VAFILIPI

VAFILIPI

¹ Ni yeny Paulo na Timoteo, lukee mashinga a Kristo Yesu, lwamureiya yeni veele va Kristo Yesu mukee Filipi ando amwi na vesalallya siri na vatarami va vayo. ² Isarya lyimukaye na urilalyi luukye kwa Iruva Nde na kwa Nndumi Yesu Kristo. ³ Wo kyeeri shamukumbwa yeni mmbo nkeyaana Iruva. ⁴ Wo nkonu shavemuterevya yeni shiiterevaa na ifura, ⁵ kimaruma kya wiitanu lwany ivambisa Nrumi ya Nsia, uka nkonu ulya wa mbee na kufike inu. ⁶ Na kindo shivikye nsia ni ekyi, sheelyi yeto alepooka ishora elyo isha indo efo miriminy yaany nkuti nashelyiinutya kufike nkonu yeto wa Kristo Yesu. ⁷ Na shaasa kivekee kuti yakwa shimukusarye kya efyo fyoose, mashika yeni mmbo mukee kunu nriminy wakwa, kimmba kyeeri kya ikaa lyakwa kifingyony neefo ishoreny elyo lya ikureekya Nrumi ya Nsia na iivangisa, yeni moose mmbo muleakana neeny isarya elyi. ⁸ Mashika na Iruva ni nkureekyi wakwa shaasa shitirwa ni nsia kimaruma kyany yeni moose shikee na nrima wa Yesu Kristo. ⁹ Na kiterewo kyakwa nkyo ekyi, ikunda lyany lyeengere ing’ana nnu mwikee na waarya na umanyo loose; ¹⁰ muwarye yefyo fikee fisha, naambo mutire mirima myaa, ilatiri ivara, kufike nkonu yeto wa Kristo. ¹¹ Indo muvekaa-fo mwiishwe ndunda ta usumanu kyeendwa ni Yesu Kristo, kya itumbe na nnduma wa Iruva. ¹² Lyo vana vama vakwa, mmbo shikundye mumanyi sheelyi filya fyoose fileshikooya mmbo fileenda indo mmwasi kyeendwa ni ikwaanisa Nrumi ya Nsia. ¹³ Naakwa ni ifingwa lyakwa mmbo lyilekoora paa kwi Kristo, vasikari vakalollya, na vandu vengyi-da. ¹⁴ Na veengyi va yewo vakusirye Nndumi, kyeeri vakeekaariswa kyeendwa ni ifingwa lyakwa, vakeengera ikaarya yaamba irero lya Iruva kulaiyoo weerei. ¹⁵ Mashika kwiifo vengyi vakeevambisa mbony ta Kristo kimaruma kya uriingyi na ukasha; na vengyi lyo kikee kya usha. ¹⁶ Wo mmbo vakeyaamba Kristo na ukundi, veishi sheelyi yeny mmbo shikee nsauwe naambo shikureekye Nrumi ya Nsia; ¹⁷ kyaindi kwiifo yewo vakeamba Kristo na uriingyi kilakee kya nrima mwaa, naambo vafumbute ngatara ta ifingwa lyakwa. ¹⁸ A kyamaany-kyi? Lyo na kyikava inda, kwakooya nkwa ntambo, ao kwakooya ni kya dede, lyo Kristo akee yaambawa tupu, nkyo neeny shitirwa ni nsia, na sheengere ifura. ¹⁹ Mashika shiishi shamanya efyo mmbo fisheshiwuiyaa five ukiro kwakwa, kyeendwa ni fiterewo fyany neesimbwa Mumuyo wa Yesu Kristo; ²⁰ shaasa sheevikye nsia deny, na ilanga, sheelyi nshiwonaa isuka-fo, indi shiishi na nshushwa wo nkonu, na ulaalu-da