TITO

TITO

¹ Yeny Paulo, shikee ishinga lya Iruva, na nrumi wa Yesu Kristo, kimaruma kya kikusiryo kya vasauwe va Iruva, na wiidimi lweemanya dede ilya ishendee muu nsha. ² Na ivika nsia kya muu wa llung’anu, yeto Iruva yeu nalashambaa wongo aleluvikya nsia uka elyo mbee. ³ Kavasukuya irero lyakwe elyi kyeeri kyakwe kyileinana kya nrumi ilya shilerambikywa kwi ivavasyo lya Nkira weeru we Iruva. ⁴ Yewe Tito, mwana-kwa kunu iirikyony elyi lukee ilyivambisa. Isarya lyikae neewe na urilalyi luukye kwa Iruva Nde na kwa Kristo Yesu Mwiikira weeru. ⁵ Nkyo kimaruma shilekura Krete, naambo kutumbani filya fyeanguye, neevika vamiku va siri wo muri shaasa llya shilekuvavasya; ⁶ kwakooya nndu nalatiri kiteve nawe ni nndu wa nka umwi, na vana vakwe vatiri iirikyo, nta valarerwaa kya ukasha nta valakee valyang’a. ⁷ Mashika mmbo kisumani askofu nave nndu nalatiri kiteve, mashika mmbo akee nngari wa Iruva; nta nalave nndu akukundye we muni-fo, nalave mwaangu irosa unyafi-fo ao mwinangwa mmbwari na mwikunda myaandu-fo, nta nalave mwikuwonisya kindo kilasumani-fo. ⁸ Lyo nave nndu alangye yaambya vandu, alangye mesha, wa mwiiyanu, wa usumanu, mweele, ashiidimaa isira ngata yakwe muni. ⁹ Mwikallya irero elyo lya kikusiryo shaasa llya aleloshwa, indo llyo ashiidimaa ilosha vandu evaikimbaa na ufundo elo lwa muu naveidima ivinga yewo vesalala ao vekukyikyisaa nawe. ¹⁰ Mashika veefo veengyi valakeekiita kindo vavioo, vatiri marero alatiri urango, valembaa vengyi, mmwasi ni yewo veerinwa, na yewo lyo nkuti vafindikirwa kana. ¹¹ Yewo mmbo vakee ireta vandu va mmba shoose, vevaloshaa findo filavasumannyi kimaruma kya ikuwonisya findo fya sony. ¹² Kwiifo nndu umwi wa kwawo ekee nkisuku karera indi kyawo, “Vakrete ni vandu va wongo kyeeri kyoose, mmbo vavakye mafisi maravi, veetalauwa ndeu vakaveva varoko.” ¹³ Ukureekyi yelo ni lwa dede. Kikeeny indo vakyeemyi na finya, naambo vakooye itumaa iirikyony; ¹⁴ valashearanya nganu nganu ta Kiyuda, nta ilatya mavavasyo a vandu vareeye filya fikee fya dede. ¹⁵ Findo fyoose mmbo fikee fyeeremutu kwa yewo va usumanu; lyo nkwiifo kyikee kyeeremutu kwa yewo vakyirinda, na kwa yewo valairikye-fo, mashika makusaro awo mmbo akee matefusu na mirima yawo kiwo. ¹⁶ Vakaamba mmbo vaishi Iruva, lyo na ngaa tawo mmbo vakee inkana; mmbo vatanaa fya yeende unyafi, vakava filemi, valavaa nta kwa kindo kisha.

