VAEBRANIA

VAEBRANIA

¹ Iruva mmbo alerera neese kasha kalya ka vande veru wo vakisuku, karera na shia shiingyi na kundo kwiingyi. ² Matika yaa a ulaalu mmbo arera neese na shia ya Mwana wakwe, yeto alemmbika nave muya ding’u wa fyoose, na kyeendwa mmbwe kaumba ulana loose. ³ Kimmba we akee ngyesa ya usuri lwakwe na wende lwakwe, eshipoo fyoose na ivavaso lya wiidimi lwakwe, ekimaa ivika wiilyiso lwa ulyamari, mmbo alekaa rembo woko usha lwa Uniini lwakwe efo iruveeu; ⁴ mmbo alevikwa nailanyi vasu woose, shaasa irina elyo lyikee ding’u yakwe lyileng’annya lyawo. ⁵ Mashika lyo mmbo alemmivia nsu ungau nta lyimwi, Nnyewe mwana-kwa, “Inu mmbo shakwiira.” Na lyingyi, “Neeny mmbo nshevaa Nde kwakwe nawe kwakwa nave mwana.” ⁶ Na lyingyi-se, elyi aende mwana wakwe mmbee ulaniny kaamba, “Vasu woose va Iruva vamfiirye ndi.” ⁷ Na kya vasu kaamba, “Yeto avika vasu vakwe vave va ngata ya mumuyo, na varundi vakwe vave fipalapala fya muro.” ⁸ Kyaindi kya mbony ta mwana mmbo aamba, “Kitima kyafo kya itumbe, woi Iruva nkya llung’anu na llung’anu; na rungu ya umangyi lwafo ni ya usumanu. ⁹ Mmbo kwalanga usumanu, kwasua uravi. Naasany Iruva, we Iruva wafo, ankwaamba mafura, mafura a nsia ngota a wooroo.” ¹⁰ Na lyingyi, yewe, Nndumi, llya kipooka mmbo kulevika uvasha lwa ulana, “Na iruveeu mmashora a maako afo. ¹¹ Yefyo fyoose fishelyamarikaa, lyo yewe kushesalala-u, nato shoose tisheekaa sha soori. ¹² Kushetilemaa sha masara, nato taalashike. Kyaindi yewe mmbwe ulya da, na fyeeri fyafo mfishemandaa-fo.” ¹³ A ndesa kwiifo nsu alemmuvia nta lyimwi, “Kaa yewe yoo woko lwakwa usha, kutani shavika vakiduva vafo yoo si ya ngyayo tafo?” ¹⁴ A yeyo myoose nshi mimuyo mifurukani, yeerumwa indefurukannya valya vashevaa veni ding’u ya ukiro?

¹ Kyasiany mmbo kilukooye ilola nnu efyo fileitiwa naambo lulasheefitura. ² Mashika kwankooya irero llya lyilererwa ni nsu lyekee iniini, na wo urekwa na uravi lukawonisa weesi lwa usumanu, ³ a yese mmbo lusheturunyaa inda, lukanra lulasara ukiro elu uniini indi? Nalo Nndumi alerera kya vayo mapookyony, numa lukakoora kweru paa kyuuka kwa valya valeita. ⁴ Iruva nawe evikaa ukureekyi ando amwi nawo na ngyende na findo filandelollyo na finya ta ngata shiingyi, na yaavyo Mumuyo Mweele, shaasa alekukundya we muni. ⁵ Mashika ulana llwa lukeesha lukeerera mbony ta vayo nnyaleluvika si ya vasu-fo, mashika kwiifo nndu umwi alekureeka kya vayo kaamba, ⁶ A nndu wa vandu nkyokyi kutani kwankumbwa, ao mwana wa nndu, kutani kwallola? ⁷ Mmbo kulemuumba nave n-du deny ngota nsu kwambika ureto lwa itumbe na wiindi kwambika uwe ya mashora a maako afo. ⁸ Mmbo kuvikye findo fyoose yoo si ya uvayo lwakwe. Mashika elyi kulevika findo fyoose si yakwe nnyalera-fo kindo nta kimwi kilakee si yakwe-fo. Kyaindi lyo llwalelollya findo fyoose fivikwa si yakwe-fo, ⁹ lyo yeto aletanwa n-du deny ngota vasu lullollye, mmbwe Yesu, mashika a ivavyo fika ufu, kavikwa ureto lwa itumbe na nnduma, naambo kyeendwa ni isarya lya Iruva na shoshe ufu kimaruma kya vandu woose. ¹⁰ Mashika yeto kyeendwa mmbwe na kwa kimaruma kyakwe findo fyoose fiiyo, mmbo kyilenkooya nawoni vana veengyi vafikye itumbe, na yaawutya yeto nniini mweende ukiro na shia ya makiva. ¹¹ Mashika yeto mwiilyisa na yewo veilyiswa, woose nkwa umwi vammyi. Kimmba kya ekyo nnyalollye sony ivavaanga vanavamaye-fo; ¹² llya aamba, Mmbo nshevambisaa irina lyafo kwa vanavama. Efo mmba ya Iruva nshekwimbyaa kyerumisha, ¹³ Na lyingyi, Mmbwe yeto nshemmbikaa nsia. Na lyingyise, Lola, yeny shikee yaa na vana yewo Iruva aleshivaniinga. ¹⁴ Naasany, kyimmba vana valeakaniswa samu na mwiili, nawe ni indo-da aleveakana efyo fyeni, naambo kyeendwa ni shia yeyo ya ufu narumate yeto atiri finya ta ufu, we Nkumbi, ¹⁵ naambo naleke yewo woose muu wao wekee ushingeny kimaruma kya weerei lwa ufu. ¹⁶ Shamashika lyo n-dede, nnyatiri ngata ya vasu-fo, mmbo aleipoo ngata ya ngyeeri ya Abrahamu. ¹⁷ Nkyo kavakaniswa na vanavamaye kya findo fyoose, naambo nave nkohani nniini araiye ilyillya, akutiri na ngata ya Iruva, naambo naleke vandu vakwe kya ngyulyamari tawo. ¹⁸ Na kimmba we muni alelyiswa ukiva esheeswaa, mmbo ashidimaa yeekya yewo vakeeyeeswa.

