TIMOTEO

TIMOTEO

¹ Yeny Paulo, nrumi wa Kristo, kwi ivavaso lya Iruva akee Mwiikira weeru na Kristo Yesu akee ekyo luvikye nsia, ² shakureiya yewe Timoteo, mwana-kwa efo kikusiryony. Isarya lya Iruva lyikee neewe, na ilyillyo, na urilalyi luukye kwa Iruva Nde na kwa Kristo Yesu Nndumi weeru. ³ Shaasa shilekutereva kukae Efeso, kyeeri kilya shekeenda Makedonia, naambo kwiikimbe vengyi valashelosha ngyufundo tingyi; ⁴ nta valeshearanya ngyuraawe na nganunganu tilatiri umando, tishendee makusaro meengyi nta tilaryani na uvavaso lwa Iruva lwa iirikyo, naasa vaikimbe indo. ⁵ Na kyeefinga ivavaso elyo ni ukundi luukye nriminy nsha na makusaro mesha, na iirikyo lyilatiri ukunang’ari. ⁶ Vandu vengyi vakanra valalatya efi mmbo vankaa marerony a ing’ana. ⁷ Vakalanga iva veelosha va mavavaso, lla elyi valaishi songosiny efyo vakeerera. ⁸ Lyo lwiishi sheelyi uvavaso ni usha kwakooya nndu arunda nalo kya usumanu. ⁹ Navemanya irero elyi, sheelyi uvavaso llutiri mwaandu na nndu nsumanu-fo, kuuta yewo veerenga veni, neewo valakee vaarya, valaishi Iruva, valyamari, na vatefusu, neewo valashinndyaa Iruva, na veekapa vandeye vawo, na veekapa vamaye vawo, na vewaa. ¹⁰ Na vatuusi, vasodomi na veiiva vandu, vaongo, veelya mboo kya wongo; na kwakooya kwiiyo kindo kingyi kilaryani na ufundo lutiri muu. ¹¹ Shaasa kikee kirere efo Nruminy ya Nsia ya itumbe lya Iruva yeto akee iitikiswa, yeyo shilerambikywa. ¹² Neeny mmbo shaana Kristo Yesu akee Nndumi weeru, yeto aleshisimba finya mashika aleshilollya shikee mwaarya kashivika efo urundiny lwakwe. ¹³ Na kikava elyo mbee shekee nndu mwaarara, shafuluta vandu vengyi, shava nndu llyang’a, lyo shawonisa ilyillyo, mashika elyi shetana indo kikee kya urung’ani neelyi kulaore shetiri kikusiryo. ¹⁴ Na isarya lya Nndumi weeru mmbo lyileng’ana nnu kweru ando amwi na kikusiryo na ikunda yelyo lyuukye kwa Kristo Yesu. ¹⁵ Ni irero lyisumani iirikywa nalyo mmbo lyisumani ikusiryo deny, nalyo llyo elyi, Kristo Yesu mmbo alesha ulaniny nashekira valyamari, na wa mbee waawo ni yeny. ¹⁶ Lyo kimaruma kya vayo mmbo shilewona ilyillyo, naambo shikee yeny ni yeto wa mbee, Yesu Kristo noore-u usisiryo lwakwe loose, shiveva na kyaaso kyeelola kwa yewo vashenkusiryaa numa, naambo vawonise muu wa llung’anu. ¹⁷ Naasany ulaalu Mangyi yeto wa llung’anu, nalashidimaa ifwa, nta nalalolyoo mmiso, akee Iruva we muni, nawoni iindyo na nnduma mmbwakwe llung’anu na llung’anu. Amen. ¹⁸ Mwana-kwa Timoteo, mmbo shakurambikya ivavaso elyi kulyiringe kimaruma kya irero lya ukisuku llwa lulenkusongoya, naambo kimaruma kya vayo kukooye ikapana fira yeyo sheele; ¹⁹ kuraa kikusiryo na nrima nsha, efyo vandu vengyi valafisarye nawo vakarumaka elyi vauwa kikusiryo. ²⁰ Nnang’ani ya yewo ni Himenayo na Iskanda, neewo mmbo shilevaniinga mmbishwa naambo navaloshe valasheyaarara-se Iruva.

