2 PETRO

¹ Yeny Simion Petro shikee ishinga na nrumi wa Yesu Kristo, shareiya kwany yeni mulewonisa kikusiryo kimwi neese, kitiri wuuru efo usumanuny lwa Iruva weeru na Nkira weeru Yesu Kristo. ² Isarya lyimukae na urilalyi lwengerywa-u kwi immanya Iruva na Yesu Nndumi weeru. ³ Kimmba wiidimi lwa Ki-iruva lwallusimba findo fyoose fikwaani na muu na utele kya immanya yeto aleluvaanga na itumbe lyakwe na usha lwakwe muni. ⁴ Kyeendwa ni efyo kalusimba kyaasa kiniini nnu, kya wuuru. Naambo kimaruma kya vayo muve veakana ngata ya Ki-iruva, mwikirwaa efo uraviny lukee ya ulaniny kyeendwa ni lango. ⁵ Ee, kimaruma kikee ekyo kyeni mukwiitike nnu kwa taari yaany efo kikusiryony muvesanda na mesha, na efo mesheny yoo musande-fo urango, ⁶ na efo urangony mwengeryen mwiina, neefo nnang’ani ya mwiina muvike-u ivereya, na ivereya elyo lyisange na utele, ⁷ Efo uteleny kushe-u nkundanu wa vakristo, naefo nkundanuny wa vakristo lyisange-u ikunda. ⁸ Naasa kwakooya findo fya ngata yeyo fyawalawala efo kwany, mmbo fishemwekyaa mulave varoko ao valavikaa ndunda na yeni mmbo mwiishi Nndumi weeru Yesu. ⁹ Mashika yeto nalatiri efyo mmbo akee mfu miso, nnyashiidimaa ilollya findo fikee kwaasha-fo, mmbo anrekywa mbony ta iilyiswa ngyulyamari takwe ta kasha. ¹⁰ Naasany vanavama, kutakureny nnu ivangisa uvaango lwany na isauwa lyany, mashika mukantana indo mmushewonaa nta nsindara umwi-fo. ¹¹ Mashika mmbo mukee vaniinge mwaanya ruu wa yaanga umanginy lwa llung’anu lwa Nndumi na Mwikira weeru Yesu Kristo. ¹² Kwa ekyo mmbo shikudeesye imukumbura efyo mikonu myoose, na kikava mufiishi na ivangisywa efo dedeny yeyo. ¹³ Na yeny mmbo shilollye ni usumanu, kyeeri ekyi shikee yaa ulaniny, shimwaante shiimukumburaa efyo. ¹⁴ Kimmba shammanya sheelyi yaa shikai nkufii shuuke-u, shaasa Nndumi weeru Yesu Kristo ammeshoora. ¹⁵ Lyo mmbo shikutakuraa naambo wo kyeeri elyi shammaa ifwa mwiidimi ikumbwa efyo fyoose. ¹⁶ Mashika llulelatya mbony tikee shisongosie na urango lwa kivandu, llya lulemuvia yeni mbony ta wiidimi lwa Nndumi weeru Yesu Kristo na isha lyakwe-fo. Lyo mmbo lwelollya luveni itumbe lyakwe. ¹⁷ Mashika mmbo aleniingwa wiindi na itumbe ni Iruva, kyeeri aleengywa unyanga luleuka itumbeny iniini lwishambaa,“Yeu ni Mwana wakwa Nkunde wakwa, ashisennyi.” ¹⁸ Na unyanga yelo mmbo lulelwiita luuka iruveeu kyeeri lwekee nawe kulya ifumbuny llya yeele. ¹⁹ Neese mmbo lutiri irero elyo lya ukisuku lyitiri finya mmwasi, na yeni mukammaa ilyilola, sha taa imikaa ando a ireema, mwatana nisha, kutani kwakya na nyinyiri ya ngama ipooke ivaa miriminy yaany. ²⁰ Mashika nkwiifo nta kyeeri kimwi ao ando koose ukisuku lulemmendwa ni ikunda lya nndu wa vandu-fo. ²¹ Lyo vandu mmbo valerera filya fileuka kwa Iruva, lyo veteterwaa ni Mumuyo Mweele.