¹ Naasany, vanavama veele, mukee vaakanise uvaango lwa iruveeu, kusareny nnu kya Nrumi na Nkohani Nniini wa kikusiryo kyeru, we Yesu. ² Yeto aleindya yeto mwinruma, shaasa na Mose ekai, kulya mmba koose kwa Iruva. ³ Mashika we mmbo akee nninge itumbe mmwasi ngota Mose, kimwi sha nndu mwisongosya mmba awona nnduma ngota mmba yeyo. ⁴ Mashika wo mmba mmbo ikeeshisongosye ni nndu; kyaindi yeto mwisongosya findo fyoose ni Iruva muni. ⁵ Na Mose dede lyo mmbo aleindya fyoose kulya mmba ya Iruva, ekee mwifurukannya-u; nave nkureekyi wa findo fyoose fishererwaa numa; ⁶ lyo we Kristo, akee mwana, mwikallya mmba ya Iruva, yeto mmba yakwe ikee nnyo yese, lyo kwakooya luwaranaa nnu na ukaari lweru na itumbe lya ivereya lyeru fika mafurumyony. ⁷ Naasany shaasa Mumuyo Mweele arera, “Inu yeni kwakooya mwaita unyanga lwakwe. ⁸ Mulasheumisa mirima yaany, sha kyeeri kya yeende unyafi sha nkonu wa kyeeso kulya kasa. ⁹ Llya vande valya vany valesheesa, vakashiisa, vakalollya mitannyi yakwa ando a myaaka 40. ¹⁰ Nkyo sharooyo ni unyafi kimaruma kya irika elyi, shaamba, ‘Kyeeri kyoose mirima ya vandu yeva mmbo yeevekye, mmbalemanya shia takwa-fo.’ ¹¹ Kimaruma kya unyafi lwakwa shalya mboo, ‘Mmbashangaa ifureny lyakwa-fo.’ “ ¹² Kyasia, loleny vanavama vakwa, nnang’ani yaany kulashekaa-fo nrima muumu ulatiri kikusiryo; kimaruma kya ikurauwa na Iruva yeu akee na muu. ¹³ Naasa ikimbaniny nkonu simu, naambo kulave-fo nta umwi waany ava muumu elembwaa nnulyamari. ¹⁴ Mashika mmbo lwammba veakana ando amwi na Kristo, kwankooya lwavandama na ukaari lweru lwa finya uka mbee fika mafurumyony; ¹⁵ shaasa kyaambawa, Inu yeni kwakooya mwaita unyanga lwakwe mulasheumisa mirima yaany sha kyeeri kya yeende unyafi. ¹⁶ Mashika ni vakyi valeende unyafi kyeeri valeita? Nshi woose-se valya valeuka Misri veeteterwaa ni Mose? ¹⁷ A ndesa ni vakyi alerooywa ni unyafi kimaruma kyawo ando a myaaka 40? Nshi valya valelyamara, minying’a yaawo ikawa kulya kasa? ¹⁸ A ndesa ni vakyi alevalyiiya mboo sheelyi mbashangaa ifureny lyakwe, kulaore ni valya valelyang’aa? ¹⁹ Naasany mmbo lwakooya sheelyi mbaleidima yaanga ifureny-fo, kimaruma ira valakusirya-u.

¹ Naasany, kwakooya kyaasa ekyo kyeyaanga ifureny kyisalalyi-u, lweereye, nta kulave umwi waany asheturaa ifura elyo. ² Mashika naakwa ni yese mmbo luleongoyo Nrumi ya Nsia kimwi sha wo. Lyo irero elyi lyileitiwa llyilevasenyafo, mashika elyi lyiletura-u kikusiryo kyeelyiwarya. ³ Mashika yese lulekusirya-u mmbo lushangaa ifureny elyo shaasa aleamba, Shaasa shilelya mboo kya unyafi lwakwa, mmbashangaa ifureny lyakwa-fo; na kikava ishora elyo lyilemarisyo uka elyo uvasha lwa ulana lulevikwa. ⁴ Mashika kwiiyo ando alesenda nkonu wa mfungare kaamba, “Iruva mmbo aleimuya nkonu wa mfungare, karau mashora moose.” ⁵ Na yoo nang’u, “Mmbashangaa ifureny lyakwa-fo.” ⁶ Kyasiany, kimmba irero elyi lyiiyo-da kyeyaamba veefo vasheangaa-fo, na valya valeongoywa mbony yeto kasha vakalemwa yaanga-fo kimaruma kya ulyang’a lwawo, ⁷ kavika nkonu ungyi, kaamba na kana ka Davidi numa ya fyeeri fyaasha, “Inu”shaasa kyilererwa uka kasha, Inu yeni, kwakooya musheita unyanga lwakwe, mulasheumisa mirima yaany. ⁸ Mashika kukooye Yosua evaniinga ifura, nnyesendaa nkonu ungyi wa numa-fo. ⁹ Naasany mmbo kusaye-u ifura lya nkonu wa iimuya kwa vandu va Iruva. ¹⁰ Shamashika yeto aleanga ifureny lyakwe mmbo akeekyesa we muni kya mashora akwe, shaasa na Iruva nave alefura kya mashora akwe. ¹¹ Kyasiany neese lukutakure yaanga ifureny elyo, naambo kulashekaa-fo nta nndu afwa kimaruma kya ngata yeyo yelyang’aa. ¹² Shamashika Irero lya Iruva mmbo lyitiri muu, lyikatira finya, lyikaveva lyoovi ngota usu lukee unnwe kunu na kunu, lyikaidima ikora na yaavanisa miili na mirima, na filungo na mafura a vayo. Na lyingyi kwa vayo nkyaangu imanya makusaro na fyama fya mirima. ¹³ Nta nkwiiyo kyuumbe kilalollyo paa mbee ya vayo-fo, na findo fyoose mmbo fikee mbereto yoo misony a yeto arye mbony teru toose. ¹⁴ Kyasiany, kimmba lutiri Nkohani yeto aleanga na iruveeu, we Yesu, Mwana wa Iruva, lukutire deny na iirikyo lyeru. ¹⁵ Mashika Nkohani yeu weeru Nniini nnyalelemwa itamballya neese kunu ufwafweny lweru-fo, mashika we mmbo aleeswa kimwi sheese-da kya findo fyoose, lyo nalatani ulyamari. ¹⁶ Kyikeeny indo, luserikye kitima ekyo kya isarya lukee nookaari, naambo luwoni ilyillyo, na iwona isarya yelyo lyishelutaramaa kyeeri kya yaanguywa.

¹ Mashika wo Nkohani Nniini akee imwiipoo efo vanduny mmbo akeembike kimaruma kya vandu navafurukannyi mbee ya Iruva, naniingye firaso na fyaanu kimaruma kya ulyamari. ² Yeto ashidimaa ivallya nawo waarya yewo varung’ani na vakeereka, kimmba naakwa ni we avekee na ngata ya ufwafwa. ³ Na kimmba ni indo mmbo kyinkooye naute firaso kimaruma kyakwe we muni na kya vandu vengyi kya isangywa ulyamari. ⁴ Nta nkwiiyo nndu ashidimaa itafurau nnduma yeufo, kuuta yeto Iruva ammuvaanga, shaasa alevaanga Aron. ⁵ Na kiwo-da naakwa ni Kristo nnyalekurosa we muni kava Nkohani Nniini-fo, mmbo kwiifo yeto alemmbia, Ni yewe Mwana wakwa. Inu mmbo shakwiira. ⁶ Na ando engyi kaamba, Nnyewe Nkohani llung’anu kuvakye Melekizedeki. ⁷ We kyeeri ekyo ekee na mwiili, yeto ashidimaa imwauwa ufuny mmbo alensheya, kimaruma kya fiterewo na fyeerero na misoru miingyi, kaaranywa kimmba aleirikya Iruva. ⁸ Na lla elyi akee Mwana, mmbo alesisirya makyiva yoo alenkooya; ⁹ Na kyeeri alemaa iinutya, kava mmbwe mweende ukiro lwa llung’anu kwa yewo vemwirikya. ¹⁰ Na Iruva kaamba mmbo akee Nkohani Nniini kimwi sha Melekizedeki. ¹¹ Kimaruma kya yeto mmbo lutiri findo fiingyi fyeyaamba, lyo kikava kyuumu mashika elyi mukee varoo iita. ¹² Mashika alya kyemukooye muve yeni mmbo velosha (mashika kwamiira-u fyeeri fyaasha), lyo fika ulaalu mmbo mukee veloshwa ufundo lwa mbee deny lwa mbony yeti ta Iruva, mukava sha vana vanaa malela vakalemwa shoonga shuumu. ¹³ Shamashika yeto moose mwiina malela nnyamanyaa deny marero a usumanu-fo, mashika ni mwana nndu. ¹⁴ Kyaindi shoonga shuumu nnya vandu vaniini, yewo kimaruma kyekwishivira urango lwawo lwammidima itambashwa kyisha na kyikasha.

