VAGALATIA

VAGALATIA

¹ Ni yeny nrumi Paulo, (indi nshi nrumi wa vandu-fo, nta nshi alerumwa ni nndu-fo, ni Yesu Kristo na Iruva Nde yeto alennruta kooka kwa vafu). ² Na vanavama yeva vakee na yeny, shamureiya yeni siri ta Galatia. ³ Isarya lyikae na yeni, na ufoo, lyuukye kwa Iruva Nde, na kwa Nndumi weeru Yesu Kristo; ⁴ yeto alekurambikya-u we muni kimaruma kya ngyulyamari teru, naambo nalukire ulaniny elu uravi lwiiyo ulaalu, shaasa Iruva Nde weeru alekunda we muni. ⁵ Nnduma ni wakwe llung’anu na llung’anu, Amen. ⁶ Mmbo shifulukywa nnu mashika elyi mwara yeto alemuvaangya isarya lya Kristo uviny indo, na iindukya nrumi ya ngata ingyi. ⁷ Nta nshi ingyi-da-fo, kyaindi kwiifo vandu vakeemwerevise vakunndye ifullwa nrumi ya nsia ya Kristo. ⁸ Lyo naakwa lwava yese ao nsu wa iruveeu kwakooya ashemoongoyaa nrumi ingyi kuuta yeyo lulemmaa imwoongoya, nave n-denge. ⁹ Shaasa lulemmaa imuvia, na ulaalu shawuiya-se yaamba, kwakooya nndu ashemoongoyaa nrumi ingyi kuuta yeyo muleiwarya, nave n-denge. ¹⁰ Mashika-le ndesa, ni vandu nkeevalelemba, a ni Iruva? Ao ndesa mmbo shikunndye isenya vandu? Kukooye fika ulaalu mmbo shikeesenya vandu, nta nshevaa ishinga lya Kristo-fo. ¹¹ Mashika vanavama vakwa, nrumi yeyo shilemoongoya mmbo shamuvia deny, nshi ya mbuka ya kivandu-fo. ¹² Mashika nshileyuuta kwa nndu-fo, nta nshileloshwa ni nndu-fo, ni Yesu Kristo muni aleshirambuya. ¹³ Mashika mulemmiita muveni mbony ta ngaa yakwa llya shekee na ufundo lwa Kiyuda. Mashika mmbo shesisya siri ya Iruva kikailanya kyeeso, shakunda iilyamara deny. ¹⁴ Neeny shatumaa efo ufundony lwa Kiyuda ngota veengyi yewo vekee va irika lyakwa na efo vanduny vakwa, shakutakura nnu itira ngyufundo ta kasha ta vande vakwa. ¹⁵ Kyaindi lyo Iruva yeto aleshisauwa uka shilandewonika kwa ma, kashivaangya isarya lyakwe, ¹⁶ shaasa kilensenya ishisunundya mbony ta mwana wakwe, naambo neeny shiidimi yoongoya vandu va masanga mbony yeto takwe, neeny nta nshilevesa mbele nta nndu-fo. ¹⁷ Nta nshilerwa na kulya Yerusalemu indekwaananya na yewo valeshisongoya iva varumi-fo, mmbo shileenda kulya kasa ka Vaarabu, shooka-fo shawuya na Dameski. ¹⁸ Numa ya vayo kwiikisia myaaka iraru, sharwa na Yerusalemu naambo shindekwaananya na Kefa, shakaa kwakwe ando a mikonu ikumi na iraanu. ¹⁹ Lyo nta nshilelollya-fo nrumi ungyi-fo, kuuta Yakobo muni, we mwanamaye wa Nndumi weeru. ²⁰ Neefyo shikeemureiya, loleny nnu, shikee mbee ya Iruva nta nshireraa wongo-fo. ²¹ Numa ya vayo sheenda taari ta Siria na Kilikia. ²² Lyo siri ta Kristo ta kulya Uyuda ntileshilollya tishimanyi-fo. ²³ Kuuta elyi valeeta-da, sheelyi yeto ekeelusaveesa elyo mbee, ulaalu mmbo akeevambisa kikusiryo ekyo llya kasha ekeekimamita. ²⁴ Vakaitikisa Iruva kimaruma kyakwa.

