1 VAKORINTO

¹ Ni yeny Paulo, shilevaangwa iva nrumi wa Yesu Kristo kwi ikunda lya Iruva, na Sostene mwanamayeru. " ² Yeni va siri ya Iruva ikee Korinto, valya vakee vailyise kyeendwa ni Yesu Kristo, vakavaangwa naambo vave veele, ando amwi na woose valya vakeesenda irina lya Yesu Kristo wo ando, Nndumi waawo na weeru. ³ Isarya lyikae neeni na ufoo, yelo luukye efo kwa Iruva Nde weeru, na kwa Nndumi Yesu Kristo. ⁴ Mmbo shava mwaana Iruva mikonu myoose kimaruma kyany, kimaruma kya isarya lya Iruva mulelyimywa kwi Kristo Yesu. " ⁵ Mashika mmbo mulelyimywa mbora shiingyi kyeendwa mmbwe, efo mireryeny yaany na waarya loose; ⁶ shaasa ukureeki lwa Kristo lulekoora paa kwany. ⁷ Nta mmulaanguyo nsimbo nta imwifo, mukavekaa-fo mwiivikaa nsia kya ishekoora paa lya Nndumi weeru Yesu Kristo. ⁸ Mmbwe yeto ashemuvangisaa fika mafurumyony, naambo mulashekapwa mong’wa nkonu ulya wa Nndumi weeru Yesu Kristo. ⁹ Iruva yeto alemuvaanga ni nsaari, nambo mukooye isandwa na Mwana wakwe Yesu Kristo Nndumi weeru. ¹⁰ Naasany vanavama, shamutereva na irina lya, Nndumi weeru Yesu Kristo, murere kimwi; nta mulatarakani, kyaindi mufikye iva va nrwe umwi na makusaro amwi nsi. ¹¹ Mashika-le vanavama, valya va mmba ya Kloe mmbo valeshifitya mbony tany kyeyaamba kwiifo uriingyi kwany. ¹² Naasany, kirye yaamba indi, wo umwi waany mmbo akee yaamba indi, yeny mmbo shikee wa Paulo, na ungyi kaamba ni wa Apolo, na ungyi ni wa Kefa, na yeny ni wa Kristo. ¹³ A Kristo mmbo akwaavye ndesa? A Paulo yeto mmbo alekapyo nsalabeny kimaruma kyany? Ale ndesa, mmbo mulebatisyo irina lya Paulo? ¹⁴ Mmbo nkeyaana nnu Iruva mashika efo kwany nshilebatisafo nndu-fo, kuuta Krispo na Gayo; ¹⁵ naambo kulasheva-fo nndu aamba mmbo alebatiswa na irina lyakwa. ¹⁶ Na lyingyise shilebatisa vandu va mmba ya Stefana, na mmwasi ya yewo nshiishi kwakooya shilebatisa nndu ungyi nta umwi-fo. ¹⁷ Shamashika Kristo nnyaleshiruma naambo shindebatisa-fo, kuuta ni ivambisa Nrumi Shisha, na nta nshi na urango lwa marero-fo, naambo nsalaba wa Kristo ulasheeva ruu. ¹⁸ Mashika irero lya nsalaba kwa yewo vakeereka ni kindo kyeeseta, indi kweru yese lukeekirwa ni finya ya Iruva. ¹⁹ Mashika kikee kireiye kyeyaamba, “Nshelyamaraa urango lwa yewo vatiri urango, na imanya lya yewo vaamba veeshi, nshelyilema.” ²⁰ Yeto atiri urango nkwi akai? Mwilosha mavavaso akee kwi? A yeto mwisuma mbony wa inu akee kwi? A Iruva nnyalealwa urango lwa ulana yelu luve urung’ani? ²¹ Mashika efo waaryeny lwa Iruva kukooyaa kulaore ulana lwamannya-u Iruva na urango lwa vayo, Iruva mmbo alekunda ikira valya vakusiryeu na ufwafwa lwa irero llya lyikeyaambawa. ²² Mashika wo Vayuda vakeeruya ngyende, na Vagriki ni urango; ²³ lyo yese mmbo lukeevambisa Kristo ulya alekapyo nsalebeny, na kwa Vayuda ni nsindara na kwa Vagriki ni kindo kyeseta. ²⁴ Kyaindi kwawo vakee vavaange, kwa Vayuda ao Vagriki, ni Kristo, finya ya Iruva, na waarya lwa Iruva. ²⁵ Mashika urung’ani lwa Iruva mmbo lutiri urango ngota vandu, na ufwafwa lwa Iruva lukatira finya ngota vandu. ²⁶ Mashika-le vandu vakwa, loleny kya uvaango lwany, sheelyi nshi veengyi vatiri urango lwa kivandu, nta nshi veengyi vatiri finya, nshi veengyi vatiri uniini vakee vavaange-fo. ²⁷ Mashika Iruva mmbo alesauwa findo firung’ani fya ulana yelu naambo nasute valya vakee varango. Lyingyi Iruva mmbo alesauwa findo fifwafwa fya ulana elu naambo nasute filya fitiri finya. ²⁸ Na lyingyi-se Iruva mmbo alesauwa findo finana fya ulana na fikee fiile, yee, filya filaiyo. ²⁹ Yeto atiri mwiili moose nalasheekurosa mmbee ya Iruva-fo. ³⁰ Mashika nkimaruma kyakwe mukakusirya na Kristo Yesu yeto alealuwa waarya lwa Iruva kweru, na usumanu, na weele, na ukiro; ³¹ naambo shaasa kikee kireiye, yeto mwikushopa nakushope na Nndumi.

¹ Kyasiany vanavama, kyeeri shilesha kwany nshilesha shishemoongoya kyama kya Iruva na moososo wa marero nta na urango-fo. ² Mashika mmbo shilefisha shila nriminy wakwa shilamanyi kindo kyoose efo kwany kuuta Yesu Kristo ulya alekapyo nsalabeny. ³ Neeny mmbo shekee na ufwafwa efo kwany na weerei na irerema nnu. ⁴ Na irero lyakwa na yaamba Nrumi ya Nsia nkyekee kya marero a urango-fo, atiri yoomwa vandu-fo, ni kwa finya na ngata ya Mumuyo. ⁵ Naambo kikusiryo kyany kilave nkya ngata ya urango lwa nndu, indi kive kya finya ya Iruva. ⁶ Kyaindi kwiifo urango lwa vandu yewo vasalalyi nisha, nta nshi waarya lwa ulana elu-fo. Nta lwa yewo veshillya, ulana elu vakava ruu-fo. ⁷ Mmbo lwarerya mbony ta waarya lwa kyama kya Iruva. Llo waarya lukee usurumi, llo Iruva aleluvika-fo uka elyo mbee kimaruma kya itumbe lyeru. ⁸ Nalo yewo veshillya ulana elu mmbalwiishi nta umwi-fo. Mashika kukooye velyishi, mmbekapyaa Nndumi wa itumbe nsalebeny-fo. ⁹ Lyo shaasa kikee kireiye. Findo filya kulaore iriso lyilefilollya nta kuri ifiita, (Nta mfileanga nriminy wa nndu-fo,) mfyo Iruva aledeesya valya venkunda. ¹⁰ Lyo Iruva mmbo alelusukuya yese na Mumuyo Mweele. Mashika Mumuyo we mmbo aishi fyoose, naakwa ni fyama fya Iruva. ¹¹ Mashika efo vanduny mmbi aishi mbony ta vandu kulaore ni ngoo ya nndu yeyo ikee efo nnang’ani yakwe? Ni indo-da na mbony ta Iruva nkwiifo mwitimanya-fo kuuta Mumuyo wa Iruva. ¹² Kyaindi yese llulewarya mumuyo wa ulana elu fo, ni Mumuyo wuukye kwa Iruva, naambo lwiidimi imanya filya lukee valyimyi ni Iruva. ¹³ Neefyo lukafivera, nshi na marero akeeloshwa ni urango lwa kinndu-fo ni marero akeeloshwa ni Mumuyo, lwitambashwaa findo fya nriminy na marero a nriminy. ¹⁴ Naasany nndu yeto akee wa mbuka ya llya kipooka nnyashiidimaa iwarya mbony ta Mumuyo wa Iruva-fo; mashika kwa yeto ni kindo kyeseta, nta nnyashidimaa itimanya-fo, mashika mmbo tishidimaa imanyika kwa ngata ya nriminy sheni. ¹⁵ Kyaindi nndu wa ngata ya nriminy mmbo amanyaa fyoose, naakwa kulaore vengyi vamanya. ¹⁶ Mashika, Ni vi alemmanya makusaro a Nndumi, nanniinge makusaro? Kyaindi yese lutiri makusaro a Kristo.