Kristo nkuti nawoni iitikiswa mwiiliny wakwa, kwakoya shikee na muu ao kwakooya shifiiye. ²¹ Mashika kyakwa yeny ikaa na muu ni Kristo na ifwa ni mbusha. ²² Lyo kwakooya ikaa na muu shikee indi na mwiili ni ndunda ta mashora akwa, naasa ekyo nsauwaa nshikiishi-fo. ²³ Mmbo shikee nsisirye yoo nnang’ani ya findo fivii, mmbo shilangye yeenda shindekaa na Kristo, mashika mmbo kyevaa kyisha mmwasi. ²⁴ Neekaa na mwiili mmbo lyikee kisha mmwasi lyo kimaruma kyany. ²⁵ Neeny shambikya efyo nsia, shiishi sheelyi mmbo nkaa-u na yaakana neeni, naambo mukooye yeengera ifura efo kikusiryony; ²⁶ naambo mweengere ifura mukee na Kristo Yesu kimaruma kyakwa kyeendwa ni ishekaa neeni lyingyi. ²⁷ Llyo mikaaye yaany ive shaasa kiisumanyi Nrumi ya Nsia ya Kristo. Naambo kwakooya shasha neemulollya, yeni, ao kwakooya shilaiyo, shikooye iita mbony tany, sheelyi mmbo muselelyi shumu mwikee na nrima umwi nsi, mwiikapanyaa iirikyo lya Nrumi ya Nsia. ²⁸ Mure mulairyaa vakiduva vany kya kindo kyoose, kwa yewo ni wende lulollyo paa lweereka, lyo kwany yeni ni ukiro yelo luukye kwa Iruva. ²⁹ Mashika mmbo muleniingyo kimaruma kya Kristo, nshi naambo mumwiirikye-da-fo, ni ando amwi neelyiswa ukyiva kimaruma kyakwe; ³⁰ mwiikee na fira ilya sheni muleilollya kwakwa, na iita sheelyi shikeekapana fika ulaalu.

¹ Kyasia kwakooya kyiiyo iviryo muu kwi Kristo ao ikaariswa lya ngata shoose lya ikunda, na kwakooya kwiiyo yaakaniswa Mmumuyo na kwakooya kwiiyo isaryo na ilyillyo, ² ishuryeny ifura lyakwa, naambo muve va nrwe umwi nsi, na ikunda lyimwi, na nrima umwi, mwikusaraa kimwi. ³ Mulasheetana kindo kyoose mwiiwakyanaa nta mwikung’anisaa-fo, kyaindi taniny fyoose mwikunyiisye, wo nndu nalollye yeto ungyi sheelyi mmbo akee ng’waana ngota we muni. ⁴ Kulave nndu ava mwiisara mbony takwe muni, kyaindi wo umwi waany nave mwiikusara kya yeekya vengyi. ⁵ Veny na nrima wa ngata yeyo sheni shasa yekee nnang’ani ya Kristo Yesu, ⁶ mashika we muni lllya kipooka mmbo ekee na ngata ya Iruva, lyo we nnyalelollya iva wa ngata ya Iruva nkindo kyeekutira nakyo-fo; ⁷ llyo we muni mmbo aleva sheelyi nalatiri itumbe, kava sha ishinga, karaa ngata ya nndu wa vandu; ⁸ lyingyi-se llya alelollyo mmbo atiri fwana ya nndu wa vandu, mmbo alekunyiisa we muni katira wiindi kutani akooya ufu, yee, ufu lwa alya nsalabeny. ⁹ Naasa Iruva kanng’anisa nnu, kansimba irina lyiilanyi marina moose; ¹⁰ naambo wo nndu nashefiirya irina lya Yesu ndi, va iruvee-u na va ya