LUKA

LUKA

¹ Ni veengyi veefo valeipoo maako vandevika mbony ta Yesu ando amwi, tyeende ntere, yeto ta findo fileutika kunu kweru, ² shaasa lulefityo ni vandu valya valellollya irero yelyo na miso awo wo veni kumya yoo mapookyony a vayo, na ilyirundya. ³ Kimmba ni indo, na yeny shavelollya ni kisha shiiduve mbele mbony yeto udongo kipookya yoo mapookyony a vayo shitisununde nisha, shikwekye-ny itireiya Teofilo wakwa nsuri. ⁴ Naambo kukooye imanya mbony yeto kuleloshwa mmbo titiri ukureekyi lwa vayo. ⁵ Naasa meendi alya Herode akee mangyi ya kulya Yudaya kweefo nndu nkohani evaangwa Sakaria akee wa ufyari lwa Abia. Erie nka wa efo vefuny va Aron, na irina lyakwe ni Elisabeti. ⁶ Nawo vee vavii vekee vandu va usumanu efo usanguny lwa Iruva; veevallya na mavavaso moose a Nndumi na ngyufundo takwe valatiri nta mbese. ⁷ Nawo mmbetiri mwana-fo mashika Elisabeti ekee nka kyuumba nawo vee vavii vemmikwa deny. ⁸ Naasa Sakaria eefo arundaa mashora akwe a ukohani efo kisanguny kya Iruva kikwaani na ikamba lyakwe lya irunda. ⁹ Naasa na vakohani veeshivye ikapa kura, nalyo kawuiyo ni kura nandeanga neefo mmba ya Nndumi nandekora ubani. ¹⁰ Na vandu vakuumbye-u mamwiingyi moose veefo vaterevaa efo poo kyeeri ekyo ubani lwakorwa. ¹¹ Naasa nsu wa Nndumi kasha ikoora nawe asalalyi yoo woko usha lwa mesa eekorya ubani. ¹² Sakaria kallollya kaising’ang’a kawoywa mmbwerei. ¹³ Naasa nsu ulya wa Iruva kammbia, “Nta kulairyee-fo Sakaria! Kimmba kiterewo kyafo kyammirikywa, na nka wafo Elisabeti akaa nakwiirye mwana wa womi. Neewe kushemfishya irina lyakwe ni Yohane. ¹⁴ Nawe ashekuniinga ifura na ikyesa, neelyi awonikaa veengyi vashuuta-u nsia. ¹⁵ Mashika akaa nave nniini yoo kisanguny kya Nndumi, nta nalashenaa mfinyo nta kindo kinangaa, na kipookyaa elyi awonikaa naveva nndu aishwe Mumuyo Mweele. ¹⁶ Na vana va Israeli veengyi ashevaviiraa vawuye yaalukya Nndumi Iruva waawo. ¹⁷ Nawe muni ashemwiiryaa mbee akee na Mumuyo wa Elia na finya yakwe nandealwa ngoo ta vandeye va vandu tiwuye yaalukya vana vawo, na yewo vatiri kiila navevaalwa vakooye itira makusaro a vandu va usumanu, naambo vakooye ideesya Nndumi vandu vakwe vakee vasongosye.” ¹⁸ Nalyo Sakaria kavia nsu ulya wa Iruva: “A kindo ekyo mmbo shikyimanyaa inda? Mashika yeny shammba mmiku, na nka wakwa ni nkyeku wa suku shiingi.” ¹⁹ Nalyo nsu ulya wa iruva kaallwa kammbia: “Yeny ni Gabrieli shisalalyi yoo kisanguny kya Iruva. Sharumwa shisherera neewe shivekufitya nrumi yeyo ya nsia. ²⁰ Neewe llate kushevaa mbimbi kulashiidimaa irera kufike nkonu yeto elyi kisheutikaa indo. Kimmba kwanra kulakusirya na marero yoo akwa. Nang’u ashiinukyaa elyi kyeeri kya vayo kyamfika.” ²¹ Naasa na vandu valya vakuumbye-fo vee-fo vavereyaa Sakaria. Vakatambiswa elyi akyeeywa indo efo mmba ya Iruva. ²² Naasa kasomuka na poo nta naleedimi irera nawo. Nawo vakamanya paa mmbo amwoorwa kindo efo mmba ya Iruva. Nawe kava avasinya-sinyaany. Kakaa akee mbimbi. ²³ Kikava elyi mikonu ya mashora akwe yansia alya a ukohani lwakwe, kakwiipoo keenda kyeny kwakwe. ²⁴ Naasa elyi numa ya mikonu ilya nka ulya wakwe, we Elisabeti kakufinga. Kandekusuruma efo kyeny ando a miiri iraanu. ²⁵ Kaamba, “Ni indo Nndumi aleshitannya mikonu yei annyisauwa, nashyuute nayo usutu lwakwa kunu vanduny.” ²⁶ Naasa elyi kwamfika mwiiri wa karindaru nsu ulya Gabrieli karumwa ni Iruva nandefika kulya muriny wa Galilaya uvangwaa Nasareti, ²⁷ kulya kwa mwana wa kyeny umwi akee mfinge ni nsero umwi avangwaa Yosefu, akee wa mmba ya Davidi. Na irina lya mwana ulya wa kyeny ni Maria. ²⁸ Nalyo nsu ulya wa Iruva kaanga na efo kwakwo kaamba, “Shakuidikira yewe kukee nkyiiye! Ni Nndumi akee neewe!” ²⁹ Naasa elyi eeta avio indo, kaising’ang’a. Kava aswaangyany kya kyiidikiro kyilya nkya ngata-kyi? ³⁰ Nalyo nsu ulya wa Iruva kammbia, “Nta kulairyee-fo Maria! Mmbo kwawona ikyiiyo efo kwa Iruva. ³¹ Neewe llate kushekufingaa kwiire mwana wa womi, na irina lyakwe kushemmbangaa Yesu. ³² Nawe akaa nave nniini navevaangwa ni Mwana wa yeto akee uve ya findo fyoose. Na Nndumi Iruva nanniinge kitima kya umangyi kya ndeye we Davidi. ³³ Nawe asheshillya mmba ya Yakobo nafike llung’anu na umangyi lwakwe lulakooyaa nta ando lwamanda-fo.” ³⁴ Naasa Maria kavia nsu ulya wa Iruva, “A kindo ekyo kyishutikaa inda elyi yeny shilaishi nta mmi?” ³⁵ Nsu ulya wa Iruva kaallwa kambia, “Ni Mumuyo Mweele ashekusokyaa na finya ya yeto akee uwe ya findo fyoose ishekukayaa. Nkyo kyaniinga ekyo kyeele kyishirwaa kyivaangwa ni ‘Mwana wa Iruva.’ ³⁶ Neewe llate, mfyari ulya wafo Elisabeti nawe-da avekufingye lya mwana wa womi lla ndesa akee nkuu. Na mwiiri yeu wakwe mbwa karindaru. Nawe alevaangwa kyuumba. ³⁷ Mashika efo kwa Iruva nkwiifo kindo kyilashiidimikaa-fo.” ³⁸ Naasa Maria kaamba, “Akakau yeny shikee kyishinga kya Nndumi, ekyo kyakwa kyivekuviiyany indo shaasa kwaamba.” " Naasa nsu ulya wa Iruva kakwiipoo keenda. ³⁹ Naasa Maria kawara shia mikonu ilya myeni. Kandefika kulya mafumbu-u na ngeta, kulya muri wa Yuda. ⁴⁰ Kasha yaanga neefo mmba kwa Sakaria. Kaidikira Elisabeti. ⁴¹ Kyikavaany elyi Elisabeti aita kyiidikiro kilya kya Maria, nalyo kimwana kilya kyikashonga efo nsangeny wa maye. Na Elisabeti kaishwa Mumuyo Mweele. ⁴² Kaonisa unyanga uniini kaamba, " “Yewe kulelimyo mbora nnang’ani ya vaka! Na ekyo kyeendwa ni nsanga wafo kyivekee kyilimyi mbora! ⁴³ Na kindo ekyo kyashukya na kwi, elyi shakusheyo ni maye wa Nndumi wakwa? ⁴⁴ Mashika elyi mangelele a kiidikiro kyafo aanga maarwiny akwa, nalyo kyimwana ekyo kikashonga kunu nsangen mbwakwa kiitirwa ni nsia. ⁴⁵ Na ngoma yewe kulekusirya-u, mashika ekyo kulevio kyuuka kwa Nndumi mmbo kyikaa kiutike indo.” ⁴⁶ Nalyo Maria kaamba, “Nrima wakwa wang’anisa Nndumi ⁴⁷ na ngoo yakwa ikakyesa kyimaruma kya Iruva akee nkira wakwa. ⁴⁸ Mashika elyi alelola ufwafwa lwa kyishinga kyakwe. Mashika kipookya ulaalu Marika moose asheshivia, ‘Ngoma ni yewe!’ ⁴⁹ Kimmba yeto Mwaafinya anshitanya findo finiini. Na irina lyakwe lyikava yeele. ⁵⁰ Kalunga isarya vandu marika na marika a yewo vamweereiye. ⁵¹ Kava mwiitana fya wiidimi na woko lwakwe Katarakanisa yewo vatiri kyiila efo makusarony a mirima yaawo. ⁵² Yewo valyimbye kavakuna efo fitiminy fyawo. Karosa yewo vafwafwa. ⁵³ Yewo vatirwa nshaa kavawutisa findo fya muye na yewo masimba kavasama vakeenda ruu, ⁵⁴ Kasheekya kyishinga kyakwe we Israeli. Nandekummbwa ivasarya. ⁵⁵ Ndesa alevia vande valya veru we Abrahamu na ufyari lwakwe kufike llung’anu.” " ⁵⁶ Naasa Maria kakaa na Elisabeti kafika ando a mikonu iraru. Kawuya na kulya kyeny kwakwe. ⁵⁷ Naasa Elisabeti kafita kyeeri kyakwe kya iira mwana. Kaira mwana wa womi." ⁵⁸ Nalyo vandu va nnyanu sanda na va ufyari lwakwe vakaita mmbo Nndumi allilya kyikang’ana. Vakasanga nawe vakafura. ⁵⁹ Kyikavaany elyi kwamfika nkonu wa nyanya vakasha nafo vanderina kimwana kilya. Vakakunda ikyifishya irina lya ndeye Sakaria. ⁶⁰ Nalyo maye karouwa kaamba, “Ode! Mmbo avaangwa Yohane!” ⁶¹ Nawo vakambia, “A elyi efo ufyariny lwafo kuleefo nndu avaangwaa irina elyi!” ⁶² Naasa vakasinnya ndeye kya immbesa irina akundye imfishya. ⁶³ Nawe kakunda ipoo lya ireiya. Kareiya-u kyeamba Irina lyakwe ni Yohane. Vakasongololo woose. ⁶⁴ Naasa kyaangu naakyo kana kakwe kakatambashuka kiwo na ulumi lwakwe. Karera ashaarafumaa Iruva. ⁶⁵ Nalyo valya vafiiti nawo nnyanuny vakawoywa mbweerei woose. Na mbony tilya toose tikaenda ikwaana kulya mafumbuny a Yudaya tikakwaana koose. ⁶⁶ Na valya vaita vakatisuruma efo ngoony tawo vakaamba, “A Mwana yeu mmbo akaa nave wa ngata ingai? Nyeli woko lwa Nndumi lunkaaye.” ⁶⁷ Na ndeye, we Sakaria kaishwa Mumuyo Mweele kaawuya kisuku kaamba, ⁶⁸ “Kundearafumwa Nndumi, we Iruva wa Israeli. Kimmba ansaiya vandu vakwe na ivawouwa. ⁶⁹ Kaluseleesya ngo ya ukiro lwa efo mmba ya nsero wakwe, we Davidi. ⁷⁰ Shaasa alerera na kana ka vakisuku valya vakwe veele kyipookya elyo mbee. ⁷¹ Kya iluniinga ikirwa misa eru na ilwauwa efo maakony a yewo valusuuye woose. ⁷² Natani indo kya isarya vande valya veru na ikummbwa nkundanu ulya wakwe mweele. ⁷³ Mboo ilya alelyiiya nde ulya weeru, we Abrahamu naluniinge, ⁷⁴ ando lushenndundyaa lulakitiri weerei lukee valete maakony a misa. ⁷⁵ Lukooye ikaafo lukee na uvaramu na usumanu efo kisanguny kyakwe fyeeri fyeru fyoose. ⁷⁶ Na yewe kyimwana kukaa kuvaangwa, ‘Nkisuku wa eto akee uwe ya findo fyoose,’ mashika kushiryaa Nndumi mbee efo kisanguny kyakwe kundesongosia shia takwe. ⁷⁷ Kya iniinga vandu vakwe urango usha, lweemanya shaasa vakooyaa ikirwa kyikee kyeefwaayo ngyulyamari tawo. ⁷⁸ Nnyelyi Iruva weeru avavyo mmuu kya ilulyilya. Nkyo kimaruma lukasheyo ni sa yuuka efo uuwe. ⁷⁹ Naambo ishevaiya yewo valele ireeminy na nruveny wa ufu. Nakooye yoorisa marende eru na efo shieny ya ufoo.” ⁸⁰ Naasa kimwana kyilya kyikaenda kyiing’ana-ng’anaa na yeengera itumaa efo nriminy. Nawe kandekaa kundo kwa kasa katana afika nkonu ulya alendekoora na Israeli paa.

¹ Naasa kikava fyeeri efyo ivavaso lyikauka kwa Kaisari Augusto ulana loose lweende ireiyo kya usanu. ² Na kireiyo kilya kyikava kya kyipooka llya meendi Kirenio aleshillya kulya Siria. ³ Nalyo vandu vakandereiyo woose, wo nndu na muriny kwakwe kundo aparikye. ⁴ Na Yosefu nawe kavekwiipoo auka kulya Galilaya kulya muriny wa Nasareti kaenda kulya Yudaya muriny wa Davidi uvaangwaa Betilehemu, nnyeli akee nndu wa efo ufyariny lwa Davidi, mfo ukuuny lwakwe. ⁵ Nandereiyo ando amwi na Maria tindi yakwe nawe akufingye. ⁶ Naasa kyikava elyi vakaa-fo kafika kyeeri kyakwe kya iira mwana. ⁷ Kaira mwana wakwe wa mbee kamfingya firami, kamwaara mundiny wa ng’umbe, nnyeli kulaore valeona mwaanya efo mmba ya veny. ⁸ Naasa kyuungony kilya kyeni kweefo veesi velele mbateny veshaala makamba a iringa ironda lyawo elyi kio. ⁹ Paripari vakasheyo ni nsu wa Nndumi na itumbe lya Nndumi lyikavamikya, vakaringityo ni sa riti. Vakairyaa nnu. ¹⁰ Nsu ulya wa Nndumi kavavia, “Nta mulairyaa-fo! Mashika akakau shiifo mmongoyaa Nrumi ya Nsia nayo ikaa ifike kwa vandu woose. ¹¹ Mashika mwamiiryo NKIRA inu mmbwe Kristo akee Nndumi efo muriny wa Davidi. ¹² Na wende shamoora; Mmbo mushekooya nkoku yeto akee mfingye firami akee mwaare mundiny wa ng’umbe.” ¹³ Nalyo pariparii kulya kwa nsu ulya wa Iruva kukasha ikuumbye-u nsemu mwiingyi nng’u matorito aefo iruveeu. Vakaarafuma Iruva vakaamba, ¹⁴ “Nnduma ulele Iruva efo kukee uuwe ya findo fyoose na kunu urukeny kukava na ufoo efo kwa vandu vakundikye.” ¹⁵ Nalyo kyikava elyi vasu valya va Iruva vankwiipoo kulya veesi valya vakai vaende Iruveu, nawo vakaumburana wo veni na veni, vakaamba, “Ndifony-te lweende lutani lwafika kulya Betilehemu, lundelola kindo ekyo kyatanyika ekyo Nndumi aloongoya.” ¹⁶ Vakaenda veerishaa vakakooya-fo Maria na Yosefu na nkoku ulya akee mwaare efo mundiny wa ng’umbe. ¹⁷ Naasa elyi vallolya vakandevambisa mbony eto valevio kya mwana ulya. ¹⁸ Na vandu vaita vakasongololo woose kya mbony tilya vavio ni veesi valya. ¹⁹ Na Maria kavika marero alya moose efo nriminy eeswongyaa. ²⁰ Na veesi valya vakawuya na kwawo veshiitikisaa Iruva na imwaarafuma kya findo fyoose valeeta vakavelolya indo-da shaasa valevio. ²¹ Na elyi mikonu yamfika nyanya llyo kyeeri kyakwe kyeenda irinwa, kafishywa irina lyakwe ni YESU, llyo alefishywa ni nsu ulya wa Iruva kyeeri kilya kulaore maye enkufinga. ²² Na elyi mikonu ya Yosefu na Maria yamiinana ya yeenda ikweeremuta kyikwaani na uvavaso lwa Mose vakandenrosa na kulya Yerusalemu, vandenserisya na efo kisanguny kya Nndumi. ²³ Shaasa kikee kireiye efo uvavasony lwa Nndumi kyeamba, “Wo kindo kyuumi kiruaa nsanga wa maye kuti kyivaangwa ni kindo kyeele kya Nndumi.” ²⁴ Vakatana na kyingi-se kyikee kyivavasye, ni indeniingya kiraso shaasa kyikee kirere efo uvavasony lwa Nndumi, nakyo ni mbeta ivii ao maana avii a mbeta ta mmba. ²⁵ Nalyo akakau nndu akee kulya Yerusalemu na irina lyakwe ni Simion. Nawe ni nndu wa usumanu mwiindya Iruva. Kaveva nndu avereyaa kiviiryaa Israeli muu akee nkaye ni Mumuyo Mweele. ²⁶ Nawe akee moore Mmumuyo Mweele kyembia nnashefwaa kulaore alolya mbele Kristo eto wa Nndumi-fo. ²⁷ Nalyo kasha na efo mmba ya Iruva aitikwa ni Mumuyo Mweele. Na elyi vamiku va kimwana kyilya Yesu veefo vamweende na efo mmba ya Iruva vashemmbutya shaasa kyikee mbuka ya uvavaso, ²⁸ kasha imbwarya na maako, kaarafuma Iruva kaamba, ²⁹ “Ulaalu shisamaany yeny kishinga kyafo Nndumi shikweengye na ufoo shaasa kuleamba. ³⁰ Kimmba miso akwa allolya ukiro lwafo, ³¹ yelo kudeesye usanguny lwa vandu va masanga moose. ³² Ukiro elu nsa iniingaa vandu va masanga vakooye irambuyo mbony tafo. Na vandu vafo va Israeli vavikwa itumbeny.” ³³ Na ndeye na maye vakava mmbo vatirwa ntamba veshiitaa kyilya kyarerwa kya mwana ulya. ³⁴ Na Simion kavavikya mbora kavia maye we Maria, “Yeu mmbo akee mmbike-u naambo va kunu Israeli veengyi vakooye iwa nawe na isalala nawe; naveva na wende lurerwa kya iipalwa. ³⁵ Na yewe usu lukaa lukwiire efo ngoony na makusaro a vandu veengyi naambo akooye imanyika paa.” ³⁶ Naasa kwiiyo na nndu nka mwauya kisuku we Anna akee mfu wa Fanueli wa efo ufyariny lwa Aseri. Nawe amaaye fyeeri fiingyi enkaa na mmi ando a myaaka mfungare uka ammalyikwa. ³⁷ Nawe ni nka wa ding’u, na kya ukuu lwakwe amaaye myaaka makumi nyanya na iina. Nawe nnyelakana efo mmba ya Iruva-fo, kava mwiindya Iruva ekootoyaa na itereva Iruva kio na nsanyiny. " ³⁸ Nalyo kyeeri kyilya kasha nang’u kaitikisa Iruva. Kandeongoya vandu mbony ta mwana ulya Yesu, valya veefo vaverayaa kufike elyi makiryony a Yerusalemu. ³⁹ Naasa elyi vammaa iinutya filya fyoose fikee fivavasye ni Nndumi vakawuya na kulya muriny kwawo kulya Nasareti. ⁴⁰ Na mwana ulya kaenda eng’anaa na itumaa eshishwaa urango usha, na iwona ikyiiyo efo kwa Iruva. " ⁴¹ Naasa vamiku vakwe veshendaa na kulya Yerusalemu wo mwaaka elyi kwamfika nkonu ulya nniini wa Pasaka. ⁴² Nawe ekifita myaaka ikumi na ivii, vakaveenda inderwa nafo, shaasa vandu vaishivye iindya nkonu ulya nniini. ⁴³ Naasa elyi vammawutya mikonu ilya miniini, varie shia yewuya na kyeny, mwana ulya Yesu karewa kulya Yerusalemu vamiku vakwe valeeshi. ⁴⁴ Vakakummbwa kulakooye akee na vandu va kyaaro. Vakaenda efo shia ando a nkonu umwi. Vakansia efo kwa vandu va ufyari, na efo kwa vandu vaishivani nawo. ⁴⁵ Nta valallolye, vakawuya na kulya Yerusalemu, vandensia-fo. ⁴⁶ Kukaira-u mikonu iraru, vakatana vankooya akee rembo efo nnang’ani ya velosha valya avaaranyaa na ivavesa mbony. ⁴⁷ Na valya veiyo vemmwaranyaa vakauma ng’any kya urango lwakwe na mbony tilya arouwa. ⁴⁸ Naasa elyi vallolya indo vakaising’ang’a. Na maye kammbia: Mwana-akwa nkyiki elyi kwalutannya indo? Lla-te ndoo na yeny lwakusia na ting’wa-dwa! ⁴⁹ Nawe kavavia: “A ekyo mwashisiiya nkyokyi? A mmbo mulaishi kundo kushisumanyi isinda ni efo kutiri findo fya Nde?” ⁵⁰ Nawo kyirero kyilya avavia nta valakimanyi. ⁵¹ Nawe kandeoloka nawo kasha na kulya Nasareti. Kava Mwana avatirye vio. ⁵² Na Yesu keengera irangwa na ing’ana na ikyiiyo efo kwa Iruva kasennya Iruva na vandu.

¹ Naasa mwaaka wekee wa ikumi na karaanu kipookya Kaisari ulya Tiberio antira uruka na Pontio Pilato ekee nshilyi nniini wa kulya Yudaya na Herode akee mangyi wa kulya Galilaya na Filipo we mwanamaye ekee mangyi wa kulya Iturea na uruka lwa Trakoniti, na Lisania akee mangyi ya kulya Abilene, ² meendi alya Anasi na Kayafa vekee Vakohani vaniini, llyo meendi kirero kya Iruva kilefika kulya kwa Yohane, we mwana wa Sakaria, ekee kulya kasa. ³ Nawe kandefika kulya urukeny lufiitani na Yordani loose, kava mwikapa-fo weele lwevia vandu kya ubatiso luryani na yaalashika efo nriminy, naambo vakooye ifwaaywa ngyulyamari tawo. ⁴ Kikaenda indo shaasa kikee kireiye efo kitabuny kitiri marero a nkisuku ulya Yesaya, nang’u akee ule, “Alu unyanga lwa nndu mwiikapa weele kundo kwa kasa ashaambaa, ‘Songosyeny shia ya Nndumi, muveorota na ngyushengye takwe. ⁵ Wo imungo lyiiyo lyishevovirwaa na wo ifumbu lyiiyo na wo kidooro fisholotwaa na si. Na efyo fikulemyi fiveva fyoorotu, na shia eto tikee malomi-lomi tiveva shirambalali. ⁶ Na woose vatiri mwiili valollye ukiro lwa Iruva.’ “ ⁷ Nalyo vandu vakava vemweengya mamwiingyi vandebatiswa mmbwe. Nawe kavavia, “Yeni luva ya shoka a ni vi alemusununndya shaasa muturunyaa unyafi elo lwa Iruva lukaa lukape vandu? ⁸ Naasa vikeny ndunda tisumani na nrima waalashikye! Nta mulapooke irera efo nriminy mwaambe, ‘Nde weeru luntiri ni Abrahamu!’ Mmbo shamuvia, Iruva kakunda ashiidimaa iparya Abrahamu vana navaute naakwa ni efo maweny! ⁹ Na kyaara kyammaa ivikwa sindeny ya miri. Naasa wo nri wiiyo ulavikaa ndunda shisha umanywaa na indeerwa murony.” ¹⁰ Nalyo vandu valya vakuumbye-fo vakammbesa vakaamba, A lukatanany inda? ¹¹ Nawe kaalwa kavavia, “Yeto akoyaa atiri soori ivii naniinge yeto nalatiri. Na yeto akoyaa atiri shoonga navetana kiwo.” ¹² Naasa vandu vadedemi vakasha nafo vashebatiswa. Vakammbia, “Llosha, a yese lukatana inda?” ¹³ Nawe kavavia, “Nta mulaengere isoka nndu kindo ngota ekyo kyikee kivavasye.” ¹⁴ Naasa vandu vasikari vakavemmbesa vakaamba, “A na yese lukatana inda?” Nawe kavavia, “Nta mulaafinyi nndu, nta mulakumbe nndu kya wongo. Mmbo mushekufuryaa na ekyo muniingwaa kya urundi lwany lwa kyaasikari.” ¹⁵ Naasa vandu va kulya urukeny woose veefo vavereyaa na ikusara-sara kya Yohane efo nriminy veshambaa kulakooye mmbwe muni akee Kristo. ¹⁶ Nalyo Yohane kaalwa kavavia, “Yeny ni mura shamubatisa nato. Indi kwiifo kushaa yeto mwaafinya ashiilannyi. Nawe nshammaa shiporomwi nta ukova lwa fyaaru fyakwe-fo. We mmbwe ashemubatisaa na Mumuyo Mweele na muro. ¹⁷ Nawe arie nndeeva na woko lwakwe nandeaiya efo muunguny wakwe kwiile peru. Na nganu eto natyaalye efo mbesheny yakwe, na muulu nandeuvivya murony ularumikaa.” " ¹⁸ Naasa kalungya-u na marero engyi-se meengyi eveetikaa ashoongoyaa vandu nrumi yeyo ya nsia. ¹⁹ Naasa mangyi ilya Herode kakooya areryo mmbwe kimaruma kya Herodia ekee nka wa mwanamaye na kimaruma kya makasha moose aletana. ²⁰ Na findo filya fyoose fya ngata yeyo keengerya-fo kingyi kanderaya Yohane kifingyony. ²¹ Naasa kyikava elyi vandu va kulya urukeny vaenda ibatiswa ni Yohane na Yesu kaveenda indebatiswa. Eefo atereva Iruva, kulya iruveeu kukarauka. ²² Na Mumuyo Mweele kansokya kashenkaya. Na fwana yakwe alesha afwanani na kindo kyuumbe kyikee na mwiili kyikee sha mbeta. Na unyanga lukavaanga luuka efo iruveeu lwishambaa, " “Yeu mmbwe mwana wakwa nkunde shisenywa mmbwe.” ²³ Na Yesu muni kava nndu wa myaaka makumi araru elyi alepooka ilosha vandu. Nawe aishiwa mmbo akee mwana wa Yosefu, we mwana wa Eli, ²⁴ we mwana wa Matati, we mwana wa Levi, we mwana wa Maliki, we mwana wa Yanai, we mwana wa Yosefu, ²⁵ we mwana wa Matatia, we mwana wa Amosi, we mwana wa Nahumu, we mwana wa Esili, we mwana wa Nagai, ²⁶ we mwana wa Maati, we mwana wa Matatia, we mwana wa Semei, we mwana wa Yosefu, we mwana wa Yuda, ²⁷ we mwana wa Yoana, we mwana wa Resa, we mwana wa Serubabeli, we mwana wa Salatieli, we mwana wa Neri, ²⁸ we mwana wa Maliki, we mwana wa Adi, we mwana wa Kosamu, we mwana wa Elmadamu, we mwana wa Eri, ²⁹ we mwana wa Yosua, we mwana wa Elieseri, we mwana wa Yorimu, we mwana wa Matati, we mwana wa Levi, ³⁰ we mwana wa Simion, we mwana wa Yuda, we mwana wa Yosefu, we mwana wa Yonamu, we mwana wa Eliakimu, ³¹ we mwana wa Melea, we mwana wa Mena, we mwana wa Matata, we mwana wa Natani, we mwana wa Davidi, ³² we mwana wa Isai, we mwana wa Obedi, we mwana wa Boas, we mwana wa Salmoni, we mwana wa Naasoni, ³³ we mwana wa Aminadabu, we mwana wa Aramu, we mwana wa Esrom, we mwana wa Faresi, we mwana wa Yuda, ³⁴ we mwana wa Yakobo, we mwana wa Isaki, we mwana wa Abrahamu, we mwana wa Tera, we mwana wa Nahori, ³⁵ we mwana wa Seruki, we mwana wa Ragau, we mwana wa Faleki, we mwana wa Eberi, we mwana wa Sala, ³⁶ we mwana wa Kaini, we mwana wa Arafaksadi, we mwana wa Semu, we mwana wa Noe, we mwana wa Lameki, ³⁷ we mwana wa Metusala, we mwana wa Enoki, we mwana wa Yaredi, we mwana wa Maleleeki, we mwana wa Kenani, ³⁸ we mwana wa Enoki, we mwana wa Seti, we mwana wa Adamu we mwana wa Iruva.