¹ Numa ya vayo kwiikisia myaaka ikumi na iina, sharwa lyingyi na kulya Yerusalemu shiryani na Barnaba, shaveipoo na Tito sheenda nawe. ² Na yeny mmbo shileenda nafo mashika elyi Nndumi aleshoora, shavaongoya kya nrumi yeyo shikeongoya vandu va masanga, lyo lwikee luveni na yewo vatiri nnduma, kulashekooya mmbo nkeetambalya ruu, ao mmbo nkeetambalya irisha ruu. ³ Kyaindi Tito yeu sheriani nawe, nawe akee Ngriki, nnyaleitikywa irinwa-fo. ⁴ Lyo kimaruma kya vakristo va wongo yewo valeatwa siriny kirisi, valeatwafo kirisi naambo valumanyi shaasa lukai kunu kwa Yesu Kristo, naambo valurwaa ushingeny; ⁵ neese nta llulekunda ivaaranya-fo, naambo dede yeyo ya Nrumi ya Nsia ikooye ikaa na yeni. ⁶ Kyaindi valya vatiri nnduma; (na vakava inda kwakwa yeny nkimwi nsi, Iruva lyo nnalolaa fisangu fya vandu-fo), mmbo nkeyaamba valya vatiri nnduma vandu mbalesheengerya-u nta kindo-fo. ⁷ Kyaindi mbai na efyo, kyeeri valelollya shishoongoyaa valya valakee varini Nrumi ya Nsia, shaasa Petro ekeeyoongoya valya vakee varini; ⁸ (mashika yeto aleidimisya Petro iva nrumi wa yewo varini mmbwe yeto-da aleshiidimisya yeenda kwa vandu va masanga). ⁹ Na llya valemeemanya kya isarya elyo shilesimbwa; varumi Yakobo na Kefa na Yohane yewo vaishiwa ni ngo ta siri, mmbo valeshiwara yeny na Barnaba ng’asa ya woko usha kya wiitanu, naambo yese lweende kwa vandu valakee Vayuda nawo veende kwa Vayuda. ¹⁰ Nawo vakalukundya kindo kimwi nsi, lukummbwe vakiva; na yeny shakutakura nnu iinutya irero elyi. ¹¹ Kyaindi kyeeri Kefa alesha Antiokia mmbo shilewakyana nawe kisangu kwa kisangu, mashika mmbo asumannyi uvingo. ¹² Mashika kulaore vensha vauka kwa Yakobo mmbo ekeelya na vandu va masanga. Kyaindi kyeeri valesha we mmbo alekaa kwaasha nawo keereya Vayuda yewo vakee varini. ¹³ Na Vayuda yewo vengyi vakainduka ando amwi nawe, kutani na Barnaba nawe eewa ni ukunang’ari lwawo. ¹⁴ Kyaindi kyeeri shilelollya sheelyi ngata yeyo nnyisumani na Nrumi ya Nsia, mmbo shevia Kefa mbee yaawo woose, “Kwakooya yewe kukee Myuda kwasora mbuka ya vandu va masanga, ilakee ya Vayuda, a nkikyi elyi kukeitikya vandu va masanga isora mbuka ya Kiyuda?” ¹⁵ Yese lukee Vayuda tukula, lulake varekwa va masanga. ¹⁶ Neese lwiishi sheelyi nndu wa vandu nnyashekennywaa usumanu kyeendwa ni mashora akwe-fo, nkyeendwa ni ikusirya Kristo Yesu naasa, yese mmbo luleirikya Kristo Yesu naambo lweekennywa usumanu kimaruma kya Kristo, nta nshi kimaruma kya mashora-fo, mashika kyeendwa ni mashora a nndu kwiifo nta umwi asheekennywaa usumanu-fo. ¹⁷ Nkyoony kwakooya yese luveni lweekennywa usumanu elyi lwairikya Kristo lukalollywa mmbo lukee valyamari-da. A Kristo mmbo akee mwirundya ulyamari? Nta-fo! ¹⁸ Mashika kwakooya shawuya irosa filya shilefisammbwa, mmbo shakoora yeny shimuni sheelyi mmbo shikee nrekwa. ¹⁹ Mashika yeny mmbo shilefiiya uvavaso kyeendwa ni uvavaso naambo shikee na muu kwa Iruva. ²⁰ Mmbo shilekapywa nsalabeny ando amwi na Kristo; lyo ulaalu shikee na muu, nta nshi yeny-se-fo, ni Kristo akee nnang’ani yakwa, na muu yeu nkee nato wa mwiili yeu, mmbo nkee nato kikusiryony kya Mwana wa Iruva, yeto alelukunda kakuuta we muni kimaruma kyakwa. ²¹ Nshiminaa isarya lya Iruva na ilyaallwa ruu-fo, mashika kwakooya usumanu mmbo luwonikaa kyuukana na mashora a nndu, naasany na Kristo mmbo alefwa ruu.