¹ Kimmba ni indo, lukara lulasenda ufundo lwa mbee lwa Kristo, lwangusye yeenda lwaawutye, lulasheva-se vekaa uvasheny lwa mashora alakee a muu, neera kikusiryo kwa Iruva, ² na ufundo lwa ubatiso, na yeekeryo maako, neeruka lya vafu na mwaandu wa llung’anu. ³ Na efyo mmbo lutanaa kwakooya Iruva alwiidimisya. ⁴ Mashika yewo valemmainingwa sa, na ishosha simbo yeyo ya iruveeu na iwona yaakaniswa na Mumuyo Mweele, ⁵ na ishosha irero yelyo lyirolaa lya Iruva, na wiidimi lwa fyeeri efyo fishaa, ⁶ vakawuya iwa-da numa ya efyo, nkikiidimikaa-se ivaviira wiiya kutani vakurya-fo, mashika mmbo vakeekapya Mwana wa Iruva nsalabeny lya kavii, na insuta wo veni. ⁷ Mashika naakwa ni sumbai yeyo yana mura wa mmbwa yeyo ikapaau wo kyeeri na ivikya yewo varema ndunda shisha, wo mmbo vawaryaa mbora tishukaa kwa Iruva; ⁸ lyo kwakooya sumbai yeyo yauta miinga tupu na mooro, mmbo ivaa sheelyi yadengwa nyishirikyoo-fo, nayo mmbo ishelyamarwaa. ⁹ Kyaindi vakunde vakwa, lla elyi lwaamba indo, mmbo lwiishi mbony tany, tikee shisha mmwasi, tikee ta ukiro. ¹⁰ Mashika Iruva nshi nrekwa kutani arekyo mashora any-fo, na ukundi lulya muleora kimaruma kya irina lyakwe, llya mulefurukannya veele, na fika ulaalu ni indo-da mukeetana. ¹¹ Neese mmbo lukee mwikima nnu naambo mutire usasari yelo weni na yaawutya ekyo luvereye fika mafurumyony; ¹² naambo mulasherokwa, naambo musheva vamwi neewo va fyaasa efyo vekee na kikusiryo sanda na usisiryo. ¹³ Mashika kyeeri Iruva alevika kyaasa na Abrahamu, mashika elyi kulaore eiyo ungyi nniini ngota we wellyisa mboo, mmbo alelya mboo we muni, ¹⁴ kaamba, ni dede ivikya mbora nshekuvikyaa, na ikufumbuta nshekufumbuta. ¹⁵ Na kyeendwa ni ivika nsia kashefityo kyaasa ekyo. ¹⁶ Mashika nndu mmbo alyee mboo na yeto amwilannyi, na yekyo kyailanya marero moose ni ilya mboo, evikaa kyiringyisyo. ¹⁷ Kyikeeny indo Iruva ekundye yoora valya vashewaryaa kyaasa kilya, shaasa fyaasa fyakwe filashaalashikaa, kavika-u kyaasa. ¹⁸ Naambo kimaruma kya findo fivii filashaalashikaa, nang’u Iruva nalashambaa wongo, lukaariswa lwivirywaa muu, yese lukeetamballya efyo luvikye nsia fikee mbee yeeru, ¹⁹ nakyo mmbo kivakye kya nrima, kyeluuta nrengeny, itiri finya, yeelwaata efo nnang’ani ya ando eele, ²⁰ yefo Yesu aleanga nafo kimaruma kyeru, nsongoru weeru, kava Nkohani Nniini fika llung’anu avakye Melekizedeki.

¹ Mashika mangyi yeto wa Salemu we Melekizedeki ekee nkohani wa Iruva akee uwe, yeto alekwaananya na Abrahamu llya ekewuya ooka ikapa vamangyi valya, kammbikya mbora. ² Mmbwe ulya Abrahamu alenninga kyenga kya ikumi kya findo fyakwe fyoose; (udongo lwa irina lyakwe ni “Mangyi wa usumanu”, na lyingyi “Mangyi wa Salemu”, nkyo kyaamba ni mangyi wa urilalyi. ³ Nnyatiri ndeye nta maye-fo, nnyatiri kyeeri apookye-fo, nta mafurumyony a muu wakwe-fo, lyo mmbo alevakaniswa na Mwana wa Iruva); yeto mmbo akaa llung’anu. ⁴ Naasa, loleny shaasa nndu yeto ekee nsuri, yeto Abrahamu nkuu weeru, alenninga kyenga kya ikumi kya masaa akwe. ⁵ Neefo kwa vana va Levi valya vetira ukuhani, mmbo vatiri ivavaso ipoo kyenga kya ikumi kive kya vandu vawo, mmbo va ufyari lwawo, ni ivavaso, lla elyi vaukye kwa Abrahamu. ⁶ Lyo we, ufyari lwakwe lulaukye kwawo, mmbo alewarya kyenga kya ikumi kwa Abrahamu, yeto atiri kyaasa ekyo kammbikya mbora. ⁷ Mmbo kimanyikye deny, yeto mwivikya mbora mmbo ailannyi yeto avikyo mbora. ⁸ Na Vakohani yewo vawaryaa kyenga ekyo kya ikumi vakee vandu vashefwaa, lyo nkwa yeto akureekyo sheelyi eefo na muu. ⁹ Na lyo ivaa yaamba kyeendwa ni Abrahamu, naakwa Llevi mwiwarya kyenga kya ikumi mmbo aleniingya kyenga kya ikumi; ¹⁰ mashika mmbo aukye kwa ndeye, yoo Melekizedeki alekwaananya nawe. ¹¹ Naasa kukooye kweiyo usongovisi efo ukuhaniny lwa Levi, (mashika vandu yewo mfo valewonisa uvavaso); nkuti ki se yeiyo yewonisa nkohani ungyi avakye Melekizedeki, nta nare nalavakaniswa na Aron? ¹² Mashika ukuhani lulya lukammaalashika, na ivavaso nalyo mmbo lyishalashikaa. ¹³ Mashika