VAEFESO

VAEFESO

¹ Ni yeny Paulo, nrumi wa Kristo Yesu, shaasa kilesennya Iruva, shamureiya yeni veele va Efeso mukusirye na Kristo Yesu, ² Isarya lyimukaye na ufoo luukye kwa Iruva Nde weeru na kwa Nndumi Yesu Kristo. ³ Iruva nang’aniswa, we Nde wa Nndumi weeru Yesu Kristo, yeto aleluvikya mbora takwe ta nriminy, ulaniny elu lwa kimumuyo lukee lwa Kristo. ⁴ Shaasa alelusauwa lukee va Yesu uka llya kulaore ulana lwemmbeiywa, naambo lukooye iva veele, luveva vandu valatiri mbese mbee yakwe lukae na ikunda. ⁵ Mashika mmbo alesongwa ilusauwa, naambo luvikwa vana vakwe kwi Yesu Kristo, shaasa alekunda we muni. ⁶ Itumbe lya isarya lyakwe lyiniingwa nnduma, elyo alelulyimmya kyuuka na Mwana wakwe. ⁷ Kyeendwa mmbwe na kimaruma kya samu yakwe yese lukawonisa iwowowa lyeru, na ifwaaywa kya ulyamari kiinani na usimba lwa isarya lyakwe. ⁸ Nawe mmbo alelupusuya yefyo kya usaari na urango lwakwe. ⁹ Llya alemaa iloora kyama kya ikunda lyakwe shaasa alekunda we muni. ¹⁰ Kyeendwa ni Kristo kavika findo fyoose ushilyiny lungyi, yefyo fya iruveeu na fya ulaniny kiwo, ee, kyeendwa mmbwe. ¹¹ Yese lukavikwa veni ding’u, mashika shaasa eekundye uka elyo mbee mmbo eelusauye, shaasa akukundya itana fyoose shaasa akundye we muni. ¹² Neese lukee nnang’ani yakwe luve nnduma wa itumbe lyakwe, yese lulesongwa yoora ivika nsia weru efo kwa Kristo. ¹³ Na yeni ni kiwo-da kyeendwa mmbwe mmbo mulemmaa iita irero lya dede, lyo Nrumi ya Nsia ya ukiro lwany, mukammaa imwiirikya, na ivikwa wende lwa kiringisyo ni Mumuyo ulya ekee nteerye akee Mweele. ¹⁴ We mmbwe akee kiringisyo kya ding’u yeeru, naambo nalulyimyi ukiro efo umangyiny lwakwe luve nnduma wa itumbe lyakwe. ¹⁵ Kimmba ni indo na yeny, uka llya shileeta mbony ta kikusiryo kyany kwa Nndumi Yesu, na kya ikunda lyany kwa veele woose, ¹⁶ nshikeemanda yaana Iruva kimaruma kyany-fo, shiimukummbwaa efo fiterewony fyakwa. ¹⁷ Iruva Nde wa Nndumi weeru Yesu Kristo we Nde wa itumbe, namuniinge yeni nrima wa urango na imurambuya immanya we. ¹⁸ Miso any na mirima yaany yeengere imikywa nsa, naambo mumanyi ivika nsia kya uvaango lwany shaasa lukai, na usimba lwa itumbe lwa ding’u yakwe kwa veele shaasa lyikai. ¹⁹ Na utore lwa uniini lwa wiidimi lwakwe lukee nnang’ani yeeru yese lukusirye shaasa lukai, kiinani na urundi lwa finya yakwe. ²⁰ Llo elo alelwiinutya kwa Kristo llya alennduta kauka kwa vafu, kammbika yoo woko lwakwe usha efo ulaniny yelo lwa mumuyo. ²¹ Kanrosa uwe nnu ngota ngyumangyi toose, na wiidimi na finya na ushilyi, kailanya wo irina lyivaa isenda, nta nshi yaa ulaniny-da-fo, naakwa ni yefo ulaniny elo lwiishaa. ²² Iruva kavika findo fyoose yoo si ya marende akwe. Kaniinga ulyimbi lweesalallya findo fyoose kimaruma kya siri. ²³ Ikee nnyo mwiili wakwe, mmbwe yeto amaye fyoose na iinutya fyoose yoo kwakwe.