¹ Yeni Vagalatia mulatiri urango, a mmbi alemulyamara mirwe. Yeni muleongoywa paa mbony ta Yesu Kristo sheelyi mmbo alekapywa nsalabeny? ² Ni kindo kimwi nsi shikundye ikimanya kwany. A ndesa mmbo mulewarya Mumuyo kyuuka na mashora a nndu, ao nkimaruma kya iita yelyo lyileende kikusiryo? ³ A ni indii mulerung’ana indi? Mwammaa ipooka na Mumuyo, ulaalu mmbo mukundye ifurummya na findo fya mwiili? ⁴ A mmbo muleera fyuureny efyo fyoose kisheva kya ruu? A mmbo kishevaa kya ruu dede? ⁵ Naasany yeto mwimuniinga Mumuyo na irunda mashora maniini nnang’ani yaany mmbo atana indo kyuuka na mashora a mwiili, ao nshi kimaruma kya iita elyo lyishendee kikusiryo? ⁶ Nkimwi sha llya Abrahamu aleirikya Iruva kaeekennywa usumanu. ⁷ Kyasia manyiny sheelyi valya va kikusiryo mmbo vana va Abrahamu. ⁸ Mareiyo nang’u shaasa aambaye uka elyo sheelyi Iruva mmbo asheekenyaa vandu va masanga usumanu kivaukya efo kikusiryony, mareiyo mmbo alevia Abrahamu Nrumi ya Nsia elyo kasha, kyeyaamba, “Vandu va masanga woose mmbo vashevikywaa mbora yoo kwafo.” ⁹ Naasa yewo va kikusiryo mmbo vavikywa mbora ando amwi na Abrahamu yeto etiri kikusiryo. ¹⁰ Shamashika valya woose vakeetana fya uvavaso, mmbo valamywa si nkidengo, mashika nkireiye indi, “Yeto moose nalawarani na efyo fyoose fikee efo uvavasony nafiinutye mmbo akee n-denge.” ¹¹ Nkyo kyaambany nkwiifo nndu asheekenywaa usumanu mbee ya Iruva kyuuka na uvavaso-fo, mashika yeto wa usumanu mmbo ashekaa na muu kimaruma kya kikusiryo. ¹² Na uvavaso lluleendwa nkikusiryo-fo, kyaindi mwitana indo mmbo ashekaa na muu kimaruma kya vayo. ¹³ Kristo mmbo aleluwouwa luuke kidengony kya uvavaso, mashika mmbo alealuwa kidengo kimaruma kyeru, mashika nkireiye kikaambawa, “Yeto moose avanikwa nri-u mmbo akee n-denge.” ¹⁴ Naambo mbora ya Abrahamu ikooye ifikya vandu va masanga kwi Yesu Kristo, naambo luwarye kyaasa kya Mumuyo lwikee na kikusiryo. ¹⁵ Vanavama vakwa, mmbo nkeerera sha nndu