MASHORA

MASHORA

¹ Teofilo wakwa mmbee, kitabu kilya kya mbee shilekireiya mmbo kitiri mbony ta Yesu kya filya alepooka itana na ilosha fyoose, ² kutani kwafika nkonu ulya aleipowa na uwe. Nawe ammaa ivavasya vakiloshyony vakwe kwi shia ya Mumuyo Mweele valya emmbasauwa, ³ valya alekoora nawo na shia shiingi, kyeeri alemaa ilyiswa ukiva, vakamanya akee na muu, kakoora nawo ando a mikonu makumi aana, neerera filya fikwaani na umangyi lwa Iruva. ⁴ Kyeeri alekwaanannya nawo mmbo alevavasa valasheuka Yerusalemu, lyo vavereye mbele kyaasa kya Nde, kilya valeita mbony ta vayo kwakwe. ⁵ Kyeyaamba sheelyi Yohane we mmura alebatisa nato; kyaindi yeni mmbo mushebatiswaa na Mumuyo Mweele numa ya mikonu yei myaangu. ⁶ Naasa kyeeri valekwaananya nawe vakammbesa veshambaa, “Ale Nndumi, kyeeri eki nkyo kusheviryaa Vaisraeli umangi?” ⁷ Nawe kavavia. “Nshi kindo kyany imanya meendi na fyeeri efyo Nde avikye efo ushilyiny lwakwe muni-fo. ⁸ Lyo mmbo mushewaryaa finya, elyi Mumuyo Mweele ashemusokyaa neeni mushevaa vakureeki vakwa kunu Yerusalemu, na Yudaya koose, na Samaria, na kufike kishingony kya ulana.” ⁹ Elyi amaa irera indo, velollye indi, Yesu kaipowa na uwe ifishi lyikammbwarya kooka misony awo. ¹⁰ Kyeeri vekeengera ilola efo uwe iruveeu, llyo ekeerwa na uwe, pari pari ekakava vasero vavii varee soori shaa vakasalala kufii nawo, ¹¹ vakaamba, “Yeni vandu va Galilaya a niinda elyi mwasalala mwiilolaa iruveeu? Yesu yeu aroswa na iruveeu auka kwany, mmbo ashewuyaa lyingyi indo shaasa mwallollya eerwaa na iruveeu.” ¹² Naasa vakawuya na Yerusalemu vauka alya ifumbuny lyevangwaa lya Miseituni, lyikee kufii na Yerusalemu, ando a kirambo kyaangu. ¹³ Kyeeri valefika vakasaama na kai, nawo ni Petro, Yohane, Yakobo, Andrea, Filipo na Toma, Bartolomayo, Matayo, Yakobo wa Alfayo, Simon Selote na Yuda wa Yakobo. ¹⁴ Yeva woose mmbo vekee ando amwi veterevaa na nrima umwi nsi, ando amwi nawo veifo vaka valya Maria maye wa Yesu na vana va maye. ¹⁵ Mikonu yeyo Petro kasalala yoo vakiloshyony yewo vekai (yeekena lyawo nsha iyana na makumi avii indi) kaamba, ¹⁶ “Nyira, kilesenya indo mareiyo neenutyo, shaasa Mumuyo Mweele alerera kasha na kana ka Davidi. Kya mbony ta Yuda, yeto aletetera yewo valetira Yesu. ¹⁷ Mashika elyi ekee ando amwi neese, kawonisa urundi elu.” ¹⁸ (“Naasa nndu yeu mmbo aleura irema na fesa ya ulembi; nawe kawa uviny kariika ndeu maala akasomuka. ¹⁹ Vandu woose yewo vekee Yerusalemu vakamanya; na irema lyilya lyikafishyo Akeldama ni kishomu kyawo kyeyaamba, ni irema lya samu.”) ²⁰ Mashika niindo kikee kireiye efo kitabuny kya Saburi: Ando akwe na kuve nrapu nta kulave nndu ashekaa-u lyingi nndu ungyi nashesalala ando akwe. ²¹ Naasa veefo vandu yewo vekee neese kyeeri kyoose ekyo Nndumi ekee neese, eshaangaa neesomuka, ²² kupookya ubatiso lwa Yohane, kufike nkonu ulya aleipowa kweru karwa na uwe, kikooye umwi waawo nave nkureeki wa iruka lyakwe ando amwi neese. ²³ Vakavika-u vandu vavii, Yosefu wa Barsaba, ao Yusto, na Matiya. ²⁴ Naasa vakatereva, vakaamba, “Woi Nndumi, yewe kwiishi mirima ya vandu woose, loore ni ungau nnang’ani ya yeva vavii, ²⁵ naambo nakae kunu urundiny yelu na nruminy yei natire ando a Yuda.” ²⁶ Vakakapa kura; nayo ikawoya Matiya, nawe kasanga ando amwi na vakiloshyony valya ikumi na umwi.

¹ Naasa kwikifika nkonu ulya wa Pentekoste vakiloshyony woose mmbo vekee ando amwi. ² Kukaitiwa yoona iniini lya uraato lwa finya, nalo lukaishwa kulya mmba kundo vekai. ³ Vakasheyo ni findo fivakye fipalapala fya muro fikwaavye-avye fikakaya wo umwi wa valya veiyo. ⁴ Woose vakaishurwa Mumuyo Mweele, vakapooka irera na fishomu fyeny, shaasa Mumuyo alevasimba irera. ⁵ Neefo Yerusalemu kweefo Vayuda, vandu veereiye Iruva, nawo vaukye wo ando ulaniny. ⁶ Naasa kyeeri yoona lyilya lyileitiwa nkuka ulya wa vandu ukasavaa, vakakusanyirya, mashika llya valevaita wo umwi ereraa kishomu kyakwe muni. ⁷ Vakafulukyo nnu, vakaviana, “A nkyelola, yeva vakerera woose nshi Vagalilaya? ⁸ A mmbo kyava indaany elyi wo umwi weeru eeta kishomu kyakwe ekyo awonikye nakyo? ⁹ Vaparti na Vaamedi na Vailami, neewo vakee Mesopotamia, na Yudaya na yewo vakaa Kapadokia, Ponto na Asia, ¹⁰ Frigia na Pamfilia, Misri na va taari ta Libia kulya kufii na Krene, na veny yewo vaukye Rome, wo Vayuda na vandu veeshi Iruva, ¹¹ na Vakrete-da na Vaarabu; yeva woose mmbo lwaita veereraa na fishomu fyeru luveni mbony ta mashora maniini a Iruva.” ¹² Vakafulukyo deny woose neetirwa nnyinyira, vakaamba, “A nkyoki eki nyira vandu? ¹³ Kukakaa-fo na vengyi vamina, vakaamba, ‘Mmbo vannangwa mmbwari wa kyaanka.’ “ ¹⁴ Lyo Petro kasalala ando amwi na valya ikumi na umwi, kaonisa unyanga kaamba, “Eni vandu va Yudaya, neeni moose va Yerusalemu, manyiny kindo ekyi, mwaranye marero akwa, ¹⁵ Nshi shaasa mukusarye-fo; vandu yeva mmbanangyo-fo, mashika ulaalu ni saa isaru ta ngama; ¹⁶ kyaindi kindo ekyi ni kilya kyikee kirere na kana ka nkisuku Yoeli kyeamba, ¹⁷ ‘Mmbo kyishevaa mikonu yeyo yeefurumya, ni Iruva aamba, mmbo nshepusuyaa vandu woose Mumuyo wakwa, na vana vany va womi na va kyeny, vasheambaa fisuku, na vana vakoo vashelolyaa ngyende, na vamiku vasheoryaa moorya. ¹⁸ Yee, na kyeeri yekyo nshepusuyaa varundi wakwa, womi na vaka, Mumuyo wakwa, nawo vasheavuyaa fisuku. ¹⁹ Neeny nshoraa ngyende efo nginiiu, neefo urukeny si, samu na muro, na nrike wa nsu. ²⁰ Nkyeere mmbo ushevaa ireema, na mwiiri uve samu, kulaore nkonu ulya wa Nndumi wansha, ukee nniini nato ukee kuti ushe. ²¹ Neeto moose ashesendaa irina lya Nndumi, mmbwe ashekirwaa.’ “ ²² “Yeni vandu va Israeli, aranyeny marero yaa; Yesu wa Nasareti, nndu ulya Iruva amoora paa kyany na shia ya ngyende na findo filandelolyo lyingi, Iruva kafitana kwany na woko lwakwe, shaasa yeni muveni mwiishi. ²³ Shaasa Iruva alekunda immbika kwany, shaasa eekundye uka elyo mbee, mukanrambikya vandu vakasha vakankapya nsalabeny, mmukambwaa. ²⁴ Mmbwe Iruva alenduta, kafisha mwinga wa ufu, mashika lluleidima intira-fo. ²⁵ Mashika Davidi alerera mbony takwe kaamba, ‘Shilelollya Nndumi mbee yakwe wo nkonu, mashika elyi akee taari ya woko lwakwa usha, shilashesinga-singa. ²⁶ Naasany nrima wakwa ukasennyo, shakapa nndoro, neeny nshevaa nndu mwiivika nsia. ²⁷ Mashika nnyasheraa nrima wakwa uretiny-fo. Nta nkusheningyaa mweele wafo nalyamarike-fo. ²⁸ Mmbo kuleshoora shia ya muuny kisangu kyafo kisheshiningaa ifura.’ “ ²⁹ “Nyira wanavama, shisaryeny shirere nookaari yaa mbee yaany, mbony ta nde weeru nniini Davidi, kyeamba mmbo alefwa karikwa, na kifu kyakwe kiiyo fika inu. ³⁰ Naasa kimmba akee nkisuku eishi sheelyi Iruva mmbo alelyiiya mboo, sheelyi umwi wa ewo veshaukaa efo ufyariny lwakwe ashekaa yoo kitiminy kyakwe kya umangyi. ³¹ Nawe muni shaasa alesongwa ilolya efyi fyoose, kasenda mbony ta iruka lya Kristo, kyeamba ufu llulentira-fo, nta mwili wakwe mmbulelyamarika-fo. ³² Yesu yeto Iruva mmbo alenduta neese mmbo lukee vakureeki vakwe. ³³ Naasa we ekimaa isaamiswa fika woko usha lwa Iruva, na iwarya kwa Nde kyaasa kilya kya Mumuyo mweele, mmbo alepuswa simbo yei muilollye ulaalu na iita. ³⁴ Mashika Davidi muni nnyalensaama iruveeu-fo, lyo kaamba, ‘Nndumi mmbo alevia Nndumi wakwa, salala yewe taari ya woko lwakwa usha, ³⁵ kutani shaara vakiduva vafo yoo si ya marende afo.’ ³⁶ Naasany mmba shoose ya Israeli imanyi paa sheelyi Iruva mmbo alevika Yesu yeto mulenkapya nsalabeu nave Nndumi na Kristo.” ³⁷ Kyeeri valeita indo vakaokywa mirima yaawo, vakavia Petro na Varumi valya vengyi, “A lukatana inda vanavama veru?” ³⁸ Petro kavavia, kuryeny mundebatiswa wo nndu na irina lya Yesu Kristo, muwoni isaryo ngyulyamari tany, naambo muwoni simbo ya Mumuyo Mweele. ³⁹ Mashika kyaasa ekyi ni kimaruma kyany, na vana vany, na kwa yewo vakee kwaasha, neewo woose vashevaangwa ni Iruva Nndumi weeru vansheye. ⁴⁰ Kavautya ukureeki evaviaa findo fiingyi evaikyimbaa, kavavia, kwiiseny na irika elyi lya umini. ⁴¹ Valya valeirikya marero akwe vakabatiswa, na nkonu eto vakaengerekau vandu sha fiku firaru indi. ⁴² Vakatira ufundo lwa Varumi valya, neekaa ando amwi, neefisha nkate, neetereva. ⁴³ Wo nndu katirwa mbwerei, ngyende shiingyi tikatanwa ni Varumi. ⁴⁴ Na yewo woose valekusirya-u vekee ando amwi, vakasanda masaa awo ando amwi. ⁴⁵ Vakakumba masaa awo na findo fyawo vetiri, na yaavya wo nndu shaasa ekee nting’i. ⁴⁶ Wo nkonu mmbo valekaa kulya mmba ya Iruva, vekee na nrima umwi nsi vakalya shoonga mmba kwi mmba, vakalya shoonga tawo na ifura na nrima umwi nsi, ⁴⁷ vakarumisha Iruva, vakavesennya vandu woose. Nndumi kafumbuta yeekena lya valya veeke ikirwa wo nkonu.

¹ Nkonu umwi Petro na Yohane mmbo vekeenda mmba ya Iruva indetereva, kyeeri kya saa kyeenda. ² Na nndu umwi ekee kitongororo malungo ukya iwonika eeriwa mmbandu, veembikaa yoo mwangony uvaangwaa “Nsha” wa mmba ya Iruva wo nkonu, naambo natereve ngarami kwa vandu yewo vakeanga kulya mmba. ³ Nndu yeu kyeeri alelollya Petro na Yohane veshangaa na mmba ya Iruva katereva vanninge kindo. ⁴ Petro na Yohane vakambikya miso swaa, vakammbia, “Lulole yese.” ⁵ Kavalola, evikye nsia mmbo awonisaa kindo kwawo. ⁶ Kyaindi Petro kammbia, “Yeny nshitiri fesa nta saabu-fo lyo ekyo shitiri nkyo nkuningaa, Na irina lya Yesu wa Nasareti, salala kweenda.” ⁷ Kantira woko usha kamwipoo, ngyayo takwe na malungo akwe akavanga. ⁸ Kakupoo shu kasalala, kapooka yeenda kaanga mmba ya Iruva eriani nawo, keenda eshongashongaa erumishaa Iruva. ⁹ Vandu woose vakalollya shaasa ekeenda erumishaa Iruva. ¹⁰ Vakamanya mmbwe ulya ekee alya mwangony “Nsha” eterevaa, vakasongololo neefulukyo kyeefyo filentanyikya . ¹¹ Naasa kyeeri eriani na Petro na Yohane, vandu woose vakakuumbya yoo vakai yoo kari kavangwa ni “Kari ka Solmoni,” vakafulukyo deny. ¹² Petro ekyilollya indo kavavia, “Eni Vaisraeli, Nkyiki elyi mwafulukyo nkya efi, mukaveluvikya miso yese, sheelyi ni yese na finya yeeru lweedimisya nayo nndu yeu neende, ao na usha lweru yese? ¹³ Iruva wa Abrahamu na Isaki na Yakobo, Iruva wa vande veru mmbo aleng’anisa nsero wakwe Yesu, neeni mukandiingya neekana mbee ya Pilato, llya emmaa irummbwa nalekeyo. ¹⁴ Neeni mukakana Mweele yeto, muni usumanu yeto, mukatereva muningyo mwiwaa; ¹⁵ mukawaa Muni muu yeto, na mmbwe Iruva alenduta auka kwa vafu, neese lukee vakureeki vakwe. ¹⁶ Kimaruma kyekusirya irina lyakwe, irina lyakwe llyo lyaninga nndu yeu mumwiishi, finya na kikusiryo ekyo kyenkusirya nkyo kyaninga nndu yeu muu shaasa mullolye yaa mbee yaany. ¹⁷ Naasany, ulaalu vanavama, shiishi mmbo muletana efi kimaruma kya ilemwa imanya-da, shaasa na vasongoru vany valetana. ¹⁸ Kyaindi mbony tilya Iruva uka kasha alevambisa na kana ka vakisuku vakwe woose, kyeamba Kristo wakwe ashelyiswaa ukiva, mmbo aleinutyo indo. ¹⁹ Kuryeeny-te, mwiinduke, naambo ngyulyamari tany tiutwa, fishe fyeeri fyeellelisyo kimaruma kya Nndumi, ²⁰ narumi Kristo Yesu akee mmbike uka elyo mbee, ²¹ kyikasenya nawaryo iruveeu kutani kwasha fyeeri fiiya fya findo fyoose ivikwa wiiya, fikee firere ni Iruva na kana ka vakisuku vakwe veele uka mapookyony a ulana. ²² Mashika dede Mose aleamba sheeli, Nndumi waany ashemweengye nkisuku, efo ufyariny lwany, sha yeny, mwaranyiny we efyo fyoose ashemuviaa. ²³ Na wo nndu moose yeto araa nalaaranya nkisuku yeto mmbo asherumatwaa na ilakaniswaa na vandu vakwe. ²⁴ Yee, na vakisuku woose pookya Samweli na valya va numa yakwe, woose yewo, mmbo valeawuya mbony ta mikonu yei.” ²⁵ Yeni mmbo mukee vana va vakisuku na va fyaasa efyo, Iruva alevika na vande yewo vany, llya alevia Abrahamu, “Efo ufyariny lwafo mfo ngyufyari toose ta ulana tishevikywaa mbora. ²⁶ Iruva, llya alemaa iruta nsero wakwe Yesu, mmbo alesongwa inruma kwany, namulyimyi mbora eshiitaa maravi moose kwaasha neeni.”

¹ Kyeeri vekee irera na vandu yewo, makohani na nsongoru wa mmba ya Iruva na Vasadukayo vakavasheya, ² vakaereve nnu kimaruma kya elyi vakeelosha vandu na ivambisa mbony ta iruka lya Yesu auka kwa vafu. ³ Vakavatira vakavarwaa kifingyony fika elyi lya ngama; mashika kwemmeva nkwaany. ⁴ Llyo veengyi nnang’ani ya valya valeita irero elyo vakakusirya-u, na yekena lya vomi veni lyikafikya fiku firaanu. ⁵ Elyi lya ngama vasongoru na vamiku na vaarya va fitabu vakakusanyirya alya Yerusalemu, ⁶ na Anasi Nkohani nniini, na Kayafa-da na Yohane na Iskanda, na woose valya vekee va kwa Nkohani nniini. ⁷ Kyeeri valevasaleesa yoo nnang’ani, vakavavesa, Ni finya-ki na ni kwa irina lya vi mwatana nalyo yefi? ⁸ Naasa Petro, eishwe Mumuyo Mweele, kavavia, “Yeni vaniini va vandu na vamiku va Israeli, ⁹ kwakooya lwaveswa inu mbony ta kindo kisha nndu ulya mfwafwa aletanywa, na shaasa aleshiiswa, ¹⁰ manyiny yeni moose na vandu woose va Israeli sheelyi ni irina lya Yesu wa Nasareti, ulya yeni mulenkabya nsalabeeu, na Iruva kanduta kooka kwa vafu, na irina elyo nndu yeu mmbo aselelyi yaa mbee yaany ekee nsha indi. ¹¹ We mmbwe iwe elyo lyikee iile ni veetana mmba, nalyo mmbo lyamevikwa lyive iwe lya ndumba. ¹² Nta nkwiifo ukiro kwa ungyi nta umwi-fo, mashika nkwiifo irina lyingyi kwasi ya ngina vandu vakee vaniinge vakirwa llyo-fo.” ¹³ Naasa kyeeri valelollya ukaari lwa Petro na Yohane, neevamanya nshi vandu vasommyi nnu, valatiri urango, vakafulukywa, vakamanya mmbo vekee na Yesu. ¹⁴ Na vekilollya nndu aleshiiswa esalalyi ando amwi nawo mbalekiidima irera-fo. ¹⁵ Vakavaumbuta alya ikwaanuny lilya, numa vakarera wo veni na veni, ¹⁶ vakaamba, “Lukatannya inda vandu yeva? Mashika vandu woose vakee Yerusalemu mmbo valelollya ni wende uniini luletano mmbo, nta llushidimaa ilema-fo. ¹⁷ Llyo naambo kindo ekyi kilashekwaana vanduny, luvaimi deny neeverese valasherera lyingyi na nndu moose kwa irina elyi-fo.” ¹⁸ Vakavavaanga, vakavaima deny valashelosha-se na irina lya Yesu. ¹⁹ Petro na Yohane vakavavia, “Kwakooya ni usumanu mbee ya Iruva imwaaranya yeni ngota yaaranya Iruva, rumbweny yeni muveni; ²⁰ mashika yese llushidimaa ira lulaamba mbony eto lulelollya na itiita-fo.” " ²¹ Naasa vekimaa ivaerese lyingyi vakavaporomwa valalollye kimaruma kyevakapa, nyelyi valeereya vandu mashika vandu woose mmbo vekee irumisha Iruva kya efyo fyoose filetanyika. ²² Mashika nndu ulya aletannywa wende elu etiri myaaka makumi aana. ²³ Llya valemaa iporomuwa, vakaenda kwa vandu vawo, vakavavia mbony toose tilya valevio ni vaniini va makohani na vamiku. ²⁴ Nawo vekiita, vakaonisya Iruva ngyunyanga tawo na nrima umwi nsi, vakaamba, " “Nndumi ni yewe Iruva, nnyewe kutannyi iruveeu na ulana na yeeve na fyoose yefyo fiifo; ²⁵ kwi Mumuyo Mweele mmbo kulerera na kana ka ndeye weeru Davidi we nsero wafo kwaamba, ‘Ni inda vandu va masanga vakeyuushana. Na vandu va ngyufyari ta vandu vakakusara-sara ruu. ²⁶ Vamangyi va ulana vankudeesya na vasongoru vamfisha kyama. Uwe ya Nndumi na uwe ya Kristo wakwe.’ “ ²⁷ “Mashika ni dede, Herode na Pontio Pilato ando amwi na vandu va masanga na vandu va Israeli mmbo valekusanyirya yaa muriny yeu kimaruma kya nsero wafo mweele Yesu, yeto kulemwaamba mafura, ²⁸ naambo vatani fyoose efyo woko lwafo na wiidimi lwafo lwendeesya uka elyo mbee fitanyike. ²⁹ Naasa, woi Nndumi ulaalu kulole wiitiki elo lwawo, kwidimisye mashinga afo yaamba irero lyafo na ukaari, ³⁰ kuveorwa woko lwafo kushiise, ngyende na myoorye fitanyike na irina lya Mwana wafo Yesu.” " ³¹ Vekimaa itereva Iruva, ando alya vekai kukarinyiswa, woose vakaishurwa Mumuyo Mweele, vakaamba irero lya Iruva na ukaari. ³² Na ironda elyo lya vandu va kikusiryo vakatira nrima umwi nsi na ngoo imwi nta kulakae-fo nndu aamba kindo kyoose atiri nkyakwe muni; kyaindi findo fyoose vakaallwa fyawo woose. ³³ Na Varumi valya vakauta ukureekyi lwa iruka lya Yesu na finya shiniini, na mbora shiingyi tikakaa nawo woose. " ³⁴ Nta nkulekaafo nndu umwi waawo aleting’wa nkindo; mashika woose yewo vetiri marema ao mmba mmbo valekumba, vakeende uuru lwa vayo; ³⁵ vakaniingya vakiloshony, wo nndu kaniingwa-u shaasa eekunndye. ³⁶ Na Yosefu ulya Llevi vakiloshyony valemfishya Barnaba, (kyeamba, “Nmwana wa Iviirya Muu.”) kwawo ni Kipro, ³⁷ etiri irema kalyikumba, keengye valya vakiloshyony fesa.