¹ Naasa Yesu kawuya yuuka kulya Yordani aishwe Mumuyo Mweele. Kanderawa ni Mumuyo wa Iruva neende kulya kasa. ² Kakaa-fo ando a mikonu makumi aana asheswaa ni yeto Nkumbi. Nawe mikonu ilya kasinda nalalye shoonga. Nalyo elyi yansia, katirwa nshaa. ³ Naasa yeto Nkumbi kashembia, “Kwakooya mmbo kukee mwana wa Iruva, via iwe elyi lyaaluke nkate!” ⁴ Yesu kanndouwa, “Mmbo kyikee kireiye kyeamba, ‘Kindo nndu akirya-u nakyo muu nshi shoonga tupu-fo.’ “ ⁵ Nalyo kandensaamisa ando a uuwe kamoora ngyumangyi ta ulana yelu toose sha ikafya lyimwi. ⁶ Nalyo yeto Nkumbi kambia, “Umangyi yelu sanda na usuri lwavayo nkuningaa yewe, mashika ni fyakwa shikee nniingye, neeny nshefikuniingyaa nndu shankunda. ⁷ Naasa neewe kwashoolokya sumbai yoo kisanguny kyakwa mmbo fishevaa fyafo fyoose.” ⁸ Na Yesu kaalwa kammbia, “Mmbo kyikee kireiye kyeamba, ‘Ni Nndumi wafo Iruva mmbwe kushemolokyaa si, nawe mmbwe muni kushemwindyaa.’ “ ⁹ Naasa kawuya inrwaa kulya Yerusalemu kansaleesa alya urorony lwa mmba ya Iruva. Kammbia, “Kwakooya mmbo kukee mwana wa Iruva, kilya si kwauka yaa kukai!” ¹⁰ Mmbo kyikee kireiye kyeamba, “Ashekuvavasyaa vasu vakwe va iruveeu mashika afo, vashekuringa kwaashuke. ¹¹ Nawo vashekukamaraa na mai, neewe kulasheekapa nta urende iwe-u.” ¹² Nalyo Yesu kaalwa kambia, “Mmbo kyikee kyaambe, ‘Nta kulaese Nndumi wafo Iruva!’ “ " ¹³ Nalyo yeto Nkumbi kakooya ammarisya fyeeso fyoose, Kammbuka, katevesa mbele. ¹⁴ Na Yesu kawuya na kulya Galilaya akee mmbikye finya ya Mumuyo wa Iruva. Na kyulaalu kyakwe kyikandekwaana na kulya urukeny lusengetye loose. ¹⁵ Nawe kava mwiilosha efo mmba tawo teterevya eerumishwaa mmbandu woose. " ¹⁶ Nalyo kasha na kulya Nasareti kundo alelelyo. Kandeanga na efo mmba yeeterevya elyi nkonu wa Sabato shaasa eshivye. Kasalala nandesomya vandu. ¹⁷ Kasheniingyo kitabu kya nkisuku ulya Yesaya. Kakyoororwa kakooya ando akee areiye u-le: ¹⁸ “Ni Mumuyo wa Nndumi ashikaye kimmba aleshaamba mafura shindeongoya vakiva nrumi ya Iruva ya nsia. Kashiruma shindekapya yewo vafinge weele lweelekeyo. Na yewo vafu miso vakooye ilola, indelotora yewo vaondore vave valeke, ¹⁹ indekapa weele lwa mwaaka wa Nndumi usennyi.” ²⁰ Nalyo kaososa kitabu kilya kaviirya yeto mwiifurukanya-fo. Kakaa rembo. Na vandu vakee efo mmba yeeterevya woose vakammbikya miso swaa. ²¹ Naasa kapooka ivavia, “Ekyo kyikee kireiye kyaamba indo, ni inu kyammiinukya kyikamwaanga maarwiny any.” ²² Nalyo vakandumisha woose vakasongololo kya marero alya asennyi indo auka efo kaniny kakwe. Vakaamba, “A yeu nshiwe mwana wa Yosefu?” ²³ Nawe kavavia, “Mmbo shiishi deny musheshiviaa, ‘Kukee mwaanga kukire kumuni! Findo lwiitye fyambutika kulya Kapernaumu kyevefitani na kunu kweru fyoose kunu muriny kwafo.’ “ ²⁴ Kawuya kaamba, “Ni kya dede shamuvia, nndu nkisuku mmbo ashiirikyoo koose kuutaa efo kundo alewonikya. ²⁵ Nkya dede shamuvia, kweefo vaka va ding’u veengyi kulya Israeli fyeeri filya fya Elia llya meendi efo iruveeu kuleraya ando a myaaka iraru na miiri irindaru, uruka lukatana lwawoywa nshaa shiniini nnu. ²⁶ Nta umwi waawo Elia alerumwa kwakwe-fo, kulaore ni kulya kwa nka ulya wa ding’u ekee kulya Sarepta kulya urukeny lwa Sidoni. ²⁷ Kukavekaa-fo vandu va ivave veengyi kulya Israeli meendi alya a nkisuku ulya Elisa. Nawo nta umwi waawo alewona yeeremutwa-fo kulaore ni Naemani, nawe ni nndu wa kulya Siria.” ²⁸ Nalyo valya vakee efo mmba yeeterevya elyi veeta arera indo vakatirwa ni unyafi woose. ²⁹ Vakakwiipoo vakankilyisa vakanfita kulya kwakulya ya muri wawo. Vakanrwaa alya ifumbu-u masasa, kulya kundo muri ulya wawo ukee ntannyi naambo vakooye imwoolota nang’u. ³⁰ Nawe kaira efo nnang’ani yaawo vyaa kakweengya. ³¹ Nalyo kandesoka na kulya Kapernaumu. Nato ni muri wa kulya Galilaya. Kava mwiivalosha elyi mikonu ya Sabato. ³² Nawo vakaising’ang’a kya miloshye yakwe, nyeli arera kyikee na ushilyi. ³³ Nalyo efo mmba yeeterevya eefo nndu atirwa mmumuyo wa utefusu. Nawe kafua na unyanga lwa finya. ³⁴ Kaamba, “Sha! Nkyiki kyeru na yewe Yesu wa Nasareti? Mmbo kusheye ilurumataro! Neeny shikwiishi yewe Yewe ni yeto Mweele wa Iruva!” ³⁵ Nalyo Yesu kankyeemya kaamba, “Malallya sau kummbuke!” Nalyo mumuyo ulya nkasha ukantuula si yoo nnang’ani yaawo ukammbuka, nta ulammanyi furu-fo. ³⁶ Vakatirwa ni mwising’ang’o woose, vakava vaumburanaany, vakaamba, “A kirero ekyo nkya ngata-kyi? Ate arera kikee na ushilyi na wiidimi kyevavasa mimuyo yeyo ya utefusu, nayo ikauka-fo.” " ³⁷ Nalyo mbony takwe tikaenda ikwaana kundo koose kulya urukeny lwa kufii. ³⁸ Naasa kasomuka efo mmba yeeterevya kandefika kulya mmba kwa Simion. Naasa mayaanka wa Simion etirwa mmuro mwiingi. Vakantereva naambo nanshiise. ³⁹ Nalyo kasha nang’u kakwiinyika yoo akai kakyeemmya muro ulya. Nato ukammbuka. Naasa kyaangu nakyo kakwiipoo kavafurukannyany. " ⁴⁰ Naasa elyi mwi wiifo ushoolokaa kakooya asheywa ni valya woose vatiri vandu valwee ndwari shive na shive, vakamweenngye. Nawe kaveekerya maako wo nndu umwi umwi shaasa veiyo kavakira. ⁴¹ Naasa veengyi vakookwa ni mimuyo mikasha, ikafua ishaambaa, “Yewe mmbwe Mwana wa Iruva!” Nawe kaikyeemya nta nalailekeye ikarera, kimmba imwiishi we mmbwe Kristo. ⁴² Naasa elyi kwankya kakwiipoo keenda kundo kulalelwa. Nalyo vandu valya vakuumbye-fo mamwiingyi vakava vannduya-ruyaany. Vakafika kulya akai. Vakakunda intira nalavauke-se. ⁴³ Nawe kavavia, “Kuti shindefika na miriny yeyo ingyi shindeongoya vandu nrumi ya nsia yeyo ya umangyi lwa Iruva, mashika nkyo kindo shilerummyo. ⁴⁴ Nalyo kava mwoongoya vandu mbony efo mmba tawo teeterevya ta kulya Galilaya.”

¹ Kyikava elyi vandu valya vakuumbye-fo veefo vansisiraa veshaaranyaa ndera ya Iruva, nawe asalalyi yoo mbai ya yeeve ilya ya Genesareti. ² Kalollya ngalava ivii tikee shiirikise yoo mbai ya yeeve ilya. Na valya veereiya makunga vambuka-fo veefo vasangyaa mireiyo yaawo ya nruu. ³ Naasa ngalava tilya kaalukya ilya imwi, nayo ikee ya Simion Petro. Kantereva naisembere yuuke yoo kwaarutu yeende neefo kimureny kinnywa. Kakaa-u rembo, kalosha. ⁴ Ammanda irera kavia Simion, “Enderwaa ngalava yeyo efo nnang’ani ya mura, moolote-fo mireiyo yaany mureiye makunga.” ⁵ Simion kaalwa kammbia, “Ale Ndumi! Lweelele rembo taa lwiivinaa, lulatire nta kindo. Indi kwammbika-u ulumi lwafo yewe, nsheendaa yoolota mireiyo yakwa efo mureny.” ⁶ Vakatana indo vakareiya kyilula kya makunga. Mireiyo ilya yaawo ikatana yasia iranduka. ⁷ Vakasinnya wooroye valya vawo vakee ngalaveny ilya ingyi, vashe ivatarama yaalutya wambeu. Vakavesha vakaishura ngalava tilya tiivii, tikatana takunda idovya na si. ⁸ Naasa Simion Petro alolya kive indo, kakutuula si yoo marendeny a Yesu, kaamba, “Nndumi uka yaa shikai, mashika shikee nndu llyamari.” ⁹ Nyeli asongololo na valya akee nawo woose kimaruma kya kilula kilya kya makunga vareiya. ¹⁰ Na vana valya va Sebedayo, we Yakobo na Yohane, wo ni kiwo da. Yesu kavia Simion, “Nta kulairyee! Uka ulaalu kushaalukaa mwireiya vandu.” " ¹¹ Vakanderwaa ngalava tilya alya kwaarutu, vakaisityo-u findo fyoose vakallatya. ¹² Nalyo kyikava elyi amfika muriny ilya umwi wa vayo, akakau nndu nsero asiiye ni ivave deny. Nawe alolya Yesu kamoolokya si kantereva kaamba, " “Woi Nndumi kwankunda kushiidimaa isheremuta.” ¹³ Nalyo kaorwa woko kampaana, kammbia, “Shankunda eremukany!” Nalyo yeni ivave llya lyikammbuka. ¹⁴ Nawe kammbavasa nalendekivya nndu. Kaamba, “Mmbo kusheendaa ikoora kulya kwa nkohani, kuvevika na kindo kyeniinga Iruva kya elyi kwammeeremuka, shaasa Mose avavasye kive nkyo ukureekyi lwa efo kwawo.” " ¹⁵ Naasa mbony yeto takwe tikeengera ikwaana. Na vandu vakava vekuumbya-u misemu miingyi vashe imwaaranya na ishiiswa ndwari tawo. ¹⁶ Nawe muni kandekoovisa kundo kulalelwa katerevya-fo Iruva. ¹⁷ Nalyo kyikava mikonu ilya elyi lyimwi eefo aloshaa, na Vafarisayo vakee-fo rembo vasangyi na veelosha mavavaso, nawo vasheye vauka wo kimuri kya kulya Galilaya na Yudaya na kulya Yerusalemu. Na wiidimi lwa Nndumi lwinkaye nakooye ishiisa vandu. " ¹⁸ Nalyo akakava vasoro vansha nang’u varie nndu na kitara akee muumu malungo. Vakasia mwaanya wemwiita na mmba na immbika yoo usumanu nawe. ¹⁹ Valaoni shia yemwiita nafo kimaruma kya nsemu ulya wa vandu vakuumbye-u. Vakasaama na efo mmbeeu. Matofari alya maale vakauta-fo maata, vakamwoolota nang’u ando amwi na kitara kyilya kafika si yoo Yesu akai. ²⁰ Nawe elyi allolya shaasa vakusirya-u indo, kaamba, “Nndu wakwa kwammefwaaywa ngyulyamari tafo!” ²¹ Nalyo veelosha va mavavaso veefo na Vafarisayo vakapooka itirwa mmakusaro vakaamba, “Ni nndu kyi yeu arera indo kyikee kya iruma Iruva?” Mmbi ashiidimaa ifwaaya vandu kya ngyulyamari tawo kuloore ni Iruva muni? ²² Naasa Yesu kamanya makusaro alya awo kaalwa kavavia, “A ekyo mukusarye efo nriminy ni kya ngata ingai? ²³ A kyaangu ni kyingakyi? Ndesa ni yaamba, ‘Kwammefwaaywa ngyulyamari tafo,’ ao ni yaamba, ‘Salala kurue-rue?’ ²⁴ Naasa manyin-te Mwana yeto wa nndu mmbo atiri mumu-da kunu urukeny wefwaaya vandu kya ngyulyamari tawo.” Naasa kavia nndu ulya muumu malungo, “Salala, kwepoo kitara kyafo, kweende na kyeny kwafo.” ²⁵ Na kyaangu naakyo kasalala velollye woose. Kakurika kitara, keenda kulya kyeny kwakwe esharafumaa Iruva. ²⁶ Na vandu vaiyo vakaising’ang’a woose, vakava vaarafumany Iruva. Vakatirwa mmbwerei. Vakaamba, “Inu lwalolya findo fya wende.” ²⁷ Nalyo ekyo kinsia kakwipoo-fo kalolya nndu n-dedemi, avaangwaa Levi, ekee rembo efo mmba yeededemya. Kammbia, “Shilatya!” ²⁸ Nawe keesityo-u fyoose, kakwipoo, kallatya. ²⁹ Nalyo Levi kavika suku-kuu niini, kukasha nafo nseemu mwiingyi wa vadedemi na vandu vengyi vasasangyi nawo. Vakakaa-fo rembo vakalya shoonga. ³⁰ Nalyo Vafarisayo vasangyi na veelosha mavavaso vakakunung’una veereraa na valya vakiloshyony vakwe vakaamba, “A kimaruma nkyikyi elyi mwalya na ina indo amwi na vadedemi yewo valyamari?” ³¹ Na Yesu kaallwa kavavia, “Nshi yewo vakee na finya vatinnyo mmwaanga-fo, ni yewo valwee. ³² Nta nshisheye ivaanga yewo va usumanu-fo, kulaore ni yewo valyamari naambo vakooye yaalashika efo nriminy.” ³³ Nawo vakammbia, “A elyi vakiloshyony kya Yohane vakootoyaa keengyi na ivika fiterewo, na vakiloshyony kya Vafarisayo vakavetana kiwo, indi yewo vafo wo valya na ina.” ³⁴ Naasa Yesu kavavia, “A mwaamba mushiidimaa iitikya vandu va walyi vakootoye elyi muni walyi akee nawo? ³⁵ Indi kwikaa kushe mikonu elyi vasokwaa muni walyi. Llyo kyeeri vashekootoyaany.” ³⁶ Naasa kaveera kyaaso ekyi. “Nkwiifo nndu asaara kirami efo sooriny shiiya kakifummya efo sooriny shikuu-fo. Kakyifummya-u mmbo asheniingaa na soori ilya shiiya iranduke. Na kirami ekyo kya efo sooriny shiiya nta nkyishiishivanaa na yeyo shikuu-fo. ³⁷ Nta nkwiifo nndu asuruma mfinyo mwiiya efo mbolokony ta masara makuu-fo. Kasuruma-fo mfinyo yeto mwiiya mmbo uriita mboloko yeto. Nato mweni upusuke, na mboloko nato tikavelyamarika. ³⁸ Indi mfinyo eto mwiiya kuti undesurumwa mbolokony shiiya. ³⁹ Nta nkwiifoo nndu ammaa ina mfinyo nkuu kakunda yeto mwiiya-fo. Mmbo ashambaa, yeto nkuu nto utiri muye.”

¹ Naasa kyikava elyi nkonu wa Sabato, eefo ashiraa mareminy a nganu, valya vakiloshyony vakaurushwa fyaa, vakasisa na maako vakalya. ² Naasa Vafarisayo valya maata vakaamba, “A nkyikyi elyi mwatana kindo kilatiri mumu weetana elyi lya Sabato?” ³ Nalyo Yesu kaalwa kavavia, “A mmbo mulandesomi shaasa Davidi aletana, llya eetirwa nshaa na valya aryani nawo? ⁴ Shaasa aleanga na efo mmba ya Iruva kaipoo mikate ilya ya kideesyo? Kalya kaniingya na valya aryani nawo. Nayo nnyetiri mumu weelyiwa ni nndu-fo, kuuta Vakohani veni.” ⁵ Nalyo kavavia, “Mwana yeto wa nndu mmbo akee Nndumi wa Sabato.” ⁶ Naasa kikaa elyi lya Sabato ingyi kaanga nee-fo mmba yaawo yeeterevya kaloshya-fo. Nafo kusheye nafo nndu, woko lwakwe usha lwekee ufiri. ⁷ Naasa vaarya valya va fitabu vasangyi na Vafarisayo veefo vallola kwakooya ashisaa nndu elyi lya Sabato, naambo vakooye inkumba. ⁸ Nawe eeshi makusaro awo, kavia nndu ulya wa woko ufiri, “Kwiipoo, kushe na yaa nnang’ani.” Kakwiipoo kashesalala-u. ⁹ Naasa Yesu kavavia, “Shamuvesany indi, ‘A kwiifo mumu weetanya nndu mesha elyi nkonu wa Sabato, ao niitana ukasha, ni ikira muu wa nndu ao ni yuureta?’ “ ¹⁰ Kavalola kavakwaanisa woose. Kavia nndu ulya. “Orwa woko lwafo!” Nawe katana indo, nalyo woko lwakwe lukawuya iva usha. ¹¹ Naasa nawo vakarooyo nngoo, vakavaany varera wo veni na veni kindo vashiidimaa itannya Yesu. ¹² Naasa kyikava mikonu ilya kakwiipoo-fo kandefika ando a ifumbu-u indeterevya-fo Iruva. Kalala rembo taa eterevaa Iruva. ¹³ Na elyi kwankya kavaanga valya vakiloshyony na ando akai. Efo nnang’ani yaawo kasauwa-fo ikumi na vavii. Nawo mmbo alevavaanga varumi. ¹⁴ Nawo ni Simion, yeto alemmbaanga ni Petro, na Andrea we mwanamaye, na Yakobo na Yohane, na Filipo, na Bartolomayo, ¹⁵ na Matayo, na Toma, na Yakobo ulya wa Alfayo, na Simion ulya avaangwa Selote; ¹⁶ na Yuda Iskariote, mmbwe yeto aleva ndiingyi wakwe. ¹⁷ Nalyo kooloka-fo aryani nawo. Kasheirisha efo kukee kurambalali. Na vandu vakuumbye-u veengyi vakee vakiloshyony kyakwe. Na ironda iniini lya vandu lyiifo vaukye kulya Yudaya koose na Yerusalemu, na uruka lufiitani na yeeve ilya niini, lulya lwa Tiro na Sidoni. Nawo vasheye ishemwaaranya naishiiswa ndwari tawo. ¹⁸ Na yewo valyise ukiva mmimuyo yeyo ya utefusu vakaveshiiswa. ¹⁹ Na vandu valya vakuumbye-fo woose vakakunda ishempaana. Nyeli akee na finya ishyukyaa vandu woose ishiiswa. ²⁰ Nalyo kainwa miso kalola valya vakiloshyony kyakwe kaamba, Ngoma yeni mukee vakiva kimmba umangyi lwa Iruva lwava lwany. ²¹ Ngoma yeni mutirwa nshaa ulaalu, kimmba mukaa muwuutiswa. Ngoma yeni mwiifo mwiiyaa ulaalu, kimmba mukaa museke. ²² Ngoma yeni elyi vandu vamusua na imwaanta efo ikwaanuny lyawo, na imwaarara, na isuta irina lyany sheelyi ni kindo kyeesi, kwakooya ni kimaruma kya Mwana yeto wa nndu. ²³ Fureny-dwa nkonu eto na ifina, mashika akakalyi isina lyany lyava iniini efo iruveeu. Mashika findo fya ngata yeyo mfyo vandeye vawo valevetannya vakisuku valya. ²⁴ Indi yeni mukee vasuri, oshiny lwany, mashika fimuviryaa muu mulemmaa ifiwarya. ²⁵ Na yeni muwuurye shapu ulaalu, oshiny lwany, mmbo mukaa mutirwa nshaa. Na yeni mwiifo musekaa ulaalu oshiny lwany, mmbo mukaa mukunarye na iiya. ²⁶ Na yeni vandu vakamurera kya usha woose, oshiny lwany! Mashika niindo vandeyawo valeva vetanya vakisuku valya va wongo. ²⁷ Indi kindo shamuvia yeni mwiifo musharanyaa, Kundeny vakiduva vany. Yewo vamusua vatanyiny fya usha. ²⁸ Yewo vamudenga vakundyeny mbora. Yewo vamwiinyala vaterevyeny efo kwa Iruva. ²⁹ Na nndu kakukapa woi lwa yuundu lyimwi, kyevemmberetye na yelyo lyingyi. Na nndu kakusoka soori yafo ya yeerya, na yeyo kuree nta kulamwiimi. ³⁰ Wo nndu akutereva kindo nniinge. Na nndu kakusoka efyo fyafo nreeye. ³¹ Shaasa mukundye vamutannyi yeni, neeni kevevatanyiny indo-da. ³² Na kwakooya mwakunda yewo vemukunda yeni tupu, a kyaanu kyany mushutaa-u nkyoki? Naakwa na vandu valyamari mmbo vavekunda yewo veevakunda. ³³ Mashika vandu muvatanyaa fya usha, kwakooya ni yewo vamutannyaa yeni fya usha, a kyaanu kyany mushuuta-u nkyoki? Naakwa na yevo valyamari ni indo-da vatanaa. ³⁴ Na vandu muvaakuyaa kwakooya ni yewo muvikye nsia wewarya-fo kindo, a kyaanu kyany mushutaa-u nkyokyi? Na yewo valyamari mmbo vaveakuya valyamari vauroye vawo vakooye itawo ekyo kiinani. ³⁵ Indi veny vekunda vakiduva vany, veny vetanya vandu fya usha na ivaakuya mulavereyaa kindo mutawaa. Llyo isina lyany lyisheng’anaa muveva na vana va eto akee uuwe ya findo fyoose. Kimmba we ava indo mwiisimba naakwa ni yewo valatiri kyaanu na yewo varavi. ³⁶ Naasa veny veelyilya vandu, shaasa na Nde eto waany akee mwiilillya. ³⁷ Nta mulakuvike veerumbwa kya vandu mukooye ekyo kyany kyarumbuwa indo. Nta mulave veutya vandu uvingo mukooye yuutyo uvingo yeni. Veny vereeya vandu siye tany, neeni mukooye ireeywa siye. ³⁸ Simbeny vandu simbo, na yeni muvesimbwa. Ni kyeeso kisha kyikee kisirye, kikee kisisikye, kikee kya mwangara nkyo vashemuletyaa efo maakony. Nyeli kyeeso musheesaa nakyo nkyo musheesyoo yeni mwiviiryo. ³⁹ Nawe kaveera kyaaso eki, “Ndesa nndu mfu miso ashiidimaa yoora nndu mfu miso uroye shia? Oode, wo vee vavii mmbo vashoolokaa irininy. ⁴⁰ Nta nkwiiyo nndu wa kiloshyony eerye mwiillosha-fo. Indi kammaa isongosyo deny mmbo ashiinanaa na mwiillosha. ⁴¹ Neewe naambo-kyi kwalola kinaana kyikee irisony lya mwanamau, na ikongo lyikee irisony lyafo yewe kulalyilolye? ⁴² A ni inda kusheviaa mwanamau, ‘Sya-do mwanama, shikweekye yuuta kinaana kikee irisony lyafo,’ kulalolyaa ikongo lyikee irisony lyafo ku muni? Yewe nkunang’ari songwa yuuta ikongo lyikee irisony lyafo kumuni, llyo kushelolyaa warya kinaana kyikee irisony lya mwanamau kukiute.” ⁴³ Mashika nkwiifo nri nsha uvikaa ndunda shikasha-fo. Nta nkwiifoo nri nkasha uvikaa ndunda shisha-fo. ⁴⁴ Mashika wo nri mmbo umanyika na ndunda tavayo. Mashika ndunda ta marwaa nshi efo nrweny tayaywa-fo, nta ndunda ta nsabibu ntidowaa efo miingeny-fo. ⁴⁵ Na nndu yeto nsha, efo findony fyakwe fisha asurumyi efo nriminy mmbo avaa mweende-fo ekyo kisha. Na nndu yeto nravi efo findony fyakwe fya uravi asurumyi nriminy kaveva mweende-fo ekyo kiravi. Mashika efyo fikee efo nriminy mfyo kana karera. ⁴⁶ Neeni naambo ki mwashivanga, “Nndumi, Nndumi, na ekyo shaamba nta mulakitani? ⁴⁷ Wo nndu asha na kwakwa kaaranya marero yoo akwa kaatana, nshemoraa mmbo avakye vi? ⁴⁸ Mmbo avakye nndu aletana mmba yakwe kasuma uvasha kafika si. Kaiveiya uvasha ando iwe lyikwaalye si. Naasa mura ukasoka mwiingyi, mfu yeto ukashesindika mmba ilya, nta uleedimi isingisa, nyeli ikee shitani nisha. ⁴⁹ Na yeto mwaaranya kara nalatana, mmbo avakye nndu aletana mmba kaisimbita si nalasumi uvasha. Ikasha isindikwa ni mfu wa mura. Nalyo yeni ikawunduka na miwoye yavayo ikawa pu!”

