VAKOLOSAI

VAKOLOSAI

¹ Ni yeny Paulo shikee nrumi wa Kristo Yesu kyeendwa ni isarya lya Iruva shikee na Timoteo mwanamaye weeru. ² Shamureiya yeni vanavama mukee veele, vasaari va Kristo mukee muriny wa Kolosai. Isarya lyimukaye na urilalyi yelo luukye kwa Iruva Nde weeru. ³ Mmbo lukeyaana Iruva, Nde wa Nndumi weeru Yesu Kristo wo nkonu lwiimuterevyaa. ⁴ Kipookya kyeeri luleita mbony ta kikusiryo kyany kwa Kristo Yesu, na kya ikunda elyo lyany kwa vandu va Iruva woose. ⁵ Kyeendwa ni ivika nsia eto mulesurummyo iruveeu, eto mbony ta vayo muleita llya mbee efo dedeny ya irero lya Nrumi ya Nsia. ⁶ Nnyo yeyo ilemufikya shaasa ivekee ulaniny koose, ikavevika ndunda tilollyo, shaasa ikeeng’ana efo kwany uka llya muleiita na imanya nnu isarya elyo lya Iruva kya dede. ⁷ Shaasa Epafra akee ishinga urooye wany na nkunde waany alemulosha. Kaveva mwifurukannya Kristo akee nsaari kimaruma kyany. ⁸ Mmbwe yeto aleluvia kya ikunda lyany lyikee lya ngata ya Mumuyo. ⁹ Kimmba ni indo naakwa ni yese, uka nkonu ulya lulepooka iita llukeederya itereva kimaruma kyany-fo, naambo mukooye iishurwa urango lwa ikunda lyakwe na waarya na imanya lya efo nriminy. ¹⁰ Naambo mukee shaasa kimusumannyi mbee ya Nndumi mukooye insenya deny, muvevika ndunda shisha efo mashoreny mesha moose, na yeengera urango lweemanya Iruva. ¹¹ Mwishidimisywaa deny, kiinani na finya ya itumbe lyakwe, muvewona usisiryo lwa wo ngata muvereyaa mukee na ifura; ¹² mwishanaa Nde yeto alemuniinga iwarya waavi lwa ding’u ya veele efo seny yeyo. ¹³ Nawe mmbo aleluuta efo finyiny ta ireema, kalusamisa-fo kalwaata efo umangyiny lwa Mwana yeto muni ikunda lyakwe. ¹⁴ Na efo kwakwe mfo lutiri iwowowa na llyo ifwaayo ngyulyamari. ¹⁵ Nawe mmbo avakye Iruva yeto nalavaa ilollya na miso, kasongoya fyuumbe fyoose ikaafo. ¹⁶ Mashika fyuumbe fyoose mmbo fileumbwa mmbwe, yefyo fikee iruveeu na efyo fikee uwe ya uruka efyo filollyo na miso na filalollyo, fikava fitima fya itumbe, ao umangyi, ao wiidimi, findo fyoose mmbo fileumbwa kyeendwa mmbwe, na kimaruma kyakwe. ¹⁷ Nawe mmbo asongoye findo fyoose ikaafo, na fyoose ni efo kwakwe fikutiri. ¹⁸ Nawe mmbwe nrwe wa mwiili, nnyo siri, nawe ni mapookyony, na wa mbee yuuka kwa vafu, naambo nave nsongoru wa findo fyoose. ¹⁹ Mashika mmbo alekunda findo fyoose nafyo mmbo fishefurumyaa yoo kwakwe. ²⁰ Nawe nashesanda findo fyoose nafyeende yoo kwakwe, elyi alemaa yeende urilalyi na samu yakwe alya nsalabeny, yoo kwakwe ni indo, kwakoya ni kya findo fya yaa ulaniny ao fya iruveeu. ²¹ Na yeni elyo mbee mwekee vatarakanise mukavikyana fiduva, mukatana filasumani, ulaalu mmbo ammaa imusanda; ²² kyeendwa mwiili wakwe llya alefwa, naambo namoomwi na yoo akai, muve veele, mulatiri kiteve nta mbese; ²³ mukaarye efo kikusiryony ekyo mwiikee uvasheny, muvangiswa, nta mulashiindutwaa mure ivika nsia lya Nrumi ya Nsia ilya muleeta mbony ta vayo, ilya ileongoyo fyuumbe fyoose fikee kwasi ya ngina, nnyo yeyo yeny Paulo shileva mwiifurukannya. ²⁴ Ulaalu mmbo shikeefura nnu kya makyiva yaa ashitiri kimaruma kyany, neeny shaveinutya-u filya