ulaniny, na va efo si ya ulana. ¹¹ Na wo ulumi lwaambe paa sheelyi YESU KRISTO NI NNDUMI, naambo Iruva Nde naute-u ing’aniswa. ¹² Kyasiany vakunde vakwa, shaasa muletira wiindi mikonu myoose, nta nshi kyeeri kilya shekee neeni-da-fo, kyaindi kive indo mmwasi elyi shilaiyo, moore ukiro lwany yeni muveni mwiitirwa ni usau na irerema. ¹³ Mashika ni Iruva akeerunda mashora nnang’ani yaany, ikunda lyany na irunda lyany, mushiinutyaa mesha yoo akundye. ¹⁴ Rundeny findo fyoose kulaifo nkunung’unu ao iwakyana, ¹⁵ naambo mukooye iva vana vesha va Iruva valatiri mbese, nta ulembi, mulatiri nta ntambo yaa irikeny elyi lyikee ilyang’a lyikeenda mwiiri, neeni elyi mukee nnang’ani yaawo mmbo mulollyo sha sa niini ya ulaniny yelu, ¹⁶ muvetira irero lya muu; naambo shiidimi iwona nrima wa ifura elyi nkonu wa Kristo ufikaa, kyoore sheelyi nshilekutakura ruu-fo, nta nshilekwaarisa ruu-fo. ¹⁷ Ee, naakwa shaaluwa kiraso kyeepusuwa kimaruma kya kikusiryo kyany, mmbo shitirwa ni nsia; neeny shitirwa ni nsia ando amwi neeni moose. ¹⁸ Neeni kevefureny indo, muvefura ando amwi neeny. ¹⁹ Kyaindi shivikye nsia Nndumi Yesu ashiidimisyaa shirumi Timoteo nashe kwany fyeeri fya kufii, naambo neeny shiviiryo muu, elyi shimanyaa mbony tany. ²⁰ Kimmba shilatiri nndu ungyi akee kindo kyimwi neeny, ashiidimaa imanya deny mbony tany shaasa tikai. ²¹ Mashika vandu vengyi mmbo vakeeruuya mbony tawo veni, na nshi mbony ta Kristo Yesu-fo. ²² Lyo mwiishi nnduma wa Timoteo sheelyi mmbo alerundya Nrumi ya Nsia ando amwi neeny, kava sha mwana neeny sha ndeye. ²³ Naasany mmbo nshenrumaa uviny, shammeemanya efyo fikaa fishikooye. ²⁴ Neeny shikusirye sheelyi Nndumi ashiidimisyaa naakwa nnyeny isha uviny. ²⁵ Lyo shavelollya kuti iruma Epafradito kwany, akee mwanama wakwa, avekee mwaakana mashora ando amwi neeny, nsikari uroyaakwa, nawe ni nrumi waany na mwifurukanya filya fishitinyi. ²⁶ Mashika mmbo eelangye imulollya yeni moose, karovyo deny, mashika elyi muleeta sheelyi mmbo elwee. ²⁷ Mashika mmbo elwee nnu deny, kufii nafwe, lyo Iruva kallyillya, nta nshi we muni-da-fo, neeny da, nta nshikundye iting’wa nnu shifuluye-fo. ²⁸ Naasany mmbo shikee ikutakura nnu inruma, naambo elyi mushellolla lyingyi mufure, neeny ting’wa yakwa yaangwe. ²⁹ Mmbwaryeny na ifura kimaruma kya Nndumi, nndu sha yeu mulollye ni nndu asumani iindyo. ³⁰ Mmbo alefikya kufii ifwa kimaruma kya ishora lya Kristo, naambo tupu nainutye filya fyeyaanguye efo utaraminy lwany kwakwa.