¹ Kyaindi nndu umwi evangwaa Anania, ando amwi na nkaakwe Safira, mmbo ekumba masaa, ² kasuruma kyenga kya wuuru lwa vayo, na nkaakwe nawe kamanya ekyo, keende kyenga ekyo kakyiniingya Varumi ewo. ³ Petro kavia Anania, “Nkyiki elyi mmbishwa akaya nrima wafo kwavia Mumuyo Mweele wongo, kwasuruma kirisi kyenga kya wuuru lwa irema? ⁴ Kyeeri kyekee maakony afo kyekee-se kyafo? Na kyeeri ekyo kyemmaa ikumbwa, fesa ta vayo tekee-se ushilyiny lwafo? Mmbo kileva inda kwakunda itana kindo kya ngata yeyo? Nshi nndu wa vandu kulellemba-fo, ni Iruva.” ⁵ Anania ekiita marero yoo kawa si kafwa. Weerei uniini lukatira vandu woose valeita mbony yei. ⁶ Vasoro vakakwiipoo vakammbika sanda, vakansomuta vakandendika. ⁷ Kyikyisia saa isaru numa nka nawe kasha, nalaishi kindo kyantanyika. ⁸ Petro kammbesa, “Nkyeshivia, Nrema ilya mmbo mulekumba kwa wuuru elo dede?” Kaamba, “Yee, nkwa wuuru yelo.” ⁹ Petro kammbia, “A mmbo kileva inda mukasanga amwi ilemba Mumuyo wa Nndumi? Lola-te, valya valerika mmi wafo vakuvereye mwaangony, nawo vakusomutaa neewe.” ¹⁰ Llya yeni nawe kawa si yoo marendeny akwe kafwa; vasoro valya vakaanga vakakooya ammaa ifwa, vakansomuta, vakandika ando amwi na mmi wakwe. ¹¹ Weerei uniini lukatira Siri shoose na vandu woose valeita mbony yeti. ¹² Maakony a vakiloshyony tikatanyika ngyende na findo fyeyaawuta fingyi vanduny; nawo woose vakakaa na nrima umwi nsi efo kariny ka Solomon. ¹³ Neewo veengyi woose nkwifoo nndu alekarya yeenda nawofo, kuuta ivarumisha tupu. ¹⁴ Naasa valya valekusirya Nndumi vakaengereka, veengyi vomi na vaka; ¹⁵ kutani vandu vasomuta vandu vawo valoe efo shia velele firaany, naambo Petro eshiraa, naakwa ni kirishe kyakwe kipaani umwi waawo. ¹⁶ Nalyo maronda a vandu va miri ilya ikee kufii na Yerusalemu vakakusanyirya, vakeende vandu valoe, na valya vetirwa mmimuyo mikasha, nawo woose vakashiiswa. ¹⁷ Nkohani nniini ando amwi na vandu vakwe, (yewo mmbo yewo va kyama kya Vasadukayo), vakaishwa nyashi, ¹⁸ vakashetira Varumi yewo vakavavika kifingyony. ¹⁹ Kyaindi Nsu wa Nndumi karua myaango ya kifingyony elyi kio kavasomuta-fo, kavavia, ²⁰ “Endeny salaleny mmba ya Iruva muvie vandu mbony ta Muu yeu.” ²¹ Nawo vekiita indo vakaenda mmba ya Iruva nraasi, vakapooka ilosha. Nkohani Nniini ando amwi na vandu vakwe vakasanyirya vandu va ikwaanuny na vamiku va vana va Israeli vakaruma vandu kulya kifingyony naambo vavaende. ²² Kyeeri varundi vawo valefika-fo mbalevakooya-fo, vakawuya vavavie mbony, ²³ vakaamba, “Kifingyo nkiraye nisha, na varingyi vesalalyi mwaangony; lyo kyeeri lwarua llwakoyafo nta ndu-fo.” ²⁴ Kyasia nshilyi wa mmba ya Iruva na vaniini va makohani vekiita indo, vakatirwa nnyinyira kimaruma kyawo, kyeyaamba mmbo kivaa inda kindo ekyi. ²⁵ Nndu umwi kasha kavavia sheelyi, vandu valya mulevavika kifingyony ekawo vakee kulya mmba ya Iruva, vasalali-fo veeloshaa vandu. ²⁶ Lyo nshilyi ulya alekupoo ando amwi na varundi, vakaveende, lyo nshi na finya-fo, mashika valeereya vandu valashevakapa na mawe. ²⁷ Vekiveende vakavavika ikwaanuny. Nkohani Nniini kavavesa, ²⁸ kavavia, “Lulemwiima-se na finya deny, mulashelosha na irina elyi, lyo yeni mmbo mwammishura Yerusalemu yei ufundo lwany, neeni mmbo mukunndye samu ya nndu yeto iluvavye.” ²⁹ Petro na Varumi vakarouwa vakaamba, “Mmbo kilukooye lwiindye Iruva ngota vandu.” ³⁰ Iruva wa vande veru mmbo aleruta Yesu, yeto mulembwaa mumbambye nsalabeu. ³¹ Nndu yeto Iruva mmbo aleng’anisa na woko lwakwe usha, nave nniini na Mwikira naniinge Vaisraeli ikurya na ifywayo kya ulyamari. ³² Neese mmbo lukee vakureekyi va mbony eti, ando amwi na Mumuyo Mweele yeto Iruva aleniinga woose vakeemwindya. ³³ Naasa vekiita indo kikavakora miriminy yaawo, vakaumburana kyevawaa. ³⁴ Kyaindi nndu umwi Mfarisayo irina lyakwe evangwa Gamalieli, akee mwilosha mavavaso, nawe ni nndu eendyo mmbandu woose, kasalala alya ikwaanuny llya, kavavasya Varumi vavikwa poo kyaangu, ³⁵ llyo kavaviany, “Yeni womi va Israeli, kwiiseny shaasa mutannyaa vandu yeva. ³⁶ Mashika mikonu yei ya kufii Teuda mmbo alekupoo kakwaalwa nndu nniini, vandu sha mayana aana vakansora, lyo we kawaawa na valya veriani nawe vakanyanyaka vakafwa mmwasi.” ³⁷ “Numa ya nndu yeto kakwiipoo Yuda Mgalilaya, mikonu ilya ya ireiyo yeekena, keenduta vandu veengyi vakansora, llyo nawe-da mmbo alereka na woose vemwirikye vakanyanyaka. ³⁸ Naasany ulaalu mmbo shamuvia, kwiiseny na vandu yeva, vareny vakae, mashika mbony yei ao ishora elyi kwankooya mmbo lyuukye kwa nndu wa vandu mmbo lyishefikaa; ³⁹ lyo kwankooya mmbo lyuukye kwa Iruva mmushidimaa ilyifisha-fo; kilasheeva sheelyi mmbo mukeekapana na Iruva.” ⁴⁰ Nawo vakairikya marero akwe, naasa vekivaanga Varumi valya vakavakapa, vakavavasa valakisende irina lya Yesu; naasa lyo vakavara vakweengye. ⁴¹ Naasa vekyisomuka alya ikwaanuny llya, vakeenda vefuraa mashika elyi vansandwa na vandu vasumani isutwa kimaruma kya irina elyo. ⁴² Na wo nkonu, efo mmba ya Iruva na kyeny kwawo, mmbalera ilosha neevambisa Nrumi ya Nsia ya Yesu sheelyi ni Kristo-fo.

¹ Naasa kyeeri kilya yeekena lya vakiloshyony lyekeengereka, kukakaa-fo nkunung’unu wa Vayuda va Kigriki kwa Vaebrania kyeyaamba vaka va ding’u vawo mmbo valerekyo-fo valalolwa efo urundiny lwa nkonu simu. ² Valya ikumi na vavii vakavaanga vakiloshyony woose, vakavavia, Nkivaa yese lure irero lya Iruva lufurukanyi meseny-fo. ³ Kyasia vanavama, sauweny vandu mfungare efo nnang’ani yaany, vakureekywa kya usha, vaishwe Mumuyo Mweele, na waarya, naambo luvarambikye mbony yei. ⁴ Neese lusaa na itereva na irundya irero elyo. ⁵ Irero elyi lyikasenya shila shoose; vakasauwa Stefano, nndu atiri kikusiryo eeshwe Mumuyo Mweele, na Filipo, na Prokoro na Nikonori na Timon, na Parmena na Nikolao wa kulya Antiokia; ⁶ nawo vakavikwa mbee ya Varumi yewo, nawo vekimaa ivaterevya, vakavaekerya maako. ⁷ Irero lya Iruva lyikakwaana, na yeekena lya vakiloshyony lyikaengereka nnu kulya Yerusalemu, na ikyenga lya vakohani vakaalukya kyikusiryo ekyi. ⁸ Naasa Stefano nawe, kawona ikiiyo na wiidimi, katana ngyende na findo finiini filandelollyo efo vanduny. ⁹ Kyaindi vandu maata va kyama kyevaangwaa Sinagogi lya Valeke na lya Vakirene na lya Vaiskandaria, na lya valya va Kilikia na Asia, vakasalala na Stefano naambo vammbinge, ¹⁰ lyo valaidimi immbinga mashika a waarya lwakwe na finya ya Mumuyo eto enkaye. ¹¹ Naasa vakafullwa vandu mirwe vakaamba, mmbo luleita nndu yeu eshaararaa Mose na Iruva. ¹² Vakaaya vandu na vamiku na vaarya va fitabu; vakansora, vakantira vakanrwaa ikwaanuny. ¹³ Vakasaleesa vakureeki va wongo vakaamba, “Nndu yeu nnyakeera nalaarara ando yaa eele na uvavaso-fo; ¹⁴ mashika mmbo luleeta eshambaa Yesu yeto wa Nasareti mmbo ashelyamaraa ando yaa, na yaalasha mbuka teru tilya lulereeyo ni Mose.” ¹⁵ Vandu woose valya vekee alya ikwaanuny vakankatuya miso awo, vakalollya kisangu kyakwe kive sha kya nsu wa Iruva.

¹ Nkohani nniini kaamba, “A mbony yeto niindo tikai?” ² Nawe Stefano karouwa, “Vanama na vande vakwa shaaranyiny. Iruva wa itumbe mmbo alekoora na nde weeru Abrahamu kyeeri ekee Mesopotamia, nalandekae Harani, ³ kammbia, ‘Uka urukeny lwafo na kwa vandu vafo kweende urukeny elo nshekooraa.’ ⁴ Lyoony kooka urukeny lwa Vakaldayo kakaa Harani, numa kooka-fo llya ndeye alefwa. Iruva kansamisya urukeny elu yeni mukee ulaalu. ⁵ Nta nnyalenningwa ding’u kunu, nta ando kwamaa ivika urende-fo; kavika kyaasa asheningwaa uruka, luve lwakwe deny, luve na lwa ufyari lwakwe lwa numa lla llya nalandetire mwana. ⁶ Iruva kaamba, ‘Ufyari lwakwe mmbo lushevaa veny urukeny lwa vandu vengyi, nawo vashevavika mashinga, neevataa meesi ando a myaaka mayana aana. ⁷ Na vandu yewo vashevallwa mashinga nshevataiyaa, niindo Iruva aleamba, neelyi numa vasheukaa-fo, nawo vasheshiindyaa yaa.’ ⁸ Kammbikya kyaasa kya irinwa; naasa Abrahamu kaira Isaki kanrina nkonu wa nyanya. Isaki kaira Yakobo. Yakobo nawe keera valya ikumi na vavii, mmbo vandeye veru.” ⁹ Vande yewo veru vekitirya Yosefu kinying’u, vakankumba keenda Misri. Iruva kakaa nawe. ¹⁰ Kamuuta ngatareny takwe toose, kanniinga ilyillyo na waarya mbee ya Farao, we mangyi ya Misri nawe kammbika nawe mwishillya Misri amwi na mmba yakwe shoose. ¹¹ Naasa kukasha shaa kulya Misri na Kanaani koose na fyuure fiingyi, nta vande veru mbalewonisa shoonga yavamaa-fo. ¹² Kutani kyeeri Yakobo aleita kulya Misri kwiifo shoonga, karuma-fo vande ewo veru lya mbee. ¹³ Naasa kyaaro ekyo kya kavii llyo Yosefu alekumanyisya kwa vanavamaye, na ufyari lwa Yosefu lukamanyika paa kwa Farao. ¹⁴ Yosefu karuma vandu kandevaanga ndeye Yakobo na vandu vakwe woose nawo, woose ni vandu makumi mfungare na varaanu. ¹⁵ Naasa Yakobo kasoka na Misri; numa kawuya ifwa we na vande valya veru; ¹⁶ vakaipowa vakafitwa Shekemu vakanderikwa kulya mbangeny ilya, Abrahamu aleura na fesa kwa vana va Hamori kulya Shekemu. ¹⁷ Naasa kyeeri kya kyaasa kilya Iruva alevikya Abrahamu kyekee kufii, vandu valya vakaengereka neefumbuka nnu kulya Misri, ¹⁸ numa kukakwiipoo-fo mangyi kulya Misri nalaishi Yosefu. ¹⁹ Yeto katanya vandu veru fya kiila, katannya vande veru makasha, kaveetikya veere vakoku vao efo naambo valakae na muu. ²⁰ Kyeeri ekyo llyo na Mose awonika ekee kimwana kisha nnu, kalelwa ando a miiri iraru nsi ekee mmba kwa ndeye. ²¹ Kyeeri alerwa efo, mfu wa Farao kamwiipoo nallele nave sha mwana wakwe. ²² Mose kaishivirwa urango loose lwa ki-Misri, kamanya kishomu na ngaa yaawo. ²³ Nafite myaaka makumi aana karummbwa nriminy wakwe nandesaiya vana va maye wo Vaisraeli. ²⁴ Kalollya-fo umwi esisyoo kamweekya itaiya, kawaa Mmisri ulya. ²⁵ We kakusara vanavamaye mmbo vamanyaa sheelyi Iruva mmbo akee ivawouwa na woko lwakwe, llyo mbalemanya-fo. ²⁶ Elyi lya ndesi kalollya lyingyi vengyi vekapanaa, kakunda ivaleta, kavavia, “Eni vomi vakwa, yeni ni vana va nka. Nkyiki elyi mwakapana?” ²⁷ Kyaindi yeto ekeefota eto ungyi kammbira-fo emmbiaa, “Ni vi alekuvika yewe kuve uwe yeeru na mwiluleta-ro? ²⁸ A mmbo kukundye ishiwaa neeny shaasa kulewaa Mmisri ulya ukwau?” ²⁹ Mose karisha kimaruma kya irero elyo, karisha kandekaa sha muny urukeny lwa Midian, keerya-fo vana vavii. ³⁰ Kwikyisia myaaka makumi na aana nsu wa Iruva kansheya kulya kasa ka ifumbu lya Sinai efo murony wa ngorosho ishakaa. ³¹ Mose nalole indo kaaukwa, na kyeeri alesembeya kufii nalole nisha, unyanga lwa Nndumi lukansheya, lukammbia, ³² “Yeny ni Iruva wa vande vafo, Iruva wa Abrahamu na Isaki na Yakobo.” Mose karerema, nalakarye ilola. ³³ Nndumi kammbia, “Utafo fyaaru fyafo, mashika ando ya kuselelyi ni uruka weele.” ³⁴ Mmbo shallolya paa, ukiva lwa vandu vakwa vakee Misri, ivavyo lyawo lyanshifikya, neeny mmbo shooloka naambo shivaute-fo. Naasa ulaalu mmbo nkurumaa Misri. ³⁵ Mose yeto valellema veshambaa, “Ni vi yeto alekuvika nniini na mwiluleta mmbwe yeto muni alerumwa ni Iruva nave nniini na mwiwouwa na kana ka nsu ulya alensheya alya ngoroshony ilya yekee yaaka.” ³⁶ Mose yeto mmbwe alevauta-fo, katana ngyende na firingisyo kulya urukeny lwa Misri, na yeeveny ya Shamu, na kulya kasa ando a myaaka makumi aana. ³⁷ Mose yeto mmbwe da alevia vana va Israeli, Iruva Nndumi waany ashemuselesyaa nkisuku efo ufyariny lwany sha yeny, mwaranyiny we. ³⁸ We mmbwe yeto ekee kulya kasa ando amwi na nsu ulya alerera nawe alya ifumbuny lya Sinai, na ando amwi na vande veru, mmbwe yeto alewarya marero a muu naluningye yese. ³⁹ “Lyo nndu yeto vaninii veru mbalekunda imwirikya-fo, mmbo valemwisityo mbai, vakaviira mirima yaawo Misri tupu, ⁴⁰ vakavia Aron, ‘Ndifo lusongosie maruva ashelusongoyaa; mashika Mose yeto aleluuta urukeny lwa Misri llwiishi kindo kyankooyafo.’ ⁴¹ Vakasongosia ifanu lya ngashe vakaende na firaso kwa ifwanu elyo, vefuryaa mashora a maako awo. ⁴² Naasa Iruva kaalasha makusaro akwe kavara naambo vendye matorito a nginiiu, shaasa kikee kireiye efo fitabuny fya vakisuku kyeamba, ‘A ni yeny muleshyuutya firaso myaaka makumi aana kulya kasa, eni mmba ya Israeli? ⁴³ Mmbo muleipoo yeema lya Moleki na nyinyiri ta iruva lyany Refani, mafwanu muleasongosia naambo mwiindye. Neeny mmbo nshemusamisaa mweende kwaasha mwiire Babeli.’ “ ⁴⁴ “Yeema lyilya lya ukureekyi lyekee ando amwi na vande veru kulya kasa, shaasa Mose alevavasya, naambo nalyisongosie sha ufwanu llwa aleorwa. ⁴⁵ Llyo vande veru vetarannyaa, vakalyaata ando amwi na Yosua efo ushilyiny lwa vandu va masanga valya Iruva alevaumbuta mbee ya vande veru, kufike kyeeri kya Davidi; ⁴⁶ ulya alewona ikiiyo efo kwa Iruva, llyo aletereva naambo nawonisye Iruva wa Yakobo kirembo kyeekaa. ⁴⁷ Kyaindi Solomon mmbwe yeto alentanya mmba.” ⁴⁸ “Kyaindi lyo yeto akee uwe ya fyoose nnyakaa mmba ikee shitani na maako a vandu-fo, shaasa nkisuku aleammba indi: ⁴⁹ ‘Iruveu ni kiri kyako kya itumbe na uruka ni ando a yeekerya marende akwa. Ni mmba ya ngata-ki mushitannyaa? Nndumi avesa. ⁵⁰ Ao ni ando-ki nsheimuyaa? Nshi woko lwakwa luletana efi fyoose?’ “ ⁵¹ “Yeni mutiri singo shuumu, mukava sha vandu va masanga mulashiitaa. Mikonu myoose mmbo mukeekapana na Mumuyo Mweele, shaasa vande vany valetana, neeni, ni indo-da. ⁵² Ni ungau nnang’ani ya vakisuku kulaore vande vany valemmbavisa? Nawo mmbo valewaa valya valeawuya fisuku kya isha lya yeu wa usumanu, yeu ulaalu muleva variingyi vakwe, mukammbwaa. ⁵³ Ni nsu wa Iruva alemuvavasya muwarye uvavaso lyo mulakunde itira.” ⁵⁴ Naasa kyeeri valeeta marero yoo, vakakorwa miriminy yaawo, vakanrafunnya mayoo. ⁵⁵ Llyo Stefano eishwe Mumuyo Mweele, kalola iruveeu, kalollya itumbe lya Iruva, na Yesu esalalyi taari ya woko usha lwa Iruva. ⁵⁶ Kaamba, “Lola-te, shilollye kulya iruvee-u kurauka, na Mwana yeto wa Nndu aselelyi woko usha lwa Iruva.” ⁵⁷ Vakaongora vakafinika maarwi awo, vakanrumbukya na lyimwi woose, ⁵⁸ vakansomuta kipoo ya muri, vakankapa na mawe. Na variingyi yewo vakavika soori takwe yoo marendeny a nsoro umwi evaangwa ni Saulo. ⁵⁹ Vakakapa Stefano na mawe, nawe eeterevaa kaamba, “Woi Nndumi Yesu, warya nrima wakwa.” ⁶⁰ Kafiirya ndi, kafua na unyanga waasha, kaamba, “Nndumi kulaveekennyi ulyamari elu-fo.” Amaa yaamba indo kafwa. Na Saulo mmbo elolye ninsha shaasa alewaawa.

