USUKUYONY

USUKUYONY

¹ Masukuyo a Yesu Kristo, aleorwa ni Iruva noore mashinga akwe findo efyo fikaa fishe uviny; nawe karuma nsu wakwe neende erye na woko nandeora ishinga lyakwe we Yohane. ² Yeto alekureekya Irero lya Iruva na ukureekyi lwa Yesu Kristo, mfyo findo fyoose alefilolya. ³ Ngoma yeto asomaa na yewo vashitaa marero a ukisuku yelu, na itira efi fikee fireiye-fo, mashika fyeeri fyamiinana. ⁴ Ni yeny Yohane, shamwiidikira yeni siri mfungare tikee Asia. Isarya na unapwe fimukaye, efyo fyuukye efo kwa yeto aiyo na eifo, na isha ashesha; nafyo fyuukye kwa mimuyo mfungare ikee yoo mbee ya kitima kyakwe kya ushilyi; ⁵ lyingyi fyuukye kwa Yesu Kristo, akee nkureekyi wa dede, mwana wa mbee wa yewo vafiiye, na mangyi wa vamangyi va ulana. Yeto alukundye na ilusangya ngyulyamari teru na samu yakwe. ⁶ Neluvika umangyiny, na makohani va Iruva, nawe ni Ndeye; usuri na uniini llwakwe we fika llung’anu na llung’anu. Amen. ⁷ Lola-te, efo ashaa na mafishi; na wo iriso mmbo lyishellollyaa, na yewo valenndosha na ifumu, na vandu va masanga a ulana woose vashekapaa kiiyo kyeendwa mmbwe. Ee ni indo. Amen. ⁸ Yeny ni Alfa na Omega, wa mapookyony na wa mafurumyony, ni indo Nndumi Iruva aamba, yeto aiyoo, eiyoo nawe ashekaa-fo, Muni finya shoose. ⁹ Ni yeny Yohane mwanamaye waany shikee mwaakanise na yeni makiva na umangyi na usisiryo lwa Yesu Kristo, mmbo shekee kyuurukeny kyivangwaa Patmo, kimaruma kya irero lya Iruva, na ukureekyi lwa Yesu. ¹⁰ Elyi shikaaywa ni Mumuyo, nato ukee nkonu wa Nndumi, shaita yoona iniini efo numa yakwa, lyivakye unyanga lwa iranda. ¹¹ Lukaamba, “Efi kulollye fireiye kitabuny, kunderikya siri yeto mfungare: Nto Efeso, Simirna, Pergamo, Tiatira, Sardi, Filadelfia na Laodikia.” ¹² Shainduka naambo shilole yeto arera na yeny. Llya shainduka shalollya taa mfungare ta saabu tikee shiipoiyo uwe. ¹³ Na nnang’ani ya taa eto shalollya-u umwi avakye Nndu wa vandu, aree soori ifikye marendeny, ikee shifinge na ukova lwa saabu yoo mavee. ¹⁴ Nrwe wakwe na fii takwe tekee shaa pyai sha laura ya kyaamwi, na miso akwe akava sha kipalapala kya muro. ¹⁵ Marende akwe akava sha minya ya arera ikee shisinge ikeela deny, ikava sheelyi yailyiswa ni muro; na unyanga lwakwe lukava sha yoona lya mura mwiingyi. ¹⁶ Nawe mmbo etiri nyinyiri mfungare efo wokony lwakwe usha; na usu woovi, lukee unnwi koose, lukauka efo kaniny kakwe, na kisangu kyakwe kikavaa paa sha mwi na finya ya vayo. ¹⁷ Na yeny kyeeri shilellollya shawa si yoo marendeny akwe shava sha nndu amfwa. Kasheekerya woko lwakwe usha, kaamba, “Kulairyee-fo, mmbo shikee wa mbee na wa ifurumya. ¹⁸ Eto akee na muu, na yeny mmbo sheefiye, lyo lola ulaalu mmbo shikee na muu fika llung’anu na llung’anu. Na yeny mmbo shitiri ngyufunguo ta ufu na ta kwa vafu. ¹⁹ Kyasia, reiyany findo efi kwalollya, na efyo fiiyo, na efyo fishaa numa yeefyo. ²⁰ Kyama kya nyinyiri tilya mfungare kulelollya wokony lwakwa usha, na kya taa tilya mfungare ta saabu, ni ekyi: nyinyiri tilya mfungare ni vasu va siri tilya mfungare, na taa mfungare ni siri mfungare.”

¹ “Kwa nsu wa siri ikee Efeso reiya indi: Efi mfyo aamba yeto atiri nyinyiri yeto mfungare efo wokony lwakwe usha, mmbwe yeto akeerua-rua nnang’ani ya taa tilya mfungare ta saabu. ² Shiishi mashora afo na ngatara yafo, na usisiryo lwafo, na ekyo sheelyi nkusangaa na vandu vakasha-fo, na yewe mmbo kuleesa valya vakuvangaa varumi wo veni, nawo nshi wo-fo, kwavakooya ni vaongo. ³ Na yewe mmbo kuleva mwisisirya kimaruma kya irina lyakwa, nta kulawoni yaaraa. ⁴ Lyo shitiri irero lyimwi uwe yafo, llyo elyi, mmbo kulenra ikunda llya lyafo lya kipooka. ⁵ Naasa kumbwany ni angaa kulewoya, kukurye na itana mesha alya a mbee. Lyo kwanra kulatana indo, mmbo nshaa kwafo, na yeny nshutaa taa yafo ando a vayo, elyi kwanra kulakurya. ⁶ Lyo kutiri usha lumwi, llo elu, elyi kusuuye mikaaye ya Vanikolai, nayo naakwa ni yeny shiveisuuye. ⁷ Yeto atiri kuri navearanya irero elyi Mumuyo aifo avia siri. Yeto mwivinga mmbo nsheniingaa nalye ndunda ta nri yeto wa muu, yeto ukee nndeny wa Iruva.” ⁸ “Na kwa nsu yeto wa siri ikee Simirna reiya indi: Efi mfyo aamba yeto akee wa mapookyony na mafurumyony yeto efiiye, kawuya ikaa na muu. ⁹ Shiishi ukiva lwafo na itura lyafo, (lyo kukee isimba) shishi na firumu fya yewo vakeyaamba mmbo vakee Vayuda, nawo nta nshi indo vakai-fo, nawo ni mmba ya kiterevyo ya Satana. ¹⁰ Kulairyee efyo fikaa fikusheye-fo. Lola-te, yeto Nkumbi mmbo asheeraa vengyi vany kifingyony naambo kive kyeeso kyany, na yeni lyo mushekaa fyuureny ando a mikonu ikumi. Kusirye-u fika ifwa, na yeny nshekuvikaa ureto lwa muu. ¹¹ Yeto atiri kuri avearanya irero elyi Mumuyo aifo avia siri. Yeto ashevingaa nnyashewonaa ilyamarwa ni ufu elo lwa kavii-fo.” ¹² “Na kwa nsu wa siri ikee Pergamo reiya indi: Efi mfyo aamba yeto atiri usu elo woovi, lukee woovi taari toose. ¹³ Shiishi ando kusalalyi, nng’u kitima kya ushilyi kya Satana kyikai, neewe kwatira irina lyakwa deny, nta kulamini kikusiryo kyakwa, kufike mikonu ilya ya nkureekyi wakwa we Antipa, ashikusirye, yeto alewaiyo efo kwany, yoo Satana akai. ¹⁴ Lyo shitiri marero maangu na yewe, mashika efo kwafo kutiri vandu veetira ngyufundo ta Balaamu yeto alelosha Balaki navikye Vaisraeli nsindara, vakalya findo fileutwa firaso kwa maruva a wongo, na ituusa, ¹⁵ Kiwo da na yewe kutiri vandu velatya kiloshyo kya Vanikolai. ¹⁶ Kyasia, kuryeeny, lyo kwanra kulakurya mmbo nshaa kwafo uviny, nshekapa nawo fira na usu elo lukee kaniny kakwa. ¹⁷ Yeto atiri kuri navearanya irero elyi Mumuyo aifo avia siri. Yeto mwivinga mmbo nsheniinga-u mana ilya ikee shisurumi, shinniinge na iwe yaa, na yoo iweny elyo mmbo kukee kureiye irina iya lyilaishiwa ni nndu kuuta yeto akee ilyiwarya.” ¹⁸ “Na kwa nsu wa siri ya Tiatira reiya indi: Efi mfyo Mwana wa Iruva aamba, yeto atiri miso avakye kipalapala kya muro, na marende akwe akavaka minya ya arera ikee shisinge deny. ¹⁹ Shiishi mashora afo na ikunda lyafo na kikusiryo kyafo na ikuuta lyafo na usisiryo lwafo; na lyingyi sheelyi mesha afo a numa yei mmbo ailannyi alya a mbee. ²⁰ Lyo shitiri irero uwe yafo yewe, mmbo kulefura na nka yeto Yezebeli, yeto alekwaallwa nkisuku kalosha vandu vakwa evaretaa, naambo vatuuse na ilya findo fileutwa kiraso kwa mafwanu. ²¹ Na yeny mmbo shilenniinga mwaanya naambo nakurye, lyo nnyakundye ikurya kya utuusi lwakwe-fo. ²² Kulollye, mmbo nshemweraa uwe ya kitara ando amwi na yewo veetuusa nawe, vawoni ukiva uniini vakanra valakurya kya mashora awo, ²³ na yeny mmbo nshewaa vana vakwe na ufu. Na siri toose mmbo tishemanyaa ni yeny shasaiya mirima. Na yeny mmbo nshetaiyaa wo umwi waany kiinani na mashora akwe. ²⁴ Kyaindi mmbo shamuvia yeni vengyi mukee Tiatira, woose yewo valatiri ngyufundo eto, valaishi fyaaso fya Satana, shaasa vakeamba, Nshimwekeryaa irio lyingyi-fo. ²⁵ Lyo tireny tapu ekyo mutiri, kutani elyo nshaa. ²⁶ Na yeto ashevingaa, na iringa mbony takwa fika mafurumyony, mmbo shinningaa ushilyi lwa masanga a vandu, ²⁷ nawe mmbo asheveesaa na nsenge wa minya, shaasa fiiya fya muumba nungu firyaa uteeri, shaasa na yeny shilevavasyo ni Ndeakwa. ²⁸ Na yeny mmbo nshenniingaa nyinyiri ilya ya ngama. ²⁹ Yeto atiri kuri keyaaranya navearanya irero elyi Mumuyo avia siri.”