¹ Naasany kindo kya mbee kive ni fyeerero na fiterewo neeterevya vengyi Iruva ando amwi na fyaanu, efyo mufitani kimaruma kya vandu woose. ² Kimaruma kya vamangyi neewo woose vatiri ushilyi, naambo luwoni suku shisha na ta urilalyi, lukee na waarya na utele. ³ Ekyi ni kindo kisha kikakundika neefo kwa Iruva akee Mwikira weeru. ⁴ Nawe mmbo akundye vandu woose vakirwa neekooya imanya ekyo kikee kya dede. ⁵ Kimmba Iruva ni umwi, na nsandi wa Iruva na vandu ni umwi, mmbwe Mwana yeto wa Nndu we Kristo Yesu; ⁶ mmbwe yeto alekurambikya-u we muni nave ukiro kwa woose, na ukiro elo mmbo lushevikyoo ukureekyi elyi kyeeri kya vayo kifikaa. ⁷ Na kimaruma kya vayo mmbo shilevikwa shive mwiivambisa na nrumi (mmbo sharera dede nta nshi wongo-fo), shive llori wa vandu va masanga efo kikusiryony kya dede. ⁸ Kimmba ni indo, mmbo shikundye vomi vaate miindye wo ando, veshiipoo maako awo vavikye vandu mbora kulaiyo ulai nta unyafi. ⁹ Na kiwo vaka, nawo vakushope na masara esikya mwiili ando amwi na wiindi usha, na nrima wa mwiiyanu, utore lwawo lulave lwa yooka fii, nta lweekwaamba mafura a wuuru ao lwa soori ta wuuru uniini. ¹⁰ Lyo luve lwa mashora mesha, shaasa kisumanyi vaka valya vatirye Iruva vyo. ¹¹ Nndu nka nave mwaaranya sau needimi ikulosha findo, nave mfoo kyeeri kyoose, ¹² Nndu nka nalaniingwa mwaanya wa ilosha-fo, nta ishillya nndumi-fo, namalallye sau. ¹³ Shamashika Adamu mmbwe alepooka yuumbwa na Eva kasorya. ¹⁴ Nta nshi Adamu alelembwa-fo, lyo nka mmbo alelembwa deny kaanga urekweny. ¹⁵ Lyo mmbo ashekirwa kimuukya efo vaniny vakwe, kwakooya vasinda iirikyony na ukundiny na ikwiilyisa, ando amwi na nrima wa mwiiyanu.

¹ Nkindo kya dede, kwakooya nndu alanga iva askofu mmbo alanga ishora isha. ² Kyasiany kindo kikooye askofu ni iva nndu nalarerwa kikasha, nndumi wa nka umwi, nave wa mwiiyanu na araiye urango, naveva nndu mwaarya, mwiambya vandu naveva nndu eeshi ilosha; ³ nta nalave nndu wa wari ao mwiikapana; lyo nave nndu mfoo; nta nalave nndu mwiillya ulai na vandu, nta nalave nndu mwiikunda fesa-fo; ⁴ naveva mwiisalallya kyeny kwakwe nisha neelosha vana vakwe vatire vyo; ⁵ (mashika lyo le, nndu nalashidimaa isalallya mmba yakwe muni, mmbo ashidimaa inda ivavara siri ya Iruva?) ⁶ Nta nalave nndu aangye siriny mikonu ya kufii, nalasheekurosa nawe uvingony lwa yeto nkumbi. ⁷ Lyingyi mmbo kisumani nave nndu akureekyo mesha mmbandu vengyi; naambo nalasheewa uvingony na nreiyony wa yeto nkumbi. ⁸ Kiwo na mashemasi nawo vave vandu vavaa iindyo; valatiri ulumi lwa ntambo, nta valave veena nnu mfinyo-fo, nta valalangaa fesa ya ntambo. ⁹ Vatire ngata ya iirikyo vekee na nrima nsaari. ¹⁰ Yeva nkuti valolwa mbele, llyo varundeny mashora a ushemasi, elyi vammaa imanyika mmbatiri kyiteve. ¹¹ Na vaka vawo naawo, vave vasaari, nta valave vevikya vengyi ureeree, vave va mwiiyanu, vave vaarya findony fyoose. ¹² Mashemasi nkuti vave vomi va nka umwi, vesalallya vana vawo nisha, na poo kwawo. ¹³ Mashika yewo veerunda mashora a ushemasi nisha mmbo vashewonisaa nnduma nsha, neewona ukaari usongovisi lwa iirikyo valuuta efo kwa Kristo Yesu. ¹⁴ Efi mmbo shafikureiya lyo shiivikye nsia wesha kwafo mikonu ya kufii. ¹⁵ Lyo kwallollya shakyeeyo, lyo manya-da shaasa kisumanyi vandu ikaa efo mmba ya Iruva, ikee nnyo siri ya Iruva muni muu, kaveva mmbwe ngo na uvasha lwa dede. ¹⁶ Na kyama yekyo kya weele nkiniini. Iruva mmbo aleorwa paa kwi ngata ya mwiili na ngata yeyo ya mumuyo ikammanya mmbo akee nsumanu. Kalollyo mmbasu kavambiswa masangeny, kavikwa nsia kunu masangeny. Kavikwa uwe efo itumbeny.

