe nhtu hte n sat na nga, dai ni shi ngai hpe dagam u ga, nga ai, ngu nna Shawlumon hpe shana ya mu ai. ⁵² Shoawlumon gaw, Shi masha kaja rai nga yang, shi a kara singgawng langai mi ga de hkrat lu na n rai; shi hta mara nga ai rai yang gaw, si ai hkrum lu na re ai, nga ai. ⁵³ Shingrai hkawhkam Shawlumon shangun nna, tawn hkungri de na shi hpe shapraw wu ai; shi shang nna hkawhkam Shawlumon hpe naw dagup wu ai: Shawlumon gaw, Na nta de wa su, ngu nna shi hpe tsun wu ai.

¹ Ya Dawi si na nhtoi du magang ra ai rai nna, shi gaw kasha Shawlumon hpe, ² Ngai gaw n-gawn shawa lam de sa wa na ni ai: dai rai nna, nang gaw n-gun atsam tawng nna, marai ningjap shapraw nga u. ³ Nang shang hkawm wa ai lam shagu hta e awng wa lu hkra, Mawshe a tara hta ka da nga ai hte maren, na a Karai Kasang Yehowa hkangda ai ga, tara dara ai hku hte sakse ga hkan shatup nga u; ⁴ shingrai, Na nshu nsha ni sadi sahka nga nna, tengman ai hku hkan let, tinang a kraw lawang mahkra hte, myit masin mahkra hte, nye a man e hkawm nga ma yang, Israela mungdan tingnyang hta, na a aru arat kaw na langai mi matut manoi dung nga na ra ai, nga nna Yehowa ngai hpe tsun dan ai ga hpe shadik ya na ra ai. ⁵ Dai hta kaga, Zeruia kasha Yoab ngai hpe galaw ai lam nang chye nga ndai; shi gaw Nira a kasha Abna hte Yehtera kasha Abasa ngu ai, Israela hpyenbu lahkawng hpe sat kau nna, hpyen majan n nga timung asai jahkaw kau ai hte, shi a nshang na shingkyit hpe mung, shi a lagaw na kyepdin hpe mung, majan sai shakap wu ai. ⁶ Nang hpaji lu ai hte maren shi hpe tai nna, ngwi pyaw baw hpraw ai hte katsan ga de hkum yu wa shangun u. ⁷ Gilead masha Barazili a kashu kasha ni hpe nang chyeju madun dan u ga; shanhte gaw na a sha ku e sha ai ni hta lawm nga mu ga: ngai na nhpu Absalom gaw na hprawng wa yang, shanhte dai lam e ngai hpe sa tau la ma ai. ⁸ Bai yu u, Ngai Mahana-im de yu wa ai shani jang, n hkru la ai dagam ga hte ngai hpe sa dagam kau ai, Balurim kahtawng na, Ben-yamin amyu Gera a kasha Shimi mung, nang hte rau anga nga ai; shi chyawm gaw Yawdan hka kau e ngai hpe sa tau la ai majaw, Ngai nang hpe nhtu hte nsat kau na nngai, ngu nna Yehowa amying gang let ngai shi hpe dagam da se ai. Nang hpaji rawng ai wa rai nga ndai majaw, dai wa mara n kap ai zawn hkum nawn et; nang shi hpe kaning di matai dawp na nang chye nga ndai: shi a baw hpraw hpe katsan ga de asai hte yui wa shangun u, ngu nna htet da wu ai. ¹⁰ Shingrai Dawi gaw kaji kawa ni hte rau yup pyaw nna, Dawi a mare hta e makoi mayang di kau mu ai. ¹¹ Dawi gaw Israela masha ni hpe uphkang ai aten mali shi ning rai nga ai: shi gaw Hebron mare hta e sanit ning, bai, Yerusalem mare hta e sumshi masum ning hkaw dung nga ai. ¹² Shingrai Shawlumon gaw kawa Dawi a tingnyang hta dung nga ai rai nna, shi a mungdan nachying jat grin wa nga ai. ¹³ Dai shaloi e Hagit a Kasha Adoniya gaw Shawlumon a kanu Batsheba hpang de sa wu ai. Batsheba gaw, Nang ngwi pyaw lam hte sa n ni? ngu nna san wu yang, Shi gaw, Ngwi pyaw hte sa nngai, ngu nna htan wu ai. ¹⁴ Bai shi gaw, Ngai tsun shara lama ni lu nngai, nga ai; Batsheba mung, Tsum u, ngu wu ai. ¹⁵ Shaloi shi gaw, Nang chye nga ai hte maren, dai mungdan gaw nye a mungdan rai nga nna, ngai hkaw dung na, Israela masha ni nlang ngai hpang de myiman yawng wa masai; raitimung ban galai nna, mungdan gaw ngai nau wa a mungdan tai wa sai: dai lam gaw Yehowa a myit rai nga ai. ¹⁶ Ya chyawm gaw lam langai mi ngai nang hpe hpyi de ga; hkum ndang kau et, ngu wu yang, Batsheba gaw, Tsun u, ngu wu ai. ¹⁷ Shaloi Adoniya gaw,, Hkawhkam Shawlumon Shunem num Abishaga hpe ngai e ya u ga, hpyi ya mi; shi nang hpe ndang kau na n rai, ngu nna, tsun wu ai. ¹⁸ Batsheba gaw, Mai sa, ngi na a lam hkawhkam wa hpe tsun ya na nngai, ngu wu ai. ¹⁹ Shingrai Batsheba gaw Adoniya lam s tsun na matu, hkawhkam Shawlumon hpang de shang wa sai. Hkawhkam wa gaw shi hpe tau la na nga, rawt nna, shi a man e gum dagup nhtawm, shi a tingnyang hta dung nga ai; hkawhkam wa a kanu a matu mung tingnyang langai mi shi tawn da nna, kanu gaw shi a hkra maga e dung nga ai. ²⁰ shaloi kau gaw, lam kaji sha mi ngai nang hpe hpyi de ga; hkum ndang kau ta et, ngu wu yang, hkawhkam wa gaw, Nu e, hpyi e, ngai ndang kau na nngai n rai, ngu wu ai. ²¹ Bai kanu gaw, Shunem num Abishaga hpe na nhpu Adoniya hpe ya sha gaw, ngu wu ai. ²² Shaloi hkawhkam Shawlumon gaw, Nang hpa majaw Adoniya matu Shunem num Abishaga hpe sha hpyi n ta? dai mungdan mung shi a matu hpyi u ga; shi gaw ngai hpu rai nga ai majaw, shi a matu mung, hkinjawng Abiahta yan Zeruia kasha Yoab a matu mung hpyi u ga, ngu nna kanu hpe htan wu ai. ²³ Bai hkawhkam Shawlumon gaw, Adoniya asak sum na matu, ndai ga n tsun ai teng yang gaw, Karai Kasang dai hta grau nna ngai hpe deng u ga: ²⁴ ga ndat tawn da ai hte maren ngai hpe shagrin da nna, nye wa Dawi a gingnyang hta dung nga shangun ai hte, ngai hpe dinghku arai ya ai Yehowa hkrung nga ai hte maren. Adoniya gaw gaja wa teng teng dai ni jang asak sum na ra ai, ngu nna Yehowa amying gang let dagam wu ai. ²⁵ Shingrai hkawhkam Shawlumon Yehoiada kasha Benaia hpe shangun dat nna, shi gaw Adoniya hpe adup sat kau wu ai. ²⁶ Bai hkawhkam wa gaw hkinjawng Abiahta hpe, Na a buga Anahtut mare ndai: raitimung nang gaw nye wa Dawi a man e Madu Yehowa a sumpu hpai ndai hte, nye wa hkrum sha ai yawng hte hta nang mung sha ndai majaw, dai ni ngai nang hpe sat mayu de ai n rai, ngu nna tsun dan ai ga dat wu ai. ²⁷ Shing ra, Yehowa gaw Shilo mare e Kli a amyu matu ni a lam tsun dan ai ga dik wa u ga, Shawlumon gaw Abiahta hpe Yehowa hkinjawng aya hta na jahkrat kau wu ai. ²⁸ Dai shiga gaw Yoab hpang de du nna, shi gaw Absalom kaw n hkan nang ai sha, Adoniya kaw hkan nang ai majaw, Yehowa nawku Sum de hprawng nhtawm, tawn hkungri na jut nrung ni hpe sa jum nga ai. ²⁹ Shingrai, Yoab gaw Yehowa nawku Sum de hprawng nna, tawn hkungri makau e nga nga ai, ngu nna hkawhkam Shawlumon hpe shana ya wu ai. Shaloi Shawlumon gaw Yehoiada kasha Benaia hpe shangun nna, Shi hpe sa sat kau u, ngu nna hkangda wu ai. ³⁰ Benaia gaw Yehowa nawku Sum de sa nna, Yoab hpe, Hkawhkam wa, Wa rit, ngi ai, ngu wu yang, shi gaw, ngai n wa na nngai, nang e she si na nngai, ngu wu ai. Benaia mung wa nna, Yoab gaw ning nga ai hte ngai e htan ya ai, ngu nna hkawhkam wa hpe shana ya wu ai. ³¹ Hkawhkam wa mung, Shi tsun ai hte maren galaw u: mara n kap ai sai shi jahkaw ai gaw, ngai hte nye wa nta na shaprai kau na matu, shi hpe sat nhtawm lup makoi kau u. ³² Shi gaw, shi hta grau dinghpring nna kaja nga ai marai lahkawng hpe nhtu hte dat kau ru ai rai nna, nye wa Dawi dai lam n chye wu ai majaw, Yehowa gaw dai sai hpe shi baw ntsa e bai htang bun nu ai; dai yan lahkawng gaw, Israela luksu ni a hpyenbu Yehtera kasha Amasa rai ma ai. ³³ Shingrai dai yan a sai gaw Yoab a baw ntsa e mung shi a amyu matu ni a baw ntsa e mung, tutnawng prat ding sa anga nga na ra ai: Dawi a ntsa e mung, shi amyu matu ni, shi a nta na ni hte shi a tingnyang ntsa e mung, Yehowa kaw na ngwi pyaw ai gaw tutnawng prat dingsa anga nga na sai law, ngu nna Benaia hpe tsun wu ai. ³⁴ Shaloi Yehoiada kasha Benaia lung wa nna shi hpe adup sat kau wu ai; shi hpe mung, nam mali na tinang a nta hta makoi mayang di mu ai. ³⁵ Shingrai hkwahkam wa gaw, shi a malai luksuk ni a ntsa e Yehowiada kasha Benaia hpe san tawn da wu ai; bai hkawhkam wa gaw, Abiahta a malai hkinjawng Zadok hpe san tawn da wu ai. ³⁶ Shaloi hkawhkam wa gaw Shimi hpe shaga la nna, Yerusalim hta e nta gap u; dai de anga nga nna, kanang n-mung hkum pru et. ³⁷ Gara shani hta e rai ri mung nang pru hkawm wa nna, Kidron hkaraw e rap wa yang, nang teng teng si lu na ndai, dum chye nga u: na a sai gaw na a baw ntsa e rai na ra ai, ngu nna shi hpe tsun wu ai. ³⁸ Shimi gaw, Mai sa, nye madu hkawhkam wa tsun ai ku, na a mayam wa hkan galaw na nngai, ngu nna hkawhkam wa hpe tsun nem nhtawm, ntoi tsawmta na hkra Yerusalem e anga nga ai. ³⁹ Dai hpang masum ning lai yang, Shimi a mayam lahkawng, Gat a hkawhkam Mahka a kasha Ahkisha hpang de haprawng shang ma ai. Shanhte gaw, Yu u, na a mayam yan Gat a mare e nga nga ma ai, ngu nna shi hpe tsun mu ai. ⁴⁰ Shaloi Shimi rawt nhtawm, shi a lawze byau nna, mayam yan hep tam na Gat a mare na Ahkisha kaw du bang wa ai rai nna, shi a mayam yan hpe Gat a mare na woi wa mu ai. ⁴¹ Ya Shimi gaw Yerusalem mare nna, GAt a mare de sa nhtawm bai wa ai lam, Shawlumon hpe shana ya mu ai. ⁴² Dai re ai majaw hkawhkam wa gaw Shimi hpe shaga la nna, Nang kanang pru hkawm wa yang, pru ai shani jang nang teng teng si lu na ndai, dum chye nga u, ngu nna, Yehowa amying gang let, ngai nang hpe dagam ginhtim da ni ai n rai ni? Nang mung nye man e nem nna, nye ga hkap la ya nit dai. ⁴³ Dai rai yang, Yehowa man e dagam ai ga hpe mung, hpa majaw tawt lai kau a ta? ngu nna daru ku wu ai. ⁴⁴ Bai hkawhkam wa gaw Shimi hpe, Na kraw lawang na n hkru ai lam yawng, nye wa Dawi hpe nang madun dan ndai gaw nang nan chye nga ndai: dai re ai majaw Yehowa dai lam ni hpe na baw ntsa e bai tai na ra ai. ⁴⁵ Hkawhkam Shawlumon chyawm ga gumring gumrat lu la nna, Dawi a tingnyang gaw Yehowa a man e tutnawng prat dingsa agrin nga na ra ai, ngu nna kahtap tsun wu ai. ⁴⁶ Shingrai hkawhkam wa gaw Yehoiada kasha Benaia hpe hkangda nna, shi pru nhtawm Shimi hpe adup sat kau wu ai. Dai mungdan chyawm gaw Shawlumon lata hta agrin nga ai.

¹ Ya Shawlumon gaw Egutu mung na hkawhkam Hpara-u hte mayu dama shaw hkat nna, Hpara-u a shayi sha la nhtawn tinang a nta hpe mung, Yehowa a nta hte Yerusalem mare grupyin na bunghku ni hpe mung shangut lu ai shani du hkra, Dawi a mare hta e shi hpe nga shangun wu ai. ² Dai aten du hkra Yehowa amying nsang matu nta garai n gaw da ai majaw, mung masha ni gaw tsaw ai kawng ni a ntsa e hkungga sat nawng ya mu ai. ³ Shawlumon chyawm gaw kawa Dawi a matsun maroi ga hkan let, Yehowa hpe tsawra wu ai: raitimung shi gaw tsaw ai kawng ni a ntsa e hkungga nawng ya nna, manam pyaw ai baw nat ya wu ai. ⁴ Ya hkawhkam wa gaw hkungga nawng ya na matu Gibeon kawng de sa wa ai; dai yang hkungga nawng na shara kaba rai nga ai: de a tawn hkungri ntsa e Shawlumon gaw, wan nat hkungga hkying mi nat nawng ya wu ai. ⁵ Gibeon shara e Yehowa gaw shana e yupmang hta Shawlumon kaw danpru ai rai nna, Karai Kasang gaw, Ngai nang hpe hpa jaw na hpyi e, ngu wu ai. ⁶ Shawlumon gaw, na a mayam wa, ngai wa Dawi, tengman ai hku, dinghpring ai hte myit malang ai hku hkan let, na a man e hkawm nga ai hte maren, nang shi hpe chyeju myit kaba madun dan nu ai: shi a tingnyang hte dung nga lu na, dai ni e rai nga ai, shi hpe shadang sha langai mi nang jaw ya ai gaw, shi a matu chyeju kaba ai lam rai nga ai. ⁷ Ya chyawm gaw nye a Karai Kasang Yehowa e, nang gaw nye wa Dawi a malai, na a mayam wa hpe hkawhkam shatai ndai: ngai wa gaw ma kaji naw rai nga nna, shang wa na pru wa na lam n chye nngai. ⁸ Nang lata la nna, n dang hti lu ai hte, law la ai majaw n dang sawn lu ai na a amyu kaba hta, na a mayam wa lawm nga nngai. ⁹ Dai re ai majaw, kaja ai hte n kaja ai hpe ngai chye ginhka lu nna, dai na a amyu hpe chye jeyang na hpaji byeng-ya rawng ai myit, na a mayam w hpe jaw ya e law; ndai galu kaba ai na a amyu hpe kadai wa jeyang lu na rai nga a ta? ngu nna hpyi wu ai. ¹⁰ Shawlumon gaw dai lam hpyi wu ai majaw, shi hpyi ai ga gaw Madu a man e mai kaja nga lu ai. ¹¹ Shingrai Karai Kasang gaw, Ndai lam nang hpyi nga ai rai nna, asak galu ai, sut su sut lu ai, na a hpyen ni hpe sat kau lu na lam nang n hpyi ndai, tara dawdan na lam chye ginhka lu hkra hpaji byeng-ya hpyi ndai majaw, ¹² yu u, nang hpyi ai hte maren ngai jaw sade ai. Ngai nang hpe hpaji byeng-ya rawng ai hte chye chyang ai myit jaw ni ai: nang zawn hpaji rawng ai, na a shawng e kadai n nga, na a hpang e kadai n pra na ra ai. ¹³ Dai hta n-ga, nang n hpyi lawm ai sutgan hte arawng sadang mung, ngai nang hpe kahtap jaw sade ai: nang pra nga ai prat dingsa e, nang hte bung ai hkawhkam; langai mi n paw pru na sai. ¹⁴ Na nwa Dawi zawn, nang nye a lam hkan nna, nye a matsun maroi ga hte htet da a ga hkan shatup nga yang gaw, na a aprat hpe mung galu shangun na nngai, ngu wu ai. ¹⁵ Shaloi Shawlumon yup hprang nna, yu u, dai gaw yupmang rai nga ai: Yerusalem mare de shi bai wa nna, Madu a ga shaka sumpu man e tsap nga let, wan nat hkungga hte mahku hkungga nawng ya ai hte, shi a ali ama ni mahkra a matu poi galaw wu ai. ¹⁶ Dai hpang shaw num lahkawng hkawhkam wa hpang de sa nna, shi a man e tsap nga ma ai. ¹⁷ Shawng na wa gaw, madu du e, ngai hte ndai jan gaw nta langai hta sha rawng nga ga ai; shingrai jawm rawng nga yang, ngai kasha shaprat nngai. ¹⁸ Masum ya lai ai hpang ndai jan mung kasha shaprat wu ai: ndai nta e an hta kaga kadai mung n nga ai: shi hte an hkrai sha nga ga ai. ¹⁹ Ndai jan gaw shana e yup yang n dum ai shi a kasha hpe dip apyet kau ai majaw, si mat lu ai. ²⁰ Shana yuptung e shi gaw rawt nhtawm, na a mayam jan yup pyaw nga yang, nye a kasha hpe pawn la nna shi lahpyen e shayup d awu ai; shi a kasha si mang hpe gaw nye a lahpyen e tawn da ya ai. ²¹ Ngai gaw jahpawt aten e ma hpe chyu shachyu na rawt wa yang, yu u, ma gaw si taw nga ai; bai jahpawt nhtoi e yu yang, ngai shaprat ai kasha n rai nga ai, ngu nna tsun dan wu ai. ²² Num kaga chyawm gaw, N rai law, hkrung nga ai ma gaw ngai sha, si taw nga ai ma gaw na nsha rai nga lit dai, ngu wu ai. Bai shawng na num gaw, N rai law, si ai na gaw na nsha, naw hkrung nga ai ma gaw ngai sha rai nga li ai, ngu wu ai. Shingrai shan lahakwng gaw hkawhkam wa a man e ndang kalang hkat nga ma ai. ²³ Shingrai hkawhkam wa gaw, Num langai mi, Hkrung nga ai ma gaw ngai sha, si taw nga ai ma gaw na nsha rai nga lit dai; bai num kaga gaw, N rai law, si taw nga ai ma gaw na nsha, hkrung nga ai ma gaw ngai sha rai nga li ai, nga nna ndang kalang hkat nga ma ai majaw, ²⁴ Nhtu la wa rit, ngu nna htet da wu ai. Shaloi shanhte gaw hkawhkam wa hpe nhtu jaw mu ai. ²⁵ Bai hkawhkam wa gaw, Hkrung nga ai ma hpe ka-ang brang di nna, dai num yan hpe chyen hpra karan ya mu, ngu nna hparan ya mu ai. ²⁶ Hkrung nga ai ma a kanu chyawm gaw shi a kasha hpe tsawra matsan dum wu ai majaw, Madu du e, hkrung nga ai ma hpe hkum sat kau u, ngu nna hpyi wu ai; manang jan gaw, She karau u, nye a mung, na a mung n rai u ga, nga ai. ²⁷ Shaloi hkawhkam wa gaw, Hkrung nga ai ma hpe hkum sat kau et; shawng na num hpe jaw kau mu; shi gaw ma a kanu teng nga ai, ngu nna hparan shangut ya mu ai. ²⁸ Hkawhkam wa hparan jeyang ya ai lam Israela masha ni yawng na shajang ma ai; tara dara na lam hta dingman ai hku hkan lu hkra, Karai Kasang a hpaji byeng-ya shi hta rawng nga ai gaw shanhte dum chye ma ai majaw, hkawhkam wa hpe hkrit hkungga ma ai.

¹ Ya hkawhkam Shawlumon gaw, Israela mungdan ting a hkawhkam rai nga ai. ² Ndai ni gaw shi a hkringjung hkringmang ni rai nga ma ai: Hkinjawng Zdok a kasha Azaria; ³ Shisha a kasha Elilhorep yan Ahiya gaw chyare; Ahiluda a kasha Yehoshahpat jahpan ka da ai wa; ⁴ Yehoiada kasha Benaia gaw hpyenbu kaba; Zadok yan Abiahta hkinjawng agyi; ⁵ Nahtan a kasha Azaaria gaw mung du ni a agyi; bai Nahtan a kasha Zabuda bawmung kaba he, hawhkam wa a jinghku; ⁶ Ahisha gaw kunhting wa hte, Abda a kasha Adoniram gaw nchyang ni a agyi rai nga ma ai.. ⁷ Bai Shawlumon gaw Israela mungdan ting hta lusha shahpa lahkawn ya ai mung du shi lahkawng san da nna, shanhte gaw shata mi hta marai langai mi rai nna, hkawhkam wa hte hkaw na masha ni a matu lusha shahpa shapraw ya mu ai. ⁸ Da ndai gaw shanhte a amying ni: Ehprim bum ga na Benhura; ⁹ Makaza, Shalabim, Bet-sheme hte Elon-bet-hanan ginwang na Bendeke; ¹⁰ Arubot ginwang na Benhese: shi gaw Sohku hte Hehpera mung ting up nga ai; ¹¹ Dora kawng ginwang ting na Ben-abinada: shi a madu jan gaw Shawlumon a shayi sha Tahpat rai lu ai; ¹² Tanak, Megido hte, Yezrela lawu e Zarehtan makau na Bet-shean kaw nna Yokemean lai Abela-mehola du hkra ngu ai, Bet-shean ginwang na Ahiluda a kasha Bana; ¹³ Ramot-gilead ginwang na Ben-gebera: shi gaw Bashan mung na Argoba ginwang hta, bunghku kum nna magri htinggrang grang ai mare kaba Kru shi ngu ai, Manashe a kasha Ya-ira Sali wunli lu la ai Gilead mung na ginwang up nga ai; ¹⁴ Mahana-im ginwang na Ido a kasha Ahinadab; ¹⁵ Naphtali ginwang na Ahimaza: shi gaw Shawlumon a shayi sha Basemat hpe la wu ai; ¹⁶ Ashe hte Bealut ginwang na Hushai a kasha Bana; ¹⁷ Isahka ginwang na Parua kasha Yehoshahpat: ¹⁸ Ben-yamin ginwang na Ela a kasha Shimi; ¹⁹ Amori hkawhkam silon hte Bashan mung na hkawhkam Oga hte seng ai Gilead ginwang na Uri a kasha Gebera, rai nga ma ai: Gebera chyawm gaw dai mung hta shi hkrai up ai du rai nga ai. ²⁰ Ya Yuda hte Israela amyu masha ni gaw, nammukdara makau na zaibru zawn law ma ai hte, lu lu sha sha let pyaw pyaw ma ai. ²¹ Ya Shawlumon gaw dai Hka mu kaw nna Hpilisti mung hprang, Egutu mung na lamu ga jarit du hkra, mungdan mahkra up nna, shanhte gaw Shawlumon a prat htum hkra, shi hpe hkanse jaw nna dawjau mu ai. ²² Shawlumon a hkaw e lami mi hta e ma wa ai lusha shahpa gaw: mani ai muk shadung dang sumshi, n mani ai shadung dang kru shi; ²³ kawn tawn ai usu shi, udat e rem ai usu hkun, sagu latsa; dai hta kaga chyahkyi shannga, aya hte rem tawn ai pyek hkrangma law law rai nga ai. ²⁴ Kaning rai nme law, shi gaw Tipsa kaw nna Gaza du hkra ngu ai, Hka nu a sinna hkran ginwang na hkawhkam mahkra ni hpe a up nga ai rai nna, shara shagu grupyin e mung gaw ngwi pyaw ai hkrai rai nga ai. ²⁵ Shawlumon a aprat htaum kra Yuda hte Israela amyu masha ni langai hte langai, Dan mare kaw nna Bera-sheba du hkra, tinang a tsabyi ru hte tinang a lakum hpun nhpang hkan e ngwi pyaw ai hte dung nga lu ma ai. ²⁶ Bai Shawlumon gaw shi a gumra leng ni a matu gumra rawng ai gawk mun mali hte, gumra jawn ai masha mun me hkying lahkawng rai lu ai. ²⁷ Mung du ni gaw hsata mi hta marai langai mi rai nna, hkawhkam Shawlumon a matu mung, hkawhkam Shawlumon a sha ku hta lawm ai ni a matu mung lusha shahpa shapraw ya mu ai: shanhte gaw hpa mung n hprai kau ma ai. ²⁸ Shanhte langai hte langai tinang tawn da ang ai shara de, gumra ni hte laring ma ngan ni a matu mng muk-yaw mam hte yi hku shinggyin tawn da mu ai. ²⁹ Bai Karai Kasang gaw Shawlumon hpe nachying kaba ai hpaji byeng-ya hte nyan hpe mung, nammukdara makau na zai bru zawn law la ai hkum tsup ai myit hpe mung, jaw da wu ai. ³⁰ Shawlumon a hpaji byeng-ya gaw sinpraw maga na kashu kasha ni yawng a hpaji byeng-ya hte, Egutu mung na hpaji byeng-yamahkra hta grau kaba nga lu ai. ³¹ Kaning rai nme law, shi gaw masha mahkra hta hpaji byeng-ya grau rawng nga ai; Ezrahi masha Ehtan hte, Mahola kasha heman, Hkalahkola, Darda hta grau rawng nga ai rai nna, grupyin na mungdan shgu hta shi a kajai gara lam danhkung nga ai. ³² Shi ga shagawp hkying masum tsun nna, shi a mahkawn mangoi ga hkying mi manga rai lu ai. ³³ Libanon bum ga na marau hpun ni du hkra, hpun amyu mahkra a lam hpe mung, ashu ashan a lam, u amyu a lam hpe mung, shi tsun nga ai. ³⁴ Shawlumon a hpaji byeng-ya lam na lu a ga ntsa hkawhkam ni yawng hta na, shi a hpaji ga madat na matu, mung masha sa du ma ai.

