BAFILIBI

BAFILIBI

¹ Ami Bulus ba Timoti zhen nya bu Yesu Kiristi ina ta afa wakara ri. Ina ta afa waji yini ani pajukun baa bà Yesu Kiristi kata baa na finka Filibi, ba ani baco ba dikon. ² Atai Cidon ba Cindoi Yesu Kiristi ku sanni sansan ku yini mikyin wa na jinni. ³ Ayo waa m mana ga ajini numa, mna nya ason bu Cidon ki cinni kata ko nukon. ⁴ Ki bye ndedzwa wani kata waa m mana pya Cidon weni yo numa, mna mbu mikyin numa cia wa dandan ba. ⁵ Ki cin wa tsazazani waa ni tsazami yo ki bye aji bu Cidon waa mna dan numa kapyo na kyen avo ndi gbogbo nde numa keke bibi jinna. ⁶ M yinu byen­ byen numa danra Cidon wa ndi kapyen jo nwo butsoa ki byeni ra, kuri tsa butso waji numa ya ban myi ki bye anyunu waa Yesu Kiristi ri kasen bi ra. ⁷ San kari ki byemi m ga atswi aji wakara numa ki cinni kata, ki cin waa ajini cimi ki mikyin numa cia wa dandan ba. Ki cin waa ani kwan dzun bami kata mbyà wa sansan waa Cidon tsai ranu tanma numa ki bye ayo waa be panmi nde saso jinni ci kara, bā ki bye ayo waa m ndi pantse pyen bu kwen mna zen aji ki cin aji bu Cidon ra, m tà yi pajukun ki byeya numa danra aji waji ci aji wajinderi. ⁸ Cidon ba dia ri zen numi ri. Ajini wa cimi ki mikyin numa cia wa dandan bara, dzu bye Kiristi ba dia bi. ⁹ Mna pya Cidon weni yo dan­ ra ní con dini suu numa kwan yo foji wa yaya ki pyen. Níkà yì aji wa byenbyen numa kwan yo foji wa yaya ki pyen, ní hwayi cinna bu abu kata, ¹⁰ jiji ní mbafo abu kata jiji ní ce abu baa san kari kata, ni ci nyenye numa nde numa keke yaya ki bye anyunu waa Yesu Kiristi ri kasen bi ra, kúká bi panni ba ada dzun ba. ¹¹ Nī kari ci ba mikyin wa sansan numa wari dzu bye Yesu Kiristi ribi. Niri tsa abu baa sansan suu numa. Pajukun baa ma mbyà abu baa sansan baaji beri yi Ci­ don hwe, be kari nya ason bu Cidon ki cin abu baaji. ¹² Bazhenzami, mna con jiji ní yinu danra, afyin baakara baa du­ mi ra hwa aji bu Cidon kapyo kwan yo foji wana yaya ki pyen. ¹³ Ki cin afyin baaji numa hwa pa­ jukun baa nuken baa na kon pyín ndokù wa ki Roma, ba abye ba­ dati, be mbyà yinu danra, akān waa be ho wemi sa jinni ra, be wemi ki cin bu Yesu Kiristi. ¹⁴ Pan-pan waa be panmi nde saso jinni ra hwa zhenzami badati suu numa du gben mikyin ki di bu Cindoi bena dan aji bu Cidon kwan yo foji wa yaya ki pyen, be gebe mikyin ba. ¹⁵ Pajukun badati na dan yi pajukun aji ki cin bu Yesu Kiristi ki cin waa bena fifi ki fin mikyinbe, bena nyà ajinya, ama pajukun badati na dan aji ki cin bu Yesu Kiristi yi pajukun ba mikyin wa sansan. ¹⁶ Acon hwari