¹ “Na kwa nsu wa siri ya Sardi reiya indi: Yefi mfyo yeto atiri Mimuyo yeyo mfungare ya Iruva akeeamba, na nyinyiri tilya mfungare. Shiishi mashora afo, kya yaamba mmbo kutiri irina lya muu kyaindi lyo mmbo kufiiye. ² Lala shoovi, kuvangyise yefyo fisaaye-fo fikee kufii ifwa. Mashika nshilelollya mashora afo asongovye mbee ya Iruva wakwa-fo. ³ Kummbwany shaasa kileva na shaasa kuleita, tira efyo kukurye. Lyo kwanra kulakurya mmbo nkusheyaa sha inyinyi, nta nkumanyaa kyeeri ekyo nsheshaa kwafo-fo. ⁴ Lyo kusaae-fo marina maangu efo Sardi, a vandu valaketefura soori tawo. Nawo mmbo vashendaa veriyani na yeny veree soori shaa, kimmba kivasumannyi. ⁵ Yeto ashevingaa mmbo avikwa indo soori shaa, nta nshisheutaa irina lyakwe efo kitabuny kya muu-fo na yeny mmbo nshekureekyaa irina lyakwe mbee ya Ndeakwa, na mbee ya vasu vakwe. ⁶ Yeto atiri kuri, navearanya irero elyi Mumuyo avia siri.” ⁷ “Na kwa nsu wa siri ikee Filadelfia reiya indi: Efi mfyo yeto akee Mweele akeyaamba, nawe mmbwa dede, arye ufunguo lwa Davidi, yeto mwirua kulaifo ashiidimaa ifinga, nalyo kamfinga kulaifo ashidimaa irua. Shiishi mashora afo. ⁸ Lola, mmbo shakoora mwaango ukee murwe mbee yafo, nato kulaifo aidima iuraya, mashika ukeemwikare, na yewe mmbo kulelatya irero lyakwa, nta nkulemina irina lyakwa-fo. ⁹ Lola mmbo shakuniinga yewo va ironda lya Satana, yewo vashambaa wo ni Vaisraeli nawo nshi wo-fo, mmbo vakeyaamba wongo, lola mmbo nshevarumaa vashefirya ndi yoo marendeny afo, na imanya sheelyi mmbo shikukundye. ¹⁰ Mashika elyi kulekutira na irero lya usisiryo lwakwa, na yeny mmbo nshekuringaa, kukye fyeeri efi fya yeeswa yefyo fisheyaa ulana loose, nafyo mmbo fisheesaa yewo woose vakee urukeny. ¹¹ Mmbo nkeesha uviny. Tira ekyo kutiri tapu, naambo kulave nndu akusoka ureto lwafo. ¹² Yeto mwiivinga mmbo nshemwallwa ngo ya mmba ya Iruva wakwa, nta nnyashukaafo-fo, na yeny mmbo nshereiyaa yoo uwe yakwe irina lya Iruva wakwa, na irina lya Yerusalemu yeyo shiiya, ushoolokaa uuka iruveu kwa Iruva wakwa, utiri irina lyakwa elyo iiya. ¹³ Yeto atiri kuri navearanya irero elyi Mumuyo aifo ivia siri.” ¹⁴ “Na kwa nsu wa siri ya Laodikia reiya indi: Efi mfyo akeyamba yeto akee Amen, akee Nkureekyi wa dede nawe eefo uka elyo Iruva aleumba ulana. ¹⁵ Shiishi mashora afo sheelyi nkukee mbeo nta muro-fo, kyevaa kyeni kukooye kwevaa mbeo ao muro. ¹⁶ Kyasiany, kimmba kutiri ngukumu, kulakee nta mbeo nta muro, mmbo shikumishaa kuuke kaniny kakwa. ¹⁷ Mashika mmbo kukeyaamba, yeny mmbo shikee isimba, mmbo shankuvika isimba, nkwiifo nta kindo kishitinyi-fo, na yewe nta nkwiishi sheelyi kukee nkiva, kwavetirwa nnyinyira, na nkiva na mfu miso na mbereto. ¹⁸ Mmbo nkee ikuniinga urango, kuure kwakwa saabu ikee shisangye na muro, llyo kuveny isimba; kuraa na soori shaa pyai, sony tafo teeva mbereto tisikywa, na nri wa yaamba miso afo naambo kulollye. ¹⁹ Woose yewo shivakundye mmbo shavakyeemya na ivakapa; naasany marukya kukurye. ²⁰ Lola-te, ekakau shisalalyi yoo mwaangony shyuukapa-kapaa; kwakooya nndu aita unyanga lwakwa kashiruya mwaango, mmbo nshangaa kwakwe shilye nawe shoonga, nawe nalye na yeny. ²¹ Yeto mwivinga mmbo nshenningaa mwaanya wekaa na yeny kitiminy kyakwa kya itumbe, shaasa na yeny shilevinga shakaa na Ndeakwa kitiminy kyakwe kya itumbe. ²² Yeto atiri kuri navearanya irero elyi Mumuyo avia siri.”

¹ Numa ya efyo, shoorwa mwaango wa iruveu wiirwiikaa, na unyanga lulya lwa mbee shelwiita luvakye unyanga lwa iranda lukarera na yeny, lukaamba, “Saama kushe kunu, na yeny nshekoraa findo fishekaa-fo numa ya efyo.” ² Naasa shaipowa Mmumuyo, shalollya kitima kya itumbe kyikee kivike iruveu na umwi akee kitiminy ekyo; ³ na yeto akee rembo uwe ya vayo avakye iwe lyimika mikaa, na ukova lwa mmbwa lukaringyitya kitima kilya kya itumbe, lukava sha sumaradi. ⁴ Na fitima makumi avii na fiina fikaringyitya kitima kilya kya itumbe, na yoo fitiminy efyo shalollya vamiku makumi avii na vaana vefikaye, varee soori shaa; na mirweny vakaraa ngyureto ta saabu. ⁵ Na yoo kitiminy yekyo kya itumbe kukauka-u ukova lwa muro na unyanga lwa iruruma. Na taa mfungare ta muro tikaaka mbee ya kitima kilya kya itumbe, yeyo nnyo Mimuyo mfungare ya Iruva. ⁶ Na mbee ya kitima kilya kya itumbe kweiyo yeeve ya kilola, sha bilauri; na yoo nnang’ani ya kitima kilya kya itumbe na taari ta vayo toose, veiyo fyuumbe fiina fikee na muu, fitiri miso mbee na numa. ⁷ Na yeto atiri muu wa mbee kavaka miiso; na yeto atiri muu wa kavii avakye ngashe, na yeto atiri muu wa kararu kavaka kisangu kya nndu wa vandu; na yeto atiri muu wa kaana kavaka ngoru irumbukaa. ⁸ Na yeva vatiri muu vaana wo umwi mmbo etiri maaru arindaru, na taari toose kipoo na kimmba vakaringyityo ni miso, nta mmbakeeimuya kio na nsanyiny-fo, veshambaa, “Mweele, Mweele, Mweele ni Nndumi Iruva muni matorito, yeto eiyo, aifo nawe asheshaa.” ⁹ Na yewo vatiri muu vaana vakeeniinga yeto akee rembo yoo kitiminy ekyo kya itumbe nnduma, na wiindi na fyaanu, yeto akee na muu llung’anu na llung’anu. ¹⁰ Llyo vamiku yewo makumi avii na vaana vakafiirya ndi si yoo mbee ya yeto akee rembo yoo kitiminy yekyo kya itumbe, nawo vakamfiirya ndi yeto akee na muu fika llung’anu na llung’anu, nawo vakeerya ngyureto tawo mbee ya kitima kilya kya itumbe, veshambaa, ¹¹ “Yewe Nndumi weeru na Iruva weeru, mmbo kusumani iwarya itumbe na wiindi. Mashika ni yewe kuumbye findo fyoose, na kyeendwa ni ikunda lyafo fikakaa-fo, nafyo fikaumbwa.”

¹ Naasa shalollya efo wokony usha lwa yeto akee rembo uwe ya kitima kilya kya itumbe kitabu kyikee kireiye mmba na efo kwa numa, kyikee kikape muuri mfungare. ² Shalollya nsu atiri finya deny, evambisaa irero na unyanga uniini nnu, eshambaa, “Ni vi yeto asumani itarambwa kitabu ekyo na ifisha muuri eyo ya vayo?” ³ Nta nkulakaa-fo nndu iruveu, nta kunu ulaniny, nta efo si ya vayo, aleidima irua kitabu ekyo-fo, nta ikilla-fo. ⁴ Na yeny shafua nnu elyi kulewiika nndu asumani irua kitabu ekyo nta ikilla. ⁵ Naasa umwi wa vamiku valya kashivia, kulafwe-fo, lola-te, kwiifo Miiso ya ufyari lwa Yuda, wa Isindeny lya Davidi, we mmbo alevinga kutani aidima irua kitabu kilya, na muuri ya vayo mfungare. ⁶ Shalollya yoo nnang’ani ya kitima kilya kya itumbe na valya vatiri muu vaana, na yoo nnang’ani ya vamiku valya, Ngurana ya Iruva esalalyi-u, akee sheelyi akee nshishe, atiri mbembe mfungare na miso mfungare na yeto nto Mimuyo mfungare ya Iruva yeyo ilerumwa ulaniny koose. ⁷ Kasha, keepoo kitabu kilya na woko lwakwe usha, mmbwe yeto akee rembo yoo kitiminy kilya kya itumbe. ⁸ Kyeeri aleipoo kitabu kilya, valya vatiri muu vaana na vamiku valya makumi avii na vaana vakawa si yoo mbee ya Ngurana ya Iruva, wo umwi waawo etiri kivale, na fipete fya saabu fiishwe mafura afwaamaa, nafyo mfyo fiterewo fya veele. ⁹ Nawo vakeemba kiimbo veshaambaa, “Nnyewe kusumani irua kitabu ekyo na iporommwa muuri ya vayo, mashika elyi kuleshishwa, kwaurya Iruva vandu va wo isanga na wa kishomu na wo mmba, kwawoora na samu yafo. ¹⁰ Kwavaallwa vana va umangyi na vakohani va Iruva weeru; nawo mmbo vakee ishillya kunu urukeny.” ¹¹ Shalollya na iita ngyunyanga ta vasu veengyi taari toose ta kitima kilya kya itumbe, na ta valya vatiri muu, na ta vamiku valya, na yeekena lyawo lyefikye fiku ka fiku ka mafiku. ¹² Vakarera na unyanga uniini vakaamba, ni Ngurana ya Iruva yeyo ileshishwa isumani iwarya wiidimi na usuri na urango na finya na wiindi na uniini na mbora. ¹³ Na wo kyuumbe ekyo kikee iruveu na yaa ulaniny na efo si ya uruka na uwe ya yeeve, na efyo fyoose fiifo, shafiita fishaambaa, “Mbora na wiindi na usuri na wiidimi mfya yeto akee rembo uwe ya kitima kya itumbe, na Ngurana ya Iruva, llung’anu na llung’anu.” ¹⁴ Na valya vatiri muu vaana vakaamba, “Amen.” Na vamiku valya vakawa si, vakafiirya ndi.

