VAROME

VAROME

¹ Ni yeny Paulo shikee ishinga lya Kristo Yesu, shilevaangwa shive nrumi, neesauwau shaambe mbony shisha ta Iruva; ² tilya Iruva alemmaa ivikya kyaasa na kana ka vakisuku vakwe efo Mareiyony Meele. ³ Nto mbony ta mwana wakwe, ekee wa ngata ya mwiili alewonika efo ufyariny lwa Davidi. ⁴ Nawe kasheorwa paa na wiidimi sheelyi we ni Mwana wa Iruva, ngata ya Mumuyo Mweele, na iruka lya vafu, mmbwe Yesu Kristo Nndumi weeru. ⁵ Na efo kwakwe lukawarya isarya na usu naambo vandu va masanga vakooye ikunyiisya efo kikusiryony kyeendwa ni irina lyakwe, ⁶ elyo kimaruma kya vayo yeni mulevikwa vasauwe va Yesu Kristo. ⁷ Kwany yeni moose mukee Rome, mukunndyo ni Iruva, mukee vavaange naambo muve veele. Isarya lyimukae na ufoo luukye kwa Iruva Nde weeru, na kwa Nndumi weeru Yesu Kristo. ⁸ Kya mbee mmbo shaana Iruva wakwa kwi Yesu Kristo kimaruma kyany, yeni moose mashika elyi kikusiryo kyany kikee ivambiswa ulaniny koose. ⁹ Shamashika Iruva yeu shikemwindya na nrima wakwa kwi Nrumi shisha ya Mwana wakwe, we ni nkureeki wakwa eeshi shaasa shilakeemanda imusenda, ¹⁰ mikonu myoose efo fiterewony fyakwa. Shiiterevaa naambo shishe kwany uviny, kwakoya Iruva akunda ishiidimisya kyaarony ekyi kyakwa. ¹¹ Mashika mmbo shilangye nnu imulollya, naambo nkooye imwaavya simbo ta nrima, naambo mukooye itumariswa. ¹² Llyo iviiryana muu yeny na yeni, wo nndu na kikusiryo kya yeto ungyi, kyany na kyakwa. ¹³ Vanavama vakwa nshikundye mure mulamanya sheelyi nkeengyi shelangye isha kwany lyo shalemmyo-da fika ulaalu, naambo shimuwonisye ndunda na yeni shaasa shilevewonisya neewo va masanga engyi. ¹⁴ Mmbo shitiri sye kwa Vagriki na kwa yewo valakee Vagriki. Shitiri sye kwa yewo va urango na kwa yewo valatiri urango. ¹⁵ Kimmba niindo, yeny mmbo kishikooye shaambe Nrumi ya Nsia naakwa nkwany yeni mukee Roma. ¹⁶ Mashika nshishiiryaa Nrumi ya Iruva ya Nsia sony-fo, mashika nnyo wiidimi lwa Iruva lushendee ukiro, kwa wo umwi akusirye-u, kwa Muyuda mbele na kwa Mgriki-da. ¹⁷ Mashika usumanu lwa Iruva lwallollyo paa nnang’ani ya vayo, kikusiryo na kikusiryo. Shaasa kikee kireiye, “Yeto wa usumanu nkikusiryo kyintiryaa-u na muu.” ¹⁸ Mashika unyafi lwa Iruva lwammaa ilollyo paa luuka iruveeu lushe uwe ya uravi loose lwa nndu wa vandu yeto aora uravi kweemina dede yeyo. ¹⁹ Mbony ta Iruva mmbo tikoorye paa neemanyika kwa woose, mashika Iruva mmbo alevasukuya. ²⁰ Mashika mbony takwe tilya tilandelollyo uka yuumbwa lya ulana ulaalu tallollyo, neemanyika efo mashoreny akwe, nkyo wiidimi lwakwe na ngata yakwe ya iva Iruva, naambo numa valashelollya-u kindo kyeekuuta. ²¹ Mashika le, kyeeri kilya valemanya Iruva mmbaleng’anisa sheelyi mmbwe Iruva nta imwaana-fo. Lyo mmbo valerekya efo uretiny, na mirima yeyo yaawo ya utondo ikawoywa niirema. ²² Vekusaraa mmbo vakee varango, ate llyo varung’ana mmwasi. ²³ Vakatavasha itumbe lya Iruva nalatiri ilyamarika na fwana ya nndu wa vandu akee wa ifwa, na ya ndeye na ya mafisi na ya efyo fikurufwaa si. ²⁴ Kimaruma kya efyo Iruva kavara efo langony ta mirima yaawo, valatye findo fya ukirinda, kutani veengye miili yawo usutu wo veni na veni. ²⁵ Ni llya valealasha dede ya Iruva na wongo, vakafiirya fyuumbe ndi neefiindya ando a Muumbi yeto akeerumishwa llung’anu. Amen. ²⁶ Naasa Iruva kavara vasore lango tawo ta usutu, kutani na vaka vaalasha ngata ilya ya mbee nevika-u ngata ilakee ilya ya mbee. ²⁷ Na womi nawo naakiwo, vakara ikaa na vaka shaasa kyekai, vakatusana wo veni na veni, womi vakatana findo filakwaani nawo, vakakuwonisya itaiyo wo veni kisumani na uravi lwawo. ²⁸ Na kimmba valelema ikaa na Iruva efo umanyony lwawo, Iruva mmbo alevareeya valatye urango lwawo yelo lulavaa, vatani findo filavasumannyi. ²⁹ Mmbo veeshwe uravi lwa wo ngata, uravi na lango na weesi, mmbo veeshwe ukasha, uwai, uriingyi, ulembi; vandu va mirima mikasha, veamba fyesuta vengyi, ³⁰ vevikya ureeree, mmbo vasuuye Iruva, vatiri ulyang’a vekushopa, vekung’anisa, vesongosia fya wongo, valashiindyaa vamika vawo, ³¹ valatiri umanyo, vefisha fyaasa, valakundye vandu vawo, valalyilyaa vengyi. ³² Nawo vammaa imanya ngapo ya usumanu ya Iruva, kyeyaamba vetana efyo mmbo vasumanyo ni ufu, mmbo vakeetana indo, nta nshi indo-da fo, mmbo vakeeyirikyana na yewo vetana indo.

¹ Naasany, yewe nndu mmbo kwava vi, kushuutyaa ungyi uvingo, nta nkutiri kyeekuuta-fo. Shamashika efyo kukeeyuutya nafyo vengyi uvingo, mfyo fyeni kukeekuutya nafyo uvingo kumuni kyeyaamba kukee nrekwa, mashika yewe kukeeyuutya uvingo mmbo kwatana efyo fyeni. ² Lyo yese lwiishi sheelyi ni mirumbuye ya Iruva myeni ikee ya dede kwa yewo vetana efyo. ³ Yewe nndu wa vandu kurumbuyaa vengyi newe kumuni kwatana efyo fyeni. A ndesa mmbo kusheidimaa inda ikyia unyafi lwa Iruva? ⁴ A ndesa mmbo kukeemina wiingyi lwa isarya lyakwe na usisiryo kulamanyi sheelyi usha lwa Iruva mmbo lwakoomwa naambo kufikye ikurya? ⁵ Kyaindi kyeendwa ni uumu lwafo, na nrima wafo ulatiri ngata ya ikurya, mmbo kwakudeesya unyafi kufike nkonu ulya wa unyafi na yaanduyo lyaorwa paa yoo usumanuny lwa Iruva, ⁶ yeto ashetaa wo umwi kiinani na mitannyi yakwe; ⁷ valya veefo vesisiryaa neetana mesha veruuya itumbe na nnduma na ira kulalyamarika, wo vasheningwaa muu wa llung’anu. ⁸ Na valya veerenga, valalatyaa dede, lyo vakairikya uravi, vashewonisaa unyafi na yuumisyo ngoo. ⁹ Ukiva na ngatara nkwa wo nndu mwitana meesi, kava Myuda ao Mgriki. ¹⁰ Itumbe na wiindi na ufooni kwa yeto mwitana mesha, Myuda mbele na Mgriki-da. ¹¹ Mashika kwa Iruva nkwiifo ikunndyo-fo. ¹² Shamashika yewo valyamarye kulaiyo uvavaso, neewo valelyamara vetiri uvavaso, woose mmbo vasheutyoo uvingo ni mavavaso. ¹³ Lyoony nshi valya veeta mavavaso vatiri usumanu mbee ya Iruva-fo, kuuta ni valya veevallya na mavavaso mmbo vasheekenyoo usumanu. ¹⁴ Mashika kyeeri vandu va masanga vatana kiinani na mikae yaawo filya fikee efo mavavasony, valya valatiri mavavaso mmbo vammeva mavavaso wo veni. ¹⁵ Mmbo vaora mashora a mavavaso akee mareiye efo miriminy yaawo, ngoo tawo tiivakureekyaa, na makusaro awo, wo veni, eevautyaa uvingo ao evaletaa, ¹⁶ kufike nkonu ulya Iruva ashesukwaa fyama fya vandu fyoose vaanduyo, kiinani na Nrumi ya Nsia yei yakwa, kwi Kristo Yesu. ¹⁷ Lyo yewe kwakooya kukee Myuda kwavevika mavavaso nsia, na irumana na Iruva, ¹⁸ na imanya filya akundye, na ikunda findo fisha, neewe mmbo kurangusyo efo mavavasony, ¹⁹ na ikumanya kumuni sheelyi mmbo kukee nteteri wa vafu miso, na sa ya yewo vakee ireeminy, ²⁰ mwilosha wa matondo na llosha wa vana vadu, atiri ngata ya urango, na wa dede efo mavavasony. ²¹ Naasany yewe kukeelosha vengyi, a mmbo kuraa kulakulosha kumuni? ²² Yewe kushambaa nndu nalatuuse, na yewe kumuni mmbo kutuusaa? Yewe kusuuye maruva a wongo, mmbo kutiraa mmba ta vayo? ²³ A yewe kwarumana na mavavaso, mmbo kuturaa wiindi kwa Iruva kwiifishaa mavavaso yoo? ²⁴ Mashika irina lya Iruva mmbo lyikee yaararwa efo kwa vandu va masanga kimaruma kyany, shaasa lya kikee kireiye. ²⁵ Mashika irinwa mmbo lyisheekyaa tupu elyi kukee mwiindya mavavaso, kyaindi kwankooya kukee mwifisha mavavaso, irinwa lyafo mmbo lyikee sheelyi kulakee nrini tusu. ²⁶ Naasany kwankooya yeto nalakee nrini antira ufundo lwa mavavaso, ra elyi nalakee nrini we nnyasheekenwa-se sheelyi mmbo akee nrini? ²⁷ Na yeto nalakee nrini uka efo nkuu-kuu, kaindya mavavaso, a yeto nnyakuutya-se uvingo yewe kukee nrini lyo kwawuya ifisha mavavaso! ²⁸ Kimmba we nshi Myuda akee Myuda kyipoo tupu-fo, nta urini nshi llwa lwa kyapoo tupu yoo mwiliny-fo. ²⁹ Ni elyi akee Myuda akee Myuda auka efo nnang’ani na irinwa lyakwe llya efo nriminy, lya ngoony, nshi lya mareiyony-fo. Na nnduma wa vayo nshi wooka kwa vandu-fo, nkwa Iruva muni wooka.

