MATAYO

MATAYO

¹ Yesu Kristo mmbo akee wa ufyari lwa Davidi, akee wa ufyari lwa Abrahamu. Yelu ni uramba lwa ufyari lwakwe. ² Abrahamu kaira Isaki, Isaki kaira Yakobo, Yakobo kaira Yuda na vanavamaye. ³ Yuda kaira Faresi na Zara na mayaawo ni Tamari; Faresi kaira Esrom, Esrom kaira Aramu. ⁴ Aramu kaira Aminadabu, Aminadabu kaira Naasoni; Naasoni kaira Salmoni. ⁵ Salmoni kaira Boas, nawe maye ni Rahabu, Boas kaira Obedi nawe maye ni Ruti. Obedi kaira Isai. ⁶ Isai kaira mangyi Davidi, Davidi kaira Solomon. Nawe maye ni nka ulya wa Uria. ⁷ Solomon kaira Rehoboamu; Rehoboamu kaira Abia, Abia kaira Asafu. ⁸ Asafu kaira Yosafati, Yosafati kaira Yoramu. Yoramu kaira Usia. ⁹ Usia kaira Yotamu, Yotamu kaira Ahasi, Ahasi kaira Hesekia. ¹⁰ Hesekia kaira Manase, Manase kaira Amosi, Amosi kaira Yosia; ¹¹ Yosia kaira Yekonia na vanavamaye meendi vandu veefo veesamirywa kulya Babeli. ¹² Na meendi vandu vansamirywa kulya Babeli Yekonia kaira Saltieli, Saltieli kaira Serubabeli. ¹³ Serubabeli kaira Abiudi, Abiudi kaira Eliakimu. Eliakimu kaira Asori; ¹⁴ Asori kaira Sadoki, Sadoki kaira Akimu, Akimu kaira Eliudi; ¹⁵ Eliudi kaira Eleasari, Eleasari kaira Matani; Matani kaira Yakobo. ¹⁶ Yakobo kaira Yosefu we mmi wa Maria. Mmbwe aleira Yesu yeto avaangwa Kristo. ¹⁷ Naasa kupookya Abrahamu fika Davidi marika akava ikumi na aana. Na kupookya Davidi fika meendi alya vandu valesamiryo kulya Babeli marika akaveva ikumi na aana. Na kupookya meendi vandu valesamirywa kulya Babeli fika Kristo marika akaveva ikumi na aana. ¹⁸ Naasa yoo maonikyony a Kristo kileenda u-le, “Maye ulya wakwe we Maria, eefinngywa ni Yosefu valandesanga ando amwi sha nndu na nka kamanyika mmbo akufingye kyuuka na Mumuyo Mweele. ¹⁹ Na mmi ulya wakwe we Yosefu akee nndu nsumanu nalakunde insuta karummbwa nanreu kirika. ²⁰ Eefo akusaraa indo nsu wa Iruva kansheya efo yooryeny kaamba, ‘Yewe Yosefu kukee mwana wa Davidi! Nta kulairyee irwaa tindi wafo Maria, mashika elyi akufingye mmbo kyuukye na Mumuyo Mweele.’ ²¹ Mmbo ashiira mwana wa womi na yewe kumfishye irina ni Yesu. ‘Mashika mmbwe akiraa vandu vakwe ngyulyamari tawo.’ “ ²² Na kimaruma kikaenda indo, ni kirero kilya Nndumi alerera na kana ka nkisuku naambo kikooye iinukya kyeamba, ²³ “Lla-te mwana wa kyeny akaa naire mwana wa womi, na irina lyakwe vammbaange ni ‘Emanueli’ (Kwaallwa kyaamba; Iruva asasangyi neese).” ²⁴ Naasa Yosefu kakwiipoo rony, kandetana kilya nsu ulya wa Nndumi ammbia karwaa tindi ulya wakwe. ²⁵ Nta nalasange nawe kutani afika kyeeri kya iira mwana nawe kammbaanga irina lyakwe ni Yesu.

¹ Llya meendi Yesu alewonika kulya Betilehemu ya Yuda fyeeri filya Herode etiri umangyi vakasha vandu vauka na taari ya ngama vakafika Yerusalemu. ² Vakaamba, “A mangyi yeyo ya Vayuda aleirwa akee kwi? Shamashika mmbo lulelollya nyinyiri yakwe kulya taari ya ngama neese mmbo lwasha lushemfirya-ndi.” ³ Naasa mangyi Herode ekiita indo kasavaa kimwi na vandu woose va kulya Yerusalemu. ⁴ Kasanyiria vakohani vaniini woose na velosha mavavaso evasunundaa mbony ta Kristo kundo ashewonikyaa. ⁵ “Vakaamba ni kulya Betilehemu ya Yudaya. Shamashika ni kindo kikee kireiye ni ulya mwauya fisuku kaamba, ⁶ ‘Na yewe Betilehemu ya Uruka lwa Yuda nshi kukee nndu kwanyiiya vashilyi va Yuda-fo. Shamashika efo kwafo kwiikaa kuuke-fo mangyi ashiisaa vandu vakwe va Israeli.’ “ ⁷ Nalyo mangyi ilya Herode kavaanga vaanga valya kirisi. Kavasununda vammbye kyeeri valelollya nyinyiri ilya. ⁸ Kavaruma veende kulya Betilehemu kavavia, “Kweenngye mundevesa waarya kya mwana yeto. Mukankooya sheenngyeny mbony, na yeny shiveenda indemfiirya-ndi.” ⁹ Naasa, vekiita kilya kya mangyi vakakweengya. Nalyo pariparii nyinyiri ilya valelollya kulya taari ya ngama ikasha ivasongoya shia. Ikaenda ikatana yairisha efo uwe usumanu na ando mwana ulya akai. ¹⁰ Naasa elyi valollya nyinyiri ilya vakatirwa ni nsia nniini nnu. ¹¹ Vakaanga na efo mmba vakakooya kimwana kilya ando amwi na maye; vakamfiiryandi vakamwoolokyasi vakawuya vakaporomwa findo fyawo vasurummye fya usuri. Vakansimba findo fyawo fya pya fya wuuru uniini, ni saabu na ubani na manemane. ¹² Vakoorwa ni Iruva efo yooryeny valaviire kyaaro na kulya kwa Herode, kya indi vawuye na kulya urukeny lwawo veshiiraa shia ingyi. ¹³ Naasa elyi vaanga valya varie shia yeewuya, nsu wa Nndumi kasha ikoora na Yosefu efo yooryeny; kammbia, “Wara shia kweenda kwirye kimwana ekyo na maye kunderishia kulya Misri kundekaa-fo; shitani shakuvia-se shamashika Herode arie iruuya kimwana yekyo nakirumate.” ¹⁴ Nalyo kawara shia yeenda arie kimwana kilya na maye elyi kio. Karishya kulya Misri kandekaa-fo. Herode katana afwa. ¹⁵ Na kilya kikee kirere ni Nndumi na kana ka ulya Mwauya fisuku naambo kikooye iinukya; kyeamba, “Ni kulya Misri mfo shilevaangya mwana wakwa.” ¹⁶ Nalyo Herode ankooya allembwa ni vaanga valya karooywa n’ngoo nnu. Karuma vana va kyuumi kulya Betilehemu na va kulya minyanuny koose vawaawa. Kupookya valya va myaaka ivii na valya vawuya-wuya numa; kyuuka na kyeeri kilya alesununda vaanga valya. ¹⁷ Nalyo kilya kikee kirere ni ulya mwauya fisuku Yeremia kiveinukya indo elyi aleamba: ¹⁸ “Ni unyanga luleitiwa kulya Rama, ni kiiyo na ikwaalala kyuumu. Ni Raheli akee iiya vana vakwe, nta naleve iviirya muu nyelyi valakiiyo-se.” ¹⁹ Naasa Herode ekimaa ifwa, nsu wa Nndumi kasha ikoora na Yosefu efo yooryeny kulya Misri. ²⁰ Kammbia wara shia kweenda kurie kimwana na maye kundefika kulya urukeny lwa Israeli, kimmba valya valesia muu wa kimwana yekyo valemfwa. ²¹ Nawe kawara shia keenda arie kimwana kilya na maye kandefika kulya urukeny lwa Israeli. ²² Naasa ekivywa ni Arikelao atiri umangyi ando a ndeye Herode, kairyaa yeenda-fo, koorwa ni Iruva yooryeny kawara-se shia kandefika kulya myuungony ya Galilaya. ²³ Kashesamya muri uvaangwaa Nasareti, na kilya kikee kirere nivaauya fisuku naambo kikooye iinukya elyi vaambaye, “Ashevaangwa Nndu wa Nasareti.”

¹ Naasa fyeeri fikee filya-da nalyo Yohane Mmbatisi kafummya vandu akapaa weele kulya kasa ka Yuda kaamba, ² “Kuryeny ngyulyamari tany, kimmba umangyi lwa Iruva lwammaafukya.” ³ Shamashika mmbwe eambaywa na kana ka nkisuku ulya Isaya eeshaambaa, “Akalu unyanga lwa nndu akapaa weele efo kasa eeshaambaa, ‘Songosyeny shia ya Nndumi!’ Sumaniseny miko yakwe.” ⁴ Nawe Yohane muni eraa soori tikee shooke; ta mafwaa a ngamula, kakufinga na ukova lwa shony efo mwiniiny. Na shoonga takwe ni nrie na ukyi wa mbakony. ⁵ Nalyo vandu vakamweengya va kulya Yerusalemu na kulya Yudaya koose na va muungo wa Yordani woose. ⁶ Vakandebatiswa mmbwe efo mureny wa Yordani veparaa ngyulyamari tawo. ⁷ Kyasia kalollya Vafarisayo veengyi na Vasadukayo vensheyaa naambo vabatiswa mmbwe, “Nawe kavavia yeni ufyari lwa shoka, a ni vi alemwiikimba shaasa musheturuunyaa unyafi lwa Iruva yelo lukaa luwoye ulana? ⁸ Oreny kyuuka na mashora any mwalashike mirima! ⁹ Nta mulakusare mwaambe, Nde weeru luntiri ni Abrahamu! Mmbo shamuvia, Iruva ashiidimaa iparya Abrahamu vana navaute naakwa kunu maweny. ¹⁰ Na kyaara mmbo kyammaa ivikwa sindeny ya miri. Naasa wo nri wiiyo ulavikaa ndunda shisha mmbo umanywaa undeerwa murony. ¹¹ Kyakwa yeny shamubatisa na mura mukooye yaalashika efo nriminy. Indi yeto ashaa numa yakwa mmbo atiri finya kashiilanya. Na yeny nshimaa nta shintare fyaaru fyakwe-fo. Mmbwe ashemubatisaa na Mumuyo Mweele na muro. ¹² Nawe arie nndeeva na woko lwakwe na efo muunguny wakwe asheaiyaa-fo kwiile peru. Na nganu yeto nataallye efo mbesheny yakwe na muulu yeto nandeuvivya murony ularumikaa.” ¹³ Nalyo Yesu kasha auka Galilaya kafika kulya Yordani kwa Yohane nandebatiswa mmbwe. ¹⁴ Nawe kakunda imwiima kammbia, “Yeny mmbo shisumani ibatiso ni yewe, na yewe kwasha na kwakwa?” ¹⁵ Yesu kammbia, “Ra! Ulaalu kikuviiyeny indo! Mashika ni indo kilusumanyi; naambo lwiinutye efyo Iruva akundye fyoose.” ¹⁶ Naasa elyi Yesu ammebatiswa kauka efo mureny. Nalyo efo iruveeu kukanraukya kalollya Mumuyo wa Iruva ashoolokaa akee sha mbeta kasha inkaya. ¹⁷ Nalyo akakalu unyanga lureraa luuka iruveeu lukaamba, “Yeu mmbwe mwana wakwa nkunde, mmbwe shilensauwa.”

¹ Nalyo Yesu kaorwa ni Mumuyo wa Iruva neende kulya kasa, nandeeswa-fo ni mmbishwa. ² Kamaa-fo mikonu makumi aana kio na nsanyiny nalakomba nta shoonga, elyi numa katirwa nshaa. ³ Naasa mmbishwa kansheya kammbia, “Kwakooya mmbo kukee mwana wa Iruva ambaany mawe yaa nawe mikate.” ⁴ Nawe kaallwa kaamba, “Kindo nndu akirya-u nakyo muu nshi shoonga tupu-fo, ni wo kirero kyauka efo kaniny ka Iruva.” ⁵ Nalyo mmbishwa kamwiipoo kamfita kulya muriny mweele kanseleesa alya urorony lwa mmba ya Iruva. ⁶ Kammbia, “Kwakooya mmbo kukee Mwana wa Iruva killyany si, shamashika kikee kireiye kikaambawa, ‘Ashevavasya vasu vakwe va iruveeu mashika afo yewe, vashekukamaraa na mai, kulasheekapa nta urende lwafo iweny.’ “ ⁷ Yesu kamwaallwa kammbia, “Nta kulaese Nndumi Iruva wafo!” ⁸ Naasa mmbishwa kamwiipoo lyingyi, kamfita ando a ifumbuny yaasha kamoora ngyumangyi ta ulana toose na usuri lwa vayo. ⁹ Kammbia, “Akati shikuniinga toose, kwakooya kwakutuula si neshoolokya ng’undeny.” ¹⁰ Nalyo Yesu Kammbia, “Shuuka satana! Mmbo kikee kireiye kyeamba, ‘Ni Nndumi Iruva wafo mmbwe kushemoolokya nawe mmbwe muni kushemwiindyaa.’ “ " ¹¹ Nalyo satana kanra-u, na vasu va Iruva vakansheya vakamfurukannya. ¹² Naasa ekiita mbony ta Yohane sheelyi amfingwa, kookau keenda kulya Galilaya; ¹³ Kasama kulya Nasareti kandekaa kulya Kapernaumu mbaambaa ya yeeve kulya myuungony ya Sabuloni na Naftali. ¹⁴ Naambo kilya kikee kirere na kana ka nkisuku ulya Yesaya kikooye iinukya llya aleamba, ¹⁵ " “Yewe uruka lwa Sabuloni na Naftali kundo kwiirye shia yeefika yeveny kulya kwa kulya ya Yordani, efo Galilaya ya vandu va masanga. ¹⁶ Wo ni vandu vakee ireeminy vakawuya ilollya sa niini. Ni vandu vakee urukeny lwa vafu vakawuya ifummywa ni sa.” ¹⁷ Naasa fyeeri filya llyo meendi Yesu alepooka ikapa weele na irera, “Kuryeny ngyulyamari tany, kimmba umangyi lwa Iruva lwammaafukya.” ¹⁸ Naasa eefo arua-ruaa kulya mbaambaa ya yeewe ilya ya Galilaya kalollya vana va nka vavii, ni Simion ulya avangwaa Petro, na mwanamaye we Andrea. Nawo veefo vashoolotaa mireiyo yaawo yeereiya makunga mashika vekee veereiya makunga. ¹⁹ Nawe kavavia, “Ndifony mushilatye! Na yeny nshemwaallwa veereiya vandu.” ²⁰ Nawo lyo yeni vakatiiya-u mireiyo ilya yaawo vakallatya. ²¹ Naasa alla na mbee kalollya vanavanka vengyi vavii ni Yakobo akee mwana wa Sebedayo na Yohane akee ni mwanamaye. Nawo vakee efo ngalaveny na nde-yaawo, we Sebedayo veefo vasongosya mireiyo ilya yaawo. Nawe kavavaanga. ²² Nawo lyo yeni vakatiiya-u ngalava ilya na nde-yaawo, vakallatya. ²³ Nalyo kava mwisengetya kulya Galilaya koose eeloshaa efo mmba tawo teeterevya, na yoongoya vandu nrumi ya nsia, yeyo ya umangyi lwa Iruva. Kaveshiisa na wo ndwari na wo unana lwa efo vanduny. ²⁴ Nalyo nnduma wakwe ukaenda ikwaana kulya Siria koose. Na vandu vakamweengya yewo woose velwee ndwari shive na shive na yewo velyilyiswa kyuumu, na yewo vatirwa ni mimuyo mikasha, vasukwa na fitongororo malungo. Nawe kavakira. ²⁵ Vandu vakallatya matorito meengyi vauka kulya Galilaya na kulya muungo wa miri ikumi; na Yerusalemu na Yudaya, na kulya kwakulya ya Yordani.

¹ Naasa elyi alollya vashe ikuumbya-fo nsemu mwiingyi wa vandu, kandesaama kulya ifumbuny kakaa-fo rembo. Na valya vakiloshyony vakakaa yoo kufii nawe. ² Nawe kapooka ivalosha eshaambaa. ³ “Ngoma yewo va mirima mikiva, mashika mmbo umangyi lwa iruveeu lwava lwavo. ⁴ Ngoma yewo vatirwa mfyoova, mashika mmbo vakaa vaviirywa muu. ⁵ Ngoma yewo vafoo, mashika mmbo vakaa vatire uruka luwe ding’u yaawo. ⁶ Ngoma yewo vatirwa nshaa na nyura ya usumanu mashika mmbo vakaa vawuutiswa. ⁷ Ngoma yewo velyillya vandu mashika mmbo vakaa valyillywa. ⁸ Ngoma yewo vatiri nrima mwaa mashika mmbo vakaa valollye Iruva. ⁹ Ngoma yewo veende ufoo mashika mmbo vakaa vavaangwa vana va Iruva. ¹⁰ Ngoma yewo varishiswa kimaruma kya usumanu mashika mmbo umangyi lwa Iruva lwava lwavo ¹¹ Ngoma yeni kwakooya vandu vamwaarara na imurishisa na imufinngya wo kindo kikasha kyoose kikee kya wongo elyi mukee vakwa. ¹² Fureny-dwa muvelooka mashika iviiri lyany mutiri efo iruveeu lyava iniini. Mashika ni indo verishisa vakisuku valya vamusongoye.” ¹³ “Yeni mmbo mukee mmbala wa ulana yelu. Indi kwakooya mmbala wammba iturya, a kindo ushewuyaa iroliswa nakyo nkyo ki? Mmbukivaa-se-fo, kulaore ni indeerwa efo poo uvavarwa mmbandu. ¹⁴ Yeni mmbo mukee sa ya ulana. Muri ukee mmbike ando a ifumbuu-ny mmbushiidimaa ikusuruma-fo. ¹⁵ Nta nkwiifoo nndu ashataa taa efo mmba kawuya iisikya-fo. Mmbo aivika ando a uwe ikamikya yewo woose vakee efo mmba. ¹⁶ Veny sa efo usanguny lwa vandu woose, nawo vakooye ilollya efyo fya usha mutanaa, vaute-u ing’anisa Nde waany wa efo iruveeu.” ¹⁷ “Nta mulakusare kindo kilesheende ni ishefullwa mavavaso ao vakisuku-fo. Nshisheeye ifullwa-fo ni iinutya. ¹⁸ Ni kya dede shamuvia, ‘Iruveu na ulana fishiraa indi efyo fikee fireiye nfishiraa-fo, na ikava mbekye imwi nsi, nkuti fiinutyo fyoose.’ ¹⁹ Naasa nndu akara ifullwa mavavaso yoo naakwa ni elyo lyikee idu ya engyi, kalosha vandu indo, mmbo akaa navaangwa n-du-wa-woose efo umangyi ny lwa iruveeu. Indi yeto atana na yaafunda mmbo akaa navaangwa nniini efo umangyi ny lwa iruveeu. ²⁰ Mashika shamuvia kwakooya kulaore usumanu yelo lwany lwiilannyi yelo lwa velosha mavavaso na Vafarisayo mmukooyaa yaanga efo umangyi ny lwa iruveeu-fo.” ²¹ “Mmbo mwiitye valya va mbee valevio, ‘Kulawae!’ Na nndu mwiwaa ammba nndu mwiutywa uvingo efo kwa veerumbwa mwaandu.” ²² Na yeny shamuvia, “Nndu katirya mwanamaye unyafi ammba nndu mwiutywa uvingo lwakwe efo kwa veerumbwa mwaandu. Na nndu kavia mwanamaye, ‘Yewe ni mbafu, ammba nndu mwiutywa uvingo efo ikwaanuny lya masiingo. Na nndu kavia mwanamaye Iruva akusuuye ammba nndu mwiutywa uvingo lweenda yeerwa murony wa Gehena.’ “ ²³ Naasany kwafika yeende kiraso kyeeniinga Iruva, kwakyeende na alya ando eerasya, kwamfikau kwakumbwa mwanamau atiri mwaandu neewe, ²⁴ rau kyaanu kilya kyeeningya Iruva kupooke mbele inderera na mwanamau kusange nawe. Naasa kusheny kusheningya Iruva kyaanu kyafo. ²⁵ Va nndu mwaanguya yeto atiri mwaandu neewe kyeeri muriani nawe shia. Na nkiduva nalandeekurambikya efo maakony a nniini yeto wa mwaandu, na yeto nniini wa mwaandu nandekurambikya efo maakony a nsero yeto wa poo, kundeerwa kifingyony. ²⁶ Ni kya dede shakuvia, “Nta nkushuukaafo-fo kutani kwataa na senti ya kiparwe.” ²⁷ “Mmbo mwiitye valya va mbee valevio, ‘Kulatuuse nta kulashetuuswa.’ ²⁸ Na yeny shamuvia, wo nndu allola nndu nka kya illanga mmbo ammaa ituusa efo nriminy. ²⁹ Na kwakooya iriso lyafo lyishekweengyee nsindara lyiillwe kulyeere efo! Mmbo kyakuviiya kisha mmwasi ilungo lyafo lyimwi lyikakurekya, na mwiili wafo moose ukyie yeerwa murony wa Gehena. ³⁰ Na kwakooya woko lwafo usha lushekweengye nsindara lurummbwe kulweere efo lukuuke. Mmbo kyakuviiya kisha ilungo lyafo lyimwi lyikakurekya na mwiili wafo moose ukie yeerwa murony wa Gehena.” ³¹ “Mmbo kilererwa-se kyeamba, ‘Nndu kalakana na nka wakwe kuti nanniinge barua ya ilakana.’ ³² Na yeny shamuvia, ‘Wo nndu alakana na nka wakwe kwakooya kulaore ni kimaruma kya utuusi, mmbo amwaallwa nave mwituuswa.’ Na nndu arwaa nka mmi allakana nawe mmbo amwaallwa nka ntuusi.” ³³ “Na kingyi-se valya va mbee valevywa, ‘Nta kulalye mboo, mmbo kushefityaa Nndumi ekyo kuteerye kullye mboo.’ ³⁴ Na yeny shamuvia, ‘Nta mulakulyise mboo’ mwaambe, ‘Swa iruveeu, mashika nng’u kirembo kya Iruva;’ ³⁵ Nta mulalye mboo mwaambe, ‘Swa uruka! Mashika nng’u aekyerya marende akwe. Nta mulaambe swa Yerusalemu! Mashika muni muri ni mangyi nniini.’ ³⁶ Nta kulalye mboo kwaambe, ‘Swa nrwe wakwa! Mashika elyi kulashiidimaa yaalwa nta ufii lumwi luve waa ao uu.’ ³⁷ Naasany kirero kyany kive, ‘Ee!’ Ao ‘Ode!’ Kyairya efyo ni efo kwa yeto nkasha kyuukye.” ³⁸ “Mmbo mwiitye kilya kileambawa, ‘Iriso lyitawa ni iriso, na iyoo lyitawa ni iyoo.’ ³⁹ Na yeny shamuvia, ‘Nta mulasalale na nndu nkasha. Indi nndu kakukapa woi lwa yuundu lya woko usha mwaluye na yelyo lyingi.’ ⁴⁰ Na nndu kakuvaanga mwaanduny nandekusoka soori yafo ya mwiiliny, neewe nreeye na yeyo ya yeerya. ⁴¹ Na nndu kakwiitikya kweende nawe kyenga kya shia neewe enda nawe ando a fyenga fivii. ⁴² Nndu kakutereva kindo nniinge. Na nndu kasha ikwaakwa nta kulamwiimi.” ⁴³ “Mmbo mwiitye kilya kileambawa, ‘Kunda nndu uroo na nkiduva wafo kunsue.’ ⁴⁴ Na yeny shamuvia, ‘Kundeny vakiduva vany, na yewo vemurishisa muvevaterevya efo kwa Iruva.’ ⁴⁵ Naambo mukooye imanyika mmbo mukee vana va nde yeto waany wa efo iruveeu; mashika we ava mwiirosa mwi wakwe ukavaiya yewo varavi na yewo vesha. Kaveva mweende mmbwa yakwe ikakapa kwa yewo va usumanu na kwa yewo va kiila. ⁴⁶ Mashika kwakooya mwakunda yewo vemukunda veni, a isina musheonisaa llyo kyi? A vadedemi nshi indo-da vatanaa? ⁴⁷ Na kwakooya mushiidikiraa vanavamaye vany tupu, a kindo mwatana kya mmwasi nkyo kyi? A vandu va masanga nshi indo-da vatanaa? ⁴⁸ Naasany veny vandu vasongovisi shaasa Nde yeto waany wa efo iruvee-u akee nsongovisi.”