¹ Naasany Mumuyo mmbo arera paa deny kyeyaamba sheelyi fyeeri fya ifurumya vandu vengyi mmbo vashelakanaa na iirikyo, vakutire na mimuyo yeyo ilembaa, na ngyufundo ta varumu; ² veeriwa ni ukunang’ari lwa vandu va wongo, mirima yaawo ikorwaa mmuro; ³ veshimaa vandu valaore vaka, neevavikya ishingo lya shoonga eto Iruva aletivika-fo naambo lutiwarye lumwaani neewo vatiri kikusiryo vengere imanya dede yeyo. ⁴ Shamashika lyo wo kyuumbe kya Iruva mmbo kyikee kisha, nta nkwiifo kivaa ilema-fo kuuta ni ifiwarya lwishaanaa. ⁵ Mashika mmbo kikee kiilyise ni irero lya Iruva na fiterewo. ⁶ Kumbura Vakristo mbony yeto, neewe llyo kushevaa nndundi nsha wa Kristo Yesu, kuvemanya nisha ufundo lwa iirikyo ando amwi na ufundo lwa dede llwa kuleloshwa. ⁷ Lyo ngyuraawe ta kimiku tilakee ta siri, nkuti kutilemi, kuvekwiishivira iva nsaari. ⁸ Shamashika ikwiishivira iwona finya ya mwiili nkisha-da kyaindi usaari mmbo lukee usha kyeeri kyoose, mmbo lukee uvikye kyaasa kya muu wa ulaalu na ulya ushaa numa. ⁹ Ni irero lyeevikyo nsia, nalyo lyisumani iirikyo deny; ¹⁰ mashika mmbo lukee ikuvinisa nekwaatara kimaruma kya efi, mashika elyi lukusirye Iruva yeu muni muu, yeu avekee Mwiikira wa vandu woose, mmwasi yewo vakusirye. ¹¹ Vavasya mbony yeti neetilosha. ¹² Lola nndu moose nalasheemina ukoo lwafo-fo, mashika nkuti kuve kyaaso kwa yewo vakusirye, kwiireraa na kwiitanaa, na yoora ikunda na kikusiryo kisha. ¹³ Kutani elyi nshaa, kutakure isoma na iikimba neelosha. ¹⁴ Kulare kularunda na simbo yeyo kulesimbwa, nkimaruma kya ukisuku neelyi kuleekeryo maako a vamiku. ¹⁵ Swaangya nnu efyo, kukutire nafyo; naambo ivesyo lyafo lyikooye ilollyo mmbandu woose. ¹⁶ Kuringe kumuni kutire ufundo lwafo. Kusinde ufundony yelo mashika kwatana indo mmbo kusheashuka yewe kumuni ando amwi na yewo vekwaaranya.