¹ A Myuda nki kya mmwasi atiri? A irinwa mmbo lyisheekyaa-ki? ² Mmbo lyisheekyaa deny taari toose. Mbele kimmba vakee varambikye fyaasa fya Iruva, ³ A ni indaany, kwankooya vengyi valakusiryeu? A ira lyawo valakusiryau mmbo lyisheallwa usha lwa Iruva luve ruu? ⁴ Oode! Iruva mbwelollyo mmbwa dede na nndu ni llembi, shaasa kikee kireiye indi: “Naambo kulolyo yewe ni wa dede elyi kwarera, kweende ivinga elyi kwaanga ando afo a yaanduya.” ⁵ Kyaindi kwakooya uravi lweru mmbo lwaringisya usumanu lwa Iruva, mmbo lushaambaa-u-ki ndesa? A Iruva mmbo akee nravi elyi aora unyafi? (A shirere kinndu.) ⁶ Nta-fo. Kukooye niindo Iruva mmbo eeshidimaa inda yaanduya ulana? ⁷ Lyo kwakooya dede ya Iruva yeengera yoora paa itumbe lyakwe, kyeendwa ni wongo lwakwa, nkikyi elyi shekeengera yuutyo uvingo sheelyi nkee llyamari? ⁸ Nkyoki kishimaa lulaambe (lulefingyo wongo, na vengyi vakakaarisa sheelyi luleamba indo), Ndeny lutani makasha, naambo mesha asorye, nawo yaanduyo lyawo lyitiri usumanu. ⁹ A ni indaany? Yese Vayuda lukee kyeni ngota vengyi? Oode, nta kinnywa-fo. Mashika lwammaa yuutya Vayuda na Vagriki uvingo sheelyi mmbo vakee valammyi ni ulyamari. ¹⁰ Shaasa kikee kireiye, “Nkwiifo atiri usumanu nta umwi-fo. ¹¹ Nkwiifo eeshi-fo, nkwiifo mwiruuya Iruva-fo. ¹² Woose mmbo vaevekye, vakapwaa woose deny. Nkwiifo mwitana mesha-fo, oode, nta umwi-fo. ¹³ Uroo lwawo ni kifu kirwe, na ngyulumi tawo mmbo tilerera fya ntambo. Uroi lwa shoka mmbo lukee efo kaniny kawo. ¹⁴ Kana kawo mmbo keeshwe fidengo na kivawo. ¹⁵ Marende awo mmbo arishyaa indepuswa samu. ¹⁶ Ikasheesa na nyinyira fikakaa efo shieny tawo. ¹⁷ Nta shia ya usumanu mbaleimanya-fo. ¹⁸ Iindya Iruva llyikee efo misony awo-fo.” ¹⁹ Naasany lwiishi sheelyi findo fyoose firerwaa mmavavaso mmbo fyarerya kwa yewo vakee si ya mavavaso, naambo vamalalyiswa, na ulana loose lukae si ya uvingo lwa Iruva. ²⁰ Shamashika nkwiifo nta nndu umwi atiri mwiili asheekenywa usumanu mmashora a mavavaso-fo. Mashika imanya ulyamari mmbo lyeendwaa mmavavaso. ²¹ Lyoony ulaalu, usumanu lwa Iruva lwankoora paa kulaiyo mavavaso, mmbo lukeekureekyo ni mavavaso na vakisuku. ²² Ni usumanu lwa Iruva lweendwa nkikusiryo kya Yesu Kristo kwa woose yewo vairikya. Lyo nkwiyoo kilakaniso-fo. ²³ Shamashika woose mmbo vatannyi ulyamari, na yaanguywa ni itumbe lya Iruva. ²⁴ Mmbo vashekenywaa usumanu ruu kyeendwa ni isarya lyakwe, kwa shia ya iwowowa ni Kristo Yesu. ²⁵ Mmbwe Iruva alemmbika nave nsandi kyeendwa nkikusiryo efo samuny yakwe, naambo noore usumanu lwakwe, kimaruma kya ilekeya efo usisiryony lwa Iruva ngyulyamari toose tilensongwa itanwa. ²⁶ Naambo noore usumanu lwakwe kyeeri eki, naveva mmbwe muni usumanu na mwiekenya usumanu yeto moose airikye Yesu. ²⁷ A nkwi ikurosa lyafo lyikai? Akalyo lyanraywa poo. Ni ivavaso lya ngata-ki? Kwa ivavaso lya mitannyi? Oode, nkwa ivavaso lya kikusiryo. ²⁸ Naasany mmbo lwalollya sheelyi nndu wa vandu mmbo asheekennywaa usumanu kyuuka na kikusiryo kulaiyo mashora a mavavaso. ²⁹ Ao le, Iruva mmbo akee Iruva wa Vayuda veni? Nshi akee Iruva wa Vamasanga woose? Yee ni Iruva wa masanga woose. ³⁰ Lyo dede kwankooya Iruva ni umwi, nawe nasheekennya yewo vakee varini usumanu, naakwa ni valya valakee varini mmbo asheveekennyaa usumanu na shia yeyo sheni. ³¹ A le ndesa, mmbo luminaa mavavaso kimaruma kya kikusiryo ekyo? Oode, ando a vayo indo mmbo lwakaarisa mavavaso.

¹ Naasany, kya Abrahamu lukaamba-ki, nde yeto weeru wa mwiiliny? ² Mashika kwakooya Abrahamu aleekennywa usumanu kimaruma kya mashora akwe, we atiri kyirumannyo. Lyoony, nshi mbee ya Iruva-fo. ³ Mashika mareiyo mmbo aamba inda? Abrahamu mmbo aleirikya Iruva, kyiikava nkyo kyamwekennya usumanu. ⁴ Kwa nndu mwirunda mashora, weesi lwakwe llweekenwaa sheelyi ni isarya-fo, ni siye. ⁵ Kyaindi lyo kwa nndu nalarundaa mashora, lyo kakusirya yeto ashemwekennyaa usumanu nalatannyi mesha, kikusiryo kya nndu yeto mmbo kyaekenwa ni usumanu. ⁶ Shaasa na Davidi nawe arera kya pule ya nndu yeto Iruva amwekennya iva na usumanu nalatiri mesha atannyi, ⁷ Ngoma ni yewo vakee vasarye maravi awo, na ngyulyamari tawo tikasikyo. ⁸ Ngoma ni ya nndu yeto Nndumi nalamwekennyaa ulyamari. ⁹ A le ndesa, pule yeyo ni ya yewo vakee varini-da a ni ando amwi na yewo valakee varini? Mashika mmbo lwaamba sheelyi kimaruma kya kikusiryo Abrahamu mmbo aleekennywa usumanu. ¹⁰ A mmbo aleekennywa inda? Nkyeeri alemaa irinwa a nkulaore anrinwa? Nshi ammaa irinwa-fo nkuvie, nkulaore enrinwa. ¹¹ Nawe mmbo alewarya kyaasa ekyo kya irinwa, luve wende lwa usumanu lwa kikusiryo ekee nakyo nalanderinwa, naambo nave ndeye wa woose yewo vasheirikyaa, na kikava mbalerinwa, naambo nawo vekennywa usumanu. ¹² Na lyingyi nave nde wa veerinwa nave nde wa alakee nrini, kwa valya woose nshi valya vakee varini-da-fo, na kwa valya vakeelatya ngyayo ta kikusiryo kya nde weeru Abrahamu ekee nakyo uka llya nalanderinwa. ¹³ Mashika kyaasa kilya kyeamba mmbo eshevaa muya ding’u wa ulana, Abrahamu mmbo alekiniingwa na vana vakwe, nshi na mavavaso-fo kyaindi kwa usumanu aleekenywa kyuuka na iirikyo. ¹⁴ Mashika kwakooya valya va mavavaso mmbo verwaa ding’u, iirikyo mmbo lyevaa ruu, na kyaasa kifwe mmwasi. ¹⁵ Mashika uvavaso llo lweendee unyafi, mashika uvavaso lulaiyo, ukasha llulolywa-fo. ¹⁶ Kweekyo kyaasa mmbo kilesha na iirikyo, kishe na shia yeesarya, naambo kyaasa ekyo kikooye ivanga efo vaniny va kyaasa. Nshi kwa valya va uvavaso-da-fo, lyo ni kwa valya va kikusiryo kya Abrahamu, nawe ni nde weeru loose. ¹⁷ (Shaasa kyikee kireiye, “Mmbo shilekuvika kuve Nde wa ngyuufyari shiingyi.”) Usanguny lwa yeto alekusirya Iruva, yeto mwiiviirya vafu muu. Yeto aidima ivaanga filya filandekaa-fo kimwi sheelyi mmbo fiifo. ¹⁸ Nawe mmbo aleirikya evereyaa filya filavaa ivika nsia, naambo nave nde wa ngyufyari shiingyi, shaasa kileambawa, “Niindo ufyari lwafo lushevaa.” ¹⁹ Yeto nalakee mfwafwa wa iirikyo, mmbo alekusara kya mwiili wakwe wemmaa ifwa, (kyeeri kilya emmaa myaaka sha iyana), na ngata yeyo ya ifwa ya nsanga wa Sara. ²⁰ Llyo llya alelollya kyaasa kya Iruva, nnyaletirwa nnyinyira nare nalairikya-fo, kyaindi mmbo kikusiryo kilemmbika finya, kaarafuma Iruva; ²¹ nawe eishi deny sheelyi Iruva asheinutya fyaasa fyakwe. ²² Kekeennywa we sheelyi ni usumanu. ²³ Kyaindi lyo mfilereiyo kimaruma kyakwe muni-fo sheelyi mmbo aleekennywa muni. ²⁴ Kyaindi na yese lusheekenywaa usumanu indo-da, yese lukusirye yeto aleruta Yesu Nndumi weeru nooke kwa vafu. ²⁵ Nawe mmbo alerambikywa kimaruma kya uravi lweru, nawe karutwa naambo neese lweekennywa usumanu.