¹ Ya Turu hkawhkam Hiram gaw shi a shangun ma ni hpe Shawlumon hpang de shangun dat wu ai; kaning rai nme law, Dawi a lamai shi hpe hkawhkam aya hta namman chya ya ai lam Hiram na wu ai: Hiram chyawm gaw Dawi a jinghku tutnawng a rai nga ai ² Shaloi Shawlumon gaw Hiram hpang de shangun dat nna, ³ Nye wa Dawi gaw, shi a grupyin shara shagu hkan e hpyen majan rawt nna, Yehowa gaw shi a lagaw npu e hpyen ni hpe garai n tawn da dingsa, shi a Karai Kasang Yehowa a matu nawku nta n gaw da lu ai gaw, nang chye nga ndai. ⁴ Ya chyawm nye a Karai Kasang Yehowa gaw shara shagu hkan e ngai hpe ngwi pyaw shangun ya ai, gunlau wa mung n nga ai, gumlu gumlan she rai sai law. ⁵ Dai re ai majaw, Yehowa gaw nye wa Dawi hpe, Na malai, na tingnyang hta ngai dang da na, na nsha gaw, nye a amying nsang a matu nawku nta gaw da na ra ai, nga nna tsun da ai hte maren, nye a Karai Kasang Yehowa amying nsang a matu nawku nta gaw da na ngai maw nga nngai. ⁶ Dai rai yang, Lebanon bum ga na arit hpun kran la na htet da u; nye a shangun ma ni hte na a shangun ma ni rau rai na mara ai: nang heyi ai hte maren, na a shangun ma ni a mtu ngai shabrai jaw na nngai: Sidon masha ni zawn mailung chye shaw ai masha kaga n nga ai gaw, nang chye nga ndai, ngu nna hpyi dat wu ai. ⁷ Ya Hiram gaw Shawlumon a ga na wu ai shloi e ja ja kabu nga nna, Ndai amyu kaba hpe up na matu, Dawi hpe hpaji byeng-ya rawng ai kasha jaw ya ai Yehowa gaw dai ni a nga u ga law nga ai. ⁸ Bai Hiram gaw Sawlumon hpang de masha shangun nna, Nang ngai hpe htet dat ai ga ngai na se ai; nang ra ai hte maren arit hpun hte marau hpun ngai jaw na nngai. ⁹ Nye shangun ma ni gaw Lebanon bum ga nna nammukdara du hkra dai mailung ni hpe karawt la nna, ngai dai hpe wawn shachyaw nhtawm, nang ra ai shara de du hkra hka lam hku shayawng ya na nngai; dai de du yang, ngai zawn run nna nang hkap htawk karawt la nu: nang mung ngai ra ai hte maren, nye a Hkaw na masha ni a matu lusha jaw na rin dai, ngu nna tsun dat wu ai. ¹⁰ Shingrai Hiram gaw Shawlumon ra ai hte maren, arit hpun mung, marau hpun mung jaw wu ai. ¹¹ Shawlumon mung Hiram a hkaw na ni a matu hkaulan mam dang mun lahkawng, jet ai sau pung hkun, jaw mu ai: Shawlumon gaw laning hte laning Hiram hpe dai daram jaw wu ai. ¹² Bai Yehowa gaw ga ndat tawn da ai hte maren Shawlumon hpe hpaji byeng-ya jaw wu ai; Hiram yan Shawlumon gaw shada hkau chyap nga nna, shan lahkawng ga shaka tawn da ma ai. ¹³ Ya hkawhkam Sawlumon gaw Israela amyu masha yawng hta na, marai mun masum hte hpe ga saw la mu ai; ¹⁴ shi shanhte hpe Lebanon bum ga de shata mi hta marai mun mun shangun dat mu ai: shanhte gaw Lebanon bum ga de shata mi, bai, tinang a nta de shata lahkawng wa nga ma ai: Adoniram mung amu galaw ai ni a ntsa e a up nga ai. ¹⁵ Bai Shawlumon gaw lit gunhpai ai ni mun sanit, bum ga de nlung tawk nga ai ni mun matsat hpe mung shangun dat wu ai: ¹⁶ shi a amu up ai agyi ni a ntsa e up nga ai hpareng ni gaw hkying masum e masum tsa rai nga ma ai. ¹⁷ Hkawhkam wa htet da ai hte maren dai nta a npawt nhpang hpe tawk la ai nlung hte gaw da na mtu, shanhte gaw nlung kaba hte hpu la ai nlung ni hpe tawk la mu ai. ¹⁸ Shingrai Shawlumon a amu galaw ai ni mung, Hiram a amu galaw ai ni hte Gebali masha ni gaw, nta gaw da na matu hpunpyen hte nlung ni hpe lajang shachyip tawn da nga ma ai.

¹ Israela masha ni gaw Egutu mung nna pru wa ai mali tsa matsat shi ning shaning e, Shawlumon gaw Israela mungdan hta hkaw dung ai mali ning shaning na Ziwa ngu ai shata lahkawng hta e, si gaw Yehowa nta hpe gaw da hpang nga ai. ² Hkawhkam Shawlumon gaw Yehowa a matu gaw da ai nta gaw, de a galu de dawng kru shi, nda de dawng hkun, tsaw de dawng sumshi rai nga ai. ³ DAi nta a htingnu gawk na ajan gaw, de a galu de nta a nda hte bung nga nna, dawng hkun rai nga ai; de a nda de gaw dawng shi rai nga ai. ⁴ Nta matu pat tawn ai hkuwawt awa mung shachyaw wu ai. ⁵ Bai nta shakum grupyin e, htingnu gawk ngu ai daw mi hta raitimung, shingran mu ai gawk a grupyin e raitimung, gawk htap mi hte htap mi, shi gaw da wu ai. ⁶ Lawu htap gaw nda de dawng sanit rai nga ai: kaning rai nme law, dingbat ngau matu hpe shakum hta n tawk htinggrang ai sha, dai shakum a shinggan maga de n-gam galaw nna mara lung wa wu ai. ⁷ Dai nta hpe gaw shachyaw yang, nlung nhkune tawi shatsawm la ngut sai nlung hte shachyaw wu ai majaw, sumdu mung, nwa mung, hpa hpri arai ngoi shra ai mung, n na lu ai. ⁸ Nta ajan ka-ang gawk ni a matu shang wa ai chyinghka lam gaw nta a hkra maga de waw nga ai; bai manai ai lakang hte lapran htap ngu na de shanhte lung wa nna, lapran htap kaw nna ntsa htap de bai lung wa ma ai. ⁹ Shingrai shi gaw dai nta hpe gaw da shangut lu ai; arit hpunpyen hte mung dai hpe magap da wu ai. ¹⁰ Dai nta makau na htap gawk ni hpe langai mi a tsaw de dawng manga nga, nta ting shakum hte htep di nna gaw da nu ai: de a arit hpun dingbat ni gaw shakum a n-gam ni hta mara shachya da wu ai. ¹¹ Shaloi Yehowa a ga Shawlumon hpang de du nna, ¹² Ya nang gap da ai nta a lam gaw, nye a matsun maroi ga hta nang hkan hkawm nna, ngai hkangda ai ga hkan shatup let, ngai htet da da ai ga hkan shatup let, ngai htet da ai ga nlang hte hpe hkan galaw ndai rai yang gaw, na nwa Dawi hpe ngai tsun da ai ga hte maren, ngai nang hta e shagrin shadik na we ai. ¹³ Ngai gaw Israela kashu kasha ni hte rau nga nga nna, nye a amyu Israela hpe n kau da na nngai, ngu nna tsun wu ai. ¹⁴ Shingrai Shawlumon gaw dai nta hpe gaw shangut da wu ai. ¹⁵ Shi gaw nta shakum kata maga de arit hpunpyen hte magap da wua i; madang kaw nna magaw du hkra nhku maga de hpunpyen hte shangut da wu ai: nta hpe marau hpunpyen hte nep da wu ai. ¹⁶ Chyoi pra htum ai shara ngu ai shingran gawk a matu, mali maga maren dawng hkun hkun gang nna, nta nbang matut ai gawk a nhku maga de mung, arit hpunpyen hte shangut wu ai. ¹⁷ Shingran gawk n lawm ai sha, nawku htingnu gawk ngu ai nta a galu de dawng mali shi rai nga ai. ¹⁸ Nta nhku maga de gaw tauba si sumla hte nampan pu sumla ni ka hkrep ai arit hpunpyen hte kum da wu ai: yawng gaw arit hpunpyen hkrai rai nga ai; hpa nlung mung n mu lu ai. ¹⁹ Yehowa sakse sumpu tawn da na mtu, nta nhku e shingran gawk san mazing da wu ai. ²⁰ Shingran gawk gaw, galu de dawng hkun, nda de dawng hkun, tsaw de dawng hkun rai nga ai: dai gawk hpe ja jet hte sup wu ai; arit hpun hte galaw ai hkungri hpe mung sup wu ai. ²¹ Shingrai Shawlumon gaw nta nhku maga de ja jet hte sup wu ai; shingran gawk a npan e mung ja saidawng dun grang nna, dai hpe aja sup wu ai. ²² Nta ting ngut hkra ja hte sup nga ai; shingran gawk hte seng a hkungri ting hta mung ja hte sup wu ai. ²³ Shingran gawk kata e, tsanlun hpun hte, dawng shi shi tsaw ai. Hkerubim lahkawng shi galaw da wu ai. ²⁴ Dai Hkerubim yan a singkaw gaw maga mi hte mga mi dawng manga nga rai malu ai: singkaw matu maga mi kaw nna maga mi du hkra dawng shi rai nga ai. ²⁵ Kaga ngu na Hkerubim mung dawng shi rai nga ai; dai Hkerubim yan gaw hkrang bung nna, maren sha rai nga ma ai. ²⁶ Dai Hkerubim langai mi a tsaw de gaw dawng shi, bai langai mi mung dawng shi rai nga ai. ²⁷ Dai Hkerubim yan hpe shingram gawk kata e shadun da nhtawm, shakum du hkra shan a singkaw maga mi hte maga mi shachyen da nna, gawk ka-ang e de a matu lahakwng shada hkrum nga ma ai. ²⁸ Dai Hkerubim yan hpe mung ja hte sup wu ai. ²⁹ Bai, nta shakum a kata maga te shinggan maga grupyin e, Hkerubim sumla, namhtan hpun sumla, apu pu ai nampan sumla ni tawk ka da wu ai. ³⁰ Nta a kata gawk hte shinggan gawk a htingnep hpe mung ja hte sup wu ai. ³¹ Shingran gawk chyinghka lam matu, tsanlun hpun hte chyinghka lam matu, tsanlun hpun hte chyinghka man mi galaw mu ai: chyinghka hkadun ni hte hkanoi gaw shakum a htam manga nta na htammi gang ma ai. ³² Shingrai tsanlun hpun hte shi chyinghka man mi galaw nna, Hkerubim sumla, namhtan hpun hte nampan pu ai sumla ni tawk ka nhtawm, aja hte sup wu ai: Hkerubim hpe mung, namhtan hpun hpe mung, aja hte chya da wu ai. ³³ DAi hte maren Htingnu gawk ngu ai chyinghika lam a matu, htam mali hta htammi gang ai tsanlun hpun hkadun daw shadun wu ai: ³⁴ chyinghka man mi marau hpun hte mung shachyaw wu ai; man mi hte man mi katsu mai ai chyinghka rai nga ai. ³⁵ Dai hta mung Hkerubim sumla, namhtan hpun hte nampan pu ai sumla tawk ka nna, aja hte sup shakap wu ai. ³⁶ Bai kata ngu na wing gaw gawk la ai nlung htap masum hte, arit hpun dingbat htap mi e shangut da wu ai. ³⁷ Hkaw dung ai mali ning e Ziwa shata hta, Yehowa a nta npawt nhpang gaw da wu ai. ³⁸ Shi langai ning na, shata matsat ngu ai Bula shata hta kasi hte maren nta ting na amu mahkra ngut wa sai. Shingrai shi gaw dai nta hpe sanit ning hta e shangut da lu ai.

¹ Bai Shawlumon gaw shi a Htingnu hpe shi masum ning tup galaw nna, Htingnu ting hpe shangut wu ai. ² Shi gaw Lebanon maling na Htingnu hpe galaw wu ai: de a galu de dawng latsa, nda de dawng manga shi, tsaw de dawng sumshi rai nga ai; arit hpun shadaw ni gaw ayan mali rai nga nna, arit hpun dingbat ni shadaw ni hta htinggrang nga ai. ³ Shawdaw ni hta htinggrang nga ai dingbat mali shi manga a ntsa e a rit hpun pyen ni nep da wu ai; yan mi hte yan mi shi manga rai nga ai. ⁴ Dingbat yan masum rai nga ai hte, hkuwawt hku htap masum maren htawnglawng rai nga ai. ⁵ Chyinghka ni hte shadaw ni yawng gaw hpunpyen hte man mali maren di mu ai; hkuwawt hku ni mung htap masum maren htawnglawng rai nga ai. ⁶ Bai shi gaw shadaw ajan hpe galaw wu ai; de a galu de dawng manga shi, nda de dawng sumshi, rai nga ai: de a npan e mung ajan langai mi rai nga ai; shadaw ayan mi hte ndawn mung ari nga ai. ⁷ Tara dara na ajan ngu ai, tingnyang shadun shara jan mung shi galaw nhtawm, arit hpun pyen hte dai yawng hpe nep da wu ai. ⁸ Dai ajan nhku de na wing kata de nga ai: shi rawng nga na htingnu hpe dai hte maren galaw wu ai: Shawlumon hkungran la ai Hpara-u a shayi sha maru mung, dai ajan zawn re ai htingnu hpe mung shachyaw ya wu ai, ⁹ Ndai nta ni yawng, bunghku kaba a shinggan maga du hkra mng, tawk shatsawm ai nlung hte, lashkawng maga zingret hte ret kau nna shadawn tawn ai nlung, nachying hpu la ai nlung ni hte shangut mu ai. ¹⁰ De a npawt nhpang gaw, dawng matsat dawng shi kaba nna hpu la ai nlung hte rai nga ai. ¹¹ Ntsa de mung, shadawn tawn ai, tawk la ai hte hpu la ai nlung mung, arit hpun mung rai nga ai. ¹² Grupyin na wing kaba mung tawk la ai nlung mung, arit hpun mung rai nga ai. Mi rai nga ai; Yehowa a nta matu kata wing mung, hkawhkam wa a ajan wing mung dai hte maren rai nga ai. ¹³ Bai hkawhkam Shawlumon gaw shangun nna, Turu mare de na Hiram hpe shaga la wu ai. ¹⁴ Dai wa gaw Naphtali amyu na gaida jan a kasha rai nga nna, kawa gaw Turu mare na magri janghkam rai nga ai: shi gaw magri amu amyu myu chye galaw lu ai hpaji hparat, zai byeng-ya hte chye chyang ai nyan hpring nga ai; shi gaw hkawhkam Shawlumon mahkra hpe jaw shangut wu ai. ¹⁵ Dai wa gaw, tsaw de dawng shi matsat, kaba de dawng shi lahkawng re ai magri shadaw lahkawng jaw wu ai. ¹⁶ Bai shadaw yan a ntsa e shadun na matu dawng manga nga re ai magri bandung lahkawng mungjaw wu ai. ¹⁷ Bai shadaw yan a ntsa e shadun ai bandung ni a matu, sumgawn zawn re ai awa nung, nam pan shidawng mungrai nga ai; langai mi a matu sanit, bai kaga a matu mung sanit rai nga ai. ¹⁸ Shingrai dai shadaw yan hpe shi galaw wu ai: hkamu si zawn re ai magri sumbaw mung galaw nna, shadaw matu na sumgawn a ntsa e langai mi hta lam lahkawng di nna mawn sumli wu ai: kaga ngu na shadaw hpe mung dai hte maren galaw wu ai. ¹⁹ Bai, dai ajan a shadaw yan a bandung ni gaw, dawng mali kaba nga nna, hka law pan hte bung nga ai. ²⁰ Shadaw matu yan hta sumgawn awa hte kayep ai ntsa e grup hkainu si nampan ni tsa rai nga ai. ²¹ Bai daw shadaw yan hpe nawku Htingnu a ajan e shadun wu ai: hkra maga na shadaw hpe shadun nna, dai hpe Yahkin shamying wu ai; pai maga na shadaw hep shadun nna, dai hpe Boaza shamying wu ai. ²² Shadaw matu hta hkalaw pan sumla hte sumli wu ai: shingrai shadaw ni a amu ngut wa sai. ²³ Bai magri hkalawng hpe shajaw wu ai: de a nda de dawng shi, de a tsa de dawng manga rai nga ai; de a grupyin e dawng sumshi rai nga ai. ²⁴ De a mahka grupyin lawu e nampan majawm lam lahkawng jaw nna, dawng mi hta shi shi shakap let, dai magri hkalawng hpe shajaw yang, dai magri hkalawng hpe shajaw yang, dai majawm ni hpe mung jaw shalawm wu ai. ²⁵ Dai hkalawng gaw usu shi lahkawng a ntsa e dung nga ai: masum gaw dingdung maga de, masum gaw sinna maga de, masum gaw dingda maga de, masum gaw sinpraw maga de, man yawng nn, a shingdu hkrum rai nga ma ai. ²⁶ Dai gaw lahpa mi tup htat nga ai; de a mahka gaw hkawan mahka zawn rai nna, hkalaw pan sumla hte sumli wu ai: dai gaw ntsin gat hkying lahkawng shang nga ai. ²⁷ Bai, magri punghkum shi galaw da wu ai: de a galu de dawng mali, nda de dawng mali, tsaw de dawng masum rai nga ai. ²⁸ Punghkum ni gaw ning rai nga ai: hpun pyen pa ni rainga ai hte mahku grupyin e hpun pyen kaji hte hkawp nhtawm, dai hpunpyen pa ni hta hkanghkyi, usu hte Hkerubim sumla ni hpe ka da wu ai. ²⁹ Hkawp ai hpun pyen kaj n a ntsa e mung dai hte maren rai nga ai; hkanghkyi, usu sumla ni a lawu e nampan shanghkawng abya nga ai. ³⁰ Punghkum langai hte langai magri leng dingsen mali hte magri htinggrang rawng nna, dai hpe shachyai na matu lagaw mali kra nga ai: dai angdung npu e kra nga ai lagaw ni a man mali maga hta nampan shanghkawng jaw wu ai. ³¹ Dai angdung mahka gaw punghkum shakau ai hta dawng mi, bai, kra nga ai gaw dawng mi rai nga ai: de a mahka gaw shadaw zawn din din rai nna dawng me lahkam mi kaba nga ai; dai mahka grupyin e din din n re ai sha, jut mali rai nna tawk ka ai pa rai nga ai. ³² Dai leng dingsen mali gaw punghkum njut npu e shachyai nna; htinggrang ni gaw kra nga ai lagaw mali hta kap nga ai: leng dingsen langai mi gaw dawng me lahkam mi tsaw nga ai. ³³ Leng dingsen ni gaw hpyen leng dingsen hte bung nna, de a htinggrang ni, htingkan ni hkawp ai ni yawng jaw wu ai. ³⁴ Punghkum a jut mali hta kra nga ai lagaw mali mung rai nga ai; dai ni gaw punghkum hte langai sha di nna jaw wu ai. ³⁵ Bai punghkum ni a matu e lahkam mi sung ai shingwang rai nga ai; dai matu grupyin e shingkawng ni hte hpun pa ni gaw langai sha rai nga ai. ³⁶ Dai shingkawng ni hte hpun pa ni hta grupyin e shang ai hte maren Hkerubim, hkanghkyi, namhtan hpun sumla ni hte nampan shanghkawng sumla ni tawk ka da wu ai. ³⁷ Dai lam hkan nna dai punghkum shi hpe galaw da wu ai: langai hte langai gaw, shachyaw ai lam shadawn ai lam hte hkrang langai sha rai nga ai. ³⁸ Bai shi gaw magri angdung shi jaw wu ai: angdung langai mi gaw ntsin bat mali shi shang lu ai; langai hte langai gaw dawng mali kaba nga ai; punghkum langai mi a ntsa e angdung langai mi dai shi gu hkra, mara nga ai. ³⁹ Bai dai punghkum ni gaw nawku Htingnu a hkra de manga, pai de manga shadun wu ai: dai magri hkalawng hpe mung, dai nta a hkra maga de sinpraw dingda jut e tawn da wu ai. ⁴⁰ Bai Hiram gaw ntsin htung ni, dap shakawt ni hte angdung ni mung galaw wu ai. Shingrai Hiram gaw, hkawhkam Shawlumon a matu, Yehowa a nta hta na amu yawng mayawng hte hpe shangut wu ai. ⁴¹ dai shadaw lahkawng hpe mung; dai shadaw ni a ntsa na bandung na hkawan lahkawng hpe mung; dai shadaw ni a ntsa na bandung na hkawan lahkawng hpe mawn sumli na matu sumgawn aw hpe mung; ⁴² dai shadaw ni a ntsa na bandung na hkawan lahkawng hpe mawn sumli ai sumgawn awa hpe magap na matu, hkainu si nampan lam lahkawng grang ai, lam mi hta ni tsa tsa nna, yawng hpawn mali tsa rai nga ai nampan hpe mung; ⁴³ pung hkum shi hte de a ntsa na angdung shi hpe mung; ⁴⁴ magri hka lawng hte, dai hpe madi ai usu shi lahkawng hpe mung; ⁴⁵ di bu ni, shingban ni, angdung ni hpe mung, galaw shangut wu ai hkawhkam Shawlumon galaw shangun nna, Hiram gaw Yehowa a nta matu shangut ai arai yawng hte gaw, jet ai magri hte galaw ngut wu ai. ⁴⁶ Hkawhkam wa gaw dai arai ni hpe Yawdan layang ga na, Suhkot hte Zarehtan lapran e nga ai ga kagam hta jaw shangun wu ai. ⁴⁷ Dai arai ni gaw nachying law ai majaw Shawlumon gaw n shen ai tawn da wu ai; dai magri gaw joi gade re ai, kadai n shen yu lu ai. ⁴⁸ Bai Shawlumon gaw, Yehowa a nta kata de nga ai rai yawng hte hpe galaw wu ai: aja hkungri galaw wu ai; madun dan nga na muk matu aku, aja rai nga ai; ⁴⁹ pyengdin shadun ni, shingran gawk a man e hkra maga de manga, pai maga de manga, aja jet rai nga ai; nampan ni, pyengdin ni, lakap ni mung aja rai nga ai; ⁵⁰ hka wan ni, wan lakap ni, angdung ni, chyaw ni, wan ban pa ni mung, aja jet rai nga ai: chyoi pra htum ai shara ngu na kata nta a chyinghka ni a matu mung, nawku Htingnu ngu na nta a chyinghka ni a matu mung, de a pat ta ni aja rai nga ai. ⁵¹ Shingrai hkawhkam Shawlumon gaw Yehowa a nta hta galaw ai yawng mayawng hte hpe shangut wu ai. Bai Shawlumon gaw shi a kawa Dawi madat da ai aja gumhpraw hte arai yawng mayawng hte hpe shapraw nna, Yehowa a nta na sutdek ni hta tawn da wu ai.

