1 VATESALONIKE

¹ Ni yese, Paulo, Silvanu na Timoteo lwareiya kwa siri ya Vatesalonike ikee siri ya Iruva Nde na Nndumi Yesu Kristo. Isarya na urilalyi fikae neeni. ² Mmbo lukeana Iruva kyeeri kyoose kimaruma kyany yeni moose, lwimukumbwaa efo fiterewony fyeru. ³ Nta llurekywaa ishora lyany iirikyo na ngatara yaany imusheye kimaruma kya ikunda-fo, ando amwi na usisiryo lwany luriani na ivika nsia efo kwa Nndumi weeru Yesu Kristo, na mbee ya Iruva Nde weeru." ⁴ Mashika-le vanavama mukunndyo ni Iruva, lwiishi sheelyi mmbo mukee vasauwe. ⁵ Mashika nrumi yeeru ya nsia nnyilemusheya ikee marero a ruu-fo, mmbo ilesha iitiri finya ya Mumuyo Mweele na ukaariso luvangyi, shaasa mulevelollya mikaaye yeeru efo kwany. ⁶ Neeni mmbo mulelusora yese na Nndumi, llya mulewarya irero mwikee ngatareny shiroo, lyo Mumuyo Mweele kamulyimya ifura. ⁷ Kutani mwava kyaaso kyisha kwa valya vairikye va kulya Makedonia na Akaya. ⁸ Mashika irero lya Iruva mmbo lyilerumwa lyuuka kwany, na nshi lyilefika Makedonia na Akaya-fo, ni wo ando kikusiryo kyany kwa Iruva kilefika, nta yese llutiri-u kya mmwasi kyeyaamba-fo. ⁹ Ni elyi wo veni vakeevambisa mbony teru, shaasa lulesha kwany, na shaasa mulera maruva a wongo mukalatya Iruva, naambo murundye Iruva yeu muni muu akee wa dede; ¹⁰ muvevereya Mwana wakwe nooke iruveeu, mmbwe yeto alennduta kooka kwa vafu, we Yesu, yeto ashelukiraa unyafi yelo lusheshaa.

¹ Mashika-le vanavama, yeni muveni mwiishi shaasa lulesha kwany, sheelyi nkileva kya ruu-fo; ² kyaindi lwikimaa ilyiswa ukyiva na itannywa fya kiila, efo Filipi, mwiishi, mmbo lulekaarya yaamba Nrumi ya Iruva ya Nsia kwany, lukaiwaanya nnu. ³ Ni elyi wiikimbi lweru kwany lulakee lwa ruu, nta ukasha nta llutiri ntambo-fo ⁴ Llyo shaasa Iruva alekunda lurambikyo Nrumi ya Nsia neese niindo luyaambaa, nshi sheelyi lukesennya vandu-fo, kyaindi lwikee vandu vasenyaa Iruva yeto aishi mirima yeeru. ⁵ Mashika yese lluleamba marero ekukundisa luveni-fo, neeni mwiishi indo, nta llulerera marero esikya unyuku-fo, nawe Iruva eeshi ekyo. ⁶ Nta lluleruuya nnduma kwa vandu-fo, nta kwany-fo, nta kwa vandu vengyi-fo, elyi lukee varumi va Kristo kive mmbo lwamurovya-fo, ⁷ mmbo luleva vafoo sau efo kwany, lukavaka nde mwiilela vana vakwe muni. ⁸ Neese kiwo lukammuvika nsia indo, lukakunda imuniinga fyoose, Nrumi ya Nsia sanda na mirima yeeru, mashika elyi mukee vakunde veru. ⁹ Mashika-le vanavamaye veru, mmbo mukumbuye kya waataro na ngatara teru, mashika yese mmbo lulerunda mashora kio na nsanyiny naambo lulasheerovya nta nndu na kava vi, kyeeri ekyo lwekee imoongoya Nrumi ya Iruva ya Nsia. ¹⁰ Yeni muveni mmbo mukee vakureekyi, na Iruva kiwo, shaasa lulekaa kwany yeni mwiirikye, lukee vaarya, va usumanu, lulatiri kyeekumbwa. ¹¹ Lyingyi-se shaasa muvekumbuye, shaasa luleikimba wo umwi waany shaasa nde wa vana aikimba vana vakwe muni, lukamutumarisa, lwiimukureekyaa neemwitika; ¹² naambo yeni mukooye ikaa shaasa kimusumanyi mbee ya Iruva, yeu amuvaangye