¹ “Kwiiseny efyo fya usumanu mutanaa mulasheefitana efo fisanguny fya vandu mukooye ilollyo mmbo. Kwakooya kulaore ni indo, nkukiiyo-se isina mutiri efo kwa Nde yeto waany wa efo iruveeu-fo. ² Naasa elyi kwiifo kuniingya kyaanu kya vakiva nta kulakunde ikapywa wombe lukwiirye mbee shaasa vakunang’ari vatana efo mmba teeterevya neefo shia tikwaannyi naambo vakooye irumishwa. Ni kya dede shamuvia, ‘Isina lyawo alyo vammeelyiwarya.’ ³ Indi elyi kwiifo kuniingya kyaanu kya vakiva, kulare woko lwafo umuso lumanyi ekyo woko usha lwiifo lutanaa. ⁴ Na kyaanu kyafo kyeeninga vakiva kive ni kirika na ndoo yeto alollye fya kirika akaa nakutae.” ⁵ “Na elyi kwatereva Iruva nta kulave sha vakunang’ari. Wo mmbo vakunndye itereva vasalali efo mmba teeterevya na efo shia tikwaannyi ta efo muriny naambo vakooye ilollywa mmbandu. Ni kya dede shamuvia, ‘Isina lyawo alyo vammeelyiwarya.’ ⁶ Indi kyafo yewe elyi kwatereva Iruva ira na efo kirieny kya mmba yafo kya nnang’ani kuveraya na mwaango, kutereveny Ndoo efo kyaminy kukai. Na Ndoo yeto alollye fya kyama akaa nakutae.” ⁷ “Na elyi mwatereva Iruva, nta mularere ura-ura sha vandu va masanga; mashika wo mmbo vaishi kindo vashiirikywa ni elyi marero awo ava meengyi. ⁸ Naasa yeni mulave shawo; mashika Nde yeto waany aishi yekyo mwatura kulaore mwammutereva. ⁹ Naasany yeni tereveny indi, ‘Nde weeru kukee efo iruveeu; irina lyafo lyivikwa yeele, umangyi lwafo lushe. ¹⁰ Kindo kyafo kukundye shaasa kyatanyika efo iruveeu na kunu urukeny kivetanyika indo. ¹¹ Luniinge inu shoonga teru tilufye. ¹² Kulusarye ngyulyamari teru shaasa na yese lwasarya valya valulyamarya. ¹³ Kulalurwaa efo kyeesyony, indi kulukire ekyo kivishwa. [Shamashika umangyi ni lwafo, na finya, na usuri, meeri moose allung’ani. Amen.]’ ¹⁴ Shamashika kwakooya yeni mushefwaayaa vandu kya efyo vamulyamarye, na Nde yeto waany wa efo iruveeu ashemufwayaa. ¹⁵ Indi kwakooya yeni mulafwaaya vandu na Nde yeto waany nta nnashemufwaayaa kya efyo mullyamarye-fo. ¹⁶ Na elyi mushekootoyaa nta mulave sha vakunang’ari. Mashika wo mmbo vakusha fisangu naambo vamanyike efo vanduny mmbo veefo vakootoyaa. Ni kya dede shamuvia, ‘Isina lyawo alyo vammeelyiwarya.’ ¹⁷ Indi kyafo yewe elyi kukekootoya amba nrwe wafo mafura kuvesangya kisangu. ¹⁸ Naambo kulamanyike efo vanduny mmbo kwiifo kukootoyaa. Mmbo kumanyikaa yefo kwa Ndoo yeto akee efo kyaminy. Na Ndoo yeto alolye fya kyama akaa nakutaa.” ¹⁹ “Nta mulave vekusanyirya masaa kunu urukeny. Mfo kurukuru ilyaa na kurere na manyinyi akasuma mmba akaiva. ²⁰ Indi kusanyiryeny masaa efo iruveeu kundo kulaifo kurukuru ilyaa nta kurere, nta manyinyi nalaifo asumaa mmba akaiva. ²¹ Shamashika ando kusurumyi umasi lwafo na ngoo yafo nng’u ando ikai.” ²² “Naasa kwakooya iriso lyafo lyikee isha na mwiili yeto wafo mmbo ukaa na sa. ²³ Indi kwakooya iriso lyafo lyankashaa, na mwiili wafo mmbo ukaa na ireema moose deny. Naasa sa yeyo ikee nnang’ani yafo kwakooya yammba ireema, a paa ireema lying’ani.” ²⁴ “Nkwiiyo nndu ashiidimaa irundya vanndumi vavii-fo. Mashika ndesa ashesua yeto umwi na ikunda yeto wa kavii. Ao ndesa ashetiraa yeto umwi namini yeto ungyi. Nta mmushiidimaa irundya Iruva musande na irundya masaa a ulana elu-fo.” ²⁵ “Kimmba ni indo, neeny shamuvia nta mulasaukwa kya muu yeu kindo mulyaa ao ina, nta kya mwiili kindo muraa. A muu nshi kindo kiniini kikailanya shoonga, na mwiili wany nshi kindo kiniini kikailanya masara eeraa? ²⁶ Loleny ndeye ta efo nginiiu-te nteera nta mbeu nta yuulula-fo, nta yaalya mbesheny-fo. Lyo Nde yeto wa iruveu eefo atilelaa. A yeni nshi mutiilanyi kya mmwasi? ²⁷ A mmbo kwiifo nndu kunu kwany ashiidimaa yeengerya waasha lwakwe naakwa ni ando a irambo lyimwi nsi na kasaukwa inda? ²⁸ Na kya masara yoo nkikyi elyi musawukwaa nng’u? Kufundeny na fivaro fya efo mbuven-te shaasa fimmyaa filavinaa filashooka nta soori. ²⁹ Na yeny shamuvia, ‘Nta Solomon na utore lwakwe loose, nneeree nisha sha kimwi kya vayo-fo.’ ³⁰ Naasany, mare a efo mbuveny aiyo inu na ndesi akandeerwa iyeny, kimmba Iruva amfyaambika indo afikaany yeni mukee va kikusiryo kidu nshi ashemweengeryaa? ³¹ Naasany nta mulasaukwa mwaambe, ‘A lukalya-kyi ao lukana-kyi ao lukaraa-kyi?’ ³² Shamashika fya ngata yeyo ni vandu va masanga vafilalakyaa. Shamashika Nde yeto waany wa efo iruveeu we eeshi mmbo mutinnyo mfindo efyo. ³³ Pookeny mbele iruuya umangyi lwa Iruva na usumanu lwa vayo, na efyo fingyi fyoose musheerywaa-u fya ngyeerya. ³⁴ Naasany nta mulasaukwa kya ndesi, Shamashika nkonu wa ndesi usawukwaa nkya vayo. Wo nkonu utiri ngatara ya vayo iwumaa.”

¹ “Nta mulautye vengyi uvingo, naambo mulashyeyuutywa muveni. ² Shamashika mirumbuye yaany mwanrumbuya vandu, nnyo musherumbuywaa. Na myeesye yaany mwameesya vengyi, nnyo musheesyoo. ³ A yewe nkyikyi elyi kwalola kinaana kikee irisony lya mwanamau na ikongo lyikee irisony lyafo yewe kulalyimanyi? ⁴ A ni inda kushevia mwanamau, ‘Ra nkweekye yuuta kinaana yekyo kikee efo irisony lyafo, na efo irisony lyafo kumuni ni ikongo lyiifo?’ ⁵ Yewe nkunang’ari pooka mbele yuuta ikongo yelyo efo irisony lyafo, llyo kushelolya nisha kwiidimi yuuta kinaana ekyo kikee efo irisony lya mwanamau. ⁶ Nta mulasheeniinga fite ekyo kikee kyeele, nta samana tany mulateerye nguvefo, naambo tilasheeitivavara na imwiindukya timuratwe.” ⁷ “Tereveny, neeni musheniingwa, syeny neeni musheonaa, kakapeny mwaango neeni musheruywaa. ⁸ Shamashika wo nndu atereva mmbo aniingwa, na yeto mwisia asheonaa na yeto mwikakapa mwaango mmbo asheruywaa. ⁹ A ni vi nndu wa kunu kwany mwana wakwe akooya intereva nkate nawe nanniinge iwe? ¹⁰ Ao katereva ikunga nawe nanniinge shoka? ¹¹ Naasany yeni mukee varavi kwakooya mwaidima iniinga vana vany simbo shisha, a Nde yeto waany wa efo iruveeu nshi asheengeraa isimba yewo vatereva mesha? ¹² Naasa findo fyoose shaasa mukunndye itanywa mmbandu neeni veny vetana indo kimwi shawo, mashika ni indo ivavaso lyikai amwi na veawuya fisuku.” ¹³ “Angeny ngiriny mwilatya shia yeyo shisiise, kimmba ngiri nshilandari na shia iifo itiri mwaanya nniini ni yeyo ishemufitaa uretiny na yewo vailatya vakava veengyi. ¹⁴ Mashika ngiri ii-fo ikee shisiise na shia iifo nshisiise yeyo imufitaa muuny, na yewo vailatya vakava vaangu.” ¹⁵ “Kwiiseny na veawuya fisuku va wongo, mashika wo mmbo vafika kwany varee masara a moonri na efo kimmba vakava mafite eerutwarutwa. ¹⁶ Ndunda tawo vavikaa nto tishevaparaa sengye muvamanyi nato. A ndesa vandu vayaya ndunda ta misabibu efo miingeny ao marwaa efo nrwen? ¹⁷ Niindi kikai; wo nri nsha mmbo uvikaa ndunda shisha na nri nkasha ukavika ndunda shikasha. ¹⁸ Nta nkwiifo nri nsha ushiidimaa ivika ndunda shikasha-fo, nta nri nkasha ushiidimaa ivika ndunda shisha-fo. ¹⁹ Na wo nri ulavikaa ndunda shisha mmbo ushemanywaa na yeerwa murony. ²⁰ Naasany ni ndunda tawo vavikaany nto tishevaparaa sengye muvamanyi nato.” ²¹ “Nshi wo nndu ashivia, ‘Woi Nndumi, Woi Nndumi!’ Ashekooya yaanga yefo umangyi ny lwa iruveeu-fo, kulaore ni yeto atannyi efyo fikundyo ni Nde yeto wakwa wa efo iruveeu.” ²² Nkonu yeto ukamfika, vengyi vasheshiviaa, “Woi Nndumi! Woi Nndumi! A nshi lweefo lweshaauyaa fisuku na irina lyafo? A nshi lweefo lweshaanta mimuyo mikasha na irina lyafo? A nshi lweefo lwetanaa fya wiidimi fiingyi na irina lyafo?” ²³ Llyo nshevaviaa paa, “Yeni nshimwiishi-fo. Kwiipony yaa shikai yeni vetana fya kiila!” ²⁴ “Kyasiany wo nndu mwiirannya marero yoo akwa na yaatana kaatana mmbo ashevaa sha nndu nnrango aletana mmba yakwe kaiveiya ando a iweny. ²⁵ Nalyo mmbwa ikakapa na mifu ikasoka na ngyuraato tikadina, tikakapa mmba ilya, nayo ilawunduke. Mashika uvasha lwavayo lukee uveiye iweny. ²⁶ Na wo nndu mwiirannya marero yoo akwa kara nalaatana mmbo ashevaa sha nndu itondo aletana mmba yakwe, kaiveiya nsangeny. ²⁷ Nalyo mmbwa ikakapa, na mifu ikasoka, na ngyuraato tikadina tikakapa mmba ilya, nayo ikawunduka. Na mmbundukye wa vayo ikawa pu.” ²⁸ Naasa kikava elyi Yesu ammanda irera marero yoo, nkuka ulya wa vandu vekuumbye-u vakeesing’ang’a kya ufundo lwakwe. ²⁹ Nyeelyi aleva mwiifunda sha nndu atiri ushilyi nalaloshe sha velosha valya vawo va mavavaso.

¹ Naasa elyi eefo asholookaa auka kulya ifumbu-u vandu vakallatya matorito meengyi. ² Nalyo kasha nang’u nndu alwee ivave kamoolokya ng’undeny kaamba, “Woi Nndumi kwankunda kushiidimaa isheeremuta.” ³ Yesu kaorwa woko kampaana kaamba, “Shankunda, eremukany.” Nalyo yeni keeremuka ivave lyilya lyentiri. ⁴ Naasa Yesu kammbia, “Nta kulavie nndu! Mmbo kusheenda kundekoora efo kwa nkohani, kundevika kyaanu kwa Iruva kilya Mose avavasye, kive nkyo ukureeki kwawo.” ⁵ Kikasia, elyi afika kulya Kapernaumu, kasheywa ni nshilyi wa vasikari iyana, kamooshora, ⁶ kammbia, “Woi Nndumi shitiri ishinga lyakwa lyilele kyeny lyikee yuumu malungo, lyiifo lyivavywaa kyuumu.” ⁷ Nawe kammbia, “Nsheendaa shindenkira.” ⁸ Nshilyi ulya wa vasikari iyana kaallwa kammbia, “Woi Nndumi yeny nshimaa kutani kwafika efo si ya kai ka mmba-kwa-fo. Ammba irero lyimwi nsi na ishinga lyakwa lyisheshiaa. ⁹ Shamashika neeny mmbo shikee kwasi ya ushilyi lwa vengyi shivetiri na vasikari vakwa, neeny ni nniini waawo; naasa shavia eto umwi, ‘Enda’, mmbo asheenda, shavia eto ungyi, ‘Osho’ nawe mmbo aveshaa. Shavia ishinga elyo lyakwa, ‘Tana kindo kive! Lyikavekitana.’ “ ¹⁰ Naasa Yesu ekiita indo kikantamba kavia valya veeiyo vevandami nawe, “Ni kya dede shamuvia, nta kunu Israeli nshindelollye kikusiryo king’ani indo-fo.” ¹¹ Na yeny shamuvia, “Kusheshaa vandu vengyi wooka taari ya ngama na ya nkwaany vashelya shoonga vasasangyi na Abrahamu na Isaki na Yakobo efo umangyi ny lwa Iruva. ¹² Na veni umangyi wo vandeerwa poo efo kuwoye ireema na ikwaalala na irafunnya mayoo.” ¹³ Naasa Yesu kavia nshilyi ulya wa vasikari iyana, “Kweenngye! Kivekuviiya indo shaasa kukusirye-u!” " Nalyo ishinga lilya lyakwe lyikashia kyeeri kilya kyeni. ¹⁴ Nalyo Yesu kandefika kulya kyeny kwa Petro kalollya maye-a-nka alele kitareny elwee iseng’u. ¹⁵ Nawe kampaana woko, iseng’u lyilya lyikammbuka. Kakwiipoo kapooka infurukannya. ¹⁶ Na elyi kwammiila vakamweenngye vandu vengyi vellyiswa ukiva mmimuyo mikasha. Nawe kaanta mimuyo ilya mikasha eshaambaa kirero kyeni. Na valya veeiyo valwee kavakira woose; ¹⁷ Naambo kirero kilya kindekooya iinukya shaasa kilererwa ni nkisuku ulya Isaya kikaamba, " “Mmbwe aleipoo ngyunana teru neekurika ndwari teru.” ¹⁸ Naasa Yesu ekilollya nsemu wa vandu vansha ikummbya-fo vakanndingitya nawe kavavasya vanderuuka mbai ilya ingyi. ¹⁹ Nalyo mwaarya wa fitabu umwi kamweengya kammbia, “Llori shikundye ikulatya wo ando koose kusheenda.” ²⁰ Na Yesu kammbia, “Maparwe mmbo atiri mbanga ta vayo na ndeye ta nginiiu tikavetira fifuri fya vayo. Indi mwana yeto wa nndu nnatiri ando asheekeryaa nrwe wakwe-fo.” ²¹ Na ungyi akee nnang’ani ya valya vakiloshyony kyakwe kasha kammbia, “Nndumi shiniinga mumu mbele shikweengye inderika nde wakwa.” ²² Indi Yesu kammbia, “Shilatya, kureeye vafu varike vafo vawo.” ²³ Naasa Yesu kasaama ngalaveny valya vakiloshyony kyakwe vakasaamafo nawe. ²⁴ Naasa elyi veefo kukasha uraato uniini. Ngalava ilya ikatana yasikywa ni matundulu. Nawe eelele rony. ²⁵ Vakanserikya vakamwaanta vakammbia, “Woi Nndumi lwaauwe lwiifo lusiaa.” ²⁶ Nawe kavavia, “A nkikyi elyi mweereiye indo? Mmbo mukee va kikusiryo kyaangu nnu.” Nalyo kasalala kakyeemmya uraato lulya na yeeve ilya kukava kimammya sau. ²⁷ Naasa vandu valya vakatambiswa vakaamba, “A nndu yeu ni wa kwi, kutani uraato lwamwiirikya na yeeve yeyo!” ²⁸ Naasa ekifika kwakulya ya uruka lwa Vagerasi kakwaanannya-fo na vandu vavii vatirwa mmimuyo mikasha vauka fifuny vakee vanyaasi nnu, nta nndu nalaidimi iira shia ilya. ²⁹ Nawo akakawo vakoongora vakaamba, “Yewe mwana wa Iruva nkyikyi lutiri na yewe? A mmbo kulesha kunu kushelusisya kulaore kyeeri kyeru kyamfika?” ³⁰ Naasa kwaasha na yoo ando vekai kweifo ironda lya nguve lyishiiswa-fo. ³¹ Nalyo mimuyo ilya mikasha ikantereva ikaamba, “Kwakooya kwalwaanta lurumi lundeanga irondeny lya nguve yeto.” ³² Nawe kaivia, “Kweenngye!” Nato akakato tikapufuka-fo tikandekweera efo waangeu. Tikasiiya efo yeeveny tikafiiya efo mureny. ³³ Naasa veesi valya vakarisha vakatana vafika kulya muriny. Vakandeongoya-fo mbony tilya toose na ta vandu valya vatirwa mmimuyo mikasha. ³⁴ Nalyo akakava vandu va kulya muriny vakakuruka-fo woose vakasha ikwaananya na Yesu. Vekillolya vakantereva naambo nauke efo myuungony yaawo.

¹ Nalyo kasaama neefo ngalaveny karuuka yeeve ilya katana afika kulya muriny kwakwe muni. ² Nalyo akakau nndu akee kitongororo malungo vakamweende eeriwa na kitara. Na Yesu kalollya kikusiryo kyawo, kavia nndu ulya muumu malungo, “Wuiyo mmuu mwana-kwa, kwambutwa ulyamari lwafo!” ³ Nalyo akakava velosha mavavaso vaiyoo maata verera efo nriminy wawo veshaambaa, “Yeu mmbo anruma Iruva.” ⁴ Yesu kamanya makusaro awo kaamba, “Naambo ki elyi mwakusara ukasha efo miriminy yaany? ⁵ A kyaangu yaamba-u nkingakyi? Ndesa ni yaamba, ‘Kwambutwa ulyamari lwafo ao ni yaamba, kwiipo kweenda?’ ⁶ Manyiny-te Mwana yeto wa nndu mmbo atiri ushilyi kunu urukeny lwa yuuta vandu ulyamari, naasa kavia kitongororo kilya, ‘Salala ipoo kitara kyafo kukweengye kyeny.’ “ " ⁷ Nawe kakwiipo kakweengya kyeny. ⁸ Naasa mamwiingyi ulya wa vandu vekilollya kive indo, vakatirwa mbwerei, vakaitikisa Iruva elyi aniinga vandu ushilyi uniini indo. ⁹ Nalyo Yesu eshiraa kulya kalollya nndu akee rembo efo mmba yeededemya avaangwa ni Matayo, kammbia, " “Shilatya!” " Nawe kakwiipoo kallatya. ¹⁰ Kikava elyi eefoo alyaa shoonga efo mmba kwa Matayo vakasha vadedemi vengyi na valyamari vakasha nau vakalya shoonga ando amwi na Yesu na yewo vakiloshyony kyakwe. ¹¹ Na Vafarisayo vekilolya indo vakavia valya vakiloshyony kyakwe, " “A kyavaany inda elyi llosha waany alya shoonga ando amwi na vadedemi na valyamari?” ¹² Nawe ekiita indo kavavia, “Nshi yewo vakee vesha vatiri isiiyo mwaanga-fo; indi ni yewo valwee. ¹³ Kweenngye mukandekulosha kilya kikee kirere kyeyaamba, ‘Kishisenyi ni ilyillya vandu nta nshi irasyo-fo.’ Shamashika vandu shisheye ivavaanga nshi yewo va usumanu-fo ni yewo valyamari.” ¹⁴ Nalyo valya vakiloshyony kya Yohane vakansheya vakaamba, “Yese lwava vekootoya na Mafarisayo kiwo, na yewo vakiloshyony kyafo valakootoye. A kimaruma nkyoki ndesa?” ¹⁵ Na Yesu kavavia, “A vandu va walyi vashidimaa inda ikapa kiiyo meendi muni walyi asindi nawo? Indi ikaa ishe mikonu vashesokwa muni walyi; llyony vashekootoyaa. ¹⁶ Nta nkwiifoo nndu afumyaa soori shikuu kirami kiiya-fo, mashika yekyo kiveiyo-u mmbo kyawuya yuuka-u na yoo kurandukye kwengere ing’ana. ¹⁷ Nta mmbasurumaa mfinyo mwiiya efo mbolokony shikuu-fo, Kwakooya mmbo kyava indo mboloko yeto mmbo tiriikaa, na mfinyo upusuke. Indi mfinyo yeto mwiiya mmbo wasurumwa mbolokony shiiya nafyo fi fivii fikaa nisha.” ¹⁸ Naasa eefo ereraa indo nndu nshilyi umwi kasha nau kamoolokya ng’undeny eshaambaa, “Shitiri mwana wakwa wa kyeny amfwa ulaalu indi. Indi woi mbee osho kundemwekerya woko llyo ashewuiyoo m muu.” ¹⁹ Nalyo Yesu kakwiipoo kaenda aryani nawe na vakiloshyony kyakwe. ²⁰ Nalyo nndu nka alwee ndwari ya kyika ando a myaaka ikumi na ivii kasha numa yakwe kapaana ikedu lya soori yakwe ya uwe. ²¹ Nawe mmbo arera efo nriminy wakwe, “Naakwa shapaana soori yakwe sheni nshekushiiyaa.” ²² Nalyo Yesu kainduka kallollya kammbia, “Wuiyo mmuu mwana-kwa, kwammekusirya-u indo, nkyo kyakukira.” Nka ulya kashia llya yeni. ²³ Naasa kafika kulya kyeny kwa nshilyi ulya. Kakooya-fo vekapa fivale na vandu vengyi nkuka vakuumbye-fo vekapaa kyoorongye. ²⁴ Nawe kavavia, “Kwiipony-fo mwana yeto nshi afwa-fo mmbo alele rony.” " Vakanseka. ²⁵ Naasa vandu valya vekuumbye-fo vekimaa yaantwa-fo, nawe kaanga neefo mmba kantira woko; kimwana kilya kikakwiipoo. ²⁶ Naasa mbony tilya tikakwaana kulya urukeny koose. ²⁷ Nalyo Yesu kakwiipoo keenda na mbee. Naasa vandu vafu miso vavii vakallatya numa vakaonisa unyanga veshaambaa, " “Woi mwana wa Davidi lusarye ukiva lweru!” ²⁸ Naasa elyi ammaa ifika-u kaira na efo mmba. Na vafu miso vakansheya; nalyo Yesu kavavia, “A mukusirye-u sheelyi nshiidimaa itana kindo ekyi?” Vakammbia; “Ee-da Nndumi.” ²⁹ Nalyo kavapaana miso alya awo eshaambaa, “Kivemuviiyany indo, shaasa mukusirye-u.” ³⁰ Naasa miso alya awo akatarambuka. Nalyo Yesu kavavia na finya kaamba, “Manyiny kulave nndu akimanya.” " ³¹ Nawo vakakwiipoo-fo vakandekwaanisa mbony yeto efo urukeny koose. ³² Naasa elyi wo veefo vesheendaa vakasha vandu vakamweenngye nndu akee mbimbi atirwa mmumuyo nkasha. ³³ Mumuyo ulya nkasha ukaantwa nalyo mbimbi ilya ikawuya irera na vandu valya vakuumbye-fo vakasongololo vakaamba, " “Nkundeonike nndu kunu Israeli akee shawe-fo.” ³⁴ Naasa Vafarisayo vakaamba, “Ni ngaya ya yeto nniini wa mimuyo mikasha nnyo aanta nayo mimuyo mikasha-te.” ³⁵ Na Yesu kasengetya miri yeyo miniini na yeyo midu myoose eeloshaa efo mmba tawo teeterevya na yoongoya vandu nrumi ya nsia yeyo ya umangyi na ishiisa vandu ndwari ya wo ngata na unana lwa wo ngata. ³⁶ Na elyi alollye ironda iniini lya vandu vakuumbye-fo kavavyo mmuu kyawo mashika vakee vakapekape mariinga vakee veere efo vavakye mburu tilatiri mwiisi. ³⁷ Nalyo kavia valya vakiloshyony kyakwe. “Fya yuulula mfiingyi fiifo, lyo veerundya-u vakaangwa. ³⁸ Naasa tereveny yeto muni irema narumi varundi efo mailullyony akwe.”