¹ Lyo, vanavama, yeny nshileidima irera neeni sha vandu vatiri ngata ya mumuyo-fo, indi mmbo shilerera neeni sha vandu wa ngata ya mwiiliny, sha fivana fidu kwi Kristo. ² Mmbo shilemuniinga malela, nshilemuninga shoonga shuumu-fo; mashika mmwemiidima iilya-fo. Yee, fika ulaalu mmwaleidima-fo. ³ Mashika fika ulaalu yeni mmbo mukee vandu va ngata ya mwiiliny. Mashika kwany kwiifo kififi na uriingyi. Yeni nshi vandu va ngata ya mwiiliny, na lyingyi mukeenda na ngata ya kivandu? ⁴ Mashika yoo nndu umwi ashiidimaa yaamba, yeny shikee wa Paulo, na ungyi, yeny ni wa Apolo, a yeni mmukee vandu? ⁵ Kyasia Apolo mmbi? Na Paulo mmbi? Ni varundi, yeni mulekusirya kimaruma kyawo, na shaasa wo umwi Nndumi alemwidimisya. ⁶ Yeny mmbo shilevaaya Apolo siri; lyo yeto mwirosa ni Iruva. ⁷ Kwa ekyo, mwivaaya nshi kindo-fo nta yeto anisaafo, kuuta yeto arosaa, mmbwe Iruva. ⁸ Naasany yeto akeevaaya na yeto akeenisa mmbo vakee vamwi, na wo nndu mmbo ashewonisaa weesi lwakwe muni kiinani na ngatara yakwe muni. ⁹ Mashika lyo yese mmbo lukee varundi ando amwi na Iruva; yeni mmbo mukee irema lya Iruva, mukaveva mmba ya Iruva. ¹⁰ Kiinani na isarya lya Iruva shilelyimmyo, yeny, shivakye mwitana mmba atiri urango, mmbo shileveiya uvasha, na nndu ungyi mmbo akeetanyau mmba. Kyaindi wo umwi kuti nalole shaasa atannyaa yoo uwasheny elo. ¹¹ Mashika nkwiifo nndu ashiidimaa ivika uvasha lungyi-fo, kuuta yelo lulemmaa ivikwa, llo Yesu Kristo. ¹² Llyo yoo uvasheny yelo nndu katannya-u, saabu ao fesa ao mawe a wuuru, ao firi ao mamburu ao nyasi, ishora llya wo umwi lyishekooraa paa. ¹³ Mashika nkonu yeto ishesukua, mashika mmbo isheetwaa murony, na muro yeto nto usheesaa ishora lya wo umwi woore ni ngata ki. ¹⁴ Ishora lya nndu yelyo atannyi-u lyikansalala, ashewonisaa itumbe. ¹⁵ Ishora lya nndu lyikanrumaka, afwaa mmwasi nndu yeto; kyaindi ikirwa lyake lyishevaa sha nndu aturunya murony. ¹⁶ A mmbo mulaishi sheelyi yeni ni mmba ya Iruva, na lyingyi sheelyi Mumuyo wa Iruva mmbo akaa nnang’ani yaany? ¹⁷ Kwakooya nndu alyamara mmba ya Iruva, na Iruva mmbo ashelyamaraa nndu yeto. Mashika mmba ya Iruva nsheele nnyo yeni. ¹⁸ Nndu nalashekulemba we muni; kwakooya nndu akulollye we muni mmbo atiri urango yaa ulaniny elu, ra nave ntondo naambo nave nnrango. ¹⁹ Mashika urango lwa ulana yelu ni urung’ani mbee ya Iruva. Mashika kikee kireiye kyeaamba. We mmbwe yeto areiya varango na mireiyo yaawo. ²⁰ Na lyingyi, Nndumi eeshi makusaro a yewo vatiri urango sheelyi ni ruu. ²¹ Naasany, nndu nalakurose kimaruma kya vandufo. Mashika fyoose mfyany; ²² kwakooya ni Paulo, ao Apolo, ao Kefa; ao ulana; ao muu, ao filya fiiyoo ulaalu ao filyaa fishaa, fyoose mfyany; ²³ neeni mmbo mukee va Kristo, na Kristo mmbwa Iruva.

¹ Nndu nalulole indi, sheelyi mmbo lukee varundi va Kristo, na vangari vekallya fyama fya Iruva. ² Kikeeny indo kindo, kikunndwa efo kwa vangari ni nndu ilollyo mmbo akee wa dede. ³ Kyaindi yeny nshilollye nkindo kwakooya mwashuutya uvingo-fo, nta na uvingo lwa kivandu-fo, na nta nshikuutyaa uvingo yeny shimuni-fo. ⁴ Mashika nshitiri kimaruma kyetana indo-fo. Lyo nshikyo kyasheekennya usumanu-fo; mashika mwishuutya uvingo ni Nndumi muni. ⁵ Naasa yeni mulaute uvingo lwa kindo kyoose kyeeri kilandefika-fo, kutani elyi Nndumi ashaa; mmbwe yeto ashemikyaa yefyo fikee fisurumi ireeminy, neesukwa fyama fyoose fya ngoony ta vandu, llyony, wo nndu ashewonisaa nnduma wakwe efo kwa Iruva. ⁶ Naasany vanavama, mbony yeto mmbo shatirera na fyaaso kimaruma kyakwa yeny na Apolo kimaruma kyany, na kwa kyaaso kyeru yeni mwiidimi ikulosha mure mularekywa filya fikee fireiye. Naambo nta umwi waany nalakushope kimaruma kya ng’anya kikee kilakaniso na yeto ungyi. ⁷ Mashika lyo ni vi yeto alollya yewe nkukee sha yeto ungyi? A yewe nkyokyi kulandekiwarya? Indi kwakooya kulewarya, mmbo kukung’anisaa inda elyi kulandewarya? ⁸ Mmbo mwammaa iwuura, mwamaa iwarya usimba, mwammaa ishilya lulaiyoo. Yee kyeshiaa, naambo neese lushillye neeni! ⁹ Mashika shikusara Iruva mmbo aleluvika yese varumi yoo mafurumyony, luvake vandu vautye uvingo vandewaawa; luve kindo kyeelola kwa ulana loose, kwa vamalaika na kwa vandu. ¹⁰ Yese mmbo lukee varung’ani kimaruma kya Kristo, neeni lyo mukava varango kimaruma kya Kristo, yese mmbo lukee vafwafwa, neeni mukatira finya, yeni mmbo mutiri nnduma lyo yese llukeewonisa nta wiindi-fo. ¹¹ Na fika ulaalu, mmbo lutirwa nshaa na nyura, lukee ruu, lukeekapwa na ng’unde, nta llutiri ando ekaafo; ¹² na lyingyi mmbo lukeyaatarika nnu lwirundaa mashora na maako eru luveni. Lukaararwa mmbo lwaavikya mbora, lukavaviswa nriminy lukasisirya; ¹³ lukavikyo ureeree mmbo lwalelemba; mmbo lukee yaaluwa sha kirinda kya ulana na kyoo kya findo fyoose fika ulaalu. ¹⁴ Nshikeemureiya findo efi naambo shimwiing’ashe-fo; indi naambo shimwikimbe sha vana vakunde. ¹⁵ Mashika na kikava mutiri veelosha vafye sha fiku ikumi kwi Kristo, lyo mmutiri vande veengyi-fo. Mashika ni yeny shilemwiira kwi Kristo Yesu kyeendwa ni Nrumi ya Nsia. ¹⁶ Kyasiany shamwiikima mushisore yeny. ¹⁷ Nkyo kiteve sharuma Timoteo kwany, we mwana wakwa nkunde na nsaari kwa Nndumi, we mmbwe ashemukumburaa shia shileisora kwi Kristo, shaasa shivekeelosha wo ando efo siriny. ¹⁸ Naasa kukaa-fo vengyi vakeekushopa veshaamba nshikekisha kwany-fo. ¹⁹ Lyo nkeesha kwany uviny, shammidimisyo, neeny nshemanya, nshi vakeekushopya marero tupu-fo, kyaindi na finya-da. ²⁰ Mashika umangyi lwa Iruva llwiiyoo na marero-fo, kyaindi nna wiidimi. ²¹ A nkingakyi musauwaa-u? Shasha kwany na mbiiri, a shasha na ikunda na nrima wa ufoo?

¹ Ni dede mmbo kikee irerwa efo kwany mbony tikakwaana riti, sheelyi kwiifo utuusi lulakee nta kwa vandu va masanga, sheelyi nndu nakae na nka wa ndeye. ² Neeni mukarumana, nta mmusukaa-fo, kwakooya ashuuka kwany nndu mwitana kindo kya ngata efyo. ³ Mashika lyo dede, kwakooya shilaiyoo na mwiili, lyo shakaa-u kinrima, yeny shimuni mmbo shammayuutya yeto aletana kindo ekyo uvingo, kimwi sheelyi sheiyo. ⁴ Kyeeri mukusanyirye na irina lya Nndumi weeru Yesu, neeny shikee neeni kwi mumuyo ando amwi na wiidimi lwa Nndumi weeru Yesu. ⁵ Shirambikye mmbishwa nndu yeto, naambo mwiili ukapwa, indi to nrima ukirwa nkonu yeto wa Nndumi Yesu. ⁶ Irumana lyany nshi isha-fo. Mmbo mulaishi sheelyi ntarang’o munnywa mmbo ushashwa mbumba moose? ⁷ Kyasia, kwiilyiseny, mundeutaa-fo ntarang’o eto wa kasha, muwake mbumba muiya, mukae-fo mulatiri ntarang’o. Mashika Pasaka yeeru ilemmaa yuuto ive kiraso, mmbwe Kristo; ⁸ naasany luvike nkonu nnini, nshi wa ntarang’o ulya wa kasha-fo, ao nta nshi na ntarang’o wa uravi na ukasha-fo, kyaindi nkya filya filataran’gaa, llo waa lwa nrima na dede. ⁹ Mmbo shilemureiya kulya barueny ilya yakwa, kyeyaamba mulasasange na vatuusi-fo. ¹⁰ Nnshi shikeamba mulasange deny na vatuusi va ulana elu-fo, ao na velanga, ao na vasoki, ao na veindya maruva a wongo-fo; mashika mmbo kyevaa kuti mukee kunu ulaniny yelu. ¹¹ Kyaindi shaasa kikai, mmbo shilemureiya mulatarannyi na nndu moose akee umwi weeru, akee ntuusi ao mwilanga ao mwiindya maruva a wongo ao mwiyarara, ao nnangwa ao nsoki-fo. Vandu va ngata yeto mulakunde nta ilya nawo-fo. ¹² A nkikyi elyi yeny nshuutyaa valya vakee poo uvingo? Yeni mmbo mulakeyuutya uvingo yewo vakee neese? ¹³ Yewo vakee poo ni Iruva ashevautyaa uvingo. Yeto akee nravi muuteny efo nnang’ani yaany.