¹ Naasa elyi ammaya marero alya moose efo maarwiny a vandu, kandefika kulya Kapernaumu. ² Naasa kweefo kishinga kya nshilyi umwi wa vasikari iyana elwee nnu deny, nawe ni nndu akundikye efo kwakwe. ³ Naasa ammiita mbony ta Yesu kanrummya vamiku va Vayuda vandentereva neende nandeshiisa kishinga kilya kyakwe. ⁴ Nawo vakafika kulya kwa Yesu vakantereva nnu, vakaamba, “Mmbo asumani kumbutye kindo ekyo, ⁵ Kimmba akundye vandu va uruka lweru, katana alutanya na mmba yeyo ya iterevya.” ⁶ Naasa kawara shia yeenda nawo. Naasa elyi amfika ando nalakyikee-se kwaasha nafike efo kyeny kwa nshilyi ulya, karuma vambuya vakashembia, “Nndumi nta kulakwaarise! Mashika nshimaa yewe kufike kyeny kwakwa-fo. ⁷ Nkyo kimaruma na yeny shalolya nshimaa shifike kwafo shimuni-fo. Indi amba kirero kyimwi-da, nalyo kyishinga kyakwa kyishiaa. ⁸ Mashika na yeny mmbo shikee nndu mwiitorye mmbaniini vakwa. Shivetiri na vasikari shivaitorye. Naasa, shavia yeu, ‘Enda!’ Kaveenda. Shavia ungyi, ‘Osho!’ Kavesha. Shavia kishinga ekyo kyakwa, ‘Endetana ule!’ Kavetana.” ⁹ Naasa elyi Yesu aita indo kasongololo kyakwe, Kaindukya valya vasangi-fo vellatyaa, kavavia, “Shamuvia, nta kunu Israeli nshandelolya kyikusiryo king’ani indo-fo.” " ¹⁰ Nalyo valya varumwa vakawuya na kulya kyeny vakakooya kishinga kyilya kyammishia. ¹¹ Naasa kyikava elyi kyeeri kya numa-numa kawara shia yeenda kafika muriny uvangwaa Naini. Na vakiloshyony vakwe varyani nawe na vandu nkuka. ¹² Naasa elyi afika kufii na ngiri ya muri ulya, nalyo akakau nndu mfu ariwa eefo asomutwaa na kulya kipoo ya muri. Nawe ni mwana wa ngitany efo kwa maye akee nka wa ding’u, na vandu va kulya muriny veefo veengyi vemwimyaa. ¹³ Nndumi kallollya kavavyo mmuu kyakwe, kammbia, " “Kusyedo mai! Kulaiye!” ¹⁴ Kaserikya yoo kufii, kapaana kitara kilya kirye nnying’a ulya. Na valya vakurikye vakairisha. Nawe Yesu kaamba, “Mwana shakuvia, kwiipoo!” ¹⁵ Nndu ulya mfu kakwiipoo kakaa rembo, kapooka irera. Kaniingya maye. ¹⁶ Naasa valya vaiyo vakatirwa mmbwerei woose, vakang’anisa Iruva, vakaamba, “Ate nndu mwawuya kisuku nniini ankwiipoo kunu kweru, na Iruva ansha isaiya vandu vakwe.” " ¹⁷ Na mbony tilya tikeenda iidukana kulya Yudaya koose na masangeny alya a minyanuny moose. ¹⁸ Nalyo valya vakiloshyony kya Yohane vakandemwoongoya mbony yeto toose. ¹⁹ Nalyo Yohane kavaanga vavii va efo kiloshyony kyakwe na yoo akai, kavaruma kulya kwa Nndumi, kaamba, " “A yewe mmbwe ulya avereyoo nashe, ao lukavereya ungyi?” ²⁰ Naasa vasoro valya vakafika kulya kwakwe vakaamba, “Ni Yohane Mmbatisi aluruma kunu kwafo kavesa kwakooya yewe mmbwe ulya avereywaa nashe, ao lukavera ungi?” ²¹ Nalyo kyeeri kilya kyeni Yesu eefo ashiisaa vandu veengyi ndwari na fivalyilyisaa na mimuyo mikasha. Na vandu vafumiso veengyi kavasimba simbo yeelola. ²² Nalyo kaalwa kavavia, “Endeny mundeongoya Yohane kindo mwalollya na iita, yewo vafu-miso veefo valolaa, yewo vakee miketekete veefo vashendaa, yewo va ivave veefo vasheeremukaa. Yewo vafu-maarwi vee-fo vashitaa. Yewo vafu veefo varukaa. Yewo vakiva veefo vashoongoywaa nrumi ya nsia. ²³ Na ngoma nndu nalaonisa nsindara yaa kwakwa.” ²⁴ Naasa vakiloshyony valya va Yohane vakakwiipoo vakeenda. Nawe kapooka irera na valya vakuumbye-fo kya Yohane kaamba, “A kimaruma mukakwipoo kyeny mukandefika kulya kasa a nkyikyi muleenda ilola-fo? Ndesa ni ikongye lyivivitwa-vivitwaa ni uraato? ²⁵ A kimaruma mukakwipoo mukandefika-fo, a nkyikyi muleenda ilola-fo? Ndesa ni nndu aree masara mamamiri? Yewo varee masara a wiitori na ilya usuri akawo vakee efo mmba ta kimangyi. ²⁶ A kimaruma mukakwipoo kyeny mukandefika-fo nkyikyi muleenda ilola-fo? Ni nndu mwaawuya fisuku ndesa? Ee-da, neeny shamuvia, Mmbo ang’annyi nndu nkisuku. ²⁷ We mmbwe ulya akee ndeiye kyeyamba, ‘Akakau nsu wakwa shanruma nakwiirye mbee, mmbwe ashedeesyaa shia yafo nakusongoye.’ “ ²⁸ Naasa shamuviany, “Efo nnang’ani ya yewo vaire mmbaka nkwiifo nniini kairya Yohane-fo. Kya indi yeto akee n-du efo umanginy lwa Iruva mmbo ang’ani kamwiirya.” ²⁹ Na vandu va uruka loose sanda na vadedemi mmbo valearannya vakairikya Iruva mmbwa usumanu elyi valeenda ibatiswa ubatiso lwa Yohane. ³⁰ Indi Vafarisayo sanda na yewo vasunundye uvavaso mmbo valealwa makusaro a Iruva akusarye kyawo akafwa mmwasi elyi valelema indebatiswa mmbwe. ³¹ “Naasany vandu va irika elyi a shivaananise neekyi? Mmbo vafwanani navi? ³² Mmbo vafwanani na fivana fikee rembo ando a singira. Fikavaangana fikaamba, ‘A nkyikyi elyi lwamukapya fivale neeni mulafini? Lukaimba fiimbo fya kiiyo neeni mulaiye!’ ³³ Yohane Mmbatisi mmbo alesha ekee nndu nalalyaa nkate nta ina mfinyo. Mukaamba, ‘Mmbo atirwa mmumuyo nkasha.’ ³⁴ Kukasha nafo Mwana yeto wa Nndu akee mwiilya na ina mukawuya yaamba, ‘Akakau mwitalauwa ndeu na mwiina mfinyo, kavetira mbuya na vandu vadedemi na valyamari.’ ³⁵ Kyikavaany urango usha mmbo lulekooya ivinga mwaandu kyuuka na efo kwa yewo vakee vana va vayo woose.” ³⁶ Naasa nndu wa efo kwa Vafarisayo kasha intereva nandelya nawe shoonga. Nalyo kandeanga na efo mmba kwa Mfarisayo ulya, kakaa-u rembo. ³⁷ Nalyo akakau nndu nka ansha nang’u akee wa kulya muriny atannyi fya ulyamari. Nawe elyi ammanya Yesu mmbo akeelya shoonga efo mmba kwa Mfarisayo ulya, kasha arie kishupa kya iwe yaa kitiri mafura ekwaamba afwaamaa nisha. ³⁸ Kashesalala yoo numa ando aoroye nang’u marende ashiiyaa kanshoshotya misoru alya marendeny. Kawuya kaangata-u na fii ta nrwe wakwe. Nawe kamiminda-miminda marende alya akwe kaamba mafura alya. ³⁹ Naasa mfarisayo ulya ammbaanga elyi alolya kive indo, karera efo nriminy kaamba, “Kukooye nndu yeu ekee nkisuku mmbo emanyaa nka yeu mmbwe vi na ni wa ngata-kyi yeu ampaana ndesa akee llyamari.” ⁴⁰ Nalyo Yesu kaalwa kammbia, “Simon-ro, mmbo ntiri kindo nkuviaa!” Nawe kaamba, “Llosha, kwaambaye mbee!” ⁴¹ Kammbia, “Kweefo nndu mwaakuya vandu etiri vaasile vavii. Yeto umwi etiri siye yakwe ya dinari mayana araanu, na yeto ungyi ni ya dinari makumi araanu. ⁴² Kakooya valatiri kyetaa. Kavareeya siye woose ve vavii. Naasany, vandu yewo ni ungau ashenkundaa kilanya?” ⁴³ Simon kaalwa kammbia, “Shikusarye ni ulya alenreeya siye yeyo shiniini mmwasi.” Nawe kammbia, “Kwarumbwa kisumani.” ⁴⁴ Llyo kaindukya nka ulya kavia Simion, “Kulollye nka yeu-ro? Mmbo shaanga na kunu mmba kwafo, nta kulashiniinge mura wa marende akwa. Nawe katana ashishoshotya misoru yakwe marendeny. Kawuya kaangata na fii takwe ta nrweny. ⁴⁵ Nta nkwashimiminda na fyoomu-fo. Nawe kipookya shammaanga na kunu nalandederya ishimiminda-miminda marende-fo. ⁴⁶ Nta nkwashaamba mafura nrwen-fo. Nawe katana aamba marende akwa mafura afwamaa. ⁴⁷ Nkyo shakuviaany, mmbo amfwaaywa ngyulyamari takwe tikee shiingyi kimmba ankunda nnu. Indi yeto afwaaywa kyaangu, mmbo akunda kyaangu da.” ⁴⁸ Naasa kammbia, “Kwamfwaaywa ngyulyamari tafo!” ⁴⁹ Nalyo valya veefo vellyaa nawe shoonga vakapooka irera efo nriminy, “A nndu yeu ni vi katana afwaaya vandu kya ngyulyamari tawo?” ⁵⁰ Naasa nawe kavia nka ulya, “Kwankusirya-u indo, nkyo kyakukyira! Enda na ufoo!”

¹ Kyikava kyeeri kya elyi numa we muni ekee kyaaro kafika muriny ungyi na ungyi na kimuriny kingyi na kingyi akapaa weele na yoongoya vandu nrumi ya nsia ya umangyi lwa Iruva, na valya ikumi na vavii varyani nawe. ² Na vaka vaangu vakee vashiise mimuyo mikasha na ndwari, mmbwe Maria wa kulya Magdala embukwa ni mimuyo mikasha mfungare; ³ na Yoane akee nka wa Kusa ulya mwiikalya findo fya Herode, na Susana na vengyi veengyi. Nawo vakava vemfurukannya na findo fyawo vatiri. ⁴ Naasa vandu vakasha ikuumbya-fo ironda iniini, vakakwiipoo vauka miri mive na mive vakavingya kulya akai. Nawe karera nawo avaviaa fyaaso. ⁵ “Kweefo nndu mweera mbeu, kakwipoo nandeera mbeu takwe. Eefo asheraa, tilya maata tikawa efo mbai ya shia. Tikavavarwa, na ndeye ta efo nginiiu tikalya tikamaa. ⁶ Na tingyi tikaoloka ando iwe lyikwaalye si. Tikamya tikawuya yuuma mashika tilatiri nsiny. ⁷ Tingyi tikawa ando a miingeny. Miinga ilya ikamia ando amwi nato, ikatifira. ⁸ Tingyi tikawa ando a uteri usha, tikamia tikaraaka, ilya imwi ikavika iyana.” Elyi arera indo kaonisa unyanga kaamba, “Nndu atiri maarwi earanya navearanya!” ⁹ Naasa valya vakiloshyony vakwe vakammbesa, a kyaaso ekyo mmbo kyaambakyi? ¹⁰ Nawe kaamba, “Yeni mmbo muleniingwa imanya mbony eto ta umangyi lwa Iruva tikee shirike. Na valya vengyi wo vakavio fyaaso tupu, naambo ilola valole valalolye, na yaaranya vaaranyi valaipuye.” ¹¹ Na kyaaso ekyo kyikee ule, “Mbeu tilya ni Irero lya Iruva. ¹² Na valya va mbai ya shia wo ni vandu vearanya. Vekyaaranya, yeto mmbishwa kasha nang’u, kaipoo irero llya efo nriminy mmbwawo, valakooye ikusirya nalyo na ikirwa. ¹³ Na valya va efo iwe-u, mmbo vandu vearanya irero elyo, vakalyitira na nsia. Nawo kindo vauwa ni mirarii, mmbo vakusirye-u kivero tupu, na kyeeri kya yeeswa vakalakana-u. ¹⁴ Na tilya tawa ando a miingeny, mmbo vandu vearanya-da, vakeenda vakafirwa ni ngyusau ta findo fya muu yeu, na masaa avayo, na lango ta vayo valakyivike-se kimu. ¹⁵ Na tilya ta uteri usha, to ni vandu vearanya irero elyo vakalyitira na nrima usongovye ukee nsha, vakavika kimu kimaruma kya elyi vakee vandu vakusirye-u.” ¹⁶ Nkwiifo nndu ashataa taa ya mmba kaisikya na kiiya, ao kaivika kwasi ya kitara-fo. Mmbo aivikaa ando a yeekerya taa na vandu vaanga neefo mmba vakooye ilolya sa woose. ¹⁷ Mashika kuleefo kindo kyikee kyirike kyikara kyilaparikya paa-fo. Nta nkwiifo kindo kyikee kisurumi kyikara kyilamanyika kyikafumirwa paa-fo. ¹⁸ Naasany loleny waarya shaasa mushaaranyaa. Mashika wo nndu atiri kindo mmbo aniingwaa kingi, na yeto nalatiri kindo naakwa na ekyo atiri kavekisokwa. ¹⁹ Naasa kakooya maye na vanavamaye vafika kulya kwakwe. Nalyo valeedimi ifika yoo akai kimaruma kya vandu valya vakuumbye-fo. ²⁰ Naasa kashevio sheelyi maye na vanavamaye vasalali yoo poo vakundye illolya. ²¹ Nawe kaalwa kavavia, “Ma na vanavama vakwa mmbo vandu yewo vaaranya ndera ya Iruva vakaveilatya.” ²² Naasa kyikava nkonu umwi kasaama na ngalaveny we na vakiloshyony vakwe, kavavia, “Ndifony-te, luruuke lufike kulya kwakulya ya iruva elyi!” Vakaporomwa ngalava ilya ikeenda iivarye. ²³ Naasa elyi vee-fo vashendaa nayo we karengeya kalala. Nalyo uraato uniini lukaoloka efo iruveny. Ngalava ilya ikeenda ishishwaa mura, kikavany ni ando eeretya muu. ²⁴ Nawo vakamweengya vakamwaanta vakaamba, “Woi Llosha, woi llosha, lwiifo lusyaa!” Nawe kakwiipoo kakyeemmya uraato llwa na mwaalukoluko ulya wa mura. Fikamalallya kukava kimammya sau. ²⁵ Naasa kavavia, “Nkwi mweera kikusiryo kyany?” Naasa vakasongololo vatirwa mmbwerei. Vakaviana, “A nndu yeu mmbwa kwi katana arerya na ngyuraato na mura, nafyo fikamwiirikya?” ²⁶ Nalyo vakaruuka na kulya kwa kulya vakafika kulya urukeny lwa Vagerasi nalo lusumani na lwa Galilaya. ²⁷ Naasa elyi ammooloka na kulya kwaarutu auka efo ngalaveny nalyo kakwaannya na nndu umwi auka kulya muriny atirwa mmimuyo mikasha. Nawe kipookya kyeeri kyaasha nnyeraa soori-fo. Na ando akwe ekaa nshi efo mmba-fo, ni efo mmbangeny ta vafu. ²⁸ Naasa kalollya Yesu kakooma. Kamwolokya-si karera na unyanga uniini, kaamba, “Nkyiki kyeru neewe Yesu kukee Mwana wa Iruva yeto akee uwe ya findo fyoose? Mmbo shakutereva kulashilyi-se ukiva-fo!” ²⁹ Nyeli eekundye ivavasya mumuyo ulya nkasha wa utefusu uuke nndu ulya. Mashika uleva mwiintafukya fyeeri fiingyi. Nawe kava mwiifingwa na mise na ikapyo minya eeringwaa indo. Indi filya fyamfinga kava mwiififisha karumbutwa ni mumuyo ulya nkasha ukamfita kundo kulalelwa. ³⁰ Naasa Yesu kauvesa kaamba, “A irina lyafo ni yewe vi?” Nato ukaamba, “Ni itorito,” mashika emmaangwa ni mimuyo mikasha miingyi. ³¹ Nayo ikamfuuya nalaivavasye yeende yooloka irininy. ³² Naasa kweifo ironda lya nguve shiingyi lyeshiiswaa yoo kipirimikony kya ifumbu. Nayo ikamwooshora naivikye mumu yeende itaanga. Nawe kaivikya mumu. ³³ Naasa Mimuyo ilya mikasha ikauka nndu ulya ikandeanga nguve tilya. Nalyo ironda llya lyikapufuka-fo lyikaoloka neefo waangeu. Lyikasiiya kulya iruveny, lyikafumbwa mmura. ³⁴ Nalyo veesi valya valolya indo vakarisha vakandevia vandu kulya muriny na kulya mareminy. ³⁵ Na vandu vakakwiipoo-fo vandelola kilya kyatanyika. Vakafika kulya Yesu akai. Vakavekooya-fo nndu ulya ammbukwa mmimuyo ilya mikasha akee rembo yoo marendeny a Yesu aree soori ammbuiyo ni urango. ³⁶ Naasa valya valolya nndu ulya eetirwa ni mimuyo mikasha shaasa ashiiswa, vakawoongoya. ³⁷ Nalyo ikwaanu lyoose lya vandu va Gerasini vasangyi na valya va nnyanu vakantereva nakwipoo kulya kwawo nnyeli vatirwa mmbwerei wiingi. Naasa we muni kandesaama neefo ngalaven. Kawuya na kulya ooka nafo. ³⁸ Naasa nndu ulya aukwa ni mimuyo ilya mikasha kantereva mumu wekaa nawe. Nawe kansama kaamba, ³⁹ “Kuwuiye na kyeny kwafo kundeongoya-fo vengyi kyoose Iruva akutannya.” " Nalyo kakweengya kandeamba kyoose Yesu alentanya kakwaanisa kulya muriny koose. ⁴⁰ Naasa kikava elyi Yesu awuya nafo mamwiingyi ulya wa vandu ukamwaambya na nsia, nyeli woose veefo vemmbereyaa. ⁴¹ Nalyo akakau nndu umwi ansha nang’u na irina lyakwe ni Yairo. Nawe ni nndu nsongoru wa efo mmba yeeterevya. Kasha ikweera si yoo marendeny a Yesu. Kantereva nandefika kulya kyeny kwakwe. ⁴² Mashika etiri mwana wa kyeny akee wa ngitany amaye irika lya myaaka ikumi na ivii, nawe eefo akumbaa muu. Naasa elyi eefo ashendaa vandu valya vakuumbye-fo vakava vansisiraa deny." ⁴³ Nalyo kweifo nndu nka alwee ndwari ya kyika ando a myaaka ikumi na ivii. Nawe ellyiwa nnu mmbaanga enretya-fo masaa akwe moose efo kwa vaanga nta kulakee-fo nndu eedima inshiisa. ⁴⁴ Nawe kashesha na yoo numa ya Yesu nakooye ipaana nse wa soori yakwe ya yeerya, nalyo yeni kishoru kya ndwari ilya yakwe ya kyika kyikafikya. ⁴⁵ Na Yesu kaamba, “Ni vi ashipaana?” Naasa vakakana woose. Na Petro asangyi na valya aryani nawe kambia, “Llosha, ni vandu vakekusisira-sisira.” ⁴⁶ Naasa Yesu kaamba, “Kwiifo nndu ashipaana-da! Mmbo shamanya shammbukwa ni finya.” ⁴⁷ Naasa nka ulya kalollya nalakiidimi-se imalallya, kasha nang’u eereremaa. Kamwolokya si kaamba paa kimaruma kampaana, na shaasa akooya ishia na lyimwi. ⁴⁸ Nawe kammbia, “Mwana-akwa kwankusirya-u indo nkyo kyakukira! Kweengye kukooyaa ufoo!” ⁴⁹ Naasa eefo areraa indo nalandemanda kukasha nafo nndu auka kyeny kwa nndu ulya nsongoru wa mmba yeeterevya. Kaamba, “Mwana wafo ammaa ifwa, nta kulakivinise llosha yeu!” ⁵⁰ Naasa elyi Yesu eeta kanndouwa, “Kulairyee-fo Kusirye-u tupu! Nawe ashekirwaa.” ⁵¹ Naasa elyi amfika kulya poo, nta nalalekeye nndu kaanga nawe mmba, kulaore ni Petro na Yohane na Yakobo na ndeye wa mwana ulya na maye. ⁵² Naasa kakooya valya vaiyo woose veshiyaa na ikapa kapa mbafu. Nawe kaamba, “Nta mulaiye-fo! Nshi afiiye-fo, mmbo alele rweny.” ⁵³ Nawo vakanseka, nyeli veeshi amfwa. ⁵⁴ Nawe Yesu kantira woko kambaanga kaamba, “Mwana kwiipoo!” ⁵⁵ Nalyo kawuiyo ni muu wakwe kakwiipoo kyaangu naakyo. Nawe kavavasya vanniinge kyeelya. ⁵⁶ Na vamiku vakwe vakeesing’ang’a. Nawe kaveekimba kindo kyilya kyautika valeshekyivia nndu-fo.