¹ Naasa shalollya kyeeri Ngurana ya Iruva aleporommwa muuri umwi kya filya mfungare, sheeta umwi wa valya vatiri muu vaana eshambaa, “Osho!” Unyanga lwakwe lukavaka iruruma. ² Shalollya frasi shaa, na yeto aisaamyi etiri ura, kaniingyo ureto nawe kauka-u, evingaa naambo navinge lyingyi. ³ Llya aleporomwa muuri ulya wa kavii, sheeta ulya atiri muu wa kavii ashambaa, “Osho!” ⁴ Ikasomuka-fo frasi ingyi, idodorye nnu, na yeto aisaamyi kawonisa mwaanya wa yuuta urilalyi urukeny, naambo vandu vakuwaa veni na veni, nawe kaniingyo usu uniini. ⁵ Llya aleporomwa muuri wa kararu, sheeta ulya atiri muu wa kararu eshambaa, Osho! Naasa shalollya frasi shuu, na yeto aisaamyi erye mesa a yeesa wokony lwakwe. ⁶ Sheeta unyanga lwava sheelyi lukee yuuka nnang’ani ya yewo vatiri muu vaana, lwiishaambaa, Kibakuri kya nganu nshilingyi, na fibakuri fya nganu shuu ni shilingyi, nta kulalyamare mafura na mfinyo-fo. ⁷ Na llya aleporommwa muuri wa kaana, shaita unyanga lwa ulya atiri muu wa kaana eshambaa, Osho! ⁸ Naasa shalollya frasi ifwani ifu, na yeto aisaamyi mmbo avangwaa Ufu, na kwa Vafu, keenda nawe. Nawo vakaniingwa ushilyi uwe ya kyenga kya kaana kya uruka, vawaa na usu na shaa na ndwari shiroo na mafisi a uruka. ⁹ Kyeeri aleporommwa muuri ulya wa karaanu, shalollya yoo kwasi ya kitara kyeerasya mimuyo ya valya valenshishwa kimaruma kya irero lya Iruva, na kimaruma kya ukureekyi lwawo. ¹⁰ Vakafua na unyanga waasha vakaamba, Woi Nndumi Mweele, muni Dede, mmbo kufikaa indii kulashuutaa uvingo, nta iniinga samu teru usumanu kya yewo vakee ulaniny? ¹¹ Wo umwi waawo kaniingyo soori shaasha, shaa vakavio vengere ifura-se ando a kirambo, kutani yeekena lya veakana nawo na vanavamaye vawo lyafikya, mmbo yewo vashemamitwaa ando amwi nawo. ¹² Na yeny shalollya kyeeri aleporommwa muuri wa karindaru, kukasha kidinasi kiniini, nkyeere ukafwana muu sha fii shuu, mwiiri nato ukava sha samu. ¹³ Nyinyiri tikaangara sheelyi mkuu utulaa mapora a vayo kyeeri wavivitwa ni uraato lwa finya. ¹⁴ Iruveeu kukakweete sheelyi nndu alema karatasi, na wo ifumbu na kyuuruka fikasamiswa ando a vayo. ¹⁵ Na vamangyi va ulana, na vaniini, vaniini va fira, na masimba, na vaafinya, na wo ishinga, na yewo valeke, vakoovya mbangeny na ifo si ya mawe a mafumbu, ¹⁶ veviaa mawe na mafumbu, luwoyeny, lusikyeny, lulalollyo ni yeto akee rembo kitiminy kya itumbe, na unyafi lwa Ngurana ya Iruva. ¹⁷ Mashika nkonu yeto nniini, urye unyafi lwawo wansha, a mmbi yeto ashenkyaa?

¹ Numa ya efyo shalollya vasu vaana vesalalyi taariny iinya ta ulana, vesikaa ngyuraato iinya, naambo uraato lulavivite ya urukeny nta efo yeeveny, nta lulashevivita miri. ² Shalollya nsu ungyi asaama auka taari ya ngama, arye muuri ya Iruva yeto muni muu, karerya vasu valya vaana na unyanga waasha mmbo valya valerambikywa ikapa uruka na yeeve, ³ kaamba, “Mulakape uruka nta yeeve-fo, nta miri-fo, kutani elyi lushemaa ivika mashinga a Iruva wende efo fisanguny fyawo.” ⁴ Sheeta marina a yewo valevikwa wende va ngyufyari ta Israeli vafikye vandu fiku iyana na makumi aana na fiina: ⁵ Va ufyari lwa Yuda, fiku ikumi na fivii; va ufyari lwa Ruben, fiku ikumi na fivii; va ufyari lwa Gadi, fiku ikumi na fivii; ⁶ va ufyari lwa Aseri, fiku ikumi na fivii; va ufyari lwa Naftali, fiku ikumi na fivii; va ufyari lwa Manase, fiku ikumi na fivii; ⁷ va ufyari lwa Simion, fiku ikumi na fivii; va ufyari lwa Levi, fiku ikumi na fivii; va ufyari lwa Iskari, fiku ikumi na fivii; ⁸ va ufyari lwa Sabuloni, fiku ikumi na fivii; va ufyari lwa Yosefu fiku ikumi na fivii; va ufyari lwa Benyamini, fiku ikumi na fivii. ⁹ Numa ya efyo shalollya ate kwiiyo ironda iniini nnu kulaifo nndu ashiidimaa ilyeekena, vandu va wo isanga na wo ufyari na mmba na kishomu, vesalalyi-u mbee ya kitima kilya kya itumbe, na mbee ya Ngurana ya Iruva, veerye soori shaa pyai, varye na maramba a myaangashi maakony awo. ¹⁰ Vakafua na unyanga uniini vakaamba, “Ukiro ni lwa Iruva weeru yeto akee rembo kitiminy kya itumbe na lwa Ngurana ya Iruva.” ¹¹ Na vasu woose mmbo vekee rembo veringyitye kitima kilya kya itumbe taari toose, na mbee ya vamiku yewo na valya vatiri muu vaana, nawo vakawa si kifulufulu yoo mbee ya kitima kilya kya itumbe, vakaindya Iruva. ¹² Vakaamba, Amen, Mbora na usuri na waarya na fyaanu na wiindi na wiidimi na finya mfya Iruva weeru fika llung’anu na llung’anu. Amen. ¹³ Umwi wa vamiku valya kashirouwa kaamba, “A vandu yeva varee soori shaa indo ni wo vakyi? Nawo nkwi wooka?” ¹⁴ Na yeny shammbia, “Woi Nndumi wakwa, ni yewe kwiishi.” Nawe kashivia, “Yewo mmbo valya valemmuuka ngatareny ilya ing’ani, nawo mmbo valensangya soori tawo vakaeelyisa na samu ya Ngurana ya Iruva. ¹⁵ Naasany ulaalu mmbo vakee mbee ya kitima kya itumbe kya Iruva, nawo mmbo vakendundya kio na nsanyiny efo mmba yakwe, na yeto akee rembo yoo kitiminy kya itumbe mmbo ashevavikyaa nruve na yeema lyakwe. ¹⁶ Nta mmbashekitirwaa nshaa nta nyura-fo, nta mwi ivakora nta nrike-fo. ¹⁷ Shamashika Ngurana yeyo ya Iruva akee nnang’ani ya kitima ekyo kya itumbe, mmbo asheveesaa, nawe mmbo ashevateteraa yeengya ngyusoka titiri mura wa muu, na Iruva mmbo asheangata misoru myoose efo misony awo.”

¹ Na kyeeri aleporomwa muuri wa mfungare, kukava kimammya sau iruveu ando a kyenga kya saa. ² Na yeny shalollya vasu valya vasalala mbee ya Iruva, nawo vakaniingyo maranda mfungare. ³ Naasa ungyi kasha kasalala yoo mbee ya kitara kya irasya, erye kipete kya saabu, kaniingyo miri ifwaamaa, naambo nasande ando amwi na fiterewo fya veele yoo uwe ya kitara kya saabu kya irasya, yeyo ikee mbee ya kitima kya itumbe. ⁴ Nsu wa miri ilya ifwaamaa ukasaama ukafikya Iruva ando amwi na fiterewo fya veele, fyuuka wokony lwa nsu ulya. ⁵ Na nnsu yeto kaipoo kipete kilya kakiishura muro wa kitara kyeerasya, kaufwallya kunu urukeeny, kukava-fo ukova na iruruma na unyanga uniini na kimwii na kidinasi. ⁶ Na vasu valya mfungare varye maranda mfungare vakakudeesya yakapa. ⁷ Nnsu wa mbee kakapa iranda, mmbwa ya masaawe na muro fisasangyi na samu, fikeerwa urukeny; kyenga kya kararu kya uruka kyikasarumya, na mooro mmbisi moose ukasarumya. ⁸ Nnsu wa kavii kakapa iranda, kukalollyo-u kindo kivakye ifumbu yaasha lyishakaa muro kikeerwa yeeveny, kyenga kya kararu kya yeeve kikava samu. ⁹ Kyenga kya kararu kya findo fikee yeeveny fikafwa na kyenga kya kararu kya ngalava kikalyamarwa. ¹⁰ Nnsu wa kararu kakapa iranda, nyinyiri imwi niini ikawa yuuka iruveu, iishakaa sha taa, ikawoya kyenga kya kararu kya mira, na ngyusoka ta mura. ¹¹ Na irina lya nyinyiri ilya ni Kivawo; kyenga kya kararu kya mura kikavava deny, na vandu veengyi vakafwa kyeendwa mmura yeto. ¹² Nnsu wa kaana kakapa iranda, kyenga kya kararu kya nkyeere kikakapwa, na kya mwiiri na kya nyinyiri, fyenga efyo fya kararu fikava ireema, nsanyiny kyenga kya kararu uve ireema na kio nakyo. ¹³ Numa ya vayo shalollya na sheeta uviri lwiirumbukaa efo iruveu, lukaamba na unyanga waasha, “Oshiny, oshiny oshiny lwa yewo vakee ulaniny, kimaruma kya ngyunyanga ta maranda a vasu vararu eto tisaaye-fo, nawo vankudeesya itikapa.”