¹ A kwakooya umwi wany akeeyava ungyi sye, akaryaa inrwaa mbee ya vandu va masanga, nare-fo vandu veele? ² A mmbo mulaishi sheelyi veele mmbo vasheutyaa ulana uvingo? Na kwankooya ulana mmbo lusheutywaa uvingo ni yeni, mmbo mulasumani ulaalu irumbwa myaandu midu? ³ Mmbo mulaishi sheelyi mmbo lusheutyaa vasu uvingo, na nshi mmwasi deny kya mbony ta muu yeu! ⁴ Naasany, kwakooya mutiri ando musheanduyaa mbony ta muu yeu mmbo mwavika veerummbwa yewo vakee ruu kunu siriny? ⁵ Mmbo sharera indo kikee kyeemuteenda. A mmbokyaamba kwany nkwiifo nta nndu umwi atiri urango, ashiidimaa irummbwa mbony ta vandu vakwe? ⁶ Kyaindi mmbo mwakukumba muweni na veni nndu na uroye kwa vandu va masanga. ⁷ Naasany mmbo mukeevaanguye deny mukankuriingya muveni na veni. A nshi ng’waana kwaanguywa, ao isokwa findo fyany? ⁸ Indi kilasha neefyo yeni mmbo mwalammya vengi neevasoka masaa awo; yee, naakwa ni vandu vany veni. ⁹ A mmbo mulaishi sheelyi varavi va ngata yeyo mmbawonaa umangyi lwa Iruva-fo? Mulasheelembika, vatuusi mmbashewonaa umangyi lwa Iruva-fo, nta veindya maruva a wongo-fo, nta vaatuusi, na varavi va ngata eto, ¹⁰ manyinyi, nta velanga, nta vanangwa-fo, nta veyaarara, nta vasoki-fo. ¹¹ Na vengyi vany mmbo mwekee va ngata yeyo; lyo mukailyiswa, mukaekennywa usumanu na irina lya Nndumi Yesu Kristo, na lya Mumuyo wa Iruva weeru. ¹² Kwakwa yeny findo fyoose mfisha. Lyo nshi fyoose fivaa-fo. Kwakwa yeny findo fyoose mfisha. Lyo yeny nshisheshilywa nta nkindo kimwi-fo. ¹³ Shoonga nnya ndeu, na ndeu nya shoonga. Lyo Iruva mmbo asheutaa-u fyoose, ndeu na shoonga. Indi mwiili nshi wa utuusi-fo, ni wa Nndumi, na Nndumi ni wa mwiili. ¹⁴ Na Iruva mmbo aleruta Nndumi weeru na lyingyi we mmbo ashelurutaa neese na wiidimi lwakwe. ¹⁵ A mmbo mulaishi sheelyi miili yaany ni malungo a Kristo? A mmbo nshuutaa fyuungo fya Kristo shifyaallwe five fya ntuusi? Oode! ¹⁶ A mmbo mulaishi sheelyi yeto akee llunge na ntuusi mmbo akee mwiili umwi nawe? Mashika aamba, mmbo yewo vavii vashevaa mwiili umwi. ¹⁷ Lyo yeto akellunge na Nndumi ni nrima umwi nawe. ¹⁸ Risheny utuusi. Wo ulyamari nndu alutana mmbo lukee kipoo ya mwiili wakwe. Kyaindi mwituusa mmbo atannya mwiili wakwe muni ulyamari. ¹⁹ Ao ndesa mmbo mulaishi sheelyi mwiili wany ni mmba ya Mumuyo Mweele yeto akee nnang’ani yaany mukee vaniinge ni Iruva? Nta yeni mmukee vany muveni-fo. ²⁰ Mashika mmbo mukee woore na uuru. Kikeeny indo naasa itikiseny Iruva efo miiliny yaany-te.

¹ Kyasia kya mbony tilya muleshireiya, nkyeni nndu nndumi nare nalapaana nndu nka. ² Lyo kyeekwiisa utuusi wo nndu nave na nka wakwe muni, na wo nka nave na mmi wakwe muni. ³ Mmi naniinge nka wakwe usumanu lwakwe. ⁴ Nka nnyatiri finya na mwiili wakwe-fo, ni mmi wakwe; na indo-da nndumi nnyatiri finya na mwiili wakwe-fo, kuuta nka wakwe. ⁵ Kulaore mmbo mwanrumbwa indo mulakwiimi-fo, naambo mwiidimi iwona mwaanya weetereva, muwuyani lyingyi, mmbishwa nalashewona mwaanya kwany elyi mwara muleva na mwiina. ⁶ Lyo mmbo shamuvia indo, shaasa shilollye yeny, lyo nshi ivavaso-fo. ⁷ Kuuta lyo kindo shikunndye ni vandu woose vave shaasa yeny shikai. Lyo wo nndu mmbo akee nsimbe simbo yakwe yuuka kwa Iruva, yeu indi, na yeto indo. ⁸ Lyo mmbo nkeevia valya valandeora, na vaka va ding’u, nkyeni vakae shaasa yeny shikai. ⁹ Kyaindi vakallemwa isisirya, vaore. Mashika nngw’aana yoora ngota irovyo llango. ¹⁰ Lyo valya valemmaa ikoora shavavia; na nta nshi yeny-fo, ni Nndumi. Nka nalalakani na mmi-fo. ¹¹ Lyo, kwakooya valakana, nalakyoorwa-se-fo, kulakooye vawuyana-se na mmi wakwe, na nndumi nalare nka wakwe-fo. ¹² Indi vandu vengyi mmbo shavavia yeny, lyo nshi Nndumi-fo; sheelyi kwakooya umwi weeru atiri nka nalairikye, na nka yeto kairikya ikaa nawe, nalanre-fo. ¹³ Na nka, kwakooya atiri nndumi nalairikye, na nndumi yeto alangye ikaa nawe, naasa nalare mmi wakwe-fo. ¹⁴ Mashika nndumi yeto nalairikye mmbo asheilyiswaa ni nka wakwe. Na nka yeto nalairikye mmbo asheilyiswaa ni mmi wakwe. Kukooye kulaore ni indo vana vany mbevaa vasumanu-fo. Kyaindi ulaalu mmbo vakee vesha. ¹⁵ Lyo ulya nalairikye kankunda yeenda, nakweengye. Lyo yeto airikye kava nndumi ao nka nnyakee mfinge-fo. Lyo Iruva mmbo aluvaangye ufoo. ¹⁶ A kwamannya kwi, yewe nka, kwakooya kushekiraa mmi wafo? Ao kwamannya-kwi, yewe nndumi, kwakooya kushekiraa nka wafo? ¹⁷ Lyo shaasa Nndumi aavye wo nndu, shaasa Iruva avaangye wo nndu, nakae indo. Niindo shikeemuvavasya siriny toose. ¹⁸ A ndesa kwiifo nndu alevaangwa ammaa irinwa? Nalesheva sheelyi nalakee nrini. A nndu ungyi alevaangwa nalakee nrini? Naasany nalarinwa-fo. ¹⁹ Irinwa nshi kindo-fo, na ira irinwa nshi kindo-fo. Kindo kisha ni iringa mavavaso a Iruva. ²⁰ Wo nndu nakae ngata ilya sheni ekai llya alevaangwa. ²¹ A kulevaangwa kwikee ishinga? Naasa kulasue-fo. Lyo kwakooya kushiidimaa yuuka-fo, nkisha, tana indo. ²² Mashika yeto alevaangwa ni Nndumi ekee ishinga, mmbo akee lleke wa Nndumi. Ni indo-da yeto alevaangwa ekee lleke, mmbo akee ishinga lya Kristo. ²³ Mmbo mukewoore na uuru. Mulasheeva mashinga a vandu-fo. ²⁴ Vanavama, wo nndu nakee mbee ya Iruva na ngata ilya alevaangwa nayo. ²⁵ Kya vana va kyika nshitiri ivavaso lyuuka kwa Nndumi-fo. Lyo a shuute makusaro akwa, yeny shikee nsarye ni Nndumi iva wa toki. ²⁶ Naasany, shilollye ekyi nkisha, kyeendwa ni ngatara tiiyo, sheelyi nkisha nndu nakae shaasa akai. ²⁷ A kukee mfinge kwa nka? Kularuuye yaauwa-fo. Kukee mwaauwe? Kularuuye nka-fo. ²⁸ Lyo kwakooya koora, nkwalerenga-fo. Nta mwana wa kyeny koorwa nnyalerenga-fo. Lyo vandu va ngata yeyo vatiri ngatara mwiliny; neeny mmbo shikunndye ivaaua efyo. ²⁹ Lyo shaamba indi vanavama fyeeri fiiyo nshi fyaasha-fo. Naasany kipookya ulaalu valya varye vaka vave sheelyi valarye vaka. ³⁰ Na valya vaiyaa sheelyi valakeiya. Na yewo veefura sheelyi valakeefura. Na valya vakeeyuura sheelyi valatiri kindo. ³¹ Na valya vakeerunda na ulana yelu vave sheelyi valakeerunda nalo nnu. Shamashika findo fya ulana yelu mmbo fishiraa. ³² Kyaindi mmbo shikunndye mulawonise waataro. Yeto nalarye nka mmbo akuvinisaa na mbony ta Nndumi shaasa akooyaa insenya. ³³ Indi yeto arye nka mmbo akwaataraa na findo fya ulana, shaasa ashesenyaa nka wakwe. ³⁴ Na lyingyi kwiiyo kilakaniso ekyi kwa nka na mwana wa kyeny. Yeto nalakee moore mmbo akuvinisaa na mbony ta Nndumi, nave nsongovisi mwiili na nrima. Kyaindi yeto akee moore mmbo akwaataraa na findo fya ulana elu, shaasa ashesennyaa mmi wakwe. ³⁵ Mmbo shaamba indo shimuviiye mbusha; nshi shimuviiye nsoori-fo, nkimaruma kya filya fisennyi, naambo mwidimi ifurukannya Nndumi mulashoomuwaa mfindo fingyi. ³⁶ Lyo kwakooya nndu moose alollye nnyaketannya mwana wakwe wa kyika kisumani, nawe kwakooya ammaa itima naasa ekyo akunndye itana natani. Nnyatana ulyamari-fo; nanniinge mumu noorwa. ³⁷ Kyaindi yeto asalalyi nisha na ukaari lwa nrima wakwe, nnyashitikywaa-fo, nawe akeeidima ishillya lango yakwe, nawe mmbo akunndye nriminy wakwe iringa mwana wakwe wa kika, atana nisha. ³⁸ Ni indo-da, naakwa ni yeto aorisa mwana wakwe wa kyika atana nisha, neeto nalamoorisaa mmbo atanaa nisha mmwasi. ³⁹ Nka mmbo akee mfinge elyi mmi wakwe aiyo na muu. Lyo kwankooya mmi amminutwa, mmbo akee lleke noorwa ni nndu moose yeto ankundaa, kwi Nndumi, naasa. ⁴⁰ Lyo nkyeni mwasi nakae shaasa akai. Nshaasa yeny shilollye; neeny shilollye sheelyi naakwa ni yeny shitiri Mumuyo wa Iruva.

