IBRAHIM

IBRAHIM

¹ Avo ndi gbogbo dzu jinni bi Cidon zen aji ba abe bayakui dzu ki nu bu pajukun baa da don bu Cidon yibe, ki nyaco badati atswi tswi. ² Ama ki bye anyunu baa kennu tanma ku zen aji dzu bye Nwua yii. Nwua waji ku ndeku so ciri wari za fin bu koke kata, ku mà koke kata dzu di bu Nwua waji. ³ Ci tsadzu waa anyunu ri pofan zoa tà yi pajukun abye wa yafan jinni bu fin tswen ra, ci numa Yesu Kiristi na tà yii abye wa yafan jinni bu Cidon. Mikyin bu Yesu Kiristi na tà yii tswi mikyin bu Cidon ki bye aji bu Yesu Kiristi wa ci ba gben kuna kon fin tswen kata. Yesu Kiristi pofan nyaco waa ku wo nyere pa­ jukun kata ki bye abu wa bababe, waa ku neya ki bye Cidon ki don, ku ya tuci ki vo wunu bu Cidon wa ci ba hwe kari kata ki don. ⁴ Cidon so Nwua Yesu Kiristi kári zhentsōn, azen’a waa ku tsoku yo ra ka abube zhentsōn ra ri pyuu numa. ⁵ Ki cin waa Cidon dan foa yi apa dzun ki fin zhentsōn’a hora danra, "Au ci nwumi; jinna m ci Atau." Ku ka dan foa yi nwutsōn dzun danra, "Mri ci Ataa, aku kari ci nwumi," fora ba. ⁶ Waa Cidon ndi ri tson Nwua Yesu Kiristi wa dzundzun tori ra bi ki fin tswen ra, ku danra, "Ani zhentsōn bu Cidon kata ni waku." ⁷ Abu waa Cidon dan ki cin bu zhentsōn ci kara danra, "M mà zhentsōnmi be ci awo, baa ri tsa butso yimi ci nene pyu." ⁸ Ama aji waa Cidon dan ki cin bu Nwua ciri, "Cidon, adudu bu ámà buu ci kenken numa yaya ki pyen ko nukon, Ùri tsa tson u ndafan jinni byenbyen numa." ⁹ Uri con abu wa sansan, uri ngha abu wa rimyi. Ábu wa tsa ami Cidon wa ci Ata Cidon u wa ndeu so jiji u du hwe ba mikyin wa mbumbu kári bu bajou hora. ¹⁰ Ku ka danra, "Au Cindomi, avo ndi gbogbo ù kapyen ma abye wa ki jinni. Au ma bye don ri ba avo diu. ¹¹ Abu baakara kata ri ji ki jinni, ama buu ù ci kenken ra hun ko nukon. Beri ci pu keke numa ci tsadzu ayoke tukpa. ¹² Uri taben be kwan dzun. Beri vyin pukan ci tsadzu atukpa, ama buu uri ci kenken uri vyin pukan u ba, ajuu ri tea ki jinni ba, ko nukon." ¹³ Cidon dan foa aji dzun yi nwutsōn’a dzun danra, "Ci vo wunumi kire keke numa ya zan anyunu waa mri yi pajukun baa ri zeu hora kan abu wa te abeu," ba. ¹⁴ Ma ci numa zhentsōn bu Ci­ don ci ke? Katabe be ci denden wari tsa butso yi Cidon. kuna tsonbe tson jiji be tsaza pajukun baa Cidon nwadzube ki fin abu wa bababe ra.

¹ Aji waa i fo ra, san kari í so hwan kiyo sansan numa, ki cin waa ika fan dabe jan dzu ba. ² Aji bu Cidon baa zhentsōn ho­ ra dan yii ra ci aji baa byenbyen. Apa wama pan’a aji waji nde hwa mikyin’a ba, ajù wa mbamba nua tseku ki bye aji waa ku gbe­ kyan rara. ³ Too, iri tsanini ri nwadzu in ima soi hwan ki bye nyaco wa kwakyi wakara wa nwadzu apa raba? Cidon kapyen ri dan aji ki cin nyaco wa nwa­ dzudzu wakara ba dia. Pajukun baa ndi kapyen fo ra ta yii danra ci aji wajinderi. ⁴ Cidon ba dia du ka tà yii àmà bu badati wa ta danra aji waji ci aji wa wajinderi. Ku tà yii àmà wakara numa ki bye abu waa kuri tsa ki bye gbentsòn’a, ba abu baa ken nwo, ba abu baa kyahozo ki cincin ki cincin numa. Kukà gafan abyon bu Denden’a yi pajukun ci tsa­ dzu waa mikyin’a con. ⁵ Tanma iri dan aji ki cin anyu­ nu wa kyen. Cidon yia zhentsōn gben wa tsa tsòn ki cin bu pa­ jukun anyunu wa kyen waji ba. ⁶ Ama ì kyepan ba aji dzun waa be dan ki fin ato dzun ki fin Afa bu Cidon danra, "Au Cidon, apa ci kake waji, waa una kyepan baku? Apa zota numa ci abu wa tsake kiyo, har una tsa zaku yo? ⁷ Ki bye ayo titi numa ù yi hwea koshe ka zhentsōn. Ki nyaken wakara ù gbe doku ki don ù yiku hwe suu numa, ù yiku kan aku ki cin ko kake kata waa ù mà. ⁸ U yi koke kata kasen kan abu wa ki tata bea ki jinni." Be tā danra, "Cidon yi apa ku ci ein bu koke kata." Abu dzun numa waa apa cia cin’a ba baani, ama tanma numa ī ngha mbyà yii waa ku ci cin bu koke kata raba tiri. ⁹ Ama ina mbyà Yesu nu! Waa be ndi kodzu ku hwea yo kasen koshe na nyaken bu zhentsōn ki fin ayo titi numa ki cin waa kuna hwi cici bu pajukun kata. Ábu wa tsa Yesu hu aki jiji bu pajukun kata ra hun. Waa Yesu Kiristi wa fyin hu aki numa Cidon yiku gben ba hwe suu numa. ¹⁰ Ci coa ki bye Cidon wa mà koke kata, wa kana kon koke kata ku yi Yesu wa baani ba adà ku wa fyin. Ki bye fyin’a ra ku gbe zhenzhen suu numa bi bye nyaco waa be du hwe. ¹¹ Aku Yesu Kiristi wari tsonye pajukun ki bye abu wa bababe ra, ba pajukun baa ku tsonye abu wa bababe hora kata Atabe ci dzun­ dzun. Ábu wa tsa Yesu pan’a tsenni wa babe danra be ci ba­ zhenzhen’a bara hun. ¹² Ku danra, "Cidon, mri dan aji ki cin u yi bazhenzami, mri nya zen u ki fin bi pajukun buu ba avyon wa tsotso." ¹³ Ku ka danra, "Atami Cidon ciri apa waa mri nde mikyinmi so dia." Kukà danra, "M ci kara ba zhenzhen baa Cidon yimi ra." ¹⁴ Zhenzhen’a baa ku babe nde hora kata ci pajukun. Ki cin wakara Yesu ba dia be mbaku ci apa tsadzu zhenzhen’a hora jiji ku hu aki ku bwan Shetan. Ki cin waa andi gbogbo Shetan ciri ba gben wa bwan pajukun. ¹⁵ Ki di bu aki bu Yesu hu ra ku nwàdzu pajukun baa avo waa be mbabe be ci anya bu Shetan be­ na zinzin bu aki wa huhu ra. ¹⁶ Ci fa byeya numa danra Yesu bia waa jiji ku tsaza zhentsōn bu Cidon yo ba, ama ci tsadzu waa Afa bu Cidon danra, "Kuna tsa­ za tsu bu Ibrahim yo." ¹⁷ Ci numa ra ajinderi ku ci Avon wa ciho wajinderi byenbyen numa, wa tsa butso bu Cidon ndafan jinni sansan numa jiji ku tsonye abu wa baba bu pajukun ku banbe vyon ba Cidon. ¹⁸ Andi Yesu ba dia wa fyin ki bye waa Shetan ndi na ken mbafoku ra ki cin wakara kuri tsaza pajukun baa Shetan ri ken mbafobe ra yo.