¹ Naasa kavaanga valya ikumi na vavii vakuumbye ando amwi. Kavaniingya wiidimi na ushilyi lwa iitorya mimuyo mikasha myoose neeshisa vandu ndwari. ² Nalyo kavaruma vandekapya vandu weele lwa umangyi lwa Iruva na indevashiisa. ³ Kavavia, “Mulakamare kindo kya efo shia, nta nsengye, nta mboloko, nta kishau, nta fesa, nta muleende mwiirye soori ivii ta mwiili-fo.” ⁴ Na efo kwa nndu mwammaanga nafo keeny-fo mutani mwakwiipoo-fo mweende kungyi. ⁵ Na wo kundo mwankooya vandu vara valamwaaranya, ukeny efo muriny eto na kiluulyi ekyo kya efo marendeny any muvekikakapa-fo, kive nkyo ukureekyi lwa efo kwawo lwa uvingo. " ⁶ Naasa vakawara shia vakava veira fimuriny fya vandu kwi kimwi kimwi vewoongoyaa nrumi ya Iruva ya nsia na ivakira ndwari kundo koose vafikaa. ⁷ Naasa mangyi ilya Herode keeta kilya kyoose shaasa kileenda. Nawe kava afulukywa-fulukywany mashika a kilya kyarerwa mmbandu maata veshambaa Yohane ammbuya iruka. ⁸ Na vengyi vakaamba, " “Ni Elia ansha ikoora na vandu.” Na vengyi vakaamba, “Ni umwi wa vakisuku va elyo mbee alewuya iruka.” ⁹ Naasa Herode kaamba, “Yohane ni yeny shilenrummbwa nrwe. Indi yeu shaita shivioo indo kyakwe mbwakwi-se?” " Naasa kasia mwaanya wellolya. ¹⁰ Nalyo vakiloshyony valya vakawuya nafo vakashemwoongoya fyoose valetana. Nawe kavakamara kawara shia waarya keenda kulya kya taari ya muri ulya uvaangwaa Betisaida, vakandekaa-fo kyaanya kyawo. ¹¹ Naasa vandu valya vakuumbye-fo mamwiingyi vakawuya imanya vakandensora-fo. Nawe kavawarya. Kavany arera nawo kya umangyi lwa Iruva, na valya vakee vating’i ni ndwari tawo kavevashiisa. ¹² Naasa nkonu ukapooka yeenda wisyaa. Valya ikumi na vavii vakasha na yoo akai, vakambia, " “Sama mamwiingyi yeu wa vandu, veende neefo fimuriny fisengetye neefo mareminy vanderuuya ando eelala na iwonisa shoonga, kimmba kundo lukai kwava kasa.” ¹³ Nawe kavavia, “Vaniingeny shoonga yeni te!” Nawo vakaamba, “Llutiri kilanya ya mikate iraanu na makunga avii-fo. Kulakooye ni yese lushendaa lundeura shoonga timaa vandu yeva vakuumbye-u woose.” ¹⁴ Na womi veefo sha fiku firaanu. Nawe kavia vakiloshyony vakwe, “Endevieny vandu yewo vakee rembo matorito-matorito, wo itorito vandu 50.” ¹⁵ Vakandetana indo, vakakaa rembo woose. ¹⁶ Nawe kawarya mikate ilya iraanu na makunga alya avii. Kalla efo iruveeu kaana Iruva kya ifivikya mbora, Kafisha-fisha, kaniingya valya vakiloshyony vandeavya vandu valya vakuumbye-fo. ¹⁷ Vakalya vakawuura woose. Na nsaaro ulya wa fipereshu ukarorowa, mikusha ikaishwa ikumi na ivii. ¹⁸ Nalyo kikava elyi eefo aterevaa Iruva akee kyaanya, amwi na vakiloshyony vakwe. Nawe kavavesa, " “A ironda elyo lya vandu ni inda lyaamba kyakwa mmbo shikee vi?” ¹⁹ Nawo vakaalwa vakaamba, “Ni Yohane Mmbatisi. Na vengyi vakaamba, “Yewe ni Elia. Vengyi vakaamba, Yewe ni umwi wa vakisuku valya va elyo mbee, alewuya iruka.” ²⁰ Naasa kavavia, “A yeni mwaamba yeny mmbwe vi?” Naasa Petro kaalwa kaamba, “Yewe ni yewe Kristo wa Iruva!” ²¹ Nawe kavavavasa kindo ekyo valashekivia nndu. ²² Kaamba, “Mmbo kyikee kirummbwe, Mwana yeto wa Nndu nandeliswa ukiva wiingyi na indeinyikwa mmasiingo a vandu na vakohani vaniini na veelosha mavavaso, na iwaawa navewaawa na elyi kwamfika nkonu wa kararu naruke-ny!” ²³ Naasa kavia vandu vaiyo woose, “Kwakooya nndu akunda ishilatya kuti nasue nyama takwe muni, nawe mwikurika nsalaba wakwe wo nkonu naveshilatya-ny. ²⁴ Shamashika wo nndu akunda ikira muu wakwe akaa maure-te. Na wo nndu areta muu wakwe kwakooya ni kimaruma kyakwa yeto akoyaa yuukira. ²⁵ Mashika iviiri nndu ashutaa-u nkyokyi kwakooya ashewonisaa ulana loose luve mbusha yakwe kakuretya-u we muni, ao muu wakwe ukafiiya-fo mmwasi? ²⁶ Mashika wo nndu aira sony kyakwa na kya marero akwa, na Mwana yeto wa nndu mmbo ashiraa sony kyakwe elyi ashaa akee na usuri lwakwe na lwa Ndeye na lwa vasu veele va efo iruve-u. ²⁷ Na yeny ni kya dede shamuvia: Yewo vasalalyi yaa kwiifo valasheshosha ufu kulaore vallolya umangyi lwa Iruva.” ²⁸ Naasa kikava elyi anrera indo mikonu ikaira-u sha nyanya, kakamara Petro na Yohane na Yakobo kandesaama na ando a ifumbu-u nandeterevya-fo. ²⁹ Nalyo elyi eefo aterevaa, fwana ya kisangu kyakwe ikaalashika na soori takwe tikava shaa pyai timika-mikaa. ³⁰ Nalyo akakava vandu vavii veefo vareraa nawe, nawo ni Mose na Elia. ³¹ Vakakoora vakee na usuri, vakarera nawe kya yoo mainukyony akwe ashendaa yafutya kulya Yerusalemu. ³² Naasa Petro vakee varovye ni rwe na valya aryani nawo. Naasa kyeeri vookya rony vakalolya usuri llwa lwakwe na vasero valya vavii vasalali-u ando amwi nawe. ³³ Nalyo kikava elyi vallakana nawe, Petro kavia Yesu, “Nndumi nkisha elyi yese lukee yaa. Naasa lushevikaa matengo araru, lyafo lyimwi, na lya Mose lyimwi, na lya Elia lyimwi.” Nawe nta naleeshi kindo arera. ³⁴ Naasa eefo areraa indo ifishi lyikasha lyikavavikya nruve. Naasa vakairyaa elyi vakooya ikaa efo nnang’ani ya ifishi llya. ³⁵ Nalyo unyanga lukaitiwa luuka efo ifishiny lwishambaa, “Yeu mmbwe mwana wakwa yeto shilensauwa. Mwaaranyiny-te!” " ³⁶ Nalyo elyi unyanga llwa lwammiitiwa vakakooya Yesu anrewa-u we muni. Nawo veni vakamalallya, mikonu ilya myeni nta valaongoye nndu mbony ta kilya valolya. ³⁷ Nalyo kyikava elyi lya nkonu ulya waiduva vee-fo vashoolokaa kulya ifumbuny vakakwaananya na vandu mamwiingyi nniini. ³⁸ Nalyo akakau nndu nsoro akee wa efo mamwiinginy kakapa ngaya kaamba, " “Woi Llosha! Lyilya mwana yeu wakwa wa womi kaveva ngitany. ³⁹ Nawe lla-te mumuyo nkasha ava mwintafukya. Nalyo yeni kavefua. Nato ukamwaaruva keende mavia, na kweeta wanra ni kindo kyuumu, nato mmbo weenda vimfirisaa.” ⁴⁰ Neeny shatereva vakiloshyony kyafo vamwaante valaidimi. ⁴¹ Nalyo Yesu kaalwa kaamba, “Oo yeni mukee irika lya vandu lyauwa kyikusiryo lyeevekye indo. A mmbo nkaa neeni shifike kwi? A shimusisirye shifike indii? Endeny mwana yeu na yaa-te!” ⁴² Naasa elyi mwana ulya eefoo ashaa nang’u, mumuyo ulya nkasha ukantafukya ukankusha-kusha. Naasa Yesu kakyeemmya mumuyo ulya. Kashiisa mwana ulya kammbiirya ndeye. ⁴³ Naasa vandu valya vakaising’ang’a woose valolya ulyimbi lwa Iruva. Naasa elyi veefo vasongololo woose kya efyo aletana, nawe kavia valya vakiloshyony vakwe. ⁴⁴ Marero shiifo nshambaa avikeny maarwiny any! Mwana yeto wa nndu mmbo eefo anderambikyoo efo maakony a vandu. " ⁴⁵ Nawo kirero ekyo valakyimanyi kyikavaviiya kindo kirike nta valakooye iitumuso. Na iryaa vakairyaa immbesa kya kirero ekyo. ⁴⁶ Naasa efo nnang’ani yaawo kukakwiipoo marero a ikuvesa-vesa kya nniini nnang’ani yaawo ni ungau. ⁴⁷ Naasa Yesu kamanya makusaro a mirima yaawo. Katira mwana n-du woko, kashemmbika yoo akai. ⁴⁸ Nalyo kavavia, " “Wo nndu awarya kimwana ekyi ekumbwaa irina lyakwa, ni yeny ashiwarya.” “Wo nndu ashiwarya yeny mmbo awarya yeto aleshiruma. Kikavaany yeto akee n-du wa efo nnang’ani yaany moose, mmbo ava mmbwe nniini.” ⁴⁹ Naasa Yohane kaallwa kaamba, “Lulelolya nndu ashantaa mimuyo mikasha asendaa irina lyafo.” Neese lukamwiima, kimmba nalakee nndu alulatye aryani neese. ⁵⁰ Na Yesu kavavia, “Nta mulamwiimi-fo. Mashika nndu nalamuvikyaa kiduva mmbo akee kyaalu kyany.” ⁵¹ Naasa kikava elyi mikonu yammiinana nanderoswa na uuwe, nawe muni kaorisa kisangu kyakwe kikasumana na shia ya yeenda na kulya Yerusalemu. ⁵² Nalyo karuma varumi vamwiirye mbee. Vakeenda vakandefika muriny wa Vasamaria vakundye inteesya-fo ando a iimuya. ⁵³ Nawo valammbwarye, elyi kisangu kyakwe kyammilla Yerusalemu. ⁵⁴ Naasa elyi valya vakiloshyony valolya kive indo, we Yakobo na Yohane vakaambia, “Ale Nndumi! Kwakunda luvaange muro wooloke wuuka efo iruve-u weevarumata, shaasa Elia aletana.” ⁵⁵ Nawe kaveendukya kavakyeemya kaamba, “A mmbo mulaishi mmbo mukee vandu va mumuyo wa ngata ingai? ⁵⁶ Mashika Mwana yeto wa nndu nshi asheye ireta mirima ya vandu-fo, ni iikira! Nalyo vakeenda kimuriny kingyi.” ⁵⁷ Neelyi varie shia yaawo ya yeenda kakooya nndu aamba, “Mmbo nkulatyaa wo kundo kusheendaa!” ⁵⁸ Yesu kambia, “Maparwe atiri marina a vayo na ndeye ta efo nginiiu tikavetira fifuri fya vayo kya indi Mwana yeto wa nndu nnatiri ando a yeekyerya nrwe-fo.” ⁵⁹ Naasa kakooya ungyi kambia, “Shilatya!” Nawe kambia, “Shivikya mbele muumu shinderika nde yaakwa.” ⁶⁰ Nawe kammbia, “Ra vafu varike vafu vawo wo veni! Indi yewe wara shia kundeongoya vandu mbony ta umangyi lwa Iruva kwishiidukanisaa.” ⁶¹ Naasa kukavekaa-fo ungyi ammbia, “Nndumi shikundye ikulatya-da. Indi shivikya mbele mumu shindelakana na yewo va kyeny kwakwa.” ⁶² Naasa Yesu kambia, “Nndu kammipoo woko natire ikumbi lyeerema na ng’umbe kawuya illa numa we nnyavaa kwa umangyi lwa Iruva-fo.”

¹ Naasa numa yavayo Nndumi kasauwa vandu vengyi-se makumi mfungare. Kavaruma vavii vavii vandensongoya vafike wo muri wa vandu na wo kundo arie yeenda. ² Naasa kavavia, “Fya iilula fiifo fiingyi, lyo varundi vakaangwa. Kyetereveny Nndumi muni fimu narumi varundi efo mailullyony akwe. ³ Kweengyeny! Akakava shamuruma mukee sha ngurana ta moonri nnang’ani a mafite a ngoroshony. ⁴ Nta mulakamare mboloko yesuruma fesa, nta nkusha, nta fyaaru-fo. Nta mulaidikire nndu efo shia.” ⁵ Indi yefo mmba kwa nndu kundo mwaammiira nafo pookeny yaamba, “Keeny na ufoo kunu kyeny! ⁶ Na kwakooya mmbo kwiifo mwana wa ufoo, naasa ufoo elo lwany lushenkayaa. Kilave indo, ufoo lwany mmbo lushemuwuiyaa. ⁷ Indi efo mmba kwa nndu yeto amuwarya kaeny-fo mwilyaa na ina fya efo kwawo. Mashika nndu nndundi nkuti nawonise weesi lwakwe. Nta mulave veuka mmba yei mweende yeyo ingyi-fo. ⁸ Na wo muri wa vandu mwammaanga nafo vakamuwarya kulyiiyeny efyo vamweengye. ⁹ Na yewo mukoyaa-fo valwee vakireny muwoongoye, ‘Mwammaafukyo ni umangyi lwa Iruva kunu kwany!’ ¹⁰ Na wo muri wa vandu mwammaanga nafo valamuwarye, ukeny-fo mufike efo mitaniny yavayo mwishambaa, ¹¹ ‘Na kiluulyi ekyi kya kunu muriny kwany ekyo kyakutira na marende eru akyo lwamukukutya kimuwuiye! Kyaidi manyiny umangyi lwa Iruva lwamaafukya!’ ¹² Na yeny shamuvia nkonu yeto ukamfika ekyo kya Sodoma kishangwaa ngota kya muri yeto.” ¹³ Oshiny lwafo yewe Korasini! Oshiny lwafo yewe Betisaida! Mashika efyo fya wiidimi filetanyikya kwany kukooye mmbo fileutikya kulya Tiro na Sidoni, kukooye valemaaluka efo nriminy kasha na iraa makunnya na ifu. ¹⁴ Indi ekyo kya Tiro na Sidoni mmbo kishangwaa ngota ekyo kyany elyi vandu vasherumbuywaa mwaandu. ¹⁵ Na yewe Kapernaumu nshi kwekee nrose kwafika ngini-u mmbo kushoolotwaa kufike kundo kwa vafu. ¹⁶ Nndu amwaaranya yeni ni yeny ashaaranya. Na nndu amumina yeny ashimina. Indi yeto ashimina yeny mmbo amina yeto aleshiruma. ¹⁷ Nalyo valya makumi mfungare vakawuya vefuraa vakaamba, “Nndumi na mimuyo yeyo mikasha mmbo ilevelwiirikya kimaruma kya irina lyafo.” ¹⁸ Nawe kavavia, “Mmbo shilelollya Satana ashoolokaa auka iruve-u sha kimwii. ¹⁹ Akakalo shamuniinga wiidimi lwevavara shoka na nguluva na iitorya finya toose ta yeto nkiduva. Nta kulaiyo kindo kishiidimaa imumanya furu-fo. ²⁰ Indi kindo mushefuraa nakyo nshi elyi mimuyo yeyo mikasha imwiirikye-fo, mmbo mushefuraa elyi marina any akee mareiye efo iruveeu.” ²¹ Kyeeri kilya kyeni kalooka kyuuka na Mumuyo Mweele kaamba, “Woi Nde shakwaarafuma paa kukee Nndumi wa efo iruve-u na kunu urukeny, kimmba mbony yeti kwatirika vandu veeshi reu na yewo varango, kwawuya itirambuya vakoku. Ee-da Nde, ni indo kivekusenyi!” ²² Nalyo kaindukya valya vakiloshyony kaamba, “Mmbo shilerambikywa findo fyoose ni Nde wakwa. Nta nkwiiyo nndu eeshi Mwana kulaore ni Nde-fo, nta Nde mmbwe ungau kulaore ni Mwana-fo,na nndu yeto mwana ankunda inrambuya.” ²³ Nalyo kaindukya valya vakiloshyony vakee kyaanya kyawo kaamba, “Ngoma vandu miso awo alolye kindo mulolye yeni! ²⁴ Shamashika shamuvia, kweiifo veawuya fisuku veengyi naakwa ni vamangyi velangye ilola yefyo mulolye yeni, valalolye, na iita mbony mwaita yeni valaite.” ²⁵ Nalyo akakau nndu akufundye mavavasyo ankwipoo kasha imweesa, kaamba, “Ale llosha! Shatana inda shikooye muu wa llung’anu uve ding’u yakwa?” ²⁶ Nawe kammbia, “A efo kitabuny kya mavavaso mmbo kyikee kyireiye kwasoma-fo inda?” ²⁷ Nawe kaamba, “Mmbo kushekundaa Nndumi Iruva wafo, kunkunde na ngoo yafo shoose, na nrima wafo moose, na finya yafo shoose, na makusaro afo moose. Kuvekunda na nndu uroo shaasa kukukundye kumuni.” ²⁸ Nawe kambia, “Mmbo kwaveallwa nisha. Kevetana indo, kuwoniny-muu!” ²⁹ Nawe akundye ikwallwa nndu wa usumanu we muni, kavia Yesu, “A uroye wakwa mmbi?” ³⁰ Nalyo Yesu karouwa kaamba, “Kweefo nndu aleuka kulya Yerusalemu kandesoka na kulya Yeriko, kakooya veala shia. Nawo wakamuuta soori takwe, vakammbika fyaasha, vakanra-u akee kinanawo kya ifwa na ikya. Vakakweengya. ³¹ Naasa nndu Nkohani kasoka na shia ilya sheni nalamanyi kindo kiifo, kallollya, keera mbai. ³² Na nndu wa Valevi ni indo-da kasha nang’u, kallollya, keera mbai. ³³ Naasa nndu wa Samaria arye kyaaro kafika alya ando akai, kallollya kavavyo mmuu kyakwe. ³⁴ Keenda na yoo akai, na fyaasha filya fyakwe kafyaamba mafura na mfinyo. Kafinga-u na firami. Kansaamisa mungony wa nshungu wakwe, kandemfita mmba ya veny, kammbavarya-fo. ³⁵ Na elyi lya ndesi kauta fesa kaniingya ulya muni mmba ya veny, kammbia, ‘Sheekya immbavara, na kwakooya kwalekyeya kya mmwasi nkutaa elyi shiwuyaa.’ “ ³⁶ A kwaambany inda kya vandu valya vararu, ulya akee uroye wa ulya alewoywa ni veala shia ni ungau ndesa? ³⁷ Nawe Kaamba, “Ni ulya alensarya ukiva-te!” Yesu kammbia, “Kweengye kuvetana indo!” ³⁸ Naasa veefo varie shia, nawe kaira neefo kimuriny kya vandu. Nafo kweifo nndu nka avaangwaa Marta. Kammbwarya efo kyeny kwakwe. ³⁹ Nawe atiri mfwamaye avaangwaa Maria. We kashekaa rembo yoo marendeny a Nndumi kava amwaaranyaa marero alya akwe. ⁴⁰ Naasa Marta eefo afurukanaa kya findo fiingyi fyeerunda. Kyasia kasha nang’u kaamba, “Nndumi, a mmbo kilakutinnyi elyi mfwama ashira sharunda shimuni? Mbieny nashyeekye-te!” ⁴¹ Naasa Nndumi kambia, “Marta, Yewe mmbo kwasaukwa na ikuvinisa na findo fiingyi. ⁴² Kindo kilavaa ira mmbo kyava kimwi nsi, na Maria kakusawuya waavi yelo usha, nalo nta nnashelusokwaa-se-fo.”

¹ Naasa kafika ando katerevya-fo Iruva kamaa. Nndu wa efo kiloshyony kyakwe kammbia, “Nndumi lufunde shaasa luterevaa Iruva, shaasa na Yohane alevelosha vakiloshyony vakwe.” ² Nawe kavavia, “Mukafika itereva ambeny indi, ‘Woi Nde irina lyafo lyitanwa yeele. Umangyi lwafo lushe. Kindo kukundye kitanyike yaa ulaniny sheefo iruveeu. ³ Luniinge wo nkonu shoonga teru tilufye. ⁴ Kulusarye ulyamari lweru, mashika neese lwasarya wo nndu alulyamarya. Nta kulalurwaa kyeesony.’ “ ⁵ Nalyo kavavia, “A nndu wa kunu nnang’ani yaany ni vi akooya atiri mbuya yakwe, kamweengya kio nnang’ani kavii kammbia, mbuya-akwa shaakuya mikate iraanu, ⁶ mmbo shasheyo ni mbuya-akwa auka kyaaro, neeny shilatiri kindo kyemweengye kyeelya. ⁷ Na ulya akee efo mmba naalwe naambe, kulashaatare!” “Mmba yanraywa, na vana vakwa vallala. Nshishiidimaa-se ikwiipoo shindekuniingya-fo?” ⁸ Na yeny shamuvia, na kara nalakwiipoo, uviny nandenningya elyi akee mbuya yakwe, indi kimmba nalatiri sony yengeera intereva nkyo kimaruma kakwipoo, kandenniingya fyoose atura. ⁹ Na yeny shamuviany, tereveny, mmbo muniingwaa. Syeny, mmbo musheonaa. Kakapeny mwaango mmbo musheruyoo mmba! ¹⁰ Mashika wo nndu aterevaa mmbo avewarya. Na yeto mwiisia kavewona. ¹¹ A mwana wa nndu wa kunu nnang’ani yaany ni ungau atereva ndeye nkate, nawe nanniinge iwe? Ao kantereva ikunga, nawe nanniinge shoka ando a ikunga? ¹² Ao kantereva ipore nawe nanniinge nguluva? ¹³ Naasa yeni mukee varavi kwankooya mwammiidima iniinga fivana yefyo fyany findo fisha, aafikaany Nde waany wa efo iruveeu nshi asheengeraa iniinga vandu Mumuyo Mweele yewo vava ventereva? ¹⁴ Nalyo eefo ashantaa mumuyo nkasha, nato ukee mbimbi, na mumuyo ulya nkasha elyi wammbuka naasa nndu ulya kaidima irera. Vandu valya vakuumbye-u vakasongololo. ¹⁵ Na valya vaangu vawo vakaamba, “Ni yeto nniini wa mimuyo mikasha, we Belsebuli, mmbwe ammbikye ngarami, kaantany nayo mimuyo yeyo mikasha.” ¹⁶ Na vengyi vakakunda nawoore wende luuka efo iruve-u vemweesaa. ¹⁷ Nawe kamanya makusaro alya awo, kavavia, “Wo umangyi lukankwava-ava lukakukapa weni, mmbo lwava nrapu, na mmba iiyo ikankwaava mmbo iwundukaa. ¹⁸ Naakwa ni Satana kwakooya akwaava-ava kakukapa we muni, a umangyi lwakwe lushidimaa inda ikaa-u? Elyi mwaamba ni ngarami ya Belsebuli shaanta nayo mimuyo yeyo mikasha? ¹⁹ Na kwakooya ni ngarami ya Belsebuli shaanta nayo mimuyo yeyo mikasha, a vana yewo vany, wo nkyokyi vawaanta nakyo? Kikavaany mmbo vashemutyaa uvingo. ²⁰ Indi kwakooya ni finya ya Iruva shaanta nayo mimuyo yeyo mikasha, naasany, umangyi lwa Iruva akakalu lwamfika kwany. ²¹ Elyi mwaafinya aree fisha fyakwe karinga indo poo yakwe, na findo fyakwe atiri mmbo fikaa kipwa. ²² Indi kasheywa ni mwaafinya ungyi amwiilanyi kammbinga, mmbo ashensokaa fisha filya fyakwe eefikusirye, na mifungwa ilya kandeyaava. ²³ Nndu nalakee wa kyaalu kyakwa mmbo akee nkiduva wakwa. Na nndu nalashekyaa isanyirya mmbo anyanyataa.” ²⁴ “Na mumuyo nkasha yeto kwankooya wammbuka nndu, mmbo usheiraa kundo kuumu wisyaa ando a iimuya-u ulaoni, ukaamba, ‘A shiwuye neefo mmba kundo shileuka.’ ²⁵ Ukasha nang’u ukakooya kwammaaiyo na ishopwa. ²⁶ Nalyo ukeenda, ukasha uryani na mimuyo mikasha ingyi mfungare ikee mikasha ngota to mweni, ukeenda nafo, Na mbony teefurumya ta nndu yeto mmbo tivaa shikasha ngota tilya ta mbee.” ²⁷ Naasa elyi arera indo, nndu nka wa efo vanduny vakuumbye-fo kaonisa unyanga kammbia, “Ngoma nsanga ulya ulekwiira na mavee alya kuloonga.” ²⁸ Nawe kaamba, “Kilanya ngoma vandu vearanya irero lya Iruva vakalyiringa.” ²⁹ Naasa elyi vandu veefo vasheengeraa isha ishekuumbya-u nkuka nawe kapooka irera ashambaa, “Irika elyi lya vandu lyava irika iravi. Mmbo lyasia yoorwa wende, na wende nta lyilasheniingwaa, kulaore ni wende yelo lwa Yona-fo. ³⁰ Mashika Yona shaasa aleviiya vandu va kulya Ninive wende, na Mwana yeto wa nndu ni kiwo-da asheviiyaa irika elyi wende. ³¹ Mangyi ulya wa kyika wa sinde ashekaa-fo ando amwi na vasoro va irika elyi, elyi mwaandu yeto nniini ureraa, llyo ashekwipoo na ivautya uvingo. Mashika we alesha auka marayony a ulana yelu, nashe yaaranya marero alya a urango a Solomon. Neeni lleny-te, yeu akee yaa mmbo ang’annya Solomon. ³² Na vasoro va kulya Ninive vashekaa-fo ando amwi na vandu va irika elyi, elyi mwaandu yeto nniini ureraa, llyo vashekwiipoo na ivautya uvingo. Mashika wo valealashika efo nriminy elyi Yona alevakapya weele. Neeni llen-te ekyi kyikee yaa mmbo kyang’annya Yona.” ³³ Nta nkwiifo nndu ashataa taa kaivika ando kukusurummyi ao kaisikya-fo! Mmbo asheivikaa yoo ando a yeekerya taa, naambo woose vaanga mmba vaoni sa. ³⁴ Iriso llyo taa ya imikyaa mwiili, naasa kwakooya iriso lyafo niisha na mwiili yeto wafo mmbo utiraa sa moose. Indi kwakooya iriso ni ikasha na mwili wafo mmbo uvetiraa ireema. ³⁵ Naasa sa yeyo ikee nnang’ani yafo ilole kulasheeva ireema! ³⁶ Naasany kwakooya mwili yeto wafo ukee sa moose piny, kuleefo-se kyenga kitiri ireema, mmbo uvaa sa moose piny, kyikava sheelyi taa yakuvaiya ng’aa na sa yavayo. ³⁷ Naasa eefo areraa indo, nndu Mfarisayo kashentereva nafike kwakwe, nandelya nawe shoonga. Nawe kaveanga nafo kakaa rembo yoo ando eelyiiya shoonga. ³⁸ Naasa Mfarisayo ulya kasongololo elyi alepooka ilya kulore ansangya maako. ³⁹ Naasa Nndumi kammbia, “A nyira yeni Vafarisayo mmbo musangyaa upata na kideeva efo kipoo, indi yefo nnang’ani yaany mukawuya iishwa usokyi na uravi. ⁴⁰ Mmbo muring’ani-te! Yeto aletana fya kipoo a nshiwe alevetana na fya kimmba? ⁴¹ Indi yefyo fikee yefo nnang’ani mfyo mushevikaa fyeesarya vakiva llyo fyoose fishemuviyaa fyaa.” ⁴² “Indi oshiny lwany yeni Vafarisayo! Mmbo muvikaa kya ikumi ikumi kya findo fyefwaamisa na fyeerolisa na fyeelonga shoonga! Indi irummbwa fya usumanu na ikunda Iruva, fyo mukawuya ifira. Efyo mfyo fyeetana neefyo fingyi fivekukaya-u filarewa. ⁴³ Neeni Vafarisayo oshiny lwany! Mmbo mukundye marembo a mbee efo mmba teererevya na iidikirwa mmbandu efo singireny. ⁴⁴ Oshiny lwany! Mmbo mufwanani na fifu filalollyo na vandu yewo veirau yoo uwe valafimanyi.” ⁴⁵ Naasa nndu wa efo nnang’ani ya valya vakufundye mavavasyo kaalwa, “Llosha elyi kwarera indo mmbo kwalwiinyala na yese!” ⁴⁶ Nawe kaamba, “Na yeni mukufundye mavavasyo oshiny lwany, Mmbo murikaa vandu mario nalavaa ifita, na yeni muveni mario yoo mulaapanaa nta na nni. ⁴⁷ Oshiny lwany mmbo mwatokopa ando valya vakisuku vakee varike, ate ni vandeye valya vany valevawaa. ⁴⁸ Naasa kyikavany mmbo mwavika ukureekyi kya makasha a vandeye valya vany valetana, neeni mukasennywa nng’u, kimmba mmbo valevawaa neeni mukawuya itokopa ando vakee varike. ⁴⁹ Nakyo nkyo kimaruma ufundo lulya lwa Iruva lukaamba, ‘Nshevarumyaa vakisuku na nrumi nawo maata vashevawaa na ivarishisa.’ ⁵⁰ Kyikaenda indo naambo irika elyi lyikooye ireelyo kya samu ya vakisuku valya woose ilya ileeritwa kipookya yuumbwa lya ulana yelu. ⁵¹ Kipookya samu ilya ya Abeli kufike samu ilya ya Sakaria ulya aleretya muu alya nnang’ani kavii ya ando eekorya firaso na mmba ya Iruva sheni. Ee-da, shamuvia, irika elyi lyikaa lyisheveswa kyavayo.” ⁵² “Yeni mukufundye mavavasyo oshiny lwany, mmbo muleuta-fo ufunguo lwa irua mmba yekooya urango usha, na yeni muveni nta mulaange nafo, na yewo varye yaanga nafo mukaveema.” ⁵³ Nalyo elyi ansomuka-fo veelosha mavavaso vasasangyi na Vafarisayo vakapooka intirya ndooshuu nakamwi na isha insellwa kya findo fiingyi. ⁵⁴ Vemwalaa vakooye irakwa-fo kirero kyimwi kyauka kaniny kakwe.

