TITUS

TITUS

¹ Ami Bulus nwu nya bu Cidon, mkà ci fotson bu Yesu Kiristi, mna ta afa wakara ri. Cidon cemi jiji m ya tsaza pajukun baa ku cebe ra yo, jiji be yi wajinderi ki bye ajia foji wa yaya ki pyen. Ki cin waa jiji be yì aji wa byenbyen ki cin bu Cidon zan myi kata; ² jiji be ho mikyinbe so danra, beri du cindi wa ci kenken waa Cidon wari kan’a akan ba ndi genu ki cin’a avo gbogbo dzu jinni bi danra, kuri yi pajukun ra. ³ Waa anyunu mba tiri rara, ku tà yi pajukun cindi waji ki fa byeya numa, ki bye ajia waa ku nde kwami ki vomi ra. Mna zen aji ki cin aji waji na yi pajukun ci tsadzu waa Cidon wa nwa pa, ndi numi dòn ra. ⁴ Titus nwumi wa concon, ami Bulus atau, ki bye aji bu Yesu Kiristi waa ī kwan dzun zen nde yi wajinderi kiyo ra, mna ta afa wakara ri na yiu. Atai Cidon, ba Yesu Kiristi Cindoi ku san u san­ san, ku yiu mikyin wa na jinni. ⁵ Abu wa tsa m ndi fan u so ki Karita ra, ki cin waa jiji ú mbyā­ san abu badati baa cibe coa nda­ fan jinni bara so sansan, jiji ú ce baco ki fin pajukun baa bà Ci­ don ki finka wani kata. U kye­ pan ba waa m ndi dan yiu danra, ⁶ ko kani waa uma ceku jiji ku kan baco ki fin bi bu pajukun baa bà Cidon, ci ken apa waji ku ci apa wa baani ba aji dzun wa baba ki cin’a. Ku ci apa wa ban wuwa dzundzun tori numa. Ci ken bazhenzhen bu apa waji be ci bazhenzhen baa zen nde yi wajinderi ki bye aji bu Yesu Ki­ risti. Béká ci ba azèn dzun wa baba ki cinbe waa pajukun bé bi ndebe zen dzwa bobe kiyo na kyen danra, be ci zhenzhen baa gban cin, be ci zhenzhen baa fobe tson ba. ⁷ Apa wama ci baco ki bye butso bu Cidon wa tsatsa, ci ken kúká tsada abu dzun waa pajukun be mbyà aboa kiyo ba, kúká cì dia, nde cin’a ki don ba, kúká ngongo mwamwa ba. Kúká pyen jan ba, kúká ci apa wa hwa jan nga ba. Kúká ci apa wa ngi­ ngi bu abu wa dudu zadi ba. ⁸ Ama ci ken ku pan pajukun sansan, kúká tsa abu wa rimyi ba, ku ci kyoo numa, ku tsa abu wa sansan, ku ci sansan numa ki pyen bu Cidon, ku pan cin’a san­ san. ⁹ Ci ken ku pansan ajibyen waa ī ndi fyenku ra so don san­ san, jiji ku zen gban pajukun mikyin ba aji waji. Pajukun baa na sunnu ba aji waji ra, kú fyen ta yibe ki fa byeya numa danra, be yìbe abu waa bena tsa raba. ¹⁰ Pajukun badati ki tiri suu numa gban cin kagben, tuntun ki fin bi bu pajukun baa na bàvo ki bye aji bu abuku wa kyukyu raba, bena zen aji baa nya hwan azota numa na puji pajukun ki­ yo. ¹¹ San kari, ú kan denbe jiji be bande ba anube kyoo numa. Ki cin waa bena ka ki ndo, ki ndo na fyen pajukun abu baa fyea wa fyenfyen ba. Bena pan pajukun mikyinbe yo na nukwan cincin, ki cin waa jiji bé du abè ki bye nyaco wa pan tsenni wa­ kara. ¹² Apa wa da dòn bube dzun ki finbe danra, "Pajukun baa ki Karita kankan kagben, be ci tsadzu abupon ki hwan, be ngingi bu abu, adibe zen’a hwen ba." ¹³ Aji wakara waa apa wa da dòn waji dan ra, ci aji wajinderi. Ci numa ra, ú nube dòn gban­ gban numa jiji be yi wajinderi ki bye aji wa byenbyen. ¹⁴ Béká bà aji bu aji wa màma abube Ya­ hudawa, ba adòn bu pajukun baa sinni aji wa byenbyen ra ri­ ba. ¹⁵ Apa wama ci ba mikyin wa sansan koke kata ki byea ci abu wa sansan numa. Ama apa wa­ ma ci ba mikyin wa baba, kuma kà yia wajinderi ki bye aji wa byenbyen ba, abu dzun wari ci abu wa sansan numa ki zoa baa­ ni. Ki cin waa mikyin’a kata tsa­ ba jinni ra. ¹⁶ Bena so dibe danra, be yì Cidon nu, ama ki bye abube waa bena tsa ra, tà yi pajukun danra, be yìbe Cidon ba. Be ci zadi numa, be gban cin kagben, be dzube cin wa tsa abu dzun wa sansan ba, ko titi.