yeto mbony takwe tilererwa mmbo aleakaniswa na ufyari lungyi, neefo nkweifo nndu ungyi mwirundya kitara kyeerasya-fo. ¹⁴ Mashika nkindo kya paa Nndumi weeru mmbo ookye efo ufyariny lwa Yuda, na Mose nnyalererau kya ufyari yelo kikee kya ukuhani-fo. ¹⁵ Yefyo lukerera yese mmbo fimanyikye mmwasi, kyimmba alewonika nkohani ungyi avakye Melekizedeki; ¹⁶ nalakee nkohani kyeendwa ni ivavaso lya uvavaso llwa lwa ngata ya mwiili, akee wa wiidimi lwa muu ulamandaa. ¹⁷ Mmbwe alekureekywa kyeyaamba, Nnyewe Nkohani llung’anu kuvakye Melekizedeki. ¹⁸ Mashika kwiiyo yuuta-u ivavaso llya lya mbee, kimaruma kya ufwafwa lwa vayo, neelyi kulore lyilemaa; ¹⁹ (mashika ivavaso llya lya mbee lyileinutya kindo-fo); na ando amwi na efyo mmbo kulesha-u ivereya iiya isha mmwasi lyelusembera kufii na Iruva. ²⁰ Na kimmba kulaore kweiyo ilyiswa mboo, ²¹ (mashika valya mmbo valevikwa vave makuhani kulaiyo ilya mboo, kyaindi we, ando amwi neelyiswa mboo kwa yeto alemmbia, Nndumi mmbo alelya mboo nta nnyashalashaa-fo, yewe mmbo kukee nkohani llung’anu); ²² naasany kiinani na efi Yesu mmbo aleva mwisalallya kyaasa ekyo kyikee kyisha mmwasi. ²³ Na valya valevikwa makuhani veengyi, mashika elyi valeimwa ni ufu valakee-u. ²⁴ Kyaindi we, kimmba aiyo llung’anu mmbo atiri ukohani lwakwe lulamandaa. ²⁵ Kimmba ni indo we mmbo ashidimaa ikira deny yewo vasheyaa Iruva na irina lyakwe, mashika we akee na muu mikonu myoose evaterevyaa. ²⁶ Mashika mmbo kilelukooya lutire Nkohani nniini wa ngata yei akee mweele, nalatiri uravi, nalatiri nta ivara, akee nrauwe na varavi, kavekaa uwe kairya iruveeu; ²⁷ nalatiri kimaruma kya yuuta mbele kiraso kimaruma kyeekwilyisa ulyamari lwakwe muni shaasa makuhani valya vengyi vaniini valetana, numa nooteny kiraso kimaruma kya ulyamari lwa vandu yewo, mashika we mmbo aletana indo lyimwi nsi llya alekuuta we muni. ²⁸ Mashika uvavaso mmbo lwavika vandu vakee vafwafwa vave makohani vaniini, kyaindi irero elyo mboo yeyo ilesha numa ya uvavaso mbo lyilevika-u Mwana, yeto amaa fyoose fika llung’anu.

¹ Naasa, nnang’ani ya efyo lukeeamba, irero isongoru llyo elyi, mmbo lutiri Nkohani Nniini indi, akee rembo woko usha lwa kitima kya itumbe kya uniini iruveeu, ² mfurukani wa ando eele, na wa yeema llya dede lyilevikwa ni Nndumi muni nta nshi nndu-fo. ³ Mashika Nkohani Nniini moose mmbo avikwaa naambo naniingye simbo na firaso, kweekyo yeu nawe nkuti natire findo fyeeyuuta. ⁴ Kukooye ekee uwe ya uruka, nnyevaa nkohani-fo; mashika veefo yewo vaniingyaa firaso kimaruma kya ivavaso, ⁵ verundya-u sha ando a kirishe kya iruveeu, shaasa Mose alevavasyo ni Iruva, llya emma ivavasyo nadeesye yeema llya, mashika mmbo aamba, Lola kusongosye findo fyoose shaasa kuleorwa kulya ifumbu-u. ⁶ Lyo ulaalu mmbo ambonisa urundi usha mmwasi, kiinani na shaasa nrumi wa kyaasa kiniini mmwasi, kyikee kivavasye nkyaasa ekyo kisha mmwasi, ⁷ Mashika kukooye kyaasa ekyo kya mbee kulaore kyeetiri unana, mmbwekaa-u mwaanya wa iruuya ekyo kya kavii-fo. ⁸ Mashika evasakiraa mmbo aamba, Lola, mikonu iifo ishaa, ni Nndumi arera, neeny nsheinutyaa kyaasa Kiiya kwa mmba ya Israeli na mmba ya Yuda. ⁹ Nakyo nkishevaa sha kyaasa kilya shilevikya vandeyaawo-fo, nkonu ulya shilevatira woko shavauta urukeny lwa Misri. Mashika mbalewarana na kyaasa kyakwa-fo neeny nshilevasara-fo, ni indo Nndumi aamba. ¹⁰ Mashika ekyi nkyo kyaasa nshevikaa na mmba ya Israeli, numa ya mikonu ilya ni indo Nndumi aamba, Nshevavikya uvavaso lwakwa makusarony awo, nshereiya efo miriminy yaawo neeny nshevaa Iruva waawo, nawo vave vandu vakwa. ¹¹ Nawo mbasheloshanaa wo nndu na uroye-fo, na wo nndu na mwanamaye, veshambaa, irikya Nndumi-fo, mashika woose vasheshiirikyaa. Uka yeto akee n-du waawo fika yeto akee nniini waawo. ¹² Mashika mmbo nshevafwayaa maravi awo na ngyulyamari tawo nshishetikumbwaa-sefo. ¹³ Llya aleamba, ni Kyaasa Kiiya, mmbo aleallwa kilya kya mbee kive kikuu. Na lyo kindo kikampooka iva kikuu mmbo kyamfika kufii na imanda.