¹ Numa ya efyo vanavama, fureny mukee na Nndumi. Imureiya mbony tilya sheni nkishirovyaa yeny-fo, mashika kyivaa mbusha kwany. ² Kwiiseny na vandu vavakye fite, kwiiseny na veetana maravi kevekwiiseny na vekurumbwa mwiili. ³ Mashika vandu vakee varini kya dede ni yese, lukaveva veinndya Iruva kyikee kya ngata ya Mumuyo neewona ifura nnu elyi lutiri Kristo Yesu, nta lluvikye findo fya mwiili yeu nsia-fo. ⁴ Kulakooye yeny sheshiidima ivikya findo fya mwiili nsia. Kwakooya nndu moose alollya kuti yeevikya findo fya mwiili nsia, yeny ni mmwasi. ⁵ Mashika mmbo sherinwa shiitiri mikonu nyanya, nndu wa ufyari lwa Israeli, va mmba ya Benyamini, Mwisraeli va Vaisraeli, efo kweeringa uvavaso shava Mfarisayo, ⁶ efo kwa utakusu, shava mwiisisya siri, kya usumanu luwonikaa kimaruma kya iringa uvavaso, nsheetiri mbese-fo. ⁷ Kyaindi lyo findo filya sheefilollye mmbusha kwakwa, mmbo shilefilollya nruu kimaruma kya Kristo. ⁸ Ee, kyailanya yefyo, kwakwa yeny mmbo shilelollya findo fyoose ni ruu kwainanisa na usha yelo lwiilanyi kyeeso lweemanya Kristo Yesu, Nndumi wakwa, yeto kimaruma kyakwe shilelollya findo fyoose ni ruu neefyaallwa sha mando naambo tupu shiwoni Kristo. ⁹ Na lyingyi shilollyo shikee nawe, naambo shilasheetira usumanu lwakwa shimuni yelo lushuka uvavasony, kyaindi shiwoni usumanu yelo lushaa na kikusiryo kwa Kristo, llo usumanu luukye kwa Iruva, kyeendwa nkikusiryo. ¹⁰ Naambo shimmanyi we na wiidimi lwa iruka lyakwe na kya iitana nawe kya makyiva akwe, naambo shivakaniswa na ifwa lyakwe. ¹¹ Naambo na kyikakyi shiidimi ifikya iruka lya vafu. ¹² Lyoony nshi sheelyi shammaa ifika-fo, ao shammaa isongovika-fo, oode, mmbo shikeengera iwaana naambo shikooye iwara kilya Kristo Yesu ashikunndya llya aleshivaanga. ¹³ Vanavama, nshikusarye sheelyi mmbo shammaa itira-fo; lyo shitiri irero lyimwi nsi, fingyi fyoose shafiviira numa, shatamballya yefyo fikee mbee yakwa; ¹⁴ mmbo nkeyaangusya, nambo nshewonisa ureto lwa simbo yeyo ya uvaango lwa kiiruveu lwa Iruva luukye kwa Kristo Yesu. ¹⁵ Kyasiany, yese lukee vasongovisi lusoongye yefyo; naakwa mwakusara ngata ingyi kya kindo kyoose, Iruva mmbo ashemusukuyaa neekyo. ¹⁶ Lyo yaa lufikye ulaalu lweende lwikee indo. ¹⁷ Vanavama vakwa, shilatyeny yeny, muvelola na valya vakeesora kyaaso kilya lulemoora. ¹⁸ Mashika lyo kwiifo vengyi shaasa shilemmaa imuvia mbony tawo na ulaalu shimuvye lyingyi na misoru, sheelyi mmbo vakee vakyiduva va nsalaba wa Kristo. ¹⁹ Yewo mmbo vashefurumyaa na urumato, mashika iruva lyawo nndeu, na itumbe lyawo ni usutu elo lwaawo, valangye findo fya ulana. ²⁰ Lyo yese kweru kwekaa ni iruveeu, na yoo nng’u luvikye nsia ilollya Mwikira, we Nndumi Yesu Kristo; ²¹ mmbwe yeto ashealashaa miili yei yeeru ifwaa, ivake mwiili yeto wakwe wa itumbe, na wiidimi yelo lwakwe lushevikaa findo fyoose yoo si ya marende akwe.