¹ Ama ci ken numa, ú zen aji we dzun ba abu wa fyenfyen wa byenbyen. ² Baco be ci kyoo numa, be pan cinbe bi dzun san­ san, be pantse ba gben gangan numa ki bye aji bu Cidon waa be yi wajinderi kiyo ra. Be con pajukun, be ci ba mikyin wa ta­ shuma. ³ Kà ci numa ba baco bawuwa du, be tsa abuu Cidon ndafan jinni byenbyen numa. Béká zen aji tsaba pajukun ba. Béká wa jan fan dibe kan nya bu ajan wa wawa ba, Be fyen abu wa sansan wa tsatsa. ⁴ Ki cin waa jiji be fyen abe zhen mafan bawuwa jiji be con anube ba zhenzhenbe. ⁵ Bé pan cinbe bi dzun sansan. Mikyinbe ku ci nyenye numa. Be pan ndobe sansan numa. Be nde cinbe na jinni yi anube, ki cin waa jiji apa dzun kúká du nyaco wa zen aji tsaba aji bu Cidon ba. ⁶ Kà ci numa du, ú nu zhen mafan dòn jiji be pan cinbe sansan. ⁷ Ki bye abu baa uma tsa kata ú tsa san­ san jiji pajukun badati be ten beu kiyo. Úká jojo ba abu wa fyenfyen ba, ú pan diu sansan. ⁸ Ú zen aji baa dzu cin jiji tsenni ku pan pajukun baa na zen aji tsaba zen u ra. Ki cin waa bē dube abye waa be nde vo pan yo be zen aji tsabai kiyo ba. ⁹ Ábe zhen nya, bé nde cin na jinni fo tson bu cindobe. Bé tsa abu wa vya hwan bu cindobe ki bye abu waa bema tsa kata. Bé­ ká sunnu ba cindobe ba. ¹⁰ Béká vyi vyu ba, ama be tsa abu baa byenbyen ndafan jinni wari hwa yi pajukun ri zen nde babe byen­ byen numa dzwadzwa ki jinni. ¹¹ Ki bye wakara numa hunnu ri hwa yi pajukun ri nyā aji bu abu wa fyenfyen bu Cidon wa nwà­ dzui. Cidon tà yi pajukun wa sansan ki fa byeya numa jiji pa­ jukun kata be du nyaco wa nwà­ dzudzu. ¹² Wa sansan waji na fyen tà yii danra, abu wama vyaa hwan bu Cidon ba, íká tsa abu waji ba. Íká ho mikyin’i so bye abu baa vyai ki di wa tsatsa baa ki fin tswen kire raba. Í ho mikyin’i we jinni, í ci byecui ki fin tswen kire kyoo numa, í tsa abu wa byenbyen, í bà Cidon ndafan jinni. ¹³ Ci tsadzu waa ī ci na ge cin bu anyunu wa cu cucu waa ī ho hwan’i so nyaco na ge cin’a jiji í mbyà, ki bye anyunu waa Cidon ba apa wa nwa apa waa beri baku danra, Yesu Kiri­ sti ribi ta hwea kiyo ra. ¹⁴ Ku nde dia ka aki ki cin’i jiji ku nwàdzui ki fin abu wa baba kata, jiji ku wo nyei, í ci nyenye numa, jiji í kan pajukun bua kenken baa ri so hwan ki bye abu wa sansan wa tsatsa. ¹⁵ Ú zen aji ki cin abu baakara bàvo kiyo gbangban numa yi pa­ jukun, ú nube don, ú gbebe tson ba gben u kata, ki cin waa jiji apa dzun kúká sinniu ba.