¹ Kwakooya lwammaa ilyimmyo usumanu kimaruma kya iirikyo, luve vafoo sau yoo kwa Iruva, kyeendwa ni Nndumi weeru Yesu Kristo. ² Mashika mmbwe yeto aleluniinga ifikya isarya elyi na iirikyo elyi lukee nalyo neefura nalyo lwiivikye nsia yaakana itumbe lya Iruva. ³ Nta nshi indo-da-fo, luvefura na ngatara-da, mashika ngatara mmbo teende usisiryo. ⁴ Na ishora lya ngatara ni yeende ukaari, na ukaari mmbo lweende ivika nsia. ⁵ Na ivika nsia llyivikaa nyinyira-fo. Mashika isarya lya Iruva lyammaa iletywa miriminy yeeru ni Mumuyo Mweele yeto lulensimbwa. ⁶ Mashika llya yese lwekee vafwafwa, fyeeri fikiinana lyo Kristo aleshelufiiya yese valyamari. ⁷ Kimmba kilavaa nndu nafwe kimaruma kya nndu nsumanu, lyo kyishidimikaa nndu ikarya ifwa kimaruma kya nndu nsha. ⁸ Kyaindi Iruva mmbo aora ukundi lwakwe we muni shaasa alukundye. Mashika Kristo mmbo alefwa kimaruma kyeru llya lwekee valyamari. ⁹ Naasa mmwasi ya efyo lukammaa yekennywa usumanu efo samuny yakwe, mmbo lushekiaa unyafi elo kyeendwa mmbwe. ¹⁰ Shamashika kwakooya llya lwekee vakiduva mmbo lulesandwa na Iruva kyeendwa ni ufu lwa Mwana wakwe; llyo mmwasi lukammaa isandwa indo mmbo lusheekennywaa usumanu kyeendwa mmuu wakwe. ¹¹ Nta nshi indo-da-fo, mmbo luvetiri ifura lwikee na Iruva kyeendwa ni Nndumi weeru Yesu Kristo, yeto luleona isandwa na Iruva kimaruma kyakwe. ¹² Naasany, ulyamari mmbo luleendwa ulaniny ni nndu umwi, nalo lukaende ufu. Na ulyamari yelo lukasheya vandu woose mashika elyi woose valyamarye. ¹³ Shamashika kulaore uvavaso lwensha ulyamari mmbo lweefo ulaniny, lyo ulyamari llulollywa kulaiyo ivavaso-fo. ¹⁴ Kyaindi lyo ufu mmbo lulekaa-u uka Adamu kufike Mose, nalo lukashilya naakwa ni valya valatannyi ulyamari luvakye lulya lwa Adamu.Yeto akee kyaaso kya yeto asheshaa. ¹⁵ Lyo simbo yeyo nyileva sha urekwa elo-fo. Mashika kwakooya kimaruma kya urekwa lwa nndu umwi veengyi mmbo valefwa. Isarya lya Iruva ni mmwasi na wiidimi lwa isarya lya nndu yeto umwi Yesu Kristo mmbo luleilanya kimaruma kya vandu veengyi. ¹⁶ Nta kyeeso kya nndu yeto umwi nkiinani na wiidimi yelo-fo; shamashika uvingo mmbo luleendwa ni nndu umwi nalo lukaende isisywa, kyaindi simbo ya isarya mmbo ilesha kimaruma kya urekwa wiingyi, ikeende na yeekennywa usumanu. ¹⁷ Mashika kwakooya llya nndu umwi alelyamara ufu mmbo luleshillya kyeendo ni yeto umwi, ni mmwasiny deny kwa yewo vawaryaa wiingyi lwa isarya, na wiidimi lwa usumanu, nawo mmbo vasheshillyaa efo muuny kyeendwa ni yeto umwi we Yesu Kristo. ¹⁸ Naasany-da, kwakooya kimaruma kya urekwa lumwi vandu woose mmbo valerumbuywa vasisyo, niindo-da kivekai kimaruma kya usha lumwi luletanwa vandu woose mmbo valekennywa usumanu lurye muu. ¹⁹ Mashika kwakooya kyeendwa ni uravi lwa nndu umwi vandu veengyi mmbo valewa ulyamariny, naa indo-da, kimmba yeto umwi aleva mwiirikya, vandu veengyi mmbo valeekenywa usumanu. ²⁰ Kyaindi lyo uvavaso mmbo lulesha naambo urekwa llwa lung’ani deny; na kyeeri ulyamari luleilanya, na isarya mmbo lyileengera mmwasi. ²¹ Naambo, shaasa ulyamari luleshillya na ufu, kisorye indo na kya shia yeyo ya usumanu isarya lyishillye fika muu wa llung’anu kwi Yesu Kristo Nndumi weeru.

¹ Lukaambany inda ulaalu? Lukakusindyany ulyamariny naambo isarya lyiingifwa? ² Oode, A yese lulemmaa ifiiya ulyamari mmbo lukaa inda-se ulyamariny? ³ A mulemmanya-se sheelyi yese lulebatiswa na irina lya Yesu Kristo mmbo lulebatiswa kya ufu lwakwe? ⁴ Mmbo lulerikwa nawe sheelyi mmbo lulefwa llya lulebatiswa, naambo shaasa Kristo aleruka kawona itumbe kwa Nde, naasa neese lukae na muu mwiiya. ⁵ Mashika kimmba lulelungwa nawe kya ufu lwakwe, niindo-da lushelungwaa nawe kya iruka lyakwe; ⁶ naasa elyi lwammanyany indo, sheelyi ngata yeeru mmbo ilekapyo nsalabeny ando amwi nawe, naambo mwiili wa ulyamari umirwa, lulakirundye ulyamari-fo; ⁷ shamashika yeto alefwa mmbo allyimyo usumanu kautwa ulyamariny. ⁸ Na kwakooya lulefwa na Kristo mmbo lushekaa na muu ando amwi nawe; ⁹ lwiimanyaa elyi Kristo ammeeruka nnyakifwaa-fo, nta ufu llukimwiidimaa-fo. ¹⁰ Mashika llya alefwa, mmbo alevinga ulyamari lyimwi kikamaa, lyo elyi akee na muu, nkimaruma kya Iruva. ¹¹ Naasany na yeni, kya ulyamari veny sheelyi mufiiye, muveny vandu va Iruva vakee na muu kyeendwa ni Kristo Yesu. ¹² Naasany, ulyamari lulakishillye efo miiliny yaany yeyo isheywa ni ufu kutani mwasora lango ta vayo-fo. ¹³ Nta mulakyeengere iniingya malungo yoo any ave fisha fya uravi na ulyamari-fo; kyaindi kurambikyeny muveni kwa Iruva sha vandu vemmaa ifwa vakawuya ikaa na muu, na malungo yoo any ave fisha fya usumanu kwa Iruva. ¹⁴ Nkivaa ulyamari lumushillye yeni-fo, mashika mmukikee vashillye mmavavaso-fo, mmbo mushillyo ni isarya. ¹⁵ A niindaany? Lukatanany ulyamari mashika elyi ando a ishillyo mmavavaso lukee vashillye ni isarya? Oode, ntafo! ¹⁶ A mmbo mulaishi sheelyi yeto mwakuniingya kwakwe mukava mashinga akwe kyeindya yeto mumwiindye mmbo mwammba mashinga akwe, kwakooya ni ushinga lwa ulyamari lusheendee ufu, ao kwakooya ni ushinga lwa wiindi yelo lweende usumanu. ¹⁷ Lyo Iruva naanwa nnu, mashika yeni mmbo mwekee mashinga a ulyamari, kyaindi mmbo muleirikya na mirima yaany ngata ilya ya urango yeyo ilemushillya; ¹⁸ na kyeeri mulemaa ilekwa ulyamariny, mukavikwa mashinga erundya usumanu. ¹⁹ Mmbo sharera kivandu kimaruma kya ufwafwa lweru. Kimmba shaasa muleniingya miili yaany itani fya ukirinda muve filemi, nkyo ulaalu niingyeny miili yaany irunndye usumanu mukooye iilyiswa. ²⁰ Shamashika kyeeri mwekee mashinga a ulyamari mmweishi kya usumanu-fo. ²¹ A mmbusha-ki mulewonisa-fo? Mashika kindo mushefurummyaa iwonisa-fo ni ufu. ²² Kyaindi ulaalu mukammaa ivikwa valeke mulakirunndyaa ulyamari, mwaaluwa mashinga a Iruva, nnyo mbusha yaany, llyo iilyiswa muute-u iwona muu wa llung’anu. ²³ Mashika weesi lwa ulyamari ni ufu. Kyaindi simbo ya Iruva mmuu wa llung’anu, kyeendwa ni Yesu Kristo Nndumi weeru.