¹ Bazhenzami baa ki nyaco bu Yesu Kiristi waa Cindoi bani nde jiji ni ci pajukun bua. Ni ho mikyinni so di bu Yesu Kiristi waa Cidon tsonku bi jiji ku ciri Avon wa Ndanda kari kata wa nde dia yi Cidon a hu aki jijii ra, aku waa iri dan wajinderi waa ī yi ki byea ra. ² Ku tsa butso ba mikyin dzundzun wā Cidon wa ceku so jiji ku tsa butso waji ra tsadzu waa Musa ndi tsa butsoa ndafan jinni sansan numa ba pa­ jukun bu Cidon ra. ³ Ci tsadzu waa apa wa sen tan ci ba hwe kari atan waa ku myi ra, ci numa Yesu ci ba hwe ka Musa ri. ⁴ Ko atan wani kata apa myiku ri, ama Cidon ciri wa tsa koke kata. ⁵ Musa ci nwu butso azota wa kofyin tsa butso wā pajukun bu Cidon ba mikyin dzundzun kuka zen aji dan yi pajukun abu waa Cidon ri tsa ki pyen kire. ⁶ Ama Yesu Kiristi ci apa wajinderi byenbyen a Nwu waa Cidon ho koke kata ki ndoa kwaku ki vo. Ai ciri pajukun bua in ima pan­ tse ba gben gangan fan avoi ba abei ho mikyin’i so dia. ⁷ Denden bu Cidon danra, "Jinna nima fo akyu bu Cidon, ní gon tson ni foku, ⁸ Niká gban cin ci tsadzu waa andi gbogbo bayakuni gban cin, be nghami ki bye yo waa be ndi kyenkyon ki hwan be ken mba fomi ra. ⁹ Ki hwan waji bayakuni ndi ken mbafomi ko waa be ndi mbyànu ba zobe abu baa m tsa ki fin ju dipa pyinna ra. ¹⁰ Ki cin wakara m ngongo babe m danra, ’Be jan nyacomi ki mikyinbe, be fobe tsonmi ba.’ ¹¹ M ngongo m ne gebe danra, ’Beri dube nwo wa nghangha ki byemi ba.’" ¹² Bazhenza, ní wà dini sansan jiji ko apa dzun ki finni kuka dada ci ba mikyin wa baba wa yia wajinderi ki bye Cidon ba, ku kokwi ki nyaco bu Cidon wa ci ba cindi ba. ¹³ Ama san kari nina dan gban dini mikyin jinna ba kyen jiji Shetan kuka bi byeni ni gban cin tsa abu wa baba ba. Ki cin waa jinna nina fo akyu bu Cidon tiri. ¹⁴ Ki cin waa ī yi wajinderi avo ndi kapyen īma tse ba gben gbangban numa ya zan anyunu wa kennu iri ci bazhen­ zaa waa iri kwan cin ki dzun baku. ¹⁵ Cidon dan ki fin Afaa danra, "Jinna nima fo akyumi niká gban cin ci tsadzu waa andi gbogbo bayakui ndi kyenkyon ki hwan a nghami raba." ¹⁶ Pajukun baa ndi fo akyu wa­ ji gban cin ra ci bani? Be cibe pajukun baa ndi pwadzu ki fin jen bu Masar baa Musa ndi ho­ be nyaco raba? ¹⁷ Cidon ndi ba báni ngongo zan aju dipa pyinna ra? A pajukun baa tsa abu wa baba be hu ji jinni ki fin pon. ¹⁸ Pajukun baa ku ne gebe danra, beri dube nwo wa nghangha ki byea bara ci bani? Be cibe pa­ jukun baa gban cin baaji ba? ¹⁹ ī mbyàyi danra abu wa tsa be ka­ kabe ki bye waa Cidon ri con be kayo bara, ki cin waa be yibe wajinderi ki byea ba,

¹ Ko waa nuge waa Cidon ge danra ko kani kata ri ka ki bye wa ngha nwo ra, se í ci fin azin ki cin waa dzun tiri pajukun badati ribi ya kakabe ki byeri ba. ² Ci tsadzu waa ndi gbogbo ba­ yakui hora ndi fo aji bu Cidon ki fín pon, ci numa ki byei du, ī fo Aji wa Sansan bu Cidon ra. Ko waa be fo aji waji ra be tsabe butso baku ba, ki cin waa dede waa be fo ra be pan sobe ki mikyinbe ba. ³ Ama ai baa yi wajinderi kiyo ra iri ka ki bye Cidon iri ya baku ngha nwo ki dzun. Ci tsadzu ku ndi danra, "M ndi ngongo dan aki danra: ’Beri dube nwo wa nghangha ki byemi ba.’" Ko waa Cidon ndi kapyen tsa vinni butsoa avo gbogbo ra, ku dan yi bayakui aji wa ci kara. ⁴ Ki cin waa be dan aji dzun ki bye Afa bu Cidon ki cin anyunu tsu­ pyen danra, "Cidon ngha nwo dia ki fin anyunu wa kwan tsu­ pyen ki bye butsoa kata." ⁵ Beka zen aji ki cin aji waji wakara kwan yo kati danra, "Beri kabibe ribi bami ngha nwo ki dzun ba," ⁶ Har tanma apyo ci tiri jiji pa­ jukun badati be kaya, pajukun baa ndi kapyen fo Aji wa Sansan bu Cidon ra, be kakabe ba, ki cin waa be gban cin kagben, ⁷ Wakara ci fa byeya numa ki cin waa Cidon ka mbyā nde anyunu dzun so waa ku baku danra, "Jinna." Ku dan aji waji wakara dzu nu bu Dawuda ki nyaken waa be ci dede numa ci tadzu waa be danra, "Jinna nima fo akyu bu Cidon niká gban cin ba." ⁸ Avo ndi gbogbo pajukun baa ndi ki fin hwan hora rima ndi zen nde yi Joshua hobe ya ka ki bye wa ngha nwo bu Cidon jiji be baku ngha nwo ki dzun, Ci­ don ri kyan dan’a aji ki cin anyu­ nu wa ngha nwo dzun ken riba. ⁹ Wakara tà yii ki fa byeya numa danra apyo ci tiri kiyo waa pa­ jukun bu Cidon ri du nwo wa nghangha ci tsadzu waa Cidon ndi ngha nwo ki fin anyunu wa kwan tsupyen ra. ¹⁰ Ko kani kata wama kaya ya ngha nwo ki dzun ba Cidon kuri ngha nwo ki bye butsoa kata ci tsadzu waa Cidon ndi ngha nwo di bua ki bye bu­ tsoa ra. ¹¹ Ci numa ra í so hwan kiyo nganga jiji í kaya du Cidon í baku ngha nwo ki dzun. Apa dzun ki fin’i ká dada gban cin ci tsadzu waa bayakui ndi gban a nyani wa kaya du nwo wa nghangha raba, ¹² Aji bu Cidon ci ju na tsa butso ji kári gisingiri. Kuna tsa butso ki mikyin bu apa. Aji bu Cidon ri ge apa ka yaya ki fin mikyin wa ga aji bu apa, kwan ba Denden’a. Kuri ka fofo ki bye waa ake ba aswe den kwan dzun kiyo. Aji waji ri ta yi apa abu waa kuna ga ki fin mikyin ba abu waa kuna con. ¹³ Ki bye abu waa Cidon mà hora kata wa dzun wari yu kaa dia ki zoa numa baani. Koke kata ci fa byeya numa ki zoa, Cidon na mbyà koke kata nu. Ku ciri dzundzun waa iri pantse pyen’a dan yiku abu waa ina tsa kata. ¹⁴ Ci numa ra í pantse ba gben gangan numa ki cin wajinderi waa ī zen nde dan pwadzu ki nui ra. Ki cin waa ī ci ba avon wa Ciho numa wa neya ki bye Ci­ don ki don. Avon waji ciri Yesu Kiristi Nwu bu Cidon. ¹⁵ Avon wa ndanda waa ī ci baku ra tsayi wa hwi cicii ri ki fin afyin waa ī ki fin’a ra, ki cin waa be mbaku ku ci apa ba adi ci tsadzu waa ī ci ra. Be mbafoku, ku wa tswi fyin wani kata, ama ku tsaa abu wa baba dzun ba. ¹⁶ I gban mikyin í ya ki pyen bu Cidon ki bye adudua waa kuri nda wea tu yo. Abye waa kuri hwi cici bu apa kiyo, í ya jiji ku hwi cicii í du wa sansan’a ki bye ayo wani waa ima con kata.

¹ Ko Avon wa ndanda wani be ceku ki fin pajukun jiji ku ci fotson wa tsa abu anube ki nya­ co bu Cidon. Kuna fon Cidon ku kana bwan bupyu tsòn hwa ton kiyo yi Cidon ki cin wa tsonye abu wa baba. ² Ci tsadzu waa aku ci apa wari dà ada du ra, aku kuri tsayi wa fyen tà yi pajukun baa ci kon, baa ri dà ada, abu ba mikyin wa sansan. ³ Tsadzu waa abe von baaji ci pajukun baa ri da ada du, ci numa ra ci ken be tsòn abu yi Cidon ki cin abu wa baba bu dibe, ci tsadzu waa beri tsòn yi Cidon ki cin pajukun baa tsa abu wa baba ra. ⁴ Apa dzun wari ce dia ba dia ya ci byecu bu von wa ndanda wa­ kara baani, se Cidon ma baku nde ci tsadzu waa ku ndi ba Haruna ra. ⁵ Ci numa ra Yesu Kiristi yia dia hwe wakara ba dia waa ku ci Avon wa ndanda raba. Ama Cidon dan yiku ri danra, "U ci Nwumi, jinna m kan Atau ra." ⁶ Kuka dan ki bye dzun danra, "Uri ci avon pan numa keke yaya ko nukon, uri tsa butsou ci tsadzu waa Melikizedik tsa ra." ⁷ Ayo waa Yesu Kiristi ki tiri ki fin tswen wakara ku vo Cidon, ku pyaku pyapya ba ndekuto ba janme ki zo. Ku vo Cidon wa tsayi wa nwàdzuku ki vo bu aki. Cidon fo ndekutoa ki cin waa ku fan voa ba abea kata yiku. ⁸ Ko waa ku ci Nwu bu Cidon ra ku fyen wa nde cin’a na jinni ki di bu afyin wa duku ra. ⁹ Ki nyaken waa ku wa vinni fyin waji ya zan myi rito ra, ku kan apa wa nwà­ dzu pajukun baa gon tson fo jia ki bye abu wa baba kata. ¹⁰ Ci-don nde Yesu so danra ku ci avon wa ndanda kári wa nde dia yi aki yi Cidon ki cin’i. Ku tsa butso ci tsadzu Melikizedik tsa butso bua ra. ¹¹ I ci ba aji badati suu numa waa í dan yini ki cin bu Melikize-dik ama ci ba fyin waa í dan yini yafan jinni van numa yini ki cin waa atsonni fo tu aji kagben. ¹² Nde numa keke bi tanma ra ken waa niri kyan na fyen tà yi pajukun badati aji bu Cidon ra, ama avo tanma ba, ni tsayini numa raba tiri. Ni ci tsadzu pa­ jukun baa ndi fyen fobe aji dzun ki nyaco bu Cidon fo raba. Avo jinna ba nina ma myi tiri, ni ngha kenni wa jika buju gban ake ra­ ba tiri. ¹³ Ko kani kata wa mana ma myi tiri, ku ci tiri nwutishe, kuri hwayia ba aji wa ci wa san­ san, ba wa ci wa baba ba. ¹⁴ Ama apa wama dzwan gban ake ra, ku kan apa ra, kuri tsayi wa hwayi aji ki mikyin’a ku gafan abu wa sansan ba wa baba.