¹ Kulakyeemyi nndu mmiku-fo mmbo kumwiikimbaa sha ndoo, na vakoo sha vanavamau, ² vaka vakuu kuvaikimbe sha mau, na vana va kyika sha vamfwamau, kutani indo na waarya nnu. ³ Indya nnu vaka va ding’u yewo vatiri wiindi. ⁴ Kyaindi kwankooya nka wa ding’u atiri vana ao vashuku, yeva vakuloshe itana efyo fivasumanyi efo kyeny kwawo veni, varundye vamiku vawo. Mashika ekyi nkyo kyisenyi kwa Iruva. ⁵ Na yeto akee nka wa dingu deny karewa muni, yeto we mmbo avikye Iruva nsia, kavesinda etereva na yeererya Iruva kio na nsanyiny. ⁶ Kyaindi yeto nalakuvavaraa muni mmbo afiiye na kikava akee na muu. ⁷ Naakwa ni efi fivavasye, naambo valawoni kiteve. ⁸ Lyo nndu yeto nalalolaa vandu vakwe, mmbo yewo va kyeny kwakwe muni, yeto mmbo amina iirikyo, kooka-fo kava nkasha ngota nndu nalakee nkristo. ⁹ Nka wa ding’u nalafitye myaaka 60 nalavaangwa nka wa ding’u-fo nawe nave ekee nka wa mmi umwi-nsi. ¹⁰ Nawe nkuti nakooye akureekyo mesha, kwakooya alerosa vana, neyaambya veny neesangya veele marende, na yeekya velyiswa ukyiva, neetana findo fisha etiri usau. ¹¹ Lyo vaka va ding’u vakee vakoo kulavawarye-fo, mashika elyi vatirwa llango valalatya Kristo mmbo vashelangaa yoorwa. ¹² Nawo mmbo vakaa uvingony mashika elyi vara kikusiryo kyawo kya mbee. ¹³ Na kya mmwasi mmbo vakulosha iva varoko, vakaringitya efo neefo mmba ku mmba, nta nshi vakee varoko-da-fo mmbo vavikya vengyi ureeree needola mbony ta vandu, vakooka-fo vakarera urere. ¹⁴ Kyasiany mmbo shaamba vaka yewo va ding’u valandenkwa, vaorwa vaire vana, vaidimi ikallya kyeny kwawo, naambo valasheelekeiya nkiduva yeto mwaanya wa ivautya kiteve. ¹⁵ Mashika kwiifo vengyi valemmaa iinduka vakasora mmbishwa. ¹⁶ Nka nkristo, kwakooya atiri vaka va ding’u, naveekye we muni, naambo Siri ilasheerovyo; naambo yo siri yeekye yewo vakee vaka va ding’u deny. ¹⁷ Vamiku yewo vakallya findo nisha vendyo nnu kavii kararu, mmwasi yewo vekwaatara ivambisa mbony neelosha. ¹⁸ Mashika mareiyo mmbo aamba, “Ng’umbe ikapaa nganu nnyivaa ifinga kana-fo.” Na kingyi-se, “Mwiirunda mmbo asumani weesi lwakwe.” ¹⁹ Kulawarye mwaandu wa nndu akeesalala na mmiku-fo, nkuti mbele kukee-u vakureekyi vavii vararu indi. ²⁰ Valya vakeengera itana ulyamari vakyeemyi yoo mbee ya woose, naambo vengyi vaute-u iiryaa. ²¹ Mmbo shakuvavasya mbee ya Iruva, na mbee ya Kristo Yesu, na mbee ya vasu vakwe veele, salallya findo efyo nta kulaute uvingo uviny, nta kulatani kindo kweekundya-fo. ²² Kulaekyerye nndu maako kuladeesye nisha-fo, nta kulaange ulyamariny lwa vandu vengyi-fo. Kuringe kumuni kuve mwaarya deny. ²³ Kipookya ulaalu kulani mura mweni-fo sanda-u mfinyo mwaangu kimaruma kyeevavyo nndeu, ando amwi na ndwari yeto takwaatara llya na llya. ²⁴ Ngyulyamari ta vandu vengyi mmbo timanyikye paa, tikoora shaasa tikeerwaa vandu uvingony, vengyi ngyulyamari tawo tikavasora. ²⁵ Kiwo indo na mashora mesha mmbo amanyikye paa, nta filya filalollyo paa mfishiidimaa ikusuruma-fo.