wa vandu. Na kyikava ni kyaasa kya nndu, lyo kyikammaa ivangiswa nkwiifo nndu akiminaa-fo ao nta yeengerya-u kindo-fo. ¹⁶ Fyaasa efyo mmbo fileniingwa Abrahamu na mwana wakwe. Nkyaambawa nkwa vana sheelyi mmbo vakee veengyi-fo; kyaindi nkwa umwi, kwa mwana wafo, nawe ni Kristo. ¹⁷ Ekyo shiifo nshambaa nkyo ekyi, kyaasa ekyo mmbo kilevangiswa mbele ni Iruva, uvavaso yelo lulesha ando a myaaka 430 lluleidima yaalasha-u kindo-fo ao ikiuta-u-fo. ¹⁸ Mashika kwakooya ding’u mmbo yasha na uvavaso, nnyikivaa ya kyaasa-fo, kyaindi we Iruva mmbo alesimba Abrahamu efyo emmbikya kyaasa. ¹⁹ A uvavaso nkyokyiny ndesa? Mmbo luleendwa kimaruma kya ukasha lwa vandu kutani asha yeto awonikye kawarya kyaasa ekyo, kikee kyeende ni nsu wa Iruva akee nrumi nasheamba. ²⁰ Na yeto akee nrumi nshi asanda kimaruma kya nndu umwi nsi-fo, lyo yeto akee umwi ni Iruva. ²¹ A ndesa uvavaso mmbo lulariani na fyaasa fya Iruva? Oode, mashika kukooye lweeningywaa uvavaso lushendee muu, naasa usumanu mmbo lwewonikaa lweendwa ni uvavaso. ²² Kyaindi mareiyo mmbo alesandya fyoose na ifivika finyiny ya ulyamari, naambo yewo vakusirye vaniingwa kyaasa ekyo vekutiri efo iirikyony lya Yesu Kristo. ²³ Lyo kulaore kikusiryo ekyo kyensha mmbo lwekee si ya uvavaso, lukalamywa si kutani iirikyo elyo lyilesukuwa paa. ²⁴ Kikeeny indo uvavaso mmbo luleva sha nteteri wa ilurwaa kwa Kristo, naambo lusheekennywa usumanu kyuuka na kikusiryo. ²⁵ Lyo kwankooya kikusiryo kyansha, llukikee-se maakony a nteteri-fo. ²⁶ Mashika yeni moose mmbo mukee vana va Iruva kyeendwa nkikusiryo kwi Yesu Kristo. ²⁷ Mashika yeni moose mulebatisyo irina lya Kristo mmbo muree Kristo. ²⁸ Na yoo nkwiiyo Myuda nta Ngriki-fo. Nta nndu lleke na nndu ishinga-fo. Nta nkwiiyo nndu nndumi na nndu nka-fo. Nnyelyi yeni moose mwammba ngata imwi mukee va Yesu Kristo. ²⁹ Na kimmba mukee va Kristo, naasany mmbo mwammba ufyari lwa Abrahamu, na veni ding’u shaasa kyaasa kilya kyikai.