¹ Mikonu yeyo kukapooka ilyiso ukiva siri tikee Yerusalemu, woose vakanyanyaka efo urukeny lwa Uyuda na Samaria, kuuta Varumi yewo veni. ² Vandu vesha vakarika Stefano, vakammbikya kiiyo kiniini. ³ Saulo kalyamara Siri eshiraa wo mmba, eruffwaa vomi na vaka neevavika kifingyony. ⁴ Na valya valenyanyaka mmbo valeenda efo neefo vevambisaa Irero elyo. ⁵ Filipo kasoka kaanga muriny wa Samaria, “Kavaongoya mbony ta Kristo.” ⁶ Maronda kwa nrwe umwi nsi vakaaranya marero alya aleambawa ni Filipo kyeeri valeeta neelollya ngyende tilya ekeetana. ⁷ Mashika mimuyo mikasha miingyi ileuka vandu veengyi yewo veetirwa nnyo, veffwaa na unyanga waasha, na vandu veengyi vekee fitongororo malungo, vakashiiswa. ⁸ Lyikava ifura iniini nnu kulya muriny ulya. ⁹ Naasa kweifo ndu umwi evangwaa Simon, elyo mbee mmbo ekee nsavi efo muriny eto, kaawuta vandu va Samaria, eshambaa we ni ndu nsuri. ¹⁰ Woose vakamwaranya kupookya n-du fika nniini, vakaamba, “Nndu yeu ni wiidimi lwa Iruva, ullya niini.” ¹¹ Vakamwarannya nnu mashika elyi emmauta vandu na usavi lwakwe, kyeeri kiingyi. ¹² Kyaindi kyeeri valeirikya Filipo llya alevambisa Nrumi ya umangyi lwa Iruva, na irina lya Yesu Kristo, vakabatiswa, vomi na vaka. ¹³ Na Simion yeto we muni kakusirya-u, kakutira na Filipo; kafulukyo elyi alelollya ngyende na myoorye miniini yekeetanyika. ¹⁴ Naasa Varumi yewo vekee Yerusalemu vekiita sheelyi Samaria yambwarya Irero lya Iruva, vakavarikya Petro na Yohane; ¹⁵ nawo kyeeri valesoka nafo, vakavaterevya naambo vasimbwa Mumuyo Mweele. ¹⁶ Mashika nnyensokya nta umwi waawo-fo, kuuta elyi da vemmbatiso na irina lya Yesu. ¹⁷ Llyony valevika maako awo uwe yaawo, nawo vakasokywa ni Mumuyo Mweele. ¹⁸ Naasa llya Simion alelollya vandu vesimbwaa Mumuyo Mweele veshekerywa maako a Varumi valya, kakunda ivaniinga fesa, kaamba, ¹⁹ “Shiniingeny neeny wiidimi elu, naambo neeny wo ndu nshemwekeryaa maako nawonise Mumuyo Mweele.” ²⁰ Kyaindi Petro kammbia, “Fesa yafo irekye si ando amwi neewe, mashika yewe mmbo kukusarye simbo ya Iruva mmbo yawonika na fesa. ²¹ Nkutiri waavi nta kyenga yaa-fo, mashika nrima wafo mmbukunyiisye kwa Iruva-fo. ²² Naasany, kurye ulyamari elu lwafo, kutereve Nndumi, kulakooye ashekusaryaa uravi elu lwa nrima wafo. ²³ Mashika shilollye mmbo kukeevava sha udwa na lyingyi mmbo kukee kifingyony kya uravi.” ²⁴ Simion karouwa kaamba, “Shiterevyeny yeni kwa Nndumi, naambo efyo mwaamba fyoose kilashikooye nta kimwi.” " ²⁵ Naasa vekimaa yuuta ukureekyi na ivambisa Irero lya Nndumi vakawuya Yerusalemu, lyo vakaamba mbele Nrumi ya Nsia fyuungony fiingyi fya Vasamaria. ²⁶ Nsu wa Nndumi karera na Filipo, kammbia, " “Kwiipoo kweende taari ya sinde kundefika shia ilya isokaa na Gasa kuuka Yerusalemu, nafo ni kasa koomu.” ²⁷ Nawe kakwiipoo, keenda, llya yeni kalollya nndu umwi Mwabashi Nndu eto ekee nshilyi kwasi ya Kandake, mangyi ya kika ya Kyabashi, eitorye masaa akwe moose; nawe mmbo eengye Yerusalemu nandeindya-fo Iruva, ²⁸ kyeeri ekeewuya, kava eekee rembo yoo ikariny mmbo ekesoma kitabu kya nkisuku Isaya. ²⁹ Mumuyo kavia Filipo, “Sembeya kufii neekari elyi.” ³⁰ Naasa Filipo keenda sere, kamwaranya esomaa kitabu kya Nkisuku Isaya, kaamba, “A kukeemanya kindo kukeesoma?” ³¹ Kammbia, A mmbo nshidimaa inda imanya, nndu nalashitetera? Katereva Filipo nasaami nakee-u nawe rembo. ³² Na kyenga ekyo kya mareiyo ekeekisoma nnyekyi, “Mmbo aleteterwa yeenda kishishyony ekee sha yoonri, na shaasa ngurana ya yoonri imalalyaa sau iisemwaa mafwaa, na indo nawe nnyatarammbwa kana kakwe-fo. ³³ Kimaruma kya ikunyiisa lyakwe uvingo lwakwe lukautwa-u, ni vi ashevia vandu va kyeeri kyakwe? Mashika muu wakwe wammbutwa urukeny.” ³⁴ Nshilyi ulya kavesa Filipo, “Shakutereva, Nkisuku yeu mmbo arera marero yaa kimaruma kya vi, nyakwe a nya nndu ungyi?” ³⁵ Filipo nawe katarammbwa kana kakwe, kapooka na mareiyo yoo, kammbia Nrumi ya Nsia ya Yesu. ³⁶ Elyi veefo vasheendaa vakafika ando kwiyoo mura, nshilyi ulya kaamba, “Lola mura yeu, nkyokyi kikee ishiima shilabatiswa?” [ ³⁷ “Filipo kaamba, ‘Kwankusirya-u na nrima wafo moose kivaa.’ “ Karouwa, kaamba, “Shikusirye sheelyi Yesu Kristo ni Mwana wa Iruva.” ] ³⁸ Kavavasya ikari lyilya lyisaleeswa; vakaoloka woose ve vavii neefo mureny, we Filipo na nshilyi ulya; nawe kammbatisa. ³⁹ Naasa kyeeri valesaama vauka mureny, mumuyo wa Nndumi katakwa-u Filipo, nshilyi ulya nalallollye-se; naasa kakwengya efuraa. ⁴⁰ Nalyo Filipo kashelollyo-kulya Asoto, nawe esheenda kaamba, “Nrumi ya Nsia efo miriny myoose kutani afika Kaisaria.”

¹ Naasa Saulo keengera ilyilyisa neekusara iwaa vakiloshyony va Nndumi, keengya Nkohani Nniini. ² Kakunda nanniinge barua teenda Dameski tikeeshireiye kwa mmba teeterevya ta Vayuda, naambo vakalollya-fo vandu va shia yei ya Nndumi, vomi na vaka naambo vakalollya-fo navafinge neeveende Yerusalemu. ³ Kikava elyi efoo ashendaa, kufii afike Dameski, pari pari karingityo koose nsa niini yuuka iruveeu, ⁴ Kawa si, kaita unyanga lummbia, “Saulo, Saulo-ro, nkikyi elyi kukeeshivavisa?” ⁵ Kaamba, “A ni yewe vi Nndumi?” Nawe kaamba, “Ni yeny Yesu yeto kukeimbavisa yewe.” ⁶ Lyo salala, kwaange muriny llyo kushevioo ekyo kyikukooye itana. ⁷ Na vandu valya veriani nawe vakasalala sau, vakaita unyanga, lyo valalollye nndu. ⁸ Saulo kakwiipoo alya si, na kyeeri aletarambwa miso, nalalollye nta kindo; vakantira woko vakamfita Dameski. ⁹ Kakaa mikonu iraru nalalollye; nalakeelya nta ina. ¹⁰ Naasa alya Dameski kweiyo wa kiloshyony umwi evaangwa Anania. Nndumi karera na Anania yooryeny. Kaamba, “Ekau yeny, Nndumi.” ¹¹ Nndumi kammbia, “Salala kweenda kundekooya shia ivaangwaa Shisaari, kundevesa efo mmba kwa Yuda nndu avaangwaa Saulo, wa Tarso, mashika kushenkoyaa eterevaa, ¹² nawe allolya nndu avangwaa Anania eshangaa neemwekerya maako, needimi ilollya lyingi.” ¹³ Kyaindi Anania karouwa, “Nndumi, mmbo shilemmiita mbony ta nndu yeu kwa vandu veengyi, kya makasha meengyi atannya veele vafo vakee Yerusalemu; ¹⁴ naako ni kunu mmbo arye ivavaso alyuutye kwa vaniini va makohani nashefinga woose vakeevaanga Irina lyafo.” ¹⁵ Kyaindi Nndumi kammbia, “Kweengye tupu; Mashika yeu ni kiiya kisauwe kyakwa, narwaa irina lyakwa kwa vandu va masanga, na vamangyi na vana va Israeli. ¹⁶ Mashika mmbo nshemoraa shaasa fikee fingyi efyo ashelyisywaa ukiva kimaruma kya Irina lyakwa.” ¹⁷ Anania keenda, kaanga kulya mmba ilya, kamwekerya maako kaamba, “Mwanama Saulo, Ni Nndumi ashiruma, we Yesu, yeto alekoora neewe efo shia kulesha nayo, naambo kwiidimise ilollya, kuveishurwa na Mumuyo Mweele.” ¹⁸ Lya yeni fikaangara findo misony akwe fivakye mavala, naasa kaidima ilollya, kasalala, kapatiswa; ¹⁹ kalya na shoonga, kawuiyo mmuu. Kakaa-fo ando a mikonu mive na mive ando amwi na vakiloshyony vakee Dameski. ²⁰ Nalyo yeni kapooka ivambisa mbony ta Yesu efo fisomyony fya Vayuda, sheelyi we ni Mwana wa Iruva. ²¹ Na woose valeita vakafulukyo vakaamba, “A yeu nshi we yeto ekesaveesa yewo vekeesenda irina elyi kulya Yerusalemu?” Na yaa da mmbo alesha kwa kimaruma ekyo, navafinge neevarwaa kwa vaniini va makohani? ²² Saulo keengera iva nkaari, kasaveesa Vayuda valya va Dameski, eeringisyaa sheelyi Yesu ni Kristo. ²³ Naasa kwikyiira mikonu miingyi Vayuda vakaumburana vambwaa, ²⁴ kyaindi Saulo kamanya kyama kyawo, vakallaya efo ngiriny kio na nsanyiny naambo vammbwae. ²⁵ Vakiloshyony kyakwe vakamwipoo kio vakammbika kikabuny vakamoolota na isimamba lya mmba. ²⁶ Kyeeri Saulo alefika Yerusalemu kakunda isanga na vakiloshyony, lyo wo vakamweereya woose, valaidimi ikusara iirikya sheelyi nawe ni wakiloshyony. ²⁷ Kyaindi Barnaba kammbwarya kanrwaa kwa Varumi, kavaongoya shaasa alekwanannya na Nndumi efo shia, na kingyi sheelyi alerera nawe, na kingyi shaasa aleamba Nrumi ya Nsia na ukaari kulya Dameski na irina lya Yesu. ²⁸ Nawe kakaa nawo efo Yerusalemu eshangaa neesomuka, kaamba mbony na irina lya Nndumi nookaari, eereraa na irouwana na Vayuda va Kigriki. ²⁹ Llyo nawo valeesa immbwaa. ³⁰ Kyaindi wooroye vekimanya vakamwipoo vakanrwaa Kaisaria, naambo neende Tarso. " ³¹ Naasa Siri ikakaa na ifura efo Uyuda koose na Galilaya na Samaria, siri ikavangiswa ikeengera ing’ana neetirya Nndumi vio, na iviiryo muu ni Mumuyo Mweele. ³² Naasa kyeeri Petro ekeiringitya taari toose kashesokya kulya kwa veele vakee muriny uvaangwa Lida. ³³ Efo kalollya-fo nndu avaangwa Ainea, nawe ellala kitareny ando a myaaka nyanya, mashika mmbo ekee muumu malungo. ³⁴ Petro kammbia, " “Ainea, Yesu Kristo akushiisa, kwiipoo kwaalye kitara kyafo kumuni, " lya yeni kakwiipoo.” ³⁵ Na vandu woose valya vekee Lida na Sharoni vakallollya, nawo vakaalukya Nndumi. ³⁶ Na kulya Yafa kweefo wa Kiloshyony umwi irina lyakwe ni Tabita, kwaalwa ni Dorkasi (nkyo ni sarya); nka yeu mmbo ekee mwitana mesha kasanda na firaso fyakwe eshuutaa. ³⁷ Naasa fyeeri filya-da kalwaa, kavefwa; nawo vekimaa insangya vakansaamisa ghorofeny. ³⁸ Na kimmba Lida kwekee kufii na Yafa, na vakiloshyony vammaa iita sheelyi Petro mfo akai, vakaruma vandu vavii kwakwe vantereve neemmbia, " “Kulakyeeyo isha kweru.” ³⁹ Petro kakwiipoo keenda nawo. Kyeeri alefika-fo vakansaamisa na kulya ghorofeny, vaka va ding’u woose vakasha na yoo akai veiyaa neemora kansu tilya Dorkasi eefumaa kyeeri kilya ekee nawo. ⁴⁰ Petro kavasomuta poo woose, kafiirya ndi, katereva, naasa keendukya nnyinga ulya, kaamba, Tabita, kupoo. Nawe katarammbwa miso akwe, na ekilollya Petro, kakwiipoo, kakaa rembo. ⁴¹ Kantira woko kansaleesa, naasa ekimaa ivaanga vandu wa Nndumi na vaka valya vading’u kammbika yoo mbee yaawo, ekee na muu. ⁴² Kikamanyika kulya muriny wa Yafa koose; vandu veengyi vakakusirya na Nndumi. ⁴³ Naasa Petro kakaa mikonu mive na mive efo Yafa, kyeny kwa nndu umwi, avaangwaa Simion, mwisisa shony.

¹ Kyasia kweefo nndu umwi wa Kaisaria, irina lyakwe ni Kornelio, ekee nniini wa itorito lya Vasikari lyevangwaa Kiitalia ² ni nndu nsongovisi, mwiindya Iruva, we na mmba yakwe shoose, nawe mmbo eningyaa vandu findo fiingyi fyeevekya, kava na mwiitereva Iruva kyeeri kyoose. ³ Nkonu umwi (Nndumi) kamoora paa, kwikee sha saa keenda ta nsanyiny, nsu wa Iruva kansheya kammbia, “Kornelio, ⁴ Fiterewo fyafo na firaso fyafo filefika uwe na iva kindo kyekumbuwa mbee ya Iruva.” ⁵ Naasa ulaalu rika vandu kulya Yafa, kundevaanga-fo Simion avaangwa Petro. ⁶ We mmbo akee muny wa nndu umwi avaangwaa Simion mwisisa shony, mmba yakwe ikee yoo mbai ya iruva; nawe mmbo ashekuviaa kyetana. " ⁷ Naasa nsu ulya wa Iruva arera nawe ekimaa yeenda, Kornelio kavaanga-u varundi vavii va efo kyeny kwakwe, na nsikari umwi akee nndu nsaari nnang’ani ya valya vendundyaa wo nkonu; ⁸ nawe ekimaa ivavia filya fyatanyika fyoose kavaruma veende Yafa. ⁹ Na elyi lya ndesi, veshendaa kufii vaafukye muriny, Petro kasaama ghorofeny naambo nandetereva, saa irindaru ta nsanyiny; ¹⁰ katirwa nshaa deny, kakunda shoonga; lyo kyeeri shoonga yekeekorwa kaorya, " ¹¹ kalollya efo iruveeu kurauka na kiiya kyivakye ntaraso nniini wishoolokaa, wikee nnunute na taari ta vayo iinya kikafika si; ¹² neefo ntarasony eto kwiifo findo fikee na muu fya wo ngata, fitiri marende aana, neefyo fikurufwaa si na ndeye ta nginiiu. ¹³ Naasa unyanga lukansheya immbia, “Kwiipoo Petro, shisha kwalya.” ¹⁴ Kyaindi Petro kaamba, “Oode Nndumi, shamashika nshilellye kindo kitefusu tara-fo.” ¹⁵ Unyanga llwa lukansheya lya kavii, lwiimmbiaa, “Yefyo Iruva amfyeeremuta, yewe kulafivaange mfitefusu-fo.” ¹⁶ Kindo ekyi kikatanyika kararu sele; numa ntaraso ulya ukawaryose ukawuya iruveeu. ¹⁷ Naasa kyeeri Petro etirwa nnyinyira nriminy mbwakwe, nalamanyi urango lwa efyo alollya, vandu valya valerumwa ni Kornelio, vekimaa ivesa ando mmba ya Simion ikai, vakasalala yoo mwaangony, ¹⁸ vakavaanga vakavesa kwakooya Simion avaangwa Petro mfo akai. ¹⁹ Kyeeri ekyi Petro mmbo ekeekusara mbony ta myoorye ilya. Mumuyo kammbia, “Kwiifo vandu vararu vakeekuruuya. ²⁰ Naasa kwiipoo kweende nawo nta kulatirwa nnyinyira-fo, mashika ni yeny shavaruma.” ²¹ Petro kaolokany kakooya vandu valya, kaamba, “Ni yeny mukeeshiruuya. A nkyokyi kyamweende?” ²² Vakaamba, “Ni Kornelio nshilyi, akee nndu wa usumanu, mwiindya Iruva, akee nndu atiri irina isha kwa Vayuda woose, mmbo alevavasywa ni nsu mweele, narumi vandu kwafo, kweende kyeny kwakwe, naambo needimi ikwaaranya.” " ²³ Naasa kavawarya vave veny vakwe. Naasa elyi lya ndesi, Petro kakupoo ando amwi nawo, na vandu maata va Yafa vakamwiimya. ²⁴ Elyi lya ndesi vakaafukya Kaisaria. Nawe Kornelio mmbo eevavereye, emma isanyirya va mmba yakwe na vambuya vakwe. ²⁵ Kyeeri Petro ekeeyaanga Kornelio kasomuka nandemwaambya, Kammboya yoo marendeny kyemwindya. ²⁶ Kyaindi Petro kamwiipoo, kammba, " “Salala, naakwa ni yeny ni nndu wa vandu.” ²⁷ Na ereraa indo kaanga na mmba, kalollya-fo vandu veengyi vakuumbyeu. ²⁸ Kavavia, “Yeni mwiishi nshi kindo kisumani kwa nndu Myuda netani na nndu wa ufyari lungyi, nta yaanga kwakwe-fo, lyo Iruva mmbo aleshiikyimba, shilavaange nndu moose ntefusu-fo. ²⁹ Nkyo kimaruma shasha elyi kwashivaanga, nta shilalemi; naasany, a shimuvese, nkyokyi mwashivaangya?” ³⁰ Kornelio kaamba, “Mmikonu iraru ileira, saa yei sheni, nnyo saa kyeenda, mmbo shekee kyeny kwakwa shiterevaa, kukava nndu asalala mbee yakwa, aree soori timikaa, ³¹ kaamba, ‘Kornelio, fiterewo fyafo fyammitiwa, na firaso fyafo fyankumbuwa ni Iruva. ³² Naasany, ruma vandu veende Yafa, kundevaanga-fo nndu avaangwaa Petro, nawe mmbo akee mmba ya nndu umwi avaangwaa Simion akee mwisisa shony, kufii na mbai ya iruva; nawe kansha kurere nawe.’ ³³ Llyo neeny sharuma vandu kwafo, neewe kwantana kisha elyi kwasha. Naasany yese loose mmbo lukee yaa mbee ya Iruva, naambo lwaaranyi marero moose Nndumi alekuvavasya.” ³⁴ Petro kaamba, “Nkya dede shammanya Iruva nnyatiri ikundya-fo.” ³⁵ Kyaindi wo nndu eefo wa wo isanga kantana usumanu mmbo awonaa iwaryo mmbwe. ³⁶ Irero llya alerikya vana va Israeli eshambaa Nrumi ya Nsia ya ufoo ya Yesu Kristo (yeto akee Nndumi wa woose), ³⁷ kindo ekyi yeni mukiishi, kilekwaana kulya Uyuda koose, kupookya kulya Galilaya, numaya ubatiso llwa lwa Yohane; ³⁸ mbony ta Yesu wa Nasareti, shaasa Iruva alemwaamba mafura na shia ya Mumuyo Mweele na finya, nawe karingitya efo neefo erundaa mashora mesha neeshiisa woose vekee vafote ni yeto nkasha; mashika Iruva ekee nawe. ³⁹ Neese mmbo lukee vakureekyi va mbony toose aletana kulya urukeny lwa Vayuda na kulya Yerusalemu, mbweny valemmbwaa vembammbyaa nriny. ⁴⁰ Yeu Iruva kannduta nkonu wa kararu, kanniinga imanyika, ⁴¹ nshi kwa wo nndu-fo, kuuta ni kwa vakureekyi valya vemmaa isauwa ni Iruva, mmbo yeseny, lulelya na ina nawe kyeeri kilya alemaa iruka auka kwa vafu. ⁴² Kaluvavasya luvie vandu na ikureekya sheelyi yeu mmbwe alevavasywa ni Iruva nave we mmbwe mwianduya vakee na muu na vafu. ⁴³ Yeu vakisuku woose mmbo vammbikye ukureeki, sheelyi na irina lyakwe yewo vamwirikya mmbo vashewonisaa ifwaayo kya ulyamari. ⁴⁴ Kyeeri Petro ekeerera marero yoo Mumuyo Mweele kaolokya woose valeita irero elyo. ⁴⁵ Na valya vakee varini, vakakusiryau, vakafulukyo, kya vandu woose valya valesha na Petro, elyi vandu va masanga nawo vanletyo simbo ya Mumuyo Mweele. ⁴⁶ Mashika mmbo valevaita veereraa na fishomu, neerumisha Iruva. Naasa Petro kaamba, ⁴⁷ “Ni vi yeto ashiidima iima vandu yeva vare valebatiswa na mura; vandu vambwarya Mumuyo Mweele indo kimwi sha yese? ⁴⁸ Kavavasya vabatiswa na irina lya Yesu Kristo. Llyony valentereva neengere ikaa nawo mikonu mive.”

