1 PETRO

¹ Yeny Petro, Nrumi wa Yesu Kristo, shamureiya yeni Vakristo munyanyakye mukakaa kundo kweny efo Ponto na Galatia, Kapadokia na Asia na Bitinia. ² Shaasa Iruva Nde alesongwa imumanya llya alemwiilyisa na Mumuyo, mukatana mwakunyiisa mukaletywa samu ya Yesu Kristo. Nndumi namweengerye urilalyi na isarya. ³ Iruva naitikiswa, we Nde wa Nndumi weeru Yesu Kristo, yeto alelwiira lya kavii kyuuka na isarya lyakwe naambo luwoni ivika nsia elyo lyeende muu kimaruma kya iruka lya Yesu Kristo auka kwa vafu; ⁴ Naambo luwoni ding’u yeyo ilalyamarikaa, ilatiri ivara, ilashuumaa, ikeeshisurumi iruveeu kimaruma kyany. ⁵ Na yeni mmbo mukeeringwa ni finya ya Iruva kimuukya kikusiryony kutani mwawona ukiro yelo lushelolywa paa kyeeri kya ifurummya. ⁶ Mmbo mufuraa nnu kyeeri ekyo, na kikava ulaalu kyeeri ekyi kifii mmbo kimukooye irovyo ni fyeeso fya ngata shive na shive. ⁷ Naambo elyi kikusiryo kyany kisheeswaa, nakyo mmbo kiilanyi saabu shoose yeyo yeeswa na muro, kushe nnduma na itumbe na wiindi, elyi Nndumi Yesu Kristo ashelolywa paa. ⁸ Nawe mmbo munkundye, lla elyi mulandellollye na miso, na kikava mmullollye ulaalu, lyo mumwiirikye, na ifura nawe nnu deny ifura lyilavaa imina nta, ifura lyitiri itumbe, ⁹ kya iwarya ekyo mushefurumya nakyo kya iirikyo lyany, llo ukiro lwa mirima yaany. ¹⁰ Kya mbony ta ukiro elo vakisuku mmbo valeruuyaruuya, nesununda-sununda, vakaawuya kisuku kya isarya elyo lyishekaa lyimusheye yeni. ¹¹ Vakaruuya ni indii na ni kyeeri kyi kileorwa ni Mumuyo wa Kristo yeto ekee nnang’ani yaawo, yeto alepooka ikureekya makiva yoo ashekoyaa Kristo, na itumbe elyo lyisheshaa numa ya vayo. ¹² Vakaorwa sheelyi nshi kimaruma kyawo veni-fo, kyaindi kimaruma kyany nkyo vakafurukannya efyo, na mfyo muleongoywa ni valya valemoongoya Nrumi ya Nsia vekaywa ni Mumuyo Mweele yeto alerumwa auka iruveeu. Mbony eti naakwa ni vasu mmbo valangye itilola. ¹³ Kyasia, kaaryeny efo miriminy yaany, muve na mwiina findony fyany muvikye isarya elyo nsia deny eto muleorwa paa lya Yesu Kristo alesha. ¹⁴ Veny sha vana vatiri wiindi mure mulasora lango tilya ta mbee teeriyani na utondo. ¹⁵ Muvevaka yeto alemuvaanga akee mweele, neeni muveva veele efo mikaayeny yaany; ¹⁶ kimmba kikee kireiye indi, mmbo mushevaa veele shaasa neeny shikee mweele. ¹⁷ Na kimmba mwambaanga Nde, nawe mmbwe yeto ashaanduyaa wo nndu kulaifo ikundya shaasa akunda we muni, naasa kaeny na usau kyeeri ekyi mukee yaa ulaniny mukee veny. ¹⁸ Muvemanya sheelyi nshi mulewowowa na findo filyamarikaa-fo, sha fesa ao saabu, naambo muuke efo ngaany ya ureti mulewarya kwa vande vany-fo. ¹⁹ Kyaindi mmbo mulewowowa na samu ya wuuru, shaa ya ngurana ilatiri ivara nta mfere, nnyo ya Kristo. ²⁰ Nawe mmbo aishiwa deny uka elyo mbee kulaore ulana elu lwemmbeiywa, nawe kaorwa paa fyeeri efi kimaruma kyany. ²¹ Yeni muleirikya Iruva kyeendwa mmbwe, nawe mmbo alennruta auka ufuny kaniinga itumbe, naambo muwoni kikusiryo neevika nsia efo kwa Iruva. ²² Mukammaa ikwiilyisa mirima yaany na iirikya dede yeyo, muvefikya ikunda lya Kikristo lyilatiri ukunang’ari, mukundani na nrima. ²³ Mashika mmbo muleirwa lya kavii, nshi kyuuka ufyariny yelo lukeesia-fo, nkwa yelo lulasiaa, na irero lya Iruva lyitiri muu, elyo lyakaa llung’anu. ²⁴ Mashika, Mwiili wa nndu mmbo uvakye mare, na itumbe lya vayo lyoose nkimwi sha kivaro kya mare, mare mmbo ashumaa na kivaro kyaangare. ²⁵ Kyaindi irero lya Iruva mmbo lyakaa-u llung’anu. Na irero elyo ni irero llya isha lyileongowa kwany.

