2 TIMOTEO

¹ Ni yeny Paulo, nrumi wa Kristo Yesu, shaasa Iruva akundye; kimaruma kya kyaasa kya muu yeto wa Kristo Yesu. ² Shakureiya yewe Timoteo mwana-kwa nkunde. Isarya lyikae neewe, na ilyillyo, na urilalyi luukye efo kwa Iruva Nde na kwa Kristo Yesu we Nndumi weeru. ³ Mmbo nkeyaana Iruva, yeto nkemwiindya na nrima mwaa uka elyo kyeeri kya vakuu vakwa, shaasa shikeekukumbwa yewe kyeeri kyoose shiiterevaa kio na nsanyiny. ⁴ Shavelanga nnu ikulollya, shaishwa ifura nnu elyi nkumbwaa kya misoru yafo. ⁵ Na kikusiryo kyafo kilatiri ukunang’ari, shaasa kikusiryo kya kyekuwo Loisi kyeekai na mau we Eonike, neeny shiishi neewe kutiri kikusiryo sheekyo. ⁶ Kyikeeny indo, mmbo nkeekukumbura kunangise nnu simbo yeyo ya Iruva kulesimbwa llya kuleekeryo maako akwa. ⁷ Mashika Iruva nnyaleluniinga nrima wa weerei-fo, mmbo aleluniinga nrima wa ukaari na wa ikunda ukaveva wa mwiiyanu. ⁸ Naasany kulairyee sony ukureekyi lwa Nndumi weeru-fo, nta kulashiirye sony yeny shikee mfingwa wakwe-fo, lyo sisirya makasha yoo ando amwi neeny kimaruma kya Nrumi ya Nsia, kiinani na wiidimi lwa Iruva; ⁹ mmbwe alelukira kalweengye uvaango weele, nshi kimaruma kya mashora eru-fo, kyaindi nkya isarya lyakwe shaasa alekunda we muni. Isarya yelyo mmbo lulesimbwa kyuuka na Kristo Yesu uka llung’anu, ¹⁰ kyeeri ekyi kikaorwa paa llya Kristo Yesu Nkira weeru alefumirwa paa kweru, yeto alevinga ufu na iloora muu na uvingyi kyeendwa ni Nrumi ya Nsia ¹¹ na kimaruma kya vayo llyo shilealuwa mwiivambisa na nrumi na mwiilosha. ¹² Na kimaruma kya vayo shawona ngatara yeti, nta nshitirwa nnyinyira-fo, mashika shiishi yeto shinkusirye, neemanya deny sheelyi ashiidimaa isheekya iringa ekyo shilerambikywa kufike nkonu yeto ushaa. ¹³ Tira kyaaso kya marero yoo atiri muu kuleeta kwakwa efo kikusiryony na ukundiny lwa Kristo Yesu. ¹⁴ Ringa nnu ekyo kulerambikywa ni Mumuyo Mweele yeto akee nnang’ani yeeru. ¹⁵ Shikusara kwiishi sheelyi valya va Asia mmbo valelakana na yeny, nnang’ani yaawo ni Figelo na Hermogene. ¹⁶ Mmbo shatereva Iruva navikye mbora valya va mmba ya Onesiforo; mashika mmbo aleshiviiryaa muu keengyi nnu, nta nnyaleshiirya sony mashika elyi shikee mfinge-fo. ¹⁷ Lyo kyeeri ekee kunu Roma mmbo aleshiruuya na sina katana ashikooya. ¹⁸ Nndumi nanniinge iwona ilyillyo misony akwe elyi nkonu weefurumya. Na shaasa aleshifurukannya nnu kulya Efeso yewe kwiishi nnu.