¹ Naasany vakiloshyony ewo na Vakristo vekee kulya Uyuda vakeeta sheelyi vandu va masanga nawo vambarya kirero kya Iruva. ² Na kyeeri Petro alerwa na Yerusalemu, valya va ngata ya Kiyuda yeerina vakasalala nawe. ³ Vakallya nawe ulai vakaamba, “Mmbo kullenda kwa vandu valakee varini kwalya nawo!” ⁴ Petro kapooka irera nawo waarya-dwa, kaamba, ⁵ “Nkonu umwi mmbo shekee kulya Yafa, shiitereva, shooma, shoorya yooryeny, kiiya kikaoloka, sha ntaraso wa soori niini ikoolotwa yuuka iruveeu na taari tavayo iinya, ikashisheya. ⁶ Shaimaiya-fo shalollya findo fikee na muu fya ngata shiingyi, fya marende aana na fya ngoroshony efyo fikuruffwaa si na ndeye teefo nginiiu. ⁷ Sheeta na unyanga lushambaa, ‘Petro, kwiipoo, kushishe, kulye.’ ⁸ Shaamba, ‘Oode Nndumi mashika nkwiifo kindo kitefusu kilemmanga kaniny kakwa tarafo.’ ⁹ Unyanga luuka iruveeu lukashirouwa lya kavii, ‘Efyo Iruva anfyeremuta, yewe kulafyallwe fitefusu-fo. ¹⁰ Kindo eki kikatanyika kararu, numa findo efyo fikaviirwa na iruveeu.’ “ ¹¹ Na llya yeni ekava vandu vararu vasalali yoo mwaangony wa mmba ilya lwekai, vekee varumi kwakwa vauka Kaisaria. ¹² Mumuyo Kashivia sheende nawo, shire itirwa nnyinyira. Vanavama eva varindaru vakaenda neeny lukandeanga mmba kwa nndu yeto; ¹³ Kaloongoya shaasa alelollya nsu wa Iruva alesalala kyeny kwakwe na immbia, “Ruma vandu veende Yafa vandevaanga nndu avaangwa Simion Petro, ¹⁴ nashekuvia marero ashidimaa ikukira, yewe na mmba yafo shoose.” ¹⁵ Naasa kyeeri llepooka irera Mumuyo Mweele kavasokya shaasa alelusokya naako ni yese mapookyony. ¹⁶ Neeny shakummbwa irero llya lya Nndumi, shaasa aleamba, Yohane mmbo alebatisa na mura, lyo yeni mmbo mushebatiswaa na Mumuyo Mweele. ¹⁷ Naasany kwakooya Iruva muni finya toose ammbaniinga wo simbo ilya sheni aleluniinga yese luleirikya Nndumi Yesu Kristo, yeny mmbo shivaa sha vi shivakyane na Iruva? ¹⁸ Llya valeeta marero yoo vakamalallya sau, vakarumisha Iruva, vakaamba, “Naasa-da Iruva allyilya na vandu va masanga vakakooya yaalashika lyeende muu.” ¹⁹ Naasany na valya valenyanyaka kimaruma kya ngatara ilya ilevasheya kya mbony tilya ta Stefano, vakaipoo kyaaro vakafika Foinike, Kipro na Antiokia, nawo mmbalevambisa irero llya kuuta kwa Vayuda veni-fo. ²⁰ Llyo kyaindi veengyi vawo vekee vandu va Kipro na Krene, nawo kyeeri valefika Antiokia vakarera na Vayuda wa Kigriki, veevambisa mbony shaantu ta Nndumi Yesu. ²¹ Woko lwa Nndumi lukakaa nawo; vandu veengyi vakakusiryau, vakasora Nndumi. ²² Mbony ta vandu yewo tikashefikya Siri ya kulya Yerusalemu, vakaruma Barnaba neende Antiokia. ²³ Nawe ekifika neelolya isarya lya Iruva katirwa nnu ni nsia, kavaikyima vengere yeenda na Nndumi kya nrima deny. ²⁴ Mashika ekee nndu nsaari aishwe Mumuyo Mweele na kikusiryo; valya valekaa kyaalu kya Nndumi vakaengereka. ²⁵ Numa kauka-u keenda Tarso nanderuuya-fo Saulo. ²⁶ Eekyimaa illolya kamweende Antiokia. Naasany ando a mwaaka moose vakakaa isiriny ilya vakalosha vandu veengyi. Na vakiloshyony mmbo valevaangwa vakristo lya mapookyony kulya antiokia. ²⁷ Mikonu yeyo myeni veawuya fisuku vave vakasoka vauka Yerusalemu vakandefika Antiokia. ²⁸ Kyeeri lulekwaanannya umwi waawo kasalala, irina lyakwe ni Agabo, kaawuya kisuku na finya ya Mumuyo Mweele sheelyi shaa niini ishaa kufii ulaniny koose; nayo dede ileshaa kyeeri kya Kaisari Klaudio. ²⁹ Na vakiloshyony valya, wo umwi kiinani na ivesyo lyakwe, vakarummbwa varike ngarami yaawo kwa vanavamaye vawo vakee Uyuda. ³⁰ Vakavetana indo, vakavarikya vamiku veeteterwaa ni Barnaba na Saulo.

¹ Kwiikee fyeeri efyo fyeni mangyi Herode kasisya vandu vave va siri. ² Kawaa Yakobo mwanamaye wa Yohane na usu. ³ Na ekilollya mmbo kilesenya Vayuda kawuya itira na Petro nawe. Mikonu yeyo yekee mikonu ya mikate ilatiri ntarang’o. ⁴ Kyeeri alemaa intira kammbika kifingyony maakony a ngyulimali ta vasikari vaana vaana, vamwiise naambo numa ya pasaka nansomute neenrambikya vandu. ⁵ Naasa Petro kavikwa kifingyony. Nalyo siri ikatereva Iruva nnu kimaruma kyakwe. ⁶ Kikava kyeeri Herode ekundye imuuta-fo, kio ekyo kyeni Petro elele nnang’ani ya vasikari vavii, ekeemfinge na mise ivii, na varingyi yoo mwaangony veeringaa kifingyony ekyo. ⁷ Pari pari nsu wa Nndumi kashesalala yoo akai, sa ikamika kulya mmba, nsu wa Nndumi kantukuva yoo uvariny, kamwaanta kammbia, Kweete uviny. Mise ilya ikasuruka efo maakony ikawa si. ⁸ Nsu ulya wa Iruva kammbia, “Kwiinive, kurae fyaaru fyafo.” Katana indo. Kawuya immbia, “Raa soori tafo, kwashisora.” ⁹ Kasomuka kansora; nta nalaitumuso sheelyi ni dede kindo nsu yeto atana, we kakusara mmbo akee yorya tupu. ¹⁰ Llya valeira kiringyony kya mbee na kya kavii, vakashekooya ngiri ya minya yeaanga kulya muriny, mwaango ulya wa ngiri ukarwiika to mweni. Vakasomuka vakashekooya shia imwi, nsu ulya kanra-u. ¹¹ Kyeeri Petro alemarukya-fo, kaamba, “Ulaalu shammanya na nshushwa sheelyi Nndumi mmbo anruma nsu wakwe nasheshuuta maakony a Herode ave ando ufyari loose lwa Vayuda lushevikaa nsia.” ¹² Na kyeeri ekeekusara efyo fyoose kashekooya amfika kyeny kwa Maria, we maye wa Yohane ulya evaangwaa ni Marko; nafo kweefo vandu veengyi vesasangyi-fo veterevaa. ¹³ Nawe kyeeri alekakapa mwaango wa ngiri yeyo, kishinga kyimwi kyevaangwaa Roda kikashearanya. ¹⁴ Kyeeri alemanya ni unyanga lwa Petro, nnyalerua mbele ngiri-fo, kyeendwa ni ifura, lyo mmbo alerisha mbele, kaanga mmba kavavia sheelyi Petro mmbo asalalyi yoo mbee ya ngiri. ¹⁵ Vakammbia, “Ni ukwale lukutiri-ro!” Kyaindi we karumisha deny sheelyi niindo kikai. Vakaamba, ni nsu wakwe. ¹⁶ Petro keengera ikakapa; naasa kyeeri valenduya, vakallollya vakaawukwa. ¹⁷ Llyony alevatukya woko naambo vamalallye, kavaongoya shaasa Nndumi alemuuta kulya kifingyony. Kaamba, “Endevieny Yakobo na valya vengyi mbony eti.” Kauka-u keenda kundo kungyi. ¹⁸ Naasa kwikyikya vasikari vakeereve nnu, mmbo kyava inda kya Petro. ¹⁹ Na Herode kyeeri alennduuya nalallolye, neekyivesa-vesa varingyi valya, kavavasya vawaawa. Naasa Herode kasama kooka Uyuda kandefika Kaisaria, kakaa-fo. ²⁰ Na Herode emmiswa nnu kimaruma kya vandu va Tiro na Sidoni; vakamweengya na nrwe umwi nsi, nawo vammaa iitana na Blasto, yeto mwikallya kiria kya mangyi kyeelala, vakatereva ufoo shamashika uruka lwawo llwewonisaa shoonga yuuka urukeny, lwa mangyi. ²¹ Naasa nkonu umwi ukee n-deerye, Herode karaa masara a kimangyi, kakaa rembo kitiminy kya umangyi, karera mbee yaawo. ²² Vandu vakakapa ngaya vakaamba, “Elu ni unyanga lwa Iruva muni, nshi unyanga lwa nndu-fo.” ²³ Naasa nsu wa Nndumi kankapa, ni llya ara nalaniinga Iruva nnduma; kalyiwa nshoka, kakumba muu kafwa. ²⁴ Irero lya Nndumi lyikaengera ikwaana. ²⁵ Na kyeeri Barnaba na Saulo valemaa iinutya urundi lwawo, vakawuya vauka Yerusalemu, vakeenda veerie Yohane evangoo Marko ando amwi nawo.

¹ Na efo siriny yeyo yekee Antiokia kweefo vakisuku na velosha, nawo ni Barnaba, na Simion evaangwaa Nigeri, na Lukio nndu wa Krene, na Manaeni, veeng’anyi ando amwi na Herode, na Saulo. ² Naasa kyeeri yeva vekeevikya Nndumi miindye neetereva, Mumuyo Mweele kaamba, “Kyeshyuutyeny nng’u Barnaba na Saulo kya ishora lyillya shilevavaangya. " ³ Llyo vekimaa ikootoya na itereva, vakavaekerya maako, naambo vedimi ikweengya.” ⁴ Naasa vandu yewo veeriwa ni Mmumuyo Mweele vakandesokya na Seleukia, na kuuka-fo vakaira yeeveny vakandefika Kipro. ⁵ Na kyeeri vekee Salami vakaamba irero lya Iruva efo mmba teeterevya ta Vayuda, na Yohane kakaa nawo eevafurukannya. " ⁶ Naasa llya valemaa irummbwa Kipro shoose fika Pafo, vakalollya nndu umwi nsavi, nkisuku wa wongo, ni Myuda avaangoo Bar-Yesu. ⁷ Nndu yeu mmbo ekee na nshilyi wa Sergio Paulo, nndu atiri urango. We nshilyi yeto kavaanga Barnaba na Saulo kwakwe, nawe mmbo alekunda yaaranya Irero lya Iruva. ⁸ Llyo Elima, nsavi ulya (mashika llyo irina lyakwe kwa Kigriki) kawakyana nawe, kakunda iinduta nrima wa nshilyi ulya nare kikusiryo eki. ⁹ Kyaindi Saulo, mbwe Paulo ulaalu, eeshwe Mumuyo Mweele kamulla na unyaasi, ¹⁰ kaamba, “Ewe kwiishwe ntambo na uravi loose, mwana wa yeto Nkumbi, nkiduva wa usumanu, a ndesa nkuraa yeeveta shia ta Iruva tikee shoorotu?” ¹¹ Kyasiany, woko lwa Nndumi lukukapaa, kufwe miso kulallolyaa mwi ando a mikonu. Llya yeni nruve ukansheya na ireema misony, karunguka-runguka eeruyaa nndu mwintira woko nantetere. ¹² Naasa nshilyi ulya ekilollya efyo fyautika, kakusirya-u, efulukywaa nkya kiloshyo kya Nndumi. ¹³ Naasany Paulo na wooroye vakakwiipoo na ngalava vakafika Pafo vakeenda Perge kulya Pamfilia. Yohane kavara-fo kawuya Yerusalemu. ¹⁴ Wo vakauka Perge veshiiraa yoo nnang’ani ya uruka vakandefika Antiokia, nto muri wa Pisidia,sabato vakaanga mmba ya kiterevyo vakakaa rembo. ¹⁵ Naasa uvavaso na mbony ta veawuya fisuku tikimaa isomwa, vaniini va mmba ya iterevya vakaruma nndu kwawo navavie, nyira kwakooya mutiri kindo kisha kyevia vandu yeva, naasa muvavie. ¹⁶ Naasa Paulo kasalala kavatukya woko, kavavia, “Yeni vomi va Israeli mukeeindya Iruva shaaranyiny-te. ¹⁷ Iruva wa vandu yeva va Israeli mmbo alesauwa vande veru, kavang’anisa, kyeeri kilya vekee sha veny kulya urukeny lwa Misri, nawe kavauta-fo na woko lwakwe kavatetera. ¹⁸ Na ando a myaaka makumi aana kavasisirya nnu kulya kasa. ¹⁹ Nawe ekimaa imamita ngyufyari ta vandu mfungare kulya urukeny lwa Kanaani kavaniinga uruka elo luve ding’u yaawo ando a myaaka mayana aana na makumi araanu; ²⁰ numa ya vayo kavaniinga Valeti va myaandu fika kyeeri kya nkisuku Samweli. ²¹ Kwanuma vakatereva vavikyo mangyi; Iruva kavaniinga Sauli mwana wa Kishi, nndu wa ufyari lwa Benyamini, ando a myaaka makumi aana. ²² Na kyeeri alemaa yuuta-fo eto, kaipoo Davidi naambo nave mangyi waawo, mmbwe alenkureekya, eshambaa, ‘Shalollya Davidi mwana wa Yese nndu asenyi nrima wakwa, nawe mmbo ashetana efyo shikundye fyoose.’ ²³ Kuuka efo ufyariny lwa nndu yeto Iruva mmbo aleengye Israeli Mwikira, mmbwe Yesu, ²⁴ shaasa aledeerya kyaasa; kyeeri Yohane emmaa yoongoya vandu woose va Israeli mbony ta ubatiso lwa yaalashika, kulaore we ensha. ²⁵ Yohane nawe nalandemarisya kyaaro kyakwe, kaamba, ‘Mmbo mushikusarye yeny ni vi ndesa? Yeny nshi we-fo. Kyaindi loleny, asheshaa umwi numa yakwa shilasumani nta imwelelisya fyaaru fyakwe.’ “ ²⁶ “Vanavama vakwa, vana va ufyari lwa Abrahamu, na yewo vengyi nnang’ani yaany veindya Iruva, Irero elyi lya ukiro mmbo lyilerikwa kweru. ²⁷ Mashika valya vakee Yerusalemu na vaniini vawo, elyi kulaore valemmanya we, nta marero a vakisuku yoo asomwaa wo nkonu wa sabato, mmbo valeenutya vemutyaa uvingo. ²⁸ Na kikava mmbalelollya kiteve kyemmamita, vakatereva Pilato nawaawa. ²⁹ Nawe ekimaa iinutya fyoose filya ekeendeerye, vakamoolota kulya nriny ulya vakammbika mbangeny. ³⁰ Lyo Iruva kanduta nooke ufuny; ³¹ kalollyo ando a mikonu miingyi mmbalya alesaama nawo auka Galilaya fika Yerusalemu, vakava ulaalu mmbo vakureekyi vakwe kunu vanduny. ³² Neese ulaalu mmbo lukee imoongoya nrumi shisha ya kyaasa kilya vakuu valya valeniinngywa, ³³ kyeyaamba, Iruva mmbo aleinutya kwa vana veru kyaasa kyilya, llya aleruta Yesu; shaasa kikee kireiye kulya Saburiny ya kavii indi: ‘Yewe mmbwe Mwana wakwa inu shakwiira.’ “ ³⁴ “Na lyingyi sheelyi alenduta auka kwa vafu, nare nalawuiyase urumato, kaamba indi: ‘Nshemoraa yeni mbony sheele ta Davidi tikee dede.’ “ ³⁵ na ando engyi-da kaamba, “Nkusheraa mweele wafo nawoni irumaka-fo.” ³⁶ “Mashika Davidi ekimaa irunndya mbony ta Iruva kya kyeeri kyakwe, mmbo alefwa, kaarwa ando amwi na vandeye, kapwaa. ³⁷ Kyaindi yeu alerutwa ni Iruva nnyalepwaa-fo. ³⁸ Naasany, vanavama, mumanyi sheelyi kyeendwa ni Yesu mmbo uruka loongoywa mbony teesaryo ulyamari; ³⁹ na kyeendwa mmbwe wo nndu yeto ashemwirikyaa mmbo ashekennywaa usumanu kya findo fyoose nalashidimaa iwona usumanu efo uvavasony lwa Mose. ⁴⁰ Ulaalu loleny kilasheeva kwany kilya kilererwa ni veawuya fisuku, kyeyaamba, ⁴¹ ‘Loleny-te yeni vemina, mufulukyo neereka kulu. Mashika yeny sharunda mashora fyeeriny fyany, ishora muleshiidimaa ilyiirikya nta, naako mwoongoywa inda.’ “ ⁴² Naasa kyeeri vekee isomuka, vakavatereva vashevavia-se marero yoo-da elyi sabato ya kavii. ⁴³ Kyeeri mwindye vekee isomuka, Vayuda na valya vaalukye veengyi vakakutira na Paulo na Barnaba; vekyirera nawo, vakavavika nrima naambo vawarani neekaa na isarya lya Iruva. ⁴⁴ Naasa elyi lya sabato ya kavii, vandu veengyi nnu, kufii muri moose vakakusanyirya naambo vashearanya Irero lya Iruva. ⁴⁵ Kyaindi Vayuda wo kyeeri valelollya nsemu wa vandu vakaishwa kififi, vakakana deny marero alya alererwa ni Paulo, vellyaa ulai na yaarara. ⁴⁶ Paulo na Barnaba vakarera nookaari nnu, vakaamba, Mmbo kileva, nkuti Irero lya Iruva lyaambawa kwany yeni mbele, lyo kimmba mwalyiisityo kwaasha, neekulollya sheelyi yeni mmutinnyo mmuu wa llung’anu, naasa lolely, lweendany kwa vandu va masanga. ⁴⁷ Shamashika Nndumi aleluvia, mmbo shilekuvika kuve sa yeevaiya vandu, kuve ukiri fika fishingony fya ulana. ⁴⁸ Llya vandu va masanga valeita indo vakafura, vakarumisha Irero lya Nndumi, na valya vekee vadeesye umangyi lwa iruveeu vakakusirya-u. ⁴⁹ Irero lya Nndumi lyikakwaana urukeny lulya koose. ⁵⁰ Indi Vayuda vakaaya vaka valya vatiri nnduma vakaveva vasaari amwi na vaniini va muri, na vandu naambo vaarare Paulo na Barnaba; vakavaumbuta vauke efo minyanuny yaawo. ⁵¹ Wo vakavakukutya kiulye kya marende awo, vakaenda Ikonio. ⁵² Vakiloshyony vakaishwa ifura na Mumuyo Mweele.

¹ Naasa vekifika kulya Ikonio vakaanga mwiindeny wa Vayuda, na shaasa llya valerera, ironda iniini lya Vayuda na Vagriki vakakusiryau. ² Kyaindi llyo Vayuda valya valandealuke vakafuluta vandu va masanga vakavaishura nrima nkasha kwa valya venkusirya. ³ Naasa vakakaafo kyeeri kyaasha, vereraa na ukaari vekayo ni Nndumi, yeto alekureekya irero lya isarya lyakwe, kavalyimya ngyende na findo filandelollyo fitanwa mmbo. ⁴ Lyo yewo vekaa miriny vakaraukana; maata vakakaa kyaalu kya Vayuda na yengyi kyaalu kya Varumi. ⁵ Numa Vayuda veshaakana na vandu va masanga amwi na vaniini vawo vakakusara itannya varumii makasha. ⁶ Varumi vakawonisa mbony yeto vakarishya Listra na Derbe ikee miri ya Likonia na ngyuruka ta nnyanuny, ⁷ vakakaafo, veshaambaa Nrumi ya Nsia. ⁸ Neefo Listra kweifo nndu umwi, ekee, kitongororo uka elyo awonika kwa maye, nnta nnyemwiidima irua-rua-fo. ⁹ Nndu yeto mmbo ekee iirannya Paulo eshaamba Nrumi ya Nsia. Paulo kallola kyuumu kamanya atiri kikusiryo kya inshiisa. ¹⁰ Nrumi kakooma na na unyanga uniini, kammbia, “Salala shumu na marende afo.” Kasalala swany, kkapooka yeenda. ¹¹ Naasa nsemu ulya wikilollya filya Paulo atana vakaonisa ngyunyanga tawo vakaamba kwa Kilikaonia, Maruva allusheya vekee sha vandu. ¹² Barnaba vakamfishya Zeu, na Paulo vakamfishya Herme mashika elyi we ekeerera. ¹³ Nkohani wa Zeu eetiri mmba yeeterevya yekee yoo mbee ya muri ulya, keende ng’umbe na ngyureto na fivaro fika yoo mwaangony, kakunda iniingya firaso ando amwi na nsemu ulya wa vandu. ¹⁴ Kyeeri Barnaba na Paulo valemanya, vakarandwa soori tawo, vakaangusya yaanga kulya vanduny vakakooma, ¹⁵ vakaamba, “Nyira vomi, nkikyi elyi mwatana indi? Yese neese ni vandu va vandu kimwi sheeni moose, mmbo lwamoongoya Nrumi ya Nsia, naambo mwinduke neera mbony yeti ta tangalu, na iindukya Iruva yeu akee na muu, yeu aleumba iruveeu na ulana na yeeve-da na fyoose fiifo; ¹⁶ mmbwe yeto kasha alera vandu va masanga vasore shia tawo veni. ¹⁷ Lyo nalare nakae nalatiri ukureeki, mashika aletana mesha, kamuniinga mmbwa yakwe yuuka iruveeu, na kyeeri kya fimu, kawuutisa miri yaany shoonga na nsia.” ¹⁸ Na kwa marero yoo kikava kiroo kwawo iima nsemu ulya wa vandu ivautya firaso. ¹⁹ Kyaindi Vayuda vakasha vauka Antiokia na Ikonio vakaaya mamwingyi ulya wa vandu kutani vakapa Paulo na mawe, vakanrufwa na si fika kipoo ya muri, veekusarye mmbo ammaa ifwa. ²⁰ Llo kyeeri vakiloshony vendingitye taari toose, kasalala, kaanga na kulya muriny; na elyi lya ndesi kauka-fo, keenda ando amwi na Barnaba fika Derbe. ²¹ Naasa ekimaa yaamba Nrumi ya Nsia kulya muriny ulya, neewonisa vakiloshyony veengyi, kawuya-se na kulya Listra, Ikonio na Antiokia. ²² Vakavangisa mirima ya vakiloshyony, neevaikima vakae iirikyony lyilya, na ekyo sheelyi nkuti lwaange umangyiny lwa Iruva na mavina meengyi. ²³ Naasa vekimaa ivika vamiku va siri, na itereva ando amwi nawo neekotoya, vakavavika maakony a Nndumi yeto vankusirye. ²⁴ Vakaira yoo nnang’ani ya Pisidia vakafika Pamfilia. ²⁵ Nawo vekimaa yaamba Nrumi ya Nsia efo Perge vakaoloka vakafika Atalia. ²⁶ Naasa kuuka yoo vakeenda kyaaro kya mureny fika Antiokia. Efo mfo valeterevyo isarya lya Iruva kyeendwa ni ishora llya vemmaa ilyirunda. ²⁷ Llya valefika indi vakaumbya siri, vakavaongoya findo fyoose Iruva aletana ando amwi nawo, na kyeyaamba Iruva mmbo alemmaa iruya vandu va masanga mwango wa iirikyo. ²⁸ Vakairisha-fo kyeeri kyaasha kyaangu ando amwi na vakiloshyony.