¹ Naasany, rweeny kwaasha uravi loose na ntambo moose, na ukunang’ari na ukasha na ivikyana ureeree loose. ² Mukee sha vakoku vaonika ulaalu indi, langeny urango luvakye malela alakee malonge-longe, naambo mwiidimi itumaa efo ukirony. ³ Kimmba mwammaa ishosha ulyilyi lwa Nndumi. ⁴ Endeny kwa yeto akee iwe lyitiri muu, yelyo vandu valelyilema, kyaindi kwa Iruva mmbo lyikee isauwe, lyikavetira nnduma. ⁵ Neeni mukee sha mawe atiri muu, mmbo mukee vatani muve mmba ya Mumuyo, ukohani weele mukooye yuuta firaso fya mirima, efyo fishiirikywa ni Iruva, kwi Yesu Kristo. ⁶ Mashika mmbo kikee kireiye efo mareiyony indi, Lola-te yoo Sion mmbo shavika-u iwe iniini lya ndumba, lyikee isauwe lyitiri nnduma na yeto mumwiirikya nnyashefiyaa sony-fo. ⁷ Naasany nnduma yeu ni wany yeni mukusirye-u. Kyaindi kwa yewo valakusirye-u, Iwe elyo veetana mmba valelyilema, mmbo lyilealuwa iwe iniini lya ndumba. ⁸ Na lyingyi-se, lyikava iwe lyekapa urende, na lyitulaa. Mashika irero elyo mmbo lyileva nsindara kwawo, valalyiirikye, nawo mmbo vekee vadeesye efyo. ⁹ Kyaindi yeni mmbo mukee ufyari usauwe, lukee ukohani lwa kimangyi, ufyari lwa vandu veele, vandu va ushilyi lwa Iruva, naambo mwiidimi ivambisa isarya lyakwe yeto alemuvaanga naambo muuke ireeminy na yaanga seny yakwe iilanyi; ¹⁰ yeni kulaore mbee mwekee ufyari elyo, kyaindi ulaalu ni ufyari lwa Iruva, mwekee vandu valaishi isarya lya Iruva, kyaindi ulaalu mmbo mwammaa iwarya isarya. ¹¹ Vakunde vakwa, mmbo shamwiikima mwikee sha vandu va kyaaro valaiyo kyaasha, kwiiseny na lango ta mwiili yeto tikapanaa na mumuyo. ¹² Kaeny na ngaa shisha efo kwa vandu va masanga, naambo kwakooya vamweekerya fya wongo sheelyi mukee veetana makasha, elyi valolaa mikaaye yaany misha, vang’anise Iruva elyi nkonu ufikaa. ¹³ Indyeny wo ivavasyo mwaniingwa, mwishiryaa Iruva, kwakooya mmbo kyauka kwa mangyi, yee mmbo atiri ushilyi uniini. ¹⁴ Kwakooya ni vaniini, yee, mmbo varumwa mbwe naambo vaorote yewo veetana makasha na irumisha yewo vetana mesha. ¹⁵ Mashika ni indo Iruva akunndye, naambo kyeendwa ni itana mesha mufindikire kana ka vandu yewo varung’ani; ¹⁶ muve sha vandu valeke, lyo mure mularunda na uleke lwany kyikee kya isikya makasha, kyaindi mukae sha vana va Iruva. ¹⁷ Indyeny vandu woose. Kundeny Vakristo vengyi. Ishikeny Iruva. Niingyeny mangyi wiindi. ¹⁸ Yeni varundi, indyeny vanndumi vany na usau nnu, nta nshi yewo vakee vesha na vafoo-da-fo, naakwa ni yewo vanyaasi. ¹⁹ Mashika usha lwa dede ni elyi nndu asisirya eireiye Iruva kyeeri akeelyiswa ukiva kilakee kya usumanu. ²⁰ Shamashika ni usha-ki nndu ashewonisaa-u elyi asisirya ekapwaa ngyoi elyi atannyi ulyamari? Kyaindi isisirya mwikapwaa elyi mutannyi mesha, elu llo usha lwa dede mbee ya Iruva. ²¹ Mashika ekyo nkyo mulevaangywa; mashika