¹ Ci numa ra abu wa fyenfyen wa ndi kapyen wa gban’a ba­ ra waa be ndi fyenni yo ki cin bu Yesu Kiristi ra, í nga kwan yo foji wa yaya ki pyen. Bà se íkà mbyā kasen fyen aji wa ndi kapyen wa danra, í vyin pukan mikyin bi ki bye Yesu Kiristi, í fan abu wa baba jinni, í yi wajinderi ki bye Cidon. ² Ba abu wa fyenfyen ki cin bu batisma, ba avo wa sen apa ki cin, ba aji ki cin waa Cidon ri ba do baa huhu pwadzu ki shimbi ba cindi ba aji ki cin akwēn wa gbogbo baa Cidon ri fo pajukun anyunu wa kennu. ³ Í foji wa yaya ki pyen Cidon ma zen nde. ⁴ Ki cin waa pajukun baa ndi kapyen mbyàyi abye wa yafan jinni rara, bekà du Denden bu Cidon, ⁵ har be fo kyaa avya bu aji bu Cidon, ba hwe wana bi ki pyen kire ra, ⁶ a hunnu be kasen ba nyaken ki nyaco bu Cidon, bekà mbyā nde Nwu bu Cidon na kan ki cin hin wa shon gege, be kana nyàku di ki fa byeya numa, ci ba fyin tswi pajukun baakara be mbyā vyin pukan mikyinbe kasen bi bye Ci­ don. ⁷ Adā waa kuri yi acu ma ta kuri ho wa, kuri yi abu baa be ta ki da waji ra ri nga dzu sansan numa ri tsa cin yi pajukun baa nà ada waji ra, Cidon ri san ada waji sansan numa. ⁸ Ama ada waji ma nga tswí, ba byen ku tsaa cin ba ko dzundzun, Cidon ri dàn tsaba ada waji beri dzo pyu kiyo ji tsaba ku. ⁹ Bandomi baa concon, ko waa m zen tswi aji baakara suu numa ki cinni ra, ī gei mikyin ki cinni ba. ī yinu danra nina tsa koke ni kata sansan numa ki nyaco bu Cidon wari nwadzuni ki bye abu wa babani ra. ¹⁰ Cidon ri tsaa abu wa baba ba. Kuri mujia ba bu­ tsoni waa ni tsa raba, kuri mujia ba aconni waa ni ndi conku na tsaza bazhenzani baa ki nyaco bu Yesu Kiristi ra keke bibi jin­ na raba. ¹¹ Abu waa ina con ki mikyin’i ciri ko kani kata ku nga ku pantse ba mikyin dzundzun ajinderi gbangban numa keke yaya anyunu wa kennu. ¹² Ī con’i waa ni ci dengere numa ba, ama ina con ni ci tsadzu pajukun baa yi wajinderi ba aji wa byenbyen waa be gban mikyin du abu baa Cidon gebe nu ki cin’a ra. ¹³ Ayo waa Cidon ge Ibrahim nu ra, abu wa kaku baani waa ku dan aki kiyo, ci numa ra ku dan aki ba azen bua bu dia. ¹⁴ Ku danra, "Mri san u sansan numa, mri yi tsuu ri mba nà suu numa." ¹⁵ Ibrahim gban mikyin, ci numa ra Cidon yiku abu waa ku geku nu ki cin’a ra. ¹⁶ Ayo waa apa mari dan aki kuri dan ba azen bu apa wa kagben’a. Aki wa dandan ciri abu wari bwan azo aji. ¹⁷ Cidon con ku dan tà yi pajukun baa ri pan abu waa ku gebe nu ki cin’a ra ki byeya numa danra, anu waa ku ge ba­ be ra kuri pukan’a jinni ba. Abu wa tsa ku dan aki ba azen’a ra hun. ¹⁸ Ki cin abu baa kwan dzun pyinna baa ri vyin pukanbe bara, anuge ba aki wa dandan baa ta danra, Cidon ri kan’akan ba ko dzundzun, wakara yii gben mikyin danra ai baa shesho bi yu ci nwini bu Cidon ra kuri kon’i, iri lolo mikyin’i so bye abu baa Cidon gei nu ki cinbe hora danra kuri yii. ¹⁹ Abu waa ī lolo mikyin’i so yo ra, pan re mikyin’i so gan­ gan numa. Ki cin wakara mikyin’i waa ī lolo so ra kà nwā­ dzu ya zanzan ki bye waa be dzo gere nde so waa Cidon ri nda hwea tu yo ra. ²⁰ Yesu Kiristi ciri apa wa kapyen bi ka ki fin bye wakara jijii. Abu wa tsa ku ka kiyo ra ki cin waa ku ci Avon wa ndanda wa kári wari tsa butso bu Cidon ko nukon ci tsadzu Melikizedik ndi tsa butso bua ra.

¹ Andi gbogbo Melikizedik ci akù wa ki tswen dzun waa beri baku danra Salem, ku ciri Avon wa wa Cidon wa ci ba hwe kári kata. Ayo waa Ibrahim dzu aken waa ku ndi bwan abe akù hora nabi numa Melikizedik pwadzu ya ge cin’a ki nyaco, ku yi Ibrahim ande wa sansan. ² Ki fin abu baa Ibrahim ji ki bye aken ra ku kadzu cin’a wā Meli­ kizedik baku. Cinna bu zen bu Melikizedik ra ci pyinna, wa ka­ pyen ciri, "Kù wari tsa abu waa Cidon ri con kata." Wa kwan pyinna beri baku danra, "Akù wa ki Salem wari yi pajukun mikyin wa na jinni." ³ Be danbe aji dzun ki cin ata bu Melikize-dik ko ayoa ba. Be ka danbe aji dzun ki cin nwo kyukyua, ba bonbon’a ba; ī yii anyunu waa be mbaku ba, ika yii anyunu waa ku hu ba. Ku ci Avon wa tsa butso bu Cidon. ⁴ Agbo! Ni mbyà atswi hwe waa ku ci baku ra. Andi gbogbo atai Ibrahim ndi ten dzu cin bu baa ku ji ki bye aken ra waku kiyo, ⁵ Ci-don nu don ki fin Afa bu Cidon ki go kyekye bu nuge wa riko danra zhenzhen Isra’ila bé gafan tswénbe kata ndo dzwe bé ten ndo dzundzun ki finbe wa zhen­ zhen bu Lawi baa ci avon hora kiyo. Ko waa zhenzhen Isra’ila ka­ ta ci zhenzhen bu Ibrahim ra, zhenzhen bu Lawi du abu baakara ki vo bu zhenzhenbe. ⁶ Aku Meli­ kizedik ko waa ku cia tsu bu Lawi ba, Ibrahim gafan tswén’a ndo dzwe ten ndo dzun waku kiyo ku pan. Ko waa Ibrahim ciri apa waa Cidon genu baku, Melikizedik yi­ ku nde wa sansan. ⁷ Ayepye baani kiyo, apa wama yi apa dzun nde wa sansan ku ciri ki pyen bu apa wa pan nde wa sansan ra. ⁸ Abe von baa ki fin tsu bu Lawi baa ri du abu ndo dzundzun ki fin ndo dzwe ki bye tswén bu zhenzhen Isra’ila, be ciri baa hu, ama aku Melikizedik wa du abu ndo dzun­ dzun ki fin tswén bu Ibrahim ra, Cidon dan yii aji dzun ki cin akia ki fin Afa ba. ⁹ Zhenda bu Lawi baa ri ten abu ndo dzundzun ki fin ndo dzwe ki bye pajukun rama, be ten abu ando dzundzun ki fin ndo dzwe bube dzu ki bye Ibrahim. ¹⁰ Ki cin waa Ibrahim shon ba Melikizedik ra zhenzhen bu Lawi be ci ki fin tsu bu Ibrahim baa be ndi mbabe be raba tiri. ¹¹ Adon waa Cidon