¹ Kyasiany, yewe mwana-kwa wona ikaariswa ni isarya lya Kristo Yesu. ² Na mbony tilya kuletiita kwakwa kwiiyo vakureekyi veengyi, tirambikye vandu yewo vasaari yewo vashidimaa ilosha na vengyi. ³ Sisirya ngatara ando amwi neeny, kuve sha nsikari nsha wa Kristo Yesu. ⁴ Nkwiifo mwiikapana fira akwaata ngusaniny ta ulana elu needimi isenya yeto mwimmbika-fo. ⁵ Na nndu mwiiwakyana efo fitavanuny nnyawonaa ureto kanra nalawakyana kisumani-fo. ⁶ Mmbo kikooye nremi ankwaatara na mashora akwe nasonngwe we iwona-u waavi lwakwe. ⁷ Soongya nnu yeki nkeekuvia, mashika ni Nndumi ashekurangusaa kya findo fyoose. ⁸ Nkye kummbwa Yesu Kristo ulya aleruka auka kwa vafu, akee wa ufyari lwa Davidi shaasa Nrumi ya Nsia yaamba. ⁹ Neeny mmbo shilelyiswa ukiva kimaruma kya vayo kutani shifingwaa sha nndu mwiitana maravi; lyoony, irero lya Iruva llyivaa ifinga-fo. ¹⁰ Kyeendwa llyo mmbo nkeesisirya fyoose, kimaruma kyeewo vasauwe, naambo nawo vakooye ukiro elo lweendwa ni Kristo Yesu, ando amwi na itumbe lya llung’anu. ¹¹ Ni irero lyisumani iirikyo deny. Shamashika kwakooya lwafwa nawe, mmbo luverutwaa ando amwi nawe. ¹² Kwakooya lwasisirya, mmbo lusheshillyaa ando amwi nawe. Kwakooya lwankana we naakwa niwe mmbo ashelukanaa yese; ¹³ Kwakooya yese lulakusirye-u we mmbo eengera iva nsaari. Mashika we nnyashiidimaa ikukana we muni-fo. ¹⁴ Nkye vakumbure mbony yeto kuvevaikimba na irina lya Iruva, naambo valashellya ulai lulatiri mbusha, yelo lulyamaraa yewo vearanya. ¹⁵ Kaarya nnu yoora sheelyi ni Iruva akusauye, kwaveva nndundi nalatiri nyinyira, kwavesalallya irero lya dede. ¹⁶ Kwiise nnu na marero a ing’ana alakee a ki-Iruva, mashika yewo mmbo vasheengeraa nnu na uravi, ¹⁷ na marero awo mmbo ashekwaanaa ree sha itiinga ikasha. Vandu va ngata yeyo nsha Himenayo na Fileto, ¹⁸ nawo mmbo valenreta ekyo kya dede, vakaveamba mwaandu wa ifurummya ulemmaa iira indo kikava nkyo kyeeveta iirikyo lya veengyi. ¹⁹ Kyaindi lyo irero lya Iruva lyivangyi, lyikavikywa na kiringisyo ekyi, kyeyaamba, Nndumi eeshi yewo vakee vakwe, na kingyi-se, yeto moose mwiisenda Irina lya Nndumi nare uravi lakwe. ²⁰ Kyasiany efo mmba ya Nndumi nshi kwiifo fiiya fya saabu na fya fesa-da-fo, kuveefo na fya firi na fya uteeri, fingyi fitiri nnduma deny, na fingyi mfitiri-fo. ²¹ Naasany kwakooya nndu akusongosye elyi akwiisa na vandu yewo, mmbo ashevakaa kiiya kilya kitiri nnduma, kyisennyi Nndumi, kyikee kideesye kirunde mashora mesha. ²² Naasany kukwiise lango yeto ta ukoony, kusore usumanu na iirikyo, ukundi, urilalyi kwikee na valya vakeevaanga Nndumi vekee na nrima wa dede. ²³ Lyo marero a utondo evesa-vesa alemi mashika nshi a urango-fo, nang’u mmbo ashendee myaandu tupu. ²⁴ Na nkivaa nndundi wa Nndumi nave nndu wa myaandu-fo. Mmbo akundyo nave nndu mmamiri kwa vandu woose, eeshi ilosha, atiri usisiryo. ²⁵ Na vandu yewo vawakyanaa nawe navaikimbe na ufoo, naambo kwakooya kiivaa naambo Iruva naveekye vakurye neemanya dede yeyo. ²⁶ Naambo urango luvawuiye, vauke efo nreiyony wa yeto nkumbi alevareiya, vakatana efyo finsennyi.

¹ Lyo manya mbony yei, sheelyi kyeeri kya ifurummya mmbo kusheshaa mikonu yeeresye. ² Mashika vandu mmbo vashekukundaa wo veni, valange nnu fesa, vave vekurumisha veni, veekung’anisa, vearara, valashinndyaa vamiku vawo, nta valakee vandu va kyaanu, valakee va miriminy, ³ valakundye va kyeny kwawo, nta valakundye isaryana na vengyi, vakava vevikya ureeree, valasiraa ngoo vakava vanyaasi, nta valalangye ngata shoose ya usha na umamiri. ⁴ Mmbo vakee veeriingya vengyi, vakatira utiilyi, neekung’anisa, vakakunda lango ta mwiili ngota ikunda Iruva. ⁵ Vakava sheelyi ni vandu vesha ate lyo mmbo valemmyi ekyo deny. Yewo woose kukwiise nawo. ⁶ Nnang’ani yaawo mmbo kwiifony na valya vakwaataa efo mmbeny ta vandu, vakakamara-fo mifungwa vaka yewo varavi varye maryo a ulyamari, na ilamyo ni lango ta ngata shiingyi; ⁷ vakakwiishivirya-fo indo wo nkonu naambo valasheefikya dede yeyo irye urango. ⁸ Na kivaka llya Yane na Yambre valesalala na Mose kyellema, ni indo neeva mmbo vakelemana na dede yeyo; yewo ni vandu vallyamarikyo mmirwe, vakakaa kwaasha na mbony ta iirikyo. ⁹ Lyo nshi vafikaa kwaasha nta-fo, mashika urung’ani elu lwawo lwammelollyo mmbandu woose, shaasa na urung’ani lwa yewo lulelollyo paa. ¹⁰ Lyo yewe mmbo kulelatya ufundo lwakwa, na ngaa yakwa, na kilya shikundye itana, na iirikyo, na usisiryo, ¹¹ na ukundi, na ivereya, na ngatara eti takwa na makyiva yaa, na filya fileshikooya kulya Antiokia, na Ikonio na Listra, ngata toose ta ngatara yeto shiletisisirya; nawe Nndumi kashaauwa efo koose. ¹² Ee deny, neewo woose valangye muu mweele mmbo vasheminwaa. ¹³ Lyo vandu vakasha na velemba vasheengeraa ikaafo, na yeengera iraveeka, velembaa neelembwa. ¹⁴ Kyaindi yewe kutire na filya kuleloshwa neesununndyo, mashika kwiishi ni kwa vaki kulekulosha kwawo; ¹⁵ neewe lyo uka udu lwafo mmbo kuleloshwa mareiyo meele kwaamanya, nang’u ng’u akurangusaa kuwoni ukiro lukuukya efo kikusiryony kwa Yesu Kristo. ¹⁶ Mareiyo moose atiri Mumuyo wa Iruva mmbo avaa kwa ilosha, na kwa iikimba vandu makasha awo na kwa ivatetera, neevavika ngeeny ya songosiny ikee ya usumanu. ¹⁷ Naambo nndu moose akee wa Iruva nasongovike neekaariswa naambo needimi itana findo fyoose nisha.