¹ Nnsu wa karaanu kakapa iranda, shalollya nyinyiri yeeluka iruveu, ikawa ulaniny. Nawe kaniingywo ufunguo lwa irina lya kwa vafu. ² Karua irina lya kwa vafu, nsu ukarwa wuuka kulya irininy, uvakye nsu wa nguminy niini, nkyeere na ngyina fikava ireema kimaruma kya nsu yeto wauka efo irininy elyo. ³ Nrie tikauka kulya nsuny ulya tikawoya uruka, nato tikatira finya sha finya ya nguluva yoo uteeriny. ⁴ Tikavio tilashepaana mooro wa uruka, ao nta kindo kyoose kyikee kivisi, nta nri, lyo tilye vandu yewo valakee vavike wende lwa Iruva efo fisanguny fyawo. ⁵ Tikavavaswa tilasheevawaa lyo tivatuurwe ando a miiri iraanu. Na mavavyo awo akava sha uroi lwa nguluva elyi yamaara nndu. ⁶ Nalyo kyeeri ekyo vandu mmbo varuuyaa ufu lyo valalulolyaa. Nawo mmbo valanga ifwa, lyo ufu luvarishe. ⁷ Na ngata ya nrie yeto mmbo yekee sha ya frasi tikudeesye kya fira, na mirwe yaawo ikava sheelyi iree ureto lwa saabu, na fisangu fya vayo tikavaka kisangu kya nndu. ⁸ Nato mmbo tetiri fii tivakye ta vaka. Na mayoo a vayo mmbo evakye mayoo a miiso. ⁹ Na yoo mbafuny tikaraa firinga-mbafu fivakye fya minya. Na unyanga lwa maaru a vayo lukava sha lwa makari a frasi shiingyi tikeerishya fireny. ¹⁰ Nato mmbo titiri minkya sha nguluva, na miinga, na ifo minkyeny ya vayo mfo kweekee finya yeyo yeetuurwa vandu ando a miiri iraanu. ¹¹ Nato mmbo titiri mangyi yaawo mmbwe nsu nka wa si kwa vafu, na irina lyakwe kwa Kiebrania ni Abadoni, na kwa Kigriki ni Apolioni. ¹² Oshiny lwa mbee lulemmaa iira. Lla-te kuseeri-fo oshiny tingyi ivii tishaa numa. ¹³ Nnsu wa karindaru kakapa iranda, shaita unyanga lumwi lwauka efo mbai ya kitara kyeerasya kilya kya saabu kikee yoo mbee ya Iruva, ¹⁴ lwiiviaa nsu ulya wa karindaru etiri iranda, “Porommwa na vasu valya vaana vakee vafingye kulya mureny ulya nniini to Frati.” ¹⁵ Vasu yewo vaana vakaporomuwa, na mmbo yewo ven-deesyo kimaruma kyeeri ekyo na nkonu na mwiiri na mwaaka, naambo vawaa kyenga kya kararu kya vandu. ¹⁶ Na yeekena lya maronda a vasikari va frasi efikye fiku makumi avii ka fiku ikumi; llyo yeekena shileeta. ¹⁷ Ni indo shilelollya frasi eto efo myooryeny akwa, na yewo vetisaamyi, vetiri findo fyeeringa mbafu, sha fya muro, na ta buluu, na ta kibiriti, na mirwe ya frasi eto nsha mirwe ya miiso, na efo mirweny yaawo kukauka-fo muro na nsu na kibiriti. ¹⁸ Kyenga kya kararu kya vandu kikawawa nngapo eto isaru, nto muro eto na nsu eto na kibiriti ekyo mfyo fileuka efo kaniny kawo. ¹⁹ Mashika finya ya frasi eto mmbo yuukye efo kaniny kawo, na efo minkyeny yawo, mashika minkya ya yawo mmbo ivakye shoka, mmbo itiri mirwe, nato mmbo tiwaa nayo. ²⁰ Na vandu yewo valekya kulaore valewaawa ni ngapo yeto, mbalekurya kya mashora a maako awo, vare valaindya vambishwa, na mafwanu a saabu na a fesa na mawe na miri, yoo alalolaa nta iita nta yeenda-fo. ²¹ Nta valakuryaa kya uravi lwawo, nta usavi lwawo, nta utuusi lwawo nta unyinyi lwawo-fo.

¹ Naasa shalollya nsu ungyi atiri finya eshoolokaa ooka iruveu, akee nsikye ni ifishi, na ukova lwa ngyima lukee nrweny wakwe; kisangu kyakwe kikava sha nkyeere, na marende akwe akavaka ngo ta muro. ² Na efo wokony lwakwe arye kitabu kidu kikee kitarambwe. Karwaa urende lwakwe usha yoo uwe ya yeeve, na elo umuso kalurwaa ulaniny. ³ Nawe kaffwa na unyanga waasha, sha miiso idinaa. Kyeeri alefua, maruruma alya mfungare akariika. ⁴ Kyeeri maruruma yoo mfungare aleriika, llyo shilekudeesya ireiya. Naasa sheeta unyanga looka iruveu lwishambaa, Vikya muuri marero yoo moose alererwa ni maruruma yoo mfungare, kure kulaareiya. ⁵ Na nnsu ulya shilelollya esalalyi uwe ya yeeve na uwe ya uruka, kaorwa woko lwakwe usha na efo iruveu, ⁶ kalya mboo na yeto akee na muu llung’anu fika llung’anu, yeto atannyi iruveu na fyoose fiefo, na ulana na fyoose fiefo, na yeeve na fyoose fiefo, kyeyaamba nkushekaa-fo fyeeri numa ya findo efi-fo; ⁷ kuuta kyeeri kya mikonu ya unyanga llwa lwa nnsu ulya wa mfungare elyi ashekudeesya ikapa iranda, llyo ekyo Iruva akundye kisheinutywoo, shaasa aleongoya vasero yewo vakwe wo vakisuku. ⁸ Na unyanga llwa shelwiita lushukaa iruveu shawuya ilwiita lyingyi lwireraa na yeny, lukaamba, Enda kwandewarya kitabu kilya kyekee wokony lwa nsu ulya alesalala uwe ya yeeve na uruka. ⁹ Naasa shaeengya nnsu ulya shammbia nashiniingye kitabu kilya kidu. Kashivia, “Kiwarye kukilye. Nakyo kishekuvikyaa kivawo efo ndewuny yafo, kyaindi efo kaniny kafo kisherolaa sha ukyi.” ¹⁰ Shawarya kitabu kilya efo wokony lwa nnsu ulya, shakilya, kikarola sha ukyi kunu kaniny kakwa, na kyeeri shemaa ikilya ndeu yakwa ikavava. ¹¹ Vakashivia, “Mmbo kikukooye kuute ukisuku lyingyi kwa vandu na fishomu na vamangyi veengyi.”

¹ Naasa shaniingyo nsengye wa irere, nalyo umwi kashivia, “Kwiipoo kundeesa mmba ya Iruva na kitara kyerasya, na yewo vakeiindya-fo.” ² Na kari ka mmba ya Iruva kulakee-se-fo, mashika vandu va masanga mmbo valeaniingwa, nawo mmbo vashevavaraa muri yeto mweele ando a miiri 42. ³ Na yeny mmbo nsheningaa vakureekyi vakwa vavii mumu vaute ukureekyi ando a mikonu 1,260, veree makunnya. ⁴ Yewo mmbo miri ilya ya mafura na firembo fya mishumaa fisalalyi mbee ya Nndumi wa ulana. ⁵ Na kwakooya nndu akunda ivapaana muro mmbo ushukaa efo kaniny kawo na ikomba vakyiduva vawo kombi. Na kwakooya nndu akunda ivapaana ni indo kinkooye iwaawa. ⁶ Yewo mmbo vatiri ivavaso lya iima ngyina mbua ilashe nta kyeeri kyoose kya ukisuku lwawo. Nawo mmbo varye ivavaso lya yaalasha mura uve samu, na ikapa uruka na wo ngapo shoose wo kyeeri vakundaa. ⁷ Elyi vashemaa ukureekyi lwawo, ifisi llya lyishuukaa si kwa vafu mmbo lyishekapaa fira nawo nalyo mmbo lyishevavingaa na ivawaa. ⁸ Na minying’a yaawo mmbo ishewaa efo shieny ya muri yeto nniini, uvaangwaa irina lya uresi Nsodomu, ao Misri, na nng’u yoo Nndumi waawo alekapyo nsalabeny. ⁹ Na vandu va mmba yeto na ngyufyari na fishomu na isanga lya vandu mmbo valolaa minying’a yaawo ando a mikonu iraru na kyenga, na nta mmbaraa minying’a yaawo irikwa-fo. ¹⁰ Na yewo vakee ulaniny mmbo vafuraa neekapa nndoro. Nawo vashekuningaa findo fya pya wo veni na veni, mashika elyi vakisuku yewo vavii valevatuuwa yewo vakee ulaniny. ¹¹ Mikonu yeyo iraru na kyenga ikansia, mumuyo wa muu wuuka kwa Iruva ukawaanga, vakansalala na marende awo veni, na weerei uniini ukatira vandu yewo vakeevalla. ¹² Vakeeta unyanga uniini luuka iruveu lwishambaa, “Saaminy na kunu.” Vakasaama iruveu veriwa ni ifishi, vakiduva vawo vevallaa. ¹³ Na kyeeri ekyo kukasha kidinasi kiniini, na kyenga kya ikumi kya muri kikawundukya si, na vandu fiku mfungare vakawaawa nkidinasi ekyo. Na yewo valesaa-u vakairyaa nnu, vakarumisha Iruva wa iruveu. ¹⁴ Woshiny lwa kavii lwammaa iira, naasa woshiny lwa kararu mmbo lukeesha uviny. ¹⁵ Nnsu wa mfungare kakapa iranda, kukaitiwa ngyunyanga niini iruveu tishambaa, “Umangyi lwa ulana ulaalu mmbo lwammaa iva umangyi lwa Nndumi weeru llo na lwa Kristo wakwe, nawe mmbo asheshillyaa llung’anu na llung’anu.” ¹⁶ Na vamiku valya makumi avii na vaana vakee mbee ya Iruva vakaye fitima fya itumbe vakawa si kifulufulu, vakeendya Iruva, ¹⁷ veshambaa, “Mmbo lwakwaana yewe Nndumi Iruva muni finya shoose, yewe kuiyo na kweifo, mashika elyi kwawarya wiidimi lwafo lukee uniini, kushillyeny. ¹⁸ Vandu va masanga vakasua, na unyafi lwafo lukasha, na kyeeri kya yuutya valya valemfwa uvingo, na iniinga mashinga afo isina lyawo mmbo vakisuku na veele vafo, na yewo veindya irina lyafo, vadu na vaniini, na yewo valelyamara uruka.” ¹⁹ Numa mmba ya Iruva yeyo ikee iruveu ikaruwa, na isanduku lya kyaasa lyikalollyo-fo. Kimwii kikamika, na iruruma na ukova na kidinasi, na mbua ya masaawe shiniini nnu.

¹ Naasa wende uniini lukalollyo iruveu, nka aree nkyeere na mwiiri ukakaa yo si ya marende akwe, na nrweny wakwe ureto lwa nyinyiri ikumi na ivii. ² Nawe mmbo ekufingye, effwaa elyiwaa ni usu lwa mwana. ³ Lukalollyo wende lungyi iruveu, shoka niini idodorye, itiri mirwe mfungare na mbembe ikumi, na efo mirweny ya vayo ikaraa ngyureto mfungare. ⁴ Na nkya wa vayo wirufwaa laura ya nyinyiri ta iruveu, netituula ulaniny. Na shoka ilya ikasalala mbee ya nka ulya akeelyiwa ni usu lwa mwana, naambo elyi aniingwaa mwana ilye mwana yeto wakwe. ⁵ Nawe mmbo aleningwa mwana wa kyuumi, nawe mmbo asheesaa vandu va masanga woose na nsengye wa minya. Na mwana wakwe karukwau kafitwa kwa Iruva, yoo kitiminy kyakwe kya itumbe. ⁶ Nka ulya karishya kasa, nakooye ando akee nsongosye ni Iruva, naambo nalalollyo-fo ando a mikonu 1260. ⁷ Naasa kukakaa-fo fira efo iruveu. Mikaeli na vasu vakwe vakakapana na shoka ilya, na shoka yeyo nayo ikakapana nawo na vasu va vayo. ⁸ Lyo mmbalevinga-fo, nta ando vekai nkulekilollyo-se efo iruveu-fo. ⁹ Shoka yeyo ikafwallyo si, shoka yeyo shiniini, shoka nguu, ivaangwaa Nkumbi na Satana, yeto mwireta ulana loose, keerwa ulaniny, na vasu vakwe ando amwi nayo. ¹⁰ Sheeta unyanga uniini iruveu lwishaambaa, “Ulaalu ukiro lwambonika, na finya na umangyi lwa Iruva weeru, na ushilyi lwa Kristo wakwe, mashika nkumbi wa vanavamaye veru ammeerwa si, yeto ekeevakumba kwa Iruva weeru kio na nsanyiny. ¹¹ Nawo vakambinga na samu ya Ngurana ya Iruva na irero lya ukureekyi lwawo, nawo mbalelanga muu wawo-fo, fika ifwa. ¹² Naasa, kyeseny, yeni va iruveu na woose va efo. Oshiny lwa uruka na yeeve! Mashika nkumbi yeto mmbo ammooloka kwany etirwa ni unyafi uniini, eishi sheelyi ni fyeeri fyaangu-da atiri.” ¹³ Na shoka yeyo kyeeri ilelollya yammerwa ulaniny ikaing’asha nka ulya aleira mwana wa kyuumi. ¹⁴ Nka ulya kaniingyo maaru avii a uviri llwa uniini naambo narumbuke neende ando akwe efo kasa, yoo akeelelwa ando a myaaka iraru na kyenga, nakee kwaasha na shoka yeyo. ¹⁵ Shoka yeyo ikauta mura-mfongo nniini efo kaniny ka vayo ukasha yoo numa ya nka yeto naambo umweete! ¹⁶ Ulana lukaekya nka yeto, ulana lukatarambwa kana ka vayo lukamira mura ulya moose uleuka kaniny ka shoka yeyo. ¹⁷ Shoka yeyo ikasua nka yeto, ikeenda naambo indekapa fira na vana va nka yeto yewo valesaau, yewo veringa mavavaso a Iruva, netira ukureekyi lwa Yesu, nawe kashesalala yoo nsangeny wa yeeve.