¹ Shaloi Shawlumon gaw, Yehowa ga shaka sumpu hpe Ziun ngu ai Dawi a mare kaw na shalun la na matu, Israela agyi salang ni hpe mung, amyu ni a agyi ni yawng hte, Israela kashu kasha ni a ji wa dap lakung ni a du ni hpe mung, Yerusalem mare de shaga jahpawng mu ai. ² Shingrai Israela masha ni yawng hte gaw, shata sanit ngu ai, Ehtanim shata na poi laman e, Shawlumon hpang de sa zuphpawng nga ma ai. ³ Israela agyi salang ni yawng sa du nna, hkinjawng ni gaw dai sumpu hpe hpai sharawt mu ai. ⁴ Shanhte gaw Yehowa a sumpu hpe mung, shawa Sum hpe mung, dai Sum hta rawng ai chyoi pra ai arung arai yawng hpe mung, hpai sharawt mu ai; hkinjawng ni hte Lewi masha ni gaw, dai hte hpe hpai shalun la mu ai. ⁵ Hkawhkam Shawlumon hte rau zuphpawng nga ai Israela wunawng wuwa ting, dai sumpu man e rau hpawng nga nna, law ai majaw n dang hti lu ai sagu dumsu ni hpe sat nawng ya mu ai. ⁶ Hkinjawng ni gaw Yehowa a ga shaka sumpu hpe, chyoi pra htum ai shara ngu ai Shingran gawk kata de, Hkerubim yan a singkaw npu e, hpai tawn da mu ai. ⁷ Kaning rai nme law, dai Hkerubim yan gaw, dai sumpu dung ai ntsa e tinang a singkaw ni shachyen nna, sumpu hpe mung, de a ntsa na kandang ni hpe mung, ka-up da mu ai. ⁸ Kandang a matu ni gaw shingran gawk a npan e nga ai chyoi pra ai shara hta mu lu hkra galu nga ai: shinggan de chyawm gaw n kra nga ai; dai de gaw dai ni du hkra anga nga ai. ⁹ Israela masha ni gaw Egutu mung na pru wa nna, Yehowa gaw Horeb bum e shanhte hte ga shaka tawn da nhtawm, Mawshe bang tawn da ai lung pa lahkawng hta kaga dai sumpu hta hpa mung n rawng nga ai. ¹⁰ Ya hkinjawng ni gaw dai chyoi pra ai shara kaw na pru wa ma yang, dai sumwi gaw Yehowa nta hpe ka-up nna, ¹¹ hkinjawng ni gaw dai sumwi a majaw tinang a dawjau ai amu ni hpe n galaw lu mu ai: kaning rai nme law, Yehowa a hpung shinkang gaw Yehowa a nta hta hpring ka-up nga ai. ¹² Shaloi Shawlumon gaw, Yehowa htat chyang ai nsin kata e nga nga na ra ai, nga ai. ¹³ Gaja wa ngai gaw, Na a matu tutnawng prat dingsa shanu nga na shingbyi shara nta gaw da nngai, nga ai. ¹⁴ Bai hkawhkam wa gaw myiman kayin nna, zuphpawng nga ai Israela masha ni mahkra hpe shaman ya mu ai; zuphpawng nga ai Israela masha ni mahkra gaw tsap nga ma ai. ¹⁵ Bai shi gaw, Nye a amyu Israela hpe Egutu mung na shapraw ai shani kaw nna, Israela amyu ni a mare langai mi hta nye a amying shanu nga na matu nta galaw da na ngai garai n lata la timung, nye a amyu Israela ntsa e up nga na matu ngai Dawi hpe lata la se ai, ¹⁶ nga nna nye wa Dawi hpe n-gup ga hte tsun nhtawm shi a lata hte ga dai hpe shadik ya ai Israela Karai Kasang Yehowa gaw, a nga u ga law. ¹⁷ Ya, Israela Karai Kasang Yehowa amying nsang a matu nta galaw da na, nye wa Dawi maw nga timung, Yehowa gaw, ¹⁸ Nang nye a amying nsang matu nta galaw da na, nga nna myit maw nga ndai lam gaw mai kaja nga ai; ¹⁹ raitimung nang dai nta hpe gaw da lu na n rai; na nshang nna hkrat ai na nsha gaw, nye a amying nsang matu dai nta hpe gaw da na ra ai, nga nna nye wa Dawi hpe tsun da wu ai. ²⁰ Yehowa mung shi tsun da ai ga hpe shadik nu ai: ngai wa gaw nye wa Dawi a malai paw pru nna, Yehowa ndat da ai hte maren, Israela Karai Kasang Yehowa amying nasang a matu ndai nta hpe gaw da se ai. ²¹ Dai mhku e mung, Yehowa gaw anhte a ji wa ni hpe Egutu ung na shapraw wa ai shani e shanhte hte tawn da ai ga shaka rawng ai sumpu dung shara hpe mung, ngai san da se ai, nga ai. ²² Shingrai Shawlumon gaw Yehowa a tawn hkungri hte Israela masha ni a wunawng wuwa ting a man e tsap nga nna, shi lata ladawn let, ²³ Israela Karai Kasang Yehowa e, sumsing lamu lahta tang e mung, ginding aga lawu tsang e mung, nang zawn re ai Karai Kasang gaw n nga ai law; myit masin mahkra hte na a man e hkawm nga ai ali ama ni hpe nang ga shaka hku hte chyeju myit madun dan nga ndai: ²⁴ na shangun ma, nye wa Dawi hpe ga ndat tawn da ai hte maren nang shadik ya nu ai; rai sa nang n-gup ga hte tsun nna, dai ni mu lu ai hte maren, na lata hte nan dai hpe shadik ya nu ai. ²⁵ Dai rai nna, Israela karai Kasang Yehowa e, Nang gaw nye a man e hkawm nga sai hte maren, nannshu nsha ni mung kangka ai hte nye a man e hkawm nga ma yang gaw, Israela mungdan a tingnyang hta na aru arat kaw na, nye a man e langai mi matut manoi adung nga na ra ai, nga nna na shangun ma nye wa Dawi hpe tsun da sai hte maren ya shagrin ya u ga: ²⁶ Rai sa, Israela Karai Kasang e, na shangun ma, nye wa Dawi hpe nang tsun da ai ga gaw teng nga lit ga law. ²⁷ Karai Kasang gaw ga ning tsa e gaja wa teng teng shanu nga lu na kun? Yu u, sunsing lamu hte sumsing lamu ni a sumsing lamu gaw, nang hpe sharawng da lu na n rai; dai rai yang, ngai gaw da ai hta hta nang kaning rai rawng lu na n hka! ²⁸ Raitimung, nye a Karai Kasang Yehowa e, na a mayam wa gaw dai ni na a man e jahtau ai nsen hte akyu hpyi ai ga hpe na la lu hkra, na a mayam wa akyu hpyi ai hte hpyi nem ai ga hpe madat la ya e law; ²⁹ Nye a amying ningsang dai yang e anga nga na ra ai, nga nna nang tsun da ai shara de yawng let, na a mayam wa dai shara a man e akyu hpyi ai ga na lu hkra, na a myi gaw dai shara hpe shani shana a mada nga lit ga law. ³⁰ Na a mayam wa, na a amyu Israela gaw dai shara de yawng let akyu hpyi nga ma yang, anhte a hpyi nem ai ga hpe madat mara ya mi; sumsing lamu e nga ai na a shanu shara hta madat mara ya mi: madat mara nga yang yubak raw dat kau u law. ³¹ Masha langai ngai tinang htingbu wa hpe shut nna, dagam shara pru ai majaw, ndai nta na tawn hkungri a man e sa dagam ma yang; ³² nang gaw sumsing lamu hta e madat mara la nna, na a mauam ni he tara dara ya mu: shut ai wa hpe mar ahte maren shi a baw ntsa e tai u; dinghpring ai wa hpe dat dat nna, shi dinghpring ai hte maren akyu jaw u law. ³³ Na a amyu Israela gaw nang hpe shut kau ai majaw, hpyen ni a lata hte sum mat ai hkrum jang, shanhte gaw myit kayin nna, na a mying nsang hpe yin la let, ndai nta hta nang hpe akyu hpyi nna tawngban nga ma yang; ³⁴ nang gaw sumsing lamu hta e madat mara ya nna, na amyu Israela hpe yubak raw dat kau ya nhtawm, nang shanhte a kaji kawa ni hpe jaw da ai Sali wunli ga de bai wa shangun ya mi law. ³⁵ Nang hpe shut ai mara majaw marang n htu nna jan gri nga yang, shanhte gaw dai shara de yawng let, akyu hpyi nna, nang shanhte hpe ari jaw ai majaw, na a amying nsang hpe yin la let tinang a yubak hpe kau da ma yang; ³⁶ nang gaw sumsing lamu hta e madat mara ya nna, na a mayam ni hte na amyu Israela yubak hpe raw dat kau ya e: shanhte hkan nang mai ai lam kaja hpe madun dan nhtawm, na a mayu hpe jaw da ai Sali wunli ga ngau ai, na a lamu ga ntsa e maran ghtu shangun ya mi law. ³⁷ Dai mungdan hta n-gawn hku wa wa ai, ana zinli, hkau pyi pyi ai, man maru ru ai, dinggam-yaw hte shingchyut sha ai mung; shanhte hpe hpyen ai ni gaw shnahte a mung na mare ni hpe sa wang tawn ai mung; hpa ana ahkya hte hpa machyi makaw hkrum yang mung; ³⁸ marai langai ngai, shing n rai, na amyu Israela ting ga, tinang hkum hta hkra ai ana ahkya hpe dum yang, ndai nta de yawng let lata ladawn nna, kaning nga akyu hpyi tawng ban timung, ³⁹ nang gaw sumsing lamu e nga ai, na shanu shara hta madat mara ya mi; nang masha myit masin hpe chye ya nga ai hte maren, yubak hpe raw dat kau ya nna, langai hte langai hte hpe amu bungli galaw ai hku hkan nna htang ya mu; nang chyu sha shinggyim masha ni a myit masin he chye ya nga ndai. ⁴⁰ Shingrai, nang shanhte a kaji kawa ni hpe jaw da ai mungkan hta shanhte nga nga na laman e, nang hpe hkrit hkungga nga na mara ai law. ⁴¹ Dai hta n-ga, sumtsan mung na masha ni gaw, na a daru magam amying hpe mung, na n-gun ja ai lata hte ladawn ai lahpum hpe mung, chye wa lu nna, ⁴² na amyu nsang majaw sumtsan mung na pru ai masha tsasam wa gaw, ndai nta de yawng let akyu hpyi nga yang; ⁴³ na amyu Israela gaw na amying hpe chye nna hkrit hkungga nga ai hte, ndai ngai galaw da ai nta gaw, na a amying nsang rawng ai nta rai nga ai gaw, ga ntsa na amyu baw mahkra chye nga lu hkra, nang gaw sumsing lamu e nga ai, na shanu shara hta madat mara ya nna, tsasam wa hpyi mahpyi hte maren galaw ya u law. ⁴⁴ Na amyu masha ni gaw hpyen ni hpe sa gasat nga ma yang, nang shanhte hpe gara lam shangun raitimung, shanhte gaw, nang lata la ai mare hte, na amying nsang matu ngai galaw sa ai nta de yawng let, Yehowa hpe akyu hpyi nga ma yang, ⁴⁵ nang gaw sumsing lamu hta e shanhte a hpyi nem ai hte tawngban ga hpe madat mara ya nna, shanhte hpe ninglaw ya mu law. ⁴⁶ Masha kadai mung yubak n galaw ai n nga ai majaw, shanhte nang hpe yubak galaw nna, nang shanhte hpe pawt sindawng nhtawm, hpyen ni a lata de ap ya nna, hpyen ni gaw tinang a mung hte tsan ai ni ai shara de shanhte hpe bawng wa dung shangun ai rai yang gaw, ⁴⁷ shanhte bawng wa dung nga ai ga hta myit dum myit hprang nna, myit kayin wa let, Anhte yubak galaw saga ai, anhte nhtan shai ai hte shut hpyit nga ga ai, nga nna bawng wa dung nga ai madu ni a ga hta myit nem nna tawngban nga ma ai hte; ⁴⁸ bawng ding nga ma ai ga hta myit masin mahkra hte kraw lawang mahkra hte nang hpang de kayin wa nna, shanhte a kaji kawa ni he nang jaw ya ai mungdan hte, nang lata la ai mare hta na a amying matu ngai galaw da ai nta de yawng let akyu hpyi nga ma ai, ⁴⁹ shaloi jang, nang gaw sumsing lamu e nga ai na a shanu shata hta shanthe a akyu hpyi tawng ban ai ga madat mara ya nna shanhte hpeninglaw ya mu: ⁵⁰ nang hpe shut hpyit ai, na a amyu hpe yubak dat dat nna, shanhte a tawt lai ai mara mahkra hpe raw kau ya mu; shanhte a bawngdung madu ni gaw shanhte hpe matsan dum lu hkra, shanthe a man e na amyu masha ni hpe matsan dum ya mi; ⁵¹ kaning rai nme law, shanhte gaw Egutu mung a hpri wan mang na gara la ai, na amyu hte Sali wunli rai nga ma ai. ⁵² Shingrai, na a mayam wa mung, na a amyu Israela mung, nang hpe galoi jahtau nga ma yang, shanthe a hpyi tawng ban ai gahpe madat ya lu hkra, na a myi azi nga lit ga law. ⁵³ Madu du Yehowa e, anhte a ji wa ni hpe Egutu mung na shaw la ai shaloi jang, na a shangun ma Mawshe a n-gup hte nang tsun ai hte maren, na a Sali wunli tai na matu, nang shanhte hpe ga ntsa amyu baw mahkra hta na san tawn da manu ai law, ngu nna hpyi wu ai. ⁵⁴ Shing ra Shawlumon gaw Yehowa hpe akyu hpyi tawngban ga mahkra shangut nhtawm, Yehowa tawn hkungri man e lahput hput di ai kaw nna, lata ladawn let rawt tsap nga ai hte, ⁵⁵ Israela wunawng wuwa ting hpe nsen kaba hte shaman ya nna, ⁵⁶ Shi a amyu Israela hpek, tsun da ai hte maren, ngwi pyaw lam jaw da ai Yehwoa gaw, a nga u ga law; shi a shangun ma Mawshe a lata hte shi jaw da i ga ndat langai mi muk, nhten n run nga ai. ⁵⁷ Anhte a Karai Kasang Yehowa gaw ji wa ni hte rau nga nga ai hte maren, anhte hte rau mung nga nga u ga; anhte shi hta shamyet shanat nga lu nna, ⁵⁸ Shi a lam yawng hpe hkan nang let, anhte a ji wa ni hpe shi hkangda ai htet da ai ga, matsun maroi ga hte tara lam ni hpe hkan shatup lu hkra, anhte hpe n jahti kau da u ga law. ⁵⁹ Yehowa gaw Karai Kasang rai nga ai hte shi hta shaje kaga n nga ai, ga ntsa na amyu baw mahkra chye lu ai hte, shi gaw shi a mayam wa hpe mung, shi amyu Israela hpe munglam shagu hta ninglaw shangun lu hkra, ⁶⁰ ngai Yehowa hpe hpyi nem tawngban ai ga gaw, anhte a Karai Kasang Yehowa a man e shani shana anga nga u ga law. ⁶¹ Dai re ai majaw, dai ni rai nga ai zawn, anhte a Karai Kasnag Yehowa a matsun maroi ga hkan nang nna, shi hkangda ai lam ni hpe shatup lu hkra, nanhte a myit masin gaw shi a man e hkum tsup nga u ga law, nga ai. ⁶² Shingrai hkawhkam wa hte rau Israela amyu ting, Yehowa a man e hkungga nawng ya mu ai. ⁶³ Shawlumon gaw Yehowa hpe mahku hkungga matu, usu mun lahkawng hkying lahkawng, sagu sen me mun lahkawng sat nawng ya wu ai. Shing rai hkawhkam wa hte Israela kashu kasha ni yang dai nta hpe Yehowa a matu san tawn nna dingshawn shang ma ai. ⁶⁴ Dai shani jang hkawhkam wa gaw Yehowa nta ndaw na wing ka-ang hpe shachyoi shapra wu ai rai nna, dai yang e wan nat hkungga, shadung hkungga hte mahku hkungga ni a sau man hte hpe nat nawng ya wu ai: kaning rai nme law, Yehowa a man e nga ai magri hkungri gaw, nau kaji nga ai majaw, dai ntsa e wan nat hkungga ni, shandung hkungga ni hte mahku hkungga a sat man ni hpe tawn da shara n nga ai. ⁶⁵ Shingrai Shawlumon gaw, ndai aten e, Habat mare kaw nna Egutu hka shi du hkra, shara shagu hkan na du sa ai grai law ai Isrela shawa hpawng hte rau, anhte a Karai Kasang Yehowa a man e nhtoi bat lahkawng ngu ai nhtoi shi mali ya tup, poi de wu ai. ⁶⁶ Matsat ya ngu ai nhtoi hta e shi gaw mung masha ni hpe shabawn dat mu ai; shanhte mung hkawhkam wa hpe shaman ya let, Yehowa gaw shi a shangun ma Dawi hte shi a amyu Israela hpe madun dan ai chyeju yawng a majaw, kabu gara myit hte tinang a sum nta de bai wa shajang ma ai.

¹ Ya Shawlumon gaw Yehowa a nta hpe mung, hkawhkam nta hte shi galaw mayu ai ra mara mahkra hpe mung galaw ngut jang, ² Yehowa gaw Gibeon shara e danpru ai zawn, Shawlumon kaw bai danpru wa ai. ³ Shaloi Yehowa gaw, Nang nye a man e akyu hpyi ai ga hte tawngban ga hpe ngai madat mara ya sade ai; ndai nang galaw da ai nta hta nye a mying hpe prat dingsa e tawn da na matu ngai dai hpe shachyoi shapra se ai: nye a myi mung, nye a myit masin mung, dai hta e shani shagu a shanu nga na li ai. ⁴ Nang chyawm gaw, na nwa Dawi zawn, ngai nang hpe hkangda mada hte hpe hkum tsun nna, dinghpring ai myit hte hkan galaw nga ai hte, nye a matsun maroi ga mung, tara tawn da ai lam ni hpe mung, hkan shatup nga n yang gaw, ⁵ ngai gaw, Israela mungdan tingnyang hta, na aru arat kaw na langai mi matut manoi adung nga na ra ai, ngu nna na nwa Dawi hpe ga ndat tawn da ai hte maren, Israela amyu ntsa e up nga na matu, na a mungdan tingnyang hpe prat dingsa e shagrin da na we ai. ⁶ Shing n rai, nang hte na nshu nsha ni gaw nye a hpang e n hkan nang ai hte, ngai nanhte hpe hkangda ai htet da ai ga hpe mung, matsun maroi ga hpe mung n hkan shatup ai sha, Hpara shaje hpe dawjau nawku nga myit yang gaw; ⁷ ngai Israela hpe jaw da ai mungdan hta na ngai shanhte hpe jahtum kau nna, ndai nye a amying nsang matu ngai shachyoi shapra ai nta hpe mung, ngai shinggan kau na we ai rai nna, Israela amyu gaw masha amyu baw mahkra hta abung shadawn chyai shara hte asawng shara tai na marin dai. ⁸ Ndai nta gaw nde wa galu kaba nga raitimung, lam e lai wa ai ni nlang hte gaw mau mahka let, Yehowa gaw ndai mungdan hpe mung, ndai nta hpe mung, hpa majaw ning ria galaw a ta? nga nna aroi ai hte san ma yang, ⁹ masha ni gaw, Shanhte a kaji kawa ni hpe Egutu mung na shaw la ai Karai Kasang Yehowa hpe shanhte kau da nhtawm, Hpara shaje hpe hkan nang nna, nawku dawjau ma ai majaw, Yehowa gaw shanhte a ntsa e ndai tsindam shapraw wu ai, nga nna htan na ma ai, ngu wu ai. ¹⁰ Ya Shawlumon gaw Yehowa a nta hpe mung, Hkawhkam wa a htingnu hpe mung ngu ai nta lahkawng hpe hkun ning ngu na shaning hta e galaw ngut jang, hkawhkam Shawlumon gaw Hiram hpe Galile ginwang na mare hkun sakjaw wu ai. ¹¹ Turu hkawhkam Hiram chyawm gaw Shawlumon hpe, shi myit ra mara hte maren, arit hpun, marau hpun hte aja jaw da sai. ¹² Shing ria Hiram gaw, Shawlumon shi hpe jaw da ai mare ni hpe kawan yu na matu, Turu mare na pru wa ai: shi gaw dai mare ni hpe n yu krem wu ai rai nna, ¹³ Hpu e, nang ngai hpe jaw ai mare ni gaw, hpa baw mare ni rai nga a ta? ngu nna dai mare ni a ginwang hpe Hkabula ngu nna dai ni du hkra shamying da wu ai. ¹⁴ Hiram gaw hkawhkam wa hpe aja talenta latsa hkun shagun dat wu ai. ¹⁵ Hkawhkam Shawlumon gaw ga saw nna Yehowa a nta hte shi a nta hpe Milo shara hte Yerusalem mare bunghku hpe, Hazora mare, Megido sshara hte Gezera mare hpe galaw ai lam gaw, da ndai rai nga ai: ¹⁶ Egutu hkawhkam Hpara-u gaw lung wa nna Gezera mare hpe gasat la nhtawm, dai hpe nat kau ai hte, dai yang nga ai Hkanani masha ni hpe sat kau nna, shi a shayi sha rai nga ai Shawlumon a madu jan hpe sharung shakau jaw kau wu ai. ¹⁷ Shingrai Shawlumon gaw Gezera hte lawu na Bet-horon hpe mung; ¹⁸ bai dai mung na nam mali hkan e Balat hte Tama hpe mung; ¹⁹ bai, Shawlumon a sutgan mahkawng da na mare ni hpe yawng, hpyen leng tawn da na mare ni hte, shi a gumra jawn ai ni a matu mare ni hpe mung; bai, Yerusalem mare hta, Lebanon ginwang hkan e mung, shi up nga ai mungdan shara shagu hkan e mung, shi a pyaw lam matu galaw mayu ai made de da wu ai. ²⁰ Israela kashu kasha ni hta n lawm ai hte, Israela kashu kasha ni n shaza kau lu ai, dai mungdan hta naw ngam nga ai ²¹ Amori, Hiti, Perizi, Hiwi hte Yebusi masha ni a kashu kasha ni hpe, Shawlumon shinggyin la nna, dai ni du hkra mayam shatai da mu ai. ²² Raitimung Shawlumon gaw Israela kashu kasha ni hta na mayam n shayam mu ai; shanthe gaw shi a hpyen masha ni, ali ama ni, du gyi ni, hpyenbu ni, hpyen leng ni hte gumra jawn ai ni a agyi ni rai nga ma ai. ²³ Ya Shawlumon a amu bungli galaw ai masha ni hpe hpareng nga na du agyi ni gaw, manga tsa manga shi rai nga ma ai. ²⁴ Hpara-u a shayi sha mung, Dawi a mare kaw nna, Shawlumon shi a matu galaw da ai htingnu de htawt lung wa ai hpang, shi gaw Milo dap hpe jung da wu ai. ²⁵ Bai Shawlumon gaw, Yehowa a matu shi galaw da ai tawn hkungri ntsa e, laning mi hta masum lang wan nat hkungga hte mahku hkungga hpe nawng ya nna, Yehowa a man e nga ai hkungri ntsa e, dai hte hpawn, manam pyaw ai baw hpe nat ya wu ai. Shingrai shi gaw dai nta hpe shangut nu ai. ²⁶ Bai hkawhkam Shawlumon gaw, Edom mung na, Hkyeng ai nawng hkingau, Elot makau na Ezion-gebera hta e shanghpaw li law shachyaw wu ai. ²⁷ Hiram mung, nammukdara lam chye chyang ai shi a li hkang ma ni hpe, Shawlumon a ali ama ni hte rau shanghpaw li ni hta tawn da mu ai. ²⁸ Shanhte gaw Ohpira shara de du nna aja talenta mali tsa e hkun lu la nhtawm, hkawhkam Shawlumon hpang de la sa mu ai.