¹ Neeni mmbo mwekee vafu kimaruma kya maravi na ngyulyamari tany. ² Tilya muleva veetana mwiisoraa mikaaye ya ulana. Mwisoraa mangyi yeyo ya nginiiu-te, mmbwe mumuyo yeto akeerunda mashora a yaallwa vandu filemi. ³ Yewo naakwa ni yese lweekee nnang’ani yaawo elyo mbee, efo langony ta miili yeeru, llya luleinutya lango ta nrima na mwiili, ngaa teru tikava tefuluta unyafi shaasa yewo vengyi vekai. ⁴ Kyaindi we Iruva kimmba akee nnu mwiilyillya, alelukunda ikunda iniini nnu. ⁵ Kyeeri kilya yese lwekee vafu kyeendwa ni maravi, mmbo aleluruta ando amwi na Kristo, nkyo kyaamba mmbo mulekirwa kya isarya yeni. ⁶ Kaluruta ando amwi nawe-sho, kaluvika ando amwi nawe efo ulaniny llwa lwa kimumuyo lukee na Kristo Yesu. ⁷ Naambo fyeeri efi fishaa naore isarya lyakwe paa yelyo lyiilanyi kyeeso kya usha lwakwe kweru yese kwi Kristo Yesu. ⁸ Mashika mmbo mukee vakire kwi isarya kyeendwa ni kikusiryo, nakyo nkilemmya kwany yeni-fo, ni simbo ya Iruva muni. ⁹ Nta nnyileendwa mmashora mesha-fo, nta kulasheeva-fo nndu akurosa. ¹⁰ Mashika yese mmbo lukee mashora a maako akwe, mmbo luleumbwa kyuuka na Kristo Yesu naambo lurunde mashora mesha yoo Iruva aleludeesya uka elyo mbee naambo luarunde. ¹¹ Kimmba ni indo kummbweny sheelyi yeni mwekee vandu va masanga elyo kasha, yeni mukeevaangwa mmukee varini na valya vakee varini, urini yelo lwa mwiiliny. ¹² Kasha ekyo mmwetiri Kristo-fo, mmbo mweraukani na vandu va Iruva, mukava sha veny valakwaani na kyaasa kilya. Mmweetiri kindo muvikye nsia-fo, mmweetiri Iruva yaa ulaniny-fo. ¹³ Kyaindi ulaalu kimmba mutiri Kristo, yeni elyo mbee mwekee kwaasha ulaalu mmbo mwammendwa kufii nsamu ya Kristo. ¹⁴ Mashika we mbwe urilalyi lweru, yese lwekee maronda avii lukava vamwi, kasammbwa isimamba lya lyelwaavye kavii. ¹⁵ Na llya alemaa yuuta-u ukiduva yelo na mwiili wakwe, kafisha finya ya uvavaso na mavavasyo naambo nalunge vandu woose vave ufyari wiiya lwakwe, kavasimba urilalyi. ¹⁶ Kasanda woose na Iruva, kyuuka na mwiili umwi alya nsalabeny, kamaa ukiduva loose na ishora elyo lya nsalaba. ¹⁷ Kashemongoya yeni mbony ta urilalyi yeni mwekee kwaasha, kiwo na yewo vekee kufii. ¹⁸ Mashika kyeendwa mmbwe yese loose mmbo lulewona mwaanya wa iserikya Iruva Nde kwi Mumuyo yeto umwi. ¹⁹ Kyasiany, kimmba ni indo, mmukikee veny nta vandu vakee iira-fo, mmbo mwammba veni kyeny ando amwi na veele, vandu va kyeny kwa Iruva. ²⁰ Mmbo mukee vavike yoo uvasheny lwa varumi na vakisuku na Yesu Kristo we muni ni iwe lya ndumba. ²¹ Yoo kwakwe nng’u mmba shoose yalungwa nisha kutani yava mmba sheele ya Iruva kyeendwa ni Nndumi muni. ²² Yoo kwakwe yeni mmbo mukee valunge ando amwi muve mmba ya Iruva ya ngata ya Mumuyo.

