2 VATESALONIKE

¹ Yeny Paulo na Silvanu na Timoteo, mmbo lwamureiya yeni va siri ya Tesalonike, siri ya Iruva Nde weeru na Nndumi Yesu Kristo. ² Isarya lyimukaye ando amwi na urilalyi luukye kwa Iruva Nde na kwa Nndumi Yesu Kristo. ³ Vanavama, mmbo kilukooye lwaani Iruva kyeeri kyoose kimaruma kyany, shaasa kilusumannyi, mashika elyi iirikyo lyeru lyikee inga’na nnu, na ikunda lya wo umwi waany lyikang’ana nnu. ⁴ Neese luveni mmbo lutirwa ni nsia nniini kimaruma kyany yeni va siri ta Iruva kyeendwa ni usisiryo lwany, na kya usisiryo lwany kya ngatara na waataro lukee kwany. ⁵ Elo llo ukureekyi loora uvingo luukye usumanuny lwa Iruva, naambo kyoore shaasa musumanyi yaanga umanginy lwa Iruva yelo yeni mukeelyiswa ukyiva kimaruma kya vayo. ⁶ Mashika ni kindo kisumani mbee ya Iruva valya vakeemulyisa ukyiva nawo valyiswa ukyiva. ⁷ Neeni mukeelyiswa ukyiva mutawa nsia ando amwi neese kyeeri ekyo Nndumi Yesu asheorwaa paa akee na finya eriyani na vasu va efo iruveeu. ⁸ Ekee na kipalapala kya muro, etaiyaa yewo valaishi Iruva neewo valairikye Nrumi ya Nsia ya Nndumi weeru Yesu; ⁹ vasheorotwaa ni urumato lwa llunganu, irauwa deny vauke kisanguny kya Nndumi na itumbe lya wiidimi lwakwe. ¹⁰ Kyeeri we asheshaa narumishwa ni veele vakwe, na yaambyo ni valya vamwiirikye nkonu yeto, (mashika ukureekyi lweru mmbo luleirikyo efo kwany). ¹¹ Nkyo kimaruma lukamuterevya mikonu myoose, naambo Iruva weeru nairikye uvaango lwany, naveinutya na wo kindo kimutinnyi na wo ishora lyuukye kikusiryony na finya yakwe. ¹² Irina lya Nndumi weeru Yesu lying’aniswa nnang’ani yaany, neeni nnang’ani ya vayo, kyeendwa ni isarya lya Iruva weeru na lya Nndumi Yesu Kristo.

¹ Kyasiany vanavama, lwamooshora, kya isha lya Nndumi weeru Yesu Kristo, na kya ishekuumbya yoo mbee yakwe, ² mulaatarike nnu mure kilya mukee ivinya-fo, nta mulaawukwa efo nriminy-fo ao nta na marero-fo, ao na barwa mukusare nkweru yauka-fo, kyeyaamba sheelyi nkonu yeto wa Nndumi mmbo ulemmaa isha-fo. ³ Kulave nta nndu umwi amulemba-fo, mashika nkonu yeto mmbusheshaa kulaore mbele umini llwa lwansha-fo, na nndu yeto kilemi noorwa paa yeto akee mwana wa ureti; ⁴ yeto akee kilemi, yeto mwiikurosa muni mbee ya Iruva yeto mwiindyo, nawe muni kakutemira yoo mmba ya Iruva kakwaalwa mmbwe Iruva. ⁵ A ndesa mmbo mulakumbuye sheelyi kyeeri shekee neeni shilemuvia mbony yeti? ⁶ Neekyo kikee iima nravi yeto nalamanyike ulaalu mukiishi kutani kyeeri kya vayo kyasha. ⁷ Mashika kyama kya urekwa elo kikee ikoora ulaalu lyo kwiiyo umwi akee iima finya ya vayo, na kutani kyautwa-u deny. ⁸ Lyo yeto akee kilemi asheorwaa paa, nawe Nndumi Yesu ashemwiviaa mumuyo wakwe ummbwaa, na inrumata deny elyi aiyo. ⁹ Isha lya kilemi ekyo mmbo lyivakye elyo lya mmbishwa, na wiidimi lwakwe ekooraa na wongo uniini; ¹⁰ neefo ulembiny lwa yewo vakee ireka, mashika elyi kulaore valekunda dede yeyo naambo vakirwa. ¹¹ Nkyo kimaruma kavaora finya ya ureti shaasa ikai, vengere ikutira na wongo; ¹² naambo yewo woose valelema iirikya dede yeyo vautyo uvingo, mashika elyi valefurya uravi. ¹³ Kyaindi yese kilukooye yaana Iruva wo nkonu kimaruma kyany, yeni vanavama mukundyo indo ni Nndumi, mashika elyi alemusauwa yeni uka elyo mbee naambo muwoni ukiro, mushillyiswaa Mmumuyo na iirikya dede; ¹⁴ yefyo Iruva alemuvaangya na Nrumi ya Nsia yei yeru, naambo muwoni itumbe lya Nndumi weeru Yesu Kristo. ¹⁵ Kyasiany, vanavama, salaleny kyuumi, muwarani na mikaye ilya muleloshwa, kyikee kya marero ao kya barwa yei yeeru. ¹⁶ Na Nndumi weeru Yesu Kristo we muni, na Iruva Nde weeru, yeu alelukunda kalusimba iviirywa muu yelyo lyishendee ivika nsia lya llung’anu kyeendwa ni isarya lyakwe, ¹⁷ namuviirye muu efo miriminy yaany, na imuvangisya efo irerony na ishoreny isha.