¹ Nyira vanavama vakwa, a mmbo mulaishi (yaa mmbo sharera neewo vaishi mavavaso) sheelyi mavavaso mmbo ashillyaa nndu kyeeri akee na muu? ² Nsha elyi nka akee na mmi akee nshillye ni ivavaso kwa muni ulya kyeeri aiyo na muu, kyaindi mmi ulya kashefwa, we mmbo allekwa ivavasony lya mmi yeto. ³ Indi kyeeri mmi wakwe aiyo na muu, kwakooya atira mmi ungyi mmbo avangwaa ntuusi. Lyo mmi kamfwa mmbo ammba lleke, nnyakikee si ya ivavaso elyofo, nta nnyakyikee ntuusi naakwa oorwa ni mmi ungyi-fo. ⁴ Naakiwony-da vanavama, yeni mmbo mulefiiya mavavaso na shia ilya ya mwiili wa Kristo, naambo muve masaa a ungyi, we yeto aleruka auka kwa vafu naambo lwidimi ivikya Iruva ndunda. ⁵ Shamashika llya lwekee na ngata ya mwiili, lango ta ulyamari yeto tilelollyo kimaruma kya uvavaso, mmbo tilerunda mashora efo malungony any kutani taonisya ufu kimu, ⁶ Kyaindi ulaalu yese mmbo lwamboromuwa efo uvavasony, lwamfiiya ngata ilya yekee ilulamya naambo lwidimi irundya ngata shiiya ya nriminy, shi ilya ya kasha-fo, nnyo ilya ya mareiyo. ⁷ A lukaambany inda? Uvavaso ni ulyamari? Oode! Lyo nshemanyaa ulyamari kulaiyo uvavasofo. Mashika nsheemanyaa ilanga, kukooye kulore uvavaso lulaamba, “Kulalange-fo.” ⁸ Nkyo uvavaso mmbo luleniingya ulyamari mwaanya, lukavika kunu nnang’ani yakwa ngata shoose ya lango. Mashika ulyamari kulaiyo ivavaso mmbo lufiiye. ⁹ Neeny mmbo shekee na muu alya mapookyony kuleefo uvavaso, lyo kyeeri ivavaso lyilesha, ulyamari lukakwiipoo, neeny lyo shafwa. ¹⁰ Shalollyany sheelyi ivavaso llya lyishendee muu yeny mmbo lyilesheengye ufu. ¹¹ Shamashika ulyamari kimmba lulewonisa mwaanya efo uvavasony, mmbo shilelembikya-u shafwa. ¹² Naasany uvavaso mmbo lukee weele na mavavaso akava meele, akaveva a usumanu na mesha. ¹³ A kilya kyeekee kisha mmbo kileva ufu kwakwa? Oode, kyaindi ulyamari naambo lulollyo paa, mmbo lulesheengye ufu na shia yeyo shisha, naambo kimaruma kya ivavaso ulyamari luvave deny. ¹⁴ Mashika lwiishi kimayeny kya uvavaso ni efo nriminy, kyaindi yeny mmbo nkee wa mwiiliny, mmbo shikee nkumbe ulyamariny. ¹⁵ Mashika nshiishi kindo nkeetanafo, mashika kilya shikyikunndye nshikeekitana kuuta kilya shilakikunndye nkyo nkeekitana. ¹⁶ Lyo na shatana kilya shilakikundye, mmbo shaveirikya sheelyi mavavaso mmesha. ¹⁷ Naasany nshi yeny shimuni shatana indo-fo, ni ulyamari llwa lushikaaye. ¹⁸ Mashika shiishi kunu nnang’ani yakwa, yee kunu mwiiliny wakwa, nkwiifo mesha-fo, mashika ikunda shikunndye, lyo itana mesha nshaidima-fo. ¹⁹ Mashika kisha kilya shikundye ikitana nshikeekitana-fo, kuuta ni kilya kikasha shilakikundye, nkyo nkeetana. ²⁰ Naasany kwankooya kilya shilakikundye nkyo shikeekitana, naasa nshi yeny shimuni shikeekitana-fo ni ulyamari llwa lushikaaye. ²¹ Naasany shalollya ngata yei, yeny shikundye itana kisha, na kikasha mmbo kiveiyoo. ²² Mashika lyo shikundye mavavaso a Iruva na nrima; ²³ Lyo kunu malungony akwa shalollya-fo ngata ingyi, ikeekapana fira na ngata ilya ya umanyo lwakwa, na ishikamara mfungwa wa ulyamari kyishuukya kunu mwiiliny wakwa. ²⁴ Oshiny lwakwa yeny shikee nndu nkiva. A mmbi asheshaauwaa yaa mwiiliny yeu wa ufu? ²⁵ Mmbo nkeyaana nnu Iruva kimaruma kya Yesu Kristo Nndumi weeru. Nasaany, kimmba niindo, yeny shimuni na urango lwakwa mmbo sharundya mavavaso a Iruva, lyo efo mwiiliny wakwa sharundya finya ya ulyamari.

¹ Naasany ulaalu, nkukyiifo uvingo lwa yoorotwa kwa yewo vakee nnang’ani ya Kristo Yesu-fo. ² Mashika ivavaso lya Mumuyo wa muu ulya wa Kristo Yesu mmbo wanshileka, sharawa kwaasha na ivavaso lya ulyamari na ufu. ³ Mashika filya fileeshidimikaa ni mavavaso, mashika a ufwafwa lwa vayo lwa ngata ya mwiili, Iruva ekiruma mwana wakwe muni ekee na mwiili uvakye wa ulyamari, mmbo alevinga ulyamari mwiiliny; ⁴ naambo filya mavavaso avavasye fiinutyo ni yese, luve lulaenda lwilatyaa mbony ta mwiili lyo lulatye ta nrima. ⁵ Mashika valya vakeelatya mwili mmbo vakekusara mbony ta mwiili; kyaindi valya vakeesora mbony ta Mumuyo wo mmbo vakeekusara mbony ta Mumuyo. ⁶ Mashika kirengo kya mwiili ni ufu kyaindi kirengo kya Mumuyo ni muu na ufoo. ⁷ Kimmba kirengo kilya kya mwiili ni ukiduva na Iruva, mashika elyi kilashiindyaa mavavaso a Iruva, nta nkishiidimaa iinndya-fo. ⁸ Valya vasoraa mbony ta mwiili mmbashidimaa isenya Iruva-fo. ⁹ Lyo kwakooya Mumuyo wa Iruva ukee nnang’ani yaany, yeni mmukisoraa mwiili-fo; mmbo musoraa Mumuyo. Na nndu moose yeto nalatiri Mumuyo wa Kristo, yeto nshi wakwe-fo. ¹⁰ Kristo kankaa nnang’ani yaany, miili yaany mmbo ifiiye efo ulyamariny, mirima yaany ikakaa na muu kyeendwa ni usumanu. ¹¹ Kyaindi kwakooya Mumuyo wa yeto aleruta Yesu auka kwa vafu akee efo nnang’ani yaany, we yeto aleruta Yesu Kristo mmbo asheviryaa miili yaany muu yeyo itiri ngata ya ifwa, na Mumuyo wakwe yeto amukaye. ¹² Kimmba niindo, vanavama, mmbo lutiri sye, nshi sye ya mwiili lusore mwiili-fo. ¹³ Mashika kwakooya mwasora mbony ta mwiili mmbo mwaruuya ufu, lyo Mumuyo kammweekya ilammya mbony ta mwiili mmbo mukaa na muu. ¹⁴ Mashika valya vakee iteterwa Mmumuyo wa Iruva mmbo vakee vana va Iruva. ¹⁵ Shamashika mmulewarya ngata ya ushinga yeyo ya weeresi-fo, mmbo mulewarya ngata ya ivikwa vana, yalweengye lukavaanga, “Aba” nkyo kyaamba “Nde weeru.” ¹⁶ Mumuyo Mweele mmbo akureeka ando amwi na mirima yeeru sheelyi yese mmbo lukee vana va Iruva; ¹⁷ na kimmba lukee vana va Iruva, mmbo lukee veni ding’u, veni ding’u va Iruva, yewo vashekaa na Kristo, yee, lwiilyiswaa ukiva nawe ulaalu numa lusherumishwaa ando amwi nawe. ¹⁸ Mmbo shilollye sheelyi ngatara yeti tiifo ulaalu nshi kindo, elyi shatiinanisa na itumbe elyo lushelyimywa. ¹⁹ Mashika naakwa mfyuumbe fyoose mmbo fivikye nsia nnu isheorwa paa itumbe lya vana va Iruva. ²⁰ Mashika fyuumbe fyoose mmbo fikee fishillye na finya ni yeto alefivika-u fikee fiivereyaa. ²¹ Mashika nafyo mmbo fisheutwaa ushingeny lwa urumato, kutani fyaanga itumbeny lya vana va Iruva. ²² Mashika fyuumbe fyoose mmbo fikee ngatareny fika ulaalu. ²³ Nta nshifyo-da-fo, naakwa ni yese lukee vakaye mumuyo mmbo luvekee ngatareny, lukavika nsia wa yaauwa efo ushingeny na yaaluwa vana. ²⁴ Mashika mmbo lulekirwa kwi ivereya; kyaindi kindo kikee ivereyo kwakooya kyallolyo, nkukiifo ivereya-fo. Shamashika ni vi alemmbereya kilya kyammelollyo? ²⁵ Indi lukammbereya kindo lulakilollye, mmbo lukivereyaa na usau. ²⁶ Ni indo na Mumuyo nawe mmbo alweekyaa ufwafwa lweru, mashika elyi lulaishi itereva shaasa kisumani; kyaindi Mumuyo muni mmbo aluterevya neerosa uuwo kindo kilavaa yaamba. ²⁷ Na yeto aishi mirima ya vandu mmbo aishi ngata ya Mumuyo shaasa ikai, mashika mmbwe ava mwiterevya veele shaasa Iruva akundye. ²⁸ Neese mmbo lwishi Iruva mmbo arundaa ando amwi na valya vankundye evawonisyaa mesha, mmbo valya vakee vavaange shaasa akunndye. ²⁹ Mashika valya avaishi uka mbee, mmbo alevasauwa uka elyo mbee vavakaniswa na Mwana wakwe naambo we nave mwana mmbee nnang’ani ya vandu veengyi. ³⁰ Na valya alevasauwa uka elyo mbee, yewo kavavaanga, na valya alevavaanga, wo kaveekennya usumanu; na valya aleveekennya usumanu wo kavang’anisa. ³¹ A kya efyo fyoose lukaambany inda? Iruva kankaa taari yeeru ni vi ashiidimaa ilukyinga? ³² Yeto alelotora mwana wakwe kimaruma kyeru yese loose, mmbo araa inda nalalulyimya findo fyoose ando amwi nawe? ³³ Ni vi yeto asheringyaa vasauwe va Iruva? Ni Iruva muni aveekennya usumanu. ³⁴ Ni vi ashevarumbuyaa mwaandu? Ni Kristo Yesu alefwa, yee, na mmwasi ya efyo mmbo aleruka kooka kwa vafu, nawe mmbo akee woko usha lwa Iruva; na mmbwe yeto akeeluterevya. ³⁵ Ni vi ashelurauwaa na ikunda lya Kristo? A ndesa ni ukiva ao ngatara, ao ni fyuure, ao nshaa, ao ni ikuuywa, ao ni nrenga ao ni usu? ³⁶ Shaasa kyikee kireiye kyeyaamba, “Mmbo lukee isisyo nkonu piti kimaruma kyafo, lukavevaka moonri eeshisha.” ³⁷ Kyaindi nnang’ani ya efyo fyoose mmbo lukeevinga na mmwasi yeevinga, kyeendwa mmbwe yeto alukundye. ³⁸ Mashika mmbo shammaa imanya na nshushwa sheelyi, nta ufu ao muu, ao vasu, nta yewo vatiri ushilyi, nta yefi fiiyo ao yefyo fishaa numa, nta yewo vatiri wiidimi, ³⁹ nta efyo fikee uwe ao yefyo fikee si, ao nta kyuumbe kingyi kyoose nkishiidimaa ilurauwa na ikunda lya Iruva yelyo lyuukye kwa Yesu Kristo Nndumi weeru-fo.