¹ Nkyo kimaruma yeny Paulo shikee mfinge kimaruma kya Kristo Yesu kimaruma kyany yeni vandu va masanga. ² Kwakooya mulemmiita mbony ta ungari lwa isarya lya Iruva shileningwa kimaruma kyany ³ sheelyi mmbo shileorwa kyama ekyo, shaasa shilesongwa imuvia kyaangu. ⁴ Naasany, elyi musomaa mmbo mushidimaa ilollya imanya lyakwa lwa kyama ekyo kya Kristo shaasa kyikai. ⁵ Nkwiifo vandu va fyeeri fingyi valeorwa kyama ekyo-fo, kive shaasa varumi va Yesu veele na vakisuku va kyeeri ekyi kwi Mumuyo, ⁶ sheelyi vandu va masanga ando amwi neese ni veni ding’u va ngata imwi nsi, va mwiili umwi, na veakana ando amwi neese kyaasa kilya kya Kristo Yesu kya Nrumi ya Nsia. ⁷ Nrumi yeyo ya Nsia shileivaangywa shiifurukannyi, kiinani na simbo ya isarya lya Iruva shilenningwa kiinani na wiidimi lwakwe. ⁸ Yeny Paulo, shinyiiye yeto akee n-du wa veele woose, mmbo shilesimbwa isarya elyi naambo shoongoye vandu va masanga mbony ta usimba lwa Kristo lulavaa yeesa. ⁹ Na imikya vandu woose naambo vamanyi mbony ta wiidimi lwa kyama ekyo, kyikee efo kwa Iruva yeto aleumba findo fyoose. ¹⁰ Naambo ulaalu kimaruma kya siri, waarya lwa Iruva lukee lwa ngata shiingyi lumanyike ni ngyumangyi na vaitori va ulana lwa ngata ya mumuyo, ¹¹ kimaruma ekyo kya llunga’nu kyikee kideesye kyuuka na Kristo Yesu Nndumi weeru. ¹² Kyeendwa mmbwe mmbo lutiri ukaari na wiidimi lwa iserikya kyuuka na ivika nsia kyeendwa ni inkusirya. ¹³ Naasa mmbo shamutereva mulaute pa kimaruma kya fyuure efi fyakwa fishitiri kimaruma kyany-fo, nato ni nnduma wany. ¹⁴ Naasany we Nde mmbo shamfirya ndi. ¹⁵ Yeto u-nde lwakwe lukeesendwa yaa ulaniny na efo iruveeu. ¹⁶ Nawe namulyimyi iwona finya neevangiswa kiinani na usimba lwa itumbe lyakwe, kyiriyani na mashora a Mumuyo wakwe alukayaa efo nnang’ani. ¹⁷ Kristo nakae efo miriminy yaany na kikusiryony mwiikutiri tapu uvasheny lwa ukundi. ¹⁸ Naambo mwiidimi na imanya ando amwi na veele woose shaasa waasha na ivari, na yeenda uwe na yeenda si, ¹⁹ neemanya ikunda lya Kristo shaasa lying’ani lyikailanya urango lweru shaasa lung’ani, naambo mwiidimi ivangisywa efo wiidiminy lwa Iruva. ²⁰ Naasany naitikiswa yeto aidima itana findo finiini nnu ngota efyo lwatereva na ikusara, kiinani na finya yeyo yakwe irunda mashora efo nnang’ani yeeru, ²¹ yee, naitikiswa kunu siriny ando amwi na Kristo Yesu marika moose a llung’anu na llung’anu. Amen.