¹ Lyo mmbo shikeerera mbony ta iva muni ding’u. Kyeeri muni ding’u akee mwana, nnyatiri kilakaniso na ishinga-fo, na kava mmbwe muni wa fyoose. ² Mashika mmbo akee nrambikye vangari na vellela, kufike kyeeri ekyo kikee kideerye ni ndeye. ³ Kiwo neese kyeeri lwekee vana vadu, mmbo lweekee vakaye ni miishivye ilya ya mbee ya ulana elu. ⁴ Na kutani llya fyeeri fileinana, llyo Iruva alelurumya mwanaakwe akee mwiire ni nka si ya uvavaso. ⁵ Naambo needimi iwouwa yewo vakee si ya uvavaso, naambo neese lwiidimi iwarya ngata yeyo yeevikwa vana va Iruva. ⁶ Na kimmba yeni mwammba vana, Iruva mmbo aleruma Mumuyo wa Mwana wakwe miriminy yeeru yeto avangaa “Aba” nkyo kyaamba “Woi Nde.” ⁷ Kimmba ni indo yewe nkukikee-se kishinga-fo, mmbo kukee mwana, na kwankooya kukee mwana naasany, mmbo kukee muni ding’u efo kwa Iruva. ⁸ Lyo fyeeri filya fya mbee llya kulaore mwemmanya Iruva, mmbo muleva veerundya maruva alakee iruva dede. ⁹ Kyaindi elyi mwammaa imanya Iruva, na mmwasi imanyika kwa Iruva, nkyi kisheengyee muwuiyese filoshyo filya fya mbee fyekee fifwafwa, fyekee fyaanguye, neeni mukakunda iwuyafo-se ulaalu? ¹⁰ Mmbo mweekena mikonu, na miiri, na fyeeri na myaaka. ¹¹ Shammaawukwa deny nkyany, kulakooye mmbo shikeyaatarika ruu kimaruma kyany. ¹² Vanavama vakwa, shamutereva nnu muve sha yeny, mashika na yeny mmbo shikee sheeni. Mulenshisoka nta kindo-fo. ¹³ Lyo mwiishi llya shilepooka imoongoya Nrumi ya Nsia mmbo shekee mfwafwa mwiiliny. ¹⁴ Na kyeeso ekyo mulekiwonisa kimaruma kyakwa mmulekimina, nta ikilema-fo, mmbo muleshiwarya sha nsu wa Iruva, sheelyi mweewaryaa Yesu Kristo muni. ¹⁵ A nshidimaa inda yaamba shitiri ngoma? Mashika mmbo shamukureekya, kukooye kyevaa, mmbo mweeshillwaa miso any mushivike yeny, ¹⁶ A ndesa mmbo shivaa nkiduva waany elyi shamuvia kya dede? ¹⁷ Yewo mmbo valangye imulollya, lyo nshi veetiri kimaruma kisha-fo, lyo mmbo vakundye imuraya poo, naambo yeni mulange ivalollya. ¹⁸ Nalyo nkindo kisha nnu ilanga ilollyo kimaruma kikee kisha, nta nshi kyeeri shikee ando amwi neeni-da-fo. ¹⁹ Fivana fyakwa fidu, shikeemuiya nnu mashoya kutani Kristo amuwonikya; ²⁰ a nkyema sheshiidimaa ikaa neeni ulaalu, na itundwa unyanga lwakwa! Mashika mmbo shitirwa nnyinyira deny kimaruma kyany. ²¹ Nkyeshivieny, yeni mukundye iitoryo mmavavaso, ao mmbo mulaereye mavavaso? ²² Mashika kikee kireiye sheelyi, Abrahamu mmbo etiri vana vavii, umwi kwa nka kishinga na ungyi kwa nka muni kyeny. ²³ Kyaindi ulya wa nka kishinga mmbo alewonika kyikee kya mwiili-da, lyo ulya wa nka muni kyeny kawonika akee wa kyaasa kya Iruva. ²⁴ Findo efi mmbo fikeererwa fikee fya kyaaso; mashika vaka yeva mmbo vavakye fyaasa fivii, kimwi kyuukye ifumbuny lya Sinai, nkyo kya Hajiri aleira vana vakee ushingeny. ²⁵ Mashika Hajiri mmbo avakye ifumbu lya Sinai lyikee urukeny lwa Vaarabu, lyikavaka Yerusalemu yei ya ulaalu, mashika elyi akee ushingeny ando amwi na vana vakwe. ²⁶ Kyaindi Yerusalemu ya uwe ni muni kyeny, nawe ni maye weeru yese. ²⁷ Mashika kikee kireiye indi, Fura yewe nka kyuumba, kulandeire mwana, rosa unyanga, kufwe, yewe kulandetire mavina a mwana, mashika vana va nka akee muni ni veengyi, ngota va yeto akee na mmi. ²⁸ Kyasiany, vanavama yese mmbo lukee vana va kyaasa sha Isaki. ²⁹ Lyo shaasa ulya alewonika kyuuka na mwiili alesisya ulya wa Mumuyo, ni indo-da kivekai ulaalu. ³⁰ Kyaindi mareiyo mmbo aamba inda? “Umbuta nka kishinga na mwana wakwe, mashika mwana wa kishinga nnyawonaa ding’u ando amwi na yeto wa nka muni kyeny-fo.” ³¹ Kikeeny indo vanavama vakwa, yese llukee vana va nka kishinga-fo, mmbo lukee vana va nka muni kyeny.