yi pajukun bu zhenzhen Isra’ila hora ku yi dzu nwo tsu bu Lawi baa ci avon. Tanma butso bube von hora rima kyan ci nyenye, iri kyan ri nyai avon dzun ken wa dzu ki nwo tsu bu Melikizedik riba, wa dzua ki nwo tsu bu Ha­ runa ba. ¹² Avo Cidon za pukan byecu bu avon hora ci ken ku pukan adon du. ¹³ Ki cin waa Cindoi Yesu Kiristi waa ina dan aji ki cin’a ra be mbaku ki fin tsu dzun ken. Ko apa dzundzun numa ki fin tsua tsa foa butso ki cin kyenkyen foraba. ¹⁴ I yinu byenbyen numa danra Cindoi Yesu Kiristi be mbaku ki fin tsu bu Yahuda. Waa Musa zen aji ki cin tsu baa tsa butso von ra, ku hwen’a zen bu tsu bu Yahuda kiyo ba. ¹⁵ Aji waji pwadzu ki fa byeya numa ra tanma, waa avon dzun ken pwadzu bi ci tsadzu Meli­ kizedik. ¹⁶ Ku dzua nyaco waa pajukun ri bà hunnu kan avon raba, ama ku kan avon ba gben dzu di bu cindi wari tea jinni ba. ¹⁷ Ki cin waa Cidon dan aji ki cin’a danra, "Uri kan avon keke numa yaya ko nukon, ki bye tswi nyaco waa Melikizedik tsa butso bua kiyo ra," ¹⁸ Adon baa ndi kapyen gbogbo ra, Cidon tebe bwan jinni ki cin waa be ci byèbyè numa, be ci dan numa ra. ¹⁹ Ki cin waa Adon waa Cidon yi Musa ra tsakaa wa hwa yi abu dzun ku ci nyenye ba, ama tanma Cidon nde nyaco wapye waa ī so mikyin ki dia pwadzu waa Cidon gbei kpasun bi ki goa. ²⁰ Abu wa ka kwan yo ciri Cidon dan aki kiyo, ama ayo waa be ndi dan aji ki cin zhenzhen bu Lawi danra beri ci avon ra be dànbe aki ki cinbe numa ba, ²¹ Ama Yesu Kiristi kan von dzu bye nyaco bu aki wa dandan waa Cidon danra, "Ami Cidon m dan danra, uri tsa butso bu avon numa yaya ko nukon, mri vyin pukanmi nu ki bye aji wakara ba." ²² Ki bye wakara hwa yii hwayi sansan numa danra anuge waa Cidon ge ra sanka adon wa ndi rari nana numa, Yesu ciri apa wa ka ki yobai ki bye nuge waji. ²³ Avon baa ndi ki fin tsu bu Lawi ra be ndi suu numa, ki cin waa be ci pajukun baa huhu, beri ci kabe ki bye butsobe keke numa yaya ko nukon ba. ²⁴ Ama Yesu Kiristi ci avon numa yaya ra hun ko nukon, abutsoa bu avon ra beri tenre yibe apa dzun ba. ²⁵ Ci numa ra ku tsayi wa nwàdzu pajukun baa bà ki dia kpasun bi bye Cidon ra ko nukon, ki cin waa ku ci kenken numa yaya ra hun, kuri pya Cidon we pajukun yo. ²⁶ Wa-kara ciri tswi von waa ina con ra hun. Ku ci nyenye, ku daa aji dzun ba, ku cia ba abu wa baba dzun ba, Cidon ten nwa ku dzu ken ba pajukun baa tsa abu wa baba, ku ci don nana numa ba bye jinni. ²⁷ Ku cia tsadzu avon baa ndanda badati hora ba baa ndi ri kapyen bwan bupyu wa Cidon hwa pen abu ki cinbe hunnu, be hun ka vo Cidon ku hwa pen abu wa baba wa ki cin bu pajukun raba. Ama Yesu tsaa numa ba, ki cin waa ku ndi kapyen tsòn bu wā Cidon dzwa dzundzun vinni mba tiri ra, kati ki bye ayo waa ku ndi fan dia yi aki ki cin abu wa babai ra. ²⁸ Ki bye adon bu Musa be ce pajukun baa tsa abu wa baba ciri avon, ama ki bye aji waa Cidon dan aki ki cin’a wa bi ki nyaken bu akwēn ra, ku ce Nwua Yesu Kiristi ciri avon, waa ku tsa vinni koke kata dzu byea ko nukon.

¹ Aji wa kwakyi waa ina dan ra, ciri, ī ci ba avon wa nda­ nda kari kata, ku ciri Yesu wari tu ci ki go kyekye vo wunu bu Cidon ki don. ² Kuna tsa butso bu avon wa ndanda ki Bye wa Nyenye Kari kata. Abye waji Ci­ don ba dia mbyári nda hwea ki byeri, apa mbyāa ri ba. ³ Ko avon wa ndanda wani ka­ ta be ceku ki cin waa ku ndafan vo vyon Cidon vyon, ku bwan bupyu waku kiyo. Ci numa ra avon bui wa ndanda kari kata ci ken kuka du abu dzun waa kuri hwa yi Cidon. ⁴ Akyan kuri ma ci tiri dzun bai ki fin tswen kire, kuri kyan tsaa butso bu avon ba, ki cin waa ki fin tswen kire avon hora na dzu tiri nyaco bu adon wa ndi gbogbo waa Cidon yi Musa ra. ⁵ Butso bu avon waa bena tsa ra bena kàn nde bu butso waa Yesu na tsa ki don azota. Ci abu dzundzun ba Mu­ sa, ki bye ayo waa kuna nga ku fàn akpa ra Cidon dan yiku dan­ ra, "U tsa sansan. U tsa koke kata dzu tiri abe bu waa m ndi ta yiu ki ci kwèn ra." ⁶ Ama tan­ ma Cidon nde butso bu von nde kwa Yesu ki vo ra, butso bua ra kari bu baco baa ndi ci avon ra. Yesu ciri ki yoba bu Cidon ba pajukun ci numa ra anu wa gege waa ku ge ki yoba bu Cidon ba pajukun ra kari anuge waa ku ndi ge ra ki cin waa abu waa Cidon genu kiyo bai ra kari wa ndi. ⁷ Beri ma kyan danra abu dzun ndi tsabaa anuge wa ndi kapyen raba, beri kyan ri nyàbe anuge wa kwan pyinna riba. ⁸ Ama Cidon mbyà bo bu pa­ jukun ku danra, "Anyunu nabi ki pyen waa mri bi ge nuge wa ripye ba zhenzhen Isra’ila, kwan ba tsu bu Yahuda. ⁹ Anuge waji ri cia tsadzu waa m ndi ge ba bayakube anyunu waa m ndi hobe ki vo numa pwadzu ki fin jen bu Masar raba. Be ndi panbe nuge waa m ndi ge babe ra sansan ba, ci numa ra m pukan nyaken yibe." ¹⁰ Cidon ka danra, "Nuge waa mri ge ba tsu bu Isra’ila ki bye anyunu wari bi ra ciri, mri yibe adon ki mikyinbe mri nde adonmi ta so ki hwanbe. Ami ri ci Cidonbe, abe beri ci pajukun bumi. ¹¹ Ki nyaken wakara nwu tswen dzun ri fyen tà yia nwu tswen dzun ko ajoa danra, ’Yì Cindoi Cidon!’ Ki cin waa beri yimi nu ba dibe, pan ki cin bu baci nde numa yaya ki cin bu baco. ¹² Mri hwi cici bu abu wa bababe, mri kyepanmi ba abu wa bababe ba." ¹³ Waa Cidon zen aji ki cin nuge wa ripye ra ku yi wa ndi kapyen ra kasen kan wa riko. Ī yinu danra abu wama kan akò foji wana tsaba yaya ki pyen, abua te jinni ra.