¹ Nalyo kavaanga vakyiloshony kyakwe ikumi na vavii, kavaniinga ushilyi lwayiitorya mimuyo mikasha naambo vayaante, na ishiisa ndwari ta wo ngata na unana lwa wo ngata. ² Na marina a vakyiloshony kyakwe ikumi na vavii akee ule, Wa mbee ni Simion avaangwa Petro, na Andrea akee mwanamaye. Yakobo akee mwana wa Sebedayo, na Yohane akee mwanamaye, ³ Filipo, Bartolomayo, Toma na Matayo yeto akee nndedemi, Yakobo akee mwana wa Alfayo na Tadayo, ⁴ Simion akee wa yewo vakaari iringa ngata ya Kiyuda, na Yuda Iskariote yeto alenndiingya. ⁵ Yewo ikumi na vavii Yesu mmbo alevaruma kavavavasa ashaambaa, “Nta mulaire shia ya vandu va masanga. Nta muri wa Vasamaria mulaange nafo-fo. ⁶ Enderuuyeny vandu va Israeli yewo varekye sha moonri. ⁷ Na elyi murie shia endeny mwiikapaa weele mwaambe, ‘Umangyi lwa iruveeu lwamaafukya.’ ⁸ Yewo valwee vashiiseny yewo vafu varuteny, yewo va ivave veremuteny, mimuyo yeyo mikasha yaanteny; mwankiniingwa kya ruu, kevekiniingyeny-fo ruu. ⁹ Muleepoo saabu nta fesa nta ukova lwa iiniva kisiny; ¹⁰ nta mulakamare mboloko ya shia nta soori ivii, nta nsengye. Nndu nndundi mmbo asumani iniingwa shoonga yakwe. ¹¹ Na kwakooya mushaangaa muriny wa vandu ukava nniini ao ni n-du lolen-fo warya nndu eefo asumani mfo kundo mushekaa kutani mwakwiipoo-fo. ¹² Na elyi mushaangaa efo mmba iidikireny. ¹³ Kwakooya ni mmba isumannyi kiidikiro ekyo kyany nakyo mmbo kisheikayaa, na kwakooya kulaore isumannyi kiidikiro ekyo kyany, mmbo kishemuwuiyaa. ¹⁴ Na kwakooya nndu ara nalamuwarya, nta yaaranya marero any, somukeny efo mmba yeyo, naakwa ni efo muriny yeto mwiikakapaa kiluulyi efo marendeny. ¹⁵ Ni kya dede shamuvia, ‘Ekyo kya uruka lwa Sodoma na Gomora kishangwaa nkonu yeto wa mwaandu ngota kya muri yeto.’ “ ¹⁶ “Llen-te mmbo shamuruma mukee sha moonri akee nnang’ani ya fite fya ngoroshony. Veny sha shoka tikee shirango, muveva sha mbeta tilashevikaa ntambo. ¹⁷ Na yeni kwiiseny na vandu. Mmbo vashemurambikyaa efo ikwaanuny lya masiingo, na efo mmba tawo teeterevya vavemukapa na ngova. ¹⁸ Naakwa ni efo usanguny lwa vashilyi vaniini na vamangyi musherawaa-fo kimaruma kyakwa kive nkyo ukureeki lwa efo kwawo na kwa vandu va masanga. ¹⁹ Na kyeeri vamurambikya-fo nta mulasaukwa kindo mushaambaau. Mashika kyeeri ekyo kyeni mmbo musheniingwaa kya yaamba-u. ²⁰ Mashika veerera-u nshi yeni-fo ni Mumuyo wa Nde waany, mmbwe areraa-u akee efo miriminy yaany. ²¹ Kya indi mwanamaye wa nndu akaa nanderambikya-fo mwanamaye nandewaawa, na ndeye wa nndu nanderambikya-fo mwana. Na vana wa nndu vakwiipoo kya isua vamiku vawo vandevarambikya-fo vandewaawa. ²² Na yeni mushevaa veesuwa mmbandu woose kimaruma kya irina lyakwa. Indi yeto asisirya-u kafika mafurummyony, mmbwe akirwaa. ²³ Naasa kwakooya vashemurishisaa vamwaante muriny mmbe, enderishyeny ungyi. Ni kya dede shamuvia, ‘Nta mmushekwanisaa miri yeyo ya kunu Israeli-fo, kulaore Mwana yeto wa nndu ansha.’ ²⁴ Na nndu wa kiloshyony nta nnairye llosha wakwe-fo, nta nndu kishinga nnairye nndumi wakwe-fo. ²⁵ Mmbo kimaa nndu wakiloshyony kwakooya ava sha llosha wakwe; na nndu kishinga kaveva sha nndumi wakwe. Vantana vambaanga yeto muni kyeny Belsebuli afikaany kya va kyeny kwakwe nshi kishiiryaa kilanya?” ²⁶ “Naasa nta mulavairyae-fo shamashika nkwiifo kindo kikee kisikye kire kilalollyo-fo. Nta kindo kiifo kisurumi kire kilamanyika-fo. ²⁷ Ekyo shamuviiya ireemeny endekyaambeny efo seny. Na ekyo mwamiita muvereryo kuriny endekyaambeny musaamye mmbeeu. ²⁸ Na yewo vewaa mwiili yeto wa nndu nta valashiidimaa iwaa nrima yeto nta mulavairyae! Kilanya mmbo mushiiryaa yeto aidima ireta nrima na mwiili fi fivii firekye yefo murony wa Gehena. ²⁹ A ngyuruu ivii nshi tikumbwaa senti imwi? Nta lumwi lwa vayo lluwaa si kulaore Nde yeto waany aishi-fo. ³⁰ Na yeni naakwa ni fii ta efo nrweny wany mmbo tikee sheekeni toose. ³¹ Naasany nta mulairyee! Mmbo mwiirye ngyuruu na tikava shiingyi.” ³² “Naasa wo nndu ankureekaa-u kyakwa efo fisanguny fya vandu, neeny nshevekureekaa-u kyakwe efo kisanguny kya Nde wakwa wa efo iruveeu. ³³ Na wo nndu ashikana efo fisanguny fya vandu neeny nshevenkanaa efo kisanguny kya Nde wakwa wa efo iruveeu.” ³⁴ “Nta mulakusare mmbo shisheye yeende ufoo kunu urukeny. Kindo shisheye yeende nshi ufoo-fo ni usu. ³⁵ Mmbo shisheye ilakanisa nndu na mwana na mwana wa kyika na maye, na mwalyi na mammi wakwe. ³⁶ Na yewo va kyeny kwa nndu vaveva mmbo vakiduva vakwe. ³⁷ Na yeto mwiikunda ndeye ao maye ngota yen, we nshi nndu ashisumannyi-fo. Na yeto mwiikunda mwana wakwe wa womi ao wa kyika ngota yeny, we nshi nndu ashisumannyi-fo. ³⁸ Na yeto nalakurika nsalaba wakwe neeshilatya, we nshi nndu ashisumannyi-fo. ³⁹ Yeto mwiikuwonisya muu wakwe mmbo asheuretaa. Na yeto mwiikuretya muu wakwe kikava ni kimaruma kyakwa mmbo asheuonisaa.” ⁴⁰ “Na yeto amuwarya efo kyeny kwakwe ni yeny ashiwarya. Na yeto ashiwarya yeny mmbo awarya yeto aleshiruma. ⁴¹ Na yeto awarya nndu nkisuku aishi ni nndu nkisuku, mmbo aniingwaa waavi lwa nndu nkisuku. Na yeto awarya nndu nsumanu aishi ni nndu nsumanu mmbo aniingwaa waavi lwa nndu nsumanu. ⁴² Na vandu yewo vafwafwa naakwa ni yeto umwi nsi nndu kanrita mura mweni na aishi mmbo akee wakiloshyony kyakwa, shamuvia kya dede waavi lwakwe llukaa lureke-fo.”

¹ Naasa Yesu ekimaa ivavasya valya vakiloshyony kyakwe ikumi na vavii, kakwiipoo kulya vakai nandelosha vandu na iwoongoya mbony efo miriny yaawo. ² Naasa elyi Yohane akee kulya kifinngyony kashevio mbony ta mashora Kristo aifo arundaa, naasa kanrummya nrumi karika vakiloshyony kyakwe vavii. ³ Kandemmbia, “A yewe mmbwe ulya avereyo nashe ao lukavereya ungyi ndesa?” ⁴ Na Yesu karouwa kavavia, “Kweenngye mundevia Yohane kindo mwamiita na ikilolya. ⁵ Vandu vafu miso veefo valolaa, na vandu vakee miketekete veefo vasheendaa, na va ivave veefo vasheeremukaa, na vandu vafu maarwi veefo vashiitaa; na vandu vafu veefo varutwaa, na vandu vakiva veefo vashoongoywaa nrumi ya Iruva ya nsia. ⁶ Na ngoma nndu nalautau nsindara yaa kwakwa.” ⁷ Naasa elyi vandu valya varie shia yeewuya, Yesu kapooka irera na vandu valya vakuummbye-u kavavia kya Yohane kaamba, “A kimaruma mukakwiipoo kyeny mukandefika kulya kasa nkyoki? A ndesa ni indelola ikongye lyivivitwa-vivitwaa ni uraato? ⁸ A kindo kilemuuta kikammufita-fo nkyokyi? A ndesa ni indelola nndu aree soori shisha! Vandu varee findo fisha ekawo vakee efo mmba ta kimangyi. ⁹ A kilemuuta kulya kyeny kikammufita-fo nkyokyi? A ndesa ni indelola nndu mwaauya fisuku? Ee-da na yeny shamuvia mmbo aveng’ani kailanya nndu nkisuku. ¹⁰ We mmbwe ulya akee mwaambe efo mareiyony meele kaambawa, ‘Akau nrumi wakwa shanruma nakwiirye mbee, nandekusongoya shia yafo.’ ¹¹ Ni kya dede shamuvia, ‘Nnang’ani ya vandu woose valembonika kulandekwiipoo-fo nndu ang’annyi Yohane Mbatisi-fo. Indi efo umangyi ny lwa iruveeu, nndu aifo akee n-du ya vengyi mmbo amwiirye. ¹² Na kipookya fyeeri efyo fya Yohane Mmbatisi fika ulaalu, umangyi lwa iruveeu mmbo lwatirwa na finya, na vandu vaafinya vakava velurakwa-u. ¹³ Kimmba veawuya fisuku woose sanda na uvavaso, mmbo valeva veamba fisuku kumande Yohane. ¹⁴ Na mukakunda iirikya we mmbwe Elia ulya akee nteerye nashe. ¹⁵ Nndu atiri maarwi a yaaranya navearannya!’ ¹⁶ A irika elyi lya vandu yeva shilyiinanise neekyi? Mmbo lyifwanani na vana vadu vakaa ando a singira vakavaangana na wooroyaawo. ¹⁷ Vakaamba, ‘A elyi lwamukapya fivale neeni mulafini? A elyi lwakapa kiiyo neeni mulakape mbafu?’ ¹⁸ Yohane mmbo alesha nafo nalakee nndu mwiilyaa nta mwiina, nawo vakaamba, ‘Mmbo atirwa mmumuyo nkasha.’ ¹⁹ Mwana yeto wa nndu kasha nafo akee mwiilyaa na mwiina vakauya yaamba, ‘Akakau makilya na makina mfinyo, kaveva na mbuya ya vadedemi na valyamari,’ kikava waarya lwa Iruva mmbo lukooya ivinga, kyuuka na efo mashoreny a vayo.” ²⁰ Naasa kapooka isakira miri ilya kundo kuleutikya mashora akwe a wiidimi meengyi, na vandu nta valaute-u yaalashika efo miriminy. ²¹ Kaamba, “Oshiny lwafo yewe Betisaida! Mashika kulya Tiro na Sidoni, kwee mmbo kuleutikya mashora a wiidimi sha alya aleutikya efo kwany, kwee valemaalashika efo miriminy kasha na iraa masara a ukiva na ikoollya ifu, ²² Indi shamuvia, ‘Ekyo kya Tiro na Sidoni mmbo kishangwaa nkonu yeto wa mwaandu ngota yekyo kyany.’ ²³ Na yewe Kapernaumu kuleroswa kwatana kwakooya iruveeu, mmbo kushoolotwaa kufike ando a vafu! Mashika kulya Sodoma kukooye mmbo kuleutika-fo mashora a wiidimi sha alya aleutika kwafo, mmbo verewaa-u vafike nkonu wa inu. ²⁴ Indi shamuvia, ‘Nalyo ekyo kya Sodoma mmbo kishangwaa nkonu yeto wa mwaandu ngota ekyo kyafo.’ “ ²⁵ Naasa kyeeri yekyo kyeni Yesu kaalwa kaamba, “Shakwaarafuma paa woi Nde kukee Nndumi wa efo iruveeu na wa masanga, kimmba mbony yeti kwatisuruma vandu vaarya-reu, na yewo varango, kwawuya itirambuya vakoku. ²⁶ Ee-da Nde, ni indo kilevekusenya. ²⁷ Mmbo shilerambikywa findo fyoose ni Nde-yaakwa. Nta nkwiifo nndu aishi Mwana-fo kulaore ni Nde. Nta nndu aishi nde-fo, kulaore ni Mwana, na nndu yeto Mwana ankunda inrambuya. ²⁸ Kusheyeny na kwakwa yeni moose mwivinaa, mukee varovye mmario, na yeny nshemwiimurisaa! ²⁹ Endeny raare neeny mukufunde kwakwa, shamashika shikee mfoo shavekunyiisa na nrima, llyoo-ny musheonisyaa mirima yaanga kiimuyo. ³⁰ Mashika raare yakwa ikee shisha na irio lyakwa likava yaangu.”

¹ Kyeeri kilya Yesu kaira mareminy a nganu elyi lya nkonu wa Sabato. Valya vakiloshyony kyakwe vakalyiwa nshaa, vakapooka yuurushwa fyaa fya nganu vakasisasisa vakalya. ² Naasa Vafarisayo vekilolya vakaamba, “Lla-te vakiloshyony kyafo mmbo vatana kindo kilatiri mumu weetana nkonu wa Sabato.” ³ Nawe kavavia, “A mmbo mulandesomi shaasa Davidi aletana kyeeri eetirwa nshaa we na valya eeryani nawo? ⁴ Shaasa aleanga na efo mmba ya Iruva vakalya mikate ilya ya kideesyo, nayo nta we nta wooroye valeetiri mumu weelya, kulaore ni Vakohani veni? ⁵ A ndesa mmbo mulandesomi efo mavavasony kya vakohani yewo elyi nkonu wa Sabato mmbo vaimbwa Sabato nta valatiri uvingo. ⁶ Na yeny shamuvia, ‘Ekyi kyikee yaa mmbo king’annyi mmba ya Iruva!’ ⁷ Na kilya kikee kirere kyeamba, ‘Kishisenyi ni ilyillya vandu, nshi irasyo-fo, kwee mwenkimanya shaasa kikai, nta mmweekundaa idenga vandu yeva valatiri uvingo-fo.’ ⁸ Shamashika Mwana yeto wa nndu mmbo akee Nndumi wa Sabato.” ⁹ Nalyo kakwiipoo alya vakai kafika efo mmba yaawo yeeterevya. ¹⁰ Nalyo akakau nndu aifo atiri woko lukee kitongororo. Nawe vakammbesa vakaamba, “Kwiifo mumu-ro weeshiisa nndu nkonu wa Sabato?” Nyeeli vasia kyeenkumba. ¹¹ Nawe kavavia, “A mmbo kwiifo nndu kunu kwany atiri mburu yakwe imwi nsi kakooya yamooloka kiroriny elyi nkonu wa Sabato, kara nalayuuta-fo? ¹² A nndu nshi we ailannyi mburu deny? Naasa mmbo kuveefo mumu-da weetanya vandu mesha nkonu wa Sabato.” ¹³ Nalyo kavia nndu ulya, “Orwa woko lwafo!” Nawe kaorwa. Lukawuya iva usha sha yelo lungyi. ¹⁴ Na Vafarisayo vakasomuka vakandenruvya shila vasie mwaanya wa immamita. ¹⁵ Naasa Yesu kamanya kakwiipo-fo. ¹⁶ Vandu vakallatya veengyi nawe kavashiisa woose kavavia nta mulasheevia nndu. ¹⁷ Na kimaruma kikeenda indo ni kilya kilererwa ni nkisuku ulya Yesaya kyeamba, ¹⁸ “Akakau nndundi wakwa shilensauwa, mmbwe nkunde wakwa ashisetye nriminy, neeny nshemmbikya Mumuyo wakwa nankaye. Nawe ashoongoyaa vandu va masanga ngaa ya songosiny. ¹⁹ Nawe nta nalashaandwa myaandu nta nalashekoomaa. Na unyanga lwakwe nta lulashiitiwa efo shia. ²⁰ Na irere lyikee ibobore nta nnyashelyifishaa-fo, na uruu lufumbyaa nsu nta nnyashelurumyaa-fo. Mmbo ashekapannyaa efyo fya usumanu fivinge. ²¹ Na irina lyakwe llyo vandu va masanga vashelyivikaa nsia.” ²² Nalyo keengyo nndu atirwa mmumuyo nkasha, avekee mfu miso, kaveva mbimbi. Nawe kankira. Nndu ulya mbimbi kawuya irera na ilola. ²³ Naasa vandu valya vakuummbye-u mamwiingyi vakaising’ang’a. “A ndesa yeu mmbwe mwana ulya wa Davidi?” ²⁴ Na Vafarisayo vekiita kiirerwa indo vakaamba, “Yeto nta nnyaanta mimuyo mikasha kulaore ni elyi aekywa ni Belsebuli yeto akee nniini wa mimuyo mikasha-fo.” ²⁵ Nawe kamanya makusaro alya awo kavavia, “Wo umangyi lwiifo lukaraukana lukakukapa weni mmbo luwaa. Na wo muri wa vandu wiiyo naakwa ni mmba ikaraukana ikakukapa sheni nnyikaaufo. ²⁶ Na kwakooya satana ashaantaa satana urooye, mmbo araukana kakukapa muni. Naasa umangyi lwakwe mmbo lushidimaa ikaa-u inda? ²⁷ Na kwakooya yeny mmbo shaanta mimuyo mikasha sheekywa ni Belsebuli, a vana yewo vany wo mmbo vaanta vaekywa mmbiny? Kimmba ni indo mmbo vashemuutyaa uvingo. ²⁸ Indi kwakooya shaanta mimuyo mikasha sheekywa ni Mumuyo wa Iruva, akakakyo mwammaafukywa ni umangyi lwa Iruva-te!” ²⁹ “Ao ni inda nndu ashiidimaa yaanga efo mmba kwa mwaafinya nandekamara-fo fiiya fyakwe, kwakooya kulaore ampooka ifinga mbele mwaafinya ulya? Llyony ashekamaraa fya efo mmba kakwe nafimaa-fo. ³⁰ Nndu nalakee wa kyaalu kyakwa mmbo akee nkiduva wakwa. Na yeto nalasheekyaa isanyirya mmbo anyanyataa. ³¹ Kimmba ni indo shamuvia, ‘Kya wo ulyamari lwa nndu na kya wo kyaararo kya nndu mmbo asheonaa ifwaaywa. Indi kya kyaararo kya yaarara Mumuyo Mweele, kyeekyo nnaonaa ifwaayo-fo.’ ³² Kwakooya nndu arera kya imina Mwana yeto wa Nndu asheona ifwaaywa. Indi kwakooya nndu arera kya imina Mumuyo Mweele, ekyo kyo nnaonaa ifwaayo-fo, nta meendi a ulana yelu nta yelo lwiishaa-fo.” ³³ “Allweny nri uve nsha na ndunda ta vayo tiveshia. Ao allweny nri uve nkasha na ndunda ta vayo shikasha. ³⁴ Yeni ufyari lwa shoka a ni inda mushiidimaa irera kisha mummbe vakasha? Mashika efyo fiishwe efo nriminy mfyo kana kafirera. ³⁵ Na nndu yeto nsha efyo fisha asurumyi kaveva mwiiutya vandu fisha. ³⁶ Indi shamuviany Wo kirero kya ngula vandu varera mmbo vashekireellywaa nkonu yeto wa mwaandu. ³⁷ Shamashika marero afo nng’u kusherumbuywaa nang’u kwiivingaa, na marero afo-se kusherumbuywaa nang’u kwiivingwaa.” ³⁸ Nalyo velosha va mavavaso vaiyo maata na Vafarisayo vakaallwa vakaamba, “Llosha, mmbo lukunndye lulollye wende kwafo!” ³⁹ Nawe kavavia, “Irika elyi yeesi llyiraiye utuusi mmbo lyilanngye lyoorwa wende. Nta llyikaa lyiniingwa wende-fo, kuuta ni wende lwa nkisuku Yona. ⁴⁰ Mashika shaasa Yona alekaa efo ndewuny ya ikunga lyilya iniini kamaa-fo mikonu iraru kio na nsanyiny Mwana yeto wa nndu ni kiwo-da ashevekaa efo si namae-fo mikonu iraru kio na nsanyiny. ⁴¹ Vasero va kulya Ninive mmbo vashekwiipoo vasalale-u nkonu yeto wa mwaandu amwi na irika elyi valyuutye uvingo, mashika wo valekurya llya valeongoywa mbony ni Yona. ⁴² Mangyi ilya ya kyika ya kulya taari ya sinde mmbo ashekwiipoo nkonu yeto wa mwaandu nasalale amwi na irika elyi nalyuutye uvingo. Shamashika, we alesha auka kishingony kya masanga nandearanya ufundo lwa Solomoni. Na ekyi kyikee yaa akakyi nkiniini kikailanya Solomoni.” ⁴³ “Na Mumuyo yeto nkasha kwakooya vansomuka nnduny, mmbo uraaraa kundo kulatiri mura wiisyaa ando a iimuya ulaoni. ⁴⁴ Nalyo ukaamba, ‘A shindewuya na mmba ilya kundo shilesomuka.’ Ukasha nang’u ukakooya ilelwa ikee shaaiye na ishopwa. ⁴⁵ Nalyo ukaenda ukandeende mimuyo ingyi mikasha mfungare ikee myeesi ngota to mweni. Ukasha uryani nayo, nayo ikaanga nafo ikaallwafo kwekaa na mbony teefurumya ta nndu ulya tikakashaa ngota tilya ta mbee. Na kya irika elyi yeesi ni indo-da ekyo kya vayo ni indo kisheendaa.” ⁴⁶ Naasa eefo areraa indo na vandu valya vakuumbye-fo nkuka, akakava maye na vanavamaye vansha nau vasalali yoo poo vakunndye irera nawe. ⁴⁷ Naasa nndu umwi kammbia, “Akakawo mau na vanavamau vasalali yoo poo vakunndye irera neewe.” ⁴⁸ Nawe kaalwa kavia ulya ammbia, “A ma ni vi? Na vanavama?” ⁴⁹ Kooroya vakiloshyony kyakwe woko, kaamba, “Yeva mmbo ma na vanavama. ⁵⁰ Mashika wo nndu atana efyo fisennyi Nde-yaakwa wa efo iruveeu, yeto mmbwe ava mwanama na mfwama na ma.”