¹ Yese loose lwiishi mbony ta findo fikee finiingye kiraso kwa maruva a mafwanu, Imanya mmbo lyendee ikushopa, kyaindi ukundi lo lukarosa. ² Nndu kankusara mmbo eeshi, eto nnyeeshi nta kindo shaasa kinsumanyi imanya-fo. ³ Lyo kwakooya nndu akunda Iruva, nawe mmbo ammanyaa. ⁴ Naasany kya mbony teelya findo fikee fyuute kiraso kwa mafwanu, lwiishi lukamanya ifwanu nshi kindo kya dede yaa ulaniny-fo, na kingyi sheelyi nkwiifo Iruva kuuta umwi nsi-fo. ⁵ Mashika lla elyi kwiifo avaangwa maruva, kulya iruveeu ao yaa ulaniny, shasany-da kuveefo maruva meengyi na vandumi veengyi, ⁶ kweru yese Iruva ni umwi nsi, we Nde, yeto findo fyoose fimmyi kwakwe, neese nkwakwe lukutiri na muu. Eefo na Nndumi umwi Yesu Kristo, nawe kwakwe findo fyoose mmbo filekaa-fo, neese-da ni yefo kakwe luukye. ⁷ Kyaindi lyo imanya yelyi llyikee kwa vandu woose-fo, lyo vengyi kimaruma kya iishivya mafwanu yoo fika ulaalu mmbo valyee kindo kileutwa kiraso kwa ifwanu, na kyeendwa ni elyi kikusiryo kyawo kilaiyo vakatefuswa mfyo. ⁸ Lyo shoonga nshiyo ilurwaa kwa Iruva-fo, mashika naakwa lwara lulalya llushaanguywaa nkindo-fo, ao lukalya nshi elyi lwammengeryo-u kindo-fo. ⁹ Indi loleny uleke lwany lulashewonisya nsindara valya vakee vafwafwa. ¹⁰ Shamashika le, yewe kutiri urango nndu kakulollya kwilyaa shoonga mmba ya maruva ao mafwanu, nrima wa nndu yeto akee mfwafwa wa iirikyo, a ndesa nawe nnyalollyaa nkisha ilya findo fikee fyuute kiraso kwa mafwanu? ¹¹ Na nndu yeto mfwafwa mmbo alyamarwa kimaruma kya urango lwafo, nawe ate ni nndu Kristo alevefwa kimaruma kyakwe. ¹² Kikeeny indo, kwakooya mwalyamarya vanavamaye vany na ivavisa mirima yaawo ikee mifwafwa, indo ni Kristo muni mwantannya ulyamari. ¹³ Kimmba niindo, kwakooya shoonga ishengyee mwanama nsindara, naakwa yava nyama nshiilyaa-fo na kukafika indii, naambo tupu shilasheviiya mwanama nsindara.

¹ A ndesa yeny shikee lleke-se? Shivekee nrumi se? A yeny shilelollya Yesu Nndumi weeru se? A yeni nshi mashora akwa kwi irina lya Nndumi se? ² Mashika kwakooya kwa vengyi shilakee nrumi, lyo kwany yeni shikee nrumi, mashika nyeni mukee kiringisyo kya usu lwakwa efo kwa Nndumi. ³ Ekyo nkyo kirouwo kyakwa kwa valya valeshivesa. ⁴ A mmbo lulatiri wiidimi lwa ilya na ina? ⁵ A mmbo lulatiri wiidimi lwa ipoo nka airikye Nndumi shaasa na varumi yewo vengyi valetana, wo vanavamaye va Nndumi, na Kefa-da? ⁶ Aa niinda! Ni yeny shimuni na Barnaba lulatiri wiidimi lwa ira irunda. ⁷ Ni nsikari ungau kyeeri kyoose alemmenda fireny kwa urundi lwakwe we muni? Ni vi yeto avaayaa misabibu nare nalalya ndunda ta vayo? Ao ni vi ashiisaa ironda lyakwe lya findo, nare nalana malela a vayo? ⁸ A mmbo sharera efyo kivandu? A uvavaso nalo nshi efyo fyeni lwarera? ⁹ Shamashika efo uvavasony lwa Mose kikee kireiye kyeyaamba. Kulasheefinga ng’umbe kana kyeeri ikeesa nganu. A ndesa yoo Iruva mmbo akeelola mbony ta ng’umbe sheni? ¹⁰ A nshi dede ni mbony teru arera? Yee, mmbo tikee shireiye kimaruma kyeru. Shamashika yeto akeerema fimu mmbo akee irema evikye nsia, neeto asaa mmbo avikye nsia wa iwonisau waavi lwakwe. ¹¹ Kwakooya yese lulemuvaaya mbeu ta nriminy, a nkindo kilavaa kwakooya lwailula-u findo fya mwiiliny? ¹² Na kwakooya vengyi vakeewarya-u wiidimi elu yoo kwany yeni, a yese nshi mmwasi, kyaindi yese llulewarya wiidimi elo-fo. Indi mmbo lwasisirya fyoose naambo lulafofise Nrumi ya Nsia ya Kristo. ¹³ A mmbo mulaishi sheelyi valya varundaa mmba ya Iruva mmbo valyee findo fya vayo, na valya varundyaa yoo kitareny kyerasya mmbo vawonisa-u waavi lwawo? ¹⁴ Na Nndumi nawe ni indo avavasye, valya veamba Nrumi ya Nsia vawonise imutu lyawo lyuuka efo Nruminy ya Nsia. ¹⁵ Lyo yeny nshiletana indo-fo. Nta nshikeereiya indo naambo kive indo kwakwa-fo. Mashika ni kyeni yeny shifwe ngota elyi nndu moose afofisaa nnduma wakwa. ¹⁶ Mashika lla elyi shikeyaamba Nrumi ya Nsia, nshitiri kyeekurumisha-fo, mashika shikeembikye ivavaso, neeny oshiny lwakwa shanra shilaamba Nrumi ya Nsia! ¹⁷ Mashika shiwonisaa ikiiyo kwakooya sharunda ishora elyi na nrima, lyo shanra shilarunda na nrima, lyo shikee nrambikye ungari. ¹⁸ Kyasiany, ikiiyo lyakwa llyo lyingalyi? Llyo elyi, kyeeri shikeamba Nrumi ya Nsia na nrima moose. ¹⁹ Mashika, lla elyi shileva lleke kwa vandu woose, mmbo shileva ishinga kwa woose, naambo shiwonise vandu veengyi mmwasi. ²⁰ Kwa Vayuda mmbo shileva sha Myuda, naambo shiwonise Vayuda. Na kwa valya vekee si ya mavavaso, shava sheelyi shikee si ya mavavaso (Lla elyi yeny shimuni shilakee si ya mavavaso), naambo shiwonise valya vakee si ya mavavaso. ²¹ Kwa valya valatiri uvavaso shava neeny sheelyi shilatiri uvavaso (nshi sheelyi shilatiri uvavaso mbee ya Iruva-fo, kyaindi mbee ya Kristo shitiri uvavaso), naambo tupu shiwonise yewo valatiri uvavaso. ²² Shaveva sha mfwafwa kwa yewo vakee vafwafwa, naambo tupu shiwonise vafwafwa. Mmbo shileva ngata toose kwa vandu woose, naambo na shia yeto toose shikooye ikira vandu. ²³ Neeny mmbo shatana findo fyoose kimaruma kya Nrumi ya Nsia naambo shiyaavye na vengyi. ²⁴ A mmbo mulaishi sheelyi valya vavakyanaa irisha, woose mmbo varisha kyaindi mwiwarya uvingyi ni umwi nsi? Naasa risheny indo-da naambo muwonise. ²⁵ Na wo nndu mwivakyana efo fitavanuny mmbo akwiima findo fyoose. Yewo mmbo vatanaa indo naambo vawarye ureto yelo lulyamarikaa. Lyo, lyo yese mmbo luwaryaa ureto lulalyamarikaa. ²⁶ Neeny mmbo shiifo shirishaa indo, nshi sha mwikapa ing’ana-fo, mmbo shikeekapana ng’unde, nshi sha nndu akapaa uraato-fo. ²⁷ Mmbo shikeesisya mwiili wakwa na iuvinisa naambo kilasheeva elyi shammaa yoongoya vengyi mbony, ate yeny shimuni nsheva nndu wa ilemika.