naakwa ni Kristo mmbo alelyiswa ukiva kimaruma kyany, kamoora shia ya ilatya, mukooye insora. ²² We nnyaletana ulyamari-fo, nta kindo kya ntambo-fo. ²³ Kyeeri aleararwa nnyaleviira firumu-fo; llya alelyiswa ukiva nnyalekutatarye-fo, lyo mmbo alekurambikya kwa yeto mwirumbwa fya usumanu. ²⁴ We mmbo aleipoo ngyulyamari teru mwiiliny wakwe alya nsalabeny, naambo lukava vafu kya ulyamari, lukae na muu kya mbony ta usumanu, na llya alekapwa nkyo kilemukira. ²⁵ Mashika lyo mmbo mwekeereka sha mburu; kyaindi ulaalu mmbo mwambuiya Mwiisi waany na Mwiisalallya mirima yaany.

¹ Naasany na yeni vaka indyeny womi wany; naambo kwakooya veefo valairikye Irero lya Iruva, vaalashwa ni ngaa ta vaka vawo kulore nta vaita irero elyo, ² kyeeri valolaa ngaa yaany shisha itiri vyo. ³ Utore lwany lulave utore lwa kipoo, sha yooka fii, na ikwaamba findo fisha na ikwaambika soori-fo; ⁴ kyaindi luve unndu usha lwa efo nriminy lulalolywa ni miso lukee llo utore lulalyamarikaa, nto nrima wa urilalyi na umamiri lukee lwa wuuru uniini mbee ya Iruva. ⁵ Mashika indo ni indo vaka valya veele va kasha valekutokopa vakaora usha lwawo kwa Iruva veshiindyaa womi vawo. ⁶ Mukumbuye shaasa Sara aleindya Abrahamu katana ammbaanga nndumi. Na yeni nkiwo mukee sha vana vakwe, mutani mesha, nta nshi kimaruma kya iryaa ikapwa-fo. ⁷ Neeni womi kiwo, kaeny na vaka vany na urango, muveniinga nka wiindi, mashika avakye kiiya kilatiri finya, kimmba nawo vakee veni ding’u ya isarya lya muu, naambo fiterewo fyany filafwe mmwasi. ⁸ Na kirero kya ifurumya ni ekyi, veny na nrwe umwi, muve velyillyana, muvekundana sha vana va nka, veiyana mashoya mwiikunyiisye. ⁹ Muveva vandu valataa ukasha na ukasha, ao ikapa mong’wa; lyo muve vevikya mbora. Shamashika, efyo mfyo mulevaangywa naambo muwoni mbora ive ding’u yaany. ¹⁰ Shamashika, yeto akundye muu wakwe, nawoni suku shisha. Naimi ulumi lwakwe irera makasha, na kana kakwe kalarere fya ntambo. ¹¹ Nare makasha natani mesha, nalange urilalyi, na ilulalakya deny ¹² Mashika miso a Nndumi mmbo alola yewo va usumanu na maarwi akwe akaaranya fiterewo fyawo. Kyaindi kisangu kya Nndumi mmbo kyafummbya yewo veetana makasha. ¹³ A ni vi yeto ashemuvavisaa, mukankutakura itana mesha? ¹⁴ Lyo kwakooya mwalyiswa ukiva kimaruma kya usumanu ngoma ni yaany. Mulaereye elyi vamweerese, nta mulaereve, lyo itikiseny Kristo Nndumi weeru efo miriminy yaany. ¹⁵ Wo nkonu kudeesyeny irouwa wo nndu yeto ashemuvesaa mbony ta ivika nsia elyi lyany, lyo murouwe na urilalyi na wiindi. ¹⁶ Neeni kaeny na nrima nsha ulatiri usakiro, naambo kwakooya mwavikywa ureeree, yewo vetendaa mweendo wany nsha efo kwa Kristo vakooye isutwa. ¹⁷ Mashika mmbo kikee ngoma ilyiswa ukiva kimaruma kya elyi lwatana mesha, kwakooya Iruva ankunda kive indo, ngota elyi