¹ Naasany naakwa nkyaasa kilya kya mbee mmbo kyevikye uramba lwa miindye, na ando a vayo eele a yaa ulaniny. ² Mashika yeema mmbo lyilesongosyo, llya lya kipooka, lyikavikyo ekyerya taa, na mesa, na mikate ya Myoorye, ng’ng’u alevaangwa Eele. ³ Na yoo numa ya isullya elyo lya kavii, yeema llya lyivaangwa Eele kwa Kweele, ⁴ lyitiri kirembo kya saabu, na isanduku lya kyaasa lyikee isengetye nsaabu riti, mfo kweiyo na ikopo lya saabu lyetiri mana, na nsengye ulya wa Aron ileshau, na mapoo alya a kyaasa. ⁵ Na uwe ya vayo kukaa-u makerubi na itumbe, akavikya kitima ekyo kyesarya nruve; naasa nta llutiri mwaanya wa yaamba mbony ta findo efyo fyoose kimwi kimwi-fo. ⁶ Naasa findo efyo fikimaa isongosyo indo, wo kyeeri makohani mmbo veshangaa efo yeeminy elyo lya kipooka, vakainutya mirumwa ya miindye. ⁷ Kyaindi efo yeeminy yelyo lya kavii nkohani nnini mmbo eshangaa-fo we muni, na lyimwi nsi wo mwaaka, na samu yeyo yeningyaa kimaruma kyakwe muni na kya ngyulyamari ta itura imanya lya vandu yewo. ⁸ Mumuyo Mweele eshoraa mbony yei, sheelyi shia ya yaanga ando eele nnyensukuwa paa-fo, yoo yeema llya lya kipooka lyeiyo. ⁹ Elyo llyo kyaaso kya kyeeri ekyi kya ulaalu, kyeeri ekyo fyaanu na firaso fyekora na muro, nayo filashidimaa isongovisa nndu yeto akee iindya, ¹⁰ kyimmba ni uvavaso lwa ngata ya mwiili-da, fyeelya na fyeena neesamba yefyo fyekee fivavasye fika kyeeri kya usongosyo wiiya. ¹¹ Kyaindi elyi Kristo ammaa isha, akee nkohani nniini wa findo efyo fishaa, atiri yeema iniini na lyawutye fyoose, lyilakee lyisongosye mmaako, nkyo kyaamba lyilakee lya yaa ulaniny elu. ¹² Nta kilakee kya samu ya mburu na ngashe, kyaindi kya samu yakwe muni, mmbo aleanga lyimwi nsi ando yoo Eele, ekimaa itira iwouwa lya llung’anu. ¹³ Shamashika kwakooya samu ya mburu na ya shau na ifu lya ngashe ya ng’umbe yeyo valefwallyo yewo vetirwa nkyirinda kya mwiili nawo vakasambika, ¹⁴ a samu ya Kristo nshi mmwasi, yeto kyeendwa ni Mumuyo wa llung’anu mmbo alekuuta we muni kwa Iruva kava kiraso kya ulyamari, mmbo ishemusangyaa makusaro any na mashora any mafu. ¹⁵ Kimmba ni indo mmbo akee Nrumi wa Kyaasa Kiiya, naambo, ufu lukammekaa-u kimaruma kya yuuta filya fikasha filetanwa kyeeri kilya kya kyaasa kilya kya mbee, yewo vakee vavaange vawarye kyaasa kya ding’u ya llung’anu. ¹⁶ Mashika alya kyaasa kya ding’u kikai, nkuti ufu lwa yeto alekivika lukee-u. ¹⁷ Mashika kyaasa kya ding’u yeyo mmbo kitiri finya alya ufu lwa nndu (we Kristo) lulesheya; mashika kilya kilatiri finya, elyi ulya alekivika akee na muu. ¹⁸ Naako nkyaasa kilya kya kipooka nkilevikwa kulaiyoo samu-fo. ¹⁹ Mashika wo ivavaso shaasa lyilererwa ni Mose kwa vandu yewo woose, shaasa uvavaso luleamba, mmbo alewarya samu ya ngashe na ya mburu ando amwi na mafwaa a yaari adodorye na hisopo, kananatya kitabu ekyo kyeni, na vandu yewo woose, ²⁰ kaamba, “Yei nnyo samu ya kyaasa ilevavasyo ni Iruva.” " ²¹ Na yeema elyo nalyo na fiiya fyoose fya miindye kafinanatya samu kiwo, ²² neefo uvavasony kufii findo fyoose mmbo fyasangyo nsamu, na kulaiyo samu yapusuka nkwiiyo ifwaaywa-fo. ²³ Naasa kikava nkuti mareiyo a mbony tikee iruveeu tifitwa-fo, kyaindi mbony ta iruveeu tiilyiso mfiraso fisha ngota to. " ²⁴ Mashika Kristo nnyaleanga ando kweele kukee kusongosie mmaako-fo, nkyo kyaaso kya ando eele a dede, we mmbo aleanga iruveeu kweni, nalollyo yoo mbee ya kisangu kya Iruva kimaruma kyeru yese. ²⁵ Nta nshi akuutaa lyingyi na lyingyi-fo, shaasa llya nkohani nniini aleanga ando eele wo mwaaka na samu ilakee yakwe; ²⁶ kukooye ni indo, mmbo elyisoo ukyiva keengyi uka elyo ulana luumbwa; kyaindi ulaalu lyimwi nsi elyi kyeeri kyileinana, kaorwa paa, namaa ulyamari na kiraso kya muu wakwe. ²⁷ Na shaasa vandu vakee vavikye ufu lyimwi nsi, na numa yeefwa ni yaanduywa; ²⁸ na Kristo nawe, mmbo aleutwa kiraso lyimwi naambo neepoo ngyulyamari ta vandu veengyi, nawe mmbo asheshaa lya kavii, kulaiyo ulyamari, kwa yewo vembereya vaoni ukiro.

¹ Naasa kyimmba uvavaso ni kyirishe kya mesha yoo asheshaa, lulakee fwana sheni ya findo efyo, kya firaso filya fya iniingywaa wo kyeeri mwaaka moose, nkimaa nta kinnywa isangya deny yewo vashaa-u-fo. ² Kwankooya ni indony, a kukooye firaso fyemandaa, mashika yewo veindya vakammaa iilyiswa lyimwi, mmbekilollyaa-se vatiri ulyamari? ³ Lyo ando amwi na firaso efyo mmbo kwiiyo ikummbwa kya ulyamari wo mwaaka. ⁴ Mashika samu ya shau na mburu nnyimaa yuuta ulyamari-fo. ⁵ Nkyo elyi asha ulaniny mmbo aamba, Firaso fyekora na muro na fyaanu nkukundye-fo, lyo mwiili ukashideesya. ⁶ Firaso fyekora na muro na firaso fya ulyamari nkulesennyo mfyo-fo. ⁷ Llyo shileamba, Lola, shansha (mmbo shilereiyo efo kitabuny) shitani filya kukundye, woi Iruva wakwa. ⁸ Yoo uwe aamba, Firaso fyekora na fyaanu fya yuuta ukulefikunda-fo (filya fikee fivavasye ni uvavaso), ⁹ llyo aleamba, “Lola te, mmbo shasha nshetana efyo kukundye. Mmbo auta-u kilya kya mbee kavika-u kilya kya kavii.” ¹⁰ Yoo efyo akundye fikai ng’u