¹ Valya woose vakee vafinge vakava mashinga, vairikye vanndumi vawo na ivaniinga wiindi loose, naambo irina lya Iruva lyilaararwa ando amwi na kiloshyo kyeru. ² Na valya vanndumi vawo vakee Vakristo valavamini-fo; nkyeni vengere ivarundya, mashika yewo vakeefura kya urundi lwawo mmbo vatiri iirikyo lyeru vakaveekundwa. Losha findo efi na iikimba deny. ³ Kwakooya nndu moose alosha ufundo lungyi neera nalairikya irero elyo lya muu lya Nndumi weeru Yesu Kristo na ufundo yelo lusheendee weele, ⁴ yeto mmbo ankurosa; nalaishi nta kindo, mmbo alyamarikye nrwe vakakusara mbony ta ivesa-vesa, na ulai lwa marero, neefo mfo kuukaa usuvanu, myaandu, na fyaararo, na nyinyira shikasha; ⁵ na ulai lwa vandu mirwe yaawo ilasongovye vakatura fya dede vakakusara sheelyi usaari ni shia ya iwonisa mbusha. ⁶ Kyaindi usaari na ira ifwaiya mmbusha niini. ⁷ Shamashika llulesha na kindo yaa ulaniny-fo, nta llushukaa-u na kindo-fo; ⁸ lyo kwakooya lutiri shoonga na soori teeraa mmbo lufuraa nafyo, ⁹ Indi yewo valangaa itira masaa mmbo vawee nreiyony na fyeesony, na langony shiingyi tilatiri nrwe, tivavisaa, yeto tirwaa vandu uretiny na urumatony. ¹⁰ Mashika kimayeny kyimwi kya uravi lwa wo ngata ni ikunda fesa, nayo elyi vengyi vanyiilanga nnu vakalakana na iirikyo, neekwaatara na mavavyo meengyi. ¹¹ Lyo yewe, kukee nndu wa Iruva, kutirishe findo efyo; kusore usumanu, usaari, iirikyo, ukundi, usisiryo, ufoo. ¹² Kapana fira yeyo sheele ya iirikyo, tira muu eto wa llung’anu kukee mmbaangye, kutani kulekureeka ukureekyi llwa usha mbee ya vakureekyi veengyi. ¹³ Mmbo shakuvavasa na irina lya Iruva, yeto aniinga fyuumbe fyoose muu, na lya Kristo Yesu, ulya alekureeka ukureekyi llwa usha mbee ya Pontio Pilato. ¹⁴ Ringa ivavaso elyi nisha, kulaiyo kiteve, kutani nkonu yeto Nndumi Yesu Kristo asheorwaa paa. ¹⁵ Nawe elyi kyeeri kyakwe kifikaa eshekooraa paa, niwe yeto akee iindyo, kava mmbwe muni wiidimi, kaveva Mangyi ya vamangyi, na Nndumi wa woose; ¹⁶ mmbwe muni nalasheywaa ni ufu, mmbo akee itumbeny lyilavaa ifikya, nta kulaifo nndu alemmulollya na miso yaa, nta nalashidimaa illolya. Wiindi na wiidimi llwakwe fika llunganu. Amen. ¹⁷ Yewo vakee masimba yaa ulaniny yelu vavie valakushope-fo, nta valakusirye usimba elo lulakee lwa dede-fo, kyaindi vavike Iruva nsia yeto aluniinga findo fyoose shapu naambo lurunde nafyo neefura. ¹⁸ Vavie vatani mesha, vave masimba kyeetana mesha, vavetira maako iniingya masaa awo, vasange na vandu vengyi veetiri nrima mwaa. ¹⁹ Ni indo vasurumi umasi usha efo lukeenda nafo, vashewonisaa muu yeto ukee wa dede deny. ²⁰ Ewe Timoteo, ringa nnu isaa elyo; kukwiise na marero alakee a ki-Iruva, alatiri urango, na fiwakyanu fya urango lulakee urango dede, ²¹ na vengyi elyi vakeisora vakara kikusiryo kya dede. Isarya lya Iruva lyimukaye.