lwelyiswaa ukiva lwiitanyi makasha. ¹⁸ Mashika naakwa ni Kristo alelyiswa ukiva lyimwi kimaruma kya ngyulyamari, we kava muni usumanu ando a yewo valatiri usumanu, naambo nalurwaa kwa Iruva. Mwiili wakwe mmbo ulewaawa, lyo nrima wakwe ukakaa na muu, ¹⁹ na nto aleengya nato yewo vekee vafinge, kavaongoya nrumi shisha, ²⁰ nawo vekee vandu vemina elyo mbee, kyeeri Iruva evavereye na usisiryo uniini, sha kyeeri kilya kya Noe, llya mmba ilya ya maboo yekee songosyo, nafo ni vandu vaangu valeanga-fo vandu nyanya nsi, vakakya iwaawa ni mura. ²¹ Ubatiso mmbo luvakye findo efyo, mashika ubatiso mmbo lukeemukira yeni mikonuny yei, (nshi kya ira uravi lwa mwiili-da-fo, kyaindi kya nrima ulatiri usakiro mbee ya Iruva), kyeendwa ni iruka lya Yesu Kristo. ²² Nawe akee rembo woko usha lwa Iruva kakweengya na iruveu, vasu na, itumbe na finya fikyimaa ivikwa si yakwe.

¹ Naasany kimmba Kristo alelyiswa ukiva ekee na mwiili, na yeeni raeny fisha fya kirengo ekyo kyeni. Mashika yeto alelyiswa ukiva ekee na mwiili mmbo amfuna ulyamari. ² Kipookya ulaalu mulakyeengere ikaa efo langony ta kivandu-fo, kuuta ni ikaa efo Iruva akunndye fyeeri efi fyany fyamusaaya fyekaa yaa ulaniny. ³ Mashika fyeeri fyeru efyo fyammira fivekufiye itana fya lango ta kiulana, nto yeenda efo uraviny, na lango, na unangwa, na mirumwa ya italauwa ndeu, na ngyari, na miindye ya maruva a wongo ilasumani; ⁴ efo findony efyo wo mmbo vatinnywa nkyany deny elyi mulakeesanga nawo efo uraviny elu lulatiri nta kyeeso, nawo vakava vamutendaany. ⁵ Nawo mmbo vasheveswaa kimwi kimwi ni yeto akudeesye isherumbuya yewo vakee na muu na valya vafiiye. ⁶ Mashika elyi kikee indo naakwa ni valya vafiiye valeongoywa nrumi yeyo ya nsia naambo vautywa uvingo vekee na mwiili kiinani na ngata ya kivandu. Lyo vashekaa na muu wa kimumuyo indo shaasa Iruva akee na muu. ⁷ Lyo masiyony a findo fyoose ansha kufii, naasany, wareny urango muvelala shoovi mwiterevaa. ⁸ Mmwasi ya findo fyoose veny na usasari nnu lwa ikundana, mashika ukundi mmbo lulamyaa ulyamari na lukang’ana inda. ⁹ Waryaniny muveni efo kyeny kwany kulaifo ikunung’una, ¹⁰ wo umwi kiinani na shaasa akee nsimbe kive kyerundyana muveva sha vangari vesha vekallya fyama fya Iruva fya wo ngata. " ¹¹ Kwakooya nndu arerya vandu navarerye shaasa irero lya Iruva lyikai, kwakooya arunda narunde na wiidimi elo Iruva anningye naambo Iruva naute-u ing’aniswa kya findo fyoose kwi Yesu Kristo. Nnduma na wiidimi mfyakwe we llung’anu na llung’anu. Amen. ¹² Nyira vakunde, loleny mulasheyaawutwa ni ngatara yeto tikee nnang’ani yaany timusheyaa sha muro naambo timweese, eto tilave sha kindo kyeny kyamusheya-fo. ¹³ Lyo shaasa muleakana makiva a Kristo, fureny, naambo na kyeeri ekyo kya itumbe lyisheorwa paa mushefura na ikapa ukoru. " ¹⁴ Mukee va ngoma kwakooya mwakapwa mong’wa, kimaruma kya irina lya Kristo mashika Mumuyo yeto wa itumbe wa Iruva mmbwe yeto amukaaye. ¹⁵ Nkivaa nndu wa kwany noorotwa kya iwaa-fo, ao kya unyinyi, ao kya maravi, ao sha nndu mwikulambika findony fya vandu vengyi-fo. ¹⁶ Kyaindi kwankooya orotwa elyi akee Nkristo nalafiiyo ni nrwe-fo, lyo neengere irumisha Iruva na irina elyo. ¹⁷ Mashika fyeeri fyammaa iinana yuutywa uvingo kyipooka na efo mmba ya Iruva; na elyi kishepookaa neese, a kyefurumya kya yewo valatirye Nrumi yeyo ya Iruva wo mmbo kishevaa inda? ¹⁸ Na kwakooya yeto wa usumanu kishemmbiyaa tamba ikya, a yeto nalakee mwiindya Iruva kaveva llyamari ashelollywaa dede? ¹⁹ Naasany yewo veorotwa shaasa Iruva akunndye vasurumi mirima yaawo efo kwakwe, vavekaa-fo vetanaa fya usha, kive ni Muumbi yeto weeru nsha vantannya.

¹ Kya vamiku yewo vakee efo kwany, yeny shikee mmiku uroyeawo, na nkureekyi wa makiva a Kristo na mwiakana itumbe llya lyishesukuwaa paa elyi numa; mmbo shamoolokya, ² mwiise na isalallya nisha ironda elyo lya Iruva lyikee kwany, nta mulavaa sheelyi mwaitikywa, kyaindi mutani indo kikee kya ikunda shaasa Iruva akundye; nta nshi kya fesa ya ntambo-fo, lyo kive kya nrima. ³ Nta mulasheeva sha vekwaallwa vanndumi efo fyuungony fyawo-fo, mashika mmbo mukundywa muve kyaaso kisha efo irondeny lyany. ⁴ Na elyi Mwiisi yeto nniini ashelollywaa paa, mmbo mushewaryaa ureto lwa itumbe llwa lulanaa. ⁵ Kiwo-da na yeni mukee vakoo, irikyeny vamiku. Yee, yeni moose raeny ngata ya ikunyiisa, llyo mushidimaa irundyana nisha, shamashika Iruva mmbo alema yewo vekung’anisa, lyo yewo vekunyiisa kavasimba isarya lyakwe. ⁶ Kyasia kunyiisyen yoo wokony lwa Iruva lukee ulyimbi, naambo namwipoo elyi kyeeri kifikaa. ⁷ Mukeny indo muvenrika we mario any moose, ni elyi we akee ikuvinisa nnu kyany yeni. ⁸ Veny na mwiiyanu muvelala shoovi; mashika nkumbi yeto waany we mmbishwa, mmbo avakye miiso idinaa, itivaa-tivaa efo na efo iiruyaa nndu inratwe-ratwe. ⁹ Lyo yeni kaaryeny, munlemi na kikusiryo, manyiny ukiva elo lyo weni lukee ilollyo kwa vanavamaye vany yaa ulaniny. ¹⁰ Na Iruva yeto muni isarya lyoose, yeto alemuvaanga naambo mwaange itumbeny lyakwe lya llung’anu kwi Kristo, mwammaa ilyiso ukiva kyaangu, we muni mmbo ashemuselevendee, na imuvika kiringisyo, na imusimba finya. ¹¹ Wiidimi llwakwe llung’anu kufike llung’anu. Amen. ¹² Barwa yei mmbo shamureiya na woko lwa Silvanu, mwanamaye weeru akee nsaari, nng’u marero yoo maangu, naambo shiikyimbe na ikureeka-u sheelyi yelyi llyo isarya lya dede lya Iruva. Na yeni salaleny mukusirye-u. ¹³ Siri shisauwe ni Iruva ya kunu Babeli yamwiidikira, na nsero wakwa, we Marko kiwo. ¹⁴ Kwiidikireny na kimimindo kya ukundi. Unapwe lukae kwany yeni moose mukee nnang’ani ya Kristo. Amen.