naambo mwaange umanginy lwakwe lwa itumbe. ¹³ Kikeeny indo yese mmbo lukee yaana Iruva kulaifo ideerya mashika uka kyeeri mulewonisa irero elyo lya Nrumi shisha lya Iruva lyuuka kweru, nshi mulelyiwarya lyiikee ni irero lya vandu-fo, mmbo mulemanya ni irero lya Iruva, na niindo lyikai dede deny, lyikarunda mashora nnang’ani yaany yeni mukusirye-u. ¹⁴ Shamashika yeni vanavama veru mmbo mulelatya siri ta Iruva ta Uyuda, kwi Kristo Yesu, mashika naakwa ni yeni mmbo mulewonisa makyiva yoo meni kyuuka kwa vandu vany, na Vayuda yewo kiwo; ¹⁵ na mmbo yewo veni valewaa Nndumi Yesu, na vakisuku, vakalusisya neese-da, valatani kyeesenya Iruva nta vandu vengyi, ¹⁶ vakavelwiima lularere na vandu va masanga naambo vakirwa, vakatana indo kya yaawutya uravi lwawo nkonu simu, lyo unyafi lwa Iruva mmbo luvakaaye fika mafurumyony. ¹⁷ Lyo ulaalu, vanavama, elyi luraukani neeni ando a kirambo kidu, lyo mmashika elyi lulamulollye, lluraukani nriminy-fo mmbo lulangye nnu imulollya. ¹⁸ Kyasia mmbo lweekundye isha kwany, ee, yeny Paulo, shilenkunda isha lyimwi na lya kavii, lyo mmbishwa kakukikyisa-u. ¹⁹ Mashika ivika nsia lyeru, na ifura lyeru, na ureto lwa nsia weru nkyoki? Ndesa nshi yeni mbee ya Nndumi Yesu kufike elyi asheshaa? ²⁰ Mashika yeni mmbo mukee itumbe lyeru na ifura lyeru.

¹ Naasa kyikeeny indo, lwiikyilemwa isisirya mmwasi, lukalollya nkyeni lurewa Atene yese luveni. ² Lukaruma mwanamaye weeru Timoteo akee nndundi wa Iruva mwiirundya Nrumi ya Nsia ya Kristo, naambo namuvangise neemuviiryaa muu kikusiryony kyany; ³ kulave nndu asavaa kimaruma kya ngatara eti, mashika lyo yeni muveni mwiishi sheelyi mmbo tiluvereye. ⁴ Mashika kyeeri lweekee kwany mmbo lwesongwa imuvia sheelyi ngatara tisheshaa, nakyo kikaveva indo, mukamanya. ⁵ Nkyo kimaruma kyeeri shilelemwa isisirya mmwasi, shileruma nndu nashemusaiya nalole kikusiryo kyany, kulakooye nkumbi ashemweesa, yeni na usisiryo lwany luve ruu. ⁶ Kyaindi kyeeri Timoteo alesha auka kwany, mmbo alelweengye mbony shisha ta kikusiryo kyany, na ta ukundi lwany, kaveluvia shaasa mukee ilukumbwa nisha nkonu simu, na ilanga nnu ilulollya shaasa neese lulangye imulollya. ⁷ Kyimmba ni indo vanavama, kya mbony yeto tany mmbo lulewuiyo nnu mmuu, lla elyi lweetirwa nngatara shiroo, kikusiryo kyany kyikafweera fyoose. ⁸ Yese mmbo lukee na muu kwankooya neeni muselelyi kwa Nndumi. ⁹ A ndesa nkyoki lushidimaa itaa Iruva kive kyaanu kimaruma kya kikusiryo kyany mashika a ifura lyilutiri mbee ya Iruva weeru? ¹⁰ Kio na nsanyiny mmbo lukeetereva Iruva naambo lwiidimi imulollya, na iishurya-u fyilya fyaanguye-u efo iirikyony lyany. ¹¹ Naasany we Iruva Nde weeru muni, na Nndumi weeru Yesu namusongoye shia naambo lushe kwany. ¹² Nndumi namuvangise na imwengerya ikunda muveni na veni na kwa vengyi woose, shaasa neese lumukundye; ¹³ naambo navangise mirima yaany ikae ikee mivaramise ilatiri kyiteve mbee ya Iruva, Nde weeru, ivereye isha lya Nndumi weeru Yesu ando amwi na veele vakwe woose.