¹ Vakasoka nafo vandu valeuka Yudaya, vakashelosha vandu sheelyi, mulanrinwa shaasa lukee uvavaso lwa Mose, mmushidimaa ikirwo-fo. ² Naasa Paulo na Barnaba vekimaa ivakyana na vandu yewo nnu, neerouwana nawo kyuumu, siri karummbwa sheelyi Paulo na Barnaba na vengyi-se nnang’ani yawo varwe na Yerusalemu kwa Varumi na vamiku va siri kyeendwa ni mbony yeyo. ³ Naasa siri ikavarika; vakaira yoo nnang’ani ya uruka lwa Foinike na Samaria, vevambisaa mbony ta yaaluka lya vandu va masanga, vandu va kikusiryo vakafura nnu. ⁴ Kyeeri valefika Yerusalemu vakawaryo ni varumi na vamiku, vakavaongoya findo fyoose Nndumi aletana ando amwi nawo. ⁵ Kyaindi vandu vave va siri ya Mafarisayo vaalukye vakasalala vakaamba, nkuti varinwa na ivavasya vatire uvavaso lwa Mose. ⁶ Varumi na vamiku vakakusanyirya naambo vedimi ikusara kindo eki. ⁷ Naasa vammaa irera findo fiingyi Petro kasalala kavavia, “Vanavama, yeni mwiishi sheelyi uka mapookyony Iruva aleshisauwa shyuuke nnang’ani yaany naambo vandu va masanga veete irero lya Nrumi ya Nsia na kana kakwa, neelyiirikya. ⁸ Na Iruva yeto eeshi mirima ya vandu kavakureekya, evaningaa Mumuyo Mweele indo kimwi sha yese; ⁹ nta nnyalevikau kilakaniso nnang’ani yeeru yese nawo-fo; kavasangya mirima yaawo na kikusiryo. ¹⁰ Naasany ulaalu nkikyi elyi mukeesa Iruva mwivikaa mario singony ta vakiloshyony mario kulaore vande veru nta yese luveni lulashidimaa iipoo. ¹¹ Kuuta elyi lwiirikye sheelyi mmbo lushekirwaa kyeendwa ni isarya lya Nndumi Yesu kimwi nsi nawo.” ¹² Naasa shila shoose ikamalallya, vakaarannya Paulo na Barnaba vevaviaa mbony ta ngyende na findo filandelolyo, Iruva alefitana kimaruma kya nrumi yaawo kwa vandu va masanga. ¹³ Naasa vekimaa imalallya na Yakobo, karouwa, kaamba, “Vanavama, nkyeshaaranyiny-te! ¹⁴ Simion mmbo aleloongoya shaasa Iruva yoo mapookyony alevaasya vandu va masanga naambo nasauwe vandu nnang’ani yaawo vave vandu vakwe. ¹⁵ Na marero a veawuya fisuku akasumana na yoo, shaasa kyikee kireiye kyeyaamba, ¹⁶ ‘Numa ya mbony yeti nshewuyaa, neeny nshetanaa se mmba ya Davidi ilya ilewunduka. Nsheitana lyingyi iwa lya vayo neeny nshisaleesaa. ¹⁷ Naambo vandu yewo valeturunya varuuye Nndumi, na vandu va masanga woose yewo irina lyakwa lyikeesendwa kwawo; ¹⁸ Nndumi aamba, yefyo uka mapookyony.’ “ ¹⁹ “Kimmba niindo neeny sharumbwa indi; lulasaveese vandu va masanga valya valealukya Nndumi. ²⁰ Lyo luvavie vakwiise na utefusu lwa maruva engyi na utuusi na nyama tikee shisasande na samu. ²¹ Mashika uka elyo kasha Mose mmbo atiri vandu vakeyaamba mbony takwe, na wo muriny na wo nkonu wa sabato tikasomwa fisomyony fya Vayuda.” ²² Naasa kyikasennya varumi na vamiku na siri shoose isauwa vandu nnang’ani yaawo neevaruma Antiokia ando amwi na Paulo na Barnaba; nawo mmbo yeva, Yuda evaangwaa Barsaba, na Sila, vekee vandu va nrwe nnang’ani ya siri. Vakareiya indi neevaningya vavarwaaye na maako awo, ²³ Varumi na vanavama vamiku, kwa vanavama veru vakee Antiokia na Shamu na Kilikia, mukee va masanga: Lwamwidikira nnuu. ²⁴ Mashika elyi luleeta sheelyi vandu maata valeuka kunu kweru mmbo valemwaatara na marero awo, vakaeveta mirima yaany, nawo nshi yese lulevaruma-fo; ²⁵ naasa lukalollya nkisha, kimmba lwammaisanda mirwe ando amwi na nrima umwi, isauwa vandu na ivaruma kwany ando amwi na vakunde veru Barnaba na Paulo, ²⁶ nawo ni vandu valemmbika muu wawo nrengeny kimaruma kya irina lya Nndumi weeru Yesu Kristo. ²⁷ Naasany mmbo lwamurumya Yuda na Sila, vashemuviaa wo veni na marero yoo meni vaambe na kana kawo. ²⁸ Mashika mmbo kilesenya Mumuyo Mweele na yese, lulavarike mario kuuta tupu yekyo kyikee kuti, ²⁹ kyeyaamba mukwiise na findo fileniingyo firaso kwa maruva a wongo, na samu na nyama tikee shisasande na samu, na utuusi. Mukankwiisa efyo, mmbo mwantana kisha. Kaeny na ufoo. ³⁰ Naasa yewo vekimaa isamwa vakasokya na Antiokia; na vekimaa isanyirya siri shoose vakavarambikya barua ilya. ³¹ Nawo vekimaa iisoma vakafura nnu kimaruma kya iviiryo muu indo. ³² Na lyingyi Yuda na Sila, kimmba wo ni veawuya fisuku vakaikima siri na marero meengyi vakavavangisa. ³³ Nawo vekikaa-fo ando a fyeeri da vakasamwa nsiri vaende na ufoo vawuye kwa yewo valevaruma. [ ³⁴ Llyo we Sila kalollya nkisha nasaefo.] ³⁵ Wo Paulo na Barnaba vakakaa kulya Antiokia, veloshaa na yaamba Irero lya Nndumi, ando amwi na vandu vengyi veengyi. ³⁶ Kwikyiira-u mikonu mive na mive Paulo kavia Barnaba, “Kyasia ulaalu luwuye lundelola siri ya wo muri kulya luleamba kirero kya Nndumi, lumanyi shaasa veefo.” ³⁷ Barnaba kakunda iipoo Yohane ulya evaangwa Marko neende nawo. ³⁸ Paulo nalasenyo imwipoo mashika llya evara kulya Pamfilia, nalaende nawo mashoreny. ³⁹ Naasa kukasha-u ngany nnang’ani yaawo kutani valakana. Barnaba kaipoo Marko vakaenda Kipro. ⁴⁰ Paulo we keepoo Sila, kakupoo, ekiterevyo ni siri nawoni isarya lya Nndumi. ⁴¹ Keera kulya Shamu na Kilikia evangisaa siri.

¹ Naasa Paulo kafika Derbe na Listra, na yoo kweiyo wa kiloshyony umwi evaangwaa Timoteo, nawe mmwana wa nka umwi Myuda ekee wa siri; kyaindi ndeye we ni Mgriki. ² Nndu yeu mmbo alekureekywa nisha ni siri ya Listra na Ikonio. ³ Paulo kakunda yeu neende nawe, kammbwarya kanrina kimaruma kya Vayuda valya vekee taari tilya; mashika woose veishi ndeye ni Mgriki. ⁴ Naasa kyeeri veke iira kulya miriny ilya, vakavaniingya mavavaso alya alevikwa ni varumi na vamiku kulya Yerusalemu, naambo nawo vaaringe. ⁵ Siri tikavanga iirikyony yelyo, yeekena lyawo lyikaengereka wo nkonu. ⁶ Vakaira urukeny lwa Frigia na Galatia, Mumuyo Mweele kaveema valasheenda Asia indeambafo irero elyo. ⁷ Vekifika kufii na Misia, vakaasa yeenda Bitinia, kyaindi Mumuyo wa Yesu mbulevaniinga mumu-fo, ⁸ vakakillya Misia vakasokya Troa. ⁹ Naasa elyi kio Paulo koorwa kindo; mmbo alelollya nndu wa Makedonia esalalyi, kantereva kammbia, “Ruuka kushelweekya kunu Makedonia.” ¹⁰ Naasa kyeeri alemaa ilolya indo, llya yeni lukakunda yeenda Makedonia, mashika yese mmbo lulelollya deny sheelyi Iruva mmbo aluvaanga-fo lundeamba-fo Nrumi ya Nsia. ¹¹ Naasa lukauka Troa na ngalava lukafika Samotrake, na nkonu wa kavii lukafika Neapoli; ¹² na kuukau lukafika Filipi, muri wa Makedonia nto muri nniini wa uruka lulya, ando Varome vasaamyi; lukakaa muriny yeu, mikonu mive na mive. ¹³ Kwikifika nkonu wa sabato lukasomuka kipoo ya ngiri, lukeenda mbaambaa ya mura, lwikusarye kulakooye luwonaa-u ando esha eterevya; lukakaa rembo lukarera na vaka veiyo. ¹⁴ Nka umwi, irina lyakwe avaangwa Lidya, ekumbaa fwana ya kinyanyari, ni nndu wa Tiatira, aindye Iruva, kalwarannya waarya, nawe nrima wakwe uleruwa ni Nndumi, navike nriminy marero a Paulo. ¹⁵ Na kyeeri alemaa ibatiswa, we na va mmba yakwe, kalwikima, kaamba, “Kwakooya dede mushilollye shikee mwiindya Nndumi, angeny kyeny kwakwa mukae-u. " Kalulelemba deny.” ¹⁶ Naasa kyeeri lwekeenda ando alya eterevya, kishinga kimwi kyetirwa mmumuyo weemanya findo, kalukooya, nawe mmbo emmbonisya vanndumi vakwe fesa shiingyi kwa ishoro elyo. ¹⁷ Kasora Paulo neese ekomaa, kaamba, " “Vandu yeva ni varundi va Iruva akee uwe, vakeelosha shia ya dede ya ukiro. ¹⁸ Katana indo ando a mikonu miingyi. Indi Paulo kasua, kainduka kavia mumuyo ulya, ‘Shakukyeemmya na irina lya Yesu Kristo, muuke.’ Kamuuka saa ilya sheni.” ¹⁹ Naasa vandumi vakwe vekilollya sheelyi mbusha yaawo ikeereka, vakatira Paulo na Sila, vakavarufwa na si fika singireny mbee ya vaniini va muri; ²⁰ vakavarwaa kwa verumbwa mwaandu, vakaamba, Vandu yeva mmbo vakeelyamara muri weru nnu, nawo ni Vayuda; ²¹ na lyingyi mmbo vakeamba mbony ta mikaaye ilakee ya usumanu kweru iwarya nta iilatya, mashika yese lukee Varome. ²² Nsemu yeto wa vandu moose ukakupoo ukavasora, verummbwa mwaandu vakavauta soori tawo na finya, vakavavasya vakapwa na filemu. ²³ Na vekimaa ivakapa ngapo niini nnu vakaveera kifingyony, vakavavasya nringyi wa kifingyony navaringe nnu. ²⁴ Ekimaa iwonisa ivavaso elyi, kavaerya efo kiryeny kya efo mmba, kavafinga na minyororo. ²⁵ Kyeeri kya kio nnang’ani Paulo na Sila mmbo veketereva Iruva na ikwimmbya fiimbo fyeerumisha, Iruva na vafungwa vengyi vevaaranya. ²⁶ Paripari kukasha kidinasi, kutani sumbai na kifingyony kyarerema, na lyimwi nsi myaango ikarwiika, fifungo fya woose fikeeleliswa. ²⁷ Nringyi ulya wa kifingyo kakupoo, nawe ekilollya myaango ya kifingyo yanrwiika, koommwa usu, kakunda ikuwaa, ekusarye vafungwa mmbo vanrisha. ²⁸ Llyo Paulo alekooma na finya, kammbia, kulakuvavise-fo, mashika yese loose luiyo. ²⁹ Kaamba taa teendwa, kakillya mmba, eererema na weerei, kawoya Paulo na Sila; ³⁰ naasa kavasomuta poo kaamba, “Vanndumi vakwa, shatana-ki ndesa naambo shikooye ukiro?” ³¹ Vakammbia, Kusirye na Nndumi Yesu, neewe kushekiaa ando amwi na va mmba yafo. ³² Vakammbia Irero lya Nndumi, we na vandu woose vakeemmba kwakwe. ³³ Kavawarya kwakwe saa ilya sheni ya kio, kavasangya fyaasha filya fyawo, kavebatiswa, we na vandu vakwe woose kyeeri ekyo kyeni. ³⁴ Kaveende mmba kwakwe, kavadeesya shoonga, katirwa ni nsia nnu, we na mmba yakwe shoose, mashika elyi ammaa ikusirya na Iruva. ³⁵ Elyi kulekya veanduya vandu vakaruma vaniini va asikari vakaamba, “Kureeyeny vandu valya veende.” ³⁶ Nringyi ulya wa kifingyo kasheruuya Paulo mbony yeti kammbia, “Verumbuya vandu mmbo varuma mbony naambo mushelotorwa, naasa ulaalu somukeny, kweengyeny na ufoo.” ³⁷ Paulo kammbia, “Mmbo valukapa mbee ya vandu woose kulare valluutya uvingo, neese mmbo lukee Varome, na lyingi vakalweera kifingyony, noolalu mmbo vakundye iluuta-fo kirisi? Oode! Nshi indo-fo, na vashe veni vasheluuta-fo.” ³⁸ Vaniini va maaskari vakarwaaya verumbuya vandu mbony ta marero yaa; nawo vakeereya, kyeeri valeeta wo ni Varome. ³⁹ Vakavalelemba; na elyi valemaa ivasomuta poo, vakavatereva vauke kulya muriny ulya. ⁴⁰ Nawo vakooka kifingyony vakaanga kyeny kwa Lidya; na elyi valemaa ikwaanannya na Siri neevakaarisa, vakakweengya.

¹ Kyeeri valemaa iira Amfipoli na Apolonia vakafika Tesalonike, na yoo kweiyo mmba ya Vayuda yeeterevya. ² Na Paulo shaasa eeshivye, kaanga na kulya vakai, kavesana neerouwana nao marero a mareiyo, ando a sabato isaru. ³ Kavarambuya mareiyo na ivaora sheelyi mmbo kyekooye Kristo nalyiso ukiva neeruka nooke kwa vafu; na kingi-se, Yesu yeu shikee moongoya yeni mbony takwe niwe Kristo. ⁴ Veengyi nnang’ani yaawo vakakusiryau, vakakulunga na Paulo na Sila; na Vagriki veirikye Iruva, veengyi nnu na vaka vatiri nnduma vekee veengyi. ⁵ Na Vayuda vakalollya kififi, vakaipoo vandu vave vakee vandu va tangalu, valatiri nnduma nsha vanduny, nawo vakaumbya vandu vakaanta kituuru kulya muriny, vakeengya vandu va mmba ya Yason, vakakunda ivarwaa mbee ya vandu va muri; ⁶ kyeeri valevatura vakaburusa Yason na vandu vengyi fika mbee ya vaniini va muri, vekomaa, vakaamba, “Vandu yeva valemfullwa ulana vamfika kunu nafo, na ⁷ Yason kavawarya; na yeva woose mmbo vakeetana findo fikeekapana na mavavaso a Kaisari, veshambaa, ‘Kwiifo mangyi ingyi avaangwaa Yesu.’ “ " ⁸ Vakaerevise nsemu ulya wa vandu na vaniini va muri llya valeita indo. ⁹ Vekimaa ivarya ikari lyuuka Yason na valya vengyi vakavalotora vakakweengya. ¹⁰ Na llya yeni Siri ilya ikarwaa Paulo na Sila Beroya elyi kio. Nawo kyeeri valefikafo vakaanga kiterevyony kya Vayuda. ¹¹ Vandu yeva vekee vafoo ngota valya va Tesalonike, mashika mmbo valewarya irero llya na nrima nsha, vakasununda mareiyo meele wo nkonu, naambo valole kwakooya mbony yeto ni indo tikai. " ¹² Veengyi nnang’ani yaawo vakakusiryau, na vaka va Kigriki vatiri nnduma, na vomi vekee veengyi. ¹³ Kyaindi kyeeri Vayuda wa Tesalonike valeeta irero lya Iruva mmbo lyikeyoongowa ni Paulo kulya Beroya, vakandefika-fo nafo vakasarya vandu neevasaveesa. ¹⁴ Kyeeri ekyo kyeni vandu va siri ilya vakarwaa Paulo mbai ya yeve, kyaindi Sila na Timoteo vakasaa-u mbele. ¹⁵ Llyo valya valeimmya Paulo kulya Atene vakawuya, nao vekaende ivavaso sheelyi Sila na Timoteo walantye Paulo uvinyadwa. ¹⁶ Kyeeri Paulo ekeevavereya kulya Atene neelollya shaasa muri ulya wiishwe mafwanu a maruva, nrima wakwe ukavava nnu deny. ¹⁷ Naasa efo mmba ya kiterevyo ya Vayuda na veindya Iruva kavesana neerouwana nawo, ando amwi na valya venlolyaa wo nkonu singireny. ¹⁸ Na Vaepikureo maata na Vaistoiko, vatiri urango, vakakwanannya nawe. Vengyi vakaamba, “Yeu ni nrung’ani, a nki akunndye yaamba?” Vengyi-se vakaamba, “Akee sheelyi ni mwaamba mbony ta maruva meny, mmashika llya ekeyaamba mbony ta Yesu na iruka lya vafu.” ¹⁹ Vakantira vakanrwaa mmba ya shila, vakaamba, Ndesa lushiidima imanya kya ufundo yelu wiiya kukeererya? ²⁰ Mashika mmbo kukeende mbony shiiya maarwiny eru, mmbo lukunndye imanyany urango lwa mbony eti. ²¹ Mashika Vaatene na veny veefo mmbeekundye imanya kindo kingyi-fo kuuta yaamba na iita mbony shiiya. ²² Paulo kasalala yoo nnang’ani kavii ya mmba ya shila kaamba, Yeni vandu va Atene, nnang’ani ya findo fyoose mmbo shilollye yeni ni vandu vekusara nnu mbony ta iindya maruva. ²³ Mashika kyeeri shekeiira efo neefo neelollya mbony ta miindye yaany, mmbo shilelollya kitara kyerasya kyikee kireiye, KWA IRUVA NALAISHIWA. Kyasiany, yeny mmbo shimuviaa mbony ta yeto mukeemwindya kulaore mumwiishi. ²⁴ Iruva yeto atanye ulana na findo fyoose fiifo, we, kimmba akee Nndumi wa iruveeu na si, nalakaa mbeny tikeeshitane na maako; ²⁵ nta nalarundyoo mmaako a vandu sheelyi mmbo akee mwaanguye nkindo mmbwe yeto aniinga woose muu na mumuyo na findo fyoose. ²⁶ Nawe mmbo alevikafo vandu va wo isanga vauka kwa yeto umwi nsi, vakee yaa ulaniny koose, kyeeri alemaa ivavikya fyeeri filya alefivavasya uka elyo kasha, na minyanu ya efo vakai, ²⁷ naambo varuuye Iruva, na kyikava ni iwara-wara, lyo vallolye, na kikava nnyakaa kwaasha neese-fo. ²⁸ Shamashika mmbo lukee na muu efo nnang’ani yakwe, lukaruarua-fo. Shaasa umwi waany, mwireiya fyaaso aleamba, Mashika yese loose mmbo lukee vana vakwe.” ²⁹ Naasany kimmba yese lukee vana va Iruva, nkivaa yese lukusare Iruva ni wa ngata ya saabu ao fesa ao iwe, nafyo mfindo fikee fipashe na urango na waarya lwa nndu wa vandu-fo. ³⁰ Naasa, fyeeri filya fya ireema Iruva mmbo aleva sheelyi nalalollye, indi ulaalu mmbo avavasya vandu woose va wo ando vakurye. ³¹ Shamashika mmbo avikye nkonu yeto asherumbuya ulana yelu mwaandu kya usumanu, kwa nndu ulya alensauwa; nawe mmbo alelyimya vandu nrima nkaari wa mbony yeti elyi alenduta auka kwa vafu. ³² Naasa vekiita mbony ta iruka lya vafu, vengyi vakamina; na vengyi vakaamba, lushekwaanyaa lyingyi kya mbony yeyo. ³³ Paulo ekimaa irera keenda kavara-u. ³⁴ Vandu maata vakakutira nawe, vakakusiryau; nnang’ani ya yewo ni Dionisio Mwareopago, na nka umwi irina lyakwe ni Damari, na vandu vengyi-da ando amwi nawo.