¹ Naasa numa ya vayo shalollya ifisi lyikeyuuka efo yeeveny lyitiri mbembe ikumi na mirwe mfungare, na uwe ya mbembe eto ni ngyureto ikumi na efo mirweny yeyo ni marina a vearara. ² Na ifisi llya shilelollya mmbo lyevakye nyamandu, na marende a vayo akavaka a ngare, na kana ka vayo sha ka miiso; shoka yeyo ikaniingya ifisi elyo finya ya vayo na kitima kya vayo kya ushilyi na wiidimi uniini. ³ Llya shilelola nrwe wa vayo umwi ukava sheelyi utiri itiinga lya ufu, na ngapo ya vayo ya ufu ikashia. Ulana loose lukaawukwa kimaruma kya ifisi elyo. ⁴ Vakee indya shoka yeyo mashika nnyo ileniinga ifisi elyo finya ya vayo, nawo vakawuya iindya ifisi elyo, veshambaa, Ni viiny avakye ifisi elyi? Na lyingyi ni vi ashiidimaa ikapana nalyo? ⁵ Nalyo lyikaniingwa wiidimi lwerera marero maniini a fyaararo. Lyikaniingwa na wiidimi lweerunda ando a miiri 42. ⁶ Lyikatarambwa kana ka vayo naambo lyaarare Iruva, na yaarara irina lyakwe, na ando akwe, na yewo vakee iruveu, ⁷ Lyingyi lyikaniingwa mwaanya wa ikapa fira na veele naambo vavavinge, lyikaniingwa wiidimi uwe ya wo vandu na kishomu na mmba na isanga lya vandu. ⁸ Na vandu woose va uruka mmbo vashelyifiryaa ndi, yeto moose irina lyakwe lyilakee ireiye efo kitabuny kya muu kya Ngurana ya Iruva, ulya aleshishwa uka llya ulana luleumbwa. ⁹ Nndu atiri kuri naveita. ¹⁰ Nndu mwitirwa mfingwa, nkuti ashetirwaa mfingwa. Nndu mwiwawa na usu nkuti ashewawaa na usu. Yaa ng’u usisiryo lwa veele lukai. ¹¹ Numa shalollya-se ifisi lyingyi, lyisamaa lyuuka ulaniny, nalyo mmbo lyetiri mbembe ivii tivakye Ngurana ya Iruva, lyikarera sha shoka. ¹² Nalyo mmbo lyirye wiidimi loose lwa ifisi llya lya mbee. Nalyo mmbo lyikeallwa ulana na woose veefo vafiirye ifisi llya lya mbee ndi, llya itiinga lya vayo lya ufu lyileshia. ¹³ Nalyo mmbo lyiketana ngyende shiingyi, kutani lyeengye muro ukaoloka wuuka iruveu ushe ulaniny vandu velollye. ¹⁴ Nalyo lyikareta valya vakee ulaniny, kyeendwa ni ngyende tilya lyileniingwa wiidimi lwa itoora mbee ya ifisi llya, vakavia valya vakee urukeny vasongosye ifwanu lya ifisi llya lyetiri itiinga lya usu lyo lyikakaa na muu. ¹⁵ Lyikaniingwa wiidimi lwa ivika ifwanu llya mumuyo, kutani ifwanu yelyo lyarera, na yeengye yewo woose valashiindyaa ifwanu yelyo vawaawa. ¹⁶ Nalyo lyivavasye woose vavikwa wende vadu na vaniini; masimba na vakiva, valeke na mashinga, vavikwa wende yoo wokony usha ao yoo fisanguny fyawo. ¹⁷ Naambo nndu moose nalaidimi ikumba ao yuura, kuuta ulya atiri wende yelo, llyo irina lya ifisi llya ao yeekena lya irina lya vayo. ¹⁸ Yoo ng’u ntambo ukai. Yeto atiri urango, naruuye yeekena lya ifisi elyo, mashika ni yeekena lya kivandu. Na yeekena lya vayo ni 666.

¹ Naasa shalollya lyingyi, Ngurana ya Iruva esalalyi uwe ya ifumbu lya Sion, na vandu 144,000 ando amwi nawe, veerye irina lyakwe na irina lya ndeye lyikee lyireiye yoo fisanguny fyawo. ² Na yeny shaita unyanga luuka iruveu luvakye yoona lya mura mwiingyi, na lyingyi sha iruruma iniini. Na unyanga yelo shilelwiita lukavaka unyanga lwa vekapa fivale fyawo; ³ na iimba kiimbo kiiya mbee ya kitima kilya kya itumbe, na mbee ya valya vatiri muu vaana na vamiku valya; nta kulakae-fo nndu aidima ikulosha kiimbo kilya, kuuta valya 144,000, vakee woore kunu urukeny. ⁴ Yewo mmbo valakee vatefuse, mashika “Ni vana va kyeny.” Mmbo yewo vakerua na Ngurana ya Iruva wo ando ashendaa. Yewo mmbo vakee vaute efo vanduny, vave sha fimu fya mbee kwa Iruva na kwa Ngurana ya Iruva. ⁵ Ni ewo kaniny kawo kulandelollyo-fo wongo. Mashika mmbatiri mbese-fo. ⁶ Numa shalollya nsu ungyi erumbukaa nnang’ani ya iruveu, arye Nrumi ya Nsia ya llung’anu, naambo na ongoye yewo vakee ulaniny mbony shisha, na wo vandu, na ufyari na kishomu na wo mmba, ⁷ ereraa na unyanga uniini eshaambaa, Indyeny Iruva, na inndumisha, mashika kyeeri kya yaanduya woose kyamfika, mfiiryeny ndi yeto aletana iruveu na ulana, na yeeve na ngyusoka ta mura. ⁸ Numa shalollya nsu wa kavii asorya eshambaa, “Ekato muri wa Babeli wambwa, wambwa, muri yeto nniini, mashika nto yeto ulerita vandu va masanga mfinyo urye unyafi lwa utuusi lwakwe.” ⁹ Na nsu ungyi wa kararu kavalatya, ereraa na unyanga waasha kaamba, “Kwakooya nndu moose asheindyaa ifisi elyo na ifwanu lya vayo, na iwarya wende lwa vayo yoo kisanguny, ao yoo wokony, ¹⁰ yeto nawe mmbo ashenaa mfinyo wa unyafi lwa Iruva ukee nsongosye nta ulakee nsasande na mura, ukee upateny lwa unyafi lwakwe nawe mmbo asheorotwaa ni muro na kibiriti yoo mbee ya vasu veele na mbee ya Ngurana ya Iruva.” ¹¹ Na nnsu wa mavavyo awo mmbo urwaa llung’anu na llung’anu, nta mbatiraa ifura nsanyiny nta kio-fo, yewo veindya ifisi elyo na ifwanu lya vayo, na yeto mwiwarya wende yelo lwa irina lyakwe. ¹² Yoo ng’u usisiryo lwa veele lukai, yewo veeringa mavavaso a Iruva, na kikusiryo kya Yesu. ¹³ Shaita-se unyanga luuka iruve-u lukaamba, “Reiya, ‘Ngoma vafu yewo vafwaa vekee na Nndumi uka ulaalu. Ee da, Mumuyo aamba, vawoni iimuya numa ya ngatara tawo, mashika mashora awo ashendaa eriyani nawo.’ “ ¹⁴ Naasa shaorwa ifishi yaa pyai, na yoo uwe ya vayo shalollya umwi aiyo rembo, avakye Nndu, aree ureto lwa saabu efo nrweny wakwe, na efo wokony atiri nndo moovi. ¹⁵ Na nnsu ungyi kooka efo mmba ya Iruva, eterevaa ulya ekee uwe ya ifishi lyilya na unyanga waasha kambia, “Rwaa-u nndo wafo, kundeilula; mashika saa ya ilula yamfika. Shamashika fimu fya uruka fyammikwa.” ¹⁶ Na yeto ekee uwe ya ifishi keera nndo wakwe urukeny, uruka lukailulwa. ¹⁷ Naasa shalollya-se nnsu ungyi eshukaa kulya mmba ya Iruva ikee iruveu, nawe-da etiri nndo moovi. ¹⁸ Na nnsu ungyi-da kooka yoo kitareny kya irasya, yeu mbwe yeto atiri ushilyi na muro, nawe katereva yeto ungyi arye nndo ulya moovi, kammbia, “Rwaa-u nndo yeto wafo moovi kuyaye ndunda ta nsabibu wa uruka, mashika ndunda yeto ta vayo tammbira nnu.” ¹⁹ Na ulya keera nndo wakwe kailula nsabibu wa uruka, keera ndunda ta vayo efo irininy elyo iniini lya unyafi lwa Iruva. ²⁰ Ndunda eto tikavavaryo efo kipoo ya muri, samu ikooka-fo ikafika ngoveny ta kana ka frasi ishekaa kyamaa waasha lwa kilometa 300.