¹ Shamashika le vanavama vakwa, yeny nshikundye mure mulamanya sheelyi vande valya veru mmbo valeira woose kwasi ya ifishi, woose vakaira kulya yeeveny, ² woose vakabatiswa naambo vave va Mose kulya ifishiny, na yeeveny ilya. ³ Woose vakalya shoonga ilya sheni ya nrima. ⁴ Woose vakana kyeena kilya kyeni kya nrima, mashika mmbo valeniya yoo iweny elyo lyikavakaniswa na Kristo. ⁵ Kyaindi veengyi vawo Iruva nnyalesennywa mmbo-fo, nkyo vakamamityo kulya kasa. ⁶ Naasa mbony yeto tikava nta fyaaso kweru, naambo yese lulasheeva vandu velanga maravi, shaasa na valya valelanga. ⁷ Nta mulave veindya maruva a wongo, shaasa vengyi vawo valetana; shaasa kikee kireiye. Vandu ewo mmbo valekaa rembo naambo valye neena, numa vakakwiipoo vafini mbasa. ⁸ Nta lulatani fya utuusi, shaasa vengyi valevetana, vakafwa vandu fiku makumi avii na varaanu nkonu umwi. ⁹ Nta lulaese Nndumi shaasa valya vengyi valetana vakalyamarwa ni shoka. ¹⁰ Nta mulakunung’uni, shaasa valya valekunung’una vakaretwa ni nreti ulya. ¹¹ Naasa findo efyo mmbo filevakooya wo fikee fyaaso fikareiyo fyelwikimba yese va fyeeri efi. ¹² Kimmba niindo yeto akulollye sheelyi mmbo aselelyi nalole nalasheewa. ¹³ Nkwiifo kyeeso kilemusheya yeni kuuta ekyo kiinani na nndu wa vandu-fo. Kyaindi Iruva ni nsha, nalaraa mweeswa kiilanyi wiidimi lwany, na lyingyi ando amwi na kyeeso ekyo kavika-u na mwaango weesomuka-u, naambo mwiidimi isisirya. ¹⁴ Kimaruma kya efyo, vakunde vakwa, kwiiseny iindya maruva a wongo. ¹⁵ Mmbo shikeerera na vandu vatiri urango nkyekusareny nisha eki nkemuvia. ¹⁶ A upata lulya lwa mbora luvikyaa mbora, nshi utarannyo lwa mwiili umwi, mashika yese loose mmbo lwawarya kipereshu kya nkate yeto umwi. ¹⁷ Mashika nkate ni umwi neese lukee vengyi ni mwiili umwi, mashika yese loose mmbo lwawarya kipereshu kya nkate yeto umwi. ¹⁸ Kummbweny Vaisraeli yewo shaasa vekai kya mwiili, valya velyaa firaso, mmbo valatiri ukulungo na kitara kyerasya? ¹⁹ A shaambany ki? Shaambany sheelyi kilya kileutwa firaso kwa mafwanu nkindo kya dede? Ao ifwanu nalyo nkindo? ²⁰ Nta kinnywa-fo mashika findo filya vafyuuta sha firaso mmbo vafiniingya varumu, nta nshi vaniingya Iruva-fo. Neeny nshikundye yeni mwaakaniswa a varumu-fo. ²¹ Mmushidimaa iniiya upateny lwa Nndumi musande na iniiya upateny lwa varumu-fo. Nta mmushidimaa ilyiiya yoo meseny a Nndumi muvenda ilyiiya meseny a varumu-fo. ²² Mmbo lweengye Nndumi kififi ndesa? A mmbo lutiri finya ngota we? ²³ Findo fyoose mfisha, lyo nshi fyoose fivaa-fo. Findo fyoose mfisha, llyo nshi fyoose fivangisaa-fo. ²⁴ Kulave nndu aruuya mbusha yakwe muni-fo, naruuye mbele ya vengi. ²⁵ Wo kindo kyakumbwa singireny kulyiiyeny mulavesa-vesaa mwitirwa nnyinyira. ²⁶ Shamashika ulana loose mmasaa a Nndumi amwi na fyoose fiishwe-fo. ²⁷ Naakwa nndu nalakusirye-u amwaambya kwakwe, neeni mukalanga ikaa kwakwe, kulyiiyeny wo kindo kisheendwaa mbee yaany, mulavesa-vesa nta itirwa nnyinyira. ²⁸ Lyo kwakooya nndu amuvia kindo eki mmbo kileutwa kiraso mulakilye-fo, nkimaruma kya yeto aleniingya na nyinyira iveu. ²⁹ Mmbo shaamba nnyinyira, nshi yafo yewe-fo, ni ya yeto ungyi. Mashika nkiki-lyo elyi uleke lwakwa lushillywa nnyinyira ya nndu ungyi? ³⁰ Kwakooya yeny shawarya filya shaavyo shiitiri kyaanu kwa Iruva, mmbo kivaa inda shaararwa neeny shammaa yaana? ³¹ Naasany, mukalya, ao mukana, ao mukatana kindo kyoose, taniny fyoose mwing’anisaa Iruva. ³² Loleny mulasheteva Vayuda ao Vagriki nta siri ya Iruva, ³³ shaasa yeny nkesennya vandu woose findony fyoose, shilasiaa mbusha yakwa shimuni, kuuta mbusha ya yewo veengyi naambo vakooye ikirwa.

¹ Shilatyeny yeny shaasa na yeny shikeelatya Kristo. ² Naasany nkemwitikisa, mashika elyi mukeshikummbwa kya findo fyoose, neeni mukatira mikaaye ilya ya mbee shaasa shilemuningya. ³ Kyaindi shikundye mumanyi sheelyi nrwe wa wo nndumi ni Kristo, na nrwe wa nka ni mmi wakwe, na nrwe wa Kristo ni Iruva. ⁴ Wo nndu nndumi kyeeri akeetereva, ao eereryaa vandu, kwakooya asikye nrwe, mmbo akeesuta nrwe wakwe. ⁵ Kyaindi nndu nka we eeterevaa, ao eereryaa vandu, kara nalasikya nrwe wakwe, mmbo akusuta we muni, mashika mmbo avaa sha ulya akee nkure nrwe. ⁶ Mashika nka nalasikyaa nrwe nkuti nautwa fii. Ao kwankooya nsony yuutwa nrwe, naasany, asikye, ⁷ Mashika lyo nkisumani nndumi nasikywe nrwe-fo, we ni kyaaso na itumbe lya Iruva. Kyaindi nka we ni itumbe lya nndu nndumi. ⁸ Mashika nndumi nnyaleuka kwa nka-fo, ni nka aleuka kwa nndumi. ⁹ Nta nndumi nnyaleumbwa kimaruma kya nka-fo, ni nka kimaruma kya nndumi. ¹⁰ Kikeeny indo nkuti nka noore ngata ya ishillyo ooka nrweny kimaruma kya vasu. ¹¹ Nta nka nshi kindo kulaiyo nndumi-fo, nta nndumi nshi kindo kulaiyo nka-fo, kimaruma kya Nndumi. ¹² Shamashika kwakooya nka aleutwa kwa nndumi, na nndumi nawe mmbo eerwaa ni nka. Na findo fyoose kimayeny kya vayo nkwa Iruva. Rummbweny yeni muveni efo miriminy yaany. ¹³ A kivaany nka natereve Iruva nalasikye nrwe? ¹⁴ A myuumbye yeyo myeni yoorye-se sheelyi nndumi katira fii shaasha ni usutu kwakwe? ¹⁵ Kyaindi nka we katira fii shaasha ni itumbe kwakwe. Mashika mmbo akee nninge fii yeto nakusikye nato ando a soori. ¹⁶ Lyo nndu moose kakunda yeende uriingyi, yese llutiri mikaaye ya ngata yeyo-fo, nta siri ta Iruva ntitiri-fo. ¹⁷ Lyo kyeeri nkeemuvia indi nshikemurumisha-fo, mashika elyi mukesanga amwi nshi kya mbusha-fo, nkya ukasha. ¹⁸ Mashika mmbo shiitye kyeeri mwakwanannya efo mmba ya Iruva mmbo muraukani, neeny nta nshilemaa-fo. ¹⁹ Mashika lyo kwany nkuti kukae-fo urere, naambo valya vesha vamanyike paa kwany. ²⁰ Naasa kyeeri mukekwaanannya nkivaa mulye shoonga ya Nndumi-fo. ²¹ Mashika wo umwi mmbo arangya iwarya, yeu mmbo atirwa nshaa neeto ungyi mmbo annangwa. ²² A mmbo mulatiri mmba tany teelyiya na teeniya? A mmbo mukeemina mmba ya Iruva, na isaveesa yewo valatiri kindo? Shamuviany, shamurumisha? Oode, kya efyo nshimurumishaa-fo. ²³ Mashika yeny filya shilewarya kwa Nndumi mfyo shilemoora, kyeyaamba, Nndumi weeru Yesu Kristo kio kilya aleriingyo mmbo aleipoo nkate, ²⁴ nawe ekimaa yaana Iruva kaufisha-fisha, kaamba, “Eu nto mwiili wakwa ukee kimaruma kyany, veny vetana indi kya ishikumbwa.” ²⁵ Naaindo vekimaa ilya kaipoo upata (lwa ina) kaamba, “Upata elu ni mma shiiya ya samu yakwa, taniny indi wo kyeeri mwiina, kive kya ishikumbwa.” ²⁶ Mashika wo kyeeri mulyaa neeniya upata elo mmbo mukeevambisa ufu lwa Nndumi kutani elyi ashewuyaa-se. ²⁷ Naasany nndu yeto ashelyaa nkate yeto ao iniiya upata elo lwa Nndumi kilasumani mmbo ankuwonisya nsindara kya mwiili wa Nndumi na samu yakwe. ²⁸ Naasa nndu nakusununde we muni, llyo nalyeny nkate neeniya upata elo. ²⁹ Mashika yeto alya na ina, mmbo alya na ina kya uvingo lwakwe muni, elyi ara nalaitumuso kya mwiili yeto. ³⁰ Kimmba niindo efo kwany veefo veengyi valoe na vafwafwa, na vengyi valellala. ³¹ Kyaindi kukooye lukumannyaa luveni shaasa lukai, llweshutyoo uvingo-fo. ³² Lyo lwishutyoo uvingo ni Nndumi akeelukapa, naambo numa lulasheutyo uvingo ando amwi na ulana. ³³ Naasany vanavama vakwa, kyeeri mukekwaanannya vereny vengyi. ³⁴ Kwakooya nndu atirwa nshaa, nalye mbele kyeny; naambo mulashekwaanannya kive kya uvingo. Efyo fyasaa-fo nshesongosiaa elyi nshaa kwany.