¹ Naasany mmbo shamutereva, yeny shikee mfinge kimaruma kya Nndumi, endeny mweendo wany kiinani na uvaango lwany shaasa mulevaangywa. ² Mwikunyiisye nnu na ufoo, mwitiri usisiryo, mwisheekyanaa kyuuka na ikunda. ³ Mwiivekutakuraa nnu iringa umwi wa Mmumuyo, lweendwa ni wiitanu lwa urilayi. ⁴ Mwiili umwi na Mumuyo umwi shaasa mulevaangywa ivika nsia lya ngata imwi lya uvaango lwany. ⁵ Na Nndumi ni umwi, kikusiryo nkimwi, na ubatiso llumwi. ⁶ Na Iruva kaveva nawe ni Nde wa woose, akee uwe ya findo fyoose na nnang’ani ya fyoose. ⁷ Lyo wo umwi weeru mmbo alesimbwa isarya kiinani na mwiina wa simbo ya Kristo. ⁸ Nkyo kikaambawa, “Llya alerwa na uwe mmbo aletira mifungwa, kalyimmya vandu simbo.” ⁹ Naasa irero elyo “Alerwa na uwe”, mmbo lyaamba kyi kulaore ni yaamba we mmbo aleoloka si kafika si deny? ¹⁰ Na yeto aleoloka si deny mmbwe yeto alerwa na uwe kailanya ngina toose, naambo namulemule findo fyoose. ¹¹ Nawe mmbo alevika vengyi vave varumi; na vengyi ni vakisuku, na vengyi ni vatarami va siri na vengyi ni veesi na veelosha. ¹² Katana indo naambo veele vakooye ikwaaniswa, na mashora a utarami akooye iinutywa, na mwiili wa Kristo uvangiswa. ¹³ Neese loose kyeeri lushefikyaa ukulungo lwa iirikyo lyeru neemanya nnu, Mwana wa Iruva, kutani lwavangiswa, neekooya uniini lwa usongovisi lwa Kristo; ¹⁴ naambo lure lulakiva sha vakoku, lwiisingiswaa efo na efo, na iipowa ni wo uraato lwa miloshye ya vandu, na mitambo ya vandu, lwiilatyaa shia ta ulembi. ¹⁵ Naasa lutire dede yeyo lwikee na ukundi naambo lutumae neemfikya we kya findo fyoose, lumfikye we yeto akee nrwe, we Kristo. ¹⁶ Yoo kwakwe we mwiili moose mmbo ukee llunge filungo fyoose fikainiwa nisha na wo kimwi kirunde ishora lya vayo naambo mwiili wiidimi itumarisywa efo ukundiny. ¹⁷ Kyasiany mmbo shaamba indi, shavekureeka shikee na Nndumi, kupookya ulaalu mulashekaa sha vandu va masanga na ngaa shiravi ta mirima yaawo-fo. ¹⁸ Mashika yewo mmbo vavikye ireema miriminy yaawo, vakasuvaniswa na muu wa ki-Iruva, kyeendwa ni urung’ani yelo lukee nnang’ani yaawo, kimaruma kya uumu lwa mirima yaawo. ¹⁹ Nawo vakammaa ifwa ngashari mmbo vakwaataa findony fya uravi naambo vatani findo fya ukirinda fya wo ngata veetiri lango sheesi. ²⁰ Lyo yeni, nshiindo mulekulosha kwa Kristo-fo. ²¹ Kwakooya muleita mukaloshwa mbony takwe, shaasa dede ya Yesu ikai, ²² kuute-u deny ngata ilya ya mbee na unndu lwa kasha yelo lulyamarikaa kyeendwa ni ilatya lango yeto tilembaa. ²³ Mwaaluwa vaiya efo makusarony na miriminy. ²⁴ Muveraa unndu wiiya lukee wuumbe lwa ki-Iruva kyikee kya usumanu na weele lwa dede. ²⁵ Naasa kuuteny wongo, murere dede sheni wo nndu na ungyi, mashika yese loose mmbo luvakye filungo fya mwiili umwi nsi. ²⁶ Kwakooya mwarooyo ni unyafi, lyo loleny mulashelyamara,mwi ulasheoloka neeni mwiivavyoo miriminy. ²⁷ Nta mulasheniinga yeto nkumbi mwaanya. ²⁸ Nndu mwiiva, nalakiive-fo; kyaindi nakutakure irunda na nrike we muni, naambo nawoni na kindo kyeniinga nndu aanguywa. ²⁹ Irero iravi lya ngata shoose lyilasheuka kaniny kany-fo, lyo kuuke-fo marero mesha ashidimaa yeekya nndu akee nting’i, na valya vashitaa vakooye ivikywa mbora. ³⁰ Loleny deny naambo mulashevavisa Mumuyo Mweele wa Iruva, yeto yeni mulevikwa wende mmbwe mufikye nkonu yeto wa iwowowa. ³¹ Nrima uvavaa na unyafi na irooywa nngoo na marero na firumu fyuuke kwany deny, ando amwi na uravi lwa wo ngata, ³² na lyingyi veny velyilyana muveni na veni, muvesaryana shaasa Iruva nawe alemusarya kyeendwa ni Kristo.