¹ Ya Sheba hkawhkam jan gaw, Yehowa a mying nsang hte seng ai Shawlumon a kajai gumhkawng wa ai lam hpe na wu yang, shi hpe gumwai ga hte chyam yu na matu, sa du wu ai. ² Shi gaw Yerusalem mare de han pawp hkan nang ai wunawng wuwa kaba ni hte, manam pyaw ai baw mung, aja law law hte lungseng htaw ai gawla-up ni hte mung sa du nna, Shawlumon a man de shang nhtawm, tinang a myit hta rawng marawng hte maren shi hte tsun chyai wu ai. ³ Shawlumon gaw, shi san yu ai ga tawng mayawng hte hpe htan ya wu ai: hkawhkam wa gaw shi hpe n tsun dan lu ai lam langi mi muk n nga ai. ⁴ Sheba hkawhkam jan gaw, Shawlumon a hpaji byeng-ya mahkra hpe mung, shi gaw da sai nta hpe mung; ⁵ shi a ali ama ni dung nga ai lam hpe mung, shi ama ni dung nga ai lam hpe mung, shi a hkringjung ni tsap nga ai hte shanhte a bu hpun ai lam hpe mung, shi a tsabyi gawm jau ai ni hte, shi Yehowa a nta de lung wa ai lam hpe mung mu wu yang, shi a minla byaw mat lu ai rai nna, ⁶ shi gaw, Nang galaw ai amu hte na a hpaji byeng-ya a lam, nye a mungdan hta ngai na lu ai kajai gumhkawng ai ga gaw teng nga ai. ⁷ Raitimung, ngai garai n du yu nna, nye a myi hte chyaw garai n mu lu yang gaw, ngai n kam we ai: yu u, chyen mi pyi nga hpe n tsun dan mi ai; na a hpaji byeng-ya hte, na a ngamu ngamai ai lam, ngai na lu ai kajai gumhkawng ai ga mahkra hta grau nga a hka. ⁸ Na a man e tutnawng tsap nga nna, na a hpaji ga na lu ai, na a ali ama ndai ni hte, na a mung masha ni gaw, a lu ma ai. ⁹ Nang hta sharawng awng nna, Israela mungdan tingnyang hta nang hpe dung shangun ai, na a Karai Kasang Yehowa gaw a nga u ga law: Yehowa gaw Israela amyu hpe prat dingsa e tsawra nga ai majaw, dingman ai hku tara dawdan na matu, shi nang hpe hkaw dung shangun nit dai, ¹⁰ ngu nna hkawhkam wa hpe tsun let, aja talenta latsa e hkun, manam pyaw ai baw law law hte lungseng hpe mung sakjaw wu ai: Sheba hkawhkam jan hkawhkam Shawlumon hpe sakjaw ai daram law ai manam pyaw ai baw, htawmhpang de galoi mung n mu yu sai. ¹¹ Ohpira mung na aja htaw ya ai Hiram a shanghpaw li ni mung, Ohpira mung na almuga hpun law law hte lungseng ni wa htaw sa ya wu ai. ¹² Hkawhkam wa gaw almuga mailung ni hte, Yehowa a nta matu mung, hkawhkam htingnu a matu mung bandung galaw da nna, mahkawn mangoi ai ni a matu mara tingse hte simpyi galaw wu ai: dai zawn re ai almuga mailung ni dai ni du hkra galoi mung n mu yu ga ai. ¹³ Bai hkawhkam Shawlumon gaw Sheba hkawhkam jan hpe shi a hkawhkam sutdek hta na jaw ya ai hta kaga, shi ra mara hpyi mahpyi hta maren jaw da wu ai. Shingrai shi gaw shi a ali ama ni hte rau tinang a buga de bai nhtang wa ai. ¹⁴ Shawlumon gaw laning mi hta lu la ai aja shen yu yang, talenta kru tsa e kru shi kru rai lu ai; ¹⁵ dai hta kaga, hpaga ga ai ni, seng dung ai ni, tsasam hkawhkam ni mahkra hte munggyi ni sakjaw ai mung naw nga ai. ¹⁶ Bai hkwahkam Shawlumon gaw n-gang kaba ni tsa aja hte dup wu ai: n-gang langai mi hta aja shekela kru tsa rawng lu ai. ¹⁷ Bai shi gaw n-gang kaji masum tsa aja hte dup wu ai: n-gang langai mi hta aja joi mi rawng lu ai: hkawhkam wa gaw dai ni hpe Lebanon maling na nta kata e tawn da wu ai. ¹⁸ Dai hta kaga hkawhkam wa gaw hkawhkam tingnyang kaba magwi kawng hte galaw nna, aja jet hte sup da wu ai. ¹⁹ Tingnyang de lung wa na matu lakang n-gam kru rai nga nna, tingnyang baw a shingdu maga e din din rai nga ai; dung shara maga mi hte maga mi de lata mara shara rawng nna, de a makau e hkanghkyi lahkawng tsap nga ma ai. ²⁰ N-gup kru a maga mi hte maga mi yawng hpawn hkanghkyi shi lahkawng tsap nga ma ai: dai zawn re ai gaw gara mungdan hta mung n galaw yu ma ai. ²¹ Hkawhkam Shawlumon ntsin lu ai gawm ni yawng aja rai nga ai; Lebanon maling a nta na wan ni yawng mung ja jet rai nga lu ai: langai mi muk gumhpraw n rai nga ai; Shawlumon a aprat e gumhpraw hpe hpa n nawn nga ai. ²² Kaning rai nme law, hkawhkam wa gaw Kiram a shanghpaw li ni hpe mung, nammukdara hta hkawm shangun wu ai: Tarshi ngu ai shanghpaw li ni gaw, masum ning hta lang mi wa du nna, aja gumhpraw, magwi kawng, awoi hte u tawng ni hpe wa htaw ya mu ai. ²³ Shingrai hkawhkam Shawlumon gaw, ga ntsa hkawhkam mahkra hta, sutgan hte hpaji byeng-ya grau lu nga ai. ²⁴ Karai Kasang gaw Shawlumon a myit masin hta bang ya ai hpaji byeng-ya hpe na lu na matu, ga ntsa na ni yawng shi hpang de sa du ma ai. ²⁵ Shanhte langai hte langai gumhpraw wan ni, aja wan ni, hpun palawng, ri nhtu ni, manam pyaw ai baw, gumra hte lawze ni laning mi hte laning mi sak bang jaw mu ai. ²⁶ Bai Shawlumon gaw gumra leng ni hte gumra jawn ai ni hpe lahkawn la mu ai: shi gaw leng kying mi mali tsa hte gumra jawn ai ni mun me hkying lahkawng lu nna, leng ni rem da ai mare ni hte Yerusalem mare na hkawhkam nta hta tawn da shajang mu ai. ²⁷ Bai hkawhkam wa gaw Yerusalem mare hta e gumhpraw hpe nlung zawn, arit hpun hpe layang ga na lakum hpun zawn, shalaw wu ai. ²⁸ Shawlumon rem la ai gumra ni gaw Egutu mungna pru nna hkawhkam a hpaga ga ai ni hpung mi hte hpungmi manu sawn nna mari la mu ai. ²⁹ Egutu mung na gumra leng langai mi gaw gumhpraw shekela kru tsa, gumra langai mi latsa manga shi ging ai: dai hte maren shanhte gaw, Hiti hte Suri hkawhkam ni mahkra a matu mung hkan mari tawn ma ai.

¹ Ya hkawhkam Shawlumon gaw Hpara-u a shayi sha hta kaga, Moba, Amon, Edom, Sidon, hte Hiti mung na tsusam namsha law law hpe tsawra wu ai: ² dai amyu ni a lam Yehowa gaw Israela kashu kasha ni hpe, Nanhte gaw shanhte hte n mai kanawn, shanhte mung nanhte hta n lawm u ga; gaja wa shanhte gaw nanhte a myit masin hpe shanhte a Hpara ni hpang de shadam kau ya na myit dai, ngu nna tsun timung, Shawlumon gaw shanhte hta sumtsaw sumra hte a manoi nga ai. ³ Shi a madu jan ni gaw hkawhkam shayi sha hkrai sanit tsa lu nna, lashi num masum tsa rai lu ai: shi a madu jan ni gaw shi a myit masin hpe shadam kau ya mu ai. ⁴ Kaning rai nme law, Shawlumon asak kaba ai shaloi, shi a num ni gaw shi a myit masin hpe Hpara tsasam ni a hpang de woi shadam kau ya mu ai: shi a kawa Dawi a myit masin gaw, shi Karai Kasang Yehowa man e dinghpring nga ai hte maren, shi a myit masin dinghpring nga ai n rai. ⁵ Shawlumon gaw Sidon masha ni a shayi Hpara Ashtoret hte, Amon masha ni a matsat shabat lam ngu ai Milhkom Hpara hpe hkan nang wu ai. ⁶ Shawlumon gaw Yehowa man e n hkru n hkra re ai amu galaw nna, kawa Dawi zawn Yehowa hpe htep lahti hkan nang wu ai n rai. ⁷ Shingrai Shawlumon gaw Moba masha ni a matsat shabat ngu ai Hkemosha Hpara a matu mung, Amon masha ni a matsat shabat ngu ai Molok Hpara a matu mung, Yerusalem mare hte tawtap re ai bum hta e tawn hkungri gaw da wu ai. ⁸ Bai shi gaw, tinang a Hpara ni hpe manam pyaw ai baw nat ya ai hte, hkungga nawng yaw ai shi a tsasam num ni mahkra a matu, dai hte maren galaw da wu ai. ⁹ Shawlumon gaw myit kayin wa nna, Hpara tsasam ni hpe n hkan nang na nga, nga nna lahkawng lang shi kaw danpru ai hte aga htet da ai, ¹⁰ Israela Karai Kasang Yehowa kaw na yit mat wa ai hte Yehowa a htet da ai ga n hkan shatu wu ai majaw, Yehowa shi hpe pawt bu nga ai. ¹¹ Dai re ai majaw Yehowa gaw Shawlumon hpe, Nang ndai lam galaw ndai hte, ngai nang hpe htet da ai ga shaka hte hkangda ai lam ni hpe n hkannang ndai majaw, ngai gaja wa teng teng na a mungdan hpe karan kau nna, na a mayam wa hpe ya kau na we ai. ¹² Raitimung, na nwa Dawi a majaw na a aprat hta e dai hpe n galaw na nngai; na nsha a lata hta na dai hpe shanyen la na we ai. ¹³ Dai hta kaga, na a mungdan ting hpe shanyen la na we ai n rai; nye shangun ma Dawi a matu mung, ngai lata la se ai Yerusalem mare matu mung ngai na nsha hpe amyu lakung langai mi hpe jaw da we ai, ngu wu ai. ¹⁴ Dai hpang Yehowa gaw Shawlumon hpe gumlau na matu, Edom masha Hadad hpe sharawt da wu ai: dai wa gaw Edom hkawhkam amyu rai nga ai. ¹⁵ Kaning ra nme law, Dawi gaw Edom mung e nga nna, hpyenbu Yoab gaw Edom mung na lasha ni mahkra hpe atsai awai sat kau lu hkra, ¹⁶ Israela masha ni yawng hte rau shata kru dai yang e nga nga nna, lasha ni mahkra sat kau ai hte si mang ni hpe lup makoi kau na matu sa du ai shaloi jang, ¹⁷ Hadad gaw Egutu mung de sa wa na matu shi kawa a ali ama ni nkau mi hte rau hprawng pru wa ma ai; Hadad chyawm gaw ma kaji naw rai nga ai. ¹⁸ Shaloi shanhte Midian mung na pru wa nna, Paran ginwang de du ma ai; bai Paran kaw nna shanhte manang shaga nhtawm, Egutu mung na Egutu hkwahkam Hpara-u hpang de du nna, shi gaw dai wa hpe nta jaw nna, shi a matu lusha karan ai hte lamu ga mung jaw da wu ai. ¹⁹ Hadad mung Hpara-u a man e myiman grai pa nga ai hte, shi gaw shi a madu jan Tahpene a kanau hpe shi hpe ya sha wu ai. ²⁰ Tahpene a kanau mung Hadad a matu Genubat mying ai shadang sha langai mi shaprat ya wu ai rai nna, Tahpene gaw dai ma hpe Hpara-u a nta hta e Hpara-u a shadang sha ni hte rau kaba wa nga ai. ²¹ Ya Dawi gaw shi a kaji kawa ni hte rau yup pyaw nga ai hte, hpyenbu Yoab mung si mat sai hpe, Hadad gaw Egutu mung e na wu yang, shi gaw Hpara-u hpe, Nye a buga de bai wa lu na ahkang jaw e law, ngu nna hpyi wu ai. ²² Hpara-u gaw, Na a buga de bai wa mayu ai gaw, ngai hte rau nga nga yang, nang hpa kadawn nga n ta? ngu nna shi hpe htan wu yang shi gaw, Hpa n kadawn timung, wa na ahkang she jaw e law, ngu nna bai hpyi wu ai. ²³ Bai Karai Kasang gaw, shi hpe hpyen tai na matu, shi a madu Zoba hkawhkam Hadadeze kaw na hprawng mat wa ai Eliada a kasha Rezon hpe naw sharawt wu ai. ²⁴ Shi gaw masha shaga la nna, Dawi gaw shanhte hpe Zoba shara e gasat sat wa yang, shi gaw luksuk ni a agyi rai nga ai: shanhte gaw Damasku mare de hprawng nhtawm dai de nga nga nna up nga ma ai. ²⁵ Dai wa gaw Hadad gumlau amu galaw ai hta kaga, Shawlumon nga ai; shi gaw Israela amyu hpe matsat kau nna, Suri mung hta e up nga ai. ²⁶ Bai, Shawlumon a hkring mang, Zereda mare na Ehprim masha Nebat a kasha Yeroboam mung, hkawhkam wa hpe gumlau na matu rawt wa sai; shi a kanu gaw gaida jan rai nga nna, shi a mying Zerua rai lu ai. ²⁷ Shi hkawhkam wa hpe galaw ai lam gaw ning rai nga ai: Shawlumon gaw Milo dap galaw nna, shi kawa Dawi a mare na bunghku hpe galaw lajang wu ai. ²⁸ Ya Yeroboam wa gaw jaubu share kaba rai nga ai hte, dai shabrang wa gaw let nga ai hpe Shawlumon mu wu ai rai nna, Yosep a nta na amu galaw ai n mahkra ntsa e agyi shatai wu ai. ²⁹ Shingrai dai aten e Yeroboam gaw Yerusalem mare na pru wa yang, Shilo masha myihtoi Ahiya gaw shi hpe mu hkrup wu ai; Ahiya mung palawng nnan bu hpun nna, shan lahkawng hkrai pa hta e rai nga ma ai. ³⁰ Ahiya mung shi bu hpun ai palawng nnan hpe la nhtawm, daw shi lahkawng di nna gang je wu ai hte, ³¹ Yeroboam hep, Ndai daw shi hkap la u; Israela Karai Kasang Yehowa gaw ning nga ai: Yu u, Shawlumon a lata na ndai mungdan hpe ngai dawm la nna, nang hpe amyu lakung shi jaw na de ai. ³² Raitimung, nye shangun ma Dawi a matu hte, Israela amyu lakung mahkra hta na ngai lata la ai Yerusalem mare a matu, shi gaw amyu lakung langai mi lu la na wu ai. ³³ Kaning rai nme nga yang, shanhte ngai hpe kau da nna, Sidon Hpara shayi sha Ashtoret, Moba Hpara Hkemosha, Amon kashu kasha ni a Hpara Milhkom hpe nawku ai hte, shi a kawa Dawi zawn, nye a man e tengman ai amu galaw na hte, ngai htet da ai ga hte matsun maroi ga hpe hkan nang namatu, nye a lam ni hpe n hkan hkraw ma ai. ³⁴ Raitimung, dai mungdan ting hpe nga shi a lata na dawm la lu na n rai; nye a hkangda ai ga hte matsun maroi ga hpe hkan nang nga ai, nye a shangun ma Dawi a jaw e shi a prat dingsa ngai shi hpe du tai nga shangun na we ai: ³⁵ shi kasha a lata na chyawm gaw, dai mungdan hpe ngaidawm la nna, nang hpe amyu lakung shi jaw na de ai. ³⁶ Nye a amying nsang hpe tawn da na matu, ngailata la ai Yerusalem mare hta e, nye a shangun ma Dawi gaw nye a man e tutnawng pyengdin shadun lu hkra, shi a kasha hpe amyu lakung langi mi, ngai jaw na we ai. ³⁷ Ngai nang hpe lata la nna, nang ra mara hte maren up lu na hte, Israela amyu ntsa e hkawhkam tai lu na ndai. ³⁸ Nga hkangda mada hpe nang madat mara ya nna, nye a lam ni hkan nang let, nye a man e dingman ai amu shachyen nna, nye shangun ma Dawi hte maren ngai hkangda ai ga hte matsun maroi ga hpe hkan shatup n yang gaw, ngainang hte rau anga nga nna, ngai Dawi a matu nta shagrin da nhtawm, nang hpe Israela amyu hpe jaw na de ai. ³⁹ Ndai lam a majaw ngai Dawi a amyu hpe zingri na n rai, ngu nna tsun wu ai. ⁴⁰ Dai re ai majaw Shawlumon gaw Yeroboam hpe sat na tam nga ai:Yehoboam chyawm gaw rawt nna, Egutu mung na hkawhkam Shishak hpang de hprawng nhtawm, Shawlumon si mat ai nhtoi du hkra, Egutu mung e nga nga ai. ⁴¹ Ya Shawlumon a lam tsun shara naw nga nga ai hte, shi a amu bungli yawng, shi a hpaji byeng-ya lam, Shawlumon amu bungli gawn dan ai laika hta ka da nga ai, n rai ni? ⁴² gaw Yerusalem mare e hkaw dung nna, Israela mungdan ting a ntsa e up nga ai gaw, mali shi ning rai nga ai. ⁴³ Shaloi Shawlumon gaw kaji Dawi a mare hta makoi mayang di mu ai: kasha Rehoboam gaw shi a malai hkaw dung nga ai.