¹ Anuge wa kapyen waa Ci­ don ge pajukun ra ku fyen ta yibe nyaco waa be waku kiyo, ba bye baa pajukun mbyāsan ba di­ be so be waku kiyo. ² Abye wa mbyámbya bu akpa wa fanfan ra, be dzo ge gafanku fin pyinna ba tukpa, afin wa kapyen ra be baku danra abye waa Cidon ri nda wea tu yo. Ki fin tan wa kapyen ra be mu pyu ba atswà, ba borodi wa wa Cidon so byeri. ³ Fin tan wa kwan pyinna wa ki fin ra beri baku danra, Afin wa Nyenye kari kata waa Cidon ri nda wea tu yo. ⁴ Ki fin tan wa ya kari kata ra be mbyā kyenkyen wa ba zinariya waa beri tsòn abu wa nufyin sansan yi Cidon kiyo. Be kan akpati dzun so tan waji akpati waji ci akpati bu anuge wa gege. Be pa zinariya ki di bu akpati waji. Be nde ape dzun waa be myiku ba zinariya so fin akpati waji. Ki fin ape waji be nde buju waa beri baku danra manna waa Cidon ndi yibe ki hwan ra so fin’a, ba agà bu Ha­ runa wa tswa je ra, ka ba a ko hin bu abàn kwan dzun pyinna baa Cidon ndi ta adon dzwe so fin’a ra. ⁵ Be hwa zhentsōn bu Cidon baa beri babe danra Ce­ rubim ra so cin akpati waji. Ta danra Cidon wa ci ba hwe ci kiyo. Be ho savobe gon tsuken cin kpati waji ta danra Cidon na hwi cici bu pajukun. Ama tanma numa iri dan kai cinna bu aji wakara yafan jinni sansan numa ba. ⁶ Bema fàn vinni akpa waji numa ra, abe von, ko anyunu wani ri kaya ki fin tan wa kapyen ra, ri tsa butsobe kiyo ri wa Ci­ don. ⁷ Ama ki fin tan wa kwan pyinna wa ci ki fin ra avon wa ciho ri kàri kiyo maari vinni. Aku ba dia ma kuri ka dzwa dzun­ dzun vinni ki fin ju wani. Kuma bwan bucon ra kuri nde saa kaya ki tan wa Cidon jiji cin’a kapyen, ba abu wa baba bu pajukun ka­ ta. ⁸ Denden bu Cidon na tà yii nyenye numa danra akpa waa be fàn ra rima kyan ci tiri kiyo pa­ jukun ri kyan dube nyaco wa nwādzu atan wa kapyen be kaya ki Tan wa Nyenye kari raba. ⁹ Abu wakara na tà yii cinna bu abu wa tanma, avyon wa vyon Cidon ba bucon waa beri bwan tsòn wa Cidon kiyo ra, ken’a wa tsaka wa yi mikyin bu apa ku we jinni byenbyen numa ba. ¹⁰ Avyon wa vyonvyon ba bucon baa bwanbwan ci abu baa beri tsa ki fin tswen, abe buju wa jiji ba jan wa wawa ci butswen wa tsatsa waa niri tsonye dini kata ki bye nyaco tswi tswi. Abu baakara kata ci abu di maari vinni waa be ndi nde so kapyen waa Cidon kubi pukan ku kan wa ripye. ¹¹ Tanma numa Yesu kapyen bira ki fin tswen wakara ra. Ku ciri Avon wa ciho kata bu abu wa sansan, waa ī ci baku tanma. Abye waa kuna tsa butso bua kiyo tanma ra kari akpa waa pajukun ndi fan ki fin tswen kire. Butso bua ka kari, ku zenmu koke kata. Abye waji pajukun mbyābe ku ri ci tsadzu abye wa ki fin tswen kire ba. ¹² Ayo waa Yesu Kiristi kaya ki bye wa Nyenye kari kata ra, ku ka dzwa dzundzun tori numa vinni. Ku kaa ba asa bu abyín ko bu mafan ana ba. Ama ku nde asa bua bu dia wa we ki jinni ra hwa penrei kiyo. ¹³ Andi beri nde asa bu abyín ba asa bu ana wa wunu nukwan ba tsonpyu bu mafan ana waa beri tsòn ra fen pajukun baa cibe sansan ki nyaco bu Ci­ don ba ki di, jiji be ci nyenye numa. ¹⁴ Tsadzu waa asa bu bu­ con hora tsayi wa hwa apa ku ci nyenye numa, fyin mbye asa bu Yesu Kiristi wa ci ba gben kari wa tsayi wa tsonye mikyin’i ki bye abu wa babai. Ki bye gben bu Denden bu Cidon wa ci ken­ ken ko nukon, Yesu Kiristi ba dia wa cia ba abu dzun wa baba dzun ba, ku nde dia yi Cidon hwa penrei. Ki bye asa bua waa ku nde tswan jinni ra, kuna tson­ yei mikyin’i yo jiji í gadi ba abu wa baba wari gbe aki yii, san kari í bà Cidon wari yii cindi. ¹⁵ Wakara ta danra Yesu Kiri­ sti ciri ki yoba bu Cidon ba pa­ jukun, ku ciri waa ku ge anu wapye baku ra. Ki cin wakara pajukun baa Cidon babe nde be ci pajukun bua ra, abu wa san­ san wa ci kenken ko nukon waa Cidon genu danra kuri yibe ra beri duku. Beri du ki cin waa Yesu Kiristi hu aki. ki bye akia ra kuri hwa penre pajukun ki bye abu wa bababe waa be ndi tsa avo waa be ndi ki tiri ki vo bu anuge wa kapyen. ¹⁶ Apa wa­ ma dan aji ki cin pajukun baari ji tswen’a avo waa kuma ngha hua raba tiri, pajukun baaji ma zen nde danra beri gafan tswen baaji ci tsadzu waa ku dan ra, ci ken be yinu danra ku hura aji­ nderi hunnu. ¹⁷ Avo waa apa waji ci tiri riju, aji waa ku dan ra ri tsaa butso raba hunnu se kuma hu ra hunnu beri tsa butso ba aji waa ku dan so jinni ra. ¹⁸ Abu wa tsa anuge wa ndi kapyen ra ri tsaa butso ba se bema bwan bu­ pyu ma we asa ki jinni ra hunnu. ¹⁹ Musa ndi dan aji yi pajukun ki cin adon waa Cidon ndi yiku ta ra kata ki nyaken wakara se ku nya ajebu dzun waa beri baku danra hissop ku nya asa bu abyín ba mafan ana ba jape ba afyon wa nyonyo ku nde jebu ra dzo yo nde myi cin Afa waa be ta adon bu Cidon kata kiyo ra, ku ka myi pajukun numa kata ki dibe. ²⁰ Ku danra, "Asa wakara ci ama bu nuge wa zen mumu waa Cidon genu bani danra ni konku ra." ²¹ Ci numa Musa myi asa ki fin akpa waa ku fàn ra, ba abu baa beri wa Cidon baku kata. ²² Ajinderi ki bye adon dati titi numa beri tsonye koke kata ki bye asa. Ci numa ra, nyaco baani waa Cidon ku fan abu wa baba bu apa yiku se bema pan bupyu dzun bwan we asa ki jinni ra hunnu. ²³ Andi ci ken be we asa bu bupyu ki jinni numa, abu baa ci kara kata ci ande wa kankan bu baa ki ndo Atai Cidon ki don. Ama abu baa ci ki ndo Cidon ki don ra san kari waa be hwa Ci­ don ton bu wa ka asa bu bupyu hora, ki cin waa abu baa kiyo ra be ci sansan numa ki pyen bu Cidon. ²⁴ Andi abe von hora ri ka ki fin pu bye waa pajukun mbyā ra. Àbye waji ci sinni bu abye waa Cidon kiyo ki don, Yesu Kiristi kaa kiyo ba. Ama ku ka ki bye waji waa Cidon kiyo ki don ra, ku ci pyen bu Cidon jiji nui. ²⁵ Avon wa ciho ri ka ki bye wa nyenye dzwa dzundzun ki fin ju wani kata. Kuri ndea asa bu dia kaya kiyo ba, se asa bu bupyu. Ama Yesu ka kiyo dzwa dzundzun vinni waa ku nde dia yi aki we asaa ki jinni ki cin abu wa babai. ²⁶ Rima kyan cia dzwa dzundzun vinni ba, ase kuri kyan pan fyin wana wawa numa yaya ra hun ko nukon avo waa be mà abye wa ki don ba abye wa ki jinni ra. Ama ku bi ki fin tswen kire dzwa dzundzun tori numa vinni ki bye ayo wa kennu. ku bi dzwa dzundzun vin­ ni jiji ku nde dia hwa yi Cidon jiji ku hore abu wa baba bu pa­ jukun kata gadi babe gbogbo. ²⁷ Cidon so ra ko kani kata ri hu aki dzwa dzundzun, ki nyaken wakara kuri foku kwen. ²⁸ Andi Yesu Kiristi nde dia hwa aki yi Cidon dzwa dzundzun dede waa ku hu aki jiji ku nwàdzu pajukun ki bye abu wa bababe ra. Kuri mbyā kasen bi ki fin tswen wa­ kara. Ayo waa kuri kasen bi ra, kuri bia ki cin waa jiji ku hore abu wa baba bu pajukun ba, ama kuri bi ki cin waa jiji ku nwàdzu pajukun bua baa na bàku ra.