¹ Na kya ifurumya, vanavama, luterevyeny, naambo irero lya Nndumi lyeende na mbee, nerumishwa kiwo shaasa kyikee efo kwany; ² naambo lwauwa maakony a vandu valakee va usumanu, varavi, mashika vandu woose mmbatiri kikusiryo-fo. ³ Kyaindi we Nndumi ni nsaari mmbwe yeto ashemukaarisaa nemuringa mulaevetwa ni nravi yeto. ⁴ Neese mmbo lulevika Nndumi nsia kimaruma kyany, elyi muletana kilya lulemulosha, na mweengere itana indo. ⁵ Nndumi namutetere efo miriminy yaany naambo muwoni ikunda lya Iruva na usisiryo lwa Kristo. ⁶ Vanavama, mmbo lwamwiikimba na irina lya Nndumi Yesu Kristo, kwiiseny na wo nndu nkristo akee nroko, nta nalasoraa mikaaye ilya lulemulosha. ⁷ Yeni mwiishi shaasa kimusumannyi ilulatya mashika naakwa ni yese llulekaa kwany lulatiri waarya-fo; ⁸ nta llulelya shoonga ya nndu ruu-fo, mmbo lulelya shoonga lwannyivinnya nnu, lwirundaa kio na nsanyiny, naambo lulasheeva irio kwa nndu wa kwany na kava vi. ⁹ Nshi mashika elyi kulore lweetiri mumu-fo, kyaindi naambo lumureeye kyaaso kyeelola, mulusore yese. ¹⁰ Mashika naakwa nkyeeri kilya lweekee kwany mmbo lulemuvia mbony yei, sheelyi, kwakooya nndu nalakundye irunda, naasa, na shoonga nalailye-fo, ¹¹ mashika lwiitye efo kwany kwiifo vandu valatiri uramba, valatiri ishora vakeerunda, kyaindi vakakwaataa-ata findony fya vengyi. ¹² Kyasia yewo lwavaikimbany na ivavia na irina lya Nndumi Yesu Kristo, varunde mashora na usaari neelya shoonga vaivinnya wo veni. ¹³ Lyo yeni vanavama, mulafwe nrima kya itana mesha-fo. ¹⁴ Na kwakooya nndu moose ara nalawarya kirero kya barua yei yeeru na kava vi, kwiiseny nawe, nta mularere nawe-fo, naambo nasuke deny; ¹⁵ lyo mulamwaallwe nkiduva-fo, mmbo mumwiikimbaa sha umwi waany. ¹⁶ Kyasiany, Nndumi muni urilalyi we muni namulyimmyi urilalyi wo kyeeri shieny toose. Nndumi nakae neeni moose. ¹⁷ Yefi mfiidikiro fyakwa yeny Paulo, shareiya na woko lwakwa shimuni. Ekyi nkyo kiringyisyo barueny takwa toose, llo woko lwakwa. ¹⁸ Isarya lya Nndumi weeru Yesu Kristo lyimukaye yeni moose.