¹ Naasa vandu veefo vashaa ishekuumbya-fo fiku na fiku vakatana vakuvavara. Nalyo kapooka ivia valya vakiloshyony vakwe, “Manyiny mukwiise kinruwo ekyo kitarang’aa kya Vafarisayo, nakyo ni ngata yaawo yekunang’ara. ² Indi nkwiifo kindo kyikee kyisikye kire kyilasukuka-fo, nta kindo kisurumi kire kyilamanyika-fo. ³ Kyimmba ni indo, naasa fyoose mwaambaye yefo ireeminy fikaa fiitiwa efo seny. Na kindo mwaambaye yoo kuriny ka nndu mukee efo firyeny fya mmba fikaa fyaambawa paa efo mmbee-u.” ⁴ “Nyeni mukee mbuya takwa shamuvia, nta mulairyae yewo vewaa mwiili yeto wa nndu, valeedimi itana-se kya mmwasi. ⁵ Indi nshemoraa yeto mushemwiiryaa. Ni yeto, atiri wiidimi lwewaa na numa ya iwaa keedima yeera nndu yefo murony wa Gehena! Ee-da shamuvia, mmbwe mushemwiryaa. ⁶ Ngyuruu isaanu takumbwa senti shaangu se? Nato nta lumwi lwavayo llurekekye efo kisanguny kwa Iruva-fo. ⁷ Indi naakwa mfii ta efo mirweny yaany mmbo tikee shyeekyeni toose. Nta mulairyee! Mmbo mwiirye ngyuruu na tikaingifwa.” ⁸ Neeny shamuvia, “Wo nndu ashekureeka-u kyakwa efo usanguny lwa vandu, na mwana wa nndu ashekureeka-u kyakwe efo usanguny lwa vasu va Iruva. ⁹ Indi yeto asheshikanaa efo usanguny lwa vandu mmbwe ashekanwaa efo usanguny lwa vasu va Iruva. ¹⁰ Na wo nndu ashambaa-u kindo kyeelema Mwana yeto wa nndu, mmbo ashekoyaa ifwaaywa. Indi yeto anruma Mumuyo Mweele, we nnyakoyaa-se ifwaaywa-fo. ¹¹ Neeni elyi mukoyaa vemurwaa efo mmba tawo teeterevya na efo kwa vashilyi na kwa vandu vaitorye nta mulasavae mukusare ndesa murouwaa ao kindo mushambaa kyekuuta mwaandu, ao kindo mushambaa-u. ¹² Mashika Mumuyo Mweele mmbwe ashemufundaa kyeeri ekyo kyeni mumanyi kindo kyisumani irera-u.” ¹³ Nalyo nndu wa efo nnang’ani ya vandu valya vakuumbye-fo kambia, “Llosha, via mwanamaye wakwa naavani ding’u neeny!” ¹⁴ Nawe kambia, “Yewe nndu wakwa, a ni vi ashivikye mwiirumbwa myaandu yaany ao mwaava ding’u tany?” ¹⁵ Nawe kavavia, “Manyiny mukwiise waafu lwa wo ngata. Mashika kishyukyaa nndu muu nshi masaa yoo atiri kaingyifyo-fo.” ¹⁶ Naasa kaveera kyaaso kaamba, “Kweefo nndu eetiri irema lyakwe kakooya lyivesye deny.” ¹⁷ Kava akusara-saraany efo nriminy kaamba, “A shitani inda? Mashika elyi shauwa ando nshesanyiryaa fimu fyakwa?” ¹⁸ Nalyo kaamba, “Akakyi kindo ntanaa. Mmbo nsammbwaa mbeshe yeti takwa, shyooke tingyi niini kilanya. Mfo nshesanyiryaa fimu fyakwa fyoose na umasi lwakwa loose. ¹⁹ Shivieny nrima wakwa, ‘Manya kutiriny findo fisha fingyi kwansurumyo fya myaaka miingyi. Naasany kukaye rembo, kuve mwiilyaa na ina na ifura.’ ²⁰ Naasa Iruva kashembia, ‘Kukee nrung’ani te! Ni kio eki kya inu muu wafo usheondowaa. A efyo kusurumyi fivaa fya viiny?’ ²¹ Naasa kya nndu ashekusanyiryaa findo ni indo kishendaa kwakooya kulaore atiri umasi lwa efo kwa Iruva.” ²² Nalyo kavia valya vakiloshyony vakwe, “Nkyo kyimaruma shamuvia, nta mulave vandu veesaukwa-saukwa kya muu yeu kindo mushelyaa, nta kya mwiili eto wany, kindo musheraa. ²³ Muu nto nniini ngota shoonga na mwiili yeto wa nndu ukairya masara. ²⁴ Endeloleny mangola-te! Nta nnyeraa mbeu-fo nta iilula-fo. Na Iruva kava mmbwe aalela. Aafikaany yeni nshi mwiilanyi ndeye kwaasha kyikang’ana deny?” ²⁵ A nndu wa kunu kwany ni ungau ashiidimaa yeengerya waasha lwakwe ando a irambo lyimwi tupu na kasaukwa inda? ²⁶ Naasany kwakooya mulashiidimaa efyo fidu nta kimwi, a nkyikyi elyi mwasaukwa? ²⁷ Endeloleny fivaro efyo fya efo mbuveny-te. Nta mfyooka uruu-fo, nta yooka soori-fo. Neeny shamuvia, nta Solomon na usuri lwakwe loose nnyeree mesha sha kimwi kyavayo-fo. ²⁸ Naasa mare yoo efo mbuveny aiyo inu na lya ndesi akandeerwa murony, Iruva antana amaambika indo, a yeni nshi ashemweengeryaa kilanya kyikairya? Mmbo mukee vandu vakusirye-u kyaangu-da! ²⁹ Nta mulave vandu veevesa-vesa kindo mushelyaa na ina nta mulatafukwa-tafukwa kya findo efyo-fo. ³⁰ Kyimmba vandu valalakyaa findo efyo fyoose ni vandu va masanga. Indi kyany yeni ni Nde eeshi mmumanyaa ikaa indo mulatiri findo efyo-fo. ³¹ Indi veny vandu veevalya na umangyi lwa Iruva na efyo fingyi musheengeryo-u fya mmwasi. ³² Nta kulairyee yewe ironda idu! Ni Nde yeto waany anrumbwa indo namuniinge umangyi. ³³ Endekumbeny findo yefyo mutiri mukandevika fyeesarya vakiva! Kusongosyeny fikushu fyeesuruma fesa filakwaa ni masaa eekusurumya efo iruve-u nalafikyaa, kundo manyinyi nalakooyaa, nta kurukuru ilashiidimaa ilyamara-fo kindo. ³⁴ Mashika kundo mwansuruma umasi lwany, na ngoo eto tany mfo kundo tikai. " ³⁵ Veny vandu vakwiinivye fisiny, muveva na taa tany tikee shyaate. ³⁶ Neeni muvefwanani na vandu veevereya Nndumi waawo kyeeri awuya auka waliny na elyi ashaa lyo yeni kakapa mwaango naambo mwiidimi induya. ³⁷ Ngoma mashinga alya nndumi waawo akooya valele shoovi. Nkya dede shamuvia, ashekwiinivaa nashevavika rembo valye shoonga na isha navesha ivafurukanya. ³⁸ Kasha ikamba lya kavii lyeringa kyio, naakwa ni lya kararu, kakooya veevereye indo, ngoma wo! ³⁹ Indi manyiny, kwe yeto muni kyeny eeshi ni kyeeri kyi inyinyi lyisheshaa mmbo eelalaa rembo nta nneelekeyaa mmba yakwe ifishwa-fo. ⁴⁰ Neeni kevekaeny-fo mwikudeesye mashika mwana yeto wa nndu asheshaa kyeeri mulakyiishi. ⁴¹ Nalyo Petro kammbia, “Nndumi a kyaaso ekyo mmbo kwalweera kyeeluronga yese ao na vengyi woose ndesa?” ⁴² Na Nndumi kaamba, “A ni nndu ungau avany mmbwe mwiikallya kyeny akee nsaari kaveva nndango, yeto nndumi wakwe ashemmbikaa nniini wa mashinga akwe, nawe mwiivaniinga shoonga kyeeri kisumani? ⁴³ Ngoma ishinga elyo kwakooya nndumi wakwe asha kakooya etana indo. ⁴⁴ Nkya dede shamuvia, mmbo ashemmbikaa nniini wa masaa akwe moose. ⁴⁵ Indi kwakooya ishinga elyo lyikusaraa efo nriminy, nndumi wakwa mmbo akeekyeeywa isha, nalyo lyikapooka ikapa mashinga wooroye alya a kyuumi na a kyika, na ilya na ina na inangwa. ⁴⁶ Nndumi wa ishinga elyo, isha asheshaa nkonu nalavereye na kyeeri naleeshi. Nawe ashemparaa fiparwe fivii, na imwaavya waavi lwakwe ando amwi na yewo vamini. ⁴⁷ Indi ishinga elyo lyiishi efyo nndumi wakwe akundye kara nalakudeesya nta itana kisumani na yefyo akundye mmbo ashekapwaa ngapo shiingyi. ⁴⁸ Indi yeto naleeshi katana fisumani ikapwa, we ashekapwaa ngapo shaangu-angu. Indi wo nndu aniingyo fiingyi mmbo asheveswaa fiingyi. Na yeto arambikyo fiingyi vandu mmbo vasheengeraa indesia fiingyi efo kwakwe.” ⁴⁹ “Mmbo shisheye yeera muro kunu urukeny. Nato kwe wemmaaka nsheekundye kindo kingyi kilanya-fo. ⁵⁰ Indi shitiri ubatiso nshebatiswaa nalo, neeny shiifo nshaakarwaa-da kutani lwainutyo. ⁵¹ Ndesa mukusarye kindo shisheye ni isheende ufoo na kunu ulaniny? Nshi indo-fo! Mmbo shamuvia, ni mirauko. ⁵² Mashika pookya ulaalu vashekaa-fo vandu varaanu valele mmba imwi, nawo varaukani, yewo vararu vasue yewo vavii, na yewo vavii vasue yewo vararu. ⁵³ Na vandu vasheraukanaa ni ndeyaa-nndu na mwana wakwe, na mwana wa nndu na ndeye, na mayea-nndu na mfu wakwe, na mfu wa nndu na maye, na mammi wa nndu na mwalyi wakwe, na mwalyi wa nndu na mammi wakwe.” ⁵⁴ Nalyo kavia valya vakuumbye-u mamwiingyi, “Kyeeri mwalollya mafishi akwiipoo taari ya nkwaany, nalyo yeni mukaamba, ‘Kwiifo kwishaa mbua! Nakyo kyikaveva indo.’ ⁵⁵ Na kyeeri mwalollya uraato lwiivivitaa luuka taari ya kasa mukaamba, ‘Kwiifo kushevaa mwi! Nalyo kyikaveva indo.’ ⁵⁶ Mukee vandu vakunang’ari! Mmbo mwiishi ilola ngata ya ulana yelu na ya efo nginiiu. Mmbo kyava inda elyi mulalolaa fyeeri efyo fiifo shaasa fikai?” ⁵⁷ Nkyiki elyi mularumbwaa fya usumanu yeni muveni? ⁵⁸ Mashika kikee sheelyi kukooyaa kutiri mwaandu na nndu, mwiifo mushendaa nawe kulya kwa mwiirumbwa myaandu, naasa efo shia kutakure kulakooye kwiishenkuutaa, nalashekurambikya efo kwa mwiirumbwa mwaandu. Na yeto mwiirumbwa mwaandu nandekurambikya efo maakony a mwituuro vandu. Na yeto mwituuro nandekweera kyifingyony. ⁵⁹ Mmbo shakuvia, nta nkushukaa-fo fo, na kutani kwataa na senti ya kiparwe.

¹ Naasa fyeeri filya kweesheye nafo vandu valemwoongoya mbony ta Vagalilaya valya Pilato alesasanda samu yaawo na firaso fyawo. ² Nawe kaalwa kavavia, “A ndesa mmbo mukusarye Vagalilaya yewo mmbo vekee vandu valyamari vakeerya Vagalilaya vengyi woose elyi valeliswa indo ukiva?” ³ Nshi indo-fo! Mmbo shamuvia, “Kwakooya mulashaalashikaa nrima ni indo mushesarumyaa moose! ⁴ Naasa na vandu valya ikumi na nyanya valya valewoyo ni nnara kulya Siloamu, ukavawaa. A nyira mukusarye mmbo vekee varekwa vakairyaa vandu valele Yerusalemu woose?” ⁵ Nshi indo-fo! Mmbo shamuvia, “Kwakooya mulashaalashikaa nrima ni indo-da mushesarumyaa moose!” ⁶ Nawe kaveera kyaaso kyikee ule, “Kweefo nndu eetiri nkuu wakwe wa nndeny ukee nronge efo nndeny wakwe wa misabibu. Kasha isya-u ndunda nalaoni. ⁷ Nawe kavia ulya mwiiremmya misabibu, ‘Lla-te kwansia myaaka iraru uka elyo shilepooka isya ndunda kunu nkuuny yeu shilawonise. Umanyiny-te! Nkyiki elyi wakuvisa sumbai ruu?’ ⁸ Nawe kaalwa kambia, ‘Nndumi kuureye-u mwaaka yeu umwi-da, neeny shiuremyi na iwaalya kirashi. ⁹ Kulakooye uvikaa ndunda kyeeri ekyi kishaa. Kilave indo llyo kusheumanyaany.’ “ ¹⁰ Naasa eefo eloshaa efo mmba yaawo imwi yeeterevya elyi lya Sabato. ¹¹ Nalyo akakau nndu nka eefo atirwa mmumuyo nkasha ullweesye ando a myaaka ikumi na nyanya. Nawe kakulema nta naleedimi yooroka shumu. ¹² Naasa Yesu allolya kammbaanga na yoo akai, kammbia, “Nka kwameeyauwa unana yelo lwafo!” ¹³ Kamweekerya maako. Nalyo yeni kaoroka, kapookany iitikisa Iruva. ¹⁴ Nalyo ulya nniini wa mmba ilya yeeterevya kasukyo elyi Yesu akyira vandu nkonu wa Sabato. Kaallwa, kavia vandu valya vakuumbye-fo, “Mmbo kwiifo mikonu irindaru isumani irunda nayo. Naasa nnyo musheshaa nayo ishekirwa nta mulashe nkonu yeu wa Sabato.” ¹⁵ Nalyo Nndumi kanndouwa kaamba, “Mmbo mukee vakunang’ari-te! A kunu kwany nshi wo nndu ashauwaa shau yakwe ao nshungu wakwe efo nguvanuny, katiauwa kandetiniinga mura, nkonu na ukava wa Sabato? ¹⁶ Afikaany yeu akee wa ufyari lwa Abrahamu na satana kamfinga myaaka yei ikumi na nyanya myoose, a nshi kyeemaa naauwa elyi akee mwiinive indo, nkonu na ukava wa Sabato? ¹⁷ Nalyo elyi arera indo, vakatirwa nsony woose valya vantirye kiduva. Na valya vakuumbye-fo mamwiingyi vakafura woose kya findo fya wiitori fitanwaa mmbwe.” ¹⁸ Naasa kaamba, “A umangyi lwa Iruva mmbo lufwanani neekyi, nalo nkindo kyingakyi nshelwananisaa nalo? ¹⁹ Mmbo lufwanani na mbeu ya haradali, na Nndu kaiipoo, Kandeyeera efo nndeny wakwe. Nayo ikang’ana ikava nri nniini na ndeye ta nginiiu tikakaa efo marambeny avayo.” ²⁰ Nalyo kawuya kaamba, “A nkyikyi nshiinanisaa nakyo umangyi lwa Iruva? ²¹ Mmbo lufwanani na kinruwo kitarang’aa kyifumbisaa nswa.” ²² Nalyo kawara shia karumbwa muriny kwi muri na fimuriny asheloshaa-fo. Kavaany arwaany na kulya Yerusalemu. ²³ Nalyo kakooya nndu ambia, “Yewo vakoyaa ikirwa ni vaangu ndesa?” Nawe kavavia, ²⁴ “Kapanyiny ngiri yeyo shisiise mukooye yaanga nafo! Mashika shamuvia, kwiifo veengyi vasiaa yaanga nafo valashiidimaa.” ²⁵ Mukammbera muni kyeny kakwipoo na iraya mwaango, neeni kwakooya llyo mwapooka isalala yoo poo na ikakapa mwaango na yaamba, “Woi Nndumi luruye mmba, nalyo ashallwaa, ‘Nshimwiishi kundo muukye-fo!’ ²⁶ Llyo mushepookaa yaamba, ‘Mmbo lulelya shoonga na ina yoo usanguny lwafo-te, na efo minyanuny yeeru mfo kundo kulelosha.’ ²⁷ Nalyo asheambaa, ‘Mmbo shamuvia, nshimwiishi kundo muukye-fo. Shyuukeny yeni moose mutannyi fya kiila!’ ²⁸ Nafo kushekaa-fo ikapa kiiyo na irafunnya mayoo, elyi mushelolyaa Abrahamu na Isaki na Yakobo na vakisuku valya woose vakee efo umangyiny lwa Iruva, neeni muveni musheerwa efo poo. ²⁹ Nalyo vasheshaa vandu vauka taari ya ngama na ya nkwaany na nturu na ya sinde vashekaa rembo valye shoonga efo umangyiny lwa Iruva. ³⁰ Neeni manyiny, va numa vashevaa va mbee, na vambee vashevaa va numa.” ³¹ Nalyo saa ilya sheni kasheywa ni Vafarisayo vaangu. Vakammbia, “Kwipoo kuuke yaa kukai! Mashika Herode arie ikuwaa!” ³² Nawe kavavia, “Endevieny iparwe elyo, akakau shiifo nshantaa mimuyo mikasha na itana mashora eshiisa vandu inu na ndesi. Na nkonu yeto wa kararu nsheinutyony. ³³ Indi kuti shilunge kyaaro kyakwa inu na ndesi na nrondo. Shamashika nkivaa nndu nkisuku narumatyo ando engyi kulaore ni kulya Yerusalemu-fo.” ³⁴ “Yewe Yerusalemu! Yewe Yerusalemu! Kukee mwiwaa vakisuku na yewo varumwa kwafo kwaveera mawe! Ni keengyi sheekundye yuumbya vana vafo shaasa nguku ishyuumbya fivana ikasikya na maaru. Neeni mulakunde. ³⁵ Llen-te mmba yeyo yaany mushereywaa ikee irama. Mmbo shamuvia, Mmushekishilolyaa-se-fo kutani kwafika kyeeri elyi musheambaa, ‘Kundearafumwa yeu asha arumwa ni Nndumi!’ “

¹ Naasa kikava elyi aleanga na efo mmba kwa nsongoru wa Vafarisayo elyi nkonu wa Sabato nandelya-fo shoonga, nawo vakava vanreiyaany. ² Nalyo akakau nndu alwee ndwari yeefumbisa malungo ansha nang’u asalalyi yoo usumanu nawe. ³ Yesu kapooka irera, kavia valya vakufunndye-mavavasyo veefo na Vafarisayo, kaamba, “A ndesa kwiiyo mumu weeshisa nndu nkonu yeu wa Sabato ao oode?” ⁴ Vakamalallya sau. Nawe kampaana kanshiisa kansama. ⁵ Kawuya kavavia, “A kunu kwany kwiifo nndu ndesa akooya nshungu wakwe au shau yakwe yammooloka irininy lya mura, nawe kara nalaangusya iyoomwa-fo swany, naakwa ni elyi lya nkonu wa Sabato?” ⁶ Nawo valeedimi irouwa kilya aamba. ⁷ Nawe keera valya vavaange kyaaso, elyi alolya shaasa vakusawuya marembo a mbee, kavavia, ⁸ “Kwavaangwa walyiny ni nndu nta kulakunde ikaa kirembo ekyo kya mbee-fo, kukooyaa kwiiyo nndu nniini akwiilanyi akee mmbaange. ⁹ Na ulya alemuvaanga nashekuvia, ‘Seiya yeu-te!’ Nalyo yewe kuti kukwiipoo kundekaa kirembo kya efo numa kwisukaa! ¹⁰ Indi kwavaangwa enda kundekaa kirembo kya efo numa, na yeto akuvaanga kasha nang’u nakuvie, ‘Mbuya-akwa serikya efo kya mbee!’ Llyo kushewonisaa nnduma, na valya mukeelya nawo shoonga velollye woose. ¹¹ Shamashika wo nndu akwaallwa nniini we muni akaa nanyiiswa neeto akwaalla n-du we muni akaa naroswa.” ¹² Naasa kavevia na ulya ambaanga, “Kwafika ikora shoonga yevaangya vandu ya ngama ao ya nkwaany nta kulashevaanga mbuya yeto tafo-da-fo nta vanavamau-da-fo, nta vaufyari lwafo-da-fo, nta vandu va nnyanu vakee masimba-da-fo, naambo nawo vakuvaange ikamba lyawo kive ni kileko vakutaa. ¹³ Indi kwafika ikora shoonga yevaangya vandu, vaanga vakiva na fisaya na yewo vakee miketekete, na yewo vafu miso. ¹⁴ Neewe llyo kushevaa nndu wa ngoma, kyimmba valatiri kindo kyekutaa mmbo kushetawaa yoo marukyony a yewo wa usumanu.” ¹⁵ Naasa elyi veefo valyaa shoonga, ulya umwi ammiita Yesu arera indo kammbia, “Ngoma nndu ashelyaa shoonga efo umanginy lwa Iruva!” ¹⁶ Na Yesu kammbia, “Kweefo nndu alekora shoonga shiingi tevaangya vandu, kavaanga veengyi. ¹⁷ Naasa kyeeri shoonga tilya tileya, karuma ishinga llya lyakwe, lyindevia valya vakee vaarye nrumi, kusheyeny fyoose fyammaa ideesyo. ¹⁸ Naasa vakapooka na nrwe umwi nsi iviira nrumi ilya. Ulya wa mbee kammbia, ‘Shammuura irema, na shakyi kuti shyeende ilyisengera. Shakutereva manya mmbo shammbiira nrumi ilya.’ ¹⁹ Na ulya ungyi kaamba, ‘Na yeny shammuura nguleta teengya mapaleny araanu, shiifo shindeteesaa. Shakutereva manya mmbo shammbiira nrumi ilya.’ ²⁰ Na ulya ungyi kaamba, ‘Na yeny shammaalyika nka, nkyo kindo kyashiima isha.’ ²¹ Ishinga llya lyikafika kyeny, lyikanderuuya nndumi ulya wakwe mbony tilya. Nalyo ulya muni kyeny karooywa ni ngoo, kavia ishinga llya lyakwe, ‘Iluya kundefika shieny niini na shieny ta efo muriny, kundeende valya vakiva na fisaya na vafu miso, na fitongororo vashe na kunu.’ ²² Ishinga llya lyikasha lyikaamba, ‘Kyammeeva indo-da shaasa kwavavasya, indi kwasaa-u mwaanya.’ ²³ Nndumi ulya kavia ishinga llya lyakwe, ‘Enda kufike efo shia, na efo minyanuny, kundevaitika vashe yaanga na kunu mmba, mmba yakwa iishwe. ²⁴ Mashika shamuvia, valya vakee vaarye nrumi nta umwi nnashelongwaa shoonga yakwa-fo.’ “ ²⁵ Naasa vandu vakeenda varyani nawe nkuka. Nawe kavaindukya kavavia, ²⁶ “Kwakooya nndu akusheya na kwakwa kara nalasua ndeye na maye na nka na vana na vanavamaye na vamfwamaye, navesanda-u na muu wakwe muni, we nnyashiidimaa iva nndu wa kiloshyony kyakwa-fo. ²⁷ Nndu kara nalakurika nsalaba wakwe muni nashilatye yoo numa, we nnyashiidimaa iva nndu wa kiloshyony kyakwa-fo. ²⁸ A mmbo kwiifo nndu wa kunu kwany akunda itana nnara kara nalakaa mbele rembo neekeni efyo ashelekeiyaa-u namanyi kwakooya atiri fya iinutya mashora yoo? ²⁹ Naambo nalakooye ammbika mawe a uvasha nalemwa imarisya. Nalyo vandu vallollyaa vapooke inseka woose, ³⁰ veshambaa, ate nndu yeu alepooka itana mmba naleedimi imarisya. ³¹ A mmbo kwiifo nndu mangyi ndesa akwiipoo nandekwaananya na mangyi ingyi kya ikapana, kara nalakaa mbele rembo navike shila namanyi kwakooya ashiidimaa indekapana na ulya arye fiku makumi avii nawe muni kakooya arie fiku ikumi tupu? ³² Kwakooya kilavaa mmbo ashutaa varumi veerumya ulya ekee kikwaasha, nandevesa kyindo kyeetana kuwonike ufoo. ³³ Naasany neeni ni kiwo-da, Wo nndu wa kunu kwany ara nalalakana na findo efyo atiri fyoose nnyashiidimaa iva nndu wa kiloshyony kyakwa-fo.” ³⁴ Naasany mmbala nkindo kisha. Indi mmbala kwakooya wammba iturya a kindo uwuyaa iroliswa nakyo nkyokyi? ³⁵ Mmbukivaa-se nta ivika sumbai iwaallwa kirashi-fo. Mmbo vasheweeraa efo poo. Yeto atiri maarwi eyaaranya navearanya.