¹ Naasany, latyeny Iruva, muve sha vana vakunde; ² mukae na ukundi shaasa na Kristo alevelukunda yese, kutani akuvika-u kimaruma kyany, kava kiraso kwa Iruva, kive nrungo nsha ufwamaa. ³ Lyingyi utuusi lulasheesendwa nta kinnywa kwany-fo, nta uravi lwa ngata shoose-fo, nta lango sheesi, muve vandu veele; ⁴ nta findo fya sony na urung’ani na itira ngashile, mashika efyo mfisenyi-fo, lyo mukummbwe yaana Iruva. ⁵ Mashika lyo irero elyi mulyiishi nisha nnu, sheelyi nkwiifo ntuusi ao nkirinda nta mwilanga na mwiindya maruva a wongo, ashewonaa ding’u efo umanginy lwa Kristo na Iruva Nde-fo. ⁶ Kulave nndu amulemba na marero a ing’ana; mashika unyafi lwa Iruva mmbo lwasheya vana yewo va uravi. ⁷ Kyasiany, mulaakani nawo-fo. ⁸ Mashika elyo mbee mmbo mwekee ireeminy, kyaindi ulaalu mmbo mukee seny mukee na Nndumi, naasa endeny sha vana va sa. ⁹ Kimmba ndunda ta sa ni usha lwa wo ngata na usumanu na dede; ¹⁰ mwimanyaa na nshushwa nkyokyi kisenyi Nndumi. ¹¹ Nta mulaakani ngaa shikasha titiri ndunda ta ireema-fo, kyeemminy findo fya ngata yeyo; ¹² mashika efyo vakeetana kirika ni sony ifisenda. ¹³ Kyaindi lyo efyo fikekyeemmywa mmbo filollyo paa yoo seny, mashika ekyo kyalollyo paa mmbo kyamikywa nsa. ¹⁴ Nkyo kikaambawa, “Marukya yewe kukeerengeya, kuruke kuuke ufuny, naambo Kristo nakumikye.” ¹⁵ Kyasia loleny nnu shaasa mushendaa; nshi sha vandu valatiri urango-fo, kyaindi muve vandu vatiri urango; ¹⁶ muvekira fyeeri mashika fyeeri efi mfya uravi nnu. ¹⁷ Kimmba ni indo mulasheeva varung’ani-fo, mumanyi nkyokyi kisenyi Nndumi. ¹⁸ Nta mulave veenangwa mmbwari nato utiri nnu ufullwe, lyo lalakyeny iishurwa Mumuyo. ¹⁹ Muumburani na fiimbo fya zaburi na fiimbo fisongosye fya nriminy, mwiishimbaa na ikapya Iruva ukoru efo miriminy yaany, ²⁰ muveana Iruva Nde mikonu myoose kya findo fyoose, kwi irina lya Nndumi weeru Yesu Kristo. ²¹ Neeni muveni na veni mwiikunyisaa mwiireiye Kristo. ²² Yeni vaka, indyeny womi vany kimwi sha iindya Nndumi weeru. ²³ Shamashika nndumi mmbo akee nrwe wa nka, shaasa na Kristo akee nrwe wa siri, nawe mmbo akee mwiikira wa mwiili. ²⁴ Na shaasa siri yaindya Kristo, kiwo indo na vaka vendye womi vawo findony fyoose. ²⁵ Yeni womi, kundeny vaka vany, shaasa na Kristo nawe alevekunda siri, kakuuta we muni kimaruma kya vayo. ²⁶ Naambo nayiilyise neeisangya na mura uriyani na irero lyakwe; ²⁷ Naambo nakuwonisye siri itiri itumbe ilatiri ivara nta mbese nta uravi sha elo; naambo ive sheele ilatiri ivara. ²⁸ Naasa ni indo kisumani womi vakunde vaka vawo shaasa vakundye miili yaawo veni. Nndu akunda nka wakwe mmbo akukunda we muni. ²⁹ Mashika nkukaa-fo nndu asuaa mwiili wakwe muni-fo, kyaindi mmbo auwuutisa na iuvavara, shaasa na Kristo nawe avetanya siri. ³⁰ Mashika mmbo lukee fyilungo fya mwiili wakwe. ³¹ Kimmba ni indo nndu mmbo asheraa ndeye na maye, nandekutira na nka wakwe na yewo vavii vashevaa mwiili umwi. ³² Kyama ekyi nkiniini nnu, lyo yeny mmbo nkeerera kya Kristo na siri. ³³ Lyo wo nndu nakunde nka wakwe shaasa akukundye we muni, nta nka nalare nalaindya mmi wakwe-fo.