filewiika-u fya makiva a Kristo efo mwiiliny wakwe, nnyo siri yakwe. ²⁵ Nayo mmbo shilevikwa shive mwiifurukannya kiinani na ungari lwa Iruva shilerambikywa kive mbusha kwany, naambo shiinutye irero lya Iruva. ²⁶ Kyama ekyo mmbo kyekee kirike uka mbee ya marika moose, kyaindi ulaalu mmbo kilesukuyo veele vakwe. ²⁷ Nawe Iruva kakunda iwoora shaasa usimba na itumbe lya kyama ekyi efo vanduny va masanga, nawo ni Kristo akee nnang’ani yaawo, ivika nsia kya itumbe elyo. ²⁸ Nawe mmbwe yeto lukee ivambisa mbony takwe, lwishiikimbaa wo nndu, neelosha wo nndu lukee na waarya loose, naambo lweende nndu asongovikye kwa Kristo. ²⁹ Neeny mmbo shikeekuvinisa nnu kimaruma kya irero elyo yeni, shavekutakura kiinani na iidimisywa ni yeto mwiirunda na finya nnang’ani yakwa.

¹ Mashika mmbo shikundye mumanyi ikutakura lyakwa shaasa lying’ani kimaruma kyany, na kya valya va Laodikia na kya valya valashilollye na miso yaa, ² naambo vaviiryo muu miriminy yaawo, velungwaa ukundiny, naambo vawonise usimba loose lweemanya songosiny, vaute-u imanya nisha deny fyama efyo fya Iruva, mmbwe Kristo; ³ mmbwe yeto kwakwe usimba loose lwa urango lukusurumyi ⁴ Mmbo shaamba irero elyi, naambo tupu kulasheeva nndu amulembaa na marero emuleleveya. ⁵ Mashika ra elyi shilaiyo shimuni, kyaindi efo nriminy mmbo shikee neeni, shilangaa na ivereya uramba lwany na ukaari lwa kikusiryo kyany efo kwa Kristo. ⁶ Naasany shaasa mulewarya Kristo Yesu, we Nndumi weeru, endeny indo indo mwikee nawe; ⁷ mwiikulungye neekutira nawe, muveva vakaari efo iirikyony, shaasa muleloshwa; muveengera iva va kyaanu. ⁸ Loleny mukwiise kulasheeva nndu amukamara mifungwa na urango lwa ing’ana neemulemba, shaasa miishivye ya kivandu ikai, na filoshyo fya uraatony efyo fya kiulana filya fya mbee, filakee fya ngata ya Kristo. ⁹ Mashika yoo kwakwe nng’u usongovisi loose lwa Iruva lukai, efo mwiiliny. ¹⁰ Na yeni mukasongoviswa yoo kwakwe we akee nrwe wa itumbe na wiidimi loose. ¹¹ Yoo kwakwe mmbo mukee sha vandu varini lyo urini lulakee lwa mwiili, sheelyi kwara mwiili wa kinndu, llo urini lwa Kristo. ¹² Mmbo mulerikwa ando amwi nawe llya mulebatiswa; na yoo ubatisony mukarutwa ando amwi nawe, kyeendwa ni iirikya wiidimi lwa Iruva yeto alennduta auka kwa vafu. ¹³ Na yeni llya mweefiiye kimaruma kya makasha any na ira mularinwa, kamuviirya muu ando amwi nawe, ekyimaa imfwaaya makasha moose, ¹⁴ kamaa na yaangata barwa ilya yeemutya uvingo ikavika kiduva kweru, kayuuta-u deny neikapya nsalabeny; ¹⁵ kavinga ngyumangyi na wiidimi, kataallwa ruu ekee na ukaari, katirwaa alya nsalabeny. ¹⁶ Naasany kulave nndu amuutya uvingo kimaruma kya fyeelya ao fyeena-fo, ao kimaruma kya mikonu miniini ao ilollyo lya mwiiri-fo, ao nta kya sabato-fo; ¹⁷ yefyo fyoose m-firishe fya findo efyo fishaa; lyo mwiili ni wa Kristo. ¹⁸ Kulave nndu amusoka simbo yaany, kya ikunyiisya efyo akundye we muni, na iindya vasu, ekuvikaa efo mooryeny neekung’anisa we muni kya ruu, na urango lwa kivandu; ¹⁹ nta nalasoraa Nrwe yeto ukee ntire na ilungyo ando amwi na miraarii nato ukalungika indo kyuuka na