¹ Nyira vanavama vakwa, nshikundye mure mulamannya kya simbo yeto ta Mumuyo-fo. ² Mmbo muveishi muveni llya mwekee vandu va masanga, shaasa muleva veraawa efo kwa mafwanu yoo nalashidimaa irera. ³ Nkyo shamuviany, nkwiifo nndu ashidimaa irera ekaywa ni Mumuyo wa Iruva naambe, Yesu ni nndenge, nta nndu nnyashiidimaa yaamba, Yesu ni Nndumi, kuloore akaywa ni Mumuyo Mweele-fo. ⁴ Naasany simbo titiri kilasha; kyaindi Mumuyo ni we muni. ⁵ Lyingyi ifurukana lyitiri kilasha, na Nndumi lyo ni yeto muni. ⁶ Kukavekaa-fo na kilasha kya mirundye mashora, kyaindi Iruva niwe yeto muni arunda mashora nnang’ani ya woose. ⁷ Lyo wo umwi mmbo akee nninge urambuyo lwa Mumuyo kya yeekyana. ⁸ Mashika kyeendwa Mmumuyo nndu umwi mmbo aniingwa irero lya waarya, na ungyi ni irero lya urango shaasa Mumuyo yeto akukundya muni. ⁹ Ungyi kasimbwa kikusiryo ni Mumuyo yeto mweni; na simbo yeeshisa aniingwa ni Mumuyo yeto mweni. ¹⁰ Na ungyi ni mashora a ngyende; na ungyi ni yaawuya fisuku, na ungyi ni yaavanisa mimuyo, ungyi kasimbwa ngata ta fishomu; na ungyi ni itambashwa fishomu. ¹¹ Kyaindi mashora yaa moose ni Mumuyo yeto umwi nsi, eshaviaa o nndu umwi umwi shaasa akukundya. ¹² Shamashika kimwi na shaasa mwiili ukee umwi ukavetira filungo fiingyi, na filungo fyavayo fikaveva fiingyi, ni mwiili umwi lyo, niindo na Kristo akai. ¹³ Mashika yese loose mmbo lulebatisyo Mumuyo umwi lukava mwiili umwi, kwakooya lukee Vayuda ao Vagriki, kwakooya lukee mashinga ao valeke; yese loose mmbo luleritwa Mumuyo yeto umwi. ¹⁴ Shamashika mwiili nshi ilungo lyimwi-fo, mmengyi. ¹⁵ Kwakooya urende lwaamba, kimmba shilakee woko yeny nshi wa mwiili-fo, a mmbo luraa luleva lwa mwiili na kimaruma ekyo? ¹⁶ Na kuri kaambe, kimmba shilakee iriso, yeny nshi wa mwiili-fo, mmbo kuri karaa kaleva ka mwiili kimmba kya ekyo? ¹⁷ Kukooye mwiili moose wevaa iriso, mmbo lweshitaa inda? Ao kukooye moose wevaa kuri, mmbo lweefwamyaa inda? ¹⁸ Nkyo kimaruma Iruva evika-fo fyuungo fyoose wo kimwi mwiiliny shaasa alekunda. ¹⁹ Mashika lyo kukooye fyoose fyekee kyuungo kimwi nsi, mwiili mmbo wevaa inda? ²⁰ Lyo ulaalu fyuungo mfiingyi na mwiili ukava umwi. ²¹ Nkyo iriso llyishidimaa ivia woko, nshikutinnyo yewe-fo, nta nrwe mmbushidimaa ivia marende, nshimutinnyo yeni-fo. ²² Na mmwasiny deny fyuungo filya fya mwiili filya filollyo mfifwafwa mmwasi mfyo fitiri mashora kilanya. ²³ Na fyuungo filya filatiri nnu nnduma, fyo mmbo lwafininga wiindi mmwasi, na filya fikee sheelyi mfitiri usha, mfyo fitiri usha deny lukairya. ²⁴ Mashika fyuungo fyeru filya fitiri usha mfitiri nnu mashora-fo, kyaindi Iruva mmbo alungye mwiili ando amwi, kyuungo kilya kikee kyaanguye kakiniinga wiindi mmwasi; ²⁵ naambo kulakae-fo urauko mwiiliny, naambo fyuungo fyeekyani wo kimwi na urooye. ²⁶ Kyuungo kimwi kwakooya kyavavio, na fingyi fyoose mmbo fivavioo nakyo. Na kilya kyarumishwa, efyo fingyi fyoose mmbo fifuraa ando amwi nakyo. ²⁷ Naasany yeni mmbo mukee mwiili wa Kristo, na filungo wo kimwi ando a vayo. ²⁸ Na Iruva mmbo avikye varundi kunu siriny, va mbee ni varumi, vakavii ni veawuya fisuku, va kararu ni veelosha, vengyi ni ngyende, vengyi ni simbo teeshiisa vandu, vengyi va yeekyana, na uteteri na ngata ta fishomu. ²⁹ A woose ni varumi? Woose mbeawuya fisuku? Woose ni veelosha? ³⁰ Woose mberera fishomu fyeny? Woose mmbetambashwa fishomu? ³¹ Langeny nnu simbo yeto shisongoru. Naakwa niindo mmbo shamoora shia shisha.

¹ Na kwakooya sharera na fishomu fya vandu na fya varumi va iruveeu, shanra shilatira ukundi mmbo shava sha ipengele lyishoonaa. ² Lyingyi shawona yaawuya fisuku, neemanya fyoose na urango loose, na shitire kikusiryo kivangyi kutani shaidima isamisa mafumbu, shilatiri ukundi efyo nshikindo kwakwafo. ³ Lyingyi shuute mwiili wakwa ukorwa na muro, shilatiri ukundi, nkyashuukyau kindo-fo. ⁴ Ikunda mmbo lyisisirya, lyikalyillya; ukundi llutiri ukasha-fo; nta llutiraa kififi-fo llukurosaa-fo; ⁵ lluturaa wiindi-fo; lluruyaa findo fyavayo weni-fo, nta lluvavioo-fo, llwekenaa makasha-fo, ⁶ mmbo lwiirikyaa fyoose, mmbo luvikaa nsia kya fyoose, ⁷ mmbo lusisiryaa fyoose. ⁸ Ukundi llwangwa-u kindo nta kyeeri kimwi-fo. Yaawuya fisuku lyikaa lyimande, na fishomu fishemandaa, na ngyurango tishevaa ruu. ⁹ Shamashika mmbo lwamanya na kyeeso, na yaawuya fisuku na kyeeso-da. ¹⁰ Lyo kyeeri ekyo kimaye, kilya kya kyeeso mmbo kishevaa ruu. ¹¹ Kyeeri shekee mwana ndu mmbo shereraa sha mwana nndu, shawemannya sha mwana ndu, shevekusaraa sha mwana ndu, kipookya yoo shileva ndu nniini, mmbo shanra mbony ta kimwana. ¹² Mashika kyeeri eki kya ulalu mmbo lulollye sha kiyoony kikava sha kyaaso. Kyeeri ekyo mmbo lushelollya kisangu na kisangu. Kyeeri eki kya ulaalu mmbo shamanya kyenga, kyeeri ekyo mmbo nshemanyaa deny shaasa neeny shiishiwa nnu. ¹³ Naasany ulaalu mmbo kwasaa-u kikusiryo, ivika nsia, ukundi, efi firaru. Na nnang’ani ya efyo kiilanyi fyoose ni ukundi.