¹ Ú kyepan bandou yo, jiji be nde cinbe na jinni ki pyen bu baco baa natson, ba baco baa ki pyenbe ki bye aji bu atson wa tsatsa. Bé nde cin na jinni yibe, bé mbyā dibe soso jiji be tsa butso wa sansan wani kata. ² Bé-ká zen aji tsaba cin bu apa dzun ba, ama be ci tashuma numa, béká nya ajinya ba, abu waa be­ ma tsa kata, be hwa ce bu pa­ jukun kiyo, ³ Andi gbogbo, ī ndi jeje yara, ī ndi gban cin yara, be ndi pujii yara, ī ndi fan dii kan nya bu abu baa vyai ki di, ki fin tswen suu numa yara. Mikyin’i ndi baba ko nukon, ī ndi ci bye­ cu bu anwe wa nwanwa, pajukun ndi conbe ajii ba, ai kà con’i ajibe ba du. ⁴ Ama ayo waa Ci­ don hwi cicii, ku con’i ra, ku nwàdzui. ⁵ Wakara tàa danra, ī tsá abu wa sansan kacin ba, ama ki cin waa ku hwi cicii, ku nwà­ dzui ku yi Denden wa nyenye tsonyei kan pajukun baa ripye, kukà yii cindi wa ripye. ⁶ Ku yii Denden wa nyenye ba mikyin’a kata dzu bye Yesu Kiristi apa wa nwàdzui. ⁷ Ki cin waa ku hwi cicii ra, ku hwa yii ci sansan numa ki pyen bu Cidon, jiji í du cindi wa ci kenken waa ī lolo mikyin’i so dia ra. ⁸ Aji wakara ci aji wajinderi byenbyen numa. Ú so hwan kiyo jiji ú dan yi pajukun baa pan vo ki bye aji bu Cidon ra, be so hwan kiyo be tsa abu sansan. Abu baa kara ci abu baa sansan, bekà cí abu baa tsaza apa yo. ⁹ Ú gadi ba ayepye wa yeye wa nya hwan ra jinni. Ú gadi ba aji bu anwo tsu wa hwenhwen kapyo tiriri ra jinni, ba andegbe wa gbegbe, ba ayepye ki cin aji bu adòn bu Yahudawa. Atswi ayepye baakara ci abu baa nya hwan azota numa ki tswen. ¹⁰ Apa wama hwā yi pajukun baa bà Cidon gafan dibe nya cincin, ú nu apa waji don dzwa dzun, dzwa pyinna, apa waji ma gon’a tson fou ba, ú fanku ci bye. ¹¹ Ú yinu danra, atswi apa wakara ci atswi apa wa baba. Ku gbe aji be dia yo ki cin ra hun. ¹² Ayo waa mma tson Aritimas tson, ko Tikikus ma bi byeu, se ú tsa mwamwa jiji ú bi dumi ki Nikapolis, ki cin waa mna so mikyin danra, mri ci bye waji ri zan àdinu. ¹³ Ú nga jiji ú tsaza Zinas apa wa yì aji bu akwen ra yo, ba Apolo, ki bye akyonbe waa beri do ra, ki cin waa jiji béká do avo rinyi numa ba. ¹⁴ Pajukun bandoi bé fyen wa tsaza pajukun baa nyani abu ki vobe ra abu wa sansan, béká ci numa azota ba. ¹⁵ Pajukun baa bami cire ra na nau jen kiyo. U nà pajukun baa na con ajii, bena zen nde ba Yesu ra kiyo. Cidon ku sanni sansan numa kata ken cin dini dzwa myi.