¹ Ya Rehoboam gaw Shehkem mare de lung wa sai; kaning rai nme law, shi hpe hkawhkam aya dang na nga, Israela masha ni yawng Shehkem mare de du ma ai. ² Ya Nebat a kasha Yeroboam gaw hkawhkam Shawlumon kaw na hprawng wa nna, Egutu mung e naw nga nga ai majaw, ³ shanhte gaw shi hpe shaga la nna, shi dai lam na wu ai shaloi e, Yeroboam hte Israela shawa hpawng ting sa nna Rehoboam hpe, ⁴ Na nwa gaw anhte a kandang hpe li wa shangun ya ai li la ai kandan hpe, nang shayawm shatsang kau ya mi; shaloi anhte nang hpe da jau nga na ga ai, ngu nna tsun mu ai. ⁵ Shaloi shi gaw, Naw wa ma wu, masum ya lai jang she ngai hpang de sa marit, ngu nna shanhte hpe tsun dat mu ai; masha ni mung wa mat ma ai. ⁶ Ya hkawhkam Rehoboam gaw shi kawa Shawlumon a prat e shi a man e tsap nga ai salang ni hte bawng yu nna, Ndai masha ni hpe htan ya na ga, nanhte ngai hpe hpa lam daw ya na myi ta? ngu mu ai. ⁷ Shanhte gaw, Nang dai ni e ndai masha ni hpe dawjau mayu nna, shanhte hpe dawjau let htan ai ga hte ga ngawi ga pyaw tsun nga yang, shanhte gaw prat dingsa e na a mayam ni tai na mara ai, ngu nna shi hpe daw ya mu ai. ⁸ Shi chyawm gaw, salang ni shi hpe hpaji daw ya ai hku kau da nhtawm, shi man e tsap nga nna shi hte rau kaba wa ai shabrang ni hte bawng yu nna, ⁹ Ndai masha ni gaw, Na nwa anhte hpe shagun ya ai kandang hpe tsang shangun ya mi, nga nna ngai hpe hpyi ma ai majaw, shanhte hpe ga htan ya na lam nanhte gara hku hpaji daw ya nga myit ta? ngu nna shanhte hpe san mu ai. ¹⁰ Shaloi shi hte rau kaba wa ai shabrang ni gaw, Nan wa anhte a kandang hpe li shangun nga timung, nang dai hpe anhte a matu tsang shangun ya mi, nga nna nang hpe hpyi ma ai masha ni hpe ning ngu u, Nye a yung hkyi gaw nye wa a nshang hte grau kaba nga ai: ¹¹ nye wa gaw nanhte hpe li la ai kandang shagun da timung, ngai nanhte a kandang hta naw jat na we ai: nye wa gaw nanhte hpe ri lasik hte kayat ai, ngai mahtang nanhte hpe hpri n-gawgawk hte kayat na made ai, ngu nna tsun u, ngu mu ai. ¹² Shingrai hkawhkam wa gaw, Masum ya lai jang she ngai hpang de wa marit, nga nna hkang dat ai hte maren, Yeroboam hte mung masha ni nlang, masum ya nhtoi hta e Rehoboam hpang de bai wa ma ai. ¹³ Hkawhkam wa gaw mung masha ni hpe sheng mareng ga tsun nna, salang ni shi hpe hpaji daw ya ai ga kau da nhtawm ¹⁴ shabrang ni shi hpe hpaji daw ya ai ga hku hkan nna, Nye wa gaw nanhte a kandang hpe shali timung, ngai nanhte a kandang hta naw jat na we ai; nye wa gaw nanhte hpe ti lasik hte kayat ai, ngai mahtang nanhte hpe hpri n-gawgawk hte kayat na made ai, ngu nna shanhte hpe tsun dat mu ai. ¹⁵ Shingrai hkawhkam wa gaw mung masha ni a ga n madat nga ai: dai lam gaw, Yehowa nan Shilo masha Ahiya n-gup hte Nebat a kasha Yeroboam hpe tsun da ai ga hpe shagrin da na matu, Yehowa kaw nna pru ai lam rai nga ai. ¹⁶ Hkawhkam wa gaw shanhte a ga n madat nga ai hpe, Israela amyu masha ni yawng mu mu ai shaloi jang, shanthe gaw, Anhte Daei hta hpa daw nga ga ta? Yese kasha hta anhte Sali n lawm ga ai; Israela e, na a sum nta ni de bai wa nu; Dawi e, na nta hpe ya yu yu u law, ngu nna hkawhkam wa hpe htan nhtawm, Israela gaw tinang a sum nta ni de bai wa ma ai. ¹⁷ Raitimung, Yuda mung na mare ni hta nga nga ai Israela masha ni a ntsa e, Rehoboam gaw naw up nga ai. ¹⁸ Shaloi hkawhkam Rehoboam gaw, nchyang amu galaw ai ni a ntsa e up nga ai Adoram hpe shangun dat wu yang, Israela masha ni yawng shi hpe nlung hte hkap kabai sat kau mu ai: hkawhkam Rehoboam mung, Yerusalem mare de hprawng wa na matu shi a leng hta alawang gat shang wu ai. ¹⁹ Shingrai Israela amyu ni gaw dai ni du hkra, Daei a dap lakung hpe gumlau nga ma ai. ²⁰ Ya Yeroboam bai wa ra ai lam hpe Israela amyu masha ni na mu yang, shi hpe shawa hpawng de shaga shashawn nhtawm, Israela amyu ntsa e hkawhkam shatai mu ai: Yuda amyu hta kaga, Dawi a dap lakung hpe kadai mung n hkan nang ma ai. ²¹ Ya Rehoboam gaw Yerusalem de du wa yang, Yuda amyu lakung yawng hte Ben-yamin amyu hta na, Israela amyu hpa hkap gasat nna, Shawlumon a kasha Rehoboam kaw dai mungdan hpe nhtang shashawn lu na matu, hpyen masha sen me mun matsat shaga tawn mu ai. ²² Shaloi Karai Kasang a masha wa Shemia kaw Karai Kasang a mungga du nna, ²³ Yuda hkawhkam Shawlumon a kasha Rehoboam hte, Yuda yan Ben-yamin amyu lading mahkra hte, mung masha ni gale hpe mung, ning ngu tsun u: ²⁴ Yehowa gaw ning nga nga ai, nanhte gaw Israela amyu nhpu nnau ni hpe sa gasat lu na myit dai n rai: langai hte langai tinang a nta de bai wa manu; ndai lam gaw ngai kaw na rai nga ai, ngu u, ngu wu ai. Shingrai shanhte gaw Yehowa a ga madat mara nna, langai hte langai Yehowa tsun dan ai hte maren, bai nhtang wa ma ai. ²⁵ Shaloi Yeroboam gaw Ehprim bum ga hta e Shehkem mare de nna, dai yang e nga nga ai; dai kaw na htawt nhtawm Penuela mare de wu ai. ²⁶ Bai Yeroboam gaw, Ndai mungdan Dawi a dap ladung de bai nhtang wa na ra ai: ²⁷ ndai amyu masha ni gaw, Yehowa a nawku Htingnu hta hkungga sa nawng ya na matu, Yerusalem mare de lung wa ma yang, shanhte a myit masin gaw, shanthe a madu ngu na, Yuda hkawhkam Rehoboam hpang de bai machyu wa nna, shanthe ngai hpe sat kau nhtawm, Yuda hkawhkam Rehoboam hpang de bai nhtang wa na mara ai, nga nna tinang a myit masin hta tsun nga let, ²⁸ Hkawhkam wa gaw bawng hkut nna aja hte dumsu kasha lahkawng jaw nhtawm mung masha ni hpe, Yerusalem mare de lung wa na nanhte a matu nau yak la nga ai; Israela amyu e, Egutu mung na nang hpe shapraw la ai, na a Hpara ni hpe yu yu mu law, ngu nna, ²⁹ Behtela mare de rangai mi, Dan mare de langai mi tawn da wu ai. ³⁰ Ya mung masha ni gaw, dai sumla ni a man e nawku na matu Dan mare du hkra pyi sa du du rai ma ai majaw, dai lam gaw yubak tai wa sai. ³¹ Bai tsaw ai kawng ni a ntsa e shi nta gap da nna, Lewi amyu n re ai yu maya masha ni hpe hkunjawng shatai wu ai. ³² Bai Yeroboam gaw Yuda mung na poi hte maren, shata matsat ngu na shi manga ya e poi ladaw tawn da wu ai rai nna, dai hkungri de lung wa wu ai: shingrai dai lam Behtela shara e shi galaw nna, shi jaw da sai dumsu kasha ni a man e, hkungga nawng ya wu ai: tsaw ai kawng nawku shara ni a matu shatai ai hkinjawng ni hpe mung, Behtela e tawn da mu ai. ³³ Shingrai shi a myit hkrai hkan nna, shata matsat ngu na hta shi manga ya e, Behtela shara e shi galaw da ai hkungri de shi lung wa nna, Israela kashu kasha ni a matu poi tawn da ai hte, manam pyaw ai baw nat nawng ya na nga, dai tawn hkungri de lung wa ai.

¹ Ya Yeroboam gaw manam pyaw ai baw nat nawng ya na matu dai tawn hkungri makau e tsap nga ai shaloi jang, Karai Kasang a masha langai mi, Yehowa a ga hkang ai hte maren, Yuda mung na Behtela shara de sa de nhtawm: ² Hkungri e, hkungri e, Yehowa ning nga ai: Yoshia mying ai wa langai mi Dawi a dap lakung nta shangai wa na ra ai rai nna, ndai wa gaw na ntsa e manam pyaw ai baw nat nawng ya ai tsaw ai kawng ni a hkinjawng ni hpe nang hta sat nawng ya nna, masha nra mung nang hta nat nawng ya na mara ai, ngu nna htawn tsun wu ai. ³ Dai shani jang shi kumla mung tawn da nna, Yehowa hkangda ai kumla gaw ndai rai nga ai: Dai tawn hkungri gaw ga wa nna, dai ntsa e nga ai wan dap ni yun hkrat wa na ra ai, nga ai. ⁴ Shingrai, dai Karai Kasang a masha gaw Behtela shara na tawn hkungri a lam tsun jahtau ai ga hpe hkawhkam Yeroboam na wu yang, shi hkungri de na shi a lata ladawn nna, Dai wa hpe rim la mu, ngu mu ai. Shi ladawn dat ai ladawn dat ai lata gaw katsing si mat nna, bai n dawm la lu nu ai. ⁵ Dai Karai Kasang a masha gaw Yehowa a ga hku hkan nna kumla madun dan ai hte maren, tawn hkungri mung ga wa nna, wan dap ni yun hkrat mat wa ai. ⁶ Shaloi hkawhkam wa gaw Karai Kasang a masha hpe, Nye a lata bai mai wa lu hkra, nye a matu na a Karai Kasang Yehowa hpe akyu hpyi ya e, ngu nna tawngban wu yang, Karai Kasang a masha gaw Yehowa hpe akyu hpyi nna, hkawhkam wa a lata gaw mai wa ai hte shawoi na hte maren majing bai ra mat sa lu ai. ⁷ Bai hkawhkam wa gaw Karai Kasang a masha wa hpe, Ngai hte rau nta se shang nna nsa naw awai la u; ngai nang hpe dumhpa jaw na de ai, ngu wu ai. ⁸ Karai Kasang a masha wa chyawm gaw, Yehowa shi a mungga hte, Nang muk mung sha lu na ndai n rai, ntsin mung lu lu na ndai n rai, nang sa a ai lam hku bai nhtang wa lu na ndai n ra, nga nna ngai hpe hakng da ai majaw, ⁹ nang ngai hpe na nta chyen mi jaw da timung ngai n hkan nang lu na nngai; ndai shara hta e muk mung sha na nngai n rai, ntsin mung lu na nngai n rai, ngu nna hkawhkam wa hpe htan nhtawm, ¹⁰ Behtela de sa de ai lam hku n rai, kaga lam hku wa mat ai. ¹¹ Ya Behtela mare e mayihtoi dingla langai mi nga nga nna, Karai Kasang a masha wa gaw dai shani e Behtela de galaw ai amu mahkra hpe, shi a kasha ni shi hpe sa sha na ya mu ai: hkawhkam wa hpe tsun dan ai ga mung shanthe a kawa hpe shana ya mu ai. ¹² Shanhte a kawa mung, Shi gara lam hku rai wa sata? ngu nna shanhte hpe san mu ai: shi a kasha ni gaw, Yuda mung nna sa du ai Karai Kasang a masha wa gaw gara lam hku bai wa ai hpe mu da mu ai. ¹³ Bai shi gaw, Lawze byau ya mi, ngu nna kasha ni hpe tsun wu yang, shanhte shi a lawze byau ya nna shi jawn wu ai. ¹⁴ Shingrai Karai Kasang a masha wa hpe shi hkan shachyut nna, a myi hpun nhpang e dung nga ai hpe mu hkrup wu yang, Nang Yuda mung nna sa du ai Karai Kasang a masha wa rai n ni? ngu nna san wu ai; shi gaw, Ngai rai nga nngai, nga ai. ¹⁵ Bai myihtoi dingla gaw, Ngai hte rau nta de wa nna muk sha u, ngu nna shaga wu yang, ¹⁶ shi gaw, Ndai shara e muk sha lu na ndai n rai, ntsin mung lu lu na ndai nrai; nang sa du ai lam hku bai wa lu na ndai n rai, nga nna Yehowa ngai hpe hkangda nngai majaw, ¹⁷ ngai nang hte rau n wa lu na nngai, nta hta mung n shang lu na nngai; ndai shara e mung ngai nang hte rau muk mung n sha, ntsin mung n lu na nngai, ngu nna ndang wu ai. ¹⁸ Shaloi myihtoi dingla gaw, Ataw ngai mung nang hte maren myihtoi she rai nga nngai; lamu kasa gaw Yehowa a ga ngai hpe htawn tsun nna, Dai wa gaw muk sha ntsin lu na matu, na nta de shi hpe shaga la u, nga ai, ngu nna shi hpe masu kau wu ai. ¹⁹ Shingrai shi hte rau bai wa nna, shi a nta hta muk mung sha, ntsin mung lu rai nga ai. ²⁰ Ya shan gaw sha ku makau e dung nga ma yang, Yehowa mungga shi hpe bai shaga la ai myihtoi dingla kaw du nna, Yuda mung nna sa du ai Karai Kasang a masha wa hpe, ²¹ Yehowa ning nga ai: Nang gaw Yehowa a n-gup ga hpe n madat nna, na a Karai Kasang Yehowa nang hpe hkangda ai ga n hkan nang nga nna, ²² Muk hkum sha, ntsin mung hkum lu, nga nga ai shara de nang bai wa nna, muk mung sha, ntsin mung lu rai ndai majaw, na a moi mang gaw na nji nwa ni a lupwa hta du wa lu na n rai, ngu nna tsun jahtau wu ai. ²³ Shingrai shi muk sha ntsin lu ai hpang, myihtoi dingla gaw, shi bai shaga la ai myihtoi wa a matu lawze byau ya wu ai. ²⁴ Ya shi pru wa yang, hkanghkyi langai mi hte hkrum nna, shi hpe kawa sat kau wu ai; shi a moi mang gaw nmaw lam e kadawng taw nna, lawze gaw makau e tsap nga ai; dai hkanghkyi mung moi mang makau e tsap nga ai. ²⁵ Dai moi mang gaw nmaw lam e kadawng taw nga nna, hkanghkyi gaw de a makau e tsap nga ai hpe, lai wa ai masha ni mu nna, myihtoi ding la nga ai mare hta e sa shana ya mu ai. ²⁶ Ya dai wa hpe bai shaga la ai myihtoi dingla gaw dai lam na wu yang, shi gaw, Dai wa gaw Yehowa a n-gup ga n madat ai Karai Kasang a masha wa rai nga ai, dai re ai majaw Yehowa shi hpe tsun dan ai hte maren, shi hpe kawa amya na shi hpe sat kau ai hkanghkyi a n-gup hta ap kau n hka, nga ai. ²⁷ Bai shi gaw, Nye lawze hpe byau ya mi, ngu nna kasha ni hpe tsun mu yang, shanhte byau ya mu ai. ²⁸ Shaloi shi sa wa nna, lam e kadawng taw nga ai moi mang hte, lawze yan hkanghkyi hpe mu wu ai: dai hkanghkyi gaw moi mang hpe mung n sha, lawze hpe mung n maya, rai nga la ai. ²⁹ Myihtoi dingla wa mung, Karai Kasng a masha wa a moi mang hpe lawze ntsa e mara nna nhtang wa ai; shi a lam sharung shayawt nna, shi hpe makoi mayang di na matu myihtoi dingla a mare de du wa ai.S ³⁰ Shi gaw dai moi mang hpe shi a lup hta tawn da nna, shi a lam sharung shayawt let, Ala, hpu e, nga ai. ³¹ Ya dai wa hpe makoi mayang ngt ai hpang, dai myihtoi dingla gaw shi a kasha ni hpe, Ngai si wa yang Karai Kasang a masha wa hpe lup makoi ai lup hta e nga hpe mung lup da mi; nye a nrut nra ni gaw shi a nrut nra makau e bang tawn da mu. ³² Kaning rai nme law nga yang, Behtela e nga ai hkungri a lam hpe mung, Samari mung na mre ni a tsaw ai kawng na nta ni a lam hpe mung, shi jahtau tsun ai Yehowa a ga gaw, teng teng dik wa na ra ai, ngu nna htet da mu ai. ³³ Dai amu byin timung, Yeroboam gaw shi nhkru ai lam hta myit n kayin nna, tsaw ai kawng ni a mtu, mayu maya masha ni kaw na kadai hpe raitimung hkinjawng naw shatai wu ai: dai tsaw ai kawng ni hta hkinjawng tai mayu ai ni yawng hte hpe, shi aya dang ya nna, shanhte hkinjawng tai nga ma ai. ³⁴ Ndai lam gaw, Yeroboam a nta hpe jahten kau nna, ga ntsa na shaprai kau ai du hkra, yubak mara tai wa sai.

¹ Ndai aten e Yeroboam a kasha Abiya gaw machyi wa ai rai nna, ² Yeroboam gaw shi a madu jan hpe, Rawt u, nang Yeroboam a madu jan rai nga ai kadai mung n chye lu hkra, hpun palawng galai nna Shilo mare de sa wa su: yu u, ndai amyu a ntsa e ngai hkawhkam tai na nga, nye a lam tsun dan ai myihtoi Ahiya gaw dai yang e nga nga ai: ³ muk tawng shi, muk pa ni hte lagat jahku namtau langai mi la nna, shi kaw sa su; ndai ma hta hpa byin na lam, shi nang hpe tsun dan na ra ai, ngu wu ai. ⁴ Yeroboam a madu jan gaw shingrai rawt nna, Shilo de sa wa ai hte Ahiya nta de du wa ai; Ahiya chyawm gaw aprat kaba sai majaw, myi amam ai hte myi n mu lu ai. ⁵ Shaloi Yehowa gaw Ahiya hp, Yu u, Yeroboam a madu jan nang hpang de sa du nna, shi a kasha machyi nga i majaw dai ma a lam nang hpe san yu na ra ai: shi shang wa jang numsha kaga zawn sawt ai hte du na ra ai majaw, nang shi hpe wora lera lam tsun kan na ru ai, ngu wu ai. ⁶ Ya dai numsha gaw chyinghka lam hku shang wa jawng, shi a lagaw nsen hpe Ahiya na wu yang, shi gaw, Yeroboam a madu jan e, shang wa rit; nang num kaga nsan nna, hpa majaw sawt nga n ta? ngai gaw na a matu yawn hpa ashi gun nga nngai: ⁷ Yeroboam hpe wa tsun su, Israela Karai Kasang Yehowa ning nga ai: Ngai nang hpe mung masha ni hta na sharawt shagrau nhtawm, nye amyu Israela ntsa e du shatai sade ai hte, ⁸ Dawi a nta na dai mungdan hpe dawm la nna, nang hpe jaw d ade ai; raitimung, nang gaw nye a shangun ma Dawi zawn ngai hkangda ai ga matsun n madat ai hte, nye a man e dingman ai hku galaw na hkrai, na a myit masin mahkra hte n hkan sharau ai sha; ⁹ na a shawng na ni mahkra hta nang yubak grau galaw ai hte, ngai hpe pawt bu shangun hkra, Hpara tsasam nang galaw nna, sumla jaw da ai hte ngai hpe shinggan kau ndai majaw, ¹⁰ yu u, ngai gaw Yeroboam a nta ntsa e tsin-yam tsindam shangun dat nna, Yeroboam a amyu a lasha ma nlang hte hte, Israela hta bawngdung nga bawng lawt pra ai ni hpe htau di kau nna, masha wa gaw shanut shanaw ye kau ai zawn, Yeroboam a nta hpe atsai awai ye kau na we ai. ¹¹ Yeroboam hte seng ai wa mar ehkan e si yang, gwi ni e sha kau ai hkrum na ma rai ai; pa hkan e si yang, ntsa malen u ni e sha kau ai hkrum na mara ai: ndai lam Yehowa tsun da sai . ¹² Dai re ai majaw rawt u, nta de wa su; nang mare de du wa nung tawn e, ma gaw si na ra ai. ¹³ Israela masha ni yawng shi hpe sharung shayawt di nna lup kau na mu ai: Yeroboam a nta masha ni hta na shi chu sha lup makoi mayang di ai hkrum na wu ai: kaning rai nme nga yang, Yeroboam a nta masha ni hta na shi gaw Israela Karai Kasang Yehowa a man e kaja ai myit lama ma rawng ai wa rai nga ai. ¹⁴ Dai hta n-ga, Yeroboam a nta masha ni hpe dai shani e htau di kau na hkawhkam hpe, Yehowa gaw Israela ntsa e sharawt d ana ru ai: dai gaw ya e pyi rai nga ai, n rai ni? ¹⁵ Maiaw hpe hkae shamawt kanga ai zawn, Yehowa gaw Israela hpe anu adup na rai nna, shanhte gaw Yehowa hpe pawt bu shangun hkra, Asherim sumla ni hpe galaw ma ai majaw, Israela kaji kawa ni hpe jaw da ai mai kaja ai mungdan hta na shanhte hpe baw kau nhtawm, dai Hka nu lai hkra shabra kau na mu ai. ¹⁶ Yeroboam gaw shi hkum nanshut kau nna, Israela amyu hpe shut shangun ai yubak mara a majaw, Yehowa gaw Israela hpe kau da na mu ai, ngu wu ai. ¹⁷ Shingrai Yeroboa a madu jan gaw rawt pru wa nna, Tirza mare de du ai: shi nta chyinghka hkinbawng du wa yang, dai ma gaw si wa sai. ¹⁸ Yehowa gaw shi a shangun ma myihtoi Ahiya n-gup hta ga tsun ai hte maren, Israela masha ni yawng shi hpe makoi mayang kau nna, shi a matu sharung shayawt di mu ai. ¹⁹ Yeroboam a lam naw gawn ra ai hte, shi hpyen gasat ai lam raitimung, mung up ai lam raitimung, Israela hkahkam ni a Labau laika hta ka da nga ai. ²⁰ Yeroboam hkaw dung ai shaning gaw hkun lahkawng ning rai nga ai: shaloi kaji kawa ni hte shi yup pyaw wa nna, shi a kasha Nadab shi a malai hkaw dung nga ai. ²¹ Ya Shawlumon a kasha Rehoboam gaw Yuda mung hta hkaw dung nga ai: Rehoboam gaw hkaw dung ai shani e shi a asak mali shi langai ning rai nga nna, Yerusalem mare hta e shi sanit ning hkaw dung wu ai: dai mare gaw, Yehowa, shi a amying nsang tawn da na matu, Israela amyu lakung ni yawng hta na lata la ai mare rai nga ai: shi a kanu a amying gaw, Amon numsha, Nama rai lu ai. ²² Yuda mung na masha ni gaw, shanhte a kaji kawa ni hta grau nna Yehowa a man e n hkru ai amu galaw ai hte, shanhte a shut hpyit ai hku hkan let, shi hpe pawt bu shangun mu ai. ²³ Shanhte gaw tsaw ai kawng shagu hta, tsit lali ai hpun shagu npu e, nawku shara ni, sumla shadaw ni hte Asherim sumla ni hpe sharawt tawn da mu ai: ²⁴ shawa la shawa num ni mung dia mungdan hta shang nna, Yehowa gaw Israela amyu a man e shapraw shachyut kau ai maigan amyu ni a matsat shabat lam mahkra hpe hkan galaw ma ai. ²⁵ Ya hkawhkam Rehoboam gaw hkaw dung ai manga ning hta e, Egutu hkawhkam Shishak gaw Yerusalem mare de hpyen gasat lung wa nna, ²⁶ shi gaw Yehowa a nawku Htingnu na aja gumhpraw hte, hkawhkam htingnu na aja gumhpraw hpe la kau wu ai: shi yawng mayawng hte hpe la kau nu ai: Shawlumon galaw da ai aja n-gang ni mahkra hpe mung la kau nu ai. ²⁷ Hkawhkam Rehoboam gaw aja n-gang ni a malai magri n-gang galaw nna, hkawhkam htingnu a chyinghka sin langa ni a agyi ni a lata hta ap ya mu ai. ²⁸ Hkawhkam wa gaw Yehowa htingnu hta shang shagu gaw, sin langa ni dai n-gang ni hpe lang nna, sin langa gawk hta e bai wa tawn da mu ai. ²⁹ Rehoboam a lam naw gawn ra ai hte, shi galaw ai lam mahkra gaw, Yuda hkawhkam ni a Labau laika hta ka da nga ai, n rai ni? ³⁰ Rehoboam yan Yeroboam gaw, shan a prat tup hpyen gasat hkat ma ai. ³¹ Ya Rehoboam gaw kaji kawa ni hte yup pyaw wa nna, Dawi mare hta e shanhte hte rau makoi mayang di ai hkrum wu ai: shi a kanu a amying gaw, Amon numsha, Nama rai lu ai. Shi a kasha Abiyam gaw shi a malai hkaw dung nga ai.