¹ Naasa nkonu ulya mweni Yesu kasomuka efo mmba kandekaa rembo alya mbaambaa ya yeeve ilya. ² Na alya akai nsemu mwiingyi wa vandu ukandekuumbya-u. Nawe katana asaama na efo, ngalaveny kandekaa-fo rembo. Na nsemu ulya wa vandu ukuumbye-u ukasalala yoo waambeu. ³ Nawe kavavia mbony shiingyi asheera fyaaso kaamba, “Akau nndu mweera mbeu alekwiipoo kandeera mbeu takwe. ⁴ Nalyo eefo asheeraa tilya maata tikooloka yoo mbai ya shia. Na ndeye tikasha tikalya tikamaa. ⁵ Na tilya tingyi; tikooloka ando iwe lyikwaalye si, alatiri uteri wiingyi. Tikamya na kyaangu, neelyi tilatiri uteri lufikye si. ⁶ Indi elyi mwi ulevaa tikaya tikanaa, neelyi tilasotye miraarii si tikauma. ⁷ Na tilya tingyi tikooloka ando a miingeny. Miinga ilya ikarwa, ikatisisira, ⁸ tingyi tikooloka ando a uteri usha, tikaraaka fimu. Kimwi kikavika iyana, na tingyi makumi arindaru, na kingyi makumi araru. ⁹ Na nndu atiri maarwi earannya navearanya!” ¹⁰ Naasa valya va kiloshyony kyakwe vakasha na yoo akai vakammbia, “A kimaruma kwarera nawo kusheraa fyaaso nkyokyi?” ¹¹ Nawe kaallwa kaamba, “Yeni mmbo mwaniingwa imanya mbony tikee shirike ta umangyi lwa iruveeu. Indi kya yewo wo valaniingwa. ¹² Kimmba nndu atiri kindo mmbo aniingwaa fiingyi katana afumbukywa. Indi yeto nalatiri kindo, mmbo asokwaa na kilya akooya atiri. ¹³ Nkyo kimaruma sharera nawo shisheraa fyaaso, mashika ilola valolaa valalollyaa, na yaaranya vaarannyi nta valaite nta iitumuso. ¹⁴ Na kisuku kilya kya Yesaya nng’u kyainukya kyeamba, ‘Yaaranya mushearannyaa mulamanyaa na ilola mulole mulalollyaa. ¹⁵ Mashika vandu yeva ngoo tawo tammba shuumu. Nawo vakava varoo yaaranya. Na miso awo vakasingira, naambo valakooye ilollya, nta iipuye kindo na maarwi awo, nta iipuye kindo na ngoo tawo wooke efo shieny tawo na yeny shivakire.’ ¹⁶ Indi yeni miso any ava a ngoma mashika alollye kindo, na maarwi any, mashika aitye kindo. ¹⁷ Ni kya dede shamuvia, ‘Vakisuku veefo veengyi na vandu va usumanu velangye ilollya yekyo mulollye yeni, valalollye, na iita yekyo mwiitye yeni valaite.’ “ ¹⁸ “Naasa yeni arannyiny-te kyaaso ekyo kya mweera mbeu shaasa kyikai. ¹⁹ Wo nndu aifo ashearannyaa kirero ekyo kya mbony ta umangyi lwa Iruva nalaitumuso mmbo asheywa ni yeto nkasha. Kasherakwa-u mbeu yeyo sheere efo nriminy wakwe. Nto mbeu tilya tilewa efo shia. ²⁰ Na kya yeto tileerwa ando iwe lyikwaalye si. We mmbwe nndu mwaarannya kirero ekyo. Nalyo yeni kakyiwarya na nsia nriminy. ²¹ Na kindo atura ni miraarii. Mmbo akee nndu wa veru-veru. Kwakooya ashaatarwaa ao irishiswa kimaruma kya ndera yeyo, nalyo yeni kauta-u nsindara. ²² Na kya yeto tileerwa efo miingeny, we mmbwe mwiirannya ndera yeyo kandetirwa ni ngyusau ta muu yeu na ilembwa ni masaa, nafyo fikansisira na ndera yeyo ikakaa indo ilavika kimu. ²³ Na kya yeto tileerwa ando a uteri usha, we mmbwe nndu mwiirannya ndera yeyo kaitumuso. Naasany kandevika fimu. Umwi kavika iyana, ungyi makumi arindaru, ungyi makumi araru.” ²⁴ Na kyaaso kyingyi kaveera kaamba, “Umangyi lwa iruveeu lulesha ifwanana na nndu aleenda yeera mbeu shisha efo ireminy lyakwe. ²⁵ Naasa elyi vandu valele rony nkiduva wakwe kasha nau. Kaera mbeu ta mamburu nnang’ani ya nganu tilya, kakweengya. ²⁶ Kyasia, elyi mbeu tilya tamya tikava mooro na iraaka, nalyo mamburu alya akavelollywa paa. ²⁷ Naasa mashinga a nndu ulya muni irema akansheya akammbia, ‘Ale Nndumi! Yewe kuleera mbeu shisha efo ireminy lyafo-ndi? A kundo lyoota mamburu alya nkwi?’ ²⁸ Nawe kavavia: Ni nkiduva alekitana. Mashinga alya akammbia, ‘A ndesa kwakunda lundesanyirya?’ ²⁹ Nawe kaamba, ‘Ode, elyi musanyiryaa mamburu yoo, naambo mulaillwe nganu mutisande nang’u. ³⁰ Reny fing’ani fii-fivii ando amwi fifike yoo maveiyony. Na elyi kwamfika maveiyony, neeny mmbo nsheviaa yewo veevyaa Pookeny isanyirya mamburu alya mufinge fikonde fikonde andevivyo murony. Na nganu to tivikwa efo mbesheny yakwa.’ “ ³¹ Na kyaaso kingyi kaveera kaamba, “Umangyi lwa iruveeu mmbo lufwanani na mbekye imwi ya haradali. Nndu mmbo aleiipoo kandeyeera efo ireminy lyakwe. ³² Nayo mmbo ikee shinnywa ngota mbeu toose. Indi kwakooya yang’ana ikava niini, ikailanya mare alya akee maronge-fo eelonga shoonga, ikava nri mweni. Na ndeye ta efo nginiiu tikatana tasha ishevika fifuri fyavayo marambeny a vayo.” ³³ Na kyaaso kingyi kaveera, “Umangyi lwa iruveeu mmbo lufwanani na kinruwo kitarang’aa kyeefumbisa nswa. Nndu nka kakiipoo kakisanda na nswa fideeva firaru. Nato ukatana wakwaana itarang’a deny.” ³⁴ Naasa mbony yeto toose Yesu alevia vandu valya vakuummbye-u aveeraa fyaaso. Nta nalavavie kindo kulaore aveera fyaaso-fo. ³⁵ Na kimaruma kikaenda indo, ni kilya kilererwa na kana ka nkisuku ulya Yesaya naambo kikooye iinukya-u kyeamba, “Nshetarammbwaa kana kakwa sheere fyaaso shipare mbony yeto tekee shirike uka mapookyony a ulana yelu.” ³⁶ Nalyo Yesu kasama vandu valya vakuummbye-u nkuka, kaenda efo mmba. Valya vakiloshyony vakasha ikuumbya yoo akai, vakaamba, “Lukapye nsuka wa kyaaso yekyo kya mamburu a efo ireminy, mbee!” ³⁷ Nawe kaallwa kavavia, “Yeto mweera mbeu yeto shisha ni Mwana yeto wa Nndu. ³⁸ Na irema elyo ni ulana yelu. Na mbeu yeto shisha ni vana va efo umangyi ny. Na mamburu yoo ni vana va yeto nkasha. ³⁹ Na nkiduva yeto aleera ni mmbishwa. Na mailullyony ni yoo masiiyony a ulana yelu. Na veelula ni vasu va Iruva. ⁴⁰ Nasaany shaasa mamburu asanyirywa akandevivywa murony, na yoo masiiyony a ulana yelu ni indo-da kishevaa. ⁴¹ Ni Mwana yeto wa nndu asherumaa vasu vakwe, vandesanyirya yewo veende misindara woose yuutwa efo umangyi ny lwakwe, na yewo vetana fya kiila. ⁴² Nawo vavaere efo irininy lya muro. Nafo kushekaa-fo kiiyo na irafunnya mayoo. ⁴³ Llyo yewo va usumanu vashevaa paa sha mwi mweni; vekee efo umangyi ny lwa Nde-yaawo. Yeto atiri maarwi earannya navearannya.” ⁴⁴ “Lyingyi umangyi lwa iruveeu mmbo lufwanani na masaa akee masurumyi ando a ireminy. Nndu kaakooya, kawuya yaalyikya. Na elyi atirwa indo ni nsia kandekumba fyoose atiri kandeura irema lyilya.” ⁴⁵ “Na lyingyi-se umangyi lwa iruveeu mmbo lufwanani na nndu mwiikapa mbusha aruuyaa samana ta ngata shisha. ⁴⁶ Naasa kakooya samana imwi ya uuru uniini. Kaenda kandekumba fyoose atiri kasha iyuura.” ⁴⁷ “Na lyingyi-se umangyi lwa iruveeu mmbo lufwanani na nreiyo wa makunga uleolotwa efo yeeveny ukaummbya wo ngata iifo. ⁴⁸ Ukaishwa vakawoomuya na efo waambeu. Vakakaa-fo rembo. Alya mesha vakasanyirya efo fiiyeny fyawo. Na alya maporu vakaeera efo. ⁴⁹ Na yoo masiiyony a ulana yelu ni indo-da kyishevaa. Ni vasu va Iruva vashekwiipoo vanderauwa-fo yewo veesi vavaute efo nnang’ani ya va usumanu. ⁵⁰ Nawo vasheveeraa efo irininy lya muro. Nafo kukaa-fo kiiyo na irafunnya mayoo.” ⁵¹ “A ndesa mwaitumuso efo fyoose?” Vakaamba, “Ee-da mbee.” ⁵² Nawe kavavia, “Kimmba ni indo, naasa wo mwiilosha mavavaso aloshywa kya umangyi lwa iruveeu, mmbo avakye nndu muni kyeny asurumyi masaa akwe, kava muuta-fo fyeesimba fiiya na fikuu.” ⁵³ Kyikava elyi Yesu ammanda yeera fyaaso efyo kakwiipoo efo akai. ⁵⁴ Kandefika kulya muriny wakwe kundo alelelyo. Kavaloshya efo mmba yaawo yeeterevya. Nawo vakaising’ang’a vakaamba, “A nyira nndu yeu nkwi autye urango yelo na fya wiidimi efi atanaa? ⁵⁵ Yeu nshi we mwana wa mwiipasha firi? Na maye nshi we Maria? Na vanavamaye nshi wo Yakobo na Yosefu na Simion na Yuda? ⁵⁶ Na vamfwamaye nshi wo yewo vakee kunu kweru woose? Naasany nkwi nndu yeu autye findo efyo fyoose?” ⁵⁷ Naasa vakatirwa nnyinyira nawe. Na Yesu kavavia, “Nndu nkisuku nnaminwa kulaore ni efo muriny wakwe muni na efo kyeny kwakwe kweni-fo.” ⁵⁸ Naasa nafo nta nalatani-fo fya wiidimi mashika elyi valera valekusirya nawe.

¹ Fyeeri efi fyeni mangyi ilya Herode kaita kilya kishaambawaa kya Yesu. ² Naasa kavia vasero va efo poo kwakwe, “Ate yeto mmbwe Yohane mmbatisi? Mmbwe muni aleruka auka kwa vafu. Nkyo kimaruma findo efyo fya wiidimi fikatanyika efo kwakwe.” ³ Nyeelyi Herode entira Yohane, kamfinga kandemweera efo mmba ya vafinge kimaruma kya Herodia ekee nka wa mwana-maye, we Filipo. ⁴ Mashika Yohane emmbya, “Nkutiri mumu weenrwaa-fo.” ⁵ Nawe kaamba nammbwae, kawuya iiryaa vandu vashekuumbaa, neelyi vaishi Yohane ni nndu nkisuku. ⁶ Naasa elyi kwanfika nkonu weekummbwa llya Herode alewonika mwana ulya wa kyeny wa Herodia kafina yoo nnang’ani yaawo, kasennya Herode. ⁷ Nalyo kanteerya kyaasa elyaa mboo nanniinge kindo ankitereva na kyikava-kyi. ⁸ Nawe kasha nau akee mwaaye mmaye kaamba, “Shiniinga nrwe wa Yohane mmbatisi wekerwa yaa ndeeveny.” ⁹ Na mangyi ilya kating’wa. Indi kimaruma kya valya akee nawo rembo alya shoongeny, naasa kavavasya nandeniingwa. ¹⁰ Karuma Yohane nanderumbuwa nrwe kulya kifinngyony. ¹¹ Naasa nrwe wakwe ukeendwa ukee nndeeveny ukaniinngyo mwana ulya wa kyeny. Nawe keenda ariiye maye. ¹² Nalyo valya vakiloshyony kyakwe vakasha nang’u vakaipoo nnying’a ulya vakandeurika. Vakaenda vakafitya Yesu mbony tilya. ¹³ Na Yesu ekiita kakwiipoo-fo kirisi kaenda na ngalava. Kafika kundo kulalelwa ekee kyaanya kyakwe muni. Na vandu valya vakuummbye-fo mamwiingyi vakakiita, vakansora-fo vesheendaa na marende vauka kulya miriny yaawo. ¹⁴ Naasa eekifika mbai ya nruva, kooka ngalaveny, kalollya vandu vasheye ikuumbya-u nkuka. Kavavyo m muu, kashiisa vandu yewo vawo valwee. ¹⁵ Naasa elyi kwamiila valya vakiloshyony vakasha na yoo akai vakaamba, “Kunu lukai ni kasa koomu, nalyo kwammiila. Naasany tauwany mamwiingyi yeu wa vandu vakweengye efo miriny yaawo; vandekuurya-fo fyeelya.” ¹⁶ Nawe kavavia, “Mmbatiri kimaruma kya yeenda-fo, yeni vaniingeny fyeelya.” ¹⁷ Nawo vakaamba, “Nta llutiri kindo yaa-fo kulaore ni mikate iraanu na makunga avii nsi.” ¹⁸ Nawe kavavia, “Sheengyeny findo efyo na yaa!” ¹⁹ Naasa, kavavasya vandu valya vakuummbye-u vavikwa rembo yoo mareny. Kawarya mikate ilya iraanu, na makunga alya avii. Kalla efo iruveeu kaana Iruva. Kaifisha-fisha fyenga. Kaniingya vakiloshyony kyakwe mikate ilya. Na vakiloshyony vakandeavya vandu. ²⁰ Vakalya woose vakawuura. Vakaveipoo fipereshu filya fyasaa, ikaishwa mikusha ikumi na ivii. ²¹ Na valya valelya ni womi vafye sha fiku firaanu kuuta-fo vaka na vana. ²² Naasa karika valya vakiloshyony kyakwe vandesaama neefo ngalaveny vandesongwa iruuka vafike kulya kwa kulya, nawe natani asamana na vandu valya vakuummbye-u. ²³ Na elyi ansama mamwiingyi ulya kandesaama na kulya ifumbuny, nandeterevya-fo Iruva ekee kyaanya kyakwe muni. Kukafika kweela ekee-fo we muni. ²⁴ Naasa na ngalava ilya yamfika efo nnang’ani ya yeeve ilya, yeefo ishaatarwaa m matundulu mashika uraato lweesumani nawo. ²⁵ Naasa elyi kukee kufii ikya, kasha na alya vakai asheendaa yoo uwe ya yeeve ilya. ²⁶ Vekilolya ashendaa indo uwe ya yeeve vakasavaa. Vakaamba, “Ni nndu wa kwa vafu.” Vakairyaa vakafua uwui-uwui. ²⁷ Nalyo yeni karera nawo, kaamba, “Wuiyony muu, ni yeny, nta mulairyae-fo.” ²⁸ Naasa Petro karouwa kaamba, “Nndumi kwakooya ni yewe shivavasyaany shishe na yefo kukai shisheendaa yo uwe ya mura.” ²⁹ Nawe kammbia, “Kusheye!” Petro kooloka efo ngalaveny kaenda efo uwe ya mura, kasha na alya Yesu akai. ³⁰ Naasa elyi alollya uraato lwaira-u na finya kawuya iryaa. Kapooka irekya kafua, kaamba, “Nndumi shaauwa!” ³¹ Nalyo yeni Yesu kaorwa woko kantira kammbia, “Kukee nndu wa kikusiryo kidu! A nkikyi elyi kwatirwa nnyiinyira?” ³² Vakasaama na efo ngalaveny uraato lukamalallya. ³³ Na valya va efo ngalaveny vakasha na yoo akai; vakamoolokya si. Vakaamba, “Ni kya dede yewe ni Mwana wa Iruva.” ³⁴ Naasa elyi valemaa iruuka kwa kulya vakafika uruka lulya lwa Genesareti. ³⁵ Naasa vasero va ando alya vekimanya mmbwe, vakaruma kulya kundevaangwa vandu va muungony kwawo woose. Vandu vakasha nang’u ishemweengye vandu valwee woose. ³⁶ Vakamooshora nta vakupaanyi naakwa ni nse wa soori yakwe ya yeerya. Na valya vaiyo vapaana woose vakaveshia.

¹ Nalyo Yesu kasheywa ni Vafarisayo na velosha va mavavaso vauka kulya Yerusalemu. Vakaamba, ² A nkikyi elyi vakiloshyony kyafo vava veimmbwa ngyufundo ta vakuu? Mashika vara valasangya maako elyi valya shoonga. ³ Nawe kaallwa kavavia, “Nkyiki elyi yeni mwava veimmbwa ivavaso lya Iruva kimaruma kya ngyufundo yeto tany? ⁴ Shamashika Iruva mmbo avavasye kaamba, ‘Indya ndoo na mau. Na yeto aruma ndeye ao maye iwaawa nawaawa.’ ⁵ Na yeni mukaamba-le, ‘Kwakooya nndu amina ndeye ao maye, Kavavia efyo mweewarya kwakwa fyeemulela, akakafyo shammefivika five waavi lwa mmba ya Iruva! Naasa, nndu yeto nalakiindye-se nta ndeye nta maye-fo.’ ⁶ Na yeni mukaniinga ivavaso elyo lya Iruva lyikarewa mutewa ni ngyufundo yeto tany. ⁷ Mmbo mukee vakunang’ari, Yesaya kamuronga ninsha elyi aleawuya kisuku kilya kaamba, ⁸ ‘Vandu yeva ni firomu fyawo vashiinndya nafyo, indi ngoo tawo tikakaa kwaasha neeny. ⁹ Mmbo vashiinndya kikee kya ruu deny, mashika miloshye yaawo valosha ni mavavaso a kivandu.’ “ ¹⁰ Naasa kavaanga mamwiingyi ulya wa vandu naambo vashekuummbya yoo akai. Kavavia, “Aranyiny mwiitumuso! ¹¹ Kindo kireveesa nndu nshi yekyo kishangaa na kaniny-fo, ni yekyo kishuukaa kaniny, nkyo kindo kireveesa nndu.” ¹² Naasa valya vakiloshyony vakasha na yoo akai, vakaamba, “A ndesa kwamanya Vafarisayo vamiita kirero ekyo vakauta-u nsindara?” ¹³ Nawe kavavia, “Wo kindo kivaakye kiiyo kulaore kyammbaaywa ni Nde-yaakwa wa efo iruveeu mmbo kishiiluwaa. ¹⁴ Vakureeyeny-te! Mmbo vasongoye vafu miso shia vavekee vafu miso wo veni. Na kwakooya mfu miso asongoya mfu miso uroye shia, mmbo vashoolokaa irininy vee vavii.” ¹⁵ Naasa Petro kaallwa kammbia, “Lukapye nsuka wa kyaaso ekyo, mbee!” ¹⁶ Nawe kaamba, “Na yeni-da fika ulaalu nta mulandeipuye kindo? ¹⁷ A mmbo mulandeitumuso sheelyi wo kindo kishangaa na efo kaniny, mmbo kishoolokaa na ndewuny kikauka-fo kikaenda irininy? ¹⁸ Indi efyo fishuukaa efo kaniny mmbo fisomukaa fyuuka efo nriminy. Nafyo mfyo fireveesaa nndu. ¹⁹ Shamashika efo ngoony mfo kundo kushuukaa makusaro meesi, na fya uwai, na fya utuusi, na wiivi, na fya urui, na fya ukureekyi lwa wongo, na fyaararo. ²⁰ Mfyo efyo fireveesaa nndu. Indi nndu kalya shoonga na maako alakee masangye nshikyo kireveesaa nndu-fo.” ²¹ Naasa Yesu kakwiipoo warya kooka-u, kafika kulya myuungony ya Tiro na Sidoni. ²² Nalyo akau nndu nka wa Kikanaani ansha nau, auka urukeny lwa kufii-fii. Kaonisa unyanga, kaamba, “Woi Nndumi kukee mwana wa Davidi, shisarya ukiva lwakwa! Mmbo shitiri mwana wa kyeny atirwa mmumuyo nkasha ukamwaaruva kyuumu.” ²³ Nawe nalanndouwe nta kirero. Naasa, vakiloshyony kyakwe vakanserikya, vakantereva, vakaamba, “Ntauwe mbee, mmbo afua nnu yoo numa yeeru.” ²⁴ Nawe kaallwa kaamba, “Nshilerumwa kundo-fo, kulaore ni kwa vandu va Israeli varekye sha moonri.” ²⁵ Nawe kasha nau kamoolokya si, kaamba, “Woi Nndumi sheekya kima kyakwa-te!” ²⁶ Nawe kaallwa kaamba, “Nshi kisha nndu nasoke fivana shoonga yaawo neerye fite-fo.” ²⁷ Nawe kaamba, “Ee-da Nndumi. Indi naakwa ni fite fikulyiiyaa fipereshu fishaangaraa fyuuka efo meseny a vanndumi va vayo.” ²⁸ Nalyo Yesu kaallwa, “Ee nka, kwankusirya-u kiniini-dwa. Kivekuviiyany indo shaasa kwakukunndya!” " Nalyo mwana ulya wakwe kashia kyeeri kilya kyeni. ²⁹ Naasa Yesu kakwiipoo-fo kandefika kulya waambeu lwa yeeve ilya ya Galilaya. Kasaama na kulya ifumbuny kakaa-fo rembo. ³⁰ Naasa vandu vakamweengya matorito meengyi varie yewo vakee miketekete, na vafu miso, na mbimbi, na fitongororo, na va ngata ingyi veengyi, vakaveera yoo marendeny akwe. Nawe kavakira. ³¹ Vandu valya vakuummbye-u vakasongololo elyi valollya valya fitongororo veshiaa, na valya vakee miketekete vesheendaa, na valya vafu miso velolaa. Nawo vakauta-u ing’anisa Iruva wa Israeli. ³² Naasa Yesu kavaanga valya vakiloshyony kyakwe vakuummbye yoo akai, kaamba, " “Mmbo shavavyo mmuu kya nsemu yeu wa vandu. Mashika kwammiira-u mikonu iraru sele vesisirye yaa kwakwa, nta valatiri kindo kyeelya. Nta nshikunndye ivasama indo valakomba kindo-fo, mmbo valemmywaa efo shia.” ³³ Valya vakiloshyony vakammbia, “A yaa kasa lukai, nkwi lushuutaa mikate miingyi indo yeewuutisa vandu yeva vamiingifwa indo?” ³⁴ Na Yesu kavavia, “Mikate mutiri ni iinga?” Vakammbia, “Ni mfungare, na fikunga fiifo fyaangu.” ³⁵ Naasa kavavasya vandu valya vakuummbye-fo mamwiingyi vakee rembo. ³⁶ Naasa kawarya mikate ilya mfungare na makunga alya. Kaarafuma Iruva kafisha-fisha fyenga, kaniingya vakiloshyony. Valya vakiloshyony vakandeavya mamwiingyi ulya. ³⁷ Vakalya woose vakawuura vakaveipoo na fipereshu filya fyasaa, mikusha ikaishwa mfungare. ³⁸ Na vandu valelya vafye womi fiku fiina kwauta-fo vaka na vana. ³⁹ Naasa kasama mamwiingyi ulya wa vandu. Kandesaama na efo ngalaveny. Kandefika kulya myuungony ya kulya Magadani.