lulewonisya iilyiswa, yoo mwiili wa Yesu Kristo ulerambikywa-u lyimwi nsi. ¹¹ Na wo nkohani mmbo asalalaa wo nkonu navike miindye, neeningya firaso efyo fyeni keengyi, nafyo filashidimaa nta yuuta ulyamari. ¹² Kyaindi yeu, kyeeri alemaa kiraso kimwi kimaa yuuta ulyamari llung’anu, mmbo alekaa rembo woko usha lwa Iruva; ¹³ ukau navereye kutani vakiduva vakwe vavikwa yoo si ya marende akwe. ¹⁴ Mashika kwa yuuta lyimwi nsi mmbo alesongovisa deny yewo vasheilyiswaa fika llunganu. ¹⁵ Na Mumuyo Mweele mmbo alukureekya, mashika ekyaamba, ¹⁶ Ekyi nkyo kyaasa nshevikaa nawo numa ya mikonu ilya. Nshevika mavavaso akwa miriminy yaawo. Na efo makusarony awo nsheareiya-fo. ¹⁷ Lyo kaamba, Ngyulyamari tawo na ulyang’a lwawo nshishelukumbwaa-se-fo, " ¹⁸ Naasany, kwankooya yefyo fisheutwaa-u, nkukyiifo-se kiraso kimaruma kya ulyamari-fo. ¹⁹ Kyasiany, vanavama, kyimmba lutiri ukaari lwa yaanga ando eele kyeendo nsamu ya Yesu, ²⁰ shia ilya aleloora shiiya, itiri muu, ishiraa isulyeny, nto mwiili wakwe; ²¹ na iwona Nkohani nniini wa mmba ya Iruva, ²² luserikyeny ng’u na nrima wa dede, na kikusiryo kivangyi, lukee vasangye mirima yeeru lure makusaro makasha, lukee vasangye miili yeeru na mura mweele." ²³ Lutire nnu ikusirya lya filya luvikye nsia, lyilashaalashikaa, mashika lya aleluvikya kyaasa ni wa dede. ²⁴ Lukukaarise luveni na veni neekwitika itana mashora mesha a ikunda. ²⁵ Nta lulare ikwaanannya ando amwi-fo, shaasa vengyi vaishivye, lyo lwiikimbani; na yeengera itana indo, shaasa mulollye nkonu yeto ukee kufii. ²⁶ Mashika kwakooya lwatana ulyamari naambo lukammaa imanya ekyo kya dede, nkukisaa-u kiraso kimaruma kya ulyamari-fo; ²⁷ lyo isheshaa ngapo yeeresye, na waami lwa muro yeto ushelyaa yewo valyang’a. ²⁸ Nndu amina uvavaso lwa Mose mmbo ashefwaa kulaiyo usari, na irero lya vakureekyi vavii ao vararu. ²⁹ Mwalollya inda? Ndesa nndu yeto ashewaryaa Mwana wa Iruva nnyashewaryaase ngapo niini mwasi, neemina samu yeyo ya iilyisa sheelyi nshi kindo-fo, neemina Mumuyo mwiisarya? ³⁰ Mashika lwiishi yeto aleamba, Itaiya kiduva ni ishora lyakwa, yeny nshetaiyaa. Na lyingyi, Nndumi mmbo asheanduyaa vandu vakwe. ³¹ Ni kindo kyeeresye iwoya maakony a Iruva muni Muu. ³² Lyo kumbweny mikonu ilya ya mbee, llya kyeeri mulewona sa, mmbo mulesisirya isisirya lying’ani lya mavavyo. ³³ Kyeeri mulelamyo ivikywa ureeree na fyuure, na kyeeri muleakaniswa na vetanywa efyo. ³⁴ Mashika valya vekee fifingyony mmbo mulevaiya mashoya, mukairikya na nsia yuuta masaa any, mwiishi sheelyi efo nnang’ani yaany mmbo mutiri masaa ailannyi yoo, alamandaa. ³⁵ Kyasia mulashereta ukaari lwany, mashika lutiri simbo niini. ³⁶ Mashika mukundye usisiryo, naambo mukammaa itana filya Iruva akundye muwonise kyaasa kilya. ³⁷ Mashika nkyeeri kyaangu deny kiiyo. Yeto avereyo asheshaa, nta nalakeywa. ³⁸ Lyo yeto wakwa wa usumanu mmbo ashewonaa muu na iirikyo, kwakooya atirwa nnyinyira, nrima wakwa mmbutiri ifura nawe-fo. ³⁹ Kyaindi lyo yese llusangyi na yewo vatirwa nnyinyira na vakeereka-fo, mmbo lukee na yewo vakikusiryo ekyo kikiraa mirima yeeru.

¹ Naasany ikusirya ni ivika nsia deny kya efyo fikaa fishe, kulaore fyallollyo. ² Na vamiku veru mmbo valekureekywa kya ekyo. ³ Kyeendwa ni irero lya Iruva ulana mmbo luleumbwa, ni indo lukusirye, naakwa mfindo efi filollyo mfileumbwa mfindo fingyi-se. ⁴ Eetiri kikusiryo, Abeli mmbo aleutya Iruva kiraso kyisha ngota Kaini, kakureekyo sheelyi mmbo akee wa usumanu; Iruva kakureekya firaso fyakwe, kimmba ni indo, na kikava alemmaa ifwa, mmbo eefo areraa. ⁵ Kyeendwa nkikusiryo Enoki mmbo aleipowa-u, nalalollye ufu, nta nnyalelollyo-fo mashika Iruva alemwiipo-u: Mashika elyo kulore emmipowa-u mmbo ekureekye sheelyi mmbo alesennya Iruva. ⁶ Lyo kulaiyo kikusiryo nkushiidimaa insenya-fo; mashika nndu asheengyaa Iruva nkuti mbele neerikye sheelyi eefo, na sheelyi we mmbo alyimyaa mbora yewo vensheya. ⁷ Ekee na kikusiryo, Noe llya alemaa iikimbwa ni Iruva kya findo efyo fikaa fishe numa filandelollyo, shaasa aleirikya Iruva, mmbo aletana mmba ilya ya isanduku, naambo nakire va mmba yakwe. Nkyo kautya ulana uvingo neeva muya ding’u wa usumanu yelo lwawonika kimmya efo kikusiryony. ⁸ Kyeendwa nkikusiryo Abrahamu mmbo aleirika llya alevaangwa, nakupoo neende iwonisa ando alya kushevaa ding’u yakwe, kakwiipoo naleeshi kundo akeenda. ⁹ Na kikusiryo kakaa kulya urukeny llwa weny lwa kyaasa, urukeny lulakee lwakwe, kakaa yeeminy we na Isaki na Yakobo, veni ding’u ando amwi nawe va kyaasa kilya kyeni. ¹⁰ Mashika mmbo evikye nsia ilollya muri utiri uvasha, ukee n-deesye neetanwa ni Iruva muni. ¹¹ Kyeendwa nkikusiryo Sara muni mmbo alewona wiidimi lwa ikufinga lla llya emiilanya kyeeri kyakwe, mashika llya alevika nsia yeto mwiimbikya kyaasa ni wa dede. ¹² Kyeendwa ni efyo vakairwa ni nndu umwi nawe kava sheelyi amfwa, vakawonika vandu veengyi sha nyinyiri ta efo nginiiu-te, sha nsanga wa mbai ya nruva ulavaa yekyena. ¹³ Yewo woose vakafwa na kikusiryo, valandewarya