¹ Naasany vanavama vakwa, mukee vakunde vakwa, shimulangye nnu, mukaveva ifura lyakwa na ureto lwakwa, salaleny indo shumu mwiikutiri na Nndumi, ee-te vakunde vakwa. ² Mmbo nkeetereva Euodia, shooka-fo shatereva Sintike, vave na nrwe umi nsi vekee na Nndumi. ³ Ee-da, shikundye na yewe, ishinga uroye wakwa wa dede, kweekye vaka yewo, mashika mmbo valekapannya Nrumi ya Nsia ando amwi neeny, ando amwi na Klementi, ando amwi na yewo vengyi valeakana neeny nawo marina awo akee efo kitabuny kya muu. ⁴ Fureny na Nndumi mikonu myoose, shaamba-se, fureny. ⁵ Ufoo lwany lulollyo ni vandu woose, mashika Nndumi nkufii nashe. ⁶ Mulakwaatare na kindo nta kimwi-fo, lyo wo kindo kimuting’aa mmbo muterevaa Iruva, ando amwi neemwaana, Iruva nakooye imanya yefyo fyamwaanguya. ⁷ Na urilalyi lwa Iruva lwiilanyi urango lweru, lo lumweekye iringa mirima yaany na makusaro any kyeendwa ni Kristo Yesu. ⁸ Na kya ifurumya vanavama vakwa, kwakooya kwiiyo mbony shoose ya dede, fyoose fikee fya waarya, fyoose fya usumanu, fyoose fikee fya usha na fisenyi, neefyo fyoose fikee fya nnduma nsha, kwakooya kwiiyo usha loose, kwakooya kwiiyo nnduma nsha, langeny nnu mikaye ya ngata yeyo. ⁹ Findo filya mulewarya kwakwa neekulosha, na iita na ifilollya kwakwa, fitaniny, na Iruva yeto wa isarya nakae neeni. ¹⁰ Nndumi mmbo aleshiniinga ifura nnu, mashika elyi ulaalu mwammaa ivangisa mirima yaany kimaruma kyakwa, shaasa llya mwekeekusara kyakwa, lyo mulawonise mwaanya. ¹¹ Nshi nkeerera indo mashika elyi shaanguywa nkindo-fo, mashika shilemmaa iishivya na iirikya ikaa na mwiina yeto wakwa. ¹² Shiishivye yaanguywa, shavemanya na iwonisyo, ngata shoose na kya findo fyoose, mmbo shiishi iwuura na itirwa nshaa, itira fiingyi na yaanguywa. ¹³ Neefyo fyoose mmbo shaidima kyeendwa ni yeto mwiishisimba finya. ¹⁴ Lyo mmbo muletana kyisha nnu elyi muleakana neeny efo ngatareny takwa. ¹⁵ Na yeni-da, yeni Vafilipi mwiishi muveni, sheelyi kyeeri shileuka Makedonia llya mapookyony a ivambisa Nrumi ya Nsia, nkwiifo nta siri ingyi ileakana neeny kunu urundiny yelu lwa iningya neewarya kuuta yeni muveni-fo. ¹⁶ Mashika fika kulya Tesalonike mmbo muleshirikya ngarami naambo shilaanguyo, na nta nshi lyimwi da-fo. ¹⁷ Nta nshi shilangye mweengere ishitannya indo-fo, lyo mmbo shifurye kimaruma kya simbo yeto tany tikeengera ifumbuka efo kwany. ¹⁸ Lyo yeny mmbo shitiri findo fyoose na mmwasi, shaishwa shapu; findo filya fileuka kwany mmbo shilefityo ni Epafradito fikava nrungo nsha, kikaveva kiraso kyikee kiirikye kikasennya Iruva. ¹⁹ Nawe Iruva yeto wakwa mmbo ashemeengeryaa wo kindo ekyo kyamwaanguya kiinani na usimba lwakwe na efo itumbeny lyakwe kwi Kristo Yesu. ²⁰ Ulaalu Nndumi we Nde weeru nang’aniswa, akee wa llung’anu na llung’anu. Amen! ²¹ Idikireny veele woose na irina lya Kristo Yesu. Wooroye wany yeva vakee neeny vamwiidikira nnu. ²² Veele woose vamwiidikira, mmwasi yewo vakee va mmba ya Kaisari. ²³ Isarya lya Nndumi Yesu Kristo lyimukaye efo miriminy yaany.