¹ Mmbo nkerera kya dede shikee na Kristo, nshireraa wongo-fo, nrima wakwa wiishitikaa shikaayo ni Mumuyo Mweele, ² kyeyaamba mmbo shitirwa nting’wa niini neevavyo nriminy wakwa. ³ Mashika sheshiidimaa itereva yeny shimuni shimamitwa na irauwa na Kristo kimaruma kya vandu vakwa, vanavama kwi ngata ya mwiili. ⁴ Mmbo Vaisraeli yewo, vatiri ngata ya iva vana, na itumbe llya, na fyaasa, na iningyo uvavaso, na miindye ya Iruva, na mma yakwe, ⁵ nawo mmbo vasaawoye veru, neefo kwawo mfo Kristo aleuka kwi ngata ya mwiili. Mmbwe yeto akee uwe ya findo fyoose, Iruva, akee mwiitikiswa llung’anu, Amen. ⁶ Nshi sheelyi Irero lya Iruva mmbo lyammukau-fo, mashika woose nshi Vaisraeli yewo vakee vana va Israeli-fo. ⁷ Nta woose yewo vakee vana va Abrahamu nshi vana-fo, kyaindi, kyeendwa ni Isaki vana vakavaangwa; ⁸ nkyo kyaamba, nshi vana kwi ngata ya mwiili vakee vana va Iruva-fo, ni vana valya va kyaasa vakeekenwa mmbo vana. ⁹ Mashika irero lya kyaasa llyo elyi, “Kyeeri sha eki shiwuyaa, na Sara ashewonisaa mwana.” ¹⁰ Nta nshi indo-da-fo, Rebeka nawe ekimaa ikufinga kyeendwa ni mmi wakwe, we Isaki nde weeru, ¹¹ mashika vana yewo valandewonika, ao nta valandemanya itana mesha ao makasha, naambo shaasa Iruva ensauwa we muni kive, nshi kwa isora mashora-fo, indi nshaasa we muni yeto mwivaanga akundye. ¹² Mmbo evio indi, yeto nniini mmbo asherundya yeto n-du. ¹³ Shaasa kikee kireiye kyeyaamba, “Mmbo shakunda Yakobo, lyo we Esau shansua.” ¹⁴ A lwaambe-ki? Iruva atiri ukasha? Oode! ¹⁵ Mashika mmbo eviiye Mose, “Mmbo nshelyillyaa yeto shikunndye illyillya, neesarya yeto shikundye insarya. ¹⁶ Naasany kwankooya ni indo, nkyiriani na wiidimi lwa ulya akundye-fo, nta lwa ulya mwikutakura-fo; kyaindi kwi wiidimi lwa ulya mwillyillya, mmbwe Iruva.” ¹⁷ Mashika areiye indi kya Farao, “Kimaruma shilekusaleesa-u ni ekyi, naambo shikoore yewe finya yakwa, na irina lyakwa lyivambiswa urukeny koose.” ¹⁸ Kyasiany, kwakooya niindo, yeto akundye illyillya mmbo allyillya, neeto akundye imuumisya ngoo, kamuumisya. ¹⁹ Naasany, kulakooye kushivia, A nkikyi elyi ekeeyuutya vengyi uvingo-da? Mashika lyo mmbi ashidimaa iwakyana na ekyo akundye? ²⁰ Oode, nkivaa-fo nndu wakwa. Mmbi yewe-ro kwiidimi irouwa Iruva? A kindo kyuumbe kiidimi ivia yeto alekiumba, “Nkyiki elyi kuleshiumba indi?” ²¹ A yeto mwiumba findo fya uteri atiri-se finya na uteeri na imbumba lyimwi lya uteeri nasongosye nalyo kiiya kitiri nnduma na kyingyikilatiri nnduma? ²² A niindaany, kwakooya Iruva elyi atirwa ni unyafi, na yoora wiidimi lwakwe, na usisiryo uniini, mmbo aleva mwiisisirya fiiya filya fyeora unyafi fikee fivike fyesisya vandu. ²³ Na lyingyi naambo naore paa uniini lwa itumbe lyakwe efo fiiyeny filya fyelyillya, alefivika-fo uka elyo mbee naambo fiwoni itumbe. ²⁴ Mmbo yese aluvaangye, nta nshi Vayuda-da-fo, kyaindi na vandu va masanga woose. ²⁵ Nshaasa alerera kulya kwa Hosea kyeamba, “Mmbo nshevaangaa vandu valya kulaore vekee vandu vakwa, ‘Na nkunde wakwa yeto kulore ekee nkunde wakwa.’ ²⁶ Na mmbo kishevaa ando alya valevio, ‘Yeni mmukee vandu vakwa-fo. Ng’u vashevaangywaa vana va Iruva yeto muni muu.’ “ ²⁷ Isaya nawe kaonisa unyanga lwakwe kya Israeli, kaamba, “Yeekena lya vana va Israeli, na kikava nsha nsanga wa yeeveny, ni nsaaro wawo mweni vashekirwaa. ²⁸ Mashika Nndumi mmbo asheinutyaa irero lyakwe kunu urukeny, namaa neerummbwa.” ²⁹ Nshaasa llya Isaya alesongwa yaamba, “Kukooye kulaore Nndumi wa matorito alelureeya ufyari, mmbo lwevaa sha Sodoma, luvevakaniswa na Gomora.” ³⁰ A lukaambany inda ulaalu? Nsheelyi vandu va masanga, valaishi usumanu, lyo vakaonisa usumanu; lyo ni usumanu llwa lumye iirikyony. ³¹ Lyo Vaisraeli veni uramba llwa lwa usumanu mbaleidima ikooya usumanu-fo. ³² A nkikyi ndesa? Mmashika elyi kulaore valesara efyo kwa shia ya iirikyo, lyo vakasora na ngata ya mitannyi. Vakawona nsindara yoo iweny lya nsindara, ³³ shaasa kilereiyo kyeyaamba, “Lola-te, nkeevika iwe lyepaaya alya Sion, na iwe lyeetuula. Neeto moose ashemwiirikya nnyashesutwaa-fo.”