¹ Andi adon baa Cidon yi Yahudawa ra be ci sinni azota bu abu baa sansan baa nabi ki pyen. Ama adon baaji tsayibe wa tà yii tswi abu baa byenbyen baaji yafan jinni numa ba. Jinna ba akyen, kan kyen kan ju abe von hora na tsòn bucon hwa Cidon kiyo, be foji bucon wana dzwandzwan. Ama tanma apa wama con ku bi ki bye Cidon, abucon waa beri bwan hwa Cidon kiyo ra cia ba gben dzun wari yi apa ku tsa abu waa Cidon ri con kata ba. ² Beri ma kyan danra bucon wa tsòn hwa Cidon ra rima kyan ci ba gben wa hwa penre apa abu wa babaa yo, akyan pajukun ri gadi ba bucon wa bwan tsòntson ra. Beri kyan ri gabe aji ki cin abu wa bababe iriba. ³ Ama abu waa bena tsòn hwa Cidon aju ba aju ra, hwa yibe na kyepan ba abu wa bababe. ⁴ Ki cin waa asa bu ana ba abyín ri tsonyea abu wa baba ka ba. ⁵ Ábu wa tsa ayo waa Yesu Kiristi na dzubye wa bi ki fin tswen ra, ku dan yi Cidon danra, "Uri con u waa be tson bucon yiu ba, ama ù mbyāsan dimi so jiji m nde hwa yiu. ⁶ U mbuu mikyin ba abu baa tsòntsòn baa be tsòn na yiu raba, u fou vya ba waa be tsòn abu wa hwa penre be ki bye abu wa bababe ba. ⁷ Ki cin wakara mna dan yiu danra, ’Au Ata Cidon, m ci kara, m bi ki cin waa m tsa abu waa uri con, mri tsa abu we ba abu waa u yibe ta ki fin Afa ki cinmi ra.’" ⁸ Abu wa kapyen dzu nua ciri, "Uri con u abu wa tsòntson waa beri tsòn wau kiyo, ba bupyu waa be bwan na tsòn ki cin kyenkyen raba. Ba abu wa tsòntson waa ku penre abu wa baba wa ki einbe don ra, u fou vya babe ba, ko titi." Ko waa abu baakara bena tsabe bà nyaco bu adon ra. ⁹ Se ku dan aji kwan yo danra, "Mbyà m ki kara, m bi jiji m tsa abu wa vya hwan u." Ci numa ra ku yibe fan abu waa be ndi na tsòn yiku ra be jinni, kuna con jiji Yesu ku hu nde asaa we jinni za nua. ¹⁰ Dede waa Yesu Kiristi hu nde asaa we jinni nde dia hwa yiku ra ku tsa abu wa vya hwan bu Cidon ra. Waa ku tsa numa dzwa dzundzun ra, ku tso nyere abu wa babai kata gadi bai ra, ku ndei so danra ī ci pajukun bua. ¹¹ Ko avon wani kata ri pantse ko anyunu wani kata ri tsòn bucon wa Cidon kiyo. Bucon baaji baa bena tsòn ra, ri wo nyerea abu wa baba bu apa ba. ¹² Ama Yesu Ki­ risti nde dia hwa aki yi Cidon we asa ki jinni dzwa dzundzun vinni, ku ci ba gben wa wo nyere abu wa baba bu pajukun don dzwa dzundzun. Ki nyaken wakara ku ya tuci ki go kyekye vo wunu bu Cidon, ¹³ pan numa keke yaya ya zan anyunu waa Cidon ri vyin pu­ kan pajukun baa zeku hora be kan abu wa te abea kiyo. ¹⁴ Ki cin waa Yesu Kiristi nde dia hwa aki yi Cidon we asaa ki jinni dzwa dzun­ dzun ra, ku tsa vinni abu kata ra ko nukon, ki cin pajukun baa ku wo nyebe ra. ¹⁵ Denden bu Cidon na tà yii ajinderi byenbyen numa danra, ¹⁶ "Cidon danra, nuge waa mri bi ge babe ki pyen kire ci kara. Mri ta adonmi hora so fin mikyinbe, mri nde don so hwanbe," ¹⁷ ku ka mbyā dan kwan yo danra, "Mri kyepanmi ba abu wa bababe ba adabe riba." ¹⁸ Ci tsadzu waa Cidon fan abu wa bababe yibe ki bye nyaco wakara, nyaco dzun baani wa wo nye abu wa baba bu pajukun ri. ¹⁹ Bazhenza, ī ci ba nyaco waa ī kaya ki Bye wa Nyenye kari kata ki di bu aki bu Yesu Kiristi. ²⁰ Ku pofan’i nyaco wa ripye wa riju ki bye tukpa wa dzo ge gafan fin tan hora, watoo, adia hun. ²¹ I ci ba avon wa ciho waa be nde ndo bu Cidon kwaku ki voa. ²² Ki cin wakara í kyen kpasun bi bye Cidon ba mikyin wajinderi byen­ byen í bi ba mikyin waa Cidon tsonyere aji wa baba wari tai kwen ra i bi ba dii waa ku tso nyere ku ba jape wa nyenye ra. ²³ Í pantse gbangban numa ki bye abu waa ī lolo hwan’i so yo ra, ki cin waa ī yinu byenbyen danra Cidon ri zenmu nugea zen mumu. ²⁴ Í so dii hwan ki di, í con dii, í tsa dii abu wa sansan. ²⁵ Iká fan cinkwan waa ina kwan ki bye dzundzun ba dii ra be jinni tsadzu waa pajukun badati fan be jinni raba. Í zen gban dii mikyin ki cin waa anyunu waa Cindoi Yesu ri kasen bira, naben jinni ra. ²⁶ Apa wama yi aji wa byenbyen nu, kuma foji abu wa baba wa tsatsa bu digbe numa kuri dua nyaco wa nwàdzudzu ki fin abu wa babaa ba. ²⁷ Ama abu waa apa waji ri ci fin’a ciri azin bu akwen bu Cidon wa zinzin, ba apyu wa sepyu suu numa wari tsòn bwan pajukun baa ngha Ci­ don. ²⁸ Ko kani kata wama gbe­ kyan adon bu Cidon yi Musa ra, anyunu waa bema foku kwen be­ ma panku ba ada ki nu bu apa pyinna ko atsara, beri hwibe ci­ cia ba, beri bwanku bwanbwan. ²⁹ Apa wama jojo ba Nwu bu Cidon, kuma ka tsa dan numa ba asaa wa ciri ama bu nuge wa wo nye ku ki bye abu wa baba, kuma nya Denden wa Nyenye di atswi fyin ke wa tutu ka wa hun ra, nina ga danra beri taku? ³⁰ Ki cin waa ī yi Cidon nu wa danra, "Aton wa banban ci bumi, mri ban ba avo dimi." Ku ka danra, "Ami ri fo pajukun bumi kwen." ³¹ Abu wa zinzin ka waa apa ku koju ki vo bu Cidon wa ci ba cindi, baani. ³² Ní kyepan ba aji suu numa baa nwadzu ya ba nyaken. Ki nyaken waa Cidon pofan abye wa yafan jinni dzwa mikyinni ra, afyin tswi tswi numa duni, ama nī pantse gbangban numa nī ge­ ni mikyin ba. ³³ Ayo dzun be tso­ ni ce ki pyin numa be tani fyin duzo pajukun numa. Ayo dzun niya kwan cin ki dzun ba pa­ jukun baa wa tswi fyin waji numa. ³⁴ Nī kan yiki bu pajukun baa be ndi panbe tsu ki tan ra, ko waa be ndi pan fye ho tswen­ ni don ra nī gban mikyin mbu mikyin teyo, ki cin waa nī yinu danra nī ci tiri ba tswén baa sari kari wakara, baa ri ci kenken gbogbo. ³⁵ Ci numa nika geni mikyin ba, nī yinu danra niri du vokwin wa ci ba hwe suu numa, ³⁶ Ní gban mikyin ní tsa abu waa ku geni nu ki cin’a ra. ³⁷ Ki cin waa Afa bu Cidon danra, "Cifo titi numa apa wa danra kuri kasen bi ra, kuri bi. Kuri jaa adi ba. ³⁸ Pajukun bandomi baa ri tsa abu wa vyami ri yi wajinderi ki byemi ra, ri du cindi. Ama ko ma kani ki finbe kata wama pukan nyaken yimi, mri fomi vya baku ba." ³⁹ Ama bui ī bàini ki fin pajukun baa ri kasen ba nyaken ri hu ji jinni raba. Ama bui ī ci fin pajukun baa ri yi wajinderi ki byea wajinderi wari nwàdzui ra.