¹ Numa ya findo efyo, Paulo kauka Atene kafika Korinto. ² Kalollya-fo Myuda umwi avaangoo Akila, awonikye Ponto; nawe mmbo asheye auka Italia mikonu ya kufii, ando amwi na nkawakwe Priskila, ni llya Klaudio emmumbuta Vayuda woose wooke Rome, nawe kafikya kwawo, ³ na kimmba ishora lyawo lya waarya lyekee lyimwi, kakaa kwawo, vakarundya ando amwi, mashika verunda mashora eefuma meema. ⁴ Wo sabato karera efo mmba yeeterevya, naambo noomwi Vayuda na Vagriki. ⁵ Naasa kyeeri Sila na Timoteo valesoka vauka Makedonia, Paulo kavangisa nnu irero llya, ekureekyaa Vayuda kyeyaamba Yesu ni Kristo. ⁶ Vekillya nawe ulai na yaarara Iruva, kasisika soori takwe kavavia, “Samu yaany imusheye uwe ya mirwe yaany; yeny nshitiri mbese-fo, uka ulaalu mmbo nshendaa kwa vandu va masanga.” ⁷ Kooka-u kaanga mmba kwa nndu umwi avaangwaa Tito Yusto, mwiindya Iruva, nawe mmba yakwe mmbo yekee nnyanu na kiterevyo kya Vayuda. ⁸ Krispo, nniini wa kiterevyo ekyo, kakusirya Nndumi ando amwi na mmba yakwe shoose. Kyeeri Vakorinto veeta indo, nawo vakakusiryau, vakabatiswa. ⁹ Nndumi kavia Paulo na yoorya kio, kulairyee-fo, rera, nta kuladeerye-fo, ¹⁰ mashika yeny shikee neewe, nta nkwiifo nndu akupaana-fo, nyelyi yeny shitiri vandu veengyi kunu muriny yeu. ¹¹ Kakaa-fo ando a mwaka umwi na miiri irindaru eelosha-fo Irero lya Iruva. ¹² Kyeeri Galio ekee nshilyi wa Akaya, Vayuda vakaanta kituuru na Paulo, vakamweende ishenkumba, ¹³ vakaamba, “Nndu yeu mmbo akee yoomwa vandu vaindye Iruva kafisha mavavaso.” ¹⁴ Naasa Paulo ekundye itarambwa kana narere, Galio kavia Vayuda, “Kukooye kweiyo kindo kyantambo ao kikasha, yeni Vayuda, kyevaa usumanu yeny shiirikyani neeni; ¹⁵ kyaindi kwakooya ni mbony ta marero na marina na mavavaso any, Loleny efyo yeni muveni, mashika yeny nshikundye iva mwianduya findo sheefyo-fo.” ¹⁶ Kavafuna vakauka alya mbee ya kiri kilya kya mwirumbwa myaandu. ¹⁷ Nawo woose vakatira Sostene, nniini wa kiterevyo kya Vayuda, vakankapya yoo mbee ya kitima ekyo. Galio nalalollye nkindo. ¹⁸ Numa ya mbony eti Paulo keengera ikaafo mikonu miingyi numa kasamana na siri naambo neende Shamu na ngalava; na Priskila na Akila vakeenda nawe, kyeeri alemaa yuuta fii alya Kenkrea, mashika emmbika kyaasa ¹⁹ Vekifika Efeso kavatiya-fo. We muni kaanga kiterevyony kya Vayuda karera nawo. ²⁰ Lya valekunda nakee-u mmwasi we kalema; ²¹ we kalakana nawo, eshaambaa, shimuwuiyaa-se kwakooya Iruva akunda. Kasaama ngalava kooka Efeso, ²² na kyeeri alefika Kaisaria, keedikira siri, naasa kasokany na Antiokia. ²³ Naasa ekyikaa-fo mikonu mive na mive kakupoo, keera yoo nnang’ani ya uruka lwa Galatia na Frigia, muri kwi muri, ekarisaa vakiloshyony. ²⁴ Naasa Myuda umwi irina lyakwe ni Apolo, awonikye Aleksandiria, ni nndu asomyi deny, kafika Efeso, nawe ekee ntakusu wa mareiyo. ²⁵ Nndu yeto mmbo elloshwa shia ya Nndumi; na kimmba nriminy wakwe etiri nkukumo, kapooka irera na ilosha mbony ta Yesu songosiny deny; lyo we mmbo eeshi ubatiso lwa Yohane weni. ²⁶ Kapooka irera nookaari kiterevyony kya Vayuda, na kyeeri Priskila na Akila walemwiita vakanrwaa kwawo, vakallosha shia ya Nndumi nisha mmwasi. ²⁷ Na kyeeri ekundye iruuka yeeve neende Akaya, siri ikareiya, vareiye vakiloshyony barwa naambo vambwarye; nawe kyeeri efika-fo keekya nnu valya vemmaa ikusirya-u kwi isarya lya Iruva. ²⁸ Mashika mmbo evinga Vayuda nnu kyuumu vandu woose velollye, ewooraa na mareiyo sheelyi Yesu ni Kristo.

¹ Naasa kyeeri Apolo ekee Korinto na Paulo ekimaa iira ngyuruka eto ta taari ya ndoo, kafika Efeso, kakwaanannya-fo na vakiloshyo vaangu, ² kavavesa, “A mulewarya Mumuyo Mweele kyeeri mulekusiryau?” Vakammbia, “Oode, nta iita sheelyi kukaa-fo Mumuyo Mweele llulemiita-fo.” ³ Kavavesa, “A mmbo mulebatisyo ubatiso lungalu?” Vakaamba, “Ni ubatiso lwa Yohane.” ⁴ Paulo kaamba, “Yohane alebatisa ubatiso lwa ikurya ulyamari, eeviaa vandu vakusirye, yeto asheshaa numa, we Yesu.” ⁵ Vekimaa iita efyo vakabatiswa na irina lya Ndumi Yesu. ⁶ Na Kyeeri Paulo alemaa iveekerya maako Mumuyo Mweele kavaolokya; vakapooka irera na fishomu fingyi verumishaa Iruva. ⁷ Woose yewo vekee vomi ikumi na vavii. ⁸ Kaanga kiterevyony kya Vayuda, Karera na ukaari ando a miiri iraru, eereryana nawo, na yoomwa vandu kya mbony ta umangyi lwa Iruva. ⁹ Vengyi vakaumisa ngoo, vakalema ikusirya-u, vakamina shia yei vandu vengyi veiitye. Naasa kauka-u kavara-u, kavika vakiloshyony mbai, kareryana na vandu wo nkonu efo mmba ya ikwaanu ya nndu umwi avaangwaa Tirano. ¹⁰ Mbony yeti tikaenda indo ando a myaaka ivii, kutani vandu woose va Asia, Vayuda na Vagriki vaita irero lya Nndumi. ¹¹ Iruva kaora na ngyende shiingyi tiilanyi fyeeso fiingy kwa shia ya maako a Paulo, ¹² kutani vandu valoe veengyo firami na soori tooka mwiiliny wakwe, ndwari tawo tikavauka, na mimuyo mikasha ikavauka. ¹³ Vayuda maata veraaraa na vengyi ni vaanga va mimuyo mikasha vakeesa isenda irina lya Yesu kweewo vekee valammyi ni mimuyo mikasha, veshambaa, shamulyisa mboo na irina lya Yesu, ulya akee yambawa ni Paulo. ¹⁴ Veefo vana mfungare va nndu umwi avangwaa Skewa, Myuda, nkohani nniini, mmbo vetana indo. ¹⁵ Mumuyo ulya nkasha kavavia, “Yesu shamumanya na Paulo shimwiishi a yeni ni vaki?” ¹⁶ Na nndu ulya etirwa mmumuyo nkasha karumbukya vavii, kaveedima kavaringa kutani vasomuka mmba ilya veerishaa valaree soori vammbikwa na fyaasha. ¹⁷ Mbony yei ikamanyika ni Vayuda na Vagriki woose vakee Efeso, weerei lukavatira woose, na irina lya Nndumi Yesu lyikang’aniswa. ¹⁸ Na veengyi va valya venkusirya-u vakakurya veshoraa paa mashora awo. ¹⁹ Na vandu vengyi vasavi vakaipoo fitabu fyawo vakafikora na muro mbee ya vandu woose; vakakapa yeekena lya vayo, tikafika fesa fiku makumi araanu. ²⁰ Kikavaany niindo irero lya Nndumi lyileengera ivinga na finya. ²¹ Mbony yeto tikimaa itanyika, Paulo ekimaa iira nnang’ani ya Makedonia na Akaya, karummbwa shila neende Yerusalemu, eshambaa, “Shammuka-fo shivefika na Rumi nafo.” ²² Karuma-u vandu vavii nnang’ani ya valya vemfurukanyaa veende Makedonia, nawo ni Timoteo na Erasto, kyaindi we muni keengera ikaa mbele yoo Asia. ²³ Kyeeri ekyo kukakaa-fo ngatara ilakee shidu kya mbony ta Shia yei ya Nndumi. ²⁴ Mashika nndu umwi evaangwa Demetrio mfuru wa fesa na isongosia mafwanu a fesa a mmba teeterevya ta Artemi (iruva lya Kigriki lya kyika) eewonisyaa vaarya valya vawo fesa shiingyi. ²⁵ Yewo kavasanyirya na vengyi se yewo vekee va ishora elyo yeni, kaamba, “Eni vomi, mwishi usimba lweru mmbo luukye kunu ishoreny elyi. ²⁶ Na ulaalu mwiitye sheelyi nshi kunu Efeso kweni-da-fo, ni Asia koose Paulo mmbo ammeveta vandu veengyi neevainduta mirima yaawo, eshaambaa yoo akeesongosyo mmaako a vandu nshi maruva-fo. ²⁷ Nkyo kyaamba ulaalu ishora elyi lyeru nshi lyikee nrengeny yeeminwa-da-fo; kyaindi na mmba ya iruva lya kika elyo lying’ani, we Artemi, mmbo lyilolyoo nshi kindo-fo, lyisokwa itumbe lya vayo, nalyo Asia shoose na ulana loose-da mmbo valyiinndye.” ²⁸ Vekiita indo vakarooyo ni unyafi, vakaongora, veshaambaa, “Artemi wa Efeso ni nniini.” ²⁹ Muri moose ukasavaa, vandu woose vakeenda vakandefika ando kwa fitavanu veeriani, vammaa itira Gayo na Aristariko ni vandu va Makedonia veriani na Paulo. ³⁰ Paulo mmbo ekundye isanga efo vanduny yewo llyo vakiloshyony vakantira. ³¹ Vasongoru va Asia maata, valya vakee vambuya vakwe, vakaruma vandu kwakwe, vamwikimbe nalashendefika tara alya ando a fitavanu. ³² Naasany maata mmbo vekee irorongya indi na vengyi indo, mashika ironda lyilya mmbo lyemmalaluka nnu, na vengyi vawo nta mmbemanya nkyokyi kyatanyika kikaveende alya-fo. ³³ Vakaipoo Iskanda vakamuuta efo irondeny elyo Vayuda vakammbika yoo mbee ya vandu. Iskanda kavatukya woko ekundye nakukureekye woose veiitye. ³⁴ Kyaindi llya valemanya we ni Myuda vakarorongya woose ando amwi ando a saa sha ivii indi, veshambaa, “Artemi wa Efeso ni nniini.” ³⁵ Kyeeri karani wa muri alemaa imalalyisa vandu, kavavia, “Yeni vomi va Efeso, ni vi yeto nalaishi sheelyi muri wa Efeso ni nringyi wa mmba yeerasya ya Artemi, yeto ang’ani, na wa kindo kilya kiwoye kyuuka iruveeu?” ³⁶ Naasany kimmba mbony yei ilavaa imina, kyimukooye mumalalye, mulatani kindo kya kara kara-fo. ³⁷ Mashika mmbo mweende vandu yeva, mmbaleiva findo fya mmba ya iruva lyeru nta yaarara iruva lyeru lya kyikaa-fo. ³⁸ Kyasiany, kwakooya Demetrio na vaarya yewo (vetana fesa) vakee nawe vatiri irero na nndu, ando kwa yaanduya kwiiyo, na verumbuya vandu veefo, kyasia vanderingyanafo. ³⁹ Kwakooya ni mbony ya kindo kingyi kyoose, mmbo fisongosyoo ikwaanuny lya usumanu. ⁴⁰ Mashika lyo mmbo lukee nrengeny yeendekumbwa kimaruma kya iraanga yelyi lya inu, nalyo nta llyetiri kimaruma-fo; na shaasa kikai nshidimaa ikuuta mwaandu yeu-fo. ⁴¹ Elyi amaa irera indo kafinga ikwaanu llya.

¹ Ntiri ulya kyeeri ulemanda, Paulo karuma vakiloshyony vandevaangwa, ekimaa ivavavasa, kavavia nakwafo. Naasa kakwiipoo-fo neende Makedonia. ² Ekimaa iira taari yeto nevaviirya muu na marero meengyi, kaafukya Ugriki. ³ Ekimaa ikaafo ando a miiri iraru, Vayuda vensaryaa, eekundye yeenda Shamu eeshiraa mureny; karumbwa nawuye eshiraa Makedonia. ⁴ Vandu yeva vakeenda nawe, mmbo Sopatro Mberoya, mwana wa Piro, na Aristariko na Sekundo, vandu vaukye Tesalonike; na Gayo nndu wa Derbe, na Timoteo na Tikiko na Trofumu wo ni vandu va Asia. ⁵ Lyo vandu yewo vemmaa isongwa vakandeluvereya Troa. ⁶ Yese lukasaama ngalava lukeenda numa ya mikonu ya mikate ilatiri ntarang’o, lukauka Filipi, lukavakooya Troa, kyaaro kya mikonu iraanu lukakaa-fo mikonu mfungare. ⁷ Naasany nkonu wa mbee weepooka mfungare, lwikusanyirye lulye kilaayo, Paulo kavaongoya mbony, ekusarye elyi lya ndesi neende kyaaro, lyo keengera irera kafika kio nnang’ani. ⁸ Nafo kweefo taa shiingyi kulya ghorofeny lwekai. ⁹ Nsoro umwi evaangwa Eutiko, mmbo ekee yoo idirisheny karengeya karovyo nrwe, kawa ooka ghorofeny ya kararu kasherorowa ammaa ifwa. ¹⁰ Paulo kaoloka, kammboya, kankulyingilya, kaamba, “Muleereve-fo nyira, mashika muu wakwe useeri-fo nnang’ani yakwe.” " ¹¹ Kawuya isaama-se na uwe, kalya shoonga keengera irera nawo fika nraasi, llyo keendany. ¹² Vakeende nsoro ulya eifo na muu vakawuiyo mmuu kindo kilavaa yaamba. ¹³ Lyo yese lukasongwa yeenda ngalaveny, lukandefika Aso, yese lwiishi mmbo lundeipoony Paulo, ate we mmbo anrummbwa yeenda na marende. ¹⁴ Kyeeri alelufikya alya Aso, lukansaamisa lukandefika Mitilene. " " ¹⁵ Lukauka yoo na elyi lya ndesi lukashefika yoo kwiduvani na Kio; elyi lya ndesi se lukaafukya Samo, lukakaa Trogilio, suku ya kaana lukafika Mileto. ¹⁶ Mashika elyi Paulo ekundye ifika Efeso na ngalava, naambo nalashekeeyo nnu efo Asia, nnyeli ekeyaangusya, naambo nandesumana na nkonu wa Pentekoste kyikammidimika. ¹⁷ Uka yoo Mileto Paulo karuma vandu Efeso, kavaanga vamiku va siri. ¹⁸ Vekisha kavavia, " “Yeni muveni mwiishi uka nkonu wa mbee llya shilesha yaa Asia, shaasa shekee kwany mikonu myoose, ¹⁹ shiirunndyaa Nndumi shikunyiisye nnu, na misoru, na fyeeso yefyo fyoose fileshikooya kimaruma kya Vayuda. ²⁰ Nshilekwiisa shara shilavaongoya irero elyo yoose lyiveekyaa-fo, lyo shava mwivalosha paa, mmba kwi mmba. ²¹ Shikureekya Vayuda na Vagriki naambo vaindukye Iruva, na iirikya Nndumi weeru Yesu Kristo. ²² Llyo ulaalu, loleny, yeny mmbo nkeipoo kyaaro sheende Yerusalemu, shikeemfinge kunu nriminy, shilamanyaa findo fisheshikooyaa kulya. ²³ Llyo Mumuyo Mweele mmbo akee ishikureekya muri kwi muri eshambaa sheelyi ifingwa na ngatara tikee mbee yakwa. ²⁴ Llyo nta nshikusarye sheelyi muu wakwa utiri mbusha deny kwakwafo sha imaa kyaaro kyakwa na urundi llwa shilevaangyo ni Nndumi, ikureekya Nrumi ya Nsia ya Isarya lya Iruva.” ²⁵ “Ulaalu loleny, yeni moose shilemoongoya mbony ta umangyi lwa Iruva, kyeeri shileenda efo neefo, mmukishilolyaa-se kisangufo. ²⁶ Naasany mmbo nkee mukureekya moose nkonu yeu wa inu, sheelyi shitiri mbese na samu ya nndu moose-fo. ²⁷ Mashika nshilera shilamoongoya mbony ta ikunda lya Iruva-fo. ²⁸ Kwiiseny muveni, na ironda elyo nalyo, elyo Iruva alemuvika nnang’ani ya vayo naambo muve velyisalallya, naambo mwidimi iisa siri ya Iruva, yeyo aleyuura na samu yakwe muni. ²⁹ Shiishi deny sheelyi kyeeri yeny shimaa yuuka yaa, mafite a ngoroshony mmbo ashangaa-u, are alasarya ironda lyany. ³⁰ Na lyingise nnang’ani yaany muweni vashekwiipoo vandu vashambaa fyelemba vashoommwa na vakiloshyony yewo vavasore wo. ³¹ Kyasiany laleny shoovi mwimanya ando a myaaka yei iraru, kio na nsanyiny nshilera shilaikyimba wo nndu na misoru-fo.” ³² “Naasany ulaalu shamurambikya efo kwa Iruva, na kwa isarya lya irero lyakwe, yelyo lyishidimaa imuringa nemuniinga ding’u ando amwi na woose yewo vakee vailyise. ³³ Nshilelanga fesa nta saabu, nta masara a nndu-fo. ³⁴ Neeni mwiishi mukamanya maako yaa akwa mmbo alerundya filya fishitinnyi na fya valya shekee nawo. ³⁵ Yefo findony fyoose mmbo shilemoora sheelyi mukarunda mashora indi mmbo mushiidimaa yeekya vafwafwa, neekumbwa marero a Nndumi Yesu, shaasa aleamba, ‘Ni kyeni yuuta ngota iwarya.’ “ ³⁶ Kyeeri alemaa irera indo kafiirya ndi, katereva ando amwi nawo woose. ³⁷ Vakaiya deny woose, vakakulyingillya Paulo singony, vakammiminda, ³⁸ llyo verovyo nnu nriminy kimaruma kya irero llya alevavia mbakillolyaa-se kisangu-fo. Vakamwiimya vakamfita ngalaveny.

¹ Kyeeri lulemaa ilakana nawo neesama ngalava, lukafika Kosi, neelyi lya ndesi lukafika Rodo na kuukau lukafika Patara, ² lukawonisa-u ngalava yekeenda Foinike lukasaama neepoka kyaaro. ³ Lukalollya Kipro lyo lukaira yo woko umuso: Lukeenda lukafika Shamu yoo Tiro. Mashika yoo ng’u ngalava yeeru isheolotwaa mario iriye. ⁴ Lwikimaa ilollya vakiloshyony lukakaa-u ando a mikonu mfungare, nawo vakavia Paulo vaorwa ni Mumuyo Mweele naleende Yerusalemu. ⁵ Kyeeri lulemaa mikonu ilya lukaukau lukakwengya, na vandu woose ando amwi na vaka vawo na vana vawo, vakalwiimya fika kipoo ya muri, lukafirya ndi mbai ya yeeve lukatereva, ⁶ lwikimaa ilakana lukasaama ngalaveny, nawo vakawuya kwawo. ⁷ Lwikimaa kyaaro kyeru luuka Tiro lukafika Tolemai, lukeedikira siri neekaa kwawo nkonu umwi. ⁸ Elyi lya ndesi lukauka-fo lukandefika Kaisaria, lukaanga kyeny kwa Filipo, mwiamba Nrumi ya Nsia, umwi wa valya mfungare, lukakaa kwakwe. ⁹ Nndu yeu mmbo etiri vana va kika vaana valandemanya nndu ndumi, vekee veawuya fisuku. ¹⁰ Naasa kyeeri lulekaa-u mikonu miingyi, nkisuku umwi avaangwaa Agabo kasoka auka Uyuda. ¹¹ Ekilukooya kaipoo nkanda wa Paulo kakufinga we muni marende na maako, kaamba, “Mumuyo Mweele aamba ule, ‘Indi niindo Vayuda va Yerusalemu vashefingaa nndu yeu muni nkanda yeu, nawo mmbo vashemmbikaa maakony a vandu va masanga.’ “ ¹² Naasa kyeeri luleita indo, yese na vandu va ando yoo lukamwiima nalasaame na Yerusalemu. ¹³ Nalyo Paulo karouwa, “Nkyokiro mukeetana, iiya na ishiwaa nrima? Mashika, yeny na mbony ta ifingwa, mmbo shikudeesye naakwa ni iwaawa efo Yerusalemu kimaruma kya irina lya Nndumi Yesu.” ¹⁴ Kyeeri alelema kilya lulemmbia, lukamalallya, lukaamba, “Ikunda lya Nndumi lyitanyike.” " ¹⁵ Numa ya mikonu yei lukaipoo fiiya fyeru lukasaama yeenda Yerusalemu. ¹⁶ Vakiloshyony maata va Kaisaria vakeenda veryani neese, vakaipoo na Mnason, ni nndu wa Kipro, ni nndu wa kiloshyo wa kasha na mmbwe yeto lushekaa kwakwe. ¹⁷ Lukifika Yerusalemu vakiloshyony vakaluwarya na nsia. " ¹⁸ Elyi lya ndesi Paulo kaanga kwa Yakobo eriani neese, na vamiku woose veiyo. ¹⁹ Lwikimaa ivaidikira, kavavia wo kindo wo kindo Iruva aletanya vandu va masanga efo urundiny lwakwe. ²⁰ Kyeeri valemaiita indo vakaarafuma Iruva, vakammbia, “Mwanama weeru, kulollye shaasa Vayuda yewo valemwaluka vakee fiku fiingyi, kyaindi woose mmbo vatirwa nkififi nnu kimaruma kya uvavaso lwa Mose. ²¹ Nawo mmbo valemmaa ivio mbony tafo, sheelyi mmbo kukeelosha Vayuda woose yewo vakee efo masangeny engyi ilakana na Mose, kwiivaviaa valarini vana vawo-fo, nta valasore mirumwa ya Kiyuda-fo. ²² Nkyoki ekyo? Nkuti vashitaa shelyi kusheye kunu. ²³ Naasa tanany shaasa lukuviaa. Yaa kweru kwiiyo vandu vaana vavikye kyaasa na Iruva. ²⁴ Ipoo vandu yewo, kukwiilyise nawo, kuvataiye naambo vaute mirwe yaawo, naambo vandu woose vamanyi mbony toose tilya valeita kyafo nshi indo tikaifo, kyaindi yewe kumuni mmbo kukeenda ninsha neesora uvavaso. ²⁵ Kya mbony ta vandu va masanga valya valealuka, lulereiya barwa ya yoora uteteri lweru wo vakwiise ilya findo fileniingyo firaso kwa maruva a wongo, na samu, na findo fikee fisasande na samu, neekwiisa utuusi.” ²⁶ Naasa Paulo kaipoo vomi valya na elyi lya ndesi kakwilyisa ando amwi nawo, numa kaanga mmba ya Iruva kaamba mbony ya imaa mikonu yeekwilyisa, kutani kiraso kisheningywaa kimaruma kya wo umwi waawo. ²⁷ Naasa kyeeri mikonu ilya mfungare ilefika kufii isya, Vayuda valya vaukye Asia vakallollya kulya mmba ya Iruva, vakasarya vandu woose, vakantira. ²⁸ Vakaongora vakaamba, Yeni vomi va Israeli lutaraminy. Yeu mbwe nndu ulya alooshaa vandu woose wo ando vafulute vandu veru na uvavaso lweru na ando yaa. Lyingyi, mmwasi yeefyo, mmbo aleata Vagriki mmba ya Iruva, katefusa ando yaa kweele. ²⁹ Mashika mmbo alelollya Trofumu, Mweefeso ando amwi nawe kulya muriny, mbwe yeto valekusara Paulo mmbo alemwaata mmba ya Iruva. ³⁰ Muri moose ukasavaa, vakakusanyirya uviny, vakatira Paulo, vakamrufwa na si, vakamuuta efo mmba ya Iruva, llya yeni myaango ikaraywa. ³¹ Kyeeri vekeruuya shia ya imbwaa, mbony tikafikya nnini umwi wa vasikari kyeyamba Yerusalemu mmbo yammushana shoose. ³² Naasa keepoo askari na vashilyi kavasora swany. Nawo elyi valollya vasikari na nshilyi waawo vakamanda ikapa Paulo. ³³ Naasa nshilyi yeto na vasikari kasha, kantira kavavasia nafingwa na mise ivii, kavesa, “Ni vi yeu? A nkyokyi atana?” ³⁴ Vengyi va mamwiingyi yeto vakaongora yeva indi na vengyi ekyi. Naasa ekilemwa imanya kimaruma kya kyoorongye kilya, kavavasya neendwa kulya turuveny ya vasikari. ³⁵ Kyeeri Paulo alefika ando kwiyoo fitere, vasikari vakaipoo Paulo mashika a finya ya mamwiingyi ulya. ³⁶ Mashika ironda lyilya mmbo lyekeesora, vekapaa kyoorongye na yaamba, “Utau nndu yeu.” ³⁷ Nawe kyeeri ekeendwa kulya turuveny; Paulo kavia nshilyi ulya wa vasikari, “A shitiri mumu wekuvia kindo ndesa?” Nawe kammbia, “Kwiishi Kigriki?” ³⁸ A yewe nshi Mmisri ulya mikonuny yei aleriingya vandu valya fiku fiina, vakavaangwa veewaa, kavatetera fika kasa nng’alo? ³⁹ Paulo kammbia, “Yeny ni nndu wa Kiyuda, nndu wa Tarso, muri wa Kilikia, nndu wa muriny ulakee n-du. Shakutereva shiniinga mumu shirere na vandu yeva.” ⁴⁰ Naasa ekinninga mumu, Paulo kasalala alya fitereny, katukya vandu valya woko. Kyeeri valemalallya sau, karera nawo kwa Kiebrania.