¹ Naasa vadedemi veefo vensheyaa woose na valyamari vashemwaaranya. ² Na Vafarisayo vasasangyi na veelosha mavavaso vakarininda vakaamba, “Yeu mmbo awarya valyamari kalya nawo shoonga.” ³ Nawe kaveera kyaaso kaamba, ⁴ “Ndesa kunu kwany ni nndu ungau akooya atiri moonri iyana, kareta-u lyimwi, nawe nare nalatiiya alya makumi keenda na keenda kulya kasa nandevingya llya lyirekye kutani alyikooya? ⁵ Kammelyikooya nalyivike mevee-u etirwa ni nsia. ⁶ Kamfika kyeny kwakwe kandevaanga mbuya takwe na vandu va nnyanu vakwe, navavie kesangeny neeny mwiifuraa, mashika yoonri llya lyakwa lyeerekye ekakalyi shallyikooya!” ⁷ Na yeny shamuvia, “Efo iruveeu ni indo-da kukaa-fo nsia kya nndu llyamari umwi elyi aaluka, ngota kya vandu va usumanu iyana valatiri kimaruma kya yaaluka.” ⁸ “Ao ni nndu nka ungau eefo atiri shilingyi ikumi, kareta-u imwi, nawe nare nalaata kimwii na yaaiya mmba na iruuya na sina kutani aikooya? ⁹ Kammeikooya mmbo andevangaa vaka vambuya na va nnyanu navavie kyesangeny neeny mwiifuraa mashika shilingyi ilya yakwa sheeretye akakai shammeeikooya. ¹⁰ Na yeny shamuvia, ni indo-da kukaa-fo nsia efo kwa vasu va iruveeu kya nndu llyamari umwi elyi aaluka.” ¹¹ Kawuya kaamba, “Kweefo nndu etiri vana vakwe vavii va womi. ¹² Na ulya mwanawo wa nndu kavia ndeye shiniinga kyenga kya masaa yoo eefo, ekyo kikwaani neeny. Nalyo kavaavya umasi llwa lwiiyo. ¹³ Nalyo mwana ulya mwanawo wa nndu kavera mikonu myaangu. Kaumbya findo filya fyoose ando amwi. Kasama naambo nandekaa uruka lwa kwaasha. Nafo kanyanyatya-fo masaa alya akwe esindi na vandu va ngula. ¹⁴ Naasa elyi ammaa findo fyoose, uruka llwa lukawoywa nshaa shiniini nnu. Nawe muni kapooka ifikyo mfindo. ¹⁵ Nalyo kawara shia kandekunanavya na muni kyeny umwi wa uruka llwa. Nawe kanruma efo mareminy akwe, nandeisa-fo nguve. ¹⁶ Nalyo kava alangany makanda alya alyiwaa nnguve tilya, kulakae-fo nta nndu anniinga kindo. ¹⁷ Naasa kakwiindukya we muni kaamba, ‘Varundi vakee efo veekya kwa nde-yaakwa vafye indo, mmbo vatiri fyeelya fiingyi filasiaa. Neeny shatana shafiiya nshaa kunu!’ ¹⁸ A shikwipoo shindefika kwa nde-yaakwa shimmbie, ‘Woi nde, mmbo shilelyamara kya efo iruveeu na yoo usanguny lwafo! ¹⁹ Nshikisumani-se ivaangwa ni mwana wafo-fo. Shaallwa shive umwi wa varundi vafo.’ ²⁰ Nalyo kakwipoo keenda kulya kwa ndeye. Elyi akee kwaasha ndeye kallollya, kavavyo mmuu, keenda eerishaa, kallingilya singony kammiminda.” ²¹ “Naasa mwana ulya kammbia, ‘Woi nde mmbo shilelyamara kya efo iruveeu na yoo usanguny lwafo! Nshikisumani-se nta ivaangwa mwana wafo-fo!’ ²² Naasa ndeye kavia mashinga alya akwe, ‘Angusyeny mundeende soori ya wuuru mumbike na nrashi efo wokony, na fyaaru. ²³ Muvendeende na ngashe ya shau ikee shivanri mwiishishe. Neese ndifony lulye lukese! ²⁴ Kimmba mwana yeu wakwa efiiye kawuya iruka. Erekye kawuya ilollyo.’ Nalyo vakapooka indekesa.” ²⁵ Naasa mwana ulya vavaye wa nndu kakooya akee ireminy. Nalyo elyi eefo ashaafukyaa kyeny keeta kwiireraa finanda na ufina. ²⁶ Nalyo kavaanga umwi wa mashinga alya kansununda nammbie kindo ekyo kiifo nkyokyi? ²⁷ Nawe kammbia, “Ni mwanamau ansha. Na ndoo kanshishya ngashe ilya shivanri, kimmba awuya immbwarya akee na muu. ²⁸ Naasa kafulukwa nta nalakunde yaanga na mmba. Naasa ndeye kasomuka na poo kandellelemba.” ²⁹ Nawe kavia ndeye, “Lla-te yeny shileva mwikurundya myaaka miingyi indo nta ivavaso lyafo lyimwi shilalyiimbwe. Neewe nta kulakunde ishiniinga nta ngurana ya mburu shifure ando amwi na mbuya takwa. ³⁰ Indi mwana yeto wafo alemaa masaa afo moose asangyi na vaka va shia, kwallollya ashe we kwanshishya ngashe shivanri.” ³¹ Nawe kammbia, “Mwana wakwa, mmbo kusindi neeny fyeeri fyoose, na fyoose fikee fyakwa fikaveva fyafo. ³² Kya indi yese mmbo lwalollya kuti lufure na ilooka kimmba mwanamau yeu mmbo efiiye kawuya iruka, mmbo eerekye kawuya ilollyo.”

¹ Naasa kavevia-se valya vakiloshyony vakwe, “Kweefo nndu nsuri eetiri nngari mwikallya findo fyakwe. Nawe kashekumbwa kwakwe mmbo ennyanyata findo filya fyakwe. ² Kammbaanga kammbia, ‘Nto mbony kyi shaita tafo? Shekennya findo efyo kukalyaa-te! Mashika nkukyiidimaa-se iva nngari-fo!’ ³ Nawe kakusara efo nriminy, ‘A mmbo ntanaa inda elyi nndumi wakwa ashuutaa kunu ungariny? Irema nshishiidimaa-fo, na yeererya vandu mmbo lyisheengye usutu. ⁴ Akakakyo shammanya ndesa shitanaa elyi nsheutwaa kunu ungariny, naambo vashiwarye efo kyeny kwawo.’ ⁵ Naasa, kandevaanga vandu vatiri siye ta nndumi ulya wakwe kwi umwi umwi. Kavia ulya wa mbee, ‘A yewe siye ya nndumi wakwa kutiri ifye inda?’ ⁶ Nawe kaamba, ‘Ni nakori iyana ta mafura.’ Kammbia, ‘Warya barua yafo ya siye kukee rembo kureiye na ngeta makumi nave araanu.’ ⁷ Kawuya kavia ulya ungyi, ‘A yewe siye kutiri ifye inda?’ Nawe kaamba, ‘Ni mindi iyana ya nganu!’ Kammbia, ‘Warya barua yafo ya siye kureiye makumi nave nyanya.’ “ ⁸ “Naasa nndumi ulya karumisha nngari ulya llembi. Shamashika elyi aletana kya urango. Kimmba vana va ulana yelu shaasa valyimyana na woofyari lwawo, mmbo vava varango-rango vakeerya vana va sa.” ⁹ Na yeny shamuvia, “Masaa yaa a ulembi kuwonyiny nang’u mbuya, na elyi mukooyaa asya naambo vamuwarye efo kwawo. ¹⁰ Nndu akee nsaari ikallya yekyo kidu deny, mmbo ashevaa nsaari ikallya na yekyo kyiniini. Na nndu aengye mbai kya ekyo kidu deny, mmbo ashendaa mbai na kya ekyo kiniini. Na nndu nalakee nsaari ikallya ekyo kidu deny, nta nnashevaa nsaari ikallya ekyo kiniini-fo. ¹¹ Naasa kwakooya kulaore muleva vasaari ikallya masaa yaa a ulembi a mmbi ashemuningaa ekyo kyikee kyany muveni? ¹² Na kwakooya kulaore muleva vasaari ikallya findo fya vengyi a mmbi ashemuniingaa ekyo kivaa kyany muveni? ¹³ Nta nkwiifo nsoro wa poo kwa nndu ashiidimaa irundya vanndumi vavii-fo. Kungyi ashesuaa yeto umwi nakunde yeto ungyi, ao kungyi ashekulumbaa yeto umwi namini yeto wa kavii. Nta mmushiidimaa irundya Iruva musande irundya na masaa-fo.” ¹⁴ Naasa Vafarisayo vakaita ekyo kyoose aamba, nawo ni vandu vaafu va fesa, nalyo vakamwiipoiyo mmbwa. ¹⁵ Nalyo kavavia, “Yeni mukee vandu vekwallwa va usumanu muveni efo fisanguny fya vandu. Indi Iruva mmbo amwiishi mirima yaany! Mashika yekyo kirose kunu vanduny mmbo kyava usutu efo usanguny lwa Iruva. ¹⁶ Uvavaso na vakisuku veifo veereraa kutani Yohane asha. Indi kipookya yoo ni Nrumi ya Nsia iifo ishaambawaa ya umangyi lwa Iruva, na wo nndu kapara nafo. ¹⁷ Indi ngina na ulana nkyaangu firumake ngota mbekye imwi ya uvavaso ishaalashikaa. ¹⁸ Na wo nndu allakana na nka wakwe kaalyika ungyi, mmbo atana kya utuusi. Na yeto aalyika nka wa nndu allakana nawe mmbo avetana kindo kya utuusi.” ¹⁹ “Naasa kweefo nndu isimba ekee mwiraa soori ta ki-mangyi ngata shimamiri. Kava mwiisinda alyaa usuri wo nkonu kikava kyeekoora. ²⁰ Naasa kukavekaa-fo na nndu nkiva eevaangwaa Lasaro akee mmbike yoo mwaangony kwakwe atirwa mfishavere. ²¹ Nawe mmbo elangye iwuura fipereshu fya fyeelya fiwaa fyuuka efo meseny a nndu ulya nsuri. Na fite fikasha fikakomba fishavere filya fyakwe. ²² Naasa nndu ulya nkiva kafwa, kasha iipowa ni vasu va iruveeu, vakanrwaa ng’undeny ta Abrahamu. Na isimba llya lyikavefwa lyikanderikwa. ²³ Naasa kulya kwa vafu kainwa miso ekee uvavyony kalollya Abrahamu ekee kwaasha na Lasaro ekee ng’undeny takwe. ²⁴ Kaonisa unyanga kaamba, ‘Woi Nde Abrahamu shisarya ukiva lwakwa-dwa, kurumi Lasaro nandekapa kisangu kya nni wakwe mureny nashefweera ulumi elu lwakwa; shamashika shikeevavyo nnu kunu kipalapaleny kya muro yeu.’ ²⁵ Abrahamu kaamba, ‘Mwana-kwa kummbwa mmbo kulewarya mesha alya ekumaye llya meendi kweesindi na muu. Na Lasaro kyakwe kawonisa fya ukiva. Kya indi we ulaalu eefo aviiryoony muu yaa, na yewe kwaliliswany. ²⁶ Na kyingyi ngota ekyo, mmbo kuraukye kukatira waanga uniini efo nnang’ani kavii yaany na yese, na yewo vakunndye yuuka kunu kweru vanderuuka vafike kwany, nta valashiidimaa, nta yuuka efo kwany vafike kweru.’ ²⁷ Naasa kammbia, ‘Kyimmba ni indo, nde, shakutereva kundenruma efo kyeny kwa nde wakwa. ²⁸ Mashika shitiri-fo vanavama varaanu, nawe nandevasununndya, valashe ifika kunu uvavyony sheeny.’ ²⁹ Abrahamu kaamba, ‘Mmbo vatiri Mose na valya veauya fisuku kuti vavaaranyi wo.’ ³⁰ Nawe kaamba, ‘Ode nde Abrahamu. Indi kwakooya nndu auka kunu kwa vafu kandefika kwawo, llyo vashekuryaa.’ ³¹ Nawe kammbia, ‘Vakanra valaaranya nta Mose nta valya veauya fisuku, naakwa nndu aruka auka kwa vafu mmbasheindutwaa-fo.’ “

¹ Naasa kavevia-se valya vakiloshyony vakwe, “Nkivaa misindara ire ilasha-fo; indi nndu yeto misindara ishaa yeendwa mmbwe, oshiny lwakwe! ² Mmbo kyeesumani nafingyo isewe efo singony nandeerwa efo yeeveny, ngota yeengye yewo vafwafwa nsindara naakwa ni yeto umwi waawo. ³ Kwiiseny muveni-te! Kwakooya mwanamau alyamara nrerye na kwakooya arumbuya mfwaaye! ⁴ Na kwakooya akulyamarya matorito mfungare nkonu umwi-da kakuwuiya kaamba, ‘Shanrumbuya!’ Neewe kyevemfwaaye-da!” ⁵ Nalyo varumi valya vakavia Nndumi, “Lweengerye kyikusiryo kyeru!” ⁶ Naasa Nndumi kaamba, “Kukooye mwetiri kyikusiryo kifye sha mbekye ya haradali, mmbo mweeviaa nri yeu wa nkuu iluka kweende efo yeeveny, nato wemwirikyaa.” ⁷ “A nndu wa kunu kwany ni ungau akoyaa atiri ishinga lyiremaa na ng’umbe, ao yiisa findo, kakooya lyasha na kyeny lyuuka ireminy, nawe nalyivie, ‘Angusya isha kukaa rembo, kulye shoonga!’ ⁸ Nshi indo-fo! Mmbo alyiviaa, ‘Songosya shoonga nshelya nkwaany, kusheny kukwiinive kushifurukanyi shitani shalya na ina. Shammaa llyony neewe kushekulyiiyaa na ina.’ ⁹ A mmbo mwaamba asheviaa ishinga elyo aika, elyi lyatana shaasa lyikee ivavasye? ¹⁰ Neeni ni kiwo-da, Kwakooya mwantana fyoose mukee vavavasye, ambeny lukee mashinga a mweelu! Mmbo lwatana efyo tupu lweevavasyo lufitani.” ¹¹ Nalyo kikava elyi arie kyaaro kya yeenda Yerusalemu, nawe muni eefo erumbwaa kulya Samaria kufiitani na Galilaya. ¹² Elyi afika yaafukya kundo kwa muri, kakwaanannya na vandu ikumi vatirwa ni ivave. ¹³ Vakoonisa ngyunyanga veshambaa, “Woi Yesu woi Nndumi weeru! Lulyillye ukiva lweru!” ¹⁴ Nawe kavavia, “Kweengyeny mundekoora efo kwa vakohani!” Naasa veefo vasheendaa vakeeremuka. ¹⁵ Naasa ulya umwi eekilolya ammishia, kawuya kwa Yesu eng’anisaa Iruva na unyanga uniini. ¹⁶ Kashekweera yoo marendeny a Yesu, kamwaana, nawe ni nndu wa kulya Samaria. ¹⁷ Nalyo Yesu karouwa kaamba, “A vandu veremuka nshi ikumi? A valya keenda valla kwi? ¹⁸ A ndesa nkwawonika-u awuya isheetikisa Iruva, kulaore ni nndu yeu nawe kaveva muny?” ¹⁹ Naasa kambia, “Kwankusirya-u indo nkyo kyakukira!” ²⁰ Naasa Vafarisayo vakavesa Yesu, “A ni indii umangyi lwa Iruva lusheshaa?” Nawe karouwa, “Isha lya umangi lwa Iruva llyivaa isununda-fo! ²¹ Nta llushambawaa, akakalu kunu! Ao akakalo kulya-fo. Mashika lleny-te, umangyi lwa Iruva ni efo nnang’ani yaany lukai!” ²² Naasa kavia valya vakiloshyony, “Kukaa kushe fyeeri elyi mushelangaa ilollya mikonu yeyo ya Mwana yeto wa nndu, nta umwi tupu mulaulolyaa. ²³ Nalyo vandu vashemuviaa, Ekakau kunu! Ekakato efo! Neeni nta muleende-fo nta mularishe nafo-fo! ²⁴ Mashika shaasa ukova lushakaa paa luuka marayony a ngina taari yei lukafika marayony a ngina taari yei ingyi lwivevaa paa, na Mwana yeto wa nndu ni indo ashevaa elyi kufikaa nkonu yeto wakwe. ²⁵ Indi kindo kyikee kirummbwe kishesongwaa immbonisa ni indeliswa ukiva wiingyi na iminwa ni vandu va irika elyi. ²⁶ Na shaasa kileva fyeeri filya fya Noe ni indo kishendaa elyi kufikaa fyeeri efyo fya Mwana yeto wa nndu. ²⁷ Mmbo valeva veelya na ina na yaalyika na yaalyikwa kutani kwafika nkonu ulya Noe aleanga na efo isandukuny llya iniini. Nalyo yeeve ilya ikasha ikavarumata woose. ²⁸ Nakyo kyikafwanana na kyilya kileutika fyeeri filya fya Loti. Mmbo veefo vellyaa na ina na yuura na ikumba na ivaakya na itana mmba tawo. ²⁹ Naasa nkonu ulya Loti alekwiipoo kulya Sodoma, kukooloka mbua ya muro na kibiriti yuuka na efo iruveeu ikavakomba kombi. ³⁰ Na elyi kufikaa nkonu yeto Mwana yeto wa nndu ashefumaa nato paa, ni indo-da kishendaa. ³¹ Nkonu yeto nndu akooyaa akee efo mmbeu na fiiya fyakwe fikee efo mmba, nta nalaoloke-fo nandefipoo-fo. Na nndu akooyaa akee ireminy ni kiwo-da nalawuye na numa. ³² Kyekummbweny nka ulya wa Loti. ³³ Nndu katambalya ikyira muu wakwe, mmbo asheuretaa. Na nndu kakuretya, mmbwe akooyaa ikaa nato. ³⁴ Mmbo shamuvia, vandu vavii vakooyaa valele kitareny kimwi. Yeto umwi awarywaa, na yeto ungyi narewa-u. ³⁵ Kuvekaa-fo na vaka vavii vakee ando amwi vesaa nswa. Yeto umwi awarywaa na yeto ungyi narewa-u. [ ³⁶ Vandu vavii vakooya vakee ireminy, nawo yeto umwi awarywaa na yeto ungyi narewa-u.]” ³⁷ Nawo vakarouwa vakaamba, “A nkwi, Nndumi?” Nawe kaamba, “Kundo kuwoye nnying’a na mamutony mfo kundo ashekuumbyaa.”

¹ Naasa Yesu kaveera kyaaso kyeevafunda kuti vave vetereva Iruva fyeeri fyoose nta valashelemwa. ² Kaamba, “Kweefo nndu mwiirumbwa myaandu ekee muriny mmbe, kava nndu naleereiye Iruva nta nalasarye nndu. ³ Naasa efo muriny ulya kukavekaa-fo nka wa ding’u. Nawe kativa-tiva efo kwakwe kaamba, ‘Shirumbuya mwaandu wakwa nisha kwashiauwa nkiduva wakwa.’ ⁴ Nawe kava mwiilema-da ando a mikonu myaashaa. Elyi lyeefurummya karera efo nriminy, ‘Na kyikava shileereiye Iruva na shilasarye nta nndu, ⁵ indi nka yeu wa ding’u elyi ashitivila indo, ra shinrumbuye mwaandu wakwe kya songosiny naambo nalashaatare nnu.’ “ ⁶ Kyasia Nndumi kaamba, “Aranyiny-te kindo mwiirumbwa myaandu yeto wa kiila aleamba. ⁷ Iruva mmbo mwaamba we asheraa nalarumbuya yewo asawuye myaandu yaawo kya songosiny, nawo veefo vamfuyaa kio na nsanyiny, nawe navatevese tupu? ⁸ Shamuvia mmbo ashevarumbuyaa myaandu yaawo kya songosiny uviny. Indi Mwana yeto wa nndu elyi asheshaa a ndesa ashewonisaa vandu vakusirye-u kunu ulaniny?” ⁹ Kavavia kyaaso ekyi, “Kwiifo vandu vakusarye wo veni mmbo vakee va usumanu vakamina vengyi. ¹⁰ Mmbo kweifo vandu vavii valeenda na mmba ya Iruva. Ulya umwi ni mfarisayo, na ulya ungyi ni n-dedemi. ¹¹ Naasa Mfarisayo ulya kasalala-u, karera efo nrimin eetereva Iruva, kaamba, ‘Woi Iruva shakwaana elyi yeny shilakee sha vandu vengyi shilakee sha vasoki ao valembi, ao sha vandu vetuusa, shilakee nta sha n-dedemi yeu. ¹² Ando a mfungare umwi shava mwikootoya kavii, na findo shitiri fyoose kilya kya ikumi ikumi shakivika kya ukamba lwa Iruva.’ ¹³ Na n-dedemi ulya kasalala kwaasha nalakare nta iinuya miso kya efo uuwe iruvee-u, kakukapa-kapa mbafu kaamba, ‘Woi Iruva shifwaaya yeny shikee nndu llyamari.’ ¹⁴ Na yeny shamuvia, nndu yeto mmbo aleenda na kyeny eetiri usumanu ngota ulya. Mashika yeto akwaallwa nniini we muni mmbo akaa nanyiiswa, na yeto akunyiisa mmbo akaa nang’aniswa.” ¹⁵ Naasa vakamweenngye vana vadu naambo naveekerye maako. Valya vakiloshyony vakavakyeemya. ¹⁶ Naasa Yesu kavavaanga vakusheye na kwakwe. Kaamba, “Reny fivana efyo fikusheye na kwakwa, nta mulafiimi! Mashika yewo va ngata yaawo mmbo umangyi lwa Iruva lwava lwawo. ¹⁷ Nkya dede shamuvia, kwakooya kulaore nndu awarya umangyi lwa Iruva ekee wa ngata ya fivana yefi, nnyakooya yaanga-fo-fo.” ¹⁸ Nalyo nndu nsongoru umwi kammbesa, “Ale llosha nsha, a shatana inda shiwonise ding’u ya muu wa llung’anu?” ¹⁹ Naasa Yesu kammbia, “Nkyiki kwashivaangya nsha? Nkwiifo akee nsha kuuta Iruva muni-fo.” ²⁰ Mmbo kwiishi mavavasyo a Iruva, “Kulatuuse, nta kulawae, nta kulaive, nta kulafingye uroo kindo kya wongo. Indya ndoo na mau.” ²¹ Nawe kammbia, “Efyo mmbo shilevefiringa fyoose uka elyo shekee n-du.” ²² Naasa Nndumi ekiita indo kammbia, “Ni kimwi kiifo kuturye. Endekumba fyoose kutiri, kundeavya vakiva. Neewe llyo kushekuwonisyaa masaa efo iruveeu. Kwammaa kusheny kushilatye!” ²³ Naasa ammiita indo kasokywa mfyoova deny, kimmba eetiri masaa meengyi nnu. ²⁴ Naasa Yesu eekilolya indo, kaamba, “A paa ndesa kyava kyuumu-dwa kya vandu yewo vatiri masaa vakooye yaanga na efo umanginy lwa Iruva! ²⁵ Mmbo kyava kyaangu ngamula iire neefo mmbweny ya sindano, ngota nndu isimba yaanga neefo umanginy lwa Iruva.” ²⁶ Naasa valya veeta vakaamba, “Kwakooya ni indo, a nndu ashekooyaa ikirwa ni ungau?” ²⁷ Nawe kaamba, “Ekyo kyara kilaidimika kwa vandu, mmbo kyaidimika efo kwa Iruva.” ²⁸ Naasa Petro kaamba, “Lla-te yese mmbo lureeye findo fyeru lukasha ikulatya.” ²⁹ Nawe kavavia, “Nkya dede shamuvia, nkwiifo nndu anra naakwa ni mmba, naakwa ni nka, naakwa ni vanavamaye, naakwa ni ndeye, na maye, naakwa ni vana, kwakooya ni kimaruma kya umangyi lwa Iruva, ³⁰ nare nalaniingwa eviiryoo fingyi fiingyi ando a kilya kimwi na kya efi fya ulaalu; na efo ulaniny elo lwishaa nawarye muu wa llung’anu.” ³¹ Naasa kaumbya valya ikumi na vavii alya ando akai, vakee kyaanya kyawo. Kavavia, “Manyiny lwiifo lushendaa irwa na kulya Yerusalemu, na mbony tilya tikee shireiye ni valya veauya fisuku kya Mwana yeto wa nndu llyo tishiinukya-u indo toose. ³² Mashika asherambikywaa efo maakony a vandu va masanga, naveteendwa, naveinyalwa, navemishyo minyiiri. ³³ Na elyi numa vapooke inkapa na ngova, vambwae-ny. Na elyi lya nkonu wa kararu asherukaany.” " ³⁴ Nawo elyi avavia indo valamanyi nta kinnywa, kindo ekyo kikava sheelyi vankisurumwa, nta valamanyi kilya kyaambawa-u. ³⁵ Kyasia kikava elyi ee-fo ashaafukyaa Yeriko kwee-fo nndu mfu miso akee rembo yoo mbai ya shia asheereryaa vandu. ³⁶ Keeta vandu veshiraa-u nkuka, kavesa kindo kiifo. ³⁷ Vakammbia, " “Ni Yesu wa kulya Nasareti ee-fo ashiiraa-u.” ³⁸ Nawe kafua nnu kaamba, “Woi Yesu kukee mwana wa Davidi, shisarya ukiva lwakwa!” ³⁹ Valya vasongoye vakankyeemya namalalye. Nawe keengera ifua kilanya, “Woi mwana wa Davidi, shisarya ukiva lwakwa!” ⁴⁰ Naasa Yesu kairisha, kavavasya neendwa na alya akai. Afika kufii kammbesa, ⁴¹ A mmbo kwakunda shikutannyi inda? Nawe kammbia, “Nndumi naambo shimanyi ilola.” ⁴² Yesu kammbia, “Idima ilolany! Kwankusirya-u indo nkyo kyakushiisa.” ⁴³ Nalyo yeni kaidima ilola. Kallatya eshaarafumaa Iruva. Na vandu valya vaiyo valolya indo, vakavikya Iruva nnduma.