¹ Kristo mmbo aleluvika valeke, kwa ekyo salaleny, nta mulasheereiywa muvikwa ushingeny-fo. ² Lolen-te, yeny Paulo mmbo shamuvia, kwakooya mwarinwa Kristo nnyatiri mbusha neeni-fo. ³ Na lyingyi mmbo shikeevia wo nndu akee nrini, mmbo kinkooye iinutya uvavaso loose. ⁴ Mmbo mukee varauwe na Kristo yeni moose mukunndye yeekennywa usumanu ni uvavaso, mmbo muwoye mukauka efo isaryeny lya Iruva. ⁵ Mashika yese lwiikayo Mmumuyo mmbo luvereye ivika nsia elyo lya usumanu lweendwa nkikusiryo. ⁶ Mashika kyeendwa ni Yesu Kristo irinwa llyisheekyaa-u kindo-fo, ao nta nndu ira nalarinwa-fo, kitiri-u mashora ni kikusiryo ekyo kikaaywa ni ikunda. ⁷ Mmbo mwekeetammballya nisha, a mmbi alemwiima mulalatye efyo fya dede? ⁸ Yaalashika elyo llyuukye kwa yeto amuvaangye yeni-fo. ⁹ Ntarang’o munnywa mmbo woomwa imbumba lyoose lya nswa. ¹⁰ Mmbo shimuvikye nsia nnu shikee na Nndumi, sheelyi mmushetiraa nrima wa ngata ingyi-fo. Kyaindi lyo yeto akeemusaveesa mmbo ashewona uvingo lwakwe, na kava vi. ¹¹ Na yeny, lyo vanavama vakwa, kwakooya shavambisa mbony ta irinwa, a nkikyi elyi shiifo shitendwaa? Yoo nsindara wa nsalaba mmbo wammba ruu. ¹² Kyevaa kyeni kukooye yewo vakeemwishura nyinyira veendekuvanikaa! ¹³ Mashika le nyira, vanavama, mmbo mulevaangwa naambo muve valeke, lyo uleke lwany nshi yelo lweelatya mbony ta mwiili-fo, llweetaramana kya ikunda. ¹⁴ Mashika uvavaso loose mmbo lwainutywa yaa irerony elyi lyimwi nsi, lyeyaamba, “Kunda nndu ungyi shaasa kukukundye kumuni.” ¹⁵ Lyo kwakooya mwava sha mafisi mukulye muveni, loleny mulasheekumaa. ¹⁶ Naasany mmbo shaamba, endeny mweendo wany mwiiteterwaa Mmumuyo, nta mulashiinutyaa lango eto ta mwiili. ¹⁷ Mashika to mwiili mmbo utiri lango wikapanaa na Mumuyo, na Mumuyo ukakapana na mwiili; mashika efi fivii mmbo fivikyani kiduva kutani mwalemwa imanya kyeetana. ¹⁸ Kyaindi kwakooya mwateterwa Mmumuyo, mmukikee-se vashillye mmavavaso-fo. ¹⁹ Kyasiany mashora a mwiili nng’u yaa nang’u mmbo amanyikye paa, ni fya urui, ukirinda, uravi. ²⁰ Iindya maruva a wongo, usavi, ukiduva, myaandu, itira iriso, irooyo nngoo, uriingyi, iraukana, kyama kikasha. ²¹ Isuvana, unangwa, italauwa ndeu, na findo fivakye efyo. Kya findo fya ngata yeyo mmbo shasongwa imuvia, shaasa llya shilemmaa imuvia, sheelyi vandu veetana findo fya ngata yeyo mbashewonaa ding’u ya umangyi lwa Iruva-fo. ²² Kyaindi ndunda ta Mumuyo ni ukundi, ifura, urilalyi, usisiryo, unndu usha, ilyillya, usaari, ²³ ufoo, mwiiyanu, na veetana efyo uvavaso llutiri kyeetana-fo. ²⁴ Na yewo va Kristo Yesu mmbo valemmaa ikapya miili yaawo nsalabeny veisandye-u na makusaro awo maravi na lango yeto sheesi toose. ²⁵ Kwakooya lukee na Mumuyo, lweende lwiiteterwaa Mmumuyo, ²⁶ Nta lulave vekuninga nnduma luveni, lwitanaa fya kitatarwa neetiryana finying’u luveni na veni.