hunnu yi pajukun baakara na tsa numa ki cin waa be yinu danra, Cidon ndemi so kire ki cin waa jiji m tà yi pajukun danra, aji bu Ci­ don ci aji wajinderi. ¹⁷ Pajukun ba­ dati baa hun ra, bena dan aji ki cin bu Yesu Kiristi na nyà hwe kwan yo. Be danbe aji waji ba mikyin dzundzun ndafan jinni ba. Bena dan numa ki cin waa bena ga danra beri gbe mikyin wa pepe ri kwanmi kiyo, ki bye akān waa be ho wemi yo ra. ¹⁸ Akake waji tsari hun? Ko be mana dan yi pajukun aji ki cin bu Yesu Kiristi anini, ko be mana bye pajukun byebye, ko be mana dan aji wajinderi na yibe, ci abu wa mbu mikyin ki byemi, ki cin waa pa­ jukun na du aji na fo ki cin bu Yesu Kiristi, Mri kari mbu mikyin numa kwan yo ya pyen, ¹⁹ ki cin waa m yinu danra, mri nwàdzudzu ki cin waa nina pya Cidon wemi yo ki bye ndedzwani ba wa tsazaza bu Denden bu Yesu Kiristi. ²⁰ Mna ma ki fin mikyinmi mna so hwan danra, mká tsa abu dzun wa gbe tsenni yi dimi ba. Ama m ci ba gben mikyin wa gbangban numa, nde kire jinna yaya ki pyen ko nukon. Jiji ḿ yi Yesu Kiristi ahwè ba adimi káta, ko mma ci ju, ko mma huhu. ²¹ Ki cin waa bumi ki byemi, ko mma ci ju m ci bu Yesu Kiristi, ko mma huhu sansan. ²² Ama byecumi wa ki fin tswen kire numa yaya mari tsaza pa­ jukun yo kari, m yimi waa m gbe ki finbe ba. ²³ Ama mikyinmi na tsami pyinna pyinna. Mna con jiji m gadi ba cin dimi wakara jiji m ya ci bye Yesu Kiristi, ki cin waa wakara ciri abu wa san kari kata. ²⁴ Ama ki byeni mma ci tiri riju numa ribi tsazani yo kari. ²⁵ Waka­ ra m̀ yinu numa ajinderi byenbyen. Ci numa ra, m yinu danra, mri bi ci tiri bani. Mri bani kata ci tiri ki dzun ki cin waa jiji ḿ tsazani yo ki cin waa jiji ní mbu mikyin ní yi wajinderi kwan yo ya pyen. ²⁶ Ki cin waa ayo waa mma bi duni, mma bani ci dzun ra, niri cu cucu suu numa yi Yesu Kiristi ki dimi. ²⁷ Tanma abu wa san kari ciri, ní tsa abuni kata ku we ki dzun ba aji bu Yesu Kiristi, ki cin waa jiji mma bi ki byeni kire, ko mma bimi ba, ḿ fo aji ki cinni danra, ni ho mikyinni kwan dzun pantse gban­ gban numa, nina nga adini kata ki cin aji bu Cidon waa ni yi wajinderi kiyo ra. ²⁸ Níká zinzin bu abe jo kenni hora ko titi numa ba. Wakara ri ta yibe ki byeya numa danra, Cidon ri bwan jibe, ama buni niri nwàdzudzu. Wakara ci abu waa Cidon ba dia ri ta yibe hun. ²⁹ Cidon yiani apyo ki cin waa jiji ni yi wajinderi ki bye Yesu Kiristi vinni ba, ama ki dn waa jiji níkà wa fyin ki cin’a. ³⁰ Atswi aken waa ni ndi mbyà m ci fin’a ra, duni ra. Nī fonu danra, avo jinna ba, m ci tiri ki fin aken waji.