¹ Kyaindi kulya vanduny valya mmbo kulekwiipoo-fo vakisuku va wongo, shaasa na efo kwany kushekaa-fo velosha va wongo, nawo mmbo vasheloshaa vandu mbony ta urere tiretaa, vavelema naakwa ni Nndumi yeto alevawouwa, vakwengye urumato wo veni uviny. ² Vandu veengyi mmbo vashesoraa uravi elo lwawo, na shia yeyo ya dede mmbo isheminwaa kyeendwa mmbo. ³ Na efo langony tawo mmbo vashewonaa-fo mbusha efo kwany kimaruma kya marero awo a ulembi na ngapo yaawo shaasa kyekee uka elyo mbee nnyikyeeywa-fo, na yeto mwivarumata ni afii akai nta nnalala-fo. ⁴ Mashika kwakooya kulaore Iruva aleauwa vasu valya valelyamara indi kaveera irininy evavikaa kifingyony kya ireema, varingyo-u kutani yaanduywa lyasha. ⁵ Nta ulana lulya lwa kasha kyeeri kya Noe nalalure indi-fo, lyo kasuruma muya usumanu ulya we Noe ando amwi na vandu vengyi mfungare. ⁶ Lyo aleengye urumato miri ilya ya Sodoma na Gomora, ikaya ikatana yaaluka ifu yeni, naambo ive kindo kya ikumbura yewo vasheraa iindya Iruva elyi numa. ⁷ Iruva kakira-u Loti ekee nndu wa usumanu alesukywa nnu mfilya fyeketanwa ni valya na weendo lwawo lwa uravi lwawo. ⁸ Mashika nndu yeu wa usumanu kwakooya akaa nnang’ani yaawo, nalollye na iita, mmbo alevavyo nriminy yeu wakwe wa usumanu, wo nkonu indo, kyeendwa ni mashora awo nalakee a usumanu. ⁹ Kyikeeny indo, Iruva mmbo eeshi shaasa asheauwaa vasauwe vakwe efo fyeesony sha efyo, na irwaa yewo valakee va usumanu ando a yoorotwa kufike nkonu yeto wa mwaandu. ¹⁰ Mmwasi valya valatyaa ngaa ya mwiili ya ukirinda, na imina ushilyi lwiiyo. ¹¹ Vandu yeva mmbo vakee vakaari, vakakurosa, nta valareremaa elyi vakeyaarara findo fyeele, naakwa vava ni vasu nawo vailanyi vaafinya vakawara wiidimi na finya mmwasi, nta mmbavakumbaa mbee ya Nndumi-fo. ¹² Lyo vandu yewo mmbo vavakye mafisi nalatiri urango, vawonikye sha mafisi da etirwa na yuutwa-u. Mashika vaararaa Iruva kya findo nta valafiishi, nawo mmbo vasherumatwaa. ¹³ Vakasumana na firetaa, fikee ni weesi lwa uravi lwawo, vakakusara unangwa kyeeri kya nsanyiny ni kindo kya ifura, vakava varavi na sony vesoraa lango tilatiri nnyanu vevikaa mirumwa ya ikunda, elyi vavikaa mirumwa yaawo ando amwi na yeni. ¹⁴ Mmbo vatiri miso eshwe utuusi, vakava vandu valamandaa itana fya ulyamari vakavelemba valya kulore vantumaa iirikyony vakavetira mirima ishivye ilanga tupu, indo vakava vadenge; ¹⁵ vakara shia ya usumanu, vakareka, vesoraa shia ya Balaamu we mwana wa Beori, ulya alekunda weesi lwetana uravi. ¹⁶ Lyo mmbo alekeemyo kimaruma kya uravi lwakwe muni, llya nshungu ukee kindo kileeshi irera, ukarera sha nndu, kafisha uravi lwa nkisuku ulya wa wongo. ¹⁷ Vandu yeva mmbo vavakye firori filatiri mura na mafishi avivitwa ni uraato uniini, na efo mbee yaawo ni ireema iniini lyivavereye. ¹⁸ Mashika kyeeri vapuswaa marero maniini nnu ekurosa nnu, na uravi na lango ta mwiili velembaa vandu valemmaa irisha valya vakeengera ikaa efo ngaeny ya ulembi. ¹⁹ Wo mmbo vakee ivavika nsia wa iva valeke, ate wo veni mmbo vakee mashinga a uravi, mashika elyi avingwa ni nndu ungyi mmbo avaa ishinga lyakwe. ²⁰ Mashika valya valemmaa irisha maravi a ulana yelu kimaruma kya imanya Nndumi na Mwikira Yesu Kristo, kwakooya atirwa lyingi na iwa, ngata yakwe ya ifurumya mmbo ishevaa shikasha ngota ilya ya mbee. ²¹ Mashika kyevaa ng’waana kukooye kulore veishi shia ya usumanu, numa vakara ivavaso elyo yeele vekee vaniingye. ²² Mmbo kileenda indo kyawo kyiinani na kyaaso kilya kileamba, “Akyo kite kyambuiya uraako lwa vayo, na nguve ilya ilesangywa ikawuya ikwaalala ipwashiny.”