¹ Vanavama vakwa, kindo shilangye nnu deny nriminy wakwa, na kiterewo kyakwa shiterevaa Iruva kimaruma kyawo, naambo vakooye ikirwa. ² Mashika lyo shiishi sheelyi vatiri usau kimaruma kya Iruva, lyo nshi kya urango-fo. ³ Mashika lyo vekee indo valaishi usumanu lwa Iruva, lyo vekundye yoora usumanu lwawo veni, mbalekunyisya efo usumanuny lwa Iruva-fo. ⁴ Mashika Kristo mmbwe aleinutya uvavaso, naambo wo nndu akusirya-u nakooye yeekennywa usumanu. ⁵ Na Mose nawe kareiya kya usumanu yelo lweendwa mavavaso, kaamba, Yeto mwiinutya efyo mmbo ashekaa na muu kimaruma kya vayo. ⁶ Kyaindi usumanu lulya lwaendwa ni iirikyo, mmbo lwaamba indi, Lola kulasheamba nriminy wafo, Ni vi yeto ashesamaa iruveeu? (nkyo ni yoolota Kristo si), ⁷ ao, Ni vi yeto ashoolokaa nafike kwa vafu? (Nkyo ni isaamisa Kristo uwe, nooke kwa vafu). ⁸ Lyo mmbo aamba inda? Irero llya mmbo lyikee kufii neewe, yoo kaniny kafo, neefo nriminy wafo; llyo irero llya lya iirikyo lukeelyivambisa. ⁹ Mashika kwairikya Yesu na kana kafo sheelyi ni Nndumi, neekusiryau efo nriminy wafo sheelyi Iruva alennruta kooka kwa vafu mmbo kushekoyaa ikirwa. ¹⁰ Mashika nndu mmbo erikya na nrima kutani awonisa usumanu, na iirikya eereraa na kana kakwe muni kutani awonisa ukiro. ¹¹ Mashika mareiyo aamba, “Yeto moose ashenkusiryaa nnyashesutwaa-fo.” ¹² Mashika nkwiyo kilakaniso nnang’ani ya Myuda na Mgriki-fo. Mashika we ni Nndumi wa woose, araiye simbo kwa woose yewo vemmbaanga. ¹³ Mashika, wo nndu yeto ashevangaa Nndumi mmbo ashekirwaa. ¹⁴ A mmbo vashevangaa inda yeto valamwirikye? Na lyingyi, mmbo vashiriikyaa inda yeto valandemwiite? A mmbo vamwiitaa inda valatiri mwiwoongoya? ¹⁵ Na lyingyi mmbo vavambisaa inda irero, valanderumwa? Nshaasa da kikee kireiye, Apaa shaasa marende awo asenyi yewo veevambisa Nrumi Shisha! ¹⁶ Kyaindi nshi woose valewarya Nrumi ilya ya Nsia-fo. Nshaasa Isaya aamba, A Nndumi, ni vi alewarya nrumi yeeru? ¹⁷ Kyasiany, kikusiryo kimayeny kya vayo ni iita, na iita mmbo lyishee na irero lya Kristo. ¹⁸ Indi mmbo shaamba, A wo mmbo kulaore valeita? Yee, valeita. Unyanga lwawo mmbo lulekwaana ulaniny koose, na marero awo fika fishingony fya ulana ¹⁹ Kyaindi mmbo shavesa, Vaisraeli wo valemanya-se? Mbele Mose mmbo aamba, “Mmbo vashelolyaa kififi kyeendwa ni vandu valakee vakwa, kimaruma kya vandu valaishi shivaengye itafukwa. ²⁰ Na Isaya atiri ukaari uniini, nawe aamba indi, Mmbo shilelollyo ni yewo valekeeshiruuya shamanyika paa ni yewo valakeevesa mbony takwa.” ²¹ Lyo kwa Israeli kaamba, “Nkonu moose mmbo shileoroya vandu valashiirikyaa vakee filemi maako akwa.”

¹ Naasa, mmbo shikeevesa, Iruva mmbo alevivya vandu vakwe mbai? Oode! Mashika naakwa ni yeny ni Mwisraeli, umwi wa vana va Abrahamu, nndu wa ufyari lwa Benyamini. ² Iruva nnyalevivya vandu vakwe alevamanya uka elyo mbee mbai-fo. Ao ndesa mmbo mulaishi filya fikee firere efo mareiyony kya Elia? Shaasa alekumba Vaisraeli efo kwa Iruva, ³ kaamba, “Nndumi mmbo valewaa vakisuku vafo, vakasammbwa na fitara fyafo fyeerasya, neeny mmbo shansaau shimuni, nawo mmbo vakeruuya ishiwaa.” ⁴ A kirouwo kya Iruva mmbo kileamba inda? “Mmbo shikusaarisye-fo vandu fiku mfungare valakeefirya Baali ndi.” ⁵ Naasany ni indo-da kyeeri ekyi, kweiifo nsaaro ukeensauwe kwa isarya lya Iruva. ⁶ Kimmba nkya isarya, nkikivaa ni kya mashora a nndu-fo, mashika kukooye niindo isarya llyekivaa isaryafo. ⁷ A mmbo kyava inda? Kindo kilya Israeli ekeekiruuya nnyalekiwonisa-fo; kuuta valya valesauwa wo vakakiwonisa, na vengyi wo vakaumisywa. ⁸ Nshaasa kyikeekireiye kyeyaamba, “Iruva mmbo alevaniinga ngoo tirengeyaa, miso nare nalalollya, maarwi are nalaita kufike nkonu sha yeu wa inu.” ⁹ Na Davidi nawe aamba, “Ando awo kwelyiya shoonga ave a nsindara na nreiyo na kindo kya ivakyinga, llo weesi lwawo. ¹⁰ Miso awo avikwa ireema vare valalollya, na mungo wawo ukwiinyike mikonu myoose.” ¹¹ Kyasia shavesaany, A mmbo valerendeya vawe ppu? Oode nta-fo! Lyo kyeendwa ni urekwa lwawo ukiro mmbo lulefikya vandu va masanga, naambo wo vatirwa nkififi. ¹² Naasany kwakooya urekwa lwawo mmbo luleengye ulana pule indo, na unana lwawo lukaveva pule ya masanga, a nshi kishevaa indo mmwasi ndesa Vaisraeli vasheakaniswaa ukiro? ¹³ Lyo mmbo shikeerera neeni mukee vandu va masanga. Naasany, kiinani na shaasa shikee llori wa vandu va masanga, mmbo sharumisha urundi lwakwa shimuni? ¹⁴ Kulakooye nsheengye kififi yewo vakee va samu imwi neeny shikire-u kyenga kyawo. ¹⁵ Mashika kwakooya ivivyo mbai kyawo mmbo lyileende usandi lwa ulana, a iirikyo lyawo mmbo lyishendee ki kulaore ni muu numa ya ifwa? ¹⁶ Na lyingyi kwakooya fimu fyeele, niindo-da na imbumba lyoose; na isinde lyikammba yeele, na maramba nang’u nkiwo-da. ¹⁷ Kyaindi kwankooya maramba engyi ammanywa, neewe nri wa ngoroshony kwalungyau, kwava umwi wa maramba yoo a nri yeto nsha na uredi lwa vayo, ¹⁸ lola kulashekurumisha mbee ya maramba yoo; awooye kwakooya kushekurumishaa, nshi yewe kurye isinde elyo-fo, ni isinde elyo lyikurye yewe. ¹⁹ Naasa mmbo kushaambaa, Maramba alya mmbo alemanywa naambo yeny shilungywa-u. ²⁰ Kyasia-da, lyo mmbo alemanywa kimaruma kya ira nalakusirya-u, neewe mmbo kwasalala-u kyeendwa ni kikusiryo kyafo. Naasany, kulakushope-fo, iryaa. ²¹ Mashika kwankooya kulaore Iruva alesarya maramba alya a mbee nta yewe nnyashekusaryaa-fo. ²² Nkyelolany, usha na unyaasi lwa Iruva kwa valya veewa ni unyafi, indi kwafo yewe ni usha lwa Iruva, lyo kwankaa usheny yelo; lyo kyilammba, neewe-da mmbo kushemanywaa-u. ²³ Neewo-da, vakara valasinda efo kikusiryony kifu, mmbo vashelungwaa-u, nnyeli Iruva ashidimaa ivalungyau-se. ²⁴ Mashika yewe kwakooya kulemanywa yoo nriny yeto ukee wa ngoroshony uka mbee, numa kwalungya-u, kileekee indo uka mbee; nshi mmwasiny deny kwa valya vekee va elyo mbee isheviirwa ando alya awo a mbee ando valemanywa? ²⁵ Shamashika vanavama vakwa, nshikundye mure mulamanya kyama ekyi-fo, naambo mulashekusara mmbo mutiri urango sheelyi Vaisraeli vakee woomu, kutani vandu va masanga vasheumbywa. ²⁶ Nkyoony Israeli shoose ishekirwaa. Nshaasa kikee kireiye, Mwikira asheshaa ooka Sion. Nasherauwa Yakobo na uravi lwakwe. ²⁷ Neekyi nkyo kyaasa kyakwa nawo, elyi nshevaangataa marekyo awo. ²⁸ Naasany kyeendwa ni Nrumi ya Nsia mmbo valeva vakiduva vany; kyaindi kyeendwa ni isauwa vakava vakunde kimaruma kya vande veru. ²⁹ Mashika simbo ta Iruva ntitiri yaamba shilamanya ilasongwaa-fo, na uvaango lwakwe niindo da. ³⁰ Mashika yeni shaasa mulemina Iruva llya kasha, yeni ulaalu mukawona ilyillyo kyeendwa ni imina lyawo; ³¹ niindo-da nawo ulaalu mmbo vakeemina Iruva, naambo shaasa neeni mulewona ilyillyo nawo vavewona ilyillyo. ³² Mashika kwa Iruva woose nkimwi vemminaa vakooye ilyillyo woose. ³³ Apaa utonga lwa Iruva shaasa lung’ani na waarya lwakwe na urango lwakwe. Shila takwe tilavaa isavaiya, nta shia takwe tilavaa ikutwa. ³⁴ Mashika ni vi alemanya makusaro a Nndumi? Ao ni vi alemfisha kyama nawe? ³⁵ Ao ni vi alensongwa inninga kindo nashekitawa-se? ³⁶ Mashika findo fyoose nkwakwe fyuukye, mmbo fiiyoo na wiidimi lwakwe, na mmbo fishewuyaa neefo kwakwe. Nnduma ni wakwe llung’anu. Amen.