¹ Ci numa ra, nima ho cinni kwan dzun sansan numa ki bye Yesu Kiristi, nima con dini, nima zen gban dini mikyin yo, nima ci byecu bu vyon ba Den­ den bu Cidon, nima hwi cici bu dini, ni mana ta aki bu dini. ² Ci numa ra ní ho mikyinni kwan dzun, ní con dini anu dzundzun. Mikyinni ku ci dzundzun, ni ho mikyinni kwan dzun. Ki cin waa ma ci numa nī tsa vinni abu wa vya hwanmi ra. ³ Níká ci pajukun baa condi ba, níká kà nde cinni ki don ba, ama ni nde cinni na jinni, ko kani kata ku mbyà dia danra, apa dzun kaku ri. ⁴ Níká ho hwanni so bye aji bu abu wa ci abu dini vinni ba, ama ni so hwan ki bye aji bu abu pajukun badati du. ⁵ Ní ci ba atswi mikyin wakara numa ki finni, atswi mikyin waa Yesu ci baku ra. ⁶ Ko waa ku ci abu dzundzun ba Ci­ don ra, ku soa dia mba dzun bwa numa ba Cidon ba. ⁷ Ama ku fan dia kan anya, be mbaku azén’a dzu abu pajukun. ⁸ Ayo waa ku ci nwu pajukun tiri ra, ku sinni ba dia, ku fan adia yi aki ki vo, har pajukun pan’aku nde kan bwan ki cin hin wa shon gege. ⁹ Ki cin wakara numa hwa Cidon yiku hwe wa kari kata, kukà tso­ ku azèn wa kagben bu azèn ba­ dati kata. ¹⁰ Ki cin waa pajukun baa ma fo azèn bu Yesu jiji be ho kunubebe tu ben jinni kata ki pyen’a be waku ki don, ba ki myi kire, ba ki kindo. ¹¹ Pajukun ri dan ba anube ki byeya numa danra, Yesu Kiristi ci Cindoi, be kari yi Ata Cidon hwe. ¹² Ci numa bandomi, ci tsadzu waa ni ndi na fo tsonmi ko nukon ki bye ayo waa m ndi bani ci tiri ki bye dzundzun ra, ci numa ní fo tsonmi kwan yo ya pyen ki bye ayo wa tanma waa m bamni ci bye dzundzun bara. Ní zinzin, ní ge mikyin, ni só hwan kiyo tsa butso jiji ni du nyaco wa nwàdzudzu. ¹³ Cidon na tsa butso ki byeni. Ku ciri apa wa hwa yini na con na tsakaa abu baa san mikyin’a. ¹⁴ Ki bye abu waa nima tsa kata, niká nwinde ba, níká kya ajinu kiyo ba. ¹⁵ Ki cin waa jiji apa dzun kúká mbyà boni ki bye abu dzun ba. Ní ci byecuni nyenye numa. Ní ci zhenzhen baajinderi numa bu Cidon, baa cibe ba abu dzun wa baba numa ki dibe ba. Nī ci ki fin bu pa­ jukun baa baba baa mikyinbe vyin pukan jinni numa ki cin tan­ ma. Ani ciri pajukun baa na ya­ fan bye ki finbe ci tsadzu apyu ki fin tswen. ¹⁶ Nína dan tà yi pajukun aji wari yi apa cindi ra. Ma ci numa mri cu cucu suu numa ki bye anyunu waa Yesu Kiristi ri kasen bi ra. Ki cin waa afyin waa m ndì ko ra, m ko nyami hwan azota ba. M ndì tsa­ mi fyin wa nya hwan numa azota ki tswen ba. ¹⁷ Ko bema nde cin dimi kwan bye wajinderini ba butsoni wa ci tsadzu abupyū waa beri pan ge bwan tson wa Cidon kiyo ra, mri mbu mikyin, mri cu cucu bani ki dzun kata. ¹⁸ Fye waa ani du, ní mbu mikyin ní cu cucu ki dzun bami. ¹⁹ Mna so hwan danra Cindoi Yesu Kiristi ma zen nde, ma cifo kwan yo titi numa mri tson Ti­ moti bi ki byeni kire jiji ku kasen bi dan yimi aji ki cinni kire. Ki cin waa jiji ami du m du gben mikyin ayo waa kuma kasen bi dan yimi aji ki cin tswi byecuni. ²⁰ M̀ dumi apa dzun waa mikyin’a we ki dzun ba bumi numa jiji ku soni hwan ki di ajinderi byenbyen numa ci tsa­ dzu ku ba. ²¹ Pajukun badati kata ho hwanbe so bye aji bu abu dibe wa nyanya vinni. Be sobe hwan ki bye aji bu abu wa ci abu Yesu Kiristi ba. ²² Ama ani ba dini ni yinu ki byeya numa danra Timoti ci apa wa sansan. Aku bami ci tsadzu anwu ba ata. Ī tsa butso ki bye dzundzun dan aji bu Cidon yi pajukun fo. ²³ Ku ciri apa waa m̀ nde hwan so dia danra, mri tsonku bi ki byeni kire mwamwa numa ki nyaken waa mma yì vinni aji ki cin abu wari dumi kire ra. ²⁴ Ama m nde hwami so bye Cidon danra, mri bi ki byeni kire ba dimi mwamwa numa. ²⁵ Mna mbyà ki byemi danra, san kari m tson Apafradi-tus ku kasen bia ki byeni kire ri du. Ku ci nwuzai wa bami tsa butso ki bye dzundzun ī nuken ki bye dzundzun. Ku ciri apa waa ni ndi tsonku bi jiji ku bi dzwami zo ki di ki bye ayo waa mna nya wa tsazaza ra. ²⁶ Kuna nya jiji ku bi mbyà zoni. Ku kana pe mikyin suu numa ki cin waa nī fo danra, ku ndi foa vya bara. ²⁷ Aji wajinderi ku ndi dado te nu aki. Ama Cidon hwi cicia. Cicia waa Cidon hwiku ra, na ta danra, kuri hwi cicimi numa du. Ki cin waa abu wa pe mikyin dzun kúká dumi sen dia ki cin bu abu wa pe mikyin dzun ba. ²⁸ Ki cin wakara, m con kari waa jiji m tsonku bi duni kire. Ki cin waa nima mbyà zoa ra, ní mbu mikyin jiji m ho mikyinmi we jinni du. ²⁹ Ci numa ra kuma bi ki byeni ra, ní panku avo pyinna sansan numa ki di bu Cindoi, ní yi tswi pajukun baakara hwe, ³⁰ Fan titi numa kuri ndi hu ra, ki cin butso waa kuna tsa yi Yesu Kiristi ra. Ku nde dia ka aki ki cin waa jiji ku tsa ban anu butso nuni ki cinmi.

¹ Bazhenza, aji wa ken niken ciri ní mbu mikyin ki cin waa ni ci bu Cindoi. Cia abu wa tutu ki byemi jiji m mbyā tā aji baa ci kara yini ba. Aji baaji ci jiji wa rito bu dini. ² Ní wà dini sansan ba abá hora. Abe pajukun baa baba. Abe baa na bàvo ki bye aji bu abuku wa kyukyu ra. ³ Ai ciri pajukun baa kyu abukui wajinderi byenbyen numa ci ka­ ra. Ina wa Cidon ki bye Denden bu Cidon. Ina caco ki di bu Yesu Kiristi. Ī fan’i voi ba abei zan ki di bu abu dzun wa tsatsa ki di ba. ⁴ Ko waa m tsayi wa caco ki cin bu abu wa ki di. Apa wa mana so dia danra, ku ci ba abu dzun waa ku nde dia zan kiyo ki myi kire, ami ka ko kani ri kata. ⁵ Be kyumi abukumi yo ki fin anyunu wa kwan tsuntsa. M ci tsu bu zhenzhen bu Isra’ila, m ci bando Banyami. M ci nwu Ibra­ niyawa waa abe Ibraniyawa mba. Ki bye aji bu adòn bu Yahudawa m ci Farisawa. ⁶ Aji ki cin mikyin wa nyònyó, m ndi ci apa wari tà pajukun baa bà Cidon fyin. M̀ ngyami ngyo abu dzun ko titi numa ki bye adòn bu Yahudawa ba. Apa dzun ri mbyàa bomi ki bye abu dzun ba. ⁷ Abu baakara baa m ndi sobe danra, be ci abu baa dzu cin ki byemi, ama tanma numa mna mbyàbe ci abu wa nya hwan numa azota ki byemi ki cin aji bu Yesu Kiristi. ⁸ Aji wajinderi byenbyen numa, abu baa m ci babe hora kata, m mbyàbe ci abu wa nya hwan azo­ ta numa ki zomi. Ki cin bu Yesu Kiristi m zen nde fan abu kata be jinni. M mbyà koke kata ci tsadzu amyi numa ki zomi, ki cin waa jiji m du Yesu Kiristi, ⁹ jiji m ci baku. Wakara