¹ Naasa Vafarisayo vakansheya na Vasadukayo vakasha imweesa. Vakantereva nawoore wende luuka iruveeu. ² Nawe kaamba, “Nkwaany mmbo mwaamba, ‘Kwiifo kwiishaa ngesa, mashika efo iruveeu kufwani nsoru.’ ³ Na elyi ngama mukaamba, ‘Inu kwiikapaa mmbwa ya maruruma.’ Mmbo kufwani samu efo iruveeu kukafumba-fumba. Kikavaany fwana ya efo iruveeu, yo mwaidima iimanya indi ngyende ta meendi yaa to mulatimanyi, ⁴ Irika yelyi yeesi lyiraiye utuusi lyisyaa wende. Nalyo nta llyisheniingwaa wende-fo, kulaore ni wende yelo lwa Yona. " Naasa kavara-u kakweengyany.” ⁵ Naasa elyi valya vakiloshyony varuuka vakafika kulya kwakulya, vakakooya vanrekyo iipoo mikate ya kishau. ⁶ Nalyo Yesu kavavia, " “Manyiny mukwiise na kinruwo kitarang’aa ekyo kya Vafarisayo na Vasadukayo!” ⁷ Nawo vakaumburana wo veni na veni. Vakaamba, “Ni elyi lwarekyo iipoo mikate.” ⁸ Nalyo Yesu kamanya kaamba, “Nyira vandu va kikusiryo kyaangu a ekyo mwaumburana kya mikate ilya mwarekyo iipoo nkyokyi? ⁹ A mmbo mulandeipuye nta kindo, nta ikummbwa mikate ilya na vasero valya fiku firaanu na mikusha ilya muleishura fipereshu mmbo yekee iinga? ¹⁰ Nta mikate ilya na fiku filya fiina na mikusha muleipoo shaasa yeefye? ¹¹ A mmbo kyava-se inda elyi mwarekyo iipuye kindo sharerya nshi kya mikate ilya-fo! Naasa kevekwiiseny na kinruwo ekyo kitarang’aa ekyo kya Vafarisayo na Vasadukayo.” " ¹² Nawo vakaitumuso, ate nshi akundye ivavia vakwiise na kinruwo ekyo kitarang’ashaa mikate-fo, mmbo akunndye ivavia vakwiise na ufundo lwa Vafarisayo na Vasadukayo. ¹³ Naasa elyi Yesu afika kulya Kaisaria ya Filipo Kavesa yewo vakiloshyony kyakwe, kaamba, " “A vandu varera inda kya Mwana yeto wa nndu mmbo akee vi?” ¹⁴ Nawo vakaamba, “Kwiifo vaamba ni Yohane Mwiibatisa. Vengyi vakaamba ni Elia. Vengyi vakaamba ni Yeremia ao ni nndu wa vakisuku umwi.” ¹⁵ Kavavesa, “A yeni mmbo mwaamba yeny ni vi?” ¹⁶ Simon Petro kaallwa kaamba, “Yewe ni yewe Kristo kukee Mwana wa Iruva yeto muni muu!” ¹⁷ Yesu kaallwa kaamba, “Ngoma yewe Simion wa Yona! Mashika kyakurambuya ekyo nshi nndu wa vandu-fo Nde-yaakwa wa efo iruveeu.” ¹⁸ Naasa neeny shakuvia-le, “Yewe ni yewe Petro, na yaa iweu elyi ntannyau mmba nnyo siri yakwa. Nalyo nta finya ta ufu ntilyiidimaa-fo. ¹⁹ Mmbo nkuniinngyaa ngyufunguo ta efo umangyi ny lwa iruveeu. Na kindo kwankifinga kunu urukeny, na efo iruveeu ni kiwo-da kyaveva kifinge. Na kindo kwankiporommwa kunu urukeny, na efo iruveeu ni kiwo-da kyaveva kiporommwi.” " ²⁰ Nalyo kavavasa yewo vakiloshyony nta valandevie vandu vaambe we mmbwe Kristo. ²¹ Naasa fyeeri filya fyeni Yesu kapooka yoora valya vakiloshyony kyakwe mmbo kikee kirummbwe, nandefika kulya Yerusalemu nandelyisyo-fo ukiva wiingyi mmasiingo a uruka na Vakohani yewo vaniini, na vaarya va fitabu. Na iwaawa navewaawa, na elyi lya nkonu wa kararu narukeny. ²² Nalyo Petro kanrwaa na mbai. Kapooka inkeemmya kaamba, " “Ekyo Iruva nakiite kwaasha nakamwi! Kindo sha ekyo kilakuwonise-fo!” ²³ Nawe kainduka kavia Petro, “Kwiipoo wuya numa yakwa Satana! Mmbo kwava nsindara-akwa! Mashika ekyo kikee nrweny kwafo nshi ekyo kya Iruva-fo, ni ekyo kya kivandu.” ²⁴ Nalyo Yesu kavia yewo vakiloshyony vakwe, “Kwakooya nndu akunda ishilatya kuti nasue mwiili wakwe muni, nakurike nsalaba wakwe, nashilatyeeny!” ²⁵ Mashika nndu yeto akundaa ikira muu wakwe mmbo asheuretaa. Na nndu asheeraa muu wakwe sakyeny kwakooya ni kimaruma kyakwa, mmbo ashuuwonisaa. ²⁶ Mashika iviiri nndu ashuutaa-u nkyokyi kwakooya asheonisaa ulana loose luve mbusha yakwe, karetya-fo muu wakwe? Ao kindo nndu avikaa kyeewouwa muu wakwe nkyokyi? ²⁷ Mashika mwana yeto wa nndu isha asheshaa aree usuri lwa Ndeye aryani na vasu vakwe va efo iruveeu, nalyo nandetaa wo nndu kiinani na mashora akwe. ²⁸ Ni kya dede shamuvia, “Vandu vasalali yaa indi kwiifo valashoshaa ufu kulaore valollya Mwana yeto wa nndu ashe akee na umangyi lwakwe.”

¹ Nalyo kukaira-u mikonu irindaru, Yesu kaipoo Petro na Yakobo na Yohane we mwanamaye wa Yakobo, kavasaamisa kundo kwa ifumbuny yaasha vakee kyaanya kyawo veni. ² Nalyo kaalashika fwana yakwe valollye. Kisangu kyakwe kikamika sha mwi mweni. Na soori takwe tikava shaa pyai sha sa sheni. ³ Nalyo akakava Mose na Elia vansha nau ikoora nawo, vakarera nawe. ⁴ Naasa Petro karouwa kavia Yesu, “Nndumi nkisha elyi yese lukee kunu! Kwakunda ntanaa matengo araru, lyimwi lyafo, na lya Mose lyimwi, na lya Elia lyimwi.” ⁵ Arera indo nalandesyado akalyi ifishi lyitiri sa lyikavavikya kirishe. Akalu na unyanga luvaangaa luuka efo ifishiny lukaamba, “Akakau Mwana wakwa nkunde, yeto shilensauwa, mmbwe mushemwaarannyaa!” ⁶ Naasa valya vakiloshyony vaita kiireraa indo vakawa si na fisangu vakairyaa nnu. ⁷ Yesu kaserikya nau kavapaana, kaamba, “Kwiipony-te! Nta mulairyae-fo!” ⁸ Vakainuya miso na uwe valakilollye-se nndu, kuuta Yesu muni. ⁹ Naasa elyi veefo vashoolokaa kulya ifumbuny, Yesu kavavavasa kaamba, “Kindo ekyo mwamoorwa nta mulandeekivia nndu, na mutani mwafika kyeeri ekyo Mwana yeto wa nndu annduka auka kwa vafu.” ¹⁰ Naasa yewo vakiloshyony vakammbesa, vakaamba, “Mmbo kyikee inda elyi vaarya va fitabu vaammbaye, ‘Elia kuti napooke isha mbele.’ “ ¹¹ Nawe kaallwa kaamba, “Elia isha ashaa-da navauwe findo fyoose fishie sha elyo mbee.” ¹² Indi yeny shamuvia, “Elia alemmeesha nta valammanyi. Vakantannya shaasa vekundye. Na Mwana yeto wa nndu ni kiwo-da, we kuti navelyiswa ukiva mmbo.” " ¹³ Nalyo vakiloshyony vakamanya mmbo arera nawo kya Yohane Mmbatisi. ¹⁴ Na elyi vansha na efo kundo vandu vakuumbye-fo nkuka kasheyo ni nndu kashemoolokya ng’undeny. ¹⁵ Kaamba, " “Woi Nndumi! Sarya mwana yeu wakwa ukiva. Mmbo atirwa ni usukwa, kava mwiivavyo kyuumu. Mashika keengyi awa murony na keengyi kavewa efo mureny. ¹⁶ Na yeny shamweengye yewo vakiloshyony kyafo, nta valaidimi inshiisa.” ¹⁷ Na Yesu kaallwa kaamba, “Apaa irika lyilemmyi ikusirya-u lyikaenda mbai. A shikae neeni shifike kwi? Mweende na yaa shikai-te!” ¹⁸ Naasa Yesu kankeemmya, nalyo mumuyo ulya nkasha ukamuuka. Na mwana ulya kashia kipookya sa ilya sheni. ¹⁹ Nalyo vakiloshyony vakakuumbya yoo Yesu akai vekee kyaanya kyawo, vakaamba, “A elyi yese kulaore luleidima iwaanta nkikyi?” ²⁰ Nawe kavavia, “Neelyi kikusiryo kyany kyava kyaangu! Ni kya dede shamuvia, ‘Kwakooya mwatira kikusiryo na kikava kyaangu sha mbekye imwi ya karadali, mmbo musheviaa ifumbu yelyi, kwiipoo yaa kuteshuke-u, nalyo lyiteshukaa-da.’ Nta nkwiifo kindo kilashiidimikaa kwany-fo. [ ²¹ Ngata yei nnyishuukaa kulaore ni elyi kwatereva Iruva ando amwi na ikootoya-fo.]” ²² Naasa elyi veefo vashiira-iraa kulya Galilaya, nalyo Yesu kavavia, “Mwana yeto wa Nndu eefo anderambikyoo maakony a vandu. ²³ Nawo vashemmbwaa. Na elyi lya nkonu wa kararu asherukaa. " Nawo vakasokywa mfyoova nnu.” ²⁴ Naasa elyi vamfika kulya Kapernaumu, valya veesana ukamba lwa mmba ya Iruva vakasheya Petro, vakaamba, " “A llori yeto waany aniingyaa fesa ya mmba ya Iruva? Petro kavavia, ‘Avikaa-da!’ “ ²⁵ Naasa kaanga na efo mmba. Yesu kalava irera nawe, kaamba, “A mmbo kukusarye inda Simion? Vamangyi va masanga mmbo vashuutaa udedemi na ukamba kwa vandu vangava? Ndesa ni efo kwa vana vawo, ao ni efo kwa yewo vengyi?” ²⁶ Nawe kaamba, “Ni efo kwa vengyi-te!” Yesu kammbia, “Naasany vana yewo mmbo vakee vaute-fo-sho. ²⁷ Indi yese nta lulavateve vaute nsindara kweru. Naasa enda efo yeeveny kundeolota kiminya ekyo kya ngorori kyeereiya makunga. Na ikunga yelyo kulavaa ilyuuta-fo mmbo kushelyiipoo kulyitarammbwe kana. Llyo kushekooyaa-fo fesa imwi. Yuute-fo kundevaniinga ando akwa na afo.”

¹ Naasa sa ilya sheni valya vakiloshyony vakasha ikuummbya yoo Yesu akai, vakaamba, “A yeto akee nniini wa wooroye efo umangyiny lwa iruveeu ni viiny?” ² Nalyo kavaanga kimwana na yoo vakai. Kakivika nnang’ani yaawo. ³ Kaamba, “Nkya dede shamuvia, ‘Kwakooya kulaore mwaaluka mukava va ngata ya fivana, efo umangyi ny lwa iruveeu mmukooyaa yaanga-fo nta-fo!’ ⁴ Naasany nndu kakwaalwa n-du we muni, kava wa ngata ya kimwana yekyi, yeto mmbwe nniini wa wooroye efo umangyi ny lwa iruveeu. ⁵ Na wo nndu aiyo moose awarya kimwana kya ngata yeyo kimaruma kya irina lyakwa, mmbo ashiwarya yeny.” ⁶ “Na yeto ammba nsindara weetuula yewo vafwafwa vakusirye neeny, naakwa ni yeto umwi tupu, kya nndu yeto kyava kisha kilanya nafinngyo isewe lyirungutwaa ni nshungu efo singony yakwe, nandeolotwa efo uroony lwa yeeve. ⁷ Oshiny lwa ulana yelu kimaruma kya misindara iifo. Kya misindara isha kuti ishe. Indi oshiny lwa nndu yeto nsindara ushaa weendwa mmbwe. ⁸ Na kwakooya woko lwafo ao urende lwafo lushekweenngyee nsindara, lurummbwe kwalweera efo! Mmbo kyava kisha kilanya kwakooya kwaanga na efo muuny kukee kisaya ao kitongororo, ngota elyi kwatira maako ai avii na marende ai avii kwandeerwa efo murony ularumikaa. ⁹ Na kwakooya iriso lyafo lyishekweengyee nsindara, lyiillwe kwalyeera efo! Mmbo kyava kisha kilanya ikwiirya na efo muuny kukee nndu wa iriso lyimwi, ngota elyi kwatira miso ai avii, kwandeerwa efo Gehena ya muro.” ¹⁰ Manyiny mure mulamina yewo vafwafwa nta umwi! Mmbo shamuvia, vasu vawo efo iruveeu mmbo valollye kisangu kya Nde-yaakwa wa efo iruveeu kyeeri kyoose. [ ¹¹ Kimmba Mwana yeto wa nndu kindo asheye yuuta ni ishekira ekyo kirekye.] ¹² A mmbo mukusarye inda? Kwakooya kwiifo nndu atiri moonri iyana kakooya lyimwi lyanreka-u nawe nare nalatiiya-u alya makumi kyeenda na kyeenda nandepara na efo mafumbuny asyaa lilya lyirekye. ¹³ Ikava pule yakwe kalyilollya, nkya dede shamuvia, mmbo afuraa nalyo kilanya ngota kya alya makumi kyeenda na kyeenda alarekye. ¹⁴ Na efo kisanguny kya Nde yaakwa wa efo iruveeu nawe-da nnakunndye yewo vafwafwa vareke-u nta umwi-fo. ¹⁵ “Na mwanamau kammeelyamara enda kumoore ulyamari lwakwe mwiiyo muveni. Kammekwiirikya mmbo kyava iviiri lyafo, kwankooya mwanama-u. ¹⁶ Kanra nalakwiirikya enda kundeende nndu umwi ao vavii-se, kushe nawo wo kindo kirumbuke kisunundwa nkana ka vakureekyi vavii ao vararu. ¹⁷ Kallema ivairikya wo enda kundekyoongoya siri. Kallema iirikya siri, naasany nakuviiyeeny sha nndu wa masanga na n-dedemi.” ¹⁸ “Ni kya dede shamuvia, wo kindo mwankifinga kunu urukeny, na efo iruveeu ni kiwo-da kyaveva kifinge. Na kindo mwankiporommwa kunu urukeny, na efo iruveeu ni kiwo-da kyaveva kiporommwi. ¹⁹ Na kingyi-se shamuvia, ‘Vandu vany vavii ao vararu vakandeeryana kya wo kindo vakitereve efo kwa Iruva, mmbo vashewonisaa kyuuka na Nde-yaakwa wa efo iruveeu.’ ²⁰ Mashika ando kwankuumbya vavii ao vararu kikee kya ikummbwa irina lyakwa, na yeny mmbu ando nkaa nnang’ani yaawo.” ²¹ Nalyo Petro kaserikya yoo kufii, kaamba, “Ale Nndumi! Mwanama mmbo ashirenngyaa keenga na yeny shive mwiimfwaaya! A ndesa shifike matorito mfungare, naasany?” ²² Yesu kammbia, “Shakuvia, nshi matorito mfungare-da-fo. Mmbo kufikaa matorito makumi mfungare ka mfungare.” ²³ Nkyo kimaruma umangyi lwa iruveeu lukashefwanana na nndu mangyi akundye yeekena siye takwe na mashinga akwe. ²⁴ Apooka yeekena kaengywa nndu wa sye atiri sye yakwe ya talanta 10,000. ²⁵ Kakooya nalatiri fyeetaa, naasa nndumi ulya wakwe kavavasya nandekumbwa nasandwa na nka na vana, na findo fyakwe fyoose atiri, sye ilya indetawa. ²⁶ Naasa ishinga llya lyikakweera si, lyikamweererya, lyikammbia, “Woi Nndumi, shisisirya, shikaa shikutaa-da.” ²⁷ Naasa nndumi ulya kalyillya ishinga llya kalyilekeya. Na sye ilya katana alyireeya shoose. ²⁸ Naasa ishinga llya kasomuka na efo poo. Kakooya mashinga wooroye, ulya umwi, atiri sye yakwe ya dinari 100. Kantira isanga, kammbia, “Shitaa sye yakwa kutiri!” ²⁹ Ishinga llya uroye lyikammbia, “Shisisirya shikaa shikutaa-da!” ³⁰ Nawe kalema fushu kandenrwaa kifingyony natani ataa sye ilya yakwe atiri. ³¹ Elyi mashinga wooroye valollya kive indo, vakasukywa nnu, vakanderuuya nndumi ulya wakwe mbony tilya tatanyika toose. ³² Nalyo nndumi ulya wakwe kammbaanga, kammbia, “Kukee ishinga yeesi! Sye ilya yakwa mmbo shilekureeya shoose llya kuleshyeererya. ³³ Afikaany yewe nshi indo kivekusumanyi isarya ishinga uroo, shaasa yeny shavekusarya yewe?” ³⁴ Nndumi ulya wakwe karooywa nngoo. Kanrambikya efo maakony a vetuurwa vandu, na natani ataa siye yakwe atiri namae piny. ³⁵ Na Nde-yaakwa wa efo iruveeu ni indo-da ashemutanyaa yeni, kwakooya kulaore mwasaryana wo nndu na uroye efo miriminy yaany.

¹ Kikavaany elyi ammarisya irera marero yoo moose, nawe kawara shia, kauka kulya Galilaya. Kaenda kyaaro kya uruka lwa Yudaya ashiiraa shia ya kwakulya ya Yordani. ² Vandu vakallatya matorito meengyi, nawe kava mwiivakirya-fo. ³ Naasa Vafarisayo vakansheya vakamweesa vakaamba, “A ndesa nndu nndumi atiri muumu weelakana na nka wakwe kwakooya kwawonika kiteve kya ngata shoose?” ⁴ Nawe kaallwa, “A mmbo mulasommyi kya yeto aleumba vandu mmbo alevaumba vakee nndu nndumi na nndu nka uka elyo mapookyony?” ⁵ Kaamba, “Kimmba ni indo nndu nndumi ashuukaa kwa ndeye na maye nandekutira na nka wakwe, nawo vee vavii vashevaa mwiili umwi nsi. ⁶ Kikavaany nshi vakee-se vavii-fo, mmbo vava mwiili umwi nsi. Naasany kindo Iruva allunga we muni, na nndu nta nalakirauwe-fo.” ⁷ Nawo vakammbia, “A kyavaany inda, elyi Mose avavasye nndu naniinge nka barua ya llakanu nalakaniny nawe?” ⁸ Nawe kavavia, “Ni kimaruma kya mirima yaany ikee myuumu indo nkyo kileniinga Mose kaniingya muumu weelakana na vaka vany. Uka elyo mapookyony nshi indo kyeekai-fo.” ⁹ Neeny shamuvia, “ ‘Nndu kalakana na nka wakwe kwakooya kulaore ni kimaruma kya utuusi kaora ungyi mmbo atuusa.’ ¹⁰ Naasa valya vakiloshyony kyakwe vakammbia, ‘Kwankooya ekyo kya mmi na nka kikae indo, mmbo kyevaa kisha kilanya kwakooya nndu ara nalaalyika nka.’ ¹¹ Nawe kavavia, “Nshi woose vamanya itira kirero ekyi-fo, kulaore ni yewo vakee vaniinge. ¹² Mmbo kwiifo valashiidimaa yoora uka elyo veerwaa, kukavekaa-fo vakee vaallwe indo mmbandu, kukavekaa-fo vakwaaluye indo wo veni kimaruma kya umangyi lwa iruveeu. Mwiidima itira kirero ekyo nakitire.” ¹³ Nalyo keengywa fivana nafyeekerye maako navefiterevya efo kwa Iruva. Na valya vakiloshyony vakavakeemmya. ¹⁴ Na Yesu kavavia, “Reny fivana efi fikusheye na kwakwa, nta mulafiimi! Mashika vakee va ngata yaawo mmbo umangyi lwa iruveeu lwava lwawo.” " ¹⁵ Naasa kafyeekerya maako. Kawuya kakwiipoo keenda. ¹⁶ Nalyo akakau nndu ansha nau kammbia, " “Llori, a fisha ntanaa mfyokyi shikooye muu wa llung’anu?” ¹⁷ Nawe kammbia, “Nkyiki elyi kwashivesya kya efyo fisha? Yeto aifo akee nsha ni umwi-da! Indi kwakooya kukundye yaanga na muuny wa llung’anu va mwiiringa mavavaso!” ¹⁸ Kaamba, “Nng’u angaa?” Na Yesu kammbia, “Kulawae, nta kulatuuse, nta kulaive, nta kulavike ukureekyi lwa wongo. ¹⁹ Indya ndoo na mau. Na nndu uroo kuvenkunda ndesa kukukunndye kumuni.” ²⁰ Naasa nndu ulya, kammbia, “Efyo fyoose mmbo shileva mwiifiringa-da-te. A kindo kyashyaanguya-u nkyokyi?” ²¹ Yesu kammbia, “Kwakooya kukundye iva nndu nsongovisi deny, enda kundekumba efyo kutiri, kufyaavye vakiva. Llyo kushetiraa masaa efo iruveeu. Kwammaa oshoony kusheshilatya.” ²² Naasa nndu ulya eeta indo kasokywa mfyoova, mashika elyi ekee nndu atiri findo fiingyi. ²³ Naasa Yesu kavia valya vakiloshyony kyakwe, “Nkya dede shamuvia, ‘Nndu isimba atiri ngatara nnu yaanga umangyi ny lwa iruveeu.’ ²⁴ Na lyingyi-se shamuvia, ‘Nkyaangu kilanya ngamula iire na mmbweny ya sindanu,’ ngota nndu isimba ashaangaa neefo umangyi ny lwa iruveeu.” ²⁵ Naasa valya vakiloshyony vekiita indo, vakamatuka nnu, vakaamba, “Kwakooya ni indo, a nndu ashiidimaa ikirwa ni vi?” ²⁶ Naasa Yesu kavalola karii, kavavia, “Kunu vanduny ekyo nkishiidimikaa-fo, indi efo kwa Iruva mmbo fishiidimikaa fyoose.” ²⁷ Nalyo Petro kaallwa, kammbia, “Lla-te mbee! Yese mmbo lwiisityo-u findo fyeru fyoose, lukakulatya. A ekyo lusheonisaa-u nkyokyi?” ²⁸ Na Yesu kavavia, “Nkya dede shamuvia, ‘Yeni mushilatye mmbo mukooyaa elyi kwamfika meendi findo fyuumbe fisheviirwaa wiiya, elyi Mwana yeto wa nndu ashekaa rembo yoo kitiminy kyakwe kya itumbe, neeni mmbo mushekaa rembo fitimeny ikumi na fivii mushillye ngyufyari ikumi na ivii yeto ta Israeli.’ ²⁹ Na wo nndu aiyo areeye vanavamaye ao vamfwamaye ao ndeye ao maye ao vana ao marema ao mmba kwakooya ni kimaruma kya irina lyakwa, we mmbo awaryaa ando a kimwi naniingwa ka iyana, navewarya na muu wa llung’anu uve ding’u yakwe. ³⁰ Indi yewo vesonngwa veengyi vakaa vaaluke va numa, na yewo va numa vaaluke va mbee.”