¹ Soreny ukundi na ilanga nnu simbo ta Mumuyo, lyo kisha mmwasi tereveny mwidimi itambashwa mbony. ² Mashika yeto mwirera na kishomu kyeny, nshi arera na vandu-fo, mmbo arera na Iruva nyelyi kulaifo nndu amanya, lyo mmbo arera findo fya kyama efo nriminy wakwe muni. ³ Kyaindi yeto arera eeloshaa, mmbo arera na vandu findo fyeveekya, neevaviirya muu, neevakaarisa. ⁴ Yeto arera na kishomu kyeny mmbo akukaarisa we muni. Kyaindi yeto akee itambashwa mmbo akeekaarisa siri. ⁵ Neeny lyo shikundye yeni moose murere na fishomu fyeny, lyo mmwasi mmbo shikundye mutambashwe. Mashika yeto alosha mmbo ailannyi yeto arera na kishomu kyeny, kuuta lyo kwakooya atambashwa, naambo siri ikooye ikaariswa. ⁶ Lyo ulaalu vanavama, kwakooya shasha kwany neerera na kishomu kyeny, mmbusha-kyi kwany, kuuta elyi sharera neeni na irammbwa, ao na shia ya urango, ao ilosha, ao na shia ya ufundo? ⁷ Naakwa ni findo filatiri muu kyeeri fyuutaa unyanga, sha kivale ao kingi, lyo fyava filoota unyanga lwaalashikye, mmbo kimanyikyaa kwi nkiimbo kya ngata-ki kikee ikapwa nkivale ao ekyo kingi? ⁸ Mashika iranda lyikakapwa lyikauta unyanga lulaishiwa mmbi akudeesyaa kya fira? ⁹ Neeni ni kiwo. Ulumi lwany lukanra luloota kindo kimanyikye, irero lyikeererwa mmbo lyimanyikaa inda? Kilasheeva mmbo mukeererya efo uraatony kweni. ¹⁰ Lyo dede kwiifo ngyunyanga shiingyi ulaniny, na nkwiifo lumwi lulamanyikye-fo. ¹¹ Naasa shanra shilamanya urango lwa unyanga elo mmbo shivaa sha nrung’ani kwa yeto akeerera, nawe yeto mwirera naveva nrung’ani kwakwa. ¹² Naakiwo neeni, mashika elyi mulangye nnu iwona simbo ta Mumuyo, langeny nnu deny itiwonisa naambo muvangise siri. ¹³ Kimmba niindo yeto mwirera na kishomu kyeny natereve naidimi itambashwa. ¹⁴ Mashika shatereva na kishomu kyeny, nrima mmbo watereva, lyo urango lwakwa llutiri ndunda-fo. ¹⁵ A mmbo kyavany inda? Mmbo shitereva na mumuyo, shivetereva na urango-da, mmbo nshiimbaa na ngata ya mumuyo lyo shiveimba na urango-da. ¹⁶ Mashika kwatereva Iruva efo nriminy, yeto aiyo kava sha itondo mmbo ashidimaa inda yaamba Amen, kyeeri kumaa itereva, elyi nalaishi ekyo kwaamba? ¹⁷ Mashika lyo n-dede yewe mmbo kwatereva nisha, lyo yeto ungyi nyavikyo mbora-fo. ¹⁸ Mmbo shaana nnu Iruva mashika yeny mmbo shiishi fishomu shamwilannya yeni moose. ¹⁹ Lyo kunu siriny mmbo shikunndye irera marero araanu nsi a urango, shiloshe nang’u vengyi, ngota elyi shereraa marero fiku ikumi. ²⁰ Vanavama, mulasheva sha vana vadu, lyo efo uraviny veny sha fikoku deny, lyo efo mirweny yaany veny vandu vaniini. ²¹ Mmbo kikee kireiye efo uvavasony, mmbo shireraa na vandu yeva na kishomu kya vandu vengyi, na kana ka vandu veny, lyo nta mmbashitaa-fo. Niindo Nndumi aamba. ²² Naasany, fishomu efi ni ngyende, nshi kwa yewo veerikye-fo, lyo kwa yewo valairikye. Lyo ilosha nshi kwa yewo valairikye-fo lyo nkwa yewo vairikye. ²³ Kyasiany, kwakooya siri shoose mmbo ikusanyirye ando amwi, na woose varere na fishomu fyeny, na yoo kweni vaangeu vandu valaishi kyeni na valakee vakristo, mulla ndesa mmbashambaa mmbo mutirwa ni ukwale? ²⁴ Lyo woose vakarera kyeelosha, numa naange-u nndu nalakee nkristo ao nalaishi kyeni, mmbo amanyisywa mmboose na asongosywaa mmboose. ²⁵ Filya akusarye efo nriminy mmbo fimanyikaa paa, nawe mmbo ashidimaa isanga neeni iindya Iruva, nafirye ndi deny, na iirikya sheelyi Iruva akee neeni kulaifo nyinyira. ²⁶ Kyasiany vanavama, mwalollya inda, Kyeeri mwakwanannya, yeto umwi atiri kiimbo neeto ungyi ufundo, ungyi kindo kyerambuya, ungyi ni kishomu na ungyi ni itambashwa fishomu. Findo fyoose fitanyike kikee kya ivangisa siri. ²⁷ Kwakooya nndu ashereraa na kishomu kyeny, lyo varere vavii ao vararu nsi, valailanyi-fo, na lyingyi kwa makamba, na umwi waany natambashwe. ²⁸ Kyaindi kwankooya kulaiyo nndu mwitambashwa naasa namalallye efo mmba ya Iruva narere na nrima wakwe muni na Iruva. ²⁹ Vakisuku nawo-da varere vavii ao vararu na umwi natambashwe. ³⁰ Kwakooya umwi wa valya vakee rembo arambuyo kindo ulya wa mbee namalallye mbele. ³¹ Mashika yeni mmbo mushidimaa irera umwi umwi nsi, naambo vengyi vakooye ikuloshau, na woose vaviiryo muu. ³² Na mimuyo ya vakisuku mmbo iirikye vakisuku. ³³ Shamashika Iruva nshi Iruva wa fulu-fulu-fo, mmbo akee wa ufoo; indo shaasa kikee siriny toose ta vandu va Iruva. ³⁴ Vaka wo vamalallye efo mmba ya Iruva, mashika elyi valatiri mumu weerera. Vaindye shaasa uvavaso lwaambaye kyawo. ³⁵ Nawo vakankunda imanya kindo kyoose vavese womi vawo waarya efo kyeny kwawo. Mashika nsony nndu nka irera efo mmba ya Iruva. ³⁶ A ndesa kirero kya Iruva nkwany kyuukye? Ao mmbo kilemusheya yeni muveni? ³⁷ Nndu kakulollya mmbo akee nkisuku ao wa ngata ya mumuyo, navemenya efi shamuvia yaa, sheelyi ni Nndumi afivavasya. ³⁸ Lyo yeto akunda iva nrung’ani nave nrung’ani. ³⁹ Kimaruma kya efyo, vanavama, langeny nnu ilosha, lyo nta mulaimi kya irera na fishomu-fo. ⁴⁰ Lyo findo fyoose fitanyike kwiiyo umamiri na waarya.