¹ Yeni vana, indyeny vamiku vany kimaruma kya Nndumi, mashika elu llo usumanu. ² Indya nde wafo na mae wafo, ivavaso elyi llyo lya mbee lyitiri kyaasa. ³ Kuwoni ngoma, kuwoni suku shifumbutu yaa ulaniny. ⁴ Na yeni vande va vana, mulatavise vana vany, kyaindi valeleny vang’ani veetiri vio vaveringa mavavaso a Nndumi. ⁵ Na yeni varundi va vandu, indyeny vanndumi vany yewo va yaa ulaniny mwiireiye neereremya-u, mwiikunyiisye nriminy, kimwi sha iindya Kristo muni. ⁶ Nshi sha wiindi lulollyo na miso lwa vandu vakeekukundisa kwa vandu-fo, kyaindi muve sha mashinga a Kristo, mutani findo fisenyi Iruva na nrima umwi nsi; ⁷ mwikee na nrima nsha sheelyi mukeerundya Iruva na kilave sheelyi nkya vandu-da-fo. ⁸ Mwiimanyaa sheelyi wo kindo kisha nndu atana mmbo ashekitawaa ni Nndumi evirywaa ekyo kyeni, kwava ishinga ao nndu lleke. ⁹ Na yeni vanndumi va vandu, kevetanyiny varundi vany efyo fyeni, nta mulavatavise ao ivamatwa, mwiimanyaa sheelyi Nndumi yeto waawo na waany ni yeto umwi wa iruveeu, nawe nnyatiri ikundya-fo. ¹⁰ Na kingi-se, engereny iva vakaari mukee na Nndumi na wiidimi lwa finya yakwe. ¹¹ Raeny fisha fyoose fya Iruva, mwiidimi ivinga mitambo ya Satana. ¹² Mashika fira lutiri yekapana nshi ya samu na mwiili-fo, ni fira yekapa ngyumangyi na finya, na vaniini veshillya efo ireeminy, na ya matorito a mimuyo mikasha ulaniny lwa mumuyo. ¹³ Kimmba ni indo ipoony fisha fyoose fya Iruva, naambo mwiidimi ikapana na uravi, na mukammaa iinutya fyoose musalaleny. ¹⁴ Kyasia kwiipony shu, muveraa dede, neeraa kisha kiringaa mbafu kya usumanu. ¹⁵ Na marende any nakudeesye yeenda sere indeamba Nrumi ya Nsia yeyo ishendee urilalyi. ¹⁶ Mmwasi ya fyoose mwiipoo ngao yaany nnyo kikusiryo, nayo nnyo imwekyaa irummya mife yeyo ya muro ya yeto nravi. ¹⁷ Na lyingyi muvewarya wende lwa ukiro na usu lwa Mumuyo llo irero lya Iruva; ¹⁸ na fiterewo na fyeerero fyoose mwiiterevaa wo kyeeri mukee na Mumuyo, muvelala shoovi kya efyo mwiiterevyaa veele woose. ¹⁹ Kiwo neeny da muveshiterevya, naambo shiidimi irera nisha, na yaamba kyama ekyo kya Nrumi ya Nsia shikee na ukaari. ²⁰ Mashika nkimaruma kya efyo shilevaangwa shive nrumi kutani shafingwa, kutani shawona ukaari lweerera shaasa kishikooye irera. ²¹ Naasa neeni mukooye imanya mbony takwa, shaasa shiifo, Tikiko mwanama nkunde, nndundi nsaari wa Nndumi, yeto mmbo ashemuviaa mbony toose. ²² Nawe mmbo shikeenruma kwany kimaruma kya vayo namuvie mbony teru, navemuviirya muu. ²³ Siri ikae na urilalyi na ukundi, ando amwi na kikusiryo, kyiluukya kwa Iruva Nde na kwa Nndumi Yesu Kristo. ²⁴ Isarya lyikae woose yewo vakunndye Nndumi weeru Yesu Kristo kyikee kya dede.