¹ Nwo bu wajinderi ciri abu waa apa ri lolo mikyin’a so yo danra kuri du, abu waa ku mbyà foa ba azoa ba, ama ku nde mikyin’a sen so yo danra kuri du. ² Andi gbogbo wajinderi bu bayakui hwari hunnu be du cin wa sansan ki pyen bu Cidon. ³ Ki bye wajinderi waa ī ci baku ra hwa ī hwayi ki bye aji wa dzu ki nu bu Cidon ku mà abye wa ki don ba abye wa ki jinni. Ci numa ra abu waa ina mbyà ba azo ra dzu bye abu waa azoi mbyà foaku raba. ⁴ Ki bye wajinderi waa Habila ci baku ki bye Cidon ra hwari ku ten abu wa Cidon kiyo ki bye nyaco wa sansan kari bu Kayinu. Ki bye wajinderi waa Habila ci baku ra hunnu Cidon hun zen nde baku danra ku ci apa wajinderi. Ki cin waa Cidon ba dia zen nde ba abu waa Habila waku kiyo. Ha­ bila hu ra, ama ki bye wajinderi waa ku ci baku ra, kuna zen aji tiri. ⁵ Ki bye wajinderi waa Enok ci baku ra ku hua ba, ama Cidon ndeku neya ki hwadon. Apa ma nyaku kuri duaku ba, ki cin waa Cidon ndeku neya ki byea ra. Cidon dan ki fin Afaa danra avo waa ku ndi ndea Enok neya ki byea raba, Enok ndi du cin wa sansan ki pyen’a. ⁶ Apa dzun wa­ ri du cin wa sansan ki pyen bu Cidon baani se kuma ci ba wajinderi ki bye Cidon. Ko kani wama bi ki bye Cidon ci ken ku yi wajinderi ki mikyin’a danra Cidon ki tiri. Cidon ri yi ko kani kata wama nyàku vokwin’a. ⁷ Ki bye wajinderi waa Nuhu ci baku ra ku gon tson fo aji waa Cidon dan yiku abu wari tsa ki pyen kire waa Nuhu mbyàa ba azoa raba hunnu. Ku fo aji bua ku hwa akò wa kwakyi waa Ci­ don dan yiku ku hwa. Aku ba ndoa kata nwàdzu ki fin akò wa­ ji. Ki bye wajinderia ku tā pa­ jukun baa dati kata ki bye kwen, ki bye wajinderia ku du wa san­ san bu Cidon. ⁸ Ki bye wajinderi waa Ibrahim ci baku ra, ku gon tson fo aji bu Cidon dan yiku ra, ku ya ki tswen waa Cidon dan yiku danra ku ya kiyo ra. Ku do fan tswen’a jinni ya ki tswen dzun waa ku mbyà foa ba azoa foraba. Ku yia nyaco waa ku dzu ya ba. ⁹ Ki bye wajinderia ku ci ki fin tswen waa Cidon ndi geku nu danra kuri yiku ku ci kiyo ra. Ku ci ki bye waji ci tsadzu akyon. Be ci ki fin pugon, aku ba Isha­ ku, ba Yakubu abe baa Cidon gebe nu numa ra. ¹⁰ Ibrahim nde zoa hwa nyaco na ge cin atswēn wa ci ki don nwoa ci kenken gbogbo, atswēn waji Cidon mbyá ri. ¹¹ Ki bye wajinderi waa Saraya ci baku ra ko waa ku ci zakenku ku kan hweton ra, ku nyefin ku yi wajinderi Cidon ri zenmu nu­ gea zen mumu kuri pukan’a ba. ¹² Ibrahim ko waa ku kan hweton nguru-nguru numa ba apa wa huhu nga wa ci abu dzundzun, ku mba nwu, ki bye nwu waji ku du zhenda hwehwe numa ci tsa­ dzu atswí ki don. Zhendaa ci hwehwe numa ci tsadzu avon nu, apa dzun wa hwen kaabe baani. ¹³ Pajukun baakara kata hu ki fin wajinderibe waa be ci baku ra. Anu wa gege waa Cidon ge babe ra, be dube mbyà ba zobe ba, ama be mbyà yinu danra, ki tiri ki tiri ki pyen kire beri du. Be mbu mikyin ba waa be mbyàyi numa ra, be danra be ci akyon ki fin tswēn kire. ¹⁴ Pajukun baa dan tswi aji baakara yafan jinni numa ra, na ta danra be ho zobe so ki bye tswēn dzun waa ku kan bube bu dibe. ¹⁵ Beri ma kyan na nya waa be kasen ya ki tswen bye waa be ndi do dzu yo bira, beri kyan ri du nyaco wa kasen ya kiyo. ¹⁶ Ama cia numa ba, be ho zobe so ki tswen wa san kari, ndo Cidon ki don. Ci numa ra cia abu wa pan tsenni ki bye Cidon waa be baku danra ku ci Cidonbe ba. Ku ciri wa mbyā tswen wa ki don sobe yo. ¹⁷ Ki bye ayo waa Cidon ken mbafo Ibrahim ra, ki bye wajinderi Ibrahim zen nde waa ku nde Ishaku nwua bwan tson wa Ci­ don kiyo. Ibrahim ciri apa waa Cidon ge nuge hora baku ama ku zen nde danra kuri nde nwua wa ngyikan dzundzun tori ra bwan tson wa Cidon kiyo. ¹⁸ An-di Cidon dan yiku danra, "Ki di bu Ishaku nwuu ra, ùri bi du zhenda." ¹⁹ Ibrahim yi wajinderi danra Cidon tsayi wa ba do Isha­ ku do don ki bye aki. Cidon tsa numa ci tsadzu ku ba do Ishaku ki bye aki ndeku kasen yi ataa, ama ku hua ba. ²⁰ Ki bye wajinderi waa Ishaku ci baku ra ku yi Yakubu ba Isu­ wa ande wa sansan ki pyen kire. ²¹ Ki bye wajinderi waa Yakubu ci baku ra dede waa kuna nga wa huhu ra ku nde dia zan ki cin agá bua numa ku wa Cidon ku yi zhenzhen bu Yusufu nu wa sansan ken cin dibe kata. ²² Ki bye wajinderi waa Yusufu ci ba­ ku ra dede waa ku yi danra anyunua wa huhu naben jinni rara, ku dan aji so jinni yi zhenzhen Isra’ila abu waa be tsa ba akea anyunu waa bema do fan Masar, ²³ Ki bye wajinderi, anyunu waa be mba Musa be ndeku yu ason tsara. Be mbyà Musa ci nwu wa sansan, be zinbe zin bu adon bu aku ba, be gbe­ kyan. ²⁴ Ki bye wajinderi hwari dede waa Musa hwe gban kata ra, ku zen’ande be baku danra ku ci nwu bu nwu wa wuwa bu Fir’auna ba, ²⁵ Ku con kari waa ku wa fyin ba pajukun bu Cidon ki dzun, ku con’a waa ku fo vya ba abu baa baba baa ki fin tswen baa ri nwadzudzu azota numa ra ba. ²⁶ Ku mbyà waa ku wa fyin jiji bu Yesu Kiristi ra sanku kari ba dukya baa ki Masar, ki cin waa ku nde zoa so nyaco na bazo vokwin wa anyunu wa kyen. ²⁷ Ki bye wajinderi waa Musa ci baku ra hwari waa kuri do pwadzu ki Masar ra ku zin’a zin bu Fir’auna ba. Ku gban ci tsa­ dzu ku mbyà Cidon ba azo, waa pajukun ri mbyàa ku bara. ²⁸ Wajinderi bua hwa ri ku fyen tà yi pajukun jibi bu paska wa kapyen waa be myi asa bu bucon ki nu nyakyon jiji Nwutsōn bu aki kuka bwan anwu wa wunu wa kapyen ki tan waji ba. ²⁹ Wajinderi waa Isra’ila hora ci baku ra hwari hunnu be kyan anu wa kwakyi wa nyonyo ci tsa­ dzu bena kyenkyon cin jen numa azota. Ayo waa pajukun baa ki Masar hora na nga be kyan numa ra du, anu be tsukenbe be hu ba jinni. ³⁰ Ki nyaken waa zhenzhen Isra’ila kyen shukwa akà bu Jeriko anyunu tsupyen wajinderi waa be ci baku ra hwa­ ri hunnu akà bu Jeriko gban dzu we jinni ra. ³¹ Rahaba wuwa gba­ za ra wajinderi waa ku ci baku hwari hunnu dede waa be bwan pajukun baa gban cin ba Cidon ki Jeriko ra be bwanbe ku ba, ki cin waa akyòn baa ndi bi mbyà finka waji ku panbe ba azo vyon sansan. ³² Tanma m dan dan ke kwan yo ri? Ayo ken’a waa m dan yini aji ki cin bu Gyidion, ba Baraka, ba Samson, ba Japta, ba Da­ wuda, ba Samuila, ba pajukun baa ndi ri da adon bu Cidon ri yi pajukun. ³³ Ki bye wajinderi waa be ci baku ra, be nuken ci tswen badati ji tswen kiyo. Be tsa abu wa sansan, be du abu baa Cidon gebe nu kiyo ra. Wajinderi be hwa anu zenku ho­ ra tsuken jinni kata. ³⁴ Be tsa den apyu baa sepyu, be nwadzu ki vo bu pajukun baa na con be bwan­ be ba gisingiri. Be kan pajukun baa gbangban, be tsa wunu ki bye aken, be bwan ji pajukun baa ci tswen dzun baa ri zebe hora. ³⁵ Bawuwa baa aki bwanbe ki ndobe ra Cidon do pajukun baaji ki bye aki ba cindi. Pajukun badati wa fyin hwehwe numa har be hu ki cin waa be conbe waa be vyin pukan nyaken yi Cidon ba. Be con kari waa Ci­ don ku ba dobe ki bye don wa kari wa ki fin tswen kire. ³⁶ Pa­ jukun badati wa fyin be vyenbe vyon, dabe akpan, webe kan ho­ be tsu ki tan akon. ³⁷ Be ta ba­ dati aban, be geken gafanbe ba gisingiri, be bwanbe. Pajukun badati ci baa tsa hwen, beri be tsuken dibe ba ageho bupyu, be wa fyin jiji bu Cidon, pajukun tsabe abu wa fyea ba. ³⁸ Bube fin tswen vyaa be riba, bena kyen­ kyon na ki fin pon ngha vyon, ba cin kwen, bena na fin ponshi, ba fon ban ki tswen. ³⁹ Pajukun hora kata du azen wa sansan ki cin wajinderi waa be ci baku ra, ama be dube anu wa gege waa Cidon ge babe raba. ⁴⁰ Ki cin waa Cidon mbyà abu wa sansan wa ka wakara ki pyen ku nde soi yo, ma dzua ki dii ba, abu waji ri kwaa ba.