¹ Naasany vanavama vakwa, mmbo shamutereva kikee kya isarya lya Iruva niingyeny miili yaany ive kiraso kyeele kitiri muu, kive nkyo mwiindye wa dede. ² Nta mulasore mikaaye ya ulana yelu-fo, mmbo mushaalashikaa mikaaye yaany, mwiimanyaa nkyoki Iruva akunndye kwany naambo munsenyi neeva vasongovisi. ³ Kimaruma kyeelyimyo isarya lya Iruva mmbo shaidima imuvia yeni moose, kulave nndu alanga ikurosa mwasi ngota elyi akai. Veny vandu va mwiina, shaasa Iruva aavye wo nndu mwiina wakwe wa kikusiryo. ⁴ Mashika shaasa mwiili utiri filungo fiingyi nafyo filarundaa ishora lyimwi nsi. ⁵ Niindo neese mmbo lukee filungo fya mwiili wa Kristo wo nndu kalungwa neeto ungyi. ⁶ Naasany kimmba lukee valyimye simbo tikwaavye-avye, kiinani na isarya lya Iruva, kwakooya ni ukisuku, lurere kikee kya iirikyo. ⁷ Kwakooya ni yaambya veny lurunde nisha, neeto mwiilosha, naverunda nisha. ⁸ Neeto ashiikimbaa vengi, navaikimbe kyikee kya usha. Neeto mwiiwarya veny navawarye na nrima nkesi. Na mwiisalallya vengyi navasalallye nalashaaraa. Na mwiilyillya vengyi navalyillye na ifura. ⁹ Ukundi lwany lulatire ukunang’ari-fo. Taniny findo fisha mulakani neefyo fikasha. ¹⁰ Kundaniny muveni sha vana va nka, kikee kya wiindi na ilekeiya vengyi mwaanya. ¹¹ Veny vandu vasasari mulasheelelekaa, muve vakaari miriminy yaany irundya Iruva (Nndumi) ¹² mwiivikaa nsia na ifura, mutire usisiryo kyeeri kya ngatara, mukutire efo kiterewony. ¹³ Muvetira maako irundya vandu va Iruva, muveambya veny na usau. ¹⁴ Vemutannya makasha vakunndyeny mbora nta mulavadenge-fo. ¹⁵ Fureny neewo vafuraa, muveiya neewo vaiyaa. ¹⁶ Veny va nrwe umwi nsi moose, nta mulave vandu vakurosaa. Indi irikyeny yaatarwa naakwa mfindo fifwafwa. Nta mulave vandu vekushopa na urango mutiri. ¹⁷ Mulataiye ukasha na ukasha-fo. Latyeny yefyo fisennyaa vandu woose. ¹⁸ Llyo mushekaa na ufoo na vandu woose. ¹⁹ Vakunde vakwa, loleny mulataiyane fiduva naambo mulasheesheyo ni unyafi lwa Iruva, kimmba kikee kireiye indi, “Itaiya kiduva llyakwa yeny Nndumi.” ²⁰ Lyo nkiduva wafo eetirwa nshaa nniinge shoonga. Eetirwa nnyura nrite. Kwantana indo llyo ashewonaa ngapo imfye. ²¹ Ukasha lulakuvinge-fo, mmbo kutanaa mesha kuvinge ukasha.

¹ Wo nndu nainndye ushilyi yelo uniini, mashika nkwiifo ushilyi lulaukye kwa Iruva-fo. Ushilyi lwiiyo loose mmbo lukee uvavasye ni Iruva. ² Neewo vekukikisa na ushilyi lwiiyo mmbo vashekuwonisyaa uvingo. ³ Shamashika yewo veshillya mmbaeresee vandu mashika elyi vatana mesha-fo, kuuta ni elyi vatana maravi. A mmbo kulakunndye iiryaa yeto atiri ushilyi? Kyasia, tana efyo fikwaani naambo kuwoni-u irerwa kisha. ⁴ Mashika we mmbo avikywa ni Iruva nasalallye kutannywa fya usha. Naasa, kwatana firavi iryaa, mashika yeto mwiishillya nnyatira nsengye wa ushilyi ruu-fo, ni elyi akee mmbike ni Iruva, nataiye yewo veetana makasha kivavavise. ⁵ Nkyoony, nkuti iirikya ushilyi, nshi iryaa unyafi-da-fo, lyo ni kimaruma kya usakiro nriminy. ⁶ Nkyo na kimaruma-da kwataa kodi mmashika elyi veshilya vakeerundya Iruva elyi vakee ishoreny elyo lyawo. ⁷ Niingyeny vandu woose usumanu lwawo, wa kodi naniingywa kodi, na wa usanu naniingywa usanu, yeto asumani yeerewa neerewa, neeto wa wiindi naniingwa wiindi. ⁸ Mulatire sye ya nndu kuuta ukundi-fo. Mashika yeto mwiikunda ungyi mmbo ainutya uvavaso. ⁹ Mashika elyi lwavio kulatuuse, kulawae, kulaive, kulalange, na mavavaso yoo engyi-da, fyoose efyo kwasanda, mmbo kyaamba. Kunda nndu ungyi shaasa kukukundye kumuni. ¹⁰ Ukundi llutannyaa nndu ungyi kindo kikasha-fo. Naasany, ukundi llo lwiinutyaa mavavaso moose. ¹¹ Kimmba niindo, ulaalu lumanyi sheelyi kyeeri kya yuuka rony mmbo kyamfika. Mashika ulaalu ukiro lweru mmbo lwanserikya kufii mmwasi ngota llya lulebatiswa lukakusirya-u. ¹² Kio mmbo kyammikwa, nkufii kukye. Naasany luute-fo mitannyi ya ireema, luipoo fisha fya sa. ¹³ Mashora a nsanyiny ni itira winndi, nta lulasheeva veelya nnu na inangwa, nta itana fya uravi na fya utuusi, nta isyana myaandu, kififi. ¹⁴ Mmbo musheraa Nndumi Yesu muuny wany, nta mulalolaa mwiili na yaanta lango ta vayo.

¹ Yeto akee mfwafwa wa kikusiryo mmbwaryeny kwany, lyo mulamuutye uvingo-fo. ² Nndu wa kikusiryo mmbo akulyiiya shoonga toose, lyo yeto mfwafwa kikusiryony mmbo alya nyany sheni. ³ Mwiilya shoonga toose nalamini yeto ara nalalya-fo, mashika woose mmba Iruva. ⁴ A yewe ni vi ndesa kutani kwautya ungyi uvingo? Ni nndumi yeto wakwe muni amwiirikyaa ao nallemi. Ni yoo kwa nndumi yeto wakwe kweni asalalaa ao nawe. ⁵ Nndu ungyi mmbo alollya mikonu myoose nshi kimwi-fo, na ungyi kalollya mikonu myoose nkimwi nsi. Nshaasa wo nndu alollya we muni. ⁶ Yeto alollya nkonu mmbee ntorya mmwasi, ni Nndumi amwiidimisya indo, neeto mwiilya shoonga ni Nndumi da ansimba indo. Na lyingyi-se yeto ara nalalya kindo kive, ni efo kwa Nndumi avekai, kavemwaana. ⁷ Mashika nkwiifo nta nndu umwi aidima ikaau na muu we muni-fo, nta yeto mwiifwa nnyafwa kyuuka nawe muni-fo. ⁸ Mashika kwakooya lwiiyo na muu mmbo lweekyo ni Nndumi, na lukafwa mmbo lwafwa lukee na Nndumi. Kyasiany lukakaa na muu ao lukafwa mmbo lukee va Nndumi. ⁹ Ekyo nkyo kileengye Kristo kafwa numa kawuya iruka naambo nashillye yewo vakee na muu kiwo neewo vafiiye. ¹⁰ A nkyiki elyi kwautya mwanamau uvingo? Ao kwammina? Lyo lumanyi sheelyi yese loose mmbo lushesalalaa mbee ya kitima kya ushilyi kya Iruva. ¹¹ Kimmba kikee kireiye indi, Yeny Nndumi shiiyo, woose mmbo vasheshifiiryaa ndi. Na vandu woose vasheshaambaa paa. ¹² Niindo kikai, wo umwi weeru mmbo asheutaa yeekena lyakwe muni yoo mbee ya Iruva. ¹³ Naasany lulakiengere ikurera kikasha-fo, kyeendi ng’waana lurummbwe indi, kulave nndu avika kindo kyeengye mwanamaye nsindara ao kyentuula. ¹⁴ Shiishi deny nesununndywa nnu na irina lya Nndumi Yesu, sheelyi nkwiifo kindo kikee kitefusu uka efo kiparikye-fo. Kyaindi yeto muni alollya kindo nkitefusu, kwakwe we muni mmbo kivaa kitefusu. ¹⁵ Na nndu wafo kwakooya asherovywaa nriminy kyeendwa nshoonga, yewe mmbo kwamaangwa efo ikundeny lyafo. Kyeendwa nshoonga yafo kulasherovya nndu ulya Kristo alefwa kimaruma kyakwe. ¹⁶ Naasany, mikaaye yaany misha ilashesendwa na ukasha-fo. ¹⁷ Mashika umangyi lwa Iruva nshi ilya na ina-fo, ni usumanu, ufoo na ifura nnang’ani ya Mumuyo Mweele. ¹⁸ Mashika yeto arundya Kristo nisha efo findony efyo mmbo asennya Iruva, naakwa ni vandu vakamwirikya. ¹⁹ Naasa kwakooya niindo, lusore ngata ya ufoo na yeyo yekaarisana. ²⁰ Lola kulashelyamara ishora lya Iruva kweengywa nshoonga. Yee, fyoose mfisha; kyaindi nkikasha kwakooya nndu alya shoonga keengye vengyi nsindara. ²¹ Nkyeni deny shire shilalya nyama ao ina wari ao itana kindo kingyi kyoose kwakooya nndu ungyi asheutaa-u nsindara. ²² Kikusiryo kilya kukee nakyo kitire kwikee na Iruva. Ngoma nndu yeto nalalollyaa nyinyira we muni kya findo filya we muni afiirikye. ²³ Lyo mwiilya na nyinyira, mmbo ambutywa uvingo kyeamba anrenga, mashika elyi alya nalatiri iirikyo. Na wo kindo nndu atana kilaryani na kikusiryo ni ulyamari.