¹ Vanavama wakwa, kwakooya nndu arendeya karenga, yeni mukee va ngata ya Mumuyo viireny nndu yeto mukee na nrima wa ufoo, na ikulola yeni muveni mulasheanga fyeesony. ² Taraniny mario any mukooye iinutya ivavaso lya Kristo. ³ Mashika kwakooya nndu alollya akee ng’waana ya vengyi, nawe nalakee indo, mmbo akulemba we muni. ⁴ Kyaindi wo nndu nakulole we muni eshesaa mashora akwe, lyo ashemanyaa kwakooya kivaa nakurumishe we muni, nalyo llyo ashewonaa kimaruma kyeefura efo nriminy wakwe we muni, lyo nshi kwa vandu vengyi-fo. ⁵ Kimmba wo nndu mmbo akamaraa irio lyakwe muni. ⁶ Mwiiloshwa naakani na mwiillosha wakwe kya mesha moose. ⁷ Mulasheelembika, Iruva nnyavaa ilemba-fo, mashika wo kindo nndu ammbaaya nkyo asheilulaa. ⁸ Mashika yeto avaaya fya mwiili wakwe mmbo asheilulaa urumato kya mashora yoo; kyaindi yeto avaaya fya ngata ya Mumuyo, kiinani na Mumuyo mmbo asheilulaa-u muu wa llung’anu. ⁹ Nta lulasheyaaraa itana mesha-fo, mashika mmbo lusheilulaa elyi kyeeri kya vayo kifikaa, lukanra lulafwa nrima. ¹⁰ Nkyo wo kyeeri luwonaa mwaanya lutannyi vandu woose mesha, mmwasi yewo vakusirye-u. ¹¹ Loleny shaasa shamureiya na fireiyo finiini na woko lwaka yeny shimuni! ¹² Yewo valangye ikushiisa kya findo fya mwiili, mmbo yewo vakee imwiitikya irinwa, naambo valasheesuka kimaruma kya nsalaba wa Kristo, naasa da. ¹³ Shamashika naakwa ni yewo vakee varini mmbakeeinutya uvavaso-fo; lyo mmbo vakundye yeni murinwa-da, naambo vakufurye kimaruma kya vayo-da. ¹⁴ Lyo yeny, nshikundye ifura na kindo kingyi nta kinnywa-fo, kuuta nsalaba wa Nndumi weeru Yesu Kristo, na kimaruma kya vayo ulana loose mmbo lulekapyo nsalabeny yaa kwakwa, na yeny kimaruma kya ulana. ¹⁵ Mashika irinwa ao ira kularinwa nshi kindo-fo, iva kyuumbe kiiya nkyo kikundywa. ¹⁶ Na yewo woose vasoraa irero elyi ufoo na isarya fivakayaa, yee, kwa Israeli ya Iruva. ¹⁷ Kupookya ulaalu, kulakive-se nndu ashaatara-fo mashika mmbo shirye wende lwa Yesu mwiiliny wakwa. ¹⁸ Vanavama wakwa, isarya lya Nndumi weeru Yesu Kristo lyikee ando amwi na mirima yaany. Amen.