¹ “Umangyi lwa iruveeu mmbo luvakye nndu muni kyeny alekwiipoo ngama nraasi nanderuuya varundi va efo nndeny wakwe wa misabibu. ² Kadeeryana na varundi valya kya urundi, nkonu umwi navaniinge weesi lwa nkonu, kavarika efo nndeny ulya wakwe wa misabibu. ³ Kawuya kakwiipoo lyingyi elyi kwamfika sa isaru, kakooya vengyi vasalali kulya singireny valarunda mashora. ⁴ Nawo kavevavia, ‘Na yeni keveendeny efo nndeny wakwa wa misabibu. Mmbo nshemuniingaa ekyo kisumani.’ ⁵ Vakaenda. Kakwiipoo lyingyi elyi kwamfika sa irindaru, na sa keenda, kavetana indo, ⁶ Na elyi kwamfika sa ikumi na imwi kavekwiipoo kakooya vengyi vasalali indo, kavavia, ‘N kikyi elyi musalali indo nkonu piti mularunda mashora?’ Vakaamba, ⁷ ‘Llwaona nndu aluvika varundi-fo.’ Nawe kavavia, ‘Na yeni keveendeny kulya nndeny wa misabibu.’ ⁸ Naasa elyi kwamiila nndu ulya muni kyeny kavia ulya amweekya ikallya findo fyakwe, ‘Vaanga varundi valya kuvaniinge weesi lwawo, kupooke valya vafurummya isha, kufike valya valava isha.’ ⁹ Valya va sa ikumi na imwi vakasha. Vakawarya wo nndu weesi lwa nkonu. ¹⁰ Valya va mbee vakasha, vakakusara kulakooye wo vashewaryaa kilanya. Nawo-da vakavewarya indo, wo nndu weesi lwa nkonu. ¹¹ Vekiwarya vakakunung’unnya ulya muni kyeny. ¹² Vakaamba, ‘Nkyelola yewo vafurummyi ni sa imwi nsi varunda-u, na yewe kwawuya ivainanisa neese. Neese mmbo lwansisirya mavina a nkonu piti, na ikorwa mmwi.’ “ ¹³ “Nawe karouwa, kavia ulya umwi, ‘Mbuya yakwa nshi shakutannya kindo kilasumani-fo. A mmbo kulaore kwairikya ludeeryanaa kyaasa kya weesi lwa nkonu? ¹⁴ Kamarany ekyo kyafo kwakweenngya! Mmbo shikunndye indo iniinga yeto afurummyi kiinani na ekyo kyafo. ¹⁵ A findo efyo fyakwa mmbo shilatiri mumu wa itana nafyo ndesa shankunda? A mmbo kwanying’a elyi yeny shitiri maako?’ ¹⁶ Naasa ni indo kivaa, yewo vafurummyi vaaluke va mbee, na yewo va mbee vaaluke vefurummya.” ¹⁷ Na elyi Yesu eefo arie shia yeenda irwa na kulya Yerusalemu, karwaa valya ikumi na vavii mbai, llya vekee kyaarony, kavavia, ¹⁸ “Llen-te lwiifo lwiirwaa na kulya Yerusalemu, na Mwana yeto wa nndu asherambikywaa maakony a vakohani vaniini na velosha mavavaso, nawo vashemmbutyaa uvingo nandewaawa. ¹⁹ Mmbo vashenrambikyaa maakony a vandu va masanga, nandeteendwa na ikapwa na ngova na ikapyo nsalabeny, na elyi lya nkonu wa kararu asherukaany.” ²⁰ Nalyo maye wa vana va Sebedayo kasha na yoo akai, aryani na vana valya vakwe vavii, kamoolokya si akundye intereva kindo. ²¹ Nawe kammbia, “A ekyo kwakunda nkyokyi?” Kammbia, “Ammba vana yeva vakwa vee vavii vavandami neewe efo umangyi ny lwafo, umwi nakae uvari lwafo usha, na ungyi uvari lwafo umuso.” ²² Na Yesu kaallwa kaamba, “Mmwiishi nta ekyo mwatereva shaasa kyikai-fo! A ndesa mushiidimaa ina upata lwakwa shiifo shinaa?” Vakammbia, “Lukwiidimmya-da!” ²³ Nawe kavavia, “Ina upata lwakwa mushenaa-da. Indi iniinga vandu ando eekaa yoo uvari lwakwa usha ao umuso, ekyo nshi kindo kyakwa yeny-fo.” Vandu vaniingwa-u ni yewo valemmeekideesyo ni Nde-yaakwa. ²⁴ Naasa valya ikumi elyi vaita indo, vakasua vana yewo va nka vee vavii. ²⁵ Na Yesu kavavaanga na yoo akai, kaamba, “Mwiishi yewo veshillya vandu mmbo vavaafinya. Na yewo vaniini vawo vakavalammya. ²⁶ Indi kunu nnang’ani yaany nshi indo kivaa-fo. Indi nndu kakunda ing’ana kunu nnang’ani yaany, we kuti nave nndundi waany. ²⁷ Na nndu kakunda iva wa nrwe kunu nnang’ani yaany, we kuti nave ishinga lyany. ²⁸ Niindo-da kivekai, Mwana yeto wa nndu nshi asheye irunndyo-fo, mmbo asheye we nave nndundi navevika na muu wakwe uve kiraso kyeewouwa veengyi.” ²⁹ Na elyi veefo vashuukaa kulya Yeriko vandu vakallatya nsemu mwiingyi. ³⁰ Nalyo akakava vandu vafu miso vavii vakee rembo yoo mbaambaa ya shia. Vakaita Yesu mmbo eefo eshiiraa-u vakaonisa ngyunyanga vakaamba, “Woi Nndumi lusarye! Yewe kukee mwana wa Davidi!” ³¹ Na vandu valya veefo mamwiingyi vakavakeemmya vamalallye. Nawo vakaengera ifua, vakaamba, “Woi Nndumi, Mwana wa Davidi lusarye.” ³² Na Yesu kairisha, kavavaanga kaamba, “A mmbo mukunndye shimutannyi inda?” ³³ Vakaamba, “Woi mbee, ni miso yaa eru naambo alole!” ³⁴ Naasa Yesu kavalyilya, kapaana miso alya awo, nalyo yeni vakalola. Vakallatya.

¹ Naasa elyi Yesu na vakiloshyony kyakwe veefo vashaafukyaa Yerusalemu vamfika kulya Betifage, alya ifumbuny lya miri itiri ndunda tikamwaa mafura, nalyo Yesu karuma-u vakiloshyony vavii. ² Kavavia, “Endeny efo muriny usumani na yaa mukai. Mukamfika-fo llyo yeni mushekooyaa-fo nshungu wa kyika ukee mfingye ando uryani na ngashe ya vayo. Endeny muuporommwi, musheenngye. ³ Na kwakooya nndu amuvesa, mmbieny, ‘Ni Nndumi aukunndye, nalyo asheweekeyaa.’ ⁴ Na kimaruma kikaenda indo ni kilya kikee kirere na kana ka nndu ulya mwaauya kisuku naambo kikooye iinukya-u kyeamba, ⁵ ‘Endevieny muri wa Sion, akakato mangyi yafo eefo ashaa na kwafo akee mfoo, asaammyi mungo wa nshungu na ngashe ya vayo, ikee mwana wa kindo kyeenga mario.’ “ ⁶ Naasa valya vakiloshyony vakakweengya vakavetana indo, shaasa Yesu avavavasya. ⁷ Vakeende nshungu ulya na ngashe ya vayo. Vakawuya vakaala soori tawo ta uwe efo mungony wa vayo. Vakansaamisa-u. ⁸ Naasa vandu valya vakuummbye-u vaifo mamwiingyi, veengyi vakakuuta soori tawo ta uwe. Vakaala efo shia. Na valya maata vakandemanya maramba a miriny, vakaveala efo shia. ⁹ Na valya vaifo mamwiingyi, valya vaira mbee vakasanga na valya valatya efo numa, vekapa ukoru veshaambaa, “Hosiana yewe kukee mwana wa Davidi! Kundearafumwa yeu asha arumwa ni Nndumi! Hosiana efo kukee uwe ya findo fyoose!” ¹⁰ Na elyi amaanga na kulya Yerusalemu vandu va muri woose vakasavaa, vakaamba, “A nndu yeu ni vi?” ¹¹ Na mamwiingyi ulya wa vandu ukaallwa, “Mmbwe Yesu, we nkisuku wa Nasareti ya kulya Galilaya.” ¹² Naasa Yesu kaanga neefo mmba ya Iruva, kaanta-fo woose valya vekummbyaa-fo na yuurya-fo findo. Kafullwa mesa ta valya veshaalashaa fesa na fitima fya valya veekumbaa mbeta. ¹³ Kavavia, “Mmbo kikee kireiye kyeamba, ‘Mmba yakwa mmbo ivaangwaa mmba yeeterevya,’ lyo yeni mukayaallwa mbanga ya veala shia.” ¹⁴ Nalyo kasheywa ni vandu vafu miso na yewo vakee miketekete ekee alya poo ya mmba ya Iruva, nawe kavakira woose. ¹⁵ Naasa vakohani valya vaniini na vaarya va fitabu elyi valollya efyo atana filandelollyo lyingyi, na vana vekapaa ukoru efo mmba ya Iruva vashaambaa, “Hosiana yewe mwana wa Davidi, nalyo vakasswa.” ¹⁶ Vakammbia, “Kwiitye-ndi ndesa vakeamba? Indi Yesu kavavia, ‘Ee-da!’ A mmbo mulasommyi kilya kikee kyaambe, ‘Ni efo kaniny ka vakoku, na yewo vashoonga nng’u kukudeesye nnduma wafo?’ “ " ¹⁷ Nalyo kavara-u kaenda kipoo auka kulya muriny. Kafika kulya Betania, kandelala-fo. ¹⁸ Na elyi lya ndesi ngama arie shia yeewuya na kulya muriny katirwa nshaa. ¹⁹ Kalollya nkuu umwi yoo mbai ya shia. Kandeulola, nalakooye-u nta kindo kuuta maru meni. Nawe kauvia, " “Yewe kulakivike-se ndunda-fo na kufike llung’anu.” Na nkuu ulya nalyo yeni ukariika. ²⁰ Naasa yewo vakiloshyony valollya kive indo, vakasongololo. A kyava inda elyi nkuu yeu wariika indo na lyimwi nsi? ²¹ Na Yesu kaallwa kavavia, “Ni kya dede shamuvia, ‘Kwakooya mutiri kikusiryo, nta mulatirwa nnyinyira, nshi ekyo kya nkuu mushekitanaa-da-fo.’ Naakwa mwavia ifumbu yelyi, ‘Iluka yaa kukai kundekweera efo yeeveny, mmbo kisheutikaa-da.’ ²² Na wo findo mwamfifuuya Iruva yoo ando mwaterevya mukusirye nawe mmbo mushefiwaryaa.” ²³ Naasa elyi vamfika efo poo ya mmba ya Iruva, eefo aloshaa, kasheywa ni Vakohani vaniini na masiingo a vandu, vakaamba, “A mmbo kutiri mumu wa ngata ingai elyi kwatana findo sha efyo? Na yeto akuniinga mumu yeto ni vi?” ²⁴ Na Yesu kaallwa kavavia, “A neeny shimuvese mbony imwi, mukanshivia neeny shimuvie kya mumu yeto shatana nato findo efyo mmbwa ngata ingai.” ²⁵ “A ubatiso lulya lwa Yohane luukye kwi ndesa? Ni efo iruveeu ao ni kunu vanduny? Naasa vakarera-rera kikwawo veni.” Vakaamba, ²⁶ “Kwakooya lwaamba, ‘Ni lwa efo iruveeu, mmbo asheluviaa, kikavakyi-se mulakunde ikusirya na Yohane?’ Indi kwakooya lwaamba, ‘Ni lwa kunu vanduny, ekakato nkuka yeto wa vandu mmbo walweerese mashika mmbo valollye Yohane ni nkisuku.’ “ ²⁷ Naasa vakaallwa Yesu vakammbia, “Yese llwiishi-fo.” Nawe kavavia, “Nta yeny nshikimuviaa kya mumu yeto ntanaa nato efyo mmbwa ngata ingai-fo.” ²⁸ “Mwakusara inda?” Kweefo nndu etiri vana vavii. Kaenda kwa ulya wa mbee kaamba, “Mwana-akwa, inu enda kunderunda efo nndeny wa misabibu.” ²⁹ Nawe kaallwa kaamba, “Nshikunndye-fo. Elyi numa kakuria, keenda.” ³⁰ Naasa keenda kwa ulya wa kavii, kavemmbia kiwo-da. Nawe kaallwa kaamba, “Nkisha mbee! Lyo nalaende. ³¹ A vandu yewo vavii nndu aletana ekyo kisenyi ndeye ni ungau ndesa?” Vakaamba, “Ni ulya wa mbee-te!” Yesu kavavia, “Nkya dede shamuvia, ‘Vandu vadedemi na vaka va shia mmbo vakeemusongoya yaanga efo umangyi ny lwa Iruva.’ ³² Mashika llya Yohane Mwiibatisa alesha na kunu kwany aira shia ya usumanu, neeni nta mulakunde inkusirya. Indi vadedemi wo sanda na vaka va shia mmbo valekunda inkusirya. Na yeni mukalollya kive indo, nta elyi numa mulakurie mukunde inkusirya.” ³³ Kyevearannyiny kyaaso kingyi, “Kweefo nndu muni kyeny aleronga nnda wakwe wa misabibu. Kauringitya na uvare. Kasuma-u ando eekammya misabibu. Katannya-fo nnara weeringa. Kaara-fo varemi. Kaenda kyaaro. ³⁴ Naasa elyi kwamfika kyeeri kya yaaya ndunda karuma mashinga akwe kulya kwa varemi valya vandewarya waavi yelo lwakwe lwa ndunda. ³⁵ Naasa varemi valya vakatira mashinga akwe. Ulya umwi vakambondora, ulya ungyi vakammbwaa, ulya ungyi vakankapa na mawe. ³⁶ Kawuya karuma mashinga engyi meengyi mmwasi ya valya va mbee, nawo vakavevatannya indo-da. ³⁷ Elyi lyefurummya kavarumya mwana wakwe, kaamba, ‘Ni mwana wakwa muni, mmbwe vashenreremyaa!’ ³⁸ Naasa elyi varemi valya valollya mwana ulya ashe vakarera kikwawo, vakaamba, ‘Akakau muya ding’u! Ndifony-te lummbwae, yese luve veni ding’u!’ ³⁹ Vakantira vakansomuta kipoo ya nnda ulya vakambwaa. ⁴⁰ A mwaambany inda? Elyi muni nnda ulya wa misabibu ashaa, mmbo ashetanaa inda na varemi valya ndesa? ⁴¹ Vakammbia, ‘Vammba indo vakasha mmbo ashevarumataa, na nnda yeto wa misabibu naare-fo varemi vengyi, yewo vashenrwaayaa waavi lwakwe lwa ndunda elyi fyeeri fya vayo fyamfika.’ “ ⁴² Yesu kavavia, “A mmbo mulandesomi kindo kikee kirere efo mareiyony kyeamba, ‘Iwe yelyo vetana mmba valelyimina, llyo lyilewuya iva iwe lya ndumbeny. Mmbo kileva indo kyuuka kwa Nndumi muni, kikava kindo kyeesongololo elyi lukilollye na miso eru.’ ⁴³ Elyi kikeeny indo neeny shamuvia, ‘Mmbo mwiikaa musokwa umangyi lwa Iruva lumuuke lundeniingwa vandu va uruka yelo luvikaa ndunda tikwaani nalo.’ [ ⁴⁴ Na wo nndu awa iweny yelyo mmbo afika-fikaa. Na nndu kalyiwoya mmbo lyishensaa-saa.]” ⁴⁵ Naasa vakohani valya vaniini veefo na Vafarisayo elyi vamiita fyaaso efyo, vakamanya mmbo arera kikee nkyawo veni. ⁴⁶ Vakasia mwaanya weentira, lyo vakairyaa mamwiingyi ulya wa vandu, mashika to nyelyi wiirikye sheelyi Yesu ni nndu nkisuku.

¹ Nalyo Yesu karera lyingyi esheraa fyaaso kavavia, ² “Umangyi lwa Iruva mmbo lufwanani na nndu alealyikya mwana wakwe nka. ³ Naasa kanderuma mashinga akwe andevaanga valya vakee vaarye nrumi vakavaangyo walyi lulya. Nawo valakunde isha. ⁴ Kawuya karuma mashinga engyi, kavavia, ‘Endevieny valya vakee vaarye nrumi, shoonga takwa akati shantideesya. Shau takwa tanshishwa na nrasa takwa. Na findo fyoose fyandeesyo. Kusheyeny na walyiny.’ ⁵ Vakamina vakakweengya kyawo, ulya umwi efo ireminy lyakwe, na ulya ungyi efo mbusheny yakwe. ⁶ Na valya vengyi vasaa-u, vakatira mashinga alya akwe, vakavaila, vakavawaa. ⁷ Nalyo mangyi ilya karooywa nngoo, karika vasikari vakwe, vakamamita vawai valya neekora muri ulya wawo. ⁸ Nalyo kavia mashinga alya akwe, ‘Kya walyi lwemmba, lyo valya vekee vaarye nrumi mbalekisumanya-u-fo. ⁹ Naasa kwiipoony mundefika efo shieny eto niini, na wo vandu mwambakooya-fo muvavaange vashe walyiny!’ ¹⁰ Nalyo mashinga alya akakwiipoo, vakafika efo shieny eto. Na wo vandu valevakooya, vakavasanda woose, na ulya nkasha, na ulya nsha. Na efo walyiny kukaishwa vandu veny.” ¹¹ “Naasa mangyi kasha nau ishesengera veny valya. Kakooya-fo umwi nalaree soori ya walyiny. ¹² Kammbia, ‘Mbuya-akwa, a niinda kwasha na kunu, kularee nta soori ya walyiny?’ Nawe kafulukywa deny. ¹³ Nalyo mangyi kavia valya vefurukannya-u, ‘Mfingeny marende na maako, mundemweera efo ireeminy lyiwoye efo poo. Mfo kundo kushekaa kiiyo na irafunya mayoo.’ “ ¹⁴ Kimmba veevaangwa mmbeengyi na valya vasauwe vakaangwa. ¹⁵ Nalyo Vafarisayo vakanderuvya shila, vandereiya Yesu na marero. ¹⁶ Vakanrummya vakiloshyony kyawo varyani na vandu vatiri mbuya na Herode, vakaamba, “Ale llori! Lwiishi mmbo kukee nndu mwiirera fya dede na shia ya Iruva kwaveifunda kya dede, kulalolaa nta fisangu fya vandu. ¹⁷ Naasany luvie mmbo kukusarye inda? A ndesa yuutya Kaisari usanu ni kindo kisumani ao ode?” ¹⁸ Na Yesu kamanya uravi lwawo, kaamba, “A kimaruma mukasha isheesa nkyokyi yeni vandu vakunang’ari? ¹⁹ Keshooreny fesa ya usanu-te!” Vakamweenngye. ²⁰ Nawe kavavesa, “A ufwanu elo lwiiyo llwa vi na kireiyo ekyo?” ²¹ Vakarouwa, “Ni fya Kaisari.” Nawe kavavia, “Naasa, niingyeny Kaisari efyo fikwaani na Kaisari. Na efyo fikwaani na Iruva muvefiniinga Iruva.” " ²² Naasa vekiita indo, vakasongololo, vakanra-u vakakweengya kyawo. ²³ Naasa nkonu ulya mweni, kasheywa Vasadukayo, mmbo vandu veshaambaa nkwiifo iruka lya vafu-fo. Vakammbesa, ²⁴ " “Ale llori, Mose mmbo aambaye, ‘Nndu kafwa nalareeye-u mwana, naasa nka yeto wakwe, noorwa-se mmwanamaye nave nka wakwe, nawonisye mwanamaye ngyeeri. ²⁵ Naasa kunu kweru kweefo vanavanka mfungare. Ulya wa mbee kaalyika kafwa, nalareeye-u mwana. Kareeya mwanamaye nka ulya wakwe. ²⁶ Na ulya wa kavii kiwo, na ulya wa kararu kiwo-da, tana vasia woose mfungare. ²⁷ Na elyi lya numa ya woose nka ulya nawe kafwa. ²⁸ A elyi kwamfika yoo marukyony a vafu, nka yeto ashevaany wa ungau ndesa? Kimmba vemmoora woose?’ “ ²⁹ Naasa Yesu kaallwa kavavia, “Mmbo mwarekwa deny, mashika elyi mulaishi nta mareiyo nta finya ya Iruva. ³⁰ Mashika elyi kwamfika yoo marukyony a vafu, mmbakyaalyika-se-fo nta yaalyikwa-fo. Mmbo vashevaa sha vasu va iruveeu. ³¹ Na kya iruka lya vafu a mmbo mulandesomi ekyo Iruva amuviiye kaamba, ³² ‘Yeny ni Iruva, wa Abrahamu na Iruva wa Isaki na Iruva wa Yakobo. Naasany, Iruva nshi akee wa vafu-fo, mmbo akee wa vamuu.’ “ " ³³ Kyasia vandu valya vakuummbye-u elyi vamiita indo vakaising’ang’a kya kiloshyo kyakwe. ³⁴ Naasa elyi Vafarisayo vamiita amfindikira kana ka Vasadukayo, nawo vakandekuummbya ando amwi. ³⁵ Na umwi waawo akufundye mavavaso kasha immbesa amweesaa, ³⁶ kaamba, " “Ale llori! A efo mavavasony ivavaso lyiifo lyikee iniini lyikailanya engyi llyingalyi?” ³⁷ Nawe kammbia, “Mmbo kushekundaa Nndumi Iruva wafo kunkunde na ngoo imwi nsi, na nrima umwi nsi, na makusaro amwi nsi. ³⁸ Llyo ivavaso iniini lyisongoye engyi. ³⁹ Lya kavii lyiifo lyifwanani nalyo, ‘Mmbo kushekundaa nndu uroo shaasa kukukunndye kumuni.’ ⁴⁰ Na mavavaso yoo avii nng’u arie mavavaso engyi moose na vakisuku.” ⁴¹ Naasa elyi Vafarisayo vakuummbye-fo indo, Yesu kavavesa, ⁴² Kaamba, “A ni inda mukusarye kya Kristo? Akee mwana wa vi?” Vakaamba, “Ni wa Davidi-te!” ⁴³ Nawe kavavia, “A kikavaany inda elyi Davidi ammbaanga ni Nndumi?” Mmbo aambaye afundwa ni Mumuyo wa Iruva kaamba, ⁴⁴ “Nndumi alevia Nndumi wakwa, ‘Kaa rembo yoo woko lwakwa usha, shitani shaara vakiduva vafo si, kuvaekerye marende afo.’ “ ⁴⁵ “Naasa elyi Davidi ammbaanngye ni Nndumi, ni inda ava mwana wakwe?” ⁴⁶ Nalyo kulawonike-fo nndu aidima imwaallwa, nta nndu nalakarye immbesa kindo uka nkonu ulya.

¹ Nalyo Yesu karera na ironda lilya lya vandu na valya vakiloshyony kyakwe, kaamba, ² “Velosha mavavaso na Vafarisayo mmbo velosha mavavaso a Mose. ³ Naasa fyoose vamuvia mufitire muvefiringa. Indi kya mashora awo nta mulatani shawo. Mmbo varera valatani. ⁴ Nawo vakava vefinga mario maroo, vakaekerya vandu meeveny awo. Indi wo veni nta valakunde yaasembera na nni. ⁵ Na mashora awo moose vakaatana vakooye ilolwa mmbandu. Mashika fingova fyawo varee elyi vatereva vakafilambara, na mise ya soori tawo ta uwe vakaing’anisa. ⁶ Nawo vakasia marembo a mbee ando a shoongeny, na fitima fisongoru efo mmba teeterevya. ⁷ Na fiidikiro fya vandu efo singireny, na ivaangwa valori mmbandu. ⁸ Indi yeni nta mulavaangwa valori mashika llori yeto waany aifo ni umwi, neeni moose mukainana. ⁹ Nta mulavaange nndu ni Nde waany, kunu urukeny, Mashika Nde waany aifo ni umwi, ni yeto wa efo iruveeu. ¹⁰ Nta mulavaangwa vasongoru, mashika nsongoru waany aifo ni umwi-da, we Kristo. ¹¹ Indi yeto akee nniini waany, we kuti nave nndundi waany. ¹² Indi yeto mwiikung’anisa we muni mmbo akaa nanyiiswa. Na yeto mwiikunyiisa we muni akaa nang’aniswa.” ¹³ “Indi yeni veelosha mavavaso na Vafarisayo mukee vakunang’ari, oshiny lwany! Mmbo mwaraya mwaango wa iruveeu mukeema vandu yaanga-fo. Shamashika nta yeni muveni mmushaangaa-fo-fo, nta yewo vakunndye yaanga mulavalekeye vakaanga-fo.” [ ¹⁴ “Nyira veelosha mavavaso na Vafarisayo mukee vakunang’ari, oshiny lwany! Shamashika elyi mwava veemira mmba ta vaka va ding’u mukawuya itereva Iruva na marero maasha kikee kya ukunang’ari. Kimmba ni indo mmbo musheonisaa uvingo uniini nnu.”] ¹⁵ “Yeni veelosha mavavaso na Vafarisayo mukee vakunang’ari oshiny lwany! Mmbo mwasengetya yeeve yeyo niini na uruka uumu naambo mukooye-fo nndu amulatyaa umwi. Na kwakooya ammba nndu amulatye mukawuya imwaallwa nndu wa gehena ngota yeni kavii.” ¹⁶ “Yeni vasongoru vafu miso, oshiny lwany! Mmbo mwaambaye, ‘Nndu kalya mboo na mmba ya Iruva, nkitiri mwaandu-fo. Indi nndu kalya mboo na saabu yeyo ya efo mmba ya Iruva, we allyamara.’ ¹⁷ Mmbo mukee vakunang’ari mukaveva vafu miso. A kiniini ni kingakyi? Ni saabu yeyo ao ni mmba yeyo ya Iruva iniinngye saabu yeyo ikava kindo kyeele? ¹⁸ Mukaveamba-se, ‘Nndu kalya mboo na ando eekorya firaso nkitiri mwaandu-fo. Indi nndu kalya mboo na kiraso ekyo kikee kyeekere-u, we allyamara.’ ¹⁹ Mmbo mwava vandu vafu miso. A kiniini ya kingyi n kingakyi? Ni kiraso ekyo ao ni ando eekerya firaso anniinngye kiraso ekyo kikava kindo kyeele? ²⁰ Naasany, yeto alya mboo na ando eekorya firaso, mmbo alya mmbo nang’u kasanda na fyoose fikee fyeekere-u. ²¹ Na yeto alya mboo na mmba ya Iruva, mmbo alya nayo mboo kasanda na yeto akaa-fo. ²² Na yeto alya mboo na iruveeu, mmbo alya mboo na kitima kya Iruva kasanda na yeto akeeu rembo.” ²³ “Yeni veelosha mavavasyo na Vafarisayo mukee vakunang’ari, oshiny lwany! Mmbo mwavika firaso fya findo efyo fyeefwamisa na fyeerolisa na fyeelonga shoonga. Indi efo mavavasony findo fiiyo finiini fyo mukawuya ifira, ni irummbwa fya songosiny na ilyillya vandu na kikusiryo, efyo mfyo fyeetana, nta efyo fingyi mulafire-fo. ²⁴ Mukee vasongoru vafu miso! Mmbo mufifinaa mbu, mukawuya imira ngamula. ²⁵ Yeni veelosha mavavaso na Vafarisayo mukee vakunang’ari, oshiny lwany! Mmbo mwasangya kikombe na kideeva kunu kipoo, na efo mmba fikaishwa fya usoki na uraami. ²⁶ Yewe Mfarisayo mfu miso! Lava mbele isangya kikombe efo kimmba-te, na kunu kipoo kuveva kwaa. ²⁷ Yeni veelosha mavavaso na Vafarisayo mukee vakunang’ari oshiny lwaanyi! Mmbo mufwanani na mbanga ta vafu tikee shaambe yeela, kunu kipoo tikalollyo mmbo tikee shisha, na efo kimmba tikaishwa maffwa a vafu na uravi lwa wo ngata. ²⁸ Na yeni ni kiwo-da, kunu kipoo mmbo mulolywaa mukee va usumanu, indi efo kimmba mukava vandu vaishwe ukunang’ari na kiila.” ²⁹ “Yeni veelosha mavavaso na Vafarisayo mukee vakunang’ari oshiny lwany! Mbanga yeto kundo vakisuku vakee varike mmbo mwatannya-u mmba, na efo kundo valya va usumanu vakee vaare mukaatokopa. ³⁰ Mukaamba, ‘Kwee ni yese lweefo meendi alya a vakuu veru, yese llweeshaakanaa nawo iirita samu ya vakisuku valya-fo.’ ³¹ Kikavaany mwavika ukureeki lweekuvinga muveni, mukamanyika mmbo mukee vana va valya valewaa vakisuku valya. ³² Naasa neeni keveishuryeny-fo ekyo kilerewa kyenga ni vakuu valya vany! ³³ Yeni shoka mukee fivana fya mashoka, a ni inda mushaashukaa uvingo lwa Gehena? ³⁴ Kimmba ni indo, lleny-te, shiifo shimurummyaa veawuya fisuku na vandu vaishi reu na veelosha mavavaso. Na yeni yewo maata mushevawaa, neevakapya nsalabeny, na yewo maata mushevakapaa na ngova efo mmba tany teeterevya, muvevarishisa muri ku muri. ³⁵ Naambo mukooye isheywa ni samu ya vandu va usumanu shoose ipookya samu ya nndu ulya wa usumanu Abeli, fika samu ya Sakaria we mwana wa Barakia, yeto mulemmbwaiya efo nnang’ani kavii ya mmba ya Iruva na ando eekorya firaso. ³⁶ Ni kya dede shamuvia, ‘Efyo fyoose mmbo fishewoyaa irika elyi lyiiyo.’ “ ³⁷ “Woi Yerusalemu! Woi Yerusalemu! Mwiiwaa veawuya fisuku, na yewo kwarummywa kwaveveera mawe. Ni keengyi na keengyi sheekunndye yuummbya fivana fyafo, sheelyi nguku yawummbya fivana fya vayo ikasikya na maaru. Na yeni mulakunde! ³⁸ Llen-te mwiikaa mureeywa mmba yei yeanga ive irama. ³⁹ Mmbo shamuviany, ‘Mmukaa mushilollye-se kipookya ulaalu-fo,’ na kutani mwaamba, ‘Kundearafumwa yeu asha na irina lya Nndumi!’ “