¹ Kyasaa-u ulaalu vanavama mmbo lwamwiikyimba na imutereva: musore Nndumi Yesu, shaasa lulemoora yese shaasa kisumani musenyi Iruva, shaasa yeni mukai, mweengere itana indo. ² Mashika mwiishi ni mavavaso-kyi lulemuniinga musore Nndumi. ³ Mashika ni indo Iruva akundye, mukooye iilyiswa, mulakani na utuusi. ⁴ Wo umwi waany namanyi shaasa akaa na nka wakwe muni nakae akee mweele naveva na wiindi, ⁵ nta nalasoraa lango sheesi, sha vandu va masanga valaishi Iruva-fo. ⁶ Kulave nndu alemba ungyi kindo nta illyamarya kya efi-fo, mashika Nndumi mmbwe yeto ataiyaa findo fyoose shaasa lulemuvia uka mapookyony lwimukureekyaa nnu. ⁷ Shamashika Iruva nnyaleluvaangya ngata ya ukyirinda-fo, mmbo akundye lukooye iilyiswa. ⁸ Kyasiany, yeto alema yefi nshi alemmya nndu wa vandu-fo mmbo alemmya Iruva yeto amulyimmya yeni Mumuyo wakwe Mweele. ⁹ Kya mbony ta ikundana nta nshitiri kimaruma kya imureiya-fo, mashika yeni muveni mmbo mukeevaloshe ikundana ni Iruva muni. ¹⁰ Mashika mmbo mukeyoora ekyo kwa vakristo woose va Makedonia koose. Naasa lukamuterevany mweengere deny itana indo. ¹¹ Na kingyi-se, kutakureny irunda mashora any, murunde mashora na maako any muveni shaasa lulemuvia; ¹² naambo moore wiindi kwa yewo valakee Vakristo na nta mulatafukwaa nkindo. ¹³ Lyo vanavama, llukundye mure mulamanya kya valya valellala-fo; naambo elyi numa mulasheesokyo mfyoova sha vandu valatiri kindo vavikye nsia. ¹⁴ Mashika kwakooya lwiirikye sheelyi Yesu mmbo alefwa karuka, naakiwo neewo valellala vekee na Yesu, Iruva mmbo ashevaviiraa-se ando amwi nawe. ¹⁵ Ekyi mmbo lwamuvia na irero lya Nndumi, sheelyi yese lukee na muu ulaalu lushesaa-u fika nkonu yeto Nndumi ashewuyaa nato, dede lyo llushesongoyaa yewo valellava ilala kya ufu-fo. ¹⁶ Mashika Nndumi we muni mmbo asheolokaa auka iruveeu na unyanga luvangaa, lwa nsu ulya nniini na iranda lya Iruva, na valya valefwa vekee na Kristo mmbo vashesongwaa irutwa mbele. ¹⁷ Numa llyo yese lukee na muu, lusee-u, lusherakuwaa-u lusandwa nawo efo mafishiny lundeambya Nndumi efo uwe; naasa lushekaa na Nndumi llung’anu. ¹⁸ Naasany, viiryaniny muu na marero yoo.