¹ Naasa shaorwa wende lungyi kulya iruveu, lung’ani, lweeresye, vasu mfungare varye ngapo mfungare ta ifurumya, mashika kyeendwa nto ng’u unyafi lwa Iruva lushemandaa. ² Shaorwa-se kindo kivakye yeeve ya kilola isasangyi na muro na valya veevinga, vaukye kwa ifisi lyilya, na ifwanu lya vayo, na efo yekeneny lya irina lya vayo, nawo mmbo vesalalyi yoo mbai ya yeeve yeyo ya kilola varye fivale fya Iruva. ³ Nawo vakee iimba kiimbo kya ishinga lya Iruva we Mose, na kiimbo kya Ngurana ya Iruva veshambaa, “Mashora afo ni maniini na a ngyende, Woi Nndumi Iruva mwaafinya, Ni ta usumanu, na ta dede shia tafo nta usumanu woi Mangyi ya vandu va masanga. ⁴ Ni vi yeto nalakwindyaa Woi Nndumi na irumisha irina lyafo? Shamashika ni yewe kumuni kukee Mweele; mashika masanga moose ashefiryaa ndi mbee yafo, mashika mashora afo a usumanu ammaa yoorwa paa.” ⁵ Numa ya efyo shalollya lyingyi mmba ya Iruva ya yeema lya ukureekyi iruveu ikaruwa; ⁶ na vasu valya mfungare varye ngapo mfungare vakauka efo mmba ya Iruva, veree soori shaa timika-mikaa, nawo vafingye mikanda ya saabu yoo mbafuny. ⁷ Na umwi wa valya vatiri muu mfungare kaniingya vasu valya mfungare fipete mfungare fya saabu, fiishwe unyafi lwa Iruva yeto akee na muu llung’anu fika llung’anu. ⁸ Mmba ya Iruva ikaishwa nnsu uleuka itumbeny lya Iruva na wiidimi lwakwe. Nta nkwiefo nndu aleidima yaanga efo mmba ya Iruva-fo. Kutani mbele ngapo yeto mfungare tinutyo ni vasu valya mfungare.

¹ Shaita unyanga uniini luuka efo mmba ya Iruva, lwiviaa vasu valya mfungare, “Endeny mukandepusuya fipete filya mfungare firye unyafi lwa Iruva efo ulaniny.” ² Yeto wa mbee keenda kapusuya kipete kyakwe ulaniny, kukasha yuure ikasha, iroo, lyikatira vandu valya vatiri wende lwa ifisi llya, na yewo veindya ifwanu lya vayo. ³ Na yeto wa kavii kapusuya kipete kyakwe efo yeeveny, kukava-fo samu sha samu ya nying’a, na findo fyoose fyetiri mumuyo wa muu fikafwa. ⁴ Na yeto wa kararu kapusuya kibete kyakwe efo mireny na ngyusokeny ta mura, tikava samu. ⁵ Naasa sheeta nnsu yeto wa mura eshambaa, “Ni yewe muni usumanu, yewe kuiyo na kweefo, Mweele, mashika elyi kwarummbwa indi. ⁶ Mashika elyi valepusua samu ya vandu veele na ya vakisuku, na yewe kwavaniinga samu vani, nkyo kivasumanyi.” ⁷ Sheeta kiraso ekyo kyeerasya kishambaa, “Ee, Nndumi muni finya toose, Mirumbuye yafo ni ya dede na ya usumanu.” ⁸ Na yeto wa kaana kaletya kipete kyakwe efo nkyeereny, nato ukakora vandu na muro wa vayo. ⁹ Vandu vakaya iya iniini, nawo vakaarara irina lya Iruva yeto atiri wiidimi na ngapo yeto, nawo nta valakurye nta inninga nnduma. ¹⁰ Na yeto wa karaanu kapusuya kipete kilya kyakwe yoo kitiminy kya uniini kya ifisi llya. Umangyi lwakwe lukasheyo ni ireema vakarafuna ngyulumi tawo kimaruma kya ivavyo. ¹¹ Vakaarara Iruva wa iruveu kimaruma kyeevavio, na kimaruma kya moore awo, nta mmbalekurya kya mashora awo-fo. ¹² Na yeto wa karindaru kapusuya kipete kyakwe kulya mureny ulya nniini uvaangwaa Frati; mura wa vayo ukoomya, naambo kukee shia ya yeende vamangyi vauke taari ya ngaminy. ¹³ Shalollya mimuyo iraru mitefusu ivakye filwa, fishukaa kaniny ka shoka ilya, na kaniny ka ifisi lyilya, na kaniny ka nkisuku ulya wa wongo. ¹⁴ Yeto nto mimuyo ya vambishwa, veetana ngyende tikee indya vamangyi woose wa ulana, na ivasanyirya kya fira ya nkonu ulya wa Iruva muni finya toose. ¹⁵ (Lola, mmbo nshaa sha inyinyi. Ngoma yeto mwiilala shoovi, na ikallya soori takwe, naleende ruu na yoora sony takwe.) ¹⁶ Vakavasanyirya vakafika ando avangwaa kwa Kiebrania, Har-Magedoni. ¹⁷ Na yeto wa mfungare kapusuuya kipete kyakwe efo ngyinii-u. Unyanga uniini lukauka efo mmba ya Iruva, alya kitiminy kya itumbe, lwishambaa, “Kyammaa iva.” ¹⁸ Kikasha kimwii na iruruma na kidinasi kiniini, kulore uka elyo vandu valekaa-fo kilellollyo kyingyi sha ekyo, shaasa kidinasi ekyo kyeng’ani. ¹⁹ Na muri yeto nniini ukakwaava kararu. Na miri ya masanga ikawa. Nato muri yeto nniini wa Babeli ukakumbuwa mbee ya Iruva, iniingwa upata lulya lwa unyafi lwakwe. ²⁰ Naasa wo kyuuruka kikarisha, nta mafumbu a vayo nalakilollyo-se. ²¹ Na mmbwa ya masaawe, niini nnu, ya masaawe maroo nnu, kyikava kyiroo kyuumu. Ikasha yuuka iruveu ikasheya vandu. Vandu vakaarara Iruva kimaruma kya mmbwa ilya ya masaawe; mashika elyi ngapo yeyo yekee niini nnu.

¹ Umwi wa vasu valya mfungare kasha, valya vatiri fipete filya mfungare, nnsu yeto karera na yeny kaamba, “Osho kunu, nshekora uvingo lwa ntuusi eto akayaa mura mwiingyi. ² Mmbwe yeto vamangyi va ulana valetuusa nawe, na yewo vakee urukeny vakanangyiswa mmbwari wa utuusi lwakwe.” ³ Kashiipoo na Mumuyo kashifita kasa koomu, shalollyafo nka, ekee uwe ya ifisi lyidodorye deny, lyireiye marina a fyaararo, lyitiri mirwe mfungare na mbembe ikumi. ⁴ Na nka ulya mmbo ekee mmbike soori ya king’ang’ari, na idodorye, akee nshope na saabu na mafura afwamaa, na lulu, nawe katira upata lwa saabu wokony lwakwe, lukaishwa uravi na ukasha lwa utuusi lwakwe. ⁵ Na yoo kisanguny kyakwe mmbo akee nreiye irina lyisurumi, “Babeli muri nniini, maye wa vaka vatuusi na uravi lwa uruka.” ⁶ Shalollya nka ulya enangyo nsamu ya veele na samu ya vakureekyi va Yesu. Kyeeri shilellollya shaawukwa nnu. ⁷ Naasa nnsu ulya kashivia, “Nkyiki elyi kwaawukwa? Shikuviaa kyama kya nka yeu na kya ifisi elyo lyinrie, lyitiri mirwe mfungare na mbembe ikumi. ⁸ Ifisi llya kulelyilollya lyo efo, llyo lyikiefo-fo, lyo mmbo lyikudeesye isaama lyuuka si kwa vafu na yeenda urumatony. Neewo vakee ulaniny, mmbo vasheawukwaa elyi valollyaa ifisi elyo, elyi lyeiyo lyo lyilakiyo, lyo lyishekaa-fo. ⁹ Yoo ng’u kukee urango lutiri waarya. Mirwe ilya mfungare ni fidooro mfungare akaaya nka yeto. ¹⁰ Nafyo ni vamangyi mfungare. Varaanu valemmaa iwa. Na umwi aiyo, na ungyi nnyalesha-fo. Na elyi asheshaa mmbo kinkooye nakae-u fyeeri fyaangu. ¹¹ Na ifisi elyo lyeiyo lyilakiyo, yelyo llya nyanya, nalyo llyimwi lya alya mfungare, nalyo mmbo lyikeevingya urumatony.” ¹² “Na mbembe tilya ikumi kulelollya ni vamangyi ikumi valandewarye umangyi, lyo mmbo vakewarya ushilyi sha vamangyi ando a saa imwi ando amwi na ifisi llya. ¹³ Yaa mmbo akee kindo kimwi nsi, nawo vakeniingya ifisi llya finya tawo na ushilyi lwawo. ¹⁴ Yeva mmbo vashekapaa fira na Ngurana ya Iruva, na Ngurana ya Iruva mmbo asheavingaa, mashika we ni Nndumi wa Vanndumi, na Mangyi ya Vamangyi na yewo variyani nawe mmbo valya vavaange vakee vasauwe, vairikye.” ¹⁵ Kawuya ishivia, “Mura ulya kuleulollya, yoo ntuusi ullya akee rembo, ni mmba ya maronda a masanga a vandu na fishomu. ¹⁶ Na mbembe tilya ikumi kulelollya na ifisi elyo, yewo mmbo vasheswaa nka yeto ntuusi, kutani vashenraa ruu na mbereto, vallye nyama, vashemmamitaa na muro deny. ¹⁷ Mashika Iruva ambika miriminy yaawo ikusaro lyakwe, na ivika ikusaro lyimwi, na yeninga ifisi llya umangyi lwawo kutani marero a Iruva ainutyo. ¹⁸ Na nka ulya kulelollya ni muri ulya nniini, utiri umangyi lukee uwe ya vamangyi va uruka.”