¹ Nalyo Yesu kakwiipoo auka efo poo ya mmba ya Iruva, arie shia, valya vakiloshyony kyakwe vakakuumbya yoo akai vamoore mmba ta mwiindye. ² Nawe kaallwa kavavia, “Mulollye yoo moose-ndi? Nkya dede shamuvia, ‘Kunu nkwiikaa kurewa-u iwe lyakweekerya iwe uroye lyire lyilasambuwa-fo.’ “ ³ Naasa elyi ameenda ikaa rembo alya ifumbuny lya miri ya mafura, valya vakiloshyony kyakwe vakashekuummbya yoo akai, vakee kyaanya kyawo, vakaamba, “Luvie-te meendi kwiikaa kuutike indo, na wende lweemanya yoo masheyony afo na masiiyony a ulana yelu.” ⁴ Yesu kaallwa kavavia, “Kwiiseny nndu nalamulembe! ⁵ Mashika veengyi vakaa vashe varee irina lyakwa veshaambaa, ‘Yeny mmbwe Kristo!’ Nawo vaevete veengyi. ⁶ Na kingyi-se mushekooyaa iita kya fira na fyuulaalu fya fira. Manyiny mure mulaereve! Mashika mmbo kikee kirummbwe kyeende indo. Indi yoo masiiyony a ulana nnyandefika-fo. ⁷ Mashika uruka lumwi lushekwiipoo lukape yelo lungyi, na umangyi lukape yelo lungyi. Kuvekaa-fo na shaa shiniini, na fidinasi kundo na kwiingyi. ⁸ Na efyo fyoose mfyo mapookyony a fyuure efyo fyeefurumya. ⁹ Nalyo llyo vashemurambikyaa-fo mulyisywaa ukiva na iwaawa. Na yeni mushevaa veesuwa mmbandu woose va masanga kimaruma kya irina lyakwa. ¹⁰ Nalyo veengyi vashewonisaa nsindara na iriinngyana na isuvana wo veni na veni. ¹¹ Na veawuya fisuku veengyi va wongo vavekwiipoo-fo vasheevetaa vengi. ¹² Na elyi fya uravi fisheengerekaa indo nkyo kisheniingaa ukundi lwa veengyi lusheangwa. ¹³ Naasa yeto asisirya-u nafike yoo mafurummyony mmbwe ashekirwaa. ¹⁴ Na nrumi yeyo ya nsia ya mbony ta umangyi yo isheendaa yongoywa kunu ulaniny koose, vandu va masanga vawonise ukureekyi woose. Kikamfika yoo llyony kwamfika yoo masiiyony.” ¹⁵ “Naasa elyi meendi mushelollyaa uravi lwiilannyi kyeeso usutu lulya lweeallwa ando kweele irama lwansha nang’u lulya lukee waambe ni nkisuku ulya Danieli (na mwiisoma-u nakummbwe!)” ¹⁶ “Llyo yewo valele kunu Yudaya vanderishya mafumbu-u. ¹⁷ Na nndu akoyaa akee mmbeeu, nalaoloke-fo nandeipoo fya efo mmba kwakwe. ¹⁸ Na nndu akooyaa akee efo ireminy, nta nalainduke nawuye na numa nandeipoo soori yakwe ya yeerya. ¹⁹ Indi vaka yewo vakooyaa vakufingye fyeeri efyo na yewo vashootaa vana, oshiny lwawo! ²⁰ Indi tereveny Iruva, kyeeri ekyo kyeerisha kilave ni kyeeri kya mbeo, nta nkonu wa Sabato! ²¹ Shamashika meendi yoo kushekaa-fo fyuure finiini. Nta uka elyo mapookyony a ulana fika ulaalu kulandekae-fo fing’ani indo-fo. Nta meendi a numa mfishekaa-fo finiini indo-fo. ²² Na fyeeri efyo kukooye kulaore fyeefiiswaa, nkweekiaa-fo nta nndu-fo. Indi kimaruma kya yewo vasauwe nkyo kisheniingaa fyeeri efyo fifiiswa.” ²³ Na fyeeri efyo fikamfika, kwakooya nndu amuvia Kristo akakau yaa, ao, “Akakato efo, nta mulairikye-fo. ²⁴ Shamashika kushekwiipoo Vakristo va wongo na veawuya fisuku va wongo, nawo vandeora vandu ngyende shiniini na findo filandelollyo lyingyi, na kukooye kyeevaa naakwa na yewo vasauwe verekaa. ²⁵ Akakyo shalava imuvia. ²⁶ Naasany, kwakooya vashemuviaa, ‘A ulya kulya kasa! Nta mulaende isaiya-fo! Akakato aovye efo firyeny nnang’ani ya mmba! Na yeni nta mulairikye!’ ²⁷ Mashika shaasa kimwii kimikaa kyuuka taari ya ngama kikatana kyafika taari ya nkwaany, na yoo masheyony a Mwana yeto wa nndu ni indo kisheendaa. ²⁸ Na kundo kukee nnying’a na mamutony mfo kundo ashekuumbyaa.” ²⁹ “Naasa fyuure efyo fikamiira llyo yeni mwi yeu ushaalukaa ireema, na mwiiri mmbusheendee-se sa yavayo-fo. Na nyinyiri tishoolokaa tyuuka efo iruveeu. Na finya yeto ta efo iruveeu tiverinyiswa. ³⁰ Nalyo llyo wende lwa Mwana yeto wa nndu lusheonikaa efo iruveeu, na ngyufyari toose ta vandu va ulana tishekapaa kiiyo. Nato tishelollyaa Mwana yeto wa nndu ashaa ariwa mmafishi a nginiiu akee na wiitori uniini na itumbe. ³¹ Nawe asherumaa vasu vakwe, na mbembe tikapwa na finya. Nawo vandeummbya-u yewo vasauwe vakwe vavaute efo ndumbeny tilya iinya vepookaa marayony yoo a ngina vafite marayony yoo engyi.” ³² “Naasa efo nriny wa nkuu uten-fo wende lwekulosha. Iramba lya vayo lyikamfumbisa lyikaora maru, neeni mukamanya meelulyony amfika kufii. ³³ Na kya findo efyo na kiwo-da. Mukammeefilollya fyoose, kevemanyiny, mmbo ansha kufii na yoo mwaangony. ³⁴ Ni kya dede shamuvia, ‘Irika elyi nta llyishiraa kulaore findo efyo fyainukya fyoose-fo. ³⁵ Efo iruveeu kwiikaa kurumake, na kunu ulaniny, kilarumakaa ni marero akwa.’ “ ³⁶ “Indi kya nkonu yeto mweni, na saa yeyo sheni, nkwiifo nndu aishi-fo, nta vasu va efo iruveeu, nta we Mwana-fo, kulaore ni Nde we muni. ³⁷ Indi shaasa kyeekee fyeeri filya fya Noe, ni indo-da kisheendaa elyi kwamfika yoo masheyony a Mwana yeto wa nndu. ³⁸ Mashika vandu valya veefo meendi alya kulaore yeeve ilya niini yansha, shaasa valeva veelya na ina na yaalyika, na yaalyikwa, vakatana vafika nkonu ulya Noe aleanga na efo isandukuny. ³⁹ Nta valaipuye kindo, yeeve ilya niini ikatana yasha ikavakomba kombi. Na yoo masheyony a Mwana yeto wa nndu ni indo-da kisheendaa. ⁴⁰ Nalyo llyo vandu vavii vakooyaa vakee ireminy, yeto umwi awarywaa na yeto ungyi narewa-u. ⁴¹ Vaka vavii vakooya veesaa iseweeny, yeto umwi ashewarywaa, na yeto ungyi narewa-u.” ⁴² “Naasany veny velala shoovi, kimmba mulaishi nkonu yeto Nndumi waany ashaa nato ni ungau. ⁴³ Indi kindo kimwi mwiishi, ‘Kya muni kyeny kukooye mmbo eeishi ni ikamba lya kio lyeeringa lyingalyi inyinyi lyishaa, mmbo elalaa shoovi, nnyeraa mmba yakwe isumwa-fo.’ ⁴⁴ Kimmba ni indo neeni veny vandu vakudeesye, mashika Mwana yeto wa nndu asheshaa kyeeri mulakumbuye.” ⁴⁵ “Naasany ishinga lyiiyo lyitiri usaari na urango usha llyingalyiny? Nndumi wakwe kammbika nniini wa mmba yakwe nandeavya mashinga wooroye shoonga kyeeri kisumani. ⁴⁶ Na ishinga elyo elyi nndumi wakwe ashaa, nakooye eetanaa indo, ngoma lyo. ⁴⁷ Nkya dede shamuvia, ‘Mmbo ashemmbikaa nniini wa findo fyakwe fyoose.’ ⁴⁸ Indi ishinga elyo ikasha, kwakooya lyaamba efo nriminy: Nndumi wakwa nnashaa uviny-fo. ⁴⁹ Nalyo lyikapooka ikapa mashinga wooroye nawe kasanga na veenangwa kalya na ina nawo. ⁵⁰ Naasa nndumi ulya wa ishinga elyo mmbo asheshaa kyeeri lyilaifo lyimmbereyaa na saa lyilaishi. ⁵¹ Nawe ashelyirummbwaa tapa nandelyisanda ando amwi na yewo vakunang’ari, kive nkyo waavi lwakwe. Nalyo kukae-fo ikapa kiiyo na irafunnya mayoo.”

¹ “Nalyo llyo umangyi lwa iruveeu lushekaa-fo lufwanani na vana va kyeny ikumi valeipoo taa tawo, vakauka kyeny, vandeammbya muni walyi. ² Nawo valya varaanu varung’ani, na valya varaanu varango. ³ Naasa valya varung’ani vakaipoo taa tawo valakiipoo mafura. ⁴ Na valya varango vakaipoo mafura na fiiya fyawo ando amwi na taa tawo. ⁵ Naasa muni walyi kakyeeywa. Vakarengeya woose vakalala rony. ⁶ Naasa elyi kio nnang’ani kavii kukaitiwa kyoorongye, ‘Akakato muni walyi! Kwiipoony-te mundemwaammbya!’ ⁷ Naasa vana valya va kyeny vakakwiipoo woose vakasongosia taa tilya tawo. ⁸ Valya varung’ani vakavia valya varango, ‘Mafura yoo any lwaavyeny-ng’u kidu! Mashika taa teru tiifo tirumikaa.’ ⁹ Valya varango vakarouwa vakaamba, ‘Ode, nnyalumaa yese neeni-fo. Nkisha mweende kwa yewo veekumba, mundekuurya-fo any muveni!’ ¹⁰ Naasa varie shia yeenda, muni walyi kasha. Na valya vakooya vekudeesye vakaenda nawe efo walyiny. Mwaango ukaraywa. ¹¹ Elyi numa vana valya va kyeny vengyi vakasha nau, vakaamba, ‘Woi Nndumi! Woi Nndumi! Luruye mmba!’ ¹² Nawe kaamba, ‘Nkya dede shamuvia, nshimwiishi yeni-fo.’ ¹³ Kimmba ni indo, veny velala shoovi shamashika elyi mulaishi nta nkonu yeto na saa yeyo.” ¹⁴ “Mmbo kyava sheelyi nndu eekunndye yeenda kyaaro, kapooka ivaanga mashinga akwe muni. Kavaarya masaa akwe. ¹⁵ Ulya umwi kaniinngya talanta isaanu, na ungyi ivii, na ungyi imwi. Wo nndu kanniinngya kisumani na mwiina wa wiidimi lwakwe. Naasany kaipoo kyaaro. ¹⁶ Ameenda, nalyo yeni ulya wa talanta isaanu katiipoo, kandekapa nato mbusha. Kalyima-u talanta tingyi isaanu. ¹⁷ Na ulya wa talanta ivii kavetana kiwo. Kauta-u mbusha ya tingyi ivii. ¹⁸ Naasa ulya wa talanta imwi kaiipoo. Kandeisummya si. Kasuruma-fo talanta ilya ya nndumi wakwe. ¹⁹ Naasa kwamiira-u kyeeri kyaasha, nalyo nndumi ulya wa mashinga alya kasha. Kakundany vamweekennyi. ²⁰ Ulya alewarya talanta tilya isaanu, kasha nau, kaende talanta isaanu tingyi. Kaamba, ‘Nndumi talanta kuleshyaarya ni isaanu. Akati talanta isaanu tingyi shilelyima-u.’ ²¹ Nndumi ulya wakwe kammbia, ‘Aika ishinga isha kwaveva nsaari. Kwekee mwiikallya findo fyaangu kikee kya usaari. Nkuvikaany mwiikallya findo fiingyi. Anga na efo nsieny wa nndumi wafo!’ “ ²² Na ulya alewarya talanta tilya ivii kavesha nau. Kaamba, “Nndumi talanta kuleshyaarya ni ivii. Akati talanta tingyi ivii shilelyima-u.” ²³ Nndumi ulya wakwe kammbia, “Aika ishinga isha kwaveva nsaari! Kwekee mwiikallya findo fyaangu kikee kya usaari. Nkuvikaany mwiikallya findo fiingyi. Anga na efo nsieny wa nndumi wafo.” ²⁴ Naasa ulya alewarya talanta ilya imwi kavesha nau. Kaamba, “Nndumi shilekumanya mmbo kukee nndu muumu, mmbo kwailula ando kulasuye mbeu, kwavesanyirya ando kulanyanyatye. ²⁵ Neeny shairyaa, shandesummya talanta ilya yafo efo si.” ²⁶ Naasa nndumi ulya wakwe kaallwa kammbia, “Yewe ishinga yeesi kwaveva mpeere! ²⁷ Kuleshimanya-sho, mmbo shailula ando shilasuye mbeu, shavesanyirya ando shilanyanyatye? Kyasiany yewe nshi kyeekusumannyi indeera talanta ilya yakwa efo kwa vandu vekapa mbusha va fesa. Na yeny kwakooya shasha nsheviirywany efyo fyakwa ando amwi na ulyimi lwa vayo. ²⁸ Naasa nsokeny talanta yeyo mundeniinngya yeto atiri talanta yeto ikumi. ²⁹ Mashika wo nndu atiri findo mmbo asheengerywaa fiingyi katana aingifywa. Indi yeto nalatiri kindo, naakwa na kilya atiri mmbo akisokwaa. ³⁰ Na ishinga elyo lya mweelu endelyeereny efo poo. Mfo kuvaa ikapa kiiyo na irafunnya mayoo. ³¹ Naasa elyi Mwana yeto wa nndu ashaa akee na itumbe lyakwe, aryani na vasu va Iruva woose, llyo ashekaa rembo yoo kitiminy kyakwe kya itumbe. ³² Nalyo efo kisanguny kyakwe kushesanyiryou vandu va masanga moose. Nawe ashevarauwaa navaave kavii, shaasa nndu mwiisi arauwa moonri na mburu. ³³ Na moonri asheavikaa yoo woko lwakwe usha, na mburu yeto tivikwaa yoo woko lwakwe umuso. ³⁴ Nalyo mangyi asheviaa valya va efo wokony lwakwe usha, ‘Kusheyeny na yaa shikai, mukee vandu va Nde-yaakwa avakunndye mbora! Endekeeny efo umangyi ny, mfo ding’uny yeanga, mulesurummywa uka mapookyony a ulana. ³⁵ Shamashika shetirwa nshaa mukashiniinga shoonga. Shetirwa nnyura mukashirita. Shekee muny mukashiwarya efo kyeny kwany. ³⁶ Shekuuywa mukashivika soori. Shelwee mukashisengera. Shekee kifingyony mukasha ishisaiya.’ ³⁷ Nalyo vandu yewo va usumanu vashemwaallwa, ‘Nndumi a niindii lulelollya kutirwa nshaa lukakuniinga shoonga? Ao kutirwa nnyura neese lukakurita? ³⁸ A ni indii lulekulollya kukee muny, neese lukakuwarya efo kyeny kweru? Ao kukuuywa neese lukakuvika soori? ³⁹ Ao ni indii lulekulollya kulwee ao kukee mfinge, neese lukasha ikusaiya?’ ⁴⁰ Nalyo mangyi ashevarouwaa, ‘Nkya dede shamuvia, wo kindo muletannya vanavama wakwa yewo vafwafwa ya woose, naakwa ni ulya umwi nsi, ni yeny muleshitannya.’ ⁴¹ Nalyo asheviaa na yewo va wokony lwakwe umuso naambe, ‘Ukeny yaa shikai mukee vandu vakee vadenge, mundefika efo murony ularumikaa, ulesurummyo Satana na vasu vakwe. ⁴² Shamashika shetirwa nshaa, nta mulashiniinge shoonga. Shetirwa nnyura, nta mulashirite. ⁴³ Shekee muny nta mulashiwarye efo kyeny kwany. Shekuuywa nta mulashivike soori. Shelwee, shekee mfinge, nta mulashe ishisaiya.’ ⁴⁴ Nawo vasheverouwaa kiwo, ‘Nndumi, a niindii lulekulollya kutirwa nshaa, ao nyura, ao kukee muny, ao kukuuywa, ao kulwee, ao kukee kifingyony, neese lukara lulakufurukannya?’ ⁴⁵ Nalyo ashevarouwaa, ‘Nkya dede shamuvia, Wo kindo mulera mulatannya yewo vafwafwa ya woose, naakwa ni ulya umwi tupu, mmbwe yeny mulera mulashitannya.’ ⁴⁶ Nawo vasheendaa vandelyiswa ukiva llung’anu, na yewo va usumanu wo vandekaa na muu wa llung’anu.”