¹ Kyaindi yewe rera findo efyo fikwaani na ufundo elo lutiri muu, ² kyeyaamba vamiku vave na mwiiyanu, vakae na wiindi, na waarya vantumaa kikusiryony na ukundiny neeva na usisiryo. ³ Kiwo na vamiku va kyika vakae na mikaaye myeeele; valave vevikya vengyi ureeree, valave veena nnu wari, lyo valoshe vengyi findo fya usumanu; ⁴ naambo varanguse vaka vakoo naambo vakunde womi vawo na vana vawo nisha. ⁵ Vave na mwiiyanu, na waa lwa nrima, varundye kyeny kwawo, vave vasaari, vendye womi vawo; naambo Irero lya Iruva lyilawoni yaararwa. ⁶ Ni indo na vana vakoo va kyuumi kuvaikyimbe vave na mwiiyanu; ⁷ yewe kumuni kuve kyaaso kyisha kyeelolwa kwikee na mweendo usennyi findony fyafo fyoose, neefo ufundony lwafo koore woorotu na usaari. ⁸ Kuvetira na marero atiri muu nalavaa yuutyo uvingo, naambo yewo velema efyo vakooye isuka kyeeri vakooyaa valatiri kikasha kyeerera uwe yeeru. ⁹ Yewo vakee mashinga vaindye vanndumi vawo, vavasenyi findony fyoose; valatire ng’anyi. ¹⁰ Valave veevi; lyo vaore usha lwawo woose, naambo vashope ufundo lwa Mwikira we Iruva weeru findony fyoose. ¹¹ Mashika isarya lya Iruva yelyo lyikiraa vandu woose lyammaa yoorwa paa; ¹² nalyo mmbo lyalulosha ilema uravi na lango ta kiulana; naambo lukooye ikaa na mwiiyanu, usumanu, usongovisi, yaa ulaniny yelu lwa inu, ¹³ lwiivereyaa na nsia ekyo kyeende mbora na yoorwa itumbe lya Kristo Yesu, Iruva mmbwe akee Mwiikira weeru; ¹⁴ yeto alekuuta we muni kimaruma kyeru, naambo naluute efo maraviny moose, nelyise vandu yewo va ushilyi lwakwe muni, vatiri umale lweetana mashora mesha. ¹⁵ Ongoya vandu mbony yeti, ikimba na isakyira nookaari loose, nta kulave nndu akumina.

¹ Kumbura vandu yewo ikunyiisya yewo vatiri wiidimi na ushilyi, vavaindye, neekunda itana mashora mesha; ² valave vearara vandu, valave veruuya myaandu, vave vasaari, vaore urilalyi lwawo kwa vandu woose. ³ Mashika elyo mbee naakwa ni yese llweetiri urango-fo, mmbo lwekee varavi, lukalembika, lwiirundyaa lango sheesi ta wo ngata, lwiisindaa uraviny na ukasha neesuvana na vengyi. ⁴ Kyaindi kimaruma kya usha lwa Iruva yeu akee Mwikira weeru, na ukundi lwakwe kwa vandu yelo luleorwa paa kalukira; ⁵ nshi kimaruma kya mashora mesha luletana yese-fo, nkimaruma kya ilyillya lyakwe, luleona llya luleirwa lya kavii na ivikwa wiiya kyuuka na Mumuyo Mweele. ⁶ Yeto luleirityo shapu kyeendwa ni Yesu Kristo Mwikira weeru; ⁷ naambo elyi lukee ekenywa usumanu kyeendwa ni isarya lyakwe, lukooye ivikwa veni ding’u ya muu wa llung’anu, shaasa iirikyo lyeru lyikai. ⁸ Ni irero lya iirikyo dede; na mbony yeto mmbo shikundye kutaambe na ukaari, naambo valya valeirikya Iruva vakummbwe ikaa na mweendo nsha. Efyo mfisha nafyo fitiri mbusha kwa vandu. ⁹ Kyaindi lyo marero a ulai kukwiise nang’u na nganunganu, na myaandu, na ulai lwa mbony toorokye. Mashika efyo mfitiri mbusha-fo nta urango-fo. ¹⁰ Nndu wa urere, kwammwiikimba lyimwi, kavii, llemi. ¹¹ Kwammemanya nndu sheeto mmbo eevekye katana ulyamari neekuutya uvingo we muni. ¹² Elyi shirumaa Artema ao Tikiko kwafo kutakure isha kwakwa kunu Nikapoli; mashika mmbo shikundye ikaa kunu kyeeri kya mbeo. ¹³ Ruma Zena ulya mwivavara mbony, na Apolo kwa ifura deny, valaanguyo nta nkindo-fo. ¹⁴ Vandu veru vakuloshe itira maako neetana findo fisha naambo valave sha vandu valavikaa ndunda. ¹⁵ Yeva woose shikee nawo vakwiidikira. Lwiidikirye valya valukundye efo iirikyony. Isarya lyimukaye yeni moose.