¹ Naasa numa ya vayo shalollya nnsu ungyi, esholokaa ooka iruve-u, atiri ushilyi uniini; na ulana lukamikyo ni itumbe lyakwe. ² Kafua na unyanga uniini kaamba, “Wammbwa, Babeli wammbwa, muri yeto nniini. Mmbo uleva kyeny kwa vammbishwa, na turuve ya wo mumuyo ntefusu, na turuve ya wo ndeye shiravi ivavisaa nrima. ³ Mashika vandu va masanga moose mmbo valena mfinyo wa unyafi lwa utuusi lwakwe, na vamangyi va uruka mmbo valetuusa nawe, na vekapa mbusha va uruka mmbo valewonisa masaa kwa umbafu lwa finya yakwe.” ⁴ Numa sheeta unyanga lungyi luuka iruve-u, lwishambaa, “Ukeny kwakwe yeni vandu vakwa, mulaakani ulyamari lwakwe-fo, nta mulawarye ngapo takwe-fo. ⁵ Mashika ngyulyamari takwe mmbo tilemfika iruve-u, na Iruva kakummbwa maravi akwe.” ⁶ Ntaeny shaasa we aletaa, muntaa kavii kiinani na mashora akwe. Efo upateny elo alesasandya, nsansandyeny nawe kavii. ⁷ Shaasa alekurosa we muni na ilanga findo fya ulana, nningyeny mavavyo na ting’wa kiinani indo-da. Mashika mmbo akeamba efo nriminy wakwe, yeny mmbo shikee nka wa mangyi, nta shi nka wa ding’u-fo, nta nshishelolyaa ting’wa-fo. ⁸ Kimmba ni indo ngapo takwe tishensheyaa nkonu umwi, ufu, na ting’wa, na shaa, nawe mmbo asherumatwaa deny ni muro. Mashika Nndumi Iruva yeto alemwaanduya mmuni finya shoose. ⁹ Na vamangyi yewo va uruka, valetuusa nawe na ilanga findo fya ulana nawe, mmbo vaiyaa nenkapya kiiyo, kyeeri vashelolyaa nnsu kyeeri vakeeiya. ¹⁰ Vasalale kwaasha veereiye kyeendwa mmavavyo akwe, veshambaa, “Woshiny, woshiny, lwa muri ulya nniini to Babeli ukee muri utiri finya mashika ando a saa imwi uvingo lwawo mmbo lushaa.” ¹¹ Na vekapa mbusha va uruka mmbo vasheiyaa na inkapya kiiyo, mashika nkwiefo-se nndu muura findo fyawo-fo; ¹² findo fya saabu, na fesa, na mawe a wuuru, na mafwaa mesha a moonri na soori tidodorye; na wo nri ufwamaa nisha, na wo kiiya kya wombe, na wo kiiya kya kitima kitiri wuuru uniini, na kya arera, na kya minya, na kya fimawe fya maru maru. ¹³ Na mdalasini, na iliki, na kifwaamu kisha, na mafura afwamaa na ubani, na mfinyo, na mafura a seituni, na nswa nsha, na nganu, na ng’umbe na moonri, na frasi, na makari, na miili na mimuyo ya vandu. ¹⁴ Na ndunda tisenyi nrima wafo mmbo kwantisokwa, na findo fyoose fimamiri na findo fya usuri mmbo fyankurekya; nta vandu mmbashefilolyaa-se nta-fo. ¹⁵ Na veekapa mbusha na findo efyo, vakawonisa-fo masaa, mmbo vashesalalaa kwaasha, veshereyaa mavavyo akwe vakaiya na ikapa kiiyo, ¹⁶ vakaamba, “Oshiny, oshiny, lwa muri yeto nniini! Ukeemmbike soori shisha, na soori ta fwana ya sambarau, na soori idodorye, na ishopwa na saabu, na mafura afwamaa, na lulu.” ¹⁷ Mashika na lyimwi nsi usimba uniini sha elo lwammeeva ukyiva. Na wo nteteri wa ngalava na wo yeto ateterwaa ni uraato na verunda ngalaveny, na yewo woose varundaa yeeveny, vakasalala kwaasha. ¹⁸ Vakafua nnu llya valelollya nnsu eto wa iiya lyakwe, veshambaa, “Mmuri ungau uvakye muri yeu nniini?” ¹⁹ Vakafwallya kiluulyi efo mirweny yaawo, vakafua, vesholotaa misoru na ikapa kiiyo, veshambaa, “Woshiny, woshiny, lwa muri yeto nniini! Yeto nnang’ani ya vayo yewo vatiri ngalava yeeveny, valewonisa masaa ooka usimbeny lwakwe, mashika elyi ando a saa imwi uvaa nrapu. ²⁰ Fureny nawe, yeni va iruveu, na yeni veele na vasu na vakisuku; mashika Iruva mmbo oota uvingo lwany uwe yakwe.” ²¹ Naasa nnsu umwi atiri finya kaipoo iwe, sha iwe lya isewe, kalyeerya yeeveny, kaamba, Ni indo, na finya niini, Babeli usheerwaa, nto muri yeto nniini, nta mbushekilolyoo-se-fo. ²² Nta unyanga lwa vekapa finanda, na vekapa fivale, na vekapa maranda, ntisheitiwa-se-fo. ²³ Nta sa ya taa nyishekilolyoo-se kwafo-fo, nta unyanga lwa nndumi wa walyi nta lwa nka wa walyi llusheitiwaa efo kwafo-fo, mashika veekapa mbusha yewo vafo mmbo vekee vaniini va uruka, ni llya vandu woose va masanga valelembwa ni usavi lwafo. ²⁴ Na nnang’ani ya vayo ikalollyo-fo samu ya veele, na ya vakisuku na ya valya woose valewaawa urukeny.

¹ Elyi numa ya efyo shaita unyanga sha lwa nkuka wa vandu, unyanga uniini iruve-u, lwishambaa, “Haleluya, Ukiro na Itumbe na finya mfya Nndumi Iruva weeru. ² Kimmba mirumbuye yakwe ni ya dede na ya usumanu, mashika mmbo anrumbuya ntuusi eto nniini ekeekasheesa uruka na utuusi lwakwe, na itaiya samu ya mashinga akwe efo wokony lwakwe.” ³ Vakawuiya lya kavii yaamba, “Haleluya.” Na nnsu wa vayo mmbo urwaa uwe llung’anu fika llung’anu. ⁴ Na vamiku valya makumi avii na vaana na valya vatiri muu vaana, vakafiirya ndi na iindya Iruva, yeto akee rembo kitiminy kilya kya itumbe, veshambaa, “Amen! Haleluya.” ⁵ Unyanga lukauka kulya kitiminy kilya kya itumbe, lukaamba, “Rumisheny Iruva weeru, yeni mashinga akwe, yeni mumwirikye, vadu na vaniini. ⁶ Shaita unyanga sha unyanga lwa nsemu mwiingyi, sha yoona lya mura mwiingyi, na lyingyi sha iruruma lya finya, lukaamba, Haleluya; mmbo Iruva Nndumi weeru muni finya asheshilyaa. ⁷ Nndeny lufure, lukese, lundeniingya nnduma, kya walyi lwa Ngurana ya Iruva, kyimmba nka wa walyi ansha.” ⁸ Nawe kawona iraa soori shisha, shaa imikamikaa, mashika soori yeyo shisha ni mashora a usumanu a veele. ⁹ Nawe kashivia, “Reiya, ‘Ngoma ni yewo vakee vavaangye nndumwa wa walyi lwa Ngurana ya Iruva.’ “ Kashivia, “Marero yaa ni marero a dede ya Iruva.” ¹⁰ Naasa shawa yoo marendeny akwe, naambo shimwiindye, nawe kashivia, “Lola, kulatani indo-fo. Yeny mmbo shikee nndu amwi na vana va mau yewo vatiri ukureekyi lwa Yesu. Indyeny Iruva. Shamashika ukureekyi lwa Yesu llo mumuyo wa ukisuku.” ¹¹ Naasa shalollya kulya iruve-u kurauka, shalollya-u kwiiyo frasi shaa, na yeto aisaamyi, avangwaa wa dede wa va-dede, nawe kikee kya usumanu mmbo arumbwa nisha na ikapana fira. ¹² Miso akwe akava sha kipalapala kya muro, na efo nrweny wakwe karaa ngyureto shiingyi, nawe mmbo atiri irina lyikee ireiye, kulaefo nndu alyiishi kuuta we muni. ¹³ Nawe mmbo aree soori ikee shikape efo samuny, na irina lyakwe kavaangwa, “Irero lya Iruva.” ¹⁴ Na maronda yoo akee iruveu akansora, vesaamyi frasi shaa neraa soori shisha tisenyi. ¹⁵ Na usu woovi mmbo luukye efo kaniny kakwe naambo nakape nalo vandu va masanga. Nawe mmbo ashevesaa na nsengye wa minya, nawe mmbo ashevavaraa muungu wa mfinyo ya saabu yeyo ya unyafi lwa Iruva muni finya. ¹⁶ Nawe mmbo atiri irina lyikee ireiye yoo sooriny yakwe na yoo kinaminy kyakwe indi, MANGYI YA VAMANGYI, NA NNDUMI WA VANNDUMI. ¹⁷ Numa shalollya nnsu ungyi eselelyi efo nkyeereny, kafua na unyanga waasha, kavia ndeye toose ta efo ngyiniiu, oshony-te mushewona nndumwa nniini wa Iruva. ¹⁸ Mushelya nteera wa vamangyi, na nteera wa vashilyi va vasikari, na wa vandu vatiri finya, na wa frasi na wa yewo vatisaamyi, na nteera wa vandu woose, wa valeke na wa mashinga vaniini na vadu. ¹⁹ Numa shalollya ifisi llya, na vamangyi va uruka, na maronda awo a vasikari, vakakusanyirya naambo vakape fira na yeto akee uwe ya frasi yeyo, na ando amwi na maronda akwe. ²⁰ Ifisi llya lyikawarwa, ando amwi na nkisuku ulya wa wongo, yeto aletana ngyende tilya elollye, nato nto alevalemba nato vandu valya valewarya wende lwa ifisi elyo, na iindya ifanu lyakwe, yewo ve vavii vakeerwo veefo na muu kulya iruveny lya muro lyishakaa sha kibiriti. ²¹ Na valya valesaa-u mmbo valewaawa ni usu lwa yeto iesamyi frasi ilya, llo usu yelo lukee efo kaniny kakwe, na ndeye toose tikawuutiswa nnyama tawo.

¹ Naasa shalollya nnsu akee oloka auka iruveu, arye ufunguo lwa kwa vafu, na nse wa minya nniini arye efo wokony lwakwe. ² Katira shoka lya, shoka ilya shikuu, mmbwe Nkumbi na Satana, kaifinga myaaka kyiku. ³ Kayeera si kwa vafu, kaifinga, kavikya-u kiringyisyo lyilakiidimi-se ilemba vandu va masanga, kutani myaaka yeyo kyiku yasia; na numa ya vayo iruwa ando a kirambo kyaangu. ⁴ Numa shalollya fitima fya itumbe, vakakau rembo, vakautyo uvingo, na yeny shalollya mimuyo ya valya valerumbuwa mirwe kimaruma kya ukureekyi lwa Yesu, na kimaruma kya irero lya Iruva, na yewo valashiindyaa ifisi llya nta ifwanu lyakwe. Nta valandewarye wende lulya yoo fisanguny fyawo, nta efo maakony awo; nawo vakakaa na muu, vakashillya ando amwi na Kristo ando a myaaka kyiku. ⁵ Vafu yewo valesaa-u mbalekaa na muu-fo, kutani myaaka yeyo kyiku yasia. ⁶ Yelyo llyo iruka lya mbee. Ngoma, mmweele yeto atiri waavi efo irukeny lya mbee. Kwa yewo ufu lwa kavii llutiri finya-fo, llyoony vashevaa vakohani va Iruva na Kristo, nawo vashekooya ishilya nawe myaaka yeyo kyiku. ⁷ Naasa myaaka yeyo kyiku ikisia, mmbishwa kaporomuwa, neekyi nkifingyony kyakwe. ⁸ Nawe mmbo asheukaa-fo nashelemba vandu vakee wo ando ulaniny, Gogu na Magogu, navasanyirye kya fira, na yeekena lyawo mmbo lyifye sha nsanga wa mbai ya yeeve. ⁹ Vakasaama vakarumbusa uruka, vakaringyitya ulale lwa veele na muri yeto ukundikye. Muro ukaoloka wuuka iruveu ukavakomba kombi. ¹⁰ Na nkumbi yeto llembi keerwa iruveny lya muro na kibiriti, kundo ifisi llya lyikai ando amwi na nkisuku ulya wa wongo. Nawo mmbo vasheorotwaa kio na nsanyiny llung’anu na llung’anu. ¹¹ Numa shalollya kitima kya itumbe kiniini, kyaa, na yeto akyikaaye mmbwe yeto iruveu na ulana valeovya kisangu kyakwe, na ando awo nnyalelollyo-fo. ¹² Shalollya vafu, vaniini na vadu, vesalalyi yoo mbee ya kitima kilya kya itumbe; numa fitabu fikatarambuwa, na kitabu kingyi kikatarambuwa, nkyo kilya kya muu; na vafu yewo vakautyo uvingo kiinani na filya fikee fireiye efo fitabuny, shaasa mashora awo akai. ¹³ Yeeve ikaraaka vafu valya veifo, na ufu na kwa vafu, vakalotora vafu yewo veefo. Wo nndu kautyo uvingo kiinani na mashora akwe. ¹⁴ Ufu na kwa vafu fikaletywa iruveny llya lya muro. Yelu llo ufu lwa kavii, llyo iruva elyo lya muro. ¹⁵ Na nndu yeto nalandereiywa efo kitabuny yekyo kya muu mmbo aleerwa iruveny llya lya muro.