¹ Ya, Nebat a kasha hkawhkam Yeroboam hkaw dung ai shi matsat ning e, Abiyam gaw Yuda mung hta hkaw dung hpang wu ai. ² Shi gaw Yerusalem mare hta e masum ning hkaw dung nga ai: shi a kanu gaw Abishalom a kasha rai nna, Mahka mying lu ai. ³ Abiyam gaw shi kawa galaw ai shaut hpyit ai lam mahkra hpe hkan galaw nna, shi a kaji Dawi a myit masin Yehowa hta hkum tsup nga ai hte maren, shi a myit masin gaw hkum tsup nga lu ai n rai. ⁴ Raitimung shi a Karai Kasang Yehowa gaw, Dawi hpe tau yu nna, shi a kasha hpe shi a malai shatai wu ai hte, Yerusalem hpe shagrin da na matu, dai mare hta e shi hpe pyengdin jaw da wu ai: ⁵ kaning rai nme law, Dawi gaw Yehowa man e tengman ai amu galaw wu ai rai nna, Hiti masha Uria lam hta kaga, shi hpe hkangda mada hta na, shi a prat dingsa e yit kau wu ai n rai. ⁶ Rehoboam yan Yeroboam gaw, shi asak hkrung nga dingsa, hpyen gasat hkat nga ma ai. ⁷ Abiyam a lam naw gawn ra ai hte, shi galaw ai lam mahkra gaw, Yuda hkawhkam ni a Labau laika hta ka da nga ai, n rai ni? Abiya yan Yeroboam gaw, shada hpyen gasat hkat ma ai. ⁸ Ya Abiyam gaw kaji kawa ni hte yup pyaw wa nna, Dawi mare hta e makoi mayang di ai hkrum wu ai; shi a kasha Asa gaw shi a malai hkaw dung nga ai. ⁹ Ya, Israela hkawhkam Yeroboam a hkaw dung ai hkun ning e, Asa gaw Yuda mung hta hkaw dung hpang wu ai. ¹⁰ Shi gaw Yerusalem mare hta e mali shi langai ning hkaw dung nga ai: shi a kanu gaw Abishalom a kasha rai nna, Mahka mying lu ai. ¹¹ Asa gaw shi a kawa Dawi hte maren Yehowa a man e hkum tsup re ai amu galaw wu ai. ¹² Shi gaw shawa num shawa la ni hpe dai mungdan hta na shaden kau nna, kaji kawa ni galaw da ai Hpara sumla ni hpe htawm kau wu ai. ¹³ Shi a kanu Mahka mung, matsat shabat re ai Ashera sumla galaw da nu ai majaw, shi hpe hkawhkam jan aya na gum-yu yu kau nna, shi a sumla hpe kahtam kau nhtawm, Kedron hka shi hkaraw e nat kau ya wu ai. ¹⁴ Raitimung, tsaw ai kawng ni a nawku shara ni hpe shi htawm kau wu ai n rai: Asa a myit masin chyawm gaw, shi hkrung nga dingsa Yehowa a man e hkum tsup nga lu ai. ¹⁵ Shi a kawa majai da ai hte, shi hkum nan majai kau ai, aja, gumhpraw hte wan ni hpe, Yehowa a nawku Htingnu kata de, shi wa tawn da wu ai. ¹⁶ Ya Asa yan, Israela hkawhkam Basha lapran e, shan a prat dingsa e hpyen majan rai nga ai. ¹⁷ Yuda hkahkam Asa hpang de kadai mung n shang n pru lu u ga, Israela hkawhkam Basha gaw Yuda mung de lung nna, Rama mare hpe de da wu ai. ¹⁸ Shaloi Asa gaw, Yehowa a nta na sutdek hte, hkawhkam htingnu na sutdek hta ngam nga ai aja gumhpraw yawng hpe shaw la nna, shi a shangun ma ni a lata hta ap ya mu ai; bai hkawhkam Asa gaw, Damasku e dung nga ai Suri hkawhkam, Hezion a kashu, Jabtimon a kasha Ben-hada hpang de shanhte hpe shangun dat nna, ¹⁹ Ngai hte na a lapran e, nye wa hte na nwa lapran e ga shaka tawn da nga ai: yu u, ngai nang hpe aja gumhpraw kumhpa sak ya de ai; Israela hkawhkam Basha gaw ngai kaw na pru wa lu hkra, nang shi hte tawn da ai ga shaka hpe sa sharun kau u, ngu dat mu ai. ²⁰ Ya Ben-hada gaw hkawhakm Asa a ga hpe madat nna, shi a hpyenbu ni hpe Israela mare ni hpang de shangun dat nna, shanhte gaw Ion mare, Dan mare, Abela Bet Mahka shara hte hpawn, Genesaret yan Naphptali lamu ga mahkra hpe shaza kau mu ai. ²¹ Ya Basha gaw dai lam na wu yang, shi Rama mare hpe n de shangut ai sha Tirza mare hta nga nga ai. ²² Shaloi hkawhkam Asa gaw Yuda mung ting hpe ga hkang dat mu ai gaw, mung masha langai mi muk n lawt ai sha, Rama mare hta e Basha de da ai nlung ni hte ngau ni hpe hpai kau nn, hkawhkam Asa gaw dai hte Ben-yamin ginwang na Geba mare hte Mizpa de da wu ai. ²³ Ya naw gawn ra ai Asa amu ni a lam nlang, shi a daru magam, shi galaw ai yawng hte hte, shi de da ai mare ni a lam, Yuda hkawhkam ni a Labau gawn ai laika hta ka da nga ai, n rai ni? Asa gaw asak kaba wa sayang, lagaw hta byin wa ai. ²⁴ Shaloi Asa gaw shi a kaji kawa ni hte yup pyaw wa nna, shi kawa Dawi a mare hta e, kaji kawa ni hte rau makoi mayang di ai hkrum nu ai; shi a kasha Yehosahpat gaw shi a malai hkaw dung nga ai. ²⁵ Yuda hkawhkam Asa hkaw dung ai ni ning hta e, Yeeraboam a kasha Nadab gaw Israela mungdan hta hkaw dung hpang nga ai; shi gaw Israela ntsa e ni ning up nga ai. ²⁶ Shi gaw Yehowa a man e n kaja ai amu galaw nna, shi kawa a lam hte, Israela masha ni hpe yubak galaw shangun ai yubak hta hkan hkawm nga ai. ²⁷ Yisahka amyu na Ahiya kasha Basha gaw shi hpe gumlau wu ai; Basha gaw Hpilisti mung na Gibehton shara e shi hpe sat kau wu ai: kaning rai nme law, Nadab hte Israela masha ni yawng Gibehton hpe wang tawn da mu ai. ²⁸ Yuda hkawhkam Asa hkaw dung ai masum ning hta e, vasha gaw shi hpe sat kau nna, shi a malai hkaw dung nga ai. ²⁹ Ya shi hkawhkam tai wa jang, Yeroboam a nta masha ni mahkra hpe shi sat kau mu ai; Yeroboam a masha langai mi hpe muk asak n jahkrung da wu ai: dai lam, Yehowa gaw shi a mayam Shilo masha Ahiya hpe tsun ai hte maren rai nga ai: ³⁰ Yeroboam galaw ai yubak hte, Israela masha ni hpe yubak galaw shangun na matu mung, Israela Karai Kasang Yehowa hpe pawt bu shangun ai matu mung, dai rai nga ai. ³¹ Ya naw gawn ra ai Nadab a amu ni hte shi galaw ai lam ni mahkra gaw, Israela hkawhkam ni a Labau gawn ai laika hta ka da nga ai, n rai ni? ³² Asa yan Israela hkawhkam Basha lapran e, shan a prat dingsa e hpyen majan rai nga ma ai. ³³ Yuda hkawhkam Asa hkaw dung ai masum ning hta e, Ahiya kasha Basha gaw, Tirza mare hta e, Israela masha ni mahkra a ntsa e hkaw dung hpang nna, hkun mali ning up nga ai. ³⁴ Shi gaw Yehowa a man e n kaja ai amu galaw nna, Yeroboam a lam hte Israela masha ni hpe yubak galaw shangun ai yubak hta hkan hkawm nga ai.

¹ Shaloi Yehowa a ga, Basha hpe lakap nna, Hanani a kasha Yehu kaw du ai gaw, ² Ngai nang hpe ga nhpu hta na sharawt nhtawm, nye amyu Israela ntsa e du shatai de timung, nang gaw Yeroboam a lam hta hkan hkawm ai hte, nye a amyu Israela hpe yubak galaw sha ngun nna, shanhte a yubak galaw shangun nna, shanhte a yubak hta ngai hpe pawt bu shangun ai majaw, ³ Yu u, Basha hte shi a nta masha ni hpe ngai atsai awai shaza kau na mawe ai; ngai na a nta hpe, Nebat a kasha Yeroboam a nta hte maren shatai na we ai; ⁴ Basha hte seng ai wa gaw mare hkan e si yang, gwi n e sha kau ai hkrum na ra ai; pa hkan e si yang, ntsa malen u ni e sha kau ai hkrum na ra ai, nga ai. ⁵ Ya Basha a lam naw gawn ra ai amu hte, shi galaw ai bungli raitimung, shi daru magam lam raitimung, Israela hkawhkam ni a Labau laika hta ka da nga ai, n rai ni? ⁶ Shaloi Basha gaw shi a kaji kawa ni hte yup pyaw wa nna, Tirza mare e makoi mayang di ai hkrum nu ai: shi a kasha Ela gaw, shi a malai hkaw dung nga ai. ⁷ Shingrai, Basha gaw, Yeroboam a nta masha ni hte bung nna, tinang a lata amu hte Yehowa man e n kaja ai amu galaw let, shi hpe pawt bu shangun ai majaw mung, dai nta masha ni hpe pagawn sat kau mu ai majaw mung, Basha hte shi a nta masha ni hpe lakap ai Yehowa a ga gaw, Hanani a kasha myihtoi Yehu a n-gup hte du pru wa ai. ⁸ Yuda hkawhkam Asa hkaw dung ai hkun kru ning hta e, Basha a kasha Ela gaw, Tirza mare hta, Israe;a amyu ntsa e hkaw dung hpang nna, ni ning up nga ai. ⁹ Ya shi a shangun ma, hpyen leng hpung chyen mi up ai, hpyenbu Zimri gaw Ela hpe gumlau wu ai; shi gaw Tirza mare hta e shi a kunhting wa Arza a nta hta e chyaru nang nga ai shaloi, ¹⁰ Zimri shang nna shi hpe sat kau wu ai: ndai gaw Yuda hkawhkam Asa a hkaw dung ai hkun sanit ning e byin nga ai rai nna, Zimri gaw shi a malai hkaw dung nga ai. ¹¹ Shi hkaw dung hpang nna, shi a tingnyang hta up nga jang, Basha nta masha ni mahkra hpe sat ku mu ai rai nna, mayu dama ni hta na mung, jing-hku jing-yu ni hta na mung, lasha langai mi muk jahkrung da mu ai n rai. ¹² Shingrai Yehowa gaw, Basha hpe ladap nna, myihtoi Yehu a n-gup hte tsun ai ga hte maren, Zimri gaw Basha a nta masha ni mahkra hpe shaza kau wu ai: ¹³ Hpa rai nga yang, Basha mung, shi a kasha Ela mung, tinang nan galaw ai yubak mahkra hta n-ga, Israela masha ni hpe yubak galaw shangun ai hte, sha a sawse lawklek ai amu hte Israela Karai Kasang Yehowa hpe pawt bu shangun ai majaw rai nga ai. ¹⁴ Ela a lam naw gawn ra ai amu hte, shi galaw ai lam mahkra gaw,Israela hkawhkam ni a Labau laika hta ka da nga ai, n rai ni? ¹⁵ Yuda hkawhkam Asa a hkaw dung ai hkun sanit ning hta e, Zimri gaw, Tirza mare hta e, sanit ya up nga ai. Dai shaloi e mung masha ni gaw Hpilisti mung na Gibehton mare hpewang tawn nga ma ai. ¹⁶ Wang tawn nga ai ni gaw, Zimri gumlau rawt nna, hkawhkam wa hpe sat kau nu ai da, nga nna kajaw ai ga na ma yang, Israela masha ni yawng, dai shani jang, shanhte a dap hta, luksuk ni a hpyenbu Omri hpe Israela hkawhkam shatai mu ai. ¹⁷ Omri mung, Israela masha ni mahkra hte rau Gibehton mare kaw na rawt nhtawm Tirza mare hpe wang tawn mu ai. ¹⁸ Wang tawn ai ni dai mare hpe lu la wa manu ai, Zimri mu wu yang, shi htingnu a hpyendap nhku de shang nna htingnu hpe nat kau ai hte shi dai si wa sai: ¹⁹ dai lam gaw, Yehowa a man e galaw dan ai, n hkru n shawp ai yubak mara a majaw mung, Yeroboam a lam hta hkan hkawm ai hte, Israela hpe yubak galaw shangun ai mara a majaw mung byin wa ai, rai nga ai. ²⁰ Zimri a lam naw gawn ra ai amu hte, shi gumlau sharawt ai lam, Israela hkawhakm ni a Labau laika hta ka da nga ai, n rai ni? ²¹ Dai shaloi e Israela masha ni gaw hpung lahakwng bra wa nna, hpung mi gaw Ginat a kasha Tibni hpe hkan nna hkawhkam shatai mayu ma ai: hpung mi chyawm gaw Omri kaw hkan nang ma ai. ²² Omri kaw hkan nang ai ni mahtang, Ginat a kasha Tibni kaw hkan nang ai ni hpe dang kau nna, Tibni gaw si wa sai, Omri gaw hkaw dung nga ai. ²³ Yuda hkawhkam Asa hkaw dung ai sumshi langai ning hta e, Omri gaw Israela ntsa e hkaw dung hpang nna, shi lahkawng ning up nga ai: Tirza mare hta e kru ning hkaw dung nga ai. ²⁴ Ya Omri gaw Shemera kaw na gumhpraw talenta lahkawng hte Samari kawng mari nna, dai hta e mare de da wu ai: dai de da ai mare hpe, kawng madu Shemera mying hkan nna, dai hpe Samari ngu wu ai. ²⁵ Omri gaw Yehowa a man e n kaja ai amu galaw nna, shi a shawng na ni mahkra hta grau n hkru nga ai. ²⁶ Shi gaw Nebat a kasha Yeroboam a lam mahkra hta mung, shanthe a sawse lawklek ai amu hta, Israela Karai Kasang Yehowa hpe pawt bu shangun na maru, shi Israela masha ni hpe yubak galaw shangun ai lam hta mung, hkan hkawm nga ai. ²⁷ Omri a lam naw gawn ra ai, shi galaw ai amu hte shi madun dan ai daru magam gaw, Israela hkawhkam ni a Labau laika hta ka da nga ai, n rai ni? ²⁸ Shaloi Omri kaji kawa ni hte yup pyaw wa nn, Samari mare hta e makoi mayang di ai hkrum wu ai: shi a kasha Ahab gaw shi a malai hkaw dung nga ai. ²⁹ Yuda hkawhkam Asa hkaw dung ai sumshi matsat ning e, Omri a kasha Ahab gaw Israela ntsa e hkaw dung hpang nna, Omri a kasha Ahab gaw, Samari mare hta e hkun lahkawng ning up nga ai. ³⁰ Omri a kasha Ahab gaw, shi a shawng na ni mahkra hta Yehowa man e n hkru ai amu grau nna galaw nga ai. ³¹ Shi gaw Nebat a kasha Yeroboam a yubak hta hkan hkawm nna gaw, hpa nre ai zawn nawn wu ai hta n-ga, Sidon hkawhkam Etbala a shayi sha Yezebela hpe la nna, Bala hpara hpe dawjau ai hte nawku wu ai. ³² Samari mare hta de da ai Bala nta nhku de, shi Bala matu tawn hkung ri galaw da wu ai. ³³ Bai Ahab gaw Ashera sumla galaw ai hte, shi a shawng na Israela hkawhkam ni mahkra hta grau nna, Israela Karai Kasang Yehowa hpe pawt bu shangun wu ai. ³⁴ Ahba a lakhtak e Beteli masha Hiela gaw Yerihko mare hpe bai de da wu ai: Yehowa gaw Nun a kasha Yawshu a n-gup hta tsun ai hte maren, shi gaw npawt gaw da yang shi a kasha alat Abiram si mat nna, mare chyinghka noi da yang, shi a kasha hpungdim Seguba si nang mat wa ai.

¹ Shaloi Gilead mung e sa nga ai Tirbi mahsa Ela gaw, Ahab hpe, Ngai daw jaw nga ai Israela karai Kasang Yehowa hkrung nga ai hte maren ngai n tsun yang gaw, ya kaw nna mari mung n hkrat, marang mung n htu na ra ai, ngu wu ai. ² Bai Yehowa a ga shi kaw du nna, ³ Shanang na pru wa u, sinpraw maga de man yawng nna, Yawdan hka tawtap na Hkerit hka shi makau e sa makoi nga u; ⁴ dai hka na mtsin mang lu nna, u hka ni nang hpe lusha jaw na matu, ngai htet da ni ai, ngu nna tsun wu ai. ⁵ Elia mung Yehowa a ga hte maren hkan galaw nna, Yawdan hka tawtap na Hkerit hka shi makau e sa nga nga ai. ⁶ U hka ni gaw jahpawt e mung shana e mung muk hte shan hpai jaw nna, shi gaw dai hka shi ntsin lu nga ai. ⁷ Dai mung hta e marang n htu ai majaw, tawng marang mi rai jang, dai hka shi gaw hkyet kan mat sai. ⁸ Shaloi Yehowa a ga shi kaw du nna, ⁹ Rawt u, Sidun maung na Zarephta mare de htawt nga u: yu u, dai yang na gaida jan langai mi nang hpe bau na, ngai hkangda se ai, ngu wu ai. ¹⁰ Shingrai shi rawt nna Zarephta de sa wa ai; mare chyinghka lam e du jang, yu u, hpun hta ai gaida jan langi mi nga ai rai nna, Elia gaw, Ataw, ngai lu na ntsin loi mi sa jaw e law, ngu nna, shi hpe shaga wu ai. ¹¹ Shi gaw ntsin sa la na wa nga yang, bai Elia gaw, Muk hkyep mi mung la sa rit, ngu nna hpyi dat wu ai. ¹² Shaloi gawda jan gaw, Na a Karai Kasang Yehowa hkrung nga ai hte maren, ngai muk pa mi pyi n lu nngai; di bu hta muk shadung latup mi hte, namtau hta namman kaji mi sha rawng nga ai; nga hpun hkyep langai lahkawng sa hta nna, dai hpe nye a matu mung, ngai sha a matu mung shadu ngut yang she, an lahkawng sha nna, si na saga ai, ngu nna htan wu ai. ¹³ Bai Elia gaw, Hkum tsang et; nang tsun ai hte maren sa galaw timung, nye a matu muk pa kaji shawng shadu nna sa jaw rit; dai hpang, na a matu mung nsha a matu mung shadu tawn u. ¹⁴ Kaning rai nme law, Israela Karai Kasng Yehowa ning nga ai: Yehowa gaw ga ntsa e marang ntu shangun ai shani du hkra, dibu na muk shadung gaw ma wa na n rai, namtau na namman mung yawm wa na n rai, nga ai, ngu nna shi hpe htawn tsun wu ai. ¹⁵ Shingrai shi gaw Elia ga hte maren wa galaw nga ai rai nna, shi mung, myihtoi wa mung, shi a nta masha ni mung, nhtoi tsawmra wa sha nga ma ai. ¹⁶ Yehowa gaw Elia n-gup hta htawn tsun ai hte maren, dibu na muk shadung ma wa ai n rai, namtau na namman mung yawm wa ai n rai. ¹⁷ Dai hpang e nta madu jan a kasha gaw machyi wa nna, shi machyi ai gaw rung wa ai hte shi hta nsa n rawng nga ai. ¹⁸ Dai rai nna nta madu jan gaw Elia hpe, Nang Karai Kasang a masha wa e, ngai nang hte hpa daw ga ta? nye yubak mara ngai hpe shadum nna, ngai sha hpe sat kau na matu, nang ngai hpang de shang n hka! Ngu wu ai. ¹⁹ Shaloi Elia gaw, Na nsha ngai hpe jaw rit, ngu nna, shi hpe tsun wu yang, shi gaw kanu a lahpyen hta na dai ma hpe pawn la nna, shi nga ai ntsa gawk de pawn lung wa nhtawm, shi a yupra ntsa e kaleng da wu ai. ²⁰ Yehowa hpe mung shi hpyi nna, Nye a Karai Kasang Yehowa e, ndai ngai shingbyi nga ai gaida jan a kasha hpe sat kau na gaw, nang shi a ntsa e mara shagun da n ni? ngu nna jahtau wu ai. ²¹ Bai shi gaw dai ma ntsa e shi hkum hpe masum lang hkrawn gum nna, Yehowa hpe hpyi let, Nye a Karai Kasang Yehowa e, dai ma a nsoi nsa gaw shi hta bai shang u ga, ngai nang hpe hpyi de ai, ngu nna jahtau wu ai. ²² Yehowa mung Elia a ga hpe madat mara ya nna, dai ma a nsoi nsa gaw shi hta bai shang wa ai hte, shi prawn wa sai. ²³ Shaloi Elia gaw dai ma hpe ntsa gawk de na woi yu wa nhtawm, nta nhku de kanu hpe ap ya let, Yu u, na nsha gaw hkrung wa salit dai, ngu nna shi hpe tsun wu ai. ²⁴ Dai num sha mung, Nang gaw Karai Kasang a masha wa rai nga ai hte, na a n-gup na Yehowa a ga gaw teng nga lu ai hpe, ya ngai chye nga nngai, ngu nna Elia hpe tsun wu ai.