fyaasa filya, lyo vakafilollya vekee kwaasha na iirikya, neiirikya sheelyi wo ni veny na va kyaaro kunu urukeny. ¹⁴ Mashika yewo veamba findo sha yefyo mmbo woora paa sheelyi mmbo vakeeruuya uruka lwawo veni. ¹⁵ Na kukooye veekumbwaa uruka lulya kundo valeuka, mmbo veshidimaa iwuya nafo. ¹⁶ Kyaindi lyo ulaalu mmbo valangye uruka usha mmwasi, llo elo lwa iruveeu. Kweekyo Iruva nnyasuaa ivaangwa Iruva waawo-fo; kimmba mmbwe yeto alevatannya muri. ¹⁷ Kwi kikusiryo Abrahamu llya aleeswa mmbo aleuta Isaki nave kiraso, neeto alewarya fyaasa efyo mmbo ekeniingya mwana wakwe wa ngitany. ¹⁸ Ee-da, mmbo emmivyo, Yoo kwa Isaki ng’u ufyari lwafo lushepookyaa, ¹⁹ kikallollyo sheelyi Iruva mmbo ashidimaa innduta ooke kwa vafu, nammbonise lyingyi. ²⁰ Ekee na kikusiryo Isaki mmbo alevikya Yakobo na Esau mbora, naakwa nkya findo efyo fisheshaa numa. ²¹ Ekee na kikusiryo llya Yakobo emfikya ifwa, mmbo alevikya vana va Yosefu mbora, keendya Iruva ekwinyikye yoo runguny ya nsengye wakwe. ²² Ekee na kikusiryo llya Yosefu alefikya yoo mafurumyony akwe, mmbo alesenda mbony ta vana va Israeli yuuka Misri kavavasya kya mafua akwe. ²³ Na kikusiryo llya Mose alewonika kasurumwa mmbamiku vakwe ando a miiri iraru, llya valellollya nkinkoku kyisha, nta valairyae ivavaso lya mangyi. ²⁴ Ekee na kikusiryo ekiva nndu nniini kalema ivaangwa mwana wa mfu wa Farao; ²⁵ kalollya nkyeni ilyiswa ukyiva ando amwi na vandu va Iruva ngota ifurya ulyamari ando a kirambo kidu; ²⁶ kalolya Kristo iteendwa ni usimba uniini ngota umasi loose lwa Misri, mashika nfyo evereye natawa. ²⁷ Na kikusiryo kooka Misri nalairyee unyafi lwa mangyi, kasisirya evikye nsia yeto nalalollyo. ²⁸ Na kikusiryo kavika Pasaka, na yaamba samu ilya, naambo ulya asherumataa fyuumbe fivee fyoose wo nalavapaani. ²⁹ Na kikusiryo vakaira kulya yeeveny lya Shamu sha ando oomu; Vamisri vakunda nawo itana indo vakamirwa mmura. ³⁰ Kyeendwa nkikusiryo isimamba lya Yeriko ukawunduka, llya muri uleringityo ando a mikonu mfungare. ³¹ Ekee na kikusiryo Rahabu ulya ntuusi nnyalerumatwa ando amwi na valyang’a valya-fo; mashika llya alewarya vandu valya va sa na ufoo. ³² A yeny shaambe-se kyi? Mashika mwaanya mmbushimaa shaambe mbony ta Gidion na Baraka na Samson na Yefta na Davidi na Samweli na ta vakisuku, ³³ yewo kyeendwa ni iirikyo valevinga ngyumangyi ta vamangyi, vakatana usumanu, vakatira fyaasa, vakafinga kana ka miiso, ³⁴ vakavinga muro, vakakya iwaawa na usu. Vakaniingwa finya llya vekee vafwafwa, vakakaarya fireny, vakoombuta vamisa woose. ³⁵ Vaka nawo vakawaarya vafu yewo valerutwa. Lyo vengyi vakawondorwa fika ifwa, valairikye iwouwa, naambo vaoni irutwa. ³⁶ Vengyi vakeetwa fyeesony fyeteendwa neekapwa, yee neefingwa, neevikwa kifingyony; ³⁷ vakakapwa na mawe, vakaparwa na misumenu, vakavikwa fyeesony, vakawaawa noosu, vakaringitya-ringitya veree masara a moonri na mburu; vakaanguyo mfindo, vakalyiswa ukyiva, vakatannyo uravi; ³⁸ (vandu yewo kulore vesumani ikaa yaa ulaniny), mmbo valeraa-raa kulya kasa na kulya mafumbu-u neefo mbangeny na midesheny. ³⁹ Na vandu yewo woose mmbo valekureekywa kyeendo nkikusiryo kyawo, lyo valawarye kyaasa. ⁴⁰ Kimmba Iruva elludeesya yese ekyo kikee kyisha mmwasi, naambo wo valashesongwa iwaryo ngota yese.

¹ Kiwo neeseny-da, kimmba lukee varingitye ni vakureekyi veengyi indo, lukurwe mario yoo maroo, na ulyamari, lutamballye yeenda mbee lwikee na usisiryo efo kivakyanuny kya muu yeu. ² Lwiilolaa Yesu, yeto mwipooka na mwiinutya kikusiryo kyeru; kimaruma kya ifura elyo aleniingwa we mmbo alesisirya nsalaba neemina sony, nawe mmbo akee rembo woko usha lwa kitima kya itumbe kya Iruva. ³ Nkye kusareny nnu kya yeto alesisirya iteendwa iniini indo lya vetana ulyamari, mulasheyaaraa-fo, nta ifwa nrima-fo. ⁴ Mulekapana fira mukafikya nta ipuswa samu, mwiwanaa na ulyamari-fo; ⁵ lyingyi mmbo mwanrekyo wiikimbi lulya, lukeerera neeni yeni mukee vana, Mwana-kwa kulaile umbiri lwa Nndumi, nta kulafwe nrima kyeeri akeekukyeemya, ⁶ Mashika yeto Nndumi ankundye mmbo ankapa, na mwana yeto mumwirikya mmbo ankapa. ⁷ Mmbo musumani ikapwa, Iruva mmbo ammutanya sha vana; mashika lyo ni mwana-kyi yeto nalakapwaa n-ndeye? ⁸ Naasa kwankooya mulakapwa shaasa kikee kwa woose, mmbo mwava vana valakee veni kyeny, nshi vana va dede-fo. ⁹ Ando amwi na efyo mmbo lutiri vande veru va ngata ya mwiili nawo vakalukapa, neese lukairikya, a nshi kyeni deny luwarani na Nde yeto wa mirima yeeru lukie muu? ¹⁰ Mashika lyo dede yewo ando a mikonu myaangu mmbo valelukapa shaasa valelollya wo veni kivaa, nawe kya pule yeeru, naambo lwaakaniswa weele lwakwe. ¹¹ Wo ngapo kyeeri kilya nnyilelollyo nkindo kya ifura-fo, nkyeevavisa, kyaindi kwa yewo vakee veeshivire indo numa vakawonisa ndunda ta usumanu titiri ufoo. ¹² Kyasia orweny maako yoo akee mafwafwa na ndi yeto shipooru, ¹³ sumanisyeny marende any shia, naambo ekyo kikee nketekete kilareke shia, naambo kikirwa. ¹⁴ Kundeny na nrima moose ikaa na urilalyi