¹ Kimmba niindo mmbo kilukooye yese lutiri finya lwiipoo ufwafwa lwa valya valatiri finya, nta lulave vandu vekukunda luveni. ² Wo nndu nnang’ani yeeru nalole shaasa ashesennyaa yeto ungyi, nasennywa neetumariswa. ³ Mashika naakwa ni Kristo nnyalekusennya we munifo; kuuta nshaasa kikee kireiye. Filya filererwa-u kikasha kyafo ni yeny fileshikooya. ⁴ Shamashika efyo fikee fireiye mmbo filereiyo naambo yese kyeendwa ni usisiryo na iviiryo muu lwawonisa efo Mareiyony yoo Meele lwiidimi ivika nsia. ⁵ Iruva mmbwe mwiluniinga usisiryo na iviiryo muu, nawe namulyimyi ukaari na ikutira efo kwa Yesu Kristo. ⁶ Naambo neeni moose mwikee na nrwe umwi nsi mwiidimi iitikisa Iruva Nde na Nndumi weeru Yesu Kristo. ⁷ Kyasia waryaniny kyeny kwany muveni na veni shaasa Kristo alemuwarya yeni naambo itumbe lya Iruva lyikooye ilollyo. ⁸ Manyiny-te naakwa ni Kristo mmbo alerundya Vayuda naambo naore paa shaasa Iruva akee nsha, na fyaasa filya Iruva alevikya vakuu veru fikooye iinukya. ⁹ Naambo na vandu va masanga engyi vaute-u irumisha Iruva kyeendwa ni ilyillya lyakwe. Mareiyo yoo Meele niindo aamba: “Kimmba niindo mmbo nshekurumishaa efo vanduny va masanga moose. Shiimbe nnduma wa irina lyafo.” ¹⁰ Nang’u mareiyo akaamba lyingi, “Kyefureny yeni vandu va masanga fureny musange na vandu vengyi woose.” ¹¹ Na lyingyi, “Eni vandu va masanga moose ng’aniseny Nndumi eni vandu woose nnganiseny.” ¹² Nawe Isaya kaamba, “Asheshaa nndu auka efo ufyariny lwa Yese, nawe asheshillyaa vandu va masanga nawo vashembikaa nsia.” ¹³ Naasany, Iruva yeto amwiidimisya ivika nsia namweengye ifura lyoose na ufoo lyuukye efo kikusiryony kyany, naambo na ivika nsia lyany lyeengereke kyeendwa ni finya ya Mumuyo Mweele. ¹⁴ Vanavama, mmbo shikee nsunundye deny kyany kyeyaamba naakwa nnyeni mutiri mesha meengyi, muraiye urango, mukaidima na iikimbana. ¹⁵ Lyo mmbo shiifo shimureiyaa findo efi nookaari yaa kyengeny eki kya barwa yei, kive sheelyi shamukumbura-da, kimaruma kya isarya llya shilelyimmyo ni Iruva. ¹⁶ Naambo shive mwifurukannya Kristo Yesu efo nnang’ani ya vandu va masanga, shirundye Nrumi ya Iruva ya Nsia ishora lya ukohani, naambo vandu va masanga vave kiraso kisenyi, kikammaa iilyiso ni Mumuyo Mweele. ¹⁷ Naasany, yeny mmbo shilollye kimaruma kya ifura nnu na Kristo Yesu mbee ya Iruva. ¹⁸ Mashika nshishidimaa isenda nta irero lyimwi ishoreny lyakwa Kristo alyisuuye-fo, naambo vandu va masanga vaindye-u, na irero ao na kindo kyeetana. ¹⁹ Kwi finya ya ngyende na findo filandelollywa na wiidimi lwa Mumuyo Mweele; naasa kipookya Yerusalemu neefo minyanuny ya vayo kufike Iluriko mmbo shilevambisa Nrumi shisha ya Kristo na ifura. ²⁰ Lingyi shakutakura shilaambe Nrumi ya Nsia alya kweni irina lya Kristo lyilemmaa isendwa, naambo tupu shilatanyi mmba uvasheny lwa nndu ungi. ²¹ Kive shaasa kikee kireiye indi, “Valya valandeongoywa mbony takwe vashelollyaa. Na valya valandeite vashemmanyaa.” ²² Nkyo kimaruma wo kyeeri shilelemwa isha kwany. ²³ Kyaindi ulaalu, kimmba shilatiri mwaanya kunu, na lyingyi uka myaaka miingyi sheelangye isha kwany; ²⁴ nkonu moose eto nshipoo kyaaro yeenda Hispania mmbo nshaa kwany. Mashika mmbo shilangye imulollya yeni kyaarony ekyo kyakwa. Mushivikye kilyilyika kyaarony ekyo, nrima wakwa uwuutiso nnyeni. ²⁵ Lyo ulaalu nkuti sheende mbele Yerusalemu, shindefurukannya veele va Nndumi. ²⁶ Mashika mmbo kilesenya vandu va Makedonia na Akaya isanyirya firaso kimaruma kya veele yewo va Yerusalemu vakee vakiva. ²⁷ Yee, mmbo kilevasennya indo, nawo mmbo vatiri sye kwawo. Mashika kwakooya vandu va masanga vantarannya nawo mbony ta miriminy, mmbo valesenyo nawo ivafurukannya kya efyo fya mwiili. ²⁸ Naasany kwakooya shainutya ishora elyo, na iringisya ndunda eto, mmbo nshiiraa kwany sheende Hispania. ²⁹ Neeny shiishi shamanya shansha kwany mmbo nshaa na mbora ya Kristo iishwe shapu. ³⁰ Vanavama, mmbo shamutereva kwi Yesu Kristo, na kwi ukundi lwa Mumuyo kutakureny ando amwi neeny efo fiterewony fyany mbee ya Iruva kimaruma kyakwa. ³¹ Shikirwa maakony a valya valairikye kulya Uyuda, na lyingyi naambo urundi elu lwakwa kulya Yerusalemu lukooye iirikywa mbee ya veele. ³² Naambo shiidimi isha kwany shiitiri ifura, shaasa Iruva akundye, nsheimuya ando amwi neeni. ³³ Iruva wa ufoo nakae ando amwi neeni moose. Amen.

¹ Mmbo shikeerambikya Fibi mwanamaye weeru kwany. We ni mwifurukannya siri ya Kenkrea. ² Shamutereva mbwaryeny kimaruma kya Nndumi; shaasa kikooye veele, mushemweekya kindo kyoose yekyo kishenting’aa, mashika naako niwe mmbo aleva mwiekya vandu veengyi, kavesheekya naako ni yeny. ³ Shiidikiryeny Priska na Akila. Yeva ni varundi va Kristo Yesu kimwi sha yeny. ⁴ Nawo mmbo vekudeesye naako ni irumbuwa nrwe kimaruma kyakwa; nawo mmbo nkevaana, nta nshi yeny shimuni-da-fo, kyaindi ando amwi na Siri ta vandu va masanga moose. Shiidikiryeny na siri yeyo ya mmba kwawo. ⁵ Shiidikiryeny Epaineto, nkunde wakwa yeto alepooka tishi iirikya Kristo kulya Asia. ⁶ Shiidikiryeny na Miryamu yeto alekuvinisa nnu-dwa kimaruma kyany. ⁷ Shiidikiryeny na Androniko na Yunia, wo ni vandu vakwa, valefingwa ando amwi neeny, vakavetira nnduma efo nnang’ani ya varumi; nawo mmbo valeshisongoya imanya Nndumi. ⁸ Shiidikiryeny na Ampliato, nkunde wakwa kimaruma kya Nndumi. ⁹ Shiidikiryeny na Urbano, nndundi wa Kristo ando amwi neeny, na Stakisi, nkunde wakwa. ¹⁰ Shiidikiryeny na Apele, nawe akee mwirikye ni Kristo. Shiidikiryeny na vandu va mmba ya Aristabulo. ¹¹ Shiidikiryeny Herodiani, nndu wakwa. Shiidikiryeny na vandu va mmba ya Narkiso, nawo vakee na Nndumi. ¹² Shiidikiryeny na Trifaina na Trifosa, vasasari nnu efo kwa Nndumi. Shiidikiryeny na Persisi, nkunde alekutakura nnu kimaruma kya Nndumi. ¹³ Shiidikiryeny na Rufo, nsauwe wa Nndumi, na maaye, kaveva na ma-da. ¹⁴ Shiidikiryeny na Asinkrito, Flegoni, Herme, Patroba, Herma, na vanavama yewo vakee nawo. ¹⁵ Shiidikiryeny Filologo na Yulia, Nerea na mfwamaye, na Olimpa, na veele woose yewo vakee ando amwi nawo. ¹⁶ Idikiraniny mwikumimindaa na ngata sheele. Siri toose ta Kristo nato tamwiidikira. ¹⁷ Vanavama vakwa, shamwiikima, kwiiseny nnu na valya vatiri uriingyi na filya fyeende misindara nafyo fivikyani kiduva na ufundo lwany. ¹⁸ Mashika yewo vakee indo mmbakeerunndya Nndumi weeru Yesu Kristo-fo, nndeu tawo veni. Nawo mmbo vareraa marero mafoo vekukundisaa, ate mmbo vakeelemba mirima ya vandu vatele. ¹⁹ Mashika wiindi lwany mmbo lulemanyika ni vandu woose, nkyo kimaruma shafura neeni. Lyo mmbo shikundye muve vaarya nnu mwitanaa findo fisha, muveva vatondo findony fikasha. ²⁰ Nawe Iruva mmbo ashekakashaa mmbishwa efo si ya marende any uviny. ²¹ Timoteo, ulya akee nndundi ando amwi neeny amwiidikira, na Lukio na Yason, na Sosipatro, vanavama. ²² Neeny Tertio, shareiya barwa yei shamwiidikira shikee na Nndumi. ²³ Gayo yeto aleshiwarya na Siri shoose-da amwiidikira na irina lya Nndumi. Erasto, mwisalallya muri, nawe amwiidikira, na Kwarto, we mwanamaye weeru. [ ²⁴ Isarya lya Nndumi weeru Yesu Kristo lyikae neeni moose Amen.] ²⁵ Ulaaluny narumishwa yeto ashidimaa imutumarisa kiinani na ndera yakwa na kya elyi Yesu Kristo akee yongoywa kiinani na masukuyony a kyama kilya kyekee kisikye uka kasha. ²⁶ Kikashesukuwa kyeeri ekyi efo mareiyony a vakisuku, kikashemanyika ni vandu va masanga moose, shaasa Iruva wa llung’anu alevavasya. Naambo vaindye Kikusiryo ekyo. ²⁷ Ni we Iruva muni araiye urango. Nnduma mmbwakwe kyeendwa ni Yesu Kristo, llung’anu na llung’anu. Amen.