cia abu wa san­ san dzun bumi waa m tsa ba dimi ki bye adòn bu Yahudawa ba, ama ki bye wajinderi waa m yi ki bye Yesu Kiristi Cidon hwa yimi kan apa wa sansan ki di bu wajinderi waa m yi ki bye Yesu Kiristi ra. ¹⁰ Abu waa mna nya kata ciri jiji m yì Yesu Kiristi ba gben’a waa ku do don pwadzu ki shimbi ra. M kana con jiji m wa fyin baku ki bye fyin’a jiji m ci tsadzu ku numa ki bye aki. ¹¹ Ki cin waa ko ma tsanini ba, m do don pwadzu ki shimbi du. ¹² M̀ danmi danra, m̀ du abu baaji raba. M̀ kà danmi danra, m cí apa wa sansan numa ndafan jinni dzwadzwa ki myi ba. Ama mna nga dimi foji wana pi kpa­ sun na yaya ki pyen jiji m pansan abu baaji ki vomi ci tsadzu waa Yesu Kiristi pansanmi ki voa ra. ¹³ Bazhenza, m somi dimi danra, m ken wa du abu baaji raba tiri. Abu dzundzun waa mna tsa ciri, m̀ muji ba abu baa tsa nwādzu ya hwan ki nyaken kata ra. Mna so zénmi ndafan jinni na yaya ki bye abu baa na pyen. ¹⁴ Mna so hwan kiyo pi foji wana yaya ki pyen, jiji m ya zan ki nu nyakyon ḿ ya ji jiji ḿ ya pan avokwin waa Cidon bami nde danra, m bi pan ki di bu Yesu Kiristi m ya baku ci don ra. ¹⁵ Ai baa hwe byen kan pajukun ki bye aji bu Yesu Kiri­ sti rara, san kari í nga tswi mikyin baakara numa. Apa dzun ma ga aji bua dzu ken, Cidon ri hwa aji waji ri ci yafan jinni numa ki zoni. ¹⁶ Abu wa tutu kari kata ciri, í bà abu waa ī ndi pan dzu jinni numa bi, nde numa keke yaya ki pyen. ¹⁷ Bazhenzami, ní ten bei na tsa abu ci tsadzu waa ina tsa ra. ¹⁸ M ndi dan yini abu baakara suu numa gbogbo numa ya hwan ra. Mkà mbyā na dan yini ba janme ki zomi tanma numa na kwan yo. Abu waji ciri pajukun badati suu numa ki finni bena tsa abu ci tsa­ dzu be ci ajo ze bu Yesu Kiristi waa be panku nde kan ki cin hin wa shon gege ra. ¹⁹ Anyunu wa ken niken pajukun baaji beri ya kaka ki pyu ki kindo. Cidon bube ci afinbe. Bena cu cucu ki cin abu wa pan tsenni numa. Aji wa gaga bube kata kwan dzun ken cin bu abu wa ki fin tswen kire maari vinni, ²⁰ Ama bui ī ci zhenzhen baa ki ndo wa ki don. ī ho mikyin’i soso ki nyaco numa na ge cin anyunu wa hun waa Cindoi Yesu Kiristi apa wa nwàdzui ri pwadzu dzu don bi dui ra. ²¹ Ku ci ba gben wa vyin pukan koke kata ci tsadzu waa ku con. Ki bye gben waji kuri vyin pukan dii wa baba wakara ri ci tsadzu adi bua wa d ba hwe ra.

¹ Bazhenzami baa concon, baa mna pya jiji m mbyà zoni. Nī ciri pajukun baa yimi mikyin wa mbumbu ko nukon. Nī kà ciri pajukun baa mna caco ki cinni danra, nī ciri àtābàmi. Ani ba­ ndomi baa concon, ní pantse gbangban numa ki nyaco bu Cin­ doi. ² Mna vo Afodiya, ba Sintiki danra, be gbagba be zen nde be ci abu dzundzun ba dibe ki bye Cindoi. ³ Au wa ci ajo butsomi ra, u tsaza bawuwa baakara yo, ki cin waa be ndi bami kofyin tsa butso ki dzun nde aji bu Cidon na dan yi pajukun, ci tsadzu waa Klement ba pajukun bandomi badati ndi bai na tsa butso waji ra. Cidon ho zènbe ta ki fin afa waa beri ta azèn bu pajukun baa ci ba cindi kiyo rara. ⁴ Ní mbu mikyin ki cin waa nī ci bu Cindoi ko nukon. Mkà