¹ Vakunde vakwa, barwa yei nnyo ya kavii shilemureiya yeni. Kunu barueny eti mmbo shikunndye shaante mirima yaany shiimukumburaa, ² mukooye ikummbwa marero alya alererwa ni vakisuku valya veele va mbee, na ivavaso lyilya lya Nndumi na Mwikira lyileendwa ni varumi vakwe. ³ Mwimanyaa mbele irero lya elyi kya yaamba elyi mikonu ya ifurumya mmbo vasheshaa vandu va kinyala na vetatala, vesoraa lango tawo veni. ⁴ Veshambaa, “A kyaasa kilya kya isha lyakwe kikee kwi? Mashika uka elyo vande veru valelala, findo fyoose mmbo fikwiiyo indo-da, uka elyo ulana luumbwa.” ⁵ Yeva mmbo vasingira miso awo alalollye sheelyi kweiifo ngina uka elyo mbee, na ulana-da, lyo mmbo fileumbwa fyuuka efo mureny ni irero lya Iruva. ⁶ Kyaindi ulana lulya lwa kyeeri kilya mmbo lulerumatwa ni mura lukasarummya. ⁷ Indi ngina na ulana lwa ulaalu mmbo fikee fivike-u fivere muro, kyeendwa ni irero elyo, fikaringywa-u fivere muro nkonu wa mwaandu, na vandu yewo valashiindyaa Iruva nawo vashesarumya-da. ⁸ Lyo vakunde vakwa, loleny mulasheerekyo irero elyi, sheelyi kwa Nndumi nkonu umwi mmbo ummbiiye sha myaaka kyiku, na myaaka kyiku ikammbiiya sha nkonu umwi. ⁹ Nndumi nnyakyeywaa iinutya fyaasa fyakwe shaasa vandu vengyi vakee ikusara mmbo ankyeeywa-fo, lyo mmbo asanda-fo imusisirya mbele mashika elyi nalakunndye nta nndu umwi nareke, naambo woose vakooye yaalashika mirima. ¹⁰ Mashika lyo nkonu yeto wa Nndumi mmbo usheshaa tiny sha inyinyi, llyo nkonu yeto ngina ishekweete-u na ntiri nniini, na fyuumbe fyoose fya mbee fisheyaa na yeeka deny, na ulana loose na mashora a vayo moose mmbo ashesarummyaa. ¹¹ Naasany kimmba findo efi fisheekaa indo, mmbo kimukooye yeni muve vandu va ngaa-kyi? Weendo lwany luve weele na utele. ¹² Mwivereyaa kutani nkonu yeto wa Iruva washa, na iwiitika; nato nkonu eto llyo ngina isheekaa na fyuumbe fyoose fya mbee fishesarumyaa na yeeka. ¹³ Lyo shaasa kyaasa kyakwe kyikai, mmbo luvikye nsia ilollya ngina shiiya na ulana wiiya, ando usumanu lushekaa. ¹⁴ Kimmba ni indo, vakunde vakwa, kimmba muvikye nsia ilollya findo efyo, kutakureny naambo musalale iirikyony kyeyoora sheelyi mmutiri kiteve-fo nta ifiiya sony mbee yakwe-fo. ¹⁵ Loleny sheelyi usisiryo lwa Nndumi weeru mmbo lwaluukya ukiro lweru, shaasa naakwa ni mwanamaye weeru we Paulo alevemureiya ekee na waarya alesimbwa. ¹⁶ Shaasa kivekee efo barueny takwe toose, kauta-fo mbony ta findo efyo, efo barueny eto mmbo kwiifo mbony tikee shuumu imanya. Na vandu valandetumaa nta valasommyi mmbo vakee yeveta mbony eto shaasa vevetaa na mareiyo engyi, kyikava kyevarumata wo veni. ¹⁷ Kyasiany vakunde vakwa, kimmba mwansongwa imanya efyo, kwiiseny muveni, naambo mulashekurikwa ni urekwa lwawo, mukooye ireta ukaari lwany. ¹⁸ Lyo, endeny mwitumaa efo isaryeny lya Iruva, mwimanyaa Nndumi weeru we Mwiikira Yesu Kristo. Nnduma ni wakwe ulaalu na llung’anu.