¹ Numa ya vayo shalollya ngyina shiiya na ulana wiiya, ni elyi ngyina ya mbee na ulana lwa mbee fyemmaa iira, nta nkulekikaa-fo yeeve-fo. ² Naasa shalollya muri ulya mweele, nto Yerusalemu shiiya wiisholokaa wuuka iruveu kwa Iruva, nato wamaa ideesyo, uvakye mwalyi wa walyi ammaa ideesyo mmi wakwe. ³ Shaita unyanga uniini lwishuukaa alya kitiminy kilya kya itumbe lwiishambaa, “Loleny-te, ando a Iruva ulaalu ni efo vanduny nawe mmbo ashekaa nawo, nawo vasheva vandu vakwe. Nawe Iruva muni ashekaa nawo. ⁴ Nawe asheangataa misoru myoose efo misony awo, nta ufu llushekyikaafo-fo, nta ikapa kiiyo-fo, nta ivavyo llyikyikaa-fo-fo, mashika elyi findo filya fya mbee fikoyaa fyammaa iira.” ⁵ Na yeto akee rembo yoo kitiminy ekyo kya itumbe kaamba, “Loleny-te, mmbo shaallwa fyoose fikava fiiya.” Kawuya kashivia, “Yewe reiya sheelyi marero yaa ni dede na songosiny.” ⁶ Kashivia, “Kyammaa iva. Yeny ni Alfa na Omega. Mapookyony na mafurumyony. Yeto atirwa nnyura mmbo nshenningaa ishena mura yoo usokeny lwa muu ruu. ⁷ Yeto mwivinga mmbo ashevaa muya ding’u wa efi, na yeny mmbo nshevaa Iruva wakwe nawe nave mwana wakwa. ⁸ Lyo yewo veerei na yewo valairikye, newo veende unyafi, na veewaa, na vasavi, na vatuusi, na veindya maruva a wongo, na vaongo woose, waavi lwawo ni kulya iruveny llya lya muro wa kibiriti. Yelu llo ufu lwa kavii.” ⁹ Umwi wa vasu valya mfungare kasha mmbo valya verye fipete filya fyeiishwe ngapo tilya mfungare teefurumya, nawe karera na yeny kashivia, “Nkyeosho na kunu shikoore Mwalyi yeto wa Walyi, akee nka wa Ngurana ya Iruva.” ¹⁰ Kashiipoo shikee na Mumuyo kashifita ifumbuny yaasha, kashoora muri ulya mweele, nto Yerusalemu, wisholokaa wuuka kwa Iruva muni finya toose. ¹¹ Nato mmbo utiri itumbe lya Iruva, na sa ya vayo ikava sha iwe lya wuuru uniini llya lyivangwaa yaspi, isha sha bilauri. ¹² Mmbo wetiri mmbombo nniini mwaasha, utiri myaango ikumi na ivii, na marina mmbo akee mareiye, ng’u marina a ngyufyari ikumi na ivii ta Vaisraeli. ¹³ Taari ya ngaminy myaango iraru, taari ya ndoo myaango iraru, na taari ya sinde myaango iraru na taari ya nkywaany myaango iraru. ¹⁴ Mmbombo wa muri mmbo wetiri ngyuvasha ikumi na ivii, na efo ngyuvasheny yeto kukareiyo-fo marina ikumi na avii a vakiloshyony valya ikumi na vavii va Ngurana ya Iruva. ¹⁵ Na yeto alerera na yeny mmbo etiri irere lya saabu, lya yeesa muri yeto, myaango ya vayo na mmbombo wa vayo. ¹⁶ Na muri yeto mmbo wiinani taari toose, waasha lwa vayo na ivari lya vayo. Keesa muri yeto na irere llya, nato wetiri waasha lwa kilometa 2400, waasha lwa vayo na ivari na yeenda uwe mmbo fiinani. ¹⁷ Kawuya keesa mmbombo wa vayo kakooya mmbo utiri mita 60, kwi fyeeso fya kivandu, nkyo kya vasu. ¹⁸ Nato mmbo wekee ntani na yaspi mmbombo wa vayo na muri yeto mmbo wetiri saabu shisha, ivakye kilola kisha. ¹⁹ Na efo uvasheny lwa muri yeto kukashopwa na mawe a wuuru a wo ngata. Efo uvasheny taari imwi kukava yaspi, taari ingyi ni yakuti ya buluu, ya kararu ni kalkedoni, ya kaana sumaridi; ²⁰ ya karaanu sardoniki ya karindaru akiki; ya mfungare krisolito, ya nyanya ni sabarajadi, ya kyeenda ni yakuti ifwani sha kyeri, ya ikumi krisopraso, ya ikumi na lyimwi ni hiakinto, ya ikumi na kavii ni ametisto. ²¹ Na myaango yeyo ikumi na ivii ni lulu ikumi na ivii na wo mwaango ni lulu imwi. Na wo shia ya muri ni saabu shisha ivakye kilola kimikaa. ²² Lyo nshilelollya-fo mmba ya Iruva-fo; shamashika Nndumi Iruva muni finya toose na Ngurana ya Iruva niwo mmba ya Iruva. ²³ Na muri yeto nta mmbutinnyo ni nkyeere nta mwiiri wuuvaiye-fo, mashika itumbe lya Iruva llyo lyikewumikya na taa ya vayo ni Ngurana ya Iruva. ²⁴ Na vandu va masanga mmbo vasherua-ruaa efo seny ya vayo. Na vamangyi va ulana mmbo vende-u itumbe lya vayo. ²⁵ Na myaango ya vayo nsanyiny nnyisheraywaa-fo, mashika lyo nkushekaa-fo kio-fo. ²⁶ Nawo mmbo vashendee itumbe na wiindi lwa vandu va masanga efo muriny eto. ²⁷ Nafo nkusheangaa-fo kindo kyikee kifwafwa, ao yeto mweende unyafi na wongo-fo, kuuta yewo veni vakee vareiye efo kitabuny kya muu kya Ngurana ya Iruva.

¹ Numa kashoora mura wa mura wa muu, umikaa sha bilauri, wishukaa kulya kitiminy kya ushilyi kya Iruva, na kya Ngurana ya Iruva. ² Yoo nnang’ani ya shia ya vayo. Na taari toose ta mura yeto, mmbo weiyo nri wa muu uvikaa ndunda ta ngata ikumi na ivii, uvikaa ndunda ta vayo wo mwiiri, na mamburu a nri yeto ni a ikira vandu va masanga. ³ Nta nkushekaa-fo nta kidengo kimwi-fo. Na kitima kya ushilyi kya Iruva na kya Ngurana ya Iruva mmbo kishekaa yoo nnang’ani ya vayo. Na mashinga alya mmbo ashendundya. ⁴ Nawo mmbo vashelolyaa kisangu kyakwe, na irina lyakwe mmbo lyishekaa yoo fisanguny fyawo. ⁵ Nta nkushekaa-fo kio-se-fo; nta mbasheruyaa taa nta sa ya mwi-fo; mashika Nndumi Iruva mmbo ashevamikyaa nawo mmbo vasheshillyaa llung’anu na llung’anu. ⁶ Numa kashivia, “Marero yaa ni dede na songosiny. Nawe Nndumi, Iruva wa mimuyo ya vakisuku, mmbo aleruma nnsu wakwe nasheora mashinga akwe findo fikee kuti fishe uviny. ⁷ Lla-te, mmbo nkesha sere, ngoma ni yeto akutiraa na marero a ukisuku lwa kitabu ekyi.” ⁸ Na yeny Yohane ni yeny shileita na ilollya findo efi. Na llya shilefiita neefilollya shawa si, naambo shifiirye ndi yoo marendeny a nnsu ulya aleshisukuya efyo. ⁹ Nawe kashivia, “Ra, kulasheetana indo-fo; yeny mmbo shikee ishinga sheewe na wooroo wa vakisuku, na wa valya veetira marero a kitabu ekyi. Indya Iruva muni.” ¹⁰ Kooka-fo kashivia, “Kulavikye marero a ukisuku lwa kitabu ekyi muuri-fo, mashika fyeeri fyamiinana. ¹¹ Mwilammya vengyi neengere ivalammya. Na yeto nkyirinda neengere iva nkirinda. Na mwitana fya usumanu neengere itana fya usumanu. Na yeto mweele naengere iilyiswa. ¹² Lola-te, shiefo shishaa uviny, shiirye weesi lwakwa nshetaa wo umwi shaasa ishora lyakwe lyikai. ¹³ Yeny mmbo shikee Alfa na Omega, mapookyony na mafurumyon wa mbee na wa ifurumya.” ¹⁴ Ngoma ni yewo vasangyaa soori tawo, vawoni mumu wa yeengya nri yeto wa muu, na yaanga muriny veshiraa yoo ngyiriny ta vayo. ¹⁵ Efo poo mfite fiifoo, na vasavi, na vatuusi na vewaa, na yewo veindya maruva a wongo, na wo nndu yeto alangye wongo na itana fya vayo. ¹⁶ “Ni yeny Yesu shileruma nnsu wakwa nashemukureekya kya findo efi efo siriny. Ni yeny shikee Maa na Mfyari wa Davidi; nnyo Nyinyiri ilya ya Ngama imikaa paa.” ¹⁷ Na Mumuyo ando amwi na Mwalyi wa walyi vakaamba, “Osho!” Na yeto eta naambe, “Osho!” Yeto atirwa nnyura nashe na yeto akundye nashe nasheraa mura wa muu ruu. ¹⁸ Mmbo shikeekureekya wo nndu yeto etye marero a ukisuku lwa kitabu ekyi. Kwakooya nndu aengerya-u kindo, na Iruva mmbo ashemwengeryaa-u ngapo eto tikee shireiye kunu kitabuny ekyi. ¹⁹ Na kwakooya nndu moose ota-u nta mbekye imwi yaa marerony a ukisuku lwa kitabu ekyi, nawe Iruva mmbo ashensokaa waavi lwakwe alya nriny ulya wa muu, na kulya muriny ulya mweele, yeto nto mbony ta vayo tikee shireiye kunu kitabuny ekyi. ²⁰ Yeto mwikureekya efi mmbo aamba, “Ee, shiefo nshaa sere. Amen. Ee osho Nndumi Yesu.” ²¹ Isarya lya Nndumi Yesu lyimukaye yeni moose. Amen!