¹ Kaamba, “Yeni vomi, vanavama vakwa na vande vakwa, kye shaaranyiny shiireraa kyakwa shimuni yaa mbee yaany ulaalu.” ² Vekiita mmbo akeerera nawo kwa Kiebrania vakaengera isyado, kaamba, ³ “Yeny ni nndu wa Kiyuda, shiwonikye Tarso, muri wa Kilikia, lyo mmbo shilelyo yaa muriny yeu, marendeny a Gamalieli shaloshwa mavavaso a vande veru nisha nnu, sha nndu wa usasari kwa Iruva shaasa yeni muvekai inu. ⁴ Shalyisa vandu va Shia yei ya Nndumi ukiva neevawaa, shavarwaa kifingyony, ee, vomi na vaka. ⁵ Shaasa na Nkohani Nniini eshidimaa ishikureekya, na vamiku va ikwaanu woose-da, yewo shilewarya barua kwawo naambo shirwaye wooroye vawo, sheenda Dameski, naambo shindeende yewo veefo vashe Yerusalemu, vekee veenive naambo vasheorotwa.” ⁶ “Naasany kyeeri sheenda, kufii shifike Dameski, kyeeri kya nsanyiny mwi usimbiki, paripari sa niini ikooka iruveeu ikashiringitya taari toose. ⁷ Shawa si, sheeta unyanga lushaambaa, ‘Saulo, Saulo nkikyi elyi kukeeshivavisa?’ ⁸ Sharouwa, ‘A ni yewe vi Nndumi?’ Kashivia, ‘Yeny ni Yesu wa Nasareti, yeto yewe kukeemmbavisa.’ ⁹ Valya vekee neeny valelollya sa ilya lyo mmbaleita unyanga lwa yeto alerera neeny-fo. ¹⁰ Naasa shaamba, ‘A shatana inda Nndumi?’ Nndumi kashivia, ‘Salala kwaange Dameski, neefo kushevioo findo fyoose fikee fivavasye kutani.’ ¹¹ Na kyeeri shilelemwa ilolya kimaruma kya itumbe lya sa ilya, shateterwa ni maako a valya vekee neeny shaanga Dameski.” ¹² “Naasa nndu umwi evaangwaa Anania, nsaari wa isora mavavaso, akee nkureekye mesha ni Vayuda woose va efo, ¹³ kashisheya kasalala kufii neeny, kashivia, Mwanama Saulo, lola, ‘Shamwipoiyo miso akwa sa ilya sheni.’ ¹⁴ Kaamba, ‘Iruva wa vande veru mmbo alekusauwa yewe kukooye imanya filya akundye, neelola yeto muni usumanu, na yaaranya unyanga lushuukaa kaniny kakwe. ¹⁵ Mashika mmbo kushevaa nkureeki wakwe kwa vandu woose, wa findo efyo kulelollya neefiita. ¹⁶ Naasa ulaalu nkyoki kukeevera? Salala kubatiswa, kusangyo ngyulyamari tafo, kwiivangaa irina lyakwe.’ “ ¹⁷ “Naasa kyeeri shewuya Yerusalemu, shiiterevaa efo mmba ya Iruva, shava sheely shikee yuuma, ¹⁸ shallolya Nndumi nawe kashivia, ‘Uka yaa Yerusalemu uviny, mashika mmbasheirikyaa ukureeki lwafo kya mbony takwa-fo.’ ¹⁹ Neeny shaamba, ‘Nndumi, wo veeshi sheelyi yeny mmbo shevikaa kifingyony valya vakekukusirya neevakapa efo mmba toose teeterevya. ²⁰ Na samu ya Stefano nkureeki ulya wafo kyeeri ilepusuwa, neeny nyoo mbai shesalalyi, sheerikya, neeringa soori ta valya valemmbwaa.’ ²¹ Nawe kashivia, ‘Enda, mashika yeny nshekurumaa kweende kwaasha kwa vandu va masanga.’ “ ²² Vakamwaranya kafikya irero elyo, vakaongora, vakaamba, “Muute yaa urukeny, mashika nkivaa nakee na muu-fo.” ²³ Kyeeri vekee irorongya na yeereera soori tawo na ifwalafwala kiluulyi uwe, ²⁴ nshilyi ulya wa vasikari kavavasya Paulo neendwa kulya turuveny, kaamba naveswa mbony takwe ekapwaa na ngova, naambo namanyi na kimaruma vakankapya kyorongye indo. ²⁵ Vekimaa imfinga na kyoove, Paulo kavia nshilyi ulya ekee kufii nawe, “A ni kindo kya usumanu ikapa nndu Mroma indi kulore anrumbuyo mwaandu?” ²⁶ Nshilyi ulya aita indo keenda kandevia nshilyi ulya nniini, “Nkyoki kukundye itana? Mashika nndu yeu ni Mroma.” ²⁷ Nshilyi nniini kasha, kammbesa, “Nkyeshivia, yewe ni Mroma?” Kaamba, “Yee.” ²⁸ Nshilyi yeto nniini kammbia, “Yeny mmbo shilewonisa Uroma na shia ya fesa shiingyi.” Paulo kaamba, “Neeny mmbo shekee Nroma kwa iwonika.” " ²⁹ Naasa valya vekundye immbesa vakanrau vakeenda. Na nshilyi ulya nniini nawe keereya, llya alemanya ni Mroma, mashika a llya alemfinga. ³⁰ Elyi lya ndesi ekundye imanya songosiny, ni kwa kiteve-ki Vayuda vakashenkumba, kamporomwa, kavavasya vaniini va makuhani na shila yaawo shoose vavike ikwaanu. Kaolota Paulo, kammbika yoo mbee yaawo. "

¹ Paulo kalola vandu va ikwaanu elyi karii, kaamba, “Vanavama, yeny shitiri nrima mwaa mmbo shilekaa mbee ya Iruva fika inu.” ² Nkohani nniini we Anania kavavasya valya vakee kufii nawe vakape Paulo kana. ³ Llyo na Paulo kammbia, “Iruva akukapaa neewe, yewe kuvakye isimamba likee yaambe yeela. Yewe mmbo kwakaa rembo kushiutye uvingo kisumani na mavavaso, neewe kwawuya yaamba shakapwa kilasumani na mavavaso?” ⁴ Valya vesalalyi kufii vakaamba, “A mmbo kushaararaa nkohani nniini wa Iruva.” ⁵ Nshamanya-fo nyira, sheelyi we ni nkohani nniini-fo; mashika lyo kyikee kireiye, kularere nnini wa vandu vafo kikasha-fo. ⁶ Llyo Paulo alemanya ikyenga lyimwi ni Vasadukayo, neelyo lyingyi ni Vafarisayo, kaonisa unyanga alya ikwaanuny lyilya kaamba, “Nyira vanavama vakwa, yeny mmbo shikee Mfarisayo mwana wa Mfarisayo, yeny shikee yuutywa uvingo kyeendwa ni iirikyo lya iruka lya vafu.” ⁷ Ekimaa irera indo kukasha-u ulai nnang’ani ya Vafarisayo na Vasadukayo, ikwaanu lyikatarakana. ⁸ Mashika Vasadukayo wo mmbo vaamba nkwiifo iruka lya vafu-fo, nta vasu-fo, nta mumuyo-fo, kyaindi wo Vafarisayo mmbo veerikye efyo fyoose. ⁹ Kukasha-u kyoorongye kiniini. Vaarya va fitabu valya maata va taari ya Vafarisayo vakasalala, vakaumburana vakaamba, “Llulollye ukasha loose kwa nndu yeu-fo; kyaindi kwakooya Mumuyo ao nsu anrera nawe, ni indaany?” ¹⁰ Llya raa niini ileshau, nshilyi ulya wa vasikari katirwa nnyinyira, valasheenratwa, kavavasya vasikari vaoloke vanturushwe efo maakony awo, vamweende kulya turuveny. ¹¹ Kio kilya Nndumi kasalala kufii nawe, kaamba, “Tira nrima nkaari; mashika, shaasa kuleshikureekya kunu Yerusalemu, kikukooye kushikureekye indo indo na kulya Rome.” ¹² Kyeeri kulekya, Vayuda vakasanga ando amwi, vakalya mboo, “Kyeyaamba mmbalyaa nta inafo kutani vawaa Paulo. ¹³ Neewo valelyiiyana mboo indo vefikye vandu mwasi ya makumi aana.” ¹⁴ Naasa vakeenda kwa Vakohani vaniini na vamiku, vakaamba, “Mmbo lwankufinga na mboo, llukombaa nta kindo-fo kutani lwawaa Paulo. ¹⁵ Naasa yeni ando amwi na vamiku va ikwaanu vieny nniini wa vasikari namoolote alya si kwany, kive sheelyi mmbo mukundye imanya mbony takwe nisha mwasi, neese lukudeesye immbwaa nalandefika-u.” ¹⁶ Nndu umwi mwana wa mfwamaye wa Paulo ekiita kyama ekyo keenda kandekivia Paulo kulya turuveny ilya. ¹⁷ Paulo kavaanga nshilyi umwi kammbia, “Rwaa nsoro yeu kwa nshilyi wa vasikari, mashika atiri kindo kyemmbia.” ¹⁸ Naasa kamwiipoo kandenrwaa kwa nshilyi ulya wa vasikari, kammbia, “Mfungwa ulya avangwaa Paulo mmbo ashivaanga naambo shikweengye nsoro yeu mashika atiri kindo akundye ikuvia.” ¹⁹ Nshilyi ulya nnini kantira woko kanrwaa mbai, kammbesa kirika, “Nkyokyiro ekyo kukundye ishivia?” ²⁰ Kaamba, “Vayuda mmbo valefisha kyama vakutereve koolote Paulo ndesi, kundemmbika alya mmba ya shila, kive sheelyi vakundye imanya mbony takwe nisha mmwasi. ²¹ Naasa yewe kulairikye-fo, mashika vandu mwasi ya makumi aana mmbo vafishye kyama ando amwi vakalya mboo vare valalya nta ina kutani vawaa Paulo. Ulaalu mmbo vankudeesya iinutya kyaasa kyawo.” ²² Naasa nshilyi ulya kara nsoro ulya keenda, embavasaa, “Kulavie nta nndu umwi-fo sheelyi kwanshivia mbony yeyo-fo.” ²³ Kavaanga vashilyi vavii kavavia, “Deesyeny askari mayana avii veende Kaisaria, na askari makumi mfungare va frasi, na va mafumu mayana avii, saa isaru ta kio. ²⁴ Deesyeny na frasi musaamisefo Paulo, munrwaa waarya nafike kwa Feliki nshilyi wa uruka.” ²⁵ Kareiyany barwa indi, ²⁶ “Ni yeny Klaudio Lisia shakureiya Mwiitori Feliki mmbee, shakwidikira. ²⁷ Nndu yeu mmbo aletirwa ni Vayuda vakasia immbwaa, llyo sheenda na itorito lya vasikari shandemuuta, kyeeri shileeta sheelyi we ni Mroma. ²⁸ Llya shilekunda imanya kikumbo vanriiye, shamweende mmba yeerumbuya myaandu. ²⁹ Shakooya ate mmbo vakeenkumba kimaruma kya mbony ta uvavaso lwawo, nta nnyakeekumbwa kimaruma kya irero lyoose lyinkooye nawaawa-fo, nta ifingwa-fo. ³⁰ Fika kyeeri shileeta sheelyi kwiifo ntambo vatiri uwe yakwe, shalollya nkuti shimweeende kwafo swany, shavia na valya venkapa vasheamba mbony tawo mbee yafo. Nakwafo mbe!” ³¹ Naasa vasikari valya vakakurika Paulo shaasa valevavasyo, vakafika kwa Antipatri kio; ³² elyi lya ndesi vakara veesama frasi vanrwaa, wo vakawuya kulya turuveny. ³³ Nawo kyeeri valefika Kaisaria, neeningya Mwitori wa uruka barwa ilya, vakafita Paulo mbee yakwe. ³⁴ Ekimaa iisoma kavavesa, “Nndu yeu ni wa taari ingai?” Kyeeri alevywa ni wa Kilikia, ³⁵ kaamba, “Yewe mmbo shikwaaranyaa kyeeri valya vakeekukumba vashaa.” Kavavasya naringwa nakee kulya mmba ya mwitori ulya Herode.

¹ Kwiikisia mikonu iraanu, Anania, we Nkohani nniini, kaoloka ando amwi na vamiku vave, na nreri umwi Tertulo, nawo vakavia mwitori wa uruka mbony ta Paulo. ² Nawe Tertulo kyeeri alevaangwa kapooka irera indi kyenkumba, “Kimmba lukeewonisa ufoo wiingyi kwa finya yafo, Feliki mmbee, neelyi kusalallye findo fyoose naambo fyeende nisha kunu vanduny veru, ³ mmbo lukeewarya efyo fyoose na kyaanu wo kyeeri na wo ando. ⁴ Kyaindi shakutereva kulasue, lyo kulwaaranyi marero maangu kwi isarya lyafo. ⁵ Mashika mmbo lulollye nndu yeu ngata, alepooka uriingyi kwa Vayuda ulaniny koose, na lyingyi we ni nrwe wa siri ta Vanazorayo. ⁶ Na kingi-se mmbo alekunda itefusa mmba ya Iruva lukantira. [Lukakunda imuutya uvingo kisumani na uvavaso lweru. ⁷ Indi Lisia nshilyi nnini wa vasikari kasha, kamuuta maakony eru na finya, ⁸ kavavasya valya valenkumba vashe kwafo.] Yewe kumuni kwammbesa-vesa nkuti kumanyi mbony yeto lwankumba nato yese.” ⁹ Vayuda nawo vakankumba kya mbony yeto sheni. ¹⁰ Na llya Mwitori wa uruka aletukya Paulo narere, karouwa indi, Kimmba shiishi shamanya yewe mmbo kukee mwirumbuya vandu va uruka yelu kwa myaaka miingyi, mmbo shikeerera kyakwa shimuni na nrima wa ifura nnu. ¹¹ Mashika kushidimaa imanya sheelyi nkwaleirau mwasi ya mikonu ikumi na ivii uka kyeeri shilerwaa na Yerusalemu indeendya Iruva. ¹² Vandu yeva mmbaleshilollya kulya mmba ya Iruva-fo, nta shireraa na nndu moose, ao sheende mwaandu ikwaanuny nta efo kiterevyo kya Vayuda nta efo muriny-fo. ¹³ Nta wo mmbashidimaa iringisya mbony yeti vasheshikumba nato-fo. ¹⁴ Kuuta lyo kwiifo kindo kimwi, kyo kuti shikyiirikye, Shia yei ya Nndumi wo vakeiivanga ni ngula, niindo shikeindya Iruva yeu wa vakuu veru, shivikye nsia, mmbo firiani na uvavaso na fikee fireiye efo fitabuny fya vakisuku. ¹⁵ Shivikye nsia efo kwa Iruva, shaasa nawo vavikye nsia, sheelyi kushekaa-fo iruka lya vafu, kwa yewo va usumanu na valakee va usumanu. ¹⁶ Neeny mmbo shikekwishivira yoo ufundony yelu naambo nrima wakwa ulawonise usakiro mmbee ya Iruva na mmbee ya vandu vengyi mikonu myoose. ¹⁷ Numa ya myaaka miingyi mmbo shilesha naambo shuutye vandu vakwa firaso na fyeeningyoo. ¹⁸ Lyo wo valeshilollya mmba ya Iruva shirundya findo yefyo, shamma iilyiswa, nta nsherye ironda lya vandu nta yaatara-fo; kyaindi lyo kweifo Vayuda maata valeuka Asia, ¹⁹ kyikavaitikya wo veni vafike yaa mmbee yafo isheshikumba, kwakooya vatiri kirero kyoose neeny. ²⁰ Ao vandu yeva wo veni vakureeke, nkyoki valellollya shirengya llya shilesalala alya mwaanduny, ²¹ kuuta tupu ni kimaruma kya unyanga elo lumwi, kyeeri shilefua shisalalyi nnang’ani yaawo, shaamba, “Kyeendwa ni ufundo lwa iruka lya vafu nkyo kyeengye shautyo uvingo yaa mmbee yaany inu.” ²² Feliki kaveerikisa, mashika we eishi mbony ta Shia yei ya Nndumi nisha mmwasi kaamba, “Lisia nniini wa vasikari kyeeri ashesokaa na kunu llyo nshemurumbuyaa mbony yeti tany. " ²³ Kavavasya nshilyi ulya sheelyi Paulo naringwa; naniingwa na uleke, nta kulave nndu aima umwi wa vambuya vakwe imfurukannya.” ²⁴ Kwikyisia mikonu mive, Feliki kasha ariani na nkaakwe Drusila akee Myuda, karuma Paulo nandevaangwa naambo nawe nashaaranya mbony ta kikusiryo yekyo kya Yesu Kristo. ²⁵ Na Paulo elyi ekeaamba mbony eto ta usumanu, na iva na mwiyanu, na mwaandu wefurumya, Feliki kairyaa, karouwa, " “Ulaalu enda mbele neeny shallollya mwaanya shikuvangaa lyingyi.” ²⁶ Na kingi-se kavika nsia kulakooye Paulo anningaa fesa; kweekyo kammbaanga lyingyi-se eerera nawe. ²⁷ Myaaka ivii ikiira, Feliki kawarya Porkio Festo nashillye ando akwe. Na kimmba Feliki eekundye ikundya Vayuda kara Paulo nengere ikaa kifingyony.

¹ Naasa kyeeri Festo alemaa yaanga mashoreny a witori lwa uruka, kukasia mikonu iraru nsi nawe kasaama Yerusalemu auka Kaisaria. ² Nkohani nniini na vaniini va Vayuda vakammbia mbony ta Paulo, vakantereva, ³ naambo navairikye naute ivavaso Paulo neendwa Yerusalemu, naambo vammboye neemmbwaa efo shia. ⁴ Kyaindi Festo kavarouwa sheelyi Paulo mmbo akeeringyo kulya Kaisaria, nawe muni nkufii neendefo. ⁵ Kawuya kaamba, “Vasongoru vashe veende ando amwi neeny indenkumba kwakooya kwiifo kiteve uwe ya nndu yeu.” ⁶ Ekimaa ikaa kwawo mikonu irindaru ao nyanya indo nsi, kasoka na Kaisaria, elyi lya ndesi kakaa rembo kitiminy kya mwaandu kavavasya Paulo neendwa. ⁷ Kyeeri alesha, Vayuda valya valesoka vauka Yerusalemu vakasalala kufii nawe vakeende fikumbo fiingyi firoo uwe yakwe, valashiidimaa nta yaasumanisa. ⁸ Paulo ekuringaa kaamba, “Yeny nshileimbwa mavavaso a Vayuda-fo, nta mmba ya Iruva-fo, nta a Kaisari-fo.” ⁹ Kyaindi Festo we ekundye ikushiisa kwa Vayuda karouwa paulo, kaamba, “A kukundye iwuya Yerusalemu kunderumbuyofo mwaandu yeu mmbee yakwa?” ¹⁰ Paulo kaamba, “Yeny mmbo shisalalyi yaa mmbee ya kitima kya mwaandu kya Kaisari, ng’u ando kusumani ishaanduya, nshilelyamarya Vayuda kindo-fo, shaasa neewe kuveishi ninsha. ¹¹ Naasany kwakooya shilyamarye, ao kwakooya shitannyi kindo kishisumanyi ifwa, nshilemaa ntafo, lyo kwankooya nshi kya dede ikumbwa elyi, nkwiifo nndu ashidimaa ishivika maakony awo-fo. Mwaandu wakwa weende mbee kwa Kaisari.” ¹² Festo ekimaa irera na vandu va ikwaanu lyilya, karouwa kaamba, “Mmbo kwakunda yeenda mmbee kwa Kaisari-sho! Ra kweendeny kwa Kaisari.” ¹³ Kwikyiira mikonu mive, mangyi Agripa na Bernike vakasha Kaisaria, vakaidikira Festo. ¹⁴ Vekikaa-fo mikonu miingyi Festo koongoya mangyi Agripa mbony ta Paulo, kaamba, “Kwiiyo nndu umwi yaa alerewa ni Feliki kifingyony; ¹⁵ nawe kyeeri shekee Yerusalemu vaniini va Makohani na vamiku va Kiyuda vakashivia mbony takwe, vakakunda shinrumbuye mwaandu. ¹⁶ Shavavia sheelyi nshi mbuka ya Varome irummbwa mwaandu wa nndu kulore ankwaanya na valya venkumba-fo, naonise mwaanya wa ikureeka kyakwe muni. ¹⁷ Naasa kyeeri valekwaananya yaa nshileirisha-fo, kyaindi elyi lya ndesi shakaya kiri kya yaanduya myaandu shavavasya nndu yeto neendwa. ¹⁸ Na valya venkumba kyeeri valesalala mbaleende nta irero lyimwi ikasha, shaasa sheekusarye-fo. ¹⁹ Kuuta tupu elyi valeende marero engyi akwaani na kikusiryo kyawo veni na mbony ta nndu umwi avaangwaa Yesu, nawe alemmaa ifwa, na Paulo karingisya sheelyi eefo na muu. ²⁰ Neeny shatirwa nnyinyira shaasa shiwonisa udede lwa mbony yei, shammbesa kwakooya akundye yeenda Yerusalemu nadeanduyo-fo mwaandu kya mbony yeti.” ²¹ Paulo kakunda mbony yeti tisherumbuwa ni Kaisari, shavavasya naringwaa shitani shanrwaa kwa Kaisari. ²² Agripa kavia Festo, “Naakwa ni yeny shilanje yaaranya nndu yeu.” Kammbia, “Ndesi kumwiitaa.” ²³ Elyi lya ngama Agripa na Bernike vakasha na utore wiingyi, vakaanga ando earanya mbony na vashilyi vaniini va vandu na vaniini va muri, Festo koota ivavaso Paulo nandeendwa. ²⁴ Festo kaamba, “Mangyi Agripa, na yeni moose mukee yaa ando amwi neese, mulolye nndu yeu, nawe ufyari loose lwa Vayuda na kulya Yerusalemu na va yaa valekunda shivaekye, vekapaa kyoorongye na yaamba nnyasumani ikaa na muu-fo. ²⁵ Kyaindi lyo yeny shilelollya nnyatanyi kindo kinkooye nawaawa-fo. Nawe muni kyeeri alekunda nandeanduyo ni Kaisari, shakunda inrwaa kwakwe.” ²⁶ Neeny efo mbony yeti takwe nshitiri nta irero lyimwi lyoorokye lyereiya-fo. Naasany llyo shamweende yaa mmbee yaany, na mwaasi mmbee yafo yewe Mangyi Agripa, naambo kammaa isunundwa shiwoniny irero lyeereiya. ²⁷ Mashika shilollye mmbo kivaa kindo kilatiri nrwe kwakooya sharwaa mfungwa na mmbee kulaore shoora na ikumbwa akee nkumbe nalyo.