¹ Mmbo sheengera ikuvavasa-se na irina lya Iruva, na lya Kristo Yesu yeto asheutyaa vakee na muu na vafu uvingo, elyi ashelolywa paa we na umangyi lwakwe; ² vambisa irero lya Iruva, kyeeri kyisenyi na kyeeri kyilasennyi, sakira na ikyeemya, na iikimba kwikee na usisiryo loose kwiloshaa. ³ Mashika kwiikaa kushe fyeeri vashelemaa kiloshyo ekyo kirye muu, lyo kimaruma kyeesora makusaro awo veni mmbo vashekuwonisyaa veelosha nkuka maronda na maronda, ni elyi vatiri maarwi enunnwa. ⁴ Nawo mmbo vashekwiisaa naambo valeete efyo fikee fya dede, vendukye ngyuraawe ta wongo. ⁵ Kyaindi yewe, va na mwiiyanu findony fyafo fyoose, sisirya makasha, runda ishora lya mwiivambisa Nrumi ya Nsia, kwiinutye urundi lwafo. ⁶ Mashika yeny ulaalu nkimwi sheelyi nkeepusuwa sha mura, nkyo kyeeri kya ifwa lyakwa mmbo kyamfika. ⁷ Mmbo shikapanaa fira shisha shyaawutye kyaaro kyakwa, shiringe iirikyo. ⁸ Mafurumyony a vayo mmbo shikee n-deesye ureto lwa usumanu, elo Nndumi yeu mwirummbwa usumanu asheshiniingaa nkonu yeto, nta nshi yeny shimuni-fo, ni ando amwi na vandu woose yewo valelanga ilollya ifumirwa lyakwe. ⁹ Kutakure isha kwakwa uviny. ¹⁰ Mashika Dema mmbo alelakana neeny, kalanga ulana elu, kakwiipoo keenda Tesalonike, na Kreske mmbo aleenda Galatia; na Tito Dalmatia, ¹¹ ni Luka muni akee yaa ando amwi neeny. Ipoo Marko kushe nawe, mashika ashisennyi nnu urundiny lwakwe. ¹² Kyaindi we Tikiko mmbo shilenruma Efeso. ¹³ Osho na ikoti lya shilelyira kwa Karpo efo Troa, ando amwi na fitabu filya, mmwasi filya fya shony. ¹⁴ Mfuru ulya wa minya ya arera we Iskanda mmbo aleshitannya findo firavi nnu; nawe Nndumi mmbo ashentaa kiinani na mitannyi yakwe. ¹⁵ Neewe kwiise nawe, mashika mmbo alemina nnu ufundo lweru. ¹⁶ Kindo kya mbee shilelollya, nkwiifo nndu alesalala taari yakwa-fo. Woose mmbo valeshira. Neeny mmbo shatereva Iruva nalasheevautya uvingo kimaruma kya vayo. ¹⁷ Lyo Nndumi mmbo aleshisalallya kashiniinga finya, naambo, kyeendwa ni urundi lwakwa naambo nrumi yeyo yaambawa kisumani, naambo vandu va masanga moose veete; neeny lyo shaauwa efo kaniny ka miiso. ¹⁸ Nawe Nndumi mmbo asheshaauwaa efo nrengeny toose, neeshiringa kutani shafikya umangyi lwakwe lwa iruvee-u. Nnduma mmbwakwe we fika llun’anu na llung’anu. Amen. ¹⁹ Shiidikirya Priska na Akila, na valya va kyeny kwa Onesiforo. ²⁰ Erasto mmbo alekaa Korinto. Trofimu mmbo shilenra Mileto elwee. ²¹ Kutakure isha kulaore kyeeri kya mbeo kyansha. Eubulo akwiidikira, na Pude na Lino, na Klaudio na vakristo woose da. ²² Naasa Nndumi nakae na nrima wafo. Isarya lyimukae.