¹ Naasany vanavama mmbo shikundye imuvia mbony ta Nrumi ya Nsia ilya shilemwoongoya. Nnyo yeyo muleiwarya na mfo muselelyi. ² Mmbo mukeekirwa kyeendwa nnyo; kwankooya muletira nisha marero alya shilemoongoya, na kwankooya kulaore mulekusiryau ruu. ³ Mashika yeny llya kiipooka mmbo shilemufitya filya yeny shimuni shilewarya, kyeyaamba Kristo mmbo alefwa kimaruma kya ulyamari lweru, kikwaani na mbony shireiye. ⁴ Na lyingyi karikwa; na lyingyi sheelyi mmbo aleruka nkonu wa kararu kikwaani na mbony shireiye. ⁵ Na sheelyi mmbo alekoora na Kefa na valya ikumi na vavii. ⁶ Numa kakoora na vakristo mmwasi ya mayana araanu vekee ando amwi, nnang’ani yaawo vaiyo fika inu na maata valellala. ⁷ Numa kakoora na Yakobo; numa na vakiloshony woose. ⁸ Na numa ya vandu woose, kakoora neeny, shikee sha nndu alewonika kyeeri kilakee kyakwe. ⁹ Mmashika elyi yeny shikee n-du shanyiyya vakiloshyony woose, shilesumani nta ivaangwa nrumi, mashika llya shilesaveesa siri ya Iruva. ¹⁰ Lyo kyeendwa ni isarya lya Iruva mmbo shikee shaasa shikai inu; na isarya lyakwe yelyo lyileshisheya llyileva ruu-fo, mashika elyi shilekutakura nnu irunda shavailannya woose. Lyo nta nshi yeny-fo, kyaindi ni isarya lya Iruva lyishikaaye. ¹¹ Naasany kwakooya ni yeny ao valya, niindo lukeevambisa irero. Na niindo mulekusirya-u. ¹² Naasa kwakooya Kristo akeevambiswa sheelyi aleruka auka kwa vafu, a niindaany elyi maata va efo kwany vashambaa nkwiifo iruka lya vafu? ¹³ Lyo kwankooya kulaifo iruka lya vafu na Kristo nawe nnyalerukaa-fo. ¹⁴ Na lyingyi kwankooya Kristo kuloore aleruka naasa, ivambisa lyeru ni ruu na kikusiryo kyeru nruu. ¹⁵ Yee, neese mmbo lufwanani na vakureeki va Iruva va wongo, mashika mmbo lulekureekya Iruva wongo sheelyi mmbo aleruta Kristo, nawe nnyalenduta-fo, kwankooya vafu valarutwaa. ¹⁶ Mashika kwankooya vafu valarutwaa, na Kristo nawe nnyalerukafo. ¹⁷ Na kwankooya kuloore Kristo aleruka, kikusryo kyany nruu, mmbo muvesindye efo ulyamariny fika ulaalu. ¹⁸ Na yewo valellala vekusirye Kristo mmbo valereka. ¹⁹ Mashika kwakooya mmbo lwakusirya Kristo yaa ulaniny kweni naasa, yese mmbo lukee vakiva lukairya vandu woose. ²⁰ Kyaindi ulaalu Kristo annduka auka kwa vafu, kava wa mbee wa valya valemfwa. ²¹ Mashika shaasa ufu luleendwa ni nndu, niindo-da na iruka lya vafu mmbo lyileendwa ni nndu. ²² Mashika kwakooya woose mmbo vakeefwa kyeendwa ni Adamu, niindo-da woose vakooya muu kyeendwa ni Kristo. ²³ Lyo wo umwi ando akwe. Mwiivirya muu ni Kristo; numa valya vakee va Kristo elyi ashaa. ²⁴ Yoo nng’u mafurummyony, kyeeri Iruva Nde ashenrambikyaa umangyi lwakwe, kyeeri asheallwaa ngyumangyi toose na ushilyi loose luve ruu. ²⁵ Mashika nkuti nashillye fyoose, natani avika vakiduva vakwe woose yoo si ya marende akwe. ²⁶ Nkiduva wa ifurummya imamitwaa ni ufu. ²⁷ Mashika, mmbo alevika findo fyoose yoo si ya marende akwe. Kyaindi kyeeri asheambaa, fyoose fyammaa yaarwa si, yeto, alemmbikya fyoose yoo si lyo nnyakiyo-fo. ²⁸ Naasa, findo fyoose fikammaa ivikwa yoo si yakwe, llyony na Mwana muni ashevaa si ya yeto alenrammbikya findo fyoose, naambo Iruva nave mmbwe fyoose nnang’ani ya fyoose. ²⁹ A ndesa yewo vabatise kimaruma kya vafu mmbo vashetanaa inda? Kwakooya vafu valarutwaa tusu, kyamaa kyi ibatiswa kimaruma kyawo? ³⁰ Neese nkyikyi elyi lukee nrengeny kyeeri kyoose. ³¹ Yee, vanavama, nnduma yeu wakwa kimaruma kyany kwi Kristo Yesu, Nndumi weeru, mmbo nkeefwa wo nkonu. ³² Kwankooya shikee na mwiili mmbo shilekapana na mafisi a vandu kulya Efeso, mmbusha-kyi shiwonisaa-u? Vafu vakanra valarutwaa, naasa lulyeny neena, mashika ndesi mmbo lweenda ifwa. ³³ Mulalembike, usaare ukasha mmbo lulyamaraa ngaa shisha. ³⁴ Rundeny na urango shaasa kisumani, mulatanaa ulyamari, mashika vengyi mmbeshi Iruva-fo. Mmbo sharera indo naambo shimusute. ³⁵ Kulakooye nndu avesaa, A niinda vafu varutwaa? Na mmbo varukaa na mwiili wa ngata-kyi? ³⁶ Ewe itondo! Yekyo kwavaaya nkirukaa kulaore kyafwa mbele-fo. ³⁷ Na yekyo kwavaaya, nkwavaaya kilya kisheshaa-fo mmbeu sheni, ikava ya nganu ao ingyi. ³⁸ Kyaindi Iruva mmbo aitunndwa shaasa akundye muni, na wo mbeu ngata ya vayo. ³⁹ Nyama toose nshi nyama imwi-fo, ingyi ni-nndu, ingyi ni ya ifisi, ingyi nnya ndeye, neengyi nnya ikunga. ⁴⁰ Na lyingyi kwiifo fyuumbe fya iruveeu, kukavekaa-fo fyuumbe fya ulaniny, kyaindi itumbe lya fya iruveeu ni ngata ingyi deny, kweenanisa na yei ya ulana. ⁴¹ Kwiifo itumbe lya nkyeere na itumbe lya mwiiri, na itumbe lyingyise llya nyinyiri. Mashika kuveefo kilakaniso kya itumbe lya nyinyiri na nyinyiri. ⁴² Niindo-da na iruka lya vafu lyikai. Mmbo urikwaa mwiili na ulyamarikaa, ukarutwaa ulalyamarika-se. ⁴³ Mmbo urikwaa na sony, ukarutwaa na itumbe. Mmbo urikwaa ufwafwa, ukarutwa na finya. ⁴⁴ Mmbo urikwaa mwiili wa ngata ilya ya mbee ukarutwa ukee mwili wa ngata ya Mumuyo. Kwankooya wiifo mwiili wa ngata ya mbee naako ni wa ngata ya mumuyo mmbo wiifo-da. ⁴⁵ Niindi kikee kireiye, Nndu wa mmbee we Adamu aleva nndu atiri muu. Adamu weefurumya ni mumuyo mwiruta. ⁴⁶ Kyaindi mbushesongoyaa ulya wa mumuyo-fo, ni ulya wa ngata ilya ya mbee, numa ukasha ulya wa mumuyo. ⁴⁷ Nndu wa mbee ni wa ulaniny, mmbwa uteeri. Nndu wa kavii mmbo ookye iruveeu. ⁴⁸ Shaasa yeto wa uteeri akai niindo yewo va uteeri vakai. ⁴⁹ Na shaasa yese luleipoo fwana ya yeto wa uteeri, niindo-da neese mmbo lusheipoo fwana ya yeto wa iruveeu. ⁵⁰ Vanavama kindo nkeamba n ekyi, sheelyi mwiili na samu mfishidimaa iwona umangyi lwa Iruva-fo. Ao kilya kilyamarikaa nkishiidimaa iwona kilya kilalyamarikaa-fo. ⁵¹ Loleny-te mmbo nkunndye imuvia kyama kimwi. Llulalaa loose-fo, lyo loose mmbo lushealashikaa. ⁵² Sha lyimwi nsi, sha ikafya miso, kyeeri kya iranda lyefurummya; mashika lyo iranda lyishereraa, llyo vafu varutwa, valakilyamarikaa. Neese mmbo lushealashikaa. ⁵³ Mashika nkuti yeu wa ilyamarika urae ira ulalyamarika, na yeu wa ifwa uraa ira ulafwa. ⁵⁴ Naasany elyi yeu weelyamarika usheraa ira ulalyamarika, na yeu weefwa usheraa ira ulafwa, llyo irero llya lyikeeireiye lyisheinukyaa. Ufu lwammirwa ni uvingyi. ⁵⁵ A ivinga lyafo yewe ufu nkwi lyikai? A ivava lyafo yewe ufu nkwi lyikai? ⁵⁶ Ivava lya ufu ni ulyamari, na finya ya ulyamari ni uvavaso. ⁵⁷ Lyo luniinge nnu Iruva kyaanu yeto aluniinga ivinga kyeendwa ni Nndumi weeru Yesu Kristo. ⁵⁸ Naasany vanavama vakwa vakunde, vangeny iirikyony, nta mulasingesinge-fo, mwengere nnu irunda ishora lya Nndumi mikonu myooose, mashika mwiishi sheelyi ngatara yaany kwi Nndumi nshi ruu-fo.

¹ Kya mbony teesang’irya findo kimaruma kya veele, shaasa llya shilevavasya siri ta Galatia, neeni kevetaniny indo. ² Wo nkonu wa mbee wa mfungare wo nndu nadeesye kindo kyakwe, kiinani na ivesyo lyakwe; naambo isanyirya lyilasheeva nkonu yeto nshaa. ³ Neeny kyeeri nshaa mmbo nshevarikaa na barwa yewo muvasauwaa, veepoo isarya lyany fika Yerusalemu. ⁴ Kwakooya kivaa neeny sheende. ⁵ Kyaindi nshaa kwany shammaa iira Makedonia; mashika lyo nshiraa Makedonia mbele. ⁶ Kweenda nshesindaa kwany, yee, kweenda kyeeri kyoose kya mbeo; mushirwaa koose efo nsheendaa. ⁷ Mashika nshikunndye ikwaanya neeni ulaalu-fo, nshiraa-da, mashika mmbo shivikye nsia wekaa neeni kyaangu, kwakooya Nndumi ashiidimisya. ⁸ Lyo mmbo nkaa Efeso fika Pentekoste. ⁹ Mashika kulya mmbo shileruyo mwaango nniini nsha nnu, nafo veefo veengyi vakeshikapa fira. ¹⁰ Kyaindi, Timoteo kansha, loleny nakae kwany nofoo, elyi akeerunda ishora lya Nndumi kimwi sheeny shimuni. ¹¹ Naasa kulave nndu moose amwiila, lyo nrikeny na ufoo, naambo nashe kwakwa, mashika mmbo shimbereye amwi na vanavamaye veru. ¹² Kyaindi kya mbony ta mwanamaye weeru Apolo, mmbo shilemwikima nnu nashe kwany ando amwi na vanavamaye veru, lyo we nnyekundye isha ulaalu-fo; lyo mmbo ashaa elyi awonisaa mwaanya. ¹³ Laleny shoovi. Salaleny shumu efo kikusiryony. Rundeny kyuumi muve vatakusu. ¹⁴ Findo fyany fyoose fitanyike na ikunda. ¹⁵ Na lyingyi vanavama shamutereva; mwiishi vandu va kyeny kwa Stefana, sheelyi wo mfimu fya mbee fya Akaya, nawo mmbo valekwaata ishoreny lya ifurukanya veele. ¹⁶ Vandu sha yeva veendyeny na wo nndu narunde ando amwi nawo neekuvinisa nnu. ¹⁷ Neeny mmbo shilefura nnu kyaisha lya Stefana na Fortunata na Akaiko; mashika yeva mmbo valeshilyilya nnu kya filya fyenshaanguya yoo kwany. ¹⁸ Mashika mmbo valeviirya nrima wakwa muu nnu, na mirima yaany-da. Naasa manyiny nnu vandu sha yewo. ¹⁹ Siri ta Asia tamwiidikira. Akila na Priska vamwiidikira nnu na irina lya Nndumi, ando amwi na siri yeyo ikee efo mmba kwawo. ²⁰ Vakristo woose vamwiidikira. Kwiidikireny na kimimindo kyeele. ²¹ Ekyi nkyo kiidikiro kyakwa shakireiya na woko lwakwa shimuni. ²² Nndu moose yeto nalakundye Nndumi, nave n-denge. Maranatha (Nndumi weeru nkufii nashe). ²³ Isarya lya Nndumi Yesu lyikae neeni. ²⁴ Ukundi lwakwa lumukaye yeni moose mukee na Kristo Yesu.