¹ Na elyi amfika kulya Yeriko eefo ashiraa-u, ² nalyo akakau nndu avangwaa irina lyakwe ni Sakayo. Nawe ekee nniini wa vadedemi kaveva na nndu isimba. ³ Naasa karuuya mwaanya wa ilollya Yesu namanyi mmbwa ngata kyi nalaidimi mashika a mamwiingyi ulya wa vandu, kimmba akee nndu wa yuumba ifii. ⁴ Nalyo karisha na mbee, kasaama nriny wa nkuu, naambo nallolye. Mashika nnyo shia ashiraa. ⁵ Nalyo elyi Yesu afika-u kalola efo uuwe, kammbia, “Sakayo, oloka-fo uviny. Mashika yeny shalollya kuti shive muny wafo inu.” ⁶ Nawe kaangusya yooloka-fo, kammbwarya efo kyeny kwakwe efuraa. ⁷ Na llya vandu valelolya kive indo vakarininda woose, vakaamba, “Mmbo angaa neefo mmba kwa nndu llyamari nandekwiimurisa-fo.” ⁸ Naasa Sakayo kashesalala yoo mbee ya Nndumi kammbia, “Lla-te Nndumi findo shitiri nshaavaa kavii, kyenga shikininge vakiva. Na kwakooya shilensoka nndu kindo nshembiryaa kaana.” ⁹ Naasa Yesu kambia, “Kyeny eka kammbona ukiro inu, kimmba neewe-da ni mwana wa Abrahamu. ¹⁰ Mashika Mwana yeto wa nndu mmbo asheye iruuya ekyo kirekye nakikire.” ¹¹ Naasa veefo veshaaranyaa mbony yeto, nawe kalungya-u kaveera kyaaso. Nyelyi eefo ashaafukyaa Yerusalemu nawo veeshi kulakooye umangyi lwa Iruva lwiifo lufumaa paa na lyimwi. ¹² Naasa kaamba, “Kweefo nndu wa mmba ya mangyi aleipoo kyaaro kya uruka lwa kwaasha, nandetira-fo umangyi nawuyeny. ¹³ Naasa kavaanga mashinga alya akwe ikumi, kavaniingya fesa ta ikapa mbusha. Kavavia, ‘Endekapeny nato mbusha shitani shawuya.’ ¹⁴ Naasa vandu va uruka llwa lwakwe muni vensuuye. Vakaruma varumi veellatya numa vandeamba, ‘Llukundye kutire umangyi kulwiitorye yese-fo!’ ¹⁵ Nalyo kikava elyi antira umangyi ammbuya na kyeny, kaamba kundevaangwa mashinga alya alevaniingya fesa tilya naambo namanyi wo nndu mbusha alewonisa. ¹⁶ Nalyo ulya wa mbee kasha nang’u, kaamba, ‘Nndumi iyana llya lyafo lya fesa lyileende mbusha ya mayana ikumi.’ ¹⁷ Nawe kammbia, ‘Eeka ishinga isha, mmbo kweetiri fyaangu kwavefikallya na usaari. Tiraany ushilyi lwa iitorya miri ikumi!’ ¹⁸ Nalyo ulya wa kavii kasha nang’u kaamba, ‘Nndumi iyana lyafo lya fesa lyileende mbusha ya mayana araanu.’ ¹⁹ Naasa na yeu-da kavemmbia, ‘Neewe vaany mwiitori wa miri iraanu!’ “ ²⁰ “Nalyo ulya ungyi kasha kaamba, ‘Nndumi iyana llya lyafo lya fesa akakalyi shilelyifingya kiraminy shalyisuruma. ²¹ Mashika shilekwiryaa kimmba yewe ni nndu nnyuku. Mmbo koondwa kundo kulaarye. Kwaveilula kundo kulasuye mbeu.’ ²² Nawe kammbia, ‘Yewe ishinga yeesi! Ekyo kyauka kaniny kafo nkyo nkutyaa nakyo uvingo lwafo. Elyi kweeshi yeny ni nndu nnyuku shoondwa kundo shilaarye, shaveilula kundo shilasuye mbeu. ²³ A kimaruma kwara kulanderwaa fesa ilya yakwa efo kwa vandu vekapa mbusha na fesa ta vandu nkyikyi? Neeny elyi sheshaa llyo sheewaryaa kimwi na ulyimi lwa vayo?’ ²⁴ Nalyo kavia valya vasalali yoo kufii, ‘Nsokeny iyana elyo lyakwe lya fesa muniingye yeto atiri mayana ikumi.’ ²⁵ Nawo vakammbia, ‘Nndumi, mmbo atiri mayana ikumi-te!’ ²⁶ Neeny shamuvia, ‘Wo nndu atiri kindo mmbo aniingwaa na fingi. Na yeto nalatiri mmbo asokwaa na kilya atiri. ²⁷ Indi vakiduva valya vakwa valya valakundye shivikwa mangyi mwivashilya, endeveendeny na yaa muvarengetye si shiilolye!’ “ ²⁸ Nalyo elyi ammaa irera indo keera na mbee asheendaa irwa na kulya Yerusalemu. ²⁹ Nalyo kikava elyi aafukya kulya Betifage na Betania kulya ifumbuny lya miri ya mafura, nalyo karuma vandu vakiloshyony vavii. ³⁰ Kaamba, “Endeny efo muriny usumani na yaa lukai. Mukafika-fo mushekooyaa ngashe ya nshungu ikee shifingye ando nayo ilandesaamwa ni nndu. Iporomweny musheengye. ³¹ Na kwakooya nndu amuvesa, nnyeeki mwaiporomwa mmbo mushambaa ni Nndumi aikundye!” ³² Naasa valya varumwa vakakweengya vakavekooya indo-da shaasa avavia. ³³ Naasa elyi veefo veporomwaa ngashe ilya veni valya va vayo vakavavia, “Nkyiki elyi mwaporomwa ngashe yei ya nshungu?” ³⁴ Nawo vakaamba, “Ni Nndumi aikundye-te!” ³⁵ Nalyo vakayeengye Yesu. Vakawuya vakaala soori tawo ta yeerya efo mungony wa vayo, vakasaamisa-u Yesu. ³⁶ Naasa eefo ashendaa nawo vakaala soori tawo ta yeerya efo shia. ³⁷ Naasa elyi amfika alya kufii na yoolokyony lya ifumbu llya lya miri ya mafura, nalyo mamwiingyia valya vakiloshyony kyakwe vakapooka iitikisa Iruva na unyanga uniini velookaa, kimaruma kya findo filya fya wiidimi valolye fyoose. ³⁸ Vakaamba, “Kundearafumwa yeu asha akee mangyi arumwa ni Nndumi! Efo iruvee-u kuvaa na ufoo na efo kukee uuwe ya findo fyoose kukatira tikisi!” ³⁹ Nalyo Vafarisayo vaangu vakee efo nnang’ani ya mamwiingyi ulya wa vandu, vakambia, “Llosha kyeemya vandu yeva vakiloshyony kyafo-te!” ⁴⁰ Nawe kaallwa kaamba, “Kwakooya wo vamalalya ni mawe yaa ashekapaa kyoorongye.” ⁴¹ Na elyi eefo ashaafukyaa-fo kalola muri ulya kaudonisya misoru. ⁴² Kaamba, “A nkyema kuveishi na yewe kindo kyeekweengyee ufoo naakwa ni nkonu yeu wa inu! Indi kwankisurumwa kulashekilolyaa-se ulaalu-fo. ⁴³ Mashika kukaa kushe kyeeri kikuwoyaa tiny elyi misa ashekuringityaa sha isimamba riti vakuraye deny vakushingilye taari toose. ⁴⁴ Nawo vakuwunduye si vakusande na vana vafo va efo nnang’ani yafo, nta mmbasheraa-u iwe lyikweekyerye iwe uroye wa vayo-fo, kimmba kwanra kulamanya kyeeri kyafo kya isengerwa.” ⁴⁵ Nawe keera neefo poo ya mmba ya Iruva kaanta-fo valya veefo veekumbaa findo. ⁴⁶ Kavavia, “Mmbo kyikee kireiye kyeamba, ‘Mmba yakwa kuti ive mmba yeeterevya.’ Lyo yeni mukawuya iyaallwa mbanga ya veala shia.” ⁴⁷ Naasa kava mwiilosha efo mmba ya Iruva wo nkonu. Na vakohani valya vaniini vakasanga na veelosha mavavaso vakasia mwaanya weemmamita, na vandu valya vasongoru va uruka ni kiwo-da. ⁴⁸ Nawo nta valaoni kyeetana mashika mamwiingyi moose wa vandu mmbo weeriani nawe vemwaaranyaa.

¹ Naasa nkonu umwi elyi eefo aloshaa vandu efo mmba ya Iruva na iwoongoya Nrumi ya Nsia, nalyo vakohani vaniini vakasha nang’u tiny na vaarya va fitabu vasasangyi na masiingo a vandu. ² Vakarera nawe vakaamba, “Elyi kwatana indo mmbo kutiri muumu wa ngata ingai? Na nndu yeto akuvikye muumu yeto mmbi?” ³ Naasa kaalwa kavavia, “Ra neeny shimuvese neeni mushirouwe! ⁴ Ubatiso lwa Yohane luukye kwi? Ni efo iruveeu, ao ni kunu vanduny ndesa?” ⁵ Naasa vakakusara-sara kikwawo, vakaamba, “Kwakooya lwaamba ni iruveeu luukye, mmbo ashambaa kikavaany inda elyi mulamwiirikye?” ⁶ Indi kwakooya lwaamba nkunu vanduny luukye, ekakayo mburwa yei ya vandu shoose ishelweeraa mawe, mashika elyi veeshi na nshushwa Yohane mmbo akee nndu nkisuku. ⁷ Nalyo vakarouwa, “Llwamanya kundo luukye-fo.” ⁸ Na Yesu kavavia, “Nta yeny nshimuviaa mumu shatana nato indo mmbo ukee wa ngata ingai-fo.” ⁹ Naasa kapooka irera na vandu kaveera kyaaso ekyi, “Kweefo nndu aleronga nnda wakwe wa misabibu. Kauningya varemi wikee wa waara, keenda kyaaro kya kyeeri kyaasha. ¹⁰ Neelyi kyeeri kya vayo kyamfika karuma ishinga kulya kwa varemi valya vanniinge waavi lwakwe lwa fimu efyo fya misabibu. Naasa varemi valya vakamwiila vakammbiira ruu. ¹¹ Nalyo keengera iruma ishinga lyingyi. Nalyo-da vakavelyiila na ilyipira. Vakalyiviira ruu. ¹² Nalyo keengera iruma wa kararu. Nawe-da vakankapa mariinga vakampurusa neefo shia. ¹³ Naasa muni nnda ulya wa misabibu kaamba, ‘A mmbo shitanaa inda? Mmbo nshevarumyaa mwana nkunde wakwa. Kulakooye we vashenreremyaa.’ ¹⁴ Naasa varemi valya veekilolya ashe vakaumburana wo veni na veni, vakaamba, ‘Akakato muni ding’u! Ndifonte lumbwae ding’u yeyo ive yeeru luveni!’ ¹⁵ Nalyo vakankunnya neefo kipoo ya nnda ulya, vakambwaa, ‘A muni nnda ulya wa misabibu mmbo ashevatanyaa inda? ¹⁶ Mmbo asheshaa nasherumata varemi valya na nnda ulya wa misabibu asheningyaa vandu vengyi.’ Naasa elyi veeta indo vakaamba, ‘Nta kilave indo-fo!’ “ ¹⁷ Naasa kavavikya miso swaa kavavia, “A kyavaany inda elyi kilereiyo kyeaamba, Iwe elyo vetana mmba valelyilema, llyo lyileva iwe lya ndumbeny.” ¹⁸ “Wo nndu awoya iwe elyo afika-fikaa. Na yeto lyammboya lyishensa-saa.” " ¹⁹ Nalyo veelosha mavavaso valya vakasanga na vakohani vaniini vakasia mwaanya weentira kyeeri kyilya kyeni, vakawuya iiryaa ironda llya lya vandu lyiiyo mashika elyi valemanya mmbo aleera kyaaso kyilya kyeevaronga wo. ²⁰ Nalyo vakava vanreiyaa vakaruma vellaa vakunang’arye sheelyi vakee vandu vesha, vandenreiya na ekyo areraa, vawonise kindo naambo vedimi indenrambikya efo maakony a Serikali na mwiitori wa uruka, mmbwe nshilyi wa Kaisari. ²¹ Nawo vakashemmbesa vakaamba, " “Ale llosha! Lwiishi mmbo kukee nndu mwiirera na ilosha kisumani kulalolaa nta fisangu fya vandu. Mmbo kwafunda shia ya Iruva kyikee kya dede. ²² A lukataa usanu lwa Kaisari ni kindo kisumani ndesa ao ode?” ²³ Nawe kaitumuso ntambo wawo, kavavia, ²⁴ “Kyeshooreny fesa-te! A ufwanu yelo lwiiyo llwa-vi na kireiyo yekyo?” Nawo vakaamba, “Llwa Kaisari-te!” ²⁵ Naasa kavavia, “Kyasiany Kaisari nningye findo fikwaani na Kaisari, na Iruva muvenniingya efyo fikwaani na Iruva.” ²⁶ Nawo valeedimi inreiya neekyo areraa efo usanguny lwa vandu valya vakuumbye-fo. Vakatirwa ntamba kya kilya avarouwa. Vakamalallya sau. ²⁷ Naasa Vasadukayo vaangu vakansheya nawo ni vandu valemmyi kya iruka lya vafu vakaamba llyiifo-fo, vakashemmbesa, ²⁸ Vakaamba, “Ale llosha! Mose mmbo areiye kyeeluvia kwakooya mwanamaye wa nndu afwa nalatiri mwana, kuti mwanamaye narwaa nka yeto, naonisye mwanamaye muya ding’u. ²⁹ Naasa kweefo vana va nka mfungare. Ulya wa mbee karwaa nka, kafwa nalare-u mwana. ³⁰ Na ulya wa kavii-da. ³¹ Na ulya wa kararu kavenrwaa. Ni indo valya mfungare woose, valare-u nta mwana, vakasia ifwa. ³² Neelyi lya ifurummya nka ulya kavefwa. ³³ Kyivaany inda elyi kufikaa yoo marukyony a vandu vafu kya nka yeto, mmbo ashevaa wa nndu ungau? Mashika woose mfungare veerie nka yeto.” ³⁴ Nalyo Yesu kavavia, “Vana va ulana yelu vashalyikaa na yaalyikwa. ³⁵ Kya indi yewo vasherumbuyoo mwaandu vandekooya ulana yelo lwishaa na iruka lya vafu, wo mmbashaalyikaa-se-fo, nta yaalyikwa-fo. ³⁶ Nta ifwa mmbakiidimaa-se ifwa-fo, mmbo vavaa sha vasu va Iruva, vaveva na vana va Iruva elyi vannduka. ³⁷ Na mbony ta vandu vafu shaasa varukaa dede, na Mose-da alevetironga alya akee areiye mbony ta ngorosho ilya yekee yaaka, avaangye-u Nndumi mmbwe Iruva wa Abrahamu, na Iruva wa Isaki, na Iruva wa Yakobo. ³⁸ Kyasia, Iruva nshi akee wa vandu vafu-fo, mmbo akee wa valya vakee na muu. Mashika woose vakee vakwe mmbo vava vandu vakee na muu.” ³⁹ Naasa veelosha mavavaso valya maata vakaamba, “Llosha mmbo kwarera kwaronga deny!” ⁴⁰ Nawo valakare immbesa-se nta kindo. ⁴¹ Naasa, nawe kavavia, “Kyava inda elyi vandu vaambaye Kristo mmbo akee mwana wa Davidi? ⁴² Kimmba Davidi we muni arerye efo kitabuny kya Saburi kaamba, ‘Nndumi alevia Nndumi wakwa, kaa rembo yaa woko lwakwa usha, ⁴³ shitani shaara vakiduva vafo si, shivaallwe kiri kyafo kya yeekyerya marende.’ “ ⁴⁴ “Naasany kimmba Davidi ammbaanga ni Nndumi, a ni inda ava-se mwana wakwe?” ⁴⁵ Naasa elyi vandu valya vakuumbye-fo veefo vashaaranyaa, nawe kavia valya vakiloshyony vakwe, ⁴⁶ “Kwiiseny na veelosha mavavaso vakundye iraa soori shaasha na ilanga iidikiryo efo singireny na indekaa marembo a mbee efo mmba teeterevya na marembo a mbee elyi vavaangwa ando a sukukuu. ⁴⁷ Ate wo mmbo vandu veemira mmba ta vaka va ding’u. Vakava vetereva fiterewo fyaasha kyikee kya ikoora vanduny tupu. Mmbo vashewonisaa uvingo uniini nnu.”

¹ Naasa Yesu kalolya vandu masimba shaasa vavika firaso fyawo efo isandukuny lyeesanyirya fesa ta mmba ya Iruva. ² Naasa kalollya nka wa ding’u akee nkiva avika-fo senti ivii. ³ Nalyo kaamba, “Nkya dede shamuvia, ‘Nka yeu wa ding’u akee nkiva indo mmbo avika kiniini ngota woose. ⁴ Mashika yewo woose ni efo findony fyawo fya mmwasi vauta efyo vavika fya pya.’ Indi we ni efo findony fyakwe fyerorwa aleuta kavika kyoose atiri kyeelela muu wakwe.” ⁵ Nalyo kakooya vandu vereraa kya mmba ya Iruva elyi ikee shishope indo na mawe a utore na findo vandu vavikye fya iishopa, nawe kaamba, ⁶ “Kya efyo mulollye kukaa kushe fyeeri kulasherewaa-u iwe lyikweekyerye iwe lyingyi lyire lyilawunduyo si-fo.” ⁷ Naasa vakammbesa vakaamba, “Llosha a meendi kisheutikaa indo ni indii? Na elyi findo efyo fyamfika isha, wende lwavayo llokyi?” ⁸ Naasa kaamba, “Kwiiseny mulasheelembwa mashika veengi vasheshaa na irina lyakwa vashambaa, ‘Mmbwe yeu!’ vaveamba-se, kyeeri ekyo kyikee kufii kyifike. Neeni nta muleende ivalatya-fo. ⁹ Indi meendi mushitaa kwiikapaa fira na myaalukoluko ya vandu iifo, neeni nta mulairyee! Mmbo kyikee kirummbwe kisongwe yeenda indo, indi yoo masiiyony nshilyo yeni ammba isha-fo.” ¹⁰ Keengera ivavia, “Uruka lushekwiipoo lukape uruka lungyi, na umangyi luvekapa umangyi lungyi. ¹¹ Kushiraa-u na fidinasi finiini, na shaa na ndwari wo ando, na ngyende teeresye tivelolyo tuuka neefo iruveeu. ¹² Indi kindo kipokaa itanyika kulaore findo yefyo fyansha, mmbo veshemutiraa na imurishisa vandemurwaa efo mmba tawo teeterevya, na mmba ta vafinge, mundevefitwa na efo fisanguny fya vamangyi na vashilyi yewo va Kaisari kimaruma kya irina lyakwa. ¹³ Nakyo nkyo kishemwengyee mwaanya weevika ukureeki lwany. ¹⁴ Naasa nng’u mushefishyaa shila tapa efo nriminy mure mulakusara-saraa kindo musherouwaa ewo vamukumba. ¹⁵ Mashika ni yeny nshemuniingaa kana na urango usha, na vakiduva yewo vany woose nta valashiidimaa ifilyimba na ifyaallwa. ¹⁶ Indi naakwa ni vamiku vany, na vanavamaye vany, na woofyari vany, na vambuya vany, mmbo mushendaa irambikyo mmbo efo maakony a vakiduva, nawo vamwiite na ufuny yeni maata. ¹⁷ Muveva na veesuwa mmbandu woose kimaruma kya irina lyakwa. ¹⁸ Manyiny naakwa ni ufii lwa efo nrweny wany nta llusherekaa-u-fo. ¹⁹ Kwakooya mushesisirya-u llyo mushekirwaa.” ²⁰ “Indi meendi mushelolyaa kunu Yerusalemu kushingilyo mmatorito a fira nalyo manyiny, mmbo kwamfika kyeeri kya vayo kyealuka irama. ²¹ Nalyo yewo vakooyaa vakee kunu Yudaya varishe vandepara na mafumbu-u. Na yewo vakooya vakee mareminy, wo valawuye na numa vandeanga nafo-fo. ²² Mashika fyeeri efyo mfyo fyeetaiya naambo efyo fikee fireiye fikooye indeinukya-u fyoose. ²³ Indi yewo vakooyaa vakufingye na yoota vana fyeeri efyo, oshiny lwawo! Mashika llyo uruka lushewoywaa ni ngatara shiniini, na vandu va uruka yelu vakooye iwoywa ni ngapo shinyaasi. ²⁴ Nalyo vashewawaa noosu na inderawa mifungwa efo vanduny va masanga na usu. Na kunu Yerusalemu kuve kundo vandu va masanga vavavara kutani fyeeri fyawo fyafika.” ²⁵ “Nalyo kushelolyoo ngyende efo ngini-u na efo mwiiriny na efo nyinyiriny. Na kunu urukeny vandu va masanga vasheerevee vatambwa ni yeeve yeyo shiniini ishonaa na irosa matundulu maniini. ²⁶ Na vandu vashumaa mwaangaya kimaruma kya weerei na ivereya kindo kikaa kiwoye ulana elu, mashika vekooyaa na finya yeto ta efo iruveeu tirinyiswaa-rinyiswaa. ²⁷ Nalyo llyo vashelolyaa paa Mwana yeto wa nndu ashaa ariwa ni ifishi atiri finya shiniini na itumbe. ²⁸ Na yeni meendi mukooyaa findo yefyo fipookaa itanyika, kwipoony shu muveinwa mirwe yaany, mashika kwamfika kufii na mawoweny any.” ²⁹ Nawe kaveera kyaaso, “Loleny nkuu na miri ingyi myoose. ³⁰ Kwakooya yamfumbisa mmbo mwamanya kwamfika kufii na iilula. ³¹ Na yeni ni kiwo-da, meendi mulolyaa findo efyo fiifo fishutikaa, kyevemanyiny ni umangyi lwa Iruva lwamfika kufii lulolyo paa. ³² Nkya dede shamuvia, irika elyi llyishesiaa kulaore findo efyo fyamiinukya indo fyoose-fo. ³³ Ngina na ulana firumakaa, kilarumakaa ni marero akwa.” ³⁴ “Kya indi kwiiseny muveni, mirima yaany ilakooye irovyo mwiitalauwaa ndeu na inangwa mmbwari na yaafuka kya findo fya muu yeu, na nkonu yeto umuwoye tiny sha nsoori. ³⁵ Shamashika ushesheyaa vandu vakee yaa ulaniny ukooye vakweekye. ³⁶ Naasany, laleny shoovi wo kyeeri mwiiterevaa Iruva mwiidimi ikyia findo efyo fyoose fikee fiteerye fishe, muverewa mwiisalalyi yoo mbee ya Mwana yeto wa Nndu.” ³⁷ Naasa, fyeeri fya nsanyiny kava mwiilosha efo mmba ya Iruva, na kyio kandelala kulya ifumbuny lya Miri ya mafura. ³⁸ Na ironda llya lya vandu lyoose lyikava lyilavaa insheya ngama efo mmba ya Iruva lyishemwaaranya.