Iruva. ²⁰ Naasany kwakooya mmbo mulefwa ando amwi na Kristo na ira filoshyo filya fya mbee fya kiulana, nkikyi elyi mukaa si ya mavavaso, sha vandu va kiulana, ²¹ mulapaani, mulakombe, mulatire; ²² (findo efyo fyoose mmbo filyamarikaa elyi fyarunda), mwiisoraa ngyufundo na filoshyo fya kivandu? ²³ Findo efyo mmbo fivakye sheelyi mmbo fikee fisha, efo urambeny lwa miindye yeyo mulekusongosya muveni, mukaiindya, na ishillya mwiili na unyaasi; lyo filashiidimaa iima lango ta mwiili.

¹ Naasa kyimmba mukee varute ando amwi na Kristo, ruuyeny efyo fikee uwe efo Kristo akai, akee rembo woko usha lwa Iruva. ² Kusareny efyo fikee uwe, nshi yefyo fikee kunu si-fo. ³ Mashika mmbo mulefwa, na muu wany mmbo ukee nsurumi amwi na Kristo kwa Iruva. ⁴ Kyeeri Kristo asheorwaa paa, yeto akee muu weru, llyo neeni musheorwaa paa ando amwi nawe efo itumbeny. ⁵ Kyasia, lakaniny na lango sheesi ta ya ulaniny, utuusi na uravi, na ilanga, llyo iindya maruva a wongo; ⁶ kyeendwa mfindo yefyo unyafi lwa Iruva mmbo lumusheyaa. ⁷ Findony efyo mfo mwekai elyo mbee llya mweifo. ⁸ Lyo ulaalu reny deny efyo, mfyo unyafi, irooyo nngoo, uravi, firumu, na iing’asha filooke kaniny kany-fo. ⁹ Mulaviani wongo-fo, mashika elyi mwankwaatwa deny unndu lulya lwa mbee ando amwi na mashora a vayo; ¹⁰ muraa unndu wiiya, yelo lulealuwa wiiya luve lwa ngata ya yeto aleluumba. ¹¹ Yoo nkwiiyo Mgriki nta Myuda-fo, irinwa ao ira irinwa-fo, nndu nnrango ao itondo, ishinga ao nndu lleke-fo, mashika Kristo mmbo akee fyoose nnang’ani a fyoose. ¹² Naasany, kimmba mukee vasauwe va Iruva, veele mukakundwa nnu raeny nrima wa ilyillya, unndu usha, ikunyiisa, ufoo, usisiryo, ¹³ muvesisiryana neesaryana, na kwakooya nndu asuuye na ungi, shaasa Nndumi alemusarya yeni, neeni kiwo. ¹⁴ Mmwasi ya fyoose tireny ukundi mashika llo kyeeso kya usongovisi. ¹⁵ Na urilalyi lwa Kristo lumusalallye miriminy yaany, nkyo mulevaangyo, muveva vandu va kyaanu. ¹⁶ Irero lya Kristo lyiwalyi-walyi miriminy yaany na waarya loose, muvekulosha na iikimbana na zaburi na fiimbo, na mbony shisongosye yeto tipanaa nrima, kimmba mwansaryo indo muveimbya Iruva miriminy yaany. ¹⁷ Na wo kindo mutanaa, na kikava kyeerera ao kyerunda, taniny fyoose na irina lya Nndumi Yesu, muveana Iruva Nde kyeendwa mmbwe. ¹⁸ Yeni vaka, indyeny vomi vany shaasa kisennyi Nndumi. ¹⁹ Na yeni vomi kundeny vaka vany nta mulakee na nrima muu nawo-fo. ²⁰ Na yeni vana, indyeny vamiku vany kya findo fyoose; mashika ekyi nkyo kisennyi Nndumi. ²¹ Na yeni vande va vana nta mulatavise vana vany, naambo valasheuta pa yoo kwany. ²² Na yeni mashinga, irikyen vanndumi yewo vany va yaa ulaniny kya findo fyoose, nta nshi naambo kive kindo kyeelola kya ikukundisa vanduny-fo, kyaindi kive kya nrima muni, mwiireiye Iruva. ²³ Wo kindo mutanaa kitaniny na nrima deny, sheelyi mwatannya Nndumi muni nta nshi vandu-fo, ²⁴ mwiimanyaa sheelyi mmbo mushewaryaa weesi lwany luve ding’u yaany. Mmbo mukerundya Nndumi ake Kristo. ²⁵ Mashika yeto mwiitannya vengi fya ukasha mmbo ashetaiywaa kya ukasha lwakwe, nta nnyashesaryoo kya ruu-fo.