¹ Ya tawng marang mi ngu na, masum ning hta e, Yehowa a ga gaw Elia kaw du nna, Sa wa su, na hkum Ahab hpe madun dan su; ngai gaw ga ntsa e marang htu shangun na we ai, ngu wu ai. ² Shaloi Elia gaw, Ahab hpe shi hkum madun dan na nga, sa wa ai. Samari mung hta e dai hku wa grai hku nga ai. ³ Dai shaloi e Ahab gaw shi a kunhting wa Obedia hpe shaga wu ai. Dai Obedia gaw, Yehowa hpe grai hkrit hkungga ai wa rai nga ai. ⁴ Yezebela gaw Yehowa a myihtoi ni hpe sat kau mu yang, Obedia gaw myihtoi latsa woi la nna, shanhte hpe manga shi shi di karan nna, lungpu hta e makoi da nhtawm, muk hte ntsin jaw nna bau da mu ai. ⁵ Dai shaloi e Ahab gaw Obedia hpe, Dai mung na hka hpawk ni hte ka shi ni mahkra hpe sa tam yu su; lawze hte gumra ni hkrung nga nna, yamnga ni yawng n si mu ga, anhte ushat mu hkrup na nhten, ngu wu ai. ⁶ Shingrai shan lahkawng gaw, dai mung hpesa sawk yu na matu karan nna,Ahab gaw shi hkrai lam mi de, Obedia mung shi hkrai hkrai lam mi hku rai nna, bra hkawm wa ma ai. ⁷ Ya Obedia sa wa nga yang, yu u, Elia gaw shi hte hkrum wu ai; shi mung, Elia re ai hpe chye nna, shi a myiman gum dagup let, Nye a Madu Elia rai nga n hka? Ngu wu yang, ⁸ Elia gaw, rai nga nngai; yu u, Ndai yang Elia rai nga ai lam, na madu hpe wa tsun su, ngu wu ai. ⁹ Obedia gaw, Ngai na a mayam wa si na matu, Ahab a lata hta ap kau na gaw, ngai hpa wa shut ni ta? ¹⁰ Na a Karai Kasang Yehowa hkrung nga ai hte maren, nye a madu nang hpe n sa tam shangun ai, amyu langi mi, mung langai mi muk n nga ai: mung shagu amyu shagu, Shi nang e n nga ai, ma yang, nang hpe teng teng n mu ai gaw, shanhte hpe dagam shangun da mu ai. ¹¹ Ya chyawm gaw, Yu u, Elia nang e rai nga ai, ngu nna na Madu hpe wa tsun su, nang nga nhtawme, ¹² ngai nang kaw nna pru wa yang, Yehowa a Wenyi gaw ngai n chye ai shara de nang hpe woi htawt mat na ra ai: shingrai, ngai Ahab hpe sa tsun yang, shi nang hpe n mu hkrup nna, ngai hpe sat kau na nngai: na mayam, ngai wa chyawm gaw, brang ramprat kaw nna Yehowa hpe hkrit hkungga ni ai. ¹³ Yezebela gaw Yehowa a myihtoi ni hpe sat kau nga yang, ngai chyawm Yehowa a myihtoi latsa hpe manga shi shi di karan nhtawm, lungpu hta makoi da ai hte, shanhte hpe muk mung ntsin mung jaw nna bau da ai gaw, nye a madu hpe n shana ya ma ni? ¹⁴ Ya chyawm gaw, Yu u, Elia nang e rai nga ai, ngu nna na madu hpe wa tsun su, nang nga ndai; shi mahtang ngai hpe sat kau na ni ai, ngu wu ai. ¹⁵ Bai Elia gaw, Ngai dawjau nga ai Zaw nawng zaw wa up ai Yehowa hkrung nga ai hte maren, ngai dai ni jang hkawhkam wa man e paw pru na ring ngai, nga ai. ¹⁶ Shingrai Obedia gaw Ahab hpe sa tau nna tsun dan wu ai; Ahab mung Elia hpe tau la na sa wa ai. ¹⁷ Ahab gaw Elia hpe mu wu yang, shi gaw, Israela amyu hpe sharu shatsang ai wa e, nang rai nit ni? ngu wu ai. ¹⁸ Elia gaw, Ngai wa Israela hpe sharu shatsang ai n rai; nang hkum hte na nji nwa ni gaw, Yehowa hkangda ai ga hpe kau da nna Bala hpara ni hpe hkan nang myit dai majaw she sharu shatsang mu ai. ¹⁹ Dai re ai majaw, Israela masha ni nlang, Bala myihtoi ni mali tsa manga shi hte, Yezebela sha ku e shat jawm sha nga ai. Ashera myihtoi ni mali tsa hpe mung Hkarmela bum de ngai kaw zuphpawng shangun mu law, ngu wu ai. ²⁰ Shingrai Ahab gaw Israela kashu kasha ni mahkra hta na shaga nhtawm, myihtoi ni hpe Hkarmela bum de zuphpawng shangun mu ai. ²¹ Shaloi Elia gaw mung masha ni mahkra hpang de si sa nna, Nanhte gaw lam lahkawng a lapran e gade na hkra hpat wat hkawm nga na myit ta? Yehowa nan Karai Kasang rai nga yang, shi hpe hkan mu; Bala mahtang rai yang, shi hpe hkan mu, ngu mu ai rai nna, mung masha ni gaw ga hkawa mi muk n htan mu ai. ²² Bai Elia gaw mung masha ni hpe, Yehowa myihtoi ngu na gaw ngai chyu sha ngam ni ai; Bala myihtoi ni mahtang mali tsa e manga shi ting rai nga ma ai. ²³ Dai re ai majaw, shanhte gaw usu lahkawng shapraw ya mu ga; shingrai shanhte usu langai mi lata la nna, hpya ngut jang, hpun hta mara da timung, wan n shachyi mu ga; ngai mung de a manang hya nna, hpun hta mara nhtawm, wan n shachyi na nngai. ²⁴ Shingrai nanhte gaw nanhte a Hpara amying hpe shaga mu; ngai mahtang Yehowa amying hpe shaga na nngai: wan hte htan pru ai wa mahtang, Karai Kasang ra wa u ga, ngu mu ai. Mung masha ni nlang hte mung, Dai gaw mai kaja ai ga rai nga ai, nga nna htan ma ai. ²⁵ Bai Elia gaw Bala myihtoi ni hpe, Nanhte law nga myit dai majaw usu langai mi lata la nna, shawng hpya mu; nanhte a Hpara amying hpe shaga timung, wan hkum shachyi myit, ngu mu ai. ²⁶ Shaloi shanhte kaw jaw da ai usu hpe shanhte la nna, hpya tawn nhtawm, Bala e, anhte hpe htan ya mi, ngu nna jahpawt kaw nna jan pungding ga hkra, Bala amying hpe shaga mu ai. Raitimung, hpa nsen ngoi ai mi n na, htan ai wa mung kadai n nga ai rai nna, shanhte gaw galaw tawn ai tawn hkungri grupyin e ka gumlawt nga ma ai. ²⁷ Ya jan pungding e rai jang Elia gaw, Aja awa jahtau yu mu; shi gaw Hpara rai nga ai hka; myitsumru yu nga ai nhten, shing n rai lama ma hkan tam sa ai; lam hkawm nga ai nhten, shing n rai yup pyaw nga nna jasu ra ai, ngu nna shanhte hpe asawng mu ai. ²⁸ Shaloi shanhte gaw aja awa jahtu nn, htung nga ai hte maren, tinang hkum hpe asai pru hkra, ri nhtu hte jahpye kau mu ai. ²⁹ Shingrai shanhte gaw jan kayau kaw nna shana hkungga jaw ang ai aten du hkra, myihtoi htoi shajang ma timung, nsen ngoi ai mi n na, htan ai wa mung kata, sawn nawn ai wa mung kadai n pra nga ai. ³⁰ Shaloi Elia gaw mung masha ni mahkra hpe, Ngai hpang de sit wa marit, ngu nna tsun mu yang, mung masha ni nlang shi kawa sit sa ma ai. Sharun shabya hkrum ai Yehowa a tawn hkungri hpe mung shi lajang da wu ai. ³¹ Shingrai. Na a amying hpe Israela ngu na ra ai, nga nna Yehowa a ga pru ang ai hte maren, Elia gaw, Yaku a shadang sha n a amyu lakung ni a nambat hkan nna nlung shi lahkawng la wu ai. ³² Yehowa amying gang let shi dai nlung ni hte tawn hkungri galaw nna, dai hkungri grupyin e nli dang lahkawng dang shang ai hka hkawng htu wu ai. ³³ Hpun hpe ahpreng nhtawm, dai usu hpe shi hpya nna, hpun ntsa e mara da wu ai. ³⁴ Bai shi gaw, yam mali hta ntsin jahpring nna, wan nat hkungga hte hpun a ntsa e jaw bun mu, ngu mu ai. Bai, Naw jaw mu, ngu mu ai hte maren bai jaw bun ma ai. ³⁵ Ntsin gaw tawn hkungri grupyin e lwi nga ai hte, hka hkawng mung ntsin hte jahpring wu ai. ³⁶ Ya shana hkungga jaw ang ai aten e, myihtoi Elia sit sa nna, Abraham a, Isak a, Israela a Karai Kasang Yehowa e; nang gaw Israela amyu hta Karai Kasang rai nga ai mung, ngai gaw na a shangun ma rai nga nngai mung, ndai ngai galaw ai yawng gaw, na a mungga hte ngai galaw nngai mung, daini jawng chye lu hkra shapraw dan u: ³⁷ nang Yehowa nan, Karai Kasang rai nga ndai gaw, ndai amyu masha ni chye lu nna, nang shanhte a myit masin hpe nhtang kayi shangun ai gaw, danpru hkra, madat mara ya e, Yehwoa e, madat mara ya e law, ngu nna hpyi wu ai. ³⁸ Shaloi Yehowa a wan di hkrat nna, wan nat hkungga hpe, hpun hpe, nlung ni hte shingbut hpe hkru kau ai hte, hka hkawng na ntsin hpe mung shahkyet kau wu ai. ³⁹ Mung masha ni dai hpe mu yang, nlang hte gaw myiman gum dagup nna, Yehowa gaw Karai Kasang rai nga ai; Yehowa gaw Karai Kasang rai nga ai law, nga ma ai. ⁴⁰ Shingrai Elia gaw, Bala myihtoi ni hpe rim la mu; langi mi muk n lawt u ga, ngu mu ai hte maren, shanhte hpe rim la nhtawm, Elia gaw Kishon hka shi de woi sa nna, dai yang e shanthe hpe sat kau mu ai. ⁴¹ Shaloi Elia gaw Ahab hpe, lung wa su, lusha nga u; marang kaba zawn wu ngoi nga ai, ngu wu ai. ⁴² Shingrai Ahab gaw lusha na matu lung wa sai. Elia chyawm gaw, Hkarmela bum pungding de lung nna, ga de gum dagup let, shi a myiman lahput lapran e matep nna, ⁴³ shi a mayam wa hpe, lung wa su, nammkdara de yu yu e, ngu wu ai hte maren, shi mada yu yang, Hpa mung n nga ai, ngu wu ai. Bai Elia gaw, Shingrai sanit lang du hkra sa yu yu u, ngu wu ai. ⁴⁴ Ya sanit lang nu na hta sa yu yang, mayam wa gaw, Yu u, masha lata daram kaji ai sumwi gaw nammukdara na dawng pru nga ai, ngu nna tsun wu ai. Dai rai nna Elia gaw, lung wa nna Ahab hpe, Marang gaw nang hpe n hkap hkum yang gaw, na a leng alawan hkyen tawn nna yu wa su, ngu u, ngu nna htet dat wu ai. ⁴⁵ Shingrai gade n na yang, lamu gaw laru marang hte chyang mang wa nna, marang ja ja htu nga ai. Ahab mung leng jawn let, Yezrela de du wa ai. ⁴⁶ Yehowa a lata gaw Elia hta rai nga nna, shi shingkyit kyit nhtawm, Yezrela mare chyinghka lam de Ahab a shawng e gat du wu ai.

¹ Ya Ahab gaw Elia galaw ai lam yawng hte, myihtoi ni nlang hte hpe nhtu hte sat kau ai lam, Yezebela hpe tsun dan wu ai. ² Shingrai Yezebela gaw Elia hpang de kasa shangun dat nna, Hpawt de ndai aten e, na a asak hpe shanthe hta na langi mi a asak hte maren ngai n di yang gaw, Hpara ni ngai hpe dai hta grau na di mi ga law, nga ai. ³ Elia gaw dai na wu yang, asak lawt hkra rawt nna, Yuda mung na Bera-sheba de hprawng nhtawm, shi a mayam wa hpe dai yang e jahti da wu ai. ⁴ Shi hkum hkrai lani mi sat nam mali de naw lai sa nna, marau hpun npu e dung nga let, si mayu nna hpyi ai gaw, Yehowa e, ya ram sai; nye a asak dawm la ya ni; gnai gaw ji wa ni hta akyu grau rawng nngain rai, ⁵ nga nna maru hpun npu e kaleng yup pyaw wa sai; shaloi yu u, lamu kasa langai mi shi hpe ahtawk let, Rawt u, shat sha u, ngu nna shi hpe tsun wu ai. ⁶ Mada yu wu yang, yu u, shi a baw nhpang e wan n-ga hta kakang ai muk pa hte ntsin namtau mu wu ai. Shi mung lusha nna bai kaleng taw nga ai. ⁷ Yehowa a lamu kasa mung bai sa nna, shi hpe ahtawk let, Rawt u, shat sha u, nang sa wa na lam gaw na a matu naw yak la nga ai, ngu wu ai. ⁸ Shaloi shi gaw rawt nna lusha nga ai hte, dai lusha hta n-gun lu la nna, Karai Kasang a bum Horeb de hkra, shani mali shi ya, shana mali shi na hkawm sa wa ai. ⁹ Shaloi shi gaw lungpu langai mi de du nna, dai yan ge nga nga ai; Yehowa a ga mung shi kaw du nna, Elia e, nang nang e hpa galaw nga n ta? ngu nna shi hpe san wu ai. ¹⁰ Elia gaw, Ngai wa, Zaw nawng zaw wa up ai Karai Kasang Yehowa a lam myit grai yu kahtet ni ai; hpa majaw nga yang, Israela kashu kasha ni gaw na a ga shaka lam kau da nna, na a tawn hkungri ni hpe sharun shabya ku ai hte, na a myihtoi ni hpe nhtu hte sat kau mu ai: ngai hkum hkrai sha hti nga nna, ngai hpe mung sat kau na tam nga ma ai, nga ai. ¹¹ Bai Yehowa gaw, Pru u, dai bum ntsa e Yehowa man e tsap nga u, ngu wu ai. Shaloi, yu u, Yehowa law wa nna, grai ja ai nbung laru gaw Yehowa man e bum ni hpe jaga kau nna, lung hkrung ni hpe agrawp kau mu timung, Yehowa gaw da nbung laru hta lawm nga ai n rai; nbung laru a hpang e nnang nawn timung, Yehowa gaw dai nnang nawn hta lawm nga ai n rai, ¹² nnang ngawn a hpang e wan grung timung Yehowa gaw dai wan hta lawm nga ai n rai;dai wan a hpang e angwi sha nga ai nsen shara nga ai. ¹³ Elia gaw dai na jang, shi a myiman hpe hpajawng hte lawai magap nhtawm, pru wa nna lungpu mahka e tsap nga ai. Shaloi, yu u, nsen langai mi gaw, Elia e, nang nang e hpa galaw nga n ta? ngu nna shi hpe san wu ai. ¹⁴ Elia gaw, Ngai wa, Zaw nawn zaw wa up ai Karai Kasang Yehowa a lam myit grai yu kahtet ni ai; hpa majaw nga yang, Israela kashu kasha ni gaw na a ga shaka lam kau da nna, na a tawn hkungri ni hpe sharun shabya kau ai hte, na a myihtoi ni hpe nhtu hte sat kau mu ai: ngai hkum hkrai sha hti nga nna, ngai hpe mung sat kau na tam nga ma ai, nga ai. ¹⁵ Bai Yehowa gaw, Rawt u, Damasku nam mali hku bai wa u; dai yang du jang, Hazaela hpe Suru hkawhkam tai na matu, namman chya ya na ndai; ¹⁶ bai, Israela hkawhkam tai na matu Nimshi a kasha Yehu hpe namman chya ya na ndai; bai, na a malai myihtoi tai na matu, Abela-mehola mare na Shahpat a kasha Elisha hpe namman chya ya na ndai. ¹⁷ Shingrai, Hazaela nhtu hte lawt ai wa hpe, Yehu sat kau na ru ai; Yehu a mhtu hte lawt ai wa hpe, Elisha sat kau na ru ai. ¹⁸ Raitimung, Bala man e lahput n hput di nna, shi hpe n pup yu ai, Israela masha hkying sanit hte hpe ngai naw jahti da na nme ai, ngu wu ai. ¹⁹ Shaloi shi sa wa nna, Shahpat a kasha Elisha hpe mu hkrup wu ai: shi gaw utang gap shi lahkawng hte hkaibang galau nna, shi hkum shi lahkawng ngu na gap hta lawm nga ai; shaloi Elia shi hpang de sit sa nna, shi a hpajawng Elisha ntsa e kabai mara ya wu ai. ²⁰ Shingrai shi gaw utang ni hpe kau da ai hte Elia hpang de gat nang nna, Nye nu wa ni hpe naw pup da n ga, dai hpang nang kaw hkan nang na nngai, ngu nna tsun wu yang, Elia gaw, Wa su, ngai nang hpehpa di de ta? ngu wu ai. ²¹ Elisha mung bai wa nna, shi a utang gap mi la sat nhtawm, nga shan he nahtai hking rai ni hte shadu nna, masha ni hpe jaw wu ai hte, shanhte mung sha nga ma ai. Dai hpang shi rawt nna, Elia kaw hkan let shi hpe dawjau nga ai.

¹ Dai shaloi e Suri hakwhkam Ben-hada gaw shi a hpyen luksuk ni nlang hte hpe shaga jahapwng da mu ai; hkawhkam sumshi lahkawng hte, gumra jawn ai ni leng jawn ai ni, shi hte rau nga ma ai: shingrai shi rawat nna Samari mare hpe wang tawn nna gasat da wu ai. ² Bai shi gaw, mare kata de, Israela hkawhkam Ahab hpang de kasa shangun dat nna, Benhada gaw ning nga ai: ³ Na a ja gumhpraw nye a rai nga ai; rau tsawm htap ai, na a madu jan ni mung, na nshu nsha ni mung, nye a rai nga ai, ngu nna htet dat wu ai. ⁴ Israela hkawhkam wa gaw, Nye a madu hkwahkam wa e, nang tsun ai hte maren rai y ga; ngai mung, ngai lu malu mung, na a rai nga ai, ngu nna htan dat wu ai. ⁵ Kasa ni chyawm gaw bai sa nna, Benhada gaw ning nga ai: Na a ja gumhpraw, na a madu jan ni, na a kashu kasha ni hpe, nang nye a lata hta hp ya na hta n-ga, ⁶ hpawt de ndai aten e ngai nye a shangun ma ni hpe shangun dat nna, na a nta hpe mung, na a ali ama ni a nta ni hpe mung sawk yu nna, nang jahpu da ai arai ni hpa hpe raitimung, shanhte shaw la nhtawm hpai la na mu ai, ngu wu ai. ⁷ Shaloi Israela hkawhkam wa gaw mung na agyi salang ni nlang hte hpe shaga la nna, Ndai wa gaw gade wa kajam mayu ai myit rawng nga ai gaw, mada yu mu: shi nye a madu jan ni, kashu kasha ni hte aja gumhprawa ni hpe hpyi shangun yang, ngai wa hpa mung ndang kau we ai n rai, ngu mu ai. ⁸ Mung masha ni hte agyi salang ni mahkra gaw, Hkum madat, hkum galaw u, ngu nna shi hpe tsun mu ai. ⁹ Dai re ai majaw shi gaw Benhada kasa ni hpe, Nye madu hkawhkam wa hpe ning ngu mu: Shawng de na a mayam wa kaw nang hpyi shangun ai lam mahkra hpe ngai hkan galaw na nngai; ya nang tsun ai chyawm gaw n galaw lu na nngai, nga ai, ngu mu, ngu mu ai. ¹⁰ Bai Benhada gaw shangun nna, Ngai hpe hkan nang ai masha ni mahkra a matu, Samari mare na ga nhpu latup tup law nga yang, Hpara ni ngai hpe grau nna di mi ga, ngu nna shi hpe tsun wu ai. ¹¹ Shaloi Israela hkawhkam htan nna, Shingkyit kyit la ai wa gaw, shingkyit raw ai wa zawn hkum gumrawng nga u ga, ngu mu, ngu mu ai. ¹² Ya Benhada gaw, hkawhkam ni hte rau nta jan e chyaru lu nga let, dai ga na wu jang, shi gaw, Hkyen tawn mu, ngu nna ali ama ni hpe tsun mu yang, shanhte gaw mare a man e hkyen tawn nga ma ai. ¹³ Shaloi myihtoi langai mi gaw Israela hkawhkam Ahab hpang de sit sa nna, Yehowa ning nga ai: Ndai masha ga da ga hpe nang mu da wu ni? Yu u, ngai Yehowa rai nga nngai gaw nang chye lu hkra, dai ni pyi ngai shanhte hpe na a lata hta ap ya na de ai, ngu wu ai. ¹⁴ Shaloi Ahab gaw, Gade a lata hte rai ta? ngunna san wu yang, myihtoi wa gaw, Yehowa ning nga ai: Mungdaw ginwang a du ni a shabrang ni hte re ai, ngu wu ai. Bai hkawhkam wa gaw, Kadai shawng htim na rai ta? ngu nna naw san wu yang, myihtoi wa gaw, Nang rai ndai, ngu nna htan wu ai. ¹⁵ Dai rai nna hkawhkam wa gaw Mungdaw du ni a shabrang ni hpe hti yu nna, shanhte gaw ni tsa e sumshi lahkawng rai nga ma ai; dai hpang Israela a kashu kasha ni a hpyen masha ni mahkra hpe bai hti yu wu yang, shanhte gaw hkying sanit rai nga ma ai. ¹⁶ Shingrai shanhte gaw jan pungding ga hpawa e pru wa ma ai. Benhada chyawm gaw shi hpe shingdep nga ai hkawhkam sumshi lahkawng hte rau, nta jan e chyaru ngan nga ma ai. ¹⁷ Ya Mungdaw du ni a shabrang ni shawng pru ma ai: Ben-hada mung masha shangun dat nna shanhte gaw, Samari mare de na masha pru wa masai, ngu nna wa tsun dan mu ai. ¹⁸ Bai Ben-hada gaw, Ngwi pyaw ai lam hte raitimung, majan baw na matu raitimung, pru sa wa ai ni hpe jahkrung rim tawn mu, ngu mu ai. ¹⁹ Shingrai Mungdaw du ni a shabrang ni hte, shanhte kaw hkan nang ai hpyen luksuk ni gaw dai mare de na pru wa ma ai rai nna, ²⁰ shanhte langai hte langai dek hpyen ni hpe sat kau mu ai: Suri masha ni hprawng nna, Israela masha ni hkan shachyut ma ai: Suri hkawhkam Benhada mung, shi a gumra jawn ai ni hte rau, gumra hta hprawng lawt lu ai. ²¹ Israela hkawhkam mung pru wa nhtawm, gumra ni hpe mung, leng jawn ai ni hpe mung sat kau mu ai hte, Suri masha ni hpe nhtum nni sat shaza kau mu ai. ²² Bai dai myihtoi wa gaw Israela hkawhkam hpang de sit sa nna, Da ting nga u; nang galaw ai amu a lam myit yu nna sadi nga u: ladu hkrum jang Suri hkawhkam nang hpe gasat na nga, bai lung wa na ra ai, ngu nna tsun wu ai. ²³ Suri hkawhkam a ali ama ni mahtang hkawhkam wa hpe, Shanhte a Hpara gaw bum ga na Hpara rai nga ai; dai re ai majaw shanhte anhte hpe dang kau mi ai: raitimung, layang ga e gasat ga; dai rai yang she, anhte shanhte hpe dang kau lu n gaw ai. ²⁴ Shingrai galaw mu: hkawhkam ni mahkra hpe jahkrat kau nna, shanhte a malai hpyenbu ni hpe san da ga; ²⁵ nang sum mat ai luksuk ni hte gumra ni hpe mung, leng ni hpe mung, maren law hkra naw shaga tawn nna, anhte layang ga e shanhte hpe sa gasat nna, gaja wa shanhte hpe dang kau lu na gaw ai, nga nna hpaji daw ma ai. Hkawhkam wa mung shanhte a ga madat nna, dai lam hkan galaw wu ai. ²⁶ Ya ladu hkrum yang Benhada gaw Suri masha ni hpe hti yu nna, Israela masha ni hpe gasat na nga, Ahpek shara de lung wa ma ai. ²⁷ Israela kashu kasha ni hpe mung hti yu nna, lam jarit shachyip nhtawm, shanhte hpe sa hkap tau mu ai: Israela kashu kasha ni gaw shanhte a man e bainam kasha hpung kaji lahkawng zawn dap jung nga ma ai; Suri masha ni chyawm gaw mung ting pri rai nga ma ai. ²⁸ Shaloi Karai Kasang a masha wa gaw Israela hkawhkam hpang de sit sa nna, Yehowa ning nga ai: Yehowa gaw bum ga na Hpara rai nga ai, layang ga na Hpara n rai nga ai law, nga nna Suri masha ni tsun shajang ma ai majaw, ngai gaw Yehowa rai nga nngai, nanhte chye lu hkra, ndai masha wunawng wuwa kaba hpe na a lata hta ngai ap da na we ai, ngu nna htawn tsun wu ai. ²⁹ Shingrai shanhte gaw sanit ya tup shada tawtap e dap jung nhtawm, sanit ya ngu na nhtoi hta shanhte hpyen gasat nna, Israela kashu kasha ni gaw Suri hpyen masha sen mi hpe dai shani jang sat kau mu ai. ³⁰ Ngam nga ai ni gaw Ahpek mara kata de hprawng nna, mare bunghku daw wa ai hte, ngam nga ai hpyen masha mun lahkawng hkying sanit hpe kamyet sat kau mu ai. Benhada mung hprawng nna, mare kata na gawk ni hta makoi nga ai. ³¹ Shaloi shi a ali ama ni gaw, Yu u, Israela hkawhkam ni gaw matsan dum chye ai hkawhkam ni rai nga ma ai hpe, anhte na yu sagaw ai; dai rai nna, anhte lachyit nba bu hpun ai hte baw hta sumri ahkyen nna, Israela hkawhkam hpang de sa na ahkang jaw mi; shi na a asak hpe mahkoi jahkrung da na nhten, ngu nna hkawhkam wa hpe tsun mu ai. ³² Shingrai shanhte gaw lachyit nba hpe shingkyit hte kyit nna, baw hta sumri ahkyen nhtawm, Israela hkawhkam hpang de sa du nna, Na a mayam Benhada gaw, Ngai asak naw hkrung nga n ga, nga ai, ngu nna hpyi nem mu ai. Ahab gaw, Shi naw hkrung nga a ni? shi ngai hpu rai nga ai, ngu mu ai. ³³ Shanhte gaw dai lam atsawm sha madat la nna shi a ga hpe alawan hkap htan yang, Rai gaw, Benhada na nnau rai nga ai, ngu nna tsun mu yang, shi gaw, Shi hpe ngai kaw woi wa marit, ngu mu ai. Shingrai Benhada gaw shi hpang de sa du nna, Ahab a hpyen leng hta jawn na ahkang lu la wu ai. ³⁴ Shaloi Benhada gaw, Nye wa gaw na nwa kaw na kashun la ai mare ni hpe ngai bai jaw na de ai; nye wa gaw Samari mare hta e mare lam madat d ai hte maren, nang mung damasku mare hta e mare lam madat da na rin dai, ngu nna tsun wu ai. Ahab mung, Rai sa, ndai ga shaka hte ngai nang hpe dat dat na de ai, ngu wu ai. Shingrai shi hte ga shaka tawn da nna, shi hpe dat dat wu ai. ³⁵ Ya myihtoi sape ni hta na marai langai mi gaw, Yehowa ga hku hkan nna shi a mangang wa hpe, Ngai hpe jahpye ya e, ngu nna tsun wu yang, shi n hkraw wu ai. ³⁶ Shaloi shi gaw, Nang Yehowa a ga n madat ndai majaw, ngai kaw na pru wa jang, nang hkanghkyi hkrum na ndai, ngu wu ai hte maren, gaja wa shi pru wa jang hkanghkyi hte hkrum nna si wa sai. ³⁷ Dai hpang kaga wa hte hkrum nna, Ngai hpe jahpye ya e, ngu wu yang, dai wa gaw shi hpe kayat jahpye ya wu ai. ³⁸ Shingrai dai myihtoi wa gaw pru nna, lam makau e hkawhkam wa hpe a la nga let, shi a bunghkaw hte myiman hpe magap da wu ai. ³⁹ Ya hkawhkam wa lai wa yang, dai wa gaw, Na mayam wa hpyen gasat ai de lawm nga ai; shaloi marai langai mi sit sa nna bawng langai mi nye a lata hta ap ya let, Ndai wa hpe sin u; shi hprawng wa yang shi a asak a malai na a asak sum na ra ai; shing n rai, gumhpraw joi hkying mi wa lu na ndai, nga nna ngai hpe tsun ai. ⁴⁰ ngai na mayam wa gaw, amu wora lera galaw nga yang shi hprawng mat wa lu ai, ngu nna hkawhkam wa hpe tsun wu ai. Shaloi Israela hkawhkam wa gaw, Dai lam jeyang ya u ga; nang chyu hparan ya nit dai, ngu nna shi hpe htan wu ai. ⁴¹ Shaloi dai wa gaw shi a myiman magap ai bunhkaw alawan raw dat nna, dai wa gaw myihtoi ni hta lawm ai wa rai nga ai, Israela hkawhkam hten wu ai. ⁴² Bai dai myihtoi wa gaw hkawhkam wa hpe, Yehowa ning nga ai: Sat kau na matu ngai dawdan kau ai wa hpe nang dat dat ndai majaw, shi a asak a malai na a asak, shi a mayu a malai na a amyu htum mat na mara ai, ngu nna htawn tsun wu ai. ⁴³ Israela hkawhkam wa mung myit ru ai hte nji nmu nga let shi a nta de wa nna, Samari mare hta dung nga ai.