¹ Agripa kavia Paulo, “Ulaalu kutiri muumu wa yaamba marero afo.” Naasa Paulo kaorwa woko lwakwe, kakureeka-u kyakwe indi, ² “Nriminy wakwa shikwiitye shitiri ngoma, Mangyi Agripa mmbee, mashika elyi shikukureekyaa shimuni mmbee yafo inu, kya fyoose fyilya Vayuda vakeeshikumba nafyo. ³ Mmwasi deny mashika elyi yewe kwiishi nnu mukee na fiveso fyoose fya Vayuda; kimmba niindo shikutereve kushaaranyi na usisiryo. ⁴ Mashika Vayuda woose veeshi mbony ta muu wakwa ukya ukoo lwaka shaasa muu wakwa wekai ukya mapookyony shikee na vandu vakwa kulya Yerusalemu, ⁵ vakashimanya nnu uka mmbee, kwakooya vakundaa iirikya sheelyi shikee Mfarisayo kwa isora miloshye yeeru ilatiri ivara. ⁶ Naasany ulaalu mmbo shasalala yaa shaanduyo kimaruma kya ivika nsia kya kyaasa kilya kya vande veru valeniingwa ni Iruva, ⁷ ekyo ngyufyari teru ikumi na ivii vavikye nsia ishekiwarya, veshiindyaa Iruva na usau kio na nsanyiny. Neeny mmbo nkeeringyo ni Vayuda kimaruma kya vayo, woi Mangyi. ⁸ A dede nkikyi elyi kwany kyilollyo ni kindo kilavaa iirikya, sheelyi Iruva aruta vafu? ⁹ Dede lyo yeny shimuni shilelollya nkuti shitani findo fiingyi fikapanaa na Irina lya Yesu wa Nasareti; ¹⁰ shatana indo kulya Yerusalemu; shafinga veele veengyi shivavikaa kifingyony, kyeeri shileningwa ivavaso ni vakohani vaniini, na kyeeri valewaawa ni yeny shilekureekyany. ¹¹ Na keengyi nnu shevakapya efo mmba ta Vayuda teeterevya, shavaitikya yaarara Iruva, shavatirya unyafi sha nndu asukwaa, shavavavisa shafika miriny ya kwaasha.” ¹² “Naasa ishoreny elyi nkonu umwi shishendaa Dameski, shitiri wiidimi na ivavaso lya vaniini va Vakuhani; ¹³ Woi Mangyi, lyo kyeeri mwi usimbiki shikee efo shieny ya Dameski shalollya saa niini yuuka iruveeu, iilanyi sa ya mwi, ikashimikya, ando amwi na valya sheriani nawo. ¹⁴ Loose lukawa si, sheeta unyanga lureraa neeny na kishomu kya Kiebrania, ‘Saulo, Saulo, nkikyi elyi kukeeshivavisa? Ni kyuumu ikapa mwiisi wafo inanga.’ ¹⁵ Neeny shaamba, ‘A ni yewe vi Nndumi.’ Nndumi kashivia, ‘Yeny ni Yesu yeu yewe kukemmbavisa. ¹⁶ Llo kwipoo kusalale na marende afo, mashika mmbo shakusheya kwa kimaruma eki, shikuvike kuve nkureeki wa findo efyo fyoose kulelollya, na kwa findo fyoose efyo nshekusukuyaa numa. ¹⁷ Shikukire na vandu vafo, na vandu va masanga, yewo nshekurumaa kwawo; ¹⁸ kuvatarammbwe miso, na ivaalasha vauke ireeminy na iindukya sa, vare finya ya mmbishwa nayiindukya Iruva; naambo vaonise ifwaayo ulyamari lwawo, na iwonisa ding’u ya yewo vailyise kimaruma kya kikusiryo ekyo kyakwa.’ “ ¹⁹ “Naasany, woi mangyi Agripa, nshilekarya imina moorya yoo a iruveeu-fo. ²⁰ Nkyo mbele shandeongoya valya va Dameski na Yerusalemu, na uruka loose lwa Uyuda, na vandu va masanga, sheelyi vakurye vaindukye Iruva, vatani findo fiinani na ikurya lyawo. ²¹ Kimaruma kya efyo Vayuda vakashitira shikee mmba ya Iruva vakaesa ishiwaa. ²² Naasa kimmba shilewonisa ngarami yuukye kwa Iruva nkyo shiselelyi-u fika inu, shikureekye woose vaniini na vadu, nta nshishambaa-u kindo-fo kuuta efyo filererwa ni vakisuku na Mose, kyeyaamba fisheshaa; ²³ sheelyi Kristo nkuti nalyiswa ukiva nafwe mbele naruke auka kwa vafu naambe mbony ta sa kwa vandu vakwe woose na kwa vandu va masanga.” ²⁴ Kyeeri ekerera indi, Festo kammbia, na unyanga uniini, “Paulo mmbo kutirwa ni ukwale? Isoma lyafo nnu mmbo lyilekufullwa nrwe.” ²⁵ Kyaindi Paulo kaamba, “Nta nshitirwa nuukwale-fo Festo mmbee, mmbo shikeerera marero a dede deny na a urango tukula. ²⁶ Mashika mangyi eeshi mbony yeti, neeny mmbo nshidimaa irera nawe nookaari, mashika shiishi deny sheelyi nnang’ani ya marero yaa nkwiiyo irero kulalyiishi-fo, mashika kindo eki nkiletanyikya kwaasha-fo. ²⁷ Mangyi Agripa, a nkwiirikye vakisuku? Yee shiishi shamanya kuvairikye.” ²⁸ Agripa kavia Paulo, “Akwa, na kyaangu indo mmbo kushallwaa Nkristo-ro?” ²⁹ Paulo kammbia, “Mmbo nkeetereva Iruva, kwakooya nkwa kyaangu eki ao nkwa kyaasha, nta nshi yewe da-fo, lyo na yewo woose vakeshaarannya inu vave sheeny, kuuta minyororo yei.” ³⁰ Mangyi na nshilyi ulya na Bernike na valya vekee nawo vakasalala, ³¹ llya valeukau vakaumburana veni na veni vakaamba, Nndu yeu nnyatanyi kindo kisumani ufu-fo nta ifingwa-fo. ³² Agripa kavia Festo, “Nndu yeto eshidimaa yeekeyo, kukooye kulaore ekundaa yeenda mbee kwa Kaisari.”

¹ Naasa kyeeri lulevavasyo lusaami ngalava lweende Italia, vakavika Paulo ando amwi na vafungwa vengyi maakony a nshilyi umwi avaangwaa Yulio, wa itorito lya Augusto. ² Lukasaama ngalaveny ya Adramitio yekudesye yeenda fika miriny ya mbai ya yeeve ya Asia, lukapooka kyaaro, Aristariko nndu wa Makedonia aukye Tesalonike keenda neese. ³ Elyi lya ndesi lukafika Sidoni. Yulio katannya Paulo fya isarya kanninga muumu wa yeenda kwa vambuya vakwe, naambo nafurukanyo-fo. ⁴ Lukauka-u lukaenda lukafika Kipro, naambo lukwiise uraato, mashika ngyuraato tekee ta finya. ⁵ Kyeeri lweera yeeve taari ya Kilikia na Pamfilia, lukafika Mira muri wa Likia, ⁶ Nafo nshilyi ulya kakooya-u ngalava ya Aleksandiria, iikudesye yeenda Italia, kalusaamisa-fo. ⁷ Lukeenda kyaaro eki waarya ando a mikonu miingyi lukafikya Nido kwa tamba nnu, mashika elyi uraato lwekeelusindika lukeera kwasinde ya Krete kufii na Salmoni. ⁸ Lukaira-u na ngatara deny, mbaa mbaa ya yeeve, lukashekooya ando avaangwaa, “Shashio Shisha.” Kufii na yoo kwiiyo muri uvangwaa Lasea. ⁹ Na llya kyeeri kiingyi kyemmiira, na kyaaro kikava kya yeerese nnu, mashika na mikonu yekootoya yemmaa iira, Paulo kavaikimba, ¹⁰ Kavavia, “Nyira vomi, shilollye sheelyi kyaaro eki kishetiraa ngapo na irekyo mfindo fiingyi, nshi ya masaa na ngalava-da-fo, kyaindi na ya muu weru-da. ¹¹ Kyaindi Nshilyi ulya kaaranya nniini wa ngalava na muni wa vayo ngota filya Paulo aleamba. ¹² Na kimmba muri ulya wa alya yeeveny kulore wekevaa ikaa kyeeri kya mbeo, veengyi vakauta makusaro vauke-u veende Foinike, kwakooya kyiivaa, vandekaa-fo kyeeri kya mbeo, nato mmuri wa Krete usumanu na taari ya sinde-nkwaany na ndoo-nkwaany.” ¹³ Na llya uraato lwa sinde lulepooka kyaangu, nawo vakakusara mmbo kivaa shaasa llya vekundye, vakakwiipoo na ngalava vakaira Krete yo kufii na mbai ya yeeve. ¹⁴ Numa kyaangu lukasha uraato lwa finya, sha kitita-si, nalo luvangwaa Eurakilo. ¹⁵ Kyeeri ngalava iletamba, ilakiidimise ikuna uraato, lukaikureeya ikakunwa ni uraato. ¹⁶ Kyeeri luleira uviny kufii na kiuruka kidu kivaangwaa Kauda lukaidima kwa tamba yaashwa ngalava. ¹⁷ Vekiidima iyaashwa, vakafinga ngalava kwa iita fiwoye efo kwasi ya vayo nawo elyi veetiri weerei valashetammbya efo kwasi-kwa Sitri, vakara naambo ngalava ikunwa ni uraato. ¹⁸ Kimmba lukekapwa nnu ni kivivita ekyo kya uraato, elyi lya ndesi vakapooka yeerya mario a ngalava efo mureny. ¹⁹ Elyi lya nkonu wa kararu vakeerya naakwa ni fiiya fya ngalava efo mureny wo veni. ²⁰ Nta nkyeere nta nyinyiri mfilelolyo-fo, ando a mikonu na uraato lwa finya lukalukapa, lukauta pa ya iturunya. ²¹ Na llya venkaa kyaasha valalya shoonga, Paulo kasalala yoo nnang’ani yaawo, kavavia, “Vomi, mmbo kyesumani kukooye mmbo muleshaaranya mure mulauka Krete nkonu ulya, neeni mwewona ngatara yei na efi mwanreta-fo. ²² Ulaalu a shimuningeny makusaro. Kaariseny ngoo tany, mashika nkwiifo nta nndu umwi waany arekaa-fo, llyo kuuta ngalava sheni. ²³ Shamashika kio eki kya inu, nsu wa Iruva yeu yeny shikee wakwe, nawe mmbwe nkemwiindya, mmbo alesalala kufii neeny, ²⁴ kashivia, ‘Kulairyee-fo Paulo, nkuti kundesalala mmbee ya Kaisari, na lyingyi lola, Iruva mmbo ankuniinga vandu yeva woose kukee nawo kyaarony.’ ²⁵ Naasany, vomi, kaareny, mashika shikusirye na Iruva, sheelyi fyoose mmbo fishevaa indo shaasa shilevio. ²⁶ Kyaindi lyo nkuti lufwallyo mbai ya kiuruka kimwi.” ²⁷ Kyeeri nkonu wa ikumi na kaana ulefika, kyeeri lwekerawa efo neefo efo yeeveny ya Adria, kufika kio nnang’ani varundi va ngalaveny vakakusara sheelyii nkufii vakooye uruka wuumu. ²⁸ Vakeera kyeeso kya yeesa mura vakaonisa fyeeso makumi avii, vakeenda mmbee vakeerase fikava firaanu. ²⁹ Vakairyaa kulakooye lushefwallywa ando iwe lyikwaallye si, naasa vakavika mireiyo ya ngalava vakatereva Iruva kukye. ³⁰ Kyeeri vateteri va ngalava valekunda iisitiyou ngalava varishe, kyeeri ekyo valeolota ngalava ta mundi efo mureny kive sheelyi mmbo vakeereiya ngalava-da, ³¹ Paulo kavia nshilyi na nsikari, “Yeva vakanra valamammya kunu ngalaveny mmushidimaa ikia-fo.” ³² Naasa vaskari vakarummbwa fiwoye filya fya ngalava ilya ya mundi ikawa kulya mureny. ³³ Kwikee kufii kukye Paulo kavaitika valye shoonga, evavia, “Inu ni nkonu wa ikumi na kaana lwiveraa na ikootoya, mmulekomba nta kindo-fo. ³⁴ Naasa shamuutereva lyeny shoonga, mashika nkyo kishemukiraa. Nta nkwiifoo nta ufii lwumwi lwa nrweny wa umwi waany lurekaafo.” ³⁵ Ekimaa yaamba indo kaipoo nkate kaarafuma Iruva velollye woose kaufisha-fisha kapooka iulya. ³⁶ Naasa vakakya mirima woose vakalya shoonga wo veni. ³⁷ Neese lwekee ngalaveny lwefikye vandu mayana avii makumi mfungare na varinderu indi. ³⁸ Vekimaa iwuura vakaangura-se mario a ngalava, vakeera nganu efo mureny. ³⁹ Kyeeri kulekya mmbalemanya uruka llwa-fo, lyo mmbo valelollya yoo mbai ando kuvakye mundi, vakalollya nkyeni vasaleese-u ngalava vakamiidima. ⁴⁰ Vakeera nanga teesaleesa ngalava kwaasha, efo mureny, vakaelelisa na fiwoye fya ngalava, na soori eto tikunwaa ni uraato vakarau imwi shidu. ⁴¹ Vakandefikya ando yeeve ivii tikwaananyi, vakasaleesau ngalava. ⁴² Vasikari vakakunda vafungwa vawaawa, naambo nndu nalakeleye narishe. ⁴³ Lyo nshilyi umwi eekundye ikira Paulo, kavaima valashetana shaasa vekundye, kavia valya veeshi ikeleya vapooke mbele ikweera mureny, naambo vafikye uruka uumu. ⁴⁴ Neewo valesaau maata vakasaama uwe ya mapoo na vengyi uwe ya findo efyo fyekee ngalaveny. Naasa indo vandu woose vakatana vafikya uruka wuumu kipwa.

¹ Lwikimaa ikia, llyo lukamanya sheelyi kyuuruka kilya kidu ni Malta. ² Vandu va kyuruka ekyo vakalutannya mesha elanyi kyeeso. Mashika mmbo valeata muro, vakaluwarya loose, kyeendwa ni mbua yeyo yekeekapa na kya mbeo. ³ Kyeeri Paulo ensanyirya ngwi, neetivika murony, ikafumafo shoka kimaruma kya muro, ikarorova efo maakony akwe. ⁴ Vandu va alya vekilollya shoka ilya iising’ang’a yoo wokony lwa Paulo, vakaamba, “Nndu yeu ni nsavi tishi; nawe nakikava ammikya ifiiya mureny lyo usumanu llunraa nakae na muu-fo.” ⁵ Kyaindi we kaisisikya efo murony, we muni nalaoni ukasha. ⁶ Lyo wo mmbo valekusara nkuti nafumbe ao nawe si neefwa tiny; vekimmbikya miso deny, neelolya nkwiifoo nta kindo kyankooya, vakaalasha, vakaamba, “We ni Iruva.” ⁷ Kufii na ando yoo kweiyo marema a mangyi wa kyuuruka ekyo, irina lyakwe ni Publio; nndu yeu kaluwarya na nrima wa ki-umbuya deny, kaluvika veny vakwe ando a mikonu iraru sele. ⁸ Naasa ndeye wa Publio elwee etirwa ni muro na yaarisha samu. Paulo kaanga kwakwe, katereva, kamwekerya maako, nenshiisa. ⁹ Efi fikimaa itanyika na vengyi veetiri vandu valoe kulya kiurukeny kilya vakaveende vakashiiswa. ¹⁰ Nawo vakaluniinga wiindi uniini nnu, naasa kyeeri lwekesaama ngalava lweende vakaluvikya-fo na findo efyo fyelutinnyi. ¹¹ Kwikyisia miiri iraru lukeenda na ngalava ya Aleksandiria nayo yenkaa yoo kyuurukeny ekyo kyeeri kya mbeo; na kiring’isyo kya vayo ni “Vana va Maasa.” ¹² Lukandefika Sirakusa, lukakaau mikonu iraru. ¹³ Luuka-fo lukaringitya lukandefika Regiumu; elyi lya ndesi uraato lwa sinde lukasha, neelyi lya nrondo lukandefika Puteoli. ¹⁴ Efo lukakooya-fo vakiloshyony vakalutereva lukae nawo ando a mikonu mfungare; llyony lukaafukya Rome. ¹⁵ Na kuuka yoo kyeeri vakiloshyony valeeta mbony teru, vakasha fika alya singira ya Apio ishelwaambya, ando kuvangwaa “Mmba Isaru ta Veny.” Paulo ekivalollya kaana Iruva deny, neewuiyo mmuu. " ¹⁶ Lwikifika Rome Paulo kaniingwa uleke lwekaa ando akwe muni lyo eeringwaa ni nsikari. ¹⁷ Kwikisia mikonu iraru kavaanga vaniini va Vayuda vakwanannyi. Kyeeri valekwaananya kavavia, " “Vanavama, na kikava nshiletana kindo kikasha kwa vandu, nta kindo kyefullwa mbuka ya vande veru, lyo mmbo shilevikwa maakony a Varoma shasha shikee mfinge uka kulya Yerusalemu. ¹⁸ Nawo kyeeri valemaa ishivesa-vesa mmbo vekundye ishilotora, mashika nkweefo nta kimaruma kimwi yeny shiwaawa-fo. ¹⁹ Kyaindi kyeeri Vayuda valesalala neeny shaitikyo ikunda mwaandu wakwa weende mmbee kwa Kaisari. Nta nshi sheelyi yeny mmbo sheetiri kindo kikasha na vandu vakwafo. ²⁰ Naasa kikeeny indo, mmbo shamuvaanga naambo musheshilollya neerera neeny; mashika mmbo shikeemfinge na mise yei kimaruma kya kikusiryo kya Israeli.” ²¹ Valya vakammbia, “Yese llulewonisa barua titiri mbony tafo uka kulya Uyuda-fo, na nta nkwifoo wa kiloshyony alesha iluvia mbony eto-fo, ao nta irera kindo kyeesi uwe yafo-fo. ²² Kyaindi ulaalu lukunndye kuluvie yewe shaasa kulollye; mashika lyo kimaruma kya ikusirya elyo mmbo tikeererwa mbony shiingyi shikasha kundo koose.” ²³ Naasa vekimaa ideryana nkonu, vakansheya yoo mmba yeyo eekai, vakasha nkuka wa vandu, kavaongoya waarya neekureekya umangyi lwa Iruva, evaikimbaa kya mbony ta Yesu eshipoo marero a uvavaso lwa Mose na vakisuku, apookya ngama kukafika nkwaany. ²⁴ Maata vakakusirya na filya filererwa, na maata mmbalekusirya-u-fo. ²⁵ Na kyeeri kilekoora mbakee kindo kimwi wo veni na veni, vakaenda, kyeeri Paulo alemaa irera irero elyi lyimwi nsi, shelyi “Mumuyo Mweele mmbo alerera songosiny deny llya alevia vande veru na kana ka nkisuku Isaya ²⁶ kaamba, ‘Enda kwa vandu yeva kwandevavia, iita mushitaa lyo mmumanyaa-fo. Na ilola mulolaa, lyo mmushitumusoo-fo; ²⁷ Shamashika mirima ya vandu yeva mmbo irung’ani na maarwi awo mmaroo iita, na miso awo vakaasingira. Naambo tupu valeshelollya na miso awo, na iita na maarwi awo. Na iitumuso na mirima yaawo na yaalasha mirima yaawo shivakire.’ “ ²⁸ “Kyaindi lyo kaeny mwiishi sheelyi ukiro yelu lwa Iruva mmbo lulerumwa kwa vandu va masanga. Nawo mmbo vakeiita!” " [ ²⁹ Nawe ekimaa irera efyo, Vayuda vakeenda, vekuvesa- vesaa findo fingyi wo veni na veni.] ³⁰ Nawe Paulo kakaa Roma ando a myaaka ivii sele efo mmba ilya yakwe ekai kaitaiya. Kawarya-fo vandu woose yewo vekee insheya. ³¹ Nawe kavaongoya mbony ta umangyi lwa Iruva, neelosha mbony ta Nndumi Yesu Kristo, etiri ukaari, nalakae-fo nta nndu amwiima. "