¹ Na yeni vanndumi va vandu, tanyiny mashinga any fya usumanu na fya wiindi, mwiimanyaa sheelyi naakwa ni yeni mutiri Nndumi waany akee wa efo iruveeu. ² Laleny shoovi nnu mwiiterevaa, ando amwi na yaana Iruva, ³ muveluterevya neese kiwo, naambo Iruva naluruye mwaango wa irero lyakwe, luvambise kyama ekyo kya Kristo na nkyo ekyo kyileengye shafingwa. ⁴ Naambo shikyoore paa shaasa kishisumanyi irera. ⁵ Kaeny na urango kwa yewo valakee vakristo, mularetaa nta fyeeri. ⁶ Marero any ave a mbora kyeeri kyoose, arolaa, muvemanya shaasa kisumani irouwa wo nndu. ⁷ Tikiko we mwanamaye weeru nkunde akee nsaari na mwiakana neeny mashoreny a Nndumi, mmbo ashemoongoyaa mbony takwa toose. ⁸ Nawe mmbo shanruma kwany kimaruma kya vayo, naambo mumanyi mbony teru, namuviirye nato muu. ⁹ Mmbo ashaa na Onesimo mwanamaye weeru ungyi akee nkunde na nsaari, nawe mmbwa efo kwany. Yewo mmbo vashemuviaa mbony toose ta yaa kweru. ¹⁰ Na Aristariko ulya alefingwa ando amwi neeny amwiidikira, ando amwi na Marko mwanamaye wa maye wa Barnaba, ulya mulevavaso mmbwe, naasany kansha mwaambyeny. ¹¹ Na Yesu yeto avaangwaa Yusto; yewo ni vandu va Kiyuda. Yewo wo veni ni vandu veakana neeny mashoreny yoo a umangyi lwa Iruva; nawo mmbo valeshiviirya nnu muu. ¹² Epafra ulya wa kwany, nawe akee ishinga lya Yesu Kristo, amwiidikira, nawe mmbo akeevina nnu kimaruma kyany imuterevya, naambo mukooye isalala na ivanga nisha shaasa Iruva akundye. ¹³ Mashika mmbo nkenkureekya deny sheelyi mmbo akee ikuvinisa nnu kimaruma kyany na kya valya vakee Laodikia, na kya valya vakee Hierapoli, ¹⁴ Na Luka ulya akee mwaanga nkunde, na Dema vamwiidikira nnu. ¹⁵ Na yeni idikireny nnu siri ya Laodikia, na Nimfa, na siri yeyo ya mmba yakwe. ¹⁶ Mukammaa isoma barwa yei, niingyeny indesomwa se kulya siriny ya Laodikia, na barwa ilya ya Laodikia nayo isomwa ni yeni. ¹⁷ Vieny Arkipo indi, “Salallya nnu urundi yelu Nndumi alekurambikya naambo kulwiinutye.” ¹⁸ Yefi mfyo fiidikiro fyakwa yeny Paulo shareiya na woko lwakwa shimuni. Mukummbwe nnu ifingwa lyakwa. Isarya lya Iruva lyimukaye yeni.