mbyā na dan yini kwan yo danra, ní mbu mikyin. ⁵ Ní tsa abuni kata ki bye nyaco waa pajukun be mbyà yinu dan­ ra, ni ci pajukun baa gban mikyin. Cindoi naben wa bibi ra. ⁶ Níká tu mikyin ki cin abu dzun ba, Ama ki bye ndedzwani waa nima dzwa kata ni dan yi Cidon abu waa nina nya. Ní pyaku, ní voku, ní mbu mikyin yiku. ⁷ Ci-don ri yini mikyin wa na jinni wa kagben waa pajukun be hwayi cinnaa. Kuri kon mikyinni, ba aji wa gagani ki cin bu Yesu Kiristi. ⁸ Bazhenza, ajimi wa ken niken ci kara, ko kake wama ci wajinderi byenbyen numa, ko kake wama ken waa apa ku yiku hwe, ko kake wama ci wa san­ san, ko kake wama ci wa nyenye numa, ko kake wama ci wa zun­ zun, ko kake waa pajukun ma dan aji ki cin’a sansan numa, abu baaji ma ci abu baa tsa cin, bema ci abu baa apa ri nya asonbe, ní ho mikyinni so bye abu baaji. ⁹ Abu baakara baa m ndi fyen ta yini, m ndi nde kwani ki voni nī ndi fo ki numi, ba waa nikà mbyà ki bye abu baa mna tsa ra, ní tsa abu baaji baakara numa, Cidon wari yi apa mikyin wa na jinni ra, ku bani ci bye dzun­ dzun. ¹⁰ Mna mbu mikyin ki pyen bu Cindoi suu numa ki cin waa nī jo nwo wana somi hwan ki di tanma kwan yo foji wana yaya ki pyen. Ko avo ndi gbogbo ma nina kyepan bami, ama nī ndi du kani nyaco wa tsa numa ba. ¹¹ Mna danmi aji wakara ki cin waa m nyani ba abu ki vo ba. Ama ki cin waa m fyen nyaco wa gban mikyin ho mikyinmi we jin­ ni ki fin ayo waa mma ci fin’a kata. ¹² M yi abu waa mri tsa nu ki bye ayo waa abu ma nya tutu. Mkà yi abu waa mri tsa nu ki bye ayo waa abu ma gbànna tswen. Abu baa yuyu baakara kata m yibe nu ko nukon ki bye ko kake kata. M fyen bà byecu wa ki fin zu ra, mkà fyen bà byecu wa ki fin mbo ra, ko m du abu ki vomi, ko m dumi abu ki vomi ba. ¹³ Mri tsayi wa tsa koke kata ki di bu gben waa Yesu Kiristi na yimi ra. ¹⁴ Ama waa nī tsazami yo ki fin fyin waa m̀ ci fin’a ra, nī tsa numa mba tiri. ¹⁵ Ani Bafilibi ba dini, ni yinu danra, ayo waa m ndi kapyen do ki Makidoniya nde aji bu Cidon na dan yi pa­ jukun ra, m za fomi avo numa ba abi bu pajukun baa bà Cidon dzun numa fo raba, se ani maari vinni tsazami ri yo. ¹⁶ Ayo waa m ndi ci tiri ki Tasalonika ra, nī ndi na tson atswén baa tsazami yo na yimi te dzun te dzun numa. ¹⁷ Mna nyàmi avyon wa vyon­ vyon ki byeni ba, ama mna pya Cidon ku kwanni wa sansan’a kiyo ki cin abu waa nī tsa ra. ¹⁸ Nī yimi abu wa fye waa ní yimi ra, nikà kwan abu kiyo ki cin’a suu numa kagben waa mna ga ra. Abu baa ni ho tsōn Apafradi-tus bi yimi ra, kenmi ra. Abu baaji ci tsadzu abu wa nufyin sansan numa, bekà ci tsadzu abu waa apa ri tsòn wa Cidon kiyo ri vyaku ra. ¹⁹ Cidonmi wa sen abu suu numa ra, abu baa nima nya kata ku yini ki di bu Kiristi wa ci ba hwe. ²⁰ Ahwè ku ci abu Atai Cidon keke numa yaya ko nukon. Ku ci numa. ²¹ Ní nà pajukun baa bà Yesu Kiristi kata kiyo. Bandoi baa na kire ra na nani jen kiyo. ²² Pa-jukun baa bà Cidon kire kata na nani jen kiyo, tuntun pajukun baa ki ndo Kaisar ba. ²³ Cindoi Yesu Kiristi ku sanni sansan ka­ ta ken cin dini.