na vandu woose, nalo weele yelo kulaifo nndu ashidimaa ilollya Nndumi kwakooya alutura. ¹⁵ Mulole nnu deny kulasheva nndu amina isarya lya Iruva, kwiiseny nnu naambo nri yeto uvavaa ulasheemya kwany ushemwaatara na veengyi vaone itefuswa. ¹⁶ Kulakae-fo nndu ntuusi nta nndu naleshiindya Iruva-fo, sha Esau llya alekumba ding’u yakwe ya mwana mmbee kimaruma kya shoonga ikee imutu lyimwi nsi. ¹⁷ Mashika mwiishi llya numa alekunda iwona mbora, nkilekiva-fo, (mashika nnyalewona mwaanya wa ikurya-fo), lla shaasa aleiruuya na misoru deny. ¹⁸ Mashika mmulefikya ifumbu lyivaa ipaana-fo, lyileaka muro, nta ifishi yuu, na ireema, na uraato lwa finya, ¹⁹ na unyanga lwa iranda na unyanga lwa marero, yelo valya valelwiita valetereva valakivyo kindo kingyi-fo, ²⁰ mashika mbaleidima isisirya marero alya valevavasyo-fo. Naakwa ni ifisi lyikapaana ifumbu elyo mmbo lyikapwaa na mawe. ²¹ Na efyo filelollyo shaasa fyeeresye, kutani Mose aamba, “Shantirwa mmbwerei neererema.” ²² Kyaindi yeni mmbo mwasheya ifumbu lya Sion, na muri wa Iruva akee na muu, Yerusalemu ya iruveeu, na maronda meengyi a vasu fiku fiingyi, ²³ na ikwaanu iniini na siri ya vana vavee vakee vareiye iruveeu, na Iruva mwileta vandu woose, na mirima ya vandu va usumanu vasongovikye, ²⁴ na Yesu nrumi wa kyaasa kiiya, na samu ya inanatywa, yeyo ireraa mesha ngota ilya ya Abeli. ²⁵ Loleny mulashelema yeto akeerera. Mashika kwakooya kulaore valekirwa valya valelema yeto alevaikimba yaa ulaniny, ni mmwasiny deny llushekirwaa kwakooya lwaindukya mbai neeto aleuka iruveeu elwikimbaa; ²⁶ yeto unyanga lwakwe lulereremisa uruka kyeeri ekyo, lyo ulaalu mmbo avika kyaasa kyeyaamba, ulaalu mmbo shireremisaa lyingyi lyimwi nshi uruka-da-fo na iruveeu-da. ²⁷ Kyaindi irero elyi, “Lyingyi lyimwi”, mmbo lyoora paa filya fisheutwaa-u elyi fireremiswaa, mfyo filya fikee fyuumbe, naambo filya filavaa ireremiswa fyo fisalale-u. ²⁸ Naasany kimmba lukeewarya umangyi yelo lulavaa ireremiswa, lukaeny na isarya, na kyeendwa llyo luvikye Iruva miindye insenyi, ando amwi neekunyiisa na vio; ²⁹ mashika Iruva weeru nsha muro.

¹ Ukundi sha lwa vana va nka lukee-u. ² Mulare mulawarya veny-fo; mashika indo kwiifo vengyi valembwarya vasu va Iruva valaishi. ³ Kummbweny yewo vakee vafinge kimwi sheelyi mukee vafinge nawo; neewo vakeesisyo da muveekye, kimmba neeni mukee vandu. ⁴ Usando lwa nndu na nka luindyo ni vandu woose, na ando elala ashie; mashika vatuusi na vakirinda Iruva mmbo ashevautyaa uvingo. ⁵ Mulatire ngaa yekunda fesa-fo; fureny neefyo mutiri; mashika we muni mmbo aleamba, “Nshishekwaanguyaa nta-fo, nta nshishekuraa-fo.” ⁶ Kutani lwaidima yaamba, Nndumi mmbwe mwishitarama, nshishiryaa-fo; nndu wa vandu nkyoki asheshitannyaa? ⁷ Kummbweny vasongoru vany, valya valemoongoya irero lya Iruva. Na lyingyi, mwiilolaa nnu masiiyony a ngaa tawo, musore kikusiryo kyawo. ⁸ Yesu Kristo ni we yeto muni da aiyoo, ukwau na inu na fika llung’anu. ⁹ Mulashekurikwa ni ngyufundo tingyi shive na shive, na ta veny, mashika nkyisha nrima utumariswa ni isarya nta nshi shoonga-fo, mashika valya valeenda indo mbalewona-u pule-fo. ¹⁰ Lutiri kitara kyerasya ekyo valya vakee ifurukanyau yoo yeeminy elyo valatiri mumu wa ilya findo fya vayo. ¹¹ Mashika findo filya samu ya vayo yeendwaa ando yoo eele ni nkohani nniini kimaruma kya ulyamari, firimbiti fya vayo mmbo fyakoryo efo kipoo ya ulale. ¹² Kwa kimaruma ekyi Yesu nawe naambo nailyise vandu na samu yakwe muni, mmbo alelyiswa ukyiva kipoo ya muri. ¹³ Naasa lweende lunsheye kipoo ya ulaleny lwakwe, lwiirye uvingo lwakwe. ¹⁴ Mashika yaa llutiri-u muri ukaa-fo, mmbo lukeeruuya ulya ushaa. ¹⁵ Naasany, kyeendwa mmbwe, luniinge Iruva kiraso kya nnduma kyeeri kyoose, nkyo kyaamba, eto nto ndunda ta kana eko kakeindya irina lyakwe. ¹⁶ Lyo mularekywa itana fya usha na yaakana amwi-fo; mashika firaso sha efi mfyo fisenyi Iruva. ¹⁷ Indyeny vasongoru vany neevatirya vio, mashika wo mmbo vakeelala rembo kimaruma kya mirima yaany, sha vandu vasheveswaa kyany, naambo vatani indo vemusongoyaa na ifura nta valarosaa uuwo, mashika nkishemukyau kyisha-fo. ¹⁸ Luterevyeny; mashika lwiishi mmbo lutiri nrima nkesi, lukakunda itira ngaa shisha findony fyeru fyoose. ¹⁹ Neeny mmbo shamutereva nnu mutani indo naambo shiviirwa kwany uviny. ²⁰ Naasany, Iruva wa urilalyi yeto aleviira Mwisi Nniini wa ironda lyakwe auka kwa vafu, na samu ya kyaasa kya llung’anu, we Nndumi weeru Yesu, ²¹ namusongovise yeni mutani wo kindo kyisha, mwitanaa shaasa akundye; nawe natani efyo finsennyi nnang’ani yeeru, kwi Yesu Kristo, Nnduma mmbwakwe llung’anu na llung’anu. Amen. ²² Lyo shamutereva vanavama, musisiryani na irero elyi lyirye wiikimbi; mashika mmbo shamureiya na marero maangu. ²³ Manyiny sheelyi mwanamaye weeru Timoteo alemmaa iporomuwa, nawe kansha uviny, mmbo nshekwanannyaa na yeni ando amwi nawe. ²⁴ Idikireny vasongoru vany woose, na veele woose; yewo va Italia nawo vamwiidikira. ²⁵ Isarya lyikae na yeni moose.