¹ Ya dai amu ni byin ai hpang, Yezrela masha Nabot gaw, Yezrela mare hta e tsabyi sun langai mi lu ai; dai sun gaw Samari hkawhkam Ahab a htingnu hte ni nga ai. ² Dai rai nna Ahab gaw Nabot hpe, Na a tsabyi sun nye a nta hte ni nga ai majaw, ngai dai hpe shatmai sun shatai na matu, ngai hpe jaw e; ngai nang hpe grau kaja ai tsabyi sun galai ya na de ai; shing n rai, nang tsaw n yang gaw, jahpu raitimung jaw na de ai, ngu nna tsun wu ai. ³ Shaloi Nabot gaw, Ji wa ni a sali wunli ga hpe nang hpe jaw kau na gaw, Yehowa hkum kau u ga, ngu nna Ahab hpe tsun wu ai. ⁴ Shingrai, Ngai ji wa ni a Sali wunli ga nang hpe n jaw na de ai, nga nna Yezrela masha Nabot gaw Ahab hpe tsun wu ai majaw, shi gaw myit ru nna nji nmu let shi a nta de bai wa nhtawm, yupku hta kaleng taw let, myiman makoi kau nna, shat n sha hkraw ai. ⁵ Dai re ai majaw shi a madu jan Yezebela gaw shi kaw sa du nna, Nang shat n sha hkra, hpa rai myit ru nga n ta? ngu nna shi hpe san wu ai. ⁶ Shi gaw, Yezrela masha Nabot hpe ngai shaga nna, Ataw, na a tsabyi sun ngai hpe dut ya e; shing n rai, nang tsaw n yang gaw, de a malai grau kaja ai tsabyi sun jaw na de ai, ngu nna hpyi we yang, ngai nye a tsabyi sun nang hpe n jaw lu na nngai, nga nna shi ngai hpe tsun ai majaw rai nngai, ngu nna Yezebela hpe htan wu ai. ⁷ Dai rai nna shi a madu jan Yezebela gaw, Nang Israela mungdan hpe up nga ai n rai ni? rawt u, shat sha nna pyaw pyaw nga u: ngai mahtang Yezrela masha Nabot a tsabyi sun nang hpe sakjaw na de ai, ngu nna shi hpe tsun shalan wu ai. ⁸ Shaloi shi gaw Ahab a amying hte laika ka nna, Ahab a dazik dawk da nhtawm, dai laika ni hpe Nabot a mare e nga ai agyi salang ni hpang de shagun dat wu ai. ⁹ Dai laika ni gaw ning nga nga ai: Lusha gam ai aten madat da nna, mung masha ni hta reng grau ai shara e Nabot hpe shadun mu: ¹⁰ shingrai, n hkru ai masha lahkawng shi a man e shapraw nna, Nang gaw Karai Kasang hpe mung, hkawhkam wa hpe mung matsa kau ndai, ngu nna sakse hkam shangun mu: dai hpang shi hpe shapraw nhtawm, nlung hte kabai sat kau mu, nga ai, ngu nna ka dat wu ai. ¹¹ Ya dai mare na agyi salang ni hte hpung rawng ai ni gaw, Yezebela shanhte hpang de ka dat ai laika hte maren galaw ma ai. ¹² Shanhte lusha gam ai aten madat da nna, mung masha ni hta reng grau ai shara e Nabot hpe shadun da mu ai. ¹³ Shaloi dai n hkru ai masha lahkawng gaw Nabot a man e sa dung nna, shan gaw mung masha ni a man e, Nabot gaw Karai Kasang hpe mung, hkawhkam wa hpe mung matsa kau wu ai, nga nna shi a lam sakse hkam ma ai. Dai hpang, dai mare de na shi hpe shapraw nhtawm, nlung hte kabai sat mu ai. ¹⁴ Shingrai shanhte gaw Yezebela hpang de shangun nna, Nabot hpe nlung hte kabai nna, shi si mat sai, ngu dat mu ai. ¹⁵ Nabot hpe nlung hte kabai nna shi si mat sai hpe, Yezebela na wu yang, shi Ahab hpe, Rawt u, Yezrela masha Nabot nang hpe ndut ya hkraw ai tsabyi sun hpe madu la u; Nabot gaw hkrung nga ai n rai, si mat sai da, ngu nna tsun wu ai. ¹⁶ Ya Ahab gaw Nabot si ai lam na wu yang, Yezrela masha Nabot a tsabyi sun madu la na nga, rawt yu wa ai. ¹⁷ Shaloi Yehowa a ga Tishbi masha Elia kaw du nna, ¹⁸ Rawt u, Samari mare e dung nga ai Israela hkawhkam Ahab hpe sa tau su: shi gaw Nabot a tsabyi sun hpe madu la na nga, yu wa sai. ¹⁹ Shi hpe ning ngu u; Yehowa ning nga ai: Nang asak mung sat, shi a sut rai mung madu la nu ni? bai Yehowa ning nga ai, Gwi ni gaw Nabot a sai hpe mata lu ai shara hta e, na a sai hpe mung mata lu na mara ai, nga ai, ngu nna htawn tsun wu ai. ²⁰ Dai rai nna Ahab gaw, Ngai hpe hpyen ai wa e, nang ngai hpe mu da n ni? ngu nna Elia hpe tsun wu ai. Elia gaw, Nang Yehowa man e n kaja ai amu galw na nga, na hkum hpe dut kau nu ai majaw, ngai nang hpe mu de ai. ²¹ Yu u, ngai na a ntsa e tsin-yam tsindam shangun dat nna, nang hpe atsai awai ye kau na de ai; Ahab a amyu a lasha ma nlang hte hte, Israela hta bawngdung nga bawng lawt pra ai ni hpe htau di kau na we ai: ²² nang ngai hpe shapawt nna, Israela amyu hpe yubak galaw shangun ai majaw, ngai na nta hpe, Nebat a kasha Yeroboam a nta hpe zawn, bai, Ahiya kasha Basha nta hpe zawn, di kau ya na de ai, ngu wu ai. ²³ Bai Yehowa Yezebela a lam hpe mung, Gwi ni gaw Yezrela bunghku makau e Yezebela hpe sha kau na mu ai. ²⁴ Ahab hte seng ai wa mare hkan e si yang gwi ni e sha kau ai hkrum na mara ai; pa hkan e si yang, ntsa malen u ni e sha kau ai hkrum na mara ai, nga ai. ²⁵ Hpa majaw nga yang, Ahab zawn Yehowa man e n kaja ai amu galaw na nga, tinang hkum hpe dut kau ai wa kaga kadai mung n nga ai; shi a madu jan Yezebela mung shi hpe shatsam wu ai. ²⁶ Israela kashu kasha man na Yehowa shachyut kau ai Amori masha ni hkan galaw ai sumla ni nawku ai matsat shabat lam shagu hta, shi htep lahti hkan nang nga ai. ²⁷ Ya Ahab gaw dai ga na jang, shi a hpun nba gang je kau nhtawm, lachyit nba dagraw nna, lusha gam let, lachyit nba hta kaleng taw ai hte yawn hkawm nga ai. ²⁸ Shingrai Yehowa a ga Tishbi masha Elia kaw du nna, ²⁹ Ahab gaw nye a man e kaning rai myit nem nga ai gaw, nang mu da wu ni: shi nye a man e myit nem nga ai majaw, ndai tsinyam tsindam hpe shi a aprat hta n rai, kasha aprat hta e she, shi a nta ntsa e, ngai shapraw dat na we ai, ngu wu ai.

¹ Ya masum ning tup Suri masha ni hte Israela masha ni a lapran e hpyen majan sim nga ai. ² Ya masum ning ngu na hta e Yuda hkawhkam Yehosahpat, Israela hkawhkam hpang de sa du ai. ³ Shingrai Israela hkawhkam shi a ali ama ni hpe, Ramot-gilead mare gaw anhte a mare rai nga timung, anhte atsin sha nga nna, Suri hkawhkam a lata na n kashun la ai gaw, nanhte chye nga myit ni? ngu mu ai. ⁴ Bai shi gaw Yehosahpat hpe, Nang ngai hte rau hpyen gasat na matu, Ramot-gilead de lung wa na n ni? ngu wu ai. Yehosahpat gaw, Ngai wa nang zawn, nye a amyu na a amyu zawn, nye a gumra ni na a gumra ni zawn rai nga ai, ngu nna Israela hkawhkam hpe htan wu ai. ⁵ Bai Yehosahpat gaw, Dai ni jang anhte Yehowa hpe ga naw san yu ga, ngu nna Israela hkawhkam wa hpe tsun wu ai. ⁶ Shaloi Israela hkawhkam gaw myihtoi mali tsa daram jahpawng tawn nhtawm, Ngai gaw Ramot-gilead de hpyen gasat na, sa mai n sa mai na a kun? Ngu nna shanhte hpe san yu mu yang, shanhte gaw, Lung wa su; Yehowa Madu dai mare hpe hkawhkam wa a lata de ap ya na ra ai, ngu nn htan mu ai. ⁷ Raitimung, Yehosahpat gaw, Anhte Yehowa hpe san yu lu na, shi a myihtoi langai ngai naw nga a ni? ngu nna san wu yang, ⁸ Israela hkawhkam wa gaw, Yehowa hpe san yu lu na, Imla a kasha Mihkaia ngu ai wa langai mi naw nga ai: raitimung, kadai wa hpe ngai ndawng we ai; shi nye a lam n kaja ai hku hkrai hkaw ya ya re ai, ngu nna Yehosahpat hpe tsun wu ai. Yehosahpat chyawm gaw, Hkawhkam wa dai lam n tsun u ga, ngu wu ai. ⁹ Shaloi Israela hkawhkam gaw shangun ma langai mi hpe shaga nna, Imla kasha Mihkaia hpe alawan shaga wa rit, ngu dat wu ai. ¹⁰ Ya Israela hkawhkam hte Yuda hkawhkam Yehosahpat gaw hkawhkam hpun palawng bu hpun let, Samari mare na chyinghka lam a ndaw e, tinang a tingnyang hta dung nga ma ai rai nna, myihtoi ni mahkra gaw shan a man e htoi nga ma ai. ¹¹ Hkenana kasha Zedekia gaw hpri nrung galaw nna, Yehowa ning nga ai: Suri masha ni hpe shaza kau lu hkra, ndai nrung hte nang shanhte hpe daru kau na mu ai, nga ai, ngu wu ai. ¹² Myihtoi ni mahkra mung, Ramot-gilead de lung gasat nna awng wa nu; Yehowa dai mare hpe hkawhkam wa a lata de ap ya na ra ai, ngu nna hkaw ya mu ai. ¹³ Ya Mihkaia hpe sa shaga ai kasa gaw, Yu u, myihtoi ni yawng hkawhkam wa hpe n-gup langai hte sha kaja ai hku hkrai hkaw ya manu ai; dai majaw nang mung shanhte hte maren kaja ai hku sha hkaw ya u, ngu nna shi hpe hpyi wu ai. ¹⁴ Mihkaia gaw, Yehowa hkrung nga ai hte maren, Yehowa ngai hpe tsun ai hte sha ngai htawn tsun na nngai, ngu wu ai. ¹⁵ Ya shi gaw hkawhkam kaw du yang hkawhkam wa gaw, Mihkaia e, an gaw Ramot-gilead de hpyen gasat na matu, sa mai n sa mai na kun? ngu nna sa wu yang, shi gaw, Lung gasat nna, awng wa nu; Yehowa dai mare hpe hkawhkam wa a lata de ap ya na ra ai, ngu wu ai. ¹⁶ Hkawhkam wa mahtang gaw, Yehowa amying hte tengman ai ga hta kaga nang ngai hpe hpa mung n tsun ai gaw, nang hpe gade lang shadum na rai ta? ngu nna shi hpe tsun wu ai. ¹⁷ Shaloi shi gaw, Sagu rem wa n nga ai sagu ni zawn, Israela masha ni yawng bum ga hkan e bra nga ma ai hpe, ngai mu nngai; Yehowa mung, Ndai ni gaw madu n lu m ai; langai hte langai tinang a nta de ngwi pyaw ai hte nhtang wa manu ga, nga ai, ngu wu ai. ¹⁸ Shingrai Israela hkawhkam gaw Yehosahpat hpe, Ndai wa nye a lam kaja ai n rai, n kaja ai hku sha hkaw ya ya re ai, ngu nna ngai nang hpe tsun ni ai, n rai ni? ngu wu ai. ¹⁹ Bai Mihkaia gaw, Dai re ai majaw Yehowa a ga madat mara ya u: Yehowa gaw shi a tingnyang hta dung nna, sumsing lamu na zaw nawng zaw wa ni, shi a hkra maga hte pai maga de tsap nga ma ai hpe, ngai mu nngai. ²⁰ Yehowa mung, Ahab gaw Ramot-gilead de lung wa nna si wa hkra, shi hpe kadai wa woi lau lu na rai ta? nga ai rai nna, langai mi gaw ndai lam, kaga wa gaw wora lam tsun shajang ma ai. ²¹ Shingrai we nyi langai mi gaw Yehowa man e sa tsap nna, Ngai shi hpe woi lau lu na we ai, nga ai. ²² Yehowa gaw, Kaning di lau na wu ta? ngu nna san wu yang, dai wenyi gaw, Ngai pru nna, shi a myihtoi ni mahkra a n-gup hta masu ai wenyi tai na nngai, ngu nna htan wu ai. Yehoaw mung, Nang shi hpe lau lu na wu ai; dai hku sa galaw su, ngu dat wu ai. ²³ Dai re ai majaw, Yu u, Yehowa gaw ndai na a myihtoi ni mahkra a n-gup hta masu ai wenyi bang da wu ai; Yehowa mungna a lam n kaja ai hku hkrat hkaw ya ndai, ngu wu ai. ²⁴ Dai rai nna Hkenana kasha Zedekia sit sa nhtawm, Mihkala hpe kahpret nna, Yehowa Wenyi gaw nang hta shung lu hkra, gara lam hku ngai kaw na pru wa sata? ngu wu ai. ²⁵ Mihkaia gaw yu u, Nang wa makoi na nga, kata gawk de shang wa ai shani jang mu na rin dai, ngu wu ai. ²⁶ Israela hkawhkam wa mung, Mihkaia hpe rim la nna, mare agyi wa Amon hte hkawhkam kasha Yoasha hpe ap ya nhtawm, ²⁷ Hawhkam wa ning nga ai: Ngai ngwi pyaw ai hte bai wa ai du da nna, matsan mayan di jaw lu jaw sha mu, ngu mu, ngu wu ai. ²⁸ Mihkaia gaw, Nang gaja wa ngwi pyaw ai hte bai wa n yang gaw, Yehowa nye a n-gup hte ga htawn tsun sai n rai, ngu wu ai. Bai shi gaw, Mung masha ni e, Yawng hte gaw, dum nga mu law, nga ai. ²⁹ Shingrai Israela hkawhakm hte Yuda hkawhkam Yehosahpat gaw, Ramot-gilead de lung wa ma ai. ³⁰ Ya Israela hkawhkam gaw, Yehosahpat hpe, Ngai nye hkum hpe yu maya hking dagraw nna hpyen gasat ai kata de shang wa ai. ³¹ Ya Suri hkawhkam gaw, Israela hkawhkam hta kaga, kaji kaba kadai hpe mung hkum gasat myit, ngu nna shi a hpyen leng bu sumshi lahkawng hte hpe hkangda mu ai. ³² Ya hpyen leng bu ni gaw Yehosahpat hpe mu mu yang, shanhte gaw, Gaja wa, ndai wa gaw Israela hkawhkam rai nga ai, ngai nna shi hpe gasat na nga hkan shachyut mu ai. Yehosahpat chyawm gaw marawn jahtau wu ai. ³³ Dai wa gaw Israela hkawhkam n re ai hpe, hpyen leng bu ni dum chye jang, shi hpe n hkan shachyut ai, kayin mat wa ma ai. ³⁴ Marai langai mi chawm gaw, shi a ndan pagawn gap dat nna, Israela hkawhkam wa a kan magup hte sinda magap lapran e hkra ya wu ai rai nna, shi gaw, Kayin u; ngai hpe hpyen gasat ai de na shapraw wa e; ngai hkala nba grai wa hkrum ni ai, ngu nna shi a leng hkang ai wa hpe tsun wu ai. ³⁵ Dai shani hta myit htum myit si gasat mu ai rai nna, hkawhkam wa gaw Suri masha ni hte katut rai nga yang, shi a hpyen leng hta e tsap nga nna, shana du jang si mat wa sai; shi a nma kaw na asai gaw hpyen leng hta e yun hkrat nga lu ai. ³⁶ Ya jan shang sayang hpyen luksuk ni gaw, Langai hte langai tinang a buga de wa ma su, nga nna marawn jahtau ma ai. ³⁷ Shingrai hkawhkam wa si mat nna, Samari mare de la wa nhtawm, dai yang e makoi mayang di mu ai. ³⁸ Shanhte gaw Samari mare makau na hka lawng hta dai hpyen leng hpe kashin kau ma ai rai nna, Yehowa tsun da ai ga hte maren, gwi ni gaw shi a asai hpe mata lu ma ai; shawa num ni mung dai yang e, tiang hkum shin ma ai. ³⁹ Ya naw gawn ra ai Ahab a amu ni hte shi galaw ai lam mahkra gaw, shi gaw da ai magwi kawng nta hte, shi de da ai mare ni mahkra a lam, Israela hkawhkam ni a Labau gawn ai laika hta ka da nga ai, n rai ni? ⁴⁰ Shingrai Ahab gaw kaji kawa ni hte rau yup pyaw nna, shi a kasha Ahazia gaw, shi a malai hkaw dung nga ai. ⁴¹ Israela hkawhkam Ahab a hkaw dung ai mali ning hta e, Asa a kasha Yehosahpat gaw Yuda mung a ntsa e hkaw dung hpang nga ai. ⁴² Yehosahpat gaw hkaw dung hpang ai shaloi, asak sumshi manga ning rai nga nna, Yerusalem mare hta e hkun manga ning hkaw dung nga ai. Shi a kanu gaw Shilahi a kasha Azuba mying lu ai. ⁴³ Shi gaw kawa Asa a lam shagu hta hkan hkawm nna, Yehowa a man e tengman ai lam galaw na, hpa mung n hprai kau wu ai: raitimung tsaw ai kawng ni a nawku shara ni hpe shi htawm kau wu ai n rai; mung masha ni gaw tsaw ai kawng ni a ntsa e, manam pyaw ai baw naw nat nga ma ai. ⁴⁴ Yehosahpat gaw, majan n baw na hku, Israela hkawhkam hte ga tawn da wu ai. ⁴⁵ Ya naw gawn ra ai Yehosahpat a amu ni a lam, shi madun dan ai daru magam hte, shi hpyen majan galaw ai lam ni gaw, Yuda hkawhkam ni a labau gawn ai laika hta ka da nga ai, n rai ni? ⁴⁶ Shi a kawa Asa a lakhtak kaw nna naw ngam nga ai shawa la shaw num ni hpe mung, dai mung na shapraw kau mu ai. ⁴⁷ Dai aten e Edom mung hta hkawhkam n nga ai: hkawhkam a malai ngu na wa up nga ai. ⁴⁸ Yehosahpat gaw, Ohpira mung de aja sa htaw na nga, Tarshi shanghaw li shachyaw timung, Ezion-gebera danam e hen grawp mat lu ai majaw, n sa lu ma ai. ⁴⁹ Shaloi Ahab a kasha Ahazia gaw Yehosahpat hpe, Nye a ali ama ni gaw, na a ali ama ni hte rau shanghpaw li jawn mu ga, ngunna hpyi timung, Yehosahpat nhkraw wu ai. ⁵⁰ Shingrai Yehosahpat gaw kaji kawa ni hte rau yup pyaw wa nna, shi a kawa Dawi a mare hta e, kaji kawa ni hte rau, makoi mayang di ai hkrum wu ai rai nna, shi a kasha Yehoram gawa, shi a malai hkaw dung nga ai. ⁵¹ Yuda hkawhkam Yehosahpat hkaw dung ai shi sanit ning hta e, Ahab a kasha Ahazia gaw, Samari mare hta e hkaw dung hpang nga ai rai nna, Israela ntsa e ni ning up nga ai. ⁵² Dai wa gaw Yehowa a man e n hkru ai amu galaw nna, shi a kawa a lam hta mung, kanu a lam hta mung, Nebat a kasha Yeroboam gaw Israela amyu hpe yubak galaw shangun ai lam hta mung, hkan hkawm nga ai rai nna, ⁵³ Bala Hpara hpe nawku dawjau let, shi a kawa galaw dan ai lam shagu hte maren, Israela Karai Kasang Yehowa hpe pawt bu shangun wu ai law.