¹ Tsadzu waa pajukun hwe­ hwe numa ge shukwai shon dzun ra ki cin wakara í gadi ba abu baa na ndai tswen, ba abu wa baba wa tabai ki di. i pen penpen wa ki pyen’i ra ba mikyin gben. ² i ho zoi so di bu Yesu, aku wa ciri nwo bu wajinderi bui avo ndi kapyen keke numa ya anyunu wa kennu. Ko waa Yesu yinu, danra kuri wa fyin ki bye ahin wa shon gege ra, ku gea mikyin ba, ama ku kyepan ba mikyin wa mbumbu wa ci nari bàzoa se ku zen nde waa ku pan tsenni ku hu aki ki bye ahin wa shon gege. Tanma ku ci ki go kyekye vo wunu bu Cidon. ³ Ní kyepan ba fyin ba pajukun baa baba baa nghaku ra. Ani du ní ci ba gben mikyin nika vonni adi ba. ⁴ Ngangani waa nina nga jiji ni fan abu wa baba jinni, zan’a waa be bwanni ní we asa ki jinni ba. ⁵ Nī mujini ba aji waa Cidon dan yini ci tsadzu kuna dan yi bazhenzhen’a hora ra? "Nwumi, ka sinni ba natenten bu Cidon ba, ayo waa kuma gbeu tson uka hu adi ba. ⁶ Ki cin waa ami Cindou, apa waa mma conku ciri apa waa mri natenku, ko anwu wani kata mma pan mri gbeku tson." ⁷ Ní gban mikyin ní wa fyin wa dzu ki vo bu ata bi. Ki cin waa afyin waa nina wa ra na ta danra Cidon na tsani ci tsadzu bazhenzhen’a. Anwu dzun ki tiri numa waa ataa ri naten’aku ba? ⁸ Cidon wari naten bazhenzhen’a hora kuma naten’ani ba, ta danra ni ci zhenzhen agya hun. ⁹ I yinu batai baa ki fin tswen kire bena naten’i ina yibe hwe, fyin mbye atai Ata Cidon wa ki don í tsa abu waa kuri con kata yiku í du cindi ki byea? ¹⁰ Batai ri naten’i ba wa natenten waa be mbyà danra sanbe ki mikyin ma cifo kwan yo titi numa ku nwādzu ra. Ama Cidon ri naten’i ki jiji wa sansan bui jiji í ci pajukun baa ri kwan cin ki dzun baku tsa abu wa sansan ndafan jinni. ¹¹ Ayo waa be mana nà apa kuri mbyà tsadzu kuna wa fyin ku baani ba mikyin wa mbumbu se wa pepe. Ama ki nyaken wakara se mikyin wa na jinni, ku fyen abu wa sansan waa ku tsa abu waa Cidon ri con. ¹² Ní ndafan avoni wa huhu ba kunubeni wa zaho jinni ra jinni. ¹³ Ní kyenkyon ki fin nyaco wa ndafan jinni jiji nika ta atsu ki bye abeni wa tutu raba ama abe­ ni wa tutu ra ku yafan jinni. ¹⁴ Ní so hwan kiyo ní ci byecu rito numa ba ko kani kata. Ko kani kata ku nga ku ci byecu ndafan jinni byenbyen numa we hwan bu Cidon. Apa wama tsaa numa ba, kuri mbyàa Cidon ba. ¹⁵ Ní tsa sansan jiji ko kani kata kuka pukan nyaken yi wa sansan bu Cidon ba. Ní tsa sansan jiji ko kani kata kuka ci nwo apa wa dzon mikyin wari zen aji dzu nua ba tsadzu akyan tsaba mikyin bu pajukun hwehwe numa ba. ¹⁶ Ko kani kata kuka bà aji bu agya wa nyanya ba, ku ngha tswi aso wa­ ni kata. Kuká ci tsadzu Isuwa wa soa hwan ki bye aji bu Cidon raba ku nde hwe bu nwu mba­ fyen’a nde hwen ki cin buju dzundzun tori. ¹⁷ Ní yinu ki nya­ ken wakara ku nya jiji ku du nde wa sansan bu ataa, ba janme ki zo ama ataa vyin pukan nyaken yiku ki cin waa ku dukaa nyaco dzun waa ku pukan abu waa ku kapyen tsa raba. ¹⁸ Nī ngha zanni ki bye abu waa niri go vo kiyo raba tiri, apyu wa sese, abye wa na tsuken jinni gyu numa ko acu wa zuzu, ¹⁹ be fo ahyu wa nwenwe, ba akyu wana zen aji ba pajukun be voku danra kuka zen aji dzun yibe kwan yo riba. ²⁰ Ki cin waa be konkabe adon wa nunu waa ku nube danra, "Ko bupyu ma go di ki di bu akwen ra, be ta bwan reku ba aban." ²¹ Waa be mbyà akwen waji numa be zin­ zin, har Musa danra, "Mna zin­ zin, adimi na vonvon." ²² Buni ni bini ki cin akwen bu Sinai ba, ama nī bi ki cin kwen bu Sihiyo­ na finka bu Cidon wa ci ba cindi, Urushalima wa ki don, zhentsōn shan mama numa wena yo. ²³ Nī bi ki bye cinkwan wa mbu mikyin bu zhen mbafyen bu Cidon baa be ta azenbe so don. Nī bi ra ki bye Cidon wa ciri wari fo pa­ jukun kata kwen, ba denden bu pajukun baa tsa abu wa we hwan bu Cidon, Cidon ri zenmu koke kata ki mikyinbe. ²⁴ Nī zan ra ki bye Yesu Kiristi apa wa ci yoba bu Cidon ba apa, ku genu wa ripye bai ku we asaa ki jinni ta danra abu wa sansan bua waa ku tsai ra kari asa bu Habila ndi nde we jinni ra. ²⁵ Ci numa ra ní mbyàyi sansan niká ngha wa gon tson fo aji waa Yesu na dan yini raba. Pajukun baa ndi nghabe wa fo aji bu Cidon waa ku dan yi pajukun ki fin tswen ra be nwàdzube ba. Aku Yesu waa aji bua ri dzu hwadon bi ra, ima vyin pukan nyaken yiku iri tsanini hunnu í nwàdzu? ²⁶ Andi dede waji ku zen aji yi abye myi ndedi. Ama tanma ku ge nuge danra, "Mri bi yi abye myi ndedi dzwa dzun­ dzun tori numa kwan yo, bàa bye myi zoa ba, har ba bye hwa­ don kata ma." ²⁷ Aji waa ku dan­ ra, "Dzwa dzundzun tori numa kwan yo." Kuri bi yi abye wa ki myi ba abye wa ki hwadon nde­ di, ba abu baa ki fin’a kata na tà yii ki byeya numa danra abu baa Cidon màbe hora kata ribi ndedi, ri ji tsaba jinni, jiji abu baa ri ndebe di bara be ci tiri numa yaya. ²⁸ Ki cin wakara í mbu mikyin yi Cidon ki cin waa ī du atsòn wari ndea di ba. i mbu mikyin yi Cidon í waku ki bye nyaco wari vya hwan’a ki bye azin ba ahwè wa ciho numa, ²⁹ ki cin waa Cidon’i ci apyu wari ji tsòn vinni abu kata.

¹ Ní so hwan kiyo con dini ba vyon. ² Nína zen nde pan kyon ki ndòni ba mikyin wa mbumbu, Ki bye wa tsa numa badati ndi pan zhentsōn bu Ci­ don ki ndobe be yìbe ba. ³ Nína kyepan ba pajukun baa be ho tsu tan hora ci tsadzu áni ba dini be honi tsu ki tan waji babe du. Nína kyepan ba pajukun baa na wa fyin hora ci tsadzu áni ma nina wa fyin waji ki dzun babe du. ⁴ Ko kani kata ku yi abēn wa banban hwe, apa dzun kuka ba apa dzun tsa aso ki bye byena bu aben ba. Cidon ri fo baa tsa aso, ba baa nya wa bu apa kwen. ⁵ Niká lolo hwanni so bye abè wa vyavya ba. Abu waa ni ci baku ra mba tiri ra numa ki cin waa Cidon ba dia danra, "Mri bi fanmi ni jinni ba ko nukon, mri bi vyin pukanmi nyaken yini ba ko nukon." ⁶ Ki cin wakara ī ci ba gben mikyin wa danra, "Cindomi ciri wari tsazami yo, mri zinmi azin ba. Apa ri tsami ke ka?" ⁷ Ní byepan ba baco bandoni baa ndi kapyen dan yini aji bu Cidon ra, ní kyepan byecube waa be ndi ci ra, ní ten jiten bu wajinderi waa be ndi ci baku ra. ⁸ Yesu Kiristi ri vyin pukan’a ba, avo ndi, ba jinna, ba akyen ko nukon. ⁹ Niká zen nde yi atswi abu wa fyenfyen wa ripye atswi tswi ku vyin pukanni ba. Wa san­ san bu Cidon ciri wari yii gben í pansan wajinderi gbangban numa, cia buju wa sheshe tswi tswi waa pajukun badati na she bavo kiyo raba, ri tsazaa be yo ba. ¹⁰ Avon baa ri wa Cidon ki pugon bu Yahudawa hóra be ci­ be ba nyaco dzun waa be dzwan bucon baa be tson ki cin kyen­ kyen’i raba. ¹¹ Avon wa ciho kata bu Yahudawa ri nde asa bu bu­ con bi ki Bye wa Nyenye Kari kata jiji abu wa tsòntson wa pen­ re abu wa baba ki cin apa. Ama awi di bu bupyu wàji beri tsònku tsòntson ki dika. ¹² Ci numa ba Yesu du, ku wa fyin ki dika ki cin waa jiji ku tsonye pajukun ba asaa. ¹³ Ci numa ra se í pwadzu ya duku ki dika í ya wa tswi fyin waa be taku ra ki dzun baku, ¹⁴ Ki cin waa ī cii ba tswēn dzun wa ci kenken ki fin tswen kire ba, ina ho zoi so nyaco ge cin atswēn wari bi ki pyen kire. ¹⁵ Ki cin wakara ko nukon ina nyā Cidon dzu di bu Yesu Kiristi. Ina nya zen’a ba nui ba akyu. ¹⁶ Nika muji ba abu wa sansan wa tsatsa, ba wa tsaza dini yo ba. Ki cin waa abu baakara ri vya hwan bu Cidon kagben. ¹⁷ Ní nde cin na jinni fo tson bu baco baa ki pyenni, ki cin waa be ciri baa na dzwani zo ki di. Beka ciri baa ri dan anube ki cin butsobe yi Cidon. Nima nde cin na jinni yibe beri tsa butsobe ba mikyin wa mbumbu, ma numa ba beri tsa ba mikyin wa pepe, wa­ kara ri tsazaa hi yo ba ko titi. ¹⁸ Ní foji Cidon wa pyapya wei yo. ī yinu byenbyen numa danra aji wa gagai ci sansan ki pyen bu Cidon. Ki cin waa ina con í tsa koke kata ndafan jinni sansan numa ko nukon. ¹⁹ Mna voni ba­ vo kiyo danra ní vo Cidon jiji ku tsonmi kasen bi duni kire mwa­ mwa numa. ²⁰ Aku Cidon wari yi apa mikyin wa na jinni wa ba do Cindoi Yesu Kiristiwa ci apa wa kari wari za bupyua pwadzu ki bye aki, ki di bu asa waa ku nde we jinni gei nuge wa ci kenken rá. ²¹ Cidon ku ga abu wa sansan wani kata waa nima con yini jiji ní tsa abu wa we hwan’a. Ki di bu Yesu Kiristi ku yii tsa abu wa vyaku. Ahwè ci abu Yesu Kiristi keke numa yaya ko nukon! Ku ci numa. ²² Bazhenzami mna voni ní gon tson gban mikyin fo aji waa m dan gbanni mikyin ra, ki cin waa aji waa m dan ki fin afa waji ra gon’a ba. ²³ Mna con ní yinu danra be ten Timoti ndoi pwa­ dzu ki tan ra, Kuma bi mwamwa mri baku kyen dzun bi byeni. ²⁴ Baco baa ki pyenni kata ní nàbe kiyo nana numa. Bazhen­ zai baa ki finka Italiya dan’ m nàni kiyo yibe. ²⁵ Wa sansan bù Cidon ku bani ci dzun kata.