¹ Naasa nkonu nniini ukafika isha ulya wa sukukuu ya mikate ilatiri ntarang’u yeto uvaangwaa ni Pasaka. ² Nalyo vakohani valya vaniini vasasangyi na veelosha mavavaso vakaruuya mwaanya wa iwaa Yesu, mashika veereiye mamwiingyi ulya wa vandu. ³ Naasa Satana kaanga Yuda ulya avaangwa Iskariote, nawe akee umwi wa valya ikumi na vavii. ⁴ Nalyo kawara shia kandefisha shila na vakohani valya vaniini na vashilyi veshilya vasoro va efo poo ya mmba ya Iruva karera nawo shaasa ashenrambikyaa efo maakony awo. ⁵ Nawo vakafura vakateeryana nawe vanniinge fesa. ⁶ Nawe kairikya karuuyany mwaanya weenrambikya efo maakony awo kirika. ⁷ Naasa nkonu ulya wa mikate ilatiri ntarang’o ukafika yeto usumani ishisha ngurana ya Pasaka. ⁸ Nalyo karuma Petro na Yohane kaamba, “Yendeny, mundeludeesya Pasaka lushe ilya.” ⁹ Nawo vakambia, “A kundo kwakunda lundeideesya ni kwi, mbee?” ¹⁰ Nawe kavavia, “Llen-te, mukammaanga efo muriny, mwishekwaananyaa na nndu arie nungu ya mura, mmbwe mushellatyaa mufike nawe efo mmba kundo ashangaa. ¹¹ Naasa muvieny yeto muni kyeny, Llosha akunndye ando a ishelyiiya Pasaka ando amwi na vakiloshyony vakwe. ¹² Nalyo nndu yeto ashemwooraa kirya kiniini kya mmba ya uuwe kyikee kideesye, nng’u mushedeesyaa kilaayo yekyo.” ¹³ Naasa vakeenda vakavekooya indo-da shaasa avavia. Vakandedeesya-fo Pasaka. ¹⁴ Nalyo elyi kyeeri kyamfika kashekaa-fo rembo ilya shoonga na vakiloshyony vakwe. ¹⁵ Kavavia, “Sheetirwa mmasha deny shilye shoonga yei ya Pasaka neeni kulaore shammeenda indeliswa ukiva. ¹⁶ Mmbo shamuvia, ‘Nshisheilyaa-se-fo, na kutani yainutyo efo umanginy lwa Iruva.’ “ ¹⁷ Nalyo kaipoo kikombe kaana Iruva kaamba, “Nngeny ekyi niny-fo moose. ¹⁸ Mashika shamuvia, kipookya ulaalu nshishekyinaa-se kya kimu ekyo kya nsabibu-fo kutani umangyi lwa Iruva lwasha.” ¹⁹ Nalyo kaipoo nkate kaana Iruva, kaufisha-fisha fyenga, kavaniingya kaamba, “Ekyi ni mwiili akwa [nato wiifo urambikyoo-u kimaruma kyany. Neeni kevetaniny indo kya ishikummbwa.” ²⁰ Na upata lulya lweeniwaa elyi numa ya Kilaayo kilya, kavetana nalo indo-da, kaamba, “Upata yelu ni nkundanu mwiiya wavikwa na samu yakwa, nayo iifo ishiiritwaa kimaruma kyany.] ²¹ Indi loleny-te woko lwa yeto asheshiriingyaa mmbo lukee yaa meseny ando amwi neeny. ²² Kya Mwana yeto wa nndu mmbo ashendaa shia yakwe shaasa kikee kirummbwe indi oshiny lwa nndu eto ashendiingyaa!” ²³ Nawo vakapooka ikuvesa wo veni na veni kya nndu wa efo kwawo ashetanaa indo mmbi? ²⁴ Naasa kikava mmbo vallya ulai efo nnang’ani yaawo kya nndu akee nniini waawo. ²⁵ Naasa Yesu kavavia, “Vamangyi va vandu va masanga mmbo vavaafinyi, na yewo vavaitorye vakavaangwa, vambuya va uruka. ²⁶ Indi kyany yeni nta kilave indo-fo! Kya indi yeto akee nniini wa vengyi kunu nnang’ani yaany naaluke nave n-du wa vengyi. Neeto eefo asongoye vengyi naaluke mwiifurukannya vengyi. ²⁷ Mashika nniini wa vengyi ni ungau? Ndesa ni yeto akaa rembo keengyo shoonga ao ni yeto eefo amfurukanyaa-u? Nshi yeto akaa rembo keengyo shoonga? Kyasia, na yeny-da shavekaa kunu nnang’ani yaany shava mwiifurukannya vengyi.” ²⁸ “Kya indi yeni mmbo yewo musisirye-u ando amwi neeny efo fyeesyony fyakwa. ²⁹ Neeny shamuterevyany ding’u ya umangyi shaasa Nde aleshiterevya yeny, ³⁰ neeni muvekooya ikaa efo umanginy lwakwa musasangyi neeny mwilyaa na ina efo meseny akwa. Nalyo mushekaa-fo rembo efo fitiminy fya umangyi mushilye ngyufyari yeto ikumi na ivii ta Israeli.” ³¹ “Yewe Simion, Simion-ro! Ekakato Satana akemuruuya kyuumu nakooye imweela sha nganu. ³² Kyaindi yeny mmbo shilekuterevya kwa Iruva naambo kyikusiryo kyafo kilasheangwa. Neewe elyi numa kwakooya kwashiwuiya-se kuvangise vanavamau.” ³³ Nawe kammbia, “Nndumi shikee neewe mmbo nshidimaa naakwa ni inderawa kyifingyony naakwa ni indewaawa.” ³⁴ Nawe kaamba, “Petro shakuvia, oro ya nguku, nnyishereraa kulaore kwanshikana kararu kwaambe nkushiishi-fo.” ³⁵ Nalyo kavavia, “Llya shilemuruma mularie nta mboloko nta nkusha, nta fyaaru, a ndesa kwiiyo kindo muletura?” Nawo vakammbia, “Nta kyimwi-fo!” ³⁶ “Kya indi ulaalu yeto akooyaa atiri mboloko neende arie, na yeto wa nkusha naa-kiwo-da. Na yeto akoyaa nalatiri nandekumba soori yakwe ya yeerya nandekuurya usu. ³⁷ Mmbo shamuvia, ekyo kyikee kireiye mmbo kyanrumbuwa kyindeinukya yaa kwakwa, kyeamba, ‘Nawe mmbo aleekenwa ando amwi na varavi.’ Mashika ekyo kikee kirummbwe kyakwa mmbo kiifo kimarisyony.” ³⁸ Naasa vakaamba, “Nndumi akakati ngyusu ivii tikee yaa.” Nawe kavavia, “Kifye.” ³⁹ Nalyo kakwipoo-fo kaenda kulya ifumbuny lya miri ya mafura shaasa eeshivye. Na valya vakiloshyony vakallatya. ⁴⁰ Naasa eekyifika ando alya kavavia, “Ketereveny Iruva mulasheanga kyeesyony!” ⁴¹ Nalyo kooka yoo vakai, kafika sha ando a yeera iwe. Kafiirya ndi kapooka itereva, ⁴² kaamba, “Woi Nde kwakunda, ita upata yelo mbai lushiiyami. Indi kilaende shaasa shikundye yeny-fo.” [ ⁴³ Naasa nsu wa Iruva kasha ikoora nawe auka efo iruveeu kammbika finya. ⁴⁴ Nalyo kava asavaany kapooka itereva kanangisa. Kasina nrike ukava sha marony a samu wishoshokya-si.] ⁴⁵ Nalyo kakwipoo yoo kiterevyony kasha na alya vakiloshyony vakai, kakooya valele rony kimaruma kya fyoova fivatiri. ⁴⁶ Nawe kavavia, “Naambo-kyi mulele rony? Kwipoon-te mutereve Iruva mulakooye yaanga fyeesyony!” ⁴⁷ Eefo areraa indo akakau mamwiingyi wa vandu vansha nang’u. Na nndu avasongoye ni ulya avaangwa ni Yuda, akee wa valya ikumi na vavii, kasha na yoo kufii na Yesu kammiminda fyoomu. ⁴⁸ Naasa Yesu kammbia, “Yuda mmbo kwariingya Mwana yeto wa nndu na kimimindo?” ⁴⁹ Naasa valya varyani nawe elyi valolya kishendaa indo vakaamba, “Nndumi a lukavamanya na ngyusu?” ⁵⁰ Nalyo umwi wa efo nnang’ani yaawo kamanya kishinga kya nkohani nniini kammaswa kurwi ka woko usha. ⁵¹ Naasa Yesu karouwa kaamba, “Kureeyeny kimande yoo!” Nalyo kapaana kuri kalya kanshiisa. ⁵² Na Yesu kavia vakohani valya vaniini vansheya na vashilyi veshilya vasoro va efo poo ya mmba ya Iruva na masiingo alya a vandu, “Mmbo mwakwiipoo mukasha murie ngyusu na mbiiri sheelyi shikee mwaalashia? ⁵³ A tepa shilesinda neeni mikonu simu efo mmba ya Iruva nta mulashitire Indi ekyi nkyo kyeeri kyany na kya finya ta ireema.” ⁵⁴ Naasa vakantira vakeenda vanrie vakamfita efo mmba kwa nkohani ulya nniini. Na Petro kalatya yoo numa ashengyaa kwaasha. ⁵⁵ Nawo vakaata muro alya poo vakakaa rembo vakauringitya, nawe Petro kakaa-u rembo nawo. ⁵⁶ Naasa nka kishinga wa efo poo kallollya Petro ekee rembo emikyoo mmuro, Kaamba, “Na yeu-da ni nndu eeryani na Yesu!” ⁵⁷ Nawe kanlema-fushu kaamba, “Nshimwiishi-fo-te!” ⁵⁸ Numa kyinnywa nndu ungyi kallola kaamba, “Na yewe-da kukee umwi waawo!” Naasa Petro kaamba, “Ode nndu, nshiwe yeny-fo!” ⁵⁹ Naasa kukaira kyeeri kyaangu, nndu ungyi kavika ukaari kaamba, “Ni dede, na yeu-da akee nndu eeryani na Yesu. Mashika nawe ni nndu wa Galilaya.” ⁶⁰ Naasa Petro kaamba, “Nshiishi ekyo kwaamba-fo nndu!” Nalyo yeni eefo areraa indo oro ya nguku ikakapa. ⁶¹ Naasa Nndumi kainduka kalola Petro. Nalyo Petro kakummbwa kirero kya Nndumi kilya alemmbia, “Oro ya nguku nyishekapaa inu kulaore kwanshikana kararu-fo!” " ⁶² Nalyo kasomuka na mbengyeny kaiya kavavyo nnu nriminy. ⁶³ Nalyo vasoro valya vannrie vakantatala vakankapa na mbiiri. ⁶⁴ Nalyo vakansikya kisangu vakammbesa vakaamba, " “Kyeamba yeto akukapa mmbi?” " ⁶⁵ Vakarera na marero engyi meengyi emwaarara. ⁶⁶ Naasa elyi kwankya masiingo alya a vandu akashekuumbya-fo na vakohani vaniini na vaarya va fitabu, Vakanrwaa efo ikwaanuny lya vaniini. ⁶⁷ Vakaambaya-u, " “Kwakooya yewe mmbwe Kristo luvieny!” Nawe kavavia, “Kwakooya shamuvia mmushiirikyaa-fo, ⁶⁸ Lingyi-se kwakooya shamuvesa kindo mmusherouwaa-fo. ⁶⁹ Indi kipookya ulaalu Mwana yeto wa nndu ashevaa mmbo akee rembo yoo woko usha lwa Iruva yeto Mwaafinya.” ⁷⁰ Naasa vakaamba woose, “A yewe mmbo kukee mwana wa Iruva-ny?” Na Yesu kavavia, “Ni yeni mwakyaamba, yeny mmbwe.” ⁷¹ Naasa vakaamba, “Naambo-kyi-se lwakaa lwiruyaa ukureeki lungyi? Mmbo lweeta luveni kyuuka kaniny kakwe.”

¹ Nalyo vakakwiipoo nseemu ulya wawo moose vakanrwaa kwa Pilato. ² Naasa vakapooka inkumba vakaamba, “Nndu yeu mmbo lwankooya asheevetaa vandu va uruka lweru kavaima valaute kodi ya Kaisari, kaamba we muni mmbwe Kristo akee mangyi.” ³ Naasa Pilato kawesa Yesu, “A yewe mmbo kukee mangyi ya Vayuda ndesa?” Yesu kaallwa kammbia, “Ni yewe kwakyaamba.” ⁴ Naasa Pilato kavia vakohani valya vaniini na nsemu ulya wa vandu, “Yeny nshilollye kindo kya uvingo kwa nndu yeu-fo.” ⁵ Nawo vakaitika vakaamba, “Mmbo ayaa vandu va uruka eeloshaa kakwaanisa kunu Yudaya koose apookya kulya Galilaya katana afika kunu.” ⁶ Naasa Pilato ekyiita indo kavesa kwakooya akee wa kulya Galilaya. ⁷ Ammanya nisha mmbwa efo ushilyiny lwa Herode, naasa kanrika kulya kwa Herode, nawe asheye na kulya Yerusalemu fyeeri filya-da. ⁸ Naasa llya Herode alelollya Yesu kafura kyuumu, kimmba eelangye illolya uka fyeeri fyaasha mashika elyi emmiita mbony takwe. Herode mmbo evikye nsia mmbo ashorwaa wende luuka kwa Yesu. ⁹ Naasa kammbesa mbony shiingyi, lyo we nalarouwe nta kindo. " ¹⁰ Naasa vakohani valya vaniini vasasangyi na veelosha mavavaso vakasha isalala-fo, vakeengera inkumba. ¹¹ Naasa Herode kamwiinyala ando amwi na vasikari vakwe vakantatala, vakavembika soori shisha, vakambiira-se kwa Pilato. ¹² Naasa Herode katira mbuya na Pilato nkonu ulya mweni, mashika elyo mbee vesuvani. ¹³ Naasa Pilato kavaanga vakohani valya vaniini na vandu va nrwe na vandu va uruka vashekuummbya ando amwi, ¹⁴ Kavavia, " “Mmbo mulesheengye nndu yeu mukaamba mmbo akeeveta vandu. Neeny shammeembesa kya mwaandu wakwe mwiitye, llyo shilaoni kindo kya uvingo kya efyo mwankumba nafyo kyikee kwakwe. ¹⁵ Naakwa ni Herode, nawe nta-fo, llyoony kammbiira na kweru. Nawe akakau nkwiifo kindo kisumani na ufu kyikee kitani mmbwe-fo. ¹⁶ Naasany, shinkapaany nakweengye.” [ ¹⁷ Nalyo kyikee miishivye yakwe navaporomuye nndu umwi wo kyeeri kya sukukuu.] ¹⁸ “Naasa vakaongora ando amwi nseemu ulya moose, utau nndu yeu nalakilolyo-fo, kuluporomuye Baraba!” ¹⁹ Nawe Baraba ni nndu emmeenda yeerwa kifingyony kimaruma kya uriingyi lweefo kulya muriny na vandu vakawaawa. ²⁰ Naasa Pilato karera nawo lya kavii ni elyi eekundye ilekeya Yesu. ²¹ Nawo vakakapa ngaya vakaamba, “Nkapye nsalabeny.” ²² Naasa kavavia lya kararu, “A kindo kya ukasha nndu yeu aletana nkyokyi? Yeny nshilollye kindo kya uvingo kisumani na ufu kyikee efo kwakwe-fo. Naasany nshenkapaany shillekeye.” ²³ Nawo vakaitikya vekapaa kisengelele vakundye nandekapyo nsalabeny! Ngyunyanga tawo tikalyimba. ²⁴ Nalyo Pilato karumbwa kindetanwa ekyo vakunndye. ²⁵ Nalyo kalekeya nndu ulya aleerwa kifingyony kimaruma kya yaanta uriingyi na iwaa, na Yesu kavaniingya vantannyi shaasa vakundye. ²⁶ Naasa elyi veefo vasheendaa vanrie vakatira Simon wa Krene asha auka ireminy. Vakanrika nsalaba nashe yoo numa ya Yesu aurie. ²⁷ Naasa vandu va uruka vakallatya nseemu mwiingyi na vaka vekukapa-kapaa mbafu na imwiiya. ²⁸ Naasa Yesu kavaindukya kaamba, “Nyira vaka va Yerusalemu mulashiiye yeny-fo! Iiyeny kyany muveni na kya vana vany!” ²⁹ Llen-te kwikaa kushe fyeeri elyi vandu vashambaa, “Ngoma vaka fyuumba na misanga ilandeire wana na mavee alandeote. ³⁰ Llyo meendi vashepokaa ivia mafumbu, Luwoyeny! Na yeni fidooro lusikyeny! ³¹ Mashika kwakooya vatanya nri yeto nshu indo a kya yeto muumu kisheendaa inda?” ³² Naasa kweeifo na vasoro vavii vetana uravi veeriwa ando amwi nawe vandewaawa. ³³ Nalyo vakafika ando avangwaa ni Kisharongony. Nafo vakankapya-fo nsalabeny vakansanda na valya vetana makasha. Ulya umwi kavikwa kwa yoo woko lwakwe usha na ungyi yoo woko umuso. ³⁴ Naasa Yesu kaamba, “Woi Nde vafwaaye kimmba valeeshi ekyo vatana.” Naasa vakaavana na soori takwe veetikapyaa kura. ³⁵ Na vandu va uruka vasalali-fo velolaa. Na vandu valya va nrwe vakanteenda vakaamba, “Elyi nndu yeto alekira vengyi nalakukire we muni, kwakooya mmbwe Kristo nsauwe wa Iruva!” ³⁶ Naasa na vasikari valya vaiyo vakafika yoo kufii vakantatala, Vakanserisya mfinyo utarang’aa. ³⁷ Nalyo vakaamba, “Kwakooya yewe mmbo kukee mangyi ya Vayuda, Kukireeny kumuni-te!” ³⁸ Naasa na ipoo lyiifo lyikee ivike yoo uuwe ya nrwe wakwe lyikee ireiye, “Yeu mmbwe mangyi ya Vayuda.” ³⁹ Na valya veetana makasha valya vavambyo ando amwi nawe, ulya umwi kavemwaarara, “A yewe nshi Kristo? Naasany, kukyire kumuni kulusande-u neese.” ⁴⁰ Indi ulya ungyi karouwa kikee kya insakira kammbia, “A mmbo kulaireiye nta Iruva! Neewe kwaveva nndu kwaona uvingo yelo-da. ⁴¹ Kyeru yese mmbo lwatannywa kisumani. Mashika kindo lwatawa ni ekyo kyikwaani na efo mitannyi yeeru. Indi yeu nnyatiri kindo atannyi kikasha-fo.” ⁴² Nalyo kaamba, “Woi Yesu shikummbwa elyi kwafika isha kukee na umangyi lwafo!” ⁴³ Nawe kammbia, “Nkya dede shakuvia, ni inu-da kukooyaa kukee neeny efo Paradiso.” ⁴⁴ Nalyo kumfika kyeeri kya saa irindaru uruka loose lukawoyo ni ireema kukafika saa kyeenda. ⁴⁵ Na nkyeere ukareta sa ya vayo. Naasa isullya llya iniini lyaavanisye efo mmba ya Iruva lyikavambuka rany nnang’ani kavii. ⁴⁶ Nalyo Yesu kaonisa unyanga waasha kaamba, “Woi Nde ni efo maakony afo shakurambikyaany nrima wakwa.” Ammaa yaamba indo kakumba muu. ⁴⁷ Naasa nshilyi ulya wa vasikari iyana elyi allolya kiutika indo kaarafuma Iruva kaamba, “Ni kya dede nndu yeu ekee wa usumanu!” ⁴⁸ Na vandu vakuumbye-fo nkuka vasheye nafo ishelola ekyo, nawo-da elyi vallolya kilya kyautika, vakawuya na kyeny vekukapa-kapaa mbafu. ⁴⁹ Naasa kusalalye-fo na valya vaitani nawe woose sanda na vaka valya vavandami nawe vauka kulya Galilaya, nawo woose veefo-da velolaa efyo. ⁵⁰ Nalyo akakau nndu nndumi ansha nafo avangwaa ni Yosefu, akee nndu nsongoru ni ntele kaveva wa usumanu. ⁵¹ Nawe shila ilya yaawo varummbwa nyeerikye kasanga nawo-fo. Na kundo aukye ni kulya Arimataya ukee muri wa Vayuda, nawe ni nndu avereye umangyi lwa Iruva. ⁵² Naasa nndu yeu kaengya Pilato kantereva mwiili ulya wa Yesu. ⁵³ Kawoolota kawoososya sooriny sha pyai. Kandewaara kundo kwa mbangeny kukee kudoshe iweny kulandearwa nta nndu. ⁵⁴ Na nkonu ulya ni nkonu wekudeesya na nkonu wa Sabato wiifo upokaany. ⁵⁵ Naasa na vaka valya valesha varyani nawe vauka kulya Galilaya nawo vakasora yoo numa. Vakalolya mbanga ilya na nnying’a wakwe shaasa usharwaa. ⁵⁶ Naasa vakawuya na kyeny. Vakandedeesya miri ifwamaa na mafura eyaamba. Na nkonu ulya wa Sabato mweni vakaimuya shaasa kyikee kivavasye.

¹ Naasa nkonu ulya wepooka mfungare vakeenda alya mbangeny na ivishivishi lya ngama varie miri ilya ifwaamaa. ² Naasa vakakooya iwe llya lyikee ikunnye mbai lyammbutwa yoo mbangeny. ³ Naasa vakaanga nafo valalollye-fo nnying’a ulya wa Nndumi Yesu. ⁴ Nalyo kyikava elyi veefo vafulukyo nkindo ekyo, nalyo akakava vasero vavii vavasheya tiny varee soori timika-mikaa. ⁵ Naasa vakatirwa mmbwerei vakafiikya fisangu si. Nawo vakavavia, “Yeu akee na muu nkyikyi elyi mwanduuya yaa ando a vafu?” ⁶ Nnyakyikee-se yaa-fo, mmbo annduka! Kummbweny kilya alemuvia kulya Galilaya, ⁷ eshambaa kya Mwana yeto wa nndu shaasa kyikee kirummbwe nanderambikyo efo maakony a vandu valyamari na indekapyo nsalabeny na elyi lya nkonu wa kararu nawuye iruka-ny. ⁸ Nalyo vakakummbwa marero alya akwe. ⁹ Nalyo vakawuya na kyeny vauka alya mbangeny. Vakandeongoya valya ikumi na umwi na valya vengyi mbony tilya toose. ¹⁰ Naasa kwiifo Maria wa kulya Magdala, na Yoana, na Maria we maye wa Yakobo, na valya vengyi veryani nawo, mmbo valendevia vakiloshyony vakwe mbony tilya, ¹¹ nawo marero alya akavaviiya ni a urung’ani nta valaveerikye. [ ¹² Naasa Petro kakwiipoo keenda kulya mbangeny eerishaa, keemaiya-fo kalollya firami filya fyeni fyeerika, kawuya eetirwa ntamba kya kilya kyatanyika.] ¹³ Nalyo akakava vandu vavii va efo nnang’ani yaawo na nkonu ulya mweni veefo vasheenda kundo kwa muriny nafo kwauka kulya Yerusalemu kusheendaa ando a saa ivii kufike-fo, na irina lya vayo ni Emau. ¹⁴ Nawo vakava vareraany kya mbony tilya tiletanyika toose. ¹⁵ Naasa, veefo vekapaa indo sumu na yuumburana, nalyo Yesu muni kasha nang’u, keenda aryani nawo. ¹⁶ Na miso awo akasikywa nta valamanyi mmbwe. ¹⁷ Nawe kavavia, “A ni marero eekyi mwavesana indo elyi mwiifo mushendaa?” Vakairisha vekushye fisangu fyawo. ¹⁸ Na ulya umwi avangwaa irina lyakwe ni Kleopa kaalwa kambia, “A nnyewe kumuni kusheye na kunu Yerusalemu kukee muny, kwara kulamanya mbony yeto tiletanyika mikonu yei myaangu?” ¹⁹ Nawe kavavia, “A mbony yeekyi?” Vakammbia, “Ni ta Yesu wa kulya Nasareti-te ekee nndu mwauya fisuku kaveva mwiidimi itana findo finiini, fyeetana na fyeerera kikalollyo ni Iruva na vandu woose va kunu urukeny. ²⁰ Na vakohani veru vaniini vakasanga na vandu veru va nrwe vakanrambikya-fo nandeutyo uvingo lweewaawa. Vakankapya nsalabeny. ²¹ Neese mmbo lweembikye nsia lukaamba, we mmbwe yeto eekaa nawouwe vandu va Israeli. Na findo efyo firyani indo nkonu wa inu mmbwa kararu uka fyantanyika indo. ²² Na kingyi-se ni vaka va kunu kweru vaangu valelwaawuta muu. Mmbo valefika kulya mbangeny elyi ngama nraasi. ²³ Nta valakooye-fo mwiili wa Yesu. Vakasha veshambaa ni vasu va Iruva vavakooya-fo vekooraa nawo paa, vakaamba, ‘Eefo na muu.’ ²⁴ Na vandu va kweru maata vakandesaiya alya mmbangeny vakakooya ni indo kyikai shaasa vaka valya vaamba, indi we muni mmballolya-fo.” ²⁵ Nawe kavavia, “Apaa vandu murung’ani, muvetiri na ngoo tikee shiroo ikusirya na filya fikee firere ni valya veawuya fisuku fyoose. ²⁶ A nshi indo kivekee kirummbwe Kristo nasonngwe indeliswa ukyiva yelo loose, navekwiiryany neefo usuriny lwakwe?” ²⁷ Nawe kapookya Mose na valya veawuya fisuku woose kavatambashuya mbony tikee shirere kyakwe ta efo mareiyony moose. ²⁸ Naasa vakaparikya kulya muriny kundo veshendaa. Nawe kakwaalwa sheelyi akundye yeenda na mbee. ²⁹ Vakamwiikyima vakaamba, “Kaa kweru mmbee, mashika kwiifo kushilaa.” Nawe kaanga neefo mmba kakaa nawo. ³⁰ Naasa kyikava elyi akee nawo rembo vashelyaa shonga, nawe keepoo nkate kaana Iruva, kaufisha-fisha fyenga kavaavya. ³¹ Nalyo miso awo akaambuka vakamanya mmbwe. Veru, kavaverukya valakillolye-se. ³² Vakaumburana wo veni na veni vakaamba, “Ate ngoo teru nteekeyaaka-aka kunu nnang’ani yeeru elyi eefo eereraa neese efo shia elutambashuyaa mbony tilya tikee shireiye?” ³³ Vakakwiipoo saa ilya sheni vakawuya na kulya Yerusalemu. Vakakooya valya ikumi na umwi, vakuumbye ando amwi, na valya vavandami nawo. ³⁴ Vakakooya veshambaa, “Nkya dede Nndumi annduka kakoora na Simion!” ³⁵ Nawo llyo valevaongoya mbony tilya ta efo shia na shaasa wo vammanya elyi afisha-fisha nkate ulya. ³⁶ Naasa veefo vereraa indo we muni kashesalala yoo nnang’ani yaawo. Kavavia, “Kaeny na ufoo!” ³⁷ Nawo vakamatuka vakatirwa mmbwerei, veeshi ni kirishe kya nndu mfu valolya. ³⁸ Nalyo kavavia, “A kimaruma mukasavaa indo nkyokyi? Mukavetirwa mmakusaro a nyinyira naambo-kyi?” ³⁹ Keloleny maako akwa na marende akwa mumanyi mmbwe yeny! Muveshilola mashika kirishe kya nndu mfu nkitiri mwiili nta mafua shaasa mushilollye yeny-fo. ⁴⁰ Ekyaamba indo kawoora maako akwe na marende akwe. ⁴¹ Kakooya valandeedima iirikya deny kimaruma kya nsia uvatiri sanda na isongololo. Kavavia, “A ndesa mutiri kindo kyeelya yaa?” ⁴² Nalyo vakaniingya kiparwe kya ikunga yookye. ⁴³ Kawarya kalya velollye. ⁴⁴ Naasa kavavia, “Marero alya akwa shilemuvia llya shekee neeni ng’u yaa. Mmbo kyikee kirummbwe kundeinutyo mbony tilya toose tikee shireiye efo uvavasony lwa Mose na Vakisuku na Saburi.” ⁴⁵ Nalyo kapooka ivasukuya kya mareiyo. ⁴⁶ Kavavia, “Ni indo-da kyikee kireiye Kristo nandelyiswa ukiva na iruka narukeny auka kwa vafu elyi lya nkonu wa kararu.” ⁴⁷ Nalyo kundekapwa weele kyikee kya irina lyakwe efo kwa vandu va masanga woose vaalashike efo nriminy vakooye ifwaaywa ulyamari lwawo, kipookya kunu Yerusalemu. ⁴⁸ Neeni mukavaany mmbo vakureekyi va mbony eti toose. ⁴⁹ Neeny shimurummyaa ekyo kyiledeeryo kyaasa ni Nde kishemoolokyaa kimukaye. Indi yeni kaeny kunu Yerusalemu kutani mwaningwa finya yuuka efo uwe. ⁵⁰ Naasa kavauta kulya muriny kavafita kulya shia ya yeenda na Betania. Kaipoo maako akwe kavavikya mbora. ⁵¹ Kyikava elyi eefo avavikyaa mbora kavauka karoswa na efo iruveeu. ⁵² Nawo vakawuya na kulya Yerusalemu vatirwa ni nsia mwiingyi. ⁵³ Vakava vesindaa efo mmba ya Iruva kyeeri kyoose veshaarafumaa Iruva.