¹ Lyo vanavama, Kya mbony ta mikonu na fyeeri nshitiri kimaruma kya imureiyafo. ² Kimmba yeni muveni mmbo mwiishi ninsha sheelyi nkonu yeto wa Nndumi weewuya mmbo usheshaa sha inyinyi kyeeri kya kio. ³ Kyeeri ekyo vandu vakusaraa mmbo kukee kusha kukatira urilalyi, llyo urumato lusheshaa tiny, shaasa usu lwasheya nka llemwa, nalyo mmbashekirwaa-fo. ⁴ Kyaindi lyo yeni vanavama, mmukee ireeminy kutani nkonu yeto ushemusheyaa tiny-fo. ⁵ Mashika yeni mmbo mukee vana va sa, mmbo va nsanyiny; ee, yese llukee va ireema nta va kio-fo. ⁶ Kyasiany, lulalale sheewo vengyi-fo, lukae na mwiiyanu lusinde luvereyaa Nndumi. ⁷ Mashika yewo velala mmbo valala kio, neewo veenangwa mmbo vanangwa kio. ⁸ Kyaindi yese lukee va nsanyiny luve vandu va mwiina, luveraa kikusiryo na ikunda five sha fisha ando amwi na ivikya ukiro nsia. ⁹ Mashika Iruva nnyaleluvika yaa ulaniny luvereye unyafi lwakwe-fo, kyaindi naambo luwoni ukiro efo kwa Nndumi weeru Yesu Kristo; ¹⁰ yeto alefwa kimaruma kyeru naambo lusinde nawe lukee na muu ulaalu kwakooya lwafwa. ¹¹ Naasany, kuviiryeny muu neekukaarisa wo nndu na ungyi shaasa mwiifo mutanaa. ¹² Na kingyi-se vanavama, lukunndye mumanyi valya vakekwaatara kimaruma kyany, valya valemusalallya na irina lya Nndumi vemwikimbaa; ¹³ naambo muveendye nnu mukee na ikunda kimaruma kya ishora elyo lyawo. Muveva vandu va urilalyi yeni muveni na veni. ¹⁴ Vanavama, mmbo lwamutereva mwikimbe yewo valakee vasaari, muvekaarisa yewo vakee vafwafwa, neevikya kilyilyika yewo vafiiye nrima, muvesisirya vandu woose. ¹⁵ Kevekwiiseny naambo kulakae-fo nndu ataiya makasha na makasha, mmbo muvaa vandu vetana mesha kyeeri kyoose, muveni na veni na kwa vandu woose. ¹⁶ Veny vefura wo nkonu; ¹⁷ tereveny kulaifo iderya. ¹⁸ Veny veana Iruva kya wo kindo, mashika efyo mfyo Iruva akundye kwany kimmba mukee va Kristo Yesu. ¹⁹ Mulaimi Mumuyo mwaanya. ²⁰ Nta mulasheemina ukisuku; ²¹ eseny findo fyoose, musauwe-u ekyo kikee kyisha; ²² muvekwiisa na uravi lwa wo ngata. ²³ Naasany Iruva yeto wa urilalyi namwiilyise nakamwi, naambo ngoo tany na mirima yaany na miili yaany mukooye iringwa nisha, mukae-fo mulatiri kiteve, kufike nkonu yeto Nndumi weeru Yesu Kristo asheshaa nato. ²⁴ We Nndumi yeto amuvaangye mmbo akee nsaari nawe mmbo asheinutyaa fyaasa fyakwe. ²⁵ Vanavama, keveluterevyeny, ²⁶ Idikireny vanavama na kimimindo kyeele. ²⁷ Mmbo shamuvavasya shikee na Nndumi, vakristo woose vasomywa barwa yei. ²⁸ Isarya lya Nndumi weeru Yesu Kristo lyimukaye yeni moose.