¹ Kyikava elyi Yesu ammarisya marero alya moose, nalyo kavia valya vakiloshyony kyakwe, ² “Mwamanya mmbo kushiraa-u mikonu ivii, kufike yeto wa Pasaka. Llyo Mwana yeto wa nndu ashendaa irambikyo-fo nandekapyo nsalabeny.” ³ Nalyo vakohani valya vaniini vakakuumbya ando amwi na masiingo a vandu kulya mmba ikee shaakare ya nkohani ulya nniini avaangwaa ni Kayafa. ⁴ Vakafisha shila shaasa vashetiraa Yesu na ntambo vammbwae. ⁵ Naasa vakaamba, “Nkyivaa elyi lya nkonu yeto nniini-fo. Mmbo kusheshaa mwaaluko-luko wa vandu.” ⁶ Naasa Yesu akee kulya Betania, kulya mmba kwa Simon, yeto etirwa ni ivave, ⁷ kasheywa ni nndu nka arie kipete kitiri mafura eekwaamba a wuuru uniini. Kalletya efo nrueny akee rembo eelyaa shoonga. ⁸ Naasa valya vakiloshyony vakalolya, vakasswa. Vakaamba, “Nkyiki elyi kindo ekyo kyareka indo? ⁹ Kindo ekyi mmbo kyeevaa ikumba wuuru uniini kindeavyo vakyiva.” ¹⁰ Naasa Yesu kamanya kavavia, “A ekyo mwaatarya nka yeu nkyoki? Mmbo ashitannya ekyo kisha! ¹¹ Shamashika vandu vakyiva mmbo mukee nawo kyeeri kyoose. Indi yeny mmukee neeny kyeeri kyoose-fo! ¹² Nawe elyi aletya mwiili wakwa mafura yoo, mmbo atana indo kya yuudesya underikwa. ¹³ Nkya dede shamuvia, ‘Kundo kwamoongoywa nrumi yeyo ya nsia kunu ulaniny koose, na ekyo kyakwe atana mmbo kishekumbuwaa.’ “ ¹⁴ Nalyo ulya umwi wa valya ikumi na vavii avaangwaa ni Yuda Iskariote, kandefika kulya kwa vakohani vaniini. ¹⁵ Kaamba, “Kindo musheshiniingaa nkyokyi neeny shindenrambikya maakony any?” " Nawo vakamweesya misasarwe ya fesa makumi araru. ¹⁶ Nalyo nng’u alepookya isia mwaanya nsha weenrambikya efo maakony awo. ¹⁷ Naasa elyi lya nkonu wa mbee weelyiwa mikate ilatiri ntarang’o, valya vakiloshyony vakakuumbya yoo Yesu akai, vakaamba, " “A kundo kukundye lundesongosya eelyiya Pasaka nkwi?” ¹⁸ Nawe kaamba, “Endeny efo muriny kwa ng’anya mundemmbia, ‘Llori akuvia-le vai, Kyeeri kyakwa kyamfika kufii. Ni efo kwafo shikundye yuutya-fo nndumwa yeu wa Pasaka, amwi na vakiloshyony kyakwa.’ “ ¹⁹ Na valya vakiloshyony vakandetana indo-da, shaasa Yesu avavasya. Vakandesongosya Pasaka ilya. ²⁰ Naasa elyi kwamfika nkwaany, kasha nau ishekaa-fo rembo nalye shoonga aryani na valya vakiloshyony ikumi na vavii. ²¹ Veefo valyaa kavavia, “Nkya dede shamuvia, ‘Nnang’ani yaany umwi waany asheshiriingyaa.’ ²² Nawo vakasokywa mfyoova finiini. Vakapooka immbia kwi umwi umwi, ‘A ndesa ni yeny Nndumi?’ ²³ Nawe kavavia, ‘Yeto loolota nawe maako marama efo kideeveny mmbwe asheshiriingyaa. ²⁴ Kya Mwana yeto wa nndu yeenda mmbo asheendaa shaasa kyikee kireiye kyakwe. Indi nndu yeto Mwana wa nndu asheriinngyaa mmbwe, oshiny lwakwe!’ Nndu yeto kyakwe mmbo kyekee kisha kwee eraa nalairwa! ²⁵ Naasa Yuda yeto mwiinndiinngya kaamba, ‘A ndesa ni yeny-ro llori?’ Nawe kammbia, ‘Kwankyaamba kumuni!’ “ ²⁶ Naasa elyi veefo valyaa Yesu kaipoo nkate. Kaarafuma Iruva. Kaufisha-fisha fyenga. Kaavya valya vakiloshyony kyakwe kaamba, “Nngeny, lyeny! Yeu ni mwiili wakwa.” ²⁷ Kaveipoo na upata kaana Iruva. Kavaniingya kaamba, “Niny-fo moose!” ²⁸ Yei ni samu yakwa yeevika nkundanu, iifoo ishiiritwaa kimaruma kya vandu veengyi vakooye ifwaayo ngyulyamari. ²⁹ Indi yeny shamuviany, “Kyipookya ulaalu nshishekinaa-se ekyo kyavikwa ni nsabibu-fo, na shifike nkonu yeto shana lya wuiya ando amwi neeni efo umangyi ny lwa Nde-yaakwa.” ³⁰ Naasa elyi vamiimba fiimbo vakakwiipoo. Vakaenda kulya ifumbuny lya miri ya mafura. ³¹ Nalyo Yesu kavavia, “Kio yekyi kyeni moose mushesukyoo ni yeny! Kimmba kyikee kyireiye kyeamba, ‘Nshekapaa mwiisi na ironda lya mburu lyindenyanyaka.’ ³² Indi elyi numa shammaa iruka nshemusongoyaa indefika kulya Galilaya. ³³ Petro kaallwa kaamba, ‘Naakwa woose vasukyo ni yewe, yeny nta nshishesukyoo-fo.’ ³⁴ Yesu kammbia, ‘Nkya dede shakuvia, kio yekyi kyeni kulaore nguku yankapa kukooyaa kwanshikana kararu.’ ³⁵ Petro kammbia, ‘Naakwa shalollya kuti shifwe shisandwa neewe, nshishekukanaa-fo. Na valya vakiloshyony vengyi vakaveamba indo woose.’ “ ³⁶ Nalyo Yesu keenda aryani nawo. Kafika ando ukee nnda uvaangwaa Getsemane. Kavia valya vakiloshyony vakwe, “Kaeny yaa sheende alya indeterevyau Iruva.” ³⁷ Kakamara Petro na vana valya va Sebedayo vavii. Kapooka isokyo mfyoova na yeereve. ³⁸ Nalyo kavavia, “Nrima wakwa wiifo usokywaa mfyoova deny, wafika kufii na ifwa. Kaeny yaa mulale shoovi neeny.” ³⁹ Kaenda mbee kinnywa. Kawa si na kisangu katereva Iruva kaamba, “Woi Nde, kwakooya kikuviiyaa, upata yelu lushiire shire shilaluna! Indi kilave shaasa shikundye yeny-fo, kiveva shaasa kukunndye yewe!” ⁴⁰ Naasa kasha na alya vakiloshyony vakai, kakooya valele rony. Kavia Petro, “A niinda, nta mulashiidimaa ilala shoovi neeny ando a saa imwi nsi? ⁴¹ Kyelaleny shoovi mwiterevaa mulakooye iira kyeesyony! Nrima to ulangye indi mwiili ukava mfwafwa.” ⁴² Kaenda lyingyi lya kavii, kandetereva. Kaamba, “Woi Nde-yaakwa, kwakooya kivaa upata yelu lushiire shire shilaluna, lyo kikuviiyeny shaasa kwankunda!” ⁴³ Kasha nang’u lyingyi, kakooya velele rony. Mashika miso awo akee marovye nrwe. ⁴⁴ Naasa kavara-u, keenda lyingyi katereva lya kararu. Kaamba marero alya meni. ⁴⁵ Nalyo kasha na yoo vakiloshyony vakwe vakai, kavavia, “A niindo mwalunga ilala na iimuya! Llen-te kyeeri kyamfika, na Mwana yeto wa nndu eefo anderambikywaa maakony a vandu valyamari. ⁴⁶ Kwiipony-te, lweende. Akakato yeto mwiishiriingyaa amaafukya!” ⁴⁷ Na elyi eefo areraa indo, Yuda kasha nang’u, akee umwi wa valya ikumi na vavii, aryani na nsemu mwiingyi wa vandu varie ngyusu na mariinga vauka kwa vakohani vaniini na masiingo a vandu. ⁴⁸ Na nndiingyi yeu eevavikye kiring’isyo kavavia, “Nndu yeto nshemmimindaa mmbwe mushentiraa!” ⁴⁹ Nalyo yeni kafika yoo Yesu akai, kaamba, “Shakwiidikira llori! Kammiminda.” ⁵⁰ Naasa Yesu kammbia, “Mbuya yakwa kyakweende na yaa nkyokyi?” Nalyo vakaserikya na yoo akai, vakaleesya Yesu maako vakantira. ⁵¹ Nalyo akakau umwi wa valya vavandami na Yesu kaorwa woko, kasommwa usu lwakwe, kamanya nalo ishinga lilya lya nkohani ulya nniini, kammaswa kuri. ⁵² Nalyo Yesu kammbia, “Viira usu efo kipony kya vayo. Kimmba yewo vamiipoo usu, ni usu lushevaretaa. ⁵³ A mmbo shilashiidimaa ifuuya Nde-yaakwa, nawe nashirikye vasu va efo iruveeu maronda ikumi na avii na kilanya?” ⁵⁴ A efyo fikee fireiye fyeamba, “Mmbo kyikee kirummbwe kyeende indo, mmbo fyeeshiinukyaa indaany?” ⁵⁵ Naasa kyeeri kilya kyeni Yesu kavia nsemu ulya wa vandu, “Mmbo mwooka kyeny mukasheshisheya sheelyi nkee mwaala shia, murie ngyusu, na mariinga musheshitira. A kyera shekee rembo ando amwi neeni mikonu myoose shiloshaa efo mmba ya Iruva, neeni mulashitire! ⁵⁶ Indi kimaruma kyikaenda indo, ni kilya kyikee kyireiye ni veawuya fisuku, naambo kyikooye iinukya-u.” " Nalyo valya vakiloshyony vakanreeya vakarisha. ⁵⁷ Naasa valya vatira Yesu vakandenrwaa kulya kwa nkohani ulya nniini we Kayafa. Nafo mfo kweekuumbye-fo veelosha mavavaso na masiingo a uruka. ⁵⁸ Naasa Petro eefo allatyaa yoo numa akee kyikwaasha. Kalava ifika mmba ilya shaakare ya nkohani ulya nniini kaanga nafo, kakaa-fo rembo kasanga na vasero valya va poo nakooye ilola shaasa kivaa. " ⁵⁹ Naasa, vakohani valya vaniini vasasangyi na ikwaanu lilya iniini lya masiingo a uruka, vakava varuuyaa ukureekyi lwa wongo naambo vakooye iwaa Yesu, ⁶⁰ nta valaonise, lla ndesa vakureekyi va wongo valesha nang’u veengyi. Elyi lyeefurummya vakasha nang’u vavii. ⁶¹ Vakaamba, “Nndu yeu aleamba vai, ‘Nshiidimaa isammbwa mmba ya Iruva ando a mikonu iraru shiitani lyingyi shimaa.’ ⁶² Kyasia nkohani ulya nniini kasalala-u kammbia, ‘A nkushaambaa nta kindo kyeerouwa ukureekyi lwa yewo vavika lweekukumba?’ “ ⁶³ Indi Yesu kamalallya sau. Nkohani ulya nniini kaallwa kammbia, “Nkulyisaany mboo, ‘Swa Iruva muni muu kuluvie kwakooya yewe ni Kristo kukee Mwana wa Iruva.’ “ ⁶⁴ Yesu kammbia, “Kwankyaamba kumuni. Indi shamuvia, ‘Kupookya ulaalu mushelollyaa Mwana yeto wa nndu akee rembo yoo woko usha lwa Muni itumbe na isha navesha ariwa mmafishi a efo nginiiu.’ ⁶⁵ Nalyo nkohani ulya nniini karanndwa soori takwe ta yeerya. Kaamba, ‘Akakyo anruma Iruva nyira!’ A ekyo lusiiyaa vakureekyi vengyi nkyeekyi-se? Mmbo mwiitye ulaalu aruma Iruva.” ⁶⁶ A mwarummbwa inda? Nawo vakaallwa vakaamba, “Kindo kinsumanyi ni iwaawa.” ⁶⁷ Nalyo vakamwiisellye minyiiri efo kisanguny. Vakankapa na ng’unde. Vengyi vakankapa na mbiiri. ⁶⁸ Vakaamba, “Lwaauye kisuku-te Kristo, yeto akukapa mmbi?” ⁶⁹ Naasa Petro ekee rembo efo poo ya mmba ilya shaakare, nka kishinga kasha na yoo akai, kaamba, “Na yewe-da kweekee na Yesu yeto wa kulya Galilaya! ⁷⁰ Nawe kalema-fushu mbee yaawo woose, kaamba, ‘Nshamanya ekyo kwaamba-fo.’ “ ⁷¹ Kakwiipoo-fo kafika yoo ngiriny. Nka kyishinga ungyi kallollya kavia valya, “Yeu avekee nndu umwi na Yesu yeto wa kulya Nasareti. ⁷² Nawe kalema-fushu lyingyi eelyaa mboo kaamba, ‘Nshiishi nndu yeu-fo.’ “ ⁷³ Kairisha kinnywa, valya vasalali-fo vakasha na kufii. Vakavia Petro, “N-dede-da naakwa nnyewe kukee nndu waawo, ni mirerye yafo yakwaamba.” ⁷⁴ Nalyo Petro kakudenga we muni na ilya mboo eshaambaa, “Nshiishi nndu yeu-fo!” Nalyo nguku ikakapa. ⁷⁵ Naasa Petro kakummbwa kirero kilya Yesu alemmbia, “Kulaore nguku yankapa kukooyaa kwanshikana kararu.” Kasomuka na mbengyeny kaiya kyuumu nnu.

¹ Naasa elyi kwamfika ikya Vakohani vaniini woose vasasangyi na masingo a vandu vakafisha kyama kikee kya kisuuya naambo vakooye iwaa Yesu. ² Vakankamara vandenrambikya kwa nshilyi ulya wa Kaisari, we Pilato. ³ Nalyo Yuda ulya alenndiingya elyi allolya Yesu ameekerywa uvingo lweewaawa nawe kakuria. Kaipoo misasarwe ilya ya fesa makumi araru kandeiviirya Vakohani valya vaniini na masiingo a vandu. ⁴ Kaamba, “Mmbo shiletana ukasha elyi shariinngya samu ilatiri kiteve.” Nawo vakaamba, “A mmbo kiluwore-kyi yese? Lola kyafo kumuni!” ⁵ Nawe kandeera misasarwe ilya ya fesa kulya mmba ya Iruva. Kawara shia, kandekuvanika. ⁶ Naasa vakohani vaniini vakaipoo misasarwe ilya ya fesa, vakaamba, “Nkwiifo mumu wa iivika efo mbolokony ya mmba ya Iruva-fo, kimmba ni wuuru lwa samu.” ⁷ Naasa vakafisha shila vakaura nayo irema lya uteri lwa muumba nungu lyive ando eerika veny. ⁸ Nkyo kimaruma irema lilya lyikavaangwa ni irema lya samu kufike inu. ⁹ Nalyo kilya kyikee kirere na kana ka nkisuku ulya Yeremia kikakooya iinukya-u kyeamba, “Na yeny shileipoo misasarwe ilya makumi araru ya fesa, ni wuuru lwa nndu alererywa wuuru, yeto vana va Israeli valenrerya wuuru. ¹⁰ Shaivika yeeura irema lilya lya uteeri lwa muumba nungu, shatana shaasa Nndumi avavasye.” ¹¹ Naasa Yesu kandeseleeswa mbee ya nshilyi ulya wa Kaisari. Nshilyi wa Kaisari kammbesa kaamba, “Yewe mmbo kukee mangyi ya Vayuda?” Na Yesu kaamba, “Kwankyaamba kumuni.” ¹² Na elyi eefo akumbwaa ni Vakohani vaniini na masiingo a vandu, nta nalarouwe kindo. ¹³ Nalyo Pilato kammbia, “A mmbo kulaitye efyo vakureeka-u fyeekuutya uvingo shaasa fifye?” ¹⁴ Nawe nta nalarouwe nta kyimwi ammbesa. Nshilyi ulya wa Kaisari katana afulukywa deny. ¹⁵ Naasa elyi lya nkonu nniini nshilyi ulya wa Kaisari eishivie iporomuya vandu nndu mfinge umwi ulya vankunda. ¹⁶ Naasa meendi alya alekooya atiri nndu mfinge umwi aenngye usutu avaangwaa Baraba. ¹⁷ Naasa elyi vakuummbye-u indo nkuka Pilato kavavia, “A nndu mwankunda shimuporomuye ni ungau ndesa, ni Baraba ao ni Yesu yeto avaangwa ni Kristo?” ¹⁸ Nyelyi aishi kyavaniinga vakankumba ni kyinying’u. ¹⁹ Naasa elyi akee rembo yoo kitiminy kya ushilyi, nalyo nka wakwe kanrummya nrumi. Kammbia, “Kulasange mbony ta nndu yeu wa usumanu! Mmbo shilelya ukiva wiingyi kimaruma kyakwe nshooryaa kyio kya inu.” ²⁰ Naasa Vakohani valya vaniini vasasangyi na masiingo a uruka vakaaya vandu valya vakuummbye-u nkuka, naambo vakunde Baraba, na Yesu nawaawa. ²¹ Naasa nshilyi ulya wa Kaisari kaallwa kavavia, “A yeva vavii ni ungau mukunndye shimuporomuye-u ndesa? Nawo vakaamba, N Baraba.” ²² Pilato kavavia, “A shatana inda na Yesu yeu avaangwa ni Kristo?” Woose vakaamba, “Nandekapywa nsalabeny!” ²³ Naasa kaamba, A ukasha alelutana llo kyi-ro? Nawo vakakapa kisengelele na kamwi, vakaamba, “Nandekapywa nsalabeny!” ²⁴ Naasa Pilato kalollya kulaifo kindo kyikyivaa, kyoorongye kyilya kyikaenda kyiing’anaa tupu. Kawarya mura kasangya maako yoo kisanguny kya vandu valya vakuummbye-u mamwiingyi. Kaamba, “Loleny yeny nshitiri ukasha na samu ya nndu yeu-fo. Loleny yeni muveni!” ²⁵ Na vandu vakaallwa woose vakaamba, “Samu yakwe iluwuiye yese na vana veru!” " ²⁶ Nalyo kavaporomuya Baraba. Na Yesu kanrambikya-u nandekapo na ngova numa nandekapyony nsalabeny. ²⁷ Nalyo vasikari va nshilyi ulya wa Kaisari vakakamara Yesu. Vakanrwaa mmba ya ushilyi. Vakaende nang’u siri shoose ya vasikari. Ikasha inkuummbya. ²⁸ Vakamuuta soori takwe muni vakammbika soori ifwani nsoru. ²⁹ Vakaoka ureto lwa miinga vakammbika nrueny. Vakanniinngya irere efo wokony lwakwe usha. Vakafiiryandi vakanteenda, vakaamba, " “Lwakwiidikira mangyi ya Vayuda!” ³⁰ Vakamwiisellye minyiiri. Vakawarya irere lilya vakankapa nalyo nrwe. " ³¹ Na elyi vammaa inteenda indo vakamuuta soori ilya vakawuya immbika soori tilya takwe muni, vakankamara nandekapyo nsalabeu. ³² Naasa elyi vankwiipoo veefo vasheendaa, vakakooya nndu wa Krene avaangwaa Simion, vakamwiitikya nantare nsalaba ulya wakwe. ³³ Vakafika ando avaangwaa ni Golgota, kyikee sheelyi kyaambawa, “Nkisharongony.” ³⁴ Vakanniinga mfinyo ukee nsande na nri weenangisa. Ashosha nalakunde ina." ³⁵ Naasa vakankapya nsalabeu. Vakaavana soori takwe veetikapyaa kura. ³⁶ Vakakaa-fo rembo vakanringa. ³⁷ Na yoo nrweny wakwe vakavika ngumbwa ikee shireiye ule, “YEU MMBWE YESU MANGYI YA VAYUDA.” ³⁸ Nalyo veala shia vavii vakakapyo nsalabeny vakasandwa nawe. Umwi kavikwa woko usha na ungyi woko umuso. ³⁹ Naasa valya vairau vakanruma, vesisikaa mirwe, ⁴⁰ vakaamba, “Yewe mwiwundwa mmba ya Iruva ando a mikonu iraru kuwuye iitana lyingyi, nkyekukyireeny kumuni, kwakooya mmbo kukee mwana wa Iruva! Kuveolokany nsalabeny!” ⁴¹ Na Vakohani valya vaniini vakaventeenda kiwo vasasangyi na veelosha mavavaso na masiingo a vandu. ⁴² Vakaamba, “A elyi alekyira vengyi, nalaidimi ikukyira we muni! Mmbo akee mangyi ya Israeli, noolokeny nsalabeny ulaalu indi, neese lumwiirikye! ⁴³ Mmbo akusirye na Iruva, naasa we namwaauweeny kwakooya ankunndye. Kyimmba aleamba mmbo akee mwana wa Iruva.” " ⁴⁴ Naasa na valya veala shia vakapyo nsalabeny ando amwi nawe, nawo-da vakavemmina. ⁴⁵ Naasa uruka loose lukawoywa ni ireema kupookya saa irindaru kukafika saa keenda. ⁴⁶ Naasa elyi kwamfika saa keenda Yesu koonisa unyanga waasha kaamba, " “Eli, Eli lama sabaktani.” Nakyo kyikee sheelyi kyaambawa, “Woi Iruva wakwa, Woi Iruva wakwa, nkyikyi elyi kwashira?” ⁴⁷ Naasa vandu vasalali-u maata vaita indo vakaamba, “Nndu yeu mmbo avaanga Elia.” ⁴⁸ Nalyo yeni umwi waawo kanderisha, kandeende kivikaa mura, kakyiishura mfinyo utarang’aa. Kavika irereeny, kanrita. ⁴⁹ Naasa valya vengyi vakaamba, “Ra lulole kwakooya Elia ashaa imwaauwa-u.” ⁵⁰ Naasa Yesu kafua lyingyi na unyanga uniini kakumba muu. ⁵¹ Nalyo akakalyo isullya lyilya lyaavanisye mmba ya Iruva lyikavambuka nnang’ani kavii lyipookya yo si lyikavambukya uwe. Na uruka lukarerema. Na ngereko ta mawe tikaparika-parika. ⁵² Na mbanga ta vafu tikarwika, minying’a miingyi ikaruka ya vandu veele. ⁵³ Vakaruka vauka efo mbangeny, na elyi numa we ammaa iruka vakafika kulya muriny mweele, vakakoora na vandu veengyi. ⁵⁴ Naasa nshilyi ulya wa vasikari na valya akee nawo veeringaa Yesu, elyi valollya kidinasi kilya na filya fyautika fyoose vakatirwa mmbweerei wiingyi. Vakaamba, “Nkya dede yeu mmbo ekee mwana wa Iruva.” ⁵⁵ Naasa kweefo na vaka veengyi velolaa vekee kikwaasha. Nawo mmbo valya valelatya Yesu vauka kulya Galilaya vemfurukanyaa. ⁵⁶ Na efo nnang’ani yaawo kusangyi-fo Maria Magdala na Maria ulya akee maye wa Yakobo na Yosefu, na maye wa vana valya va Sebedayo. ⁵⁷ Naasa elyi kwiifo kushiilaa kukasha nafo nndu isimba wa kulya Arimataya, avaangwaa Yosefu. Nawe muni avealukye Yesu kava nndu wa kiloshyony kyakwe. ⁵⁸ We kafika kulya kwa Pilato kantereva nnying’a ulya wa Yesu. Nalyo Pilato kavavasya nandeniingywa. ⁵⁹ Na Yosefu kaipoo nnying’a ulya kawoososya sooriny shaa pyai. ⁶⁰ Kandewaara mbangeny yakwe shiiya adoshye efo iweny. Kapirimitya iwe iniini yoo mwaangony wa mbanga ilya, kakweengya. ⁶¹ Naasa na Maria Magdala mfo kundo eekai, na Maria ulya ungyi vakakaa rembo yoo usumanu na mbanga ilya. ⁶² Naasa elyi lya ndesi ukee nkonu ulatye nkonu weekudeesya llyo Vakohani valya vaniini vakandekuummbya kulya kwa Pilato varyani na Vafarisayo. ⁶³ Vakaamba, “Ale Nndumi! Lwawuya ikummbwa kyilya llembi ulya alerera ekee na muu eeshaambaa, kushiiraa-u mikonu iraru shirukeny.” ⁶⁴ Naasa vavasyany mbanga yeyo indevikywa kiringisyo kufike nkonu yeto wa kararu naambo yewo vakiloshyony kyakwe valashe nau vamwiive-fo, vandeviany vandu, “Annduka auka kwa vafu, na ulembi yelo lweefurummya luilanyi lulya lwa mbee.” ⁶⁵ Pilato kavavia, “Varingyi vawonikaa. Kweengyeny munderinga shaasa mwaidima.” ⁶⁶ Naasa vakakweengya vakandevikya mbanga ilya uringyi vevikaa iwe lilya kiring’isyo kyawo na varingyi valya vakakaa-u.

¹ Naasa elyi nkonu ulya wa Sabato wamiira kwiifo kwikyaa elyi lya nkonu yeto wa mbee wa mfungare, llyo Maria wa kulya Magdala kaenda aryani na Maria ulya ungyi, vandelola mbanga ilya. ² Nalyo akakakyo kidinasi kikaira kiniini. Nyeeli nsu ulya wa Nndumi aoloka auka iruveeu. Kasha nang’u, kakunnya iwe lilya mbai kalyikaya. ³ Na fwana yakwe ikee shaa pyai sha kimwii kya iruveeu na soori yakwe ikamika paa sha laura ya kulya kyaamwi. ⁴ Na kimaruma kya imwiiryaa varingyi valya vakava sheelyi vamfwa. ⁵ Naasa nsu ulya wa Iruva kaallwa kavia vaka valya, “Nta mulairyee yeni-fo! Mmbo shammanya mmbo mwiifo musiaa Yesu yeto alekapyo nsalabeny.” ⁶ Nnakyikee-se yaa-fo, mashika annduka, shaasa aleamba. Oshony na yaa-te, mushelola ando ekee mwaare. ⁷ Na yeni endeny na ngeta, mundevia valya vakyiloshyony vakwe, mmbo annduka. Nawe llen-te ashemwiiryaa mbee indefika kulya Galilaya, mfo kundo mushellollyaa. Akakakyo shamuvia. ⁸ Nawo kyaangu naakyo vakakwiipoo vauka alya mbangeny vatirwa mmbweerei vakasanda na nsia. Vakarisha pyany vandekyoongoya valya vakiloshyony vakwe. ⁹ Nalyo akakau Yesu ansha ikwaananya nawo efo shia. Kaamba, “Kaeny na ufoo vama mmbee!” Naasa vakaenda na yoo akai, vakallyingillya marende vakamoolokya na fisangu. ¹⁰ Nalyo Yesu kavavia, “Nta mulairyae-fo! Endevieny vanavama wakwa vafike kulya Galilaya. Mfo kundo vasheshilollyaa.” ¹¹ Naasa elyi varie shia yeenda, akakawo varingyi valya maata vankwiipoo, vakaenda kulya muriny. Vakandevia vakohani valya vaniini mbony tilya tautika toose. ¹² Nawo vakakuumbya ando amwi na masiingo alya a uruka. Vakafisha kyama vakaniinngya vasikari valya fesa shiingyi, ¹³ vakaamba, “Ambeny, ‘Valya vakiloshyony vakwe mmbo valesha kyio, vakamwiiva-fo lwiilele rony.’ ¹⁴ Na kwakooya kindo ekyi kyandeitiwa kwa nshilyi wa Kaisari, neese lushemfweera-fweeraa lumuute mwaandu.” " ¹⁵ Naasa vakawarya fesa tilya. Vakatana shaasa valefundwa. Na kirero ekyo kyikakwaana kulya kwa Vayuda kyikafika inu. ¹⁶ Naasa valya vakiloshyony ikumi na umwi vakaenda kulya Galilaya vakafika alya ifumbu-u kundo Yesu evavavasya. ¹⁷ Vakallolya vakamoolokya na fisangu. Indi kukavekaa-fo na vetirwa nnyinyira. ¹⁸ Na Yesu kasha na yoo vakai, karera nawo. Kavavia, " “Shanniinngyo ushilyi loose lwa efo iruveeu na lwa kunu urukeny. ¹⁹ Kyasia endeny mundeallwa vandu va masanga moose vave vakiloshyony vakwa mwiivabatisyaa irina lya Nde na lya Mwana na lya Mumuyo Mweele. Muvevalosha varinge efyo shilemuvavasya fyoose. ²⁰ Na yeni manyiny-te, nkaa neeni mikonu myoose kufike yoo masiiyony a ulana.”